੧. ਏਕਕਨਿਦ੍ਦੇਸਵਣ੍ਣਨਾ

੧. ਇਦਾਨਿ ਯਥਾਠਪਿਤਂ ਮਾਤਿਕਂ ਆਦਿਤੋ ਪਟ੍ਠਾਯ ਵਿਭਜਿਤ੍ਵਾ ਦਸ੍ਸੇਤੁਂ – ਕਤਮੋ ਚ ਪੁਗ੍ਗਲੋ ਸਮਯਵਿਮੁਤ੍ਤੋਤਿਆਦਿਮਾਹ. ਤਤ੍ਥ ਇਧਾਤਿ ਇਮਸ੍ਮਿਂ ਸਤ੍ਤਲੋਕੇ. ਏਕਚ੍ਚੋ ਪੁਗ੍ਗਲੋਤਿ ਏਕੋ ਪੁਗ੍ਗਲੋ. ਕਾਲੇਨ ਕਾਲਨ੍ਤਿ ਏਤ੍ਥ ਭੁਮ੍ਮਵਸੇਨ ਅਤ੍ਥੋ ਵੇਦਿਤਬ੍ਬੋ. ਏਕੇਕਸ੍ਮਿਂ ਕਾਲੇਤਿ ਵੁਤ੍ਤਂ ਹੋਤਿ. ਸਮਯੇਨ ਸਮਯਨ੍ਤਿ ਇਦਂ ਪੁਰਿਮਸ੍ਸੇਵ ਵੇਵਚਨਂ. ਅਟ੍ਠ ਵਿਮੋਕ੍ਖੇਤਿ ਰੂਪਾਵਚਰਾਰੂਪਾਵਚਰਅਟ੍ਠਸਮਾਪਤ੍ਤਿਯੋ. ਤਾਸਞ੍ਹਿ ਪਚ੍ਚਨੀਕਧਮ੍ਮੇਹਿ ਵਿਮੁਚ੍ਚਨਤੋ ਵਿਮੋਕ੍ਖੋਤਿ ਨਾਮਂ. ਕਾਯੇਨਾਤਿ ਵਿਮੋਕ੍ਖਸਹਜਾਤੇਨ ਨਾਮਕਾਯੇਨ. ਫੁਸਿਤ੍ਵਾ ਵਿਹਰਤੀਤਿ ਪਟਿਲਭਿਤ੍ਵਾ ਇਰਿਯਤਿ. ਕਤਮਸ੍ਮਿਂ ਪਨੇਸ ਕਾਲੇ ਵਿਮੋਕ੍ਖੇ ਫੁਸਿਤ੍ਵਾ ਵਿਹਰਤੀਤਿ? ਸਮਾਪਤ੍ਤਿਂ ਸਮਾਪਜ੍ਜਿਤੁਕਾਮਸ੍ਸ ਹਿ ਕਾਲੋ ਨਾਮ ਅਤ੍ਥਿ, ਅਕਾਲੋ ਨਾਮ ਅਤ੍ਥਿ. ਤਤ੍ਥ ਪਾਤੋਵ ਸਰੀਰਪਟਿਜਗ੍ਗਨਕਾਲੋ, ਵਤ੍ਤਕਰਣਕਾਲੋ ਚ ਸਮਾਪਜ੍ਜਨਸ੍ਸ ਅਕਾਲੋ ਨਾਮ. ਸਰੀਰਂ ਪਨ ਪਟਿਜਗ੍ਗਿਤ੍ਵਾ ਵਤ੍ਤਂ ਕਤ੍ਵਾ ਵਸਨਟ੍ਠਾਨਂ ਪਵਿਸਿਤ੍ਵਾ ਨਿਸਿਨ੍ਨਸ੍ਸ ਯਾਵ ਪਿਣ੍ਡਾਯ ਗਮਨਕਾਲੋ ਨਾਗਚ੍ਛਤਿ, ਏਤਸ੍ਮਿਂ ਅਨ੍ਤਰੇ ਸਮਾਪਜ੍ਜਨਸ੍ਸ ਕਾਲੋ ਨਾਮ.

ਪਿਣ੍ਡਾਯ ਗਮਨਕਾਲਂ ਪਨ ਸਲ੍ਲਕ੍ਖੇਤ੍ਵਾ ਨਿਕ੍ਖਨ੍ਤਸ੍ਸ ਚੇਤਿਯਵਨ੍ਦਨਕਾਲੋ, ਭਿਕ੍ਖੁਸਙ੍ਘਪਰਿਵੁਤਸ੍ਸ ਵਿਤਕ੍ਕਮਾਲ਼ਕੇ ਠਾਨਕਾਲੋ ਪਿਣ੍ਡਾਯ ਗਮਨਕਾਲੋ ਗਾਮੇ ਚਰਣਕਾਲੋ; ਆਸਨਸਾਲਾਯ ਯਾਗੁਪਾਨਕਾਲੋ ਵਤ੍ਤਕਰਣਕਾਲੋਤਿ ਅਯਮ੍ਪਿ ਸਮਾਪਜ੍ਜਨਸ੍ਸ ਅਕਾਲੋ ਨਾਮ. ਆਸਨਸਾਲਾਯ ਪਨ ਵਿਵਿਤ੍ਤੇ ਓਕਾਸੇ ਸਤਿ ਯਾਵ ਭਤ੍ਤਕਾਲੋ ਨਾਗਚ੍ਛਤਿ, ਏਤਸ੍ਮਿਮ੍ਪਿ ਅਨ੍ਤਰੇ ਸਮਾਪਜ੍ਜਨਸ੍ਸ ਕਾਲੋ ਨਾਮ. ਭਤ੍ਤਂ ਪਨ ਭੁਞ੍ਜਨਕਾਲੋ, ਵਿਹਾਰਗਮਨਕਾਲੋ, ਪਤ੍ਤਚੀਵਰਪਟਿਸਾਮਨਕਾਲੋ, ਦਿਵਾਵਤ੍ਤਕਰਣਕਾਲੋ, ਪਰਿਪੁਚ੍ਛਾਦਾਨਕਾਲੋਤਿ ਅਯਮ੍ਪਿ ਸਮਾਪਜ੍ਜਨਸ੍ਸ ਅਕਾਲੋ ਨਾਮ. ਯੋ ਅਕਾਲੋ, ਸ੍ਵੇਵ ਅਸਮਯੋ. ਤਂ ਸਬ੍ਬਮ੍ਪਿ ਠਪੇਤ੍ਵਾ ਅਵਸੇਸੇ ਕਾਲੇ ਕਾਲੇ, ਸਮਯੇ ਸਮਯੇ ਵੁਤ੍ਤਪ੍ਪਕਾਰੇ ਅਟ੍ਠ ਵਿਮੋਕ੍ਖੇ ਸਹਜਾਤਨਾਮਕਾਯੇਨ ਪਟਿਲਭਿਤ੍ਵਾ ਵਿਹਰਨ੍ਤੋ, ‘‘ਇਧੇਕਚ੍ਚੋ ਪੁਗ੍ਗਲੋ…ਪੇ… ਵਿਹਰਤੀ’’ਤਿ ਵੁਚ੍ਚਤਿ.

ਅਪਿਚੇਸ ਸਫਸ੍ਸਕੇਹਿ ਸਹਜਾਤਨਾਮਧਮ੍ਮੇਹਿ ਸਹਜਾਤਧਮ੍ਮੇ ਫੁਸਤਿਯੇਵ ਨਾਮ, ਉਪਚਾਰੇਨ ਅਪ੍ਪਨਂ ਫੁਸਤਿਯੇਵ ਨਾਮ. ਪੁਰਿਮਾਯ ਅਪ੍ਪਨਾਯ ਅਪਰਂ ਅਪ੍ਪਨਂ ਫੁਸਤਿਯੇਵ. ਯੇਨ ਹਿ ਸਦ੍ਧਿਂ ਯੇ ਧਮ੍ਮਾ ਸਹਜਾਤਾ, ਤੇਨ ਤੇ ਪਟਿਲਦ੍ਧਾ ਨਾਮ ਹੋਨ੍ਤਿ. ਫਸ੍ਸੇਨਾਪਿ ਫੁਟ੍ਠਾਯੇਵ ਨਾਮ ਹੋਨ੍ਤਿ. ਉਪਚਾਰਮ੍ਪਿ ਅਪ੍ਪਨਾਯ ਪਟਿਲਾਭਕਾਰਣਮੇਵ, ਤਥਾ ਪੁਰਿਮਾ ਅਪ੍ਪਨਾ ਅਪਰਅਪ੍ਪਨਾਯ. ਤਤ੍ਰਾਸ੍ਸ ਏਵਂ ਸਹਜਾਤੇਹਿ ਸਹਜਾਤਾਨਂ ਫੁਸਨਾ ਵੇਦਿਤਬ੍ਬਾ – ਪਠਮਜ੍ਝਾਨਞ੍ਹਿ ਵਿਤਕ੍ਕਾਦੀਹਿ ਪਞ੍ਚਙ੍ਗਿਕਂ. ਤਸ੍ਮਿਂ ਠਪੇਤ੍ਵਾ ਤਾਨਿ ਅਙ੍ਗਾਨਿ ਸੇਸਾ ਅਤਿਰੇਕਪਣ੍ਣਾਸਧਮ੍ਮਾ ਚਤ੍ਤਾਰੋ ਖਨ੍ਧਾ ਨਾਮ ਹੋਨ੍ਤਿ. ਤੇਨ ਨਾਮਕਾਯੇਨ ਪਠਮਜ੍ਝਾਨਸਮਾਪਤ੍ਤਿਵਿਮੋਕ੍ਖਂ ਫੁਸਿਤ੍ਵਾ ਪਟਿਲਭਿਤ੍ਵਾ ਵਿਹਰਤਿ. ਦੁਤਿਯਂ ਝਾਨਂ ਪੀਤਿਸੁਖਚਿਤ੍ਤੇਕਗ੍ਗਤਾਹਿ ਤਿਵਙ੍ਗਿਕਂ, ਤਤਿਯਂ ਸੁਖਚਿਤ੍ਤੇਕਗ੍ਗਤਾਹਿ ਦੁਵਙ੍ਗਿਕਂ, ਚਤੁਤ੍ਥਂ ਉਪੇਕ੍ਖਾਚਿਤ੍ਤੇਕਗ੍ਗਤਾਹਿ ਦੁਵਙ੍ਗਿਕਂ, ਤਥਾ ਆਕਾਸਾਨਞ੍ਚਾਯਤਨਂ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਞ੍ਚ. ਤਤ੍ਥ ਠਪੇਤ੍ਵਾ ਤਾਨਿ ਅਙ੍ਗਾਨਿ ਸੇਸਾ ਅਤਿਰੇਕਪਣ੍ਣਾਸਧਮ੍ਮਾ ਚਤ੍ਤਾਰੋ ਖਨ੍ਧਾ ਨਾਮ ਹੋਨ੍ਤਿ. ਤੇਨ ਨਾਮਕਾਯੇਨ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਵਿਮੋਕ੍ਖਂ ਫੁਸਿਤ੍ਵਾ ਪਟਿਲਭਿਤ੍ਵਾ ਵਿਹਰਤਿ.

ਪਞ੍ਞਾਯ ਚਸ੍ਸ ਦਿਸ੍ਵਾਤਿ ਵਿਪਸ੍ਸਨਾਪਞ੍ਞਾਯ ਸਙ੍ਖਾਰਗਤਂ, ਮਗ੍ਗਪਞ੍ਞਾਯ ਚਤੁਸਚ੍ਚਧਮ੍ਮੇ ਪਸ੍ਸਿਤ੍ਵਾ. ਏਕਚ੍ਚੇ ਆਸਵਾ ਪਰਿਕ੍ਖੀਣਾ ਹੋਨ੍ਤੀਤਿ ਉਪਡ੍ਢੁਪਡ੍ਢਾ ਪਠਮਮਗ੍ਗਾਦਿਵਜ੍ਝਾ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਮਯਵਿਮੁਤ੍ਤੋਤਿ ਏਤ੍ਥ ਅਟ੍ਠਸਮਾਪਤ੍ਤਿਲਾਭੀ ਪੁਥੁਜ੍ਜਨੋ ਤੇਨ ਨਾਮਕਾਯੇਨ ਫੁਸਿਤ੍ਵਾ ਵਿਹਰਤੀਤਿ ਵਤ੍ਤੁਂ ਵਟ੍ਟਤਿ. ਪਾਲ਼ਿਯਂ ਪਨ ‘‘ਏਕਚ੍ਚੇ ਆਸਵਾ ਪਰਿਕ੍ਖੀਣਾ’’ਤਿ ਵੁਤ੍ਤਂ. ਪੁਥੁਜ੍ਜਨਸ੍ਸ ਚ ਖੀਣਾ ਆਸਵਾ ਨਾਮ ਨਤ੍ਥਿ, ਤਸ੍ਮਾ ਸੋ ਨ ਗਹਿਤੋ. ਅਟ੍ਠਸਮਾਪਤ੍ਤਿਲਾਭੀ ਖੀਣਾਸਵੋਪਿ ਤੇਨ ਨਾਮਕਾਯੇਨ ਫੁਸਿਤ੍ਵਾ ਵਿਹਰਤੀਤਿ ਵਤ੍ਤੁਂ ਵਟ੍ਟਤਿ. ਤਸ੍ਸ ਪਨ ਅਪਰਿਕ੍ਖੀਣਾਸਵਾ ਨਾਮ ਨਤ੍ਥਿ, ਤਸ੍ਮਾ ਸੋਪਿ ਨ ਗਹਿਤੋ. ਸਮਯਵਿਮੁਤ੍ਤੋਤਿ ਪਨ ਤਿਣ੍ਣਂ ਸੋਤਾਪਨ੍ਨਸਕਦਾਗਾਮਿਅਨਾਗਾਮੀਨਂਯੇਵੇਤਂ ਨਾਮਨ੍ਤਿ ਵੇਦਿਤਬ੍ਬਂ.

੨. ਅਸਮਯਵਿਮੁਤ੍ਤਨਿਦ੍ਦੇਸੇ – ਪੁਰਿਮਸਦਿਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਅਸਮਯਵਿਮੁਤ੍ਤੋਤਿ ਪਨੇਤ੍ਥ ਸੁਕ੍ਖਵਿਪਸ੍ਸਕਖੀਣਾਸਵਸ੍ਸੇਤਂ ਨਾਮਂ. ਸੁਕ੍ਖਵਿਪਸ੍ਸਕਾ ਪਨ ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਨੋ ਅਟ੍ਠਸਮਾਪਤ੍ਤਿਲਾਭਿਨੋ ਚ ਖੀਣਾਸਵਾ ਪੁਥੁਜ੍ਜਨਾ ਚ ਇਮਸ੍ਮਿਂ ਦੁਕੇ ਨ ਲਬ੍ਭਨ੍ਤਿ, ਦੁਕਮੁਤ੍ਤਕਪੁਗ੍ਗਲਾ ਨਾਮ ਹੋਨ੍ਤਿ. ਤਸ੍ਮਾ ਸਤ੍ਥਾ ਅਤ੍ਤਨੋ ਬੁਦ੍ਧਸੁਬੁਦ੍ਧਤਾਯ ਹੇਟ੍ਠਾ ਗਹਿਤੇ ਚ ਅਗ੍ਗਹਿਤੇ ਚ ਸਙ੍ਕਡ੍ਢਿਤ੍ਵਾ ਸਦ੍ਧਿਂ ਪਿਟ੍ਠਿਵਟ੍ਟਕੇਹਿ ਤਨ੍ਤਿਂ ਆਰੋਪੇਨ੍ਤੋ ਸਬ੍ਬੇਪਿ ਅਰਿਯਪੁਗ੍ਗਲਾਤਿਆਦਿਮਾਹ. ਤਤ੍ਥ ਅਰਿਯੇ ਵਿਮੋਕ੍ਖੇਤਿ ਕਿਲੇਸੇਹਿ ਆਰਕਤ੍ਤਾ ਅਰਿਯੇਤਿ ਸਙ੍ਖਂ ਗਤੇ ਲੋਕੁਤ੍ਤਰਵਿਮੋਕ੍ਖੇ. ਇਦਂ ਵੁਤ੍ਤਂ ਹੋਤਿ – ਬਾਹਿਰਾਨਞ੍ਹਿ ਅਟ੍ਠਨ੍ਨਂ ਸਮਾਪਤ੍ਤੀਨਂ ਸਮਾਪਜ੍ਜਨ੍ਤਸ੍ਸ ਸਮਯੋਪਿ ਅਤ੍ਥਿ ਅਸਮਯੋਪਿ. ਮਗ੍ਗਵਿਮੋਕ੍ਖੇਨ ਵਿਮੁਚ੍ਚਨਸ੍ਸ ਸਮਯੋ ਵਾ ਅਸਮਯੋ ਵਾ ਨਤ੍ਥਿ. ਯਸ੍ਸ ਸਦ੍ਧਾ ਬਲਵਤੀ, ਵਿਪਸ੍ਸਨਾ ਚ ਆਰਦ੍ਧਾ, ਤਸ੍ਸ ਗਚ੍ਛਨ੍ਤਸ੍ਸ ਤਿਟ੍ਠਨ੍ਤਸ੍ਸ ਨਿਸੀਦਨ੍ਤਸ੍ਸ ਨਿਪਜ੍ਜਨ੍ਤਸ੍ਸ ਖਾਦਨ੍ਤਸ੍ਸ ਭੁਞ੍ਜਨ੍ਤਸ੍ਸ ਮਗ੍ਗਫਲਪਟਿਵੇਧੋ ਨਾਮ ਨ ਹੋਤੀਤਿ ਨਤ੍ਥਿ. ਇਤਿ ਮਗ੍ਗਵਿਮੋਕ੍ਖੇਨ ਵਿਮੁਚ੍ਚਨਸ੍ਸ ਸਮਯੋ ਵਾ ਅਸਮਯੋ ਵਾ ਨਤ੍ਥੀਤਿ ਹੇਟ੍ਠਾ ਗਹਿਤੇ ਚ ਅਗ੍ਗਹਿਤੇ ਚ ਸਙ੍ਕਡ੍ਢਿਤ੍ਵਾ ਇਮਂ ਪਿਟ੍ਠਿਵਟ੍ਟਕਂ ਤਨ੍ਤਿਂ ਆਰੋਪੇਸਿ ਧਮ੍ਮਰਾਜਾ. ਸਮਾਪਤ੍ਤਿਲਾਭੀ ਪੁਥੁਜ੍ਜਨੋ ਇਮਾਯਪਿ ਤਨ੍ਤਿਯਾ ਅਗ੍ਗਹਿਤੋਵ. ਭਜਾਪਿਯਮਾਨੋ ਪਨ ਸਮਾਪਤ੍ਤਿਵਿਕ੍ਖਮ੍ਭਿਤਾਨਂ ਕਿਲੇਸਾਨਂ ਵਸੇਨ ਸਮਯਵਿਮੁਤ੍ਤਭਾਵਂ ਭਜੇਯ੍ਯ.

੩. ਕੁਪ੍ਪਧਮ੍ਮਾਕੁਪ੍ਪਧਮ੍ਮਨਿਦ੍ਦੇਸੇਸੁ – ਯਸ੍ਸ ਅਧਿਗਤੋ ਸਮਾਪਤ੍ਤਿਧਮ੍ਮੋ ਕੁਪ੍ਪਤਿ ਨਸ੍ਸਤਿ, ਸੋ ਕੁਪ੍ਪਧਮ੍ਮੋ. ਰੂਪਸਹਗਤਾਨਨ੍ਤਿ ਰੂਪਨਿਮਿਤ੍ਤਸਙ੍ਖਾਤੇਨ ਰੂਪੇਨ ਸਹਗਤਾਨਂ. ਤੇਨ ਸਦ੍ਧਿਂ ਪਵਤ੍ਤਾਨਂ ਨ ਵਿਨਾ ਰੂਪਾਰਮ੍ਮਣਾਨਂ ਚਤੁਨ੍ਨਂ ਰੂਪਾਵਚਰਜ੍ਝਾਨਾਨਨ੍ਤਿ ਅਤ੍ਥੋ. ਅਰੂਪਸਹਗਤਾਨਨ੍ਤਿ ਰੂਪਤੋ ਅਞ੍ਞਂ, ਨ ਰੂਪਨ੍ਤਿ ਅਰੂਪਂ. ਅਰੂਪੇਨ ਸਹਗਤਾਨਂ ਤੇਨ ਸਦ੍ਧਿਂ ਪਵਤ੍ਤਾਨਂ ਨ ਵਿਨਾ ਅਰੂਪਾਰਮ੍ਮਣਾਨਂ ਚਤੁਨ੍ਨਂ ਅਰੂਪਾਵਚਰਜ੍ਝਾਨਾਨਨ੍ਤਿ ਅਤ੍ਥੋ. ਨ ਨਿਕਾਮਲਾਭੀਤਿ ਪਞ੍ਚਹਾਕਾਰੇਹਿ ਅਚਿਣ੍ਣਵਸਿਤਾਯ ਇਚ੍ਛਿਤਾਕਾਰੇਨ ਅਲਦ੍ਧਤ੍ਤਾ ਨ ਨਿਕਾਮਲਾਭੀ. ਅਪ੍ਪਗੁਣਸਮਾਪਤ੍ਤਿਕੋਤਿ ਅਤ੍ਥੋ. ਨ ਅਕਿਚ੍ਛਲਾਭੀਤਿ ਕਿਚ੍ਛਲਾਭੀ ਦੁਕ੍ਖਲਾਭੀ. ਯੋ ਆਗਮਨਮ੍ਹਿ ਕਿਲੇਸੇ ਵਿਕ੍ਖਮ੍ਭੇਨ੍ਤੋ ਉਪਚਾਰਂ ਪਾਪੇਨ੍ਤੋ ਅਪ੍ਪਨਂ ਪਾਪੇਨ੍ਤੋ ਚਿਤ੍ਤਮਞ੍ਜੂਸਂ ਲਭਨ੍ਤੋ ਦੁਕ੍ਖੇਨ ਕਿਚ੍ਛੇਨ ਸਸਙ੍ਖਾਰੇਨ ਸਪ੍ਪਯੋਗੇਨ ਕਿਲਮਨ੍ਤੋ ਤਂ ਸਮ੍ਪਦਂ ਪਾਪੁਣਿਤੁਂ ਸਕ੍ਕੋਤਿ, ਸੋ ਨ ਅਕਿਚ੍ਛਲਾਭੀ ਨਾਮ. ਨ ਅਕਸਿਰਲਾਭੀਤਿ ਅਵਿਪੁਲਲਾਭੀ. ਸਮਾਪਤ੍ਤਿਂ ਅਪ੍ਪੇਤ੍ਵਾ ਅਦ੍ਧਾਨਂ ਫਰਿਤੁਂ ਨ ਸਕ੍ਕੋਤਿ. ਏਕਂ ਦ੍ਵੇ ਚਿਤ੍ਤਵਾਰੇ ਵਤ੍ਤੇਤ੍ਵਾ ਸਹਸਾਵ ਵੁਟ੍ਠਾਤੀਤਿ ਅਤ੍ਥੋ.

