(੧.) ਏਕਕਨਿਦ੍ਦੇਸਵਣ੍ਣਨਾ

੭੬੧. ਇਦਾਨਿ ਯਥਾਨਿਕ੍ਖਿਤ੍ਤਾਯ ਮਾਤਿਕਾਯ ‘‘ਪਞ੍ਚਵਿਞ੍ਞਾਣਾ ਨ ਹੇਤੁਮੇਵਾ’’ਤਿਆਦਿਨਾ ਨਯੇਨ ਆਰਦ੍ਧੇ ਨਿਦ੍ਦੇਸਵਾਰੇ ਨ ਹੇਤੁਮੇਵਾਤਿ ਸਾਧਾਰਣਹੇਤੁਪਟਿਕ੍ਖੇਪਨਿਦ੍ਦੇਸੋ. ਤਤ੍ਥ ‘‘ਹੇਤੁਹੇਤੁ, ਪਚ੍ਚਯਹੇਤੁ, ਉਤ੍ਤਮਹੇਤੁ, ਸਾਧਾਰਣਹੇਤੂਤਿ ਚਤੁਬ੍ਬਿਧੋ ਹੇਤੂ’’ਤਿਆਦਿਨਾ ਨਯੇਨ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਰੂਪਕਣ੍ਡੇ ‘‘ਸਬ੍ਬਂ ਰੂਪਂ ਨ ਹੇਤੁਮੇਵਾ’’ਤਿਆਦੀਨਂ ਅਤ੍ਥਵਣ੍ਣਨਾਯਂ (ਧ. ਸ. ਅਟ੍ਠ. ੫੯੪) ਵੁਤ੍ਤਮੇਵ. ਅਹੇਤੁਕਮੇਵਾਤਿਆਦੀਸੁ ਬ੍ਯਞ੍ਜਨਸਨ੍ਧਿਵਸੇਨ ਮਕਾਰੋ ਵੇਦਿਤਬ੍ਬੋ; ਅਹੇਤੁਕਾ ਏਵਾਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ. ਅਪਿਚ ‘‘ਹੇਤੂ ਧਮ੍ਮਾ ਨਹੇਤੂ ਧਮ੍ਮਾ’’ਤਿਆਦੀਸੁ (ਧ. ਸ. ਦੁਕਮਾਤਿਕਾ ੧) ਧਮ੍ਮਕੋਟ੍ਠਾਸੇਸੁ ਪਞ੍ਚਵਿਞ੍ਞਾਣਾਨਿ ਹੇਤੂ ਧਮ੍ਮਾਤਿ ਵਾ ਸਹੇਤੁਕਾ ਧਮ੍ਮਾਤਿ ਵਾ ਨ ਹੋਨ੍ਤਿ. ਏਕਨ੍ਤੇਨ ਪਨ ਨ ਹੇਤੂਯੇਵ, ਅਹੇਤੁਕਾ ਯੇਵਾਤਿ ਇਮਾਨਿਪਿ ਨਯੇਨੇਤ੍ਥ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਅਬ੍ਯਾਕਤਮੇਵਾਤਿ ਪਦਂ ਵਿਪਾਕਾਬ੍ਯਾਕਤਵਸੇਨ ਵੁਤ੍ਤਂ. ਸਾਰਮ੍ਮਣਮੇਵਾਤਿ ਓਲੁਬ੍ਭਾਰਮ੍ਮਣਵਸੇਨ. ਪਚ੍ਚਯਾਰਮ੍ਮਣਂ ਓਲੁਬ੍ਭਾਰਮ੍ਮਣਨ੍ਤਿ ਹਿ ਦੁਵਿਧਂ ਆਰਮ੍ਮਣਂ. ਇਮਸ੍ਮਿਂ ਪਨ ਠਾਨੇ ਓਲੁਬ੍ਭਾਰਮ੍ਮਣਮੇਵ ਧੁਰਂ, ਪਚ੍ਚਯਾਰਮ੍ਮਣਮ੍ਪਿ ਲਬ੍ਭਤਿਯੇਵ. ਅਚੇਤਸਿਕਮੇਵਾਤਿ ਪਦਂ ਚਿਤ੍ਤਂ, ਰੂਪਂ, ਨਿਬ੍ਬਾਨਨ੍ਤਿ ਤੀਸੁ ਅਚੇਤਸਿਕੇਸੁ ਚਿਤ੍ਤਮੇਵ ਸਨ੍ਧਾਯ ਵੁਤ੍ਤਂ. ਨੋ ਅਪਰਿਯਾਪਨ੍ਨਮੇਵਾਤਿ ਗਤਿਪਰਿਯਾਪਨ੍ਨਚੁਤਿਪਰਿਯਾਪਨ੍ਨਸਂਸਾਰਵਟ੍ਟਭਵਪਰਿਯਾਪਨ੍ਨਭਾਵਤੋ ਪਰਿਯਾਪਨ੍ਨਾ ਏਵ, ਨੋ ਅਪਰਿਯਾਪਨ੍ਨਾ. ਲੋਕਤੋ ਵਟ੍ਟਤੋ ਨ ਨਿਯ੍ਯਨ੍ਤੀਤਿ ਅਨਿਯ੍ਯਾਨਿਕਾ. ਉਪ੍ਪਨ੍ਨਂ ਮਨੋਵਿਞ੍ਞਾਣਵਿਞ੍ਞੇਯ੍ਯਮੇਵਾਤਿ ਰੂਪਕਣ੍ਡੇ ਚਕ੍ਖੁਵਿਞ੍ਞਾਣਾਦੀਨਂ ਪਚ੍ਚੁਪ੍ਪਨ੍ਨਾਨੇਵ ਰੂਪਾਦੀਨਿ ਆਰਬ੍ਭ ਪਵਤ੍ਤਿਤੋ ਅਤੀਤਾਦਿਵਿਸਯਂ ਮਨੋਵਿਞ੍ਞਾਣਮ੍ਪਿ ਪਞ੍ਚਵਿਞ੍ਞਾਣਸੋਤਪਤਿਤਮੇਵ ਕਤ੍ਵਾ ‘‘ਉਪਪਨ੍ਨਂ ਛਹਿ ਵਿਞ੍ਞਾਣੇਹਿ ਵਿਞ੍ਞੇਯ੍ਯ’’ਨ੍ਤਿ (ਧ. ਸ. ੫੮੪) ਵੁਤ੍ਤਂ. ਪਞ੍ਚਵਿਞ੍ਞਾਣਾ ਪਨ ਯਸ੍ਮਾ ਪਚ੍ਚੁਪ੍ਪਨ੍ਨਾਪਿ ਚਕ੍ਖੁਵਿਞ੍ਞਾਣਾਦੀਨਂ ਆਰਮ੍ਮਣਾ ਨ ਹੋਨ੍ਤਿ, ਮਨੋਵਿਞ੍ਞਾਣਸ੍ਸੇਵ ਹੋਨ੍ਤਿ, ਤਸ੍ਮਾ ‘‘ਮਨੋਵਿਞ੍ਞਾਣਵਿਞ੍ਞੇਯ੍ਯਮੇਵਾ’’ਤਿ ਵੁਤ੍ਤਂ. ਅਨਿਚ੍ਚਮੇਵਾਤਿ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਾਯੇਵ. ਜਰਾਭਿਭੂਤਮੇਵਾਤਿ ਜਰਾਯ ਅਭਿਭੂਤਤ੍ਤਾ ਜਰਾਭਿਭੂਤਾ ਏਵ.

