ਧਮ੍ਮੁਦ੍ਦੇਸਵਾਰਕਥਾ
ਪਠਮਚਿਤ੍ਤਂ
੩੬੫. ਇਦਾਨਿ ਅਕੁਸਲਧਮ੍ਮਪਦਂ ਭਾਜੇਤ੍ਵਾ ਦਸ੍ਸੇਤੁਂ ਕਤਮੇ ਧਮ੍ਮਾ ਅਕੁਸਲਾਤਿਆਦਿ ਆਰਦ੍ਧਂ. ਤਤ੍ਥ ਧਮ੍ਮਵਵਤ੍ਥਾਨਾਦਿਵਾਰਪ੍ਪਭੇਦੋ ਚ ਹੇਟ੍ਠਾ ਆਗਤਾਨਂ ਪਦਾਨਂ ਅਤ੍ਥਵਿਨਿਚ੍ਛਯੋ ਚ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਤਤ੍ਥ ਤਤ੍ਥ ਪਨ ਵਿਸੇਸਮਤ੍ਤਮੇਵ ਵਣ੍ਣਯਿਸ੍ਸਾਮ. ਤਤ੍ਥ ਸਮਯਵਵਤ੍ਥਾਨੇ ਤਾਵ ਯਸ੍ਮਾ, ਕੁਸਲਸ੍ਸ ਵਿਯ, ਅਕੁਸਲਸ੍ਸ ਭੂਮਿਭੇਦੋ ਨਤ੍ਥਿ, ਤਸ੍ਮਾ ਏਕਨ੍ਤਂ ਕਾਮਾਵਚਰਮ੍ਪਿ ਸਮਾਨਂ ਏਤਂ ‘ਕਾਮਾਵਚਰ’ਨ੍ਤਿ ਨ ਵੁਤ੍ਤਂ. ਦਿਟ੍ਠਿਗਤਸਮ੍ਪਯੁਤ੍ਤਨ੍ਤਿ ਏਤ੍ਥ ਦਿਟ੍ਠਿ ਏਵ ਦਿਟ੍ਠਿਗਤਂ ‘ਗੂਥਗਤਂ ਮੁਤ੍ਤਗਤ’ਨ੍ਤਿਆਦੀਨਿ (ਅ. ਨਿ. ੯.੧੧) ਵਿਯ. ਗਨ੍ਤਬ੍ਬਾਭਾਵਤੋ ਵਾ ਦਿਟ੍ਠਿਯਾ ਗਤਮਤ੍ਤਮੇਵੇਤਨ੍ਤਿਪਿ ਦਿਟ੍ਠਿਗਤਂ. ਤੇਨ ਸਮ੍ਪਯੁਤ੍ਤਂ ਦਿਟ੍ਠਿਗਤਸਮ੍ਪਯੁਤ੍ਤਂ.
ਤਤ੍ਥ ਅਸਦ੍ਧਮ੍ਮਸਵਨਂ, ਅਕਲ੍ਯਾਣਮਿਤ੍ਤਤਾ, ਅਰਿਯਾਨਂ ਅਦਸ੍ਸਨਕਾਮਤਾਦੀਨਿ ਅਯੋਨਿਸੋ ਮਨਸਿਕਾਰੋਤਿ ਏਵਮਾਦੀਹਿ ਕਾਰਣੇਹਿ ਇਮਸ੍ਸ ਦਿਟ੍ਠਿਗਤਸਙ੍ਖਾਤਸ੍ਸ ਮਿਚ੍ਛਾਦਸ੍ਸਨਸ੍ਸ ਉਪ੍ਪਤ੍ਤਿ ਵੇਦਿਤਬ੍ਬਾ. ਯੇ ਹਿ ਏਤੇ ਦਿਟ੍ਠਿਵਾਦਪਟਿਸਂਯੁਤ੍ਤਾ ਅਸਦ੍ਧਮ੍ਮਾ ਤੇਸਂ ਬਹੁਮਾਨਪੁਬ੍ਬਙ੍ਗਮੇਨ ਅਤਿਕ੍ਕਨ੍ਤਮਜ੍ਝਤ੍ਤੇਨ ਉਪਪਰਿਕ੍ਖਾਰਹਿਤੇਨ ਸਵਨੇਨ, ਯੇ ਚ ਦਿਟ੍ਠਿਵਿਪਨ੍ਨਾ ਅਕਲ੍ਯਾਣਮਿਤ੍ਤਾ ਤਂਸਮ੍ਪਵਙ੍ਕਤਾਸਙ੍ਖਾਤਾਯ ਅਕਲ੍ਯਾਣਮਿਤ੍ਤਤਾਯ, ਬੁਦ੍ਧਾਦੀਨਂ ਅਰਿਯਾਨਞ੍ਚੇਵ ਸਪ੍ਪੁਰਿਸਾਨਞ੍ਚ ਅਦਸ੍ਸਨਕਾਮਤਾਯ ਚਤੁਸਤਿਪਟ੍ਠਾਨਾਦਿਭੇਦੇ ਅਰਿਯਧਮ੍ਮੇ ਅਕੋਵਿਦਤ੍ਤੇਨ ਪਾਤਿਮੋਕ੍ਖਸਂਵਰਇਨ੍ਦ੍ਰਿਯਸਂਵਰਸਤਿਸਂਵਰਞਾਣਸਂਵਰਪਹਾਨਸਂਵਰਪ੍ਪਭੇਦੇ ਅਰਿਯਧਮ੍ਮੇ ਚੇਵ ਸਪ੍ਪੁਰਿਸਧਮ੍ਮੇ ਚ ਸਂਵਰਭੇਦਸਙ੍ਖਾਤੇਨ ਅਵਿਨਯੇਨ ਤੇਹੇਵ ਕਾਰਣੇਹਿ ਪਰਿਭਾਵਿਤੇਨ ਅਯੋਨਿਸੋ ਮਨਸਿਕਾਰੇਨ ਕੋਤੂਹਲਮਙ੍ਗਲਾਦਿਪਸੁਤਤਾਯ ਚ ਏਤਂ ਉਪ੍ਪਜ੍ਜਤੀਤਿ ਵੇਦਿਤਬ੍ਬਂ. ਅਸਙ੍ਖਾਰਭਾਵੋ ਪਨਸ੍ਸ ਚਿਤ੍ਤਸ੍ਸ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.
ਧਮ੍ਮੁਦ੍ਦੇਸਵਾਰੇ ਫਸ੍ਸੋਤਿ ਅਕੁਸਲਚਿਤ੍ਤਸਹਜਾਤੋ ਫਸ੍ਸੋ. ਵੇਦਨਾਦੀਸੁਪਿ ਏਸੇਵ ਨਯੋ. ਇਤਿ ਅਕੁਸਲਮਤ੍ਤਮੇਵ ਏਤੇਸਂ ਪੁਰਿਮੇਹਿ ਵਿਸੇਸੋ.
ਚਿਤ੍ਤਸ੍ਸੇਕਗ੍ਗਤਾ ਹੋਤੀਤਿ ਪਾਣਾਤਿਪਾਤਾਦੀਸੁਪਿ ਅਵਿਕ੍ਖਿਤ੍ਤਭਾਵੇਨ ਚਿਤ੍ਤਸ੍ਸ ਏਕਗ੍ਗਤਾ ਹੋਤਿ. ਮਨੁਸ੍ਸਾ ਹਿ ਚਿਤ੍ਤਂ ਸਮਾਦਹਿਤ੍ਵਾ ਅਵਿਕ੍ਖਿਤ੍ਤਾ ਹੁਤ੍ਵਾ ਅਵਿਰਜ੍ਝਮਾਨਾਨਿ ਸਤ੍ਥਾਨਿ ਪਾਣਸਰੀਰੇਸੁ ਨਿਪਾਤੇਨ੍ਤਿ, ਸੁਸਮਾਹਿਤਾ ਪਰੇਸਂ ਸਨ੍ਤਕਂ ਹਰਨ੍ਤਿ, ਏਕਰਸੇਨ ਚਿਤ੍ਤੇਨ ਮਿਚ੍ਛਾਚਾਰਂ ਆਪਜ੍ਜਨ੍ਤਿ. ਏਵਂ ਅਕੁਸਲਪ੍ਪਵਤ੍ਤਿਯਮ੍ਪਿ ਚਿਤ੍ਤਸ੍ਸ ਏਕਗ੍ਗਤਾ ਹੋਤਿ.
