੨. ਦੁਤਿਯਪਣ੍ਣਾਸਕਂ

(੬) ੧. ਗੋਤਮੀਵਗ੍ਗੋ

੧. ਗੋਤਮੀਸੁਤ੍ਤਵਣ੍ਣਨਾ

੫੧. ਛਟ੍ਠਸ੍ਸ ਪਠਮੇ ਸਕ੍ਕੇਸੁ ਵਿਹਰਤੀਤਿ ਪਠਮਗਮਨੇਨ ਗਨ੍ਤ੍ਵਾ ਵਿਹਰਤਿ. ਮਹਾਪਜਾਪਤੀਤਿ ਪੁਤ੍ਤਪਜਾਯ ਚੇਵ ਧੀਤੁਪਜਾਯ ਚ ਮਹਨ੍ਤਤ੍ਤਾ ਏਵਂਲਦ੍ਧਨਾਮਾ. ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਭਗਵਾ ਕਪਿਲਪੁਰਂ ਗਨ੍ਤ੍ਵਾ ਪਠਮਮੇਵ ਨਨ੍ਦਂ ਪਬ੍ਬਾਜੇਸਿ, ਸਤ੍ਤਮੇ ਦਿਵਸੇ ਰਾਹੁਲਕੁਮਾਰਂ. ਚੁਮ੍ਬਟਕਕਲਹੇ (ਦੀ. ਨਿ. ਅਟ੍ਠ. ੨.੩੩੧; ਸਂ. ਨਿ. ਅਟ੍ਠ. ੧.੧.੩੭) ਪਨ ਉਭਯਨਗਰਵਾਸਿਕੇਸੁ ਯੁਦ੍ਧਤ੍ਥਾਯ ਨਿਕ੍ਖਨ੍ਤੇਸੁ ਸਤ੍ਥਾ ਗਨ੍ਤ੍ਵਾ ਤੇ ਰਾਜਾਨੋ ਸਞ੍ਞਾਪੇਤ੍ਵਾ ਅਤ੍ਤਦਣ੍ਡਸੁਤ੍ਤਂ (ਸੁ. ਨਿ. ੯੪੧ ਆਦਯੋ; ਮਹਾਨਿ. ੧੭੦ ਆਦਯੋ) ਕਥੇਸਿ. ਰਾਜਾਨੋ ਪਸੀਦਿਤ੍ਵਾ ਅਡ੍ਢਤਿਯਸਤੇ ਅਡ੍ਢਤਿਯਸਤੇ ਕੁਮਾਰੇ ਅਦਂਸੁ, ਤਾਨਿ ਪਞ੍ਚ ਕੁਮਾਰਸਤਾਨਿ ਸਤ੍ਥੁ ਸਨ੍ਤਿਕੇ ਪਬ੍ਬਜਿਂਸੁ, ਅਥ ਨੇਸਂ ਪਜਾਪਤਿਯੋ ਸਾਸਨਂ ਪੇਸੇਤ੍ਵਾ ਅਨਭਿਰਤਿਂ ਉਪ੍ਪਾਦਯਿਂਸੁ. ਸਤ੍ਥਾ ਤੇਸਂ ਅਨਭਿਰਤਿਯਾ ਉਪ੍ਪਨ੍ਨਭਾਵਂ ਞਤ੍ਵਾ ਤੇ ਪਞ੍ਚਸਤੇ ਦਹਰਭਿਕ੍ਖੂ ਕੁਣਾਲਦਹਂ ਨੇਤ੍ਵਾ ਅਤ੍ਤਨੋ ਕੁਣਾਲਕਾਲੇ ਨਿਸਿਨ੍ਨਪੁਬ੍ਬੇ ਪਾਸਾਣਤਲੇ ਨਿਸੀਦਿਤ੍ਵਾ ਕੁਣਾਲਜਾਤਕਕਥਾਯ (ਜਾ. ੨.੨੧.ਕੁਣਾਲਜਾਤਕ) ਤੇਸਂ ਅਨਭਿਰਤਿਂ ਵਿਨੋਦੇਤ੍ਵਾ ਸਬ੍ਬੇਪਿ ਤੇ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਸਿ, ਪੁਨ ਮਹਾਵਨਂ ਆਨੇਤ੍ਵਾ ਅਰਹਤ੍ਤਫਲੇਤਿ. ਤੇਸਂ ਚਿਤ੍ਤਜਾਨਨਤ੍ਥਂ ਪੁਨਪਿ ਪਜਾਪਤਿਯੋ ਸਾਸਨਂ ਪਹਿਣਿਂਸੁ. ਤੇ ‘‘ਅਭਬ੍ਬਾ ਮਯਂ ਘਰਾਵਾਸਸ੍ਸਾ’’ਤਿ ਪਟਿਸਾਸਨਂ ਪਹਿਣਿਂਸੁ. ਤਾ ‘‘ਨ ਦਾਨਿ ਅਮ੍ਹਾਕਂ ਘਰਂ ਗਨ੍ਤੁਂ ਯੁਤ੍ਤਂ, ਮਹਾਪਜਾਪਤਿਯਾ ਸਨ੍ਤਿਕਂ ਗਨ੍ਤ੍ਵਾ ਪਬ੍ਬਜ੍ਜਂ ਅਨੁਜਾਨਾਪੇਤ੍ਵਾ ਪਬ੍ਬਜਿਸ੍ਸਾਮਾ’’ਤਿ ਪਞ੍ਚਸਤਾਪਿ ਮਹਾਪਜਾਪਤਿਂ ਉਪਸਙ੍ਕਮਿਤ੍ਵਾ ‘‘ਅਯ੍ਯੇ, ਅਮ੍ਹਾਕਂ ਪਬ੍ਬਜ੍ਜਂ ਅਨੁਜਾਨਾਪੇਥਾ’’ਤਿ ਆਹਂਸੁ. ਮਹਾਪਜਾਪਤੀ ਤਾ ਇਤ੍ਥਿਯੋ ਗਹੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ. ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਰਞ੍ਞੋ ਪਰਿਨਿਬ੍ਬੁਤਕਾਲੇ ਉਪਸਙ੍ਕਮੀਤਿਪਿ ਵਦਨ੍ਤਿਯੇਵ.

ਅਲਂ ਗੋਤਮਿ, ਮਾ ਤੇ ਰੁਚ੍ਚੀਤਿ ਕਸ੍ਮਾ ਪਟਿਕ੍ਖਿਪਿ, ਨਨੁ ਸਬ੍ਬੇਸਮ੍ਪਿ ਬੁਦ੍ਧਾਨਂ ਚਤਸ੍ਸੋ ਪਰਿਸਾ ਹੋਨ੍ਤੀਤਿ? ਕਾਮਂ ਹੋਨ੍ਤਿ, ਕਿਲਮੇਤ੍ਵਾ ਪਨ ਅਨੇਕਵਾਰਂ ਯਾਚਿਤੇ ਅਨੁਞ੍ਞਾਤਂ ਪਬ੍ਬਜ੍ਜਂ ‘‘ਦੁਕ੍ਖੇਨ ਲਦ੍ਧਾ’’ਤਿ ਸਮ੍ਮਾ ਪਰਿਪਾਲੇਸ੍ਸਨ੍ਤੀਤਿ ਗਰੁਂ ਕਤ੍ਵਾ ਅਨੁਞ੍ਞਾਤੁਕਾਮੋ ਪਟਿਕ੍ਖਿਪਿ. ਪਕ੍ਕਾਮੀਤਿ ਪੁਨ ਕਪਿਲਪੁਰਮੇਵ ਪਾਵਿਸਿ. ਯਥਾਭਿਰਨ੍ਤਂ ਵਿਹਰਿਤ੍ਵਾਤਿ ਬੋਧਨੇਯ੍ਯਸਤ੍ਤਾਨਂ ਉਪਨਿਸ੍ਸਯਂ ਓਲੋਕੇਨ੍ਤੋ ਯਥਾਜ੍ਝਾਸਯਨੇ ਵਿਹਰਿਤ੍ਵਾ. ਚਾਰਿਕਂ ਪਕ੍ਕਾਮੀਤਿ ਮਹਾਜਨਸਙ੍ਗਹਂ ਕਰੋਨ੍ਤੋ ਉਤ੍ਤਮਾਯ ਬੁਦ੍ਧਸਿਰਿਯਾ ਅਨੋਪਮੇਨ ਬੁਦ੍ਧਵਿਲਾਸੇਨ ਅਤੁਰਿਤਚਾਰਿਕਂ ਪਕ੍ਕਾਮਿ.

ਸਮ੍ਬਹੁਲਾਹਿ ਸਾਕਿਯਾਨੀਹਿ ਸਦ੍ਧਿਨ੍ਤਿ ਅਨ੍ਤੋਨਿਵੇਸਨਮ੍ਹਿਯੇਵ ਦਸਬਲਂ ਉਦ੍ਦਿਸ੍ਸ ਪਬ੍ਬਜ੍ਜਾਵੇਸਂ ਗਹੇਤ੍ਵਾ ਪਞ੍ਚਸਤਾ ਸਾਕਿਯਾਨਿਯੋ ਪਬ੍ਬਜ੍ਜਾਵੇਸਂਯੇਵ ਗਾਹਾਪੇਤ੍ਵਾ ਸਬ੍ਬਾਹਿਪਿ ਤਾਹਿ ਸਮ੍ਬਹੁਲਾਹਿ ਸਾਕਿਯਾਨੀਹਿ ਸਦ੍ਧਿਂ. ਚਾਰਿਕਂ ਪਕ੍ਕਾਮੀਤਿ ਗਮਨਂ ਅਭਿਨੀਹਰਿ. ਗਮਨਾਭਿਨੀਹਰਣਕਾਲੇ ਪਨ ਤਾ ਸੁਖੁਮਾਲਾ ਰਾਜਿਤ੍ਥਿਯੋ ਪਦਸਾ ਗਨ੍ਤੁਂ ਨ ਸਕ੍ਖਿਸ੍ਸਨ੍ਤੀਤਿ ਸਾਕਿਯਕੋਲਿਯਰਾਜਾਨੋ ਸੋਵਣ੍ਣਸਿਵਿਕਾਯੋ ਉਪਟ੍ਠਾਪਯਿਂਸੁ. ਤਾ ਪਨ ‘‘ਯਾਨੇ ਆਰੁਯ੍ਹ ਗਚ੍ਛਨ੍ਤੀਤਿ ਸਤ੍ਥਰਿ ਅਗਾਰਵੋ ਕਤੋ ਹੋਤੀ’’ਤਿ ਏਕਪਣ੍ਣਾਸਯੋਜਨਿਕਂ ਪਦਸਾਵ ਪਟਿਪਜ੍ਜਿਂਸੁ. ਰਾਜਾਨੋਪਿ ਪੁਰਤੋ ਚ ਪਚ੍ਛਤੋ ਚ ਆਰਕ੍ਖਂ ਸਂਵਿਦਹਾਪੇਤ੍ਵਾ ਤਣ੍ਡੁਲਸਪ੍ਪਿਤੇਲਾਦੀਨਂ ਸਕਟਾਨਿ ਪੂਰਾਪੇਤ੍ਵਾ ‘‘ਗਤਟ੍ਠਾਨੇ ਗਤਟ੍ਠਾਨੇ ਆਹਾਰਂ ਪਟਿਯਾਦੇਥਾ’’ਤਿ ਪੁਰਿਸੇ ਪੇਸਯਿਂਸੁ. ਸੂਨੇਹਿ ਪਾਦੇਹੀਤਿ ਤਾਸਞ੍ਹਿ ਸੁਖੁਮਾਲਤ੍ਤਾ ਪਾਦੇਸੁ ਏਕੋ ਫੋਟੋ ਉਟ੍ਠੇਤਿ, ਏਕੋ ਭਿਜ੍ਜਤਿ. ਉਭੋ ਪਾਦਾ ਕਤਕਟ੍ਠਿਸਮ੍ਪਰਿਕਿਣ੍ਣਾ ਵਿਯ ਹੁਤ੍ਵਾ ਉਦ੍ਧੁਮਾਤਾ ਜਾਤਾ. ਤੇਨ ਵੁਤ੍ਤਂ – ‘‘ਸੂਨੇਹਿ ਪਾਦੇਹੀ’’ਤਿ. ਬਹਿਦ੍ਵਾਰਕੋਟ੍ਠਕੇਤਿ ਦ੍ਵਾਰਕੋਟ੍ਠਕਤੋ ਬਹਿ. ਕਸ੍ਮਾ ਪਨੇਵਂ ਠਿਤਾਤਿ? ਏਵਂ ਕਿਰਸ੍ਸਾ ਅਹੋਸਿ – ‘‘ਅਹਂ ਤਥਾਗਤੇਨ ਅਨਨੁਞ੍ਞਾਤਾ ਸਯਮੇਵ ਪਬ੍ਬਜ੍ਜਾਵੇਸਂ ਅਗ੍ਗਹੇਸਿਂ, ਏਵਂ ਗਹਿਤਭਾਵੋ ਚ ਪਨ ਮੇ ਸਕਲਜਮ੍ਬੁਦੀਪੇ ਪਾਕਟੋ ਜਾਤੋ. ਸਚੇ ਸਤ੍ਥਾ ਪਬ੍ਬਜ੍ਜਂ ਅਨੁਜਾਨਾਤਿ, ਇਚ੍ਚੇਤਂ ਕੁਸਲਂ. ਸਚੇ ਪਨ ਨਾਨੁਜਾਨਿਸ੍ਸਤਿ, ਮਹਤੀ ਗਰਹਾ ਭਵਿਸ੍ਸਤੀ’’ਤਿ ਵਿਹਾਰਂ ਪਵਿਸਿਤੁਂ ਅਸਕ੍ਕੋਨ੍ਤੀ ਰੋਦਮਾਨਾਵ ਅਟ੍ਠਾਸਿ.

ਕਿਂ ਨੁ ਤ੍ਵਂ ਗੋਤਮੀਤਿ ਕਿਂ ਨੁ ਰਾਜਕੁਲਾਨਂ ਵਿਪਤ੍ਤਿ ਉਪ੍ਪਨ੍ਨਾ, ਕੇਨ ਤ੍ਵਂ ਕਾਰਣੇਨ ਏਵਂ ਵਿਵਣ੍ਣਭਾਵਂ ਪਤ੍ਤਾ, ਸੂਨੇਹਿ ਪਾਦੇਹਿ…ਪੇ… ਠਿਤਾਤਿ. ਅਞ੍ਞੇਨਪਿ ਪਰਿਯਾਯੇਨਾਤਿ ਅਞ੍ਞੇਨਪਿ ਕਾਰਣੇਨ. ਬਹੁਕਾਰਾ, ਭਨ੍ਤੇਤਿਆਦਿਨਾ ਤਸ੍ਸਾ ਗੁਣਂ ਕਥੇਤ੍ਵਾ ਪੁਨ ਪਬ੍ਬਜ੍ਜਂ ਯਾਚਨ੍ਤੋ ਏਵਮਾਹ. ਸਤ੍ਥਾਪਿ ‘‘ਇਤ੍ਥਿਯੋ ਨਾਮ ਪਰਿਤ੍ਤਪਞ੍ਞਾ, ਏਕਯਾਚਿਤਮਤ੍ਤੇਨ ਪਬ੍ਬਜ੍ਜਾਯ ਅਨੁਞ੍ਞਾਤਾਯ ਨ ਮਮ ਸਾਸਨਂ ਗਰੁਂ ਕਤ੍ਵਾ ਗਣ੍ਹਿਸ੍ਸਨ੍ਤੀ’’ਤਿ ਤਿਕ੍ਖਤ੍ਤੁਂ ਪਟਿਕ੍ਖਿਪਿਤ੍ਵਾ ਇਦਾਨਿ ਗਰੁਂ ਕਤ੍ਵਾ ਗਾਹਾਪੇਤੁਕਾਮਤਾਯ ਸਚੇ, ਆਨਨ੍ਦ, ਮਹਾਪਜਾਪਤੀ ਗੋਤਮੀ ਅਟ੍ਠ ਗਰੁਧਮ੍ਮੇ ਪਟਿਗ੍ਗਣ੍ਹਾਤਿ, ਸਾਵ’ਸ੍ਸਾ ਹੋਤੁ ਉਪਸਮ੍ਪਦਾਤਿਆਦਿਮਾਹ. ਤਤ੍ਥ ਸਾਵਸ੍ਸਾਤਿ ਸਾ ਏਵ ਅਸ੍ਸਾ ਪਬ੍ਬਜ੍ਜਾਪਿ ਉਪਸਮ੍ਪਦਾਪਿ ਹੋਤੁ.

ਤਦਹੂਪਸਮ੍ਪਨ੍ਨਸ੍ਸਾਤਿ ਤਂਦਿਵਸਂ ਉਪਸਮ੍ਪਨ੍ਨਸ੍ਸ. ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਤ੍ਤਬ੍ਬਨ੍ਤਿ ਓਮਾਨਾਤਿਮਾਨੇ ਅਕਤ੍ਵਾ ਪਞ੍ਚਪਤਿਟ੍ਠਿਤੇਨ ਅਭਿਵਾਦਨਂ, ਆਸਨਾ ਪਚ੍ਚੁਟ੍ਠਾਯ ਪਚ੍ਚੁਗ੍ਗਮਨਵਸੇਨ ਪਚ੍ਚੁਟ੍ਠਾਨਂ, ਦਸਨਖੇ ਸਮੋਧਾਨੇਤ੍ਵਾ ਅਞ੍ਜਲਿਕਮ੍ਮਂ, ਆਸਨਪਞ੍ਞਾਪਨਬੀਜਨਾਦਿਕਂ ਅਨੁਚ੍ਛਵਿਕਕਮ੍ਮਸਙ੍ਖਾਤਂ ਸਾਮੀਚਿਕਮ੍ਮਞ੍ਚ ਕਤਬ੍ਬਂ. ਅਭਿਕ੍ਖੁਕੇ ਆਵਾਸੇਤਿ ਯਤ੍ਥ ਵਸਨ੍ਤਿਯਾ ਅਨਨ੍ਤਰਾਯੇਨ ਓਵਾਦਤ੍ਥਾਯ ਉਪਸਙ੍ਕਮਨਟ੍ਠਾਨੇ ਓਵਾਦਦਾਯਕੋ ਆਚਰਿਯੋ ਨਤ੍ਥਿ, ਅਯਂ ਅਭਿਕ੍ਖੁਕੋ ਆਵਾਸੋ ਨਾਮ. ਏਵਰੂਪੇ ਆਵਾਸੇ ਵਸ੍ਸਂ ਨ ਉਪਗਨ੍ਤਬ੍ਬਂ. ਅਨ੍ਵਡ੍ਢਮਾਸਨ੍ਤਿ ਅਨੁਪੋਸਥਿਕਂ. ਓਵਾਦੂਪਸਙ੍ਕਮਨਨ੍ਤਿ ਓਵਾਦਤ੍ਥਾਯ ਉਪਸਙ੍ਕਮਨਂ. ਦਿਟ੍ਠੇਨਾਤਿ ਚਕ੍ਖੁਨਾ ਦਿਟ੍ਠੇਨ. ਸੁਤੇਨਾਤਿ ਸੋਤੇਨ ਸੁਤੇਨ. ਪਰਿਸਙ੍ਕਾਯਾਤਿ ਦਿਟ੍ਠਸੁਤਵਸੇਨ ਪਰਿਸਙ੍ਕਿਤੇਨ. ਗਰੁਧਮ੍ਮਨ੍ਤਿ ਗਰੁਕਂ ਸਙ੍ਘਾਦਿਸੇਸਾਪਤ੍ਤਿਂ. ਪਕ੍ਖਮਾਨਤ੍ਤਨ੍ਤਿ ਅਨੂਨਾਨਿ ਪਨ੍ਨਰਸ ਦਿਵਸਾਨਿ ਮਾਨਤ੍ਤਂ. ਛਸੁ ਧਮ੍ਮੇਸੂਤਿ ਵਿਕਾਲਭੋਜਨਚ੍ਛਟ੍ਠੇਸੁ ਸਿਕ੍ਖਾਪਦੇਸੁ. ਸਿਕ੍ਖਿਤਸਿਕ੍ਖਾਯਾਤਿ ਏਕਸਿਕ੍ਖਮ੍ਪਿ ਅਖਣ੍ਡਂ ਕਤ੍ਵਾ ਪੂਰਿਤਸਿਕ੍ਖਾਯ. ਅਕ੍ਕੋਸਿਤਬ੍ਬੋ ਪਰਿਭਾਸਿਤਬ੍ਬੋਤਿ ਦਸਨ੍ਨਂ ਅਕ੍ਕੋਸਵਤ੍ਥੂਨਂ ਅਞ੍ਞਤਰੇਨ ਅਕ੍ਕੋਸਵਤ੍ਥੁਨਾ ਨ ਅਕ੍ਕੋਸਿਤਬ੍ਬੋ, ਭਯੂਪਦਂਸਨਾਯ ਯਾਯ ਕਾਯਚਿ ਪਰਿਭਾਸਾਯ ਨ ਪਰਿਭਾਸਿਤਬ੍ਬੋ.

