.ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.
ਅਙ੍ਗੁਤ੍ਤਰਨਿਕਾਯੇ
ਅਟ੍ਠਕਨਿਪਾਤ-ਅਟ੍ਠਕਥਾ
੧. ਪਠਮਪਣ੍ਣਾਸਕਂ
੧. ਮੇਤ੍ਤਾਵਗ੍ਗੋ
੧. ਮੇਤ੍ਤਾਸੁਤ੍ਤਵਣ੍ਣਨਾ
੧. ਅਟ੍ਠਕਨਿਪਾਤਸ੍ਸ ਪਠਮੇ ਆਸੇਵਿਤਾਯਾਤਿ ਆਦਰੇਨ ਸੇਵਿਤਾਯ. ਭਾਵਿਤਾਯਾਤਿ ਵਡ੍ਢਿਤਾਯ. ਬਹੁਲੀਕਤਾਯਾਤਿ ਪੁਨਪ੍ਪੁਨਂ ਕਤਾਯ. ਯਾਨਿਕਤਾਯਾਤਿ ਯੁਤ੍ਤਯਾਨਸਦਿਸਕਤਾਯ. ਵਤ੍ਥੁਕਤਾਯਾਤਿ ਪਤਿਟ੍ਠਾਨਟ੍ਠੇਨ ਵਤ੍ਥੁ ਵਿਯ ਕਤਾਯ. ਅਨੁਟ੍ਠਿਤਾਯਾਤਿ ਪਚ੍ਚੁਪਟ੍ਠਿਤਾਯ. ਪਰਿਚਿਤਾਯਾਤਿ ਸਮਨ੍ਤਤੋ ਚਿਤਾਯ ਉਪਚਿਤਾਯ. ਸੁਸਮਾਰਦ੍ਧਾਯਾਤਿ ਸੁਟ੍ਠੁ ਸਮਾਰਦ੍ਧਾਯ ਸੁਕਤਾਯ. ਆਨਿਸਂਸਾਤਿ ਗੁਣਾ. ਸੁਖਂ ਸੁਪਤੀਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਏਕਾਦਸਕਨਿਪਾਤੇ ਵਕ੍ਖਾਮ.
ਅਪ੍ਪਮਾਣਨ੍ਤਿ ਫਰਣਵਸੇਨ ਅਪ੍ਪਮਾਣਂ. ਤਨੂ ਸਂਯੋਜਨਾ ਹੋਨ੍ਤਿ, ਪਸ੍ਸਤੋ ਉਪਧਿਕ੍ਖਯਨ੍ਤਿ ਮੇਤ੍ਤਾਪਦਟ੍ਠਾਨਾਯ ਵਿਪਸ੍ਸਨਾਯ ਅਨੁਕ੍ਕਮੇਨ ਉਪਧਿਕ੍ਖਯਸਙ੍ਖਾਤਂ ਅਰਹਤ੍ਤਂ ਪਤ੍ਤਸ੍ਸ ਦਸ ਸਂਯੋਜਨਾ ਪਹੀਯਨ੍ਤੀਤਿ ਅਤ੍ਥੋ. ਅਥ ਵਾ ਤਨੂ ਸਂਯੋਜਨਾ ਹੋਨ੍ਤੀਤਿ ਪਟਿਘਞ੍ਚੇਵ ਪਟਿਘਸਮ੍ਪਯੁਤ੍ਤਸਂਯੋਜਨਾ ਚ ਤਨੁਕਾ ਹੋਨ੍ਤਿ. ਪਸ੍ਸਤੋ ਉਪਧਿਕ੍ਖਯਨ੍ਤਿ ਤੇਸਂਯੇਵ ਕਿਲੇਸੂਪਧੀਨਂ ਖਯਸਙ੍ਖਾਤਂ ਮੇਤ੍ਤਂ ਅਧਿਗਮਵਸੇਨ ਪਸ੍ਸਨ੍ਤਸ੍ਸ. ਕੁਸਲੀ ਤੇਨ ਹੋਤੀਤਿ ਤੇਨ ਮੇਤ੍ਤਾਯਨੇਨ ਕੁਸਲੋ ਹੋਤਿ. ਸਤ੍ਤਸਣ੍ਡਨ੍ਤਿ ਸਤ੍ਤਸਙ੍ਖਾਤੇਨ ਸਣ੍ਡੇਨ ਸਮਨ੍ਨਾਗਤਂ, ਸਤ੍ਤਭਰਿਤਨ੍ਤਿ ਅਤ੍ਥੋ. ਵਿਜੇਤ੍ਵਾਤਿ ਅਦਣ੍ਡੇਨ ਅਸਤ੍ਥੇਨ ਧਮ੍ਮੇਨੇਵ ਵਿਜਿਨਿਤ੍ਵਾ. ਰਾਜਿਸਯੋਤਿ ਇਸਿਸਦਿਸਾ ਧਮ੍ਮਿਕਰਾਜਾਨੋ. ਯਜਮਾਨਾਤਿ ਦਾਨਾਨਿ ਦਦਮਾਨਾ. ਅਨੁਪਰਿਯਗਾਤਿ ਵਿਚਰਿਂਸੁ.
ਅਸ੍ਸਮੇਧਨ੍ਤਿਆਦੀਸੁ ਪੋਰਾਣਕਰਾਜਕਾਲੇ ਕਿਰ ਸਸ੍ਸਮੇਧਂ, ਪੁਰਿਸਮੇਧਂ, ਸਮ੍ਮਾਪਾਸਂ, ਵਾਚਾਪੇਯ੍ਯਨ੍ਤਿ ਚਤ੍ਤਾਰਿ ਸਙ੍ਗਹਵਤ੍ਥੂਨਿ ਅਹੇਸੁਂ, ਯੇਹਿ ਰਾਜਾਨੋ ਲੋਕਂ ਸਙ੍ਗਣ੍ਹਿਂਸੁ. ਤਤ੍ਥ ਨਿਪ੍ਫਨ੍ਨਸਸ੍ਸਤੋ ਦਸਮਭਾਗਗ੍ਗਹਣਂ ਸਸ੍ਸਮੇਧਂ ਨਾਮ, ਸਸ੍ਸਸਮ੍ਪਾਦਨੇ ਮੇਧਾਵਿਤਾਤਿ ਅਤ੍ਥੋ. ਮਹਾਯੋਧਾਨਂ ਛਮਾਸਿਕਂ ਭਤ੍ਤਵੇਤਨਾਨੁਪ੍ਪਦਾਨਂ ਪੁਰਿਸਮੇਧਂ ਨਾਮ, ਪੁਰਿਸਸਙ੍ਗਣ੍ਹਨੇ ਮੇਧਾਵਿਤਾਤਿ ਅਤ੍ਥੋ. ਦਲਿਦ੍ਦਮਨੁਸ੍ਸਾਨਂ ਹਤ੍ਥਤੋ ਲੇਖਂ ਗਹੇਤ੍ਵਾ ਤੀਣਿ ਵਸ੍ਸਾਨਿ ਵਿਨਾ ਵਡ੍ਢਿਯਾ ਸਹਸ੍ਸਦ੍ਵਿਸਹਸ੍ਸਮਤ੍ਤਧਨਾਨੁਪ੍ਪਦਾਨਂ ਸਮ੍ਮਾਪਾਸਂ ਨਾਮ. ਤਞ੍ਹਿ ਸਮ੍ਮਾ ਮਨੁਸ੍ਸੇ ਪਾਸੇਤਿ ਹਦਯੇ ਬਨ੍ਧਿਤ੍ਵਾ ਵਿਯ ਠਪੇਤਿ, ਤਸ੍ਮਾ ਸਮ੍ਮਾਪਾਸਨ੍ਤਿ ਵੁਚ੍ਚਤਿ. ‘‘ਤਾਤ, ਮਾਤੁਲਾ’’ਤਿਆਦਿਨਾ ਨਯੇਨ ਪਨ ਸਣ੍ਹਵਾਚਾਭਣਨਂ ਵਾਚਾਪੇਯ੍ਯਂ ਨਾਮ, ਪਿਯਵਾਚਾਤਿ ਅਤ੍ਥੋ. ਏਵਂ ਚਤੂਹਿ ਸਙ੍ਗਹਵਤ੍ਥੂਹਿ ਸਙ੍ਗਹਿਤਂ ਰਟ੍ਠਂ ਇਦ੍ਧਞ੍ਚੇਵ ਹੋਤਿ, ਫੀਤਞ੍ਚ, ਬਹੁਅਨ੍ਨਪਾਨਂ, ਖੇਮਂ, ਨਿਰਬ੍ਬੁਦਂ. ਮਨੁਸ੍ਸਾ ਮੁਦਾ ਮੋਦਮਾਨਾ ਉਰੇ ਪੁਤ੍ਤੇ ਨਚ੍ਚੇਨ੍ਤਾ ਅਪਾਰੁਤਘਰਾ ਵਿਹਰਨ੍ਤਿ. ਇਦਂ ਘਰਦ੍ਵਾਰੇਸੁ ਅਗ੍ਗਲ਼ਾਨਂ ਅਭਾਵਤੋ ਨਿਰਗ੍ਗਲ਼ਨ੍ਤਿ ਵੁਚ੍ਚਤਿ. ਅਯਂ ਪੋਰਾਣਿਕਾ ਪਵੇਣਿ.
ਅਪਰਭਾਗੇ ਪਨ ਓਕ੍ਕਾਕਰਾਜਕਾਲੇ ਬ੍ਰਾਹ੍ਮਣਾ ਇਮਾਨਿ ਚਤ੍ਤਾਰਿ ਸਙ੍ਗਹਵਤ੍ਥੂਨਿ ਇਮਞ੍ਚ ਰਟ੍ਠਸਮ੍ਪਤ੍ਤਿਂ ਪਰਿਵਤ੍ਤੇਤ੍ਵਾ ਉਦ੍ਧਂਮੂਲਕਂ ਕਤ੍ਵਾ ਅਸ੍ਸਮੇਧਂ ਪੁਰਿਸਮੇਧਨ੍ਤਿਆਦਿਕੇ ਪਞ੍ਚ ਯਞ੍ਞੇ ਨਾਮ ਅਕਂਸੁ. ਤੇਸੁ ਅਸ੍ਸਮੇਤ੍ਥ ਮੇਧਨ੍ਤਿ ਵਧੇਨ੍ਤੀਤਿ ਅਸ੍ਸਮੇਧੋ. ਦ੍ਵੀਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਏਕਵੀਸਤਿਯੂਪਸ੍ਸ ਏਕਸ੍ਮਿਂ ਪਚ੍ਛਿਮਦਿਵਸੇਯੇਵ ਸਤ੍ਤਨਵੁਤਿਪਞ੍ਚਪਸੁਸਤਘਾਤਭਿਂਸਨਸ੍ਸ ਠਪੇਤ੍ਵਾ ਭੂਮਿਞ੍ਚ ਪੁਰਿਸੇ ਚ ਅਵਸੇਸਸਬ੍ਬਵਿਭਵਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਪੁਰਿਸਮੇਤ੍ਥ ਮੇਧਨ੍ਤੀਤਿ ਪੁਰਿਸਮੇਧੋ. ਚਤੂਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਸਦ੍ਧਿਂ ਭੂਮਿਯਾ ਅਸ੍ਸਮੇਧੇ ਵੁਤ੍ਤਵਿਭਵਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਸਮ੍ਮਮੇਤ੍ਥ ਪਾਸਨ੍ਤੀਤਿ ਸਮ੍ਮਾਪਾਸੋ. ਦਿਵਸੇ ਦਿਵਸੇ ਯੁਗਚ੍ਛਿਗ੍ਗਲ਼ੇ ਪਵੇਸਨਦਣ੍ਡਕਸਙ੍ਖਾਤਂ ਸਮ੍ਮਂ ਖਿਪਿਤ੍ਵਾ ਤਸ੍ਸ ਪਤਿਤੋਕਾਸੇ ਵੇਦਿਂ ਕਤ੍ਵਾ ਸਂਹਾਰਿਮੇਹਿ ਯੂਪਾਦੀਹਿ ਸਰਸ੍ਸਤੀਨਦਿਯਾ ਨਿਮੁਗ੍ਗੋਕਾਸਤੋ ਪਭੁਤਿ ਪਟਿਲੋਮਂ ਗਚ੍ਛਨ੍ਤੇਨ ਯਜਿਤਬ੍ਬਸ੍ਸ ਸਤ੍ਰਯਾਗਸ੍ਸੇਤਂ ਅਧਿਵਚਨਂ. ਵਾਜਮੇਤ੍ਥ ਪਿਵਨ੍ਤੀਤਿ ਵਾਜਪੇਯ੍ਯੋ. ਏਕੇਨ ਪਰਿਯਞ੍ਞੇਨ ਸਤ੍ਤਰਸਹਿ ਪਸੂਹਿ ਯਜਿਤਬ੍ਬਸ੍ਸ ਬੇਲੁਵਯੂਪਸ੍ਸ ਸਤ੍ਤਰਸਕਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਨਤ੍ਥਿ ਏਤ੍ਥ ਅਗ੍ਗਲ਼ਾਤਿ ਨਿਰਗ੍ਗਲ਼ੋ. ਨਵਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਸਦ੍ਧਿਂ ਭੂਮਿਯਾ ਚ ਪੁਰਿਸੇਹਿ ਚ ਅਸ੍ਸਮੇਧੇ ਵੁਤ੍ਤਵਿਭਵਦਕ੍ਖਿਣਸ੍ਸ ਸਬ੍ਬਮੇਧਪਰਿਯਾਯਨਾਮਸ੍ਸ ਅਸ੍ਸਮੇਧਵਿਕਪ੍ਪਸ੍ਸੇਤਂ ਅਧਿਵਚਨਂ.
ਕਲਮ੍ਪਿ ਤੇ ਨਾਨੁਭਵਨ੍ਤਿ ਸੋਲ਼ਸਿਨ੍ਤਿ ਤੇ ਸਬ੍ਬੇਪਿ ਮਹਾਯਾਗਾ ਏਕਸ੍ਸ ਮੇਤ੍ਤਾਚਿਤ੍ਤਸ੍ਸ ਵਿਪਾਕਮਹਨ੍ਤਤਾਯ ਸੋਲ਼ਸਿਂ ਕਲਂ ਨ ਅਗ੍ਘਨ੍ਤਿ, ਸੋਲ਼ਸਮਂ ਭਾਗਂ ਨ ਪਾਪੁਣਨ੍ਤੀਤਿ ਅਤ੍ਥੋ. ਨ ਜਿਨਾਤੀਤਿ ਨ ਅਤ੍ਤਨਾ ਪਰਸ੍ਸ ਜਾਨਿਂ ਕਰੋਤਿ. ਨ ਜਾਪਯੇਤਿ ਨ ਪਰੇਨ ਪਰਸ੍ਸ ਜਾਨਿਂ ਕਾਰੇਤਿ. ਮੇਤ੍ਤਂਸੋਤਿ ਮੇਤ੍ਤਾਯਮਾਨਚਿਤ੍ਤਕੋਟ੍ਠਾਸੋ ਹੁਤ੍ਵਾ. ਸਬ੍ਬਭੂਤਾਨਨ੍ਤਿ ਸਬ੍ਬਸਤ੍ਤੇਸੁ. ਵੇਰਂ ਤਸ੍ਸ ਨ ਕੇਨਚੀਤਿ ਤਸ੍ਸ ਕੇਨਚਿ ਸਦ੍ਧਿਂ ਅਕੁਸਲਵੇਰਂ ਵਾ ਪੁਗ੍ਗਲਵੇਰਂ ਵਾ ਨਤ੍ਥਿ.
੨. ਪਞ੍ਞਾਸੁਤ੍ਤਵਣ੍ਣਨਾ
੨. ਦੁਤਿਯੇ ਆਦਿਬ੍ਰਹ੍ਮਚਰਿਯਿਕਾਯਾਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾਯ. ਪਞ੍ਞਾਯਾਤਿ ਵਿਪਸ੍ਸਨਾਯ. ਗਰੁਟ੍ਠਾਨਿਯਨ੍ਤਿ ਗਾਰਵੁਪ੍ਪਤ੍ਤਿਪਚ੍ਚਯਭੂਤਂ ਗਰੁਭਾਵਨੀਯਂ. ਤਿਬ੍ਬਨ੍ਤਿ ਬਹਲਂ. ਪਰਿਪੁਚ੍ਛਤੀਤਿ ਅਤ੍ਥਪਾਲ਼ਿਅਨੁਸਨ੍ਧਿਪੁਬ੍ਬਾਪਰਂ ਪੁਚ੍ਛਤਿ. ਪਰਿਪਞ੍ਹਤੀਤਿ ਪਞ੍ਹਂ ਕਰੋਤਿ, ਇਦਞ੍ਚਿਦਞ੍ਚ ਪਟਿਪੁਚ੍ਛਿਸ੍ਸਾਮੀਤਿ ਵਿਤਕ੍ਕੇਤਿ. ਦ੍ਵਯੇਨਾਤਿ ਦੁਵਿਧੇਨ. ਅਨਾਨਾਕਥਿਕੋਤਿ ਅਨਾਨਤ੍ਤਕਥਿਕੋ ਹੋਤਿ. ਅਤਿਰਚ੍ਛਾਨਕਥਿਕੋਤਿ ਨਾਨਾਵਿਧਂ ਤਿਰਚ੍ਛਾਨਕਥਂ ਨ ਕਥੇਤਿ. ਅਰਿਯਂ ਵਾ ਤੁਣ੍ਹੀਭਾਵਨ੍ਤਿ ਅਰਿਯਤੁਣ੍ਹੀਭਾਵੋ ਨਾਮ ਚਤੁਤ੍ਥਜ੍ਝਾਨਂ, ਸੇਸਕਮ੍ਮਟ੍ਠਾਨਮਨਸਿਕਾਰੋਪਿ ਵਟ੍ਟਤਿ. ਜਾਨਂ ਜਾਨਾਤੀਤਿ ਜਾਨਿਤਬ੍ਬਕਂ ਜਾਨਾਤਿ. ਪਸ੍ਸਂ ਪਸ੍ਸਤੀਤਿ ਪਸ੍ਸਿਤਬ੍ਬਕਂ ਪਸ੍ਸਤਿ. ਪਿਯਤ੍ਤਾਯਾਤਿ ਪਿਯਭਾਵਤ੍ਥਾਯ. ਗਰੁਤ੍ਤਾਯਾਤਿ ਗਰੁਭਾਵਤ੍ਥਾਯ. ਭਾਵਨਾਯਾਤਿ ਭਾਵਨਤ੍ਥਾਯ ਗੁਣਸਮ੍ਭਾਵਨਾਯ ਵਾ. ਸਾਮਞ੍ਞਾਯਾਤਿ ਸਮਣਧਮ੍ਮਤ੍ਥਾਯ. ਏਕੀਭਾਵਾਯਾਤਿ ਨਿਰਨ੍ਤਰਭਾਵਤ੍ਥਾਯ.
੩-੪. ਅਪ੍ਪਿਯਸੁਤ੍ਤਦ੍ਵਯਵਣ੍ਣਨਾ
੩-੪. ਤਤਿਯੇ ਅਪ੍ਪਿਯਪਸਂਸੀਤਿ ਅਪ੍ਪਿਯਜਨਸ੍ਸ ਪਸਂਸਕੋ ਵਣ੍ਣਭਾਣੀ. ਪਿਯਗਰਹੀਤਿ ਪਿਯਜਨਸ੍ਸ ਨਿਨ੍ਦਕੋ ਗਰਹਕੋ. ਚਤੁਤ੍ਥੇ ਅਨਵਞ੍ਞਤ੍ਤਿਕਾਮੋਤਿ ‘‘ਅਹੋ ਵਤ ਮਂ ਅਞ੍ਞੇਨ ਅਵਜਾਨੇਯ੍ਯੁ’’ਨ੍ਤਿ ਅਨਵਜਾਨਨਕਾਮੋ. ਅਕਾਲਞ੍ਞੂਤਿ ਕਥਾਕਾਲਂ ਨ ਜਾਨਾਤਿ, ਅਕਾਲੇ ਕਥੇਤਿ. ਅਸੁਚੀਤਿ ਅਸੁਚੀਹਿ ਕਾਯਕਮ੍ਮਾਦੀਹਿ ਸਮਨ੍ਨਾਗਤੋ.
੫. ਪਠਮਲੋਕਧਮ੍ਮਸੁਤ੍ਤਵਣ੍ਣਨਾ
੫. ਪਞ੍ਚਮੇ ਲੋਕਸ੍ਸ ਧਮ੍ਮਾਤਿ ਲੋਕਧਮ੍ਮਾ. ਏਤੇਹਿ ਮੁਤ੍ਤਾ ਨਾਮ ਨਤ੍ਥਿ, ਬੁਦ੍ਧਾਨਮ੍ਪਿ ਹੋਨ੍ਤਿ. ਤੇਨੇਵਾਹ – ਲੋਕਂ ਅਨੁਪਰਿਵਤ੍ਤਨ੍ਤੀਤਿ ਅਨੁਬਨ੍ਧਨ੍ਤਿ ਨਪ੍ਪਜਹਨ੍ਤਿ, ਲੋਕਤੋ ਨ ਨਿਵਤ੍ਤਨ੍ਤੀਤਿ ਅਤ੍ਥੋ. ਲੋਕੋ ਚ ਅਟ੍ਠ ਲੋਕਧਮ੍ਮੇ ਅਨੁਪਰਿਵਤ੍ਤਤੀਤਿ ਅਯਞ੍ਚ ਲੋਕੋ ਏਤੇ ਅਨੁਬਨ੍ਧਤਿ ਨ ਪਜਹਤਿ, ਤੇਹਿ ਧਮ੍ਮੇਹਿ ਨ ਨਿਵਤ੍ਤਤੀਤਿ ਅਤ੍ਥੋ.
ਲਾਭੋ ਅਲਾਭੋਤਿ ਲਾਭੇ ਆਗਤੇ ਅਲਾਭੋ ਆਗਤੋਯੇਵਾਤਿ ਵੇਦਿਤਬ੍ਬੋ. ਅਯਸਾਦੀਸੁਪਿ ਏਸੇਵ ਨਯੋ. ਅਵੇਕ੍ਖਤਿ ਵਿਪਰਿਣਾਮਧਮ੍ਮੇਤਿ ‘‘ਵਿਪਰਿਣਾਮਧਮ੍ਮਾ ਇਮੇ’’ਤਿ ਏਵਂ ਅਵੇਕ੍ਖਤਿ. ਵਿਧੂਪਿਤਾਤਿ ਵਿਧਮਿਤਾ ਵਿਦ੍ਧਂਸਿਤਾ. ਪਦਞ੍ਚ ਞਤ੍ਵਾਤਿ ਨਿਬ੍ਬਾਨਪਦਂ ਜਾਨਿਤ੍ਵਾ. ਸਮ੍ਮਪ੍ਪਜਾਨਾਤਿ ਭਵਸ੍ਸ ਪਾਰਗੂਤਿ ਭਵਸ੍ਸ ਪਾਰਂ ਗਤੋ ਨਿਪ੍ਫਤ੍ਤਿਂ ਮਤ੍ਥਕਂ ਪਤ੍ਤੋ, ਨਿਬ੍ਬਾਨਪਦਂ ਞਤ੍ਵਾਵ ਤਂ ਪਾਰਂ ਗਤਭਾਵਂ ਸਮ੍ਮਪ੍ਪਜਾਨਾਤੀਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.
੬. ਦੁਤਿਯਲੋਕਧਮ੍ਮਸੁਤ੍ਤਵਣ੍ਣਨਾ
੬. ਛਟ੍ਠੇ ਕੋ ਵਿਸੇਸੋਤਿ ਕਿਂ ਵਿਸੇਸਕਾਰਣਂ. ਕੋ ਅਧਿਪ੍ਪਯਾਸੋਤਿ ਕੋ ਅਧਿਕਪ੍ਪਯੋਗੋ. ਪਰਿਯਾਦਾਯਾਤਿ ਗਹੇਤ੍ਵਾ ਪਰਿਨਿਟ੍ਠਪੇਤ੍ਵਾ. ਇਧਾਪਿ ਵਟ੍ਟਵਿਵਟ੍ਟਮੇਵ ਕਥਿਤਂ.
੭. ਦੇਵਦਤ੍ਤਵਿਪਤ੍ਤਿਸੁਤ੍ਤਵਣ੍ਣਨਾ
੭. ਸਤ੍ਤਮੇ ਅਚਿਰਪਕ੍ਕਨ੍ਤੇਤਿ ਸਙ੍ਘਂ ਭਿਨ੍ਦਿਤ੍ਵਾ ਨ ਚਿਰਪਕ੍ਕਨ੍ਤੇ. ਆਰਬ੍ਭਾਤਿ ਆਗਮ੍ਮ ਪਟਿਚ੍ਚ ਸਨ੍ਧਾਯ. ਅਤ੍ਤਵਿਪਤ੍ਤਿਨ੍ਤਿ ਅਤ੍ਤਨੋ ਵਿਪਤ੍ਤਿਂ ਵਿਪਨ੍ਨਾਕਾਰਂ. ਸੇਸਪਦੇਸੁਪਿ ਏਸੇਵ ਨਯੋ. ਅਭਿਭੁਯ੍ਯਾਤਿ ਅਭਿਭਵਿਤ੍ਵਾ ਮਦ੍ਦਿਤ੍ਵਾ.
੮. ਉਤ੍ਤਰਵਿਪਤ੍ਤਿਸੁਤ੍ਤਵਣ੍ਣਨਾ
੮. ਅਟ੍ਠਮੇ ਵਟਜਾਲਿਕਾਯਨ੍ਤਿ ਏਵਂਨਾਮਕੇ ਵਿਹਾਰੇ. ਸੋ ਕਿਰ ਵਟਵਨੇ ਨਿਵਿਟ੍ਠਤ੍ਤਾ ਵਟਜਾਲਿਕਾਤਿ ਸਙ੍ਖਂ ਗਤੋ. ਪਾਤੁਰਹੋਸੀਤਿ ਇਮਮਤ੍ਥਂ ਦੇਵਰਞ੍ਞੋ ਆਰੋਚੇਸ੍ਸਾਮੀਤਿ ਗਨ੍ਤ੍ਵਾ ਪਾਕਟੋ ਅਹੋਸਿ. ਆਦਿਬ੍ਰਹ੍ਮਚਰਿਯਕੋਤਿ ਸਿਕ੍ਖਤ੍ਤਯਸਙ੍ਗਹਸ੍ਸ ਸਕਲਸਾਸਨਬ੍ਰਹ੍ਮਚਰਿਯਸ੍ਸ ਆਦਿਭੂਤੋ.
੯. ਨਨ੍ਦਸੁਤ੍ਤਵਣ੍ਣਨਾ
੯. ਨਵਮੇ ਕੁਲਪੁਤ੍ਤੋਤਿ ਜਾਤਿਕੁਲਪੁਤ੍ਤੋ. ਬਲਵਾਤਿ ਥਾਮਸਮ੍ਪਨ੍ਨੋ. ਪਾਸਾਦਿਕੋਤਿ ਰੂਪਸਮ੍ਪਤ੍ਤਿਯਾ ਪਸਾਦਜਨਕੋ. ਤਿਬ੍ਬਰਾਗੋਤਿ ਬਹਲਰਾਗੋ. ਕਿਮਞ੍ਞਤ੍ਰਾਤਿਆਦੀਸੁ ਅਯਮਤ੍ਥੋ – ਕਿਂ ਅਞ੍ਞੇਨ ਕਾਰਣੇਨ ਕਥਿਤੇਨ, ਅਯਂ ਨਨ੍ਦੋ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਭੋਜਨੇ ਮਤ੍ਤਞ੍ਞੂ ਜਾਗਰਿਯਮਨੁਯੁਤ੍ਤੋ ਸਤਿਸਮ੍ਪਜਞ੍ਞੇਨ ਸਮਨ੍ਨਾਗਤੋ, ਯੇਹਿ ਨਨ੍ਦੋ ਸਕ੍ਕੋਤਿ ਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਚਰਿਤੁਂ. ਸਚੇ ਇਮੇਹਿ ਕਾਰਣੇਹਿ ਸਮਨ੍ਨਾਗਤੋ ਨਾਭਵਿਸ੍ਸ, ਨ ਸਕ੍ਕੁਣੇਯ੍ਯਾਤਿ. ਇਤਿਹ ਤਤ੍ਥਾਤਿ ਏਵਂ ਤਤ੍ਥ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਂ.
੧੦. ਕਾਰਣ੍ਡਵਸੁਤ੍ਤਵਣ੍ਣਨਾ
੧੦. ਦਸਮੇ ਅਞ੍ਞੇਨਾਞ੍ਞਂ ਪਟਿਚਰਤੀਤਿ ਅਞ੍ਞੇਨ ਕਾਰਣੇਨ ਵਚਨੇਨ ਵਾ ਅਞ੍ਞਂ ਕਾਰਣਂ ਵਚਨਂ ਵਾ ਪਟਿਚ੍ਛਾਦੇਤਿ. ਬਹਿਦ੍ਧਾ ਕਥਂ ਅਪਨਾਮੇਤੀਤਿ ਬਾਹਿਰਤੋ ਅਞ੍ਞਂ ਆਗਨ੍ਤੁਕਕਥਂ ਓਤਾਰੇਤਿ. ਅਪਨੇਯ੍ਯੇਸੋਤਿ ਅਪਨੇਯ੍ਯੋ ਨੀਹਰਿਤਬ੍ਬੋ ਏਸ. ਸਮਣਦੂਸੀਤਿ ਸਮਣਦੂਸਕੋ. ਸਮਣਪਲਾਪੋਤਿ ਵੀਹੀਸੁ ਵੀਹਿਪਲਾਪੋ ਵਿਯ ਨਿਸ੍ਸਾਰਤਾਯ ਸਮਣੇਸੁ ਸਮਣਪਲਾਪੋ. ਸਮਣਕਾਰਣ੍ਡਵੋਤਿ ਸਮਣਕਚਵਰੋ. ਬਹਿਦ੍ਧਾ ਨਾਸੇਨ੍ਤੀਤਿ ਬਹਿ ਨੀਹਰਨ੍ਤਿ. ਯਵਕਰਣੇਤਿ ਯਵਖੇਤ੍ਤੇ. ਫੁਣਮਾਨਸ੍ਸਾਤਿ ਉਚ੍ਚੇ ਠਾਨੇ ਠਤ੍ਵਾ ਮਹਾਵਾਤੇ ਓਪੁਨਿਯਮਾਨਸ੍ਸ. ਅਪਸਮ੍ਮਜ੍ਜਨ੍ਤੀਤਿ ਸਾਰਧਞ੍ਞਾਨਂ ਏਕਤੋ ਦੁਬ੍ਬਲਧਞ੍ਞਾਨਂ ਏਕਤੋ ਕਰਣਤ੍ਥਂ ਪੁਨਪ੍ਪੁਨਂ ਅਪਸਮ੍ਮਜ੍ਜਨ੍ਤਿ, ਅਪਸਮ੍ਮਜ੍ਜਨਿਸਙ੍ਖਾਤੇਨ ਵਾਤਗ੍ਗਾਹਿਨਾ ਸੁਪ੍ਪੇਨ ਵਾ ਵਤ੍ਥੇਨ ਵਾ ਨੀਹਰਨ੍ਤਿ. ਦਦ੍ਦਰਨ੍ਤਿ ਦਦ੍ਦਰਸਦ੍ਦਂ.
ਸਂਵਾਸਾਯਨ੍ਤਿ ਸਂਵਾਸੇਨ ਅਯਂ. ਵਿਜਾਨਾਥਾਤਿ ਜਾਨੇਯ੍ਯਾਥ. ਸਨ੍ਤਵਾਚੋਤਿ ਸਣ੍ਹਵਾਚੋ. ਜਨਵਤੀਤਿ ਜਨਮਜ੍ਝੇ. ਰਹੋ ਕਰੋਤਿ ਕਰਣਨ੍ਤਿ ਕਰਣਂ ਵੁਚ੍ਚਤਿ ਪਾਪਕਮ੍ਮਂ, ਤਂ ਰਹੋ ਪਟਿਚ੍ਛਨ੍ਨੋ ਹੁਤ੍ਵਾ ਕਰੋਤਿ. ਸਂਸਪ੍ਪੀ ਚ ਮੁਸਾਵਾਦੀਤਿ ਸਂਸਪ੍ਪਿਤ੍ਵਾ ਮੁਸਾਵਾਦੀ, ਮੁਸਾ ਭਣਨ੍ਤੋ ਸਂਸਪ੍ਪਤਿ ਫਨ੍ਦਤੀਤਿ ਅਤ੍ਥੋ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥੇਤ੍ਵਾ ਗਾਥਾਸੁ ਵਟ੍ਟਵਿਵਟ੍ਟਂ ਕਥਿਤਨ੍ਤਿ.
ਮੇਤ੍ਤਾਵਗ੍ਗੋ ਪਠਮੋ.
੨. ਮਹਾਵਗ੍ਗੋ
੧. ਵੇਰਞ੍ਜਸੁਤ੍ਤਵਣ੍ਣਨਾ
੧੧. ਦੁਤਿਯਸ੍ਸ ਪਠਮੇ ਅਭਿਵਾਦੇਤੀਤਿ ਏਵਮਾਦੀਨਿ ਨ ਸਮਣੋ ਗੋਤਮੋਤਿ ਏਤ੍ਥ ਵੁਤ੍ਤਨਕਾਰੇਨ ਯੋਜੇਤ੍ਵਾ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ ‘‘ਨ ਵਨ੍ਦਤਿ ਨਾਸਨਾ ਵੁਟ੍ਠਾਤਿ, ਨਾਪਿ ‘ਇਧ ਭੋਨ੍ਤੋ ਨਿਸੀਦਨ੍ਤੂ’ਤਿ ਏਵਂ ਆਸਨੇਨ ਵਾ ਨਿਮਨ੍ਤੇਤੀ’’ਤਿ. ਏਤ੍ਥ ਹਿ ਵਾ-ਸਦ੍ਦੋ ਵਿਭਾਵਨੇ ਨਾਮ ਅਤ੍ਥੇ ‘‘ਰੂਪਂ ਨਿਚ੍ਚਂ ਵਾ ਅਨਿਚ੍ਚਂ ਵਾ’’ਤਿਆਦੀਸੁ ਵਿਯ. ਏਵਂ ਵਤ੍ਵਾ ਅਥ ਅਤ੍ਤਨੋ ਅਭਿਵਾਦਨਾਦੀਨਿ ਅਕਰੋਨ੍ਤਂ ਭਗਵਨ੍ਤਂ ਦਿਸ੍ਵਾ ਆਹ – ਤਯਿਦਂ, ਭੋ ਗੋਤਮ, ਤਥੇਵਾਤਿ. ਯਂ ਤਂ ਮਯਾ ਸੁਤਂ, ਤਂ ਤਥੇਵ, ਤਂ ਸਵਨਞ੍ਚ ਮੇ ਦਸ੍ਸਨਞ੍ਚ ਸਂਸਨ੍ਦਤਿ ਸਮੇਤਿ, ਅਤ੍ਥਤੋ ਏਕੀਭਾਵਂ ਗਚ੍ਛਤਿ. ਨ ਹਿ ਭਵਂ ਗੋਤਮੋ…ਪੇ… ਆਸਨੇਨ ਵਾ ਨਿਮਨ੍ਤੇਤੀਤਿ. ਏਵਂ ਅਤ੍ਤਨਾ ਸੁਤਂ ਦਿਟ੍ਠੇਨ ਨਿਗਮੇਤ੍ਵਾ ਨਿਨ੍ਦਨ੍ਤੋ ਆਹ – ਤਯਿਦਂ, ਭੋ ਗੋਤਮ, ਨ ਸਮ੍ਪਨ੍ਨਮੇਵਾਤਿ ਤਂ ਅਭਿਵਾਦਨਾਦੀਨਂ ਅਕਰਣਂ ਅਯੁਤ੍ਤਮੇਵਾਤਿ.
ਅਥਸ੍ਸ ਭਗਵਾ ਅਤ੍ਤੁਕ੍ਕਂਸਨਪਰਵਮ੍ਭਨਦੋਸਂ ਅਨੁਪਗਮ੍ਮ ਕਰੁਣਾਸੀਤਲੇਨ ਹਦਯੇਨ ਤਂ ਅਞ੍ਞਾਣਂ ਵਿਧਮਿਤ੍ਵਾ ਯੁਤ੍ਤਭਾਵਂ ਦਸ੍ਸੇਤੁਕਾਮੋ ਨਾਹਂ ਤਂ ਬ੍ਰਾਹ੍ਮਣਾਤਿਆਦਿਮਾਹ. ਤਤ੍ਰਾਯਂ ਸਙ੍ਖੇਪਤ੍ਥੋ – ਅਹਂ, ਬ੍ਰਾਹ੍ਮਣ, ਅਪ੍ਪਟਿਹਤੇਨ ਸਬ੍ਬਞ੍ਞੁਤਞ੍ਞਾਣਚਕ੍ਖੁਨਾ ਓਲੋਕੇਨ੍ਤੋਪਿ ਤਂ ਪੁਗ੍ਗਲਂ ਏਤਸ੍ਮਿਂ ਸਦੇਵਕਾਦਿਭੇਦੇ ਲੋਕੇ ਨ ਪਸ੍ਸਾਮਿ, ਯਮਹਂ ਅਭਿਵਾਦੇਯ੍ਯਂ ਵਾ ਪਚ੍ਚੁਟ੍ਠੇਯ੍ਯਂ ਵਾ ਆਸਨੇਨ ਵਾ ਨਿਮਨ੍ਤੇਯ੍ਯਂ. ਅਨਚ੍ਛਰਿਯਂ ਵਾ ਏਤਂ, ਸ੍ਵਾਹਂ ਅਜ੍ਜ ਸਬ੍ਬਞ੍ਞੁਤਂ ਪਤ੍ਤੋ ਏਵਰੂਪਂ ਨਿਪਚ੍ਚਾਕਾਰਾਰਹਂ ਪੁਗ੍ਗਲਂ ਨ ਪਸ੍ਸਾਮਿ. ਅਪਿਚ ਖੋ ਯਦਾਪਾਹਂ ਸਮ੍ਪਤਿਜਾਤੋਵ ਉਤ੍ਤਰੇਨ ਮੁਖੋ ਸਤ੍ਤਪਦਵੀਤਿਹਾਰੇਨ ਗਨ੍ਤ੍ਵਾ ਸਕਲਂ ਦਸਸਹਸ੍ਸਿਲੋਕਧਾਤੁਂ ਓਲੋਕੇਸਿਂ, ਤਦਾਪਿ ਏਤਸ੍ਮਿਂ ਸਦੇਵਕਾਦਿਭੇਦੇ ਲੋਕੇ ਤਂ ਪੁਗ੍ਗਲਂ ਨ ਪਸ੍ਸਾਮਿ, ਯਮਹਂ ਏਵਰੂਪਂ ਨਿਪਚ੍ਚਕਾਰਂ ਕਰੇਯ੍ਯਂ. ਅਥ ਖੋ ਮਂ ਸੋਲ਼ਸਕਪ੍ਪਸਹਸ੍ਸਾਯੁਕੋ ਖੀਣਾਸਵਮਹਾਬ੍ਰਹ੍ਮਾਪਿ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਤ੍ਵਂ ਲੋਕੇ ਮਹਾਪੁਰਿਸੋ, ਤ੍ਵਂ ਸਦੇਵਕਸ੍ਸ ਲੋਕਸ੍ਸ ਅਗ੍ਗੋ ਚ ਜੇਟ੍ਠੋ ਚ ਸੇਟ੍ਠੋ ਚ, ਨਤ੍ਥਿ ਤਯਾ ਉਤ੍ਤਰਿਤਰੋ’’ਤਿ ਸਞ੍ਜਾਤਸੋਮਨਸ੍ਸੋ ਪਤਿਮਾਨੇਸਿ. ਤਦਾਪਿ ਚਾਹਂ ਅਤ੍ਤਨਾ ਉਤ੍ਤਰਿਤਰਂ ਅਪਸ੍ਸਨ੍ਤੋ ਆਸਭਿਂ ਵਾਚਂ ਨਿਚ੍ਛਾਰੇਸਿਂ – ‘‘ਅਗ੍ਗੋਹਮਸ੍ਮਿ ਲੋਕਸ੍ਸ, ਜੇਟ੍ਠੋਹਮਸ੍ਮਿ ਲੋਕਸ੍ਸ, ਸੇਟ੍ਠੋਹਮਸ੍ਮਿ ਲੋਕਸ੍ਸਾ’’ਤਿ. ਏਵਂ ਸਮ੍ਪਤਿਜਾਤਸ੍ਸਾਪਿ ਮਯ੍ਹਂ ਅਭਿਵਾਦਨਾਦਿਰਹੋ ਪੁਗ੍ਗਲੋ ਨਤ੍ਥਿ, ਸ੍ਵਾਹਂ ਇਦਾਨਿ ਸਬ੍ਬਞ੍ਞੁਤਂ ਪਤ੍ਤੋ ਕਂ ਅਭਿਵਾਦੇਯ੍ਯਂ. ਤਸ੍ਮਾ ਤ੍ਵਂ, ਬ੍ਰਾਹ੍ਮਣ, ਮਾ ਤਥਾਗਤਾ ਏਵਰੂਪਂ ਪਰਮਨਿਪਚ੍ਚਕਾਰਂ ਪਤ੍ਥਯਿ. ਯਞ੍ਹਿ, ਬ੍ਰਾਹ੍ਮਣ, ਤਥਾਗਤੋ ਅਭਿਵਾਦੇਯ੍ਯ ਵਾ…ਪੇ… ਆਸਨੇਨ ਵਾ ਨਿਮਨ੍ਤੇਯ੍ਯ, ਮੁਦ੍ਧਾਪਿ ਤਸ੍ਸ ਪੁਗ੍ਗਲਸ੍ਸ ਰਤ੍ਤਿਪਰਿਯੋਸਾਨੇ ਪਰਿਪਾਕਸਿਥਿਲਬਨ੍ਧਨਂ ਵਣ੍ਟਾ ਮੁਤ੍ਤਤਾਲਫਲਂ ਵਿਯ ਗੀਵਤੋ ਛਿਜ੍ਜਿਤ੍ਵਾ ਸਹਸਾਵ ਭੂਮਿਯਂ ਨਿਪਤੇਯ੍ਯ.
ਏਵਂ ਵੁਤ੍ਤੇਪਿ ਬ੍ਰਾਹ੍ਮਣੋ ਦੁਪ੍ਪਞ੍ਞਤਾਯ ਤਥਾਗਤਸ੍ਸ ਲੋਕਜੇਟ੍ਠਭਾਵਂ ਅਸਲ੍ਲਕ੍ਖੇਨ੍ਤੋ ਕੇਵਲਂ ਤਂ ਵਚਨਂ ਅਸਹਮਾਨੋ ਆਹ – ਅਰਸਰੂਪੋ ਭਵਂ ਗੋਤਮੋਤਿ. ਅਯਂ ਕਿਰਸ੍ਸ ਅਧਿਪ੍ਪਾਯੋ – ਯਂ ਲੋਕੇ ਅਭਿਵਾਦਨਪਚ੍ਚੁਟ੍ਠਾਨਅਞ੍ਜਲਿਕਮ੍ਮਸਾਮੀਚਿਕਮ੍ਮਂ ‘‘ਸਾਮਗ੍ਗਿਰਸੋ’’ਤਿ ਵੁਚ੍ਚਤਿ, ਤਂ ਭੋਤੋ ਗੋਤਮਸ੍ਸ ਨਤ੍ਥਿ. ਤਸ੍ਮਾ ਅਰਸਰੂਪੋ ਭਵਂ ਗੋਤਮੋ, ਅਰਸਜਾਤਿਕੋ ਅਰਸਸਭਾਵੋਤਿ. ਅਥਸ੍ਸ ਭਗਵਾ ਚਿਤ੍ਤਮੁਦੁਭਾਵਜਨਨਤ੍ਥਂ ਉਜੁਵਿਪਚ੍ਚਨੀਕਭਾਵਂ ਪਰਿਹਰਨ੍ਤੋ ਅਞ੍ਞਥਾ ਤਸ੍ਸ ਵਚਨਸ੍ਸ ਅਤ੍ਥਂ ਅਤ੍ਤਨਿ ਸਨ੍ਦਸ੍ਸੇਨ੍ਤੋ ਅਤ੍ਥਿ ਖ੍ਵੇਸ, ਬ੍ਰਾਹ੍ਮਣ, ਪਰਿਯਾਯੋਤਿਆਦਿਮਾਹ.
ਤਤ੍ਥ ਅਤ੍ਥਿ ਖ੍ਵੇਸਾਤਿ ਅਤ੍ਥਿ ਖੋ ਏਸ. ਪਰਿਯਾਯੋਤਿ ਕਾਰਣਂ. ਇਦਂ ਵੁਤ੍ਤਂ ਹੋਤਿ – ਅਤ੍ਥਿ ਖੋ, ਬ੍ਰਾਹ੍ਮਣ, ਏਤਂ ਕਾਰਣਂ, ਯੇਨ ਕਾਰਣੇਨ ਮਂ ‘‘ਅਰਸਰੂਪੋ ਭਵਂ ਗੋਤਮੋ’’ਤਿ ਵਦਮਾਨੋ ਪੁਗ੍ਗਲੋ ਸਮ੍ਮਾ ਵਦੇਯ੍ਯ, ਅਵਿਤਥਵਾਦੀਤਿ ਸਙ੍ਖਂ ਗਚ੍ਛੇਯ੍ਯ. ਕਤਮੋ ਪਨ ਸੋਤਿ? ਯੇ ਤੇ, ਬ੍ਰਾਹ੍ਮਣ, ਰੂਪਰਸਾ…ਪੇ… ਫੋਟ੍ਠਬ੍ਬਰਸਾ, ਤੇ ਤਥਾਗਤਸ੍ਸ ਪਹੀਨਾਤਿ. ਕਿਂ ਵੁਤ੍ਤਂ ਹੋਤਿ? ਯੇ ਤੇ ਜਾਤਿਵਸੇਨ ਵਾ ਉਪਪਤ੍ਤਿਵਸੇਨ ਵਾ ਸੇਟ੍ਠਸਮ੍ਮਤਾਨਮ੍ਪਿ ਪੁਥੁਜ੍ਜਨਾਨਂ ਰੂਪਾਰਮ੍ਮਣਾਦੀਨਿ ਅਸ੍ਸਾਦੇਨ੍ਤਾਨਂ ਅਭਿਨਨ੍ਦਨ੍ਤਾਨਂ ਰਜ੍ਜਨ੍ਤਾਨਂ ਉਪ੍ਪਜ੍ਜਨ੍ਤਿ ਕਾਮਸੁਖਸ੍ਸਾਦਸਙ੍ਖਾਤਾ ਰੂਪਰਸਾ, ਸਦ੍ਦਰਸਾ, ਗਨ੍ਧਰਸਾ, ਰਸਰਸਾ, ਫੋਟ੍ਠਬ੍ਬਰਸਾ, ਯੇ ਇਮਂ ਲੋਕਂ ਗੀਵਾਯ ਬਨ੍ਧਿਤ੍ਵਾ ਵਿਯ ਆਵਿਞ੍ਛਨ੍ਤਿ, ਵਤ੍ਥਾਰਮ੍ਮਣਾਦਿਸਾਮਗ੍ਗਿਯਞ੍ਚ ਉਪ੍ਪਨ੍ਨਤ੍ਤਾ ਸਾਮਗ੍ਗਿਰਸਾਤਿ ਵੁਚ੍ਚਨ੍ਤਿ. ਤੇ ਸਬ੍ਬੇਪਿ ਤਥਾਗਤਸ੍ਸ ਪਹੀਨਾ. ‘‘ਮਯ੍ਹਂ ਪਹੀਨਾ’’ਤਿ ਵਤ੍ਤਬ੍ਬੇਪਿ ਮਮਾਕਾਰੇਨ ਅਤ੍ਤਾਨਂ ਅਨੁਕ੍ਖਿਪਨ੍ਤੋ ਧਮ੍ਮਂ ਦੇਸੇਤਿ, ਦੇਸਨਾਵਿਲਾਸੋ ਵਾ ਏਸ ਤਥਾਗਤਸ੍ਸ.
ਤਤ੍ਥ ਪਹੀਨਾਤਿ ਚਿਤ੍ਤਸਨ੍ਤਾਨਤੋ ਵਿਗਤਾ, ਪਜਹਿਤਾ ਵਾ. ਏਤਸ੍ਮਿਂ ਪਨਤ੍ਥੇ ਕਰਣੇ ਸਾਮਿਵਚਨਂ ਦਟ੍ਠਬ੍ਬਂ. ਅਰਿਯਮਗ੍ਗਸਤ੍ਥੇਨ ਉਚ੍ਛਿਨ੍ਨਂ ਤਣ੍ਹਾਵਿਜ੍ਜਾਮਯਂ ਮੂਲਂ ਏਤੇਸਨ੍ਤਿ ਉਚ੍ਛਿਨ੍ਨਮੂਲਾ. ਤਾਲਵਤ੍ਥੁ ਵਿਯ ਨੇਸਂ ਵਤ੍ਥੁ ਕਤਨ੍ਤਿ ਤਾਲਾਵਤ੍ਥੁਕਤਾ. ਯਥਾ ਹਿ ਤਾਲਰੁਕ੍ਖਂ ਸਮੂਲਂ ਉਦ੍ਧਰਿਤ੍ਵਾ ਤਸ੍ਸ ਵਤ੍ਥੁਮਤ੍ਤੇ ਤਸ੍ਮਿਂ ਪਦੇਸੇ ਕਤੇ ਨ ਪੁਨ ਤਸ੍ਸ ਤਾਲਸ੍ਸ ਉਪ੍ਪਤ੍ਤਿ ਪਞ੍ਞਾਯਤਿ, ਏਵਂ ਅਰਿਯਮਗ੍ਗਸਤ੍ਥੇਨ ਸਮੂਲੇ ਰੂਪਾਦਿਰਸੇ ਉਦ੍ਧਰਿਤ੍ਵਾ ਤੇਸਂ ਪੁਬ੍ਬੇ ਉਪ੍ਪਨ੍ਨਪੁਬ੍ਬਭਾਵੇਨ ਵਤ੍ਥੁਮਤ੍ਤੇ ਚਿਤ੍ਤਸਨ੍ਤਾਨੇ ਕਤੇ ਸਬ੍ਬੇਪਿ ਤੇ ਤਾਲਾਵਤ੍ਥੁਕਤਾਤਿ ਵੁਚ੍ਚਨ੍ਤਿ. ਅਵਿਰੁਲ਼੍ਹਿਧਮ੍ਮਤ੍ਤਾ ਵਾ ਮਤ੍ਥਕਚ੍ਛਿਨ੍ਨਤਾਲੋ ਵਿਯ ਕਤਾਤਿ ਤਾਲਾਵਤ੍ਥੁਕਤਾ. ਯਸ੍ਮਾ ਪਨ ਏਵਂ ਤਾਲਾਵਤ੍ਥੁਕਤਾ ਅਨਭਾਵਂਕਤਾ ਹੋਨ੍ਤਿ, ਯਥਾ ਨੇਸਂ ਪਚ੍ਛਾਭਾਵੋ ਨ ਹੋਤਿ, ਤਥਾ ਕਤਾ ਹੋਨ੍ਤਿ. ਤਸ੍ਮਾ ਆਹ – ਅਨਭਾਵਂਕਤਾਤਿ. ਆਯਤਿਂ ਅਨੁਪ੍ਪਾਦਧਮ੍ਮਾਤਿ ਅਨਾਗਤੇ ਅਨੁਪ੍ਪਜ੍ਜਨਕਸਭਾਵਾ.
ਨੋ ਚ ਖੋ ਯਂ ਤ੍ਵਂ ਸਨ੍ਧਾਯ ਵਦੇਸੀਤਿ ਯਞ੍ਚ ਖੋ ਤ੍ਵਂ ਸਨ੍ਧਾਯ ਵਦੇਸਿ, ਸੋ ਪਰਿਯਾਯੋ ਨ ਹੋਤਿ. ਨਨੁ ਚ ਏਵਂ ਵੁਤ੍ਤੇ ਯੋ ਬ੍ਰਾਹ੍ਮਣੇਨ ਵੁਤ੍ਤੋ ਸਾਮਗ੍ਗਿਰਸੋ, ਤਸ੍ਸ ਅਤ੍ਤਨਿ ਵਿਜ੍ਜਮਾਨਤਾ ਅਨੁਞ੍ਞਾਤਾ ਹੋਤੀਤਿ? ਨ ਹੋਤਿ. ਯੋ ਹਿ ਨਂ ਸਾਮਗ੍ਗਿਰਸਂ ਕਾਤੁਂ ਭਬ੍ਬੋ ਹੁਤ੍ਵਾ ਨ ਕਰੋਤਿ, ਸੋ ਤਦਭਾਵੇਨ ਅਰਸਰੂਪੋਤਿ ਵਤ੍ਤਬ੍ਬਤਂ ਅਰਹਤਿ. ਭਗਵਾ ਪਨ ਅਭਬ੍ਬੋਵ ਏਤਂ ਕਾਤੁਂ, ਤੇਨਸ੍ਸ ਕਾਰਣੇ ਅਭਬ੍ਬਤਂ ਪਕਾਸੇਨ੍ਤੋ ਆਹ – ‘‘ਨੋ ਚ ਖੋ ਯਂ ਤ੍ਵਂ ਸਨ੍ਧਾਯ ਵਦੇਸੀ’’ਤਿ. ਯਂ ਪਰਿਯਾਯਂ ਸਨ੍ਧਾਯ ਤ੍ਵਂ ਮਂ ‘‘ਅਰਸਰੂਪੋ’’ਤਿ ਵਦੇਸਿ, ਸੋ ਅਮ੍ਹੇਸੁ ਨੇਵ ਵਤ੍ਤਬ੍ਬੋਤਿ.
ਏਵਂ ਬ੍ਰਾਹ੍ਮਣੋ ਅਤ੍ਤਨਾ ਅਧਿਪ੍ਪੇਤਂ ਅਰਸਰੂਪਤਂ ਆਰੋਪੇਤੁਂ ਅਸਕ੍ਕੋਨ੍ਤੋ ਅਥਾਪਰਂ ਨਿਬ੍ਭੋਗੋ ਭਵਨ੍ਤਿਆਦਿਮਾਹ. ਸਬ੍ਬਪਰਿਯਾਯੇਸੁ ਚੇਤ੍ਥ ਵੁਤ੍ਤਨਯੇਨੇਵ ਯੋਜਨਾਕ੍ਕਮਂ ਵਿਦਿਤ੍ਵਾ ਸਨ੍ਧਾਯਭਾਸਿਤਮਤ੍ਥਂ ਏਵਂ ਵੇਦਿਤਬ੍ਬਂ – ਬ੍ਰਾਹ੍ਮਣੋ ਤਦੇਵ ਵਯੋਵੁਦ੍ਧਾਨਂ ਅਭਿਵਾਦਨਾਦਿਕਮ੍ਮਂ ਲੋਕੇ ‘‘ਸਾਮਗ੍ਗਿਪਰਿਭੋਗੋ’’ਤਿ ਮਞ੍ਞਮਾਨੋ ਤਦਭਾਵੇਨ ਚ ਭਗਵਨ੍ਤਂ ‘‘ਨਿਬ੍ਭੋਗੋ’’ਤਿਆਦਿਮਾਹ. ਭਗਵਾ ਚ ਯ੍ਵਾਯਂ ਰੂਪਾਦੀਸੁ ਸਤ੍ਤਾਨਂ ਛਨ੍ਦਰਾਗਪਰਿਭੋਗੋ, ਤਦਭਾਵਂ ਅਤ੍ਤਨਿ ਸਮ੍ਪਸ੍ਸਮਾਨੋ ਅਪਰਂ ਪਰਿਯਾਯਮਨੁਜਾਨਿ.
ਪੁਨ ਬ੍ਰਾਹ੍ਮਣੋ ਯਂ ਲੋਕੇ ਵਯੋਵੁਦ੍ਧਾਨਂ ਅਭਿਵਾਦਨਾਦਿਕੁਲਸਮੁਦਾਚਾਰਕਮ੍ਮਂ ਲੋਕਿਯਾ ਕਰੋਨ੍ਤਿ, ਤਸ੍ਸ ਅਕਿਰਿਯਂ ਸਮ੍ਪਸ੍ਸਮਾਨੋ ਭਗਵਨ੍ਤਂ ਅਕਿਰਿਯਵਾਦੋਤਿ ਆਹ. ਭਗਵਾ ਪਨ ਯਸ੍ਮਾ ਕਾਯਦੁਚ੍ਚਰਿਤਾਦੀਨਂ ਅਕਿਰਿਯਂ ਵਦਤਿ, ਤਸ੍ਮਾ ਤਂ ਅਕਿਰਿਯਵਾਦਿਤਂ ਅਤ੍ਤਨਿ ਸਮ੍ਪਸ੍ਸਮਾਨੋ ਅਪਰਂ ਪਰਿਯਾਯਮਨੁਜਾਨਿ. ਤਤ੍ਥ ਠਪੇਤ੍ਵਾ ਕਾਯਦੁਚ੍ਚਰਿਤਾਦੀਨਿ ਅਵਸੇਸਾ ਅਕੁਸਲਾ ਧਮ੍ਮਾ ਅਨੇਕਵਿਹਿਤਾ ਪਾਪਕਾ ਅਕੁਸਲਾ ਧਮ੍ਮਾਤਿ ਵੇਦਿਤਬ੍ਬਾ.
ਪੁਨ ਬ੍ਰਾਹ੍ਮਣੋ ਤਦੇਵ ਅਭਿਵਾਦਨਾਦਿਕਮ੍ਮਂ ਭਗਵਤਿ ਅਪਸ੍ਸਨ੍ਤੋ ‘‘ਇਮਂ ਆਗਮ੍ਮ ਅਯਂ ਲੋਕਤਨ੍ਤਿ ਲੋਕਪਵੇਣੀ ਉਚ੍ਛਿਜ੍ਜਤੀ’’ਤਿ ਮਞ੍ਞਮਾਨੋ ਭਗਵਨ੍ਤਂ ਉਚ੍ਛੇਦਵਾਦੋਤਿ ਆਹ. ਭਗਵਾ ਪਨ ਯਸ੍ਮਾ ਪਞ੍ਚਕਾਮਗੁਣਿਕਰਾਗਸ੍ਸ ਚੇਵ ਅਕੁਸਲਚਿਤ੍ਤਦ੍ਵਯਸਮ੍ਪਯੁਤ੍ਤਸ੍ਸ ਚ ਦੋਸਸ੍ਸ ਅਨਾਗਾਮਿਮਗ੍ਗੇਨ ਉਚ੍ਛੇਦਂ ਵਦਤਿ, ਸਬ੍ਬਾਕੁਸਲਸਮ੍ਭਵਸ੍ਸ ਪਨ ਮੋਹਸ੍ਸ ਅਰਹਤ੍ਤਮਗ੍ਗੇਨ ਉਚ੍ਛੇਦਂ ਵਦਤਿ, ਠਪੇਤ੍ਵਾ ਤੇ ਤਯੋ ਅਵਸੇਸਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਯਥਾਨੁਰੂਪਂ ਚਤੂਹਿ ਮਗ੍ਗੇਹਿ ਉਚ੍ਛੇਦਂ ਵਦਤਿ, ਤਸ੍ਮਾ ਤਂ ਉਚ੍ਛੇਦਵਾਦਂ ਅਤ੍ਤਨਿ ਸਮ੍ਪਸ੍ਸਮਾਨੋ ਅਪਰਂ ਪਰਿਯਾਯਮਨੁਜਾਨਿ.
ਪੁਨ ਬ੍ਰਾਹ੍ਮਣੋ ‘‘ਜਿਗੁਚ੍ਛਤਿ ਮਞ੍ਞੇ ਸਮਣੋ ਗੋਤਮੋ ਇਦਂ ਵਯੋਵੁਦ੍ਧਾਨਂ ਅਭਿਵਾਦਨਾਦਿਕੁਲਸਮੁਦਾਚਾਰਕਮ੍ਮਂ, ਤੇਨ ਤਂ ਨ ਕਰੋਤੀ’’ਤਿ ਮਞ੍ਞਮਾਨੋ ਭਗਵਨ੍ਤਂ ਜੇਗੁਚ੍ਛੀਤਿ ਆਹ. ਭਗਵਾ ਪਨ ਯਸ੍ਮਾ ਜਿਗੁਚ੍ਛਤਿ ਕਾਯਦੁਚ੍ਚਰਿਤਾਦੀਹਿ, ਯਾਨਿ ਕਾਯਵਚੀਮਨੋਦੁਚ੍ਚਰਿਤਾਨਿ ਚੇਵ ਯਾਵ ਚ ਅਕੁਸਲਾਨਂ ਲਾਮਕਧਮ੍ਮਾਨਂ ਸਮਾਪਤ੍ਤਿ ਸਮਾਪਜ੍ਜਨਾ ਸਮਙ੍ਗਿਭਾਵੋ, ਤਂ ਸਬ੍ਬਮ੍ਪਿ ਗੂਥਂ ਵਿਯ ਮਣ੍ਡਨਕਜਾਤਿਕੋ ਪੁਰਿਸੋ ਜਿਗੁਚ੍ਛਤਿ ਹਿਰੀਯਤਿ, ਤਸ੍ਮਾ ਤਂ ਜੇਗੁਚ੍ਛਿਤਂ ਅਤ੍ਤਨਿ ਸਮ੍ਪਸ੍ਸਮਾਨੋ ਅਪਰਂ ਪਰਿਯਾਯਮਨੁਜਾਨਿ. ਤਤ੍ਥ ਕਾਯਦੁਚ੍ਚਰਿਤੇਨਾਤਿਆਦਿ ਕਰਣਵਚਨਂ ਉਪਯੋਗਤ੍ਥੇ ਦਟ੍ਠਬ੍ਬਂ.
ਪੁਨ ਬ੍ਰਾਹ੍ਮਣੋ ਤਦੇਵ ਅਭਿਵਾਦਨਾਦਿਕਮ੍ਮਂ ਭਗਵਤਿ ਅਪਸ੍ਸਨ੍ਤੋ ‘‘ਅਯਂ ਇਦਂ ਲੋਕਜੇਟ੍ਠਕਕਮ੍ਮਂ ਵਿਨੇਤਿ ਵਿਨਾਸੇਤਿ, ਅਥ ਵਾ ਯਸ੍ਮਾ ਏਤਂ ਸਾਮੀਚਿਕਮ੍ਮਂ ਨ ਕਰੋਤਿ, ਤਸ੍ਮਾ ਅਯਂ ਵਿਨੇਤਬ੍ਬੋ ਨਿਗ੍ਗਣ੍ਹਿਤਬ੍ਬੋ’’ਤਿ ਮਞ੍ਞਮਾਨੋ ਭਗਵਨ੍ਤਂ ਵੇਨਯਿਕੋਤਿ ਆਹ. ਤਤ੍ਰਾਯਂ ਪਦਤ੍ਥੋ – ਵਿਨਯਤੀਤਿ ਵਿਨਯੋ, ਵਿਨਾਸੇਤੀਤਿ ਵੁਤ੍ਤਂ ਹੋਤਿ. ਵਿਨਯੋ ਏਵ ਵੇਨਯਿਕੋ. ਵਿਨਯਂ ਵਾ ਅਰਹਤੀਤਿ ਵੇਨਯਿਕੋ, ਨਿਗ੍ਗਹਂ ਅਰਹਤੀਤਿ ਵੁਤ੍ਤਂ ਹੋਤਿ. ਭਗਵਾ ਪਨ ਯਸ੍ਮਾ ਰਾਗਾਦੀਨਂ ਵਿਨਯਾਯ ਵੂਪਸਮਾਯ ਧਮ੍ਮਂ ਦੇਸੇਤਿ, ਤਸ੍ਮਾ ਵੇਨਯਿਕੋ ਹੋਤਿ. ਅਯਮੇਵ ਚੇਤ੍ਥ ਪਦਤ੍ਥੋ – ਵਿਨਯਾਯ ਧਮ੍ਮਂ ਦੇਸੇਤੀਤਿ ਵੇਨਯਿਕੋ. ਵਿਚਿਤ੍ਰਾ ਹਿ ਤਦ੍ਧਿਤਵੁਤ੍ਤਿ. ਸ੍ਵਾਯਂ ਤਂ ਵੇਨਯਿਕਭਾਵਂ ਅਤ੍ਤਨਿ ਸਮ੍ਪਸ੍ਸਮਾਨੋ ਅਪਰਂ ਪਰਿਯਾਯਮਨੁਜਾਨਿ.
ਪੁਨ ਬ੍ਰਾਹ੍ਮਣੋ ਯਸ੍ਮਾ ਅਭਿਵਾਦਨਾਦੀਨਿ ਸਾਮੀਚਿਕਮ੍ਮਾਨਿ ਕਰੋਨ੍ਤਾ ਵਯੋਵੁਦ੍ਧੇ ਤੋਸੇਨ੍ਤਿ ਹਾਸੇਨ੍ਤਿ, ਅਕਰੋਨ੍ਤਾ ਪਨ ਤਾਪੇਨ੍ਤਿ ਵਿਹੇਸੇਨ੍ਤਿ ਦੋਮਨਸ੍ਸਂ ਨੇਸਂ ਉਪ੍ਪਾਦੇਨ੍ਤਿ, ਭਗਵਾ ਚ ਤਾਨਿ ਨ ਕਰੋਤਿ, ਤਸ੍ਮਾ ‘‘ਅਯਂ ਵਯੋਵੁਦ੍ਧੇ ਤਪਤੀ’’ਤਿ ਮਞ੍ਞਮਾਨੋ ਸਪ੍ਪੁਰਿਸਾਚਾਰਵਿਰਹਿਤਤ੍ਤਾ ਵਾ ‘‘ਕਪਣਪੁਰਿਸੋ ਅਯ’’ਨ੍ਤਿ ਮਞ੍ਞਮਾਨੋ ਭਗਵਨ੍ਤਂ ਤਪਸ੍ਸੀਤਿ ਆਹ. ਤਤ੍ਰਾਯਂ ਪਦਤ੍ਥੋ – ਤਪਤੀਤਿ ਤਪੋ, ਰੋਸੇਤਿ ਵਿਹੇਸੇਤੀਤਿ ਅਤ੍ਥੋ. ਸਾਮੀਚਿਕਮ੍ਮਾਕਰਣਸ੍ਸੇਤਂ ਅਧਿਵਚਨਂ. ਤਪੋ ਅਸ੍ਸ ਅਤ੍ਥੀਤਿ ਤਪਸ੍ਸੀ. ਦੁਤਿਯੇ ਅਤ੍ਥਵਿਕਪ੍ਪੇ ਬ੍ਯਞ੍ਜਨਾਨਿ ਅਵਿਚਾਰੇਤ੍ਵਾ ਲੋਕੇ ਕਪਣਪੁਰਿਸੋ ਤਪਸ੍ਸੀਤਿ ਵੁਚ੍ਚਤਿ. ਭਗਵਾ ਪਨ ਯੇ ਅਕੁਸਲਾ ਧਮ੍ਮਾ ਲੋਕਂ ਤਪਨਤੋ ਤਪਨੀਯਾਨਿ ਵੁਚ੍ਚਨ੍ਤਿ, ਤੇਸਂ ਪਹੀਨਤ੍ਤਾ ਯਸ੍ਮਾ ਤਪਸ੍ਸੀਤਿ ਸਙ੍ਖਂ ਗਤੋ. ਤਸ੍ਮਾ ਤਂ ਤਪਸ੍ਸਿਤਂ ਅਤ੍ਤਨਿ ਸਮ੍ਪਸ੍ਸਮਾਨੋ ਅਪਰਂ ਪਰਿਯਾਯਮਨੁਜਾਨਿ. ਤਤ੍ਰਾਯਂ ਵਚਨਤ੍ਥੋ – ਤਪਨ੍ਤੀਤਿ ਤਪਾ, ਅਕੁਸਲਧਮ੍ਮਾਨਮੇਤਂ ਅਧਿਵਚਨਂ. ਤੇ ਤਪੇ ਅਸ੍ਸਿ ਨਿਰਸ੍ਸਿ ਪਹਾਸਿ ਵਿਦ੍ਧਂਸੀਤਿ ਤਪਸ੍ਸੀ.
ਪੁਨ ਬ੍ਰਾਹ੍ਮਣੋ ਤਂ ਅਭਿਵਾਦਨਾਦਿਕਮ੍ਮਂ ਦੇਵਲੋਕਗਬ੍ਭਸਮ੍ਪਤ੍ਤਿਯਾ ਦੇਵਲੋਕਪਟਿਸਨ੍ਧਿਪਟਿਲਾਭਾਯ ਸਂਵਤ੍ਤਤੀਤਿ ਮਞ੍ਞਮਾਨੋ ਭਗਵਤਿ ਚਸ੍ਸ ਅਭਾਵਂ ਦਿਸ੍ਵਾ ਭਗਵਨ੍ਤਂ ਅਪਗਬ੍ਭੋਤਿ ਆਹ. ਕੋਧਵਸੇਨ ਵਾ ਭਗਵਤੋ ਮਾਤੁਕੁਚ੍ਛਿਸ੍ਮਿਂ ਪਟਿਸਨ੍ਧਿਗ੍ਗਹਣੇ ਦੋਸਂ ਦਸ੍ਸੇਨ੍ਤੋਪਿ ਏਵਮਾਹ. ਤਤ੍ਰਾਯਂ ਵਚਨਤ੍ਥੋ – ਗਬ੍ਭਤੋ ਅਪਗਤੋਤਿ ਅਪਗਬ੍ਭੋ, ਅਭਬ੍ਬੋ ਦੇਵਲੋਕੂਪਪਤ੍ਤਿਂ ਪਾਪੁਣਿਤੁਨ੍ਤਿ ਅਧਿਪ੍ਪਾਯੋ. ਹੀਨੋ ਵਾ ਗਬ੍ਭੋ ਅਸ੍ਸਾਤਿ ਅਪਗਬ੍ਭੋ. ਦੇਵਲੋਕਗਬ੍ਭਪਰਿਬਾਹਿਰਤ੍ਤਾ ਆਯਤਿਂ ਹੀਨਗਬ੍ਭਪਟਿਲਾਭਭਾਗੀਤਿ. ਹੀਨੋ ਵਾਸ੍ਸ ਮਾਤੁਕੁਚ੍ਛਿਸ੍ਮਿਂ ਗਬ੍ਭਵਾਸੋ ਅਹੋਸੀਤਿ ਅਧਿਪ੍ਪਾਯੋ. ਭਗਵਤੋ ਪਨ ਯਸ੍ਮਾ ਆਯਤਿਂ ਗਬ੍ਭਸੇਯ੍ਯਾ ਅਪਗਤਾ, ਤਸ੍ਮਾ ਸੋ ਤਂ ਅਪਗਬ੍ਭਤਂ ਅਤ੍ਤਨਿ ਸਮ੍ਪਸ੍ਸਮਾਨੋ ਅਪਰਂ ਪਰਿਯਾਯਮਨੁਜਾਨਿ. ਤਤ੍ਰ ਚ ਯਸ੍ਸ ਖੋ, ਬ੍ਰਾਹ੍ਮਣ, ਆਯਤਿਂ ਗਬ੍ਭਸੇਯ੍ਯਾ ਪੁਨਬ੍ਭਵਾਭਿਨਿਬ੍ਬਤ੍ਤਿ ਪਹੀਨਾਤਿ ਏਤੇਸਂ ਪਦਾਨਂ ਏਵਮਤ੍ਥੋ ਦਟ੍ਠਬ੍ਬੋ – ‘‘ਬ੍ਰਾਹ੍ਮਣ, ਯਸ੍ਸ ਪੁਗ੍ਗਲਸ੍ਸ ਅਨਾਗਤੇ ਗਬ੍ਭਸੇਯ੍ਯਾ ਪੁਨਬ੍ਭਵੇ ਚ ਅਭਿਨਿਬ੍ਬਤ੍ਤਿ ਅਨੁਤ੍ਤਰੇਨ ਮਗ੍ਗੇਨ ਵਿਹਤਕਾਰਣਤ੍ਤਾ ਪਹੀਨਾ. ਗਬ੍ਭਸੇਯ੍ਯਾਗਹਣੇਨ ਚੇਤ੍ਥ ਜਲਾਬੁਜਯੋਨਿ ਗਹਿਤਾ, ਪੁਨਬ੍ਭਵਾਭਿਨਿਬ੍ਬਤ੍ਤਿਗ੍ਗਹਣੇਨ ਇਤਰਾ ਤਿਸ੍ਸੋ’’ਪਿ.
ਅਪਿਚ ਗਬ੍ਭਸ੍ਸ ਸੇਯ੍ਯਾ ਗਬ੍ਭਸੇਯ੍ਯਾ. ਪੁਨਬ੍ਭਵੋ ਏਵ ਅਭਿਨਿਬ੍ਬਤ੍ਤਿ ਪੁਨਬ੍ਭਵਾਭਿਨਿਬ੍ਬਤ੍ਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਯਥਾ ਚ ਵਿਞ੍ਞਾਣਟ੍ਠਿਤੀਤਿ ਵੁਤ੍ਤੇਪਿ ਨ ਵਿਞ੍ਞਾਣਤੋ ਅਞ੍ਞਾ ਠਿਤਿ ਅਤ੍ਥਿ, ਏਵਮਿਧਾਪਿ ਨ ਗਬ੍ਭਤੋ ਅਞ੍ਞਾ ਸੇਯ੍ਯਾ ਵੇਦਿਤਬ੍ਬਾ. ਅਭਿਨਿਬ੍ਬਤ੍ਤਿ ਚ ਨਾਮ ਯਸ੍ਮਾ ਪੁਨਬ੍ਭਵਭੂਤਾਪਿ ਅਪੁਨਬ੍ਭਵਭੂਤਾਪਿ ਅਤ੍ਥਿ, ਇਧ ਚ ਪੁਨਬ੍ਭਵਭੂਤਾ ਅਧਿਪ੍ਪੇਤਾ, ਤਸ੍ਮਾ ਵੁਤ੍ਤਂ – ‘‘ਪੁਨਬ੍ਭਵੋ ਏਵ ਅਭਿਨਿਬ੍ਬਤ੍ਤਿ ਪੁਨਬ੍ਭਵਾਭਿਨਿਬ੍ਬਤ੍ਤੀ’’ਤਿ.
