੨. ਦੁਕਨਿਦ੍ਦੇਸਵਣ੍ਣਨਾ

੪੫. ਦੁਕਨਿਦ੍ਦੇਸੇ ਕੋਧਨੋਤਿ ਕੁਜ੍ਝਨਸੀਲੋ ਮਹਾਕੋਧੋ. ਏਵਂ ਪੁਗ੍ਗਲਂ ਪੁਚ੍ਛਿਤ੍ਵਾਪਿ ਧਮ੍ਮੇਨ ਪੁਗ੍ਗਲਂ ਦਸ੍ਸੇਤੁਂ ਤਤ੍ਥ ਕਤਮੋ ਕੋਧੋਤਿਆਦਿਮਾਹ. ਉਪਨਾਹੀਨਿਦ੍ਦੇਸਾਦੀਸੁਪਿ ਏਸੇਵ ਨਯੋ. ਕੋਧੋ ਕੁਜ੍ਝਨਾਤਿਆਦੀਨਿ ਹੇਟ੍ਠਾ ਵੁਤ੍ਤਤ੍ਥਾਨੇਵ. ਤਥਾ ਉਪਨਾਹੀਨਿਦ੍ਦੇਸਾਦੀਸੁ ਪੁਬ੍ਬਕਾਲਂ ਕੋਧੋਤਿਆਦੀਨਿ. ਅਯਂ ਕੋਧੋ ਅਪ੍ਪਹੀਨੋਤਿ ਅਯਂ ਏਤ੍ਤਕੋ ਕੋਧੋ ਵਿਕ੍ਖਮ੍ਭਨਪ੍ਪਹਾਨੇਨ ਵਾ ਤਦਙ੍ਗਪ੍ਪਹਾਨੇਨ ਵਾ ਸਮੁਚ੍ਛੇਦਪ੍ਪਹਾਨੇਨ ਵਾ ਅਪ੍ਪਹੀਨੋ. ਪਰਤੋ ਉਪਨਾਹਾਦੀਸੁਪਿ ਏਸੇਵ ਨਯੋ.

੫੩. ਅਹਿਰਿਕਨਿਦ੍ਦੇਸਾਦੀਸੁ – ਇਮਿਨਾ ਅਹਿਰਿਕੇਨਾਤਿ ਇਮਿਨਾ ਏਵਂਪਕਾਰੇਨ ਅਹਿਰਿਕਧਮ੍ਮੇਨ ਸਮਨ੍ਨਾਗਤੋ. ਇਮਿਨਾ ਅਨੋਤ੍ਤਪ੍ਪੇਨਾਤਿਆਦੀਸੁਪਿ ਏਸੇਵ ਨਯੋ.