ਯਤ੍ਥਿਚ੍ਛਕਨ੍ਤਿ ਯਸ੍ਮਿਂ ਓਕਾਸੇ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਿਤੁਂ ਇਚ੍ਛਤਿ. ਯਦਿਚ੍ਛਕਨ੍ਤਿ ਕਸਿਣਜ੍ਝਾਨਂ ਵਾ ਆਨਾਪਾਨਜ੍ਝਾਨਂ ਵਾ ਬ੍ਰਹ੍ਮਵਿਹਾਰਜ੍ਝਾਨਂ ਵਾ ਅਸੁਭਜ੍ਝਾਨਂ ਵਾਤਿ ਯਂ ਯਂ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਿਤੁਂ ਇਚ੍ਛਤਿ. ਯਾਵਤਿਚ੍ਛਕਨ੍ਤਿ ਅਦ੍ਧਾਨਪਰਿਚ੍ਛੇਦੇਨ ਯਤ੍ਤਕਂ ਕਾਲਂ ਇਚ੍ਛਤਿ. ਇਦਂ ਵੁਤ੍ਤਂ ਹੋਤਿ – ਯਤ੍ਥ ਯਤ੍ਥ ਯਂ ਯਂ ਸਮਾਪਤ੍ਤਿਂ ਯਤ੍ਤਕਂ ਅਦ੍ਧਾਨਂ ਸਮਾਪਜ੍ਜਿਤੁਮ੍ਪਿ ਵੁਟ੍ਠਾਤੁਮ੍ਪਿ ਇਚ੍ਛਤਿ, ਤਤ੍ਥ ਤਤ੍ਥ ਤਂ ਤਂ ਸਮਾਪਤ੍ਤਿਂ ਤਤ੍ਤਕਂ ਅਦ੍ਧਾਨਂ ਸਮਾਪਜ੍ਜਿਤੁਮ੍ਪਿ ਵੁਟ੍ਠਾਤੁਮ੍ਪਿ ਨ ਸਕ੍ਕੋਤਿ. ਚਨ੍ਦਂ ਵਾ ਸੂਰਿਯਂ ਵਾ ਉਲ੍ਲੋਕੇਤ੍ਵਾ ‘ਇਮਸ੍ਮਿਂ ਚਨ੍ਦੇ ਵਾ ਸੂਰਿਯੇ ਵਾ ਏਤ੍ਤਕਂ ਠਾਨਂ ਗਤੇ ਵੁਟ੍ਠਹਿਸ੍ਸਾਮੀ’ਤਿ ਪਰਿਚ੍ਛਿਨ੍ਦਿਤ੍ਵਾ ਝਾਨਂ ਸਮਾਪਨ੍ਨੋ ਯਥਾਪਰਿਚ੍ਛੇਦੇਨ ਵੁਟ੍ਠਾਤੁਂ ਨ ਸਕ੍ਕੋਤਿ, ਅਨ੍ਤਰਾਵ ਵੁਟ੍ਠਾਤਿ; ਸਮਾਪਤ੍ਤਿਯਾ ਅਪ੍ਪਗੁਣਤਾਯਾਤਿ.

ਪਮਾਦਮਾਗਮ੍ਮਾਤਿ ਪਮਾਦਂ ਪਟਿਚ੍ਚ. ਅਯਂ ਵੁਚ੍ਚਤੀਤਿ ਅਯਂ ਏਵਂਵਿਧੋ ਪੁਗ੍ਗਲੋ ਕੁਪ੍ਪਧਮ੍ਮੋਤਿ ਵੁਚ੍ਚਤਿ. ਇਦਂ ਪਨ ਅਟ੍ਠਸਮਾਪਤ੍ਤਿਲਾਭਿਨੋ ਪੁਥੁਜ੍ਜਨਸ੍ਸ ਸੋਤਾਪਨ੍ਨਸ੍ਸ ਸਕਦਾਗਾਮਿਨੋਤਿ ਤਿਣ੍ਣਂ ਪੁਗ੍ਗਲਾਨਂ ਨਾਮਂ. ਏਤੇਸਞ੍ਹਿ ਸਮਾਧਿਪਾਰਿਬਨ੍ਧਕਾ ਵਿਪਸ੍ਸਨਾਪਾਰਿਬਨ੍ਧਕਾ ਚ ਧਮ੍ਮਾ ਨ ਸੁਵਿਕ੍ਖਮ੍ਭਿਤਾ, ਨ ਸੁਵਿਕ੍ਖਾਲਿਤਾ, ਤੇਨ ਤੇਸਂ ਸਮਾਪਤ੍ਤਿ ਨਸ੍ਸਤਿ ਪਰਿਹਾਯਤਿ. ਸਾ ਚ ਖੋ ਨੇਵ ਸੀਲਭੇਦੇਨ, ਨਾਪਤ੍ਤਿਵੀਤਿਕ੍ਕਮੇਨ. ਨ ਗਰੁਕਮੋਕ੍ਖਧਮ੍ਮੋ ਪਨੇਸ ਅਪ੍ਪਮਤ੍ਤਕੇਨਪਿ ਕਿਚ੍ਚਕਰਣੀਯੇਨ ਵਾ ਵਤ੍ਤਭੇਦਮਤ੍ਤਕੇਨ ਵਾ ਨਸ੍ਸਤਿ.

ਤਤ੍ਰਿਦਂ ਵਤ੍ਥੁ – ਏਕੋ ਕਿਰ ਥੇਰੋ ਸਮਾਪਤ੍ਤਿਂ ਵਲ਼ਞ੍ਜੇਤਿ. ਤਸ੍ਮਿਂ ਪਿਣ੍ਡਾਯ ਗਾਮਂ ਪਵਿਟ੍ਠੇ ਦਾਰਕਾ ਪਰਿਵੇਣੇ ਕੀਲ਼ਿਤ੍ਵਾ ਪਕ੍ਕਮਿਂਸੁ. ਥੇਰੋ ਆਗਨ੍ਤ੍ਵਾ ‘ਪਰਿਵੇਣਂ ਸਮ੍ਮਜ੍ਜਿਤਬ੍ਬ’ਨ੍ਤਿ ਚਿਨ੍ਤੇਤ੍ਵਾ ਅਸਮ੍ਮਜ੍ਜਿਤ੍ਵਾ ਵਿਹਾਰਂ ਪਵਿਸਿਤ੍ਵਾ ‘ਸਮਾਪਤ੍ਤਿਂ ਅਪ੍ਪੇਸ੍ਸਾਮੀ’ਤਿ ਨਿਸੀਦਿ. ਸੋ ਅਪ੍ਪੇਤੁਂ ਅਸਕ੍ਕੋਨ੍ਤੋ, ‘ਕਿਂ ਨੁ ਖੋ ਆਵਰਣ’ਨ੍ਤਿ ਸੀਲਂ ਆਵਜ੍ਜਨ੍ਤੋ ਅਪ੍ਪਮਤ੍ਤਕਮ੍ਪਿ ਵੀਤਿਕ੍ਕਮਂ ਅਦਿਸ੍ਵਾ ‘ਵਤ੍ਤਭੇਦੋ ਨੁ ਖੋ ਅਤ੍ਥੀ’ਤਿ ਓਲੋਕੇਨ੍ਤੋ ਪਰਿਵੇਣਸ੍ਸ ਅਸਮ੍ਮਟ੍ਠਭਾਵਂ ਞਤ੍ਵਾ ਸਮ੍ਮਜ੍ਜਿਤ੍ਵਾ ਪਵਿਸਿਤ੍ਵਾ ਨਿਸੀਦਨ੍ਤੋ ਸਮਾਪਤ੍ਤਿਂ ਅਪ੍ਪੇਨ੍ਤੋਵ ਨਿਸੀਦਿ.

੪. ਅਕੁਪ੍ਪਧਮ੍ਮਨਿਦ੍ਦੇਸੋ ਵੁਤ੍ਤਪਟਿਪਕ੍ਖਵਸੇਨੇਵ ਵੇਦਿਤਬ੍ਬੋ. ਅਕੁਪ੍ਪਧਮ੍ਮੋਤਿ ਇਦਂ ਪਨ ਅਟ੍ਠਸਮਾਪਤ੍ਤਿਲਾਭਿਨੋ ਅਨਾਗਾਮਿਸ੍ਸ ਚੇਵ ਖੀਣਾਸਵਸ੍ਸ ਚਾਤਿ ਦ੍ਵਿਨ੍ਨਂ ਪੁਗ੍ਗਲਾਨਂ ਨਾਮਂ. ਤੇਸਞ੍ਹਿ ਸਮਾਧਿਪਾਰਿਬਨ੍ਧਕਾ ਵਿਪਸ੍ਸਨਾਪਾਰਿਬਨ੍ਧਕਾ ਚ ਧਮ੍ਮਾ ਸੁਵਿਕ੍ਖਮ੍ਭਿਤਾ ਸੁਵਿਕ੍ਖਾਲਿਤਾ; ਤੇਨ ਤੇਸਂ ਭਸ੍ਸਸਙ੍ਗਣਿਕਾਰਾਮਾਦਿਕਿਚ੍ਚੇਨ ਵਾ ਅਞ੍ਞੇਨ ਵਾ ਯੇਨ ਕੇਨਚਿ ਅਤ੍ਤਨੋ ਅਨੁਰੂਪੇਨ ਪਮਾਦੇਨ ਵੀਤਿਨਾਮੇਨ੍ਤਾਨਮ੍ਪਿ ਸਮਾਪਤ੍ਤਿ ਨ ਕੁਪ੍ਪਤਿ, ਨ ਨਸ੍ਸਤਿ. ਸੁਕ੍ਖਵਿਪਸ੍ਸਕਾ ਪਨ ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਖੀਣਾਸਵਾ ਇਮਸ੍ਮਿਂ ਦੁਕੇ ਨ ਲਬ੍ਭਨ੍ਤਿ; ਦੁਕਮੁਤ੍ਤਕਪੁਗ੍ਗਲਾ ਨਾਮ ਹੋਨ੍ਤਿ. ਤਸ੍ਮਾ ਸਤ੍ਥਾ ਅਤ੍ਤਨੋ ਬੁਦ੍ਧਸੁਬੁਦ੍ਧਤਾਯ ਹੇਟ੍ਠਾ ਗਹਿਤੇ ਚ ਅਗ੍ਗਹਿਤੇ ਚ ਸਙ੍ਕਡ੍ਢਿਤ੍ਵਾ ਇਮਸ੍ਮਿਮ੍ਪਿ ਦੁਕੇ ਸਦ੍ਧਿਂ ਪਿਟ੍ਠਿਵਟ੍ਟਕੇਹਿ ਤਨ੍ਤਿਂ ਆਰੋਪੇਨ੍ਤੋ ਸਬ੍ਬੇਪਿ ਅਰਿਯਪੁਗ੍ਗਲਾਤਿਆਦਿਮਾਹ. ਅਟ੍ਠਨ੍ਨਞ੍ਹਿ ਸਮਾਪਤ੍ਤੀਨਂ ਕੁਪ੍ਪਨਂ ਨਸ੍ਸਨਂ ਭਵੇਯ੍ਯ, ਲੋਕੁਤ੍ਤਰਧਮ੍ਮਸ੍ਸ ਪਨ ਸਕਿਂ ਪਟਿਵਿਦ੍ਧਸ੍ਸ ਕੁਪ੍ਪਨਂ ਨਸ੍ਸਨਂ ਨਾਮ ਨਤ੍ਥਿ, ਤਂ ਸਨ੍ਧਾਯੇਤਂ ਵੁਤ੍ਤਂ.

੫. ਪਰਿਹਾਨਧਮ੍ਮਾਪਰਿਹਾਨਧਮ੍ਮਨਿਦ੍ਦੇਸਾਪਿ ਕੁਪ੍ਪਧਮ੍ਮਾਕੁਪ੍ਪਧਮ੍ਮਨਿਦ੍ਦੇਸਵਸੇਨੇਵ ਵੇਦਿਤਬ੍ਬਾ. ਕੇਵਲਞ੍ਹਿ ਇਧ ਪੁਗ੍ਗਲਸ੍ਸ ਪਮਾਦਂ ਪਟਿਚ੍ਚ ਧਮ੍ਮਾਨਂ ਪਰਿਹਾਨਮ੍ਪਿ ਅਪਰਿਹਾਨਮ੍ਪਿ ਗਹਿਤਨ੍ਤਿ ਇਦਂ ਪਰਿਯਾਯਦੇਸਨਾਮਤ੍ਤਮੇਵ ਨਾਨਂ. ਸੇਸਂ ਸਬ੍ਬਤ੍ਥ ਤਾਦਿਸਮੇਵ.

੭. ਚੇਤਨਾਭਬ੍ਬਨਿਦ੍ਦੇਸੇ – ਚੇਤਨਾਭਬ੍ਬੋਤਿ ਚੇਤਨਾਯ ਅਪਰਿਹਾਨਿਂ ਆਪਜ੍ਜਿਤੁਂ ਭਬ੍ਬੋ. ਸਚੇ ਅਨੁਸਞ੍ਚੇਤੇਤੀਤਿ, ਸਚੇ ਸਮਾਪਜ੍ਜਤਿ. ਸਮਾਪਤ੍ਤਿਞ੍ਹਿ ਸਮਾਪਜ੍ਜਨ੍ਤੋ ਅਨੁਸਞ੍ਚੇਤੇਤਿ ਨਾਮ. ਸੋ ਨ ਪਰਿਹਾਯਤਿ, ਇਤਰੋ ਪਰਿਹਾਯਤਿ.

੮. ਅਨੁਰਕ੍ਖਣਾਭਬ੍ਬਨਿਦ੍ਦੇਸੇ – ਅਨੁਰਕ੍ਖਣਾਭਬ੍ਬੋਤਿ ਅਨੁਰਕ੍ਖਣਾਯ ਅਪਰਿਹਾਨਿਂ ਆਪਜ੍ਜਿਤੁਂ ਭਬ੍ਬੋ. ਸਚੇ ਅਨੁਰਕ੍ਖਤੀਤਿ ਸਚੇ ਅਨੁਪਕਾਰਧਮ੍ਮੇ ਪਹਾਯ ਉਪਕਾਰਧਮ੍ਮੇ ਸੇਵਨ੍ਤੋ ਸਮਾਪਜ੍ਜਤਿ. ਏਵਞ੍ਹਿ ਪਟਿਪਜ੍ਜਨ੍ਤੋ ਅਨੁਰਕ੍ਖਤਿ ਨਾਮ. ਸੋ ਨ ਪਰਿਹਾਯਤਿ, ਇਤਰੋ ਪਰਿਹਾਯਤਿ.

ਇਮੇ ਦ੍ਵੇਪਿ ਸਮਾਪਤ੍ਤਿਂ ਠਪੇਤੁਂ ਥਾਵਰਂ ਕਾਤੁਂ ਪਟਿਬਲਾ. ਚੇਤਨਾਭਬ੍ਬਤੋ ਪਨ ਅਨੁਰਕ੍ਖਣਾਭਬ੍ਬੋਵ ਬਲਵਤਰੋ. ਚੇਤਨਾਭਬ੍ਬੋ ਹਿ ਉਪਕਾਰਾਨੁਪਕਾਰੇ ਧਮ੍ਮੇ ਨ ਜਾਨਾਤਿ. ਅਜਾਨਨ੍ਤੋ ਉਪਕਾਰਧਮ੍ਮੇ ਨੁਦਤਿ ਨੀਹਰਤਿ, ਅਨੁਪਕਾਰਧਮ੍ਮੇ ਸੇਵਤਿ. ਸੋ ਤੇ ਸੇਵਨ੍ਤੋ ਸਮਾਪਤ੍ਤਿਤੋ ਪਰਿਹਾਯਤਿ. ਅਨੁਰਕ੍ਖਣਾਭਬ੍ਬੋ ਉਪਕਾਰਾਨੁਪਕਾਰੇ ਧਮ੍ਮੇ ਜਾਨਾਤਿ. ਜਾਨਨ੍ਤੋ ਅਨੁਪਕਾਰਧਮ੍ਮੇ ਨੁਦਤਿ ਨੀਹਰਤਿ, ਉਪਕਾਰਧਮ੍ਮੇ ਸੇਵਤਿ. ਸੋ ਤੇ ਸੇਵਨ੍ਤੋ ਸਮਾਪਤ੍ਤਿਤੋ ਨ ਪਰਿਹਾਯਤਿ.

ਯਥਾ ਹਿ ਦ੍ਵੇ ਖੇਤ੍ਤਪਾਲਾ ਏਕੋ ਪਣ੍ਡੁਰੋਗੇਨ ਸਰੋਗੋ ਅਕ੍ਖਮੋ ਸੀਤਾਦੀਨਂ, ਏਕੋ ਅਰੋਗੋ ਸੀਤਾਦੀਨਂ ਸਹੋ. ਸਰੋਗੋ ਹੇਟ੍ਠਾਕੁਟਿਂ ਨ ਓਤਰਤਿ, ਰਤ੍ਤਾਰਕ੍ਖਂ ਦਿਵਾਰਕ੍ਖਂ ਵਿਜਹਤਿ. ਤਸ੍ਸ ਦਿਵਾ ਸੁਕਮੋਰਾਦਯੋ ਖੇਤ੍ਤਂ ਓਤਰਿਤ੍ਵਾ ਸਾਲਿਸੀਸਂ ਖਾਦਨ੍ਤਿ, ਰਤ੍ਤਿਂ ਮਿਗਸੂਕਰਾਦਯੋ ਪਵਿਸਿਤ੍ਵਾ ਖਲਂ ਤਚ੍ਛਿ ਤਂ ਵਿਯ ਛੇਤ੍ਵਾ ਗਚ੍ਛਨ੍ਤਿ. ਸੋ ਅਤ੍ਤਨੋ ਪਮਤ੍ਤਕਾਰਣਾ ਪੁਨ ਬੀਜਮਤ੍ਤਮ੍ਪਿ ਨ ਲਭਤਿ. ਇਤਰੋ ਰਤ੍ਤਾਰਕ੍ਖਂ ਦਿਵਾਰਕ੍ਖਂ ਨ ਵਿਜਹਤਿ. ਸੋ ਅਤ੍ਤਨੋ ਅਪ੍ਪਮਤ੍ਤਕਾਰਣਾ ਏਕਕਰੀਸਤੋ ਚਤ੍ਤਾਰਿਪਿ ਅਟ੍ਠਪਿ ਸਕਟਾਨਿ ਲਭਤਿ.

ਤਤ੍ਥ ਸਰੋਗਖੇਤ੍ਤਪਾਲੋ ਵਿਯ ਚੇਤਨਾਭਬ੍ਬੋ, ਅਰੋਗੋ ਵਿਯ ਅਨੁਰਕ੍ਖਣਾਭਬ੍ਬੋ ਦਟ੍ਠਬ੍ਬੋ. ਸਰੋਗਸ੍ਸ ਅਤ੍ਤਨੋ ਪਮਾਦੇਨ ਪੁਨ ਬੀਜਮਤ੍ਤਸ੍ਸਪਿ ਅਲਭਨਂ ਵਿਯ ਚੇਤਨਾਭਬ੍ਬਸ੍ਸ ਉਪਕਾਰਾਨੁਪਕਾਰੇ ਧਮ੍ਮੇ ਅਜਾਨਿਤ੍ਵਾ ਉਪਕਾਰੇ ਪਹਾਯ ਅਨੁਪਕਾਰੇ ਸੇਵਨ੍ਤਸ੍ਸ ਸਮਾਪਤ੍ਤਿਯਾ ਪਰਿਹਾਨਂ. ਇਤਰਸ੍ਸ ਅਤ੍ਤਨੋ ਅਪ੍ਪਮਾਦੇਨ ਏਕਕਰੀਸਮਤ੍ਤਤੋ ਚਤੁਅਟ੍ਠਸਕਟਉਦ੍ਧਰਣਂ ਵਿਯ ਅਨੁਰਕ੍ਖਣਾਭਬ੍ਬਸ੍ਸ ਉਪਕਾਰਾਨੁਪਕਾਰੇ ਧਮ੍ਮੇ ਜਾਨਿਤ੍ਵਾ ਅਨੁਪਕਾਰੇ ਪਹਾਯ ਉਪਕਾਰੇ ਸੇਵਨ੍ਤਸ੍ਸ ਸਮਾਪਤ੍ਤਿਯਾ ਅਪਰਿਹਾਨਂ ਵੇਦਿਤਬ੍ਬਂ. ਏਵਂ ਚੇਤਨਾਭਬ੍ਬਤੋ ਅਨੁਰਕ੍ਖਣਾਭਬ੍ਬੋਵ ਸਮਾਪਤ੍ਤਿਂ ਥਾਵਰਂ ਕਾਤੁਂ ਬਲਵਤਰੋਤਿ ਵੇਦਿਤਬ੍ਬੋ.

੯. ਪੁਥੁਜ੍ਜਨਨਿਦ੍ਦੇਸੇ – ਤੀਣਿ ਸਂਯੋਜਨਾਨੀਤਿ ਦਿਟ੍ਠਿਸਂਯੋਜਨਸੀਲਬ੍ਬਤਪਰਾਮਾਸਸਂਯੋਜਨਵਿਚਿਕਿਚ੍ਛਾਸਂਯੋਜਨਾਨਿ. ਏਤਾਨਿ ਹਿ ਫਲਕ੍ਖਣੇ ਪਹੀਨਾਨਿ ਨਾਮ ਹੋਨ੍ਤਿ. ਅਯਂ ਪਨ ਫਲਕ੍ਖਣੇਪਿ ਨ ਹੋਤੀਤਿ ਦਸ੍ਸੇਤਿ. ਤੇਸਂ ਧਮ੍ਮਾਨਨ੍ਤਿ ਤੇਸਂ ਸਂਯੋਜਨਧਮ੍ਮਾਨਂ. ਮਗ੍ਗਕ੍ਖਣਸ੍ਮਿਞ੍ਹਿ ਤੇਸਂ ਪਹਾਨਾਯ ਪਟਿਪਨ੍ਨੋ ਨਾਮ ਹੋਤਿ. ਅਯਂ ਪਨ ਮਗ੍ਗਕ੍ਖਣੇਪਿ ਨ ਹੋਤਿ. ਏਤ੍ਤਾਵਤਾ ਵਿਸ੍ਸਟ੍ਠਕਮ੍ਮਟ੍ਠਾਨੋ ਥੂਲਬਾਲਪੁਥੁਜ੍ਜਨੋਵ ਇਧ ਕਥਿਤੋਤਿ ਵੇਦਿਤਬ੍ਬੋ.

