ਦੁਕਨਿਦ੍ਦੇਸਵਣ੍ਣਨਾ
ਉਪਾਦਾਭਾਜਨੀਯਕਥਾ
੫੯੫. ਇਦਾਨਿ ਦੁਵਿਧਸਙ੍ਗਹਾਦੀਸੁ ‘ਅਤ੍ਥਿ ਰੂਪਂ ਉਪਾਦਾ, ਅਤ੍ਥਿ ਰੂਪਂ ਨੋਉਪਾਦਾ’ਤਿ ਏਵਂ ਭੇਦਸਬ੍ਭਾਵਤੋ ਪੁਚ੍ਛਾਪੁਬ੍ਬਙ੍ਗਮਂ ਪਦਭਾਜਨਂ ਦਸ੍ਸੇਨ੍ਤੋ ਕਤਮਂ ਤਂ ਰੂਪਂ ਉਪਾਦਾਤਿਆਦਿਮਾਹ. ਤਤ੍ਥ ਉਪਾਦਿਯਤੀਤਿ ‘ਉਪਾਦਾ’; ਮਹਾਭੂਤਾਨਿ ਗਹੇਤ੍ਵਾ, ਅਮੁਞ੍ਚਿਤ੍ਵਾ, ਤਾਨਿ ਨਿਸ੍ਸਾਯ ਪਵਤ੍ਤਤੀਤਿ ਅਤ੍ਥੋ. ਇਦਾਨਿ ਤਂ ਪਭੇਦਤੋ ਦਸ੍ਸੇਨ੍ਤੋ ਚਕ੍ਖਾਯਤਨਨ੍ਤਿਆਦਿਮਾਹ.
੫੯੬. ਏਵਂ ਤੇਵੀਸਤਿਵਿਧਂ ਉਪਾਦਾਰੂਪਂ ਸਙ੍ਖੇਪਤੋ ਉਦ੍ਦਿਸਿਤ੍ਵਾ ਪੁਨ ਤਦੇਵ ਵਿਤ੍ਥਾਰਤੋ ਨਿਦ੍ਦਿਸਨ੍ਤੋ ਕਤਮਂ ਤਂ ਰੂਪਂ ਚਕ੍ਖਾਯਤਨਨ੍ਤਿਆਦਿਮਾਹ. ਤਤ੍ਥ ਦੁਵਿਧਂ ਚਕ੍ਖੁ – ਮਂਸਚਕ੍ਖੁ ਪਞ੍ਞਾਚਕ੍ਖੁ ਚ. ਏਤੇਸੁ ‘ਬੁਦ੍ਧਚਕ੍ਖੁ ਸਮਨ੍ਤਚਕ੍ਖੁ ਞਾਣਚਕ੍ਖੁ ਦਿਬ੍ਬਚਕ੍ਖੁ ਧਮ੍ਮਚਕ੍ਖੂ’ਤਿ ਪਞ੍ਚਵਿਧਂ ਪਞ੍ਞਾਚਕ੍ਖੁ. ਤਤ੍ਥ ‘‘ਅਦ੍ਦਸਂ ਖੋ ਅਹਂ, ਭਿਕ੍ਖਵੇ, ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਸਤ੍ਤੇ ਅਪ੍ਪਰਜਕ੍ਖੇ…ਪੇ… ਦੁਵਿਞ੍ਞਾਪਯੇ’’ਤਿ (ਮ. ਨਿ. ੧.੨੮੩) ਇਦਂ ਬੁਦ੍ਧਚਕ੍ਖੁ ਨਾਮ. ‘‘ਸਮਨ੍ਤਚਕ੍ਖੁ ਵੁਚ੍ਚਤਿ ਸਬ੍ਬਞ੍ਞੁਤਞ੍ਞਾਣ’’ਨ੍ਤਿ ਇਦਂ ਸਮਨ੍ਤਚਕ੍ਖੁ ਨਾਮ. ‘‘ਚਕ੍ਖੁਂ ਉਦਪਾਦਿ ਞਾਣਂ ਉਦਪਾਦੀ’’ਤਿ (ਸਂ. ਨਿ. ੫.੧੦੮੧; ਮਹਾਵ. ੧੫) ਇਦਂ ਞਾਣਚਕ੍ਖੁ ਨਾਮ. ‘‘ਅਦ੍ਦਸਂ ਖੋ ਅਹਂ, ਭਿਕ੍ਖਵੇ, ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨਾ’’ਤਿ (ਮ. ਨਿ. ੧.੨੮੪) ਇਦਂ ਦਿਬ੍ਬਚਕ੍ਖੁ ਨਾਮ. ‘‘ਤਸ੍ਮਿਂ ਯੇਵਾਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦੀ’’ਤਿ (ਮ. ਨਿ. ੨.੩੯੫) ਇਦਂ ਹੇਟ੍ਠਿਮਮਗ੍ਗਤ੍ਤਯਸਙ੍ਖਾਤਂ ਞਾਣਂ ਧਮ੍ਮਚਕ੍ਖੁ ਨਾਮ.
ਮਂਸਚਕ੍ਖੁਪਿ ਪਸਾਦਚਕ੍ਖੁ ਸਸਮ੍ਭਾਰਚਕ੍ਖੂਤਿ ਦੁਵਿਧਂ ਹੋਤਿ. ਤਤ੍ਥ ਯੋਯਂ ਅਕ੍ਖਿਕੂਪਕੇ ਪਤਿਟ੍ਠਿਤੋ ਹੇਟ੍ਠਾ ਅਕ੍ਖਿਕੂਪਕਟ੍ਠਿਕੇਨ, ਉਪਰਿ ਭਮੁਕਟ੍ਠਿਕੇਨ, ਉਭਤੋ ਅਕ੍ਖਿਕੂਟੇਹਿ, ਅਨ੍ਤੋ ਮਤ੍ਥਲੁਙ੍ਗੇਨ, ਬਹਿਦ੍ਧਾ ਅਕ੍ਖਿਲੋਮੇਹਿ ਪਰਿਚ੍ਛਿਨ੍ਨੋ ਮਂਸਪਿਣ੍ਡੋ. ਸਙ੍ਖੇਪਤੋ ‘ਚਤਸ੍ਸੋ ਧਾਤੁਯੋ, ਵਣ੍ਣੋ ਗਨ੍ਧੋ ਰਸੋ ਓਜਾ, ਸਮ੍ਭਵੋ ਸਣ੍ਠਾਨਂ, ਜੀਵਿਤਂ ਭਾਵੋ ਕਾਯਪਸਾਦੋ ਚਕ੍ਖੁਪਸਾਦੋ’ਤਿ ਚੁਦ੍ਦਸਸਮ੍ਭਾਰੋ. ਵਿਤ੍ਥਾਰਤੋ ‘ਚਤਸ੍ਸੋ ਧਾਤੁਯੋ, ਤਂਸਨ੍ਨਿਸ੍ਸਿਤਵਣ੍ਣਗਨ੍ਧਰਸਓਜਾਸਣ੍ਠਾਨਸਮ੍ਭਵਾ ਚਾ’ਤਿ ਇਮਾਨਿ ਦਸ ਚਤੁਸਮੁਟ੍ਠਾਨਿਕਤ੍ਤਾ ਚਤ੍ਤਾਲੀਸਂ ਹੋਨ੍ਤਿ. ਜੀਵਿਤਂ ਭਾਵੋ ਕਾਯਪਸਾਦੋ ਚਕ੍ਖੁਪਸਾਦੋਤਿ ਚਤ੍ਤਾਰਿ ਏਕਨ੍ਤਕਮ੍ਮਸਮੁਟ੍ਠਾਨਾਨੇਵਾਤਿ ਇਮੇਸਂ ਚਤੁਚਤ੍ਤਾਲੀਸਾਯ ਰੂਪਾਨਂ ਵਸੇਨ ਚਤੁਚਤ੍ਤਾਲੀਸਸਮ੍ਭਾਰੋ. ਯਂ ਲੋਕੋ ਸੇਤਂ ਚਕ੍ਖੁਂ ਪੁਥੁਲਂ ਵਿਸਟਂ ਵਿਤ੍ਥਿਣ੍ਣਂ ‘ਚਕ੍ਖੁ’ਨ੍ਤਿ ਸਞ੍ਜਾਨਨ੍ਤੋ ਨ ਚਕ੍ਖੁਂ ਸਞ੍ਜਾਨਾਤਿ, ਵਤ੍ਥੁਂ ਚਕ੍ਖੁਤੋ ਸਞ੍ਜਾਨਾਤਿ, ਸੋ ਮਂਸਪਿਣ੍ਡੋ ਅਕ੍ਖਿਕੂਪੇ ਪਤਿਟ੍ਠਿਤੋ, ਨ੍ਹਾਰੁਸੁਤ੍ਤਕੇਨ ਮਤ੍ਥਲੁਙ੍ਗੇ ਆਬਦ੍ਧੋ, ਯਤ੍ਥ ਸੇਤਮ੍ਪਿ ਅਤ੍ਥਿ, ਕਣ੍ਹਮ੍ਪਿ ਲੋਹਿਤਕਮ੍ਪਿ, ਪਥਵੀਪਿ ਆਪੋਪਿ ਤੇਜੋਪਿ ਵਾਯੋਪਿ, ਯਂ ਸੇਮ੍ਹੂਸ੍ਸਦਤ੍ਤਾ ਸੇਤਂ, ਪਿਤ੍ਤੁਸ੍ਸਦਤ੍ਤਾ ਕਣ੍ਹਂ, ਰੁਹਿਰੁਸ੍ਸਦਤ੍ਤਾ ਲੋਹਿਤਕਂ, ਪਥਵੁਸ੍ਸਦਤ੍ਤਾ ਪਤ੍ਥਿਣ੍ਣਂ ਹੋਤਿ, ਆਪੁਸ੍ਸਦਤ੍ਤਾ ਪਗ੍ਘਰਤਿ, ਤੇਜੁਸ੍ਸਦਤ੍ਤਾ ਪਰਿਦਯ੍ਹਤਿ, ਵਾਯੁਸ੍ਸਦਤ੍ਤਾ ਸਮ੍ਭਮਤਿ, ਇਦਂ ਸਸਮ੍ਭਾਰਚਕ੍ਖੁ ਨਾਮ.
ਯੋ ਪਨੇਤ੍ਥ ਸਿਤੋ ਏਤ੍ਥ ਪਟਿਬਦ੍ਧੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ, ਇਦਂ ਪਸਾਦਚਕ੍ਖੁ ਨਾਮ. ਤਦੇਤਂ ਤਸ੍ਸ ਸਸਮ੍ਭਾਰਚਕ੍ਖੁਨੋ ਸੇਤਮਣ੍ਡਲਪਰਿਕ੍ਖਿਤ੍ਤਸ੍ਸ ਕਣ੍ਹਮਣ੍ਡਲਸ੍ਸ ਮਜ੍ਝੇ, ਅਭਿਮੁਖੇ ਠਿਤਾਨਂ ਸਰੀਰਸਣ੍ਠਾਨੁਪ੍ਪਤ੍ਤਿਦੇਸਭੂਤੇ ਦਿਟ੍ਠਿਮਣ੍ਡਲੇ, ਸਤ੍ਤਸੁ ਪਿਚੁਪਟਲੇਸੁ ਆਸਿਤ੍ਤਤੇਲਂ ਪਿਚੁਪਟਲਾਨਿ ਵਿਯ, ਸਤ੍ਤਕ੍ਖਿਪਟਲਾਨਿ ਬ੍ਯਾਪੇਤ੍ਵਾ, ਧਾਰਣਨ੍ਹਾਪਨਮਣ੍ਡਨਬੀਜਨਕਿਚ੍ਚਾਹਿ ਚਤੂਹਿ ਧਾਤੀਹਿ ਖਤ੍ਤਿਯਕੁਮਾਰੋ ਵਿਯ, ਸਨ੍ਧਾਰਣਆਬਨ੍ਧਨਪਰਿਪਾਚਨਸਮੁਦੀਰਣਕਿਚ੍ਚਾਹਿ ਚਤੂਹਿ ਧਾਤੂਹਿ ਕਤੂਪਕਾਰਂ, ਉਤੁਚਿਤ੍ਤਾਹਾਰੇਹਿ ਉਪਤ੍ਥਮ੍ਭਿਯਮਾਨਂ, ਆਯੁਨਾ ਅਨੁਪਾਲਿਯਮਾਨਂ, ਵਣ੍ਣਗਨ੍ਧਰਸਾਦੀਹਿ ਪਰਿਵੁਤਂ, ਪਮਾਣਤੋ ਊਕਾਸਿਰਮਤ੍ਤਂ, ਚਕ੍ਖੁਵਿਞ੍ਞਾਣਾਦੀਨਂ ਯਥਾਰਹਂ ਵਤ੍ਥੁਦ੍ਵਾਰਭਾਵਂ ਸਾਧਯਮਾਨਂ ਤਿਟ੍ਠਤਿ. ਵੁਤ੍ਤਮ੍ਪਿ ਚੇਤਂ ਧਮ੍ਮਸੇਨਾਪਤਿਨਾ –
‘‘ਯੇਨ ਚਕ੍ਖੁਪ੍ਪਸਾਦੇਨ, ਰੂਪਾਨਿ ਮਨੁਪਸ੍ਸਤਿ;
ਪਰਿਤ੍ਤਂ ਸੁਖੁਮਂ ਏਤਂ, ਊਕਾਸਿਰਸਮੂਪਮ’’ਨ੍ਤਿ.
ਚਕ੍ਖੁ ਚ ਤਂ ਆਯਤਨਞ੍ਚਾਤਿ ਚਕ੍ਖਾਯਤਨਂ. ਯਂ ਚਕ੍ਖੁ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋਤਿ ਇਧਾਪਿ ਉਪਯੋਗਤ੍ਥੇਯੇਵ ਸਾਮਿਵਚਨਂ; ਚਤ੍ਤਾਰਿ ਮਹਾਭੂਤਾਨਿ ਉਪਾਦਿਯਿਤ੍ਵਾ ਪਵਤ੍ਤਪ੍ਪਸਾਦੋਤਿ ਅਤ੍ਥੋ. ਇਮਿਨਾ ਪਸਾਦਚਕ੍ਖੁਮੇਵ ਗਣ੍ਹਾਤਿ, ਸੇਸਚਕ੍ਖੁਂ ਪਟਿਕ੍ਖਿਪਤਿ. ਯਂ ਪਨ ਇਨ੍ਦ੍ਰਿਯਗੋਚਰਸੁਤ੍ਤੇ ‘‘ਏਕਂ ਮਹਾਭੂਤਂ ਉਪਾਦਾਯ ਪਸਾਦੋ ਪਥਵੀਧਾਤੁਯਾ ਤੀਹਿ ਮਹਾਭੂਤੇਹਿ ਸਙ੍ਗਹਿਤੋ ਆਪੋਧਾਤੁਯਾ ਚ ਤੇਜੋਧਾਤੁਯਾ ਚ ਵਾਯੋਧਾਤੁਯਾ ਚ,’’ ਚਤੁਪਰਿਵਤ੍ਤਸੁਤ੍ਤੇ ‘‘ਦ੍ਵਿਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ ਪਥਵੀਧਾਤੁਯਾ ਚ ਆਪੋਧਾਤੁਯਾ ਚ ਦ੍ਵੀਹਿ ਮਹਾਭੂਤੇਹਿ ਸਙ੍ਗਹਿਤੋ ਤੇਜੋਧਾਤੁਯਾ ਚ ਵਾਯੋਧਾਤੁਯਾ ਚਾ’’ਤਿ ਵੁਤ੍ਤਂ, ਤਂ ਪਰਿਯਾਯੇਨ ਵੁਤ੍ਤਂ. ਅਯਞ੍ਹਿ ਸੁਤ੍ਤਨ੍ਤਿਕਕਥਾ ਨਾਮ ਪਰਿਯਾਯਦੇਸਨਾ. ਯੋ ਚ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ ਸੋ ਤੇਸੁ ਏਕੇਕਸ੍ਸਾਪਿ ਦਿਨ੍ਨਂ ਦ੍ਵਿਨ੍ਨਮ੍ਪਿ ਪਸਾਦੋਯੇਵਾਤਿ ਇਮਿਨਾ ਪਰਿਯਾਯੇਨ ਤਤ੍ਥ ਦੇਸਨਾ ਆਗਤਾ. ਅਭਿਧਮ੍ਮੋ ਪਨ ਨਿਪ੍ਪਰਿਯਾਯਦੇਸਨਾ ਨਾਮ. ਤਸ੍ਮਾ ਇਧ ‘ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ’ਤਿ ਵੁਤ੍ਤਂ.
‘ਅਯਂ ਮੇ ਅਤ੍ਤਾ’ਤਿ ਬਾਲਜਨੇਨ ਪਰਿਗ੍ਗਹਿਤਤ੍ਤਾ ਅਤ੍ਤਭਾਵੋ ਵੁਚ੍ਚਤਿ ਸਰੀਰਮ੍ਪਿ ਖਨ੍ਧਪਞ੍ਚਕਮ੍ਪਿ. ਤਸ੍ਮਿਂ ਪਰਿਯਾਪਨ੍ਨੋ ਤਨ੍ਨਿਸ੍ਸਿਤੋਤਿ ਅਤ੍ਤਭਾਵਪਰਿਯਾਪਨ੍ਨੋ ਚਕ੍ਖੁਵਿਞ੍ਞਾਣੇਨ ਪਸ੍ਸਿਤੁਂ ਨ ਸਕ੍ਕਾਤਿ ਅਨਿਦਸ੍ਸਨੋ. ਪਟਿਘਟ੍ਟਨਾਨਿਘਂਸੋ ਏਤ੍ਥ ਜਾਯਤੀਤਿ ਸਪ੍ਪਟਿਘੋ.
ਯੇਨਾਤਿਆਦੀਸੁ ਅਯਂ ਸਙ੍ਖੇਪਤ੍ਥੋ – ਯੇਨ ਕਰਣਭੂਤੇਨ ਚਕ੍ਖੁਨਾ ਅਯਂ ਸਤ੍ਤੋ ਇਦਂ ਵੁਤ੍ਤਪ੍ਪਕਾਰਂ ਰੂਪਂ ਅਤੀਤੇ ਪਸ੍ਸਿ ਵਾ, ਵਤ੍ਤਮਾਨੇ ਪਸ੍ਸਤਿ ਵਾ, ਅਨਾਗਤੇ ਪਸ੍ਸਿਸ੍ਸਤਿ ਵਾ, ਸਚਸ੍ਸ ਅਪਰਿਭਿਨ੍ਨਂ ਚਕ੍ਖੁ ਭਵੇਯ੍ਯ, ਅਥਾਨੇਨ ਆਪਾਥਗਤਂ ਰੂਪਂ ਪਸ੍ਸੇ ਵਾ, ਅਤੀਤਂ ਵਾ ਰੂਪਂ ਅਤੀਤੇਨ ਚਕ੍ਖੁਨਾ ਪਸ੍ਸਿ, ਪਚ੍ਚੁਪ੍ਪਨ੍ਨਂ ਪਚ੍ਚੁਪ੍ਪਨ੍ਨੇਨ ਪਸ੍ਸਤਿ, ਅਨਾਗਤਂ ਅਨਾਗਤੇਨ ਪਸ੍ਸਿਸ੍ਸਤਿ, ਸਚੇ ਤਂ ਰੂਪਂ ਚਕ੍ਖੁਸ੍ਸ ਆਪਾਥਂ ਆਗਚ੍ਛੇਯ੍ਯ ਚਕ੍ਖੁਨਾ ਤਂ ਰੂਪਂ ਪਸ੍ਸੇਯ੍ਯਾਤਿ ਇਦਮੇਤ੍ਥ ਪਰਿਕਪ੍ਪਵਚਨਂ. ਦਸ੍ਸਨਪਰਿਣਾਯਕਟ੍ਠੇਨ ਚਕ੍ਖੁਂਪੇਤਂ, ਸਞ੍ਜਾਤਿਸਮੋਸਰਣਟ੍ਠੇਨ ਚਕ੍ਖਾਯਤਨਂਪੇਤਂ, ਸੁਞ੍ਞਤਭਾਵਨਿਸ੍ਸਤ੍ਤਟ੍ਠੇਨ ਚਕ੍ਖੁਧਾਤੁਪੇਸਾ. ਦਸ੍ਸਨਲਕ੍ਖਣੇ ਇਨ੍ਦਟ੍ਠਂ ਕਾਰੇਤੀਤਿ ਚਕ੍ਖੁਨ੍ਦ੍ਰਿਯਂਪੇਤਂ. ਲੁਜ੍ਜਨਪਲੁਜ੍ਜਨਟ੍ਠੇਨ ਲੋਕੋਪੇਸੋ. ਵਲ਼ਞ੍ਜਨਟ੍ਠੇਨ ਦ੍ਵਾਰਾਪੇਸਾ. ਅਪੂਰਣੀਯਟ੍ਠੇਨ ਸਮੁਦ੍ਦੋਪੇਸੋ. ਪਰਿਸੁਦ੍ਧਟ੍ਠੇਨ ਪਣ੍ਡਰਂਪੇਤਂ. ਫਸ੍ਸਾਦੀਨਂ ਅਭਿਜਾਯਨਟ੍ਠੇਨ ਖੇਤ੍ਤਂਪੇਤਂ. ਤੇਸਂਯੇਵ ਪਤਿਟ੍ਠਾਨਟ੍ਠੇਨ ਵਤ੍ਥੁਂਪੇਤਂ. ਸਮਵਿਸਮਂ ਦਸ੍ਸੇਨ੍ਤਂ ਅਤ੍ਤਭਾਵਂ ਨੇਤੀਤਿ ਨੇਤ੍ਤਂਪੇਤਂ. ਤੇਨੇਵਟ੍ਠੇਨ ਨਯਨਂਪੇਤਂ. ਸਕ੍ਕਾਯਪਰਿਯਾਪਨ੍ਨਟ੍ਠੇਨ ਓਰਿਮਂ ਤੀਰਂਪੇਤਂ. ਬਹੁਸਾਧਾਰਣਟ੍ਠੇਨ ਅਸ੍ਸਾਮਿਕਟ੍ਠੇਨ ਚ ਸੁਞ੍ਞੋ ਗਾਮੋਪੇਸੋਤਿ.
ਏਤ੍ਤਾਵਤਾ ‘ਪਸ੍ਸਿ ਵਾ’ਤਿਆਦੀਹਿ ਚਤੂਹਿ ਪਦੇਹਿ ਚਕ੍ਖੁਂਪੇਤਨ੍ਤਿਆਦੀਨਿ ਚੁਦ੍ਦਸ ਨਾਮਾਨਿ ਯੋਜੇਤ੍ਵਾ ਚਕ੍ਖਾਯਤਨਸ੍ਸ ਚਤ੍ਤਾਰੋ ਵਵਤ੍ਥਾਪਨਨਯਾ ਵੁਤ੍ਤਾਤਿ ਵੇਦਿਤਬ੍ਬਾ. ਕਥਂ? ਏਤ੍ਥ ਹਿ ਯੇਨ ਚਕ੍ਖੁਨਾ ਅਨਿਦਸ੍ਸਨੇਨ ਸਪ੍ਪਟਿਘੇਨ ਰੂਪਂ ਸਨਿਦਸ੍ਸਨਂ ਸਪ੍ਪਟਿਘਂ ਪਸ੍ਸਿ ਵਾ ਚਕ੍ਖੁਂਪੇਤਂ…ਪੇ… ਸੁਞ੍ਞੋ ਗਾਮੋਪੇਸੋ, ਇਦਂ ਤਂ ਰੂਪਂ ਚਕ੍ਖਾਯਤਨਨ੍ਤਿ ਅਯਮੇਕੋ ਨਯੋ. ਏਵਂ ਸੇਸਾਪਿ ਵੇਦਿਤਬ੍ਬਾ.
੫੯੭. ਇਦਾਨਿ ਯਸ੍ਮਾ ਵਿਜ੍ਜੁਨਿਚ੍ਛਰਣਾਦਿਕਾਲੇਸੁ ਅਨੋਲੋਕੇਤੁਕਾਮਸ੍ਸਾਪਿ ਰੂਪਂ ਚਕ੍ਖੁਪਸਾਦਂ ਘਟ੍ਟੇਤਿ, ਤਸ੍ਮਾ ਤਂ ਆਕਾਰਂ ਦਸ੍ਸੇਤੁਂ ਦੁਤਿਯੋ ਨਿਦ੍ਦੇਸਵਾਰੋ ਆਰਦ੍ਧੋ. ਤਤ੍ਥ ਯਮ੍ਹਿ ਚਕ੍ਖੁਮ੍ਹੀਤਿ ਯਮ੍ਹਿ ਅਧਿਕਰਣਭੂਤੇ ਚਕ੍ਖੁਮ੍ਹਿ. ਰੂਪਨ੍ਤਿ ਪਚ੍ਚਤ੍ਤਵਚਨਮੇਤਂ. ਤਤ੍ਥ ਪਟਿਹਞ੍ਞਿ ਵਾਤਿ ਅਤੀਤਤ੍ਥੋ. ਪਟਿਹਞ੍ਞਤਿ ਵਾਤਿ ਪਚ੍ਚੁਪ੍ਪਨ੍ਨਤ੍ਥੋ. ਪਟਿਹਞ੍ਞਿਸ੍ਸਤਿ ਵਾਤਿ ਅਨਾਗਤਤ੍ਥੋ. ਪਟਿਹਞ੍ਞੇ ਵਾਤਿ ਵਿਕਪ੍ਪਨਤ੍ਥੋ. ਅਤੀਤਞ੍ਹਿ ਰੂਪਂ ਅਤੀਤੇ ਚਕ੍ਖੁਸ੍ਮਿਂ ਪਟਿਹਞ੍ਞਿ ਨਾਮ. ਪਚ੍ਚੁਪ੍ਪਨ੍ਨਂ ਪਚ੍ਚੁਪ੍ਪਨ੍ਨੇ ਪਟਿਹਞ੍ਞਤਿ ਨਾਮ. ਅਨਾਗਤਂ ਅਨਾਗਤੇ ਪਟਿਹਞ੍ਞਿਸ੍ਸਤਿ ਨਾਮ. ਸਚੇ ਤਂ ਰੂਪਂ ਚਕ੍ਖੁਸ੍ਸ ਆਪਾਥਂ ਆਗਚ੍ਛੇਯ੍ਯ, ਚਕ੍ਖੁਮ੍ਹਿ ਪਟਿਹਞ੍ਞੇਯ੍ਯ ਤਂ ਰੂਪਨ੍ਤਿ ਅਯਮੇਤ੍ਥ ਪਰਿਕਪ੍ਪੋ. ਅਤ੍ਥਤੋ ਪਨ ਪਸਾਦਂ ਘਟ੍ਟਯਮਾਨਮੇਵ ਰੂਪਂ ਪਟਿਹਞ੍ਞਤਿ ਨਾਮ. ਇਧਾਪਿ ਪੁਰਿਮਨਯੇਨੇਵ ਚਤ੍ਤਾਰੋ ਵਵਤ੍ਥਾਪਨਨਯਾ ਵੇਦਿਤਬ੍ਬਾ.
੫੯੮. ਇਦਾਨਿ ਯਸ੍ਮਾ ਅਤ੍ਤਨੋ ਇਚ੍ਛਾਯ ਓਲੋਕੇਤੁਕਾਮਸ੍ਸ ਰੂਪੇ ਚਕ੍ਖੁਂ ਉਪਸਂਹਰਤੋ ਚਕ੍ਖੁ ਰੂਪਸ੍ਮਿਂ ਪਟਿਹਞ੍ਞਤਿ, ਤਸ੍ਮਾ ਤਂ ਆਕਾਰਂ ਦਸ੍ਸੇਤੁਂ ਤਤਿਯੋ ਨਿਦ੍ਦੇਸਵਾਰੋ ਆਰਦ੍ਧੋ. ਸੋ ਅਤ੍ਥਤੋ ਪਾਕਟੋਯੇਵ. ਏਤ੍ਥ ਪਨ ਚਕ੍ਖੁ ਆਰਮ੍ਮਣਂ ਸਮ੍ਪਟਿਚ੍ਛਮਾਨਮੇਵ ਰੂਪਮ੍ਹਿ ਪਟਿਹਞ੍ਞਤਿ ਨਾਮ. ਇਧਾਪਿ ਪੁਰਿਮਨਯੇਨੇਵ ਚਤ੍ਤਾਰੋ ਵਵਤ੍ਥਾਪਨਨਯਾ ਵੇਦਿਤਬ੍ਬਾ.
