੧. ਪਣ੍ਣਤ੍ਤਿਉਦ੍ਦੇਸਵਾਰਵਣ੍ਣਨਾ

੧. ਇਦਾਨਿ ਮੂਲਯਮਕੇ ਦੇਸਿਤੇਯੇਵ ਕੁਸਲਾਦਿਧਮ੍ਮੇ ਖਨ੍ਧਵਸੇਨ ਸਙ੍ਗਣ੍ਹਿਤ੍ਵਾ ਮੂਲਯਮਕਾਨਨ੍ਤਰਂ ਦੇਸਿਤਸ੍ਸ ਖਨ੍ਧਯਮਕਸ੍ਸ ਵਣ੍ਣਨਾ ਹੋਤਿ. ਤਤ੍ਥ ਪਾਲ਼ਿਵਵਤ੍ਥਾਨਂ ਤਾਵ ਏਵਂ ਵੇਦਿਤਬ੍ਬਂ – ਇਮਸ੍ਮਿਞ੍ਹਿ ਖਨ੍ਧਯਮਕੇ ਤਯੋ ਮਹਾਵਾਰਾ ਹੋਨ੍ਤਿ – ਪਣ੍ਣਤ੍ਤਿਵਾਰੋ, ਪਵਤ੍ਤਿਵਾਰੋ, ਪਰਿਞ੍ਞਾਵਾਰੋਤਿ. ਤੇਸੁ ਪਣ੍ਣਤ੍ਤਿਵਾਰੋ ਖਨ੍ਧਾਨਂ ਨਾਮਾਭਿਧਾਨਸੋਧਨਵਸੇਨੇਵ ਗਤਤ੍ਤਾ ਪਣ੍ਣਤ੍ਤਿਵਾਰੋਤਿ ਵੁਚ੍ਚਤਿ. ਪਵਤ੍ਤਿਵਾਰੋ ਤੇਨ ਸੋਧਿਤਨਾਮਾਭਿਧਾਨਾਨਂ ਖਨ੍ਧਾਨਂ ਉਪ੍ਪਾਦਨਿਰੋਧਵਸੇਨ ਪਵਤ੍ਤਿਂ ਸੋਧਯਮਾਨੋ ਗਤੋ, ਤਸ੍ਮਾ ਪਵਤ੍ਤਿਵਾਰੋਤਿ ਵੁਚ੍ਚਤਿ. ਪਰਿਞ੍ਞਾਵਾਰੋ ਇਮਿਨਾਨੁਕ੍ਕਮੇਨ ਪਵਤ੍ਤਾਨਂ ਖਨ੍ਧਾਨਂ ਸਙ੍ਖੇਪੇਨੇਵ ਤਿਸ੍ਸੋ ਪਰਿਞ੍ਞਾ ਦੀਪਯਮਾਨੋ ਗਤੋ, ਤਸ੍ਮਾ ਪਰਿਞ੍ਞਾਵਾਰੋਤਿ ਵੁਚ੍ਚਤਿ. ਤਤ੍ਥ ਪਣ੍ਣਤ੍ਤਿਵਾਰੋ ਉਦ੍ਦੇਸਨਿਦ੍ਦੇਸਵਸੇਨ ਦ੍ਵੀਹਾਕਾਰੇਹਿ ਵਵਤ੍ਥਿਤੋ. ਇਤਰੇਸੁ ਵਿਸੁਂ ਉਦ੍ਦੇਸਵਾਰੋ ਨਤ੍ਥਿ. ਆਦਿਤੋ ਪਟ੍ਠਾਯ ਪੁਚ੍ਛਾਵਿਸ੍ਸਜ੍ਜਨਵਸੇਨ ਏਕਧਾ ਵਵਤ੍ਥਿਤਾ. ਤਤ੍ਥ ਪਞ੍ਚਕ੍ਖਨ੍ਧਾਤਿਪਦਂ ਆਦਿਂ ਕਤ੍ਵਾ ਯਾਵ ਨ ਖਨ੍ਧਾ, ਨ ਸਙ੍ਖਾਰਾਤਿ ਪਦਂ ਤਾਵ ਪਣ੍ਣਤ੍ਤਿਵਾਰਸ੍ਸ ਉਦ੍ਦੇਸਵਾਰੋ ਵੇਦਿਤਬ੍ਬੋ. ਪੁਚ੍ਛਾਵਾਰੋਤਿਪਿ ਤਸ੍ਸੇਵ ਨਾਮਂ. ਤਤ੍ਥ ਪਞ੍ਚਕ੍ਖਨ੍ਧਾਤਿ ਅਯਂ ਯਮਕਵਸੇਨ ਪੁਚ੍ਛਿਤਬ੍ਬਾਨਂ ਖਨ੍ਧਾਨਂ ਉਦ੍ਦੇਸੋ. ਰੂਪਕ੍ਖਨ੍ਧੋ…ਪੇ… ਵਿਞ੍ਞਾਣਕ੍ਖਨ੍ਧੋਤਿ ਤੇਸਞ੍ਞੇਵ ਪਭੇਦਤੋ ਨਾਮਵਵਤ੍ਥਾਨਂ.

