੨. ਪਵਤ੍ਤਿਵਾਰਵਣ੍ਣਨਾ

੧੮-੨੧. ਇਧਾਪਿ ਚ ਪਵਤ੍ਤਿਵਾਰਸ੍ਸ ਉਪ੍ਪਾਦਵਾਰਾਦੀਸੁ ਤੀਸੁ ਅਨ੍ਤਰਵਾਰੇਸੁ ਏਕੇਕਸ੍ਮਿਂ ਛਲ਼ੇਵ ਕਾਲਭੇਦਾ. ਤੇਸਂ ਏਕੇਕਸ੍ਮਿਂ ਕਾਲੇ ਪੁਗ੍ਗਲਵਾਰਾਦਯੋ ਤਯੋ ਵਾਰਾ. ਤੇ ਸਬ੍ਬੇਪਿ ਅਨੁਲੋਮਪਟਿਲੋਮਨਯਵਸੇਨ ਦੁਵਿਧਾਵ ਹੋਨ੍ਤਿ. ਤਤ੍ਥ ਪਚ੍ਚੁਪ੍ਪਨ੍ਨਕਾਲੇ ਪੁਗ੍ਗਲਵਾਰਸ੍ਸ ਅਨੁਲੋਮਨਯੇ ਯਥਾ ਖਨ੍ਧਯਮਕੇ ਰੂਪਕ੍ਖਨ੍ਧਮੂਲਕਾਨਿ ਚਤ੍ਤਾਰਿ, ਵੇਦਨਾਕ੍ਖਨ੍ਧਮੂਲਕਾਨਿ ਤੀਣਿ, ਸਞ੍ਞਾਕ੍ਖਨ੍ਧਮੂਲਕਾਨਿ ਦ੍ਵੇ, ਸਙ੍ਖਾਰਕ੍ਖਨ੍ਧਮੂਲਕਂ ਏਕਨ੍ਤਿ ਅਗ੍ਗਹਿਤਗ੍ਗਹਣੇਨ ਦਸ ਯਮਕਾਨਿ ਹੋਨ੍ਤਿ. ਏਵਂ ‘‘ਯਸ੍ਸ ਚਕ੍ਖਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਸੋਤਾਯਤਨਂ ਉਪ੍ਪਜ੍ਜਤਿ; ਯਸ੍ਸ ਵਾ ਪਨ ਸੋਤਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਚਕ੍ਖਾਯਤਨਂ ਉਪ੍ਪਜ੍ਜਤਿ; ਯਸ੍ਸ ਚਕ੍ਖਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਘਾਣਾਯਤਨਂ, ਜਿਵ੍ਹਾਯਤਨਂ, ਕਾਯਾਯਤਨਂ, ਰੂਪਾਯਤਨਂ, ਸਦ੍ਦਾਯਤਨਂ, ਗਨ੍ਧਾਯਤਨਂ, ਰਸਾਯਤਨਂ, ਫੋਟ੍ਠਬ੍ਬਾਯਤਨਂ, ਮਨਾਯਤਨਂ, ਧਮ੍ਮਾਯਤਨਂ, ਉਪ੍ਪਜ੍ਜਤਿ; ਯਸ੍ਸ ਵਾ ਪਨ ਧਮ੍ਮਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਚਕ੍ਖਾਯਤਨਂ ਉਪ੍ਪਜ੍ਜਤੀ’’ਤਿ ਏਵਂ ਚਕ੍ਖਾਯਤਨਮੂਲਕਾਨਿ ਏਕਾਦਸ. ‘‘ਯਸ੍ਸ ਸੋਤਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਘਾਨਾਯਤਨਂ ਉਪ੍ਪਜ੍ਜਤੀ’’ਤਿਆਦਿਨਾ ਨਯੇਨ ਸੋਤਾਯਤਨਮੂਲਕਾਨਿ ਦਸ; ਘਾਨਾਯਤਨਮੂਲਕਾਨਿ ਨਵ, ਜਿਵ੍ਹਾਯਤਨਮੂਲਕਾਨਿ ਅਟ੍ਠ; ਕਾਯਾਯਤਨਮੂਲਕਾਨਿ ਸਤ੍ਤ; ਰੂਪਾਯਤਨਮੂਲਕਾਨਿ ਛ; ਸਦ੍ਦਾਯਤਨਮੂਲਕਾਨਿ ਪਞ੍ਚ; ਗਨ੍ਧਾਯਤਨਮੂਲਕਾਨਿ ਚਤ੍ਤਾਰਿ; ਰਸਾਯਤਨਮੂਲਕਾਨਿ ਤੀਣਿ; ਫੋਟ੍ਠਬ੍ਬਾਯਤਨਮੂਲਕਾਨਿ ਦ੍ਵੇ; ਮਨਾਯਤਨਮੂਲਕਂ ਏਕਨ੍ਤਿ ਅਗ੍ਗਹਿਤਗ੍ਗਹਣੇਨ ਛਸਟ੍ਠਿ ਯਮਕਾਨਿ ਹੋਨ੍ਤਿ.

