.ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.
ਅਙ੍ਗੁਤ੍ਤਰਨਿਕਾਯੇ
ਛਕ੍ਕਨਿਪਾਤ-ਅਟ੍ਠਕਥਾ
੧. ਪਠਮਪਣ੍ਣਾਸਕਂ
੧. ਆਹੁਨੇਯ੍ਯਵਗ੍ਗੋ
੧. ਪਠਮਆਹੁਨੇਯ੍ਯਸੁਤ੍ਤਵਣ੍ਣਨਾ
੧. ਛਕ੍ਕਨਿਪਾਤਸ੍ਸ ਪਠਮੇ ਇਧ, ਭਿਕ੍ਖਵੇ, ਭਿਕ੍ਖੂਤਿ, ਭਿਕ੍ਖਵੇ, ਇਮਸ੍ਮਿਂ ਸਾਸਨੇ ਭਿਕ੍ਖੁ. ਨੇਵ ਸੁਮਨੋ ਹੋਤਿ ਨ ਦੁਮ੍ਮਨੋਤਿ ਇਟ੍ਠਾਰਮ੍ਮਣੇ ਰਾਗਸਹਗਤੇਨ ਸੋਮਨਸ੍ਸੇਨ ਸੁਮਨੋ ਵਾ ਅਨਿਟ੍ਠਾਰਮ੍ਮਣੇ ਦੋਸਸਹਗਤੇਨ ਦੋਮਨਸ੍ਸੇਨ ਦੁਮ੍ਮਨੋ ਵਾ ਨ ਹੋਤਿ. ਉਪੇਕ੍ਖਕੋ ਵਿਹਰਤਿ ਸਤੋ ਸਮ੍ਪਜਾਨੋਤਿ ਮਜ੍ਝਤ੍ਤਾਰਮ੍ਮਣੇ ਅਸਮਪੇਕ੍ਖਨੇਨ ਅਞ੍ਞਾਣੁਪੇਕ੍ਖਾਯ ਉਪੇਕ੍ਖਕਭਾਵਂ ਅਨਾਪਜ੍ਜਿਤ੍ਵਾ ਸਤੋ ਸਮ੍ਪਜਾਨੋ ਹੁਤ੍ਵਾ ਆਰਮ੍ਮਣੇ ਮਜ੍ਝਤ੍ਤੋ ਵਿਹਰਤਿ. ਇਮਸ੍ਮਿਂ ਸੁਤ੍ਤੇ ਖੀਣਾਸਵਸ੍ਸ ਸਤਤਵਿਹਾਰੋ ਕਥਿਤੋ.
੨. ਦੁਤਿਯਆਹੁਨੇਯ੍ਯਸੁਤ੍ਤਵਣ੍ਣਨਾ
੨-੪. ਦੁਤਿਯੇ ਅਨੇਕਵਿਹਿਤਂ ਇਦ੍ਧਿਵਿਧਨ੍ਤਿਆਦੀਨਿ ਵਿਸੁਦ੍ਧਿਮਗ੍ਗੇ ਵੁਤ੍ਤਾਨੇਵ. ਆਸਵਾਨਂ ਖਯਾ ਅਨਾਸਵਨ੍ਤਿ ਆਸਵਾਨਂ ਖਯੇਨ ਅਨਾਸਵਂ, ਨ ਚਕ੍ਖੁਵਿਞ੍ਞਾਣਾਦੀਨਂ ਵਿਯ ਅਭਾਵੇਨਾਤਿ. ਇਮਸ੍ਮਿਂ ਸੁਤ੍ਤੇ ਖੀਣਾਸਵਸ੍ਸ ਅਭਿਞ੍ਞਾ ਪਟਿਪਾਟਿਯਾ ਕਥਿਤਾ. ਤਤਿਯਚਤੁਤ੍ਥੇਸੁ ਖੀਣਾਸਵੋ ਕਥਿਤੋ.
੫-੭. ਆਜਾਨੀਯਸੁਤ੍ਤਤ੍ਤਯਵਣ੍ਣਨਾ
੫-੭. ਪਞ੍ਚਮੇ ਅਙ੍ਗੇਹੀਤਿ ਗੁਣਙ੍ਗੇਹਿ. ਖਮੋਤਿ ਅਧਿਵਾਸਕੋ. ਰੂਪਾਨਨ੍ਤਿ ਰੂਪਾਰਮ੍ਮਣਾਨਂ. ਵਣ੍ਣਸਮ੍ਪਨ੍ਨੋਤਿ ਸਰੀਰਵਣ੍ਣੇਨ ਸਮ੍ਪਨ੍ਨੋ. ਛਟ੍ਠੇ ਬਲਸਮ੍ਪਨ੍ਨੋਤਿ ਕਾਯਬਲੇਨ ਸਮ੍ਪਨ੍ਨੋ. ਸਤ੍ਤਮੇ ਜਵਸਮ੍ਪਨ੍ਨੋਤਿ ਪਦਜਵੇਨ ਸਮ੍ਪਨ੍ਨੋ.
੮-੯. ਅਨੁਤ੍ਤਰਿਯਸੁਤ੍ਤਾਦਿਵਣ੍ਣਨਾ
੮-੯. ਅਟ੍ਠਮੇ ਅਨੁਤ੍ਤਰਿਯਾਨੀਤਿ ਅਞ੍ਞੇਨ ਉਤ੍ਤਰਿਤਰੇਨ ਰਹਿਤਾਨਿ ਨਿਰੁਤ੍ਤਰਾਨਿ. ਦਸ੍ਸਨਾਨੁਤ੍ਤਰਿਯਨ੍ਤਿ ਰੂਪਦਸ੍ਸਨੇਸੁ ਅਨੁਤ੍ਤਰਂ. ਏਸ ਨਯੋ ਸਬ੍ਬਪਦੇਸੁ. ਹਤ੍ਥਿਰਤਨਾਦੀਨਞ੍ਹਿ ਦਸ੍ਸਨਂ ਨ ਦਸ੍ਸਨਾਨੁਤ੍ਤਰਿਯਂ, ਨਿਵਿਟ੍ਠਸਦ੍ਧਸ੍ਸ ਪਨ ਨਿਵਿਟ੍ਠਪੇਮਵਸੇਨ ਦਸਬਲਸ੍ਸ ਵਾ ਭਿਕ੍ਖੁਸਙ੍ਘਸ੍ਸ ਵਾ ਕਸਿਣਅਸੁਭਨਿਮਿਤ੍ਤਾਦੀਨਂ ਵਾ ਅਞ੍ਞਤਰਸ੍ਸ ਦਸ੍ਸਨਂ ਦਸ੍ਸਨਾਨੁਤ੍ਤਰਿਯਂ ਨਾਮ. ਖਤ੍ਤਿਯਾਦੀਨਂ ਗੁਣਕਥਾਸਵਨਂ ਨ ਸਵਨਾਨੁਤ੍ਤਰਿਯਂ, ਨਿਵਿਟ੍ਠਸਦ੍ਧਸ੍ਸ ਪਨ ਨਿਵਿਟ੍ਠਪੇਮਵਸੇਨ ਤਿਣ੍ਣਂ ਵਾ ਰਤਨਾਨਂ ਗੁਣਕਥਾਸਵਨਂ ਤੇਪਿਟਕਬੁਦ੍ਧਵਚਨਸਵਨਂ ਵਾ ਸਵਨਾਨੁਤ੍ਤਰਿਯਂ ਨਾਮ. ਮਣਿਰਤਨਾਦੀਨਂ ਲਾਭੋ ਨ ਲਾਭਾਨੁਤ੍ਤਰਿਯਂ, ਸਤ੍ਤਵਿਧਅਰਿਯਧਨਲਾਭੋ ਪਨ ਲਾਭਾਨੁਤ੍ਤਰਿਯਂ ਨਾਮ. ਹਤ੍ਥਿਸਿਪ੍ਪਾਦਿਸਿਕ੍ਖਨਂ ਨ ਸਿਕ੍ਖਾਨੁਤ੍ਤਰਿਯਂ, ਸਿਕ੍ਖਾਤ੍ਤਯਸ੍ਸ ਪੂਰਣਂ ਪਨ ਸਿਕ੍ਖਾਨੁਤ੍ਤਰਿਯਂ ਨਾਮ. ਖਤ੍ਤਿਯਾਦੀਨਂ ਪਾਰਿਚਰਿਯਾ ਨ ਪਾਰਿਚਰਿਯਾਨੁਤ੍ਤਰਿਯਂ, ਤਿਣ੍ਣਂ ਪਨ ਰਤਨਾਨਂ ਪਾਰਿਚਰਿਯਾ ਪਾਰਿਚਰਿਯਾਨੁਤ੍ਤਰਿਯਂ ਨਾਮ. ਖਤ੍ਤਿਯਾਦੀਨਂ ਗੁਣਾਨੁਸ੍ਸਰਣਂ ਨ ਅਨੁਸ੍ਸਤਾਨੁਤ੍ਤਰਿਯਂ, ਤਿਣ੍ਣਂ ਪਨ ਰਤਨਾਨਂ ਗੁਣਾਨੁਸ੍ਸਰਣਂ ਅਨੁਸ੍ਸਤਾਨੁਤ੍ਤਰਿਯਂ ਨਾਮ. ਇਤਿ ਇਮਾਨਿ ਛ ਅਨੁਤ੍ਤਰਿਯਾਨਿ ਲੋਕਿਯਲੋਕੁਤ੍ਤਰਾਨਿ ਕਥਿਤਾਨਿ. ਨਵਮੇ ਬੁਦ੍ਧਾਨੁਸ੍ਸਤੀਤਿ ਬੁਦ੍ਧਗੁਣਾਰਮ੍ਮਣਾ ਸਤਿ. ਸੇਸਪਦੇਸੁਪਿ ਏਸੇਵ ਨਯੋ.
੧੦. ਮਹਾਨਾਮਸੁਤ੍ਤਵਣ੍ਣਨਾ
੧੦. ਦਸਮੇ ਮਹਾਨਾਮੋਤਿ ਦਸਬਲਸ੍ਸ ਚੂਲ਼ਪਿਤੁ ਪੁਤ੍ਤੋ ਏਕੋ ਸਕ੍ਯਰਾਜਾ. ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਭੁਤ੍ਤਪਾਤਰਾਸੋ ਹੁਤ੍ਵਾ ਦਾਸਪਰਿਜਨਪਰਿਵੁਤੋ ਗਨ੍ਧਮਾਲਾਦੀਨਿ ਗਾਹਾਪੇਤ੍ਵਾ ਯਤ੍ਥ ਸਤ੍ਥਾ, ਤਤ੍ਥ ਅਗਮਾਸਿ. ਅਰਿਯਫਲਂ ਅਸ੍ਸ ਆਗਤਨ੍ਤਿ ਆਗਤਫਲੋ. ਸਿਕ੍ਖਾਤ੍ਤਯਸਾਸਨਂ ਏਤੇਨ ਵਿਞ੍ਞਾਤਨ੍ਤਿ ਵਿਞ੍ਞਾਤਸਾਸਨੋ. ਇਤਿ ਅਯਂ ਰਾਜਾ ‘‘ਸੋਤਾਪਨ੍ਨਸ੍ਸ ਨਿਸ੍ਸਯਵਿਹਾਰਂ ਪੁਚ੍ਛਾਮੀ’’ਤਿ ਪੁਚ੍ਛਨ੍ਤੋ ਏਵਮਾਹ.
ਨੇਵਸ੍ਸ ਰਾਗਪਰਿਯੁਟ੍ਠਿਤਨ੍ਤਿ ਨ ਉਪ੍ਪਜ੍ਜਮਾਨੇਨ ਰਾਗੇਨ ਉਟ੍ਠਹਿਤ੍ਵਾ ਗਹਿਤਂ. ਉਜੁਗਤਨ੍ਤਿ ਬੁਦ੍ਧਾਨੁਸ੍ਸਤਿਕਮ੍ਮਟ੍ਠਾਨੇ ਉਜੁਕਮੇਵ ਗਤਂ. ਤਥਾਗਤਂ ਆਰਬ੍ਭਾਤਿ ਤਥਾਗਤਗੁਣੇ ਆਰਬ੍ਭ. ਅਤ੍ਥਵੇਦਨ੍ਤਿ ਅਟ੍ਠਕਥਂ ਨਿਸ੍ਸਾਯ ਉਪ੍ਪਨ੍ਨਂ ਪੀਤਿਪਾਮੋਜ੍ਜਂ. ਧਮ੍ਮਵੇਦਨ੍ਤਿ ਪਾਲ਼ਿਂ ਨਿਸ੍ਸਾਯ ਉਪ੍ਪਨ੍ਨਂ ਪੀਤਿਪਾਮੋਜ੍ਜਂ. ਧਮ੍ਮੂਪਸਞ੍ਹਿਤਨ੍ਤਿ ਪਾਲ਼ਿਞ੍ਚ ਅਟ੍ਠਕਥਞ੍ਚ ਨਿਸ੍ਸਾਯ ਉਪ੍ਪਨ੍ਨਂ. ਪਮੁਦਿਤਸ੍ਸਾਤਿ ਦੁਵਿਧੇਨ ਪਾਮੋਜ੍ਜੇਨ ਪਮੁਦਿਤਸ੍ਸ. ਪੀਤਿ ਜਾਯਤੀਤਿ ਪਞ੍ਚਵਿਧਾ ਪੀਤਿ ਨਿਬ੍ਬਤ੍ਤਤਿ. ਕਾਯੋ ਪਸ੍ਸਮ੍ਭਤੀਤਿ ਨਾਮਕਾਯੋ ਚ ਕਰਜਕਾਯੋ ਚ ਦਰਥਪਟਿਪ੍ਪਸ੍ਸਦ੍ਧਿਯਾ ਪਟਿਪ੍ਪਸ੍ਸਮ੍ਭਤਿ. ਸੁਖਨ੍ਤਿ ਕਾਯਿਕਚੇਤਸਿਕਸੁਖਂ. ਸਮਾਧਿਯਤੀਤਿ ਆਰਮ੍ਮਣੇ ਸਮ੍ਮਾ ਠਪਿਤਂ ਹੋਤਿ. ਵਿਸਮਗਤਾਯ ਪਜਾਯਾਤਿ ਰਾਗਦੋਸਮੋਹਵਿਸਮਗਤੇਸੁ ਸਤ੍ਤੇਸੁ. ਸਮਪ੍ਪਤ੍ਤੋਤਿ ਸਮਂ ਉਪਸਮਂ ਪਤ੍ਤੋ ਹੁਤ੍ਵਾ. ਸਬ੍ਯਾਪਜ੍ਝਾਯਾਤਿ ਸਦੁਕ੍ਖਾਯ. ਧਮ੍ਮਸੋਤਂ ਸਮਾਪਨ੍ਨੋਤਿ ਵਿਪਸ੍ਸਨਾਸਙ੍ਖਾਤਂ ਧਮ੍ਮਸੋਤਂ ਸਮਾਪਨ੍ਨੋ. ਬੁਦ੍ਧਾਨੁਸ੍ਸਤਿਂ ਭਾਵੇਤੀਤਿ ਬੁਦ੍ਧਾਨੁਸ੍ਸਤਿਕਮ੍ਮਟ੍ਠਾਨਂ ਬ੍ਰੂਹੇਤਿ ਵਡ੍ਢੇਤਿ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਇਤਿ ਮਹਾਨਾਮੋ ਸੋਤਾਪਨ੍ਨਸ੍ਸ ਨਿਸ੍ਸਯਵਿਹਾਰਂ ਪੁਚ੍ਛਿ. ਸਤ੍ਥਾਪਿਸ੍ਸ ਤਮੇਵ ਕਥੇਸਿ. ਏਵਂ ਇਮਸ੍ਮਿਂ ਸੁਤ੍ਤੇ ਸੋਤਾਪਨ੍ਨੋਵ ਕਥਿਤੋਤਿ.
ਆਹੁਨੇਯ੍ਯਵਗ੍ਗੋ ਪਠਮੋ.
੨. ਸਾਰਣੀਯਵਗ੍ਗੋ
੧. ਪਠਮਸਾਰਣੀਯਸੁਤ੍ਤਵਣ੍ਣਨਾ
੧੧. ਦੁਤਿਯਸ੍ਸ ਪਠਮੇ ਸਾਰਣੀਯਾਤਿ ਸਰਿਤਬ੍ਬਯੁਤ੍ਤਕਾ. ਮੇਤ੍ਤਂ ਕਾਯਕਮ੍ਮਨ੍ਤਿ ਮੇਤ੍ਤੇਨ ਚਿਤ੍ਤੇਨ ਕਾਤਬ੍ਬਂ ਕਾਯਕਮ੍ਮਂ. ਵਚੀਕਮ੍ਮਮਨੋਕਮ੍ਮੇਸੁਪਿ ਏਸੇਵ ਨਯੋ. ਇਮਾਨਿ ਚ ਪਨ ਭਿਕ੍ਖੂਨਂ ਵਸੇਨ ਆਗਤਾਨਿ, ਗਿਹੀਸੁਪਿ ਲਬ੍ਭਨ੍ਤਿ. ਭਿਕ੍ਖੂਨਞ੍ਹਿ ਮੇਤ੍ਤੇਨ ਚਿਤ੍ਤੇਨ ਆਭਿਸਮਾਚਾਰਿਕਧਮ੍ਮਪੂਰਣਂ ਮੇਤ੍ਤਂ ਕਾਯਕਮ੍ਮਂ ਨਾਮ. ਗਿਹੀਨਂ ਚੇਤਿਯਵਨ੍ਦਨਤ੍ਥਾਯ ਬੋਧਿਵਨ੍ਦਨਤ੍ਥਾਯ ਸਙ੍ਘਨਿਮਨ੍ਤਨਤ੍ਥਾਯ ਗਮਨਂ, ਗਾਮਂ ਪਿਣ੍ਡਾਯ ਪਵਿਟ੍ਠੇ ਭਿਕ੍ਖੂ ਦਿਸ੍ਵਾ ਪਚ੍ਚੁਗ੍ਗਮਨਂ, ਪਤ੍ਤਪਟਿਗ੍ਗਹਣਂ, ਆਸਨਪਞ੍ਞਾਪਨਂ, ਅਨੁਗਮਨਨ੍ਤਿ ਏਵਮਾਦਿਕਂ ਮੇਤ੍ਤਂ ਕਾਯਕਮ੍ਮਂ ਨਾਮ.
ਭਿਕ੍ਖੂਨਂ ਮੇਤ੍ਤੇਨ ਚਿਤ੍ਤੇਨ ਆਚਾਰਪਣ੍ਣਤ੍ਤਿਸਿਕ੍ਖਾਪਨਂ, ਕਮ੍ਮਟ੍ਠਾਨਕਥਨਂ, ਧਮ੍ਮਦੇਸਨਾ, ਤੇਪਿਟਕਮ੍ਪਿ ਬੁਦ੍ਧਵਚਨਂ ਮੇਤ੍ਤਂ ਵਚੀਕਮ੍ਮਂ ਨਾਮ. ਗਿਹੀਨਂ ‘‘ਚੇਤਿਯਵਨ੍ਦਨਾਯ ਗਚ੍ਛਾਮ, ਬੋਧਿਵਨ੍ਦਨਾਯ ਗਚ੍ਛਾਮ, ਧਮ੍ਮਸ੍ਸਵਨਂ ਕਰਿਸ੍ਸਾਮ, ਦੀਪਮਾਲਾਪੁਪ੍ਫਪੂਜਂ ਕਰਿਸ੍ਸਾਮ, ਤੀਣਿ ਸੁਚਰਿਤਾਨਿ ਸਮਾਦਾਯ ਵਤ੍ਤਿਸ੍ਸਾਮ, ਸਲਾਕਭਤ੍ਤਾਦੀਨਿ ਦਸ੍ਸਾਮ, ਵਸ੍ਸਾਵਾਸਿਕਂ ਦਸ੍ਸਾਮ, ਅਜ੍ਜ ਸਙ੍ਘਸ੍ਸ ਚਤ੍ਤਾਰੋ ਪਚ੍ਚਯੇ ਦਸ੍ਸਾਮ, ਸਙ੍ਘਂ ਨਿਮਨ੍ਤੇਤ੍ਵਾ ਖਾਦਨੀਯਾਦੀਨਿ ਸਂਵਿਦਹਥ, ਆਸਨਾਨਿ ਪਞ੍ਞਾਪੇਥ, ਪਾਨੀਯਂ ਉਪਟ੍ਠਾਪੇਥ, ਸਙ੍ਘਂ ਪਚ੍ਚੁਗ੍ਗਨ੍ਤ੍ਵਾ ਆਨੇਥ, ਪਞ੍ਞਤ੍ਤਾਸਨੇ ਨਿਸੀਦਾਪੇਤ੍ਵਾ ਉਸ੍ਸਾਹਜਾਤਾ ਵੇਯ੍ਯਾਵਚ੍ਚਂ ਕਰੋਥਾ’’ਤਿਆਦਿਵਚਨਕਾਲੇ ਮੇਤ੍ਤਂ ਵਚੀਕਮ੍ਮਂ ਨਾਮ.
ਭਿਕ੍ਖੂਨਂ ਪਾਤੋਵ ਉਟ੍ਠਾਯ ਸਰੀਰਪਟਿਜਗ੍ਗਨਂ ਚੇਤਿਯਙ੍ਗਣਵਤ੍ਤਾਦੀਨਿ ਚ ਕਤ੍ਵਾ ਵਿਵਿਤ੍ਤਾਸਨੇ ਨਿਸੀਦਿਤ੍ਵਾ ‘‘ਇਮਸ੍ਮਿਂ ਵਿਹਾਰੇ ਭਿਕ੍ਖੂ ਸੁਖੀ ਹੋਨ੍ਤੁ ਅਵੇਰਾ ਅਬ੍ਯਾਪਜ੍ਝਾ’’ਤਿ ਚਿਨ੍ਤਨਂ ਮੇਤ੍ਤਂ ਮਨੋਕਮ੍ਮਂ ਨਾਮ. ਗਿਹੀਨਂ ‘‘ਅਯ੍ਯਾ ਸੁਖੀ ਹੋਨ੍ਤੁ ਅਵੇਰਾ ਅਬ੍ਯਾਪਜ੍ਝਾ’’ਤਿ ਚਿਨ੍ਤਨਂ ਮੇਤ੍ਤਂ ਮਨੋਕਮ੍ਮਂ ਨਾਮ.
ਆਵਿ ਚੇਵ ਰਹੋ ਚਾਤਿ ਸਮ੍ਮੁਖਾ ਚ ਪਰਮ੍ਮੁਖਾ ਚ. ਤਤ੍ਥ ਨਵਕਾਨਂ ਚੀਵਰਕਮ੍ਮਾਦੀਸੁ ਸਹਾਯਭਾਵਗਮਨਂ ਸਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ, ਥੇਰਾਨਂ ਪਨ ਪਾਦਧੋਵਨਦਾਨਾਦਿਭੇਦਂ ਸਬ੍ਬਮ੍ਪਿ ਸਾਮੀਚਿਕਮ੍ਮਂ ਸਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ. ਉਭਯੇਹਿਪਿ ਦੁਨ੍ਨਿਕ੍ਖਿਤ੍ਤਾਨਂ ਦਾਰੁਭਣ੍ਡਾਦੀਨਂ ਤੇਸੁ ਅਵਞ੍ਞਂ ਅਕਤ੍ਵਾ ਅਤ੍ਤਨਾ ਦੁਨ੍ਨਿਕ੍ਖਿਤ੍ਤਾਨਂ ਵਿਯ ਪਟਿਸਾਮਨਂ ਪਰਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ. ‘‘ਦੇਵਤ੍ਥੇਰੋ ਤਿਸ੍ਸਤ੍ਥੇਰੋ’’ਤਿ ਏਵਂ ਪਗ੍ਗਯ੍ਹ ਵਚਨਂ ਸਮ੍ਮੁਖਾ ਮੇਤ੍ਤਂ ਵਚੀਕਮ੍ਮਂ ਨਾਮ. ਵਿਹਾਰੇ ਅਸਨ੍ਤਂ ਪਨ ਪਟਿਪੁਚ੍ਛਨ੍ਤਸ੍ਸ ‘‘ਕਹਂ ਅਮ੍ਹਾਕਂ ਦੇਵਤ੍ਥੇਰੋ, ਕਹਂ ਅਮ੍ਹਾਕਂ ਤਿਸ੍ਸਤ੍ਥੇਰੋ, ਕਦਾ ਨੁ ਖੋ ਆਗਮਿਸ੍ਸਤੀ’’ਤਿ ਏਵਂ ਮਮਾਯਨਵਚਨਂ ਪਰਮ੍ਮੁਖਾ ਮੇਤ੍ਤਂ ਵਚੀਕਮ੍ਮਂ ਨਾਮ. ਮੇਤ੍ਤਾਸਿਨੇਹਸਿਨਿਦ੍ਧਾਨਿ ਪਨ ਨਯਨਾਨਿ ਉਮ੍ਮੀਲੇਤ੍ਵਾ ਪਸਨ੍ਨੇਨ ਮੁਖੇਨ ਓਲੋਕਨਂ ਸਮ੍ਮੁਖਾ ਮੇਤ੍ਤਂ ਮਨੋਕਮ੍ਮਂ ਨਾਮ. ‘‘ਦੇਵਤ੍ਥੇਰੋ ਤਿਸ੍ਸਤ੍ਥੇਰੋ ਅਰੋਗੋ ਹੋਤੁ ਅਪ੍ਪਾਬਾਧੋ’’ਤਿ ਸਮਨ੍ਨਾਹਰਣਂ ਪਰਮ੍ਮੁਖਾ ਮੇਤ੍ਤਂ ਮਨੋਕਮ੍ਮਂ ਨਾਮ.
ਲਾਭਾਤਿ ਚੀਵਰਾਦਯੋ ਲਦ੍ਧਪਚ੍ਚਯਾ. ਧਮ੍ਮਿਕਾਤਿ ਕੁਹਨਾਦਿਭੇਦਂ ਮਿਚ੍ਛਾਜੀਵਂ ਵਜ੍ਜੇਤ੍ਵਾ ਧਮ੍ਮੇਨ ਸਮੇਨ ਭਿਕ੍ਖਾਚਰਿਯਵਤ੍ਤੇਨ ਉਪ੍ਪਨ੍ਨਾ. ਅਨ੍ਤਮਸੋ ਪਤ੍ਤਪਰਿਯਾਪਨ੍ਨਮਤ੍ਤਮ੍ਪੀਤਿ ਪਚ੍ਛਿਮਕੋਟਿਯਾ ਪਤ੍ਤਪਰਿਯਾਪਨ੍ਨਂ ਪਤ੍ਤਸ੍ਸ ਅਨ੍ਤੋਗਤਂ ਦ੍ਵਤ੍ਤਿਕਟਚ੍ਛੁਭਿਕ੍ਖਾਮਤ੍ਤਮ੍ਪਿ. ਅਪ੍ਪਟਿਵਿਭਤ੍ਤਭੋਗੀਤਿ ਏਤ੍ਥ ਦ੍ਵੇ ਪਟਿਵਿਭਤ੍ਤਾਨਿ ਨਾਮ ਆਮਿਸਪਟਿਵਿਭਤ੍ਤਂ ਪਨ ਪੁਗ੍ਗਲਪਟਿਵਿਭਤ੍ਤਞ੍ਚ. ਤਤ੍ਥ ‘‘ਏਤ੍ਤਕਂ ਦਸ੍ਸਾਮਿ, ਏਤ੍ਤਕਂ ਨ ਦਸ੍ਸਾਮੀ’’ਤਿ ਏਵਂ ਚਿਤ੍ਤੇਨ ਪਟਿਵਿਭਜਨਂ ਆਮਿਸਪਟਿਵਿਭਤ੍ਤਂ ਨਾਮ. ‘‘ਅਸੁਕਸ੍ਸ ਦਸ੍ਸਾਮਿ, ਅਸੁਕਸ੍ਸ ਨ ਦਸ੍ਸਾਮੀ’’ਤਿ ਏਵਂ ਚਿਤ੍ਤੇਨ ਵਿਭਜਨਂ ਪਨ ਪੁਗ੍ਗਲਪਟਿਵਿਭਤ੍ਤਂ ਨਾਮ. ਤਦੁਭਯਮ੍ਪਿ ਅਕਤ੍ਵਾ ਯੋ ਅਪ੍ਪਟਿਵਿਭਤ੍ਤਂ ਭੁਞ੍ਜਤਿ, ਅਯਂ ਅਪ੍ਪਟਿਵਿਭਤ੍ਤਭੋਗੀ ਨਾਮ. ਸੀਲਵਨ੍ਤੇਹਿ ਸਬ੍ਰਹ੍ਮਚਾਰੀਹਿ ਸਾਧਾਰਣਭੋਗੀਤਿ ਏਤ੍ਥ ਸਾਧਾਰਣਭੋਗਿਨੋ ਇਦਂ ਲਕ੍ਖਣਂ – ਯਂ ਯਂ ਪਣੀਤਂ ਲਭਤਿ, ਤਂ ਤਂ ਨੇਵ ਲਾਭੇਨਲਾਭਂ-ਨਿਜਿਗੀਸਨਤਾਮੁਖੇਨ ਗਿਹੀਨਂ ਦੇਤਿ, ਨ ਅਤ੍ਤਨਾ ਪਰਿਭੁਞ੍ਜਤਿ, ਪਟਿਗ੍ਗਣ੍ਹਨ੍ਤੋ ਚ ‘‘ਸਙ੍ਘੇਨ ਸਾਧਾਰਣਂ ਹੋਤੂ’’ਤਿ ਗਹੇਤ੍ਵਾ ਘਣ੍ਟਿਂ ਪਹਰਿਤ੍ਵਾ ਪਰਿਭੁਞ੍ਜਿਤਬ੍ਬਂ ਸਙ੍ਘਸਨ੍ਤਕਂ ਵਿਯ ਪਸ੍ਸਤਿ.
