ਨਿਦ੍ਦੇਸਵਾਰਕਥਾ
੩੭੫. ਨਿਦ੍ਦੇਸਵਾਰੇ ਚਿਤ੍ਤਸ੍ਸੇਕਗ੍ਗਤਾਨਿਦ੍ਦੇਸੇ ਤਾਵ ਸਣ੍ਠਿਤਿ ਅਵਟ੍ਠਿਤੀਤਿ. ਇਦਂ ਦ੍ਵਯਂ ਠਿਤਿਵੇਵਚਨਮੇਵ. ਯਂ ਪਨ ਕੁਸਲਨਿਦ੍ਦੇਸੇ ‘ਆਰਮ੍ਮਣਂ ਓਗਾਹੇਤ੍ਵਾ ਅਨੁਪਵਿਸਿਤ੍ਵਾ ਤਿਟ੍ਠਤੀਤਿ ਅਵਟ੍ਠਿਤੀ’ਤਿ ਵੁਤ੍ਤਂ, ਤਂ ਇਧ ਨ ਲਬ੍ਭਤਿ. ਅਕੁਸਲਸ੍ਮਿਞ੍ਹਿ ਦੁਬ੍ਬਲਾ ਚਿਤ੍ਤਸ੍ਸੇਕਗ੍ਗਤਾਤਿ ਹੇਟ੍ਠਾ ਦੀਪਿਤਮੇਵ.
੩੮੪. ਉਦ੍ਧਚ੍ਚਵਿਚਿਕਿਚ੍ਛਾਵਸੇਨ ਪਵਤ੍ਤਸ੍ਸ ਵਿਸਾਹਾਰਸ੍ਸ ਪਟਿਪਕ੍ਖਤੋ ਅਵਿਸਾਹਾਰੋਤਿ ਏਵਰੂਪੋਪਿ ਅਤ੍ਥੋ ਇਧ ਨ ਲਬ੍ਭਤਿ. ਸਹਜਾਤਧਮ੍ਮੇ ਪਨ ਨ ਵਿਸਾਹਰਤੀਤਿ ਅਵਿਸਾਹਾਰੋ. ਨ ਵਿਕ੍ਖਿਪਤੀਤਿ ਅਵਿਕ੍ਖੇਪੋ. ਅਕੁਸਲਚਿਤ੍ਤੇਕਗ੍ਗਤਾਵਸੇਨ ਅਵਿਸਾਹਟਸ੍ਸ ਮਾਨਸਸ੍ਸ ਭਾਵੋ ਅਵਿਸਾਹਟਮਾਨਸਤਾ. ਸਹਜਾਤਧਮ੍ਮੇਸੁ ਨ ਕਮ੍ਪਤੀਤਿ ਸਮਾਧਿਬਲਂ. ਅਯਾਥਾਵਸਮਾਧਾਨਤੋ ਮਿਚ੍ਛਾਸਮਾਧੀਤਿ ਏਵਮਿਧ ਅਤ੍ਥੋ ਦਟ੍ਠਬ੍ਬੋ.
੩੮੫. ਵੀਰਿਯਿਨ੍ਦ੍ਰਿਯਨਿਦ੍ਦੇਸੇ ਯੋ ਹੇਟ੍ਠਾ ‘ਨਿਕ੍ਕਮੋ ਚੇਸੋ ਕਾਮਾਨਂ ਪਨੁਦਨਾਯਾ’ਤਿਆਦਿ ਨਯੋ ਵੁਤ੍ਤੋ, ਸੋ ਇਧ ਨ ਲਬ੍ਭਤਿ. ਸਹਜਾਤਧਮ੍ਮੇਸੁ ਅਕਮ੍ਪਨਟ੍ਠੇਨੇਵ ਵੀਰਿਯਬਲਂ ਵੇਦਿਤਬ੍ਬਂ.
੩੮੬. ਮਿਚ੍ਛਾਦਿਟ੍ਠਿਨਿਦ੍ਦੇਸੇ ਅਯਾਥਾਵਦਸ੍ਸਨਟ੍ਠੇਨ ਮਿਚ੍ਛਾਦਿਟ੍ਠਿ. ਦਿਟ੍ਠੀਸੁ ਗਤਂ ਇਦਂ ਦਸ੍ਸਨਂ, ਦ੍ਵਾਸਟ੍ਠਿਦਿਟ੍ਠਿਅਨ੍ਤੋਗਤਤ੍ਤਾਤਿ ਦਿਟ੍ਠਿਗਤਂ. ਹੇਟ੍ਠਾਪਿਸ੍ਸ ਅਤ੍ਥੋ ਵੁਤ੍ਤੋਯੇਵ. ਦਿਟ੍ਠਿਯੇਵ ਦੁਰਤਿਕ੍ਕਮਨਟ੍ਠੇਨ ਦਿਟ੍ਠਿਗਹਨਂ, ਤਿਣਗਹਨਵਨਗਹਨਪਬ੍ਬਤਗਹਨਾਨਿ ਵਿਯ. ਦਿਟ੍ਠਿਯੇਵ ਸਾਸਙ੍ਕਸਪ੍ਪਟਿਭਯਟ੍ਠੇਨ ਦਿਟ੍ਠਿਕਨ੍ਤਾਰੋ, ਚੋਰਕਨ੍ਤਾਰਵਾਲ਼ਕਨ੍ਤਾਰਮਰੁਕਨ੍ਤਾਰਨਿਰੁਦਕਕਨ੍ਤਾਰਦੁਬ੍ਭਿਕ੍ਖਕਨ੍ਤਾਰਾ ਵਿਯ. ਸਮ੍ਮਾਦਿਟ੍ਠਿਯਾ ਵਿਨਿਵਿਜ੍ਝਨਟ੍ਠੇਨ ਵਿਲੋਮਨਟ੍ਠੇਨ ਚ ਦਿਟ੍ਠਿਵਿਸੂਕਾਯਿਕਂ. ਮਿਚ੍ਛਾਦਸ੍ਸਨਞ੍ਹਿ ਉਪ੍ਪਜ੍ਜਮਾਨਂ ਸਮ੍ਮਾਦਸ੍ਸਨਂ ਵਿਨਿਵਿਜ੍ਝਤਿ ਚੇਵ ਵਿਲੋਮੇਤਿ ਚ. ਕਦਾਚਿ ਸਸ੍ਸਤਸ੍ਸ ਕਦਾਚਿ ਉਚ੍ਛੇਦਸ੍ਸ ਗਹਣਤੋ ਦਿਟ੍ਠਿਯਾ ਵਿਰੂਪਂ ਫਨ੍ਦਿਤਨ੍ਤਿ ਦਿਟ੍ਠਿਵਿਪ੍ਫਨ੍ਦਿਤਂ. ਦਿਟ੍ਠਿਗਤਿਕੋ ਹਿ ਏਕਸ੍ਮਿਂ ਪਤਿਟ੍ਠਾਤੁਂ ਨ ਸਕ੍ਕੋਤਿ, ਕਦਾਚਿ ਸਸ੍ਸਤਂ ਅਨੁਪਤਤਿ ਕਦਾਚਿ ਉਚ੍ਛੇਦਂ. ਦਿਟ੍ਠਿਯੇਵ ਬਨ੍ਧਨਟ੍ਠੇਨ ਸਂਯੋਜਨਨ੍ਤਿ ਦਿਟ੍ਠਿਸਂਯੋਜਨਂ.