ਏਵਂ ਆਗਤਕਾਲਤੋ ਪਟ੍ਠਾਯ ਅਰਸਰੂਪਤਾਦੀਹਿ ਅਟ੍ਠਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਨ੍ਤਮ੍ਪਿ ਬ੍ਰਾਹ੍ਮਣਂ ਭਗਵਾ ਧਮ੍ਮਿਸ੍ਸਰੋ ਧਮ੍ਮਰਾਜਾ ਧਮ੍ਮਸਾਮੀ ਤਥਾਗਤੋ ਅਨੁਕਮ੍ਪਾਯ ਸੀਤਲੇਨੇਵ ਚਕ੍ਖੁਨਾ ਬ੍ਰਾਹ੍ਮਣਂ ਓਲੇਕੇਨ੍ਤੋ ਯਂ ਧਮ੍ਮਧਾਤੁਂ ਪਟਿਵਿਜ੍ਝਿਤ੍ਵਾ ਦੇਸਨਾਵਿਲਾਸਪ੍ਪਤ੍ਤਾ ਨਾਮ ਹੋਤਿ, ਤਸ੍ਸਾ ਧਮ੍ਮਧਾਤੁਯਾ ਸੁਪ੍ਪਟਿਵਿਦ੍ਧਤ੍ਤਾ ਵਿਗਤਵਲਾਹਕੇ ਨਭੇ ਪੁਣ੍ਣਚਨ੍ਦੋ ਵਿਯ ਚ ਸਰਦਕਾਲੇ ਸੂਰਿਯੋ ਵਿਯ ਚ ਬ੍ਰਾਹ੍ਮਣਸ੍ਸ ਹਦਯਨ੍ਧਕਾਰਂ ਵਿਧਮੇਨ੍ਤੋ ਤਾਨਿਯੇਵ ਅਕ੍ਕੋਸਵਤ੍ਥੂਨਿ ਤੇਨ ਤੇਨ ਪਰਿਯਾਯੇਨ ਅਞ੍ਞਥਾ ਦਸ੍ਸੇਤ੍ਵਾ ਪੁਨਪਿ ਅਤ੍ਤਨੋ ਕਰੁਣਾਵਿਪ੍ਫਾਰਂ ਅਟ੍ਠਹਿ ਲੋਕਧਮ੍ਮੇਹਿ ਅਕਮ੍ਪਿਯਭਾਵੇਨ ਪਟਿਲਦ੍ਧਤਾਦਿਗੁਣਲਕ੍ਖਣਂ ਪਥਵਿਸਮਚਿਤ੍ਤਤਂ ਅਕੁਪ੍ਪਧਮ੍ਮਤਞ੍ਚ ਪਕਾਸੇਨ੍ਤੋ ‘‘ਅਯਂ ਬ੍ਰਾਹ੍ਮਣੋ ਕੇਵਲਂ ਪਲਿਤਸਿਰਖਣ੍ਡਦਨ੍ਤਵਲਿਤ੍ਤਚਤਾਦੀਹਿ ਅਤ੍ਤਨੋ ਵੁਦ੍ਧਭਾਵਂ ਸਲ੍ਲਕ੍ਖੇਤਿ, ਨੋ ਚ ਖੋ ਜਾਨਾਤਿ ਅਤ੍ਤਾਨਂ ਜਾਤਿਯਾ ਅਨੁਗਤਂ ਜਰਾਯ ਅਨੁਸਟਂ ਬ੍ਯਾਧਿਨੋ ਅਧਿਭੂਤਂ ਮਰਣੇਨ ਅਬ੍ਭਾਹਤਂ ਅਜ੍ਜ ਮਰਿਤ੍ਵਾ ਪੁਨ ਸ੍ਵੇਵ ਉਤ੍ਤਾਨਸੇਯ੍ਯਦਾਰਕਭਾਵਗਮਨੀਯਂ. ਮਹਨ੍ਤੇਨ ਖੋ ਪਨ ਉਸ੍ਸਾਹੇਨ ਮਮ ਸਨ੍ਤਿਕਂ ਆਗਤੋ, ਤਦਸ੍ਸ ਆਗਮਨਂ ਸਾਤ੍ਥਕਂ ਹੋਤੂ’’ਤਿ ਚਿਨ੍ਤੇਤ੍ਵਾ ਇਮਸ੍ਮਿਂ ਲੋਕੇ ਅਤ੍ਤਨੋ ਅਪ੍ਪਟਿਸਮਂ ਪੁਰੇਜਾਤਭਾਵਂ ਦਸ੍ਸੇਨ੍ਤੋ ਸੇਯ੍ਯਥਾਪਿ, ਬ੍ਰਾਹ੍ਮਣਾਤਿਆਦਿਨਾ ਨਯੇਨ ਬ੍ਰਾਹ੍ਮਣਸ੍ਸ ਧਮ੍ਮਦੇਸਨਂ ਵਡ੍ਢੇਸਿ.
ਤਤ੍ਥ ਸੇਯ੍ਯਥਾਪੀਤਿਆਦੀਨਂ ਹੇਟ੍ਠਾ ਵੁਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਅਯਂ ਪਨ ਵਿਸੇਸੋ – ਹੇਟ੍ਠਾ ਵੁਤ੍ਤਨਯੇਨੇਵ ਹਿ ਤੇ ਕੁਕ੍ਕੁਟਪੋਤਕਾ ਪਕ੍ਖੇ ਵਿਧੁਨਨ੍ਤਾ ਤਂਖਣਾਨੁਰੂਪਂ ਵਿਰਵਨ੍ਤਾ ਨਿਕ੍ਖਮਨ੍ਤਿ. ਏਵਂ ਨਿਕ੍ਖਮਨ੍ਤਾਨਞ੍ਚ ਤੇਸਂ ਯੋ ਪਠਮਤਰਂ ਨਿਕ੍ਖਮਤਿ, ਸੋ ਜੇਟ੍ਠੋਤਿ ਵੁਚ੍ਚਤਿ. ਤਸ੍ਮਾ ਭਗਵਾ ਤਾਯ ਉਪਮਾਯ ਅਤ੍ਤਨੋ ਜੇਟ੍ਠਭਾਵਂ ਸਾਧੇਤੁਕਾਮੋ ਬ੍ਰਾਹ੍ਮਣਂ ਪੁਚ੍ਛਤਿ – ਯੋ ਨੁ ਖੋ ਤੇਸਂ ਕੁਕ੍ਕੁਟਚ੍ਛਾਪੋਤਕਾਨਂ…ਪੇ… ਕਿਨ੍ਤਿ ਸ੍ਵਾਸ੍ਸ ਵਚਨੀਯੋਤਿ. ਤਤ੍ਥ ਕੁਕ੍ਕੁਟਚ੍ਛਾਪਕਾਨਨ੍ਤਿ ਕੁਕ੍ਕੁਟਪੋਤਕਾਨਂ. ਕਿਨ੍ਤਿ ਸ੍ਵਾਸ੍ਸ ਵਚਨੀਯੋਤਿ ਸੋ ਕਿਨ੍ਤਿ ਵਚਨੀਯੋ ਅਸ੍ਸ, ਕਿਂ ਵਤ੍ਤਬ੍ਬੋ ਭਵੇਯ੍ਯ ਜੇਟ੍ਠੋ ਵਾ ਕਨਿਟ੍ਠੋ ਵਾਤਿ.
‘‘ਜੇਟ੍ਠੋ’’ਤਿਸ੍ਸ, ਭੋ ਗੋਤਮ, ਵਚਨੀਯੋਤਿ, ਭੋ ਗੋਤਮ, ਸੋ ਜੇਟ੍ਠੋ ਇਤਿ ਅਸ੍ਸ ਵਚਨੀਯੋ. ਕਸ੍ਮਾਤਿ ਚੇ? ਸੋ ਹਿ ਨੇਸਂ ਜੇਟ੍ਠੋਤਿ, ਯਸ੍ਮਾ ਸੋ ਨੇਸਂ ਵੁਦ੍ਧਤਰੋਤਿ ਅਤ੍ਥੋ. ਅਥਸ੍ਸ ਭਗਵਾ ਓਪਮ੍ਮਂ ਸਮ੍ਪਟਿਪਾਦੇਨ੍ਤੋ ਏਵਮੇਵ ਖੋਤਿ ਆਹ, ਯਥਾ ਸੋ ਕੁਕ੍ਕੁਟਪੋਤਕੋ, ਏਵਂ ਅਹਮ੍ਪਿ. ਅਵਿਜ੍ਜਾਗਤਾਯ ਪਜਾਯਾਤਿ ਅਵਿਜ੍ਜਾ ਵੁਚ੍ਚਤਿ ਅਞ੍ਞਾਣਂ, ਤਤ੍ਥ ਗਤਾਯ. ਪਜਾਯਾਤਿ ਸਤ੍ਤਧਿਵਚਨਮੇਤਂ, ਅਵਿਜ੍ਜਾਕੋਸਸ੍ਸ ਅਨ੍ਤੋ ਪਵਿਟ੍ਠੇਸੁ ਸਤ੍ਤੇਸੂਪਿ ਵੁਤ੍ਤਂ ਹੋਤਿ. ਅਣ੍ਡਭੂਤਾਯਾਤਿ ਅਣ੍ਡੇ ਭੂਤਾਯ ਪਜਾਤਾਯ ਸਞ੍ਜਾਤਾਯ. ਯਥਾ ਹਿ ਅਣ੍ਡੇ ਨਿਬ੍ਬਤ੍ਤਾ ਏਕਚ੍ਚੇ ਸਤ੍ਤਾ ਅਣ੍ਡਭੂਤਾਤਿ ਵੁਚ੍ਚਨ੍ਤਿ, ਏਵਮਯਂ ਸਬ੍ਬਾਪਿ ਪਜਾ ਅਵਿਜ੍ਜਣ੍ਡਕੋਸੇ ਨਿਬ੍ਬਤ੍ਤਤ੍ਤਾ ਅਣ੍ਡਭੂਤਾਤਿ ਵੁਚ੍ਚਤਿ. ਪਰਿਯੋਨਦ੍ਧਾਯਾਤਿ ਤੇਨ ਅਵਿਜ੍ਜਣ੍ਡਕੋਸੇਨ ਸਮਨ੍ਤਤੋ ਓਨਦ੍ਧਾਯ ਬਦ੍ਧਾਯ ਵੇਠਿਤਾਯ. ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾਤਿ ਤਂ ਅਵਿਜ੍ਜਾਮਯਂ ਅਣ੍ਡਕੋਸਂ ਭਿਨ੍ਦਿਤ੍ਵਾ. ਏਕੋਵ ਲੋਕੇਤਿ ਸਕਲੇਪਿ ਲੋਕਸਨ੍ਨਿਵਾਸੇ ਅਹਮੇਵ ਏਕੋ ਅਦੁਤਿਯੋ. ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋਤਿ ਉਤ੍ਤਰਰਹਿਤਂ ਸਬ੍ਬਸੇਟ੍ਠਂ ਸਮ੍ਮਾ ਸਾਮਞ੍ਚ ਬੋਧਿਂ, ਅਥ ਵਾ ਪਸਤ੍ਥਂ ਸੁਨ੍ਦਰਞ੍ਚ ਬੋਧਿਂ. ਅਰਹਤ੍ਤਮਗ੍ਗਞਾਣਸ੍ਸੇਤਂ ਨਾਮਂ, ਸਬ੍ਬਞ੍ਞੁਤਞ੍ਞਾਣਸ੍ਸਾਪਿ ਨਾਮਮੇਵ. ਉਭਯਮ੍ਪਿ ਵਟ੍ਟਤਿ. ਅਞ੍ਞੇਸਂ ਅਰਹਤ੍ਤਮਗ੍ਗੋ ਅਨੁਤ੍ਤਰਾ ਬੋਧਿ ਹੋਤਿ, ਨ ਹੋਤੀਤਿ? ਨ ਹੋਤਿ. ਕਸ੍ਮਾ? ਅਸਬ੍ਬਗੁਣਦਾਯਕਤ੍ਤਾ. ਤੇਸਞ੍ਹਿ ਕਸ੍ਸਚਿ ਅਰਹਤ੍ਤਮਗ੍ਗੋ ਅਰਹਤ੍ਤਫਲਮੇਵ ਦੇਤਿ, ਕਸ੍ਸਚਿ ਤਿਸ੍ਸੋ ਵਿਜ੍ਜਾ, ਕਸ੍ਸਚਿ ਛ ਅਭਿਞ੍ਞਾ, ਕਸ੍ਸਚਿ ਚਤਸ੍ਸੋ ਪਟਿਸਮ੍ਭਿਦਾ, ਕਸ੍ਸਚਿ ਸਾਵਕਪਾਰਮਿਞਾਣਂ. ਪਚ੍ਚੇਕਬੁਦ੍ਧਾਨਮ੍ਪਿ ਪਚ੍ਚੇਕਬੋਧਿਞਾਣਮੇਵ ਦੇਤਿ, ਬੁਦ੍ਧਾਨਂ ਪਨ ਸਬ੍ਬਗੁਣਸਮ੍ਪਤ੍ਤਿਂ ਦੇਤਿ ਅਭਿਸੇਕੋ ਵਿਯ ਰਞ੍ਞੋ ਸਬ੍ਬਲੋਕਿਸ੍ਸਰਭਾਵਂ. ਤਸ੍ਮਾ ਅਞ੍ਞਸ੍ਸ ਕਸ੍ਸਚਿਪਿ ਅਨੁਤ੍ਤਰਾ ਬੋਧਿ ਨ ਹੋਤੀਤਿ. ਅਭਿਸਮ੍ਬੁਦ੍ਧੋਤਿ ਅਬ੍ਭਞ੍ਞਾਸਿਂ ਪਟਿਵਿਜ੍ਝਿਂ, ਪਤ੍ਤੋਮ੍ਹਿ ਅਧਿਗਤੋਮ੍ਹੀਤਿ ਵੁਤ੍ਤਂ ਹੋਤਿ.
ਇਦਾਨਿ ਯਦੇਤਂ ਭਗਵਤਾ ‘‘ਏਵਮੇਵ ਖੋ’’ਤਿਆਦਿਨਾ ਨਯੇਨ ਵੁਤ੍ਤਂ ਓਪਮ੍ਮਸਮ੍ਪਟਿਪਾਦਨਂ, ਤਂ ਏਵਂ ਅਤ੍ਥੇਨ ਸਂਸਨ੍ਦਿਤ੍ਵਾ ਵੇਦਿਤਬ੍ਬਂ – ਯਥਾ ਹਿ ਤਸ੍ਸਾ ਕੁਕ੍ਕੁਟਿਯਾ ਅਤ੍ਤਨੋ ਅਣ੍ਡੇਸੁ ਅਧਿਸਯਨਾਦਿਤਿਵਿਧਕਿਰਿਯਾਕਰਣਂ, ਏਵਂ ਬੋਧਿਪਲ੍ਲਙ੍ਕੇ ਨਿਸਿਨ੍ਨਸ੍ਸ ਬੋਧਿਸਤ੍ਤਭੂਤਸ੍ਸ ਭਗਵਤੋ ਅਤ੍ਤਨੋ ਸਨ੍ਤਾਨੇ ਅਨਿਚ੍ਚਂ, ਦੁਕ੍ਖਂ, ਅਨਤ੍ਤਾਤਿ ਤਿਵਿਧਾਨੁਪਸ੍ਸਨਾਕਰਣਂ. ਕੁਕ੍ਕੁਟਿਯਾ ਤਿਵਿਧਕਿਰਿਯਾਸਮ੍ਪਾਦਨੇਨ ਅਣ੍ਡਾਨਂ ਅਪੂਤਿਭਾਵੋ ਵਿਯ ਬੋਧਿਸਤ੍ਤਭੂਤਸ੍ਸ ਭਗਵਤੋ ਤਿਵਿਧਾਨੁਪਸ੍ਸਨਾਸਮ੍ਪਾਦਨੇਨ ਵਿਪਸ੍ਸਨਾਞਾਣਸ੍ਸ ਅਪਰਿਹਾਨਿ. ਕੁਕ੍ਕੁਟਿਯਾ ਤਿਵਿਧਕਿਰਿਯਾਕਰਣੇਨ ਅਣ੍ਡਾਨਂ ਅਲ੍ਲਸਿਨੇਹਪਰਿਯਾਦਾਨਂ ਵਿਯ ਬੋਧਿਸਤ੍ਤਭੂਤਸ੍ਸ ਭਗਵਤੋ ਤਿਵਿਧਾਨੁਪਸ੍ਸਨਾਸਮ੍ਪਾਦਨੇਨ ਭਵਤ੍ਤਯਾਨੁਗਤਨਿਕਨ੍ਤਿਸਿਨੇਹਪਰਿਯਾਦਾਨਂ. ਕੁਕ੍ਕੁਟਿਯਾ ਤਿਵਿਧਕਿਰਿਯਾਕਰਣੇਨ ਅਣ੍ਡਕਪਾਲਾਨਂ ਤਨੁਭਾਵੋ ਵਿਯ ਬੋਧਿਸਤ੍ਤਭੂਤਸ੍ਸ ਭਗਵਤੋ ਤਿਵਿਧਾਨੁਪਸ੍ਸਨਾਸਮ੍ਪਾਦਨੇਨ ਅਵਿਜ੍ਜਣ੍ਡਕੋਸਸ੍ਸ ਤਨੁਭਾਵੋ, ਕੁਕ੍ਕੁਟਿਯਾ ਤਿਵਿਧਕਿਰਿਯਾਕਰਣੇਨ ਕੁਕ੍ਕੁਟਪੋਤਕਸ੍ਸ ਪਾਦਨਖਤੁਣ੍ਡਕਾਨਂ ਥਦ੍ਧਖਰਭਾਵੋ ਵਿਯ ਬੋਧਿਸਤ੍ਤਭੂਤਸ੍ਸ ਭਗਵਤੋ ਤਿਵਿਧਾਨੁਪਸ੍ਸਨਾਸਮ੍ਪਾਦਨੇਨ ਵਿਪਸ੍ਸਨਾਞਾਣਸ੍ਸ ਤਿਕ੍ਖਖਰਵਿਪ੍ਪਸਨ੍ਨਸੂਰਭਾਵੋ. ਕੁਕ੍ਕੁਟਿਯਾ ਤਿਵਿਧਕਿਰਿਯਾਕਰਣੇਨ ਕੁਕ੍ਕੁਟਪੋਤਕਸ੍ਸ ਪਰਿਣਾਮਕਾਲੋ ਵਿਯ ਬੋਧਿਸਤ੍ਤਭੂਤਸ੍ਸ ਭਗਵਤੋ ਤਿਵਿਧਾਨੁਪਸ੍ਸਨਾਸਮ੍ਪਾਦਨੇਨ ਵਿਪਸ੍ਸਨਾਞਾਣਸ੍ਸ ਪਰਿਣਾਮਕਾਲੋ ਵਡ੍ਢਿਕਾਲੋ ਗਬ੍ਭਗ੍ਗਹਣਕਾਲੋ. ਕੁਕ੍ਕੁਟਿਯਾ ਤਿਵਿਧਕਿਰਿਯਾਕਰਣੇਨ ਕੁਕ੍ਕੁਟਪੋਤਕਸ੍ਸ ਪਾਦਨਖਸਿਖਾਯ ਵਾ ਮੁਖਤੁਣ੍ਡਕੇਨ ਵਾ ਅਣ੍ਡਕੋਸਂ ਪਦਾਲੇਤ੍ਵਾ ਪਕ੍ਖੇ ਪਪ੍ਫੋਟੇਤ੍ਵਾ ਸੋਤ੍ਥਿਨਾ ਅਭਿਨਿਬ੍ਭਿਦਾਕਾਲੋ ਵਿਯ ਭਗਵਤੋ ਤਿਵਿਧਾਨੁਪਸ੍ਸਨਾਸਮ੍ਪਾਦਨੇਨ ਵਿਪਸ੍ਸਨਾਞਾਣਗਬ੍ਭਂ ਗਣ੍ਹਾਪੇਤ੍ਵਾ ਅਨੁਪੁਬ੍ਬਾਧਿਗਤੇਨ ਅਰਹਤ੍ਤਮਗ੍ਗੇਨ ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾ ਅਭਿਞ੍ਞਾਪਕ੍ਖੇ ਪਪ੍ਫੋਟੇਤ੍ਵਾ ਸੋਤ੍ਥਿਨਾ ਸਕਲਬੁਦ੍ਧਗੁਣਸਚ੍ਛਿਕਤਕਾਲੋ ਵੇਦਿਤਬ੍ਬੋ.
ਅਹਞ੍ਹਿ, ਬ੍ਰਾਹ੍ਮਣ, ਜੇਟ੍ਠੋ ਸੇਟ੍ਠੋ ਲੋਕਸ੍ਸਾਤਿ, ਬ੍ਰਾਹ੍ਮਣ, ਯਥਾ ਤੇਸਂ ਕੁਕ੍ਕੁਟਪੋਤਕਾਨਂ ਪਠਮਤਰਂ ਅਣ੍ਡਕੋਸਂ ਪਦਾਲੇਤ੍ਵਾ ਅਭਿਨਿਬ੍ਬਤ੍ਤੋ ਕੁਕ੍ਕੁਟਪੋਤਕੋ ਜੇਟ੍ਠੋ ਹੋਤਿ, ਏਵਂ ਅਵਿਜ੍ਜਾਗਤਾਯ ਪਜਾਯ ਤਂ ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾ ਪਠਮਤਰਂ ਅਰਿਯਾਯ ਜਾਤਿਯਾ ਜਾਤਤ੍ਤਾ ਅਹਞ੍ਹਿ ਜੇਟ੍ਠੋ ਵੁਦ੍ਧਤਮੋਤਿ ਸਙ੍ਖਂ ਗਤੋ, ਸਬ੍ਬਗੁਣੇਹਿ ਪਨ ਅਪ੍ਪਟਿਸਮਤ੍ਤਾ ਸੇਟ੍ਠੋਤਿ.
ਏਵਂ ਭਗਵਾ ਅਤ੍ਤਨੋ ਅਨੁਤ੍ਤਰਂ ਜੇਟ੍ਠਸੇਟ੍ਠਭਾਵਂ ਬ੍ਰਾਹ੍ਮਣਸ੍ਸ ਪਕਾਸੇਤ੍ਵਾ ਇਦਾਨਿ ਯਾਯ ਪਟਿਪਦਾਯ ਤਂ ਅਧਿਗਤੋ, ਤਂ ਪਟਿਪਦਂ ਪੁਬ੍ਬਭਾਗਤੋ ਪਭੁਤਿ ਦਸ੍ਸੇਤੁਂ ਆਰਦ੍ਧਂ ਖੋ ਪਨ ਮੇ, ਬ੍ਰਾਹ੍ਮਣਾਤਿਆਦਿਮਾਹ. ਤਤ੍ਥ ਆਰਦ੍ਧਂ ਖੋ ਪਨ ਮੇ, ਬ੍ਰਾਹ੍ਮਣ, ਵੀਰਿਯਂ ਅਹੋਸੀਤਿ, ਬ੍ਰਾਹ੍ਮਣ, ਨ ਮਯਾ ਅਯਂ ਅਨੁਤ੍ਤਰੋ ਜੇਟ੍ਠਸੇਟ੍ਠਭਾਵੋ ਕੁਸੀਤੇਨ ਮੁਟ੍ਠਸ੍ਸਤਿਨਾ ਸਾਰਦ੍ਧਕਾਯੇਨ ਵਿਕ੍ਖਿਤ੍ਤਚਿਤੇਨ ਅਧਿਗਤੋ, ਅਪਿਚ ਖੋ ਤਦਧਿਗਮਾਯ ਆਰਦ੍ਧਂ ਖੋ ਪਨ ਮੇ ਵੀਰਿਯਂ ਅਹੋਸਿ. ਬੋਧਿਮਣ੍ਡੇ ਨਿਸਿਨ੍ਨੇਨ ਮਯਾ ਚਤੁਸਮ੍ਮਪ੍ਪਧਾਨਭੇਦਂ ਵੀਰਿਯਂ ਆਰਦ੍ਧਂ ਅਹੋਸਿ, ਪਗ੍ਗਹਿਤਂ ਅਸਿਥਿਲਪ੍ਪਵਤ੍ਤਿਤਂ. ਆਰਦ੍ਧਤ੍ਤਾਯੇਵ ਚ ਮੇ ਤਂ ਅਸਲ੍ਲੀਨਂ ਅਹੋਸਿ. ਨ ਕੇਵਲਞ੍ਚ ਵੀਰਿਯਮੇਵ, ਸਤਿਪਿ ਮੇ ਆਰਮ੍ਮਣਾਭਿਮੁਖਭਾਵੇਨ ਉਪਟ੍ਠਿਤਾ ਅਹੋਸਿ, ਉਪਟ੍ਠਿਤਤ੍ਤਾਯੇਵ ਚ ਅਸਮ੍ਮੁਟ੍ਠਾ. ਪਸ੍ਸਦ੍ਧੋ ਕਾਯੋ ਅਸਾਰਦ੍ਧੋਤਿ ਕਾਯਚਿਤ੍ਤਪ੍ਪਸ੍ਸਦ੍ਧਿਵਸੇਨ ਕਾਯੋਪਿ ਮੇ ਪਸ੍ਸਦ੍ਧੋ ਅਹੋਸਿ. ਤਤ੍ਥ ਯਸ੍ਮਾ ਨਾਮਕਾਯੇ ਪਸ੍ਸਦ੍ਧੇ ਰੂਪਕਾਯੋਪਿ ਪਸ੍ਸਦ੍ਧੋਯੇਵ ਹੋਤਿ, ਤਸ੍ਮਾ ‘‘ਨਾਮਕਾਯੋ ਰੂਪਕਾਯੋ’’ਤਿ ਅਵਿਸੇਸੇਤ੍ਵਾਵ ‘‘ਪਸ੍ਸਦ੍ਧੋ ਕਾਯੋ’’ਤਿ ਵੁਤ੍ਤਂ. ਅਸਾਰਦ੍ਧੋਤਿ ਸੋ ਚ ਖੋ ਪਸ੍ਸਦ੍ਧਤ੍ਤਾਯੇਵ ਅਸਾਰਦ੍ਧੋ, ਵਿਗਤਦਰਥੋਤਿ ਵੁਤ੍ਤਂ ਹੋਤਿ. ਸਮਾਹਿਤਂ ਚਿਤ੍ਤਂ ਏਕਗ੍ਗਨ੍ਤਿ ਚਿਤ੍ਤਮ੍ਪਿ ਮੇ ਸਮ੍ਮਾ ਆਹਿਤਂ ਸੁਟ੍ਠੁ ਠਪਿਤਂ ਅਪ੍ਪਿਤਂ ਵਿਯ ਅਹੋਸਿ, ਸਮਾਹਿਤਤ੍ਤਾ ਏਵ ਚ ਏਕਗ੍ਗਂ ਅਚਲਂ ਨਿਪ੍ਫਨ੍ਦਨਨ੍ਤਿ. ਏਤ੍ਤਾਵਤਾ ਝਾਨਸ੍ਸ ਪੁਬ੍ਬਭਾਗਪਟਿਪਦਾ ਕਥਿਤਾ ਹੋਤਿ.
ਇਦਾਨਿ ਇਮਾਯ ਪਟਿਪਦਾਯ ਅਧਿਗਤਂ ਪਠਮਜ੍ਝਾਨਂ ਆਦਿਂ ਕਤ੍ਵਾ ਵਿਜ੍ਜਾਤ੍ਤਯਪਰਿਯੋਸਾਨਂ ਵਿਸੇਸਂ ਦਸ੍ਸੇਨ੍ਤੋ ਸੋ ਖੋ ਅਹਨ੍ਤਿਆਦਿਮਾਹ. ਤਤ੍ਥ ਯਂ ਯਾਵ ਵਿਨਿਚ੍ਛਯਨਯੇਨ ਵਤ੍ਤਬ੍ਬਂ ਸਿਯਾ, ਤਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੬੯) ਵੁਤ੍ਤਮੇਵ.
ਅਯਂ ਖੋ ਮੇ, ਬ੍ਰਾਹ੍ਮਣਾਤਿਆਦੀਸੁ ਪਨ ਵਿਜ੍ਜਾਤਿ ਵਿਦਿਤਕਰਣਟ੍ਠੇਨ ਵਿਜ੍ਜਾ. ਕਿਂ ਵਿਦਿਤਂ ਕਰੋਤਿ? ਪੁਬ੍ਬੇਨਿਵਾਸਂ. ਅਵਿਜ੍ਜਾਤਿ ਤਸ੍ਸੇਵ ਪੁਬ੍ਬੇਨਿਵਾਸਸ੍ਸ ਅਵਿਦਿਤਕਰਣਟ੍ਠੇਨ ਤਪ੍ਪਟਿਚ੍ਛਾਦਕਮੋਹੋ. ਤਮੋਤਿ ਸ੍ਵੇਵ ਮੋਹੋ ਤਪ੍ਪਟਿਚ੍ਛਾਦਕਟ੍ਠੇਨ ਤਮੋ ਨਾਮ. ਆਲੋਕੋਤਿ ਸਾ ਏਵ ਵਿਜ੍ਜਾ ਓਭਾਸਕਰਣਟ੍ਠੇਨ ਆਲੋਕੋਤਿ. ਏਤ੍ਥ ਚ ਵਿਜ੍ਜਾ ਅਧਿਗਤਾਤਿ ਅਤ੍ਥੋ, ਸੇਸਂ ਪਸਂਸਾਵਚਨਂ. ਯੋਜਨਾ ਪਨੇਤ੍ਥ – ਅਯਂ ਖੋ ਮੇ ਵਿਜ੍ਜਾ ਅਧਿਗਤਾ, ਤਸ੍ਸ ਮੇ ਅਧਿਗਤਵਿਜ੍ਜਸ੍ਸ ਅਵਿਜ੍ਜਾ ਵਿਹਤਾ, ਵਿਨਟ੍ਠਾਤਿ ਅਤ੍ਥੋ. ਕਸ੍ਮਾ? ਯਸ੍ਮਾ ਵਿਜ੍ਜਾ ਉਪ੍ਪਨ੍ਨਾ. ਏਸ ਨਯੋ ਇਤਰਸ੍ਮਿਮ੍ਪਿ ਪਦਦ੍ਵਯੇ. ਯਥਾ ਤਨ੍ਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ. ਸਤਿਯਾ ਅਵਿਪ੍ਪਵਾਸੇਨ ਅਪ੍ਪਮਤ੍ਤਸ੍ਸ ਵੀਰਿਯਾਤਾਪੇਨ ਆਤਾਪਿਨੋ ਕਾਯੇ ਚ ਜੀਵਿਤੇ ਚ ਅਨਪੇਕ੍ਖਾਤਾਯ ਪਹਿਤਤ੍ਤਸ੍ਸ ਪੇਸਿਤਤ੍ਤਸ੍ਸਾਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਯਥਾ ਅਪ੍ਪਮਤ੍ਤਸ੍ਸ ਆਤਾਪਿਨੋ ਪਹਿਤਤ੍ਤਸ੍ਸ ਵਿਹਰਤੋ ਅਵਿਜ੍ਜਾ ਵਿਹਞ੍ਞੇਯ੍ਯ, ਵਿਜ੍ਜਾ ਉਪ੍ਪਜ੍ਜੇਯ੍ਯ ਤਮੋ ਵਿਹਞ੍ਞੇਯ੍ਯ, ਆਲੋਕੋ ਉਪ੍ਪਜ੍ਜੇਯ੍ਯ, ਏਵਮੇਵ ਮਮ ਅਵਿਜ੍ਜਾ ਵਿਹਤਾ, ਵਿਜ੍ਜਾ ਉਪ੍ਪਨ੍ਨਾ, ਤਮੋ ਵਿਹਤੋ, ਆਲੋਕੋ ਉਪ੍ਪਨ੍ਨੋ. ਏਤਸ੍ਸ ਮੇ ਪਧਾਨਾਨੁਯੋਗਸ੍ਸ ਅਨੁਰੂਪਮੇਵ ਫਲਂ ਲਦ੍ਧਨ੍ਤਿ.
ਅਯਂ ਖੋ ਮੇ, ਬ੍ਰਾਹ੍ਮਣ, ਪਠਮਾ ਅਭਿਨਿਬ੍ਭਿਦਾ ਅਹੋਸਿ ਕੁਕ੍ਕੁਟਚ੍ਛਾਪਕਸ੍ਸੇਵ ਅਣ੍ਡਕੋਸਮ੍ਹਾਤਿ ਅਯਂ ਖੋ ਮਮ, ਬ੍ਰਾਹ੍ਮਣ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਮੁਖਤੁਣ੍ਡਕੇਨ ਪੁਬ੍ਬੇ ਨਿਵੁਤ੍ਥਖਨ੍ਧਪ੍ਪਟਿਚ੍ਛਾਦਕਂ ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾ ਪਠਮਾ ਅਭਿਨਿਬ੍ਭਿਦਾ ਪਠਮਾ ਨਿਕ੍ਖਨ੍ਤਿ ਪਠਮਾ ਅਰਿਯਾਜਾਤਿ ਅਹੋਸਿ ਕੁਕ੍ਕੁਟਚ੍ਛਾਪਕਸ੍ਸੇਵ ਮੁਖਤੁਣ੍ਡਕੇਨ ਵਾ ਪਾਦਨਖਸਿਖਾਯ ਵਾ ਅਣ੍ਡਕੋਸਂ ਪਦਾਲੇਤ੍ਵਾ ਤਮ੍ਹਾ ਅਣ੍ਡਕੋਸਮ੍ਹਾ ਅਭਿਨਿਬ੍ਭਿਦਾ ਨਿਕ੍ਖਨ੍ਤਿ ਕੁਕ੍ਕੁਟਨਿਕਾਯੇ ਪਚ੍ਚਾਜਾਤੀਤਿ. ਅਯਂ ਤਾਵ ਪੁਬ੍ਬੇਨਿਵਾਸਕਥਾਯਂ ਨਯੋ.
ਚੁਤੁਪਪਾਤਕਥਾਯ ਪਨ ਵਿਜ੍ਜਾਤਿ ਦਿਬ੍ਬਚਕ੍ਖੁਞਾਣਵਿਜ੍ਜਾ. ਅਵਿਜ੍ਜਾਤਿ ਚੁਤੁਪਪਾਤਪ੍ਪਟਿਚ੍ਛਾਦਿਕਾ ਅਵਿਜ੍ਜਾ. ਯਥਾ ਪਨ ਪੁਬ੍ਬੇਨਿਵਾਸਕਥਾਯਂ ‘‘ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਮੁਖਤੁਣ੍ਡਕੇਨ ਪੁਬ੍ਬੇ ਨਿਵੁਤ੍ਥਕ੍ਖਨ੍ਧਪ੍ਪਟਿਚ੍ਛਾਦਕਂ ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾ’’ਤਿ ਵੁਤ੍ਤਂ, ਏਵਮਿਧ ‘‘ਚੁਤੁਪਪਾਤਞਾਣਮੁਖਤੁਣ੍ਡਕੇਨ ਚੁਤੁਪਪਾਤਪ੍ਪਟਿਚ੍ਛਾਦਕਂ ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾ’’ਤਿ ਵਤ੍ਤਬ੍ਬਂ.
ਯਂ ਪਨੇਤਂ ਪਚ੍ਚਵੇਕ੍ਖਣਞਾਣਪਰਿਗ੍ਗਹਿਤਂ ਆਸਵਾਨਂ ਖਯਞਾਣਾਧਿਗਮਂ ਬ੍ਰਾਹ੍ਮਣਸ੍ਸ ਦਸ੍ਸੇਨ੍ਤੋ ਅਯਂ ਖੋ ਮੇ, ਬ੍ਰਾਹ੍ਮਣ, ਤਤਿਯਾ ਵਿਜ੍ਜਾਤਿਆਦਿਮਾਹ, ਤਤ੍ਥ ਵਿਜ੍ਜਾਤਿ ਅਰਹਤ੍ਤਮਗ੍ਗਵਿਜ੍ਜਾ. ਅਵਿਜ੍ਜਾਤਿ ਚਤੁਸਚ੍ਚਪ੍ਪਟਿਚ੍ਛਾਦਿਕਾ ਅਵਿਜ੍ਜਾ. ਅਯਂ ਖੋ ਮੇ, ਬ੍ਰਾਹ੍ਮਣ, ਤਤਿਯਾ ਅਭਿਨਿਬ੍ਭਿਦਾ ਅਹੋਸੀਤਿ ਏਤ੍ਥ ਅਯਂ ਖੋ ਮਮ, ਬ੍ਰਾਹ੍ਮਣ, ਆਸਵਾਨਂ ਖਯਞਾਣਮੁਖਤੁਣ੍ਡਕੇਨ ਚਤੁਸਚ੍ਚਪਟਿਚ੍ਛਾਦਕਂ ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾ ਤਤਿਯਾ ਅਭਿਨਿਬ੍ਭਿਦਾ ਤਤਿਯਾ ਨਿਕ੍ਖਨ੍ਤਿ ਤਤਿਯਾ ਅਰਿਯਜਾਤਿ ਅਹੋਸਿ ਕੁਕ੍ਕੁਟਚ੍ਛਾਪਕਸ੍ਸੇਵ ਮੁਖਤੁਣ੍ਡਕੇਨ ਵਾ ਪਾਦਨਖਸਿਖਾਯ ਵਾ ਅਣ੍ਡਕੋਸਂ ਪਦਾਲੇਤ੍ਵਾ ਤਮ੍ਹਾ ਅਣ੍ਡਕੋਸਮ੍ਹਾ ਅਭਿਨਿਬ੍ਭਿਦਾ ਨਿਕ੍ਖਨ੍ਤਿ ਕੁਕ੍ਕੁਟਨਿਕਾਯੇ ਪਚ੍ਚਾਜਾਤੀਤਿ.
