੧. ਪਣ੍ਣਤ੍ਤਿਉਦ੍ਦੇਸਵਾਰਵਣ੍ਣਨਾ

੧-੧੬. ਇਦਾਨਿ ਤੇਸਞ੍ਞੇਵ ਮੂਲਯਮਕੇ ਦੇਸਿਤਾਨਂ ਕੁਸਲਾਦਿਧਮ੍ਮਾਨਂ ਮਾਤਿਕਂ ਠਪੇਤ੍ਵਾ ਚਿਤ੍ਤਯਮਕਾਨਨ੍ਤਰਂ ਦੇਸਿਤਸ੍ਸ ਧਮ੍ਮਯਮਕਸ੍ਸ ਵਣ੍ਣਨਾ ਹੋਤਿ. ਤਤ੍ਥ ਖਨ੍ਧਯਮਕੇ ਵੁਤ੍ਤਨਯੇਨੇਵ ਪਾਲ਼ਿਵਵਤ੍ਥਾਨਂ ਵੇਦਿਤਬ੍ਬਂ. ਯਥਾ ਹਿ ਤਤ੍ਥ ਪਣ੍ਣਤ੍ਤਿਵਾਰਾਦਯੋ ਤਯੋ ਮਹਾਵਾਰਾ, ਅਵਸੇਸਾ ਅਨ੍ਤਰਵਾਰਾ ਚ ਹੋਨ੍ਤਿ, ਤਥਾ ਇਧਾਪਿ. ‘‘ਯੋ ਕੁਸਲਂ ਧਮ੍ਮਂ ਭਾਵੇਤਿ, ਸੋ ਅਕੁਸਲਂ ਧਮ੍ਮਂ ਪਜਹਤੀ’’ਤਿ ਆਗਤਤ੍ਤਾ ਪਨੇਤ੍ਥ ਪਰਿਞ੍ਞਾਵਾਰੋ, ਭਾਵਨਾਵਾਰੋ ਨਾਮਾਤਿ ਵੇਦਿਤਬ੍ਬੋ. ਤਤ੍ਥ ਯਸ੍ਮਾ ਅਬ੍ਯਾਕਤੋ ਧਮ੍ਮੋ ਨੇਵ ਭਾਵੇਤਬ੍ਬੋ, ਨ ਪਹਾਤਬ੍ਬੋ, ਤਸ੍ਮਾ ਤਂ ਪਦਮੇਵ ਨ ਉਦ੍ਧਟਂ. ਪਣ੍ਣਤ੍ਤਿਵਾਰੇ ਪਨੇਤ੍ਥ ਤਿਣ੍ਣਂ ਕੁਸਲਾਦਿਧਮ੍ਮਾਨਂ ਵਸੇਨ ਪਦਸੋਧਨਵਾਰੋ, ਪਦਸੋਧਨਮੂਲਚਕ੍ਕਵਾਰੋ, ਸੁਦ੍ਧਧਮ੍ਮਵਾਰੋ, ਸੁਦ੍ਧਧਮ੍ਮਮੂਲਚਕ੍ਕਵਾਰੋਤਿ ਇਮੇਸੁ ਚਤੂਸੁ ਵਾਰੇਸੁ ਯਮਕਗਣਨਾ ਵੇਦਿਤਬ੍ਬਾ.