੫. ਧਮ੍ਮਿਕਵਗ੍ਗੋ
੧. ਨਾਗਸੁਤ੍ਤਵਣ੍ਣਨਾ
੪੩. ਪਞ੍ਚਮਸ੍ਸ ਪਠਮੇ ਆਯਸ੍ਮਤਾ ਆਨਨ੍ਦੇਨ ਸਦ੍ਧਿਨ੍ਤਿ ਇਦਂ ‘‘ਆਯਾਮਾਨਨ੍ਦਾ’’ਤਿ ਥੇਰਂ ਆਮਨ੍ਤੇਤ੍ਵਾ ਗਤਤ੍ਤਾ ਵੁਤ੍ਤਂ, ਸਤ੍ਥਾ ਪਨ ਅਨੂਨੇਹਿ ਪਞ੍ਚਹਿ ਭਿਕ੍ਖੁਸਤੇਹਿ ਪਰਿਵੁਤੋ ਤਤ੍ਥ ਅਗਮਾਸੀਤਿ ਵੇਦਿਤਬ੍ਬੋ. ਤੇਨੁਪਸਙ੍ਕਮੀਤਿ ਤੇਹੇਵ ਪਞ੍ਚਹਿ ਭਿਕ੍ਖੁਸਤੇਹਿ ਪਰਿਵੁਤੋ ਉਪਸਙ੍ਕਮਿ. ਪਰਿਸਿਞ੍ਚਿਤ੍ਵਾਤਿ ਵੋਹਾਰਵਚਨਮੇਤਂ, ਨ੍ਹਾਯਿਤ੍ਵਾਤਿ ਅਤ੍ਥੋ. ਪੁਬ੍ਬਾਪਯਮਾਨੋਤਿ ਰਤ੍ਤਦੁਪਟ੍ਟਂ ਨਿਵਾਸੇਤ੍ਵਾ ਉਤ੍ਤਰਾਸਙ੍ਗਚੀਵਰਂ ਦ੍ਵੀਹਿ ਹਤ੍ਥੇਹਿ ਗਹੇਤ੍ਵਾ ਪਚ੍ਛਿਮਲੋਕਧਾਤੁਂ ਪਿਟ੍ਠਿਤੋ ਕਤ੍ਵਾ ਪੁਰਤ੍ਥਿਮਲੋਕਧਾਤੁਂ ਅਭਿਮੁਖੋ ਵੋਦਕਭਾਵੇਨ ਗਤ੍ਤਾਨਿ ਪੁਬ੍ਬਸਦਿਸਾਨਿ ਕੁਰੁਮਾਨੋ ਅਟ੍ਠਾਸੀਤਿ ਅਤ੍ਥੋ. ਭਿਕ੍ਖੁਸਙ੍ਘੋਪਿ ਤੇਨ ਤੇਨ ਠਾਨੇਨ ਓਤਰਿਤ੍ਵਾ ਨ੍ਹਤ੍ਵਾ ਪਚ੍ਚੁਤ੍ਤਰਿਤ੍ਵਾ ਸਤ੍ਥਾਰਂਯੇਵ ਪਰਿਵਾਰੇਤ੍ਵਾ ਅਟ੍ਠਾਸਿ. ਇਤਿ ਤਸ੍ਮਿਂ ਸਮਯੇ ਆਕਾਸਤੋ ਪਤਮਾਨਂ ਰਤ੍ਤਸੁਵਣ੍ਣਕੁਣ੍ਡਲਂ ਵਿਯ ਸੂਰਿਯੋ ਪਚ੍ਛਿਮਲੋਕਧਾਤੁਂ ਪਟਿਪਜ੍ਜਿ, ਪਰਿਸੁਦ੍ਧਰਜਤਮਣ੍ਡਲੋ ਵਿਯ ਪਾਚੀਨਲੋਕਧਾਤੁਤੋ ਚਨ੍ਦੋ ਅਬ੍ਭੁਗ੍ਗਞ੍ਛਿ, ਮਜ੍ਝਟ੍ਠਾਨੇਪਿ ਪਞ੍ਚਭਿਕ੍ਖੁਸਤਪਰਿਵਾਰੋ ਸਮ੍ਮਾਸਮ੍ਬੁਦ੍ਧੋ ਛਬ੍ਬਣ੍ਣਬੁਦ੍ਧਰਸ੍ਮਿਯੋ ਵਿਸ੍ਸਜ੍ਜੇਤ੍ਵਾ ਪੁਬ੍ਬਕੋਟ੍ਠਕਨਦੀਤੀਰੇ ਲੋਕਂ ਅਲਙ੍ਕੁਰੁਮਾਨੋ ਅਟ੍ਠਾਸਿ.
ਤੇਨ ਖੋ ਪਨ ਸਮਯੇਨ…ਪੇ… ਸੇਤੋ ਨਾਮ ਨਾਗੋਤਿ ਸੇਤਵਣ੍ਣਤਾਯ ਏਵਂ ਲਦ੍ਧਨਾਮੋ ਹਤ੍ਥਿਨਾਗੋ. ਮਹਾਤੂਰਿਯਤਾਲ਼ਿਤਵਾਦਿਤੇਨਾਤਿ ਮਹਨ੍ਤੇਨ ਤੂਰਿਯਤਾਲ਼ਿਤਵਾਦਿਤੇਨ. ਤਤ੍ਥ ਪਠਮਂ ਸਙ੍ਘਟ੍ਟਨਂ ਤਾਲ਼ਿਤਂ ਨਾਮ ਹੋਤਿ, ਤਤੋ ਪਰਂ ਵਾਦਿਤਂ. ਜਨੋਤਿ ਹਤ੍ਥਿਦਸ੍ਸਨਤ੍ਥਂ ਸਨ੍ਨਿਪਤਿਤਮਹਾਜਨੋ. ਦਿਸ੍ਵਾ ਏਵਮਾਹਾਤਿ ਅਙ੍ਗਪਚ੍ਚਙ੍ਗਾਨਿ ਘਂਸਿਤ੍ਵਾ ਨ੍ਹਾਪੇਤ੍ਵਾ ਉਤ੍ਤਾਰੇਤ੍ਵਾ ਬਹਿਤੀਰੇ ਠਪੇਤ੍ਵਾ ਗਤ੍ਤਾਨਿ ਵੋਦਕਾਨਿ ਕਤ੍ਵਾ ਹਤ੍ਥਾਲਙ੍ਕਾਰੇਨ ਅਲਙ੍ਕਤਂ ਤਂ ਮਹਾਨਾਗਂ ਦਿਸ੍ਵਾ ਇਦਂ ‘‘ਅਭਿਰੂਪੋ ਵਤ, ਭੋ’’ਤਿ ਪਸਂਸਾਵਚਨਮਾਹ. ਕਾਯੁਪਪਨ੍ਨੋਤਿ ਸਰੀਰਸਮ੍ਪਤ੍ਤਿਯਾ ਉਪਪਨ੍ਨੋ, ਪਰਿਪੁਣ੍ਣਙ੍ਗਪਚ੍ਚਙ੍ਗੋਤਿ ਅਤ੍ਥੋ. ਆਯਸ੍ਮਾ ਉਦਾਯੀਤਿ ਪਟਿਸਮ੍ਭਿਦਾਪ੍ਪਤ੍ਤੋ ਕਾਲ਼ੁਦਾਯਿਤ੍ਥੇਰੋ. ਏਤਦਵੋਚਾਤਿ ਤਂ ਮਹਾਜਨਂ ਹਤ੍ਥਿਸ੍ਸ ਵਣ੍ਣਂ ਭਣਨ੍ਤਂ ਦਿਸ੍ਵਾ ‘‘ਅਯਂ ਜਨੋ ਅਹੇਤੁਕਪਟਿਸਨ੍ਧਿਯਂ ਨਿਬ੍ਬਤ੍ਤਹਤ੍ਥਿਨੋ ਵਣ੍ਣਂ ਕਥੇਤਿ, ਨ ਬੁਦ੍ਧਹਤ੍ਥਿਸ੍ਸ. ਅਹਂ ਦਾਨਿ ਇਮਿਨਾ ਹਤ੍ਥਿਨਾਗੇਨ ਉਪਮਂ ਕਤ੍ਵਾ ਬੁਦ੍ਧਨਾਗਸ੍ਸ ਵਣ੍ਣਂ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਤਂ ‘‘ਹਤ੍ਥਿਮੇਵ ਨੁ ਖੋ, ਭਨ੍ਤੇ’’ਤਿਆਦਿਵਚਨਂ ਅਵੋਚ. ਤਤ੍ਥ ਮਹਨ੍ਤਨ੍ਤਿ ਆਰੋਹਸਮ੍ਪਨ੍ਨਂ. ਬ੍ਰਹਨ੍ਤਨ੍ਤਿ ਪਰਿਣਾਹਸਮ੍ਪਨ੍ਨਂ. ਏਵਮਾਹਾਤਿ ਏਵਂ ਵਦਤਿ. ਅਥ ਭਗਵਾ ਯਸ੍ਮਾ ਅਯਂ ਨਾਗਸਦ੍ਦੋ ਹਤ੍ਥਿਮ੍ਹਿਚੇਵ ਅਸ੍ਸਗੋਣਉਰਗਰੁਕ੍ਖਮਨੁਸ੍ਸੇਸੁ ਚਾਪਿ ਪਵਤ੍ਤਤਿ, ਤਸ੍ਮਾ ਹਤ੍ਥਿਮ੍ਪਿ ਖੋਤਿਆਦਿਮਾਹ.
ਆਗੁਨ੍ਤਿ ਪਾਪਕਂ ਲਾਮਕਂ ਅਕੁਸਲਧਮ੍ਮਂ. ਤਮਹਂ ਨਾਗੋਤਿ ਬ੍ਰੂਮੀਤਿ ਤਂ ਅਹਂ ਇਮੇਹਿ ਤੀਹਿ ਦ੍ਵਾਰੇਹਿ ਦਸਨ੍ਨਂ ਅਕੁਸਲਕਮ੍ਮਪਥਾਨਂ ਦ੍ਵਾਦਸਨ੍ਨਞ੍ਚ ਅਕੁਸਲਚਿਤ੍ਤਾਨਂ ਅਕਰਣਤੋ ਨਾਗੋਤਿ ਵਦਾਮਿ. ਅਯਞ੍ਹਿ ਨ ਆਗੁਂ ਕਰੋਤੀਤਿ ਇਮਿਨਾ ਅਤ੍ਥੇਨ ਨਾਗੋ. ਇਮਾਹਿ ਗਾਥਾਹਿ ਅਨੁਮੋਦਾਮੀਤਿ ਇਮਾਹਿ ਚਤੁਸਟ੍ਠਿਪਦਾਹਿ ਸੋਲ਼ਸਹਿ ਗਾਥਾਹਿ ਅਨੁਮੋਦਾਮਿ ਅਭਿਨਨ੍ਦਾਮਿ.
ਮਨੁਸ੍ਸਭੂਤਨ੍ਤਿ ਦੇਵਾਦਿਭਾਵਂ ਅਨੁਪਗਨ੍ਤ੍ਵਾ ਮਨੁਸ੍ਸਮੇਵ ਭੂਤਂ. ਅਤ੍ਤਦਨ੍ਤਨ੍ਤਿ ਅਤ੍ਤਨਾਯੇਵ ਦਨ੍ਤਂ, ਨ ਅਞ੍ਞੇਹਿ ਦਮਥਂ ਉਪਨੀਤਂ. ਭਗਵਾ ਹਿ ਅਤ੍ਤਨਾ ਉਪ੍ਪਾਦਿਤੇਨੇਵ ਮਗ੍ਗਦਮਥੇਨ ਚਕ੍ਖੁਤੋਪਿ ਦਨ੍ਤੋ, ਸੋਤਤੋਪਿ, ਘਾਨਤੋਪਿ, ਜਿਵ੍ਹਾਤੋਪਿ, ਕਾਯਤੋਪਿ, ਮਨਤੋਪੀਤਿ ਇਮੇਸੁ ਛਸੁ ਠਾਨੇਸੁ ਦਨ੍ਤੋ ਸਨ੍ਤੋ ਨਿਬ੍ਬੁਤੋ ਪਰਿਨਿਬ੍ਬੁਤੋ. ਤੇਨਾਹ – ‘‘ਅਤ੍ਤਦਨ੍ਤ’’ਨ੍ਤਿ. ਸਮਾਹਿਤਨ੍ਤਿ ਦੁਵਿਧੇਨਾਪਿ ਸਮਾਧਿਨਾ ਸਮਾਹਿਤਂ. ਇਰਿਯਮਾਨਨ੍ਤਿ ਵਿਹਰਮਾਨਂ. ਬ੍ਰਹ੍ਮਪਥੇਤਿ ਸੇਟ੍ਠਪਥੇ, ਅਮਤਪਥੇ, ਨਿਬ੍ਬਾਨਪਥੇ. ਚਿਤ੍ਤਸ੍ਸੂਪਸਮੇ ਰਤਨ੍ਤਿ ਪਠਮਜ੍ਝਾਨੇਨ ਪਞ੍ਚ ਨੀਵਰਣਾਨਿ ਵੂਪਸਮੇਤ੍ਵਾ, ਦੁਤਿਯਜ੍ਝਾਨੇਨ ਵਿਤਕ੍ਕਵਿਚਾਰੇ, ਤਤਿਯਜ੍ਝਾਨੇਨ ਪੀਤਿਂ, ਚਤੁਤ੍ਥਜ੍ਝਾਨੇਨ ਸੁਖਦੁਕ੍ਖਂ ਵੂਪਸਮੇਤ੍ਵਾ ਤਸ੍ਮਿਂ ਚਿਤ੍ਤਸ੍ਸੂਪਸਮੇ ਰਤਂ ਅਭਿਰਤਂ.