ਇਮਂ ਪਨ ਸਾਰਣੀਯਧਮ੍ਮਂ ਕੋ ਪੂਰੇਤਿ, ਕੋ ਨ ਪੂਰੇਤਿ? ਦੁਸ੍ਸੀਲੋ ਤਾਵ ਨ ਪੂਰੇਤਿ. ਨ ਹਿ ਤਸ੍ਸ ਸਨ੍ਤਕਂ ਸੀਲਵਨ੍ਤਾ ਗਣ੍ਹਨ੍ਤਿ. ਪਰਿਸੁਦ੍ਧਸੀਲੋ ਪਨ ਵਤ੍ਤਂ ਅਖਣ੍ਡੇਨ੍ਤੋ ਪੂਰੇਤਿ. ਤਤ੍ਰਿਦਂ ਵਤ੍ਤਂ – ਯੋ ਹਿ ਓਦਿਸ੍ਸਕਂ ਕਤ੍ਵਾ ਮਾਤੁ ਵਾ ਪਿਤੁ ਵਾ ਆਚਰਿਯੁਪਜ੍ਝਾਯਾਦੀਨਂ ਵਾ ਦੇਤਿ, ਸੋ ਦਾਤਬ੍ਬਂ ਦੇਤਿ. ਸਾਰਣੀਯਧਮ੍ਮੋ ਪਨਸ੍ਸ ਨ ਹੋਤਿ, ਪਲਿਬੋਧਜਗ੍ਗਨਂ ਨਾਮ ਹੋਤਿ. ਸਾਰਣੀਯਧਮ੍ਮੋ ਹਿ ਮੁਤ੍ਤਪਲਿਬੋਧਸ੍ਸ ਵਟ੍ਟਤਿ. ਤੇਨ ਪਨ ਓਦਿਸ੍ਸਕਂ ਦੇਨ੍ਤੇਨ ਗਿਲਾਨਗਿਲਾਨੁਪਟ੍ਠਾਕਆਗਨ੍ਤੁਕਗਮਿਕਾਨਞ੍ਚੇਵ ਨਵਪਬ੍ਬਜਿਤਸ੍ਸ ਚ ਸਙ੍ਘਾਟਿਪਤ੍ਤਗ੍ਗਹਣਂ ਅਜਾਨਨ੍ਤਸ੍ਸ ਦਾਤਬ੍ਬਂ. ਏਤੇਸਂ ਦਤ੍ਵਾ ਅਵਸੇਸਂ ਥੇਰਾਸਨਤੋ ਪਟ੍ਠਾਯ ਥੋਕਂ ਥੋਕਂ ਅਦਤ੍ਵਾ ਯੋ ਯਤ੍ਤਕਂ ਗਣ੍ਹਾਤਿ, ਤਸ੍ਸ ਤਤ੍ਤਕਂ ਦਾਤਬ੍ਬਂ. ਅਵਸਿਟ੍ਠੇ ਅਸਤਿ ਪੁਨ ਪਿਣ੍ਡਾਯ ਚਰਿਤ੍ਵਾ ਥੇਰਾਸਨਤੋ ਪਟ੍ਠਾਯ ਯਂ ਯਂ ਪਣੀਤਂ, ਤਂ ਤਂ ਦਤ੍ਵਾ ਸੇਸਂ ਭੁਞ੍ਜਿਤਬ੍ਬਂ. ‘‘ਸੀਲਵਨ੍ਤੇਹੀ’’ਤਿ ਵਚਨਤੋ ਦੁਸ੍ਸੀਲਸ੍ਸ ਅਦਾਤੁਮ੍ਪਿ ਵਟ੍ਟਤਿ.
ਅਯਂ ਪਨ ਸਾਰਣੀਯਧਮ੍ਮੋ ਸੁਸਿਕ੍ਖਿਤਾਯ ਪਰਿਸਾਯ ਸੁਪੂਰੋ ਹੋਤਿ, ਸੁਸਿਕ੍ਖਿਤਾਯ ਹਿ ਪਰਿਸਾਯ ਯੋ ਅਞ੍ਞਤੋ ਲਭਤਿ, ਸੋ ਨ ਗਣ੍ਹਾਤਿ. ਅਞ੍ਞਤੋ ਅਲਭਨ੍ਤੋਪਿ ਪਮਾਣਯੁਤ੍ਤਮੇਵ ਗਣ੍ਹਤਿ, ਨ ਅਤਿਰੇਕਂ. ਅਯਂ ਪਨ ਸਾਰਣੀਯਧਮ੍ਮੋ ਏਵਂ ਪੁਨਪ੍ਪੁਨਂ ਪਿਣ੍ਡਾਯ ਚਰਿਤ੍ਵਾ ਲਦ੍ਧਂ ਲਦ੍ਧਂ ਦੇਨ੍ਤਸ੍ਸਾਪਿ ਦ੍ਵਾਦਸਹਿ ਵਸ੍ਸੇਹਿ ਪੂਰੇਤਿ, ਨ ਤਤੋ ਓਰਂ. ਸਚੇ ਹਿ ਦ੍ਵਾਦਸਮੇ ਵਸ੍ਸੇ ਸਾਰਣੀਯਧਮ੍ਮਪੂਰਕੋ ਪਿਣ੍ਡਪਾਤਪੂਰਂ ਪਤ੍ਤਂ ਆਸਨਸਾਲਾਯਂ ਠਪੇਤ੍ਵਾ ਨ੍ਹਾਯਿਤੁਂ ਗਚ੍ਛਤਿ, ਸਙ੍ਘਤ੍ਥੇਰੋ ਚ ‘‘ਕਸ੍ਸੇਸੋ ਪਤ੍ਤੋ’’ਤਿ ਵਤ੍ਵਾ ‘‘ਸਾਰਣੀਯਧਮ੍ਮਪੂਰਕਸ੍ਸਾ’’ਤਿ ਵੁਤ੍ਤੇ ‘‘ਆਹਰਥ ਨ’’ਨ੍ਤਿ ਸਬ੍ਬਂ ਪਿਣ੍ਡਪਾਤਂ ਵਿਚਾਰੇਤ੍ਵਾਵ ਭੁਞ੍ਜਿਤ੍ਵਾ ਰਿਤ੍ਤਪਤ੍ਤਂ ਠਪੇਤਿ. ਅਥ ਖੋ ਸੋ ਭਿਕ੍ਖੁ ਰਿਤ੍ਤਪਤ੍ਤਂ ਦਿਸ੍ਵਾ ‘‘ਮਯ੍ਹਂ ਅਸੇਸੇਤ੍ਵਾਵ ਪਰਿਭੁਞ੍ਜਿਂਸੂ’’ਤਿ ਦੋਮਨਸ੍ਸਂ ਉਪ੍ਪਾਦੇਤਿ, ਸਾਰਣੀਯਧਮ੍ਮੋ ਭਿਜ੍ਜਤਿ, ਪੁਨ ਦ੍ਵਾਦਸ ਵਸ੍ਸਾਨਿ ਪੂਰੇਤਬ੍ਬੋ ਹੋਤਿ. ਤਿਤ੍ਥਿਯਪਰਿਵਾਸਸਦਿਸੋ ਹੇਸ, ਸਕਿਂ ਖਣ੍ਡੇ ਜਾਤੇ ਪੁਨ ਪੂਰੇਤਬ੍ਬੋਵ. ਯੋ ਪਨ ‘‘ਲਾਭਾ ਵਤ ਮੇ, ਸੁਲਦ੍ਧਂ ਵਤ ਮੇ, ਯਸ੍ਸ ਮੇ ਪਤ੍ਤਗਤਂ ਅਨਾਪੁਚ੍ਛਾਵ ਸਬ੍ਰਹ੍ਮਚਾਰੀ ਪਰਿਭੁਞ੍ਜਨ੍ਤੀ’’ਤਿ ਸੋਮਨਸ੍ਸਂ ਜਨੇਤਿ, ਤਸ੍ਸ ਪੁਣ੍ਣੋ ਨਾਮ ਹੋਤਿ.
ਏਵਂ ਪੂਰਿਤਸਾਰਣੀਯਧਮ੍ਮਸ੍ਸ ਪਨ ਨੇਵ ਇਸ੍ਸਾ ਨ ਮਚ੍ਛਰਿਯਂ ਹੋਤਿ, ਮਨੁਸ੍ਸਾਨਂ ਪਿਯੋ ਹੋਤਿ, ਅਮਨੁਸ੍ਸਾਨਂ ਪਿਯੋ ਹੋਤਿ, ਸੁਲਭਪਚ੍ਚਯੋ. ਪਤ੍ਤਗਤਮਸ੍ਸ ਦਿਯ੍ਯਮਾਨਮ੍ਪਿ ਨ ਖੀਯਤਿ, ਭਾਜਨੀਯਭਣ੍ਡਟ੍ਠਾਨੇ ਅਗ੍ਗਭਣ੍ਡਂ ਲਭਤਿ, ਭਯੇ ਵਾ ਛਾਤਕੇ ਵਾ ਪਤ੍ਤੇ ਦੇਵਤਾ ਉਸ੍ਸੁਕ੍ਕਂ ਆਪਜ੍ਜਨ੍ਤਿ.
ਤਤ੍ਰਿਮਾਨਿ ਵਤ੍ਥੂਨਿ – ਸੇਨਗਿਰਿਵਾਸੀ ਤਿਸ੍ਸਤ੍ਥੇਰੋ ਕਿਰ ਮਹਾਗਿਰਿਗਾਮਂ ਉਪਨਿਸ੍ਸਾਯ ਵਸਤਿ, ਪਞ੍ਞਾਸ ਮਹਾਥੇਰਾ ਨਾਗਦੀਪਂ ਚੇਤਿਯਵਨ੍ਦਨਤ੍ਥਾਯ ਗਚ੍ਛਨ੍ਤਾ ਗਿਰਿਗਾਮੇ ਪਿਣ੍ਡਾਯ ਚਰਿਤ੍ਵਾ ਕਿਞ੍ਚਿ ਅਲਦ੍ਧਾ ਨਿਕ੍ਖਮਿਂਸੁ. ਥੇਰੋ ਪਵਿਸਨ੍ਤੋ ਤੇ ਦਿਸ੍ਵਾ ਪੁਚ੍ਛਿ – ‘‘ਲਦ੍ਧਂ, ਭਨ੍ਤੇ’’ਤਿ? ਵਿਚਰਿਮ੍ਹਾ, ਆਵੁਸੋਤਿ. ਸੋ ਅਲਦ੍ਧਭਾਵਂ ਞਤ੍ਵਾ ਆਹ – ‘‘ਭਨ੍ਤੇ, ਯਾਵਾਹਂ ਆਗਚ੍ਛਾਮਿ, ਤਾਵ ਇਧੇਵ ਹੋਥਾ’’ਤਿ. ਮਯਂ, ਆਵੁਸੋ, ਪਞ੍ਞਾਸ ਜਨਾ ਪਤ੍ਤਤੇਮਨਮਤ੍ਤਮ੍ਪਿ ਨ ਲਭਿਮ੍ਹਾਤਿ. ਭਨ੍ਤੇ, ਨੇਵਾਸਿਕਾ ਨਾਮ ਪਟਿਬਲਾ ਹੋਨ੍ਤਿ, ਅਲਭਨ੍ਤਾਪਿ ਭਿਕ੍ਖਾਚਾਰਮਗ੍ਗਸਭਾਗਂ ਜਾਨਨ੍ਤੀਤਿ. ਥੇਰਾ ਆਗਮੇਸੁਂ. ਥੇਰੋ ਗਾਮਂ ਪਾਵਿਸਿ. ਧੁਰਗੇਹੇਯੇਵ ਮਹਾਉਪਾਸਿਕਾ ਖੀਰਭਤ੍ਤਂ ਸਜ੍ਜੇਤ੍ਵਾ ਥੇਰਂ ਓਲੋਕਯਮਾਨਾ ਠਿਤਾ ਥੇਰਸ੍ਸ ਦ੍ਵਾਰਂ ਸਮ੍ਪਤ੍ਤਸ੍ਸੇਵ ਪਤ੍ਤਂ ਪੂਰੇਤ੍ਵਾ ਅਦਾਸਿ. ਸੋ ਤਂ ਆਦਾਯ ਥੇਰਾਨਂ ਸਨ੍ਤਿਕਂ ਗਨ੍ਤ੍ਵਾ ‘‘ਗਣ੍ਹਥ, ਭਨ੍ਤੇ’’ਤਿ ਸਙ੍ਘਤ੍ਥੇਰਂ ਆਹ. ਥੇਰੋ ‘‘ਅਮ੍ਹੇਹਿ ਏਤ੍ਤਕੇਹਿ ਕਿਞ੍ਚਿ ਨ ਲਦ੍ਧਂ, ਅਯਂ ਸੀਘਮੇਵ ਗਹੇਤ੍ਵਾ ਆਗਤੋ, ਕਿਂ ਨੁ ਖੋ’’ਤਿ ਸੇਸਾਨਂ ਮੁਖਂ ਓਲੋਕੇਸਿ. ਥੇਰੋ ਓਲੋਕਨਾਕਾਰੇਨੇਵ ਞਤ੍ਵਾ, ‘‘ਭਨ੍ਤੇ, ਧਮ੍ਮੇਨ ਸਮੇਨ ਲਦ੍ਧੋ, ਨਿਕ੍ਕੁਕ੍ਕੁਚ੍ਚਾ ਗਣ੍ਹਥਾ’’ਤਿ ਆਦਿਤੋ ਪਟ੍ਠਾਯ ਸਬ੍ਬੇਸਂ ਯਾਵਦਤ੍ਥਂ ਦਤ੍ਵਾ ਅਤ੍ਤਨਾਪਿ ਯਾਵਦਤ੍ਥਂ ਭੁਞ੍ਜਿ.
ਅਥ ਨਂ ਭਤ੍ਤਕਿਚ੍ਚਾਵਸਾਨੇ ਥੇਰਾ ਪੁਚ੍ਛਿਂਸੁ – ‘‘ਕਦਾ, ਆਵੁਸੋ, ਲੋਕੁਤ੍ਤਰਧਮ੍ਮਂ ਪਟਿਵਿਜ੍ਝੀ’’ਤਿ? ਨਤ੍ਥਿ ਮੇ, ਭਨ੍ਤੇ, ਲੋਕੁਤ੍ਤਰਧਮ੍ਮੋਤਿ. ਝਾਨਲਾਭੀਸਿ, ਆਵੁਸੋਤਿ. ਏਤਮ੍ਪਿ, ਭਨ੍ਤੇ, ਨਤ੍ਥੀਤਿ? ਨਨੁ, ਆਵੁਸੋ, ਪਾਟਿਹਾਰਿਯਨ੍ਤਿ. ਸਾਰਣੀਯਧਮ੍ਮੋ ਮੇ, ਭਨ੍ਤੇ, ਪੂਰਿਤੋ, ਤਸ੍ਸ ਮੇ ਪੂਰਿਤਕਾਲਤੋ ਪਟ੍ਠਾਯ ਸਚੇਪਿ ਭਿਕ੍ਖੁਸਤਸਹਸ੍ਸਂ ਹੋਤਿ, ਪਤ੍ਤਗਤਂ ਨ ਖੀਯਤੀਤਿ. ਸਾਧੁ ਸਾਧੁ, ਸਪ੍ਪੁਰਿਸ, ਅਨੁਚ੍ਛਵਿਕਮਿਦਂ ਤੁਯ੍ਹਨ੍ਤਿ. ਇਦਂ ਤਾਵ ਪਤ੍ਤਗਤਂ ਨ ਖੀਯਤੀਤਿ ਏਤ੍ਥ ਵਤ੍ਥੁ.
ਅਯਮੇਵ ਪਨ ਥੇਰੋ ਚੇਤਿਯਪਬ੍ਬਤੇ ਗਿਰਿਭਣ੍ਡਮਹਾਪੂਜਾਯ ਦਾਨਟ੍ਠਾਨਂ ਗਨ੍ਤ੍ਵਾ ‘‘ਇਮਸ੍ਮਿਂ ਦਾਨੇ ਕਿਂ ਵਰਭਣ੍ਡ’’ਨ੍ਤਿ ਪੁਚ੍ਛਿ. ਦ੍ਵੇ ਸਾਟਕਾ, ਭਨ੍ਤੇਤਿ. ਏਤੇ ਮਯ੍ਹਂ ਪਾਪੁਣਿਸ੍ਸਨ੍ਤੀਤਿ? ਤਂ ਸੁਤ੍ਵਾ ਅਮਚ੍ਚੋ ਰਞ੍ਞੋ ਆਰੋਚੇਸਿ – ‘‘ਏਕੋ ਦਹਰੋ ਏਵਂ ਵਦਤੀ’’ਤਿ. ‘‘ਦਹਰਸ੍ਸ ਏਵਂ ਚਿਤ੍ਤਂ, ਮਹਾਥੇਰਾਨਂ ਪਨ ਸੁਖੁਮਸਾਟਕਾ ਵਟ੍ਟਨ੍ਤੀ’’ਤਿ ਵਤ੍ਵਾ ‘‘ਮਹਾਥੇਰਾਨਂ ਦਸ੍ਸਾਮੀ’’ਤਿ ਠਪੇਸਿ. ਤਸ੍ਸ ਭਿਕ੍ਖੁਸਙ੍ਘੇ ਪਟਿਪਾਟਿਯਾ ਠਿਤੇ ਦੇਨ੍ਤਸ੍ਸ ਮਤ੍ਥਕੇ ਠਪਿਤਾਪਿ ਤੇ ਸਾਟਕਾ ਹਤ੍ਥਂ ਨਾਰੋਹਨ੍ਤਿ, ਅਞ੍ਞੇਵ ਆਰੋਹਨ੍ਤਿ. ਦਹਰਸ੍ਸ ਦਾਨਕਾਲੇ ਪਨ ਹਤ੍ਥਂ ਆਰੁਲ਼੍ਹਾ. ਸੋ ਤਸ੍ਸ ਹਤ੍ਥੇ ਠਪੇਤ੍ਵਾ ਅਮਚ੍ਚਸ੍ਸ ਮੁਖਂ ਓਲੋਕੇਤ੍ਵਾ ਦਹਰਂ ਨਿਸੀਦਾਪੇਤ੍ਵਾ ਦਾਨਂ ਦਤ੍ਵਾ ਸਙ੍ਘਂ ਵਿਸ੍ਸਜ੍ਜੇਤ੍ਵਾ ਦਹਰਸ੍ਸ ਸਨ੍ਤਿਕੇ ਨਿਸੀਦਿਤ੍ਵਾ ‘‘ਕਦਾ, ਭਨ੍ਤੇ, ਇਮਂ ਧਮ੍ਮਂ ਪਟਿਵਿਜ੍ਝਿਤ੍ਥਾ’’ਤਿ ਆਹ. ਸੋ ਪਰਿਯਾਯੇਨਪਿ ਅਸਨ੍ਤਂ ਅਵਦਨ੍ਤੋ ‘‘ਨਤ੍ਥਿ ਮਯ੍ਹਂ, ਮਹਾਰਾਜ, ਲੋਕੁਤ੍ਤਰਧਮ੍ਮੋ’’ਤਿ ਆਹ. ਨਨੁ, ਭਨ੍ਤੇ, ਪੁਬ੍ਬੇਵ ਅਵਚੁਤ੍ਥਾਤਿ. ਆਮ, ਮਹਾਰਾਜ, ਸਾਰਣੀਯਧਮ੍ਮਪੂਰਕੋ ਅਹਂ, ਤਸ੍ਸ ਮੇ ਧਮ੍ਮਸ੍ਸ ਪੂਰਿਤਕਾਲਤੋ ਪਟ੍ਠਾਯ ਭਾਜਨੀਯਭਣ੍ਡਟ੍ਠਾਨੇ ਅਗ੍ਗਭਣ੍ਡਂ ਪਾਪੁਣਾਤੀਤਿ. ‘‘ਸਾਧੁ ਸਾਧੁ, ਭਨ੍ਤੇ, ਅਨੁਚ੍ਛਵਿਕਮਿਦਂ ਤੁਮ੍ਹਾਕ’’ਨ੍ਤਿ ਵਤ੍ਵਾ ਪਕ੍ਕਾਮਿ. ਇਦਂ ਭਾਜਨੀਯਭਣ੍ਡਟ੍ਠਾਨੇ ਅਗ੍ਗਭਣ੍ਡਂ ਪਾਪੁਣਾਤੀਤਿ ਏਤ੍ਥ ਵਤ੍ਥੁ.
ਬ੍ਰਾਹ੍ਮਣਤਿਸ੍ਸਭਯੇ ਪਨ ਭਾਤਰਗਾਮਵਾਸਿਨੋ ਨਾਗਤ੍ਥੇਰਿਯਾ ਅਨਾਰੋਚੇਤ੍ਵਾਵ ਪਲਾਯਿਂਸੁ. ਥੇਰੀ ਪਚ੍ਚੂਸਸਮਯੇ ‘‘ਅਤਿਵਿਯ ਅਪ੍ਪਨਿਗ੍ਘੋਸੋ ਗਾਮੋ, ਉਪਧਾਰੇਥ ਤਾਵਾ’’ਤਿ ਦਹਰਭਿਕ੍ਖੁਨਿਯੋ ਆਹ. ਤਾ ਗਨ੍ਤ੍ਵਾ ਸਬ੍ਬੇਸਂ ਗਤਭਾਵਂ ਞਤ੍ਵਾ ਆਗਮ੍ਮ ਥੇਰਿਯਾ ਆਰੋਚੇਸੁਂ. ਸਾ ਸੁਤ੍ਵਾ ‘‘ਮਾ ਤੁਮ੍ਹੇ ਤੇਸਂ ਗਤਭਾਵਂ ਚਿਨ੍ਤਯਿਤ੍ਥ, ਅਤ੍ਤਨੋ ਉਦ੍ਦੇਸਪਰਿਪੁਚ੍ਛਾਯੋਨਿਸੋਮਨਸਿਕਾਰੇਸੁਯੇਵ ਯੋਗਂ ਕਰੋਥਾ’’ਤਿ ਵਤ੍ਵਾ ਭਿਕ੍ਖਾਚਾਰਵੇਲਾਯਂ ਪਾਰੁਪਿਤ੍ਵਾ ਅਤ੍ਤਦ੍ਵਾਦਸਮਾ ਗਾਮਦ੍ਵਾਰੇ ਨਿਗ੍ਰੋਧਰੁਕ੍ਖਮੂਲੇ ਅਟ੍ਠਾਸਿ. ਰੁਕ੍ਖੇ ਅਧਿਵਤ੍ਥਾ ਦੇਵਤਾ ਦ੍ਵਾਦਸਨ੍ਨਮ੍ਪਿ ਭਿਕ੍ਖੁਨੀਨਂ ਪਿਣ੍ਡਪਾਤਂ ਦਤ੍ਵਾ, ‘‘ਅਯ੍ਯੇ, ਅਞ੍ਞਤ੍ਥ ਮਾ ਗਚ੍ਛਥ, ਨਿਚ੍ਚਂ ਇਧੇਵ ਆਗਚ੍ਛੇਯ੍ਯਾਥਾ’’ਤਿ ਆਹ. ਥੇਰਿਯਾ ਪਨ ਕਨਿਟ੍ਠਭਾਤਾ ਨਾਗਤ੍ਥੇਰੋ ਨਾਮ ਅਤ੍ਥਿ. ਸੋ ‘‘ਮਹਨ੍ਤਂ ਭਯਂ, ਨ ਸਕ੍ਕਾ ਯਾਪੇਤੁਂ, ਪਰਤੀਰਂ ਗਮਿਸ੍ਸਾਮੀ’’ਤਿ ਅਤ੍ਤਦ੍ਵਾਦਸਮੋਵ ਅਤ੍ਤਨੋ ਵਸਨਟ੍ਠਾਨਾ ਨਿਕ੍ਖਨ੍ਤੋ ‘‘ਥੇਰਿਂ ਦਿਸ੍ਵਾ ਗਮਿਸ੍ਸਾਮੀ’’ਤਿ ਭਾਤਰਗਾਮਂ ਆਗਤੋ. ਥੇਰੀ ‘‘ਥੇਰਾ ਆਗਤਾ’’ਤਿ ਸੁਤ੍ਵਾ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ‘‘ਕਿਂ ਅਯ੍ਯਾ’’ਤਿ ਪੁਚ੍ਛਿ. ਸੋ ਤਂ ਪਵਤ੍ਤਿਂ ਆਰੋਚੇਸਿ. ਸਾ ‘‘ਅਜ੍ਜ ਏਕਦਿਵਸਂ ਵਿਹਾਰੇਵ ਵਸਿਤ੍ਵਾ ਸ੍ਵੇ ਗਮਿਸ੍ਸਥਾ’’ਤਿ ਆਹ. ਥੇਰਾ ਵਿਹਾਰਂ ਅਗਮਿਂਸੁ.
ਥੇਰੀ ਪੁਨਦਿਵਸੇ ਰੁਕ੍ਖਮੂਲੇ ਪਿਣ੍ਡਾਯ ਚਰਿਤ੍ਵਾ ਥੇਰਂ ਉਪਸਙ੍ਕਮਿਤ੍ਵਾ ‘‘ਇਮਂ ਪਿਣ੍ਡਪਾਤਂ ਪਰਿਭੁਞ੍ਜਥਾ’’ਤਿ ਆਹ. ਥੇਰੋ ‘‘ਵਟ੍ਟਿਸ੍ਸਤਿ ਥੇਰੀ’’ਤਿ ਵਤ੍ਵਾ ਤੁਣ੍ਹੀ ਅਟ੍ਠਾਸਿ. ਧਮ੍ਮਿਕੋ, ਤਾਤ, ਪਿਣ੍ਡਪਾਤੋ, ਕੁਕ੍ਕੁਚ੍ਚਂ ਅਕਤ੍ਵਾ ਪਰਿਭੁਞ੍ਜਥਾਤਿ. ਵਟ੍ਟਿਸ੍ਸਤਿ ਥੇਰੀਤਿ? ਸਾ ਪਤ੍ਤਂ ਗਹੇਤ੍ਵਾ ਆਕਾਸੇ ਖਿਪਿ, ਪਤ੍ਤੋ ਆਕਾਸੇ ਅਟ੍ਠਾਸਿ. ਥੇਰੋ ‘‘ਸਤ੍ਤਤਾਲਮਤ੍ਤੇ ਠਿਤਮ੍ਪਿ ਭਿਕ੍ਖੁਨੀਭਤ੍ਤਮੇਵ ਥੇਰੀ’’ਤਿ ਵਤ੍ਵਾ ‘‘ਭਯਂ ਨਾਮ ਸਬ੍ਬਕਾਲਂ ਨ ਹੋਤਿ, ਭਯੇ ਵੂਪਸਨ੍ਤੇ ਅਰਿਯਵਂਸਂ ਕਥਯਮਾਨੋ, ‘ਭੋ ਪਿਣ੍ਡਪਾਤਿਕ, ਭਿਕ੍ਖੁਨੀਭਤ੍ਤਂ ਭੁਞ੍ਜਿਤ੍ਵਾ ਵੀਤਿਨਾਮਯਿਤ੍ਥਾ’ਤਿ ਚਿਤ੍ਤੇਨ ਅਨੁਵਦਿਯਮਾਨੋ ਸਨ੍ਥਮ੍ਭਿਤੁਂ ਨ ਸਕ੍ਖਿਸ੍ਸਾਮਿ, ਅਪ੍ਪਮਤ੍ਤਾ ਹੋਥ ਥੇਰਿਯੋ’’ਤਿ ਮਗ੍ਗਂ ਪਟਿਪਜ੍ਜਿ.
ਰੁਕ੍ਖਦੇਵਤਾਪਿ ‘‘ਸਚੇ ਥੇਰੋ ਥੇਰਿਯਾ ਹਤ੍ਥਤੋ ਪਿਣ੍ਡਪਾਤਂ ਪਰਿਭੁਞ੍ਜਿਸ੍ਸਤਿ, ਨ ਤਂ ਨਿਵਤ੍ਤੇਸ੍ਸਾਮਿ. ਸਚੇ ਨ ਪਰਿਭੁਞ੍ਜਿਸ੍ਸਤਿ, ਨਿਵਤ੍ਤੇਸ੍ਸਾਮੀ’’ਤਿ ਚਿਨ੍ਤਯਮਾਨਾ ਠਤ੍ਵਾ ਥੇਰਸ੍ਸ ਗਮਨਂ ਦਿਸ੍ਵਾ ਰੁਕ੍ਖਾ ਓਰੁਯ੍ਹ ‘‘ਪਤ੍ਤਂ, ਭਨ੍ਤੇ, ਦੇਥਾ’’ਤਿ ਵਤ੍ਵਾ ਪਤ੍ਤਂ ਗਹੇਤ੍ਵਾ ਥੇਰਂ ਰੁਕ੍ਖਮੂਲਂਯੇਵ ਆਨੇਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਪਿਣ੍ਡਪਾਤਂ ਦਤ੍ਵਾ ਕਤਭਤ੍ਤਕਿਚ੍ਚਂ ਪਟਿਞ੍ਞਂ ਕਾਰੇਤ੍ਵਾ ਦ੍ਵਾਦਸ ਭਿਕ੍ਖੁਨਿਯੋ ਦ੍ਵਾਦਸ ਚ ਭਿਕ੍ਖੂ ਸਤ੍ਤ ਵਸ੍ਸਾਨਿ ਉਪਟ੍ਠਹਿ. ਇਦਂ ਦੇਵਤਾ ਉਸ੍ਸੁਕ੍ਕਂ ਆਪਜ੍ਜਨ੍ਤੀਤਿ ਏਤ੍ਥ ਵਤ੍ਥੁ. ਤਤ੍ਰ ਹਿ ਥੇਰੀ ਸਾਰਣੀਯਧਮ੍ਮਪੂਰਿਕਾ ਅਹੋਸਿ.
ਅਖਣ੍ਡਾਨੀਤਿਆਦੀਸੁ ਯਸ੍ਸ ਸਤ੍ਤਸੁ ਆਪਤ੍ਤਿਕ੍ਖਨ੍ਧੇਸੁ ਆਦਿਮ੍ਹਿ ਵਾ ਅਨ੍ਤੇ ਵਾ ਸਿਕ੍ਖਾਪਦਂ ਭਿਨ੍ਨਂ ਹੋਤਿ, ਤਸ੍ਸ ਸੀਲਂ ਪਰਿਯਨ੍ਤੇ ਛਿਨ੍ਨਸਾਟਕੋ ਵਿਯ ਖਣ੍ਡਂ ਨਾਮ. ਯਸ੍ਸ ਪਨ ਵੇਮਜ੍ਝੇ ਭਿਨ੍ਨਂ, ਤਸ੍ਸ ਛਿਦ੍ਦਸਾਟਕੋ ਵਿਯ ਛਿਦ੍ਦਂ ਨਾਮ ਹੋਤਿ. ਯਸ੍ਸ ਪਟਿਪਾਟਿਯਾ ਦ੍ਵੇ ਤੀਣਿ ਭਿਨ੍ਨਾਨਿ, ਤਸ੍ਸ ਪਿਟ੍ਠਿਯਂ ਵਾ ਕੁਚ੍ਛਿਯਂ ਵਾ ਉਟ੍ਠਿਤੇਨ ਵਿਸਭਾਗਵਣ੍ਣੇਨ ਕਾਲ਼ਰਤ੍ਤਾਦੀਨਂ ਅਞ੍ਞਤਰਵਣ੍ਣਾ ਗਾਵੀ ਵਿਯ ਸਬਲਂ ਨਾਮ ਹੋਤਿ. ਯਸ੍ਸ ਅਨ੍ਤਰਨ੍ਤਰਾ ਭਿਨ੍ਨਾਨਿ, ਤਸ੍ਸ ਅਨ੍ਤਰਨ੍ਤਰਾ ਵਿਸਭਾਗਬਿਨ੍ਦੁਵਿਚਿਤ੍ਰਾ ਗਾਵੀ ਵਿਯ ਕਮ੍ਮਾਸਂ ਨਾਮ ਹੋਤਿ. ਯਸ੍ਸ ਪਨ ਸਬ੍ਬੇਨ ਸਬ੍ਬਂ ਅਭਿਨ੍ਨਾਨਿ, ਤਸ੍ਸ ਤਾਨਿ ਸੀਲਾਨਿ ਅਖਣ੍ਡਾਨਿ ਅਚ੍ਛਿਦ੍ਦਾਨਿ ਅਸਬਲਾਨਿ ਅਕਮ੍ਮਾਸਾਨਿ ਨਾਮ ਹੋਨ੍ਤਿ. ਤਾਨਿ ਪਨੇਤਾਨਿ ਤਣ੍ਹਾਦਾਸਬ੍ਯਤੋ ਮੋਚੇਤ੍ਵਾ ਭੁਜਿਸ੍ਸਭਾਵਕਰਣਤੋ ਭੁਜਿਸ੍ਸਾਨਿ, ਬੁਦ੍ਧਾਦੀਹਿ ਵਿਞ੍ਞੂਹਿ ਪਸਤ੍ਥਤ੍ਤਾ ਵਿਞ੍ਞੁਪ੍ਪਸਤ੍ਥਾਨਿ, ਤਣ੍ਹਾਦਿਟ੍ਠੀਹਿ ਅਪਰਾਮਟ੍ਠਤ੍ਤਾ ‘‘ਇਦਂ ਨਾਮ ਤ੍ਵਂ ਆਪਨ੍ਨਪੁਬ੍ਬੋ’’ਤਿ ਕੇਨਚਿ ਪਰਾਮਟ੍ਠੁਂ ਅਸਕ੍ਕੁਣੇਯ੍ਯਤ੍ਤਾ ਚ ਅਪਰਾਮਟ੍ਠਾਨਿ, ਉਪਚਾਰਸਮਾਧਿਂ ਅਪ੍ਪਨਾਸਮਾਧਿਂ ਵਾ ਸਂਵਤ੍ਤਯਨ੍ਤੀਤਿ ਸਮਾਧਿਸਂਵਤ੍ਤਨਿਕਾਨੀਤਿ ਵੁਚ੍ਚਨ੍ਤਿ.