ਓਵਟੋ ਭਿਕ੍ਖੁਨੀਨਂ ਭਿਕ੍ਖੂਸੁ ਵਚਨਪਥੋਤਿ ਓਵਾਦਾਨੁਸਾਸਨਧਮ੍ਮਕਥਾਸਙ੍ਖਾਤੋ ਵਚਨਪਥੋ ਭਿਕ੍ਖੁਨੀਨਂ ਭਿਕ੍ਖੂਸੁ ਓਵਰਿਤੋ ਪਿਹਿਤੋ, ਨ ਭਿਕ੍ਖੁਨਿਯਾ ਕੋਚਿ ਭਿਕ੍ਖੁ ਓਵਦਿਤਬ੍ਬੋ ਅਨੁਸਾਸਿਤਬ੍ਬੋ ਵਾ ‘‘ਭਨ੍ਤੇ, ਪੋਰਾਣਕਤ੍ਥੇਰਾ ਇਦਂ ਚੀਵਰਵਤ੍ਤਂ ਪੂਰਯਿਂਸੂ’’ਤਿ ਏਵਂ ਪਨ ਪਵੇਣਿਵਸੇਨ ਕਥੇਤੁਂ ਵਟ੍ਟਤਿ. ਅਨੋਵਟੋ ਭਿਕ੍ਖੂਨਂ ਭਿਕ੍ਖੁਨੀਸੁ ਵਚਨਪਥੋਤਿ ਭਿਕ੍ਖੂਨਂ ਪਨ ਭਿਕ੍ਖੁਨੀਸੁ ਵਚਨਪਥੋ ਅਨਿਵਾਰਿਤੋ, ਯਥਾਰੁਚਿ ਓਵਦਿਤੁਂ ਅਨੁਸਾਸਿਤੁਂ ਧਮ੍ਮਕਥਂ ਕਥੇਤੁਨ੍ਤਿ ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨੇਸਾ ਗਰੁਧਮ੍ਮਕਥਾ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ (ਪਾਚਿ. ਅਟ੍ਠ. ੧੪੮) ਵੁਤ੍ਤਨਯੇਨੇਵ ਵੇਦਿਤਬ੍ਬਾ.

ਇਮੇ ਪਨ ਅਟ੍ਠ ਗਰੁਧਮ੍ਮੇ ਸਤ੍ਥੁ ਸਨ੍ਤਿਕੇ ਉਗ੍ਗਹੇਤ੍ਵਾ ਥੇਰੇਨ ਅਤ੍ਤਨੋ ਆਰੋਚਿਯਮਾਨੇ ਸੁਤ੍ਵਾਵ ਮਹਾਪਜਾਪਤਿਯਾ ਤਾਵ ਮਹਨ੍ਤਂ ਦੋਮਨਸ੍ਸਂ ਖਣੇਨ ਪਟਿਪ੍ਪਸ੍ਸਮ੍ਭਿ, ਅਨੋਤਤ੍ਤਦਹਤੋ ਆਭਤੇਨ ਸੀਤੁਦਕਸ੍ਸ ਘਟਸਤੇਨ ਮਤ੍ਥਕੇ ਪਰਿਸਿਤ੍ਤਾ ਵਿਯ ਵਿਗਤਪਰਿਲ਼ਾਹਾ ਅਤ੍ਤਮਨਾ ਹੁਤ੍ਵਾ ਗਰੁਧਮ੍ਮਪਟਿਗ੍ਗਹਣੇਨ ਉਪ੍ਪਨ੍ਨਪੀਤਿਪਾਮੋਜ੍ਜਂ ਆਵਿਕਰੋਨ੍ਤੀ ਸੇਯ੍ਯਥਾਪਿ, ਭਨ੍ਤੇਤਿਆਦਿਕਂ ਉਦਾਨਂ ਉਦਾਨੇਸਿ.

ਕੁਮ੍ਭਤ੍ਥੇਨਕੇਹੀਤਿ ਕੁਮ੍ਭੇ ਦੀਪਂ ਜਾਲੇਤ੍ਵਾ ਤੇਨ ਆਲੋਕੇਨ ਪਰਘਰੇ ਭਣ੍ਡਂ ਵਿਚਿਨਿਤ੍ਵਾ ਥੇਨਕਚੋਰੇਹਿ. ਸੇਤਟ੍ਠਿਕਾ ਨਾਮ ਰੋਗਜਾਤੀਤਿ ਏਕੋ ਪਾਣਕੋ ਨਾਲ਼ਮਜ੍ਝਗਤਂ ਕਣ੍ਡਂ ਵਿਜ੍ਝਤਿ, ਯੇਨ ਵਿਦ੍ਧਾ ਕਣ੍ਡਾ ਨਿਕ੍ਖਨ੍ਤਮ੍ਪਿ ਸਾਲਿਸੀਸਂ ਖੀਰਂ ਗਹੇਤੁਂ ਨ ਸਕ੍ਕੋਤਿ. ਮਞ੍ਜਿਟ੍ਠਿਕਾ ਨਾਮ ਰੋਗਜਾਤੀਤਿ ਉਚ੍ਛੂਨਂ ਅਨ੍ਤੋਰਤ੍ਤਭਾਵੋ.

ਮਹਤੋ ਤਲ਼ਾਕਸ੍ਸ ਪਟਿਕਚ੍ਚੇਵ ਆਲ਼ਿਨ੍ਤਿ ਇਮਿਨਾ ਪਨ ਏਤਮਤ੍ਥਂ ਦਸ੍ਸੇਤਿ – ਯਥਾ ਮਹਤੋ ਤਲ਼ਾਕਸ੍ਸ ਪਾਲ਼ਿਯਾ ਅਬਦ੍ਧਾਯਪਿ ਕਿਞ੍ਚਿ ਉਦਕਂ ਤਿਟ੍ਠਤੇਵ, ਪਠਮਮੇਵ ਬਦ੍ਧਾਯ ਪਨ ਯਂ ਅਬਦ੍ਧਪਚ੍ਚਯਾ ਨ ਤਿਟ੍ਠੇਯ੍ਯ, ਤਮ੍ਪਿ ਤਿਟ੍ਠੇਯ੍ਯ, ਏਵਮੇਵ ਯੇ ਇਮੇ ਅਨੁਪ੍ਪਨ੍ਨੇ ਵਤ੍ਥੁਸ੍ਮਿਂ ਪਟਿਕਚ੍ਚੇਵ ਅਨਤਿਕ੍ਕਮਨਤ੍ਥਾਯ ਗਰੁਧਮ੍ਮਾ ਪਞ੍ਞਤ੍ਤਾ, ਤੇਸੁ ਅਪਞ੍ਞਤ੍ਤੇਸੁ ਮਾਤੁਗਾਮਸ੍ਸ ਪਬ੍ਬਜਿਤਤ੍ਤਾ ਪਞ੍ਚ ਵਸ੍ਸਸਤਾਨਿ ਸਦ੍ਧਮ੍ਮੋ ਤਿਟ੍ਠੇਯ੍ਯ. ਪਟਿਕਚ੍ਚੇਵ ਪਞ੍ਞਤ੍ਤਤ੍ਤਾ ਪਨ ਅਪਰਾਨਿਪਿ ਪਞ੍ਚ ਵਸ੍ਸਸਤਾਨਿ ਠਸ੍ਸਤੀਤਿ ਏਵਂ ਪਠਮਂ ਵੁਤ੍ਤਵਸ੍ਸਸਹਸ੍ਸਮੇਵ ਠਸ੍ਸਤਿ. ਵਸ੍ਸਸਹਸ੍ਸਨ੍ਤਿ ਚੇਤਂ ਪਟਿਸਮ੍ਭਿਦਾਪਭੇਦਪ੍ਪਤ੍ਤਖੀਣਾਸਵਾਨਂ ਵਸੇਨੇਵ ਵੁਤ੍ਤਂ, ਤਤੋ ਪਨ ਉਤ੍ਤਰਿਪਿ ਸੁਕ੍ਖਵਿਪਸ੍ਸਕਖੀਣਾਸਵਵਸੇਨ ਵਸ੍ਸਸਹਸ੍ਸਂ, ਅਨਾਗਾਮਿਵਸੇਨ ਵਸ੍ਸਸਹਸ੍ਸਂ, ਸਕਦਾਗਾਮਿਵਸੇਨ ਵਸ੍ਸਸਹਸ੍ਸਂ, ਸੋਤਾਪਨ੍ਨਵਸੇਨ ਵਸ੍ਸਸਹਸ੍ਸਨ੍ਤਿ ਏਵਂ ਪਞ੍ਚਵਸ੍ਸਸਹਸ੍ਸਾਨਿ ਪਟਿਵੇਧਸਦ੍ਧਮ੍ਮੋ ਠਸ੍ਸਤਿ. ਪਰਿਯਤ੍ਤਿਧਮ੍ਮੋਪਿ ਤਾਨਿਯੇਵ. ਨ ਹਿ ਪਰਿਯਤ੍ਤਿਯਾ ਅਸਤਿ ਪਟਿਵੇਧੋ ਅਤ੍ਥਿ, ਨਾਪਿ ਪਰਿਯਤ੍ਤਿਯਾ ਸਤਿ ਪਟਿਵੇਧੋ ਨ ਹੋਤਿ. ਲਿਙ੍ਗਂ ਪਨ ਪਰਿਯਤ੍ਤਿਯਾ ਅਨ੍ਤਰਹਿਤਾਯਪਿ ਚਿਰਂ ਪਵਤ੍ਤਿਸ੍ਸਤੀਤਿ.

੨. ਓਵਾਦਸੁਤ੍ਤਵਣ੍ਣਨਾ

੫੨. ਦੁਤਿਯੇ ਬਹੁਸ੍ਸੁਤੋਤਿ ਇਧ ਸਕਲਸ੍ਸਪਿ ਬੁਦ੍ਧਵਚਨਸ੍ਸ ਵਸੇਨ ਬਹੁਸ੍ਸੁਤਭਾਵੋ ਵੇਦਿਤਬ੍ਬੋ. ਗਰੁਧਮ੍ਮਨ੍ਤਿ ਕਾਯਸਂਸਗ੍ਗਂ. ਅਯਮੇਤ੍ਥ ਸਙ੍ਖੇਪੋ. ਭਿਕ੍ਖੁਨੋਵਾਦਕਵਿਨਿਚ੍ਛਯੋ ਪਨ ਸਮਨ੍ਤਪਾਸਾਦਿਕਾਯ (ਪਾਚਿ. ਅਟ੍ਠ. ੧੪੪ ਆਦਯੋ) ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

੩. ਸਂਖਿਤ੍ਤਸੁਤ੍ਤਵਣ੍ਣਨਾ

੫੩. ਤਤਿਯੇ ਸਰਾਗਾਯਾਤਿ ਸਰਾਗਤ੍ਥਾਯ. ਵਿਰਾਗਾਯਾਤਿ ਵਿਰਜ੍ਜਨਤ੍ਥਾਯ. ਸਂਯੋਗਾਯਾਤਿ ਵਟ੍ਟੇ ਸਂਯੋਗਤ੍ਥਾਯ. ਵਿਸਂਯੋਗਾਯਾਤਿ ਵਟ੍ਟੇ ਵਿਸਂਯੋਗਭਾਵਤ੍ਥਾਯ. ਆਚਯਾਯਾਤਿ ਵਟ੍ਟਸ੍ਸ ਵਡ੍ਢਨਤ੍ਥਾਯ. ਨੋ ਅਪਚਯਾਯਾਤਿ ਨ ਵਟ੍ਟਵਿਦ੍ਧਂਸਨਤ੍ਥਾਯ. ਦੁਬ੍ਭਰਤਾਯਾਤਿ ਦੁਪ੍ਪੋਸਨਤ੍ਥਾਯ. ਨੋ ਸੁਭਰਤਾਯਾਤਿ ਨ ਸੁਖਪੋਸਨਤ੍ਥਾਯ. ਇਮਸ੍ਮਿਂ ਸੁਤ੍ਤੇ ਪਠਮਵਾਰੇਨ ਵਟ੍ਟਂ ਕਥਿਤਂ, ਦੁਤਿਯਵਾਰੇਨ ਵਿਵਟ੍ਟਂ ਕਥਿਤਂ. ਇਮਿਨਾ ਚ ਪਨ ਓਵਾਦੇਨ ਗੋਤਮੀ ਅਰਹਤ੍ਤਂ ਪਤ੍ਤਾਤਿ.

੪. ਦੀਘਜਾਣੁਸੁਤ੍ਤਵਣ੍ਣਨਾ

੫੪. ਚਤੁਤ੍ਥੇ ਬ੍ਯਗ੍ਘਪਜ੍ਜਾਤਿ ਇਦਮਸ੍ਸ ਪਵੇਣਿ ਨਾਮ ਵਸੇਨ ਆਲਪਨਂ. ਤਸ੍ਸ ਹਿ ਪੁਬ੍ਬਪੁਰਿਸਾ ਬ੍ਯਗ੍ਘਪਥੇ ਜਾਤਾਤਿ ਤਸ੍ਮਿਂ ਕੁਲੇ ਮਨੁਸ੍ਸਾ ਬ੍ਯਗ੍ਘਪਜ੍ਜਾਤਿ ਵੁਚ੍ਚਨ੍ਤਿ. ਇਸ੍ਸਤ੍ਥੇਨਾਤਿ ਇਸ੍ਸਾਸਕਮ੍ਮੇਨ. ਤਤ੍ਰੁਪਾਯਾਯਾਤਿ ‘‘ਇਮਸ੍ਮਿਂ ਕਾਲੇ ਇਦਂ ਨਾਮ ਕਾਤੁਂ ਵਟ੍ਟਤੀ’’ਤਿ ਜਾਨਨੇ ਉਪਾਯਭੂਤਾਯ. ਵੁਦ੍ਧਸੀਲਿਨੋਤਿ ਵਡ੍ਢਿਤਸੀਲਾ ਵੁਦ੍ਧਸਮਾਚਾਰਾ. ਆਯਨ੍ਤਿ ਆਗਮਨਂ. ਨਾਚ੍ਚੋਗਾਲ਼੍ਹਨ੍ਤਿ ਨਾਤਿਮਹਨ੍ਤਂ. ਨਾਤਿਹੀਨਨ੍ਤਿ ਨਾਤਿਕਸਿਰਂ. ਪਰਿਯਾਦਾਯਾਤਿ ਗਹੇਤ੍ਵਾ ਖੇਪੇਤ੍ਵਾ. ਤਤ੍ਥ ਯਸ੍ਸ ਵਯਤੋ ਦਿਗੁਣੋ ਆਯੋ, ਤਸ੍ਸ ਵਯੋ ਆਯਂ ਪਰਿਯਾਦਾਤੁਂ ਨ ਸਕ੍ਕੋਤਿ.

‘‘ਚਤੁਧਾ ਵਿਭਜੇ ਭੋਗੇ, ਪਣ੍ਡਿਤੋ ਘਰਮਾਵਸਂ;

ਏਕੇਨ ਭੋਗੇ ਭੁਞ੍ਜੇਯ੍ਯ, ਦ੍ਵੀਹਿ ਕਮ੍ਮਂ ਪਯੋਜਯੇ;

ਚਤੁਤ੍ਥਞ੍ਚ ਨਿਧਾਪੇਯ੍ਯ, ਆਪਦਾਸੁ ਭਵਿਸ੍ਸਤੀ’’ਤਿ. (ਦੀ. ਨਿ. ੩.੨੬੫) –

ਏਵਂ ਪਟਿਪਜ੍ਜਤੋ ਪਨ ਵਯੋ ਆਯਂ ਪਰਿਯਾਦਾਤੁਂ ਨ ਸਕ੍ਕੋਤਿਯੇਵ.

ਉਦੁਮ੍ਬਰਖਾਦੀਵਾਤਿ ਯਥਾ ਉਦੁਮ੍ਬਰਾਨਿ ਖਾਦਿਤੁਕਾਮੇਨ ਪਕ੍ਕੇ ਉਦੁਮ੍ਬਰਰੁਕ੍ਖੇ ਚਾਲਿਤੇ ਏਕਪ੍ਪਹਾਰੇਨੇਵ ਬਹੂਨਿ ਫਲਾਨਿ ਪਤਨ੍ਤਿ, ਸੋ ਖਾਦਿਤਬ੍ਬਯੁਤ੍ਤਕਾਨਿ ਖਾਦਿਤ੍ਵਾ ਇਤਰਾਨਿ ਬਹੁਤਰਾਨਿ ਪਹਾਯ ਗਚ੍ਛਤਿ, ਏਵਮੇਵਂ ਯੋ ਆਯਤੋ ਵਯਂ ਬਹੁਤਰਂ ਕਤ੍ਵਾ ਵਿਪ੍ਪਕਿਰਨ੍ਤੋ ਭੋਗੇ ਪਰਿਭੁਞ੍ਜਤਿ, ਸੋ ‘‘ਉਦੁਮ੍ਬਰਖਾਦਿਕਂਵਾਯਂ ਕੁਲਪੁਤ੍ਤੋ ਭੋਗੇ ਖਾਦਤੀ’’ਤਿ ਵੁਚ੍ਚਤਿ. ਅਜੇਟ੍ਠਮਰਣਨ੍ਤਿ ਅਨਾਯਕਮਰਣਂ. ਸਮਂ ਜੀਵਿਕਂ ਕਪ੍ਪੇਤੀਤਿ ਸਮ੍ਮਾ ਜੀਵਿਕਂ ਕਪ੍ਪੇਤਿ. ਸਮਜੀਵਿਤਾਤਿ ਸਮਜੀਵਿਤਾਯ ਜੀਵਿਤਾ. ਅਪਾਯਮੁਖਾਨੀਤਿ ਵਿਨਾਸਸ੍ਸ ਠਾਨਾਨਿ.