ਸੁਸੁਮਾਰਾਦਯੋ ਵਿਯ ਪੁਰਿਸਂ, ਆਰਮ੍ਮਣਂ ਦਲ਼੍ਹਂ ਗਣ੍ਹਾਤੀਤਿ ਗਾਹੋ. ਪਤਿਟ੍ਠਹਨਤੋ ਪਤਿਟ੍ਠਾਹੋ. ਅਯਞ੍ਹਿ ਬਲਵਪ੍ਪਵਤ੍ਤਿਭਾਵੇਨ ਪਤਿਟ੍ਠਹਿਤ੍ਵਾ ਗਣ੍ਹਾਤਿ. ਨਿਚ੍ਚਾਦਿਵਸੇਨ ਅਭਿਨਿਵਿਸਤੀਤਿ ਅਭਿਨਿਵੇਸੋ. ਧਮ੍ਮਸਭਾਵਂ ਅਤਿਕ੍ਕਮਿਤ੍ਵਾ ਨਿਚ੍ਚਾਦਿਵਸੇਨ ਪਰਤੋ ਆਮਸਤੀਤਿ ਪਰਾਮਾਸੋ. ਅਨਤ੍ਥਾਵਹਤ੍ਤਾ ਕੁਚ੍ਛਿਤੋ ਮਗ੍ਗੋ, ਕੁਚ੍ਛਿਤਾਨਂ ਵਾ ਅਪਾਯਾਨਂ ਮਗ੍ਗੋਤਿ ਕੁਮ੍ਮਗ੍ਗੋ. ਅਯਾਥਾਵਪਥਤੋ ਮਿਚ੍ਛਾਪਥੋ. ਯਥਾ ਹਿ ਦਿਸਾਮੂਲ਼੍ਹੇਨ ਅਯਂ ਅਸੁਕਗਾਮਸ੍ਸ ਨਾਮ ਪਥੋਤਿ ਗਹਿਤੋਪਿ ਤਂ ਗਾਮਂ ਨ ਸਮ੍ਪਾਪੇਤਿ, ਏਵਂ ਦਿਟ੍ਠਿਗਤਿਕੇਨ ਸੁਗਤਿਪਥੋਤਿ ਗਹਿਤਾਪਿ ਦਿਟ੍ਠਿ ਸੁਗਤਿਂ ਨ ਪਾਪੇਤੀਤਿ ਅਯਾਥਾਵਪਥਤੋ, ਮਿਚ੍ਛਾਪਥੋ. ਮਿਚ੍ਛਾਸਭਾਵਤੋ ਮਿਚ੍ਛਤ੍ਤਂ. ਤਤ੍ਥੇਵ ਪਰਿਬ੍ਭਮਨਤੋ ਤਰਨ੍ਤਿ ਏਤ੍ਥ ਬਾਲਾਤਿ ਤਿਤ੍ਥਂ. ਤਿਤ੍ਥਞ੍ਚ ਤਂ ਅਨਤ੍ਥਾਨਞ੍ਚ ਆਯਤਨਨ੍ਤਿ ਤਿਤ੍ਥਾਯਤਨਂ. ਤਿਤ੍ਥਿਯਾਨਂ ਵਾ ਸਞ੍ਜਾਤਿਦੇਸਟ੍ਠੇਨ ਨਿਵਾਸਠਾਨਟ੍ਠੇਨ ਚ ਆਯਤਨਨ੍ਤਿਪਿ ਤਿਤ੍ਥਾਯਤਨਂ. ਵਿਪਰਿਯੇਸਭੂਤੋ ਗਾਹੋ, ਵਿਪਰਿਯੇਸਤੋ ਵਾ ਗਾਹੋਤਿ ਵਿਪਰਿਯੇਸਗ੍ਗਾਹੋ; ਵਿਪਲ੍ਲਤ੍ਥ ਗਾਹੋਤਿ ਅਤ੍ਥੋ.
੩੮੭-੩੮੮. ਅਹਿਰਿਕਾਨੋਤ੍ਤਪ੍ਪਨਿਦ੍ਦੇਸੇਸੁ ਹਿਰੋਤ੍ਤਪ੍ਪਨਿਦ੍ਦੇਸਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ. ਸਹਜਾਤਧਮ੍ਮੇਸੁ ਪਨ ਅਕਮ੍ਪਨਟ੍ਠੇਨੇਵ ਅਹਿਰਿਕਬਲਂ ਅਨੋਤ੍ਤਪ੍ਪਬਲਞ੍ਚ ਵੇਦਿਤਬ੍ਬਂ.
੩੮੯. ਲੋਭਮੋਹਨਿਦ੍ਦੇਸੇਸੁ ਲੁਬ੍ਭਤੀਤਿ ਲੋਭੋ. ਲੁਬ੍ਭਨਾਤਿ ਲੁਬ੍ਭਨਾਕਾਰੋ. ਲੋਭਸਮ੍ਪਯੁਤ੍ਤਚਿਤ੍ਤਂ, ਪੁਗ੍ਗਲੋ ਵਾ ਲੁਬ੍ਭਿਤੋ; ਲੁਬ੍ਭਿਤਸ੍ਸ ਭਾਵੋ ਲੁਬ੍ਭਿਤਤ੍ਤਂ. ਸਾਰਜ੍ਜਤੀਤਿ ਸਾਰਾਗੋ. ਸਾਰਜ੍ਜਨਾਕਾਰੋ ਸਾਰਜ੍ਜਨਾ. ਸਾਰਜ੍ਜਿਤਸ੍ਸ ਭਾਵੋ ਸਾਰਜ੍ਜਿਤਤ੍ਤਂ. ਅਭਿਜ੍ਝਾਯਨਟ੍ਠੇਨ ਅਭਿਜ੍ਝਾ. ਪੁਨ ‘ਲੋਭ’-ਵਚਨੇ ਕਾਰਣਂ ਵੁਤ੍ਤਮੇਵ. ਅਕੁਸਲਞ੍ਚ ਤਂ ਮੂਲਞ੍ਚ ਅਕੁਸਲਾਨਂ ਵਾ ਮੂਲਨ੍ਤਿ ਅਕੁਸਲਮੂਲਂ.
੩੯੦. ਞਾਣਦਸ੍ਸਨਪਟਿਪਕ੍ਖਤੋ ਅਞ੍ਞਾਣਂ ਅਦਸ੍ਸਨਂ. ਅਭਿਮੁਖੋ ਹੁਤ੍ਵਾ ਧਮ੍ਮੇਨ ਨ ਸਮੇਤਿ, ਨ ਸਮਾਗਚ੍ਛਤੀਤਿ ਅਨਭਿਸਮਯੋ. ਅਨੁਰੂਪਤੋ ਧਮ੍ਮੇ ਬੁਜ੍ਝਤੀਤਿ ਅਨੁਬੋਧੋ. ਤਪ੍ਪਟਿਪਕ੍ਖਤਾਯ ਅਨਨੁਬੋਧੋ. ਅਨਿਚ੍ਚਾਦੀਹਿ ਸਦ੍ਧਿਂ ਯੋਜੇਤ੍ਵਾ ਨ ਬੁਜ੍ਝਤੀਤਿ ਅਸਮ੍ਬੋਧੋ. ਅਸਨ੍ਤਂ ਅਸਮਞ੍ਚ ਬੁਜ੍ਝਤੀਤਿਪਿ ਅਸਮ੍ਬੋਧੋ. ਚਤੁਸਚ੍ਚਧਮ੍ਮਂ ਨਪ੍ਪਟਿਵਿਜ੍ਝਤੀਤਿ ਅਪ੍ਪਟਿਵੇਧੋ. ਰੂਪਾਦੀਸੁ ਏਕਧਮ੍ਮਮ੍ਪਿ ਅਨਿਚ੍ਚਾਦਿਸਾਮਞ੍ਞਤੋ ਨ ਸਙ੍ਗਣ੍ਹਾਤੀਤਿ ਅਸਂਗਾਹਨਾ. ਤਮੇਵ ਧਮ੍ਮਂ ਨ ਪਰਿਯੋਗਾਹਤੀਤਿ ਅਪਰਿਯੋਗਾਹਨਾ. ਨ ਸਮਂ ਪੇਕ੍ਖਤੀਤਿ ਅਸਮਪੇਕ੍ਖਣਾ. ਧਮ੍ਮਾਨਂ ਸਭਾਵਂ ਪਤਿ ਨ ਅਪੇਕ੍ਖਤੀਤਿ ਅਪਚ੍ਚਵੇਕ੍ਖਣਾ.