੧੦. ਗੋਤ੍ਰਭੁਨਿਦ੍ਦੇਸੇ – ਯੇਸਂ ਧਮ੍ਮਾਨਨ੍ਤਿ ਯੇਸਂ ਗੋਤ੍ਰਭੁਞਾਣੇਨ ਸਦ੍ਧਿਂ ਉਪ੍ਪਨ੍ਨਾਨਂ ਪਰੋਪਣ੍ਣਾਸਕੁਸਲਧਮ੍ਮਾਨਂ. ਅਰਿਯਧਮ੍ਮਸ੍ਸਾਤਿ ਲੋਕੁਤ੍ਤਰਮਗ੍ਗਸ੍ਸ. ਅਵਕ੍ਕਨ੍ਤਿ ਹੋਤੀਤਿ ਓਕ੍ਕਨ੍ਤਿ ਨਿਬ੍ਬਤ੍ਤਿ ਪਾਤੁਭਾਵੋ ਹੋਤਿ. ਅਯਂ ਵੁਚ੍ਚਤੀਤਿ ਅਯਂ ਨਿਬ੍ਬਾਨਾਰਮ੍ਮਣੇਨ ਞਾਣੇਨ ਸਬ੍ਬਂ ਪੁਥੁਜ੍ਜਨਸਙ੍ਖਂ ਪੁਥੁਜ੍ਜਨਗੋਤ੍ਤਂ ਪੁਥੁਜ੍ਜਨਮਣ੍ਡਲਂ ਪੁਥੁਜ੍ਜਨਪਞ੍ਞਤ੍ਤਿਂ ਅਤਿਕ੍ਕਮਿਤ੍ਵਾ ਅਰਿਯਸਙ੍ਖਂ ਅਰਿਯਗੋਤ੍ਤਂ ਅਰਿਯਮਣ੍ਡਲਂ ਅਰਿਯਪਞ੍ਞਤ੍ਤਿਂ ਓਕ੍ਕਮਨਤੋ ਗੋਤ੍ਰਭੂਪੁਗ੍ਗਲੋ ਨਾਮ ਵੁਚ੍ਚਤਿ.

੧੧. ਭਯੂਪਰਤਨਿਦ੍ਦੇਸੇ – ਭਯੇਨ ਉਪਰਤੋਤਿ ਭਯੂਪਰਤੋ. ਸਤ੍ਤਪਿ ਸੇਕ੍ਖਾ ਪੁਥੁਜ੍ਜਨਾ ਚ ਭਾਯਿਤ੍ਵਾ ਪਾਪਤੋ ਓਰਮਨ੍ਤਿ ਪਾਪਂ ਨ ਕਰੋਨ੍ਤਿ. ਤਤ੍ਥ ਪੁਥੁਜ੍ਜਨਾ ਦੁਗ੍ਗਤਿਭਯਂ, ਵਟ੍ਟਭਯਂ, ਕਿਲੇਸਭਯਂ, ਉਪਵਾਦਭਯਨ੍ਤਿ ਚਤ੍ਤਾਰਿ ਭਯਾਨਿ ਭਾਯਨ੍ਤਿ. ਤੇਸੁ ਭਾਯਿਤਬ੍ਬਟ੍ਠੇਨ ਦੁਗ੍ਗਤਿਯੇਵ ਭਯਂ ਦੁਗ੍ਗਤਿਭਯਂ. ਸੇਸੇਸੁਪਿ ਏਸੇਵ ਨਯੋ. ਤਤ੍ਥ ਪੁਥੁਜ੍ਜਨੋ ‘ਸਚੇ ਤ੍ਵਂ ਪਾਪਂ ਕਰਿਸ੍ਸਸਿ, ਚਤ੍ਤਾਰੋ ਅਪਾਯਾ ਮੁਖਂ ਵਿਵਰਿਤ੍ਵਾ ਠਿਤਚ੍ਛਾਤਅਜਗਰਸਦਿਸਾ, ਤੇਸੁ ਦੁਕ੍ਖਂ ਅਨੁਭਵਨ੍ਤੋ ਕਥਂ ਭਵਿਸ੍ਸਸੀ’ਤਿ ਦੁਗ੍ਗਤਿਭਯਂ ਭਾਯਿਤ੍ਵਾ ਪਾਪਂ ਨ ਕਰੋਤਿ. ਅਨਮਤਗ੍ਗਸਂਸਾਰਵਟ੍ਟਂਯੇਵ ਪਨ ਵਟ੍ਟਭਯਂ ਨਾਮ. ਸਬ੍ਬਮ੍ਪਿ ਅਕੁਸਲਂ ਕਿਲੇਸਭਯਂ ਨਾਮ. ਗਰਹਾ ਪਨ ਉਪਵਾਦਭਯਂ ਨਾਮ. ਤਾਨਿਪਿ ਭਾਯਿਤ੍ਵਾ ਪੁਥੁਜ੍ਜਨੋ ਪਾਪਂ ਨ ਕਰੋਤਿ. ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਨੋ ਪਨ ਤਯੋ ਸੇਕ੍ਖਾ ਦੁਗ੍ਗਤਿਂ ਅਤੀਤਤ੍ਤਾ ਸੇਸਾਨਿ ਤੀਣਿ ਭਯਾਨਿ ਭਾਯਿਤ੍ਵਾ ਪਾਪਂ ਨ ਕਰੋਨ੍ਤਿ. ਮਗ੍ਗਟ੍ਠਕਸੇਕ੍ਖਾ ਆਗਮਨਵਸੇਨ ਵਾ ਅਸਮੁਚ੍ਛਿਨ੍ਨਭਯਤ੍ਤਾ ਵਾ ਭਯੂਪਰਤਾ ਨਾਮ ਹੋਨ੍ਤਿ. ਖੀਣਾਸਵੋ ਇਮੇਸੁ ਚਤੂਸੁ ਭਯੇਸੁ ਏਕਮ੍ਪਿ ਨ ਭਾਯਤਿ. ਸੋ ਹਿ ਸਬ੍ਬਸੋ ਸਮੁਚ੍ਛਿਨ੍ਨਭਯੋ; ਤਸ੍ਮਾ ਅਭਯੂਪਰਤੋਤਿ ਵੁਚ੍ਚਤਿ. ਕਿਂ ਪਨ ਸੋ ਉਪਵਾਦਮ੍ਪਿ ਨ ਭਾਯਤੀਤਿ? ਨ ਭਾਯਤਿ. ਉਪਵਾਦਂ ਪਨ ਰਕ੍ਖਤੀਤਿ ਵਤ੍ਤੁਂ ਵਟ੍ਟਤਿ. ਦੋਣੁਪ੍ਪਲਵਾਪਿਗਾਮੇ ਖੀਣਾਸਵਤ੍ਥੇਰੋ ਵਿਯ.

੧੨. ਅਭਬ੍ਬਾਗਮਨਨਿਦ੍ਦੇਸੇ – ਸਮ੍ਮਤ੍ਤਨਿਯਾਮਾਗਮਨਸ੍ਸ ਅਭਬ੍ਬੋਤਿ ਅਭਬ੍ਬਾਗਮਨੋ. ਕਮ੍ਮਾਵਰਣੇਨਾਤਿ ਪਞ੍ਚਵਿਧੇਨ ਆਨਨ੍ਤਰਿਯਕਮ੍ਮੇਨ. ਕਿਲੇਸਾਵਰਣੇਨਾਤਿ ਨਿਯਤਮਿਚ੍ਛਾਦਿਟ੍ਠਿਯਾ. ਵਿਪਾਕਾਵਰਣੇਨਾਤਿ ਅਹੇਤੁਕਦੁਹੇਤੁਕਪਟਿਸਨ੍ਧਿਯਾ. ਅਸ੍ਸਦ੍ਧਾਤਿ ਬੁਦ੍ਧਧਮ੍ਮਸਙ੍ਘੇਸੁ ਸਦ੍ਧਾਰਹਿਤਾ. ਅਚ੍ਛਨ੍ਦਿਕਾਤਿ ਕਤ੍ਤੁਕਮ੍ਯਤਾਕੁਸਲਚ੍ਛਨ੍ਦਰਹਿਤਾ. ਤੇ ਠਪੇਤ੍ਵਾ ਜਮ੍ਬੁਦੀਪਂ ਇਤਰਦੀਪਤ੍ਤਯਵਾਸਿਨੋ ਵੇਦਿਤਬ੍ਬਾ. ਤੇਸੁ ਹਿ ਮਨੁਸ੍ਸਾ ਅਚ੍ਛਨ੍ਦਿਕਭਾਵਂ ਪਵਿਟ੍ਠਾ ਨਾਮ. ਦੁਪ੍ਪਞ੍ਞਾਤਿ ਭਵਙ੍ਗਪਞ੍ਞਾਰਹਿਤਾ. ਅਭਬ੍ਬਾਤਿ ਅਪ੍ਪਟਿਲਦ੍ਧਮਗ੍ਗਫਲੂਪਨਿਸ੍ਸਯਾ. ਨਿਯਾਮਨ੍ਤਿ ਮਗ੍ਗਨਿਯਾਮਂ, ਸਮ੍ਮਤ੍ਤਨਿਯਾਮਂ. ਓਕ੍ਕਮਿਤੁਨ੍ਤਿ ਏਤਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਸਙ੍ਖਾਤਂ ਨਿਯਾਮਂ ਓਕ੍ਕਮਿਤੁਂ ਪਵਿਸਿਤੁਂ ਤਤ੍ਥ ਪਤਿਟ੍ਠਾਤੁਂ ਅਭਬ੍ਬਾ.

੧੩. ਭਬ੍ਬਾਗਮਨਨਿਦ੍ਦੇਸੋ ਵੁਤ੍ਤਪਟਿਪਕ੍ਖਨਯੇਨ ਵੇਦਿਤਬ੍ਬੋ. ਏਵਮਿਮਸ੍ਮਿਂ ਦੁਕੇ ਯੇ ਚ ਪੁਗ੍ਗਲਾ ਪਞ੍ਚਾਨਨ੍ਤਰਿਯਕਾ, ਯੇ ਚ ਨਿਯਤਮਿਚ੍ਛਾਦਿਟ੍ਠਿਕਾ, ਯੇਹਿ ਚ ਅਹੇਤੁਕਦੁਹੇਤੁਕਪਟਿਸਨ੍ਧਿ ਗਹਿਤਾ, ਯੇ ਚ ਬੁਦ੍ਧਾਦੀਨਂ ਨ ਸਦ੍ਦਹਨ੍ਤਿ, ਯੇਸਞ੍ਚ ਕਤ੍ਤੁਕਮ੍ਯਤਾਛਨ੍ਦੋ ਨਤ੍ਥਿ, ਯੇ ਚ ਅਪਰਿਪੁਣ੍ਣਭਵਙ੍ਗਪਞ੍ਞਾ, ਯੇਸਞ੍ਚ ਮਗ੍ਗਫਲਾਨਂ ਉਪਨਿਸ੍ਸਯੋ ਨਤ੍ਥਿ, ਤੇ ਸਬ੍ਬੇਪਿ ਸਮ੍ਮਤ੍ਤਨਿਯਾਮਂ ਓਕ੍ਕਮਿਤੁਂ ਅਭਬ੍ਬਾ, ਵਿਪਰੀਤਾ ਭਬ੍ਬਾਤਿ ਵੁਤ੍ਤਾ.

੧੪. ਨਿਯਤਾਨਿਯਤਨਿਦ੍ਦੇਸੇ – ਆਨਨ੍ਤਰਿਕਾਤਿ ਆਨ੍ਤਰਿਕਕਮ੍ਮਸਮਙ੍ਗਿਨੋ. ਮਿਚ੍ਛਾਦਿਟ੍ਠਿਕਾਤਿ ਨਿਯਤਮਿਚ੍ਛਾਦਿਟ੍ਠਿਸਮਙ੍ਗਿਨੋ. ਸਬ੍ਬੇਪਿ ਹੇਤੇ ਨਿਰਯਸ੍ਸ ਅਤ੍ਥਾਯ ਨਿਯਤਤ੍ਤਾ ਨਿਯਤਾ ਨਾਮ. ਅਟ੍ਠ ਪਨ ਅਰਿਯਪੁਗ੍ਗਲਾ ਸਮ੍ਮਾਭਾਵਾਯ ਉਪਰੂਪਰਿਮਗ੍ਗਫਲਤ੍ਥਾਯ ਚੇਵ ਅਨੁਪਾਦਾਪਰਿਨਿਬ੍ਬਾਨਤ੍ਥਾਯ ਚ ਨਿਯਤਤ੍ਤਾ ਨਿਯਤਾ ਨਾਮ. ਅਵਸੇਸਪੁਗ੍ਗਲਾ ਪਨ ਅਨਿਬਦ੍ਧਗਤਿਕਾ. ਯਥਾ ਆਕਾਸੇ ਖਿਤ੍ਤਦਣ੍ਡੋ ਪਥਵਿਯਂ ਪਤਨ੍ਤੋ ‘ਅਗ੍ਗੇਨ ਵਾ ਮਜ੍ਝੇਨ ਵਾ ਮੂਲੇਨ ਵਾ ਪਤਿਸ੍ਸਤੀ’ਤਿ ਨ ਞਾਯਤਿ; ਏਵਮੇਵ ‘ਅਸੁਕਗਤਿਯਾ ਨਾਮ ਨਿਬ੍ਬਤ੍ਤਿਸ੍ਸਨ੍ਤੀ’ਤਿ ਨਿਯਮਾਭਾਵਾ ਅਨਿਯਤਾ ਨਾਮਾਤਿ ਵੇਦਿਤਬ੍ਬਾ. ਯਾ ਪਨ ਉਤ੍ਤਰਕੁਰੁਕਾਨਂ ਨਿਯਤਗਤਿਕਤਾ ਵੁਤ੍ਤਾ, ਨ ਸਾ ਨਿਯਤਧਮ੍ਮਵਸੇਨ. ਮਿਚ੍ਛਤ੍ਤਸਮ੍ਮਤ੍ਤਨਿਯਤਧਮ੍ਮਾਯੇਵ ਹਿ ਨਿਯਤਾ ਨਾਮ. ਤੇਸਞ੍ਚ ਵਸੇਨਾਯਂ ਪੁਗ੍ਗਲਨਿਯਮੋ ਕਥਿਤੋਤਿ.

੧੫. ਪਟਿਪਨ੍ਨਕਨਿਦ੍ਦੇਸੇ – ਮਗ੍ਗਸਮਙ੍ਗਿਨੋਤਿ ਮਗ੍ਗਟ੍ਠਕਪੁਗ੍ਗਲਾ. ਤੇ ਹਿ ਫਲਤ੍ਥਾਯ ਪਟਿਪਨ੍ਨਤ੍ਤਾ ਪਟਿਪਨ੍ਨਕਾ ਨਾਮ. ਫਲਸਮਙ੍ਗਿਨੋਤਿ ਫਲਪਟਿਲਾਭਸਮਙ੍ਗਿਤਾਯ ਫਲਸਮਙ੍ਗਿਨੋ. ਫਲਪਟਿਲਾਭਤੋ ਪਟ੍ਠਾਯ ਹਿ ਤੇ ਫਲਸਮਾਪਤ੍ਤਿਂ ਅਸਮਾਪਨ੍ਨਾਪਿ ਫਲੇ ਠਿਤਾਯੇਵ ਨਾਮ.

੧੬. ਸਮਸੀਸੀਨਿਦ੍ਦੇਸੇ – ਅਪੁਬ੍ਬਂ ਅਚਰਿਮਨ੍ਤਿ ਅਪੁਰੇ ਅਪਚ੍ਛਾ, ਏਕਪ੍ਪਹਾਰੇਨੇਵਾਤਿ ਅਤ੍ਥੋ. ਪਰਿਯਾਦਾਨਨ੍ਤਿ ਪਰਿਕ੍ਖਯੋ. ਅਯਂ ਵੁਚ੍ਚਤੀਤਿ ਅਯਂ ਪੁਗ੍ਗਲੋ ਸਮਸੀਸੀ ਨਾਮ ਵੁਚ੍ਚਤਿ. ਸੋ ਪਨੇਸ ਤਿਵਿਧੋ ਹੋਤਿ – ਇਰਿਯਾਪਥਸਮਸੀਸੀ, ਰੋਗਸਮਸੀਸੀ, ਜੀਵਿਤਸਮਸੀਸੀਤਿ. ਤਤ੍ਥ ਯੋ ਚਙ੍ਕਮਨ੍ਤੋਵ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਤ੍ਵਾ ਚਙ੍ਕਮਨ੍ਤੋਵ ਪਰਿਨਿਬ੍ਬਾਤਿ ਪਦੁਮਤ੍ਥੇਰੋ ਵਿਯ; ਠਿਤਕੋਵ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਤ੍ਵਾ ਠਿਤਕੋਵ ਪਰਿਨਿਬ੍ਬਾਤਿ ਕੋਟਪਬ੍ਬਤਵਿਹਾਰਵਾਸੀਤਿਸ੍ਸਤ੍ਥੇਰੋ ਵਿਯ; ਨਿਸਿਨ੍ਨੋਵ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਤ੍ਵਾ ਨਿਸਿਨ੍ਨੋਵ ਪਰਿਨਿਬ੍ਬਾਤਿ, ਨਿਪਨ੍ਨੋਵ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਤ੍ਵਾ ਨਿਪਨ੍ਨੋਵ ਪਰਿਨਿਬ੍ਬਾਤਿ – ਅਯਂ ਇਰਿਯਾਪਥਸਮਸੀਸੀ ਨਾਮ.

ਯੋ ਪਨ ਏਕਂ ਰੋਗਂ ਪਤ੍ਵਾ ਅਨ੍ਤੋਰੋਗੇਯੇਵ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਤ੍ਵਾ ਤੇਨੇਵ ਰੋਗੇਨ ਪਰਿਨਿਬ੍ਬਾਤਿ – ਅਯਂ ਰੋਗਸਮਸੀਸੀ ਨਾਮ.

ਕਤਰੋ ਜੀਵਿਤਸਮਸੀਸੀ ਨਾਮ? ‘‘ਸੀਸਨ੍ਤਿ ਤੇਰਸ ਸੀਸਾਨਿ – ਪਲਿਬੋਧਸੀਸਞ੍ਚ ਤਣ੍ਹਾ, ਵਿਨਿਬਨ੍ਧਨਸੀਸਞ੍ਚ ਮਾਨੋ, ਪਰਾਮਾਸਸੀਸਞ੍ਚ ਦਿਟ੍ਠਿ, ਵਿਕ੍ਖੇਪਸੀਸਞ੍ਚ ਉਦ੍ਧਚ੍ਚਂ, ਸਂਕਿਲੇਸਸੀਸਞ੍ਚ ਅਵਿਜ੍ਜਾ, ਅਧਿਮੋਕ੍ਖਸੀਸਞ੍ਚ ਸਦ੍ਧਾ, ਪਗ੍ਗਹਸੀਸਞ੍ਚ ਵੀਰਿਯਂ, ਉਪਟ੍ਠਾਨਸੀਸਞ੍ਚ ਸਤਿ, ਅਵਿਕ੍ਖੇਪਸੀਸਞ੍ਚ ਸਮਾਧਿ, ਦਸ੍ਸਨਸੀਸਞ੍ਚ ਪਞ੍ਞਾ, ਪਵਤ੍ਤਸੀਸਞ੍ਚ ਜੀਵਿਤਿਨ੍ਦ੍ਰਿਯਂ, ਗੋਚਰਸੀਸਞ੍ਚ ਵਿਮੋਕ੍ਖੋ, ਸਙ੍ਖਾਰਸੀਸਞ੍ਚ ਨਿਰੋਧੋ’’ਤਿ (ਪਟਿ. ਮ. ੧.੮੭). ਤਤ੍ਥ ਕਿਲੇਸਸੀਸਂ ਅਵਿਜ੍ਜਂ ਅਰਹਤ੍ਤਮਗ੍ਗੋ ਪਰਿਯਾਦਿਯਤਿ. ਪਵਤ੍ਤਸੀਸਂ ਜੀਵਿਤਿਨ੍ਦ੍ਰਿਯਂ ਚੁਤਿਚਿਤ੍ਤਂ ਪਰਿਯਾਦਿਯਤਿ. ਅਵਿਜ੍ਜਾਪਰਿਯਾਦਾਯਕਂ ਚਿਤ੍ਤਂ ਜੀਵਿਤਿਨ੍ਦ੍ਰਿਯਂ ਪਰਿਯਾਦਾਤੁਂ ਨ ਸਕ੍ਕੋਤਿ. ਜੀਵਿਤਿਨ੍ਦ੍ਰਿਯਪਰਿਯਾਦਾਯਕਂ ਚਿਤ੍ਤਂ ਅਵਿਜ੍ਜਂ ਪਰਿਯਾਦਾਤੁਂ ਨ ਸਕ੍ਕੋਤਿ. ਅਵਿਜ੍ਜਾਪਰਿਯਾਦਾਯਕਂ ਚਿਤ੍ਤਂ ਅਞ੍ਞਂ, ਜੀਵਿਤਿਨ੍ਦ੍ਰਿਯਪਰਿਯਾਦਾਯਕਂ ਚਿਤ੍ਤਂ ਅਞ੍ਞਂ. ਯਸ੍ਸ ਚੇਤਂ ਸੀਸਦ੍ਵਯਂ ਸਮਂ ਪਰਿਯਾਦਾਨਂ ਗਚ੍ਛਤਿ, ਸੋ ਜੀਵਿਤਸਮਸੀਸੀ ਨਾਮ.

ਕਥਮਿਦਂ ਸਮਂ ਹੋਤੀਤਿ? ਵਾਰਸਮਤਾਯ. ਯਸ੍ਮਿਞ੍ਹਿ ਵਾਰੇ ਮਗ੍ਗਵੁਟ੍ਠਾਨਂ ਹੋਤਿ – ਸੋਤਾਪਤ੍ਤਿਮਗ੍ਗੇ ਪਞ੍ਚ ਪਚ੍ਚਵੇਕ੍ਖਣਾਨਿ, ਸਕਦਾਗਾਮਿਮਗ੍ਗੇ ਪਞ੍ਚ, ਅਨਾਗਾਮਿਮਗ੍ਗੇ ਪਞ੍ਚ, ਅਰਹਤ੍ਤਮਗ੍ਗੇ ਚਤ੍ਤਾਰੀਤਿ ਏਕੂਨਵੀਸਤਿਯਾ ਪਚ੍ਚਵੇਕ੍ਖਣਞਾਣੇ ਪਤਿਟ੍ਠਾਯ ਭਵਙ੍ਗਂ ਓਤਰਿਤ੍ਵਾ ਪਰਿਨਿਬ੍ਬਾਯਤਿ. ਇਮਾਯ ਵਾਰਸਮਤਾਯ ਇਦਂ ਉਭਯਸੀਸਪਰਿਯਾਦਾਨਂ ਸਮਂ ਹੋਤਿ ਨਾਮ. ਤੇਨਾਯਂ ਪੁਗ੍ਗਲੋ ਜੀਵਿਤਸਮਸੀਸੀਤਿ ਵੁਚ੍ਚਤਿ. ਅਯਮੇਵ ਚ ਇਧ ਅਧਿਪ੍ਪੇਤੋ.