ਤਤ੍ਥ ਚਕ੍ਖਾਯਤਨਮੂਲਕੇਸੁ ਏਕਾਦਸਸੁ ‘‘ਯਸ੍ਸ ਚਕ੍ਖਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਸੋਤਾਯਤਨਂ, ਘਾਨਾਯਤਨਂ, ਰੂਪਾਯਤਨਂ, ਮਨਾਯਤਨਂ, ਧਮ੍ਮਾਯਤਨਂ ਉਪ੍ਪਜ੍ਜਤੀ’’ਤਿ ਇਮਾਨਿ ਪਞ੍ਚੇਵ ਵਿਸ੍ਸਜ੍ਜਿਤਾਨਿ. ਤੇਸੁ ਪਠਮਂ ਵਿਸ੍ਸਜ੍ਜੇਤਬ੍ਬਂ ਤਾਵ ਵਿਸ੍ਸਜ੍ਜਿਤਂ. ਦੁਤਿਯਂ ਕਿਞ੍ਚਾਪਿ ਪਠਮੇਨ ਸਦਿਸਵਿਸ੍ਸਜ੍ਜਨਂ, ਚਕ੍ਖੁਸੋਤਾਯਤਨਾਨਂ ਪਵਤ੍ਤਿਟ੍ਠਾਨੇ ਪਨ ਘਾਨਾਯਤਨਸ੍ਸ ਨ ਏਕਨ੍ਤੇਨ ਪਵਤ੍ਤਿਤੋ ‘‘ਕਥਂ ਨੁ ਖੋ ਏਤਂ ਵਿਸ੍ਸਜ੍ਜੇਤਬ੍ਬ’’ਨ੍ਤਿ ਵਿਮਤਿਨਿਵਾਰਣਤ੍ਥਂ ਵਿਸ੍ਸਜ੍ਜਿਤਂ. ਰੂਪਾਯਤਨਮਨਾਯਤਨਧਮ੍ਮਾਯਤਨੇਹਿ ਸਦ੍ਧਿਂ ਤੀਣਿ ਯਮਕਾਨਿ ਅਸਦਿਸਵਿਸ੍ਸਜ੍ਜਨਤ੍ਤਾ ਵਿਸ੍ਸਜ੍ਜਿਤਾਨਿ. ਸੇਸੇਸੁ ਜਿਵ੍ਹਾਯਤਨਕਾਯਾਯਤਨੇਹਿ ਤਾਵ ਸਦ੍ਧਿਂ ਦ੍ਵੇ ਯਮਕਾਨਿ ਪੁਰਿਮੇਹਿ ਦ੍ਵੀਹਿ ਸਦ੍ਧਿਂ ਸਦਿਸਵਿਸ੍ਸਜ੍ਜਨਾਨਿ. ਸਦ੍ਦਾਯਤਨਸ੍ਸ ਪਟਿਸਨ੍ਧਿਕ੍ਖਣੇ ਅਨੁਪ੍ਪਤ੍ਤਿਤੋ ਤੇਨ ਸਦ੍ਧਿਂ ਯਮਕਸ੍ਸ ਵਿਸ੍ਸਜ੍ਜਨਮੇਵ ਨਤ੍ਥਿ. ਗਨ੍ਧਰਸਫੋਟ੍ਠਬ੍ਬਾਯਤਨੇਹਿਪਿ ਸਦ੍ਧਿਂ ਤੀਣਿ ਯਮਕਾਨਿ ਪੁਰਿਮੇਹਿ ਦ੍ਵੀਹਿ ਸਦਿਸਵਿਸ੍ਸਜ੍ਜਨਾਨੇਵ ਹੋਨ੍ਤੀਤਿ ਤਨ੍ਤਿਯਾ ਲਹੁਭਾਵਤ੍ਥਂ ਸਙ੍ਖਿਤ੍ਤਾਨਿ. ਸੋਤਾਯਤਨਮੂਲਕੇਸੁ ਯਂ ਲਬ੍ਭਤਿ, ਤਂ ਪੁਰਿਮੇਹਿ ਸਦਿਸਵਿਸ੍ਸਜ੍ਜਨਮੇਵਾਤਿ ਏਕਮ੍ਪਿ ਪਾਲ਼ਿਂ ਨਾਰੁਲ਼੍ਹਂ. ਘਾਨਾਯਤਨਮੂਲਕੇਸੁ ਰੂਪਾਯਤਨੇਨ ਸਦ੍ਧਿਂ ਏਕਂ, ਮਨਾਯਤਨਧਮ੍ਮਾਯਤਨੇਹਿ ਸਦ੍ਧਿਂ ਦ੍ਵੇਤਿ ਤੀਣਿ ਯਮਕਾਨਿ ਪਾਲ਼ਿਂ ਆਰੁਲ਼੍ਹਾਨਿ. ਸੇਸਾਨਿ ਘਾਨਾਯਤਨਯਮਕੇਨ ਸਦਿਸਵਿਸ੍ਸਜ੍ਜਨਤ੍ਤਾ ਨਾਰੁਲ਼੍ਹਾਨਿ. ਤਥਾ ਜਿਵ੍ਹਾਯਤਨਕਾਯਾਯਤਨਮੂਲਕਾਨਿ. ਰੂਪਾਯਤਨਮੂਲਕੇਸੁ ਮਨਾਯਤਨਧਮ੍ਮਾਯਤਨੇਹਿ ਸਦ੍ਧਿਂ ਦ੍ਵੇਯੇਵ ਵਿਸ੍ਸਜ੍ਜਿਤਾਨਿ. ਗਨ੍ਧਰਸਫੋਟ੍ਠਬ੍ਬੇਹਿ ਪਨ ਸਦ੍ਧਿਂ ਤੀਣਿ ਰੂਪਾਯਤਨਮਨਾਯਤਨੇਹਿ ਸਦ੍ਧਿਂ ਸਦਿਸਵਿਸ੍ਸਜ੍ਜਨਾਨਿ. ਯਥੇਵ ਹੇਤ੍ਥ ‘‘ਸਰੂਪਕਾਨਂ ਅਚਿਤ੍ਤਕਾਨ’’ਨ੍ਤਿਆਦਿ ਵੁਤ੍ਤਂ, ਤਥਾ ਇਧਾਪਿ ‘‘ਸਰੂਪਕਾਨਂ ਅਗਨ੍ਧਕਾਨਂ, ਅਰਸਕਾਨਂ ਅਫੋਟ੍ਠਬ੍ਬਕਾਨ’’ਨ੍ਤਿ ਯੋਜਨਾ ਵੇਦਿਤਬ੍ਬਾ. ਗਨ੍ਧਾਦੀਨਿ ਚੇਤ੍ਥ ਆਯਤਨਭੂਤਾਨੇਵ ਅਧਿਪ੍ਪੇਤਾਨਿ. ਤਸ੍ਮਾ ‘‘ਸਰੂਪਕਾਨਂ ਸਗਨ੍ਧਾਯਤਨਾਨ’’ਨ੍ਤਿ ਆਯਤਨਵਸੇਨੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਸਦ੍ਦਾਯਤਨਮੂਲਕਾਨਿ ਅਤ੍ਥਾਭਾਵਤੋ ਪਾਲ਼ਿਂ ਨਾਰੁਲ਼੍ਹਾਨੇਵ. ਗਨ੍ਧਰਸਫੋਟ੍ਠਬ੍ਬਮੂਲਕਾਨਿ ਚਤ੍ਤਾਰਿ ਤੀਣਿ ਦ੍ਵੇ ਚ ਹੇਟ੍ਠਿਮੇਹਿ ਸਦਿਸਵਿਸ੍ਸਜ੍ਜਨਤ੍ਤਾ ਪਾਲ਼ਿਂ ਨਾਰੁਲ਼੍ਹਾਨਿ. ਮਨਾਯਤਨਮੂਲਕਂ ਵਿਸ੍ਸਜ੍ਜਿਤਮੇਵਾਤਿ ਏਵਮੇਤਾਨਿ ਪਚ੍ਚੁਪ੍ਪਨ੍ਨਕਾਲੇ ਪੁਗ੍ਗਲਵਾਰਸ੍ਸ ਅਨੁਲੋਮਨਯੇ ਕਤਿਪਯਯਮਕਵਿਸ੍ਸਜ੍ਜਨੇਨੇਵ ਛਸਟ੍ਠਿਯਮਕਾਨਿ ਵਿਸ੍ਸਜ੍ਜਿਤਾਨਿ ਨਾਮ ਹੋਨ੍ਤੀਤਿ ਵੇਦਿਤਬ੍ਬਾਨਿ. ਯਥਾ ਚ ਪੁਗ੍ਗਲਵਾਰੇ, ਏਵਂ ਓਕਾਸਵਾਰੇਪਿ ਪੁਗ੍ਗਲੋਕਾਸਵਾਰੇਪਿ ਛਸਟ੍ਠੀਤਿ ਪਚ੍ਚੁਪ੍ਪਨ੍ਨਕਾਲੇ ਤੀਸੁ ਵਾਰੇਸੁ ਅਨੁਲੋਮਨਯੇ ਅਟ੍ਠਨਵੁਤਿਸਤਂ ਯਮਕਾਨਿ ਹੋਨ੍ਤਿ. ਯਥਾ ਚ ਅਨੁਲੋਮਨਯੇ, ਏਵਂ ਪਟਿਲੋਮਨਯੇਪੀਤਿ ਸਬ੍ਬਾਨਿਪਿ ਪਚ੍ਚੁਪ੍ਪਨ੍ਨਕਾਲੇ ਛਨ੍ਨਵੁਤਾਧਿਕਾਨਿ ਤੀਣਿ ਯਮਕਸਤਾਨਿ ਹੋਨ੍ਤਿ. ਤੇਸੁ ਦ੍ਵਾਨਵੁਤਾਧਿਕਾਨਿ ਸਤ੍ਤ ਪੁਚ੍ਛਾਸਤਾਨਿ, ਚਤੁਰਾਸੀਤਾਧਿਕਾਨਿ ਚ ਪਨ੍ਨਰਸ ਅਤ੍ਥਸਤਾਨਿ ਹੋਨ੍ਤੀਤਿ ਵੇਦਿਤਬ੍ਬਾਨਿ. ਏਵਂ ਸੇਸੇਸੁਪਿ ਪਞ੍ਚਸੁ ਕਾਲਭੇਦੇਸੂਤਿ ਸਬ੍ਬਾਨਿਪਿ ਛਸਤ੍ਤਤਾਧਿਕਾਨਿ ਤੇਵੀਸਤਿ ਯਮਕਸਤਾਨਿ. ਤਤੋ ਦਿਗੁਣਾ ਪੁਚ੍ਛਾ, ਤਤੋ ਦਿਗੁਣਾ ਅਤ੍ਥਾਤਿ ਇਦਮੇਤ੍ਥ ਉਪ੍ਪਾਦਵਾਰੇ ਪਾਲ਼ਿਵਵਤ੍ਥਾਨਂ. ਨਿਰੋਧਵਾਰਉਪ੍ਪਾਦਨਿਰੋਧਵਾਰੇਸੁਪਿ ਏਸੇਵ ਨਯੋਤਿ. ਸਬ੍ਬਸ੍ਮਿਮ੍ਪਿ ਪਵਤ੍ਤਿਵਾਰੇ ਅਟ੍ਠਵੀਸਾਨਿ ਏਕਸਤ੍ਤਤਿ ਯਮਕਸਤਾਨਿ. ਤਤੋ ਦਿਗੁਣਾ ਪੁਚ੍ਛਾ, ਤਤੋ ਦਿਗੁਣਾ ਅਤ੍ਥਾ ਵੇਦਿਤਬ੍ਬਾ. ਪਾਲ਼ਿ ਪਨ ਮਨਾਯਤਨਂ ਧਮ੍ਮਾਯਤਨਞ੍ਚ ਏਕਸਦਿਸਂ, ਨਾਨਂ ਨਤ੍ਥਿ. ਉਪਰਿ ਪਨ ‘‘ਵਾਰਸਙ੍ਖੇਪੋ ਹੋਤੀ’’ਤਿਆਦੀਨਿ ਵਤ੍ਵਾ ਤਤ੍ਥ ਤਤ੍ਥ ਸਙ੍ਖਿਤ੍ਤਾ. ਤਸ੍ਮਾ ਯਂ ਤਤ੍ਥ ਤਤ੍ਥ ਸਙ੍ਖਿਤ੍ਤਂ, ਤਂ ਸਬ੍ਬਂ ਅਸਮ੍ਮੁਯ੍ਹਨ੍ਤੇਹਿ ਸਲ੍ਲਕ੍ਖੇਤਬ੍ਬਂ.

ਅਤ੍ਥਵਿਨਿਚ੍ਛਯੇ ਪਨੇਤ੍ਥ ਇਦਂ ਨਯਮੁਖਂ. ਸਚਕ੍ਖੁਕਾਨਂ ਅਸੋਤਕਾਨਨ੍ਤਿ ਅਪਾਯੇ ਜਾਤਿਬਧਿਰਓਪਪਾਤਿਕਂ ਸਨ੍ਧਾਯ ਵੁਤ੍ਤਂ. ਸੋ ਹਿ ਸਚਕ੍ਖੁਕੋ ਅਸੋਤਕੋ ਹੁਤ੍ਵਾ ਉਪਪਜ੍ਜਤਿ. ਯਥਾਹ – ‘‘ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸਚਿ ਅਪਰਾਨਿ ਦਸਾਯਤਨਾਨਿ ਪਾਤੁਭਵਨ੍ਤਿ. ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ, ਓਪਪਾਤਿਕਾਨਂ ਨੇਰਯਿਕਾਨਂ; ਜਚ੍ਚਬਧਿਰਾਨਂ ਉਪਪਤ੍ਤਿਕ੍ਖਣੇ ਦਸਾਯਤਨਾਨਿ ਪਾਤੁਭਵਨ੍ਤਿ, ਚਕ੍ਖਾਯਤਨਂ ਰੂਪਘਾਨਗਨ੍ਧਜਿਵ੍ਹਾਰਸਕਾਯਫੋਟ੍ਠਬ੍ਬਾਯਤਨਂ ਮਨਾਯਤਨਂ ਧਮ੍ਮਾਯਤਨ’’ਨ੍ਤਿ. ਸਚਕ੍ਖੁਕਾਨਂ ਸਸੋਤਕਾਨਨ੍ਤਿ ਸੁਗਤਿਦੁਗ੍ਗਤੀਸੁ ਪਰਿਪੁਣ੍ਣਾਯਤਨੇ ਚ ਓਪਪਾਤਿਕੇ ਰੂਪੀਬ੍ਰਹ੍ਮਾਨੋ ਚ ਸਨ੍ਧਾਯ ਵੁਤ੍ਤਂ. ਤੇ ਹਿ ਸਚਕ੍ਖੁਕਾ ਸਸੋਤਕਾ ਹੁਤ੍ਵਾ ਉਪਪਜ੍ਜਨ੍ਤਿ. ਯਥਾਹ – ‘‘ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸਚਿ ਏਕਾਦਸਾਯਤਨਾਨਿ ਪਾਤੁਭਵਨ੍ਤਿ; ਕਾਮਾਵਚਰਾਨਂ ਦੇਵਾਨਂ, ਪਠਮਕਪ੍ਪਿਕਾਨਂ ਮਨੁਸ੍ਸਾਨਂ, ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ, ਓਪਪਾਤਿਕਾਨਂ ਨੇਰਯਿਕਾਨਂ, ਪਰਿਪੁਣ੍ਣਾਯਤਨਾਨਂ. ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਪਞ੍ਚਾਯਤਨਾਨਿ ਪਾਤੁਭਵਨ੍ਤਿ, ਚਕ੍ਖਾਯਤਨਂ ਰੂਪਸੋਤਮਨਾਯਤਨਂ ਧਮ੍ਮਾਯਤਨ’’ਨ੍ਤਿ.