ਕੁਸਲਾਕੁਸਲਕਮ੍ਮੇਸੁ ਵਿਪਰੀਤਵੁਤ੍ਤਿਯਾ ਸਭਾਵਗ੍ਗਹਣਾਭਾਵੇਨ ਵਾ ਏਕਮ੍ਪਿ ਕਮ੍ਮਂ ਏਤਸ੍ਸ ਪਚ੍ਚਕ੍ਖਂ ਨਤ੍ਥਿ, ਸਯਂ ਵਾ ਕਸ੍ਸਚਿ ਕਮ੍ਮਸ੍ਸ ਪਚ੍ਚਕ੍ਖਕਰਣਂ ਨਾਮ ਨ ਹੋਤੀਤਿ ਅਪ੍ਪਚ੍ਚਕ੍ਖਕਮ੍ਮਂ. ਯਂ ਏਤਸ੍ਮਿਂ ਅਨੁਪ੍ਪਜ੍ਜਮਾਨੇ ਚਿਤ੍ਤਸਨ੍ਤਾਨਂ ਮੇਜ੍ਝਂ ਭਵੇਯ੍ਯ, ਸੁਚਿ, ਵੋਦਾਨਂ, ਤਂ ਦੁਟ੍ਠਂ ਮੇਜ੍ਝਂ ਇਮਿਨਾਤਿ ਦੁਮ੍ਮੇਜ੍ਝਂ. ਬਾਲਾਨਂ ਭਾਵੋਤਿ ਬਾਲ੍ਯਂ. ਮੁਯ੍ਹਤੀਤਿ ਮੋਹੋ. ਬਲਵਤਰੋ ਮੋਹੋ ਪਮੋਹੋ. ਸਮਨ੍ਤਤੋ ਮੁਯ੍ਹਤੀਤਿ ਸਮ੍ਮੋਹੋ. ਵਿਜ੍ਜਾਯ ਪਟਿਪਕ੍ਖਭਾਵਤੋ ਨ ਵਿਜ੍ਜਾਤਿ ਅਵਿਜ੍ਜਾ. ਓਘਯੋਗਤ੍ਥੋ ਵੁਤ੍ਤੋਯੇਵ. ਥਾਮਗਤਟ੍ਠੇਨ ਅਨੁਸੇਤੀਤਿ ਅਨੁਸਯੋ. ਚਿਤ੍ਤਂ ਪਰਿਯੁਟ੍ਠਾਤਿ, ਅਭਿਭਵਤੀਤਿ ਪਰਿਯੁਟ੍ਠਾਨਂ. ਹਿਤਗ੍ਗਹਣਾਭਾਵੇਨ ਹਿਤਾਭਿਮੁਖਂ ਗਨ੍ਤੁਂ ਨ ਸਕ੍ਕੋਤਿ, ਅਞ੍ਞਦਤ੍ਥੁ ਲਙ੍ਗਤਿਯੇਵਾਤਿ ਲਙ੍ਗੀ; ਖਞ੍ਜਤੀਤਿ ਅਤ੍ਥੋ. ਦੁਰੁਗ੍ਘਾਟਨਟ੍ਠੇਨ ਵਾ ਲਙ੍ਗੀ. ਯਥਾ ਹਿ ਮਹਾਪਲਿਘਸਙ੍ਖਾਤਾ ਲਙ੍ਗੀ ਦੁਰੁਗ੍ਘਾਟਾ ਹੋਤਿ, ਏਵਮਯਮ੍ਪਿ ਲਙ੍ਗੀ ਵਿਯਾਤਿ ਲਙ੍ਗੀ. ਸੇਸਂ ਉਤ੍ਤਾਨਤ੍ਥਮੇਵ. ਸਙ੍ਗਹਵਾਰਸੁਞ੍ਞਤਵਾਰਾਪਿ ਹੇਟ੍ਠਾ ਵੁਤ੍ਤਨਯੇਨੇਵ ਅਤ੍ਥਤੋ ਵੇਦਿਤਬ੍ਬਾਤਿ.
ਦੁਤਿਯਚਿਤ੍ਤਂ
੩੯੯. ਦੁਤਿਯਚਿਤ੍ਤੇ ਸਸਙ੍ਖਾਰੇਨਾਤਿ ਪਦਂ ਵਿਸੇਸਂ. ਤਮ੍ਪਿ ਹੇਟ੍ਠਾ ਵੁਤ੍ਤਤ੍ਥਮੇਵ. ਇਦਂ ਪਨ ਚਿਤ੍ਤਂ ਕਿਞ੍ਚਾਪਿ ਛਸੁ ਆਰਮ੍ਮਣੇਸੁ ਸੋਮਨਸ੍ਸਿਤਸ੍ਸ ਲੋਭਂ ਉਪ੍ਪਾਦੇਤ੍ਵਾ ‘ਸਤ੍ਤੋ ਸਤ੍ਤੋ’ਤਿਆਦਿਨਾ ਨਯੇਨ ਪਰਾਮਸਨ੍ਤਸ੍ਸ ਉਪ੍ਪਜ੍ਜਤਿ, ਤਥਾਪਿ ਸਸਙ੍ਖਾਰਿਕਤ੍ਤਾ ਸਪ੍ਪਯੋਗੇਨ ਸਉਪਾਯੇਨ ਉਪ੍ਪਜ੍ਜਨਤੋ – ਯਦਾ ਕੁਲਪੁਤ੍ਤੋ ਮਿਚ੍ਛਾਦਿਟ੍ਠਿਕਸ੍ਸ ਕੁਲਸ੍ਸ ਕੁਮਾਰਿਕਂ ਪਤ੍ਥੇਤਿ. ਤੇ ਚ ‘ਅਞ੍ਞਦਿਟ੍ਠਿਕਾ ਤੁਮ੍ਹੇ’ਤਿ ਕੁਮਾਰਿਕਂ ਨ ਦੇਨ੍ਤਿ. ਅਥਞ੍ਞੇ ਞਾਤਕਾ ‘ਯਂ ਤੁਮ੍ਹੇ ਕਰੋਥ ਤਮੇਵਾਯਂ ਕਰਿਸ੍ਸਤੀ’ਤਿ ਦਾਪੇਨ੍ਤਿ. ਸੋ ਤੇਹਿ ਸਦ੍ਧਿਂ ਤਿਤ੍ਥਿਯੇ ਉਪਸਙ੍ਕਮਤਿ. ਆਦਿਤੋਵ ਵੇਮਤਿਕੋ ਹੋਤਿ. ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਏਤੇਸਂ ਕਿਰਿਯਾ ਮਨਾਪਾਤਿ ਲਦ੍ਧਿਂ ਰੋਚੇਤਿ, ਦਿਟ੍ਠਿਂ ਗਣ੍ਹਾਤਿ – ਏਵਰੂਪੇ ਕਾਲੇ ਇਦਂ ਲਬ੍ਭਤੀਤਿ ਵੇਦਿਤਬ੍ਬਂ.
ਯੇਵਾਪਨਕੇਸੁ ਪਨੇਤ੍ਥ ਥਿਨਮਿਦ੍ਧਂ ਅਧਿਕਂ. ਤਤ੍ਥ ਥਿਨਨਤਾ ‘ਥਿਨਂ’. ਮਿਦ੍ਧਨਤਾ ‘ਮਿਦ੍ਧਂ’; ਅਨੁਸ੍ਸਾਹਸਂਹਨਨਤਾ ਅਸਤ੍ਤਿਵਿਘਾਤੋ ਚਾਤਿ ਅਤ੍ਥੋ. ਥਿਨਞ੍ਚ ਮਿਦ੍ਧਞ੍ਚ ਥਿਨਮਿਦ੍ਧਂ. ਤਤ੍ਥ ਥਿਨਂ ਅਨੁਸ੍ਸਾਹਲਕ੍ਖਣਂ, ਵੀਰਿਯਵਿਨੋਦਨਰਸਂ, ਸਂਸੀਦਨਪਚ੍ਚੁਪਟ੍ਠਾਨਂ. ਮਿਦ੍ਧਂ ਅਕਮ੍ਮਞ੍ਞਤਾਲਕ੍ਖਣਂ, ਓਨਹਨਰਸਂ, ਲੀਨਭਾਵਪਚ੍ਚੁਪਟ੍ਠਾਨਂ ਪਚਲਾਯਿਕਾਨਿਦ੍ਦਾਪਚ੍ਚੁਪਟ੍ਠਾਨਂ ਵਾ. ਉਭਯਮ੍ਪਿ ਅਰਤਿਤਨ੍ਦੀਵਿਜਮ੍ਭਿਤਾਦੀਸੁ ਅਯੋਨਿਸੋਮਨਸਿਕਾਰਪਦਟ੍ਠਾਨਨ੍ਤਿ.