੭੬੨. ਉਪ੍ਪਨ੍ਨਵਤ੍ਥੁਕਾ ਉਪ੍ਪਨ੍ਨਾਰਮ੍ਮਣਾਤਿ ਅਨਾਗਤਪਟਿਕ੍ਖੇਪੋ. ਨ ਹਿ ਤੇ ਅਨਾਗਤੇਸੁ ਵਤ੍ਥਾਰਮ੍ਮਣੇਸੁ ਉਪ੍ਪਜ੍ਜਨ੍ਤਿ.

ਪੁਰੇਜਾਤਵਤ੍ਥੁਕਾ ਪੁਰੇਜਾਤਾਰਮ੍ਮਣਾਤਿ ਸਹੁਪ੍ਪਤ੍ਤਿਪਟਿਕ੍ਖੇਪੋ. ਨ ਹਿ ਤੇ ਸਹੁਪ੍ਪਨ੍ਨਂ ਵਤ੍ਥੁਂ ਵਾ ਆਰਮ੍ਮਣਂ ਵਾ ਪਟਿਚ੍ਚ ਉਪ੍ਪਜ੍ਜਨ੍ਤਿ, ਸਯਂ ਪਨ ਪਚ੍ਛਾਜਾਤਾ ਹੁਤ੍ਵਾ ਪੁਰੇਜਾਤੇਸੁ ਵਤ੍ਥਾਰਮ੍ਮਣੇਸੁ ਉਪ੍ਪਜ੍ਜਨ੍ਤਿ.

ਅਜ੍ਝਤ੍ਤਿਕਵਤ੍ਥੁਕਾਤਿ ਅਜ੍ਝਤ੍ਤਜ੍ਝਤ੍ਤਵਸੇਨ ਵੁਤ੍ਤਂ. ਤਾਨਿ ਹਿ ਅਜ੍ਝਤ੍ਤਿਕੇ ਪਞ੍ਚ ਪਸਾਦੇ ਵਤ੍ਥੁਂ ਕਤ੍ਵਾ ਉਪ੍ਪਜ੍ਜਨ੍ਤਿ. ਬਾਹਿਰਾਰਮ੍ਮਣਾਤਿ ਬਾਹਿਰਰੂਪਾਦਿਆਰਮ੍ਮਣਾ. ਤਤ੍ਥ ਚਤੁਕ੍ਕਂ ਵੇਦਿਤਬ੍ਬਂ – ਪਞ੍ਚਵਿਞ੍ਞਾਣਾ ਹਿ ਪਸਾਦਵਤ੍ਥੁਕਤ੍ਤਾ ਅਜ੍ਝਤ੍ਤਿਕਾ ਅਜ੍ਝਤ੍ਤਿਕਵਤ੍ਥੁਕਾ, ਮਨੋਵਿਞ੍ਞਾਣਂ ਹਦਯਰੂਪਂ ਵਤ੍ਥੁਂ ਕਤ੍ਵਾ ਉਪ੍ਪਜ੍ਜਨਕਾਲੇ ਅਜ੍ਝਤ੍ਤਿਕਂ ਬਾਹਿਰਵਤ੍ਥੁਕਂ, ਪਞ੍ਚਵਿਞ੍ਞਾਣਸਮ੍ਪਯੁਤ੍ਤਾ ਤਯੋ ਖਨ੍ਧਾ ਬਾਹਿਰਾ ਅਜ੍ਝਤ੍ਤਿਕਵਤ੍ਥੁਕਾ, ਮਨੋਵਿਞ੍ਞਾਣਸਮ੍ਪਯੁਤ੍ਤਾ ਤਯੋ ਖਨ੍ਧਾ ਹਦਯਰੂਪਂ ਵਤ੍ਥੁਂ ਕਤ੍ਵਾ ਉਪ੍ਪਜ੍ਜਨਕਾਲੇ ਬਾਹਿਰਾ ਬਾਹਿਰਵਤ੍ਥੁਕਾ.

ਅਸਮ੍ਭਿਨ੍ਨਵਤ੍ਥੁਕਾਤਿ ਅਨਿਰੁਦ੍ਧਵਤ੍ਥੁਕਾ. ਨ ਹਿ ਤੇ ਨਿਰੁਦ੍ਧਂ ਅਤੀਤਂ ਵਤ੍ਥੁਂ ਪਟਿਚ੍ਚ ਉਪ੍ਪਜ੍ਜਨ੍ਤਿ. ਅਸਮ੍ਭਿਨ੍ਨਾਰਮ੍ਮਣਤਾਯਪਿ ਏਸੇਵ ਨਯੋ.

ਅਞ੍ਞਂ ਚਕ੍ਖੁਵਿਞ੍ਞਾਣਸ੍ਸ ਵਤ੍ਥੁ ਚ ਆਰਮ੍ਮਣਞ੍ਚਾਤਿਆਦੀਸੁ ਚਕ੍ਖੁਵਿਞ੍ਞਾਣਸ੍ਸ ਹਿ ਅਞ੍ਞਂ ਵਤ੍ਥੁ, ਅਞ੍ਞਂ ਆਰਮ੍ਮਣਂ. ਅਞ੍ਞਂ ਸੋਤਵਿਞ੍ਞਾਣਾਦੀਨਂ. ਚਕ੍ਖੁਵਿਞ੍ਞਾਣਂ ਸੋਤਪਸਾਦਾਦੀਸੁ ਅਞ੍ਞਤਰਂ ਵਤ੍ਥੁਂ, ਸਦ੍ਦਾਦੀਸੁ ਵਾ ਅਞ੍ਞਤਰਂ ਆਰਮ੍ਮਣਂ ਕਤ੍ਵਾ ਕਪ੍ਪਤੋ ਕਪ੍ਪਂ ਗਨ੍ਤ੍ਵਾਪਿ ਨ ਉਪ੍ਪਜ੍ਜਤਿ; ਚਕ੍ਖੁਪਸਾਦਮੇਵ ਪਨ ਵਤ੍ਥੁਂ ਕਤ੍ਵਾ ਰੂਪਞ੍ਚ ਆਰਮ੍ਮਣਂ ਕਤ੍ਵਾ ਉਪ੍ਪਜ੍ਜਤਿ. ਏਵਮਸ੍ਸ ਵਤ੍ਥੁਪਿ ਦ੍ਵਾਰਮ੍ਪਿ ਆਰਮ੍ਮਣਮ੍ਪਿ ਨਿਬਦ੍ਧਂ, ਅਞ੍ਞਂ ਵਤ੍ਥੁਂ ਵਾ ਦ੍ਵਾਰਂ ਵਾ ਆਰਮ੍ਮਣਂ ਵਾ ਨ ਸਙ੍ਕਮਤਿ, ਨਿਬਦ੍ਧਵਤ੍ਥੁ ਨਿਬਦ੍ਧਦ੍ਵਾਰਂ ਨਿਬਦ੍ਧਾਰਮ੍ਮਣਮੇਵ ਹੁਤ੍ਵਾ ਉਪ੍ਪਜ੍ਜਤਿ. ਸੋਤਵਿਞ੍ਞਾਣਾਦੀਸੁਪਿ ਏਸੇਵ ਨਯੋ.

