੩. ਤਿਕਨਿਦ੍ਦੇਸਵਣ੍ਣਨਾ

੯੧. ਤਿਕਨਿਦ੍ਦੇਸੇ – ਦੁਸ੍ਸੀਲੋਤਿ ਨਿਸ੍ਸੀਲੋ. ਪਾਪਧਮ੍ਮੋਤਿ ਲਾਮਕਧਮ੍ਮੋ. ਸੀਲਵਿਪਤ੍ਤਿਯਾ ਵਾ ਦੁਸ੍ਸੀਲੋ, ਦਿਟ੍ਠਿਵਿਪਤ੍ਤਿਯਾ ਪਾਪਧਮ੍ਮੋ. ਕਾਯਵਚੀਸਂਵਰਭੇਦੇਨ ਦੁਸ੍ਸੀਲੋ, ਸੇਸਸਂਵਰਭੇਦੇਨ ਪਾਪਧਮ੍ਮੋ. ਅਸੁਦ੍ਧਪਯੋਗਤਾਯ ਦੁਸ੍ਸੀਲੋ, ਅਸੁਦ੍ਧਾਸਯਤਾਯ ਪਾਪਧਮ੍ਮੋ. ਕੁਸਲਸੀਲਵਿਰਹੇਨ ਦੁਸ੍ਸੀਲੋ; ਅਕੁਸਲਸੀਲਸਮਨ੍ਨਾਗਮੇਨ ਪਾਪਧਮ੍ਮੋ. ਅਸੁਚੀਤਿ ਅਸੁਚੀਹਿ ਕਾਯਕਮ੍ਮਾਦੀਹਿ ਸਮਨ੍ਨਾਗਤੋ. ਸਙ੍ਕਸ੍ਸਰਸਮਾਚਾਰੋਤਿ ਸਙ੍ਕਾਯ ਪਰੇਹਿ ਸਰਿਤਬ੍ਬਸਮਾਚਾਰੋ. ਕਿਞ੍ਚਿਦੇਵ ਅਸਾਰੁਪ੍ਪਂ ਦਿਸ੍ਵਾ ‘ਇਦਂ ਇਮਿਨਾ ਕਤਂ ਭਵਿਸ੍ਸਤੀ’ਤਿ ਏਵਂ ਪਰੇਹਿ ਆਸਙ੍ਕਨੀਯਸਮਾਚਾਰੋ, ਅਤ੍ਤਨੋਯੇਵ ਵਾ ਸਙ੍ਕਾਯ ਸਰਿਤਬ੍ਬਸਮਾਚਾਰੋ – ਸਾਸਙ੍ਕਸਮਾਚਾਰੋਤਿ ਅਤ੍ਥੋ. ਤਸ੍ਸ ਹਿ ਦਿਵਾਟ੍ਠਾਨਾਦੀਸੁ ਸਨ੍ਨਿਪਤਿਤ੍ਵਾ ਕਿਞ੍ਚਿਦੇਵ ਮਨ੍ਤਯਨ੍ਤੇ ਭਿਕ੍ਖੂ ਦਿਸ੍ਵਾ ‘ਇਮੇ ਏਕਤੋ ਹੁਤ੍ਵਾ ਮਨ੍ਤੇਨ੍ਤਿ, ਕਚ੍ਚਿ ਨੁ ਖੋ ਮਯਾ ਕਤਕਮ੍ਮਂ ਜਾਨਿਤ੍ਵਾ ਮਨ੍ਤੇਨ੍ਤੀ’ਤਿ ਏਵਂ ਸਾਸਙ੍ਕਸਮਾਚਾਰੋ ਹੋਤਿ.

ਪਟਿਚ੍ਛਨ੍ਨਕਮ੍ਮਨ੍ਤੋਤਿ ਪਟਿਚ੍ਛਾਦੇਤਬ੍ਬਯੁਤ੍ਤਕੇਨ ਪਾਪਕਮ੍ਮੇਨ ਸਮਨ੍ਨਾਗਤੋ. ਅਸ੍ਸਮਣੋ ਸਮਣਪਟਿਞ੍ਞੋਤਿ ਅਸ੍ਸਮਣੋ ਹੁਤ੍ਵਾਵ ਸਮਣਪਤਿਰੂਪਕਤਾਯ ‘ਸਮਣੋ ਅਹ’ਨ੍ਤਿ ਏਵਂ ਪਟਿਞ੍ਞੋ. ਅਬ੍ਰਹ੍ਮਚਾਰੀ ਬ੍ਰਹ੍ਮਚਾਰਿਪਟਿਞ੍ਞੋਤਿ ਅਞ੍ਞੇ ਬ੍ਰਹ੍ਮਚਾਰਿਨੋ ਸੁਨਿਵਤ੍ਥੇ ਸੁਪਾਰੁਤੇ ਸੁਮ੍ਭਕਪਤ੍ਤਧਰੇ ਗਾਮਨਿਗਮਜਨਪਦਰਾਜਧਾਨੀਸੁ ਪਿਣ੍ਡਾਯ ਚਰਿਤ੍ਵਾ ਜੀਵਿਕਂ ਕਪ੍ਪੇਨ੍ਤੇ ਦਿਸ੍ਵਾ ਸਯਮ੍ਪਿ ਤਾਦਿਸੇਨ ਆਕਾਰੇਨ ਤਥਾ ਪਟਿਪਜ੍ਜਨਤੋ ‘ਅਹਂ ਬ੍ਰਹ੍ਮਚਾਰੀ’ਤਿ ਪਟਿਞ੍ਞਂ ਦੇਨ੍ਤੋ ਵਿਯ ਹੋਤਿ. ‘ਅਹਂ ਭਿਕ੍ਖੂ’ਤਿ ਵਤ੍ਵਾ ਉਪੋਸਥਗ੍ਗਾਦੀਨਿ ਪਵਿਸਨ੍ਤੋ ਪਨ ਬ੍ਰਹ੍ਮਚਾਰਿਪਟਿਞ੍ਞੋ ਹੋਤਿਯੇਵ, ਤਥਾ ਸਙ੍ਘਿਕਂ ਲਾਭਂ ਗਣ੍ਹਨ੍ਤੋ. ਅਨ੍ਤੋਪੂਤੀਤਿ ਪੂਤਿਨਾ ਕਮ੍ਮੇਨ ਅਨ੍ਤੋ ਅਨੁਪਵਿਟ੍ਠੋ, ਨਿਗ੍ਗੁਣਤਾਯ ਵਾ ਗੁਣਸਾਰਵਿਰਹਿਤਤ੍ਤਾ ਅਨ੍ਤੋਪੂਤਿ. ਅਵਸ੍ਸੁਤੋਤਿ ਰਾਗਾਦੀਹਿ ਤਿਨ੍ਤੋ. ਕਸਮ੍ਬੁਜਾਤੋਤਿ ਸਞ੍ਜਾਤਰਾਗਾਦਿਕਚਵਰੋ. ਅਥ ਵਾ ਕਸਮ੍ਬੁ ਵੁਚ੍ਚਤਿ ਤਿਨ੍ਤਕੁਣਪਗਤਂ ਕਸਟਉਦਕਂ. ਇਮਸ੍ਮਿਞ੍ਚ ਸਾਸਨੇ ਦੁਸ੍ਸੀਲੋ ਨਾਮ ਜਿਗੁਚ੍ਛਨੀਯਤ੍ਤਾ ਤਿਨ੍ਤਕੁਣਪਕਸਟਉਦਕਸਦਿਸੋ. ਤਸ੍ਮਾ ਕਸਮ੍ਬੁ ਵਿਯ ਜਾਤੋਤਿ ਕਸਮ੍ਬੁਜਾਤੋ.

ਤਸ੍ਸ ਨ ਏਵਂ ਹੋਤੀਤਿ ਕਸ੍ਮਾ ਨ ਹੋਤਿ? ਯਤ੍ਥ ਪਤਿਟ੍ਠਿਤੇਨ ਸਕ੍ਕਾ ਭਵੇਯ੍ਯ ਅਰਹਤ੍ਤਂ ਲਦ੍ਧੁਂ, ਤਸ੍ਸਾ ਪਤਿਟ੍ਠਾਯ ਭਿਨ੍ਨਤ੍ਤਾ. ਯਥਾ ਹਿ ਚਣ੍ਡਾਲਕੁਮਾਰਕਸ੍ਸ ‘ਅਸੁਕੋ ਨਾਮ ਖਤ੍ਤਿਯਕੁਮਾਰੋ ਰਜ੍ਜੇ ਅਭਿਸਿਤ੍ਤੋ’ਤਿ ਸੁਤ੍ਵਾਪਿ, ਯਸ੍ਮਿਂ ਕੁਲੇ ਪਚ੍ਚਾਜਾਤਾ ਅਭਿਸੇਕਂ ਪਾਪੁਣਨ੍ਤਿ, ਤਸ੍ਮਿਂ ਕੁਲੇ ਅਪਚ੍ਚਾਜਾਤਤ੍ਤਾ ਨ ਏਵਂ ਹੋਤਿ – ‘ਕੁਦਾਸ੍ਸੁ ਨਾਮਾਹਮ੍ਪਿ ਸੋ ਖਤ੍ਤਿਯਕੁਮਾਰੋ ਵਿਯ ਅਭਿਸੇਕਂ ਪਾਪੁਣੇਯ੍ਯ’ਨ੍ਤਿ; ਏਵਮੇਵ ਦੁਸ੍ਸੀਲਸ੍ਸ ‘ਅਸੁਕੋ ਨਾਮ ਭਿਕ੍ਖੁ ਅਰਹਤ੍ਤਂ ਪਤ੍ਤੋ’ਤਿ ਸੁਤ੍ਵਾਪਿ, ਯਸ੍ਮਿਂ ਸੀਲੇ ਪਤਿਟ੍ਠਿਤੇਨ ਅਰਹਤ੍ਤਂ ਪਤ੍ਤਬ੍ਬਂ, ਤਸ੍ਸ ਅਭਾਵਤੋ ‘ਕੁਦਾਸ੍ਸੁ ਨਾਮਾਹਮ੍ਪਿ ਸੋ ਸੀਲਵਾ ਵਿਯ ਅਰਹਤ੍ਤਂ ਪਾਪੁਣੇਯ’ਨ੍ਤਿ ਨ ਏਵਂ ਹੋਤਿ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਅਰਹਤ੍ਤਾਸਾਯ ਅਭਾਵਾ ਨਿਰਾਸੋਤਿ ਵੁਚ੍ਚਤਿ.

੯੨. ਤਸ੍ਸ ਏਵਂ ਹੋਤੀਤਿ ਕਸ੍ਮਾ ਹੋਤਿ? ਯਸ੍ਮਿਂ ਪਤਿਟ੍ਠਿਤੇਨ ਸਕ੍ਕਾ ਭਵੇਯ੍ਯ ਅਰਹਤ੍ਤਂ ਪਾਪੁਣਿਤੁਂ, ਤਸ੍ਸਾ ਪਤਿਟ੍ਠਾਯ ਥਿਰਤ੍ਤਾ. ਯਥਾ ਹਿ ਸੁਜਾਤਸ੍ਸ ਖਤ੍ਤਿਯਕੁਮਾਰਸ੍ਸ ‘ਅਸੁਕੋ ਨਾਮ ਖਤ੍ਤਿਯਕੁਮਾਰੋ ਰਜ੍ਜੇ ਅਭਿਸਿਤ੍ਤੋ’ਤਿ ਸੁਤ੍ਵਾਵ ਯਸ੍ਮਿਂ ਕੁਲੇ ਪਚ੍ਚਾਜਾਤਾ ਅਭਿਸੇਕਂ ਪਾਪੁਣਨ੍ਤਿ, ਤਸ੍ਮਿਂ ਪਚ੍ਚਾਜਾਤਸ੍ਸ ਏਵਂ ਹੋਤਿ – ‘ਕੁਦਾਸ੍ਸੁ ਨਾਮਾਹਮ੍ਪਿ, ਸੋ ਕੁਮਾਰੋ ਵਿਯ ਅਭਿਸੇਕਂ ਪਾਪੁਣੇਯ੍ਯ’ਨ੍ਤਿ ਏਵਮੇਵ ਸੀਲਵਤੋ ‘ਅਸੁਕੋ ਨਾਮ ਭਿਕ੍ਖੁ ਅਰਹਤ੍ਤਂ ਪਤ੍ਤੋ’ਤਿ ਸੁਤ੍ਵਾਵ ਯਸ੍ਮਿਂ ਸੀਲੇ ਪਤਿਟ੍ਠਿਤੇਨ ਅਰਹਤ੍ਤਂ ਪਤ੍ਤਬ੍ਬਂ, ਤਸ੍ਸਾ ਪਤਿਟ੍ਠਾਯ ਥਿਰਤ੍ਤਾ – ‘ਕੁਦਾਸ੍ਸੁ ਨਾਮਾਹਮ੍ਪਿ ਸੋ ਭਿਕ੍ਖੁ ਵਿਯ ਅਰਹਤ੍ਤਂ ਪਾਪੁਣੇਯ੍ਯ’ਨ੍ਤਿ ਏਵਂ ਹੋਤਿ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਆਸਂਸੋ ਨਾਮ ਵੁਚ੍ਚਤਿ. ਸੋ ਹਿ ਅਰਹਤ੍ਤਂ ਆਸਂਸਤਿ ਪਤ੍ਥੇਤੀਤਿ ਆਸਂਸੋ.