ਤਤਿਯਚਿਤ੍ਤਂ
੪੦੦. ਤਤਿਯਂ ਛਸੁ ਆਰਮ੍ਮਣੇਸੁ ਸੋਮਨਸ੍ਸਿਤਸ੍ਸ ਲੋਭਂ ਉਪ੍ਪਾਦੇਤ੍ਵਾ ‘ਸਤ੍ਤੋ ਸਤ੍ਤੋ’ਤਿਆਦਿਨਾ ਨਯੇਨ ਅਪਰਾਮਸਨ੍ਤਸ੍ਸ ਨਾਰਾਯਣਵਿਰਾਜਨਮਲ੍ਲਯੁਦ੍ਧਨਟਸਮਜ੍ਜਾਦੀਨਿ ਪਸ੍ਸਤੋ ਮਨਾਪਿਯਸਦ੍ਦਸਵਨਾਦਿਪਸੁਤਸ੍ਸ ਵਾ ਉਪ੍ਪਜ੍ਜਤਿ. ਇਧ ਮਾਨੇਨ ਸਦ੍ਧਿਂ ਪਞ੍ਚ ਅਪਣ੍ਣਕਙ੍ਗਾਨਿ ਹੋਨ੍ਤਿ. ਤਤ੍ਥ ਮਞ੍ਞਤੀਤਿ ‘ਮਾਨੋ’. ਸੋ ਉਨ੍ਨਤਿਲਕ੍ਖਣੋ, ਸਮ੍ਪਗ੍ਗਹਰਸੋ, ਕੇਤੁਕਮ੍ਯਤਾਪਚ੍ਚੁਪਟ੍ਠਾਨੋ, ਦਿਟ੍ਠਿਵਿਪ੍ਪਯੁਤ੍ਤਲੋਭਪਦਟ੍ਠਾਨੋ, ਉਮ੍ਮਾਦੋ ਵਿਯ ਦਟ੍ਠਬ੍ਬੋਤਿ.
ਚਤੁਤ੍ਥਚਿਤ੍ਤਂ
੪੦੨. ਚਤੁਤ੍ਥਂ ਵੁਤ੍ਤਪ੍ਪਕਾਰੇਸੁ ਏਵ ਠਾਨੇਸੁ ਯਦਾ ਸੀਸੇ ਖੇਲ਼ਂ ਖਿਪਨ੍ਤਿ, ਪਾਦਪਂਸੁਂ ਓਕਿਰਨ੍ਤਿ, ਤਦਾ ਤਸ੍ਸ ਪਰਿਹਰਣਤ੍ਥਂ ਸਉਸ੍ਸਾਹੇਨ ਅਨ੍ਤਰਨ੍ਤਰਾ ਓਲੋਕੇਨ੍ਤਾਨਂ ਰਾਜਨਾਟਕੇਸੁ ਨਿਕ੍ਖਨ੍ਤੇਸੁ ਉਸ੍ਸਾਰਣਾਯ ਵਤ੍ਤਮਾਨਾਯ ਤੇਨ ਤੇਨ ਛਿਦ੍ਦੇਨ ਓਲੋਕੇਨ੍ਤਾਨਞ੍ਚਾਤਿ ਏਵਮਾਦੀਸੁ ਠਾਨੇਸੁ ਉਪ੍ਪਜ੍ਜਤਿ. ਇਧ ਪਨ ਥਿਨਮਿਦ੍ਧੇਹਿ ਸਦ੍ਧਿਂ ਸਤ੍ਤ ਯੇਵਾਪਨਕਾ ਹੋਨ੍ਤਿ. ਉਭਯਤ੍ਥਾਪਿ ਮਿਚ੍ਛਾਦਿਟ੍ਠਿ ਪਰਿਹਾਯਤਿ. ਤਂ ਠਪੇਤ੍ਵਾ ਸੇਸਾਨਂ ਵਸੇਨ ਧਮ੍ਮਗਣਨਾ ਵੇਦਿਤਬ੍ਬਾਤਿ.
ਪਞ੍ਚਮਚਿਤ੍ਤਂ
੪੦੩. ਪਞ੍ਚਮਂ ਛਸੁ ਆਰਮ੍ਮਣੇਸੁ ਵੇਦਨਾਵਸੇਨ ਮਜ੍ਝਤ੍ਤਸ੍ਸ ਲੋਭਂ ਉਪ੍ਪਾਦੇਤ੍ਵਾ ‘ਸਤ੍ਤੋ ਸਤ੍ਤੋ’ਤਿਆਦਿਨਾ ਨਯੇਨ ਪਰਾਮਸਨ੍ਤਸ੍ਸ ਉਪ੍ਪਜ੍ਜਤਿ. ਸੋਮਨਸ੍ਸਟ੍ਠਾਨੇ ਪਨੇਤ੍ਥ ਉਪੇਕ੍ਖਾਵੇਦਨਾ ਹੋਤਿ, ਪੀਤਿਪਦਂ ਪਰਿਹਾਯਤਿ. ਸੇਸਂ ਸਬ੍ਬਂ ਪਠਮਚਿਤ੍ਤਸਦਿਸਮੇਵ.
ਛਟ੍ਠਚਿਤ੍ਤਾਦਿ
੪੦੯-੪੧੨. ਛਟ੍ਠਸਤ੍ਤਮਟ੍ਠਮਾਨਿਪਿ ਵੇਦਨਂ ਪਰਿਵਤ੍ਤੇਤ੍ਵਾ ਪੀਤਿਪਦਞ੍ਚ ਹਾਪੇਤ੍ਵਾ ਦੁਤਿਯਤਤਿਯਚਤੁਤ੍ਥੇਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ. ਇਮੇਸੁ ਅਟ੍ਠਸੁ ਲੋਭਸਹਗਤਚਿਤ੍ਤੇਸੁ ਸਹਜਾਤਾਧਿਪਤਿ ਆਰਮ੍ਮਣਾਧਿਪਤੀਤਿ ਦ੍ਵੇਪਿ ਅਧਿਪਤਯੋ ਲਬ੍ਭਨ੍ਤਿ.
ਨਵਮਚਿਤ੍ਤਂ
੪੧੩. ਨਵਮਂ ਛਸੁ ਆਰਮ੍ਮਣੇਸੁ ਦੋਮਨਸ੍ਸਿਤਸ੍ਸ ਪਟਿਘਂ ਉਪ੍ਪਾਦਯਤੋ ਉਪ੍ਪਜ੍ਜਤਿ. ਤਸ੍ਸ ਸਮਯਵਵਤ੍ਥਾਨਵਾਰੇ ਤਾਵ ਦੁਟ੍ਠੁ ਮਨੋ, ਹੀਨਵੇਦਨਤ੍ਤਾ ਵਾ ਕੁਚ੍ਛਿਤਂ ਮਨੋਤਿ ਦੁਮ੍ਮਨੋ; ਦੁਮ੍ਮਨਸ੍ਸ ਭਾਵੋ ਦੋਮਨਸ੍ਸਂ. ਤੇਨ ਸਹਗਤਨ੍ਤਿ ਦੋਮਨਸ੍ਸਸਹਗਤਂ. ਅਸਮ੍ਪਿਯਾਯਨਭਾਵੇਨ ਆਰਮ੍ਮਣਸ੍ਮਿਂ ਪਟਿਹਞ੍ਞਤੀਤਿ ਪਟਿਘਂ. ਤੇਨ ਸਮ੍ਪਯੁਤ੍ਤਨ੍ਤਿ ਪਟਿਘਸਮ੍ਪਯੁਤ੍ਤਂ.
ਧਮ੍ਮੁਦ੍ਦੇਸੇ ਤੀਸੁਪਿ ਠਾਨੇਸੁ ਦੋਮਨਸ੍ਸਵੇਦਨਾਵ ਆਗਤਾ. ਤਤ੍ਥ ਵੇਦਨਾਪਦਂ ਵੁਤ੍ਤਮੇਵ. ਤਥਾ ਦੁਕ੍ਖਦੋਮਨਸ੍ਸਪਦਾਨਿ ਲਕ੍ਖਣਾਦਿਤੋ ਪਨ ਅਨਿਟ੍ਠਾਰਮ੍ਮਣਾਨੁਭਵਨਲਕ੍ਖਣਂ ਦੋਮਨਸ੍ਸਂ, ਯਥਾਤਥਾ ਵਾ ਅਨਿਟ੍ਠਾਕਾਰਸਮ੍ਭੋਗਰਸਂ, ਚੇਤਸਿਕਾਬਾਧਪਚ੍ਚੁਪਟ੍ਠਾਨਂ, ਏਕਨ੍ਤੇਨੇਵ ਹਦਯਵਤ੍ਥੁਪਦਟ੍ਠਾਨਂ.