੭੬੩. ਨ ਅਞ੍ਞਮਞ੍ਞਸ੍ਸ ਗੋਚਰਵਿਸਯਂ ਪਚ੍ਚਨੁਭੋਨ੍ਤੀਤਿ ਏਤ੍ਥ ਅਞ੍ਞਮਞ੍ਞਸ੍ਸ ਚਕ੍ਖੁ ਸੋਤਸ੍ਸ, ਸੋਤਂ ਵਾ ਚਕ੍ਖੁਸ੍ਸਾਤਿ ਏਵਂ ਏਕਂ ਏਕਸ੍ਸ ਗੋਚਰਵਿਸਯਂ ਨ ਪਚ੍ਚਨੁਭੋਤੀਤਿ ਅਤ੍ਥੋ. ਸਚੇ ਹਿ ਨੀਲਾਦਿਭੇਦਂ ਰੂਪਾਰਮ੍ਮਣਂ ਸਮੋਧਾਨੇਤ੍ਵਾ ਸੋਤਿਨ੍ਦ੍ਰਿਯਸ੍ਸ ਉਪਨੇਯ੍ਯ ‘ਇਙ੍ਘ ਤਾਵ ਨਂ ਵਵਤ੍ਥਾਪੇਹਿ ਵਿਭਾਵੇਹਿ – ਕਿਂ ਨਾਮੇਤਂ ਆਰਮ੍ਮਣ’ਨ੍ਤਿ, ਚਕ੍ਖੁਵਿਞ੍ਞਾਣਂ ਵਿਨਾਪਿ ਮੁਖੇਨ ਅਤ੍ਤਨੋ ਧਮ੍ਮਤਾਯ ਏਵਂ ਵਦੇਯ੍ਯ – ‘ਅਰੇ ਅਨ੍ਧਬਾਲ, ਵਸ੍ਸਸਤਮ੍ਪਿ ਵਸ੍ਸਸਹਸ੍ਸਮ੍ਪਿ ਪਰਿਧਾਵਮਾਨੋ ਅਞ੍ਞਤ੍ਰ ਮਯਾ ਕੁਹਿਂ ਏਤਸ੍ਸ ਜਾਨਨਕਂ ਲਭਿਸ੍ਸਸਿ; ਆਹਰ ਨਂ ਚਕ੍ਖੁਪਸਾਦੇ ਉਪਨੇਹਿ; ਅਹਮੇਤਂ ਆਰਮ੍ਮਣਂ ਜਾਨਿਸ੍ਸਾਮਿ – ਯਦਿ ਵਾ ਨੀਲਂ ਯਦਿ ਵਾ ਪੀਤਕਂ. ਨ ਹਿ ਏਸੋ ਅਞ੍ਞਸ੍ਸ ਵਿਸਯੋ; ਮਯ੍ਹਮੇਵੇਸੋ ਵਿਸਯੋ’ਤਿ. ਸੇਸਵਿਞ੍ਞਾਣੇਸੁਪਿ ਏਸੇਵ ਨਯੋ. ਏਵਮੇਤੇ ਅਞ੍ਞਮਞ੍ਞਸ੍ਸ ਗੋਚਰਵਿਸਯਂ ਨ ਪਚ੍ਚਨੁਭੋਨ੍ਤਿ ਨਾਮ.

੭੬੪. ਸਮਨ੍ਨਾਹਰਨ੍ਤਸ੍ਸਾਤਿ ਆਵਜ੍ਜਨੇਨੇਵ ਸਮਨ੍ਨਾਹਰਨ੍ਤਸ੍ਸ.

ਮਨਸਿਕਰੋਨ੍ਤਸ੍ਸਾਤਿ ਆਵਜ੍ਜਨੇਨੇਵ ਮਨਸਿਕਰੋਨ੍ਤਸ੍ਸ. ਏਤਾਨਿ ਹਿ ਚਿਤ੍ਤਾਨਿ ਆਵਜ੍ਜਨੇਨ ਸਮਨ੍ਨਾਹਟਕਾਲੇ ਮਨਸਿਕਤਕਾਲੇਯੇਵ ਚ ਉਪ੍ਪਜ੍ਜਨ੍ਤਿ.

ਨ ਅਬ੍ਬੋਕਿਣ੍ਣਾਤਿ ਅਞ੍ਞੇਨ ਵਿਞ੍ਞਾਣੇਨ ਅਬ੍ਬੋਕਿਣ੍ਣਾ ਨਿਰਨ੍ਤਰਾਵ ਨੁਪ੍ਪਜ੍ਜਨ੍ਤਿ. ਏਤੇਨ ਤੇਸਂ ਅਨਨ੍ਤਰਤਾ ਪਟਿਕ੍ਖਿਤ੍ਤਾ.

੭੬੫. ਨ ਅਪੁਬ੍ਬਂ ਅਚਰਿਮਨ੍ਤਿ ਏਤੇਨ ਸਬ੍ਬੇਸਮ੍ਪਿ ਸਹੁਪ੍ਪਤ੍ਤਿ ਪਟਿਕ੍ਖਿਤ੍ਤਾ. ਨ ਅਞ੍ਞਮਞ੍ਞਸ੍ਸ ਸਮਨਨ੍ਤਰਾਤਿ ਏਤੇਨ ਸਮਨਨ੍ਤਰਤਾ ਪਟਿਕ੍ਖਿਤ੍ਤਾ.

੭੬੬. ਆਵਟ੍ਟਨਾ ਵਾਤਿਆਦੀਨਿ ਚਤ੍ਤਾਰਿਪਿ ਆਵਜ੍ਜਨਸ੍ਸੇਵ ਨਾਮਾਨਿ. ਤਞ੍ਹਿ ਭਵਙ੍ਗਸ੍ਸ ਆਵਟ੍ਟਨਤੋ ਆਵਟ੍ਟਨਾ, ਤਸ੍ਸੇਵ ਆਭੁਜਨਤੋ ਆਭੋਗੋ, ਰੂਪਾਦੀਨਂ ਸਮਨ੍ਨਾਹਰਣਤੋ ਸਮਨ੍ਨਾਹਾਰੋ, ਤੇਸਂਯੇਵ ਮਨਸਿਕਰਣਤੋ ਮਨਸਿਕਾਰੋਤਿ ਵੁਚ੍ਚਤਿ. ਏਵਮੇਤ੍ਥ ਸਙ੍ਖੇਪਤੋ ਪਞ੍ਚਨ੍ਨਂ ਵਿਞ੍ਞਾਣਾਨਂ ਆਵਜ੍ਜਨਟ੍ਠਾਨੇ ਠਤ੍ਵਾ ਆਵਜ੍ਜਨਾਦਿਕਿਚ੍ਚਂ ਕਾਤੁਂ ਸਮਤ੍ਥਭਾਵੋ ਪਟਿਕ੍ਖਿਤ੍ਤੋ.

