੬. ਸਮ੍ਪਯੁਤ੍ਤਵਾਰਵਣ੍ਣਨਾ

੩੯੨-੪੦੦. ਸਮ੍ਪਯੁਤ੍ਤਵਾਰੇ ਕੁਸਲਂ ਧਮ੍ਮਂ ਸਮ੍ਪਯੁਤ੍ਤੋਤਿ ਕੁਸਲਂ ਧਮ੍ਮਂ ਸਮ੍ਪਯੁਤ੍ਤਪਚ੍ਚਯਂ ਕਤ੍ਵਾਤਿ ਅਤ੍ਥੋ. ਸੇਸਮੇਤ੍ਥ ਸਂਸਟ੍ਠਵਾਰੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਅਵਸਾਨੇ ਪਨਸ੍ਸ ‘‘ਸਂਸਟ੍ਠਤ੍ਤਂ ਨਾਮ ਸਮ੍ਪਯੁਤ੍ਤਤ੍ਤਂ, ਸਮ੍ਪਯੁਤ੍ਤਤ੍ਤਂ ਨਾਮ ਸਂਸਟ੍ਠਤ੍ਤ’’ਨ੍ਤਿ ਇਦਂ ਉਭਿਨ੍ਨਮ੍ਪਿ ਏਤੇਸਂ ਵਾਰਾਨਂ ਅਤ੍ਥਤੋ ਨਿਨ੍ਨਾਨਾਕਰਣਭਾਵਦਸ੍ਸਨਤ੍ਥਂ ਵੁਤ੍ਤਂ. ਅਤ੍ਥਤੋ ਹਿ ਏਤੇਪਿ ਪਟਿਚ੍ਚਸਹਜਾਤਾ ਵਿਯ ਪਚ੍ਚਯਨਿਸ੍ਸਯਾ ਵਿਯ ਚ ਨਿਨ੍ਨਾਨਾਕਰਣਾ. ਏਵਂ ਸਨ੍ਤੇਪਿ ਅਞ੍ਞਮਞ੍ਞਸ੍ਸ ਅਤ੍ਥਨਿਯਮਨਤ੍ਥਂ ਵੁਤ੍ਤਾ. ‘‘ਸਂਸਟ੍ਠਾ ਯੋਜਿਤਾ ਹਯਾ’’ਤਿਆਦੀਸੁ (ਜਾ. ੨.੨੨.੭੦) ਹਿ ਅਸਮ੍ਪਯੁਤ੍ਤਮ੍ਪਿ ਸਂਸਟ੍ਠਨ੍ਤਿ ਵੁਚ੍ਚਤਿ. ‘‘ਯਾ ਸਾ ਵੀਮਂਸਾ ਕੋਸਜ੍ਜਸਹਗਤਾ ਕੋਸਜ੍ਜਸਮ੍ਪਯੁਤ੍ਤਾ’’ਤਿਆਦੀਸੁ (ਸਂ. ਨਿ. ੫.੮੩੨) ਅਸਂਸਟ੍ਠਂ ਵੋਕਿਣ੍ਣਮ੍ਪਿ ਸਮ੍ਪਯੁਤ੍ਤਨ੍ਤਿ. ਇਤਿ ਸਂਸਟ੍ਠਵਾਰੇਨ ਏਕੁਪ੍ਪਾਦਲਕ੍ਖਣਸ੍ਸ ਸਮ੍ਪਯੁਤ੍ਤਸ੍ਸ ਸਂਸਟ੍ਠਭਾਵਂ ਸਮ੍ਪਯੁਤ੍ਤਵਾਰੇਨ ਚ ਸਂਸਟ੍ਠਸ੍ਸ ਏਕੁਪ੍ਪਾਦਾਦਿਲਕ੍ਖਣਸ੍ਸ ਸਮ੍ਪਯੁਤ੍ਤਭਾਵਂ ਨਿਯਮੇਤੁਂ ਉਭੋਪੇਤੇ ਵੁਤ੍ਤਾ. ਅਪਿਚ ਤਥਾ ਬੁਜ੍ਝਨਕਾਨਂ ਅਜ੍ਝਾਸਯਵਸੇਨ ਦੇਸਨਾਵਿਲਾਸੇਨ ਨਿਰੁਤ੍ਤਿਪਟਿਸਮ੍ਭਿਦਾਪਭੇਦਜਾਨਨਵਸੇਨ ਚਾਪਿ ਏਤੇ ਉਭੋਪਿ ਵੁਤ੍ਤਾਤਿ.

ਸਮ੍ਪਯੁਤ੍ਤਵਾਰਵਣ੍ਣਨਾ.

ਏਤੇਸੁ ਪਨ ਛਸੁ ਵਾਰੇਸੁ ਅਤ੍ਥਿ ਕੋਚਿ ਪਚ੍ਚਯੋ ਏਕਨ੍ਤਂ ਅਨੁਲੋਮਤੋ ਨ ਤਿਟ੍ਠਤਿ, ਪਚ੍ਚਨੀਕਤੋਵ ਤਿਟ੍ਠਤਿ; ਅਤ੍ਥਿ ਏਕਨ੍ਤਂ ਪਚ੍ਚਨੀਕਤੋ ਨ ਤਿਟ੍ਠਤਿ, ਅਨੁਲੋਮਤੋਵ ਤਿਟ੍ਠਤਿ; ਅਤ੍ਥਿ ਅਨੇਕਨ੍ਤਂ ਅਨੁਲੋਮਤੋ ਚੇਵ ਤਿਟ੍ਠਤਿ, ਪਚ੍ਚਨੀਕਤੋ ਚਾਤਿ ਇਦਂ ਪਕਿਣ੍ਣਕਂ ਵੇਦਿਤਬ੍ਬਂ. ਤਤ੍ਥ ਪਠਮੋ ਪਞ੍ਹੋ ਪਚ੍ਛਾਜਾਤਸ੍ਸ, ਦੁਤਿਯੋ ਮਹਾਚਤੁਕ੍ਕਸ੍ਸ, ਤਤਿਯੋ ਯੁਜ੍ਜਮਾਨਕਾਨਂ ਸੇਸਾਨਂ ਵਸੇਨ ਵੇਦਿਤਬ੍ਬੋਤਿ.