੨. ਰੂਪਕਣ੍ਡੋ

ਉਦ੍ਦੇਸਵਣ੍ਣਨਾ

ਇਦਾਨਿ ਰੂਪਕਣ੍ਡਂ ਭਾਜੇਤ੍ਵਾ ਦਸ੍ਸੇਤੁਂ ਪੁਨ ਕਤਮੇ ਧਮ੍ਮਾ ਅਬ੍ਯਾਕਤਾਤਿਆਦਿ ਆਰਦ੍ਧਂ. ਤਤ੍ਥ ਕਿਞ੍ਚਾਪਿ ਹੇਟ੍ਠਾ ਚਿਤ੍ਤੁਪ੍ਪਾਦਕਣ੍ਡੇ ਵਿਪਾਕਾਬ੍ਯਾਕਤਞ੍ਚੇਵ ਕਿਰਿਯਾਬ੍ਯਾਕਤਞ੍ਚ ਨਿਸ੍ਸੇਸਂ ਕਤ੍ਵਾ ਭਾਜਿਤਂ, ਰੂਪਾਬ੍ਯਾਕਤਨਿਬ੍ਬਾਨਾਬ੍ਯਾਕਤਾਨਿ ਪਨ ਅਕਥਿਤਾਨਿ, ਤਾਨਿ ਕਥੇਤੁਂ ਚਤੁਬ੍ਬਿਧਮ੍ਪਿ ਅਬ੍ਯਾਕਤਂ ਸਮੋਧਾਨੇਤ੍ਵਾ ਦਸ੍ਸੇਨ੍ਤੋ ਕੁਸਲਾਕੁਸਲਾਨਂ ਧਮ੍ਮਾਨਂ ਵਿਪਾਕਾਤਿਆਦਿਮਾਹ. ਤਤ੍ਥ ਕੁਸਲਾਕੁਸਲਾਨਨ੍ਤਿ ਚਤੁਭੂਮਕਕੁਸਲਾਨਞ੍ਚੇਵ ਅਕੁਸਲਾਨਞ੍ਚ. ਏਵਂ ਤਾਵ ਵਿਪਾਕਾਬ੍ਯਾਕਤਂ ਕੁਸਲਵਿਪਾਕਾਕੁਸਲਵਿਪਾਕਵਸੇਨ ਦ੍ਵੀਹਿ ਪਦੇਹਿ ਪਰਿਯਾਦਿਯਿਤ੍ਵਾ ਦਸ੍ਸਿਤਂ. ਯਸ੍ਮਾ ਪਨ ਤਂ ਸਬ੍ਬਮ੍ਪਿ ਕਾਮਾਵਚਰਂ ਵਾ ਹੋਤਿ, ਰੂਪਾਵਚਰਾਦੀਸੁ ਵਾ ਅਞ੍ਞਤਰਂ, ਤਸ੍ਮਾ ‘ਕਾਮਾਵਚਰਾ’ਤਿਆਦਿਨਾ ਨਯੇਨ ਤਦੇਵ ਵਿਪਾਕਾਬ੍ਯਾਕਤਂ ਭੂਮਨ੍ਤਰਵਸੇਨ ਪਰਿਯਾਦਿਯਿਤ੍ਵਾ ਦਸ੍ਸਿਤਂ. ਯਸ੍ਮਾ ਪਨ ਤਂ ਵੇਦਨਾਕ੍ਖਨ੍ਧੋਪਿ ਹੋਤਿ…ਪੇ… ਵਿਞ੍ਞਾਣਕ੍ਖਨ੍ਧੋਪਿ, ਤਸ੍ਮਾ ਪੁਨ ਸਮ੍ਪਯੁਤ੍ਤਚਤੁਕ੍ਖਨ੍ਧਵਸੇਨ ਪਰਿਯਾਦਿਯਿਤ੍ਵਾ ਦਸ੍ਸਿਤਂ.

ਏਵਂ ਵਿਪਾਕਾਬ੍ਯਾਕਤਂ ਕੁਸਲਾਕੁਸਲਵਸੇਨ ਭੂਮਨ੍ਤਰਵਸੇਨ ਸਮ੍ਪਯੁਤ੍ਤਕ੍ਖਨ੍ਧਵਸੇਨਾਤਿ ਤੀਹਿ ਨਯੇਹਿ ਪਰਿਯਾਦਾਯ ਦਸ੍ਸੇਤ੍ਵਾ, ਪੁਨ ਕਿਰਿਯਾਬ੍ਯਾਕਤਂ ਦਸ੍ਸੇਨ੍ਤੋ ਯੇ ਚ ਧਮ੍ਮਾ ਕਿਰਿਯਾਤਿਆਦਿਮਾਹ. ਤਤ੍ਥ ‘ਕਾਮਾਵਚਰਾ ਰੂਪਾਵਚਰਾ ਅਰੂਪਾਵਚਰਾ ਵੇਦਨਾਕ੍ਖਨ੍ਧੋ…ਪੇ… ਵਿਞ੍ਞਾਣਕ੍ਖਨ੍ਧੋ’ਤਿ ਵਤ੍ਤਬ੍ਬਂ ਭਵੇਯ੍ਯ. ਹੇਟ੍ਠਾ ਪਨ ਗਹਿਤਮੇਵਾਤਿ ਨਯਂ ਦਸ੍ਸੇਤ੍ਵਾ ਨਿਸ੍ਸਜ੍ਜਿਤਂ. ਇਦਾਨਿ ਅਵਿਭਤ੍ਤਂ ਦਸ੍ਸੇਨ੍ਤੋ ਸਬ੍ਬਞ੍ਚ ਰੂਪਂ ਅਸਙ੍ਖਤਾ ਚ ਧਾਤੂਤਿ ਆਹ. ਤਤ੍ਥ ‘ਸਬ੍ਬਞ੍ਚ ਰੂਪ’ਨ੍ਤਿ ਪਦੇਨ ਪਞ੍ਚਵੀਸਤਿ ਰੂਪਾਨਿ ਛਨ੍ਨਵੁਤਿਰੂਪਕੋਟ੍ਠਾਸਾ ਨਿਪ੍ਪਦੇਸਤੋ ਗਹਿਤਾਤਿ ਵੇਦਿਤਬ੍ਬਾ. ‘ਅਸਙ੍ਖਤਾ ਚ ਧਾਤੂ’ਤਿ ਪਦੇਨ ਨਿਬ੍ਬਾਨਂ ਨਿਪ੍ਪਦੇਸਤੋ ਗਹਿਤਨ੍ਤਿ. ਏਤ੍ਤਾਵਤਾ ‘ਅਬ੍ਯਾਕਤਾ ਧਮ੍ਮਾ’ਤਿ ਪਦਂ ਨਿਟ੍ਠਿਤਂ ਹੋਤਿ.

੫੮੪. ਤਤ੍ਥ ਕਤਮਂ ਸਬ੍ਬਂ ਰੂਪਨ੍ਤਿ ਇਦਂ ਕਸ੍ਮਾ ਗਹਿਤਂ? ਹੇਟ੍ਠਾ ਰੂਪਾਬ੍ਯਾਕਤਂ ਸਙ੍ਖੇਪੇਨ ਕਥਿਤਂ. ਇਦਾਨਿ ਤਂ ਏਕਕਦੁਕਤਿਕਚਤੁਕ੍ਕ…ਪੇ… ਏਕਾਦਸਕਵਸੇਨ ਵਿਤ੍ਥਾਰਤੋ ਭਾਜੇਤ੍ਵਾ ਦਸ੍ਸੇਤੁਂ ਇਦਂ ਗਹਿਤਂ. ਤਸ੍ਸਤ੍ਥੋ – ਯਂ ਵੁਤ੍ਤਂ ‘ਸਬ੍ਬਞ੍ਚ ਰੂਪਂ, ਅਸਙ੍ਖਤਾ ਚ ਧਾਤੂ’ਤਿ, ਤਸ੍ਮਿਂ ਪਦਦ੍ਵਯੇ ‘ਕਤਮਂ ਸਬ੍ਬਂ ਰੂਪਂ ਨਾਮ’? ਇਦਾਨਿ ਤਂ ਦਸ੍ਸੇਨ੍ਤੋ ਚਤ੍ਤਾਰੋ ਚ ਮਹਾਭੂਤਾਤਿਆਦਿਮਾਹ. ਤਤ੍ਥ ਚਤ੍ਤਾਰੋਤਿ ਗਣਨਪਰਿਚ੍ਛੇਦੋ. ਤੇਨ ਤੇਸਂ ਊਨਾਧਿਕਭਾਵਂ ਨਿਵਾਰੇਤਿ. ‘ਚ’-ਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨ ਨ ਕੇਵਲਂ ‘ਚਤ੍ਤਾਰੋ ਮਹਾਭੂਤਾਵ’ ਰੂਪਂ, ਅਞ੍ਞਮ੍ਪਿ ਅਤ੍ਥੀਤਿ ‘ਉਪਾਦਾਰੂਪਂ’ ਸਮ੍ਪਿਣ੍ਡੇਤਿ.

ਮਹਾਭੂਤਾਤਿ ਏਤ੍ਥ ਮਹਨ੍ਤਪਾਤੁਭਾਵਾਦੀਹਿ ਕਾਰਣੇਹਿ ਮਹਾਭੂਤਤਾ ਵੇਦਿਤਬ੍ਬਾ. ਏਤਾਨਿ ਹਿ ਮਹਨ੍ਤਪਾਤੁਭਾਵਤੋ, ਮਹਾਭੂਤਸਾਮਞ੍ਞਤੋ, ਮਹਾਪਰਿਹਾਰਤੋ, ਮਹਾਵਿਕਾਰਤੋ, ਮਹਨ੍ਤਭੂਤਤ੍ਤਾ ਚਾਤਿ ਇਮੇਹਿ ਕਾਰਣੇਹਿ ਮਹਾਭੂਤਾਨੀਤਿ ਵੁਚ੍ਚਨ੍ਤਿ. ਤਤ੍ਥ ‘ਮਹਨ੍ਤਪਾਤੁਭਾਵਤੋ’ਤਿ, ਏਤਾਨਿ ਹਿ ਅਨੁਪਾਦਿਨ੍ਨਕਸਨ੍ਤਾਨੇਪਿ ਉਪਾਦਿਨ੍ਨਕਸਨ੍ਤਾਨੇਪਿ ਮਹਨ੍ਤਾਨਿ ਪਾਤੁਭੂਤਾਨਿ. ਤੇਸਂ ਅਨੁਪਾਦਿਨ੍ਨਕਸਨ੍ਤਾਨੇ ਏਵਂ ਮਹਨ੍ਤਪਾਤੁਭਾਵਤਾ ਵੇਦਿਤਬ੍ਬਾ – ਏਕਞ੍ਹਿ ਚਕ੍ਕਵਾਲ਼ਂ ਆਯਾਮਤੋ ਚ ਵਿਤ੍ਥਾਰਤੋ ਚ ਯੋਜਨਾਨਂ ਦ੍ਵਾਦਸ ਸਤਸਹਸ੍ਸਾਨਿ ਤੀਣਿ ਸਹਸ੍ਸਾਨਿ ਚਤ੍ਤਾਰਿ ਸਤਾਨਿ ਪਞ੍ਞਾਸਞ੍ਚ ਯੋਜਨਾਨਿ. ਪਰਿਕ੍ਖੇਪਤੋ –

ਸਬ੍ਬਂ ਸਤਸਹਸ੍ਸਾਨਿ, ਛਤ੍ਤਿਂਸ ਪਰਿਮਣ੍ਡਲਂ;

ਦਸ ਚੇਵ ਸਹਸ੍ਸਾਨਿ, ਅਡ੍ਢੁਡ੍ਢਾਨਿ ਸਤਾਨਿ ਚ. (ਪਾਰਾ. ਅਟ੍ਠ. ੧.੧; ਵਿਸੁਦ੍ਧਿ. ੧.੧੩੭);

ਤਤ੍ਥ –

ਦੁਵੇ ਸਤਸਹਸ੍ਸਾਨਿ, ਚਤ੍ਤਾਰਿ ਨਹੁਤਾਨਿ ਚ;

ਏਤ੍ਤਕਂ ਬਹਲਤ੍ਤੇਨ, ਸਙ੍ਖਾਤਾਯਂ ਵਸੁਨ੍ਧਰਾ. (ਪਾਰਾ. ਅਟ੍ਠ. ੧.੧; ਵਿਸੁਦ੍ਧਿ. ੧.੧੩੭);

ਤਸ੍ਸਾਯੇਵ ਸਨ੍ਧਾਰਕਂ –

ਚਤ੍ਤਾਰਿ ਸਤਸਹਸ੍ਸਾਨਿ, ਅਟ੍ਠੇਵ ਨਹੁਤਾਨਿ ਚ;

ਏਤ੍ਤਕਂ ਬਹਲਤ੍ਤੇਨ, ਜਲਂ ਵਾਤੇ ਪਤਿਟ੍ਠਿਤਂ.

ਤਸ੍ਸਾਪਿ ਸਨ੍ਧਾਰਕੋ –

ਨਵਸਤਸਹਸ੍ਸਾਨਿ, ਮਾਲੁਤੋ ਨਭਮੁਗ੍ਗਤੋ;

ਸਟ੍ਠਿ ਚੇਵ ਸਹਸ੍ਸਾਨਿ, ਏਸਾ ਲੋਕਸ੍ਸ ਸਣ੍ਠਿਤਿ.

ਏਵਂ ਸਣ੍ਠਿਤੇ ਚੇਤ੍ਥ ਯੋਜਨਾਨਂ –

ਚਤੁਰਾਸੀਤਿਸਹਸ੍ਸਾਨਿ, ਅਜ੍ਝੋਗਾਲ਼੍ਹੋ ਮਹਣ੍ਣਵੇ;

ਅਚ੍ਚੁਗ੍ਗਤੋ ਤਾਵਦੇਵ, ਸਿਨੇਰੁ ਪਬ੍ਬਤੁਤ੍ਤਮੋ.

ਤਤੋ ਉਪਡ੍ਢੁਪਡ੍ਢੇਨ, ਪਮਾਣੇਨ ਯਥਾਕ੍ਕਮਂ;

ਅਜ੍ਝੋਗਾਲ਼੍ਹੁਗ੍ਗਤਾ ਦਿਬ੍ਬਾ, ਨਾਨਾਰਤਨਚਿਤ੍ਤਿਤਾ.

ਯੁਗਨ੍ਧਰੋ ਈਸਧਰੋ, ਕਰਵੀਕੋ ਸੁਦਸ੍ਸਨੋ;

ਨੇਮਿਨ੍ਧਰੋ ਵਿਨਤਕੋ, ਅਸ੍ਸਕਣ੍ਣੋ ਗਿਰਿ ਬ੍ਰਹਾ.

ਏਤੇ ਸਤ੍ਤ ਮਹਾਸੇਲਾ, ਸਿਨੇਰੁਸ੍ਸ ਸਮਨ੍ਤਤੋ;

ਮਹਾਰਾਜਾਨਮਾਵਾਸਾ ਦੇਵਯਕ੍ਖਨਿਸੇਵਿਤਾ.

ਯੋਜਨਾਨਂ ਸਤਾਨੁਚ੍ਚੋ, ਹਿਮਵਾ ਪਞ੍ਚ ਪਬ੍ਬਤੋ;

ਯੋਜਨਾਨਂ ਸਹਸ੍ਸਾਨਿ, ਤੀਣਿ ਆਯਤਵਿਤ੍ਥਤੋ;

ਚਤੁਰਾਸੀਤਿਸਹਸ੍ਸੇਹਿ, ਕੂਟੇਹਿ ਪਟਿਮਣ੍ਡਿਤੋ.

ਤਿਪਞ੍ਚਯੋਜਨਕ੍ਖਨ੍ਧਪਰਿਕ੍ਖੇਪਾ ਨਗਵ੍ਹਯਾ;

ਪਞ੍ਞਾਸਯੋਜਨਕ੍ਖਨ੍ਧਸਾਖਾਯਾਮਾ ਸਮਨ੍ਤਤੋ.

ਸਤਯੋਜਨਵਿਤ੍ਥਿਣ੍ਣਾ, ਤਾਵਦੇਵ ਚ ਉਗ੍ਗਤਾ;

ਜਮ੍ਬੂ ਯਸ੍ਸਾਨੁਭਾਵੇਨ, ਜਮ੍ਬੁਦੀਪੋ ਪਕਾਸਿਤੋ. (ਪਾਰਾ. ਅਟ੍ਠ. ੧.੧; ਵਿਸੁਦ੍ਧਿ. ੧.੧੩੭);

ਯਞ੍ਚੇਤਂ ਜਮ੍ਬੁਯਾ ਪਮਾਣਂ ਤਦੇਵ ਅਸੁਰਾਨਂ ਚਿਤ੍ਤਪਾਟਲਿਯਾ, ਗਰੁਲ਼ਾਨਂ ਸਿਮ੍ਬਲਿਰੁਕ੍ਖਸ੍ਸ, ਅਪਰਗੋਯਾਨੇ ਕਦਮ੍ਬਰੁਕ੍ਖਸ੍ਸ, ਉਤ੍ਤਰਕੁਰੁਮ੍ਹਿ ਕਪ੍ਪਰੁਕ੍ਖਸ੍ਸ, ਪੁਬ੍ਬਵਿਦੇਹੇ ਸਿਰੀਸਸ੍ਸ, ਤਾਵਤਿਂਸੇਸੁ ਪਾਰਿਚ੍ਛਤ੍ਤਕਸ੍ਸਾਤਿ. ਤੇਨਾਹੁ ਪੋਰਾਣਾ –

ਪਾਟਲੀ ਸਿਮ੍ਬਲੀ ਜਮ੍ਬੂ, ਦੇਵਾਨਂ ਪਾਰਿਚ੍ਛਤ੍ਤਕੋ;

ਕਦਮ੍ਬੋ ਕਪ੍ਪਰੁਕ੍ਖੋ ਚ, ਸਿਰੀਸੇਨ ਭਵਤਿ ਸਤ੍ਤਮਨ੍ਤਿ.

ਦ੍ਵੇਅਸੀਤਿਸਹਸ੍ਸਾਨਿ, ਅਜ੍ਝੋਗਾਲ਼੍ਹੋ ਮਹਣ੍ਣਵੇ;

ਅਚ੍ਚੁਗ੍ਗਤੋ ਤਾਵਦੇਵ, ਚਕ੍ਕਵਾਲ਼ਸਿਲੁਚ੍ਚਯੋ;

ਪਰਿਕ੍ਖਿਪਿਤ੍ਵਾ ਤਂ ਸਬ੍ਬਂ, ਲੋਕਧਾਤੁਮਯਂ ਠਿਤੋਤਿ.

ਉਪਾਦਿਨ੍ਨਕਸਨ੍ਤਾਨੇਪਿ ਮਚ੍ਛਕਚ੍ਛਪਦੇਵਦਾਨਵਾਦਿਸਰੀਰਵਸੇਨ ਮਹਨ੍ਤਾਨੇਵ ਪਾਤੁਭੂਤਾਨਿ. ਵੁਤ੍ਤਞ੍ਹੇਤਂ ਭਗਵਤਾ – ‘‘ਸਨ੍ਤਿ, ਭਿਕ੍ਖਵੇ, ਮਹਾਸਮੁਦ੍ਦੇ ਯੋਜਨਸਤਿਕਾਪਿ ਅਤ੍ਤਭਾਵਾਤਿ’’ਆਦਿ.

‘ਮਹਾਭੂਤਸਾਮਞ੍ਞਤੋ’ਤਿ ਏਤਾਨਿ ਹਿ ਯਥਾ ਮਾਯਾਕਾਰੋ ਅਮਣਿਂਯੇਵ ਉਦਕਂ ਮਣਿਂ ਕਤ੍ਵਾ ਦਸ੍ਸੇਤਿ, ਅਸੁਵਣ੍ਣਂਯੇਵ ਲੇਡ੍ਡੁਂ ਸੁਵਣ੍ਣਂ ਕਤ੍ਵਾ ਦਸ੍ਸੇਤਿ, ਯਥਾ ਚ ਸਯਂ ਨੇਵ ਯਕ੍ਖੋ ਨ ਪਕ੍ਖੀ ਸਮਾਨੋ ਯਕ੍ਖਭਾਵਮ੍ਪਿ ਪਕ੍ਖਿਭਾਵਮ੍ਪਿ ਦਸ੍ਸੇਤਿ, ਏਵਮੇਵ ਸਯਂ ਅਨੀਲਾਨੇਵ ਹੁਤ੍ਵਾ ਨੀਲਂ ਉਪਾਦਾਰੂਪਂ ਦਸ੍ਸੇਨ੍ਤਿ, ਅਪੀਤਾਨਿ… ਅਲੋਹਿਤਾਨਿ… ਅਨੋਦਾਤਾਨੇਵ ਹੁਤ੍ਵਾ ਓਦਾਤਂ ਉਪਾਦਾਰੂਪਂ ਦਸ੍ਸੇਨ੍ਤੀਤਿ ਮਾਯਾਕਾਰਮਹਾਭੂਤਸਾਮਞ੍ਞਤੋ ਮਹਾਭੂਤਾਨਿ. ਯਥਾ ਚ ਯਕ੍ਖਾਦੀਨਿ ਮਹਾਭੂਤਾਨਿ ਯਂ ਗਣ੍ਹਨ੍ਤਿ ਨੇਵ ਤੇਸਂ ਤਸ੍ਸ ਅਨ੍ਤੋ ਨ ਬਹਿਠਾਨਂ ਉਪਲਬ੍ਭਤਿ, ਨ ਚ ਤਂ ਨਿਸ੍ਸਾਯ ਨ ਤਿਟ੍ਠਨ੍ਤਿ, ਏਵਮੇਵ ਏਤਾਨਿਪਿ ਨੇਵ ਅਞ੍ਞਮਞ੍ਞਸ੍ਸ ਅਨ੍ਤੋ ਨ ਬਹਿ ਠਿਤਾਨਿ ਹੁਤ੍ਵਾ ਉਪਲਬ੍ਭਨ੍ਤਿ, ਨ ਚ ਅਞ੍ਞਮਞ੍ਞਂ ਨਿਸ੍ਸਾਯ ਨ ਤਿਟ੍ਠਨ੍ਤੀਤਿ. ਅਚਿਨ੍ਤੇਯ੍ਯਟ੍ਠਾਨਤਾਯ ਯਕ੍ਖਾਦਿਮਹਾਭੂਤਸਾਮਞ੍ਞਤੋਪਿ ਮਹਾਭੂਤਾਨਿ.

ਯਥਾ ਚ ਯਕ੍ਖਿਨੀਸਙ੍ਖਾਤਾਨਿ ਮਹਾਭੂਤਾਨਿ ਮਨਾਪੇਹਿ ਵਣ੍ਣਸਣ੍ਠਾਨਵਿਕ੍ਖੇਪੇਹਿ ਅਤ੍ਤਨੋ ਭਯਾਨਕਭਾਵਂ ਪਟਿਚ੍ਛਾਦੇਤ੍ਵਾ ਸਤ੍ਤੇ ਵਞ੍ਚੇਨ੍ਤਿ, ਏਵਮੇਵ ਏਤਾਨਿਪਿ ਇਤ੍ਥਿਪੁਰਿਸਸਰੀਰਾਦੀਸੁ ਮਨਾਪੇਨ ਛਵਿਵਣ੍ਣੇਨ, ਮਨਾਪੇਨ ਅਙ੍ਗਪਚ੍ਚਙ੍ਗਸਣ੍ਠਾਨੇਨ, ਮਨਾਪੇਨ ਚ ਹਤ੍ਥਪਾਦਙ੍ਗੁਲਿਭਮੁਕਵਿਕ੍ਖੇਪੇਨ ਅਤ੍ਤਨੋ ਕਕ੍ਖਲ਼ਤਾਦਿਭੇਦਂ ਸਰਸਲਕ੍ਖਣਂ ਪਟਿਚ੍ਛਾਦੇਤ੍ਵਾ ਬਾਲਜਨਂ ਵਞ੍ਚੇਨ੍ਤਿ, ਅਤ੍ਤਨੋ ਸਭਾਵਂ ਦਟ੍ਠੁਂ ਨ ਦੇਨ੍ਤਿ. ਇਤਿ ਵਞ੍ਚਕਟ੍ਠੇਨ ਯਕ੍ਖਿਨੀਮਹਾਭੂਤਸਾਮਞ੍ਞਤੋਪਿ ਮਹਾਭੂਤਾਨਿ.

‘ਮਹਾਪਰਿਹਾਰਤੋ’ਤਿ ਮਹਨ੍ਤੇਹਿ ਪਚ੍ਚਯੇਹਿ ਪਰਿਹਰਿਤਬ੍ਬਤੋ. ਏਤਾਨਿ ਹਿ ਦਿਵਸੇ ਦਿਵਸੇ ਉਪਨੇਤਬ੍ਬਤ੍ਤਾ ਮਹਨ੍ਤੇਹਿ ਘਾਸਚ੍ਛਾਦਨਾਦੀਹਿ ਭੂਤਾਨਿ ਪਵਤ੍ਤਾਨੀਤਿ ਮਹਾਭੂਤਾਨਿ. ਮਹਾਪਰਿਹਾਰਾਨਿ ਵਾ ਭੂਤਾਨੀਤਿ ਮਹਾਭੂਤਾਨਿ.

‘ਮਹਾਵਿਕਾਰਤੋ’ਤਿ ਭੂਤਾਨਂ ਮਹਾਵਿਕਾਰਤੋ. ਏਤਾਨਿ ਹਿ ਉਪਾਦਿਣ੍ਣਾਨਿਪਿ ਅਨੁਪਾਦਿਣ੍ਣਾਨਿਪਿ ਮਹਾਵਿਕਾਰਾਨਿ ਹੋਨ੍ਤਿ. ਤਤ੍ਥ ਅਨੁਪਾਦਿਣ੍ਣਾਨਂ ਕਪ੍ਪਵੁਟ੍ਠਾਨੇ ਵਿਕਾਰਮਹਤ੍ਤਂ ਪਾਕਟਂ ਹੋਤਿ, ਉਪਾਦਿਣ੍ਣਾਨਂ ਧਾਤੁਕ੍ਖੋਭਕਾਲੇ. ਤਥਾ ਹਿ –

ਭੂਮਿਤੋ ਵੁਟ੍ਠਿਤਾ ਯਾਵ, ਬ੍ਰਹ੍ਮਲੋਕਾ ਵਿਧਾਵਤਿ;

ਅਚ੍ਚਿ ਅਚ੍ਚਿਮਤੋ ਲੋਕੇ, ਦਯ੍ਹਮਾਨਮ੍ਹਿ ਤੇਜਸਾ.

ਕੋਟਿਸਤਸਹਸ੍ਸੇਕਂ, ਚਕ੍ਕਵਾਲ਼ਂ ਵਿਲੀਯਤਿ;

ਕੁਪਿਤੇਨ ਯਦਾ ਲੋਕੋ, ਸਲਿਲੇਨ ਵਿਨਸ੍ਸਤਿ.

ਕੋਟਿਸਤਸਹਸ੍ਸੇਕਂ, ਚਕ੍ਕਵਾਲ਼ਂ ਵਿਕੀਰਤਿ;

ਵਾਯੋਧਾਤੁਪ੍ਪਕੋਪੇਨ, ਯਦਾ ਲੋਕੋ ਵਿਨਸ੍ਸਤਿ.

