ਪਕਿਣ੍ਣਕਕਥਾ
ਇਮੇਸੁ ਪਨ ਰੂਪੇਸੁ ਅਸਮ੍ਮੋਹਤ੍ਥਂ ਸਮੋਧਾਨਂ ਸਮੁਟ੍ਠਾਨਂ ਪਰਿਨਿਪ੍ਫਨ੍ਨਞ੍ਚ ਸਙ੍ਖਤਨ੍ਤਿ ਇਦਂ ‘ਪਕਿਣ੍ਣਕਂ’ ਵੇਦਿਤਬ੍ਬਂ.
ਤਤ੍ਥ ‘ਸਮੋਧਾਨ’ਨ੍ਤਿ ਸਬ੍ਬਮੇਵ ਹਿਦਂ ਰੂਪਂ ਸਮੋਧਾਨਤੋ ਚਕ੍ਖਾਯਤਨਂ…ਪੇ… ਕਬਲ਼ੀਕਾਰੋ ਆਹਾਰੋ, ਫੋਟ੍ਠਬ੍ਬਾਯਤਨਂ ਆਪੋਧਾਤੂਤਿ ਪਞ੍ਚਵੀਸਤਿਸਙ੍ਖ੍ਯਂ ਹੋਤਿ. ਤਂ ਵਤ੍ਥੁਰੂਪੇਨ ਸਦ੍ਧਿਂ ਛਬ੍ਬੀਸਤਿਸਙ੍ਖ੍ਯਂ ਵੇਦਿਤਬ੍ਬਂ. ਇਤੋ ਅਞ੍ਞਂ ਰੂਪਂ ਨਾਮ ਨਤ੍ਥਿ. ਕੇਚਿ ਪਨ ‘ਮਿਦ੍ਧਰੂਪਂ ਨਾਮ ਅਤ੍ਥੀ’ਤਿ ਵਦਨ੍ਤਿ. ਤੇ ‘‘ਅਦ੍ਧਾ ਮੁਨੀਸਿ ਸਮ੍ਬੁਦ੍ਧੋ, ਨਤ੍ਥਿ ਨੀਵਰਣਾ ਤਵਾ’’ਤਿਆਦੀਨਿ (ਸੁ. ਨਿ. ੫੪੬) ਵਤ੍ਵਾ ਮਿਦ੍ਧਰੂਪਂ ਨਾਮ ਨਤ੍ਥੀਤਿ ਪਟਿਸੇਧੇਤਬ੍ਬਾ. ਅਪਰੇ ਬਲਰੂਪੇਨ ਸਦ੍ਧਿਂ ਸਤ੍ਤਵੀਸਤਿ, ਸਮ੍ਭਵਰੂਪੇਨ ਸਦ੍ਧਿਂ ਅਟ੍ਠਵੀਸਤਿ, ਜਾਤਿਰੂਪੇਨ ਸਦ੍ਧਿਂ ਏਕੂਨਤਿਂਸਤਿ, ਰੋਗਰੂਪੇਨ ਸਦ੍ਧਿਂ ਸਮਤਿਂਸਤਿ ਰੂਪਾਨੀਤਿ ਵਦਨ੍ਤਿ. ਤੇਪਿ ਤੇਸਂ ਵਿਸੁਂ ਅਭਾਵਂ ਦਸ੍ਸੇਤ੍ਵਾ ਪਟਿਕ੍ਖਿਪਿਤਬ੍ਬਾ. ਵਾਯੋਧਾਤੁਯਾ ਹਿ ਗਹਿਤਾਯ ਬਲਰੂਪਂ ਗਹਿਤਮੇਵ, ਅਞ੍ਞਂ ਬਲਰੂਪਂ ਨਾਮ ਨਤ੍ਥਿ. ਆਪੋਧਾਤੁਯਾ ਸਮ੍ਭਵਰੂਪਂ, ਉਪਚਯਸਨ੍ਤਤੀਹਿ ਜਾਤਿਰੂਪਂ, ਜਰਤਾਅਨਿਚ੍ਚਤਾਹਿ ਗਹਿਤਾਹਿ ਰੋਗਰੂਪਂ ਗਹਿਤਮੇਵ. ਅਞ੍ਞਂ ਰੋਗਰੂਪਂ ਨਾਮ ਨਤ੍ਥਿ. ਯੋਪਿ ਕਣ੍ਣਰੋਗਾਦਿ ਆਬਾਧੋ ਸੋ ਵਿਸਮਪਚ੍ਚਯਸਮੁਟ੍ਠਿਤਧਾਤੁਮਤ੍ਤਮੇਵ. ਨ ਅਞ੍ਞੋ ਤਤ੍ਥ ਰੋਗੋ ਨਾਮ ਅਤ੍ਥੀਤਿ ਸਮੋਧਾਨਤੋ ਛਬ੍ਬੀਸਤਿਮੇਵ ਰੂਪਾਨਿ.