ਸੀਲਸਾਮਞ੍ਞਗਤੋ ਵਿਹਰਤੀਤਿ ਤੇਸੁ ਤੇਸੁ ਦਿਸਾਭਾਗੇਸੁ ਵਿਹਰਨ੍ਤੇਹਿ ਭਿਕ੍ਖੂਹਿ ਸਦ੍ਧਿਂ ਸਮਾਨਭਾਵੂਪਗਤਸੀਲੋ ਵਿਹਰਤਿ. ਸੋਤਾਪਨ੍ਨਾਦੀਨਞ੍ਹਿ ਸੀਲਂ ਸਮੁਦ੍ਦਨ੍ਤਰੇਪਿ ਦੇਵਲੋਕੇਪਿ ਵਸਨ੍ਤਾਨਂ ਅਞ੍ਞੇਸਂ ਸੋਤਾਪਨ੍ਨਾਦੀਨਂ ਸੀਲੇਨ ਸਮਾਨਮੇਵ ਹੋਤਿ, ਨਤ੍ਥਿ ਮਗ੍ਗਸੀਲੇ ਨਾਨਤ੍ਤਂ. ਤਂ ਸਨ੍ਧਾਯੇਤਂ ਵੁਤ੍ਤਂ.
ਯਾਯਂ ਦਿਟ੍ਠੀਤਿ ਮਗ੍ਗਸਮ੍ਪਯੁਤ੍ਤਾ ਸਮ੍ਮਾਦਿਟ੍ਠਿ. ਅਰਿਯਾਤਿ ਨਿਦ੍ਦੋਸਾ. ਨਿਯ੍ਯਾਤੀਤਿ ਨਿਯ੍ਯਾਨਿਕਾ. ਤਕ੍ਕਰਸ੍ਸਾਤਿ ਯੋ ਤਥਾਕਾਰੀ ਹੋਤਿ. ਦੁਕ੍ਖਕ੍ਖਯਾਯਾਤਿ ਸਬ੍ਬਦੁਕ੍ਖਕ੍ਖਯਤ੍ਥਂ. ਦਿਟ੍ਠਿਸਾਮਞ੍ਞਗਤੋਤਿ ਸਮਾਨਦਿਟ੍ਠਿਭਾਵਂ ਉਪਗਤੋ ਹੁਤ੍ਵਾ ਵਿਹਰਤੀਤਿ.
੨. ਦੁਤਿਯਸਾਰਣੀਯਸੁਤ੍ਤਵਣ੍ਣਨਾ
੧੨. ਦੁਤਿਯੇ ਯੋ ਤੇ ਧਮ੍ਮੇ ਪੂਰੇਤਿ, ਤਂ ਸਬ੍ਰਹ੍ਮਚਾਰੀਨਂ ਪਿਯਂ ਕਰੋਨ੍ਤੀਤਿ ਪਿਯਕਰਣਾ. ਗਰੁਂ ਕਰੋਨ੍ਤੀਤਿ ਗਰੁਕਰਣਾ. ਸਙ੍ਗਹਾਯਾਤਿ ਸਙ੍ਗਣ੍ਹਨਤ੍ਥਾਯ. ਅਵਿਵਾਦਾਯਾਤਿ ਅਵਿਵਦਨਤ੍ਥਾਯ. ਸਾਮਗ੍ਗਿਯਾਤਿ ਸਮਗ੍ਗਭਾਵਤ੍ਥਾਯ. ਏਕੀਭਾਵਾਯਾਤਿ ਏਕਭਾਵਤ੍ਥਾਯ ਨਿਨ੍ਨਾਨਾਕਰਣਾਯ. ਸਂਵਤ੍ਤਨ੍ਤੀਤਿ ਵਤ੍ਤਨ੍ਤਿ ਪਵਤ੍ਤਨ੍ਤਿ.
੩. ਨਿਸ੍ਸਾਰਣੀਯਸੁਤ੍ਤਵਣ੍ਣਨਾ
੧੩. ਤਤਿਯੇ ਨਿਸ੍ਸਾਰਣੀਯਾ ਧਾਤੁਯੋਤਿ ਨਿਸ੍ਸਰਣਧਾਤੁਯੋਵ. ਮੇਤ੍ਤਾ ਹਿ ਖੋ ਮੇ ਚੇਤੋਵਿਮੁਤ੍ਤੀਤਿ ਏਤ੍ਥ ਪਚ੍ਚਨੀਕਧਮ੍ਮੇਹਿ ਵਿਮੁਤ੍ਤਤ੍ਤਾ ਤਿਕਚਤੁਕ੍ਕਜ੍ਝਾਨਿਕਾ ਮੇਤ੍ਤਾਵ ਮੇਤ੍ਤਾਚੇਤੋਵਿਮੁਤ੍ਤਿ ਨਾਮ. ਭਾਵਿਤਾਤਿ ਵਡ੍ਢਿਤਾ. ਬਹੁਲੀਕਤਾਤਿ ਪੁਨਪ੍ਪੁਨਂ ਕਤਾ. ਯਾਨੀਕਤਾਤਿ ਯੁਤ੍ਤਯਾਨਸਦਿਸਾ ਕਤਾ. ਵਤ੍ਥੁਕਤਾਤਿ ਪਤਿਟ੍ਠਾ ਕਤਾ. ਅਨੁਟ੍ਠਿਤਾਤਿ ਅਧਿਟ੍ਠਿਤਾ. ਪਰਿਚਿਤਾਤਿ ਸਮਨ੍ਤਤੋ ਚਿਤਾ ਆਚਿਤਾ ਉਪਚਿਤਾ. ਸੁਸਮਾਰਦ੍ਧਾਤਿ ਸੁਪ੍ਪਗੁਣਕਰਣੇਨ ਸੁਟ੍ਠੁ ਸਮਾਰਦ੍ਧਾ. ਪਰਿਯਾਦਾਯ ਤਿਟ੍ਠਤੀਤਿ ਪਰਿਯਾਦਿਯਿਤ੍ਵਾ ਗਹੇਤ੍ਵਾ ਤਿਟ੍ਠਤਿ. ਮਾ ਹੇਵਨ੍ਤਿਸ੍ਸ ਵਚਨੀਯੋਤਿ ਯਸ੍ਮਾ ਅਭੂਤਬ੍ਯਾਕਰਣਂ ਬ੍ਯਾਕਰੋਤਿ, ਤਸ੍ਮਾ ‘‘ਮਾ ਏਵਂ ਭਣੀ’’ਤਿ ਵਤ੍ਤਬ੍ਬੋ. ਯਦਿਦਂ ਮੇਤ੍ਤਾਚੇਤੋਵਿਮੁਤ੍ਤੀਤਿ ਯਾ ਅਯਂ ਮੇਤ੍ਤਾਚੇਤੋਵਿਮੁਤ੍ਤਿ, ਇਦਂ ਨਿਸ੍ਸਰਣਂ ਬ੍ਯਾਪਾਦਸ੍ਸ, ਬ੍ਯਾਪਾਦਤੋ ਨਿਸ੍ਸਟਾਤਿ ਅਤ੍ਥੋ. ਯੋ ਪਨ ਮੇਤ੍ਤਾਯ ਤਿਕਚਤੁਕ੍ਕਜ੍ਝਾਨਤੋ ਵੁਟ੍ਠਿਤੋ ਸਙ੍ਖਾਰੇ ਸਮ੍ਮਸਿਤ੍ਵਾ ਤਤਿਯਮਗ੍ਗਂ ਪਤ੍ਵਾ ‘‘ਪੁਨ ਬ੍ਯਾਪਾਦੋ ਨਤ੍ਥੀ’’ਤਿ ਤਤਿਯਫਲੇਨ ਨਿਬ੍ਬਾਨਂ ਪਸ੍ਸਤਿ, ਤਸ੍ਸ ਚਿਤ੍ਤਂ ਅਚ੍ਚਨ੍ਤਨਿਸ੍ਸਰਣਂ ਬ੍ਯਾਪਾਦਸ੍ਸ. ਏਤੇਨੁਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.
ਅਨਿਮਿਤ੍ਤਾਚੇਤੋਵਿਮੁਤ੍ਤੀਤਿ ਬਲਵਵਿਪਸ੍ਸਨਾ. ਦੀਘਭਾਣਕਾ ਪਨ ਅਰਹਤ੍ਤਫਲਸਮਾਪਤ੍ਤੀਤਿ ਵਦਨ੍ਤਿ. ਸਾ ਹਿ ਰਾਗਨਿਮਿਤ੍ਤਾਦੀਨਞ੍ਚੇਵ ਰੂਪਨਿਮਿਤ੍ਤਾਦੀਨਞ੍ਚ ਨਿਚ੍ਚਨਿਮਿਤ੍ਤਾਦੀਨਞ੍ਚ ਅਭਾਵਾ ਅਨਿਮਿਤ੍ਤਾਤਿ ਵੁਤ੍ਤਾ. ਨਿਮਿਤ੍ਤਾਨੁਸਾਰੀਤਿ ਵੁਤ੍ਤਪ੍ਪਭੇਦਂ ਨਿਮਿਤ੍ਤਂ ਅਨੁਸਰਣਸਭਾਵਂ.
ਅਸ੍ਮੀਤਿ ਅਸ੍ਮਿਮਾਨੋ. ਅਯਮਹਮਸ੍ਮੀਤਿ ਪਞ੍ਚਸੁ ਖਨ੍ਧੇਸੁ ਅਯਂ ਨਾਮ ਅਹਂ ਅਸ੍ਮੀਤਿ. ਏਤ੍ਤਾਵਤਾ ਅਰਹਤ੍ਤਂ ਬ੍ਯਾਕਤਂ ਹੋਤਿ. ਵਿਚਿਕਿਚ੍ਛਾਕਥਂਕਥਾਸਲ੍ਲਨ੍ਤਿ ਵਿਚਿਕਿਚ੍ਛਾਭੂਤਂ ਕਥਂਕਥਾਸਲ੍ਲਂ. ਮਾ ਹੇਵਨ੍ਤਿਸ੍ਸ ਵਚਨੀਯੋਤਿ ਸਚੇ ਤੇ ਪਠਮਮਗ੍ਗਵਜ੍ਝਾ ਵਿਚਿਕਿਚ੍ਛਾ ਉਪ੍ਪਜ੍ਜਤਿ, ਅਰਹਤ੍ਤਬ੍ਯਾਕਰਣਂ ਮਿਚ੍ਛਾ ਹੋਤਿ, ਤਸ੍ਮਾ ‘‘ਮਾ ਅਭੂਤਂ ਗਣ੍ਹੀ’’ਤਿ ਵਾਰੇਤਬ੍ਬੋ. ਅਸ੍ਮੀਤਿ ਮਾਨਸਮੁਗ੍ਘਾਤੋਤਿ ਅਰਹਤ੍ਤਮਗ੍ਗੋ. ਅਰਹਤ੍ਤਮਗ੍ਗਫਲਵਸੇਨ ਹਿ ਨਿਬ੍ਬਾਨੇ ਦਿਟ੍ਠੇ ਪੁਨ ਅਸ੍ਮਿਮਾਨੋ ਨਤ੍ਥੀਤਿ ਅਰਹਤ੍ਤਮਗ੍ਗੋ ‘‘ਅਸ੍ਮੀਤਿ ਮਾਨਸਮੁਗ੍ਘਾਤੋ’’ਤਿ ਵੁਤ੍ਤੋ. ਇਤਿ ਇਮਸ੍ਮਿਂ ਸੁਤ੍ਤੇ ਅਭੂਤਬ੍ਯਾਕਰਣਂ ਨਾਮ ਕਥਿਤਂ.
੪. ਭਦ੍ਦਕਸੁਤ੍ਤਵਣ੍ਣਨਾ
੧੪. ਚਤੁਤ੍ਥੇ ਨ ਭਦ੍ਦਕਨ੍ਤਿ ਨ ਲਦ੍ਧਕਂ. ਤਤ੍ਥ ਯੋ ਹਿ ਭੀਤਭੀਤੋ ਮਰਤਿ, ਤਸ੍ਸ ਨ ਭਦ੍ਦਕਂ ਮਰਣਂ ਹੋਤਿ. ਯੋ ਅਪਾਯੇ ਪਟਿਸਨ੍ਧਿਂ ਗਣ੍ਹਾਤਿ, ਤਸ੍ਸ ਨ ਭਦ੍ਦਿਕਾ ਕਾਲਕਿਰਿਯਾ ਹੋਤਿ. ਕਮ੍ਮਾਰਾਮੋਤਿਆਦੀਸੁ ਆਰਮਣਂ ਆਰਾਮੋ, ਅਭਿਰਤੀਤਿ ਅਤ੍ਥੋ. ਵਿਹਾਰਕਰਣਾਦਿਮ੍ਹਿ ਨਵਕਮ੍ਮੇ ਆਰਾਮੋ ਅਸ੍ਸਾਤਿ ਕਮ੍ਮਾਰਾਮੋ. ਤਸ੍ਮਿਂਯੇਵ ਕਮ੍ਮੇ ਰਤੋਤਿ ਕਮ੍ਮਰਤੋ. ਤਦੇਵ ਕਮ੍ਮਾਰਾਮਤਂ ਪੁਨਪ੍ਪੁਨਂ ਯੁਤ੍ਤੋਤਿ ਅਨੁਯੁਤ੍ਤੋ. ਏਸ ਨਯੋ ਸਬ੍ਬਤ੍ਥ. ਏਤ੍ਥ ਚ ਭਸ੍ਸਨ੍ਤਿ ਆਲਾਪਸਲ੍ਲਾਪੋ. ਨਿਦ੍ਦਾਤਿ ਸੋਪ੍ਪਂ. ਸਙ੍ਗਣਿਕਾਤਿ ਗਣਸਙ੍ਗਣਿਕਾ. ਸਾ ‘‘ਏਕਸ੍ਸ ਦੁਤਿਯੋ ਹੋਤਿ, ਦ੍ਵਿਨ੍ਨਂ ਹੋਤਿ ਤਤਿਯਕੋ’’ਤਿਆਦਿਨਾ ਨਯੇਨ ਵੇਦਿਤਬ੍ਬਾ. ਸਂਸਗ੍ਗੋਤਿ ਦਸ੍ਸਨਸਵਨਸਮੁਲ੍ਲਾਪਸਮ੍ਭੋਗਕਾਯਸਂਸਗ੍ਗਵਸੇਨ ਪਵਤ੍ਤੋ ਸਂਸਟ੍ਠਭਾਵੋ. ਪਪਞ੍ਚੋਤਿ ਤਣ੍ਹਾਦਿਟ੍ਠਿਮਾਨਵਸੇਨ ਪਵਤ੍ਤੋ ਮਦਨਾਕਾਰਸਣ੍ਠਿਤੋ ਕਿਲੇਸਪਪਞ੍ਚੋ. ਸਕ੍ਕਾਯਨ੍ਤਿ ਤੇਭੂਮਕਵਟ੍ਟਂ. ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾਤਿ ਹੇਤੁਨਾ ਨਯੇਨ ਸਕਲਵਟ੍ਟਦੁਕ੍ਖਸ੍ਸ ਪਰਿਵਟੁਮਪਰਿਚ੍ਛੇਦਕਰਣਤ੍ਥਂ. ਮਗੋਤਿ ਮਗਸਦਿਸੋ. ਨਿਪ੍ਪਪਞ੍ਚਪਦੇਤਿ ਨਿਬ੍ਬਾਨਪਦੇ. ਆਰਾਧਯੀਤਿ ਪਰਿਪੂਰਯਿ ਤਂ ਸਮ੍ਪਾਦੇਸੀਤਿ.
੫. ਅਨੁਤਪ੍ਪਿਯਸੁਤ੍ਤਵਣ੍ਣਨਾ
੧੫. ਪਞ੍ਚਮੇ ਅਨੁਤਪ੍ਪਾਤਿ ਅਨੁਸੋਚਿਤਬ੍ਬਾ ਅਨੁਤਾਪਕਾਰੀ. ਇਮੇਸੁ ਦ੍ਵੀਸੁਪਿ ਸੁਤ੍ਤੇਸੁ ਗਾਥਾਸੁ ਚ ਵਟ੍ਟਵਿਵਟ੍ਟਂ ਕਥਿਤਂ.
੬. ਨਕੁਲਪਿਤੁਸੁਤ੍ਤਵਣ੍ਣਨਾ
੧੬. ਛਟ੍ਠੇ ਬਾਲ਼੍ਹਗਿਲਾਨੋਤਿ ਅਧਿਮਤ੍ਤਗਿਲਾਨੋ. ਏਤਦਵੋਚਾਤਿ ਸਾਮਿਕਸ੍ਸ ਭੇਸਜ੍ਜਂ ਕਤ੍ਵਾ ਬ੍ਯਾਧਿਂ ਵੂਪਸਮੇਤੁਂ ਅਸਕ੍ਕੋਨ੍ਤੀ ਇਦਾਨਿ ਸੀਹਨਾਦਂ ਨਦਿਤ੍ਵਾ ਸਚ੍ਚਕਿਰਿਯਾਯ ਬ੍ਯਾਧਿਂ ਵੂਪਸਮੇਤੁਂ ਸਨ੍ਤਿਕੇ ਨਿਸੀਦਿਤ੍ਵਾ ਏਤਂ ‘‘ਮਾ ਖੋ ਤ੍ਵ’’ਨ੍ਤਿਆਦਿਵਚਨਂ ਅਵੋਚ. ਸਾਪੇਕ੍ਖੋਤਿ ਸਤਣ੍ਹੋ. ਨ ਨਕੁਲਮਾਤਾਤਿ ਏਤ੍ਥ ਨ-ਕਾਰੋ ਨ ਸਕ੍ਖਤੀਤਿ ਏਵਂ ਪਰਪਦੇਨ ਯੋਜੇਤਬ੍ਬੋ. ਸਨ੍ਥਰਿਤੁਨ੍ਤਿ ਨਿਚ੍ਛਿਦ੍ਦਂ ਕਾਤੁਂ, ਸਣ੍ਠਪੇਤੁਨ੍ਤਿ ਅਤ੍ਥੋ. ਵੇਣਿਂ ਓਲਿਖਿਤੁਨ੍ਤਿ ਏਲ਼ਕਲੋਮਾਨਿ ਕਪ੍ਪੇਤ੍ਵਾ ਵਿਜਟੇਤ੍ਵਾ ਵੇਣਿਂ ਕਾਤੁਂ.
ਅਞ੍ਞਂ ਘਰਂ ਗਮਿਸ੍ਸਤੀਤਿ ਅਞ੍ਞਂ ਸਾਮਿਕਂ ਗਣ੍ਹਿਸ੍ਸਤਿ. ਸੋਲ਼ਸ ਵਸ੍ਸਾਨਿ ਗਹਟ੍ਠਕਂ ਬ੍ਰਹ੍ਮਚਰਿਯਂ ਸਮਾਚਿਣ੍ਣਨ੍ਤਿ ਇਤੋ ਸੋਲ਼ਸਵਸ੍ਸਮਤ੍ਥਕੇ ਗਹਟ੍ਠਬ੍ਰਹ੍ਮਚਰਿਯਵਾਸੋ ਸਮਾਚਿਣ੍ਣੋ. ਦਸ੍ਸਨਕਾਮਤਰਾਤਿ ਅਤਿਰੇਕੇਨ ਦਸ੍ਸਨਕਾਮਾ. ਇਮੇਹਿ ਤੀਹਿ ਅਙ੍ਗੇਹਿ ਸੀਹਨਾਦਂ ਨਦਿਤ੍ਵਾ ‘‘ਇਮਿਨਾ ਸਚ੍ਚੇਨ ਤਵ ਸਰੀਰੇ ਬ੍ਯਾਧਿ ਫਾਸੁ ਹੋਤੂ’’ਤਿ ਸਚ੍ਚਕਿਰਿਯਂ ਅਕਾਸਿ.
ਇਦਾਨਿ ਭਗਵਨ੍ਤਂ ਸਕ੍ਖਿਂ ਕਤ੍ਵਾ ਅਤ੍ਤਨੋ ਸੀਲਾਦਿਗੁਣੇਹਿਪਿ ਸਚ੍ਚਕਿਰਿਯਂ ਕਾਤੁਂ ਸਿਯਾ ਖੋ ਪਨ ਤੇਤਿਆਦਿਮਾਹ. ਤਤ੍ਥ ਪਰਿਪੂਰਕਾਰਿਨੀਤਿ ਸਮਤ੍ਤਕਾਰਿਨੀ. ਚੇਤੋਸਮਥਸ੍ਸਾਤਿ ਸਮਾਧਿਕਮ੍ਮਟ੍ਠਾਨਸ੍ਸ. ਓਗਾਧਪ੍ਪਤ੍ਤਾਤਿ ਓਗਾਧਂ ਅਨੁਪ੍ਪਵੇਸਂ ਪਤ੍ਤਾ. ਪਤਿਗਾਧਪ੍ਪਤ੍ਤਾਤਿ ਪਤਿਗਾਧਂ ਪਤਿਟ੍ਠਂ ਪਤ੍ਤਾ. ਅਸ੍ਸਾਸਪ੍ਪਤ੍ਤਾਤਿ ਅਸ੍ਸਾਸਂ ਅਵਸ੍ਸਯਂ ਪਤ੍ਤਾ. ਵੇਸਾਰਜ੍ਜਪ੍ਪਤ੍ਤਾਤਿ ਸੋਮਨਸ੍ਸਞਾਣਂ ਪਤ੍ਤਾ. ਅਪਰਪ੍ਪਚ੍ਚਯਾਤਿ ਪਰਪ੍ਪਚ੍ਚਯੋ ਵੁਚ੍ਚਤਿ ਪਰਸਦ੍ਧਾ ਪਰਪਤ੍ਤਿਯਾਯਨਾ, ਤਾਯ ਵਿਰਹਿਤਾਤਿ ਅਤ੍ਥੋ. ਇਮੇਹਿ ਤੀਹਿ ਅਙ੍ਗੇਹਿ ਅਤ੍ਤਨੋ ਗੁਣੇ ਆਰਬ੍ਭ ਸਚ੍ਚਕਿਰਿਯਂ ਅਕਾਸਿ. ਗਿਲਾਨਾ ਵੁਟ੍ਠਿਤੋਤਿ ਗਿਲਾਨੋ ਹੁਤ੍ਵਾ ਵੁਟ੍ਠਿਤੋ. ਯਾਵਤਾਤਿ ਯਤ੍ਤਿਕਾਯੋ. ਤਾਸਂ ਅਞ੍ਞਤਰਾਤਿ ਤਾਸਂ ਅਨ੍ਤਰੇ ਏਕਾ. ਅਨੁਕਮ੍ਪਿਕਾਤਿ ਹਿਤਾਨੁਕਮ੍ਪਿਕਾ. ਓਵਾਦਿਕਾਤਿ ਓਵਾਦਦਾਯਿਕਾ. ਅਨੁਸਾਸਿਕਾਤਿ ਅਨੁਸਿਟ੍ਠਿਦਾਯਿਕਾ.
੭. ਸੋਪ੍ਪਸੁਤ੍ਤਵਣ੍ਣਨਾ
੧੭. ਸਤ੍ਤਮੇ ਪਟਿਸਲ੍ਲਾਨਾ ਵੁਟ੍ਠਿਤੋਤਿ ਏਕੀਭਾਵਾਯ ਧਮ੍ਮਨਿਜ੍ਝਾਨਕ੍ਖਨ੍ਤਿਤੋ ਫਲਸਮਾਪਤ੍ਤਿਵਿਹਾਰਤੋ ਵੁਟ੍ਠਿਤੋ. ਯਥਾਵਿਹਾਰਨ੍ਤਿ ਅਤ੍ਤਨੋ ਅਤ੍ਤਨੋ ਵਸਨਵਿਹਾਰਂ. ਨਵਾਤਿ ਪਬ੍ਬਜ੍ਜਾਯ ਨਵਕਾ. ਤੇ ਪਞ੍ਚਸਤਮਤ੍ਤਾ ਅਹੇਸੁਂ. ਕਾਕਚ੍ਛਮਾਨਾਤਿ ਕਾਕਸਦ੍ਦਂ ਕਰੋਨ੍ਤਾ ਦਨ੍ਤੇ ਖਾਦਨ੍ਤਾ. ਥੇਰਾਤਿ ਥਿਰਭਾਵਂ ਪਤ੍ਤਾ. ਤੇਨ ਨੋਤਿ ਤੇਨ ਨੁ. ਸੇਯ੍ਯਸੁਖਾਦੀਨਿ ਹੇਟ੍ਠਾ ਵੁਤ੍ਤਤ੍ਥਾਨੇਵ. ਰਟ੍ਠਿਕੋਤਿ ਯੋ ਰਟ੍ਠਂ ਭੁਞ੍ਜਤਿ. ਪੇਤ੍ਤਣਿਕੋਤਿ ਯੋ ਪਿਤਰਾ ਭੁਤ੍ਤਾਨੁਭੁਤ੍ਤਂ ਭੁਞ੍ਜਤਿ. ਸੇਨਾਪਤਿਕੋਤਿ ਸੇਨਾਯ ਜੇਟ੍ਠਕੋ. ਗਾਮਗਾਮਣਿਕੋਤਿ ਗਾਮਭੋਜਕੋ. ਪੂਗਗਾਮਣਿਕੋਤਿ ਗਣਜੇਟ੍ਠਕੋ. ਅਵਿਪਸ੍ਸਕੋ ਕੁਸਲਾਨਂ ਧਮ੍ਮਾਨਨ੍ਤਿ ਕੁਸਲਾਨਂ ਧਮ੍ਮਾਨਂ ਅਨੇਸਕੋ ਅਗਵੇਸਕੋ ਹੁਤ੍ਵਾ. ਬੋਧਿਪਕ੍ਖਿਯਾਨਂ ਧਮ੍ਮਾਨਨ੍ਤਿ ਸਤ੍ਤਤਿਂਸਾਯ ਬੋਧਿਪਕ੍ਖਿਯਧਮ੍ਮਾਨਂ.
੮. ਮਚ੍ਛਬਨ੍ਧਸੁਤ੍ਤਵਣ੍ਣਨਾ
੧੮. ਅਟ੍ਠਮੇ ਮਚ੍ਛਿਕਨ੍ਤਿ ਮਚ੍ਛਘਾਤਕਂ. ਹਤ੍ਥਿਨਾ ਯਾਤੀਤਿ ਹਤ੍ਥਿਯਾਯੀ. ਪਰਤੋਪਿ ਏਸੇਵ ਨਯੋ. ਵਜ੍ਝੇਤਿ ਵਧਿਤਬ੍ਬੇ. ਵਧਾਯਨੀਤੇਤਿ ਵਧਾਯ ਉਪਨੀਤੇ. ਪਾਪਕੇਨ ਮਨਸਾਤਿ ਲਾਮਕੇਨ ਵਧਕਚਿਤ੍ਤੇਨ. ਪਾਲ਼ਿਯਂ ਪਨ ਵਧਾਯੁਪਨੀਤੇਤਿ ਲਿਖਨ੍ਤਿ. ਮਾਗਵਿਕੋਤਿ ਮਿਗਘਾਤਕੋ. ਕੋ ਪਨ ਵਾਦੋ ਮਨੁਸ੍ਸਭੂਤਨ੍ਤਿ ਯੋ ਮਨੁਸ੍ਸਭੂਤਂ ਪਾਪਕੇਨ ਮਨਸਾ ਅਨੁਪੇਕ੍ਖਤਿ, ਤਸ੍ਸ ਸਮ੍ਪਤ੍ਤਿਯਾ ਅਭਾਵੇ ਕਿਮੇਵ ਵਤ੍ਤਬ੍ਬਂ. ਇਦਂ ਪਾਪਕਸ੍ਸ ਕਮ੍ਮੁਨੋ ਅਨਿਟ੍ਠਫਲਭਾਵਂ ਦਸ੍ਸੇਤੁਂ ਵੁਤ੍ਤਂ. ਯੇਸਂ ਪਨ ਤਾਦਿਸਂ ਕਮ੍ਮਂ ਕਰੋਨ੍ਤਾਨਮ੍ਪਿ ਯਸਪਟਿਲਾਭੋ ਹੋਤਿ, ਤੇਸਂ ਤਂ ਅਕੁਸਲਂ ਨਿਸ੍ਸਾਯ ਕੁਸਲਂ ਵਿਪਚ੍ਚਤੀਤਿ ਵੇਦਿਤਬ੍ਬਂ. ਤੇਨ ਪਨਸ੍ਸ ਅਕੁਸਲਕਮ੍ਮੇਨ ਉਪਹਤਤ੍ਤਾ ਵਿਪਾਕੋ ਨ ਚਿਰਟ੍ਠਿਤਿਕੋ ਹੋਤਿ. ਇਮਸ੍ਮਿਂ ਸੁਤ੍ਤੇ ਅਕੁਸਲਪਕ੍ਖੋਵ ਕਥਿਤੋ.
