੫. ਨਿਰੋਧਸਮਾਪਤ੍ਤਿਕਥਾਵਣ੍ਣਨਾ

੪੫੭-੪੫੯. ਇਦਾਨਿ ਨਿਰੋਧਸਮਾਪਤ੍ਤਿਕਥਾ ਨਾਮ ਹੋਤਿ. ਤਤ੍ਥ ਨਿਰੋਧਸਮਾਪਤ੍ਤੀਤਿ ਚਤੁਨ੍ਨਂ ਖਨ੍ਧਾਨਂ ਅਪ੍ਪਵਤ੍ਤਿ. ਯਸ੍ਮਾ ਪਨ ਸਾ ਕਰਿਯਮਾਨਾ ਕਰਿਯਤਿ, ਸਮਾਪਜ੍ਜਿਯਮਾਨਾ ਸਮਾਪਜ੍ਜਿਯਤਿ, ਤਸ੍ਮਾ ਨਿਪ੍ਫਨ੍ਨਾਤਿ ਵੁਚ੍ਚਤਿ. ਸਙ੍ਖਤਾਸਙ੍ਖਤਲਕ੍ਖਣਾਨਂ ਪਨ ਅਭਾਵੇਨ ਨ ਵਤ੍ਤਬ੍ਬਾ ‘‘ਸਙ੍ਖਤਾਤਿ ਵਾ ਅਸਙ੍ਖਤਾ’’ਤਿ ਵਾ. ਤਤ੍ਥ ਯੇਸਂ ‘‘ਯਸ੍ਮਾ ਸਙ੍ਖਤਾ ਨ ਹੋਤਿ, ਤਸ੍ਮਾ ਅਸਙ੍ਖਤਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਞ੍ਚੇਵ ਉਤ੍ਤਰਾਪਥਕਾਨਞ੍ਚ; ਤੇ ਸਨ੍ਧਾਯ ਨਿਰੋਧਸਮਾਪਤ੍ਤੀਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਉਪ੍ਪਾਦੇਨ੍ਤੀਤਿਆਦਿ ਸਮਾਪਜ੍ਜਨਪਟਿਲਾਭਵਸੇਨੇਵ ਵੁਤ੍ਤਂ. ਯਥਾ ਪਨ ਰੂਪਾਦਯੋ ਅਸਙ੍ਖਤਧਮ੍ਮੇ ਉਪ੍ਪਾਦੇਨ੍ਤਿ; ਨ ਤਥਾ ਤਂ ਕੇਚਿ ਉਪ੍ਪਾਦੇਨ੍ਤਿ ਨਾਮ. ਨਿਰੋਧਾ ਵੋਦਾਨਂ ਵੁਟ੍ਠਾਨਨ੍ਤਿ ਫਲਸਮਾਪਤ੍ਤਿ ਵੇਦਿਤਬ੍ਬਾ. ਅਸਙ੍ਖਤਾ ਪਨ ਤਂ ਨਤ੍ਥਿਯੇਵ, ਤਸ੍ਮਾ ਪਟਿਕ੍ਖਿਪਤਿ. ਤੇਨ ਹੀਤਿ ਯਸ੍ਮਾ ਸਙ੍ਖਤਾ ਨ ਹੋਤਿ, ਤਸ੍ਮਾ ਅਸਙ੍ਖਤਾਤਿ ਲਦ੍ਧਿ. ਇਦਂ ਪਨ ਅਸਙ੍ਖਤਭਾਵੇ ਕਾਰਣਂ ਨ ਹੋਤੀਤਿ ਵੁਤ੍ਤਮ੍ਪਿ ਅਵੁਤ੍ਤਸਦਿਸਮੇਵਾਤਿ.

ਨਿਰੋਧਸਮਾਪਤ੍ਤਿਕਥਾਵਣ੍ਣਨਾ.