‘ਸਮੁਟ੍ਠਾਨ’ਨ੍ਤਿ ਕਤਿ ਰੂਪਾਨਿ ਕਤਿਸਮੁਟ੍ਠਾਨਾਨਿ? ਦਸ ਏਕਸਮੁਟ੍ਠਾਨਾਨਿ, ਏਕਂ ਦ੍ਵਿਸਮੁਟ੍ਠਾਨਂ, ਤੀਣਿ ਤਿਸਮੁਟ੍ਠਾਨਾਨਿ, ਨਵ ਚਤੁਸਮੁਟ੍ਠਾਨਾਨਿ, ਦ੍ਵੇ ਨ ਕੇਨਚਿ ਸਮੁਟ੍ਠਹਨ੍ਤਿ.
ਤਤ੍ਥ ਚਕ੍ਖੁਪਸਾਦੋ…ਪੇ… ਜੀਵਿਤਿਨ੍ਦ੍ਰਿਯਨ੍ਤਿ ਇਮਾਨਿ ਅਟ੍ਠ ਏਕਨ੍ਤਂ ਕਮ੍ਮਤੋਵ ਸਮੁਟ੍ਠਹਨ੍ਤਿ. ਕਾਯਵਿਞ੍ਞਤ੍ਤਿਵਚੀਵਿਞ੍ਞਤ੍ਤਿਦ੍ਵਯਂ ਏਕਨ੍ਤੇਨ ਚਿਤ੍ਤਤੋ ਸਮੁਟ੍ਠਾਤੀਤਿ ਦਸ ‘ਏਕਸਮੁਟ੍ਠਾਨਾਨਿ’ ਨਾਮ. ਸਦ੍ਦੋ ਉਤੁਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤੀਤਿ ਏਕੋ ‘ਦ੍ਵਿਸਮੁਟ੍ਠਾਨੋ’ ਨਾਮ. ਤਤ੍ਥ ਅਵਿਞ੍ਞਾਣਕਸਦ੍ਦੋ ਉਤੁਤੋ ਸਮੁਟ੍ਠਾਤਿ, ਸਵਿਞ੍ਞਾਣਕਸਦ੍ਦੋ ਚਿਤ੍ਤਤੋ. ਲਹੁਤਾਦਿਤ੍ਤਯਂ ਪਨ ਉਤੁਚਿਤ੍ਤਾਹਾਰੇਹਿ ਸਮੁਟ੍ਠਾਤੀਤਿ ਤੀਣਿ ‘ਤਿਸਮੁਟ੍ਠਾਨਾਨਿ’ ਨਾਮ. ਅਵਸੇਸਾਨਿ ਨਵ ਰੂਪਾਨਿ ਤੇਹਿ ਕਮ੍ਮੇਨ ਚਾਤਿ ਚਤੂਹਿ ਸਮੁਟ੍ਠਹਨ੍ਤੀਤਿ ਨਵ ‘ਚਤੁਸਮੁਟ੍ਠਾਨਾਨਿ’ ਨਾਮ. ਜਰਤਾ ਅਨਿਚ੍ਚਤਾ ਪਨ ਏਤੇਸੁ ਏਕਤੋਪਿ ਨ ਸਮੁਟ੍ਠਹਨ੍ਤੀਤਿ ਦ੍ਵੇ ‘ਨ ਕੇਨਚਿ ਸਮੁਟ੍ਠਹਨ੍ਤਿ’ ਨਾਮ. ਕਸ੍ਮਾ? ਅਜਾਯਨਤੋ. ਨ ਹਿ ਏਤਾਨਿ ਜਾਯਨ੍ਤਿ. ਕਸ੍ਮਾ? ਜਾਤਸ੍ਸ ਪਾਕਭੇਦਤ੍ਤਾ. ਉਪ੍ਪਨ੍ਨਞ੍ਹਿ ਰੂਪਂ ਜੀਰਤਿ ਭਿਜ੍ਜਤੀਤਿ ਅਵਸ੍ਸਂ ਪਨੇਤਂ ਸਮ੍ਪਟਿਚ੍ਛਿਤਬ੍ਬਂ. ਨ ਹਿ ਉਪ੍ਪਨ੍ਨਂ ਰੂਪਂ ਅਰੂਪਂ ਵਾ ਅਕ੍ਖਯਂ ਨਾਮ ਦਿਸ੍ਸਤਿ. ਯਾਵ ਪਨ ਨ ਭਿਜ੍ਜਤਿ ਤਾਵਸ੍ਸ ਪਰਿਪਾਕੋਤਿ ਸਿਦ੍ਧਮੇਤਂ. ‘ਜਾਤਸ੍ਸ ਪਾਕਭੇਦਤ੍ਤਾ’ਤਿ ਯਦਿ ਚ ਤਾਨਿ ਜਾਯੇਯ੍ਯੁਂ ਤੇਸਮ੍ਪਿ ਪਾਕਭੇਦਾ ਭਵੇਯ੍ਯੁਂ. ਨ ਚ ਪਾਕੋ ਪਚ੍ਚਤਿ, ਭੇਦੋ ਵਾ ਭਿਜ੍ਜਤੀਤਿ ਜਾਤਸ੍ਸ ਪਾਕਭੇਦਤ੍ਤਾ ਨੇਤਂ ਦ੍ਵਯਂ ਜਾਯਤਿ.
ਤਤ੍ਥ ਸਿਯਾ – ਯਥਾ ‘ਕਮ੍ਮਸ੍ਸ ਕਤਤ੍ਤਾ’ਤਿ ਆਦਿਨਿਦ੍ਦੇਸੇਸੁ ‘ਰੂਪਸ੍ਸ ਉਪਚਯੋ ਰੂਪਸ੍ਸ ਸਨ੍ਤਤੀ’ਤਿ ਵਚਨੇਨ ‘ਜਾਤਿ’ ਜਾਯਤੀਤਿ ਸਮ੍ਪਟਿਚ੍ਛਿਤਂ ਹੋਤਿ, ਏਵਂ ‘ਪਾਕੋ’ਪਿ ਪਚ੍ਚਤੁ ‘ਭੇਦੋ’ਪਿ ਭਿਜ੍ਜਤੂਤਿ. ‘‘ਨ ਤਤ੍ਥ ‘ਜਾਤਿ ਜਾਯਤੀ’ਤਿ ਸਮ੍ਪਟਿਚ੍ਛਿਤਂ. ਯੇ ਪਨ ਧਮ੍ਮਾ ਕਮ੍ਮਾਦੀਹਿ ਨਿਬ੍ਬਤ੍ਤਨ੍ਤਿ ਤੇਸਂ ਅਭਿਨਿਬ੍ਬਤ੍ਤਿਭਾਵਤੋ ਜਾਤਿਯਾ ਤਪ੍ਪਚ੍ਚਯਭਾਵਵੋਹਾਰੋ ਅਨੁਮਤੋ. ਨ ਪਨ ਪਰਮਤ੍ਥਤੋ ਜਾਤਿ ਜਾਯਤਿ. ਜਾਯਮਾਨਸ੍ਸ ਹਿ ਅਭਿਨਿਬ੍ਬਤ੍ਤਿਮਤ੍ਤਂ ਜਾਤੀ’’ਤਿ.