੨-੩. ਇਦਾਨਿ ਇਮੇਸਂ ਖਨ੍ਧਾਨਂ ਵਸੇਨ ਪਦਸੋਧਨਵਾਰੋ, ਪਦਸੋਧਨਮੂਲਚਕ੍ਕਵਾਰੋ, ਸੁਦ੍ਧਖਨ੍ਧਵਾਰੋ, ਸੁਦ੍ਧਖਨ੍ਧਮੂਲਚਕ੍ਕਵਾਰੋਤਿ ਚਤ੍ਤਾਰੋ ਨਯਵਾਰਾ ਹੋਨ੍ਤਿ. ਤਤ੍ਥ ਰੂਪਂ ਰੂਪਕ੍ਖਨ੍ਧੋ, ਰੂਪਕ੍ਖਨ੍ਧੋ ਰੂਪਨ੍ਤਿਆਦਿਨਾ ਨਯੇਨ ਪਦਮੇਵ ਸੋਧੇਤ੍ਵਾ ਗਤੋ ਪਦਸੋਧਨਵਾਰੋ ਨਾਮ. ਸੋ ਅਨੁਲੋਮਪਟਿਲੋਮਵਸੇਨ ਦੁਵਿਧੋ ਹੋਤਿ. ਤਤ੍ਥ ਅਨੁਲੋਮਵਾਰੇ ‘ਰੂਪਂ ਰੂਪਕ੍ਖਨ੍ਧੋ, ਰੂਪਕ੍ਖਨ੍ਧੋ ਰੂਪ’ਨ੍ਤਿਆਦੀਨਿ ਪਞ੍ਚ ਯਮਕਾਨਿ. ਪਟਿਲੋਮਵਾਰੇਪਿ ‘ਨ ਰੂਪਂ, ਨ ਰੂਪਕ੍ਖਨ੍ਧੋ; ਨ ਰੂਪਕ੍ਖਨ੍ਧੋ ਨ ਰੂਪ’ਨ੍ਤਿਆਦੀਨਿ ਪਞ੍ਚੇਵ. ਤਤੋ ਪਰਂ ਤੇਸਞ੍ਞੇਵ ਪਦਸੋਧਨਵਾਰੇ ਸੋਧਿਤਾਨਂ ਖਨ੍ਧਾਨਂ ‘ਰੂਪਂ ਰੂਪਕ੍ਖਨ੍ਧੋ, ਖਨ੍ਧਾ ਵੇਦਨਾਕ੍ਖਨ੍ਧੋ’ਤਿਆਦਿਨਾ ਨਯੇਨ ਏਕੇਕਖਨ੍ਧਮੂਲਕਾਨਿ ਚਤ੍ਤਾਰਿ ਚਤ੍ਤਾਰਿ ਚਕ੍ਕਾਨਿ ਬਨ੍ਧਿਤ੍ਵਾ ਗਤੋ ਪਦਸੋਧਨਮੂਲਕਾਨਂ ਚਕ੍ਕਾਨਂ ਅਤ੍ਥਿਤਾਯ ਪਦਸੋਧਨਮੂਲਚਕ੍ਕਵਾਰੋ ਨਾਮ. ਸੋਪਿ ਅਨੁਲੋਮਪਟਿਲੋਮਵਸੇਨ ਦੁਵਿਧੋ ਹੋਤਿ. ਤਤ੍ਥ ਅਨੁਲੋਮਵਾਰੇ ‘ਰੂਪਂ ਰੂਪਕ੍ਖਨ੍ਧੋ, ਖਨ੍ਧਾ ਵੇਦਨਾਕ੍ਖਨ੍ਧੋ’ਤਿਆਦੀਨਿ ਏਕੇਕਖਨ੍ਧਮੂਲਕਾਨਿ ਚਤ੍ਤਾਰਿ ਚਤ੍ਤਾਰਿ ਕਤ੍ਵਾ ਵੀਸਤਿ ਯਮਕਾਨਿ. ਪਟਿਲੋਮਵਾਰੇਪਿ ‘ਨ ਰੂਪਂ, ਨ ਰੂਪਕ੍ਖਨ੍ਧੋ; ਨ ਖਨ੍ਧਾ ਨ ਵੇਦਨਾਕ੍ਖਨ੍ਧੋ’ਤਿਆਦੀਨਿ ਵੀਸਤਿਮੇਵ.

