੨. ਦੁਤਿਯਪਣ੍ਣਾਸਕਂ

੬. ਮਹਾਵਗ੍ਗੋ

੧. ਸੋਣਸੁਤ੍ਤਵਣ੍ਣਨਾ

੫੫. ਛਟ੍ਠਸ੍ਸ ਪਠਮੇ ਸੋਣੋਤਿ ਸੁਖੁਮਾਲਸੋਣਤ੍ਥੇਰੋ. ਸੀਤਵਨੇਤਿ ਏਵਂਨਾਮਕੇ ਸੁਸਾਨੇ. ਤਸ੍ਮਿਂ ਕਿਰ ਪਟਿਪਾਟਿਯਾ ਪਞ੍ਚ ਚਙ੍ਕਮਨਪਣ੍ਣਸਾਲਾਸਤਾਨਿ ਮਾਪਿਤਾਨਿ, ਤੇਸੁ ਥੇਰੋ ਅਤ੍ਤਨੋ ਸਪ੍ਪਾਯਚਙ੍ਕਮਨਂ ਗਹੇਤ੍ਵਾ ਸਮਣਧਮ੍ਮਂ ਕਰੋਤਿ. ਤਸ੍ਸ ਆਰਦ੍ਧਵੀਰਿਯਸ੍ਸ ਹੁਤ੍ਵਾ ਚਙ੍ਕਮਤੋ ਪਾਦਤਲਾਨਿ ਭਿਜ੍ਜਿਂਸੁ, ਜਾਣੂਹਿ ਚਙ੍ਕਮਤੋ ਜਾਣੁਕਾਨਿਪਿ ਹਤ੍ਥਤਲਾਨਿਪਿ ਭਿਜ੍ਜਿਂਸੁ, ਛਿਦ੍ਦਾਨਿ ਅਹੇਸੁਂ. ਏਵਂ ਆਰਦ੍ਧਵੀਰਿਯੋ ਵਿਹਰਨ੍ਤੋ ਓਭਾਸਨਿਮਿਤ੍ਤਮਤ੍ਤਕਮ੍ਪਿ ਦਸ੍ਸੇਤੁਂ ਨਾਸਕ੍ਖਿ. ਤਸ੍ਸ ਵੀਰਿਯੇਨ ਕਿਲਮਿਤਕਾਯਸ੍ਸ ਕੋਟਿਯਂ ਪਾਸਾਣਫਲਕੇ ਨਿਸਿਨ੍ਨਸ੍ਸ ਯੋ ਵਿਤਕ੍ਕੋ ਉਦਪਾਦਿ, ਤਂ ਦਸ੍ਸੇਤੁਂ ਅਥ ਖੋ ਆਯਸ੍ਮਤੋਤਿਆਦਿ ਵੁਤ੍ਤਂ. ਤਤ੍ਥ ਆਰਦ੍ਧਵੀਰਿਯਾਤਿ ਪਰਿਪੁਣ੍ਣਪਗ੍ਗਹਿਤਵੀਰਿਯਾ. ਨ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚਤੀਤਿ ਸਚੇ ਹਿ ਅਹਂ ਉਗ੍ਘਟਿਤਞ੍ਞੂ ਵਾ ਅਸ੍ਸਂ ਵਿਪਞ੍ਚਿਤਞ੍ਞੂ ਵਾ ਨੇਯ੍ਯੋ ਵਾ, ਨੂਨ ਮੇ ਚਿਤ੍ਤਂ ਵਿਮੁਚ੍ਚੇਯ੍ਯ. ਅਦ੍ਧਾ ਪਨਸ੍ਮਿ ਪਦਪਰਮੋ, ਯੇਨ ਮੇ ਚਿਤ੍ਤਂ ਨ ਵਿਮੁਚ੍ਚਤੀਤਿ ਸਨ੍ਨਿਟ੍ਠਾਨਂ ਕਤ੍ਵਾ ਸਂਵਿਜ੍ਜਨ੍ਤਿ ਖੋ ਪਨਾਤਿਆਦੀਨਿ ਚਿਨ੍ਤੇਸਿ. ਤਤ੍ਥ ਭੋਗਾਤਿ ਉਪਯੋਗਤ੍ਥੇ ਪਚ੍ਚਤ੍ਤਂ.

ਪਾਤੁਰਹੋਸੀਤਿ ਥੇਰਸ੍ਸ ਚਿਤ੍ਤਾਚਾਰਂ ਞਤ੍ਵਾ ‘‘ਅਯਂ ਸੋਣੋ ਅਜ੍ਜ ਸੀਤਵਨੇ ਪਧਾਨਭੂਮਿਯਂ ਨਿਸਿਨ੍ਨੋ ਇਮਂ ਵਿਤਕ੍ਕਂ ਵਿਤਕ੍ਕੇਤਿ, ਗਨ੍ਤ੍ਵਾਸ੍ਸ ਵਿਤਕ੍ਕਂ ਸਹੋਤ੍ਥਂ ਗਣ੍ਹਿਤ੍ਵਾ ਵੀਣੋਪਮਂ ਕਮ੍ਮਟ੍ਠਾਨਂ ਕਥੇਸ੍ਸਾਮੀ’’ਤਿ ਪਮੁਖੇ ਪਾਕਟੋ ਅਹੋਸਿ. ਪਞ੍ਞਤ੍ਤੇ ਆਸਨੇਤਿ ਪਧਾਨਿਕਭਿਕ੍ਖੂ ਅਤ੍ਤਨੋ ਵਸਨਟ੍ਠਾਨੇ ਓਵਦਿਤੁਂ ਆਗਤਸ੍ਸ ਬੁਦ੍ਧਸ੍ਸ ਭਗਵਤੋ ਨਿਸੀਦਨਤ੍ਥਂ ਯਥਾਲਾਭੇਨ ਆਸਨਂ ਪਞ੍ਞਾਪੇਤ੍ਵਾਵ ਪਧਾਨਂ ਕਰੋਨ੍ਤਿ, ਅਞ੍ਞਂ ਅਲਭਮਾਨਾ ਪੁਰਾਣਪਣ੍ਣਾਨਿਪਿ ਸਨ੍ਥਰਿਤ੍ਵਾ ਉਪਰਿ ਸਙ੍ਘਾਟਿਂ ਪਞ੍ਞਪੇਨ੍ਤਿ. ਥੇਰੋਪਿ ਆਸਨਂ ਪਞ੍ਞਾਪੇਤ੍ਵਾ ਪਧਾਨਂ ਅਕਾਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਪਞ੍ਞਤ੍ਤੇ ਆਸਨੇ’’ਤਿ.

ਤਂ ਕਿਂ ਮਞ੍ਞਸੀਤਿ ਸਤ੍ਥਾ ‘‘ਇਮਸ੍ਸ ਭਿਕ੍ਖੁਨੋ ਅਵਸੇਸਕਮ੍ਮਟ੍ਠਾਨੇਹਿ ਅਤ੍ਥੋ ਨਤ੍ਥਿ, ਅਯਂ ਗਨ੍ਧਬ੍ਬਸਿਪ੍ਪੇ ਛੇਕੋ ਚਿਣ੍ਣਵਸੀ, ਅਤ੍ਤਨੋ ਵਿਸਯੇ ਕਥਿਯਮਾਨਂ ਖਿਪ੍ਪਮੇਵ ਸਲ੍ਲਕ੍ਖੇਸ੍ਸਤੀ’’ਤਿ ਵੀਣੋਪਮਂ ਕਥੇਤੁਂ ‘‘ਤਂ ਕਿਂ ਮਞ੍ਞਸੀ’’ਤਿਆਦਿਮਾਹ. ਵੀਣਾਯ ਤਨ੍ਤਿਸ੍ਸਰੇ ਕੁਸਲਤਾ ਨਾਮ ਵੀਣਾਯ ਵਾਦਨਕੁਸਲਤਾ, ਸੋ ਚ ਤਤ੍ਥ ਕੁਸਲੋ. ਮਾਤਾਪਿਤਰੋ ਹਿਸ੍ਸ ‘‘ਅਮ੍ਹਾਕਂ ਪੁਤ੍ਤੋ ਅਞ੍ਞਂ ਸਿਪ੍ਪਂ ਸਿਕ੍ਖਨ੍ਤੋ ਕਾਯੇਨ ਕਿਲਮਿਸ੍ਸਤਿ, ਇਦਂ ਪਨ ਸਯਨੇ ਨਿਸਿਨ੍ਨੇਨੇਵ ਸਕ੍ਕਾ ਉਗ੍ਗਣ੍ਹਿਤੁ’’ਨ੍ਤਿ ਗਨ੍ਧਬ੍ਬਸਿਪ੍ਪਮੇਵ ਉਗ੍ਗਣ੍ਹਾਪੇਸੁਂ. ਤਸ੍ਸ –

‘‘ਸਤ੍ਤ ਸਰਾ ਤਯੋ ਗਾਮਾ, ਮੁਚ੍ਛਨਾ ਏਕਵੀਸਤਿ;

ਠਾਨਾ ਏਕੂਨਪਞ੍ਞਾਸ, ਇਚ੍ਚੇਤੇ ਸਰਮਣ੍ਡਲਾ’’ਤਿ. –

ਆਦਿਕਂ ਗਨ੍ਧਬ੍ਬਸਿਪ੍ਪਂ ਸਬ੍ਬਮੇਵ ਪਗੁਣਂ ਅਹੋਸਿ. ਅਚ੍ਚਾਯਤਾਤਿ ਅਤਿਆਯਤਾ ਖਰਮੁਚ੍ਛਨਾ. ਸਰਵਤੀਤਿ ਸਰਸਮ੍ਪਨ੍ਨਾ. ਕਮ੍ਮਞ੍ਞਾਤਿ ਕਮ੍ਮਕ੍ਖਮਾ ਕਮ੍ਮਯੋਗ੍ਗਾ. ਅਤਿਸਿਥਿਲਾਤਿ ਮਨ੍ਦਮੁਚ੍ਛਨਾ. ਸਮੇ ਗੁਣੇ ਪਤਿਟ੍ਠਿਤਾਤਿ ਮਜ੍ਝਿਮੇ ਸਰੇ ਠਪੇਤ੍ਵਾ ਮੁਚ੍ਛਿਤਾ.

ਅਚ੍ਚਾਰਦ੍ਧਨ੍ਤਿ ਅਤਿਗਾਲ਼੍ਹਂ. ਉਦ੍ਧਚ੍ਚਾਯ ਸਂਵਤ੍ਤਤੀਤਿ ਉਦ੍ਧਤਭਾਵਾਯ ਸਂਵਤ੍ਤਤਿ. ਅਤਿਲੀਨਨ੍ਤਿ ਅਤਿਸਿਥਿਲਂ. ਕੋਸਜ੍ਜਾਯਾਤਿ ਕੁਸੀਤਭਾਵਤ੍ਥਾਯ. ਵੀਰਿਯਸਮਥਂ ਅਧਿਟ੍ਠਹਾਤਿ ਵੀਰਿਯਸਮ੍ਪਯੁਤ੍ਤਂ ਸਮਥਂ ਅਧਿਟ੍ਠਹ, ਵੀਰਿਯਂ ਸਮਥੇਨ ਯੋਜੇਹੀਤਿ ਅਤ੍ਥੋ. ਇਨ੍ਦ੍ਰਿਯਾਨਞ੍ਚ ਸਮਤਂ ਪਟਿਵਿਜ੍ਝਾਤਿ ਸਦ੍ਧਾਦੀਨਂ ਇਨ੍ਦ੍ਰਿਯਾਨਂ ਸਮਤਂ ਸਮਭਾਵਂ ਅਧਿਟ੍ਠਾਹਿ. ਤਤ੍ਥ ਸਦ੍ਧਂ ਪਞ੍ਞਾਯ, ਪਞ੍ਞਞ੍ਚ ਸਦ੍ਧਾਯ, ਵੀਰਿਯਂ ਸਮਾਧਿਨਾ, ਸਮਾਧਿਞ੍ਚ ਵੀਰਿਯੇਨ ਯੋਜਯਤਾ ਇਨ੍ਦ੍ਰਿਯਾਨਂ ਸਮਤਾ ਅਧਿਟ੍ਠਿਤਾ ਨਾਮ ਹੋਤਿ. ਸਤਿ ਪਨ ਸਬ੍ਬਤ੍ਥਿਕਾ, ਸਾ ਸਦਾ ਬਲਵਤੀਯੇਵ ਵਟ੍ਟਤਿ. ਤਞ੍ਚ ਪਨ ਤੇਸਂ ਯੋਜਨਾਵਿਧਾਨਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੬੦-੬੨) ਪਕਾਸਿਤਮੇਵ. ਤਤ੍ਥ ਚ ਨਿਮਿਤ੍ਤਂ ਗਣ੍ਹਾਹੀਤਿ ਤਸ੍ਮਿਞ੍ਚ ਸਮਭਾਵੇ ਸਤਿ ਯੇਨ ਆਦਾਸੇ ਮੁਖਬਿਮ੍ਬੇਨੇਵ ਨਿਮਿਤ੍ਤੇਨ ਉਪ੍ਪਜ੍ਜਿਤਬ੍ਬਂ, ਤਂ ਸਮਥਨਿਮਿਤ੍ਤਂ ਵਿਪਸ੍ਸਨਾਨਿਮਿਤ੍ਤਂ ਮਗ੍ਗਨਿਮਿਤ੍ਤਂ ਫਲਨਿਮਿਤ੍ਤਞ੍ਚ ਗਣ੍ਹਾਹਿ ਨਿਬ੍ਬਤ੍ਤੇਹੀਤਿ ਏਵਮਸ੍ਸ ਸਤ੍ਥਾ ਅਰਹਤ੍ਤੇ ਪਕ੍ਖਿਪਿਤ੍ਵਾ ਕਮ੍ਮਟ੍ਠਾਨਂ ਕਥੇਸਿ.

ਤਤ੍ਥ ਚ ਨਿਮਿਤ੍ਤਂ ਅਗ੍ਗਹੇਸੀਤਿ ਸਮਥਨਿਮਿਤ੍ਤਞ੍ਚ ਵਿਪਸ੍ਸਨਾਨਿਮਿਤ੍ਤਞ੍ਚ ਅਗ੍ਗਹੇਸਿ. ਛ ਠਾਨਾਨੀਤਿ ਛ ਕਾਰਣਾਨਿ. ਅਧਿਮੁਤ੍ਤੋ ਹੋਤੀਤਿ ਪਟਿਵਿਜ੍ਝਿਤ੍ਵਾ ਪਚ੍ਚਕ੍ਖਂ ਕਤ੍ਵਾ ਠਿਤੋ ਹੋਤਿ. ਨੇਕ੍ਖਮ੍ਮਾਧਿਮੁਤ੍ਤੋਤਿਆਦਿ ਸਬ੍ਬਂ ਅਰਹਤ੍ਤਵਸੇਨੇਵ ਵੁਤ੍ਤਂ. ਅਰਹਤ੍ਤਞ੍ਹਿ ਸਬ੍ਬਕਿਲੇਸੇਹਿ ਨਿਕ੍ਖਨ੍ਤਤ੍ਤਾ ਨੇਕ੍ਖਮ੍ਮਂ, ਤੇਹੇਵ ਪਵਿਵਿਤ੍ਤਤ੍ਤਾ ਪਵਿਵੇਕੋ, ਬ੍ਯਾਪਜ੍ਝਾਭਾਵਤੋ ਅਬ੍ਯਾਪਜ੍ਝਂ, ਤਣ੍ਹਾਕ੍ਖਯਨ੍ਤੇ ਉਪ੍ਪਨ੍ਨਤ੍ਤਾ ਤਣ੍ਹਾਕ੍ਖਯੋ, ਉਪਾਦਾਨਕ੍ਖਯਨ੍ਤੇ ਉਪ੍ਪਨ੍ਨਤ੍ਤਾ ਉਪਾਦਾਨਕ੍ਖਯੋ, ਸਮ੍ਮੋਹਾਭਾਵਤੋ ਅਸਮ੍ਮੋਹੋਤਿ ਵੁਚ੍ਚਤਿ.

ਕੇਵਲਂ ਸਦ੍ਧਾਮਤ੍ਤਕਨ੍ਤਿ ਪਟਿਵੇਧਰਹਿਤਂ ਕੇਵਲਂ ਪਟਿਵੇਧਪਞ੍ਞਾਯ ਅਸਮ੍ਮਿਸ੍ਸਕਂ ਸਦ੍ਧਾਮਤ੍ਤਕਂ. ਪਟਿਚਯਨ੍ਤਿ ਪੁਨਪ੍ਪੁਨਂ ਕਰਣੇਨ ਵਡ੍ਢਿਂ. ਵੀਤਰਾਗਤ੍ਤਾਤਿ ਮਗ੍ਗਪਟਿਵੇਧੇਨ ਰਾਗਸ੍ਸ ਵਿਗਤਤ੍ਤਾਯੇਵ ਨੇਕ੍ਖਮ੍ਮਸਙ੍ਖਾਤਂ ਅਰਹਤ੍ਤਂ ਪਟਿਵਿਜ੍ਝਿਤ੍ਵਾ ਸਚ੍ਛਿਕਤ੍ਵਾ ਠਿਤੋ ਹੋਤਿ, ਫਲਸਮਾਪਤ੍ਤਿਵਿਹਾਰੇਨ ਵਿਹਰਤਿ, ਤਨ੍ਨਿਨ੍ਨਮਾਨਸੋਯੇਵ ਚ ਹੋਤੀਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ.