ਤਤ੍ਥ ਸਿਯਾ – ‘ਯਥੇਵ ਜਾਤਿ ਯੇਸਂ ਧਮ੍ਮਾਨਂ ਅਭਿਨਿਬ੍ਬਤ੍ਤਿ ਤਪ੍ਪਚ੍ਚਯਭਾਵਵੋਹਾਰਂ ਅਭਿਨਿਬ੍ਬਤ੍ਤਿਵੋਹਾਰਞ੍ਚ ਲਭਤਿ, ਤਥਾ ਪਾਕਭੇਦਾਪਿ ਯੇਸਂ ਧਮ੍ਮਾਨਂ ਪਾਕਭੇਦਾ ਤਪ੍ਪਚ੍ਚਯਭਾਵਵੋਹਾਰਂ ਅਭਿਨਿਬ੍ਬਤ੍ਤਿਵੋਹਾਰਞ੍ਚ ਲਭਨ੍ਤੁ. ਏਵਂ ਇਦਮ੍ਪਿ ਦ੍ਵਯਂ ਕਮ੍ਮਾਦਿਸਮੁਟ੍ਠਾਨਮੇਵਾਤਿ ਵਤ੍ਤਬ੍ਬਂ ਭਵਿਸ੍ਸਤੀ’ਤਿ. ‘ਨ ਪਾਕਭੇਦਾ ਤਂ ਵੋਹਾਰਂ ਲਭਨ੍ਤਿ. ਕਸ੍ਮਾ? ਜਨਕਪਚ੍ਚਯਾਨੁਭਾਵਕ੍ਖਣੇ ਅਭਾਵਤੋ. ਜਨਕਪਚ੍ਚਯਾਨਞ੍ਹਿ ਉਪ੍ਪਾਦੇਤਬ੍ਬਧਮ੍ਮਸ੍ਸ ਉਪ੍ਪਾਦਕ੍ਖਣੇਯੇਵ ਆਨੁਭਾਵੋ, ਨ ਤਤੋ ਉਤ੍ਤਰਿ. ਤੇਹਿ ਅਭਿਨਿਬ੍ਬਤ੍ਤਿਤਧਮ੍ਮਕ੍ਖਣਸ੍ਮਿਞ੍ਚ ਜਾਤਿ ਪਞ੍ਞਾਯਮਾਨਾ ਤਪ੍ਪਚ੍ਚਯਭਾਵਵੋਹਾਰਂ ਅਭਿਨਿਬ੍ਬਤ੍ਤਿਵੋਹਾਰਞ੍ਚ ਲਭਤਿ, ਤਸ੍ਮਿਂ ਖਣੇ ਸਬ੍ਭਾਵਤੋ; ਨ ਇਤਰਦ੍ਵਯਂ, ਤਸ੍ਮਿਂ ਖਣੇ ਅਭਾਵਤੋਤਿ ਨੇਵੇਤਂ ਜਾਯਤੀ’ਤਿ ਵਤ੍ਤਬ੍ਬਂ. ‘‘ਜਰਾਮਰਣਂ, ਭਿਕ੍ਖਵੇ, ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨ’’ਨ੍ਤਿ (ਸਂ. ਨਿ. ੨.੨੦) ਆਗਤਤ੍ਤਾ ਇਦਮ੍ਪਿ ਦ੍ਵਯਂ ਜਾਯਤੀਤਿ ਚੇ – ‘ਨ, ਪਰਿਯਾਯਦੇਸਿਤਤ੍ਤਾ. ਤਤ੍ਥ ਹਿ ਪਟਿਚ੍ਚਸਮੁਪ੍ਪਨ੍ਨਾਨਂ ਧਮ੍ਮਾਨਂ ਜਰਾਮਰਣਤ੍ਤਾ ਪਰਿਯਾਯੇਨ ਤਂ ਪਟਿਚ੍ਚਸਮੁਪ੍ਪਨ੍ਨ’ਨ੍ਤਿ ਵੁਤ੍ਤਂ.