੯੩. ਯਾ ਹਿਸ੍ਸ ਪੁਬ੍ਬੇ ਅਵਿਮੁਤ੍ਤਸ੍ਸਾਤਿ ਯਾ ਤਸ੍ਸ ਖੀਣਾਸਵਸ੍ਸ ਪੁਬ੍ਬੇ ਅਰਹਤ੍ਤਵਿਮੁਤ੍ਤਿਯਾ ਅਵਿਮੁਤ੍ਤਸ੍ਸ ਵਿਮੁਤ੍ਤਾਸਾ ਅਹੋਸਿ, ਸਾ ਪਟਿਪ੍ਪਸ੍ਸਦ੍ਧਾ, ਤਸ੍ਮਾ ਨ ਏਵਂ ਹੋਤਿ. ਯਥਾ ਹਿ ਅਭਿਸਿਤ੍ਤਸ੍ਸ ਖਤ੍ਤਿਯਸ੍ਸ ‘ਅਸੁਕੋ ਨਾਮ ਖਤ੍ਤਿਯਕੁਮਾਰੋ ਰਜ੍ਜੇ ਅਭਿਸਿਤ੍ਤੋ’ਤਿ ਸੁਤ੍ਵਾ ਏਕਸ੍ਸ ਰਞ੍ਞੋ ਦ੍ਵਿਨ੍ਨਂ ਰਜ੍ਜਾਭਿਸੇਕਾਨਂ ਦ੍ਵਿਨ੍ਨਂ ਸੇਤਚ੍ਛਤ੍ਤਾਨਂ ਅਭਾਵਾ ਨ ਏਵਂ ਹੋਤਿ – ‘‘ਕੁਦਾਸ੍ਸੁ ਨਾਮਾਹਮ੍ਪਿ ਸੋ ਕੁਮਾਰੋ ਵਿਯ ਅਭਿਸੇਕਂ ਪਾਪੁਣੇਯ੍ਯ’’ਨ੍ਤਿ; ਏਵਮੇਵ ਖੀਣਾਸਵਸ੍ਸ ‘ਅਸੁਕੋ ਨਾਮ ਭਿਕ੍ਖੁ ਅਰਹਤ੍ਤਂ ਪਤ੍ਤੋ’ਤਿ ਸੁਤ੍ਵਾ, ਦ੍ਵਿਨ੍ਨਂ ਅਰਹਤ੍ਤਾਨਂ ਅਭਾਵਾ – ‘ਕੁਦਾਸ੍ਸੁ ਨਾਮਾਹਮ੍ਪਿ ਸੋ ਭਿਕ੍ਖੁ ਵਿਯ ਅਰਹਤ੍ਤਂ ਪਾਪੁਣੇਯ੍ਯ’ਨ੍ਤਿ ਨ ਏਵਂ ਹੋਤਿ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਅਰਹਤ੍ਤਾਸਾਯ ਵਿਗਤਤ੍ਤਾ ਵਿਗਤਾਸੋਤਿ ਵੁਚ੍ਚਤਿ.

੯੪. ਗਿਲਾਨੂਪਮਨਿਦ੍ਦੇਸੇ – ਯਾਯ ਉਪਮਾਯ ਤੇ ਗਿਲਾਨੂਪਮਾਤਿ ਵੁਚ੍ਚਨ੍ਤਿ, ਤਂ ਤਾਵ ਉਪਮਂ ਦਸ੍ਸੇਤੁਂ ਤਯੋ ਗਿਲਾਨਾਤਿਆਦਿ ਵੁਤ੍ਤਂ. ਤਤ੍ਥ ਸਪ੍ਪਾਯਾਨੀਤਿ ਹਿਤਾਨਿ ਵੁਦ੍ਧਿਕਰਾਨਿ. ਪਤਿਰੂਪਨ੍ਤਿ ਅਨੁਚ੍ਛਵਿਕਂ. ਨੇਵ ਵੁਟ੍ਠਾਤਿ ਤਮ੍ਹਾ ਆਬਾਧਾਤਿ ਇਮਿਨਾ ਅਤੇਕਿਚ੍ਛੇਨ ਵਾਤਾਪਮਾਰਾਦਿਨਾ ਰੋਗੇਨ ਸਮਨ੍ਨਾਗਤੋ ਨਿਟ੍ਠਪ੍ਪਤ੍ਤੋ ਗਿਲਾਨੋ ਕਥਿਤੋ. ਵੁਟ੍ਠਾਤਿ ਤਮ੍ਹਾ ਆਬਾਧਾਤਿ ਇਮਿਨਾ ਖਿਪਿਤਕਚ੍ਛੁਤਿਣਪੁਪ੍ਫਕਜਰਾਦਿਪ੍ਪਭੇਦੋ ਅਪ੍ਪਮਤ੍ਤਕਾਬਾਧੋ ਕਥਿਤੋ.

ਲਭਨ੍ਤੋ ਸਪ੍ਪਾਯਾਨਿ ਭੋਜਨਾਨਿ ਨੋ ਅਲਭਨ੍ਤੋਤਿ ਇਮਿਨਾ ਪਨ ਯੇਸਂ ਪਟਿਜਗ੍ਗਨੇਨ ਫਾਸੁਕਂ ਹੋਤਿ, ਸਬ੍ਬੇਪਿ ਤੇ ਆਬਾਧਾ ਕਥਿਤਾ. ਏਤ੍ਥ ਚ ਪਤਿਰੂਪੋ ਉਪਟ੍ਠਾਕੋ ਨਾਮ ਗਿਲਾਨੁਪਟ੍ਠਾਕਅਙ੍ਗੇਹਿ ਸਮਨ੍ਨਾਗਤੋ ਪਣ੍ਡਿਤੋ ਦਕ੍ਖੋ ਅਨਲਸੋ ਵੇਦਿਤਬ੍ਬੋ.

ਗਿਲਾਨੁਪਟ੍ਠਾਕੋ ਅਨੁਞ੍ਞਾਤੋਤਿ ‘ਭਿਕ੍ਖੁਸਙ੍ਘੇਨ ਦਾਤਬ੍ਬੋ’ਤਿ ਅਨੁਞ੍ਞਾਤੋ. ਤਸ੍ਮਿਞ੍ਹਿ ਗਿਲਾਨੇ ਅਤ੍ਤਨੋ ਧਮ੍ਮਤਾਯ ਯਾਪੇਤੁਂ ਅਸਕ੍ਕੋਨ੍ਤੇ ਭਿਕ੍ਖੁਸਙ੍ਘੇਨ ਤਸ੍ਸ ਭਿਕ੍ਖੁਨੋ ‘ਏਕੋ ਭਿਕ੍ਖੁ ਚ ਸਾਮਣੇਰੋ ਚ ਇਮਂ ਪਟਿਜਗ੍ਗਥਾ’ਤਿ ਅਪਲੋਕੇਤ੍ਵਾ ਦਾਤਬ੍ਬਾ. ਯਾਵ ਪਨ ਤੇ ਤਂ ਪਟਿਜਗ੍ਗਨ੍ਤਿ, ਤਾਵ ਗਿਲਾਨਸ੍ਸ ਚ ਤੇਸਞ੍ਚ ਦ੍ਵਿਨ੍ਨਂ ਯੇਨਤ੍ਥੋ ਸਬ੍ਬਂ ਭਿਕ੍ਖੁਸਙ੍ਘਸ੍ਸੇਵ ਭਾਰੋ. ਅਞ੍ਞੇਪਿ ਗਿਲਾਨਾ ਉਪਟ੍ਠਾਤਬ੍ਬਾਤਿ ਇਤਰੇਪਿ ਦ੍ਵੇ ਗਿਲਾਨਾ ਉਪਟ੍ਠਾਤਬ੍ਬਾ. ਕਿਂ ਕਾਰਣਾ? ਯੋਪਿ ਹਿ ਨਿਟ੍ਠਪ੍ਪਤ੍ਤਗਿਲਾਨੋ, ਸੋ ਅਨੁਪਟ੍ਠਿਯਮਾਨੋ ‘ਸਚੇ ਮਂ ਪਟਿਜਗ੍ਗੇਯ੍ਯੁਂ, ਫਾਸੁਕਂ ਮੇ ਭਵੇਯ੍ਯ, ਨ ਖੋ ਪਨ ਮਂ ਪਟਿਜਗ੍ਗਨ੍ਤੀ’ਤਿ ਮਨੋਪਦੋਸਂ ਕਤ੍ਵਾ ਅਪਾਯੇ ਨਿਬ੍ਬਤ੍ਤੇਯ੍ਯ. ਪਟਿਜਗ੍ਗਿਯਮਾਨਸ੍ਸ ਪਨ ਏਵਂ ਹੋਤਿ – ‘ਭਿਕ੍ਖੁਸਙ੍ਘੇਨ ਯਂ ਕਤ੍ਤਬ੍ਬਂ ਤਂ ਸਬ੍ਬਂ ਕਤਂ, ਮਯ੍ਹਂ ਪਨ ਕਮ੍ਮਵਿਪਾਕੋ ਈਦਿਸੋ’ਤਿ ਸੋ ਭਿਕ੍ਖੁਸਙ੍ਘੇ ਮੇਤ੍ਤਂ ਪਚ੍ਚੁਪਟ੍ਠਪੇਤ੍ਵਾ ਸਗ੍ਗੇ ਨਿਬ੍ਬਤ੍ਤਤਿ. ਯੋ ਪਨ ਅਪ੍ਪਮਤ੍ਤਕੇਨ ਬ੍ਯਾਧਿਨਾ ਸਮਨ੍ਨਾਗਤੋ ਲਭਨ੍ਤੋਪਿ ਅਲਭਨ੍ਤੋਪਿ ਵੁਟ੍ਠਾਤਿਯੇਵ, ਤਸ੍ਸ ਵਿਨਾਪਿ ਭੇਸਜ੍ਜੇਨ ਵੂਪਸਮਨਕਬ੍ਯਾਧਿ ਭੇਸਜ੍ਜੇ ਕਤੇ ਖਿਪ੍ਪਤਰਂ ਵੂਪਸਮ੍ਮਤਿ. ਤਤੋ ਸੋ ਬੁਦ੍ਧਵਚਨਂ ਵਾ ਉਗ੍ਗਣ੍ਹਿਤੁਂ ਸਮਣਧਮ੍ਮਂ ਵਾ ਕਾਤੁਂ ਸਕ੍ਖਿਸ੍ਸਤਿ. ਇਮਿਨਾ ਕਾਰਣੇਨ ਅਞ੍ਞੇਪਿ ਗਿਲਾਨਾ ਉਪਟ੍ਠਾਤਬ੍ਬਾਤਿ ਵੁਤ੍ਤਂ.

ਨੇਵ ਓਕ੍ਕਮਤੀਤਿ ਨੇਵ ਪਵਿਸਤਿ. ਨਿਯਾਮਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਨ੍ਤਿ ਕੁਸਲੇਸੁ ਧਮ੍ਮੇਸੁ ਮਗ੍ਗਨਿਯਾਮਸਙ੍ਖਾਤਂ ਸਮ੍ਮਤ੍ਤਂ. ਇਮਿਨਾ ਪਦਪਰਮੋ ਪੁਗ੍ਗਲੋ ਕਥਿਤੋ. ਦੁਤਿਯਵਾਰੇਨ ਉਗ੍ਘਟਿਤਞ੍ਞੂ ਗਹਿਤੋ ਸਾਸਨੇ ਨਾਲ਼ਕਤ੍ਥੇਰਸਦਿਸੋ. ਬੁਦ੍ਧਨ੍ਤਰੇ ਏਕਵਾਰਂ ਪਚ੍ਚੇਕਬੁਦ੍ਧਾਨਂ ਸਨ੍ਤਿਕੇ ਓਵਾਦਂ ਲਭਿਤ੍ਵਾ ਪਟਿਵਿਦ੍ਧਪਚ੍ਚੇਕਬੋਧਿਞਾਣੋ ਚ. ਤਤਿਯਵਾਰੇਨ ਵਿਪਞ੍ਚਿਤਞ੍ਞੂ ਪੁਗ੍ਗਲੋ ਕਥਿਤੋ. ਨੇਯ੍ਯੋ ਪਨ ਤਨ੍ਨਿਸ੍ਸਿਤੋਵ ਹੋਤਿ.

ਧਮ੍ਮਦੇਸਨਾ ਅਨੁਞ੍ਞਾਤਾਤਿ ਮਾਸਸ੍ਸ ਅਟ੍ਠ ਵਾਰੇ ਧਮ੍ਮਕਥਾ ਅਨੁਞ੍ਞਾਤਾ. ਅਞ੍ਞੇਸਮ੍ਪਿ ਧਮ੍ਮੋ ਦੇਸੇਤਬ੍ਬੋਤਿ ਇਤਰੇਸਮ੍ਪਿ ਧਮ੍ਮੋ ਕਥੇਤਬ੍ਬੋ. ਕਿਂ ਕਾਰਣਾ? ਪਦਪਰਮਸ੍ਸ ਹਿ ਇਮਸ੍ਮਿਂ ਅਤ੍ਤਭਾਵੇ ਧਮ੍ਮਂ ਪਟਿਵਿਜ੍ਝਿਤੁਂ ਅਸਕ੍ਕੋਨ੍ਤਸ੍ਸਾਪਿ ਅਨਾਗਤੇ ਪਚ੍ਚਯੋ ਭਵਿਸ੍ਸਤਿ. ਯੋ ਪਨ ਤਥਾਗਤਸ੍ਸ ਰੂਪਦਸ੍ਸਨਂ ਲਭਨ੍ਤੋਪਿ ਅਲਭਨ੍ਤੋਪਿ ਧਮ੍ਮਵਿਨਯਞ੍ਚ ਸਵਨਾਯ ਲਭਨ੍ਤੋਪਿ ਅਲਭਨ੍ਤੋਪਿ ਧਮ੍ਮਂ ਅਭਿਸਮੇਤਿ; ਸੋ ਅਲਭਨ੍ਤੋ ਨ ਤਾਵ ਅਭਿਸਮੇਤਿ, ਲਭਨ੍ਤੋ ਪਨ ਖਿਪ੍ਪਮੇਵ ਅਭਿਸਮੇਸ੍ਸਤੀਤਿ ਇਮਿਨਾ ਕਾਰਣੇਨ ਤੇਸਂ ਧਮ੍ਮੋ ਦੇਸੇਤਬ੍ਬੋ. ਤਤਿਯਸ੍ਸ ਪਨ ਪੁਨਪ੍ਪੁਨਂ ਦੇਸੇਤਬ੍ਬੋਵ. ਕਾਯਸਕ੍ਖਿਦਿਟ੍ਠਪ੍ਪਤ੍ਤਸਦ੍ਧਾਵਿਮੁਤ੍ਤਾ ਹੇਟ੍ਠਾ ਕਥਿਤਾਯੇਵ.