੧੭. ਠਿਤਕਪ੍ਪੀਨਿਦ੍ਦੇਸੇ – ਠਿਤੋ ਕਪ੍ਪੋਤਿ ਠਿਤਕਪ੍ਪੋ, ਠਿਤਕਪ੍ਪੋ ਅਸ੍ਸ ਅਤ੍ਥੀਤਿ ਠਿਤਕਪ੍ਪੀ. ਕਪ੍ਪਂ ਠਪੇਤੁਂ ਸਮਤ੍ਥੋਤਿ ਅਤ੍ਥੋ. ਉਡ੍ਡਯ੍ਹਨਵੇਲਾ ਅਸ੍ਸਾਤਿ ਝਾਯਨਕਾਲੋ ਭਵੇਯ੍ਯ. ਨੇਵ ਤਾਵਾਤਿ ਯਾਵ ਏਸ ਮਗ੍ਗਸਮਙ੍ਗੀ ਪੁਗ੍ਗਲੋ ਸੋਤਾਪਤ੍ਤਿਫਲਂ ਨ ਸਚ੍ਛਿਕਰੋਤਿ, ਨੇਵ ਤਾਵ ਕਪ੍ਪੋ ਝਾਯੇਯ੍ਯ. ਝਾਯਮਾਨੋਪਿ ਅਜ੍ਝਾਯਿਤ੍ਵਾਵ ਤਿਟ੍ਠੇਯ੍ਯ. ਕਪ੍ਪਵਿਨਾਸੋ ਹਿ ਨਾਮ ਮਹਾਵਿਕਾਰੋ ਮਹਾਪਯੋਗੋ ਕੋਟਿਸਤਸਹਸ੍ਸਚਕ੍ਕਵਾਲ਼ਸ੍ਸ ਝਾਯਨਵਸੇਨ ਮਹਾਲੋਕਵਿਨਾਸੋ. ਅਯਮ੍ਪਿ ਏਵਂ ਮਹਾਵਿਨਾਸੋ ਤਿਟ੍ਠੇਯ੍ਯ ਵਾਤਿ ਵਦਤਿ. ਸਾਸਨੇ ਪਨ ਧਰਮਾਨੇ ਅਯਂ ਕਪ੍ਪਵਿਨਾਸੋ ਨਾਮ ਨਤ੍ਥਿ. ਕਪ੍ਪਵਿਨਾਸੇ ਸਾਸਨਂ ਨਤ੍ਥਿ. ਗਤਕੋਟਿਕੇ ਹਿ ਕਾਲੇ ਕਪ੍ਪਵਿਨਾਸੋ ਨਾਮ ਹੋਤਿ. ਏਵਂ ਸਨ੍ਤੇਪਿ ਸਤ੍ਥਾ ਅਨ੍ਤਰਾਯਾਭਾਵਂ ਦੀਪੇਤੁਂ ਇਦਂ ਕਾਰਣਂ ਆਹਰਿ – ‘‘ਇਦਮ੍ਪਿ ਭਵੇਯ੍ਯ, ਮਗ੍ਗਸਮਙ੍ਗਿਨੋ ਪਨ ਫਲਸ੍ਸ ਅਨ੍ਤਰਾਯੋ ਨ ਸਕ੍ਕਾ ਕਾਤੁ’’ਨ੍ਤਿ. ਅਯਂ ਪਨ ਪੁਗ੍ਗਲੋ ਕਪ੍ਪਂ ਠਪੇਨ੍ਤੋ ਕਿਤ੍ਤਕਂ ਕਾਲਂ ਠਪੇਯ੍ਯਾਤਿ? ਯਸ੍ਮਿਂ ਵਾਰੇ ਮਗ੍ਗਵੁਟ੍ਠਾਨਂ ਹੋਤਿ, ਅਥ ਭਵਙ੍ਗਂ ਆਵਟ੍ਟੇਨ੍ਤਂ ਮਨੋਦ੍ਵਾਰਾਵਜ੍ਜਨਂ ਉਪ੍ਪਜ੍ਜਤਿ. ਤਤੋ ਤੀਣਿ ਅਨੁਲੋਮਾਨਿ, ਏਕਂ ਗੋਤ੍ਰਭੁਚਿਤ੍ਤਂ, ਏਕਂ ਮਗ੍ਗਚਿਤ੍ਤਂ, ਦ੍ਵੇ ਫਲਚਿਤ੍ਤਾਨਿ, ਪਞ੍ਚ ਪਚ੍ਚਵੇਕ੍ਖਣਞਾਣਾਨੀਤਿ ਏਤ੍ਤਕਂ ਕਾਲਂ ਠਪੇਯ੍ਯ. ਇਮਂ ਪਨਤ੍ਥਂ ਬਾਹਿਰਾਯ ਆਗਨ੍ਤੁਕੂਪਮਾਯਪਿ ਏਵਂ ਦੀਪਯਿਂਸੁ. ਸਚੇ ਹਿ ਸੋਤਾਪਤ੍ਤਿਮਗ੍ਗਸਮਙ੍ਗਿਸ੍ਸ ਮਤ੍ਥਕੂਪਰਿ ਯੋਜਨਿਕਂ ਏਕਗ੍ਘਨਸੇਲਂ ਤਿਵਟ੍ਟਾਯ ਰਜ੍ਜੁਯਾ ਬਨ੍ਧਿਤ੍ਵਾ ਓਲਮ੍ਬੇਯ੍ਯ, ਏਕਸ੍ਮਿਂ ਵਟ੍ਟੇ ਛਿਨ੍ਨੇ ਦ੍ਵੀਹਿ ਓਲਮ੍ਬੇਯ੍ਯ, ਦ੍ਵੀਸੁ ਛਿਨ੍ਨੇਸੁ ਏਕੇਨ ਓਲਮ੍ਬੇਯ੍ਯੇਵ, ਤਸ੍ਮਿਮ੍ਪਿ ਛਿਨ੍ਨੇ ਅਬ੍ਭਕੂਟਂ ਵਿਯ ਆਕਾਸੇ ਤਿਟ੍ਠੇਯ੍ਯ, ਨ ਤ੍ਵੇਵ ਤਸ੍ਸ ਪੁਗ੍ਗਲਸ੍ਸ ਮਗ੍ਗਾਨਨ੍ਤਰਫਲਸ੍ਸ ਅਨ੍ਤਰਾਯਂ ਕਰੇਯ੍ਯਾਤਿ. ਅਯਂ ਪਨ ਦੀਪਨਾ ਪਰਿਤ੍ਤਾ, ਪੁਰਿਮਾਵ ਮਹਨ੍ਤਾ. ਨ ਕੇਵਲਂ ਪਨ ਸੋਤਾਪਤ੍ਤਿਮਗ੍ਗਟ੍ਠੋਵ ਕਪ੍ਪਂ ਠਪੇਤਿ, ਇਤਰੇ ਮਗ੍ਗਸਮਙ੍ਗਿਨੋਪਿ ਠਪੇਨ੍ਤਿਯੇਵ. ਤੇਨ ਭਗਵਾ ਹੇਟ੍ਠਾ ਗਹਿਤਞ੍ਚ ਅਗ੍ਗਹਿਤਞ੍ਚ ਸਬ੍ਬਂ ਸਙ੍ਕਡ੍ਢਿਤ੍ਵਾ ਸਦ੍ਧਿਂ ਪਿਟ੍ਠਿਵਟ੍ਟਕਪੁਗ੍ਗਲੇਹਿ ਇਮਂ ਤਨ੍ਤਿਂ ਆਰੋਪੇਸਿ – ‘‘ਸਬ੍ਬੇਪਿ ਮਗ੍ਗਸਮਙ੍ਗਿਨੋ ਪੁਗ੍ਗਲਾ ਠਿਤਕਪ੍ਪਿਨੋ’’ਤਿ.

੧੮. ਅਰਿਯਨਿਦ੍ਦੇਸੇ – ਕਿਲੇਸੇਹਿ ਆਰਕਤ੍ਤਾ ਅਰਿਯਾ. ਸਦੇਵਕੇਨ ਲੋਕੇਨ ਅਰਣੀਯਤ੍ਤਾ ਅਰਿਯਾ. ਅਰਿਯਟ੍ਠੋ ਨਾਮ ਪਰਿਸੁਦ੍ਧਟ੍ਠੋਤਿ ਪਰਿਸੁਦ੍ਧਤ੍ਤਾਪਿ ਅਰਿਯਾ. ਸੇਸਾ ਅਪਰਿਸੁਦ੍ਧਤਾਯ ਅਨਰਿਯਾ.

੧੯. ਸੇਕ੍ਖਨਿਦ੍ਦੇਸੇ – ਮਗ੍ਗਸਮਙ੍ਗਿਨੋ ਮਗ੍ਗਕ੍ਖਣੇ, ਫਲਸਮਙ੍ਗਿਨੋ ਚ ਫਲਕ੍ਖਣੇ, ਅਧਿਸੀਲਸਿਕ੍ਖਾਦਿਕਾ ਤਿਸ੍ਸੋਪਿ ਸਿਕ੍ਖਾ ਸਿਕ੍ਖਨ੍ਤਿਯੇਵਾਤਿ ਸੇਕ੍ਖਾ. ਅਰਹਤਾ ਪਨ ਅਰਹਤ੍ਤਫਲਕ੍ਖਣੇ ਤਿਸ੍ਸੋ ਸਿਕ੍ਖਾ ਸਿਕ੍ਖਿਤਾ. ਪੁਨ ਤਸ੍ਸ ਸਿਕ੍ਖਨਕਿਚ੍ਚਂ ਨਤ੍ਥੀਤਿ ਅਸੇਕ੍ਖਾ. ਇਤਿ ਸਤ੍ਤ ਅਰਿਯਾ ਸਿਕ੍ਖਨ੍ਤੀਤਿ ਸੇਕ੍ਖਾ. ਖੀਣਾਸਵਾ ਅਞ੍ਞਸ੍ਸ ਸਨ੍ਤਿਕੇ ਸੀਲਾਦੀਨਂ ਸਿਕ੍ਖਿਤਤ੍ਤਾ ਸਿਕ੍ਖਿਤਅਸੇਕ੍ਖਾ ਨਾਮ. ਬੁਦ੍ਧਪਚ੍ਚੇਕਬੁਦ੍ਧਾ ਸਯਮ੍ਭੂਤਤਾਯ ਅਸਿਕ੍ਖਿਤਅਸੇਕ੍ਖਾ ਨਾਮ. ਸੇਸਪੁਗ੍ਗਲਾ ਨੇਵ ਸਿਕ੍ਖਨ੍ਤਿ ਨ ਸਿਕ੍ਖਿਤਾਤਿ ਨੇਵਸੇਕ੍ਖਾਨਾਸੇਕ੍ਖਾ.

੨੦. ਤੇਵਿਜ੍ਜਨਿਦ੍ਦੇਸੇ – ਪਠਮਂ ਪੁਬ੍ਬੇਨਿਵਾਸਦਿਬ੍ਬਚਕ੍ਖੁਞਾਣਾਨਿ ਨਿਬ੍ਬਤ੍ਤੇਤ੍ਵਾ ਪਚ੍ਛਾ ਅਰਹਤ੍ਤਂ ਪਤ੍ਤੋਪਿ, ਪਠਮਂ ਅਰਹਤ੍ਤਂ ਪਤ੍ਵਾ ਪਚ੍ਛਾ ਪੁਬ੍ਬੇਨਿਵਾਸਦਿਬ੍ਬਚਕ੍ਖੁਞਾਣਨਿਬ੍ਬਤ੍ਤਕੋਪਿ ਤੇਵਿਜ੍ਜੋਯੇਵ ਨਾਮ. ਸੁਤ੍ਤਨ੍ਤਕਥਾ ਪਨ ਪਰਿਯਾਯਦੇਸਨਾ ਅਭਿਧਮ੍ਮਕਥਾ ਨਿਪ੍ਪਰਿਯਾਯਦੇਸਨਾਤਿ ਇਮਸ੍ਮਿਂ ਠਾਨੇ ਆਗਮਨੀਯਮੇਵ ਧੁਰਂ. ਤਸ੍ਮਾ ਪਠਮਂ ਦ੍ਵੇ ਵਿਜ੍ਜਾ ਨਿਬ੍ਬਤ੍ਤੇਤ੍ਵਾ ਪਚ੍ਛਾ ਅਰਹਤ੍ਤਂ ਪਤ੍ਤੋਵ ਇਧ ਅਧਿਪ੍ਪੇਤੋ. ਛਲ਼ਭਿਞ੍ਞੇਪਿ ਏਸੇਵ ਨਯੋ.

੨੨. ਸਮ੍ਮਾਸਮ੍ਬੁਦ੍ਧਨਿਦ੍ਦੇਸੇ – ਪੁਬ੍ਬੇ ਅਨਨੁਸ੍ਸੁਤੇਸੂਤਿ ਪਚ੍ਛਿਮਭਵੇ ਸਚ੍ਚਪ੍ਪਟਿਵੇਧਤੋ ਪੁਬ੍ਬੇ ਅਞ੍ਞਸ੍ਸ ਕਸ੍ਸਚਿ ਸਨ੍ਤਿਕੇ ਅਸ੍ਸੁਤਪੁਬ੍ਬੇਸੁ. ਤਤੋ ਪੁਰਿਮਪੁਰਿਮੇਸੁ ਪਨ ਭਵੇਸੁ ਸਬ੍ਬਞ੍ਞੁਬੋਧਿਸਤ੍ਤਾ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾ ਤੀਣਿ ਪਿਟਕਾਨਿ ਉਗ੍ਗਹੇਤ੍ਵਾ ਗਤਪਚ੍ਚਾਗਤਵਤ੍ਤਂ ਆਰੁਯ੍ਹ ਕਮ੍ਮਟ੍ਠਾਨਂ ਅਨੁਲੋਮਂ ਗੋਤ੍ਰਭੁਂ ਆਹਚ੍ਚ ਠਪੇਨ੍ਤਿ. ਤਸ੍ਮਾ ਪਚ੍ਛਿਮਭਵਸ੍ਮਿਂਯੇਵ ਅਨਾਚਰਿਯਕਭਾਵਂ ਸਨ੍ਧਾਯੇਤਂ ਵੁਤ੍ਤਂ. ਤਦਾ ਹਿ ਤਥਾਗਤੋ ਪੂਰਿਤਪਾਰਮਿਤ੍ਤਾ ਅਞ੍ਞਸ੍ਸ ਸਨ੍ਤਿਕੇ ਸਾਮਂ ਅਨਨੁਸ੍ਸੁਤੇਸੁ ਸਙ੍ਖਤਾਸਙ੍ਖਤਧਮ੍ਮੇਸੁ ‘‘ਇਦਂ ਦੁਕ੍ਖਂ…ਪੇ… ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’ਤਿ ਅਤ੍ਤਪਚ੍ਚਕ੍ਖੇਨ ਞਾਣੇਨ ਚਤ੍ਤਾਰਿ ਸਚ੍ਚਾਨਿ ਅਭਿਸਮ੍ਬੁਜ੍ਝਤਿ.

ਤਤ੍ਥ ਚਾਤਿ ਤਸ੍ਮਿਞ੍ਚ ਚਤੁਸਚ੍ਚਸਮ੍ਬੋਧਿਸਙ੍ਖਾਤੇ ਅਰਹਤ੍ਤਮਗ੍ਗੇ. ਸਬ੍ਬਞ੍ਞੁਤਂ ਪਾਪੁਣਾਤਿ ਬਲੇਸੁ ਚ ਵਸੀਭਾਵਨ੍ਤਿ ਸਬ੍ਬਞ੍ਞੁਤਞ੍ਞਾਣਞ੍ਚੇਵ ਬਲੇਸੁ ਚ ਚਿਣ੍ਣਵਸੀਭਾਵਂ ਪਾਪੁਣਾਤਿ. ਬੁਦ੍ਧਾਨਞ੍ਹਿ ਸਬ੍ਬਞ੍ਞੁਤਞ੍ਞਾਣਸ੍ਸ ਚੇਵ ਦਸਬਲਞਾਣਸ੍ਸ ਚ ਅਧਿਗਮਨਤੋ ਪਟ੍ਠਾਯ ਅਞ੍ਞਂ ਕਾਤਬ੍ਬਂ ਨਾਮ ਨਤ੍ਥਿ. ਯਥਾ ਪਨ ਉਭਤੋਸੁਜਾਤਸ੍ਸ ਖਤ੍ਤਿਯਕੁਮਾਰਸ੍ਸ ਅਭਿਸੇਕਪ੍ਪਤ੍ਤਿਤੋ ਪਟ੍ਠਾਯ ‘ਇਦਂ ਨਾਮ ਇਸ੍ਸਰਿਯਂ ਅਨਾਗਤ’ਨ੍ਤਿ ਨ ਵਤ੍ਤਬ੍ਬਂ, ਸਬ੍ਬਂ ਆਗਤਮੇਵ ਹੋਤਿ. ਏਵਮੇਵ ਬੁਦ੍ਧਾਨਂ ਅਰਹਤ੍ਤਮਗ੍ਗਸ੍ਸ ਆਗਮਨਤੋ ਪਟ੍ਠਾਯ ‘ਅਯਂ ਨਾਮ ਗੁਣੋ ਨ ਆਗਤੋ, ਨ ਪਟਿਵਿਦ੍ਧੋ, ਨ ਪਚ੍ਚਕ੍ਖੋ’ਤਿ ਨ ਵਤ੍ਤਬ੍ਬੋ, ਸਬ੍ਬੇਪਿ ਸਬ੍ਬਞ੍ਞੁਗੁਣਾ ਆਗਤਾ ਪਟਿਵਿਦ੍ਧਾ ਪਚ੍ਚਕ੍ਖਕਤਾਵ ਹੋਨ੍ਤਿ. ਅਯਂ ਵੁਚ੍ਚਤੀਤਿ ਅਯਂ ਏਵਂ ਪਾਰਮੀਪੂਰਣਸਿਦ੍ਧਾਨੁਭਾਵੇਨ ਅਰਿਯਮਗ੍ਗੇਨ ਪਟਿਵਿਦ੍ਧਸਬ੍ਬਞ੍ਞੁਗੁਣੋ ਪੁਗ੍ਗਲੋ ਸਮ੍ਮਾਸਮ੍ਬੁਦ੍ਧੋਤਿ ਵੁਚ੍ਚਤਿ.

੨੩. ਪਚ੍ਚੇਕਬੁਦ੍ਧਨਿਦ੍ਦੇਸੇਪਿ – ਪੁਬ੍ਬੇ ਅਨਨੁਸ੍ਸੁਤੇਸੂਤਿ ਪਦੇ ਪੁਬ੍ਬੇ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਪਚ੍ਚੇਕਬੁਦ੍ਧੋਪਿ ਹਿ ਪਚ੍ਛਿਮਭਵੇ ਅਨਾਚਰਿਯਕੋ ਅਤ੍ਤੁਕ੍ਕਂਸਿਕਞਾਣੇਨੇਵ ਪਟਿਵਿਦ੍ਧਸਚ੍ਚੋ ਸਬ੍ਬਞ੍ਞੁਤਞ੍ਞਾਣਞ੍ਚੇਵ ਬਲੇਸੁ ਚ ਚਿਣ੍ਣਵਸੀਭਾਵਂ ਨ ਪਾਪੁਣਾਤਿ.

੨੪. ਉਭਤੋਭਾਗਵਿਮੁਤ੍ਤਨਿਦ੍ਦੇਸੇ – ਅਟ੍ਠ ਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ ਅਟ੍ਠ ਸਮਾਪਤ੍ਤਿਯੋ ਸਹਜਾਤਨਾਮਕਾਯੇਨ ਪਟਿਲਭਿਤ੍ਵਾ ਵਿਹਰਤਿ. ਪਞ੍ਞਾਯ ਚਸ੍ਸ ਦਿਸ੍ਵਾਤਿ ਵਿਪਸ੍ਸਨਾਪਞ੍ਞਾਯ ਸਙ੍ਖਾਰਗਤਂ, ਮਗ੍ਗਪਞ੍ਞਾਯ ਚਤ੍ਤਾਰਿ ਸਚ੍ਚਾਨਿ ਪਸ੍ਸਿਤ੍ਵਾ ਚਤ੍ਤਾਰੋਪਿ ਆਸਵਾ ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਉਭਤੋਭਾਗਵਿਮੁਤ੍ਤੋ ਨਾਮਾਤਿ ਵੁਚ੍ਚਤਿ. ਅਯਞ੍ਹਿ ਦ੍ਵੀਹਿ ਭਾਗੇਹਿ ਦ੍ਵੇ ਵਾਰੇ ਵਿਮੁਤ੍ਤੋਤਿ ਉਭਤੋਭਾਗਵਿਮੁਤ੍ਤੋ. ਤਤ੍ਰਾਯਂ ਥੇਰਵਾਦੋ – ਤਿਪਿਟਕਚੂਲ਼ਨਾਗਤ੍ਥੇਰੋ ਤਾਵ ਆਹ – ‘‘ਸਮਾਪਤ੍ਤਿਯਾ ਵਿਕ੍ਖਮ੍ਭਨਵਿਮੋਕ੍ਖੇਨ, ਮਗ੍ਗੇਨ ਸਮੁਚ੍ਛੇਦਵਿਮੋਕ੍ਖੇਨ ਵਿਮੁਤ੍ਤੋਤਿ ਉਭਤੋਭਾਗੇਹਿ ਦ੍ਵੇ ਵਾਰੇ ਵਿਮੁਤ੍ਤੋ’’ਤਿ. ਤਿਪਿਟਕਮਹਾਧਮ੍ਮਰਕ੍ਖਿਤਤ੍ਥੇਰੋ ‘‘ਨਾਮਨਿਸ੍ਸਿਤਕੋ ਏਸੋ’’ਤਿ ਵਤ੍ਵਾ –

‘‘ਅਚ੍ਚੀ ਯਥਾ ਵਾਤਵੇਗੇਨ ਖਿਤ੍ਤਾ, (ਉਪਸੀਵਾਤਿ ਭਗਵਾ;)

ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖਂ;

ਏਵਂ ਮੁਨੀ ਨਾਮਕਾਯਾ ਵਿਮੁਤ੍ਤੋ,

ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖ’’ਨ੍ਤਿ. (ਸੁ. ਨਿ. ੧੦੮੦);

ਵਤ੍ਵਾ ਸੁਤ੍ਤਂ ਆਹਰਿਤ੍ਵਾ ‘‘ਨਾਮਕਾਯਤੋ ਚ ਰੂਪਕਾਯਤੋ ਚ ਸੁਵਿਮੁਤ੍ਤਤ੍ਤਾ ਉਭਤੋਭਾਗਵਿਮੁਤ੍ਤੋ’’ਤਿ ਆਹ. ਤਿਪਿਟਕਚੂਲ਼ਾਭਯਤ੍ਥੇਰੋ ਪਨਾਹ – ‘‘ਸਮਾਪਤ੍ਤਿਯਾ ਵਿਕ੍ਖਮ੍ਭਨਵਿਮੋਕ੍ਖੇਨ ਏਕਵਾਰਂ ਵਿਮੁਤ੍ਤੋ ਮਗ੍ਗੇਨ ਸਮੁਚ੍ਛੇਦਵਿਮੋਕ੍ਖੇਨ ਏਕਵਾਰਂ ਵਿਮੁਤ੍ਤੋਤਿ ਉਭਤੋਭਾਗਵਿਮੁਤ੍ਤੋ’’ਤਿ. ਇਮੇ ਪਨ ਤਯੋਪਿ ਥੇਰਾ ਪਣ੍ਡਿਤਾ, ‘ਤਿਣ੍ਣਮ੍ਪਿ ਵਾਦੇ ਕਾਰਣਂ ਦਿਸ੍ਸਤੀ’ਤਿ ਤਿਣ੍ਣਮ੍ਪਿ ਵਾਦਂ ਤਨ੍ਤਿਂ ਕਤ੍ਵਾ ਠਪਯਿਂਸੁ.