‘ਯਦਿ ਏਵਂ, ਤਯਮ੍ਪੇਤਂ ਅਜਾਤਤ੍ਤਾ ਸਸਵਿਸਾਣਂ ਵਿਯ ਨਤ੍ਥਿ; ਨਿਬ੍ਬਾਨਂ ਵਿਯ ਵਾ ਨਿਚ੍ਚ’ਨ੍ਤਿ ਚੇ – ਨ, ਨਿਸ੍ਸਯਪਟਿਬਦ੍ਧਵੁਤ੍ਤਿਤੋ; ਪਥਵੀਆਦੀਨਞ੍ਹਿ ਨਿਸ੍ਸਯਾਨਂ ਭਾਵੇ ਜਾਤਿਆਦਿਤ੍ਤਯਂ ਪਞ੍ਞਾਯਤਿ, ਤਸ੍ਮਾ ਨ ਨਤ੍ਥਿ. ਤੇਸਞ੍ਚ ਅਭਾਵੇ ਨ ਪਞ੍ਞਾਯਤਿ, ਤਸ੍ਮਾ ਨ ਨਿਚ੍ਚਂ. ਏਤਮ੍ਪਿ ਚ ਅਭਿਨਿਵੇਸਂ ਪਟਿਸੇਧੇਤੁਂ ਏਵ ਇਦਂ ਵੁਤ੍ਤਂ – ‘‘ਜਰਾਮਰਣਂ, ਭਿਕ੍ਖਵੇ, ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨ’’ਨ੍ਤਿ (ਸਂ. ਨਿ. ੨.੨੦). ਏਵਮਾਦੀਹਿ ਨਯੇਹਿ ਤਾਨਿ ਦ੍ਵੇ ਰੂਪਾਨਿ ਨ ਕੇਹਿਚਿ ਸਮੁਟ੍ਠਹਨ੍ਤੀਤਿ ਵੇਦਿਤਬ੍ਬਂ.
ਅਪਿਚ ‘ਸਮੁਟ੍ਠਾਨ’ਨ੍ਤਿ ਏਤ੍ਥ ਅਯਮਞ੍ਞੋਪਿ ਅਤ੍ਥੋ. ਤਸ੍ਸਾਯਂ ਮਾਤਿਕਾ – ‘ਕਮ੍ਮਜਂ ਕਮ੍ਮਪਚ੍ਚਯਂ ਕਮ੍ਮਪਚ੍ਚਯਉਤੁਸਮੁਟ੍ਠਾਨਂ, ਆਹਾਰਸਮੁਟ੍ਠਾਨਂ ਆਹਾਰਪਚ੍ਚਯਂ ਆਹਾਰਪਚ੍ਚਯਉਤੁਸਮੁਟ੍ਠਾਨਂ, ਉਤੁਸਮੁਟ੍ਠਾਨਂ ਉਤੁਪਚ੍ਚਯਂ ਉਤੁਪਚ੍ਚਯਉਤੁਸਮੁਟ੍ਠਾਨਂ, ਚਿਤ੍ਤਸਮੁਟ੍ਠਾਨਂ ਚਿਤ੍ਤਪਚ੍ਚਯਂ ਚਿਤ੍ਤਪਚ੍ਚਯਉਤੁਸਮੁਟ੍ਠਾਨ’ਨ੍ਤਿ.
ਤਤ੍ਥ ਚਕ੍ਖੁਪਸਾਦਾਦਿ ਅਟ੍ਠਵਿਧਂ ਰੂਪਂ ਸਦ੍ਧਿਂ ਹਦਯਵਤ੍ਥੁਨਾ ‘ਕਮ੍ਮਜਂ’ ਨਾਮ. ਕੇਸਮਸ੍ਸੁ ਹਤ੍ਥਿਦਨ੍ਤਾ ਅਸ੍ਸਵਾਲਾ ਚਮਰਵਾਲਾਤਿ ਏਵਮਾਦਿ ‘ਕਮ੍ਮਪਚ੍ਚਯਂ’ ਨਾਮ. ਚਕ੍ਕਰਤਨਂ ਦੇਵਤਾਨਂ ਉਯ੍ਯਾਨਵਿਮਾਨਾਦੀਨੀਤਿ ਏਵਮਾਦਿ ‘ਕਮ੍ਮਪਚ੍ਚਯਉਤੁਸਮੁਟ੍ਠਾਨਂ’ ਨਾਮ.