ਪਤ੍ਥਦ੍ਧੋ ਭਵਤਿ ਕਾਯੋ, ਦਟ੍ਠੋ ਕਟ੍ਠਮੁਖੇਨ ਵਾ;

ਪਥਵੀਧਾਤੁਪ੍ਪਕੋਪੇਨ, ਹੋਤਿ ਕਟ੍ਠਮੁਖੇਵ ਸੋ.

ਪੂਤਿਯੋ ਭਵਤਿ ਕਾਯੋ, ਦਟ੍ਠੋ ਪੂਤਿਮੁਖੇਨ ਵਾ;

ਆਪੋਧਾਤੁਪ੍ਪਕੋਪੇਨ, ਹੋਤਿ ਪੂਤਿਮੁਖੇਵ ਸੋ.

ਸਨ੍ਤਤ੍ਤੋ ਭਵਤਿ ਕਾਯੋ, ਦਟ੍ਠੋ ਅਗ੍ਗਿਮੁਖੇਨ ਵਾ;

ਤੇਜੋਧਾਤੁਪ੍ਪਕੋਪੇਨ, ਹੋਤਿ ਅਗ੍ਗਿਮੁਖੇਵ ਸੋ.

ਸਞ੍ਛਿਨ੍ਨੋ ਭਵਤਿ ਕਾਯੋ, ਦਟ੍ਠੋ ਸਤ੍ਥਮੁਖੇਨ ਵਾ;

ਵਾਯੋਧਾਤੁਪ੍ਪਕੋਪੇਨ, ਹੋਤਿ ਸਤ੍ਥਮੁਖੇਵ ਸੋ. (ਸਂ. ਨਿ. ਅਟ੍ਠ. ੩.੪.੨੩੮);

ਇਤਿ ਮਹਾਵਿਕਾਰਾਨਿ ਭੂਤਾਨੀਤਿ ਮਹਾਭੂਤਾਨਿ.

‘ਮਹਨ੍ਤਭੂਤਤ੍ਤਾ ਚਾ’ਤਿ ਏਤਾਨਿ ਹਿ ਮਹਨ੍ਤਾਨਿ ਮਹਤਾ ਵਾਯਾਮੇਨ ਪਰਿਗ੍ਗਹੇਤਬ੍ਬਤ੍ਤਾ, ਭੂਤਾਨਿ ਵਿਜ੍ਜਮਾਨਤ੍ਤਾਤਿ, ਮਹਨ੍ਤਭੂਤਤ੍ਤਾ ਚ ਮਹਾਭੂਤਾਨਿ. ਏਵਂ ਮਹਨ੍ਤਪਾਤੁਭਾਵਾਦੀਹਿ ਕਾਰਣੇਹਿ ਮਹਾਭੂਤਾਨਿ.

ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯ ਰੂਪਨ੍ਤਿ ਉਪਯੋਗਤ੍ਥੇ ਸਾਮਿਵਚਨਂ. ਚਤ੍ਤਾਰਿ ਮਹਾਭੂਤਾਨਿ ਉਪਾਦਾਯ, ਨਿਸ੍ਸਾਯ, ਅਮੁਞ੍ਚਿਤ੍ਵਾ ਪਵਤ੍ਤਰੂਪਨ੍ਤਿ ਅਤ੍ਥੋ. ਇਦਂ ਵੁਚ੍ਚਤਿ ਸਬ੍ਬਂ ਰੂਪਨ੍ਤਿ ਇਦਂ ਚਤ੍ਤਾਰਿ ਮਹਾਭੂਤਾਨਿ, ਪਦਪਟਿਪਾਟਿਯਾ ਨਿਦ੍ਦਿਟ੍ਠਾਨਿ ਤੇਵੀਸਤਿ ਉਪਾਦਾਰੂਪਾਨੀਤਿ, ਸਤ੍ਤਵੀਸਤਿਪ੍ਪਭੇਦਂ ਸਬ੍ਬਂ ਰੂਪਂ ਨਾਮ.

ਏਕਵਿਧਰੂਪਸਙ੍ਗਹੋ

ਇਦਾਨਿ ਤਂ ਵਿਤ੍ਥਾਰਤੋ ਦਸ੍ਸੇਤੁਂ ਏਕਵਿਧਾਦੀਹਿ ਏਕਾਦਸਹਿ ਸਙ੍ਗਹੇਹਿ ਮਾਤਿਕਂ ਠਪੇਨ੍ਤੋ ਸਬ੍ਬਂ ਰੂਪਂ ਨ ਹੇਤੂਤਿਆਦਿਮਾਹ.

ਤਤ੍ਥ ‘ਸਬ੍ਬਂ ਰੂਪ’ਨ੍ਤਿ ਇਦਂ ਪਦਂ ‘ਸਬ੍ਬਂ ਰੂਪਂ ਨ ਹੇਤੁ’ ‘ਸਬ੍ਬਂ ਰੂਪਂ ਅਹੇਤੁਕ’ਨ੍ਤਿ ਏਵਂ ਸਬ੍ਬਪਦੇਹਿ ਸਦ੍ਧਿਂ ਯੋਜੇਤਬ੍ਬਂ. ਸਬ੍ਬਾਨੇਵ ਚੇਤਾਨਿ ‘ਨ ਹੇਤੂ’ਤਿਆਦੀਨਿ ਤੇਚਤ੍ਤਾਲੀਸਪਦਾਨਿ ਉਦ੍ਦਿਟ੍ਠਾਨਿ. ਤੇਸੁ ਪਟਿਪਾਟਿਯਾ ਚਤ੍ਤਾਲੀਸਪਦਾਨਿ ਮਾਤਿਕਤੋ ਗਹੇਤ੍ਵਾ ਠਪਿਤਾਨਿ, ਅਵਸਾਨੇ ਤੀਣਿ ਮਾਤਿਕਾਮੁਤ੍ਤਕਾਨੀਤਿ. ਏਵਂ ਤਾਵ ਪਠਮੇ ਸਙ੍ਗਹੇ ਪਾਲ਼ਿਵਵਤ੍ਥਾਨਮੇਵ ਵੇਦਿਤਬ੍ਬਂ. ਤਥਾ ਦੁਤਿਯਸਙ੍ਗਹਾਦੀਸੁ.

ਦੁਵਿਧਰੂਪਸਙ੍ਗਹੋ

ਤਤ੍ਰਾਯਂ ਨਯੋ – ਦੁਤਿਯਸਙ੍ਗਹੇ ਤਾਵ ਸਤਂ ਚਤ੍ਤਾਰੋ ਚ ਦੁਕਾ. ਤਤ੍ਥ ਅਤ੍ਥਿ ਰੂਪਂ ਉਪਾਦਾ, ਅਤ੍ਥਿ ਰੂਪਂ ਨੋਉਪਾਦਾਤਿਆਦਯੋ ਆਦਿਮ੍ਹਿ ਚੁਦ੍ਦਸ ਦੁਕਾ ਅਞ੍ਞਮਞ੍ਞਸਮ੍ਬਨ੍ਧਾਭਾਵਤੋ ਪਕਿਣ੍ਣਕਦੁਕਾ ਨਾਮ. ਤਤੋ ਅਤ੍ਥਿ ਰੂਪਂ ਚਕ੍ਖੁਸਮ੍ਫਸ੍ਸਸ੍ਸ ਵਤ੍ਥੂਤਿਆਦਯੋ ਪਞ੍ਚਵੀਸਤਿ ਦੁਕਾ ਵਤ੍ਥੁਅਵਤ੍ਥੁਉਪਪਰਿਕ੍ਖਣਵਸੇਨ ਪਵਤ੍ਤਤ੍ਤਾ ਵਤ੍ਥੁਦੁਕਾ ਨਾਮ. ਤਤੋ ਅਤ੍ਥਿ ਰੂਪਂ ਚਕ੍ਖੁਸਮ੍ਫਸ੍ਸਸ੍ਸ ਆਰਮ੍ਮਣਨ੍ਤਿਆਦਯੋ ਪਞ੍ਚਵੀਸਤਿ ਆਰਮ੍ਮਣਾਨਾਰਮ੍ਮਣਉਪਪਰਿਕ੍ਖਣਵਸੇਨ ਪਵਤ੍ਤਤ੍ਤਾ ਆਰਮ੍ਮਣਦੁਕਾ ਨਾਮ. ਤਤੋ ਅਤ੍ਥਿ ਰੂਪਂ ਚਕ੍ਖਾਯਤਨਨ੍ਤਿ ਆਦਯੋ ਦਸ ਆਯਤਨਾਨਾਯਤਨਉਪਪਰਿਕ੍ਖਣਵਸੇਨ ਪਵਤ੍ਤਤ੍ਤਾ ਆਯਤਨਦੁਕਾ ਨਾਮ. ਤਤੋ ਅਤ੍ਥਿ ਰੂਪਂ ਚਕ੍ਖੁਧਾਤੂਤਿਆਦਯੋ ਦਸ ਧਾਤੁਅਧਾਤੁਉਪਪਰਿਕ੍ਖਣਵਸੇਨ ਪਵਤ੍ਤਤ੍ਤਾ ਧਾਤੁਦੁਕਾ ਨਾਮ. ਤਤੋ ਅਤ੍ਥਿ ਰੂਪਂ ਚਕ੍ਖੁਨ੍ਦ੍ਰਿਯਨ੍ਤਿਆਦਯੋ ਅਟ੍ਠ ਇਨ੍ਦ੍ਰਿਯਾਨਿਨ੍ਦ੍ਰਿਯਉਪਪਰਿਕ੍ਖਣਵਸੇਨ ਪਵਤ੍ਤਤ੍ਤਾ ਇਨ੍ਦ੍ਰਿਯਦੁਕਾ ਨਾਮ. ਤਤੋ ਅਤ੍ਥਿ ਰੂਪਂ ਕਾਯਵਿਞ੍ਞਤ੍ਤੀਤਿਆਦਯੋ ਦ੍ਵਾਦਸ ਸੁਖੁਮਾਸੁਖੁਮਰੂਪਉਪਪਰਿਕ੍ਖਣਵਸੇਨ ਪਵਤ੍ਤਤ੍ਤਾ ਸੁਖੁਮਰੂਪਦੁਕਾ ਨਾਮਾਤਿ. ਇਦਂ ਦੁਤਿਯਸਙ੍ਗਹੇ ਪਾਲ਼ਿਵਵਤ੍ਥਾਨਂ.

ਤਿਵਿਧਰੂਪਸਙ੍ਗਹੋ

੫੮੫. ਤਤਿਯਸਙ੍ਗਹੇ ਸਤਂ ਤੀਣਿ ਚ ਤਿਕਾਨਿ. ਤਤ੍ਥ ਦੁਤਿਯਸਙ੍ਗਹੇ ਵੁਤ੍ਤੇਸੁ ਚੁਦ੍ਦਸਸੁ ਪਕਿਣ੍ਣਕਦੁਕੇਸੁ ਏਕਂ ਅਜ੍ਝਤ੍ਤਿਕਦੁਕਂ ਸੇਸੇਹਿ ਤੇਰਸਹਿ ਯੋਜੇਤ੍ਵਾ ਯਂ ਤਂ ਰੂਪਂ ਅਜ੍ਝਤ੍ਤਿਕਂ ਤਂ ਉਪਾਦਾ; ਯਂ ਤਂ ਰੂਪਂ ਬਾਹਿਰਂ ਤਂ ਅਤ੍ਥਿ ਉਪਾਦਾ, ਅਤ੍ਥਿ ਨੋਉਪਾਦਾਤਿਆਦਿਨਾ ਨਯੇਨ ਠਪਿਤਾ ਤੇਰਸ ਪਕਿਣ੍ਣਕਤਿਕਾ ਨਾਮ. ਤਤੋ ਤਮੇਵ ਦੁਕਂ ਸੇਸਦੁਕੇਹਿ ਸਦ੍ਧਿਂ ਯੋਜੇਤ੍ਵਾ ਯਂ ਤਂ ਰੂਪਂ ਬਾਹਿਰਂ ਤਂ ਚਕ੍ਖੁਸਮ੍ਫਸ੍ਸਸ੍ਸ ਨ ਵਤ੍ਥੁ, ਯਂ ਤਂ ਰੂਪਂ ਅਜ੍ਝਤ੍ਤਿਕਂ ਤਂ ਅਤ੍ਥਿ ਚਕ੍ਖੁਸਮ੍ਫਸ੍ਸਸ੍ਸ ਵਤ੍ਥੁ, ਅਤ੍ਥਿ ਚਕ੍ਖੁਸਮ੍ਫਸ੍ਸਸ੍ਸ ਨ ਵਤ੍ਥੂਤਿਆਦਿਨਾ ਨਯੇਨ ਸੇਸਤਿਕਾ ਠਪਿਤਾ. ਤੇਸਂ ਨਾਮਞ੍ਚ ਗਣਨਾ ਚ ਤੇਸਂਯੇਵ ਵਤ੍ਥੁਦੁਕਾਦੀਨਂ ਵਸੇਨ ਵੇਦਿਤਬ੍ਬਾਤਿ. ਇਦਂ ਤਤਿਯਸਙ੍ਗਹੇ ਪਾਲ਼ਿਵਵਤ੍ਥਾਨਂ.

ਚਤੁਬ੍ਬਿਧਾਦਿਰੂਪਸਙ੍ਗਹਾ

੫੮੬. ਚਤੁਤ੍ਥਸਙ੍ਗਹੇ ਦ੍ਵਾਵੀਸਤਿ ਚਤੁਕ੍ਕਾ. ਤਤ੍ਥ ਸਬ੍ਬਪਚ੍ਛਿਮੋ ਅਤ੍ਥਿ ਰੂਪਂ ਉਪਾਦਾ ਅਤ੍ਥਿ ਰੂਪਂ ਨੋਉਪਾਦਾਤਿ ਏਵਂ ਇਧ ਵੁਤ੍ਤਂ ਮਾਤਿਕਂ ਅਨਾਮਸਿਤ੍ਵਾ ਠਪਿਤੋ. ਇਤਰੇ ਪਨ ਆਮਸਿਤ੍ਵਾ ਠਪਿਤਾ. ਕਥਂ? ਯੇ ਤਾਵ ਇਧ ਦੁਵਿਧਸਙ੍ਗਹੇ ਪਕਿਣ੍ਣਕੇਸੁ ਆਦਿਤੋ ਤਯੋ ਦੁਕਾ, ਤੇਸੁ ਏਕੇਕਂ ਗਹੇਤ੍ਵਾ ਯਂ ਤਂ ਰੂਪਂ ਉਪਾਦਾ ਤਂ ਅਤ੍ਥਿ ਉਪਾਦਿਣ੍ਣਂ, ਅਤ੍ਥਿ ਅਨੁਪਾਦਿਣ੍ਣਨ੍ਤਿਆਦਿਨਾ ਨਯੇਨ ਪਞ੍ਚਹਿ ਪਞ੍ਚਹਿ ਦੁਕੇਹਿ ਸਦ੍ਧਿਂ ਯੋਜੇਤ੍ਵਾ ਦੁਕਤ੍ਤਯਮੂਲਕਾ ਆਦਿਮ੍ਹਿ ਪਞ੍ਚਦਸ ਚਤੁਕ੍ਕਾ ਠਪਿਤਾ.

ਇਦਾਨਿ ਯੋ ਯਂ ਚਤੁਕ੍ਕੋ ਸਨਿਦਸ੍ਸਨਦੁਕੋ ਸੋ ਯਸ੍ਮਾ ਯਂ ਤਂ ਰੂਪਂ ਸਨਿਦਸ੍ਸਨਂ ਤਂ ਅਤ੍ਥਿ ਸਪ੍ਪਟਿਘਂ, ਅਤ੍ਥਿ ਅਪ੍ਪਟਿਘਨ੍ਤਿਆਦਿਨਾ ਨਯੇਨ ਪਰੇਹਿ ਵਾ, ਅਤ੍ਥਿ ਉਪਾਦਾ ਅਤ੍ਥਿ ਨੋਉਪਾਦਾਤਿਆਦਿਨਾ ਨਯੇਨ ਪੁਰਿਮੇਹਿ ਵਾ, ਦੁਕੇਹਿ ਸਦ੍ਧਿਂ ਅਤ੍ਥਾਭਾਵਤੋ ਕਮਾਭਾਵਤੋ ਵਿਸੇਸਾਭਾਵਤੋ ਚ ਯੋਗਂ ਨ ਗਚ੍ਛਤਿ. ਸਨਿਦਸ੍ਸਨਞ੍ਹਿ ‘ਅਪ੍ਪਟਿਘਂ’ ਨਾਮ, ‘ਨੋ ਉਪਾਦਾ’ ਵਾ ਨਤ੍ਥੀਤਿ ਅਤ੍ਥਾਭਾਵਤੋ ਯੋਗਂ ਨ ਗਚ੍ਛਤਿ. ‘ਉਪਾਦਿਣ੍ਣਂ ਪਨ ਅਨੁਪਾਦਿਣ੍ਣਞ੍ਚ ਅਤ੍ਥਿ ਤਂ ਕਮਾਭਾਵਾ ਯੋਗਂ ਨ ਗਚ੍ਛਤਿ. ਸਬ੍ਬਦੁਕਾ ਹਿ ਪਚ੍ਛਿਮਪਚ੍ਛਿਮੇਹੇਵ ਸਦ੍ਧਿਂ ਯੋਜਿਤਾ. ਅਯਮੇਤ੍ਥ ਕਮੋ. ਪੁਰਿਮੇਹਿ ਪਨ ਸਦ੍ਧਿਂ ਕਮਾਭਾਵੋਤਿ. ‘ਸਤਿ ਅਤ੍ਥੇ ਕਮਾਭਾਵੋ ਅਕਾਰਣਂ. ਤਸ੍ਮਾ ਉਪਾਦਿਣ੍ਣਪਦਾਦੀਹਿ ਸਦ੍ਧਿਂ ਯੋਜੇਤਬ੍ਬੋ’ਤਿ ਚੇ – ਨ, ਵਿਸੇਸਾਭਾਵਾ; ਉਪਾਦਿਣ੍ਣਪਦਾਦੀਨਿ ਹਿ ਇਮਿਨਾ ਸਦ੍ਧਿਂ ਯੋਜਿਤਾਨਿ. ਤਤ੍ਥ ‘ਉਪਾਦਿਣ੍ਣਂ ਵਾ ਸਨਿਦਸ੍ਸਨਂ, ਸਨਿਦਸ੍ਸਨਂ ਵਾ ਉਪਾਦਿਣ੍ਣ’ਨ੍ਤਿ ਵੁਤ੍ਤੇ ਵਿਸੇਸੋ ਨਤ੍ਥੀਤਿ ਵਿਸੇਸਾਭਾਵਾਪਿ ਯੋਗਂ ਨ ਗਚ੍ਛਤਿ. ਤਸ੍ਮਾ ਤਂ ਚਤੁਤ੍ਥਦੁਕਂ ਅਨਾਮਸਿਤ੍ਵਾ, ਤਤੋ ਪਰੇਹਿ ਅਤ੍ਥਿ ਰੂਪਂ ਸਪ੍ਪਟਿਘਨ੍ਤਿਆਦੀਹਿ ਤੀਹਿ ਦੁਕੇਹਿ ਸਦ੍ਧਿਂ ‘ਯਂ ਤਂ ਰੂਪਂ ਸਪ੍ਪਟਿਘਂ ਤਂ ਅਤ੍ਥਿ ਇਨ੍ਦ੍ਰਿਯਂ, ਅਤ੍ਥਿ ਨ ਇਨ੍ਦ੍ਰਿਯਂ, ਯਂ ਤਂ ਰੂਪਂ ਅਪ੍ਪਟਿਘਂ ਤਂ ਅਤ੍ਥਿ ਇਨ੍ਦ੍ਰਿਯਂ, ਅਤ੍ਥਿ ਨ ਇਨ੍ਦ੍ਰਿਯ’ਨ੍ਤਿਆਦਿਨਾ ਨਯੇਨ ਯੁਜ੍ਜਮਾਨੇ ਦ੍ਵੇ ਦ੍ਵੇ ਦੁਕੇ ਯੋਜੇਤ੍ਵਾ ਛ ਚਤੁਕ੍ਕਾ ਠਪਿਤਾ.

ਯਥਾ ਚਾਯਂ ਚਤੁਤ੍ਥਦੁਕੋ ਯੋਗਂ ਨ ਗਚ੍ਛਤਿ, ਤਥਾ ਤੇਨ ਸਦ੍ਧਿਂ ਆਦਿਦੁਕੋਪਿ. ਕਸ੍ਮਾ? ਅਨੁਪਾਦਾਰੂਪਸ੍ਸ ਏਕਨ੍ਤੇਨ ਅਨਿਦਸ੍ਸਨਤ੍ਤਾ. ਸੋ ਹਿ ਯਂ ਤਂ ਰੂਪਂ ਨੋਉਪਾਦਾ ਤਂ ਅਤ੍ਥਿ ਸਨਿਦਸ੍ਸਨਂ, ਅਤ੍ਥਿ ਅਨਿਦਸ੍ਸਨਨ੍ਤਿ – ਏਵਂ ਚਤੁਤ੍ਥੇਨ ਦੁਕੇਨ ਸਦ੍ਧਿਂ ਯੋਜਿਯਮਾਨੋ ਯੋਗਂ ਨ ਗਚ੍ਛਤਿ. ਤਸ੍ਮਾ ਤਂ ਅਤਿਕ੍ਕਮਿਤ੍ਵਾ ਪਞ੍ਚਮੇਨ ਸਹ ਯੋਜਿਤੋ. ਏਵਂ ਯੋ ਯੇਨ ਸਦ੍ਧਿਂ ਯੋਗਂ ਗਚ੍ਛਤਿ, ਯੋ ਚ ਨ ਗਚ੍ਛਤਿ ਸੋ ਵੇਦਿਤਬ੍ਬੋਤਿ. ਇਦਂ ਚਤੁਤ੍ਥਸਙ੍ਗਹੇ ਪਾਲ਼ਿਵਵਤ੍ਥਾਨਂ. ਇਤੋ ਪਰੇ ਪਨ ਪਞ੍ਚਵਿਧਸਙ੍ਗਹਾਦਯੋ ਸਤ੍ਤ ਸਙ੍ਗਹਾ ਅਸਮ੍ਮਿਸ੍ਸਾ ਏਵ. ਏਵਂ ਸਕਲਾਯਪਿ ਮਾਤਿਕਾਯ ਪਾਲ਼ਿਵਵਤ੍ਥਾਨਂ ਵੇਦਿਤਬ੍ਬਂ.

ਰੂਪਵਿਭਤ੍ਤਿਏਕਕਨਿਦ੍ਦੇਸਵਣ੍ਣਨਾ

੫੯੪. ਇਦਾਨਿ ਤਸ੍ਸਾ ਅਤ੍ਥਂ ਭਾਜੇਤ੍ਵਾ ਦਸ੍ਸੇਤੁਂ ਸਬ੍ਬਂ ਰੂਪਂ ਨ ਹੇਤੁਮੇਵਾਤਿਆਦਿ ਆਰਦ੍ਧਂ. ਕਸ੍ਮਾ ਪਨੇਤ੍ਥ ‘ਕਤਮਂ ਤਂ ਸਬ੍ਬਂ ਰੂਪਂ ਨ ਹੇਤੂ’ਤਿ ਪੁਚ੍ਛਾ ਨ ਕਤਾਤਿ? ਭੇਦਾਭਾਵਤੋ. ਯਥਾ ਹਿ ਦੁਕਾਦੀਸੁ ‘ਉਪਾਦਾਰੂਪ’ਮ੍ਪਿ ਅਤ੍ਥਿ ‘ਨੋਉਪਾਦਾਰੂਪ’ਮ੍ਪਿ, ਏਵਮਿਧ ਹੇਤੁ ਨ ਹੇਤੂਤਿਪਿ ਸਹੇਤੁਕਮਹੇਤੁਕਨ੍ਤਿਪਿ ਭੇਦੋ ਨਤ੍ਥਿ, ਤਸ੍ਮਾ ਪੁਚ੍ਛਂ ਅਕਤ੍ਵਾਵ ਵਿਭਤ੍ਤਂ. ਤਤ੍ਥ ‘ਸਬ੍ਬ’ਨ੍ਤਿ ਸਕਲਂ, ਨਿਰਵਸੇਸਂ. ‘ਰੂਪ’ਨ੍ਤਿ ਅਯਮਸ੍ਸ ਸੀਤਾਦੀਹਿ ਰੁਪ੍ਪਨਭਾਵਦੀਪਨੋ ਸਾਮਞ੍ਞਲਕ੍ਖਣਨਿਦ੍ਦੇਸੋ. ਨ ਹੇਤੁਮੇਵਾਤਿ ਸਾਧਾਰਣਹੇਤੁਪਟਿਕ੍ਖੇਪਨਿਦ੍ਦੇਸੋ.

ਤਤ੍ਥ ਹੇਤੁਹੇਤੁ ਪਚ੍ਚਯਹੇਤੁ ਉਤ੍ਤਮਹੇਤੁ ਸਾਧਾਰਣਹੇਤੂਤਿ ਚਤੁਬ੍ਬਿਧੋ ਹੇਤੁ. ਤੇਸੁ ‘ਤਯੋ ਕੁਸਲਹੇਤੂ, ਤਯੋ ਅਕੁਸਲਹੇਤੂ, ਤਯੋ ਅਬ੍ਯਾਕਤਹੇਤੂ’ਤਿ (ਧ. ਸ. ੧੦੫੯) ਅਯਂ ‘ਹੇਤੁਹੇਤੁ’ ਨਾਮ. ‘‘ਚਤ੍ਤਾਰੋ ਖੋ, ਭਿਕ੍ਖੁ, ਮਹਾਭੂਤਾ ਹੇਤੁ, ਚਤ੍ਤਾਰੋ ਮਹਾਭੂਤਾ ਪਚ੍ਚਯੋ ਰੂਪਕ੍ਖਨ੍ਧਸ੍ਸ ਪਞ੍ਞਾਪਨਾਯਾ’’ਤਿ (ਮ. ਨਿ. ੩.੮੫; ਸਂ. ਨਿ. ੩.੮੨) ਅਯਂ ‘ਪਚ੍ਚਯਹੇਤੁ’ ਨਾਮ. ‘‘ਕੁਸਲਾਕੁਸਲਂ ਅਤ੍ਤਨੋ ਵਿਪਾਕਟ੍ਠਾਨੇ, ਉਤ੍ਤਮਂ ਇਟ੍ਠਾਰਮ੍ਮਣਂ ਕੁਸਲਵਿਪਾਕਟ੍ਠਾਨੇ, ਉਤ੍ਤਮਂ ਅਨਿਟ੍ਠਾਰਮ੍ਮਣਂ ਅਕੁਸਲਵਿਪਾਕਟ੍ਠਾਨੇ’’ਤਿ ਅਯਂ ‘ਉਤ੍ਤਮਹੇਤੁ’ ਨਾਮ. ਯਥਾਹ – ‘ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਕਮ੍ਮਸਮਾਦਾਨਾਨਂ ਠਾਨਸੋ ਹੇਤੁਸੋ ਵਿਪਾਕਂ ਯਥਾਭੂਤਂ ਪਜਾਨਾਤੀ’ਤਿ (ਮ. ਨਿ. ੧.੧੪੮; ਵਿਭ. ੮੧੦; ਪਾਟਿ. ਮ. ੨.੪੪), ‘‘ਏਸੇਵ ਹੇਤੁ ਏਸ ਪਚ੍ਚਯੋ ਸਙ੍ਖਾਰਾਨਂ ਯਦਿਦਂ ਅਵਿਜ੍ਜਾ’’ਤਿ ਅਵਿਜ੍ਜਾ ਸਙ੍ਖਾਰਾਨਂ ਸਾਧਾਰਣਹੇਤੁ ਹੁਤ੍ਵਾ ਪਚ੍ਚਯਟ੍ਠਂ ਫਰਤੀਤਿ ਅਯਂ ‘ਸਾਧਾਰਣਹੇਤੁ’ ਨਾਮ. ਯਥਾ ਹਿ ਪਥਵੀਰਸੋ ਆਪੋਰਸੋ ਚ ਮਧੁਰਸ੍ਸਾਪਿ ਅਮਧੁਰਸ੍ਸਾਪਿ ਪਚ੍ਚਯੋ, ਏਵਂ ਅਵਿਜ੍ਜਾ ਕੁਸਲਸਙ੍ਖਾਰਾਨਮ੍ਪਿ ਅਕੁਸਲਸਙ੍ਖਾਰਾਨਮ੍ਪਿ ਸਾਧਾਰਣਪਚ੍ਚਯੋ ਹੋਤਿ. ਇਮਸ੍ਮਿਂ ਪਨਤ੍ਥੇ ‘ਹੇਤੁਹੇਤੁ’ ਅਧਿਪ੍ਪੇਤੋ. ਇਤਿ ‘ਹੇਤੂ ਧਮ੍ਮਾ ਨ ਹੇਤੂ ਧਮ੍ਮਾ’ਤਿ (ਧ. ਸ. ਦੁਕਮਾਤਿਕਾ ੧) ਮਾਤਿਕਾਯ ਆਗਤਂ ਹੇਤੁਭਾਵਂ ਰੂਪਸ੍ਸ ਨਿਯਮੇਤ੍ਵਾ ਪਟਿਕ੍ਖਿਪਨ੍ਤੋ ‘ਨ ਹੇਤੁਮੇਵਾ’ਤਿ ਆਹ. ਇਮਿਨਾ ਨਯੇਨ ਸਬ੍ਬਪਦੇਸੁ ਪਟਿਕ੍ਖੇਪਨਿਦ੍ਦੇਸੋ ਚ ਅਪ੍ਪਟਿਕ੍ਖੇਪਨਿਦ੍ਦੇਸੋ ਚ ਵੇਦਿਤਬ੍ਬੋ. ਵਚਨਤ੍ਥੋ ਪਨ ਸਬ੍ਬਪਦਾਨਂ ਮਾਤਿਕਾਵਣ੍ਣਨਾਯਂ ਵੁਤ੍ਤੋਯੇਵ.

