੫. ਸਬ੍ਬਮਤ੍ਥੀਤਿਕਥਾ

੧. ਵਾਦਯੁਤ੍ਤਿਵਣ੍ਣਨਾ

੨੮੨. ਇਦਾਨਿ ਸਬ੍ਬਮਤ੍ਥੀਤਿਵਾਦਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਯਂ ਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ…ਪੇ… ਅਯਂ ਵੁਚ੍ਚਤਿ ਰੂਪਕ੍ਖਨ੍ਧੋ’’ਤਿਆਦਿਵਚਨਤੋ (ਵਿਭ. ੨) ‘‘ਸਬ੍ਬੇਪਿ ਅਤੀਤਾਦਿਭੇਦਾ ਧਮ੍ਮਾ ਖਨ੍ਧਸਭਾਵਂ ਨ ਵਿਜਹਨ੍ਤਿ, ਤਸ੍ਮਾ ਸਬ੍ਬਂ ਅਤ੍ਥਿਯੇਵ ਨਾਮਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਸਬ੍ਬਮਤ੍ਥਿਵਾਦਾਨਂ, ਤੇਸਂ ਲਦ੍ਧਿਵਿਸੋਧਨਤ੍ਥਂ ਸਬ੍ਬਮਤ੍ਥੀਤਿ ਪੁਚ੍ਛਾ ਸਕਵਾਦਿਸ੍ਸ, ਵੁਤ੍ਤਪ੍ਪਕਾਰਾਯ ਲਦ੍ਧਿਯਾ ਠਤ੍ਵਾ ਪਟਿਞ੍ਞਾ ਇਤਰਸ੍ਸ. ਸਬ੍ਬਥਾਤਿ ਸਬ੍ਬਸ੍ਮਿਂ ਸਰੀਰੇ ਸਬ੍ਬਮਤ੍ਥੀਤਿ ਪੁਚ੍ਛਤਿ. ਸਬ੍ਬਦਾਤਿ ਸਬ੍ਬਸ੍ਮਿਂ ਕਾਲੇ ਸਬ੍ਬਮਤ੍ਥੀਤਿ ਪੁਚ੍ਛਤਿ. ਸਬ੍ਬੇਨ ਸਬ੍ਬਨ੍ਤਿ ਸਬ੍ਬੇਨਾਕਾਰੇਨ ਸਬ੍ਬਮਤ੍ਥੀਤਿ ਪੁਚ੍ਛਤਿ. ਸਬ੍ਬੇਸੂਤਿ ਸਬ੍ਬੇਸੁ ਧਮ੍ਮੇਸੁ ਸਬ੍ਬਮਤ੍ਥੀਤਿ ਪੁਚ੍ਛਤਿ. ਅਯੋਗਨ੍ਤਿ ਅਯੁਤ੍ਤਂ. ਨਾਨਾਸਭਾਵਾਨਞ੍ਹਿ ਯੋਗੋ ਹੋਤਿ, ਨ ਏਕਸਭਾਵਸ੍ਸ. ਇਤਿ ਇਮਸ੍ਮਿਂ ਪਞ੍ਹੇ ਰੂਪਂ ਵੇਦਨਾਯ, ਵੇਦਨਂ ਵਾ ਰੂਪੇਨ ਅਨਾਨਂ ਏਕਲਕ੍ਖਣਮੇਵ ਕਤ੍ਵਾ ਸਬ੍ਬਮਤ੍ਥੀਤਿ ਪੁਚ੍ਛਤਿ. ਯਮ੍ਪਿ ਨਤ੍ਥਿ ਤਮ੍ਪਤ੍ਥੀਤਿ ਯਮ੍ਪਿ ਛਟ੍ਠਖਨ੍ਧਾਦਿਕਂ ਸਸਵਿਸਾਣਾਦਿਕਂ ਵਾ ਕਿਞ੍ਚਿ ਨਤ੍ਥੀਤਿ ਸਿਦ੍ਧਂ, ਤਮ੍ਪਿ ਤੇ ਅਤ੍ਥੀਤਿ ਪੁਚ੍ਛਤਿ. ਸਬ੍ਬਮਤ੍ਥੀਤਿ ਯਾ ਦਿਟ੍ਠਿ ਸਾ ਦਿਟ੍ਠਿ ਮਿਚ੍ਛਾਦਿਟ੍ਠੀਤਿ, ਯਾ ਦਿਟ੍ਠਿ ਸਾ ਦਿਟ੍ਠਿ ਸਮ੍ਮਾਦਿਟ੍ਠੀਤਿ ਹੇਵਮਤ੍ਥੀਤਿ ਇਮਿਨਾ ਇਦਂ ਪੁਚ੍ਛਤਿ – ਯਾ ਤੇ ਏਸਾ ਸਬ੍ਬਮਤ੍ਥੀਤਿ ਦਿਟ੍ਠਿ, ਸਾ ਦਿਟ੍ਠਿ ਅਯਾਥਾਵਕਤ੍ਤਾ ਮਿਚ੍ਛਾਦਿਟ੍ਠੀਤਿ ਏਵਂ ਯਾ ਅਮ੍ਹਾਕਂ ਦਿਟ੍ਠਿ, ਸਾ ਦਿਟ੍ਠਿ ਯਾਥਾਵਕਤ੍ਤਾ ਸਮ੍ਮਾਦਿਟ੍ਠੀਤਿ ਏਵਂ ਤਵ ਸਮਯੇ ਅਤ੍ਥੀਤਿ ਪੁਚ੍ਛਤਿ. ਇਤਰੋ ਸਬ੍ਬੇਸੁਪਿ ਏਤੇਸੁ ਨਯੇਸੁ ਵੁਤ੍ਤਪ੍ਪਕਾਰਾਯ ਅਤ੍ਥਿਤਾਯ ਅਭਾਵਤੋ ਪਟਿਕ੍ਖਿਪਤਿ. ਇਮੇਸੁ ਪਨ ਸਬ੍ਬੇਸੁਪਿ ਨਯੇਸੁ ‘‘ਆਜਾਨਾਹਿ ਨਿਗ੍ਗਹ’’ਨ੍ਤਿ ਆਦਿਂ ਕਤ੍ਵਾ ਸਬ੍ਬੋ ਕਥਾਮਗ੍ਗਭੇਦੋ ਵਿਤ੍ਥਾਰਤੋ ਵੇਦਿਤਬ੍ਬੋਤਿ ਅਯਂ ਤਾਵੇਤ੍ਥ ਵਾਦਯੁਤ੍ਤਿ.