ਨਮਸ੍ਸਨ੍ਤੀਤਿ ਕਾਯੇਨ ਨਮਸ੍ਸਨ੍ਤਿ, ਵਾਚਾਯ ਨਮਸ੍ਸਨ੍ਤਿ, ਮਨਸਾ ਨਮਸ੍ਸਨ੍ਤਿ, ਧਮ੍ਮਾਨੁਧਮ੍ਮਪਟਿਪਤ੍ਤਿਯਾ ਨਮਸ੍ਸਨ੍ਤਿ, ਸਕ੍ਕਰੋਨ੍ਤਿ ਗਰੁਂ ਕਰੋਨ੍ਤਿ. ਸਬ੍ਬਧਮ੍ਮਾਨਪਾਰਗੁਨ੍ਤਿ ਸਬ੍ਬੇਸਂ ਖਨ੍ਧਾਯਤਨਧਾਤੁਧਮ੍ਮਾਨਂ ਅਭਿਞ੍ਞਾਪਾਰਗੂ, ਪਰਿਞ੍ਞਾਪਾਰਗੂ, ਪਹਾਨਪਾਰਗੂ, ਭਾਵਨਾਪਾਰਗੂ, ਸਚ੍ਛਿਕਿਰਿਯਾਪਾਰਗੂ, ਸਮਾਪਤ੍ਤਿਪਾਰਗੂਤਿ ਛਬ੍ਬਿਧੇਨ ਪਾਰਗਮਨੇਨ ਪਾਰਗਤਂ ਪਾਰਪ੍ਪਤ੍ਤਂ ਮਤ੍ਥਕਪ੍ਪਤ੍ਤਂ. ਦੇਵਾਪਿ ਤਂ ਨਮਸ੍ਸਨ੍ਤੀਤਿ ਦੁਕ੍ਖਪ੍ਪਤ੍ਤਾ ਸੁਬ੍ਰਹ੍ਮਦੇਵਪੁਤ੍ਤਾਦਯੋ ਸੁਖਪ੍ਪਤ੍ਤਾ ਚ ਸਬ੍ਬੇਵ ਦਸਸਹਸ੍ਸਚਕ੍ਕਵਾਲ਼ਵਾਸਿਨੋ ਦੇਵਾਪਿ ਤੁਮ੍ਹੇ ਨਮਸ੍ਸਨ੍ਤਿ. ਇਤਿ ਮੇ ਅਰਹਤੋ ਸੁਤਨ੍ਤਿ ਇਤਿ ਮਯਾ ਚਤੂਹਿ ਕਾਰਣੇਹਿ ਅਰਹਾਤਿ ਲਦ੍ਧਵੋਹਾਰਾਨਂ ਤੁਮ੍ਹਾਕਂਯੇਵ ਸਨ੍ਤਿਕੇ ਸੁਤਨ੍ਤਿ ਦੀਪੇਤਿ.
ਸਬ੍ਬਸਂਯੋਜਨਾਤੀਤਨ੍ਤਿ ਸਬ੍ਬਾਨਿ ਦਸਵਿਧਸਂਯੋਜਨਾਨਿ ਅਤਿਕ੍ਕਨ੍ਤਂ. ਵਨਾ ਨਿਬ੍ਬਨਮਾਗਤਨ੍ਤਿ ਕਿਲੇਸਵਨਤੋ ਨਿਬ੍ਬਨਂ ਕਿਲੇਸਵਨਰਹਿਤਂ ਨਿਬ੍ਬਾਨਂ ਆਗਤਂ ਸਮ੍ਪਤ੍ਤਂ. ਕਾਮੇਹਿ ਨੇਕ੍ਖਮ੍ਮਰਤਨ੍ਤਿ ਦੁਵਿਧੇਹਿ ਕਾਮੇਹਿ ਨਿਕ੍ਖਨ੍ਤਤ੍ਤਾ ਪਬ੍ਬਜ੍ਜਾ ਅਟ੍ਠ ਸਮਾਪਤ੍ਤਿਯੋ ਚਤ੍ਤਾਰੋ ਚ ਅਰਿਯਮਗ੍ਗਾ ਕਾਮੇਹਿ ਨੇਕ੍ਖਮ੍ਮਂ ਨਾਮ, ਤਤ੍ਥ ਰਤਂ ਅਭਿਰਤਂ. ਮੁਤ੍ਤਂ ਸੇਲਾਵ ਕਞ੍ਚਨਨ੍ਤਿ ਸੇਲਧਾਤੁਤੋ ਮੁਤ੍ਤਂ ਕਞ੍ਚਨਸਦਿਸਂ.
ਸਬ੍ਬੇ ਅਚ੍ਚਰੁਚੀਤਿ ਸਬ੍ਬਸਤ੍ਤੇ ਅਤਿਕ੍ਕਮਿਤ੍ਵਾ ਪਵਤ੍ਤਰੁਚਿ. ਅਟ੍ਠਮਕਞ੍ਹਿ ਅਤਿਕ੍ਕਮਿਤ੍ਵਾ ਪਵਤ੍ਤਰੁਚਿਤਾਯ ਸੋਤਾਪਨ੍ਨੋ ਅਚ੍ਚਰੁਚਿ ਨਾਮ, ਸੋਤਾਪਨ੍ਨਂ ਅਤਿਕ੍ਕਮਿਤ੍ਵਾ ਪਵਤ੍ਤਰੁਚਿਤਾਯ ਸਕਦਾਗਾਮੀ…ਪੇ… ਖੀਣਾਸਵਂ ਅਤਿਕ੍ਕਮਿਤ੍ਵਾ ਪਵਤ੍ਤਰੁਚਿਤਾਯ ਪਚ੍ਚੇਕਸਮ੍ਬੁਦ੍ਧੋ, ਪਚ੍ਚੇਕਸਮ੍ਬੁਦ੍ਧਂ ਅਤਿਕ੍ਕਮਿਤ੍ਵਾ ਪਵਤ੍ਤਰੁਚਿਤਾਯ ਸਮ੍ਮਾਸਮ੍ਬੁਦ੍ਧੋ ਅਚ੍ਚਰੁਚਿ ਨਾਮ. ਹਿਮਵਾਵਞ੍ਞੇ ਸਿਲੁਚ੍ਚਯੇਤਿ ਯਥਾ ਹਿਮਵਾ ਪਬ੍ਬਤਰਾਜਾ ਅਞ੍ਞੇ ਪਬ੍ਬਤੇ ਅਤਿਰੋਚਤਿ, ਏਵਂ ਅਤਿਰੋਚਤੀਤਿ ਅਤ੍ਥੋ. ਸਚ੍ਚਨਾਮੋਤਿ ਤਚ੍ਛਨਾਮੋ ਭੂਤਨਾਮੋ ਆਗੁਂ ਅਕਰਣੇਨੇਵ ਨਾਗੋਤਿ ਏਵਂ ਅਵਿਤਥਨਾਮੋ.
ਸੋਰਚ੍ਚਨ੍ਤਿ ਸੁਚਿਸੀਲਂ. ਅਵਿਹਿਂਸਾਤਿ ਕਰੁਣਾ ਚ ਕਰੁਣਾਪੁਬ੍ਬਭਾਗੋ ਚ. ਪਾਦਾ ਨਾਗਸ੍ਸ ਤੇ ਦੁਵੇਤਿ ਤੇ ਬੁਦ੍ਧਨਾਗਸ੍ਸ ਦੁਵੇ ਪੁਰਿਮਪਾਦਾ.
ਤਪੋਤਿ ਧੁਤਸਮਾਦਾਨਂ. ਬ੍ਰਹ੍ਮਚਰਿਯਨ੍ਤਿ ਅਰਿਯਮਗ੍ਗਸੀਲਂ. ਚਰਣਾ ਨਾਗਸ੍ਸ ਤ੍ਯਾਪਰੇਤਿ ਤੇ ਬੁਦ੍ਧਨਾਗਸ੍ਸ ਅਪਰੇ ਦ੍ਵੇ ਪਚ੍ਛਿਮਪਾਦਾ. ਸਦ੍ਧਾਹਤ੍ਥੋਤਿ ਸਦ੍ਧਾਮਯਾਯ ਸੋਣ੍ਡਾਯ ਸਮਨ੍ਨਾਗਤੋ. ਉਪੇਕ੍ਖਾਸੇਤਦਨ੍ਤਵਾਤਿ ਛਲ਼ਙ੍ਗੁਪੇਕ੍ਖਾਮਯੇਹਿ ਸੇਤਦਨ੍ਤੇਹਿ ਸਮਨ੍ਨਾਗਤੋ.
ਸਤਿ ਗੀਵਾਤਿ ਯਥਾ ਨਾਗਸ੍ਸ ਅਙ੍ਗਪਚ੍ਚਙ੍ਗਸ੍ਮਿਂ ਸਿਰਾਜਾਲਾਨਂ ਗੀਵਾ ਪਤਿਟ੍ਠਾ, ਏਵਂ ਬੁਦ੍ਧਨਾਗਸ੍ਸ ਸੋਰਚ੍ਚਾਦੀਨਂ ਧਮ੍ਮਾਨਂ ਸਤਿ. ਤੇਨ ਵੁਤ੍ਤਂ – ‘‘ਸਤਿ ਗੀਵਾ’’ਤਿ. ਸਿਰੋ ਪਞ੍ਞਾਤਿ ਯਥਾ ਹਤ੍ਥਿਨਾਗਸ੍ਸ ਸਿਰੋ ਉਤ੍ਤਮਙ੍ਗੋ, ਏਵਂ ਬੁਦ੍ਧਨਾਗਸ੍ਸ ਸਬ੍ਬਞ੍ਞੁਤਞਾਣਂ. ਤੇਨ ਹਿ ਸੋ ਸਬ੍ਬਧਮ੍ਮੇ ਜਾਨਾਤਿ. ਤੇਨ ਵੁਤ੍ਤਂ – ‘‘ਸਿਰੋ ਪਞ੍ਞਾ’’ਤਿ. ਵੀਮਂਸਾ ਧਮ੍ਮਚਿਨ੍ਤਨਾਤਿ ਯਥਾ ਹਤ੍ਥਿਨਾਗਸ੍ਸ ਅਗ੍ਗਸੋਣ੍ਡੋ ਵੀਮਂਸਾ ਨਾਮ ਹੋਤਿ. ਸੋ ਤਾਯ ਥਦ੍ਧਮੁਦੁਕਂ ਖਾਦਿਤਬ੍ਬਾਖਾਦਿਤਬ੍ਬਞ੍ਚ ਵੀਮਂਸਤਿ, ਤਤੋ ਪਹਾਤਬ੍ਬਂ ਪਜਹਤਿ, ਆਦਾਤਬ੍ਬਂ ਆਦਿਯਤਿ, ਏਵਮੇਵ ਬੁਦ੍ਧਨਾਗਸ੍ਸ ਧਮ੍ਮਕੋਟ੍ਠਾਸਪਰਿਚ੍ਛੇਦਕਞਾਣਸਙ੍ਖਾਤਾ ਧਮ੍ਮਚਿਨ੍ਤਨਾ ਵੀਮਂਸਾ. ਤੇਨ ਹਿ ਞਾਣੇਨ ਸੋ ਭਬ੍ਬਾਭਬ੍ਬੇ ਜਾਨਾਤਿ. ਤੇਨ ਵੁਤ੍ਤਂ – ‘‘ਵੀਮਂਸਾ ਧਮ੍ਮਚਿਨ੍ਤਨਾ’’ਤਿ. ਧਮ੍ਮਕੁਚ੍ਛਿਸਮਾਤਪੋਤਿ ਧਮ੍ਮੋ ਵੁਚ੍ਚਤਿ ਚਤੁਤ੍ਥਜ੍ਝਾਨਸਮਾਧਿ, ਕੁਚ੍ਛਿਯੇਵ ਸਮਾਤਪੋ ਕੁਚ੍ਛਿਸਮਾਤਪੋ. ਸਮਾਤਪੋ ਨਾਮ ਸਮਾਤਪਨਟ੍ਠਾਨਂ. ਧਮ੍ਮੋ ਕੁਚ੍ਛਿਸਮਾਤਪੋ ਅਸ੍ਸਾਤਿ ਧਮ੍ਮਕੁਚ੍ਛਿਸਮਾਤਪੋ. ਚਤੁਤ੍ਥਜ੍ਝਾਨਸਮਾਧਿਸ੍ਮਿਂ ਠਿਤਸ੍ਸ ਹਿ ਤੇ ਤੇ ਇਦ੍ਧਿਵਿਧਾਦਿਧਮ੍ਮਾ ਇਜ੍ਝਨ੍ਤਿ, ਤਸ੍ਮਾ ਸੋ ਕੁਚ੍ਛਿਸਮਾਤਪੋਤਿ ਵੁਤ੍ਤੋ. ਵਿਵੇਕੋਤਿ ਕਾਯਚਿਤ੍ਤਉਪਧਿਵਿਵੇਕੋ. ਯਥਾ ਨਾਗਸ੍ਸ ਵਾਲਧਿ ਮਕ੍ਖਿਕਾ ਵਾਰੇਤਿ, ਏਵਂ ਤਥਾਗਤਸ੍ਸ ਵਿਵੇਕੋ ਗਹਟ੍ਠਪਬ੍ਬਜਿਤੇ ਵਾਰੇਤਿ. ਤਸ੍ਮਾ ਸੋ ਵਾਲਧੀਤਿ ਵੁਤ੍ਤੋ.