ਮਿਚ੍ਛਾਦਿਟ੍ਠੀਤਿ ਅਯਾਥਾਵਦਿਟ੍ਠਿ, ਵਿਰਜ੍ਝਿਤ੍ਵਾ ਗਹਣਤੋ ਵਾ ਵਿਤਥਾ ਦਿਟ੍ਠਿ ਮਿਚ੍ਛਾਦਿਟ੍ਠਿ. ਅਨਤ੍ਥਾਵਹਤ੍ਤਾ ਪਣ੍ਡਿਤੇਹਿ ਜਿਗੁਚ੍ਛਿਤਾ ਦਿਟ੍ਠੀਤਿਪਿ ਮਿਚ੍ਛਾਦਿਟ੍ਠਿ. ਮਿਚ੍ਛਾਸਙ੍ਕਪ੍ਪਾਦੀਸੁਪਿ ਏਸੇਵ ਨਯੋ. ਅਪਿਚ ਮਿਚ੍ਛਾ ਪਸ੍ਸਨ੍ਤਿ ਤਾਯ, ਸਯਂ ਵਾ ਮਿਚ੍ਛਾ ਪਸ੍ਸਤਿ, ਮਿਚ੍ਛਾਦਸ੍ਸਨਮਤ੍ਤਮੇਵ ਵਾ ਏਸਾਤਿ ਮਿਚ੍ਛਾਦਿਟ੍ਠਿ. ਸਾ ਅਯੋਨਿਸੋ ਅਭਿਨਿਵੇਸਲਕ੍ਖਣਾ, ਪਰਾਮਾਸਰਸਾ, ਮਿਚ੍ਛਾਭਿਨਿਵੇਸਪਚ੍ਚੁਪਟ੍ਠਾਨਾ, ਅਰਿਯਾਨਂ ਅਦਸ੍ਸਨਕਾਮਤਾਦਿਪਦਟ੍ਠਾਨਾ; ਪਰਮਂ ਵਜ੍ਜਨ੍ਤਿ ਦਟ੍ਠਬ੍ਬਾ. ਮਿਚ੍ਛਾਸਙ੍ਕਪ੍ਪਾਦੀਸੁ ‘ਮਿਚ੍ਛਾ’ਤਿ ਪਦਮਤ੍ਤਮੇਵ ਵਿਸੇਸੋ. ਸੇਸਂ ਕੁਸਲਾਧਿਕਾਰੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
ਅਹਿਰਿਕਬਲਂ ਅਨੋਤ੍ਤਪ੍ਪਬਲਨ੍ਤਿ ਏਤ੍ਥ ਬਲਤ੍ਥੋ ਨਿਦ੍ਦੇਸਵਾਰੇ ਆਵਿ ਭਵਿਸ੍ਸਤਿ. ਇਤਰੇਸੁ ਪਨ – ਨ ਹਿਰਿਯਤੀਤਿ ਅਹਿਰਿਕੋ. ਅਹਿਰਿਕਸ੍ਸ ਭਾਵੋ ਅਹਿਰਿਕਂ. ਨ ਓਤ੍ਤਪ੍ਪਂ ਅਨੋਤ੍ਤਪ੍ਪਂ. ਤੇਸੁ ਅਹਿਰਿਕਂ ਕਾਯਦੁਚ੍ਚਰਿਤਾਦੀਹਿ ਅਜਿਗੁਚ੍ਛਨਲਕ੍ਖਣਂ, ਅਲਜ੍ਜਾਲਕ੍ਖਣਂ ਵਾ. ਅਨੋਤ੍ਤਪ੍ਪਂ ਤੇਹੇਵ ਅਸਾਰਜ੍ਜਨਲਕ੍ਖਣਂ ਅਨੁਤ੍ਤਾਸਨਲਕ੍ਖਣਂ ਵਾ. ਅਹਿਰਿਕਮੇਵ ਬਲਂ ਅਹਿਰਿਕਬਲਂ. ਅਨੋਤ੍ਤਪ੍ਪਮੇਵ ਬਲਂ ਅਨੋਤ੍ਤਪ੍ਪਬਲਂ. ਅਯਮੇਤ੍ਥ ਸਙ੍ਖੇਪਤ੍ਥੋ. ਵਿਤ੍ਥਾਰੋ ਪਨ ਹੇਟ੍ਠਾ ਵੁਤ੍ਤਪਟਿਪਕ੍ਖਵਸੇਨ ਵੇਦਿਤਬ੍ਬੋ.
ਲੁਬ੍ਭਨ੍ਤਿ ਤੇਨ, ਸਯਂ ਵਾ ਲੁਬ੍ਭਤਿ, ਲੁਬ੍ਭਨਮਤ੍ਤਮੇਵ ਵਾ ਤਨ੍ਤਿ ਲੋਭੋ. ਮੁਯ੍ਹਨ੍ਤਿ ਤੇਨ, ਸਯਂ ਵਾ ਮੁਯ੍ਹਤਿ, ਮੁਯ੍ਹਨਮਤ੍ਤਮੇਵ ਵਾ ਤਨ੍ਤਿ ਮੋਹੋ. ਤੇਸੁ ਲੋਭੋ ਆਰਮ੍ਮਣਗ੍ਗਹਣਲਕ੍ਖਣੋ ਮਕ੍ਕਟਾਲੇਪੋ ਵਿਯ, ਅਭਿਸਙ੍ਗਰਸੋ ਤਤ੍ਤਕਪਾਲੇ ਖਿਤ੍ਤਮਂਸਪੇਸਿ ਵਿਯ, ਅਪਰਿਚ੍ਚਾਗਪਚ੍ਚੁਪਟ੍ਠਾਨੋ ਤੇਲਞ੍ਜਨਰਾਗੋ ਵਿਯ, ਸਂਯੋਜਨਿਯਧਮ੍ਮੇਸੁ ਅਸ੍ਸਾਦਦਸ੍ਸਨਪਦਟ੍ਠਾਨੋ. ਸੋ ਤਣ੍ਹਾਨਦੀਭਾਵੇਨ ਵਡ੍ਢਮਾਨੋ, ਸੀਘਸੋਤਾ ਨਦੀ ਵਿਯ ਮਹਾਸਮੁਦ੍ਦਂ, ਅਪਾਯਮੇਵ ਗਹੇਤ੍ਵਾ ਗਚ੍ਛਤੀਤਿ ਦਟ੍ਠਬ੍ਬੋ.