ਨ ਕਞ੍ਚਿ ਧਮ੍ਮਂ ਪਟਿਵਿਜਾਨਾਤੀਤਿ ‘‘ਮਨੋਪੁਬ੍ਬਙ੍ਗਮਾ ਧਮ੍ਮਾ’’ਤਿ (ਧ. ਪ. ੧-੨) ਏਵਂ ਵੁਤ੍ਤਂ ਏਕਮ੍ਪਿ ਕੁਸਲਂ ਵਾ ਅਕੁਸਲਂ ਵਾ ਨ ਪਟਿਵਿਜਾਨਾਤਿ.

ਅਞ੍ਞਤ੍ਰ ਅਭਿਨਿਪਾਤਮਤ੍ਤਾਤਿ ਠਪੇਤ੍ਵਾ ਰੂਪਾਦੀਨਂ ਅਭਿਨਿਪਾਤਮਤ੍ਤਂ. ਇਦਂ ਵੁਤ੍ਤਂ ਹੋਤਿ – ਸੁਪਣ੍ਡਿਤੋਪਿ ਪੁਰਿਸੋ, ਠਪੇਤ੍ਵਾ ਆਪਾਥਗਤਾਨਿ ਰੂਪਾਦੀਨਿ, ਅਞ੍ਞਂ ਕੁਸਲਾਕੁਸਲੇਸੁ ਏਕਧਮ੍ਮਮ੍ਪਿ ਪਞ੍ਚਹਿ ਵਿਞ੍ਞਾਣੇਹਿ ਨ ਪਟਿਵਿਜਾਨਾਤਿ. ਚਕ੍ਖੁਵਿਞ੍ਞਾਣਂ ਪਨੇਤ੍ਥ ਦਸ੍ਸਨਮਤ੍ਤਮੇਵ ਹੋਤਿ. ਸੋਤਵਿਞ੍ਞਾਣਾਦੀਨਿ ਸਵਨਘਾਯਨਸਾਯਨਫੁਸਨਮਤ੍ਤਾਨੇਵ. ਦਸ੍ਸਨਾਦਿਮਤ੍ਤਤੋ ਪਨ ਮੁਤ੍ਤਾ ਅਞ੍ਞਾ ਏਤੇਸਂ ਕੁਸਲਾਦਿਪਟਿਵਿਞ੍ਞਤ੍ਤਿ ਨਾਮ ਨਤ੍ਥਿ.

ਮਨੋਧਾਤੁਯਾਪੀਤਿ ਸਮ੍ਪਟਿਚ੍ਛਨਮਨੋਧਾਤੁਯਾਪਿ. ਸਮ੍ਪਿਣ੍ਡਨਤ੍ਥੋ ਚੇਤ੍ਥ ਪਿਕਾਰੋ. ਤਸ੍ਮਾ ਮਨੋਧਾਤੁਯਾਪਿ ਤਤੋ ਪਰਾਹਿ ਮਨੋਵਿਞ੍ਞਾਣਧਾਤੂਹਿਪੀਤਿ ਸਬ੍ਬੇਹਿਪਿ ਪਞ੍ਚਦ੍ਵਾਰਿਕਵਿਞ੍ਞਾਣੇਹਿ ਨ ਕਞ੍ਚਿ ਕੁਸਲਾਕੁਸਲਂ ਧਮ੍ਮਂ ਪਟਿਵਿਜਾਨਾਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਨ ਕਞ੍ਚਿ ਇਰਿਯਾਪਥਂ ਕਪ੍ਪੇਤੀਤਿਆਦੀਸੁਪਿ ਏਸੇਵ ਨਯੋ. ਨ ਹਿ ਪਞ੍ਚਦ੍ਵਾਰਿਕਵਿਞ੍ਞਾਣੇਹਿ ਗਮਨਾਦੀਸੁ ਕਞ੍ਚਿ ਇਰਿਯਾਪਥਂ ਕਪ੍ਪੇਤਿ, ਨ ਕਾਯਕਮ੍ਮਂ ਨ ਵਚੀਕਮ੍ਮਂ ਪਟ੍ਠਪੇਤਿ, ਨ ਕੁਸਲਾਕੁਸਲਂ ਧਮ੍ਮਂ ਸਮਾਦਿਯਤਿ, ਨ ਸਮਾਧਿਂ ਸਮਾਪਜ੍ਜਤਿ ਲੋਕਿਯਂ ਵਾ ਲੋਕੁਤ੍ਤਰਂ ਵਾ, ਨ ਸਮਾਧਿਤੋ ਵੁਟ੍ਠਾਤਿ ਲੋਕਿਯਾ ਵਾ ਲੋਕੁਤ੍ਤਰਾ ਵਾ, ਨ ਭਵਤੋ ਚਵਤਿ, ਨ ਭਵਨ੍ਤਰੇ ਉਪਪਜ੍ਜਤਿ. ਸਬ੍ਬਮ੍ਪਿ ਹੇਤਂ ਕੁਸਲਾਕੁਸਲਧਮ੍ਮਪਟਿਵਿਜਾਨਨਾਦਿਵਚਨਪਰਿਯੋਸਾਨਂ ਕਿਚ੍ਚਂ ਮਨੋਦ੍ਵਾਰਿਕਚਿਤ੍ਤੇਨੇਵ ਹੋਤਿ, ਨ ਪਞ੍ਚਦ੍ਵਾਰਿਕੇਨਾਤਿ ਸਬ੍ਬਸ੍ਸਾਪੇਤਸ੍ਸ ਕਿਚ੍ਚਸ੍ਸ ਕਰਣੇ ਸਹਜਵਨਕਾਨਿ ਵੀਥਿਚਿਤ੍ਤਾਨਿ ਪਟਿਕ੍ਖਿਤ੍ਤਾਨਿ. ਯਥਾ ਚੇਤੇਸਂ ਏਤਾਨਿ ਕਿਚ੍ਚਾਨਿ ਨਤ੍ਥਿ, ਏਵਂ ਨਿਯਾਮੋਕ੍ਕਮਨਾਦੀਨਿਪਿ. ਨ ਹਿ ਪਞ੍ਚਦ੍ਵਾਰਿਕਜਵਨੇਨ ਮਿਚ੍ਛਤ੍ਤਨਿਯਾਮਂ ਓਕ੍ਕਮਤਿ, ਨ ਸਮ੍ਮਤ੍ਤਨਿਯਾਮਂ; ਨ ਚੇਤਂ ਜਵਨਂ ਨਾਮਗੋਤ੍ਤਮਾਰਬ੍ਭ ਜਵਤਿ, ਨ ਕਸਿਣਾਦਿਪਣ੍ਣਤ੍ਤਿਂ; ਨ ਲਕ੍ਖਣਾਰਮ੍ਮਣਿਕਵਿਪਸ੍ਸਨਾਵਸੇਨ ਪਵਤ੍ਤਤਿ, ਨ ਵੁਟ੍ਠਾਨਗਾਮਿਨੀਬਲਵਵਿਪਸ੍ਸਨਾਵਸੇਨ; ਨ ਰੂਪਾਰੂਪਧਮ੍ਮੇ ਆਰਬ੍ਭ ਜਵਤਿ, ਨ ਨਿਬ੍ਬਾਨਂ; ਨ ਚੇਤੇਨ ਸਦ੍ਧਿਂ ਪਟਿਸਮ੍ਭਿਦਾਞਾਣਂ ਉਪ੍ਪਜ੍ਜਤਿ, ਨ ਅਭਿਞ੍ਞਾਞਾਣਂ, ਨ ਸਾਵਕਪਾਰਮੀਞਾਣਂ, ਨ ਪਚ੍ਚੇਕਬੋਧਿਞਾਣਂ, ਨ ਸਬ੍ਬਞ੍ਞੁਤਞਾਣਂ. ਸਬ੍ਬੋਪਿ ਪਨੇਸ ਪਭੇਦੋ ਮਨੋਦ੍ਵਾਰਿਕਜਵਨੇਯੇਵ ਲਬ੍ਭਤਿ.

