੪. ਉਪਾਦਿਨ੍ਨਤ੍ਤਿਕਵਣ੍ਣਨਾ

੫੧. ਉਪਾਦਿਨ੍ਨੁਪਾਦਾਨਿਯਤ੍ਤਿਕਸ੍ਸ ਪਞ੍ਹਾਵਾਰੇ ਵਤ੍ਥੁ ਉਪਾਦਾਨਿਯਾਨਂ ਖਨ੍ਧਾਨਂ ਪੁਰੇਜਾਤਪਚ੍ਚਯੇਨ ਪਚ੍ਚਯੋਤਿ ਪਵਤ੍ਤਿਂ ਸਨ੍ਧਾਯ ਵੁਤ੍ਤਂ. ਪਟਿਸਨ੍ਧਿਯਂ ਪਨ ਤਂ ਪੁਰੇਜਾਤਂ ਨ ਹੋਤਿ.

੭੨. ਉਪਾਦਿਨ੍ਨੁਪਾਦਾਨਿਯੋ ਕਬਲ਼ੀਕਾਰੋ ਆਹਾਰੋ ਉਪਾਦਿਨ੍ਨੁਪਾਦਾਨਿਯਸ੍ਸ ਕਾਯਸ੍ਸ ਆਹਾਰਪਚ੍ਚਯੇਨ ਪਚ੍ਚਯੋਤਿ ਏਤ੍ਥ ਉਪਾਦਿਨ੍ਨੁਪਾਦਾਨਿਯੋ ਕਬਲ਼ੀਕਾਰਾਹਾਰੋ ਨਾਮ ਕਮ੍ਮਸਮੁਟ੍ਠਾਨਾਨਂ ਰੂਪਾਨਂ ਅਬ੍ਭਨ੍ਤਰਗਤਾ ਓਜਾ. ਉਪਾਦਿਨ੍ਨੁਪਾਦਾਨਿਯਸ੍ਸ ਕਾਯਸ੍ਸਾਤਿ ਤਸ੍ਸੇਵ ਕਮ੍ਮਸਮੁਟ੍ਠਾਨਰੂਪਕਾਯਸ੍ਸ ਆਹਾਰਪਚ੍ਚਯੇਨ ਪਚ੍ਚਯੋ. ਰੂਪਜੀਵਿਤਿਨ੍ਦ੍ਰਿਯਂ ਵਿਯ ਕਟਤ੍ਤਾਰੂਪਾਨਂ ਅਨੁਪਾਲਨਉਪਤ੍ਥਮ੍ਭਨਵਸੇਨ ਪਚ੍ਚਯੋ, ਨ ਜਨਕਵਸੇਨ. ਯਂ ਪਨ ਮਣ੍ਡੂਕਾਦਯੋ ਗਿਲਿਤ੍ਵਾ ਠਿਤਾਨਂ ਅਹਿਆਦੀਨਂ ਕਾਯਸ੍ਸ ਜੀਵਮਾਨਕਮਣ੍ਡੂਕਾਦਿਸਰੀਰੇ ਓਜਾ ਆਹਾਰਪਚ੍ਚਯੇਨ ਪਚ੍ਚਯੋਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਨ ਹਿ ਜੀਵਮਾਨਕਸਰੀਰੇ ਓਜਾ ਅਞ੍ਞਸ੍ਸ ਸਰੀਰਸ੍ਸ ਆਹਾਰਪਚ੍ਚਯਤਂ ਸਾਧੇਤਿ. ਅਨੁਪਾਦਿਨ੍ਨੁਪਾਦਾਨਿਯਸ੍ਸ ਕਾਯਸ੍ਸਾਤਿ ਏਤ੍ਥ ਪਨ ਜਨਕਵਸੇਨਾਪਿ ਲਬ੍ਭਤਿ. ਉਪਾਦਿਨ੍ਨੁਪਾਦਾਨਿਯਸ੍ਸ ਚ ਅਨੁਪਾਦਿਨ੍ਨੁਪਾਦਾਨਿਯਸ੍ਸ ਚਾਤਿ ਏਤ੍ਥ ਏਕਸ੍ਸ ਉਪਤ੍ਥਮ੍ਭਕਵਸੇਨ, ਏਕਸ੍ਸ ਜਨਕਵਸੇਨ, ਉਭਿਨ੍ਨਮ੍ਪਿ ਵਾ ਉਪਤ੍ਥਮ੍ਭਕਵਸੇਨੇਵ ਵੁਤ੍ਤੋ. ਦ੍ਵੇ ਪਨ ਆਹਾਰਾ ਏਕਤੋ ਪਚ੍ਚਯਾ ਹੋਨ੍ਤਾ ਉਪਤ੍ਥਮ੍ਭਕਾਵ ਹੋਨ੍ਤਿ, ਨ ਜਨਕਾ. ਸੇਸਮੇਤ੍ਥ ਪਾਲ਼ਿਮੇਵ ਸਾਧੁਕਂ ਓਲੋਕੇਤ੍ਵਾ ਵੇਦਿਤਬ੍ਬਂ.

ਉਪਾਦਿਨ੍ਨਤ੍ਤਿਕਵਣ੍ਣਨਾ.