ਝਾਯੀਤਿ ਦੁਵਿਧੇਨ ਝਾਨੇਨ ਝਾਯੀ. ਅਸ੍ਸਾਸਰਤੋਤਿ ਨਾਗਸ੍ਸ ਹਿ ਅਸ੍ਸਾਸਪਸ੍ਸਾਸਾ ਵਿਯ ਬੁਦ੍ਧਨਾਗਸ੍ਸ ਫਲਸਮਾਪਤ੍ਤਿ, ਤਤ੍ਥ ਰਤੋ, ਅਸ੍ਸਾਸਪਸ੍ਸਾਸੇਹਿ ਵਿਯ ਤਾਯ ਵਿਨਾ ਨ ਵਤ੍ਤਤੀਤਿ ਅਤ੍ਥੋ. ਸਬ੍ਬਤ੍ਥ ਸਂਵੁਤੋਤਿ ਸਬ੍ਬਦ੍ਵਾਰੇਸੁ ਸਂਵੁਤੋ. ਅਨਵਜ੍ਜਾਨੀਤਿ ਸਮ੍ਮਾਆਜੀਵੇਨ ਉਪ੍ਪਨ੍ਨਭੋਜਨਾਨਿ. ਸਾਵਜ੍ਜਾਨੀਤਿ ਪਞ੍ਚਵਿਧਮਿਚ੍ਛਾਜੀਵਵਸੇਨ ਉਪ੍ਪਨ੍ਨਭੋਜਨਾਨਿ.
ਅਣੁਂਥੂਲਨ੍ਤਿ ਖੁਦ੍ਦਕਞ੍ਚ ਮਹਨ੍ਤਞ੍ਚ. ਸਬ੍ਬਂ ਛੇਤ੍ਵਾਨ ਬਨ੍ਧਨਨ੍ਤਿ ਸਬ੍ਬਂ ਦਸਵਿਧਮ੍ਪਿ ਸਂਯੋਜਨਂ ਛਿਨ੍ਦਿਤ੍ਵਾਨ. ਨੁਪਲਿਪ੍ਪਤਿ ਲੋਕੇਨਾਤਿ ਲੋਕੇਨ ਸਦ੍ਧਿਂ ਤਣ੍ਹਾਮਾਨਦਿਟ੍ਠਿਲੇਪੇਹਿ ਨ ਲਿਪ੍ਪਤਿ. ਮਹਾਗਿਨੀਤਿ ਮਹਾਅਗ੍ਗਿ. ਵਿਞ੍ਞੂਹਿ ਦੇਸਿਤਾਤਿ ਇਧ ਪਟਿਸਮ੍ਭਿਦਾਪ੍ਪਤ੍ਤੋ ਕਾਲ਼ੁਦਾਯਿਤ੍ਥੇਰੋਵ ਵਿਞ੍ਞੂ ਪਣ੍ਡਿਤੋ, ਤੇਨ ਦੇਸਿਤਾਤਿ ਅਤ੍ਥੋ. ਵਿਞ੍ਞਸ੍ਸਨ੍ਤਿ ਮਹਾਨਾਗਾ, ਨਾਗਂ ਨਾਗੇਨ ਦੇਸਿਤਨ੍ਤਿ ਉਦਾਯਿਤ੍ਥੇਰਨਾਗੇਨ ਦੇਸਿਤਂ ਬੁਦ੍ਧਨਾਗਂ ਇਤਰੇ ਖੀਣਾਸਵਾ ਨਾਗਾ ਵਿਜਾਨਿਸ੍ਸਨ੍ਤਿ.
ਸਰੀਰਂ ਵਿਜਹਂ ਨਾਗੋ, ਪਰਿਨਿਬ੍ਬਿਸ੍ਸਤੀਤਿ ਬੋਧਿਪਲ੍ਲਙ੍ਕੇ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ, ਯਮਕਸਾਲਨ੍ਤਰੇ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿਸ੍ਸਤਿ. ਏਵਂ ਪਟਿਸਮ੍ਭਿਦਾਪ੍ਪਤ੍ਤੋ ਉਦਾਯਿਤ੍ਥੇਰੋ ਸੋਲ਼ਸਹਿ ਗਾਥਾਹਿ ਚਤੁਸਟ੍ਠਿਯਾ ਪਦੇਹਿ ਦਸਬਲਸ੍ਸ ਵਣ੍ਣਂ ਕਥੇਨ੍ਤੋ ਦੇਸਨਂ ਨਿਟ੍ਠਾਪੇਸਿ. ਭਗਵਾ ਅਨੁਮੋਦਿ. ਦੇਸਨਾਵਸਾਨੇ ਚਤੁਰਾਸੀਤਿਪਾਣਸਹਸ੍ਸਾਨਿ ਅਮਤਪਾਨਂ ਪਿਵਿਂਸੂਤਿ.
੨. ਮਿਗਸਾਲਾਸੁਤ੍ਤਵਣ੍ਣਨਾ
੪੪. ਦੁਤਿਯੇ ਕਥਂ ਕਥਂ ਨਾਮਾਤਿ ਕੇਨ ਕੇਨ ਕਾਰਣੇਨ. ਅਞ੍ਞੇਯ੍ਯੋਤਿ ਆਜਾਨਿਤਬ੍ਬੋ. ਯਤ੍ਰ ਹਿ ਨਾਮਾਤਿ ਯਸ੍ਮਿਂ ਨਾਮ ਧਮ੍ਮੇ. ਸਮਸਮਗਤਿਕਾਤਿ ਸਮਭਾਵੇਨੇਵ ਸਮਗਤਿਕਾ. ਭਵਿਸ੍ਸਨ੍ਤੀਤਿ ਜਾਤਾ. ਸਕਦਾਗਾਮਿਪਤ੍ਤੋ ਤੁਸਿਤਂ ਕਾਯਂ ਉਪਪਨ੍ਨੋਤਿ ਸਕਦਾਗਾਮਿਪੁਗ੍ਗਲੋ ਹੁਤ੍ਵਾ ਤੁਸਿਤਭਵਨੇਯੇਵ ਨਿਬ੍ਬਤ੍ਤੋ. ਕਥਂ ਕਥਂ ਨਾਮਾਤਿ ਕੇਨ ਕੇਨ ਨੁ ਖੋ ਕਾਰਣੇਨ, ਕਿਂ ਨੁ ਖੋ ਜਾਨਿਤ੍ਵਾ ਦੇਸਿਤੋ, ਉਦਾਹੁ ਅਜਾਨਿਤ੍ਵਾਤਿ. ਥੇਰੋ ਕਾਰਣਂ ਅਜਾਨਨ੍ਤੋ ਏਵਂ ਖੋ ਪਨੇਤਂ ਭਗਿਨਿ ਭਗਵਤਾ ਬ੍ਯਾਕਤਨ੍ਤਿ ਆਹ.
ਅਮ੍ਮਕਾ ਅਮ੍ਮਕਪਞ੍ਞਾਤਿ ਇਤ੍ਥੀ ਹੁਤ੍ਵਾ ਇਤ੍ਥਿਸਞ੍ਞਾਯ ਏਵ ਸਮਨ੍ਨਾਗਤਾ. ਕੇ ਚ ਪੁਰਿਸਪੁਗ੍ਗਲਪਰੋਪਰਿਯਞਾਣੇਤਿ ਏਤ੍ਥ ਪੁਰਿਸਪੁਗ੍ਗਲਪਰੋਪਰਿਯਞਾਣਂ ਵੁਚ੍ਚਤਿ ਪੁਰਿਸਪੁਗ੍ਗਲਾਨਂ ਤਿਕ੍ਖਮੁਦੁਵਸੇਨ ਇਨ੍ਦ੍ਰਿਯਪਰੋਪਰਿਯਞਾਣਂ. ਤਸ੍ਮਾ ਕਾ ਚ ਬਾਲਾ ਮਿਗਸਾਲਾ, ਕੇ ਚ ਪੁਰਿਸਪੁਗ੍ਗਲਾਨਂ ਇਨ੍ਦ੍ਰਿਯਪਰੋਪਰਿਯਞਾਣੇ ਅਪ੍ਪਟਿਹਤਵਿਸਯਾ ਸਮ੍ਮਾਸਮ੍ਬੁਦ੍ਧਾ, ਉਭਯਮੇਤਂ ਦੂਰੇ ਸੁਵਿਦੂਰੇਤਿ ਅਯਮੇਤ੍ਥ ਸਙ੍ਖੇਪੋ.
ਇਦਾਨਿ ਮਿਗਸਾਲਾਯ ਅਤ੍ਤਨੋ ਦੂਰਭਾਵਂ ਦਸ੍ਸੇਨ੍ਤੋ ਛਯਿਮੇ, ਆਨਨ੍ਦਾਤਿਆਦਿਮਾਹ. ਸੋਰਤੋ ਹੋਤੀਤਿ ਪਾਪਤੋ ਸੁਟ੍ਠੁ ਓਰਤੋ ਵਿਰਤੋ ਹੋਤਿ. ਸੁਰਤੋਤਿਪਿ ਪਾਠੋ. ਅਭਿਨਨ੍ਦਨ੍ਤਿ ਸਬ੍ਰਹ੍ਮਚਾਰੀ ਏਕਤ੍ਤਵਾਸੇਨਾਤਿ ਤੇਨ ਸਦ੍ਧਿਂ ਏਕਤੋਵਾਸੇਨ ਸਬ੍ਰਹ੍ਮਚਾਰੀ ਅਭਿਨਨ੍ਦਨ੍ਤਿ ਤੁਸ੍ਸਨ੍ਤਿ. ਏਕਨ੍ਤਵਾਸੇਨਾਤਿਪਿ ਪਾਠੋ, ਸਤਤਵਾਸੇਨਾਤਿ ਅਤ੍ਥੋ. ਸਵਨੇਨਪਿ ਅਕਤਂ ਹੋਤੀਤਿ ਸੋਤਬ੍ਬਯੁਤ੍ਤਕਂ ਅਸੁਤਂ ਹੋਤਿ. ਬਾਹੁਸਚ੍ਚੇਨਪਿ ਅਕਤਂ ਹੋਤੀਤਿ ਏਤ੍ਥ ਬਾਹੁਸਚ੍ਚਂ ਵੁਚ੍ਚਤਿ ਵੀਰਿਯਂ, ਵੀਰਿਯੇਨ ਕਤ੍ਤਬ੍ਬਯੁਤ੍ਤਕਂ ਅਕਤਂ ਹੋਤੀਤਿ ਅਤ੍ਥੋ. ਦਿਟ੍ਠਿਯਾਪਿ ਅਪ੍ਪਟਿਵਿਦ੍ਧਂ ਹੋਤੀਤਿ ਦਿਟ੍ਠਿਯਾ ਪਟਿਵਿਜ੍ਝਿਤਬ੍ਬਂ ਅਪ੍ਪਟਿਵਿਦ੍ਧਂ ਹੋਤਿ. ਸਾਮਾਯਿਕਮ੍ਪਿ ਵਿਮੁਤ੍ਤਿਂ ਨ ਲਭਤੀਤਿ ਕਾਲਾਨੁਕਾਲਂ ਧਮ੍ਮਸ੍ਸਵਨਂ ਨਿਸ੍ਸਾਯ ਪੀਤਿਪਾਮੋਜ੍ਜਂ ਨ ਲਭਤਿ. ਹਾਨਗਾਮੀਯੇਵ ਹੋਤੀਤਿ ਪਰਿਹਾਨਿਮੇਵ ਗਚ੍ਛਤਿ.