ਮੂਲਕਮ੍ਮਪਥੇਸੁ ਯਥਾ ਪੁਰਿਮਚਿਤ੍ਤੇਸੁ ਲੋਭੋ ਹੋਤਿ, ਅਭਿਜ੍ਝਾ ਹੋਤੀਤਿ ਆਗਤਂ, ਏਵਂ ਦੋਸੋ ਹੋਤਿ, ਬ੍ਯਾਪਾਦੋ ਹੋਤੀਤਿ ਵੁਤ੍ਤਂ. ਤਤ੍ਥ ਦੁਸ੍ਸਨ੍ਤਿ ਤੇਨ, ਸਯਂ ਵਾ ਦੁਸ੍ਸਤਿ, ਦੁਸ੍ਸਨਮਤ੍ਤਮੇਵ ਵਾ ਤਨ੍ਤਿ ਦੋਸੋ ਸੋ ਚਣ੍ਡਿਕ੍ਕਲਕ੍ਖਣੋ ਪਹਟਾਸਿਵਿਸੋ ਵਿਯ, ਵਿਸਪ੍ਪਨਰਸੋ ਵਿਸਨਿਪਾਤੋ ਵਿਯ, ਅਤ੍ਤਨੋ ਨਿਸ੍ਸਯਦਹਨਰਸੋ ਵਾ ਦਾਵਗ੍ਗਿ ਵਿਯ, ਦੁਸ੍ਸਨਪਚ੍ਚੁਪਟ੍ਠਾਨੋ ਲਦ੍ਧੋਕਾਸੋ ਵਿਯ ਸਪਤ੍ਤੋ, ਆਘਾਤਵਤ੍ਥੁਪਦਟ੍ਠਾਨੋ ਵਿਸਸਂਸਟ੍ਠਪੂਤਿਮੁਤ੍ਤਂ ਵਿਯ ਦਟ੍ਠਬ੍ਬੋ.
ਬ੍ਯਾਪਜ੍ਜਤਿ ਤੇਨ ਚਿਤ੍ਤਂ, ਪੂਤਿਭਾਵਂ ਉਪਗਚ੍ਛਤਿ, ਬ੍ਯਾਪਾਦਯਤਿ ਵਾ ਵਿਨਯਾਚਾਰਰੂਪਸਮ੍ਪਤ੍ਤਿਹਿਤਸੁਖਾਦੀਨੀਤਿ ਬ੍ਯਾਪਾਦੋ. ਅਤ੍ਥਤੋ ਪਨੇਸ ਦੋਸੋਯੇਵ. ਇਧ ਪਦਪਟਿਪਾਟਿਯਾ ਏਕੂਨਤਿਂਸ ਪਦਾਨਿ ਹੋਨ੍ਤਿ. ਅਗ੍ਗਹਿਤਗ੍ਗਹਣੇਨ ਚੁਦ੍ਦਸ. ਤੇਸਂ ਵਸੇਨ ਸਵਿਭਤ੍ਤਿਕਾਵਿਭਤ੍ਤਿਕਰਾਸਿਭੇਦੋ ਵੇਦਿਤਬ੍ਬੋ.
ਯੇਵਾਪਨਕੇਸੁ ਛਨ੍ਦਾਧਿਮੋਕ੍ਖਮਨਸਿਕਾਰਉਦ੍ਧਚ੍ਚਾਨਿ ਨਿਯਤਾਨਿ. ਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚੇਸੁ ਪਨ ਅਞ੍ਞਤਰੇਨ ਸਦ੍ਧਿਂ ਪਞ੍ਚ ਪਞ੍ਚ ਹੁਤ੍ਵਾਪਿ ਉਪ੍ਪਜ੍ਜਨ੍ਤਿ. ਏਵਮੇਪਿ ਤਯੋ ਧਮ੍ਮਾ ਅਨਿਯਤਯੇਵਾਪਨਕਾ ਨਾਮ. ਤੇਸੁ ਇਸ੍ਸਤੀਤਿ ‘ਇਸ੍ਸਾ’. ਸਾ ਪਰਸਮ੍ਪਤ੍ਤੀਨਂ ਉਸੂਯਨਲਕ੍ਖਣਾ, ਤਤ੍ਥੇਵ ਅਨਭਿਰਤਿਰਸਾ, ਤਤੋ ਵਿਮੁਖਭਾਵਪਚ੍ਚੁਪਟ੍ਠਾਨਾ, ਪਰਸਮ੍ਪਤ੍ਤਿਪਦਟ੍ਠਾਨਾ. ਸਂਯੋਜਨਨ੍ਤਿ ਦਟ੍ਠਬ੍ਬਾ. ਮਚ੍ਛੇਰਭਾਵੋ ‘ਮਚ੍ਛਰਿਯਂ’. ਤਂ ਲਦ੍ਧਾਨਂ ਵਾ ਲਭਿਤਬ੍ਬਾਨਂ ਵਾ ਅਤ੍ਤਨੋ ਸਮ੍ਪਤ੍ਤੀਨਂ ਨਿਗੂਹਨਲਕ੍ਖਣਂ, ਤਾਸਂਯੇਵ ਪਰੇਹਿ ਸਾਧਾਰਣਭਾਵਅਕ੍ਖਮਨਰਸਂ, ਸਙ੍ਕੋਚਨਪਚ੍ਚੁਪਟ੍ਠਾਨਂ ਕਟੁਕਞ੍ਚੁਕਤਾਪਚ੍ਚੁਪਟ੍ਠਾਨਂ ਵਾ, ਅਤ੍ਤਸਮ੍ਪਤ੍ਤਿਪਦਟ੍ਠਾਨਂ. ਚੇਤਸੋ ਵਿਰੂਪਭਾਵੋਤਿ ਦਟ੍ਠਬ੍ਬਂ. ਕੁਚ੍ਛਿਤਂ ਕਤਂ ਕੁਕਤਂ. ਤਸ੍ਸ ਭਾਵੋ ‘ਕੁਕ੍ਕੁਚ੍ਚਂ’. ਤਂ ਪਚ੍ਛਾਨੁਤਾਪਲਕ੍ਖਣਂ, ਕਤਾਕਤਾਨੁਸੋਚਨਰਸਂ, ਵਿਪ੍ਪਟਿਸਾਰਪਚ੍ਚੁਪਟ੍ਠਾਨਂ, ਕਤਾਕਤਪਦਟ੍ਠਾਨਂ. ਦਾਸਬ੍ਯਂ ਵਿਯ ਦਟ੍ਠਬ੍ਬਂ. ਅਯਂ ਤਾਵ ਉਦ੍ਦੇਸਵਾਰੇ ਵਿਸੇਸੋ.
੪੧੫. ਨਿਦ੍ਦੇਸਵਾਰੇ ਵੇਦਨਾਨਿਦ੍ਦੇਸੇ ਅਸਾਤਂ ਸਾਤਪਟਿਪਕ੍ਖਵਸੇਨ ਵੇਦਿਤਬ੍ਬਂ.