ਤਤੋ ਪਰਂ ਰੂਪਂ ਖਨ੍ਧੋ ਖਨ੍ਧਾ ਰੂਪਨ੍ਤਿਆਦਿਨਾ ਨਯੇਨ ਸੁਦ੍ਧਖਨ੍ਧਵਸੇਨੇਵ ਗਤੋ ਸੁਦ੍ਧਖਨ੍ਧਵਾਰੋ ਨਾਮ. ਤਤ੍ਥ ਖਨ੍ਧਾ ਰੂਪਨ੍ਤਿਆਦੀਸੁ ਖਨ੍ਧਾ ਰੂਪਕ੍ਖਨ੍ਧੋ, ਖਨ੍ਧਾ ਵੇਦਨਾਕ੍ਖਨ੍ਧੋਤਿ ਅਤ੍ਥੋ ਗਹੇਤਬ੍ਬੋ. ਕਸ੍ਮਾ? ਨਿਦ੍ਦੇਸਵਾਰੇ ਏਵਂ ਭਾਜਿਤਤ੍ਤਾ. ਤਤ੍ਥ ਹਿ ‘ਰੂਪਂ ਖਨ੍ਧੋਤਿ ਆਮਨ੍ਤਾ. ਖਨ੍ਧਾ ਰੂਪਕ੍ਖਨ੍ਧੋਤਿ ਰੂਪਕ੍ਖਨ੍ਧੋ ਖਨ੍ਧੋ ਚੇਵ ਰੂਪਕ੍ਖਨ੍ਧੋ ਚ, ਅਵਸੇਸਾ ਖਨ੍ਧਾ ਨ ਰੂਪਕ੍ਖਨ੍ਧੋ’ਤਿ ਏਵਂ ‘ਖਨ੍ਧਾ ਰੂਪ’ਨ੍ਤਿਆਦੀਨਂ ਖਨ੍ਧਾ ਰੂਪਕ੍ਖਨ੍ਧੋਤਿਆਦਿਨਾ ਨਯੇਨ ਪਦਂ ਉਦ੍ਧਰਿਤ੍ਵਾ ਅਤ੍ਥੋ ਵਿਭਤ੍ਤੋ. ਤੇਨੇਵ ਚ ਕਾਰਣੇਨੇਸੇ ਸੁਦ੍ਧਖਨ੍ਧਵਾਰੋਤਿ ਵੁਤ੍ਤੋ. ਵਚਨਸੋਧਨੇ ਵਿਯ ਹਿ ਏਤ੍ਥ ਨ ਵਚਨਂ ਪਮਾਣਂ. ਯਥਾ ਯਥਾ ਪਨ ਸੁਦ੍ਧਖਨ੍ਧਾ ਲਬ੍ਭਨ੍ਤਿ, ਤਥਾ ਤਥਾ ਅਤ੍ਥੋਵ ਪਮਾਣਂ. ਪਰਤੋ ਆਯਤਨਯਮਕਾਦੀਸੁਪਿ ਏਸੇਵ ਨਯੋ. ਏਸੋਪਿ ਚ ਸੁਦ੍ਧਖਨ੍ਧਵਾਰੋ ਅਨੁਲੋਮਪਟਿਲੋਮਵਸੇਨ ਦੁਵਿਧੋ ਹੋਤਿ. ਤਤ੍ਥ ਅਨੁਲੋਮਵਾਰੇ ‘ਰੂਪਂ ਖਨ੍ਧੋ ਖਨ੍ਧਾ ਰੂਪ’ਨ੍ਤਿਆਦੀਨਿ ਪਞ੍ਚ ਯਮਕਾਨਿ. ਪਟਿਲੋਮਵਾਰੇਪਿ ‘ਨ ਰੂਪਂ ਨ ਖਨ੍ਧੋ, ਨ ਖਨ੍ਧਾ ਨ ਰੂਪ’ਨ੍ਤਿਆਦੀਨਿ ਪਞ੍ਚੇਵ.