੯੮. ਗੂਥਭਾਣੀਆਦੀਸੁ – ਸਭਗ੍ਗਤੋਤਿ ਸਭਾਯਂ ਠਿਤੋ. ਪਰਿਸਗ੍ਗਤੋਤਿ ਗਾਮਪਰਿਸਾਯ ਠਿਤੋ. ਞਾਤਿਮਜ੍ਝਗਤੋਤਿ ਦਾਯਾਦਾਨਂ ਮਜ੍ਝੇ ਠਿਤੋ. ਪੂਗਮਜ੍ਝਗਤੋਤਿ ਸੇਣੀਨਂ ਮਜ੍ਝੇ ਠਿਤੋ. ਰਾਜਕੁਲਮਜ੍ਝਗਤੋਤਿ ਰਾਜਕੁਲਸ੍ਸ ਮਜ੍ਝੇ ਮਹਾਵਿਨਿਚ੍ਛਯੇ ਠਿਤੋ. ਅਭਿਨੀਤੋਤਿ ਪੁਚ੍ਛਨਤ੍ਥਾਯ ਨੀਤੋ. ਸਕ੍ਖਿਪੁਟ੍ਠੋਤਿ ਸਕ੍ਖਿਂ ਕਤ੍ਵਾ ਪੁਚ੍ਛਿਤੋ. ਏਹਮ੍ਭੋ ਪੁਰਿਸਾਤਿ ਆਲਪਨਮੇਤਂ. ਅਤ੍ਤਹੇਤੁ ਵਾ ਪਰਹੇਤੁ ਵਾਤਿ ਅਤ੍ਤਨੋ ਵਾ ਪਰਸ੍ਸ ਵਾ ਹਤ੍ਥਪਾਦਾਦਿਹੇਤੁ ਵਾ ਧਨਹੇਤੁ ਵਾ. ਆਮਿਸਕਿਞ੍ਚਿਕ੍ਖਹੇਤੁ ਵਾਤਿ ਏਤ੍ਥ ਆਮਿਸਨ੍ਤਿ ਲਾਭੋ ਅਧਿਪ੍ਪੇਤੋ. ਕਿਞ੍ਚਿਕ੍ਖਨ੍ਤਿ ਯਂ ਵਾ ਤਂ ਵਾ ਅਪ੍ਪਮਤ੍ਤਕਂ. ਅਨ੍ਤਮਸੋ ਤਿਤ੍ਤਿਰਵਟ੍ਟਕਸਪ੍ਪਿਪਿਣ੍ਡਨਵਨੀਤਪਿਣ੍ਡਾਦਿਅਪ੍ਪਮਤ੍ਤਕਸ੍ਸਾਪਿ ਲਞ੍ਜਸ੍ਸ ਹੇਤੂਤਿ ਅਤ੍ਥੋ. ਸਮ੍ਪਜਾਨਮੁਸਾ ਭਾਸਿਤਾ ਹੋਤੀਤਿ ਜਾਨਨ੍ਤੋਯੇਵ ਮੁਸਾਵਾਦਂ ਕਤ੍ਤਾ ਹੋਤਿ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਗੂਥਸਦਿਸਵਚਨਤ੍ਤਾ ਗੂਥਭਾਣੀਤਿ ਵੁਚ੍ਚਤਿ. ਯਥਾ ਹਿ ਗੂਥਂ ਨਾਮ ਮਹਾਜਨਸ੍ਸ ਅਨਿਟ੍ਠਂ ਹੋਤਿ ਅਕਨ੍ਤਂ; ਏਵਮੇਵ ਇਮਸ੍ਸ ਪੁਗ੍ਗਲਸ੍ਸ ਵਚਨਂ ਦੇਵਮਨੁਸ੍ਸਾਨਂ ਅਨਿਟ੍ਠਂ ਹੋਤਿ ਅਕਨ੍ਤਂ.

੯੯. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਪੁਪ੍ਫਸਦਿਸਵਚਨਤ੍ਤਾ ਪੁਪ੍ਫਭਾਣੀਤਿ ਵੁਚ੍ਚਤਿ. ਯਥਾ ਹਿ ਫੁਲ੍ਲਾਨਿ ਵਸ੍ਸਿਕਾਨਿ ਵਾ ਅਧਿਮੁਤ੍ਤਕਾਨਿ ਵਾ ਮਹਾਜਨਸ੍ਸ ਇਟ੍ਠਾਨਿ ਕਨ੍ਤਾਨਿ ਹੋਨ੍ਤਿ; ਏਵਮੇਵ ਇਮਸ੍ਸ ਪੁਗ੍ਗਲਸ੍ਸ ਵਚਨਂ ਦੇਵਮਨੁਸ੍ਸਾਨਂ ਇਟ੍ਠਂ ਹੋਤਿ ਕਨ੍ਤਂ.

੧੦੦. ਨੇਲਾਤਿ ਏਲਂ ਵੁਚ੍ਚਤਿ ਦੋਸੋ. ਨਾਸ੍ਸਾ ਏਲਨ੍ਤਿ ਨੇਲਾ. ਨਿਦ੍ਦੋਸਾਤਿ ਅਤ੍ਥੋ, ‘‘ਨੇਲਙ੍ਗੋ ਸੇਤਪਚ੍ਛਾਦੋ’’ਤਿ (ਉਦਾ. ੬੫) ਏਤ੍ਥ ਵੁਤ੍ਤਨੇਲਂ ਵਿਯ. ਕਣ੍ਣਸੁਖਾਤਿ ਬ੍ਯਞ੍ਜਨਮਧੁਰਤਾਯ ਕਣ੍ਣਾਨਂ ਸੁਖਾ. ਸੂਚਿਵਿਜ੍ਝਨਂ ਵਿਯ ਕਣ੍ਣਸੂਲਂ ਨ ਜਨੇਤਿ. ਅਤ੍ਥਮਧੁਰਤਾਯ ਸਕਲਸਰੀਰੇ ਕੋਪਂ ਅਜਨੇਤ੍ਵਾ ਪੇਮਂ ਜਨੇਤੀਤਿ ਪੇਮਨੀਯਾ. ਹਦਯਂ ਗਚ੍ਛਤਿ ਅਪ੍ਪਟਿਹਞ੍ਞਮਾਨਾ ਸੁਖੇਨ ਚਿਤ੍ਤਂ ਪਵਿਸਤੀਤਿ ਹਦਯਙ੍ਗਮਾ. ਗੁਣਪਰਿਪੁਣ੍ਣਤਾਯ ਪੁਰੇ ਭਵਾਤਿ ਪੋਰੀ. ਪੁਰੇ ਸਂਵਡ੍ਢਨਾਰੀ ਵਿਯ ਸੁਕੁਮਾਰਾਤਿਪਿ ਪੋਰੀ. ਪੁਰਸ੍ਸ ਏਸਾਤਿਪਿ ਪੋਰੀ. ਨਗਰਵਾਸੀਨਂ ਕਥਾਤਿ ਅਤ੍ਥੋ. ਨਗਰਵਾਸਿਨੋ ਹਿ ਯੁਤ੍ਤਕਥਾ ਹੋਨ੍ਤਿ. ਪਿਤਿਮਤ੍ਤਂ ਪਿਤਾਤਿ, ਮਾਤਿਮਤ੍ਤਂ ਮਾਤਾਤਿ, ਭਾਤਿਮਤ੍ਤਂ ਭਾਤਾਤਿ ਵਦਨ੍ਤਿ. ਏਵਰੂਪੀ ਕਥਾ ਬਹੁਨੋ ਜਨਸ੍ਸ ਕਨ੍ਤਾ ਹੋਤੀਤਿ ਬਹੁਜਨਕਨ੍ਤਾ. ਬਹੁਜਨਸ੍ਸ ਕਨ੍ਤਭਾਵੇਨੇਵ ਬਹੁਨੋ ਜਨਸ੍ਸ ਮਨਾਪਾ ਚਿਤ੍ਤਵੁਦ੍ਧਿਕਰਾਤਿ ਬਹੁਜਨਮਨਾਪਾ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਮਧੁਭਾਣੀਤਿ ਵੁਚ੍ਚਤਿ. ਮੁਦੁਭਾਣੀਤਿਪਿ ਪਾਠੋ. ਉਭਯਤ੍ਥਾਪਿ ਮਧੁਰਵਚਨੋਤਿ ਅਤ੍ਥੋ. ਯਥਾ ਹਿ ਚਤੁਮਧੁਰਂ ਨਾਮ ਮਧੁਰਂ ਪਣੀਤਂ; ਏਵਮੇਵ ਇਮਸ੍ਸ ਪੁਗ੍ਗਲਸ੍ਸ ਵਚਨਂ ਦੇਵਮਨੁਸ੍ਸਾਨਂ ਮਧੁਰਂ ਹੋਤਿ.

੧੦੧. ਅਰੁਕੂਪਮਚਿਤ੍ਤਾਦੀਸੁ – ਅਭਿਸਜ੍ਜਤੀਤਿ ਲਗ੍ਗਤਿ. ਕੁਪ੍ਪਤੀਤਿ ਕੋਪਵਸੇਨ ਕੁਪ੍ਪਤਿ. ਬ੍ਯਾਪਜ੍ਜਤੀਤਿ ਪਕਤਿਭਾਵਂ ਪਜਹਤਿ, ਪੂਤਿਕੋ ਹੋਤਿ. ਪਤਿਤ੍ਥੀਯਤੀਤਿ ਥਿਨਭਾਵਂ ਥਦ੍ਧਭਾਵਞ੍ਚ ਆਪਜ੍ਜਤਿ. ਕੋਪਨ੍ਤਿ ਦੁਬ੍ਬਲਕੋਧਂ. ਦੋਸਨ੍ਤਿ ਦੁਸ੍ਸਨਵਸੇਨ ਤਤੋ ਬਲਵਤਰਂ. ਅਪ੍ਪਚ੍ਚਯਨ੍ਤਿ ਅਤੁਟ੍ਠਾਕਾਰਂ ਦੋਮਨਸ੍ਸਂ. ਦੁਟ੍ਠਾਰੁਕੋਤਿ ਪੁਰਾਣਵਣੋ. ਕਟ੍ਠੇਨਾਤਿ ਦਣ੍ਡਕਕੋਟਿਯਾ. ਕਠਲਾਯਾਤਿ ਕਪਾਲੇਨ. ਆਸਵਂ ਦੇਤੀਤਿ ਅਪਰਾਪਰਂ ਸਵਤਿ. ਪੁਰਾਣਵਣੋ ਹਿ ਅਤ੍ਤਨੋ ਧਮ੍ਮਤਾਯ ਏਵ ਪੁਬ੍ਬਂ ਲੋਹਿਤਂ ਯੂਸਨ੍ਤਿ ਇਮਾਨਿ ਤੀਣਿ ਸਵਤਿ, ਘਟ੍ਟਿਤੋ ਪਨ ਤਾਨਿ ਅਧਿਕਤਰਂ ਸਵਤਿ. ਏਵਮੇਵਂ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ, ਦੁਟ੍ਠਾਰੁਕੋ ਵਿਯ ਹਿ ਕੋਧਨੋ ਪੁਗ੍ਗਲੋ. ਤਸ੍ਸ ਅਤ੍ਤਨੋ ਧਮ੍ਮਤਾਯ ਸਵਨਂ ਵਿਯ ਕੋਧਨਸ੍ਸਪਿ ਅਤ੍ਤਨੋ ਧਮ੍ਮਤਾਯ ਉਦ੍ਧੁਮਾਤਕਸ੍ਸ ਵਿਯ ਚਣ੍ਡਿਕਤਸ੍ਸ ਚਰਣਂ. ਕਟ੍ਠੇਨ ਵਾ ਕਠਲਾਯ ਵਾ ਘਟ੍ਟਨਂ ਵਿਯ ਅਪ੍ਪਮਤ੍ਤਕਮ੍ਪਿ ਵਚਨਂ ਭਿਯ੍ਯੋਸੋ ਮਤ੍ਤਾਯ ਸਵਨਂ ਵਿਯ ‘ਮਾਦਿਸਂ ਨਾਮ ਏਸ ਏਵਂ ਵਦਤੀ’ਤਿ ਭਿਯ੍ਯੋਸੋ ਮਤ੍ਤਾਯ ਉਦ੍ਧੁਮਾਯਨਭਾਵੋ ਦਟ੍ਠਬ੍ਬੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਅਰੁਕੂਪਮਚਿਤ੍ਤੋਤਿ ਵੁਚ੍ਚਤਿ. ਪੁਰਾਣਵਣਸਦਿਸਚਿਤ੍ਤੋਤਿ ਅਤ੍ਥੋ.

੧੦੨. ਰਤ੍ਤਨ੍ਧਕਾਰਤਿਮਿਸਾਯਾਤਿ ਰਤ੍ਤਿਂ ਚਕ੍ਖੁਵਿਞ੍ਞਾਣੁਪ੍ਪਤ੍ਤਿਨਿਵਾਰਣੇਨ ਅਨ੍ਧਭਾਵਕਰਣੇ ਬਹਲਤਮੇ. ਵਿਜ੍ਜਨ੍ਤਰਿਕਾਯਾਤਿ ਵਿਜ੍ਜੁਪ੍ਪਤ੍ਤਿਕ੍ਖਣੇ. ਇਧਾਪਿ ਇਦਂ ਓਪਮ੍ਮਸਂਸਨ੍ਦਨਂ – ਚਕ੍ਖੁਮਾ ਪੁਰਿਸੋ ਵਿਯ ਹਿ ਯੋਗਾਵਚਰੋ ਦਟ੍ਠਬ੍ਬੋ. ਅਨ੍ਧਕਾਰਂ ਵਿਯ ਸੋਤਾਪਤ੍ਤਿਮਗ੍ਗਵਜ੍ਝਾ ਕਿਲੇਸਾ. ਵਿਜ੍ਜੁਸਞ੍ਚਰਣਂ ਵਿਯ ਸੋਤਾਪਤ੍ਤਿਮਗ੍ਗਞਾਣਸ੍ਸ ਉਪ੍ਪਤ੍ਤਿਕਾਲੋ. ਵਿਜ੍ਜਨ੍ਤਰਿਕਾਯ ਚਕ੍ਖੁਮਤੋ ਪੁਰਿਸਸ੍ਸ ਸਾਮਨ੍ਤਾ ਰੂਪਦਸ੍ਸਨਂ ਵਿਯ ਸੋਤਾਪਤ੍ਤਿਮਗ੍ਗਕ੍ਖਣੇ ਨਿਬ੍ਬਾਨਦਸ੍ਸਨਂ. ਪੁਨ ਅਨ੍ਧਕਾਰਾਵਤ੍ਥਰਣਂ ਵਿਯ ਸਕਦਾਗਾਮਿਮਗ੍ਗਵਜ੍ਝਾ ਕਿਲੇਸਾ. ਪੁਨ ਵਿਜ੍ਜੁਸਞ੍ਚਰਣਂ ਵਿਯ ਸਕਦਾਗਾਮਿਮਗ੍ਗਞਾਣਸ੍ਸ ਉਪ੍ਪਾਦੋ. ਵਿਜ੍ਜਨ੍ਤਰਿਕਾਯ ਚਕ੍ਖੁਮਤੋ ਪੁਰਿਸਸ੍ਸ ਸਾਮਨ੍ਤਾ ਰੂਪਦਸ੍ਸਨਂ ਵਿਯ ਸਕਦਾਗਾਮਿਮਗ੍ਗਕ੍ਖਣੇ ਨਿਬ੍ਬਾਨਦਸ੍ਸਨਂ. ਪੁਨ ਅਨ੍ਧਕਾਰਾਵਤ੍ਥਰਣਂ ਵਿਯ ਅਨਾਗਾਮਿਮਗ੍ਗਵਜ੍ਝਾ ਕਿਲੇਸਾ. ਪੁਨ ਵਿਜ੍ਜੁਸਞ੍ਚਰਣਂ ਵਿਯ ਅਨਾਗਾਮਿਮਗ੍ਗਞਾਣਸ੍ਸ ਉਪ੍ਪਾਦੋ. ਵਿਜ੍ਜਨ੍ਤਰਿਕਾਯ ਚਕ੍ਖੁਮਤੋ ਪੁਰਿਸਸ੍ਸ ਸਾਮਨ੍ਤਾ ਰੂਪਦਸ੍ਸਨਂ ਵਿਯ ਅਨਾਗਾਮਿਮਗ੍ਗਕ੍ਖਣੇ ਨਿਬ੍ਬਾਨਦਸ੍ਸਨਂ ਵੇਦਿਤਬ੍ਬਂ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਵਿਜ੍ਜੂਪਮਚਿਤ੍ਤੋਤਿ ਵੁਚ੍ਚਤਿ. ਇਤ੍ਤਰਕਾਲੋਭਾਸੇਨ ਵਿਜ੍ਜੁਸਦਿਸਚਿਤ੍ਤੋਤਿ ਅਤ੍ਥੋ.

