੫. ਉਪੋਸਥਵਗ੍ਗੋ

੪. ਵਾਸੇਟ੍ਠਸੁਤ੍ਤਵਣ੍ਣਨਾ

੪੪. ਪਞ੍ਚਮਸ੍ਸ ਚਤੁਤ੍ਥੇ ਇਮੇ ਚੇਪਿ, ਵਾਸੇਟ੍ਠ, ਮਹਾਸਾਲਾਤਿ ਪੁਰਤੋ ਠਿਤੇ ਦ੍ਵੇ ਸਾਲਰੁਕ੍ਖੇ ਦਸ੍ਸੇਨ੍ਤੋ ਪਰਿਕਪ੍ਪੋਪਮਂ ਆਹ. ਇਦਂ ਵੁਤ੍ਤਂ ਹੋਤਿ – ਇਮੇ ਤਾਵ ਮਹਾਸਾਲਾ ਅਚੇਤਨਾ. ਸਚੇ ਏਤੇਪਿ ਸਚੇਤਨਾ ਹੁਤ੍ਵਾ ਅਟ੍ਠਙ੍ਗਸਮਨ੍ਨਾਗਤਂ ਉਪੋਸਥਂ ਉਪਵਸੇਯ੍ਯੁਂ, ਏਤੇਸਮ੍ਪਿ ਸੋ ਉਪੋਸਥਵਾਸੋ ਦੀਘਰਤ੍ਤਂ ਹਿਤਾਯ ਸੁਖਾਯ ਅਸ੍ਸ. ਭੂਤੇ ਪਨ ਵਤ੍ਤਬ੍ਬਮੇਵ ਨਤ੍ਥੀਤਿ.

੬. ਅਨੁਰੁਦ੍ਧਸੁਤ੍ਤਵਣ੍ਣਨਾ

੪੬. ਛਟ੍ਠੇ ਯੇਨਾਯਸ੍ਮਾ ਅਨੁਰੁਦ੍ਧੋਤਿ ਤਾ ਕਿਰ ਦੇਵਤਾ ਅਤ੍ਤਨੋ ਸਮ੍ਪਤ੍ਤਿਂ ਓਲੋਕੇਤ੍ਵਾ ‘‘ਕਿਂ ਨੁ ਖੋ ਨਿਸ੍ਸਾਯ ਅਯਂ ਸਮ੍ਪਤ੍ਤਿ ਅਮ੍ਹੇਹਿ ਲਦ੍ਧਾ’’ਤਿ ਆਵਜ੍ਜਮਾਨਾ ਥੇਰਂ ਦਿਸ੍ਵਾ ‘‘ਮਯਂ ਅਮ੍ਹਾਕਂ ਅਯ੍ਯਸ੍ਸ ਪੁਬ੍ਬੇ ਚਕ੍ਕਵਤ੍ਤਿਰਜ੍ਜਂ ਕਰੋਨ੍ਤਸ੍ਸ ਪਾਦਪਰਿਚਾਰਿਕਾ ਹੁਤ੍ਵਾ ਤੇਨ ਦਿਨ੍ਨੋਵਾਦੇ ਠਤ੍ਵਾ ਇਮਂ ਸਮ੍ਪਤ੍ਤਿਂ ਲਭਿਮ੍ਹ, ਗਚ੍ਛਾਮ ਥੇਰਂ ਆਨੇਤ੍ਵਾ ਇਮਂ ਸਮ੍ਪਤ੍ਤਿਂ ਅਨੁਭਵਿਸ੍ਸਾਮਾ’’ਤਿ ਦਿਵਾ ਯੇਨਾਯਸ੍ਮਾ ਅਨੁਰੁਦ੍ਧੋ ਤੇਨੁਪਸਙ੍ਕਮਿਂਸੁ. ਤੀਸੁ ਠਾਨੇਸੂਤਿ ਤੀਸੁ ਕਾਰਣੇਸੁ. ਠਾਨਸੋ ਪਟਿਲਭਾਮਾਤਿ ਖਣੇਨੇਵ ਲਭਾਮ. ਸਰਨ੍ਤਿ ਵਚਨਸਦ੍ਦਂ ਵਾ ਗੀਤਸਦ੍ਦਂ ਵਾ ਆਭਰਣਸਦ੍ਦਂ ਵਾ. ਪੀਤਾ ਅਸ੍ਸੂਤਿਆਦੀਨਿ ਨੀਲਾ ਤਾਵ ਜਾਤਾ, ਪੀਤਾ ਭਵਿਤੁਂ ਨ ਸਕ੍ਖਿਸ੍ਸਨ੍ਤੀਤਿਆਦਿਨਾ ਨਯੇਨ ਚਿਨ੍ਤੇਤ੍ਵਾ ਵਿਤਕ੍ਕੇਤਿ. ਤਾਪਿ ‘‘ਇਦਾਨਿ ਅਯ੍ਯੋ ਅਮ੍ਹਾਕਂ ਪੀਤਭਾਵਂ ਇਚ੍ਛਤਿ, ਇਦਾਨਿ ਲੋਹਿਤਭਾਵ’’ਨ੍ਤਿ ਤਾਦਿਸਾਵ ਅਹੇਸੁਂ.