੫੯੯. ਇਤੋ ਪਰਂ ਫਸ੍ਸਪਞ੍ਚਮਕਾਨਂ ਉਪ੍ਪਤ੍ਤਿਦਸ੍ਸਨਵਸੇਨ ਪਞ੍ਚ, ਤੇਸਂਯੇਵ ਆਰਮ੍ਮਣਪਟਿਬਦ੍ਧਉਪ੍ਪਤ੍ਤਿਦਸ੍ਸਨਵਸੇਨ ਪਞ੍ਚਾਤਿ, ਦਸ ਵਾਰਾ ਦਸ੍ਸਿਤਾ. ਤਤ੍ਥ ਚਕ੍ਖੁਂ ਨਿਸ੍ਸਾਯਾਤਿ ਚਕ੍ਖੁਂ ਨਿਸ੍ਸਾਯ, ਪਚ੍ਚਯਂ ਕਤ੍ਵਾ. ਰੂਪਂ ਆਰਬ੍ਭਾਤਿ ਰੂਪਾਰਮ੍ਮਣਂ ਆਗਮ੍ਮ, ਸਨ੍ਧਾਯ, ਪਟਿਚ੍ਚ. ਇਮਿਨਾ ਚਕ੍ਖੁਪਸਾਦਵਤ੍ਥੁਕਾਨਂ ਫਸ੍ਸਾਦੀਨਂ ਪੁਰੇਜਾਤਪਚ੍ਚਯੇਨ ਚਕ੍ਖੁਦ੍ਵਾਰਜਵਨਵੀਥਿਪਰਿਯਾਪਨ੍ਨਾਨਂ ਆਰਮ੍ਮਣਾਧਿਪਤਿਆਰਮ੍ਮਣੂਪਨਿਸ੍ਸਯਪਚ੍ਚਯੇਹਿ ਰੂਪਸ੍ਸ ਪਚ੍ਚਯਭਾਵੋ ਦਸ੍ਸਿਤੋ. ਇਤਰੇਸੁ ਪਞ੍ਚਸੁ ਵਾਰੇਸੁ ਰੂਪਂ ਆਰਮ੍ਮਣਮਸ੍ਸਾਤਿ ਰੂਪਾਰਮ੍ਮਣੋਤਿ ਏਵਂ ਆਰਮ੍ਮਣਪਚ੍ਚਯਮਤ੍ਤੇਨੇਵ ਪਚ੍ਚਯਭਾਵੋ ਦਸ੍ਸਿਤੋ. ਯਥਾ ਪਨ ਪੁਰਿਮੇਸੁ ਤੀਸੁ, ਏਵਂ ਇਮੇਸੁਪਿ ਦਸਸੁ ਵਾਰੇਸੁ ਚਤ੍ਤਾਰੋ ਚਤ੍ਤਾਰੋ ਵਵਤ੍ਥਾਪਨਨਯਾ ਵੇਦਿਤਬ੍ਬਾ. ਏਵਂ ਕਤਮਂ ਤਂ ਰੂਪਂ ਚਕ੍ਖਾਯਤਨਨ੍ਤਿ ਪੁਚ੍ਛਾਯ ਉਦ੍ਧਟਂ ਚਕ੍ਖੁਂ ‘ਇਦਂ ਤ’ਨ੍ਤਿ ਨਾਨਪ੍ਪਕਾਰਤੋ ਦਸ੍ਸੇਤੁਂ, ਪੁਰਿਮਾ ਤਯੋ, ਇਮੇ ਦਸਾਤਿ, ਤੇਰਸ ਨਿਦ੍ਦੇਸਵਾਰਾ ਦਸ੍ਸਿਤਾ. ਏਕੇਕਸ੍ਮਿਞ੍ਚੇਤ੍ਥ ਚਤੁਨ੍ਨਂ ਚਤੁਨ੍ਨਂ ਵਵਤ੍ਥਾਪਨਨਯਾਨਂ ਆਗਤਤ੍ਤਾ ਦ੍ਵਿਪਞ੍ਞਾਸਾਯ ਨਯੇਹਿ ਪਟਿਮਣ੍ਡੇਤ੍ਵਾਵ ਦਸ੍ਸਿਤਾਤਿ ਵੇਦਿਤਬ੍ਬਾ.
੬੦੦. ਇਤੋ ਪਰੇਸੁ ਸੋਤਾਯਤਨਾਦਿਨਿਦ੍ਦੇਸੇਸੁਪਿ ਏਸੇਵ ਨਯੋ. ਵਿਸੇਸਮਤ੍ਤਂ ਪਨੇਤ੍ਥ ਏਵਂ ਵੇਦਿਤਬ੍ਬਂ – ਸੁਣਾਤੀਤਿ ਸੋਤਂ. ਤਂ ਸਸਮ੍ਭਾਰਸੋਤਬਿਲਸ੍ਸ ਅਨ੍ਤੋ ਤਨੁਤਮ੍ਬਲੋਮਾਚਿਤੇ ਅਙ੍ਗੁਲਿਵੇਧਕਸਣ੍ਠਾਨੇ ਪਦੇਸੇ ਵੁਤ੍ਤਪ੍ਪਕਾਰਾਹਿ ਧਾਤੂਹਿ ਕਤੂਪਕਾਰਂ, ਉਤੁਚਿਤ੍ਤਾਹਾਰੇਹਿ ਉਪਤ੍ਥਮ੍ਭਿਯਮਾਨਂ, ਆਯੁਨਾ ਅਨੁਪਾਲਿਯਮਾਨਂ, ਵਣ੍ਣਾਦੀਹਿ ਪਰਿਵੁਤਂ ਸੋਤਵਿਞ੍ਞਾਣਾਦੀਨਂ ਯਥਾਰਹਂ ਵਤ੍ਥੁਦ੍ਵਾਰਭਾਵਂ ਸਾਧਯਮਾਨਂ ਤਿਟ੍ਠਤਿ.
ਘਾਯਤੀਤਿ ਘਾਨਂ. ਤਂ ਸਸਮ੍ਭਾਰਘਾਨਬਿਲਸ੍ਸ ਅਨ੍ਤੋ ਅਜਪ੍ਪਦਸਣ੍ਠਾਨੇ ਪਦੇਸੇ ਯਥਾਵੁਤ੍ਤਪ੍ਪਕਾਰਉਪਕਾਰੁਪਤ੍ਥਮ੍ਭਨਾਨੁਪਾਲਨਪਰਿਵਾਰਂ ਹੁਤ੍ਵਾ ਘਾਨਵਿਞ੍ਞਾਣਾਦੀਨਂ ਯਥਾਰਹਂ ਵਤ੍ਥੁਦ੍ਵਾਰਭਾਵਂ ਸਾਧਯਮਾਨਂ ਤਿਟ੍ਠਤਿ.
ਸਾਯਨਟ੍ਠੇਨ ਜਿਵ੍ਹਾ. ਸਾ ਸਸਮ੍ਭਾਰਜਿਵ੍ਹਾਮਜ੍ਝਸ੍ਸ ਉਪਰਿ ਉਪ੍ਪਲਦਲਗ੍ਗਸਣ੍ਠਾਨੇ ਪਦੇਸੇ ਯਥਾਵੁਤ੍ਤਪ੍ਪਕਾਰਉਪਕਾਰੁਪਤ੍ਥਮ੍ਭਨਾਨੁਪਾਲਨਪਰਿਵਾਰਾ ਹੁਤ੍ਵਾ ਜਿਵ੍ਹਾਵਿਞ੍ਞਾਣਾਦੀਨਂ ਯਥਾਰਹਂ ਵਤ੍ਥੁਦ੍ਵਾਰਭਾਵਂ ਸਾਧਯਮਾਨਾ ਤਿਟ੍ਠਤਿ.
ਯਾਵਤਾ ਪਨ ਇਮਸ੍ਮਿਂ ਕਾਯੇ ਉਪਾਦਿਣ੍ਣਕਰੂਪਂ ਨਾਮ ਅਤ੍ਥਿ, ਸਬ੍ਬਤ੍ਥ ਕਾਯਾਯਤਨਂ, ਕਪ੍ਪਾਸਪਟਲੇ ਸ੍ਨੇਹੋ ਵਿਯ, ਯਥਾਵੁਤ੍ਤਪ੍ਪਕਾਰਉਪਕਾਰੁਪਤ੍ਥਮ੍ਭਨਾਨੁਪਾਲਨਪਰਿਵਾਰਮੇਵ ਹੁਤ੍ਵਾ ਕਾਯਵਿਞ੍ਞਾਣਾਦੀਨਂ ਯਥਾਰਹਂ ਵਤ੍ਥੁਦ੍ਵਾਰਭਾਵਂ ਸਾਧਯਮਾਨਂ ਤਿਟ੍ਠਤਿ. ਅਯਮੇਤ੍ਥ ਵਿਸੇਸੋ. ਸੇਸੋ ਪਾਲ਼ਿਪ੍ਪਭੇਦੋ ਚ ਅਤ੍ਥੋ ਚ ਚਕ੍ਖੁਨਿਦ੍ਦੇਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਕੇਵਲਞ੍ਹਿ ਇਧ ਚਕ੍ਖੁਪਦਸ੍ਸ ਠਾਨੇ ਸੋਤਪਦਾਦੀਨਿ, ਰੂਪਪਦਸ੍ਸ ਠਾਨੇ ਸਦ੍ਦਪਦਾਦੀਨਿ, ਪਸ੍ਸੀਤਿ ਆਦੀਨਂ ਠਾਨੇ ਸੁਣੀਤਿਆਦਿਪਦਾਨਿ ਚ ਆਗਤਾਨਿ. ‘ਨੇਤ੍ਤਂਪੇਤਂ, ਨਯਨਂਪੇਤ’ਨ੍ਤਿ ਇਮਸ੍ਸ ਚ ਪਦਦ੍ਵਯਸ੍ਸ ਅਭਾਵਾ ਦ੍ਵਾਦਸ ਦ੍ਵਾਦਸ ਨਾਮਾਨਿ ਹੋਨ੍ਤਿ. ਸੇਸਂ ਸਬ੍ਬਤ੍ਥ ਵੁਤ੍ਤਸਦਿਸਮੇਵ.
ਤਤ੍ਥ ਸਿਯਾ – ਯਦਿ ਯਾਵਤਾ ਇਮਸ੍ਮਿਂ ਕਾਯੇ ਉਪਾਦਿਣ੍ਣਕਰੂਪਂ ਨਾਮ ਅਤ੍ਥਿ, ਸਬ੍ਬਤ੍ਥ ਕਾਯਾਯਤਨਂ, ਕਪ੍ਪਾਸਪਟਲੇ ਸ੍ਨੇਹੋ ਵਿਯ. ‘ਏਵਂ ਸਨ੍ਤੇ ਲਕ੍ਖਣਸਮ੍ਮਿਸ੍ਸਤਾ ਆਪਜ੍ਜਤੀ’ਤਿ. ‘ਨਾਪਜ੍ਜਤੀ’ਤਿ. ‘ਕਸ੍ਮਾ’? ‘ਅਞ੍ਞਸ੍ਸ ਅਞ੍ਞਤ੍ਥ ਅਭਾਵਤੋ’. ‘ਯਦਿ ਏਵਂ, ਨ ਸਬ੍ਬਤ੍ਥ ਕਾਯਾਯਤਨ’ਨ੍ਤਿ? ‘ਨੇਵ ਪਰਮਤ੍ਥਤੋ ਸਬ੍ਬਤ੍ਥ. ਵਿਨਿਬ੍ਭੁਜਿਤ੍ਵਾ ਪਨਸ੍ਸ ਨਾਨਾਕਰਣਂ ਪਞ੍ਞਾਪੇਤੁਂ ਨ ਸਕ੍ਕਾ, ਤਸ੍ਮਾ ਏਵਂ ਵੁਤ੍ਤਂ. ਯਥਾ ਹਿ ਰੂਪਰਸਾਦਯੋ, ਵਾਲਿਕਾਚੁਣ੍ਣਾਨਿ ਵਿਯ, ਵਿਵੇਚੇਤੁਂ ਅਸਕ੍ਕੁਣੇਯ੍ਯਤਾਯ ਅਞ੍ਞਮਞ੍ਞਬ੍ਯਾਪਿਨੋਤਿ ਵੁਚ੍ਚਨ੍ਤਿ, ਨ ਚ ਪਰਮਤ੍ਥਤੋ ਰੂਪੇ ਰਸੋ ਅਤ੍ਥਿ. ਯਦਿ ਸਿਯਾ ਰੂਪਗ੍ਗਹਣੇਨੇਵ ਰਸਗ੍ਗਹਣਂ ਗਚ੍ਛੇਯ੍ਯ. ਏਵਂ ਕਾਯਾਯਤਨਮ੍ਪਿ ਪਰਮਤ੍ਥਤੋ ਨੇਵ ਸਬ੍ਬਤ੍ਥ ਅਤ੍ਥਿ, ਨ ਚ ਸਬ੍ਬਤ੍ਥ ਨਤ੍ਥਿ, ਵਿਵੇਚੇਤੁਂ ਅਸਕ੍ਕੁਣੇਯ੍ਯਤਾਯਾਤਿ. ਏਵਮੇਤ੍ਥ ਨ ਲਕ੍ਖਣਸਮ੍ਮਿਸ੍ਸਤਾ ਆਪਜ੍ਜਤੀਤਿ ਵੇਦਿਤਬ੍ਬਾ’.
ਅਪਿਚ ਲਕ੍ਖਣਾਦਿਵਵਤ੍ਥਾਪਨਤੋਪੇਤੇਸਂ ਅਸਮ੍ਮਿਸ੍ਸਤਾ ਵੇਦਿਤਬ੍ਬਾ – ਏਤੇਸੁ ਹਿ ਰੂਪਾਭਿਘਾਤਾਰਹਭੂਤਪ੍ਪਸਾਦਲਕ੍ਖਣਂ ਦਟ੍ਠੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪ੍ਪਸਾਦਲਕ੍ਖਣਂ ਵਾ ਚਕ੍ਖੁ, ਰੂਪੇਸੁ ਆਵਿਞ੍ਛਨਰਸਂ, ਚਕ੍ਖੁਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਂ, ਦਟ੍ਠੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਂ.
ਸਦ੍ਦਾਭਿਘਾਤਾਰਹਭੂਤਪ੍ਪਸਾਦਲਕ੍ਖਣਂ ਸੋਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪ੍ਪਸਾਦਲਕ੍ਖਣਂ ਵਾ ਸੋਤਂ, ਸਦ੍ਦੇਸੁ ਆਵਿਞ੍ਛਨਰਸਂ, ਸੋਤਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਂ, ਸੋਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਂ.
ਗਨ੍ਧਾਭਿਘਾਤਾਰਹਭੂਤਪ੍ਪਸਾਦਲਕ੍ਖਣਂ ਘਾਯਿਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪ੍ਪਸਾਦਲਕ੍ਖਣਂ ਵਾ ਘਾਨਂ, ਗਨ੍ਧੇਸੁ ਆਵਿਞ੍ਛਨਰਸਂ, ਘਾਨਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਂ ਘਾਯਿਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਂ.
ਰਸਾਭਿਘਾਤਾਰਹਭੂਤਪ੍ਪਸਾਦਲਕ੍ਖਣਾ ਸਾਯਿਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪ੍ਪਸਾਦਲਕ੍ਖਣਾ ਵਾ ਜਿਵ੍ਹਾ, ਰਸੇਸੁ ਆਵਿਞ੍ਛਨਰਸਾ, ਜਿਵ੍ਹਾਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਾ, ਸਾਯਿਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਾ.
ਫੋਟ੍ਠਬ੍ਬਾਭਿਘਾਤਾਰਹਭੂਤਪ੍ਪਸਾਦਲਕ੍ਖਣੋ ਫੁਸਿਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪ੍ਪਸਾਦਲਕ੍ਖਣੋ ਵਾ ਕਾਯੋ, ਫੋਟ੍ਠਬ੍ਬੇਸੁ ਆਵਿਞ੍ਛਨਰਸੋ, ਕਾਯਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨੋ, ਫੁਸਿਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨੋ.
ਕੇਚਿ ਪਨ ‘ਤੇਜਾਧਿਕਾਨਂ ਭੂਤਾਨਂ ਪਸਾਦੋ ਚਕ੍ਖੁ, ਵਾਯੁਪਥਵੀਆਪਾਧਿਕਾਨਂ ਭੂਤਾਨਂ ਪਸਾਦਾ ਸੋਤਘਾਨਜਿਵ੍ਹਾ, ਕਾਯੋ ਸਬ੍ਬੇਸ’ਨ੍ਤਿ ਵਦਨ੍ਤਿ. ਅਪਰੇ ‘ਤੇਜਾਧਿਕਾਨਂ ਪਸਾਦੋ ਚਕ੍ਖੁ, ਵਿਵਰਵਾਯੁਆਪਪਥਵਾਧਿਕਾਨਂ ਪਸਾਦਾ ਸੋਤਘਾਨਜਿਵ੍ਹਾਕਾਯਾ’ਤਿ ਵਦਨ੍ਤਿ. ਤੇ ਵਤ੍ਤਬ੍ਬਾ – ‘ਸੁਤ੍ਤਂ ਆਹਰਥਾ’ਤਿ. ਅਦ੍ਧਾ ਸੁਤ੍ਤਮੇਵ ਨ ਦਕ੍ਖਿਸ੍ਸਨ੍ਤਿ. ਕੇਚਿ ਪਨੇਤ੍ਥ ‘ਤੇਜਾਦੀਨਂ ਗੁਣੇਹਿ ਰੂਪਾਦੀਹਿ ਅਨੁਗ੍ਗਯ੍ਹਭਾਵਤੋ’ਤਿ ਕਾਰਣਂ ਵਦਨ੍ਤਿ. ਤੇ ਚ ਵਤ੍ਤਬ੍ਬਾ – ‘ਕੋ ਪਨੇਵਮਾਹ – ਰੂਪਾਦਯੋ ਤੇਜਾਦੀਨਂ ਗੁਣਾ’ਤਿ? ਅਵਿਨਿਬ੍ਭੋਗੇਸੁ ਹਿ ਰੂਪੇਸੁ ‘ਅਯਂ ਇਮਸ੍ਸ ਗੁਣੋ, ਅਯਂ ਇਮਸ੍ਸ ਗੁਣੋ’ਤਿ ਨ ਲਬ੍ਭਾ ਵਤ੍ਤੁਂ. ਅਥਾਪਿ ਵਦੇਯ੍ਯੁਂ – ‘ਯਥਾ ਤੇਸੁ ਤੇਸੁ ਸਮ੍ਭਾਰੇਸੁ ਤਸ੍ਸ ਤਸ੍ਸ ਭੂਤਸ੍ਸ ਅਧਿਕਤਾਯ ਪਥਵੀਆਦੀਨਂ ਸਨ੍ਧਾਰਣਾਦੀਨਿ ਕਿਚ੍ਚਾਨਿ ਇਚ੍ਛਥ, ਏਵਂ ਤੇਜਾਦਿਅਧਿਕੇਸੁ ਸਮ੍ਭਾਰੇਸੁ ਰੂਪਾਦੀਨਂ ਅਧਿਕਭਾਵਦਸ੍ਸਨਤੋ ਇਚ੍ਛਿਤਬ੍ਬਮੇਤਂ ਰੂਪਾਦਯੋ ਤੇਸਂ ਗੁਣਾ’ਤਿ. ਤੇ ਵਤ੍ਤਬ੍ਬਾ – ਇਚ੍ਛੇਯ੍ਯਾਮ, ਯਦਿ ਆਪਾਧਿਕਸ੍ਸ ਆਸਵਸ੍ਸ ਗਨ੍ਧਤੋ ਪਥਵੀਅਧਿਕੇ ਕਪ੍ਪਾਸੇ ਗਨ੍ਧੋ ਅਧਿਕਤਰੋ ਸਿਯਾ, ਤੇਜਾਧਿਕਸ੍ਸ ਚ ਉਣ੍ਹੋਦਕਸ੍ਸ ਵਣ੍ਣਤੋਪਿ ਸੀਤੂਦਕਸ੍ਸ ਵਣ੍ਣੋ ਪਰਿਹਾਯੇਥ. ਯਸ੍ਮਾ ਪਨੇਤਂ ਉਭਯਮ੍ਪਿ ਨਤ੍ਥਿ, ਤਸ੍ਮਾ ਪਹਾਯੇਥੇਤਂ ਏਤੇਸਂ ਨਿਸ੍ਸਯਭੂਤਾਨਂ ਵਿਸੇਸਕਪ੍ਪਨਂ, ਯਥਾ ਅਵਿਸੇਸੇਪਿ ਏਕਕਲਾਪੇ ਭੂਤਾਨਂ ਰੂਪਰਸਾਦਯੋ ਅਞ੍ਞਮਞ੍ਞਂ ਵਿਸਦਿਸਾ ਹੋਨ੍ਤਿ, ਏਵਂ ਚਕ੍ਖੁਪਸਾਦਾਦਯੋ, ਅਵਿਜ੍ਜਮਾਨੇਪਿ ਅਞ੍ਞਸ੍ਮਿਂ ਵਿਸੇਸਕਾਰਣੇਤਿ ਗਹੇਤਬ੍ਬਮੇਤਂ.
ਕਿਂ ਪਨ ਤਂ ਯਂ ਅਞ੍ਞਮਞ੍ਞਸ੍ਸ ਅਸਾਧਾਰਣਂ? ਕਮ੍ਮਮੇਵ ਨੇਸਂ ਵਿਸੇਸਕਾਰਣਂ. ਤਸ੍ਮਾ ਕਮ੍ਮਵਿਸੇਸਤੋ ਏਤੇਸਂ ਵਿਸੇਸੋ, ਨ ਭੂਤਵਿਸੇਸਤੋ. ਭੂਤਵਿਸੇਸੇ ਹਿ ਸਤਿ ਪਸਾਦੋਵ ਨੁਪ੍ਪਜ੍ਜਤਿ. ਸਮਾਨਾਨਞ੍ਹਿ ਪਸਾਦੋ, ਨ ਵਿਸਮਾਨਾਨਨ੍ਤਿ ਪੋਰਾਣਾ. ਏਵਂ ਕਮ੍ਮੇਵਿਸਸਤੋ ਵਿਸੇਸਵਨ੍ਤੇਸੁ ਚ ਏਤੇਸੁ ਚਕ੍ਖੁਸੋਤਾਨਿ ਅਸਮ੍ਪਤ੍ਤਵਿਸਯਗ੍ਗਾਹਕਾਨਿ ਅਤ੍ਤਨੋ ਨਿਸ੍ਸਯਂ ਅਨਲ੍ਲੀਨਨਿਸ੍ਸਯੇ ਏਵ ਵਿਸਯੇ ਵਿਞ੍ਞਾਣਹੇਤੁਤ੍ਤਾ. ਘਾਨਜਿਵ੍ਹਾਕਾਯਾ ਸਮ੍ਪਤ੍ਤਵਿਸਯਗ੍ਗਾਹਕਾ, ਨਿਸ੍ਸਯਵਸੇਨ ਚੇਵ ਸਯਞ੍ਚ ਅਤ੍ਤਨੋ ਨਿਸ੍ਸਯਂ ਅਲ੍ਲੀਨੇਯੇਵ ਵਿਸਯੇ ਵਿਞ੍ਞਾਣਹੇਤੁਤ੍ਤਾ.
ਅਟ੍ਠਕਥਾਯਂ ਪਨ ‘‘ਆਪਾਥਗਤਤ੍ਤਾਵ ਆਰਮ੍ਮਣਂ ਸਮ੍ਪਤ੍ਤਂ ਨਾਮ. ਚਨ੍ਦਮਣ੍ਡਲਸੂਰਿਯਮਣ੍ਡਲਾਨਞ੍ਹਿ ਦ੍ਵਾਚਤ੍ਤਾਲੀਸਯੋਜਨਸਹਸ੍ਸਮਤ੍ਥਕੇ ਠਿਤਾਨਂ ਵਣ੍ਣੋ ਚਕ੍ਖੁਪਸਾਦਂ ਘਟ੍ਟੇਤਿ. ਸੋ ਦੂਰੇ ਠਤ੍ਵਾ ਪਞ੍ਞਾਯਮਾਨੋਪਿ ਸਮ੍ਪਤ੍ਤੋਯੇਵ ਨਾਮ. ਤਂਗੋਚਰਤ੍ਤਾ ਚਕ੍ਖੁ ਸਮ੍ਪਤ੍ਤਗੋਚਰਮੇਵ ਨਾਮ. ਦੂਰੇ ਰੁਕ੍ਖਂ ਛਿਨ੍ਦਨ੍ਤਾਨਮ੍ਪਿ, ਰਜਕਾਨਞ੍ਚ ਵਤ੍ਥਂ ਧੋਵਨ੍ਤਾਨਂ ਦੂਰਤੋਵ ਕਾਯਵਿਕਾਰੋ ਪਞ੍ਞਾਯਤਿ. ਸਦ੍ਦੋ ਪਨ ਧਾਤੁਪਰਮ੍ਪਰਾਯ ਆਗਨ੍ਤ੍ਵਾ ਸੋਤਂ ਘਟ੍ਟੇਤ੍ਵਾ ਸਣਿਕਂ ਵਵਤ੍ਥਾਨਂ ਗਚ੍ਛਤੀ’’ਤਿ ਵੁਤ੍ਤਂ.
ਤਤ੍ਥ ਕਿਞ੍ਚਾਪਿ ਆਪਾਥਗਤਤ੍ਤਾ ਆਰਮ੍ਮਣਂ ਸਮ੍ਪਤ੍ਤਨ੍ਤਿ ਵੁਤ੍ਤਂ, ਚਨ੍ਦਮਣ੍ਡਲਾਦਿਵਣ੍ਣੋ ਪਨ ਚਕ੍ਖੁਂ ਅਸਮ੍ਪਤ੍ਤੋ ਦੂਰੇ ਠਿਤੋਵ ਪਞ੍ਞਾਯਤਿ. ਸਦ੍ਦੋਪਿ ਸਚੇ ਸਣਿਕਂ ਆਗਚ੍ਛੇਯ੍ਯ, ਦੂਰੇ ਉਪ੍ਪਨ੍ਨੋ ਚਿਰੇਨ ਸੁਯ੍ਯੇਯ੍ਯ, ਪਰਮ੍ਪਰਘਟ੍ਟਨਾਯ ਚ ਆਗਨ੍ਤ੍ਵਾ ਸੋਤਂ ਘਟ੍ਟੇਨ੍ਤੋ ਅਸੁਕਦਿਸਾਯ ਨਾਮਾਤਿ ਨ ਪਞ੍ਞਾਯੇਯ੍ਯ. ਤਸ੍ਮਾ ਅਸਮ੍ਪਤ੍ਤਗੋਚਰਾਨੇਵ ਤਾਨਿ.
ਅਹਿਆਦਿਸਮਾਨਾਨਿ ਚੇਤਾਨਿ. ਯਥਾ ਹਿ ਅਹਿ ਨਾਮ ਬਹਿ ਸਿਤ੍ਤਸਮ੍ਮਟ੍ਠਟ੍ਠਾਨੇ ਨਾਭਿਰਮਤਿ, ਸਙ੍ਕਾਰਟ੍ਠਾਨਤਿਣਪਣ੍ਣਗਹਨਵਮ੍ਮਿਕਾਨਿਯੇਵ ਪਨ ਪਵਿਸਿਤ੍ਵਾ ਨਿਪਨ੍ਨਕਾਲੇ ਅਭਿਰਮਤਿ, ਏਕਗ੍ਗਤਂ ਆਪਜ੍ਜਤਿ, ਏਵਮੇਵ ਚਕ੍ਖੁਪੇਤਂ ਵਿਸਮਜ੍ਝਾਸਯਂ ਮਟ੍ਠੇਸੁ ਸੁਵਣ੍ਣਭਿਤ੍ਤਿਆਦੀਸੁ ਨਾਭਿਰਮਤਿ, ਓਲੋਕੇਤੁਮ੍ਪਿ ਨ ਇਚ੍ਛਤਿ, ਰੂਪਚਿਤ੍ਤਪੁਪ੍ਫਲਤਾਦਿਚਿਤ੍ਤੇਸੁਯੇਵ ਪਨ ਅਭਿਰਮਤਿ. ਤਾਦਿਸੇਸੁ ਹਿ ਠਾਨੇਸੁ ਚਕ੍ਖੁਮ੍ਹਿ ਅਪ੍ਪਹੋਨ੍ਤੇ ਮੁਖਮ੍ਪਿ ਵਿਵਰਿਤ੍ਵਾ ਓਲੋਕੇਤੁਕਾਮਾ ਹੋਨ੍ਤਿ.
ਸੁਸੁਮਾਰੋਪਿ ਬਹਿ ਨਿਕ੍ਖਨ੍ਤੋ ਗਹੇਤਬ੍ਬਂ ਨ ਪਸ੍ਸਤਿ, ਅਕ੍ਖੀਨਿ ਨਿਮ੍ਮੀਲੇਤ੍ਵਾਵ ਚਰਤਿ. ਯਦਾ ਪਨ ਬ੍ਯਾਮਸਤਮਤ੍ਤਂ ਉਦਕਂ ਓਗਾਹਿਤ੍ਵਾ ਬਿਲਂ ਪਵਿਸਿਤ੍ਵਾ ਨਿਪਨ੍ਨੋ ਹੋਤਿ, ਤਦਾ ਤਸ੍ਸ ਚਿਤ੍ਤਂ ਏਕਗ੍ਗਂ ਹੋਤਿ ਸੁਖਂ ਸੁਪਤਿ, ਏਵਮੇਵ ਸੋਤਂ ਤਮ੍ਪੇ ਬਿਲਜ੍ਝਾਸਯਂ ਆਕਾਸਸਨ੍ਨਿਸ੍ਸਿਤਂ ਕਣ੍ਣਚ੍ਛਿਦ੍ਦਕੂਪਕੇਯੇਵ ਅਜ੍ਝਾਸਯਂ ਕਰੋਤਿ. ਕਣ੍ਣਚ੍ਛਿਦ੍ਦਾਕਾਸੋਯੇਵ ਤਸ੍ਸ ਸਦ੍ਦਸਵਨੇ ਪਚ੍ਚਯੋ ਹੋਤਿ. ਅਜਟਾਕਾਸੋਪਿ ਵਟ੍ਟਤਿਯੇਵ. ਅਨ੍ਤੋਲੇਣਸ੍ਮਿਞ੍ਹਿ ਸਜ੍ਝਾਯੇ ਕਰਿਯਮਾਨੇ ਨ ਲੇਣਚ੍ਛਦਨਂ ਭਿਨ੍ਦਿਤ੍ਵਾ ਸਦ੍ਦੋ ਬਹਿ ਨਿਕ੍ਖਮਤਿ, ਦ੍ਵਾਰਵਾਤਪਾਨਚ੍ਛਿਦ੍ਦੇਹਿ ਪਨ ਨਿਕ੍ਖਮਿਤ੍ਵਾ ਧਾਤੁਪਰਮ੍ਪਰਾਯੇਵ ਘਟ੍ਟੇਨ੍ਤੋ ਗਨ੍ਤ੍ਵਾ ਸੋਤਪਸਾਦਂ ਘਟ੍ਟੇਤਿ. ਅਥ ਤਸ੍ਮਿਂ ਕਾਲੇ ‘ਅਸੁਕੋ ਨਾਮ ਸਜ੍ਝਾਯਤੀ’ਤਿ ਲੇਣਪਿਟ੍ਠੇ ਨਿਸਿਨ੍ਨਾ ਜਾਨਨ੍ਤਿ.