੧੦੩. ਵਜਿਰੂਪਮਚਿਤ੍ਤਤਾਯਪਿ ਇਦਂ ਓਪਮ੍ਮਸਂਸਨ੍ਦਨਂ – ਵਜਿਰਂ ਵਿਯ ਹਿ ਅਰਹਤ੍ਤਮਗ੍ਗਞਾਣਂ ਦਟ੍ਠਬ੍ਬਂ. ਮਣਿਗਣ੍ਠਿਪਾਸਾਣਗਣ੍ਠਿ ਵਿਯ ਅਰਹਤ੍ਤਮਗ੍ਗਵਜ੍ਝਾ ਕਿਲੇਸਾ. ਵਜਿਰਸ੍ਸ ਮਣਿਗਣ੍ਠਿਂ ਵਾ ਪਾਸਾਣਗਣ੍ਠਿਂ ਵਾ ਵਿਨਿਵਿਜ੍ਝਿਤ੍ਵਾ ਅਗਮਨਭਾਵਸ੍ਸ ਨਤ੍ਥਿਭਾਵੋ ਵਿਯ ਅਰਹਤ੍ਤਮਗ੍ਗਞਾਣੇਨ ਅਚ੍ਛੇਜ੍ਜਾਨਂ ਕਿਲੇਸਾਨਂ ਨਤ੍ਥਿਭਾਵੋ. ਵਜਿਰੇਨ ਨਿਬ੍ਬਿਦ੍ਧਵੇਧਸ੍ਸ ਪੁਨ ਅਪਟਿਪੂਰਣਂ ਵਿਯ ਅਰਹਤ੍ਤਮਗ੍ਗੇਨ ਛਿਨ੍ਨਾਨਂ ਕਿਲੇਸਾਨਂ ਪੁਨ ਅਨੁਪ੍ਪਾਦੋ ਦਟ੍ਠਬ੍ਬੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਵਜਿਰੂਪਮਚਿਤ੍ਤੋਤਿ ਵੁਚ੍ਚਤਿ. ਕਿਲੇਸਾਨਂ ਮੂਲਘਾਤਕਰਣਸਮਤ੍ਥਤਾਯ ਵਜਿਰੇਨ ਸਦਿਸਚਿਤ੍ਤੋਤਿ ਅਤ੍ਥੋ.

੧੦੪. ਅਨ੍ਧਾਦੀਸੁ ਤਥਾਰੂਪਂ ਚਕ੍ਖੁ ਨ ਹੋਤੀਤਿ ਤਥਾਜਾਤਿਕਂ ਤਥਾਸਭਾਵਂ ਪਞ੍ਞਾਚਕ੍ਖੁ ਨ ਹੋਤਿ. ਫਾਤਿਂ ਕਰੇਯ੍ਯਾਤਿ ਫੀਤਂ ਵਡ੍ਢਿਤਂ ਕਰੇਯ੍ਯ. ਸਾਵਜ੍ਜਾਨਵਜ੍ਜੇਤਿ ਸਦੋਸਨਿਦ੍ਦੋਸੇ. ਹੀਨਪ੍ਪਣੀਤੇਤਿ ਅਧਮੁਤ੍ਤਮੇ. ਕਣ੍ਹਸੁਕ੍ਕਸਪ੍ਪਟਿਭਾਗੇਤਿ ਕਣ੍ਹਸੁਕ੍ਕਾਯੇਵ ਅਞ੍ਞਮਞ੍ਞਪਟਿਬਾਹਨਤੋ ਪਟਿਪਕ੍ਖਵਸੇਨ ਸਪ੍ਪਟਿਭਾਗਾਤਿ ਵੁਚ੍ਚਨ੍ਤਿ. ਅਯਂ ਪਨੇਤ੍ਥ ਸਙ੍ਖੇਪੋ – ਕੁਸਲੇ ਧਮ੍ਮੇ ‘ਕੁਸਲਾ ਧਮ੍ਮਾ’ਤਿ ਯੇਨ ਪਞ੍ਞਾਚਕ੍ਖੁਨਾ ਜਾਨੇਯ੍ਯ, ਅਕੁਸਲੇ ਧਮ੍ਮੇ ‘ਅਕੁਸਲਾ ਧਮ੍ਮਾ’ਤਿ, ਸਾਵਜ੍ਜਾਦੀਸੁਪਿ ਏਸੇਵ ਨਯੋ. ਕਣ੍ਹਸੁਕ੍ਕਸਪ੍ਪਟਿਭਾਗੇਸੁ ਪਨ ਕਣ੍ਹਧਮ੍ਮੇ ‘ਸੁਕ੍ਕਸੁਪ੍ਪਟਿਭਾਗਾ’ਤਿ, ਸੁਕ੍ਕਧਮ੍ਮੇ ‘ਕਣ੍ਹਸਪ੍ਪਟਿਭਾਗਾ’ਤਿ ਯੇਨ ਪਞ੍ਞਾਚਕ੍ਖੁਨਾ ਜਾਨੇਯ੍ਯ. ਤਥਾਰੂਪਮ੍ਪਿਸ੍ਸ ਚਕ੍ਖੁ ਨ ਹੋਤੀਤਿ ਇਮਿਨਾ ਨਯੇਨ ਸੇਸਟ੍ਠਾਨੇਸੁਪਿ ਅਤ੍ਥੋ ਵੇਦਿਤਬ੍ਬੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਦਿਟ੍ਠਧਮ੍ਮਿਕਭੋਗਸਂਹਰਣਪਞ੍ਞਾਚਕ੍ਖੁਨੋ ਚ ਸਮ੍ਪਰਾਯਿਕਤ੍ਥਸੋਧਨਪਞ੍ਞਾਚਕ੍ਖੁਨੋ ਚ ਅਭਾਵਾ ਅਨ੍ਧੋਤਿ ਵੁਚ੍ਚਤਿ. ਦੁਤਿਯੋ ਦਿਟ੍ਠਧਮ੍ਮਿਕਭੋਗਸਂਹਰਣਪਞ੍ਞਾਚਕ੍ਖੁਨੋ ਭਾਵਾ, ਸਮ੍ਪਰਾਯਿਕਤ੍ਥਸੋਧਨਪਞ੍ਞਾਚਕ੍ਖੁਨੋ ਪਨ ਅਭਾਵਾ ਏਕਚਕ੍ਖੂਤਿ ਵੁਚ੍ਚਤਿ. ਤਤਿਯੋ ਦ੍ਵਿਨ੍ਨਮ੍ਪਿ ਭਾਵਾ ਦ੍ਵਿਚਕ੍ਖੂਤਿ ਵੁਚ੍ਚਤਿ.

੧੦੭. ਅਵਕੁਜ੍ਜਪਞ੍ਞਾਦੀਸੁ ਧਮ੍ਮਂ ਦੇਸੇਨ੍ਤੀਤਿ ਉਪਾਸਕੋ ਧਮ੍ਮਸ੍ਸਵਨਤ੍ਥਾਯ ਆਗਤੋਤਿ ਅਤ੍ਤਨੋ ਕਮ੍ਮਂ ਪਹਾਯ ਧਮ੍ਮਂ ਦੇਸੇਨ੍ਤਿ. ਆਦਿਕਲ੍ਯਾਣਨ੍ਤਿ ਆਦਿਮ੍ਹਿ ਕਲ੍ਯਾਣਂ ਭਦ੍ਦਕਂ ਅਨਵਜ੍ਜਂ ਨਿਦ੍ਦੋਸਂ ਕਤ੍ਵਾ ਦੇਸੇਨ੍ਤਿ. ਸੇਸਪਦੇਸੁਪਿ ਏਸੇਵ ਨਯੋ. ਏਤ੍ਥ ਪਨ ਆਦੀਤਿ ਪੁਬ੍ਬਪਟ੍ਠਪਨਾ. ਮਜ੍ਝਨ੍ਤਿ ਕਥਾਵੇਮਜ੍ਝਂ. ਪਰਿਯੋਸਾਨਨ੍ਤਿ ਸਨ੍ਨਿਟ੍ਠਾਨਂ. ਇਤਿਸ੍ਸ ਧਮ੍ਮਂ ਕਥੇਨ੍ਤਾ ਪੁਬ੍ਬਪਟ੍ਠਪਨੇਪਿ ਕਲ੍ਯਾਣਂ ਭਦ੍ਦਕਂ ਅਨਵਜ੍ਜਮੇਵ ਕਤ੍ਵਾ ਕਥੇਨ੍ਤਿ, ਵੇਮਜ੍ਝੇਪਿ, ਪਰਿਯੋਸਾਨੇਪਿ. ਏਤ੍ਥ ਚ ਅਤ੍ਥਿ ਦੇਸਨਾਯ ਆਦਿਮਜ੍ਝਪਰਿਯੋਸਾਨਾਨਿ, ਅਤ੍ਥਿ ਸਾਸਨਸ੍ਸ. ਤਤ੍ਥ ਦੇਸਨਾਯ ਤਾਵ – ਚਤੁਪ੍ਪਦਿਕਗਾਥਾਯ ਪਠਮਪਦਂ ਆਦਿ, ਦ੍ਵੇ ਪਦਾਨਿ ਮਜ੍ਝਂ, ਅਵਸਾਨਪਦਂ ਪਰਿਯੋਸਾਨਂ. ਏਕਾਨੁਸਨ੍ਧਿਕਸੁਤ੍ਤਸ੍ਸ – ਨਿਦਾਨਂ ਆਦਿ, ਅਨੁਸਨ੍ਧਿ ਮਜ੍ਝਂ, ਇਦਮਵੋਚਾਤਿ ਅਪ੍ਪਨਾ ਪਰਿਯੋਸਾਨਂ. ਅਨੇਕਾਨੁਸਨ੍ਧਿਕਸ੍ਸ – ਪਠਮੋ ਅਨੁਸਨ੍ਧਿ ਆਦਿ, ਤਤੋ ਪਰਂ ਏਕੋ ਵਾ ਅਨੇਕਾ ਵਾ ਮਜ੍ਝਂ, ਪਚ੍ਛਿਮੋ ਪਰਿਯੋਸਾਨਂ. ਅਯਂ ਤਾਵ ਦੇਸਨਾਯ ਨਯੋ.

ਸਾਸਨਸ੍ਸ ਪਨ ਸੀਲਂ ਆਦਿ, ਸਮਾਧਿ ਮਜ੍ਝਂ, ਵਿਪਸ੍ਸਨਾ ਪਰਿਯੋਸਾਨਂ. ਸਮਾਧਿ ਵਾ ਆਦਿ, ਵਿਪਸ੍ਸਨਾ ਮਜ੍ਝਂ, ਮਗ੍ਗੋ ਪਰਿਯੋਸਾਨਂ. ਵਿਪਸ੍ਸਨਾ ਵਾ ਆਦਿ, ਮਗ੍ਗੋ ਮਜ੍ਝਂ, ਫਲਂ ਪਰਿਯੋਸਾਨਂ. ਮਗ੍ਗੋ ਵਾ ਆਦਿ, ਫਲਂ ਮਜ੍ਝਂ, ਨਿਬ੍ਬਾਨਂ ਪਰਿਯੋਸਾਨਂ. ਦ੍ਵੇ ਦ੍ਵੇ ਵਾ ਕਰਿਯਮਾਨੇ ਸੀਲਸਮਾਧਯੋ ਆਦਿ, ਵਿਪਸ੍ਸਨਾਮਗ੍ਗਾ ਮਜ੍ਝਂ, ਫਲਨਿਬ੍ਬਾਨਾਨਿ ਪਰਿਯੋਸਾਨਂ. ਸਾਤ੍ਥਨ੍ਤਿ ਸਾਤ੍ਥਕਂ ਕਤ੍ਵਾ ਦੇਸੇਨ੍ਤਿ. ਸਬ੍ਯਞ੍ਜਨਨ੍ਤਿ ਅਕ੍ਖਰਪਾਰਿਪੂਰਿਂ ਕਤ੍ਵਾ ਦੇਸੇਨ੍ਤਿ. ਕੇਵਲਪਰਿਪੁਣ੍ਣਨ੍ਤਿ ਸਕਲਪਰਿਪੁਣ੍ਣਂ ਅਨੂਨਂ ਕਤ੍ਵਾ ਦੇਸੇਨ੍ਤਿ. ਪਰਿਸੁਦ੍ਧਨ੍ਤਿ ਪਰਿਸੁਦ੍ਧਂ ਨਿਜ੍ਜਟਂ ਨਿਗ੍ਗਣ੍ਠਿਂ ਕਤ੍ਵਾ ਦੇਸੇਨ੍ਤਿ. ਬ੍ਰਹ੍ਮਚਰਿਯਂ ਪਕਾਸੇਨ੍ਤੀਤਿ ਏਵਂ ਦੇਸੇਨ੍ਤਾ ਚ ਸੇਟ੍ਠਚਰਿਯਭੂਤਂ ਸਿਕ੍ਖਤ੍ਤਯਸਙ੍ਗਹਿਤਂ ਅਰਿਯਂ ਅਟ੍ਠਙ੍ਗਿਕਂ ਮਗ੍ਗਂ ਪਕਾਸੇਨ੍ਤਿ. ਨੇਵ ਆਦਿਂ ਮਨਸਿ ਕਰੋਤੀਤਿ ਨੇਵ ਪੁਬ੍ਬਪਟ੍ਠਪਨਂ ਮਨਸਿ ਕਰੋਤਿ. ਕੁਮ੍ਭੋਤਿ ਘਟੋ. ਨਿਕ੍ਕੁਜ੍ਜੋਤਿ ਅਧੋਮੁਖੋ ਠਪਿਤੋ. ਏਵਮੇਵਨ੍ਤਿ ਏਤ੍ਥ ਕੁਮ੍ਭੋ ਨਿਕ੍ਕੁਜ੍ਜੋ ਵਿਯ ਅਵਕੁਜ੍ਜਪਞ੍ਞੋ ਪੁਗ੍ਗਲੋ ਦਟ੍ਠਬ੍ਬੋ. ਉਦਕਾਸਿਞ੍ਚਨਕਾਲੋ ਵਿਯ ਧਮ੍ਮਦੇਸਨਾਯ ਲਦ੍ਧਕਾਲੋ. ਉਦਕਸ੍ਸ ਵਿਵਟ੍ਟਨਕਾਲੋ ਵਿਯ ਤਸ੍ਮਿਂ ਆਸਨੇ ਨਿਸਿਨ੍ਨਸ੍ਸ ਉਗ੍ਗਹੇਤੁਂ ਅਸਮਤ੍ਥਕਾਲੋ. ਉਦਕਸ੍ਸ ਅਸਣ੍ਠਾਨਕਾਲੋ ਵਿਯ ਉਟ੍ਠਹਿਤ੍ਵਾ ਅਸਲ੍ਲਕ੍ਖਣਕਾਲੋ ਵੇਦਿਤਬ੍ਬੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਅਵਕੁਜ੍ਜਪਞ੍ਞੋਤਿ ਵੁਚ੍ਚਤਿ. ਅਧੋਮੁਖਪਞ੍ਞੋਤਿ ਅਤ੍ਥੋ.