੬੩. ਅਜ੍ਝਤ੍ਤਸਂਯੋਜਨੋਤਿ ਅਜ੍ਝਤ੍ਤਬਨ੍ਧਨੋ. ਬਹਿਦ੍ਧਾਸਂਯੋਜਨੋਤਿ ਬਹਿਦ੍ਧਾਬਨ੍ਧਨੋ. ਤੇ ਉਭੋਪਿ ਵਚ੍ਛਕਸਾਲੂਪਮਾਯ ਦੀਪੇਤਬ੍ਬਾ. ਵਚ੍ਛਕਸਾਲਾਯ ਹਿ ਅਨ੍ਤੋ ਬਦ੍ਧੋ ਅਨ੍ਤੋਯੇਵ ਸਯਿਤਵਚ੍ਛਕੋ ਵਿਯ ਇਧਟ੍ਠਕਸੋਤਾਪਨ੍ਨਸਕਦਾਗਾਮਿਨੋ. ਤੇਸਞ੍ਹਿ ਬਨ੍ਧਨਮ੍ਪਿ ਇਧੇਵ, ਸਯਮ੍ਪਿ ਇਧੇਵ. ਅਨ੍ਤੋ ਬਦ੍ਧੋ ਪਨ ਬਹਿ ਸਯਿਤਵਚ੍ਛਕੋ ਵਿਯ ਰੂਪਾਰੂਪਭਵੇ ਸੋਤਾਪਨ੍ਨਸਕਦਾਗਾਮਿਨੋ. ਤੇਸਞ੍ਹਿ ਬਨ੍ਧਨਮੇਵ ਇਧ, ਸਯਂ ਪਨ ਬ੍ਰਹ੍ਮਲੋਕੇ ਠਿਤਾ. ਬਹਿ ਬਦ੍ਧੋ ਬਹਿ ਸਯਿਤਵਚ੍ਛਕੋ ਵਿਯ ਰੂਪਾਰੂਪਭਵੇ ਅਨਾਗਾਮੀ. ਤਸ੍ਸ ਹਿ ਬਨ੍ਧਨਮ੍ਪਿ ਬਹਿਦ੍ਧਾ, ਸਯਮ੍ਪਿ ਬਹਿਦ੍ਧਾਵ. ਬਹਿ ਬਦ੍ਧੋ ਪਨ ਅਨ੍ਤੋਸਯਿਤਵਚ੍ਛਕੋ ਵਿਯ ਇਧਟ੍ਠਕਅਨਾਗਾਮੀ. ਤਸ੍ਸ ਹਿ ਬਨ੍ਧਨਂ ਰੂਪਾਰੂਪਭਵੇਸੁ, ਸਯਂ ਪਨ ਇਧ ਠਿਤੋ.

੬੫. ਅਕ੍ਕੋਧਨਨਿਦ੍ਦੇਸਾਦੀਸੁ – ਪਹੀਨੋਤਿ ਵਿਕ੍ਖਮ੍ਭਨਪ੍ਪਹਾਨੇਨ ਵਾ, ਤਦਙ੍ਗਪ੍ਪਹਾਨੇਨ ਵਾ, ਸਮੁਚ੍ਛੇਦਪ੍ਪਹਾਨੇਨ ਵਾ ਪਹੀਨੋ.

੮੩. ਦੁਲ੍ਲਭਨਿਦ੍ਦੇਸੇ – ਦੁਲ੍ਲਭਾਤਿ ਨ ਸੁਲਭਾ. ਪੁਬ੍ਬਕਾਰੀਤਿ ਪਠਮਮੇਵ ਕਾਰਕੋ. ਕਤਵੇਦੀਤਿ ਕਤਂ ਵੇਦੇਤਿ, ਵਿਦਿਤਂ ਪਾਕਟਂ ਕਰੋਤਿ. ਤੇ ਅਗਾਰਿਯਾਨਗਾਰਿਯੇਹਿ ਦੀਪੇਤਬ੍ਬਾ. ਅਗਾਰਿਯੇਸੁ ਹਿ ਮਾਤਾਪਿਤਰੋ ਪੁਬ੍ਬਕਾਰਿਨੋ ਨਾਮ. ਪੁਤ੍ਤਧੀਤਰੋ ਪਨ ਮਾਤਾਪਿਤਰੋ ਪਟਿਜਗ੍ਗਨ੍ਤਾ ਅਭਿਵਾਦਨਾਦੀਨਿ ਤੇਸਂ ਕੁਰੁਮਾਨਾ ਕਤਵੇਦਿਨੋ ਨਾਮ. ਅਨਗਾਰਿਯੇਸੁ ਆਚਰਿਯੁਪਜ੍ਝਾਯਾ ਪੁਬ੍ਬਕਾਰਿਨੋ ਨਾਮ. ਅਨ੍ਤੇਵਾਸਿਕਸਦ੍ਧਿਵਿਹਾਰਿਕਾ ਆਚਰਿਯੁਪਜ੍ਝਾਯੇ ਪਟਿਜਗ੍ਗਨ੍ਤਾ ਅਭਿਵਾਦਨਾਦੀਨਿ ਤੇਸਂ ਕੁਰੁਮਾਨਾ ਕਤਵੇਦਿਨੋ ਨਾਮ. ਤੇਸਂ ਆਵਿਭਾਵਤ੍ਥਾਯ ਉਪਜ੍ਝਾਯਪੋਸਕਸੋਣਤ੍ਥੇਰਾਦੀਨਂ ਵਤ੍ਥੂਨਿ ਕਥੇਤਬ੍ਬਾਨਿ.

ਅਪਰੋ ਨਯੋ – ਪਰੇਨ ਅਕਤੇਯੇਵ ਉਪਕਾਰੇ ਅਤ੍ਤਨਿ ਕਤਂ ਉਪਕਾਰਂ ਅਨਪੇਕ੍ਖਿਤ੍ਵਾ ਕਾਰਕੋ ਪੁਬ੍ਬਕਾਰੀ, ਸੇਯ੍ਯਥਾਪਿ ਮਾਤਾਪਿਤਰੋ ਚੇਵ ਆਚਰਿਯੁਪਜ੍ਝਾਯਾ ਚ. ਸੋ ਦੁਲ੍ਲਭੋ; ਸਤ੍ਤਾਨਂ ਤਣ੍ਹਾਭਿਭੂਤਤ੍ਤਾ. ਪਰੇਨ ਕਤਸ੍ਸ ਉਪਕਾਰਸ੍ਸ ਅਨੁਰੂਪਪ੍ਪਵਤ੍ਤਿਂ ਅਤ੍ਤਨਿ ਕਤਂ ਉਪਕਾਰਂ ਉਪਕਾਰਤੋ ਜਾਨਨ੍ਤੋ, ਵੇਦਿਯਨ੍ਤੋ, ਕਤਞ੍ਞੁਕਤਵੇਦੀ. ਸੇਯ੍ਯਥਾਪਿ ਮਾਤਾਪਿਤੁਆਚਰਿਯੁਪਜ੍ਝਾਯੇਸੁ ਸਮ੍ਮਾ ਪਟਿਪਨ੍ਨੋ. ਸੋਪਿ ਦੁਲ੍ਲਭੋ; ਸਤ੍ਤਾਨਂ ਅਵਿਜ੍ਜਾਭਿਭੂਤਤ੍ਤਾ.

ਅਪਿਚ – ਅਕਾਰਣਵਚ੍ਛਲੋ ਪੁਬ੍ਬਕਾਰੀ, ਸਕਾਰਣਵਚ੍ਛਲੋ ਕਤਞ੍ਞੁਕਤਵੇਦੀ. ‘ਕਰਿਸ੍ਸਤਿ ਮੇ’ਤਿ ਏਵਮਾਦਿਕਾਰਣਨਿਰਪੇਕ੍ਖਕਿਰਿਯੋ ਪੁਬ੍ਬਕਾਰੀ. ‘ਕਰਿਸ੍ਸਤਿ ਮੇ’ਤਿ ਏਵਮਾਦਿਕਾਰਣਸਾਪੇਕ੍ਖਕਿਰਿਯੋ ਕਤਞ੍ਞੁਕਤਵੇਦੀ. ਤਮੋਜੋਤਿਪਰਾਯਣੋ ਪੁਬ੍ਬਕਾਰੀ, ਜੋਤਿਜੋਤਿਪਰਾਯਣੋ ਕਤਞ੍ਞੁਕਤਵੇਦੀ. ਦੇਸੇਤਾ ਪੁਬ੍ਬਕਾਰੀ, ਪਟਿਪਜ੍ਜਿਤਾ ਕਤਞ੍ਞੁਕਤਵੇਦੀ. ਸਦੇਵਕੇ ਲੋਕੇ ਅਰਹਂ ਸਮ੍ਮਾਸਮ੍ਬੁਦ੍ਧੋ ਪੁਬ੍ਬਕਾਰੀ, ਅਰਿਯਸਾਵਕੋ ਕਤਞ੍ਞੁਕਤਵੇਦੀਤਿ. ਦੁਕਨਿਪਾਤਟ੍ਠਕਥਾਯਂ (ਅ. ਨਿ. ਅਟ੍ਠ. ੨.੨.੧੨੦) ਪਨ – ‘‘‘ਪੁਬ੍ਬਕਾਰੀ’ਤਿ ਪਠਮਂ ਉਪਕਾਰਸ੍ਸ ਕਾਰਕੋ, ‘ਕਤਞ੍ਞੁਕਤਵੇਦੀ’ਤਿ ਤੇਨ ਕਤਂ ਞਤ੍ਵਾ ਪਚ੍ਛਾ ਕਾਰਕੋ. ਤੇਸੁ ਪੁਬ੍ਬਕਾਰੀ ਇਣਂ ਦੇਮੀਤਿ ਸਞ੍ਞਂ ਕਰੋਤਿ, ਪਚ੍ਛਾਕਾਰਕੋ ‘ਇਣਂ ਜੀਰਾਪੇਮੀ’ਤਿ ਸਞ੍ਞਂ ਕਰੋਤੀ’’ਤਿ ਏਤ੍ਤਕਮੇਵ ਵੁਤ੍ਤਂ.