੨. ਕਾਲਸਂਸਨ੍ਦਨਵਣ੍ਣਨਾ

੨੮੩-੨੮੪. ਇਦਾਨਿ ਅਤੀਤਂ ਅਤ੍ਥੀਤਿ ਕਾਲਸਂਸਨ੍ਦਨਂ ਹੋਤਿ. ਤਤ੍ਥ ਅਤੀਤਂ ਅਤ੍ਥੀਤਿਆਦਿਕਂ ਸੁਦ੍ਧਿਕਸਂਸਨ੍ਦਨਂ. ਅਤੀਤਂ ਰੂਪਂ ਅਤ੍ਥੀਤਿਆਦਿਕਂ ਖਨ੍ਧਵਸੇਨ ਕਾਲਸਂਸਨ੍ਦਨਂ.

੨੮੫. ਪਚ੍ਚੁਪ੍ਪਨ੍ਨਂ ਰੂਪਂ ਅਪ੍ਪਿਯਂ ਕਰਿਤ੍ਵਾਤਿ ਅਤੀਤਾਨਾਗਤਂ ਪਹਾਯ ਪਚ੍ਚੁਪ੍ਪਨ੍ਨਰੂਪਮੇਵ ਅਪ੍ਪਿਯਂ ਅਵਿਭਜਿਤਬ੍ਬਂ ਕਰਿਤ੍ਵਾ. ਰੂਪਭਾਵਂ ਜਹਤੀਤਿਪਞ੍ਹੇ ਨਿਰੁਦ੍ਧਸ੍ਸਾਪਿ ਰੂਪਸ੍ਸ ਰੂਪਕ੍ਖਨ੍ਧਸਙ੍ਗਹਿਤਤ੍ਤਾ ਪਟਿਕ੍ਖਿਪਤਿ. ਰੂਪਭਾਵਂ ਨ ਜਹਤੀਤਿ ਪਟਿਲੋਮਪਞ੍ਹੇਪਿ ਰੂਪਕ੍ਖਨ੍ਧੇਨ ਸਙ੍ਗਹਿਤਤ੍ਤਾਵ ਪਟਿਜਾਨਾਤਿ. ਓਦਾਤਂ ਵਤ੍ਥਂ ਅਪ੍ਪਿਯਂ ਕਰਿਤ੍ਵਾਤਿ ਏਤ੍ਥ ਕਿਞ੍ਚਾਪਿ ਨ ਸਬ੍ਬਂ ਵਤ੍ਥਂ ਓਦਾਤਂ, ਇਮਿਨਾ ਪਨ ਵਤ੍ਥਨ੍ਤਿ ਅਵਤ੍ਵਾ ‘‘ਓਦਾਤਂ ਵਤ੍ਥਂ ਅਪ੍ਪਿਯਂ ਕਰਿਤ੍ਵਾ’’ਤਿ ਵੁਤ੍ਤੇ ਸਕਵਾਦਿਨਾ ਏਕਤ੍ਥਤਾ ਅਨੁਞ੍ਞਾਤਾ. ਓਦਾਤਭਾਵਂ ਜਹਤੀਤਿ ਪਞ੍ਹੇ ਵਣ੍ਣਵਿਗਮਂ ਸਨ੍ਧਾਯ ਪਟਿਞ੍ਞਾ ਸਕਵਾਦਿਸ੍ਸ. ਵਤ੍ਥਭਾਵਂ ਜਹਤੀਤਿ ਏਤ੍ਥ ਪਨ ਪਞ੍ਞਤ੍ਤਿਯਾ ਅਵਿਗਤਤ੍ਤਾ ਪਟਿਕ੍ਖੇਪੋ ਤਸ੍ਸੇਵ. ਪਟਿਲੋਮੇਪਿ ਏਸੇਵ ਨਯੋ.

੨੮੬. ਅਤੀਤਂ ਅਤੀਤਭਾਵਂ ਨ ਜਹਤੀਤਿ ਪੁਟ੍ਠੋ ‘‘ਯਦਿ ਜਹੇਯ੍ਯ, ਅਨਾਗਤਂ ਵਾ ਪਚ੍ਚੁਪ੍ਪਨ੍ਨਂ ਵਾ ਸਿਯਾ’’ਤਿ ਮਞ੍ਞਮਾਨੋ ਪਟਿਜਾਨਾਤਿ. ਅਨਾਗਤਂ ਅਨਾਗਤਭਾਵਂ ਨ ਜਹਤੀਤਿ ਪੁਟ੍ਠੋ ਪਨ ‘‘ਯਦਿ ਨ ਜਹੇਯ੍ਯ, ਅਨਾਗਤਮੇਵਸ੍ਸ, ਪਚ੍ਚੁਪ੍ਪਨ੍ਨਭਾਵਂ ਨ ਪਾਪੁਣੇਯ੍ਯਾ’’ਤਿ ਮਞ੍ਞਮਾਨੋ ਪਟਿਕ੍ਖਿਪਤਿ. ਪਚ੍ਚੁਪ੍ਪਨ੍ਨਪਞ੍ਹੇਪਿ ਅਤੀਤਭਾਵਂ ਅਨਾਪਜ੍ਜਨਦੋਸੋ ਸਿਯਾਤਿ ਪਟਿਕ੍ਖਿਪਤਿ. ਅਨੁਲੋਮਪਞ੍ਹੇਸੁਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ.

੨੮੭. ਏਵਂ ਸੁਦ੍ਧਿਕਨਯਂ ਵਤ੍ਵਾ ਪੁਨ ਖਨ੍ਧਵਸੇਨ ਦਸ੍ਸੇਤੁਂ ਅਤੀਤਂ ਰੂਪਨ੍ਤਿਆਦਿ ਵੁਤ੍ਤਂ. ਤਂ ਸਬ੍ਬਂ ਪਾਲ਼ਿਅਨੁਸਾਰੇਨੇਵ ਸਕ੍ਕਾ ਜਾਨਿਤੁਂ.