ਅਚ੍ਛਰਂ ਵਾਦੇਸੀਤਿ ਪਾਣਿਤਲਂ ਵਾਦੇਸਿ. ਪਞ੍ਚਙ੍ਗਿਕਸ੍ਸਾਤਿ ਆਤਤਂ, ਵਿਤਤਂ, ਆਤਤਵਿਤਤਂ, ਘਨਂ, ਸੁਸਿਰਨ੍ਤਿ ਇਮੇਹਿ ਪਞ੍ਚਹਿ ਅਙ੍ਗੇਹਿ ਸਮਨ੍ਨਾਗਤਸ੍ਸ. ਤਤ੍ਥ ਆਤਤਂ ਨਾਮ ਚਮ੍ਮਪਰਿਯੋਨਦ੍ਧੇਸੁ ਭੇਰਿਆਦੀਸੁ ਏਕਤਲਤੂਰਿਯਂ, ਵਿਤਤਂ ਨਾਮ ਉਭਯਤਲਂ, ਆਤਤਵਿਤਤਂ ਨਾਮ ਸਬ੍ਬਸੋ ਪਰਿਯੋਨਦ੍ਧਂ, ਸੁਸਿਰਂ ਵਂਸਾਦਿ, ਘਨਂ ਸਮ੍ਮਾਦਿ. ਸੁਵਿਨੀਤਸ੍ਸਾਤਿ ਆਕਡ੍ਢਨਸਿਥਿਲਕਰਣਾਦੀਹਿ ਸਮੁਚ੍ਛਿਤਸ੍ਸ. ਸੁਪ੍ਪਟਿਪਤਾਲ਼ਿਤਸ੍ਸਾਤਿ ਪਮਾਣੇ ਠਿਤਭਾਵਜਾਨਨਤ੍ਥਂ ਸੁਟ੍ਠੁ ਪਟਿਪਤਾਲ਼ਿਤਸ੍ਸ. ਕੁਸਲੇਹਿ ਸੁਸਮਨ੍ਨਾਹਤਸ੍ਸਾਤਿ ਯੇ ਵਾਦੇਤੁਂ ਕੁਸਲਾ ਛੇਕਾ, ਤੇਹਿ ਵਾਦਿਤਸ੍ਸ. ਵਗ੍ਗੂਤਿ ਛੇਕੋ ਸੁਨ੍ਦਰੋ. ਰਜਨੀਯੋਤਿ ਰਞ੍ਜੇਤੁਂ ਸਮਤ੍ਥੋ. ਕਮਨੀਯੋਤਿ ਕਾਮੇਤਬ੍ਬਯੁਤ੍ਤੋ. ਖਮਨੀਯੋਤਿ ਵਾ ਪਾਠੋ, ਦਿਵਸਮ੍ਪਿ ਸੁਯ੍ਯਮਾਨੋ ਖਮਤੇਵ, ਨ ਨਿਬ੍ਬਿਨ੍ਦਤੀਤਿ ਅਤ੍ਥੋ. ਮਦਨੀਯੋਤਿ ਮਾਨਮਦਪੁਰਿਸਮਦਜਨਨੋ. ਇਨ੍ਦ੍ਰਿਯਾਨਿ ਓਕ੍ਖਿਪੀਤਿ ‘‘ਅਸਾਰੁਪ੍ਪਂ ਇਮਾ ਦੇਵਤਾ ਕਰੋਨ੍ਤੀ’’ਤਿ ਇਨ੍ਦ੍ਰਿਯਾਨਿ ਹੇਟ੍ਠਾ ਖਿਪਿ, ਨ ਅਕ੍ਖੀਨਿ ਉਮ੍ਮੀਲੇਤ੍ਵਾ ਓਲੋਕੇਸਿ. ਨ ਖ੍ਵਯ੍ਯੋ ਅਨੁਰੁਦ੍ਧੋ ਸਾਦਿਯਤੀਤਿ ‘‘ਮਯਂ ਨਚ੍ਚਾਮ ਗਾਯਾਮ, ਅਯ੍ਯੋ ਪਨ ਅਨੁਰੁਦ੍ਧੋ ਨ ਖੋ ਸਾਦਿਯਤਿ, ਅਕ੍ਖੀਨਿ ਉਮ੍ਮੀਲੇਤ੍ਵਾ ਨ ਓਲੋਕੇਤਿ, ਕਿਂ ਮਯਂ ਨਚ੍ਚਿਤ੍ਵਾ ਵਾ ਗਾਯਿਤ੍ਵਾ ਵਾ ਕਰਿਸ੍ਸਾਮਾ’’ਤਿ ਤਤ੍ਥੇਵ ਅਨ੍ਤਰਧਾਯਿਂਸੁ. ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਤਾਸਂ ਦੇਵਤਾਨਂ ਆਨੁਭਾਵਂ ਦਿਸ੍ਵਾ ‘‘ਕਤਿਹਿ ਨੁ ਖੋ ਧਮ੍ਮੇਹਿ ਸਮਨ੍ਨਾਗਤੋ ਮਾਤੁਗਾਮੋ ਮਨਾਪਕਾਯਿਕੇ ਦੇਵਲੋਕੇ ਨਿਬ੍ਬਤ੍ਤਤੀ’’ਤਿ ਇਮਮਤ੍ਥਂ ਪੁਚ੍ਛਿਤੁਂ ਉਪਸਙ੍ਕਮਿ.

