੪. ਮਹਾਚੁਨ੍ਦਸੁਤ੍ਤਵਣ੍ਣਨਾ

੪੬. ਚਤੁਤ੍ਥੇ ਚੇਤੀਸੂਤਿ ਚੇਤਿਰਟ੍ਠੇ. ਸਯਂਜਾਤਿਯਨ੍ਤਿ ਏਵਂਨਾਮਕੇ ਨਿਗਮੇ. ਮਹਾਚੁਨ੍ਦੋਤਿ ਧਮ੍ਮਸੇਨਾਪਤਿਸ੍ਸ ਕਨਿਟ੍ਠਭਾਤਿਕੋ. ਧਮ੍ਮੇ ਯੋਗੋ ਅਨੁਯੋਗੋ ਏਤੇਸਨ੍ਤਿ ਧਮ੍ਮਯੋਗਾ. ਧਮ੍ਮਕਥਿਕਾਨਂ ਏਤਂ ਨਾਮਂ. ਝਾਯਨ੍ਤੀਤਿ ਝਾਯੀ. ਅਪਸਾਦੇਨ੍ਤੀਤਿ ਘਟ੍ਟੇਨ੍ਤਿ ਹਿਂਸਨ੍ਤਿ. ਝਾਯਨ੍ਤੀਤਿ ਚਿਨ੍ਤੇਨ੍ਤਿ. ਪਜ੍ਝਾਯਨ੍ਤੀਤਿਆਦੀਨਿ ਉਪਸਗ੍ਗਵਸੇਨ ਵਡ੍ਢਿਤਾਨਿ. ਕਿਮਿਮੇ ਝਾਯਨ੍ਤੀਤਿ ਕਿਂ ਨਾਮ ਇਮੇ ਝਾਯਨ੍ਤਿ. ਕਿਨ੍ਤਿਮੇ ਝਾਯਨ੍ਤੀਤਿ ਕਿਮਤ੍ਥਂ ਇਮੇ ਝਾਯਨ੍ਤਿ. ਕਥਂ ਇਮੇ ਝਾਯਨ੍ਤੀਤਿ ਕੇਨ ਕਾਰਣੇਨ ਇਮੇ ਝਾਯਨ੍ਤਿ. ਅਮਤਂ ਧਾਤੁਂ ਕਾਯੇਨ ਫੁਸਿਤ੍ਵਾ ਵਿਹਰਨ੍ਤੀਤਿ ਮਰਣਵਿਰਹਿਤਂ ਨਿਬ੍ਬਾਨਧਾਤੁਂ ਸਨ੍ਧਾਯ ਕਮ੍ਮਟ੍ਠਾਨਂ ਗਹੇਤ੍ਵਾ ਵਿਹਰਨ੍ਤਾ ਅਨੁਕ੍ਕਮੇਨ ਤਂ ਨਾਮਕਾਯੇਨ ਫੁਸਿਤ੍ਵਾ ਵਿਹਰਨ੍ਤਿ. ਗਮ੍ਭੀਰਂ ਅਤ੍ਥਪਦਨ੍ਤਿ ਗੁਲ਼੍ਹਂ ਪਟਿਚ੍ਛਨ੍ਨਂ ਖਨ੍ਧਧਾਤੁਆਯਤਨਾਦਿਅਤ੍ਥਂ. ਪਞ੍ਞਾਯ ਅਤਿਵਿਜ੍ਝ ਪਸ੍ਸਨ੍ਤੀਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ ਪਟਿਵਿਜ੍ਝਿਤ੍ਵਾ ਪਸ੍ਸਨ੍ਤਿ. ਇਮਸ੍ਮਿਂ ਪਨਤ੍ਥੇ ਸਮ੍ਮਸਨਪਟਿਵੇਧਪਞ੍ਞਾਪਿ ਉਗ੍ਗਹਪਰਿਪੁਚ੍ਛਾਪਞ੍ਞਾਪਿ ਵਟ੍ਟਤਿਯੇਵਾਤਿ.