ਪਮਾਣਿਕਾਤਿ ਪੁਗ੍ਗਲੇਸੁ ਪਮਾਣਗ੍ਗਾਹਕਾ. ਪਮਿਨਨ੍ਤੀਤਿ ਪਮੇਤੁਂ ਤੁਲੇਤੁਂ ਆਰਭਨ੍ਤਿ. ਏਕੋ ਹੀਨੋਤਿ ਏਕੋ ਗੁਣੇਹਿ ਹੀਨੋ. ਏਕੋ ਪਣੀਤੋਤਿ ਏਕੋ ਗੁਣੇਹਿ ਪਣੀਤੋ. ਤਂ ਹੀਤਿ ਤਂ ਪਮਾਣਕਰਣਂ.
ਅਭਿਕ੍ਕਨ੍ਤਤਰੋਤਿ ਸੁਨ੍ਦਰਤਰੋ. ਪਣੀਤਤਰੋਤਿ ਉਤ੍ਤਮਤਰੋ. ਧਮ੍ਮਸੋਤੋ ਨਿਬ੍ਬਹਤੀਤਿ ਸੂਰਂ ਹੁਤ੍ਵਾ ਪਵਤ੍ਤਮਾਨਵਿਪਸ੍ਸਨਾਞਾਣਂ ਨਿਬ੍ਬਹਤਿ, ਅਰਿਯਭੂਮਿਂ ਸਮ੍ਪਾਪੇਤਿ. ਤਦਨ੍ਤਰਂ ਕੋ ਜਾਨੇਯ੍ਯਾਤਿ ਤਂ ਅਨ੍ਤਰਂ ਤਂ ਕਾਰਣਂ ਅਞ੍ਞਤ੍ਰ ਤਥਾਗਤੇਨ ਕੋ ਜਾਨੇਯ੍ਯਾਤਿ ਅਤ੍ਥੋ.
ਕੋਧਮਾਨੋਤਿ ਕੋਧੋ ਚ ਮਾਨੋ ਚ. ਲੋਭਧਮ੍ਮਾਤਿ ਲੋਭੋਯੇਵ. ਵਚੀਸਙ੍ਖਾਰਾਤਿ ਆਲਾਪਸਲ੍ਲਾਪਵਸੇਨ ਵਚਨਾਨੇਵ. ਯੋ ਵਾ ਪਨਸ੍ਸ ਮਾਦਿਸੋਤਿ ਯੋ ਵਾ ਪਨ ਅਞ੍ਞੋਪਿ ਮਯਾ ਸਦਿਸੋ ਸਮ੍ਮਾਸਮ੍ਬੁਦ੍ਧੋਯੇਵ ਅਸ੍ਸ, ਸੋ ਪੁਗ੍ਗਲੇਸੁ ਪਮਾਣਂ ਗਣ੍ਹੇਯ੍ਯਾਤਿ ਅਤ੍ਥੋ. ਖਞ੍ਞਤੀਤਿ ਗੁਣਖਣਨਂ ਪਾਪੁਣਾਤਿ. ਇਮੇ ਖੋ, ਆਨਨ੍ਦ, ਛ ਪੁਗ੍ਗਲਾਤਿ ਦ੍ਵੇ ਸੋਰਤਾ, ਦ੍ਵੇ ਅਧਿਗਤਕੋਧਮਾਨਲੋਭਧਮ੍ਮਾ, ਦ੍ਵੇ ਅਧਿਗਤਕੋਧਮਾਨਵਚੀਸਙ੍ਖਾਰਾਤਿ ਇਮੇ ਛ ਪੁਗ੍ਗਲਾ. ਗਤਿਨ੍ਤਿ ਞਾਣਗਤਿਂ. ਏਕਙ੍ਗਹੀਨਾਤਿ ਏਕੇਕੇਨ ਗੁਣਙ੍ਗੇਨ ਹੀਨਾ. ਪੂਰਣੋ ਸੀਲੇਨ ਵਿਸੇਸੀ ਅਹੋਸਿ, ਇਸਿਦਤ੍ਤੋ ਪਞ੍ਞਾਯ. ਪੂਰਣਸ੍ਸ ਸੀਲਂ ਇਸਿਦਤ੍ਤਸ੍ਸ ਪਞ੍ਞਾਠਾਨੇ ਠਿਤਂ, ਇਸਿਦਤ੍ਤਸ੍ਸ ਪਞ੍ਞਾ ਪੂਰਣਸ੍ਸ ਸੀਲਟ੍ਠਾਨੇ ਠਿਤਾਤਿ.
੩. ਇਣਸੁਤ੍ਤਵਣ੍ਣਨਾ
੪੫. ਤਤਿਯੇ ਦਾਲਿਦ੍ਦਿਯਨ੍ਤਿ ਦਲਿਦ੍ਦਭਾਵੋ. ਕਾਮਭੋਗਿਨੋਤਿ ਕਾਮੇ ਭੁਞ੍ਜਨਕਸਤ੍ਤਸ੍ਸ. ਅਸ੍ਸਕੋਤਿ ਅਤ੍ਤਨੋ ਸਨ੍ਤਕੇਨ ਰਹਿਤੋ. ਅਨਾਲ਼੍ਹਿਕੋਤਿ ਨ ਅਡ੍ਢੋ. ਇਣਂ ਆਦਿਯਤੀਤਿ ਜੀਵਿਤੁਂ ਅਸਕ੍ਕੋਨ੍ਤੋ ਇਣਂ ਆਦਿਯਤਿ. ਵਡ੍ਢਿਂ ਪਟਿਸ੍ਸੁਣਾਤੀਤਿ ਦਾਤੁਂ ਅਸਕ੍ਕੋਨ੍ਤੋ ਵਡ੍ਢਿਂ ਦਸ੍ਸਾਮੀਤਿ ਪਟਿਜਾਨਾਤਿ. ਅਨੁਚਰਨ੍ਤਿਪਿ ਨਨ੍ਤਿ ਪਰਿਸਮਜ੍ਝਗਣਮਜ੍ਝਾਦੀਸੁ ਆਤਪਠਪਨਪਂਸੁਓਕਿਰਣਾਦੀਹਿ ਵਿਪ੍ਪਕਾਰਂ ਪਾਪੇਨ੍ਤੋ ਪਚ੍ਛਤੋ ਪਚ੍ਛਤੋ ਅਨੁਬਨ੍ਧਨ੍ਤਿ. ਸਦ੍ਧਾ ਨਤ੍ਥੀਤਿ ਓਕਪ੍ਪਨਕਸਦ੍ਧਾਮਤ੍ਤਕਮ੍ਪਿ ਨਤ੍ਥਿ. ਹਿਰੀ ਨਤ੍ਥੀਤਿ ਹਿਰੀਯਨਾਕਾਰਮਤ੍ਤਕਮ੍ਪਿ ਨਤ੍ਥਿ. ਓਤ੍ਤਪ੍ਪਂ ਨਤ੍ਥੀਤਿ ਭਾਯਨਾਕਾਰਮਤ੍ਤਕਮ੍ਪਿ ਨਤ੍ਥਿ. ਵੀਰਿਯਂ ਨਤ੍ਥੀਤਿ ਕਾਯਿਕਵੀਰਿਯਮਤ੍ਤਕਮ੍ਪਿ ਨਤ੍ਥਿ. ਪਞ੍ਞਾ ਨਤ੍ਥੀਤਿ ਕਮ੍ਮਸ੍ਸਕਤਪਞ੍ਞਾਮਤ੍ਤਕਮ੍ਪਿ ਨਤ੍ਥਿ. ਇਣਾਦਾਨਸ੍ਮਿਂ ਵਦਾਮੀਤਿ ਇਣਗ੍ਗਹਣਂ ਵਦਾਮਿ. ਮਾ ਮਂ ਜਞ੍ਞੂਤਿ ਮਾ ਮਂ ਜਾਨਾਤੁ.
ਦਾਲਿਦ੍ਦਿਯਂ ਦੁਕ੍ਖਨ੍ਤਿ ਧਨਦਲਿਦ੍ਦਭਾਵੋ ਦੁਕ੍ਖਂ. ਕਾਮਲਾਭਾਭਿਜਪ੍ਪਿਨਨ੍ਤਿ ਕਾਮਲਾਭਂ ਪਤ੍ਥੇਨ੍ਤਾਨਂ. ਪਾਪਕਮ੍ਮਵਿਨਿਬ੍ਬਯੋਤਿ ਪਾਪਕਮ੍ਮਵਡ੍ਢਕੋ. ਸਂਸਪ੍ਪਤੀਤਿ ਪਰਿਪ੍ਫਨ੍ਦਤਿ. ਜਾਨਨ੍ਤਿ ਜਾਨਨ੍ਤੋ. ਯਸ੍ਸ ਵਿਪ੍ਪਟਿਸਾਰਜਾਤਿ ਯੇ ਅਸ੍ਸ ਵਿਪ੍ਪਟਿਸਾਰਤੋ ਜਾਤਾ. ਯੋਨਿਮਞ੍ਞਤਰਨ੍ਤਿ ਏਕਂ ਤਿਰਚ੍ਛਾਨਯੋਨਿਂ. ਦਦਂ ਚਿਤ੍ਤਂ ਪਸਾਦਯਨ੍ਤਿ ਚਿਤ੍ਤਂ ਪਸਾਦੇਨ੍ਤੋ ਦਦਮਾਨੋ.
ਕਟਗ੍ਗਾਹੋਤਿ ਜਯਗ੍ਗਾਹੋ, ਅਨਪਰਾਧਗ੍ਗਾਹੋ ਹੋਤਿ. ਘਰਮੇਸਿਨੋਤਿ ਘਰਾਵਾਸਂ ਪਰਿਯੇਸਨ੍ਤਸ੍ਸ ਵਸਮਾਨਸ੍ਸ ਵਾ. ਚਾਗੋ ਪੁਞ੍ਞਂ ਪਵਡ੍ਢਤੀਤਿ ਚਾਗੋਤਿ ਸਙ੍ਖਂ ਗਤਂ ਪੁਞ੍ਞਂ ਵਡ੍ਢਤਿ. ਚਾਗਾ ਪੁਞ੍ਞਨ੍ਤਿ ਵਾ ਪਾਠੋ. ਪਤਿਟ੍ਠਿਤਾਤਿ ਪਤਿਟ੍ਠਿਤਸਦ੍ਧਾ ਨਾਮ ਸੋਤਾਪਨ੍ਨਸ੍ਸ ਸਦ੍ਧਾ. ਹਿਰਿਮਨੋਤਿ ਹਿਰਿਸਮ੍ਪਯੁਤ੍ਤਚਿਤ੍ਤੋ. ਨਿਰਾਮਿਸਂ ਸੁਖਨ੍ਤਿ ਤੀਣਿ ਝਾਨਾਨਿ ਨਿਸ੍ਸਾਯ ਉਪ੍ਪਜ੍ਜਨਕਸੁਖਂ. ਉਪੇਕ੍ਖਨ੍ਤਿ ਚਤੁਤ੍ਥਜ੍ਝਾਨੁਪੇਕ੍ਖਂ. ਆਰਦ੍ਧਵੀਰਿਯੋਤਿ ਪਰਿਪੁਣ੍ਣਪਗ੍ਗਹਿਤਵੀਰਿਯੋ. ਝਾਨਾਨਿ ਉਪਸਮ੍ਪਜ੍ਜਾਤਿ ਚਤ੍ਤਾਰਿ ਝਾਨਾਨਿ ਪਤ੍ਵਾ. ਏਕੋਦਿ ਨਿਪਕੋ ਸਤੋਤਿ ਏਕਗ੍ਗਚਿਤ੍ਤੋ ਕਮ੍ਮਸ੍ਸਕਤਞਾਣਸਤੀਹਿ ਚ ਸਮਨ੍ਨਾਗਤੋ.