ਨ ਸੁਪਤਿ ਨ ਪਟਿਬੁਜ੍ਝਤਿ ਨ ਸੁਪਿਨਂ ਪਸ੍ਸਤੀਤਿ ਸਬ੍ਬੇਨਾਪਿ ਚ ਪਞ੍ਚਦ੍ਵਾਰਿਕਚਿਤ੍ਤੇਨ ਨੇਵ ਨਿਦ੍ਦਂ ਓਕ੍ਕਮਤਿ, ਨ ਨਿਦ੍ਦਾਯਤਿ, ਨ ਪਟਿਬੁਜ੍ਝਤਿ, ਨ ਕਿਞ੍ਚ ਸੁਪਿਨਂ ਪਸ੍ਸਤੀਤਿ ਇਮੇਸੁ ਤੀਸੁ ਠਾਨੇਸੁ ਸਹ ਜਵਨੇਨ ਵੀਥਿਚਿਤ੍ਤਂ ਪਟਿਕ੍ਖਿਤ੍ਤਂ.

ਨਿਦ੍ਦਾਯਨ੍ਤਸ੍ਸ ਹਿ ਮਹਾਵਟ੍ਟਿਂ ਜਾਲੇਤ੍ਵਾ ਦੀਪੇ ਚਕ੍ਖੁਸਮੀਪੇ ਉਪਨੀਤੇ ਪਠਮਂ ਚਕ੍ਖੁਦ੍ਵਾਰਿਕਂ ਆਵਜ੍ਜਨਂ ਭਵਙ੍ਗਂ ਨ ਆਵਟ੍ਟੇਤਿ, ਮਨੋਦ੍ਵਾਰਿਕਮੇਵ ਆਵਟ੍ਟੇਤਿ. ਅਥ ਜਵਨਂ ਜਵਿਤ੍ਵਾ ਭਵਙ੍ਗਂ ਓਤਰਤਿ. ਦੁਤਿਯਵਾਰੇ ਚਕ੍ਖੁਦ੍ਵਾਰਿਕਂ ਆਵਜ੍ਜਨਂ ਭਵਙ੍ਗਂ ਆਵਟ੍ਟੇਤਿ. ਤਤੋ ਚਕ੍ਖੁਵਿਞ੍ਞਾਣਾਦੀਨਿ ਜਵਨਪਰਿਯੋਸਾਨਾਨਿ ਪਵਤ੍ਤਨ੍ਤਿ. ਤਦਨਨ੍ਤਰਂ ਭਵਙ੍ਗਂ ਪਵਤ੍ਤਤਿ. ਤਤਿਯਵਾਰੇ ਮਨੋਦ੍ਵਾਰਿਕਆਵਜ੍ਜਨੇਨ ਭਵਙ੍ਗੇ ਆਵਟ੍ਟਿਤੇ ਮਨੋਦ੍ਵਾਰਿਕਜਵਨਂ ਜਵਤਿ. ਤੇਨ ਚਿਤ੍ਤੇਨ ਞਤ੍ਵਾ ‘ਕਿਂ ਅਯਂ ਇਮਸ੍ਮਿਂ ਠਾਨੇ ਆਲੋਕੋ’ਤਿ ਜਾਨਾਤਿ.