ਵਚਨਸੋਧਨਵਣ੍ਣਨਾ

੨੮੮. ਇਦਾਨਿ ‘‘ਅਤੀਤਂ ਨ੍ਵਤ੍ਥੀ’’ਤਿਆਦਿ ਵਚਨਸੋਧਨਾ ਹੋਤਿ. ਤਤ੍ਥ ਹਞ੍ਚਿ ਅਤੀਤਂ ਨ੍ਵਤ੍ਥੀਤਿ ਯਦਿ ਅਤੀਤਂ ਨੋ ਅਤ੍ਥੀਤਿ ਅਤ੍ਥੋ. ਅਤੀਤਂ ਅਤ੍ਥੀਤਿ ਮਿਚ੍ਛਾਤਿ ਅਤੀਤਞ੍ਚ ਤਂ ਅਤ੍ਥਿ ਚਾਤਿ ਮਿਚ੍ਛਾ ਏਵ. ਤਞ੍ਞੇਵ ਅਨਾਗਤਂ ਤਂ ਪਚ੍ਚੁਪ੍ਪਨ੍ਨਨ੍ਤਿ ਪੁਟ੍ਠੋ ਅਨਾਗਤਕ੍ਖਣੇਯੇਵਸ੍ਸ ਪਚ੍ਚੁਪ੍ਪਨ੍ਨਤਾਯ ਅਭਾਵਂ ਸਨ੍ਧਾਯ ਕਾਲਨਾਨਤ੍ਤੇਨ ਪਟਿਕ੍ਖਿਪਤਿ.

ਦੁਤਿਯਂ ਪੁਟ੍ਠੋ ਯਂ ਉਪ੍ਪਾਦਤੋ ਪੁਬ੍ਬੇ ਅਨਾਗਤਂ ਅਹੋਸਿ, ਤਸ੍ਸ ਉਪ੍ਪਨ੍ਨਕਾਲੇ ਪਚ੍ਚੁਪ੍ਪਨ੍ਨਤ੍ਤਾ ਪਟਿਜਾਨਾਤਿ. ਹੁਤ੍ਵਾ ਹੋਤਿ ਹੁਤ੍ਵਾ ਹੋਤੀਤਿ ਯਦੇਤਂ ਤਯਾ ‘‘ਅਨਾਗਤਂ ਹੁਤ੍ਵਾ ਪਚ੍ਚੁਪ੍ਪਨ੍ਨਂ ਹੋਤੀ’’ਤਿ ਵਦਤਾ ਤਞ੍ਞੇਵ ਅਨਾਗਤਂ ਤਂ ਪਚ੍ਚੁਪ੍ਪਨ੍ਨਨ੍ਤਿ ਲਦ੍ਧਿਵਸੇਨ ‘‘ਅਨਾਗਤਂ ਵਾ ਪਚ੍ਚੁਪ੍ਪਨ੍ਨਂ ਵਾ ਹੁਤ੍ਵਾ ਹੋਤੀ’’ਤਿ ਵੁਤ੍ਤਂ. ਕਿਂ ਤੇ ਤਮ੍ਪਿ ਹੁਤ੍ਵਾ ਹੋਤੀਤਿ? ਇਤਰੋ ਹੁਤ੍ਵਾ ਭੂਤਸ੍ਸ ਪੁਨ ਹੁਤ੍ਵਾ ਅਭਾਵਤੋ ਨ ਹੇਵਨ੍ਤਿ ਪਟਿਕ੍ਖਿਪਤਿ.

ਦੁਤਿਯਂ ਪੁਟ੍ਠੋ ਯਸ੍ਮਾ ਤਂ ਅਨਾਗਤਂ ਹੁਤ੍ਵਾ ਪਚ੍ਚੁਪ੍ਪਨ੍ਨਂ ਹੋਨ੍ਤਂ ‘‘ਹੁਤ੍ਵਾ ਹੋਤੀ’’ਤਿ ਸਙ੍ਖਂ ਗਤਂ, ਤਸ੍ਮਾ ਪਟਿਜਾਨਾਤਿ. ਅਥ ਨਂ ਸਕਵਾਦੀ ‘‘ਯਦਿ ਤੇ ਤਂ ਅਨਾਗਤਂ ਹੁਤ੍ਵਾ ਪਚ੍ਚੁਪ੍ਪਨ੍ਨਂ ਹੋਨ੍ਤਂ ‘ਹੁਤ੍ਵਾ ਹੋਤੀ’ਤਿ ਸਙ੍ਖਂ ਗਤਂ, ਪੁਨ ਹੁਤ੍ਵਾ ਹੋਤਿ, ਯਂ ਅਨਾਗਤਂ ਨ ਹੁਤ੍ਵਾ ਪਚ੍ਚੁਪ੍ਪਨ੍ਨਂ ਨ ਹੋਨ੍ਤਂ ‘ਨ ਹੁਤ੍ਵਾ ਨ ਹੋਤੀ’ਤਿ ਸਙ੍ਖਂ ਗਤਂ ਸਸਵਿਸਾਣਂ, ਕਿਂ ਤੇ ਤਮ੍ਪਿ ਪੁਨ ਨ ਹੁਤ੍ਵਾ ਨ ਹੋਤੀ’’ਤਿਅਧਿਪ੍ਪਾਯੇਨ ਨ ਹੁਤ੍ਵਾ ਨ ਹੋਤਿ ਨ ਹੁਤ੍ਵਾ ਨ ਹੋਤੀਤਿ ਪਞ੍ਹਂ ਪੁਚ੍ਛਤਿ. ਇਤਰੋ ‘‘ਯਂ ਨਤ੍ਥਿ, ਤਂ ਨਤ੍ਥਿਤਾਯ, ਏਵ ਅਨਾਗਤਂ ਨ ਹੁਤ੍ਵਾ ਪਚ੍ਚੁਪ੍ਪਨ੍ਨਂ ਨ ਹੋਤੀਤਿ ਨਹੁਤ੍ਵਾਨਹੋਤਿ ਨਾਮ ਤਾਵ ਹੋਤੁ, ਪੁਨ ਨਹੁਤ੍ਵਾਨਹੋਤਿਭਾਵੋ ਪਨਸ੍ਸ ਕੁਤੋ’’ਤਿ ਮਞ੍ਞਮਾਨੋ ਪਟਿਕ੍ਖਿਪਤਿ. ਤਞ੍ਞੇਵ ਪਚ੍ਚੁਪ੍ਪਨ੍ਨਂ ਤਂ ਅਤੀਤਨ੍ਤਿ ਪਞ੍ਹੇਪਿ ਪਚ੍ਚੁਪ੍ਪਨ੍ਨਕ੍ਖਣੇਯੇਵਸ੍ਸ ਅਤੀਤਤਾਯ ਅਭਾਵਂ ਸਨ੍ਧਾਯ ਕਾਲਨਾਨਤ੍ਤਾ ਪਟਿਕ੍ਖਿਪਤਿ.