ਸਪ੍ਪਚ੍ਚਯਮੇਵਾਤਿ ਏਤ੍ਥ ਪਨ ਕਮ੍ਮਸਮੁਟ੍ਠਾਨਂ ਕਮ੍ਮਪਚ੍ਚਯਮੇਵ ਹੋਤਿ, ਆਹਾਰਸਮੁਟ੍ਠਾਨਾਦੀਨਿ ਆਹਾਰਾਦਿਪਚ੍ਚਯਾਨੇਵਾਤਿ ਏਵਂ ਰੂਪਸ੍ਸੇਵ ਵੁਤ੍ਤਚਤੁਪਚ੍ਚਯਵਸੇਨ ਅਤ੍ਥੋ ਵੇਦਿਤਬ੍ਬੋ. ਰੂਪਮੇਵਾਤਿ ‘ਰੂਪਿਨੋ ਧਮ੍ਮਾ ਅਰੂਪਿਨੋ ਧਮ੍ਮਾ’ਤਿ ਮਾਤਿਕਾਯ ਵੁਤ੍ਤਂ ਅਰੂਪੀਭਾਵਂ ਪਟਿਕ੍ਖਿਪਤਿ. ਉਪ੍ਪਨ੍ਨਂ ਛਹਿ ਵਿਞ੍ਞਾਣੇਹੀਤਿ ਪਚ੍ਚੁਪ੍ਪਨ੍ਨਰੂਪਮੇਵ ਚਕ੍ਖੁਵਿਞ੍ਞਾਣਾਦੀਹਿ ਛਹਿ ਵੇਦਿਤਬ੍ਬਂ. ਨਿਯਾਮੋ ਪਨ ਚਕ੍ਖੁਵਿਞ੍ਞਾਣਾਦੀਨਿ ਸਨ੍ਧਾਯ ਗਹਿਤੋ. ਨ ਹਿ ਤਾਨਿ ਅਤੀਤਾਨਾਗਤਂ ਵਿਜਾਨਨ੍ਤਿ. ਮਨੋਵਿਞ੍ਞਾਣਂ ਪਨ ਅਤੀਤਮ੍ਪਿ ਅਨਾਗਤਮ੍ਪਿ ਵਿਜਾਨਾਤਿ. ਤਂ ਇਮਸ੍ਮਿਂ ਪਞ੍ਚਵਿਞ੍ਞਾਣਸੋਤੇ ਪਤਿਤਤ੍ਤਾ ਸੋਤਪਤਿਤਮੇਵ ਹੁਤ੍ਵਾ ਗਤਂ. ਹੁਤ੍ਵਾ ਅਭਾਵਟ੍ਠੇਨ ਪਨ ਅਨਿਚ੍ਚਮੇਵ. ਜਰਾਯ ਅਭਿਭਵਿਤਬ੍ਬਧਮ੍ਮਕਤ੍ਤਾ ਜਰਾਭਿਭੂਤਮੇਵ. ਯਸ੍ਮਾ ਵਾ ਰੂਪਕਾਯੇ ਜਰਾ ਪਾਕਟਾ ਹੋਤਿ, ਤਸ੍ਮਾਪਿ ‘ਜਰਾਭਿਭੂਤਮੇਵਾ’ਤਿ ਵੁਤ੍ਤਂ.

ਏਵਂ ਏਕਵਿਧੇਨ ਰੂਪਸਙ੍ਗਹੋਤਿ ਏਤ੍ਥ ‘ਵਿਧਾ’-ਸਦ੍ਦੋ ਮਾਨਸਣ੍ਠਾਨਕੋਟ੍ਠਾਸੇਸੁ ਦਿਸ੍ਸਤਿ. ‘‘ਸੇਯ੍ਯੋਹਮਸ੍ਮੀਤਿ ਵਿਧਾ, ਸਦਿਸੋਹਮਸ੍ਮੀਤਿ ਵਿਧਾ’’ਤਿਆਦੀਸੁ (ਵਿਭ. ੯੬੨) ਹਿ ਮਾਨੋ ਵਿਧਾ ਨਾਮ. ‘‘ਕਥਂਵਿਧਂ ਸੀਲਵਨ੍ਤਂ ਵਦਨ੍ਤਿ, ਕਥਂਵਿਧਂ ਪਞ੍ਞਵਨ੍ਤਂ ਵਦਨ੍ਤੀ’’ਤਿਆਦੀਸੁ (ਸਂ. ਨਿ. ੧.੯੫) ਸਣ੍ਠਾਨਂ. ‘ਕਥਂਵਿਧ’ਨ੍ਤਿ ਹਿ ਪਦਸ੍ਸ ਕਥਂਸਣ੍ਠਾਨਨ੍ਤਿ ਅਤ੍ਥੋ. ‘‘ਏਕਵਿਧੇਨ ਞਾਣਵਤ੍ਥੁਂ ਦੁਵਿਧੇਨ ਞਾਣਵਤ੍ਥੂ’’ਤਿਆਦੀਸੁ (ਵਿਭ. ੭੫੧-੭੫੨) ਕੋਟ੍ਠਾਸੋ ਵਿਧਾ ਨਾਮ. ਇਧਾਪਿ ਕੋਟ੍ਠਾਸੋਵ ਅਧਿਪ੍ਪੇਤੋ.

ਸਙ੍ਗਹਸਦ੍ਦੋਪਿ ਸਜਾਤਿਸਞ੍ਜਾਤਿਕਿਰਿਯਾਗਣਨਵਸੇਨ ਚਤੁਬ੍ਬਿਧੋ. ਤਤ੍ਥ ‘‘ਸਬ੍ਬੇ ਖਤ੍ਤਿਯਾ ਆਗਚ੍ਛਨ੍ਤੁ, ਸਬ੍ਬੇ ਬ੍ਰਾਹ੍ਮਣਾ ਸਬ੍ਬੇ ਵੇਸ੍ਸਾ ਸਬ੍ਬੇ ਸੁਦ੍ਦਾ ਆਗਚ੍ਛਨ੍ਤੁ’’, ‘‘ਯਾ ਚਾਵੁਸੋ ਵਿਸਾਖ, ਸਮ੍ਮਾਵਾਚਾ, ਯੋ ਚ ਸਮ੍ਮਾਕਮ੍ਮਨ੍ਤੋ, ਯੋ ਚ ਸਮ੍ਮਾਆਜੀਵੋ – ਇਮੇ ਧਮ੍ਮਾ ਸੀਲਕ੍ਖਨ੍ਧੇ ਸਙ੍ਗਹਿਤਾ’’ਤਿ (ਮ. ਨਿ. ੧.੪੬੨) ਅਯਂ ‘ਸਜਾਤਿਸਙ੍ਗਹੋ’ ਨਾਮ. ‘ਏਕਜਾਤਿਕਾ ਆਗਚ੍ਛਨ੍ਤੂ’ਤਿ ਵੁਤ੍ਤਟ੍ਠਾਨੇ ਵਿਯ ਹਿ ਇਧ ਸਬ੍ਬੇ ਜਾਤਿਯਾ ਏਕਸਙ੍ਗਹਂ ਗਤਾ. ‘‘ਸਬ੍ਬੇ ਕੋਸਲਕਾ ਆਗਚ੍ਛਨ੍ਤੁ, ਸਬ੍ਬੇ ਮਾਗਧਕਾ, ਸਬ੍ਬੇ ਭਾਰੁਕਚ੍ਛਕਾ ਆਗਚ੍ਛਨ੍ਤੁ’’, ‘‘ਯੋ ਚਾਵੁਸੋ ਵਿਸਾਖ, ਸਮ੍ਮਾਵਾਯਾਮੋ, ਯਾ ਚ ਸਮ੍ਮਾਸਤਿ, ਯੋ ਚ ਸਮ੍ਮਾਸਮਾਧਿ – ਇਮੇ ਧਮ੍ਮਾ ਸਮਾਧਿਕ੍ਖਨ੍ਧੇ ਸਙ੍ਗਹਿਤਾ’’ਤਿ ਅਯਂ ‘ਸਞ੍ਜਾਤਿਸਙ੍ਗਹੋ’ ਨਾਮ. ਏਕਟ੍ਠਾਨੇ ਜਾਤਾ ਸਂਵੁਦ੍ਧਾ ਆਗਚ੍ਛਨ੍ਤੂਤਿ ਵੁਤ੍ਤਟ੍ਠਾਨੇ ਵਿਯ ਹਿ ਇਧ ਸਬ੍ਬੇ ਸਞ੍ਜਾਤਿਟ੍ਠਾਨੇਨ ਨਿਵੁਤ੍ਥੋਕਾਸੇਨ ਏਕਸਙ੍ਗਹਂ ਗਤਾ. ‘‘ਸਬ੍ਬੇ ਹਤ੍ਥਾਰੋਹਾ ਆਗਚ੍ਛਨ੍ਤੁ, ਸਬ੍ਬੇ ਅਸ੍ਸਾਰੋਹਾ, ਸਬ੍ਬੇ ਰਥਿਕਾ ਆਗਚ੍ਛਨ੍ਤੁ’’, ‘‘ਯਾ ਚਾਵੁਸੋ ਵਿਸਾਖ, ਸਮ੍ਮਾਦਿਟ੍ਠਿ, ਯੋ ਚ ਸਮ੍ਮਾਸਙ੍ਕਪ੍ਪੋ – ਇਮੇ ਧਮ੍ਮਾ ਪਞ੍ਞਾਕ੍ਖਨ੍ਧੇ ਸਙ੍ਗਹਿਤਾ’’ਤਿ (ਮ. ਨਿ. ੧.੪੬੨) ਅਯਂ ‘ਕਿਰਿਯਾਸਙ੍ਗਹੋ’ ਨਾਮ. ਸਬ੍ਬੇਵ ਹੇਤੇ ਅਤ੍ਤਨੋ ਕਿਰਿਯਾਕਰਣੇਨ ਏਕਸਙ੍ਗਹਂ ਗਤਾ. ‘‘ਚਕ੍ਖਾਯਤਨਂ ਕਤਮਕ੍ਖਨ੍ਧਗਣਨਂ ਗਚ੍ਛਤਿ? ਚਕ੍ਖਾਯਤਨਂ ਰੂਪਕ੍ਖਨ੍ਧਗਣਨਂ ਗਚ੍ਛਤਿ. ਹਞ੍ਚਿ ਚਕ੍ਖਾਯਤਨਂ ਰੂਪਕ੍ਖਨ੍ਧਗਣਨਂ ਗਚ੍ਛਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ਚਕ੍ਖਾਯਤਨਂ ਰੂਪਕ੍ਖਨ੍ਧੇਨ ਸਙ੍ਗਹਿਤ’’ਨ੍ਤਿ (ਕਥਾ. ੪੭੧), ਅਯਂ ‘ਗਣਨਸਙ੍ਗਹੋ’ ਨਾਮ. ਅਯਮਿਧ ਅਧਿਪ੍ਪੇਤੋ. ਏਕਕੋਟ੍ਠਾਸੇਨ ਰੂਪਗਣਨਾਤਿ ਅਯਞ੍ਹੇਤ੍ਥ ਅਤ੍ਥੋ. ਏਸ ਨਯੋ ਸਬ੍ਬਤ੍ਥ.

ਦੁਕਨਿਦ੍ਦੇਸਵਣ੍ਣਨਾ

ਉਪਾਦਾਭਾਜਨੀਯਕਥਾ

੫੯੫. ਇਦਾਨਿ ਦੁਵਿਧਸਙ੍ਗਹਾਦੀਸੁ ‘ਅਤ੍ਥਿ ਰੂਪਂ ਉਪਾਦਾ, ਅਤ੍ਥਿ ਰੂਪਂ ਨੋਉਪਾਦਾ’ਤਿ ਏਵਂ ਭੇਦਸਬ੍ਭਾਵਤੋ ਪੁਚ੍ਛਾਪੁਬ੍ਬਙ੍ਗਮਂ ਪਦਭਾਜਨਂ ਦਸ੍ਸੇਨ੍ਤੋ ਕਤਮਂ ਤਂ ਰੂਪਂ ਉਪਾਦਾਤਿਆਦਿਮਾਹ. ਤਤ੍ਥ ਉਪਾਦਿਯਤੀਤਿ ‘ਉਪਾਦਾ’; ਮਹਾਭੂਤਾਨਿ ਗਹੇਤ੍ਵਾ, ਅਮੁਞ੍ਚਿਤ੍ਵਾ, ਤਾਨਿ ਨਿਸ੍ਸਾਯ ਪਵਤ੍ਤਤੀਤਿ ਅਤ੍ਥੋ. ਇਦਾਨਿ ਤਂ ਪਭੇਦਤੋ ਦਸ੍ਸੇਨ੍ਤੋ ਚਕ੍ਖਾਯਤਨਨ੍ਤਿਆਦਿਮਾਹ.

੫੯੬. ਏਵਂ ਤੇਵੀਸਤਿਵਿਧਂ ਉਪਾਦਾਰੂਪਂ ਸਙ੍ਖੇਪਤੋ ਉਦ੍ਦਿਸਿਤ੍ਵਾ ਪੁਨ ਤਦੇਵ ਵਿਤ੍ਥਾਰਤੋ ਨਿਦ੍ਦਿਸਨ੍ਤੋ ਕਤਮਂ ਤਂ ਰੂਪਂ ਚਕ੍ਖਾਯਤਨਨ੍ਤਿਆਦਿਮਾਹ. ਤਤ੍ਥ ਦੁਵਿਧਂ ਚਕ੍ਖੁ – ਮਂਸਚਕ੍ਖੁ ਪਞ੍ਞਾਚਕ੍ਖੁ ਚ. ਏਤੇਸੁ ‘ਬੁਦ੍ਧਚਕ੍ਖੁ ਸਮਨ੍ਤਚਕ੍ਖੁ ਞਾਣਚਕ੍ਖੁ ਦਿਬ੍ਬਚਕ੍ਖੁ ਧਮ੍ਮਚਕ੍ਖੂ’ਤਿ ਪਞ੍ਚਵਿਧਂ ਪਞ੍ਞਾਚਕ੍ਖੁ. ਤਤ੍ਥ ‘‘ਅਦ੍ਦਸਂ ਖੋ ਅਹਂ, ਭਿਕ੍ਖਵੇ, ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਸਤ੍ਤੇ ਅਪ੍ਪਰਜਕ੍ਖੇ…ਪੇ… ਦੁਵਿਞ੍ਞਾਪਯੇ’’ਤਿ (ਮ. ਨਿ. ੧.੨੮੩) ਇਦਂ ਬੁਦ੍ਧਚਕ੍ਖੁ ਨਾਮ. ‘‘ਸਮਨ੍ਤਚਕ੍ਖੁ ਵੁਚ੍ਚਤਿ ਸਬ੍ਬਞ੍ਞੁਤਞ੍ਞਾਣ’’ਨ੍ਤਿ ਇਦਂ ਸਮਨ੍ਤਚਕ੍ਖੁ ਨਾਮ. ‘‘ਚਕ੍ਖੁਂ ਉਦਪਾਦਿ ਞਾਣਂ ਉਦਪਾਦੀ’’ਤਿ (ਸਂ. ਨਿ. ੫.੧੦੮੧; ਮਹਾਵ. ੧੫) ਇਦਂ ਞਾਣਚਕ੍ਖੁ ਨਾਮ. ‘‘ਅਦ੍ਦਸਂ ਖੋ ਅਹਂ, ਭਿਕ੍ਖਵੇ, ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨਾ’’ਤਿ (ਮ. ਨਿ. ੧.੨੮੪) ਇਦਂ ਦਿਬ੍ਬਚਕ੍ਖੁ ਨਾਮ. ‘‘ਤਸ੍ਮਿਂ ਯੇਵਾਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦੀ’’ਤਿ (ਮ. ਨਿ. ੨.੩੯੫) ਇਦਂ ਹੇਟ੍ਠਿਮਮਗ੍ਗਤ੍ਤਯਸਙ੍ਖਾਤਂ ਞਾਣਂ ਧਮ੍ਮਚਕ੍ਖੁ ਨਾਮ.

ਮਂਸਚਕ੍ਖੁਪਿ ਪਸਾਦਚਕ੍ਖੁ ਸਸਮ੍ਭਾਰਚਕ੍ਖੂਤਿ ਦੁਵਿਧਂ ਹੋਤਿ. ਤਤ੍ਥ ਯੋਯਂ ਅਕ੍ਖਿਕੂਪਕੇ ਪਤਿਟ੍ਠਿਤੋ ਹੇਟ੍ਠਾ ਅਕ੍ਖਿਕੂਪਕਟ੍ਠਿਕੇਨ, ਉਪਰਿ ਭਮੁਕਟ੍ਠਿਕੇਨ, ਉਭਤੋ ਅਕ੍ਖਿਕੂਟੇਹਿ, ਅਨ੍ਤੋ ਮਤ੍ਥਲੁਙ੍ਗੇਨ, ਬਹਿਦ੍ਧਾ ਅਕ੍ਖਿਲੋਮੇਹਿ ਪਰਿਚ੍ਛਿਨ੍ਨੋ ਮਂਸਪਿਣ੍ਡੋ. ਸਙ੍ਖੇਪਤੋ ‘ਚਤਸ੍ਸੋ ਧਾਤੁਯੋ, ਵਣ੍ਣੋ ਗਨ੍ਧੋ ਰਸੋ ਓਜਾ, ਸਮ੍ਭਵੋ ਸਣ੍ਠਾਨਂ, ਜੀਵਿਤਂ ਭਾਵੋ ਕਾਯਪਸਾਦੋ ਚਕ੍ਖੁਪਸਾਦੋ’ਤਿ ਚੁਦ੍ਦਸਸਮ੍ਭਾਰੋ. ਵਿਤ੍ਥਾਰਤੋ ‘ਚਤਸ੍ਸੋ ਧਾਤੁਯੋ, ਤਂਸਨ੍ਨਿਸ੍ਸਿਤਵਣ੍ਣਗਨ੍ਧਰਸਓਜਾਸਣ੍ਠਾਨਸਮ੍ਭਵਾ ਚਾ’ਤਿ ਇਮਾਨਿ ਦਸ ਚਤੁਸਮੁਟ੍ਠਾਨਿਕਤ੍ਤਾ ਚਤ੍ਤਾਲੀਸਂ ਹੋਨ੍ਤਿ. ਜੀਵਿਤਂ ਭਾਵੋ ਕਾਯਪਸਾਦੋ ਚਕ੍ਖੁਪਸਾਦੋਤਿ ਚਤ੍ਤਾਰਿ ਏਕਨ੍ਤਕਮ੍ਮਸਮੁਟ੍ਠਾਨਾਨੇਵਾਤਿ ਇਮੇਸਂ ਚਤੁਚਤ੍ਤਾਲੀਸਾਯ ਰੂਪਾਨਂ ਵਸੇਨ ਚਤੁਚਤ੍ਤਾਲੀਸਸਮ੍ਭਾਰੋ. ਯਂ ਲੋਕੋ ਸੇਤਂ ਚਕ੍ਖੁਂ ਪੁਥੁਲਂ ਵਿਸਟਂ ਵਿਤ੍ਥਿਣ੍ਣਂ ‘ਚਕ੍ਖੁ’ਨ੍ਤਿ ਸਞ੍ਜਾਨਨ੍ਤੋ ਨ ਚਕ੍ਖੁਂ ਸਞ੍ਜਾਨਾਤਿ, ਵਤ੍ਥੁਂ ਚਕ੍ਖੁਤੋ ਸਞ੍ਜਾਨਾਤਿ, ਸੋ ਮਂਸਪਿਣ੍ਡੋ ਅਕ੍ਖਿਕੂਪੇ ਪਤਿਟ੍ਠਿਤੋ, ਨ੍ਹਾਰੁਸੁਤ੍ਤਕੇਨ ਮਤ੍ਥਲੁਙ੍ਗੇ ਆਬਦ੍ਧੋ, ਯਤ੍ਥ ਸੇਤਮ੍ਪਿ ਅਤ੍ਥਿ, ਕਣ੍ਹਮ੍ਪਿ ਲੋਹਿਤਕਮ੍ਪਿ, ਪਥਵੀਪਿ ਆਪੋਪਿ ਤੇਜੋਪਿ ਵਾਯੋਪਿ, ਯਂ ਸੇਮ੍ਹੂਸ੍ਸਦਤ੍ਤਾ ਸੇਤਂ, ਪਿਤ੍ਤੁਸ੍ਸਦਤ੍ਤਾ ਕਣ੍ਹਂ, ਰੁਹਿਰੁਸ੍ਸਦਤ੍ਤਾ ਲੋਹਿਤਕਂ, ਪਥਵੁਸ੍ਸਦਤ੍ਤਾ ਪਤ੍ਥਿਣ੍ਣਂ ਹੋਤਿ, ਆਪੁਸ੍ਸਦਤ੍ਤਾ ਪਗ੍ਘਰਤਿ, ਤੇਜੁਸ੍ਸਦਤ੍ਤਾ ਪਰਿਦਯ੍ਹਤਿ, ਵਾਯੁਸ੍ਸਦਤ੍ਤਾ ਸਮ੍ਭਮਤਿ, ਇਦਂ ਸਸਮ੍ਭਾਰਚਕ੍ਖੁ ਨਾਮ.

ਯੋ ਪਨੇਤ੍ਥ ਸਿਤੋ ਏਤ੍ਥ ਪਟਿਬਦ੍ਧੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ, ਇਦਂ ਪਸਾਦਚਕ੍ਖੁ ਨਾਮ. ਤਦੇਤਂ ਤਸ੍ਸ ਸਸਮ੍ਭਾਰਚਕ੍ਖੁਨੋ ਸੇਤਮਣ੍ਡਲਪਰਿਕ੍ਖਿਤ੍ਤਸ੍ਸ ਕਣ੍ਹਮਣ੍ਡਲਸ੍ਸ ਮਜ੍ਝੇ, ਅਭਿਮੁਖੇ ਠਿਤਾਨਂ ਸਰੀਰਸਣ੍ਠਾਨੁਪ੍ਪਤ੍ਤਿਦੇਸਭੂਤੇ ਦਿਟ੍ਠਿਮਣ੍ਡਲੇ, ਸਤ੍ਤਸੁ ਪਿਚੁਪਟਲੇਸੁ ਆਸਿਤ੍ਤਤੇਲਂ ਪਿਚੁਪਟਲਾਨਿ ਵਿਯ, ਸਤ੍ਤਕ੍ਖਿਪਟਲਾਨਿ ਬ੍ਯਾਪੇਤ੍ਵਾ, ਧਾਰਣਨ੍ਹਾਪਨਮਣ੍ਡਨਬੀਜਨਕਿਚ੍ਚਾਹਿ ਚਤੂਹਿ ਧਾਤੀਹਿ ਖਤ੍ਤਿਯਕੁਮਾਰੋ ਵਿਯ, ਸਨ੍ਧਾਰਣਆਬਨ੍ਧਨਪਰਿਪਾਚਨਸਮੁਦੀਰਣਕਿਚ੍ਚਾਹਿ ਚਤੂਹਿ ਧਾਤੂਹਿ ਕਤੂਪਕਾਰਂ, ਉਤੁਚਿਤ੍ਤਾਹਾਰੇਹਿ ਉਪਤ੍ਥਮ੍ਭਿਯਮਾਨਂ, ਆਯੁਨਾ ਅਨੁਪਾਲਿਯਮਾਨਂ, ਵਣ੍ਣਗਨ੍ਧਰਸਾਦੀਹਿ ਪਰਿਵੁਤਂ, ਪਮਾਣਤੋ ਊਕਾਸਿਰਮਤ੍ਤਂ, ਚਕ੍ਖੁਵਿਞ੍ਞਾਣਾਦੀਨਂ ਯਥਾਰਹਂ ਵਤ੍ਥੁਦ੍ਵਾਰਭਾਵਂ ਸਾਧਯਮਾਨਂ ਤਿਟ੍ਠਤਿ. ਵੁਤ੍ਤਮ੍ਪਿ ਚੇਤਂ ਧਮ੍ਮਸੇਨਾਪਤਿਨਾ –

‘‘ਯੇਨ ਚਕ੍ਖੁਪ੍ਪਸਾਦੇਨ, ਰੂਪਾਨਿ ਮਨੁਪਸ੍ਸਤਿ;

ਪਰਿਤ੍ਤਂ ਸੁਖੁਮਂ ਏਤਂ, ਊਕਾਸਿਰਸਮੂਪਮ’’ਨ੍ਤਿ.