ਮੋਹੋ ਚਿਤ੍ਤਸ੍ਸ ਅਨ੍ਧਭਾਵਲਕ੍ਖਣੋ ਅਞ੍ਞਾਣਲਕ੍ਖਣੋ ਵਾ, ਅਸਮ੍ਪਟਿਵੇਧਰਸੋ ਆਰਮ੍ਮਣਸਭਾਵਚ੍ਛਾਦਨਰਸੋ ਵਾ, ਅਸਮ੍ਮਾਪਟਿਪਤ੍ਤਿਪਚ੍ਚੁਪਟ੍ਠਾਨੋ ਅਨ੍ਧਕਾਰਪਚ੍ਚੁਪਟ੍ਠਾਨੋ ਵਾ, ਅਯੋਨਿਸੋਮਨਸਿਕਾਰਪਦਟ੍ਠਾਨੋ. ਸਬ੍ਬਾਕੁਸਲਾਨਂ ਮੂਲਨ੍ਤਿ ਦਟ੍ਠਬ੍ਬੋ.
ਅਭਿਜ੍ਝਾਯਨ੍ਤਿ ਤਾਯ, ਸਯਂ ਵਾ ਅਭਿਜ੍ਝਾਯਤਿ, ਅਭਿਜ੍ਝਾਯਨਮਤ੍ਤਮੇਵ ਵਾ ਏਸਾਤਿ ਅਭਿਜ੍ਝਾ. ਸਾ ਪਰਸਮ੍ਪਤ੍ਤੀਨਂ ਸਕਕਰਣਇਚ੍ਛਾਲਕ੍ਖਣਾ, ਤੇਨਾਕਾਰੇਨ ਏਸਨਭਾਵਰਸਾ, ਪਰਸਮ੍ਪਤ੍ਤਿ-ਅਭਿਮੁਖਭਾਵਪਚ੍ਚੁਪਟ੍ਠਾਨਾ, ਪਰਸਮ੍ਪਤ੍ਤੀਸੁ ਅਭਿਰਤਿਪਦਟ੍ਠਾਨਾ. ਪਰਸਮ੍ਪਤ੍ਤਿਅਭਿਮੁਖਾ ਏਵ ਹਿ ਸਾ ਉਪਟ੍ਠਹਤਿ. ਤਾਸੁ ਚ ਅਭਿਰਤਿਯਾ ਸਤਿ ਪਵਤ੍ਤਤਿ, ਪਰਸਮ੍ਪਤ੍ਤੀਸੁ ਚੇਤਸੋ ਹਤ੍ਥਪ੍ਪਸਾਰੋਵਿਯਾਤਿ ਦਟ੍ਠਬ੍ਬਾ.
ਸਮਥੋ ਹੋਤੀਤਿਆਦੀਸੁ ਅਞ੍ਞੇਸੁ ਕਿਚ੍ਚੇਸੁ ਵਿਕ੍ਖੇਪਸਮਨਤੋ ਸਮਥੋ. ਅਕੁਸਲਪ੍ਪਵਤ੍ਤਿਯਂ ਚਿਤ੍ਤਂ ਪਗ੍ਗਣ੍ਹਾਤੀਤਿ ਪਗ੍ਗਾਹੋ. ਨ ਵਿਕ੍ਖਿਪਤੀਤਿ ਅਵਿਕ੍ਖੇਪੋ.