੯. ਪਠਮਮਰਣਸ੍ਸਤਿਸੁਤ੍ਤਵਣ੍ਣਨਾ
੧੯. ਨਵਮੇ ਨਾਤਿਕੇਤਿ ਏਵਂਨਾਮਕੇ ਗਾਮੇ. ਗਿਞ੍ਜਕਾਵਸਥੇਤਿ ਇਟ੍ਠਕਾਮਯੇ ਪਾਸਾਦੇ. ਅਮਤੋਗਧਾਤਿ ਨਿਬ੍ਬਾਨੋਗਧਾ, ਨਿਬ੍ਬਾਨਪਤਿਟ੍ਠਾਤਿ ਅਤ੍ਥੋ. ਭਾਵੇਥ ਨੋਤਿ ਭਾਵੇਥ ਨੁ. ਮਰਣਸ੍ਸਤਿਨ੍ਤਿ ਮਰਣਸ੍ਸਤਿਕਮ੍ਮਟ੍ਠਾਨਂ. ਅਹੋ ਵਤਾਤਿ ਪਤ੍ਥਨਤ੍ਥੇ ਨਿਪਾਤੋ. ਬਹੁਂ ਵਤ ਮੇ ਕਤਂ ਅਸ੍ਸਾਤਿ ਤੁਮ੍ਹਾਕਂ ਸਾਸਨੇ ਮਮ ਕਿਚ੍ਚਂ ਬਹੁ ਕਤਂ ਅਸ੍ਸ. ਤਦਨ੍ਤਰਨ੍ਤਿ ਤਂ ਅਨ੍ਤਰਂ ਖਣਂ ਓਕਾਸਂ. ਅਸ੍ਸਸਿਤ੍ਵਾ ਵਾ ਪਸ੍ਸਸਾਮੀਤਿ ਏਤ੍ਥ ਅਸ੍ਸਾਸੋ ਵੁਚ੍ਚਤਿ ਅਨ੍ਤੋ ਪਵਿਸਨਵਾਤੋ, ਪਸ੍ਸਾਸੋ ਬਹਿ ਨਿਕ੍ਖਮਨਵਾਤੋ. ਇਤਿ ਅਯਂ ਭਿਕ੍ਖੁ ਯਾਵ ਅਨ੍ਤੋ ਪਵਿਟ੍ਠਵਾਤੋ ਬਹਿ ਨਿਕ੍ਖਮਤਿ, ਬਹਿ ਨਿਕ੍ਖਨ੍ਤੋ ਵਾਤੋ ਅਨ੍ਤੋ ਪਵਿਸਤਿ, ਤਾਵ ਜੀਵਿਤਂ ਪਤ੍ਥੇਨ੍ਤੋ ਏਵਮਾਹ. ਦਨ੍ਧਨ੍ਤਿ ਮਨ੍ਦਂ ਗਰੁਕਂ ਅਸੀਘਪ੍ਪਵਤ੍ਤਂ. ਆਸਵਾਨਂ ਖਯਾਯਾਤਿ ਅਰਹਤ੍ਤਫਲਤ੍ਥਾਯ. ਇਮਸ੍ਮਿਂ ਸੁਤ੍ਤੇ ਮਰਣਸ੍ਸਤਿ ਅਰਹਤ੍ਤਂ ਪਾਪੇਤ੍ਵਾ ਕਥਿਤਾਤਿ.
੧੦. ਦੁਤਿਯਮਰਣਸ੍ਸਤਿਸੁਤ੍ਤਵਣ੍ਣਨਾ
੨੦. ਦਸਮੇ ਪਤਿਗਤਾਯਾਤਿ ਪਟਿਪਨ੍ਨਾਯ. ਇਤਿ ਪਟਿਸਞ੍ਚਿਕ੍ਖਤੀਤਿ ਏਵਂ ਪਚ੍ਚਵੇਕ੍ਖਤਿ. ਸੋ ਮਮਸ੍ਸ ਅਨ੍ਤਰਾਯੋਤਿ ਏਤ੍ਥ ਤਿਵਿਧੋ ਅਨ੍ਤਰਾਯੋ ਜੀਵਿਤਨ੍ਤਰਾਯੋ, ਸਮਣਧਮ੍ਮਨ੍ਤਰਾਯੋ, ਪੁਥੁਜ੍ਜਨਕਾਲਕਿਰਿਯਂ ਕਰੋਨ੍ਤਸ੍ਸ ਸਗ੍ਗਨ੍ਤਰਾਯੋ ਚੇਵ ਮਗ੍ਗਨ੍ਤਰਾਯੋ ਚਾਤਿ. ਤਂ ਸਬ੍ਬਮ੍ਪਿ ਸਨ੍ਧਾਯੇਵਮਾਹ. ਬ੍ਯਾਪਜ੍ਜੇਯ੍ਯਾਤਿ ਅਜਿਣ੍ਣਕਾਦਿਵਸੇਨ ਵਿਪਜ੍ਜੇਯ੍ਯ. ਅਧਿਮਤ੍ਤੋਤਿ ਬਲਵਾ. ਛਨ੍ਦੋਤਿ ਕਤ੍ਤੁਕਮ੍ਯਤਾਛਨ੍ਦੋ. ਵਾਯਾਮੋਤਿ ਪਯੋਗਵੀਰਿਯਂ. ਉਸ੍ਸਾਹੋਤਿ ਉਸ੍ਸਾਪਨਵੀਰਿਯਂ. ਉਸ੍ਸੋਲ਼੍ਹੀਤਿ ਸਮ੍ਪਾਦਨਵੀਰਿਯਂ. ਅਪ੍ਪਟਿਵਾਨੀਤਿ ਅਨੁਕ੍ਕਣ੍ਠਨਾ ਅਪ੍ਪਟਿਸਙ੍ਘਰਣਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਸਾਰਣੀਯਵਗ੍ਗੋ ਦੁਤਿਯੋ.
੩. ਅਨੁਤ੍ਤਰਿਯਵਗ੍ਗੋ
੧-੨. ਸਾਮਕਸੁਤ੍ਤਾਦਿਵਣ੍ਣਨਾ
੨੧-੨੨. ਤਤਿਯਸ੍ਸ ਪਠਮੇ ਸਾਮਗਾਮਕੇਤਿ ਸਾਮਕਾਨਂ ਉਸ੍ਸਨ੍ਨਤ੍ਤਾ ਏਵਂਲਦ੍ਧਨਾਮੇ ਗਾਮਕੇ. ਪੋਕ੍ਖਰਣਿਯਾਯਨ੍ਤਿ ਪੋਕ੍ਖਰਣਿਯਾਨਾਮਕੇ ਵਿਹਾਰੇ. ਅਭਿਕ੍ਕਨ੍ਤਾਯ ਰਤ੍ਤਿਯਾਤਿ ਰਤ੍ਤਿਯਾ ਪਠਮਯਾਮਂ ਅਤਿਕ੍ਕਮ੍ਮ ਮਜ੍ਝਿਮਯਾਮੇ ਸਮ੍ਪਤ੍ਤੇ. ਅਭਿਕ੍ਕਨ੍ਤਵਣ੍ਣਾਤਿ ਅਭਿਕ੍ਕਨ੍ਤਅਤਿਮਨਾਪਵਣ੍ਣਾ. ਕੇਵਲਕਪ੍ਪਨ੍ਤਿ ਸਕਲਕਪ੍ਪਂ. ਪੋਕ੍ਖਰਣਿਯਂ ਓਭਾਸੇਤ੍ਵਾਤਿ ਪੋਕ੍ਖਰਣਿਯਾਨਾਮਕਂ ਮਹਾਵਿਹਾਰਂ ਅਤ੍ਤਨੋ ਓਭਾਸੇਨ ਫਰਿਤ੍ਵਾ. ਸਮਨੁਞ੍ਞੋਤਿ ਸਮਾਨਅਨੁਞ੍ਞੋ ਸਮਾਨਚਿਤ੍ਤੋ. ਦੋਵਚਸ੍ਸਤਾਤਿ ਦੁਬ੍ਬਚਭਾਵੋ. ਪਾਪਮਿਤ੍ਤਤਾਤਿ ਲਾਮਕਮਿਤ੍ਤਤਾ. ਇਮਸ੍ਮਿਂ ਸੁਤ੍ਤੇ ਪਰਿਹਾਨਿਯਧਮ੍ਮਾਵ ਕਥਿਤਾ. ਦੁਤਿਯੇ ਅਪਰਿਹਾਨਿਯਧਮ੍ਮਾ ਲੋਕੁਤ੍ਤਰਮਿਸ੍ਸਕਾ ਕਥਿਤਾ.
੩. ਭਯਸੁਤ੍ਤਵਣ੍ਣਨਾ
੨੩. ਤਤਿਯੇ ਕਾਮਰਾਗਰਤ੍ਤਾਯਨ੍ਤਿ ਕਾਮਰਾਗਰਤ੍ਤੋ ਅਯਂ. ਛਨ੍ਦਰਾਗਵਿਨਿਬਦ੍ਧੋਤਿ ਛਨ੍ਦਰਾਗੇਨ ਵਿਨਿਬਦ੍ਧੋ. ਭਯਾਤਿ ਚਿਤ੍ਤੁਤ੍ਰਾਸਭਯਾ. ਪਙ੍ਕਾਤਿ ਕਿਲੇਸਪਙ੍ਕਤੋ. ਸਙ੍ਗੋ ਪਙ੍ਕੋ ਚ ਉਭਯਨ੍ਤਿ ਸਙ੍ਗੋ ਚ ਪਙ੍ਕੋ ਚ ਇਦਮ੍ਪਿ ਉਭਯਂ. ਏਤੇ ਕਾਮਾ ਪਵੁਚ੍ਚਨ੍ਤਿ, ਯਤ੍ਥ ਸਤ੍ਤੋ ਪੁਥੁਜ੍ਜਨੋਤਿ ਯਸ੍ਮਿਂ ਸਙ੍ਗੇ ਚ ਪਙ੍ਕੇ ਚ ਪੁਥੁਜ੍ਜਨੋ ਸਤ੍ਤੋ ਲਗ੍ਗੋ ਲਗ੍ਗਿਤੋ ਪਲਿਬੁਦ੍ਧੋ. ਉਪਾਦਾਨੇਤਿ ਚਤੁਬ੍ਬਿਧੇ ਉਪਾਦਾਨੇ. ਜਾਤਿਮਰਣਸਮ੍ਭਵੇਤਿ ਜਾਤਿਯਾ ਚ ਮਰਣਸ੍ਸ ਚ ਸਮ੍ਭਵੇ ਪਚ੍ਚਯਭੂਤੇ. ਅਨੁਪਾਦਾ ਵਿਮੁਚ੍ਚਨ੍ਤੀਤਿ ਅਨੁਪਾਦਿਯਿਤ੍ਵਾ ਵਿਮੁਚ੍ਚਨ੍ਤਿ. ਜਾਤਿਮਰਣਸਙ੍ਖਯੇਤਿ ਜਾਤਿਮਰਣਾਨਂ ਸਙ੍ਖਯਸਙ੍ਖਾਤੇ ਨਿਬ੍ਬਾਨੇ, ਨਿਬ੍ਬਾਨਾਰਮ੍ਮਣਾਯ ਵਿਮੁਤ੍ਤਿਯਾ ਵਿਮੁਚ੍ਚਨ੍ਤੀਤਿ ਅਤ੍ਥੋ. ਇਮਸ੍ਮਿਂ ਠਾਨੇ ਵਿਵਟ੍ਟੇਤ੍ਵਾ ਅਰਹਤ੍ਤਮੇਵ ਪਤ੍ਤੋ ਏਸ ਭਿਕ੍ਖੁ. ਇਦਾਨਿ ਤਂ ਖੀਣਾਸਵਂ ਥੋਮੇਨ੍ਤੋ ਤੇ ਖੇਮਪ੍ਪਤ੍ਤਾਤਿਆਦਿਮਾਹ. ਤਤ੍ਥ ਖੇਮਪ੍ਪਤ੍ਤਾਤਿ ਖੇਮਭਾਵਂ ਪਤ੍ਤਾ. ਸੁਖਿਨੋਤਿ ਲੋਕੁਤ੍ਤਰਸੁਖੇਨ ਸੁਖਿਤਾ. ਦਿਟ੍ਠਧਮ੍ਮਾਭਿਨਿਬ੍ਬੁਤਾਤਿ ਅਬ੍ਭਨ੍ਤਰੇ ਕਿਲੇਸਾਭਾਵੇਨ ਦਿਟ੍ਠਧਮ੍ਮੇਯੇਵ ਅਭਿਨਿਬ੍ਬੁਤਾ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥੇਤ੍ਵਾ ਗਾਥਾਸੁ ਵਟ੍ਟਵਿਵਟਂ ਕਥਿਤਂ.
੪. ਹਿਮਵਨ੍ਤਸੁਤ੍ਤਵਣ੍ਣਨਾ
੨੪. ਚਤੁਤ੍ਥੇ ਪਦਾਲੇਯ੍ਯਾਤਿ ਭਿਨ੍ਦੇਯ੍ਯ. ਛਵਾਯਾਤਿ ਲਾਮਿਕਾਯ. ਸਮਾਧਿਸ੍ਸ ਸਮਾਪਤ੍ਤਿਕੁਸਲੋ ਹੋਤੀਤਿ ਆਹਾਰਸਪ੍ਪਾਯਉਤੁਸਪ੍ਪਾਯਾਨਿ ਪਰਿਗ੍ਗਹੇਤ੍ਵਾ ਸਮਾਧਿਂ ਸਮਾਪਜ੍ਜਿਤੁਂ ਕੁਸਲੋ ਹੋਤਿ ਛੇਕੋ ਸਮਤ੍ਥੋ ਪਟਿਬਲੋ. ਸਮਾਧਿਸ੍ਸ ਠਿਤਿਕੁਸਲੋਤਿ ਸਮਾਧਿਸ੍ਸ ਠਿਤਿਯਂ ਕੁਸਲੋ, ਸਮਾਧਿਂ ਠਪੇਤੁਂ ਸਕ੍ਕੋਤੀਤਿ ਅਤ੍ਥੋ. ਸਮਾਧਿਸ੍ਸ ਵੁਟ੍ਠਾਨਕੁਸਲੋਤਿ ਸਮਾਧਿਸ੍ਸ ਵੁਟ੍ਠਾਨੇ ਕੁਸਲੋ, ਯਥਾਪਰਿਚ੍ਛੇਦੇਨ ਵੁਟ੍ਠਾਤੁਂ ਸਕ੍ਕੋਤੀਤਿ ਅਤ੍ਥੋ. ਸਮਾਧਿਸ੍ਸ ਕਲ੍ਲਿਤਕੁਸਲੋਤਿ ਸਮਾਧਿਸ੍ਸ ਕਲ੍ਲਤਾਯ ਕੁਸਲੋ, ਸਮਾਧਿਚਿਤ੍ਤਂ ਹਾਸੇਤੁਂ ਕਲ੍ਲਂ ਕਾਤੁਂ ਸਕ੍ਕੋਤੀਤਿ ਅਤ੍ਥੋ. ਸਮਾਧਿਸ੍ਸ ਗੋਚਰਕੁਸਲੋਤਿ ਸਮਾਧਿਸ੍ਸ ਅਸਪ੍ਪਾਯੇ ਅਨੁਪਕਾਰਕੇ ਧਮ੍ਮੇ ਵਜ੍ਜੇਤ੍ਵਾ ਸਪ੍ਪਾਯੇ ਉਪਕਾਰਕੇ ਸੇਵਨ੍ਤੋਪਿ, ‘‘ਅਯਂ ਸਮਾਧਿਨਿਮਿਤ੍ਤਾਰਮ੍ਮਣੋ ਅਯਂ ਲਕ੍ਖਣਾਰਮ੍ਮਣੋ’’ਤਿ ਜਾਨਨ੍ਤੋਪਿ ਸਮਾਧਿਸ੍ਸ ਗੋਚਰਕੁਸਲੋ ਨਾਮ ਹੋਤਿ. ਸਮਾਧਿਸ੍ਸ ਅਭਿਨੀਹਾਰਕੁਸਲੋਤਿ ਉਪਰਿਉਪਰਿਸਮਾਪਤ੍ਤਿਸਮਾਪਜ੍ਜਨਤ੍ਥਾਯ ਪਠਮਜ੍ਝਾਨਾਦਿਸਮਾਧਿਂ ਅਭਿਨੀਹਰਿਤੁਂ ਸਕ੍ਕੋਨ੍ਤੋ ਸਮਾਧਿਸ੍ਸ ਅਭਿਨੀਹਾਰਕੁਸਲੋ ਨਾਮ ਹੋਤਿ. ਸੋ ਪਠਮਜ੍ਝਾਨਾ ਵੁਟ੍ਠਾਯ ਦੁਤਿਯਂ ਸਮਾਪਜ੍ਜਤਿ, ਦੁਤਿਯਜ੍ਝਾਨਾ…ਪੇ… ਤਤਿਯਜ੍ਝਾਨਾ ਵੁਟ੍ਠਾਯ ਚਤੁਤ੍ਥਂ ਸਮਾਪਜ੍ਜਤੀਤਿ.
੫. ਅਨੁਸ੍ਸਤਿਟ੍ਠਾਨਸੁਤ੍ਤਵਣ੍ਣਨਾ
੨੫. ਪਞ੍ਚਮੇ ਅਨੁਸ੍ਸਤਿਟ੍ਠਾਨਾਨੀਤਿ ਅਨੁਸ੍ਸਤਿਕਾਰਣਾਨਿ. ਇਤਿਪਿ ਸੋ ਭਗਵਾਤਿਆਦੀਨਿ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੨੩ ਆਦਯੋ) ਵਿਤ੍ਥਾਰਿਤਾਨੇਵ. ਇਦਮ੍ਪਿ ਖੋ, ਭਿਕ੍ਖਵੇ, ਆਰਮ੍ਮਣਂ ਕਰਿਤ੍ਵਾਤਿ ਇਦਂ ਬੁਦ੍ਧਾਨੁਸ੍ਸਤਿਕਮ੍ਮਟ੍ਠਾਨਂ ਆਰਮ੍ਮਣਂ ਕਰਿਤ੍ਵਾ. ਵਿਸੁਜ੍ਝਨ੍ਤੀਤਿ ਪਰਮਵਿਸੁਦ੍ਧਿਂ ਨਿਬ੍ਬਾਨਂ ਪਾਪੁਣਨ੍ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵ. ਇਮਸ੍ਮਿਂ ਪਨ ਸੁਤ੍ਤੇ ਛ ਅਨੁਸ੍ਸਤਿਟ੍ਠਾਨਾਨਿ ਮਿਸ੍ਸਕਾਨਿ ਕਥਿਤਾਨੀਤਿ ਵੇਦਿਤਬ੍ਬਾਨਿ.
੬. ਮਹਾਕਚ੍ਚਾਨਸੁਤ੍ਤਵਣ੍ਣਨਾ
੨੬. ਛਟ੍ਠੇ ਸਮ੍ਬਾਧੇਤਿ ਪਞ੍ਚਕਾਮਗੁਣਸਮ੍ਬਾਧੇ. ਓਕਾਸਾਧਿਗਮੋਤਿ ਏਤ੍ਥ ਓਕਾਸਾ ਵੁਚ੍ਚਨ੍ਤਿ ਛ ਅਨੁਸ੍ਸਤਿਟ੍ਠਾਨਾਨਿ, ਤੇਸਂ ਅਧਿਗਮੋ. ਵਿਸੁਦ੍ਧਿਯਾਤਿ ਵਿਸੁਜ੍ਝਨਤ੍ਥਾਯ. ਸੋਕਪਰਿਦੇਵਾਨਂ ਸਮਤਿਕ੍ਕਮਾਯਾਤਿ ਸੋਕਾਨਞ੍ਚ ਪਰਿਦੇਵਾਨਞ੍ਚ ਸਮਤਿਕ੍ਕਮਤ੍ਥਾਯ. ਅਤ੍ਥਙ੍ਗਮਾਯਾਤਿ ਅਤ੍ਥਂ ਗਮਨਤ੍ਥਾਯ. ਞਾਯਸ੍ਸ ਅਧਿਗਮਾਯਾਤਿ ਸਹਵਿਪਸ੍ਸਨਕਸ੍ਸ ਮਗ੍ਗਸ੍ਸ ਅਧਿਗਮਨਤ੍ਥਾਯ. ਨਿਬ੍ਬਾਨਸ੍ਸ ਸਚ੍ਛਿਕਿਰਿਯਾਯਾਤਿ ਅਪਚ੍ਚਯਪਰਿਨਿਬ੍ਬਾਨਸ੍ਸ ਪਚ੍ਚਕ੍ਖਕਿਰਿਯਤ੍ਥਾਯ.
ਸਬ੍ਬਸੋਤਿ ਸਬ੍ਬਾਕਾਰੇਨ. ਆਕਾਸਸਮੇਨਾਤਿ ਅਲਗ੍ਗਨਟ੍ਠੇਨ ਚੇਵ ਅਪਲਿਬੁਦ੍ਧਟ੍ਠੇਨ ਚ ਆਕਾਸਸਦਿਸੇਨ. ਵਿਪੁਲੇਨਾਤਿ ਨ ਪਰਿਤ੍ਤਕੇਨ. ਮਹਗ੍ਗਤੇਨਾਤਿ ਮਹਨ੍ਤਭਾਵਂ ਗਤੇਨ, ਮਹਨ੍ਤੇਹਿ ਵਾ ਅਰਿਯਸਾਵਕੇਹਿ ਗਤੇਨ, ਪਟਿਪਨ੍ਨੇਨਾਤਿ ਅਤ੍ਥੋ. ਅਪ੍ਪਮਾਣੇਨਾਤਿ ਫਰਣਅਪ੍ਪਮਾਣਤਾਯ ਅਪ੍ਪਮਾਣੇਨ. ਅਵੇਰੇਨਾਤਿ ਅਕੁਸਲਵੇਰਪੁਗ੍ਗਲਵੇਰਰਹਿਤੇਨ. ਅਬ੍ਯਾਪਜ੍ਝੇਨਾਤਿ ਕੋਧਦੁਕ੍ਖਵਜ੍ਜਿਤੇਨ. ਸਬ੍ਬਮੇਤਂ ਬੁਦ੍ਧਾਨੁਸ੍ਸਤਿਚਿਤ੍ਤਮੇਵ ਸਨ੍ਧਾਯ ਵੁਤ੍ਤਂ. ਪਰਤੋਪਿ ਏਸੇਵ ਨਯੋ. ਵਿਸੁਦ੍ਧਿਧਮ੍ਮਾਤਿ ਵਿਸੁਜ੍ਝਨਸਭਾਵਾ. ਇਮਸ੍ਮਿਮ੍ਪਿ ਸੁਤ੍ਤੇ ਛ ਅਨੁਸ੍ਸਤਿਟ੍ਠਾਨਾਨਿ ਮਿਸ੍ਸਕਾਨੇਵ ਕਥਿਤਾਨੀਤਿ.
੭. ਪਠਮਸਮਯਸੁਤ੍ਤਵਣ੍ਣਨਾ
੨੭. ਸਤ੍ਤਮੇ ਮਨੋਭਾਵਨੀਯਸ੍ਸਾਤਿ ਏਤ੍ਥ ਮਨਂ ਭਾਵੇਤਿ ਵਡ੍ਢੇਤੀਤਿ ਮਨੋਭਾਵਨੀਯੋ. ਦਸ੍ਸਨਾਯਾਤਿ ਦਸ੍ਸਨਤ੍ਥਂ. ਨਿਸ੍ਸਰਣਨ੍ਤਿ ਨਿਗ੍ਗਮਨਂ ਵੂਪਸਮਨਂ. ਧਮ੍ਮਂ ਦੇਸੇਤੀਤਿ ਕਾਮਰਾਗਪ੍ਪਜਹਨਤ੍ਥਾਯ ਅਸੁਭਕਮ੍ਮਟ੍ਠਾਨਂ ਕਥੇਤਿ. ਦੁਤਿਯਵਾਰਾਦੀਸੁ ਬ੍ਯਾਪਾਦਪ੍ਪਹਾਨਾਯ ਮੇਤ੍ਤਾਕਮ੍ਮਟ੍ਠਾਨਂ, ਥਿਨਮਿਦ੍ਧਪ੍ਪਹਾਨਾਯ ਥਿਨਮਿਦ੍ਧਵਿਨੋਦਨਕਮ੍ਮਟ੍ਠਾਨਂ, ਆਲੋਕਸਞ੍ਞਂ ਵਾ ਵੀਰਿਯਾਰਮ੍ਭਵਤ੍ਥੁਆਦੀਨਂ ਵਾ ਅਞ੍ਞਤਰਂ, ਉਦ੍ਧਚ੍ਚਕੁਕ੍ਕੁਚ੍ਚਪ੍ਪਹਾਨਾਯ ਸਮਥਕਮ੍ਮਟ੍ਠਾਨਂ, ਵਿਚਿਕਿਚ੍ਛਾਪਹਾਨਾਯ ਤਿਣ੍ਣਂ ਰਤਨਾਨਂ ਗੁਣਕਥਂ ਕਥੇਨ੍ਤੋ ਧਮ੍ਮਂ ਦੇਸੇਤੀਤਿ ਵੇਦਿਤਬ੍ਬੋ. ਆਗਮ੍ਮਾਤਿ ਆਰਬ੍ਭ. ਮਨਸਿਕਰੋਤੋਤਿ ਆਰਮ੍ਮਣਵਸੇਨ ਚਿਤ੍ਤੇ ਕਰੋਨ੍ਤਸ੍ਸ. ਅਨਨ੍ਤਰਾ ਆਸਵਾਨਂ ਖਯੋ ਹੋਤੀਤਿ ਅਨਨ੍ਤਰਾਯੇਨ ਆਸਵਾਨਂ ਖਯੋ ਹੋਤਿ.
੮. ਦੁਤਿਯਸਮਯਸੁਤ੍ਤਵਣ੍ਣਨਾ
੨੮. ਅਟ੍ਠਮੇ ਮਣ੍ਡਲਮਾਲ਼ੇਤਿ ਭੋਜਨਸਾਲਾਯ. ਚਾਰਿਤ੍ਤਕਿਲਮਥੋਤਿ ਪਿਣ੍ਡਪਾਤਚਰਿਯਾਯ ਉਪ੍ਪਨ੍ਨਕਿਲਮਥੋ. ਭਤ੍ਤਕਿਲਮਥੋਤਿ ਭਤ੍ਤਦਰਥੋ. ਵਿਹਾਰਪਚ੍ਛਾਯਾਯਨ੍ਤਿ ਵਿਹਾਰਪਚ੍ਚਨ੍ਤੇ ਛਾਯਾਯ. ਯਦੇਵਸ੍ਸ ਦਿਵਾ ਸਮਾਧਿਨਿਮਿਤ੍ਤਂ ਮਨਸਿਕਤਂ ਹੋਤੀਤਿ ਯਂ ਏਵ ਤਸ੍ਸ ਤਤੋ ਪੁਰਿਮਦਿਵਸਭਾਗੇ ਸਮਥਨਿਮਿਤ੍ਤਂ ਚਿਤ੍ਤੇ ਕਤਂ ਹੋਤਿ. ਤਦੇਵਸ੍ਸ ਤਸ੍ਮਿਂ ਸਮਯੇ ਸਮੁਦਾਚਰਤੀਤਿ ਤਂਯੇਵ ਏਤਸ੍ਸ ਤਸ੍ਮਿਂ ਸਮਯੇ ਦਿਵਾਵਿਹਾਰੇ ਨਿਸਿਨ੍ਨਸ੍ਸ ਮਨੋਦ੍ਵਾਰੇ ਸਞ੍ਚਰਤਿ. ਓਜਟ੍ਠਾਯੀਤਿ ਓਜਾਯ ਠਿਤੋ ਪਤਿਟ੍ਠਿਤੋ. ਫਾਸੁਕਸ੍ਸ ਹੋਤੀਤਿ ਫਾਸੁਕਂ ਅਸ੍ਸ ਹੋਤਿ. ਸਮ੍ਮੁਖਾਤਿ ਕਥੇਨ੍ਤਸ੍ਸ ਸਮ੍ਮੁਖਟ੍ਠਾਨੇ. ਸੁਤਨ੍ਤਿ ਸੋਤੇਨ ਸੁਤਂ. ਪਟਿਗ੍ਗਹਿਤਨ੍ਤਿ ਚਿਤ੍ਤੇਨ ਪਟਿਗ੍ਗਹਿਤਂ.
੯. ਉਦਾਯੀਸੁਤ੍ਤਵਣ੍ਣਨਾ
੨੯. ਨਵਮੇ ਉਦਾਯਿਨ੍ਤਿ ਲਾਲ਼ੁਦਾਯਿਤ੍ਥੇਰਂ. ਸੁਣੋਮਹਂ, ਆਵੁਸੋਤਿ, ਆਵੁਸੋ, ਨਾਹਂ ਬਧਿਰੋ, ਸੁਣਾਮਿ ਭਗਵਤੋ ਵਚਨਂ, ਪਞ੍ਹਂ ਪਨ ਉਪਪਰਿਕ੍ਖਾਮੀਤਿ. ਅਧਿਚਿਤ੍ਤਨ੍ਤਿ ਸਮਾਧਿਵਿਪਸ੍ਸਨਾਚਿਤ੍ਤਂ. ਇਦਂ, ਭਨ੍ਤੇ, ਅਨੁਸ੍ਸਤਿਟ੍ਠਾਨਨ੍ਤਿ ਇਦਂ ਝਾਨਤ੍ਤਯਸਙ੍ਖਾਤਂ ਅਨੁਸ੍ਸਤਿਕਾਰਣਂ. ਦਿਟ੍ਠਧਮ੍ਮਸੁਖਵਿਹਾਰਾਯ ਸਂਵਤ੍ਤਤੀਤਿ ਇਮਸ੍ਮਿਂਯੇਵ ਅਤ੍ਤਭਾਵੇ ਸੁਖਵਿਹਾਰਤ੍ਥਾਯ ਪਵਤ੍ਤਤਿ. ਆਲੋਕਸਞ੍ਞਨ੍ਤਿ ਆਲੋਕਨਿਮਿਤ੍ਤੇ ਉਪ੍ਪਨ੍ਨਸਞ੍ਞਂ. ਦਿਵਾ ਸਞ੍ਞਂ ਅਧਿਟ੍ਠਾਤੀਤਿ ਦਿਵਾਤਿ ਸਞ੍ਞਂ ਠਪੇਤਿ. ਯਥਾ ਦਿਵਾ ਤਥਾ ਰਤ੍ਤਿਨ੍ਤਿ ਯਥਾਨੇਨ ਦਿਵਾ ਆਲੋਕਸਞ੍ਞਾ ਮਨਸਿਕਤਾ, ਰਤ੍ਤਿਮ੍ਪਿ ਤਥੇਵ ਤਂ ਮਨਸਿ ਕਰੋਤਿ. ਯਥਾ ਰਤ੍ਤਿਂ ਤਥਾ ਦਿਵਾਤਿ ਯਥਾ ਵਾਨੇਨ ਰਤ੍ਤਿਂ ਆਲੋਕਸਞ੍ਞਾ ਮਨਸਿਕਤਾ, ਦਿਵਾਪਿ ਤਂ ਤਥੇਵ ਮਨਸਿ ਕਰੋਤਿ. ਵਿਵਟੇਨਾਤਿ ਪਾਕਟੇਨ. ਅਪਰਿਯੋਨਦ੍ਧੇਨਾਤਿ ਨੀਵਰਣੇਹਿ ਅਨੋਨਦ੍ਧੇਨ. ਸਪ੍ਪਭਾਸਂ ਚਿਤ੍ਤਂ ਭਾਵੇਤੀਤਿ ਦਿਬ੍ਬਚਕ੍ਖੁਞਾਣਤ੍ਥਾਯ ਸਹੋਭਾਸਕਂ ਚਿਤ੍ਤਂ ਬ੍ਰੂਹੇਤਿ ਵਡ੍ਢੇਤਿ. ਯਂ ਪਨ ‘‘ਆਲੋਕਸਞ੍ਞਂ ਮਨਸਿ ਕਰੋਤੀ’’ਤਿ ਵੁਤ੍ਤਂ, ਤਂ ਥਿਨਮਿਦ੍ਧਵਿਨੋਦਨਾਲੋਕਸਞ੍ਞਂ ਸਨ੍ਧਾਯ ਵੁਤ੍ਤਂ, ਨ ਦਿਬ੍ਬਚਕ੍ਖੁਞਾਣਾਲੋਕਨ੍ਤਿ ਵੇਦਿਤਬ੍ਬਂ. ਞਾਣਦਸ੍ਸਨਪ੍ਪਟਿਲਾਭਾਯਾਤਿ ਦਿਬ੍ਬਚਕ੍ਖੁਸਙ੍ਖਾਤਸ੍ਸ ਞਾਣਦਸ੍ਸਨਸ੍ਸ ਪਟਿਲਾਭਾਯ.
