੪. ਇਦ੍ਧਿਕਥਾਵਣ੍ਣਨਾ

੮੮੩-੮੮੪. ਇਦਾਨਿ ਇਦ੍ਧਿਕਥਾ ਨਾਮ ਹੋਤਿ. ਤਤ੍ਥ ਇਦ੍ਧਿ ਨਾਮੇਸਾ ਕਤ੍ਥਚਿ ਇਜ੍ਝਤਿ, ਕਤ੍ਥਚਿ ਨ ਇਜ੍ਝਤਿ, ਅਨਿਚ੍ਚਾਦੀਨਂ ਨਿਚ੍ਚਾਦਿਕਰਣੇ ਏਕਨ੍ਤੇਨੇਵ ਨ ਇਜ੍ਝਤਿ. ਸਭਾਗਸਨ੍ਤਤਿਂ ਪਨ ਪਰਿਵਤ੍ਤੇਤ੍ਵਾ ਵਿਸਭਾਗਸਨ੍ਤਤਿਕਰਣੇ ਵਾ ਸਭਾਗਸਨ੍ਤਤਿਵਸੇਨੇਵ ਚਿਰਤਰਪ੍ਪਵਤ੍ਤਨੇ ਵਾ ਯੇਸਂ ਅਤ੍ਥਾਯ ਕਰਿਯਤਿ, ਤੇਸਂ ਪੁਞ੍ਞਾਦੀਨਿ ਕਾਰਣਾਨਿ ਨਿਸ੍ਸਾਯ ਕਤ੍ਥਚਿ ਇਜ੍ਝਤਿ, ਭਿਕ੍ਖੂਨਂ ਅਤ੍ਥਾਯ ਪਾਨੀਯਸ੍ਸ ਸਪ੍ਪਿਖੀਰਾਦਿਕਰਣੇ ਵਿਯ ਮਹਾਧਾਤੁਨਿਧਾਨੇ ਦੀਪਾਦੀਨਂ ਚਿਰਸਨ੍ਤਾਨਪ੍ਪਵਤ੍ਤਨੇ ਵਿਯ ਚਾਤਿ ਇਦਂ ਸਕਸਮਯੇ ਸਨ੍ਨਿਟ੍ਠਾਨਂ. ਯਂ ਪਨ ਆਯਸ੍ਮਾ ਪਿਲਿਨ੍ਦਵਚ੍ਛੋ ਰਞ੍ਞੋ ਪਾਸਾਦਂ ਸੁਵਣ੍ਣਨ੍ਤ੍ਵੇਵ ਅਧਿਮੁਚ੍ਚਿ, ਤਂ ਨਿਸ੍ਸਾਯ ਯੇਸਂ ‘‘ਅਤ੍ਥਿ ਅਧਿਪ੍ਪਾਯਇਦ੍ਧੀ’’ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਅਤ੍ਥਿ ਅਧਿਪ੍ਪਾਯਇਦ੍ਧੀਤਿ ਪੁਚ੍ਛਾ ਸਕਵਾਦਿਸ੍ਸ. ਤਤ੍ਥ ਅਧਿਪ੍ਪਾਯਇਦ੍ਧੀਤਿ ਅਧਿਪ੍ਪਾਯਇਦ੍ਧਿ, ਯਥਾਧਿਪ੍ਪਾਯਂ ਇਜ੍ਝਨਇਦ੍ਧੀਤਿ ਅਤ੍ਥੋ. ਆਮਨ੍ਤਾਤਿ ਲਦ੍ਧਿਮਤ੍ਤੇ ਠਤ੍ਵਾ ਪਟਿਞ੍ਞਾ ਪਰਵਾਦਿਸ੍ਸ. ਅਥ ਨਂ ਅਨਿਚ੍ਚਾਦੀਨਂ ਨਿਚ੍ਚਾਦਿਤਾਯ ਅਨੁਯੁਞ੍ਜਿਤੁਂ ਨਿਚ੍ਚਪਣ੍ਣਾ ਰੁਕ੍ਖਾ ਹੋਨ੍ਤੂਤਿਆਦਿਮਾਹ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਲਦ੍ਧਿਪਤਿਟ੍ਠਾਪਨੇ ਸੁਵਣ੍ਣੋ ਚ ਪਨਾਸੀਤਿ ਰਞ੍ਞੋ ਪੁਞ੍ਞੂਪਨਿਸ੍ਸਯੇਨ ਆਸਿ, ਨ ਕੇਵਲਂ ਥੇਰਸ੍ਸ ਅਧਿਪ੍ਪਾਯੇਨੇਵ. ਤਸ੍ਮਾ ਅਸਾਧਕਮੇਤਨ੍ਤਿ.

ਇਦ੍ਧਿਕਥਾਵਣ੍ਣਨਾ.