ਉਟ੍ਠਾਤਾ ਕਮ੍ਮਧੇਯ੍ਯੇਸੂਤਿ ਕਮ੍ਮਕਰਣਟ੍ਠਾਨੇਸੁ ਉਟ੍ਠਾਨਵੀਰਿਯਸਮ੍ਪਨ੍ਨੋ. ਵਿਧਾਨਵਾਤਿ ਵਿਦਹਨਸਮ੍ਪਨ੍ਨੋ. ਸੋਤ੍ਥਾਨਂ ਸਮ੍ਪਰਾਯਿਕਨ੍ਤਿ ਸੋਤ੍ਥਿਭੂਤਂ ਸਮ੍ਪਰਾਯਿਕਂ. ਸਚ੍ਚਨਾਮੇਨਾਤਿ ਬੁਦ੍ਧਤ੍ਤਾਯੇਵ ਬੁਦ੍ਧੋਤਿ ਏਵਂ ਅਵਿਤਥਨਾਮੇਨ. ਚਾਗੋ ਪੁਞ੍ਞਂ ਪਵਡ੍ਢਤੀਤਿ ਚਾਗੋ ਚ ਸੇਸਪੁਞ੍ਞਞ੍ਚ ਪਵਡ੍ਢਤਿ. ਇਮਸ੍ਮਿਂ ਸੁਤ੍ਤੇ ਸਦ੍ਧਾਦਯੋ ਮਿਸ੍ਸਕਾ ਕਥਿਤਾ. ਪਞ੍ਚਮਂ ਉਤ੍ਤਾਨਮੇਵ.

੬. ਭਯਸੁਤ੍ਤਵਣ੍ਣਨਾ

੫੬. ਛਟ੍ਠੇ ਗਬ੍ਭੋਤਿ ਗਬ੍ਭਵਾਸੋ. ਦਿਟ੍ਠਧਮ੍ਮਿਕਾਪੀਤਿ ਸਨ੍ਦਿਟ੍ਠਿਕਾ ਗਬ੍ਭਵਾਸਸਦਿਸਾ ਪੁਨਪਿ ਮਨੁਸ੍ਸਗਬ੍ਭਾ. ਸਮ੍ਪਰਾਯਿਕਾਪੀਤਿ ਠਪੇਤ੍ਵਾ ਮਨੁਸ੍ਸਗਬ੍ਭੇ ਸੇਸਗਬ੍ਭਾ. ਉਭਯਂ ਏਤੇ ਕਾਮਾ ਪਵੁਚ੍ਚਨ੍ਤੀਤਿ ਭਯਞ੍ਚ ਦੁਕ੍ਖਞ੍ਚ, ਭਯਞ੍ਚ ਰੋਗੋ ਚ, ਭਯਞ੍ਚ ਗਣ੍ਡੋ ਚ, ਭਯਞ੍ਚ ਸਲ੍ਲਞ੍ਚ, ਭਯਞ੍ਚ ਸਙ੍ਗੋ ਚ, ਭਯਞ੍ਚ ਪਙ੍ਕੋ ਚ, ਭਯਞ੍ਚ ਗਬ੍ਭੋ ਚਾਤਿ ਏਵਂ ਉਭਯਂ ਏਤੇ ਕਾਮਾ ਪਵੁਚ੍ਚਨ੍ਤਿ. ਸਾਤਰੂਪੇਨਾਤਿ ਕਾਮਸੁਖੇਨ. ਪਲਿਪਥਨ੍ਤਿ ਵਟ੍ਟਪਲਿਪਥਂ. ਅਤਿਕ੍ਕਮ੍ਮਾਤਿ ਇਮਸ੍ਮਿਂ ਠਾਨੇ ਵਿਪਸ੍ਸਨਂ ਵਡ੍ਢੇਤ੍ਵਾ ਅਸ੍ਸ ਭਿਕ੍ਖੁਨੋ ਅਰਹਤ੍ਤਪ੍ਪਤ੍ਤਭਾਵੋ ਗਹਿਤੋ. ਏਵਰੂਪਂ ਪਜਂ ਜਾਤਿਜਰੂਪੇਤਂ ਤੀਸੁ ਭਵੇਸੁ ਫਨ੍ਦਮਾਨਂ ਅਵੇਕ੍ਖਤੀਤਿ ਸੁਤ੍ਤੇ ਵਟ੍ਟਂ ਕਥੇਤ੍ਵਾ ਗਾਥਾਸੁ ਵਿਵਟ੍ਟਂ ਕਥਿਤਨ੍ਤਿ. ਸਤ੍ਤਮਟ੍ਠਮਾਨਿ ਉਤ੍ਤਾਨਤ੍ਥਾਨੇਵ.

੯-੧੦. ਪੁਗ੍ਗਲਸੁਤ੍ਤਦ੍ਵਯਵਣ੍ਣਨਾ

੫੯-੬੦. ਨਵਮੇ ਉਜੁਭੂਤੋਤਿ ਕਾਯਵਙ੍ਕਾਦੀਨਂ ਅਭਾਵੇਨ ਉਜੁਕੋ. ਪਞ੍ਞਾਸੀਲਸਮਾਹਿਤੋਤਿ ਪਞ੍ਞਾਯ ਚ ਸੀਲੇਨ ਚ ਸਮਨ੍ਨਾਗਤੋ. ਯਜਮਾਨਾਨਨ੍ਤਿ ਦਾਨਂ ਦਦਨ੍ਤਾਨਂ. ਪੁਞ੍ਞਪੇਕ੍ਖਾਨਨ੍ਤਿ ਪੁਞ੍ਞਂ ਓਲੋਕੇਨ੍ਤਾਨਂ ਗਵੇਸਨ੍ਤਾਨਂ. ਓਪਧਿਕਨ੍ਤਿ ਉਪਧਿਵਿਪਾਕਂ, ਓਪਧਿਭੂਤਂ ਠਾਨਂ ਅਪ੍ਪਮਾਣਂ. ਦਸਮੇ ਸਮੁਕ੍ਕਟ੍ਠੋਤਿ ਉਕ੍ਕਟ੍ਠੋ ਉਤ੍ਤਮੋ. ਸਤ੍ਤਾਨਨ੍ਤਿ ਸਬ੍ਬਸਤ੍ਤਾਨਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਗੋਤਮੀਵਗ੍ਗੋ ਛਟ੍ਠੋ.

(੭) ੨. ਭੂਮਿਚਾਲਵਗ੍ਗੋ

੧. ਇਚ੍ਛਾਸੁਤ੍ਤਵਣ੍ਣਨਾ

੬੧. ਸਤ੍ਤਮਸ੍ਸ ਪਠਮੇ ਪਵਿਵਿਤ੍ਤਸ੍ਸਾਤਿ ਕਾਯਵਿਵੇਕੇਨ ਵਿਵਿਤ੍ਤਸ੍ਸ. ਨਿਰਾਯਤ੍ਤਵੁਤ੍ਤਿਨੋਤਿ ਕਤ੍ਥਚਿ ਅਨਾਯਤ੍ਤਵੁਤ੍ਤਿਨੋ ਵਿਪਸ੍ਸਨਾਕਮ੍ਮਿਕਸ੍ਸ. ਲਾਭਾਯਾਤਿ ਚਤੁਪਚ੍ਚਯਲਾਭਾਯ. ਸੋਚੀ ਚ ਪਰਿਦੇਵੀ ਚਾਤਿ ਸੋਕੀ ਚ ਪਰਿਦੇਵੀ ਚ. ਸੋਚਿਚ੍ਚ ਪਰਿਦੇਵਿਚ੍ਚਾਤਿਪਿ ਪਾਠੋ. ਚੁਤੋ ਚ ਸਦ੍ਧਮ੍ਮਾਤਿ ਤਂਖਣਂਯੇਵ ਵਿਪਸ੍ਸਨਾਸਦ੍ਧਮ੍ਮਾ ਚੁਤੋ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.

੨. ਅਲਂਸੁਤ੍ਤਵਣ੍ਣਨਾ

੬੨. ਦੁਤਿਯੇ ਅਲਂ ਅਤ੍ਤਨੋ ਅਲਂ ਪਰੇਸਨ੍ਤਿ ਅਤ੍ਤਨੋ ਚ ਪਰੇਸਞ੍ਚ ਹਿਤਪਟਿਪਤ੍ਤਿਯਂ ਸਮਤ੍ਥੋ ਪਰਿਯਤ੍ਤੋ ਅਨੁਚ੍ਛਵਿਕੋ. ਖਿਪ੍ਪਨਿਸਨ੍ਤੀਤਿ ਖਿਪ੍ਪਂ ਉਪਧਾਰੇਤਿ, ਖਨ੍ਧਧਾਤੁਆਯਤਨਾਦੀਸੁ ਕਥਿਯਮਾਨੇਸੁ ਤੇ ਧਮ੍ਮੇ ਖਿਪ੍ਪਂ ਜਾਨਾਤੀਤਿ ਅਤ੍ਥੋ. ਇਮਸ੍ਮਿਂ ਸੁਤ੍ਤੇ ਸਮਥਵਿਪਸ੍ਸਨਾ ਕਥਿਤਾ. ਪੁਗ੍ਗਲਜ੍ਝਾਸਯੇਨ ਪਨ ਦੇਸਨਾਵਿਲਾਸੇਨ ਚੇਤਂ ਮਤ੍ਥਕਤੋ ਪਟ੍ਠਾਯ ਹੇਟ੍ਠਾ ਓਤਰਨ੍ਤਂ ਕਥਿਤਨ੍ਤਿ.

੩. ਸਂਖਿਤ੍ਤਸੁਤ੍ਤਵਣ੍ਣਨਾ

੬੩. ਤਤਿਯੇ ਏਵਮੇਵਾਤਿ ਨਿਕ੍ਕਾਰਣੇਨੇਵ. ਯਥਾ ਵਾ ਅਯਂ ਯਾਚਤਿ, ਏਵਮੇਵ. ਮੋਘਪੁਰਿਸਾਤਿ ਮੂਲ਼੍ਹਪੁਰਿਸਾ ਤੁਚ੍ਛਪੁਰਿਸਾ. ਅਜ੍ਝੇਸਨ੍ਤੀਤਿ ਯਾਚਨ੍ਤਿ. ਅਨੁਬਨ੍ਧਿਤਬ੍ਬਨ੍ਤਿ ਇਰਿਯਾਪਥਾਨੁਗਮਨੇਨ ਅਨੁਬਨ੍ਧਿਤਬ੍ਬਂ ਮਂ ਨ ਵਿਜਹਿਤਬ੍ਬਂ ਮਞ੍ਞਨ੍ਤਿ. ਆਜਾਨਨਤ੍ਥਂ ਅਪਸਾਦੇਨ੍ਤੋ ਏਵਮਾਹ. ਏਸ ਕਿਰ ਭਿਕ੍ਖੁ ਓਵਾਦੇ ਦਿਨ੍ਨੇਪਿ ਪਮਾਦਮੇਵ ਅਨੁਯੁਞ੍ਜਤਿ, ਧਮ੍ਮਂ ਸੁਤ੍ਵਾ ਤਤ੍ਥੇਵ ਵਸਤਿ, ਸਮਣਧਮ੍ਮਂ ਕਾਤੁਂ ਨ ਇਚ੍ਛਤਿ. ਤਸ੍ਮਾ ਭਗਵਾ ਏਵਂ ਅਪਸਾਦੇਤ੍ਵਾ ਪੁਨ ਯਸ੍ਮਾ ਸੋ ਅਰਹਤ੍ਤਸ੍ਸ ਉਪਨਿਸ੍ਸਯਸਮ੍ਪਨ੍ਨੋ, ਤਸ੍ਮਾ ਤਂ ਓਵਦਨ੍ਤੋ ਤਸ੍ਮਾਤਿਹ ਤੇ ਭਿਕ੍ਖੁ ਏਵਂ ਸਿਕ੍ਖਿਤਬ੍ਬਨ੍ਤਿਆਦਿਮਾਹ. ਤਤ੍ਥ ਅਜ੍ਝਤ੍ਤਂ ਮੇ ਚਿਤ੍ਤਂ ਠਿਤਂ ਭਵਿਸ੍ਸਤਿ ਸੁਸਣ੍ਠਿਤਂ, ਨ ਚ ਉਪ੍ਪਨ੍ਨਾ ਪਾਪਕਾ ਅਕੁਸਲਾ ਧਮ੍ਮਾ ਚਿਤ੍ਤਂ ਪਰਿਯਾਦਾਯ ਠਸ੍ਸਨ੍ਤੀਤਿ ਇਮਿਨਾ ਤਾਵਸ੍ਸ ਓਵਾਦੇਨ ਨਿਯਕਜ੍ਝਤ੍ਤਵਸੇਨ ਚਿਤ੍ਤੇਕਗ੍ਗਤਾਮਤ੍ਤੋ ਮੂਲਸਮਾਧਿ ਵੁਤ੍ਤੋ.

ਤਤੋ ‘‘ਏਤ੍ਤਕੇਨੇਵ ਸਨ੍ਤੁਟ੍ਠਿਂ ਅਨਾਪਜ੍ਜਿਤ੍ਵਾ ਏਵਂ ਸੋ ਸਮਾਧਿ ਵਡ੍ਢੇਤਬ੍ਬੋ’’ਤਿ ਦਸ੍ਸੇਤੁਂ ਯਤੋ ਖੋ ਤੇ ਭਿਕ੍ਖੁ ਅਜ੍ਝਤ੍ਤਂ ਚਿਤ੍ਤਂ ਠਿਤਂ ਹੋਤਿ ਸੁਸਣ੍ਠਿਤਂ, ਨ ਚ ਉਪ੍ਪਨ੍ਨਾ ਪਾਪਕਾ ਅਕੁਸਲਾ ਧਮ੍ਮਾ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤਿ, ਤਤੋ ਤੇ ਭਿਕ੍ਖੁ ਏਵਂ ਸਿਕ੍ਖਿਤਬ੍ਬਂ ‘‘ਮੇਤ੍ਤਾ ਮੇ ਚੇਤੋਵਿਮੁਤ੍ਤਿ ਭਾਵਿਤਾ ਭਵਿਸ੍ਸਤਿ…ਪੇ… ਸੁਸਮਾਰਦ੍ਧਾ’’ਤਿ ਏਵਮਸ੍ਸ ਮੇਤ੍ਤਾਵਸੇਨ ਭਾਵਨਂ ਵਡ੍ਢੇਤ੍ਵਾ ਪੁਨ ਯਤੋ ਖੋ ਤੇ ਭਿਕ੍ਖੁ ਅਯਂ ਸਮਾਧਿ ਏਵਂ ਭਾਵਿਤੋ ਹੋਤਿ ਬਹੁਲੀਕਤੋ, ਤਤੋ ਤ੍ਵਂ ਭਿਕ੍ਖੁ ਇਮਂ ਸਮਾਧਿਂ ਸਵਿਤਕ੍ਕਸਵਿਚਾਰਮ੍ਪਿ ਭਾਵੇਯ੍ਯਾਸੀਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ – ਯਦਾ ਤੇ ਭਿਕ੍ਖੁ ਅਯਂ ਮੂਲਸਮਾਧਿ ਏਵਂ ਮੇਤ੍ਤਾਵਸੇਨ ਭਾਵਿਤੋ ਹੋਤਿ, ਤਦਾ ਤ੍ਵਂ ਤਾਵਤਕੇਨਪਿ ਤੁਟ੍ਠਿਂ ਅਨਾਪਜ੍ਜਿਤ੍ਵਾਵ ਇਮਂ ਮੂਲਸਮਾਧਿਂ ਅਞ੍ਞੇਸੁਪਿ ਆਰਮ੍ਮਣੇਸੁ ਚਤੁਕ੍ਕਪਞ੍ਚਕਜ੍ਝਾਨਾਨਿ ਪਾਪਯਮਾਨੋ ‘‘ਸਵਿਤਕ੍ਕਸਵਿਚਾਰਮ੍ਪੀ’’ਤਿਆਦਿਨਾ ਨਯੇਨ ਭਾਵੇਯ੍ਯਾਸੀਤਿ.

ਏਵਂ ਵਤ੍ਵਾ ਚ ਪਨ ਅਵਸੇਸਬ੍ਰਹ੍ਮਵਿਹਾਰਪੁਬ੍ਬਙ੍ਗਮਮ੍ਪਿਸ੍ਸ ਅਞ੍ਞੇਸੁ ਆਰਮ੍ਮਣੇਸੁ ਚਤੁਕ੍ਕਪਞ੍ਚਕਜ੍ਝਾਨਭਾਵਨਂ ਕਰੇਯ੍ਯਾਸੀਤਿ ਦਸ੍ਸੇਨ੍ਤੋ ਯਤੋ ਖੋ ਤੇ ਭਿਕ੍ਖੁ ਅਯਂ ਸਮਾਧਿ ਏਵਂ ਭਾਵਿਤੋ ਹੋਤਿ ਸੁਭਾਵਿਤੋ, ਤਤੋ ਤੇ ਭਿਕ੍ਖੁ ਏਵਂ ਸਿਕ੍ਖਿਤਬ੍ਬਂ ‘‘ਕਰੁਣਾ ਮੇ ਚੇਤੋਵਿਮੁਤ੍ਤੀ’’ਤਿਆਦਿਮਾਹ. ਏਵਂ ਮੇਤ੍ਤਾਪੁਬ੍ਬਙ੍ਗਮਂ ਚਤੁਕ੍ਕਪਞ੍ਚਕਜ੍ਝਾਨਭਾਵਨਂ ਦਸ੍ਸੇਤ੍ਵਾ ਪੁਨ ਕਾਯਾਨੁਪਸ੍ਸਨਾਦਿਪੁਬ੍ਬਙ੍ਗਮਂ ਦਸ੍ਸੇਤੁਂ ਯਤੋ ਖੋ ਤੇ ਭਿਕ੍ਖੁ ਅਯਂ ਸਮਾਧਿ ਏਵਂ ਭਾਵਿਤੋ ਹੋਤਿ ਸੁਭਾਵਿਤੋ, ਤਤੋ ਤੇ ਭਿਕ੍ਖੁ ਏਵਂ ਸਿਕ੍ਖਿਤਬ੍ਬਂ ‘‘ਕਾਯੇ ਕਾਯਾਨੁਪਸ੍ਸੀ’’ਤਿਆਦਿਂ ਵਤ੍ਵਾ ਯਤੋ ਖੋ ਤੇ ਭਿਕ੍ਖੁ ਅਯਂ ਸਮਾਧਿ ਏਵਂ ਭਾਵਿਤੋ ਹੋਤਿ ਸੁਭਾਵਿਤੋ, ਤਤੋ ਤ੍ਵਂ ਭਿਕ੍ਖੁ ਯੇਨ ਯੇਨੇਵ ਗਗ੍ਘਸੀਤਿਆਦਿਮਾਹ. ਤਤ੍ਥ ਗਗ੍ਘਸੀਤਿ ਗਮਿਸ੍ਸਸਿ. ਫਾਸੁਂਯੇਵਾਤਿ ਇਮਿਨਾ ਅਰਹਤ੍ਤਂ ਦਸ੍ਸੇਤਿ. ਅਰਹਤ੍ਤਪ੍ਪਤ੍ਤੋ ਹਿ ਸਬ੍ਬਿਰਿਯਾਪਥੇਸੁ ਫਾਸੁ ਵਿਹਰਤਿ ਨਾਮ.