ਏਵਂ ਞਤ੍ਵਾ ਯਥਾਭੂਤਨ੍ਤਿ ਏਵਂ ਏਤ੍ਤਕਂ ਕਾਰਣਂ ਯਥਾਸਭਾਵਂ ਜਾਨਿਤ੍ਵਾ. ਸਬ੍ਬਸਂਯੋਜਨਕ੍ਖਯੇਤਿ ਨਿਬ੍ਬਾਨੇ. ਸਬ੍ਬਸੋਤਿ ਸਬ੍ਬਾਕਾਰੇਨ. ਅਨੁਪਾਦਾਯਾਤਿ ਅਗ੍ਗਹੇਤ੍ਵਾ. ਸਮ੍ਮਾ ਚਿਤ੍ਤਂ ਵਿਮੁਚ੍ਚਤੀਤਿ ਇਦਂ ਵੁਤ੍ਤਂ ਹੋਤਿ – ਸਬ੍ਬਸਂਯੋਜਨਕ੍ਖਯਸਙ੍ਖਾਤੇ ਨਿਬ੍ਬਾਨੇ ਸਬ੍ਬਸੋ ਅਨੁਪਾਦਿਯਿਤ੍ਵਾ ਸਮ੍ਮਾ ਹੇਤੁਨਾ ਨਯੇਨ ਮਗ੍ਗਚਿਤ੍ਤਂ ਵਿਮੁਚ੍ਚਤਿ. ‘‘ਏਤਂ ਞਤ੍ਵਾ ਯਥਾਭੂਤਂ, ਸਬ੍ਬਸਂਯੋਜਨਕ੍ਖਯ’’ਨ੍ਤਿਪਿ ਪਾਲ਼ਿਯਂ ਲਿਖਿਤਂ, ਤਸ੍ਸ ਏਤਂ ਸਬ੍ਬਸਂਯੋਜਨਕ੍ਖਯਸਙ੍ਖਾਤਂ ਨਿਬ੍ਬਾਨਂ ਯਥਾਭੂਤਂ ਞਤ੍ਵਾਤਿ ਅਤ੍ਥੋ. ਪੁਰਿਮਪਚ੍ਛਿਮੇਹਿ ਪਨ ਸਦ੍ਧਿਂ ਨ ਘਟੀਯਤਿ.
ਤਸ੍ਸ ਸਮ੍ਮਾ ਵਿਮੁਤ੍ਤਸ੍ਸਾਤਿ ਤਸ੍ਸ ਸਮ੍ਮਾ ਵਿਮੁਤ੍ਤਸ੍ਸ ਖੀਣਾਸਵਸ੍ਸ. ਞਾਣਂ ਹੋਤੀਤਿ ਪਚ੍ਚਵੇਕ੍ਖਣਞਾਣਂ ਹੋਤਿ. ਤਾਦਿਨੋਤਿ ਤਂਸਣ੍ਠਿਤਸ੍ਸ. ਅਕੁਪ੍ਪਾਤਿ ਅਕੁਪ੍ਪਾਰਮ੍ਮਣਤ੍ਤਾ ਕੁਪ੍ਪਕਾਰਣਾਨਂ ਕਿਲੇਸਾਨਞ੍ਚ ਅਭਾਵੇਨ ਅਕੁਪ੍ਪਾ. ਵਿਮੁਤ੍ਤੀਤਿ ਮਗ੍ਗਵਿਮੁਤ੍ਤਿਪਿ ਫਲਵਿਮੁਤ੍ਤਿਪਿ. ਭਵਸਂਯੋਜਨਕ੍ਖਯੇਤਿ ਭਵਸਂਯੋਜਨਕ੍ਖਯਸਙ੍ਖਾਤੇ ਨਿਬ੍ਬਾਨੇ ਭਵਸਂਯੋਜਨਾਨਞ੍ਚ ਖਯਨ੍ਤੇ ਉਪ੍ਪਨ੍ਨਾ. ਏਤਂ ਖੋ ਪਰਮਂ ਞਾਣਨ੍ਤਿ ਏਤਂ ਮਗ੍ਗਫਲਞਾਣਂ ਪਰਮਞਾਣਂ ਨਾਮ. ਸੁਖਮਨੁਤ੍ਤਰਨ੍ਤਿ ਏਤਦੇਵ ਮਗ੍ਗਫਲਸੁਖਂ ਅਨੁਤ੍ਤਰਂ ਸੁਖਂ ਨਾਮ. ਆਣਣ੍ਯਮੁਤ੍ਤਮਨ੍ਤਿ ਸਬ੍ਬੇਸਂ ਅਣਣਾਨਂ ਖੀਣਾਸਵੋ ਉਤ੍ਤਮਅਣਣੋ, ਤਸ੍ਮਾ ਅਰਹਤ੍ਤਫਲਂ ਆਣਣ੍ਯਮੁਤ੍ਤਮਨ੍ਤਿ ਅਰਹਤ੍ਤਫਲੇਨ ਦੇਸਨਾਯ ਕੂਟਂ ਗਣ੍ਹਿ. ਇਮਸ੍ਮਿਞ੍ਚ ਸੁਤ੍ਤੇ ਵਟ੍ਟਮੇਵ ਕਥੇਤ੍ਵਾ ਗਾਥਾਸੁ ਵਟ੍ਟਵਿਵਟ੍ਟਂ ਕਥਿਤਨ੍ਤਿ.
੪. ਮਹਾਚੁਨ੍ਦਸੁਤ੍ਤਵਣ੍ਣਨਾ
੪੬. ਚਤੁਤ੍ਥੇ ਚੇਤੀਸੂਤਿ ਚੇਤਿਰਟ੍ਠੇ. ਸਯਂਜਾਤਿਯਨ੍ਤਿ ਏਵਂਨਾਮਕੇ ਨਿਗਮੇ. ਮਹਾਚੁਨ੍ਦੋਤਿ ਧਮ੍ਮਸੇਨਾਪਤਿਸ੍ਸ ਕਨਿਟ੍ਠਭਾਤਿਕੋ. ਧਮ੍ਮੇ ਯੋਗੋ ਅਨੁਯੋਗੋ ਏਤੇਸਨ੍ਤਿ ਧਮ੍ਮਯੋਗਾ. ਧਮ੍ਮਕਥਿਕਾਨਂ ਏਤਂ ਨਾਮਂ. ਝਾਯਨ੍ਤੀਤਿ ਝਾਯੀ. ਅਪਸਾਦੇਨ੍ਤੀਤਿ ਘਟ੍ਟੇਨ੍ਤਿ ਹਿਂਸਨ੍ਤਿ. ਝਾਯਨ੍ਤੀਤਿ ਚਿਨ੍ਤੇਨ੍ਤਿ. ਪਜ੍ਝਾਯਨ੍ਤੀਤਿਆਦੀਨਿ ਉਪਸਗ੍ਗਵਸੇਨ ਵਡ੍ਢਿਤਾਨਿ. ਕਿਮਿਮੇ ਝਾਯਨ੍ਤੀਤਿ ਕਿਂ ਨਾਮ ਇਮੇ ਝਾਯਨ੍ਤਿ. ਕਿਨ੍ਤਿਮੇ ਝਾਯਨ੍ਤੀਤਿ ਕਿਮਤ੍ਥਂ ਇਮੇ ਝਾਯਨ੍ਤਿ. ਕਥਂ ਇਮੇ ਝਾਯਨ੍ਤੀਤਿ ਕੇਨ ਕਾਰਣੇਨ ਇਮੇ ਝਾਯਨ੍ਤਿ. ਅਮਤਂ ਧਾਤੁਂ ਕਾਯੇਨ ਫੁਸਿਤ੍ਵਾ ਵਿਹਰਨ੍ਤੀਤਿ ਮਰਣਵਿਰਹਿਤਂ ਨਿਬ੍ਬਾਨਧਾਤੁਂ ਸਨ੍ਧਾਯ ਕਮ੍ਮਟ੍ਠਾਨਂ ਗਹੇਤ੍ਵਾ ਵਿਹਰਨ੍ਤਾ ਅਨੁਕ੍ਕਮੇਨ ਤਂ ਨਾਮਕਾਯੇਨ ਫੁਸਿਤ੍ਵਾ ਵਿਹਰਨ੍ਤਿ. ਗਮ੍ਭੀਰਂ ਅਤ੍ਥਪਦਨ੍ਤਿ ਗੁਲ਼੍ਹਂ ਪਟਿਚ੍ਛਨ੍ਨਂ ਖਨ੍ਧਧਾਤੁਆਯਤਨਾਦਿਅਤ੍ਥਂ. ਪਞ੍ਞਾਯ ਅਤਿਵਿਜ੍ਝ ਪਸ੍ਸਨ੍ਤੀਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ ਪਟਿਵਿਜ੍ਝਿਤ੍ਵਾ ਪਸ੍ਸਨ੍ਤਿ. ਇਮਸ੍ਮਿਂ ਪਨਤ੍ਥੇ ਸਮ੍ਮਸਨਪਟਿਵੇਧਪਞ੍ਞਾਪਿ ਉਗ੍ਗਹਪਰਿਪੁਚ੍ਛਾਪਞ੍ਞਾਪਿ ਵਟ੍ਟਤਿਯੇਵਾਤਿ.
੫-੬. ਸਨ੍ਦਿਟ੍ਠਿਕਸੁਤ੍ਤਦ੍ਵਯਵਣ੍ਣਨਾ
੪੭-੪੮. ਪਞ੍ਚਮੇ ਸਨ੍ਤਂ ਵਾ ਅਜ੍ਝਤ੍ਤਨ੍ਤਿ ਨਿਯਕਜ੍ਝਤ੍ਤੇ ਵਿਜ੍ਜਮਾਨਂ. ਲੋਭੋਤਿਆਦੀਹਿ ਤੀਣਿ ਅਕੁਸਲਮੂਲਾਨਿ ਦਸ੍ਸਿਤਾਨਿ. ਲੋਭਧਮ੍ਮਾਤਿਆਦੀਹਿ ਤਂਸਮ੍ਪਯੁਤ੍ਤਕਾ ਧਮ੍ਮਾ. ਛਟ੍ਠੇ ਕਾਯਸਨ੍ਦੋਸਨ੍ਤਿ ਕਾਯਦ੍ਵਾਰਸ੍ਸ ਦੁਸ੍ਸਨਾਕਾਰਂ. ਸੇਸਦ੍ਵਯੇਪਿ ਏਸੇਵ ਨਯੋ. ਇਮੇਸੁ ਦ੍ਵੀਸੁ ਸੁਤ੍ਤੇਸੁ ਪਚ੍ਚਵੇਕ੍ਖਣਾਵ ਕਥਿਤਾ.
੭. ਖੇਮਸੁਤ੍ਤਵਣ੍ਣਨਾ
੪੯. ਸਤ੍ਤਮੇ ਵੁਸਿਤਵਾਤਿ ਵੁਤ੍ਥਬ੍ਰਹ੍ਮਚਰਿਯਵਾਸੋ. ਕਤਕਰਣੀਯੋਤਿ ਚਤੂਹਿ ਮਗ੍ਗੇਹਿ ਕਤ੍ਤਬ੍ਬਂ ਕਤ੍ਵਾ ਠਿਤੋ. ਓਹਿਤਭਾਰੋਤਿ ਖਨ੍ਧਭਾਰਂ ਕਿਲੇਸਭਾਰਂ ਅਭਿਸਙ੍ਖਾਰਭਾਰਞ੍ਚ ਓਤਾਰੇਤ੍ਵਾ ਠਿਤੋ. ਅਨੁਪ੍ਪਤ੍ਤਸਦਤ੍ਥੋਤਿ ਸਦਤ੍ਥੋ ਵੁਚ੍ਚਤਿ ਅਰਹਤ੍ਤਂ, ਤਂ ਪਤ੍ਤੋਤਿ ਅਤ੍ਥੋ. ਪਰਿਕ੍ਖੀਣਭਵਸਂਯੋਜਨੋਤਿ ਖੀਣਭਵਬਨ੍ਧਨੋ. ਸਮ੍ਮਦਞ੍ਞਾ ਵਿਮੁਤ੍ਤੋਤਿ ਸਮ੍ਮਾ ਹੇਤੁਨਾ ਕਾਰਣੇਨ ਜਾਨਿਤ੍ਵਾ ਵਿਮੁਤ੍ਤੋ. ਤਸ੍ਸ ਨ ਏਵਂ ਹੋਤਿ ਅਤ੍ਥਿ ਮੇ ਸੇਯ੍ਯੋਤਿ ਵਾਤਿਆਦੀਹਿ ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨਾਦਯੋ ਤਯੋ ਮਾਨਾ ਪਟਿਕ੍ਖਿਤ੍ਤਾ. ਨ ਹਿ ਖੀਣਾਸਵਸ੍ਸ ‘‘ਅਤ੍ਥਿ ਮਯ੍ਹਂ ਸੇਯ੍ਯੋ, ਅਤ੍ਥਿ ਸਦਿਸੋ, ਅਤ੍ਥਿ ਹੀਨੋ’’ਤਿ ਮਾਨੋ ਹੋਤਿ. ਨਤ੍ਥਿ ਮੇ ਸੇਯ੍ਯੋਤਿਆਦੀਹਿਪਿ ਤੇਯੇਵ ਪਟਿਕ੍ਖਿਤ੍ਤਾ. ਨ ਹਿ ਖੀਣਾਸਵਸ੍ਸ ‘‘ਅਹਮੇਵ ਸੇਯ੍ਯੋ, ਅਹਂ ਸਦਿਸੋ, ਅਹਂ ਹੀਨੋ, ਅਞ੍ਞੇ ਸੇਯ੍ਯਾਦਯੋ ਨਤ੍ਥੀ’’ਤਿ ਏਵਂ ਮਾਨੋ ਹੋਤਿ.
