੧੦. ਦਸਕਨਿਦ੍ਦੇਸਵਣ੍ਣਨਾ

੨੦੯. ਦਸਕਨਿਦ੍ਦੇਸੇ – ਇਧਾਤਿ ਕਾਮਾਵਚਰਭੂਮਿਯਂ. ਕਾਮਾਵਚਰਭੂਮਿਯਞ੍ਹਿ ਸਤ੍ਤਕ੍ਖਤ੍ਤੁਪਰਮਾਦੀਨਂ ਕਾਮਾਵਚਰਭੂਮਿਯਞ੍ਞੇਵ ਨਿਟ੍ਠਾ ਹੋਤਿ. ਕਾਮਾਵਚਰਤ੍ਤਭਾਵੇਨੇਵ ਅਰਹਤ੍ਤਪ੍ਪਤ੍ਤਿ ਚ ਅਨੁਪਾਦਿਸੇਸਨਿਬ੍ਬਾਨਪ੍ਪਤ੍ਤਿ ਚ ਹੋਤੀਤਿ ਅਤ੍ਥੋ.

ਇਧ ਵਿਹਾਯਾਤਿ ਇਧ ਕਾਮਾਵਚਰੇ ਅਤ੍ਤਭਾਵੇ ਵਿਹਾਯ ਸੁਦ੍ਧਾਵਾਸਤ੍ਤਭਾਵੇ ਠਿਤਾਨਂ ਨਿਟ੍ਠਾ ਹੋਤੀਤਿ ਅਤ੍ਥੋ. ਅਨ੍ਤਰਾਪਰਿਨਿਬ੍ਬਾਯਿਆਦਯੋ ਹਿ ਇਧ ਅਨਾਗਾਮਿਫਲਂ ਪਤ੍ਵਾ ਇਤੋ ਚੁਤਾ ਸੁਦ੍ਧਾਵਾਸੇਸੁ ਉਪ੍ਪਜ੍ਜਿਤ੍ਵਾ ਤੇਨ ਅਤ੍ਤਭਾਵੇਨ ਅਰਹਤ੍ਤਞ੍ਚੇਵ ਅਨੁਪਾਦਿਸੇਸਨਿਬ੍ਬਾਨਧਾਤੁਞ੍ਚ ਪਾਪੁਣਨ੍ਤਿ. ਤੇਨ ਵੁਤ੍ਤਂ – ‘‘ਇਮੇਸਂ ਪਞ੍ਚਨ੍ਨਂ ਇਧ ਵਿਹਾਯ ਨਿਟ੍ਠਾ’’ਤਿ.

ਦਸਕਨਿਦ੍ਦੇਸਵਣ੍ਣਨਾ.

ਨਿਗਮਨਕਥਾ

ਏਤ੍ਤਾਵਤਾ ਚ –

ਯਂ ਵੇ ਪੁਗ੍ਗਲਪਞ੍ਞਤ੍ਤਿਂ, ਲੋਕੇ ਅਪ੍ਪਟਿਪੁਗ੍ਗਲੋ;

ਨਾਤਿਸਙ੍ਖੇਪਤੋ ਸਤ੍ਥਾ, ਦੇਸੇਸਿ ਤਿਦਸਾਲਯੇ.

ਤਸ੍ਸਾ ਅਟ੍ਠਕਥਞ੍ਚੇਵ, ਦੀਪਭਾਸਾਯ ਸਙ੍ਖਤਂ;

ਆਗਮਟ੍ਠਕਥਾਯੋ ਚ, ਓਗਾਹੇਤ੍ਵਾ ਅਸੇਸਤੋ.

ਸੁਵਿਭਤ੍ਤੋ ਅਸਂਕਿਣ੍ਣੋ, ਯੋ ਯੋ ਅਤ੍ਥੋ ਯਹਿਂ ਯਹਿਂ;

ਤਤੋ ਤਤੋ ਤਂ ਗਹੇਤ੍ਵਾ, ਪਹਾਯ ਅਤਿਵਿਤ੍ਥਾਰਂ.

ਵਿਸੁਦ੍ਧਿਮਗ੍ਗੇ ਯਂ ਵੁਤ੍ਤਂ, ਤਂ ਅਨਾਦਾਯ ਸਙ੍ਖਤਾ;

ਨਾਤਿਸਙ੍ਖੇਪਵਿਤ੍ਥਾਰ-ਨਯੇਨਟ੍ਠਕਥਾ ਅਯਂ.

ਤਂ ਏਤਂ ਸਤ੍ਤਮਤ੍ਤੇਹਿ, ਭਾਣਵਾਰੇਹਿ ਤਨ੍ਤਿਯਾ;

ਚਿਰਟ੍ਠਿਤਤ੍ਥਂ ਧਮ੍ਮਸ੍ਸ, ਸਙ੍ਖਰੋਨ੍ਤੇਨ ਯਂ ਮਯਾ.

ਸਮ੍ਪਤ੍ਤਂ ਕੁਸਲਂ ਤੇਨ, ਸਦ੍ਧਮ੍ਮਂ ਸੁਖੁਮਂ ਸਿਵਂ;

ਓਲੋਕੇਨ੍ਤੁ ਵਿਸੁਦ੍ਧੇਨ, ਪਾਣਯੋ ਧਮ੍ਮਚਕ੍ਖੁਨਾਤਿ.

ਪੁਗ੍ਗਲਪਞ੍ਞਤ੍ਤਿ-ਅਟ੍ਠਕਥਾ ਨਿਟ੍ਠਿਤਾ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