੪੧੮. ਦੋਸਨਿਦ੍ਦੇਸੇ ਦੁਸ੍ਸਤੀਤਿ ਦੋਸੋ. ਦੁਸ੍ਸਨਾਤਿ ਦੁਸ੍ਸਨਾਕਾਰੋ. ਦੁਸ੍ਸਿਤਤ੍ਤਨ੍ਤਿ ਦੁਸ੍ਸਿਤਭਾਵੋ. ਪਕਤਿਭਾਵਵਿਜਹਨਟ੍ਠੇਨ ਬ੍ਯਾਪਜ੍ਜਨਂ ਬ੍ਯਾਪਤ੍ਤਿ. ਬ੍ਯਾਪਜ੍ਜਨਾਤਿ ਬ੍ਯਾਪਜ੍ਜਨਾਕਾਰੋ. ਵਿਰੁਜ੍ਝਤੀਤਿ ਵਿਰੋਧੋ. ਪੁਨਪ੍ਪੁਨਂ ਵਿਰੁਜ੍ਝਤੀਤਿ ਪਟਿਵਿਰੋਧੋ. ਵਿਰੁਦ੍ਧਾਕਾਰਪਟਿਵਿਰੁਦ੍ਧਾਕਾਰਵਸੇਨ ਵਾ ਇਦਂ ਵੁਤ੍ਤਂ. ਚਣ੍ਡਿਕੋ ਵੁਚ੍ਚਤਿ ਚਣ੍ਡੋ, ਥਦ੍ਧਪੁਗ੍ਗਲੋ; ਤਸ੍ਸ ਭਾਵੋ ਚਣ੍ਡਿਕ੍ਕਂ. ਨ ਏਤੇਨ ਸੁਰੋਪਿਤਂ ਵਚਨਂ ਹੋਤਿ, ਦੁਰੁਤ੍ਤਂ ਅਪਰਿਪੁਣ੍ਣਮੇਵ ਹੋਤੀਤਿ ਅਸੁਰੋਪੋ. ਕੁਦ੍ਧਕਾਲੇ ਹਿ ਪਰਿਪੁਣ੍ਣਵਚਨਂ ਨਾਮ ਨਤ੍ਥਿ. ਸਚੇਪਿ ਕਸ੍ਸਚਿ ਹੋਤਿ ਤਂ ਅਪ੍ਪਮਾਣਂ. ਅਪਰੇ ਪਨ ਅਸ੍ਸੁਜਨਨਟ੍ਠੇਨ ਅਸ੍ਸੁਰੋਪਨਤੋ ਅਸ੍ਸੁਰੋਪੋਤਿ ਵਦਨ੍ਤਿ. ਤਂ ਅਕਾਰਣਂ, ਸੋਮਨਸ੍ਸਸ੍ਸਾਪਿ ਅਸ੍ਸੁਜਨਨਤੋ. ਹੇਟ੍ਠਾ ਵੁਤ੍ਤਅਤ੍ਤਮਨਤਾਪਟਿਪਕ੍ਖਤੋ ਨ ਅਤ੍ਤਮਨਤਾਤਿ ਅਨਤ੍ਤਮਨਤਾ. ਸਾ ਪਨ ਯਸ੍ਮਾ ਚਿਤ੍ਤਸ੍ਸੇਵ, ਨ ਸਤ੍ਤਸ੍ਸ, ਤਸ੍ਮਾ ਚਿਤ੍ਤਸ੍ਸਾਤਿ ਵੁਤ੍ਤਂ. ਸੇਸਮੇਤ੍ਥ ਸਙ੍ਗਹਸੁਞ੍ਞਤਵਾਰੇਸੁ ਚ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਦਸਮਚਿਤ੍ਤਂ
੪੨੧. ਦਸਮਂ ਸਸਙ੍ਖਾਰਤ੍ਤਾ ਪਰੇਹਿ ਉਸ੍ਸਾਹਿਤਸ੍ਸ ਵਾ, ਪਰੇਸਂ ਵਾ ਅਪਰਾਧਂ ਸਾਰਿਤਸ੍ਸ, ਸਯਮੇਵ ਵਾ ਪਰੇਸਂ ਅਪਰਾਧਂ ਅਨੁਸ੍ਸਰਿਤ੍ਵਾ ਕੁਜ੍ਝਮਾਨਸ੍ਸ ਉਪ੍ਪਜ੍ਜਤਿ.
ਇਧਾਪਿ ਪਦਪਟਿਪਾਟਿਯਾ ਏਕੂਨਤਿਂਸ, ਅਗ੍ਗਹਿਤਗ੍ਗਹਣੇਨ ਚ ਚੁਦ੍ਦਸੇਵ ਪਦਾਨਿ ਹੋਨ੍ਤਿ. ਯੇਵਾਪਨਕੇਸੁ ਪਨ ਥਿਨਮਿਦ੍ਧਮ੍ਪਿ ਲਬ੍ਭਤਿ. ਤਸ੍ਮਾ ਏਤ੍ਥ ਵਿਨਾ ਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚੇਹਿ ਚਤ੍ਤਾਰਿ ਅਪਣ੍ਣਕਙ੍ਗਾਨਿ ਥਿਨਮਿਦ੍ਧਨ੍ਤਿ ਇਮੇ ਛ ਇਸ੍ਸਾਦੀਨਂ ਉਪ੍ਪਤ੍ਤਿਕਾਲੇ ਤੇਸੁ ਅਞ੍ਞਤਰੇਨ ਸਦ੍ਧਿਂ ਸਤ੍ਤ ਯੇਵਾਪਨਕਾ ਏਕਕ੍ਖਣੇ ਉਪ੍ਪਜ੍ਜਨ੍ਤਿ. ਸੇਸਂ ਸਬ੍ਬਂ ਸਬ੍ਬਵਾਰੇਸੁ ਨਵਮਸਦਿਸਮੇਵ. ਇਮੇਸੁ ਪਨ ਦ੍ਵੀਸੁ ਦੋਮਨਸ੍ਸਚਿਤ੍ਤੇਸੁ ਸਹਜਾਤਾਧਿਪਤਿਯੇਵ ਲਬ੍ਭਤਿ, ਨ ਆਰਮ੍ਮਣਾਧਿਪਤਿ. ਨ ਹਿ ਕੁਦ੍ਧੋ ਕਿਞ੍ਚਿ ਗਰੁਂ ਕਰੋਤੀਤਿ.
ਏਕਾਦਸਮਚਿਤ੍ਤਂ
੪੨੨. ਏਕਾਦਸਮਂ ਛਸੁ ਆਰਮ੍ਮਣੇਸੁ ਵੇਦਨਾਵਸੇਨ ਮਜ੍ਝਤ੍ਤਸ੍ਸ ਕਙ੍ਖਾਪਵਤ੍ਤਿਕਾਲੇ ਉਪ੍ਪਜ੍ਜਤਿ. ਤਸ੍ਸ ਸਮਯਵਵਤ੍ਥਾਨੇ ਵਿਚਿਕਿਚ੍ਛਾਸਮ੍ਪਯੁਤ੍ਤਨ੍ਤਿ ਪਦਂ ਅਪੁਬ੍ਬਂ. ਤਸ੍ਸਤ੍ਥੋ – ਵਿਚਿਕਿਚ੍ਛਾਯ ਸਮ੍ਪਯੁਤ੍ਤਨ੍ਤਿ ਵਿਚਿਕਿਚ੍ਛਾਸਮ੍ਪਯੁਤ੍ਤਂ. ਧਮ੍ਮੁਦ੍ਦੇਸੇ ‘ਵਿਚਿਕਿਚ੍ਛਾ ਹੋਤੀ’ਤਿ ਪਦਮੇਵ ਵਿਸੇਸੋ. ਤਤ੍ਥ ਵਿਗਤਾ ਚਿਕਿਚ੍ਛਾਤਿ ਵਿਚਿਕਿਚ੍ਛਾ. ਸਭਾਵਂ ਵਾ ਵਿਚਿਨਨ੍ਤੋ ਏਤਾਯ ਕਿਚ੍ਛਤਿ ਕਿਲਮਤੀਤਿ ਵਿਚਿਕਿਚ੍ਛਾ. ਸਾ ਸਂਸਯਲਕ੍ਖਣਾ, ਕਮ੍ਪਨਰਸਾ, ਅਨਿਚ੍ਛਯਪਚ੍ਚੁਪਟ੍ਠਾਨਾ ਅਨੇਕਂਸਗਾਹਪਚ੍ਚੁਪਟ੍ਠਾਨਾ ਵਾ, ਅਯੋਨਿਸੋਮਨਸਿਕਾਰਪਦਟ੍ਠਾਨਾ. ਪਟਿਪਤ੍ਤਿਅਨ੍ਤਰਾਯਕਰਾਤਿ ਦਟ੍ਠਬ੍ਬਾ.