ਏਤ੍ਤਾਵਤਾ ਕਿਂ ਦਸ੍ਸੇਸੀਤਿ? ਸੋ ਹਿ, ਬ੍ਰਾਹ੍ਮਣ, ਕੁਕ੍ਕੁਟਚ੍ਛਾਪਕੋ ਅਣ੍ਡਕੋਸਂ ਪਦਾਲੇਤ੍ਵਾ ਤਤੋ ਨਿਕ੍ਖਮਨ੍ਤੋ ਸਕਿਮੇਵ ਜਾਯਤਿ, ਅਹਂ ਪਨ ਪੁਬ੍ਬੇਨਿਵੁਤ੍ਥਕ੍ਖਨ੍ਧਪ੍ਪਟਿਚ੍ਛਾਦਕਂ ਅਵਿਜ੍ਜਣ੍ਡਕੋਸਂ ਭਿਨ੍ਦਿਤ੍ਵਾ ਪਠਮਂ ਤਾਵ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਵਿਜ੍ਜਾਯ ਜਾਤੋ. ਤਤੋ ਸਤ੍ਤਾਨਂ ਚੁਤਿਪਟਿਸਨ੍ਧਿਪ੍ਪਟਿਚ੍ਛਾਦਕਂ ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾ ਦੁਤਿਯਂ ਦਿਬ੍ਬਚਕ੍ਖੁਞਾਣਵਿਜ੍ਜਾਯ ਜਾਤੋ, ਪੁਨ ਚਤੁਸਚ੍ਚਪ੍ਪਟਿਚ੍ਛਾਦਕਂ ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾ ਤਤਿਯਂ ਆਸਵਾਨਂ ਖਯਞਾਣਵਿਜ੍ਜਾਯ ਜਾਤੋ. ਏਵਂ ਤੀਹਿ ਵਿਜ੍ਜਾਹਿ ਤਿਕ੍ਖਤ੍ਤੁਂ ਜਾਤੋਮ੍ਹਿ. ਸਾ ਚ ਮੇ ਜਾਤਿ ਅਰਿਯਾ ਸੁਪਰਿਸੁਦ੍ਧਾਤਿ ਇਦਂ ਦਸ੍ਸੇਤਿ. ਏਵਂਦਸ੍ਸੇਨ੍ਤੋ ਚ ਪੁਬ੍ਬੇਨਿਵਾਸਞਾਣੇਨ ਅਤੀਤਂਸਞਾਣਂ, ਦਿਬ੍ਬਚਕ੍ਖੁਨਾ ਪਚ੍ਚੁਪ੍ਪਨ੍ਨਾਨਾਗਤਂਸਞਾਣਂ, ਆਸਵਕ੍ਖਯੇਨ ਸਕਲਲੋਕਿਯਲੋਕੁਤ੍ਤਰਗੁਣਨ੍ਤਿ ਏਵਂ ਤੀਹਿ ਵਿਜ੍ਜਾਹਿ ਸਬ੍ਬੇਪਿ ਸਬ੍ਬਞ੍ਞੁਗੁਣੇ ਪਕਾਸੇਤ੍ਵਾ ਅਤ੍ਤਨੋ ਅਰਿਯਾਯ ਜਾਤਿਯਾ ਜੇਟ੍ਠਸੇਟ੍ਠਭਾਵਂ ਬ੍ਰਾਹ੍ਮਣਸ੍ਸ ਦਸ੍ਸੇਸਿ.
ਏਵਂ ਵੁਤ੍ਤੇ ਵੇਰਞ੍ਜੋ ਬ੍ਰਾਹ੍ਮਣੋਤਿ ਏਵਂ ਭਗਵਤਾ ਲੋਕਾਨੁਕਮ੍ਪਕੇਨ ਬ੍ਰਾਹ੍ਮਣਂ ਅਨੁਕਮ੍ਪਮਾਨੇਨ ਨਿਗੁਹਿਤਬ੍ਬੇਪਿ ਅਤ੍ਤਨੋ ਅਰਿਯਾਯ ਜਾਤਿਯਾ ਜੇਟ੍ਠਸੇਟ੍ਠਭਾਵੇ ਵਿਜ੍ਜਾਤ੍ਤਯਪਕਾਸਿਕਾਯ ਧਮ੍ਮਦੇਸਨਾਯ ਵੁਤ੍ਤੇ ਪੀਤਿਵਿਪ੍ਫਾਰਪਰਿਪੁਣ੍ਣਗਤ੍ਤਚਿਤ੍ਤੋ ਵੇਰਞ੍ਜੋ ਬ੍ਰਾਹ੍ਮਣੋ ਤਂ ਭਗਵਤੋ ਅਰਿਯਾਯ ਜਾਤਿਯਾ ਜੇਟ੍ਠਸੇਟ੍ਠਭਾਵਂ ਵਿਦਿਤ੍ਵਾ ‘‘ਈਦਿਸਂ ਨਾਮਾਹਂ ਸਬ੍ਬਲੋਕਜੇਟ੍ਠਂ ਸਬ੍ਬਗੁਣਸਮਨ੍ਨਾਗਤਂ ਸਬ੍ਬਞ੍ਞੁਂ ‘ਅਞ੍ਞੇਸਂ ਅਭਿਵਾਦਨਾਦਿਕਮ੍ਮਂ ਨ ਕਰੋਤੀ’ਤਿ ਅਵਚਂ, ਧਿਰਤ੍ਥੁ ਵਤ, ਭੋ, ਅਞ੍ਞਾਣ’’ਨ੍ਤਿ ਅਤ੍ਤਾਨਂ ਗਰਹਿਤ੍ਵਾ ‘‘ਅਯਂ ਦਾਨਿ ਲੋਕੇ ਅਰਿਯਾਯ ਜਾਤਿਯਾ ਪੁਰੇਜਾਤਟ੍ਠੇਨ ਜੇਟ੍ਠੋ, ਸਬ੍ਬਗੁਣੇਹਿ ਅਪ੍ਪਟਿਸਮਟ੍ਠੇਨ ਸੇਟ੍ਠੋ’’ਤਿ ਨਿਟ੍ਠਂ ਗਨ੍ਤ੍ਵਾ ਭਗਵਨ੍ਤਂ ਏਤਦਵੋਚ – ਜੇਟ੍ਠੋ ਭਵਂ ਗੋਤਮੋ ਸੇਟ੍ਠੋ ਭਵਂ ਗੋਤਮੋਤਿ. ਏਵਞ੍ਚ ਪਨ ਵਤ੍ਵਾ ਪੁਨ ਤਂ ਭਗਵਤੋ ਧਮ੍ਮਦੇਸਨਂ ਅਬ੍ਭਨੁਮੋਦਮਾਨੋ ਅਭਿਕ੍ਕਨ੍ਤਂ ਭੋ ਗੋਤਮਾਤਿਆਦਿਮਾਹ. ਤਂ ਵੁਤ੍ਤਤ੍ਥਮੇਵਾਤਿ.
੨. ਸੀਹਸੁਤ੍ਤਵਣ੍ਣਨਾ
੧੨. ਦੁਤਿਯੇ ਅਭਿਞ੍ਞਾਤਾਤਿ ਞਾਤਾ ਪਞ੍ਞਾਤਾ ਪਾਕਟਾ. ਸਨ੍ਥਾਗਾਰੇਤਿ ਮਹਾਜਨਸ੍ਸ ਵਿਸ੍ਸਮਨਤ੍ਥਾਯ ਕਤੇ ਅਗਾਰੇ. ਸਾ ਕਿਰ ਸਨ੍ਥਾਗਾਰਸਾਲਾ ਨਗਰਮਜ੍ਝੇ ਅਹੋਸਿ, ਚਤੂਸੁ ਠਾਨੇਸੁ ਠਿਤਾਨਂ ਪਞ੍ਞਾਯਤਿ, ਚਤੂਹਿ ਦਿਸਾਹਿ ਆਗਤਮਨੁਸ੍ਸਾ ਪਠਮਂ ਤਤ੍ਥ ਵਿਸ੍ਸਮਿਤ੍ਵਾ ਪਚ੍ਛਾ ਅਤ੍ਤਨੋ ਅਤ੍ਤਨੋ ਫਾਸੁਕਟ੍ਠਾਨਂ ਗਚ੍ਛਨ੍ਤਿ. ਰਾਜਕੁਲਾਨਂ ਰਜ੍ਜਕਿਚ੍ਚਸਨ੍ਥਰਣਤ੍ਥਾਯ ਕਤਂ ਅਗਾਰਨ੍ਤਿਪਿ ਵਦਨ੍ਤਿਯੇਵ. ਤਤ੍ਥ ਹਿ ਨਿਸੀਦਿਤ੍ਵਾ ਲਿਚ੍ਛਵਿਰਾਜਾਨੋ ਰਜ੍ਜਕਿਚ੍ਚਂ ਸਨ੍ਥਰਨ੍ਤਿ ਕਰੋਨ੍ਤਿ ਵਿਚਾਰੇਨ੍ਤਿ. ਸਨ੍ਨਿਸਿਨ੍ਨਾਤਿ ਤੇਸਂ ਨਿਸੀਦਨਤ੍ਥਞ੍ਞੇਵ ਪਞ੍ਞਤ੍ਤੇਸੁ ਮਹਾਰਹਵਰਪਚ੍ਚਤ੍ਥਰਣੇਸੁ ਸਮੁਸ੍ਸਿਤਸੇਤਚ੍ਛਤ੍ਤੇਸੁ ਆਸਨੇਸੁ ਸਨ੍ਨਿਸਿਨ੍ਨਾ. ਅਨੇਕਪਰਿਯਾਯੇਨ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤੀਤਿ ਰਾਜਕੁਲੇ ਕਿਚ੍ਚਞ੍ਚੇਵ ਲੋਕਤ੍ਥਚਰਿਯਞ੍ਚ ਵਿਚਾਰੇਤ੍ਵਾ ਅਨੇਕੇਹਿ ਕਾਰਣੇਹਿ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤਿ ਕਥੇਨ੍ਤਿ ਦੀਪੇਨ੍ਤਿ. ਪਣ੍ਡਿਤਾ ਹਿ ਤੇ ਰਾਜਾਨੋ ਸਦ੍ਧਾ ਪਸਨ੍ਨਾ ਸੋਤਾਪਨ੍ਨਾਪਿ ਸਕਦਾਗਾਮਿਨੋਪਿ ਅਨਾਗਾਮਿਨੋਪਿ ਅਰਿਯਸਾਵਕਾ, ਤੇ ਸਬ੍ਬੇਪਿ ਲੋਕਿਯਜਟਂ ਛਿਨ੍ਦਿਤ੍ਵਾ ਬੁਦ੍ਧਾਦੀਨਂ ਤਿਣ੍ਣਂ ਰਤਨਾਨਂ ਵਣ੍ਣਂ ਭਾਸਨ੍ਤਿ. ਤਤ੍ਥ ਤਿਵਿਧੋ ਬੁਦ੍ਧਵਣ੍ਣੋ ਨਾਮ ਚਰਿਯਵਣ੍ਣੋ, ਸਰੀਰਵਣ੍ਣੋ, ਗੁਣਵਣ੍ਣੋਤਿ. ਤਤ੍ਰਿਮੇ ਰਾਜਾਨੋ ਚਰਿਯਾਯ ਵਣ੍ਣਂ ਆਰਭਿਂਸੁ – ‘‘ਦੁਕ੍ਕਰਂ ਵਤ ਕਤਂ ਸਮ੍ਮਾਸਮ੍ਬੁਦ੍ਧੇਨ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖੇਯ੍ਯਾਨਿ ਦਸ ਪਾਰਮਿਯੋ, ਦਸ ਉਪਪਾਰਮਿਯੋ, ਦਸ ਪਰਮਤ੍ਥਪਾਰਮਿਯੋਤਿ ਸਮਤ੍ਤਿਂਸ ਪਾਰਮਿਯੋ ਪੂਰੇਨ੍ਤੇਨ, ਞਾਤਤ੍ਥਚਰਿਯਂ, ਲੋਕਤ੍ਥਚਰਿਯਂ, ਬੁਦ੍ਧਚਰਿਯਂ ਮਤ੍ਥਕਂ ਪਾਪੇਤ੍ਵਾ ਪਞ੍ਚ ਮਹਾਪਰਿਚ੍ਚਾਗੇ ਪਰਿਚ੍ਚਜਨ੍ਤੇਨਾ’’ਤਿ ਅਡ੍ਢਚ੍ਛਕ੍ਕੇਹਿ ਜਾਤਕਸਤੇਹਿ ਬੁਦ੍ਧਵਣ੍ਣਂ ਕਥੇਨ੍ਤਾ ਤੁਸਿਤਭਵਨਂ ਪਾਪੇਤ੍ਵਾ ਠਪਯਿਂਸੁ.
ਧਮ੍ਮਸ੍ਸ ਵਣ੍ਣਂ ਭਾਸਨ੍ਤਾ ਪਨ ‘‘ਤੇਨ ਭਗਵਤਾ ਧਮ੍ਮੋ ਦੇਸਿਤੋ, ਨਿਕਾਯਤੋ ਪਞ੍ਚ ਨਿਕਾਯਾ, ਪਿਟਕਤੋ ਤੀਣਿ ਪਿਟਕਾਨਿ, ਅਙ੍ਗਤੋ ਨਵ ਅਙ੍ਗਾਨਿ, ਖਨ੍ਧਤੋ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸਾਨੀ’’ਤਿ ਕੋਟ੍ਠਾਸਵਸੇਨ ਧਮ੍ਮਗੁਣਂ ਕਥਯਿਂਸੁ.
ਸਙ੍ਘਸ੍ਸ ਵਣ੍ਣਂ ਭਾਸਨ੍ਤਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ‘‘ਪਟਿਲਦ੍ਧਸਦ੍ਧਾ ਕੁਲਪੁਤ੍ਤਾ ਭੋਗਕ੍ਖਨ੍ਧਞ੍ਚੇਵ ਞਾਤਿਪਰਿਵਟ੍ਟਞ੍ਚ ਪਹਾਯ ਸੇਤਚ੍ਛਤ੍ਤਂ ਓਪਰਜ੍ਜਂ ਸੇਨਾਪਤਿਸੇਟ੍ਠਿਭਣ੍ਡਾਗਾਰਿਕਟ੍ਠਾਨਨ੍ਤਰਾਦੀਨਿ ਅਗਣੇਤ੍ਵਾ ਨਿਕ੍ਖਮ੍ਮ ਸਤ੍ਥੁ ਵਰਸਾਸਨੇ ਪਬ੍ਬਜਨ੍ਤਿ. ਸੇਤਚ੍ਛਤ੍ਤਂ ਪਹਾਯ ਪਬ੍ਬਜਿਤਾਨਂ ਭਦ੍ਦਿਯਰਾਜਮਹਾਕਪ੍ਪਿਨਪੁਕ੍ਕੁਸਾਤਿਆਦੀਨਂ ਰਾਜਪਬ੍ਬਜਿਤਾਨਂਯੇਵ ਬੁਦ੍ਧਕਾਲੇ ਅਸੀਤਿਸਹਸ੍ਸਾਨਿ ਅਹੇਸੁਂ. ਅਨੇਕਕੋਟਿਸਤਂ ਧਨਂ ਪਹਾਯ ਪਬ੍ਬਜਿਤਾਨਂ ਪਨ ਯਸਕੁਲਪੁਤ੍ਤਸੋਣਸੇਟ੍ਠਿਪੁਤ੍ਤਰਟ੍ਠਪਾਲਕੁਲਪੁਤ੍ਤਾਦੀਨਂ ਪਰਿਚ੍ਛੇਦੋ ਨਤ੍ਥਿ. ਏਵਰੂਪਾ ਚ ਏਵਰੂਪਾ ਚ ਕੁਲਪੁਤ੍ਤਾ ਸਤ੍ਥੁ ਸਾਸਨੇ ਪਬ੍ਬਜਨ੍ਤੀ’’ਤਿ ਪਬ੍ਬਜ੍ਜਾਸਙ੍ਖੇਪਵਸੇਨ ਸਙ੍ਘਗੁਣੇ ਕਥਯਿਂਸੁ.
ਸੀਹੋ ਸੇਨਾਪਤੀਤਿ ਏਵਂਨਾਮਕੋ ਸੇਨਾਯ ਅਧਿਪਤਿ. ਵੇਸਾਲਿਯਞ੍ਹਿ ਸਤ੍ਤ ਸਹਸ੍ਸਾਨਿ ਸਤ੍ਤ ਸਤਾਨਿ ਸਤ੍ਤ ਚ ਰਾਜਾਨੋ. ਤੇ ਸਬ੍ਬੇਪਿ ਸਨ੍ਨਿਪਤਿਤ੍ਵਾ ਸਬ੍ਬੇਸਂ ਮਨਂ ਗਹੇਤ੍ਵਾ ‘‘ਰਟ੍ਠਂ ਵਿਚਾਰੇਤੁਂ ਸਮਤ੍ਥਂ ਏਕਂ ਵਿਚਿਨਥਾ’’ਤਿ ਵਿਚਿਨਨ੍ਤਾ ਸੀਹਂ ਰਾਜਕੁਮਾਰਂ ਦਿਸ੍ਵਾ ‘‘ਅਯਂ ਸਕ੍ਖਿਸ੍ਸਤੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਤਸ੍ਸ ਰਤ੍ਤਮਣਿਵਣ੍ਣਂ ਕਮ੍ਬਲਪਰਿਯੋਨਦ੍ਧਂ ਸੇਨਾਪਤਿਚ੍ਛਤ੍ਤਂ ਅਦਂਸੁ. ਤਂ ਸਨ੍ਧਾਯ ਵੁਤ੍ਤਂ – ‘‘ਸੀਹੋ ਸੇਨਾਪਤੀ’’ਤਿ. ਨਿਗਣ੍ਠਸਾਵਕੋਤਿ ਨਿਗਣ੍ਠਸ੍ਸ ਨਾਟਪੁਤ੍ਤਸ੍ਸ ਪਚ੍ਚਯਦਾਯਕੋ ਉਪਟ੍ਠਾਕੋ. ਜਮ੍ਬੁਦੀਪਤਲਸ੍ਮਿਞ੍ਹਿ ਤਯੋ ਜਨਾ ਨਿਗਣ੍ਠਾਨਂ ਅਗ੍ਗੁਪਟ੍ਠਾਕਾ – ਨਾਲ਼ਨ੍ਦਾਯਂ, ਉਪਾਲਿ ਗਹਪਤਿ, ਕਪਿਲਪੁਰੇ ਵਪ੍ਪੋ ਸਕ੍ਕੋ, ਵੇਸਾਲਿਯਂ ਅਯਂ ਸੀਹੋ ਸੇਨਾਪਤੀਤਿ. ਨਿਸਿਨ੍ਨੋ ਹੋਤੀਤਿ ਸੇਸਰਾਜੂਨਂ ਪਰਿਸਾਯ ਅਨ੍ਤਰਨ੍ਤਰੇ ਆਸਨਾਨਿ ਪਞ੍ਞਾਪਯਿਂਸੁ, ਸੀਹਸ੍ਸ ਪਨ ਮਜ੍ਝੇ ਠਾਨੇਤਿ ਤਸ੍ਮਿਂ ਪਞ੍ਞਤ੍ਤੇ ਮਹਾਰਹੇ ਰਾਜਾਸਨੇ ਨਿਸਿਨ੍ਨੋ ਹੋਤਿ. ਨਿਸ੍ਸਂਸਯਨ੍ਤਿ ਨਿਬ੍ਬਿਚਿਕਿਚ੍ਛਂ ਅਦ੍ਧਾ ਏਕਂਸੇਨ, ਨ ਹੇਤੇ ਯਸ੍ਸ ਵਾ ਤਸ੍ਸ ਵਾ ਅਪ੍ਪੇਸਕ੍ਖਸ੍ਸ ਏਵਂ ਅਨੇਕਸਤੇਹਿ ਕਾਰਣੇਹਿ ਵਣ੍ਣਂ ਭਾਸਨ੍ਤਿ.
ਯੇਨ ਨਿਗਣ੍ਠੋ ਨਾਟਪੁਤ੍ਤੋ ਤੇਨੁਪਸਙ੍ਕਮੀਤਿ ਨਿਗਣ੍ਠੋ ਕਿਰ ਨਾਟਪੁਤ੍ਤੋ ‘‘ਸਚਾਯਂ ਸੀਹੋ ਕਸ੍ਸਚਿਦੇਵ ਸਮਣਸ੍ਸ ਗੋਤਮਸ੍ਸ ਵਣ੍ਣਂ ਕਥੇਨ੍ਤਸ੍ਸ ਸੁਤ੍ਵਾ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਤਿ, ਮਯ੍ਹਂ ਪਰਿਹਾਨਿ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਪਠਮਤਰਂਯੇਵ ਸੀਹਂ ਸੇਨਾਪਤਿਂ ਏਤਦਵੋਚ – ‘‘ਸੇਨਾਪਤਿ ਇਮਸ੍ਮਿਂ ਲੋਕੇ ‘ਅਹਂ ਬੁਦ੍ਧੋ ਅਹਂ ਬੁਦ੍ਧੋ’ਤਿ ਬਹੂ ਵਿਚਰਨ੍ਤਿ. ਸਚੇ ਤ੍ਵਂ ਕਸ੍ਸਚਿ ਦਸ੍ਸਨਾਯ ਉਪਸਙ੍ਕਮਿਤੁਕਾਮੋ ਅਹੋਸਿ, ਮਂ ਪੁਚ੍ਛੇਯ੍ਯਾਸਿ. ਅਹਂ ਤੇ ਯੁਤ੍ਤਟ੍ਠਾਨਂ ਪੇਸੇਸ੍ਸਾਮਿ, ਅਯੁਤ੍ਤਟ੍ਠਾਨਤੋ ਨਿਵਾਰੇਸ੍ਸਾਮੀ’’ਤਿ. ਸੋ ਤਂ ਕਥਂ ਅਨੁਸ੍ਸਰਿਤ੍ਵਾ ‘‘ਸਚੇ ਮਂ ਪੇਸੇਸ੍ਸਤਿ, ਗਮਿਸ੍ਸਾਮਿ. ਨੋ ਚੇ, ਨ ਗਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਯੇਨ ਨਿਗਣ੍ਠੋ ਨਾਟਪੁਤ੍ਤੋ, ਤੇਨੁਪਸਙ੍ਕਮਿ.
ਅਥਸ੍ਸ ਵਚਨਂ ਸੁਤ੍ਵਾ ਨਿਗਣ੍ਠੋ ਮਹਾਪਬ੍ਬਤੇਨ ਵਿਯ ਬਲਵਸੋਕੇਨ ਓਤ੍ਥਟੋ ‘‘ਯਤ੍ਥ ਦਾਨਿਸ੍ਸਾਹਂ ਗਮਨਂ ਨ ਇਚ੍ਛਾਮਿ, ਤਤ੍ਥੇਵ ਗਨ੍ਤੁਕਾਮੋ ਜਾਤੋ, ਹਤੋਹਮਸ੍ਮੀ’’ਤਿ ਅਨਤ੍ਤਮਨੋ ਹੁਤ੍ਵਾ ‘‘ਪਟਿਬਾਹਨੁਪਾਯਮਸ੍ਸ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਕਿਂ ਪਨ ਤ੍ਵਨ੍ਤਿਆਦਿਮਾਹ. ਏਵਂ ਵਦਨ੍ਤੋ ਵਿਚਰਨ੍ਤਂ ਗੋਣਂ ਦਣ੍ਡੇਨ ਪਹਰਨ੍ਤੋ ਵਿਯ ਜਲਮਾਨਂ ਪਦੀਪਂ ਨਿਬ੍ਬਾਪੇਨ੍ਤੋ ਵਿਯ ਭਤ੍ਤਭਰਿਤਂ ਪਤ੍ਤਂ ਨਿਕ੍ਕੁਜ੍ਜਨ੍ਤੋ ਵਿਯ ਚ ਸੀਹਸ੍ਸ ਉਪ੍ਪਨ੍ਨਪੀਤਿਂ ਵਿਨਾਸੇਸਿ. ਗਮਿਯਾਭਿਸਙ੍ਖਾਰੋਤਿ ਹਤ੍ਥਿਯਾਨਾਦੀਨਂ ਯੋਜਾਪਨਗਨ੍ਧਮਾਲਾਦਿਗ੍ਗਹਣਵਸੇਨ ਪਵਤ੍ਤੋ ਪਯੋਗੋ. ਸੋ ਪਟਿਪ੍ਪਸ੍ਸਮ੍ਭੀਤਿ ਸੋ ਵੂਪਸਨ੍ਤੋ.
ਦੁਤਿਯਮ੍ਪਿ ਖੋਤਿ ਦੁਤਿਯਵਾਰਮ੍ਪਿ. ਇਮਸ੍ਮਿਞ੍ਚ ਵਾਰੇ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤਾ ਤੁਸਿਤਭਵਨਤੋ ਪਟ੍ਠਾਯ ਯਾਵ ਮਹਾਬੋਧਿਪਲ੍ਲਙ੍ਕਾ ਦਸਬਲਸ੍ਸ ਹੇਟ੍ਠਾ ਪਾਦਤਲੇਹਿ ਉਪਰਿ ਕੇਸਗ੍ਗੇਹਿ ਪਰਿਚ੍ਛਿਨ੍ਦਿਤ੍ਵਾ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਅਸੀਤਿਅਨੁਬ੍ਯਞ੍ਜਨਬ੍ਯਾਮਪ੍ਪਭਾਨਂ ਵਸੇਨ ਸਰੀਰਵਣ੍ਣਂ ਕਥਯਿਂਸੁ. ਧਮ੍ਮਸ੍ਸ ਵਣ੍ਣਂ ਭਾਸਨ੍ਤਾ ‘‘ਏਕਪਦੇਪਿ ਏਕਬ੍ਯਞ੍ਜਨੇਪਿ ਅਵਖਲਿਤਂ ਨਾਮ ਨਤ੍ਥੀ’’ਤਿ ਸੁਕਥਿਤਵਸੇਨੇਵ ਧਮ੍ਮਗੁਣਂ ਕਥਯਿਂਸੁ. ਸਙ੍ਘਸ੍ਸ ਵਣ੍ਣਂ ਭਾਸਨ੍ਤਾ ‘‘ਏਵਰੂਪਂ ਯਸਸਿਰਿਵਿਭਵਂ ਪਹਾਯ ਸਤ੍ਥੁ ਸਾਸਨੇ ਪਬ੍ਬਜਿਤਾ ਨ ਕੋਸਜ੍ਜਪਕਤਿਕਾ ਹੋਨ੍ਤਿ, ਤੇਰਸਸੁ ਪਨ ਧੁਤਙ੍ਗਗੁਣੇਸੁ ਪਰਿਪੂਰਕਾਰਿਨੋ ਹੁਤ੍ਵਾ ਸਤ੍ਤਸੁ ਅਨੁਪਸ੍ਸਨਾਸੁ ਕਮ੍ਮਂ ਕਰੋਨ੍ਤਿ, ਅਟ੍ਠਤਿਂਸਾਰਮ੍ਮਣਵਿਭਤ੍ਤਿਯੋ ਵਲ਼ਞ੍ਜੇਨ੍ਤੀ’’ਤਿ ਪਟਿਪਦਾਵਸੇਨ ਸਙ੍ਘਗੁਣੇ ਕਥਯਿਂਸੁ.
ਤਤਿਯਵਾਰੇ ਪਨ ਬੁਦ੍ਧਸ੍ਸ ਵਣ੍ਣਂ ਭਾਸਮਾਨਾ ‘‘ਇਤਿਪਿ ਸੋ ਭਗਵਾ’’ਤਿ ਸੁਤ੍ਤਨ੍ਤਪਰਿਯਾਯੇਨੇਵ ਬੁਦ੍ਧਗੁਣੇ ਕਥਯਿਂਸੁ, ‘‘ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ’’ਤਿਆਦਿਨਾ ਸੁਤ੍ਤਨ੍ਤਪਰਿਯਾਯੇਨੇਵ ਧਮ੍ਮਗੁਣੇ, ‘‘ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’’ਤਿਆਦਿਨਾ ਸੁਤ੍ਤਨ੍ਤਪਰਿਯਾਯੇਨੇਵ ਸਙ੍ਘਗੁਣੇ ਚ ਕਥਯਿਂਸੁ. ਤਤੋ ਸੀਹੋ ਚਿਨ੍ਤੇਸਿ – ‘‘ਇਮੇਸਞ੍ਚ ਲਿਚ੍ਛਵਿਰਾਜਕੁਮਾਰਾਨਂ ਤਤਿਯਦਿਵਸਤੋ ਪਟ੍ਠਾਯ ਬੁਦ੍ਧਧਮ੍ਮਸਙ੍ਘਗੁਣੇ ਕਥੇਨ੍ਤਾਨਂ ਮੁਖਂ ਨਪ੍ਪਹੋਤਿ, ਅਦ੍ਧਾ ਅਨੋਮਗੁਣੇਨ ਸਮਨ੍ਨਾਗਤਾ ਸੋ ਭਗਵਾ, ਇਮਂ ਦਾਨਿ ਉਪ੍ਪਨ੍ਨਂ ਪੀਤਿਂ ਅਵਿਜਹਿਤ੍ਵਾਵ ਅਹਂ ਅਜ੍ਜ ਸਮ੍ਮਾਸਮ੍ਬੁਦ੍ਧਂ ਪਸ੍ਸਿਸ੍ਸਾਮੀ’’ਤਿ. ਅਥਸ੍ਸ ‘‘ਕਿਂ ਹਿ ਮੇ ਕਰਿਸ੍ਸਨ੍ਤਿ ਨਿਗਣ੍ਠਾ’’ਤਿ ਵਿਤਕ੍ਕੋ ਉਦਪਾਦਿ. ਤਤ੍ਥ ਕਿਂ ਹਿ ਮੇ ਕਰਿਸ੍ਸਨ੍ਤੀਤਿ ਕਿਂ ਨਾਮ ਮਯ੍ਹਂ ਨਿਗਣ੍ਠਾ ਕਰਿਸ੍ਸਨ੍ਤਿ. ਅਪਲੋਕਿਤਾ ਵਾ ਅਨਪਲੋਕਿਤਾ ਵਾਤਿ ਆਪੁਚ੍ਛਿਤਾ ਵਾ ਅਨਾਪੁਚ੍ਛਿਤਾ ਵਾ. ਨ ਹਿ ਮੇ ਤੇ ਆਪੁਚ੍ਛਿਤਾ ਯਾਨਵਾਹਨਸਮ੍ਪਤ੍ਤਿਂ, ਨ ਚ ਇਸ੍ਸਰਿਯਵਿਸੇਸਂ ਦਸ੍ਸਨ੍ਤਿ, ਨਾਪਿ ਅਨਾਪੁਚ੍ਛਿਤਾ ਹਰਿਸ੍ਸਨ੍ਤਿ, ਅਫਲਂ ਏਤੇਸਂ ਆਪੁਚ੍ਛਨਨ੍ਤਿ ਅਧਿਪ੍ਪਾਯੋ.
ਵੇਸਾਲਿਯਾ ਨਿਯ੍ਯਾਸੀਤਿ ਯਥਾ ਹਿ ਗਿਮ੍ਹਕਾਲੇ ਦੇਵੇ ਵੁਟ੍ਠੇ ਉਦਕਂ ਸਨ੍ਦਮਾਨਂ ਨਦਿਂ ਓਤਰਿਤ੍ਵਾ ਥੋਕਮੇਵ ਗਨ੍ਤ੍ਵਾ ਤਿਟ੍ਠਤਿ ਨਪ੍ਪਵਤ੍ਤਤਿ, ਏਵਂ ਸੀਹਸ੍ਸ ਪਠਮਦਿਵਸੇ ‘‘ਦਸਬਲਂ ਪਸ੍ਸਿਸ੍ਸਾਮੀ’’ਤਿ ਉਪ੍ਪਨ੍ਨਾਯ ਪੀਤਿਯਾ ਨਿਗਣ੍ਠੇਨ ਪਟਿਬਾਹਿਤਕਾਲੋ. ਯਥਾਪਿ ਦੁਤਿਯਦਿਵਸੇ ਦੇਵੇ ਵੁਟ੍ਠੇ ਉਦਕਂ ਸਨ੍ਦਮਾਨਂ ਨਦਿਂ ਓਤਰਿਤ੍ਵਾ ਥੋਕਂ ਗਨ੍ਤ੍ਵਾ ਵਾਲਿਕਾਪੁਞ੍ਜਂ ਪਹਰਿਤ੍ਵਾ ਅਪ੍ਪਵਤ੍ਤਂ ਹੋਤਿ, ਏਵਂ ਸੀਹਸ੍ਸ ਦੁਤਿਯਦਿਵਸੇ ‘‘ਦਸਬਲਂ ਪਸ੍ਸਿਸ੍ਸਾਮੀ’’ਤਿ ਉਪ੍ਪਨ੍ਨਾਯ ਪੀਤਿਯਾ ਨਿਗਣ੍ਠੇਨ ਪਟਿਬਾਹਿਤਕਾਲੋ. ਯਥਾ ਤਤਿਯਦਿਵਸੇ ਦੇਵੇ ਵੁਟ੍ਠੇ ਉਦਕਂ ਸਨ੍ਦਮਾਨਂ ਨਦਿਂ ਓਤਰਿਤ੍ਵਾ ਪੁਰਾਣਪਣ੍ਣਸੁਕ੍ਖਦਣ੍ਡਕਟ੍ਠਕਚਵਰਾਦੀਨਿ ਪਰਿਕਡ੍ਢਨ੍ਤਂ ਵਾਲਿਕਾਪੁਞ੍ਜਂ ਭਿਨ੍ਦਿਤ੍ਵਾ ਸਮੁਦ੍ਦਨਿਨ੍ਨਮੇਵ ਹੋਤਿ, ਏਵਂ ਸੀਹੋ ਤਤਿਯਦਿਵਸੇ ਤਿਣ੍ਣਂ ਵਤ੍ਥੂਨਂ ਗੁਣਕਥਂ ਸੁਤ੍ਵਾ ਉਪ੍ਪਨ੍ਨੇ ਪੀਤਿਪਾਮੋਜ੍ਜੇ ‘‘ਅਫਲਾ ਨਿਗਣ੍ਠਾ ਨਿਪ੍ਫਲਾ ਨਿਗਣ੍ਠਾ, ਕਿਂ ਮੇ ਇਮੇ ਕਰਿਸ੍ਸਨ੍ਤਿ, ਗਮਿਸ੍ਸਾਮਹਂ ਸਤ੍ਥੁਸਨ੍ਤਿਕ’’ਨ੍ਤਿ ਮਨਂ ਅਭਿਨੀਹਰਿਤ੍ਵਾ ਵੇਸਾਲਿਯਾ ਨਿਯ੍ਯਾਸਿ. ਨਿਯ੍ਯਨ੍ਤੋ ਚ ‘‘ਚਿਰਸ੍ਸਾਹਂ ਦਸਬਲਸ੍ਸ ਸਨ੍ਤਿਕਂ ਗਨ੍ਤੁਕਾਮੋ ਜਾਤੋ, ਨ ਖੋ ਪਨ ਮੇ ਯੁਤ੍ਤਂ ਅਞ੍ਞਾਤਕਵੇਸੇਨ ਗਨ੍ਤੁ’’ਨ੍ਤਿ ‘‘ਯੇਕੇਚਿ ਦਸਬਲਸ੍ਸ ਸਨ੍ਤਿਕਂ ਗਨ੍ਤੁਕਾਮਾ, ਸਬ੍ਬੇ ਨਿਕ੍ਖਮਨ੍ਤੂ’’ਤਿ ਘੋਸਨਂ ਕਾਰੇਤ੍ਵਾ ਪਞ੍ਚਰਥਸਤਾਨਿ ਯੋਜਾਪੇਤ੍ਵਾ ਉਤ੍ਤਮਰਥੇ ਠਿਤੋ ਤੇਹਿ ਚੇਵ ਪਞ੍ਚਹਿ ਰਥਸਤੇਹਿ ਮਹਤਿਯਾ ਚ ਪਰਿਸਾਯ ਪਰਿਵੁਤੋ ਗਨ੍ਧਪੁਪ੍ਫਚੁਣ੍ਣਵਾਸਾਦੀਨਿ ਗਾਹਾਪੇਤ੍ਵਾ ਨਿਯ੍ਯਾਸਿ. ਦਿਵਾ ਦਿਵਸ੍ਸਾਤਿ ਦਿਵਸਸ੍ਸ ਚ ਦਿਵਾ, ਮਜ੍ਝਨ੍ਹਿਕੇ ਅਤਿਕ੍ਕਨ੍ਤਮਤ੍ਤੇ.
ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਆਰਾਮਂ ਪਵਿਸਨ੍ਤੋ ਦੂਰਤੋਵ ਅਸੀਤਿ-ਅਨੁਬ੍ਯਞ੍ਜਨ-ਬ੍ਯਾਮਪ੍ਪਭਾ-ਦ੍ਵਤ੍ਤਿਂਸ-ਮਹਾਪੁਰਿਸਲਕ੍ਖਣਾਨਿ ਛਬ੍ਬਣ੍ਣਘਨਬੁਦ੍ਧਰਸ੍ਮਿਯੋ ਚ ਦਿਸ੍ਵਾ ‘‘ਏਵਰੂਪਂ ਨਾਮ ਪੁਰਿਸਂ ਏਵਂ ਆਸਨ੍ਨੇ ਵਸਨ੍ਤਂ ਏਤ੍ਤਕਂ ਕਾਲਂ ਨਾਦ੍ਦਸਂ, ਵਞ੍ਚਿਤੋ ਵਤਮ੍ਹਿ, ਅਲਾਭਾ ਵਤ ਮੇ’’ਤਿ ਚਿਨ੍ਤੇਤ੍ਵਾ ਮਹਾਨਿਧਿਂ ਦਿਸ੍ਵਾ ਦਲਿਦ੍ਦਪੁਰਿਸੋ ਵਿਯ ਸਞ੍ਜਾਤਪੀਤਿਪਾਮੋਜ੍ਜੋ ਯੇਨ ਭਗਵਾ ਤੇਨੁਪਸਙ੍ਕਮਿ. ਧਮ੍ਮਸ੍ਸ ਚਾਨੁਧਮ੍ਮਂ ਬ੍ਯਾਕਰੋਨ੍ਤੀਤਿ ਭੋਤਾ ਗੋਤਮੇਨ ਵੁਤ੍ਤਕਾਰਣਸ੍ਸ ਅਨੁਕਾਰਣਂ ਕਥੇਨ੍ਤਿ. ਕਾਰਣਵਚਨੋ ਹੇਤ੍ਥ ਧਮ੍ਮਸਦ੍ਦੋ ‘‘ਹੇਤੁਮ੍ਹਿ ਞਾਣਂ ਧਮ੍ਮਪਟਿਸਮ੍ਭਿਦਾ’’ਤਿਆਦੀਸੁ (ਵਿਭ. ੭੨੦) ਵਿਯ. ਕਾਰਣਨ੍ਤਿ ਚੇਤ੍ਥ ਤਥਾਪਵਤ੍ਤਸ੍ਸ ਸਦ੍ਦਸ੍ਸ ਅਤ੍ਥੋ ਅਧਿਪ੍ਪੇਤੋ ਤਸ੍ਸ ਪਵਤ੍ਤਿਹੇਤੁਭਾਵਤੋ. ਅਤ੍ਥਪ੍ਪਯੁਤ੍ਤੋ ਹਿ ਸਦ੍ਦਪ੍ਪਯੋਗੋ. ਅਨੁਕਾਰਣਨ੍ਤਿ ਏਸੋ ਏਵ ਪਰੇਹਿ ਤਥਾ ਵੁਚ੍ਚਮਾਨੋ. ਸਹਧਮ੍ਮਿਕੋ ਵਾਦਾਨੁਵਾਦੋਤਿ. ਪਰੇਹਿ ਵੁਤ੍ਤਕਾਰਣੇਹਿ ਸਕਾਰਣੋ ਹੁਤ੍ਵਾ ਤੁਮ੍ਹਾਕਂ ਵਾਦੋ ਵਾ ਤਤੋ ਪਰਂ ਤਸ੍ਸ ਅਨੁਵਾਦੋ ਵਾ ਕੋਚਿ ਅਪ੍ਪਮਤ੍ਤਕੋਪਿ ਵਿਞ੍ਞੂਹਿ ਗਰਹਿਤਬ੍ਬਂ ਠਾਨਂ ਕਾਰਣਂ ਨ ਆਗਚ੍ਛਤਿ. ਇਦਂ ਵੁਤ੍ਤਂ ਹੋਤਿ – ਕਿਂ ਸਬ੍ਬਾਕਾਰੇਨਪਿ ਤਵ ਵਾਦੇ ਗਾਰਯ੍ਹਂ ਕਾਰਣਂ ਨਤ੍ਥੀਤਿ. ਅਨਬ੍ਭਕ੍ਖਾਤੁਕਾਮਾਤਿ ਨ ਅਭੂਤੇਨ ਵਤ੍ਤੁਕਾਮਾ. ਅਤ੍ਥਿ ਸੀਹਪਰਿਯਾਯੋਤਿਆਦੀਨਂ ਅਤ੍ਥੋ ਵੇਰਞ੍ਜਕਣ੍ਡੇ ਆਗਤਨਯੇਨੇਵ ਵੇਦਿਤਬ੍ਬੋ. ਪਰਮੇਨ ਅਸ੍ਸਾਸੇਨਾਤਿ ਚਤੁਮਗ੍ਗਚਤੁਫਲਸਙ੍ਖਾਤੇਨ ਉਤ੍ਤਮੇਨ. ਅਸ੍ਸਾਸਾਯ ਧਮ੍ਮਂ ਦੇਸੇਮੀਤਿ ਅਸ੍ਸਾਸਨਤ੍ਥਾਯ ਸਨ੍ਥਮ੍ਭਨਤ੍ਥਾਯ ਧਮ੍ਮਂ ਦੇਸੇਮਿ. ਇਤਿ ਭਗਵਾ ਅਟ੍ਠਹਙ੍ਗੇਹਿ ਸੀਹਸ੍ਸ ਸੇਨਾਪਤਿਸ੍ਸ ਧਮ੍ਮਂ ਦੇਸੇਸਿ.
ਅਨੁਵਿਚ੍ਚਕਾਰਨ੍ਤਿ ਅਨੁਵਿਦਿਤ੍ਵਾ ਚਿਨ੍ਤੇਤ੍ਵਾ ਤੁਲਯਿਤ੍ਵਾ ਕਤ੍ਤਬ੍ਬਂ ਕਰੋਹੀਤਿ ਵੁਤ੍ਤਂ ਹੋਤਿ. ਸਾਧੁ ਹੋਤੀਤਿ ਸੁਨ੍ਦਰੋ ਹੋਤਿ. ਤੁਮ੍ਹਾਦਿਸਸ੍ਮਿਞ੍ਹਿ ਮਂ ਦਿਸ੍ਵਾ ਮਂ ਸਰਣਂ ਗਚ੍ਛਨ੍ਤੇ ਨਿਗਣ੍ਠਂ ਦਿਸ੍ਵਾ ਨਿਗਣ੍ਠਂ ਸਰਣਂ ਗਚ੍ਛਨ੍ਤੇ ‘‘ਕਿਂ ਅਯਂ ਸੀਹੋ ਦਿਟ੍ਠਦਿਟ੍ਠਮੇਵ ਸਰਣਂ ਗਚ੍ਛਤੀ’’ਤਿ ਗਰਹਾ ਉਪ੍ਪਜ੍ਜਤਿ, ਤਸ੍ਮਾ ਅਨੁਵਿਚ੍ਚਕਾਰੋ ਤੁਮ੍ਹਾਦਿਸਾਨਂ ਸਾਧੂਤਿ ਦਸ੍ਸੇਤਿ. ਪਟਾਕਂ ਪਰਿਹਰੇਯ੍ਯੁਨ੍ਤਿ ਤੇ ਕਿਰ ਏਵਰੂਪਂ ਸਾਵਕਂ ਲਭਿਤ੍ਵਾ ‘‘ਅਸੁਕੋ ਨਾਮ ਰਾਜਾ ਵਾ ਰਾਜਮਹਾਮਤ੍ਤੋ ਵਾ ਸੇਟ੍ਠਿ ਵਾ ਅਮ੍ਹਾਕਂ ਸਰਣਂ ਗਤੋ ਸਾਵਕੋ ਜਾਤੋ’’ਤਿ ਪਟਾਕਂ ਉਕ੍ਖਿਪਿਤ੍ਵਾ ਨਗਰੇ ਘੋਸੇਨ੍ਤਾ ਆਹਿਣ੍ਡਨ੍ਤਿ. ਕਸ੍ਮਾ? ਏਵਂ ਨੋ ਮਹਨ੍ਤਭਾਵੋ ਆਵਿਭਵਿਸ੍ਸਤੀਤਿ ਚ. ਸਚੇ ਪਨਸ੍ਸ ‘‘ਕਿਮਹਂ ਏਤੇਸਂ ਸਰਣਂ ਗਤੋ’’ਤਿ ਵਿਪ੍ਪਟਿਸਾਰੋ ਉਪ੍ਪਜ੍ਜੇਯ੍ਯ, ਤਮ੍ਪਿ ਸੋ ‘‘ਏਤੇਸਂ ਮੇ ਸਰਣਗਤਭਾਵਂ ਬਹੂ ਜਾਨਨ੍ਤਿ, ਦੁਕ੍ਖਂ ਇਦਾਨਿ ਪਟਿਨਿਵਤ੍ਤਿਤੁ’’ਨ੍ਤਿ ਵਿਨੋਦੇਤ੍ਵਾ ਨ ਪਟਿਕ੍ਕਮਿਸ੍ਸਤੀਤਿ ਚ. ਤੇਨਾਹ – ‘‘ਪਟਾਕਂ ਪਰਿਹਰੇਯ੍ਯੁ’’ਨ੍ਤਿ. ਓਪਾਨਭੂਤਨ੍ਤਿ ਪਟਿਯਤ੍ਤਉਦਪਾਨੋ ਵਿਯ ਠਿਤਂ. ਕੁਲਨ੍ਤਿ ਤਵ ਨਿਵੇਸਨਂ. ਦਾਤਬ੍ਬਂ ਮਞ੍ਞੇਯ੍ਯਾਸੀਤਿ ਪੁਬ੍ਬੇ ਦਸਪਿ ਵੀਸਤਿਪਿ ਸਟ੍ਠਿਪਿ ਜਨੇ ਆਗਤੇ ਦਿਸ੍ਵਾ ਨਤ੍ਥੀਤਿ ਅਵਤ੍ਵਾ ਦੇਸਿ, ਇਦਾਨਿ ਮਂ ਸਰਣਂ ਗਤਕਾਰਣਮਤ੍ਤੇਨੇਵ ਮਾ ਇਮੇਸਂ ਦੇਯ੍ਯਧਮ੍ਮਂ ਉਪਚ੍ਛਿਨ੍ਦਿ. ਸਮ੍ਪਤ੍ਤਾਨਞ੍ਹਿ ਦਾਤਬ੍ਬਮੇਵਾਤਿ ਓਵਦਿ. ਸੁਤਂ ਮੇਤਂ, ਭਨ੍ਤੇਤਿ ਕੁਤੋ ਸੁਤਨ੍ਤਿ? ਨਿਗਣ੍ਠਾਨਂ ਸਨ੍ਤਿਕਾ. ਤੇ ਕਿਰ ਕੁਲਘਰੇਸੁ ਏਵਂ ਪਕਾਸੇਨ੍ਤਿ ‘‘ਮਯਂ ਯਸ੍ਸ ਕਸ੍ਸਚਿ ਸਮ੍ਪਤ੍ਤਸ੍ਸ ਦਾਤਬ੍ਬਨ੍ਤਿ ਵਦਾਮ, ਸਮਣੋ ਪਨ ਗੋਤਮੋ ‘ਮਯ੍ਹਮੇਵ ਦਾਨਂ ਦਾਤਬ੍ਬਂ ਨਾਞ੍ਞੇਸਂ, ਮਯ੍ਹਮੇਵ ਸਾਵਕਾਨਂ ਦਾਨਂ ਦਾਤਬ੍ਬਂ, ਨਾਞ੍ਞੇਸਂ ਸਾਵਕਾਨਂ, ਮਯ੍ਹਮੇਵ ਦਿਨ੍ਨਂ ਦਾਨਂ ਮਹਪ੍ਫਲਂ, ਨਾਞ੍ਞੇਸਂ, ਮਯ੍ਹਮੇਵ ਸਾਵਕਾਨਂ ਦਿਨ੍ਨਂ ਮਹਪ੍ਫਲਂ, ਨਾਞ੍ਞੇਸ’ਨ੍ਤਿ ਏਵਂ ਵਦਤੀ’’ਤਿ. ਤਂ ਸਨ੍ਧਾਯ ਅਯਂ ‘‘ਸੁਤਂ ਮੇਤ’’ਨ੍ਤਿ ਆਹ.
ਅਨੁਪੁਬ੍ਬਿਂ ਕਥਨ੍ਤਿ ਦਾਨਾਨਨ੍ਤਰਂ ਸੀਲਂ, ਸੀਲਾਨਨ੍ਤਰਂ ਸਗ੍ਗਂ, ਸਗ੍ਗਾਨਨ੍ਤਰਂ ਮਗ੍ਗਨ੍ਤਿ ਏਵਂ ਅਨੁਪਟਿਪਾਟਿਕਥਂ. ਤਤ੍ਥ ਦਾਨਕਥਨ੍ਤਿ ਇਦਂ ਦਾਨਂ ਨਾਮ ਸੁਖਾਨਂ ਨਿਦਾਨਂ, ਸਮ੍ਪਤ੍ਤੀਨਂ ਮੂਲਂ, ਭੋਗਾਨਂ ਪਤਿਟ੍ਠਾ, ਵਿਸਮਗਤਸ੍ਸ ਤਾਣਂ ਲੇਣਂ ਗਤਿ ਪਰਾਯਣਂ, ਇਧਲੋਕਪਰਲੋਕੇਸੁ ਦਾਨਸਦਿਸੋ ਅਵਸ੍ਸਯੋ ਪਤਿਟ੍ਠਾ ਆਰਮ੍ਮਣਂ ਤਾਣਂ ਲੇਣਂ ਗਤਿ ਪਰਾਯਣਂ ਨਤ੍ਥਿ. ਇਦਞ੍ਹਿ ਅਵਸ੍ਸਯਟ੍ਠੇਨ ਰਤਨਮਯਸੀਹਾਸਨਸਦਿਸਂ, ਪਤਿਟ੍ਠਾਨਟ੍ਠੇਨ ਮਹਾਪਥਵੀਸਦਿਸਂ, ਆਰਮ੍ਮਣਟ੍ਠੇਨ ਆਲਮ੍ਬਨਰਜ੍ਜੁਸਦਿਸਂ. ਇਦਞ੍ਹਿ ਦੁਕ੍ਖਨਿਤ੍ਥਰਣਟ੍ਠੇਨ ਨਾਵਾ, ਸਮਸ੍ਸਾਸਨਟ੍ਠੇਨ ਸਙ੍ਗਾਮਸੂਰੋ, ਭਯਪਰਿਤ੍ਤਾਣਟ੍ਠੇਨ ਸੁਸਙ੍ਖਤਨਗਰਂ, ਮਚ੍ਛੇਰਮਲਾਦੀਹਿ ਅਨੁਪਲਿਤ੍ਤਟ੍ਠੇਨ ਪਦੁਮਂ, ਤੇਸਂ ਨਿਦਹਨਟ੍ਠੇਨ ਅਗ੍ਗਿ, ਦੁਰਾਸਦਟ੍ਠੇਨ ਆਸਿਵਿਸੋ, ਅਸਨ੍ਤਾਸਨਟ੍ਠੇਨ ਸੀਹੋ, ਬਲਵਨ੍ਤਟ੍ਠੇਨ ਹਤ੍ਥੀ, ਅਭਿਮਙ੍ਗਲਸਮ੍ਮਤਟ੍ਠੇਨ ਸੇਤਵਸਭੋ, ਖੇਮਨ੍ਤਭੂਮਿਸਮ੍ਪਾਪਨਟ੍ਠੇਨ ਵਲਾਹਕੋ ਅਸ੍ਸਰਾਜਾ. ਦਾਨਂ ਨਾਮੇਤਂ ਮਯਾ ਗਤਮਗ੍ਗੋ, ਮਯ੍ਹੇਸੋ ਵਂਸੋ, ਮਯਾ ਦਸ ਪਾਰਮਿਯੋ ਪੂਰੇਨ੍ਤੇਨ ਵੇਲਾਮਮਹਾਯਞ੍ਞੋ, ਮਹਾਗੋਵਿਨ੍ਦਮਹਾਯਞ੍ਞੋ, ਮਹਾਸੁਦਸ੍ਸਨਮਹਾਯਞ੍ਞੋ, ਵੇਸ੍ਸਨ੍ਤਰਮਹਾਯਞ੍ਞੋਤਿ, ਅਨੇਕਮਹਾਯਞ੍ਞਾ ਪਵਤ੍ਤਿਤਾ, ਸਸਭੂਤੇਨ ਜਲਿਤਅਗ੍ਗਿਕ੍ਖਨ੍ਧੇ ਅਤ੍ਤਾਨਂ ਨਿਯ੍ਯਾਦੇਨ੍ਤੇਨ ਸਮ੍ਪਤ੍ਤਯਾਚਕਾਨਂ ਚਿਤ੍ਤਂ ਗਹਿਤਂ. ਦਾਨਞ੍ਹਿ ਲੋਕੇ ਸਕ੍ਕਸਮ੍ਪਤ੍ਤਿਂ ਦੇਤਿ ਮਾਰਸਮ੍ਪਤ੍ਤਿਂ ਬ੍ਰਹ੍ਮਸਮ੍ਪਤ੍ਤਿਂ, ਚਕ੍ਕਵਤ੍ਤਿਸਮ੍ਪਤ੍ਤਿਂ, ਸਾਵਕਪਾਰਮੀਞਾਣਂ, ਪਚ੍ਚੇਕਬੋਧਿਞਾਣਂ, ਅਭਿਸਮ੍ਬੋਧਿਞਾਣਂ ਦੇਤੀਤਿ ਏਵਮਾਦਿਦਾਨਗੁਣਪ੍ਪਟਿਸਂਯੁਤ੍ਤਂ ਕਥਂ.
ਯਸ੍ਮਾ ਪਨ ਦਾਨਂ ਦੇਨ੍ਤੋ ਸੀਲਂ ਸਮਾਦਾਤੁਂ ਸਕ੍ਕੋਤਿ, ਤਸ੍ਮਾ ਤਦਨਨ੍ਤਰਂ ਸੀਲਕਥਂ ਕਥੇਸਿ. ਸੀਲਕਥਨ੍ਤਿ ਸੀਲਂ ਨਾਮੇਤਂ ਅਵਸ੍ਸਯੋ ਪਤਿਟ੍ਠਾ ਆਰਮ੍ਮਣਂ ਤਾਣਂ ਲੇਣਂ ਗਤਿ ਪਰਾਯਣਂ. ਸੀਲਂ ਨਾਮੇਤਂ ਮਮ ਵਂਸੋ, ਅਹਂ ਸਙ੍ਖਪਾਲਨਾਗਰਾਜਕਾਲੇ ਭੂਰਿਦਤ੍ਤਨਾਗਰਾਜਕਾਲੇ ਚਮ੍ਪੇਯ੍ਯਨਾਗਰਾਜਕਾਲੇ ਸੀਲਵਰਾਜਕਾਲੇ ਮਾਤੁਪੋਸਕਹਤ੍ਥਿਰਾਜਕਾਲੇ ਛਦ੍ਦਨ੍ਤਹਤ੍ਥਿਰਾਜਕਾਲੇਤਿ ਅਨਨ੍ਤੇਸੁ ਅਤ੍ਤਭਾਵੇਸੁ ਸੀਲਂ ਪਰਿਪੂਰੇਸਿਂ. ਇਧਲੋਕਪਰਲੋਕਸਮ੍ਪਤ੍ਤੀਨਞ੍ਹਿ ਸੀਲਸਦਿਸੋ ਅਵਸ੍ਸਯੋ ਪਤਿਟ੍ਠਾ ਆਰਮ੍ਮਣਂ ਤਾਣਂ ਲੇਣਂ ਗਤਿ ਪਰਾਯਣਂ ਨਤ੍ਥਿ, ਸੀਲਾਲਙ੍ਕਾਰਸਦਿਸੋ ਅਲਙ੍ਕਾਰੋ ਨਤ੍ਥਿ, ਸੀਲਪੁਪ੍ਫਸਦਿਸਂ ਪੁਪ੍ਫਂ ਨਤ੍ਥਿ, ਸੀਲਗਨ੍ਧਸਦਿਸੋ ਗਨ੍ਧੋ ਨਤ੍ਥਿ. ਸੀਲਾਲਙ੍ਕਾਰੇਨ ਹਿ ਅਲਙ੍ਕਤਂ ਸੀਲਗਨ੍ਧਾਨੁਲਿਤ੍ਤਂ ਸਦੇਵਕੋਪਿ ਲੋਕੋ ਓਲੋਕੇਨ੍ਤੋ ਤਿਤ੍ਤਿਂ ਨ ਗਚ੍ਛਤੀਤਿ ਏਵਮਾਦਿਸੀਲਗੁਣਪ੍ਪਟਿਸਂਯੁਤ੍ਤਂ ਕਥਂ.
‘‘ਇਦਂ ਪਨ ਸੀਲਂ ਨਿਸ੍ਸਾਯ ਅਯਂ ਸਗ੍ਗੋ ਲਬ੍ਭਤੀ’’ਤਿ ਦਸ੍ਸੇਤੁਂ ਸੀਲਾਨਨ੍ਤਰਂ ਸਗ੍ਗਕਥਂ ਕਥੇਸਿ. ਸਗ੍ਗਕਥਨ੍ਤਿ ‘‘ਅਯਂ ਸਗ੍ਗੋ ਨਾਮ ਇਟ੍ਠੋ ਕਨ੍ਤੋ ਮਨਾਪੋ, ਨਿਚ੍ਚਮੇਤ੍ਥ ਕੀਲ਼ਾ, ਨਿਚ੍ਚਂ ਸਮ੍ਪਤ੍ਤਿਯੋ ਲਬ੍ਭਨ੍ਤਿ, ਚਾਤੁਮਹਾਰਾਜਿਕਾ ਦੇਵਾ ਨਵੁਤਿਵਸ੍ਸਸਤਸਹਸ੍ਸਾਨਿ ਦਿਬ੍ਬਸੁਖਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤਿ, ਤਾਵਤਿਂਸਾ ਤਿਸ੍ਸੋ ਚ ਵਸ੍ਸਕੋਟਿਯੋ ਸਟ੍ਠਿ ਚ ਵਸ੍ਸਸਤਸਹਸ੍ਸਾਨੀ’’ਤਿ ਏਵਮਾਦਿਸਗ੍ਗਗੁਣਪ੍ਪਟਿਸਂਯੁਤ੍ਤਂ ਕਥਂ. ਸਗ੍ਗਸਮ੍ਪਤ੍ਤਿਂ ਕਥਯਨ੍ਤਾਨਞ੍ਹਿ ਬੁਦ੍ਧਾਨਂ ਮੁਖਂ ਨਪ੍ਪਹੋਤਿ. ਵੁਤ੍ਤਮ੍ਪਿ ਚੇਤਂ – ‘‘ਅਨੇਕਪਰਿਯਾਯੇਨ ਖ੍ਵਾਹਂ, ਭਿਕ੍ਖਵੇ, ਸਗ੍ਗਕਥਂ ਕਥੇਯ੍ਯ’’ਨ੍ਤਿਆਦਿ (ਮ. ਨਿ. ੩.੨੫੫).
ਏਵਂ ਸਗ੍ਗਕਥਾਯ ਪਲੋਭੇਤ੍ਵਾ ਪਨ ਹਤ੍ਥਿਂ ਅਲਙ੍ਕਰਿਤ੍ਵਾ ਤਸ੍ਸ ਸੋਣ੍ਡਂ ਛਿਨ੍ਦਨ੍ਤੋ ਵਿਯ ‘‘ਅਯਮ੍ਪਿ ਸਗ੍ਗੋ ਅਨਿਚ੍ਚੋ ਅਦ੍ਧੁਵੋ, ਨ ਏਤ੍ਥ ਛਨ੍ਦਰਾਗੋ ਕਤ੍ਤਬ੍ਬੋ’’ਤਿ ਦਸ੍ਸਨਤ੍ਥਂ ‘‘ਅਪ੍ਪਸ੍ਸਾਦਾ ਕਾਮਾ ਬਹੁਦੁਕ੍ਖਾ ਬਹੁਪਾਯਾਸਾ, ਆਦੀਨਵੋ ਏਤ੍ਥ ਭਿਯ੍ਯੋ’’ਤਿਆਦਿਨਾ (ਮ. ਨਿ. ੧.੨੩੫-੨੩੬; ੨.੪੨) ਨਯੇਨ ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ ਕਥੇਸਿ. ਤਤ੍ਥ ਆਦੀਨਵੋਤਿ ਦੋਸੋ. ਓਕਾਰੋਤਿ ਅਵਕਾਰੋ ਲਾਮਕਭਾਵੋ. ਸਂਕਿਲੇਸੋਤਿ ਤੇਹਿ ਸਤ੍ਤਾਨਂ ਸਂਸਾਰੇ ਸਂਕਿਲਿਸ੍ਸਨਂ. ਯਥਾਹ – ‘‘ਸਂਕਿਲਿਸ੍ਸਨ੍ਤਿ ਵਤ, ਭੋ, ਸਤ੍ਤਾ’’ਤਿ (ਮ. ਨਿ. ੨.੩੫੧).
ਏਵਂ ਕਾਮਾਦੀਨਵੇਨ ਤਜ੍ਜੇਤ੍ਵਾ ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ. ਕਲ੍ਲਚਿਤ੍ਤਨ੍ਤਿ ਅਰੋਗਚਿਤ੍ਤਂ. ਸਾਮੁਕ੍ਕਂਸਿਕਾਤਿ ਸਾਮਂ ਉਕ੍ਕਂਸਿਕਾ ਅਤ੍ਤਨਾਯੇਵ ਉਦ੍ਧਰਿਤ੍ਵਾ ਗਹਿਤਾ, ਸਯਮ੍ਭੁਞਾਣੇਨ ਦਿਟ੍ਠਾ ਅਸਾਧਾਰਣਾ ਅਞ੍ਞੇਸਨ੍ਤਿ ਅਤ੍ਥੋ. ਕਾ ਪਨ ਸਾਤਿ? ਅਰਿਯਸਚ੍ਚਦੇਸਨਾ. ਤੇਨੇਵਾਹ – ਦੁਕ੍ਖਂ ਸਮੁਦਯਂ ਨਿਰੋਧਂ ਮਗ੍ਗਨ੍ਤਿ. ਵਿਰਜਂ ਵੀਤਮਲਨ੍ਤਿ ਰਾਗਰਜਾਦੀਨਂ ਅਭਾਵਾ ਵਿਰਜਂ, ਰਾਗਮਲਾਦੀਨਂ ਵਿਗਤਤ੍ਤਾ ਵੀਤਮਲਂ. ਧਮ੍ਮਚਕ੍ਖੁਨ੍ਤਿ ਇਧ ਸੋਤਾਪਤ੍ਤਿਮਗ੍ਗੋ ਅਧਿਪ੍ਪੇਤੋ. ਤਸ੍ਸ ਉਪ੍ਪਤ੍ਤਿਆਕਾਰਦਸ੍ਸਨਤ੍ਥਂ ਯਂਕਿਞ੍ਚਿ ਸਮੁਦਯਧਮ੍ਮਂ ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ ਆਹ. ਤਞ੍ਹਿ ਨਿਰੋਧਂ ਆਰਮ੍ਮਣਂ ਕਤ੍ਵਾ ਕਿਚ੍ਚਵਸੇਨ ਏਵਂ ਸਬ੍ਬਸਙ੍ਖਤਂ ਪਟਿਵਿਜ੍ਝਨ੍ਤਂ ਉਪ੍ਪਜ੍ਜਤਿ. ਦਿਟ੍ਠੋ ਅਰਿਯਸਚ੍ਚਧਮ੍ਮੋ ਏਤੇਨਾਤਿ ਦਿਟ੍ਠਧਮ੍ਮੋ. ਏਸ ਨਯੋ ਸੇਸੇਸੁਪਿ. ਤਿਣ੍ਣਾ ਵਿਚਿਕਿਚ੍ਛਾ ਅਨੇਨਾਤਿ ਤਿਣ੍ਣਵਿਚਿਕਿਚ੍ਛੋ. ਵਿਗਤਾ ਕਥਂਕਥਾ ਅਸ੍ਸਾਤਿ ਵਿਗਤਕਥਂਕਥੋ. ਵਿਸਾਰਜ੍ਜਂ ਪਤ੍ਤੋਤਿ ਵੇਸਾਰਜ੍ਜਪ੍ਪਤ੍ਤੋ. ਕਤ੍ਥ? ਸਤ੍ਥੁਸਾਸਨੇ. ਨਾਸ੍ਸ ਪਰੋ ਪਚ੍ਚਯੋ, ਨ ਪਰਂ ਸਦ੍ਧਾਯ ਏਤ੍ਥ ਵਤ੍ਤਤੀਤਿ ਅਪਰਪ੍ਪਚ੍ਚਯੋ.
ਪਵਤ੍ਤਮਂਸਨ੍ਤਿ ਪਕਤਿਯਾ ਪਵਤ੍ਤਂ ਕਪ੍ਪਿਯਮਂਸਂ ਮੂਲਂ ਗਹੇਤ੍ਵਾ ਅਨ੍ਤਰਾਪਣੇ ਪਰਿਯੇਸਾਹੀਤਿ ਅਧਿਪ੍ਪਾਯੋ. ਸਮ੍ਬਹੁਲਾ ਨਿਗਣ੍ਠਾਤਿ ਪਞ੍ਚਸਤਮਤ੍ਤਾ ਨਿਗਣ੍ਠਾ. ਥੂਲਂ ਪਸੁਨ੍ਤਿ ਥੂਲਂ ਮਹਾਸਰੀਰਂ ਗੋਕਣ੍ਣਮਹਿਂਸਸੂਕਰਸਙ੍ਖਾਤਂ ਪਸੁਂ. ਉਦ੍ਦਿਸ੍ਸਕਤਨ੍ਤਿ ਅਤ੍ਤਾਨਂ ਉਦ੍ਦਿਸਿਤ੍ਵਾ ਕਤਂ, ਮਾਰਿਤਨ੍ਤਿ ਅਤ੍ਥੋ. ਪਟਿਚ੍ਚਕਮ੍ਮਨ੍ਤਿ ਸ੍ਵਾਯਂ ਤਂ ਮਂਸਂ ਪਟਿਚ੍ਚ ਤਂ ਪਾਣਵਧਕਮ੍ਮਂ ਫੁਸਤਿ. ਤਞ੍ਹਿ ਅਕੁਸਲਂ ਉਪਡ੍ਢਂ ਦਾਯਕਸ੍ਸ, ਉਪਡ੍ਢਂ ਪਟਿਗ੍ਗਾਹਕਸ੍ਸ ਹੋਤੀਤਿ ਨੇਸਂ ਲਦ੍ਧਿ. ਅਪਰੋ ਨਯੋ – ਪਟਿਚ੍ਚਕਮ੍ਮਨ੍ਤਿ ਅਤ੍ਤਾਨਂ ਪਟਿਚ੍ਚਕਤਂ. ਅਥ ਵਾ ਪਟਿਚ੍ਚਕਮ੍ਮਨ੍ਤਿ ਨਿਮਿਤ੍ਤਕਮ੍ਮਸ੍ਸੇਤਂ ਅਧਿਵਚਨਂ, ਤਂ ਪਟਿਚ੍ਚਕਮ੍ਮਂ ਏਤ੍ਥ ਅਤ੍ਥੀਤਿ ਮਂਸਮ੍ਪਿ ਪਟਿਚ੍ਚਕਮ੍ਮਨ੍ਤਿ ਵੁਤ੍ਤਂ. ਉਪਕਣ੍ਣਕੇਤਿ ਕਣ੍ਣਮੂਲੇ. ਅਲਨ੍ਤਿ ਪਟਿਕ੍ਖੇਪਵਚਨਂ, ਕਿਂ ਇਮਿਨਾਤਿ ਅਤ੍ਥੋ. ਨ ਚ ਪਨੇਤੇਤਿ ਏਤੇ ਆਯਸ੍ਮਨ੍ਤੋ ਦੀਘਰਤ੍ਤਂ ਅਵਣ੍ਣਕਾਮਾ ਹੁਤ੍ਵਾ ਅਵਣ੍ਣਂ ਭਾਸਨ੍ਤਾਪਿ ਅਬ੍ਭਾਚਿਕ੍ਖਨ੍ਤਾ ਨ ਜਿਰਿਦਨ੍ਤਿ, ਅਬ੍ਭਕ੍ਖਾਨਸ੍ਸ ਅਨ੍ਤਂ ਨ ਗਚ੍ਛਨ੍ਤੀਤਿ ਅਤ੍ਥੋ. ਅਥ ਵਾ ਲਜ੍ਜਨਤ੍ਥੇ ਇਦਂ ਜਿਰਿਦਨ੍ਤੀਤਿ ਪਦਂ ਦਟ੍ਠਬ੍ਬਂ, ਨ ਲਜ੍ਜਨ੍ਤੀਤਿ ਅਤ੍ਥੋ.
੩. ਅਸ੍ਸਾਜਾਨੀਯਸੁਤ੍ਤਵਣ੍ਣਨਾ
੧੩. ਤਤਿਯੇ ਅਙ੍ਗੇਹੀਤਿ ਗੁਣਙ੍ਗੇਹਿ. ਤਸ੍ਸਂ ਦਿਸਾਯਂ ਜਾਤੋ ਹੋਤੀਤਿ ਤਸ੍ਸਂ ਸਿਨ੍ਧੁਨਦੀਤੀਰਦਿਸਾਯਂ ਜਾਤੋ ਹੋਤਿ. ਅਞ੍ਞੇਪਿ ਭਦ੍ਰਾ ਅਸ੍ਸਾਜਾਨੀਯਾ ਤਤ੍ਥੇਵ ਜਾਯਨ੍ਤਿ. ਅਲ੍ਲਂ ਵਾ ਸੁਕ੍ਖਂ ਵਾਤਿ ਅਲ੍ਲਤਿਣਂ ਵਾ ਸੁਕ੍ਖਤਿਣਂ ਵਾ. ਨਾਞ੍ਞੇ ਅਸ੍ਸੇ ਉਬ੍ਬੇਜੇਤਾਤਿ ਅਞ੍ਞੇ ਅਸ੍ਸੇ ਨ ਉਬ੍ਬੇਜੇਤਿ ਨ ਪਹਰਤਿ ਨ ਡਂਸਤਿ ਨ ਕਲਹਂ ਕਰੋਤਿ. ਸਾਠੇਯ੍ਯਾਨੀਤਿ ਸਠਭਾਵੋ. ਕੂਟੇਯ੍ਯਾਨੀਤਿ ਕੂਟਭਾਵੋ. ਜਿਮ੍ਹੇਯ੍ਯਾਨੀਤਿ ਜਿਮ੍ਹਭਾਵੋ. ਵਙ੍ਕੇਯ੍ਯਾਨੀਤਿ ਵਙ੍ਕਭਾਵਾ. ਇਚ੍ਚਸ੍ਸ ਚਤੂਹਿਪਿ ਪਦੇਹਿ ਅਸਿਕ੍ਖਿਤਭਾਵੋਵ ਕਥਿਤੋ. ਵਾਹੀਤਿ ਵਹਨਸਭਾਵੋ ਦਿਨ੍ਨੋਵਾਦਪਟਿਕਰੋ. ਯਾਵ ਜੀਵਿਤਮਰਣਪਰਿਯਾਦਾਨਾਤਿ ਯਾਵ ਜੀਵਿਤਸ੍ਸ ਮਰਣੇਨ ਪਰਿਯੋਸਾਨਾ. ਸਕ੍ਕਚ੍ਚਂ ਪਰਿਭੁਞ੍ਜਤੀਤਿ ਅਮਤਂ ਵਿਯ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਤਿ. ਪੁਰਿਸਥਾਮੇਨਾਤਿਆਦੀਸੁ ਞਾਣਥਾਮਾਦਯੋ ਕਥਿਤਾ. ਸਣ੍ਠਾਨਨ੍ਤਿ ਓਸਕ੍ਕਨਂ ਪਟਿਪ੍ਪਸ੍ਸਦ੍ਧਿ.
੪. ਅਸ੍ਸਖਲ਼ੁਙ੍ਕਸੁਤ੍ਤਵਣ੍ਣਨਾ
੧੪. ਚਤੁਤ੍ਥੇ ‘‘ਪੇਹੀ’’ਤਿ ਵੁਤ੍ਤੋਤਿ ‘‘ਗਚ੍ਛਾ’’ਤਿ ਵੁਤ੍ਤੋ. ਪਿਟ੍ਠਿਤੋ ਰਥਂ ਪਵਤ੍ਤੇਤੀਤਿ ਖਨ੍ਧਟ੍ਠਿਕੇਨ ਯੁਗਂ ਉਪ੍ਪੀਲ਼ਿਤ੍ਵਾ ਪਚ੍ਛਿਮਭਾਗੇਨ ਰਥਂ ਪਵਟ੍ਟੇਨ੍ਤੋ ਓਸਕ੍ਕਤਿ. ਪਚ੍ਛਾ ਲਙ੍ਘਤਿ, ਕੁਬ੍ਬਰਂ ਹਨਤੀਤਿ ਦ੍ਵੇ ਪਚ੍ਛਿਮਪਾਦੇ ਉਕ੍ਖਿਪਿਤ੍ਵਾ ਤੇਹਿ ਪਹਰਿਤ੍ਵਾ ਰਥਕੁਬ੍ਬਰਂ ਭਿਨ੍ਦਤਿ. ਤਿਦਣ੍ਡਂ ਭਞ੍ਜਤੀਤਿ ਰਥਸ੍ਸ ਪੁਰਤੋ ਤਯੋ ਦਣ੍ਡਕਾ ਹੋਨ੍ਤਿ, ਤੇ ਭਞ੍ਜਤਿ. ਰਥੀਸਾਯ ਸਤ੍ਥਿਂ ਉਸ੍ਸਜ੍ਜਿਤ੍ਵਾਤਿ ਸੀਸਂ ਨਾਮੇਤ੍ਵਾ ਯੁਗਂ ਭੂਮਿਯਂ ਪਾਤੇਤ੍ਵਾ ਸਤ੍ਥਿਨਾ ਰਥੀਸਂ ਪਹਰਿਤ੍ਵਾ. ਅਜ੍ਝੋਮਦ੍ਦਤੀਤਿ ਦ੍ਵੀਹਿ ਪੁਰਿਮਪਾਦੇਹਿ ਈਸਂ ਮਦ੍ਦਨ੍ਤੋ ਤਿਟ੍ਠਤਿ. ਉਬ੍ਬਟੁਮਂ ਰਥਂ ਕਰੋਤੀਤਿ ਥਲਂ ਵਾ ਕਣ੍ਡਕਟ੍ਠਾਨਂ ਵਾ ਰਥਂ ਆਰੋਪੇਤਿ. ਅਨਾਦਿਯਿਤ੍ਵਾਤਿ ਅਮਨਸਿਕਤ੍ਵਾ ਅਗਣਿਤ੍ਵਾ. ਮੁਖਾਧਾਨਨ੍ਤਿ ਮੁਖਠਪਨਤ੍ਥਾਯ ਦਿਨ੍ਨਂ ਅਯਸਙ੍ਖਲਿਕਂ. ਖੀਲਟ੍ਠਾਯੀਤਿ ਚਤ੍ਤਾਰੋ ਪਾਦੇ ਥਮ੍ਭੇ ਵਿਯ ਨਿਚ੍ਚਲਂ ਠਪੇਤ੍ਵਾ ਖੀਲਟ੍ਠਾਨਸਦਿਸੇਨ ਠਾਨੇਨ ਤਿਟ੍ਠਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਂ.