ਇਮਮੇਵ ਕਾਯਨ੍ਤਿਆਦੀਸੁ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਸਬ੍ਬਾਕਾਰੇਨ ਵਿਤ੍ਥਾਰਤੋ ਵਿਸੁਦ੍ਧਿਮਗ੍ਗੇ ਕਾਯਗਤਾਸਤਿਕਮ੍ਮਟ੍ਠਾਨੇ ਵੁਤ੍ਤਂ. ਕਾਮਰਾਗਪ੍ਪਹਾਨਾਯਾਤਿ ਪਞ੍ਚਕਾਮਗੁਣਿਕਸ੍ਸ ਰਾਗਸ੍ਸ ਪਹਾਨਤ੍ਥਾਯ. ਸੇਯ੍ਯਥਾਪਿ ਪਸ੍ਸੇਯ੍ਯਾਤਿ ਯਥਾ ਪਸ੍ਸੇਯ੍ਯ. ਸਰੀਰਨ੍ਤਿ ਮਤਸਰੀਰਂ. ਸਿਵਥਿਕਾਯ ਛਡ੍ਡਿਤਨ੍ਤਿ ਸੁਸਾਨੇ ਅਪਵਿਦ੍ਧਂ. ਏਕਾਹਂ ਮਤਸ੍ਸ ਅਸ੍ਸਾਤਿ ਏਕਾਹਮਤਂ. ਦ੍ਵੀਹਂ ਮਤਸ੍ਸ ਅਸ੍ਸਾਤਿ ਦ੍ਵੀਹਮਤਂ. ਤੀਹਂ ਮਤਸ੍ਸ ਅਸ੍ਸਾਤਿ ਤੀਹਮਤਂ. ਭਸ੍ਤਾ ਵਿਯ ਵਾਯੁਨਾ ਉਦ੍ਧਂ ਜੀਵਿਤਪਰਿਯਾਦਾਨਾ ਯਥਾਨੁਕ੍ਕਮਂ ਸਮੁਗ੍ਗਤੇਨ ਸੂਨਭਾਵੇਨ ਧੁਮਾਤਤ੍ਤਾ ਉਦ੍ਧੁਮਾਤਂ, ਉਦ੍ਧੁਮਾਤਮੇਵ ਉਦ੍ਧੁਮਾਤਕਂ. ਪਟਿਕੂਲਤ੍ਤਾ ਵਾ ਕੁਚ੍ਛਿਤਂ ਉਦ੍ਧੁਮਾਤਨ੍ਤਿ ਉਦ੍ਧੁਮਾਤਕਂ. ਵਿਨੀਲਂ ਵੁਚ੍ਚਤਿ ਵਿਪਰਿਭਿਨ੍ਨਵਣ੍ਣਂ, ਵਿਨੀਲਮੇਵ ਵਿਨੀਲਕਂ. ਪਟਿਕੂਲਤ੍ਤਾ ਵਾ ਕੁਚ੍ਛਿਤਂ ਵਿਨੀਲਨ੍ਤਿ ਵਿਨੀਲਕਂ. ਮਂਸੁਸ੍ਸਦਟ੍ਠਾਨੇਸੁ ਰਤ੍ਤਵਣ੍ਣਸ੍ਸ ਪੁਬ੍ਬਸਨ੍ਨਿਚਯਟ੍ਠਾਨੇਸੁ ਸੇਤਵਣ੍ਣਸ੍ਸ ਯੇਭੁਯ੍ਯੇਨ ਚ ਨੀਲਵਣ੍ਣਸ੍ਸ ਨੀਲਟ੍ਠਾਨੇ ਨੀਲਸਾਟਕਪਾਰੁਤਸ੍ਸੇਵ ਛਵਸਰੀਰਸ੍ਸੇਤਂ ਅਧਿਵਚਨਂ. ਪਰਿਭਿਨ੍ਨਟ੍ਠਾਨੇਹਿ ਨਵਹਿ ਵਾ ਵਣਮੁਖੇਹਿ ਵਿਸ੍ਸਨ੍ਦਮਾਨਂ ਪੁਬ੍ਬਂ ਵਿਪੁਬ੍ਬਂ, ਵਿਪੁਬ੍ਬਮੇਵ ਵਿਪੁਬ੍ਬਕਂ. ਪਟਿਕੂਲਤ੍ਤਾ ਵਾ ਕੁਚ੍ਛਿਤਂ ਵਿਪੁਬ੍ਬਨ੍ਤਿ ਵਿਪੁਬ੍ਬਕਂ. ਵਿਪੁਬ੍ਬਕਂ ਜਾਤਂ ਤਥਾਭਾਵਂ ਗਤਨ੍ਤਿ ਵਿਪੁਬ੍ਬਕਜਾਤਂ.
ਸੋ ਇਮਮੇਵ ਕਾਯਨ੍ਤਿ ਸੋ ਭਿਕ੍ਖੁ ਇਮਂ ਅਤ੍ਤਨੋ ਕਾਯਂ ਤੇਨ ਕਾਯੇਨ ਸਦ੍ਧਿਂ ਞਾਣੇਨ ਉਪਸਂਹਰਤਿ ਉਪਨੇਤਿ. ਕਥਂ? ਅਯਮ੍ਪਿ ਖੋ ਕਾਯੋ ਏਵਂਧਮ੍ਮੋ ਏਵਂਭਾਵੀ ਏਵਂਅਨਤੀਤੋਤਿ. ਇਦਂ ਵੁਤ੍ਤਂ ਹੋਤਿ – ਆਯੁ ਉਸ੍ਮਾ ਵਿਞ੍ਞਾਣਨ੍ਤਿ ਇਮੇਸਂ ਤਿਣ੍ਣਂ ਧਮ੍ਮਾਨਂ ਅਤ੍ਥਿਤਾਯ ਅਯਂ ਕਾਯੋ ਠਾਨਗਮਨਾਦਿਖਮੋ ਹੋਤਿ, ਇਮੇਸਂ ਪਨ ਵਿਗਮਾ ਅਯਮ੍ਪਿ ਏਵਂਧਮ੍ਮੋ ਏਵਂਪੂਤਿਕਸਭਾਵੋਯੇਵਾਤਿ. ਏਵਂਭਾਵੀਤਿ ਏਵਮੇਵਂ ਉਦ੍ਧੁਮਾਤਾਦਿਭੇਦੋ ਭਵਿਸ੍ਸਤਿ. ਏਵਂ ਅਨਤੀਤੋਤਿ ਏਵਂ ਉਦ੍ਧੁਮਾਤਾਦਿਭਾਵਂ ਅਨਤਿਕ੍ਕਨ੍ਤੋ.
ਖਜ੍ਜਮਾਨਨ੍ਤਿ ਉਦਰਾਦੀਸੁ ਨਿਸੀਦਿਤ੍ਵਾ ਉਦਰਮਂਸਓਟ੍ਠਮਂਸਅਕ੍ਖਿਕਮਂਸਾਦੀਨਿ ਲੁਞ੍ਚਿਤ੍ਵਾ ਲੁਞ੍ਚਿਤ੍ਵਾ ਖਾਦਿਯਮਾਨਂ. ਸਮਂਸਲੋਹਿਤਨ੍ਤਿ ਸੇਸਾਵਸੇਸਮਂਸਲੋਹਿਤਯੁਤ੍ਤਂ. ਨਿਮ੍ਮਂਸਲੋਹਿਤਮਕ੍ਖਿਤਨ੍ਤਿ ਮਂਸੇ ਖੀਣੇਪਿ ਲੋਹਿਤਂ ਨ ਸੁਸ੍ਸਤਿ, ਤਂ ਸਨ੍ਧਾਯ ਵੁਤ੍ਤਂ – ‘‘ਨਿਮ੍ਮਂਸਲੋਹਿਤਮਕ੍ਖਿਤ’’ਨ੍ਤਿ. ਅਞ੍ਞੇਨਾਤਿ ਅਞ੍ਞੇਨ ਦਿਸਾਭਾਗੇਨ. ਹਤ੍ਥਟ੍ਠਿਕਨ੍ਤਿ ਚਤੁਸਟ੍ਠਿਭੇਦਮ੍ਪਿ ਹਤ੍ਥਟ੍ਠਿਕਂ ਪਾਟਿਯੇਕ੍ਕਂ ਪਾਟਿਯੇਕ੍ਕਂ ਵਿਪ੍ਪਕਿਣ੍ਣਂ. ਪਾਦਟ੍ਠਿਕਾਦੀਸੁਪਿ ਏਸੇਵ ਨਯੋ. ਤੇਰੋਵਸ੍ਸਿਕਾਨੀਤਿ ਅਤਿਕ੍ਕਨ੍ਤਸਂਵਚ੍ਛਰਾਨਿ. ਪੂਤੀਨੀਤਿ ਅਬ੍ਭੋਕਾਸੇ ਠਿਤਾਨਿ ਵਾਤਾਤਪਵੁਟ੍ਠਿਸਮ੍ਫਸ੍ਸੇਨ ਤੇਰੋਵਸ੍ਸਿਕਾਨੇਵ ਪੂਤੀਨਿ ਹੋਨ੍ਤਿ, ਅਨ੍ਤੋਭੂਮਿਗਤਾਨਿ ਪਨ ਚਿਰਤਰਂ ਤਿਟ੍ਠਨ੍ਤਿ. ਚੁਣ੍ਣਕਜਾਤਾਨੀਤਿ ਚੁਣ੍ਣਵਿਚੁਣ੍ਣਂ ਹੁਤ੍ਵਾ ਵਿਪ੍ਪਕਿਣ੍ਣਾਨਿ. ਸਬ੍ਬਤ੍ਥ ਸੋ ਇਮਮੇਵਾਤਿ ਵੁਤ੍ਤਨਯੇਨ ਖਜ੍ਜਮਾਨਾਦੀਨਂ ਵਸੇਨ ਯੋਜਨਾ ਕਾਤਬ੍ਬਾ. ਅਸ੍ਮਿਮਾਨਸਮੁਗ੍ਘਾਤਾਯਾਤਿ ਅਸ੍ਮੀਤਿ ਪਵਤ੍ਤਸ੍ਸ ਨਵਵਿਧਸ੍ਸ ਮਾਨਸ੍ਸ ਸਮੁਗ੍ਘਾਤਤ੍ਥਾਯ. ਅਨੇਕਧਾਤੁਪਟਿਵੇਧਾਯਾਤਿ ਅਨੇਕਧਾਤੂਨਂ ਪਟਿਵਿਜ੍ਝਨਤ੍ਥਾਯ. ਸਤੋਵ ਅਭਿਕ੍ਕਮਤੀਤਿ ਗਚ੍ਛਨ੍ਤੋ ਸਤਿਪਞ੍ਞਾਹਿ ਸਮਨ੍ਨਾਗਤੋਵ ਗਚ੍ਛਤਿ. ਸਤੋਵ ਪਟਿਕ੍ਕਮਤੀਤਿ ਪਟਿਨਿਵਤ੍ਤਨ੍ਤੋਪਿ ਸਤਿਪਞ੍ਞਾਹਿ ਸਮਨ੍ਨਾਗਤੋਵ ਨਿਵਤ੍ਤਤਿ. ਸੇਸਪਦੇਸੁਪਿ ਏਸੇਵ ਨਯੋ. ਸਤਿਸਮ੍ਪਜਞ੍ਞਾਯਾਤਿ ਸਤਿਯਾ ਚ ਞਾਣਸ੍ਸ ਚ ਅਤ੍ਥਾਯ. ਇਤਿ ਇਮਸ੍ਮਿਂ ਸੁਤ੍ਤੇ ਸਤਿਞਾਣਾਨਿ ਮਿਸ੍ਸਕਾਨਿ ਕਥਿਤਾਨੀਤਿ.
੧੦. ਅਨੁਤ੍ਤਰਿਯਸੁਤ੍ਤਵਣ੍ਣਨਾ
੩੦. ਦਸਮੇ ਉਚ੍ਚਾਵਚਨ੍ਤਿ ਯਂ ਕਿਞ੍ਚਿ ਮਹਨ੍ਤਖੁਦ੍ਦਕਂ, ਉਚ੍ਚਨੀਚਂ ਵਾ. ਹੀਨਨ੍ਤਿ ਨਿਹੀਨਂ. ਗਮ੍ਮਨ੍ਤਿ ਗਾਮਵਾਸਿਕਾਨਂ ਦਸ੍ਸਨਂ. ਪੋਥੁਜ੍ਜਨਿਕਨ੍ਤਿ ਪੁਥੁਜ੍ਜਨਾਨਂ ਸਨ੍ਤਕਂ. ਅਨਰਿਯਨ੍ਤਿ ਨ ਅਰਿਯਂ ਨ ਉਤ੍ਤਮਂ ਨ ਪਰਿਸੁਦ੍ਧਂ. ਅਨਤ੍ਥਸਂਹਿਤਨ੍ਤਿ ਨ ਅਤ੍ਥਸਨ੍ਨਿਸ੍ਸਿਤਂ. ਨ ਨਿਬ੍ਬਿਦਾਯਾਤਿ ਨ ਵਟ੍ਟੇ ਨਿਬ੍ਬਿਨ੍ਦਨਤ੍ਥਾਯ. ਨ ਵਿਰਾਗਾਯਾਤਿ ਨ ਰਾਗਾਦੀਨਂ ਵਿਰਜ੍ਜਨਤ੍ਥਾਯ. ਨ ਨਿਰੋਧਾਯਾਤਿ ਨ ਰਾਗਾਦੀਨਂ ਅਪ੍ਪਵਤ੍ਤਿਨਿਰੋਧਾਯ. ਨ ਉਪਸਮਾਯਾਤਿ ਨ ਰਾਗਾਦੀਨਂ ਵੂਪਸਮਨਤ੍ਥਾਯ. ਨ ਅਭਿਞ੍ਞਾਯਾਤਿ ਨ ਅਭਿਜਾਨਨਤ੍ਥਾਯ. ਨ ਸਮ੍ਬੋਧਾਯਾਤਿ ਨ ਸਮ੍ਬੋਧਿਸਙ੍ਖਾਤਸ੍ਸ ਚਤੁਮਗ੍ਗਞਾਣਸ੍ਸ ਪਟਿਵਿਜ੍ਝਨਤ੍ਥਾਯ. ਨ ਨਿਬ੍ਬਾਨਾਯਾਤਿ ਨ ਨਿਬ੍ਬਾਨਸ੍ਸ ਸਚ੍ਛਿਕਿਰਿਯਾਯ.
ਨਿਵਿਟ੍ਠਸਦ੍ਧੋਤਿ ਪਤਿਟ੍ਠਿਤਸਦ੍ਧੋ. ਨਿਵਿਟ੍ਠਪੇਮੋਤਿ ਪਤਿਟ੍ਠਿਤਪੇਮੋ. ਏਕਨ੍ਤਗਤੋਤਿ ਏਕਨ੍ਤਂ ਗਤੋ, ਅਚਲਪ੍ਪਤ੍ਤੋਤਿ ਅਤ੍ਥੋ. ਅਭਿਪ੍ਪਸਨ੍ਨੋਤਿ ਅਤਿਵਿਯ ਪਸਨ੍ਨੋ. ਏਤਦਾਨੁਤ੍ਤਰਿਯਨ੍ਤਿ ਏਤਂ ਅਨੁਤ੍ਤਰਂ. ਹਤ੍ਥਿਸ੍ਮਿਮ੍ਪਿ ਸਿਕ੍ਖਤੀਤਿ ਹਤ੍ਥਿਨਿਮਿਤ੍ਤਂ ਸਿਕ੍ਖਿਤਬ੍ਬਂ ਹਤ੍ਥਿਸਿਪ੍ਪਂ ਸਿਕ੍ਖਤਿ. ਸੇਸਪਦੇਸੁਪਿ ਏਸੇਵ ਨਯੋ. ਉਚ੍ਚਾਵਚਨ੍ਤਿ ਮਹਨ੍ਤਖੁਦ੍ਦਕਂ ਸਿਪ੍ਪਂ ਸਿਕ੍ਖਤਿ.
ਉਪਟ੍ਠਿਤਾ ਪਾਰਿਚਰਿਯੇਤਿ ਪਾਰਿਚਰਿਯਾਯ ਪਚ੍ਚੁਪਟ੍ਠਿਤਾ. ਭਾਵਯਨ੍ਤਿ ਅਨੁਸ੍ਸਤਿਨ੍ਤਿ ਅਨੁਤ੍ਤਰਂ ਅਨੁਸ੍ਸਤਿਂ ਭਾਵੇਨ੍ਤਿ. ਵਿਵੇਕਪ੍ਪਟਿਸਂਯੁਤ੍ਤਨ੍ਤਿ ਨਿਬ੍ਬਾਨਨਿਸ੍ਸਿਤਂ ਕਤ੍ਵਾ. ਖੇਮਨ੍ਤਿ ਨਿਰੁਪਦ੍ਦਵਂ. ਅਮਤਗਾਮਿਨਨ੍ਤਿ ਨਿਬ੍ਬਾਨਗਾਮਿਨਂ, ਅਰਿਯਮਗ੍ਗਂ ਭਾਵੇਨ੍ਤੀਤਿ ਅਤ੍ਥੋ. ਅਪ੍ਪਮਾਦੇ ਪਮੋਦਿਤਾਤਿ ਸਤਿਯਾ ਅਵਿਪ੍ਪਵਾਸਸਙ੍ਖਾਤੇ ਅਪ੍ਪਮਾਦੇ ਆਮੋਦਿਤਾ ਪਮੋਦਿਤਾ. ਨਿਪਕਾਤਿ ਨੇਪਕ੍ਕੇਨ ਸਮਨ੍ਨਾਗਤਾ. ਸੀਲਸਂਵੁਤਾਤਿ ਸੀਲੇਨ ਸਂਵੁਤਾ ਪਿਹਿਤਾ. ਤੇ ਵੇ ਕਾਲੇਨ ਪਚ੍ਚੇਨ੍ਤੀਤਿ ਤੇ ਵੇ ਯੁਤ੍ਤਪ੍ਪਯੁਤ੍ਤਕਾਲੇ ਜਾਨਨ੍ਤਿ. ਯਤ੍ਥ ਦੁਕ੍ਖਂ ਨਿਰੁਜ੍ਝਤੀਤਿ ਯਸ੍ਮਿਂ ਠਾਨੇ ਸਕਲਂ ਵਟ੍ਟਦੁਕ੍ਖਂ ਨਿਰੁਜ੍ਝਤਿ, ਤਂ ਅਮਤਂ ਮਹਾਨਿਬ੍ਬਾਨਂ ਤੇ ਭਿਕ੍ਖੂ ਜਾਨਨ੍ਤੀਤਿ. ਇਮਸ੍ਮਿਂ ਸੁਤ੍ਤੇ ਛ ਅਨੁਤ੍ਤਰਿਯਾਨਿ ਮਿਸ੍ਸਕਾਨਿ ਕਥਿਤਾਨੀਤਿ.
ਅਨੁਤ੍ਤਰਿਯਵਗ੍ਗੋ ਤਤਿਯੋ.
੪. ਦੇਵਤਾਵਗ੍ਗੋ
੧. ਸੇਖਸੁਤ੍ਤਵਣ੍ਣਨਾ
੩੧. ਚਤੁਤ੍ਥਸ੍ਸ ਪਠਮੇ ਸੇਖਸ੍ਸਾਤਿ ਸਤ੍ਤਵਿਧਸ੍ਸ ਸੇਖਸ੍ਸ. ਪੁਥੁਜ੍ਜਨੇ ਪਨ ਵਤ੍ਤਬ੍ਬਮੇਵ ਨਤ੍ਥਿ. ਪਰਿਹਾਨਾਯਾਤਿ ਉਪਰੂਪਰਿਗੁਣਪਰਿਹਾਨਾਯ.
੨-੩. ਅਪਰਿਹਾਨਸੁਤ੍ਤਦ੍ਵਯਵਣ੍ਣਨਾ
੩੨-੩੩. ਦੁਤਿਯੇ ਸਤ੍ਥੁਗਾਰਵਤਾਤਿ ਸਤ੍ਥਰਿ ਗਰੁਭਾਵੋ. ਧਮ੍ਮਗਾਰਵਤਾਤਿ ਨਵਵਿਧੇ ਲੋਕੁਤ੍ਤਰਧਮ੍ਮੇ ਗਰੁਭਾਵੋ. ਸਙ੍ਘਗਾਰਵਤਾਤਿ ਸਙ੍ਘੇ ਗਰੁਭਾਵੋ. ਸਿਕ੍ਖਾਗਾਰਵਤਾਤਿ ਤੀਸੁ ਸਿਕ੍ਖਾਸੁ ਗਰੁਭਾਵੋ. ਅਪ੍ਪਮਾਦਗਾਰਵਤਾਤਿ ਅਪ੍ਪਮਾਦੇ ਗਰੁਭਾਵੋ. ਪਟਿਸਨ੍ਥਾਰਗਾਰਵਤਾਤਿ ਧਮ੍ਮਾਮਿਸਵਸੇਨ ਦੁਵਿਧੇ ਪਟਿਸਨ੍ਥਾਰੇ ਗਰੁਭਾਵੋ. ਸਤ੍ਥਾ ਗਰੁ ਅਸ੍ਸਾਤਿ ਸਤ੍ਥੁਗਰੁ. ਧਮ੍ਮੋ ਗਰੁ ਅਸ੍ਸਾਤਿ ਧਮ੍ਮਗਰੁ. ਤਿਬ੍ਬਗਾਰਵੋਤਿ ਬਹਲਗਾਰਵੋ. ਪਟਿਸਨ੍ਥਾਰੇ ਗਾਰਵੋ ਅਸ੍ਸਾਤਿ ਪਟਿਸਨ੍ਥਾਰਗਾਰਵੋ. ਤਤਿਯੇ ਸਪ੍ਪਤਿਸ੍ਸੋਤਿ ਸਜੇਟ੍ਠਕੋ ਸਗਾਰਵੋ. ਹਿਰੋਤ੍ਤਪ੍ਪਂ ਪਨੇਤ੍ਥ ਮਿਸ੍ਸਕਂ ਕਥਿਤਂ.
੪. ਮਹਾਮੋਗ੍ਗਲ੍ਲਾਨਸੁਤ੍ਤਵਣ੍ਣਨਾ
੩੪. ਚਤੁਤ੍ਥੇ ਤਿਸ੍ਸੋ ਨਾਮ ਭਿਕ੍ਖੂਤਿ ਥੇਰਸ੍ਸੇਵ ਸਦ੍ਧਿਵਿਹਾਰਿਕੋ. ਮਹਿਦ੍ਧਿਕੋ ਮਹਾਨੁਭਾਵੋਤਿ ਇਜ੍ਝਨਟ੍ਠੇਨ ਮਹਤੀ ਇਦ੍ਧਿ ਅਸ੍ਸਾਤਿ ਮਹਿਦ੍ਧਿਕੋ. ਅਨੁਫਰਣਟ੍ਠੇਨ ਮਹਾ ਆਨੁਭਾਵੋ ਅਸ੍ਸਾਤਿ ਮਹਾਨੁਭਾਵੋ. ਚਿਰਸ੍ਸਂ ਖੋ, ਮਾਰਿਸ ਮੋਗ੍ਗਲ੍ਲਾਨ, ਇਮਂ ਪਰਿਯਾਯਮਕਾਸੀਤਿ ਏਵਰੂਪਂ ਲੋਕੇ ਪਕਤਿਯਾ ਪਿਯਸਮੁਦਾਹਾਰਵਚਨਂ ਹੋਤਿ. ਲੋਕਿਯਾ ਹਿ ਚਿਰਸ੍ਸਂ ਆਗਤਮ੍ਪਿ ਅਨਾਗਤਪੁਬ੍ਬਮ੍ਪਿ ਮਨਾਪਜਾਤਿਯਂ ਆਗਤਂ ਦਿਸ੍ਵਾ ‘‘ਕੁਤੋ ਭਵਂ ਆਗਤੋ, ਚਿਰਸ੍ਸਂ ਭਵਂ ਆਗਤੋ, ਕਥਂ ਤੇ ਇਧਾਗਮਨਮਗ੍ਗੋ ਞਾਤੋ, ਕਿਂ ਮਗ੍ਗਮੂਲ਼੍ਹੋਸੀ’’ਤਿਆਦੀਨਿ ਵਦਨ੍ਤਿ. ਅਯਂ ਪਨ ਆਗਤਪੁਬ੍ਬਤ੍ਤਾਯੇਵ ਏਵਮਾਹ. ਥੇਰੋ ਹਿ ਕਾਲੇਨ ਕਾਲਂ ਬ੍ਰਹ੍ਮਲੋਕਂ ਗਚ੍ਛਤਿਯੇਵ. ਤਤ੍ਥ ਪਰਿਯਾਯਮਕਾਸੀਤਿ ਵਾਰਂ ਅਕਾਸਿ. ਯਦਿਦਂ ਇਧਾਗਮਨਾਯਾਤਿ ਯੋ ਅਯਂ ਇਧਾਗਮਨਾਯ ਵਾਰੋ, ਤਂ ਚਿਰਸ੍ਸਂ ਅਕਾਸੀਤਿ ਵੁਤ੍ਤਂ ਹੋਤਿ. ਇਦਮਾਸਨਂ ਪਞ੍ਞਤ੍ਤਨ੍ਤਿ ਮਹਾਰਹਂ ਬ੍ਰਹ੍ਮਪਲ੍ਲਙ੍ਕਂ ਪਞ੍ਞਾਪੇਤ੍ਵਾ ਏਵਮਾਹ. ਅਵੇਚ੍ਚਪ੍ਪਸਾਦੇਨਾਤਿ ਅਧਿਗਤੇਨ ਅਚਲੇਨ ਮਗ੍ਗਪ੍ਪਸਾਦੇਨ. ਇਮਸ੍ਮਿਂ ਸੁਤ੍ਤੇ ਸੋਤਾਪਤ੍ਤਿਮਗ੍ਗਞਾਣਂ ਕਥਿਤਂ.
੫. ਵਿਜ੍ਜਾਭਾਗਿਯਸੁਤ੍ਤਵਣ੍ਣਨਾ
੩੫. ਪਞ੍ਚਮੇ ਵਿਜ੍ਜਾਭਾਗਿਯਾਤਿ ਵਿਜ੍ਜਾਕੋਟ੍ਠਾਸਿਕਾ. ਅਨਿਚ੍ਚਸਞ੍ਞਾਤਿ ਅਨਿਚ੍ਚਾਨੁਪਸ੍ਸਨਾਞਾਣੇ ਉਪ੍ਪਨ੍ਨਸਞ੍ਞਾ. ਅਨਿਚ੍ਚੇ ਦੁਕ੍ਖਸਞ੍ਞਾਤਿ ਦੁਕ੍ਖਾਨੁਪਸ੍ਸਨਾਞਾਣੇ ਉਪ੍ਪਨ੍ਨਸਞ੍ਞਾ. ਦੁਕ੍ਖੇ ਅਨਤ੍ਤਸਞ੍ਞਾਤਿ ਅਨਤ੍ਤਾਨੁਪਸ੍ਸਨਾਞਾਣੇ ਉਪ੍ਪਨ੍ਨਸਞ੍ਞਾ. ਪਹਾਨਸਞ੍ਞਾਤਿ ਪਹਾਨਾਨੁਪਸ੍ਸਨਾਞਾਣੇ ਉਪ੍ਪਨ੍ਨਸਞ੍ਞਾ. ਵਿਰਾਗਸਞ੍ਞਾਤਿ ਵਿਰਾਗਾਨੁਪਸ੍ਸਨਾਞਾਣੇ ਉਪ੍ਪਨ੍ਨਸਞ੍ਞਾ. ਨਿਰੋਧਸਞ੍ਞਾਤਿ ਨਿਰੋਧਾਨੁਪਸ੍ਸਨਾਞਾਣੇ ਉਪ੍ਪਨ੍ਨਸਞ੍ਞਾ.