ਇਧ ਪਦਪਟਿਪਾਟਿਯਾ ਤੇਵੀਸਤਿ ਪਦਾਨਿ ਹੋਨ੍ਤਿ. ਅਗ੍ਗਹਿਤਗ੍ਗਹਣੇਨ ਚੁਦ੍ਦਸ. ਤੇਸਂ ਵਸੇਨ ਸਵਿਭਤ੍ਤਿਕਾਵਿਭਤ੍ਤਿਕਰਾਸਿਵਿਨਿਚ੍ਛਯੋ ਵੇਦਿਤਬ੍ਬੋ. ਮਨਸਿਕਾਰੋ ਉਦ੍ਧਚ੍ਚਨ੍ਤਿ ਦ੍ਵੇਯੇਵ ਯੇਵਾਪਨਕਾ.
੪੨੪. ਨਿਦ੍ਦੇਸਵਾਰਸ੍ਸ ਚਿਤ੍ਤਸ੍ਸੇਕਗ੍ਗਤਾਨਿਦ੍ਦੇਸੇ ਯਸ੍ਮਾ ਇਦਂ ਦੁਬ੍ਬਲਂ ਚਿਤ੍ਤਂ ਪਵਤ੍ਤਿਟ੍ਠਿਤਿਮਤ੍ਤਕਮੇਵੇਤ੍ਥ ਹੋਤਿ, ਤਸ੍ਮਾ ‘ਸਣ੍ਠਿਤੀ’ਤਿਆਦੀਨਿ ਅਵਤ੍ਵਾ ਚਿਤ੍ਤਸ੍ਸ ‘ਠਿਤੀ’ਤਿ ਏਕਮੇਵ ਪਦਂ ਵੁਤ੍ਤਂ. ਤੇਨੇਵ ਚ ਕਾਰਣੇਨ ਉਦ੍ਦੇਸਵਾਰੇਪਿ ‘ਸਮਾਧਿਨ੍ਦ੍ਰਿਯ’ਨ੍ਤਿਆਦਿ ਨ ਵੁਤ੍ਤਂ.
੪੨੫. ਵਿਚਿਕਿਚ੍ਛਾਨਿਦ੍ਦੇਸੇ ਕਙ੍ਖਨਵਸੇਨ ਕਙ੍ਖਾ. ਕਙ੍ਖਾਯ ਆਯਨਾਤਿ ਕਙ੍ਖਾਯਨਾ. ਪੁਰਿਮਕਙ੍ਖਾ ਹਿ ਉਤ੍ਤਰਕਙ੍ਖਂ ਆਨੇਤਿ ਨਾਮ. ਆਕਾਰਵਸੇਨ ਵਾ ਏਤਂ ਵੁਤ੍ਤਂ. ਕਙ੍ਖਾਸਮਙ੍ਗਿਚਿਤ੍ਤਂ ਕਙ੍ਖਾਯ ਆਯਿਤਤ੍ਤਾ ਕਙ੍ਖਾਯਿਤਂ ਨਾਮ. ਤਸ੍ਸ ਭਾਵੋ ਕਙ੍ਖਾਯਿਤਤ੍ਤਂ. ਵਿਮਤੀਤਿ ਨਮਤਿ. ਵਿਚਿਕਿਚ੍ਛਾ ਵੁਤ੍ਤਤ੍ਥਾ ਏਵ. ਕਮ੍ਪਨਟ੍ਠੇਨ ਦ੍ਵਿਧਾ ਏਲ਼ਯਤੀਤਿ ਦ੍ਵੇਲ਼੍ਹਕਂ. ਪਟਿਪਤ੍ਤਿਨਿਵਾਰਣੇਨ ਦ੍ਵਿਧਾਪਥੋ ਵਿਯਾਤਿ ਦ੍ਵੇਧਾਪਥੋ. ‘ਨਿਚ੍ਚਂ ਨੁ ਖੋ ਇਦਂ, ਅਨਿਚ੍ਚਂ ਨੁ ਖੋ’ਤਿਆਦਿਪਵਤ੍ਤਿਯਾ ਏਕਸ੍ਮਿਂ ਆਕਾਰੇ ਸਣ੍ਠਾਤੁਂ ਅਸਮਤ੍ਥਤਾਯ ਸਮਨ੍ਤਤੋ ਸੇਤੀਤਿ ਸਂਸਯੋ. ਏਕਂਸਂ ਗਹੇਤੁਂ ਅਸਮਤ੍ਥਤਾਯ ਨ ਏਕਂਸਗ੍ਗਾਹੋਤਿ ਅਨੇਕਂਸਗ੍ਗਾਹੋ. ਨਿਚ੍ਛੇਤੁਂ ਅਸਕ੍ਕੋਨ੍ਤੀ ਆਰਮ੍ਮਣਤੋ ਓਸਕ੍ਕਤੀਤਿ ਆਸਪ੍ਪਨਾ. ਓਗਾਹਿਤੁਂ ਅਸਕ੍ਕੋਨ੍ਤੀ ਪਰਿਸਮਨ੍ਤਤੋ ਸਪ੍ਪਤੀਤਿ ਪਰਿਸਪ੍ਪਨਾ. ਪਰਿਯੋਗਾਹਿਤੁਂ ਅਸਮਤ੍ਥਤਾਯ ਅਪਰਿਯੋਗਾਹਨਾ. ਨਿਚ੍ਛਯਵਸੇਨ ਆਰਮ੍ਮਣੇ ਪਵਤ੍ਤਿਤੁਂ ਅਸਮਤ੍ਥਤਾਯ ਥਮ੍ਭਿਤਤ੍ਤਂ; ਚਿਤ੍ਤਸ੍ਸ ਥਦ੍ਧਭਾਵੋਤਿ ਅਤ੍ਥੋ. ਵਿਚਿਕਿਚ੍ਛਾ ਹਿ ਉਪ੍ਪਜ੍ਜਿਤ੍ਵਾ ਚਿਤ੍ਤਂ ਥਦ੍ਧਂ ਕਰੋਤਿ. ਯਸ੍ਮਾ ਪਨੇਸਾ ਉਪ੍ਪਜ੍ਜਮਾਨਾ ਆਰਮ੍ਮਣਂ ਗਹੇਤ੍ਵਾ ਮਨਂ ਵਿਲਿਖਨ੍ਤੀ ਵਿਯ, ਤਸ੍ਮਾ ਮਨੋਵਿਲੇਖੋਤਿ ਵੁਤ੍ਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵ.
ਦ੍ਵਾਦਸਮਚਿਤ੍ਤਂ
੪੨੭. ਦ੍ਵਾਦਸਮਸ੍ਸ ਸਮਯਵਵਤ੍ਥਾਨੇ ਉਦ੍ਧਚ੍ਚੇਨ ਸਮ੍ਪਯੁਤ੍ਤਨ੍ਤਿ ਉਦ੍ਧਚ੍ਚਸਮ੍ਪਯੁਤ੍ਤਂ. ਇਦਞ੍ਹਿ ਚਿਤ੍ਤਂ ਛਸੁ ਆਰਮ੍ਮਣੇਸੁ ਵੇਦਨਾਵਸੇਨ ਮਜ੍ਝਤ੍ਤਂ ਹੁਤ੍ਵਾ ਉਦ੍ਧਤਂ ਹੋਤਿ. ਇਧ ਧਮ੍ਮੁਦ੍ਦੇਸੇ ‘ਵਿਚਿਕਿਚ੍ਛਾ’-ਠਾਨੇ ‘ਉਦ੍ਧਚ੍ਚਂ ਹੋਤੀ’ਤਿ ਆਗਤਂ. ਪਦਪਟਿਪਾਟਿਯਾ ਅਟ੍ਠਵੀਸਤਿ ਪਦਾਨਿ ਹੋਨ੍ਤਿ. ਅਗ੍ਗਹਿਤਗ੍ਗਹਣੇਨ ਚੁਦ੍ਦਸ. ਤੇਸਂ ਵਸੇਨ ਸਵਿਭਤ੍ਤਿਕਾਵਿਭਤ੍ਤਿਕਰਾਸਿਵਿਧਾਨਂ ਵੇਦਿਤਬ੍ਬਂ. ਅਧਿਮੋਕ੍ਖੋ ਮਨਸਿਕਾਰੋਤਿ ਦ੍ਵੇਯੇਵ ਯੇਵਾਪਨਕਾ.