ਆਹਾਰਤੋ ਸਮੁਟ੍ਠਿਤਂ ਸੁਦ੍ਧਟ੍ਠਕਂ ‘ਆਹਾਰਸਮੁਟ੍ਠਾਨਂ’ ਨਾਮ. ਕਬਲ਼ੀਕਾਰੋ ਆਹਾਰੋ ਦ੍ਵਿਨ੍ਨਮ੍ਪਿ ਰੂਪਸਨ੍ਤਤੀਨਂ ਪਚ੍ਚਯੋ ਹੋਤਿ ਆਹਾਰਸਮੁਟ੍ਠਾਨਸ੍ਸ ਚ ਉਪਾਦਿਨ੍ਨਸ੍ਸ ਚ. ਆਹਾਰਸਮੁਟ੍ਠਾਨਸ੍ਸ ਜਨਕੋ ਹੁਤ੍ਵਾ ਪਚ੍ਚਯੋ ਹੋਤਿ, ਕਮ੍ਮਜਸ੍ਸ ਅਨੁਪਾਲਕੋ ਹੁਤ੍ਵਾਤਿ ਇਦਂ ਆਹਾਰਾਨੁਪਾਲਿਤਂ ਕਮ੍ਮਜਰੂਪਂ ‘ਆਹਾਰਪਚ੍ਚਯਂ’ ਨਾਮ. ਵਿਸਭਾਗਾਹਾਰਂ ਸੇਵਿਤ੍ਵਾ ਆਤਪੇ ਗਚ੍ਛਨ੍ਤਸ੍ਸ ਤਿਲਕਕਾਲ਼ਕੁਟ੍ਠਾਦੀਨਿ ਉਪ੍ਪਜ੍ਜਨ੍ਤਿ, ਇਦਂ ‘ਆਹਾਰਪਚ੍ਚਯਉਤੁਸਮੁਟ੍ਠਾਨਂ’ ਨਾਮ.
ਉਤੁਤੋ ਸਮੁਟ੍ਠਿਤਂ ਸੁਦ੍ਧਟ੍ਠਕਂ ‘ਉਤੁਸਮੁਟ੍ਠਾਨਂ’ ਨਾਮ. ਤਸ੍ਮਿਂ ਉਤੁ ਅਞ੍ਞਂ ਅਟ੍ਠਕਂ ਸਮੁਟ੍ਠਾਪੇਤਿ, ਇਦਂ ‘ਉਤੁਪਚ੍ਚਯਂ’ ਨਾਮ. ਤਸ੍ਮਿਮ੍ਪਿ ਉਤੁ ਅਞ੍ਞਂ ਅਟ੍ਠਕਂ ਸਮੁਟ੍ਠਾਪੇਤਿ, ਇਦਂ ‘ਉਤੁਪਚ੍ਚਯਉਤੁਸਮੁਟ੍ਠਾਨਂ’ ਨਾਮ. ਏਵਂ ਤਿਸ੍ਸੋਯੇਵ ਸਨ੍ਤਤਿਯੋ ਘਟ੍ਟੇਤੁਂ ਸਕ੍ਕੋਤਿ. ਨ ਤਤੋ ਪਰਂ. ਇਮਮਤ੍ਥਂ ਅਨੁਪਾਦਿਨ੍ਨਕੇਨਾਪਿ ਦੀਪੇਤੁਂ ਵਟ੍ਟਤਿ. ਉਤੁਸਮੁਟ੍ਠਾਨੋ ਨਾਮ ਵਲਾਹਕੋ. ਉਤੁਪਚ੍ਚਯਾ ਨਾਮ ਵੁਟ੍ਠਿਧਾਰਾ. ਦੇਵੇ ਪਨ ਵੁਟ੍ਠੇ ਬੀਜਾਨਿ ਵਿਰੂਹਨ੍ਤਿ, ਪਥਵੀ ਗਨ੍ਧਂ ਮੁਞ੍ਚਤਿ, ਪਬ੍ਬਤਾ ਨੀਲਾ ਖਾਯਨ੍ਤਿ, ਸਮੁਦ੍ਦੋ ਵਡ੍ਢਤਿ, ਏਤਂ ਉਤੁਪਚ੍ਚਯਉਤੁਸਮੁਟ੍ਠਾਨਂ ਨਾਮ.
