੮. ਸਤਿਪਟ੍ਠਾਨਕਥਾਵਣ੍ਣਨਾ

੩੦੧. ਇਦਾਨਿ ਸਤਿਪਟ੍ਠਾਨਕਥਾ ਹੋਤਿ. ‘‘ਤਤ੍ਥ – ਚਤੁਨ੍ਨਂ, ਭਿਕ੍ਖਵੇ, ਸਤਿਪਟ੍ਠਾਨਾਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਦੇਸੇਸ੍ਸਾਮੀ’’ਤਿ (ਸਂ. ਨਿ. ੫.੪੦੮) ਸਤਿਪਟ੍ਠਾਨਸਂਯੁਤ੍ਤੇ ਵੁਤ੍ਤਨਯੇਨੇਵ ਯੇਸਂ ਕਾਯਾਦਯੋ ਸਤਿਯਾ ਆਰਮ੍ਮਣਧਮ੍ਮੇ ਗਹੇਤ੍ਵਾ ‘‘ਸਬ੍ਬੇ ਧਮ੍ਮਾ ਸਤਿਪਟ੍ਠਾਨਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਅਨ੍ਧਕਾਨਂ. ਅਨ੍ਧਕਾ ਨਾਮ ਪੁਬ੍ਬਸੇਲਿਯਾ, ਅਪਰਸੇਲਿਯਾ, ਰਾਜਗਿਰਿਯਾ, ਸਿਦ੍ਧਤ੍ਥਿਕਾਤਿ ਇਮੇ ਪਚ੍ਛਾ ਉਪ੍ਪਨ੍ਨਨਿਕਾਯਾ. ਤੇਸਂ ਲਦ੍ਧਿਵਿਵੇਚਨਤ੍ਥਂ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਪਰਵਾਦਿਸ੍ਸ. ਤਤ੍ਥ ਯਸ੍ਮਾ ‘‘ਪਤਿਟ੍ਠਾਤਿ ਏਤੇਸੂਤਿ ਪਟ੍ਠਾਨਾ. ਕਾ ਪਤਿਟ੍ਠਾਤਿ? ਸਤਿ. ਸਤਿਯਾ ਪਟ੍ਠਾਨਾ ਸਤਿਪਟ੍ਠਾਨਾ’’ਤਿ ਇਮਿਨਾ ਅਤ੍ਥੇਨ ਸਤਿਗੋਚਰਾਪਿ ਸਤਿਪਟ੍ਠਾਨਾ. ‘‘ਪਤਿਟ੍ਠਹਨ੍ਤੀਤਿ ਪਟ੍ਠਾਨਾ. ਕਾ ਪਤਿਟ੍ਠਹਨ੍ਤਿ? ਸਤਿਯੋ. ਸਤਿਯੋਵ ਪਟ੍ਠਾਨਾ ਸਤਿਪਟ੍ਠਾਨਾ’’ਤਿ ਇਮਿਨਾ ਅਤ੍ਥੇਨ ਸਤਿਯੋਵ ਸਤਿਪਟ੍ਠਾਨਾ. ਤਸ੍ਮਾ ਦ੍ਵੇਪਿ ਵਾਦਾ ਪਰਿਯਾਯੇਨ ਯੁਜ੍ਜਨ੍ਤਿ. ਯੇ ਪਨ ਤਂ ਪਰਿਯਾਯਂ ਪਹਾਯ ਏਕਨ੍ਤੇਨੇਵ ‘‘ਸਬ੍ਬੇ ਧਮ੍ਮਾ ਸਤਿਪਟ੍ਠਾਨਾ’’ਤਿ ਵਦਨ੍ਤਿ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਆਰਮ੍ਮਣਵਸੇਨ ਪਟਿਞ੍ਞਾ ਪਰਵਾਦਿਸ੍ਸ. ਸਬ੍ਬੇ ਧਮ੍ਮਾ ਸਤੀਤਿ ਅਨੁਯੁਤ੍ਤਸ੍ਸ ਪਨ ਸਬ੍ਬੇਸਂ ਸਤਿਸਭਾਵਾਭਾਵਤੋ ਪਟਿਕ੍ਖੇਪੋ ਤਸ੍ਸੇਵ. ਤਤ੍ਥ ਖਯਗਾਮੀਤਿਆਦੀਨਿ ਮਗ੍ਗਵਿਸੇਸਨਾਨਿ. ਏਕਾਯਨਮਗ੍ਗੋ ਹਿ ਕਿਲੇਸਾਨਂ ਖਯਭੂਤਂ ਨਿਬ੍ਬਾਨਂ ਗਚ੍ਛਤੀਤਿ ਖਯਗਾਮੀ. ਚਤ੍ਤਾਰਿ ਸਚ੍ਚਾਨਿ ਬੁਜ੍ਝਨ੍ਤੋ ਗਚ੍ਛਤੀਤਿ ਬੋਧਗਾਮੀ. ਵਟ੍ਟਂ ਅਪਚਿਨਨ੍ਤੋ ਗਚ੍ਛਤੀਤਿ ਅਪਚਯਗਾਮੀ. ਏਵਮੇਤੇਹਿ ਪਦੇਹਿ ‘‘ਕਿਂ ਤੇ ਸਬ੍ਬੇ ਧਮ੍ਮਾ ਏਵਰੂਪੋ ਤੇ ਏਕਾਯਨੋ ਮਗ੍ਗੋ ਹੋਤੀ’’ਤਿ ਪੁਚ੍ਛਤਿ. ਅਨਾਸਵਾ ਅਸਂਯੋਜਨਿਯਾਤਿਆਦੀਨਿਪਿ ਲੋਕੁਤ੍ਤਰਭਾਵਂ ਪੁਚ੍ਛਨਤ੍ਥਾਯ ਵੁਤ੍ਤਾਨਿ. ਬੁਦ੍ਧਾਨੁਸ੍ਸਤੀਤਿਆਦੀਨਿ ਪਭੇਦਪੁਚ੍ਛਾਵਸੇਨ ਵੁਤ੍ਤਾਨਿ.

ਚਕ੍ਖਾਯਤਨਂ ਸਤਿਪਟ੍ਠਾਨਨ੍ਤਿਆਦਿ ਸਬ੍ਬਧਮ੍ਮਾਨਂ ਪਭੇਦਪੁਚ੍ਛਾਵਸੇਨ ਵੁਤ੍ਤਂ. ਤਤ੍ਥਾਪਿ ਸਤਿਵਸੇਨ ਪਟਿਕ੍ਖੇਪੋ, ਆਰਮ੍ਮਣਵਸੇਨ ਪਟਿਞ੍ਞਾਤਿ. ਏਵਂ ਸਬ੍ਬਪਞ੍ਹੇਸੁ ਅਤ੍ਥੋ ਵੇਦਿਤਬ੍ਬੋ. ਸੁਤ੍ਤਸਾਧਨਾ ਉਤ੍ਤਾਨਤ੍ਥਾਯੇਵਾਤਿ.

ਸਤਿਪਟ੍ਠਾਨਕਥਾਵਣ੍ਣਨਾ ਨਿਟ੍ਠਿਤਾ.