੧੦੮. ਆਕਿਣ੍ਣਾਨੀਤਿ ਪਕ੍ਖਿਤ੍ਤਾਨਿ. ਸਤਿਸਮ੍ਮੋਸਾ ਪਕਿਰੇਯ੍ਯਾਤਿ ਮੁਟ੍ਠਸ੍ਸਤਿਤਾਯ ਵਿਕਿਰੇਯ੍ਯ. ਏਵਮੇਵਨ੍ਤਿ ਏਤ੍ਥ ਉਚ੍ਛਙ੍ਗੋ ਵਿਯ ਉਚ੍ਛਙ੍ਗਪਞ੍ਞੋ ਪੁਗ੍ਗਲੋ ਦਟ੍ਠਬ੍ਬੋ. ਨਾਨਾਖਜ੍ਜਕਾਨਿ ਵਿਯ ਨਾਨਪ੍ਪਕਾਰਂ ਬੁਦ੍ਧਵਚਨਂ. ਉਚ੍ਛਙ੍ਗੇ ਨਾਨਾਖਜ੍ਜਕਾਨਿ ਖਾਦਨ੍ਤਸ੍ਸ ਨਿਸਿਨ੍ਨਕਾਲੋ ਵਿਯ ਤਸ੍ਮਿਂ ਆਸਨੇ ਨਿਸਿਨ੍ਨਸ੍ਸ ਉਗ੍ਗਹਣਕਾਲੋ. ਵੁਟ੍ਠਹਨ੍ਤਸ੍ਸ ਸਤਿਸਮ੍ਮੋਸਾ ਵਿਕਿਰਣਕਾਲੋ ਵਿਯ ਤਸ੍ਮਾ ਆਸਨਾ ਵੁਟ੍ਠਾਯ ਗਚ੍ਛਨ੍ਤਸ੍ਸ ਅਸਲ੍ਲਕ੍ਖਣਕਾਲੋ ਵੇਦਿਤਬ੍ਬੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਉਚ੍ਛਙ੍ਗਪਞ੍ਞੋਤਿ ਵੁਚ੍ਚਤਿ. ਉਚ੍ਛਙ੍ਗਸਦਿਸਪਞ੍ਞੋਤਿ ਅਤ੍ਥੋ.

੧੦੯. ਉਕ੍ਕੁਜ੍ਜੋਤਿ ਉਪਰਿਮੁਖੋ ਠਪਿਤੋ. ਸਣ੍ਠਾਤੀਤਿ ਪਤਿਟ੍ਠਹਤਿ. ਏਵਮੇਵ ਖੋਤਿ ਏਤ੍ਥ ਉਪਰਿਮੁਖੋ ਠਪਿਤੋ ਕੁਮ੍ਭੋ ਵਿਯ ਪੁਥੁਪਞ੍ਞੋ ਪੁਗ੍ਗਲੋ ਦਟ੍ਠਬ੍ਬੋ. ਉਦਕਸ੍ਸ ਆਸਿਤ੍ਤਕਾਲੋ ਵਿਯ ਦੇਸਨਾਯ ਲਦ੍ਧਕਾਲੋ. ਉਦਕਸ੍ਸ ਸਣ੍ਠਾਨਕਾਲੋ ਵਿਯ ਤਤ੍ਥ ਨਿਸਿਨ੍ਨਸ੍ਸ ਉਗ੍ਗਹਣਕਾਲੋ. ਨੋ ਵਿਵਟ੍ਟਨਕਾਲੋ ਵਿਯ ਉਟ੍ਠਾਯ ਗਚ੍ਛਨ੍ਤਸ੍ਸ ਸਲ੍ਲਕ੍ਖਣਕਾਲੋ ਵੇਦਿਤਬ੍ਬੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਪੁਥੁਪਞ੍ਞੋਤਿ ਵੁਚ੍ਚਤਿ. ਵਿਤ੍ਥਾਰਿਕਪਞ੍ਞੋਤਿ ਅਤ੍ਥੋ.

੧੧੦. ਅਵੀਤਰਾਗਾਦੀਸੁ – ਯਥਾ ਸੋਤਾਪਨ੍ਨਸਕਦਾਗਾਮਿਨੋ, ਏਵਂ ਪੁਥੁਜ੍ਜਨੋਪਿ ਪਞ੍ਚਸੁ ਕਾਮਗੁਣੇਸੁ, ਤੀਸੁ ਚ ਭਵੇਸੁ ਅਵੀਤਰਾਗੋ. ਅਦਬ੍ਬਤਾਯ ਪਨ ਨ ਗਹਿਤੋ. ਯਥਾ ਹਿ ਛੇਕੋ ਵਡ੍ਢਕੀ ਦਬ੍ਬਸਮ੍ਭਾਰਤ੍ਥਂ ਵਨਂ ਪਵਿਟ੍ਠੋ ਨ ਆਦਿਤੋ ਪਟ੍ਠਾਯ ਸਮ੍ਪਤ੍ਤਸਮ੍ਪਤ੍ਤਰੁਕ੍ਖੇ ਛਿਨ੍ਦਤਿ, ਯੇ ਪਨਸ੍ਸ ਦਬ੍ਬਸਮ੍ਭਾਰੂਪਗਾ ਹੋਨ੍ਤਿ, ਤੇਯੇਵ ਛਿਨ੍ਦਤਿ; ਏਵਮਿਧਾਪਿ ਭਗਵਤਾ ਦਬ੍ਬਜਾਤਿਕਾ ਅਰਿਯਾਵ ਗਹਿਤਾ, ਪੁਥੁਜ੍ਜਨਾ ਪਨ ਅਦਬ੍ਬਤਾਯ ਨ ਗਹਿਤਾਤਿ ਵੇਦਿਤਬ੍ਬਾ. ਕਾਮੇਸੁ ਵੀਤਰਾਗੋਤਿ ਪਞ੍ਚਸੁ ਕਾਮਗੁਣੇਸੁ ਵੀਤਰਾਗੋ. ਭਵੇਸੁ ਅਵੀਤਰਾਗੋਤਿ ਰੂਪਾਰੂਪਭਵੇਸੁ ਅਵੀਤਰਾਗੋ.

੧੧੩. ਪਾਸਾਣਲੇਖੂਪਮਾਦੀਸੁ – ਅਨੁਸੇਤੀਤਿ ਅਪ੍ਪਹੀਨਤਾਯ ਅਨੁਸੇਤਿ. ਨ ਖਿਪ੍ਪਂ ਲੁਜ੍ਜਤੀਤਿ ਨ ਅਨ੍ਤਰਾ ਨਸ੍ਸਤਿ, ਕਪ੍ਪੁਟ੍ਠਾਨੇਨੇਵ ਨਸ੍ਸਤਿ. ਏਵਮੇਵਨ੍ਤਿ ਏਵਂ ਤਸ੍ਸਾਪਿ ਪੁਗ੍ਗਲਸ੍ਸ ਕੋਧੋ ਨ ਅਨ੍ਤਰਾ ਪੁਨਦਿਵਸੇ ਵਾ ਅਪਰਦਿਵਸੇ ਵਾ ਨਿਬ੍ਬਾਤਿ, ਅਦ੍ਧਨਿਯੋ ਪਨ ਹੋਤਿ. ਮਰਣੇਨੇਵ ਨਿਬ੍ਬਾਤੀਤਿ ਅਤ੍ਥੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਪਾਸਾਣਲੇਖਾ ਵਿਯ ਕੁਜ੍ਝਨਭਾਵੇਨ ਚਿਰਟ੍ਠਿਤਿਕਤੋ ਪਾਸਾਣਲੇਖੂਪਮੋਤਿ ਵੁਚ੍ਚਤਿ.

੧੧੪. ਸੋ ਚ ਖ੍ਵਸ੍ਸ ਕੋਧੋਤਿ ਸੋ ਅਪ੍ਪਮਤ੍ਤਕੇਪਿ ਕਾਰਣੇ ਸਹਸਾ ਕੁਦ੍ਧਸ੍ਸ ਕੋਧੋ. ਨ ਚਿਰਨ੍ਤਿ ਅਚਿਰਂ ਅਪ੍ਪਹੀਨਤਾਯ ਨਾਨੁਸੇਤਿ. ਯਥਾ ਪਨ ਪਥਵਿਯਂ ਆਕਡ੍ਢਿਤ੍ਵਾ ਕਤਲੇਖਾ ਵਾਤਾਦੀਹਿ ਖਿਪ੍ਪਂ ਨਸ੍ਸਤਿ, ਏਵਮਸ੍ਸ ਸਹਸਾ ਉਪ੍ਪਨ੍ਨੋਪਿ ਕੋਧੋ ਖਿਪ੍ਪਮੇਵ ਨਿਬ੍ਬਾਤੀਤਿ ਅਤ੍ਥੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਪਥਵਿਯਂ ਲੇਖਾ ਵਿਯ ਕੁਜ੍ਝਨਭਾਵੇਨ ਅਚਿਰਟ੍ਠਿਤਿਕਤੋ ਪਥਵੀਲੇਖੂਪਮੋਤਿ ਵੁਚ੍ਚਤਿ.

੧੧੫. ਆਗਾਲ਼੍ਹੇਨਾਤਿ ਅਤਿਗਾਲ਼੍ਹੇਨ ਮਮ੍ਮਚ੍ਛੇਦਕੇਨ ਥਦ੍ਧਵਚਨੇਨ. ਫਰੁਸੇਨਾਤਿ ਨ ਸੋਤਸੁਖੇਨ. ਅਮਨਾਪੇਨਾਤਿ ਨ ਚਿਤ੍ਤਸੁਖੇਨ. ਸਂਸਨ੍ਦਤੀਤਿ ਏਕੀਭਵਤਿ. ਸਨ੍ਧਿਯਤੀਤਿ ਘਟਯਤਿ. ਸਮ੍ਮੋਦਤੀਤਿ ਨਿਰਨ੍ਤਰੋ ਹੋਤਿ. ਅਥ ਵਾ – ਸਂਸਨ੍ਦਤੀਤਿ ਚਿਤ੍ਤਕਿਰਿਯਾਦੀਸੁ ਚਿਤ੍ਤੇਨ ਸਮੋਧਾਨਂ ਗਚ੍ਛਤਿ. ਖੀਰੋਦਕਂ ਵਿਯ ਏਕੀਭਾਵਂ ਉਪੇਤੀਤਿ ਅਤ੍ਥੋ. ਸਨ੍ਧਿਯਤੀਤਿ ਠਾਨਗਮਨਾਦੀਸੁ ਕਾਯਕਿਰਿਯਾਦੀਸੁ ਕਾਯੇਨ ਸਮੋਧਾਨਂ ਗਚ੍ਛਤਿ. ਤਿਲਤਣ੍ਡੁਲਾ ਵਿਯ ਮਿਸ੍ਸੀਭਾਵਂ ਉਪੇਤੀਤਿ ਅਤ੍ਥੋ. ਸਮ੍ਮੋਦਤੀਤਿ ਉਦ੍ਦੇਸਪਰਿਪੁਚ੍ਛਾਦੀਸੁ ਵਚੀਕਿਰਿਯਾਸੁ ਵਾਚਾਯ ਸਮੋਧਾਨਂ ਗਚ੍ਛਤਿ. ਵਿਪ੍ਪਵਾਸਗਤੋਪਿ ਪਿਯਸਹਾਯਕੋ ਵਿਯ ਪਿਯਤਰਭਾਵਂ ਉਪੇਤੀਤਿ ਅਤ੍ਥੋ. ਅਪਿਚ – ਕਿਚ੍ਚਕਰਣੀਯੇਸੁ ਤੇਹਿ ਸਦ੍ਧਿਂ ਆਦਿਤੋਵ ਏਕਕਿਰਿਯਭਾਵਂ ਉਪਗਚ੍ਛਨ੍ਤੋ ਸਂਸਨ੍ਦਤਿ. ਯਾਵ ਮਜ੍ਝਾ ਪਵਤ੍ਤਨ੍ਤੋ ਸਨ੍ਧਿਯਤਿ, ਯਾਵ ਪਰਿਯੋਸਾਨਾ ਅਨਿਵਤ੍ਤਨ੍ਤੋ ਸਮ੍ਮੋਦਤੀਤਿਪਿ ਵੇਦਿਤਬ੍ਬੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਉਦਕਲੇਖਾ ਵਿਯ ਖਿਪ੍ਪਂ ਸਂਸਨ੍ਦਨਤੋ ਉਦਕਲੇਖੂਪਮੋਤਿ ਵੁਚ੍ਚਤਿ.