ਚਿਤ੍ਤਤੋ ਸਮੁਟ੍ਠਿਤਂ ਸੁਦ੍ਧਟ੍ਠਕਂ ‘ਚਿਤ੍ਤਸਮੁਟ੍ਠਾਨਂ’ ਨਾਮ. ‘‘ਪਚ੍ਛਾਜਾਤਾ ਚਿਤ੍ਤਚੇਤਸਿਕਾ ਧਮ੍ਮਾ ਪੁਰੇਜਾਤਸ੍ਸ ਇਮਸ੍ਸ ਕਾਯਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ’’ਤਿ (ਪਟ੍ਠਾ. ੧.੧.੧੧) ਇਦਂ ‘ਚਿਤ੍ਤਪਚ੍ਚਯਂ’ ਨਾਮ. ਆਕਾਸੇ ਅਨ੍ਤਲਿਕ੍ਖੇ ਹਤ੍ਥਿਮ੍ਪਿ ਦਸ੍ਸੇਤਿ, ਅਸ੍ਸਮ੍ਪਿ ਦਸ੍ਸੇਤਿ, ਰਥਮ੍ਪਿ ਦਸ੍ਸੇਤਿ, ਵਿਵਿਧਮ੍ਪਿ ਸੇਨਾਬ੍ਯੂਹਂ ਦਸ੍ਸੇਤਿਤੀ (ਪਟਿ. ਮ. ੩.੧੮) ਇਦਂ ‘ਚਿਤ੍ਤਪਚ੍ਚਯਉਤੁਸਮੁਟ੍ਠਾਨਂ’ ਨਾਮ.
‘ਪਰਿਨਿਪ੍ਫਨ੍ਨ’ਨ੍ਤਿ ਪਨ੍ਨਰਸ ਰੂਪਾਨਿ ਪਰਿਨਿਪ੍ਫਨ੍ਨਾਨਿ ਨਾਮ, ਦਸ ਅਪਰਿਨਿਪ੍ਫਨ੍ਨਾਨਿ ਨਾਮ. ‘ਯਦਿ ਅਪਰਿਨਿਪ੍ਫਨ੍ਨਾ, ਅਸਙ੍ਖਤਾ ਨਾਮ ਭਵੇਯ੍ਯੁਂ’. ‘‘ਤੇਸਂਯੇਵ ਪਨ ਰੂਪਾਨਂ ਕਾਯਵਿਕਾਰੋ ‘ਕਾਯਵਿਞ੍ਞਤ੍ਤਿ’ ਨਾਮ, ਵਚੀਵਿਕਾਰੋ ‘ਵਚੀਵਿਞ੍ਞਤ੍ਤਿ’ ਨਾਮ, ਛਿਦ੍ਦਂ ਵਿਵਰਂ ‘ਆਕਾਸਧਾਤੁ’ ਨਾਮ, ਲਹੁਭਾਵੋ ‘ਲਹੁਤਾ’ ਨਾਮ, ਮੁਦੁਭਾਵੋ ‘ਮੁਦੁਤਾ’ ਨਾਮ, ਕਮ੍ਮਞ੍ਞਭਾਵੋ ‘ਕਮ੍ਮਞ੍ਞਤਾ’ ਨਾਮ, ਨਿਬ੍ਬਤ੍ਤਿ ‘ਉਪਚਯੋ’ ਨਾਮ, ਪਵਤ੍ਤਿ ‘ਸਨ੍ਤਤਿ’ ਨਾਮ, ਜੀਰਣਾਕਾਰੋ ‘ਜਰਤਾ’ ਨਾਮ, ਹੁਤ੍ਵਾ ਅਭਾਵਾਕਾਰੋ ‘ਅਨਿਚ੍ਚਤਾ’ ਨਾਮਾਤਿ. ਸਬ੍ਬਂ ਪਰਿਨਿਪ੍ਫਨ੍ਨਂ ਸਙ੍ਖਤਮੇਵ ਹੋਤੀ’’ਤਿ.
ਅਟ੍ਠਸਾਲਿਨਿਯਾ ਧਮ੍ਮਸਙ੍ਗਹਅਟ੍ਠਕਥਾਯ
ਰੂਪਕਣ੍ਡਵਣ੍ਣਨਾ ਨਿਟ੍ਠਿਤਾ.