੬. ਵਿਵਾਦਮੂਲਸੁਤ੍ਤਵਣ੍ਣਨਾ
੩੬. ਛਟ੍ਠੇ ਵਿਵਾਦਮੂਲਾਨੀਤਿ ਵਿਵਾਦਸ੍ਸ ਮੂਲਾਨਿ. ਕੋਧਨੋਤਿ ਕੁਜ੍ਝਨਲਕ੍ਖਣੇਨ ਕੋਧੇਨ ਸਮਨ੍ਨਾਗਤੋ. ਉਪਨਾਹੀਤਿ ਵੇਰਅਪ੍ਪਟਿਨਿਸ੍ਸਗ੍ਗਲਕ੍ਖਣੇਨ ਉਪਨਾਹੇਨ ਸਮਨ੍ਨਾਗਤੋ. ਅਹਿਤਾਯ ਦੁਕ੍ਖਾਯ ਦੇਵਮਨੁਸ੍ਸਾਨਨ੍ਤਿ ਦ੍ਵਿਨ੍ਨਂ ਭਿਕ੍ਖੂਨਂ ਵਿਵਾਦੋ ਕਥਂ ਦੇਵਮਨੁਸ੍ਸਾਨਂ ਅਹਿਤਾਯ ਦੁਕ੍ਖਾਯ ਸਂਵਤ੍ਤਤਿ? ਕੋਸਮ੍ਬਕਕ੍ਖਨ੍ਧਕੇ ਵਿਯ ਦ੍ਵੀਸੁ ਭਿਕ੍ਖੂਸੁ ਵਿਵਾਦਂ ਆਪਨ੍ਨੇਸੁ ਤਸ੍ਮਿਂ ਵਿਹਾਰੇ ਤੇਸਂ ਅਨ੍ਤੇਵਾਸਿਕਾ ਵਿਵਦਨ੍ਤਿ, ਤੇਸਂ ਓਵਾਦਂ ਗਣ੍ਹਨ੍ਤੋ ਭਿਕ੍ਖੁਨਿਸਙ੍ਘੋ ਵਿਵਦਤਿ. ਤਤੋ ਤੇਸਂ ਉਪਟ੍ਠਾਕਾ ਵਿਵਦਨ੍ਤਿ, ਅਥ ਮਨੁਸ੍ਸਾਨਂ ਆਰਕ੍ਖਦੇਵਤਾ ਦ੍ਵੇ ਕੋਟ੍ਠਾਸਾ ਹੋਨ੍ਤਿ. ਤਥਾ ਧਮ੍ਮਵਾਦੀਨਂ ਆਰਕ੍ਖਦੇਵਤਾ ਧਮ੍ਮਵਾਦਿਨਿਯੋ ਹੋਨ੍ਤਿ, ਅਧਮ੍ਮਵਾਦੀਨਂ ਅਧਮ੍ਮਵਾਦਿਨਿਯੋ. ਤਤੋ ਆਰਕ੍ਖਦੇਵਤਾਨਂ ਮਿਤ੍ਤਾ ਭੁਮ੍ਮਦੇਵਤਾ ਭਿਜ੍ਜਨ੍ਤਿ. ਏਵਂ ਪਰਮ੍ਪਰਾਯ ਯਾਵ ਬ੍ਰਹ੍ਮਲੋਕਾ ਠਪੇਤ੍ਵਾ ਅਰਿਯਸਾਵਕੇ ਸਬ੍ਬੇ ਦੇਵਮਨੁਸ੍ਸਾ ਦ੍ਵੇ ਕੋਟ੍ਠਾਸਾ ਹੋਨ੍ਤਿ. ਧਮ੍ਮਵਾਦੀਹਿ ਪਨ ਅਧਮ੍ਮਵਾਦਿਨੋਵ ਬਹੁਤਰਾ ਹੋਨ੍ਤਿ. ਤਤੋ ਯਂ ਬਹੁਕੇਹਿ ਗਹਿਤਂ, ਤਂ ਗਚ੍ਛਨ੍ਤਿ. ਧਮ੍ਮਂ ਵਿਸ੍ਸਜ੍ਜੇਤ੍ਵਾ ਬਹੁਤਰਾਵ ਅਧਮ੍ਮਂ ਗਣ੍ਹਨ੍ਤਿ. ਤੇ ਅਧਮ੍ਮਂ ਪੁਰਕ੍ਖਤ੍ਵਾ ਵਿਹਰਨ੍ਤਾ ਅਪਾਯੇ ਨਿਬ੍ਬਤ੍ਤਨ੍ਤਿ. ਏਵਂ ਦ੍ਵਿਨ੍ਨਂ ਭਿਕ੍ਖੂਨਂ ਵਿਵਾਦੋ ਦੇਵਮਨੁਸ੍ਸਾਨਂ ਅਹਿਤਾਯ ਦੁਕ੍ਖਾਯ ਹੋਤਿ. ਅਜ੍ਝਤ੍ਤਂ ਵਾਤਿ ਤੁਮ੍ਹਾਕਂ ਅਬ੍ਭਨ੍ਤਰਪਰਿਸਾਯ. ਬਹਿਦ੍ਧਾਤਿ ਪਰੇਸਂ ਪਰਿਸਾਯ.
ਮਕ੍ਖੀਤਿ ਪਰੇਸਂ ਗੁਣਮਕ੍ਖਨਲਕ੍ਖਣੇਨ ਮਕ੍ਖੇਨ ਸਮਨ੍ਨਾਗਤੋ. ਪਲ਼ਾਸੀਤਿ ਯੁਗਗ੍ਗਾਹਲਕ੍ਖਣੇਨ ਪਲ਼ਾਸੇਨ ਸਮਨ੍ਨਾਗਤੋ. ਇਸ੍ਸੁਕੀਤਿ ਪਰਸ੍ਸ ਸਕ੍ਕਾਰਾਦੀਨਿ ਇਸ੍ਸਾਯਨਲਕ੍ਖਣਾਯ ਇਸ੍ਸਾਯ ਸਮਨ੍ਨਾਗਤੋ. ਮਚ੍ਛਰੀਤਿ ਆਵਾਸਮਚ੍ਛਰਿਯਾਦੀਹਿ ਸਮਨ੍ਨਾਗਤੋ. ਸਠੋਤਿ ਕੇਰਾਟਿਕੋ. ਮਾਯਾਵੀਤਿ ਕਤਪਟਿਚ੍ਛਾਦਕੋ. ਪਾਪਿਚ੍ਛੋਤਿ ਅਸਨ੍ਤਸਮ੍ਭਾਵਨਿਚ੍ਛਕੋ ਦੁਸ੍ਸੀਲੋ. ਮਿਚ੍ਛਾਦਿਟ੍ਠੀਤਿ ਨਤ੍ਥਿਕਵਾਦੀ, ਅਹੇਤੁਵਾਦੀ, ਅਕਿਰਿਯਵਾਦੀ. ਸਨ੍ਦਿਟ੍ਠਿਪਰਾਮਾਸੀਤਿ ਸਯਂ ਦਿਟ੍ਠਮੇਵ ਪਰਾਮਸਤਿ. ਆਧਾਨਗ੍ਗਾਹੀਤਿ ਦਲ਼੍ਹਗ੍ਗਾਹੀ. ਦੁਪ੍ਪਟਿਨਿਸ੍ਸਗ੍ਗੀਤਿ ਨ ਸਕ੍ਕਾ ਹੋਤਿ ਗਹਿਤਂ ਵਿਸ੍ਸਜ੍ਜਾਪੇਤੁਂ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਂ.
੭. ਦਾਨਸੁਤ੍ਤਵਣ੍ਣਨਾ
੩੭. ਸਤ੍ਤਮੇ ਵੇਲ਼ੁਕਣ੍ਡਕੀਤਿ ਵੇਲ਼ੁਕਣ੍ਡਕਨਗਰਵਾਸਿਨੀ. ਛਲ਼ਙ੍ਗਸਮਨ੍ਨਾਗਤਨ੍ਤਿ ਛਹਿ ਗੁਣਙ੍ਗੇਹਿ ਸਮਨ੍ਨਾਗਤਂ. ਦਕ੍ਖਿਣਂ ਪਤਿਟ੍ਠਾਪੇਤੀਤਿ ਦਾਨਂ ਦੇਤਿ. ਪੁਬ੍ਬੇਵ ਦਾਨਾ ਸੁਮਨੋਤਿ ਦਾਨਂ ਦਸ੍ਸਾਮੀਤਿ ਮਾਸਡ੍ਢਮਾਸਤੋ ਪਟ੍ਠਾਯ ਸੋਮਨਸ੍ਸਪ੍ਪਤ੍ਤੋ ਹੋਤਿ. ਏਤ੍ਥ ਹਿ ਪੁਬ੍ਬੇਚੇਤਨਾ ਦਸ੍ਸਾਮੀਤਿ ਚਿਤ੍ਤੁਪ੍ਪਾਦਕਾਲਤੋ ਪਟ੍ਠਾਯ ‘‘ਇਤੋ ਉਟ੍ਠਿਤੇਨ ਦਾਨਂ ਦਸ੍ਸਾਮੀ’’ਤਿ ਖੇਤ੍ਤਗ੍ਗਹਣਂ ਆਦਿਂ ਕਤ੍ਵਾ ਚਿਨ੍ਤੇਨ੍ਤਸ੍ਸ ਲਬ੍ਭਤਿ. ਦਦਂ ਚਿਤ੍ਤਂ ਪਸਾਦੇਤੀਤਿ ਏਵਂ ਵੁਤ੍ਤਾ ਮੁਞ੍ਚਚੇਤਨਾ ਪਨ ਦਾਨਕਾਲੇਯੇਵ ਲਬ੍ਭਤਿ. ਦਤ੍ਵਾ ਅਤ੍ਤਮਨੋ ਹੋਤੀਤਿ ਅਯਂ ਪਨ ਅਪਰਚੇਤਨਾ ਅਪਰਾਪਰਂ ਅਨੁਸ੍ਸਰਨ੍ਤਸ੍ਸ ਲਬ੍ਭਤਿ. ਵੀਤਰਾਗਾਤਿ ਵਿਗਤਰਾਗਾ ਖੀਣਾਸਵਾ. ਰਾਗਵਿਨਯਾਯ ਵਾ ਪਟਿਪਨ੍ਨਾਤਿ ਰਾਗਵਿਨਯਪਟਿਪਦਂ ਪਟਿਪਨ੍ਨਾ. ਉਕ੍ਕਟ੍ਠਦੇਸਨਾ ਚੇਸਾ, ਨ ਕੇਵਲਂ ਪਨ ਖੀਣਾਸਵਾਨਂ, ਅਨਾਗਾਮਿ-ਸਕਦਾਗਾਮਿ-ਸੋਤਾਪਨ੍ਨਾਨਮ੍ਪਿ ਅਨ੍ਤਮਸੋ ਤਦਹੁਪਬ੍ਬਜਿਤਸ੍ਸ ਭਣ੍ਡਗਾਹਕਸਾਮਣੇਰਸ੍ਸਾਪਿ ਦਿਨ੍ਨਾ ਦਕ੍ਖਿਣਾ ਛਲ਼ਙ੍ਗਸਮਨ੍ਨਾਗਤਾਵ ਹੋਤਿ. ਸੋਪਿ ਹਿ ਸੋਤਾਪਤ੍ਤਿਮਗ੍ਗਤ੍ਥਮੇਵ ਪਬ੍ਬਜਿਤੋ.
ਯਞ੍ਞਸ੍ਸ ਸਮ੍ਪਦਾਤਿ ਦਾਨਸ੍ਸ ਪਰਿਪੁਣ੍ਣਤਾ. ਸਞ੍ਞਤਾਤਿ ਸੀਲਸਞ੍ਞਮੇਨ ਸਞ੍ਞਤਾ. ਸਯਂ ਆਚਮਯਿਤ੍ਵਾਨਾਤਿ ਅਤ੍ਤਨਾਵ ਹਤ੍ਥਪਾਦੇ ਧੋਵਿਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ. ਸਕੇਹਿ ਪਾਣਿਭੀਤਿ ਅਤ੍ਤਨੋ ਹਤ੍ਥੇਹਿ. ਸਯੇਹੀਤਿਪਿ ਪਾਠੋ. ਸਦ੍ਧੋਤਿ ਰਤਨਤ੍ਤਯਗੁਣੇ ਸਦ੍ਦਹਨ੍ਤੋ. ਮੁਤ੍ਤੇਨ ਚੇਤਸਾਤਿ ਲਾਭਮਚ੍ਛਰਿਯਾਦੀਹਿ ਵਿਮੁਤ੍ਤੇਨ ਚਿਤ੍ਤੇਨ. ਅਬ੍ਯਾਪਜ੍ਝਂ ਸੁਖਂ ਲੋਕਨ੍ਤਿ ਨਿਦ੍ਦੁਕ੍ਖਂ ਉਲ਼ਾਰਸੁਖਸੋਮਨਸ੍ਸਂ ਦੇਵਲੋਕਂ.
੮. ਅਤ੍ਤਕਾਰੀਸੁਤ੍ਤਵਣ੍ਣਨਾ
੩੮. ਅਟ੍ਠਮੇ ਅਦ੍ਦਸਂ ਵਾ ਅਸ੍ਸੋਸਿਂ ਵਾਤਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਮਾ ਅਦ੍ਦਸਂ, ਅਸੁਕਸ੍ਮਿਂ ਨਾਮ ਠਾਨੇ ਵਸਤੀਤਿ ਮਾ ਅਸ੍ਸੋਸਿਂ, ਕਥੇਨ੍ਤਸ੍ਸ ਵਾ ਵਚਨਂ ਮਾ ਅਸ੍ਸੋਸਿਂ. ਕਥਞ੍ਹਿ ਨਾਮਾਤਿ ਕੇਨ ਨਾਮ ਕਾਰਣੇਨ. ਆਰਮ੍ਭਧਾਤੂਤਿ ਆਰਭਨਵਸੇਨ ਪਵਤ੍ਤਵੀਰਿਯਂ. ਨਿਕ੍ਕਮਧਾਤੂਤਿ ਕੋਸਜ੍ਜਤੋ ਨਿਕ੍ਖਮਨਸਭਾਵਂ ਵੀਰਿਯਂ. ਪਰਕ੍ਕਮਧਾਤੂਤਿ ਪਰਕ੍ਕਮਸਭਾਵੋ. ਥਾਮਧਾਤੂਤਿ ਥਾਮਸਭਾਵੋ. ਠਿਤਿਧਾਤੂਤਿ ਠਿਤਿਸਭਾਵੋ. ਉਪਕ੍ਕਮਧਾਤੂਤਿ ਉਪਕ੍ਕਮਸਭਾਵੋ. ਸਬ੍ਬਂ ਚੇਤਂ ਤੇਨ ਤੇਨਾਕਾਰੇਨ ਪਵਤ੍ਤਸ੍ਸ ਵੀਰਿਯਸ੍ਸੇਵ ਨਾਮਂ.
੯-੧੦. ਨਿਦਾਨਸੁਤ੍ਤਾਦਿਵਣ੍ਣਨਾ
੩੯-੪੦. ਨਵਮੇ ਕਮ੍ਮਾਨਨ੍ਤਿ ਵਟ੍ਟਗਾਮਿਕਮ੍ਮਾਨਂ. ਸਮੁਦਯਾਯਾਤਿ ਪਿਣ੍ਡਕਰਣਤ੍ਥਾਯ. ਨਿਦਾਨਨ੍ਤਿ ਪਚ੍ਚਯੋ. ਲੋਭਜੇਨਾਤਿ ਲੋਭਤੋ ਜਾਤੇਨ. ਨ ਪਞ੍ਞਾਯਨ੍ਤੀਤਿ ‘‘ਏਵਰੂਪੇਨ ਕਮ੍ਮੇਨ ਨਿਬ੍ਬਤ੍ਤਾ’’ਤਿ ਨ ਦਿਸ੍ਸਨ੍ਤਿ. ਸੁਕ੍ਕਪਕ੍ਖੇ ਕਮ੍ਮਾਨਨ੍ਤਿ ਵਿਵਟ੍ਟਗਾਮਿਕਮ੍ਮਾਨਂ. ਇਤਿ ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ. ਦਸਮੇ ਨਿਚੁਲਵਨੇਤਿ ਮਹਾਮੁਚਲਿਨ੍ਦਵਨੇ. ਸਦ੍ਧਮ੍ਮੋਤਿ ਸਾਸਨਸਦ੍ਧਮ੍ਮੋ.
੧੧. ਦਾਰੁਕ੍ਖਨ੍ਧਸੁਤ੍ਤਵਣ੍ਣਨਾ
੪੧. ਏਕਾਦਸਮੇ ਚੇਤੋਵਸਿਪ੍ਪਤ੍ਤੋਤਿ ਚਿਤ੍ਤਵਸਿਭਾਵਂ ਪਤ੍ਤੋ. ਪਥਵੀਤ੍ਵੇਵ ਅਧਿਮੁਚ੍ਚੇਯ੍ਯਾਤਿ ਥਦ੍ਧਾਕਾਰਂ ਪਥਵੀਧਾਤੂਤਿ ਸਲ੍ਲਕ੍ਖੇਯ੍ਯ. ਯਂ ਨਿਸ੍ਸਾਯਾਤਿ ਯਂ ਵਿਜ੍ਜਮਾਨਂ ਥਦ੍ਧਾਕਾਰਂ ਪਥਵੀਧਾਤੁਂ ਨਿਸ੍ਸਾਯ ਅਮੁਂ ਦਾਰੁਕ੍ਖਨ੍ਧਂ ਪਥਵੀਤ੍ਵੇਵ ਅਧਿਮੁਚ੍ਚੇਯ੍ਯ, ਸਾ ਏਤ੍ਥ ਪਥਵੀਧਾਤੁ ਅਤ੍ਥੀਤਿ. ਇਮਿਨਾ ਨਯੇਨ ਸੇਸਪਦਾਨਿਪਿ ਵੇਦਿਤਬ੍ਬਾਨਿ. ਯਥੇਵ ਹਿ ਤਸ੍ਮਿਂ ਥਦ੍ਧਾਕਾਰਾ ਪਥਵੀਧਾਤੁ ਅਤ੍ਥਿ, ਏਵਂ ਯੂਸਾਕਾਰਾ ਆਪੋਧਾਤੁ, ਉਣ੍ਹਾਕਾਰਾ ਤੇਜੋਧਾਤੁ, ਵਿਤ੍ਥਮ੍ਭਨਾਕਾਰਾ ਵਾਯੋਧਾਤੁ, ਰਤ੍ਤਵਣ੍ਣਮ੍ਹਿ ਸਾਰੇ ਪਦੁਮਪੁਪ੍ਫਵਣ੍ਣਾ ਸੁਭਧਾਤੁ, ਪੂਤਿਭੂਤੇ ਚੁਣ੍ਣੇ ਚੇਵ ਫੇਗ੍ਗੁਪਪਟਿਕਾਸੁ ਚ ਅਮਨੁਞ੍ਞਵਣ੍ਣਾ ਅਸੁਭਧਾਤੁ, ਤਂ ਨਿਸ੍ਸਾਯ ਅਮੁਂ ਦਾਰੁਕ੍ਖਨ੍ਧਂ ਅਸੁਭਨ੍ਤ੍ਵੇਵ ਅਧਿਮੁਚ੍ਚੇਯ੍ਯ ਸਲ੍ਲਕ੍ਖੇਯ੍ਯਾਤਿ. ਇਮਸ੍ਮਿਂ ਸੁਤ੍ਤੇ ਮਿਸ੍ਸਕਵਿਹਾਰੋ ਨਾਮ ਕਥਿਤੋ.
੧੨. ਨਾਗਿਤਸੁਤ੍ਤਵਣ੍ਣਨਾ
੪੨. ਦ੍ਵਾਦਸਮੇ ਗਾਮਨ੍ਤਵਿਹਾਰਿਨ੍ਤਿ ਗਾਮਨ੍ਤਸੇਨਾਸਨਵਾਸਿਂ. ਸਮਾਹਿਤਂ ਨਿਸਿਨ੍ਨਨ੍ਤਿ ਤਸ੍ਮਿਂ ਗਾਮਨ੍ਤਸੇਨਾਸਨੇ ਸਮਾਧਿਂ ਅਪ੍ਪੇਤ੍ਵਾ ਨਿਸਿਨ੍ਨਂ. ਇਦਾਨਿਮਨ੍ਤਿ ਇਦਾਨਿ ਇਮਂ. ਸਮਾਧਿਮ੍ਹਾ ਚਾਵੇਸ੍ਸਤੀਤਿ ਸਮਾਧਿਤੋ ਉਟ੍ਠਾਪੇਸ੍ਸਤਿ. ਨ ਅਤ੍ਤਮਨੋ ਹੋਮੀਤਿ ਨ ਸਕਮਨੋ ਹੋਮਿ. ਪਚਲਾਯਮਾਨਨ੍ਤਿ ਨਿਦ੍ਦਾਯਮਾਨਂ. ਏਕਤ੍ਤਨ੍ਤਿ ਏਕਸਭਾਵਂ, ਏਕਗ੍ਗਤਾਭੂਤਂ ਅਰਞ੍ਞਸਞ੍ਞਂਯੇਵ ਚਿਤ੍ਤੇ ਕਰਿਸ੍ਸਤੀਤਿ ਅਤ੍ਥੋ. ਅਨੁਰਕ੍ਖਿਸ੍ਸਤੀਤਿ ਅਨੁਗ੍ਗਣ੍ਹਿਸ੍ਸਤਿ. ਅਵਿਮੁਤ੍ਤਂ ਵਾ ਚਿਤ੍ਤਂ ਵਿਮੋਚੇਸ੍ਸਤੀਤਿ ਅਞ੍ਞਸ੍ਮਿਂ ਕਾਲੇ ਅਵਿਮੁਤ੍ਤਂ ਚਿਤ੍ਤਂ ਇਦਾਨਿ ਪਞ੍ਚਹਿ ਵਿਮੁਤ੍ਤੀਹਿ ਵਿਮੋਚਯਿਸ੍ਸਤਿ. ਰਿਞ੍ਚਤੀਤਿ ਵਜ੍ਜੇਤਿ ਵਿਸ੍ਸਜ੍ਜੇਤਿ. ਪਟਿਪਣਾਮੇਤ੍ਵਾਤਿ ਪਨੁਦਿਤ੍ਵਾ ਵਿਸ੍ਸਜ੍ਜੇਤ੍ਵਾ. ਉਚ੍ਚਾਰਪਸ੍ਸਾਵਕਮ੍ਮਾਯਾਤਿ ਉਚ੍ਚਾਰਪਸ੍ਸਾਵਕਰਣਤ੍ਥਾਯ. ਇਮਿਨਾ ਏਤ੍ਤਕੇਨ ਠਾਨੇਨ ਸਤ੍ਥਾਰਾ ਅਰਞ੍ਞਸੇਨਾਸਨਸ੍ਸ ਵਣ੍ਣੋ ਕਥਿਤੋ. ਸੁਤ੍ਤਸ੍ਸ ਪਨ ਪਠਮਕੋਟ੍ਠਾਸੇ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵਾਤਿ.
ਦੇਵਤਾਵਗ੍ਗੋ ਚਤੁਤ੍ਥੋ.
੫. ਧਮ੍ਮਿਕਵਗ੍ਗੋ
੧. ਨਾਗਸੁਤ੍ਤਵਣ੍ਣਨਾ
੪੩. ਪਞ੍ਚਮਸ੍ਸ ਪਠਮੇ ਆਯਸ੍ਮਤਾ ਆਨਨ੍ਦੇਨ ਸਦ੍ਧਿਨ੍ਤਿ ਇਦਂ ‘‘ਆਯਾਮਾਨਨ੍ਦਾ’’ਤਿ ਥੇਰਂ ਆਮਨ੍ਤੇਤ੍ਵਾ ਗਤਤ੍ਤਾ ਵੁਤ੍ਤਂ, ਸਤ੍ਥਾ ਪਨ ਅਨੂਨੇਹਿ ਪਞ੍ਚਹਿ ਭਿਕ੍ਖੁਸਤੇਹਿ ਪਰਿਵੁਤੋ ਤਤ੍ਥ ਅਗਮਾਸੀਤਿ ਵੇਦਿਤਬ੍ਬੋ. ਤੇਨੁਪਸਙ੍ਕਮੀਤਿ ਤੇਹੇਵ ਪਞ੍ਚਹਿ ਭਿਕ੍ਖੁਸਤੇਹਿ ਪਰਿਵੁਤੋ ਉਪਸਙ੍ਕਮਿ. ਪਰਿਸਿਞ੍ਚਿਤ੍ਵਾਤਿ ਵੋਹਾਰਵਚਨਮੇਤਂ, ਨ੍ਹਾਯਿਤ੍ਵਾਤਿ ਅਤ੍ਥੋ. ਪੁਬ੍ਬਾਪਯਮਾਨੋਤਿ ਰਤ੍ਤਦੁਪਟ੍ਟਂ ਨਿਵਾਸੇਤ੍ਵਾ ਉਤ੍ਤਰਾਸਙ੍ਗਚੀਵਰਂ ਦ੍ਵੀਹਿ ਹਤ੍ਥੇਹਿ ਗਹੇਤ੍ਵਾ ਪਚ੍ਛਿਮਲੋਕਧਾਤੁਂ ਪਿਟ੍ਠਿਤੋ ਕਤ੍ਵਾ ਪੁਰਤ੍ਥਿਮਲੋਕਧਾਤੁਂ ਅਭਿਮੁਖੋ ਵੋਦਕਭਾਵੇਨ ਗਤ੍ਤਾਨਿ ਪੁਬ੍ਬਸਦਿਸਾਨਿ ਕੁਰੁਮਾਨੋ ਅਟ੍ਠਾਸੀਤਿ ਅਤ੍ਥੋ. ਭਿਕ੍ਖੁਸਙ੍ਘੋਪਿ ਤੇਨ ਤੇਨ ਠਾਨੇਨ ਓਤਰਿਤ੍ਵਾ ਨ੍ਹਤ੍ਵਾ ਪਚ੍ਚੁਤ੍ਤਰਿਤ੍ਵਾ ਸਤ੍ਥਾਰਂਯੇਵ ਪਰਿਵਾਰੇਤ੍ਵਾ ਅਟ੍ਠਾਸਿ. ਇਤਿ ਤਸ੍ਮਿਂ ਸਮਯੇ ਆਕਾਸਤੋ ਪਤਮਾਨਂ ਰਤ੍ਤਸੁਵਣ੍ਣਕੁਣ੍ਡਲਂ ਵਿਯ ਸੂਰਿਯੋ ਪਚ੍ਛਿਮਲੋਕਧਾਤੁਂ ਪਟਿਪਜ੍ਜਿ, ਪਰਿਸੁਦ੍ਧਰਜਤਮਣ੍ਡਲੋ ਵਿਯ ਪਾਚੀਨਲੋਕਧਾਤੁਤੋ ਚਨ੍ਦੋ ਅਬ੍ਭੁਗ੍ਗਞ੍ਛਿ, ਮਜ੍ਝਟ੍ਠਾਨੇਪਿ ਪਞ੍ਚਭਿਕ੍ਖੁਸਤਪਰਿਵਾਰੋ ਸਮ੍ਮਾਸਮ੍ਬੁਦ੍ਧੋ ਛਬ੍ਬਣ੍ਣਬੁਦ੍ਧਰਸ੍ਮਿਯੋ ਵਿਸ੍ਸਜ੍ਜੇਤ੍ਵਾ ਪੁਬ੍ਬਕੋਟ੍ਠਕਨਦੀਤੀਰੇ ਲੋਕਂ ਅਲਙ੍ਕੁਰੁਮਾਨੋ ਅਟ੍ਠਾਸਿ.
ਤੇਨ ਖੋ ਪਨ ਸਮਯੇਨ…ਪੇ… ਸੇਤੋ ਨਾਮ ਨਾਗੋਤਿ ਸੇਤਵਣ੍ਣਤਾਯ ਏਵਂ ਲਦ੍ਧਨਾਮੋ ਹਤ੍ਥਿਨਾਗੋ. ਮਹਾਤੂਰਿਯਤਾਲ਼ਿਤਵਾਦਿਤੇਨਾਤਿ ਮਹਨ੍ਤੇਨ ਤੂਰਿਯਤਾਲ਼ਿਤਵਾਦਿਤੇਨ. ਤਤ੍ਥ ਪਠਮਂ ਸਙ੍ਘਟ੍ਟਨਂ ਤਾਲ਼ਿਤਂ ਨਾਮ ਹੋਤਿ, ਤਤੋ ਪਰਂ ਵਾਦਿਤਂ. ਜਨੋਤਿ ਹਤ੍ਥਿਦਸ੍ਸਨਤ੍ਥਂ ਸਨ੍ਨਿਪਤਿਤਮਹਾਜਨੋ. ਦਿਸ੍ਵਾ ਏਵਮਾਹਾਤਿ ਅਙ੍ਗਪਚ੍ਚਙ੍ਗਾਨਿ ਘਂਸਿਤ੍ਵਾ ਨ੍ਹਾਪੇਤ੍ਵਾ ਉਤ੍ਤਾਰੇਤ੍ਵਾ ਬਹਿਤੀਰੇ ਠਪੇਤ੍ਵਾ ਗਤ੍ਤਾਨਿ ਵੋਦਕਾਨਿ ਕਤ੍ਵਾ ਹਤ੍ਥਾਲਙ੍ਕਾਰੇਨ ਅਲਙ੍ਕਤਂ ਤਂ ਮਹਾਨਾਗਂ ਦਿਸ੍ਵਾ ਇਦਂ ‘‘ਅਭਿਰੂਪੋ ਵਤ, ਭੋ’’ਤਿ ਪਸਂਸਾਵਚਨਮਾਹ. ਕਾਯੁਪਪਨ੍ਨੋਤਿ ਸਰੀਰਸਮ੍ਪਤ੍ਤਿਯਾ ਉਪਪਨ੍ਨੋ, ਪਰਿਪੁਣ੍ਣਙ੍ਗਪਚ੍ਚਙ੍ਗੋਤਿ ਅਤ੍ਥੋ. ਆਯਸ੍ਮਾ ਉਦਾਯੀਤਿ ਪਟਿਸਮ੍ਭਿਦਾਪ੍ਪਤ੍ਤੋ ਕਾਲ਼ੁਦਾਯਿਤ੍ਥੇਰੋ. ਏਤਦਵੋਚਾਤਿ ਤਂ ਮਹਾਜਨਂ ਹਤ੍ਥਿਸ੍ਸ ਵਣ੍ਣਂ ਭਣਨ੍ਤਂ ਦਿਸ੍ਵਾ ‘‘ਅਯਂ ਜਨੋ ਅਹੇਤੁਕਪਟਿਸਨ੍ਧਿਯਂ ਨਿਬ੍ਬਤ੍ਤਹਤ੍ਥਿਨੋ ਵਣ੍ਣਂ ਕਥੇਤਿ, ਨ ਬੁਦ੍ਧਹਤ੍ਥਿਸ੍ਸ. ਅਹਂ ਦਾਨਿ ਇਮਿਨਾ ਹਤ੍ਥਿਨਾਗੇਨ ਉਪਮਂ ਕਤ੍ਵਾ ਬੁਦ੍ਧਨਾਗਸ੍ਸ ਵਣ੍ਣਂ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਤਂ ‘‘ਹਤ੍ਥਿਮੇਵ ਨੁ ਖੋ, ਭਨ੍ਤੇ’’ਤਿਆਦਿਵਚਨਂ ਅਵੋਚ. ਤਤ੍ਥ ਮਹਨ੍ਤਨ੍ਤਿ ਆਰੋਹਸਮ੍ਪਨ੍ਨਂ. ਬ੍ਰਹਨ੍ਤਨ੍ਤਿ ਪਰਿਣਾਹਸਮ੍ਪਨ੍ਨਂ. ਏਵਮਾਹਾਤਿ ਏਵਂ ਵਦਤਿ. ਅਥ ਭਗਵਾ ਯਸ੍ਮਾ ਅਯਂ ਨਾਗਸਦ੍ਦੋ ਹਤ੍ਥਿਮ੍ਹਿਚੇਵ ਅਸ੍ਸਗੋਣਉਰਗਰੁਕ੍ਖਮਨੁਸ੍ਸੇਸੁ ਚਾਪਿ ਪਵਤ੍ਤਤਿ, ਤਸ੍ਮਾ ਹਤ੍ਥਿਮ੍ਪਿ ਖੋਤਿਆਦਿਮਾਹ.
ਆਗੁਨ੍ਤਿ ਪਾਪਕਂ ਲਾਮਕਂ ਅਕੁਸਲਧਮ੍ਮਂ. ਤਮਹਂ ਨਾਗੋਤਿ ਬ੍ਰੂਮੀਤਿ ਤਂ ਅਹਂ ਇਮੇਹਿ ਤੀਹਿ ਦ੍ਵਾਰੇਹਿ ਦਸਨ੍ਨਂ ਅਕੁਸਲਕਮ੍ਮਪਥਾਨਂ ਦ੍ਵਾਦਸਨ੍ਨਞ੍ਚ ਅਕੁਸਲਚਿਤ੍ਤਾਨਂ ਅਕਰਣਤੋ ਨਾਗੋਤਿ ਵਦਾਮਿ. ਅਯਞ੍ਹਿ ਨ ਆਗੁਂ ਕਰੋਤੀਤਿ ਇਮਿਨਾ ਅਤ੍ਥੇਨ ਨਾਗੋ. ਇਮਾਹਿ ਗਾਥਾਹਿ ਅਨੁਮੋਦਾਮੀਤਿ ਇਮਾਹਿ ਚਤੁਸਟ੍ਠਿਪਦਾਹਿ ਸੋਲ਼ਸਹਿ ਗਾਥਾਹਿ ਅਨੁਮੋਦਾਮਿ ਅਭਿਨਨ੍ਦਾਮਿ.
ਮਨੁਸ੍ਸਭੂਤਨ੍ਤਿ ਦੇਵਾਦਿਭਾਵਂ ਅਨੁਪਗਨ੍ਤ੍ਵਾ ਮਨੁਸ੍ਸਮੇਵ ਭੂਤਂ. ਅਤ੍ਤਦਨ੍ਤਨ੍ਤਿ ਅਤ੍ਤਨਾਯੇਵ ਦਨ੍ਤਂ, ਨ ਅਞ੍ਞੇਹਿ ਦਮਥਂ ਉਪਨੀਤਂ. ਭਗਵਾ ਹਿ ਅਤ੍ਤਨਾ ਉਪ੍ਪਾਦਿਤੇਨੇਵ ਮਗ੍ਗਦਮਥੇਨ ਚਕ੍ਖੁਤੋਪਿ ਦਨ੍ਤੋ, ਸੋਤਤੋਪਿ, ਘਾਨਤੋਪਿ, ਜਿਵ੍ਹਾਤੋਪਿ, ਕਾਯਤੋਪਿ, ਮਨਤੋਪੀਤਿ ਇਮੇਸੁ ਛਸੁ ਠਾਨੇਸੁ ਦਨ੍ਤੋ ਸਨ੍ਤੋ ਨਿਬ੍ਬੁਤੋ ਪਰਿਨਿਬ੍ਬੁਤੋ. ਤੇਨਾਹ – ‘‘ਅਤ੍ਤਦਨ੍ਤ’’ਨ੍ਤਿ. ਸਮਾਹਿਤਨ੍ਤਿ ਦੁਵਿਧੇਨਾਪਿ ਸਮਾਧਿਨਾ ਸਮਾਹਿਤਂ. ਇਰਿਯਮਾਨਨ੍ਤਿ ਵਿਹਰਮਾਨਂ. ਬ੍ਰਹ੍ਮਪਥੇਤਿ ਸੇਟ੍ਠਪਥੇ, ਅਮਤਪਥੇ, ਨਿਬ੍ਬਾਨਪਥੇ. ਚਿਤ੍ਤਸ੍ਸੂਪਸਮੇ ਰਤਨ੍ਤਿ ਪਠਮਜ੍ਝਾਨੇਨ ਪਞ੍ਚ ਨੀਵਰਣਾਨਿ ਵੂਪਸਮੇਤ੍ਵਾ, ਦੁਤਿਯਜ੍ਝਾਨੇਨ ਵਿਤਕ੍ਕਵਿਚਾਰੇ, ਤਤਿਯਜ੍ਝਾਨੇਨ ਪੀਤਿਂ, ਚਤੁਤ੍ਥਜ੍ਝਾਨੇਨ ਸੁਖਦੁਕ੍ਖਂ ਵੂਪਸਮੇਤ੍ਵਾ ਤਸ੍ਮਿਂ ਚਿਤ੍ਤਸ੍ਸੂਪਸਮੇ ਰਤਂ ਅਭਿਰਤਂ.
ਨਮਸ੍ਸਨ੍ਤੀਤਿ ਕਾਯੇਨ ਨਮਸ੍ਸਨ੍ਤਿ, ਵਾਚਾਯ ਨਮਸ੍ਸਨ੍ਤਿ, ਮਨਸਾ ਨਮਸ੍ਸਨ੍ਤਿ, ਧਮ੍ਮਾਨੁਧਮ੍ਮਪਟਿਪਤ੍ਤਿਯਾ ਨਮਸ੍ਸਨ੍ਤਿ, ਸਕ੍ਕਰੋਨ੍ਤਿ ਗਰੁਂ ਕਰੋਨ੍ਤਿ. ਸਬ੍ਬਧਮ੍ਮਾਨਪਾਰਗੁਨ੍ਤਿ ਸਬ੍ਬੇਸਂ ਖਨ੍ਧਾਯਤਨਧਾਤੁਧਮ੍ਮਾਨਂ ਅਭਿਞ੍ਞਾਪਾਰਗੂ, ਪਰਿਞ੍ਞਾਪਾਰਗੂ, ਪਹਾਨਪਾਰਗੂ, ਭਾਵਨਾਪਾਰਗੂ, ਸਚ੍ਛਿਕਿਰਿਯਾਪਾਰਗੂ, ਸਮਾਪਤ੍ਤਿਪਾਰਗੂਤਿ ਛਬ੍ਬਿਧੇਨ ਪਾਰਗਮਨੇਨ ਪਾਰਗਤਂ ਪਾਰਪ੍ਪਤ੍ਤਂ ਮਤ੍ਥਕਪ੍ਪਤ੍ਤਂ. ਦੇਵਾਪਿ ਤਂ ਨਮਸ੍ਸਨ੍ਤੀਤਿ ਦੁਕ੍ਖਪ੍ਪਤ੍ਤਾ ਸੁਬ੍ਰਹ੍ਮਦੇਵਪੁਤ੍ਤਾਦਯੋ ਸੁਖਪ੍ਪਤ੍ਤਾ ਚ ਸਬ੍ਬੇਵ ਦਸਸਹਸ੍ਸਚਕ੍ਕਵਾਲ਼ਵਾਸਿਨੋ ਦੇਵਾਪਿ ਤੁਮ੍ਹੇ ਨਮਸ੍ਸਨ੍ਤਿ. ਇਤਿ ਮੇ ਅਰਹਤੋ ਸੁਤਨ੍ਤਿ ਇਤਿ ਮਯਾ ਚਤੂਹਿ ਕਾਰਣੇਹਿ ਅਰਹਾਤਿ ਲਦ੍ਧਵੋਹਾਰਾਨਂ ਤੁਮ੍ਹਾਕਂਯੇਵ ਸਨ੍ਤਿਕੇ ਸੁਤਨ੍ਤਿ ਦੀਪੇਤਿ.
ਸਬ੍ਬਸਂਯੋਜਨਾਤੀਤਨ੍ਤਿ ਸਬ੍ਬਾਨਿ ਦਸਵਿਧਸਂਯੋਜਨਾਨਿ ਅਤਿਕ੍ਕਨ੍ਤਂ. ਵਨਾ ਨਿਬ੍ਬਨਮਾਗਤਨ੍ਤਿ ਕਿਲੇਸਵਨਤੋ ਨਿਬ੍ਬਨਂ ਕਿਲੇਸਵਨਰਹਿਤਂ ਨਿਬ੍ਬਾਨਂ ਆਗਤਂ ਸਮ੍ਪਤ੍ਤਂ. ਕਾਮੇਹਿ ਨੇਕ੍ਖਮ੍ਮਰਤਨ੍ਤਿ ਦੁਵਿਧੇਹਿ ਕਾਮੇਹਿ ਨਿਕ੍ਖਨ੍ਤਤ੍ਤਾ ਪਬ੍ਬਜ੍ਜਾ ਅਟ੍ਠ ਸਮਾਪਤ੍ਤਿਯੋ ਚਤ੍ਤਾਰੋ ਚ ਅਰਿਯਮਗ੍ਗਾ ਕਾਮੇਹਿ ਨੇਕ੍ਖਮ੍ਮਂ ਨਾਮ, ਤਤ੍ਥ ਰਤਂ ਅਭਿਰਤਂ. ਮੁਤ੍ਤਂ ਸੇਲਾਵ ਕਞ੍ਚਨਨ੍ਤਿ ਸੇਲਧਾਤੁਤੋ ਮੁਤ੍ਤਂ ਕਞ੍ਚਨਸਦਿਸਂ.
ਸਬ੍ਬੇ ਅਚ੍ਚਰੁਚੀਤਿ ਸਬ੍ਬਸਤ੍ਤੇ ਅਤਿਕ੍ਕਮਿਤ੍ਵਾ ਪਵਤ੍ਤਰੁਚਿ. ਅਟ੍ਠਮਕਞ੍ਹਿ ਅਤਿਕ੍ਕਮਿਤ੍ਵਾ ਪਵਤ੍ਤਰੁਚਿਤਾਯ ਸੋਤਾਪਨ੍ਨੋ ਅਚ੍ਚਰੁਚਿ ਨਾਮ, ਸੋਤਾਪਨ੍ਨਂ ਅਤਿਕ੍ਕਮਿਤ੍ਵਾ ਪਵਤ੍ਤਰੁਚਿਤਾਯ ਸਕਦਾਗਾਮੀ…ਪੇ… ਖੀਣਾਸਵਂ ਅਤਿਕ੍ਕਮਿਤ੍ਵਾ ਪਵਤ੍ਤਰੁਚਿਤਾਯ ਪਚ੍ਚੇਕਸਮ੍ਬੁਦ੍ਧੋ, ਪਚ੍ਚੇਕਸਮ੍ਬੁਦ੍ਧਂ ਅਤਿਕ੍ਕਮਿਤ੍ਵਾ ਪਵਤ੍ਤਰੁਚਿਤਾਯ ਸਮ੍ਮਾਸਮ੍ਬੁਦ੍ਧੋ ਅਚ੍ਚਰੁਚਿ ਨਾਮ. ਹਿਮਵਾਵਞ੍ਞੇ ਸਿਲੁਚ੍ਚਯੇਤਿ ਯਥਾ ਹਿਮਵਾ ਪਬ੍ਬਤਰਾਜਾ ਅਞ੍ਞੇ ਪਬ੍ਬਤੇ ਅਤਿਰੋਚਤਿ, ਏਵਂ ਅਤਿਰੋਚਤੀਤਿ ਅਤ੍ਥੋ. ਸਚ੍ਚਨਾਮੋਤਿ ਤਚ੍ਛਨਾਮੋ ਭੂਤਨਾਮੋ ਆਗੁਂ ਅਕਰਣੇਨੇਵ ਨਾਗੋਤਿ ਏਵਂ ਅਵਿਤਥਨਾਮੋ.
ਸੋਰਚ੍ਚਨ੍ਤਿ ਸੁਚਿਸੀਲਂ. ਅਵਿਹਿਂਸਾਤਿ ਕਰੁਣਾ ਚ ਕਰੁਣਾਪੁਬ੍ਬਭਾਗੋ ਚ. ਪਾਦਾ ਨਾਗਸ੍ਸ ਤੇ ਦੁਵੇਤਿ ਤੇ ਬੁਦ੍ਧਨਾਗਸ੍ਸ ਦੁਵੇ ਪੁਰਿਮਪਾਦਾ.
ਤਪੋਤਿ ਧੁਤਸਮਾਦਾਨਂ. ਬ੍ਰਹ੍ਮਚਰਿਯਨ੍ਤਿ ਅਰਿਯਮਗ੍ਗਸੀਲਂ. ਚਰਣਾ ਨਾਗਸ੍ਸ ਤ੍ਯਾਪਰੇਤਿ ਤੇ ਬੁਦ੍ਧਨਾਗਸ੍ਸ ਅਪਰੇ ਦ੍ਵੇ ਪਚ੍ਛਿਮਪਾਦਾ. ਸਦ੍ਧਾਹਤ੍ਥੋਤਿ ਸਦ੍ਧਾਮਯਾਯ ਸੋਣ੍ਡਾਯ ਸਮਨ੍ਨਾਗਤੋ. ਉਪੇਕ੍ਖਾਸੇਤਦਨ੍ਤਵਾਤਿ ਛਲ਼ਙ੍ਗੁਪੇਕ੍ਖਾਮਯੇਹਿ ਸੇਤਦਨ੍ਤੇਹਿ ਸਮਨ੍ਨਾਗਤੋ.
ਸਤਿ ਗੀਵਾਤਿ ਯਥਾ ਨਾਗਸ੍ਸ ਅਙ੍ਗਪਚ੍ਚਙ੍ਗਸ੍ਮਿਂ ਸਿਰਾਜਾਲਾਨਂ ਗੀਵਾ ਪਤਿਟ੍ਠਾ, ਏਵਂ ਬੁਦ੍ਧਨਾਗਸ੍ਸ ਸੋਰਚ੍ਚਾਦੀਨਂ ਧਮ੍ਮਾਨਂ ਸਤਿ. ਤੇਨ ਵੁਤ੍ਤਂ – ‘‘ਸਤਿ ਗੀਵਾ’’ਤਿ. ਸਿਰੋ ਪਞ੍ਞਾਤਿ ਯਥਾ ਹਤ੍ਥਿਨਾਗਸ੍ਸ ਸਿਰੋ ਉਤ੍ਤਮਙ੍ਗੋ, ਏਵਂ ਬੁਦ੍ਧਨਾਗਸ੍ਸ ਸਬ੍ਬਞ੍ਞੁਤਞਾਣਂ. ਤੇਨ ਹਿ ਸੋ ਸਬ੍ਬਧਮ੍ਮੇ ਜਾਨਾਤਿ. ਤੇਨ ਵੁਤ੍ਤਂ – ‘‘ਸਿਰੋ ਪਞ੍ਞਾ’’ਤਿ. ਵੀਮਂਸਾ ਧਮ੍ਮਚਿਨ੍ਤਨਾਤਿ ਯਥਾ ਹਤ੍ਥਿਨਾਗਸ੍ਸ ਅਗ੍ਗਸੋਣ੍ਡੋ ਵੀਮਂਸਾ ਨਾਮ ਹੋਤਿ. ਸੋ ਤਾਯ ਥਦ੍ਧਮੁਦੁਕਂ ਖਾਦਿਤਬ੍ਬਾਖਾਦਿਤਬ੍ਬਞ੍ਚ ਵੀਮਂਸਤਿ, ਤਤੋ ਪਹਾਤਬ੍ਬਂ ਪਜਹਤਿ, ਆਦਾਤਬ੍ਬਂ ਆਦਿਯਤਿ, ਏਵਮੇਵ ਬੁਦ੍ਧਨਾਗਸ੍ਸ ਧਮ੍ਮਕੋਟ੍ਠਾਸਪਰਿਚ੍ਛੇਦਕਞਾਣਸਙ੍ਖਾਤਾ ਧਮ੍ਮਚਿਨ੍ਤਨਾ ਵੀਮਂਸਾ. ਤੇਨ ਹਿ ਞਾਣੇਨ ਸੋ ਭਬ੍ਬਾਭਬ੍ਬੇ ਜਾਨਾਤਿ. ਤੇਨ ਵੁਤ੍ਤਂ – ‘‘ਵੀਮਂਸਾ ਧਮ੍ਮਚਿਨ੍ਤਨਾ’’ਤਿ. ਧਮ੍ਮਕੁਚ੍ਛਿਸਮਾਤਪੋਤਿ ਧਮ੍ਮੋ ਵੁਚ੍ਚਤਿ ਚਤੁਤ੍ਥਜ੍ਝਾਨਸਮਾਧਿ, ਕੁਚ੍ਛਿਯੇਵ ਸਮਾਤਪੋ ਕੁਚ੍ਛਿਸਮਾਤਪੋ. ਸਮਾਤਪੋ ਨਾਮ ਸਮਾਤਪਨਟ੍ਠਾਨਂ. ਧਮ੍ਮੋ ਕੁਚ੍ਛਿਸਮਾਤਪੋ ਅਸ੍ਸਾਤਿ ਧਮ੍ਮਕੁਚ੍ਛਿਸਮਾਤਪੋ. ਚਤੁਤ੍ਥਜ੍ਝਾਨਸਮਾਧਿਸ੍ਮਿਂ ਠਿਤਸ੍ਸ ਹਿ ਤੇ ਤੇ ਇਦ੍ਧਿਵਿਧਾਦਿਧਮ੍ਮਾ ਇਜ੍ਝਨ੍ਤਿ, ਤਸ੍ਮਾ ਸੋ ਕੁਚ੍ਛਿਸਮਾਤਪੋਤਿ ਵੁਤ੍ਤੋ. ਵਿਵੇਕੋਤਿ ਕਾਯਚਿਤ੍ਤਉਪਧਿਵਿਵੇਕੋ. ਯਥਾ ਨਾਗਸ੍ਸ ਵਾਲਧਿ ਮਕ੍ਖਿਕਾ ਵਾਰੇਤਿ, ਏਵਂ ਤਥਾਗਤਸ੍ਸ ਵਿਵੇਕੋ ਗਹਟ੍ਠਪਬ੍ਬਜਿਤੇ ਵਾਰੇਤਿ. ਤਸ੍ਮਾ ਸੋ ਵਾਲਧੀਤਿ ਵੁਤ੍ਤੋ.
ਝਾਯੀਤਿ ਦੁਵਿਧੇਨ ਝਾਨੇਨ ਝਾਯੀ. ਅਸ੍ਸਾਸਰਤੋਤਿ ਨਾਗਸ੍ਸ ਹਿ ਅਸ੍ਸਾਸਪਸ੍ਸਾਸਾ ਵਿਯ ਬੁਦ੍ਧਨਾਗਸ੍ਸ ਫਲਸਮਾਪਤ੍ਤਿ, ਤਤ੍ਥ ਰਤੋ, ਅਸ੍ਸਾਸਪਸ੍ਸਾਸੇਹਿ ਵਿਯ ਤਾਯ ਵਿਨਾ ਨ ਵਤ੍ਤਤੀਤਿ ਅਤ੍ਥੋ. ਸਬ੍ਬਤ੍ਥ ਸਂਵੁਤੋਤਿ ਸਬ੍ਬਦ੍ਵਾਰੇਸੁ ਸਂਵੁਤੋ. ਅਨਵਜ੍ਜਾਨੀਤਿ ਸਮ੍ਮਾਆਜੀਵੇਨ ਉਪ੍ਪਨ੍ਨਭੋਜਨਾਨਿ. ਸਾਵਜ੍ਜਾਨੀਤਿ ਪਞ੍ਚਵਿਧਮਿਚ੍ਛਾਜੀਵਵਸੇਨ ਉਪ੍ਪਨ੍ਨਭੋਜਨਾਨਿ.
ਅਣੁਂਥੂਲਨ੍ਤਿ ਖੁਦ੍ਦਕਞ੍ਚ ਮਹਨ੍ਤਞ੍ਚ. ਸਬ੍ਬਂ ਛੇਤ੍ਵਾਨ ਬਨ੍ਧਨਨ੍ਤਿ ਸਬ੍ਬਂ ਦਸਵਿਧਮ੍ਪਿ ਸਂਯੋਜਨਂ ਛਿਨ੍ਦਿਤ੍ਵਾਨ. ਨੁਪਲਿਪ੍ਪਤਿ ਲੋਕੇਨਾਤਿ ਲੋਕੇਨ ਸਦ੍ਧਿਂ ਤਣ੍ਹਾਮਾਨਦਿਟ੍ਠਿਲੇਪੇਹਿ ਨ ਲਿਪ੍ਪਤਿ. ਮਹਾਗਿਨੀਤਿ ਮਹਾਅਗ੍ਗਿ. ਵਿਞ੍ਞੂਹਿ ਦੇਸਿਤਾਤਿ ਇਧ ਪਟਿਸਮ੍ਭਿਦਾਪ੍ਪਤ੍ਤੋ ਕਾਲ਼ੁਦਾਯਿਤ੍ਥੇਰੋਵ ਵਿਞ੍ਞੂ ਪਣ੍ਡਿਤੋ, ਤੇਨ ਦੇਸਿਤਾਤਿ ਅਤ੍ਥੋ. ਵਿਞ੍ਞਸ੍ਸਨ੍ਤਿ ਮਹਾਨਾਗਾ, ਨਾਗਂ ਨਾਗੇਨ ਦੇਸਿਤਨ੍ਤਿ ਉਦਾਯਿਤ੍ਥੇਰਨਾਗੇਨ ਦੇਸਿਤਂ ਬੁਦ੍ਧਨਾਗਂ ਇਤਰੇ ਖੀਣਾਸਵਾ ਨਾਗਾ ਵਿਜਾਨਿਸ੍ਸਨ੍ਤਿ.
ਸਰੀਰਂ ਵਿਜਹਂ ਨਾਗੋ, ਪਰਿਨਿਬ੍ਬਿਸ੍ਸਤੀਤਿ ਬੋਧਿਪਲ੍ਲਙ੍ਕੇ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ, ਯਮਕਸਾਲਨ੍ਤਰੇ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿਸ੍ਸਤਿ. ਏਵਂ ਪਟਿਸਮ੍ਭਿਦਾਪ੍ਪਤ੍ਤੋ ਉਦਾਯਿਤ੍ਥੇਰੋ ਸੋਲ਼ਸਹਿ ਗਾਥਾਹਿ ਚਤੁਸਟ੍ਠਿਯਾ ਪਦੇਹਿ ਦਸਬਲਸ੍ਸ ਵਣ੍ਣਂ ਕਥੇਨ੍ਤੋ ਦੇਸਨਂ ਨਿਟ੍ਠਾਪੇਸਿ. ਭਗਵਾ ਅਨੁਮੋਦਿ. ਦੇਸਨਾਵਸਾਨੇ ਚਤੁਰਾਸੀਤਿਪਾਣਸਹਸ੍ਸਾਨਿ ਅਮਤਪਾਨਂ ਪਿਵਿਂਸੂਤਿ.
੨. ਮਿਗਸਾਲਾਸੁਤ੍ਤਵਣ੍ਣਨਾ
੪੪. ਦੁਤਿਯੇ ਕਥਂ ਕਥਂ ਨਾਮਾਤਿ ਕੇਨ ਕੇਨ ਕਾਰਣੇਨ. ਅਞ੍ਞੇਯ੍ਯੋਤਿ ਆਜਾਨਿਤਬ੍ਬੋ. ਯਤ੍ਰ ਹਿ ਨਾਮਾਤਿ ਯਸ੍ਮਿਂ ਨਾਮ ਧਮ੍ਮੇ. ਸਮਸਮਗਤਿਕਾਤਿ ਸਮਭਾਵੇਨੇਵ ਸਮਗਤਿਕਾ. ਭਵਿਸ੍ਸਨ੍ਤੀਤਿ ਜਾਤਾ. ਸਕਦਾਗਾਮਿਪਤ੍ਤੋ ਤੁਸਿਤਂ ਕਾਯਂ ਉਪਪਨ੍ਨੋਤਿ ਸਕਦਾਗਾਮਿਪੁਗ੍ਗਲੋ ਹੁਤ੍ਵਾ ਤੁਸਿਤਭਵਨੇਯੇਵ ਨਿਬ੍ਬਤ੍ਤੋ. ਕਥਂ ਕਥਂ ਨਾਮਾਤਿ ਕੇਨ ਕੇਨ ਨੁ ਖੋ ਕਾਰਣੇਨ, ਕਿਂ ਨੁ ਖੋ ਜਾਨਿਤ੍ਵਾ ਦੇਸਿਤੋ, ਉਦਾਹੁ ਅਜਾਨਿਤ੍ਵਾਤਿ. ਥੇਰੋ ਕਾਰਣਂ ਅਜਾਨਨ੍ਤੋ ਏਵਂ ਖੋ ਪਨੇਤਂ ਭਗਿਨਿ ਭਗਵਤਾ ਬ੍ਯਾਕਤਨ੍ਤਿ ਆਹ.
ਅਮ੍ਮਕਾ ਅਮ੍ਮਕਪਞ੍ਞਾਤਿ ਇਤ੍ਥੀ ਹੁਤ੍ਵਾ ਇਤ੍ਥਿਸਞ੍ਞਾਯ ਏਵ ਸਮਨ੍ਨਾਗਤਾ. ਕੇ ਚ ਪੁਰਿਸਪੁਗ੍ਗਲਪਰੋਪਰਿਯਞਾਣੇਤਿ ਏਤ੍ਥ ਪੁਰਿਸਪੁਗ੍ਗਲਪਰੋਪਰਿਯਞਾਣਂ ਵੁਚ੍ਚਤਿ ਪੁਰਿਸਪੁਗ੍ਗਲਾਨਂ ਤਿਕ੍ਖਮੁਦੁਵਸੇਨ ਇਨ੍ਦ੍ਰਿਯਪਰੋਪਰਿਯਞਾਣਂ. ਤਸ੍ਮਾ ਕਾ ਚ ਬਾਲਾ ਮਿਗਸਾਲਾ, ਕੇ ਚ ਪੁਰਿਸਪੁਗ੍ਗਲਾਨਂ ਇਨ੍ਦ੍ਰਿਯਪਰੋਪਰਿਯਞਾਣੇ ਅਪ੍ਪਟਿਹਤਵਿਸਯਾ ਸਮ੍ਮਾਸਮ੍ਬੁਦ੍ਧਾ, ਉਭਯਮੇਤਂ ਦੂਰੇ ਸੁਵਿਦੂਰੇਤਿ ਅਯਮੇਤ੍ਥ ਸਙ੍ਖੇਪੋ.
ਇਦਾਨਿ ਮਿਗਸਾਲਾਯ ਅਤ੍ਤਨੋ ਦੂਰਭਾਵਂ ਦਸ੍ਸੇਨ੍ਤੋ ਛਯਿਮੇ, ਆਨਨ੍ਦਾਤਿਆਦਿਮਾਹ. ਸੋਰਤੋ ਹੋਤੀਤਿ ਪਾਪਤੋ ਸੁਟ੍ਠੁ ਓਰਤੋ ਵਿਰਤੋ ਹੋਤਿ. ਸੁਰਤੋਤਿਪਿ ਪਾਠੋ. ਅਭਿਨਨ੍ਦਨ੍ਤਿ ਸਬ੍ਰਹ੍ਮਚਾਰੀ ਏਕਤ੍ਤਵਾਸੇਨਾਤਿ ਤੇਨ ਸਦ੍ਧਿਂ ਏਕਤੋਵਾਸੇਨ ਸਬ੍ਰਹ੍ਮਚਾਰੀ ਅਭਿਨਨ੍ਦਨ੍ਤਿ ਤੁਸ੍ਸਨ੍ਤਿ. ਏਕਨ੍ਤਵਾਸੇਨਾਤਿਪਿ ਪਾਠੋ, ਸਤਤਵਾਸੇਨਾਤਿ ਅਤ੍ਥੋ. ਸਵਨੇਨਪਿ ਅਕਤਂ ਹੋਤੀਤਿ ਸੋਤਬ੍ਬਯੁਤ੍ਤਕਂ ਅਸੁਤਂ ਹੋਤਿ. ਬਾਹੁਸਚ੍ਚੇਨਪਿ ਅਕਤਂ ਹੋਤੀਤਿ ਏਤ੍ਥ ਬਾਹੁਸਚ੍ਚਂ ਵੁਚ੍ਚਤਿ ਵੀਰਿਯਂ, ਵੀਰਿਯੇਨ ਕਤ੍ਤਬ੍ਬਯੁਤ੍ਤਕਂ ਅਕਤਂ ਹੋਤੀਤਿ ਅਤ੍ਥੋ. ਦਿਟ੍ਠਿਯਾਪਿ ਅਪ੍ਪਟਿਵਿਦ੍ਧਂ ਹੋਤੀਤਿ ਦਿਟ੍ਠਿਯਾ ਪਟਿਵਿਜ੍ਝਿਤਬ੍ਬਂ ਅਪ੍ਪਟਿਵਿਦ੍ਧਂ ਹੋਤਿ. ਸਾਮਾਯਿਕਮ੍ਪਿ ਵਿਮੁਤ੍ਤਿਂ ਨ ਲਭਤੀਤਿ ਕਾਲਾਨੁਕਾਲਂ ਧਮ੍ਮਸ੍ਸਵਨਂ ਨਿਸ੍ਸਾਯ ਪੀਤਿਪਾਮੋਜ੍ਜਂ ਨ ਲਭਤਿ. ਹਾਨਗਾਮੀਯੇਵ ਹੋਤੀਤਿ ਪਰਿਹਾਨਿਮੇਵ ਗਚ੍ਛਤਿ.
ਪਮਾਣਿਕਾਤਿ ਪੁਗ੍ਗਲੇਸੁ ਪਮਾਣਗ੍ਗਾਹਕਾ. ਪਮਿਨਨ੍ਤੀਤਿ ਪਮੇਤੁਂ ਤੁਲੇਤੁਂ ਆਰਭਨ੍ਤਿ. ਏਕੋ ਹੀਨੋਤਿ ਏਕੋ ਗੁਣੇਹਿ ਹੀਨੋ. ਏਕੋ ਪਣੀਤੋਤਿ ਏਕੋ ਗੁਣੇਹਿ ਪਣੀਤੋ. ਤਂ ਹੀਤਿ ਤਂ ਪਮਾਣਕਰਣਂ.
ਅਭਿਕ੍ਕਨ੍ਤਤਰੋਤਿ ਸੁਨ੍ਦਰਤਰੋ. ਪਣੀਤਤਰੋਤਿ ਉਤ੍ਤਮਤਰੋ. ਧਮ੍ਮਸੋਤੋ ਨਿਬ੍ਬਹਤੀਤਿ ਸੂਰਂ ਹੁਤ੍ਵਾ ਪਵਤ੍ਤਮਾਨਵਿਪਸ੍ਸਨਾਞਾਣਂ ਨਿਬ੍ਬਹਤਿ, ਅਰਿਯਭੂਮਿਂ ਸਮ੍ਪਾਪੇਤਿ. ਤਦਨ੍ਤਰਂ ਕੋ ਜਾਨੇਯ੍ਯਾਤਿ ਤਂ ਅਨ੍ਤਰਂ ਤਂ ਕਾਰਣਂ ਅਞ੍ਞਤ੍ਰ ਤਥਾਗਤੇਨ ਕੋ ਜਾਨੇਯ੍ਯਾਤਿ ਅਤ੍ਥੋ.
ਕੋਧਮਾਨੋਤਿ ਕੋਧੋ ਚ ਮਾਨੋ ਚ. ਲੋਭਧਮ੍ਮਾਤਿ ਲੋਭੋਯੇਵ. ਵਚੀਸਙ੍ਖਾਰਾਤਿ ਆਲਾਪਸਲ੍ਲਾਪਵਸੇਨ ਵਚਨਾਨੇਵ. ਯੋ ਵਾ ਪਨਸ੍ਸ ਮਾਦਿਸੋਤਿ ਯੋ ਵਾ ਪਨ ਅਞ੍ਞੋਪਿ ਮਯਾ ਸਦਿਸੋ ਸਮ੍ਮਾਸਮ੍ਬੁਦ੍ਧੋਯੇਵ ਅਸ੍ਸ, ਸੋ ਪੁਗ੍ਗਲੇਸੁ ਪਮਾਣਂ ਗਣ੍ਹੇਯ੍ਯਾਤਿ ਅਤ੍ਥੋ. ਖਞ੍ਞਤੀਤਿ ਗੁਣਖਣਨਂ ਪਾਪੁਣਾਤਿ. ਇਮੇ ਖੋ, ਆਨਨ੍ਦ, ਛ ਪੁਗ੍ਗਲਾਤਿ ਦ੍ਵੇ ਸੋਰਤਾ, ਦ੍ਵੇ ਅਧਿਗਤਕੋਧਮਾਨਲੋਭਧਮ੍ਮਾ, ਦ੍ਵੇ ਅਧਿਗਤਕੋਧਮਾਨਵਚੀਸਙ੍ਖਾਰਾਤਿ ਇਮੇ ਛ ਪੁਗ੍ਗਲਾ. ਗਤਿਨ੍ਤਿ ਞਾਣਗਤਿਂ. ਏਕਙ੍ਗਹੀਨਾਤਿ ਏਕੇਕੇਨ ਗੁਣਙ੍ਗੇਨ ਹੀਨਾ. ਪੂਰਣੋ ਸੀਲੇਨ ਵਿਸੇਸੀ ਅਹੋਸਿ, ਇਸਿਦਤ੍ਤੋ ਪਞ੍ਞਾਯ. ਪੂਰਣਸ੍ਸ ਸੀਲਂ ਇਸਿਦਤ੍ਤਸ੍ਸ ਪਞ੍ਞਾਠਾਨੇ ਠਿਤਂ, ਇਸਿਦਤ੍ਤਸ੍ਸ ਪਞ੍ਞਾ ਪੂਰਣਸ੍ਸ ਸੀਲਟ੍ਠਾਨੇ ਠਿਤਾਤਿ.