ਸਙ੍ਖੇਪਤੋ ਪਨ ਅਰੂਪਸਮਾਪਤ੍ਤਿਯਾ ਰੂਪਕਾਯਤੋ ਵਿਮੁਤ੍ਤੋ, ਮਗ੍ਗੇਨ ਨਾਮਕਾਯਤੋ ਵਿਮੁਤ੍ਤੋਤਿ ਉਭੋਹਿ ਭਾਗੇਹਿ ਵਿਮੁਤ੍ਤਤ੍ਤਾ ਉਭਤੋਭਾਗਵਿਮੁਤ੍ਤੋ. ਸੋ ਚਤੁਨ੍ਨਂ ਅਰੂਪਸਮਾਪਤ੍ਤੀਨਂ ਏਕੇਕਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਿਤ੍ਵਾ ਅਰਹਤ੍ਤਂ ਪਤ੍ਤਾਨਂ ਚਤੁਨ੍ਨਂ, ਨਿਰੋਧਾ ਵੁਟ੍ਠਾਯ ਅਰਹਤ੍ਤਂ ਪਤ੍ਤਸ੍ਸ ਅਨਾਗਾਮਿਨੋ ਚ ਵਸੇਨ ਪਞ੍ਚਵਿਧੋ ਹੋਤਿ. ਤਤ੍ਥ ਪੁਰਿਮਾ ਚਤ੍ਤਾਰੋ ਸਮਾਪਤ੍ਤਿਸੀਸਂ ਨਿਰੋਧਂ ਨ ਸਮਾਪਜ੍ਜਨ੍ਤੀਤਿ ਪਰਿਯਾਯੇਨ ਉਭਤੋਭਾਗਵਿਮੁਤ੍ਤਾ ਨਾਮ. ਅਟ੍ਠਸਮਾਪਤ੍ਤਿਲਾਭੀ ਅਨਾਗਾਮੀ ਤਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਤੋਤਿ ਨਿਪ੍ਪਰਿਯਾਯੇਨ ਉਭਤੋਭਾਗਵਿਮੁਤ੍ਤਸੇਟ੍ਠੋ ਨਾਮ. ਨਨੁ ਚ ਅਰੂਪਾਵਚਰਜ੍ਝਾਨਮ੍ਪਿ ਉਪੇਕ੍ਖਾਚਿਤ੍ਤੇਕਗ੍ਗਤਾਹਿ ਦੁਵਙ੍ਗਿਕਂ ਰੂਪਾਵਚਰਚਤੁਤ੍ਥਜ੍ਝਾਨਮ੍ਪਿ, ਤਸ੍ਮਾ ਤਮ੍ਪਿ ਪਦਟ੍ਠਾਨਂ ਕਤ੍ਵਾ ਅਰਹਤ੍ਤਂ ਪਤ੍ਤੇਨ ਉਭਤੋਭਾਗਵਿਮੁਤ੍ਤੇਨ ਭਵਿਤਬ੍ਬਨ੍ਤਿ? ਨ ਭਵਿਤਬ੍ਬਂ. ਕਸ੍ਮਾ? ਰੂਪਕਾਯਤੋ ਅਵਿਮੁਤ੍ਤਤ੍ਤਾ. ਤਞ੍ਹਿ ਕਿਲੇਸਕਾਯਤੋਵ ਵਿਮੁਤ੍ਤਂ, ਨ ਰੂਪਕਾਯਤੋ; ਤਸ੍ਮਾ ਤਤੋ ਵੁਟ੍ਠਾਯ ਅਰਹਤ੍ਤਂ ਪਤ੍ਤੋ ਉਭਤੋਭਾਗਵਿਮੁਤ੍ਤੋ ਨਾਮ ਨ ਹੋਤਿ. ਅਰੂਪਾਵਚਰਂ ਪਨ ਨਾਮਕਾਯਤੋ ਚ ਵਿਮੁਤ੍ਤਂ ਰੂਪਕਾਯਤੋ ਚਾਤਿ ਤਦੇਵ ਪਾਦਕਂ ਕਤ੍ਵਾ ਅਰਹਤ੍ਤਂ ਪਤ੍ਤੋ ਉਭਤੋਭਾਗਵਿਮੁਤ੍ਤੋ ਹੋਤੀਤਿ ਵੇਦਿਤਬ੍ਬੋ.

੨੫. ਪਞ੍ਞਾਵਿਮੁਤ੍ਤਨਿਦ੍ਦੇਸੇ – ਪਞ੍ਞਾਯ ਵਿਮੁਤ੍ਤੋਤਿ ਪਞ੍ਞਾਵਿਮੁਤ੍ਤੋ. ਸੋ ਸੁਕ੍ਖਵਿਪਸ੍ਸਕੋ ਚਤੂਹਿ ਝਾਨੇਹਿ ਵੁਟ੍ਠਾਯ ਅਰਹਤ੍ਤਂ ਪਤ੍ਤਾ ਚਤ੍ਤਾਰੋ ਚਾਤਿ ਪਞ੍ਚਵਿਧੋ ਹੋਤਿ. ਏਤੇਸੁ ਹਿ ਏਕੋਪਿ ਅਟ੍ਠਵਿਮੋਕ੍ਖਲਾਭੀ ਨ ਹੋਤਿ. ਤੇਨੇਵ ਨ ਹੇਵ ਖੋ ਅਟ੍ਠ ਵਿਮੋਕ੍ਖੇਤਿਆਦਿਮਾਹ. ਅਰੂਪਾਵਚਰਜ੍ਝਾਨੇਸੁ ਪਨ ਏਕਸ੍ਮਿਂ ਸਤਿ ਉਭਤੋਭਾਗਵਿਮੁਤ੍ਤੋਯੇਵ ਨਾਮ ਹੋਤੀਤਿ.

੨੬. ਕਾਯਸਕ੍ਖਿਨਿਦ੍ਦੇਸੇ – ਏਕਚ੍ਚੇ ਆਸਵਾਤਿ ਹੇਟ੍ਠਿਮਮਗ੍ਗਤ੍ਤਯਵਜ੍ਝਾ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਕਾਯਸਕ੍ਖੀਤਿ ਵੁਚ੍ਚਤਿ. ਸੋ ਹਿ ਫੁਟ੍ਠਨ੍ਤਂ ਸਚ੍ਛਿਕਰੋਤੀਤਿ ਕਾਯਸਕ੍ਖੀ. ਝਾਨਫਸ੍ਸਂ ਪਠਮਂ ਫੁਸਤਿ, ਪਚ੍ਛਾ ਨਿਰੋਧਂ ਨਿਬ੍ਬਾਨਂ ਸਚ੍ਛਿਕਰੋਤੀਤਿਪਿ ਕਾਯਸਕ੍ਖੀ. ਸੋ ਸੋਤਾਪਤ੍ਤਿਫਲਟ੍ਠਂ ਆਦਿਂ ਕਤ੍ਵਾ ਯਾਵ ਅਰਹਤ੍ਤਮਗ੍ਗਟ੍ਠਾ ਛਬ੍ਬਿਧੋ ਹੋਤਿ.

੨੭. ਦਿਟ੍ਠਿਪ੍ਪਤ੍ਤਨਿਦ੍ਦੇਸੇ – ਇਦਂ ਦੁਕ੍ਖਨ੍ਤਿ ਇਦਂ ਦੁਕ੍ਖਂ, ਏਤ੍ਤਕਂ ਦੁਕ੍ਖਂ, ਨ ਇਤੋ ਉਦ੍ਧਂ ਦੁਕ੍ਖਂ. ਦੁਕ੍ਖਸਮੁਦਯਾਦੀਸੁਪਿ ਏਸੇਵ ਨਯੋ. ਯਥਾਭੂਤਂ ਪਜਾਨਾਤੀਤਿ ਠਪੇਤ੍ਵਾ ਤਣ੍ਹਂ ਪਞ੍ਚੁਪਾਦਾਨਕ੍ਖਨ੍ਧੇ ‘ਦੁਕ੍ਖਸਚ੍ਚ’ਨ੍ਤਿ ਯਾਥਾਵਸਰਸਤੋ ਪਜਾਨਾਤਿ. ਤਣ੍ਹਾ ਪਨ ਦੁਕ੍ਖਂ ਜਨੇਤਿ ਨਿਬ੍ਬਤ੍ਤੇਤਿ, ਪਭਾਵੇਤਿ, ਤਤੋ ਤਂ ਦੁਕ੍ਖਂ ਸਮੁਦੇਤਿ; ਤਸ੍ਮਾ ਨਂ ਅਯਂ ‘ਦੁਕ੍ਖਸਮੁਦਯੋ’ਤਿ ਯਥਾਭੂਤਂ ਪਜਾਨਾਤਿ. ਯਸ੍ਮਾ ਪਨ ਇਦਂ ਦੁਕ੍ਖਞ੍ਚ ਸਮੁਦਯੋ ਚ ਨਿਬ੍ਬਾਨਂ ਪਤ੍ਵਾ ਨਿਰੁਜ੍ਝਨ੍ਤਿ ਵੂਪਸਮ੍ਮਨ੍ਤਿ ਅਪ੍ਪਵਤ੍ਤਿਂ ਗਚ੍ਛਨ੍ਤਿ; ਤਸ੍ਮਾ ਨਂ ‘ਅਯਂ ਦੁਕ੍ਖਨਿਰੋਧੋ’ਤਿ ਯਥਾਭੂਤਂ ਪਜਾਨਾਤਿ. ਅਰਿਯੋ ਪਨ ਅਟ੍ਠਙ੍ਗਿਕੋ ਮਗ੍ਗੋ, ਤਂ ਦੁਕ੍ਖਨਿਰੋਧਂ ਗਚ੍ਛਤਿ; ਤੇਨ ਤਂ ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ ਯਥਾਭੂਤਂ ਪਜਾਨਾਤਿ. ਏਤ੍ਤਾਵਤਾ ਨਾਨਾਕ੍ਖਣੇ ਸਚ੍ਚਵਵਤ੍ਥਾਨਂ ਦਸ੍ਸਿਤਂ. ਇਦਾਨਿ ਏਕਕ੍ਖਣੇ ਦਸ੍ਸੇਤੁਂ ਤਥਾਗਤਪ੍ਪਵੇਦਿਤਾਤਿਆਦਿਮਾਹ. ਤਤ੍ਥ ਤਥਾਗਤਪ੍ਪਵੇਦਿਤਾਤਿ ਮਹਾਬੋਧਿਮਣ੍ਡੇ ਨਿਸੀਦਤ੍ਵਾ ਤਥਾਗਤੇਨ ਪਟਿਵਿਦ੍ਧਾ ਵਿਦਿਤਾ ਪਾਕਟੀਕਤਾ. ਧਮ੍ਮਾਤਿ ਚਤੁਸਚ੍ਚਧਮ੍ਮਾ. ਵੋਦਿਟ੍ਠਾ ਹੋਨ੍ਤੀਤਿ ਸੁਦਿਟ੍ਠਾ ਹੋਨ੍ਤਿ. ਵੋਚਰਿਤਾਤਿ ਸੁਚਰਿਤਾ. ਤੇਸੁ ਅਨੇਨ ਪਞ੍ਞਾ ਸੁਟ੍ਠੁ ਚਰਾਪਿਤਾ ਹੋਤੀਤਿ ਅਤ੍ਥੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਦਿਟ੍ਠਿਪ੍ਪਤ੍ਤੋਤਿ ਵੁਚ੍ਚਤਿ. ਅਯਞ੍ਹਿ ਦਿਟ੍ਠਨ੍ਤਂ ਪਤ੍ਤੋ. ‘‘ਦੁਕ੍ਖਾ ਸਙ੍ਖਾਰਾ, ਸੁਖੋ ਨਿਰੋਧੋ’’ਤਿ ਞਾਣਂ ਹੋਤਿ. ਦਿਟ੍ਠਂ ਵਿਦਿਤਂ ਸਚ੍ਛਿਕਤਂ ਪਸ੍ਸਿਤਂ ਪਞ੍ਞਾਯਾਤਿ ਦਿਟ੍ਠਪ੍ਪਤ੍ਤੋ. ਅਯਮ੍ਪਿ ਕਾਯਸਕ੍ਖੀ ਵਿਯ ਛਬ੍ਬਿਧੋਵ ਹੋਤਿ.

੨੮. ਸਦ੍ਧਾਵਿਮੁਤ੍ਤਨਿਦ੍ਦੇਸੇ – ਨੋ ਚ ਖੋ ਯਥਾ ਦਿਟ੍ਠਿਪ੍ਪਤ੍ਤਸ੍ਸਾਤਿ ਯਥਾ ਦਿਟ੍ਠਿਪ੍ਪਤ੍ਤਸ੍ਸ ਆਸਵਾ ਪਰਿਕ੍ਖੀਣਾ, ਨ ਏਵਂ ਸਦ੍ਧਾਵਿਮੁਤ੍ਤਸ੍ਸਾਤਿ ਅਤ੍ਥੋ. ਕਿਂ ਪਨ ਨੇਸਂ ਕਿਲੇਸਪ੍ਪਹਾਨੇ ਨਾਨਤ੍ਤਂ ਅਤ੍ਥੀਤਿ? ਨਤ੍ਥਿ. ਅਥ ਕਸ੍ਮਾ ਸਦ੍ਧਾਵਿਮੁਤ੍ਤੋ ਦਿਟ੍ਠਿਪ੍ਪਤ੍ਤਂ ਨ ਪਾਪੁਣਾਤੀਤਿ? ਆਗਮਨੀਯਨਾਨਤ੍ਤੇਨ. ਦਿਟ੍ਠਿਪ੍ਪਤੋ ਹਿ ਆਗਮਨਮ੍ਹਿ ਕਿਲੇਸੇ ਵਿਕ੍ਖਮ੍ਭੇਨ੍ਤੋ ਅਪ੍ਪਦੁਕ੍ਖੇਨ ਅਪ੍ਪਕਸਿਰੇਨ ਅਕਿਲਮਨ੍ਤੋਵ ਵਿਕ੍ਖਮ੍ਭੇਤੁਂ ਸਕ੍ਕੋਤਿ. ਸਦ੍ਧਾਵਿਮੁਤ੍ਤੋ ਪਨ ਦੁਕ੍ਖੇਨ ਕਸਿਰੇਨ ਕਿਲਮਨ੍ਤੋ ਹੁਤ੍ਵਾ ਵਿਕ੍ਖਮ੍ਭੇਤੁਂ ਸਕ੍ਕੋਤਿ, ਤਸ੍ਮਾ ਦਿਟ੍ਠਿਪ੍ਪਤ੍ਤਂ ਨ ਪਾਪੁਣਾਤਿ. ਅਪਿਚ ਨੇਸਂ ਪਞ੍ਞਾਯਪਿ ਨਾਨਤ੍ਤਂ ਅਤ੍ਥਿਯੇਵ. ਦਿਟ੍ਠਿਪ੍ਪਤ੍ਤਸ੍ਸ ਹਿ ਉਪਰਿ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾਞਾਣਂ ਤਿਕ੍ਖਂ ਸੂਰਂ ਪਸਨ੍ਨਂ ਹੁਤ੍ਵਾ ਵਹਤਿ. ਸਦ੍ਧਾਵਿਮੁਤ੍ਤਸ੍ਸ ਵਿਪਸ੍ਸਨਾਞਾਣਂ ਨੋ ਤਿਕ੍ਖਂ ਸੂਰਂ ਪਸਨ੍ਨਂ ਹੁਤ੍ਵਾ ਵਹਤਿ, ਤਸ੍ਮਾਪਿ ਸੋ ਦਿਟ੍ਠਿਪ੍ਪਤ੍ਤਂ ਨ ਪਾਪੁਣਾਤਿ.

ਯਥਾ ਹਿ ਦ੍ਵੀਸੁ ਤਰੁਣੇਸੁ ਸਿਪ੍ਪਂ ਦਸ੍ਸੇਨ੍ਤੇਸੁ ਏਕਸ੍ਸ ਹਤ੍ਥੇ ਤਿਖਿਣੋ ਅਸਿ, ਏਕਸ੍ਸ ਕੁਣ੍ਠੋ. ਤਿਖਿਣੇਨ ਅਸਿਨਾ ਕਦਲੀ ਛਿਜ੍ਜਮਾਨਾ ਸਦ੍ਦਂ ਨ ਕਰੋਤਿ. ਕੁਣ੍ਠੇਨ ਅਸਿਨਾ ਛਿਜ੍ਜਮਾਨਾ ‘ਕਟਕਟਾ’ਤਿ ਸਦ੍ਦਂ ਕਰੋਤਿ. ਤਤ੍ਥ ਤਿਖਿਣੇਨ ਅਸਿਨਾ ਸਦ੍ਦਂ ਅਕਰੋਨ੍ਤਿਯਾ ਏਵ ਕਦਲਿਯਾ ਛੇਦਨਂ ਵਿਯ ਦਿਟ੍ਠਿਪ੍ਪਤ੍ਤਸ੍ਸ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾਞਾਣਸ੍ਸ ਤਿਖਿਣਸੂਰਵਿਪ੍ਪਸਨ੍ਨਭਾਵੋ. ਕੁਣ੍ਠੇਨ ਅਸਿਨਾ ਸਦ੍ਦਂ ਕਰੋਨ੍ਤਿਯਾਪਿ ਕਦਲਿਯਾ ਛੇਦਨਂ ਵਿਯ ਸਦ੍ਧਾਵਿਮੁਤ੍ਤਸ੍ਸ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾਞਾਣਸ੍ਸ ਅਤਿਖਿਣਅਸੂਰਅਪ੍ਪਸਨ੍ਨਭਾਵੋ ਵੇਦਿਤਬ੍ਬੋ. ਇਮਂ ਪਨ ਨਯਂ ‘ਨੋ’ਤਿ ਪਟਿਕ੍ਖਿਪਿਤ੍ਵਾ, ਆਗਮਨੀਯਨਾਨਤ੍ਤੇਨੇਵ ਸਦ੍ਧਾਵਿਮੁਤ੍ਤੋ ਦਿਟ੍ਠਿਪ੍ਪਤ੍ਤਂ ਨ ਪਾਪੁਣਾਤੀਤਿ ਸਨ੍ਨਿਟ੍ਠਾਨਂ ਕਤਂ.

ਆਗਮਟ੍ਠਕਥਾਸੁ ਪਨ ਵੁਤ੍ਤਂ – ‘‘ਏਤੇਸੁ ਹਿ ਸਦ੍ਧਾਵਿਮੁਤ੍ਤਸ੍ਸ ਪੁਬ੍ਬਭਾਗਮਗ੍ਗਕ੍ਖਣੇ ਸਦ੍ਦਹਨ੍ਤਸ੍ਸ ਵਿਯ ਓਕਪ੍ਪੇਨ੍ਤਸ੍ਸ ਵਿਯ ਅਧਿਮੁਚ੍ਚਨ੍ਤਸ੍ਸ ਵਿਯ ਚ ਕਿਲੇਸਕ੍ਖਯੋ ਹੋਤਿ. ਦਿਟ੍ਠਿਪ੍ਪਤ੍ਤਸ੍ਸ ਪੁਬ੍ਬਭਾਗਮਗ੍ਗਕ੍ਖਣੇ ਕਿਲੇਸਚ੍ਛੇਦਕਞਾਣਂ ਅਦਨ੍ਧਂ ਤਿਖਿਣਂ ਸੂਰਂ ਹੁਤ੍ਵਾ ਵਹਤਿ. ਤਸ੍ਮਾ ਯਥਾ ਨਾਮ ਅਤਿਖਿਣੇਨ ਅਸਿਨਾ ਕਦਲਿਂ ਛਿਨ੍ਦਨ੍ਤਸ੍ਸ ਛਿਨ੍ਨਟ੍ਠਾਨਂ ਨ ਮਟ੍ਠਂ ਹੋਤਿ, ਅਸਿ ਨ ਸੀਘਂ ਵਹਤਿ, ਸਦ੍ਦੋ ਸੁਯ੍ਯਤਿ, ਬਲਵਤਰੋ ਵਾਯਾਮੋ ਕਾਤਬ੍ਬੋ ਹੋਤਿ; ਏਵਰੂਪਾ ਸਦ੍ਧਾਵਿਮੁਤ੍ਤਸ੍ਸ ਪੁਬ੍ਬਭਾਗਮਗ੍ਗਭਾਵਨਾ. ਯਥਾ ਪਨ ਸੁਨਿਸਿਤੇਨੇਵ ਅਸਿਨਾ ਕਦਲਿਂ ਛਿਨ੍ਦਨ੍ਤਸ੍ਸ ਛਿਨ੍ਨਟ੍ਠਾਨਂ ਮਟ੍ਠਂ ਹੋਤਿ, ਅਸਿ ਸੀਘਂ ਵਹਤਿ, ਸਦ੍ਦੋ ਨ ਸੁਯ੍ਯਤਿ, ਬਲਵਵਾਯਾਮਕਿਚ੍ਚਂ ਨ ਹੋਤਿ; ਏਵਰੂਪਾ ਦਿਟ੍ਠਿਪ੍ਪਤ੍ਤਸ੍ਸ ਪੁਬ੍ਬਭਾਗਮਗ੍ਗਭਾਵਨਾ ਵੇਦਿਤਬ੍ਬਾ’’ਤਿ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਸਦ੍ਧਾਵਿਮੁਤ੍ਤੋਤਿ ਵੁਚ੍ਚਤਿ. ਅਯਞ੍ਹਿ ਸਦ੍ਦਹਨ੍ਤੋ ਵਿਮੁਤ੍ਤੋਤਿ ਸਦ੍ਧਾਵਿਮੁਤ੍ਤੋ. ਅਯਮ੍ਪਿ ਕਾਯਸਕ੍ਖੀ ਵਿਯ ਛਬ੍ਬਿਧੋਵ ਹੋਤਿ.