ਇਮਸ੍ਮਿਂ ਚਿਤ੍ਤੇ ਸਦ੍ਧਾ, ਸਤਿ, ਪਞ੍ਞਾ, ਛ ਯੁਗਲ਼ਕਾਨੀਤਿ ਇਮੇ ਧਮ੍ਮਾ ਨ ਗਹਿਤਾ. ਕਸ੍ਮਾ? ਅਸ੍ਸਦ੍ਧਿਯਚਿਤ੍ਤੇ ਪਸਾਦੋ ਨਾਮ ਨਤ੍ਥਿ. ਤਸ੍ਮਾ ਤਾਵ ਸਦ੍ਧਾ ਨ ਗਹਿਤਾ. ਕਿਂ ਪਨ ਦਿਟ੍ਠਿਗਤਿਕਾ ਅਤ੍ਤਨੋ ਅਤ੍ਤਨੋ ਸਤ੍ਥਾਰਾਨਂ ਨ ਸਦ੍ਦਹਨ੍ਤੀਤਿ? ਸਦ੍ਦਹਨ੍ਤਿ. ਸਾ ਪਨ ਸਦ੍ਧਾ ਨਾਮ ਨ ਹੋਤਿ, ਵਚਨਸਮ੍ਪਟਿਚ੍ਛਨਮਤ੍ਤਮੇਵੇਤਂ. ਅਤ੍ਥਤੋ ਅਨੁਪਪਰਿਕ੍ਖਾ ਵਾ ਹੋਤਿ, ਦਿਟ੍ਠਿ ਵਾ. ਅਸਤਿਯਚਿਤ੍ਤੇ ਪਨ ਸਤਿ ਨਤ੍ਥੀਤਿ ਨ ਗਹਿਤਾ. ਕਿਂ ਦਿਟ੍ਠਿਗਤਿਕਾ ਅਤ੍ਤਨਾ ਕਤਕਮ੍ਮਂ ਨ ਸਰਨ੍ਤੀਤਿ? ਸਰਨ੍ਤਿ. ਸਾ ਪਨ ਸਤਿ ਨਾਮ ਨ ਹੋਤਿ. ਕੇਵਲਂ ਤੇਨਾਕਾਰੇਨ ਅਕੁਸਲਚਿਤ੍ਤਪ੍ਪਵਤ੍ਤਿ. ਤਸ੍ਮਾ ਸਤਿ ਨ ਗਹਿਤਾ. ਅਥ ਕਸ੍ਮਾ ‘‘ਮਿਚ੍ਛਾਸਤੀ’’ਤਿ (ਦੀ. ਨਿ. ੩.੩੩੩; ਸਂ. ਨਿ. ੫.੧) ਸੁਤ੍ਤਨ੍ਤੇ ਵੁਤ੍ਤਾ? ਸਾ ਪਨ ਅਕੁਸਲਕ੍ਖਨ੍ਧਾਨਂ ਸਤਿਵਿਰਹਿਤਤ੍ਤਾ ਸਤਿਪਟਿਪਕ੍ਖਤ੍ਤਾ ਚ ਮਿਚ੍ਛਾਮਗ੍ਗਮਿਚ੍ਛਤ੍ਤਾਨਂ ਪੂਰਣਤ੍ਥਂ ਤਤ੍ਥ ਪਰਿਯਾਯੇਨ ਦੇਸਨਾ ਕਤਾ. ਨਿਪ੍ਪਰਿਯਾਯੇਨ ਪਨੇਸਾ ਨਤ੍ਥਿ. ਤਸ੍ਮਾ ਨ ਗਹਿਤਾ. ਅਨ੍ਧਬਾਲਚਿਤ੍ਤੇ ਪਨ ਪਞ੍ਞਾ ਨਤ੍ਥੀਤਿ ਨ ਗਹਿਤਾ. ਕਿਂ ਦਿਟ੍ਠਿਗਤਿਕਾਨਂ ਵਞ੍ਚਨਾਪਞ੍ਞਾ ਨਤ੍ਥੀਤਿ? ਅਤ੍ਥਿ. ਨ ਪਨੇਸਾ ਪਞ੍ਞਾ, ਮਾਯਾ ਨਾਮੇਸਾ ਹੋਤਿ. ਸਾ ਅਤ੍ਥਤੋ ਤਣ੍ਹਾਵ. ਇਦਂ ਪਨ ਚਿਤ੍ਤਂ ਸਦਰਥਂ ਗਰੁਕਂ ਭਾਰਿਯਂ ਕਕ੍ਖਲ਼ਂ ਥਦ੍ਧਂ ਅਕਮ੍ਮਞ੍ਞਂ ਗਿਲਾਨਂ ਵਙ੍ਕਂ ਕੁਟਿਲਂ. ਤਸ੍ਮਾ ਪਸ੍ਸਦ੍ਧਾਦੀਨਿ ਛ ਯੁਗਲ਼ਕਾਨਿ ਨ ਗਹਿਤਾਨਿ.