ਦੁਤਿਯਪਞ੍ਹੇ ਪੁਟ੍ਠੋ ਯਂ ਅਤੀਤਭਾਵਤੋ ਪੁਬ੍ਬੇ ਪਚ੍ਚੁਪ੍ਪਨ੍ਨਂ ਅਹੋਸਿ, ਤਸ੍ਸੇਵ ਅਤੀਤਤ੍ਤਾ ਪਟਿਜਾਨਾਤਿ. ਹੁਤ੍ਵਾ ਹੋਤਿ ਹੁਤ੍ਵਾ ਹੋਤੀਤਿ ਯਦੇਤਂ ਤਯਾ ‘‘ਪਚ੍ਚੁਪ੍ਪਨ੍ਨਂ ਹੁਤ੍ਵਾ ਅਤੀਤਂ ਹੋਤੀ’’ਤਿ ਵਦਤਾ ‘‘ਤਞ੍ਞੇਵ ਪਚ੍ਚੁਪ੍ਪਨ੍ਨਂ ਤਂ ਅਤੀਤ’’ਨ੍ਤਿ ਲਦ੍ਧਿਵਸੇਨ ‘‘ਪਚ੍ਚੁਪ੍ਪਨ੍ਨਂ ਵਾ ਅਤੀਤਂ ਵਾ ਹੁਤ੍ਵਾ ਹੋਤੀ’’ਤਿ ਵੁਤ੍ਤਂ, ਕਿਂ ਤੇ ਤਮ੍ਪਿ ਹੁਤ੍ਵਾ ਹੋਤੀਤਿ? ਇਤਰੋ ਹੁਤ੍ਵਾ ਭੂਤਸ੍ਸ ਪੁਨ ਹੁਤ੍ਵਾ ਅਭਾਵਤੋ ਨ ਹੇਵਨ੍ਤਿ ਪਟਿਕ੍ਖਿਪਤਿ.

ਦੁਤਿਯਪਞ੍ਹੇ ਯਸ੍ਮਾ ਤਂ ਪਚ੍ਚੁਪ੍ਪਨ੍ਨਂ ਹੁਤ੍ਵਾ ਅਤੀਤਂ ਹੋਨ੍ਤਂ ‘‘ਹੁਤ੍ਵਾ ਹੋਤੀ’’ਤਿ ਸਙ੍ਖਂ ਗਤਂ, ਤਸ੍ਮਾ ਪਟਿਜਾਨਾਤਿ. ਅਥ ਨਂ ਸਕਵਾਦੀ ‘‘ਯਦਿ ਤੇ ਤਞ੍ਞੇਵ ਪਚ੍ਚੁਪ੍ਪਨ੍ਨਂ ਹੁਤ੍ਵਾ ਅਤੀਤਂ ਹੋਨ੍ਤਂ ‘ਹੁਤ੍ਵਾ ਹੋਤੀ’ਤਿ ਸਙ੍ਖਂ ਗਤਂ, ਪੁਨ ਹੁਤ੍ਵਾ ਹੋਤਿ, ਯਂ ਪਚ੍ਚੁਪ੍ਪਨ੍ਨਂ ਨ ਹੁਤ੍ਵਾ ਅਤੀਤਂ ਨ ਹੋਨ੍ਤਂ ‘ਨ ਹੁਤ੍ਵਾ ਨ ਹੋਤੀ’ਤਿ ਸਙ੍ਖਂ ਗਤਂ ਸਸਵਿਸਾਣਂ, ਕਿਂ ਤੇ ਤਮ੍ਪਿ ਪੁਨ ਨ ਹੁਤ੍ਵਾ ਨ ਹੋਤੀ’’ਤਿ ਅਧਿਪ੍ਪਾਯੇਨ ਨ ਹੁਤ੍ਵਾ ਨ ਹੋਤਿ ਨ ਹੁਤ੍ਵਾ ਨ ਹੋਤੀਤਿ ਪਞ੍ਹਂ ਪੁਚ੍ਛਤਿ. ਇਤਰੋ ‘‘ਯਂ ਨਤ੍ਥਿ, ਤਂ ਨਤ੍ਥਿਤਾਯ ਏਵ ਪਚ੍ਚੁਪ੍ਪਨ੍ਨਂ ਨ ਹੁਤ੍ਵਾ ਅਤੀਤਂ ਨ ਹੋਤੀਤਿ ਨਹੁਤ੍ਵਾਨਹੋਤਿ ਨਾਮ ਤਾਵ ਹੋਤੁ. ਪੁਨ ਨਹੁਤ੍ਵਾਨਹੋਤਿਭਾਵੋ ਪਨਸ੍ਸ ਕੁਤੋ’’ਤਿ ਮਞ੍ਞਮਾਨੋ ਪਟਿਕ੍ਖਿਪਤਿ. ਉਭਯਂ ਏਕਤੋ ਕਤ੍ਵਾ ਆਗਤੇ ਤਤਿਯਪਞ੍ਹੇਪਿ ਇਮਿਨਾਵੁਪਾਯੇਨ ਯੋਜਨਾ ਕਾਤਬ੍ਬਾ.