ਏਵਂ ਸਨ੍ਤੇ ਸਮ੍ਪਤ੍ਤਗੋਚਰਤਾ ਹੋਤਿ. ‘ਕਿਂ ਪਨੇਤਂ ਸਮ੍ਪਤ੍ਤਗੋਚਰ’ਨ੍ਤਿ? ‘ਆਮ, ਸਮ੍ਪਤ੍ਤਗੋਚਰਂ’. ‘ਯਦਿ ਏਵਂ, ਦੂਰੇ ਭੇਰੀਆਦੀਸੁ ਵਜ੍ਜਮਾਨੇਸੁ ਦੂਰੇ ਸਦ੍ਦੋਤਿ ਜਾਨਨਂ ਨ ਭਵੇਯ੍ਯਾ’ਤਿ? ‘ਨੋ ਨ ਭਵਤਿ. ਸੋਤਪਸਾਦਸ੍ਮਿਞ੍ਹਿ ਘਟ੍ਟਿਤੇ ਦੂਰੇ ਸਦ੍ਦੋ ਆਸਨ੍ਨੇ ਸਦ੍ਦੋ, ਪਰਤੀਰੇ ਓਰਿਮਤੀਰੇਤਿ ਤਥਾ ਤਥਾ ਜਾਨਨਾਕਾਰੋ ਹੋਤਿ. ਧਮ੍ਮਤਾ ਏਸਾ’ਤਿ. ‘ਕਿਂ ਏਤਾਯ ਧਮ੍ਮਤਾਯ? ਯਤੋ ਯਤੋ ਛਿਦ੍ਦਂ ਤਤੋ ਤਤੋ ਸਵਨਂ ਹੋਤਿ, ਚਨ੍ਦਿਮਸੂਰਿਯਾਦੀਨਂ ਦਸ੍ਸਨਂ ਵਿਯਾਤਿ ਅਸਮ੍ਪਤ੍ਤਗੋਚਰਮੇਵੇਤਂ’.
ਪਕ੍ਖੀਪਿ ਰੁਕ੍ਖੇ ਵਾ ਭੂਮਿਯਂ ਵਾ ਨ ਰਮਤਿ. ਯਦਾ ਪਨ ਏਕਂ ਵਾ ਦ੍ਵੇ ਵਾ ਲੇਡ੍ਡੁਪਾਤੇ ਅਤਿਕ੍ਕਮ੍ਮ ਅਜਟਾਕਾਸਂ ਪਕ੍ਖਨ੍ਦੋ ਹੋਤਿ, ਤਦਾ ਏਕਗ੍ਗਚਿਤ੍ਤਤਂ ਆਪਜ੍ਜਤਿ, ਏਵਮੇਵ ਘਾਨਮ੍ਪਿ ਆਕਾਸਜ੍ਝਾਸਯਂ ਵਾਤੂਪਨਿਸ੍ਸਯਗਨ੍ਧਗੋਚਰਂ. ਤਥਾ ਹਿ ਗਾਵੋ ਨਵਵੁਟ੍ਠੇ ਦੇਵੇ ਭੂਮਿਯਂ ਘਾਯਿਤ੍ਵਾ ਘਾਯਿਤ੍ਵਾ ਆਕਾਸਾਭਿਮੁਖਾ ਹੁਤ੍ਵਾ ਵਾਤਂ ਆਕਡ੍ਢਨ੍ਤਿ. ਅਙ੍ਗੁਲੀਹਿ ਗਨ੍ਧਪਿਣ੍ਡਂ ਗਹੇਤ੍ਵਾਪਿ ਚ ਉਪਸਿਙ੍ਘਨਕਾਲੇ ਵਾਤਂ ਅਨਾਕਡ੍ਢਨ੍ਤੋ ਨੇਵ ਤਸ੍ਸ ਗਨ੍ਧਂ ਜਾਨਾਤਿ.
ਕੁਕ੍ਕੁਰੋਪਿ ਬਹਿ ਵਿਚਰਨ੍ਤੋ ਖੇਮਟ੍ਠਾਨਂ ਨ ਪਸ੍ਸਤਿ ਲੇਡ੍ਡੁਪਹਾਰਾਦੀਹਿ ਉਪਦ੍ਦੁਤੋ ਹੋਤਿ. ਅਨ੍ਤੋਗਾਮਂ ਪਵਿਸਿਤ੍ਵਾ ਉਦ੍ਧਨਟ੍ਠਾਨੇ ਛਾਰਿਕਂ ਬ੍ਯੂਹਿਤ੍ਵਾ ਨਿਪਨ੍ਨਸ੍ਸ ਪਨ ਫਾਸੁਕਂ ਹੋਤਿ, ਏਵਮੇਵ ਜਿਵ੍ਹਾਪਿ ਗਾਮਜ੍ਝਾਸਯਾ ਆਪੋਸਨ੍ਨਿਸ੍ਸਿਤਰਸਾਰਮ੍ਮਣਾ. ਤਥਾ ਹਿ ਤਿਯਾਮਰਤ੍ਤਿਂ ਸਮਣਧਮ੍ਮਂ ਕਤ੍ਵਾਪਿ ਪਾਤੋਵ ਪਤ੍ਤਚੀਵਰਮਾਦਾਯ ਗਾਮੋ ਪਵਿਸਿਤਬ੍ਬੋ ਹੋਤਿ. ਸੁਕ੍ਖਖਾਦਨੀਯਸ੍ਸ ਚ ਨ ਸਕ੍ਕਾ ਖੇਲ਼ੇਨ ਅਤੇਮਿਤਸ੍ਸ ਰਸਂ ਜਾਨਿਤੁਂ.
ਸਿਙ੍ਗਾਲੋਪਿ ਬਹਿ ਚਰਨ੍ਤੋ ਰਤਿਂ ਨ ਵਿਨ੍ਦਤਿ, ਆਮਕਸੁਸਾਨੇ ਮਨੁਸ੍ਸਮਂਸਂ ਖਾਦਿਤ੍ਵਾ ਨਿਪਨ੍ਨਸ੍ਸੇਵ ਪਨਸ੍ਸ ਫਾਸੁਕਂ ਹੋਤਿ, ਏਵਮੇਵ ਕਾਯੋਪਿ ਉਪਾਦਿਣ੍ਣਕਜ੍ਝਾਸਯੋ ਪਥਵੀਨਿਸ੍ਸਿਤਫੋਟ੍ਠਬ੍ਬਾਰਮ੍ਮਣੋ. ਤਥਾ ਹਿ ਅਞ੍ਞਂ ਉਪਾਦਿਣ੍ਣਕਂ ਅਲਭਮਾਨਾ ਸਤ੍ਤਾ ਅਤ੍ਤਨੋਵ ਹਤ੍ਥਤਲੇ ਸੀਸਂ ਕਤ੍ਵਾ ਨਿਪਜ੍ਜਨ੍ਤਿ. ਅਜ੍ਝਤ੍ਤਿਕਬਾਹਿਰਾ ਚਸ੍ਸ ਪਥਵੀ ਆਰਮ੍ਮਣਗ੍ਗਹਣੇ ਪਚ੍ਚਯੋ ਹੋਤਿ. ਸੁਸਨ੍ਥਤਸ੍ਸਪਿ ਹਿ ਸਯਨਸ੍ਸ, ਹਤ੍ਥੇ ਠਪਿਤਾਨਮ੍ਪਿ ਵਾ ਫਲਾਨਂ, ਨ ਸਕ੍ਕਾ ਅਨਿਸੀਦਨ੍ਤੇਨ ਵਾ ਅਨਿਪ੍ਪੀਲ਼ੇਨ੍ਤੇਨ ਵਾ ਥਦ੍ਧਮੁਦੁਭਾਵੋ ਜਾਨਿਤੁਨ੍ਤਿ. ਅਜ੍ਝਤ੍ਤਿਕਬਾਹਿਰਾਪਥਵੀ ਏਤਸ੍ਸ ਕਾਯਪਸਾਦਸ੍ਸ ਫੋਟ੍ਠਬ੍ਬਜਾਨਨੇ ਪਚ੍ਚਯੋ ਹੋਤਿ. ਏਵਂ ਲਕ੍ਖਣਾਦਿਵਵਤ੍ਥਾਨਤੋਪੇਤੇਸਂ ਅਸਮ੍ਮਿਸ੍ਸਤਾ ਵੇਦਿਤਬ੍ਬਾ. ਅਞ੍ਞੇਯੇਵ ਹਿ ਚਕ੍ਖੁਪਸਾਦਸ੍ਸ ਲਕ੍ਖਣਰਸਪਚ੍ਚੁਪਟ੍ਠਾਨਪਦਟ੍ਠਾਨਗੋਚਰਜ੍ਝਾਸਯਨਿਸ੍ਸਯਾ ਅਞ੍ਞੇ ਸੋਤਪਸਾਦਾਦੀਨਨ੍ਤਿ ਅਸਮ੍ਮਿਸ੍ਸਾਨੇਵ ਚਕ੍ਖਾਯਤਨਾਦੀਨਿ.
ਅਪਿਚ ਨੇਸਂ ਅਸਮ੍ਮਿਸ੍ਸਤਾਯ ਅਯਂ ਉਪਮਾਪਿ ਵੇਦਿਤਬ੍ਬਾ – ਯਥਾ ਹਿ ਪਞ੍ਚਵਣ੍ਣਾਨਂ ਧਜਾਨਂ ਉਸ੍ਸਾਪਿਤਾਨਂ ਕਿਞ੍ਚਾਪਿ ਛਾਯਾ ਏਕਾਬਦ੍ਧਾ ਵਿਯ ਹੋਤਿ, ਤਸ੍ਸ ਤਸ੍ਸ ਪਨ ਅਞ੍ਞਮਞ੍ਞਂ ਅਸਮ੍ਮਿਸ੍ਸਾਵ ਯਥਾ ਚ ਪਞ੍ਚਵਣ੍ਣੇਨ ਕਪ੍ਪਾਸੇਨ ਵਟ੍ਟਿਂ ਕਤ੍ਵਾ ਦੀਪੇ ਜਾਲਿਤੇ ਕਿਞ੍ਚਾਪਿ ਜਾਲਾ ਏਕਾਬਦ੍ਧਾ ਵਿਯ ਹੋਤਿ, ਤਸ੍ਸ ਤਸ੍ਸ ਪਨ ਅਂਸੁਨੋ ਪਾਟਿਯੇਕ੍ਕਾ ਪਾਟਿਯੇਕ੍ਕਾ ਜਾਲਾ ਅਸਮ੍ਮਿਸ੍ਸਾ ਏਵ, ਏਵਮੇਵ ਕਿਞ੍ਚਾਪਿ ਇਮਾਨਿ ਪਞ੍ਚਾਯਤਨਾਨਿ ਏਕਸ੍ਮਿਂ ਅਤ੍ਤਭਾਵੇ ਸਮੋਸਟਾਨਿ ਅਞ੍ਞਮਞ੍ਞਂ ਪਨ ਅਸਮ੍ਮਿਸ੍ਸਾਨੇਵ. ਨ ਕੇਵਲਞ੍ਚ ਇਮਾਨੇਵ ਪਞ੍ਚ, ਸੇਸਰੂਪਾਨਿਪਿ ਅਸਮ੍ਮਿਸ੍ਸਾਨੇਵ. ਇਮਸ੍ਮਿਞ੍ਹਿ ਸਰੀਰੇ ਹੇਟ੍ਠਿਮਕਾਯੋ ਮਜ੍ਝਿਮਕਾਯੋ ਉਪਰਿਮਕਾਯੋਤਿ ਤਯੋ ਕੋਟ੍ਠਾਸਾ. ਤਤ੍ਥ ਨਾਭਿਤੋ ਪਟ੍ਠਾਯ ਹੇਟ੍ਠਾ ਹੇਟ੍ਠਿਮਕਾਯੋ ਨਾਮ. ਤਸ੍ਮਿਂ ਕਾਯਦਸਕਂ, ਭਾਵਦਸਕਂ, ਆਹਾਰਸਮੁਟ੍ਠਾਨਾਨਿ ਅਟ੍ਠ, ਉਤੁਸਮੁਟ੍ਠਾਨਾਨਿ ਅਟ੍ਠ, ਚਿਤ੍ਤਸਮੁਟ੍ਠਾਨਾਨਿ ਅਟ੍ਠਾਤਿ ਚਤੁਚਤ੍ਤਾਲੀਸ ਰੂਪਾਨਿ. ਨਾਭਿਤੋ ਉਦ੍ਧਂ ਯਾਵ ਗਲਵਾਟਕਾ ਮਜ੍ਝਿਮਕਾਯੋ ਨਾਮ. ਤਤ੍ਥ ਚ ਕਾਯਦਸਕਂ, ਭਾਵਦਸਕਂ, ਵਤ੍ਥੁਦਸਕਂ, ਆਹਾਰਸਮੁਟ੍ਠਾਨਾਦੀਨਿ ਤੀਣਿ ਅਟ੍ਠਕਾਨੀਤਿ ਚਤੁਪਞ੍ਞਾਸ ਰੂਪਾਨਿ. ਗਲਵਾਟਕਤੋ ਉਦ੍ਧਂ ਉਪਰਿਮਕਾਯੋ ਨਾਮ. ਤਤ੍ਥ ਚਕ੍ਖੁਦਸਕਂ, ਸੋਤਦਸਕਂ, ਘਾਨਦਸਕਂ, ਜਿਵ੍ਹਾਦਸਕਂ, ਕਾਯਦਸਕਂ, ਭਾਵਦਸਕਂ, ਆਹਾਰਸਮੁਟ੍ਠਾਨਾਦੀਨਿ ਤੀਣਿ ਅਟ੍ਠਕਾਨੀਤਿ ਚਤੁਰਾਸੀਤਿ ਰੂਪਾਨਿ.
ਤਤ੍ਥ ਚਕ੍ਖੁਪਸਾਦਸ੍ਸ ਪਚ੍ਚਯਾਨਿ ਚਤ੍ਤਾਰਿ ਮਹਾਭੂਤਾਨਿ, ਵਣ੍ਣੋ ਗਨ੍ਧੋ ਰਸੋ ਓਜਾ, ਜੀਵਿਤਿਨ੍ਦ੍ਰਿਯਂ ਚਕ੍ਖੁਪਸਾਦੋਤਿ ਇਦਂ ਏਕਨ੍ਤਤੋ ਅਵਿਨਿਭੁਤ੍ਤਾਨਂ ਦਸਨ੍ਨਂ ਨਿਪ੍ਫਨ੍ਨਰੂਪਾਨਂ ਵਸੇਨ ਚਕ੍ਖੁਦਸਕਂ ਨਾਮ. ਇਮਿਨਾ ਨਯੇਨ ਸੇਸਾਨਿਪਿ ਵੇਦਿਤਬ੍ਬਾਨਿ. ਤੇਸੁ ਹੇਟ੍ਠਿਮਕਾਯੇ ਰੂਪਂ ਮਜ੍ਝਿਮਕਾਯਉਪਰਿਮਕਾਯਰੂਪੇਹਿ ਸਦ੍ਧਿਂ ਅਸਮ੍ਮਿਸ੍ਸਂ. ਸੇਸਕਾਯਦ੍ਵਯੇਪਿ ਰੂਪਂ ਇਤਰੇਹਿ ਸਦ੍ਧਿਂ ਅਸਮ੍ਮਿਸ੍ਸਮੇਵ. ਯਥਾ ਹਿ ਸਾਯਨ੍ਹਸਮਯੇ ਪਬ੍ਬਤਚ੍ਛਾਯਾ ਚ ਰੁਕ੍ਖਚ੍ਛਾਯਾ ਚ ਕਿਞ੍ਚਾਪਿ ਏਕਾਬਦ੍ਧਾ ਵਿਯ ਹੋਨ੍ਤਿ ਅਞ੍ਞਮਞ੍ਞਂ ਪਨ ਅਸਮ੍ਮਿਸ੍ਸਾਵ ਏਵਂ ਇਮੇਸੁਪਿ ਕਾਯੇਸੁ ਚਤੁਚਤ੍ਤਾਲੀਸ ਚਤੁਪਞ੍ਞਾਸ ਚਤੁਰਾਸੀਤਿ ਰੂਪਾਨਿ ਚ ਕਿਞ੍ਚਾਪਿ ਏਕਾਬਦ੍ਧਾਨਿ ਵਿਯ ਹੋਨ੍ਤਿ, ਅਞ੍ਞਮਞ੍ਞਂ ਪਨ ਅਸਮ੍ਮਿਸ੍ਸਾਨੇਵਾਤਿ.
੬੧੬. ਰੂਪਾਯਤਨਨਿਦ੍ਦੇਸੇ ਵਣ੍ਣੋਵ ਵਣ੍ਣਨਿਭਾ; ਨਿਭਾਤੀਤਿ ਵਾ ਨਿਭਾ. ਚਕ੍ਖੁਵਿਞ੍ਞਾਣਸ੍ਸ ਪਾਕਟਾ ਹੋਤੀਤਿ ਅਤ੍ਥੋ. ਵਣ੍ਣੋਵ ਨਿਭਾ ਵਣ੍ਣਨਿਭਾ. ਸਦ੍ਧਿਂ ਨਿਦਸ੍ਸਨੇਨ ਸਨਿਦਸ੍ਸਨਂ, ਚਕ੍ਖੁਵਿਞ੍ਞਾਣੇਨ ਪਸ੍ਸਿਤਬ੍ਬਨ੍ਤਿ ਅਤ੍ਥੋ. ਸਦ੍ਧਿਂ ਪਟਿਘੇਨ ਸਪ੍ਪਟਿਘਂ, ਪਟਿਘਟ੍ਟਨਨਿਘਂਸਜਨਕਨ੍ਤਿ ਅਤ੍ਥੋ. ਨੀਲਾਦੀਸੁ ਉਮਾਪੁਪ੍ਫਸਮਾਨਂ ਨੀਲਂ, ਕਣਿਕਾਰਪੁਪ੍ਫਸਮਾਨਂ ਪੀਤਕਂ, ਬਨ੍ਧੁਜੀਵਕਪੁਪ੍ਫਸਮਾਨਂ ਲੋਹਿਤਕਂ, ਓਸਧਿਤਾਰਕਸਮਾਨਂ ਓਦਾਤਂ. ਝਾਮਙ੍ਗਾਰਸਮਾਨਂ ਕਾਲ਼ਕਂ, ਮਨ੍ਦਰਤ੍ਤਂ ਸਿਨ੍ਦੁਵਾਰਕਰਵੀਰਮਕੁਲ਼ਸਮਾਨਂ ਮਞ੍ਜਿਟ੍ਠਕਂ. ‘‘ਹਰਿਤ੍ਤਚਹੇਮਵਣ੍ਣਕਾਮਂਸੁਮੁਖਪਕ੍ਕਮਾ’’ਤਿ (ਜਾ. ੧.੧੫.੧੩੩) ਏਤ੍ਥ ਪਨ ਕਿਞ੍ਚਾਪਿ ‘ਹਰੀ’ਤਿ ਸੁਵਣ੍ਣਂ ਵੁਤ੍ਤਂ, ਪਰਤੋ ਪਨਸ੍ਸ ਜਾਤਰੂਪਗ੍ਗਹਣੇਨ ਗਹਿਤਤ੍ਤਾ ਇਧ ਸਾਮਂ ਹਰਿ ਨਾਮ. ਇਮਾਨਿ ਸਤ੍ਤ ਵਤ੍ਥੁਂ ਅਨਾਮਸਿਤ੍ਵਾ ਸਭਾਵੇਨੇਵ ਦਸ੍ਸਿਤਾਨਿ.
ਹਰਿਵਣ੍ਣਨ੍ਤਿ ਹਰਿਤਸਦ੍ਦਲਵਣ੍ਣਂ. ਅਮ੍ਬਙ੍ਕੁਰਵਣ੍ਣਨ੍ਤਿ ਅਮ੍ਬਙ੍ਕੁਰੇਨ ਸਮਾਨਵਣ੍ਣਂ. ਇਮਾਨਿ ਦ੍ਵੇ ਵਤ੍ਥੁਂ ਆਮਸਿਤ੍ਵਾ ਦਸ੍ਸਿਤਾਨਿ. ਦੀਘਾਦੀਨਿ ਦ੍ਵਾਦਸ ਵੋਹਾਰਤੋ ਦਸ੍ਸਿਤਾਨਿ. ਸੋ ਚ ਨੇਸਂ ਵੋਹਾਰੋ ਉਪਨਿਧਾਯਸਿਦ੍ਧੋ ਚੇਵ ਸਨ੍ਨਿਵੇਸਸਿਦ੍ਧੋ ਚ. ਦੀਘਾਦੀਨਿ ਹਿ ਅਞ੍ਞਮਞ੍ਞਂ ਉਪਨਿਧਾਯਸਿਦ੍ਧਾਨਿ, ਵਟ੍ਟਾਦੀਨਿ ਸਨ੍ਨਿਵੇਸਵਿਸੇਸੇਨ. ਤਤ੍ਥ ਰਸ੍ਸਂ ਉਪਨਿਧਾਯ ਤਤੋ ਉਚ੍ਚਤਰਂ ਦੀਘਂ, ਤਂ ਉਪਨਿਧਾਯ ਤਤੋ ਨੀਚਤਰਂ ਰਸ੍ਸਂ. ਥੂਲਂ ਉਪਨਿਧਾਯ ਤਤੋ ਖੁਦ੍ਦਕਤਰਂ ਅਣੁਂ, ਤਂ ਉਪਨਿਧਾਯ ਤਤੋ ਮਹਨ੍ਤਤਰਂ ਥੂਲਂ. ਚਕ੍ਕਸਣ੍ਠਾਨਂ ਵਟ੍ਟਂ, ਕੁਕ੍ਕੁਟਣ੍ਡਸਣ੍ਠਾਨਂ ਪਰਿਮਣ੍ਡਲਂ. ਚਤੂਹਿ ਅਂਸੇਹਿ ਯੁਤ੍ਤਂ ਚਤੁਰਂਸਂ. ਛਲ਼ਂਸਾਦੀਸੁਪਿ ਏਸੇਵ ਨਯੋ. ਨਿਨ੍ਨਨ੍ਤਿ ਓਨਤਂ, ਥਲਨ੍ਤਿ ਉਨ੍ਨਤਂ.
ਤਤ੍ਥ ਯਸ੍ਮਾ ਦੀਘਾਦੀਨਿ ਫੁਸਿਤ੍ਵਾ ਸਕ੍ਕਾ ਜਾਨਿਤੁਂ, ਨੀਲਾਦੀਨਿ ਪਨੇਵਂ ਨ ਸਕ੍ਕਾ, ਤਸ੍ਮਾ ਨ ਨਿਪ੍ਪਰਿਯਾਯੇਨ ਦੀਘਂ ਰੂਪਾਯਤਨਂ; ਤਥਾ ਰਸ੍ਸਾਦੀਨਿ. ਤਂ ਤਂ ਨਿਸ੍ਸਾਯ ਪਨ ਤਥਾ ਤਥਾ ਠਿਤਂ ਦੀਘਂ ਰਸ੍ਸਨ੍ਤਿ ਤੇਨ ਤੇਨ ਵੋਹਾਰੇਨ ਰੂਪਾਯਤਨਮੇਵੇਤ੍ਥ ਭਾਸਿਤਨ੍ਤਿ ਵੇਦਿਤਬ੍ਬਂ. ਛਾਯਾ ਆਤਪੋਤਿ ਇਦਂ ਅਞ੍ਞਮਞ੍ਞਪਰਿਚ੍ਛਿਨ੍ਨਂ; ਤਥਾ ਆਲੋਕੋ ਅਨ੍ਧਕਾਰੋ ਚ. ਅਬ੍ਭਾ ਮਹਿਕਾਤਿਆਦੀਨਿ ਚਤ੍ਤਾਰਿ ਵਤ੍ਥੁਨਾਵ ਦਸ੍ਸਿਤਾਨਿ. ਤਤ੍ਥ ‘ਅਬ੍ਭਾ’ਤਿ ਵਲਾਹਕੋ. ‘ਮਹਿਕਾ’ਤਿ ਹਿਮਂ. ਇਮੇਹਿ ਚਤੂਹਿ ਅਬ੍ਭਾਦੀਨਂ ਵਣ੍ਣਾ ਦਸ੍ਸਿਤਾ. ਚਨ੍ਦਮਣ੍ਡਲਸ੍ਸ ਵਣ੍ਣਨਿਭਾਤਿਆਦੀਹਿ ਤੇਸਂ ਤੇਸਂ ਪਭਾਵਣ੍ਣਾ ਦਸ੍ਸਿਤਾ.
ਤਤ੍ਥ ਚਨ੍ਦਮਣ੍ਡਲਾਦੀਨਂ ਵਤ੍ਥੂਨਂ ਏਵਂ ਵਿਸੇਸੋ ਵੇਦਿਤਬ੍ਬੋ – ਮਣਿਮਯਂ ਰਜਤਪਟਿਚ੍ਛਨ੍ਨਂ ਏਕੂਨਪਞ੍ਞਾਸਯੋਜਨਾਯਾਮਵਿਤ੍ਥਾਰਂ ਚਨ੍ਦਸ੍ਸ ਦੇਵਪੁਤ੍ਤਸ੍ਸ ਵਿਮਾਨਂ ਚਨ੍ਦਮਣ੍ਡਲਂ ਨਾਮ. ਸੋਵਣ੍ਣਮਯਂ ਫਲਿਕਪਟਿਚ੍ਛਨ੍ਨਂ ਸਮਪਣ੍ਣਾਸਯੋਜਨਾਯਾਮਵਿਤ੍ਥਾਰਂ ਸੂਰਿਯਸ੍ਸ ਦੇਵਪੁਤ੍ਤਸ੍ਸ ਵਿਮਾਨਂ ਸੂਰਿਯਮਣ੍ਡਲਂ ਨਾਮ. ਸਤ੍ਤਰਤਨਮਯਾਨਿ ਸਤ੍ਤਟ੍ਠਦਸਦ੍ਵਾਦਸਯੋਜਨਾਯਾਮਵਿਤ੍ਥਾਰਾਨਿ ਤੇਸਂ ਤੇਸਂ ਦੇਵਪੁਤ੍ਤਾਨਂ ਵਿਮਾਨਾਨਿ ਤਾਰਕਰੂਪਾਨਿ ਨਾਮ.
ਤਤ੍ਥ ਹੇਟ੍ਠਾ ਚਨ੍ਦੋ, ਸੂਰਿਯੋ ਉਪਰਿ, ਉਭਿਨ੍ਨਮਨ੍ਤਰਂ ਯੋਜਨਂ ਹੋਤਿ. ਚਨ੍ਦਸ੍ਸ ਹੇਟ੍ਠਿਮਨ੍ਤਤੋ ਸੂਰਿਯਸ੍ਸ ਉਪਰਿਮਨ੍ਤੋ ਯੋਜਨਸਤਂ ਹੋਤਿ. ਦ੍ਵੀਸੁ ਪਸ੍ਸੇਸੁ ਨਕ੍ਖਤ੍ਤਤਾਰਕਾ ਗਚ੍ਛਨ੍ਤਿ. ਏਤੇਸੁ ਪਨ ਤੀਸੁ ਚਨ੍ਦੋ ਦਨ੍ਧਗਮਨੋ, ਸੂਰਿਯੋ ਸੀਘਗਮਨੋ, ਨਕ੍ਖਤ੍ਤਤਾਰਕਾ ਸਬ੍ਬਸੀਘਗਮਨਾ. ਕਾਲੇਨ ਚਨ੍ਦਿਮਸੂਰਿਯਾਨਂ ਪੁਰਤੋ ਹੋਨ੍ਤਿ ਕਾਲੇਨ ਪਚ੍ਛਾ.
ਆਦਾਸਮਣ੍ਡਲਨ੍ਤਿ ਕਂਸਮਯਂ. ਮਣੀਤਿ ਠਪੇਤ੍ਵਾ ਵੇਲ਼ੁਰਿਯਂ ਸੇਸੋ ਜੋਤਿਰਸਾਦਿਅਨੇਕਪ੍ਪਭੇਦੋ. ਸਙ੍ਖੋਤਿ ਸਾਮੁਦ੍ਦਿਕੋ; ਮੁਤ੍ਤਾ ਸਾਮੁਦ੍ਦਿਕਾਪਿ, ਸੇਸਾਪਿ. ਵੇਲ਼ੁਰਿਯੋਤਿ ਵੇਲ਼ੁਵਣ੍ਣਮਣਿ. ਜਾਤਰੂਪਂ ਵੁਚ੍ਚਤਿ ਸਤ੍ਥੁਵਣ੍ਣੋ. ਸਤ੍ਥਾ ਹਿ ਸੁਵਣ੍ਣਵਣ੍ਣੋ, ਸੁਵਣ੍ਣਮ੍ਪਿ ਸਤ੍ਥੁਵਣ੍ਣਂ. ਰਜਤਂ ਵੁਚ੍ਚਤਿ ਕਹਾਪਣੋ – ਲੋਹਮਾਸਕੋ ਦਾਰੁਮਾਸਕੋ ਜਤੁਮਾਸਕੋ, ਯੇ ‘ਵੋਹਾਰਂ ਗਚ੍ਛਨ੍ਤੀ’ਤਿ (ਪਾਰਾ. ੫੮੪) ਵੁਤ੍ਤਂ ਤਂ ਸਬ੍ਬਮ੍ਪਿ ਇਧ ਗਹਿਤਂ.
ਯਂ ਵਾ ਪਨਞ੍ਞਮ੍ਪੀਤਿ ਇਮਿਨਾ ਪਾਲ਼ਿਆਗਤਂ ਠਪੇਤ੍ਵਾ ਸੇਸਂ ਤਟ੍ਟਿਕਪਿਲੋਤਿਕਕਣ੍ਣਿਕਵਣ੍ਣਾਦਿਭੇਦਂ ਰੂਪਂ ਗਹਿਤਂ. ਤਞ੍ਹਿ ਸਬ੍ਬਂ ਯੇਵਾਪਨਕੇਸੁ ਪਵਿਟ੍ਠਂ.