ਤਤੋ ਪਰਂ ਤੇਸਞ੍ਞੇਵ ਸੁਦ੍ਧਖਨ੍ਧਾਨਂ ਰੂਪਂ ਖਨ੍ਧੋ, ਖਨ੍ਧਾ ਵੇਦਨਾਤਿਆਦਿਨਾ ਨਯੇਨ ਏਕੇਕਖਨ੍ਧਮੂਲਕਾਨਿ ਚਤ੍ਤਾਰਿ ਚਤ੍ਤਾਰਿ ਚਕ੍ਕਾਨਿ ਬਨ੍ਧਿਤ੍ਵਾ ਗਤੋ ਸੁਦ੍ਧਖਨ੍ਧਮੂਲਕਾਨਂ ਚਕ੍ਕਾਨਂ ਅਤ੍ਥਿਤਾਯ ਸੁਦ੍ਧਖਨ੍ਧਮੂਲਚਕ੍ਕਵਾਰੋ ਨਾਮ. ਤਤ੍ਥ ਖਨ੍ਧਾ ਵੇਦਨਾਤਿਆਦੀਸੁ ਖਨ੍ਧਾ ਵੇਦਨਾਕ੍ਖਨ੍ਧੋਤਿਆਦਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਇਤਰਥਾ ਨਿਦ੍ਦੇਸਵਾਰੇਨ ਸਦ੍ਧਿਂ ਵਿਰੋਧੋ ਹੋਤਿ. ਸੋਪਿ ਅਨੁਲੋਮਪਟਿਲੋਮਵਸੇਨ ਦੁਵਿਧੋ ਹੋਤਿ. ਤਤ੍ਥ ਅਨੁਲੋਮਵਾਰੇ ‘ਰੂਪਂ ਖਨ੍ਧੋ, ਖਨ੍ਧਾ ਵੇਦਨਾ’ਤਿਆਦੀਨਿ ਏਕੇਕਖਨ੍ਧਮੂਲਕਾਨਿ ਚਤ੍ਤਾਰਿ ਚਤ੍ਤਾਰਿ ਕਤ੍ਵਾ ਵੀਸਤਿ ਯਮਕਾਨਿ. ਪਟਿਲੋਮਵਾਰੇਪਿ ‘ਨ ਰੂਪਂ, ਨ ਖਨ੍ਧੋ, ਨ ਖਨ੍ਧਾ ਨ ਵੇਦਨਾ’ਤਿਆਦੀਨਿ ਵੀਸਤਿਮੇਵ. ਏਵਂ ਤਾਵ ਏਕੇਨ ਯਮਕਸਤੇਨ ਦ੍ਵੀਹਿ ਪੁਚ੍ਛਾਸਤੇਹਿ ਏਕੇਕਪੁਚ੍ਛਾਯ ਸਨ੍ਨਿਟ੍ਠਾਨਸਂਸਯਵਸੇਨ ਦ੍ਵੇ ਦ੍ਵੇ ਅਤ੍ਥੇ ਕਤ੍ਵਾ ਚਤੂਹਿ ਚ ਅਤ੍ਥਸਤੇਹਿ ਪਟਿਮਣ੍ਡਿਤੋ ਪਣ੍ਣਤ੍ਤਿਵਾਰਸ੍ਸ ਉਦ੍ਦੇਸਵਾਰੋ ਵੇਦਿਤਬ੍ਬੋਤਿ.

ਪਣ੍ਣਤ੍ਤਿਉਦ੍ਦੇਸਵਾਰਵਣ੍ਣਨਾ.