ਲਾਭਸਕ੍ਕਾਰਸਿਲੋਕਨ੍ਤਿ ਚਤੁਪਚ੍ਚਯਲਾਭਞ੍ਚ ਤੇਸਞ੍ਞੇਵ ਸੁਕਤਭਾਵਞ੍ਚ ਵਣ੍ਣਭਣਨਞ੍ਚ. ਨਿਕਾਮਯਮਾਨੋਤਿ ਇਚ੍ਛਮਾਨੋ ਪਤ੍ਥਯਮਾਨੋ. ਪਵਿਵੇਕਾਧਿਮੁਤ੍ਤੋਤਿ ਪਵਿਵੇਕੇ ਅਧਿਮੁਤ੍ਤੋ ਅਰਹਨ੍ਤਿ ਏਵਂ ਅਰਹਤ੍ਤਂ ਬ੍ਯਾਕਰੋਤੀਤਿ ਅਤ੍ਥੋ.

ਸੀਲਬ੍ਬਤਪਰਾਮਾਸਨ੍ਤਿ ਸੀਲਞ੍ਚ ਵਤਞ੍ਚ ਪਰਾਮਸਿਤ੍ਵਾ ਗਹਿਤਂ ਗਹਣਮਤ੍ਤਂ. ਸਾਰਤੋ ਪਚ੍ਚਾਗਚ੍ਛਨ੍ਤੋਤਿ ਸਾਰਭਾਵੇਨ ਜਾਨਨ੍ਤੋ. ਅਬ੍ਯਾਪਜ੍ਝਾਧਿਮੁਤ੍ਤੋਤਿ ਅਬ੍ਯਾਪਜ੍ਝਂ ਅਰਹਤ੍ਤਂ ਬ੍ਯਾਕਰੋਤਿ. ਇਮਿਨਾਵ ਨਯੇਨ ਸਬ੍ਬਟ੍ਠਾਨੇਸੁ ਅਤ੍ਥੋ ਦਟ੍ਠਬ੍ਬੋ. ਅਪਿਚੇਤ੍ਥ ‘‘ਨੇਕ੍ਖਮ੍ਮਾਧਿਮੁਤ੍ਤੋਤਿ ਇਮਸ੍ਮਿਂਯੇਵ ਅਰਹਤ੍ਤਂ ਕਥਿਤਂ, ਸੇਸੇਸੁ ਪਞ੍ਚਸੁ ਨਿਬ੍ਬਾਨ’’ਨ੍ਤਿ ਏਕੇ ਵਦਨ੍ਤਿ. ਅਪਰੇ ‘‘ਅਸਮ੍ਮੋਹਾਧਿਮੁਤ੍ਤੋਤਿ ਏਤ੍ਥੇਵ ਨਿਬ੍ਬਾਨਂ ਕਥਿਤਂ, ਸੇਸੇਸੁ ਅਰਹਤ੍ਤ’’ਨ੍ਤਿ ਵਦਨ੍ਤਿ. ਅਯਂ ਪਨੇਤ੍ਥ ਸਾਰੋ – ਸਬ੍ਬੇਸ੍ਵੇਵ ਤੇਸੁ ਅਰਹਤ੍ਤਮ੍ਪਿ ਨਿਬ੍ਬਾਨਮ੍ਪਿ ਕਥਿਤਮੇਵਾਤਿ.

ਭੁਸਾਤਿ ਬਲਵਨ੍ਤੋ ਦਿਬ੍ਬਰੂਪਸਦਿਸਾ. ਨੇਵਸ੍ਸ ਚਿਤ੍ਤਂ ਪਰਿਯਾਦਿਯਨ੍ਤੀਤਿ ਏਤਸ੍ਸ ਖੀਣਾਸਵਸ੍ਸ ਚਿਤ੍ਤਂ ਗਹੇਤ੍ਵਾ ਠਾਤੁਂ ਨ ਸਕ੍ਕੋਨ੍ਤਿ. ਕਿਲੇਸਾ ਹਿ ਉਪ੍ਪਜ੍ਜਮਾਨਾ ਚਿਤ੍ਤਂ ਗਣ੍ਹਨ੍ਤਿ ਨਾਮ. ਅਮਿਸ੍ਸੀਕਤਨ੍ਤਿ ਕਿਲੇਸਾ ਹਿ ਆਰਮ੍ਮਣੇਨ ਸਦ੍ਧਿਂ ਚਿਤ੍ਤਂ ਮਿਸ੍ਸਂ ਕਰੋਨ੍ਤਿ, ਤੇਸਂ ਅਭਾਵਾ ਅਮਿਸ੍ਸੀਕਤਂ. ਠਿਤਨ੍ਤਿ ਪਤਿਟ੍ਠਿਤਂ. ਆਨੇਞ੍ਜਪ੍ਪਤ੍ਤਨ੍ਤਿ ਅਚਲਪ੍ਪਤ੍ਤਂ. ਵਯਞ੍ਚਸ੍ਸਾਨੁਪਸ੍ਸਤੀਤਿ ਤਸ੍ਸ ਚੇਸ ਚਿਤ੍ਤਸ੍ਸ ਉਪ੍ਪਾਦਮ੍ਪਿ ਵਯਮ੍ਪਿ ਪਸ੍ਸਤਿ. ਭੁਸਾ ਵਾਤਵੁਟ੍ਠੀਤਿ ਬਲਵਾ ਵਾਤਕ੍ਖਨ੍ਧੋ. ਨੇਵ ਸਮ੍ਪਕਮ੍ਪੇਯ੍ਯਾਤਿ ਏਕਭਾਗੇਨ ਚਾਲੇਤੁਂ ਨ ਸਕ੍ਕੁਣੇਯ੍ਯ. ਨ ਸਮ੍ਪਕਮ੍ਪੇਯ੍ਯਾਤਿ ਥੂਣਂ ਵਿਯ ਸਬ੍ਬਭਾਗਤੋ ਕਮ੍ਪੇਤੁਂ ਨ ਸਕ੍ਕੁਣੇਯ੍ਯ. ਨ ਸਮ੍ਪਵੇਧੇਯ੍ਯਾਤਿ ਵੇਧੇਤ੍ਵਾ ਪਵੇਧੇਤ੍ਵਾ ਪਾਤੇਤੁਂ ਨ ਸਕ੍ਕੁਣੇਯ੍ਯ.

ਨੇਕ੍ਖਮ੍ਮਂ ਅਧਿਮੁਤ੍ਤਸ੍ਸਾਤਿ ਅਰਹਤ੍ਤਂ ਪਟਿਵਿਜ੍ਝਿਤ੍ਵਾ ਠਿਤਸ੍ਸ ਖੀਣਾਸਵਸ੍ਸ. ਸੇਸਪਦੇਸੁਪਿ ਅਰਹਤ੍ਤਮੇਵ ਕਥਿਤਂ. ਉਪਾਦਾਨਕ੍ਖਯਸ੍ਸ ਚਾਤਿ ਉਪਯੋਗਤ੍ਥੇ ਸਾਮਿਵਚਨਂ. ਅਸਮ੍ਮੋਹਞ੍ਚ ਚੇਤਸੋਤਿ ਚਿਤ੍ਤਸ੍ਸ ਚ ਅਸਮ੍ਮੋਹਂ ਅਧਿਮੁਤ੍ਤਸ੍ਸ. ਦਿਸ੍ਵਾ ਆਯਤਨੁਪ੍ਪਾਦਨ੍ਤਿ ਆਯਤਨਾਨਂ ਉਪ੍ਪਾਦਞ੍ਚ ਵਯਞ੍ਚ ਦਿਸ੍ਵਾ. ਸਮ੍ਮਾ ਚਿਤ੍ਤਂ ਵਿਮੁਚ੍ਚਤੀਤਿ ਸਮ੍ਮਾ ਹੇਤੁਨਾ ਨਯੇਨ ਇਮਾਯ ਵਿਪਸ੍ਸਨਾਪਟਿਪਤ੍ਤਿਯਾ ਫਲਸਮਾਪਤ੍ਤਿਵਸੇਨ ਚਿਤ੍ਤਂ ਵਿਮੁਚ੍ਚਤਿ, ਨਿਬ੍ਬਾਨਾਰਮ੍ਮਣੇ ਅਧਿਮੁਚ੍ਚਤਿ. ਅਥ ਵਾ ਇਮਿਨਾ ਖੀਣਾਸਵਸ੍ਸ ਪਟਿਪਦਾ ਕਥਿਤਾ. ਤਸ੍ਸ ਹਿ ਆਯਤਨੁਪ੍ਪਾਦਂ ਦਿਸ੍ਵਾ ਇਮਾਯ ਵਿਪਸ੍ਸਨਾਯ ਅਧਿਗਤਸ੍ਸ ਅਰਿਯਮਗ੍ਗਸ੍ਸਾਨੁਭਾਵੇਨ ਸਬ੍ਬਕਿਲੇਸੇਹਿ ਸਮ੍ਮਾ ਚਿਤ੍ਤਂ ਵਿਮੁਚ੍ਚਤਿ. ਏਵਂ ਤਸ੍ਸ ਸਮ੍ਮਾ ਵਿਮੁਤ੍ਤਸ੍ਸ…ਪੇ… ਨ ਵਿਜ੍ਜਤਿ. ਤਤ੍ਥ ਸਨ੍ਤਚਿਤ੍ਤਸ੍ਸਾਤਿ ਨਿਬ੍ਬੁਤਚਿਤ੍ਤਸ੍ਸ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

੨. ਫਗ੍ਗੁਨਸੁਤ੍ਤਵਣ੍ਣਨਾ

੫੬. ਦੁਤਿਯੇ ਸਮਧੋਸੀਤਿ ਉਟ੍ਠਾਨਾਕਾਰਂ ਦਸ੍ਸੇਸਿ. ਪਟਿਕ੍ਕਮਨ੍ਤੀਤਿ ਪਰਿਹਾਯਨ੍ਤਿ. ਨੋ ਅਭਿਕ੍ਕਮਨ੍ਤੀਤਿ ਨ ਵਡ੍ਢਨ੍ਤਿ. ਸੀਸਵੇਠਨਂ ਦਦੇਯ੍ਯਾਤਿ ਸੀਸਂ ਵੇਠੇਤ੍ਵਾ ਦਣ੍ਡਕੇਨ ਸਮ੍ਪਰਿਵਤ੍ਤਕਂ ਬਨ੍ਧੇਯ੍ਯ. ਇਨ੍ਦ੍ਰਿਯਾਨਿ ਵਿਪ੍ਪਸੀਦਿਂਸੂਤਿ ਤਸ੍ਮਿਂ ਮਰਣਸਮਯੇ ਛ ਇਨ੍ਦ੍ਰਿਯਾਨਿ ਵਿਪ੍ਪਸਨ੍ਨਾਨਿ ਅਹੇਸੁਂ. ਅਤ੍ਥੁਪਪਰਿਕ੍ਖਾਯਾਤਿ ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਉਪਪਰਿਕ੍ਖਨੇ. ਅਨੁਤ੍ਤਰੇ ਉਪਧਿਸਙ੍ਖਯੇਤਿ ਨਿਬ੍ਬਾਨੇ. ਅਵਿਮੁਤ੍ਤਂ ਹੋਤੀਤਿ ਅਰਹਤ੍ਤਫਲੇਨ ਅਧਿਮੁਤ੍ਤਂ ਹੋਤਿ.

੩. ਛਲ਼ਭਿਜਾਤਿਸੁਤ੍ਤਵਣ੍ਣਨਾ

੫੭. ਤਤਿਯੇ ਛਲ਼ਭਿਜਾਤਿਯੋਤਿ ਛ ਜਾਤਿਯੋ. ਤਤ੍ਰਿਦਨ੍ਤਿ ਤਤ੍ਰਾਯਂ. ਲੁਦ੍ਦਾਤਿ ਦਾਰੁਣਾ. ਭਿਕ੍ਖੂ ਕਣ੍ਟਕਵੁਤ੍ਤਿਕਾਤਿ ਸਮਣਾ ਨਾਮੇਤੇ. ਏਕਸਾਟਕਾਤਿ ਏਕੇਨੇਵ ਪਿਲੋਤਿਕਖਣ੍ਡੇਨ ਪੁਰਤੋ ਪਟਿਚ੍ਛਾਦਨਕਾ. ਅਕਾਮਕਸ੍ਸ ਬਿਲਂ ਓਲਗ੍ਗੇਯ੍ਯੁਨ੍ਤਿ ਸਤ੍ਥੇ ਗਚ੍ਛਮਾਨੇ ਗੋਣਮ੍ਹਿ ਮਤੇ ਗੋਮਂਸਮੂਲਂ ਉਪ੍ਪਾਦਨਤ੍ਥਾਯ ਵਿਭਜਿਤ੍ਵਾ ਖਾਦਮਾਨਾ ਏਕਸ੍ਸ ਗੋਮਂਸਂ ਅਨਿਚ੍ਛਨ੍ਤਸ੍ਸੇਵ ਕੋਟ੍ਠਾਸਂ ਕਤ੍ਵਾ ‘‘ਅਯਞ੍ਚ ਤੇ ਖਾਦਿਤਬ੍ਬੋ, ਮੂਲਞ੍ਚ ਦਾਤਬ੍ਬ’’ਨ੍ਤਿ ਤਂ ਕੋਟ੍ਠਾਸਸਙ੍ਖਾਤਂ ਬਿਲਂ ਓਲਗ੍ਗੇਯ੍ਯੁਂ, ਬਲਕ੍ਕਾਰੇਨ ਹਤ੍ਥੇ ਠਪੇਯ੍ਯੁਨ੍ਤਿ ਅਤ੍ਥੋ. ਅਖੇਤ੍ਤਞ੍ਞੁਨਾਤਿ ਅਭਿਜਾਤਿਪਞ੍ਞਤ੍ਤਿਯਾ ਖੇਤ੍ਤਂ ਅਜਾਨਨ੍ਤੇਨ. ਤਂ ਸੁਣਾਹੀਤਿ ਤਂ ਮਮ ਪਞ੍ਞਤ੍ਤਿਂ ਸੁਣਾਹਿ. ਕਣ੍ਹਾਭਿਜਾਤਿਕੋਤਿ ਕਾਲ਼ਕਜਾਤਿਕੋ. ਕਣ੍ਹਂ ਧਮ੍ਮਂ ਅਭਿਜਾਯਤੀਤਿ ਕਣ੍ਹਸਭਾਵੋ ਹੁਤ੍ਵਾ ਜਾਯਤਿ ਨਿਬ੍ਬਤ੍ਤਤਿ, ਕਣ੍ਹਾਭਿਜਾਤਿਯਂ ਵਾ ਜਾਯਤਿ. ਨਿਬ੍ਬਾਨਂ ਅਭਿਜਾਯਤੀਤਿ ਨਿਬ੍ਬਾਨਂ ਪਾਪੁਣਾਤਿ, ਅਰਿਯਭੂਮਿਸਙ੍ਖਾਤਾਯ ਵਾ ਨਿਬ੍ਬਾਨਜਾਤਿਯਾ ਜਾਯਤਿ.

