੧੦. ਕਕੁਧਥੇਰਸੁਤ੍ਤਵਣ੍ਣਨਾ

੧੦੦. ਦਸਮੇ ਅਤ੍ਤਭਾਵਪਟਿਲਾਭੋਤਿ ਸਰੀਰਪਟਿਲਾਭੋ. ਦ੍ਵੇ ਵਾ ਤੀਣਿ ਵਾ ਮਾਗਧਕਾਨਿ ਗਾਮਕ੍ਖੇਤ੍ਤਾਨੀਤਿ ਏਤ੍ਥ ਮਾਗਧਿਕਂ ਗਾਮਕ੍ਖੇਤ੍ਤਂ ਅਤ੍ਥਿ ਖੁਦ੍ਦਕਂ, ਅਤ੍ਥਿ ਮਜ੍ਝਿਮਂ, ਅਤ੍ਥਿ ਮਹਨ੍ਤਂ. ਖੁਦ੍ਦਕਂ ਗਾਮਕ੍ਖੇਤ੍ਤਂ ਇਤੋ ਚਤ੍ਤਾਲੀਸਂ ਉਸਭਾਨਿ, ਇਤੋ ਚਤ੍ਤਾਲੀਸਨ੍ਤਿ ਗਾਵੁਤਂ ਹੋਤਿ, ਮਜ੍ਝਿਮਂ ਇਤੋ ਗਾਵੁਤਂ, ਇਤੋ ਗਾਵੁਤਨ੍ਤਿ ਅਡ੍ਢਯੋਜਨਂ ਹੋਤਿ, ਮਹਨ੍ਤਂ ਇਤੋ ਦਿਯਡ੍ਢਗਾਵੁਤਂ, ਇਤੋ ਦਿਯਡ੍ਢਗਾਵੁਤਨ੍ਤਿ ਤਿਗਾਵੁਤਂ ਹੋਤਿ. ਤੇਸੁ ਖੁਦ੍ਦਕੇਨ ਗਾਮਕ੍ਖੇਤ੍ਤੇਨ ਤੀਣਿ, ਖੁਦ੍ਦਕੇਨ ਚ ਮਜ੍ਝਿਮੇਨ ਚ ਦ੍ਵੇ ਗਾਮਕ੍ਖੇਤ੍ਤਾਨਿ ਤਸ੍ਸ ਅਤ੍ਤਭਾਵੋ. ਤਿਗਾਵੁਤਞ੍ਹਿਸ੍ਸ ਸਰੀਰਂ. ਪਰਿਹਰਿਸ੍ਸਾਮੀਤਿ ਪਟਿਜਗ੍ਗਿਸ੍ਸਾਮਿ ਗੋਪਯਿਸ੍ਸਾਮਿ. ਰਕ੍ਖਸ੍ਸੇਤਨ੍ਤਿ ਰਕ੍ਖਸ੍ਸੁ ਏਤਂ. ਮੋਘਪੁਰਿਸੋਤਿ ਤੁਚ੍ਛਪੁਰਿਸੋ. ਨਾਸ੍ਸਸ੍ਸਾਤਿ ਨ ਏਤਸ੍ਸ ਭਵੇਯ੍ਯ. ਸਮੁਦਾਚਰੇਯ੍ਯਾਮਾਤਿ ਕਥੇਯ੍ਯਾਮ. ਸਮ੍ਮਨ੍ਨਤੀਤਿ ਸਮ੍ਮਾਨਂ ਕਰੋਤਿ. ਯਂ ਤੁਮੋ ਕਰਿਸ੍ਸਤਿ ਤੁਮੋਵ ਤੇਨ ਪਞ੍ਞਾਯਿਸ੍ਸਤੀਤਿ ਯਂ ਏਸ ਕਰਿਸ੍ਸਤਿ, ਏਸੋਵ ਤੇਨ ਕਮ੍ਮੇਨ ਪਾਕਟੋ ਭਵਿਸ੍ਸਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਕਕੁਧਵਗ੍ਗੋ ਪਞ੍ਚਮੋ.