੩. ਇਣਸੁਤ੍ਤਵਣ੍ਣਨਾ
੪੫. ਤਤਿਯੇ ਦਾਲਿਦ੍ਦਿਯਨ੍ਤਿ ਦਲਿਦ੍ਦਭਾਵੋ. ਕਾਮਭੋਗਿਨੋਤਿ ਕਾਮੇ ਭੁਞ੍ਜਨਕਸਤ੍ਤਸ੍ਸ. ਅਸ੍ਸਕੋਤਿ ਅਤ੍ਤਨੋ ਸਨ੍ਤਕੇਨ ਰਹਿਤੋ. ਅਨਾਲ਼੍ਹਿਕੋਤਿ ਨ ਅਡ੍ਢੋ. ਇਣਂ ਆਦਿਯਤੀਤਿ ਜੀਵਿਤੁਂ ਅਸਕ੍ਕੋਨ੍ਤੋ ਇਣਂ ਆਦਿਯਤਿ. ਵਡ੍ਢਿਂ ਪਟਿਸ੍ਸੁਣਾਤੀਤਿ ਦਾਤੁਂ ਅਸਕ੍ਕੋਨ੍ਤੋ ਵਡ੍ਢਿਂ ਦਸ੍ਸਾਮੀਤਿ ਪਟਿਜਾਨਾਤਿ. ਅਨੁਚਰਨ੍ਤਿਪਿ ਨਨ੍ਤਿ ਪਰਿਸਮਜ੍ਝਗਣਮਜ੍ਝਾਦੀਸੁ ਆਤਪਠਪਨਪਂਸੁਓਕਿਰਣਾਦੀਹਿ ਵਿਪ੍ਪਕਾਰਂ ਪਾਪੇਨ੍ਤੋ ਪਚ੍ਛਤੋ ਪਚ੍ਛਤੋ ਅਨੁਬਨ੍ਧਨ੍ਤਿ. ਸਦ੍ਧਾ ਨਤ੍ਥੀਤਿ ਓਕਪ੍ਪਨਕਸਦ੍ਧਾਮਤ੍ਤਕਮ੍ਪਿ ਨਤ੍ਥਿ. ਹਿਰੀ ਨਤ੍ਥੀਤਿ ਹਿਰੀਯਨਾਕਾਰਮਤ੍ਤਕਮ੍ਪਿ ਨਤ੍ਥਿ. ਓਤ੍ਤਪ੍ਪਂ ਨਤ੍ਥੀਤਿ ਭਾਯਨਾਕਾਰਮਤ੍ਤਕਮ੍ਪਿ ਨਤ੍ਥਿ. ਵੀਰਿਯਂ ਨਤ੍ਥੀਤਿ ਕਾਯਿਕਵੀਰਿਯਮਤ੍ਤਕਮ੍ਪਿ ਨਤ੍ਥਿ. ਪਞ੍ਞਾ ਨਤ੍ਥੀਤਿ ਕਮ੍ਮਸ੍ਸਕਤਪਞ੍ਞਾਮਤ੍ਤਕਮ੍ਪਿ ਨਤ੍ਥਿ. ਇਣਾਦਾਨਸ੍ਮਿਂ ਵਦਾਮੀਤਿ ਇਣਗ੍ਗਹਣਂ ਵਦਾਮਿ. ਮਾ ਮਂ ਜਞ੍ਞੂਤਿ ਮਾ ਮਂ ਜਾਨਾਤੁ.
ਦਾਲਿਦ੍ਦਿਯਂ ਦੁਕ੍ਖਨ੍ਤਿ ਧਨਦਲਿਦ੍ਦਭਾਵੋ ਦੁਕ੍ਖਂ. ਕਾਮਲਾਭਾਭਿਜਪ੍ਪਿਨਨ੍ਤਿ ਕਾਮਲਾਭਂ ਪਤ੍ਥੇਨ੍ਤਾਨਂ. ਪਾਪਕਮ੍ਮਵਿਨਿਬ੍ਬਯੋਤਿ ਪਾਪਕਮ੍ਮਵਡ੍ਢਕੋ. ਸਂਸਪ੍ਪਤੀਤਿ ਪਰਿਪ੍ਫਨ੍ਦਤਿ. ਜਾਨਨ੍ਤਿ ਜਾਨਨ੍ਤੋ. ਯਸ੍ਸ ਵਿਪ੍ਪਟਿਸਾਰਜਾਤਿ ਯੇ ਅਸ੍ਸ ਵਿਪ੍ਪਟਿਸਾਰਤੋ ਜਾਤਾ. ਯੋਨਿਮਞ੍ਞਤਰਨ੍ਤਿ ਏਕਂ ਤਿਰਚ੍ਛਾਨਯੋਨਿਂ. ਦਦਂ ਚਿਤ੍ਤਂ ਪਸਾਦਯਨ੍ਤਿ ਚਿਤ੍ਤਂ ਪਸਾਦੇਨ੍ਤੋ ਦਦਮਾਨੋ.
ਕਟਗ੍ਗਾਹੋਤਿ ਜਯਗ੍ਗਾਹੋ, ਅਨਪਰਾਧਗ੍ਗਾਹੋ ਹੋਤਿ. ਘਰਮੇਸਿਨੋਤਿ ਘਰਾਵਾਸਂ ਪਰਿਯੇਸਨ੍ਤਸ੍ਸ ਵਸਮਾਨਸ੍ਸ ਵਾ. ਚਾਗੋ ਪੁਞ੍ਞਂ ਪਵਡ੍ਢਤੀਤਿ ਚਾਗੋਤਿ ਸਙ੍ਖਂ ਗਤਂ ਪੁਞ੍ਞਂ ਵਡ੍ਢਤਿ. ਚਾਗਾ ਪੁਞ੍ਞਨ੍ਤਿ ਵਾ ਪਾਠੋ. ਪਤਿਟ੍ਠਿਤਾਤਿ ਪਤਿਟ੍ਠਿਤਸਦ੍ਧਾ ਨਾਮ ਸੋਤਾਪਨ੍ਨਸ੍ਸ ਸਦ੍ਧਾ. ਹਿਰਿਮਨੋਤਿ ਹਿਰਿਸਮ੍ਪਯੁਤ੍ਤਚਿਤ੍ਤੋ. ਨਿਰਾਮਿਸਂ ਸੁਖਨ੍ਤਿ ਤੀਣਿ ਝਾਨਾਨਿ ਨਿਸ੍ਸਾਯ ਉਪ੍ਪਜ੍ਜਨਕਸੁਖਂ. ਉਪੇਕ੍ਖਨ੍ਤਿ ਚਤੁਤ੍ਥਜ੍ਝਾਨੁਪੇਕ੍ਖਂ. ਆਰਦ੍ਧਵੀਰਿਯੋਤਿ ਪਰਿਪੁਣ੍ਣਪਗ੍ਗਹਿਤਵੀਰਿਯੋ. ਝਾਨਾਨਿ ਉਪਸਮ੍ਪਜ੍ਜਾਤਿ ਚਤ੍ਤਾਰਿ ਝਾਨਾਨਿ ਪਤ੍ਵਾ. ਏਕੋਦਿ ਨਿਪਕੋ ਸਤੋਤਿ ਏਕਗ੍ਗਚਿਤ੍ਤੋ ਕਮ੍ਮਸ੍ਸਕਤਞਾਣਸਤੀਹਿ ਚ ਸਮਨ੍ਨਾਗਤੋ.
ਏਵਂ ਞਤ੍ਵਾ ਯਥਾਭੂਤਨ੍ਤਿ ਏਵਂ ਏਤ੍ਤਕਂ ਕਾਰਣਂ ਯਥਾਸਭਾਵਂ ਜਾਨਿਤ੍ਵਾ. ਸਬ੍ਬਸਂਯੋਜਨਕ੍ਖਯੇਤਿ ਨਿਬ੍ਬਾਨੇ. ਸਬ੍ਬਸੋਤਿ ਸਬ੍ਬਾਕਾਰੇਨ. ਅਨੁਪਾਦਾਯਾਤਿ ਅਗ੍ਗਹੇਤ੍ਵਾ. ਸਮ੍ਮਾ ਚਿਤ੍ਤਂ ਵਿਮੁਚ੍ਚਤੀਤਿ ਇਦਂ ਵੁਤ੍ਤਂ ਹੋਤਿ – ਸਬ੍ਬਸਂਯੋਜਨਕ੍ਖਯਸਙ੍ਖਾਤੇ ਨਿਬ੍ਬਾਨੇ ਸਬ੍ਬਸੋ ਅਨੁਪਾਦਿਯਿਤ੍ਵਾ ਸਮ੍ਮਾ ਹੇਤੁਨਾ ਨਯੇਨ ਮਗ੍ਗਚਿਤ੍ਤਂ ਵਿਮੁਚ੍ਚਤਿ. ‘‘ਏਤਂ ਞਤ੍ਵਾ ਯਥਾਭੂਤਂ, ਸਬ੍ਬਸਂਯੋਜਨਕ੍ਖਯ’’ਨ੍ਤਿਪਿ ਪਾਲ਼ਿਯਂ ਲਿਖਿਤਂ, ਤਸ੍ਸ ਏਤਂ ਸਬ੍ਬਸਂਯੋਜਨਕ੍ਖਯਸਙ੍ਖਾਤਂ ਨਿਬ੍ਬਾਨਂ ਯਥਾਭੂਤਂ ਞਤ੍ਵਾਤਿ ਅਤ੍ਥੋ. ਪੁਰਿਮਪਚ੍ਛਿਮੇਹਿ ਪਨ ਸਦ੍ਧਿਂ ਨ ਘਟੀਯਤਿ.
ਤਸ੍ਸ ਸਮ੍ਮਾ ਵਿਮੁਤ੍ਤਸ੍ਸਾਤਿ ਤਸ੍ਸ ਸਮ੍ਮਾ ਵਿਮੁਤ੍ਤਸ੍ਸ ਖੀਣਾਸਵਸ੍ਸ. ਞਾਣਂ ਹੋਤੀਤਿ ਪਚ੍ਚਵੇਕ੍ਖਣਞਾਣਂ ਹੋਤਿ. ਤਾਦਿਨੋਤਿ ਤਂਸਣ੍ਠਿਤਸ੍ਸ. ਅਕੁਪ੍ਪਾਤਿ ਅਕੁਪ੍ਪਾਰਮ੍ਮਣਤ੍ਤਾ ਕੁਪ੍ਪਕਾਰਣਾਨਂ ਕਿਲੇਸਾਨਞ੍ਚ ਅਭਾਵੇਨ ਅਕੁਪ੍ਪਾ. ਵਿਮੁਤ੍ਤੀਤਿ ਮਗ੍ਗਵਿਮੁਤ੍ਤਿਪਿ ਫਲਵਿਮੁਤ੍ਤਿਪਿ. ਭਵਸਂਯੋਜਨਕ੍ਖਯੇਤਿ ਭਵਸਂਯੋਜਨਕ੍ਖਯਸਙ੍ਖਾਤੇ ਨਿਬ੍ਬਾਨੇ ਭਵਸਂਯੋਜਨਾਨਞ੍ਚ ਖਯਨ੍ਤੇ ਉਪ੍ਪਨ੍ਨਾ. ਏਤਂ ਖੋ ਪਰਮਂ ਞਾਣਨ੍ਤਿ ਏਤਂ ਮਗ੍ਗਫਲਞਾਣਂ ਪਰਮਞਾਣਂ ਨਾਮ. ਸੁਖਮਨੁਤ੍ਤਰਨ੍ਤਿ ਏਤਦੇਵ ਮਗ੍ਗਫਲਸੁਖਂ ਅਨੁਤ੍ਤਰਂ ਸੁਖਂ ਨਾਮ. ਆਣਣ੍ਯਮੁਤ੍ਤਮਨ੍ਤਿ ਸਬ੍ਬੇਸਂ ਅਣਣਾਨਂ ਖੀਣਾਸਵੋ ਉਤ੍ਤਮਅਣਣੋ, ਤਸ੍ਮਾ ਅਰਹਤ੍ਤਫਲਂ ਆਣਣ੍ਯਮੁਤ੍ਤਮਨ੍ਤਿ ਅਰਹਤ੍ਤਫਲੇਨ ਦੇਸਨਾਯ ਕੂਟਂ ਗਣ੍ਹਿ. ਇਮਸ੍ਮਿਞ੍ਚ ਸੁਤ੍ਤੇ ਵਟ੍ਟਮੇਵ ਕਥੇਤ੍ਵਾ ਗਾਥਾਸੁ ਵਟ੍ਟਵਿਵਟ੍ਟਂ ਕਥਿਤਨ੍ਤਿ.
੪. ਮਹਾਚੁਨ੍ਦਸੁਤ੍ਤਵਣ੍ਣਨਾ
੪੬. ਚਤੁਤ੍ਥੇ ਚੇਤੀਸੂਤਿ ਚੇਤਿਰਟ੍ਠੇ. ਸਯਂਜਾਤਿਯਨ੍ਤਿ ਏਵਂਨਾਮਕੇ ਨਿਗਮੇ. ਮਹਾਚੁਨ੍ਦੋਤਿ ਧਮ੍ਮਸੇਨਾਪਤਿਸ੍ਸ ਕਨਿਟ੍ਠਭਾਤਿਕੋ. ਧਮ੍ਮੇ ਯੋਗੋ ਅਨੁਯੋਗੋ ਏਤੇਸਨ੍ਤਿ ਧਮ੍ਮਯੋਗਾ. ਧਮ੍ਮਕਥਿਕਾਨਂ ਏਤਂ ਨਾਮਂ. ਝਾਯਨ੍ਤੀਤਿ ਝਾਯੀ. ਅਪਸਾਦੇਨ੍ਤੀਤਿ ਘਟ੍ਟੇਨ੍ਤਿ ਹਿਂਸਨ੍ਤਿ. ਝਾਯਨ੍ਤੀਤਿ ਚਿਨ੍ਤੇਨ੍ਤਿ. ਪਜ੍ਝਾਯਨ੍ਤੀਤਿਆਦੀਨਿ ਉਪਸਗ੍ਗਵਸੇਨ ਵਡ੍ਢਿਤਾਨਿ. ਕਿਮਿਮੇ ਝਾਯਨ੍ਤੀਤਿ ਕਿਂ ਨਾਮ ਇਮੇ ਝਾਯਨ੍ਤਿ. ਕਿਨ੍ਤਿਮੇ ਝਾਯਨ੍ਤੀਤਿ ਕਿਮਤ੍ਥਂ ਇਮੇ ਝਾਯਨ੍ਤਿ. ਕਥਂ ਇਮੇ ਝਾਯਨ੍ਤੀਤਿ ਕੇਨ ਕਾਰਣੇਨ ਇਮੇ ਝਾਯਨ੍ਤਿ. ਅਮਤਂ ਧਾਤੁਂ ਕਾਯੇਨ ਫੁਸਿਤ੍ਵਾ ਵਿਹਰਨ੍ਤੀਤਿ ਮਰਣਵਿਰਹਿਤਂ ਨਿਬ੍ਬਾਨਧਾਤੁਂ ਸਨ੍ਧਾਯ ਕਮ੍ਮਟ੍ਠਾਨਂ ਗਹੇਤ੍ਵਾ ਵਿਹਰਨ੍ਤਾ ਅਨੁਕ੍ਕਮੇਨ ਤਂ ਨਾਮਕਾਯੇਨ ਫੁਸਿਤ੍ਵਾ ਵਿਹਰਨ੍ਤਿ. ਗਮ੍ਭੀਰਂ ਅਤ੍ਥਪਦਨ੍ਤਿ ਗੁਲ਼੍ਹਂ ਪਟਿਚ੍ਛਨ੍ਨਂ ਖਨ੍ਧਧਾਤੁਆਯਤਨਾਦਿਅਤ੍ਥਂ. ਪਞ੍ਞਾਯ ਅਤਿਵਿਜ੍ਝ ਪਸ੍ਸਨ੍ਤੀਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ ਪਟਿਵਿਜ੍ਝਿਤ੍ਵਾ ਪਸ੍ਸਨ੍ਤਿ. ਇਮਸ੍ਮਿਂ ਪਨਤ੍ਥੇ ਸਮ੍ਮਸਨਪਟਿਵੇਧਪਞ੍ਞਾਪਿ ਉਗ੍ਗਹਪਰਿਪੁਚ੍ਛਾਪਞ੍ਞਾਪਿ ਵਟ੍ਟਤਿਯੇਵਾਤਿ.
੫-੬. ਸਨ੍ਦਿਟ੍ਠਿਕਸੁਤ੍ਤਦ੍ਵਯਵਣ੍ਣਨਾ
੪੭-੪੮. ਪਞ੍ਚਮੇ ਸਨ੍ਤਂ ਵਾ ਅਜ੍ਝਤ੍ਤਨ੍ਤਿ ਨਿਯਕਜ੍ਝਤ੍ਤੇ ਵਿਜ੍ਜਮਾਨਂ. ਲੋਭੋਤਿਆਦੀਹਿ ਤੀਣਿ ਅਕੁਸਲਮੂਲਾਨਿ ਦਸ੍ਸਿਤਾਨਿ. ਲੋਭਧਮ੍ਮਾਤਿਆਦੀਹਿ ਤਂਸਮ੍ਪਯੁਤ੍ਤਕਾ ਧਮ੍ਮਾ. ਛਟ੍ਠੇ ਕਾਯਸਨ੍ਦੋਸਨ੍ਤਿ ਕਾਯਦ੍ਵਾਰਸ੍ਸ ਦੁਸ੍ਸਨਾਕਾਰਂ. ਸੇਸਦ੍ਵਯੇਪਿ ਏਸੇਵ ਨਯੋ. ਇਮੇਸੁ ਦ੍ਵੀਸੁ ਸੁਤ੍ਤੇਸੁ ਪਚ੍ਚਵੇਕ੍ਖਣਾਵ ਕਥਿਤਾ.
੭. ਖੇਮਸੁਤ੍ਤਵਣ੍ਣਨਾ
੪੯. ਸਤ੍ਤਮੇ ਵੁਸਿਤਵਾਤਿ ਵੁਤ੍ਥਬ੍ਰਹ੍ਮਚਰਿਯਵਾਸੋ. ਕਤਕਰਣੀਯੋਤਿ ਚਤੂਹਿ ਮਗ੍ਗੇਹਿ ਕਤ੍ਤਬ੍ਬਂ ਕਤ੍ਵਾ ਠਿਤੋ. ਓਹਿਤਭਾਰੋਤਿ ਖਨ੍ਧਭਾਰਂ ਕਿਲੇਸਭਾਰਂ ਅਭਿਸਙ੍ਖਾਰਭਾਰਞ੍ਚ ਓਤਾਰੇਤ੍ਵਾ ਠਿਤੋ. ਅਨੁਪ੍ਪਤ੍ਤਸਦਤ੍ਥੋਤਿ ਸਦਤ੍ਥੋ ਵੁਚ੍ਚਤਿ ਅਰਹਤ੍ਤਂ, ਤਂ ਪਤ੍ਤੋਤਿ ਅਤ੍ਥੋ. ਪਰਿਕ੍ਖੀਣਭਵਸਂਯੋਜਨੋਤਿ ਖੀਣਭਵਬਨ੍ਧਨੋ. ਸਮ੍ਮਦਞ੍ਞਾ ਵਿਮੁਤ੍ਤੋਤਿ ਸਮ੍ਮਾ ਹੇਤੁਨਾ ਕਾਰਣੇਨ ਜਾਨਿਤ੍ਵਾ ਵਿਮੁਤ੍ਤੋ. ਤਸ੍ਸ ਨ ਏਵਂ ਹੋਤਿ ਅਤ੍ਥਿ ਮੇ ਸੇਯ੍ਯੋਤਿ ਵਾਤਿਆਦੀਹਿ ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨਾਦਯੋ ਤਯੋ ਮਾਨਾ ਪਟਿਕ੍ਖਿਤ੍ਤਾ. ਨ ਹਿ ਖੀਣਾਸਵਸ੍ਸ ‘‘ਅਤ੍ਥਿ ਮਯ੍ਹਂ ਸੇਯ੍ਯੋ, ਅਤ੍ਥਿ ਸਦਿਸੋ, ਅਤ੍ਥਿ ਹੀਨੋ’’ਤਿ ਮਾਨੋ ਹੋਤਿ. ਨਤ੍ਥਿ ਮੇ ਸੇਯ੍ਯੋਤਿਆਦੀਹਿਪਿ ਤੇਯੇਵ ਪਟਿਕ੍ਖਿਤ੍ਤਾ. ਨ ਹਿ ਖੀਣਾਸਵਸ੍ਸ ‘‘ਅਹਮੇਵ ਸੇਯ੍ਯੋ, ਅਹਂ ਸਦਿਸੋ, ਅਹਂ ਹੀਨੋ, ਅਞ੍ਞੇ ਸੇਯ੍ਯਾਦਯੋ ਨਤ੍ਥੀ’’ਤਿ ਏਵਂ ਮਾਨੋ ਹੋਤਿ.
ਅਚਿਰਪਕ੍ਕਨ੍ਤੇਸੂਤਿ ਅਰਹਤ੍ਤਂ ਬ੍ਯਾਕਰਿਤ੍ਵਾ ਅਚਿਰਂਯੇਵ ਪਕ੍ਕਨ੍ਤੇਸੁ. ਅਞ੍ਞਂ ਬ੍ਯਾਕਰੋਨ੍ਤੀਤਿ ਅਰਹਤ੍ਤਂ ਕਥੇਨ੍ਤਿ. ਹਸਮਾਨਕਾ ਮਞ੍ਞੇ ਅਞ੍ਞਂ ਬ੍ਯਾਕਰੋਨ੍ਤੀਤਿ ਹਸਮਾਨਾ ਵਿਯ ਕਥੇਨ੍ਤਿ. ਵਿਘਾਤਂ ਆਪਜ੍ਜਨ੍ਤੀਤਿ ਦੁਕ੍ਖਂ ਆਪਜ੍ਜਨ੍ਤਿ.
ਨ ਉਸ੍ਸੇਸੁ ਨ ਓਮੇਸੁ, ਸਮਤ੍ਤੇ ਨੋਪਨੀਯਰੇਤਿ ਏਤ੍ਥ ਉਸ੍ਸਾਤਿ ਉਸ੍ਸਿਤਤਾ ਸੇਯ੍ਯਪੁਗ੍ਗਲਾ. ਓਮਾਤਿ ਹੀਨਾ. ਸਮਤ੍ਤੋਤਿ ਸਦਿਸੋ. ਇਤਿ ਇਮੇਸੁ ਤੀਸੁਪਿ ਸੇਯ੍ਯਹੀਨਸਦਿਸੇਸੁ ਖੀਣਾਸਵਾ ਮਾਨੇਨ ਨ ਉਪਨੀਯਰੇ, ਨ ਉਪਨੇਨ੍ਤਿ, ਨ ਉਪਗਚ੍ਛਨ੍ਤੀਤਿ ਅਤ੍ਥੋ. ਖੀਣਾ ਜਾਤੀਤਿ ਖੀਣਾ ਤੇਸਂ ਜਾਤਿ. ਵੁਸਿਤਂ ਬ੍ਰਹ੍ਮਚਰਿਯਨ੍ਤਿ ਵੁਤ੍ਥਂ ਮਗ੍ਗਬ੍ਰਹ੍ਮਚਰਿਯਂ. ਚਰਨ੍ਤਿ ਸਂਯੋਜਨਵਿਪ੍ਪਮੁਤ੍ਤਾਤਿ ਸਬ੍ਬਸਂਯੋਜਨੇਹਿ ਵਿਮੁਤ੍ਤਾ ਹੁਤ੍ਵਾ ਚਰਨ੍ਤਿ. ਸੁਤ੍ਤੇਪਿ ਗਾਥਾਯਮ੍ਪਿ ਖੀਣਾਸਵੋ ਕਥਿਤੋ.
੮. ਇਨ੍ਦ੍ਰਿਯਸਂਵਰਸੁਤ੍ਤਵਣ੍ਣਨਾ
੫੦. ਅਟ੍ਠਮੇ ਹਤੂਪਨਿਸਂ ਹੋਤੀਤਿ ਹਤੂਪਨਿਸ੍ਸਯਂ ਹੋਤਿ. ਸੀਲਵਿਪਨ੍ਨਸ੍ਸਾਤਿ ਵਿਪਨ੍ਨਸੀਲਸ੍ਸ. ਯਥਾਭੂਤਞਾਣਦਸ੍ਸਨਨ੍ਤਿ ਤਰੁਣਵਿਪਸ੍ਸਨਾਞਾਣਂ. ਨਿਬ੍ਬਿਦਾਵਿਰਾਗੋਤਿ ਏਤ੍ਥ ਨਿਬ੍ਬਿਦਾ ਬਲਵਵਿਪਸ੍ਸਨਾ, ਵਿਰਾਗੋ ਅਰਿਯਮਗ੍ਗੋ. ਵਿਮੁਤ੍ਤਿਞਾਣਦਸ੍ਸਨਨ੍ਤਿ ਏਤ੍ਥ ਵਿਮੁਤ੍ਤੀਤਿ ਅਰਹਤ੍ਤਫਲਂ, ਞਾਣਦਸ੍ਸਨਨ੍ਤਿ ਪਚ੍ਚਵੇਕ੍ਖਣਞਾਣਂ. ਉਪਨਿਸ੍ਸਯਸਮ੍ਪਨ੍ਨਂ ਹੋਤੀਤਿ ਸਮ੍ਪਨ੍ਨਉਪਨਿਸ੍ਸਯਂ ਹੋਤਿ. ਇਮਸ੍ਮਿਂ ਸੁਤ੍ਤੇ ਸੀਲਾਨੁਰਕ੍ਖਣਇਨ੍ਦ੍ਰਿਯਸਂਵਰੋ ਕਥਿਤੋ.
੯. ਆਨਨ੍ਦਸੁਤ੍ਤਵਣ੍ਣਨਾ
੫੧. ਨਵਮੇ ਕਿਤ੍ਤਾਵਤਾਤਿ ਕਿਤ੍ਤਕੇਨ. ਅਸ੍ਸੁਤਞ੍ਚੇਵਾਤਿ ਅਞ੍ਞਸ੍ਮਿਂ ਕਾਲੇ ਅਸ੍ਸੁਤਪੁਬ੍ਬਂ. ਨ ਸਮ੍ਮੋਸਂ ਗਚ੍ਛਨ੍ਤੀਤਿ ਵਿਨਾਸਂ ਨ ਗਚ੍ਛਨ੍ਤਿ. ਚੇਤਸੋ ਸਮ੍ਫੁਟ੍ਠਪੁਬ੍ਬਾਤਿ ਚਿਤ੍ਤੇਨ ਫੁਸਿਤਪੁਬ੍ਬਾ. ਸਮੁਦਾਚਰਨ੍ਤੀਤਿ ਮਨੋਦ੍ਵਾਰੇ ਚਰਨ੍ਤਿ. ਅਵਿਞ੍ਞਾਤਞ੍ਚ ਵਿਜਾਨਾਤੀਤਿ ਅਞ੍ਞਸ੍ਮਿਂ ਕਾਲੇ ਅਵਿਞ੍ਞਾਤਕਾਰਣਂ ਜਾਨਾਤਿ. ਪਰਿਯਾਪੁਣਾਤੀਤਿ ਵਲ਼ਞ੍ਜੇਤਿ ਕਥੇਤਿ. ਦੇਸੇਤੀਤਿ ਪਕਾਸੇਤਿ. ਪਰਂ ਵਾਚੇਤੀਤਿ ਪਰਂ ਉਗ੍ਗਣ੍ਹਾਪੇਤਿ.
ਆਗਤਾਗਮਾਤਿ ਦੀਘਾਦੀਸੁ ਯੋ ਕੋਚਿ ਆਗਮੋ ਆਗਤੋ ਏਤੇਸਨ੍ਤਿ ਆਗਤਾਗਮਾ. ਧਮ੍ਮਧਰਾਤਿ ਸੁਤ੍ਤਨ੍ਤਪਿਟਕਧਰਾ. ਵਿਨਯਧਰਾਤਿ ਵਿਨਯਪਿਟਕਧਰਾ. ਮਾਤਿਕਾਧਰਾਤਿ ਦ੍ਵੇਪਾਤਿਮੋਕ੍ਖਧਰਾ. ਪਰਿਪੁਚ੍ਛਤੀਤਿ ਅਨੁਸਨ੍ਧਿਪੁਬ੍ਬਾਪਰਂ ਪੁਚ੍ਛਤਿ. ਪਰਿਪਞ੍ਹਤੀਤਿ ਇਦਞ੍ਚਿਦਞ੍ਚ ਪੁਚ੍ਛਿਸ੍ਸਾਮੀਤਿ ਪਰਿਤੁਲਤਿ ਪਰਿਚ੍ਛਿਨ੍ਦਤਿ. ਇਦਂ, ਭਨ੍ਤੇ, ਕਥਨ੍ਤਿ, ਭਨ੍ਤੇ, ਇਦਂ ਅਨੁਸਨ੍ਧਿਪੁਬ੍ਬਾਪਰਂ ਕਥਂ ਹੋਤੀਤਿ ਪੁਚ੍ਛਤਿ. ਇਮਸ੍ਸ ਕ੍ਵਤ੍ਥੋਤਿ ਇਮਸ੍ਸ ਭਾਸਿਤਸ੍ਸ ਕੋ ਅਤ੍ਥੋਤਿ ਪੁਚ੍ਛਤਿ. ਅਵਿਵਟਨ੍ਤਿ ਅਵਿਵਰਿਤਂ. ਵਿਵਰਨ੍ਤੀਤਿ ਪਾਕਟਂ ਕਰੋਨ੍ਤਿ. ਕਙ੍ਖਾਠਾਨਿਯੇਸੂਤਿ ਕਙ੍ਖਾਯ ਕਾਰਣਭੂਤੇਸੁ. ਤਤ੍ਥ ਯਸ੍ਮਿਂ ਧਮ੍ਮੇ ਕਙ੍ਖਾ ਉਪ੍ਪਜ੍ਜਤਿ, ਸ੍ਵੇਵ ਕਙ੍ਖਾਠਾਨਿਯੋ ਨਾਮਾਤਿ ਵੇਦਿਤਬ੍ਬੋ.