੨. ਕਮ੍ਮਕਥਾਵਣ੍ਣਨਾ

੬੩੩-੬੩੫. ਇਦਾਨਿ ਕਮ੍ਮਕਥਾ ਨਾਮ ਹੋਤਿ. ਤਤ੍ਥ ‘‘ਨਾਹਂ, ਭਿਕ੍ਖਵੇ, ਸਞ੍ਚੇਤਨਿਕਾਨਂ ਕਮ੍ਮਾਨ’’ਨ੍ਤਿ (ਅ. ਨਿ. ੧੦.੨੧੭) ਸੁਤ੍ਤਪਦਂ ਨਿਸ੍ਸਾਯ ‘‘ਸਬ੍ਬਂ ਕਮ੍ਮਂ ਸਵਿਪਾਕ’’ਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਮਹਾਸਂਘਿਕਾਨਂ; ਤੇਸਂ ‘‘ਚੇਤਨਾਹਂ, ਭਿਕ੍ਖਵੇ, ਕਮ੍ਮਂ ਵਦਾਮੀ’’ਤਿ (ਅ. ਨਿ. ੬.੬੩) ਸਤ੍ਥਾਰਾ ਅਵਿਸੇਸੇਨ ਚੇਤਨਾ ‘‘ਕਮ੍ਮ’’ਨ੍ਤਿ ਵੁਤ੍ਤਾ; ਸਾ ਚ ਕੁਸਲਾਕੁਸਲਾਵ ਸਵਿਪਾਕਾ, ਅਬ੍ਯਾਕਤਾ ਅਵਿਪਾਕਾਤਿ ਇਮਂ ਵਿਭਾਗਂ ਦਸ੍ਸੇਤੁਂ ਸਬ੍ਬਂ ਕਮ੍ਮਨ੍ਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਪੁਨ ਸਬ੍ਬਾ ਚੇਤਨਾਤਿ ਪਞ੍ਹੇਸੁ ਅਬ੍ਯਾਕਤਂ ਸਨ੍ਧਾਯ ਪਟਿਕ੍ਖੇਪੋ, ਕੁਸਲਾਕੁਸਲੇ ਸਨ੍ਧਾਯ ਪਟਿਞ੍ਞਾ ਵੇਦਿਤਬ੍ਬਾ. ਵਿਪਾਕਾਬ੍ਯਾਕਤਾਤਿਆਦਿ ਸਵਿਪਾਕਾਵਿਪਾਕਚੇਤਨਂ ਸਰੂਪੇਨ ਦਸ੍ਸੇਤੁਂ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ‘‘ਨਾਹਂ, ਭਿਕ੍ਖਵੇ’’ਤਿ ਸੁਤ੍ਤਂ ਸਤਿ ਪਚ੍ਚਯੇ ਦਿਟ੍ਠਧਮ੍ਮਾਦੀਸੁ ਵਿਪਾਕਪਟਿਸਂਵੇਦਨਂ ਸਨ੍ਧਾਯ ਵੁਤ੍ਤਂ, ਤਸ੍ਮਾ ਅਸਾਧਕਨ੍ਤਿ.

ਕਮ੍ਮਕਥਾਵਣ੍ਣਨਾ.