੪. ਆਸਵਸੁਤ੍ਤਵਣ੍ਣਨਾ

੫੮. ਚਤੁਤ੍ਥੇ ਸਂਵਰਾ ਪਹਾਤਬ੍ਬਾਤਿ ਸਂਵਰੇਨ ਪਹਾਤਬ੍ਬਾ. ਸੇਸੇਸੁਪਿ ਏਸੇਵ ਨਯੋ. ਇਧਾਤਿ ਇਮਸ੍ਮਿਂ ਸਾਸਨੇ. ਪਟਿਸਙ੍ਖਾਤਿ ਪਟਿਸਞ੍ਜਾਨਿਤ੍ਵਾ, ਪਚ੍ਚਵੇਕ੍ਖਿਤ੍ਵਾਤਿ ਅਤ੍ਥੋ. ਯੋਨਿਸੋਤਿ ਉਪਾਯੇਨ ਪਥੇਨ. ਏਤ੍ਥ ਚ ਅਸਂਵਰੇ ਆਦੀਨਵਪਟਿਸਙ੍ਖਾ ਯੋਨਿਸੋ ਪਟਿਸਙ੍ਖਾਤਿ ਵੇਦਿਤਬ੍ਬਾ. ਸਾ ਚਾਯਂ ‘‘ਵਰਂ, ਭਿਕ੍ਖਵੇ, ਤਤ੍ਤਾਯ ਅਯੋਸਲਾਕਾਯ ਆਦਿਤ੍ਤਾਯ ਸਮ੍ਪਜ੍ਜਲਿਤਾਯ ਸਜੋਤਿਭੂਤਾਯ ਚਕ੍ਖੁਨ੍ਦ੍ਰਿਯਂ ਸਮ੍ਪਲਿਮਟ੍ਠਂ, ਨ ਤ੍ਵੇਵ ਚਕ੍ਖੁਵਿਞ੍ਞੇਯ੍ਯੇਸੁ ਰੂਪੇਸੁ ਅਨੁਬ੍ਯਞ੍ਜਨਸੋ ਨਿਮਿਤ੍ਤਗ੍ਗਾਹੋ’’ਤਿਆਦਿਨਾ ਆਦਿਤ੍ਤਪਰਿਯਾਯੇਨ (ਸਂ. ਨਿ. ੪.੨੩੫) ਵੇਦਿਤਬ੍ਬਾ. ਚਕ੍ਖੁਨ੍ਦ੍ਰਿਯਸਂਵਰਸਂਵੁਤੋ ਵਿਹਰਤੀਤਿ ਏਤ੍ਥ ਚਕ੍ਖੁਮੇਵ ਇਨ੍ਦ੍ਰਿਯਂ ਚਕ੍ਖੁਨ੍ਦ੍ਰਿਯਂ, ਸਂਵਰਣਤੋ ਸਂਵਰੋ, ਪਿਦਹਨਤੋ ਥਕਨਤੋਤਿ ਵੁਤ੍ਤਂ ਹੋਤਿ. ਸਤਿਯਾ ਏਤਂ ਅਧਿਵਚਨਂ. ਚਕ੍ਖੁਨ੍ਦ੍ਰਿਯੇ ਸਂਵਰੋ ਚਕ੍ਖੁਨ੍ਦ੍ਰਿਯਸਂਵਰੋ. ਜਵਨੇ ਉਪ੍ਪਜ੍ਜਮਾਨੋਪਿ ਹੇਸ ਤਸ੍ਮਿਂ ਦ੍ਵਾਰੇ ਕਿਲੇਸਾਨਂ ਉਪ੍ਪਤ੍ਤਿਵਾਰਣਤੋ ਚਕ੍ਖੁਨ੍ਦ੍ਰਿਯਸਂਵਰੋਤਿ ਵੁਚ੍ਚਤਿ. ਸਂਵੁਤੋਤਿ ਤੇਨ ਸਂਵਰੇਨ ਉਪੇਤੋ. ਤਥਾ ਹਿ ‘‘ਪਾਤਿਮੋਕ੍ਖਸਂਵਰਸਂਵੁਤੋ’’ਤਿ ਇਮਸ੍ਸ ਵਿਭਙ੍ਗੇ ‘‘ਇਮਿਨਾ ਪਾਤਿਮੋਕ੍ਖਸਂਵਰੇਨ ਉਪੇਤੋ ਹੋਤਿ…ਪੇ… ਸਮਨ੍ਨਾਗਤੋ’’ਤਿ ਵੁਤ੍ਤਂ. ਅਥ ਵਾ ਸਂਵਰੀਤਿ ਸਂਵੁਤੋ, ਥਕੇਸਿ ਪਿਦਹੀਤਿ ਵੁਤ੍ਤਂ ਹੋਤਿ. ਚਕ੍ਖੁਨ੍ਦ੍ਰਿਯਸਂਵਰਸਂਵੁਤੋਤਿ ਚਕ੍ਖੁਨ੍ਦ੍ਰਿਯਸਂਵਰਸਙ੍ਖਾਤਂ ਸਤਿਕਵਾਟਂ ਚਕ੍ਖੁਦ੍ਵਾਰੇ ਘਰਦ੍ਵਾਰੇ ਕਵਾਟਂ ਵਿਯ ਸਂਵਰਿ ਥਕੇਸਿ ਪਿਦਹੀਤਿ ਵੁਤ੍ਤਂ ਹੋਤਿ. ਅਯਮੇਵੇਤ੍ਥ ਅਤ੍ਥੋ ਸੁਨ੍ਦਰਤਰੋ. ਤਥਾ ਹਿ ‘‘ਚਕ੍ਖੁਨ੍ਦ੍ਰਿਯਸਂਵਰਂ ਅਸਂਵੁਤਸ੍ਸ ਵਿਹਰਤੋ, ਸਂਵੁਤਸ੍ਸ ਵਿਹਰਤੋ’’ਤਿ ਏਤੇਸੁ ਪਦੇਸੁ ਅਯਮੇਵਤ੍ਥੋ ਦਿਸ੍ਸਤੀਤਿ.

ਯਂ ਹਿਸ੍ਸਾਤਿਆਦਿਮ੍ਹਿ ਯਂ ਚਕ੍ਖੁਨ੍ਦ੍ਰਿਯਸਂਵਰਂ ਅਸ੍ਸ ਭਿਕ੍ਖੁਨੋ ਅਸਂਵੁਤਸ੍ਸ ਅਥਕੇਤ੍ਵਾ ਅਪਿਦਹਿਤ੍ਵਾ ਵਿਹਰਨ੍ਤਸ੍ਸਾਤਿ ਅਤ੍ਥੋ. ਯੇਕਾਰਸ੍ਸ ਵਾ ਏਸ ਯਨ੍ਤਿ ਆਦੇਸੋ, ਯੇ ਅਸ੍ਸਾਤਿ ਅਤ੍ਥੋ. ਆਸਵਾ ਵਿਘਾਤਪਰਿਲ਼ਾਹਾਤਿ ਚਤ੍ਤਾਰੋ ਆਸਵਾ ਚ ਅਞ੍ਞੇ ਚ ਵਿਘਾਤਕਰਾ ਕਿਲੇਸਪਰਿਲ਼ਾਹਾ ਵਿਪਾਕਪਰਿਲ਼ਾਹਾ ਵਾ. ਚਕ੍ਖੁਦ੍ਵਾਰਸ੍ਮਿਞ੍ਹਿ ਇਟ੍ਠਾਰਮ੍ਮਣਂ ਆਪਾਥਗਤਂ ਕਾਮਸ੍ਸਾਦਵਸੇਨ ਅਸ੍ਸਾਦਯਤੋ ਅਭਿਨਨ੍ਦਤੋ ਕਾਮਾਸਵੋ ਉਪ੍ਪਜ੍ਜਤਿ, ‘‘ਈਦਿਸਂ ਅਞ੍ਞਸ੍ਮਿਮ੍ਪਿ ਸੁਗਤਿਭਵੇ ਲਭਿਸ੍ਸਾਮੀ’’ਤਿ ਭਵਪਤ੍ਥਨਾਯ ਅਸ੍ਸਾਦਯਤੋ ਭਵਾਸਵੋ ਉਪ੍ਪਜ੍ਜਤਿ, ਸਤ੍ਤੋਤਿ ਵਾ ਸਤ੍ਤਸ੍ਸਾਤਿ ਵਾ ਗਣ੍ਹਤੋ ਦਿਟ੍ਠਾਸਵੋ ਉਪ੍ਪਜ੍ਜਤਿ, ਸਬ੍ਬੇਹੇਵ ਸਹਜਾਤਂ ਅਞ੍ਞਾਣਂ ਅਵਿਜ੍ਜਾਸਵੋਤਿ ਚਤ੍ਤਾਰੋ ਆਸਵਾ ਉਪ੍ਪਜ੍ਜਨ੍ਤਿ. ਏਤੇਹਿ ਸਮ੍ਪਯੁਤ੍ਤਾ ਅਪਰੇ ਕਿਲੇਸਾ ਵਿਘਾਤਪਰਿਲ਼ਾਹਾ ਆਯਤਿਂ ਵਾ ਤੇਸਂ ਵਿਪਾਕਾ ਤੇਹਿਪਿ ਅਸਂਵੁਤਸ੍ਸੇਵ ਵਿਹਰਤੋ ਉਪ੍ਪਜ੍ਜੇਯ੍ਯੁਨ੍ਤਿ ਵੁਚ੍ਚਨ੍ਤਿ. ਏਵਂਸ ਤੇਤਿ ਏਵਂ ਅਸ੍ਸ ਤੇ, ਏਤੇਨੁਪਾਯੇਨ ਨ ਹੋਨ੍ਤਿ, ਨੋ ਅਞ੍ਞਥਾਤਿ ਵੁਤ੍ਤਂ ਹੋਤਿ. ਪਟਿਸਙ੍ਖਾ ਯੋਨਿਸੋ ਸੋਤਿਨ੍ਦ੍ਰਿਯਸਂਵਰਸਂਵੁਤੋਤਿਆਦੀਸੁਪਿ ਏਸੇਵ ਨਯੋ. ਇਮੇ ਵੁਚ੍ਚਨ੍ਤਿ ਆਸਵਾ ਸਂਵਰਾ ਪਹਾਤਬ੍ਬਾਤਿ ਇਮੇਸੁ ਛਸੁ ਦ੍ਵਾਰੇਸੁ ਚਤ੍ਤਾਰੋ ਚਤ੍ਤਾਰੋ ਕਤ੍ਵਾ ਚਤੁਵੀਸਤਿ ਆਸਵਾ ਸਂਵਰੇਨ ਪਹਾਤਬ੍ਬਾਤਿ ਵੁਚ੍ਚਨ੍ਤਿ.

ਪਟਿਸਙ੍ਖਾ ਯੋਨਿਸੋ ਚੀਵਰਨ੍ਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਸਬ੍ਬਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੮) ਸੀਲਕਥਾਯ ਵੁਤ੍ਤਮੇਵ. ਯਂ ਹਿਸ੍ਸਾਤਿ ਯਞ੍ਹਿ ਚੀਵਰਂ ਪਿਣ੍ਡਪਾਤਾਦੀਸੁ ਵਾ ਅਞ੍ਞਤਰਂ ਅਸ੍ਸ. ਅਪ੍ਪਟਿਸੇਵਤੋਤਿ ਏਵਂ ਯੋਨਿਸੋ ਅਪ੍ਪਟਿਸੇਵਨ੍ਤਸ੍ਸ. ਇਮਸ੍ਮਿਂ ਵਾਰੇ ਅਲਦ੍ਧਂ ਚੀਵਰਾਦਿਂ ਪਤ੍ਥਯਤੋ ਲਦ੍ਧਂ ਵਾ ਅਸ੍ਸਾਦਯਤੋ ਕਾਮਾਸਵਸ੍ਸ ਉਪ੍ਪਤ੍ਤਿ ਵੇਦਿਤਬ੍ਬਾ, ਈਦਿਸਂ ਅਞ੍ਞਸ੍ਮਿਮ੍ਪਿ ਸੁਗਤਿਭਵੇ ਲਭਿਸ੍ਸਾਮੀਤਿ ਭਵਪਤ੍ਥਨਾਯ ਅਸ੍ਸਾਦਯਤੋ ਭਵਾਸਵਸ੍ਸ, ਅਹਂ ਲਭਾਮਿ ਨ ਲਭਾਮੀਤਿ ਵਾ ਮਯ੍ਹਂ ਵਾ ਇਦਨ੍ਤਿ ਅਤ੍ਤਸਞ੍ਞਂ ਅਧਿਟ੍ਠਹਤੋ ਦਿਟ੍ਠਾਸਵਸ੍ਸ, ਸਬ੍ਬੇਹੇਵ ਪਨ ਸਹਜਾਤੋ ਅਵਿਜ੍ਜਾਸਵੋਤਿ ਏਵਂ ਚਤੁਨ੍ਨਂ ਆਸਵਾਨਂ ਉਪ੍ਪਤ੍ਤਿ ਵਿਘਾਤਪਰਿਲ਼ਾਹਾਵ ਨਵਵੇਦਨੁਪ੍ਪਾਦਨਤੋਪਿ ਵੇਦਿਤਬ੍ਬਾ. ਇਮੇ ਵੁਚ੍ਚਨ੍ਤਿ, ਭਿਕ੍ਖਵੇ, ਆਸਵਾ ਪਟਿਸੇਵਨਾ ਪਹਾਤਬ੍ਬਾਤਿ ਇਮੇ ਏਕਮੇਕਸ੍ਮਿਂ ਪਚ੍ਚਯੇ ਚਤ੍ਤਾਰੋ ਚਤ੍ਤਾਰੋ ਕਤ੍ਵਾ ਸੋਲ਼ਸ ਆਸਵਾ ਇਮਿਨਾ ਞਾਣਸਂਵਰਸਙ੍ਖਾਤੇਨ ਪਚ੍ਚਵੇਕ੍ਖਣਪਟਿਸੇਵਨੇਨ ਪਹਾਤਬ੍ਬਾਤਿ ਵੁਚ੍ਚਨ੍ਤਿ.

ਪਟਿਸਙ੍ਖਾ ਯੋਨਿਸੋ ਖਮੋ ਹੋਤਿ ਸੀਤਸ੍ਸਾਤਿ ਉਪਾਯੇਨ ਪਥੇਨ ਪਚ੍ਚਵੇਕ੍ਖਿਤ੍ਵਾ ਖਨ੍ਤਾ ਹੋਤਿ ਸੀਤਸ੍ਸ, ਸੀਤਂ ਖਮਤਿ ਸਹਤਿ, ਨ ਅਵੀਰਪੁਰਿਸੋ ਵਿਯ ਅਪ੍ਪਮਤ੍ਤਕੇਨਪਿ ਸੀਤੇਨ ਚਲਤਿ ਕਮ੍ਪਤਿ ਕਮ੍ਮਟ੍ਠਾਨਂ ਵਿਜਹਤਿ. ਉਣ੍ਹਾਦੀਸੁਪਿ ਏਸੇਵ ਨਯੋ. ਏਤ੍ਥ ਚ ਵਚਨਮੇਵ ਵਚਨਪਥੋਤਿ ਵੇਦਿਤਬ੍ਬੋ. ਦੁਕ੍ਖਾਨਨ੍ਤਿਆਦੀਸੁ ਦੁਕ੍ਖਮਨਟ੍ਠੇਨ ਦੁਕ੍ਖਾ, ਬਹਲਟ੍ਠੇਨ ਤਿਬ੍ਬਾ, ਫਰੁਸਟ੍ਠੇਨ ਖਰਾ, ਤਿਖਿਣਟ੍ਠੇਨ ਕਟੁਕਾ, ਅਸ੍ਸਾਦਵਿਰਹਤੋ ਅਸਾਤਾ, ਮਨਂ ਅਵਡ੍ਢਨਤੋ ਅਮਨਾਪਾ, ਪਾਣਹਰਣਸਮਤ੍ਥਤਾਯ ਪਾਣਹਰਾਤਿ ਵੇਦਿਤਬ੍ਬਾ. ਯਂ ਹਿਸ੍ਸਾਤਿ ਸੀਤਾਦੀਸੁ ਯਂਕਿਞ੍ਚਿ ਏਕਧਮ੍ਮਮ੍ਪਿ ਅਸ੍ਸ. ਅਨਧਿਵਾਸਤੋਤਿ ਅਨਧਿਵਾਸੇਨ੍ਤਸ੍ਸ ਅਕ੍ਖਮਨ੍ਤਸ੍ਸ. ਆਸਵੁਪ੍ਪਤ੍ਤਿ ਪਨੇਤ੍ਥ ਏਵਂ ਵੇਦਿਤਬ੍ਬਾ – ਸੀਤੇਨ ਫੁਟ੍ਠਸ੍ਸ ਉਣ੍ਹਂ ਪਤ੍ਥਯਤੋ ਕਾਮਾਸਵੋ ਉਪ੍ਪਜ੍ਜਤਿ, ਏਵਂ ਸਬ੍ਬਤ੍ਥ. ‘‘ਨਤ੍ਥਿ ਸੁਗਤਿਭਵੇ ਸੀਤਂ ਵਾ ਉਣ੍ਹਂ ਵਾ’’ਤਿ ਭਵਂ ਪਤ੍ਥੇਨ੍ਤਸ੍ਸ ਭਵਾਸਵੋ, ਮਯ੍ਹਂ ਸੀਤਂ ਉਣ੍ਹਨ੍ਤਿ ਗਾਹੋ ਦਿਟ੍ਠਾਸਵੋ, ਸਬ੍ਬੇਹੇਵ ਸਮ੍ਪਯੁਤ੍ਤੋ ਅਵਿਜ੍ਜਾਸਵੋਤਿ. ਇਮੇ ਵੁਚ੍ਚਨ੍ਤੀਤਿ ਇਮੇ ਸੀਤਾਦੀਸੁ ਏਕਮੇਕਸ੍ਸ ਵਸੇਨ ਚਤ੍ਤਾਰੋ ਚਤ੍ਤਾਰੋ ਕਤ੍ਵਾ ਅਨੇਕੇ ਆਸਵਾ ਇਮਾਯ ਖਨ੍ਤਿਸਂਵਰਸਙ੍ਖਾਤਾਯ ਅਧਿਵਾਸਨਾਯ ਪਹਾਤਬ੍ਬਾਤਿ ਵੁਚ੍ਚਨ੍ਤੀਤਿ ਅਤ੍ਥੋ.