ਏਵਮੇਤਂ ਨੀਲਾਦਿਨਾ ਭੇਦੇਨ ਭਿਨ੍ਨਮ੍ਪਿ ਰੂਪਂ ਸਬ੍ਬਂ ਲਕ੍ਖਣਾਦੀਹਿ ਅਭਿਨ੍ਨਮੇਵ. ਸਬ੍ਬਞ੍ਹੇਤਂ ਚਕ੍ਖੁਪਟਿਹਨਨਲਕ੍ਖਣਂ ਰੂਪਂ, ਚਕ੍ਖੁਵਿਞ੍ਞਾਣਸ੍ਸ ਵਿਸਯਭਾਵਰਸਂ, ਤਸ੍ਸੇਵ ਗੋਚਰਪਚ੍ਚੁਪਟ੍ਠਾਨਂ, ਚਤੁਮਹਾਭੂਤਪਦਟ੍ਠਾਨਂ. ਯਥਾ ਚੇਤਂ ਤਥਾ ਸਬ੍ਬਾਨਿਪਿ ਉਪਾਦਾਰੂਪਾਨਿ. ਯਤ੍ਥ ਪਨ ਵਿਸੇਸੋ ਅਤ੍ਥਿ ਤਤ੍ਥ ਵਕ੍ਖਾਮ. ਸੇਸਮੇਤ੍ਥ ਚਕ੍ਖਾਯਤਨਨਿਦ੍ਦੇਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਕੇਵਲਞ੍ਹਿ ਤਤ੍ਥ ਚਕ੍ਖੁਪੁਬ੍ਬਙ੍ਗਮੋ ਨਿਦ੍ਦੇਸੋ ਇਧ ਰੂਪਪੁਬ੍ਬਙ੍ਗਮੋ. ਤਤ੍ਥ ‘ਚਕ੍ਖੁਂ ਪੇਤ’ਨ੍ਤਿਆਦੀਨਿ ਚੁਦ੍ਦਸ ਨਾਮਾਨਿ, ਇਧ ‘ਰੂਪਂਪੇਤ’ਨ੍ਤਿਆਦੀਨਿ ਤੀਣਿ. ਸੇਸਂ ਤਾਦਿਸਮੇਵ. ਯਥਾ ਹਿ ਚਤੂਹਿ ਚਤੂਹਿ ਨਯੇਹਿ ਪਟਿਮਣ੍ਡੇਤ੍ਵਾ ਚਕ੍ਖੁਂ ਵਵਤ੍ਥਾਪੇਤੁਂ ਤੇਰਸ ਵਾਰਾ ਵੁਤ੍ਤਾ, ਇਧਾਪਿ ਤੇ ਤਥੇਵ ਵੁਤ੍ਤਾਤਿ.
੬੨੦. ਸਦ੍ਦਾਯਤਨਨਿਦ੍ਦੇਸੇ ਭੇਰਿਸਦ੍ਦੋਤਿ ਮਹਾਭੇਰੀਪਹਟਭੇਰੀਨਂ ਸਦ੍ਦੋ. ਮੁਦਿਙ੍ਗਸਙ੍ਖਪਣਵਸਦ੍ਦਾਪਿ ਮੁਦਿਙ੍ਗਾਦਿਪਚ੍ਚਯਾ ਸਦ੍ਦਾ. ਗੀਤਸਙ੍ਖਾਤੋ ਸਦ੍ਦੋ ਗੀਤਸਦ੍ਦੋ. ਵੁਤ੍ਤਾਵਸੇਸਾਨਂ ਵੀਣਾਦੀਨਂ ਤਨ੍ਤਿਬਦ੍ਧਾਨਂ ਸਦ੍ਦੋ ਵਾਦਿਤਸਦ੍ਦੋ. ਸਮ੍ਮਸਦ੍ਦੋਤਿ ਕਂਸਤਾਲਕਟ੍ਠਤਾਲਸਦ੍ਦੋ. ਪਾਣਿਸਦ੍ਦੋਤਿ ਪਾਣਿਪ੍ਪਹਾਰਸਦ੍ਦੋ. ਸਤ੍ਤਾਨਂ ਨਿਗ੍ਘੋਸਸਦ੍ਦੋਤਿ ਬਹੂਨਂ ਸਨ੍ਨਿਪਤਿਤਾਨਂ ਅਪਞ੍ਞਾਯਮਾਨਪਦਬ੍ਯਞ੍ਜਨਨਿਗ੍ਘੋਸਸਦ੍ਦੋ. ਧਾਤੂਨਂ ਸਨ੍ਨਿਘਾਤਸਦ੍ਦੋਤਿ ਰੁਕ੍ਖਾਨਂ ਅਞ੍ਞਮਞ੍ਞਨਿਘਂਸਨਘਣ੍ਟਿਕਾਕੋਟਨਾਦਿਸਦ੍ਦੋ. ਵਾਤਸ੍ਸ ਵਾਯਤੋ ਸਦ੍ਦੋ ਵਾਤਸਦ੍ਦੋ. ਉਦਕਸ੍ਸ ਸਨ੍ਦਮਾਨਸ੍ਸ ਵਾ ਪਟਿਹਤਸ੍ਸ ਵਾ ਸਦ੍ਦੋ ਉਦਕਸਦ੍ਦੋ. ਮਨੁਸ੍ਸਾਨਂ ਸਲ੍ਲਾਪਾਦਿਸਦ੍ਦੋ ਮਨੁਸ੍ਸਸਦ੍ਦੋ. ਤਂ ਠਪੇਤ੍ਵਾ ਸੇਸੋ ਸਬ੍ਬੋਪਿ ਅਮਨੁਸ੍ਸਸਦ੍ਦੋ. ਇਮਿਨਾ ਪਦਦ੍ਵਯੇਨ ਸਬ੍ਬੋਪਿ ਸਦ੍ਦੋ ਪਰਿਯਾਦਿਨ੍ਨੋ. ਏਵਂ ਸਨ੍ਤੇਪਿ ਵਂਸਫਾਲਨਪਿਲੋਤਿਕਫਾਲਨਾਦੀਸੁ ਪਵਤ੍ਤੋ ਪਾਲ਼ਿਯਂ ਅਨਾਗਤਸਦ੍ਦੋ ਯੇਵਾਪਨਕਟ੍ਠਾਨਂ ਪਵਿਟ੍ਠੋਤਿ ਵੇਦਿਤਬ੍ਬੋ.
ਏਵਮਯਂ ਭੇਰੀਸਦ੍ਦਾਦਿਨਾ ਭੇਦੇਨ ਭਿਨ੍ਨੋਪਿ ਸਦ੍ਦੋ ਲਕ੍ਖਣਾਦੀਹਿ ਅਭਿਨ੍ਨੋਯੇਵ. ਸਬ੍ਬੋਪਿ ਹੇਸ ਸੋਤਪਟਿਹਨਨਲਕ੍ਖਣੋ ਸਦ੍ਦੋ ਸੋਤਵਿਞ੍ਞਾਣਸ੍ਸ ਵਿਸਯਭਾਵਰਸੋ, ਤਸ੍ਸੇਵ ਗੋਚਰਪਚ੍ਚੁਪਟ੍ਠਾਨੋ. ਸੇਸਂ ਚਕ੍ਖਾਯਤਨਨਿਦ੍ਦੇਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਧਾਪਿ ਹਿ ਚਤੂਹਿ ਚਤੂਹਿ ਨਯੇਹਿ ਪਟਿਮਣ੍ਡਿਤਾ ਤੇਰਸ ਵਾਰਾ ਵੁਤ੍ਤਾ. ਤੇਸਂ ਅਤ੍ਥੋ ਸਕ੍ਕਾ ਵੁਤ੍ਤਨਯੇਨੇਵ ਜਾਨਿਤੁਨ੍ਤਿ ਨ ਵਿਤ੍ਥਾਰਿਤੋ.
੬੨੪. ਗਨ੍ਧਾਯਤਨਨਿਦ੍ਦੇਸੇ ਮੂਲਗਨ੍ਧੋਤਿ ਯਂ ਕਿਞ੍ਚਿ ਮੂਲਂ ਪਟਿਚ੍ਚ ਨਿਬ੍ਬਤ੍ਤੋ ਗਨ੍ਧੋ. ਸਾਰਗਨ੍ਧਾਦੀਸੁਪਿ ਏਸੇਵ ਨਯੋ. ਅਸਿਦ੍ਧਦੁਸਿਦ੍ਧਾਨਂ ਡਾਕਾਦੀਨਂ ਗਨ੍ਧੋ ਆਮਕਗਨ੍ਧੋ. ਮਚ੍ਛਸਕਲਿਕਾਪੂਤਿਮਂਸਸਂਕਿਲਿਟ੍ਠਸਪ੍ਪਿਆਦੀਨਂ ਗਨ੍ਧੋ ਵਿਸ੍ਸਗਨ੍ਧੋ. ਸੁਗਨ੍ਧੋਤਿ ਇਟ੍ਠਗਨ੍ਧੋ. ਦੁਗ੍ਗਨ੍ਧੋਤਿ ਅਨਿਟ੍ਠਗਨ੍ਧੋ. ਇਮਿਨਾ ਪਦਦ੍ਵਯੇਨ ਸਬ੍ਬੋਪਿ ਗਨ੍ਧੋ ਪਰਿਯਾਦਿਨ੍ਨੋ. ਏਵਂ ਸਨ੍ਤੇਪਿ ਕਣ੍ਣਕਗਨ੍ਧਪਿਲੋਤਿਕਗਨ੍ਧਾਦਯੋ ਪਾਲ਼ਿਯਂ ਅਨਾਗਤਾ ਸਬ੍ਬੇਪਿ ਗਨ੍ਧਾ ਯੇਵਾਪਨਕਟ੍ਠਾਨਂ ਪਵਿਟ੍ਠਾਤਿ ਵੇਦਿਤਬ੍ਬਾ.
ਏਵਮਯਂ ਮੂਲਗਨ੍ਧਾਦਿਨਾ ਭੇਦੇਨ ਭਿਨ੍ਨੋਪਿ ਗਨ੍ਧੋ ਲਕ੍ਖਣਾਦੀਹਿ ਅਭਿਨ੍ਨੋਯੇਵ. ਸਬ੍ਬੋਪਿ ਹੇਸ ਘਾਨਪਟਿਹਨਨਲਕ੍ਖਣੋ ਗਨ੍ਧੋ, ਘਾਨਵਿਞ੍ਞਾਣਸ੍ਸ ਵਿਸਯਭਾਵਰਸੋ, ਤਸ੍ਸੇਵ ਗੋਚਰਪਚ੍ਚੁਪਟ੍ਠਾਨੋ. ਸੇਸਂ ਚਕ੍ਖਾਯਤਨਨਿਦ੍ਦੇਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਧਾਪਿ ਹਿ ਤਥੇਵ ਦ੍ਵਿਪਞ੍ਞਾਸਨਯਪਟਿਮਣ੍ਡਿਤਾ ਤੇਰਸ ਵਾਰਾ ਵੁਤ੍ਤਾ. ਤੇ ਅਤ੍ਥਤੋ ਪਾਕਟਾਯੇਵ.
੬੨੮. ਰਸਾਯਤਨਨਿਦ੍ਦੇਸੇ ਮੂਲਰਸੋਤਿ ਯਂਕਿਞ੍ਚਿ ਮੂਲਂ ਪਟਿਚ੍ਚ ਨਿਬ੍ਬਤ੍ਤਰਸੋ. ਖਨ੍ਧਰਸਾਦੀਸੁਪਿ ਏਸੇਵ ਨਯੋ. ਅਮ੍ਬਿਲਨ੍ਤਿ ਤਕ੍ਕਮ੍ਬਿਲਾਦਿ. ਮਧੁਰਨ੍ਤਿ ਏਕਨ੍ਤਤੋ ਗੋਸਪ੍ਪਿਆਦਿ. ਮਧੁ ਪਨ ਕਸਾਵਯੁਤ੍ਤਂ ਚਿਰਨਿਕ੍ਖਿਤ੍ਤਂ ਕਸਾਵਂ ਹੋਤਿ. ਫਾਣਿਤਂ ਖਾਰਿਯੁਤ੍ਤਂ ਚਿਰਨਿਕ੍ਖਿਤ੍ਤਂ ਖਾਰਿਯਂ ਹੋਤਿ. ਸਪ੍ਪਿ ਪਨ ਚਿਰਨਿਕ੍ਖਿਤ੍ਤਂ ਵਣ੍ਣਗਨ੍ਧੇ ਜਹਨ੍ਤਮ੍ਪਿ ਰਸਂ ਨ ਜਹਤੀਤਿ ਤਦੇਵ ਏਕਨ੍ਤਮਧੁਰਂ. ਤਿਤ੍ਤਕਨ੍ਤਿ ਨਿਮ੍ਬਪਣ੍ਣਾਦਿ. ਕਟੁਕਨ੍ਤਿ ਸਿਙ੍ਗਿਵੇਰਮਰਿਚਾਦਿ. ਲੋਣਿਕਨ੍ਤਿ ਸਾਮੁਦ੍ਦਿਕਲੋਣਾਦਿ. ਖਾਰਿਕਨ੍ਤਿ ਵਾਤਿਙ੍ਗਣਕਲ਼ੀਰਾਦਿ. ਲਮ੍ਬਿਲਨ੍ਤਿ ਬਦਰਾਮਲਕਕਪਿਟ੍ਠਸਾਲਵਾਦਿ. ਕਸਾਵਨ੍ਤਿ ਹਰਿਤਕਾਦਿ. ਇਮੇ ਸਬ੍ਬੇਪਿ ਰਸਾ ਵਤ੍ਥੁਵਸੇਨ ਵੁਤ੍ਤਾ. ਤਂਤਂਵਤ੍ਥੁਤੋ ਪਨੇਤ੍ਥ ਰਸੋਵ ਅਮ੍ਬਿਲਾਦੀਹਿ ਨਾਮੇਹਿ ਵੁਤ੍ਤੋਤਿ ਵੇਦਿਤਬ੍ਬੋ. ਸਾਦੂਤਿ ਇਟ੍ਠਰਸੋ, ਅਸਾਦੂਤਿ ਅਨਿਟ੍ਠਰਸੋ. ਇਮਿਨਾ ਪਦਦ੍ਵਯੇਨ ਸਬ੍ਬੋਪਿ ਰਸੋ ਪਰਿਯਾਦਿਨ੍ਨੋ. ਏਵਂ ਸਨ੍ਤੇਪਿ ਲੇਡ੍ਡੁਰਸਭਿਤ੍ਤਿਰਸਪਿਲੋਤਿਕਰਸਾਦਯੋ ਪਾਲ਼ਿਯਂ ਅਨਾਗਤਾ ਸਬ੍ਬੇਪਿ ਰਸਾ ਯੇਵਾਪਨਕਟ੍ਠਾਨਂ ਪਵਿਟ੍ਠਾਤਿ ਵੇਦਿਤਬ੍ਬਾ.
ਏਵਮਯਂ ਮੂਲਰਸਾਦਿਨਾਭੇਦੇਨ ਭਿਨ੍ਨੋਪਿ ਰਸੋ ਲਕ੍ਖਣਾਦੀਹਿ ਅਭਿਨ੍ਨੋਯੇਵ. ਸਬ੍ਬੋਪਿ ਹੇਸ ਜਿਵ੍ਹਾਪਟਿਹਨਨਲਕ੍ਖਣੋ ਰਸੋ, ਜਿਵ੍ਹਾਵਿਞ੍ਞਾਣਸ੍ਸ ਵਿਸਯਭਾਵਰਸੋ, ਤਸ੍ਸੇਵ ਗੋਚਰਪਚ੍ਚੁਪਟ੍ਠਾਨੋ. ਸੇਸਂ ਚਕ੍ਖਾਯਤਨਨਿਦ੍ਦੇਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਧਾਪਿ ਹਿ ਤਥੇਵ ਦ੍ਵਿਪਞ੍ਞਾਸਨਯਪਟਿਮਣ੍ਡਿਤਾ ਤੇਰਸ ਵਾਰਾ ਵੁਤ੍ਤਾ.
੬੩੨. ਇਤ੍ਥਿਨ੍ਦ੍ਰਿਯਨਿਦ੍ਦੇਸੇ ਯਨ੍ਤਿ ਕਰਣਵਚਨਂ. ਯੇਨ ਕਾਰਣੇਨ ਇਤ੍ਥਿਯਾ ਇਤ੍ਥਿਲਿਙ੍ਗਾਦੀਨਿ ਹੋਨ੍ਤੀਤਿ ਅਯਮੇਤ੍ਥ ਅਤ੍ਥੋ. ਤਤ੍ਥ ‘ਲਿਙ੍ਗ’ਨ੍ਤਿ ਸਣ੍ਠਾਨਂ. ਇਤ੍ਥਿਯਾ ਹਿ ਹਤ੍ਥਪਾਦਗੀਵਾਉਰਾਦੀਨਂ ਸਣ੍ਠਾਨਂ ਨ ਪੁਰਿਸਸ੍ਸ ਵਿਯ ਹੋਤਿ. ਇਤ੍ਥੀਨਞ੍ਹਿ ਹੇਟ੍ਠਿਮਕਾਯੋ ਵਿਸਦੋ ਹੋਤਿ, ਉਪਰਿਮਕਾਯੋ ਅਵਿਸਦੋ. ਹਤ੍ਥਪਾਦਾ ਖੁਦ੍ਦਕਾ, ਮੁਖਂ ਖੁਦ੍ਦਕਂ. ਨਿਮਿਤ੍ਤਨ੍ਤਿ ਸਞ੍ਜਾਨਨਂ. ਇਤ੍ਥੀਨਞ੍ਹਿ ਉਰਮਂਸਂ ਅਵਿਸਦਂ ਹੋਤਿ, ਮੁਖਂ ਨਿਮ੍ਮਸ੍ਸੁਦਾਠਿਕਂ. ਕੇਸਬਨ੍ਧਵਤ੍ਥਗ੍ਗਹਣਮ੍ਪਿ ਨ ਪੁਰਿਸਾਨਂ ਵਿਯ ਹੋਤਿ. ਕੁਤ੍ਤਨ੍ਤਿ ਕਿਰਿਯਾ. ਇਤ੍ਥਿਯੋ ਹਿ ਦਹਰਕਾਲੇ ਸੁਪ੍ਪਕਮੁਸਲਕੇਹਿ ਕੀਲ਼ਨ੍ਤਿ, ਚਿਤ੍ਤਧੀਤਲਿਕਾਯ ਕੀਲ਼ਨ੍ਤਿ, ਮਤ੍ਤਿਕਵਾਕੇਨ ਸੁਤ੍ਤਕਂ ਨਾਮ ਕਨ੍ਤਨ੍ਤਿ. ਆਕਪ੍ਪੋਤਿ ਗਮਨਾਦਿਆਕਾਰੋ. ਇਤ੍ਥਿਯੋ ਹਿ ਗਚ੍ਛਮਾਨਾ ਅਵਿਸਦਾ ਗਚ੍ਛਨ੍ਤਿ, ਤਿਟ੍ਠਮਾਨਾ ਨਿਪਜ੍ਜਮਾਨਾ ਨਿਸੀਦਮਾਨਾ ਖਾਦਮਾਨਾ ਭੁਞ੍ਜਮਾਨਾ ਅਵਿਸਦਾ ਭੁਞ੍ਜਨ੍ਤਿ. ਪੁਰਿਸਮ੍ਪਿ ਹਿ ਅਵਿਸਦਂ ਦਿਸ੍ਵਾ ਮਾਤੁਗਾਮੋ ਵਿਯ ਗਚ੍ਛਤਿ ਤਿਟ੍ਠਤਿ ਨਿਪਜ੍ਜਤਿ ਨਿਸੀਦਤਿ ਖਾਦਤਿ ਭੁਞ੍ਜਤੀਤਿ ਵਦਨ੍ਤਿ.
ਇਤ੍ਥਤ੍ਤਂ ਇਤ੍ਥਿਭਾਵੋਤਿ ਉਭਯਮ੍ਪਿ ਏਕਤ੍ਥਂ; ਇਤ੍ਥਿਸਭਾਵੋਤਿ ਅਤ੍ਥੋ. ਅਯਂ ਕਮ੍ਮਜੋ ਪਟਿਸਨ੍ਧਿਸਮੁਟ੍ਠਿਤੋ. ਇਤ੍ਥਿਲਿਙ੍ਗਾਦੀਨਿ ਪਨ ਇਤ੍ਥਿਨ੍ਦ੍ਰਿਯਂ ਪਟਿਚ੍ਚ ਪਵਤ੍ਤੇ ਸਮੁਟ੍ਠਿਤਾਨਿ. ਯਥਾ ਹਿ ਬੀਜੇ ਸਤਿ, ਬੀਜਂ ਪਟਿਚ੍ਚ, ਬੀਜਪਚ੍ਚਯਾ ਰੁਕ੍ਖੋ ਵਡ੍ਢਿਤ੍ਵਾ ਸਾਖਾਵਿਟਪਸਮ੍ਪਨ੍ਨੋ ਹੁਤ੍ਵਾ ਆਕਾਸਂ ਪੂਰੇਤ੍ਵਾ ਤਿਟ੍ਠਤਿ, ਏਵਮੇਵ ਇਤ੍ਥਿਭਾਵਸਙ੍ਖਾਤੇ ਇਤ੍ਥਿਨ੍ਦ੍ਰਿਯੇ ਸਤਿ ਇਤ੍ਥਿਲਿਙ੍ਗਾਦੀਨਿ ਹੋਨ੍ਤਿ. ਬੀਜਂ ਵਿਯ ਹਿ ਇਤ੍ਥਿਨ੍ਦ੍ਰਿਯਂ, ਬੀਜਂ ਪਟਿਚ੍ਚ ਵਡ੍ਢਿਤ੍ਵਾ ਆਕਾਸਂ ਪੂਰੇਤ੍ਵਾ ਠਿਤਰੁਕ੍ਖੋ ਵਿਯ ਇਤ੍ਥਿਨ੍ਦ੍ਰਿਯਂ ਪਟਿਚ੍ਚ ਇਤ੍ਥਿਲਿਙ੍ਗਾਦੀਨਿ ਪਵਤ੍ਤੇ ਸਮੁਟ੍ਠਹਨ੍ਤਿ. ਤਤ੍ਥ ਇਤ੍ਥਿਨ੍ਦ੍ਰਿਯਂ ਨ ਚਕ੍ਖੁਵਿਞ੍ਞੇਯ੍ਯਂ, ਮਨੋਵਿਞ੍ਞੇਯ੍ਯਮੇਵ. ਇਤ੍ਥਿਲਿਙ੍ਗਾਦੀਨਿ ਚਕ੍ਖੁਵਿਞ੍ਞੇਯ੍ਯਾਨਿਪਿ ਮਨੋਵਿਞ੍ਞੇਯ੍ਯਾਨਿਪਿ.
ਇਦਂ ਤਂ ਰੂਪਂ ਇਤ੍ਥਿਨ੍ਦ੍ਰਿਯਨ੍ਤਿ ਇਦਂ ਤਂ ਰੂਪਂ, ਯਥਾ ਚਕ੍ਖੁਨ੍ਦ੍ਰਿਯਾਦੀਨਿ ਪੁਰਿਸਸ੍ਸਾਪਿ ਹੋਨ੍ਤਿ, ਨ ਏਵਂ; ਨਿਯਮਤੋ ਪਨ ਇਤ੍ਥਿਯਾ ਏਵ ਇਨ੍ਦ੍ਰਿਯਂ ‘ਇਤ੍ਥਿਨ੍ਦ੍ਰਿਯਂ’.
੬੩੩. ਪੁਰਿਸਿਨ੍ਦ੍ਰਿਯੇਪਿ ਏਸੇਵ ਨਯੋ. ਪੁਰਿਸਲਿਙ੍ਗਾਦੀਨਿ ਪਨ ਇਤ੍ਥਿਲਿਙ੍ਗਾਦੀਨਂ ਪਟਿਪਕ੍ਖਤੋ ਵੇਦਿਤਬ੍ਬਾਨਿ. ਪੁਰਿਸਸ੍ਸ ਹਿ ਹਤ੍ਥਪਾਦਗੀਵਾਉਰਾਦੀਨਂ ਸਣ੍ਠਾਨਂ ਨ ਇਤ੍ਥਿਯਾ ਵਿਯ ਹੋਤਿ. ਪੁਰਿਸਾਨਞ੍ਹਿ ਉਪਰਿਮਕਾਯੋ ਵਿਸਦੋ ਹੋਤਿ ਹੇਟ੍ਠਿਮਕਾਯੋ ਅਵਿਸਦੋ, ਹਤ੍ਥਪਾਦਾ ਮਹਨ੍ਤਾ, ਮੁਖਂ ਮਹਨ੍ਤਂ, ਉਰਮਂਸਂ ਵਿਸਦਂ, ਮਸ੍ਸੁਦਾਠਿਕਾ ਉਪ੍ਪਜ੍ਜਨ੍ਤਿ. ਕੇਸਬਨ੍ਧਨਵਤ੍ਥਗ੍ਗਹਣਂ ਨ ਇਤ੍ਥੀਨਂ ਵਿਯ ਹੋਤਿ. ਦਹਰਕਾਲੇ ਰਥਨਙ੍ਗਲਾਦੀਹਿ ਕੀਲ਼ਨ੍ਤਿ, ਵਾਲਿਕਪਾਲ਼ਿਂ ਕਤ੍ਵਾ ਵਾਪਿਂ ਨਾਮ ਖਨਨ੍ਤਿ, ਗਮਨਾਦੀਨਿ ਵਿਸਦਾਨਿ ਹੋਨ੍ਤਿ. ਇਤ੍ਥਿਮ੍ਪਿ ਗਮਨਾਦੀਨਿ ਵਿਸਦਾਨਿ ਕੁਰੁਮਾਨਂ ਦਿਸ੍ਵਾ ‘ਪੁਰਿਸੋ ਵਿਯ ਗਚ੍ਛਤੀ’ਤਿਆਦੀਨਿ ਵਦਨ੍ਤਿ. ਸੇਸਂ ਇਤ੍ਥਿਨ੍ਦ੍ਰਿਯੇ ਵੁਤ੍ਤਸਦਿਸਮੇਵ.
ਤਤ੍ਥ ਇਤ੍ਥਿਭਾਵਲਕ੍ਖਣਂ ਇਤ੍ਥਿਨ੍ਦ੍ਰਿਯਂ, ਇਤ੍ਥੀਤਿ ਪਕਾਸਨਰਸਂ, ਇਤ੍ਥਿਲਿਙ੍ਗਨਿਮਿਤ੍ਤਕੁਤ੍ਤਾਕਪ੍ਪਾਨਂ ਕਾਰਣਭਾਵਪਚ੍ਚੁਪਟ੍ਠਾਨਂ. ਪੁਰਿਸਭਾਵਲਕ੍ਖਣਂ ਪੁਰਿਸਿਨ੍ਦ੍ਰਿਯਂ, ਪੁਰਿਸੋਤਿ ਪਕਾਸਨਰਸਂ, ਪੁਰਿਸਲਿਙ੍ਗਨਿਮਿਤ੍ਤਕੁਤ੍ਤਾਕਪ੍ਪਾਨਂ ਕਾਰਣਭਾਵਪਚ੍ਚੁਪਟ੍ਠਾਨਂ. ਉਭਯਮ੍ਪੇਤਂ ਪਠਮਕਪ੍ਪਿਕਾਨਂ ਪਵਤ੍ਤੇ ਸਮੁਟ੍ਠਾਤਿ. ਅਪਰਭਾਗੇ ਪਟਿਸਨ੍ਧਿਯਂ. ਪਟਿਸਨ੍ਧਿਸਮੁਟ੍ਠਿਤਮ੍ਪਿ ਪਵਤ੍ਤੇ ਚਲਤਿ ਪਰਿਵਤ੍ਤਤਿ.
ਯਥਾਹ –
‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਇਤ੍ਥਿਲਿਙ੍ਗਂ ਪਾਤੁਭੂਤਂ ਹੋਤਿ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਿਸ੍ਸਾ ਭਿਕ੍ਖੁਨਿਯਾ ਪੁਰਿਸਲਿਙ੍ਗਂ ਪਾਤੁਭੂਤਂ ਹੋਤੀ’’ਤਿ (ਪਾਰਾ. ੬੯).
ਇਮੇਸੁ ਪਨ ਦ੍ਵੀਸੁ ਪੁਰਿਸਲਿਙ੍ਗਂ ਉਤ੍ਤਮਂ, ਇਤ੍ਥਿਲਿਙ੍ਗਂ ਹੀਨਂ. ਤਸ੍ਮਾ ਪੁਰਿਸਲਿਙ੍ਗਂ ਬਲਵਅਕੁਸਲੇਨ ਅਨ੍ਤਰਧਾਯਤਿ, ਇਤ੍ਥਿਲਿਙ੍ਗਂ ਦੁਬ੍ਬਲਕੁਸਲੇਨ ਪਤਿਟ੍ਠਾਤਿ. ਇਤ੍ਥਿਲਿਙ੍ਗਂ ਪਨ ਅਨ੍ਤਰਧਾਯਨ੍ਤਂ ਦੁਬ੍ਬਲਅਕੁਸਲੇਨ ਅਨ੍ਤਰਧਾਯਤਿ, ਪੁਰਿਸਲਿਙ੍ਗਂ ਬਲਵਕੁਸਲੇਨ ਪਤਿਟ੍ਠਾਤਿ. ਏਵਂ ਉਭਯਮ੍ਪਿ ਅਕੁਸਲੇਨ ਅਨ੍ਤਰਧਾਯਤਿ, ਕੁਸਲੇਨ ਪਤਿਟ੍ਠਾਤੀਤਿ ਵੇਦਿਤਬ੍ਬਂ.
ਉਭਤੋਬ੍ਯਞ੍ਜਨਕਸ੍ਸ ਪਨ ਕਿਂ ਏਕਂ ਇਨ੍ਦ੍ਰਿਯਂ ਉਦਾਹੁ ਦ੍ਵੇਤਿ? ਏਕਂ. ਤਞ੍ਚ ਖੋ ਇਤ੍ਥਿਉਭਤੋਬ੍ਯਞ੍ਜਨਕਸ੍ਸ ਇਤ੍ਥਿਨ੍ਦ੍ਰਿਯਂ, ਪੁਰਿਸਉਭਤੋਬ੍ਯਞ੍ਜਨਕਸ੍ਸ ਪੁਰਿਸਿਨ੍ਦ੍ਰਿਯਂ. ‘ਏਵਂ ਸਨ੍ਤੇ ਦੁਤਿਯਬ੍ਯਞ੍ਜਨਕਸ੍ਸ ਅਭਾਵੋ ਆਪਜ੍ਜਤਿ. ਇਨ੍ਦ੍ਰਿਯਞ੍ਹਿ ਬ੍ਯਞ੍ਜਨਕਾਰਣਂ ਵੁਤ੍ਤਂ. ਤਞ੍ਚਸ੍ਸ ਨਤ੍ਥੀ’ਤਿ? ‘ਨ ਤਸ੍ਸ ਇਨ੍ਦ੍ਰਿਯਂ ਬ੍ਯਞ੍ਜਨਕਾਰਣਂ’. ‘ਕਸ੍ਮਾ’? ‘ਸਦਾ ਅਭਾਵਤੋ. ਇਤ੍ਥਿਉਭਤੋਬ੍ਯਞ੍ਜਨਕਸ੍ਸ ਹਿ ਯਦਾ ਇਤ੍ਥਿਯਾ ਰਾਗਚਿਤ੍ਤਂ ਉਪ੍ਪਜ੍ਜਤਿ, ਤਦਾਵ ਪੁਰਿਸਬ੍ਯਞ੍ਜਨਂ ਪਾਕਟਂ ਹੋਤਿ, ਇਤ੍ਥਿਬ੍ਯਞ੍ਜਨਂ ਪਟਿਚ੍ਛਨ੍ਨਂ ਗੁਲ਼੍ਹਂ ਹੋਤਿ. ਤਥਾ ਇਤਰਸ੍ਸ ਇਤਰਂ.