੪੨੯. ਨਿਦ੍ਦੇਸਵਾਰਸ੍ਸ ਉਦ੍ਧਚ੍ਚਨਿਦ੍ਦੇਸੇ ਚਿਤ੍ਤਸ੍ਸਾਤਿ ਨ ਸਤ੍ਤਸ੍ਸ, ਨ ਪੋਸਸ੍ਸ. ਉਦ੍ਧਚ੍ਚਨ੍ਤਿ ਉਦ੍ਧਤਾਕਾਰੋ. ਨ ਵੂਪਸਮੋਤਿ ਅਵੂਪਸਮੋ. ਚੇਤੋ ਵਿਕ੍ਖਿਪਤੀਤਿ ਚੇਤਸੋਵਿਕ੍ਖੇਪੋ. ਭਨ੍ਤਤ੍ਤਂ ਚਿਤ੍ਤਸ੍ਸਾਤਿ ਚਿਤ੍ਤਸ੍ਸ ਭਨ੍ਤਭਾਵੋ, ਭਨ੍ਤਯਾਨਭਨ੍ਤਗੋਣਾਦੀਨਿ ਵਿਯ. ਇਮਿਨਾ ਏਕਾਰਮ੍ਮਣਸ੍ਮਿਂਯੇਵ ਵਿਪ੍ਫਨ੍ਦਨਂ ਕਥਿਤਂ. ਉਦ੍ਧਚ੍ਚਞ੍ਹਿ ਏਕਾਰਮ੍ਮਣੇ ਵਿਪ੍ਫਨ੍ਦਤਿ, ਵਿਚਿਕਿਚ੍ਛਾ ਨਾਨਾਰਮ੍ਮਣੇ. ਸੇਸਂ ਸਬ੍ਬਵਾਰੇਸੁ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
ਇਦਾਨਿ ਇਮਸ੍ਮਿਂ ਚਿਤ੍ਤਦ੍ਵਯੇ ਪਕਿਣ੍ਣਕਵਿਨਿਚ੍ਛਯੋ ਹੋਤਿ. ‘ਆਰਮ੍ਮਣੇ ਪਵਟ੍ਟਨਕਚਿਤ੍ਤਾਨਿ ਨਾਮ ਕਤੀ’ਤਿ? ਹਿ ਵੁਤ੍ਤੇ ‘ਇਮਾਨੇਵ ਦ੍ਵੇ’ਤਿ ਵਤ੍ਤਬ੍ਬਂ. ਤਤ੍ਥ ਵਿਚਿਕਿਚ੍ਛਾਸਹਗਤਂ ਏਕਨ੍ਤੇਨ ਪਵਟ੍ਟਤਿ, ਉਦ੍ਧਚ੍ਚਸਹਗਤਂ ਪਨ ਲਦ੍ਧਾਧਿਮੋਕ੍ਖਤ੍ਤਾ ਲਦ੍ਧਪਤਿਟ੍ਠਂ ਪਵਟ੍ਟਤਿ. ਯਥਾ ਹਿ ਵਟ੍ਟਚਤੁਰਸ੍ਸੇਸੁ ਦ੍ਵੀਸੁ ਮਣੀਸੁ ਪਬ੍ਭਾਰਟ੍ਠਾਨੇ ਪਵਟ੍ਟੇਤ੍ਵਾ ਵਿਸ੍ਸਟ੍ਠੇਸੁ ਵਟ੍ਟਮਣਿ ਏਕਨ੍ਤੇਨੇਵ ਪਵਟ੍ਟਤਿ, ਚਤੁਰਸ੍ਸੋ ਪਤਿਟ੍ਠਾਯ ਪਤਿਟ੍ਠਾਯ ਪਵਟ੍ਟਤਿ, ਏਵਂਸਮ੍ਪਦਮਿਦਂ ਵੇਦਿਤਬ੍ਬਂ. ਸਬ੍ਬੇਸੁਪਿ ਹੀਨਾਦਿਭੇਦੋ ਨ ਉਦ੍ਧਟੋ, ਸਬ੍ਬੇਸਂ ਏਕਨ੍ਤਹੀਨਤ੍ਤਾ. ਸਹਜਾਤਾਧਿਪਤਿ ਲਬ੍ਭਮਾਨੋਪਿ ਨ ਉਦ੍ਧਟੋ, ਹੇਟ੍ਠਾ ਦਸ੍ਸਿਤਨਯਤ੍ਤਾ. ਞਾਣਾਭਾਵਤੋ ਪਨੇਤ੍ਥ ਵੀਮਂਸਾਧਿਪਤਿ ਨਾਮ ਨਤ੍ਥਿ. ਪਚ੍ਛਿਮਦ੍ਵਯੇ ਸੇਸੋਪਿ ਨਤ੍ਥਿ ਏਵ. ਕਸ੍ਮਾ? ਕਞ੍ਚਿ ਧਮ੍ਮਂ ਧੁਰਂ ਕਤ੍ਵਾ ਅਨੁਪ੍ਪਜ੍ਜਨਤੋ, ਪਟ੍ਠਾਨੇ ਚ ਪਟਿਸਿਦ੍ਧਤੋ.
ਇਮੇਹਿ ਪਨ ਦ੍ਵਾਦਸਹਿਪਿ ਅਕੁਸਲਚਿਤ੍ਤੇਹਿ ਕਮ੍ਮੇ ਆਯੂਹਿਤੇ, ਠਪੇਤ੍ਵਾ ਉਦ੍ਧਚ੍ਚਸਹਗਤਂ, ਸੇਸਾਨਿ ਏਕਾਦਸੇਵ ਪਟਿਸਨ੍ਧਿਂ ਆਕਡ੍ਢਨ੍ਤਿ. ਵਿਚਿਕਿਚ੍ਛਾਸਹਗਤੇ ਅਲਦ੍ਧਾਧਿਮੋਕ੍ਖੇ ਦੁਬ੍ਬਲੇਪਿ ਪਟਿਸਨ੍ਧਿਂ ਆਕਡ੍ਢਮਾਨੇ ਉਦ੍ਧਚ੍ਚਸਹਗਤਂ ਲਦ੍ਧਾਧਿਮੋਕ੍ਖਂ ਬਲਵਂ ਕਸ੍ਮਾ ਨਾਕਡ੍ਢਤੀਤਿ? ਦਸ੍ਸਨੇਨ ਪਹਾਤਬ੍ਬਾਭਾਵਤੋ. ਯਦਿ ਹਿ ਆਕਡ੍ਢੇਯ੍ਯ ‘ਦਸ੍ਸਨੇਨਪਹਾਤਬ੍ਬ’-ਪਦਵਿਭਙ੍ਗੇ ਆਗਚ੍ਛੇਯ੍ਯ, ਤਸ੍ਮਾ, ਠਪੇਤ੍ਵਾ ਤਂ, ਸੇਸਾਨਿ ਏਕਾਦਸ ਆਕਡ੍ਢਨ੍ਤਿ. ਤੇਸੁ ਹਿ ਯੇਨ ਕੇਨਚਿ ਕਮ੍ਮੇ ਆਯੂਹਿਤੇ ਤਾਯ ਚੇਤਨਾਯ ਚਤੂਸੁ ਅਪਾਯੇਸੁ ਪਟਿਸਨ੍ਧਿ ਹੋਤਿ. ਅਕੁਸਲਵਿਪਾਕੇਸੁ ਅਹੇਤੁਕਮਨੋਵਿਞ੍ਞਾਣਧਾਤੁਉਪੇਕ੍ਖਾਸਹਗਤਾਯ ਪਟਿਸਨ੍ਧਿਂ ਗਣ੍ਹਾਤਿ. ਇਤਰਸ੍ਸਾਪਿ ਏਤ੍ਥੇਵ ਪਟਿਸਨ੍ਧਿਦਾਨਂ ਭਵੇਯ੍ਯ. ਯਸ੍ਮਾ ਪਨੇਤਂ ਨਤ੍ਥਿ, ਤਸ੍ਮਾ ‘ਦਸ੍ਸਨੇਨਪਹਾਤਬ੍ਬ’-ਪਦਵਿਭਙ੍ਗੇ ਨਾਗਤਨ੍ਤਿ.
ਅਕੁਸਲਾ ਧਮ੍ਮਾਤਿਪਦਸ੍ਸ ਵਣ੍ਣਨਾ ਨਿਟ੍ਠਿਤਾ.