ਏਤ੍ਤਾਵਤਾ ਪਦਪਟਿਪਾਟਿਯਾ ਚਿਤ੍ਤਙ੍ਗਵਸੇਨ ਪਾਲ਼ਿਆਰੁਲ਼੍ਹਾਨਿ ਦ੍ਵਤ੍ਤਿਂਸ ਪਦਾਨਿ ਦਸ੍ਸੇਤ੍ਵਾ ਇਦਾਨਿ ਯੇਵਾਪਨਕਧਮ੍ਮੇ ਦਸ੍ਸੇਤੁਂ ਯੇ ਵਾ ਪਨ ਤਸ੍ਮਿਂ ਸਮਯੇਤਿਆਦਿਮਾਹ. ਤਤ੍ਥ ਸਬ੍ਬੇਸੁਪਿ ਅਕੁਸਲਚਿਤ੍ਤੇਸੁ ਛਨ੍ਦੋ ਅਧਿਮੋਕ੍ਖੋ ਮਨਸਿਕਾਰੋ ਮਾਨੋ ਇਸ੍ਸਾ ਮਚ੍ਛਰਿਯਂ ਥਿਨਂ ਮਿਦ੍ਧਂ ਉਦ੍ਧਚ੍ਚਂ ਕੁਕ੍ਕੁਚ੍ਚਨ੍ਤਿ ਇਮੇ ਦਸੇਵ ਯੇਵਾਪਨਕਾ ਹੋਨ੍ਤਿ ਧਮ੍ਮਾ, ਸੁਤ੍ਤਾਗਤਾ, ਸੁਤ੍ਤਪਦੇਸੁ ਦਿਸ੍ਸਰੇਤਿ ਵੁਤ੍ਤਾ. ਇਮਸ੍ਮਿਂ ਪਨ ਚਿਤ੍ਤੇ ਛਨ੍ਦੋ ਅਧਿਮੋਕ੍ਖੋ ਮਨਸਿਕਾਰੋ ਉਦ੍ਧਚ੍ਚਨ੍ਤਿ ਇਮੇ ਅਪਣ੍ਣਕਙ੍ਗਸਙ੍ਖਾਤਾ ਚਤ੍ਤਾਰੋਵ ਯੇਵਾਪਨਕਾ ਹੋਨ੍ਤਿ.
ਤਤ੍ਥ ਛਨ੍ਦਾਦਯੋ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਕੇਵਲਞ੍ਹਿ ਤੇ ਕੁਸਲਾ, ਇਮੇ ਅਕੁਸਲਾ. ਇਤਰਂ ਪਨ ਉਦ੍ਧਤਸ੍ਸ ਭਾਵੋ ‘ਉਦ੍ਧਚ੍ਚਂ’. ਤਂ ਚੇਤਸੋ ਅਵੂਪਸਮਲਕ੍ਖਣਂ ਵਾਤਾਭਿਘਾਤਚਲਜਲਂ ਵਿਯ, ਅਨਵਟ੍ਠਾਨਰਸਂ ਵਾਤਾਭਿਘਾਤਚਲਧਜਪਟਾਕਾ ਵਿਯ, ਭਨ੍ਤਤ੍ਤਪਚ੍ਚੁਪਟ੍ਠਾਨਂ ਪਾਸਾਣਾਭਿਘਾਤਸਮੁਦ੍ਧਤਭਸ੍ਮਾ ਵਿਯ, ਚੇਤਸੋ ਅਵੂਪਸਮੇ ਅਯੋਨਿਸੋਮਨਸਿਕਾਰਪਦਟ੍ਠਾਨਂ. ਚਿਤ੍ਤਵਿਕ੍ਖੇਪੋਤਿ ਦਟ੍ਠਬ੍ਬਂ.
ਇਤਿ ਫਸ੍ਸਾਦੀਨਿ ਦ੍ਵਤ੍ਤਿਂਸ, ਯੇਵਾਪਨਕਵਸੇਨ ਵੁਤ੍ਤਾਨਿ ਚਤ੍ਤਾਰੀਤਿ ਸਬ੍ਬਾਨਿਪਿ ਇਮਸ੍ਮਿਂ ਧਮ੍ਮੁਦ੍ਦੇਸਵਾਰੇ ਛਤ੍ਤਿਂਸ ਧਮ੍ਮਪਦਾਨਿ ਭਵਨ੍ਤਿ. ਚਤ੍ਤਾਰਿ ਅਪਣ੍ਣਕਙ੍ਗਾਨਿ ਹਾਪੇਤ੍ਵਾ ਪਾਲ਼ਿਯਂ ਆਗਤਾਨਿ ਦ੍ਵਤ੍ਤਿਂਸਮੇਵ. ਅਗ੍ਗਹਿਤਗ੍ਗਹਣੇਨ ਪਨੇਤ੍ਥ ਫਸ੍ਸਪਞ੍ਚਕਂ, ਵਿਤਕ੍ਕੋ ਵਿਚਾਰੋ ਪੀਤਿ ਚਿਤ੍ਤਸ੍ਸੇਕਗ੍ਗਤਾ ਵੀਰਿਯਿਨ੍ਦ੍ਰਿਯਂ ਜੀਵਿਤਿਨ੍ਦ੍ਰਿਯਂ ਮਿਚ੍ਛਾਦਿਟ੍ਠਿ ਅਹਿਰਿਕਂ ਅਨੋਤ੍ਤਪ੍ਪਂ ਲੋਭੋ ਮੋਹੋਤਿ ਸੋਲ਼ਸ ਧਮ੍ਮਾ ਹੋਨ੍ਤਿ.