ਅਪਰੋ ਨਯੋ – ਯਦਿ ਤਞ੍ਞੇਵ ਅਨਾਗਤਂ ਤਂ ਪਚ੍ਚੁਪ੍ਪਨ੍ਨਂ, ਅਨਾਗਤਸ੍ਸ ਪਚ੍ਚੁਪ੍ਪਨ੍ਨੇ ਵੁਤ੍ਤੋ ਹੋਤਿਭਾਵੋ, ਪਚ੍ਚੁਪ੍ਪਨ੍ਨਸ੍ਸ ਚ ਅਨਾਗਤੇ ਵੁਤ੍ਤੋ ਹੁਤ੍ਵਾਭਾਵੋ ਆਪਜ੍ਜਤਿ. ਏਵਂ ਸਨ੍ਤੇ ਅਨਾਗਤਮ੍ਪਿ ਹੁਤ੍ਵਾਹੋਤਿ ਨਾਮ. ਪਚ੍ਚੁਪ੍ਪਨ੍ਨਮ੍ਪਿ ਹੁਤ੍ਵਾਹੋਤਿਯੇਵ ਨਾਮ. ਤੇਨ ਤਂ ਪੁਚ੍ਛਾਮ – ‘‘ਕਿਂ ਤੇ ਏਤੇਸੁ ਏਕੇਕਂ ਹੁਤ੍ਵਾ ਹੋਤਿ ਹੁਤ੍ਵਾ ਹੋਤੀ’’ਤਿ? ਇਤਰੋ – ‘‘ਤਞ੍ਞੇਵ ਅਨਾਗਤਂ ਤਂ ਪਚ੍ਚੁਪ੍ਪਨ੍ਨ’’ਨ੍ਤਿ ਪਞ੍ਹੇ ਪਟਿਕ੍ਖਿਤ੍ਤਨਯੇਨੇਵ ਪਟਿਕ੍ਖਿਪਿਤ੍ਵਾ ਪੁਨ ਪੁਟ੍ਠੋ ਦੁਤਿਯੇ ਪਞ੍ਹੇ ਪਟਿਞ੍ਞਾਤਨਯੇਨੇਵ ਪਟਿਜਾਨਾਤਿ. ਅਥ ਨਂ ਸਕਵਾਦੀ ‘‘ਤਞ੍ਞੇਵ ਅਨਾਗਤਂ ਤਂ ਪਚ੍ਚੁਪ੍ਪਨ੍ਨ’’ਨ੍ਤਿ ਪਞ੍ਹਾਵਸੇਨ ਤੇਸੁ ਏਕੇਕਂ ਹੁਤ੍ਵਾ ਹੋਤਿ ਹੁਤ੍ਵਾ ਹੋਤੀਤਿ ਪਟਿਜਾਨਨ੍ਤਂ ਪੁਰਿਮਂ ਪਟਿਕ੍ਖਿਤ੍ਤਪਞ੍ਹਂ ਪਰਿਵਤ੍ਤਿਤ੍ਵਾ ਪੁਚ੍ਛਨ੍ਤੋ ਨ ਹੁਤ੍ਵਾ ਨ ਹੋਤਿ ਨ ਹੁਤ੍ਵਾ ਨ ਹੋਤੀਤਿ ਪੁਚ੍ਛਤਿ. ਤਸ੍ਸਤ੍ਥੋ – ਨਨੁ ‘‘ਤਯਾ ਤਞ੍ਞੇਵ ਅਨਾਗਤਂ ਤਂ ਪਚ੍ਚੁਪ੍ਪਨ੍ਨ’’ਨ੍ਤਿ ਵੁਤ੍ਤੇ ਪਠਮਪਞ੍ਹਂ ਪਟਿਕ੍ਖਿਪਨ੍ਤੇਨ ਅਨਾਗਤਸ੍ਸ ਹੋਤਿਭਾਵੋ ਪਚ੍ਚੁਪ੍ਪਨ੍ਨਸ੍ਸ ਚ ਹੁਤ੍ਵਾਭਾਵੋ ਪਟਿਕ੍ਖਿਤ੍ਤੋਤਿ. ਤੇਨ ਅਨਾਗਤਂ ਨ ਹੋਤਿ ਨਾਮ, ਪਚ੍ਚੁਪ੍ਪਨ੍ਨਂ ਨ ਹੁਤ੍ਵਾ ਨਾਮ.

ਦੁਤਿਯਪਞ੍ਹੇ ਚ ਤਞ੍ਞੇਵ ਅਨਾਗਤਂ ਤਂ ਪਚ੍ਚੁਪ੍ਪਨ੍ਨਨ੍ਤਿ ਪਟਿਞ੍ਞਾਤਂ. ਏਵਂ ਸਨ੍ਤੇ ਅਨਾਗਤਮ੍ਪਿ ਨ ਹੁਤ੍ਵਾ ਨ ਹੋਤਿ ਨਾਮ. ਪਚ੍ਚੁਪ੍ਪਨ੍ਨਮ੍ਪਿ ਨ ਹੁਤ੍ਵਾ ਨ ਹੋਤਿਯੇਵ ਨਾਮ. ਤੇਨ ਤਂ ਪੁਚ੍ਛਾਮ – ‘‘ਕਿਂ ਤੇ ਏਤੇਸੁ ਏਕੇਕਂ ਨ ਹੁਤ੍ਵਾ ਨ ਹੋਤਿ ਨ ਹੁਤ੍ਵਾ ਨ ਹੋਤੀ’’ਤਿ? ਪਰਵਾਦੀ ਸਬ੍ਬਤੋ ਅਨ੍ਧਕਾਰੇਨ ਪਰਿਯੋਨਦ੍ਧੋ ਵਿਯ ਤੇਸਂ ਨਹੁਤ੍ਵਾਨਹੋਤਿਭਾਵਂ ਅਪਸ੍ਸਨ੍ਤੋ ਨ ਹੇਵਨ੍ਤਿ ਪਟਿਕ੍ਖਿਪਤਿ.

ਦੁਤਿਯਵਾਰੇਪਿ ਯਦਿ ਤਞ੍ਞੇਵ ਪਚ੍ਚੁਪ੍ਪਨ੍ਨਂ ਤਂ ਅਤੀਤਂ, ਪਚ੍ਚੁਪ੍ਪਨ੍ਨਸ੍ਸ ਅਤੀਤੇ ਵੁਤ੍ਤੋ ਹੋਤਿਭਾਵੋ, ਅਤੀਤਸ੍ਸ ਚ ਪਚ੍ਚੁਪ੍ਪਨ੍ਨੇ ਵੁਤ੍ਤੋ ਹੁਤ੍ਵਾਭਾਵੋ ਆਪਜ੍ਜਤਿ, ਏਵਂ ਸਨ੍ਤੇ ਪਚ੍ਚੁਪ੍ਪਨ੍ਨਮ੍ਪਿ ਹੁਤ੍ਵਾਹੋਤਿ ਨਾਮ, ਅਤੀਤਮ੍ਪਿ ਹੁਤ੍ਵਾਹੋਤਿਯੇਵ ਨਾਮ. ਤੇਨ ਤਂ ਪੁਚ੍ਛਾਮ – ‘‘ਕਿਂ ਤੇ ਏਤੇਸੁ ਏਕੇਕਂ ਹੁਤ੍ਵਾ ਹੋਤਿ ਹੁਤ੍ਵਾ ਹੋਤੀ’’ਤਿ? ਇਤਰੋ ਤਞ੍ਞੇਵ ਪਚ੍ਚੁਪ੍ਪਨ੍ਨਂ ਤਂ ਅਤੀਤਨ੍ਤਿਪਞ੍ਹੇ ਪਟਿਕ੍ਖਿਤ੍ਤਨਯੇਨੇਵ ਪਟਿਕ੍ਖਿਪਿਤ੍ਵਾ ਪੁਨ ਪੁਟ੍ਠੋ ਦੁਤਿਯਪਞ੍ਹੇ ਪਟਿਞ੍ਞਾਤਨਯੇਨੇਵ ਪਟਿਜਾਨਾਤਿ. ਅਥ ਨਂ ਸਕਵਾਦੀ ‘‘ਤਞ੍ਞੇਵ ਪਚ੍ਚੁਪ੍ਪਨ੍ਨਂ ਤਂ ਅਤੀਤ’’ਨ੍ਤਿ ਪਞ੍ਹਾਵਸੇਨ ਤੇਸੁ ਏਕੇਕਂ ਹੁਤ੍ਵਾ ਹੋਤਿ ਹੁਤ੍ਵਾ ਹੋਤੀਤਿ ਪਟਿਜਾਨਨ੍ਤਂ ਪੁਰਿਮਂ ਪਟਿਕ੍ਖਿਤ੍ਤਪਞ੍ਹਂ ਪਰਿਵਤ੍ਤਿਤ੍ਵਾ ਪੁਚ੍ਛਨ੍ਤੋ ਨ ਹੁਤ੍ਵਾ ਨ ਹੋਤਿ ਨ ਹੁਤ੍ਵਾ ਨ ਹੋਤੀਤਿ ਪੁਚ੍ਛਤਿ. ਤਸ੍ਸਤ੍ਥੋ – ਨਨੁ ਤਯਾ ਤਞ੍ਞੇਵ ਪਚ੍ਚੁਪ੍ਪਨ੍ਨਂ ਤਂ ਅਤੀਤਨ੍ਤਿ ਵੁਤ੍ਤੇ ਪਠਮਪਞ੍ਹਂ ਪਟਿਕ੍ਖਿਪਨ੍ਤੇਨ ਪਚ੍ਚੁਪ੍ਪਨ੍ਨਸ੍ਸ ਹੋਤਿਭਾਵੋ, ਅਤੀਤਸ੍ਸ ਚ ਹੁਤ੍ਵਾਭਾਵੋ ਪਟਿਕ੍ਖਿਤ੍ਤੋਤਿ. ਤੇਨ ਪਚ੍ਚੁਪ੍ਪਨ੍ਨਂ ਨਹੋਤਿ ਨਾਮ. ਅਤੀਤਂ ਨਹੁਤ੍ਵਾ ਨਾਮ.