ਅਚਿਰਪਕ੍ਕਨ੍ਤੇਸੂਤਿ ਅਰਹਤ੍ਤਂ ਬ੍ਯਾਕਰਿਤ੍ਵਾ ਅਚਿਰਂਯੇਵ ਪਕ੍ਕਨ੍ਤੇਸੁ. ਅਞ੍ਞਂ ਬ੍ਯਾਕਰੋਨ੍ਤੀਤਿ ਅਰਹਤ੍ਤਂ ਕਥੇਨ੍ਤਿ. ਹਸਮਾਨਕਾ ਮਞ੍ਞੇ ਅਞ੍ਞਂ ਬ੍ਯਾਕਰੋਨ੍ਤੀਤਿ ਹਸਮਾਨਾ ਵਿਯ ਕਥੇਨ੍ਤਿ. ਵਿਘਾਤਂ ਆਪਜ੍ਜਨ੍ਤੀਤਿ ਦੁਕ੍ਖਂ ਆਪਜ੍ਜਨ੍ਤਿ.
ਨ ਉਸ੍ਸੇਸੁ ਨ ਓਮੇਸੁ, ਸਮਤ੍ਤੇ ਨੋਪਨੀਯਰੇਤਿ ਏਤ੍ਥ ਉਸ੍ਸਾਤਿ ਉਸ੍ਸਿਤਤਾ ਸੇਯ੍ਯਪੁਗ੍ਗਲਾ. ਓਮਾਤਿ ਹੀਨਾ. ਸਮਤ੍ਤੋਤਿ ਸਦਿਸੋ. ਇਤਿ ਇਮੇਸੁ ਤੀਸੁਪਿ ਸੇਯ੍ਯਹੀਨਸਦਿਸੇਸੁ ਖੀਣਾਸਵਾ ਮਾਨੇਨ ਨ ਉਪਨੀਯਰੇ, ਨ ਉਪਨੇਨ੍ਤਿ, ਨ ਉਪਗਚ੍ਛਨ੍ਤੀਤਿ ਅਤ੍ਥੋ. ਖੀਣਾ ਜਾਤੀਤਿ ਖੀਣਾ ਤੇਸਂ ਜਾਤਿ. ਵੁਸਿਤਂ ਬ੍ਰਹ੍ਮਚਰਿਯਨ੍ਤਿ ਵੁਤ੍ਥਂ ਮਗ੍ਗਬ੍ਰਹ੍ਮਚਰਿਯਂ. ਚਰਨ੍ਤਿ ਸਂਯੋਜਨਵਿਪ੍ਪਮੁਤ੍ਤਾਤਿ ਸਬ੍ਬਸਂਯੋਜਨੇਹਿ ਵਿਮੁਤ੍ਤਾ ਹੁਤ੍ਵਾ ਚਰਨ੍ਤਿ. ਸੁਤ੍ਤੇਪਿ ਗਾਥਾਯਮ੍ਪਿ ਖੀਣਾਸਵੋ ਕਥਿਤੋ.
੮. ਇਨ੍ਦ੍ਰਿਯਸਂਵਰਸੁਤ੍ਤਵਣ੍ਣਨਾ
੫੦. ਅਟ੍ਠਮੇ ਹਤੂਪਨਿਸਂ ਹੋਤੀਤਿ ਹਤੂਪਨਿਸ੍ਸਯਂ ਹੋਤਿ. ਸੀਲਵਿਪਨ੍ਨਸ੍ਸਾਤਿ ਵਿਪਨ੍ਨਸੀਲਸ੍ਸ. ਯਥਾਭੂਤਞਾਣਦਸ੍ਸਨਨ੍ਤਿ ਤਰੁਣਵਿਪਸ੍ਸਨਾਞਾਣਂ. ਨਿਬ੍ਬਿਦਾਵਿਰਾਗੋਤਿ ਏਤ੍ਥ ਨਿਬ੍ਬਿਦਾ ਬਲਵਵਿਪਸ੍ਸਨਾ, ਵਿਰਾਗੋ ਅਰਿਯਮਗ੍ਗੋ. ਵਿਮੁਤ੍ਤਿਞਾਣਦਸ੍ਸਨਨ੍ਤਿ ਏਤ੍ਥ ਵਿਮੁਤ੍ਤੀਤਿ ਅਰਹਤ੍ਤਫਲਂ, ਞਾਣਦਸ੍ਸਨਨ੍ਤਿ ਪਚ੍ਚਵੇਕ੍ਖਣਞਾਣਂ. ਉਪਨਿਸ੍ਸਯਸਮ੍ਪਨ੍ਨਂ ਹੋਤੀਤਿ ਸਮ੍ਪਨ੍ਨਉਪਨਿਸ੍ਸਯਂ ਹੋਤਿ. ਇਮਸ੍ਮਿਂ ਸੁਤ੍ਤੇ ਸੀਲਾਨੁਰਕ੍ਖਣਇਨ੍ਦ੍ਰਿਯਸਂਵਰੋ ਕਥਿਤੋ.
੯. ਆਨਨ੍ਦਸੁਤ੍ਤਵਣ੍ਣਨਾ
੫੧. ਨਵਮੇ ਕਿਤ੍ਤਾਵਤਾਤਿ ਕਿਤ੍ਤਕੇਨ. ਅਸ੍ਸੁਤਞ੍ਚੇਵਾਤਿ ਅਞ੍ਞਸ੍ਮਿਂ ਕਾਲੇ ਅਸ੍ਸੁਤਪੁਬ੍ਬਂ. ਨ ਸਮ੍ਮੋਸਂ ਗਚ੍ਛਨ੍ਤੀਤਿ ਵਿਨਾਸਂ ਨ ਗਚ੍ਛਨ੍ਤਿ. ਚੇਤਸੋ ਸਮ੍ਫੁਟ੍ਠਪੁਬ੍ਬਾਤਿ ਚਿਤ੍ਤੇਨ ਫੁਸਿਤਪੁਬ੍ਬਾ. ਸਮੁਦਾਚਰਨ੍ਤੀਤਿ ਮਨੋਦ੍ਵਾਰੇ ਚਰਨ੍ਤਿ. ਅਵਿਞ੍ਞਾਤਞ੍ਚ ਵਿਜਾਨਾਤੀਤਿ ਅਞ੍ਞਸ੍ਮਿਂ ਕਾਲੇ ਅਵਿਞ੍ਞਾਤਕਾਰਣਂ ਜਾਨਾਤਿ. ਪਰਿਯਾਪੁਣਾਤੀਤਿ ਵਲ਼ਞ੍ਜੇਤਿ ਕਥੇਤਿ. ਦੇਸੇਤੀਤਿ ਪਕਾਸੇਤਿ. ਪਰਂ ਵਾਚੇਤੀਤਿ ਪਰਂ ਉਗ੍ਗਣ੍ਹਾਪੇਤਿ.
ਆਗਤਾਗਮਾਤਿ ਦੀਘਾਦੀਸੁ ਯੋ ਕੋਚਿ ਆਗਮੋ ਆਗਤੋ ਏਤੇਸਨ੍ਤਿ ਆਗਤਾਗਮਾ. ਧਮ੍ਮਧਰਾਤਿ ਸੁਤ੍ਤਨ੍ਤਪਿਟਕਧਰਾ. ਵਿਨਯਧਰਾਤਿ ਵਿਨਯਪਿਟਕਧਰਾ. ਮਾਤਿਕਾਧਰਾਤਿ ਦ੍ਵੇਪਾਤਿਮੋਕ੍ਖਧਰਾ. ਪਰਿਪੁਚ੍ਛਤੀਤਿ ਅਨੁਸਨ੍ਧਿਪੁਬ੍ਬਾਪਰਂ ਪੁਚ੍ਛਤਿ. ਪਰਿਪਞ੍ਹਤੀਤਿ ਇਦਞ੍ਚਿਦਞ੍ਚ ਪੁਚ੍ਛਿਸ੍ਸਾਮੀਤਿ ਪਰਿਤੁਲਤਿ ਪਰਿਚ੍ਛਿਨ੍ਦਤਿ. ਇਦਂ, ਭਨ੍ਤੇ, ਕਥਨ੍ਤਿ, ਭਨ੍ਤੇ, ਇਦਂ ਅਨੁਸਨ੍ਧਿਪੁਬ੍ਬਾਪਰਂ ਕਥਂ ਹੋਤੀਤਿ ਪੁਚ੍ਛਤਿ. ਇਮਸ੍ਸ ਕ੍ਵਤ੍ਥੋਤਿ ਇਮਸ੍ਸ ਭਾਸਿਤਸ੍ਸ ਕੋ ਅਤ੍ਥੋਤਿ ਪੁਚ੍ਛਤਿ. ਅਵਿਵਟਨ੍ਤਿ ਅਵਿਵਰਿਤਂ. ਵਿਵਰਨ੍ਤੀਤਿ ਪਾਕਟਂ ਕਰੋਨ੍ਤਿ. ਕਙ੍ਖਾਠਾਨਿਯੇਸੂਤਿ ਕਙ੍ਖਾਯ ਕਾਰਣਭੂਤੇਸੁ. ਤਤ੍ਥ ਯਸ੍ਮਿਂ ਧਮ੍ਮੇ ਕਙ੍ਖਾ ਉਪ੍ਪਜ੍ਜਤਿ, ਸ੍ਵੇਵ ਕਙ੍ਖਾਠਾਨਿਯੋ ਨਾਮਾਤਿ ਵੇਦਿਤਬ੍ਬੋ.
੧੦. ਖਤ੍ਤਿਯਸੁਤ੍ਤਵਣ੍ਣਨਾ
੫੨. ਦਸਮੇ ਭੋਗਾਧਿਪ੍ਪਾਯਾਤਿ ਭੋਗਸਂਹਰਣਤ੍ਥਂ ਠਪਿਤਾਧਿਪ੍ਪਾਯਾ ਪਵਤ੍ਤਅਜ੍ਝਾਸਯਾ. ਪਞ੍ਞੂਪਵਿਚਾਰਾਤਿ ਪਞ੍ਞਵਨ੍ਤੋ ਭਵੇਯ੍ਯਾਮਾਤਿ ਏਵਂ ਪਞ੍ਞਤ੍ਥਾਯ ਪਵਤ੍ਤੂਪਵਿਚਾਰਾ. ਅਯਮੇਵ ਨੇਸਂ ਵਿਚਾਰੋ ਚਿਤ੍ਤੇ ਉਪਵਿਚਰਤਿ. ਬਲਾਧਿਟ੍ਠਾਨਾਤਿ ਬਲਕਾਯਾਧਿਟ੍ਠਾਨਾ. ਬਲਕਾਯਞ੍ਹਿ ਲਦ੍ਧਾ ਤੇ ਲਦ੍ਧਪਤਿਟ੍ਠਾ ਨਾਮ ਹੋਨ੍ਤਿ. ਪਥਵਿਭਿਨਿਵੇਸਾਤਿ ਪਥਵਿਸਾਮਿਨੋ ਭਵਿਸ੍ਸਾਮਾਤਿ ਏਵਂ ਪਥਵਿਅਤ੍ਥਾਯ ਕਤਚਿਤ੍ਤਾਭਿਨਿਵੇਸਾ. ਇਸ੍ਸਰਿਯਪਰਿਯੋਸਾਨਾਤਿ ਰਜ੍ਜਾਭਿਸੇਕਪਰਿਯੋਸਾਨਾ. ਅਭਿਸੇਕਞ੍ਹਿ ਪਤ੍ਵਾ ਤੇ ਪਰਿਯੋਸਾਨਪ੍ਪਤ੍ਤਾ ਨਾਮ ਹੋਨ੍ਤਿ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.