ਤੇਸੁ ਸੋਲ਼ਸਸੁ ਸਤ੍ਤ ਧਮ੍ਮਾ ਅਵਿਭਤ੍ਤਿਕਾ ਨਵ ਸਵਿਭਤ੍ਤਿਕਾ ਹੋਨ੍ਤਿ. ਕਤਮੇ ਸਤ੍ਤ? ਫਸ੍ਸੋ ਸਞ੍ਞਾ ਚੇਤਨਾ ਵਿਚਾਰੋ ਪੀਤਿ ਜੀਵਿਤਿਨ੍ਦ੍ਰਿਯਂ ਮੋਹੋਤਿ ਇਮੇ ਸਤ੍ਤ ਅਵਿਭਤ੍ਤਿਕਾ. ਵੇਦਨਾ ਚਿਤ੍ਤਂ ਵਿਤਕ੍ਕੋ ਚਿਤ੍ਤਸ੍ਸੇਕਗ੍ਗਤਾ ਵੀਰਿਯਿਨ੍ਦ੍ਰਿਯਂ ਮਿਚ੍ਛਾਦਿਟ੍ਠਿ ਅਹਿਰਿਕਂ ਅਨੋਤ੍ਤਪ੍ਪਂ ਲੋਭੋਤਿ ਇਮੇ ਨਵ ਸਵਿਭਤ੍ਤਿਕਾ.
ਤੇਸੁ ਛ ਧਮ੍ਮਾ ਦ੍ਵੀਸੁ ਠਾਨੇਸੁ ਵਿਭਤ੍ਤਾ, ਏਕੋ ਤੀਸੁ, ਏਕੋ ਚਤੂਸੁ, ਏਕੋ ਛਸੁ. ਕਥਂ? ਚਿਤ੍ਤਂ ਵਿਤਕ੍ਕੋ ਮਿਚ੍ਛਾਦਿਟ੍ਠਿ ਅਹਿਰਿਕਂ ਅਨੋਤ੍ਤਪ੍ਪਂ ਲੋਭੋਤਿ ਇਮੇ ਛ ਦ੍ਵੀਸੁ ਠਾਨੇਸੁ ਵਿਭਤ੍ਤਾ. ਤੇਸੁ ਹਿ ਚਿਤ੍ਤਂ ਤਾਵ ਫਸ੍ਸਪਞ੍ਚਕਂ ਪਤ੍ਵਾ ਚਿਤ੍ਤਂ ਹੋਤੀਤਿ ਵੁਤ੍ਤਂ, ਇਨ੍ਦ੍ਰਿਯਾਨਿ ਪਤ੍ਵਾ ਮਨਿਨ੍ਦ੍ਰਿਯਨ੍ਤਿ. ਵਿਤਕ੍ਕੋ ਝਾਨਙ੍ਗਾਨਿ ਪਤ੍ਵਾ ਵਿਤਕ੍ਕੋ ਹੋਤੀਤਿ ਵੁਤ੍ਤੋ, ਮਗ੍ਗਙ੍ਗਾਨਿ ਪਤ੍ਵਾ ਮਿਚ੍ਛਾਸਙ੍ਕਪ੍ਪੋਤਿ. ਮਿਚ੍ਛਾਦਿਟ੍ਠਿ ਮਗ੍ਗਙ੍ਗੇਸੁਪਿ ਕਮ੍ਮਪਥੇਸੁਪਿ ਮਿਚ੍ਛਾਦਿਟ੍ਠਿਯੇਵ. ਅਹਿਰਿਕਂ ਬਲਾਨਿ ਪਤ੍ਵਾ ਅਹਿਰਿਕਬਲਂ ਹੋਤੀਤਿ ਵੁਤ੍ਤਂ, ਲੋਕਨਾਸਕਦੁਕਂ ਪਤ੍ਵਾ ਅਹਿਰਿਕਨ੍ਤਿ. ਅਨੋਤ੍ਤਪ੍ਪੇਪਿ ਏਸੇਵ ਨਯੋ. ਲੋਭੋ ਮੂਲਂ ਪਤ੍ਵਾ ਲੋਭੋ ਹੋਤੀਤਿ ਵੁਤ੍ਤੋ. ਕਮ੍ਮਪਥਂ ਪਤ੍ਵਾ ਅਭਿਜ੍ਝਾਤਿ. ਇਮੇ ਛ ਦ੍ਵੀਸੁ ਠਾਨੇਸੁ ਵਿਭਤ੍ਤਾ.