੮੪. ਦੁਤ੍ਤਪ੍ਪਯਨਿਦ੍ਦੇਸੇ – ਦੁਤ੍ਤਪ੍ਪਯਾਤਿ ਅਤਪ੍ਪਯਾ, ਨ ਸਕ੍ਕਾ ਕੇਨਚਿ ਤਪ੍ਪੇਤੁਂ. ਯੋ ਹਿ ਉਪਟ੍ਠਾਕਕੁਲਂ ਵਾ ਞਾਤਿਕੁਲਂ ਵਾ ਨਿਸ੍ਸਾਯ ਵਸਮਾਨੋ ਚੀਵਰੇ ਜਿਣ੍ਣੇ ਤੇਹਿ ਦਿਨ੍ਨਂ ਚੀਵਰਂ ਨਿਕ੍ਖਿਪਤਿ, ਨ ਪਰਿਭੁਞ੍ਜਤਿ. ਪੁਨਪ੍ਪੁਨਂ ਦਿਨ੍ਨਮ੍ਪਿ ਗਹੇਤ੍ਵਾ ਨਿਕ੍ਖਿਪਤੇਵ. ਯੋ ਚ ਤੇਨੇਵ ਨਯੇਨ ਲਦ੍ਧਂ ਲਦ੍ਧਂ ਵਿਸ੍ਸਜ੍ਜੇਤਿ ਪਰਸ੍ਸ ਦੇਤਿ. ਪੁਨਪ੍ਪੁਨਂ ਲਦ੍ਧਮ੍ਪਿ ਤਥੇਵ ਕਰੋਤਿ. ਇਮੇ ਦ੍ਵੇ ਪੁਗ੍ਗਲਾ ਸਕਟੇਹਿਪਿ ਪਚ੍ਚਯੇ ਉਪਨੇਨ੍ਤੇਨ ਤਪ੍ਪੇਤੁਂ ਨ ਸਕ੍ਕਾਤਿ ਦੁਤ੍ਤਪ੍ਪਯਾ ਨਾਮ.

