੪. ਨਿਸ੍ਸਯਵਾਰਵਣ੍ਣਨਾ

੩੨੯-੩੩੭. ਨਿਸ੍ਸਯਵਾਰੇ ਕੁਸਲਂ ਧਮ੍ਮਂ ਨਿਸ੍ਸਾਯਾਤਿ ਕੁਸਲਂ ਧਮ੍ਮਂ ਪਤਿਟ੍ਠਟ੍ਠੇਨ ਨਿਸ੍ਸਯਂ ਕਤ੍ਵਾਤਿ ਅਤ੍ਥੋ. ਸੇਸਮੇਤ੍ਥ ਪਚ੍ਚਯਵਾਰੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਅਵਸਾਨੇ ਪਨਸ੍ਸ ‘‘ਪਚ੍ਚਯਤ੍ਤਂ ਨਾਮ ਨਿਸ੍ਸਯਤ੍ਤਂ, ਨਿਸ੍ਸਯਤ੍ਤਂ ਨਾਮ ਪਚ੍ਚਯਤ੍ਤ’’ਨ੍ਤਿ ਇਦਂ ਉਭਿਨ੍ਨਮ੍ਪਿ ਏਤੇਸਂ ਵਾਰਾਨਂ ਅਤ੍ਥਤੋ ਨਿਨ੍ਨਾਨਾਕਰਣਭਾਵਦਸ੍ਸਨਤ੍ਥਂ ਵੁਤ੍ਤਂ. ਅਤ੍ਥਤੋ ਹਿ ਏਤੇਪਿ ਪਟਿਚ੍ਚਸਹਜਾਤਾ ਵਿਯ ਨਿਨ੍ਨਾਨਾਕਰਣਾ. ਏਵਂ ਸਨ੍ਤੇਪਿ ਅਞ੍ਞਮਞ੍ਞਸ੍ਸ ਅਤ੍ਥਨਿਯਮਨਤ੍ਥਂ ਵੁਤ੍ਤਾ. ਅਵਿਜ੍ਜਾਪਚ੍ਚਯਾ ਸਙ੍ਖਾਰਾਤਿਆਦੀਸੁ ਹਿ ਅਨਿਸ੍ਸਾਯ ਵਤ੍ਤਮਾਨਂ ਨਾਨਾਕ੍ਖਣਿਕਮ੍ਪਿ ‘‘ਪਚ੍ਚਯਾ ਉਪ੍ਪਜ੍ਜਤੀ’’ਤਿ ਵੁਤ੍ਤਂ. ਅਞ੍ਞਮਞ੍ਞਂ ਅਲ੍ਲੀਯਿਤ੍ਵਾ ਠਿਤਕਟ੍ਠਾਦੀਸੁ ਚ ਏਕਂ ਏਕਸ੍ਸ ਨਿਸ੍ਸਯਪਚ੍ਚਯੋ ਨ ਹੋਤਿ, ਤਥਾ ਉਪਾਦਾਰੂਪਂ ਮਹਾਭੂਤਸ੍ਸ ਨਿਸ੍ਸਯਪਚ੍ਚਯੋ ਨ ਹੋਤਿਯੇਵ. ਇਤਿ ਪਚ੍ਚਯਵਾਰੇਨ ਨਿਸ੍ਸਯਪਚ੍ਚਯਭਾਵਂ ਨਿਸ੍ਸਯਵਾਰੇਨ ਚ ਪਚ੍ਚਯਾਤਿ ਵੁਤ੍ਤਸ੍ਸ ਸਹਜਾਤਪੁਰੇਜਾਤਭਾਵਂ ਨਿਯਮੇਤੁਂ ਉਭੋਪੇਤੇ ਵੁਤ੍ਤਾ. ਅਪਿਚ ਤਥਾ ਬੁਜ੍ਝਨਕਾਨਂ ਅਜ੍ਝਾਸਯਵਸੇਨ ਦੇਸਨਾਵਿਲਾਸੇਨ ਨਿਰੁਤ੍ਤਿਪਟਿਸਮ੍ਭਿਦਾਪਭੇਦਜਾਨਨਵਸੇਨ ਚਾਪਿ ਏਤੇ ਉਭੋਪਿ ਵੁਤ੍ਤਾਤਿ.

ਨਿਸ੍ਸਯਵਾਰਵਣ੍ਣਨਾ.