੨੯. ਧਮ੍ਮਾਨੁਸਾਰੀਨਿਦ੍ਦੇਸੇ – ਪਟਿਪਨ੍ਨਸ੍ਸਾਤਿ ਇਮਿਨਾ ਸੋਤਾਪਤ੍ਤਿਮਗ੍ਗਟ੍ਠੋ ਦਸ੍ਸਿਤੋ. ਅਧਿਮਤ੍ਤਨ੍ਤਿ ਬਲਵਂ. ਪਞ੍ਞਂ ਵਾਹੇਤੀਤਿ ਪਞ੍ਞਾਵਾਹੀ. ਪਞ੍ਞਾ ਇਮਂ ਪੁਗ੍ਗਲਂ ਵਹਤੀਤਿ ਪਞ੍ਞਾਵਾਹੀਤਿਪਿ ਵੁਤ੍ਤਂ ਹੋਤਿ. ਪਞ੍ਞਾਪੁਬ੍ਬਙ੍ਗਮਨ੍ਤਿ ਪਞ੍ਞਂ ਪੁਰੇਚਾਰਿਕਂ ਕਤ੍ਵਾ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਧਮ੍ਮਾਨੁਸਾਰੀਤਿ ਵੁਚ੍ਚਤਿ. ਸੋ ਹਿ ਪਞ੍ਞਾਸਙ੍ਖਾਤੇਨ ਧਮ੍ਮੇਨ ਸਰਤਿ ਅਨੁਸ੍ਸਰਤੀਤਿ ਧਮ੍ਮਾਨੁਸਾਰੀ. ਸੋਤਾਪਤ੍ਤਿਮਗ੍ਗਟ੍ਠਸ੍ਸੇਵੇਤਂ ਨਾਮਂ. ਫਲੇ ਪਨ ਪਤ੍ਤੇ ਦਿਟ੍ਠਿਪ੍ਪਤ੍ਤੋ ਨਾਮ ਹੋਤਿ.

੩੦. ਸਦ੍ਧਾਨੁਸਾਰੀਨਿਦ੍ਦੇਸੇਪਿ – ਸਦ੍ਧਂ ਵਾਹੇਤੀਤਿ ਸਦ੍ਧਾਵਾਹੀ. ਸਦ੍ਧਾ ਇਮਂ ਪੁਗ੍ਗਲਂ ਵਹਤੀਤਿ ਸਦ੍ਧਾਵਾਹੀਤਿਪਿ ਵੁਤ੍ਤਮੇਵ. ਸਦ੍ਧਾਪੁਬ੍ਬਙ੍ਗਮਨ੍ਤਿ ਸਦ੍ਧਂ ਪੁਰੇਚਾਰਿਕਂ ਕਤ੍ਵਾ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਸਦ੍ਧਾਨੁਸਾਰੀਤਿ ਵੁਚ੍ਚਤਿ. ਸੋ ਹਿ ਸਦ੍ਧਾਯ ਸਰਤਿ. ਅਨੁਸ੍ਸਰਤੀਤਿ ਸਦ੍ਧਾਨੁਸਾਰੀ. ਸੋਤਾਪਤ੍ਤਿਮਗ੍ਗਟ੍ਠਸ੍ਸੇਵੇਤਂ ਨਾਮਂ. ਫਲੇ ਪਨ ਪਤ੍ਤੇ ਸਦ੍ਧਾਵਿਮੁਤ੍ਤੋ ਨਾਮ ਹੋਤਿ. ਲੋਕੁਤ੍ਤਰਧਮ੍ਮਞ੍ਹਿ ਨਿਬ੍ਬਤ੍ਤੇਨ੍ਤਾਨਂ ਦ੍ਵੇ ਧੁਰਾਨਿ ਨਾਮ, ਦ੍ਵੇ ਅਭਿਨਿਵੇਸਾ ਨਾਮ, ਦ੍ਵੇ ਸੀਸਾਨਿ ਨਾਮ. ਤਤ੍ਥ ਸਦ੍ਧਾਧੁਰਂ ਪਞ੍ਞਾਧੁਰਨ੍ਤਿ – ਦ੍ਵੇ ਧੁਰਾਨਿ ਨਾਮ. ਏਕੋ ਪਨ ਭਿਕ੍ਖੁ ਸਮਥਾਭਿਨਿਵੇਸੇਨ ਅਭਿਨਿਵਿਸਤਿ, ਏਕੋ ਵਿਪਸ੍ਸਨਾਭਿਨਿਵੇਸੇਨਾਤਿ – ਇਮੇ ਦ੍ਵੇ ਅਭਿਨਿਵੇਸਾ ਨਾਮ. ਏਕੋ ਚ ਮਤ੍ਥਕਂ ਪਾਪੁਣਨ੍ਤੋ ਉਭਤੋਭਾਗਵਿਮੁਤ੍ਤੋ ਹੋਤਿ, ਏਕੋ ਪਞ੍ਞਾਵਿਮੁਤ੍ਤੋਤਿ – ਇਮਾਨਿ ਦ੍ਵੇ ਸੀਸਾਨਿ ਨਾਮ. ਯੇ ਕੇਚਿ ਹਿ ਲੋਕੁਤ੍ਤਰਧਮ੍ਮਂ ਨਿਬ੍ਬਤ੍ਤੇਨ੍ਤਿ, ਸਬ੍ਬੇ ਤੇ ਇਮੇ ਦ੍ਵੇ ਧਮ੍ਮੇ ਧੁਰਂ ਕਤ੍ਵਾ ਇਮੇਸੁ ਦ੍ਵੀਸੁ ਠਾਨੇਸੁ ਅਭਿਨਿਵਿਸਿਤ੍ਵਾ ਇਮੇਹਿ ਦ੍ਵੀਹਿ ਠਾਨੇਹਿ ਵਿਮੁਚ੍ਚਨ੍ਤਿ. ਤੇਸੁ ਯੋ ਭਿਕ੍ਖੁ ਅਟ੍ਠਸਮਾਪਤ੍ਤਿਲਾਭੀ ਪਞ੍ਞਂ ਧੁਰਂ ਕਤ੍ਵਾ ਸਮਥਵਸੇਨ ਅਭਿਨਿਵਿਟ੍ਠੋ ਅਞ੍ਞਤਰਂ ਅਰੂਪਸਮਾਪਤ੍ਤਿਂ ਪਦਟ੍ਠਾਨਂ ਕਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਸੋ ਸੋਤਾਪਤ੍ਤਿਮਗ੍ਗਕ੍ਖਣੇ ਧਮ੍ਮਾਨੁਸਾਰੀ ਨਾਮ. ਪਰਤੋ ਪਨ ਛਸੁ ਠਾਨੇਸੁ ਕਾਯਸਕ੍ਖੀ ਨਾਮ. ਅਰਹਤ੍ਤਫਲੇ ਪਤ੍ਤੇ ਉਭਤੋਭਾਗਵਿਮੁਤ੍ਤੋ ਨਾਮ.

ਅਪਰੋ ਪਞ੍ਞਮੇਵ ਧੁਰਂ ਕਤ੍ਵਾ ਵਿਪਸ੍ਸਨਾਵਸੇਨ ਅਭਿਨਿਵਿਟ੍ਠੋ ਸੁਦ੍ਧਸਙ੍ਖਾਰੇ ਵਾ ਰੂਪਾਵਚਰਜ੍ਝਾਨੇਸੁ ਵਾ ਅਞ੍ਞਤਰਂ ਸਮ੍ਮਸਿਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਅਯਮ੍ਪਿ ਸੋਤਾਪਤ੍ਤਿਮਗ੍ਗਕ੍ਖਣੇਯੇਵ ਧਮ੍ਮਾਨੁਸਾਰੀ ਨਾਮ. ਪਰਤੋ ਪਨ ਛਸੁ ਠਾਨੇਸੁ ਦਿਟ੍ਠਿਪ੍ਪਤ੍ਤੋ ਨਾਮ. ਅਰਹਤ੍ਤੇ ਪਤ੍ਤੇ ਪਞ੍ਞਾਵਿਮੁਤ੍ਤੋ ਨਾਮ. ਇਧ ਦ੍ਵੇ ਨਾਮਾਨਿ ਅਪੁਬ੍ਬਾਨਿ, ਤਾਨਿ ਪੁਰਿਮੇਹਿ ਸਦ੍ਧਿਂ ਪਞ੍ਚ ਹੋਨ੍ਤਿ. ਅਪਰੋ ਅਟ੍ਠਸਮਾਪਤ੍ਤਿਲਾਭੀ ਸਦ੍ਧਂ ਧੁਰਂ ਕਤ੍ਵਾ ਸਮਾਧਿਵਸੇਨ ਅਭਿਨਿਵਿਟ੍ਠੋ ਅਞ੍ਞਤਰਂ ਅਰੂਪਸਮਾਪਤ੍ਤਿਂ ਪਦਟ੍ਠਾਨਂ ਕਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਾਪੁਣਾਤਿ – ਅਯਂ ਸੋਤਾਪਤ੍ਤਿਮਗ੍ਗਕ੍ਖਣੇ ਸਦ੍ਧਾਨੁਸਾਰੀ ਨਾਮ. ਪਰਤੋ ਛਸੁ ਠਾਨੇਸੁ ਕਾਯਸਕ੍ਖੀਯੇਵ ਨਾਮ. ਅਰਹਤ੍ਤੇ ਪਤ੍ਤੇ ਉਭਤੋਭਾਗਵਿਮੁਤ੍ਤੋਯੇਵ ਨਾਮ. ਇਧ ਏਕਮੇਵ ਨਾਮਂ ਅਪੁਬ੍ਬਂ. ਤੇਨ ਸਦ੍ਧਿਂ ਪੁਰਿਮਾਨਿ ਪਞ੍ਚ ਛ ਹੋਨ੍ਤਿ. ਅਪਰੋ ਸਦ੍ਧਮੇਵ ਧੁਰਂ ਕਤ੍ਵਾ ਵਿਪਸ੍ਸਨਾਵਸੇਨ ਅਭਿਨਿਵਿਟ੍ਠੋ ਸੁਦ੍ਧਸਙ੍ਖਾਰੇ ਵਾ ਰੂਪਾਵਚਰਜ੍ਝਾਨੇਸੁ ਵਾ ਅਞ੍ਞਤਰਂ ਸਮ੍ਮਸਿਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਅਯਮ੍ਪਿ ਸੋਤਾਪਤ੍ਤਿਮਗ੍ਗਕ੍ਖਣੇ ਸਦ੍ਧਾਨੁਸਾਰੀ ਨਾਮ. ਪਰਤੋ ਛਸੁ ਠਾਨੇਸੁ ਸਦ੍ਧਾਵਿਮੁਤ੍ਤੋ ਨਾਮ. ਅਰਹਤ੍ਤੇ ਪਤ੍ਤੇ ਪਞ੍ਞਾਵਿਮੁਤ੍ਤੋ ਨਾਮ. ਇਧਾਪਿ ਏਕਮੇਵ ਨਾਮਂ ਅਪੁਬ੍ਬਂ. ਤੇਨ ਸਦ੍ਧਿਂ ਪੁਰਿਮਾਨਿ ਛ ਸਤ੍ਤ ਹੋਨ੍ਤਿ. ਇਮੇ ਸਤ੍ਤ ਪੁਗ੍ਗਲਾ ਲੋਕੇ ਅਗ੍ਗਦਕ੍ਖਿਣੇਯ੍ਯਾ ਨਾਮਾਤਿ.

੩੧. ਸਤ੍ਤਕ੍ਖਤ੍ਤੁਪਰਮਨਿਦ੍ਦੇਸੇ – ਸਤ੍ਤਕ੍ਖਤ੍ਤੁਨ੍ਤਿ ਸਤ੍ਤਵਾਰੇ. ਸਤ੍ਤਕ੍ਖਤ੍ਤੁਪਰਮਾ ਭਵੂਪਪਤ੍ਤਿ ਅਤ੍ਤਭਾਵਗ੍ਗਹਣਂ ਅਸ੍ਸ, ਤਤੋ ਪਰਂ ਅਟ੍ਠਮਂ ਭਵਂ ਨਾਦਿਯਤੀਤਿ ਸਤ੍ਤਕ੍ਖਤ੍ਤੁਪਰਮੋ. ਸੋਤਾਪਨ੍ਨੋ ਹੋਤੀਤਿ ਏਤ੍ਥ ਸੋਤੋਤਿ ਅਰਿਯਮਗ੍ਗੋ, ਤੇਨ ਸਮਨ੍ਨਾਗਤੋ ਸੋਤਾਪਨ੍ਨੋ ਨਾਮ. ਯਥਾਹ –

‘‘ਸੋਤੋ ਸੋਤੋਤਿ ਹਿਦਂ, ਸਾਰਿਪੁਤ੍ਤ, ਵੁਚ੍ਚਤਿ. ਕਤਮੋ ਨੁ ਖੋ, ਸਾਰਿਪੁਤ੍ਤ, ਸੋਤੋਤਿ? ਅਯਮੇਵ ਹਿ, ਭਨ੍ਤੇ, ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਸੋਤੋ, ਸੇਯ੍ਯਥਿਦਂ – ਸਮ੍ਮਾਦਿਟ੍ਠਿ…ਪੇ… ਸਮ੍ਮਾਸਮਾਧੀਤਿ. ਸੋਤਾਪਨ੍ਨੋ ਸੋਤਾਪਨ੍ਨੋਤਿ, ਹਿਦਂ, ਸਾਰਿਪੁਤ੍ਤ, ਵੁਚ੍ਚਤਿ. ਕਤਮੋ ਨੁ ਖੋ, ਸਾਰਿਪੁਤ੍ਤ, ਸੋਤਾਪਨ੍ਨੋਤਿ? ਯੋ ਹਿ, ਭਨ੍ਤੇ, ਇਮਿਨਾ ਅਰਿਯੇਨ ਅਟ੍ਠਙ੍ਗਿਕੇਨ ਮਗ੍ਗੇਨ ਸਮਨ੍ਨਾਗਤੋ ਅਯਂ ਵੁਚ੍ਚਤਿ ਸੋਤਾਪਨ੍ਨੋ, ਸ੍ਵਾਯਂ ਆਯਸ੍ਮਾ ਏਵਂਨਾਮੋ ਏਵਂਗੋਤ੍ਤੋ ਇਤਿ ਵਾ’’ਤਿ (ਸਂ. ਨਿ. ੫.੧੦੦੧).

ਏਵਂ ਮਗ੍ਗਕ੍ਖਣੇਪਿ ਸੋਤਾਪਨ੍ਨੋ ਨਾਮ ਹੋਤਿ. ਇਧ ਪਨ ਮਗ੍ਗੇਨ ਫਲਸ੍ਸ ਨਾਮਂ ਦਿਨ੍ਨਨ੍ਤਿ ਫਲਕ੍ਖਣੇ ਸੋਤਾਪਨ੍ਨੋ ਅਧਿਪ੍ਪੇਤੋ.

ਅਵਿਨਿਪਾਤਧਮ੍ਮੋਤਿ ਵਿਨਿਪਾਤਸਙ੍ਖਾਤਂ ਅਪਾਯਂ ਉਪਪਤ੍ਤਿਵਸੇਨ ਅਨਾਗਮਨਸਭਾਵੋ. ਨਿਯਤੋਤਿ ਮਗ੍ਗਨਿਯਾਮੇਨ ਨਿਯਤੋ. ਸਮ੍ਬੋਧਿਪਰਾਯਣੋਤਿ ਬੁਜ੍ਝਨਕਭਾਵਪਰਾਯਣੋ. ਸੋ ਹਿ ਪਟਿਲਦ੍ਧਮਗ੍ਗੇਨ ਬੁਜ੍ਝਤੀਤਿ ਸਮ੍ਬੋਧਿਪਰਾਯਣੋ. ਉਪਰਿ ਤੀਹਿ ਮਗ੍ਗੇਹਿ ਅਵਸ੍ਸਂ ਬੁਜ੍ਝਿਸ੍ਸਤੀਤਿ ਸਮ੍ਬੋਧਿਪਰਾਯਣੋ. ਦੇਵੇ ਚ ਮਨੁਸ੍ਸੇ ਚਾਤਿ ਦੇਵਲੋਕਞ੍ਚ ਮਨੁਸ੍ਸਲੋਕਞ੍ਚ. ਸਨ੍ਧਾਵਿਤ੍ਵਾ ਸਂਸਰਿਤ੍ਵਾਤਿ ਪਟਿਸਨ੍ਧਿਵਸੇਨ ਅਪਰਾਪਰਂ ਗਨ੍ਤ੍ਵਾ. ਦੁਕ੍ਖਸ੍ਸਨ੍ਤਂ ਕਰੋਤੀਤਿ ਵਟ੍ਟਦੁਕ੍ਖਸ੍ਸ ਪਰਿਯਨ੍ਤਂ ਪਰਿਵਟੁਮਂ ਕਰੋਤਿ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਸਤ੍ਤਕ੍ਖਤ੍ਤੁਪਰਮੋ ਨਾਮ ਵੁਚ੍ਚਤਿ. ਅਯਂ ਪਨ ਕਾਲੇਨ ਦੇਵਲੋਕਸ੍ਸ ਕਾਲੇਨ ਮਨੁਸ੍ਸਲੋਕਸ੍ਸ ਵਸੇਨ ਮਿਸ੍ਸਕਭਵੇਨ ਕਥਿਤੋਤਿ ਵੇਦਿਤਬ੍ਬੋ.

੩੨. ਕੋਲਂਕੋਲਨਿਦ੍ਦੇਸੇ – ਕੁਲਤੋ ਕੁਲਂ ਗਚ੍ਛਤੀਤਿ ਕੋਲਂਕੋਲੋ. ਸੋਤਾਪਤ੍ਤਿਫਲਸਚ੍ਛਿਕਿਰਿਯਤੋ ਹਿ ਪਟ੍ਠਾਯ ਨੀਚੇ ਕੁਲੇ ਉਪਪਤ੍ਤਿ ਨਾਮ ਨਤ੍ਥਿ, ਮਹਾਭੋਗਕੁਲੇਸੁਯੇਵ ਨਿਬ੍ਬਤ੍ਤਤੀਤਿ ਅਤ੍ਥੋ. ਦ੍ਵੇ ਵਾ ਤੀਣਿ ਵਾ ਕੁਲਾਨੀਤਿ ਦੇਵਮਨੁਸ੍ਸਵਸੇਨ ਦ੍ਵੇ ਵਾ ਤਯੋ ਵਾ ਭਵੇ. ਇਤਿ ਅਯਮ੍ਪਿ ਮਿਸ੍ਸਕਭਵੇਨੇਵ ਕਥਿਤੋ. ਦੇਸਨਾਮਤ੍ਤਮੇਵ ਚੇਤਂ – ‘ਦ੍ਵੇ ਵਾ ਤੀਣਿ ਵਾ’ਤਿ. ਯਾਵ ਛਟ੍ਠਭਵਾ ਸਂਸਰਨ੍ਤੋਪਿ ਪਨ ਕੋਲਂਕੋਲੋਵ ਹੋਤਿ.

੩੩. ਏਕਬੀਜਿਨਿਦ੍ਦੇਸੇ – ਖਨ੍ਧਬੀਜਂ ਨਾਮ ਕਥਿਤਂ. ਯਸ੍ਸ ਹਿ ਸੋਤਾਪਨ੍ਨਸ੍ਸ ਏਕਂਯੇਵ ਖਨ੍ਧਬੀਜਂ ਅਤ੍ਥਿ, ਏਕਂ ਅਤ੍ਤਭਾਵਗ੍ਗਹਣਂ, ਸੋ ਏਕਬੀਜੀ ਨਾਮ. ਮਾਨੁਸਕਂ ਭਵਨ੍ਤਿ ਇਦਂ ਪਨੇਤ੍ਥ ਦੇਸਨਾਮਤ੍ਤਮੇਵ. ਦੇਵਭਵਂ ਨਿਬ੍ਬਤ੍ਤੇਤੀਤਿਪਿ ਪਨ ਵਤ੍ਤੁਂ ਵਟ੍ਟਤਿਯੇਵ. ਭਗਵਤਾ ਗਹਿਤਨਾਮਵਸੇਨੇਵ ਚੇਤਾਨਿ ਏਤੇਸਂ ਨਾਮਾਨਿ. ਏਤ੍ਤਕਂ ਠਾਨਂ ਗਤੋ ਸਤ੍ਤਕ੍ਖਤ੍ਤੁਪਰਮੋ ਨਾਮ ਹੋਤਿ, ਏਤ੍ਤਕਂ ਕੋਲਂਕੋਲੋ, ਏਤ੍ਤਕਂ ਏਕਬੀਜੀਤਿ ਭਗਵਤਾ ਏਤੇਸਂ ਨਾਮਂ ਗਹਿਤਂ. ਨਿਯਮਤੋ ਪਨ ਅਯਂ ਸਤ੍ਤਕ੍ਖਤ੍ਤੁਪਰਮੋ, ਅਯਂ ਕੋਲਂਕੋਲੋ, ਅਯਂ ਏਕਬੀਜੀਤਿ ਨਤ੍ਥਿ.

ਕੋ ਪਨ ਤੇਸਂ ਏਤਂ ਪਭੇਦਂ ਨਿਯਮੇਤੀਤਿ? ਕੇਚਿ ਤਾਵ ਥੇਰਾ ‘ਪੁਬ੍ਬਹੇਤੁ ਨਿਯਮੇਤੀ’ਤਿ ਵਦਨ੍ਤਿ, ਕੇਚਿ ‘ਪਠਮਮਗ੍ਗੋ’, ਕੇਚਿ ‘ਉਪਰਿ ਤਯੋ ਮਗ੍ਗਾ’, ਕੇਚਿ ‘ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ’ਤਿ. ਤਤ੍ਥ ‘ਪੁਬ੍ਬਹੇਤੁ ਨਿਯਮੇਤੀ’ਤਿ ਵਾਦੇ ‘ਪਠਮਮਗ੍ਗਸ੍ਸ ਉਪਨਿਸ੍ਸਯੋ ਕਤੋ ਨਾਮ ਹੋਤਿ, ਉਪਰਿ ਤਯੋ ਮਗ੍ਗਾ ਨਿਰੁਪਨਿਸ੍ਸਯਾ ਉਪ੍ਪਨ੍ਨਾ’ਤਿ ਵਚਨਂ ਆਪਜ੍ਜਤਿ. ‘ਪਠਮਮਗ੍ਗੋ ਨਿਯਮੇਤੀ’ਤਿ ਵਾਦੇ ਉਪਰਿ ਤਿਣ੍ਣਂ ਮਗ੍ਗਾਨਂ ਨਿਰਤ੍ਥਕਤਾ ਆਪਜ੍ਜਤਿ. ‘ਉਪਰਿ ਤਯੋ ਮਗ੍ਗਾ ਨਿਯਮੇਨ੍ਤੀ’ਤਿ ਵਾਦੇ ‘ਅਟ੍ਠਮਮਗ੍ਗੇ ਅਨੁਪ੍ਪਨ੍ਨੇਯੇਵ ਉਪਰਿ ਤਯੋ ਮਗ੍ਗਾ ਉਪ੍ਪਨ੍ਨਾ’ਤਿ ਆਪਜ੍ਜਤਿ. ‘ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ ਨਿਯਮੇਤੀ’ਤਿ ਵਾਦੋ ਪਨ ਯੁਜ੍ਜਤਿ. ਸਚੇ ਹਿ ਉਪਰਿ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ ਬਲਵਤੀ ਹੋਤਿ, ਏਕਬੀਜੀ ਨਾਮ ਹੋਤਿ; ਤਤੋ ਮਨ੍ਦਤਰਾਯ ਕੋਲਂਕੋਲੋ; ਤਤੋ ਮਨ੍ਦਤਰਾਯ ਸਤ੍ਤਕ੍ਖਤ੍ਤੁਪਰਮੋਤਿ.