ਪਟਿਸਙ੍ਖਾ ਯੋਨਿਸੋ ਚਣ੍ਡਂ ਹਤ੍ਥਿਂ ਪਰਿਵਜ੍ਜੇਤੀਤਿ ਅਹਂ ਸਮਣੋਤਿ ਨ ਚਣ੍ਡਸ੍ਸ ਹਤ੍ਥਿਸ੍ਸ ਆਸਨ੍ਨੇ ਠਾਤਬ੍ਬਂ. ਤਤੋਨਿਦਾਨਞ੍ਹਿ ਮਰਣਮ੍ਪਿ ਮਰਣਮਤ੍ਤਮ੍ਪਿ ਦੁਕ੍ਖਂ ਭਵੇਯ੍ਯਾਤਿ ਏਵਂ ਉਪਾਯੇਨ ਪਥੇਨ ਪਚ੍ਚਵੇਕ੍ਖਿਤ੍ਵਾ ਚਣ੍ਡਂ ਹਤ੍ਥਿਂ ਪਰਿਵਜ੍ਜੇਤਿ ਪਟਿਕ੍ਕਮਤਿ. ਏਸ ਨਯੋ ਸਬ੍ਬਤ੍ਥ. ਚਣ੍ਡਨ੍ਤਿ ਦੁਟ੍ਠਂ ਵਾਲ਼ਂ. ਖਾਣੁਨ੍ਤਿ ਖਦਿਰਖਾਣੁਕਾਦਿਂ. ਕਣ੍ਟਕਟ੍ਠਾਨਨ੍ਤਿ ਯਤ੍ਥ ਕਣ੍ਟਕਾ ਵਿਜ੍ਝਨ੍ਤਿ, ਤਂ ਓਕਾਸਂ. ਸੋਬ੍ਭਨ੍ਤਿ ਸਬ੍ਬਤੋ ਛਿਨ੍ਨਤਟਂ. ਪਪਾਤਨ੍ਤਿ ਏਕਤੋ ਛਿਨ੍ਨਤਟਂ. ਚਨ੍ਦਨਿਕਨ੍ਤਿ ਉਚ੍ਛਿਟ੍ਠੋਦਕਗਬ੍ਭਮਲਾਦੀਨਂ ਛਡ੍ਡਨਟ੍ਠਾਨਂ. ਓਲ਼ਿਗਲ੍ਲਨ੍ਤਿ ਤੇਸਂਯੇਵ ਕਦ੍ਦਮਾਦੀਨਂ ਸਨ੍ਦਨੋਕਾਸਂ. ਤਂ ਜਣ੍ਣੁਮਤ੍ਤਮ੍ਪਿ ਅਸੁਚਿਭਰਿਤਂ ਹੋਤਿ. ਦ੍ਵੇਪਿ ਚੇਤਾਨਿ ਠਾਨਾਨਿ ਅਮਨੁਸ੍ਸੁਸ੍ਸਦਟ੍ਠਾਨਾਨਿ ਹੋਨ੍ਤਿ, ਤਸ੍ਮਾ ਵਜ੍ਜੇਤਬ੍ਬਾਨਿ. ਅਨਾਸਨੇਤਿ ਏਤ੍ਥ ਅਯੁਤ੍ਤਂ ਆਸਨਂ ਅਨਾਸਨਂ, ਤਂ ਅਤ੍ਥਤੋ ਅਨਿਯਤਵਤ੍ਥੁਭੂਤਂ ਰਹੋਪਟਿਚ੍ਛਨ੍ਨਾਸਨਨ੍ਤਿ ਵੇਦਿਤਬ੍ਬਂ. ਅਗੋਚਰੇਤਿ ਏਤ੍ਥਪਿ ਅਯੁਤ੍ਤੋ ਗੋਚਰੋ ਅਗੋਚਰੋ. ਸੋ ਵੇਸਿਯਾਦਿਭੇਦਤੋ ਪਞ੍ਚਵਿਧੋ. ਪਾਪਕੇ ਮਿਤ੍ਤੇਤਿ ਲਾਮਕੇ ਦੁਸ੍ਸੀਲੇ ਮਿਤ੍ਤਪਤਿਰੂਪਕੇ ਅਮਿਤ੍ਤੇ. ਪਾਪਕੇਸੂਤਿ ਲਾਮਕੇਸੁ. ਓਕਪ੍ਪੇਯ੍ਯੁਨ੍ਤਿ ਸਦ੍ਦਹੇਯ੍ਯੁਂ ਅਧਿਮੁਚ੍ਚੇਯ੍ਯੁਂ ‘‘ਅਦ੍ਧਾ ਅਯਮਾਯਸ੍ਮਾ ਅਕਾਸਿ ਵਾ ਕਰਿਸ੍ਸਤਿ ਵਾ’’ਤਿ. ਯਂ ਹਿਸ੍ਸਾਤਿ ਹਤ੍ਥਿਆਦੀਸੁ ਯਂਕਿਞ੍ਚਿ ਏਕਮ੍ਪਿ ਅਸ੍ਸ. ਆਸਵੁਪ੍ਪਤ੍ਤਿ ਪਨੇਤ੍ਥ ਏਵਂ ਵੇਦਿਤਬ੍ਬਾ – ਹਤ੍ਥਿਆਦਿਨਿਦਾਨੇਨ ਦੁਕ੍ਖੇਨ ਫੁਟ੍ਠਸ੍ਸ ਸੁਖਂ ਪਤ੍ਥਯਤੋ ਕਾਮਾਸਵੋ ਉਪ੍ਪਜ੍ਜਤਿ, ‘‘ਨਤ੍ਥਿ ਸੁਗਤਿਭਵੇ ਈਦਿਸਂ ਦੁਕ੍ਖ’’ਨ੍ਤਿ ਭਵਂ ਪਤ੍ਥੇਨ੍ਤਸ੍ਸ ਭਵਾਸਵੋ, ਮਂ ਹਤ੍ਥੀ ਮਦ੍ਦਤਿ ਮਂ ਅਸ੍ਸੋਤਿ ਗਾਹੋ ਦਿਟ੍ਠਾਸਵੋ, ਸਬ੍ਬੇਹੇਵ ਸਮ੍ਪਯੁਤ੍ਤੋ ਅਵਿਜ੍ਜਾਸਵੋਤਿ. ਇਮੇ ਵੁਚ੍ਚਨ੍ਤੀਤਿ ਇਮੇ ਹਤ੍ਥਿਆਦੀਸੁ ਏਕੇਕਸ੍ਸ ਵਸੇਨ ਚਤ੍ਤਾਰੋ ਚਤ੍ਤਾਰੋ ਕਤ੍ਵਾ ਅਨੇਕੇ ਆਸਵਾ ਇਮਿਨਾ ਸੀਲਸਂਵਰਸਙ੍ਖਾਤੇਨ ਪਰਿਵਜ੍ਜਨੇਨ ਪਹਾਤਬ੍ਬਾਤਿ ਵੁਚ੍ਚਨ੍ਤਿ.

ਪਟਿਸਙ੍ਖਾ ਯੋਨਿਸੋ ਉਪ੍ਪਨ੍ਨਂ ਕਾਮਵਿਤਕ੍ਕਂ ਨਾਧਿਵਾਸੇਤੀਤਿ ‘‘ਇਤਿਪਾਯਂ ਵਿਤਕ੍ਕੋ ਅਕੁਸਲੋ, ਇਤਿਪਿ ਸਾਵਜ੍ਜੋ, ਇਤਿਪਿ ਦੁਕ੍ਖਵਿਪਾਕੋ, ਸੋ ਚ ਖੋ ਅਤ੍ਤਬ੍ਯਾਬਾਧਾਯ ਸਂਵਤ੍ਤਤੀ’’ਤਿਆਦਿਨਾ (ਮ. ਨਿ. ੧.੨੦੭-੨੦੮) ਨਯੇਨ ਯੋਨਿਸੋ ਕਾਮਵਿਤਕ੍ਕੇ ਆਦੀਨਵਂ ਪਚ੍ਚਵੇਕ੍ਖਿਤ੍ਵਾ ਤਸ੍ਮਿਂ ਤਸ੍ਮਿਂ ਆਰਮ੍ਮਣੇ ਉਪ੍ਪਨ੍ਨਂ ਕਾਮਵਿਤਕ੍ਕਂ ਨਾਧਿਵਾਸੇਤਿ, ਚਿਤ੍ਤਂ ਆਰੋਪੇਤ੍ਵਾ ਨ ਵਾਸੇਤਿ, ਅਬ੍ਭਨ੍ਤਰੇ ਵਾ ਨ ਵਾਸੇਤੀਤਿ ਅਤ੍ਥੋ. ਅਨਧਿਵਾਸੇਨ੍ਤੋ ਕਿਂ ਕਰੋਤੀਤਿ? ਪਜਹਤਿ. ਕਿਂ ਕਚਵਰਂ ਵਿਯ ਪਿਟਕੇਨਾਤਿ? ਨ ਹਿ, ਅਪਿ ਚ ਖੋ ਨਂ ਵਿਨੋਦੇਤਿ ਤੁਦਤਿ ਵਿਜ੍ਝਤਿ ਨੀਹਰਤਿ. ਕਿਂ ਬਲਿਬਦ੍ਦਂ ਵਿਯ ਪਤੋਦੇਨਾਤਿ? ਨ ਹਿ, ਅਥ ਖੋ ਨਂ ਬ੍ਯਨ੍ਤੀਕਰੋਤਿ ਵਿਗਤਨ੍ਤਂ ਕਰੋਤਿ, ਯਥਾਸ੍ਸ ਅਨ੍ਤੋਪਿ ਨਾਵਸਿਸ੍ਸਤਿ ਅਨ੍ਤਮਸੋ ਭਙ੍ਗਮਤ੍ਤਮ੍ਪਿ, ਤਥਾ ਨਂ ਕਰੋਤਿ. ਕਥਂ ਪਨ ਨਂ ਤਥਾ ਕਰੋਤੀਤਿ? ਅਨਭਾਵਂ ਗਮੇਤਿ ਅਨੁ ਅਨੁ ਅਭਾਵਂ ਗਮੇਤਿ, ਵਿਕ੍ਖਮ੍ਭਨਪ੍ਪਹਾਨੇਨ ਯਥਾ ਸੁਵਿਕ੍ਖਮ੍ਭਿਤੋ ਹੋਤਿ, ਤਥਾ ਕਰੋਤਿ. ਸੇਸਵਿਤਕ੍ਕਦ੍ਵਯੇਪਿ ਏਸੇਵ ਨਯੋ. ਉਪ੍ਪਨ੍ਨੁਪ੍ਪਨ੍ਨੇਤਿ ਉਪ੍ਪਨ੍ਨੇ ਉਪ੍ਪਨ੍ਨੇ, ਉਪ੍ਪਨ੍ਨਮਤ੍ਤੇਯੇਵਾਤਿ ਵੁਤ੍ਤਂ ਹੋਤਿ. ਸਕਿਂ ਵਾ ਉਪ੍ਪਨ੍ਨੇ ਵਿਨੋਦੇਤ੍ਵਾ ਦੁਤਿਯੇ ਵਾਰੇ ਅਜ੍ਝੁਪੇਕ੍ਖਿਤਾ ਨ ਹੋਤਿ, ਸਤਕ੍ਖਤ੍ਤੁਮ੍ਪਿ ਉਪ੍ਪਨ੍ਨੇ ਉਪ੍ਪਨ੍ਨੇ ਵਿਨੋਦੇਤਿਯੇਵ. ਪਾਪਕੇ ਅਕੁਸਲੇ ਧਮ੍ਮੇਤਿ ਤੇਯੇਵ ਕਾਮਵਿਤਕ੍ਕਾਦਯੋ, ਸਬ੍ਬੇਪਿ ਵਾ ਨਵ ਮਹਾਵਿਤਕ੍ਕੇ. ਤਤ੍ਥ ਤਯੋ ਵੁਤ੍ਤਾ, ਅਵਸੇਸਾ ‘‘ਞਾਤਿਵਿਤਕ੍ਕੋ, ਜਨਪਦਵਿਤਕ੍ਕੋ, ਅਮਰਾਵਿਤਕ੍ਕੋ, ਪਰਾਨੁਦ੍ਦਯਤਾਪਟਿਸਂਯੁਤ੍ਤੋ ਵਿਤਕ੍ਕੋ, ਲਾਭਸਕ੍ਕਾਰਸਿਲੋਕਪ੍ਪਟਿਸਂਯੁਤ੍ਤੋ ਵਿਤਕ੍ਕੋ, ਅਨਵਞ੍ਞਤ੍ਤਿਪ੍ਪਟਿਸਂਯੁਤ੍ਤੋ ਵਿਤਕ੍ਕੋ’’ਤਿ (ਮਹਾਨਿ. ੨੦੭) ਇਮੇ ਛ. ਯਂ ਹਿਸ੍ਸਾਤਿ ਏਤੇਸੁ ਵਿਤਕ੍ਕੇਸੁ ਯਂਕਿਞ੍ਚਿ ਅਸ੍ਸ. ਕਾਮਵਿਤਕ੍ਕੋ ਪਨੇਤ੍ਥ ਕਾਮਾਸਵੋ ਏਵ, ਤਬ੍ਬਿਸੇਸੋ ਭਵਾਸਵੋ, ਤਂਸਮ੍ਪਯੁਤ੍ਤੋ ਦਿਟ੍ਠਾਸਵੋ, ਸਬ੍ਬਵਿਤਕ੍ਕੇਸੁ ਅਵਿਜ੍ਜਾ ਅਵਿਜ੍ਜਾਸਵੋਤਿ ਏਵਂ ਆਸਵੁਪ੍ਪਤ੍ਤਿ ਵੇਦਿਤਬ੍ਬਾ. ਇਮੇ ਵੁਚ੍ਚਨ੍ਤੀਤਿ ਇਮੇ ਕਾਮਵਿਤਕ੍ਕਾਦਿਵਸੇਨ ਵੁਤ੍ਤਪ੍ਪਕਾਰਾ ਆਸਵਾ ਇਮਿਨਾ ਤਸ੍ਮਿਂ ਤਸ੍ਮਿਂ ਵਿਤਕ੍ਕੇ ਆਦੀਨਵਪਚ੍ਚਵੇਕ੍ਖਣਸਹਿਤੇਨ ਵੀਰਿਯਸਂਵਰਸਙ੍ਖਾਤੇਨ ਵਿਨੋਦਨੇਨ ਪਹਾਤਬ੍ਬਾਤਿ ਵੁਚ੍ਚਨ੍ਤਿ.

ਪਟਿਸਙ੍ਖਾ ਯੋਨਿਸੋ ਸਤਿਸਮ੍ਬੋਜ੍ਝਙ੍ਗਂ ਭਾਵੇਤੀਤਿ ਅਭਾਵਨਾਯ ਆਦੀਨਵਂ ਭਾਵਨਾਯ ਚ ਆਨਿਸਂਸਂ ਉਪਾਯੇਨ ਪਥੇਨ ਪਚ੍ਚਵੇਕ੍ਖਿਤ੍ਵਾ ਸਤਿਸਮ੍ਬੋਜ੍ਝਙ੍ਗਂ ਭਾਵੇਤਿ. ਏਸੇਵ ਨਯੋ ਸਬ੍ਬਤ੍ਥ. ਬੋਜ੍ਝਙ੍ਗਾਨਂ ਭਾਵਨਾ ਹੇਟ੍ਠਾ ਵਿਤ੍ਥਾਰਿਤਾਵ. ਯਂ ਹਿਸ੍ਸਾਤਿ ਏਤੇਸੁ ਬੋਜ੍ਝਙ੍ਗੇਸੁ ਯਂਕਿਞ੍ਚਿ ਅਸ੍ਸ. ਆਸਵੁਪ੍ਪਤ੍ਤਿਯਂ ਪਨੇਤ੍ਥ ਇਮੇਸਂ ਅਰਿਯਮਗ੍ਗਸਮ੍ਪਯੁਤ੍ਤਾਨਂ ਬੋਜ੍ਝਙ੍ਗਾਨਂ ਅਭਾਵਿਤਤ੍ਤਾ ਯੇ ਉਪ੍ਪਜ੍ਜੇਯ੍ਯੁਂ ਕਾਮਾਸਵਾਦਯੋ ਆਸਵਾ, ਭਾਵਯਤੋ ਏਵਂਸ ਤੇ ਨ ਹੋਨ੍ਤੀਤਿ ਅਯਂ ਨਯੋ ਵੇਦਿਤਬ੍ਬੋ. ਇਮੇ ਵੁਚ੍ਚਨ੍ਤੀਤਿ ਇਮੇ ਕਾਮਾਸਵਾਦਯੋ ਆਸਵਾ ਇਮਾਯ ਲੋਕੁਤ੍ਤਰਾਯ ਬੋਜ੍ਝਙ੍ਗਭਾਵਨਾਯ ਪਹਾਤਬ੍ਬਾਤਿ ਵੁਚ੍ਚਨ੍ਤਿ. ਇਮੇਹਿ ਛਹਾਕਾਰੇਹਿ ਪਹੀਨਾਸਵਂ ਭਿਕ੍ਖੁਂ ਥੋਮੇਨ੍ਤੋ ਯਤੋ ਖੋ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਯਤੋਤਿ ਸਾਮਿਵਚਨੇ ਤੋ-ਕਾਰੋ, ਯਸ੍ਸਾਤਿ ਵੁਤ੍ਤਂ ਹੋਤਿ. ਪੋਰਾਣਾ ਪਨ ਯਮ੍ਹਿ ਕਾਲੇਤਿ ਵਣ੍ਣਯਨ੍ਤਿ. ਯੇ ਆਸਵਾ ਸਂਵਰਾ ਪਹਾਤਬ੍ਬਾ, ਤੇ ਸਂਵਰਾ ਪਹੀਨਾ ਹੋਨ੍ਤੀਤਿ ਯੇ ਆਸਵਾ ਸਂਵਰੇਨ ਪਹਾਤਬ੍ਬਾ, ਤੇ ਸਂਵਰੇਨੇਵ ਪਹੀਨਾ ਹੋਨ੍ਤਿ, ਨ ਅਪ੍ਪਹੀਨੇਸੁਯੇਵ ਪਹੀਨਸਞ੍ਞੀ ਹੋਤੀਤਿ.

੫. ਦਾਰੁਕਮ੍ਮਿਕਸੁਤ੍ਤਵਣ੍ਣਨਾ

੫੯. ਪਞ੍ਚਮੇ ਦਾਰੁਕਮ੍ਮਿਕੋਤਿ ਦਾਰੁਵਿਕ੍ਕਯੇਨ ਪਵਤ੍ਤਿਤਾਜੀਵੋ ਏਕੋ ਉਪਾਸਕੋ. ਕਾਸਿਕਚਨ੍ਦਨਨ੍ਤਿ ਸਣ੍ਹਚਨ੍ਦਨਂ. ਅਙ੍ਗੇਨਾਤਿ ਅਗੁਣਙ੍ਗੇਨ, ਸੁਕ੍ਕਪਕ੍ਖੇ ਗੁਣਙ੍ਗੇਨ. ਨੇਮਨ੍ਤਨਿਕੋਤਿ ਨਿਮਨ੍ਤਨਂ ਗਣ੍ਹਨਕੋ. ਸਙ੍ਘੇ ਦਾਨਂ ਦਸ੍ਸਾਮੀਤਿ ਭਿਕ੍ਖੁਸਙ੍ਘਸ੍ਸ ਦਸ੍ਸਾਮਿ. ਸੋ ਏਵਂ ਵਤ੍ਵਾ ਸਤ੍ਥਾਰਂ ਅਭਿਵਾਦੇਤ੍ਵਾ ਪਕ੍ਕਾਮਿ. ਅਥਸ੍ਸ ਅਪਰਭਾਗੇ ਪਞ੍ਚਸਤਾ ਕੁਲੂਪਕਾ ਭਿਕ੍ਖੂ ਗਿਹਿਭਾਵਂ ਪਾਪੁਣਿਂਸੁ. ਸੋ ‘‘ਕੁਲੂਪਕਭਿਕ੍ਖੂ ਤੇ ਵਿਬ੍ਭਨ੍ਤਾ’’ਤਿ ਵੁਤ੍ਤੇ ‘‘ਕਿਂ ਏਤ੍ਥ ਮਯ੍ਹ’’ਨ੍ਤਿ ਵਤ੍ਵਾ ਚਿਤ੍ਤੁਪ੍ਪਾਦਵੇਮਤ੍ਤਮਤ੍ਤਮ੍ਪਿ ਨ ਅਕਾਸਿ. ਇਦਂ ਸਨ੍ਧਾਯ ਸਤ੍ਥਾ ਸਙ੍ਘੇ ਤੇ ਦਾਨਂ ਦਦਤੋ ਚਿਤ੍ਤਂ ਪਸੀਦਿਸ੍ਸਤੀਤਿ ਆਹ.

