੩. ਬ੍ਰਹ੍ਮਚਰਿਯਕਥਾ

੧. ਸੁਦ੍ਧਬ੍ਰਹ੍ਮਚਰਿਯਕਥਾਵਣ੍ਣਨਾ

੨੬੯. ਇਦਾਨਿ ਬ੍ਰਹ੍ਮਚਰਿਯਕਥਾ ਹੋਤਿ. ਤਤ੍ਥ ਦ੍ਵੇ ਬ੍ਰਹ੍ਮਚਰਿਯਵਾਸਾ, ਮਗ੍ਗਭਾਵਨਾ ਚ ਪਬ੍ਬਜ੍ਜਾ ਚ. ਪਬ੍ਬਜ੍ਜਾ ਸਬ੍ਬਦੇਵੇਸੁ ਨਤ੍ਥਿ. ਮਗ੍ਗਭਾਵਨਾ ਠਪੇਤ੍ਵਾ ਅਸਞ੍ਞਸਤ੍ਤੇ ਸੇਸੇਸੁ ਅਪ੍ਪਟਿਸਿਦ੍ਧਾ. ਤਤ੍ਥ ਯੇ ਪਰਨਿਮ੍ਮਿਤਵਸਵਤ੍ਤਿਦੇਵੇ ਉਪਾਦਾਯ ਤਦੁਪਰਿਦੇਵੇਸੁ ਮਗ੍ਗਭਾਵਨਮ੍ਪਿ ਨ ਇਚ੍ਛਨ੍ਤਿ ਸੇਯ੍ਯਥਾਪਿ ਸਮ੍ਮਿਤਿਯਾ, ਤੇ ਸਨ੍ਧਾਯ ਨਤ੍ਥਿ ਦੇਵੇਸੂਤਿ ਪੁਚ੍ਛਾ ਸਕਵਾਦਿਸ੍ਸ. ‘‘ਤੀਹਿ, ਭਿਕ੍ਖਵੇ, ਠਾਨੇਹਿ ਜਮ੍ਬੁਦੀਪਕਾ ਮਨੁਸ੍ਸਾ ਉਤ੍ਤਰਕੁਰੁਕੇ ਚ ਮਨੁਸ੍ਸੇ ਅਧਿਗ੍ਗਣ੍ਹਨ੍ਤਿ ਦੇਵੇ ਚ ਤਾਵਤਿਂਸੇ. ਕਤਮੇਹਿ ਤੀਹਿ? ਸੂਰਾ ਸਤਿਮਨ੍ਤੋ ਇਧ ਬ੍ਰਹ੍ਮਚਰਿਯਵਾਸੋ’’ਤਿ (ਅ. ਨਿ. ੯.੨੧) ਇਦਂ ਸੁਤ੍ਤਂ ਨਿਸ੍ਸਾਯ ਦ੍ਵੇਪਿ ਬ੍ਰਹ੍ਮਚਰਿਯਵਾਸਾ ਨਤ੍ਥਿ ਦੇਵੇਸੂਤਿ ਉਪ੍ਪਨ੍ਨਲਦ੍ਧਿਵਸੇਨ ਪਟਿਞ੍ਞਾ ਪਰਵਾਦਿਸ੍ਸ. ਪੁਨ ਦ੍ਵਿਨ੍ਨਮ੍ਪਿ ਬ੍ਰਹ੍ਮਚਰਿਯਾਨਂ ਅਨ੍ਤਰਾਯਿਕਧਮ੍ਮਵਸੇਨੇਵ ਸਬ੍ਬੇ ਦੇਵਾ ਜਲ਼ਾਤਿ ਪੁਚ੍ਛਾ ਸਕਵਾਦਿਸ੍ਸ. ਤਤ੍ਥ ਹਤ੍ਥਸਂਵਾਚਿਕਾਤਿ ਮੂਗਾ ਵਿਯ ਹਤ੍ਥਮੁਦ੍ਧਾਯ ਵਤ੍ਤਾਰੋ. ਪਰਤੋ ਅਤ੍ਥਿ ਦੇਵੇਸੂਤਿ ਪੁਚ੍ਛਾ ਪਰਵਾਦਿਸ੍ਸ, ਮਗ੍ਗਭਾਵਨਂ ਸਨ੍ਧਾਯ ਪਟਿਞ੍ਞਾ ਸਕਵਾਦਿਸ੍ਸ. ਪਟਿਞ੍ਞਾਯ ਅਧਿਪ੍ਪਾਯਂ ਅਸਲ੍ਲਕ੍ਖੇਤ੍ਵਾ ਪਬ੍ਬਜ੍ਜਾਵਸੇਨ ਅਨੁਯੋਗੋ ਪਰਵਾਦਿਸ੍ਸ.