ਸੇਸਪਦੇਸੁ ਪਨੇਤ੍ਥ ਅਯਮਧਿਪ੍ਪਾਯੋ – ਬ੍ਰਾਹ੍ਮਣਾ ਤਾਵ ਮਨ੍ਤੇ ਲਭਿਤ੍ਵਾ ਲਦ੍ਧਪਤਿਟ੍ਠਾ ਨਾਮ ਹੋਨ੍ਤਿ, ਗਹਪਤਿਕਾ ਯਂਕਿਞ੍ਚਿ ਸਿਪ੍ਪਂ, ਇਤ੍ਥੀ ਕੁਲਦਾਯਜ੍ਜਸਾਮਿਕਂ ਪੁਤ੍ਤਂ, ਚੋਰਾ ਯਂਕਿਞ੍ਚਿ ਆਵੁਧਸਤ੍ਥਂ, ਸਮਣਾ ਸੀਲਪਰਿਪੁਣ੍ਣਾ ਲਦ੍ਧਪਤਿਟ੍ਠਾ ਨਾਮ ਹੋਨ੍ਤਿ. ਤਸ੍ਮਾ ਮਨ੍ਤਾਧਿਟ੍ਠਾਨਾਤਿਆਦੀਨਿ ਵੁਤ੍ਤਾਨਿ.
ਬ੍ਰਾਹ੍ਮਣਾਨਞ੍ਚ ‘‘ਯਞ੍ਞਂ ਯਜਿਸ੍ਸਾਮਾ’’ਤਿ ਚਿਤ੍ਤਂ ਅਭਿਨਿਵਿਸਤਿ, ਬ੍ਰਹ੍ਮਲੋਕੇ ਪਤ੍ਤੇ ਪਰਿਯੋਸਾਨਪ੍ਪਤ੍ਤਾ ਨਾਮ ਹੋਨ੍ਤਿ. ਤਸ੍ਮਾ ਤੇ ਯਞ੍ਞਾਭਿਨਿਵੇਸਾ ਬ੍ਰਹ੍ਮਲੋਕਪਰਿਯੋਸਾਨਾਤਿ ਵੁਤ੍ਤਾ. ਕਮ੍ਮਨ੍ਤਕਰਣਤ੍ਥਾਯ ਮਨੋ ਏਤੇਸਂ ਅਭਿਨਿਵਿਸਤੀਤਿ ਕਮ੍ਮਨ੍ਤਾਭਿਨਿਵੇਸਾ. ਕਮ੍ਮੇ ਨਿਟ੍ਠਿਤੇ ਪਰਿਯੋਸਾਨਪ੍ਪਤ੍ਤਾ ਨਾਮ ਹੋਨ੍ਤੀਤਿ ਨਿਟ੍ਠਿਤਕਮ੍ਮਨ੍ਤਪਰਿਯੋਸਾਨਾ.
ਪੁਰਿਸਾਧਿਪ੍ਪਾਯਾਤਿ ਪੁਰਿਸੇਸੁ ਪਵਤ੍ਤਅਜ੍ਝਾਸਯਾ. ਅਲਙ੍ਕਾਰਤ੍ਥਾਯ ਮਨੋ ਉਪਵਿਚਰਤਿ ਏਤਿਸ੍ਸਾਤਿ ਅਲਙ੍ਕਾਰੂਪਵਿਚਾਰਾ. ਅਸਪਤ੍ਤੀ ਹੁਤ੍ਵਾ ਏਕਿਕਾਵ ਘਰੇ ਵਸੇਯ੍ਯਨ੍ਤਿ ਏਵਮਸ੍ਸਾ ਚਿਤ੍ਤਂ ਅਭਿਨਿਵਿਸਤੀਤਿ ਅਸਪਤ੍ਤੀਭਿਨਿਵੇਸਾ. ਘਰਾਵਾਸਿਸ੍ਸਰਿਯੇ ਲਦ੍ਧੇ ਪਰਿਯੋਸਾਨਪ੍ਪਤ੍ਤਾ ਨਾਮ ਹੋਨ੍ਤੀਤਿ ਇਸ੍ਸਰਿਯਪਰਿਯੋਸਾਨਾ.
ਪਰਭਣ੍ਡਸ੍ਸ ਆਦਾਨੇ ਅਧਿਪ੍ਪਾਯੋ ਏਤੇਸਨ੍ਤਿ ਆਦਾਨਾਧਿਪ੍ਪਾਯਾ. ਗਹਨੇ ਨਿਲੀਯਨਟ੍ਠਾਨੇ ਏਤੇਸਂ ਮਨੋ ਉਪਵਿਚਰਤੀਤਿ ਗਹਨੂਪਵਿਚਾਰਾ. ਅਨ੍ਧਕਾਰਤ੍ਥਾਯ ਏਤੇਸਂ ਚਿਤ੍ਤਂ ਅਭਿਨਿਵਿਸਤੀਤਿ ਅਨ੍ਧਕਾਰਾਭਿਨਿਵੇਸਾ. ਅਦਸ੍ਸਨਪ੍ਪਤ੍ਤਾ ਪਰਿਯੋਸਾਨਪ੍ਪਤ੍ਤਾ ਹੋਨ੍ਤੀਤਿ ਅਦਸ੍ਸਨਪਰਿਯੋਸਾਨਾ.
ਅਧਿਵਾਸਨਕ੍ਖਨ੍ਤਿਯਞ੍ਚ ਸੁਚਿਭਾਵਸੀਲੇ ਚ ਅਧਿਪ੍ਪਾਯੋ ਏਤੇਸਨ੍ਤਿ ਖਨ੍ਤਿਸੋਰਚ੍ਚਾਧਿਪ੍ਪਾਯਾ. ਅਕਿਞ੍ਚਨਭਾਵੇ ਨਿਗ੍ਗਹਣਭਾਵੇ ਚਿਤ੍ਤਂ ਏਤੇਸਂ ਅਭਿਨਿਵਿਸਤੀਤਿ ਆਕਿਞ੍ਚਞ੍ਞਾਭਿਨਿਵੇਸਾ. ਨਿਬ੍ਬਾਨਪ੍ਪਤ੍ਤਾ ਪਰਿਯੋਸਾਨਪ੍ਪਤ੍ਤਾ ਹੋਨ੍ਤੀਤਿ ਨਿਬ੍ਬਾਨਪਰਿਯੋਸਾਨਾ.
੧੧. ਅਪ੍ਪਮਾਦਸੁਤ੍ਤਵਣ੍ਣਨਾ
੫੩. ਏਕਾਦਸਮੇ ਸਮਧਿਗ੍ਗਯ੍ਹਾਤਿ ਸੁਟ੍ਠੁ ਗਣ੍ਹਿਤ੍ਵਾ. ਜਙ੍ਗਲਾਨਂ ਪਾਣਾਨਨ੍ਤਿ ਪਥਵੀਤਲਚਾਰੀਨਂ ਸਪਾਦਕਪਾਣਾਨਂ. ਪਦਜਾਤਾਨੀਤਿ ਪਦਾਨਿ. ਸਮੋਧਾਨਂ ਗਚ੍ਛਨ੍ਤੀਤਿ ਓਧਾਨਂ ਉਪਨਿਕ੍ਖੇਪਂ ਗਚ੍ਛਨ੍ਤਿ. ਅਗ੍ਗਮਕ੍ਖਾਯਤੀਤਿ ਸੇਟ੍ਠਂ ਅਕ੍ਖਾਯਤਿ. ਪਬ੍ਬਜਲਾਯਕੋਤਿ ਪਬ੍ਬਜਤਿਣਚ੍ਛੇਦਕੋ. ਓਧੁਨਾਤੀਤਿ ਹੇਟ੍ਠਾ ਮੁਖਂ ਧੁਨਾਤਿ. ਨਿਧੁਨਾਤੀਤਿ ਉਭੋਹਿ ਪਸ੍ਸੇਹਿ ਧੁਨਾਤਿ. ਨਿਚ੍ਛਾਦੇਤੀਤਿ ਬਾਹਾਯ ਵਾ ਪਹਰਤਿ, ਰੁਕ੍ਖੇ ਵਾ ਪਹਰਤਿ. ਅਮ੍ਬਪਿਣ੍ਡਿਯਾਤਿ ਅਮ੍ਬਫਲਪਿਣ੍ਡਿਯਾ. ਵਣ੍ਟੂਪਨਿਬਨ੍ਧਨਾਨੀਤਿ ਵਣ੍ਟੇ ਉਪਨਿਬਨ੍ਧਨਾਨਿ, ਵਣ੍ਟੇ ਵਾ ਪਤਿਟ੍ਠਿਤਾਨਿ. ਤਦਨ੍ਵਯਾਨਿ ਭਵਨ੍ਤੀਤਿ ਵਣ੍ਟਾਨੁਵਤ੍ਤਕਾਨਿ ਭਵਨ੍ਤਿ, ਅਮ੍ਬਪਿਣ੍ਡਿਦਣ੍ਡਕਾਨੁਵਤ੍ਤਕਾਨਿ ਭਵਨ੍ਤੀਤਿਪਿ ਅਤ੍ਥੋ. ਖੁਦ੍ਦਰਾਜਾਨੋਤਿ ਖੁਦ੍ਦਕਰਾਜਾਨੋ, ਪਕਤਿਰਾਜਾਨੋ ਵਾ.
੧੨. ਧਮ੍ਮਿਕਸੁਤ੍ਤਵਣ੍ਣਨਾ
੫੪. ਦ੍ਵਾਦਸਮੇ ਸਬ੍ਬਸੋਤਿ ਸਬ੍ਬੇਸੁ. ਸਤ੍ਤਸੁ ਵਿਹਾਰੇਸੂਤਿ ਸਤ੍ਤਸੁ ਪਰਿਵੇਣੇਸੁ. ਪਰਿਭਾਸਤੀਤਿ ਪਰਿਭਵਤਿ ਭਯਂ ਉਪਦਂਸੇਤਿ. ਵਿਹਿਂਸਤੀਤਿ ਵਿਹੇਠੇਤਿ. ਵਿਤੁਦਤੀਤਿ ਵਿਜ੍ਝਤਿ. ਰੋਸੇਤਿ ਵਾਚਾਯਾਤਿ ਵਾਚਾਯ ਘਟ੍ਟੇਤਿ. ਪਕ੍ਕਮਨ੍ਤੀਤਿ ਦਿਸਾ ਪਕ੍ਕਮਨ੍ਤਿ. ਨ ਸਣ੍ਠਹਨ੍ਤੀਤਿ ਨਪ੍ਪਤਿਟ੍ਠਹਨ੍ਤਿ. ਰਿਞ੍ਚਨ੍ਤੀਤਿ ਛਡ੍ਡੇਨ੍ਤਿ ਵਿਸ੍ਸਜ੍ਜੇਨ੍ਤਿ. ਪਬ੍ਬਾਜੇਯ੍ਯਾਮਾਤਿ ਨੀਹਰੇਯ੍ਯਾਮ. ਹਨ੍ਦਾਤਿ ਵਵਸ੍ਸਗ੍ਗਤ੍ਥੇ ਨਿਪਾਤੋ. ਅਲਨ੍ਤਿ ਯੁਤ੍ਤਮੇਤਂ, ਯਂ ਤਂ ਪਬ੍ਬਾਜੇਯ੍ਯੁਨ੍ਤਿ ਅਤ੍ਥੋ. ਕਿਂ ਤੇ ਇਮਿਨਾਤਿ ਕਿਂ ਤਵ ਇਮਿਨਾ ਜਾਤਿਭੂਮਿਯਂ ਵਾਸੇਨ. ਤੀਰਦਸ੍ਸਿਂ ਸਕੁਣਨ੍ਤਿ ਦਿਸਾਕਾਕਂ. ਮੁਞ੍ਚਨ੍ਤੀਤਿ ਦਿਸਾਦਸ੍ਸਨਤ੍ਥਂ ਵਿਸ੍ਸਜ੍ਜੇਨ੍ਤਿ. ਸਾਮਨ੍ਤਾਤਿ ਅਵਿਦੂਰੇ. ਸਮਨ੍ਤਾਤਿਪਿ ਪਾਠੋ, ਸਮਨ੍ਤਤੋਤਿ ਅਤ੍ਥੋ. ਅਭਿਨਿਵੇਸੋਤਿ ਪਤ੍ਥਰਿਤ੍ਵਾ ਠਿਤਸਾਖਾਨਂ ਨਿਵੇਸੋ. ਮੂਲਸਨ੍ਤਾਨਕਾਨਨ੍ਤਿ ਮੂਲਾਨਂ ਨਿਵੇਸੋ.