੬. ਹਤ੍ਥਿਸਾਰਿਪੁਤ੍ਤਸੁਤ੍ਤਵਣ੍ਣਨਾ

੬੦. ਛਟ੍ਠੇ ਅਭਿਧਮ੍ਮਕਥਨ੍ਤਿ ਅਭਿਧਮ੍ਮਮਿਸ੍ਸਕਂ ਕਥਂ. ਕਥਂ ਓਪਾਤੇਤੀਤਿ ਤੇਸਂ ਕਥਂ ਵਿਚ੍ਛਿਨ੍ਦਿਤ੍ਵਾ ਅਤ੍ਤਨੋ ਕਥਂ ਕਥੇਤਿ. ਥੇਰਾਨਂ ਭਿਕ੍ਖੂਨਨ੍ਤਿ ਕਰਣਤ੍ਥੇ ਸਾਮਿਵਚਨਂ, ਥੇਰੇਹਿ ਭਿਕ੍ਖੂਹਿ ਸਦ੍ਧਿਨ੍ਤਿ ਅਤ੍ਥੋ. ਯਾ ਚ ਥੇਰਾਨਂ ਅਭਿਧਮ੍ਮਕਥਾ, ਤਂ ਅਯਮ੍ਪਿ ਕਥੇਤੁਂ ਸਕ੍ਕੋਤੀਤਿ ਅਤ੍ਥੋ. ਚੇਤੋਪਰਿਯਾਯਨ੍ਤਿ ਚਿਤ੍ਤਵਾਰਂ. ਇਧਾਤਿ ਇਮਸ੍ਮਿਂ ਲੋਕੇ. ਸੋਰਤਸੋਰਤੋਤਿ ਸੂਰਤੋ ਵਿਯ ਸੂਰਤੋ, ਸੋਰਚ੍ਚਸਮਨ੍ਨਾਗਤੋ ਵਿਯਾਤਿ ਅਤ੍ਥੋ. ਨਿਵਾਤਨਿਵਾਤੋਤਿ ਨਿਵਾਤੋ ਵਿਯ ਨਿਵਾਤੋ, ਨਿਵਾਤਵੁਤ੍ਤਿ ਵਿਯਾਤਿ ਅਤ੍ਥੋ. ਉਪਸਨ੍ਤੁਪਸਨ੍ਤੋਤਿ ਉਪਸਨ੍ਤੋ ਵਿਯ ਉਪਸਨ੍ਤੋ. ਵਪਕਸ੍ਸਤੇਵ ਸਤ੍ਥਾਰਾਤਿ ਸਤ੍ਥੁ ਸਨ੍ਤਿਕਾ ਅਪਗਚ੍ਛਤਿ. ਸਂਸਟ੍ਠਸ੍ਸਾਤਿ ਪਞ੍ਚਹਿ ਸਂਸਗ੍ਗੇਹਿ ਸਂਸਟ੍ਠਸ੍ਸ. ਵਿਸ੍ਸਟ੍ਠਸ੍ਸਾਤਿ ਵਿਸ੍ਸਜ੍ਜਿਤਸ੍ਸ. ਪਾਕਤਸ੍ਸਾਤਿ ਪਾਕਤਿਨ੍ਦ੍ਰਿਯਸ੍ਸ.

ਕਿਟ੍ਠਾਦੋਤਿ ਕਿਟ੍ਠਖਾਦਕੋ. ਅਨ੍ਤਰਧਾਪੇਯ੍ਯਾਤਿ ਨਾਸੇਯ੍ਯ. ਗੋਪਸੂਤਿ ਗਾਵੋ ਚ ਅਜਿਕਾ ਚ. ਸਿਪ੍ਪਿਸਮ੍ਬੁਕਨ੍ਤਿ ਸਿਪ੍ਪਿਯੋ ਚ ਸਮ੍ਬੁਕਾ ਚ. ਸਕ੍ਖਰਕਠਲਨ੍ਤਿ ਸਕ੍ਖਰਾ ਚ ਕਠਲਾਨਿ ਚ. ਆਭਿਦੋਸਿਕਨ੍ਤਿ ਅਭਿਞ੍ਞਾਤਦੋਸਂ ਕੁਦ੍ਰੂਸਕਭੋਜਨਂ. ਨਚ੍ਛਾਦੇਯ੍ਯਾਤਿ ਨ ਰੁਚ੍ਚੇਯ੍ਯ. ਤਤ੍ਥ ਯਦੇਤਂ ਪੁਰਿਸਂ ਭੁਤ੍ਤਾਵਿਨ੍ਤਿ ਉਪਯੋਗਵਚਨਂ, ਤਂ ਸਾਮਿਅਤ੍ਥੇ ਦਟ੍ਠਬ੍ਬਂ. ਅਮੁਂ ਹਾਵੁਸੋ, ਪੁਰਿਸਨ੍ਤਿ, ਆਵੁਸੋ, ਅਮੁਂ ਪੁਰਿਸਂ.

ਸਬ੍ਬਨਿਮਿਤ੍ਤਾਨਨ੍ਤਿ ਸਬ੍ਬੇਸਂ ਨਿਚ੍ਚਨਿਮਿਤ੍ਤਾਦੀਨਂ ਨਿਮਿਤ੍ਤਾਨਂ. ਅਨਿਮਿਤ੍ਤਂ ਚੇਤੋਸਮਾਧਿਨ੍ਤਿ ਬਲਵਵਿਪਸ੍ਸਨਾਸਮਾਧਿਂ. ਚੀਰਿਕਸਦ੍ਦੋਤਿ ਝਲ੍ਲਿਕਸਦ੍ਦੋ. ਸਰਿਸ੍ਸਤਿ ਨੇਕ੍ਖਮ੍ਮਸ੍ਸਾਤਿ ਪਬ੍ਬਜ੍ਜਾਯ ਗੁਣਂ ਸਰਿਸ੍ਸਤਿ. ਅਰਹਤਂ ਅਹੋਸੀਤਿ ਭਗਵਤੋ ਸਾਵਕਾਨਂ ਅਰਹਨ੍ਤਾਨਂ ਅਨ੍ਤਰੇ ਏਕੋ ਅਰਹਾ ਅਹੋਸਿ. ਅਯਞ੍ਹਿ ਥੇਰੋ ਸਤ੍ਤ ਵਾਰੇ ਗਿਹੀ ਹੁਤ੍ਵਾ ਸਤ੍ਤ ਵਾਰੇ ਪਬ੍ਬਜਿ. ਕਿਂ ਕਾਰਣਾ? ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਕਿਰੇਸ ਏਕਸ੍ਸ ਭਿਕ੍ਖੁਨੋ ਗਿਹਿਭਾਵੇ ਵਣ੍ਣਂ ਕਥੇਸਿ. ਸੋ ਤੇਨੇਵ ਕਮ੍ਮੇਨ ਅਰਹਤ੍ਤਸ੍ਸ ਉਪਨਿਸ੍ਸਯੇ ਵਿਜ੍ਜਮਾਨੇਯੇਵ ਸਤ੍ਤ ਵਾਰੇ ਗਿਹਿਭਾਵੇ ਚ ਪਬ੍ਬਜ੍ਜਾਯ ਚ ਸਞ੍ਚਰਨ੍ਤੋ ਸਤ੍ਤਮੇ ਵਾਰੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣੀਤਿ.

੭. ਮਜ੍ਝੇਸੁਤ੍ਤਵਣ੍ਣਨਾ

੬੧. ਸਤ੍ਤਮੇ ਪਾਰਾਯਨੇ ਮੇਤ੍ਤੇਯ੍ਯਪਞ੍ਹੇਤਿ ਪਾਰਾਯਨਸਮਾਗਮਮ੍ਹਿ ਮੇਤ੍ਤੇਯ੍ਯਮਾਣਵਸ੍ਸ ਪਞ੍ਹੇ. ਉਭੋਨ੍ਤੇ ਵਿਦਿਤ੍ਵਾਨਾਤਿ ਦ੍ਵੇ ਅਨ੍ਤੇ ਦ੍ਵੇ ਕੋਟ੍ਠਾਸੇ ਜਾਨਿਤ੍ਵਾ. ਮਜ੍ਝੇ ਮਨ੍ਤਾ ਨ ਲਿਪ੍ਪਤੀਤਿ ਮਨ੍ਤਾ ਵੁਚ੍ਚਤਿ ਪਞ੍ਞਾ, ਤਾਯ ਉਭੋ ਅਨ੍ਤੇ ਵਿਦਿਤ੍ਵਾ ਮਜ੍ਝੇ ਨ ਲਿਪ੍ਪਤਿ, ਵੇਮਜ੍ਝੇਟ੍ਠਾਨੇ ਨ ਲਿਪ੍ਪਤਿ. ਸਿਬ੍ਬਨਿਮਚ੍ਚਗਾਤਿ ਸਿਬ੍ਬਨਿਸਙ੍ਖਾਤਂ ਤਣ੍ਹਂ ਅਤੀਤੋ. ਫਸ੍ਸੋਤਿ ਫਸ੍ਸਵਸੇਨ ਨਿਬ੍ਬਤ੍ਤਤ੍ਤਾ ਅਯਂ ਅਤ੍ਤਭਾਵੋ. ਏਕੋ ਅਨ੍ਤੋਤਿ ਅਯਮੇਕੋ ਕੋਟ੍ਠਾਸੋ. ਫਸ੍ਸਸਮੁਦਯੋਤਿ ਫਸ੍ਸੋ ਸਮੁਦਯੋ ਅਸ੍ਸਾਤਿ ਫਸ੍ਸਸਮੁਦਯੋ, ਇਮਸ੍ਮਿਂ ਅਤ੍ਤਭਾਵੇ ਕਤਕਮ੍ਮਫਸ੍ਸਪਚ੍ਚਯਾ ਨਿਬ੍ਬਤ੍ਤੋ ਅਨਾਗਤਤ੍ਤਭਾਵੋ. ਦੁਤਿਯੋ ਅਨ੍ਤੋਤਿ ਦੁਤਿਯੋ ਕੋਟ੍ਠਾਸੋ. ਫਸ੍ਸਨਿਰੋਧੋਤਿ ਨਿਬ੍ਬਾਨਂ. ਮਜ੍ਝੇਤਿ ਸਿਬ੍ਬਿਨਿਤਣ੍ਹਂ ਛੇਤ੍ਵਾ ਦ੍ਵਿਧਾਕਰਣਟ੍ਠੇਨ ਨਿਬ੍ਬਾਨਂ ਮਜ੍ਝੇ ਨਾਮ ਹੋਤਿ. ਤਣ੍ਹਾ ਹਿ ਨਂ ਸਿਬ੍ਬਤੀਤਿ ਤਣ੍ਹਾ ਨਂ ਅਤ੍ਤਭਾਵਦ੍ਵਯਸਙ੍ਖਾਤਂ ਫਸ੍ਸਞ੍ਚ ਫਸ੍ਸਸਮੁਦਯਞ੍ਚ ਸਿਬ੍ਬਤਿ ਘਟ੍ਟੇਤਿ. ਕਿਂ ਕਾਰਣਾ? ਤਸ੍ਸ ਤਸ੍ਸੇਵ ਭਵਸ੍ਸ ਅਭਿਨਿਬ੍ਬਤ੍ਤਿਯਾ. ਯਦਿ ਹਿ ਤਣ੍ਹਾ ਨ ਸਿਬ੍ਬੇਯ੍ਯ, ਤਸ੍ਸ ਤਸ੍ਸ ਭਵਸ੍ਸ ਨਿਬ੍ਬਤ੍ਤਿ ਨ ਭਵੇਯ੍ਯ. ਇਮਸ੍ਮਿਂ ਠਾਨੇ ਕੋਟਿਮਜ੍ਝਿਕੂਪਮਂ ਗਣ੍ਹਨ੍ਤਿ. ਦ੍ਵਿਨ੍ਨਞ੍ਹਿ ਕਣ੍ਡਾਨਂ ਏਕਤੋ ਕਤ੍ਵਾ ਮਜ੍ਝੇ ਸੁਤ੍ਤੇਨ ਸਂਸਿਬ੍ਬਿਤਾਨਂ ਕੋਟਿ ਮਜ੍ਝਨ੍ਤਿ ਵੁਚ੍ਚਤਿ. ਸੁਤ੍ਤੇ ਛਿਨ੍ਨੇ ਉਭੋ ਕਣ੍ਡਾਨਿ ਉਭਤੋ ਪਤਨ੍ਤਿ. ਏਵਮੇਤ੍ਥ ਕਣ੍ਡਦ੍ਵਯਂ ਵਿਯ ਵੁਤ੍ਤਪ੍ਪਕਾਰਾ ਦ੍ਵੇ ਅਨ੍ਤਾ, ਸਿਬ੍ਬਿਤ੍ਵਾ ਠਿਤਸੁਤ੍ਤਂ ਵਿਯ ਤਣ੍ਹਾ, ਸੁਤ੍ਤੇ ਛਿਨ੍ਨੇ ਕਣ੍ਡਦ੍ਵਯਸ੍ਸ ਉਭਤੋਪਤਨਂ ਵਿਯ ਤਣ੍ਹਾਯ ਨਿਰੁਦ੍ਧਾਯ ਅਨ੍ਤਦ੍ਵਯਂ ਨਿਰੁਦ੍ਧਮੇਵ ਹੋਤਿ. ਏਤ੍ਤਾਵਤਾਤਿ ਏਤ੍ਤਕੇਨ ਇਮਿਨਾ ਉਭੋ ਅਨ੍ਤੇ ਵਿਦਿਤ੍ਵਾ ਤਣ੍ਹਾਯ ਮਜ੍ਝੇ ਅਨੁਪਲਿਤ੍ਤਭਾਵੇਨ ਅਭਿਞ੍ਞੇਯ੍ਯਂ ਚਤੁਸਚ੍ਚਧਮ੍ਮਂ ਅਭਿਜਾਨਾਤਿ ਨਾਮ, ਤੀਰਣਪਰਿਞ੍ਞਾਯ ਚ ਪਹਾਨਪਰਿਞ੍ਞਾਯ ਚ ਪਰਿਜਾਨਿਤਬ੍ਬਂ ਲੋਕਿਯਸਚ੍ਚਦ੍ਵਯਂ ਪਰਿਜਾਨਾਤਿ ਨਾਮ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ. ਦੁਕ੍ਖਸ੍ਸਨ੍ਤਕਰੋ ਹੋਤੀਤਿ ਵਟ੍ਟਦੁਕ੍ਖਸ੍ਸ ਕੋਟਿਕਰੋ ਪਰਿਚ੍ਛੇਦਪਰਿਵਟੁਮਕਰੋ ਹੋਤਿ ਨਾਮ.

ਦੁਤਿਯਵਾਰੇ ਤਿਣ੍ਣਂ ਕਣ੍ਡਾਨਂ ਵਸੇਨ ਉਪਮਾ ਵੇਦਿਤਬ੍ਬਾ. ਤਿਣ੍ਣਞ੍ਹਿ ਕਣ੍ਡਾਨਂ ਸੁਤ੍ਤੇਨ ਸਂਸਿਬ੍ਬਿਤਾਨਂ ਸੁਤ੍ਤੇ ਛਿਨ੍ਨੇ ਤੀਣਿ ਕਣ੍ਡਾਨਿ ਤੀਸੁ ਠਾਨੇਸੁ ਪਤਨ੍ਤਿ, ਏਵਮੇਤ੍ਥ ਕਣ੍ਡਤ੍ਤਯਂ ਵਿਯ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਖਨ੍ਧਾ, ਸੁਤ੍ਤਂ ਵਿਯ ਤਣ੍ਹਾ. ਸਾ ਹਿ ਅਤੀਤਂ ਪਚ੍ਚੁਪ੍ਪਨ੍ਨੇਨ, ਪਚ੍ਚੁਪ੍ਪਨ੍ਨਞ੍ਚ ਅਨਾਗਤੇਨ ਸਦ੍ਧਿਂ ਸਂਸਿਬ੍ਬਤਿ. ਸੁਤ੍ਤੇ ਛਿਨ੍ਨੇ ਕਣ੍ਡਤ੍ਤਯਸ੍ਸ ਤੀਸੁ ਠਾਨੇਸੁ ਪਤਨਂ ਵਿਯ ਤਣ੍ਹਾਯ ਨਿਰੁਦ੍ਧਾਯ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਖਨ੍ਧਾ ਨਿਰੁਦ੍ਧਾਵ ਹੋਨ੍ਤਿ.