ਚਕ੍ਖੁ ਚ ਤਂ ਆਯਤਨਞ੍ਚਾਤਿ ਚਕ੍ਖਾਯਤਨਂ. ਯਂ ਚਕ੍ਖੁ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋਤਿ ਇਧਾਪਿ ਉਪਯੋਗਤ੍ਥੇਯੇਵ ਸਾਮਿਵਚਨਂ; ਚਤ੍ਤਾਰਿ ਮਹਾਭੂਤਾਨਿ ਉਪਾਦਿਯਿਤ੍ਵਾ ਪਵਤ੍ਤਪ੍ਪਸਾਦੋਤਿ ਅਤ੍ਥੋ. ਇਮਿਨਾ ਪਸਾਦਚਕ੍ਖੁਮੇਵ ਗਣ੍ਹਾਤਿ, ਸੇਸਚਕ੍ਖੁਂ ਪਟਿਕ੍ਖਿਪਤਿ. ਯਂ ਪਨ ਇਨ੍ਦ੍ਰਿਯਗੋਚਰਸੁਤ੍ਤੇ ‘‘ਏਕਂ ਮਹਾਭੂਤਂ ਉਪਾਦਾਯ ਪਸਾਦੋ ਪਥਵੀਧਾਤੁਯਾ ਤੀਹਿ ਮਹਾਭੂਤੇਹਿ ਸਙ੍ਗਹਿਤੋ ਆਪੋਧਾਤੁਯਾ ਚ ਤੇਜੋਧਾਤੁਯਾ ਚ ਵਾਯੋਧਾਤੁਯਾ ਚ,’’ ਚਤੁਪਰਿਵਤ੍ਤਸੁਤ੍ਤੇ ‘‘ਦ੍ਵਿਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ ਪਥਵੀਧਾਤੁਯਾ ਚ ਆਪੋਧਾਤੁਯਾ ਚ ਦ੍ਵੀਹਿ ਮਹਾਭੂਤੇਹਿ ਸਙ੍ਗਹਿਤੋ ਤੇਜੋਧਾਤੁਯਾ ਚ ਵਾਯੋਧਾਤੁਯਾ ਚਾ’’ਤਿ ਵੁਤ੍ਤਂ, ਤਂ ਪਰਿਯਾਯੇਨ ਵੁਤ੍ਤਂ. ਅਯਞ੍ਹਿ ਸੁਤ੍ਤਨ੍ਤਿਕਕਥਾ ਨਾਮ ਪਰਿਯਾਯਦੇਸਨਾ. ਯੋ ਚ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ ਸੋ ਤੇਸੁ ਏਕੇਕਸ੍ਸਾਪਿ ਦਿਨ੍ਨਂ ਦ੍ਵਿਨ੍ਨਮ੍ਪਿ ਪਸਾਦੋਯੇਵਾਤਿ ਇਮਿਨਾ ਪਰਿਯਾਯੇਨ ਤਤ੍ਥ ਦੇਸਨਾ ਆਗਤਾ. ਅਭਿਧਮ੍ਮੋ ਪਨ ਨਿਪ੍ਪਰਿਯਾਯਦੇਸਨਾ ਨਾਮ. ਤਸ੍ਮਾ ਇਧ ‘ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ’ਤਿ ਵੁਤ੍ਤਂ.

‘ਅਯਂ ਮੇ ਅਤ੍ਤਾ’ਤਿ ਬਾਲਜਨੇਨ ਪਰਿਗ੍ਗਹਿਤਤ੍ਤਾ ਅਤ੍ਤਭਾਵੋ ਵੁਚ੍ਚਤਿ ਸਰੀਰਮ੍ਪਿ ਖਨ੍ਧਪਞ੍ਚਕਮ੍ਪਿ. ਤਸ੍ਮਿਂ ਪਰਿਯਾਪਨ੍ਨੋ ਤਨ੍ਨਿਸ੍ਸਿਤੋਤਿ ਅਤ੍ਤਭਾਵਪਰਿਯਾਪਨ੍ਨੋ ਚਕ੍ਖੁਵਿਞ੍ਞਾਣੇਨ ਪਸ੍ਸਿਤੁਂ ਨ ਸਕ੍ਕਾਤਿ ਅਨਿਦਸ੍ਸਨੋ. ਪਟਿਘਟ੍ਟਨਾਨਿਘਂਸੋ ਏਤ੍ਥ ਜਾਯਤੀਤਿ ਸਪ੍ਪਟਿਘੋ.

ਯੇਨਾਤਿਆਦੀਸੁ ਅਯਂ ਸਙ੍ਖੇਪਤ੍ਥੋ – ਯੇਨ ਕਰਣਭੂਤੇਨ ਚਕ੍ਖੁਨਾ ਅਯਂ ਸਤ੍ਤੋ ਇਦਂ ਵੁਤ੍ਤਪ੍ਪਕਾਰਂ ਰੂਪਂ ਅਤੀਤੇ ਪਸ੍ਸਿ ਵਾ, ਵਤ੍ਤਮਾਨੇ ਪਸ੍ਸਤਿ ਵਾ, ਅਨਾਗਤੇ ਪਸ੍ਸਿਸ੍ਸਤਿ ਵਾ, ਸਚਸ੍ਸ ਅਪਰਿਭਿਨ੍ਨਂ ਚਕ੍ਖੁ ਭਵੇਯ੍ਯ, ਅਥਾਨੇਨ ਆਪਾਥਗਤਂ ਰੂਪਂ ਪਸ੍ਸੇ ਵਾ, ਅਤੀਤਂ ਵਾ ਰੂਪਂ ਅਤੀਤੇਨ ਚਕ੍ਖੁਨਾ ਪਸ੍ਸਿ, ਪਚ੍ਚੁਪ੍ਪਨ੍ਨਂ ਪਚ੍ਚੁਪ੍ਪਨ੍ਨੇਨ ਪਸ੍ਸਤਿ, ਅਨਾਗਤਂ ਅਨਾਗਤੇਨ ਪਸ੍ਸਿਸ੍ਸਤਿ, ਸਚੇ ਤਂ ਰੂਪਂ ਚਕ੍ਖੁਸ੍ਸ ਆਪਾਥਂ ਆਗਚ੍ਛੇਯ੍ਯ ਚਕ੍ਖੁਨਾ ਤਂ ਰੂਪਂ ਪਸ੍ਸੇਯ੍ਯਾਤਿ ਇਦਮੇਤ੍ਥ ਪਰਿਕਪ੍ਪਵਚਨਂ. ਦਸ੍ਸਨਪਰਿਣਾਯਕਟ੍ਠੇਨ ਚਕ੍ਖੁਂਪੇਤਂ, ਸਞ੍ਜਾਤਿਸਮੋਸਰਣਟ੍ਠੇਨ ਚਕ੍ਖਾਯਤਨਂਪੇਤਂ, ਸੁਞ੍ਞਤਭਾਵਨਿਸ੍ਸਤ੍ਤਟ੍ਠੇਨ ਚਕ੍ਖੁਧਾਤੁਪੇਸਾ. ਦਸ੍ਸਨਲਕ੍ਖਣੇ ਇਨ੍ਦਟ੍ਠਂ ਕਾਰੇਤੀਤਿ ਚਕ੍ਖੁਨ੍ਦ੍ਰਿਯਂਪੇਤਂ. ਲੁਜ੍ਜਨਪਲੁਜ੍ਜਨਟ੍ਠੇਨ ਲੋਕੋਪੇਸੋ. ਵਲ਼ਞ੍ਜਨਟ੍ਠੇਨ ਦ੍ਵਾਰਾਪੇਸਾ. ਅਪੂਰਣੀਯਟ੍ਠੇਨ ਸਮੁਦ੍ਦੋਪੇਸੋ. ਪਰਿਸੁਦ੍ਧਟ੍ਠੇਨ ਪਣ੍ਡਰਂਪੇਤਂ. ਫਸ੍ਸਾਦੀਨਂ ਅਭਿਜਾਯਨਟ੍ਠੇਨ ਖੇਤ੍ਤਂਪੇਤਂ. ਤੇਸਂਯੇਵ ਪਤਿਟ੍ਠਾਨਟ੍ਠੇਨ ਵਤ੍ਥੁਂਪੇਤਂ. ਸਮਵਿਸਮਂ ਦਸ੍ਸੇਨ੍ਤਂ ਅਤ੍ਤਭਾਵਂ ਨੇਤੀਤਿ ਨੇਤ੍ਤਂਪੇਤਂ. ਤੇਨੇਵਟ੍ਠੇਨ ਨਯਨਂਪੇਤਂ. ਸਕ੍ਕਾਯਪਰਿਯਾਪਨ੍ਨਟ੍ਠੇਨ ਓਰਿਮਂ ਤੀਰਂਪੇਤਂ. ਬਹੁਸਾਧਾਰਣਟ੍ਠੇਨ ਅਸ੍ਸਾਮਿਕਟ੍ਠੇਨ ਚ ਸੁਞ੍ਞੋ ਗਾਮੋਪੇਸੋਤਿ.

ਏਤ੍ਤਾਵਤਾ ‘ਪਸ੍ਸਿ ਵਾ’ਤਿਆਦੀਹਿ ਚਤੂਹਿ ਪਦੇਹਿ ਚਕ੍ਖੁਂਪੇਤਨ੍ਤਿਆਦੀਨਿ ਚੁਦ੍ਦਸ ਨਾਮਾਨਿ ਯੋਜੇਤ੍ਵਾ ਚਕ੍ਖਾਯਤਨਸ੍ਸ ਚਤ੍ਤਾਰੋ ਵਵਤ੍ਥਾਪਨਨਯਾ ਵੁਤ੍ਤਾਤਿ ਵੇਦਿਤਬ੍ਬਾ. ਕਥਂ? ਏਤ੍ਥ ਹਿ ਯੇਨ ਚਕ੍ਖੁਨਾ ਅਨਿਦਸ੍ਸਨੇਨ ਸਪ੍ਪਟਿਘੇਨ ਰੂਪਂ ਸਨਿਦਸ੍ਸਨਂ ਸਪ੍ਪਟਿਘਂ ਪਸ੍ਸਿ ਵਾ ਚਕ੍ਖੁਂਪੇਤਂ…ਪੇ… ਸੁਞ੍ਞੋ ਗਾਮੋਪੇਸੋ, ਇਦਂ ਤਂ ਰੂਪਂ ਚਕ੍ਖਾਯਤਨਨ੍ਤਿ ਅਯਮੇਕੋ ਨਯੋ. ਏਵਂ ਸੇਸਾਪਿ ਵੇਦਿਤਬ੍ਬਾ.

੫੯੭. ਇਦਾਨਿ ਯਸ੍ਮਾ ਵਿਜ੍ਜੁਨਿਚ੍ਛਰਣਾਦਿਕਾਲੇਸੁ ਅਨੋਲੋਕੇਤੁਕਾਮਸ੍ਸਾਪਿ ਰੂਪਂ ਚਕ੍ਖੁਪਸਾਦਂ ਘਟ੍ਟੇਤਿ, ਤਸ੍ਮਾ ਤਂ ਆਕਾਰਂ ਦਸ੍ਸੇਤੁਂ ਦੁਤਿਯੋ ਨਿਦ੍ਦੇਸਵਾਰੋ ਆਰਦ੍ਧੋ. ਤਤ੍ਥ ਯਮ੍ਹਿ ਚਕ੍ਖੁਮ੍ਹੀਤਿ ਯਮ੍ਹਿ ਅਧਿਕਰਣਭੂਤੇ ਚਕ੍ਖੁਮ੍ਹਿ. ਰੂਪਨ੍ਤਿ ਪਚ੍ਚਤ੍ਤਵਚਨਮੇਤਂ. ਤਤ੍ਥ ਪਟਿਹਞ੍ਞਿ ਵਾਤਿ ਅਤੀਤਤ੍ਥੋ. ਪਟਿਹਞ੍ਞਤਿ ਵਾਤਿ ਪਚ੍ਚੁਪ੍ਪਨ੍ਨਤ੍ਥੋ. ਪਟਿਹਞ੍ਞਿਸ੍ਸਤਿ ਵਾਤਿ ਅਨਾਗਤਤ੍ਥੋ. ਪਟਿਹਞ੍ਞੇ ਵਾਤਿ ਵਿਕਪ੍ਪਨਤ੍ਥੋ. ਅਤੀਤਞ੍ਹਿ ਰੂਪਂ ਅਤੀਤੇ ਚਕ੍ਖੁਸ੍ਮਿਂ ਪਟਿਹਞ੍ਞਿ ਨਾਮ. ਪਚ੍ਚੁਪ੍ਪਨ੍ਨਂ ਪਚ੍ਚੁਪ੍ਪਨ੍ਨੇ ਪਟਿਹਞ੍ਞਤਿ ਨਾਮ. ਅਨਾਗਤਂ ਅਨਾਗਤੇ ਪਟਿਹਞ੍ਞਿਸ੍ਸਤਿ ਨਾਮ. ਸਚੇ ਤਂ ਰੂਪਂ ਚਕ੍ਖੁਸ੍ਸ ਆਪਾਥਂ ਆਗਚ੍ਛੇਯ੍ਯ, ਚਕ੍ਖੁਮ੍ਹਿ ਪਟਿਹਞ੍ਞੇਯ੍ਯ ਤਂ ਰੂਪਨ੍ਤਿ ਅਯਮੇਤ੍ਥ ਪਰਿਕਪ੍ਪੋ. ਅਤ੍ਥਤੋ ਪਨ ਪਸਾਦਂ ਘਟ੍ਟਯਮਾਨਮੇਵ ਰੂਪਂ ਪਟਿਹਞ੍ਞਤਿ ਨਾਮ. ਇਧਾਪਿ ਪੁਰਿਮਨਯੇਨੇਵ ਚਤ੍ਤਾਰੋ ਵਵਤ੍ਥਾਪਨਨਯਾ ਵੇਦਿਤਬ੍ਬਾ.

੫੯੮. ਇਦਾਨਿ ਯਸ੍ਮਾ ਅਤ੍ਤਨੋ ਇਚ੍ਛਾਯ ਓਲੋਕੇਤੁਕਾਮਸ੍ਸ ਰੂਪੇ ਚਕ੍ਖੁਂ ਉਪਸਂਹਰਤੋ ਚਕ੍ਖੁ ਰੂਪਸ੍ਮਿਂ ਪਟਿਹਞ੍ਞਤਿ, ਤਸ੍ਮਾ ਤਂ ਆਕਾਰਂ ਦਸ੍ਸੇਤੁਂ ਤਤਿਯੋ ਨਿਦ੍ਦੇਸਵਾਰੋ ਆਰਦ੍ਧੋ. ਸੋ ਅਤ੍ਥਤੋ ਪਾਕਟੋਯੇਵ. ਏਤ੍ਥ ਪਨ ਚਕ੍ਖੁ ਆਰਮ੍ਮਣਂ ਸਮ੍ਪਟਿਚ੍ਛਮਾਨਮੇਵ ਰੂਪਮ੍ਹਿ ਪਟਿਹਞ੍ਞਤਿ ਨਾਮ. ਇਧਾਪਿ ਪੁਰਿਮਨਯੇਨੇਵ ਚਤ੍ਤਾਰੋ ਵਵਤ੍ਥਾਪਨਨਯਾ ਵੇਦਿਤਬ੍ਬਾ.

੫੯੯. ਇਤੋ ਪਰਂ ਫਸ੍ਸਪਞ੍ਚਮਕਾਨਂ ਉਪ੍ਪਤ੍ਤਿਦਸ੍ਸਨਵਸੇਨ ਪਞ੍ਚ, ਤੇਸਂਯੇਵ ਆਰਮ੍ਮਣਪਟਿਬਦ੍ਧਉਪ੍ਪਤ੍ਤਿਦਸ੍ਸਨਵਸੇਨ ਪਞ੍ਚਾਤਿ, ਦਸ ਵਾਰਾ ਦਸ੍ਸਿਤਾ. ਤਤ੍ਥ ਚਕ੍ਖੁਂ ਨਿਸ੍ਸਾਯਾਤਿ ਚਕ੍ਖੁਂ ਨਿਸ੍ਸਾਯ, ਪਚ੍ਚਯਂ ਕਤ੍ਵਾ. ਰੂਪਂ ਆਰਬ੍ਭਾਤਿ ਰੂਪਾਰਮ੍ਮਣਂ ਆਗਮ੍ਮ, ਸਨ੍ਧਾਯ, ਪਟਿਚ੍ਚ. ਇਮਿਨਾ ਚਕ੍ਖੁਪਸਾਦਵਤ੍ਥੁਕਾਨਂ ਫਸ੍ਸਾਦੀਨਂ ਪੁਰੇਜਾਤਪਚ੍ਚਯੇਨ ਚਕ੍ਖੁਦ੍ਵਾਰਜਵਨਵੀਥਿਪਰਿਯਾਪਨ੍ਨਾਨਂ ਆਰਮ੍ਮਣਾਧਿਪਤਿਆਰਮ੍ਮਣੂਪਨਿਸ੍ਸਯਪਚ੍ਚਯੇਹਿ ਰੂਪਸ੍ਸ ਪਚ੍ਚਯਭਾਵੋ ਦਸ੍ਸਿਤੋ. ਇਤਰੇਸੁ ਪਞ੍ਚਸੁ ਵਾਰੇਸੁ ਰੂਪਂ ਆਰਮ੍ਮਣਮਸ੍ਸਾਤਿ ਰੂਪਾਰਮ੍ਮਣੋਤਿ ਏਵਂ ਆਰਮ੍ਮਣਪਚ੍ਚਯਮਤ੍ਤੇਨੇਵ ਪਚ੍ਚਯਭਾਵੋ ਦਸ੍ਸਿਤੋ. ਯਥਾ ਪਨ ਪੁਰਿਮੇਸੁ ਤੀਸੁ, ਏਵਂ ਇਮੇਸੁਪਿ ਦਸਸੁ ਵਾਰੇਸੁ ਚਤ੍ਤਾਰੋ ਚਤ੍ਤਾਰੋ ਵਵਤ੍ਥਾਪਨਨਯਾ ਵੇਦਿਤਬ੍ਬਾ. ਏਵਂ ਕਤਮਂ ਤਂ ਰੂਪਂ ਚਕ੍ਖਾਯਤਨਨ੍ਤਿ ਪੁਚ੍ਛਾਯ ਉਦ੍ਧਟਂ ਚਕ੍ਖੁਂ ‘ਇਦਂ ਤ’ਨ੍ਤਿ ਨਾਨਪ੍ਪਕਾਰਤੋ ਦਸ੍ਸੇਤੁਂ, ਪੁਰਿਮਾ ਤਯੋ, ਇਮੇ ਦਸਾਤਿ, ਤੇਰਸ ਨਿਦ੍ਦੇਸਵਾਰਾ ਦਸ੍ਸਿਤਾ. ਏਕੇਕਸ੍ਮਿਞ੍ਚੇਤ੍ਥ ਚਤੁਨ੍ਨਂ ਚਤੁਨ੍ਨਂ ਵਵਤ੍ਥਾਪਨਨਯਾਨਂ ਆਗਤਤ੍ਤਾ ਦ੍ਵਿਪਞ੍ਞਾਸਾਯ ਨਯੇਹਿ ਪਟਿਮਣ੍ਡੇਤ੍ਵਾਵ ਦਸ੍ਸਿਤਾਤਿ ਵੇਦਿਤਬ੍ਬਾ.

੬੦੦. ਇਤੋ ਪਰੇਸੁ ਸੋਤਾਯਤਨਾਦਿਨਿਦ੍ਦੇਸੇਸੁਪਿ ਏਸੇਵ ਨਯੋ. ਵਿਸੇਸਮਤ੍ਤਂ ਪਨੇਤ੍ਥ ਏਵਂ ਵੇਦਿਤਬ੍ਬਂ – ਸੁਣਾਤੀਤਿ ਸੋਤਂ. ਤਂ ਸਸਮ੍ਭਾਰਸੋਤਬਿਲਸ੍ਸ ਅਨ੍ਤੋ ਤਨੁਤਮ੍ਬਲੋਮਾਚਿਤੇ ਅਙ੍ਗੁਲਿਵੇਧਕਸਣ੍ਠਾਨੇ ਪਦੇਸੇ ਵੁਤ੍ਤਪ੍ਪਕਾਰਾਹਿ ਧਾਤੂਹਿ ਕਤੂਪਕਾਰਂ, ਉਤੁਚਿਤ੍ਤਾਹਾਰੇਹਿ ਉਪਤ੍ਥਮ੍ਭਿਯਮਾਨਂ, ਆਯੁਨਾ ਅਨੁਪਾਲਿਯਮਾਨਂ, ਵਣ੍ਣਾਦੀਹਿ ਪਰਿਵੁਤਂ ਸੋਤਵਿਞ੍ਞਾਣਾਦੀਨਂ ਯਥਾਰਹਂ ਵਤ੍ਥੁਦ੍ਵਾਰਭਾਵਂ ਸਾਧਯਮਾਨਂ ਤਿਟ੍ਠਤਿ.

ਘਾਯਤੀਤਿ ਘਾਨਂ. ਤਂ ਸਸਮ੍ਭਾਰਘਾਨਬਿਲਸ੍ਸ ਅਨ੍ਤੋ ਅਜਪ੍ਪਦਸਣ੍ਠਾਨੇ ਪਦੇਸੇ ਯਥਾਵੁਤ੍ਤਪ੍ਪਕਾਰਉਪਕਾਰੁਪਤ੍ਥਮ੍ਭਨਾਨੁਪਾਲਨਪਰਿਵਾਰਂ ਹੁਤ੍ਵਾ ਘਾਨਵਿਞ੍ਞਾਣਾਦੀਨਂ ਯਥਾਰਹਂ ਵਤ੍ਥੁਦ੍ਵਾਰਭਾਵਂ ਸਾਧਯਮਾਨਂ ਤਿਟ੍ਠਤਿ.

ਸਾਯਨਟ੍ਠੇਨ ਜਿਵ੍ਹਾ. ਸਾ ਸਸਮ੍ਭਾਰਜਿਵ੍ਹਾਮਜ੍ਝਸ੍ਸ ਉਪਰਿ ਉਪ੍ਪਲਦਲਗ੍ਗਸਣ੍ਠਾਨੇ ਪਦੇਸੇ ਯਥਾਵੁਤ੍ਤਪ੍ਪਕਾਰਉਪਕਾਰੁਪਤ੍ਥਮ੍ਭਨਾਨੁਪਾਲਨਪਰਿਵਾਰਾ ਹੁਤ੍ਵਾ ਜਿਵ੍ਹਾਵਿਞ੍ਞਾਣਾਦੀਨਂ ਯਥਾਰਹਂ ਵਤ੍ਥੁਦ੍ਵਾਰਭਾਵਂ ਸਾਧਯਮਾਨਾ ਤਿਟ੍ਠਤਿ.

ਯਾਵਤਾ ਪਨ ਇਮਸ੍ਮਿਂ ਕਾਯੇ ਉਪਾਦਿਣ੍ਣਕਰੂਪਂ ਨਾਮ ਅਤ੍ਥਿ, ਸਬ੍ਬਤ੍ਥ ਕਾਯਾਯਤਨਂ, ਕਪ੍ਪਾਸਪਟਲੇ ਸ੍ਨੇਹੋ ਵਿਯ, ਯਥਾਵੁਤ੍ਤਪ੍ਪਕਾਰਉਪਕਾਰੁਪਤ੍ਥਮ੍ਭਨਾਨੁਪਾਲਨਪਰਿਵਾਰਮੇਵ ਹੁਤ੍ਵਾ ਕਾਯਵਿਞ੍ਞਾਣਾਦੀਨਂ ਯਥਾਰਹਂ ਵਤ੍ਥੁਦ੍ਵਾਰਭਾਵਂ ਸਾਧਯਮਾਨਂ ਤਿਟ੍ਠਤਿ. ਅਯਮੇਤ੍ਥ ਵਿਸੇਸੋ. ਸੇਸੋ ਪਾਲ਼ਿਪ੍ਪਭੇਦੋ ਚ ਅਤ੍ਥੋ ਚ ਚਕ੍ਖੁਨਿਦ੍ਦੇਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਕੇਵਲਞ੍ਹਿ ਇਧ ਚਕ੍ਖੁਪਦਸ੍ਸ ਠਾਨੇ ਸੋਤਪਦਾਦੀਨਿ, ਰੂਪਪਦਸ੍ਸ ਠਾਨੇ ਸਦ੍ਦਪਦਾਦੀਨਿ, ਪਸ੍ਸੀਤਿ ਆਦੀਨਂ ਠਾਨੇ ਸੁਣੀਤਿਆਦਿਪਦਾਨਿ ਚ ਆਗਤਾਨਿ. ‘ਨੇਤ੍ਤਂਪੇਤਂ, ਨਯਨਂਪੇਤ’ਨ੍ਤਿ ਇਮਸ੍ਸ ਚ ਪਦਦ੍ਵਯਸ੍ਸ ਅਭਾਵਾ ਦ੍ਵਾਦਸ ਦ੍ਵਾਦਸ ਨਾਮਾਨਿ ਹੋਨ੍ਤਿ. ਸੇਸਂ ਸਬ੍ਬਤ੍ਥ ਵੁਤ੍ਤਸਦਿਸਮੇਵ.

ਤਤ੍ਥ ਸਿਯਾ – ਯਦਿ ਯਾਵਤਾ ਇਮਸ੍ਮਿਂ ਕਾਯੇ ਉਪਾਦਿਣ੍ਣਕਰੂਪਂ ਨਾਮ ਅਤ੍ਥਿ, ਸਬ੍ਬਤ੍ਥ ਕਾਯਾਯਤਨਂ, ਕਪ੍ਪਾਸਪਟਲੇ ਸ੍ਨੇਹੋ ਵਿਯ. ‘ਏਵਂ ਸਨ੍ਤੇ ਲਕ੍ਖਣਸਮ੍ਮਿਸ੍ਸਤਾ ਆਪਜ੍ਜਤੀ’ਤਿ. ‘ਨਾਪਜ੍ਜਤੀ’ਤਿ. ‘ਕਸ੍ਮਾ’? ‘ਅਞ੍ਞਸ੍ਸ ਅਞ੍ਞਤ੍ਥ ਅਭਾਵਤੋ’. ‘ਯਦਿ ਏਵਂ, ਨ ਸਬ੍ਬਤ੍ਥ ਕਾਯਾਯਤਨ’ਨ੍ਤਿ? ‘ਨੇਵ ਪਰਮਤ੍ਥਤੋ ਸਬ੍ਬਤ੍ਥ. ਵਿਨਿਬ੍ਭੁਜਿਤ੍ਵਾ ਪਨਸ੍ਸ ਨਾਨਾਕਰਣਂ ਪਞ੍ਞਾਪੇਤੁਂ ਨ ਸਕ੍ਕਾ, ਤਸ੍ਮਾ ਏਵਂ ਵੁਤ੍ਤਂ. ਯਥਾ ਹਿ ਰੂਪਰਸਾਦਯੋ, ਵਾਲਿਕਾਚੁਣ੍ਣਾਨਿ ਵਿਯ, ਵਿਵੇਚੇਤੁਂ ਅਸਕ੍ਕੁਣੇਯ੍ਯਤਾਯ ਅਞ੍ਞਮਞ੍ਞਬ੍ਯਾਪਿਨੋਤਿ ਵੁਚ੍ਚਨ੍ਤਿ, ਨ ਚ ਪਰਮਤ੍ਥਤੋ ਰੂਪੇ ਰਸੋ ਅਤ੍ਥਿ. ਯਦਿ ਸਿਯਾ ਰੂਪਗ੍ਗਹਣੇਨੇਵ ਰਸਗ੍ਗਹਣਂ ਗਚ੍ਛੇਯ੍ਯ. ਏਵਂ ਕਾਯਾਯਤਨਮ੍ਪਿ ਪਰਮਤ੍ਥਤੋ ਨੇਵ ਸਬ੍ਬਤ੍ਥ ਅਤ੍ਥਿ, ਨ ਚ ਸਬ੍ਬਤ੍ਥ ਨਤ੍ਥਿ, ਵਿਵੇਚੇਤੁਂ ਅਸਕ੍ਕੁਣੇਯ੍ਯਤਾਯਾਤਿ. ਏਵਮੇਤ੍ਥ ਨ ਲਕ੍ਖਣਸਮ੍ਮਿਸ੍ਸਤਾ ਆਪਜ੍ਜਤੀਤਿ ਵੇਦਿਤਬ੍ਬਾ’.

ਅਪਿਚ ਲਕ੍ਖਣਾਦਿਵਵਤ੍ਥਾਪਨਤੋਪੇਤੇਸਂ ਅਸਮ੍ਮਿਸ੍ਸਤਾ ਵੇਦਿਤਬ੍ਬਾ – ਏਤੇਸੁ ਹਿ ਰੂਪਾਭਿਘਾਤਾਰਹਭੂਤਪ੍ਪਸਾਦਲਕ੍ਖਣਂ ਦਟ੍ਠੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪ੍ਪਸਾਦਲਕ੍ਖਣਂ ਵਾ ਚਕ੍ਖੁ, ਰੂਪੇਸੁ ਆਵਿਞ੍ਛਨਰਸਂ, ਚਕ੍ਖੁਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਂ, ਦਟ੍ਠੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਂ.

ਸਦ੍ਦਾਭਿਘਾਤਾਰਹਭੂਤਪ੍ਪਸਾਦਲਕ੍ਖਣਂ ਸੋਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪ੍ਪਸਾਦਲਕ੍ਖਣਂ ਵਾ ਸੋਤਂ, ਸਦ੍ਦੇਸੁ ਆਵਿਞ੍ਛਨਰਸਂ, ਸੋਤਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਂ, ਸੋਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਂ.

ਗਨ੍ਧਾਭਿਘਾਤਾਰਹਭੂਤਪ੍ਪਸਾਦਲਕ੍ਖਣਂ ਘਾਯਿਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪ੍ਪਸਾਦਲਕ੍ਖਣਂ ਵਾ ਘਾਨਂ, ਗਨ੍ਧੇਸੁ ਆਵਿਞ੍ਛਨਰਸਂ, ਘਾਨਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਂ ਘਾਯਿਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਂ.

ਰਸਾਭਿਘਾਤਾਰਹਭੂਤਪ੍ਪਸਾਦਲਕ੍ਖਣਾ ਸਾਯਿਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪ੍ਪਸਾਦਲਕ੍ਖਣਾ ਵਾ ਜਿਵ੍ਹਾ, ਰਸੇਸੁ ਆਵਿਞ੍ਛਨਰਸਾ, ਜਿਵ੍ਹਾਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਾ, ਸਾਯਿਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਾ.

ਫੋਟ੍ਠਬ੍ਬਾਭਿਘਾਤਾਰਹਭੂਤਪ੍ਪਸਾਦਲਕ੍ਖਣੋ ਫੁਸਿਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪ੍ਪਸਾਦਲਕ੍ਖਣੋ ਵਾ ਕਾਯੋ, ਫੋਟ੍ਠਬ੍ਬੇਸੁ ਆਵਿਞ੍ਛਨਰਸੋ, ਕਾਯਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨੋ, ਫੁਸਿਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨੋ.

ਕੇਚਿ ਪਨ ‘ਤੇਜਾਧਿਕਾਨਂ ਭੂਤਾਨਂ ਪਸਾਦੋ ਚਕ੍ਖੁ, ਵਾਯੁਪਥਵੀਆਪਾਧਿਕਾਨਂ ਭੂਤਾਨਂ ਪਸਾਦਾ ਸੋਤਘਾਨਜਿਵ੍ਹਾ, ਕਾਯੋ ਸਬ੍ਬੇਸ’ਨ੍ਤਿ ਵਦਨ੍ਤਿ. ਅਪਰੇ ‘ਤੇਜਾਧਿਕਾਨਂ ਪਸਾਦੋ ਚਕ੍ਖੁ, ਵਿਵਰਵਾਯੁਆਪਪਥਵਾਧਿਕਾਨਂ ਪਸਾਦਾ ਸੋਤਘਾਨਜਿਵ੍ਹਾਕਾਯਾ’ਤਿ ਵਦਨ੍ਤਿ. ਤੇ ਵਤ੍ਤਬ੍ਬਾ – ‘ਸੁਤ੍ਤਂ ਆਹਰਥਾ’ਤਿ. ਅਦ੍ਧਾ ਸੁਤ੍ਤਮੇਵ ਨ ਦਕ੍ਖਿਸ੍ਸਨ੍ਤਿ. ਕੇਚਿ ਪਨੇਤ੍ਥ ‘ਤੇਜਾਦੀਨਂ ਗੁਣੇਹਿ ਰੂਪਾਦੀਹਿ ਅਨੁਗ੍ਗਯ੍ਹਭਾਵਤੋ’ਤਿ ਕਾਰਣਂ ਵਦਨ੍ਤਿ. ਤੇ ਚ ਵਤ੍ਤਬ੍ਬਾ – ‘ਕੋ ਪਨੇਵਮਾਹ – ਰੂਪਾਦਯੋ ਤੇਜਾਦੀਨਂ ਗੁਣਾ’ਤਿ? ਅਵਿਨਿਬ੍ਭੋਗੇਸੁ ਹਿ ਰੂਪੇਸੁ ‘ਅਯਂ ਇਮਸ੍ਸ ਗੁਣੋ, ਅਯਂ ਇਮਸ੍ਸ ਗੁਣੋ’ਤਿ ਨ ਲਬ੍ਭਾ ਵਤ੍ਤੁਂ. ਅਥਾਪਿ ਵਦੇਯ੍ਯੁਂ – ‘ਯਥਾ ਤੇਸੁ ਤੇਸੁ ਸਮ੍ਭਾਰੇਸੁ ਤਸ੍ਸ ਤਸ੍ਸ ਭੂਤਸ੍ਸ ਅਧਿਕਤਾਯ ਪਥਵੀਆਦੀਨਂ ਸਨ੍ਧਾਰਣਾਦੀਨਿ ਕਿਚ੍ਚਾਨਿ ਇਚ੍ਛਥ, ਏਵਂ ਤੇਜਾਦਿਅਧਿਕੇਸੁ ਸਮ੍ਭਾਰੇਸੁ ਰੂਪਾਦੀਨਂ ਅਧਿਕਭਾਵਦਸ੍ਸਨਤੋ ਇਚ੍ਛਿਤਬ੍ਬਮੇਤਂ ਰੂਪਾਦਯੋ ਤੇਸਂ ਗੁਣਾ’ਤਿ. ਤੇ ਵਤ੍ਤਬ੍ਬਾ – ਇਚ੍ਛੇਯ੍ਯਾਮ, ਯਦਿ ਆਪਾਧਿਕਸ੍ਸ ਆਸਵਸ੍ਸ ਗਨ੍ਧਤੋ ਪਥਵੀਅਧਿਕੇ ਕਪ੍ਪਾਸੇ ਗਨ੍ਧੋ ਅਧਿਕਤਰੋ ਸਿਯਾ, ਤੇਜਾਧਿਕਸ੍ਸ ਚ ਉਣ੍ਹੋਦਕਸ੍ਸ ਵਣ੍ਣਤੋਪਿ ਸੀਤੂਦਕਸ੍ਸ ਵਣ੍ਣੋ ਪਰਿਹਾਯੇਥ. ਯਸ੍ਮਾ ਪਨੇਤਂ ਉਭਯਮ੍ਪਿ ਨਤ੍ਥਿ, ਤਸ੍ਮਾ ਪਹਾਯੇਥੇਤਂ ਏਤੇਸਂ ਨਿਸ੍ਸਯਭੂਤਾਨਂ ਵਿਸੇਸਕਪ੍ਪਨਂ, ਯਥਾ ਅਵਿਸੇਸੇਪਿ ਏਕਕਲਾਪੇ ਭੂਤਾਨਂ ਰੂਪਰਸਾਦਯੋ ਅਞ੍ਞਮਞ੍ਞਂ ਵਿਸਦਿਸਾ ਹੋਨ੍ਤਿ, ਏਵਂ ਚਕ੍ਖੁਪਸਾਦਾਦਯੋ, ਅਵਿਜ੍ਜਮਾਨੇਪਿ ਅਞ੍ਞਸ੍ਮਿਂ ਵਿਸੇਸਕਾਰਣੇਤਿ ਗਹੇਤਬ੍ਬਮੇਤਂ.

ਕਿਂ ਪਨ ਤਂ ਯਂ ਅਞ੍ਞਮਞ੍ਞਸ੍ਸ ਅਸਾਧਾਰਣਂ? ਕਮ੍ਮਮੇਵ ਨੇਸਂ ਵਿਸੇਸਕਾਰਣਂ. ਤਸ੍ਮਾ ਕਮ੍ਮਵਿਸੇਸਤੋ ਏਤੇਸਂ ਵਿਸੇਸੋ, ਨ ਭੂਤਵਿਸੇਸਤੋ. ਭੂਤਵਿਸੇਸੇ ਹਿ ਸਤਿ ਪਸਾਦੋਵ ਨੁਪ੍ਪਜ੍ਜਤਿ. ਸਮਾਨਾਨਞ੍ਹਿ ਪਸਾਦੋ, ਨ ਵਿਸਮਾਨਾਨਨ੍ਤਿ ਪੋਰਾਣਾ. ਏਵਂ ਕਮ੍ਮੇਵਿਸਸਤੋ ਵਿਸੇਸਵਨ੍ਤੇਸੁ ਚ ਏਤੇਸੁ ਚਕ੍ਖੁਸੋਤਾਨਿ ਅਸਮ੍ਪਤ੍ਤਵਿਸਯਗ੍ਗਾਹਕਾਨਿ ਅਤ੍ਤਨੋ ਨਿਸ੍ਸਯਂ ਅਨਲ੍ਲੀਨਨਿਸ੍ਸਯੇ ਏਵ ਵਿਸਯੇ ਵਿਞ੍ਞਾਣਹੇਤੁਤ੍ਤਾ. ਘਾਨਜਿਵ੍ਹਾਕਾਯਾ ਸਮ੍ਪਤ੍ਤਵਿਸਯਗ੍ਗਾਹਕਾ, ਨਿਸ੍ਸਯਵਸੇਨ ਚੇਵ ਸਯਞ੍ਚ ਅਤ੍ਤਨੋ ਨਿਸ੍ਸਯਂ ਅਲ੍ਲੀਨੇਯੇਵ ਵਿਸਯੇ ਵਿਞ੍ਞਾਣਹੇਤੁਤ੍ਤਾ.

ਅਟ੍ਠਕਥਾਯਂ ਪਨ ‘‘ਆਪਾਥਗਤਤ੍ਤਾਵ ਆਰਮ੍ਮਣਂ ਸਮ੍ਪਤ੍ਤਂ ਨਾਮ. ਚਨ੍ਦਮਣ੍ਡਲਸੂਰਿਯਮਣ੍ਡਲਾਨਞ੍ਹਿ ਦ੍ਵਾਚਤ੍ਤਾਲੀਸਯੋਜਨਸਹਸ੍ਸਮਤ੍ਥਕੇ ਠਿਤਾਨਂ ਵਣ੍ਣੋ ਚਕ੍ਖੁਪਸਾਦਂ ਘਟ੍ਟੇਤਿ. ਸੋ ਦੂਰੇ ਠਤ੍ਵਾ ਪਞ੍ਞਾਯਮਾਨੋਪਿ ਸਮ੍ਪਤ੍ਤੋਯੇਵ ਨਾਮ. ਤਂਗੋਚਰਤ੍ਤਾ ਚਕ੍ਖੁ ਸਮ੍ਪਤ੍ਤਗੋਚਰਮੇਵ ਨਾਮ. ਦੂਰੇ ਰੁਕ੍ਖਂ ਛਿਨ੍ਦਨ੍ਤਾਨਮ੍ਪਿ, ਰਜਕਾਨਞ੍ਚ ਵਤ੍ਥਂ ਧੋਵਨ੍ਤਾਨਂ ਦੂਰਤੋਵ ਕਾਯਵਿਕਾਰੋ ਪਞ੍ਞਾਯਤਿ. ਸਦ੍ਦੋ ਪਨ ਧਾਤੁਪਰਮ੍ਪਰਾਯ ਆਗਨ੍ਤ੍ਵਾ ਸੋਤਂ ਘਟ੍ਟੇਤ੍ਵਾ ਸਣਿਕਂ ਵਵਤ੍ਥਾਨਂ ਗਚ੍ਛਤੀ’’ਤਿ ਵੁਤ੍ਤਂ.

ਤਤ੍ਥ ਕਿਞ੍ਚਾਪਿ ਆਪਾਥਗਤਤ੍ਤਾ ਆਰਮ੍ਮਣਂ ਸਮ੍ਪਤ੍ਤਨ੍ਤਿ ਵੁਤ੍ਤਂ, ਚਨ੍ਦਮਣ੍ਡਲਾਦਿਵਣ੍ਣੋ ਪਨ ਚਕ੍ਖੁਂ ਅਸਮ੍ਪਤ੍ਤੋ ਦੂਰੇ ਠਿਤੋਵ ਪਞ੍ਞਾਯਤਿ. ਸਦ੍ਦੋਪਿ ਸਚੇ ਸਣਿਕਂ ਆਗਚ੍ਛੇਯ੍ਯ, ਦੂਰੇ ਉਪ੍ਪਨ੍ਨੋ ਚਿਰੇਨ ਸੁਯ੍ਯੇਯ੍ਯ, ਪਰਮ੍ਪਰਘਟ੍ਟਨਾਯ ਚ ਆਗਨ੍ਤ੍ਵਾ ਸੋਤਂ ਘਟ੍ਟੇਨ੍ਤੋ ਅਸੁਕਦਿਸਾਯ ਨਾਮਾਤਿ ਨ ਪਞ੍ਞਾਯੇਯ੍ਯ. ਤਸ੍ਮਾ ਅਸਮ੍ਪਤ੍ਤਗੋਚਰਾਨੇਵ ਤਾਨਿ.

ਅਹਿਆਦਿਸਮਾਨਾਨਿ ਚੇਤਾਨਿ. ਯਥਾ ਹਿ ਅਹਿ ਨਾਮ ਬਹਿ ਸਿਤ੍ਤਸਮ੍ਮਟ੍ਠਟ੍ਠਾਨੇ ਨਾਭਿਰਮਤਿ, ਸਙ੍ਕਾਰਟ੍ਠਾਨਤਿਣਪਣ੍ਣਗਹਨਵਮ੍ਮਿਕਾਨਿਯੇਵ ਪਨ ਪਵਿਸਿਤ੍ਵਾ ਨਿਪਨ੍ਨਕਾਲੇ ਅਭਿਰਮਤਿ, ਏਕਗ੍ਗਤਂ ਆਪਜ੍ਜਤਿ, ਏਵਮੇਵ ਚਕ੍ਖੁਪੇਤਂ ਵਿਸਮਜ੍ਝਾਸਯਂ ਮਟ੍ਠੇਸੁ ਸੁਵਣ੍ਣਭਿਤ੍ਤਿਆਦੀਸੁ ਨਾਭਿਰਮਤਿ, ਓਲੋਕੇਤੁਮ੍ਪਿ ਨ ਇਚ੍ਛਤਿ, ਰੂਪਚਿਤ੍ਤਪੁਪ੍ਫਲਤਾਦਿਚਿਤ੍ਤੇਸੁਯੇਵ ਪਨ ਅਭਿਰਮਤਿ. ਤਾਦਿਸੇਸੁ ਹਿ ਠਾਨੇਸੁ ਚਕ੍ਖੁਮ੍ਹਿ ਅਪ੍ਪਹੋਨ੍ਤੇ ਮੁਖਮ੍ਪਿ ਵਿਵਰਿਤ੍ਵਾ ਓਲੋਕੇਤੁਕਾਮਾ ਹੋਨ੍ਤਿ.

ਸੁਸੁਮਾਰੋਪਿ ਬਹਿ ਨਿਕ੍ਖਨ੍ਤੋ ਗਹੇਤਬ੍ਬਂ ਨ ਪਸ੍ਸਤਿ, ਅਕ੍ਖੀਨਿ ਨਿਮ੍ਮੀਲੇਤ੍ਵਾਵ ਚਰਤਿ. ਯਦਾ ਪਨ ਬ੍ਯਾਮਸਤਮਤ੍ਤਂ ਉਦਕਂ ਓਗਾਹਿਤ੍ਵਾ ਬਿਲਂ ਪਵਿਸਿਤ੍ਵਾ ਨਿਪਨ੍ਨੋ ਹੋਤਿ, ਤਦਾ ਤਸ੍ਸ ਚਿਤ੍ਤਂ ਏਕਗ੍ਗਂ ਹੋਤਿ ਸੁਖਂ ਸੁਪਤਿ, ਏਵਮੇਵ ਸੋਤਂ ਤਮ੍ਪੇ ਬਿਲਜ੍ਝਾਸਯਂ ਆਕਾਸਸਨ੍ਨਿਸ੍ਸਿਤਂ ਕਣ੍ਣਚ੍ਛਿਦ੍ਦਕੂਪਕੇਯੇਵ ਅਜ੍ਝਾਸਯਂ ਕਰੋਤਿ. ਕਣ੍ਣਚ੍ਛਿਦ੍ਦਾਕਾਸੋਯੇਵ ਤਸ੍ਸ ਸਦ੍ਦਸਵਨੇ ਪਚ੍ਚਯੋ ਹੋਤਿ. ਅਜਟਾਕਾਸੋਪਿ ਵਟ੍ਟਤਿਯੇਵ. ਅਨ੍ਤੋਲੇਣਸ੍ਮਿਞ੍ਹਿ ਸਜ੍ਝਾਯੇ ਕਰਿਯਮਾਨੇ ਨ ਲੇਣਚ੍ਛਦਨਂ ਭਿਨ੍ਦਿਤ੍ਵਾ ਸਦ੍ਦੋ ਬਹਿ ਨਿਕ੍ਖਮਤਿ, ਦ੍ਵਾਰਵਾਤਪਾਨਚ੍ਛਿਦ੍ਦੇਹਿ ਪਨ ਨਿਕ੍ਖਮਿਤ੍ਵਾ ਧਾਤੁਪਰਮ੍ਪਰਾਯੇਵ ਘਟ੍ਟੇਨ੍ਤੋ ਗਨ੍ਤ੍ਵਾ ਸੋਤਪਸਾਦਂ ਘਟ੍ਟੇਤਿ. ਅਥ ਤਸ੍ਮਿਂ ਕਾਲੇ ‘ਅਸੁਕੋ ਨਾਮ ਸਜ੍ਝਾਯਤੀ’ਤਿ ਲੇਣਪਿਟ੍ਠੇ ਨਿਸਿਨ੍ਨਾ ਜਾਨਨ੍ਤਿ.

ਏਵਂ ਸਨ੍ਤੇ ਸਮ੍ਪਤ੍ਤਗੋਚਰਤਾ ਹੋਤਿ. ‘ਕਿਂ ਪਨੇਤਂ ਸਮ੍ਪਤ੍ਤਗੋਚਰ’ਨ੍ਤਿ? ‘ਆਮ, ਸਮ੍ਪਤ੍ਤਗੋਚਰਂ’. ‘ਯਦਿ ਏਵਂ, ਦੂਰੇ ਭੇਰੀਆਦੀਸੁ ਵਜ੍ਜਮਾਨੇਸੁ ਦੂਰੇ ਸਦ੍ਦੋਤਿ ਜਾਨਨਂ ਨ ਭਵੇਯ੍ਯਾ’ਤਿ? ‘ਨੋ ਨ ਭਵਤਿ. ਸੋਤਪਸਾਦਸ੍ਮਿਞ੍ਹਿ ਘਟ੍ਟਿਤੇ ਦੂਰੇ ਸਦ੍ਦੋ ਆਸਨ੍ਨੇ ਸਦ੍ਦੋ, ਪਰਤੀਰੇ ਓਰਿਮਤੀਰੇਤਿ ਤਥਾ ਤਥਾ ਜਾਨਨਾਕਾਰੋ ਹੋਤਿ. ਧਮ੍ਮਤਾ ਏਸਾ’ਤਿ. ‘ਕਿਂ ਏਤਾਯ ਧਮ੍ਮਤਾਯ? ਯਤੋ ਯਤੋ ਛਿਦ੍ਦਂ ਤਤੋ ਤਤੋ ਸਵਨਂ ਹੋਤਿ, ਚਨ੍ਦਿਮਸੂਰਿਯਾਦੀਨਂ ਦਸ੍ਸਨਂ ਵਿਯਾਤਿ ਅਸਮ੍ਪਤ੍ਤਗੋਚਰਮੇਵੇਤਂ’.

ਪਕ੍ਖੀਪਿ ਰੁਕ੍ਖੇ ਵਾ ਭੂਮਿਯਂ ਵਾ ਨ ਰਮਤਿ. ਯਦਾ ਪਨ ਏਕਂ ਵਾ ਦ੍ਵੇ ਵਾ ਲੇਡ੍ਡੁਪਾਤੇ ਅਤਿਕ੍ਕਮ੍ਮ ਅਜਟਾਕਾਸਂ ਪਕ੍ਖਨ੍ਦੋ ਹੋਤਿ, ਤਦਾ ਏਕਗ੍ਗਚਿਤ੍ਤਤਂ ਆਪਜ੍ਜਤਿ, ਏਵਮੇਵ ਘਾਨਮ੍ਪਿ ਆਕਾਸਜ੍ਝਾਸਯਂ ਵਾਤੂਪਨਿਸ੍ਸਯਗਨ੍ਧਗੋਚਰਂ. ਤਥਾ ਹਿ ਗਾਵੋ ਨਵਵੁਟ੍ਠੇ ਦੇਵੇ ਭੂਮਿਯਂ ਘਾਯਿਤ੍ਵਾ ਘਾਯਿਤ੍ਵਾ ਆਕਾਸਾਭਿਮੁਖਾ ਹੁਤ੍ਵਾ ਵਾਤਂ ਆਕਡ੍ਢਨ੍ਤਿ. ਅਙ੍ਗੁਲੀਹਿ ਗਨ੍ਧਪਿਣ੍ਡਂ ਗਹੇਤ੍ਵਾਪਿ ਚ ਉਪਸਿਙ੍ਘਨਕਾਲੇ ਵਾਤਂ ਅਨਾਕਡ੍ਢਨ੍ਤੋ ਨੇਵ ਤਸ੍ਸ ਗਨ੍ਧਂ ਜਾਨਾਤਿ.

ਕੁਕ੍ਕੁਰੋਪਿ ਬਹਿ ਵਿਚਰਨ੍ਤੋ ਖੇਮਟ੍ਠਾਨਂ ਨ ਪਸ੍ਸਤਿ ਲੇਡ੍ਡੁਪਹਾਰਾਦੀਹਿ ਉਪਦ੍ਦੁਤੋ ਹੋਤਿ. ਅਨ੍ਤੋਗਾਮਂ ਪਵਿਸਿਤ੍ਵਾ ਉਦ੍ਧਨਟ੍ਠਾਨੇ ਛਾਰਿਕਂ ਬ੍ਯੂਹਿਤ੍ਵਾ ਨਿਪਨ੍ਨਸ੍ਸ ਪਨ ਫਾਸੁਕਂ ਹੋਤਿ, ਏਵਮੇਵ ਜਿਵ੍ਹਾਪਿ ਗਾਮਜ੍ਝਾਸਯਾ ਆਪੋਸਨ੍ਨਿਸ੍ਸਿਤਰਸਾਰਮ੍ਮਣਾ. ਤਥਾ ਹਿ ਤਿਯਾਮਰਤ੍ਤਿਂ ਸਮਣਧਮ੍ਮਂ ਕਤ੍ਵਾਪਿ ਪਾਤੋਵ ਪਤ੍ਤਚੀਵਰਮਾਦਾਯ ਗਾਮੋ ਪਵਿਸਿਤਬ੍ਬੋ ਹੋਤਿ. ਸੁਕ੍ਖਖਾਦਨੀਯਸ੍ਸ ਚ ਨ ਸਕ੍ਕਾ ਖੇਲ਼ੇਨ ਅਤੇਮਿਤਸ੍ਸ ਰਸਂ ਜਾਨਿਤੁਂ.

ਸਿਙ੍ਗਾਲੋਪਿ ਬਹਿ ਚਰਨ੍ਤੋ ਰਤਿਂ ਨ ਵਿਨ੍ਦਤਿ, ਆਮਕਸੁਸਾਨੇ ਮਨੁਸ੍ਸਮਂਸਂ ਖਾਦਿਤ੍ਵਾ ਨਿਪਨ੍ਨਸ੍ਸੇਵ ਪਨਸ੍ਸ ਫਾਸੁਕਂ ਹੋਤਿ, ਏਵਮੇਵ ਕਾਯੋਪਿ ਉਪਾਦਿਣ੍ਣਕਜ੍ਝਾਸਯੋ ਪਥਵੀਨਿਸ੍ਸਿਤਫੋਟ੍ਠਬ੍ਬਾਰਮ੍ਮਣੋ. ਤਥਾ ਹਿ ਅਞ੍ਞਂ ਉਪਾਦਿਣ੍ਣਕਂ ਅਲਭਮਾਨਾ ਸਤ੍ਤਾ ਅਤ੍ਤਨੋਵ ਹਤ੍ਥਤਲੇ ਸੀਸਂ ਕਤ੍ਵਾ ਨਿਪਜ੍ਜਨ੍ਤਿ. ਅਜ੍ਝਤ੍ਤਿਕਬਾਹਿਰਾ ਚਸ੍ਸ ਪਥਵੀ ਆਰਮ੍ਮਣਗ੍ਗਹਣੇ ਪਚ੍ਚਯੋ ਹੋਤਿ. ਸੁਸਨ੍ਥਤਸ੍ਸਪਿ ਹਿ ਸਯਨਸ੍ਸ, ਹਤ੍ਥੇ ਠਪਿਤਾਨਮ੍ਪਿ ਵਾ ਫਲਾਨਂ, ਨ ਸਕ੍ਕਾ ਅਨਿਸੀਦਨ੍ਤੇਨ ਵਾ ਅਨਿਪ੍ਪੀਲ਼ੇਨ੍ਤੇਨ ਵਾ ਥਦ੍ਧਮੁਦੁਭਾਵੋ ਜਾਨਿਤੁਨ੍ਤਿ. ਅਜ੍ਝਤ੍ਤਿਕਬਾਹਿਰਾਪਥਵੀ ਏਤਸ੍ਸ ਕਾਯਪਸਾਦਸ੍ਸ ਫੋਟ੍ਠਬ੍ਬਜਾਨਨੇ ਪਚ੍ਚਯੋ ਹੋਤਿ. ਏਵਂ ਲਕ੍ਖਣਾਦਿਵਵਤ੍ਥਾਨਤੋਪੇਤੇਸਂ ਅਸਮ੍ਮਿਸ੍ਸਤਾ ਵੇਦਿਤਬ੍ਬਾ. ਅਞ੍ਞੇਯੇਵ ਹਿ ਚਕ੍ਖੁਪਸਾਦਸ੍ਸ ਲਕ੍ਖਣਰਸਪਚ੍ਚੁਪਟ੍ਠਾਨਪਦਟ੍ਠਾਨਗੋਚਰਜ੍ਝਾਸਯਨਿਸ੍ਸਯਾ ਅਞ੍ਞੇ ਸੋਤਪਸਾਦਾਦੀਨਨ੍ਤਿ ਅਸਮ੍ਮਿਸ੍ਸਾਨੇਵ ਚਕ੍ਖਾਯਤਨਾਦੀਨਿ.

ਅਪਿਚ ਨੇਸਂ ਅਸਮ੍ਮਿਸ੍ਸਤਾਯ ਅਯਂ ਉਪਮਾਪਿ ਵੇਦਿਤਬ੍ਬਾ – ਯਥਾ ਹਿ ਪਞ੍ਚਵਣ੍ਣਾਨਂ ਧਜਾਨਂ ਉਸ੍ਸਾਪਿਤਾਨਂ ਕਿਞ੍ਚਾਪਿ ਛਾਯਾ ਏਕਾਬਦ੍ਧਾ ਵਿਯ ਹੋਤਿ, ਤਸ੍ਸ ਤਸ੍ਸ ਪਨ ਅਞ੍ਞਮਞ੍ਞਂ ਅਸਮ੍ਮਿਸ੍ਸਾਵ ਯਥਾ ਚ ਪਞ੍ਚਵਣ੍ਣੇਨ ਕਪ੍ਪਾਸੇਨ ਵਟ੍ਟਿਂ ਕਤ੍ਵਾ ਦੀਪੇ ਜਾਲਿਤੇ ਕਿਞ੍ਚਾਪਿ ਜਾਲਾ ਏਕਾਬਦ੍ਧਾ ਵਿਯ ਹੋਤਿ, ਤਸ੍ਸ ਤਸ੍ਸ ਪਨ ਅਂਸੁਨੋ ਪਾਟਿਯੇਕ੍ਕਾ ਪਾਟਿਯੇਕ੍ਕਾ ਜਾਲਾ ਅਸਮ੍ਮਿਸ੍ਸਾ ਏਵ, ਏਵਮੇਵ ਕਿਞ੍ਚਾਪਿ ਇਮਾਨਿ ਪਞ੍ਚਾਯਤਨਾਨਿ ਏਕਸ੍ਮਿਂ ਅਤ੍ਤਭਾਵੇ ਸਮੋਸਟਾਨਿ ਅਞ੍ਞਮਞ੍ਞਂ ਪਨ ਅਸਮ੍ਮਿਸ੍ਸਾਨੇਵ. ਨ ਕੇਵਲਞ੍ਚ ਇਮਾਨੇਵ ਪਞ੍ਚ, ਸੇਸਰੂਪਾਨਿਪਿ ਅਸਮ੍ਮਿਸ੍ਸਾਨੇਵ. ਇਮਸ੍ਮਿਞ੍ਹਿ ਸਰੀਰੇ ਹੇਟ੍ਠਿਮਕਾਯੋ ਮਜ੍ਝਿਮਕਾਯੋ ਉਪਰਿਮਕਾਯੋਤਿ ਤਯੋ ਕੋਟ੍ਠਾਸਾ. ਤਤ੍ਥ ਨਾਭਿਤੋ ਪਟ੍ਠਾਯ ਹੇਟ੍ਠਾ ਹੇਟ੍ਠਿਮਕਾਯੋ ਨਾਮ. ਤਸ੍ਮਿਂ ਕਾਯਦਸਕਂ, ਭਾਵਦਸਕਂ, ਆਹਾਰਸਮੁਟ੍ਠਾਨਾਨਿ ਅਟ੍ਠ, ਉਤੁਸਮੁਟ੍ਠਾਨਾਨਿ ਅਟ੍ਠ, ਚਿਤ੍ਤਸਮੁਟ੍ਠਾਨਾਨਿ ਅਟ੍ਠਾਤਿ ਚਤੁਚਤ੍ਤਾਲੀਸ ਰੂਪਾਨਿ. ਨਾਭਿਤੋ ਉਦ੍ਧਂ ਯਾਵ ਗਲਵਾਟਕਾ ਮਜ੍ਝਿਮਕਾਯੋ ਨਾਮ. ਤਤ੍ਥ ਚ ਕਾਯਦਸਕਂ, ਭਾਵਦਸਕਂ, ਵਤ੍ਥੁਦਸਕਂ, ਆਹਾਰਸਮੁਟ੍ਠਾਨਾਦੀਨਿ ਤੀਣਿ ਅਟ੍ਠਕਾਨੀਤਿ ਚਤੁਪਞ੍ਞਾਸ ਰੂਪਾਨਿ. ਗਲਵਾਟਕਤੋ ਉਦ੍ਧਂ ਉਪਰਿਮਕਾਯੋ ਨਾਮ. ਤਤ੍ਥ ਚਕ੍ਖੁਦਸਕਂ, ਸੋਤਦਸਕਂ, ਘਾਨਦਸਕਂ, ਜਿਵ੍ਹਾਦਸਕਂ, ਕਾਯਦਸਕਂ, ਭਾਵਦਸਕਂ, ਆਹਾਰਸਮੁਟ੍ਠਾਨਾਦੀਨਿ ਤੀਣਿ ਅਟ੍ਠਕਾਨੀਤਿ ਚਤੁਰਾਸੀਤਿ ਰੂਪਾਨਿ.

ਤਤ੍ਥ ਚਕ੍ਖੁਪਸਾਦਸ੍ਸ ਪਚ੍ਚਯਾਨਿ ਚਤ੍ਤਾਰਿ ਮਹਾਭੂਤਾਨਿ, ਵਣ੍ਣੋ ਗਨ੍ਧੋ ਰਸੋ ਓਜਾ, ਜੀਵਿਤਿਨ੍ਦ੍ਰਿਯਂ ਚਕ੍ਖੁਪਸਾਦੋਤਿ ਇਦਂ ਏਕਨ੍ਤਤੋ ਅਵਿਨਿਭੁਤ੍ਤਾਨਂ ਦਸਨ੍ਨਂ ਨਿਪ੍ਫਨ੍ਨਰੂਪਾਨਂ ਵਸੇਨ ਚਕ੍ਖੁਦਸਕਂ ਨਾਮ. ਇਮਿਨਾ ਨਯੇਨ ਸੇਸਾਨਿਪਿ ਵੇਦਿਤਬ੍ਬਾਨਿ. ਤੇਸੁ ਹੇਟ੍ਠਿਮਕਾਯੇ ਰੂਪਂ ਮਜ੍ਝਿਮਕਾਯਉਪਰਿਮਕਾਯਰੂਪੇਹਿ ਸਦ੍ਧਿਂ ਅਸਮ੍ਮਿਸ੍ਸਂ. ਸੇਸਕਾਯਦ੍ਵਯੇਪਿ ਰੂਪਂ ਇਤਰੇਹਿ ਸਦ੍ਧਿਂ ਅਸਮ੍ਮਿਸ੍ਸਮੇਵ. ਯਥਾ ਹਿ ਸਾਯਨ੍ਹਸਮਯੇ ਪਬ੍ਬਤਚ੍ਛਾਯਾ ਚ ਰੁਕ੍ਖਚ੍ਛਾਯਾ ਚ ਕਿਞ੍ਚਾਪਿ ਏਕਾਬਦ੍ਧਾ ਵਿਯ ਹੋਨ੍ਤਿ ਅਞ੍ਞਮਞ੍ਞਂ ਪਨ ਅਸਮ੍ਮਿਸ੍ਸਾਵ ਏਵਂ ਇਮੇਸੁਪਿ ਕਾਯੇਸੁ ਚਤੁਚਤ੍ਤਾਲੀਸ ਚਤੁਪਞ੍ਞਾਸ ਚਤੁਰਾਸੀਤਿ ਰੂਪਾਨਿ ਚ ਕਿਞ੍ਚਾਪਿ ਏਕਾਬਦ੍ਧਾਨਿ ਵਿਯ ਹੋਨ੍ਤਿ, ਅਞ੍ਞਮਞ੍ਞਂ ਪਨ ਅਸਮ੍ਮਿਸ੍ਸਾਨੇਵਾਤਿ.

੬੧੬. ਰੂਪਾਯਤਨਨਿਦ੍ਦੇਸੇ ਵਣ੍ਣੋਵ ਵਣ੍ਣਨਿਭਾ; ਨਿਭਾਤੀਤਿ ਵਾ ਨਿਭਾ. ਚਕ੍ਖੁਵਿਞ੍ਞਾਣਸ੍ਸ ਪਾਕਟਾ ਹੋਤੀਤਿ ਅਤ੍ਥੋ. ਵਣ੍ਣੋਵ ਨਿਭਾ ਵਣ੍ਣਨਿਭਾ. ਸਦ੍ਧਿਂ ਨਿਦਸ੍ਸਨੇਨ ਸਨਿਦਸ੍ਸਨਂ, ਚਕ੍ਖੁਵਿਞ੍ਞਾਣੇਨ ਪਸ੍ਸਿਤਬ੍ਬਨ੍ਤਿ ਅਤ੍ਥੋ. ਸਦ੍ਧਿਂ ਪਟਿਘੇਨ ਸਪ੍ਪਟਿਘਂ, ਪਟਿਘਟ੍ਟਨਨਿਘਂਸਜਨਕਨ੍ਤਿ ਅਤ੍ਥੋ. ਨੀਲਾਦੀਸੁ ਉਮਾਪੁਪ੍ਫਸਮਾਨਂ ਨੀਲਂ, ਕਣਿਕਾਰਪੁਪ੍ਫਸਮਾਨਂ ਪੀਤਕਂ, ਬਨ੍ਧੁਜੀਵਕਪੁਪ੍ਫਸਮਾਨਂ ਲੋਹਿਤਕਂ, ਓਸਧਿਤਾਰਕਸਮਾਨਂ ਓਦਾਤਂ. ਝਾਮਙ੍ਗਾਰਸਮਾਨਂ ਕਾਲ਼ਕਂ, ਮਨ੍ਦਰਤ੍ਤਂ ਸਿਨ੍ਦੁਵਾਰਕਰਵੀਰਮਕੁਲ਼ਸਮਾਨਂ ਮਞ੍ਜਿਟ੍ਠਕਂ. ‘‘ਹਰਿਤ੍ਤਚਹੇਮਵਣ੍ਣਕਾਮਂਸੁਮੁਖਪਕ੍ਕਮਾ’’ਤਿ (ਜਾ. ੧.੧੫.੧੩੩) ਏਤ੍ਥ ਪਨ ਕਿਞ੍ਚਾਪਿ ‘ਹਰੀ’ਤਿ ਸੁਵਣ੍ਣਂ ਵੁਤ੍ਤਂ, ਪਰਤੋ ਪਨਸ੍ਸ ਜਾਤਰੂਪਗ੍ਗਹਣੇਨ ਗਹਿਤਤ੍ਤਾ ਇਧ ਸਾਮਂ ਹਰਿ ਨਾਮ. ਇਮਾਨਿ ਸਤ੍ਤ ਵਤ੍ਥੁਂ ਅਨਾਮਸਿਤ੍ਵਾ ਸਭਾਵੇਨੇਵ ਦਸ੍ਸਿਤਾਨਿ.

ਹਰਿਵਣ੍ਣਨ੍ਤਿ ਹਰਿਤਸਦ੍ਦਲਵਣ੍ਣਂ. ਅਮ੍ਬਙ੍ਕੁਰਵਣ੍ਣਨ੍ਤਿ ਅਮ੍ਬਙ੍ਕੁਰੇਨ ਸਮਾਨਵਣ੍ਣਂ. ਇਮਾਨਿ ਦ੍ਵੇ ਵਤ੍ਥੁਂ ਆਮਸਿਤ੍ਵਾ ਦਸ੍ਸਿਤਾਨਿ. ਦੀਘਾਦੀਨਿ ਦ੍ਵਾਦਸ ਵੋਹਾਰਤੋ ਦਸ੍ਸਿਤਾਨਿ. ਸੋ ਚ ਨੇਸਂ ਵੋਹਾਰੋ ਉਪਨਿਧਾਯਸਿਦ੍ਧੋ ਚੇਵ ਸਨ੍ਨਿਵੇਸਸਿਦ੍ਧੋ ਚ. ਦੀਘਾਦੀਨਿ ਹਿ ਅਞ੍ਞਮਞ੍ਞਂ ਉਪਨਿਧਾਯਸਿਦ੍ਧਾਨਿ, ਵਟ੍ਟਾਦੀਨਿ ਸਨ੍ਨਿਵੇਸਵਿਸੇਸੇਨ. ਤਤ੍ਥ ਰਸ੍ਸਂ ਉਪਨਿਧਾਯ ਤਤੋ ਉਚ੍ਚਤਰਂ ਦੀਘਂ, ਤਂ ਉਪਨਿਧਾਯ ਤਤੋ ਨੀਚਤਰਂ ਰਸ੍ਸਂ. ਥੂਲਂ ਉਪਨਿਧਾਯ ਤਤੋ ਖੁਦ੍ਦਕਤਰਂ ਅਣੁਂ, ਤਂ ਉਪਨਿਧਾਯ ਤਤੋ ਮਹਨ੍ਤਤਰਂ ਥੂਲਂ. ਚਕ੍ਕਸਣ੍ਠਾਨਂ ਵਟ੍ਟਂ, ਕੁਕ੍ਕੁਟਣ੍ਡਸਣ੍ਠਾਨਂ ਪਰਿਮਣ੍ਡਲਂ. ਚਤੂਹਿ ਅਂਸੇਹਿ ਯੁਤ੍ਤਂ ਚਤੁਰਂਸਂ. ਛਲ਼ਂਸਾਦੀਸੁਪਿ ਏਸੇਵ ਨਯੋ. ਨਿਨ੍ਨਨ੍ਤਿ ਓਨਤਂ, ਥਲਨ੍ਤਿ ਉਨ੍ਨਤਂ.

ਤਤ੍ਥ ਯਸ੍ਮਾ ਦੀਘਾਦੀਨਿ ਫੁਸਿਤ੍ਵਾ ਸਕ੍ਕਾ ਜਾਨਿਤੁਂ, ਨੀਲਾਦੀਨਿ ਪਨੇਵਂ ਨ ਸਕ੍ਕਾ, ਤਸ੍ਮਾ ਨ ਨਿਪ੍ਪਰਿਯਾਯੇਨ ਦੀਘਂ ਰੂਪਾਯਤਨਂ; ਤਥਾ ਰਸ੍ਸਾਦੀਨਿ. ਤਂ ਤਂ ਨਿਸ੍ਸਾਯ ਪਨ ਤਥਾ ਤਥਾ ਠਿਤਂ ਦੀਘਂ ਰਸ੍ਸਨ੍ਤਿ ਤੇਨ ਤੇਨ ਵੋਹਾਰੇਨ ਰੂਪਾਯਤਨਮੇਵੇਤ੍ਥ ਭਾਸਿਤਨ੍ਤਿ ਵੇਦਿਤਬ੍ਬਂ. ਛਾਯਾ ਆਤਪੋਤਿ ਇਦਂ ਅਞ੍ਞਮਞ੍ਞਪਰਿਚ੍ਛਿਨ੍ਨਂ; ਤਥਾ ਆਲੋਕੋ ਅਨ੍ਧਕਾਰੋ ਚ. ਅਬ੍ਭਾ ਮਹਿਕਾਤਿਆਦੀਨਿ ਚਤ੍ਤਾਰਿ ਵਤ੍ਥੁਨਾਵ ਦਸ੍ਸਿਤਾਨਿ. ਤਤ੍ਥ ‘ਅਬ੍ਭਾ’ਤਿ ਵਲਾਹਕੋ. ‘ਮਹਿਕਾ’ਤਿ ਹਿਮਂ. ਇਮੇਹਿ ਚਤੂਹਿ ਅਬ੍ਭਾਦੀਨਂ ਵਣ੍ਣਾ ਦਸ੍ਸਿਤਾ. ਚਨ੍ਦਮਣ੍ਡਲਸ੍ਸ ਵਣ੍ਣਨਿਭਾਤਿਆਦੀਹਿ ਤੇਸਂ ਤੇਸਂ ਪਭਾਵਣ੍ਣਾ ਦਸ੍ਸਿਤਾ.

ਤਤ੍ਥ ਚਨ੍ਦਮਣ੍ਡਲਾਦੀਨਂ ਵਤ੍ਥੂਨਂ ਏਵਂ ਵਿਸੇਸੋ ਵੇਦਿਤਬ੍ਬੋ – ਮਣਿਮਯਂ ਰਜਤਪਟਿਚ੍ਛਨ੍ਨਂ ਏਕੂਨਪਞ੍ਞਾਸਯੋਜਨਾਯਾਮਵਿਤ੍ਥਾਰਂ ਚਨ੍ਦਸ੍ਸ ਦੇਵਪੁਤ੍ਤਸ੍ਸ ਵਿਮਾਨਂ ਚਨ੍ਦਮਣ੍ਡਲਂ ਨਾਮ. ਸੋਵਣ੍ਣਮਯਂ ਫਲਿਕਪਟਿਚ੍ਛਨ੍ਨਂ ਸਮਪਣ੍ਣਾਸਯੋਜਨਾਯਾਮਵਿਤ੍ਥਾਰਂ ਸੂਰਿਯਸ੍ਸ ਦੇਵਪੁਤ੍ਤਸ੍ਸ ਵਿਮਾਨਂ ਸੂਰਿਯਮਣ੍ਡਲਂ ਨਾਮ. ਸਤ੍ਤਰਤਨਮਯਾਨਿ ਸਤ੍ਤਟ੍ਠਦਸਦ੍ਵਾਦਸਯੋਜਨਾਯਾਮਵਿਤ੍ਥਾਰਾਨਿ ਤੇਸਂ ਤੇਸਂ ਦੇਵਪੁਤ੍ਤਾਨਂ ਵਿਮਾਨਾਨਿ ਤਾਰਕਰੂਪਾਨਿ ਨਾਮ.

ਤਤ੍ਥ ਹੇਟ੍ਠਾ ਚਨ੍ਦੋ, ਸੂਰਿਯੋ ਉਪਰਿ, ਉਭਿਨ੍ਨਮਨ੍ਤਰਂ ਯੋਜਨਂ ਹੋਤਿ. ਚਨ੍ਦਸ੍ਸ ਹੇਟ੍ਠਿਮਨ੍ਤਤੋ ਸੂਰਿਯਸ੍ਸ ਉਪਰਿਮਨ੍ਤੋ ਯੋਜਨਸਤਂ ਹੋਤਿ. ਦ੍ਵੀਸੁ ਪਸ੍ਸੇਸੁ ਨਕ੍ਖਤ੍ਤਤਾਰਕਾ ਗਚ੍ਛਨ੍ਤਿ. ਏਤੇਸੁ ਪਨ ਤੀਸੁ ਚਨ੍ਦੋ ਦਨ੍ਧਗਮਨੋ, ਸੂਰਿਯੋ ਸੀਘਗਮਨੋ, ਨਕ੍ਖਤ੍ਤਤਾਰਕਾ ਸਬ੍ਬਸੀਘਗਮਨਾ. ਕਾਲੇਨ ਚਨ੍ਦਿਮਸੂਰਿਯਾਨਂ ਪੁਰਤੋ ਹੋਨ੍ਤਿ ਕਾਲੇਨ ਪਚ੍ਛਾ.

ਆਦਾਸਮਣ੍ਡਲਨ੍ਤਿ ਕਂਸਮਯਂ. ਮਣੀਤਿ ਠਪੇਤ੍ਵਾ ਵੇਲ਼ੁਰਿਯਂ ਸੇਸੋ ਜੋਤਿਰਸਾਦਿਅਨੇਕਪ੍ਪਭੇਦੋ. ਸਙ੍ਖੋਤਿ ਸਾਮੁਦ੍ਦਿਕੋ; ਮੁਤ੍ਤਾ ਸਾਮੁਦ੍ਦਿਕਾਪਿ, ਸੇਸਾਪਿ. ਵੇਲ਼ੁਰਿਯੋਤਿ ਵੇਲ਼ੁਵਣ੍ਣਮਣਿ. ਜਾਤਰੂਪਂ ਵੁਚ੍ਚਤਿ ਸਤ੍ਥੁਵਣ੍ਣੋ. ਸਤ੍ਥਾ ਹਿ ਸੁਵਣ੍ਣਵਣ੍ਣੋ, ਸੁਵਣ੍ਣਮ੍ਪਿ ਸਤ੍ਥੁਵਣ੍ਣਂ. ਰਜਤਂ ਵੁਚ੍ਚਤਿ ਕਹਾਪਣੋ – ਲੋਹਮਾਸਕੋ ਦਾਰੁਮਾਸਕੋ ਜਤੁਮਾਸਕੋ, ਯੇ ‘ਵੋਹਾਰਂ ਗਚ੍ਛਨ੍ਤੀ’ਤਿ (ਪਾਰਾ. ੫੮੪) ਵੁਤ੍ਤਂ ਤਂ ਸਬ੍ਬਮ੍ਪਿ ਇਧ ਗਹਿਤਂ.

ਯਂ ਵਾ ਪਨਞ੍ਞਮ੍ਪੀਤਿ ਇਮਿਨਾ ਪਾਲ਼ਿਆਗਤਂ ਠਪੇਤ੍ਵਾ ਸੇਸਂ ਤਟ੍ਟਿਕਪਿਲੋਤਿਕਕਣ੍ਣਿਕਵਣ੍ਣਾਦਿਭੇਦਂ ਰੂਪਂ ਗਹਿਤਂ. ਤਞ੍ਹਿ ਸਬ੍ਬਂ ਯੇਵਾਪਨਕੇਸੁ ਪਵਿਟ੍ਠਂ.

ਏਵਮੇਤਂ ਨੀਲਾਦਿਨਾ ਭੇਦੇਨ ਭਿਨ੍ਨਮ੍ਪਿ ਰੂਪਂ ਸਬ੍ਬਂ ਲਕ੍ਖਣਾਦੀਹਿ ਅਭਿਨ੍ਨਮੇਵ. ਸਬ੍ਬਞ੍ਹੇਤਂ ਚਕ੍ਖੁਪਟਿਹਨਨਲਕ੍ਖਣਂ ਰੂਪਂ, ਚਕ੍ਖੁਵਿਞ੍ਞਾਣਸ੍ਸ ਵਿਸਯਭਾਵਰਸਂ, ਤਸ੍ਸੇਵ ਗੋਚਰਪਚ੍ਚੁਪਟ੍ਠਾਨਂ, ਚਤੁਮਹਾਭੂਤਪਦਟ੍ਠਾਨਂ. ਯਥਾ ਚੇਤਂ ਤਥਾ ਸਬ੍ਬਾਨਿਪਿ ਉਪਾਦਾਰੂਪਾਨਿ. ਯਤ੍ਥ ਪਨ ਵਿਸੇਸੋ ਅਤ੍ਥਿ ਤਤ੍ਥ ਵਕ੍ਖਾਮ. ਸੇਸਮੇਤ੍ਥ ਚਕ੍ਖਾਯਤਨਨਿਦ੍ਦੇਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਕੇਵਲਞ੍ਹਿ ਤਤ੍ਥ ਚਕ੍ਖੁਪੁਬ੍ਬਙ੍ਗਮੋ ਨਿਦ੍ਦੇਸੋ ਇਧ ਰੂਪਪੁਬ੍ਬਙ੍ਗਮੋ. ਤਤ੍ਥ ‘ਚਕ੍ਖੁਂ ਪੇਤ’ਨ੍ਤਿਆਦੀਨਿ ਚੁਦ੍ਦਸ ਨਾਮਾਨਿ, ਇਧ ‘ਰੂਪਂਪੇਤ’ਨ੍ਤਿਆਦੀਨਿ ਤੀਣਿ. ਸੇਸਂ ਤਾਦਿਸਮੇਵ. ਯਥਾ ਹਿ ਚਤੂਹਿ ਚਤੂਹਿ ਨਯੇਹਿ ਪਟਿਮਣ੍ਡੇਤ੍ਵਾ ਚਕ੍ਖੁਂ ਵਵਤ੍ਥਾਪੇਤੁਂ ਤੇਰਸ ਵਾਰਾ ਵੁਤ੍ਤਾ, ਇਧਾਪਿ ਤੇ ਤਥੇਵ ਵੁਤ੍ਤਾਤਿ.

੬੨੦. ਸਦ੍ਦਾਯਤਨਨਿਦ੍ਦੇਸੇ ਭੇਰਿਸਦ੍ਦੋਤਿ ਮਹਾਭੇਰੀਪਹਟਭੇਰੀਨਂ ਸਦ੍ਦੋ. ਮੁਦਿਙ੍ਗਸਙ੍ਖਪਣਵਸਦ੍ਦਾਪਿ ਮੁਦਿਙ੍ਗਾਦਿਪਚ੍ਚਯਾ ਸਦ੍ਦਾ. ਗੀਤਸਙ੍ਖਾਤੋ ਸਦ੍ਦੋ ਗੀਤਸਦ੍ਦੋ. ਵੁਤ੍ਤਾਵਸੇਸਾਨਂ ਵੀਣਾਦੀਨਂ ਤਨ੍ਤਿਬਦ੍ਧਾਨਂ ਸਦ੍ਦੋ ਵਾਦਿਤਸਦ੍ਦੋ. ਸਮ੍ਮਸਦ੍ਦੋਤਿ ਕਂਸਤਾਲਕਟ੍ਠਤਾਲਸਦ੍ਦੋ. ਪਾਣਿਸਦ੍ਦੋਤਿ ਪਾਣਿਪ੍ਪਹਾਰਸਦ੍ਦੋ. ਸਤ੍ਤਾਨਂ ਨਿਗ੍ਘੋਸਸਦ੍ਦੋਤਿ ਬਹੂਨਂ ਸਨ੍ਨਿਪਤਿਤਾਨਂ ਅਪਞ੍ਞਾਯਮਾਨਪਦਬ੍ਯਞ੍ਜਨਨਿਗ੍ਘੋਸਸਦ੍ਦੋ. ਧਾਤੂਨਂ ਸਨ੍ਨਿਘਾਤਸਦ੍ਦੋਤਿ ਰੁਕ੍ਖਾਨਂ ਅਞ੍ਞਮਞ੍ਞਨਿਘਂਸਨਘਣ੍ਟਿਕਾਕੋਟਨਾਦਿਸਦ੍ਦੋ. ਵਾਤਸ੍ਸ ਵਾਯਤੋ ਸਦ੍ਦੋ ਵਾਤਸਦ੍ਦੋ. ਉਦਕਸ੍ਸ ਸਨ੍ਦਮਾਨਸ੍ਸ ਵਾ ਪਟਿਹਤਸ੍ਸ ਵਾ ਸਦ੍ਦੋ ਉਦਕਸਦ੍ਦੋ. ਮਨੁਸ੍ਸਾਨਂ ਸਲ੍ਲਾਪਾਦਿਸਦ੍ਦੋ ਮਨੁਸ੍ਸਸਦ੍ਦੋ. ਤਂ ਠਪੇਤ੍ਵਾ ਸੇਸੋ ਸਬ੍ਬੋਪਿ ਅਮਨੁਸ੍ਸਸਦ੍ਦੋ. ਇਮਿਨਾ ਪਦਦ੍ਵਯੇਨ ਸਬ੍ਬੋਪਿ ਸਦ੍ਦੋ ਪਰਿਯਾਦਿਨ੍ਨੋ. ਏਵਂ ਸਨ੍ਤੇਪਿ ਵਂਸਫਾਲਨਪਿਲੋਤਿਕਫਾਲਨਾਦੀਸੁ ਪਵਤ੍ਤੋ ਪਾਲ਼ਿਯਂ ਅਨਾਗਤਸਦ੍ਦੋ ਯੇਵਾਪਨਕਟ੍ਠਾਨਂ ਪਵਿਟ੍ਠੋਤਿ ਵੇਦਿਤਬ੍ਬੋ.

ਏਵਮਯਂ ਭੇਰੀਸਦ੍ਦਾਦਿਨਾ ਭੇਦੇਨ ਭਿਨ੍ਨੋਪਿ ਸਦ੍ਦੋ ਲਕ੍ਖਣਾਦੀਹਿ ਅਭਿਨ੍ਨੋਯੇਵ. ਸਬ੍ਬੋਪਿ ਹੇਸ ਸੋਤਪਟਿਹਨਨਲਕ੍ਖਣੋ ਸਦ੍ਦੋ ਸੋਤਵਿਞ੍ਞਾਣਸ੍ਸ ਵਿਸਯਭਾਵਰਸੋ, ਤਸ੍ਸੇਵ ਗੋਚਰਪਚ੍ਚੁਪਟ੍ਠਾਨੋ. ਸੇਸਂ ਚਕ੍ਖਾਯਤਨਨਿਦ੍ਦੇਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਧਾਪਿ ਹਿ ਚਤੂਹਿ ਚਤੂਹਿ ਨਯੇਹਿ ਪਟਿਮਣ੍ਡਿਤਾ ਤੇਰਸ ਵਾਰਾ ਵੁਤ੍ਤਾ. ਤੇਸਂ ਅਤ੍ਥੋ ਸਕ੍ਕਾ ਵੁਤ੍ਤਨਯੇਨੇਵ ਜਾਨਿਤੁਨ੍ਤਿ ਨ ਵਿਤ੍ਥਾਰਿਤੋ.

੬੨੪. ਗਨ੍ਧਾਯਤਨਨਿਦ੍ਦੇਸੇ ਮੂਲਗਨ੍ਧੋਤਿ ਯਂ ਕਿਞ੍ਚਿ ਮੂਲਂ ਪਟਿਚ੍ਚ ਨਿਬ੍ਬਤ੍ਤੋ ਗਨ੍ਧੋ. ਸਾਰਗਨ੍ਧਾਦੀਸੁਪਿ ਏਸੇਵ ਨਯੋ. ਅਸਿਦ੍ਧਦੁਸਿਦ੍ਧਾਨਂ ਡਾਕਾਦੀਨਂ ਗਨ੍ਧੋ ਆਮਕਗਨ੍ਧੋ. ਮਚ੍ਛਸਕਲਿਕਾਪੂਤਿਮਂਸਸਂਕਿਲਿਟ੍ਠਸਪ੍ਪਿਆਦੀਨਂ ਗਨ੍ਧੋ ਵਿਸ੍ਸਗਨ੍ਧੋ. ਸੁਗਨ੍ਧੋਤਿ ਇਟ੍ਠਗਨ੍ਧੋ. ਦੁਗ੍ਗਨ੍ਧੋਤਿ ਅਨਿਟ੍ਠਗਨ੍ਧੋ. ਇਮਿਨਾ ਪਦਦ੍ਵਯੇਨ ਸਬ੍ਬੋਪਿ ਗਨ੍ਧੋ ਪਰਿਯਾਦਿਨ੍ਨੋ. ਏਵਂ ਸਨ੍ਤੇਪਿ ਕਣ੍ਣਕਗਨ੍ਧਪਿਲੋਤਿਕਗਨ੍ਧਾਦਯੋ ਪਾਲ਼ਿਯਂ ਅਨਾਗਤਾ ਸਬ੍ਬੇਪਿ ਗਨ੍ਧਾ ਯੇਵਾਪਨਕਟ੍ਠਾਨਂ ਪਵਿਟ੍ਠਾਤਿ ਵੇਦਿਤਬ੍ਬਾ.

ਏਵਮਯਂ ਮੂਲਗਨ੍ਧਾਦਿਨਾ ਭੇਦੇਨ ਭਿਨ੍ਨੋਪਿ ਗਨ੍ਧੋ ਲਕ੍ਖਣਾਦੀਹਿ ਅਭਿਨ੍ਨੋਯੇਵ. ਸਬ੍ਬੋਪਿ ਹੇਸ ਘਾਨਪਟਿਹਨਨਲਕ੍ਖਣੋ ਗਨ੍ਧੋ, ਘਾਨਵਿਞ੍ਞਾਣਸ੍ਸ ਵਿਸਯਭਾਵਰਸੋ, ਤਸ੍ਸੇਵ ਗੋਚਰਪਚ੍ਚੁਪਟ੍ਠਾਨੋ. ਸੇਸਂ ਚਕ੍ਖਾਯਤਨਨਿਦ੍ਦੇਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਧਾਪਿ ਹਿ ਤਥੇਵ ਦ੍ਵਿਪਞ੍ਞਾਸਨਯਪਟਿਮਣ੍ਡਿਤਾ ਤੇਰਸ ਵਾਰਾ ਵੁਤ੍ਤਾ. ਤੇ ਅਤ੍ਥਤੋ ਪਾਕਟਾਯੇਵ.

੬੨੮. ਰਸਾਯਤਨਨਿਦ੍ਦੇਸੇ ਮੂਲਰਸੋਤਿ ਯਂਕਿਞ੍ਚਿ ਮੂਲਂ ਪਟਿਚ੍ਚ ਨਿਬ੍ਬਤ੍ਤਰਸੋ. ਖਨ੍ਧਰਸਾਦੀਸੁਪਿ ਏਸੇਵ ਨਯੋ. ਅਮ੍ਬਿਲਨ੍ਤਿ ਤਕ੍ਕਮ੍ਬਿਲਾਦਿ. ਮਧੁਰਨ੍ਤਿ ਏਕਨ੍ਤਤੋ ਗੋਸਪ੍ਪਿਆਦਿ. ਮਧੁ ਪਨ ਕਸਾਵਯੁਤ੍ਤਂ ਚਿਰਨਿਕ੍ਖਿਤ੍ਤਂ ਕਸਾਵਂ ਹੋਤਿ. ਫਾਣਿਤਂ ਖਾਰਿਯੁਤ੍ਤਂ ਚਿਰਨਿਕ੍ਖਿਤ੍ਤਂ ਖਾਰਿਯਂ ਹੋਤਿ. ਸਪ੍ਪਿ ਪਨ ਚਿਰਨਿਕ੍ਖਿਤ੍ਤਂ ਵਣ੍ਣਗਨ੍ਧੇ ਜਹਨ੍ਤਮ੍ਪਿ ਰਸਂ ਨ ਜਹਤੀਤਿ ਤਦੇਵ ਏਕਨ੍ਤਮਧੁਰਂ. ਤਿਤ੍ਤਕਨ੍ਤਿ ਨਿਮ੍ਬਪਣ੍ਣਾਦਿ. ਕਟੁਕਨ੍ਤਿ ਸਿਙ੍ਗਿਵੇਰਮਰਿਚਾਦਿ. ਲੋਣਿਕਨ੍ਤਿ ਸਾਮੁਦ੍ਦਿਕਲੋਣਾਦਿ. ਖਾਰਿਕਨ੍ਤਿ ਵਾਤਿਙ੍ਗਣਕਲ਼ੀਰਾਦਿ. ਲਮ੍ਬਿਲਨ੍ਤਿ ਬਦਰਾਮਲਕਕਪਿਟ੍ਠਸਾਲਵਾਦਿ. ਕਸਾਵਨ੍ਤਿ ਹਰਿਤਕਾਦਿ. ਇਮੇ ਸਬ੍ਬੇਪਿ ਰਸਾ ਵਤ੍ਥੁਵਸੇਨ ਵੁਤ੍ਤਾ. ਤਂਤਂਵਤ੍ਥੁਤੋ ਪਨੇਤ੍ਥ ਰਸੋਵ ਅਮ੍ਬਿਲਾਦੀਹਿ ਨਾਮੇਹਿ ਵੁਤ੍ਤੋਤਿ ਵੇਦਿਤਬ੍ਬੋ. ਸਾਦੂਤਿ ਇਟ੍ਠਰਸੋ, ਅਸਾਦੂਤਿ ਅਨਿਟ੍ਠਰਸੋ. ਇਮਿਨਾ ਪਦਦ੍ਵਯੇਨ ਸਬ੍ਬੋਪਿ ਰਸੋ ਪਰਿਯਾਦਿਨ੍ਨੋ. ਏਵਂ ਸਨ੍ਤੇਪਿ ਲੇਡ੍ਡੁਰਸਭਿਤ੍ਤਿਰਸਪਿਲੋਤਿਕਰਸਾਦਯੋ ਪਾਲ਼ਿਯਂ ਅਨਾਗਤਾ ਸਬ੍ਬੇਪਿ ਰਸਾ ਯੇਵਾਪਨਕਟ੍ਠਾਨਂ ਪਵਿਟ੍ਠਾਤਿ ਵੇਦਿਤਬ੍ਬਾ.

ਏਵਮਯਂ ਮੂਲਰਸਾਦਿਨਾਭੇਦੇਨ ਭਿਨ੍ਨੋਪਿ ਰਸੋ ਲਕ੍ਖਣਾਦੀਹਿ ਅਭਿਨ੍ਨੋਯੇਵ. ਸਬ੍ਬੋਪਿ ਹੇਸ ਜਿਵ੍ਹਾਪਟਿਹਨਨਲਕ੍ਖਣੋ ਰਸੋ, ਜਿਵ੍ਹਾਵਿਞ੍ਞਾਣਸ੍ਸ ਵਿਸਯਭਾਵਰਸੋ, ਤਸ੍ਸੇਵ ਗੋਚਰਪਚ੍ਚੁਪਟ੍ਠਾਨੋ. ਸੇਸਂ ਚਕ੍ਖਾਯਤਨਨਿਦ੍ਦੇਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਧਾਪਿ ਹਿ ਤਥੇਵ ਦ੍ਵਿਪਞ੍ਞਾਸਨਯਪਟਿਮਣ੍ਡਿਤਾ ਤੇਰਸ ਵਾਰਾ ਵੁਤ੍ਤਾ.

੬੩੨. ਇਤ੍ਥਿਨ੍ਦ੍ਰਿਯਨਿਦ੍ਦੇਸੇ ਯਨ੍ਤਿ ਕਰਣਵਚਨਂ. ਯੇਨ ਕਾਰਣੇਨ ਇਤ੍ਥਿਯਾ ਇਤ੍ਥਿਲਿਙ੍ਗਾਦੀਨਿ ਹੋਨ੍ਤੀਤਿ ਅਯਮੇਤ੍ਥ ਅਤ੍ਥੋ. ਤਤ੍ਥ ‘ਲਿਙ੍ਗ’ਨ੍ਤਿ ਸਣ੍ਠਾਨਂ. ਇਤ੍ਥਿਯਾ ਹਿ ਹਤ੍ਥਪਾਦਗੀਵਾਉਰਾਦੀਨਂ ਸਣ੍ਠਾਨਂ ਨ ਪੁਰਿਸਸ੍ਸ ਵਿਯ ਹੋਤਿ. ਇਤ੍ਥੀਨਞ੍ਹਿ ਹੇਟ੍ਠਿਮਕਾਯੋ ਵਿਸਦੋ ਹੋਤਿ, ਉਪਰਿਮਕਾਯੋ ਅਵਿਸਦੋ. ਹਤ੍ਥਪਾਦਾ ਖੁਦ੍ਦਕਾ, ਮੁਖਂ ਖੁਦ੍ਦਕਂ. ਨਿਮਿਤ੍ਤਨ੍ਤਿ ਸਞ੍ਜਾਨਨਂ. ਇਤ੍ਥੀਨਞ੍ਹਿ ਉਰਮਂਸਂ ਅਵਿਸਦਂ ਹੋਤਿ, ਮੁਖਂ ਨਿਮ੍ਮਸ੍ਸੁਦਾਠਿਕਂ. ਕੇਸਬਨ੍ਧਵਤ੍ਥਗ੍ਗਹਣਮ੍ਪਿ ਨ ਪੁਰਿਸਾਨਂ ਵਿਯ ਹੋਤਿ. ਕੁਤ੍ਤਨ੍ਤਿ ਕਿਰਿਯਾ. ਇਤ੍ਥਿਯੋ ਹਿ ਦਹਰਕਾਲੇ ਸੁਪ੍ਪਕਮੁਸਲਕੇਹਿ ਕੀਲ਼ਨ੍ਤਿ, ਚਿਤ੍ਤਧੀਤਲਿਕਾਯ ਕੀਲ਼ਨ੍ਤਿ, ਮਤ੍ਤਿਕਵਾਕੇਨ ਸੁਤ੍ਤਕਂ ਨਾਮ ਕਨ੍ਤਨ੍ਤਿ. ਆਕਪ੍ਪੋਤਿ ਗਮਨਾਦਿਆਕਾਰੋ. ਇਤ੍ਥਿਯੋ ਹਿ ਗਚ੍ਛਮਾਨਾ ਅਵਿਸਦਾ ਗਚ੍ਛਨ੍ਤਿ, ਤਿਟ੍ਠਮਾਨਾ ਨਿਪਜ੍ਜਮਾਨਾ ਨਿਸੀਦਮਾਨਾ ਖਾਦਮਾਨਾ ਭੁਞ੍ਜਮਾਨਾ ਅਵਿਸਦਾ ਭੁਞ੍ਜਨ੍ਤਿ. ਪੁਰਿਸਮ੍ਪਿ ਹਿ ਅਵਿਸਦਂ ਦਿਸ੍ਵਾ ਮਾਤੁਗਾਮੋ ਵਿਯ ਗਚ੍ਛਤਿ ਤਿਟ੍ਠਤਿ ਨਿਪਜ੍ਜਤਿ ਨਿਸੀਦਤਿ ਖਾਦਤਿ ਭੁਞ੍ਜਤੀਤਿ ਵਦਨ੍ਤਿ.

ਇਤ੍ਥਤ੍ਤਂ ਇਤ੍ਥਿਭਾਵੋਤਿ ਉਭਯਮ੍ਪਿ ਏਕਤ੍ਥਂ; ਇਤ੍ਥਿਸਭਾਵੋਤਿ ਅਤ੍ਥੋ. ਅਯਂ ਕਮ੍ਮਜੋ ਪਟਿਸਨ੍ਧਿਸਮੁਟ੍ਠਿਤੋ. ਇਤ੍ਥਿਲਿਙ੍ਗਾਦੀਨਿ ਪਨ ਇਤ੍ਥਿਨ੍ਦ੍ਰਿਯਂ ਪਟਿਚ੍ਚ ਪਵਤ੍ਤੇ ਸਮੁਟ੍ਠਿਤਾਨਿ. ਯਥਾ ਹਿ ਬੀਜੇ ਸਤਿ, ਬੀਜਂ ਪਟਿਚ੍ਚ, ਬੀਜਪਚ੍ਚਯਾ ਰੁਕ੍ਖੋ ਵਡ੍ਢਿਤ੍ਵਾ ਸਾਖਾਵਿਟਪਸਮ੍ਪਨ੍ਨੋ ਹੁਤ੍ਵਾ ਆਕਾਸਂ ਪੂਰੇਤ੍ਵਾ ਤਿਟ੍ਠਤਿ, ਏਵਮੇਵ ਇਤ੍ਥਿਭਾਵਸਙ੍ਖਾਤੇ ਇਤ੍ਥਿਨ੍ਦ੍ਰਿਯੇ ਸਤਿ ਇਤ੍ਥਿਲਿਙ੍ਗਾਦੀਨਿ ਹੋਨ੍ਤਿ. ਬੀਜਂ ਵਿਯ ਹਿ ਇਤ੍ਥਿਨ੍ਦ੍ਰਿਯਂ, ਬੀਜਂ ਪਟਿਚ੍ਚ ਵਡ੍ਢਿਤ੍ਵਾ ਆਕਾਸਂ ਪੂਰੇਤ੍ਵਾ ਠਿਤਰੁਕ੍ਖੋ ਵਿਯ ਇਤ੍ਥਿਨ੍ਦ੍ਰਿਯਂ ਪਟਿਚ੍ਚ ਇਤ੍ਥਿਲਿਙ੍ਗਾਦੀਨਿ ਪਵਤ੍ਤੇ ਸਮੁਟ੍ਠਹਨ੍ਤਿ. ਤਤ੍ਥ ਇਤ੍ਥਿਨ੍ਦ੍ਰਿਯਂ ਨ ਚਕ੍ਖੁਵਿਞ੍ਞੇਯ੍ਯਂ, ਮਨੋਵਿਞ੍ਞੇਯ੍ਯਮੇਵ. ਇਤ੍ਥਿਲਿਙ੍ਗਾਦੀਨਿ ਚਕ੍ਖੁਵਿਞ੍ਞੇਯ੍ਯਾਨਿਪਿ ਮਨੋਵਿਞ੍ਞੇਯ੍ਯਾਨਿਪਿ.

ਇਦਂ ਤਂ ਰੂਪਂ ਇਤ੍ਥਿਨ੍ਦ੍ਰਿਯਨ੍ਤਿ ਇਦਂ ਤਂ ਰੂਪਂ, ਯਥਾ ਚਕ੍ਖੁਨ੍ਦ੍ਰਿਯਾਦੀਨਿ ਪੁਰਿਸਸ੍ਸਾਪਿ ਹੋਨ੍ਤਿ, ਨ ਏਵਂ; ਨਿਯਮਤੋ ਪਨ ਇਤ੍ਥਿਯਾ ਏਵ ਇਨ੍ਦ੍ਰਿਯਂ ‘ਇਤ੍ਥਿਨ੍ਦ੍ਰਿਯਂ’.

੬੩੩. ਪੁਰਿਸਿਨ੍ਦ੍ਰਿਯੇਪਿ ਏਸੇਵ ਨਯੋ. ਪੁਰਿਸਲਿਙ੍ਗਾਦੀਨਿ ਪਨ ਇਤ੍ਥਿਲਿਙ੍ਗਾਦੀਨਂ ਪਟਿਪਕ੍ਖਤੋ ਵੇਦਿਤਬ੍ਬਾਨਿ. ਪੁਰਿਸਸ੍ਸ ਹਿ ਹਤ੍ਥਪਾਦਗੀਵਾਉਰਾਦੀਨਂ ਸਣ੍ਠਾਨਂ ਨ ਇਤ੍ਥਿਯਾ ਵਿਯ ਹੋਤਿ. ਪੁਰਿਸਾਨਞ੍ਹਿ ਉਪਰਿਮਕਾਯੋ ਵਿਸਦੋ ਹੋਤਿ ਹੇਟ੍ਠਿਮਕਾਯੋ ਅਵਿਸਦੋ, ਹਤ੍ਥਪਾਦਾ ਮਹਨ੍ਤਾ, ਮੁਖਂ ਮਹਨ੍ਤਂ, ਉਰਮਂਸਂ ਵਿਸਦਂ, ਮਸ੍ਸੁਦਾਠਿਕਾ ਉਪ੍ਪਜ੍ਜਨ੍ਤਿ. ਕੇਸਬਨ੍ਧਨਵਤ੍ਥਗ੍ਗਹਣਂ ਨ ਇਤ੍ਥੀਨਂ ਵਿਯ ਹੋਤਿ. ਦਹਰਕਾਲੇ ਰਥਨਙ੍ਗਲਾਦੀਹਿ ਕੀਲ਼ਨ੍ਤਿ, ਵਾਲਿਕਪਾਲ਼ਿਂ ਕਤ੍ਵਾ ਵਾਪਿਂ ਨਾਮ ਖਨਨ੍ਤਿ, ਗਮਨਾਦੀਨਿ ਵਿਸਦਾਨਿ ਹੋਨ੍ਤਿ. ਇਤ੍ਥਿਮ੍ਪਿ ਗਮਨਾਦੀਨਿ ਵਿਸਦਾਨਿ ਕੁਰੁਮਾਨਂ ਦਿਸ੍ਵਾ ‘ਪੁਰਿਸੋ ਵਿਯ ਗਚ੍ਛਤੀ’ਤਿਆਦੀਨਿ ਵਦਨ੍ਤਿ. ਸੇਸਂ ਇਤ੍ਥਿਨ੍ਦ੍ਰਿਯੇ ਵੁਤ੍ਤਸਦਿਸਮੇਵ.

ਤਤ੍ਥ ਇਤ੍ਥਿਭਾਵਲਕ੍ਖਣਂ ਇਤ੍ਥਿਨ੍ਦ੍ਰਿਯਂ, ਇਤ੍ਥੀਤਿ ਪਕਾਸਨਰਸਂ, ਇਤ੍ਥਿਲਿਙ੍ਗਨਿਮਿਤ੍ਤਕੁਤ੍ਤਾਕਪ੍ਪਾਨਂ ਕਾਰਣਭਾਵਪਚ੍ਚੁਪਟ੍ਠਾਨਂ. ਪੁਰਿਸਭਾਵਲਕ੍ਖਣਂ ਪੁਰਿਸਿਨ੍ਦ੍ਰਿਯਂ, ਪੁਰਿਸੋਤਿ ਪਕਾਸਨਰਸਂ, ਪੁਰਿਸਲਿਙ੍ਗਨਿਮਿਤ੍ਤਕੁਤ੍ਤਾਕਪ੍ਪਾਨਂ ਕਾਰਣਭਾਵਪਚ੍ਚੁਪਟ੍ਠਾਨਂ. ਉਭਯਮ੍ਪੇਤਂ ਪਠਮਕਪ੍ਪਿਕਾਨਂ ਪਵਤ੍ਤੇ ਸਮੁਟ੍ਠਾਤਿ. ਅਪਰਭਾਗੇ ਪਟਿਸਨ੍ਧਿਯਂ. ਪਟਿਸਨ੍ਧਿਸਮੁਟ੍ਠਿਤਮ੍ਪਿ ਪਵਤ੍ਤੇ ਚਲਤਿ ਪਰਿਵਤ੍ਤਤਿ.

ਯਥਾਹ –

‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਇਤ੍ਥਿਲਿਙ੍ਗਂ ਪਾਤੁਭੂਤਂ ਹੋਤਿ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਿਸ੍ਸਾ ਭਿਕ੍ਖੁਨਿਯਾ ਪੁਰਿਸਲਿਙ੍ਗਂ ਪਾਤੁਭੂਤਂ ਹੋਤੀ’’ਤਿ (ਪਾਰਾ. ੬੯).

ਇਮੇਸੁ ਪਨ ਦ੍ਵੀਸੁ ਪੁਰਿਸਲਿਙ੍ਗਂ ਉਤ੍ਤਮਂ, ਇਤ੍ਥਿਲਿਙ੍ਗਂ ਹੀਨਂ. ਤਸ੍ਮਾ ਪੁਰਿਸਲਿਙ੍ਗਂ ਬਲਵਅਕੁਸਲੇਨ ਅਨ੍ਤਰਧਾਯਤਿ, ਇਤ੍ਥਿਲਿਙ੍ਗਂ ਦੁਬ੍ਬਲਕੁਸਲੇਨ ਪਤਿਟ੍ਠਾਤਿ. ਇਤ੍ਥਿਲਿਙ੍ਗਂ ਪਨ ਅਨ੍ਤਰਧਾਯਨ੍ਤਂ ਦੁਬ੍ਬਲਅਕੁਸਲੇਨ ਅਨ੍ਤਰਧਾਯਤਿ, ਪੁਰਿਸਲਿਙ੍ਗਂ ਬਲਵਕੁਸਲੇਨ ਪਤਿਟ੍ਠਾਤਿ. ਏਵਂ ਉਭਯਮ੍ਪਿ ਅਕੁਸਲੇਨ ਅਨ੍ਤਰਧਾਯਤਿ, ਕੁਸਲੇਨ ਪਤਿਟ੍ਠਾਤੀਤਿ ਵੇਦਿਤਬ੍ਬਂ.

ਉਭਤੋਬ੍ਯਞ੍ਜਨਕਸ੍ਸ ਪਨ ਕਿਂ ਏਕਂ ਇਨ੍ਦ੍ਰਿਯਂ ਉਦਾਹੁ ਦ੍ਵੇਤਿ? ਏਕਂ. ਤਞ੍ਚ ਖੋ ਇਤ੍ਥਿਉਭਤੋਬ੍ਯਞ੍ਜਨਕਸ੍ਸ ਇਤ੍ਥਿਨ੍ਦ੍ਰਿਯਂ, ਪੁਰਿਸਉਭਤੋਬ੍ਯਞ੍ਜਨਕਸ੍ਸ ਪੁਰਿਸਿਨ੍ਦ੍ਰਿਯਂ. ‘ਏਵਂ ਸਨ੍ਤੇ ਦੁਤਿਯਬ੍ਯਞ੍ਜਨਕਸ੍ਸ ਅਭਾਵੋ ਆਪਜ੍ਜਤਿ. ਇਨ੍ਦ੍ਰਿਯਞ੍ਹਿ ਬ੍ਯਞ੍ਜਨਕਾਰਣਂ ਵੁਤ੍ਤਂ. ਤਞ੍ਚਸ੍ਸ ਨਤ੍ਥੀ’ਤਿ? ‘ਨ ਤਸ੍ਸ ਇਨ੍ਦ੍ਰਿਯਂ ਬ੍ਯਞ੍ਜਨਕਾਰਣਂ’. ‘ਕਸ੍ਮਾ’? ‘ਸਦਾ ਅਭਾਵਤੋ. ਇਤ੍ਥਿਉਭਤੋਬ੍ਯਞ੍ਜਨਕਸ੍ਸ ਹਿ ਯਦਾ ਇਤ੍ਥਿਯਾ ਰਾਗਚਿਤ੍ਤਂ ਉਪ੍ਪਜ੍ਜਤਿ, ਤਦਾਵ ਪੁਰਿਸਬ੍ਯਞ੍ਜਨਂ ਪਾਕਟਂ ਹੋਤਿ, ਇਤ੍ਥਿਬ੍ਯਞ੍ਜਨਂ ਪਟਿਚ੍ਛਨ੍ਨਂ ਗੁਲ਼੍ਹਂ ਹੋਤਿ. ਤਥਾ ਇਤਰਸ੍ਸ ਇਤਰਂ.

ਯਦਿ ਚ ਤੇਸਂ ਇਨ੍ਦ੍ਰਿਯਂ ਦੁਤਿਯਬ੍ਯਞ੍ਜਨਕਾਰਣਂ ਭਵੇਯ੍ਯ, ਸਦਾਪਿ ਬ੍ਯਞ੍ਜਨਦ੍ਵਯਂ ਤਿਟ੍ਠੇਯ੍ਯ. ਨ ਪਨ ਤਿਟ੍ਠਤਿ. ਤਸ੍ਮਾ ਵੇਦਿਤਬ੍ਬਮੇਤਂ ਨ ਤਸ੍ਸ ਤਂ ਬ੍ਯਞ੍ਜਨਕਾਰਣਂ. ਕਮ੍ਮਸਹਾਯਂ ਪਨ ਰਾਗਚਿਤ੍ਤਮੇਵੇਤ੍ਥ ਕਾਰਣਂ. ਯਸ੍ਮਾ ਚਸ੍ਸ ਏਕਮੇਵ ਇਨ੍ਦ੍ਰਿਯਂ ਹੋਤਿ, ਤਸ੍ਮਾ ਇਤ੍ਥਿਉਭਤੋਬ੍ਯਞ੍ਜਨਕੋ ਸਯਮ੍ਪਿ ਗਬ੍ਭਂ ਗਣ੍ਹਾਤਿ, ਪਰਮ੍ਪਿ ਗਣ੍ਹਾਪੇਤਿ. ਪੁਰਿਸਉਭਤੋਬ੍ਯਞ੍ਜਨਕੋ ਪਰਂ ਗਬ੍ਭਂ ਗਣ੍ਹਾਪੇਤਿ, ਸਯਂ ਪਨ ਨ ਗਣ੍ਹਾਤੀਤਿ.

੬੩੪. ਜੀਵਿਤਿਨ੍ਦ੍ਰਿਯਨਿਦ੍ਦੇਸੇ ਯਂ ਵਤ੍ਤਬ੍ਬਂ ਤਂ ਹੇਟ੍ਠਾ ਅਰੂਪਜੀਵਿਤਿਨ੍ਦ੍ਰਿਯੇ ਵੁਤ੍ਤਮੇਵ. ਕੇਵਲਞ੍ਹਿ ਤਤ੍ਥ ਯੋ ਤੇਸਂ ਅਰੂਪੀਨਂ ਧਮ੍ਮਾਨਨ੍ਤਿ ਵੁਤ੍ਤਂ, ਇਧ ਰੂਪਜੀਵਿਤਿਨ੍ਦ੍ਰਿਯਤ੍ਤਾ ਯੋ ਤੇਸਂ ਰੂਪੀਨਂ ਧਮ੍ਮਾਨਨ੍ਤਿ ਅਯਮੇਵ ਵਿਸੇਸੋ. ਲਕ੍ਖਣਾਦੀਨਿ ਪਨਸ੍ਸ ਏਵਂ ਵੇਦਿਤਬ੍ਬਾਨਿ – ਸਹਜਾਤਰੂਪਾਨੁਪਾਲਨਲਕ੍ਖਣਂ ਜੀਵਿਤਿਨ੍ਦ੍ਰਿਯਂ, ਤੇਸਂ ਪਵਤ੍ਤਨਰਸਂ, ਤੇਸਂ ਯੇਵ ਠਪਨਪਚ੍ਚੁਪਟ੍ਠਾਨਂ, ਯਾਪਯਿਤਬ੍ਬਭੂਤਪਦਟ੍ਠਾਨਨ੍ਤਿ.

੬੩੫. ਕਾਯਵਿਞ੍ਞਤ੍ਤਿਨਿਦ੍ਦੇਸੇ ਕਾਯਵਿਞ੍ਞਤ੍ਤੀਤਿ ਏਤ੍ਥ ਤਾਵ ਕਾਯੇਨ ਅਤ੍ਤਨੋ ਭਾਵਂ ਵਿਞ੍ਞਾਪੇਨ੍ਤਾਨਂ ਤਿਰਚ੍ਛਾਨੇਹਿਪਿ ਪੁਰਿਸਾਨਂ, ਪੁਰਿਸੇਹਿ ਵਾ ਤਿਰਚ੍ਛਾਨਾਨਮ੍ਪਿ ਕਾਯਗਹਣਾਨੁਸਾਰੇਨ ਗਹਿਤਾਯ ਏਤਾਯ ਭਾਵੋ ਵਿਞ੍ਞਾਯਤੀਤਿ ‘ਵਿਞ੍ਞਤ੍ਤਿ’. ਸਯਂ ਕਾਯਗਹਣਾਨੁਸਾਰੇਨ ਵਿਞ੍ਞਾਯਤੀਤਿਪਿ ‘ਵਿਞ੍ਞਤ੍ਤਿ’. ‘‘ਕਾਯੇਨ ਸਂਵਰੋ ਸਾਧੂ’’ਤਿਆਦੀਸੁ (ਧ. ਪ. ੩੬੧) ਆਗਤੋ ਚੋਪਨਸਙ੍ਖਾਤੋ ਕਾਯੋਵ ਵਿਞ੍ਞਤ੍ਤਿ ‘ਕਾਯਵਿਞ੍ਞਤ੍ਤਿ’. ਕਾਯਵਿਪ੍ਫਨ੍ਦਨੇਨ ਅਧਿਪ੍ਪਾਯਵਿਞ੍ਞਾਪਨਹੇਤੁਤ੍ਤਾ, ਸਯਞ੍ਚ ਤਥਾ ਵਿਞ੍ਞੇਯ੍ਯਤ੍ਤਾ ਕਾਯੇਨ ਵਿਞ੍ਞਤ੍ਤੀਤਿਪਿ ‘ਕਾਯਵਿਞ੍ਞਤ੍ਤਿ’.

ਕੁਸਲਚਿਤ੍ਤਸ੍ਸ ਵਾਤਿਆਦੀਸੁ ਅਟ੍ਠਹਿ ਕਾਮਾਵਚਰੇਹਿ ਅਭਿਞ੍ਞਾਚਿਤ੍ਤੇਨ ਚਾਤਿ ਨਵਹਿ ਕੁਸਲਚਿਤ੍ਤੇਹਿ ਕੁਸਲਚਿਤ੍ਤਸ੍ਸ ਵਾ, ਦ੍ਵਾਦਸਹਿਪਿ ਅਕੁਸਲਚਿਤ੍ਤੇਹਿ ਅਕੁਸਲਚਿਤ੍ਤਸ੍ਸ ਵਾ, ਅਟ੍ਠਹਿ ਮਹਾਕਿਰਿਯੇਹਿ ਦ੍ਵੀਹਿ ਅਹੇਤੁਕਕਿਰਿਯੇਹਿ ਅਭਿਞ੍ਞਾਪ੍ਪਤ੍ਤੇਨ ਏਕੇਨ ਰੂਪਾਵਚਰਕਿਰਿਯੇਨਾਤਿ ਏਕਾਦਸਹਿ ਕਿਰਿਯਚਿਤ੍ਤੇਹਿ ਅਬ੍ਯਾਕਤਚਿਤ੍ਤਸ੍ਸ ਵਾ. ਇਤੋ ਅਞ੍ਞਾਨਿ ਹਿ ਚਿਤ੍ਤਾਨਿ ਵਿਞ੍ਞਤ੍ਤਿਂ ਨ ਜਨੇਨ੍ਤਿ. ਸੇਕ੍ਖਾਸੇਕ੍ਖਪੁਥੁਜ੍ਜਨਾਨਂ ਪਨ ਏਤ੍ਤਕੇਹੇਵ ਚਿਤ੍ਤੇਹਿ ਵਿਞ੍ਞਤ੍ਤਿ ਹੋਤੀਤਿ ਏਤੇਸਂ ਕੁਸਲਾਦੀਨਂ ਵਸੇਨ ਤੀਹਿ ਪਦੇਹਿ ‘ਹੇਤੁਤੋ’ ਦਸ੍ਸਿਤਾ.

ਇਦਾਨਿ ਛਹਿ ਪਦੇਹਿ ‘ਫਲਤੋ’ ਦਸ੍ਸੇਤੁਂ ਅਭਿਕ੍ਕਮਨ੍ਤਸ੍ਸ ਵਾਤਿਆਦਿ ਵੁਤ੍ਤਂ. ਅਭਿਕ੍ਕਮਾਦਯੋ ਹਿ ਵਿਞ੍ਞਤ੍ਤਿਵਸੇਨ ਪਵਤ੍ਤਤ੍ਤਾ ਵਿਞ੍ਞਤ੍ਤਿਫਲਂ ਨਾਮ. ਤਤ੍ਥ ‘ਅਭਿਕ੍ਕਮਨ੍ਤਸ੍ਸਾ’ਤਿ ਪੁਰਤੋ ਕਾਯਂ ਅਭਿਹਰਨ੍ਤਸ੍ਸ. ਪਟਿਕ੍ਕਮਨ੍ਤਸ੍ਸਾਤਿ ਪਚ੍ਛਤੋ ਪਚ੍ਚਾਹਰਨ੍ਤਸ੍ਸ. ਆਲੋਕੇਨ੍ਤਸ੍ਸਾਤਿ ਉਜੁਕਂ ਪੇਕ੍ਖਨ੍ਤਸ੍ਸ. ਵਿਲੋਕੇਨ੍ਤਸ੍ਸਾਤਿ ਇਤੋ ਚਿਤੋ ਚ ਪੇਕ੍ਖਨ੍ਤਸ੍ਸ. ਸਮਿਞ੍ਜੇਨ੍ਤਸ੍ਸਾਤਿ ਸਨ੍ਧਯੋ ਸਙ੍ਕੋਚੇਨ੍ਤਸ੍ਸ. ਪਸਾਰੇਨ੍ਤਸ੍ਸਾਤਿ ਸਨ੍ਧਯੋ ਪਟਿਪਣਾਮੇਨ੍ਤਸ੍ਸ.

ਇਦਾਨਿ ਛਹਿ ਪਦੇਹਿ ‘ਸਭਾਵਤੋ’ ਦਸ੍ਸੇਤੁਂ ਕਾਯਸ੍ਸ ਥਮ੍ਭਨਾਤਿ ਆਦਿ ਵੁਤ੍ਤਂ. ਤਤ੍ਥ ‘ਕਾਯਸ੍ਸਾ’ਤਿ ਸਰੀਰਸ੍ਸ. ਕਾਯਂ ਥਮ੍ਭੇਤ੍ਵਾ ਥਦ੍ਧਂ ਕਰੋਤੀਤਿ ਥਮ੍ਭਨਾ. ਤਮੇਵ ਉਪਸਗ੍ਗੇਨ ਵਡ੍ਢੇਤ੍ਵਾ ਸਨ੍ਥਮ੍ਭਨਾਤਿ ਆਹ. ਬਲਵਤਰਾ ਵਾ ਥਮ੍ਭਨਾ ‘ਸਨ੍ਥਮ੍ਭਨਾ’. ਸਨ੍ਥਮ੍ਭਿਤਤ੍ਤਨ੍ਤਿ ਸਨ੍ਥਮ੍ਭਿਤਭਾਵੋ. ਵਿਞ੍ਞਾਪਨਵਸੇਨ ਵਿਞ੍ਞਤ੍ਤਿ. ਵਿਞ੍ਞਾਪਨਾਤਿ ਵਿਞ੍ਞਾਪਨਾਕਾਰੋ. ਵਿਞ੍ਞਾਪਿਤਭਾਵੋ ਵਿਞ੍ਞਾਪਿਤਤ੍ਤਂ. ਸੇਸਮੇਤ੍ਥ ਯਂ ਵਤ੍ਤਬ੍ਬਂ ਤਂ ਹੇਟ੍ਠਾ ਦ੍ਵਾਰਕਥਾਯਂ ਵੁਤ੍ਤਮੇਵ. ਤਥਾ ਵਚੀਵਿਞ੍ਞਤ੍ਤਿਯਂ.

੬੩੬. ਵਚੀਵਿਞ੍ਞਤ੍ਤੀਤਿਪਦਸ੍ਸ ਪਨ ਨਿਦ੍ਦੇਸਪਦਾਨਞ੍ਚ ਅਤ੍ਥੋ ਤਤ੍ਥ ਨ ਵੁਤ੍ਤੋ, ਸੋ ਏਵਂ ਵੇਦਿਤਬ੍ਬੋ – ਵਾਚਾਯ ਅਤ੍ਤਨੋ ਭਾਵਂ ਵਿਞ੍ਞਾਪੇਨ੍ਤਾਨਂ ਤਿਰਚ੍ਛਾਨੇਹਿਪਿ ਪੁਰਿਸਾਨਂ, ਪੁਰਿਸੇਹਿ ਵਾ ਤਿਰਚ੍ਛਾਨਾਨਮ੍ਪਿ, ਵਚੀਗਹਣਾਨੁਸਾਰੇਨ ਗਹਿਤਾਯ ਏਤਾਯ ਭਾਵੋ ਵਿਞ੍ਞਾਯਤੀਤਿ ਵਿਞ੍ਞਤ੍ਤਿ. ਸਯਞ੍ਚ ਵਚੀਗਹਣਾਨੁਸਾਰੇਨ ਵਿਞ੍ਞਾਯਤੀਤਿਪਿ ਵਿਞ੍ਞਤ੍ਤਿ. ‘‘ਸਾਧੁ ਵਾਚਾਯ ਸਂਵਰੋ’’ਤਿਆਦੀਸੁ (ਧ. ਪ. ੩੬੧) ਆਗਤਾ ਚੋਪਨਸਙ੍ਖਾਤਾ ਵਚੀ ਏਵ ਵਿਞ੍ਞਤ੍ਤਿ ‘ਵਚੀਵਿਞ੍ਞਤ੍ਤਿ’. ਵਚੀਘੋਸੇਨ ਅਧਿਪ੍ਪਾਯਵਿਞ੍ਞਾਪਨਹੇਤੁਤ੍ਤਾ ਸਯਞ੍ਚ ਤਥਾਵਿਞ੍ਞੇਯ੍ਯਤ੍ਤਾ ਵਾਚਾਯ ਵਿਞ੍ਞਤ੍ਤੀਤਿਪਿ ‘ਵਚੀਵਿਞ੍ਞਤ੍ਤਿ’. ਵਾਚਾ ਗਿਰਾਤਿਆਦੀਸੁ ਵੁਚ੍ਚਤੀਤਿ ‘ਵਾਚਾ’. ਗਿਰਿਯਤੀਤਿ ‘ਗਿਰਾ’. ਬ੍ਯਪ੍ਪਥੋਤਿ ਵਾਕ੍ਯਭੇਦੋ. ਵਾਕ੍ਯਞ੍ਚ ਤਂ ਪਥੋ ਚ ਅਤ੍ਥਂ ਞਾਤੁਕਾਮਾਨਂ ਞਾਪੇਤੁਕਾਮਾਨਞ੍ਚਾਤਿਪਿ ‘ਬ੍ਯਪ੍ਪਥੋ’. ਉਦੀਰਿਯਤੀਤਿ ਉਦੀਰਣਂ. ਘੁਸ੍ਸਤੀਤਿ ਘੋਸੋ. ਕਰਿਯਤੀਤਿ ਕਮ੍ਮਂ. ਘੋਸੋਵ ਕਮ੍ਮਂ ਘੋਸਕਮ੍ਮਂ. ਨਾਨਪ੍ਪਕਾਰੇਹਿ ਕਤੋ ਘੋਸੋਤਿ ਅਤ੍ਥੋ. ਵਚਿਯਾ ਭੇਦੋ ਵਚੀਭੇਦੋ. ਸੋ ਪਨ ‘ਨ ਭਙ੍ਗੋ, ਪਭੇਦਗਤਾ ਵਾਚਾ ਏਵਾ’ਤਿ ਞਾਪਨਤ੍ਥਂ ਵਾਚਾ ਵਚੀਭੇਦੋਤਿ ਵੁਤ੍ਤਂ. ਇਮੇਹਿ ਸਬ੍ਬੇਹਿਪਿ ਪਦੇਹਿ ‘ਸਦ੍ਦਵਾਚਾਵ’ ਦਸ੍ਸਿਤਾ. ਇਦਾਨਿ ਤਾਯ ਵਾਚਾਯ ਸਦ੍ਧਿਂ ਯੋਜੇਤ੍ਵਾ ਹੇਟ੍ਠਾ ਵੁਤ੍ਤਤ੍ਥਾਨਂ ਵਿਞ੍ਞਤ੍ਤਿਆਦੀਨਂ ਪਦਾਨਂ ਵਸੇਨ ਤੀਹਾਕਾਰੇਹਿ ਸਭਾਵਤੋ ਤਂ ਦਸ੍ਸੇਤੁਂ ਯਾ ਤਾਯ ਵਾਚਾਯ ਵਿਞ੍ਞਤ੍ਤੀਤਿਆਦਿ ਵੁਤ੍ਤਂ. ਤਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.

ਇਦਾਨਿ ਵਿਞ੍ਞਤ੍ਤਿਸਮੁਟ੍ਠਾਪਕਚਿਤ੍ਤੇਸੁ ਅਸਮ੍ਮੋਹਤ੍ਥਂ ਦ੍ਵਤ੍ਤਿਂਸ ਛਬ੍ਬੀਸ ਏਕੂਨਵੀਸਤਿ ਸੋਲ਼ਸ ਪਚ੍ਛਿਮਾਨੀਤਿ ਇਦਂ ਪਕਿਣ੍ਣਕਂ ਵੇਦਿਤਬ੍ਬਂ – ਦ੍ਵਤ੍ਤਿਂਸ ਚਿਤ੍ਤਾਨਿ ਹਿ ਰੂਪਂ ਸਮੁਟ੍ਠਾਪੇਨ੍ਤਿ, ਇਰਿਯਾਪਥਮ੍ਪਿ ਉਪਤ੍ਥਮ੍ਭੇਨ੍ਤਿ, ਦੁਵਿਧਮ੍ਪਿ ਵਿਞ੍ਞਤ੍ਤਿਂ ਜਨੇਨ੍ਤਿ. ਛਬ੍ਬੀਸਤਿ ਵਿਞ੍ਞਤ੍ਤਿਮੇਵ ਨ ਜਨੇਨ੍ਤਿ, ਇਤਰਦ੍ਵਯਂ ਕਰੋਨ੍ਤਿ. ਏਕੂਨਵੀਸਤਿ ਰੂਪਮੇਵ ਸਮੁਟ੍ਠਾਪੇਨ੍ਤਿ, ਇਤਰਦ੍ਵਯਂ ਨ ਕਰੋਨ੍ਤਿ. ਸੋਲ਼ਸ ਇਮੇਸੁ ਤੀਸੁ ਏਕਮ੍ਪਿ ਨ ਕਰੋਨ੍ਤਿ.

ਤਤ੍ਥ ਦ੍ਵਤ੍ਤਿਂਸਾਤਿ ਹੇਟ੍ਠਾ ਵੁਤ੍ਤਾਨੇਵ ਕਾਮਾਵਚਰਤੋ ਅਟ੍ਠ ਕੁਸਲਾਨਿ, ਦ੍ਵਾਦਸ ਅਕੁਸਲਾਨਿ, ਕਿਰਿਯਤੋ ਦਸ ਚਿਤ੍ਤਾਨਿ, ਸੇਕ੍ਖਪੁਥੁਜ੍ਜਨਾਨਂ ਅਭਿਞ੍ਞਾਚਿਤ੍ਤਂ, ਖੀਣਾਸਵਾਨਂ ਅਭਿਞ੍ਞਾਚਿਤ੍ਤਨ੍ਤਿ. ਛਬ੍ਬੀਸਾਤਿ ਰੂਪਾਵਚਰਤੋ ਪਞ੍ਚ ਕੁਸਲਾਨਿ, ਪਞ੍ਚ ਕਿਰਿਯਾਨਿ, ਅਰੂਪਾਵਚਰਤੋ ਚਤ੍ਤਾਰਿ ਕੁਸਲਾਨਿ, ਚਤ੍ਤਾਰਿ ਕਿਰਿਯਾਨਿ, ਚਤ੍ਤਾਰਿ ਮਗ੍ਗਚਿਤ੍ਤਾਨਿ, ਚਤ੍ਤਾਰਿ ਫਲਚਿਤ੍ਤਾਨੀਤਿ. ਏਕੂਨਵੀਸਤੀਤਿ ਕਾਮਾਵਚਰਕੁਸਲਵਿਪਾਕਤੋ ਏਕਾਦਸ, ਅਕੁਸਲਵਿਪਾਕਤੋ ਦ੍ਵੇ, ਕਿਰਿਯਤੋ ਕਿਰਿਯਮਨੋਧਾਤੁ, ਰੂਪਾਵਚਰਤੋ ਪਞ੍ਚ ਵਿਪਾਕਚਿਤ੍ਤਾਨੀਤਿ. ਸੋਲ਼ਸਾਤਿ ਦ੍ਵੇ ਪਞ੍ਚਵਿਞ੍ਞਾਣਾਨਿ, ਸਬ੍ਬਸਤ੍ਤਾਨਂ ਪਟਿਸਨ੍ਧਿਚਿਤ੍ਤਂ, ਖੀਣਾਸਵਾਨਂ ਚੁਤਿਚਿਤ੍ਤਂ, ਅਰੂਪੇ ਚਤ੍ਤਾਰਿ ਵਿਪਾਕਚਿਤ੍ਤਾਨੀਤਿ. ਇਮਾਨਿ ਸੋਲ਼ਸ ਰੂਪਿਰਿਯਾਪਥਵਿਞ੍ਞਤ੍ਤੀਸੁ ਏਕਮ੍ਪਿ ਨ ਕਰੋਨ੍ਤਿ. ਅਞ੍ਞਾਨਿਪਿ ਬਹੂਨਿ ਅਰੂਪੇ ਉਪ੍ਪਨ੍ਨਾਨਿ ਅਨੋਕਾਸਗਤਤ੍ਤਾ ਰੂਪਂ ਨ ਸਮੁਟ੍ਠਾਪੇਨ੍ਤਿ. ਨ ਤਾਨੇਵ, ਕਾਯਵਚੀਵਿਞ੍ਞਤ੍ਤਿਯੋਪਿ.

੬੩੭. ਆਕਾਸਧਾਤੁਨਿਦ੍ਦੇਸੇ ਨ ਕਸ੍ਸਤਿ, ਨ ਨਿਕਸ੍ਸਤਿ, ਕਸਿਤੁਂ ਵਾ ਛਿਨ੍ਦਿਤੁਂ ਵਾ ਭਿਨ੍ਦਿਤੁਂ ਵਾ ਨ ਸਕ੍ਕਾਤਿ ਆਕਾਸੋ. ਆਕਾਸੋਵ ਆਕਾਸਗਤਂ, ਖੇਲ਼ਗਤਾਦਿ ਵਿਯ. ਆਕਾਸੋਤਿ ਵਾ ਗਤਨ੍ਤਿ ‘ਆਕਾਸਗਤਂ’. ਨ ਹਞ੍ਞਤੀਤਿ ਅਘਂ, ਅਘਟ੍ਟਨੀਯਨ੍ਤਿ ਅਤ੍ਥੋ. ਅਘਮੇਵ ਅਘਗਤਂ. ਛਿਦ੍ਦਟ੍ਠੇਨ ਵਿਵਰੋ. ਵਿਵਰੋਵ ਵਿਵਰਗਤਂ. ਅਸਮ੍ਫੁਟ੍ਠਂ ਚਤੂਹਿ ਮਹਾਭੂਤੇਹੀਤਿ ਏਤੇਹਿ ਅਸਮ੍ਫੁਟ੍ਠਂ ਨਿਜ੍ਜਟਾਕਾਸਂਵ ਕਥਿਤਂ. ਲਕ੍ਖਣਾਦਿਤੋ ਪਨ ਰੂਪਪਰਿਚ੍ਛੇਦਲਕ੍ਖਣਾ ਆਕਾਸਧਾਤੁ, ਰੂਪਪਰਿਯਨ੍ਤਪ੍ਪਕਾਸਨਰਸਾ, ਰੂਪਮਰਿਯਾਦਪਚ੍ਚੁਪਟ੍ਠਾਨਾ ਅਸਮ੍ਫੁਟ੍ਠਭਾਵਛਿਦ੍ਦਵਿਵਰਭਾਵਪਚ੍ਚੁਪਟ੍ਠਾਨਾ ਵਾ, ਪਰਿਚ੍ਛਿਨ੍ਨਰੂਪਪਦਟ੍ਠਾਨਾ, ਯਾਯ ਪਰਿਚ੍ਛਿਨ੍ਨੇਸੁ ਰੂਪੇਸੁ ‘ਇਦਮਿਤੋ ਉਦ੍ਧਂ ਅਧੋ ਤਿਰਿਯ’ਨ੍ਤਿ ਚ ਹੋਤਿ.

੬੩੮. ਇਤੋ ਪਰੇ ਰੂਪਸ੍ਸਲਹੁਤਾਦੀਨਂ ਨਿਦ੍ਦੇਸਾ ਚਿਤ੍ਤਸ੍ਸਲਹੁਤਾਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਲਕ੍ਖਣਾਦਿਤੋ ਪਨੇਤ੍ਥ ਅਦਨ੍ਧਤਾਲਕ੍ਖਣਾ ਰੂਪਸ੍ਸ ਲਹੁਤਾ, ਰੂਪਾਨਂ ਗਰੁਭਾਵਵਿਨੋਦਨਰਸਾ, ਲਹੁਪਰਿਵਤ੍ਤਿਤਾਪਚ੍ਚੁਪਟ੍ਠਾਨਾ, ਲਹੁਰੂਪਪਦਟ੍ਠਾਨਾ. ਅਥਦ੍ਧਤਾਲਕ੍ਖਣਾ ਰੂਪਸ੍ਸ ਮੁਦੁਤਾ, ਰੂਪਾਨਂ ਥਦ੍ਧਭਾਵਵਿਨੋਦਨਰਸਾ, ਸਬ੍ਬਕਿਰਿਯਾਸੁ ਅਵਿਰੋਧਿਤਾਪਚ੍ਚੁਪਟ੍ਠਾਨਾ, ਮੁਦੁਰੂਪਪਦਟ੍ਠਾਨਾ. ਸਰੀਰਕਿਰਿਯਾਨੁਕੂਲਕਮ੍ਮਞ੍ਞਭਾਵਲਕ੍ਖਣਾ ਰੂਪਸ੍ਸ ਕਮ੍ਮਞ੍ਞਤਾ, ਅਕਮ੍ਮਞ੍ਞਤਾਵਿਨੋਦਨਰਸਾ, ਅਦੁਬ੍ਬਲਭਾਵਪਚ੍ਚੁਪਟ੍ਠਾਨਾ, ਕਮ੍ਮਞ੍ਞਰੂਪਪਦਟ੍ਠਾਨਾ.

ਏਤਾ ਪਨ ਤਿਸ੍ਸੋ ਨ ਅਞ੍ਞਮਞ੍ਞਂ ਵਿਜਹਨ੍ਤਿ. ਏਵਂ ਸਨ੍ਤੇਪਿ ਯੋ ਅਰੋਗਿਨੋ ਵਿਯ ਰੂਪਾਨਂ ਲਹੁਭਾਵੋ, ਅਦਨ੍ਧਤਾਲਹੁਪਰਿਵਤ੍ਤਿਪ੍ਪਕਾਰੋ, ਰੂਪਦਨ੍ਧਤ੍ਤਕਰਧਾਤੁਕ੍ਖੋਭਪਟਿਪਕ੍ਖਪਚ੍ਚਯਸਮੁਟ੍ਠਾਨੋ, ਸੋ ਰੂਪਵਿਕਾਰੋ ‘ਰੂਪਸ੍ਸਲਹੁਤਾ’. ਯੋ ਸੁਪਰਿਮਦ੍ਦਿਤਚਮ੍ਮਸ੍ਸੇਵ ਰੂਪਾਨਂ ਮੁਦੁਭਾਵੋ ਸਬ੍ਬਕਿਰਿਯਾਵਿਸੇਸੇਸੁ ਸਰਸਵਤ੍ਤਨਭਾਵੋ ਵਸਵਤ੍ਤਨਭਾਵਮਦ੍ਦਵਪ੍ਪਕਾਰੋ ਰੂਪਥਦ੍ਧਤ੍ਤਕਰਧਾਤੁਕ੍ਖੋਭਪਟਿਪਕ੍ਖਪਚ੍ਚਯਸਮੁਟ੍ਠਾਨੋ, ਸੋ ਰੂਪਵਿਕਾਰੋ ‘ਰੂਪਸ੍ਸ ਮੁਦੁਤਾ’. ਯੋ ਪਨ ਸੁਧਨ੍ਤਸੁਵਣ੍ਣਸ੍ਸੇਵ ਰੂਪਾਨਂ ਕਮ੍ਮਞ੍ਞਭਾਵੋ ਸਰੀਰਕਿਰਿਯਾਨੁਕੂਲਭਾਵਪ੍ਪਕਾਰੋ ਸਰੀਰਕਿਰਿਯਾਨਂ ਅਨਨੁਕੂਲਕਰਧਾਤੁਕ੍ਖੋਭਪਟਿਪਕ੍ਖਪਚ੍ਚਯਸਮੁਟ੍ਠਾਨੋ, ਸੋ ਰੂਪਵਿਕਾਰੋ ‘ਰੂਪਸ੍ਸ ਕਮ੍ਮਞ੍ਞਤਾ’ਤਿ. ਏਵਮੇਤਾਸਂ ਵਿਸੇਸੋ ਵੇਦਿਤਬ੍ਬੋ.