੫. ਮਲਸੁਤ੍ਤਵਣ੍ਣਨਾ
੧੫. ਪਞ੍ਚਮੇ ਅਸਜ੍ਝਾਯਮਲਾਤਿ ਉਗ੍ਗਹਿਤਮਨ੍ਤਾਨਂ ਅਸਜ੍ਝਾਯਕਰਣਂ ਮਲਂ ਨਾਮ ਹੋਤਿ. ਅਨੁਟ੍ਠਾਨਮਲਾ ਘਰਾਤਿ ਉਟ੍ਠਾਨਵੀਰਿਯਾਭਾਵੋ ਘਰਾਨਂ ਮਲਂ ਨਾਮ. ਵਣ੍ਣਸ੍ਸਾਤਿ ਸਰੀਰਵਣ੍ਣਸ੍ਸ. ਰਕ੍ਖਤੋਤਿ ਯਂਕਿਞ੍ਚਿ ਅਤ੍ਤਨੋ ਸਨ੍ਤਕਂ ਰਕ੍ਖਨ੍ਤਸ੍ਸ. ਅਵਿਜ੍ਜਾ ਪਰਮਂ ਮਲਨ੍ਤਿ ਤਤੋ ਸੇਸਾਕੁਸਲਧਮ੍ਮਮਲਤੋ ਅਟ੍ਠਸੁ ਠਾਨੇਸੁ ਅਞ੍ਞਾਣਭੂਤਾ ਵਟ੍ਟਮੂਲਸਙ੍ਖਾਤਾ ਬਹਲਨ੍ਧਕਾਰਅਵਿਜ੍ਜਾ ਪਰਮਂ ਮਲਂ. ਤਤੋ ਹਿ ਮਲਤਰਂ ਨਾਮ ਨਤ੍ਥਿ. ਇਮਸ੍ਮਿਮ੍ਪਿ ਸੁਤ੍ਤੇ ਵਟ੍ਟਮੇਵ ਕਥਿਤਂ.
੬. ਦੂਤੇਯ੍ਯਸੁਤ੍ਤਵਣ੍ਣਨਾ
੧੬. ਛਟ੍ਠੇ ਦੂਤੇਯ੍ਯਨ੍ਤਿ ਦੂਤਕਮ੍ਮਂ. ਗਨ੍ਤੁਮਰਹਤੀਤਿ ਤਂ ਦੂਤੇਯ੍ਯਸਙ੍ਖਾਤਂ ਸਾਸਨਂ ਧਾਰੇਤ੍ਵਾ ਹਰਿਤੁਂ ਅਰਹਤਿ. ਸੋਤਾਤਿ ਯੋ ਤਂ ਅਸ੍ਸ ਸਾਸਨਂ ਦੇਤਿ, ਤਸ੍ਸ ਸੋਤਾ. ਸਾਵੇਤਾਤਿ ਤਂ ਉਗ੍ਗਣ੍ਹਿਤ੍ਵਾ ‘‘ਇਦਂ ਨਾਮ ਤੁਮ੍ਹੇਹਿ ਵੁਤ੍ਤ’’ਨ੍ਤਿ ਪਟਿਸਾਵੇਤਾ. ਉਗ੍ਗਹੇਤਾਤਿ ਸੁਗ੍ਗਹਿਤਂ ਕਤ੍ਵਾ ਉਗ੍ਗਹੇਤਾ. ਧਾਰੇਤਾਤਿ ਸੁਧਾਰਿਤਂ ਕਤ੍ਵਾ ਧਾਰੇਤਾ. ਵਿਞ੍ਞਾਤਿ ਅਤ੍ਥਾਨਤ੍ਥਸ੍ਸ ਅਤ੍ਥਂ ਜਾਨਿਤਾ. ਵਿਞ੍ਞਾਪੇਤਾਤਿ ਪਰਂ ਵਿਜਾਨਾਪੇਤਾ. ਸਹਿਤਾ ਸਹਿਤਸ੍ਸਾਤਿ ਇਦਂ ਸਹਿਤਂ, ਇਦਂ ਅਸਹਿਤਨ੍ਤਿ ਏਵਂ ਸਹਿਤਾਸਹਿਤਸ੍ਸ ਕੁਸਲੋ, ਉਪਗਤਾਨੁਪਗਤੇਸੁ ਛੇਕੋ ਸਾਸਨਂ ਆਰੋਚੇਨ੍ਤੋ ਸਹਿਤਂ ਸਲ੍ਲਕ੍ਖੇਤ੍ਵਾ ਆਰੋਚੇਤਿ. ਨ ਬ੍ਯਥਤੀਤਿ ਵੇਧਤਿ ਨ ਛਮ੍ਭਤਿ. ਅਸਨ੍ਦਿਦ੍ਧਨ੍ਤਿ ਨਿਸ੍ਸਨ੍ਦੇਹਂ ਵਿਗਤਸਂਸਯਂ. ਪੁਚ੍ਛਿਤੋਤਿ ਪਞ੍ਹਤ੍ਥਾਯ ਪੁਚ੍ਛਿਤੋ.
੭-੮. ਬਨ੍ਧਨਸੁਤ੍ਤਦ੍ਵਯਵਣ੍ਣਨਾ
੧੭-੧੮. ਸਤ੍ਤਮੇ ਰੁਣ੍ਣੇਨਾਤਿ ਰੁਦਿਤੇਨ. ਆਕਪ੍ਪੇਨਾਤਿ ਨਿਵਾਸਨਪਾਰੁਪਨਾਦਿਨਾ ਵਿਧਾਨੇਨ. ਵਨਭਙ੍ਗੇਨਾਤਿ ਵਨਤੋ ਭਞ੍ਜਿਤ੍ਵਾ ਆਹਟੇਨ ਪੁਪ੍ਫਫਲਾਦਿਪਣ੍ਣਾਕਾਰੇਨ. ਅਟ੍ਠਮੇਪਿ ਏਸੇਵ ਨਯੋ.
੯. ਪਹਾਰਾਦਸੁਤ੍ਤਵਣ੍ਣਨਾ
੧੯. ਨਵਮੇ ਪਹਾਰਾਦੋਤਿ ਏਵਂਨਾਮਕੋ. ਅਸੁਰਿਨ੍ਦੋਤਿ ਅਸੁਰਜੇਟ੍ਠਕੋ. ਅਸੁਰੇਸੁ ਹਿ ਵੇਪਚਿਤ੍ਤਿ ਰਾਹੁ ਪਹਾਰਾਦੋਤਿ ਇਮੇ ਤਯੋ ਜੇਟ੍ਠਕਾ. ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਦਸਬਲਸ੍ਸ ਅਭਿਸਮ੍ਬੁਦ੍ਧਦਿਵਸਤੋ ਪਟ੍ਠਾਯ ‘‘ਅਜ੍ਜ ਗਮਿਸ੍ਸਾਮਿ ਸ੍ਵੇ ਗਮਿਸ੍ਸਾਮੀ’’ਤਿ ਏਕਾਦਸ ਵਸ੍ਸਾਨਿ ਅਤਿਕ੍ਕਮਿਤ੍ਵਾ ਦ੍ਵਾਦਸਮੇ ਵਸ੍ਸੇ ਸਤ੍ਥੁ ਵੇਰਞ੍ਜਾਯਂ ਵਸਨਕਾਲੇ ‘‘ਸਮ੍ਮਾਸਮ੍ਬੁਦ੍ਧਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ‘‘ਮਮ ‘ਅਜ੍ਜ ਸ੍ਵੇ’ਤਿ ਦ੍ਵਾਦਸ ਵਸ੍ਸਾਨਿ ਜਾਤਾਨਿ, ਹਨ੍ਦਾਹਂ ਇਦਾਨੇਵ ਗਚ੍ਛਾਮੀ’’ਤਿ ਤਙ੍ਖਣਂਯੇਵ ਅਸੁਰਗਣਪਰਿਵੁਤੋ ਅਸੁਰਭਵਨਾ ਨਿਕ੍ਖਮਿਤ੍ਵਾ ਦਿਵਾ ਦਿਵਸ੍ਸ ਯੇਨ ਭਗਵਾ ਤੇਨੁਪਸਙ੍ਕਮਿ, ਏਕਮਨ੍ਤਂ ਅਟ੍ਠਾਸੀਤਿ ਸੋ ਕਿਰ ‘‘ਤਥਾਗਤਂ ਪਞ੍ਹਂ ਪੁਚ੍ਛਿਤ੍ਵਾ ਏਵ ਧਮ੍ਮਂ ਸੁਣਿਸ੍ਸਾਮੀ’’ਤਿ ਆਗਤੋ, ਤਥਾਗਤਸ੍ਸ ਪਨ ਦਿਟ੍ਠਕਾਲਤੋ ਪਟ੍ਠਾਯ ਬੁਦ੍ਧਗਾਰਵੇਨ ਪੁਚ੍ਛਿਤੁਂ ਅਸਕ੍ਕੋਨ੍ਤੋ ਅਪਿ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਤਤੋ ਸਤ੍ਥਾ ਚਿਨ੍ਤੇਸਿ – ‘‘ਅਯਂ ਪਹਾਰਾਦੋ ਮਯਿ ਅਕਥੇਨ੍ਤੇ ਪਠਮਤਰਂ ਕਥੇਤੁਂ ਨ ਸਕ੍ਖਿਸ੍ਸਤਿ, ਚਿਣ੍ਣਵਸਿਟ੍ਠਾਨੇਯੇਵ ਨਂ ਕਥਾਸਮੁਟ੍ਠਾਪਨਤ੍ਥਂ ਏਕਂ ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ.
ਅਥ ਨਂ ਪੁਚ੍ਛਨ੍ਤੋ ਅਪਿ ਪਨ ਪਹਾਰਾਦਾਤਿਆਦਿਮਾਹ. ਤਤ੍ਥ ਅਭਿਰਮਨ੍ਤੀਤਿ ਰਤਿਂ ਵਿਨ੍ਦਨ੍ਤਿ, ਅਨੁਕ੍ਕਣ੍ਠਮਾਨਾ ਵਸਨ੍ਤੀਤਿ ਅਤ੍ਥੋ. ਸੋ ‘‘ਪਰਿਚਿਣ੍ਣਟ੍ਠਾਨੇਯੇਵ ਮਂ ਭਗਵਾ ਪੁਚ੍ਛਤੀ’’ਤਿ ਅਤ੍ਤਮਨੋ ਹੁਤ੍ਵਾ ਅਭਿਰਮਨ੍ਤਿ, ਭਨ੍ਤੇਤਿ ਆਹ. ਅਨੁਪੁਬ੍ਬਨਿਨ੍ਨੋਤਿਆਦੀਨਿ ਸਬ੍ਬਾਨਿ ਅਨੁਪਟਿਪਾਟਿਯਾ ਨਿਨ੍ਨਭਾਵਸ੍ਸ ਵੇਵਚਨਾਨਿ. ਨ ਆਯਤਕੇਨੇਵ ਪਪਾਤੋਤਿ ਨ ਛਿਨ੍ਨਤਟਮਹਾਸੋਬ੍ਭੋ ਵਿਯ ਆਦਿਤੋਵ ਪਪਾਤੋ. ਸੋ ਹਿ ਤੀਰਤੋ ਪਟ੍ਠਾਯ ਏਕਙ੍ਗੁਲਦ੍ਵਙ੍ਗੁਲਵਿਦਤ੍ਥਿਰਤਨਯਟ੍ਠਿਉਸਭਅਡ੍ਢਗਾਵੁਤਗਾਵੁਤਅਡ੍ਢਯੋਜਨਾਦਿਵਸੇਨ ਗਮ੍ਭੀਰੋ ਹੁਤ੍ਵਾ ਗਚ੍ਛਨ੍ਤੋ ਸਿਨੇਰੁਪਾਦਮੂਲੇ ਚਤੁਰਾਸੀਤਿਯੋਜਨਸਹਸ੍ਸਗਮ੍ਭੀਰੋ ਹੁਤ੍ਵਾ ਠਿਤੋਤਿ ਦਸ੍ਸੇਤਿ.
ਠਿਤਧਮ੍ਮੋਤਿ ਠਿਤਸਭਾਵੋ. ਕੁਣਪੇਨਾਤਿ ਯੇਨ ਕੇਨਚਿ ਹਤ੍ਥਿਅਸ੍ਸਾਦੀਨਂ ਕਲ਼ੇਵਰੇਨ. ਥਲਂ ਉਸ੍ਸਾਰੇਤੀਤਿ ਹਤ੍ਥੇਨ ਗਹੇਤ੍ਵਾ ਵਿਯ ਵੀਚਿਪਹਾਰੇਨੇਵ ਥਲਂ ਖਿਪਤਿ.
ਗਙ੍ਗਾਯਮੁਨਾਤਿ ਇਧ ਠਤ੍ਵਾ ਇਮਾਸਂ ਨਦੀਨਂ ਉਪ੍ਪਤ੍ਤਿਕਥਂ ਕਥੇਤੁਂ ਵਟ੍ਟਤਿ. ਅਯਂ ਤਾਵ ਜਮ੍ਬੁਦੀਪੋ ਦਸਸਹਸ੍ਸਯੋਜਨਪਰਿਮਾਣੋ, ਤਤ੍ਥ ਚਤੁਸਹਸ੍ਸਯੋਜਨਪਰਿਮਾਣੋ ਪਦੇਸੋ ਉਦਕੇਨ ਅਜ੍ਝੋਤ੍ਥਟੋ ਮਹਾਸਮੁਦ੍ਦੋਤਿ ਸਙ੍ਖਂ ਗਤੋ, ਤਿਸਹਸ੍ਸਯੋਜਨਪ੍ਪਮਾਣੇ ਮਨੁਸ੍ਸਾ ਵਸਨ੍ਤਿ, ਤਿਸਹਸ੍ਸਯੋਜਨਪ੍ਪਮਾਣੇ ਹਿਮਵਾ ਪਤਿਟ੍ਠਿਤੋ ਉਬ੍ਬੇਧੇਨ ਪਞ੍ਚਯੋਜਨਸਤਿਕੋ ਚਤੁਰਾਸੀਤਿਕੂਟਸਹਸ੍ਸਪਟਿਮਣ੍ਡਿਤੋ ਸਮਨ੍ਤਤੋ ਸਨ੍ਦਮਾਨਪਞ੍ਚਸਤਨਦੀਵਿਚਿਤ੍ਤੋ, ਯਤ੍ਥ ਆਯਾਮਵਿਤ੍ਥਾਰੇਨ ਚ ਗਮ੍ਭੀਰਤੋ ਚ ਪਣ੍ਣਾਸਪਣ੍ਣਾਸਯੋਜਨਾ ਦਿਯਡ੍ਢਯੋਜਨਸਤਪਰਿਮਣ੍ਡਲਾ ਅਨੋਤਤ੍ਤਦਹੋ ਕਣ੍ਣਮੁਣ੍ਡਦਹੋ ਰਥਕਾਰਦਹੋ ਛਦ੍ਦਨ੍ਤਦਹੋ ਕੁਣਾਲਦਹੋ ਮਨ੍ਦਾਕਿਨਿਦਹੋ ਸੀਹਪ੍ਪਪਾਤਦਹੋਤਿ ਸਤ੍ਤ ਮਹਾਸਰਾ ਪਤਿਟ੍ਠਹਨ੍ਤਿ.
ਤੇਸੁ ਅਨੋਤਤ੍ਤੋ ਸੁਦਸ੍ਸਨਕੂਟਂ ਚਿਤ੍ਤਕੂਟਂ ਕਾਲ਼ਕੂਟਂ ਗਨ੍ਧਮਾਦਨਕੂਟਂ ਕੇਲਾਸਕੂਟਨ੍ਤਿ ਇਮੇਹਿ ਪਞ੍ਚਹਿ ਪਬ੍ਬਤੇਹਿ ਪਰਿਕ੍ਖਿਤ੍ਤੋ. ਤਤ੍ਥ ਸੁਦਸ੍ਸਨਕੂਟਂ ਸੋਵਣ੍ਣਮਯਂ ਦ੍ਵਿਯੋਜਨਸਤੁਬ੍ਬੇਧਂ ਅਨ੍ਤੋਵਙ੍ਕਂ ਕਾਕਮੁਖਸਣ੍ਠਾਨਂ ਤਮੇਵ ਸਰਂ ਪਟਿਚ੍ਛਾਦੇਤ੍ਵਾ ਤਿਟ੍ਠਤਿ, ਚਿਤ੍ਤਕੂਟਂ ਸਬ੍ਬਰਤਨਮਯਂ, ਕਾਲ਼ਕੂਟਂ ਅਞ੍ਜਨਮਯਂ, ਗਨ੍ਧਮਾਦਨਕੂਟਂ ਸਾਨੁਮਯਂ ਅਬ੍ਭਨ੍ਤਰੇ ਮੁਗ੍ਗਵਣ੍ਣਂ, ਮੂਲਗਨ੍ਧੋ ਸਾਰਗਨ੍ਧੋ ਫੇਗ੍ਗੁਗਨ੍ਧੋ ਤਚਗਨ੍ਧੋ ਪਪਟਿਕਾਗਨ੍ਧੋ ਰਸਗਨ੍ਧੋ ਪਤ੍ਤਗਨ੍ਧੋ ਪੁਪ੍ਫਗਨ੍ਧੋ ਫਲਗਨ੍ਧੋ ਗਨ੍ਧਗਨ੍ਧੋਤਿ ਇਮੇਹਿ ਦਸਹਿ ਗਨ੍ਧੇਹਿ ਉਸ੍ਸਨ੍ਨਂ, ਨਾਨਪ੍ਪਕਾਰਓਸਧਸਞ੍ਛਨ੍ਨਂ ਕਾਲ਼ਪਕ੍ਖਉਪੋਸਥਦਿਵਸੇ ਆਦਿਤ੍ਤਮਿਵ ਅਙ੍ਗਾਰਂ ਜਲਨ੍ਤਂ ਤਿਟ੍ਠਤਿ, ਕੇਲਾਸਕੂਟਂ ਰਜਤਮਯਂ. ਸਬ੍ਬਾਨਿ ਸੁਦਸ੍ਸਨੇਨ ਸਮਾਨੁਬ੍ਬੇਧਸਣ੍ਠਾਨਾਨਿ ਤਮੇਵ ਸਰਂ ਪਟਿਚ੍ਛਾਦੇਤ੍ਵਾ ਠਿਤਾਨਿ. ਤਾਨਿ ਸਬ੍ਬਾਨਿ ਦੇਵਾਨੁਭਾਵੇਨ ਨਾਗਾਨੁਭਾਵੇਨ ਚ ਵਸ੍ਸਨ੍ਤਿ, ਨਦਿਯੋ ਚੇਤੇਸੁ ਸਨ੍ਦਨ੍ਤਿ. ਤਂ ਸਬ੍ਬਮ੍ਪਿ ਉਦਕਂ ਅਨੋਤਤ੍ਤਮੇਵ ਪਵਿਸਤਿ. ਚਨ੍ਦਿਮਸੂਰਿਯਾ ਦਕ੍ਖਿਣੇਨ ਵਾ ਉਤ੍ਤਰੇਨ ਵਾ ਗਚ੍ਛਨ੍ਤਾ ਪਬ੍ਬਤਨ੍ਤਰੇਨ ਤਤ੍ਥ ਓਭਾਸਂ ਕਰੋਨ੍ਤਿ, ਉਜੁਂ ਗਚ੍ਛਨ੍ਤਾ ਨ ਕਰੋਨ੍ਤਿ. ਤੇਨੇਵਸ੍ਸ ਅਨੋਤਤ੍ਤੋ ਤਿਸਙ੍ਖਾ ਉਦਪਾਦਿ.
ਤਤ੍ਥ ਮਨੋਹਰਸਿਲਾਤਲਾਨਿ ਨਿਮ੍ਮਚ੍ਛਕਚ੍ਛਪਾਨਿ ਫਲਿਕਸਦਿਸਨਿਮ੍ਮਲੋਦਕਾਨਿ ਨ੍ਹਾਨਤਿਤ੍ਥਾਨਿ ਸੁਪਟਿਯਤ੍ਤਾਨਿ ਹੋਨ੍ਤਿ, ਯੇਸੁ ਬੁਦ੍ਧਾ ਖੀਣਾਸਵਾ ਚ ਪਚ੍ਚੇਕਬੁਦ੍ਧਾ ਚ ਇਦ੍ਧਿਮਨ੍ਤਾ ਚ ਇਸਯੋ ਨ੍ਹਾਯਨ੍ਤਿ, ਦੇਵਯਕ੍ਖਾਦਯੋ ਉਦਕਕੀਲ਼ਂ ਕੀਲ਼ਨ੍ਤਿ.
ਤਸ੍ਸ ਚਤੂਸੁ ਪਸ੍ਸੇਸੁ ਸੀਹਮੁਖਂ, ਹਤ੍ਥਿਮੁਖਂ, ਅਸ੍ਸਮੁਖਂ, ਉਸਭਮੁਖਨ੍ਤਿ ਚਤ੍ਤਾਰਿ ਮੁਖਾਨਿ ਹੋਨ੍ਤਿ, ਯੇਹਿ ਚਤਸ੍ਸੋ ਨਦਿਯੋ ਸਨ੍ਦਨ੍ਤਿ. ਸੀਹਮੁਖੇਨ ਨਿਕ੍ਖਨ੍ਤਨਦੀਤੀਰੇ ਸੀਹਾ ਬਹੁਤਰਾ ਹੋਨ੍ਤਿ, ਹਤ੍ਥਿਮੁਖਾਦੀਹਿ ਹਤ੍ਥਿਅਸ੍ਸਉਸਭਾ. ਪੁਰਤ੍ਥਿਮਦਿਸਤੋ ਨਿਕ੍ਖਨ੍ਤਨਦੀ ਅਨੋਤਤ੍ਤਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਇਤਰਾ ਤਿਸ੍ਸੋ ਨਦਿਯੋ ਅਨੁਪਗਮ੍ਮ ਪਾਚੀਨਹਿਮਵਨ੍ਤੇਨੇਵ ਅਮਨੁਸ੍ਸਪਥਂ ਗਨ੍ਤ੍ਵਾ ਮਹਾਸਮੁਦ੍ਦਂ ਪਵਿਸਤਿ. ਪਚ੍ਛਿਮਦਿਸਤੋ ਚ ਉਤ੍ਤਰਦਿਸਤੋ ਚ ਨਿਕ੍ਖਨ੍ਤਨਦਿਯੋਪਿ ਤਥੇਵ ਪਦਕ੍ਖਿਣਂ ਕਤ੍ਵਾ ਪਚ੍ਛਿਮਹਿਮਵਨ੍ਤੇਨੇਵ ਉਤ੍ਤਰਹਿਮਵਨ੍ਤੇਨੇਵ ਚ ਅਮਨੁਸ੍ਸਪਥਂ ਗਨ੍ਤ੍ਵਾ ਮਹਾਸਮੁਦ੍ਦਂ ਪਵਿਸਨ੍ਤਿ. ਦਕ੍ਖਿਣਮੁਖਤੋ ਨਿਕ੍ਖਨ੍ਤਨਦੀ ਪਨ ਤਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਉਤ੍ਤਰੇਨ ਉਜੁਕਂ ਪਾਸਾਣਪਿਟ੍ਠੇਨੇਵ ਸਟ੍ਠਿ ਯੋਜਨਾਨਿ ਗਨ੍ਤ੍ਵਾ ਪਬ੍ਬਤਂ ਪਹਰਿਤ੍ਵਾ ਉਟ੍ਠਾਯ ਪਰਿਕ੍ਖੇਪੇਨ ਤਿਗਾਵੁਤਪ੍ਪਮਾਣਾ ਉਦਕਧਾਰਾ ਹੁਤ੍ਵਾ ਆਕਾਸੇਨ ਸਟ੍ਠਿ ਯੋਜਨਾਨਿ ਗਨ੍ਤ੍ਵਾ ਤਿਯਗ੍ਗਲ਼ੇ ਨਾਮ ਪਾਸਾਣੇ ਪਤਿਤਾ, ਪਾਸਾਣੋ ਉਦਕਧਾਰਾਵੇਗੇਨ ਭਿਨ੍ਨੋ. ਤਤ੍ਥ ਪਞ੍ਞਾਸਯੋਜਨਪ੍ਪਮਾਣਾ ਤਿਯਗ੍ਗਲ਼ਾ ਨਾਮ ਮਹਾਪੋਕ੍ਖਰਣੀ ਜਾਤਾ, ਪੋਕ੍ਖਰਣਿਯਾ ਕੂਲਂ ਭਿਨ੍ਦਿਤ੍ਵਾ ਪਾਸਾਣਂ ਪਵਿਸਿਤ੍ਵਾ ਸਟ੍ਠਿ ਯੋਜਨਾਨਿ ਗਤਾ. ਤਤੋ ਘਨਪਥਵਿਂ ਭਿਨ੍ਦਿਤ੍ਵਾ ਉਮ੍ਮਙ੍ਗੇਨ ਸਟ੍ਠਿ ਯੋਜਨਾਨਿ ਗਨ੍ਤ੍ਵਾ ਗਿਞ੍ਝਂ ਨਾਮ ਤਿਰਚ੍ਛਾਨਪਬ੍ਬਤਂ ਪਹਰਿਤ੍ਵਾ ਹਤ੍ਥਤਲੇ ਪਞ੍ਚਙ੍ਗੁਲਿਸਦਿਸਾ ਪਞ੍ਚ ਧਾਰਾ ਹੁਤ੍ਵਾ ਪਵਤ੍ਤਤਿ. ਸਾ ਤਿਕ੍ਖਤ੍ਤੁਂ ਅਨੋਤਤ੍ਤਂ ਪਦਕ੍ਖਿਣਂ ਕਤ੍ਵਾ ਗਤਟ੍ਠਾਨੇ ਆਵਤ੍ਤਗਙ੍ਗਾਤਿ ਵੁਚ੍ਚਤਿ. ਉਜੁਕਂ ਪਾਸਾਣਪਿਟ੍ਠੇਨ ਸਟ੍ਠਿ ਯੋਜਨਾਨਿ ਗਤਟ੍ਠਾਨੇ ਕਣ੍ਹਗਙ੍ਗਾ, ਆਕਾਸੇਨ ਸਟ੍ਠਿ ਯੋਜਨਾਨਿ ਗਤਟ੍ਠਾਨੇ ਆਕਾਸਗਙ੍ਗਾ, ਤਿਯਗ੍ਗਲ਼ਪਾਸਾਣੇ ਪਞ੍ਞਾਸਯੋਜਨੋਕਾਸੇ ਠਿਤਾ ਤਿਯਗ੍ਗਲ਼ਪੋਕ੍ਖਰਣੀ, ਕੂਲਂ ਭਿਨ੍ਦਿਤ੍ਵਾ ਪਾਸਾਣਂ ਪਵਿਸਿਤ੍ਵਾ ਸਟ੍ਠਿ ਯੋਜਨਾਨਿ ਗਤਟ੍ਠਾਨੇ ਬਹਲਗਙ੍ਗਾਤਿ, ਉਮਙ੍ਗੇਨ ਸਟ੍ਠਿ ਯੋਜਨਾਨਿ ਗਤਟ੍ਠਾਨੇ ਉਮਙ੍ਗਗਙ੍ਗਾਤਿ ਵੁਚ੍ਚਤਿ. ਵਿਞ੍ਝਂ ਨਾਮ ਤਿਰਚ੍ਛਾਨਪਬ੍ਬਤਂ ਪਹਰਿਤ੍ਵਾ ਪਞ੍ਚ ਧਾਰਾ ਹੁਤ੍ਵਾ ਪਵਤ੍ਤਨਟ੍ਠਾਨੇ ਪਨ ਗਙ੍ਗਾ, ਯਮੁਨਾ, ਅਚਿਰਵਤੀ, ਸਰਭੂ, ਮਹੀਤਿ ਪਞ੍ਚ ਸਙ੍ਖਂ ਗਤਾ. ਏਵਮੇਤਾ ਪਞ੍ਚ ਮਹਾਨਦਿਯੋ ਹਿਮਵਨ੍ਤਤੋ ਪਵਤ੍ਤਨ੍ਤੀਤਿ ਵੇਦਿਤਬ੍ਬਾ.
ਸਵਨ੍ਤਿਯੋਤਿ ਯਾ ਕਾਚਿ ਸਵਮਾਨਾ ਗਚ੍ਛਨ੍ਤੀ ਮਹਾਨਦਿਯੋ ਵਾ ਕੁਨ੍ਨਦਿਯੋ ਵਾ. ਅਪ੍ਪੇਨ੍ਤੀਤਿ ਅਲ੍ਲੀਯਨ੍ਤਿ ਓਸਰਨ੍ਤਿ. ਧਾਰਾਤਿ ਵੁਟ੍ਠਿਧਾਰਾ. ਪੂਰਤ੍ਤਨ੍ਤਿ ਪੁਣ੍ਣਭਾਵੋ. ਮਹਾਸਮੁਦ੍ਦਸ੍ਸ ਹਿ ਅਯਂ ਧਮ੍ਮਤਾ – ‘‘ਇਮਸ੍ਮਿਂ ਕਾਲੇ ਦੇਵੋ ਮਨ੍ਦੋ ਜਾਤੋ, ਜਾਲਕ੍ਖਿਪਾਦੀਨਿ ਆਦਾਯ ਮਚ੍ਛਕਚ੍ਛਪੇ ਗਣ੍ਹਿਸ੍ਸਾਮਾ’’ਤਿ ਵਾ ‘‘ਇਮਸ੍ਮਿਂ ਕਾਲੇ ਮਹਨ੍ਤਾ ਵੁਟ੍ਠਿ, ਲਭਿਸ੍ਸਾਮ ਨੁ ਖੋ ਪਿਟ੍ਠਿਪਸਾਰਣਟ੍ਠਾਨ’’ਨ੍ਤਿ ਵਾ ਵਤ੍ਤੁਂ ਨ ਸਕ੍ਕਾ. ਪਠਮਕਪ੍ਪਿਕਕਾਲਤੋ ਪਟ੍ਠਾਯ ਹਿ ਯਂ ਸਿਨੇਰੁਮੇਖਲਂ ਆਹਚ੍ਚ ਉਦਕਂ ਠਿਤਂ, ਤਤੋ ਏਕਙ੍ਗੁਲਮਤ੍ਤਮ੍ਪਿ ਉਦਕਂ ਨੇਵ ਹੇਟ੍ਠਾ ਓਸੀਦਤਿ, ਨ ਉਦ੍ਧਂ ਉਤ੍ਤਰਤਿ. ਏਕਰਸੋਤਿ ਅਸਮ੍ਭਿਨ੍ਨਰਸੋ.
ਮੁਤ੍ਤਾਤਿ ਖੁਦ੍ਦਕਮਹਨ੍ਤਵਟ੍ਟਦੀਘਾਦਿਭੇਦਾ ਅਨੇਕਵਿਧਾ. ਮਣੀਤਿ ਰਤ੍ਤਨੀਲਾਦਿਭੇਦੋ ਅਨੇਕਵਿਧੋ. ਵੇਲ਼ੁਰਿਯੋਤਿ ਵਂਸਵਣ੍ਣਸਿਰੀਸਪੁਪ੍ਫਵਣ੍ਣਾਦਿਭੇਦੋ ਅਨੇਕਵਿਧੋ. ਸਙ੍ਖੋਤਿ ਦਕ੍ਖਿਣਾਵਟ੍ਟਤਮ੍ਬਕੁਚ੍ਛਿਕਧਮਨਸਙ੍ਖਾਦਿਭੇਦੋ ਅਨੇਕਵਿਧੋ. ਸਿਲਾਤਿ ਸੇਤਕਾਲ਼ਮੁਗ੍ਗਵਣ੍ਣਾਦਿਭੇਦੋ ਅਨੇਕਵਿਧਾ. ਪਵਾਲ਼ਨ੍ਤਿ ਖੁਦ੍ਦਕਮਹਨ੍ਤਰਤ੍ਤਘਨਰਤ੍ਤਾਦਿਭੇਦਂ ਅਨੇਕਵਿਧਂ. ਮਸਾਰਗਲ੍ਲਨ੍ਤਿ ਕਬਰਮਣਿ. ਨਾਗਾਤਿ ਊਮਿਪਿਟ੍ਠਵਾਸਿਨੋਪਿ ਵਿਮਾਨਟ੍ਠਕਾ ਨਾਗਾਪਿ.
ਅਟ੍ਠ ਪਹਾਰਾਦਾਤਿ ਸਤ੍ਥਾ ਅਟ੍ਠਪਿ ਧਮ੍ਮੇ ਵਤ੍ਤੁਂ ਸਕ੍ਕੋਤਿ, ਸੋਲ਼ਸਪਿ ਬਾਤ੍ਤਿਂਸਪਿ ਚਤੁਸਟ੍ਠਿਪਿ ਸਹਸ੍ਸਮ੍ਪਿ, ਪਹਾਰਾਦੇਨ ਪਨ ਅਟ੍ਠ ਕਥਿਤਾ, ਅਹਮ੍ਪਿ ਤੇਹੇਵ ਸਰਿਕ੍ਖਕੇ ਕਤ੍ਵਾ ਕਥੇਸ੍ਸਾਮੀਤਿ ਚਿਨ੍ਤੇਤ੍ਵਾ ਏਵਮਾਹ. ਅਨੁਪੁਬ੍ਬਸਿਕ੍ਖਾਤਿਆਦੀਸੁ ਅਨੁਪੁਬ੍ਬਸਿਕ੍ਖਾਯ ਤਿਸ੍ਸੋ ਸਿਕ੍ਖਾ ਗਹਿਤਾ, ਅਨੁਪੁਬ੍ਬਕਿਰਿਯਾਯ ਤੇਰਸ ਧੁਤਙ੍ਗਾਨਿ, ਅਨੁਪੁਬ੍ਬਪਟਿਪਦਾਯ ਸਤ੍ਤ ਅਨੁਪਸ੍ਸਨਾ ਅਟ੍ਠਾਰਸ ਮਹਾਵਿਪਸ੍ਸਨਾ ਅਟ੍ਠਤਿਂਸ ਆਰਮ੍ਮਣਵਿਭਤ੍ਤਿਯੋ ਸਤ੍ਤਤਿਂਸ ਬੋਧਪਕ੍ਖਿਯਧਮ੍ਮਾ. ਨ ਆਯਤਕੇਨੇਵ ਅਞ੍ਞਾਪਟਿਵੇਧੋਤਿ ਮਣ੍ਡੂਕਸ੍ਸ ਉਪ੍ਪਤਿਤ੍ਵਾ ਗਮਨਂ ਵਿਯ ਆਦਿਤੋਵ ਸੀਲਪੂਰਣਾਦਿਂ ਅਕਤ੍ਵਾ ਅਰਹਤ੍ਤਪ੍ਪਟਿਵੇਧੋ ਨਾਮ ਨਤ੍ਥਿ, ਪਟਿਪਾਟਿਯਾ ਪਨ ਸੀਲਸਮਾਧਿਪਞ੍ਞਾਯੋ ਪੂਰੇਤ੍ਵਾਵ ਸਕ੍ਕਾ ਅਰਹਤ੍ਤਂ ਪਤ੍ਤੁਨ੍ਤਿ ਅਤ੍ਥੋ.
ਆਰਕਾਵਾਤਿ ਦੂਰੇਯੇਵ. ਨ ਤੇਨ ਨਿਬ੍ਬਾਨਧਾਤੁਯਾ ਊਨਤ੍ਤਂ ਵਾ ਪੂਰਤ੍ਤਂ ਵਾਤਿ ਅਸਙ੍ਖ੍ਯੇਯ੍ਯੇਪਿ ਕਪ੍ਪੇ ਬੁਦ੍ਧੇਸੁ ਅਨੁਪ੍ਪਨ੍ਨੇਸੁ ਏਕਸਤ੍ਤੋਪਿ ਪਰਿਨਿਬ੍ਬਾਤੁਂ ਨ ਸਕ੍ਕੋਤਿ, ਤਦਾਪਿ ‘‘ਤੁਚ੍ਛਾ ਨਿਬ੍ਬਾਨਧਾਤੂ’’ਤਿ ਨ ਸਕ੍ਕਾ ਵਤ੍ਤੁਂ. ਬੁਦ੍ਧਕਾਲੇ ਚ ਪਨ ਏਕੇਕਸ੍ਮਿਂ ਸਮਾਗਮੇ ਅਸਙ੍ਖ੍ਯੇਯ੍ਯਾਪਿ ਸਤ੍ਤਾ ਅਮਤਂ ਆਰਾਧੇਨ੍ਤਿ, ਤਦਾਪਿ ਨ ਸਕ੍ਕਾ ਵਤ੍ਤੁਂ – ‘‘ਪੂਰਾ ਨਿਬ੍ਬਾਨਧਾਤੂ’’ਤਿ.