੪. ਗਯਾਸੀਸਸੁਤ੍ਤਵਣ੍ਣਨਾ

੬੪. ਚਤੁਤ੍ਥੇ ਏਤਦਵੋਚਾਤਿ ਅਤ੍ਤਨੋ ਪਧਾਨਭੂਮਿਯਂ ਉਪ੍ਪਨ੍ਨਂ ਵਿਤਕ੍ਕਂ ਭਿਕ੍ਖੁਸਙ੍ਘਸ੍ਸ ਆਰੋਚੇਤੁਂ – ‘‘ਪੁਬ੍ਬਾਹਂ, ਭਿਕ੍ਖਵੇ’’ਤਿਆਦਿਵਚਨਂ ਅਵੋਚ. ਓਭਾਸਨ੍ਤਿ ਦਿਬ੍ਬਚਕ੍ਖੁਞਾਣੋਭਾਸਂ. ਞਾਣਦਸ੍ਸਨਨ੍ਤਿ ਦਿਬ੍ਬਚਕ੍ਖੁਭੂਤਂ ਞਾਣਸਙ੍ਖਾਤਂ ਦਸ੍ਸਨਂ. ਸਨ੍ਨਿਵੁਤ੍ਥਪੁਬ੍ਬਨ੍ਤਿ ਏਕਤੋ ਵਸਿਤਪੁਬ੍ਬਂ. ਇਮਸ੍ਮਿਂ ਪਨ ਸੁਤ੍ਤੇ ਦਿਬ੍ਬਚਕ੍ਖੁਞਾਣਂ, ਇਦ੍ਧਿਵਿਧਞਾਣਂ, ਚੇਤੋਪਰਿਯਞਾਣਂ, ਯਥਾਕਮ੍ਮੁਪਗਞਾਣਂ, ਅਨਾਗਤਂਸਞਾਣਂ, ਪਚ੍ਚੁਪ੍ਪਨ੍ਨਂਸਞਾਣਂ, ਅਤੀਤਂਸਞਾਣਂ, ਪੁਬ੍ਬੇਨਿਵਾਸਞਾਣਨ੍ਤਿ ਇਮਾਨਿ ਤਾਵ ਅਟ੍ਠ ਞਾਣਾਨਿ ਪਾਲ਼ਿਯਂਯੇਵ ਆਗਤਾਨਿ, ਤੇਹਿ ਪਨ ਸਦ੍ਧਿਂ ਵਿਪਸ੍ਸਨਾਞਾਣਾਨਿ ਚਤ੍ਤਾਰਿ ਮਗ੍ਗਞਾਣਾਨਿ, ਚਤ੍ਤਾਰਿ ਫਲਞਾਣਾਨਿ, ਚਤ੍ਤਾਰਿ ਪਚ੍ਚਵੇਕ੍ਖਣਞਾਣਾਨਿ, ਚਤ੍ਤਾਰਿ ਪਟਿਸਮ੍ਭਿਦਾਞਾਣਾਨਿ ਛ ਅਸਾਧਾਰਣਞਾਣਾਨੀਤਿ ਏਤਾਨਿ ਞਾਣਾਨਿ ਸਮੋਧਾਨੇਤ੍ਵਾ ਕਥੇਨ੍ਤੇਨ ਏਵਂ ਇਦਂ ਸੁਤ੍ਤਂ ਕਥਿਤਂ ਨਾਮ ਹੋਤਿ.

੫. ਅਭਿਭਾਯਤਨਸੁਤ੍ਤਵਣ੍ਣਨਾ

੬੫. ਪਞ੍ਚਮੇ ਅਭਿਭਾਯਤਨਾਨੀਤਿ ਅਭਿਭਵਨਕਾਰਣਾਨਿ. ਕਿਂ ਅਭਿਭਵਨ੍ਤਿ? ਪਚ੍ਚਨੀਕਧਮ੍ਮੇਪਿ ਆਰਮ੍ਮਣਾਨਿਪਿ. ਤਾਨਿ ਹਿ ਪਟਿਪਕ੍ਖਭਾਵੇਨ ਪਚ੍ਚਨੀਕਧਮ੍ਮੇ ਅਭਿਭਵਨ੍ਤਿ, ਪੁਗ੍ਗਲਸ੍ਸ ਞਾਣੁਤ੍ਤਰਿਯਤਾਯ ਆਰਮ੍ਮਣਾਨਿ. ਅਜ੍ਝਤ੍ਤਂ ਰੂਪਸਞ੍ਞੀਤਿਆਦੀਸੁ ਪਨ ਅਜ੍ਝਤ੍ਤਰੂਪੇ ਪਰਿਕਮ੍ਮਵਸੇਨ ਅਜ੍ਝਤ੍ਤਂ ਰੂਪਸਞ੍ਞੀ ਨਾਮ ਹੋਤਿ. ਅਜ੍ਝਤ੍ਤਞ੍ਹਿ ਨੀਲਪਰਿਕਮ੍ਮਂ ਕਰੋਨ੍ਤੋ ਕੇਸੇ ਵਾ ਪਿਤ੍ਤੇ ਵਾ ਅਕ੍ਖਿਤਾਰਕਾਯ ਵਾ ਕਰੋਤਿ. ਪੀਤਪਰਿਕਮ੍ਮਂ ਕਰੋਨ੍ਤੋ ਮੇਦੇ ਵਾ ਛਵਿਯਾ ਵਾ ਹਤ੍ਥਤਲਪਾਦਤਲੇਸੁ ਵਾ ਅਕ੍ਖੀਨਂ ਪੀਤਟ੍ਠਾਨੇ ਵਾ ਕਰੋਤਿ. ਲੋਹਿਤਪਰਿਕਮ੍ਮਂ ਕਰੋਨ੍ਤੋ ਮਂਸੇ ਵਾ ਲੋਹਿਤੇ ਵਾ ਜਿਵ੍ਹਾਯ ਵਾ ਅਕ੍ਖੀਨਂ ਰਤ੍ਤਟ੍ਠਾਨੇ ਵਾ ਕਰੋਤਿ. ਓਦਾਤਪਰਿਕਮ੍ਮਂ ਕਰੋਨ੍ਤੋ ਅਟ੍ਠਿਮ੍ਹਿ ਵਾ ਦਨ੍ਤੇ ਵਾ ਨਖੇ ਵਾ ਅਕ੍ਖੀਨਂ ਸੇਤਟ੍ਠਾਨੇ ਵਾ ਕਰੋਤਿ. ਤਂ ਪਨ ਸੁਨੀਲਕਂ ਸੁਪੀਤਕਂ ਸੁਲੋਹਿਤਕਂ ਸੁਓਦਾਤਂ ਨ ਹੋਤਿ, ਅਵਿਸੁਦ੍ਧਮੇਵ ਹੋਤਿ.

ਏਕੋ ਬਹਿਦ੍ਧਾ ਰੂਪਾਨਿ ਪਸ੍ਸਤੀਤਿ ਯਸ੍ਸੇਵਂ ਪਰਿਕਮ੍ਮਂ ਅਜ੍ਝਤ੍ਤਂ ਉਪ੍ਪਨ੍ਨਂ ਹੋਤਿ, ਨਿਮਿਤ੍ਤਂ ਪਨ ਬਹਿਦ੍ਧਾ, ਸੋ ਏਵਂ ਅਜ੍ਝਤ੍ਤਂ ਪਰਿਕਮ੍ਮਸ੍ਸ ਬਹਿਦ੍ਧਾ ਚ ਅਪ੍ਪਨਾਯ ਵਸੇਨ ‘‘ਅਜ੍ਝਤ੍ਤਂ ਰੂਪਸਞ੍ਞੀ ਏਕੋ ਬਹਿਦ੍ਧਾ ਰੂਪਾਨਿ ਪਸ੍ਸਤੀ’’ਤਿ ਵੁਚ੍ਚਤਿ. ਪਰਿਤ੍ਤਾਨੀਤਿ ਅਵਡ੍ਢਿਤਾਨਿ. ਸੁਵਣ੍ਣਦੁਬ੍ਬਣ੍ਣਾਨੀਤਿ ਸੁਵਣ੍ਣਾਨਿ ਵਾ ਹੋਨ੍ਤੁ ਦੁਬ੍ਬਣ੍ਣਾਨਿ ਵਾ, ਪਰਿਤ੍ਤਵਸੇਨੇਵ ਇਦਂ ਅਭਿਭਾਯਤਨਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਤਾਨਿ ਅਭਿਭੁਯ੍ਯਾਤਿ ਯਥਾ ਨਾਮ ਸਮ੍ਪਨ੍ਨਗ੍ਗਹਣਿਕੋ ਕਟਚ੍ਛੁਮਤ੍ਤਂ ਭਤ੍ਤਂ ਲਭਿਤ੍ਵਾ ‘‘ਕਿਂ ਏਤ੍ਥ ਭੁਞ੍ਜਿਤਬ੍ਬਂ ਅਤ੍ਥੀ’’ਤਿ ਸਂਕਡ੍ਢਿਤ੍ਵਾ ਏਕਕਬਲ਼ਮੇਵ ਕਰੋਤਿ, ਏਵਮੇਵ ਞਾਣੁਤ੍ਤਰਿਕੋ ਪੁਗ੍ਗਲੋ ਵਿਸਦਞਾਣੋ ‘‘ਕਿਮੇਤ੍ਥ ਪਰਿਤ੍ਤਕੇ ਆਰਮ੍ਮਣੇ ਸਮਾਪਜ੍ਜਿਤਬ੍ਬਂ ਅਤ੍ਥਿ, ਨਾਯਂ ਮਮ ਭਾਰੋ’’ਤਿ ਤਾਨਿ ਰੂਪਾਨਿ ਅਭਿਭਵਿਤ੍ਵਾ ਸਮਾਪਜ੍ਜਤਿ, ਸਹ ਨਿਮਿਤ੍ਤੁਪ੍ਪਾਦੇਨੇਵੇਤ੍ਥ ਅਪ੍ਪਨਂ ਪਾਪੇਤੀਤਿ ਅਤ੍ਥੋ. ਜਾਨਾਮਿ ਪਸ੍ਸਾਮੀਤਿ ਇਮਿਨਾ ਪਨਸ੍ਸ ਆਭੋਗੋ ਕਥਿਤੋ. ਸੋ ਚ ਖੋ ਸਮਾਪਤ੍ਤਿਤੋ ਵੁਟ੍ਠਿਤਸ੍ਸ, ਨ ਅਨ੍ਤੋਸਮਾਪਤ੍ਤਿਯਂ. ਏਵਂਸਞ੍ਞੀ ਹੋਤੀਤਿ ਆਭੋਗਸਞ੍ਞਾਯਪਿ ਝਾਨਸਞ੍ਞਾਯਪਿ ਏਵਂਸਞ੍ਞੀ ਹੋਤਿ. ਅਭਿਭਵਨਸਞ੍ਞਾ ਹਿਸ੍ਸ ਅਨ੍ਤੋਸਮਾਪਤ੍ਤਿਯਮ੍ਪਿ ਅਤ੍ਥਿ, ਆਭੋਗਸਞ੍ਞਾ ਪਨ ਸਮਾਪਤ੍ਤਿਤੋ ਵੁਟ੍ਠਿਤਸ੍ਸੇਵ.

ਅਪ੍ਪਮਾਣਾਨੀਤਿ ਵਡ੍ਢਿਤਪ੍ਪਮਾਣਾਨਿ, ਮਹਨ੍ਤਾਨੀਤਿ ਅਤ੍ਥੋ. ਅਭਿਭੁਯ੍ਯਾਤਿ ਏਤ੍ਥ ਚ ਪਨ ਯਥਾ ਮਹਗ੍ਘਸੋ ਪੁਰਿਸੋ ਏਕਂ ਭਤ੍ਤਵਡ੍ਢਿਤਕਂ ਲਭਿਤ੍ਵਾ ‘‘ਅਞ੍ਞਾਪਿ ਹੋਤੁ, ਅਞ੍ਞਾਪਿ ਹੋਤੁ, ਕਿਂ ਏਸਾ ਮਯ੍ਹਂ ਕਰਿਸ੍ਸਤੀ’’ਤਿ ਨ ਤਂ ਮਹਨ੍ਤਤੋ ਪਸ੍ਸਤਿ, ਏਵਮੇਵ ਞਾਣੁਤ੍ਤਰੋ ਪੁਗ੍ਗਲੋ ਵਿਸਦਞਾਣੋ ‘‘ਕਿਂ ਏਤ੍ਥ ਸਮਾਪਜ੍ਜਿਤਬ੍ਬਂ, ਨਯਿਦਂ ਅਪ੍ਪਮਾਣਂ, ਨ ਮਯ੍ਹਂ ਚਿਤ੍ਤੇਕਗ੍ਗਤਾਕਰਣੇ ਭਾਰੋ ਅਤ੍ਥੀ’’ਤਿ ਅਭਿਭਵਿਤ੍ਵਾ ਸਮਾਪਜ੍ਜਤਿ, ਸਹ ਨਿਮਿਤ੍ਤੁਪ੍ਪਾਦਨੇਵੇਤ੍ਥ ਅਪ੍ਪਨਂ ਪਾਪੇਤੀਤਿ ਅਤ੍ਥੋ.

ਅਜ੍ਝਤ੍ਤਂ ਅਰੂਪਸਞ੍ਞੀਤਿ ਅਲਾਭਿਤਾਯ ਵਾ ਅਨਤ੍ਥਿਕਤਾਯ ਵਾ ਅਜ੍ਝਤ੍ਤਰੂਪੇ ਪਰਿਕਮ੍ਮਸਞ੍ਞਾਵਿਰਹਿਤੋ.

ਏਕੋ ਬਹਿਦ੍ਧਾ ਰੂਪਾਨਿ ਪਸ੍ਸਤੀਤਿ ਯਸ੍ਸ ਪਰਿਕਮ੍ਮਮ੍ਪਿ ਨਿਮਿਤ੍ਤਮ੍ਪਿ ਬਹਿਦ੍ਧਾ ਉਪ੍ਪਨ੍ਨਂ, ਸੋ ਏਵਂ ਬਹਿਦ੍ਧਾ ਪਰਿਕਮ੍ਮਸ੍ਸ ਚੇਵ ਅਪ੍ਪਨਾਯ ਚ ਵਸੇਨ ‘‘ਅਜ੍ਝਤ੍ਤਂ ਅਰੂਪਸਞ੍ਞੀ ਏਕੋ ਬਹਿਦ੍ਧਾ ਰੂਪਾਨਿ ਪਸ੍ਸਤੀ’’ਤਿ ਵੁਚ੍ਚਤਿ. ਸੇਸਮੇਤ੍ਥ ਚਤੁਤ੍ਥਾਭਿਭਾਯਤਨੇ ਚ ਵੁਤ੍ਤਨਯਮੇਵ. ਇਮੇਸੁ ਪਨ ਚਤੂਸੁ ਪਰਿਤ੍ਤਂ ਵਿਤਕ੍ਕਚਰਿਤਵਸੇਨ ਆਗਤਂ, ਅਪ੍ਪਮਾਣਂ ਮੋਹਚਰਿਤਵਸੇਨ, ਸੁਵਣ੍ਣਂ ਦੋਸਚਰਿਤਵਸੇਨ, ਦੁਬ੍ਬਣ੍ਣਂ ਰਾਗਚਰਿਤਵਸੇਨ. ਏਤੇਸਞ੍ਹਿ ਏਤਾਨਿ ਸਪ੍ਪਾਯਾਨਿ. ਸਾ ਚ ਨੇਸਂ ਸਪ੍ਪਾਯਤਾ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੪੩) ਚਰਿਯਨਿਦ੍ਦੇਸੇ ਵੁਤ੍ਤਾ.

ਪਞ੍ਚਮਅਭਿਭਾਯਤਨਾਦੀਸੁ ਨੀਲਾਨੀਤਿ ਸਬ੍ਬਸਙ੍ਗਾਹਿਕਵਸੇਨ ਵੁਤ੍ਤਂ. ਨੀਲਵਣ੍ਣਾਨੀਤਿ ਵਣ੍ਣਵਸੇਨ. ਨੀਲਨਿਦਸ੍ਸਨਾਨੀਤਿ ਨਿਦਸ੍ਸਨਵਸੇਨ. ਅਪਞ੍ਞਾਯਮਾਨਵਿਵਰਾਨਿ ਅਸਮ੍ਭਿਨ੍ਨਵਣ੍ਣਾਨਿ ਏਕਨੀਲਾਨੇਵ ਹੁਤ੍ਵਾ ਦਿਸ੍ਸਨ੍ਤੀਤਿ ਵੁਤ੍ਤਂ ਹੋਤਿ. ਨੀਲਨਿਭਾਸਾਨੀਤਿ ਇਦਂ ਪਨ ਓਭਾਸਵਸੇਨ ਵੁਤ੍ਤਂ, ਨੀਲੋਭਾਸਾਨਿ ਨੀਲਪ੍ਪਭਾਯੁਤ੍ਤਾਨੀਤਿ ਅਤ੍ਥੋ. ਏਤੇਨ ਨੇਸਂ ਸੁਵਿਸੁਦ੍ਧਤਂ ਦਸ੍ਸੇਤਿ. ਵਿਸੁਦ੍ਧਵਣ੍ਣਵਸੇਨੇਵ ਹਿ ਇਮਾਨਿ ਅਭਿਭਾਯਤਨਾਨਿ ਵੁਤ੍ਤਾਨਿ. ‘‘ਨੀਲਕਸਿਣਂ ਉਗ੍ਗਣ੍ਹਨ੍ਤੋ ਨੀਲਸ੍ਮਿਂ ਨਿਮਿਤ੍ਤਂ ਗਣ੍ਹਾਤਿ ਪੁਪ੍ਫਸ੍ਮਿਂ ਵਾ ਵਤ੍ਥਸ੍ਮਿਂ ਵਾ ਵਣ੍ਣਧਾਤੁਯਾ ਵਾ’’ਤਿਆਦਿਕਂ ਪਨੇਤ੍ਥ ਕਸਿਣਕਰਣਞ੍ਚ ਪਰਿਕਮ੍ਮਞ੍ਚ ਅਪ੍ਪਨਾਵਿਧਾਨਞ੍ਚ ਸਬ੍ਬਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੫੫) ਵਿਤ੍ਥਾਰਤੋ ਵੁਤ੍ਤਮੇਵਾਤਿ.