ਯਦਿ ਚ ਤੇਸਂ ਇਨ੍ਦ੍ਰਿਯਂ ਦੁਤਿਯਬ੍ਯਞ੍ਜਨਕਾਰਣਂ ਭਵੇਯ੍ਯ, ਸਦਾਪਿ ਬ੍ਯਞ੍ਜਨਦ੍ਵਯਂ ਤਿਟ੍ਠੇਯ੍ਯ. ਨ ਪਨ ਤਿਟ੍ਠਤਿ. ਤਸ੍ਮਾ ਵੇਦਿਤਬ੍ਬਮੇਤਂ ਨ ਤਸ੍ਸ ਤਂ ਬ੍ਯਞ੍ਜਨਕਾਰਣਂ. ਕਮ੍ਮਸਹਾਯਂ ਪਨ ਰਾਗਚਿਤ੍ਤਮੇਵੇਤ੍ਥ ਕਾਰਣਂ. ਯਸ੍ਮਾ ਚਸ੍ਸ ਏਕਮੇਵ ਇਨ੍ਦ੍ਰਿਯਂ ਹੋਤਿ, ਤਸ੍ਮਾ ਇਤ੍ਥਿਉਭਤੋਬ੍ਯਞ੍ਜਨਕੋ ਸਯਮ੍ਪਿ ਗਬ੍ਭਂ ਗਣ੍ਹਾਤਿ, ਪਰਮ੍ਪਿ ਗਣ੍ਹਾਪੇਤਿ. ਪੁਰਿਸਉਭਤੋਬ੍ਯਞ੍ਜਨਕੋ ਪਰਂ ਗਬ੍ਭਂ ਗਣ੍ਹਾਪੇਤਿ, ਸਯਂ ਪਨ ਨ ਗਣ੍ਹਾਤੀਤਿ.
੬੩੪. ਜੀਵਿਤਿਨ੍ਦ੍ਰਿਯਨਿਦ੍ਦੇਸੇ ਯਂ ਵਤ੍ਤਬ੍ਬਂ ਤਂ ਹੇਟ੍ਠਾ ਅਰੂਪਜੀਵਿਤਿਨ੍ਦ੍ਰਿਯੇ ਵੁਤ੍ਤਮੇਵ. ਕੇਵਲਞ੍ਹਿ ਤਤ੍ਥ ਯੋ ਤੇਸਂ ਅਰੂਪੀਨਂ ਧਮ੍ਮਾਨਨ੍ਤਿ ਵੁਤ੍ਤਂ, ਇਧ ਰੂਪਜੀਵਿਤਿਨ੍ਦ੍ਰਿਯਤ੍ਤਾ ਯੋ ਤੇਸਂ ਰੂਪੀਨਂ ਧਮ੍ਮਾਨਨ੍ਤਿ ਅਯਮੇਵ ਵਿਸੇਸੋ. ਲਕ੍ਖਣਾਦੀਨਿ ਪਨਸ੍ਸ ਏਵਂ ਵੇਦਿਤਬ੍ਬਾਨਿ – ਸਹਜਾਤਰੂਪਾਨੁਪਾਲਨਲਕ੍ਖਣਂ ਜੀਵਿਤਿਨ੍ਦ੍ਰਿਯਂ, ਤੇਸਂ ਪਵਤ੍ਤਨਰਸਂ, ਤੇਸਂ ਯੇਵ ਠਪਨਪਚ੍ਚੁਪਟ੍ਠਾਨਂ, ਯਾਪਯਿਤਬ੍ਬਭੂਤਪਦਟ੍ਠਾਨਨ੍ਤਿ.
੬੩੫. ਕਾਯਵਿਞ੍ਞਤ੍ਤਿਨਿਦ੍ਦੇਸੇ ਕਾਯਵਿਞ੍ਞਤ੍ਤੀਤਿ ਏਤ੍ਥ ਤਾਵ ਕਾਯੇਨ ਅਤ੍ਤਨੋ ਭਾਵਂ ਵਿਞ੍ਞਾਪੇਨ੍ਤਾਨਂ ਤਿਰਚ੍ਛਾਨੇਹਿਪਿ ਪੁਰਿਸਾਨਂ, ਪੁਰਿਸੇਹਿ ਵਾ ਤਿਰਚ੍ਛਾਨਾਨਮ੍ਪਿ ਕਾਯਗਹਣਾਨੁਸਾਰੇਨ ਗਹਿਤਾਯ ਏਤਾਯ ਭਾਵੋ ਵਿਞ੍ਞਾਯਤੀਤਿ ‘ਵਿਞ੍ਞਤ੍ਤਿ’. ਸਯਂ ਕਾਯਗਹਣਾਨੁਸਾਰੇਨ ਵਿਞ੍ਞਾਯਤੀਤਿਪਿ ‘ਵਿਞ੍ਞਤ੍ਤਿ’. ‘‘ਕਾਯੇਨ ਸਂਵਰੋ ਸਾਧੂ’’ਤਿਆਦੀਸੁ (ਧ. ਪ. ੩੬੧) ਆਗਤੋ ਚੋਪਨਸਙ੍ਖਾਤੋ ਕਾਯੋਵ ਵਿਞ੍ਞਤ੍ਤਿ ‘ਕਾਯਵਿਞ੍ਞਤ੍ਤਿ’. ਕਾਯਵਿਪ੍ਫਨ੍ਦਨੇਨ ਅਧਿਪ੍ਪਾਯਵਿਞ੍ਞਾਪਨਹੇਤੁਤ੍ਤਾ, ਸਯਞ੍ਚ ਤਥਾ ਵਿਞ੍ਞੇਯ੍ਯਤ੍ਤਾ ਕਾਯੇਨ ਵਿਞ੍ਞਤ੍ਤੀਤਿਪਿ ‘ਕਾਯਵਿਞ੍ਞਤ੍ਤਿ’.
ਕੁਸਲਚਿਤ੍ਤਸ੍ਸ ਵਾਤਿਆਦੀਸੁ ਅਟ੍ਠਹਿ ਕਾਮਾਵਚਰੇਹਿ ਅਭਿਞ੍ਞਾਚਿਤ੍ਤੇਨ ਚਾਤਿ ਨਵਹਿ ਕੁਸਲਚਿਤ੍ਤੇਹਿ ਕੁਸਲਚਿਤ੍ਤਸ੍ਸ ਵਾ, ਦ੍ਵਾਦਸਹਿਪਿ ਅਕੁਸਲਚਿਤ੍ਤੇਹਿ ਅਕੁਸਲਚਿਤ੍ਤਸ੍ਸ ਵਾ, ਅਟ੍ਠਹਿ ਮਹਾਕਿਰਿਯੇਹਿ ਦ੍ਵੀਹਿ ਅਹੇਤੁਕਕਿਰਿਯੇਹਿ ਅਭਿਞ੍ਞਾਪ੍ਪਤ੍ਤੇਨ ਏਕੇਨ ਰੂਪਾਵਚਰਕਿਰਿਯੇਨਾਤਿ ਏਕਾਦਸਹਿ ਕਿਰਿਯਚਿਤ੍ਤੇਹਿ ਅਬ੍ਯਾਕਤਚਿਤ੍ਤਸ੍ਸ ਵਾ. ਇਤੋ ਅਞ੍ਞਾਨਿ ਹਿ ਚਿਤ੍ਤਾਨਿ ਵਿਞ੍ਞਤ੍ਤਿਂ ਨ ਜਨੇਨ੍ਤਿ. ਸੇਕ੍ਖਾਸੇਕ੍ਖਪੁਥੁਜ੍ਜਨਾਨਂ ਪਨ ਏਤ੍ਤਕੇਹੇਵ ਚਿਤ੍ਤੇਹਿ ਵਿਞ੍ਞਤ੍ਤਿ ਹੋਤੀਤਿ ਏਤੇਸਂ ਕੁਸਲਾਦੀਨਂ ਵਸੇਨ ਤੀਹਿ ਪਦੇਹਿ ‘ਹੇਤੁਤੋ’ ਦਸ੍ਸਿਤਾ.
ਇਦਾਨਿ ਛਹਿ ਪਦੇਹਿ ‘ਫਲਤੋ’ ਦਸ੍ਸੇਤੁਂ ਅਭਿਕ੍ਕਮਨ੍ਤਸ੍ਸ ਵਾਤਿਆਦਿ ਵੁਤ੍ਤਂ. ਅਭਿਕ੍ਕਮਾਦਯੋ ਹਿ ਵਿਞ੍ਞਤ੍ਤਿਵਸੇਨ ਪਵਤ੍ਤਤ੍ਤਾ ਵਿਞ੍ਞਤ੍ਤਿਫਲਂ ਨਾਮ. ਤਤ੍ਥ ‘ਅਭਿਕ੍ਕਮਨ੍ਤਸ੍ਸਾ’ਤਿ ਪੁਰਤੋ ਕਾਯਂ ਅਭਿਹਰਨ੍ਤਸ੍ਸ. ਪਟਿਕ੍ਕਮਨ੍ਤਸ੍ਸਾਤਿ ਪਚ੍ਛਤੋ ਪਚ੍ਚਾਹਰਨ੍ਤਸ੍ਸ. ਆਲੋਕੇਨ੍ਤਸ੍ਸਾਤਿ ਉਜੁਕਂ ਪੇਕ੍ਖਨ੍ਤਸ੍ਸ. ਵਿਲੋਕੇਨ੍ਤਸ੍ਸਾਤਿ ਇਤੋ ਚਿਤੋ ਚ ਪੇਕ੍ਖਨ੍ਤਸ੍ਸ. ਸਮਿਞ੍ਜੇਨ੍ਤਸ੍ਸਾਤਿ ਸਨ੍ਧਯੋ ਸਙ੍ਕੋਚੇਨ੍ਤਸ੍ਸ. ਪਸਾਰੇਨ੍ਤਸ੍ਸਾਤਿ ਸਨ੍ਧਯੋ ਪਟਿਪਣਾਮੇਨ੍ਤਸ੍ਸ.
ਇਦਾਨਿ ਛਹਿ ਪਦੇਹਿ ‘ਸਭਾਵਤੋ’ ਦਸ੍ਸੇਤੁਂ ਕਾਯਸ੍ਸ ਥਮ੍ਭਨਾਤਿ ਆਦਿ ਵੁਤ੍ਤਂ. ਤਤ੍ਥ ‘ਕਾਯਸ੍ਸਾ’ਤਿ ਸਰੀਰਸ੍ਸ. ਕਾਯਂ ਥਮ੍ਭੇਤ੍ਵਾ ਥਦ੍ਧਂ ਕਰੋਤੀਤਿ ਥਮ੍ਭਨਾ. ਤਮੇਵ ਉਪਸਗ੍ਗੇਨ ਵਡ੍ਢੇਤ੍ਵਾ ਸਨ੍ਥਮ੍ਭਨਾਤਿ ਆਹ. ਬਲਵਤਰਾ ਵਾ ਥਮ੍ਭਨਾ ‘ਸਨ੍ਥਮ੍ਭਨਾ’. ਸਨ੍ਥਮ੍ਭਿਤਤ੍ਤਨ੍ਤਿ ਸਨ੍ਥਮ੍ਭਿਤਭਾਵੋ. ਵਿਞ੍ਞਾਪਨਵਸੇਨ ਵਿਞ੍ਞਤ੍ਤਿ. ਵਿਞ੍ਞਾਪਨਾਤਿ ਵਿਞ੍ਞਾਪਨਾਕਾਰੋ. ਵਿਞ੍ਞਾਪਿਤਭਾਵੋ ਵਿਞ੍ਞਾਪਿਤਤ੍ਤਂ. ਸੇਸਮੇਤ੍ਥ ਯਂ ਵਤ੍ਤਬ੍ਬਂ ਤਂ ਹੇਟ੍ਠਾ ਦ੍ਵਾਰਕਥਾਯਂ ਵੁਤ੍ਤਮੇਵ. ਤਥਾ ਵਚੀਵਿਞ੍ਞਤ੍ਤਿਯਂ.
੬੩੬. ਵਚੀਵਿਞ੍ਞਤ੍ਤੀਤਿਪਦਸ੍ਸ ਪਨ ਨਿਦ੍ਦੇਸਪਦਾਨਞ੍ਚ ਅਤ੍ਥੋ ਤਤ੍ਥ ਨ ਵੁਤ੍ਤੋ, ਸੋ ਏਵਂ ਵੇਦਿਤਬ੍ਬੋ – ਵਾਚਾਯ ਅਤ੍ਤਨੋ ਭਾਵਂ ਵਿਞ੍ਞਾਪੇਨ੍ਤਾਨਂ ਤਿਰਚ੍ਛਾਨੇਹਿਪਿ ਪੁਰਿਸਾਨਂ, ਪੁਰਿਸੇਹਿ ਵਾ ਤਿਰਚ੍ਛਾਨਾਨਮ੍ਪਿ, ਵਚੀਗਹਣਾਨੁਸਾਰੇਨ ਗਹਿਤਾਯ ਏਤਾਯ ਭਾਵੋ ਵਿਞ੍ਞਾਯਤੀਤਿ ਵਿਞ੍ਞਤ੍ਤਿ. ਸਯਞ੍ਚ ਵਚੀਗਹਣਾਨੁਸਾਰੇਨ ਵਿਞ੍ਞਾਯਤੀਤਿਪਿ ਵਿਞ੍ਞਤ੍ਤਿ. ‘‘ਸਾਧੁ ਵਾਚਾਯ ਸਂਵਰੋ’’ਤਿਆਦੀਸੁ (ਧ. ਪ. ੩੬੧) ਆਗਤਾ ਚੋਪਨਸਙ੍ਖਾਤਾ ਵਚੀ ਏਵ ਵਿਞ੍ਞਤ੍ਤਿ ‘ਵਚੀਵਿਞ੍ਞਤ੍ਤਿ’. ਵਚੀਘੋਸੇਨ ਅਧਿਪ੍ਪਾਯਵਿਞ੍ਞਾਪਨਹੇਤੁਤ੍ਤਾ ਸਯਞ੍ਚ ਤਥਾਵਿਞ੍ਞੇਯ੍ਯਤ੍ਤਾ ਵਾਚਾਯ ਵਿਞ੍ਞਤ੍ਤੀਤਿਪਿ ‘ਵਚੀਵਿਞ੍ਞਤ੍ਤਿ’. ਵਾਚਾ ਗਿਰਾਤਿਆਦੀਸੁ ਵੁਚ੍ਚਤੀਤਿ ‘ਵਾਚਾ’. ਗਿਰਿਯਤੀਤਿ ‘ਗਿਰਾ’. ਬ੍ਯਪ੍ਪਥੋਤਿ ਵਾਕ੍ਯਭੇਦੋ. ਵਾਕ੍ਯਞ੍ਚ ਤਂ ਪਥੋ ਚ ਅਤ੍ਥਂ ਞਾਤੁਕਾਮਾਨਂ ਞਾਪੇਤੁਕਾਮਾਨਞ੍ਚਾਤਿਪਿ ‘ਬ੍ਯਪ੍ਪਥੋ’. ਉਦੀਰਿਯਤੀਤਿ ਉਦੀਰਣਂ. ਘੁਸ੍ਸਤੀਤਿ ਘੋਸੋ. ਕਰਿਯਤੀਤਿ ਕਮ੍ਮਂ. ਘੋਸੋਵ ਕਮ੍ਮਂ ਘੋਸਕਮ੍ਮਂ. ਨਾਨਪ੍ਪਕਾਰੇਹਿ ਕਤੋ ਘੋਸੋਤਿ ਅਤ੍ਥੋ. ਵਚਿਯਾ ਭੇਦੋ ਵਚੀਭੇਦੋ. ਸੋ ਪਨ ‘ਨ ਭਙ੍ਗੋ, ਪਭੇਦਗਤਾ ਵਾਚਾ ਏਵਾ’ਤਿ ਞਾਪਨਤ੍ਥਂ ਵਾਚਾ ਵਚੀਭੇਦੋਤਿ ਵੁਤ੍ਤਂ. ਇਮੇਹਿ ਸਬ੍ਬੇਹਿਪਿ ਪਦੇਹਿ ‘ਸਦ੍ਦਵਾਚਾਵ’ ਦਸ੍ਸਿਤਾ. ਇਦਾਨਿ ਤਾਯ ਵਾਚਾਯ ਸਦ੍ਧਿਂ ਯੋਜੇਤ੍ਵਾ ਹੇਟ੍ਠਾ ਵੁਤ੍ਤਤ੍ਥਾਨਂ ਵਿਞ੍ਞਤ੍ਤਿਆਦੀਨਂ ਪਦਾਨਂ ਵਸੇਨ ਤੀਹਾਕਾਰੇਹਿ ਸਭਾਵਤੋ ਤਂ ਦਸ੍ਸੇਤੁਂ ਯਾ ਤਾਯ ਵਾਚਾਯ ਵਿਞ੍ਞਤ੍ਤੀਤਿਆਦਿ ਵੁਤ੍ਤਂ. ਤਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.
ਇਦਾਨਿ ਵਿਞ੍ਞਤ੍ਤਿਸਮੁਟ੍ਠਾਪਕਚਿਤ੍ਤੇਸੁ ਅਸਮ੍ਮੋਹਤ੍ਥਂ ਦ੍ਵਤ੍ਤਿਂਸ ਛਬ੍ਬੀਸ ਏਕੂਨਵੀਸਤਿ ਸੋਲ਼ਸ ਪਚ੍ਛਿਮਾਨੀਤਿ ਇਦਂ ਪਕਿਣ੍ਣਕਂ ਵੇਦਿਤਬ੍ਬਂ – ਦ੍ਵਤ੍ਤਿਂਸ ਚਿਤ੍ਤਾਨਿ ਹਿ ਰੂਪਂ ਸਮੁਟ੍ਠਾਪੇਨ੍ਤਿ, ਇਰਿਯਾਪਥਮ੍ਪਿ ਉਪਤ੍ਥਮ੍ਭੇਨ੍ਤਿ, ਦੁਵਿਧਮ੍ਪਿ ਵਿਞ੍ਞਤ੍ਤਿਂ ਜਨੇਨ੍ਤਿ. ਛਬ੍ਬੀਸਤਿ ਵਿਞ੍ਞਤ੍ਤਿਮੇਵ ਨ ਜਨੇਨ੍ਤਿ, ਇਤਰਦ੍ਵਯਂ ਕਰੋਨ੍ਤਿ. ਏਕੂਨਵੀਸਤਿ ਰੂਪਮੇਵ ਸਮੁਟ੍ਠਾਪੇਨ੍ਤਿ, ਇਤਰਦ੍ਵਯਂ ਨ ਕਰੋਨ੍ਤਿ. ਸੋਲ਼ਸ ਇਮੇਸੁ ਤੀਸੁ ਏਕਮ੍ਪਿ ਨ ਕਰੋਨ੍ਤਿ.
ਤਤ੍ਥ ਦ੍ਵਤ੍ਤਿਂਸਾਤਿ ਹੇਟ੍ਠਾ ਵੁਤ੍ਤਾਨੇਵ ਕਾਮਾਵਚਰਤੋ ਅਟ੍ਠ ਕੁਸਲਾਨਿ, ਦ੍ਵਾਦਸ ਅਕੁਸਲਾਨਿ, ਕਿਰਿਯਤੋ ਦਸ ਚਿਤ੍ਤਾਨਿ, ਸੇਕ੍ਖਪੁਥੁਜ੍ਜਨਾਨਂ ਅਭਿਞ੍ਞਾਚਿਤ੍ਤਂ, ਖੀਣਾਸਵਾਨਂ ਅਭਿਞ੍ਞਾਚਿਤ੍ਤਨ੍ਤਿ. ਛਬ੍ਬੀਸਾਤਿ ਰੂਪਾਵਚਰਤੋ ਪਞ੍ਚ ਕੁਸਲਾਨਿ, ਪਞ੍ਚ ਕਿਰਿਯਾਨਿ, ਅਰੂਪਾਵਚਰਤੋ ਚਤ੍ਤਾਰਿ ਕੁਸਲਾਨਿ, ਚਤ੍ਤਾਰਿ ਕਿਰਿਯਾਨਿ, ਚਤ੍ਤਾਰਿ ਮਗ੍ਗਚਿਤ੍ਤਾਨਿ, ਚਤ੍ਤਾਰਿ ਫਲਚਿਤ੍ਤਾਨੀਤਿ. ਏਕੂਨਵੀਸਤੀਤਿ ਕਾਮਾਵਚਰਕੁਸਲਵਿਪਾਕਤੋ ਏਕਾਦਸ, ਅਕੁਸਲਵਿਪਾਕਤੋ ਦ੍ਵੇ, ਕਿਰਿਯਤੋ ਕਿਰਿਯਮਨੋਧਾਤੁ, ਰੂਪਾਵਚਰਤੋ ਪਞ੍ਚ ਵਿਪਾਕਚਿਤ੍ਤਾਨੀਤਿ. ਸੋਲ਼ਸਾਤਿ ਦ੍ਵੇ ਪਞ੍ਚਵਿਞ੍ਞਾਣਾਨਿ, ਸਬ੍ਬਸਤ੍ਤਾਨਂ ਪਟਿਸਨ੍ਧਿਚਿਤ੍ਤਂ, ਖੀਣਾਸਵਾਨਂ ਚੁਤਿਚਿਤ੍ਤਂ, ਅਰੂਪੇ ਚਤ੍ਤਾਰਿ ਵਿਪਾਕਚਿਤ੍ਤਾਨੀਤਿ. ਇਮਾਨਿ ਸੋਲ਼ਸ ਰੂਪਿਰਿਯਾਪਥਵਿਞ੍ਞਤ੍ਤੀਸੁ ਏਕਮ੍ਪਿ ਨ ਕਰੋਨ੍ਤਿ. ਅਞ੍ਞਾਨਿਪਿ ਬਹੂਨਿ ਅਰੂਪੇ ਉਪ੍ਪਨ੍ਨਾਨਿ ਅਨੋਕਾਸਗਤਤ੍ਤਾ ਰੂਪਂ ਨ ਸਮੁਟ੍ਠਾਪੇਨ੍ਤਿ. ਨ ਤਾਨੇਵ, ਕਾਯਵਚੀਵਿਞ੍ਞਤ੍ਤਿਯੋਪਿ.
੬੩੭. ਆਕਾਸਧਾਤੁਨਿਦ੍ਦੇਸੇ ਨ ਕਸ੍ਸਤਿ, ਨ ਨਿਕਸ੍ਸਤਿ, ਕਸਿਤੁਂ ਵਾ ਛਿਨ੍ਦਿਤੁਂ ਵਾ ਭਿਨ੍ਦਿਤੁਂ ਵਾ ਨ ਸਕ੍ਕਾਤਿ ਆਕਾਸੋ. ਆਕਾਸੋਵ ਆਕਾਸਗਤਂ, ਖੇਲ਼ਗਤਾਦਿ ਵਿਯ. ਆਕਾਸੋਤਿ ਵਾ ਗਤਨ੍ਤਿ ‘ਆਕਾਸਗਤਂ’. ਨ ਹਞ੍ਞਤੀਤਿ ਅਘਂ, ਅਘਟ੍ਟਨੀਯਨ੍ਤਿ ਅਤ੍ਥੋ. ਅਘਮੇਵ ਅਘਗਤਂ. ਛਿਦ੍ਦਟ੍ਠੇਨ ਵਿਵਰੋ. ਵਿਵਰੋਵ ਵਿਵਰਗਤਂ. ਅਸਮ੍ਫੁਟ੍ਠਂ ਚਤੂਹਿ ਮਹਾਭੂਤੇਹੀਤਿ ਏਤੇਹਿ ਅਸਮ੍ਫੁਟ੍ਠਂ ਨਿਜ੍ਜਟਾਕਾਸਂਵ ਕਥਿਤਂ. ਲਕ੍ਖਣਾਦਿਤੋ ਪਨ ਰੂਪਪਰਿਚ੍ਛੇਦਲਕ੍ਖਣਾ ਆਕਾਸਧਾਤੁ, ਰੂਪਪਰਿਯਨ੍ਤਪ੍ਪਕਾਸਨਰਸਾ, ਰੂਪਮਰਿਯਾਦਪਚ੍ਚੁਪਟ੍ਠਾਨਾ ਅਸਮ੍ਫੁਟ੍ਠਭਾਵਛਿਦ੍ਦਵਿਵਰਭਾਵਪਚ੍ਚੁਪਟ੍ਠਾਨਾ ਵਾ, ਪਰਿਚ੍ਛਿਨ੍ਨਰੂਪਪਦਟ੍ਠਾਨਾ, ਯਾਯ ਪਰਿਚ੍ਛਿਨ੍ਨੇਸੁ ਰੂਪੇਸੁ ‘ਇਦਮਿਤੋ ਉਦ੍ਧਂ ਅਧੋ ਤਿਰਿਯ’ਨ੍ਤਿ ਚ ਹੋਤਿ.
੬੩੮. ਇਤੋ ਪਰੇ ਰੂਪਸ੍ਸਲਹੁਤਾਦੀਨਂ ਨਿਦ੍ਦੇਸਾ ਚਿਤ੍ਤਸ੍ਸਲਹੁਤਾਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਲਕ੍ਖਣਾਦਿਤੋ ਪਨੇਤ੍ਥ ਅਦਨ੍ਧਤਾਲਕ੍ਖਣਾ ਰੂਪਸ੍ਸ ਲਹੁਤਾ, ਰੂਪਾਨਂ ਗਰੁਭਾਵਵਿਨੋਦਨਰਸਾ, ਲਹੁਪਰਿਵਤ੍ਤਿਤਾਪਚ੍ਚੁਪਟ੍ਠਾਨਾ, ਲਹੁਰੂਪਪਦਟ੍ਠਾਨਾ. ਅਥਦ੍ਧਤਾਲਕ੍ਖਣਾ ਰੂਪਸ੍ਸ ਮੁਦੁਤਾ, ਰੂਪਾਨਂ ਥਦ੍ਧਭਾਵਵਿਨੋਦਨਰਸਾ, ਸਬ੍ਬਕਿਰਿਯਾਸੁ ਅਵਿਰੋਧਿਤਾਪਚ੍ਚੁਪਟ੍ਠਾਨਾ, ਮੁਦੁਰੂਪਪਦਟ੍ਠਾਨਾ. ਸਰੀਰਕਿਰਿਯਾਨੁਕੂਲਕਮ੍ਮਞ੍ਞਭਾਵਲਕ੍ਖਣਾ ਰੂਪਸ੍ਸ ਕਮ੍ਮਞ੍ਞਤਾ, ਅਕਮ੍ਮਞ੍ਞਤਾਵਿਨੋਦਨਰਸਾ, ਅਦੁਬ੍ਬਲਭਾਵਪਚ੍ਚੁਪਟ੍ਠਾਨਾ, ਕਮ੍ਮਞ੍ਞਰੂਪਪਦਟ੍ਠਾਨਾ.
ਏਤਾ ਪਨ ਤਿਸ੍ਸੋ ਨ ਅਞ੍ਞਮਞ੍ਞਂ ਵਿਜਹਨ੍ਤਿ. ਏਵਂ ਸਨ੍ਤੇਪਿ ਯੋ ਅਰੋਗਿਨੋ ਵਿਯ ਰੂਪਾਨਂ ਲਹੁਭਾਵੋ, ਅਦਨ੍ਧਤਾਲਹੁਪਰਿਵਤ੍ਤਿਪ੍ਪਕਾਰੋ, ਰੂਪਦਨ੍ਧਤ੍ਤਕਰਧਾਤੁਕ੍ਖੋਭਪਟਿਪਕ੍ਖਪਚ੍ਚਯਸਮੁਟ੍ਠਾਨੋ, ਸੋ ਰੂਪਵਿਕਾਰੋ ‘ਰੂਪਸ੍ਸਲਹੁਤਾ’. ਯੋ ਸੁਪਰਿਮਦ੍ਦਿਤਚਮ੍ਮਸ੍ਸੇਵ ਰੂਪਾਨਂ ਮੁਦੁਭਾਵੋ ਸਬ੍ਬਕਿਰਿਯਾਵਿਸੇਸੇਸੁ ਸਰਸਵਤ੍ਤਨਭਾਵੋ ਵਸਵਤ੍ਤਨਭਾਵਮਦ੍ਦਵਪ੍ਪਕਾਰੋ ਰੂਪਥਦ੍ਧਤ੍ਤਕਰਧਾਤੁਕ੍ਖੋਭਪਟਿਪਕ੍ਖਪਚ੍ਚਯਸਮੁਟ੍ਠਾਨੋ, ਸੋ ਰੂਪਵਿਕਾਰੋ ‘ਰੂਪਸ੍ਸ ਮੁਦੁਤਾ’. ਯੋ ਪਨ ਸੁਧਨ੍ਤਸੁਵਣ੍ਣਸ੍ਸੇਵ ਰੂਪਾਨਂ ਕਮ੍ਮਞ੍ਞਭਾਵੋ ਸਰੀਰਕਿਰਿਯਾਨੁਕੂਲਭਾਵਪ੍ਪਕਾਰੋ ਸਰੀਰਕਿਰਿਯਾਨਂ ਅਨਨੁਕੂਲਕਰਧਾਤੁਕ੍ਖੋਭਪਟਿਪਕ੍ਖਪਚ੍ਚਯਸਮੁਟ੍ਠਾਨੋ, ਸੋ ਰੂਪਵਿਕਾਰੋ ‘ਰੂਪਸ੍ਸ ਕਮ੍ਮਞ੍ਞਤਾ’ਤਿ. ਏਵਮੇਤਾਸਂ ਵਿਸੇਸੋ ਵੇਦਿਤਬ੍ਬੋ.