੧੦. ਉਪੋਸਥਸੁਤ੍ਤਵਣ੍ਣਨਾ
੨੦. ਦਸਮੇ ਨਿਸਿਨ੍ਨੋ ਹੋਤੀਤਿ ਉਪੋਸਥਕਰਣਤ੍ਥਾਯ ਉਪਾਸਿਕਾਯ ਰਤਨਪਾਸਾਦੇ ਨਿਸਿਨ੍ਨੋ. ਨਿਸਜ੍ਜ ਪਨ ਭਿਕ੍ਖੂਨਂ ਚਿਤ੍ਤਾਨਿ ਓਲੋਕੇਨ੍ਤੋ ਏਕਂ ਦੁਸ੍ਸੀਲਪੁਗ੍ਗਲਂ ਦਿਸ੍ਵਾ ‘‘ਸਚਾਹਂ ਇਮਸ੍ਮਿਂ ਪੁਗ੍ਗਲੇ ਨਿਸਿਨ੍ਨੇਯੇਵ ਪਾਤਿਮੋਕ੍ਖਂ ਉਦ੍ਦਿਸਿਸ੍ਸਾਮਿ, ਸਤ੍ਤਧਾ ਤਸ੍ਸ ਮੁਦ੍ਧਾ ਫਲਿਸ੍ਸਤੀ’’ਤਿ ਤਸ੍ਸ ਅਨੁਕਮ੍ਪਾਯ ਤੁਣ੍ਹੀਯੇਵ ਅਹੋਸਿ. ਅਭਿਕ੍ਕਨ੍ਤਾਤਿ ਅਤਿਕ੍ਕਨ੍ਤਾ ਪਰਿਕ੍ਖੀਣਾ. ਉਦ੍ਧਸ੍ਤੇ ਅਰੁਣੇਤਿ ਉਗ੍ਗਤੇ ਅਰੁਣਸੀਸੇ. ਨਨ੍ਦਿਮੁਖਿਯਾਤਿ ਤੁਟ੍ਠਮੁਖਿਯਾ. ਅਪਰਿਸੁਦ੍ਧਾ, ਆਨਨ੍ਦ, ਪਰਿਸਾਤਿ ‘‘ਅਸੁਕਪੁਗ੍ਗਲੋ ਅਪਰਿਸੁਦ੍ਧੋ’’ਤਿ ਅਵਤ੍ਵਾ ‘‘ਅਪਰਿਸੁਦ੍ਧਾ, ਆਨਨ੍ਦ, ਪਰਿਸਾ’’ਤਿ ਆਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਮਹਾਵਗ੍ਗੋ ਦੁਤਿਯੋ.
੩. ਗਹਪਤਿਵਗ੍ਗੋ
੧. ਪਠਮਉਗ੍ਗਸੁਤ੍ਤਵਣ੍ਣਨਾ
੨੧. ਤਤਿਯਸ੍ਸ ਪਠਮੇ ਪਞ੍ਞਤ੍ਤੇ ਆਸਨੇ ਨਿਸੀਦੀਤਿ ਤਸ੍ਸ ਕਿਰ ਘਰੇ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਪਞ੍ਚ ਆਸਨਸਤਾਨਿ ਨਿਚ੍ਚਂ ਪਞ੍ਞਤ੍ਤਾਨੇਵ ਹੋਨ੍ਤਿ, ਤੇਸੁ ਅਞ੍ਞਤਰਸ੍ਮਿਂ ਆਸਨੇ ਨਿਸੀਦਿ. ਤਂ ਸੁਣਾਹੀਤਿ ਤੇ ਸੁਣਾਹਿ, ਤਂ ਵਾ ਅਟ੍ਠਵਿਧਂ ਅਚ੍ਛਰਿਯਧਮ੍ਮਂ ਸੁਣਾਹਿ. ਚਿਤ੍ਤਂ ਪਸੀਦੀਤਿ ‘‘ਬੁਦ੍ਧੋ ਨੁ ਖੋ ਨ ਬੁਦ੍ਧੋ ਨੁ ਖੋ’’ਤਿ ਵਿਤਕ੍ਕਮਤ੍ਤਮ੍ਪਿ ਨ ਉਪ੍ਪਜ੍ਜਿ, ਅਯਮੇਵ ਬੁਦ੍ਧੋਤਿ ਚਿਤ੍ਤੁਪ੍ਪਾਦੋ ਪਸਨ੍ਨੋ ਅਨਾਵਿਲੋ ਅਹੋਸਿ. ਸਕਾਨਿ ਵਾ ਞਾਤਿਕੁਲਾਨੀਤਿ ਅਤ੍ਤਨੋ ਯਾਪਨਮਤ੍ਤਂ ਧਨਂ ਗਹੇਤ੍ਵਾ ਞਾਤਿਘਰਾਨਿ ਗਚ੍ਛਤੁ. ਕਸ੍ਸ ਵੋ ਦਮ੍ਮੀਤਿ ਕਤਰਪੁਰਿਸਸ੍ਸ ਤੁਮ੍ਹੇ ਦਦਾਮਿ, ਆਰੋਚੇਥ ਮੇ ਅਤ੍ਤਨੋ ਅਧਿਪ੍ਪਾਯਂ. ਅਪ੍ਪਟਿਵਿਭਤ੍ਤਾਤਿ ‘‘ਏਤ੍ਤਕਂ ਦਸ੍ਸਾਮਿ ਏਤ੍ਤਕਂ ਨ ਦਸ੍ਸਾਮਿ, ਇਦਂ ਦਸ੍ਸਾਮਿ ਇਦਂ ਨ ਦਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਾਦੇਨ੍ਤੇਨ ਹਿ ਪਟਿਵਿਭਤ੍ਤਾ ਨਾਮ ਹੋਤਿ, ਮਯ੍ਹਂ ਪਨ ਨ ਏਵਂ. ਅਥ ਖੋ ਸਙ੍ਘਿਕਾ ਵਿਯ ਗਣਸਨ੍ਤਕਾ ਵਿਯ ਚ ਸੀਲਵਨ੍ਤੇਹਿ ਸਦ੍ਧਿਂ ਸਾਧਾਰਣਾਯੇਵ. ਸਕ੍ਕਚ੍ਚਂਯੇਵ ਪਯਿਰੁਪਾਸਾਮੀਤਿ ਸਹਤ੍ਥਾ ਉਪਟ੍ਠਹਾਮਿ, ਚਿਤ੍ਤੀਕਾਰੇਨ ਉਪਸਙ੍ਕਮਾਮਿ.
ਅਨਚ੍ਛਰਿਯਂ ਖੋ ਪਨ ਮਂ, ਭਨ੍ਤੇਤਿ, ਭਨ੍ਤੇ, ਯਂ ਮਂ ਦੇਵਤਾ ਉਪਸਙ੍ਕਮਿਤ੍ਵਾ ਏਵਂ ਆਰੋਚੇਨ੍ਤਿ, ਇਦਂ ਨ ਅਚ੍ਛਰਿਯਂ. ਯਂ ਪਨਾਹਂ ਤਤੋਨਿਦਾਨਂ ਚਿਤ੍ਤਸ੍ਸ ਉਣ੍ਣਤਿਂ ਨਾਭਿਜਾਨਾਮਿ, ਤਂ ਏਵ ਅਚ੍ਛਰਿਯਨ੍ਤਿ ਵਦਤਿ. ਸਾਧੁ ਸਾਧੁ, ਭਿਕ੍ਖੂਤਿ ਏਤ੍ਥ ਕਿਞ੍ਚਾਪਿ ਭਿਕ੍ਖੁਂ ਆਮਨ੍ਤੇਤਿ, ਉਪਾਸਕਸ੍ਸੇਵ ਪਨ ਵੇਯ੍ਯਾਕਰਣਸਮ੍ਪਹਂਸਨੇ ਏਸ ਸਾਧੁਕਾਰੋਤਿ ਵੇਦਿਤਬ੍ਬੋ.
੨. ਦੁਤਿਯਉਗ੍ਗਸੁਤ੍ਤਵਣ੍ਣਨਾ
੨੨. ਦੁਤਿਯੇ ਨਾਗਵਨੇਤਿ ਤਸ੍ਸ ਕਿਰ ਸੇਟ੍ਠਿਨੋ ਨਾਗਵਨਂ ਨਾਮ ਉਯ੍ਯਾਨਂ, ਸੋ ਤਤ੍ਥ ਪੁਰੇਭਤ੍ਤਂ ਗਨ੍ਧਮਾਲਾਦੀਨਿ ਗਾਹਾਪੇਤ੍ਵਾ ਉਯ੍ਯਾਨਕੀਲ਼ਿਕਂ ਕੀਲ਼ਿਤੁਕਾਮੋ ਗਨ੍ਤ੍ਵਾ ਪਰਿਚਾਰਿਯਮਾਨੋ ਭਗਵਨ੍ਤਂ ਅਦ੍ਦਸ. ਸਹ ਦਸ੍ਸਨੇਨੇਵਸ੍ਸ ਪੁਰਿਮਨਯੇਨੇਵ ਚਿਤ੍ਤਂ ਪਸੀਦਿ, ਸੁਰਾਪਾਨੇਨ ਚ ਉਪ੍ਪਨ੍ਨਮਨ੍ਦੋ ਤਙ੍ਖਣਂਯੇਵ ਪਹੀਯਿ. ਤਂ ਸਨ੍ਧਾਯੇਵਮਾਹ. ਓਣੋਜੇਸਿਨ੍ਤਿ ਉਦਕਂ ਹਤ੍ਥੇ ਪਾਤੇਤ੍ਵਾ ਅਦਾਸਿਂ. ਅਸੁਕੋਤਿ ਅਮੁਕੋ. ਸਮਚਿਤ੍ਤੋਵ ਦੇਮੀਤਿ ‘‘ਇਮਸ੍ਸ ਥੋਕਂ, ਇਮਸ੍ਸ ਬਹੁਕ’’ਨ੍ਤਿ ਏਵਂ ਚਿਤ੍ਤਨਾਨਤ੍ਤਂ ਨ ਕਰੋਮਿ, ਦੇਯ੍ਯਧਮ੍ਮਂ ਪਨ ਏਕਸਦਿਸਂ ਕਰੋਮੀਤਿ ਦਸ੍ਸੇਤਿ. ਆਰੋਚੇਨ੍ਤੀਤਿ ਆਕਾਸੇ ਠਤ੍ਵਾ ਆਰੋਚੇਨ੍ਤਿ. ਨਤ੍ਥਿ ਤਂ ਸਂਯੋਜਨਨ੍ਤਿ ਇਮਿਨਾ ਉਪਾਸਕੋ ਅਤ੍ਤਨੋ ਅਨਾਗਾਮਿਫਲਂ ਬ੍ਯਾਕਰੋਤਿ.
੩. ਪਠਮਹਤ੍ਥਕਸੁਤ੍ਤਵਣ੍ਣਨਾ
੨੩. ਤਤਿਯੇ ਹਤ੍ਥਕੋ ਆਲ਼ਵਕੋਤਿ ਭਗਵਤਾ ਆਲ਼ਵਕਯਕ੍ਖਸ੍ਸ ਹਤ੍ਥਤੋ ਹਤ੍ਥੇਹਿ ਸਮ੍ਪਟਿਚ੍ਛਿਤਤ੍ਤਾ ਹਤ੍ਥਕੋਤਿ ਲਦ੍ਧਨਾਮੋ ਰਾਜਕੁਮਾਰੋ. ਸੀਲਵਾਤਿ ਪਞ੍ਚਸੀਲਦਸਸੀਲੇਨ ਸੀਲਵਾ. ਚਾਗਵਾਤਿ ਚਾਗਸਮ੍ਪਨ੍ਨੋ. ਕਚ੍ਚਿਤ੍ਥ, ਭਨ੍ਤੇਤਿ, ਭਨ੍ਤੇ, ਕਚ੍ਚਿ ਏਤ੍ਥ ਭਗਵਤੋ ਬ੍ਯਾਕਰਣਟ੍ਠਾਨੇ. ਅਪ੍ਪਿਚ੍ਛੋਤਿ ਅਧਿਗਮਪ੍ਪਿਚ੍ਛਤਾਯ ਅਪ੍ਪਿਚ੍ਛੋ.
੪. ਦੁਤਿਯਹਤ੍ਥਕਸੁਤ੍ਤਵਣ੍ਣਨਾ
੨੪. ਚਤੁਤ੍ਥੇ ਪਞ੍ਚਮਤ੍ਤੇਹਿ ਉਪਾਸਕਸਤੇਹੀਤਿ ਸੋਤਾਪਨ੍ਨਸਕਦਾਗਾਮੀਨਂਯੇਵ ਅਰਿਯਸਾਵਕਉਪਾਸਕਾਨਂ ਪਞ੍ਚਹਿ ਸਤੇਹਿ ਪਰਿਵੁਤੋ ਭੁਤ੍ਤਪਾਤਰਾਸੋ ਗਨ੍ਧਮਾਲਵਿਲੇਪੇਨਚੁਣ੍ਣਾਨਿ ਗਹੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ. ਸਙ੍ਗਹਵਤ੍ਥੂਨੀਤਿ ਸਙ੍ਗਣ੍ਹਨਕਾਰਣਾਨਿ. ਤੇਹਾਹਨ੍ਤਿ ਤੇਹਿ ਅਹਂ. ਤਂ ਦਾਨੇਨ ਸਙ੍ਗਣ੍ਹਾਮੀਤਿ ਨਙ੍ਗਲਬਲਿਬਦ੍ਦਭਤ੍ਤਬੀਜਾਦੀਨਿ ਚੇਵ ਗਨ੍ਧਮਾਲਮੂਲਾਦੀਨਿ ਚ ਦਤ੍ਵਾ ਸਙ੍ਗਣ੍ਹਾਮਿ. ਪੇਯ੍ਯਵਜ੍ਜੇਨਾਤਿ ਅਮ੍ਮ, ਤਾਤ, ਭਾਤਰ, ਭਗਿਨੀਤਿਆਦਿਕੇਨ ਕਣ੍ਣਸੁਖੇਨ ਮੁਦੁਕੇਨ ਪਿਯਵਚਨੇਨ ਸਙ੍ਗਣ੍ਹਾਮਿ. ਅਤ੍ਥਚਰਿਯਾਯਾਤਿ ‘‘ਇਮਸ੍ਸ ਦਾਨੇਨ ਵਾ ਪਿਯਵਚਨੇਨ ਵਾ ਕਿਚ੍ਚਂ ਨਤ੍ਥਿ, ਅਤ੍ਥਚਰਿਯਾਯ ਸਙ੍ਗਣ੍ਹਿਤਬ੍ਬਯੁਤ੍ਤਕੋ ਅਯ’’ਨ੍ਤਿ ਞਤ੍ਵਾ ਉਪ੍ਪਨ੍ਨਕਿਚ੍ਚਨਿਤ੍ਥਰਣਸਙ੍ਖਾਤਾਯ ਅਤ੍ਥਚਰਿਯਾਯ ਸਙ੍ਗਣ੍ਹਾਮਿ. ਸਮਾਨਤ੍ਤਤਾਯਾਤਿ ‘‘ਇਮਸ੍ਸ ਦਾਨਾਦੀਹਿ ਕਿਚ੍ਚਂ ਨਤ੍ਥਿ, ਸਮਾਨਤ੍ਤਤਾਯ ਸਙ੍ਗਣ੍ਹਿਤਬ੍ਬੋ ਅਯ’’ਨ੍ਤਿ ਏਕਤੋ ਖਾਦਨਪਿਵਨਨਿਸਜ੍ਜਾਦੀਹਿ ਅਤ੍ਤਨਾ ਸਮਾਨਂ ਕਤ੍ਵਾ ਸਙ੍ਗਣ੍ਹਾਮਿ. ਦਲਿਦ੍ਦਸ੍ਸ ਖੋ ਨੋ ਤਥਾ ਸੋਤਬ੍ਬਂ ਮਞ੍ਞਨ੍ਤੀਤਿ ਦਲਿਦ੍ਦਸ੍ਸ ਕਿਞ੍ਚਿ ਦਾਤੁਂ ਵਾ ਕਾਤੁਂ ਵਾ ਅਸਕ੍ਕੋਨ੍ਤਸ੍ਸ, ਯਥਾ ਦਲਿਦ੍ਦਸ੍ਸ ਨੋ ਤਥਾ ਸੋਤਬ੍ਬਂ ਮਞ੍ਞਨ੍ਤਿ, ਮਮ ਪਨ ਸੋਤਬ੍ਬਂ ਮਞ੍ਞਨ੍ਤਿ, ਦਿਨ੍ਨੋਵਾਦੇ ਤਿਟ੍ਠਨ੍ਤਿ, ਨ ਮੇ ਅਨੁਸਾਸਨਿਂ ਅਤਿਕ੍ਕਮਿਤਬ੍ਬਂ ਮਞ੍ਞਨ੍ਤਿ. ਯੋਨਿ ਖੋ ਤ੍ਯਾਯਨ੍ਤਿ ਉਪਾਯੋ ਖੋ ਤੇ ਅਯਂ. ਇਮੇਸੁ ਪਨ ਦ੍ਵੀਸੁਪਿ ਸੁਤ੍ਤੇਸੁ ਸਤ੍ਥਾਰਾ ਸੀਲਚਾਗਪਞ੍ਞਾ ਮਿਸ੍ਸਕਾ ਕਥਿਤਾਤਿ ਵੇਦਿਤਬ੍ਬਾ.
੫-੬. ਮਹਾਨਾਮਸੁਤ੍ਤਾਦਿਵਣ੍ਣਨਾ
੨੫-੨੬. ਪਞ੍ਚਮੇ ਅਤ੍ਥੂਪਪਰਿਕ੍ਖਿਤਾ ਹੋਤੀਤਿ ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਉਪਪਰਿਕ੍ਖਿਤਾ ਹੋਤਿ. ਛਟ੍ਠੇ ਸਦ੍ਧਾਸੀਲਚਾਗਾ ਮਿਸ੍ਸਕਾ ਕਥਿਤਾ.
੭. ਪਠਮਬਲਸੁਤ੍ਤਵਣ੍ਣਨਾ
੨੭. ਸਤ੍ਤਮੇ ਉਜ੍ਝਤ੍ਤਿਬਲਾਤਿ ਉਜ੍ਝਾਨਬਲਾ. ਬਾਲਾਨਞ੍ਹਿ ‘‘ਯਂ ਅਸੁਕੋ ਇਦਞ੍ਚਿਦਞ੍ਚ ਆਹ, ਮਂ ਸੋ ਆਹ, ਨ ਅਞ੍ਞ’’ਨ੍ਤਿ ਏਵਂ ਉਜ੍ਝਾਨਮੇਵ ਬਲਂ. ਨਿਜ੍ਝਤ੍ਤਿਬਲਾਤਿ ‘‘ਨ ਇਦਂ ਏਵਂ, ਏਵਂ ਨਾਮੇਤ’’ਨ੍ਤਿ ਅਤ੍ਥਾਨਤ੍ਥਨਿਜ੍ਝਾਪਨਂਯੇਵ ਬਲਂ. ਪਟਿਸਙ੍ਖਾਨਬਲਾਤਿ ਪਚ੍ਚਵੇਕ੍ਖਣਬਲਾ. ਖਨ੍ਤਿਬਲਾਤਿ ਅਧਿਵਾਸਨਬਲਾ.
੮. ਦੁਤਿਯਬਲਸੁਤ੍ਤਵਣ੍ਣਨਾ
੨੮. ਅਟ੍ਠਮੇ ਬਲਾਨੀਤਿ ਞਾਣਬਲਾਨਿ. ਆਸਵਾਨਂ ਖਯਂ ਪਟਿਜਾਨਾਤੀਤਿ ਅਰਹਤ੍ਤਂ ਪਟਿਜਾਨਾਤਿ. ਅਨਿਚ੍ਚਤੋਤਿ ਹੁਤ੍ਵਾ ਅਭਾਵਾਕਾਰੇਨ. ਯਥਾਭੂਤਨ੍ਤਿ ਯਥਾਸਭਾਵਤੋ. ਸਮ੍ਮਪ੍ਪਞ੍ਞਾਯਾਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ. ਅਙ੍ਗਾਰਕਾਸੂਪਮਾਤਿ ਸਨ੍ਤਾਪਨਟ੍ਠੇਨ ਅਙ੍ਗਾਰਕਾਸੁਯਾ ਉਪਮਿਤਾ ਇਮੇ ਕਾਮਾਤਿ. ਵਿਵੇਕਨਿਨ੍ਨਨ੍ਤਿ ਫਲਸਮਾਪਤ੍ਤਿਵਸੇਨ ਨਿਬ੍ਬਾਨਨਿਨ੍ਨਂ. ਵਿਵੇਕਟ੍ਠਨ੍ਤਿ ਕਿਲੇਸੇਹਿ ਵਜ੍ਜਿਤਂ ਦੂਰੀਭੂਤਂ ਵਾ. ਨੇਕ੍ਖਮ੍ਮਾਭਿਰਤਨ੍ਤਿ ਪਬ੍ਬਜ੍ਜਾਭਿਰਤਂ. ਬ੍ਯਨ੍ਤਿਭੂਤਨ੍ਤਿ ਵਿਗਤਨ੍ਤਭੂਤਂ ਏਕਦੇਸੇਨਾਪਿ ਅਨਲ੍ਲੀਨਂ ਵਿਸਂਯੁਤ੍ਤਂ ਵਿਸਂਸਟ੍ਠਂ. ਆਸਵਟ੍ਠਾਨਿਯੇਹੀਤਿ ਸਮ੍ਪਯੋਗਵਸੇਨ ਆਸਵਾਨਂ ਕਾਰਣਭੂਤੇਹਿ, ਕਿਲੇਸਧਮ੍ਮੇਹੀਤਿ ਅਤ੍ਥੋ. ਅਥ ਵਾ ਬ੍ਯਨ੍ਤਿਭੂਤਨ੍ਤਿ ਵਿਗਤਵਾਯਨ੍ਤਿ ਅਤ੍ਥੋ. ਕੁਤੋ? ਸਬ੍ਬਸੋ ਆਸਵਟ੍ਠਾਨਿਯੇਹਿ ਧਮ੍ਮੇਹਿ, ਸਬ੍ਬੇਹਿ ਤੇਭੂਮਕਧਮ੍ਮੇਹੀਤਿ ਅਤ੍ਥੋ. ਇਮਸ੍ਮਿਂ ਸੁਤ੍ਤੇ ਅਰਿਯਮਗ੍ਗੋ ਲੋਕਿਯਲੋਕੁਤ੍ਤਰੋ ਕਥਿਤੋ.
੯. ਅਕ੍ਖਣਸੁਤ੍ਤਵਣ੍ਣਨਾ
੨੯. ਨਵਮੇ ਖਣੇ ਕਿਚ੍ਚਾਨਿ ਕਰੋਤੀਤਿ ਖਣਕਿਚ੍ਚੋ, ਓਕਾਸਂ ਲਭਿਤ੍ਵਾਵ ਕਿਚ੍ਚਾਨਿ ਕਰੋਤੀਤਿ ਅਤ੍ਥੋ. ਧਮ੍ਮੋਤਿ ਚਤੁਸਚ੍ਚਧਮ੍ਮੋ. ਓਪਸਮਿਕੋਤਿ ਕਿਲੇਸੂਪਸਮਾਵਹੋ. ਪਰਿਨਿਬ੍ਬਾਯਿਕੋਤਿ ਕਿਲੇਸਪਰਿਨਿਬ੍ਬਾਨਕਰੋ. ਚਤੁਮਗ੍ਗਞਾਣਸਙ੍ਖਾਤਂ ਸਮ੍ਬੋਧਿਂ ਗਚ੍ਛਤਿ ਸਮ੍ਪਾਪੁਣਾਤੀਤਿ ਸਮ੍ਬੋਧਗਾਮੀ. ਦੀਘਾਯੁਕਂ ਦੇਵਨਿਕਾਯਨ੍ਤਿ ਇਦਂ ਅਸਞ੍ਞਂ ਦੇਵਨਿਕਾਯਂ ਸਨ੍ਧਾਯ ਵੁਤ੍ਤਂ. ਅਵਿਞ੍ਞਾਤਾਰੇਸੂਤਿ ਅਤਿਵਿਯ ਅਵਿਞ੍ਞੂਸੁ.
ਸੁਪ੍ਪਵੇਦਿਤੇਤਿ ਸੁਕਥਿਤੇ. ਅਨ੍ਤਰਾਯਿਕਾਤਿ ਅਨ੍ਤਰਾਯਕਰਾ. ਖਣੋ ਵੇ ਮਾ ਉਪਚ੍ਚਗਾਤਿ ਅਯਂ ਲਦ੍ਧੋ ਖਣੋ ਮਾ ਅਤਿਕ੍ਕਮਿ. ਇਧ ਚੇਵ ਨਂ ਵਿਰਾਧੇਤੀਤਿ ਸਚੇ ਕੋਚਿ ਪਮਤ੍ਤਚਾਰੀ ਇਧ ਇਮਂ ਖਣਂ ਲਭਿਤ੍ਵਾਪਿ ਸਦ੍ਧਮ੍ਮਸ੍ਸ ਨਿਯਾਮਤਂ ਅਰਿਯਮਗ੍ਗਂ ਵਿਰਾਧੇਤਿ ਨ ਸਮ੍ਪਾਦੇਤਿ. ਅਤੀਤਤ੍ਥੋਤਿ ਹਾਪਿਤਤ੍ਥੋ. ਚਿਰਤ੍ਤਂ ਅਨੁਤਪਿਸ੍ਸਤੀਤਿ ਚਿਰਰਤ੍ਤਂ ਸੋਚਿਸ੍ਸਤਿ. ਯਥਾ ਹਿ ‘‘ਅਸੁਕਟ੍ਠਾਨੇ ਭਣ੍ਡਂ ਸਮੁਪ੍ਪਨ੍ਨ’’ਨ੍ਤਿ ਸੁਤ੍ਵਾ ਏਕੋ ਵਾਣਿਜੋ ਨ ਗਚ੍ਛੇਯ੍ਯ, ਅਞ੍ਞੇ ਗਨ੍ਤ੍ਵਾ ਗਣ੍ਹੇਯ੍ਯੁਂ, ਤੇਸਂ ਤਂ ਅਟ੍ਠਗੁਣਮ੍ਪਿ ਦਸਗੁਣਮ੍ਪਿ ਭਵੇਯ੍ਯ. ਅਥ ਇਤਰੋ ‘‘ਮਮ ਅਤ੍ਥੋ ਅਤਿਕ੍ਕਨ੍ਤੋ’’ਤਿ ਅਨੁਤਪੇਯ੍ਯ, ਏਵਂ ਯੋ ਇਧ ਖਣਂ ਲਭਿਤ੍ਵਾ ਅਪ੍ਪਟਿਪਜ੍ਜਨ੍ਤੋ ਸਦ੍ਧਮ੍ਮਸ੍ਸ ਨਿਯਾਮਤਂ ਵਿਰਾਧੇਤਿ, ਸੋ ਅਯਂ ਵਾਣਿਜੋਵ ਅਤੀਤਤ੍ਥੋ ਚਿਰਂ ਅਨੁਤਪਿਸ੍ਸਤਿ ਸੋਚਿਸ੍ਸਤਿ. ਕਿਞ੍ਚ ਭਿਯ੍ਯੋ ਅਵਿਜ੍ਜਾਨਿਵੁਤੋਤਿ ਤਥਾ. ਪਚ੍ਚਵਿਦੁਨ੍ਤਿ ਪਟਿਵਿਜ੍ਝਿਂਸੁ. ਸਂਵਰਾਤਿ ਸੀਲਸਂਵਰਾ. ਮਾਰਧੇਯ੍ਯਪਰਾਨੁਗੇਤਿ ਮਾਰਧੇਯ੍ਯਸਙ੍ਖਾਤਂ ਸਂਸਾਰਂ ਅਨੁਗਤੇ. ਪਾਰਙ੍ਗਤਾਤਿ ਨਿਬ੍ਬਾਨਂ ਗਤਾ. ਯੇ ਪਤ੍ਤਾ ਆਸਵਕ੍ਖਯਨ੍ਤਿ ਯੇ ਅਰਹਤ੍ਤਂ ਪਤ੍ਤਾ. ਏਵਮਿਧ ਗਾਥਾਸੁ ਵਟ੍ਟਵਿਵਟ੍ਟਂ ਕਥਿਤਂ.
੧੦. ਅਨੁਰੁਦ੍ਧਮਹਾਵਿਤਕ੍ਕਸੁਤ੍ਤਵਣ੍ਣਨਾ
੩੦. ਦਸਮੇ ਚੇਤੀਸੂਤਿ ਚੇਤਿਨਾਮਕਾਨਂ ਰਾਜੂਨਂ ਨਿਵਾਸਟ੍ਠਾਨਤ੍ਤਾ ਏਵਂਲਦ੍ਧਵੋਹਾਰੇ ਰਟ੍ਠੇ. ਪਾਚੀਨਵਂਸਦਾਯੇਤਿ ਦਸਬਲਸ੍ਸ ਵਸਨਟ੍ਠਾਨਤੋ ਪਾਚੀਨਦਿਸਾਯ ਠਿਤੇ ਵਂਸਦਾਯੇ ਨੀਲੋਭਾਸੇਹਿ ਵੇਲ਼ੂਹਿ ਸਞ੍ਛਨ੍ਨੇ ਅਰਞ੍ਞੇ. ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦੀਤਿ ਥੇਰੋ ਕਿਰ ਪਬ੍ਬਜਿਤ੍ਵਾ ਪਠਮਅਨ੍ਤੋਵਸ੍ਸਮ੍ਹਿਯੇਵ ਸਮਾਪਤ੍ਤਿਲਾਭੀ ਹੁਤ੍ਵਾ ਸਹਸ੍ਸਲੋਕਧਾਤੁਦਸ੍ਸਨਸਮਤ੍ਥਂ ਦਿਬ੍ਬਚਕ੍ਖੁਞਾਣਂ ਉਪ੍ਪਾਦੇਸਿ. ਸੋ ਸਾਰਿਪੁਤ੍ਤਤ੍ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਵਮਾਹ – ‘‘ਇਧਾਹਂ, ਆਵੁਸੋ ਸਾਰਿਪੁਤ੍ਤ, ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਸਹਸ੍ਸਲੋਕਂ ਓਲੋਕੇਮਿ. ਆਰਦ੍ਧਂ ਖੋ ਪਨ ਮੇ ਵੀਰਿਯਂ ਅਸਲ੍ਲੀਨਂ, ਉਪਟ੍ਠਿਤਾ ਸਤਿ ਅਸਮ੍ਮੁਟ੍ਠਾ, ਪਸ੍ਸਦ੍ਧੋ ਕਾਯੋ ਅਸਾਰਦ੍ਧੋ, ਸਮਾਹਿਤਂ ਚਿਤ੍ਤਂ ਏਕਗ੍ਗਂ. ਅਥ ਚ ਪਨ ਮੇ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਨ ਵਿਮੁਚ੍ਚਤੀ’’ਤਿ. ਅਥ ਨਂ ਥੇਰੋ ਆਹ – ‘‘ਯਂ ਖੋ ਤੇ, ਆਵੁਸੋ ਅਨੁਰੁਦ੍ਧ, ਏਵਂ ਹੋਤਿ ‘ਅਹਂ ਦਿਬ੍ਬੇਨ ਚਕ੍ਖੁਨਾ…ਪੇ… ਓਲੋਕੇਮੀ’ਤਿ, ਇਦਂ ਤੇ ਮਾਨਸ੍ਮਿਂ. ਯਮ੍ਪਿ ਤੇ, ਆਵੁਸੋ, ਅਨੁਰੁਦ੍ਧ ਏਵਂ ਹੋਤਿ ‘ਆਰਦ੍ਧਂ ਖੋ ਪਨ ਮੇ ਵੀਰਿਯਂ…ਪੇ… ਏਕਗ੍ਗ’ਨ੍ਤਿ, ਇਦਂ ਤੇ ਉਦ੍ਧਚ੍ਚਸ੍ਮਿਂ. ਯਮ੍ਪਿ ਤੇ, ਆਵੁਸੋ ਅਨੁਰੁਦ੍ਧ, ਏਵਂ ਹੋਤਿ ‘ਅਥ ਚ ਪਨ ਮੇ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਨ ਵਿਮੁਚ੍ਚਤੀ’ਤਿ, ਇਦਂ ਤੇ ਕੁਕ੍ਕੁਚ੍ਚਸ੍ਮਿਂ. ਸਾਧੁ ਵਤਾਯਸ੍ਮਾ ਅਨੁਰੁਦ੍ਧੋ ਇਮੇ ਤਯੋ ਧਮ੍ਮੇ ਪਹਾਯ ਇਮੇ ਤਯੋ ਧਮ੍ਮੇ ਅਮਨਸਿਕਰਿਤ੍ਵਾ ਅਮਤਾਯ ਧਾਤੁਯਾ ਚਿਤ੍ਤਂ ਉਪਸਂਹਰਤੂ’’ਤਿ ਏਵਮਸ੍ਸ ਥੇਰੋ ਕਮ੍ਮਟ੍ਠਾਨਂ ਕਥੇਸਿ. ਸੋ ਕਮ੍ਮਟ੍ਠਾਨਂ ਗਹੇਤ੍ਵਾ ਸਤ੍ਥਾਰਂ ਆਪੁਚ੍ਛਿਤ੍ਵਾ ਚੇਤਿਰਟ੍ਠਂ ਗਨ੍ਤ੍ਵਾ ਸਮਣਧਮ੍ਮਂ ਕਰੋਨ੍ਤੋ ਅਟ੍ਠਮਾਸਂ ਚਙ੍ਕਮੇਨ ਵੀਤਿਨਾਮੇਸਿ. ਸੋ ਪਧਾਨਵੇਗਨਿਮ੍ਮਥਿਤਤ੍ਤਾ ਕਿਲਨ੍ਤਕਾਯੋ ਏਕਸ੍ਸ ਵੇਲ਼ੁਗੁਮ੍ਬਸ੍ਸ ਹੇਟ੍ਠਾ ਨਿਸੀਦਿ. ਅਥਸ੍ਸਾਯਂ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ, ਏਸ ਮਹਾਪੁਰਿਸਵਿਤਕ੍ਕੋ ਉਪ੍ਪਜ੍ਜੀਤਿ ਅਤ੍ਥੋ.
ਅਪ੍ਪਿਚ੍ਛਸ੍ਸਾਤਿ ਏਤ੍ਥ ਪਚ੍ਚਯਪ੍ਪਿਚ੍ਛੋ, ਅਧਿਗਮਪ੍ਪਿਚ੍ਛੋ, ਪਰਿਯਤ੍ਤਿਅਪ੍ਪਿਚ੍ਛੋ, ਧੁਤਙ੍ਗਪ੍ਪਿਚ੍ਛੋਤਿ ਚਤ੍ਤਾਰੋ ਅਪ੍ਪਿਚ੍ਛਾ. ਤਤ੍ਥ ਪਚ੍ਚਯਪ੍ਪਿਚ੍ਛੋ ਬਹੁਂ ਦੇਨ੍ਤੇ ਅਪ੍ਪਂ ਗਣ੍ਹਾਤਿ, ਅਪ੍ਪਂ ਦੇਨ੍ਤੇ ਅਪ੍ਪਤਰਂ ਗਣ੍ਹਾਤਿ, ਨ ਅਨਵਸੇਸਗ੍ਗਾਹੀ ਹੋਤਿ. ਅਧਿਗਮਪ੍ਪਿਚ੍ਛੋ ਮਜ੍ਝਨ੍ਤਿਕਤ੍ਥੇਰੋ ਵਿਯ ਅਤ੍ਤਨੋ ਅਧਿਗਮਂ ਅਞ੍ਞੇਸਂ ਜਾਨਿਤੁਂ ਨ ਦੇਤਿ. ਪਰਿਯਤ੍ਤਿਅਪ੍ਪਿਚ੍ਛੋ ਤੇਪਿਟਕੋਪਿ ਸਮਾਨੋ ਨ ਬਹੁਸ੍ਸੁਤਭਾਵਂ ਜਾਨਾਪੇਤੁਕਾਮੋ ਹੋਤਿ ਸਾਕੇਤਤਿਸ੍ਸਤ੍ਥੇਰੋ ਵਿਯ. ਧੁਤਙ੍ਗਪ੍ਪਿਚ੍ਛੋ ਧੁਤਙ੍ਗਪਰਿਹਰਣਭਾਵਂ ਅਞ੍ਞੇਸਂ ਜਾਨਿਤੁਂ ਨ ਦੇਤਿ ਦ੍ਵੇਭਾਤਿਕਤ੍ਥੇਰੇਸੁ ਜੇਟ੍ਠਤ੍ਥੇਰੋ ਵਿਯ. ਵਤ੍ਥੁ ਵਿਸੁਦ੍ਧਿਮਗ੍ਗੇ ਕਥਿਤਂ. ਅਯਂ ਧਮ੍ਮੋਤਿ ਏਵਂ ਸਨ੍ਤਗੁਣਨਿਗੁਹਨੇਨ ਚ ਪਟਿਗ੍ਗਹਣੇ ਮਤ੍ਤਞ੍ਞੁਤਾਯ ਚ ਅਪ੍ਪਿਚ੍ਛਸ੍ਸ ਪੁਗ੍ਗਲਸ੍ਸ ਅਯਂ ਨਵਲੋਕੁਤ੍ਤਰਧਮ੍ਮੋ ਸਮ੍ਪਜ੍ਜਤਿ, ਨੋ ਮਹਿਚ੍ਛਸ੍ਸ. ਏਵਂ ਸਬ੍ਬਤ੍ਥ ਯੋਜੇਤਬ੍ਬਂ.