੬. ਵਿਮੋਕ੍ਖਸੁਤ੍ਤਵਣ੍ਣਨਾ

੬੬. ਵਿਮੋਕ੍ਖਾਤਿ ਕੇਨਟ੍ਠੇਨ ਵਿਮੋਕ੍ਖਾ? ਅਧਿਮੁਚ੍ਚਨਟ੍ਠੇਨ. ਕੋ ਪਨਾਯਂ ਅਧਿਮੁਚ੍ਚਨਟ੍ਠੋ ਨਾਮ? ਪਚ੍ਚਨੀਕਧਮ੍ਮੇਹਿ ਚ ਸੁਟ੍ਠੁ ਮੁਚ੍ਚਨਟ੍ਠੋ, ਆਰਮ੍ਮਣੇ ਚ ਅਭਿਰਤਿਵਸੇਨ ਸੁਟ੍ਠੁ ਮੁਚ੍ਚਨਟ੍ਠੋ, ਪਿਤੁਅਙ੍ਕੇ ਵਿਸ੍ਸਟ੍ਠਙ੍ਗਪਚ੍ਚਙ੍ਗਸ੍ਸ ਦਾਰਕਸ੍ਸ ਸਯਨਂ ਵਿਯ ਅਨਿਗ੍ਗਹਿਤਭਾਵੇਨ ਨਿਰਾਸਙ੍ਕਤਾਯ ਆਰਮ੍ਮਣੇ ਪਵਤ੍ਤੀਤਿ ਵੁਤ੍ਤਂ ਹੋਤਿ. ਅਯਂ ਪਨਤ੍ਥੋ ਪਚ੍ਛਿਮੇ ਵਿਮੋਕ੍ਖੇ ਨਤ੍ਥਿ, ਪੁਰਿਮੇਸੁ ਵਿਮੋਕ੍ਖੇਸੁ ਅਤ੍ਥਿ.

ਰੂਪੀ ਰੂਪਾਨਿ ਪਸ੍ਸਤੀਤਿ ਏਤ੍ਥ ਅਜ੍ਝਤ੍ਤਂ ਕੇਸਾਦੀਸੁ ਨੀਲਕਸਿਣਾਦਿਵਸੇਨ ਉਪ੍ਪਾਦਿਤਂ ਰੂਪਜ੍ਝਾਨਂ ਰੂਪਂ, ਤਦਸ੍ਸਤ੍ਥੀਤਿ ਰੂਪੀ. ਬਹਿਦ੍ਧਾਪਿ ਨੀਲਕਸਿਣਾਦੀਨਿ ਰੂਪਾਨਿ ਝਾਨਚਕ੍ਖੁਨਾ ਪਸ੍ਸਤਿ. ਇਮਿਨਾ ਅਜ੍ਝਤ੍ਤਬਹਿਦ੍ਧਵਤ੍ਥੁਕੇਸੁ ਕਸਿਣੇਸੁ ਉਪ੍ਪਾਦਿਤਜ੍ਝਾਨਸ੍ਸ ਪੁਗ੍ਗਲਸ੍ਸ ਚਤ੍ਤਾਰਿ ਰੂਪਾਵਚਰਜ੍ਝਾਨਾਨਿ ਦਸ੍ਸਿਤਾਨਿ. ਅਜ੍ਝਤ੍ਤਂ ਅਰੂਪਸਞ੍ਞੀਤਿ ਅਜ੍ਝਤ੍ਤਂ ਨ ਰੂਪਸਞ੍ਞੀ, ਅਤ੍ਤਨੋ ਕੇਸਾਦੀਸੁ ਅਨੁਪ੍ਪਾਦਿਤਰੂਪਾਵਚਰਜ੍ਝਾਨੋਤਿ ਅਤ੍ਥੋ. ਇਮਿਨਾ ਬਹਿਦ੍ਧਾ ਪਰਿਕਮ੍ਮਂ ਕਤ੍ਵਾ ਬਹਿਦ੍ਧਾਵ ਉਪ੍ਪਾਦਿਤਜ੍ਝਾਨਸ੍ਸ ਰੂਪਾਵਚਰਜ੍ਝਾਨਾਨਿ ਦਸ੍ਸਿਤਾਨਿ.

ਸੁਭਨ੍ਤੇਵ ਅਧਿਮੁਤ੍ਤੋ ਹੋਤੀਤਿ ਇਮਿਨਾ ਸੁਵਿਸੁਦ੍ਧੇਸੁ ਨੀਲਾਦੀਸੁ ਵਣ੍ਣਕਸਿਣੇਸੁ ਝਾਨਾਨਿ ਦਸ੍ਸਿਤਾਨਿ. ਤਤ੍ਥ ਕਿਞ੍ਚਾਪਿ ਅਨ੍ਤੋਅਪ੍ਪਨਾਯ ‘‘ਸੁਭ’’ਨ੍ਤਿ ਆਭੋਗੋ ਨਤ੍ਥਿ, ਯੋ ਪਨ ਸੁਵਿਸੁਦ੍ਧਂ ਸੁਭਂ ਕਸਿਣਂ ਆਰਮ੍ਮਣਂ ਕਤ੍ਵਾ ਵਿਹਰਤਿ, ਸੋ ਯਸ੍ਮਾ ‘‘ਸੁਭਨ੍ਤਿ ਅਧਿਮੁਤ੍ਤੋ ਹੋਤੀ’’ਤਿ ਵਤ੍ਤਬ੍ਬਤਂ ਆਪਜ੍ਜਤਿ, ਤਸ੍ਮਾ ਏਵਂ ਦੇਸਨਾ ਕਤਾ. ਪਟਿਸਮ੍ਭਿਦਾਮਗ੍ਗੇ ਪਨ –

‘‘ਕਥਂ ਸੁਭਨ੍ਤੇਵ ਅਧਿਮੁਤ੍ਤੋ ਹੋਤੀਤਿ ਵਿਮੋਕ੍ਖੋ? ਇਧ ਭਿਕ੍ਖੁ ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ …ਪੇ… ਵਿਹਰਤਿ. ਮੇਤ੍ਤਾਯ ਭਾਵਿਤਤ੍ਤਾ ਸਤ੍ਤਾ ਅਪ੍ਪਟਿਕੂਲਾ ਹੋਨ੍ਤਿ. ਕਰੁਣਾਸਹਗਤੇਨ…ਪੇ… ਮੁਦਿਤਾਸਹਗਤੇਨ …ਪੇ… ਉਪੇਕ੍ਖਾਸਹਗਤੇਨ ਚੇਤਸਾ ਏਕਂ ਦਿਸਂ…ਪੇ… ਵਿਹਰਤਿ. ਉਪੇਕ੍ਖਾਯ ਭਾਵਿਤਤ੍ਤਾ ਸਤ੍ਤਾ ਅਪ੍ਪਟਿਕੂਲਾ ਹੋਨ੍ਤਿ. ਏਵਂ ਸੁਭਨ੍ਤੇਵ ਅਧਿਮੁਤ੍ਤੋ ਹੋਤੀਤਿ ਵਿਮੋਕ੍ਖੋ’’ਤਿ (ਪਟਿ. ਮ. ੧.੨੧੨) ਵੁਤ੍ਤਂ.

ਸਬ੍ਬਸੋ ਰੂਪਸਞ੍ਞਾਨਨ੍ਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੨੭੬-੨੭੭) ਵੁਤ੍ਤਮੇਵ. ਅਯਂ ਅਟ੍ਠਮੋ ਵਿਮੋਕ੍ਖੋਤਿ ਅਯਂ ਚਤੁਨ੍ਨਂ ਖਨ੍ਧਾਨਂ ਸਬ੍ਬਸੋ ਵਿਸ੍ਸਟ੍ਠਤ੍ਤਾ ਵਿਮੁਤ੍ਤਤ੍ਤਾ ਅਟ੍ਠਮੋ ਉਤ੍ਤਮੋ ਵਿਮੋਕ੍ਖੋ ਨਾਮ.

੭-੮. ਅਨਰਿਯਵੋਹਾਰਸੁਤ੍ਤਵਣ੍ਣਨਾ

੬੭-੬੮. ਸਤ੍ਤਮੇ ਅਨਰਿਯਵੋਹਾਰਾਤਿ ਨ ਅਰਿਯਕਥਾ ਸਦੋਸਕਥਾ. ਯਾਹਿ ਚੇਤਨਾਹਿ ਤੇ ਵੋਹਾਰੇ ਵੋਹਰਨ੍ਤਿ, ਤਾਸਂ ਏਤਂ ਨਾਮਂ. ਅਟ੍ਠਮੇ ਵੁਤ੍ਤਪਟਿਪਕ੍ਖਨਯੇਨ ਅਤ੍ਥੋ ਵੇਦਿਤਬ੍ਬੋ.

੯. ਪਰਿਸਾਸੁਤ੍ਤਵਣ੍ਣਨਾ

੬੯. ਨਵਮੇ ਖਤ੍ਤਿਯਪਰਿਸਾਤਿ ਖਤ੍ਤਿਯਾਨਂ ਪਰਿਸਾਨਂ ਸਨ੍ਨਿਪਾਤੋ ਸਮਾਗਮੋ. ਏਸ ਨਯੋ ਸਬ੍ਬਤ੍ਥ. ਅਨੇਕਸਤਂ ਖਤ੍ਤਿਯਪਰਿਸਨ੍ਤਿ ਬਿਮ੍ਬਿਸਾਰਸਮਾਗਮ-ਞਾਤਿਸਮਾਗਮ-ਲਿਚ੍ਛਵਿਸਮਾਗਮਾਦਿਸਦਿਸਂ, ਅਞ੍ਞੇਸੁ ਚਕ੍ਕਵਾਲ਼ੇਸੁਪਿ ਲਬ੍ਭਤੇਵ. ਸਲ੍ਲਪਿਤਪੁਬ੍ਬਨ੍ਤਿ ਆਲਾਪਸਲ੍ਲਾਪੋ ਕਤਪੁਬ੍ਬੋ. ਸਾਕਚ੍ਛਾਤਿ ਧਮ੍ਮਸਾਕਚ੍ਛਾਪਿ ਸਮਾਪਜ੍ਜਿਤਪੁਬ੍ਬਾ. ਯਾਦਿਸਕੋ ਤੇਸਂ ਵਣ੍ਣੋਤਿ ਤੇ ਓਦਾਤਾਪਿ ਹੋਨ੍ਤਿ ਕਾਲ਼ਾਪਿ ਮਙ੍ਗੁਰਚ੍ਛਵੀਪਿ, ਸਤ੍ਥਾ ਸੁਵਣ੍ਣਵਣ੍ਣੋ. ਇਦਂ ਪਨ ਸਣ੍ਠਾਨਂ ਪਟਿਚ੍ਚ ਕਥਿਤਂ. ਸਣ੍ਠਾਨਮ੍ਪਿ ਚ ਕੇਵਲਂ ਤੇਸਂ ਪਞ੍ਞਾਯਤਿਯੇਵ. ਨ ਪਨ ਭਗਵਾ ਮਿਲਕ੍ਖਸਦਿਸੋ ਹੋਤਿ, ਨਾਪਿ ਆਮੁਤ੍ਤਮਣਿਕੁਣ੍ਡਲੋ, ਬੁਦ੍ਧਵੇਸੇਨੇਵ ਨਿਸੀਦਤਿ. ਤੇਪਿ ਅਤ੍ਤਨੋ ਸਮਾਨਸਣ੍ਠਾਨਮੇਵ ਪਸ੍ਸਨ੍ਤਿ. ਯਾਦਿਸਕੋ ਤੇਸਂ ਸਰੋਤਿ ਤੇ ਛਿਨ੍ਨਸ੍ਸਰਾਪਿ ਹੋਨ੍ਤਿ ਗਗ੍ਗਸ੍ਸਰਾਪਿ ਕਾਕਸ੍ਸਰਾਪਿ, ਸਤ੍ਥਾ ਬ੍ਰਹ੍ਮਸ੍ਸਰੋਵ. ਇਦਂ ਪਨ ਭਾਸਨ੍ਤਰਂ ਸਨ੍ਧਾਯ ਕਥਿਤਂ. ਸਚੇਪਿ ਹਿ ਸਤ੍ਥਾ ਰਾਜਾਸਨੇ ਨਿਸਿਨ੍ਨੋ ਕਥੇਤਿ, ‘‘ਅਜ੍ਜ ਰਾਜਾ ਮਧੁਰੇਨ ਕਥੇਤੀ’’ਤਿ ਨੇਸਂ ਹੋਤਿ. ਕਥੇਤ੍ਵਾ ਪਕ੍ਕਨ੍ਤੇ ਪਨ ਭਗਵਤਿ ਪੁਨ ਰਾਜਾਨਂ ਆਗਤਂ ਦਿਸ੍ਵਾ ‘‘ਕੋ ਨੁ ਖੋ ਅਯ’’ਨ੍ਤਿ ਵੀਮਂਸਾ ਉਪ੍ਪਜ੍ਜਤਿ. ਤਤ੍ਥ ਕੋ ਨੁ ਖੋ ਅਯਨ੍ਤਿ ‘‘ਇਮਸ੍ਮਿਂ ਠਾਨੇ ਇਦਾਨੇਵ ਮਾਗਧਭਾਸਾਯ ਸੀਹਲ਼ਭਾਸਾਯ ਮਧੁਰੇਨ ਆਕਾਰੇਨ ਕਥੇਨ੍ਤੋ ਕੋ ਨੁ ਖੋ ਅਯਂ ਅਨ੍ਤਰਹਿਤੋ, ਕਿਂ ਦੇਵੋ ਉਦਾਹੁ ਮਨੁਸ੍ਸੋ’’ਤਿ ਏਵਂ ਵੀਮਂਸਨ੍ਤਾਪਿ ਨ ਜਾਨਨ੍ਤੀਤਿ ਅਤ੍ਥੋ. ਕਿਮਤ੍ਥਂ ਪਨੇਵਂ ਅਜਾਨਨ੍ਤਾਨਂ ਧਮ੍ਮਂ ਦੇਸੇਤੀਤਿ? ਵਾਸਨਤ੍ਥਾਯ. ਏਵਂ ਸੁਤੋਪਿ ਹਿ ਧਮ੍ਮੋ ਅਨਾਗਤੇ ਪਚ੍ਚਯੋ ਹੋਤੀਤਿ ਅਨਾਗਤਂ ਪਟਿਚ੍ਚ ਦੇਸੇਤਿ. ਅਨੇਕਸਤਂ ਬ੍ਰਾਹ੍ਮਣਪਰਿਸਨ੍ਤਿਆਦਿਨਂ ਸੋਣਦਣ੍ਡਸਮਾਗਮਾਦਿਵਸੇਨ ਚੇਵ ਅਞ੍ਞਚਕ੍ਕਵਾਲ਼ਵਸੇਨ ਚ ਸਮ੍ਭਵੋ ਵੇਦਿਤਬ੍ਬੋ.

੧੦. ਭੂਮਿਚਾਲਸੁਤ੍ਤਵਣ੍ਣਨਾ

੭੦. ਦਸਮੇ ਨਿਸੀਦਨਨ੍ਤਿ ਇਧ ਚਮ੍ਮਖਣ੍ਡਂ ਅਧਿਪ੍ਪੇਤਂ. ਉਦੇਨਂ ਚੇਤਿਯਨ੍ਤਿ ਉਦੇਨਯਕ੍ਖਸ੍ਸ ਵਸਨਟ੍ਠਾਨੇ ਕਤਵਿਹਾਰੋ ਵੁਚ੍ਚਤਿ. ਗੋਤਮਕਾਦੀਸੁਪਿ ਏਸੇਵ ਨਯੋ. ਭਾਵਿਤਾਤਿ ਵਡ੍ਢਿਤਾ. ਬਹੁਲੀਕਤਾਤਿ ਪੁਨਪ੍ਪੁਨਂ ਕਤਾ. ਯਾਨੀਕਤਾਤਿ ਯੁਤ੍ਤਯਾਨਂ ਵਿਯ ਕਤਾ. ਵਤ੍ਥੁਕਤਾਤਿ ਪਤਿਟ੍ਠਾਨਟ੍ਠੇਨ ਵਤ੍ਥੁ ਵਿਯ ਕਤਾ. ਅਨੁਟ੍ਠਿਤਾਤਿ ਅਧਿਟ੍ਠਿਤਾ. ਪਰਿਚਿਤਾਤਿ ਸਮਨ੍ਤਤੋ ਚਿਤਾ ਸੁਵਡ੍ਢਿਤਾ. ਸੁਸਮਾਰਦ੍ਧਾਤਿ ਸੁਟ੍ਠੁ ਸਮਾਰਦ੍ਧਾ.

ਇਤਿ ਅਨਿਯਮੇਨ ਕਥੇਤ੍ਵਾ ਪੁਨ ਨਿਯਮੇਤ੍ਵਾ ਦਸ੍ਸੇਨ੍ਤੋ ਤਥਾਗਤਸ੍ਸ ਖੋਤਿਆਦਿਮਾਹ. ਏਤ੍ਥ ਕਪ੍ਪਨ੍ਤਿ ਆਯੁਕਪ੍ਪਂ. ਤਸ੍ਮਿਂ ਤਸ੍ਮਿਂ ਕਾਲੇ ਯਂ ਮਨੁਸ੍ਸਾਨਂ ਆਯੁਪ੍ਪਮਾਣਂ, ਤਂ ਪਰਿਪੁਣ੍ਣਂ ਕਰੋਨ੍ਤੋ ਤਿਟ੍ਠੇਯ੍ਯ. ਕਪ੍ਪਾਵਸੇਸਂ ਵਾਤਿ ‘‘ਅਪ੍ਪਂ ਵਾ ਭਿਯ੍ਯੋ’’ਤਿ ਵੁਤ੍ਤਵਸ੍ਸਸਤਤੋ ਅਤਿਰੇਕਂ ਵਾ. ਮਹਾਸੀਵਤ੍ਥੇਰੋ ਪਨਾਹ – ‘‘ਬੁਦ੍ਧਾਨਂ ਅਟ੍ਠਾਨੇ ਗਜ੍ਜਿਤਂ ਨਾਮ ਨਤ੍ਥਿ, ਪੁਨਪ੍ਪੁਨਂ ਸਮਾਪਜ੍ਜਿਤ੍ਵਾ ਮਰਣਨ੍ਤਿਕਵੇਦਨਂ ਵਿਕ੍ਖਮ੍ਭੇਨ੍ਤੋ ਭਦ੍ਦਕਪ੍ਪਮੇਵ ਤਿਟ੍ਠੇਯ੍ਯ. ਕਸ੍ਮਾ ਪਨ ਨ ਠਿਤੋਤਿ? ਉਪਾਦਿਨ੍ਨਕਸਰੀਰਂ ਨਾਮ ਖਣ੍ਡਿਚ੍ਚਾਦੀਹਿ ਅਭਿਭੁਯ੍ਯਤਿ, ਬੁਦ੍ਧਾ ਚ ਖਣ੍ਡਿਚ੍ਚਾਦਿਭਾਵਂ ਅਪ੍ਪਤ੍ਵਾ ਪਞ੍ਚਮੇ ਆਯੁਕੋਟ੍ਠਾਸੇ ਬਹੁਜਨਸ੍ਸ ਪਿਯਮਨਾਪਕਾਲੇਯੇਵ ਪਰਿਨਿਬ੍ਬਾਯਨ੍ਤਿ. ਬੁਦ੍ਧਾਨੁਬੁਦ੍ਧੇਸੁ ਚ ਮਹਾਸਾਵਕੇਸੁ ਪਰਿਨਿਬ੍ਬੁਤੇਸੁ ਏਕਕੇਨੇਵ ਖਾਣੁਕੇਨ ਵਿਯ ਠਾਤਬ੍ਬਂ ਹੋਤਿ ਦਹਰਸਾਮਣੇਰਪਰਿਵਾਰੇਨ ਵਾ, ਤਤੋ ‘ਅਹੋ ਬੁਦ੍ਧਾਨਂ ਪਰਿਸਾ’ਤਿ ਹੀਲ਼ੇਤਬ੍ਬਤਂ ਆਪਜ੍ਜੇਯ੍ਯ. ਤਸ੍ਮਾ ਨ ਠਿਤੋ’’ਤਿ. ਏਵਂ ਵੁਤ੍ਤੇਪਿ ਯੋ ਪਨ ਵੁਚ੍ਚਤਿ ‘‘ਆਯੁਕਪ੍ਪੋ’’ਤਿ, ਇਦਮੇਵ ਅਟ੍ਠਕਥਾਯ ਨਿਯਾਮਿਤਂ.