੮੫. ਸੁਤਪ੍ਪਯਨਿਦ੍ਦੇਸੇ – ਨ ਵਿਸ੍ਸਜ੍ਜੇਤੀਤਿ ਅਤ੍ਤਨੋ ਅਕਤ੍ਵਾ ਪਰਸ੍ਸ ਨ ਦੇਤਿ. ਅਤਿਰੇਕੇ ਪਨ ਸਤਿ ਨ ਨਿਕ੍ਖਿਪਤਿ ਪਰਸ੍ਸ ਦੇਤਿ. ਇਦਂ ਵੁਤ੍ਤਂ ਹੋਤਿ – ਯੋ ਪਨ ਭਿਕ੍ਖੁ ਉਪਟ੍ਠਾਕਕੁਲਾ ਵਾ ਞਾਤਿਕੁਲਾ ਵਾ ਜਿਣ੍ਣਚੀਵਰੋ ਸਾਟਕਂ ਲਭਿਤ੍ਵਾ ਚੀਵਰਂ ਕਤ੍ਵਾ ਪਰਿਭੁਞ੍ਜਤਿ, ਨ ਨਿਕ੍ਖਿਪਤਿ; ਅਗ੍ਗਲ਼ਂ ਦਤ੍ਵਾ ਪਾਰੁਪਨ੍ਤੋਪਿ ਪੁਨ ਦਿਯ੍ਯਮਾਨੇ ਸਹਸਾ ਨ ਪਟਿਗ੍ਗਣ੍ਹਾਤਿ. ਯੋ ਚ ਲਦ੍ਧਂ ਲਦ੍ਧਂ ਅਤ੍ਤਨਾ ਪਰਿਭੁਞ੍ਜਤਿ, ਪਰੇਸਂ ਨ ਦੇਤਿ. ਇਮੇ ਦ੍ਵੇਪਿ ਸੁਖੇਨ ਸਕ੍ਕਾ ਤਪ੍ਪੇਤੁਨ੍ਤਿ ਸੁਤਪ੍ਪਯਾ ਨਾਮਾਤਿ.

੮੬. ਆਸਵਾਤਿ ਕਿਲੇਸਾ. ਨ ਕੁਕ੍ਕੁਚ੍ਚਾਯਿਤਬ੍ਬਂ ਕੁਕ੍ਕੁਚ੍ਚਾਯਤੀਤਿ ਨ ਕੁਕ੍ਕੁਚ੍ਚਾਯਿਤਬ੍ਬਯੁਤ੍ਤਕਂ ਕੁਕ੍ਕੁਚ੍ਚਾਯਤਿ. ਸੂਕਰਮਂਸਂ ਲਭਿਤ੍ਵਾ ਅਚ੍ਛਮਂਸਨ੍ਤਿ ਕੁਕ੍ਕੁਚ੍ਚਾਯਤਿ, ਮਿਗਮਂਸਂ, ਲਭਿਤ੍ਵਾ ਦੀਪਿਮਂਸਨ੍ਤਿ ਕੁਕ੍ਕੁਚ੍ਚਾਯਤਿ. ਕਾਲੇ ਸਨ੍ਤੇਯੇਵ ‘ਕਾਲੋ ਨਤ੍ਥੀ’ਤਿ, ਅਪ੍ਪਵਾਰੇਤ੍ਵਾਵ ‘ਪਵਾਰਿਤੋਸ੍ਮੀ’ਤਿ, ਪਤ੍ਤੇ ਰਜਸ੍ਮਿਂ ਅਪਤਿਤੇਯੇਵ ‘ਪਤਿਤ’ਨ੍ਤਿ, ਅਤ੍ਤਾਨਂ ਉਦ੍ਦਿਸ੍ਸ ਮਚ੍ਛਮਂਸੇ ਅਕਤੇਯੇਵ ‘ਮਂ ਉਦ੍ਦਿਸ੍ਸ ਕਤ’ਨ੍ਤਿ ਕੁਕ੍ਕੁਚ੍ਚਾਯਤਿ. ਕੁਕ੍ਕੁਚ੍ਚਾਯਿਤਬ੍ਬਂ ਨ ਕੁਕ੍ਕੁਚ੍ਚਾਯਤੀਤਿ ਕੁਕ੍ਕੁਚ੍ਚਾਯਿਤਬ੍ਬਯੁਤ੍ਤਕਂ ਨ ਕੁਕ੍ਕੁਚ੍ਚਾਯਤਿ. ਅਚ੍ਛਮਂਸਂ ਲਭਿਤ੍ਵਾ ਸੂਕਰਮਂਸਨ੍ਤਿ ਨ ਕੁਕ੍ਕੁਚ੍ਚਾਯਤਿ…ਪੇ… ਅਤ੍ਤਾਨਂ ਉਦ੍ਦਿਸ੍ਸ ਮਚ੍ਛਮਂਸੇ ਕਤੇ ‘ਮਂ ਉਦ੍ਦਿਸ੍ਸ ਕਤ’ਨ੍ਤਿ ਨ ਕੁਕ੍ਕੁਚ੍ਚਾਯਤਿ. ਅਙ੍ਗੁਤ੍ਤਰਟ੍ਠਕਥਾਯਂ ਪਨ – ‘‘‘ਨ ਕੁਕ੍ਕੁਚ੍ਚਾਯਿਤਬ੍ਬ’ਨ੍ਤਿ ਸਙ੍ਘਭੋਗਸ੍ਸ ਅਪਟ੍ਠਪਨਂ ਅਵਿਚਾਰਣਂ ਨ ਕੁਕ੍ਕੁਚ੍ਚਾਯਿਤਬ੍ਬਂ ਨਾਮ, ਤਂ ਕੁਕ੍ਕੁਚ੍ਚਾਯਤਿ. ‘ਕੁਕ੍ਕੁਚ੍ਚਾਯਿਤਬ੍ਬ’ਨ੍ਤਿ ਤਸ੍ਸੇਵ ਪਟ੍ਠਪਨਂ ਵਿਚਾਰਣਂ, ਤਂ ਨ ਕੁਕ੍ਕੁਚ੍ਚਾਯਤੀ’’ਤਿ ਏਤ੍ਤਕਮੇਵ ਵੁਤ੍ਤਂ. ਇਮੇਸਨ੍ਤਿ ਇਮੇਸਂ ਦ੍ਵਿਨ੍ਨਂ ਪੁਗ੍ਗਲਾਨਂ ਸੁਭੂਮਿਯਂ ਤਿਣਲਤਾਦੀਨਿ ਵਿਯ ਰਤ੍ਤਿਮ੍ਪਿ ਦਿਵਾਪਿ ਆਸਵਾ ਵਡ੍ਢਨ੍ਤਿਯੇਵ. ਸੁਕ੍ਕਪਕ੍ਖੇ ਕਪ੍ਪਿਯਮਂਸਂ ਲਭਿਤ੍ਵਾ ਕਪ੍ਪਿਯਮਂਸਨ੍ਤ੍ਵੇਵ ਗਣ੍ਹਨ੍ਤੋ ਨ ਕੁਕ੍ਕੁਚ੍ਚਾਯਿਤਬ੍ਬਂ ਨ ਕੁਕ੍ਕੁਚ੍ਚਾਯਤਿ ਨਾਮਾਤਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ.

੮੮. ਹੀਨਾਧਿਮੁਤ੍ਤੋਤਿ ਹੀਨਜ੍ਝਾਸਯੋ. ਦੁਸ੍ਸੀਲੋਤਿ ਨਿਸ੍ਸੀਲੋ. ਪਾਪਧਮ੍ਮੋਤਿ ਲਾਮਕਧਮ੍ਮੋ.

੮੯. ਪਣੀਤਾਧਿਮੁਤ੍ਤੋਤਿ ਪਣੀਤਜ੍ਝਾਸਯੋ. ਕਲ੍ਯਾਣਧਮ੍ਮੋਤਿ ਭਦ੍ਦਕਧਮ੍ਮੋ, ਸੁਚਿਧਮ੍ਮੋ, ਸੁਨ੍ਦਰਧਮ੍ਮੋ.

੯੦. ਤਿਤ੍ਤੋਤਿ ਸੁਹਿਤੋ ਪਰਿਯੋਸਿਤੋ. ਤਪ੍ਪੇਤਾਤਿ ਅਞ੍ਞੇਸਮ੍ਪਿ ਤਿਤ੍ਤਿਕਰੋ. ਪਚ੍ਚੇਕਸਮ੍ਬੁਦ੍ਧਾ ਯੇ ਚ ਤਥਾਗਤਸਾਵਕਾਤਿ ਏਤ੍ਥ ਪਚ੍ਚੇਕਬੁਦ੍ਧਾ ਨਵਹਿ ਲੋਕੁਤ੍ਤਰਧਮ੍ਮੇਹਿ ਸਯਂ ਤਿਤ੍ਤਾ ਪਰਿਪੁਣ੍ਣਾ. ਅਞ੍ਞੇ ਪਨ ਤਪ੍ਪੇਤੁਂ ਨ ਸਕ੍ਕੋਨ੍ਤਿ. ਤੇਸਞ੍ਹਿ ਧਮ੍ਮਕਥਾਯ ਅਭਿਸਮਯੋ ਨ ਹੋਤਿ. ਸਾਵਕਾਨਂ ਪਨ ਧਮ੍ਮਕਥਾਯ ਅਪਰਿਮਾਣਾਨਮ੍ਪਿ ਦੇਵਮਨੁਸ੍ਸਾਨਂ ਅਭਿਸਮਯੋ ਹੋਤਿ. ਏਵਂ ਸਨ੍ਤੇਪਿ ਯਸ੍ਮਾ ਪਨ ਤੇ ਧਮ੍ਮਂ ਦੇਸੇਨ੍ਤਾ ਨ ਅਤ੍ਤਨੋ ਵਚਨਂ ਕਤ੍ਵਾ ਕਥੇਨ੍ਤਿ, ਬੁਦ੍ਧਾਨਂ ਵਚਨਂ ਕਤ੍ਵਾ ਕਥੇਨ੍ਤਿ. ਸੋਤੁਂ ਨਿਸਿਨ੍ਨਪਰਿਸਾਪਿ ‘ਅਯਂ ਭਿਕ੍ਖੁ ਨ ਅਤ੍ਤਨਾ ਪਟਿਵਿਦ੍ਧਧਮ੍ਮਂ ਕਥੇਤਿ, ਬੁਦ੍ਧੇਹਿ ਪਟਿਵਿਦ੍ਧਧਮ੍ਮਂ ਕਥੇਤੀ’ਤਿ ਚਿਤ੍ਤੀਕਾਰਂ ਕਰੋਤਿ. ਇਤਿ ਸੋ ਚਿਤ੍ਤੀਕਾਰੋ ਬੁਦ੍ਧਾਨਂਯੇਵ ਹੋਤਿ. ਏਵਂ ਤਤ੍ਥ ਸਮ੍ਮਾਸਮ੍ਬੁਦ੍ਧੋਵ ਤਪ੍ਪੇਤਾ ਨਾਮ. ਯਥਾ ਹਿ ‘ਅਸੁਕਸ੍ਸ ਨਾਮ ਇਦਞ੍ਚਿਦਞ੍ਚ ਦੇਥਾ’ਤਿ ਰਞ੍ਞਾ ਆਣਤ੍ਤਾ ਕਿਞ੍ਚਾਪਿ ਆਨੇਤ੍ਵਾ ਦੇਨ੍ਤਿ, ਅਥ ਖੋ ਰਾਜਾਵ ਤਤ੍ਥ ਦਾਯਕੋ. ਯੇਹਿਪਿ ਲਦ੍ਧਂ ਹੋਤਿ, ਤੇ ‘ਰਞ੍ਞਾ ਅਮ੍ਹਾਕਂ ਠਾਨਨ੍ਤਰਂ ਦਿਨ੍ਨਂ, ਇਸ੍ਸਰਿਯਵਿਭਵੋ ਦਿਨ੍ਨੋ’ਤ੍ਵੇਵ ਗਣ੍ਹਨ੍ਤਿ, ਨ ਰਾਜਪੁਰਿਸੇਹੀਤਿ. ਏਵਂਸਮ੍ਪਦਮਿਦਂ ਵੇਦਿਤਬ੍ਬਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਦੁਕਨਿਦ੍ਦੇਸਵਣ੍ਣਨਾ.