ਅਘਾਨਕਾਨਨ੍ਤਿ ਬ੍ਰਹ੍ਮਪਾਰਿਸਜ੍ਜਾਦਯੋ ਸਨ੍ਧਾਯ ਵੁਤ੍ਤਂ. ਤੇ ਹਿ ਸਚਕ੍ਖੁਕਾ ਅਘਾਨਕਾ ਹੁਤ੍ਵਾ ਉਪਪਜ੍ਜਨ੍ਤਿ. ਕਾਮਧਾਤੁਯਂ ਪਨ ਅਘਾਨਕੋ ਓਪਪਾਤਿਕੋ ਨਤ੍ਥਿ. ਯਦਿ ਭਵੇਯ੍ਯ ‘‘ਕਸ੍ਸਚਿ ਅਟ੍ਠਾਯਤਨਾਨਿ ਪਾਤੁਭਵਨ੍ਤੀ’’ਤਿ ਵੇਦਯ੍ਯ. ਯੋ ਗਬ੍ਭਸੇਯ੍ਯਕੋ ਪਨ ਅਘਾਨਕੋ ਸਿਯਾ, ਸੋ ‘‘ਸਚਕ੍ਖੁਕਾਨ’’ਨ੍ਤਿ ਵਚਨਤੋ ਇਧ ਅਨਧਿਪ੍ਪੇਤੋ. ਸਚਕ੍ਖੁਕਾਨਂ ਸਘਾਨਕਾਨਨ੍ਤਿ ਜਚ੍ਚਬਧਿਰਮ੍ਪਿ ਪਰਿਪੁਣ੍ਣਾਯਤਨਮ੍ਪਿ ਓਪਪਾਤਿਕਂ ਸਨ੍ਧਾਯ ਵੁਤ੍ਤਂ. ਸਘਾਨਕਾਨਂ ਅਚਕ੍ਖੁਕਾਨਨ੍ਤਿ ਜਚ੍ਚਨ੍ਧਮ੍ਪਿ ਜਚ੍ਚਬਧਿਰਮ੍ਪਿ ਓਪਪਾਤਿਕਂ ਸਨ੍ਧਾਯ ਵੁਤ੍ਤਮੇਵ. ਸਘਾਨਕਾਨਂ ਸਚਕ੍ਖੁਕਾਨਨ੍ਤਿ ਪਰਿਪੁਣ੍ਣਾਯਤਨਮੇਵ ਓਪਪਾਤਿਕਂ ਸਨ੍ਧਾਯ ਵੁਤ੍ਤਂ.