ਯਥਾ ਤਂ ਮਾਰੇਨ ਪਰਿਯੁਟ੍ਠਿਤਚਿਤ੍ਤੋਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ, ਯਥਾ ਮਾਰੇਨ ਪਰਿਯੁਟ੍ਠਿਤਚਿਤ੍ਤੋ ਅਜ੍ਝੋਤ੍ਥਟਚਿਤ੍ਤੋ ਅਞ੍ਞੋਪਿ ਕੋਚਿ ਪੁਥੁਜ੍ਜਨੋ ਪਟਿਵਿਜ੍ਝਿਤੁਂ ਨ ਸਕ੍ਕੁਣੇਯ੍ਯ, ਏਵਮੇਵ ਨਾਸਕ੍ਖਿ ਪਟਿਵਿਜ੍ਝਿਤੁਨ੍ਤਿ ਅਤ੍ਥੋ. ਮਾਰੋ ਹਿ ਯਸ੍ਸ ਸਬ੍ਬੇਨ ਸਬ੍ਬਂ ਦ੍ਵਾਦਸ ਵਿਪਲ੍ਲਾਸਾ ਅਪ੍ਪਹੀਨਾ, ਤਸ੍ਸ ਚਿਤ੍ਤਂ ਪਰਿਯੁਟ੍ਠਾਤਿ. ਥੇਰਸ੍ਸ ਚ ਚਤ੍ਤਾਰੋ ਵਿਪਲ੍ਲਾਸਾ ਅਪ੍ਪਹੀਨਾ, ਤੇਨਸ੍ਸ ਮਾਰੋ ਚਿਤ੍ਤਂ ਪਰਿਯੁਟ੍ਠਾਸਿ. ਸੋ ਪਨ ਚਿਤ੍ਤਪਰਿਯੁਟ੍ਠਾਨਂ ਕਰੋਨ੍ਤੋ ਕਿਂ ਕਰੋਤੀਤਿ? ਭੇਰਵਂ ਰੂਪਾਰਮ੍ਮਣਂ ਵਾ ਦਸ੍ਸੇਤਿ, ਸਦ੍ਦਾਰਮ੍ਮਣਂ ਵਾ ਸਾਵੇਤਿ. ਤਤੋ ਸਤ੍ਤਾ ਤਂ ਦਿਸ੍ਵਾ ਵਾ ਸੁਤ੍ਵਾ ਵਾ ਸਤਿਂ ਵਿਸ੍ਸਜ੍ਜੇਤ੍ਵਾ ਵਿਵਟਮੁਖਾ ਹੋਨ੍ਤਿ, ਤੇਸਂ ਮੁਖੇਨ ਹਤ੍ਥਂ ਪਵੇਸੇਤ੍ਵਾ ਹਦਯਂ ਮਦ੍ਦਤਿ, ਤਤੋ ਵਿਸਞ੍ਞਾਵ ਹੁਤ੍ਵਾ ਤਿਟ੍ਠਨ੍ਤਿ. ਥੇਰਸ੍ਸ ਪਨੇਸ ਮੁਖੇ ਹਤ੍ਥਂ ਪਵੇਸੇਤੁਂ ਕਿਂ ਸਕ੍ਖਿਸ੍ਸਤਿ, ਭੇਰਵਾਰਮ੍ਮਣਂ ਪਨ ਦਸ੍ਸੇਸਿ. ਤਂ ਦਿਸ੍ਵਾ ਥੇਰੋ ਨਿਮਿਤ੍ਤੋਭਾਸਂ ਨਪ੍ਪਟਿਵਿਜ੍ਝਿ. ਭਗਵਾ ਜਾਨਨ੍ਤੋਯੇਵ ਕਿਮਤ੍ਥਂ ਯਾਵ ਤਤਿਯਂ ਆਮਨ੍ਤੇਸੀਤਿ? ਪਰਤੋ ‘‘ਤਿਟ੍ਠਤੁ, ਭਨ੍ਤੇ ਭਗਵਾ’’ਤਿ ਯਾਚਿਤੇ ‘‘ਤੁਯ੍ਹੇਵੇਤਂ ਦੁਕ੍ਕਟਂ, ਤੁਯ੍ਹੇਵੇਤਂ ਅਪਰਦ੍ਧ’’ਨ੍ਤਿ ਦੋਸਾਰੋਪਨੇਨ ਸੋ ਕਤਨੁਕਰਣਤ੍ਥਂ.

ਮਾਰੋ ਪਾਪਿਮਾਤਿ ਏਤ੍ਥ ਸਤ੍ਤੇ ਅਨਤ੍ਥੇ ਨਿਯੋਜੇਨ੍ਤੋ ਮਾਰੇਤੀਤਿ ਮਾਰੋ. ਪਾਪਿਮਾਤਿ ਤਸ੍ਸੇਵ ਵੇਵਚਨਂ. ਸੋ ਹਿ ਪਾਪਧਮ੍ਮਸਮਨ੍ਨਾਗਤਤ੍ਤਾ ‘‘ਪਾਪਿਮਾ’’ਤਿ ਵੁਚ੍ਚਤਿ. ਕਣ੍ਹੋ, ਅਨ੍ਤਕੋ, ਨਮੁਚਿ, ਪਮਤ੍ਤਬਨ੍ਧੂਤਿਪਿ ਤਸ੍ਸੇਵ ਨਾਮਾਨਿ. ਭਾਸਿਤਾ ਖੋ ਪਨੇਸਾਤਿ ਅਯਞ੍ਹਿ ਭਗਵਤੋ ਸਮ੍ਬੋਧਿਪਤ੍ਤਿਯਾ ਅਟ੍ਠਮੇ ਸਤ੍ਤਾਹੇ ਬੋਧਿਮਣ੍ਡੇਯੇਵ ਆਗਨ੍ਤ੍ਵਾ ‘‘ਭਗਵਾ ਯਦਤ੍ਥਂ ਤੁਮ੍ਹੇਹਿ ਪਾਰਮਿਯੋ ਪੂਰਿਤਾ, ਸੋ ਵੋ ਅਤ੍ਥੋ ਅਨੁਪ੍ਪਤ੍ਤੋ, ਪਟਿਵਿਦ੍ਧਂ ਸਬ੍ਬਞ੍ਞੁਤਞ੍ਞਾਣਂ, ਕਿਂ ਤੇ ਲੋਕਵਿਚਾਰਣੇਨਾ’’ਤਿ ਵਤ੍ਵਾ ਯਥਾ ਅਜ੍ਜ, ਏਵਮੇਵ ‘‘ਪਰਿਨਿਬ੍ਬਾਤੁ ਦਾਨਿ, ਭਨ੍ਤੇ ਭਗਵਾ’’ਤਿ ਯਾਚਿ. ਭਗਵਾ ਚਸ੍ਸ ‘‘ਨ ਤਾਵਾਹ’’ਨ੍ਤਿਆਦੀਨਿ ਵਤ੍ਵਾ ਪਟਿਕ੍ਖਿਪਿ. ਤਂ ਸਨ੍ਧਾਯ – ‘‘ਭਾਸਿਤਾ ਖੋ ਪਨੇਸਾ, ਭਨ੍ਤੇ’’ਤਿਆਦਿਮਾਹ.

ਤਤ੍ਥ ਵਿਯਤ੍ਤਾਤਿ ਮਗ੍ਗਵਸੇਨ ਬ੍ਯਤ੍ਤਾ, ਤਥੇਵ ਵਿਨੀਤਾ, ਤਥਾ ਵਿਸਾਰਦਾ. ਬਹੁਸ੍ਸੁਤਾਤਿ ਤੇਪਿਟਕਵਸੇਨ ਬਹੁ ਸੁਤਂ ਏਤੇਸਨ੍ਤਿ ਬਹੁਸ੍ਸੁਤਾ. ਤਮੇਵ ਧਮ੍ਮਂ ਧਾਰੇਨ੍ਤੀਤਿ ਧਮ੍ਮਧਰਾ. ਅਥ ਵਾ ਪਰਿਯਤ੍ਤਿਬਹੁਸ੍ਸੁਤਾ ਚੇਵ ਪਟਿਵੇਧਬਹੁਸ੍ਸੁਤਾ ਚ. ਪਰਿਯਤ੍ਤਿਪਟਿਵੇਧਧਮ੍ਮਾਨਂਯੇਵ ਧਾਰਣਤੋ ਧਮ੍ਮਧਰਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਧਮ੍ਮਾਨੁਧਮ੍ਮਪ੍ਪਟਿਪਨ੍ਨਾਤਿ ਅਰਿਯਧਮ੍ਮਸ੍ਸ ਅਨੁਧਮ੍ਮਭੂਤਂ ਵਿਪਸ੍ਸਨਾਧਮ੍ਮਂ ਪਟਿਪਨ੍ਨਾ. ਸਾਮੀਚਿਪ੍ਪਟਿਪਨ੍ਨਾਤਿ ਅਨੁਚ੍ਛਵਿਕਪਟਿਪਦਂ ਪਟਿਪਨ੍ਨਾ. ਅਨੁਧਮ੍ਮਚਾਰਿਨੋਤਿ ਅਨੁਧਮ੍ਮਂ ਚਰਣਸੀਲਾ. ਸਕਂ ਆਚਰਿਯਕਨ੍ਤਿ ਅਤ੍ਤਨੋ ਆਚਰਿਯਵਾਦਂ. ਆਚਿਕ੍ਖਿਸ੍ਸਨ੍ਤੀਤਿਆਦੀਨਿ ਸਬ੍ਬਾਨਿ ਅਞ੍ਞਮਞ੍ਞਵੇਵਚਨਾਨਿ. ਸਹਧਮ੍ਮੇਨਾਤਿ ਸਹੇਤੁਕੇਨ ਸਕਾਰਣੇਨ ਵਚਨੇਨ. ਸਪ੍ਪਾਟਿਹਾਰਿਯਨ੍ਤਿ ਯਾਵ ਨਿਯ੍ਯਾਨਿਕਂ ਕਤ੍ਵਾ ਧਮ੍ਮਂ ਦੇਸੇਸ੍ਸਨ੍ਤਿ.

ਬ੍ਰਹ੍ਮਚਰਿਯਨ੍ਤਿ ਸਿਕ੍ਖਾਤ੍ਤਯਸਙ੍ਗਹਿਤਂ ਸਕਲਂ ਸਾਸਨਬ੍ਰਹ੍ਮਚਰਿਯਂ. ਇਦ੍ਧਨ੍ਤਿ ਸਮਿਦ੍ਧਂ ਝਾਨਸ੍ਸਾਦਵਸੇਨ. ਫੀਤਨ੍ਤਿ ਵੁਦ੍ਧਿਪਤ੍ਤਂ ਸਬ੍ਬਪਾਲਿਫੁਲ੍ਲਂ ਵਿਯ ਅਭਿਞ੍ਞਾਸਮ੍ਪਤ੍ਤਿਵਸੇਨ. ਵਿਤ੍ਥਾਰਿਕਨ੍ਤਿ ਵਿਤ੍ਥਤਂ ਤਸ੍ਮਿਂ ਤਸ੍ਮਿਂ ਦਿਸਾਭਾਗੇ ਪਤਿਟ੍ਠਿਤਵਸੇਨ. ਬਾਹੁਜਞ੍ਞਨ੍ਤਿ ਬਹੂਹਿ ਞਾਤਂ ਪਟਿਵਿਦ੍ਧਂ ਮਹਾਜਨਾਭਿਸਮਯਵਸੇਨ. ਪੁਥੁਭੂਤਨ੍ਤਿ ਸਬ੍ਬਾਕਾਰੇਨ ਪੁਥੁਲਭਾਵਪ੍ਪਤ੍ਤਂ. ਕਥਂ? ਯਾਵ ਦੇਵਮਨੁਸ੍ਸੇਹਿ ਸੁਪ੍ਪਕਾਸਿਤਨ੍ਤਿ, ਯਤ੍ਤਕਾ ਵਿਞ੍ਞੁਜਾਤਿਕਾ ਦੇਵਾ ਚੇਵ ਮਨੁਸ੍ਸਾ ਚ ਅਤ੍ਥਿ, ਸਬ੍ਬੇਹਿ ਸੁਟ੍ਠੁ ਪਕਾਸਿਤਨ੍ਤਿ ਅਤ੍ਥੋ. ਅਪ੍ਪੋਸ੍ਸੁਕ੍ਕੋਤਿ ਨਿਰਾਲਯੋ. ਤ੍ਵਞ੍ਹਿ ਪਾਪਿਮ ਅਟ੍ਠਮਸਤ੍ਤਾਹਤੋ ਪਟ੍ਠਾਯ ‘‘ਪਰਿਨਿਬ੍ਬਾਤੁ ਦਾਨਿ, ਭਨ੍ਤੇ ਭਗਵਾ, ਪਰਿਨਿਬ੍ਬਾਤੁ ਸੁਗਤੋ’’ਤਿ ਵਿਰਵਨ੍ਤੋ ਆਹਿਣ੍ਡਿਤ੍ਥ. ਅਜ੍ਜ ਦਾਨਿ ਪਟ੍ਠਾਯ ਵਿਗਤੁਸ੍ਸਾਹੋ ਹੋਹਿ, ਮਾ ਮਯ੍ਹਂ ਪਰਿਨਿਬ੍ਬਾਨਤ੍ਥਂ ਵਾਯਾਮਂ ਕਰੋਹੀਤਿ ਵਦਤਿ.

ਸਤੋ ਸਮ੍ਪਜਾਨੋ ਆਯੁਸਙ੍ਖਾਰਂ ਓਸ੍ਸਜ੍ਜੀਤਿ ਸਤਿਂ ਸੂਪਟ੍ਠਿਤਂ ਕਤ੍ਵਾ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਆਯੁਸਙ੍ਖਾਰਂ ਵਿਸ੍ਸਜ੍ਜਿ ਪਜਹਿ. ਤਤ੍ਥ ਨ ਭਗਵਾ ਹਤ੍ਥੇਨ ਲੇਡ੍ਡੁਂ ਵਿਯ ਆਯੁਸਙ੍ਖਾਰਂ ਓਸ੍ਸਜਿ, ਤੇਮਾਸਮਤ੍ਤਮੇਵ ਪਨ ਫਲਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਤੋ ਪਰਂ ਨ ਸਮਾਪਜ੍ਜਿਸ੍ਸਾਮੀਤਿ ਚਿਤ੍ਤਂ ਉਪ੍ਪਾਦੇਸਿ. ਤਂ ਸਨ੍ਧਾਯ ਵੁਤ੍ਤਂ ‘‘ਓਸ੍ਸਜੀ’’ਤਿ. ਉਸ੍ਸਜੀਤਿਪਿ ਪਾਠੋ. ਮਹਾਭੂਮਿਚਾਲੋਤਿ ਮਹਨ੍ਤੋ ਪਥਵੀਕਮ੍ਪੋ. ਤਦਾ ਕਿਰ ਦਸਸਹਸ੍ਸੀ ਲੋਕਧਾਤੁ ਕਮ੍ਪਿਤ੍ਥ. ਭਿਂਸਨਕੋਤਿ ਭਯਜਨਕੋ. ਦੇਵਦੁਨ੍ਦੁਭਿਯੋ ਚ ਫਲਿਂਸੂਤਿ ਦੇਵਭੇਰਿਯੋ ਫਲਿਂਸੁ, ਦੇਵੋ ਸੁਕ੍ਖਗਜ੍ਜਿਤਂ ਗਜ੍ਜਿ, ਅਕਾਲਵਿਜ੍ਜੁਲਤਾ ਨਿਚ੍ਛਰਿਂਸੁ, ਖਣਿਕਵਸ੍ਸਂ ਵਸ੍ਸੀਤਿ ਵੁਤ੍ਤਂ ਹੋਤਿ.

ਉਦਾਨਂ ਉਦਾਨੇਸੀਤਿ ਕਸ੍ਮਾ ਉਦਾਨੇਸਿ? ਕੋਚਿ ਨਾਮ ਵਦੇਯ੍ਯ ‘‘ਭਗਵਾ ਪਚ੍ਛਤੋ ਪਚ੍ਛਤੋ ਅਨੁਬਨ੍ਧਿਤ੍ਵਾ ‘ਪਰਿਨਿਬ੍ਬਾਤੁ, ਭਨ੍ਤੇ’ਤਿ ਉਪਦ੍ਦੁਤੋ ਭਯੇਨ ਆਯੁਸਙ੍ਖਾਰਂ ਵਿਸ੍ਸਜ੍ਜੇਸੀ’’ਤਿ, ਤਸ੍ਸੋਕਾਸੋ ਮਾ ਹੋਤੁ, ਭੀਤਸ੍ਸ ਹਿ ਉਦਾਨਂ ਨਾਮ ਨਤ੍ਥੀਤਿ ਪੀਤਿਵੇਗਵਿਸ੍ਸਟ੍ਠਂ ਉਦਾਨਂ ਉਦਾਨੇਸਿ.

ਤਤ੍ਥ ਸਬ੍ਬੇਸਂ ਸੋਣਸਿਙ੍ਗਾਲਾਦੀਨਮ੍ਪਿ ਪਚ੍ਚਕ੍ਖਭਾਵਤੋ ਤੁਲਿਤਂ ਪਰਿਚ੍ਛਿਨ੍ਨਨ੍ਤਿ ਤੁਲਂ. ਕਿਂ ਤਂ? ਕਾਮਾਵਚਰਕਮ੍ਮਂ. ਨ ਤੁਲਂ, ਨ ਵਾ ਤੁਲਂ ਸਦਿਸਮਸ੍ਸ ਅਞ੍ਞਂ ਲੋਕਿਯਂ ਕਮ੍ਮਂ ਅਤ੍ਥੀਤਿ ਅਤੁਲਂ. ਕਿਂ ਤਂ? ਮਹਗ੍ਗਤਕਮ੍ਮਂ. ਅਥ ਵਾ ਕਾਮਾਵਚਰਂ ਰੂਪਾਵਚਰਂ ਤੁਲਂ, ਅਰੂਪਾਵਚਰਂ ਅਤੁਲਂ. ਅਪ੍ਪਵਿਪਾਕਂ ਵਾ ਤੁਲਂ, ਬਹੁਵਿਪਾਕਂ ਅਤੁਲਂ. ਸਮ੍ਭਵਨ੍ਤਿ ਸਮ੍ਭਵਹੇਤੁਭੂਤਂ, ਰਾਸਿਕਾਰਕਂ ਪਿਣ੍ਡਕਾਰਕਨ੍ਤਿ ਅਤ੍ਥੋ. ਭਵਸਙ੍ਖਾਰਨ੍ਤਿ ਪੁਨਬ੍ਭਵਸਙ੍ਖਾਰਣਕਂ. ਅਵਸ੍ਸਜੀਤਿ ਵਿਸ੍ਸਜ੍ਜੇਸਿ. ਮੁਨੀਤਿ ਬੁਦ੍ਧਮੁਨਿ. ਅਜ੍ਝਤ੍ਤਰਤੋਤਿ ਨਿਯਕਜ੍ਝਤ੍ਤਰਤੋ. ਸਮਾਹਿਤੋਤਿ ਉਪਚਾਰਪ੍ਪਨਾਸਮਾਧਿਵਸੇਨ ਸਮਾਹਿਤੋ. ਅਭਿਨ੍ਦਿ ਕਵਚਮਿਵਾਤਿ ਕਵਚਂ ਵਿਯ ਅਭਿਨ੍ਦਿ. ਅਤ੍ਤਸਮ੍ਭਵਨ੍ਤਿ ਅਤ੍ਤਨਿ ਸਞ੍ਜਾਤਂ ਕਿਲੇਸਂ. ਇਦਂ ਵੁਤ੍ਤਂ ਹੋਤਿ – ਸਵਿਪਾਕਟ੍ਠੇਨ ਸਮ੍ਭਵਂ, ਭਵਾਭਿਸਙ੍ਖਰਣਟ੍ਠੇਨ ਭਵਸਙ੍ਖਾਰਨ੍ਤਿ ਚ ਲਦ੍ਧਨਾਮਂ ਤੁਲਾਤੁਲਸਙ੍ਖਾਤਂ ਲੋਕਿਯਕਮ੍ਮਞ੍ਚ ਓਸ੍ਸਜਿ, ਸਙ੍ਗਾਮਸੀਸੇ ਮਹਾਯੋਧੋ ਕਵਚਂ ਵਿਯ ਅਤ੍ਤਸਮ੍ਭਵਂ ਕਿਲੇਸਞ੍ਚ ਅਜ੍ਝਤ੍ਤਰਤੋ ਹੁਤ੍ਵਾ ਸਮਾਹਿਤੋ ਹੁਤ੍ਵਾ ਅਭਿਨ੍ਦੀਤਿ.

