੧੦. ਦੁਚ੍ਚਰਿਤਵਿਪਾਕਸੁਤ੍ਤਵਣ੍ਣਨਾ

੪੦. ਦਸਮੇ ਪਾਣਾਤਿਪਾਤੋਤਿ ਪਾਣਾਤਿਪਾਤਚੇਤਨਾ. ਸਬ੍ਬਲਹੁਸੋਤਿ ਸਬ੍ਬਲਹੁਕੋ. ਅਪ੍ਪਾਯੁਕਸਂਵਤ੍ਤਨਿਕੋਤਿ ਤੇਨ ਪਰਿਤ੍ਤਕੇਨ ਕਮ੍ਮਵਿਪਾਕੇਨ ਅਪ੍ਪਾਯੁਕੋ ਹੋਤਿ, ਦਿਨ੍ਨਮਤ੍ਤਾਯ ਵਾ ਪਟਿਸਨ੍ਧਿਯਾ ਵਿਲੀਯਤਿ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਮਤ੍ਤੇ ਵਾ. ਏਵਰੂਪੋ ਹਿ ਨ ਅਞ੍ਞਸ੍ਸ ਕਸ੍ਸਚਿ ਨਿਸ੍ਸਨ੍ਦੋ, ਪਾਣਾਤਿਪਾਤਸ੍ਸੇਵ ਗਤਮਗ੍ਗੋ ਏਸੋਤਿ. ਭੋਗਬ੍ਯਸਨਸਂਵਤ੍ਤਨਿਕੋਤਿ ਯਥਾ ਕਾਕਣਿਕਾਮਤ੍ਤਮ੍ਪਿ ਹਤ੍ਥੇ ਨ ਤਿਟ੍ਠਤਿ, ਏਵਂ ਭੋਗਬ੍ਯਸਨਂ ਸਂਵਤ੍ਤੇਤਿ. ਸਪਤ੍ਤਵੇਰਸਂਵਤ੍ਤਨਿਕੋ ਹੋਤੀਤਿ ਸਹ ਸਪਤ੍ਤੇਹਿ ਵੇਰਂ ਸਂਵਤ੍ਤੇਤਿ. ਤਸ੍ਸ ਹਿ ਸਪਤ੍ਤਾ ਚ ਬਹੁਕਾ ਹੋਨ੍ਤਿ. ਯੋ ਚ ਨਂ ਪਸ੍ਸਤਿ, ਤਸ੍ਮਿਂ ਵੇਰਮੇਵ ਉਪ੍ਪਾਦੇਤਿ ਨ ਨਿਬ੍ਬਾਯਤਿ. ਏਵਰੂਪੋ ਹਿ ਪਰਸ੍ਸ ਰਕ੍ਖਿਤਗੋਪਿਤਭਣ੍ਡੇ ਅਪਰਾਧਸ੍ਸ ਨਿਸ੍ਸਨ੍ਦੋ.

ਅਭੂਤਬ੍ਭਕ੍ਖਾਨਸਂਵਤ੍ਤਨਿਕੋ ਹੋਤੀਤਿ ਅਭੂਤੇਨ ਅਬ੍ਭਕ੍ਖਾਨਂ ਸਂਵਤ੍ਤੇਤਿ, ਯੇਨ ਕੇਨਚਿ ਕਤਂ ਤਸ੍ਸੇਵ ਉਪਰਿ ਪਤਤਿ. ਮਿਤ੍ਤੇਹਿ ਭੇਦਨਸਂਵਤ੍ਤਨਿਕੋਤਿ ਮਿਤ੍ਤੇਹਿ ਭੇਦਂ ਸਂਵਤ੍ਤੇਤਿ. ਯਂ ਯਂ ਮਿਤ੍ਤਂ ਕਰੋਤਿ, ਸੋ ਸੋ ਭਿਜ੍ਜਤਿਯੇਵ. ਅਮਨਾਪਸਦ੍ਦਸਂਵਤ੍ਤਨਿਕੋਤਿ ਅਮਨਾਪਸਦ੍ਦਂ ਸਂਵਤ੍ਤੇਤਿ. ਯਾ ਸਾ ਵਾਚਾ ਕਣ੍ਟਕਾ ਕਕ੍ਕਸਾ ਕਟੁਕਾ ਅਭਿਸਜ੍ਜਨੀ ਮਮ੍ਮਚ੍ਛੇਦਿਕਾ, ਗਤਗਤਟ੍ਠਾਨੇ ਤਮੇਵ ਸੁਣਾਤਿ, ਮਨਾਪਸਦ੍ਦਸਵਨਂ ਨਾਮ ਨ ਲਭਤਿ. ਏਵਰੂਪੋ ਫਰੁਸਵਾਚਾਯ ਗਤਮਗ੍ਗੋ ਨਾਮ. ਅਨਾਦੇਯ੍ਯਵਾਚਾਸਂਵਤ੍ਤਨਿਕੋਤਿ ਅਗ੍ਗਹੇਤਬ੍ਬਵਚਨਤਂ ਸਂਵਤ੍ਤੇਤਿ, ‘‘ਤ੍ਵਂ ਕਸ੍ਮਾ ਕਥੇਸਿ, ਕੋ ਹਿ ਤਵ ਵਚਨਂ ਗਹੇਸ੍ਸਤੀ’’ਤਿ ਵਤ੍ਤਬ੍ਬਤਂ ਆਪਜ੍ਜਤਿ. ਅਯਂ ਸਮ੍ਫਪ੍ਪਲਾਪਸ੍ਸ ਗਤਮਗ੍ਗੋ. ਉਮ੍ਮਤ੍ਤਕਸਂਵਤ੍ਤਨਿਕੋ ਹੋਤੀਤਿ ਉਮ੍ਮਤ੍ਤਕਭਾਵਂ ਸਂਵਤ੍ਤੇਤਿ. ਤੇਨ ਹਿ ਮਨੁਸ੍ਸੋ ਉਮ੍ਮਤ੍ਤੋ ਵਾ ਖਿਤ੍ਤਚਿਤ੍ਤੋ ਵਾ ਏਲ਼ਮੂਗੋ ਵਾ ਹੋਤਿ. ਅਯਂ ਸੁਰਾਪਾਨਸ੍ਸ ਨਿਸ੍ਸਨ੍ਦੋ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਨ੍ਤਿ.

ਦਾਨਵਗ੍ਗੋ ਚਤੁਤ੍ਥੋ.