ਸਨ੍ਤੁਟ੍ਠਸ੍ਸਾਤਿ ਚਤੂਸੁ ਪਚ੍ਚਯੇਸੁ ਤੀਹਿ ਸਨ੍ਤੋਸੇਹਿ ਸਨ੍ਤੁਟ੍ਠਸ੍ਸ. ਪਵਿਵਿਤ੍ਤਸ੍ਸਾਤਿ ਕਾਯਚਿਤ੍ਤਉਪਧਿਵਿਵੇਕੇਹਿ ਵਿਵਿਤ੍ਤਸ੍ਸ. ਤਤ੍ਥ ਕਾਯਵਿਵੇਕੋ ਨਾਮ ਗਣਸਙ੍ਗਣਿਕਂ ਵਿਨੋਦੇਤ੍ਵਾ ਆਰਮ੍ਭਵਤ੍ਥੁਵਸੇਨ ਏਕੀਭਾਵੋ. ਏਕੀਭਾਵਮਤ੍ਤੇਨੇਵ ਕਮ੍ਮਂ ਨ ਨਿਪ੍ਫਜ੍ਜਤੀਤਿ ਕਸਿਣਪਰਿਕਮ੍ਮਂ ਕਤ੍ਵਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤਿ, ਅਯਂ ਚਿਤ੍ਤਵਿਵੇਕੋ ਨਾਮ. ਸਮਾਪਤ੍ਤਿਮਤ੍ਤੇਨੇਵ ਕਮ੍ਮਂ ਨ ਨਿਪ੍ਫਜ੍ਜਤੀਤਿ ਝਾਨਂ ਪਾਦਕਂ ਕਤ੍ਵਾ ਸਙ੍ਖਾਰੇ ਸਮ੍ਮਸਿਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਾਤਿ, ਅਯਂ ਸਬ੍ਬਾਕਾਰਤੋ ਉਪਧਿਵਿਵੇਕੋ ਨਾਮ. ਤੇਨਾਹ ਭਗਵਾ – ‘‘ਕਾਯਵਿਵੇਕੋ ਚ ਵਿਵੇਕਟ੍ਠਕਾਯਾਨਂ ਨੇਕ੍ਖਮ੍ਮਾਭਿਰਤਾਨਂ, ਚਿਤ੍ਤਵਿਵੇਕੋ ਚ ਪਰਿਸੁਦ੍ਧਚਿਤ੍ਤਾਨਂ ਪਰਮਵੋਦਾਨਪ੍ਪਤ੍ਤਾਨਂ, ਉਪਧਿਵਿਵੇਕੋ ਚ ਨਿਰੁਪਧੀਨਂ ਪੁਗ੍ਗਲਾਨਂ ਵਿਸਙ੍ਖਾਰਗਤਾਨ’’ਨ੍ਤਿ (ਮਹਾਨਿ. ੭, ੪੯).
ਸਙ੍ਗਣਿਕਾਰਾਮਸ੍ਸਾਤਿ ਗਣਸਙ੍ਗਣਿਕਾਯ ਚੇਵ ਕਿਲੇਸਸਙ੍ਗਣਿਕਾਯ ਚ ਰਤਸ੍ਸ. ਆਰਦ੍ਧਵੀਰਿਯਸ੍ਸਾਤਿ ਕਾਯਿਕਚੇਤਸਿਕਵੀਰਿਯਵਸੇਨ ਆਰਦ੍ਧਵੀਰਿਯਸ੍ਸ. ਉਪਟ੍ਠਿਤਸ੍ਸਤਿਸ੍ਸਾਤਿ ਚਤੁਸਤਿਪਟ੍ਠਾਨਵਸੇਨ ਉਪਟ੍ਠਿਤਸ੍ਸਤਿਸ੍ਸ. ਸਮਾਹਿਤਸ੍ਸਾਤਿ ਏਕਗ੍ਗਚਿਤ੍ਤਸ੍ਸ. ਪਞ੍ਞਵਤੋਤਿ ਕਮ੍ਮਸ੍ਸਕਤਪਞ੍ਞਾਯ ਪਞ੍ਞਵਤੋ.
ਸਾਧੁ ਸਾਧੂਤਿ ਥੇਰਸ੍ਸ ਵਿਤਕ੍ਕਂ ਸਮ੍ਪਹਂਸੇਨ੍ਤੋ ਏਵਮਾਹ. ਇਮਂ ਅਟ੍ਠਮਨ੍ਤਿ ਸਤ੍ਤ ਨਿਧੀ ਲਦ੍ਧਪੁਰਿਸਸ੍ਸ ਅਟ੍ਠਮਂ ਦੇਨ੍ਤੋ ਵਿਯ, ਸਤ੍ਤ ਮਣਿਰਤਨਾਨਿ, ਸਤ੍ਤ ਹਤ੍ਥਿਰਤਨਾਨਿ, ਸਤ੍ਤ ਅਸ੍ਸਰਤਨਾਨਿ ਲਦ੍ਧਪੁਰਿਸਸ੍ਸ ਅਟ੍ਠਮਂ ਦੇਨ੍ਤੋ ਵਿਯ ਸਤ੍ਤ ਮਹਾਪੁਰਿਸਵਿਤਕ੍ਕੇ ਵਿਤਕ੍ਕੇਤ੍ਵਾ ਠਿਤਸ੍ਸ ਅਟ੍ਠਮਂ ਆਚਿਕ੍ਖਨ੍ਤੋ ਏਵਮਾਹ. ਨਿਪ੍ਪਪਞ੍ਚਾਰਾਮਸ੍ਸਾਤਿ ਤਣ੍ਹਾਮਾਨਦਿਟ੍ਠਿਪਪਞ੍ਚਰਹਿਤਤ੍ਤਾ ਨਿਪ੍ਪਪਞ੍ਚਸਙ੍ਖਾਤੇ ਨਿਬ੍ਬਾਨਪਦੇ ਅਭਿਰਤਸ੍ਸ. ਇਤਰਂ ਤਸ੍ਸੇਵ ਵੇਵਚਨਂ. ਪਪਞ੍ਚਾਰਾਮਸ੍ਸਾਤਿ ਯਥਾਵੁਤ੍ਤੇਸੁ ਪਪਞ੍ਚੇਸੁ ਅਭਿਰਤਸ੍ਸ. ਇਤਰਂ ਤਸ੍ਸੇਵ ਵੇਵਚਨਂ.
ਯਤੋਤਿ ਯਦਾ. ਤਤੋਤਿ ਤਦਾ. ਨਾਨਾਰਤ੍ਤਾਨਨ੍ਤਿ ਨਿਲਪੀਤਲੋਹਿਤੋਦਾਤਵਣ੍ਣੇਹਿ ਨਾਨਾਰਜਨੇਹਿ ਰਤ੍ਤਾਨਂ. ਪਂਸੁਕੂਲਨ੍ਤਿ ਤੇਵੀਸਤਿਯਾ ਖੇਤ੍ਤੇਸੁ ਠਿਤਪਂਸੁਕੂਲਚੀਵਰਂ. ਖਾਯਿਸ੍ਸਤੀਤਿ ਯਥਾ ਤਸ੍ਸ ਪੁਬ੍ਬਣ੍ਹਸਮਯਾਦੀਸੁ ਯਸ੍ਮਿਂ ਸਮਯੇ ਯਂ ਇਚ੍ਛਤਿ, ਤਸ੍ਮਿਂ ਸਮਯੇ ਤਂ ਪਾਰੁਪਨ੍ਤਸ੍ਸ ਸੋ ਦੁਸ੍ਸਕਰਣ੍ਡਕੋ ਮਨਾਪੋ ਹੁਤ੍ਵਾ ਖਾਯਤਿ, ਏਵਂ ਤੁਯ੍ਹਮ੍ਪਿ ਚੀਵਰਸਨ੍ਤੋਸਮਹਾਅਰਿਯਵਂਸੇਨ ਤੁਟ੍ਠਸ੍ਸ ਵਿਹਰਤੋ ਪਂਸੁਕੂਲਚੀਵਰਂ ਖਾਯਿਸ੍ਸਤਿ ਉਪਟ੍ਠਹਿਸ੍ਸਤਿ. ਰਤਿਯਾਤਿ ਰਤਿਅਤ੍ਥਾਯ. ਅਪਰਿਤਸ੍ਸਾਯਾਤਿ ਤਣ੍ਹਾਦਿਟ੍ਠਿਪਰਿਤਸ੍ਸਨਾਹਿ ਅਪਰਿਤਸ੍ਸਨਤ੍ਥਾਯ. ਫਾਸੁਵਿਹਾਰਾਯਾਤਿ ਸੁਖਵਿਹਾਰਤ੍ਥਾਯ. ਓਕ੍ਕਮਨਾਯ ਨਿਬ੍ਬਾਨਸ੍ਸਾਤਿ ਅਮਤਂ ਨਿਬ੍ਬਾਨਂ ਓਤਰਣਤ੍ਥਾਯ.
ਪਿਣ੍ਡਿਯਾਲੋਪਭੋਜਨਨ੍ਤਿ ਗਾਮਨਿਗਮਰਾਜਧਾਨੀਸੁ ਜਙ੍ਘਾਬਲਂ ਨਿਸ੍ਸਾਯ ਘਰਪਟਿਪਾਟਿਯਾ ਚਰਨ੍ਤੇਨ ਲਦ੍ਧਪਿਣ੍ਡਿਯਾਲੋਪਭੋਜਨਂ. ਖਾਯਿਸ੍ਸਤੀਤਿ ਤਸ੍ਸ ਗਹਪਤਿਨੋ ਨਾਨਗ੍ਗਰਸਭੋਜਨਂ ਵਿਯ ਉਪਟ੍ਠਹਿਸ੍ਸਤਿ. ਸਨ੍ਤੁਟ੍ਠਸ੍ਸ ਵਿਹਰਤੋਤਿ ਪਿਣ੍ਡਪਾਤਸਨ੍ਤੋਸਮਹਾਅਰਿਯਵਂਸੇਨ ਸਨ੍ਤੁਟ੍ਠਸ੍ਸ ਵਿਹਰਤੋ. ਰੁਕ੍ਖਮੂਲਸੇਨਾਸਨਂ ਖਾਯਿਸ੍ਸਤੀਤਿ ਤਸ੍ਸ ਗਹਪਤਿਨੋ ਤੇਭੂਮਕਪਾਸਾਦੇ ਗਨ੍ਧਕੁਸੁਮਵਾਸਸੁਗਨ੍ਧਂ ਕੂਟਾਗਾਰਂ ਵਿਯ ਰੁਕ੍ਖਮੂਲਂ ਉਪਟ੍ਠਹਿਸ੍ਸਤਿ. ਸਨ੍ਤੁਟ੍ਠਸ੍ਸਾਤਿ ਸੇਨਾਸਨਸਨ੍ਤੋਸਮਹਾਅਰਿਯਵਂਸੇਨ ਸਨ੍ਤੁਟ੍ਠਸ੍ਸ. ਤਿਣਸਨ੍ਥਾਰਕੋਤਿ ਤਿਣੇਹਿ ਵਾ ਪਣ੍ਣੇਹਿ ਵਾ ਭੂਮਿਯਂ ਵਾ ਫਲਕਪਾਸਾਣਤਲਾਨਿ ਵਾ ਅਞ੍ਞਤਰਸ੍ਮਿਂ ਸਨ੍ਥਤਸਨ੍ਥਤੋ. ਪੂਤਿਮੁਤ੍ਤਨ੍ਤਿ ਯਂਕਿਞ੍ਚਿ ਮੁਤ੍ਤਂ. ਤਙ੍ਖਣੇ ਗਹਿਤਮ੍ਪਿ ਪੂਤਿਮੁਤ੍ਤਮੇਵ ਵੁਚ੍ਚਤਿ ਦੁਗ੍ਗਨ੍ਧਤ੍ਤਾ. ਸਨ੍ਤੁਟ੍ਠਸ੍ਸ ਵਿਹਰਤੋਤਿ ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਸਨ੍ਤੋਸੇਨ ਸਨ੍ਤੁਟ੍ਠਸ੍ਸ ਵਿਹਰਤੋ.
ਇਤਿ ਭਗਵਾ ਚਤੂਸੁ ਠਾਨੇਸੁ ਅਰਹਤ੍ਤਂ ਪਕ੍ਖਿਪਨ੍ਤੋ ਕਮ੍ਮਟ੍ਠਾਨਂ ਕਥੇਤ੍ਵਾ ‘‘ਕਤਰਸੇਨਾਸਨੇ ਨੁ ਖੋ ਵਸਨ੍ਤਸ੍ਸ ਕਮ੍ਮਟ੍ਠਾਨਂ ਸਪ੍ਪਾਯਂ ਭਵਿਸ੍ਸਤੀ’’ਤਿ ਆਵਜ੍ਜੇਨ੍ਤੋ ‘‘ਤਸ੍ਮਿਞ੍ਞੇਵ ਵਸਨ੍ਤਸ੍ਸਾ’’ਤਿ ਞਤ੍ਵਾ ਤੇਨ ਹਿ ਤ੍ਵਂ, ਅਨੁਰੁਦ੍ਧਾਤਿਆਦਿਮਾਹ. ਪਵਿਵਿਤ੍ਤਸ੍ਸ ਵਿਹਰਤੋਤਿ ਤੀਹਿ ਵਿਵੇਕੇਹਿ ਵਿਵਿਤ੍ਤਸ੍ਸ ਵਿਹਰਨ੍ਤਸ੍ਸ. ਉਯ੍ਯੋਜਨਿਕਪਟਿਸਂਯੁਤ੍ਤਨ੍ਤਿ ਉਯ੍ਯੋਜਨਿਕੇਹੇਵ ਵਚਨੇਹਿ ਪਟਿਸਂਯੁਤ੍ਤਂ, ਤੇਸਂ ਉਪਟ੍ਠਾਨਗਮਨਕਂਯੇਵਾਤਿ ਅਤ੍ਥੋ. ਪਪਞ੍ਚਨਿਰੋਧੇਤਿ ਨਿਬ੍ਬਾਨਪਦੇ. ਪਕ੍ਖਨ੍ਦਤੀਤਿ ਆਰਮ੍ਮਣਕਰਣਵਸੇਨ ਪਕ੍ਖਨ੍ਦਤਿ. ਪਸੀਦਤੀਤਿਆਦੀਸੁਪਿ ਆਰਮ੍ਮਣਵਸੇਨੇਵ ਪਸੀਦਨਸਨ੍ਤਿਟ੍ਠਨਮੁਚ੍ਚਨਾ ਵੇਦਿਤਬ੍ਬਾ. ਇਤਿ ਭਗਵਾ ਚੇਤਿਰਟ੍ਠੇ ਪਾਚੀਨਵਂਸਦਾਯੇ ਆਯਸ੍ਮਤੋ ਅਨੁਰੁਦ੍ਧਸ੍ਸ ਕਥਿਤੇ ਅਟ੍ਠ ਮਹਾਪੁਰਿਸਵਿਤਕ੍ਕੇ ਪੁਨ ਭੇਸਕਲ਼ਾਵਨਮਹਾਵਿਹਾਰੇ ਨਿਸੀਦਿਤ੍ਵਾ ਭਿਕ੍ਖੁਸਙ੍ਘਸ੍ਸ ਵਿਤ੍ਥਾਰੇਨ ਕਥੇਸਿ.
ਮਨੋਮਯੇਨਾਤਿ ਮਨੇਨ ਨਿਬ੍ਬਤ੍ਤਿਤਕਾਯੋਪਿ ਮਨੋਮਯੋਤਿ ਵੁਚ੍ਚਤਿ ਮਨੇਨ ਗਤਕਾਯੋਪਿ, ਇਧ ਮਨੇਨ ਗਤਕਾਯਂ ਸਨ੍ਧਾਯੇਵਮਾਹ. ਯਥਾ ਮੇ ਅਹੁ ਸਙ੍ਕਪ੍ਪੋਤਿ ਯਥਾ ਮਯ੍ਹਂ ਵਿਤਕ੍ਕੋ ਅਹੋਸਿ, ਤਤੋ ਉਤ੍ਤਰਿ ਅਟ੍ਠਮਂ ਮਹਾਪੁਰਿਸਵਿਤਕ੍ਕਂ ਦਸ੍ਸੇਨ੍ਤੋ ਤਤੋ ਉਤ੍ਤਰਿਂ ਦੇਸਯਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਗਹਪਤਿਵਗ੍ਗੋ ਤਤਿਯੋ.
੪. ਦਾਨਵਗ੍ਗੋ
੧. ਪਠਮਦਾਨਸੁਤ੍ਤਵਣ੍ਣਨਾ
੩੧. ਚਤੁਤ੍ਥਸ੍ਸ ਪਠਮੇ ਆਸਜ੍ਜ ਦਾਨਂ ਦੇਤੀਤਿ ਪਤ੍ਵਾ ਦਾਨਂ ਦੇਤਿ. ਆਗਤਂ ਦਿਸ੍ਵਾ ਤਂ ਮੁਹੁਤ੍ਤਂਯੇਵ ਨਿਸੀਦਾਪੇਤ੍ਵਾ ਸਕ੍ਕਾਰਂ ਕਤ੍ਵਾ ਦਾਨਂ ਦੇਤਿ, ਦਸ੍ਸਾਮੀਤਿ ਨ ਕਿਲਮੇਤਿ. ਭਯਾਤਿ ‘‘ਅਯਂ ਅਦਾਯਕੋ ਅਕਾਰਕੋ’’ਤਿ ਗਰਹਭਯਾ, ਅਪਾਯਭਯਾ ਵਾ. ਅਦਾਸਿ ਮੇਤਿ ਮਯ੍ਹਂ ਪੁਬ੍ਬੇ ਏਸ ਇਦਂ ਨਾਮ ਅਦਾਸੀਤਿ ਦੇਤਿ. ਦਸ੍ਸਤਿ ਮੇਤਿ ਅਨਾਗਤੇ ਇਦਂ ਨਾਮ ਦਸ੍ਸਤੀਤਿ ਦੇਤਿ. ਸਾਹੁ ਦਾਨਨ੍ਤਿ ਦਾਨਂ ਨਾਮ ਸਾਧੁ ਸੁਨ੍ਦਰਂ ਬੁਦ੍ਧਾਦੀਹਿ ਪਣ੍ਡਿਤੇਹਿ ਪਸਤ੍ਥਨ੍ਤਿ ਦੇਤਿ. ਚਿਤ੍ਤਾਲਙ੍ਕਾਰਚਿਤ੍ਤਪਰਿਕ੍ਖਾਰਤ੍ਥਂ ਦਾਨਂ ਦੇਤੀਤਿ ਸਮਥਵਿਪਸ੍ਸਨਾਚਿਤ੍ਤਸ੍ਸ ਅਲਙ੍ਕਾਰਤ੍ਥਞ੍ਚੇਵ ਪਰਿਕ੍ਖਾਰਤ੍ਥਞ੍ਚ ਦੇਤਿ. ਦਾਨਞ੍ਹਿ ਚਿਤ੍ਤਂ ਮੁਦੁਂ ਕਰੋਤਿ. ਯੇਨ ਲਦ੍ਧੋ, ਸੋ ‘‘ਲਦ੍ਧਂ ਮੇ’’ਤਿ ਮੁਦੁਚਿਤ੍ਤੋ ਹੋਤਿ. ਯੇਨ ਦਿਨ੍ਨਂ, ਸੋਪਿ ‘‘ਦਿਨ੍ਨਂ ਮਯਾ’’ਤਿ ਮੁਦੁਚਿਤ੍ਤੋ ਹੋਤਿ. ਇਤਿ ਉਭਿਨ੍ਨਂ ਚਿਤ੍ਤਂ ਮੁਦੁਂ ਕਰੋਤਿ. ਤੇਨੇਵ ‘‘ਅਦਨ੍ਤਦਮਨ’’ਨ੍ਤਿ ਵੁਚ੍ਚਤਿ. ਯਥਾਹ –
‘‘ਅਦਨ੍ਤਦਮਨਂ ਦਾਨਂ, ਅਦਾਨਂ ਦਨ੍ਤਦੂਸਕਂ;
ਦਾਨੇਨ ਪਿਯਵਾਚਾਯ, ਉਨ੍ਨਮਨ੍ਤਿ ਨਮਨ੍ਤਿ ਚਾ’’ਤਿ.
ਇਮੇਸੁ ਪਨ ਅਟ੍ਠਸੁ ਦਾਨੇਸੁ ਚਿਤ੍ਤਾਲਙ੍ਕਾਰਦਾਨਮੇਵ ਉਤ੍ਤਮਨ੍ਤਿ.
੨. ਦੁਤਿਯਦਾਨਸੁਤ੍ਤਵਣ੍ਣਨਾ
੩੨. ਦੁਤਿਯੇ ਸਦ੍ਧਾਤਿ ਯਾਯ ਸਦ੍ਧਾਯ ਦਾਨਂ ਦੇਤਿ, ਸਾ ਸਦ੍ਧਾ. ਹਿਰਿਯਨ੍ਤਿ ਯਾਯ ਹਿਰਿਯਾ ਦਾਨਂ ਦੇਤਿ, ਸਾਵ ਅਧਿਪ੍ਪੇਤਾ. ਕੁਸਲਞ੍ਚ ਦਾਨਨ੍ਤਿ ਅਨਵਜ੍ਜਞ੍ਚ ਦਾਨਂ. ਦਿਵਿਯਨ੍ਤਿ ਦਿਵਙ੍ਗਮਂ.
੩. ਦਾਨਵਤ੍ਥੁਸੁਤ੍ਤਵਣ੍ਣਨਾ
੩੩. ਤਤਿਯੇ ਦਾਨਵਤ੍ਥੂਨੀਤਿ ਦਾਨਕਾਰਣਾਨਿ. ਛਨ੍ਦਾ ਦਾਨਂ ਦੇਤੀਤਿ ਪੇਮੇਨ ਦਾਨਂ ਦੇਤਿ. ਦੋਸਾਤਿ ਦੋਸੇਨ ਕੁਦ੍ਧੋ ਹੁਤ੍ਵਾ ਯਂ ਅਤ੍ਥਿ, ਤਂ ਵੇਗੇਨ ਗਣ੍ਹਿਤ੍ਵਾ ਦੇਤਿ. ਮੋਹਾਤਿ ਮੋਹੇਨ ਮੂਲ਼੍ਹੋ ਦੇਤਿ. ਭਯਾਤਿ ਗਰਹਭਯੇਨ ਵਾ ਅਪਾਯਭਯੇਨ ਵਾ, ਤਸ੍ਸ ਤਸ੍ਸੇਵ ਵਾ ਪਨ ਭਯੇਨ ਦੇਤਿ. ਕੁਲਵਂਸਨ੍ਤਿ ਕੁਲਪਵੇਣਿਂ.
੪. ਖੇਤ੍ਤਸੁਤ੍ਤਵਣ੍ਣਨਾ
੩੪. ਚਤੁਤ੍ਥੇ ਨ ਮਹਪ੍ਫਲਂ ਹੋਤੀਤਿ ਧਞ੍ਞਫਲੇਨ ਮਹਪ੍ਫਲਂ ਨ ਹੋਤਿ. ਨ ਮਹਸ੍ਸਾਦਨ੍ਤਿ ਯਮ੍ਪਿਸ੍ਸ ਫਲਂ ਹੋਤਿ, ਤਸ੍ਸ ਅਸ੍ਸਾਦੋ ਨ ਮਹਾ ਹੋਤਿ ਮਨ੍ਦਸ੍ਸਾਦਂ ਨ ਮਧੁਰਂ. ਨ ਫਾਤਿਸੇਯ੍ਯਨ੍ਤਿ ਸੇਯ੍ਯਾਪਿਸ੍ਸ ਨ ਹੋਤਿ ਵੁਡ੍ਢਿ, ਤਸ੍ਸ ਮਹਨ੍ਤਂ ਵੀਹਿਥਮ੍ਭਸਨ੍ਨਿਵੇਸਂ ਨ ਹੋਤੀਤਿ ਅਤ੍ਥੋ. ਉਨ੍ਨਾਮਨਿਨ੍ਨਾਮੀਤਿ ਥਲਨਿਨ੍ਨਵਸੇਨ ਵਿਸਮਤਲਂ. ਤਤ੍ਥ ਥਲੇ ਉਦਕਂ ਨ ਸਣ੍ਠਾਤਿ, ਨਿਨ੍ਨੇ ਅਤਿਬਹੁ ਤਿਟ੍ਠਤਿ. ਪਾਸਾਣਸਕ੍ਖਰਿਕਨ੍ਤਿ ਪਤ੍ਥਰਿਤ੍ਵਾ ਠਿਤਪਿਟ੍ਠਿਪਾਸਾਣੇਹਿ ਚ ਖੁਦ੍ਦਕਪਾਸਾਣੇਹਿ ਚ ਸਕ੍ਖਰਾਹਿ ਚ ਸਮਨ੍ਨਾਗਤਂ. ਊਸਰਨ੍ਤਿ ਉਬ੍ਭਿਨ੍ਨਲੋਣਂ. ਨ ਚ ਗਮ੍ਭੀਰਸਿਤਨ੍ਤਿ ਥਦ੍ਧਭੂਮਿਤਾਯ ਗਮ੍ਭੀਰਾਨੁਗਤਂ, ਨਙ੍ਗਲਮਗ੍ਗਂ ਕਤ੍ਵਾ ਕਸਿਤੁਂ ਨ ਸਕ੍ਕਾ ਹੋਤਿ, ਉਤ੍ਤਾਨਨਙ੍ਗਲਮਗ੍ਗਮੇਵ ਹੋਤਿ. ਨ ਆਯਸਮ੍ਪਨ੍ਨਨ੍ਤਿ ਨ ਉਦਕਾਗਮਨਸਮ੍ਪਨ੍ਨਂ. ਨ ਅਪਾਯਸਮ੍ਪਨ੍ਨਨ੍ਤਿ ਪਚ੍ਛਾਭਾਗੇ ਉਦਕਨਿਗ੍ਗਮਨਮਗ੍ਗਸਮ੍ਪਨ੍ਨਂ ਨ ਹੋਤਿ. ਨ ਮਾਤਿਕਾਸਮ੍ਪਨ੍ਨਨ੍ਤਿ ਨ ਖੁਦ੍ਦਕਮਹਨ੍ਤੀਹਿ ਉਦਕਮਾਤਿਕਾਹਿ ਸਮ੍ਪਨ੍ਨਂ ਹੋਤਿ. ਨ ਮਰਿਯਾਦਸਮ੍ਪਨ੍ਨਨ੍ਤਿ ਨ ਕੇਦਾਰਮਰਿਯਾਦਾਹਿ ਸਮ੍ਪਨ੍ਨਂ. ਨ ਮਹਪ੍ਫਲਨ੍ਤਿਆਦੀਨਿ ਸਬ੍ਬਾਨਿ ਵਿਪਾਕਫਲਵਸੇਨੇਵ ਵੇਦਿਤਬ੍ਬਾਨਿ.
ਸਮ੍ਪਨ੍ਨੇਤਿ ਪਰਿਪੁਣ੍ਣੇ ਸਮ੍ਪਤ੍ਤਿਯੁਤ੍ਤੇ. ਪਵੁਤ੍ਤਾ ਬੀਜਸਮ੍ਪਦਾਤਿ ਸਮ੍ਪਨ੍ਨਂ ਬੀਜਂ ਰੋਪਿਤਂ. ਦੇਵੇ ਸਮ੍ਪਾਦਯਨ੍ਤਮ੍ਹੀਤਿ ਦੇਵੇ ਸਮ੍ਮਾ ਵਸ੍ਸਨ੍ਤੇ. ਅਨੀਤਿਸਮ੍ਪਦਾ ਹੋਤੀਤਿ ਕੀਟਕਿਮਿਆਦਿਪਾਣਕਈਤਿਯਾ ਅਭਾਵੋ ਏਕਾ ਸਮ੍ਪਦਾ ਹੋਤਿ. ਵਿਰੂਲ਼੍ਹੀਤਿ ਵਡ੍ਢਿ ਦੁਤਿਯਾ ਸਮ੍ਪਦਾ ਹੋਤਿ. ਵੇਪੁਲ੍ਲਨ੍ਤਿ ਵਿਪੁਲਭਾਵੋ ਤਤਿਯਾ ਸਮ੍ਪਦਾ ਹੋਤਿ. ਫਲਨ੍ਤਿ ਪਰਿਪੁਣ੍ਣਫਲਂ ਚਤੁਤ੍ਥੀ ਸਮ੍ਪਦਾ ਹੋਤਿ. ਸਮ੍ਪਨ੍ਨਸੀਲੇਸੂਤਿ ਪਰਿਪੁਣ੍ਣਸੀਲੇਸੁ. ਭੋਜਨਸਮ੍ਪਦਾਤਿ ਸਮ੍ਪਨ੍ਨਂ ਵਿਵਿਧਭੋਜਨਂ. ਸਮ੍ਪਦਾਨਨ੍ਤਿ ਤਿਵਿਧਂ ਕੁਸਲਸਮ੍ਪਦਂ. ਉਪਨੇਤੀਤਿ ਸਾ ਭੋਜਨਸਮ੍ਪਦਾ ਉਪਨਯਤਿ. ਕਸ੍ਮਾ? ਸਮ੍ਪਨ੍ਨਞ੍ਹਿਸ੍ਸ ਤਂ ਕਤਂ, ਯਸ੍ਮਾਸ੍ਸ ਤਂ ਕਤਕਮ੍ਮਂ ਸਮ੍ਪਨ੍ਨਂ ਪਰਿਪੁਣ੍ਣਨ੍ਤਿ ਅਤ੍ਥੋ. ਸਮ੍ਪਨ੍ਨਤ੍ਥੂਧਾਤਿ ਸਮ੍ਪਨ੍ਨੋ ਅਤ੍ਥੁ ਇਧ. ਵਿਜ੍ਜਾਚਰਣਸਮ੍ਪਨ੍ਨੋਤਿ ਤੀਹਿ ਵਿਜ੍ਜਾਹਿ ਚ ਪਞ੍ਚਦਸਹਿ ਚਰਣਧਮ੍ਮੇਹਿ ਚ ਸਮਨ੍ਨਾਗਤੋ. ਲਦ੍ਧਾਤਿ ਏਵਰੂਪੋ ਪੁਗ੍ਗਲੋ ਚਿਤ੍ਤਸ੍ਸ ਸਮ੍ਪਦਂ ਅਵੇਕਲ੍ਲਪਰਿਪੁਣ੍ਣਭਾਵਂ ਲਭਿਤ੍ਵਾ. ਕਰੋਤਿ ਕਮ੍ਮਸਮ੍ਪਦਨ੍ਤਿ ਪਰਿਪੁਣ੍ਣਕਮ੍ਮਂ ਕਰੋਤਿ. ਲਭਤਿ ਚਤ੍ਥਸਮ੍ਪਦਨ੍ਤਿ ਅਤ੍ਥਞ੍ਚ ਪਰਿਪੁਣ੍ਣਂ ਲਭਤਿ. ਦਿਟ੍ਠਿਸਮ੍ਪਦਨ੍ਤਿ ਵਿਪਸ੍ਸਨਾਦਿਟ੍ਠਿਂ. ਮਗ੍ਗਸਮ੍ਪਦਨ੍ਤਿ ਸੋਤਾਪਤ੍ਤਿਮਗ੍ਗਂ. ਯਾਤਿ ਸਮ੍ਪਨ੍ਨਮਾਨਸੋਤਿ ਪਰਿਪੁਣ੍ਣਚਿਤ੍ਤੋ ਹੁਤ੍ਵਾ ਅਰਹਤ੍ਤਂ ਯਾਤਿ. ਸਾ ਹੋਤਿ ਸਬ੍ਬਸਮ੍ਪਦਾਤਿ ਸਾ ਸਬ੍ਬਦੁਕ੍ਖੇਹਿ ਵਿਮੁਤ੍ਤਿ ਸਬ੍ਬਸਮ੍ਪਦਾ ਨਾਮ ਹੋਤੀਤਿ.
੫. ਦਾਨੂਪਪਤ੍ਤਿਸੁਤ੍ਤਵਣ੍ਣਨਾ
੩੫. ਪਞ੍ਚਮੇ ਦਾਨੂਪਪਤ੍ਤਿਯੋਤਿ ਦਾਨਪਚ੍ਚਯਾ ਉਪਪਤ੍ਤਿਯੋ. ਦਹਤੀਤਿ ਠਪੇਤਿ. ਅਧਿਟ੍ਠਾਤੀਤਿ ਤਸ੍ਸੇਵ ਵੇਵਚਨਂ. ਭਾਵੇਤੀਤਿ ਵਡ੍ਢੇਤਿ. ਹੀਨੇ ਵਿਮੁਤ੍ਤਨ੍ਤਿ ਹੀਨੇਸੁ ਪਞ੍ਚਸੁ ਕਾਮਗੁਣੇਸੁ ਵਿਮੁਤ੍ਤਂ. ਉਤ੍ਤਰਿ ਅਭਾਵਿਤਨ੍ਤਿ ਤਤੋ ਉਤ੍ਤਰਿਮਗ੍ਗਫਲਤ੍ਥਾਯ ਅਭਾਵਿਤਂ. ਤਤ੍ਰੂਪਪਤ੍ਤਿਯਾ ਸਂਵਤ੍ਤਤੀਤਿ ਯਂ ਠਾਨਂ ਪਤ੍ਥੇਤ੍ਵਾ ਕੁਸਲਂ ਕਤਂ, ਤਤ੍ਥ ਨਿਬ੍ਬਤ੍ਤਨਤ੍ਥਾਯ ਸਂਵਤ੍ਤਤਿ. ਵੀਤਰਾਗਸ੍ਸਾਤਿ ਮਗ੍ਗੇਨ ਵਾ ਸਮੁਚ੍ਛਿਨ੍ਨਰਾਗਸ੍ਸ ਸਮਾਪਤ੍ਤਿਯਾ ਵਾ ਵਿਕ੍ਖਮ੍ਭਿਤਰਾਗਸ੍ਸ. ਦਾਨਮਤ੍ਤੇਨੇਵ ਹਿ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਤੁਂ ਨ ਸਕ੍ਕਾ, ਦਾਨਂ ਪਨ ਸਮਾਧਿਵਿਪਸ੍ਸਨਾਚਿਤ੍ਤਸ੍ਸ ਅਲਙ੍ਕਾਰਪਰਿਵਾਰਂ ਹੋਤਿ. ਤਤੋ ਦਾਨੇਨ ਮੁਦੁਚਿਤ੍ਤੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਤਿ. ਤੇਨ ਵੁਤ੍ਤਂ – ‘‘ਵੀਤਰਾਗਸ੍ਸ ਨੋ ਸਰਾਗਸ੍ਸਾ’’ਤਿ.
੬. ਪੁਞ੍ਞਕਿਰਿਯਵਤ੍ਥੁਸੁਤ੍ਤਵਣ੍ਣਨਾ
੩੬. ਛਟ੍ਠੇ ਪੁਞ੍ਞਕਿਰਿਯਾਨਿ ਚ ਤਾਨਿ ਤੇਸਂ ਤੇਸਂ ਆਨਿਸਂਸਾਨਂ ਵਤ੍ਥੂਨਿ ਚਾਤਿ ਪੁਞ੍ਞਕਿਰਿਯਵਤ੍ਥੂਨਿ. ਦਾਨਾਦੀਨਞ੍ਹਿ ਲਕ੍ਖਣੇ ਚਿਤ੍ਤਂ ਠਪੇਤ੍ਵਾ ‘‘ਏਵਰੂਪਂ ਨਾਮ ਅਮ੍ਹੇਹਿ ਦਾਨਂ ਦਾਤਬ੍ਬਂ, ਸੀਲਂ ਰਕ੍ਖਿਤਬ੍ਬਂ, ਭਾਵਨਾ ਭਾਵੇਤਬ੍ਬਾ’’ਤਿ ਸਤ੍ਤਾ ਪੁਞ੍ਞਾਨਿ ਕਰੋਨ੍ਤਿ. ਦਾਨਮੇਵ ਦਾਨਮਯਂ, ਦਾਨਚੇਤਨਾਸੁ ਵਾ ਪੁਰਿਮਚੇਤਨਾਤੋ ਨਿਪ੍ਫਨ੍ਨਾ ਸਨ੍ਨਿਟ੍ਠਾਪਕਚੇਤਨਾ ਦਾਨਮਯਂ ਸੀਲਾਦੀਹਿ ਸੀਲਮਯਾਦੀਨਿ ਵਿਯ. ਸੇਸਦ੍ਵਯੇਸੁਪਿ ਏਸੇਵ ਨਯੋ. ਪਰਿਤ੍ਤਂ ਕਤਂ ਹੋਤੀਤਿ ਥੋਕਂ ਮਨ੍ਦਂ ਕਤਂ ਹੋਤਿ. ਨਾਭਿਸਮ੍ਭੋਤੀਤਿ ਨ ਨਿਪ੍ਫਜ੍ਜਤਿ. ਅਕਤਂ ਹੋਤੀਤਿ ਭਾਵਨਾਯਯੋਗੋਯੇਵ ਅਨਾਰਦ੍ਧੋ ਹੋਤੀਤਿ ਅਤ੍ਥੋ. ਮਨੁਸ੍ਸਦੋਭਗ੍ਯਨ੍ਤਿ ਮਨੁਸ੍ਸੇਸੁ ਸਮ੍ਪਤ੍ਤਿਰਹਿਤਂ ਪਞ੍ਚਵਿਧਂ ਨੀਚਕੁਲਂ. ਉਪਪਜ੍ਜਤੀਤਿ ਪਟਿਸਨ੍ਧਿਵਸੇਨ ਉਪਗਚ੍ਛਤਿ, ਤਤ੍ਥ ਨਿਬ੍ਬਤ੍ਤਤੀਤਿ ਅਤ੍ਥੋ. ਮਤ੍ਤਸੋ ਕਤਨ੍ਤਿ ਪਮਾਣੇਨ ਕਤਂ, ਥੋਕਂ ਨ ਬਹੁ. ਮਨੁਸ੍ਸਸੋਭਗ੍ਯਨ੍ਤਿ ਮਨੁਸ੍ਸੇਸੁ ਸੁਭਗਭਾਵਂ ਤਿਵਿਧਕੁਲਸਮ੍ਪਤ੍ਤਿਂ. ਅਧਿਮਤ੍ਤਨ੍ਤਿ ਅਧਿਕਪ੍ਪਮਾਣਂ ਬਲਵਂ ਵਾ. ਅਧਿਗਣ੍ਹਨ੍ਤੀਤਿ ਅਭਿਭਵਿਤ੍ਵਾ ਗਣ੍ਹਨ੍ਤਿ, ਵਿਸਿਟ੍ਠਤਰਾ ਜੇਟ੍ਠਕਾ ਹੋਨ੍ਤੀਤਿ ਅਤ੍ਥੋ.