੧੧੬. ਪੋਤ੍ਥਕੂਪਮੇਸੁ – ਯਾਯ ਉਪਮਾਯ ਤੇ ਪੋਤ੍ਥਕੂਪਮਾਤਿ ਵੁਚ੍ਚਨ੍ਤਿ, ਤਂ ਤਾਵ ਉਪਮਂ ਦਸ੍ਸੇਤੁਂ ਤਯੋ ਪੋਤ੍ਥਕਾਤਿਆਦਿ ਵੁਤ੍ਤਂ. ਤਤ੍ਥ ਨਵੋਤਿ ਨਵਵਾਯਿਮੋ. ਪੋਤ੍ਥਕੋਤਿ ਸਾਣਵਾਕਸਾਟਕੋ. ਦੁਬ੍ਬਣ੍ਣੋਤਿ ਵਿਵਣ੍ਣੋ. ਦੁਕ੍ਖਸਮ੍ਫਸ੍ਸੋਤਿ ਖਰਸਮ੍ਫਸ੍ਸੋ. ਅਪ੍ਪਗ੍ਘੋਤਿ ਅਤਿਬਹੁਂ ਅਗ੍ਘਨ੍ਤੋ ਕਹਾਪਣਗ੍ਘਨਕੋ ਹੋਤਿ. ਮਜ੍ਝਿਮੋਤਿ ਪਰਿਭੋਗਮਜ੍ਝਿਮੋ. ਸੋ ਹਿ ਨਵਭਾਵਂ ਅਤਿਕ੍ਕਮਿਤ੍ਵਾ ਜਿਣ੍ਣਭਾਵਂ ਅਪ੍ਪਤ੍ਤੋ ਮਜ੍ਝੇ ਪਰਿਭੋਗਕਾਲੇਪਿ ਦੁਬ੍ਬਣ੍ਣੋ ਚ ਦੁਕ੍ਖਸਮ੍ਫਸ੍ਸੋ ਚ ਅਪ੍ਪਗ੍ਘੋਯੇਵ ਚ ਹੋਤਿ. ਅਤਿਬਹੁਂ ਅਗ੍ਘਨ੍ਤੋ ਅਡ੍ਢਂ ਅਗ੍ਘਤਿ. ਜਿਣ੍ਣਕਾਲੇ ਪਨ ਅਡ੍ਢਮਾਸਕਂ ਵਾ ਕਾਕਣਿਕਂ ਵਾ ਅਗ੍ਘਤਿ. ਉਕ੍ਖਲਿਪਰਿਮਜ੍ਜਨਨ੍ਤਿ ਕਾਲ਼ੁਕ੍ਖਲਿਪਰਿਪੁਞ੍ਛਨਂ.

ਨਵੋਤਿ ਉਪਸਮ੍ਪਦਾਯ ਪਞ੍ਚਵਸ੍ਸਕਾਲਤੋ ਹੇਟ੍ਠਾ ਜਾਤਿਯਾ ਸਟ੍ਠਿਵਸ੍ਸੋਪਿ ਨਵੋਯੇਵ. ਦੁਬ੍ਬਣ੍ਣਤਾਯਾਤਿ ਸਰੀਰਵਣ੍ਣੇਨਪਿ ਗੁਣਵਣ੍ਣੇਨਪਿ ਦੁਬ੍ਬਣ੍ਣਤਾਯ. ਦੁਸ੍ਸੀਲਸ੍ਸ ਹਿ ਪਰਿਸਮਜ੍ਝੇ ਨਿਸਿਨ੍ਨਸ੍ਸ ਨਿਤ੍ਤੇਜਤਾਯ ਸਰੀਰਵਣ੍ਣੋਪਿ ਨ ਸਮ੍ਪਜ੍ਜਤਿ, ਗੁਣਵਣ੍ਣੇ ਵਤ੍ਤਬ੍ਬਮੇਵ ਨਤ੍ਥਿ. ਯੇ ਖੋ ਪਨਸ੍ਸਾਤਿ ਯੇ ਖੋ ਪਨ ਤਸ੍ਸ ਉਪਟ੍ਠਾਕਾ ਵਾ ਞਾਤਿਮਿਤ੍ਤਾਦਯੋ ਵਾ ਏਤਂ ਪੁਗ੍ਗਲਂ ਸੇਵਨ੍ਤਿ. ਤੇਸਂ ਤਨ੍ਤਿ ਤੇਸਂ ਪੁਗ੍ਗਲਾਨਂ ਛ ਸਤ੍ਥਾਰੇ ਸੇਵਨ੍ਤਾਨਂ ਮਿਚ੍ਛਾਦਿਟ੍ਠਿਕਾਨਂ ਵਿਯ, ਦੇਵਦਤ੍ਤਂ ਸੇਵਨ੍ਤਾਨਂ ਕੋਕਾਲਿਕਾਦੀਨਂ ਵਿਯ ਚ ਤਂ ਸੇਵਨਂ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ ਹੋਤਿ. ਮਜ੍ਝਿਮੋਤਿ ਪਞ੍ਚਵਸ੍ਸਕਾਲਤੋ ਪਟ੍ਠਾਯ ਯਾਵ ਨਵਵਸ੍ਸਕਾਲਾ ਮਜ੍ਝਿਮੋ ਨਾਮ. ਥੇਰੋਤਿ ਦਸਵਸ੍ਸਕਾਲਤੋ ਪਟ੍ਠਾਯ ਥੇਰੋ ਨਾਮ. ਏਵਮਾਹਂਸੂਤਿ ਏਵਂ ਵਦਨ੍ਤਿ. ਕਿਂ ਨੁ ਖੋ ਤੁਯ੍ਹਨ੍ਤਿ ਤੁਯ੍ਹਂ ਬਾਲਸ੍ਸ ਭਣਿਤੇਨ ਕੋ ਅਤ੍ਥੋਤਿ ਵੁਤ੍ਤਂ ਹੋਤਿ. ਤਥਾਰੂਪਨ੍ਤਿ ਤਥਾਜਾਤਿਕਂ ਤਥਾਸਭਾਵਂ ਉਕ੍ਖੇਪਨੀਯਕਮ੍ਮਸ੍ਸ ਕਾਰਣਭੂਤਂ.

੧੧੭. ਕਾਸਿਕਵਤ੍ਥੂਪਮੇਸੁ – ਕਾਸਿਕਵਤ੍ਥਂ ਨਾਮ ਤਯੋ ਕਪ੍ਪਾਸਂਸੂ ਗਹੇਤ੍ਵਾ ਕਨ੍ਤਿਤਸੁਤ੍ਤੇਨ ਵਾਯਿਤਂ ਸੁਖੁਮਵਤ੍ਥਂ. ਤਂ ਨਵਵਾਯਿਮਂ ਅਨਗ੍ਘਂ ਹੋਤਿ. ਪਰਿਭੋਗਮਜ੍ਝਿਮਂ ਵੀਸਮ੍ਪਿ ਤਿਂਸਮ੍ਪਿ ਸਹਸ੍ਸਾਨਿ ਅਗ੍ਘਤਿ. ਜਿਣ੍ਣਕਾਲੇ ਪਨ ਅਟ੍ਠਪਿ ਦਸਪਿ ਸਹਸ੍ਸਾਨਿ ਅਗ੍ਘਤਿ.

ਤੇਸਂ ਤਂ ਹੋਤੀਤਿ ਤੇਸਂ ਸਮ੍ਮਾਸਮ੍ਬੁਦ੍ਧਾਦਯੋ ਸੇਵਨ੍ਤਾਨਂ ਵਿਯ ਤਂ ਸੇਵਨਂ ਦੀਘਰਤ੍ਤਂ ਹਿਤਾਯ ਸੁਖਾਯ ਹੋਤਿ. ਸਮ੍ਮਾਸਮ੍ਬੁਦ੍ਧਞ੍ਹਿ ਏਕਂ ਨਿਸ੍ਸਾਯ ਯਾਵਜ੍ਜਕਾਲਾ ਮੁਚ੍ਚਨਕਸਤ੍ਤਾਨਂ ਪਮਾਣਂ ਨਤ੍ਥਿ. ਤਥਾ ਸਾਰਿਪੁਤ੍ਤਤ੍ਥੇਰਮਹਾਮੋਗ੍ਗਲ੍ਲਾਨਤ੍ਥੇਰੇ ਅਵਸੇਸੇ ਚ ਅਸੀਤਿਮਹਾਸਾਵਕੇ ਨਿਸ੍ਸਾਯ ਸਗ੍ਗਂ ਗਤਸਤ੍ਤਾਨਂ ਪਮਾਣਂ ਨਤ੍ਥਿ. ਯਾਵਜ੍ਜਕਾਲਾ ਤੇਸਂ ਦਿਟ੍ਠਾਨੁਗਤਿਂ ਪਟਿਪਨ੍ਨਸਤ੍ਤਾਨਮ੍ਪਿ ਪਮਾਣਂ ਨਤ੍ਥਿਯੇਵ. ਆਧੇਯ੍ਯਂ ਗਚ੍ਛਤੀਤਿ ਤਸ੍ਸ ਮਹਾਥੇਰਸ੍ਸ ਤਂ ਅਤ੍ਥਨਿਸ੍ਸਿਤਂ ਵਚਨਂ ਯਥਾ ਗਨ੍ਧਕਰਣ੍ਡਕੇ ਕਾਸਿਕਵਤ੍ਥਂ ਆਧਾਤਬ੍ਬਤਂ ਠਪੇਤਬ੍ਬਤਂ ਗਚ੍ਛਤਿ, ਏਵਂ ਉਤ੍ਤਮਙ੍ਗੇ ਸਿਰਸ੍ਮਿਂ ਹਦਯੇ ਚ ਆਧਾਤਬ੍ਬਤਂ ਠਪੇਤਬ੍ਬਤਮ੍ਪਿ ਗਚ੍ਛਤਿ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਾਨੁਸਾਰੇਨੇਵ ਵੇਦਿਤਬ੍ਬਂ.

੧੧੮. ਸੁਪ੍ਪਮੇਯ੍ਯਾਦੀਸੁ – ਸੁਖੇਨ ਪਮੇਤਬ੍ਬੋਤਿ ਸੁਪ੍ਪਮੇਯ੍ਯੋ. ਇਧਾਤਿ ਇਮਸ੍ਮਿਂ ਸਤ੍ਤਲੋਕੇ. ਉਦ੍ਧਤੋਤਿ ਉਦ੍ਧਚ੍ਚੇਨ ਸਮਨ੍ਨਾਗਤੋ. ਉਨ੍ਨਲ਼ੋਤਿ ਉਗ੍ਗਤਨਲ਼ੋ; ਤੁਚ੍ਛਮਾਨਂ ਉਕ੍ਖਿਪਿਤ੍ਵਾ ਠਿਤੋਤਿ ਅਤ੍ਥੋ. ਚਪਲੋਤਿ ਪਤ੍ਤਮਣ੍ਡਨਾਦਿਨਾ ਚਾਪਲ੍ਲੇਨ ਸਮਨ੍ਨਾਗਤੋ. ਮੁਖਰੋਤਿ ਮੁਖਖਰੋ. ਵਿਕਿਣ੍ਣਵਾਚੋਤਿ ਅਸਂਯਤਵਚਨੋ. ਅਸਮਾਹਿਤੋਤਿ ਚਿਤ੍ਤੇਕਗ੍ਗਤਾਰਹਿਤੋ. ਵਿਬ੍ਭਨ੍ਤਚਿਤ੍ਤੋਤਿ ਭਨ੍ਤਚਿਤ੍ਤੋ, ਭਨ੍ਤਗਾਵੀਭਨ੍ਤਮਿਗੀਸਪ੍ਪਟਿਭਾਗੋ. ਪਾਕਟਿਨ੍ਦ੍ਰਿਯੋਤਿ ਵਿਵਟਿਨ੍ਦ੍ਰਿਯੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ‘ਸੁਪ੍ਪਮੇਯ੍ਯੋ’ਤਿ ਵੁਚ੍ਚਤਿ. ਯਥਾ ਹਿ ਪਰਿਤ੍ਤਸ੍ਸ ਉਦਕਸ੍ਸ ਸੁਖੇਨ ਪਮਾਣਂ ਗਯ੍ਹਤਿ; ਏਵਮੇਵ ਇਮੇਹਿ ਅਗੁਣਙ੍ਗੇਹਿ ਸਮਨ੍ਨਾਗਤਸ੍ਸ ਸੁਖੇਨ ਪਮਾਣਂ ਗਯ੍ਹਤਿ. ਤੇਨੇਸ ‘ਸੁਪ੍ਪਮੇਯ੍ਯੋ’ਤਿ ਵੁਤ੍ਤੋ.

੧੧੯. ਦੁਕ੍ਖੇਨ ਪਮੇਤਬ੍ਬੋਤਿ ਦੁਪ੍ਪਮੇਯ੍ਯੋ. ਅਨੁਦ੍ਧਤਾਦੀਨਿ ਵੁਤ੍ਤਪਟਿਪਕ੍ਖਵਸੇਨ ਵੇਦਿਤਬ੍ਬਾਨਿ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ‘ਦੁਪ੍ਪਮੇਯ੍ਯੋ’ਤਿ ਵੁਚ੍ਚਤਿ. ਯਥਾ ਹਿ ਮਹਾਸਮੁਦ੍ਦਸ੍ਸ ਦੁਕ੍ਖੇਨ ਪਮਾਣਂ ਗਯ੍ਹਤਿ; ਏਵਮੇਵ ਇਮੇਹਿ ਗੁਣਙ੍ਗੇਹਿ ਸਮਨ੍ਨਾਗਤਸ੍ਸ ਦੁਕ੍ਖੇਨ ਪਮਾਣਂ ਗਯ੍ਹਤਿ. ਤਾਦਿਸੋ ‘ਅਨਾਗਾਮੀ ਨੁ ਖੋ, ਖੀਣਾਸਵੋ ਨੁ ਖੋ’ਤਿ ਵਤ੍ਤਬ੍ਬਤਂ ਗਚ੍ਛਤਿ, ਤੇਨੇਸ ‘ਦੁਪ੍ਪਮੇਯ੍ਯੋ’ਤਿ ਵੁਤ੍ਤੋ.

੧੨੦. ਨ ਸਕ੍ਕਾ ਪਮੇਤੁਨ੍ਤਿ ਅਪ੍ਪਮੇਯ੍ਯੋ. ਯਥਾ ਹਿ ਆਕਾਸਸ੍ਸ ਨ ਸਕ੍ਕਾ ਪਮਾਣਂ ਗਹੇਤੁਂ, ਏਵਂ ਖੀਣਾਸਵਸ੍ਸ. ਤੇਨੇਸ ‘ਅਪ੍ਪਮੇਯ੍ਯੋ’ਤਿ ਵੁਤ੍ਤੋ.

੧੨੧. ਨ ਸੇਵਿਤਬ੍ਬਾਦੀਸੁ – ਨ ਸੇਵਿਤਬ੍ਬੋਤਿ ਨ ਉਪਸਙ੍ਕਮਿਤਬ੍ਬੋ. ਨ ਭਜਿਤਬ੍ਬੋਤਿ ਨ ਅਲ੍ਲੀਯਿਤਬ੍ਬੋ. ਨ ਪਯਿਰੁਪਾਸਿਤਬ੍ਬੋਤਿ ਨ ਸਨ੍ਤਿਕੇ ਨਿਸੀਦਨਵਸੇਨ ਪੁਨਪ੍ਪੁਨਂ ਉਪਾਸਿਤਬ੍ਬੋ. ਹੀਨੋ ਹੋਤਿ ਸੀਲੇਨਾਤਿਆਦੀਸੁ ਉਪਾਦਾਯੁਪਾਦਾਯ ਹੀਨਤਾ ਵੇਦਿਤਬ੍ਬਾ. ਯੋ ਹਿ ਪਞ੍ਚ ਸੀਲਾਨਿ ਰਕ੍ਖਤਿ, ਸੋ ਦਸ ਸੀਲਾਨਿ ਰਕ੍ਖਨ੍ਤੇਨ ਨ ਸੇਵਿਤਬ੍ਬੋ. ਯੋ ਪਨ ਦਸ ਸੀਲਾਨਿ ਰਕ੍ਖਤਿ, ਸੋ ਚਤੁਪਾਰਿਸੁਦ੍ਧਿਸੀਲਂ ਰਕ੍ਖਨ੍ਤੇਨ ਨ ਸੇਵਿਤਬ੍ਬੋ. ਅਞ੍ਞਤ੍ਰ ਅਨੁਦ੍ਦਯਾ ਅਞ੍ਞਤ੍ਰ ਅਨੁਕਮ੍ਪਾਤਿ ਠਪੇਤ੍ਵਾ ਅਨੁਦ੍ਦਯਞ੍ਚ ਅਨੁਕਮ੍ਪਞ੍ਚ. ਅਤ੍ਤਨੋ ਅਤ੍ਥਾਯ ਏਵ ਹਿ ਏਵਰੂਪੋ ਪੁਗ੍ਗਲੋ ਨ ਸੇਵਿਤਬ੍ਬੋ. ਅਨੁਦ੍ਦਯਾਨੁਕਮ੍ਪਾਵਸੇਨ ਪਨ ਤਂ ਉਪਸਙ੍ਕਮਿਤੁਂ ਵਟ੍ਟਤਿ.

੧੨੨. ਸਦਿਸੋ ਹੋਤੀਤਿ ਸਮਾਨੋ ਹੋਤਿ. ਸੀਲਸਾਮਞ੍ਞਗਤਾਨਂ ਸਤਨ੍ਤਿ ਸੀਲੇਨ ਸਮਾਨਭਾਵਂ ਗਤਾਨਂ ਸਨ੍ਤਾਨਂ. ਸੀਲਕਥਾ ਚ ਨੋ ਭਵਿਸ੍ਸਤੀਤਿ ਏਵਂ ਸਮਾਨਸੀਲਾਨਂ ਅਮ੍ਹਾਕਂ ਸੀਲਮੇਵ ਆਰਬ੍ਭ ਕਥਾ ਭਵਿਸ੍ਸਤਿ. ਸਾ ਚ ਨੋ ਫਾਸੁ ਭਵਿਸ੍ਸਤੀਤਿ ਸਾ ਚ ਸੀਲਕਥਾ ਅਮ੍ਹਾਕਂ ਫਾਸੁਵਿਹਾਰੋ ਸੁਖਵਿਹਾਰੋ ਭਵਿਸ੍ਸਤਿ. ਸਾ ਚ ਨੋ ਪਵਤ੍ਤਿਨੀ ਭਵਿਸ੍ਸਤੀਤਿ ਸਾ ਚ ਅਮ੍ਹਾਕਂ ਕਥਾ ਦਿਵਸਮ੍ਪਿ ਕਥੇਨ੍ਤਾਨਂ ਪਵਤ੍ਤਿਨੀ ਭਵਿਸ੍ਸਤਿ, ਨ ਪਟਿਹਞ੍ਞਿਸ੍ਸਤਿ. ਦ੍ਵੀਸੁ ਹਿ ਸੀਲਵਨ੍ਤੇਸੁ ਏਕੇਨ ਸੀਲਸ੍ਸ ਵਣ੍ਣੇ ਕਥਿਤੇ ਇਤਰੋ ਅਨੁਮੋਦਤਿ; ਤੇਨ ਤੇਸਂ ਕਥਾ ਫਾਸੁ ਚੇਵ ਹੋਤਿ, ਪਵਤ੍ਤਿਨੀ ਚ. ਏਕਸ੍ਮਿਂ ਪਨ ਦੁਸ੍ਸੀਲੇ ਸਤਿ ਦੁਸ੍ਸੀਲਸ੍ਸ ਸੀਲਕਥਾ ਦੁਕ੍ਕਥਾਤਿ ਨੇਵ ਸੀਲਕਥਾ ਹੋਤਿ, ਨ ਫਾਸੁ ਹੋਤਿ, ਨ ਪਵਤ੍ਤਿਨੀ. ਸਮਾਧਿਪਞ੍ਞਾਕਥਾਸੁਪਿ ਏਸੇਵ ਨਯੋ. ਦ੍ਵੇ ਹਿ ਸਮਾਧਿਲਾਭਿਨੋ ਸਮਾਧਿਕਥਂ, ਸਪ੍ਪਞ੍ਞਾ ਚ ਪਞ੍ਞਾਕਥਂ ਕਥੇਨ੍ਤਾ, ਰਤ੍ਤਿਂ ਵਾ ਦਿਵਸਂ ਵਾ ਅਤਿਕ੍ਕਨ੍ਤਮ੍ਪਿ ਨ ਜਾਨਨ੍ਤਿ.

੧੨੩. ਸਕ੍ਕਤ੍ਵਾ ਗਰੁਂ ਕਤ੍ਵਾਤਿ ਸਕ੍ਕਾਰਞ੍ਚੇਵ ਗਰੁਕਾਰਞ੍ਚ ਕਰਿਤ੍ਵਾ. ਅਧਿਕੋ ਹੋਤੀਤਿ ਅਤਿਰੇਕੋ ਹੋਤਿ. ਸੀਲਕ੍ਖਨ੍ਧਨ੍ਤਿ ਸੀਲਰਾਸਿਂ. ਪਰਿਪੂਰੇਸ੍ਸਾਮੀਤਿ ਤਂ ਅਤਿਰੇਕਸੀਲਂ ਪੁਗ੍ਗਲਂ ਨਿਸ੍ਸਾਯ ਅਤ੍ਤਨੋ ਅਪਰਿਪੂਰਂ ਸੀਲਰਾਸਿਂ ਪਰਿਪੂਰਂ ਕਰਿਸ੍ਸਾਮਿ. ਤਤ੍ਥ ਤਤ੍ਥ ਪਞ੍ਞਾਯ ਅਨੁਗ੍ਗਹੇਸ੍ਸਾਮੀਤਿ ਏਤ੍ਥ ਸੀਲਸ੍ਸ ਅਸਪ੍ਪਾਯੇ ਅਨੁਪਕਾਰਧਮ੍ਮੇ ਵਜ੍ਜੇਤ੍ਵਾ ਸਪ੍ਪਾਯੇ ਉਪਕਾਰਧਮ੍ਮੇ ਸੇਵਨ੍ਤੋ ਤਸ੍ਮਿਂ ਤਸ੍ਮਿਂ ਠਾਨੇ ਸੀਲਕ੍ਖਨ੍ਧਂ ਪਞ੍ਞਾਯ ਅਨੁਗ੍ਗਣ੍ਹਾਤਿ ਨਾਮ. ਸਮਾਧਿਪਞ੍ਞਾਕ੍ਖਨ੍ਧੇਸੁਪਿ ਏਸੇਵ ਨਯੋ.

੧੨੪. ਜਿਗੁਚ੍ਛਿਤਬ੍ਬਾਦੀਸੁ – ਜਿਗੁਚ੍ਛਿਤਬ੍ਬੋਤਿ ਗੂਥਂ ਵਿਯ ਜਿਗੁਚ੍ਛਿਤਬ੍ਬੋ. ਅਥ ਖੋ ਨਨ੍ਤਿ ਅਥ ਖੋ ਅਸ੍ਸ. ਕਿਤ੍ਤਿਸਦ੍ਦੋਤਿ ਕਥਾਸਦ੍ਦੋ. ਏਵਮੇਵਨ੍ਤਿ ਏਤ੍ਥ ਗੂਥਕੂਪੋ ਵਿਯ ਦੁਸ੍ਸੀਲ੍ਯਂ ਦਟ੍ਠਬ੍ਬਂ. ਗੂਥਕੂਪੇ ਪਤਿਤ੍ਵਾ ਠਿਤੋ ਧਮਨੀਅਹਿ ਵਿਯ ਦੁਸ੍ਸੀਲਪੁਗ੍ਗਲੋ. ਗੁਥਕੂਪਤੋ ਉਦ੍ਧਰਿਯਮਾਨੇਨ ਤੇਨ ਅਹਿਨਾ ਪੁਰਿਸਸ੍ਸ ਸਰੀਰਂ ਆਰੁਲ਼੍ਹੇਨਾਪਿ ਅਦਟ੍ਠਭਾਵੋ ਵਿਯ ਦੁਸ੍ਸੀਲਂ ਸੇਵਮਾਨਸ੍ਸਾਪਿ ਤਸ੍ਸ ਕਿਰਿਯਾਯ ਕਾਰਣਭਾਵੋ ਸਰੀਰਂ ਗੂਥੇਨ ਮਕ੍ਖੇਤ੍ਵਾ ਅਹਿਨੋ ਗਤਕਾਲੋ ਵਿਯ ਦੁਸ੍ਸੀਲਂ ਸੇਵਮਾਨਸ੍ਸ ਪਾਪਕਿਤ੍ਤਿਸਦ੍ਦਸ੍ਸ ਅਬ੍ਭੁਗ੍ਗਮਨਕਾਲੋ ਵੇਦਿਤਬ੍ਬੋ.

੧੨੫. ਤਿਨ੍ਦੁਕਾਲਾਤਨ੍ਤਿ ਤਿਨ੍ਦੁਕਰੁਕ੍ਖਅਲਾਤਂ. ਭਿਯ੍ਯੋਸੋ ਮਤ੍ਤਾਯ ਚਿਚ੍ਚਿਟਾਯਤੀਤਿ ਤਞ੍ਹਿ ਝਾਯਮਾਨਂ ਪਕਤਿਯਾਪਿ ਪਪਟਿਕਾਯੋ ਮੁਞ੍ਚਨ੍ਤਂ ਚਿਚ੍ਚਿਟਾਯਤਿ ਚਿਟਿਚਿਟਾਤਿ ਸਦ੍ਦਂ ਕਰੋਤਿ. ਘਟ੍ਟਿਤਂ ਪਨ ਅਧਿਮਤ੍ਤਂ ਕਰੋਤੀਤਿ ਅਤ੍ਥੋ. ਏਵਮੇਵਨ੍ਤਿ ਏਵਮੇਵਂ ਕੋਧਨੋ ਅਤ੍ਤਨੋ ਧਮ੍ਮਤਾਯਪਿ ਉਦ੍ਧਤੋ ਚਣ੍ਡਿਕਤੋ ਹੁਤ੍ਵਾ ਚਰਤਿ. ਅਪ੍ਪਮਤ੍ਤਕਂ ਪਨ ਵਚਨਂ ਵੁਤ੍ਤਕਾਲੇ ‘ਮਾਦਿਸਂ ਨਾਮ ਏਵਂ ਵਦਤੀ’ਤਿ ਅਤਿਰੇਕਤਰਂ ਉਦ੍ਧਤੋ ਚਣ੍ਡਿਕਤੋ ਹੁਤ੍ਵਾ ਚਰਤਿ. ਗੂਥਕੂਪੋਤਿ ਗੂਥਪੁਣ੍ਣਕੂਪੋ, ਗੂਥਰਾਸਿਯੇਵ ਵਾ. ਓਪਮ੍ਮਸਂਸਨ੍ਦਨਂ ਪਨੇਤ੍ਥ ਪੁਰਿਮਨਯੇਨੇਵ ਵੇਦਿਤਬ੍ਬਂ. ਤਸ੍ਮਾ ਏਵਰੂਪੋ ਪੁਗ੍ਗਲੋ ਅਜ੍ਝੁਪੇਕ੍ਖਿਤਬ੍ਬੋ, ਨ ਸੇਵਿਤਬ੍ਬੋਤਿ ਯਸ੍ਮਾ ਕੋਧਨੋ ਅਤਿਸੇਵਿਯਮਾਨੋਪਿ ਅਤਿਉਪਸਙ੍ਕਮਿਯਮਾਨੋਪਿ ਕੁਜ੍ਝਤਿਯੇਵ, ‘ਕਿਂ ਇਮਿਨਾ’ਤਿ ਪਟਿਕ੍ਕਮਨ੍ਤੋਪਿ ਕੁਜ੍ਝਤਿਯੇਵ, ਤਸ੍ਮਾ ਪਲਾਲਗ੍ਗਿ ਵਿਯ ਅਜ੍ਝੁਪੇਕ੍ਖਿਤਬ੍ਬੋ, ਨ ਸੇਵਿਤਬ੍ਬੋ. ਕਿਂ ਵੁਤ੍ਤਂ ਹੋਤਿ? ਯੋ ਹਿ ਪਲਾਲਗ੍ਗਿਂ ਅਤਿਉਪਸਙ੍ਕਮਿਤ੍ਵਾ ਤਪ੍ਪਤਿ, ਤਸ੍ਸ ਸਰੀਰਂ ਝਾਯਤਿ. ਯੋ ਅਤਿਪਟਿਕ੍ਕਮਿਤ੍ਵਾ ਤਪ੍ਪਤਿ, ਤਸ੍ਸ ਸੀਤਂ ਨ ਵੂਪਸਮ੍ਮਤਿ. ਅਨੁਪਸਙ੍ਕਮਿਤ੍ਵਾ ਅਪਟਿਕ੍ਕਮਿਤ੍ਵਾ ਪਨ ਮਜ੍ਝਤ੍ਤਭਾਵੇਨ ਤਪ੍ਪੇਨ੍ਤਸ੍ਸ ਸੀਤਂ ਵੂਪਸਮ੍ਮਤਿ, ਕਾਯੋਪਿ ਨ ਡਯ੍ਹਤਿ. ਤਸ੍ਮਾ ਪਲਾਲਗ੍ਗਿ ਵਿਯ ਕੋਧਨੋ ਪੁਗ੍ਗਲੋ ਮਜ੍ਝਤ੍ਤਭਾਵੇਨ ਅਜ੍ਝੁਪੇਕ੍ਖਿਤਬ੍ਬੋ, ਨ ਸੇਵਿਤਬ੍ਬੋ, ਨ ਭਜਿਤਬ੍ਬੋ, ਨ ਪਯਿਰੁਪਾਸਿਤਬ੍ਬੋ.

੧੨੬. ਕਲ੍ਯਾਣਮਿਤ੍ਤੋਤਿ ਸੁਚਿਮਿਤ੍ਤੋ. ਕਲ੍ਯਾਣਸਹਾਯੋਤਿ ਸੁਚਿਸਹਾਯੋ. ਸਹਾਯੋਤਿ ਸਹਗਾਮੀ ਸਦ੍ਧਿਂਚਰੋ. ਕਲ੍ਯਾਣਸਮ੍ਪਵਙ੍ਕੋਤਿ ਕਲ੍ਯਾਣੇਸੁ ਸੁਚਿਪੁਗ੍ਗਲੇਸੁ ਸਮ੍ਪਵਙ੍ਕੋ, ਤਨ੍ਨਿਨ੍ਨਤਪ੍ਪੋਣਤਪ੍ਪਬ੍ਭਾਰਮਾਨਸੋਤਿ ਅਤ੍ਥੋ.

੧੨੭. ਸੀਲੇਸੁ ਪਰਿਪੂਰਕਾਰੀਤਿਆਦੀਸੁ – ਸੀਲੇਸੁ ਪਰਿਪੂਰਕਾਰਿਨੋਤਿ ਏਤੇ ਅਰਿਯਸਾਵਕਾ ਯਾਨਿ ਤਾਨਿ ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾਨਿ, ਆਦਿਬ੍ਰਹ੍ਮਚਰਿਯਕਾਨਿ, ਪਾਰਾਜਿਕਸਙ੍ਖਾਤਾਨਿ ਚਤ੍ਤਾਰਿ ਮਹਾਸੀਲਸਿਕ੍ਖਾਪਦਾਨਿ, ਤੇਸਂ ਅਵੀਤਿਕ੍ਕਮਨਤੋ ਯਾਨਿ ਖੁਦ੍ਦਾਨੁਖੁਦ੍ਦਕਾਨਿ ਆਪਜ੍ਜਨ੍ਤਿ, ਤੇਹਿ ਚ ਵੁਟ੍ਠਾਨਤੋ ਸੀਲੇਸੁ ਯਂ ਕਤ੍ਤਬ੍ਬਂ, ਤਂ ਪਰਿਪੂਰਂ ਸਮਤ੍ਤਂ ਕਰੋਨ੍ਤੀਤਿ ‘ਸੀਲੇਸੁ ਪਰਿਪੂਰਕਾਰਿਨੋ’ਤਿ ਵੁਚ੍ਚਨ੍ਤਿ. ਸਮਾਧਿਪਾਰਿਬਨ੍ਧਕਾਨਂ ਪਨ ਕਾਮਰਾਗਬ੍ਯਾਪਾਦਾਨਂ, ਪਞ੍ਞਾਪਾਰਿਬਨ੍ਧਕਸ੍ਸ ਚ ਸਚ੍ਚਪਟਿਚ੍ਛਾਦਕਸ੍ਸ ਮੋਹਸ੍ਸ ਅਸਮੂਹਤਤ੍ਤਾ, ਸਮਾਧਿਂ ਪਞ੍ਞਞ੍ਚ ਭਾਵੇਨ੍ਤਾਪਿ ਸਮਾਧਿਪਞ੍ਞਾਸੁ ਯਂ ਕਤ੍ਤਬ੍ਬਂ ਤਂ ਮਤ੍ਤਸੋ ਪਮਾਣੇਨ ਪਦੇਸਮਤ੍ਤਮੇਵ ਕਰੋਨ੍ਤੀਤਿ ਸਮਾਧਿਸ੍ਮਿਂ ਪਞ੍ਞਾਯ ਚ ਮਤ੍ਤਸੋ ਕਾਰਿਨੋਤਿ ਵੁਚ੍ਚਨ੍ਤਿ. ਇਮਿਨਾ ਉਪਾਯੇਨ ਇਤਰੇਸੁਪਿ ਦ੍ਵੀਸੁ ਨਯੇਸੁ ਅਤ੍ਥੋ ਵੇਦਿਤਬ੍ਬੋ.

ਤਤ੍ਰਾਯਂ ਅਪਰੋਪਿ ਸੁਤ੍ਤਨ੍ਤਨਯੋ –

‘‘ਇਧ, ਭਿਕ੍ਖਵੇ, ਭਿਕ੍ਖੁ ਸੀਲੇਸੁ ਪਰਿਪੂਰਕਾਰੀ ਹੋਤਿ, ਸਮਾਧਿਸ੍ਮਿਂ ਮਤ੍ਤਸੋ ਕਾਰੀ, ਪਞ੍ਞਾਯ ਮਤ੍ਤਸੋ ਕਾਰੀ. ਸੋ ਯਾਨਿ ਤਾਨਿ ਖੁਦ੍ਦਾਨੁਖੁਦ੍ਦਕਾਨਿ ਸਿਕ੍ਖਾਪਦਾਨਿ ਤਾਨਿ ਆਪਜ੍ਜਤਿਪਿ, ਵੁਟ੍ਠਾਤਿਪਿ. ਤਂ ਕਿਸ੍ਸ ਹੇਤੁ? ਨ ਹਿ ਮੇਤ੍ਥ, ਭਿਕ੍ਖਵੇ, ਅਭਬ੍ਬਤਾ ਵੁਤ੍ਤਾ. ਯਾਨਿ ਚ ਖੋ ਤਾਨਿ ਸਿਕ੍ਖਾਪਦਾਨਿ ਆਦਿਬ੍ਰਹ੍ਮਚਰਿਯਕਾਨਿ ਬ੍ਰਹ੍ਮਚਰਿਯਸਾਰੁਪ੍ਪਾਨਿ, ਤਤ੍ਥ ਧੁਵਸੀਲੋ ਚ ਹੋਤਿ, ਠਿਤਸੀਲੋ ਚ, ਸਮਾਦਾਯ ਸਿਕ੍ਖਤਿ ਸਿਕ੍ਖਾਪਦੇਸੁ. ਸੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਸੋਤਾਪਨ੍ਨੋ ਹੋਤਿ, ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸੀਲੇਸੁ…ਪੇ… ਸੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ, ਰਾਗਦੋਸਮੋਹਾਨਂ ਤਨੁਤ੍ਤਾ, ਸਕਦਾਗਾਮੀ ਹੋਤਿ; ਸਕਿਦੇਵ ਇਮਂ ਲੋਕਂ ਆਗਨ੍ਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸੀਲੇਸੁ ਪਰਿਪੂਰਕਾਰੀ ਹੋਤਿ, ਸਮਾਧਿਸ੍ਮਿਂ ਪਰਿਪੂਰਕਾਰੀ, ਪਞ੍ਞਾਯ ਮਤ੍ਤਸੋ ਕਾਰੀ. ਸੋ ਯਾਨਿ ਤਾਨਿ…ਪੇ… ਸਿਕ੍ਖਤਿ ਸਿਕ੍ਖਾਪਦੇਸੁ. ਸੋ ਪਞ੍ਚਨ੍ਨਂ ਓਰਮ੍ਭਾਗਿਯਾਨਂ…ਪੇ… ਅਨਾਵਤ੍ਤਿਧਮ੍ਮੋ ਤਸ੍ਮਾ ਲੋਕਾ. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸੀਲੇਸੁ ਪਰਿਪੂਰਕਾਰੀ, ਸਮਾਧਿਸ੍ਮਿਂ ਪਰਿਪੂਰਕਾਰੀ, ਪਞ੍ਞਾਯ ਪਰਿਪੂਰਕਾਰੀ. ਸੋ ਯਾਨਿ ਤਾਨਿ ਖੁਦ੍ਦਾਨੁਖੁਦ੍ਦਕਾਨਿ…ਪੇ… ਸਿਕ੍ਖਤਿ ਸਿਕ੍ਖਾਪਦੇਸੁ. ਸੋ ਆਸਵਾਨਂ ਖਯਾ…ਪੇ… ਉਪਸਮ੍ਪਜ੍ਜ ਵਿਹਰਤੀ’’ਤਿ (ਅ. ਨਿ. ੩.੮੭).

੧੩੦. ਸਤ੍ਥਾਰਨਿਦ੍ਦੇਸੇ – ਪਰਿਞ੍ਞਂ ਪਞ੍ਞਪੇਤੀਤਿ ਪਹਾਨਂ ਸਮਤਿਕ੍ਕਮਂ ਪਞ੍ਞਪੇਤਿ. ਤਤ੍ਰਾਤਿ ਤੇਸੁ ਤੀਸੁ ਜਨੇਸੁ. ਤੇਨ ਦਟ੍ਠਬ੍ਬੋਤਿ ਤੇਨ ਪਞ੍ਞਾਪਨੇਨ ਸੋ ਸਤ੍ਥਾ ਰੂਪਾਵਚਰਸਮਾਪਤ੍ਤਿਯਾ ਲਾਭੀਤਿ ਦਟ੍ਠਬ੍ਬੋਤਿ ਅਤ੍ਥੋ. ਦੁਤਿਯਵਾਰੇਪਿ ਏਸੇਵ ਨਯੋ. ਸਮ੍ਮਾਸਮ੍ਬੁਦ੍ਧੋ ਸਤ੍ਥਾ ਤੇਨ ਦਟ੍ਠਬ੍ਬੋਤਿ ਤੇਨ ਤਿਤ੍ਥਿਯੇਹਿ ਅਸਾਧਾਰਣੇਨ ਪਞ੍ਞਾਪਨੇਨ ਅਯਂ ਤਤਿਯੋ ਸਤ੍ਥਾ ਸਬ੍ਬਞ੍ਞੁਬੁਦ੍ਧੋ ਦਟ੍ਠਬ੍ਬੋ. ਤਿਤ੍ਥਿਯਾ ਹਿ ਕਾਮਾਨਂ ਪਰਿਞ੍ਞਂ ਪਞ੍ਞਪੇਨ੍ਤਾ ਰੂਪਭਵਂ ਵਕ੍ਖਨ੍ਤਿ. ਰੂਪਾਨਂ ਪਰਿਞ੍ਞਂ ਪਞ੍ਞਪੇਨ੍ਤਾ ਅਰੂਪਭਵਂ ਵਕ੍ਖਨ੍ਤਿ. ਵੇਦਨਾਨਂ ਪਰਿਞ੍ਞਂ ਪਞ੍ਞਪੇਨ੍ਤਾ ਅਸਞ੍ਞਭਵਂ ਵਕ੍ਖਨ੍ਤਿ. ਸਮ੍ਮਾ ਪਞ੍ਞਪੇਨ੍ਤਾ ‘ਏਵਂ ਪਞ੍ਞਪੇਯ੍ਯੁਂ’, ਨੋ ਚ ਸਮ੍ਮਾ ਪਞ੍ਞਪੇਤੁਂ ਸਕ੍ਕੋਨ੍ਤਿ. ਸਮ੍ਮਾਸਮ੍ਬੁਦ੍ਧੋ ਪਨ ਕਾਮਾਨਂ ਪਰਿਞ੍ਞਂ ਪਹਾਨਂ ਅਨਾਗਾਮਿਮਗ੍ਗੇਨ ਪਞ੍ਞਪੇਤਿ. ਰੂਪਵੇਦਨਾਨਂ ਪਰਿਞ੍ਞਂ ਪਹਾਨਂ ਅਰਹਤ੍ਤਮਗ੍ਗੇਨ ਪਞ੍ਞਪੇਤਿ. ਇਮੇ ਤਯੋ ਸਤ੍ਥਾਰੋਤਿ ਇਮੇ ਦ੍ਵੇ ਜਨਾ ਬਾਹਿਰਕਾ, ਏਕੋ ਸਮ੍ਮਾਸਮ੍ਬੁਦ੍ਧੋਤਿ – ਇਮਸ੍ਮਿਂ ਲੋਕੇ ਤਯੋ ਸਤ੍ਥਾਰੋ ਨਾਮ.

੧੩੧. ਦੁਤਿਯੇ ਸਤ੍ਥਾਰਨਿਦ੍ਦੇਸੇ – ਦਿਟ੍ਠੇ ਚੇਵ ਧਮ੍ਮੇਤਿ ਇਮਸ੍ਮਿਂ ਅਤ੍ਤਭਾਵੇ. ਅਤ੍ਤਾਨਂ ਸਚ੍ਚਤੋ ਥੇਤਤੋ ਪਞ੍ਞਪੇਤੀਤਿ ‘‘ਅਤ੍ਤਾ ਨਾਮੇਕੋ ਅਤ੍ਥਿ ਨਿਚ੍ਚੋ ਧੁਵੋ ਸਸ੍ਸਤੋ’’ਤਿ ਭੂਤਤੋ ਥਿਰਤੋ ਪਞ੍ਞਪੇਤਿ. ਅਭਿਸਮ੍ਪਰਾਯਞ੍ਚਾਤਿ ਅਪਰਸ੍ਮਿਂ ਅਤ੍ਤਭਾਵੇ ਏਵਮੇਵ ਪਞ੍ਞਪੇਤਿ. ਸੇਸਮੇਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਤਿਕਨਿਦ੍ਦੇਸਵਣ੍ਣਨਾ.