ਤਤਿਯਵਾਰੇ ਅਦੁਕ੍ਖਮਸੁਖਾ ਮਜ੍ਝੇਤਿ ਦ੍ਵਿਨ੍ਨਂ ਵੇਦਨਾਨਂ ਅਨ੍ਤਰਟ੍ਠਕਭਾਵੇਨ ਮਜ੍ਝੇ. ਸੁਖਞ੍ਹਿ ਦੁਕ੍ਖਸ੍ਸ, ਦੁਕ੍ਖਂ ਵਾ ਸੁਖਸ੍ਸ ਅਨ੍ਤਰਂ ਨਾਮ ਨਤ੍ਥਿ. ਤਣ੍ਹਾ ਸਿਬ੍ਬਿਨੀਤਿ ਵੇਦਨਾਸੁ ਨਨ੍ਦਿਰਾਗੋ ਵੇਦਨਾਨਂ ਉਪਚ੍ਛੇਦਂ ਨਿਵਾਰੇਤੀਤਿ ਤਾ ਸਿਬ੍ਬਤਿ ਨਾਮ.

ਚਤੁਤ੍ਥਵਾਰੇ ਵਿਞ੍ਞਾਣਂ ਮਜ੍ਝੇਤਿ ਪਟਿਸਨ੍ਧਿਵਿਞ੍ਞਾਣਮ੍ਪਿ ਸੇਸਵਿਞ੍ਞਾਣਮ੍ਪਿ ਨਾਮਰੂਪਪਚ੍ਚਯਸਮੁਦਾਗਤਤ੍ਤਾ ਨਾਮਰੂਪਾਨਂ ਮਜ੍ਝੇ ਨਾਮ.

ਪਞ੍ਚਮਵਾਰੇ ਵਿਞ੍ਞਾਣਂ ਮਜ੍ਝੇਤਿ ਕਮ੍ਮਵਿਞ੍ਞਾਣਂ ਮਜ੍ਝੇ, ਅਜ੍ਝਤ੍ਤਿਕਾਯਤਨੇਸੁ ਵਾ ਮਨਾਯਤਨੇਨ ਕਮ੍ਮਸ੍ਸ ਗਹਿਤਤ੍ਤਾ ਇਧ ਯਂਕਿਞ੍ਚਿ ਵਿਞ੍ਞਾਣਂ ਮਜ੍ਝੇ ਨਾਮ, ਮਨੋਦ੍ਵਾਰੇ ਵਾ ਆਵਜ੍ਜਨਸ੍ਸ ਅਜ੍ਝਤ੍ਤਿਕਾਯਤਨਨਿਸ੍ਸਿਤਤ੍ਤਾ ਜਵਨਵਿਞ੍ਞਾਣਂ ਮਜ੍ਝੇ ਨਾਮ.

ਛਟ੍ਠਵਾਰੇ ਸਕ੍ਕਾਯੋਤਿ ਤੇਭੂਮਕਵਟ੍ਟਂ. ਸਕ੍ਕਾਯਸਮੁਦਯੋਤਿ ਸਮੁਦਯਸਚ੍ਚਂ. ਸਕ੍ਕਾਯਨਿਰੋਧੋਤਿ ਨਿਰੋਧਸਚ੍ਚਂ. ਪਰਿਯਾਯੇਨਾਤਿ ਤੇਨ ਤੇਨ ਕਾਰਣੇਨੇਵ. ਸੇਸਂ ਸਬ੍ਬਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੮. ਪੁਰਿਸਿਨ੍ਦ੍ਰਿਯਞਾਣਸੁਤ੍ਤਵਣ੍ਣਨਾ

੬੨. ਅਟ੍ਠਮੇ ਅਞ੍ਞਤਰੋਤਿ ਦੇਵਦਤ੍ਤਪਕ੍ਖਿਕੋ ਏਕੋ. ਸਮਨ੍ਨਾਹਰਿਤ੍ਵਾਤਿ ਆਵਜ੍ਜਿਤ੍ਵਾ. ਇਦਂ ਸੋ ‘‘ਕਿਂ ਨੁ ਖੋ ਭਗਵਤਾ ਜਾਨਿਤ੍ਵਾ ਕਥਿਤਂ, ਉਦਾਹੁ ਅਜਾਨਿਤ੍ਵਾ, ਏਕਂਸਿਕਂ ਵਾ ਕਥਿਤਂ ਉਦਾਹੁ ਵਿਭਜ੍ਜਕਥਿਤ’’ਨ੍ਤਿ ਅਧਿਪ੍ਪਾਯੇਨ ਪੁਚ੍ਛਤਿ. ਆਪਾਯਿਕੋਤਿ ਅਪਾਯੇ ਨਿਬ੍ਬਤ੍ਤਨਕੋ. ਨੇਰਯਿਕੋਤਿ ਨਿਰਯਗਾਮੀ. ਕਪ੍ਪਟ੍ਠੋਤਿ ਕਪ੍ਪਟ੍ਠਿਯਕਮ੍ਮਸ੍ਸ ਕਤਤ੍ਤਾ ਕਪ੍ਪਂ ਠਸ੍ਸਤਿ. ਅਤੇਕਿਚ੍ਛੋਤਿ ਨ ਸਕ੍ਕਾ ਤਿਕਿਚ੍ਛਿਤੁਂ. ਦ੍ਵੇਜ੍ਝਨ੍ਤਿ ਦ੍ਵਿਧਾਭਾਵਂ. ਵਾਲਗ੍ਗਕੋਟਿਨਿਤ੍ਤੁਦਨਮਤ੍ਤਨ੍ਤਿ ਵਾਲਸ੍ਸ ਅਗ੍ਗਕੋਟਿਯਾ ਦਸ੍ਸੇਤਬ੍ਬਮਤ੍ਤਕਂ, ਵਾਲਗ੍ਗਕੋਟਿਨਿਪਾਤਮਤ੍ਤਕਂ ਵਾ. ਪੁਰਿਸਿਨ੍ਦ੍ਰਿਯਞਾਣਾਨੀਤਿ ਪੁਰਿਸਪੁਗ੍ਗਲਾਨਂ ਇਨ੍ਦ੍ਰਿਯਪਰੋਪਰਿਯਤ੍ਤਞਾਣਾਨਿ, ਇਨ੍ਦ੍ਰਿਯਾਨਂ ਤਿਕ੍ਖਮੁਦੁਭਾਵਜਾਨਨਞਾਣਾਨੀਤਿ ਅਤ੍ਥੋ.

ਵਿਜ੍ਜਮਾਨਾ ਕੁਸਲਾਪਿ ਧਮ੍ਮਾ ਅਕੁਸਲਾਪਿ ਧਮ੍ਮਾਤਿ ਏਤ੍ਤਕਾ ਕੁਸਲਾ ਧਮ੍ਮਾ ਵਿਜ੍ਜਨ੍ਤਿ, ਏਤ੍ਤਕਾ ਅਕੁਸਲਾ ਧਮ੍ਮਾਤਿ ਜਾਨਾਮਿ. ਅਨ੍ਤਰਹਿਤਾਤਿ ਅਦਸ੍ਸਨਂ ਗਤਾ. ਸਮ੍ਮੁਖੀਭੂਤਾਤਿ ਸਮੁਦਾਚਾਰਵਸੇਨ ਪਾਕਟਾ ਜਾਤਾ. ਕੁਸਲਮੂਲਨ੍ਤਿ ਕੁਸਲਜ੍ਝਾਸਯੋ. ਕੁਸਲਾ ਕੁਸਲਨ੍ਤਿ ਤਮ੍ਹਾ ਕੁਸਲਜ੍ਝਾਸਯਾ ਅਞ੍ਞਮ੍ਪਿ ਕੁਸਲਂ ਨਿਬ੍ਬਤ੍ਤਿਸ੍ਸਤਿ. ਸਾਰਦਾਨੀਤਿ ਸਾਰਾਦਾਨਿ ਗਹਿਤਸਾਰਾਨਿ, ਸਰਦਮਾਸੇ ਵਾ ਨਿਬ੍ਬਤ੍ਤਾਨਿ. ਸੁਖਸਯਿਤਾਨੀਤਿ ਸੁਖਸਨ੍ਨਿਚਿਤਾਨਿ. ਸੁਖੇਤ੍ਤੇਤਿ ਮਣ੍ਡਖੇਤ੍ਤੇ. ਨਿਕ੍ਖਿਤ੍ਤਾਨੀਤਿ ਵੁਤ੍ਤਾਨਿ. ਸਪ੍ਪਟਿਭਾਗਾਤਿ ਸਰਿਕ੍ਖਕਾ. ਅਭਿਦੋ ਅਦ੍ਧਰਤ੍ਤਨ੍ਤਿ ਅਭਿਅਦ੍ਧਰਤ੍ਤਂ ਅਦ੍ਧਰਤ੍ਤੇ ਅਭਿਮੁਖੀਭੂਤੇ. ਭਤ੍ਤਕਾਲਸਮਯੇਤਿ ਰਾਜਕੁਲਾਨਂ ਭਤ੍ਤਕਾਲਸਙ੍ਖਾਤੇ ਸਮਯੇ. ਪਰਿਹਾਨਧਮ੍ਮੋਤਿ ਕੋ ਏਵਂ ਭਗਵਤਾ ਞਾਤੋਤਿ? ਅਜਾਤਸਤ੍ਤੁਰਾਜਾ. ਸੋ ਹਿ ਪਾਪਮਿਤ੍ਤਂ ਨਿਸ੍ਸਾਯ ਮਗ੍ਗਫਲੇਹਿ ਪਰਿਹੀਨੋ. ਅਪਰੇਪਿ ਸੁਪ੍ਪਬੁਦ੍ਧਸੁਨਕ੍ਖਤ੍ਤਾਦਯੋ ਭਗਵਤਾ ਞਾਤਾਵ. ਅਪਰਿਹਾਨਧਮ੍ਮੋਤਿ ਏਵਂ ਭਗਵਤਾ ਕੋ ਞਾਤੋ? ਸੁਸੀਮੋ ਪਰਿਬ੍ਬਾਜਕੋ ਅਞ੍ਞੇ ਚ ਏਵਰੂਪਾ. ਪਰਿਨਿਬ੍ਬਾਯਿਸ੍ਸਤੀਤਿ ਏਵਂ ਕੋ ਞਾਤੋ ਭਗਵਤਾਤਿ? ਸਨ੍ਤਤਿਮਹਾਮਤ੍ਤੋ ਅਞ੍ਞੇ ਚ ਏਵਰੂਪਾ.

੯. ਨਿਬ੍ਬੇਧਿਕਸੁਤ੍ਤਵਣ੍ਣਨਾ

੬੩. ਨਵਮੇ ਅਨਿਬ੍ਬਿਦ੍ਧਪੁਬ੍ਬੇ ਅਪ੍ਪਦਾਲਿਤਪੁਬ੍ਬੇ ਲੋਭਕ੍ਖਨ੍ਧਾਦਯੋ ਨਿਬ੍ਬਿਜ੍ਝਤਿ ਪਦਾਲੇਤੀਤਿ ਨਿਬ੍ਬੇਧਿਕਪਰਿਯਾਯੋ, ਨਿਬ੍ਬਿਜ੍ਝਨਕਾਰਣਨ੍ਤਿ ਅਤ੍ਥੋ. ਨਿਦਾਨਸਮ੍ਭਵੋਤਿ ਕਾਮੇ ਨਿਦੇਤਿ ਉਪ੍ਪਾਦਨਸਮਤ੍ਥਤਾਯ ਨਿਯ੍ਯਾਦੇਤੀਤਿ ਨਿਦਾਨਂ. ਸਮ੍ਭਵਤਿ ਤਤੋਤਿ ਸਮ੍ਭਵੋ, ਨਿਦਾਨਮੇਵ ਸਮ੍ਭਵੋ ਨਿਦਾਨਸਮ੍ਭਵੋ. ਵੇਮਤ੍ਤਤਾਤਿ ਨਾਨਾਕਰਣਂ.

ਕਾਮਗੁਣਾਤਿ ਕਾਮਯਿਤਬ੍ਬਟ੍ਠੇਨ ਕਾਮਾ, ਬਨ੍ਧਨਟ੍ਠੇਨ ਗੁਣਾ ‘‘ਅਨ੍ਤਗੁਣ’’ਨ੍ਤਿਆਦੀਸੁ ਵਿਯ. ਚਕ੍ਖੁਵਿਞ੍ਞੇਯ੍ਯਾਤਿ ਚਕ੍ਖੁਵਿਞ੍ਞਾਣੇਨ ਪਸ੍ਸਿਤਬ੍ਬਾ. ਇਟ੍ਠਾਤਿ ਪਰਿਯਿਟ੍ਠਾ ਵਾ ਹੋਨ੍ਤੁ ਮਾ ਵਾ, ਇਟ੍ਠਾਰਮ੍ਮਣਭੂਤਾਤਿ ਅਤ੍ਥੋ. ਕਨ੍ਤਾਤਿ ਕਮਨੀਯਾ. ਮਨਾਪਾਤਿ ਮਨਵਡ੍ਢਨਕਾ. ਪਿਯਰੂਪਾਤਿ ਪਿਯਜਾਤਿਕਾ. ਕਾਮੂਪਸਞ੍ਹਿਤਾਤਿ ਆਰਮ੍ਮਣਂ ਕਤ੍ਵਾ ਉਪ੍ਪਜ੍ਜਮਾਨੇਨ ਕਾਮੇਨ ਉਪਸਞ੍ਹਿਤਾ. ਰਜਨੀਯਾਤਿ ਰਾਗੁਪ੍ਪਤ੍ਤਿਕਾਰਣਭੂਤਾ. ਨੇਤੇ ਕਾਮਾਤਿ ਨ ਏਤੇ ਕਮਨਟ੍ਠੇਨ ਕਾਮਾ ਨਾਮ ਹੋਨ੍ਤਿ. ਸਙ੍ਕਪ੍ਪਰਾਗੋਤਿ ਸਙ੍ਕਪ੍ਪਵਸੇਨ ਉਪ੍ਪਨ੍ਨਰਾਗੋ. ਕਾਮੋਤਿ ਅਯਂ ਕਾਮਪ੍ਪਹਾਨਾਯ ਪਟਿਪਨ੍ਨੇਹਿ ਪਹਾਤਬ੍ਬੋ. ਕਮਨਟ੍ਠੇਨ ਕਾਮਾ ਨਾਮ. ਚਿਤ੍ਰਾਨੀਤਿ ਚਿਤ੍ਰਵਿਚਿਤ੍ਰਾਰਮ੍ਮਣਾਨਿ.

ਫਸ੍ਸੋਤਿ ਸਹਜਾਤਫਸ੍ਸੋ. ਕਾਮਯਮਾਨੋਤਿ ਕਾਮਂ ਕਾਮਯਮਾਨੋ. ਤਜ੍ਜਂ ਤਜ੍ਜਨ੍ਤਿ ਤਜ੍ਜਾਤਿਕਂ ਤਜ੍ਜਾਤਿਕਂ. ਪੁਞ੍ਞਭਾਗਿਯਨ੍ਤਿ ਦਿਬ੍ਬੇ ਕਾਮੇ ਪਤ੍ਥੇਤ੍ਵਾ ਸੁਚਰਿਤਪਾਰਿਪੂਰਿਯਾ ਦੇਵਲੋਕੇ ਨਿਬ੍ਬਤ੍ਤਸ੍ਸ ਅਤ੍ਤਭਾਵੋ ਪੁਞ੍ਞਭਾਗਿਯੋ ਨਾਮ, ਦੁਚ੍ਚਰਿਤਪਾਰਿਪੂਰਿਯਾ ਅਪਾਯੇ ਨਿਬ੍ਬਤ੍ਤਸ੍ਸ ਅਤ੍ਤਭਾਵੋ ਅਪੁਞ੍ਞਭਾਗਿਯੋ ਨਾਮ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਕਾਮਾਨਂ ਵਿਪਾਕੋਤਿ ਅਯਂ ਦੁਵਿਧੋਪਿ ਕਾਮਪਤ੍ਥਨਂ ਨਿਸ੍ਸਾਯ ਉਪ੍ਪਨ੍ਨਤ੍ਤਾ ਕਾਮਾਨਂ ਵਿਪਾਕੋਤਿ ਵੁਚ੍ਚਤਿ. ਸੋ ਇਮਂ ਨਿਬ੍ਬੇਧਿਕਨ੍ਤਿ ਸੋ ਭਿਕ੍ਖੁ ਇਮਂ ਛਤ੍ਤਿਂਸਟ੍ਠਾਨੇਸੁ ਨਿਬ੍ਬਿਜ੍ਝਨਕਂ ਸੇਟ੍ਠਚਰਿਯਂ ਜਾਨਾਤਿ. ਕਾਮਨਿਰੋਧਨ੍ਤਿ ਕਾਮਾਨਂ ਨਿਰੋਧਨੇ ਏਵਂ ਲਦ੍ਧਨਾਮਂ. ਇਮਸ੍ਮਿਞ੍ਹਿ ਠਾਨੇ ਬ੍ਰਹ੍ਮਚਰਿਯਸਙ੍ਖਾਤੋ ਮਗ੍ਗੋਵ ਕਾਮਨਿਰੋਧੋਤਿ ਵੁਤ੍ਤੋ.

ਸਾਮਿਸਾਤਿ ਕਿਲੇਸਾਮਿਸਸਮ੍ਪਯੁਤ੍ਤਾ. ਇਮਿਨਾ ਨਯੇਨ ਸਬ੍ਬਠਾਨੇਸੁ ਅਤ੍ਥੋ ਵੇਦਿਤਬ੍ਬੋ. ਅਪਿਚੇਤ੍ਥ ਵੋਹਾਰਵੇਪਕ੍ਕਨ੍ਤਿ ਵੋਹਾਰਵਿਪਾਕਂ. ਕਥਾਸਙ੍ਖਾਤੋ ਹਿ ਵੋਹਾਰੋ ਸਞ੍ਞਾਯ ਵਿਪਾਕੋ ਨਾਮ. ਯਥਾ ਯਥਾ ਨਨ੍ਤਿ ਏਤ੍ਥ ਨਂ-ਇਤਿ ਨਿਪਾਤਮਤ੍ਤਮੇਵ. ਇਤਿ ਯਸ੍ਮਾ ਯਥਾ ਯਥਾ ਸਞ੍ਜਾਨਾਤਿ, ਤਥਾ ਤਥਾ ਏਵਂਸਞ੍ਞੀ ਅਹੋਸਿਨ੍ਤਿ ਕਥੇਤਿ, ਤਸ੍ਮਾ ਵੋਹਾਰਵੇਪਕ੍ਕਾਤਿ ਅਤ੍ਥੋ.