੨੭੦. ਯਤ੍ਥ ਨਤ੍ਥਿ ਪਬ੍ਬਜ੍ਜਾਤਿ ਪਞ੍ਹੇ ਗਿਹੀਨਞ੍ਚੇਵ ਏਕਚ੍ਚਾਨਞ੍ਚ ਦੇਵਾਨਂ ਮਗ੍ਗਪਟਿਲਾਭਂ ਸਨ੍ਧਾਯ ਪਟਿਕ੍ਖੇਪੋ ਤਸ੍ਸੇਵ. ਪੁਨ ਪੁਟ੍ਠੋ ਪਚ੍ਚਨ੍ਤਵਾਸਿਨੋ ਚੇਵ ਅਸਞ੍ਞਸਤ੍ਤੇ ਚ ਸਨ੍ਧਾਯ ਪਟਿਞ੍ਞਾ ਤਸ੍ਸੇਵ. ਯੋ ਪਬ੍ਬਜਤੀਤਿਆਦੀਸੁ ਪੁਚ੍ਛਾਸੁਪਿ ਏਸੇਵ ਨਯੋ. ਪੁਨ ‘‘ਅਤ੍ਥਿ ਦੇਵੇਸੂ’’ਤਿ ਪਞ੍ਹੇਪਿ ਮਗ੍ਗਭਾਵਨਂ ਸਨ੍ਧਾਯੇਵ ਪਟਿਞ੍ਞਾ ਸਕਵਾਦਿਸ੍ਸ, ‘‘ਸਬ੍ਬਦੇਵੇਸੂ’’ਤਿ ਵੁਤ੍ਤੇ ਅਸਞ੍ਞਸਤ੍ਤੇ ਸਨ੍ਧਾਯ ਪਟਿਕ੍ਖੇਪੋ ਤਸ੍ਸੇਵ.

੨੭੧. ਮਨੁਸ੍ਸੇਸੂਤਿ ਪਞ੍ਹਦ੍ਵਯੇ ਜਮ੍ਬੁਦੀਪਕੇ ਸਨ੍ਧਾਯ ਪਟਿਞ੍ਞਾ. ਪਚ੍ਚਨ੍ਤਵਾਸਿਨੋ ਸਨ੍ਧਾਯ ਪਟਿਕ੍ਖੇਪੋ ਵੇਦਿਤਬ੍ਬੋ.

ਅਤ੍ਥਿ ਯਤ੍ਥ ਅਤ੍ਥੀਤਿ ਅਤ੍ਥਿ ਤੇ ਦੇਵਾ, ਅਤ੍ਥਿ ਵਾ ਸੋ ਪਦੇਸੋ, ਯਤ੍ਥ ਅਤ੍ਥੀਤਿ ਏਵਂ ਸਤ੍ਤਪਦੇਸਵਿਭਾਗਮੁਖੇਨ ਵਿਸ੍ਸਜ੍ਜਨਂ ਸਕਵਾਦਿਸ੍ਸ. ਇਮਿਨਾ ਨਯੇਨ ਸਬ੍ਬੇ ਏਕਨ੍ਤਰਿਕਪਞ੍ਹਾ ਵੇਦਿਤਬ੍ਬਾ.

੨੭੨. ਸੁਤ੍ਤਾਨੁਯੋਗੇ ਕੁਹਿਂ ਫਲੁਪ੍ਪਤ੍ਤੀਤਿ ਤਸ੍ਸ ਅਨਾਗਾਮਿਨੋ ਅਰਹਤ੍ਤਫਲੁਪ੍ਪਤ੍ਤਿ ਕੁਹਿਨ੍ਤਿ ਪੁਚ੍ਛਾ ਸਕਵਾਦਿਸ੍ਸ. ਤਤ੍ਥੇਵਾਤਿ ਸੁਦ੍ਧਾਵਾਸੇਸੂਤਿ ਅਤ੍ਥੋ.

ਹਨ੍ਦ ਹੀਤਿ ਕਾਰਣਤ੍ਥੇ ਨਿਪਾਤੋ. ਇਦਂ ਵੁਤ੍ਤਂ ਹੋਤਿ – ਯਸ੍ਮਾ ਅਨਾਗਾਮਿਪੁਗ੍ਗਲੋ ਇਧ ਲੋਕੇ ਭਾਵਿਤੇਨ ਮਗ੍ਗੇਨ ਤਤ੍ਥ ਸੁਦ੍ਧਾਵਾਸੇਸੁ ਫਲਂ ਸਚ੍ਛਿਕਰੋਤਿ, ਨ ਤਤ੍ਥ ਅਞ੍ਞਂ ਮਗ੍ਗਂ ਭਾਵੇਤਿ, ਤਸ੍ਮਾ ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ.