ਏਤਾ ਪਨ ਤਿਸ੍ਸੋਪਿ ਕਮ੍ਮਂ ਕਾਤੁਂ ਨ ਸਕ੍ਕੋਤਿ, ਆਹਾਰਾਦਯੋਵ ਕਰੋਨ੍ਤਿ. ਤਥਾ ਹਿ ਯੋਗਿਨੋ ‘ਅਜ੍ਜ ਅਮ੍ਹੇਹਿ ਭੋਜਨਸਪ੍ਪਾਯਂ ਲਦ੍ਧਂ, ਕਾਯੋ ਨੋ ਲਹੁ ਮੁਦੁ ਕਮ੍ਮਞ੍ਞੋ’ਤਿ ਵਦਨ੍ਤਿ. ‘ਅਜ੍ਜ ਉਤੁਸਪ੍ਪਾਯਂ ਲਦ੍ਧਂ, ਅਜ੍ਜ ਅਮ੍ਹਾਕਂ ਚਿਤ੍ਤਂ ਏਕਗ੍ਗਂ, ਕਾਯੋ ਨੋ ਲਹੁ ਮੁਦੁ ਕਮ੍ਮਞ੍ਞੋ’ਤਿ ਵਦਨ੍ਤੀਤਿ.
੬੪੧. ਉਪਚਯਸਨ੍ਤਤਿਨਿਦ੍ਦੇਸੇਸੁ ਆਯਤਨਾਨਨ੍ਤਿ ਅਡ੍ਢੇਕਾਦਸਨ੍ਨਂ ਰੂਪਾਯਤਨਾਨਂ. ਆਚਯੋਤਿ ਨਿਬ੍ਬਤ੍ਤਿ. ਸੋ ਰੂਪਸ੍ਸ ਉਪਚਯੋਤਿ ਯੋ ਆਯਤਨਾਨਂ ਆਚਯੋ ਪੁਨਪ੍ਪੁਨਂ ਨਿਬ੍ਬਤ੍ਤਮਾਨਾਨਂ, ਸੋਵ ਰੂਪਸ੍ਸ ਉਪਚਯੋ ਨਾਮ ਹੋਤਿ; ਵਡ੍ਢੀਤਿ ਅਤ੍ਥੋ. ਯੋ ਰੂਪਸ੍ਸ ਉਪਚਯੋ ਸਾ ਰੂਪਸ੍ਸ ਸਨ੍ਤਤੀਤਿ ਯਾ ਏਵਂ ਉਪਚਿਤਾਨਂ ਰੂਪਾਨਂ ਵਡ੍ਢਿ, ਤਤੋ ਉਤ੍ਤਰਿਤਰਂ ਪਵਤ੍ਤਿਕਾਲੇ ਸਾ ਰੂਪਸ੍ਸ ਸਨ੍ਤਤਿ ਨਾਮ ਹੋਤਿ; ਪਵਤ੍ਤੀਤਿ ਅਤ੍ਥੋ. ਨਦਿਤੀਰੇ ਖਤਕੂਪਸ੍ਮਿਞ੍ਹਿ ਉਦਕੁਗ੍ਗਮਨਕਾਲੋ ਵਿਯ ਆਚਯੋ, ਨਿਬ੍ਬਤ੍ਤਿ; ਪਰਿਪੁਣ੍ਣਕਾਲੋ ਵਿਯ ਉਪਚਯੋ, ਵਡ੍ਢਿ; ਅਜ੍ਝੋਤ੍ਥਰਿਤ੍ਵਾ ਗਮਨਕਾਲੋ ਵਿਯ ਸਨ੍ਤਤਿ, ਪਵਤ੍ਤੀਤਿ ਵੇਦਿਤਬ੍ਬਾ.
ਏਵਂ ਕਿਂ ਕਥਿਤਂ ਹੋਤੀਤਿ? ਆਯਤਨੇਨ ਹਿ ਆਚਯੋ ਕਥਿਤੋ, ਆਚਯੇਨ ਆਯਤਨਂ ਕਥਿਤਂ. ਆਚਯੋਵ ਕਥਿਤੋ ਆਯਤਨਮੇਵ ਕਥਿਤਂ. ਏਵਮ੍ਪਿ ਕਿਂ ਕਥਿਤਂ ਹੋਤੀਤਿ? ਚਤੁਸਨ੍ਤਤਿਰੂਪਾਨਂ ਆਚਯੋ ਉਪਚਯੋ ਨਿਬ੍ਬਤ੍ਤਿ ਵਡ੍ਢਿ ਕਥਿਤਾ. ਅਤ੍ਥਤੋ ਹਿ ਉਭਯਮ੍ਪੇਤਂ ਜਾਤਿਰੂਪਸ੍ਸੇਵ ਅਧਿਵਚਨਂ. ਆਕਾਰਨਾਨਤ੍ਤੇਨ ਪਨ ਵੇਨੇਯ੍ਯਵਸੇਨ ਚ ਉਪਚਯੋ ਸਨ੍ਤਤੀਤਿ ਉਦ੍ਦੇਸਦੇਸਨਂ ਕਤ੍ਵਾ ਯਸ੍ਮਾ ਏਤ੍ਥ ਅਤ੍ਥਤੋ ਨਾਨਤ੍ਤਂ ਨਤ੍ਥਿ, ਤਸ੍ਮਾ ਨਿਦ੍ਦੇਸੇ ‘‘ਯੋ ਆਯਤਨਾਨਂ ਆਚਯੋ ਸੋ ਰੂਪਸ੍ਸ ਉਪਚਯੋ, ਯੋ ਰੂਪਸ੍ਸ ਉਪਚਯੋ ਸਾ ਰੂਪਸ੍ਸ ਸਨ੍ਤਤੀ’’ਤਿ ਵੁਤ੍ਤਂ.
ਯਸ੍ਮਾ ਚ ਉਭਯਮ੍ਪੇਤਂ ਜਾਤਿਰੂਪਸ੍ਸੇਵ ਅਧਿਵਚਨਂ ਤਸ੍ਮਾ ਏਤ੍ਥ ਆਚਯਲਕ੍ਖਣੋ ਰੂਪਸ੍ਸ ਉਪਚਯੋ, ਪੁਬ੍ਬਨ੍ਤਤੋ ਰੂਪਾਨਂ ਉਮ੍ਮੁਜ੍ਜਾਪਨਰਸੋ, ਨਿਯ੍ਯਾਤਨਪਚ੍ਚੁਪਟ੍ਠਾਨੋ ਪਰਿਪੁਣ੍ਣਭਾਵਪਚ੍ਚੁਪਟ੍ਠਾਨੋ ਵਾ, ਉਪਚਿਤਰੂਪਪਦਟ੍ਠਾਨੋ. ਪਵਤ੍ਤਿਲਕ੍ਖਣਾ ਰੂਪਸ੍ਸ ਸਨ੍ਤਤਿ, ਅਨੁਪ੍ਪਬਨ੍ਧਰਸਾ, ਅਨੁਪਚ੍ਛੇਦਪਚ੍ਚੁਪਟ੍ਠਾਨਾ, ਅਨੁਪ੍ਪਬਨ੍ਧਰੂਪਪਦਟ੍ਠਾਨਾਤਿ ਵੇਦਿਤਬ੍ਬਾ.
੬੪੩. ਜਰਤਾਨਿਦ੍ਦੇਸੇ ਜੀਰਣਕਵਸੇਨ ਜਰਾ; ਅਯਮੇਤ੍ਥ ਸਭਾਵਨਿਦ੍ਦੇਸੋ. ਜੀਰਣਾਕਾਰੋ ਜੀਰਣਤਾ. ਖਣ੍ਡਿਚ੍ਚਨ੍ਤਿ ਆਦਯੋ ਤਯੋ ਕਾਲਾਤਿਕ੍ਕਮੇ ਕਿਚ੍ਚਨਿਦ੍ਦੇਸਾ. ਪਚ੍ਛਿਮਾ ਦ੍ਵੇ ਪਕਤਿਨਿਦ੍ਦੇਸਾ. ਅਯਞ੍ਹਿ ‘ਜਰਾ’ਤਿ ਇਮਿਨਾ ਪਦੇਨ ਸਭਾਵਤੋ ਦੀਪਿਤਾ; ਤੇਨਸ੍ਸਾਯਂ ਸਭਾਵਨਿਦ੍ਦੇਸੋ. ‘ਜੀਰਣਤਾ’ਤਿ ਇਮਿਨਾ ਆਕਾਰਤੋ; ਤੇਨਸ੍ਸਾਯਂ ਆਕਾਰਨਿਦ੍ਦੇਸੋ. ਖਣ੍ਡਿਚ੍ਚਨ੍ਤਿ ਇਮਿਨਾ ਕਾਲਾਤਿਕ੍ਕਮੇ ਦਨ੍ਤਨਖਾਨਂ ਖਣ੍ਡਿਤਭਾਵਕਰਣਕਿਚ੍ਚਤੋ. ਪਾਲਿਚ੍ਚਨ੍ਤਿ ਇਮਿਨਾ ਕੇਸਲੋਮਾਨਂ ਪਲਿਤਭਾਵਕਰਣਕਿਚ੍ਚਤੋ. ਵਲਿਤ੍ਤਚਤਾਤਿ ਇਮਿਨਾ ਮਂਸਂ ਮਿਲਾਪੇਤ੍ਵਾ ਤਚੇ ਵਲਿਭਾਵਕਰਣਕਿਚ੍ਚਤੋ ਦੀਪਿਤਾ. ਤੇਨਸ੍ਸਾ ਇਮੇ ‘ਖਣ੍ਡਿਚ੍ਚ’ਨ੍ਤਿਆਦਯੋ ਤਯੋ ਕਾਲਾਤਿਕ੍ਕਮੇ ਕਿਚ੍ਚਨਿਦ੍ਦੇਸਾ. ਤੇਹਿ ਇਮੇਸਂ ਵਿਕਾਰਾਨਂ ਦਸ੍ਸਨਵਸੇਨ ਪਾਕਟੀਭੂਤਾ ਪਾਕਟਜਰਾ ਦਸ੍ਸਿਤਾ. ਯਥੇਵ ਹਿ ਉਦਕਸ੍ਸ ਵਾ ਅਗ੍ਗਿਨੋ ਵਾ ਤਿਣਰੁਕ੍ਖਾਦੀਨਂ ਸਂਭਗ੍ਗਪਲਿਭਗ੍ਗਤਾਯ ਵਾ ਝਾਮਤਾਯ ਵਾ ਗਤਮਗ੍ਗੋ ਪਾਕਟੋ ਹੋਤਿ, ਨ ਚ ਸੋ ਗਤਮਗ੍ਗੋ ਤਾਨੇਵ ਉਦਕਾਦੀਨਿ, ਏਵਮੇਵ ਜਰਾਯ ਦਨ੍ਤਾਦੀਸੁ ਖਣ੍ਡਿਚ੍ਚਾਦਿਵਸੇਨ ਗਤਮਗ੍ਗੋ ਪਾਕਟੋ, ਚਕ੍ਖੁਂ ਉਮ੍ਮੀਲੇਤ੍ਵਾਪਿ ਗਯ੍ਹਤਿ, ਨ ਚ ਖਣ੍ਡਿਚ੍ਚਾਦੀਨੇਵ ਜਰਾ. ਨ ਹਿ ਜਰਾ ਚਕ੍ਖੁਵਿਞ੍ਞੇਯ੍ਯਾ ਹੋਤਿ.
ਆਯੁਨੋ ਸਂਹਾਨਿ ਇਨ੍ਦ੍ਰਿਯਾਨਂ ਪਰਿਪਾਕੋਤਿ ਇਮੇਹਿ ਪਨ ਪਦੇਹਿ ਕਾਲਾਤਿਕ੍ਕਮੇਯੇਵ ਅਭਿਬ੍ਯਤ੍ਤਾਯ ਆਯੁਕ੍ਖਯਚਕ੍ਖਾਦਿਇਨ੍ਦ੍ਰਿਯਪਰਿਪਾਕਸਞ੍ਞਿਤਾਯ ਪਕਤਿਯਾ ਦੀਪਿਤਾ. ਤੇਨਸ੍ਸਿਮੇ ਪਚ੍ਛਿਮਾ ਦ੍ਵੇ ਪਕਤਿਨਿਦ੍ਦੇਸਾਤਿ ਵੇਦਿਤਬ੍ਬਾ. ਤਤ੍ਥ ਯਸ੍ਮਾ ਜਰਂ ਪਤ੍ਤਸ੍ਸ ਆਯੁ ਹਾਯਤਿ, ਤਸ੍ਮਾ ਜਰਾ ‘ਆਯੁਨੋ ਸਂਹਾਨੀ’ਤਿ ਫਲੂਪਚਾਰੇਨ ਵੁਤ੍ਤਾ. ਯਸ੍ਮਾ ਚ ਦਹਰਕਾਲੇ ਸੁਪ੍ਪਸਨ੍ਨਾਨਿ, ਸੁਖੁਮਮ੍ਪਿ ਅਤ੍ਤਨੋ ਵਿਸਯਂ ਸੁਖੇਨੇਵ ਗਣ੍ਹਨਸਮਤ੍ਥਾਨਿ ਚਕ੍ਖਾਦੀਨਿ ਇਨ੍ਦ੍ਰਿਯਾਨਿ ਜਰਂ ਪਤ੍ਤਸ੍ਸ ਪਰਿਪਕ੍ਕਾਨਿ ਆਲੁਲ਼ਿਤਾਨਿ ਅਵਿਸਦਾਨਿ, ਓਲ਼ਾਰਿਕਮ੍ਪਿ ਅਤ੍ਤਨੋ ਵਿਸਯਂ ਗਹੇਤੁਂ ਅਸਮਤ੍ਥਾਨਿ ਹੋਨ੍ਤਿ, ਤਸ੍ਮਾ ‘ਇਨ੍ਦ੍ਰਿਯਾਨਂ ਪਰਿਪਾਕੋ’ਤਿਪਿ ਫਲੂਪਚਾਰੇਨੇਵ ਵੁਤ੍ਤਾ.
ਸਾ ਪਨਾਯਂ ਏਵਂ ਨਿਦ੍ਦਿਟ੍ਠਾ ਸਬ੍ਬਾਪਿ ਜਰਾ ਪਾਕਟਾ ਪਟਿਚ੍ਛਨ੍ਨਾਤਿ ਦੁਵਿਧਾ ਹੋਤਿ. ਤਤ੍ਥ ਦਨ੍ਤਾਦੀਸੁ ਖਣ੍ਡਭਾਵਾਦਿਦਸ੍ਸਨਤੋ ਰੂਪਧਮ੍ਮੇਸੁ ਜਰਾ ਪਾਕਟਜਰਾ ਨਾਮ. ਅਰੂਪਧਮ੍ਮੇਸੁ ਪਨ ਜਰਾ ਤਾਦਿਸਸ੍ਸ ਵਿਕਾਰਸ੍ਸ ਅਦਸ੍ਸਨਤੋ ਪਟਿਚ੍ਛਨ੍ਨਜਰਾ ਨਾਮ. ਪੁਨ ਅਵੀਚਿ ਸਵੀਚੀਤਿ ਏਵਮ੍ਪਿ ਦੁਵਿਧਾ ਹੋਤਿ. ਤਤ੍ਥ ਮਣਿਕਨਕਰਜਤਪਵਾਲ਼ਚਨ੍ਦਿਮਸੂਰਿਯਾਦੀਨਂ ਵਿਯ, ਮਨ੍ਦਦਸਕਾਦੀਸੁ ਪਾਣੀਨਂ ਵਿਯ ਚ, ਪੁਪ੍ਫਫਲਪਲ੍ਲਵਾਦੀਸੁ ਚ ਅਪਾਣੀਨਂ ਵਿਯ, ਅਨ੍ਤਰਨ੍ਤਰਾ ਵਣ੍ਣਵਿਸੇਸਾਦੀਨਂ ਦੁਵਿਞ੍ਞੇਯ੍ਯਤ੍ਤਾ ਜਰਾ ਅਵੀਚਿਜਰਾ ਨਾਮ; ਨਿਰਨ੍ਤਰਜਰਾਤਿ ਅਤ੍ਥੋ. ਤਤੋ ਅਞ੍ਞੇਸੁ ਪਨ ਯਥਾਵੁਤ੍ਤੇਸੁ ਅਨ੍ਤਰਨ੍ਤਰਾ ਵਣ੍ਣਵਿਸੇਸਾਦੀਨਂ ਸੁਵਿਞ੍ਞੇਯ੍ਯਤ੍ਤਾ ਜਰਾ ਸਵੀਚਿਜਰਾ ਨਾਮਾਤਿ ਵੇਦਿਤਬ੍ਬਾ.
ਲਕ੍ਖਣਾਦਿਤੋਪਿ ਰੂਪਪਰਿਪਾਕਲਕ੍ਖਣਾ ਰੂਪਸ੍ਸ ਜਰਤਾ, ਉਪਨਯਨਰਸਾ, ਸਭਾਵਾਨਪਗਮੇਪਿ ਨਵਭਾਵਾਪਗਮਪਚ੍ਚੁਪਟ੍ਠਾਨਾ, ਵੀਹਿਪੁਰਾਣਭਾਵੋ ਵਿਯ ਪਰਿਪਚ੍ਚਮਾਨਰੂਪਪਦਟ੍ਠਾਨਾਤਿ ਵੇਦਿਤਬ੍ਬਾ.
੬੪੪. ਅਨਿਚ੍ਚਤਾਨਿਦ੍ਦੇਸੇ ਖਯਗਮਨਵਸੇਨ ਖਯੋ, ਵਯਗਮਨਵਸੇਨ ਵਯੋ, ਭਿਜ੍ਜਨਵਸੇਨ ਭੇਦੋ. ਅਥ ਵਾ, ਯਸ੍ਮਾ ਤਂ ਪਤ੍ਵਾ ਰੂਪਂ ਖੀਯਤਿ, ਵੇਤਿ, ਭਿਜ੍ਜਤਿ ਚ, ਤਸ੍ਮਾ ਖੀਯਤਿ ਏਤਸ੍ਮਿਨ੍ਤਿ ‘ਖਯੋ’, ਵੇਤਿ ਏਤਸ੍ਮਿਨ੍ਤਿ ‘ਵਯੋ’, ਭਿਜ੍ਜਤਿ ਏਤਸ੍ਮਿਨ੍ਤਿ ‘ਭੇਦੋ’. ਉਪਸਗ੍ਗਵਸੇਨ ਪਦਂ ਵਡ੍ਢੇਤ੍ਵਾ ਭੇਦੋਵ ਪਰਿਭੇਦੋ. ਹੁਤ੍ਵਾ ਅਭਾਵਟ੍ਠੇਨ, ਨ ਨਿਚ੍ਚਨ੍ਤਿ ਅਨਿਚ੍ਚਂ. ਤਸ੍ਸ ਭਾਵੋ ਅਨਿਚ੍ਚਤਾ. ਅਨ੍ਤਰਧਾਯਤਿ ਏਤ੍ਥਾਤਿ ਅਨ੍ਤਰਧਾਨਂ. ਮਰਣਞ੍ਹਿ ਪਤ੍ਵਾ ਰੂਪਂ ਅਨ੍ਤਰਧਾਯਤਿ, ਅਦਸ੍ਸਨਂ ਗਚ੍ਛਤਿ. ਨ ਕੇਵਲਞ੍ਚ ਰੂਪਮੇਵ, ਸਬ੍ਬੇਪਿ ਪਞ੍ਚਕ੍ਖਨ੍ਧਾ. ਤਸ੍ਮਾ ਪਞ੍ਚਨ੍ਨਮ੍ਪਿ ਖਨ੍ਧਾਨਂ ਅਨਿਚ੍ਚਤਾਯ ਇਦਮੇਵ ਲਕ੍ਖਣਨ੍ਤਿ ਵੇਦਿਤਬ੍ਬਂ. ਲਕ੍ਖਣਾਦਿਤੋ ਪਨ ਪਰਿਭੇਦਲਕ੍ਖਣਾ ਰੂਪਸ੍ਸ ਅਨਿਚ੍ਚਤਾ, ਸਂਸੀਦਨਰਸਾ, ਖਯਵਯਪਚ੍ਚੁਪਟ੍ਠਾਨਾ, ਪਰਿਭਿਜ੍ਜਮਾਨਰੂਪਪਦਟ੍ਠਾਨਾਤਿ ਵੇਦਿਤਬ੍ਬਾ.
ਹੇਟ੍ਠਾ ਜਾਤਿ ਗਹਿਤਾ ਜਰਾ ਗਹਿਤਾ, ਇਮਸ੍ਮਿਂ ਠਾਨੇ ਮਰਣਂ ਗਹਿਤਂ. ਇਮੇ ਤਯੋ ਧਮ੍ਮਾ ਇਮੇਸਂ ਸਤ੍ਤਾਨਂ ਉਕ੍ਖਿਤ੍ਤਾਸਿਕਪਚ੍ਚਾਮਿਤ੍ਤਸਦਿਸਾ. ਯਥਾ ਹਿ ਪੁਰਿਸਸ੍ਸ ਤਯੋ ਪਚ੍ਚਾਮਿਤ੍ਤਾ ਓਤਾਰਂ ਗਵੇਸਮਾਨਾ ਵਿਚਰੇਯ੍ਯੁਂ. ਤੇਸੁ ਏਕੋ ਏਵਂ ਵਦੇਯ੍ਯ – ‘ਏਤਂ ਨੀਹਰਿਤ੍ਵਾ ਅਟਵਿਪਵੇਸਨਂ ਮਯ੍ਹਂ ਭਾਰੋ ਹੋਤੂ’ਤਿ. ਦੁਤਿਯੋ ‘ਅਟਵਿਗਤਕਾਲੇ ਪੋਥੇਤ੍ਵਾ ਪਥਵਿਯਂ ਪਾਤਨਂ ਮਯ੍ਹਂ ਭਾਰੋ’ਤਿ. ਤਤਿਯੋ ‘ਪਥਵਿਗਤਕਾਲਤੋ ਪਟ੍ਠਾਯ ਅਸਿਨਾ ਸੀਸਚ੍ਛੇਦਨਂ ਮਯ੍ਹਂ ਭਾਰੋ’ਤਿ. ਏਵਰੂਪਾ ਇਮੇ ਜਾਤਿ ਆਦਯੋ. ਨੀਹਰਿਤ੍ਵਾ ਅਟਵਿਪਵੇਸਨਪਚ੍ਚਾਮਿਤ੍ਤਸਦਿਸਾ ਹੇਤ੍ਥ ਜਾਤਿ, ਤਸ੍ਮਿਂ ਤਸ੍ਮਿਂ ਠਾਨੇ ਨਿਬ੍ਬਤ੍ਤਾਪਨਤੋ. ਅਟਵਿਗਤਂ ਪੋਥੇਤ੍ਵਾ ਪਥਵਿਯਂ ਪਾਤਨਪਚ੍ਚਾਮਿਤ੍ਤਸਦਿਸਾ ਜਰਾ, ਨਿਬ੍ਬਤ੍ਤਕ੍ਖਨ੍ਧਾਨਂ ਦੁਬ੍ਬਲਪਰਾਧੀਨਮਞ੍ਚਪਰਾਯਣਭਾਵਕਰਣਤੋ. ਪਥਵਿਗਤਸ੍ਸ ਅਸਿਨਾ ਸੀਸਚ੍ਛੇਦਕਪਚ੍ਚਾਮਿਤ੍ਤਸਦਿਸਂ ਮਰਣਂ, ਜਰਾਪ੍ਪਤ੍ਤਾਨਂ ਖਨ੍ਧਾਨਂ ਜੀਵਿਤਕ੍ਖਯਪਾਪਨਤੋਤਿ.
੬੪੫. ਕਬਲ਼ੀਕਾਰਾਹਾਰਨਿਦ੍ਦੇਸੇ ਕਬਲ਼ਂ ਕਰੀਯਤੀਤਿ ਕਬਲ਼ੀਕਾਰੋ. ਆਹਰੀਯਤੀਤਿ ਆਹਾਰੋ. ਕਬਲ਼ਂ ਕਤ੍ਵਾ ਅਜ੍ਝੋਹਰੀਯਤੀਤਿ ਅਤ੍ਥੋ. ਰੂਪਂ ਵਾ ਆਹਰਤੀਤਿਪਿ ‘ਆਹਾਰੋ’. ਏਵਂ ਵਤ੍ਥੁਵਸੇਨ ਨਾਮਂ ਉਦ੍ਧਰਿਤ੍ਵਾ ਪੁਨ ਵਤ੍ਥੁਵਸੇਨੇਵੇਤਂ ਪਭੇਦਤੋ ਦਸ੍ਸੇਤੁਂ ਓਦਨੋ ਕੁਮ੍ਮਾਸੋਤਿਆਦਿ ਵੁਤ੍ਤਂ. ਓਦਨਾਦੀਨਿ ਹਿ ਫਾਣਿਤਪਰਿਯਨ੍ਤਾਨਿ ਦ੍ਵਾਦਸ ਇਧਾਧਿਪ੍ਪੇਤਸ੍ਸ ਆਹਾਰਸ੍ਸ ਵਤ੍ਥੂਨਿ. ਪਾਲ਼ਿਯਂ ਅਨਾਗਤਾਨਿ ਮੂਲਫਲਾਦੀਨਿ ਯੇਵਾਪਨਕਂ ਪਵਿਟ੍ਠਾਨਿ.
ਇਦਾਨਿ ਤਾਨਿ ਮੂਲਫਲਾਦੀਨਿ ਕਤ੍ਤਬ੍ਬਤੋ ਦਸ੍ਸੇਤੁਂ ਯਮ੍ਹਿ ਯਮ੍ਹਿ ਜਨਪਦੇਤਿਆਦਿਮਾਹ. ਤਤ੍ਥ ਮੁਖੇਨ ਅਸਿਤਬ੍ਬਂ ਭੁਞ੍ਜਿਤਬ੍ਬਨ੍ਤਿ ਮੁਖਾਸਿਯਂ. ਦਨ੍ਤੇਹਿ ਵਿਖਾਦਿਤਬ੍ਬਨ੍ਤਿ ਦਨ੍ਤਵਿਖਾਦਨਂ. ਗਲੇਨ ਅਜ੍ਝੋਹਰਿਤਬ੍ਬਨ੍ਤਿ ਗਲਜ੍ਝੋਹਰਣੀਯਂ. ਇਦਾਨਿ ਤਂ ਕਿਚ੍ਚਵਸੇਨ ਦਸ੍ਸੇਤੁਂ ਕੁਚ੍ਛਿਵਿਤ੍ਥਮ੍ਭਨਨ੍ਤਿ ਆਹ. ਤਞ੍ਹਿ ਮੂਲਫਲਾਦਿ ਓਦਨਕੁਮ੍ਮਾਸਾਦਿ ਵਾ ਅਜ੍ਝੋਹਟਂ ਕੁਚ੍ਛਿਂ ਵਿਤ੍ਥਮ੍ਭੇਤਿ. ਇਦਮਸ੍ਸ ਕਿਚ੍ਚਂ. ਯਾਯ ਓਜਾਯ ਸਤ੍ਤਾ ਯਾਪੇਨ੍ਤੀਤਿ ਹੇਟ੍ਠਾ ਸਬ੍ਬਪਦੇਹਿ ਸਵਤ੍ਥੁਕਂ ਆਹਾਰਂ ਦਸ੍ਸੇਤ੍ਵਾ ਇਦਾਨਿ ਨਿਬ੍ਬਟ੍ਟਿਤਓਜਮੇਵ ਦਸ੍ਸੇਤੁਂ ਇਦਂ ਵੁਤ੍ਤਂ.
ਕਿਂ ਪਨੇਤ੍ਥ ਵਤ੍ਥੁਸ੍ਸ ਕਿਚ੍ਚਂ? ਕਿਂ ਓਜਾਯ? ਪਰਿਸ੍ਸਯਹਰਣਪਾਲਨਾਨਿ. ਵਤ੍ਥੁਹਿ ਪਰਿਸ੍ਸਯਂ ਹਰਤਿ ਪਾਲੇਤੁਂ ਨ ਸਕ੍ਕੋਤਿ, ਓਜਾ ਪਾਲੇਤਿ ਪਰਿਸ੍ਸਯਂ ਹਰਿਤੁਂ ਨ ਸਕ੍ਕੋਤਿ. ਦ੍ਵੇਪਿ ਏਕਤੋ ਹੁਤ੍ਵਾ ਪਾਲੇਤੁਮ੍ਪਿ ਸਕ੍ਕੋਨ੍ਤਿ ਪਰਿਸ੍ਸਯਮ੍ਪਿ ਹਰਿਤੁਂ. ਕੋ ਪਨੇਸ ਪਰਿਸ੍ਸਯੋ ਨਾਮ? ਕਮ੍ਮਜਤੇਜੋ. ਅਨ੍ਤੋਕੁਚ੍ਛਿਯਞ੍ਹਿ ਓਦਨਾਦਿਵਤ੍ਥੁਸ੍ਮਿਂ ਅਸਤਿ, ਕਮ੍ਮਜਤੇਜੋ ਉਟ੍ਠਹਿਤ੍ਵਾ ਉਦਰਪਟਲਂ ਗਣ੍ਹਾਤਿ, ‘ਛਾਤੋਮ੍ਹਿ, ਆਹਾਰਂ ਮੇ ਦੇਥਾ’ਤਿ ਵਦਾਪੇਤਿ. ਭੁਤ੍ਤਕਾਲੇ ਉਦਰਪਟਲਂ ਮੁਞ੍ਚਿਤ੍ਵਾ ਵਤ੍ਥੁਂ ਗਣ੍ਹਾਤਿ. ਅਥ ਸਤ੍ਤੋ ਏਕਗ੍ਗੋ ਹੋਤਿ.
