੧. ਨਿਯਾਮਕਥਾਵਣ੍ਣਨਾ

੪੪੫-੪੪੭. ਇਦਾਨਿ ਨਿਯਾਮਕਥਾ ਨਾਮ ਹੋਤਿ. ਤਤ੍ਥ ਨਿਯਾਮੋਤਿ ‘‘ਭਬ੍ਬੋ ਨਿਯਾਮਂ ਓਕ੍ਕਮਿਤੁਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤ’’ਨ੍ਤਿ (ਪੁ. ਪ. ੧੩) ਵਚਨਤੋ ਅਰਿਯਮਗ੍ਗੋ ਵੁਚ੍ਚਤਿ. ਯਸ੍ਮਾ ਪਨ ਤਸ੍ਮਿਂ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧੇਪਿ ਪੁਗ੍ਗਲੋ ਅਨਿਯਤੋ ਨਾਮ ਨ ਹੋਤਿ, ਤਸ੍ਮਾ ‘‘ਸੋ ਨਿਯਾਮੋ ਨਿਚ੍ਚਟ੍ਠੇਨ ਅਸਙ੍ਖਤੋ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਤਤੋ ‘‘ਯਦਿ ਸੋ ਅਸਙ੍ਖਤੋ, ਏਵਰੂਪੇਨ ਤੇਨ ਭਵਿਤਬ੍ਬ’’ਨ੍ਤਿ ਦੀਪੇਨ੍ਤੋ ਨਿਬ੍ਬਾਨਨ੍ਤਿਆਦਿਮਾਹ. ਸਂਸਨ੍ਦਨਪੁਚ੍ਛਾ ਉਤ੍ਤਾਨਤ੍ਥਾਯੇਵ.

ਅਤ੍ਥਿ ਕੇਚੀਤਿਆਦਿ ਨਿਯਾਮਸ੍ਸ ਸਙ੍ਖਤਭਾਵਦੀਪਨਤ੍ਥਂ ਵੁਤ੍ਤਂ. ਮਗ੍ਗੋ ਅਸਙ੍ਖਤੋਤਿਪਞ੍ਹੇ ਤਸ੍ਸ ਉਪ੍ਪਾਦਨਿਰੋਧਭਾਵਤੋ ਪਟਿਕ੍ਖਿਪਤੀਤਿ. ਨਿਯਾਮੋ ਸਙ੍ਖਤੋਤਿਪਞ੍ਹੇ ਨਿਰੁਦ੍ਧੇਪਿ ਮਗ੍ਗੇ ਨਿਯਾਮਸ੍ਸ ਅਤ੍ਥਿਤਂ ਸਨ੍ਧਾਯ ਪਟਿਕ੍ਖਿਪਤਿ. ਸੋਤਾਪਤ੍ਤਿਨਿਯਾਮੋਤਿਆਦਿਪਞ੍ਹੇਸੁਪਿ ਅਨੁਲੋਮਤੋ ਚ ਪਟਿਲੋਮਤੋ ਚ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਪਞ੍ਚ ਅਸਙ੍ਖਤਾਨੀਤਿ ਪੁਟ੍ਠੋ ਪਞ੍ਚਨ੍ਨਂ ਅਸਙ੍ਖਤਾਨਂ ਆਗਤਟ੍ਠਾਨਂ ਅਪਸ੍ਸਨ੍ਤੋ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਚਤੁਨ੍ਨਂ ਸਮ੍ਮਤ੍ਤਨਿਯਾਮਾਨਂ ਨਿਯਾਮਵਚਨਤੋ ਨਿਬ੍ਬਾਨਸ੍ਸ ਚ ਅਸਙ੍ਖਤਭਾਵਤੋ ਪਟਿਜਾਨਾਤਿ. ਮਿਚ੍ਛਤ੍ਤਨਿਯਾਮਪਞ੍ਹੋ ਨਿਯਾਮਵਚਨਮਤ੍ਤੇਨ ਅਸਙ੍ਖਤਤਾਯ ਅਯੁਤ੍ਤਭਾਵਦੀਪਨਤ੍ਥਂ ਵੁਤ੍ਤੋਤਿ.

ਨਿਯਾਮਕਥਾਵਣ੍ਣਨਾ.