ਦੁਤਿਯਪਞ੍ਹੇ ਚ ਤੇ ‘‘ਤਞ੍ਞੇਵ ਪਚ੍ਚੁਪ੍ਪਨ੍ਨਂ ਤਂ ਅਤੀਤ’’ਨ੍ਤਿ ਪਟਿਞ੍ਞਾਤਂ. ਏਵਂ ਸਨ੍ਤੇ ਪਚ੍ਚੁਪ੍ਪਨ੍ਨਮ੍ਪਿ ਨ ਹੁਤ੍ਵਾ ਨ ਹੋਤਿ ਨਾਮ, ਅਤੀਤਮ੍ਪਿ ਨ ਹੁਤ੍ਵਾ ਨ ਹੋਤਿਯੇਵ ਨਾਮ. ਤੇਨ ਤਂ ਪੁਚ੍ਛਾਮ – ‘‘ਕਿਂ ਤੇ ਏਤੇਸੁ ਏਕੇਕਂ ਨ ਹੁਤ੍ਵਾ ਨ ਹੋਤਿ, ਨ ਹੁਤ੍ਵਾ ਨ ਹੋਤੀ’’ਤਿ. ਪਰਵਾਦੀ ਸਬ੍ਬਤੋ ਅਨ੍ਧਕਾਰੇਨ ਪਰਿਯੋਨਦ੍ਧੋ ਵਿਯ ਤੇਸਂ ਨਹੁਤ੍ਵਾਨਹੋਤਿਭਾਵਂ ਅਪਸ੍ਸਨ੍ਤੋ ਨ ਹੇਵਨ੍ਤਿ ਪਟਿਕ੍ਖਿਪਤਿ.

ਤਤਿਯਵਾਰੇਪਿ ਯਦਿ ਤਞ੍ਞੇਵ ਅਨਾਗਤਂ ਤਂ ਪਚ੍ਚੁਪ੍ਪਨ੍ਨਂ ਤਂ ਅਤੀਤਂ; ਅਨਾਗਤਪਚ੍ਚੁਪ੍ਪਨ੍ਨਾਨਂ ਪਚ੍ਚੁਪ੍ਪਨ੍ਨਾਤੀਤੇਸੁ ਵੁਤ੍ਤੋ ਹੋਤਿਭਾਵੋ, ਪਚ੍ਚੁਪ੍ਪਨ੍ਨਾਤੀਤਾਨਞ੍ਚ ਅਨਾਗਤਪਚ੍ਚੁਪ੍ਪਨ੍ਨੇਸੁ ਵੁਤ੍ਤੋ ਹੁਤ੍ਵਾਭਾਵੋ ਆਪਜ੍ਜਤਿ. ਏਵਂ ਸਨ੍ਤੇ ਅਨਾਗਤਮ੍ਪਿ ਹੁਤ੍ਵਾਹੋਤਿ ਨਾਮ. ਪਚ੍ਚੁਪ੍ਪਨ੍ਨਮ੍ਪਿ ਅਤੀਤਮ੍ਪਿ ਹੁਤ੍ਵਾ ਹੋਤਿਯੇਵ ਨਾਮ. ਤੇਨ ਤਂ ਪੁਚ੍ਛਾਮ – ‘‘ਕਿਂ ਤੇ ਤੀਸੁਪਿ ਏਤੇਸੁ ਏਕੇਕਂ ਹੁਤ੍ਵਾ ਹੋਤਿ ਹੁਤ੍ਵਾ ਹੋਤੀ’’ਤਿ? ਇਤਰੋ ‘‘ਤਞ੍ਞੇਵ ਅਨਾਗਤਂ, ਤਂ ਪਚ੍ਚੁਪ੍ਪਨ੍ਨਂ, ਤਂ ਅਤੀਤ’’ਨ੍ਤਿਪਞ੍ਹੇ ਪਟਿਕ੍ਖਿਤ੍ਤਨਯੇਨੇਵ ਪਟਿਕ੍ਖਿਪਿਤ੍ਵਾ ਪੁਨ ਪੁਟ੍ਠੋ ਦੁਤਿਯਪਞ੍ਹੇ ਪਟਿਞ੍ਞਾਤਨਯੇਨੇਵ ਪਟਿਜਾਨਾਤਿ. ਅਥ ਨਂ ਸਕਵਾਦੀ ‘‘ਤਞ੍ਞੇਵ ਅਨਾਗਤਂ, ਤਂ ਪਚ੍ਚੁਪ੍ਪਨ੍ਨਂ, ਤਂ ਅਤੀਤ’’ਨ੍ਤਿ ਪਞ੍ਹਾਵਸੇਨ ਤੇਸੁ ਏਕੇਕਂ ਹੁਤ੍ਵਾ ਹੋਤਿ, ਹੁਤ੍ਵਾ ਹੋਤੀਤਿ ਪਟਿਜਾਨਨ੍ਤਂ ਪੁਰਿਮਂ ਪਟਿਕ੍ਖਿਤ੍ਤਪਞ੍ਹਂ ਪਰਿਵਤ੍ਤਿਤ੍ਵਾ ਪੁਚ੍ਛਨ੍ਤੋ ਨ ਹੁਤ੍ਵਾ ਨ ਹੋਤਿ ਨ ਹੁਤ੍ਵਾ ਨ ਹੋਤੀਤਿ ਪੁਚ੍ਛਤਿ. ਤਸ੍ਸਤ੍ਥੋ – ਨਨੁ ਤਯਾ ਤਞ੍ਞੇਵ ਅਨਾਗਤਂ, ਤਂ ਪਚ੍ਚੁਪ੍ਪਨ੍ਨਂ, ਤਂ ਅਤੀਤਨ੍ਤਿ ਵੁਤ੍ਤੇ ਪਠਮਪਞ੍ਹਂ ਪਟਿਕ੍ਖਿਪਨ੍ਤੇਨ ਅਨਾਗਤਪਚ੍ਚੁਪ੍ਪਨ੍ਨਾਨਂ ਹੋਤਿਭਾਵੋ; ਪਚ੍ਚੁਪ੍ਪਨ੍ਨਾਤੀਤਾਨਞ੍ਚ ਹੁਤ੍ਵਾਭਾਵੋ ਪਟਿਕ੍ਖਿਤ੍ਤੋਤਿ? ਤੇਨ ਅਨਾਗਤਂ ਪਚ੍ਚੁਪ੍ਪਨ੍ਨਞ੍ਚ ਨ ਹੋਤਿ ਨਾਮ. ਪਚ੍ਚੁਪ੍ਪਨ੍ਨਞ੍ਚ ਅਤੀਤਞ੍ਚ ਨ ਹੁਤ੍ਵਾ ਨਾਮ.