੨. ਸਂਸਨ੍ਦਨਬ੍ਰਹ੍ਮਚਰਿਯਵਣ੍ਣਨਾ

੨੭੩. ਇਦਾਨਿ ਯਦਿ ਅਞ੍ਞਤ੍ਥ ਭਾਵਿਤੇਨ ਮਗ੍ਗੇਨ ਅਞ੍ਞਤ੍ਥ ਫਲਸਚ੍ਛਿਕਿਰਿਯਾ ਹੋਤਿ, ਸੋਤਾਪਨ੍ਨਾਦੀਨਮ੍ਪਿ ਸਿਯਾਤਿ ਏਤਮਤ੍ਥਂ ਦਸ੍ਸੇਤੁਂ ਪੁਨ ਅਨਾਗਾਮੀਤਿਆਦੀਨਂ ਸਂਸਨ੍ਦਨਪੁਚ੍ਛਾ ਸਕਵਾਦਿਸ੍ਸ. ਤਤ੍ਥ ਅਨਾਗਾਮਿਸ੍ਸ ਫਲਸਚ੍ਛਿਕਿਰਿਯਾਯ ਪਟਿਞ੍ਞਾ, ਸੇਸਾਨਂ ਫਲਸਚ੍ਛਿਕਿਰਿਯਾਯ ਪਟਿਕ੍ਖੇਪੋ ਪਰਵਾਦਿਸ੍ਸ. ਇਧ ਭਾਵਿਤਮਗ੍ਗੋ ਹਿ ਅਨਾਗਾਮੀ ਇਧਵਿਹਾਯਨਿਟ੍ਠੋ ਨਾਮ ਹੋਤਿ. ਸੋ ਇਧ ਅਨਾਗਾਮਿਮਗ੍ਗਂ ਭਾਵੇਤ੍ਵਾ ‘‘ਓਪਪਾਤਿਕੋ ਤਤ੍ਥਪਰਿਨਿਬ੍ਬਾਯੀ’’ਤਿ ਵਚਨਤੋ ‘‘ਪੁਨ ਮਗ੍ਗਭਾਵਨਂ ਵਿਨਾ ਉਪਪਤ੍ਤਿਵਸੇਨੇਵ ਅਰਹਤ੍ਤਫਲਂ ਸਚ੍ਛਿਕਰੋਤੀ’’ਤਿ ਤਸ੍ਸ ਲਦ੍ਧਿ. ਸੋਤਾਪਨ੍ਨਸਕਦਾਗਾਮਿਨੋ ਪਨ ਤਤ੍ਥ ਮਗ੍ਗਂ ਭਾਵੇਤ੍ਵਾ ਤਤ੍ਰੁਪਪਤ੍ਤਿਕਾ ਨਾਮ ਹੋਨ੍ਤੀਤਿ ਤੇਸਂ ਇਧਾਗਮਨਞ੍ਞੇਵ ਨਤ੍ਥਿ. ਇਤਿ ਸੋ ਅਨਾਗਾਮਿਸ੍ਸ ਫਲਸਚ੍ਛਿਕਿਰਿਯਂ ਪੁਟ੍ਠੋ ਪਟਿਜਾਨਾਤਿ. ਇਤਰੇਸਂ ਪਟਿਕ੍ਖਿਪਤਿ.

ਅਨਾਗਾਮੀ ਪੁਗ੍ਗਲੋ ਤਤ੍ਥ ਭਾਵਿਤੇਨ ਮਗ੍ਗੇਨਾਤਿ ਪਞ੍ਹੇ ‘‘ਅਨਾਗਾਮਿਨੋ ਤਤ੍ਥ ਮਗ੍ਗਭਾਵਨਾਵ ਨਤ੍ਥੀ’’ਤਿ ਲਦ੍ਧਿਯਾ ਪਟਿਕ੍ਖਿਪਤਿ. ਮਗ੍ਗੋ ਚ ਭਾਵੀਯਤਿ, ਨ ਚ ਕਿਲੇਸਾ ਪਹੀਯਨ੍ਤੀਤਿ ਪੁਚ੍ਛਾ ਸਕਵਾਦਿਸ੍ਸ, ਰੂਪਾਵਚਰਮਗ੍ਗਂ ਸਨ੍ਧਾਯ ਪਟਿਞ੍ਞਾ ਇਤਰਸ੍ਸ. ਰੂਪਾਵਚਰਮਗ੍ਗੇਨ ਹਿ ਸੋ ਇਧਵਿਹਾਯਨਿਟ੍ਠੋ ਨਾਮ ਜਾਤੋ.