ਏਕਚ੍ਚੋ ਹਿ ਸੋਤਾਪਨ੍ਨੋ ਵਟ੍ਟਜ੍ਝਾਸਯੋ ਹੋਤਿ, ਵਟ੍ਟਾਭਿਰਤੋ, ਪੁਨਪ੍ਪੁਨਂ ਵਟ੍ਟਸ੍ਮਿਂਯੇਵ ਵਿਚਰਤਿ ਸਨ੍ਦਿਸ੍ਸਤਿ. ਅਨਾਥਪਿਣ੍ਡਿਕੋ ਸੇਟ੍ਠਿ, ਵਿਸਾਖਾ ਉਪਾਸਿਕਾ, ਚੂਲ਼ਰਥਮਹਾਰਥਾ ਦੇਵਪੁਤ੍ਤਾ, ਅਨੇਕਵਣ੍ਣੋ ਦੇਵਪੁਤ੍ਤੋ, ਸਕ੍ਕੋ ਦੇਵਰਾਜਾ, ਨਾਗਦਤ੍ਤੋ ਦੇਵਪੁਤ੍ਤੋਤਿ ਇਮੇ ਹਿ ਏਤ੍ਤਕਾ ਜਨਾ ਵਟ੍ਟਜ੍ਝਾਸਯਾ ਵਟ੍ਟਾਭਿਰਤਾ ਆਦਿਤੋ ਪਟ੍ਠਾਯ ਛ ਦੇਵਲੋਕੇ ਸੋਧੇਤ੍ਵਾ ਅਕਨਿਟ੍ਠੇ ਠਤ੍ਵਾ ਪਰਿਨਿਬ੍ਬਾਯਿਸ੍ਸਨ੍ਤਿ, ਇਮੇ ਇਧ ਨ ਗਹਿਤਾ. ਨ ਕੇਵਲਞ੍ਚਿਮੇ; ਯੋਪਿ ਮਨੁਸ੍ਸੇਸੁਯੇਵ ਸਤ੍ਤਕ੍ਖਤ੍ਤੁਂ ਸਂਸਰਿਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਯੋਪਿ ਦੇਵਲੋਕੇ ਨਿਬ੍ਬਤ੍ਤੋ ਦੇਵੇਸੁਯੇਵ ਸਤ੍ਤਕ੍ਖਤ੍ਤੁਂ ਅਪਰਾਪਰਂ ਸਂਸਰਿਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਇਮੇਪਿ ਇਧ ਨ ਗਹਿਤਾ. ਮਿਸ੍ਸਕਭਵਵਸੇਨੇਵ ਪਨੇਤ੍ਥ ਸਤ੍ਤਕ੍ਖਤ੍ਤੁਪਰਮਕੋਲਂਕੋਲਾ ਮਾਨੁਸਕਭਵਨਿਬ੍ਬਤ੍ਤਕੋਯੇਵ ਚ ਏਕਬੀਜੀ ਗਹਿਤੋਤਿ ਵੇਦਿਤਬ੍ਬੋ. ਤਤ੍ਥ ਏਕੇਕੋ ਦੁਕ੍ਖਾਪਟਿਪਦਾਦਿਵਸੇਨ ਚਤੁਬ੍ਬਿਧਭਾਵਂ ਆਪਜ੍ਜਤਿ. ਸਦ੍ਧਾਧੁਰੇਨੇਵ ਚਤ੍ਤਾਰੋ ਸਤ੍ਤਕ੍ਖਤ੍ਤੁਪਰਮਾ, ਚਤ੍ਤਾਰੋ ਕੋਲਂਕੋਲਾ, ਚਤ੍ਤਾਰੋ ਏਕਬੀਜਿਨੋਤਿ ਦ੍ਵਾਦਸ ਹੋਨ੍ਤਿ. ਸਚੇ ਪਞ੍ਞਾਯ ਸਕ੍ਕਾ ਨਿਬ੍ਬਤ੍ਤੇਤੁਂ, ‘ਅਹਂ ਲੋਕੁਤ੍ਤਰਂ ਧਮ੍ਮਂ ਨਿਬ੍ਬਤ੍ਤੇਸ੍ਸਾਮੀ’ਤਿ ਏਵਂ ਪਞ੍ਞਂ ਧੁਰਂ ਕਤ੍ਵਾ ਸਤ੍ਤਕ੍ਖਤ੍ਤੁਪਰਮਾਦਿਭਾਵਂ ਪਤ੍ਤਾਪਿ ਪਟਿਪਦਾਵਸੇਨ ਦ੍ਵਾਦਸੇਵਾਤਿ ਇਮੇ ਚਤੁਵੀਸਤਿ ਸੋਤਾਪਨ੍ਨਾ ਇਹਟ੍ਠਕਨਿਜ੍ਝਾਨਿਕਵਸੇਨੇਵ ਇਮਸ੍ਮਿਂ ਠਾਨੇ ਕਥਿਤਾਤਿ ਵੇਦਿਤਬ੍ਬਾ.

੩੪. ਸਕਦਾਗਾਮਿਨਿਦ੍ਦੇਸੇ – ਪਟਿਸਨ੍ਧਿਵਸੇਨ ਸਕਿਂ ਆਗਚ੍ਛਤੀਤਿ ਸਕਦਾਗਾਮੀ. ਸਕਿਦੇਵਾਤਿ ਏਕਵਾਰਂਯੇਵ. ਇਮਂ ਲੋਕਂ ਆਗਨ੍ਤ੍ਵਾਤਿ ਇਮਿਨਾ ਪਞ੍ਚਸੁ ਸਕਦਾਗਾਮੀਸੁ ਚਤ੍ਤਾਰੋ ਵਜ੍ਜੇਤ੍ਵਾ ਏਕੋਵ ਗਹਿਤੋ. ਏਕਚ੍ਚੋ ਹਿ ਇਧ ਸਕਦਾਗਾਮਿਫਲਂ ਪਤ੍ਵਾ ਇਧੇਵ ਪਰਿਨਿਬ੍ਬਾਯਤਿ, ਏਕਚ੍ਚੋ ਇਧ ਪਤ੍ਵਾ ਦੇਵਲੋਕੇ ਪਰਿਨਿਬ੍ਬਾਯਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਯਤਿ – ਇਮੇ ਚਤ੍ਤਾਰੋਪਿ ਇਧ ਨ ਗਹਿਤਾ. ਯੋ ਪਨ ਇਧ ਪਤ੍ਵਾ ਦੇਵਲੋਕੇ ਯਾਵਤਾਯੁਕਂ ਵਸਿਤ੍ਵਾ ਪੁਨ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਯਤਿ – ਅਯਂ ਏਕੋਵ ਇਧ ਗਹਿਤੋਤਿ ਵੇਦਿਤਬ੍ਬੋ. ਸੇਸਮੇਤ੍ਥ ਯਂ ਵਤ੍ਤਬ੍ਬਂ ਸਿਯਾ ਤਂ ਸਬ੍ਬਂ ਹੇਟ੍ਠਾ ਧਮ੍ਮਸਙ੍ਗਹਟ੍ਠਕਥਾਯਂ ਲੋਕੁਤ੍ਤਰਕੁਸਲਨਿਦ੍ਦੇਸੇ ਵੁਤ੍ਤਮੇਵ. ਇਮਸ੍ਸ ਪਨ ਸਕਦਾਗਾਮਿਨੋ ਏਕਬੀਜਿਨਾ ਸਦ੍ਧਿਂ ਕਿਂ ਨਾਨਾਕਰਣਨ੍ਤਿ? ਏਕਬੀਜਿਸ੍ਸ ਏਕਾਵ ਪਟਿਸਨ੍ਧਿ, ਸਕਦਾਗਾਮਿਸ੍ਸ ਦ੍ਵੇ ਪਟਿਸਨ੍ਧਿਯੋ – ਇਦਂ ਨੇਸਂ ਨਾਨਾਕਰਣਨ੍ਤਿ.

੩੫. ਅਨਾਗਾਮਿਨਿਦ੍ਦੇਸੇ – ਓਰਮ੍ਭਾਗਿਯਾਨਂ ਸਂਯੋਜਨਾਨਨ੍ਤਿ ਓਰਂ ਵੁਚ੍ਚਤਿ ਕਾਮਧਾਤੁ. ਯਸ੍ਸ ਇਮਾਨਿ ਪਞ੍ਚ ਬਨ੍ਧਨਾਨਿ ਅਪ੍ਪਹੀਨਾਨਿ ਹੋਨ੍ਤਿ, ਸੋ ਭਵਗ੍ਗੇ ਨਿਬ੍ਬਤ੍ਤੋਪਿ ਗਿਲਿਤਬਲ਼ਿਸੋ ਮਚ੍ਛੋ ਵਿਯ ਦੀਘਸੁਤ੍ਤਕੇਨ ਪਾਦੇ ਬਦ੍ਧਕਾਕੋ ਵਿਯ ਤੇਹਿ ਬਨ੍ਧਨੇਹਿ ਆਕਡ੍ਢਿਯਮਾਨੋ ਕਾਮਧਾਤੁਯਂਯੇਵ ਪਵਤ੍ਤਤੀਤਿ ਪਞ੍ਚ ਬਨ੍ਧਨਾਨਿ ਓਰਮ੍ਭਾਗਿਯਾਨੀਤਿ ਵੁਚ੍ਚਨ੍ਤਿ. ਹੇਟ੍ਠਾਭਾਗਿਯਾਨਿ ਹੇਟ੍ਠਾਕੋਟ੍ਠਾਸਿਕਾਨੀਤਿ ਅਤ੍ਥੋ. ਪਰਿਕ੍ਖਯਾਤਿ ਤੇਸਂ ਬਨ੍ਧਨਾਨਂ ਪਰਿਕ੍ਖਯੇਨ. ਓਪਪਾਤਿਕੋਤਿ ਉਪਪਾਤਯੋਨਿਕੋ. ਇਮਿਨਾਸ੍ਸ ਗਬ੍ਭਸੇਯ੍ਯਾ ਪਟਿਕ੍ਖਿਤ੍ਤਾ. ਤਤ੍ਥ ਪਰਿਨਿਬ੍ਬਾਯੀਤਿ ਤਤ੍ਥ ਸੁਦ੍ਧਾਵਾਸਲੋਕੇ ਪਰਿਨਿਬ੍ਬਾਯਿਤਾ. ਅਨਾਵਤ੍ਤਿਧਮ੍ਮੋ ਤਸ੍ਮਾ ਲੋਕਾਤਿ ਪਟਿਸਨ੍ਧਿਗ੍ਗਹਣਵਸੇਨ ਤਸ੍ਮਾ ਲੋਕਾ ਇਧ ਅਨਾਵਤ੍ਤਨਸਭਾਵੋ. ਬੁਦ੍ਧਦਸ੍ਸਨਥੇਰਦਸ੍ਸਨਧਮ੍ਮਸ੍ਸਵਨਾਨਂ ਪਨਤ੍ਥਾਯਸ੍ਸ ਆਗਮਨਂ ਅਨਿਵਾਰਿਤਂ. ਅਯਂ ਵੁਚ੍ਚਤੀਤਿ ਅਯਂ ਏਵਂਵਿਧੋ ਪੁਗ੍ਗਲੋ ਪਟਿਸਨ੍ਧਿਵਸੇਨ ਪੁਨ ਅਨਾਗਮਨਤੋ ਅਨਾਗਾਮੀ ਨਾਮ ਵੁਚ੍ਚਤਿ.

੩੬. ਅਨ੍ਤਰਾਪਰਿਨਿਬ੍ਬਾਯਿਨਿਦ੍ਦੇਸੇ – ਉਪਪਨ੍ਨਂ ਵਾ ਸਮਨਨ੍ਤਰਾਤਿ ਉਪਪਨ੍ਨਸਮਨਨ੍ਤਰਾ ਵਾ ਹੁਤ੍ਵਾ. ਅਪ੍ਪਤ੍ਤਂ ਵਾ ਵੇਮਜ੍ਝਂ ਆਯੁਪ੍ਪਮਾਣਨ੍ਤਿ ਆਯੁਪ੍ਪਮਾਣਂ ਵੇਮਜ੍ਝਂ ਅਪ੍ਪਤ੍ਤਂ ਵਾ ਹੁਤ੍ਵਾ ਅਰਿਯਮਗ੍ਗਂ ਸਞ੍ਜਨੇਤੀਤਿ ਅਤ੍ਥੋ. ਵਾਸਦ੍ਦਵਿਕਪ੍ਪਤੋ ਪਨ ਵੇਮਜ੍ਝਂ ਪਤ੍ਤਨ੍ਤਿਪਿ ਅਤ੍ਥੋ ਵੇਦਿਤਬ੍ਬੋ. ਏਵਂ ਤਯੋ ਅਨ੍ਤਰਾਪਰਿਨਿਬ੍ਬਾਯਿਨੋ ਸਿਦ੍ਧਾ ਹੋਨ੍ਤਿ. ਉਪਰਿਟ੍ਠਿਮਾਨਂ ਸਂਯੋਜਨਾਨਨ੍ਤਿ ਉਪਰਿ ਪਞ੍ਚਨ੍ਨਂ ਉਦ੍ਧਮ੍ਭਾਗਿਯਸਂਯੋਜਨਾਨਂ ਅਟ੍ਠਨ੍ਨਂ ਵਾ ਕਿਲੇਸਾਨਂ. ਪਹਾਨਾਯਾਤਿ ਏਤੇਸਂ ਪਜਹਨਤ੍ਥਾਯ ਮਗ੍ਗਂ ਸਞ੍ਜਨੇਤਿ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਆਯੁਵੇਮਜ੍ਝਸ੍ਸ ਅਨ੍ਤਰਾਯੇਵ ਪਰਿਨਿਬ੍ਬਾਯਨਤੋ ਅਨ੍ਤਰਾਪਰਿਨਿਬ੍ਬਾਯੀਤਿ ਵੁਚ੍ਚਤਿ.

੩੭. ਉਪਹਚ੍ਚਪਰਿਨਿਬ੍ਬਾਯਿਨਿਦ੍ਦੇਸੇ – ਅਤਿਕ੍ਕਮਿਤ੍ਵਾ ਵੇਮਜ੍ਝਂ ਆਯੁਪ੍ਪਮਾਣਨ੍ਤਿ ਆਯੁਪ੍ਪਮਾਣਂ ਵੇਮਜ੍ਝਂ ਅਤਿਕ੍ਕਮਿਤ੍ਵਾ. ਉਪਹਚ੍ਚ ਵਾ ਕਾਲਕਿਰਿਯਨ੍ਤਿ ਉਪਗਨ੍ਤ੍ਵਾ ਕਾਲਕਿਰਿਯਂ. ਆਯੁਕ੍ਖਯਸ੍ਸ ਆਸਨ੍ਨੇ ਠਤ੍ਵਾਤਿ ਅਤ੍ਥੋ. ਅਯਂ ਵੁਚ੍ਚਤੀਤਿ ਅਯਂ ਏਵਰੂਪੋ ਪੁਗ੍ਗਲੋ ਅਵਿਹੇਸੁ ਤਾਵ ਕਪ੍ਪਸਹਸ੍ਸਪ੍ਪਮਾਣਸ੍ਸ ਆਯੁਨੋ ਪਞ੍ਚਕਪ੍ਪਸਤਸਙ੍ਖਾਤਂ ਵੇਮਜ੍ਝਂ ਅਤਿਕ੍ਕਮਿਤ੍ਵਾ ਛਟ੍ਠੇ ਵਾ ਕਪ੍ਪਸਤੇ ਸਤ੍ਤਮਟ੍ਠਮਨਵਮਾਨਂ ਵਾ ਅਞ੍ਞਤਰਸ੍ਮਿਂ ਦਸਮੇਯੇਵ ਵਾ ਕਪ੍ਪਸਤੇ ਠਤ੍ਵਾ ਅਰਹਤ੍ਤਂ ਪਤ੍ਵਾ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਨਤੋ ਉਪਹਚ੍ਚਪਰਿਨਿਬ੍ਬਾਯੀਤਿ ਵੁਚ੍ਚਤਿ.

੩੮. ਅਸਙ੍ਖਾਰਸਸਙ੍ਖਾਰਪਰਿਨਿਬ੍ਬਾਯਿਨਿਦ੍ਦੇਸੇਸੁ – ਅਸਙ੍ਖਾਰੇਨ ਅਪ੍ਪਦੁਕ੍ਖੇਨ ਅਧਿਮਤ੍ਤਪਯੋਗਂ ਅਕਤ੍ਵਾਵ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਨਧਮ੍ਮੋਤਿ ਅਸਙ੍ਖਾਰਪਰਿਨਿਬ੍ਬਾਯੀ. ਸਸਙ੍ਖਾਰੇਨ ਦੁਕ੍ਖੇਨ ਕਸਿਰੇਨ ਅਧਿਮਤ੍ਤਪਯੋਗਂ ਕਤ੍ਵਾਵ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਨਧਮ੍ਮੋਤਿ ਸਸਙ੍ਖਾਰਪਰਿਨਿਬ੍ਬਾਯੀ.

੪੦. ਉਦ੍ਧਂਸੋਤਨਿਦ੍ਦੇਸੇ – ਉਦ੍ਧਂ ਵਾਹਿਭਾਵੇਨ ਉਦ੍ਧਮਸ੍ਸ ਤਣ੍ਹਾਸੋਤਂ ਵਟ੍ਟਸੋਤਂ ਵਾਤਿ ਉਦ੍ਧਂਸੋਤੋ. ਉਦ੍ਧਂ ਵਾ ਗਨ੍ਤ੍ਵਾ ਪਟਿਲਭਿਤਬ੍ਬਤੋ ਉਦ੍ਧਮਸ੍ਸ ਮਗ੍ਗਸੋਤਨ੍ਤਿ ਉਦ੍ਧਂਸੋਤੋ. ਅਕਨਿਟ੍ਠਂ ਗਚ੍ਛਤੀਤਿ ਅਕਨਿਟ੍ਠਗਾਮੀ. ਅਵਿਹਾ ਚੁਤੋ ਅਤਪ੍ਪਂ ਗਚ੍ਛਤੀਤਿਆਦੀਸੁ ਅਵਿਹੇ ਕਪ੍ਪਸਹਸ੍ਸਂ ਵਸਨ੍ਤੋ ਅਰਹਤ੍ਤਂ ਪਤ੍ਤੁਂ ਅਸਕ੍ਕੁਣਿਤ੍ਵਾ ਅਤਪ੍ਪਂ ਗਚ੍ਛਤਿ. ਤਤ੍ਰਾਪਿ ਦ੍ਵੇ ਕਪ੍ਪਸਹਸ੍ਸਾਨਿ ਵਸਨ੍ਤੋ ਅਰਹਤ੍ਤਂ ਪਤ੍ਤੁਂ ਅਸਕ੍ਕੁਣਿਤ੍ਵਾ ਸੁਦਸ੍ਸਂ ਗਚ੍ਛਤਿ. ਤਤ੍ਰਾਪਿ ਚਤ੍ਤਾਰਿ ਕਪ੍ਪਸਹਸ੍ਸਾਨਿ ਵਸਨ੍ਤੋ ਅਰਹਤ੍ਤਂ ਪਤ੍ਤੁਂ ਅਸਕ੍ਕੁਣਿਤ੍ਵਾ ਸੁਦਸ੍ਸਿਂ ਗਚ੍ਛਤਿ. ਤਤ੍ਰਾਪਿ ਅਟ੍ਠ ਕਪ੍ਪਸਹਸ੍ਸਾਨਿ ਵਸਨ੍ਤੋ ਅਰਹਤ੍ਤਂ ਪਤ੍ਤੁਂ ਅਸਕ੍ਕੁਣਿਤ੍ਵਾ ਅਕਨਿਟ੍ਠਂ ਗਚ੍ਛਤਿ. ਤਤ੍ਥ ਵਸਨ੍ਤੋ ਅਰਿਯਮਗ੍ਗਂ ਸਞ੍ਜਨੇਤੀਤਿ ਅਤ੍ਥੋ.

ਇਮੇਸਂ ਪਨ ਅਨਾਗਾਮੀਨਂ ਪਭੇਦਜਾਨਨਤ੍ਥਂ ਉਦ੍ਧਂਸੋਤੋ ਅਕਨਿਟ੍ਠਗਾਮੀਚਤੁਕ੍ਕਂ ਵੇਦਿਤਬ੍ਬਂ. ਤਤ੍ਥ ਯੋ ਅਵਿਹਤੋ ਪਟ੍ਠਾਯ ਚਤ੍ਤਾਰੋ ਦੇਵਲੋਕੇ ਸੋਧੇਤ੍ਵਾ ਅਕਨਿਟ੍ਠਂ ਗਨ੍ਤ੍ਵਾ ਪਰਿਨਿਬ੍ਬਾਯਤਿ ਅਯਂ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ. ਯੋ ਪਨ ਹੇਟ੍ਠਾ ਤਯੋ ਦੇਵਲੋਕੇ ਸੋਧੇਤ੍ਵਾ ਸੁਦਸ੍ਸੀਦੇਵਲੋਕੇ ਠਤ੍ਵਾ ਪਰਿਨਿਬ੍ਬਾਯਤਿ – ਅਯਂ ਉਦ੍ਧਂਸੋਤੋ, ਨ ਅਕਨਿਟ੍ਠਗਾਮੀ ਨਾਮ. ਯੋ ਪਨ ਇਤੋ ਅਕਨਿਟ੍ਠਮੇਵ ਗਨ੍ਤ੍ਵਾ ਪਰਿਨਿਬ੍ਬਾਯਤਿ, ਅਯਂ ਨ ਉਦ੍ਧਂਸੋਤੋ, ਅਕਨਿਟ੍ਠਗਾਮੀ ਨਾਮ. ਯੋ ਪਨ ਹੇਟ੍ਠਾ ਚਤੂਸੁ ਦੇਵਲੋਕੇਸੁ ਤਤ੍ਥ ਤਤ੍ਥੇਵ ਪਰਿਨਿਬ੍ਬਾਯਤਿ, ਅਯਂ ਨ ਉਦ੍ਧਂਸੋਤੋ, ਨ ਅਕਨਿਟ੍ਠਗਾਮੀ ਨਾਮਾਤਿ. ਏਵਮੇਤੇ ਅਟ੍ਠਚਤ੍ਤਾਲੀਸ ਅਨਾਗਾਮਿਨੋ ਹੋਨ੍ਤਿ.