ਦੁਤਿਯਪਞ੍ਹੇ ਚ ਤੇ ‘‘ਤਞ੍ਞੇਵ ਅਨਾਗਤਂ, ਤਂ ਪਚ੍ਚੁਪ੍ਪਨ੍ਨਂ, ਤਂ ਅਤੀਤ’’ਨ੍ਤਿ ਪਟਿਞ੍ਞਾਤਂ. ਏਵਂ ਸਨ੍ਤੇ ਅਨਾਗਤਮ੍ਪਿ ਨ ਹੁਤ੍ਵਾ ਨ ਹੋਤਿ ਨਾਮ, ਪਚ੍ਚੁਪ੍ਪਨ੍ਨਮ੍ਪਿ ਅਤੀਤਮ੍ਪਿ ਨ ਹੁਤ੍ਵਾ ਨ ਹੋਤਿਯੇਵ ਨਾਮ. ਤੇਨ ਤਂ ਪੁਚ੍ਛਾਮ – ‘‘ਕਿਂ ਤੇ ਏਤੇਸੁ ਏਕੇਕਂ ਨ ਹੁਤ੍ਵਾ ਨ ਹੋਤਿ ਨ ਹੁਤ੍ਵਾ ਨ ਹੋਤੀ’’ਤਿ? ਪਰਵਾਦੀ ਸਬ੍ਬਤੋ ਅਨ੍ਧਕਾਰੇਨ ਪਰਿਯੋਨਦ੍ਧੋ ਵਿਯ ਤੇਸਂ ਨ ਹੁਤ੍ਵਾ ਨ ਹੋਤਿਭਾਵਂ ਅਪਸ੍ਸਨ੍ਤੋ ਨ ਹੇਵਨ੍ਤਿ ਪਟਿਕ੍ਖਿਪਤੀਤਿ. ਨਿਗ੍ਗਹਾਦੀਨਿ ਪਨੇਤ੍ਥ ਹੇਟ੍ਠਾ ਵੁਤ੍ਤਨਯੇਨੇਵ ਯੋਜੇਤਬ੍ਬਾਨਿ.

ਵਚਨਸੋਧਨਵਣ੍ਣਨਾ ਨਿਟ੍ਠਿਤਾ.

ਅਤੀਤਚਕ੍ਖੁਰੂਪਾਦਿਕਥਾਵਣ੍ਣਨਾ

੨੮੯. ਅਤੀਤਂ ਚਕ੍ਖੁ ਅਤ੍ਥੀਤਿਆਦੀਸੁਪਿ ਚਕ੍ਖਾਦਿਭਾਵਾਵਿਜਹਨੇਨੇਵ ਅਤ੍ਥਿਤਂ ਪਟਿਜਾਨਾਤਿ. ਪਸ੍ਸਤੀਤਿਆਦੀਨਿ ਪੁਟ੍ਠੋ ਪਨ ਤੇਸਂ ਵਿਞ੍ਞਾਣਾਨਂ ਕਿਚ੍ਚਾਭਾਵਵਸੇਨ ਪਟਿਕ੍ਖਿਪਤਿ.

ਅਤੀਤਞਾਣਾਦਿਕਥਾਵਣ੍ਣਨਾ

੨੯੦. ਤੇਨ ਞਾਣੇਨ ਞਾਣਕਰਣੀਯਂ ਕਰੋਤੀਤਿ ਪਞ੍ਹੇ ਤਸ੍ਸ ਞਾਣਸ੍ਸ ਨਿਰੁਦ੍ਧਤ੍ਤਾ ਕਿਚ੍ਚਭਾਵਮਸ੍ਸ ਅਪਸ੍ਸਨ੍ਤੋ ਪਟਿਕ੍ਖਿਪਤਿ. ਪੁਨ ਪੁਟ੍ਠੋ ਅਤੀਤਾਰਮ੍ਮਣਂ ਪਚ੍ਚੁਪ੍ਪਨ੍ਨਂ ਞਾਣਂ ਅਤੀਤਾਨਂ ਧਮ੍ਮਾਨਂ ਜਾਨਨਤੋ ਅਤੀਤਂ ਞਾਣਨ੍ਤਿ ਲੇਸੇਨ ਪਚ੍ਚੁਪ੍ਪਨ੍ਨਮੇਵ ‘‘ਅਤੀਤਂ ਞਾਣ’’ਨ੍ਤਿ ਕਤ੍ਵਾ ਤੇਨ ਞਾਣੇਨ ਞਾਣਕਰਣੀਯਸ੍ਸ ਅਤ੍ਥਿਤਾਯ ਪਟਿਜਾਨਾਤਿ. ਅਥਸ੍ਸ ਸਕਵਾਦੀ ਲੇਸੋਕਾਸਂ ਅਦਤ੍ਵਾ ਤੇਨ ਞਾਣੇਨ ਦੁਕ੍ਖਂ ਪਰਿਜਾਨਾਤੀਤਿਆਦਿਮਾਹ. ਇਤਰੋ ਅਤੀਤਾਰਮ੍ਮਣੇਨੇਵ ਞਾਣੇਨ ਇਮੇਸਂ ਚਤੁਨ੍ਨਂ ਕਿਚ੍ਚਾਨਂ ਅਭਾਵਾ ਪਟਿਕ੍ਖਿਪਤਿ. ਅਨਾਗਤਪਞ੍ਹੇਪਿ ਏਸੇਵ ਨਯੋ. ਪਚ੍ਚੁਪ੍ਪਨ੍ਨਪਞ੍ਹੋ ਚੇਵ ਸਂਸਨ੍ਦਨਪਞ੍ਹੋ ਚ ਉਤ੍ਤਾਨਤ੍ਥਾਯੇਵ.