ਤਥਾ ਨਿਦ੍ਦਾਯਨ੍ਤਸ੍ਸ ਕਣ੍ਣਸਮੀਪੇ ਤੂਰਿਯੇਸੁ ਪਗ੍ਗਹਿਤੇਸੁ, ਘਾਨਸਮੀਪੇ ਸੁਗਨ੍ਧੇਸੁ ਵਾ ਦੁਗ੍ਗਨ੍ਧੇਸੁ ਵਾ ਪੁਪ੍ਫੇਸੁ ਉਪਨੀਤੇਸੁ, ਮੁਖੇ ਸਪ੍ਪਿਮ੍ਹਿ ਵਾ ਫਾਣਿਤੇ ਵਾ ਪਕ੍ਖਿਤ੍ਤੇ, ਪਿਟ੍ਠਿਯਂ ਪਾਣਿਨਾ ਪਹਾਰੇ ਦਿਨ੍ਨੇ ਪਠਮਂ ਸੋਤਦ੍ਵਾਰਿਕਾਦੀਨਿ ਆਵਜ੍ਜਨਾਨਿ ਭਵਙ੍ਗਂ ਨ ਆਵਟ੍ਟੇਨ੍ਤਿ, ਮਨੋਦ੍ਵਾਰਿਕਮੇਵ ਆਵਟ੍ਟੇਤਿ. ਅਥ ਜਵਨਂ ਜਵਿਤ੍ਵਾ ਭਵਙ੍ਗਂ ਓਤਰਤਿ. ਦੁਤਿਯਵਾਰੇ ਸੋਤਦ੍ਵਾਰਿਕਾਦੀਨਿ ਆਵਜ੍ਜਨਾਨਿ ਭਵਙ੍ਗਂ ਆਵਟ੍ਟੇਨ੍ਤਿ. ਤਤੋ ਸੋਤਘਾਨਜਿਵ੍ਹਾਕਾਯਵਿਞ੍ਞਾਣਾਦੀਨਿ ਜਵਨਪਰਿਯੋਸਾਨਾਨਿ ਪਵਤ੍ਤਨ੍ਤਿ. ਤਦਨਨ੍ਤਰਂ ਭਵਙ੍ਗਂ ਪਵਤ੍ਤਤਿ. ਤਤਿਯਵਾਰੇ ਮਨੋਦ੍ਵਾਰਿਕਆਵਜ੍ਜਨੇਨ ਭਵਙ੍ਗੇ ਆਵਟ੍ਟਿਤੇ ਮਨੋਦ੍ਵਾਰਿਕਜਵਨਂ ਜਵਤਿ. ਤੇਨ ਚਿਤ੍ਤੇਨ ਞਤ੍ਵਾ ‘ਕਿਂ ਅਯਂ ਇਮਸ੍ਮਿਂ ਠਾਨੇ ਸਦ੍ਦੋ – ਸਙ੍ਖਸਦ੍ਦੋ, ਭੇਰਿਸਦ੍ਦੋ’ਤਿ ਵਾ ‘ਕਿਂ ਅਯਂ ਇਮਸ੍ਮਿਂ ਠਾਨੇ ਗਨ੍ਧੋ – ਮੂਲਗਨ੍ਧੋ, ਸਾਰਗਨ੍ਧੋ’ਤਿ ਵਾ ‘ਕਿਂ ਇਦਂ ਮਯ੍ਹਂ ਮੁਖੇ ਪਕ੍ਖਿਤ੍ਤਰਸਂ – ਸਪ੍ਪੀਤਿ ਵਾ ਫਾਣਿਤ’ਨ੍ਤਿ ਵਾ ‘ਕੇਨਮ੍ਹਿ ਪਿਟ੍ਠਿਯਂ ਪਹਤੋ, ਅਤਿਥਦ੍ਧੋ ਮੇ ਪਹਾਰੋ’ਤਿ ਵਾ ਵਤ੍ਤਾਰੋ ਹੋਨ੍ਤਿ. ਏਵਂ ਮਨੋਦ੍ਵਾਰਿਕਜਵਨੇਨੇਵ ਪਟਿਬੁਜ੍ਝਤਿ, ਨ ਪਞ੍ਚਦ੍ਵਾਰਿਕੇਨ. ਸੁਪਿਨਮ੍ਪਿ ਤੇਨੇਵ ਪਸ੍ਸਤਿ, ਨ ਪਞ੍ਚਦ੍ਵਾਰਿਕੇਨ.

ਤਞ੍ਚ ਪਨੇਤਂ ਸੁਪਿਨਂ ਪਸ੍ਸਨ੍ਤੋ ਚਤੂਹਿ ਕਾਰਣੇਹਿ ਪਸ੍ਸਤਿ – ਧਾਤੁਕ੍ਖੋਭਤੋ ਵਾ ਅਨੁਭੂਤਪੁਬ੍ਬਤੋ ਵਾ ਦੇਵਤੋਪਸਂਹਾਰਤੋ ਵਾ ਪੁਬ੍ਬਨਿਮਿਤ੍ਤਤੋ ਵਾਤਿ. ਤਤ੍ਥ ਪਿਤ੍ਤਾਦੀਨਂ ਖੋਭਕਰਣਪਚ੍ਚਯਯੋਗੇਨ ਖੁਭਿਤਧਾਤੁਕੋ ‘ਧਾਤੁਕ੍ਖੋਭਤੋ’ ਸੁਪਿਨਂ ਪਸ੍ਸਤਿ. ਪਸ੍ਸਨ੍ਤੋ ਚ ਨਾਨਾਵਿਧਂ ਸੁਪਿਨਂ ਪਸ੍ਸਤਿ – ਪਬ੍ਬਤਾ ਪਤਨ੍ਤੋ ਵਿਯ, ਆਕਾਸੇਨ ਗਚ੍ਛਨ੍ਤੋ ਵਿਯ, ਵਾਲ਼ਮਿਗਹਤ੍ਥਿਚੋਰਾਦੀਹਿ ਅਨੁਬਦ੍ਧੋ ਵਿਯ ਚ ਹੋਤਿ. ‘ਅਨੁਭੂਤਪੁਬ੍ਬਤੋ’ ਪਸ੍ਸਨ੍ਤੋ ਪੁਬ੍ਬੇ ਅਨੁਭੂਤਪੁਬ੍ਬਂ ਆਰਮ੍ਮਣਂ ਪਸ੍ਸਤਿ. ‘ਦੇਵਤੋਪਸਂਹਾਰਤੋ’ ਪਸ੍ਸਨ੍ਤਸ੍ਸ ਦੇਵਤਾ ਅਤ੍ਥਕਾਮਤਾਯ ਵਾ ਅਨਤ੍ਥਕਾਮਤਾਯ ਵਾ ਅਤ੍ਥਾਯ ਵਾ ਅਨਤ੍ਥਾਯ ਵਾ ਨਾਨਾਵਿਧਾਨਿ ਆਰਮ੍ਮਣਾਨਿ ਉਪਸਂਹਰਨ੍ਤਿ. ਸੋ ਤਾਸਂ ਦੇਵਤਾਨਂ ਆਨੁਭਾਵੇਨ ਤਾਨਿ ਆਰਮ੍ਮਣਾਨਿ ਪਸ੍ਸਤਿ. ਪੁਬ੍ਬਨਿਮਿਤ੍ਤਤੋ ਪਸ੍ਸਨ੍ਤੋ ਪੁਞ੍ਞਾਪੁਞ੍ਞਵਸੇਨ ਉਪ੍ਪਜ੍ਜਿਤੁਕਾਮਸ੍ਸ ਅਤ੍ਥਸ੍ਸ ਵਾ ਅਨਤ੍ਥਸ੍ਸ ਵਾ ਪੁਬ੍ਬਨਿਮਿਤ੍ਤਭੂਤਂ ਸੁਪਿਨਂ ਪਸ੍ਸਤਿ ਬੋਧਿਸਤ੍ਤਮਾਤਾ ਵਿਯ ਪੁਤ੍ਤਪਟਿਲਾਭਨਿਮਿਤ੍ਤਂ, ਬੋਧਿਸਤ੍ਤੋ ਵਿਯ ਪਞ੍ਚ ਮਹਾਸੁਪਿਨੇ (ਅ. ਨਿ. ੫.੧੯੬), ਕੋਸਲਰਾਜਾ ਵਿਯ ਚ ਸੋਲ਼ਸ ਸੁਪਿਨੇਤਿ (ਜਾ. ੧.੧.੪੧).