ਵੇਦਨਾ ਪਨ ਫਸ੍ਸਪਞ੍ਚਕਂ ਪਤ੍ਵਾ ਵੇਦਨਾ ਹੋਤੀਤਿ ਵੁਤ੍ਤਾ, ਝਾਨਙ੍ਗਾਨਿ ਪਤ੍ਵਾ ਸੁਖਨ੍ਤਿ, ਇਨ੍ਦ੍ਰਿਯਾਨਿ ਪਤ੍ਵਾ ਸੋਮਨਸ੍ਸਿਨ੍ਦ੍ਰਿਯਨ੍ਤਿ. ਏਵਂ ਏਕੋਵ ਧਮ੍ਮੋ ਤੀਸੁ ਠਾਨੇਸੁ ਵਿਭਤ੍ਤੋ.
ਵੀਰਿਯਂ ਪਨ ਇਨ੍ਦ੍ਰਿਯਾਨਿ ਪਤ੍ਵਾ ਵੀਰਿਯਿਨ੍ਦ੍ਰਿਯਂ ਹੋਤੀਤਿ ਵੁਤ੍ਤਂ, ਮਗ੍ਗਙ੍ਗਾਨਿ ਪਤ੍ਵਾ ਮਿਚ੍ਛਾਵਾਯਾਮੋ ਹੋਤੀਤਿ, ਬਲਾਨਿ ਪਤ੍ਵਾ ਵੀਰਿਯਬਲਨ੍ਤਿ, ਪਿਟ੍ਠਿਦੁਕਂ ਪਤ੍ਵਾ ਪਗ੍ਗਾਹੋ ਹੋਤੀਤਿ. ਏਵਂ ਅਯਂ ਏਕੋ ਧਮ੍ਮੋ ਚਤੂਸੁ ਠਾਨੇਸੁ ਵਿਭਤ੍ਤੋ.
ਸਮਾਧਿ ਪਨ ਝਾਨਙ੍ਗਾਨਿ ਪਤ੍ਵਾ ਚਿਤ੍ਤਸ੍ਸੇਕਗ੍ਗਤਾ ਹੋਤੀਤਿ ਵੁਤ੍ਤੋ, ਇਨ੍ਦ੍ਰਿਯਾਨਿ ਪਤ੍ਵਾ ਸਮਾਧਿਨ੍ਦ੍ਰਿਯਨ੍ਤਿ, ਮਗ੍ਗਙ੍ਗਾਨਿ ਪਤ੍ਵਾ ਮਿਚ੍ਛਾਸਮਾਧੀਤਿ, ਬਲਾਨਿ ਪਤ੍ਵਾ ਸਮਾਧਿਬਲਨ੍ਤਿ, ਪਿਟ੍ਠਿਦੁਕਂ ਪਤ੍ਵਾ ਦੁਤਿਯਦੁਕੇ ਏਕਕਵਸੇਨੇਵ ਸਮਥੋਤਿ, ਤਤਿਯੇ ਅਵਿਕ੍ਖੇਪੋਤਿ. ਏਵਮਯਂ ਏਕੋ ਧਮ੍ਮੋ ਛਸੁ ਠਾਨੇਸੁ ਵਿਭਤ੍ਤੋ.
ਸਬ੍ਬੇਪਿ ਪਨੇਤੇ ਧਮ੍ਮਾ ਫਸ੍ਸਪਞ੍ਚਕਵਸੇਨ ਝਾਨਙ੍ਗਵਸੇਨ ਇਨ੍ਦ੍ਰਿਯਵਸੇਨ ਮਗ੍ਗਙ੍ਗਵਸੇਨ ਬਲਵਸੇਨ ਮੂਲਵਸੇਨ ਕਮ੍ਮਪਥਵਸੇਨ ਲੋਕਨਾਸਕਵਸੇਨ ਪਿਟ੍ਠਿਦੁਕਵਸੇਨਾਤਿ ਨਵ ਰਾਸਯੋ ਹੋਨ੍ਤਿ. ਤਤ੍ਥ ਯਂ ਵਤ੍ਤਬ੍ਬਂ ਤਂ ਪਠਮਕੁਸਲਚਿਤ੍ਤਨਿਦ੍ਦੇਸੇ ਵੁਤ੍ਤਮੇਵਾਤਿ.
ਧਮ੍ਮੁਦ੍ਦੇਸਵਾਰਕਥਾ ਨਿਟ੍ਠਿਤਾ.