ਅਰਹਨ੍ਤਾਦਿਕਥਾਵਣ੍ਣਨਾ

੨੯੧. ਅਰਹਤੋ ਅਤੀਤੋ ਰਾਗੋ ਅਤ੍ਥੀਤਿਆਦੀਸੁਪਿ ਰਾਗਾਦਿਭਾਵਾਵਿਜਹਨ੍ਤੋ ਏਵਂ ਪਟਿਜਾਨਾਤਿ. ਸਰਾਗੋਤਿਆਦੀਸੁ ਸੁਤ੍ਤਵਿਰੋਧਭਯੇਨ ਚੇਵ ਯੁਤ੍ਤਿਵਿਰੋਧਭਯੇਨ ਚ ਪਟਿਕ੍ਖਿਪਤਿ.

ਪਦਸੋਧਨਕਥਾਵਣ੍ਣਨਾ

੨੯੫. ਏਵਂ ਸਬ੍ਬਮ੍ਪਿ ਪਾਲ਼ਿਅਨੁਸਾਰੇਨੇਵ ਵਿਦਿਤ੍ਵਾ ਪਰਤੋ ਅਤ੍ਥਿ ਸਿਯਾ ਅਤੀਤਂ, ਸਿਯਾ ਨ੍ਵਾਤੀਤਨ੍ਤਿ ਏਤ੍ਥ ਏਵਮਤ੍ਥੋ ਵੇਦਿਤਬ੍ਬੋ. ਯਂ ਅਤੀਤਮੇਵ ਅਤ੍ਥਿ, ਤਂ ਅਤੀਤਂ. ਯਂ ਪਚ੍ਚੁਪ੍ਪਨ੍ਨਾਨਾਗਤਂ ਅਤ੍ਥਿ, ਤਂ ਨੋ ਅਤ੍ਥਿ, ਤਂ ਨੋ ਅਤੀਤਂ. ਤੇਨਾਤੀਤਂ ਨ੍ਵਾਤੀਤਂ, ਨ੍ਵਾਤੀਤਂ ਅਤੀਤਨ੍ਤਿ ਤੇਨ ਕਾਰਣੇਨ ਅਤੀਤਂ ਨੋ ਅਤੀਤਂ, ਨੋ ਅਤੀਤਂ ਅਤੀਤਨ੍ਤਿ. ਅਨਾਗਤਪਚ੍ਚੁਪ੍ਪਨ੍ਨਪੁਚ੍ਛਾਸੁਪਿ ਏਸੇਵ ਨਯੋ.

ਸੁਤ੍ਤਸਾਧਨਵਣ੍ਣਨਾ

੨੯੬. ਨ ਵਤ੍ਤਬ੍ਬਂ ‘‘ਅਤੀਤਂ ਅਤ੍ਥਿ ਅਨਾਗਤਂ ਅਤ੍ਥੀ’’ਤਿ ਸੁਤ੍ਤਸਾਧਨਾਯ ਪੁਚ੍ਛਾ ਪਰਵਾਦਿਸ੍ਸ, ਪਟਿਞ੍ਞਾ ਸਕਵਾਦਿਸ੍ਸ. ਪੁਨ ਅਤ੍ਤਨੋ ਲਦ੍ਧਿਂ ਨਿਸ੍ਸਾਯ ਯਂਕਿਞ੍ਚਿ, ਭਿਕ੍ਖਵੇ, ਰੂਪਨ੍ਤਿ ਅਨੁਯੋਗੋ ਪਰਵਾਦਿਸ੍ਸੇਵ. ਦੁਤਿਯਨਯੇ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਏਵਂ ਸਬ੍ਬਤ੍ਥ ਪੁਚ੍ਛਾ ਚ ਪਟਿਞ੍ਞਾ ਚ ਵੇਦਿਤਬ੍ਬਾ. ਯਂ ਪਨੇਤਂ ਪਰਵਾਦਿਨਾ ਅਨਾਗਤਸ੍ਸ ਅਤ੍ਥਿਭਾਵਸਾਧਨਤ੍ਥਂ ‘‘ਨਨੁ ਵੁਤ੍ਤਂ ਭਗਵਤਾ ਕਬਲ਼ੀਕਾਰੇ, ਚੇ, ਭਿਕ੍ਖਵੇ’’ਤਿ ਸੁਤ੍ਤਸ੍ਸ ਪਰਿਯੋਸਾਨੇ ਅਤ੍ਥਿ ਤਤ੍ਥ ਆਯਤਿਂ ਪੁਨਬ੍ਭਵਾਭਿਨਿਬ੍ਬਤ੍ਤੀਤਿਆਦਿ ਦਸ੍ਸਿਤਂ ਨ ਤਂ ਅਨਾਗਤਸ੍ਸ ਅਤ੍ਥਿਭਾਵਸਾਧਕਂ. ਤਞ੍ਹਿ ਹੇਤੂਨਂ ਪਰਿਨਿਟ੍ਠਿਤਤ੍ਤਾ ਅਵਸ੍ਸਂ ਭਾਵਿਤਂ ਸਨ੍ਧਾਯ ਤਤ੍ਥ ਵੁਤ੍ਤਂ. ਅਯਂ ਸੁਤ੍ਤਾਧਿਪ੍ਪਾਯੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸਬ੍ਬਮਤ੍ਥੀਤਿਕਥਾਵਣ੍ਣਨਾ ਨਿਟ੍ਠਿਤਾ.