ਸਰੂਪਕਾਨਂ ਅਚਕ੍ਖੁਕਾਨਨ੍ਤਿ ਏਤ੍ਥ ਜਚ੍ਚਨ੍ਧਜਚ੍ਚਬਧਿਰਓਪਪਾਤਿਕੇਸੁ ਅਞ੍ਞਤਰੋਪਿ ਗਬ੍ਭਸੇਯ੍ਯਕੋਪਿ ਲਬ੍ਭਤਿਯੇਵ. ਸਚਿਤ੍ਤਕਾਨਂ ਅਚਕ੍ਖੁਕਾਨਨ੍ਤਿ ਏਤ੍ਥ ਹੇਟ੍ਠਾ ਵੁਤ੍ਤੇਹਿ ਜਚ੍ਚਨ੍ਧਾਦੀਹਿ ਤੀਹਿ ਸਦ੍ਧਿਂ ਅਰੂਪਿਨੋਪਿ ਲਬ੍ਭਨ੍ਤਿ. ਅਚਕ੍ਖੁਕਾਨਨ੍ਤਿ ਏਤ੍ਥ ਪੁਰਿਮਪਦੇ ਵੁਤ੍ਤੇਹਿ ਚਤੂਹਿ ਸਦ੍ਧਿਂ ਅਸਞ੍ਞਸਤ੍ਤਾਪਿ ਲਬ੍ਭਨ੍ਤਿ. ਸਰੂਪਕਾਨਂ ਅਘਾਨਕਾਨਨ੍ਤਿ ਏਤ੍ਥ ਗਬ੍ਭਸੇਯ੍ਯਕਾ ਚ ਅਸਞ੍ਞਸਤ੍ਤਾ ਚ ਸੇਸਰੂਪੀਬ੍ਰਹ੍ਮਾਨੋ ਚ ਲਬ੍ਭਨ੍ਤਿ. ਸਚਿਤ੍ਤਕਾਨਂ ਅਘਾਨਕਾਨਨ੍ਤਿ ਏਤ੍ਥ ਗਬ੍ਭਸੇਯ੍ਯਕਾ ਚ ਰੂਪਾਰੂਪਬ੍ਰਹ੍ਮਾਨੋ ਚ ਲਬ੍ਭਨ੍ਤਿ. ਅਚਿਤ੍ਤਕਾਨਂ ਅਰੂਪਕਾਨਨ੍ਤਿਪਦੇਸੁ ਪਨ ਏਕਵੋਕਾਰਚਤੁਵੋਕਾਰਸਤ੍ਤਾਵ ਲਬ੍ਭਨ੍ਤੀਤਿ ਇਮਿਨਾ ਨਯੇਨ ਸਬ੍ਬੇਸੁ ਪੁਗ੍ਗਲਵਾਰੇਸੁ ਪੁਗ੍ਗਲਵਿਭਾਗੋ ਵੇਦਿਤਬ੍ਬੋ.

੨੨-੨੫੪. ਓਕਾਸਵਾਰੇ ਯਤ੍ਥ ਚਕ੍ਖਾਯਤਨਨ੍ਤਿ ਰੂਪੀਬ੍ਰਹ੍ਮਲੋਕਂ ਪੁਚ੍ਛਤਿ. ਤੇਨੇਵ ਆਮਨ੍ਤਾਤਿ ਵੁਤ੍ਤਂ. ਤਸ੍ਮਿਞ੍ਹਿ ਤਲੇ ਨਿਯਮਤੋ ਤਾਨਿ ਆਯਤਨਾਨਿ ਪਟਿਸਨ੍ਧਿਯਂ ਉਪ੍ਪਜ੍ਜਨ੍ਤਿ. ਇਦਮੇਤ੍ਥ ਨਯਮੁਖਂ. ਇਮਿਨਾ ਨਯਮੁਖੇਨ ਸਕਲੇਪਿ ਪਵਤ੍ਤਿਵਾਰੇ ਅਤ੍ਥੋ ਵੇਦਿਤਬ੍ਬੋ. ਪਰਿਞ੍ਞਾਵਾਰੋ ਖਨ੍ਧਯਮਕੇ ਵੁਤ੍ਤਨਯੋਯੇਵਾਤਿ.

ਪਵਤ੍ਤਿਵਾਰਵਣ੍ਣਨਾ.

ਆਯਤਨਯਮਕਵਣ੍ਣਨਾ ਨਿਟ੍ਠਿਤਾ.