ਕਥਂ? ਅਵਿਹੇ ਤਾਵ ਤਯੋ ਅਨ੍ਤਰਾਪਰਿਨਿਬ੍ਬਾਯਿਨੋ, ਏਕੋ ਉਪਹਚ੍ਚਪਰਿਨਿਬ੍ਬਾਯੀ, ਏਕੋ ਉਦ੍ਧਂਸੋਤੋ ਤੇ ਅਸਙ੍ਖਾਰਪਰਿਨਿਬ੍ਬਾਯਿਨੋ ਪਞ੍ਚ, ਸਸਙ੍ਖਾਰਪਰਿਨਿਬ੍ਬਾਯਿਨੋ ਪਞ੍ਚਾਤਿ ਦਸ ਹੋਨ੍ਤਿ. ਤਥਾ ਅਤਪ੍ਪਾਸੁਦਸ੍ਸਾਸੁਦਸ੍ਸੀਸੂਤਿ ਚਤ੍ਤਾਰੋ ਦਸਕਾ ਚਤ੍ਤਾਲੀਸਂ. ਅਕਨਿਟ੍ਠੇ ਪਨ ਉਦ੍ਧਂਸੋਤੋ ਨਤ੍ਥਿ. ਤਯੋ ਪਨ ਅਨ੍ਤਰਾਪਰਿਨਿਬ੍ਬਾਯਿਨੋ, ਏਕੋ ਉਪਹਚ੍ਚਪਰਿਨਿਬ੍ਬਾਯੀ. ਤੇ ਅਸਙ੍ਖਾਰਪਰਿਨਿਬ੍ਬਾਯਿਨੋ ਚਤ੍ਤਾਰੋ, ਸਸਙ੍ਖਾਰਪਰਿਨਿਬ੍ਬਾਯਿਨੋ ਚਤ੍ਤਾਰੋਤਿ ਅਟ੍ਠ. ਏਵਂ ਅਟ੍ਠਚਤ੍ਤਾਲੀਸਂ ਹੋਨ੍ਤਿ.

ਤੇ ਸਬ੍ਬੇਪਿ ਪਪਟਿਕੋਪਮਾਯ ਦੀਪਿਤਾ – ਦਿਵਸਂ ਸਨ੍ਤਤ੍ਤਾਨਮ੍ਪਿ ਹਿ ਆਰਕਣ੍ਟਕਵਿਪ੍ਫਲਿਕਨਖਚ੍ਛੇਦਨਾਨਂ ਅਯੋਮੁਖੇ ਹਞ੍ਞਮਾਨੇ ਪਪਟਿਕਾ ਉਪ੍ਪਜ੍ਜਿਤ੍ਵਾਵ ਨਿਬ੍ਬਾਯਤਿ – ਏਵਰੂਪੋ ਪਠਮੋ ਅਨ੍ਤਰਾਪਰਿਨਿਬ੍ਬਾਯੀ ਵੇਦਿਤਬ੍ਬੋ. ਕਸ੍ਮਾ? ਉਪ੍ਪਨ੍ਨਸਮਨਨ੍ਤਰਾਵ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਨਤੋ. ਤਤੋ ਮਹਨ੍ਤਤਰੇ ਅਯੋਮੁਖੇ ਹਞ੍ਞਮਾਨੇ ਪਪਟਿਕਾ ਆਕਾਸਂ ਉਲ੍ਲਙ੍ਘਿਤ੍ਵਾ ਨਿਬ੍ਬਾਯਤਿ – ਏਵਰੂਪੋ ਦੁਤਿਯੋ ਅਨ੍ਤਰਾਪਰਿਨਿਬ੍ਬਾਯੀ ਦਟ੍ਠਬ੍ਬੋ. ਕਸ੍ਮਾ? ਵੇਮਜ੍ਝਂ ਅਪ੍ਪਤ੍ਵਾ ਪਰਿਨਿਬ੍ਬਾਯਨਤੋ. ਤਤੋ ਮਹਨ੍ਤਤਰੇ ਅਯੋਮੁਖੇ ਹਞ੍ਞਮਾਨੇ ਪਪਟਿਕਾ ਆਕਾਸਂ ਉਲ੍ਲਙ੍ਘਿਤ੍ਵਾ ਨਿਵਤ੍ਤਮਾਨਾ ਪਥਵਿਯਂ ਅਨੁਪਹਚ੍ਚਤਲਾ ਹੁਤ੍ਵਾ ਪਰਿਨਿਬ੍ਬਾਯਤਿ – ਏਵਰੂਪੋ ਤਤਿਯੋ ਅਨ੍ਤਰਾਪਰਿਨਿਬ੍ਬਾਯੀ ਦਟ੍ਠਬ੍ਬੋ. ਕਸ੍ਮਾ? ਵੇਮਜ੍ਝਂ ਪਤ੍ਵਾ ਅਨੁਪਹਚ੍ਚ ਪਰਿਨਿਬ੍ਬਾਯਨਤੋ. ਤਤੋ ਮਹਨ੍ਤਤਰੇ ਅਯੋਮੁਖੇ ਹਞ੍ਞਮਾਨੇ ਪਪਟਿਕਾ ਆਕਾਸਂ ਉਲ੍ਲਙ੍ਘਿਤ੍ਵਾ ਪਥਵਿਯਂ ਪਤਿਤ੍ਵਾ ਉਪਹਚ੍ਚਤਲਾ ਹੁਤ੍ਵਾ ਨਿਬ੍ਬਾਯਤਿ – ਏਵਰੂਪੋ ਉਪਹਚ੍ਚਪਰਿਨਿਬ੍ਬਾਯੀ ਵੇਦਿਤਬ੍ਬੋ. ਕਸ੍ਮਾ? ਕਾਲਕਿਰਿਯਂ ਉਪਗਨ੍ਤ੍ਵਾ ਆਯੁਗਤਿਂ ਖੇਪੇਤ੍ਵਾ ਪਰਿਨਿਬ੍ਬਾਯਨਤੋ. ਤਤੋ ਮਹਨ੍ਤਤਰੇ ਅਯੋਮੁਖੇ ਹਞ੍ਞਮਾਨੇ ਪਪਟਿਕਾ ਪਰਿਤ੍ਤੇ ਤਿਣਕਟ੍ਠੇ ਪਤਿਤ੍ਵਾ ਤਂ ਪਰਿਤ੍ਤਂ ਤਿਣਕਟ੍ਠਂ ਝਾਪੇਤ੍ਵਾ ਨਿਬ੍ਬਾਯਤਿ – ਏਵਰੂਪੋ ਅਸਙ੍ਖਾਰਪਰਿਨਿਬ੍ਬਾਯੀ ਵੇਦਿਤਬ੍ਬੋ. ਕਸ੍ਮਾ? ਅਪ੍ਪਯੋਗੇਨ ਲਹੁਸਾਯ ਗਤਿਯਾ ਪਰਿਨਿਬ੍ਬਾਯਨਤੋ. ਤਤੋ ਮਹਨ੍ਤਤਰੇ ਅਯੋਮੁਖੇ ਹਞ੍ਞਮਾਨੇ ਪਪਟਿਕਾ ਵਿਪੁਲੇ ਤਿਣਕਟ੍ਠਪੁਞ੍ਜੇ ਪਤਿਤ੍ਵਾ ਤਂ ਵਿਪੁਲਂ ਤਿਣਕਟ੍ਠਪੁਞ੍ਜਂ ਝਾਪੇਤ੍ਵਾ ਨਿਬ੍ਬਾਯਤਿ – ਏਵਰੂਪੋ ਸਸਙ੍ਖਾਰਪਰਿਨਿਬ੍ਬਾਯੀ ਵੇਦਿਤਬ੍ਬੋ. ਕਸ੍ਮਾ? ਸਪ੍ਪਯੋਗੇਨ ਅਲਹੁਸਾਯ ਗਤਿਯਾ ਪਰਿਨਿਬ੍ਬਾਯਨਤੋ. ਅਪਰਾ ਮਹਨ੍ਤੇਸੁ ਤਿਣਕਟ੍ਠਪੁਞ੍ਜੇਸੁ ਪਤਤਿ, ਤਤ੍ਥ ਮਹਨ੍ਤੇਸੁ ਤਿਣਕਟ੍ਠਪੁਞ੍ਜੇਸੁ ਝਾਯਮਾਨੇਸੁ ਵੀਤਚ੍ਚਿਤਙ੍ਗਾਰੋ ਵਾ ਜਾਲਾ ਵਾ ਉਪ੍ਪਤਿਤ੍ਵਾ ਕਮ੍ਮਾਰਸਾਲਂ ਝਾਪੇਤ੍ਵਾ ਗਾਮਨਿਗਮਨਗਰਰਟ੍ਠਂ ਝਾਪੇਤ੍ਵਾ ਸਮੁਦ੍ਦਨ੍ਤਂ ਪਤ੍ਵਾ ਨਿਬ੍ਬਾਯਤਿ – ਏਵਰੂਪੋ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਦਟ੍ਠਬ੍ਬੋ. ਕਸ੍ਮਾ? ਅਨੇਕਭਵਬੀਜਵਿਪ੍ਫਾਰਂ ਫੁਸ੍ਸ ਫੁਸ੍ਸ ਬ੍ਯਨ੍ਤੀਕਤ੍ਵਾ ਪਰਿਨਿਬ੍ਬਾਯਨਤੋ. ਯਸ੍ਮਾ ਪਨ ਆਰਕਣ੍ਟਕਾਦਿਭੇਦਂ ਖੁਦ੍ਦਕਮ੍ਪਿ ਮਹਨ੍ਤਮ੍ਪਿ ਅਯੋਕਪਾਲਮੇਵ, ਤਸ੍ਮਾ ਸੁਤ੍ਤੇ ਸਬ੍ਬਵਾਰੇਸੁ ਅਯੋਕਪਾਲਨ੍ਤ੍ਵੇਵ ਵੁਤ੍ਤਂ (ਅ. ਨਿ. ੭.੫੫). ਯਥਾਹ –

‘‘ਇਧ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ‘ਨੋ ਚਸ੍ਸ, ਨੋ ਚ ਮੇ ਸਿਯਾ, ਨ ਭਵਿਸ੍ਸਤਿ, ਨ ਮੇ ਭਵਿਸ੍ਸਤਿ, ਯਦਤ੍ਥਿ ਯਂ ਭੂਤਂ, ਤਂ ਪਜਹਾਮੀ’’’ਤਿ ਉਪੇਕ੍ਖਂ ਪਟਿਲਭਤਿ. ਸੋ ਭਵੇ ਨ ਰਜ੍ਜਤਿ, ਸਮ੍ਭਵੇ ਨ ਰਜ੍ਜਤਿ, ਅਤ੍ਥੁਤ੍ਤਰਿ ਪਦਂ ਸਨ੍ਤਂ ਸਮ੍ਮਪ੍ਪਞ੍ਞਾਯ ਪਸ੍ਸਤਿ. ਤਞ੍ਚ ਖ੍ਵਸ੍ਸ ਪਦਂ ਨ ਸਬ੍ਬੇਨ ਸਬ੍ਬਂ ਸਚ੍ਛਿਕਤਂ ਹੋਤਿ. ਤਸ੍ਸ ਨ ਸਬ੍ਬੇਨ ਸਬ੍ਬਂ ਮਾਨਾਨੁਸਯੋ ਪਹੀਨੋ ਹੋਤਿ, ਨ ਸਬ੍ਬੇਨ ਸਬ੍ਬਂ ਭਵਰਾਗਾਨੁਸਯੋ ਪਹੀਨੋ ਹੋਤਿ, ਨ ਸਬ੍ਬੇਨ ਸਬ੍ਬਂ ਅਵਿਜ੍ਜਾਨੁਸਯੋ ਪਹੀਨੋ ਹੋਤਿ. ਸੋ ਪਞ੍ਚਨ੍ਨਂ ਓਰਮ੍ਭਾਗਿਯਾਨਂ ਸਂਯੋਜਨਾਨਂ ਪਰਿਕ੍ਖਯਾ ਅਨ੍ਤਰਾਪਰਿਨਿਬ੍ਬਾਯੀ ਹੋਤਿ. ਸੇਯ੍ਯਥਾਪਿ, ਭਿਕ੍ਖਵੇ, ਦਿਵਸਂ ਸਨ੍ਤਤ੍ਤੇ ਅਯੋਕਪਾਲੇ ਹਞ੍ਞਮਾਨੇ ਪਪਟਿਕਾ ਨਿਬ੍ਬਤ੍ਤਿਤ੍ਵਾ ਨਿਬ੍ਬਾਯੇਯ੍ਯ; ਏਵਮੇਵ ਖੋ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਅਨ੍ਤਰਾਪਰਿਨਿਬ੍ਬਾਯੀ ਹੋਤਿ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਅਨ੍ਤਰਾਪਰਿਨਿਬ੍ਬਾਯੀ ਹੋਤਿ. ਸੇਯ੍ਯਥਾਪਿ, ਭਿਕ੍ਖਵੇ, ਦਿਵਸਂ ਸਨ੍ਤਤ੍ਤੇ ਅਯੋਕਪਾਲੇ ਹਞ੍ਞਮਾਨੇ ਪਪਟਿਕਾ ਨਿਬ੍ਬਤ੍ਤਿਤ੍ਵਾ ਉਪ੍ਪਤਿਤ੍ਵਾ ਨਿਬ੍ਬਾਯੇਯ੍ਯ; ਏਵਮੇਵ ਖੋ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਅਨ੍ਤਰਾਪਰਿਨਿਬ੍ਬਾਯੀ ਹੋਤਿ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਅਨ੍ਤਰਾਪਰਿਨਿਬ੍ਬਾਯੀ ਹੋਤਿ. ਸੇਯ੍ਯਥਾਪਿ, ਭਿਕ੍ਖਵੇ, ਦਿਵਸਂ ਸਨ੍ਤਤ੍ਤੇ ਅਯੋਕਪਾਲੇ ਹਞ੍ਞਮਾਨੇ ਪਪਟਿਕਾ ਨਿਬ੍ਬਤ੍ਤਿਤ੍ਵਾ ਉਪ੍ਪਤਿਤ੍ਵਾ ਅਨੁਪਹਚ੍ਚ ਤਲਂ ਨਿਬ੍ਬਾਯੇਯ੍ਯ; ਏਵਮੇਵ ਖੋ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਅਨ੍ਤਰਾਪਰਿਨਿਬ੍ਬਾਯੀ ਹੋਤਿ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਉਪਹਚ੍ਚਪਰਿਨਿਬ੍ਬਾਯੀ ਹੋਤਿ. ਸੇਯ੍ਯਥਾਪਿ, ਭਿਕ੍ਖਵੇ, ਦਿਵਸਂ ਸਨ੍ਤਤ੍ਤੇ ਅਯੋਕਪਾਲੇ ਹਞ੍ਞਮਾਨੇ ਪਪਟਿਕਾ ਨਿਬ੍ਬਤ੍ਤਿਤ੍ਵਾ ਉਪ੍ਪਤਿਤ੍ਵਾ ਉਪਹਚ੍ਚ ਤਲਂ ਨਿਬ੍ਬਾਯੇਯ੍ਯ; ਏਵਮੇਵ ਖੋ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਉਪਹਚ੍ਚਪਰਿਨਿਬ੍ਬਾਯੀ ਹੋਤਿ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਪਰਿਕ੍ਖਯਾ ਅਸਙ੍ਖਾਰਪਰਿਨਿਬ੍ਬਾਯੀ ਹੋਤਿ. ਸੇਯ੍ਯਥਾਪਿ, ਭਿਕ੍ਖਵੇ, ਦਿਵਸਂ ਸਨ੍ਤਤ੍ਤੇ ਅਯੋਕਪਾਲੇ ਹਞ੍ਞਮਾਨੇ ਪਪਟਿਕਾ ਨਿਬ੍ਬਤ੍ਤਿਤ੍ਵਾ ਉਪ੍ਪਤਿਤ੍ਵਾ ਪਰਿਤ੍ਤੇ ਤਿਣਪੁਞ੍ਜੇ ਵਾ ਕਟ੍ਠਪੁਞ੍ਜੇ ਵਾ ਨਿਪਤੇਯ੍ਯ, ਸਾ ਤਤ੍ਥ ਅਗ੍ਗਿਮ੍ਪਿ ਜਨੇਯ੍ਯ, ਧੂਮਮ੍ਪਿ ਜਨੇਯ੍ਯ, ਅਗ੍ਗਿਮ੍ਪਿ ਜਨੇਤ੍ਵਾ ਧੂਮਮ੍ਪਿ ਜਨੇਤ੍ਵਾ ਤਮੇਵ ਪਰਿਤ੍ਤਂ ਤਿਣਪੁਞ੍ਜਂ ਵਾ ਕਟ੍ਠਪੁਞ੍ਜਂ ਵਾ ਪਰਿਯਾਦਿਯਿਤ੍ਵਾ ਅਨਾਹਾਰਾ ਨਿਬ੍ਬਾਯੇਯ੍ਯ; ਏਵਮੇਵ ਖੋ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਪਰਿਕ੍ਖਯਾ ਅਸਙ੍ਖਾਰਪਰਿਨਿਬ੍ਬਾਯੀ ਹੋਤਿ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਸਸਙ੍ਖਾਰਪਰਿਨਿਬ੍ਬਾਯੀ ਹੋਤਿ. ਸੇਯ੍ਯਥਾਪਿ, ਭਿਕ੍ਖਵੇ, ਦਿਵਸਂ ਸਨ੍ਤਤ੍ਤੇ ਅਯੋਕਪਾਲੇ ਹਞ੍ਞਮਾਨੇ ਪਪਟਿਕਾ ਨਿਬ੍ਬਤ੍ਤਿਤ੍ਵਾ ਉਪ੍ਪਤਿਤ੍ਵਾ ਵਿਪੁਲੇ ਤਿਣਪੁਞ੍ਜੇ ਵਾ ਕਟ੍ਠਪੁਞ੍ਜੇ ਵਾ ਨਿਪਤੇਯ੍ਯ, ਸਾ ਤਤ੍ਥ ਅਗ੍ਗਿਮ੍ਪਿ ਜਨੇਯ੍ਯ…ਪੇ… ਤਮੇਵ ਵਿਪੁਲਂ ਤਿਣਪੁਞ੍ਜਂ ਵਾ ਕਟ੍ਠਪੁਞ੍ਜਂ ਵਾ ਪਰਿਯਾਦਿਯਿਤ੍ਵਾ ਅਨਾਹਾਰਾ ਨਿਬ੍ਬਾਯੇਯ੍ਯ; ਏਵਮੇਵ ਖੋ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਸਸਙ੍ਖਾਰਪਰਿਨਿਬ੍ਬਾਯੀ ਹੋਤਿ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਪਰਿਕ੍ਖਯਾ ਉਦ੍ਧਂਸੋਤੋ ਹੋਤਿ ਅਕਨਿਟ੍ਠਗਾਮੀ. ਸੇਯ੍ਯਥਾਪਿ, ਭਿਕ੍ਖਵੇ, ਦਿਵਸਂ ਸਨ੍ਤਤ੍ਤੇ ਅਯੋਕਪਾਲੇ ਹਞ੍ਞਮਾਨੇ ਪਪਟਿਕਾ ਨਿਬ੍ਬਤ੍ਤਿਤ੍ਵਾ ਉਪ੍ਪਤਿਤ੍ਵਾ ਮਹਨ੍ਤੇ ਤਿਣਪੁਞ੍ਜੇ ਵਾ ਕਟ੍ਠਪੁਞ੍ਜੇ ਵਾ ਨਿਪਤੇਯ੍ਯ, ਸਾ ਤਤ੍ਥ ਅਗ੍ਗਿਮ੍ਪਿ ਜਨੇਯ੍ਯ…ਪੇ… ਤਮੇਵ ਮਹਨ੍ਤਂ ਤਿਣਪੁਞ੍ਜਂ ਵਾ ਕਟ੍ਠਪੁਞ੍ਜਂ ਵਾ ਪਰਿਯਾਦਿਯਿਤ੍ਵਾ ਗਚ੍ਛਮ੍ਪਿ ਦਹੇਯ੍ਯ, ਦਾਯਮ੍ਪਿ ਦਹੇਯ੍ਯ, ਗਚ੍ਛਮ੍ਪਿ ਦਹਿਤ੍ਵਾ ਦਾਯਮ੍ਪਿ ਦਹਿਤ੍ਵਾ ਹਰਿਤਨ੍ਤਂ ਵਾ ਪਥਨ੍ਤਂ ਵਾ ਸੇਲਨ੍ਤਂ ਵਾ ਉਦਕਨ੍ਤਂ ਵਾ ਰਮਣੀਯਂ ਵਾ ਭੂਮਿਭਾਗਂ ਆਗਮ੍ਮ ਅਨਾਹਾਰਾ ਨਿਬ੍ਬਾਯੇਯ੍ਯ; ਏਵਮੇਵ ਖੋ, ਭਿਕ੍ਖਵੇ, ਭਿਕ੍ਖੁ ਏਵਂ ਪਟਿਪਨ੍ਨੋ ਹੋਤਿ – ਨੋ ਚਸ੍ਸ…ਪੇ… ਪਰਿਕ੍ਖਯਾ ਉਦ੍ਧਂਸੋਤੋ ਹੋਤਿ ਅਕਨਿਟ੍ਠਗਾਮੀ’’ਤਿ (ਅ. ਨਿ. ੭.੫੫).

੪੧-੪੪. ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਾਦਿਨਿਦ੍ਦੇਸਾ ਉਤ੍ਤਾਨਤ੍ਥਾਵ. ਅਯਂ ਵੁਚ੍ਚਤਿ ਪੁਗ੍ਗਲੋ ਅਰਹਾਤਿ ਏਤ੍ਥ ਪਨ ਦ੍ਵਾਦਸ ਅਰਹਨ੍ਤੋ ਵੇਦਿਤਬ੍ਬਾ. ਕਥਂ? ਤਯੋ ਹਿ ਵਿਮੋਕ੍ਖਾ – ਸੁਞ੍ਞਤੋ, ਅਨਿਮਿਤ੍ਤੋ, ਅਪ੍ਪਣਿਹਿਤੋਤਿ. ਤਤ੍ਥ ਸੁਞ੍ਞਤਵਿਮੋਕ੍ਖੇਨ ਵਿਮੁਤ੍ਤਖੀਣਾਸਵੋ ਪਟਿਪਦਾਵਸੇਨ ਚਤੁਬ੍ਬਿਧੋ ਹੋਤਿ; ਤਥਾ ਅਨਿਮਿਤ੍ਤਅਪ੍ਪਣਿਹਿਤਵਿਮੋਕ੍ਖੇਹੀਤਿ – ਏਵਂ ਦ੍ਵਾਦਸ ਅਰਹਨ੍ਤੋ ਵੇਦਿਤਬ੍ਬਾ. ਇਤਿ ਇਮੇ ਦ੍ਵਾਦਸ ਅਰਹਨ੍ਤੋ ਵਿਯ ਦ੍ਵਾਦਸੇਵ ਸਕਦਾਗਾਮਿਨੋ, ਚਤੁਵੀਸਤਿ ਸੋਤਾਪਨ੍ਨਾ, ਅਟ੍ਠਚਤ੍ਤਾਲੀਸ ਅਨਾਗਾਮਿਨੋਤਿ ਏਤ੍ਤਕਾ ਪੁਗ੍ਗਲਾ ਇਤੋ ਮੁਚ੍ਚਿਤ੍ਵਾ ਬਹਿਦ੍ਧਾ ਨੁਪ੍ਪਜ੍ਜਨ੍ਤਿ, ਇਮਸ੍ਮਿਞ੍ਞੇਵ ਸਬ੍ਬਞ੍ਞੁਬੁਦ੍ਧਸਾਸਨੇ ਉਪ੍ਪਜ੍ਜਨ੍ਤੀਤਿ.

ਏਕਕਨਿਦ੍ਦੇਸਵਣ੍ਣਨਾ.