ਅਵਿਜ੍ਜਾਤਿ ਅਟ੍ਠਸੁ ਠਾਨੇਸੁ ਅਞ੍ਞਾਣਭੂਤਾ ਬਹਲਅਵਿਜ੍ਜਾ. ਨਿਰਯਂ ਗਮੇਨ੍ਤੀਤਿ ਨਿਰਯਗਮਨੀਯਾ, ਨਿਰਯੇ ਨਿਬ੍ਬਤ੍ਤਿਪਚ੍ਚਯਾਤਿ ਅਤ੍ਥੋ. ਸੇਸੇਸੁਪਿ ਏਸੇਵ ਨਯੋ. ਚੇਤਨਾਹਨ੍ਤਿ ਚੇਤਨਂ ਅਹਂ. ਇਧ ਸਬ੍ਬਸਙ੍ਗਾਹਿਕਾ ਸਂਵਿਦਹਨਚੇਤਨਾ ਗਹਿਤਾ. ਚੇਤਯਿਤ੍ਵਾਤਿ ਦ੍ਵਾਰਪ੍ਪਵਤ੍ਤਚੇਤਨਾ. ਮਨਸਾਤਿ ਚੇਤਨਾਸਮ੍ਪਯੁਤ੍ਤਚਿਤ੍ਤੇਨ. ਨਿਰਯਵੇਦਨੀਯਨ੍ਤਿ ਨਿਰਯੇ ਵਿਪਾਕਦਾਯਕਂ. ਸੇਸੇਸੁਪਿ ਏਸੇਵ ਨਯੋ. ਅਧਿਮਤ੍ਤਨ੍ਤਿ ਬਲਵਦੁਕ੍ਖਂ. ਦਨ੍ਧਵਿਰਾਗੀਤਿ ਗਰੁਕਂ ਨ ਖਿਪ੍ਪਂ ਸਣਿਕਂ ਵਿਗਚ੍ਛਨਕਦੁਕ੍ਖਂ. ਉਰਤ੍ਤਾਲ਼ਿਂ ਕਨ੍ਦਤੀਤਿ ਉਰਂ ਤਾਲ਼ੇਤ੍ਵਾ ਰੋਦਤਿ. ਪਰਿਯੇਟ੍ਠਿਨ੍ਤਿ ਪਰਿਯੇਸਨਂ. ਏਕਪਦਂ ਦ੍ਵਿਪਦਨ੍ਤਿ ਏਕਪਦਮਨ੍ਤਂ ਵਾ ਦ੍ਵਿਪਦਮਨ੍ਤਂ ਵਾ, ਕੋ ਮਨ੍ਤਂ ਜਾਨਾਤੀਤਿ ਅਤ੍ਥੋ. ਸਮ੍ਮੋਹਵੇਪਕ੍ਕਨ੍ਤਿ ਸਮ੍ਮੋਹਵਿਪਾਕਂ. ਦੁਕ੍ਖਸ੍ਸ ਹਿ ਸਮ੍ਮੋਹੋ ਨਿਸ੍ਸਨ੍ਦਵਿਪਾਕੋ ਨਾਮ. ਦੁਤਿਯਪਦੇਪਿ ਏਸੇਵ ਨਯੋ. ਪਰਿਯੇਸਨਾਪਿ ਹਿ ਤਸ੍ਸ ਨਿਸ੍ਸਨ੍ਦਵਿਪਾਕੋਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.

੧੦. ਸੀਹਨਾਦਸੁਤ੍ਤਵਣ੍ਣਨਾ

੬੪. ਦਸਮੇ ਆਸਭਂ ਠਾਨਨ੍ਤਿ ਸੇਟ੍ਠਂ ਨਿਚ੍ਚਲਟ੍ਠਾਨਂ. ਸੀਹਨਾਦਨ੍ਤਿ ਅਭੀਤਨਾਦਂ ਪਮੁਖਨਾਦਂ. ਬ੍ਰਹ੍ਮਚਕ੍ਕਨ੍ਤਿ ਸੇਟ੍ਠਞਾਣਚਕ੍ਕਂ ਪਟਿਵੇਧਞਾਣਞ੍ਚੇਵ ਦੇਸਨਾਞਾਣਞ੍ਚ. ਠਾਨਞ੍ਚ ਠਾਨਤੋਤਿ ਕਾਰਣਞ੍ਚ ਕਾਰਣਤੋ. ਯਮ੍ਪੀਤਿ ਯੇਨ ਞਾਣੇਨ. ਇਦਮ੍ਪਿ ਤਥਾਗਤਸ੍ਸਾਤਿ ਇਦਮ੍ਪਿ ਠਾਨਾਟ੍ਠਾਨਞਾਣਂ ਤਥਾਗਤਸ੍ਸ ਤਥਾਗਤਬਲਂ ਨਾਮ ਹੋਤਿ. ਏਵਂ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਕਮ੍ਮਸਮਾਦਾਨਾਨਨ੍ਤਿ ਸਮਾਦਿਯਿਤ੍ਵਾ ਕਤਾਨਂ ਕੁਸਲਾਕੁਸਲਕਮ੍ਮਾਨਂ, ਕਮ੍ਮਮੇਵ ਵਾ ਕਮ੍ਮਸਮਾਦਾਨਂ. ਠਾਨਸੋ ਹੇਤੁਸੋਤਿ ਪਚ੍ਚਯਤੋ ਚੇਵ ਹੇਤੁਤੋ ਚ. ਤਤ੍ਥ ਗਤਿਉਪਧਿਕਾਲਪਯੋਗਾ ਵਿਪਾਕਸ੍ਸ ਠਾਨਂ, ਕਮ੍ਮਂ ਹੇਤੁ. ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਨ੍ਤਿ ਚਤੁਨ੍ਨਂ ਝਾਨਾਨਂ ਅਟ੍ਠਨ੍ਨਂ ਵਿਮੋਕ੍ਖਾਨਂ ਤਿਣ੍ਣਂ ਸਮਾਧੀਨਂ ਨਵਨ੍ਨਂ ਅਨੁਪੁਬ੍ਬਸਮਾਪਤ੍ਤੀਨਞ੍ਚ. ਸਂਕਿਲੇਸਨ੍ਤਿ ਹਾਨਭਾਗਿਯਂ ਧਮ੍ਮਂ. ਵੋਦਾਨਨ੍ਤਿ ਵਿਸੇਸਭਾਗਿਯਂ ਧਮ੍ਮਂ. ਵੁਟ੍ਠਾਨਨ੍ਤਿ ‘‘ਵੋਦਾਨਮ੍ਪਿ ਵੁਟ੍ਠਾਨਂ, ਤਮ੍ਹਾ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਾਨਮ੍ਪਿ ਵੁਟ੍ਠਾਨ’’ਨ੍ਤਿ (ਵਿਭ. ੮੨੮) ਏਵਂ ਵੁਤ੍ਤਂ ਪਗੁਣਜ੍ਝਾਨਞ੍ਚੇਵ ਭਵਙ੍ਗਨਫਲਸਮਾਪਤ੍ਤਿਯੋ ਚ. ਹੇਟ੍ਠਿਮਂ ਹੇਟ੍ਠਿਮਞ੍ਹਿ ਪਗੁਣਜ੍ਝਾਨਂ ਉਪਰਿਮਸ੍ਸ ਉਪਰਿਮਸ੍ਸ ਪਦਟ੍ਠਾਨਂ ਹੋਤਿ, ਤਸ੍ਮਾ ‘‘ਵੋਦਾਨਮ੍ਪਿ ਵੁਟ੍ਠਾਨ’’ਨ੍ਤਿ ਵੁਤ੍ਤਂ. ਭਵਙ੍ਗੇਨ ਪਨ ਸਬ੍ਬਜ੍ਝਾਨੇਹਿ ਵੁਟ੍ਠਾਨਂ ਹੋਤਿ, ਫਲਸਮਾਪਤ੍ਤਿਯਾ ਨਿਰੋਧਸਮਾਪਤ੍ਤਿਤੋ ਵੁਟ੍ਠਾਨਂ ਹੋਤਿ. ਤਂ ਸਨ੍ਧਾਯ ‘‘ਤਮ੍ਹਾ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਾਨਮ੍ਪਿ ਵੁਟ੍ਠਾਨ’’ਨ੍ਤਿ ਵੁਤ੍ਤਂ. ਅਨੇਕਵਿਹਿਤਨ੍ਤਿਆਦੀਨਿ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੪੦੨) ਵਣ੍ਣਿਤਾਨਿ. ਆਸਵਕ੍ਖਯਞਾਣਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਪੁਰਿਮਸ੍ਸਾਪਿ ਞਾਣਤ੍ਤਯਸ੍ਸ ਵਿਤ੍ਥਾਰਕਥਂ ਇਚ੍ਛਨ੍ਤੇਨ ਮਜ੍ਝਿਮਟ੍ਠਕਥਾਯ ਮਹਾਸੀਹਨਾਦਵਣ੍ਣਨਾ (ਮ. ਨਿ. ਅਟ੍ਠ. ੧.੧੪੬ ਆਦਯੋ) ਓਲੋਕੇਤਬ੍ਬਾ. ਸਮਾਹਿਤਸ੍ਸਾਤਿ ਏਕਗ੍ਗਚਿਤ੍ਤਸ੍ਸ. ਸਮਾਧਿ ਮਗ੍ਗੋਤਿ ਸਮਾਧਿ ਏਤੇਸਂ ਞਾਣਾਨਂ ਅਧਿਗਮਾਯ ਉਪਾਯੋ. ਅਸਮਾਧੀਤਿ ਅਨੇਕਗ੍ਗਭਾਵੋ. ਕੁਮ੍ਮਗ੍ਗੋਤਿ ਮਿਚ੍ਛਾਮਗ੍ਗੋ. ਇਮਸ੍ਮਿਂ ਸੁਤ੍ਤੇ ਤਥਾਗਤਸ੍ਸ ਞਾਣਬਲਂ ਕਥਿਤਨ੍ਤਿ.

ਮਹਾਵਗ੍ਗੋ ਛਟ੍ਠੋ.

੭. ਦੇਵਤਾਵਗ੍ਗੋ

੧-੩. ਅਨਾਗਾਮਿਫਲਸੁਤ੍ਤਾਦਿਵਣ੍ਣਨਾ

੬੫-੬੭. ਸਤ੍ਤਮਸ੍ਸ ਪਠਮੇ ਅਸ੍ਸਦ੍ਧਿਯਨ੍ਤਿ ਅਸ੍ਸਦ੍ਧਭਾਵਂ. ਦੁਪ੍ਪਞ੍ਞਤਨ੍ਤਿ ਨਿਪ੍ਪਞ੍ਞਭਾਵਂ. ਦੁਤਿਯੇ ਪਮਾਦਨ੍ਤਿ ਸਤਿਵਿਪ੍ਪਵਾਸਂ. ਤਤਿਯੇ ਆਭਿਸਮਾਚਾਰਿਕਨ੍ਤਿ ਉਤ੍ਤਮਸਮਾਚਾਰਭੂਤਂ ਵਤ੍ਤਵਸੇਨ ਪਣ੍ਣਤ੍ਤਿਸੀਲਂ. ਸੇਖਧਮ੍ਮਨ੍ਤਿ ਸੇਖਪਣ੍ਣਤ੍ਤਿਸੀਲਂ. ਸੀਲਾਨੀਤਿ ਚਤ੍ਤਾਰਿ ਮਹਾਸੀਲਾਨਿ.

੪. ਸਙ੍ਗਣਿਕਾਰਾਮਸੁਤ੍ਤਵਣ੍ਣਨਾ

੬੮. ਚਤੁਤ੍ਥੇ ਸਙ੍ਗਣਿਕਾਰਾਮੋਤਿ ਗਣਸਙ੍ਗਣਿਕਾਰਾਮੋ. ਸੁਤ੍ਤਨ੍ਤਿਕਗਣਾਦੀਸੁ ਪਨ ਗਣੇਸੁ ਅਤ੍ਤਨੋ ਵਾ ਪਰਿਸਾਸਙ੍ਖਾਤੇ ਗਣੇ ਰਮਤੀਤਿ ਗਣਾਰਾਮੋ. ਪਵਿਵੇਕੇਤਿ ਕਾਯਵਿਵੇਕੇ. ਚਿਤ੍ਤਸ੍ਸ ਨਿਮਿਤ੍ਤਨ੍ਤਿ ਸਮਾਧਿਵਿਪਸ੍ਸਨਾਚਿਤ੍ਤਸ੍ਸ ਨਿਮਿਤ੍ਤਂ ਸਮਾਧਿਵਿਪਸ੍ਸਨਾਕਾਰਂ. ਸਮ੍ਮਾਦਿਟ੍ਠਿਨ੍ਤਿ ਵਿਪਸ੍ਸਨਾਸਮ੍ਮਾਦਿਟ੍ਠਿਂ. ਸਮਾਧਿਨ੍ਤਿ ਮਗ੍ਗਸਮਾਧਿਞ੍ਚੇਵ ਫਲਸਮਾਧਿਞ੍ਚ. ਸਂਯੋਜਨਾਨੀਤਿ ਦਸ ਸਂਯੋਜਨਾਨਿ. ਨਿਬ੍ਬਾਨਨ੍ਤਿ ਅਪਚ੍ਚਯਪਰਿਨਿਬ੍ਬਾਨਂ.

੫. ਦੇਵਤਾਸੁਤ੍ਤਵਣ੍ਣਨਾ

੬੯. ਪਞ੍ਚਮੇ ਸੋਵਚਸ੍ਸਤਾਤਿ ਸੁਬ੍ਬਚਭਾਵੋ. ਕਲ੍ਯਾਣਮਿਤ੍ਤਤਾਤਿ ਸੁਚਿਮਿਤ੍ਤਤਾ. ਸਤ੍ਥੁਗਾਰਵੋਤਿ ਸਤ੍ਥਰਿ ਗਾਰਵਯੁਤ੍ਤੋ. ਏਸ ਨਯੋ ਸਬ੍ਬਤ੍ਥ.

੬. ਸਮਾਧਿਸੁਤ੍ਤਵਣ੍ਣਨਾ

੭੦. ਛਟ੍ਠੇ ਨ ਸਨ੍ਤੇਨਾਤਿ ਪਚ੍ਚਨੀਕਕਿਲੇਸੇਹਿ ਅਵੂਪਸਨ੍ਤੇਨ. ਨ ਪਣੀਤੇਨਾਤਿ ਨ ਅਤਪ੍ਪਕੇਨ. ਨ ਪਟਿਪ੍ਪਸ੍ਸਦ੍ਧਿਲਦ੍ਧੇਨਾਤਿ ਕਿਲੇਸਪ੍ਪਟਿਪ੍ਪਸ੍ਸਦ੍ਧਿਯਾ ਅਲਦ੍ਧੇਨ ਅਪ੍ਪਤ੍ਤੇਨ. ਨ ਏਕੋਦਿਭਾਵਾਧਿਗਤੇਨਾਤਿ ਨ ਏਕਗ੍ਗਭਾਵਂ ਉਪਗਤੇਨ.

੭. ਸਕ੍ਖਿਭਬ੍ਬਸੁਤ੍ਤਵਣ੍ਣਨਾ

੭੧. ਸਤ੍ਤਮੇ ਤਤ੍ਰ ਤਤ੍ਰਾਤਿ ਤਸ੍ਮਿਂ ਤਸ੍ਮਿਂ ਵਿਸੇਸੇ. ਸਕ੍ਖਿਭਬ੍ਬਤਨ੍ਤਿ ਪਚ੍ਚਕ੍ਖਭਾਵਂ. ਆਯਤਨੇਤਿ ਕਾਰਣੇ. ਹਾਨਭਾਗਿਯਾਦਯੋ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੩੯) ਸਂਵਣ੍ਣਿਤਾ. ਅਸਕ੍ਕਚ੍ਚਕਾਰੀਤਿ ਨ ਸੁਕਤਕਾਰੀ, ਨ ਆਦਰਕਾਰੀ. ਅਸਪ੍ਪਾਯਕਾਰੀਤਿ ਨ ਸਪ੍ਪਾਯਕਾਰੀ, ਨ ਉਪਕਾਰਭੂਤਧਮ੍ਮਕਾਰੀ.

੮. ਬਲਸੁਤ੍ਤਵਣ੍ਣਨਾ

੭੨. ਅਟ੍ਠਮੇ ਬਲਤਨ੍ਤਿ ਬਲਭਾਵਂ ਥਾਮਭਾਵਂ. ਅਸਾਤਚ੍ਚਕਾਰੀਤਿ ਨ ਸਤਤਕਾਰੀ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

੯-੧੦. ਤਜ੍ਝਾਨਸੁਤ੍ਤਦ੍ਵਯਵਣ੍ਣਨਾ

੭੩-੭੪. ਨਵਮੇ ਨ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਸੁਦਿਟ੍ਠੋ ਹੋਤੀਤਿ ਵਤ੍ਥੁਕਾਮਕਿਲੇਸਕਾਮੇਸੁ ਆਦੀਨਵੋ ਨ ਯਥਾਸਭਾਵਤੋ ਝਾਨਪਞ੍ਞਾਯ ਸੁਦਿਟ੍ਠੋ ਹੋਤਿ. ਦਸਮਂ ਉਤ੍ਤਾਨਤ੍ਥਮੇਵਾਤਿ.