ਅਥ ਵਾ ਤੁਲਨ੍ਤਿ ਤੁਲੇਨ੍ਤੋ ਤੀਰੇਨ੍ਤੋ. ਅਤੁਲਞ੍ਚ ਸਮ੍ਭਵਨ੍ਤਿ ਨਿਬ੍ਬਾਨਞ੍ਚੇਵ ਸਮ੍ਭਵਞ੍ਚ. ਭਵਸਙ੍ਖਾਰਨ੍ਤਿ ਭਵਗਾਮਿਕਮ੍ਮਂ. ਅਵਸ੍ਸਜਿ ਮੁਨੀਤਿ ‘‘ਪਞ੍ਚਕ੍ਖਨ੍ਧਾ ਅਨਿਚ੍ਚਾ, ਪਞ੍ਚਨ੍ਨਂ ਖਨ੍ਧਾਨਂ ਨਿਰੋਧੋ ਨਿਬ੍ਬਾਨਂ ਨਿਚ੍ਚ’’ਨ੍ਤਿਆਦਿਨਾ (ਪਟਿ. ਮ. ੩.੩੭-੩੮) ਨਯੇਨ ਤੁਲਯਨ੍ਤੋ ਬੁਦ੍ਧਮੁਨਿ ਭਵੇ ਆਦੀਨਵਂ, ਨਿਬ੍ਬਾਨੇ ਚ ਆਨਿਸਂਸਂ ਦਿਸ੍ਵਾ ਤਂ ਖਨ੍ਧਾਨਂ ਮੂਲਭੂਤਂ ਭਵਸਙ੍ਖਾਰਂ ਕਮ੍ਮਂ ‘‘ਕਮ੍ਮਕ੍ਖਯਾਯ ਸਂਵਤ੍ਤਤੀ’’ਤਿ (ਮ. ਨਿ. ੨.੮੧; ਅ. ਨਿ. ੪.੨੩੨-੨੩੩) ਏਵਂ ਵੁਤ੍ਤੇਨ ਕਮ੍ਮਕ੍ਖਯਕਰੇਨ ਅਰਿਯਮਗ੍ਗੇਨ ਅਵਸ੍ਸਜਿ. ਕਥਂ? ਅਜ੍ਝਤ੍ਤਰਤੋ ਸਮਾਹਿਤੋ, ਅਭਿਨ੍ਦਿ ਕਵਚਮਿਵਤ੍ਤਸਮ੍ਭਵਂ. ਸੋ ਹਿ ਵਿਪਸ੍ਸਨਾਵਸੇਨ ਅਜ੍ਝਤ੍ਤਰਤੋ, ਸਮਥਵਸੇਨ ਸਮਾਹਿਤੋਤਿ ਏਵਂ ਪੁਬ੍ਬਭਾਗਤੋ ਪਟ੍ਠਾਯ ਸਮਥਵਿਪਸ੍ਸਨਾਬਲੇਨ ਕਵਚਮਿਵ ਅਤ੍ਤਭਾਵਂ ਪਰਿਯੋਨਨ੍ਧਿਤ੍ਵਾ ਠਿਤਂ, ਅਤ੍ਤਨਿ ਸਮ੍ਭਵਤ੍ਤਾ ‘‘ਅਤ੍ਤਸਮ੍ਭਵ’’ਨ੍ਤਿ ਲਦ੍ਧਨਾਮਂ ਸਬ੍ਬਕਿਲੇਸਜਾਲਂ ਅਭਿਨ੍ਦਿ. ਕਿਲੇਸਾਭਾਵੇਨ ਚ ਕਤਂ ਕਮ੍ਮਂ ਅਪ੍ਪਟਿਸਨ੍ਧਿਕਤ੍ਤਾ ਅਵਸ੍ਸਟ੍ਠਂ ਨਾਮ ਹੋਤੀਤਿ ਏਵਂ ਕਿਲੇਸਪ੍ਪਹਾਨੇਨ ਕਮ੍ਮਂ ਪਜਹਿ. ਪਹੀਨਕਿਲੇਸਸ੍ਸ ਚ ਭਯਂ ਨਾਮ ਨਤ੍ਥਿ, ਤਸ੍ਮਾ ਅਭੀਤੋਵ ਆਯੁਸਙ੍ਖਾਰਂ ਓਸ੍ਸਜ੍ਜਿ, ਅਭੀਤਭਾਵਞਾਪਨਤ੍ਥਞ੍ਚ ਉਦਾਨਂ ਉਦਾਨੇਸੀਤਿ ਵੇਦਿਤਬ੍ਬੋ.

ਯਂ ਮਹਾਵਾਤਾਤਿ ਯੇਨ ਸਮਯੇਨ ਯਸ੍ਮਿਂ ਵਾ ਸਮਯੇ ਮਹਾਵਾਤਾ. ਵਾਯਨ੍ਤੀਤਿ ਉਪਕ੍ਖੇਪਕਵਾਤਾ ਨਾਮ ਉਟ੍ਠਹਨ੍ਤਿ, ਤੇ ਵਾਯਨ੍ਤਾ ਸਟ੍ਠਿਸਹਸ੍ਸਾਧਿਕਨਵਯੋਜਨਸਤਸਹਸ੍ਸਬਹਲਂ ਉਦਕਸਨ੍ਧਾਰਕਵਾਤਂ ਉਪਚ੍ਛਿਨ੍ਦਨ੍ਤਿ, ਤਤੋ ਆਕਾਸੇ ਉਦਕਂ ਭਸ੍ਸਤਿ, ਤਸ੍ਮਿਂ ਭਸ੍ਸਨ੍ਤੇ ਪਥਵੀ ਭਸ੍ਸਤਿ, ਪੁਨ ਵਾਤੋ ਅਤ੍ਤਨੋ ਬਲੇਨ ਅਨ੍ਤੋਧਮ੍ਮਕਰਣੇ ਵਿਯ ਉਦਕਂ ਆਬਨ੍ਧਿਤ੍ਵਾ ਗਣ੍ਹਾਤਿ, ਤਤੋ ਉਦਕਂ ਉਗ੍ਗਚ੍ਛਤਿ, ਤਸ੍ਮਿਂ ਉਗ੍ਗਚ੍ਛਨ੍ਤੇ ਪਥਵੀ ਉਗ੍ਗਚ੍ਛਤਿ. ਏਵਂ ਉਦਕਂ ਕਮ੍ਪਿਤਂ ਪਥਵਿਂ ਕਮ੍ਪੇਤਿ. ਏਤਞ੍ਚ ਕਮ੍ਪਨਂ ਯਾਵਜ੍ਜਕਾਲਾਪਿ ਹੋਤਿਯੇਵ, ਬਹੁਭਾਵੇਨ ਪਨ ਓਗਚ੍ਛਨੁਗ੍ਗਚ੍ਛਨਂ ਨ ਪਞ੍ਞਾਯਤਿ.

ਮਹਿਦ੍ਧਿਕਾ ਮਹਾਨੁਭਾਵਾਤਿ ਇਜ੍ਝਨਸ੍ਸ ਮਹਨ੍ਤਤਾਯ ਮਹਿਦ੍ਧਿਕਾ, ਅਨੁਭਵਿਤਬ੍ਬਸ੍ਸ ਮਹਨ੍ਤਤਾਯ ਮਹਾਨੁਭਾਵਾ. ਪਰਿਤ੍ਤਾਤਿ ਦੁਬ੍ਬਲਾ. ਅਪ੍ਪਮਾਣਾਤਿ ਬਲਵਾ. ਸੋ ਇਮਂ ਪਥਵਿਂ ਕਮ੍ਪੇਤੀਤਿ ਸੋ ਇਦ੍ਧਿਂ ਨਿਬ੍ਬਤ੍ਤੇਤ੍ਵਾ ਸਂਵੇਜੇਨ੍ਤੋ ਮਹਾਮੋਗ੍ਗਲ੍ਲਾਨੋ ਵਿਯ, ਵੀਮਂਸਨ੍ਤੋ ਵਾ ਮਹਾਨਾਗਤ੍ਥੇਰਸ੍ਸ ਭਾਗਿਨੇਯ੍ਯੋ ਸਙ੍ਘਰਕ੍ਖਿਤਸਾਮਣੇਰੋ ਵਿਯ ਪਥਵਿਂ ਕਮ੍ਪੇਤਿ. ਸਙ੍ਕਮ੍ਪੇਤੀਤਿ ਸਮਨ੍ਤਤੋ ਕਮ੍ਪੇਤਿ. ਸਮ੍ਪਕਮ੍ਪੇਤੀਤਿ ਤਸ੍ਸੇਵ ਵੇਵਚਨਂ. ਇਤਿ ਇਮੇਸੁ ਅਟ੍ਠਸੁ ਪਥਵਿਕਮ੍ਪੇਸੁ ਪਠਮੋ ਧਾਤੁਕੋਪੇਨ, ਦੁਤਿਯੋ ਇਦ੍ਧਾਨੁਭਾਵੇਨ, ਤਤਿਯਚਤੁਤ੍ਥਾ ਪੁਞ੍ਞਤੇਜੇਨ, ਪਞ੍ਚਮੋ ਞਾਣਤੇਜੇਨ, ਛਟ੍ਠੋ ਸਾਧੁਕਾਰਦਾਨਵਸੇਨ, ਸਤ੍ਤਮੋ ਕਾਰੁਞ੍ਞਸਭਾਵੇਨ, ਅਟ੍ਠਮੋ ਆਰੋਦਨੇਨ. ਮਾਤੁਕੁਚ੍ਛਿਂ ਓਕ੍ਕਮਨ੍ਤੇ ਚ ਤਤੋ ਨਿਕ੍ਖਮਨ੍ਤੇ ਚ ਮਹਾਸਤ੍ਤੇ ਤਸ੍ਸ ਪੁਞ੍ਞਤੇਜੇਨ ਪਥਵੀ ਅਕਮ੍ਪਿਤ੍ਥ, ਅਭਿਸਮ੍ਬੋਧਿਯਂ ਞਾਣਤੇਜਾਭਿਹਤਾ ਹੁਤ੍ਵਾ ਅਕਮ੍ਪਿਤ੍ਥ, ਧਮ੍ਮਚਕ੍ਕਪ੍ਪਵਤ੍ਤਨੇ ਸਾਧੁਕਾਰਭਾਵਸਣ੍ਠਿਤਾ ਸਾਧੁਕਾਰਂ ਦਦਮਾਨਾ ਅਕਮ੍ਪਿਤ੍ਥ, ਆਯੁਸਙ੍ਖਾਰਓਸ੍ਸਜ੍ਜਨੇ ਕਾਰੁਞ੍ਞਸਭਾਵਸਣ੍ਠਿਤਾ ਚਿਤ੍ਤਸਙ੍ਖੋਭਂ ਅਸਹਮਾਨਾ ਅਕਮ੍ਪਿਤ੍ਥ, ਪਰਿਨਿਬ੍ਬਾਨੇ ਆਰੋਦਨਵੇਗਤੁਨ੍ਨਾ ਹੁਤ੍ਵਾ ਅਕਮ੍ਪਿਤ੍ਥ. ਅਯਂ ਪਨਤ੍ਥੋ ਪਥਵਿਦੇਵਤਾਯ ਵਸੇਨ ਵੇਦਿਤਬ੍ਬੋ. ਮਹਾਭੂਤਪਥਵਿਯਾ ਪਨੇਤਂ ਨਤ੍ਥਿ ਅਚੇਤਨਤ੍ਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਭੂਮਿਚਾਲਵਗ੍ਗੋ ਸਤ੍ਤਮੋ.

(੮) ੩. ਯਮਕਵਗ੍ਗੋ

੧-੨. ਸਦ੍ਧਾਸੁਤ੍ਤਦ੍ਵਯਵਣ੍ਣਨਾ

੭੧-੭੨. ਅਟ੍ਠਮਸ੍ਸ ਪਠਮੇ ਨੋ ਚ ਸੀਲਵਾਤਿ ਨ ਸੀਲੇਸੁ ਪਰਿਪੂਰਕਾਰੀ. ਸਮਨ੍ਤਪਾਸਾਦਿਕੋਤਿ ਸਮਨ੍ਤਤੋ ਪਸਾਦਜਨਕੋ. ਸਬ੍ਬਾਕਾਰਪਰਿਪੂਰੋਤਿ ਸਬ੍ਬੇਹਿ ਸਮਣਾਕਾਰੇਹਿ ਸਮਣਧਮ੍ਮਕੋਟ੍ਠਾਸੇਹਿ ਪਰਿਪੂਰੋ. ਦੁਤਿਯੇ ਸਨ੍ਤਾਤਿ ਪਚ੍ਚਨੀਕਸਨ੍ਤਤਾਯ ਸਨ੍ਤਾ. ਵਿਮੋਕ੍ਖਾਤਿ ਪਚ੍ਚਨੀਕਧਮ੍ਮੇਹਿ ਵਿਮੁਤ੍ਤਤ੍ਤਾ ਚ ਵਿਮੋਕ੍ਖਾ.

੩-੯. ਮਰਣਸ੍ਸਤਿਸੁਤ੍ਤਦ੍ਵਯਾਦਿਵਣ੍ਣਨਾ

੭੩-੭੯. ਤਤਿਯੇ ਭਾਵੇਥ ਨੋਤਿ ਭਾਵੇਥ ਨੁ. ਸਾਸਨਨ੍ਤਿ ਅਨੁਸਿਟ੍ਠਿ. ਆਸਵਾਨਂ ਖਯਾਯਾਤਿ ਅਰਹਤ੍ਤਫਲਤ੍ਥਾਯ. ਚਤੁਤ੍ਥੇ ਪਤਿਹਿਤਾਯਾਤਿ ਪਟਿਪਨ੍ਨਾਯ. ਸੋ ਮਮਸ੍ਸ ਅਨ੍ਤਰਾਯੋਤਿ ਸੋ ਮਮ ਜੀਵਿਤਨ੍ਤਰਾਯੋਪਿ, ਪੁਥੁਜ੍ਜਨਕਾਲਕਿਰਿਯਂ ਕਰੋਨ੍ਤਸ੍ਸ ਸਗ੍ਗਨ੍ਤਰਾਯੋਪਿ ਮਗ੍ਗਨ੍ਤਰਾਯੋਪਿ ਅਸ੍ਸ. ਸਤ੍ਥਕਾ ਵਾ ਮੇ ਵਾਤਾਤਿ ਸਤ੍ਥਂ ਵਿਯ ਅਙ੍ਗਮਙ੍ਗਾਨਿ ਕਨ੍ਤਨ੍ਤੀਤਿ ਸਤ੍ਥਕਾ. ਪਞ੍ਚਮਾਦੀਨਿ ਵੁਤ੍ਤਨਯਾਨੇਵ. ਨਵਮੇ ਸਂਸਗ੍ਗਾਰਾਮਤਾਤਿ ਪਞ੍ਚਵਿਧੇ ਸਂਸਗ੍ਗੇ ਆਰਾਮਤਾ.

੧੦. ਕੁਸੀਤਾਰਮ੍ਭਵਤ੍ਥੁਸੁਤ੍ਤਵਣ੍ਣਨਾ

੮੦. ਦਸਮੇ ਕੁਸੀਤਵਤ੍ਥੂਨੀਤਿ ਕੁਸੀਤਸ੍ਸ ਅਲਸਸ੍ਸ ਵਤ੍ਥੂਨਿ ਪਤਿਟ੍ਠਾ, ਕੋਸਜ੍ਜਕਾਰਣਾਨੀਤਿ ਅਤ੍ਥੋ. ਕਮ੍ਮਂ ਕਤ੍ਤਬ੍ਬਂ ਹੋਤੀਤਿ ਚੀਵਰਵਿਚਾਰਣਾਦਿਕਮ੍ਮਂ ਕਤ੍ਤਬ੍ਬਂ ਹੋਤਿ. ਨ ਵੀਰਿਯਂ ਆਰਭਤੀਤਿ ਦੁਵਿਧਮ੍ਪਿ ਵੀਰਿਯਂ ਨਾਰਭਤਿ. ਅਪ੍ਪਤ੍ਤਸ੍ਸਾਤਿ ਝਾਨਵਿਪਸ੍ਸਨਾਮਗ੍ਗਫਲਧਮ੍ਮਸ੍ਸ ਅਪ੍ਪਤ੍ਤਸ੍ਸ ਪਤ੍ਤਿਯਾ. ਅਨਧਿਗਤਸ੍ਸਾਤਿ ਤਸ੍ਸੇਵ ਅਨਧਿਗਤਸ੍ਸ ਅਧਿਗਮਤ੍ਥਾਯ. ਅਸਚ੍ਛਿਕਤਸ੍ਸਾਤਿ ਤਦੇਵ ਅਸਚ੍ਛਿਕਤਸ੍ਸ ਸਚ੍ਛਿਕਰਣਤ੍ਥਾਯ. ਇਦਂ ਪਠਮਨ੍ਤਿ ਇਦਂ ‘‘ਹਨ੍ਦਾਹਂ ਨਿਪਜ੍ਜਾਮੀ’’ਤਿ ਏਵਂ ਓਸੀਦਨਂ ਪਠਮਂ ਕੁਸੀਤਵਤ੍ਥੁ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਮਾਸਾਚਿਤਕਂ ਮਞ੍ਞੇਤਿ ਏਤ੍ਥ ਪਨ ਮਾਸਾਚਿਤਂ ਨਾਮ ਤਿਨ੍ਤਮਾਸੋ. ਯਥਾ ਤਿਨ੍ਤਮਾਸੋ ਗਰੁਕੋ ਹੋਤਿ, ਏਵਂ ਗਰੁਕੋਤਿ ਅਧਿਪ੍ਪਾਯੋ. ਗਿਲਾਨਾ ਵੁਟ੍ਠਿਤੋ ਹੋਤੀਤਿ ਗਿਲਾਨੋ ਹੁਤ੍ਵਾ ਪਚ੍ਛਾ ਵੁਟ੍ਠਿਤੋ ਹੋਤਿ. ਆਰਮ੍ਭਵਤ੍ਥੂਨੀਤਿ ਵੀਰਿਯਕਾਰਣਾਨਿ. ਤੇਸਮ੍ਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਯਮਕਵਗ੍ਗੋ ਅਟ੍ਠਮੋ.