ਤਤ੍ਥ ਯਂ ਧਾਤੁਕ੍ਖੋਭਤੋ ਅਨੁਭੂਤਪੁਬ੍ਬਤੋ ਚ ਸੁਪਿਨਂ ਪਸ੍ਸਤਿ, ਨ ਤਂ ਸਚ੍ਚਂ ਹੋਤਿ. ਯਂ ਦੇਵਤੋਪਸਂਹਾਰਤੋ ਪਸ੍ਸਤਿ, ਤਂ ਸਚ੍ਚਂ ਵਾ ਹੋਤਿ ਅਲਿਕਂ ਵਾ. ਕੁਦ੍ਧਾ ਹਿ ਦੇਵਤਾ ਉਪਾਯੇਨ ਵਿਨਾਸੇਤੁਕਾਮਾ ਵਿਪਰੀਤਮ੍ਪਿ ਕਤ੍ਵਾ ਦਸ੍ਸੇਨ੍ਤਿ. ਤਤ੍ਰਿਦਂ ਵਤ੍ਥੁ – ਰੋਹਣੇ ਕਿਰ ਨਾਗਮਹਾਵਿਹਾਰੇ ਮਹਾਥੇਰੋ ਭਿਕ੍ਖੁਸਙ੍ਘਂ ਅਨਪਲੋਕੇਤ੍ਵਾਵ ਏਕਂ ਨਾਗਰੁਕ੍ਖਂ ਛਿਨ੍ਦਾਪੇਸਿ. ਰੁਕ੍ਖੇ ਅਧਿਵਤ੍ਥਾ ਦੇਵਤਾ ਥੇਰਸ੍ਸ ਕੁਦ੍ਧਾ ਪਠਮਮੇਵ ਨਂ ਪਲੋਭੇਤ੍ਵਾ ਪਚ੍ਛਾ ‘ਇਤੋ ਤੇ ਸਤ੍ਤਦਿਵਸਮਤ੍ਥਕੇ ਉਪਟ੍ਠਾਕੋ ਰਾਜਾ ਮਰਿਸ੍ਸਤੀ’ਤਿ ਸੁਪਿਨੇ ਆਰੋਚੇਸਿ. ਥੇਰੋ ਨਂ ਕਥਂ ਆਹਰਿਤ੍ਵਾ ਰਾਜੋਰੋਧਾਨਂ ਆਚਿਕ੍ਖਿ. ਤਾ ਏਕਪ੍ਪਹਾਰੇਨੇਵ ਮਹਾਵਿਰਵਂ ਵਿਰਵਿਂਸੁ. ਰਾਜਾ ‘ਕਿਂ ਏਤ’ਨ੍ਤਿ ਪੁਚ੍ਛਿ. ਤਾ ‘ਏਵਂ ਥੇਰੇਨ ਵੁਤ੍ਤ’ਨ੍ਤਿ ਆਰੋਚਯਿਂਸੁ. ਰਾਜਾ ਦਿਵਸੇ ਗਣਾਪੇਤ੍ਵਾ ਸਤ੍ਤਾਹੇ ਵੀਤਿਵਤ੍ਤੇ ਕੁਜ੍ਝਿਤ੍ਵਾ ਥੇਰਸ੍ਸ ਹਤ੍ਥਪਾਦੇ ਛਿਨ੍ਦਾਪੇਸਿ.

ਯਂ ਪਨ ਪੁਬ੍ਬਨਿਮਿਤ੍ਤਤੋ ਪਸ੍ਸਤਿ ਤਂ ਏਕਨ੍ਤਸਚ੍ਚਮੇਵ ਹੋਤਿ. ਏਤੇਸਞ੍ਚ ਚਤੁਨ੍ਨਂ ਮੂਲਕਾਰਣਾਨਂ ਸਂਸਗ੍ਗਭੇਦਤੋਪਿ ਸੁਪਿਨਭੇਦੋ ਹੋਤਿਯੇਵ. ਤਞ੍ਚ ਪਨੇਤਂ ਚਤੁਬ੍ਬਿਧਂ ਸੁਪਿਨਂ ਸੇਕ੍ਖਪੁਥੁਜ੍ਜਨਾਵ ਪਸ੍ਸਨ੍ਤਿ ਅਪ੍ਪਹੀਨਵਿਪਲ੍ਲਾਸਤ੍ਤਾ; ਅਸੇਕ੍ਖਾ ਨ ਪਸ੍ਸਨ੍ਤਿ ਪਹੀਨਵਿਪਲ੍ਲਾਸਤ੍ਤਾ.