ਆਲ਼੍ਹਕਥਾਲਿਕਾਤਿ ਤਣ੍ਡੁਲਾਲ਼੍ਹਕਸ੍ਸ ਭਤ੍ਤਪਚਨਥਾਲਿਕਾ. ਖੁਦ੍ਦਂ ਮਧੁਨ੍ਤਿ ਖੁਦ੍ਦਮਕ੍ਖਿਕਾਹਿ ਕਤਂ ਦਣ੍ਡਕਮਧੁਂ. ਅਨੇਲਕਨ੍ਤਿ ਨਿਦ੍ਦੋਸਂ. ਨ ਚ ਸੁਦਂ ਅਞ੍ਞਮਞ੍ਞਸ੍ਸ ਫਲਾਨਿ ਹਿਂਸਨ੍ਤੀਤਿ ਅਞ੍ਞਮਞ੍ਞਸ੍ਸ ਕੋਟ੍ਠਾਸੇ ਫਲਾਨਿ ਨ ਹਿਂਸਨ੍ਤਿ. ਅਤ੍ਤਨੋ ਕੋਟ੍ਠਾਸੇਹਿ ਮੂਲਂ ਵਾ ਤਚਂ ਵਾ ਪਤ੍ਤਂ ਵਾ ਛਿਨ੍ਦਨ੍ਤੋ ਨਾਮ ਨਤ੍ਥਿ, ਅਤ੍ਤਨੋ ਅਤ੍ਤਨੋ ਸਾਖਾਯ ਹੇਟ੍ਠਾ ਪਤਿਤਾਨੇਵ ਪਰਿਭੁਞ੍ਜਨ੍ਤਿ. ਅਞ੍ਞਸ੍ਸ ਕੋਟ੍ਠਾਸਤੋ ਅਞ੍ਞਸ ਕੋਟ੍ਠਾਸਂ ਪਰਿਵਤ੍ਤਿਤ੍ਵਾ ਗਤਮ੍ਪਿ ‘‘ਨ ਅਮ੍ਹਾਕਂ ਸਾਖਾਯ ਫਲ’’ਨ੍ਤਿ ਞਤ੍ਵਾ ਨੋ ਖਾਦਨ੍ਤਿ. ਯਾਵਦਤ੍ਥਂ ਭਕ੍ਖਿਤ੍ਵਾਤਿ ਕਣ੍ਠਪ੍ਪਮਾਣੇਨ ਖਾਦਿਤ੍ਵਾ. ਸਾਖਂ ਭਞ੍ਜਿਤ੍ਵਾਤਿ ਛਤ੍ਤਪ੍ਪਮਾਣਮਤ੍ਤਂ ਛਿਨ੍ਦਿਤ੍ਵਾ ਛਾਯਂ ਕਤ੍ਵਾ ਪਕ੍ਕਾਮਿ. ਯਤ੍ਰ ਹਿ ਨਾਮਾਤਿ ਯੋ ਹਿ ਨਾਮ. ਪਕ੍ਕਮਿਸ੍ਸਤੀਤਿ ਪਕ੍ਕਨ੍ਤੋ. ਨਾਦਾਸੀਤਿ ਦੇਵਤਾਯ ਆਨੁਭਾਵੇਨ ਫਲਮੇਵ ਨ ਗਣ੍ਹਿ. ਏਵਞ੍ਹਿ ਸਾ ਅਧਿਟ੍ਠਾਸਿ.
ਤੇਨੁਪਸਙ੍ਕਮੀਤਿ ਜਨਪਦਵਾਸੀਹਿ ਗਨ੍ਤ੍ਵਾ, ‘‘ਮਹਾਰਾਜ, ਰੁਕ੍ਖੋ ਫਲਂ ਨ ਗਣ੍ਹਿ, ਅਮ੍ਹਾਕਂ ਨੁ ਖੋ ਦੋਸੋ ਤੁਮ੍ਹਾਕ’’ਨ੍ਤਿ ਵੁਤ੍ਤੇ ‘‘ਨੇਵ ਮਯ੍ਹਂ ਦੋਸੋ ਅਤ੍ਥਿ, ਨ ਜਾਨਪਦਾਨਂ, ਅਮ੍ਹਾਕਂ ਵਿਜਿਤੇ ਅਧਮ੍ਮੋ ਨਾਮ ਨ ਵਤ੍ਤਤਿ, ਕੇਨ ਨੁ ਖੋ ਕਾਰਣੇਨ ਰੁਕ੍ਖੋ ਨ ਫਲਿਤੋ, ਸਕ੍ਕਂ ਉਪਸਙ੍ਕਮਿਤ੍ਵਾ ਪੁਚ੍ਛਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਯੇਨ ਸਕ੍ਕੋ ਦੇਵਾਨਮਿਨ੍ਦੋ ਤੇਨੁਪਸਙ੍ਕਮਿ. ਪਵਤ੍ਤੇਸੀਤਿ ਪਰਿਵਤ੍ਤੇਸਿ. ਉਮ੍ਮੂਲਮਕਾਸੀਤਿ ਉਦ੍ਧਂਮੂਲਂ ਅਕਾਸਿ. ਅਪਿ ਨੁ ਤ੍ਵਨ੍ਤਿ ਅਪਿ ਨੁ ਤਵ. ਅਟ੍ਠਿਤਾਯੇਵਾਤਿ ਅਟ੍ਠਿਤਾਯ ਏਵ. ਸਚ੍ਛਵੀਨੀਤਿ ਸਮਾਨਚ੍ਛਵੀਨਿ ਪਕਤਿਟ੍ਠਾਨੇ ਠਿਤਾਨਿ. ਨ ਪਚ੍ਚਕ੍ਕੋਸਤੀਤਿ ਨਪ੍ਪਟਿਕ੍ਕੋਸਤਿ. ਰੋਸਨ੍ਤਨ੍ਤਿ ਘਟ੍ਟੇਨ੍ਤਂ. ਭਣ੍ਡਨ੍ਤਨ੍ਤਿ ਪਹਰਨ੍ਤਂ.
ਸੁਨੇਤ੍ਤੋਤਿ ਨੇਤ੍ਤਾ ਵੁਚ੍ਚਨ੍ਤਿ ਅਕ੍ਖੀਨਿ, ਤੇਸਂ ਸੁਨ੍ਦਰਤਾਯ ਸੁਨੇਤ੍ਤੋ. ਤਿਤ੍ਥਕਰੋਤਿ ਸੁਗਤਿਓਗਾਹਨਤਿਤ੍ਥਸ੍ਸ ਕਾਰਕੋ. ਵੀਤਰਾਗੋਤਿ ਵਿਕ੍ਖਮ੍ਭਨਵਸੇਨ ਵਿਗਤਰਾਗੋ. ਪਸਵਤੀਤਿ ਪਟਿਲਭਤਿ. ਦਿਟ੍ਠਿਸਮ੍ਪਨ੍ਨਨ੍ਤਿ ਦਸ੍ਸਨਸਮ੍ਪਨ੍ਨਂ, ਸੋਤਾਪਨ੍ਨਨ੍ਤਿ ਅਤ੍ਥੋ. ਖਨ੍ਤਿਨ੍ਤਿ ਅਤ੍ਤਨੋ ਗੁਣਖਣਨਂ. ਯਥਾਮਂ ਸਬ੍ਰਹ੍ਮਚਾਰੀਸੂਤਿ ਯਥਾ ਇਮਂ ਸਬ੍ਰਹ੍ਮਚਾਰੀਸੁ ਅਕ੍ਕੋਸਨਪਰਿਭਾਸਨਂ, ਅਞ੍ਞਂ ਏਵਰੂਪਂ ਗੁਣਖਨ੍ਤਿਂ ਨ ਵਦਾਮੀਤਿ ਅਤ੍ਥੋ. ਨ ਨੋ ਸਮਸਬ੍ਰਹ੍ਮਚਾਰੀਸੂਤਿ ਏਤ੍ਥ ਸਮਜਨੋ ਨਾਮ ਸਕਜਨੋ ਵੁਚ੍ਚਤਿ. ਤਸ੍ਮਾ ਨ ਨੋ ਸਕੇਸੁ ਸਮਾਨਬ੍ਰਹ੍ਮਚਾਰੀਸੁ ਚਿਤ੍ਤਾਨਿ ਪਦੁਟ੍ਠਾਨਿ ਭਵਿਸ੍ਸਨ੍ਤੀਤਿ ਅਯਮੇਤ੍ਥ ਅਤ੍ਥੋ.
ਜੋਤਿਪਾਲੋ ਚ ਗੋਵਿਨ੍ਦੋਤਿ ਨਾਮੇਨ ਜੋਤਿਪਾਲੋ ਠਾਨੇਨ ਮਹਾਗੋਵਿਨ੍ਦੋ. ਸਤ੍ਤਪੁਰੋਹਿਤੋਤਿ ਰੇਣੁਆਦੀਨਂ ਸਤ੍ਤਨ੍ਨਂ ਰਾਜੂਨਂ ਪੁਰੋਹਿਤੋ. ਅਹਿਂਸਕਾ ਅਤੀਤਂਸੇਤਿ ਏਤੇ ਛ ਸਤ੍ਥਾਰੋ ਅਤੀਤਂਸੇ ਅਹਿਂਸਕਾ ਅਹੇਸੁਂ. ਨਿਰਾਮਗਨ੍ਧਾਤਿ ਕੋਧਾਮਗਨ੍ਧੇਨ ਨਿਰਾਮਗਨ੍ਧਾ. ਕਰੁਣੇਵਿਮੁਤ੍ਤਾਤਿ ਕਰੁਣਜ੍ਝਾਨੇ ਅਧਿਮੁਤ੍ਤਾ, ਕਰੁਣਾਯ ਚ ਕਰੁਣਾਪੁਬ੍ਬਭਾਗੇ ਚ ਠਿਤਾ. ਯੇਤੇਤਿ ਏਤੇ, ਅਯਮੇਵ ਵਾ ਪਾਠੋ. ਨ ਸਾਧੁਰੂਪਂ ਆਸੀਦੇਤਿ ਸਾਧੁਸਭਾਵਂ ਨ ਘਟ੍ਟੇਯ੍ਯ. ਦਿਟ੍ਠਿਟ੍ਠਾਨਪ੍ਪਹਾਯਿਨਨ੍ਤਿ ਦ੍ਵਾਸਟ੍ਠਿਦਿਟ੍ਠਿਗਤਪ੍ਪਹਾਯਿਨਂ. ਸਤ੍ਤਮੋਤਿ ਅਰਹਤ੍ਤਤੋ ਪਟ੍ਠਾਯ ਸਤ੍ਤਮੋ. ਅਵੀਤਰਾਗੋਤਿ ਅਵਿਗਤਰਾਗੋ. ਏਤੇਨ ਅਨਾਗਾਮਿਭਾਵਂ ਪਟਿਕ੍ਖਿਪਤਿ. ਪਞ੍ਚਿਨ੍ਦ੍ਰਿਯਾ ਮੁਦੂਤਿ ਪਞ੍ਚ ਵਿਪਸ੍ਸਨਿਨ੍ਦ੍ਰਿਯਾਨਿ ਮੁਦੂਨਿ. ਤਸ੍ਸ ਹਿ ਤਾਨਿ ਸਕਦਾਗਾਮਿਂ ਉਪਾਦਾਯ ਮੁਦੂਨਿ ਨਾਮ ਹੋਨ੍ਤਿ. ਵਿਪਸ੍ਸਨਾਤਿ ਸਙ੍ਖਾਰਪਰਿਗ੍ਗਹਞਾਣਂ. ਪੁਬ੍ਬੇਵ ਉਪਹਞ੍ਞਤੀਤਿ ਪਠਮਤਰਞ੍ਞੇਵ ਉਪਹਞ੍ਞਤਿ. ਅਕ੍ਖਤੋਤਿ ਗੁਣਖਣਨੇਨ ਅਕ੍ਖਤੋ ਅਨੁਪਹਤੋ ਹੁਤ੍ਵਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਧਮ੍ਮਿਕਵਗ੍ਗੋ ਪਞ੍ਚਮੋ.