(੯) ੪. ਸਤਿਵਗ੍ਗੋ

੧-੨. ਸਤਿਸਮ੍ਪਜਞ੍ਞਸੁਤ੍ਤਵਣ੍ਣਨਾ

੮੧-੮੨. ਨਵਮਸ੍ਸ ਪਠਮਂ ਹੇਟ੍ਠਾ ਵੁਤ੍ਤਨਯਮੇਵ. ਦੁਤਿਯੇ ਸਦ੍ਧੋਤਿ ਦੁਵਿਧਾਯ ਸਦ੍ਧਾਯ ਸਮਨ੍ਨਾਗਤੋ. ਨੋ ਚੁਪਸਙ੍ਕਮਿਤਾਤਿ ਨ ਉਪਟ੍ਠਹਤਿ. ਨੋ ਚ ਪਰਿਪੁਚ੍ਛਿਤਾਤਿ ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਪਰਿਪੁਚ੍ਛਿਤਾ ਨ ਹੋਤਿ. ਸਮਨ੍ਨਾਗਤੋਤਿ ਸਾਮਿਅਤ੍ਥੇ ਪਚ੍ਚਤ੍ਤਂ, ਸਮਨ੍ਨਾਗਤਸ੍ਸਾਤਿ ਵੁਤ੍ਤਂ ਹੋਤਿ. ਏਕਨ੍ਤਪਟਿਭਾਨਾ ਤਥਾਗਤਂ ਧਮ੍ਮਦੇਸਨਾ ਹੋਤੀਤਿ ਤਥਾਗਤਸ੍ਸ ਏਕਨ੍ਤਪਟਿਭਾਨਾ ਧਮ੍ਮਦੇਸਨਾ ਹੋਤਿ, ਏਕਨ੍ਤੇਨੇਵ ਪਟਿਭਾਤਿ ਉਪਟ੍ਠਾਤੀਤਿ ਅਤ੍ਥੋ.

੩. ਮੂਲਕਸੁਤ੍ਤਵਣ੍ਣਨਾ

੮੩. ਤਤਿਯੇ ਸਬ੍ਬੇ ਧਮ੍ਮਾਤਿ ਪਞ੍ਚਕ੍ਖਨ੍ਧਾ. ਛਨ੍ਦਮੂਲਕਾਤਿ ਅਜ੍ਝਾਸਯਚ੍ਛਨ੍ਦੋ ਕਤ੍ਤੁਕਮ੍ਯਤਾਛਨ੍ਦੋ ਤਂ ਮੂਲਂ ਏਤੇਸਨ੍ਤਿ ਛਨ੍ਦਮੂਲਕਾ. ਮਨਸਿਕਾਰਤੋ ਸਮ੍ਭਵਨ੍ਤੀਤਿ ਮਨਸਿਕਾਰਸਮ੍ਭਵਾ. ਫਸ੍ਸਤੋ ਸਮੁਦੇਨ੍ਤਿ ਰਾਸੀ ਭਵਨ੍ਤੀਤਿ ਫਸ੍ਸਸਮੁਦਯਾ. ਵੇਦਨਾਯ ਸਮੋਸਰਨ੍ਤੀਤਿ ਵੇਦਨਾਸਮੋਸਰਣਾ. ਸਮਾਧਿ ਏਤੇਸਂ ਪਮੁਖੋਤਿ ਸਮਾਧਿਪ੍ਪਮੁਖਾ. ਜੇਟ੍ਠਕਟ੍ਠੇਨ ਸਤਿ ਅਧਿਪਤਿ ਏਤੇਸਨ੍ਤਿ ਸਤਾਧਿਪਤੇਯ੍ਯਾ, ਸਤਿਜੇਟ੍ਠਕਾਤਿ ਅਤ੍ਥੋ. ਪਞ੍ਞਾ ਉਤ੍ਤਰਾ ਏਤੇਸਨ੍ਤਿ ਪਞ੍ਞੁਤ੍ਤਰਾ. ਵਿਮੁਤ੍ਤਿ ਏਵ ਸਾਰੋ ਏਤੇਸਨ੍ਤਿ ਵਿਮੁਤ੍ਤਿਸਾਰਾ. ਏਤ੍ਥ ਚ ਛਨ੍ਦਮੂਲਕਾਦਯੋ ਚਤ੍ਤਾਰੋਪਿ ਲੋਕਿਯਾ ਕਥਿਤਾ, ਸੇਸਾ ਲੋਕਿਯਲੋਕੁਤ੍ਤਰਮਿਸ੍ਸਕਾਤਿ.

੪. ਚੋਰਸੁਤ੍ਤਵਣ੍ਣਨਾ

੮੪. ਚਤੁਤ੍ਥੇ ਮਹਾਚੋਰੋਤਿ ਰਜ੍ਜਨ੍ਤਰੇ ਦੁਬ੍ਭਿਤੁਂ ਸਮਤ੍ਥੋ ਮਹਾਚੋਰੋ. ਪਰਿਯਾਪਜ੍ਜਤੀਤਿ ਪਰਿਯਾਦਾਨਂ ਗਚ੍ਛਤਿ. ਨ ਚਿਰਟ੍ਠਿਤਿਕੋ ਹੋਤੀਤਿ ਅਦ੍ਧਾਨਂ ਪਾਲੇਨ੍ਤੋ ਠਾਤੁਂ ਨ ਸਕ੍ਕੋਤਿ. ਅਪ੍ਪਹਰਨ੍ਤਸ੍ਸ ਪਹਰਤੀਤਿ ਅਤ੍ਤਨੋ ਅਵੇਰਿਨੇ ਅਪ੍ਪਹਰਨ੍ਤੇ ਗੁਣਸਮ੍ਪਨ੍ਨੇ ਚ ਮਹਲ੍ਲਕੇ ਚ ਤਰੁਣਦਾਰਕੇ ਚ ਅਪ੍ਪਹਰਿਤਬ੍ਬਯੁਤ੍ਤਕੇ ਪਹਰਤਿ. ਅਨਵਸੇਸਂ ਆਦਿਯਤੀਤਿ ਨਿਸ੍ਸੇਸਂ ਗਣ੍ਹਾਤਿ. ਬ੍ਯਤ੍ਤਚੋਰਾਨਞ੍ਹਿ ਇਦਂ ਵਤ੍ਤਂ – ਪਰਸ੍ਸ ਦ੍ਵੀਸੁ ਸਾਟਕੇਸੁ ਏਕੋ ਗਹੇਤਬ੍ਬੋ, ਏਕਸ੍ਮਿਂ ਸਨ੍ਤੇ ਦੁਬ੍ਬਲਂ ਦਤ੍ਵਾ ਥਿਰੋ ਗਹੇਤਬ੍ਬੋ. ਪੁਟਭਤ੍ਤਤਣ੍ਡੁਲਾਦੀਸੁ ਏਕਂ ਕੋਟ੍ਠਾਸਂ ਦਤ੍ਵਾ ਏਕੋ ਗਹੇਤਬ੍ਬੋਤਿ. ਅਚ੍ਚਾਸਨ੍ਨੇ ਕਮ੍ਮਂ ਕਰੋਤੀਤਿ ਗਾਮਨਿਗਮਰਾਜਧਾਨੀਨਂ ਆਸਨ੍ਨਟ੍ਠਾਨੇ ਚੋਰਿਕਕਮ੍ਮਂ ਕਰੋਤਿ. ਨ ਚ ਨਿਧਾਨਕੁਸਲੋ ਹੋਤੀਤਿ ਯਂ ਲਦ੍ਧਂ, ਤਂ ਦਕ੍ਖਿਣੇਯ੍ਯੇ ਨਿਦਹਿਤੁਂ ਛੇਕੋ ਨ ਹੋਤਿ, ਪਰਲੋਕਮਗ੍ਗਂ ਨ ਸੋਧੇਤਿ.

੫. ਸਮਣਸੁਤ੍ਤਵਣ੍ਣਨਾ

੮੫. ਪਞ੍ਚਮੇ ਯਂ ਸਮਣੇਨਾਤਿ ਯਂ ਗੁਣਜਾਤਂ ਸਮਣੇਨ ਪਤ੍ਤਬ੍ਬਂ. ਵੁਸੀਮਤਾਤਿ ਬ੍ਰਹ੍ਮਚਰਿਯਵਾਸਂਵੁਤੇਨ. ਮੁਤ੍ਤੋ ਮੋਚੇਮਿ ਬਨ੍ਧਨਾਤਿ ਅਹਂ ਸਬ੍ਬਬਨ੍ਧਨੇਹਿ ਮੁਤ੍ਤੋ ਹੁਤ੍ਵਾ ਮਹਾਜਨਮ੍ਪਿ ਰਾਗਾਦਿਬਨ੍ਧਨਤੋ ਮੋਚੇਮਿ. ਪਰਮਦਨ੍ਤੋਤਿ ਅਞ੍ਞੇਨ ਕੇਨਚਿ ਅਸਿਕ੍ਖਾਪਿਤੋ ਅਚੋਦਿਤੋ ਸਯਮ੍ਭੁਞਾਣੇਨ ਪਟਿਵਿਜ੍ਝਿਤ੍ਵਾ ਪਰਮਦਮਥੇਨ ਦਨ੍ਤਤ੍ਤਾ ਪਰਮਦਨ੍ਤੋ ਨਾਮ. ਪਰਿਨਿਬ੍ਬੁਤੋਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ.

੬. ਯਸਸੁਤ੍ਤਵਣ੍ਣਨਾ

੮੬. ਛਟ੍ਠੇ ਮਾ ਚ ਮਯਾ ਯਸੋਤਿ ਯਸੋ ਚ ਮਯਾ ਸਦ੍ਧਿਂ ਮਾ ਗਞ੍ਛਿ. ਅਕਸਿਰਲਾਭੀਤਿ ਵਿਪੁਲਲਾਭੀ. ਸੀਲਪਞ੍ਞਾਣਨ੍ਤਿ ਸੀਲਞ੍ਚੇਵ ਞਾਣਞ੍ਚ. ਸਙ੍ਗਮ੍ਮਾਤਿ ਸਨ੍ਨਿਪਤਿਤ੍ਵਾ. ਸਮਾਗਮ੍ਮਾਤਿ ਸਮਾਗਨ੍ਤ੍ਵਾ. ਸਙ੍ਗਣਿਕਵਿਹਾਰਨ੍ਤਿ ਗਣਸਙ੍ਗਣਿਕਵਿਹਾਰਂ. ਨ ਹਿ ਨੂਨਮੇਤਿ ਨ ਹਿ ਨੂਨ ਇਮੇ. ਤਥਾ ਹਿ ਪਨਮੇਤਿ ਤਥਾ ਹਿ ਪਨ ਇਮੇ. ਅਙ੍ਗੁਲਿਪਤੋਦਕੇਹੀਤਿ ਅਙ੍ਗੁਲਿਪਤੋਦਯਟ੍ਠਿਂ ਕਤ੍ਵਾ ਵਿਜ੍ਝਨੇਨ. ਸਞ੍ਜਗ੍ਘਨ੍ਤੇਤਿ ਮਹਾਹਸਿਤਂ ਹਸਨ੍ਤੇ. ਸਂਕੀਲ਼ਨ੍ਤੇਤਿ ਕੇਲ਼ਿਂ ਕਰੋਨ੍ਤੇ.

੭. ਪਤ੍ਤਨਿਕੁਜ੍ਜਨਸੁਤ੍ਤਵਣ੍ਣਨਾ

੮੭. ਸਤ੍ਤਮੇ ਨਿਕ੍ਕੁਜ੍ਜੇਯ੍ਯਾਤਿ ਤੇਨ ਦਿਨ੍ਨਸ੍ਸ ਦੇਯ੍ਯਧਮ੍ਮਸ੍ਸ ਅਪ੍ਪਟਿਗ੍ਗਹਣਤ੍ਥਂ ਪਤ੍ਤਨਿਕ੍ਕੁਜ੍ਜਨਕਮ੍ਮਵਾਚਾਯ ਨਿਕੁਜ੍ਜੇਯ੍ਯ, ਨ ਅਧੋਮੁਖਠਪਨੇਨ. ਅਲਾਭਾਯਾਤਿ ਚਤੁਨ੍ਨਂ ਪਚ੍ਚਯਾਨਂ ਅਲਾਭਤ੍ਥਾਯ. ਅਨਤ੍ਥਾਯਾਤਿ ਉਪਦ੍ਦਵਾਯ ਅਵਡ੍ਢਿਯਾ. ਉਕ੍ਕੁਜ੍ਜੇਯ੍ਯਾਤਿ ਉਕ੍ਕੁਜ੍ਜਨਕਮ੍ਮਵਾਚਾਯ ਉਕ੍ਕੁਜ੍ਜੇਯ੍ਯ.

੮. ਅਪ੍ਪਸਾਦਪਵੇਦਨੀਯਸੁਤ੍ਤਵਣ੍ਣਨਾ

੮੮. ਅਟ੍ਠਮੇ ਅਪ੍ਪਸਾਦਂ ਪਵੇਦੇਯ੍ਯੁਨ੍ਤਿ ਅਪ੍ਪਸਨ੍ਨਭਾਵਂ ਜਾਨਾਪੇਯ੍ਯੁਂ. ਅਪ੍ਪਸਾਦਂ ਪਵੇਦੇਨ੍ਤੇਨ ਪਨ ਕਿਂ ਕਾਤਬ੍ਬਨ੍ਤਿ? ਨਿਸਿਨ੍ਨਾਸਨਤੋ ਨ ਉਟ੍ਠਾਤਬ੍ਬਂ ਨ ਵਨ੍ਦਿਤਬ੍ਬਂ ਨ ਪਚ੍ਚੁਗ੍ਗਮਨਂ ਕਾਤਬ੍ਬਂ, ਨ ਦੇਯ੍ਯਧਮ੍ਮੋ ਦਾਤਬ੍ਬੋ. ਅਗੋਚਰੇਤਿ ਪਞ੍ਚਵਿਧੇ ਅਗੋਚਰੇ.

੯. ਪਟਿਸਾਰਣੀਯਸੁਤ੍ਤਵਣ੍ਣਨਾ

੮੯. ਨਵਮੇ ਧਮ੍ਮਿਕਞ੍ਚ ਗਿਹਿਪਟਿਸ੍ਸਵਨ੍ਤਿ ‘‘ਇਮਂ ਤੇਮਾਸਂ ਇਧੇਵ ਵਸਿਤਬ੍ਬ’’ਨ੍ਤਿ ਵੁਤ੍ਤੋ ‘‘ਏਵਂ ਹੋਤੂ’’ਤਿਆਦਿਨਾ ਨਯੇਨ ਪਟਿਸ੍ਸਵਂ. ਨ ਸਚ੍ਚਾਪੇਤੀਤਿ ਵੁਤ੍ਤਂ ਨ ਸਚ੍ਚਂ ਕਰੋਤਿ ਵਿਸਂਵਾਦੇਤਿ.

੧੦. ਸਮ੍ਮਾਵਤ੍ਤਨਸੁਤ੍ਤਵਣ੍ਣਨਾ

੯੦. ਦਸਮੇ ਪਚ੍ਚੇਕਟ੍ਠਾਨੇਤਿ ਅਧਿਪਤਿਟ੍ਠਾਨੇ ਜੇਟ੍ਠਕਟ੍ਠਾਨੇ. ਤਞ੍ਹਿ ਜੇਟ੍ਠਕਂ ਕਤ੍ਵਾ ਕਿਞ੍ਚਿ ਸਙ੍ਘਕਮ੍ਮਂ ਕਾਤੁਂ ਨ ਲਭਤਿ. ਨ ਚ ਤੇਨ ਮੂਲੇਨ ਵੁਟ੍ਠਾਪੇਤਬ੍ਬੋਤਿ ਤਂ ਮੂਲਂ ਕਤ੍ਵਾ ਅਬ੍ਭਾਨਕਮ੍ਮਂ ਕਾਤੁਂ ਨ ਲਭਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਸਤਿਵਗ੍ਗੋ ਨਵਮੋ.

(੧੦) ੫. ਸਾਮਞ੍ਞਵਗ੍ਗੋ

੯੧. ਇਤੋ ਪਰਂ ਅਥ ਖੋ ਬੋਜ੍ਝਾ ਉਪਾਸਿਕਾਤਿਆਦੀਸੁ ਬੋਜ੍ਝਾ ਉਪਾਸਿਕਾ, ਸਿਰਿਮਾ ਉਪਾਸਿਕਾ, ਪਦੁਮਾ ਉਪਾਸਿਕਾ, ਸੁਤਨਾ ਉਪਾਸਿਕਾ, ਮਨੁਜਾ ਉਪਾਸਿਕਾ, ਉਤ੍ਤਰਾ ਉਪਾਸਿਕਾ, ਮੁਤ੍ਤਾ ਉਪਾਸਿਕਾ, ਖੇਮਾ ਉਪਾਸਿਕਾ, ਰੁਚੀ ਉਪਾਸਿਕਾ, ਚੁਨ੍ਦੀ ਰਾਜਕੁਮਾਰੀ, ਬਿਮ੍ਬੀ ਉਪਾਸਿਕਾ, ਸੁਮਨਾ ਰਾਜਕੁਮਾਰੀ, ਮਲ੍ਲਿਕਾ ਦੇਵੀ, ਤਿਸ੍ਸਾ ਉਪਾਸਿਕਾ, ਤਿਸ੍ਸਾਮਾਤਾ ਉਪਾਸਿਕਾ, ਸੋਣਾ ਉਪਾਸਿਕਾ, ਸੋਣਾਯ ਮਾਤਾ ਉਪਾਸਿਕਾ, ਕਾਣਾ ਉਪਾਸਿਕਾ, ਕਾਣਮਾਤਾ ਉਪਾਸਿਕਾ, ਉਤ੍ਤਰਾ ਨਨ੍ਦਮਾਤਾ, ਵਿਸਾਖਾ ਮਿਗਾਰਮਾਤਾ, ਖੁਜ੍ਜੁਤ੍ਤਰਾ ਉਪਾਸਿਕਾ, ਸਾਮਾਵਤੀ ਉਪਾਸਿਕਾ, ਸੁਪ੍ਪਵਾਸਾ ਕੋਲਿਯਧੀਤਾ, ਸੁਪ੍ਪਿਯਾ ਉਪਾਸਿਕਾ, ਨਕੁਲਮਾਤਾ ਗਹਪਤਾਨੀਤਿ ਇਮਾਸਂ ਏਤ੍ਤਕਾਨਂ ਅਟ੍ਠਙ੍ਗਸਮਨ੍ਨਾਗਤਂ ਉਪੋਸਥਕਮ੍ਮਮੇਵ ਕਥਿਤਂ. ਇਚ੍ਛਨ੍ਤੇਨ ਵਿਤ੍ਥਾਰੇਤ੍ਵਾ ਕਥੇਤਬ੍ਬਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.