ਅਨਾਗਾਮੀ ਪੁਗ੍ਗਲੋ ਕਤਕਰਣੀਯੋਤਿ ਪਞ੍ਹੇ ‘‘ਓਪਪਾਤਿਕੋ ਤਤ੍ਥਪਰਿਨਿਬ੍ਬਾਯੀ’’ਤਿ ਵਚਨਤੋ ਉਪਪਤ੍ਤਿਯਾਵਸ੍ਸ ਕਤਕਰਣੀਯਾਦਿਭਾਵਂ ਸਨ੍ਧਾਯ ਪਟਿਜਾਨਾਤਿ. ਅਰਹਾਤਿ ਪਞ੍ਹੇ ਇਧਪਰਿਨਿਬ੍ਬਾਯਿਨੋ ਅਰਹਤੋ ਵਸੇਨੇਵ ਪਟਿਕ੍ਖਿਪਤਿ. ਪੁਨ ਪੁਟ੍ਠੋ ਤਤ੍ਥਪਰਿਨਿਬ੍ਬਾਯਿਨੋ ਵਸੇਨ ਪਟਿਜਾਨਾਤਿ.

ਅਤ੍ਥਿ ਅਰਹਤੋ ਪੁਨਬ੍ਭਵੋਤਿਆਦੀਸੁਪਿ ਤਤ੍ਥਪਰਿਨਿਬ੍ਬਾਯੀ ਇਧਪਰਿਨਿਬ੍ਬਾਯੀਨਂ ਵਸੇਨੇਵ ਅਤ੍ਥੋ ਵੇਦਿਤਬ੍ਬੋ. ਅਪ੍ਪਟਿਵਿਦ੍ਧਾਕੁਪ੍ਪੋਵ ਤਤ੍ਥਪਰਿਨਿਬ੍ਬਾਯਤੀਤਿ ਪੁਟ੍ਠੋ ਇਧੇਵ ਭਾਵਿਤੇਨ ਮਗ੍ਗੇਨ ਤਸ੍ਸ ਅਕੁਪ੍ਪਪਟਿਵੇਧਂ ਇਚ੍ਛਨ੍ਤੋ ਪਟਿਕ੍ਖਿਪਤਿ.

ਯਥਾ ਮਿਗੋਤਿ ਪਠਮਂ ਉਦਾਹਰਣਂ ਪਰਵਾਦਿਸ੍ਸ, ਦੁਤਿਯਂ ਸਕਵਾਦਿਸ੍ਸ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਬ੍ਰਹ੍ਮਚਰਿਯਕਥਾ ਨਿਟ੍ਠਿਤਾ.

੩. ਓਧਿਸੋਕਥਾਵਣ੍ਣਨਾ

੨੭੪. ਇਦਾਨਿ ਓਧਿਸੋਕਥਾ ਨਾਮ ਹੋਤਿ. ਤਤ੍ਥ ਯੇ ਸੋਤਾਪਨ੍ਨਾਦੀਨਂ ਨਾਨਾਭਿਸਮਯਵਸੇਨ ਦੁਕ੍ਖਦਸ੍ਸਨਾਦੀਹਿ ਓਧਿਸੋ ਓਧਿਸੋ ਏਕਦੇਸੇਨ ਏਕਦੇਸੇਨ ਕਿਲੇਸਪ੍ਪਹਾਨਂ ਇਚ੍ਛਨ੍ਤਿ ਸੇਯ੍ਯਥਾਪਿ ਏਤਰਹਿ ਸਮ੍ਮਿਤਿਯਾਦਯੋ, ਤੇਸਂ ਤਂ ਲਦ੍ਧਿਂ ਭਿਨ੍ਦਿਤੁਂ ਓਧਿਸੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਪਰਵਾਦਿਸ੍ਸ. ਪੁਨ ਅਨੁਯੋਗੋ ਸਕਵਾਦਿਸ੍ਸ, ਏਕਦੇਸੇਨ ਸੋਤਾਪਨ੍ਨਾਦਿਭਾਵਸ੍ਸ ਅਭਾਵਤੋ ਪਟਿਕ੍ਖੇਪੋ ਪਰਵਾਦਿਸ੍ਸ. ਇਮਿਨਾ ਉਪਾਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋਤਿ.

ਓਧਿਸੋਕਥਾਵਣ੍ਣਨਾ.