ਦੇਵਤਾਵਗ੍ਗੋ ਸਤ੍ਤਮੋ.

੮. ਅਰਹਤ੍ਤਵਗ੍ਗੋ

੧. ਦੁਕ੍ਖਸੁਤ੍ਤਵਣ੍ਣਨਾ

੭੫. ਅਟ੍ਠਮਸ੍ਸ ਪਠਮੇ ਸਵਿਘਾਤਨ੍ਤਿ ਸਉਪਘਾਤਂ ਸੋਪਦ੍ਦਵਂ. ਸਪਰਿਲ਼ਾਹਨ੍ਤਿ ਕਾਯਿਕਚੇਤਸਿਕੇਨ ਪਰਿਲ਼ਾਹੇਨ ਸਪਰਿਲ਼ਾਹਂ. ਪਾਟਿਕਙ੍ਖਾਤਿ ਇਚ੍ਛਿਤਬ੍ਬਾ ਅਵਸ੍ਸਂਭਾਵਿਨੀ.

੨. ਅਰਹਤ੍ਤਸੁਤ੍ਤਵਣ੍ਣਨਾ

੭੬. ਦੁਤਿਯੇ ਮਾਨਨ੍ਤਿ ਜਾਤਿਆਦੀਹਿ ਮਞ੍ਞਨਂ. ਓਮਾਨਨ੍ਤਿ ਹੀਨੋਹਮਸ੍ਮੀਤਿ ਮਾਨਂ. ਅਤਿਮਾਨਨ੍ਤਿ ਅਤਿਕ੍ਕਮਿਤ੍ਵਾ ਪਵਤ੍ਤਂ ਅਚ੍ਚੁਣ੍ਣਤਿਮਾਨਂ. ਅਧਿਮਾਨਨ੍ਤਿ ਅਧਿਗਤਮਾਨਂ. ਥਮ੍ਭਨ੍ਤਿ ਕੋਧਮਾਨੇਹਿ ਥਦ੍ਧਭਾਵਂ. ਅਤਿਨਿਪਾਤਨ੍ਤਿ ਹੀਨਸ੍ਸ ਹੀਨੋਹਮਸ੍ਮੀਤਿ ਮਾਨਂ.

੩. ਉਤ੍ਤਰਿਮਨੁਸ੍ਸਧਮ੍ਮਸੁਤ੍ਤਵਣ੍ਣਨਾ

੭੭. ਤਤਿਯੇ ਉਤ੍ਤਰਿਮਨੁਸ੍ਸਧਮ੍ਮਾਤਿ ਮਨੁਸ੍ਸਧਮ੍ਮਤੋ ਉਤ੍ਤਰਿ. ਅਲਮਰਿਯਞਾਣਦਸ੍ਸਨਵਿਸੇਸਨ੍ਤਿ ਅਰਿਯਭਾਵਂ ਕਾਤੁਂ ਸਮਤ੍ਥਂ ਞਾਣਦਸ੍ਸਨਵਿਸੇਸਂ, ਚਤ੍ਤਾਰੋ ਮਗ੍ਗੇ ਚਤ੍ਤਾਰਿ ਚ ਫਲਾਨੀਤਿ ਅਤ੍ਥੋ. ਕੁਹਨਨ੍ਤਿ ਤਿਵਿਧਂ ਕੁਹਨਵਤ੍ਥੁਂ. ਲਪਨਨ੍ਤਿ ਲਾਭਤ੍ਥਿਕਤਾਯ ਉਕ੍ਖਿਪਿਤ੍ਵਾ ਅਵਕ੍ਖਿਪਿਤ੍ਵਾ ਵਾ ਲਪਨਂ.

੪. ਸੁਖਸੋਮਨਸ੍ਸਸੁਤ੍ਤਵਣ੍ਣਨਾ

੭੮. ਚਤੁਤ੍ਥੇ ਯੋਨਿ ਚਸ੍ਸ ਆਰਦ੍ਧਾ ਹੋਤੀਤਿ ਕਾਰਣਞ੍ਚਸ੍ਸ ਪਰਿਪੁਣ੍ਣਂ ਪਗ੍ਗਹਿਤਂ ਹੋਤਿ. ਧਮ੍ਮਾਰਾਮੋਤਿ ਧਮ੍ਮੇ ਰਤਿਂ ਵਿਨ੍ਦਤਿ. ਭਾਵਨਾਯ ਰਮਤਿ, ਭਾਵੇਨ੍ਤੋ ਵਾ ਰਮਤੀਤਿ ਭਾਵਨਾਰਾਮੋ. ਪਹਾਨੇ ਰਮਤਿ, ਪਜਹਨ੍ਤੋ ਵਾ ਰਮਤੀਤਿ ਪਹਾਨਾਰਾਮੋ. ਤਿਵਿਧੇ ਪਵਿਵੇਕੇ ਰਮਤੀਤਿ ਪਵਿਵੇਕਾਰਾਮੋ. ਅਬ੍ਯਾਪਜ੍ਝੇ ਨਿਦ੍ਦੁਕ੍ਖਭਾਵੇ ਰਮਤੀਤਿ ਅਬ੍ਯਾਪਜ੍ਝਾਰਾਮੋ. ਨਿਪ੍ਪਪਞ੍ਚਸਙ੍ਖਾਤੇ ਨਿਬ੍ਬਾਨੇ ਰਮਤੀਤਿ ਨਿਪ੍ਪਪਞ੍ਚਾਰਾਮੋ.

੫. ਅਧਿਗਮਸੁਤ੍ਤਵਣ੍ਣਨਾ

੭੯. ਪਞ੍ਚਮੇ ਨ ਆਯਕੁਸਲੋਤਿ ਨ ਆਗਮਨਕੁਸਲੋ. ਨ ਅਪਾਯਕੁਸਲੋਤਿ ਨ ਅਪਗਮਨਕੁਸਲੋ. ਛਨ੍ਦਨ੍ਤਿ ਕਤ੍ਤੁਕਮ੍ਯਤਾਛਨ੍ਦਂ. ਨ ਆਰਕ੍ਖਤੀਤਿ ਨ ਰਕ੍ਖਤਿ.

੬. ਮਹਨ੍ਤਤ੍ਤਸੁਤ੍ਤਵਣ੍ਣਨਾ

੮੦. ਛਟ੍ਠੇ ਆਲੋਕਬਹੁਲੋਤਿ ਞਾਣਾਲੋਕਬਹੁਲੋ. ਯੋਗਬਹੁਲੋਤਿ ਯੋਗੇ ਬਹੁਲਂ ਕਰੋਤਿ. ਵੇਦਬਹੁਲੋਤਿ ਪੀਤਿਪਾਮੋਜ੍ਜਬਹੁਲੋ. ਅਸਨ੍ਤੁਟ੍ਠਿਬਹੁਲੋਤਿ ਕੁਸਲਧਮ੍ਮੇਸੁ ਅਸਨ੍ਤੁਟ੍ਠੋ. ਅਨਿਕ੍ਖਿਤ੍ਤਧੁਰੋਤਿ ਅਟ੍ਠਪਿਤਧੁਰੋ ਪਗ੍ਗਹਿਤਵੀਰਿਯੋ. ਉਤ੍ਤਰਿ ਚ ਪਤਾਰੇਤੀਤਿ ਸਮ੍ਪਤਿ ਚ ਉਤ੍ਤਰਿਞ੍ਚ ਵੀਰਿਯਂ ਕਰੋਤੇਵ. ਸਤ੍ਤਮਂ ਉਤ੍ਤਾਨਮੇਵ.

੮-੧੦. ਦੁਤਿਯਨਿਰਯਸੁਤ੍ਤਾਦਿਵਣ੍ਣਨਾ

੮੨-੮੪. ਅਟ੍ਠਮੇ ਪਗਬ੍ਭੋਤਿ ਕਾਯਪਾਗਬ੍ਭਿਯਾਦੀਹਿ ਸਮਨ੍ਨਾਗਤੋ. ਨਵਮਂ ਉਤ੍ਤਾਨਤ੍ਥਮੇਵ. ਦਸਮੇ ਵਿਘਾਤਵਾਤਿ ਮਹਿਚ੍ਛਤਂ ਨਿਸ੍ਸਾਯ ਉਪ੍ਪਨ੍ਨੇਨ ਲੋਭਦੁਕ੍ਖੇਨ ਦੁਕ੍ਖਿਤੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਅਰਹਤ੍ਤਵਗ੍ਗੋ ਅਟ੍ਠਮੋ.

੯. ਸੀਤਿਵਗ੍ਗੋ

੧. ਸੀਤਿਭਾਵਸੁਤ੍ਤਵਣ੍ਣਨਾ

੮੫. ਨਵਮਸ੍ਸ ਪਠਮੇ ਸੀਤਿਭਾਵਨ੍ਤਿ ਸੀਤਲਭਾਵਂ. ਯਸ੍ਮਿਂ ਸਮਯੇ ਚਿਤ੍ਤਂ ਨਿਗ੍ਗਣ੍ਹਿਤਬ੍ਬਨ੍ਤਿਆਦੀਸੁ ਉਦ੍ਧਚ੍ਚਸਮਯੇ ਚਿਤ੍ਤਂ ਸਮਾਧਿਨਾ ਨਿਗ੍ਗਹੇਤਬ੍ਬਂ ਨਾਮ, ਕੋਸਜ੍ਜਾਨੁਪਤਿਤਕਾਲੇ ਵੀਰਿਯੇਨ ਪਗ੍ਗਹੇਤਬ੍ਬਂ ਨਾਮ, ਨਿਰਸ੍ਸਾਦਗਤਕਾਲੇ ਸਮਾਧਿਨਾ ਸਮ੍ਪਹਂਸਿਤਬ੍ਬਂ ਨਾਮ, ਸਮਪ੍ਪਵਤ੍ਤਕਾਲੇ ਬੋਜ੍ਝਙ੍ਗੁਪੇਕ੍ਖਾਯ ਅਜ੍ਝੁਪੇਕ੍ਖਿਤਬ੍ਬਂ ਨਾਮ.

੨. ਆਵਰਣਸੁਤ੍ਤਵਣ੍ਣਨਾ

੮੬. ਦੁਤਿਯੇ ਕਮ੍ਮਾਵਰਣਤਾਯਾਤਿ ਪਞ੍ਚਾਨਨ੍ਤਰਿਯਕਮ੍ਮੇਹਿ. ਕਿਲੇਸਾਵਰਣਤਾਯਾਤਿ ਨਿਯਤਮਿਚ੍ਛਾਦਿਟ੍ਠਿਯਾ. ਵਿਪਾਕਾਵਰਣਤਾਯਾਤਿ ਅਕੁਸਲਵਿਪਾਕਪਟਿਸਨ੍ਧਿਯਾ ਵਾ ਕੁਸਲਵਿਪਾਕੇਹਿ ਅਹੇਤੁਕਪਟਿਸਨ੍ਧਿਯਾ ਵਾਤਿ.

੪-੫. ਸੁਸ੍ਸੂਸਤਿਸੁਤ੍ਤਾਦਿਵਣ੍ਣਨਾ

੮੮-੮੯. ਚਤੁਤ੍ਥੇ ਅਨਤ੍ਥਨ੍ਤਿ ਅਵਡ੍ਢਿਂ. ਅਤ੍ਥਂ ਰਿਞ੍ਚਤੀਤਿ ਵਡ੍ਢਿਅਤ੍ਥਂ ਛਡ੍ਡੇਤਿ. ਅਨਨੁਲੋਮਿਕਾਯਾਤਿ ਸਾਸਨਸ੍ਸ ਅਨਨੁਲੋਮਿਕਾਯ. ਪਞ੍ਚਮੇ ਦਿਟ੍ਠਿਸਮ੍ਪਦਨ੍ਤਿ ਸੋਤਾਪਤ੍ਤਿਮਗ੍ਗਂ.

੮-੧੧. ਅਭਬ੍ਬਟ੍ਠਾਨਸੁਤ੍ਤਚਤੁਕ੍ਕਵਣ੍ਣਨਾ

੯੨-੯੫. ਅਟ੍ਠਮੇ ਅਨਾਗਮਨੀਯਂ ਵਤ੍ਥੁਨ੍ਤਿ ਅਨੁਪਗਨ੍ਤਬ੍ਬਂ ਕਾਰਣਂ, ਪਞ੍ਚਨ੍ਨਂ ਵੇਰਾਨਂ ਦ੍ਵਾਸਟ੍ਠਿਯਾ ਚ ਦਿਟ੍ਠਿਗਤਾਨਮੇਤਂ ਅਧਿਵਚਨਂ. ਅਟ੍ਠਮਂ ਭਵਨ੍ਤਿ ਕਾਮਾਵਚਰੇ ਅਟ੍ਠਮਂ ਪਟਿਸਨ੍ਧਿਂ. ਨਵਮੇ ਕੋਤੂਹਲਮਙ੍ਗਲੇਨਾਤਿ ਦਿਟ੍ਠਸੁਤਮੁਤਮਙ੍ਗਲੇਨ. ਦਸਮੇ ਸਯਂਕਤਨ੍ਤਿਆਦੀਨਿ ਅਤ੍ਤਦਿਟ੍ਠਿਵਸੇਨ ਵੁਤ੍ਤਾਨਿ. ਅਧਿਚ੍ਚਸਮੁਪ੍ਪਨ੍ਨਨ੍ਤਿ ਅਹੇਤੁਨਿਬ੍ਬਤ੍ਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਸੀਤਿਵਗ੍ਗੋ ਨਵਮੋ.

੧੦. ਆਨਿਸਂਸਵਗ੍ਗੋ

੧-੨. ਪਾਤੁਭਾਵਸੁਤ੍ਤਾਦਿਵਣ੍ਣਨਾ

੯੬-੯੭. ਦਸਮਸ੍ਸ ਪਠਮੇ ਅਰਿਯਾਯਤਨੇਤਿ ਮਜ੍ਝਿਮਦੇਸੇ. ਇਨ੍ਦ੍ਰਿਯਾਨਨ੍ਤਿ ਮਨਚ੍ਛਟ੍ਠਾਨਂ. ਦੁਤਿਯੇ ਸਦ੍ਧਮ੍ਮਨਿਯਤੋਤਿ ਸਾਸਨਸਦ੍ਧਮ੍ਮੇ ਨਿਯਤੋ. ਅਸਾਧਾਰਣੇਨਾਤਿ ਪੁਥੁਜ੍ਜਨੇਹਿ ਅਸਾਧਾਰਣੇਨ.

੭. ਅਨਵਤ੍ਥਿਤਸੁਤ੍ਤਵਣ੍ਣਨਾ

੧੦੨. ਸਤ੍ਤਮੇ ਅਨੋਧਿਂ ਕਰਿਤ੍ਵਾਤਿ ‘‘ਏਤ੍ਤਕਾਵ ਸਙ੍ਖਾਰਾ ਅਨਿਚ੍ਚਾ, ਨ ਇਤੋ ਪਰੇ’’ਤਿ ਏਵਂ ਸੀਮਂ ਮਰਿਯਾਦਂ ਅਕਤ੍ਵਾ. ਅਨਵਤ੍ਥਿਤਾਤਿ ਅਵਤ੍ਥਿਤਾਯ ਰਹਿਤਾ, ਭਿਜ੍ਜਮਾਨਾਵ ਹੁਤ੍ਵਾ ਉਪਟ੍ਠਹਿਸ੍ਸਨ੍ਤੀਤਿ ਅਤ੍ਥੋ. ਸਬ੍ਬਲੋਕੇਤਿ ਸਕਲੇ ਤੇਧਾਤੁਕੇ. ਸਾਮਞ੍ਞੇਨਾਤਿ ਸਮਣਭਾਵੇਨ, ਅਰਿਯਮਗ੍ਗੇਨਾਤਿ ਅਤ੍ਥੋ.

੮. ਉਕ੍ਖਿਤ੍ਤਾਸਿਕਸੁਤ੍ਤਵਣ੍ਣਨਾ

੧੦੩. ਅਟ੍ਠਮੇ ਮੇਤ੍ਤਾਵਤਾਯਾਤਿ ਮੇਤ੍ਤਾਯੁਤ੍ਤਾਯ ਪਾਰਿਚਰਿਯਾਯ. ਸਤ੍ਤ ਹਿ ਸੇਖਾ ਤਥਾਗਤਂ ਮੇਤ੍ਤਾਵਤਾਯ ਪਰਿਚਰਨ੍ਤਿ, ਖੀਣਾਸਵੋ ਪਰਿਚਿਣ੍ਣਸਤ੍ਥੁਕੋ.

੯. ਅਤਮ੍ਮਯਸੁਤ੍ਤਵਣ੍ਣਨਾ

੧੦੪. ਨਵਮੇ ਅਤਮ੍ਮਯੋਤਿ ਤਮ੍ਮਯਾ ਵੁਚ੍ਚਨ੍ਤਿ ਤਣ੍ਹਾਦਿਟ੍ਠਿਯੋ, ਤਾਹਿ ਰਹਿਤੋ. ਅਹਂਕਾਰਾਤਿ ਅਹਂਕਾਰਦਿਟ੍ਠਿ. ਮਮਂਕਾਰਾਤਿ ਮਮਂਕਾਰਤਣ੍ਹਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਆਨਿਸਂਸਵਗ੍ਗੋ ਦਸਮੋ.

ਦੁਤਿਯਪਣ੍ਣਾਸਕਂ ਨਿਟ੍ਠਿਤਂ.