ਕਿਂ ਪਨ ਤਂ ਪਸ੍ਸਨ੍ਤੋ ਸੁਤ੍ਤੋ ਪਸ੍ਸਤਿ, ਪਟਿਬੁਦ੍ਧੋ? ਉਦਾਹੁ ਨੇਵ ਸੁਤ੍ਤੋ ਪਸ੍ਸਤਿ ਨ ਪਟਿਬੁਦ੍ਧੋਤਿ? ਕਿਞ੍ਚੇਤ੍ਥ ਯਦਿ ਤਾਵ ਸੁਤ੍ਤੋ ਪਸ੍ਸਤਿ, ਅਭਿਧਮ੍ਮਵਿਰੋਧੋ ਆਪਜ੍ਜਤਿ. ਭਵਙ੍ਗਚਿਤ੍ਤੇਨ ਹਿ ਸੁਪਤਿ. ਤਞ੍ਚ ਰੂਪਨਿਮਿਤ੍ਤਾਦਿਆਰਮ੍ਮਣਂ ਰਾਗਾਦਿਸਮ੍ਪਯੁਤ੍ਤਂ ਵਾ ਨ ਹੋਤਿ. ਸੁਪਿਨਂ ਪਸ੍ਸਨ੍ਤਸ੍ਸ ਚ ਈਦਿਸਾਨਿ ਚਿਤ੍ਤਾਨਿ ਉਪ੍ਪਜ੍ਜਨ੍ਤਿ. ਅਥ ਪਟਿਬੁਦ੍ਧੋ ਪਸ੍ਸਤਿ, ਵਿਨਯਵਿਰੋਧੋ ਆਪਜ੍ਜਤਿ. ਯਞ੍ਹਿ ਪਟਿਬੁਦ੍ਧੋ ਪਸ੍ਸਤਿ, ਤਂ ਸਬ੍ਬੋਹਾਰਿਕਚਿਤ੍ਤੇਨ ਪਸ੍ਸਤਿ. ਸਬ੍ਬੋਹਾਰਿਕਚਿਤ੍ਤੇਨ ਚ ਕਤੇ ਵੀਤਿਕ੍ਕਮੇ ਅਨਾਪਤ੍ਤਿ ਨਾਮ ਨਤ੍ਥਿ. ਸੁਪਿਨਂ ਪਸ੍ਸਨ੍ਤੇਨ ਪਨ ਕਤੇ ਵੀਤਿਕ੍ਕਮੇ ਏਕਨ੍ਤਂ ਅਨਾਪਤ੍ਤਿ ਏਵ. ਅਥ ਨੇਵ ਸੁਤ੍ਤੋ ਨ ਪਟਿਬੁਦ੍ਧੋ ਪਸ੍ਸਤਿ, ਨ ਸੁਪਿਨਂ ਨਾਮ ਪਸ੍ਸਤਿ. ਏਵਞ੍ਹਿ ਸਤਿ ਸੁਪਿਨਸ੍ਸ ਅਭਾਵੋਵ ਆਪਜ੍ਜਤਿ? ਨ ਅਭਾਵੋ. ਕਸ੍ਮਾ? ਯਸ੍ਮਾ ਕਪਿਮਿਦ੍ਧਪਰੇਤੋ ਪਸ੍ਸਤਿ. ਵੁਤ੍ਤਂ ਹੇਤਂ – ‘‘ਕਪਿਮਿਦ੍ਧਪਰੇਤੋ ਖੋ, ਮਹਾਰਾਜ, ਸੁਪਿਨਂ ਪਸ੍ਸਤੀ’’ਤਿ (ਮਿ. ਪ. ੫.੩.੫). ‘ਕਪਿਮਿਦ੍ਧਪਰੇਤੋ’ਤਿ ਮਕ੍ਕਟਨਿਦ੍ਦਾਯ ਯੁਤ੍ਤੋ. ਯਥਾ ਹਿ ਮਕ੍ਕਟਸ੍ਸ ਨਿਦ੍ਦਾ ਲਹੁਪਰਿਵਤ੍ਤਾ ਹੋਤਿ, ਏਵਂ ਯਾ ਨਿਦ੍ਦਾ ਪੁਨਪ੍ਪੁਨਂ ਕੁਸਲਾਦਿਚਿਤ੍ਤਵੋਕਿਣ੍ਣਤ੍ਤਾ ਲਹੁਪਰਿਵਤ੍ਤਾ; ਯਸ੍ਸਾ ਪਵਤ੍ਤਿਯਂ ਪੁਨਪ੍ਪੁਨਂ ਭਵਙ੍ਗਤੋ ਉਤ੍ਤਰਣਂ ਹੋਤਿ, ਤਾਯ ਯੁਤ੍ਤੋ ਸੁਪਿਨਂ ਪਸ੍ਸਤਿ. ਤੇਨਾਯਂ ਸੁਪਿਨੋ ਕੁਸਲੋਪਿ ਹੋਤਿ ਅਕੁਸਲੋਪਿ ਅਬ੍ਯਾਕਤੋਪਿ ੩੮੬. ਤਤ੍ਥ ਸੁਪਿਨਨ੍ਤੇ ਚੇਤਿਯਵਨ੍ਦਨਧਮ੍ਮਸ੍ਸਵਨਧਮ੍ਮਦੇਸਨਾਦੀਨਿ ਕਰੋਨ੍ਤਸ੍ਸ ਕੁਸਲੋ, ਪਾਣਾਤਿਪਾਤਾਦੀਨਿ ਕਰੋਨ੍ਤਸ੍ਸ ਅਕੁਸਲੋ, ਦ੍ਵੀਹਿ ਅਨ੍ਤੇਹਿ ਮੁਤ੍ਤੋ ਆਵਜ੍ਜਨਤਦਾਰਮ੍ਮਣਕ੍ਖਣੇ ਅਬ੍ਯਾਕਤੋਤਿ ਵੇਦਿਤਬ੍ਬੋ. ਸੁਪਿਨੇਨੇਵ ‘ਦਿਟ੍ਠਂ ਵਿਯ ਮੇ, ਸੁਤਂ ਵਿਯ ਮੇ’ਤਿ ਕਥਨਕਾਲੇਪਿ ਅਬ੍ਯਾਕਤੋਯੇਵ.

ਕਿਂ ਪਨ ਸੁਪਿਨੇ ਕਤਂ ਕੁਸਲਾਕੁਸਲਂ ਕਮ੍ਮਂ ਸਵਿਪਾਕਂ ਅਵਿਪਾਕਨ੍ਤਿ? ਸਵਿਪਾਕਂ; ਦੁਬ੍ਬਲਤ੍ਤਾ ਪਨ ਪਟਿਸਨ੍ਧਿਂ ਆਕਡ੍ਢਿਤੁਂ ਨ ਸਕ੍ਕੋਤਿ, ਦਿਨ੍ਨਾਯ ਅਞ੍ਞਕਮ੍ਮੇਨ ਪਟਿਸਨ੍ਧਿਯਾ ਪਵਤ੍ਤੇ ਵੇਦਨੀਯਂ ਹੋਤਿ.

ਏਵਂ ਯਾਥਾਵਕਵਤ੍ਥੁਵਿਭਾਵਨਾ ਪਞ੍ਞਾਤਿ ਪਞ੍ਚਨ੍ਨਂ ਵਿਞ੍ਞਾਣਾਨਂ ਨ ਹੇਤ੍ਵਟ੍ਠੋ ਯਾਥਾਵਟ੍ਠੋ. ਤਂ ਯਾਥਾਵਟ੍ਠਂ ਵਤ੍ਥੁਂ ਵਿਭਾਵੇਤੀਤਿ ਯਾਥਾਵਕਵਤ੍ਥੁਵਿਭਾਵਨਾ. ਤਥਾ ਪਞ੍ਚਨ੍ਨਂ ਵਿਞ੍ਞਾਣਾਨਂ ਅਹੇਤੁਕਟ੍ਠੋ, ਜਰਾਭਿਭੂਤਟ੍ਠੋ, ਨ ਸੁਪਿਨਂ ਪਸ੍ਸਨਟ੍ਠੋ, ਯਾਥਾਵਟ੍ਠੋ. ਤਂ ਯਾਥਾਵਟ੍ਠਂ ਵਤ੍ਥੁਂ ਵਿਭਾਵੇਤੀਤਿ ਯਾਥਾਵਕਵਤ੍ਥੁਵਿਭਾਵਨਾ. ਇਤਿ ਯਾ ਹੇਟ੍ਠਾ ‘‘ਯਾਥਾਵਕਵਤ੍ਥੁਵਿਭਾਵਨਾ ਪਞ੍ਞਾ’’ਤਿ ਮਾਤਿਕਾਯ ਨਿਕ੍ਖਿਤ੍ਤਾ, ਸਾ ਏਵਂ ਯਾਥਾਵਕਵਤ੍ਥੁਵਿਭਾਵਨਾ ਪਞ੍ਞਾਤਿ ਵੇਦਿਤਬ੍ਬਾ. ਤਸ੍ਸਾ ਏਵ ਚ ਵਸੇਨ ਏਵਂ ਏਕਵਿਧੇਨ ਞਾਣਵਤ੍ਥੂਤਿ ਏਵਂ ਏਕੇਕਕੋਟ੍ਠਾਸੇਨ ਞਾਣਗਣਨਾ ਏਕੇਨ ਵਾ ਆਕਾਰੇਨ ਞਾਣਪਰਿਚ੍ਛੇਦੋ ਹੋਤਿ.

ਏਕਕਨਿਦ੍ਦੇਸਵਣ੍ਣਨਾ.