ਯਥਾ ਹਿ ਛਾਯਾਰਕ੍ਖਸੋ ਛਾਯਂ ਪਵਿਟ੍ਠਂ ਗਹੇਤ੍ਵਾ ਦੇਵਸਙ੍ਖਲਿਕਾਯ ਬਨ੍ਧਿਤ੍ਵਾ ਅਤ੍ਤਨੋ ਭਵਨੇ ਮੋਦਨ੍ਤੋ ਛਾਤਕਾਲੇ ਆਗਨ੍ਤ੍ਵਾ ਸੀਸੇ ਡਂਸਤਿ. ਸੋ ਡਟ੍ਠਤ੍ਤਾ ਵਿਰਵਤਿ. ਤਂ ਵਿਰਵਂ ਸੁਤ੍ਵਾ ‘ਦੁਕ੍ਖਪ੍ਪਤ੍ਤੋ ਏਤ੍ਥ ਅਤ੍ਥੀ’ਤਿ ਤਤੋ ਤਤੋ ਮਨੁਸ੍ਸਾ ਆਗਚ੍ਛਨ੍ਤਿ. ਸੋ ਆਗਤਾਗਤੇ ਗਹੇਤ੍ਵਾ ਖਾਦਿਤ੍ਵਾ ਭਵਨੇ ਮੋਦਤਿ. ਏਵਂਸਮ੍ਪਦਮਿਦਂ ਵੇਦਿਤਬ੍ਬਂ. ਛਾਯਾਰਕ੍ਖਸੋ ਵਿਯ ਹਿ ਕਮ੍ਮਜਤੇਜੋ, ਦੇਵਸਙ੍ਖਲਿਕਾਯ ਬਨ੍ਧਿਤ੍ਵਾ ਠਪਿਤਸਤ੍ਤੋ ਵਿਯ ਉਦਰਪਟਲਂ, ਪੁਨ ਆਗਤਮਨੁਸ੍ਸਾ ਵਿਯ ਓਦਨਾਦਿਵਤ੍ਥੁ, ਓਤਰਿਤ੍ਵਾ ਸੀਸੇ ਡਂਸਨਂ ਵਿਯ ਕਮ੍ਮਜਤੇਜਸ੍ਸ ਵਤ੍ਥੁਤੋ ਮੁਤ੍ਤਸ੍ਸ ਉਦਰਪਟਲਗ੍ਗਹਣਂ, ਡਟ੍ਠਸ੍ਸ ਵਿਰਵਨਕਾਲੋ ਵਿਯ ‘ਆਹਾਰਂ ਦੇਥਾ’ਤਿ ਵਚਨਕਾਲੋ, ਤਾਯ ਸਞ੍ਞਾਯ ਆਗਤਾਗਤੇ ਗਹੇਤ੍ਵਾ ਖਾਦਿਤ੍ਵਾ ਭਵਨੇ ਮੋਦਨਕਾਲੋ ਵਿਯ ਕਮ੍ਮਜਤੇਜੇਨ ਉਦਰਪਟਲਂ ਮੁਞ੍ਚਿਤ੍ਵਾ ਵਤ੍ਥੁਸ੍ਮਿਂ ਗਹਿਤੇ ਏਕਗ੍ਗਚਿਤ੍ਤਤਾ.
ਤਤ੍ਥ ਓਲ਼ਾਰਿਕੇ ਵਤ੍ਥੁਸ੍ਮਿਂ ਓਜਾ ਮਨ੍ਦਾ ਹੋਤਿ. ਸੁਖੁਮੇ ਬਲਵਤੀ. ਕੁਦ੍ਰੂਸਕਭਤ੍ਤਾਦੀਨਿ ਹਿ ਭੁਞ੍ਜਿਤ੍ਵਾ ਮੁਹੁਤ੍ਤੇਨੇਵ ਛਾਤੋ ਹੋਤਿ. ਸਪ੍ਪਿਆਦੀਨਿ ਪਿਵਿਤ੍ਵਾ ਠਿਤਸ੍ਸ ਦਿਵਸਮ੍ਪਿ ਭਤ੍ਤਂ ਨ ਰੁਚ੍ਚਤਿ. ਏਤ੍ਥ ਚ ਉਪਾਦਾਯੁਪਾਦਾਯ ਓਲ਼ਾਰਿਕਸੁਖੁਮਤਾ ਵੇਦਿਤਬ੍ਬਾ. ਕੁਮ੍ਭੀਲਾਨਞ੍ਹਿ ਆਹਾਰਂ ਉਪਾਦਾਯ ਮੋਰਾਨਂ ਆਹਾਰੋ ਸੁਖੁਮੋ. ਕੁਮ੍ਭੀਲਾ ਕਿਰ ਪਾਸਾਣੇ ਗਿਲਨ੍ਤਿ. ਤੇ ਚ ਨੇਸਂ ਕੁਚ੍ਛਿਪ੍ਪਤ੍ਤਾ ਵਿਲੀਯਨ੍ਤਿ. ਮੋਰਾ ਸਪ੍ਪਵਿਚ੍ਛਿਕਾਦਿਪਾਣੇ ਖਾਦਨ੍ਤਿ. ਮੋਰਾਨਂ ਪਨ ਆਹਾਰਂ ਉਪਾਦਾਯ ਤਰਚ੍ਛਾਨਂ ਆਹਾਰੋ ਸੁਖੁਮੋ. ਤੇ ਕਿਰ ਤਿਵਸ੍ਸਛਡ੍ਡਿਤਾਨਿ ਵਿਸਾਣਾਨਿ ਚੇਵ ਅਟ੍ਠੀਨਿ ਚ ਖਾਦਨ੍ਤਿ. ਤਾਨਿ ਚ ਨੇਸਂ ਖੇਲ਼ੇਨ ਤੇਮਿਤਮਤ੍ਤਾਨੇਵ ਕਨ੍ਦਮੂਲਂ ਵਿਯ ਮੁਦੁਕਾਨਿ ਹੋਨ੍ਤਿ. ਤਰਚ੍ਛਾਨਮ੍ਪਿ ਆਹਾਰਮੁਪਾਦਾਯ ਹਤ੍ਥੀਨਂ ਆਹਾਰੋ ਸੁਖੁਮੋ. ਤੇ ਹਿ ਨਾਨਾਰੁਕ੍ਖਸਾਖਾਦਯੋ ਖਾਦਨ੍ਤਿ. ਹਤ੍ਥੀਨਂ ਆਹਾਰਤੋ ਗਵਯਗੋਕਣ੍ਣਮਿਗਾਦੀਨਂ ਆਹਾਰੋ ਸੁਖੁਮੋ. ਤੇ ਕਿਰ ਨਿਸ੍ਸਾਰਾਨਿ ਨਾਨਾਰੁਕ੍ਖਪਣ੍ਣਾਦੀਨਿ ਖਾਦਨ੍ਤਿ. ਤੇਸਮ੍ਪਿ ਆਹਾਰਤੋ ਗੁਨ੍ਨਂ ਆਹਾਰੋ ਸੁਖੁਮੋ. ਤੇ ਅਲ੍ਲਸੁਕ੍ਖਤਿਣਾਨਿ ਖਾਦਨ੍ਤਿ. ਤੇਸਮ੍ਪਿ ਆਹਾਰਤੋ ਸਸਾਨਂ ਆਹਾਰੋ ਸੁਖੁਮੋ. ਸਸਾਨਂ ਆਹਾਰਤੋ ਸਕੁਣਾਨਂ ਆਹਾਰੋ ਸੁਖੁਮੋ. ਸਕੁਣਾਨਂ ਆਹਾਰਤੋ ਪਚ੍ਚਨ੍ਤਵਾਸੀਨਂ ਆਹਾਰੋ ਸੁਖੁਮੋ. ਪਚ੍ਚਨ੍ਤਵਾਸੀਨਂ ਆਹਾਰਤੋ ਗਾਮਭੋਜਕਾਨਂ ਆਹਾਰੋ ਸੁਖੁਮੋ. ਗਾਮਭੋਜਕਾਨਂ ਆਹਾਰਤੋ ਰਾਜਰਾਜਮਹਾਮਤ੍ਤਾਨਂ ਆਹਾਰੋ ਸੁਖੁਮੋ. ਤੇਸਮ੍ਪਿ ਆਹਾਰਤੋ ਚਕ੍ਕਵਤ੍ਤਿਨੋ ਆਹਾਰੋ ਸੁਖੁਮੋ. ਚਕ੍ਕਵਤ੍ਤਿਨੋ ਆਹਾਰਤੋ ਭੁਮ੍ਮਦੇਵਾਨਂ ਆਹਾਰੋ ਸੁਖੁਮੋ. ਭੁਮ੍ਮਦੇਵਾਨਂ ਆਹਾਰਤੋ ਚਾਤੁਮਹਾਰਾਜਿਕਾਨਂ ਆਹਾਰੋ ਸੁਖੁਮੋ. ਏਵਂ ਯਾਵ ਪਰਨਿਮ੍ਮਿਤਵਸਵਤ੍ਤੀਨਂ ਆਹਾਰੋ ਵਿਤ੍ਥਾਰੇਤਬ੍ਬੋ. ਤੇਸਂ ਪਨਾਹਾਰੋ ਸੁਖੁਮੋਤ੍ਵੇਵ ਨਿਟ੍ਠਂ ਪਤ੍ਤੋ.
ਲਕ੍ਖਣਾਦਿਤੋਪਿ ਓਜਾਲਕ੍ਖਣੋ ਕਬਲ਼ੀਕਾਰੋ ਆਹਾਰੋ, ਰੂਪਾਹਰਣਰਸੋ, ਉਪਤ੍ਥਮ੍ਭਨਪਚ੍ਚੁਪਟ੍ਠਾਨੋ, ਕਬਲ਼ਂ ਕਤ੍ਵਾ ਆਹਰਿਤਬ੍ਬਵਤ੍ਥੁਪਦਟ੍ਠਾਨੋਤਿ ਵੇਦਿਤਬ੍ਬੋ.
੬੪੬. ਨੋਉਪਾਦਾਨਿਦ੍ਦੇਸੇ ਯਥਾ ਉਪਾਦਾਰੂਪਂ ਉਪਾਦਿਯਤੇਵ, ਨ ਅਞ੍ਞੇਨ ਉਪਾਦਿਯਤਿ, ਏਵਮੇਤਂ ਨ ਉਪਾਦਿਯਤੇਵਾਤਿ ਨੋਉਪਾਦਾ.
੬੪੭. ਫੁਸਿਤਬ੍ਬਨ੍ਤਿ ਫੋਟ੍ਠਬ੍ਬਂ. ਫੁਸਿਤ੍ਵਾ ਜਾਨਿਤਬ੍ਬਨ੍ਤਿ ਅਤ੍ਥੋ. ਫੋਟ੍ਠਬ੍ਬਞ੍ਚ ਤਂ ਆਯਤਨਞ੍ਚਾਤਿ ਫੋਟ੍ਠਬ੍ਬਾਯਤਨਂ. ਆਪੋ ਚ ਤਂ ਨਿਸ੍ਸਤ੍ਤਸੁਞ੍ਞਤਸਭਾਵਟ੍ਠੇਨ ਧਾਤੁ ਚਾਤਿ ਆਪੋਧਾਤੁ. ਇਦਾਨਿ ਯਸ੍ਮਾ ਤੀਣਿ ਰੂਪਾਨਿ ਫੁਸਿਤ੍ਵਾ ਜਾਨਿਤਬ੍ਬਾਨਿ ਤਸ੍ਮਾ ਤਾਨਿ ਭਾਜੇਤ੍ਵਾ ਦਸ੍ਸੇਤੁਂ ਕਤਮਂ ਤਂ ਰੂਪਂ ਫੋਟ੍ਠਬ੍ਬਾਯਤਨਂ? ਪਥਵੀਧਾਤੂਤਿਆਦਿਮਾਹ. ਤਤ੍ਥ ਕਕ੍ਖਲ਼ਤ੍ਤਲਕ੍ਖਣਾ ਪਥਵੀਧਾਤੁ, ਪਤਿਟ੍ਠਾਨਰਸਾ, ਸਮ੍ਪਟਿਚ੍ਛਨਪਚ੍ਚੁਪਟ੍ਠਾਨਾ. ਤੇਜੋਧਾਤੁ ਉਣ੍ਹਤ੍ਤਲਕ੍ਖਣਾ, ਪਰਿਪਾਚਨਰਸਾ, ਮਦ੍ਦਵਾਨੁਪ੍ਪਦਾਨਪਚ੍ਚੁਪਟ੍ਠਾਨਾ. ਵਾਯੋਧਾਤੁ ਵਿਤ੍ਥਮ੍ਭਨਲਕ੍ਖਣਾ, ਸਮੁਦੀਰਣਰਸਾ, ਅਭਿਨੀਹਾਰਪਚ੍ਚੁਪਟ੍ਠਾਨਾ. ਪੁਰਿਮਾ ਪਨ ‘ਆਪੋਧਾਤੁ’ ਪਗ੍ਘਰਣਲਕ੍ਖਣਾ, ਬ੍ਰੂਹਨਰਸਾ, ਸਙ੍ਗਹਪਚ੍ਚੁਪਟ੍ਠਾਨਾ. ਏਕੇਕਾ ਚੇਤ੍ਥ ਸੇਸਤ੍ਤਯਪਦਟ੍ਠਾਨਾਤਿ ਵੇਦਿਤਬ੍ਬਾ.
ਕਕ੍ਖਲ਼ਨ੍ਤਿ ਥਦ੍ਧਂ. ਮੁਦੁਕਨ੍ਤਿ ਅਥਦ੍ਧਂ. ਸਣ੍ਹਨ੍ਤਿ ਮਟ੍ਠਂ. ਫਰੁਸਨ੍ਤਿ ਖਰਂ. ਸੁਖਸਮ੍ਫਸ੍ਸਨ੍ਤਿ ਸੁਖਵੇਦਨਾਪਚ੍ਚਯਂ ਇਟ੍ਠਫੋਟ੍ਠਬ੍ਬਂ. ਦੁਕ੍ਖਸਮ੍ਫਸ੍ਸਨ੍ਤਿ ਦੁਕ੍ਖਵੇਦਨਾਪਚ੍ਚਯਂ ਅਨਿਟ੍ਠਫੋਟ੍ਠਬ੍ਬਂ. ਗਰੁਕਨ੍ਤਿ ਭਾਰਿਯਂ. ਲਹੁਕਨ੍ਤਿ ਅਭਾਰਿਯਂ, ਸਲ੍ਲਹੁਕਨ੍ਤਿ ਅਤ੍ਥੋ. ਏਤ੍ਥ ਚ ‘ਕਕ੍ਖਲ਼ਂ ਮੁਦੁਕਂ ਸਣ੍ਹਂ ਫਰੁਸਂ ਗਰੁਕਂ ਲਹੁਕ’ਨ੍ਤਿ ਪਦੇਹਿ ਪਥਵੀਧਾਤੁ ਏਵ ਭਾਜਿਤਾ. ‘‘ਯਦਾਯਂ ਕਾਯੋ ਆਯੁਸਹਗਤੋ ਚ ਹੋਤਿ ਉਸ੍ਮਾਸਹਗਤੋ ਚ ਵਿਞ੍ਞਾਣਸਹਗਤੋ ਚ ਤਦਾ ਲਹੁਤਰੋ ਚ ਹੋਤਿ ਮੁਦੁਤਰੋ ਚ ਕਮ੍ਮਞ੍ਞਤਰੋ ਚਾ’’ਤਿ (ਦੀ. ਨਿ. ੨.੪੨੪) ਸੁਤ੍ਤੇਪਿ ਲਹੁਮੁਦੁਭੂਤਂ ਪਥਵੀਧਾਤੁਮੇਵ ਸਨ੍ਧਾਯ ਵੁਤ੍ਤਂ.
‘ਸੁਖਸਮ੍ਫਸ੍ਸਂ ਦੁਕ੍ਖਸਮ੍ਫਸ੍ਸ’ਨ੍ਤਿ ਪਦਦ੍ਵਯੇਨ ਪਨ ਤੀਣਿਪਿ ਮਹਾਭੂਤਾਨਿ ਭਾਜਿਤਾਨਿ. ਪਥਵੀਧਾਤੁ ਹਿ ਸੁਖਸਮ੍ਫਸ੍ਸਾਪਿ ਅਤ੍ਥਿ ਦੁਕ੍ਖਸਮ੍ਫਸ੍ਸਾਪਿ. ਤਥਾ ਤੇਜੋਧਾਤੁਵਾਯੋਧਾਤੁਯੋ. ਤਤ੍ਥ ਸੁਖਸਮ੍ਫਸ੍ਸਾ ਪਥਵੀਧਾਤੁ ਮੁਦੁਤਲੁਣਹਤ੍ਥੇ ਦਹਰੇ ਪਾਦੇ ਸਮ੍ਬਾਹਨ੍ਤੇ ਅਸ੍ਸਾਦੇਤ੍ਵਾ ਅਸ੍ਸਾਦੇਤ੍ਵਾ ‘ਸਮ੍ਬਾਹ ਤਾਤ, ਸਮ੍ਬਾਹ ਤਾਤਾ’ਤਿ ਵਦਾਪਨਾਕਾਰਂ ਕਰੋਤਿ. ਸੁਖਸਮ੍ਫਸ੍ਸਾ ਤੇਜੋਧਾਤੁ ਸੀਤਸਮਯੇ ਅਙ੍ਗਾਰਕਪਲ੍ਲਂ ਆਹਰਿਤ੍ਵਾ ਗਤ੍ਤਂ ਸੇਦੇਨ੍ਤੇ ਅਸ੍ਸਾਦੇਤ੍ਵਾ ਅਸ੍ਸਾਦੇਤ੍ਵਾ ‘ਸੇਦੇਹਿ ਤਾਤ, ਸੇਦੇਹਿ ਤਾਤਾ’ਤਿ ਵਦਾਪਨਾਕਾਰਂ ਕਰੋਤਿ. ਸੁਖਸਮ੍ਫਸ੍ਸਾ ਵਾਯੋਧਾਤੁ ਉਣ੍ਹਸਮਯੇ ਵਤ੍ਤਸਮ੍ਪਨ੍ਨੇ ਦਹਰੇ ਬੀਜਨੇਨ ਬੀਜਨ੍ਤੇ ਅਸ੍ਸਾਦੇਤ੍ਵਾ ਅਸ੍ਸਾਦੇਤ੍ਵਾ ‘ਬੀਜ ਤਾਤ, ਬੀਜ ਤਾਤਾ’ਤਿ ਵਦਾਪਨਾਕਾਰਂ ਕਰੋਤਿ. ਥਦ੍ਧਹਤ੍ਥੇ ਪਨ ਦਹਰੇ ਪਾਦੇ ਸਮ੍ਬਾਹਨ੍ਤੇ ਅਟ੍ਠੀਨਂ ਭਿਜ੍ਜਨਕਾਲੋ ਵਿਯ ਹੋਤਿ. ਸੋਪਿ ‘ਅਪੇਹੀ’ਤਿ ਵਤ੍ਤਬ੍ਬਤਂ ਆਪਜ੍ਜਤਿ. ਉਣ੍ਹਸਮਯੇ ਅਙ੍ਗਾਰਕਪਲ੍ਲੇ ਆਭਤੇ ‘ਅਪਨੇਹਿ ਨ’ਨ੍ਤਿ ਵਤ੍ਤਬ੍ਬਂ ਹੋਤਿ. ਸੀਤਸਮਯੇ ਬੀਜਨੇਨ ਬੀਜਨ੍ਤੇ ‘ਅਪੇਹਿ, ਮਾ ਬੀਜਾ’ਤਿ ਵਤ੍ਤਬ੍ਬਂ ਹੋਤਿ. ਏਵਮੇਤਾਸਂ ਸੁਖਸਮ੍ਫਸ੍ਸਤਾ ਦੁਕ੍ਖਸਮ੍ਫਸ੍ਸਤਾ ਚ ਵੇਦਿਤਬ੍ਬਾ.
ਯਂ ਫੋਟ੍ਠਬ੍ਬਂ ਅਨਿਦਸ੍ਸਨਂ ਸਪ੍ਪਟਿਘਨ੍ਤਿਆਦਿਨਾ ਨਯੇਨ ਵੁਤ੍ਤਾ ਪਨ ਚਤੂਹਿ ਚਤੂਹਿ ਨਯੇਹਿ ਪਟਿਮਣ੍ਡਿਤਾ ਤੇਰਸ ਵਾਰਾ ਹੇਟ੍ਠਾ ਰੂਪਾਯਤਨਾਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਾ.
ਕਿਂ ਪਨੇਤਾਨਿ ਤੀਣਿ ਮਹਾਭੂਤਾਨਿ ਏਕਪ੍ਪਹਾਰੇਨੇਵ ਆਪਾਥਂ ਆਗਚ੍ਛਨ੍ਤਿ ਉਦਾਹੁ ਨੋਤਿ? ਆਗਚ੍ਛਨ੍ਤਿ. ਏਵਂ ਆਗਤਾਨਿ ਕਾਯਪਸਾਦਂ ਘਟ੍ਟੇਨ੍ਤਿ ਨ ਘਟ੍ਟੇਨ੍ਤੀਤਿ? ਘਟ੍ਟੇਨ੍ਤਿ. ਏਕਪ੍ਪਹਾਰੇਨੇਵ ਤਾਨਿ ਆਰਮ੍ਮਣਂ ਕਤ੍ਵਾ ਕਾਯਵਿਞ੍ਞਾਣਂ ਉਪ੍ਪਜ੍ਜਤਿ ਨੁਪ੍ਪਜ੍ਜਤੀਤਿ? ਨੁਪ੍ਪਜ੍ਜਤਿ. ਆਭੁਜਿਤਵਸੇਨ ਵਾ ਹਿ ਉਸ੍ਸਦਵਸੇਨ ਵਾ ਆਰਮ੍ਮਣਕਰਣਂ ਹੋਤਿ.
ਤਤ੍ਥ ਆਭੁਜਿਤਵਸੇਨ ਤਾਵ, ਪਤ੍ਤਸ੍ਮਿਞ੍ਹਿ ਓਦਨੇਨ ਪੂਰੇਤ੍ਵਾ ਆਭਤੇ ਏਕਂ ਸਿਤ੍ਥਂ ਗਹੇਤ੍ਵਾ ਥਦ੍ਧਂ ਵਾ ਮੁਦੁਕਂ ਵਾਤਿ ਵੀਮਂਸਨ੍ਤੋ ਕਿਞ੍ਚਾਪਿ ਤਤ੍ਥ ਤੇਜੋਪਿ ਅਤ੍ਥਿ ਵਾਯੋਪਿ ਅਤ੍ਥਿ, ਪਥਵੀਧਾਤੁਮੇਵ ਪਨ ਆਭੁਜਤਿ. ਉਣ੍ਹੋਦਕੇ ਹਤ੍ਥਂ ਓਤਾਰੇਤ੍ਵਾ ਵੀਮਂਸਨ੍ਤੋ ਕਿਞ੍ਚਾਪਿ ਤਤ੍ਥ ਪਥਵੀਪਿ ਅਤ੍ਥਿ ਵਾਯੋਪਿ ਅਤ੍ਥਿ, ਤੇਜੋਧਾਤੁਮੇਵ ਪਨ ਆਭੁਜਤਿ. ਉਣ੍ਹਸਮਯੇ ਵਾਤਪਾਨਂ ਵਿਵਰਿਤ੍ਵਾ ਵਾਤੇਨ ਸਰੀਰਂ ਪਹਰਾਪੇਨ੍ਤੋ ਠਿਤੋ ਮਨ੍ਦਮਨ੍ਦੇ ਵਾਤੇ ਪਹਰਨ੍ਤੇ ਕਿਞ੍ਚਾਪਿ ਤਤ੍ਥ ਪਥਵੀਪਿ ਅਤ੍ਥਿ ਤੇਜੋਪਿ ਅਤ੍ਥਿ, ਵਾਯੋਧਾਤੁਮੇਵ ਪਨ ਆਭੁਜਤਿ. ਏਵਂ ਆਭੁਜਿਤਵਸੇਨ ਆਰਮ੍ਮਣਂ ਕਰੋਤਿ ਨਾਮ.
ਯੋ ਪਨ ਉਪਕ੍ਖਲਤਿ ਵਾ ਸੀਸੇਨ ਵਾ ਰੁਕ੍ਖਂ ਪਹਰਤਿ ਭੁਞ੍ਜਨ੍ਤੋ ਵਾ ਸਕ੍ਖਰਂ ਡਂਸਤਿ, ਸੋ ਕਿਞ੍ਚਾਪਿ ਤਤ੍ਥ ਤੇਜੋਪਿ ਅਤ੍ਥਿ ਵਾਯੋਪਿ ਅਤ੍ਥਿ, ਉਸ੍ਸਦਵਸੇਨ ਪਨ ਪਥਵੀਧਾਤੁਮੇਵ ਆਰਮ੍ਮਣਂ ਕਰੋਤਿ. ਅਗ੍ਗਿਂ ਅਕ੍ਕਮਨ੍ਤੋਪਿ ਕਿਞ੍ਚਾਪਿ ਤਤ੍ਥ ਪਥਵੀਪਿ ਅਤ੍ਥਿ ਵਾਯੋਪਿ ਅਤ੍ਥਿ, ਉਸ੍ਸਦਵਸੇਨ ਪਨ ਤੇਜੋਧਾਤੁਮੇਵ ਆਰਮ੍ਮਣਂ ਕਰੋਤਿ. ਬਲਵਵਾਤੇ ਕਣ੍ਣਸਕ੍ਖਲਿਂ ਪਹਰਿਤ੍ਵਾ ਬਧਿਰਭਾਵਂ ਕਰੋਨ੍ਤੇ. ਕਿਞ੍ਚਾਪਿ ਤਤ੍ਥ ਪਥਵੀਪਿ ਅਤ੍ਥਿ ਤੇਜੋਪਿ ਅਤ੍ਥਿ, ਉਸ੍ਸਦਵਸੇਨ ਪਨ ਵਾਯੋਧਾਤੁਮੇਵ ਆਰਮ੍ਮਣਂ ਕਰੋਤਿ.
ਯਂਕਿਞ੍ਚਿ ਧਾਤੁਂ ਆਰਮ੍ਮਣਂ ਕਰੋਨ੍ਤਸ੍ਸ ਕਾਯਵਿਞ੍ਞਾਣਮ੍ਪਿ ਏਕਪ੍ਪਹਾਰੇਨ ਨੁਪ੍ਪਜ੍ਜਤਿ. ਸੂਚਿਕਲਾਪੇਨ ਵਿਦ੍ਧਸ੍ਸ ਏਕਪ੍ਪਹਾਰੇਨ ਕਾਯੋ ਘਟ੍ਟਿਯਤਿ. ਯਸ੍ਮਿਂ ਯਸ੍ਮਿਂ ਪਨ ਠਾਨੇ ਕਾਯਪਸਾਦੋ ਉਸ੍ਸਨ੍ਨੋ ਹੋਤਿ, ਤਤ੍ਥ ਤਤ੍ਥ ਕਾਯਵਿਞ੍ਞਾਣਂ ਉਪ੍ਪਜ੍ਜਤਿ. ਯਤ੍ਥ ਯਤ੍ਥਾਪਿ ਪਟਿਘਟ੍ਟਨਨਿਘਂਸੋ ਬਲਵਾ ਹੋਤਿ ਤਤ੍ਥ ਤਤ੍ਥ ਪਠਮਂ ਉਪ੍ਪਜ੍ਜਤਿ. ਕੁਕ੍ਕੁਟਪਤ੍ਤੇਨ ਵਣੇ ਧੋਵਿਯਮਾਨੇ ਅਂਸੁਅਂਸੁ ਕਾਯਪਸਾਦਂ ਘਟ੍ਟੇਤਿ. ਯਤ੍ਥ ਯਤ੍ਥ ਪਨ ਪਸਾਦੋ ਉਸ੍ਸਨ੍ਨੋ ਹੋਤਿ, ਤਤ੍ਥ ਤਤ੍ਥੇਵ ਕਾਯਵਿਞ੍ਞਾਣਂ ਉਪ੍ਪਜ੍ਜਤਿ. ਏਵਂ ਉਸ੍ਸਦਵਸੇਨ ਆਰਮ੍ਮਣਂ ਕਰੋਤਿ. ਉਸ੍ਸਦਵਸੇਨੇਵ ਚ ਕਾਯਵਿਞ੍ਞਾਣਂ ਉਪ੍ਪਜ੍ਜਤਿ ਨਾਮ.
ਕਥਂ ਪਨ ਚਿਤ੍ਤਸ੍ਸ ਆਰਮ੍ਮਣਤੋ ਸਙ੍ਕਨ੍ਤਿ ਹੋਤੀਤਿ? ਦ੍ਵੀਹਾਕਾਰੇਹਿ ਹੋਤਿ – ਅਜ੍ਝਾਸਯਤੋ ਵਾ ਵਿਸਯਾਧਿਮਤ੍ਤਤੋ ਵਾ. ਵਿਹਾਰਪੂਜਾਦੀਸੁ ਹਿ ‘ਤਾਨਿ ਤਾਨਿ ਚੇਤਿਯਾਨਿ ਚੇਵ ਪਟਿਮਾਯੋ ਚ ਵਨ੍ਦਿਸ੍ਸਾਮਿ, ਪੋਤ੍ਥਕਮ੍ਮਚਿਤ੍ਤਕਮ੍ਮਾਨਿ ਚ ਓਲੋਕੇਸ੍ਸਾਮੀ’ਤਿ ਅਜ੍ਝਾਸਯੇਨ ਗਤੋ ਏਕਂ ਵਨ੍ਦਿਤ੍ਵਾ ਵਾ ਪਸ੍ਸਿਤ੍ਵਾ ਵਾ ਇਤਰਸ੍ਸ ਵਨ੍ਦਨਤ੍ਥਾਯ ਵਾ ਦਸ੍ਸਨਤ੍ਥਾਯ ਵਾ ਮਨਂ ਕਤ੍ਵਾ ਵਨ੍ਦਿਤੁਮ੍ਪਿ ਪਸ੍ਸਿਤੁਮ੍ਪਿ ਗਚ੍ਛਤਿਯੇਵ, ਏਵਂ ਅਜ੍ਝਾਸਯਤੋ ਸਙ੍ਕਮਤਿ ਨਾਮ.
ਕੇਲਾਸਕੂਟਪਟਿਭਾਗਂ ਪਨ ਮਹਾਚੇਤਿਯਂ ਓਲੋਕੇਨ੍ਤੋ ਠਿਤੋਪਿ ਅਪਰਭਾਗੇ ਸਬ੍ਬਤੂਰਿਯੇਸੁ ਪਗ੍ਗਹਿਤੇਸੁ ਰੂਪਾਰਮ੍ਮਣਂ ਵਿਸ੍ਸਜ੍ਜੇਤ੍ਵਾ ਸਦ੍ਦਾਰਮ੍ਮਣਂ ਸਙ੍ਕਮਤਿ. ਮਨੁਞ੍ਞਗਨ੍ਧੇਸੁ ਪੁਪ੍ਫੇਸੁ ਵਾ ਗਨ੍ਧੇਸੁ ਵਾ ਆਭਤੇਸੁ ਸਦ੍ਦਾਰਮ੍ਮਣਂ ਵਿਸ੍ਸਜ੍ਜੇਤ੍ਵਾ ਗਨ੍ਧਾਰਮ੍ਮਣਂ ਸਙ੍ਕਮਤਿ. ਏਵਂ ਵਿਸਯਾਧਿਮਤ੍ਤਤੋ ਸਙ੍ਕਮਤਿ ਨਾਮ.