੯-੧੦. ਇਧਲੋਕਿਕਸੁਤ੍ਤਦ੍ਵਯਵਣ੍ਣਨਾ

੪੯-੫੦. ਨਵਮੇ ਅਯਂ’ਸ ਲੋਕੋ ਆਰਦ੍ਧੋ ਹੋਤੀਤਿ ਅਯਮਸ੍ਸ ਲੋਕੋ ਇਧਲੋਕੇ ਕਰਣਮਤ੍ਤਾਯ ਆਰਦ੍ਧਤ੍ਤਾ ਪਰਿਪੁਣ੍ਣਤ੍ਤਾ ਆਰਦ੍ਧੋ ਹੋਤਿ ਪਰਿਪੁਣ੍ਣੋ. ਸੋਲ਼ਸਾਕਾਰਸਮ੍ਪਨ੍ਨਾਤਿ ਸੁਤ੍ਤੇ ਵੁਤ੍ਤੇਹਿ ਅਟ੍ਠਹਿ, ਗਾਥਾਸੁ ਅਟ੍ਠਹੀਤਿ ਸੋਲ਼ਸਹਿ ਆਕਾਰੇਹਿ ਸਮਨ੍ਨਾਗਤਾ, ਯਾਨਿ ਵਾ ਅਟ੍ਠਙ੍ਗਾਨਿ ਪਰਮ੍ਪਿ ਤੇਸੁ ਸਮਾਦਪੇਤੀਤਿ ਏਵਮ੍ਪਿ ਸੋਲ਼ਸਾਕਾਰਸਮ੍ਪਨ੍ਨਾਤਿ ਏਕੇ. ਸਦ੍ਧਾਸੀਲਪਞ੍ਞਾ ਪਨੇਤ੍ਥ ਮਿਸ੍ਸਿਕਾ ਕਥਿਤਾ. ਦਸਮਂ ਭਿਕ੍ਖੁਸਙ੍ਘਸ੍ਸ ਕਥਿਤਂ. ਸਬ੍ਬਸੁਤ੍ਤੇਸੁ ਪਨ ਯਂ ਨ ਵੁਤ੍ਤਂ, ਤਂ ਹੇਟ੍ਠਾ ਆਗਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਉਪੋਸਥਵਗ੍ਗੋ ਪਞ੍ਚਮੋ.