੬੫੧. ਆਪੋਧਾਤੁਨਿਦ੍ਦੇਸੇ ਆਪੋਤਿ ਸਭਾਵਨਿਦ੍ਦੇਸੋ. ਆਪੋਵ ਆਪੋਗਤਂ. ਸਿਨੇਹਵਸੇਨ ਸਿਨੇਹੋ, ਸਿਨੇਹੋਵ ਸਿਨੇਹਗਤਂ. ਬਨ੍ਧਨਤ੍ਤਂ ਰੂਪਸ੍ਸਾਤਿ ਪਥਵੀਧਾਤੁਆਦਿਕਸ੍ਸ ਭੂਤਰੂਪਸ੍ਸ ਬਨ੍ਧਨਭਾਵੋ. ਅਯੋਪਿਣ੍ਡਿਆਦੀਨਿ ਹਿ ਆਪੋਧਾਤੁ ਆਬਨ੍ਧਿਤ੍ਵਾ ਬਦ੍ਧਾਨਿ ਕਰੋਤਿ. ਤਾਯ ਆਬਦ੍ਧਤ੍ਤਾ ਤਾਨਿ ਬਦ੍ਧਾਨਿ ਨਾਮ ਹੋਨ੍ਤਿ. ਪਾਸਾਣਪਬ੍ਬਤਤਾਲਟ੍ਠਿਹਤ੍ਥਿਦਨ੍ਤਗੋਸਿਙ੍ਗਾਦੀਸੁਪਿ ਏਸੇਵ ਨਯੋ. ਸਬ੍ਬਾਨਿ ਹੇਤਾਨਿ ਆਪੋਧਾਤੁ ਏਵ ਆਬਨ੍ਧਿਤ੍ਵਾ ਬਦ੍ਧਾਨਿ ਕਰੋਤਿ. ਆਪੋਧਾਤੁਯਾ ਆਬਦ੍ਧਤ੍ਤਾਵ ਬਦ੍ਧਾਨਿ ਹੋਨ੍ਤਿ.
ਕਿਂ ਪਨ ਪਥਵੀਧਾਤੁ ਸੇਸਧਾਤੂਨਂ ਪਤਿਟ੍ਠਾ ਹੋਤਿ ਨ ਹੋਤੀਤਿ ਹੋਤਿ ਫੁਸਿਤ੍ਵਾ ਹੋਤਿ ਉਦਾਹੁ ਅਫੁਸਿਤ੍ਵਾ? ਆਪੋਧਾਤੁ ਵਾ ਸੇਸਾ ਆਬਨ੍ਧਮਾਨਾ ਫੁਸਿਤ੍ਵਾ ਆਬਨ੍ਧਤਿ ਉਦਾਹੁ ਅਫੁਸਿਤ੍ਵਾਤਿ? ਪਥਵੀਧਾਤੁ ਤਾਵ ਆਪੋਧਾਤੁਯਾ ਅਫੁਸਿਤ੍ਵਾਵ ਪਤਿਟ੍ਠਾ ਹੋਤਿ, ਤੇਜੋਧਾਤੁਯਾ ਚ ਵਾਯੋਧਾਤੁਯਾ ਚ ਫੁਸਿਤ੍ਵਾ. ਆਪੋਧਾਤੁ ਪਨ ਪਥਵੀਧਾਤੁਮ੍ਪਿ ਤੇਜੋਵਾਯੋਧਾਤੁਯੋਪਿ ਅਫੁਸਿਤ੍ਵਾਵ ਆਬਨ੍ਧਤਿ. ਯਦਿ ਫੁਸਿਤ੍ਵਾ ਆਬਨ੍ਧੇਯ੍ਯ ਫੋਟ੍ਠਬ੍ਬਾਯਤਨਂ ਨਾਮ ਭਵੇਯ੍ਯ.
ਤੇਜੋਧਾਤੁਵਾਯੋਧਾਤੂਨਮ੍ਪਿ ਸੇਸਧਾਤੂਸੁ ਸਕਸਕਕਿਚ੍ਚਕਰਣੇ ਏਸੇਵ ਨਯੋ. ਤੇਜੋਧਾਤੁ ਹਿ ਪਥਵੀਧਾਤੁਂ ਫੁਸਿਤ੍ਵਾ ਝਾਪੇਤਿ. ਸਾ ਪਨ ਨ ਉਣ੍ਹਾ ਹੁਤ੍ਵਾ ਝਾਯਤਿ. ਯਦਿ ਉਣ੍ਹਾ ਹੁਤ੍ਵਾ ਝਾਯੇਯ੍ਯ ਉਣ੍ਹਤ੍ਤਲਕ੍ਖਣਾ ਨਾਮ ਭਵੇਯ੍ਯ. ਆਪੋਧਾਤੁਂ ਪਨ ਅਫੁਸਿਤ੍ਵਾਵ ਤਾਪੇਤਿ. ਸਾਪਿ ਤਪਮਾਨਾ ਨ ਉਣ੍ਹਾ ਹੁਤ੍ਵਾ ਤਪਤਿ. ਯਦਿ ਉਣ੍ਹਾ ਹੁਤ੍ਵਾ ਤਪੇਯ੍ਯ ਉਣ੍ਹਤ੍ਤਲਕ੍ਖਣਾ ਨਾਮ ਭਵੇਯ੍ਯ. ਵਾਯੋਧਾਤੁਂ ਪਨ ਫੁਸਿਤ੍ਵਾਵ ਤਾਪੇਤਿ. ਸਾਪਿ ਤਪਮਾਨਾ ਨ ਉਣ੍ਹਾ ਹੁਤ੍ਵਾ ਤਪਤਿ. ਯਦਿ ਉਣ੍ਹਾ ਹੁਤ੍ਵਾ ਤਪੇਯ੍ਯ ਉਣ੍ਹਤ੍ਤਲਕ੍ਖਣਾ ਨਾਮ ਭਵੇਯ੍ਯ. ਵਾਯੋਧਾਤੁ ਪਥਵੀਧਾਤੁਂ ਫੁਸਿਤ੍ਵਾ ਵਿਤ੍ਥਮ੍ਭੇਤਿ, ਤਥਾ ਤੇਜੋਧਾਤੁਂ ਆਪੋਧਾਤੁਂ ਪਨ ਅਫੁਸਿਤ੍ਵਾਵ ਵਿਤ੍ਥਮ੍ਭੇਤਿ.
ਉਚ੍ਛੁਰਸਂ ਪਚਿਤ੍ਵਾ ਫਾਣਿਤਪਿਣ੍ਡੇ ਕਰਿਯਮਾਨੇ ਆਪੋਧਾਤੁ ਥਦ੍ਧਾ ਹੋਤਿ ਨ ਹੋਤੀਤਿ? ਨ ਹੋਤਿ. ਸਾ ਹਿ ਪਗ੍ਘਰਣਲਕ੍ਖਣਾ. ਪਥਵੀਧਾਤੁ ਕਕ੍ਖਲ਼ਲਕ੍ਖਣਾ. ਓਮਤ੍ਤਂ ਪਨ ਆਪੋ ਅਧਿਮਤ੍ਤਪਥਵੀਗਤਿਕਂ ਜਾਤਂ. ਸਾ ਹਿ ਰਸਾਕਾਰੇਨ ਠਿਤਭਾਵਂ ਵਿਜਹਤਿ, ਲਕ੍ਖਣਂ ਨ ਵਿਜਹਤਿ. ਫਾਣਿਤਪਿਣ੍ਡੇ ਵਿਲੀਯਮਾਨੇਪਿ ਪਥਵੀਧਾਤੁ ਨ ਵਿਲੀਯਤਿ. ਕਕ੍ਖਲ਼ਲਕ੍ਖਣਾ ਹਿ ਪਥਵੀਧਾਤੁ ਪਗ੍ਘਰਣਲਕ੍ਖਣਾ ਆਪੋਧਾਤੁ. ਓਮਤ੍ਤਾ ਪਨ ਪਥਵੀ ਅਧਿਮਤ੍ਤਆਪਗਤਿਕਾ ਹੋਤਿ. ਸਾ ਪਿਣ੍ਡਾਕਾਰੇਨ ਠਿਤਭਾਵਂ ਵਿਜਹਤਿ, ਲਕ੍ਖਣਂ ਨ ਵਿਜਹਤਿ. ਚਤੁਨ੍ਨਞ੍ਹਿ ਮਹਾਭੂਤਾਨਂ ਭਾਵਞ੍ਞਥਤ੍ਤਮੇਵ ਹੋਤਿ, ਲਕ੍ਖਣਞ੍ਞਥਤ੍ਤਂ ਨਾਮ ਨਤ੍ਥਿ. ਤਸ੍ਸ ਅਭਾਵੋ ਅਟ੍ਠਾਨਪਰਿਕਪ੍ਪਸੁਤ੍ਤੇਨ ਦੀਪਿਤੋ. ਵੁਤ੍ਤਞ੍ਹੇਤਂ –
‘‘ਸਿਯਾ, ਆਨਨ੍ਦ, ਚਤੁਨ੍ਨਂ ਮਹਾਭੂਤਾਨਂ ਅਞ੍ਞਥਤ੍ਤਂ, ਪਥਵੀਧਾਤੁਯਾ…ਪੇ… ਵਾਯੋਧਾਤੁਯਾ; ਨ ਤ੍ਵੇਵ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤਸ੍ਸ ਅਰਿਯਸਾਵਕਸ੍ਸ ਸਿਯਾ ਅਞ੍ਞਥਤ੍ਤ’’ਨ੍ਤਿ (ਅ. ਨਿ. ੩.੭੬).
ਅਯਞ੍ਹੇਤ੍ਥ ਅਤ੍ਥੋ – ਆਨਨ੍ਦ, ਕਕ੍ਖਲ਼ਤ੍ਤਲਕ੍ਖਣਾ ਪਥਵੀਧਾਤੁ ਪਰਿਵਤ੍ਤਿਤ੍ਵਾ ਪਗ੍ਘਰਣਲਕ੍ਖਣਾ ਆਪੋਧਾਤੁ ਨਾਮ ਭਵੇਯ੍ਯ, ਅਰਿਯਸਾਵਕਸ੍ਸ ਪਨ ਅਞ੍ਞਥਤ੍ਤਂ ਨਾਮ ਨਤ੍ਥੀਤਿ. ਏਵਮੇਤ੍ਥ ਅਟ੍ਠਾਨਪਰਿਕਪ੍ਪੋ ਆਗਤੋ.
੬੫੨. ਇਤੋ ਪਰੇਸੁ ਉਪਾਦਿਣ੍ਣਰੂਪਾਦਿਨਿਦ੍ਦੇਸੇਸੁ ਉਪਾਦਿਣ੍ਣਪਦਾਦੀਨਂ ਅਤ੍ਥੋ ਮਾਤਿਕਾਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਚਕ੍ਖਾਯਤਨਾਦੀਨਿ ਹੇਟ੍ਠਾ ਵਿਤ੍ਥਾਰਿਤਾਨੇਵ. ਤਤ੍ਥ ਤਤ੍ਥ ਪਨ ਵਿਸੇਸਮਤ੍ਤਮੇਵ ਵਕ੍ਖਾਮ.
ਉਪਾਦਿਣ੍ਣਨਿਦ੍ਦੇਸੇ ਤਾਵ ਚਕ੍ਖਾਯਤਨਾਦੀਨਿ ਏਕਨ੍ਤਉਪਾਦਿਣ੍ਣਤ੍ਤਾ ਵੁਤ੍ਤਾਨਿ. ਯਸ੍ਮਾ ਪਨ ਰੂਪਾਯਤਨਾਦੀਨਿ ਉਪਾਦਿਣ੍ਣਾਨਿਪਿ ਅਤ੍ਥਿ ਅਨੁਪਾਦਿਣ੍ਣਾਨਿਪਿ, ਤਸ੍ਮਾ ਤਾਨਿ ਯਂ ਵਾ ਪਨਾਤਿ ਸਙ੍ਖੇਪਤੋ ਦਸ੍ਸੇਤ੍ਵਾ ਪੁਨ ਕਮ੍ਮਸ੍ਸ ਕਤਤ੍ਤਾ ਰੂਪਾਯਤਨਨ੍ਤਿਆਦਿਨਾ ਨਯੇਨ ਵਿਤ੍ਥਾਰਿਤਾਨਿ. ਇਮਿਨਾ ਉਪਾਯੇਨ ਸਬ੍ਬਯੇਵਾਪਨਕੇਸੁ ਅਤ੍ਥੋ ਵੇਦਿਤਬ੍ਬੋ.
ਕਸ੍ਮਾ ਪਨ ‘ਕਮ੍ਮਸ੍ਸ ਕਤਤ੍ਤਾ’ਤਿ ਚ ‘ਨ ਕਮ੍ਮਸ੍ਸ ਕਤਤ੍ਤਾ’ਤਿ ਚ ਉਭਿਨ੍ਨਮ੍ਪਿ ਨਿਦ੍ਦੇਸੇ ‘ਜਰਤਾ ਚ ਅਨਿਚ੍ਚਤਾ ਚ’ ਨ ਗਹਿਤਾ, ਅਨੁਪਾਦਿਣ੍ਣਾਦੀਨਂਯੇਵ ਨਿਦ੍ਦੇਸੇਸੁ ਗਹਿਤਾਤਿ? ਨ ਕਮ੍ਮਸ੍ਸ ਕਤਤ੍ਤਾਤਿ ਏਤ੍ਥ ਤਾਵ ਕਮ੍ਮਤੋ ਅਞ੍ਞਪਚ੍ਚਯਸਮੁਟ੍ਠਾਨਂ ਸਙ੍ਗਹਿਤਂ. ‘ਕਮ੍ਮਸ੍ਸ ਕਤਤ੍ਤਾ’ਤਿ ਏਤ੍ਥ ਕਮ੍ਮਸਮੁਟ੍ਠਾਨਮੇਵ. ਇਮਾਨਿ ਚ ਦ੍ਵੇ ਰੂਪਾਨਿ ਨੇਵ ਕਮ੍ਮਤੋ ਨ ਅਞ੍ਞਸ੍ਮਾ ਰੂਪਜਨਕਪਚ੍ਚਯਾ ਉਪ੍ਪਜ੍ਜਨ੍ਤਿ, ਤਸ੍ਮਾ ਨ ਗਹਿਤਾਨਿ. ਸਾ ਚ ਨੇਸਂ ਅਨੁਪ੍ਪਤ੍ਤਿ ਪਰਤੋ ਆਵਿ ਭਵਿਸ੍ਸਤਿ. ਅਨੁਪਾਦਿਣ੍ਣਨ੍ਤਿਆਦੀਸੁ ਪਨ ਕੇਵਲਂ ਅਨੁਪਾਦਿਣ੍ਣਾਦਿਗ੍ਗਹਣੇਨ ਕਮ੍ਮਾਦਿਸਮੁਟ੍ਠਾਨਤਾ ਪਟਿਕ੍ਖਿਤ੍ਤਾ, ਨਅਞ੍ਞਪਚ੍ਚਯਸਮੁਟ੍ਠਾਨਤਾ ਅਨੁਞ੍ਞਾਤਾ. ਤਸ੍ਮਾ ਤਤ੍ਥ ਗਹਿਤਾਨੀਤਿ ਵੇਦਿਤਬ੍ਬਾਨਿ.
੬੬੬. ਚਿਤ੍ਤਸਮੁਟ੍ਠਾਨਨਿਦ੍ਦੇਸੇ ਕਾਯਵਿਞ੍ਞਤ੍ਤਿ ਵਚੀਵਿਞ੍ਞਤ੍ਤੀਤਿ ਇਦਂ ਦ੍ਵਯਂ ਯਸ੍ਮਾ ਏਕਨ੍ਤਚਿਤ੍ਤਸਮੁਟ੍ਠਾਨਾਨਿ ਭੂਤਾਨਿ ਉਪਾਦਾਯ ਪਞ੍ਞਾਯਤਿ, ਤਸ੍ਮਾ ਵੁਤ੍ਤਂ. ਪਰਮਤ੍ਥਤੋ ਪਨ ਤਸ੍ਸ ਨਿਸ੍ਸਯਭੂਤਾਨਿ ਭੂਤਾਨੇਵ ਚਿਤ੍ਤਸਮੁਟ੍ਠਾਨਾਨਿ, ਤਂਨਿਸ੍ਸਿਤਤ੍ਤਾ. ਯਥਾ ਅਨਿਚ੍ਚਸ੍ਸ ਰੂਪਸ੍ਸ ਜਰਾਮਰਣਂ ਅਨਿਚ੍ਚਂ ਨਾਮ ਹੋਤਿ, ਏਵਮਿਦਮ੍ਪਿ ਚਿਤ੍ਤਸਮੁਟ੍ਠਾਨਂ ਨਾਮ ਜਾਤਂ.
੬੬੮. ਚਿਤ੍ਤਸਹਭੁਨਿਦ੍ਦੇਸੇਪਿ ਏਸੇਵ ਨਯੋ. ਯਾਵ ਚਿਤ੍ਤਂ ਤਾਵ ਪਞ੍ਞਾਯਨਤੋ ਇਦਮੇਵ ਦ੍ਵਯਂ ਵੁਤ੍ਤਂ. ਨ ਪਨੇਤਂ ਚਿਤ੍ਤੇਨ ਸਹ ਭੂਤਾਨਿ ਵਿਯ, ਚੇਤਨਾਦਯੋ ਵਿਯ ਚ ਉਪ੍ਪਜ੍ਜਤਿ.
੬੭੦. ਚਿਤ੍ਤਾਨੁਪਰਿਵਤ੍ਤਿਤਾਯਪਿ ਏਸੇਵ ਨਯੋ. ਯਾਵ ਚਿਤ੍ਤਂ ਤਾਵ ਪਞ੍ਞਾਯਨਤੋ ਏਵ ਹੇਤਂ ਦ੍ਵਯਂ ਚਿਤ੍ਤਾਨੁਪਰਿਵਤ੍ਤੀਤਿ ਵੁਤ੍ਤਂ.
੬੭੪. ਓਲ਼ਾਰਿਕਨ੍ਤਿ ਵਤ੍ਥਾਰਮ੍ਮਣਭੂਤਤ੍ਤਾ ਸਂਙ੍ਘਟ੍ਟਨਵਸੇਨ ਗਹੇਤਬ੍ਬਤੋ ਥੂਲਂ. ਵੁਤ੍ਤਵਿਪਲ੍ਲਾਸਤੋ ਸੁਖੁਮਂ ਵੇਦਿਤਬ੍ਬਂ.
੬੭੬. ਦੂਰੇਤਿ ਘਟ੍ਟਨਵਸੇਨ ਅਗ੍ਗਹੇਤਬ੍ਬਤ੍ਤਾ ਦੁਬ੍ਬਿਞ੍ਞੇਯ੍ਯਭਾਵੇਨ ਸਮੀਪੇ ਠਿਤਮ੍ਪਿ ਦੂਰੇ. ਇਤਰਂ ਪਨ ਘਟ੍ਟਨਵਸੇਨ ਗਹੇਤਬ੍ਬਤ੍ਤਾ ਸੁਵਿਞ੍ਞੇਯ੍ਯਭਾਵੇਨ ਦੂਰੇ ਠਿਤਮ੍ਪਿ ਸਨ੍ਤਿਕੇ. ਚਕ੍ਖਾਯਤਨਾਦਿਨਿਦ੍ਦੇਸਾ ਹੇਟ੍ਠਾ ਵੁਤ੍ਤਨਯੇਨੇਵ ਵਿਤ੍ਥਾਰਤੋ ਵੇਦਿਤਬ੍ਬਾ. ਇਦਂ ਤਾਵ ਦੁਵਿਧੇਨ ਰੂਪਸਙ੍ਗਹੇ ਵਿਸੇਸਮਤ੍ਤਂ. ਤਿਵਿਧਸਙ੍ਗਹੋ ਉਤ੍ਤਾਨਤ੍ਥੋਵ.
ਚਤੁਕ੍ਕਨਿਦ੍ਦੇਸਵਣ੍ਣਨਾ
੯੬੬. ਚਤੁਬ੍ਬਿਧਸਙ੍ਗਹਾਵਸਾਨੇ ਦਿਟ੍ਠਾਦੀਨਂ ਪਚ੍ਛਿਮਪਦਸ੍ਸ ਭੇਦਾਭਾਵੇਨ ਆਦਿਤੋ ਪਟ੍ਠਾਯ ਪੁਚ੍ਛਂ ਅਕਤ੍ਵਾਵ ਰੂਪਾਯਤਨਂ ਦਿਟ੍ਠਂ ਸਦ੍ਦਾਯਤਨਂ ਸੁਤਨ੍ਤਿਆਦਿ ਵੁਤ੍ਤਂ. ਤਤ੍ਥ ਰੂਪਾਯਤਨਂ ਚਕ੍ਖੁਨਾ ਓਲੋਕੇਤ੍ਵਾ ਦਕ੍ਖਿਤੁਂ ਸਕ੍ਕਾਤਿ ‘ਦਿਟ੍ਠਂ’ ਨਾਮ ਜਾਤਂ. ਸਦ੍ਦਾਯਤਨਂ ਸੋਤੇਨ ਸੁਤ੍ਵਾ ਜਾਨਿਤੁਂ ਸਕ੍ਕਾਤਿ ‘ਸੁਤਂ’ ਨਾਮ ਜਾਤਂ. ਗਨ੍ਧਾਯਤਨਾਦਿਤ੍ਤਯਂ ਘਾਨਜਿਵ੍ਹਾਕਾਯੇਹਿ ਪਤ੍ਵਾ ਗਹੇਤਬ੍ਬਤੋ ਮੁਨਿਤ੍ਵਾ ਜਾਨਿਤਬ੍ਬਟ੍ਠੇਨ ਮੁਤਂ ਨਾਮ ਜਾਤਂ. ਫੁਸਿਤ੍ਵਾ ਵਿਞ੍ਞਾਣੁਪ੍ਪਤ੍ਤਿਕਾਰਣਤੋ ‘ਮੁਤਂ’ ਨਾਮਾਤਿਪਿ ਵੁਤ੍ਤਂ. ਸਬ੍ਬਮੇਵ ਪਨ ਰੂਪਂ ਮਨੋਵਿਞ੍ਞਾਣੇਨ ਜਾਨਿਤਬ੍ਬਨ੍ਤਿ ਮਨਸਾ ਵਿਞ੍ਞਾਤਂ ਨਾਮ ਜਾਤਂ.
ਪਞ੍ਚਕਨਿਦ੍ਦੇਸਵਣ੍ਣਨਾ
੯੬੭. ਪਞ੍ਚਵਿਧਸਙ੍ਗਹਨਿਦ੍ਦੇਸੇ ਕਕ੍ਖਲ਼ਨ੍ਤਿ ਥਦ੍ਧਂ. ਖਰਮੇਵ ਖਰਗਤਂ, ਫਰੁਸਨ੍ਤਿ ਅਤ੍ਥੋ. ਇਤਰੇ ਦ੍ਵੇਪਿ ਸਭਾਵਨਿਦ੍ਦੇਸਾ ਏਵ. ਅਜ੍ਝਤ੍ਤਨ੍ਤਿ ਨਿਯਕਜ੍ਝਤ੍ਤਂ. ਬਹਿਦ੍ਧਾਤਿ ਬਾਹਿਰਂ. ਉਪਾਦਿਣ੍ਣਨ੍ਤਿ ਨ ਕਮ੍ਮਸਮੁਟ੍ਠਾਨਮੇਵ. ਅਵਿਸੇਸੇਨ ਪਨ ਸਰੀਰਟ੍ਠਕਸ੍ਸੇਤਂ ਗਹਣਂ. ਸਰੀਰਟ੍ਠਕਞ੍ਹਿ ਉਪਾਦਿਣ੍ਣਂ ਵਾ ਹੋਤੁ ਅਨੁਪਾਦਿਣ੍ਣਂ ਵਾ, ਆਦਿਨ੍ਨਗਹਿਤਪਰਾਮਟ੍ਠਵਸੇਨ ਸਬ੍ਬਂ ਉਪਾਦਿਣ੍ਣਮੇਵ ਨਾਮ.
੯੬੯. ਤੇਜੋਗਤਨ੍ਤਿ ਸਬ੍ਬਤੇਜੇਸੁ ਗਤਂ ਉਣ੍ਹਤ੍ਤਲਕ੍ਖਣਂ, ਤੇਜੋ ਏਵ ਵਾ ਤੇਜੋਭਾਵਂ ਗਤਨ੍ਤਿ ‘ਤੇਜੋਗਤਂ’. ਉਸ੍ਮਾਤਿ ਉਸ੍ਮਾਕਾਰੋ. ਉਸ੍ਮਾਗਤਨ੍ਤਿ ਉਸ੍ਮਾਭਾਵਂ ਗਤਂ. ਉਸ੍ਮਾਕਾਰਸ੍ਸੇਵੇਤਂ ਨਾਮਂ. ਉਸੁਮਨ੍ਤਿ ਬਲਵਉਸ੍ਮਾ. ਉਸੁਮਮੇਵ ਉਸੁਮਭਾਵਂ ਗਤਨ੍ਤਿ ਉਸੁਮਗਤਂ.
੯੭੦. ਵਾਯਨਕਵਸੇਨ ਵਾਯੋ. ਵਾਯੋਵ ਵਾਯੋਭਾਵਂ ਗਤਤ੍ਤਾ ਵਾਯੋਗਤਂ. ਥਮ੍ਭਿਤਤ੍ਤਨ੍ਤਿ ਉਪ੍ਪਲਨਾਲ਼ਤਚਾਦੀਨਂ ਵਿਯ ਵਾਤਪੁਣ੍ਣਾਨਂ ਥਮ੍ਭਿਤਭਾਵੋ ਰੂਪਸ੍ਸ.
ਛਕ੍ਕਾਦਿਨਿਦ੍ਦੇਸਵਣ੍ਣਨਾ
੯੭੨-੪. ਛਬ੍ਬਿਧਾਦਿਸਙ੍ਗਹਾਨਂ ਤਿਣ੍ਣਂ ਓਸਾਨਪਦਸ੍ਸ ਭੇਦਾਭਾਵਤੋ ਆਦਿਤੋ ਪਟ੍ਠਾਯ ਅਪੁਚ੍ਛਿਤ੍ਵਾਵ ਨਿਦ੍ਦੇਸੋ ਕਤੋ. ਤਤ੍ਥ ਚਕ੍ਖੁਵਿਞ੍ਞਾਣੇਨ ਜਾਨਿਤੁਂ ਸਕ੍ਕਾਤਿ ਚਕ੍ਖੁਵਿਞ੍ਞੇਯ੍ਯਂ…ਪੇ… ਮਨੋਵਿਞ੍ਞਾਣੇਨ ਜਾਨਿਤੁਂ ਸਕ੍ਕਾਤਿ ਮਨੋਵਿਞ੍ਞੇਯ੍ਯਂ. ਤਿਵਿਧਾਯ ਮਨੋਧਾਤੁਯਾ ਜਾਨਿਤੁਂ ਸਕ੍ਕਾਤਿ ਮਨੋਧਾਤੁਵਿਞ੍ਞੇਯ੍ਯਂ ਸਬ੍ਬਂ ਰੂਪਨ੍ਤਿ ਏਤ੍ਥ ਯਸ੍ਮਾ ਏਕਂ ਰੂਪਮ੍ਪਿ ਮਨੋਵਿਞ੍ਞਾਣਧਾਤੁਯਾ ਅਜਾਨਿਤਬ੍ਬਂ ਨਾਮ ਨਤ੍ਥਿ, ਤਸ੍ਮਾ ‘ਸਬ੍ਬਂ ਰੂਪ’ਨ੍ਤਿ ਵੁਤ੍ਤਂ. ਸਮ੍ਮਾਸਮ੍ਬੁਦ੍ਧੇਨ ਹਿ ਅਭਿਧਮ੍ਮਂ ਪਤ੍ਵਾ ਨਯਂ ਕਾਤੁਂ ਯੁਤ੍ਤਟ੍ਠਾਨੇ ਨਯੋ ਅਕਤੋ ਨਾਮ ਨਤ੍ਥਿ. ਇਦਞ੍ਚ ਏਕਰੂਪਸ੍ਸਾਪਿ ਮਨੋਵਿਞ੍ਞਾਣਧਾਤੁਯਾ ਅਜਾਨਿਤਬ੍ਬਸ੍ਸ ਅਭਾਵੇਨ ਨਯਂ ਕਾਤੁਂ ਯੁਤ੍ਤਟ੍ਠਾਨਂ ਨਾਮ, ਤਸ੍ਮਾ ਨਯਂ ਕਰੋਨ੍ਤੋ ‘ਸਬ੍ਬਂ ਰੂਪ’ਨ੍ਤਿ ਆਹ.
੯੭੪. ਸੁਖਸਮ੍ਫਸ੍ਸੋਤਿ ਸੁਖਵੇਦਨਾਪਟਿਲਾਭਪਚ੍ਚਯੋ. ਦੁਕ੍ਖਸਮ੍ਫਸ੍ਸੋਤਿ ਦੁਕ੍ਖਵੇਦਨਾਪਟਿਲਾਭਪਚ੍ਚਯੋ. ਇਧਾਪਿ ਫੋਟ੍ਠਬ੍ਬਾਰਮ੍ਮਣਸ੍ਸ ਸੁਖਦੁਕ੍ਖਸ੍ਸ ਸਬ੍ਭਾਵਤੋ ਅਯਂ ਨਯੋ ਦਿਨ੍ਨੋ.
ਨਵਕਾਦਿਨਿਦ੍ਦੇਸਵਣ੍ਣਨਾ
੯੭੫. ਨਵਕੇ ਪਨ ਇਨ੍ਦ੍ਰਿਯਰੂਪਸ੍ਸ ਨਾਮ ਅਤ੍ਥਿਤਾਯ ਨਯੋ ਦਿਨ੍ਨੋ. ਤਸ੍ਸੇਵ ਸਪ੍ਪਟਿਘਅਪ੍ਪਟਿਘਤਾਯ ਦਸਕੇ ਨਯੋ ਦਿਨ੍ਨੋ. ਏਕਾਦਸਕੇ ਅਡ੍ਢੇਕਾਦਸ ਆਯਤਨਾਨਿ ਵਿਭਤ੍ਤਾਨਿ. ਤੇਸਂ ਨਿਦ੍ਦੇਸਵਾਰਾ ਹੇਟ੍ਠਾ ਵੁਤ੍ਤਨਯੇਨ ਵਿਤ੍ਥਾਰਤੋ ਵੇਦਿਤਬ੍ਬਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵ.