੨. ਦੁਤਿਯਪਣ੍ਣਾਸਕਂ
(੬) ੧. ਨੀਵਰਣਵਗ੍ਗੋ
੧. ਆਵਰਣਸੁਤ੍ਤਵਣ੍ਣਨਾ
੫੧. ਦੁਤਿਯਸ੍ਸ ਪਠਮੇ ਆਵਰਣਵਸੇਨ ਆਵਰਣਾ. ਨੀਵਰਣਵਸੇਨ ਨੀਵਰਣਾ. ਚੇਤੋ ਅਜ੍ਝਾਰੁਹਨ੍ਤੀਤਿ ਚੇਤਸੋ ਅਜ੍ਝਾਰੁਹਾ. ਵਿਪਸ੍ਸਨਾਪਞ੍ਞਞ੍ਚ ਮਗ੍ਗਪਞ੍ਞਞ੍ਚ ਉਪ੍ਪਤ੍ਤਿਨਿਵਾਰਣਟ੍ਠੇਨ ਦੁਬ੍ਬਲਂ ਕਰੋਨ੍ਤੀਤਿ ਪਞ੍ਞਾਯ ਦੁਬ੍ਬਲੀਕਰਣਾ. ਯਾ ਵਾ ਏਤੇਹਿ ਸਦ੍ਧਿਂ ਵੋਕਿਣ੍ਣਾ ਪਞ੍ਞਾ ਉਪ੍ਪਜ੍ਜਤਿ, ਤਂ ਦੁਬ੍ਬਲਂ ਕਰੋਨ੍ਤੀਤਿਪਿ ਪਞ੍ਞਾਯ ਦੁਬ੍ਬਲੀਕਰਣਾ. ਅਬਲਾਯਾਤਿ ਪਞ੍ਚਨੀਵਰਣਪਰਿਯੋਨਦ੍ਧਤ੍ਤਾ ਅਪਗਤਬਲਾਯ. ਉਤ੍ਤਰਿ ਵਾ ਮਨੁਸ੍ਸਧਮ੍ਮਾ ਅਲਮਰਿਯਞਾਣਦਸ੍ਸਨਵਿਸੇਸਨ੍ਤਿ ਦਸਕੁਸਲਕਮ੍ਮਪਥਸਙ੍ਖਾਤਾ ਮਨੁਸ੍ਸਧਮ੍ਮਾ ਉਤ੍ਤਰਿ ਅਰਿਯਭਾਵਂ ਕਾਤੁਂ ਸਮਤ੍ਥਂ ਞਾਣਦਸ੍ਸਨਵਿਸੇਸਂ. ਹਾਰਹਾਰਿਨੀਤਿ ਹਰਿਤਬ੍ਬਂ ਹਰਿਤੁਂ ਸਮਤ੍ਥਾ. ਨਙ੍ਗਲਮੁਖਾਨੀਤਿ ਮਾਤਿਕਾਮੁਖਾਨਿ. ਤਾਨਿ ਹਿ ਨਙ੍ਗਲਸਰਿਕ੍ਖਕਤ੍ਤਾ ਨਙ੍ਗਲੇਹਿ ਚ ਖਤਤ੍ਤਾ ਨਙ੍ਗਲਮੁਖਾਨੀਤਿ ਵੁਚ੍ਚਨ੍ਤਿ.
ਏਵਮੇਵ ਖੋਤਿ ਏਤ੍ਥ ਸੋਤਂ ਵਿਯ ਵਿਪਸ੍ਸਨਾਞਾਣਂ ਦਟ੍ਠਬ੍ਬਂ, ਉਭਤੋ ਨਙ੍ਗਲਮੁਖਾਨਂ ਵਿਵਰਣਕਾਲੋ ਵਿਯ ਛਸੁ ਦ੍ਵਾਰੇਸੁ ਸਂਵਰਸ੍ਸ ਵਿਸ੍ਸਟ੍ਠਕਾਲੋ, ਮਜ੍ਝੇਨਦਿਯਾ ਰੁਕ੍ਖਪਾਦੇ ਕੋਟ੍ਟੇਤ੍ਵਾ ਪਲਾਲਤਿਣਮਤ੍ਤਿਕਾਹਿ ਆਵਰਣੇ ਕਤੇ ਉਦਕਸ੍ਸ ਵਿਕ੍ਖਿਤ੍ਤਵਿਸਟਬ੍ਯਾਦਿਣ੍ਣਕਾਲੋ ਵਿਯ ਪਞ੍ਚਹਿ ਨੀਵਰਣੇਹਿ ਪਰਿਯੋਨਦ੍ਧਕਾਲੋ, ਏਵਂ ਆਵਰਣੇ ਕਤੇ ਵਿਹਤਵੇਗਸ੍ਸ ਉਦਕਸ੍ਸ ਤਿਣਪਲਾਲਾਦੀਨਿ ਪਰਿਕਡ੍ਢਿਤ੍ਵਾ ਸਮੁਦ੍ਦਂ ਪਾਪੁਣਿਤੁਂ ਅਸਮਤ੍ਥਕਾਲੋ ਵਿਯ ਵਿਪਸ੍ਸਨਾਞਾਣੇਨ ਸਬ੍ਬਾਕੁਸਲੇ ਵਿਦ੍ਧਂਸੇਤ੍ਵਾ ਨਿਬ੍ਬਾਨਸਾਗਰਂ ਪਾਪੁਣਿਤੁਂ ਅਸਮਤ੍ਥਕਾਲੋ ਵੇਦਿਤਬ੍ਬੋ. ਸੁਕ੍ਕਪਕ੍ਖੇ ਵੁਤ੍ਤਵਿਪਲ੍ਲਾਸੇਨ ਯੋਜਨਾ ਕਾਤਬ੍ਬਾ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ. ਦੁਤਿਯਂ ਉਤ੍ਤਾਨਤ੍ਥਮੇਵ.
੩. ਪਧਾਨਿਯਙ੍ਗਸੁਤ੍ਤਵਣ੍ਣਨਾ
੫੩. ਤਤਿਯੇ ਪਧਾਨਿਯਙ੍ਗਾਨੀਤਿ ਪਧਾਨਂ ਵੁਚ੍ਚਤਿ ਪਦਹਨਭਾਵੋ, ਪਧਾਨਮਸ੍ਸ ਅਤ੍ਥੀਤਿ ਪਧਾਨਿਯੋ, ਪਧਾਨਿਯਸ੍ਸ ਭਿਕ੍ਖੁਨੋ ਅਙ੍ਗਾਨੀਤਿ ਪਧਾਨਿਯਙ੍ਗਾਨਿ. ਸਦ੍ਧੋਤਿ ਸਦ੍ਧਾਯ ਸਮਨ੍ਨਾਗਤੋ. ਸਦ੍ਧਾ ਪਨੇਸਾ ਆਗਮਸਦ੍ਧਾ ਅਧਿਗਮਸਦ੍ਧਾ ਓਕਪ੍ਪਨਸਦ੍ਧਾ ਪਸਾਦਸਦ੍ਧਾਤਿ ਚਤੁਬ੍ਬਿਧਾ. ਤਤ੍ਥ ਸਬ੍ਬਞ੍ਞੁਬੋਧਿਸਤ੍ਤਾਨਂ ਸਦ੍ਧਾ, ਅਭਿਨੀਹਾਰਤੋ ਪਟ੍ਠਾਯ ਆਗਤਤ੍ਤਾ ਆਗਮਸਦ੍ਧਾ ਨਾਮ. ਅਰਿਯਸਾਵਕਾਨਂ ਪਟਿਵੇਧੇਨ ਅਧਿਗਤਤ੍ਤਾ ਅਧਿਗਮਸਦ੍ਧਾ ਨਾਮ. ਬੁਦ੍ਧੋ ਧਮ੍ਮੋ ਸਙ੍ਘੋਤਿ ਵੁਤ੍ਤੇ ਅਚਲਭਾਵੇਨ ਓਕਪ੍ਪਨਂ ਓਕਪ੍ਪਨਸਦ੍ਧਾ ਨਾਮ. ਪਸਾਦੁਪ੍ਪਤ੍ਤਿ ਪਸਾਦਸਦ੍ਧਾ ਨਾਮ. ਇਧ ਓਕਪ੍ਪਨਸਦ੍ਧਾ ਅਧਿਪ੍ਪੇਤਾ. ਬੋਧਿਨ੍ਤਿ ਚਤੁਮਗ੍ਗਞਾਣਂ. ਤਂ ਸੁਪ੍ਪਟਿਵਿਦ੍ਧਂ ਤਥਾਗਤੇਨਾਤਿ ਸਦ੍ਦਹਤਿ. ਦੇਸਨਾਸੀਸਮੇਵ ਚੇਤਂ, ਇਮਿਨਾ ਪਨ ਅਙ੍ਗੇਨ ਤੀਸੁਪਿ ਰਤਨੇਸੁ ਸਦ੍ਧਾ ਅਧਿਪ੍ਪੇਤਾ. ਯਸ੍ਸ ਹਿ ਬੁਦ੍ਧਾਦੀਸੁ ਪਸਾਦੋ ਬਲਵਾ, ਤਸ੍ਸ ਪਧਾਨਵੀਰਿਯਂ ਇਜ੍ਝਤਿ.
ਅਪ੍ਪਾਬਾਧੋਤਿ ਅਰੋਗੋ. ਅਪ੍ਪਾਤਙ੍ਕੋਤਿ ਨਿਦ੍ਦੁਕ੍ਖੋ. ਸਮਵੇਪਾਕਿਨਿਯਾਤਿ ਸਮਵਿਪਾਕਿਨਿਯਾ. ਗਹਣਿਯਾਤਿ ਕਮ੍ਮਜਤੇਜੋਧਾਤੁਯਾ. ਨਾਤਿਸੀਤਾਯ ਨਾਚ੍ਚੁਣ੍ਹਾਯਾਤਿ ਅਤਿਸੀਤਲਗ੍ਗਹਣਿਕੋ ਹਿ ਸੀਤਭੀਰੁਕੋ ਹੋਤਿ, ਅਚ੍ਚੁਣ੍ਹਗ੍ਗਹਣਿਕੋ ਉਣ੍ਹਭੀਰੁਕੋ, ਤੇਸਂ ਪਧਾਨਂ ਨ ਇਜ੍ਝਤਿ, ਮਜ੍ਝਿਮਗ੍ਗਹਣਿਕਸ੍ਸ ਇਜ੍ਝਤਿ. ਤੇਨਾਹ – ਮਜ੍ਝਿਮਾਯ ਪਧਾਨਕ੍ਖਮਾਯਾਤਿ. ਯਥਾਭੂਤਂ ਅਤ੍ਤਾਨਂ ਆਵਿਕਤ੍ਤਾਤਿ ਯਥਾਭੂਤਂ ਅਤ੍ਤਨੋ ਅਗੁਣਂ ਪਕਾਸੇਤਾ. ਉਦਯਤ੍ਥਗਾਮਿਨਿਯਾਤਿ ਉਦਯਞ੍ਚ ਅਤ੍ਥਞ੍ਚ ਗਨ੍ਤੁਂ ਪਰਿਚ੍ਛਿਨ੍ਦਿਤੁਂ ਸਮਤ੍ਥਾਯ. ਏਤੇਨ ਪਞ੍ਞਾਸਲਕ੍ਖਣਪਰਿਗ੍ਗਾਹਕਂ ਉਦਯਬ੍ਬਯਞਾਣਂ ਵੁਤ੍ਤਂ. ਅਰਿਯਾਯਾਤਿ ਪਰਿਸੁਦ੍ਧਾਯ. ਨਿਬ੍ਬੇਧਿਕਾਯਾਤਿ ਅਨਿਬ੍ਬਿਦ੍ਧਪੁਬ੍ਬੇ ਲੋਭਕ੍ਖਨ੍ਧਾਦਯੋ ਨਿਬ੍ਬਿਜ੍ਝਿਤੁਂ ਸਮਤ੍ਥਾਯ. ਸਮ੍ਮਾ ਦੁਕ੍ਖਕ੍ਖਯਗਾਮਿਨਿਯਾਤਿ ਤਦਙ੍ਗਵਸੇਨ ਕਿਲੇਸਾਨਂ ਪਹੀਨਤ੍ਤਾ ਯਂ ਦੁਕ੍ਖਂ ਖੀਯਤਿ, ਤਸ੍ਸ ਦੁਕ੍ਖਸ੍ਸ ਖਯਗਾਮਿਨਿਯਾ. ਇਤਿ ਸਬ੍ਬੇਹਿਪਿ ਇਮੇਹਿ ਪਦੇਹਿ ਵਿਪਸ੍ਸਨਾਪਞ੍ਞਾਵ ਕਥਿਤਾ. ਦੁਪ੍ਪਞ੍ਞਸ੍ਸ ਹਿ ਪਧਾਨਂ ਨ ਇਜ੍ਝਤਿ.
੪. ਸਮਯਸੁਤ੍ਤਵਣ੍ਣਨਾ
੫੪. ਚਤੁਤ੍ਥੇ ਪਧਾਨਾਯਾਤਿ ਵੀਰਿਯਕਰਣਤ੍ਥਾਯ. ਨ ਸੁਕਰਂ ਉਞ੍ਛੇਨ ਪਗ੍ਗਹੇਨ ਯਾਪੇਤੁਨ੍ਤਿ ਨ ਸਕ੍ਕਾ ਹੋਤਿ ਪਤ੍ਤਂ ਗਹੇਤ੍ਵਾ ਉਞ੍ਛਾਚਰਿਯਾਯ ਯਾਪੇਤੁਂ. ਇਮਸ੍ਮਿਮ੍ਪਿ ਸੁਤ੍ਤੇ ਵਟ੍ਟਵਿਵਟ੍ਟਮੇਵ ਕਥਿਤਂ.
੫. ਮਾਤਾਪੁਤ੍ਤਸੁਤ੍ਤਵਣ੍ਣਨਾ
੫੫. ਪਞ੍ਚਮੇ ਪਰਿਯਾਦਾਯ ਤਿਟ੍ਠਤੀਤਿ ਪਰਿਯਾਦਿਯਿਤ੍ਵਾ ਗਹੇਤ੍ਵਾ ਖੇਪੇਤ੍ਵਾ ਤਿਟ੍ਠਤਿ. ਉਗ੍ਘਾਤਿਤਾਤਿ ਉਦ੍ਧੁਮਾਤਾ.
ਅਸਿਹਤ੍ਥੇਨਾਤਿ ਸੀਸਚ੍ਛੇਦਨਤ੍ਥਾਯ ਅਸਿਂ ਆਦਾਯ ਆਗਤੇਨਾਪਿ. ਪਿਸਾਚੇਨਾਤਿ ਖਾਦਿਤੁਂ ਆਗਤਯਕ੍ਖੇਨਾਪਿ. ਆਸੀਦੇਤਿ ਘਟ੍ਟੇਯ੍ਯ. ਮਞ੍ਜੁਨਾਤਿ ਮੁਦੁਕੇਨ. ਕਾਮੋਘਵੁਲ਼੍ਹਾਨਨ੍ਤਿ ਕਾਮੋਘੇਨ ਵੁਲ਼੍ਹਾਨਂ ਕਡ੍ਢਿਤਾਨਂ. ਕਾਲਂ ਗਤਿ ਭਵਾਭਵਨ੍ਤਿ ਵਟ੍ਟਕਾਲਂ ਗਤਿਞ੍ਚ ਪੁਨਪ੍ਪੁਨਬ੍ਭਵੇ ਚ. ਪੁਰਕ੍ਖਤਾਤਿ ਪੁਰੇਚਾਰਿਕਾ ਪੁਰਤੋ ਗਤਾਯੇਵ. ਯੇ ਚ ਕਾਮੇ ਪਰਿਞ੍ਞਾਯਾਤਿ ਯੇ ਪਣ੍ਡਿਤਾ ਦੁਵਿਧੇਪਿ ਕਾਮੇ ਤੀਹਿ ਪਰਿਞ੍ਞਾਹਿ ਪਰਿਜਾਨਿਤ੍ਵਾ. ਚਰਨ੍ਤਿ ਅਕੁਤੋਭਯਾਤਿ ਖੀਣਾਸਵਾਨਂ ਕੁਤੋਚਿ ਭਯਂ ਨਾਮ ਨਤ੍ਥਿ, ਤਸ੍ਮਾ ਤੇ ਅਕੁਤੋਭਯਾ ਹੁਤ੍ਵਾ ਚਰਨ੍ਤਿ. ਪਾਰਙ੍ਗਤਾਤਿ ਪਾਰਂ ਵੁਚ੍ਚਤਿ ਨਿਬ੍ਬਾਨਂ, ਤਂ ਉਪਗਤਾ, ਸਚ੍ਛਿਕਤ੍ਵਾ ਠਿਤਾਤਿ ਅਤ੍ਥੋ. ਆਸਵਕ੍ਖਯਨ੍ਤਿ ਅਰਹਤ੍ਤਂ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥੇਤ੍ਵਾ ਗਾਥਾਸੁ ਵਟ੍ਟਵਿਵਟ੍ਟਂ ਕਥਿਤਂ.
੬. ਉਪਜ੍ਝਾਯਸੁਤ੍ਤਵਣ੍ਣਨਾ
੫੬. ਛਟ੍ਠੇ ਮਧੁਰਕਜਾਤੋਤਿ ਸਞ੍ਜਾਤਗਰੁਭਾਵੋ. ਦਿਸਾ ਚ ਮੇ ਨ ਪਕ੍ਖਾਯਨ੍ਤੀਤਿ ਚਤਸ੍ਸੋ ਦਿਸਾ ਚ ਅਨੁਦਿਸਾ ਚ ਮਯ੍ਹਂ ਨ ਉਪਟ੍ਠਹਨ੍ਤੀਤਿ ਵਦਤਿ. ਧਮ੍ਮਾ ਚ ਮਂ ਨਪ੍ਪਟਿਭਨ੍ਤੀਤਿ ਸਮਥਵਿਪਸ੍ਸਨਾਧਮ੍ਮਾਪਿ ਮੇ ਨ ਉਪਟ੍ਠਹਨ੍ਤਿ. ਅਨਭਿਰਤੋ ਚ ਬ੍ਰਹ੍ਮਚਰਿਯਂ ਚਰਾਮੀਤਿ ਉਕ੍ਕਣ੍ਠਿਤੋ ਹੁਤ੍ਵਾ ਬ੍ਰਹ੍ਮਚਰਿਯਵਾਸਂ ਵਸਾਮਿ. ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਤਸ੍ਸ ਕਥਂ ਸੁਤ੍ਵਾ ‘‘ਬੁਦ੍ਧਵੇਨੇਯ੍ਯਪੁਗ੍ਗਲੋ ਅਯ’’ਨ੍ਤਿ ਤਂ ਕਾਰਣਂ ਭਗਵਤੋ ਆਰੋਚੇਤੁਂ ਉਪਸਙ੍ਕਮਿ. ਅਵਿਪਸ੍ਸਕਸ੍ਸ ਕੁਸਲਾਨਂ ਧਮ੍ਮਾਨਨ੍ਤਿ ਕੁਸਲਧਮ੍ਮੇ ਅਵਿਪਸ੍ਸਨ੍ਤਸ੍ਸ, ਅਨੇਸਨ੍ਤਸ੍ਸ ਅਗਵੇਸਨ੍ਤਸ੍ਸਾਤਿ ਅਤ੍ਥੋ. ਬੋਧਿਪਕ੍ਖਿਯਾਨਂ ਧਮ੍ਮਾਨਨ੍ਤਿ ਸਤਿਪਟ੍ਠਾਨਾਦੀਨਂ ਸਤ੍ਤਤਿਂਸਧਮ੍ਮਾਨਂ.
੭. ਅਭਿਣ੍ਹਪਚ੍ਚਵੇਕ੍ਖਿਤਬ੍ਬਠਾਨਸੁਤ੍ਤਵਣ੍ਣਨਾ
੫੭. ਸਤ੍ਤਮੇ ਜਰਾਧਮ੍ਮੋਮ੍ਹੀਤਿ ਜਰਾਸਭਾਵੋ ਅਮ੍ਹਿ. ਜਰਂ ਅਨਤੀਤੋਤਿ ਜਰਂ ਅਨਤਿਕ੍ਕਨ੍ਤੋ, ਅਨ੍ਤੋਜਰਾਯ ਏਵ ਚਰਾਮਿ. ਸੇਸਪਦੇਸੁਪਿ ਏਸੇਵ ਨਯੋ. ਕਮ੍ਮਸ੍ਸਕੋਤਿਆਦੀਸੁ ਕਮ੍ਮਂ ਮਯ੍ਹਂ ਸਕਂ ਅਤ੍ਤਨੋ ਸਨ੍ਤਕਨ੍ਤਿ ਕਮ੍ਮਸ੍ਸਕੋ ਅਮ੍ਹਿ. ਕਮ੍ਮਸ੍ਸ ਦਾਯਾਦੋਤਿ ਕਮ੍ਮਦਾਯਾਦੋ, ਕਮ੍ਮਂ ਮਯ੍ਹਂ ਦਾਯਜ੍ਜਂ ਸਨ੍ਤਕਨ੍ਤਿ ਅਤ੍ਥੋ. ਕਮ੍ਮਂ ਮਯ੍ਹਂ ਯੋਨਿ ਕਾਰਣਨ੍ਤਿ ਕਮ੍ਮਯੋਨਿ. ਕਮ੍ਮਂ ਮਯ੍ਹਂ ਬਨ੍ਧੂਤਿ ਕਮ੍ਮਬਨ੍ਧੁ, ਕਮ੍ਮਞਾਤਕੋਤਿ ਅਤ੍ਥੋ. ਕਮ੍ਮਂ ਮਯ੍ਹਂ ਪਟਿਸਰਣਂ ਪਤਿਟ੍ਠਾਤਿ ਕਮ੍ਮਪਟਿਸਰਣੋ. ਤਸ੍ਸ ਦਾਯਾਦੋ ਭਵਿਸ੍ਸਾਮੀਤਿ ਤਸ੍ਸ ਕਮ੍ਮਸ੍ਸ ਦਾਯਾਦੋ ਤੇਨ ਦਿਨ੍ਨਫਲਪਟਿਗ੍ਗਾਹਕੋ ਭਵਿਸ੍ਸਾਮੀਤਿ ਅਤ੍ਥੋ. ਯੋਬ੍ਬਨਮਦੋਤਿ ਯੋਬ੍ਬਨਂ ਆਰਬ੍ਭ ਉਪ੍ਪਨ੍ਨਮਦੋ. ਸੇਸੇਸੁਪਿ ਏਸੇਵ ਨਯੋ. ਮਗ੍ਗੋ ਸਞ੍ਜਾਯਤੀਤਿ ਲੋਕੁਤ੍ਤਰਮਗ੍ਗੋ ਸਞ੍ਜਾਯਤਿ. ਸਂਯੋਜਨਾਨਿ ਸਬ੍ਬਸੋ ਪਹੀਯਨ੍ਤੀਤਿ ਦਸ ਸਂਯੋਜਨਾਨਿ ਸਬ੍ਬਸੋ ਪਹੀਯਨ੍ਤਿ. ਅਨੁਸਯਾ ਬ੍ਯਨ੍ਤੀਹੋਨ੍ਤੀਤਿ ਸਤ੍ਤ ਅਨੁਸਯਾ ਵਿਗਤਨ੍ਤਾ ਪਰਿਚ੍ਛਿਨ੍ਨਾ ਪਰਿਵਟੁਮਾ ਹੋਨ੍ਤਿ. ਏਵਮੇਤ੍ਥ ਹੇਟ੍ਠਾ ਪਞ੍ਚਸੁ ਠਾਨੇਸੁ ਵਿਪਸ੍ਸਨਾ ਕਥਿਤਾ, ਇਮੇਸੁ ਪਞ੍ਚਸੁ ਲੋਕੁਤ੍ਤਰਮਗ੍ਗੋ.
ਇਦਾਨਿ ਗਾਥਾਹਿ ਕੂਟਂ ਗਣ੍ਹਨ੍ਤੋ ਬ੍ਯਾਧਿਧਮ੍ਮਾਤਿਆਦਿਮਾਹ. ਤਤ੍ਥ ਞਤ੍ਵਾ ਧਮ੍ਮਂ ਨਿਰੂਪਧਿਨ੍ਤਿ ਉਪਧਿਰਹਿਤਂ ਅਰਹਤ੍ਤਮਗ੍ਗਂ ਞਤ੍ਵਾ. ਸਬ੍ਬੇ ਮਦੇ ਅਭਿਭੋਸ੍ਮੀਤਿ ਸਬ੍ਬੇ ਇਮੇ ਤਯੋਪਿ ਮਦੇ ਅਧਿਭਵਿਂ, ਅਤਿਕ੍ਕਮ੍ਮ ਠਿਤੋਸ੍ਮੀਤਿ ਅਤ੍ਥੋ. ਨੇਕ੍ਖਮ੍ਮਂ ਦਟ੍ਠੁ ਖੇਮਤੋਤਿ ਪਬ੍ਬਜ੍ਜਂ ਖੇਮਤੋ ਦਿਸ੍ਵਾ. ਤਸ੍ਸ ਮੇ ਅਹੁ ਉਸ੍ਸਾਹੋ, ਨਿਬ੍ਬਾਨਂ ਅਭਿਪਸ੍ਸਤੋਤਿ ਤਸ੍ਸ ਮਯ੍ਹਂ ਨਿਬ੍ਬਾਨਂ ਅਭਿਪਸ੍ਸਨ੍ਤਸ੍ਸ ਵਾਯਾਮੋ ਅਹੋਸਿ. ਅਨਿਵਤ੍ਤਿ ਭਵਿਸ੍ਸਾਮੀਤਿ ਪਬ੍ਬਜ੍ਜਤੋ ਅਨਿਵਤ੍ਤਿਕੋ ਭਵਿਸ੍ਸਾਮਿ, ਬ੍ਰਹ੍ਮਚਰਿਯਵਾਸਤੋ ਅਨਿਵਤ੍ਤਿਕੋ, ਸਬ੍ਬਞ੍ਞੁਤਞ੍ਞਾਣਤੋ ਅਨਿਵਤ੍ਤਿਕੋ ਭਵਿਸ੍ਸਾਮਿ. ਬ੍ਰਹ੍ਮਚਰਿਯਪਰਾਯਣੋਤਿ ਮਗ੍ਗਬ੍ਰਹ੍ਮਚਰਿਯਪਰਾਯਣੋ. ਇਮਿਨਾ ਲੋਕੁਤ੍ਤਰੋ ਅਟ੍ਠਙ੍ਗਿਕੋ ਮਗ੍ਗੋ ਕਥਿਤੋਤਿ.
੮. ਲਿਚ੍ਛਵਿਕੁਮਾਰਕਸੁਤ੍ਤਵਣ੍ਣਨਾ
੫੮. ਅਟ੍ਠਮੇ ਸਜ੍ਜਾਨਿ ਧਨੂਨੀਤਿ ਸਜਿਯਾਨਿ ਆਰੋਪਿਤਧਨੂਨਿ. ਅਦ੍ਦਸੂਤਿ ਅਦ੍ਦਸਂਸੁ. ਭਵਿਸ੍ਸਨ੍ਤਿ ਵਜ੍ਜੀਤਿ ਵਡ੍ਢਿਸ੍ਸਨ੍ਤਿ ਵਜ੍ਜਿਰਾਜਾਨੋ. ਅਪਾਨੁਭਾਤਿ ਅਵਡ੍ਢਿਨਿਸ੍ਸਿਤਾ ਮਾਨਥਦ੍ਧਾ. ਪਚ੍ਛਾਲਿਯਂ ਖਿਪਨ੍ਤੀਤਿ ਪਚ੍ਛਤੋ ਗਨ੍ਤ੍ਵਾ ਪਿਟ੍ਠਿਂ ਪਾਦੇਨ ਪਹਰਨ੍ਤਿ. ਰਟ੍ਠਿਕਸ੍ਸਾਤਿਆਦੀਸੁ ਰਟ੍ਠਂ ਭੁਞ੍ਜਤੀਤਿ ਰਟ੍ਠਿਕੋ. ਪਿਤਰਾ ਦਤ੍ਤਂ ਸਾਪਤੇਯ੍ਯਂ ਭੁਞ੍ਜਤੀਤਿ ਪੇਤ੍ਤਨਿਕੋ. ਸੇਨਾਯ ਪਤਿ ਜੇਟ੍ਠਕੋਤਿ ਸੇਨਾਪਤਿਕੋ. ਗਾਮਗਾਮਣਿਕਸ੍ਸਾਤਿ ਗਾਮਾਨਂ ਗਾਮਣਿਕਸ੍ਸ, ਗਾਮਸਾਮਿਕਸ੍ਸਾਤਿ ਅਤ੍ਥੋ. ਪੂਗਗਾਮਣਿਕਸ੍ਸਾਤਿ ਗਣਜੇਟ੍ਠਕਸ੍ਸ. ਕੁਲੇਸੂਤਿ ਤੇਸੁ ਤੇਸੁ ਕੁਲੇਸੁ. ਪਚ੍ਚੇਕਾਧਿਪਚ੍ਚਂ ਕਾਰੇਨ੍ਤੀਤਿ ਪਚ੍ਚੇਕਂ ਜੇਟ੍ਠਕਟ੍ਠਾਨਂ ਕਾਰੇਨ੍ਤਿ. ਕਲ੍ਯਾਣੇਨ ਮਨਸਾ ਅਨੁਕਮ੍ਪਨ੍ਤੀਤਿ ਸੁਨ੍ਦਰੇਨ ਚਿਤ੍ਤੇਨ ਅਨੁਗ੍ਗਣ੍ਹਨ੍ਤਿ. ਖੇਤ੍ਤਕਮ੍ਮਨ੍ਤਸਾਮਨ੍ਤਸਬ੍ਯੋਹਾਰੇਤਿ ਯੇ ਚ ਅਤ੍ਤਨੋ ਖੇਤ੍ਤਕਮ੍ਮਨ੍ਤਾਨਂ ਸਾਮਨ੍ਤਾ ਅਨਨ੍ਤਰਕ੍ਖੇਤ੍ਤਸਾਮਿਨੋ, ਤੇ ਚ ਰਜ੍ਜੁਦਣ੍ਡੇਹਿ ਭੂਮਿਪ੍ਪਮਾਣਗ੍ਗਾਹਕੇ ਸਬ੍ਬੋਹਾਰੇ ਚ. ਬਲਿਪਟਿਗ੍ਗਾਹਿਕਾ ਦੇਵਤਾਤਿ ਕੁਲਪ੍ਪਵੇਣਿਯਾ ਆਗਤਾ ਆਰਕ੍ਖਦੇਵਤਾ. ਸਕ੍ਕਰੋਤੀਤਿ ਤਾ ਦੇਵਤਾ ਅਗ੍ਗਯਾਗੁਭਤ੍ਤਾਦੀਹਿ ਸਕ੍ਕਰੋਤਿ.
ਕਿਚ੍ਚਕਰੋਤਿ ਉਪ੍ਪਨ੍ਨਾਨਂ ਕਿਚ੍ਚਾਨਂ ਕਾਰਕੋ. ਯੇ ਚਸ੍ਸ ਅਨੁਜੀਵਿਨੋਤਿ ਯੇ ਚ ਏਤਂ ਉਪਨਿਸ੍ਸਾਯ ਜੀਵਨ੍ਤਿ. ਉਭਿਨ੍ਨਞ੍ਚੇਵ ਅਤ੍ਥਾਯਾਤਿ ਉਭਿਨ੍ਨਮ੍ਪਿ ਹਿਤਤ੍ਥਾਯ ਪਟਿਪਨ੍ਨੋ ਹੋਤੀਤਿ ਅਤ੍ਥੋ. ਪੁਬ੍ਬਪੇਤਾਨਨ੍ਤਿ ਪਰਲੋਕਗਤਾਨਂ. ਦਿਟ੍ਠੇ ਧਮ੍ਮੇ ਚ ਜੀਵਤਨ੍ਤਿ ਯੇ ਚ ਦਿਟ੍ਠੇ ਧਮ੍ਮੇ ਜੀਵਨ੍ਤਿ. ਇਤਿ ਪਦਦ੍ਵਯੇਨਾਪਿ ਅਤੀਤਪਚ੍ਚੁਪ੍ਪਨ੍ਨੇ ਞਾਤਯੋ ਦਸ੍ਸੇਤਿ. ਵਿਤ੍ਤਿਸਞ੍ਜਨਨੋਤਿ ਤੁਟ੍ਠਿਜਨਨੋ. ਘਰਮਾਵਸਨ੍ਤਿ ਘਰਾਵਾਸਂ ਵਸਨ੍ਤੋ. ਪੁਜ੍ਜੋ ਹੋਤਿ ਪਸਂਸਿਯੋਤਿ ਪੂਜੇਤਬ੍ਬੋ ਚ ਪਸਂਸਿਤਬ੍ਬੋ ਚ ਹੋਤੀਤਿ.
੯-੧੦. ਵੁਡ੍ਢਪਬ੍ਬਜਿਤਸੁਤ੍ਤਦ੍ਵਯਵਣ੍ਣਨਾ
੫੯-੬੦. ਨਵਮੇ ਨਿਪੁਣੋਤਿ ਸਣ੍ਹੋ ਸੁਖੁਮਕਾਰਣਞ੍ਞੂ. ਆਕਪ੍ਪਸਮ੍ਪਨ੍ਨੋਤਿ ਸਮਣਾਕਪ੍ਪੇਨ ਸਮ੍ਪਨ੍ਨੋ. ਦਸਮੇ ਪਦਕ੍ਖਿਣਗ੍ਗਾਹੀਤਿ ਦਿਨ੍ਨੋਵਾਦਂ ਪਦਕ੍ਖਿਣਤੋ ਗਣ੍ਹਨ੍ਤੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਨੀਵਰਣਵਗ੍ਗੋ ਪਠਮੋ.
(੭) ੨. ਸਞ੍ਞਾਵਗ੍ਗੋ
੧-੨. ਸਞ੍ਞਾਸੁਤ੍ਤਦ੍ਵਯਵਣ੍ਣਨਾ
੬੧-੬੨. ਦੁਤਿਯਸ੍ਸ ਪਠਮੇ ਮਹਪ੍ਫਲਾਤਿ ਵਿਪਾਕਫਲੇਨ ਮਹਪ੍ਫਲਾ. ਵਿਪਾਕਾਨਿਸਂਸੇਨੇਵ ਮਹਾਨਿਸਂਸਾ. ਅਮਤੋਗਧਾਤਿ ਨਿਬ੍ਬਾਨਪਤਿਟ੍ਠਾ. ਸਬ੍ਬਲੋਕੇ ਅਨਭਿਰਤਿਸਞ੍ਞਾਤਿ ਸਬ੍ਬਸ੍ਮਿਂ ਤੇਧਾਤੁਸਨ੍ਨਿਵੇਸੇ ਲੋਕੇ ਉਕ੍ਕਣ੍ਠਿਤਸ੍ਸ ਉਪ੍ਪਜ੍ਜਨਕਸਞ੍ਞਾ. ਦੁਤਿਯਂ ਉਤ੍ਤਾਨਤ੍ਥਮੇਵ.
੩-੪. ਵਡ੍ਢਸੁਤ੍ਤਦ੍ਵਯਵਣ੍ਣਨਾ
੬੩-੬੪. ਤਤਿਯੇ ਵਰਾਦਾਯੀਤਿ ਉਤ੍ਤਮਸ੍ਸ ਵਰਸ੍ਸ ਆਦਾਯਕੋ. ਸੇਸਮੇਤ੍ਥ ਚਤੁਤ੍ਥੇ ਚ ਉਤ੍ਤਾਨਤ੍ਥਮੇਵਾਤਿ.
੫. ਸਾਕਚ੍ਛਸੁਤ੍ਤਵਣ੍ਣਨਾ
੬੫. ਪਞ੍ਚਮੇ ਅਲਂਸਾਕਚ੍ਛੋਤਿ ਸਾਕਚ੍ਛਾਯ ਯੁਤ੍ਤੋ. ਆਗਤਂ ਪਞ੍ਹਨ੍ਤਿ ਪੁਚ੍ਛਿਤਂ ਪਞ੍ਹਂ. ਬ੍ਯਾਕਤ੍ਤਾ ਹੋਤੀਤਿ ਵਿਸ੍ਸਜ੍ਜਿਤਾ ਹੋਤਿ.
੬. ਸਾਜੀਵਸੁਤ੍ਤਵਣ੍ਣਨਾ
੬੬. ਛਟ੍ਠੇ ਅਲਂਸਾਜੀਵੋਤਿ ਸਾਜੀਵਾਯ ਯੁਤ੍ਤੋ. ਸਾਜੀਵੋਤਿ ਪਞ੍ਹਪੁਚ੍ਛਨਞ੍ਚੇਵ ਪਞ੍ਹਵਿਸ੍ਸਜ੍ਜਨਞ੍ਚ. ਸਬ੍ਬੇਪਿ ਹਿ ਸਬ੍ਰਹ੍ਮਚਾਰਿਨੋ ਪਞ੍ਹਂ ਉਪਜੀਵਨ੍ਤਿ, ਤੇਨੇਤਂ ਪਞ੍ਹਪੁਚ੍ਛਨਵਿਸ੍ਸਜ੍ਜਨਂ ਸਮਾਨਾਜੀਵਤਾਯ ਸਾਜੀਵੋਤਿ ਵੁਤ੍ਤਂ. ਕਤਂ ਪਞ੍ਹਨ੍ਤਿ ਅਭਿਸਙ੍ਖਤਂ ਪਞ੍ਹਂ.
੭-੧੦. ਪਠਮਇਦ੍ਧਿਪਾਦਸੁਤ੍ਤਾਦਿਵਣ੍ਣਨਾ
੬੭-੭੦. ਸਤ੍ਤਮੇ ਉਸ੍ਸੋਲ਼੍ਹੀਤਿ ਅਧਿਮਤ੍ਤਵੀਰਿਯਂ. ਅਟ੍ਠਮੇ ਅਤ੍ਤਨੋ ਬੋਧਿਮਣ੍ਡੇ ਪਟਿਵਿਦ੍ਧੇ ਆਗਮਨਇਦ੍ਧਿਪਾਦੇ ਕਥੇਤ੍ਵਾ ਉਪਰਿ ਅਤ੍ਤਨੋਵ ਛ ਅਭਿਞ੍ਞਾ ਕਥੇਸੀਤਿ. ਨਵਮਦਸਮੇਸੁ ਵਿਪਸ੍ਸਨਾ ਕਥਿਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਸਞ੍ਞਾਵਗ੍ਗੋ ਦੁਤਿਯੋ.
(੮) ੩. ਯੋਧਾਜੀਵਵਗ੍ਗੋ
੧. ਪਠਮਚੇਤੋਵਿਮੁਤ੍ਤਿਫਲਸੁਤ੍ਤਵਣ੍ਣਨਾ
੭੧. ਤਤਿਯਸ੍ਸ ਪਠਮੇ ਯਤੋ ਖੋ, ਭਿਕ੍ਖਵੇਤਿ ਹੇਟ੍ਠਾ ਵੁਤ੍ਤਨਯੇਨ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਤਸ੍ਸ ਭਿਕ੍ਖੁਨੋ ਇਦਾਨਿ ਵਣ੍ਣਭਣਨਤ੍ਥਂ ਇਦਂ ਆਰਦ੍ਧਂ. ਤਤ੍ਥ ਯਤੋ ਖੋਤਿ ਯਦਾ ਖੋ. ਉਕ੍ਖਿਤ੍ਤਪਲਿਘੋਤਿ ਅਵਿਜ੍ਜਾਪਲਿਘਂ ਉਕ੍ਖਿਪਿਤ੍ਵਾ ਅਪਨੇਤ੍ਵਾ ਠਿਤੋ. ਸਂਕਿਣ੍ਣਪਰਿਖੋਤਿ ਸਂਸਾਰਪਰਿਖਂ ਸਂਕਿਰਿਤ੍ਵਾ ਵਿਨਾਸੇਤ੍ਵਾ ਠਿਤੋ. ਅਬ੍ਬੂਲ਼੍ਹੇਸਿਕੋਤਿ ਤਣ੍ਹਾਸਙ੍ਖਾਤਂ ਏਸਿਕਾਥਮ੍ਭਂ ਅਬ੍ਬੁਯ੍ਹ ਲੁਞ੍ਚਿਤ੍ਵਾ ਠਿਤੋ. ਨਿਰਗ੍ਗਲ਼ੋਤਿ ਨੀਵਰਣਕਵਾਟਂ ਉਗ੍ਘਾਟੇਤ੍ਵਾ ਠਿਤੋ. ਪਨ੍ਨਦ੍ਧਜੋ ਪਨ੍ਨਭਾਰੋਤਿ ਮਾਨਦ੍ਧਜਞ੍ਚ ਖਨ੍ਧਾਭਿਸਙ੍ਖਾਰਕਿਲੇਸਭਾਰਞ੍ਚ ਪਾਤੇਤ੍ਵਾ ਓਤਾਰੇਤ੍ਵਾ ਠਿਤੋ. ਵਿਸਂਯੁਤ੍ਤੋਤਿ ਵਟ੍ਟੇਨ ਵਿਸਂਯੁਤ੍ਤੋ. ਸੇਸਂ ਪਾਲ਼ਿਨਯੇਨੇਵ ਵੇਦਿਤਬ੍ਬਂ. ਏਤ੍ਤਾਵਤਾ ਭਗਵਤਾ ਮਗ੍ਗੇਨ ਕਿਲੇਸੇ ਖੇਪੇਤ੍ਵਾ ਨਿਰੋਧਸਯਨਵਰਗਤਸ੍ਸ ਨਿਬ੍ਬਾਨਾਰਮ੍ਮਣਂ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਵਿਹਰਤੋ ਖੀਣਾਸਵਸ੍ਸ ਕਾਲੋ ਦਸ੍ਸਿਤੋ.
ਯਥਾ ਹਿ ਦ੍ਵੇ ਨਗਰਾਨਿ ਏਕਂ ਚੋਰਨਗਰਂ ਏਕਂ ਖੇਮਨਗਰਂ. ਅਥ ਏਕਸ੍ਸ ਮਹਾਯੋਧਸ੍ਸ ਏਵਂ ਭਵੇਯ੍ਯ – ‘‘ਯਾਵਿਮਂ ਚੋਰਨਗਰਂ ਤਿਟ੍ਠਤਿ, ਤਾਵ ਖੇਮਨਗਰਂ ਭਯਤੋ ਨ ਮੁਚ੍ਚਤਿ, ਚੋਰਨਗਰਂ ਅਨਗਰਂ ਕਰਿਸ੍ਸਾਮੀ’’ਤਿ ਸਨ੍ਨਾਹਂ ਕਤ੍ਵਾ ਖਗ੍ਗਂ ਗਹੇਤ੍ਵਾ ਚੋਰਨਗਰਂ ਉਪਸਙ੍ਕਮਿਤ੍ਵਾ ਨਗਰਦ੍ਵਾਰੇ ਉਸ੍ਸਾਪਿਤੇ ਏਸਿਕਾਥਮ੍ਭੇ ਖਗ੍ਗੇਨ ਛਿਨ੍ਦਿਤ੍ਵਾ ਸਦ੍ਧਿਂ ਦ੍ਵਾਰਬਾਹਾਹਿ ਕਵਾਟਂ ਭਿਨ੍ਦਿਤ੍ਵਾ ਪਲਿਘਂ ਉਕ੍ਖਿਪਿਤ੍ਵਾ ਪਾਕਾਰਂ ਭਿਨ੍ਦਿਤ੍ਵਾ ਪਰਿਖਂ ਵਿਕਿਰਿਤ੍ਵਾ ਨਗਰਸੋਭਤ੍ਥਾਯ ਉਸ੍ਸਿਤੇ ਧਜੇ ਪਾਤੇਤ੍ਵਾ ਨਗਰਂ ਅਗ੍ਗਿਨਾ ਝਾਪੇਤ੍ਵਾ ਖੇਮਨਗਰਂ ਪਵਿਸਿਤ੍ਵਾ ਪਾਸਾਦਂ ਆਰੁਯ੍ਹ ਞਾਤਿਗਣਪਰਿਵੁਤੋ ਸੁਰਸਭੋਜਨਂ ਭੁਞ੍ਜੇਯ੍ਯ. ਏਵਂ ਚੋਰਨਗਰਂ ਵਿਯ ਸਕ੍ਕਾਯੋ, ਖੇਮਨਗਰਂ ਵਿਯ ਨਿਬ੍ਬਾਨਂ, ਮਹਾਯੋਧੋ ਵਿਯ ਯੋਗਾਵਚਰੋ. ਤਸ੍ਸੇਵਂ ਹੋਤਿ – ‘‘ਯਾਵ ਸਕ੍ਕਾਯਵਟ੍ਟਂ ਵਟ੍ਟਤਿ, ਤਾਵ ਦ੍ਵਤ੍ਤਿਂਸਕਮ੍ਮਕਾਰਣਾਅਟ੍ਠਨਵੁਤਿਰੋਗਪਞ੍ਚਵੀਸਤਿਮਹਾਭਯੇਹਿ ਪਰਿਮੁਚ੍ਚਨਂ ਨਤ੍ਥੀ’’ਤਿ. ਸੋ ਮਹਾਯੋਧੋ ਸਨ੍ਨਾਹਂ ਵਿਯ ਸੀਲਸਨ੍ਨਾਹਂ ਕਤ੍ਵਾ ਪਞ੍ਞਾਖਗ੍ਗਂ ਗਹੇਤ੍ਵਾ ਖਗ੍ਗੇਨ ਏਸਿਕਾਥਮ੍ਭੇ ਵਿਯ ਅਰਹਤ੍ਤਮਗ੍ਗੇਨ ਤਣ੍ਹੇਸਿਕਂ ਲੁਞ੍ਚਿਤ੍ਵਾ, ਸੋ ਯੋਧੋ ਸਦ੍ਵਾਰਬਾਹਕਂ ਨਗਰਕਵਾਟਂ ਵਿਯ ਪਞ੍ਚੋਰਮ੍ਭਾਗਿਯਸਂਯੋਜਨਅਗ੍ਗਲ਼ਂ ਉਗ੍ਘਾਟੇਤ੍ਵਾ, ਸੋ ਯੋਧੋ ਪਲਿਘਂ ਵਿਯ ਅਵਿਜ੍ਜਾਪਲਿਘਂ ਉਕ੍ਖਿਪਿਤ੍ਵਾ, ਸੋ ਯੋਧੋ ਪਾਕਾਰਂ ਭਿਨ੍ਦਨ੍ਤੋ ਪਰਿਖਂ ਵਿਯ ਕਮ੍ਮਾਭਿਸਙ੍ਖਾਰਂ ਭਿਨ੍ਦਨ੍ਤੋ ਜਾਤਿਸਂਸਾਰਪਰਿਖਂ ਵਿਕਿਰਿਤ੍ਵਾ, ਸੋ ਯੋਧੋ ਨਗਰਂ ਸੋਭਤ੍ਥਾਯ ਉਸ੍ਸਾਪਿਤਦ੍ਧਜੇ ਵਿਯ ਮਾਨਦ੍ਧਜੇ ਪਾਤੇਤ੍ਵਾ ਸਕ੍ਕਾਯਨਗਰਂ ਝਾਪੇਤ੍ਵਾ, ਸੋ ਯੋਧੋ ਖੇਮਨਗਰੇ ਉਪਰਿਪਾਸਾਦੇ ਸੁਭੋਜਨਂ ਵਿਯ ਕਿਲੇਸਪਰਿਨਿਬ੍ਬਾਨਨਗਰਂ ਪਵਿਸਿਤ੍ਵਾ ਅਮਤਂ ਨਿਰੋਧਾਰਮ੍ਮਣਂ ਫਲਸਮਾਪਤ੍ਤਿਸੁਖਂ ਅਨੁਭਵਮਾਨੋ ਕਾਲਂ ਵੀਤਿਨਾਮੇਤਿ.
੨. ਦੁਤਿਯਚੇਤੋਵਿਮੁਤ੍ਤਿਫਲਸੁਤ੍ਤਵਣ੍ਣਨਾ
੭੨. ਦੁਤਿਯੇ ਅਨਿਚ੍ਚਸਞ੍ਞਾਤਿ ਖਨ੍ਧਪਞ੍ਚਕਂ ਹੁਤ੍ਵਾ ਅਭਾਵਾਕਾਰੇਨ ਅਨਿਚ੍ਚਨ੍ਤਿ ਉਪ੍ਪਜ੍ਜਨਕਸਞ੍ਞਾ. ਅਨਿਚ੍ਚੇ ਦੁਕ੍ਖਸਞ੍ਞਾਤਿ ਯਦਨਿਚ੍ਚਂ, ਤਂ ਪਟਿਪੀਲ਼ਨਾਕਾਰੇਨ ਦੁਕ੍ਖਨ੍ਤਿ ਉਪ੍ਪਜ੍ਜਨਕਸਞ੍ਞਾ. ਦੁਕ੍ਖੇ ਅਨਤ੍ਤਸਞ੍ਞਾਤਿ ਯਂ ਦੁਕ੍ਖਂ, ਤਂ ਅਵਸਵਤ੍ਤਨਾਕਾਰੇਨ ਅਨਤ੍ਤਾਤਿ ਉਪ੍ਪਜ੍ਜਨਕਸਞ੍ਞਾ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ. ਇਮੇਸੁ ਪਨ ਦ੍ਵੀਸੁਪਿ ਸੁਤ੍ਤੇਸੁ ਵਿਪਸ੍ਸਨਾਫਲਂ ਨਾਮ ਕਥਿਤਨ੍ਤਿ.
੩. ਪਠਮਧਮ੍ਮਵਿਹਾਰੀਸੁਤ੍ਤਵਣ੍ਣਨਾ
੭੩. ਤਤਿਯੇ ਦਿਵਸਂ ਅਤਿਨਾਮੇਤੀਤਿ ਦਿਵਸਂ ਅਤਿਕ੍ਕਾਮੇਤਿ. ਰਿਞ੍ਚਤਿ ਪਟਿਸਲ੍ਲਾਨਨ੍ਤਿ ਏਕੀਭਾਵਂ ਵਿਸ੍ਸਜ੍ਜੇਤਿ. ਦੇਸੇਤੀਤਿ ਕਥੇਤਿ ਪਕਾਸੇਤਿ. ਧਮ੍ਮਪਞ੍ਞਤ੍ਤਿਯਾਤਿ ਧਮ੍ਮਸ੍ਸ ਪਞ੍ਞਾਪਨਾਯ. ਧਮ੍ਮਂ ਪਰਿਯਾਪੁਣਾਤੀਤਿ ਨਵਙ੍ਗਵਸੇਨ ਚਤੁਸਚ੍ਚਧਮ੍ਮਂ ਪਰਿਯਾਪੁਣਾਤਿ ਵਲ਼ਞ੍ਜੇਤਿ ਕਥੇਤਿ. ਨ ਰਿਞ੍ਚਤਿ ਪਟਿਸਲ੍ਲਾਨਨ੍ਤਿ ਏਕੀਭਾਵਂ ਨ ਵਿਸ੍ਸਜ੍ਜੇਤਿ. ਅਨੁਯੁਞ੍ਜਤਿ ਅਜ੍ਝਤ੍ਤਂ ਚੇਤੋਸਮਥਨ੍ਤਿ ਨਿਯਕਜ੍ਝਤ੍ਤੇ ਚਿਤ੍ਤਸਮਾਧਿਂ ਆਸੇਵਤਿ ਭਾਵੇਤਿ, ਸਮਥਕਮ੍ਮਟ੍ਠਾਨੇ ਯੁਤ੍ਤਪ੍ਪਯੁਤ੍ਤੋ ਹੋਤਿ.
ਹਿਤੇਸਿਨਾਤਿ ਹਿਤਂ ਏਸਨ੍ਤੇਨ. ਅਨੁਕਮ੍ਪਕੇਨਾਤਿ ਅਨੁਕਮ੍ਪਮਾਨੇਨ. ਅਨੁਕਮ੍ਪਂ ਉਪਾਦਾਯਾਤਿ ਅਨੁਕਮ੍ਪਂ ਚਿਤ੍ਤੇਨ ਪਰਿਗ੍ਗਹੇਤ੍ਵਾ, ਪਟਿਚ੍ਚਾਤਿਪਿ ਵੁਤ੍ਤਂ ਹੋਤਿ. ਕਤਂ ਵੋ ਤਂ ਮਯਾਤਿ ਤਂ ਮਯਾ ਇਮੇ ਪਞ੍ਚ ਪੁਗ੍ਗਲੇ ਦੇਸੇਨ੍ਤੇਨ ਤੁਮ੍ਹਾਕਂ ਕਤਂ. ਏਤ੍ਤਕਮੇਵ ਹਿ ਅਨੁਕਮ੍ਪਕਸ੍ਸ ਸਤ੍ਥੁ ਕਿਚ੍ਚਂ ਯਦਿਦਂ ਅਵਿਪਰੀਤਧਮ੍ਮਦੇਸਨਾ, ਇਤੋ ਪਰਂ ਪਨ ਪਟਿਪਤ੍ਤਿ ਨਾਮ ਸਾਵਕਾਨਂ ਕਿਚ੍ਚਂ. ਤੇਨਾਹ – ਏਤਾਨਿ ਭਿਕ੍ਖੁ ਰੁਕ੍ਖਮੂਲਾਨਿ…ਪੇ… ਅਮ੍ਹਾਕਂ ਅਨੁਸਾਸਨੀਤਿ. ਤਤ੍ਥ ਚ ਰੁਕ੍ਖਮੂਲਾਨੀਤਿ ਇਮਿਨਾ ਰੁਕ੍ਖਮੂਲਸੇਨਾਸਨਂ ਦਸ੍ਸੇਤਿ. ਸੁਞ੍ਞਾਗਾਰਾਨੀਤਿ ਇਮਿਨਾ ਜਨਵਿਵਿਤ੍ਤਟ੍ਠਾਨਂ. ਉਭਯੇਨਾਪਿ ਚ ਯੋਗਾਨੁਰੂਪਂ ਸੇਨਾਸਨਮਾਚਿਕ੍ਖਤਿ, ਦਾਯਜ੍ਜਂ ਨਿਯ੍ਯਾਤੇਤਿ. ਝਾਯਥਾਤਿ ਆਰਮ੍ਮਣੂਪਨਿਜ੍ਝਾਨੇਨ ਅਟ੍ਠਤਿਂਸਾਰਮ੍ਮਣਾਨਿ, ਲਕ੍ਖਣੂਪਨਿਜ੍ਝਾਨੇਨ ਚ ਅਨਿਚ੍ਚਾਦਿਤੋ ਖਨ੍ਧਾਯਤਨਾਦੀਨਿ ਉਪਨਿਜ੍ਝਾਯਥ, ਸਮਥਞ੍ਚ ਵਿਪਸ੍ਸਨਞ੍ਚ ਵਡ੍ਢੇਥਾਤਿ ਵੁਤ੍ਤਂ ਹੋਤਿ. ਮਾ ਪਮਾਦਤ੍ਥਾਤਿ ਮਾ ਪਮਜ੍ਜਿਤ੍ਥ. ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥਾਤਿ ਯੇ ਹਿ ਪੁਬ੍ਬੇ ਦਹਰਕਾਲੇ ਆਰੋਗ੍ਯਕਾਲੇ ਸਤ੍ਤਸਪ੍ਪਾਯਾਦਿਸਮ੍ਪਤ੍ਤਿਕਾਲੇ ਸਤ੍ਥੁ ਸਮ੍ਮੁਖੀਭਾਵਕਾਲੇ ਚ ਯੋਨਿਸੋਮਨਸਿਕਾਰਵਿਰਹਿਤਾ ਰਤ੍ਤਿਨ੍ਦਿਵਂ ਮਙ੍ਕੁਲਭਤ੍ਤਾ ਹੁਤ੍ਵਾ ਸੇਯ੍ਯਸੁਖਮਿਦ੍ਧਸੁਖਮਨੁਯੁਤ੍ਤਾ ਪਮਜ੍ਜਨ੍ਤਿ, ਤੇ ਪਚ੍ਛਾ ਜਰਾਕਾਲੇ ਰੋਗਕਾਲੇ ਮਰਣਕਾਲੇ ਵਿਪਤ੍ਤਿਕਾਲੇ ਸਤ੍ਥੁ ਪਰਿਨਿਬ੍ਬਾਨਕਾਲੇ ਚ ਤਂ ਪੁਬ੍ਬੇ ਪਮਾਦਵਿਹਾਰਂ ਅਨੁਸ੍ਸਰਨ੍ਤਾ ਸਪ੍ਪਟਿਸਨ੍ਧਿਕਾਲਕਿਰਿਯਞ੍ਚ ਭਾਰਿਯਂ ਸਮ੍ਪਸ੍ਸਮਾਨਾ ਵਿਪ੍ਪਟਿਸਾਰਿਨੋ ਹੋਨ੍ਤਿ. ਤੁਮ੍ਹੇ ਪਨ ਤਾਦਿਸਾ ਮਾ ਅਹੁਵਤ੍ਥਾਤਿ ਏਤਮਤ੍ਥਂ ਦਸ੍ਸੇਨ੍ਤੋ ਆਹ – ‘‘ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥਾ’’ਤਿ. ਅਯਂ ਵੋ ਅਮ੍ਹਾਕਂ ਅਨੁਸਾਸਨੀਤਿ ਅਯਂ ਅਮ੍ਹਾਕਂ ਸਨ੍ਤਿਕਾ ‘‘ਝਾਯਥ ਮਾ ਪਮਾਦਤ੍ਥਾ’’ਤਿ ਤੁਮ੍ਹਾਕਂ ਅਨੁਸਾਸਨੀ, ਓਵਾਦੋਤਿ ਵੁਤ੍ਤਂ ਹੋਤਿ.
੪. ਦੁਤਿਯਧਮ੍ਮਵਿਹਾਰੀਸੁਤ੍ਤਵਣ੍ਣਨਾ
੭੪. ਚਤੁਤ੍ਥੇ ਉਤ੍ਤਰਿ ਚਸ੍ਸ ਪਞ੍ਞਾਯ ਅਤ੍ਥਂ ਨਪ੍ਪਜਾਨਾਤੀਤਿ ਤਤੋ ਪਰਿਯਤ੍ਤਿਤੋ ਉਤ੍ਤਰਿ ਤਸ੍ਸ ਧਮ੍ਮਸ੍ਸ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ ਅਤ੍ਥਂ ਨਪ੍ਪਜਾਨਾਤਿ, ਚਤ੍ਤਾਰਿ ਸਚ੍ਚਾਨਿ ਨ ਪਸ੍ਸਤਿ ਨਪ੍ਪਟਿਵਿਜ੍ਝਤੀਤਿ ਅਤ੍ਥੋ. ਸੇਸਵਾਰੇਸੁਪਿ ਏਸੇਵ ਨਯੋ. ਏਵਮੇਤੇਸੁ ਦ੍ਵੀਸੁਪਿ ਸੁਤ੍ਤੇਸੁ ਬਹੁਸ੍ਸੁਤਭਿਕ੍ਖੁ ਵਿਪਸ੍ਸਨਾਕਮ੍ਮਿਕੋ ਸੋਤਾਪਨ੍ਨੋ ਸਕਦਾਗਾਮੀ ਅਨਾਗਾਮੀ ਖੀਣਾਸਵੋਤਿ ਛ ਜਨਾ ਧਮ੍ਮਵਿਹਾਰਿਨੋ ਨਾਮਾਤਿ ਵੇਦਿਤਬ੍ਬਾ.
੫. ਪਠਮਯੋਧਾਜੀਵਸੁਤ੍ਤਵਣ੍ਣਨਾ
੭੫. ਪਞ੍ਚਮੇ ਯੋਧਾਜੀਵਾਤਿ ਯੁਦ੍ਧੂਪਜੀਵਿਨੋ. ਰਜਗ੍ਗਨ੍ਤਿ ਹਤ੍ਥਿਅਸ੍ਸਾਦੀਨਂ ਪਾਦਪ੍ਪਹਾਰਭਿਨ੍ਨਾਯ ਭੂਮਿਯਾ ਉਗ੍ਗਤਂ ਰਜਕ੍ਖਨ੍ਧਂ. ਨ ਸਨ੍ਥਮ੍ਭਤੀਤਿ ਸਨ੍ਥਮ੍ਭਿਤ੍ਵਾ ਠਾਤੁਂ ਨ ਸਕ੍ਕੋਤਿ. ਸਹਤਿ ਰਜਗ੍ਗਨ੍ਤਿ ਰਜਕ੍ਖਨ੍ਧਂ ਦਿਸ੍ਵਾਪਿ ਅਧਿਵਾਸੇਤਿ. ਧਜਗ੍ਗਨ੍ਤਿ ਹਤ੍ਥਿਅਸ੍ਸਦੀਨਂ ਪਿਟ੍ਠੇਸੁ ਵਾ ਰਥੇਸੁ ਵਾ ਉਸ੍ਸਾਪਿਤਾਨਂ ਧਜਾਨਂ ਅਗ੍ਗਂ. ਉਸ੍ਸਾਰਣਨ੍ਤਿ ਹਤ੍ਥਿਅਸ੍ਸਰਥਾਨਞ੍ਚੇਵ ਬਲਕਾਯਸ੍ਸ ਚ ਉਚ੍ਚਾਸਦ੍ਦਮਹਾਸਦ੍ਦਂ. ਸਮ੍ਪਹਾਰੇਤਿ ਸਮਾਗਤੇ ਅਪ੍ਪਮਤ੍ਤਕੇਪਿ ਪਹਾਰੇ. ਹਞ੍ਞਤੀਤਿ ਵਿਹਞ੍ਞਤਿ ਵਿਘਾਤਂ ਆਪਜ੍ਜਤਿ. ਬ੍ਯਾਪਜ੍ਜਤੀਤਿ ਵਿਪਤ੍ਤਿਂ ਆਪਜ੍ਜਤਿ, ਪਕਤਿਭਾਵਂ ਜਹਤਿ. ਸਹਤਿ ਸਮ੍ਪਹਾਰਨ੍ਤਿ ਦ੍ਵੇ ਤਯੋ ਪਹਾਰੇ ਪਤ੍ਵਾਪਿ ਸਹਤਿ ਅਧਿਵਾਸੇਤਿ. ਤਮੇਵ ਸਙ੍ਗਾਮਸੀਸਨ੍ਤਿ ਤਂਯੇਵ ਜਯਕ੍ਖਨ੍ਧਾਵਾਰਟ੍ਠਾਨਂ. ਅਜ੍ਝਾਵਸਤੀਤਿ ਸਤ੍ਤਾਹਮਤ੍ਤਂ ਅਭਿਭਵਿਤ੍ਵਾ ਆਵਸਤਿ. ਕਿਂ ਕਾਰਣਾ? ਲਦ੍ਧਪਹਾਰਾਨਂ ਪਹਾਰਜਗ੍ਗਨਤ੍ਥਞ੍ਚੇਵ ਕਤਕਮ੍ਮਾਨਂ ਵਿਸੇਸਂ ਞਤ੍ਵਾ ਠਾਨਨ੍ਤਰਦਾਨਤ੍ਥਞ੍ਚ ਇਸ੍ਸਰਿਯਸੁਖਾਨੁਭਵਨਤ੍ਥਞ੍ਚ.
ਇਦਾਨਿ ਯਸ੍ਮਾ ਸਤ੍ਥੁ ਯੋਧਾਜੀਵੇਹਿ ਕਿਚ੍ਚਂ ਨਤ੍ਥਿ, ਇਮਸ੍ਮਿਂ ਪਨ ਸਾਸਨੇ ਤਥਾਰੂਪੇ ਪਞ੍ਚ ਪੁਗ੍ਗਲੇ ਦਸ੍ਸੇਤੁਂ ਇਦਂ ਓਪਮ੍ਮਂ ਆਭਤਂ. ਤਸ੍ਮਾ ਤੇ ਪੁਗ੍ਗਲੇ ਦਸ੍ਸੇਨ੍ਤੋ ਏਵਮੇਵ ਖੋਤਿਆਦਿਮਾਹ. ਤਤ੍ਥ ਸਂਸੀਦਤੀਤਿ ਮਿਚ੍ਛਾਵਿਤਕ੍ਕਸ੍ਮਿਂ ਸਂਸੀਦਤਿ ਅਨੁਪ੍ਪਵਿਸਤਿ. ਨ ਸਕ੍ਕੋਤਿ ਬ੍ਰਹ੍ਮਚਰਿਯਂ ਸਨ੍ਧਾਰੇਤੁਨ੍ਤਿ ਬ੍ਰਹ੍ਮਚਰਿਯਵਾਸਂ ਅਨੁਪਚ੍ਛਿਜ੍ਜਮਾਨਂ ਗੋਪੇਤੁਂ ਨ ਸਕ੍ਕੋਤਿ. ਸਿਕ੍ਖਾਦੁਬ੍ਬਲ੍ਯਂ ਆਵਿਕਤ੍ਵਾਤਿ ਸਿਕ੍ਖਾਯ ਦੁਬ੍ਬਲਭਾਵਂ ਪਕਾਸੇਤ੍ਵਾ. ਕਿਮਸ੍ਸ ਰਜਗ੍ਗਸ੍ਮਿਨ੍ਤਿ ਕਿਂ ਤਸ੍ਸ ਪੁਗ੍ਗਲਸ੍ਸ ਰਜਗ੍ਗਂ ਨਾਮਾਤਿ ਵਦਤਿ. ਅਭਿਰੂਪਾਤਿ ਅਭਿਰੂਪਵਤੀ. ਦਸ੍ਸਨੀਯਾਤਿ ਦਸ੍ਸਨਯੋਗ੍ਗਾ. ਪਾਸਾਦਿਕਾਤਿ ਦਸ੍ਸਨੇਨੇਵ ਚਿਤ੍ਤਪ੍ਪਸਾਦਾਵਹਾ. ਪਰਮਾਯਾਤਿ ਉਤ੍ਤਮਾਯ. ਵਣ੍ਣਪੋਕ੍ਖਰਤਾਯਾਤਿ ਸਰੀਰਵਣ੍ਣੇਨ ਚੇਵ ਅਙ੍ਗਸਣ੍ਠਾਨੇਨ ਚ. ਊਹਸਤੀਤਿ ਅਵਹਸਤਿ. ਉਲ੍ਲਪਤੀਤਿ ਕਥੇਤਿ. ਉਜ੍ਝਗ੍ਘਤੀਤਿ ਪਾਣਿਂ ਪਹਰਿਤ੍ਵਾ ਮਹਾਹਸਿਤਂ ਹਸਤਿ. ਉਪ੍ਪਣ੍ਡੇਤੀਤਿ ਉਪ੍ਪਣ੍ਡਨਕਥਂ ਕਥੇਤਿ. ਅਭਿਨਿਸੀਦਤੀਤਿ ਅਭਿਭਵਿਤ੍ਵਾ ਸਨ੍ਤਿਕੇ ਵਾ ਏਕਾਸਨੇ ਵਾ ਨਿਸੀਦਤਿ. ਦੁਤਿਯਪਦੇਪਿ ਏਸੇਵ ਨਯੋ. ਅਜ੍ਝੋਤ੍ਥਰਤੀਤਿ ਅਵਤ੍ਥਰਤਿ. ਵਿਨਿਵੇਠੇਤ੍ਵਾ ਵਿਨਿਮੋਚੇਤ੍ਵਾਤਿ ਗਹਿਤਟ੍ਠਾਨਤੋ ਤਸ੍ਸਾ ਹਤ੍ਥਂ ਵਿਨਿਬ੍ਬੇਠੇਤ੍ਵਾ ਚੇਵ ਮੋਚੇਤ੍ਵਾ ਚ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.
੬. ਦੁਤਿਯਯੋਧਾਜੀਵਸੁਤ੍ਤਵਣ੍ਣਨਾ
੭੬. ਛਟ੍ਠੇ ਅਸਿਚਮ੍ਮਂ ਗਹੇਤ੍ਵਾਤਿ ਅਸਿਞ੍ਚ ਚਮ੍ਮਞ੍ਚ ਗਹੇਤ੍ਵਾ. ਧਨੁਕਲਾਪਂ ਸਨ੍ਨਯ੍ਹਿਤ੍ਵਾਤਿ ਧਨੁਞ੍ਚ ਸਰਕਲਾਪਞ੍ਚ ਸਨ੍ਨਯ੍ਹਿਤ੍ਵਾ. ਵਿਯੂਲ਼੍ਹਨ੍ਤਿ ਯੁਦ੍ਧਸਨ੍ਨਿਵੇਸਵੇਸੇਨ ਠਿਤਂ. ਸਙ੍ਗਾਮਂ ਓਤਰਤੀਤਿ ਮਹਾਯੁਦ੍ਧਂ ਓਤਰਤਿ. ਉਸ੍ਸਹਤਿ ਵਾਯਮਤੀਤਿ ਉਸ੍ਸਾਹਞ੍ਚ ਵਾਯਾਮਞ੍ਚ ਕਰੋਤਿ. ਹਨਨ੍ਤੀਤਿ ਘਾਤੇਨ੍ਤਿ. ਪਰਿਯਾਪਾਦੇਨ੍ਤੀਤਿ ਪਰਿਯਾਪਾਦਯਨ੍ਤਿ. ਉਪਲਿਕ੍ਖਨ੍ਤੀਤਿ ਵਿਜ੍ਝਨ੍ਤਿ. ਅਪਨੇਨ੍ਤੀਤਿ ਸਕਸੇਨਂ ਗਹੇਤ੍ਵਾ ਗਚ੍ਛਨ੍ਤਿ. ਅਪਨੇਤ੍ਵਾ ਞਾਤਕਾਨਂ ਨੇਨ੍ਤੀਤਿ ਸਕਸੇਨਂ ਨੇਤ੍ਵਾ ਤਤੋ ਞਾਤਕਾਨਂ ਸਨ੍ਤਿਕਂ ਨੇਨ੍ਤਿ. ਨੀਯਮਾਨੋਤਿ ਅਤ੍ਤਨੋ ਗੇਹਂ ਵਾ ਸੇਸਞਾਤਿਸਨ੍ਤਿਕਂ ਵਾ ਨਿਯ੍ਯਮਾਨੋ. ਉਪਟ੍ਠਹਨ੍ਤਿ ਪਰਿਚਰਨ੍ਤੀਤਿ ਪਹਾਰਸੋਧਨਵਣਕਪ੍ਪਨਾਦੀਨਿ ਕਰੋਨ੍ਤਾ ਜਗ੍ਗਨ੍ਤਿ ਗੋਪਯਨ੍ਤਿ.
ਅਰਕ੍ਖਿਤੇਨੇਵ ਕਾਯੇਨਾਤਿ ਅਰਕ੍ਖਿਤੇਨ ਕਾਯਦ੍ਵਾਰੇਨ. ਅਰਕ੍ਖਿਤਾਯ ਵਾਚਾਯਾਤਿ ਅਰਕ੍ਖਿਤੇਨ ਵਚੀਦ੍ਵਾਰੇਨ. ਅਰਕ੍ਖਿਤੇਨ ਚਿਤ੍ਤੇਨਾਤਿ ਅਰਕ੍ਖਿਤੇਨ ਮਨੋਦ੍ਵਾਰੇਨ. ਅਨੁਪਟ੍ਠਿਤਾਯ ਸਤਿਯਾਤਿ ਸਤਿਂ ਸੁਪਟ੍ਠਿਤਂ ਅਕਤ੍ਵਾ. ਅਸਂਵੁਤੇਹਿ ਇਨ੍ਦ੍ਰਿਯੇਹੀਤਿ ਮਨਚ੍ਛਟ੍ਠੇਹਿ ਇਨ੍ਦ੍ਰਿਯੇਹਿ ਅਪਿਹਿਤੇਹਿ ਅਗੋਪਿਤੇਹਿ. ਰਾਗੋ ਚਿਤ੍ਤਂ ਅਨੁਦ੍ਧਂਸੇਤੀਤਿ ਰਾਗੋ ਉਪ੍ਪਜ੍ਜਮਾਨੋਵ ਸਮਥਵਿਪਸ੍ਸਨਾਚਿਤ੍ਤਂ ਧਂਸੇਤਿ, ਦੂਰੇ ਖਿਪਤਿ. ਰਾਗਪਰਿਯੁਟ੍ਠਿਤੋਮ੍ਹਿ, ਆਵੁਸੋ, ਰਾਗਪਰੇਤੋਤਿ ਅਹਂ, ਆਵੁਸੋ, ਰਾਗੇਨ ਰਤ੍ਤੋ, ਰਾਗੇਨ ਅਨੁਗਤੋ.
ਅਟ੍ਠਿਕਙ੍ਕਲੂਪਮਾਤਿਆਦੀਸੁ ਅਟ੍ਠਿਕਙ੍ਕਲੂਪਮਾ ਅਪ੍ਪਸ੍ਸਾਦਟ੍ਠੇਨ. ਮਂਸਪੇਸੂਪਮਾ ਬਹੁਸਾਧਾਰਣਟ੍ਠੇਨ. ਤਿਣੁਕ੍ਕੂਪਮਾ ਅਨੁਦਹਨਟ੍ਠੇਨ. ਅਙ੍ਗਾਰਕਾਸੂਪਮਾ ਮਹਾਭਿਤਾਪਟ੍ਠੇਨ. ਸੁਪਿਨਕੂਪਮਾ ਇਤ੍ਤਰਪਚ੍ਚੁਪਟ੍ਠਾਨਟ੍ਠੇਨ. ਯਾਚਿਤਕੂਪਮਾ ਤਾਵਕਾਲਿਕਟ੍ਠੇਨ. ਰੁਕ੍ਖਫਲੂਪਮਾ ਸਬ੍ਬਙ੍ਗਪਚ੍ਚਙ੍ਗਪਲਿਭਞ੍ਜਨਟ੍ਠੇਨ. ਅਸਿਸੂਨੂਪਮਾ ਅਧਿਕੁਟ੍ਟਨਟ੍ਠੇਨ. ਸਤ੍ਤਿਸੂਲੂਪਮਾ ਵਿਨਿਵਿਜ੍ਝਨਟ੍ਠੇਨ. ਸਪ੍ਪਸਿਰੂਪਮਾ ਸਾਸਙ੍ਕਸਪ੍ਪਟਿਭਯਟ੍ਠੇਨ. ਉਸ੍ਸਹਿਸ੍ਸਾਮੀਤਿ ਉਸ੍ਸਾਹਂ ਕਰਿਸ੍ਸਾਮਿ. ਧਾਰਯਿਸ੍ਸਾਮੀਤਿ ਸਮਣਭਾਵਂ ਧਾਰਯਿਸ੍ਸਾਮਿ. ਅਭਿਰਮਿਸ੍ਸਾਮੀਤਿ ਅਭਿਰਤਿਂ ਉਪ੍ਪਾਦੇਸ੍ਸਾਮਿ ਨ ਉਕ੍ਕਣ੍ਠਿਸ੍ਸਾਮਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਨ੍ਤਿ.
੭. ਪਠਮਅਨਾਗਤਭਯਸੁਤ੍ਤਵਣ੍ਣਨਾ
੭੭. ਸਤ੍ਤਮੇ ਆਰਞ੍ਞਕੇਨਾਤਿ ਅਰਞ੍ਞਵਾਸਿਨਾ. ਅਪ੍ਪਤ੍ਤਸ੍ਸਾਤਿ ਅਸਮ੍ਪਤ੍ਤਸ੍ਸ ਝਾਨਵਿਪਸ੍ਸਨਾਮਗ੍ਗਫਲਪ੍ਪਭੇਦਸ੍ਸ ਵਿਸੇਸਸ੍ਸ ਪਤ੍ਤਿਯਾ. ਸੇਸਪਦੇਸੁਪਿ ਏਸੇਵ ਨਯੋ. ਸੋ ਮਮਸ੍ਸ ਅਨ੍ਤਰਾਯੋਤਿ ਸੋ ਮਮ ਜੀਵਿਤਨ੍ਤਰਾਯੋ ਚ ਬ੍ਰਹ੍ਮਚਰਿਯਨ੍ਤਰਾਯੋ ਚ, ਪੁਥੁਜ੍ਜਨਕਾਲਕਿਰਿਯਂ ਕਰੋਨ੍ਤਸ੍ਸ ਸਗ੍ਗਨ੍ਤਰਾਯੋ ਚ ਮਗ੍ਗਨ੍ਤਰਾਯੋ ਚ ਭਵੇਯ੍ਯ. ਹਨ੍ਦਾਤਿ ਵਵਸ੍ਸਗ੍ਗਤ੍ਥੇ ਨਿਪਾਤੋ. ਵੀਰਿਯਂ ਆਰਭਾਮੀਤਿ ਦੁਵਿਧਮ੍ਪਿ ਵੀਰਿਯਂ ਕਰੋਮਿ. ਸਤ੍ਥਕਾਤਿ ਸਤ੍ਥਂ ਵਿਯ ਸਨ੍ਧਿਬਨ੍ਧਨਚ੍ਛੇਦਕਵਾਤਾ. ਵਾਲ਼ੇਹੀਤਿ ਕਕ੍ਖਲ਼ੇਹਿ. ਮਾਣਵੇਹੀਤਿ ਚੋਰੇਹਿ. ਕਤਕਮ੍ਮੇਹਿ ਵਾ ਅਕਤਕਮ੍ਮੇਹਿ ਵਾਤਿ ਏਤ੍ਥ ਚੋਰਿਕਂ ਕਤ੍ਵਾ ਨਿਕ੍ਖਨ੍ਤਾ ਕਤਕਮ੍ਮਾ ਨਾਮ, ਚੋਰਿਕਂ ਕਾਤੁਂ ਗਚ੍ਛਨ੍ਤਾ ਅਕਤਕਮ੍ਮਾ ਨਾਮ. ਤਤ੍ਥ ਕਤਕਮ੍ਮਾ ਕਮ੍ਮਸ੍ਸ ਨਿਪ੍ਫਨ੍ਨਤ੍ਤਾ ਸਤ੍ਤਾਨਂ ਗਲਲੋਹਿਤਂ ਗਹੇਤ੍ਵਾ ਦੇਵਤਾਨਂ ਬਲਿਂ ਕਰੋਨ੍ਤਿ, ਅਕਤਕਮ੍ਮਾ ‘‘ਏਵਂ ਨੋ ਕਮ੍ਮਂ ਨਿਪ੍ਫਜ੍ਜਿਸ੍ਸਤੀ’’ਤਿ ਪਠਮਤਰਂ ਕਰੋਨ੍ਤਿ. ਇਦਂ ਸਨ੍ਧਾਯ ਤੇ ਮਂ ਜੀਵਿਤਾ ਵੋਰੋਪੇਯ੍ਯੁਨ੍ਤਿ ਵੁਤ੍ਤਂ. ਵਾਲ਼ਾ ਅਮਨੁਸ੍ਸਾਤਿ ਕਕ੍ਖਲ਼ਾ ਦੁਟ੍ਠਾ ਯਕ੍ਖਾਦਯੋ ਅਮਨੁਸ੍ਸਾ.
੮. ਦੁਤਿਯਅਨਾਗਤਭਯਸੁਤ੍ਤਵਣ੍ਣਨਾ
੭੮. ਅਟ੍ਠਮੇ ਪੁਰਾ ਮਂ ਸੋ ਧਮ੍ਮੋ ਆਗਚ੍ਛਤੀਤਿ ਯਾਵ ਸੋ ਧਮ੍ਮੋ ਮਂ ਨ ਉਪਗਚ੍ਛਤਿ, ਤਾਵ ਅਹਂ ਪੁਰੇਤਰਮੇਵ ਵੀਰਿਯਂ ਆਰਭਾਮੀਤਿ ਅਤ੍ਥੋ. ਖੀਰੋਦਕੀਭੂਤਾਤਿ ਖੀਰੋਦਕਂ ਵਿਯ ਭੂਤਾ ਏਕੀਭਾਵਂ ਉਪਗਤਾ. ਪਿਯਚਕ੍ਖੂਹੀਤਿ ਮੇਤ੍ਤਚਕ੍ਖੂਹਿ.
੯. ਤਤਿਯਅਨਾਗਤਭਯਸੁਤ੍ਤਵਣ੍ਣਨਾ
੭੯. ਨਵਮੇ ਧਮ੍ਮਸਨ੍ਦੋਸਾ ਵਿਨਯਸਨ੍ਦੋਸੋਤਿ ਧਮ੍ਮਸਨ੍ਦੋਸੇਨ ਵਿਨਯਸਨ੍ਦੋਸੋ ਹੋਤਿ. ਕਥਂ ਪਨ ਧਮ੍ਮਸ੍ਮਿਂ ਦੁਸ੍ਸਨ੍ਤੇ ਵਿਨਯੋ ਦੁਸ੍ਸਤਿ ਨਾਮ? ਸਮਥਵਿਪਸ੍ਸਨਾਧਮ੍ਮੇਸੁ ਗਬ੍ਭਂ ਅਗ੍ਗਣ੍ਹਨ੍ਤੇਸੁ ਪਞ੍ਚਵਿਧੋ ਵਿਨਯੋ ਨ ਹੋਤਿ, ਏਵਂ ਧਮ੍ਮੇ ਦੁਸ੍ਸਨ੍ਤੇ ਵਿਨਯੋ ਦੁਸ੍ਸਤਿ. ਦੁਸ੍ਸੀਲਸ੍ਸ ਪਨ ਸਂਵਰਵਿਨਯੋ ਨਾਮ ਨ ਹੋਤਿ, ਤਸ੍ਮਿਂ ਅਸਤਿ ਸਮਥਵਿਪਸ੍ਸਨਾ ਗਬ੍ਭਂ ਨ ਗਣ੍ਹਾਤਿ. ਏਵਂ ਵਿਨਯਸਨ੍ਦੋਸੇਨਪਿ ਧਮ੍ਮਸਨ੍ਦੋਸੋ ਵੇਦਿਤਬ੍ਬੋ. ਅਭਿਧਮ੍ਮਕਥਨ੍ਤਿ ਸੀਲਾਦਿਉਤ੍ਤਮਧਮ੍ਮਕਥਂ. ਵੇਦਲ੍ਲਕਥਨ੍ਤਿ ਵੇਦਪਟਿਸਂਯੁਤ੍ਤਂ ਞਾਣਮਿਸ੍ਸਕਕਥਂ. ਕਣ੍ਹਧਮ੍ਮਂ ਓਕ੍ਕਮਮਾਨਾਤਿ ਰਨ੍ਧਗਵੇਸਿਤਾਯ ਉਪਾਰਮ੍ਭਪਰਿਯੇਸਨਵਸੇਨ ਕਾਲ਼ਕਧਮ੍ਮਂ ਓਕ੍ਕਮਮਾਨਾ. ਅਪਿਚ ਦੁਟ੍ਠਚਿਤ੍ਤੇਨ ਪੁਗ੍ਗਲਂ ਘਟ੍ਟੇਨ੍ਤਾਪਿ ਤਂ ਕਣ੍ਹਧਮ੍ਮਂ ਅਤ੍ਤਨੋ ਦਹਨ੍ਤਾਪਿ ਲਾਭਸਕ੍ਕਾਰਤ੍ਥਂ ਕਥੇਨ੍ਤਾਪਿ ਕਣ੍ਹਧਮ੍ਮਂ ਓਕ੍ਕਮਨ੍ਤਿਯੇਵ.
ਗਮ੍ਭੀਰਾਤਿ ਪਾਲ਼ਿਗਮ੍ਭੀਰਾ. ਗਮ੍ਭੀਰਤ੍ਥਾਤਿ ਅਤ੍ਥਗਮ੍ਭੀਰਾ. ਲੋਕੁਤ੍ਤਰਾਤਿ ਲੋਕੁਤ੍ਤਰਧਮ੍ਮਦੀਪਕਾ. ਸੁਞ੍ਞਤਾਪਟਿਸਂਯੁਤ੍ਤਾਤਿ ਖਨ੍ਧਧਾਤੁਆਯਤਨਪਚ੍ਚਯਾਕਾਰਪਟਿਸਂਯੁਤ੍ਤਾ. ਨ ਅਞ੍ਞਾ ਚਿਤ੍ਤਂ ਉਪਟ੍ਠਪੇਸ੍ਸਨ੍ਤੀਤਿ ਜਾਨਨਤ੍ਥਾਯ ਚਿਤ੍ਤਂ ਨ ਠਪੇਸ੍ਸਨ੍ਤਿ. ਉਗ੍ਗਹੇਤਬ੍ਬਂ ਪਰਿਯਾਪੁਣਿਤਬ੍ਬਨ੍ਤਿ ਉਗ੍ਗਹੇਤਬ੍ਬੇ ਚ ਵਲ਼ਞ੍ਜੇਤਬ੍ਬੇ ਚ. ਕਵਿਤਾਤਿ ਸਿਲੋਕਾਦਿਬਨ੍ਧਨਵਸੇਨ ਕਵੀਹਿ ਕਤਾ. ਕਾਵੇਯ੍ਯਾਤਿ ਤਸ੍ਸੇਵ ਵੇਵਚਨਂ. ਬਾਹਿਰਕਾਤਿ ਸਾਸਨਤੋ ਬਹਿਦ੍ਧਾ ਠਿਤਾ. ਸਾਵਕਭਾਸਿਤਾਤਿ ਬਾਹਿਰਸਾਵਕੇਹਿ ਭਾਸਿਤਾ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਤ੍ਤਾ ਚ ਉਤ੍ਤਾਨਤ੍ਥਮੇਵ.
੧੦. ਚਤੁਤ੍ਥਅਨਾਗਤਭਯਸੁਤ੍ਤਵਣ੍ਣਨਾ
੮੦. ਦਸਮੇ ਕਲ੍ਯਾਣਕਾਮਾਤਿ ਸੁਨ੍ਦਰਕਾਮਾ. ਰਸਗ੍ਗਾਨੀਤਿ ਉਤ੍ਤਮਰਸਾਨਿ. ਸਂਸਟ੍ਠਾ ਵਿਹਰਿਸ੍ਸਨ੍ਤੀਤਿ ਪਞ੍ਚਵਿਧੇਨ ਸਂਸਗ੍ਗੇਨ ਸਂਸਟ੍ਠਾ ਵਿਹਰਿਸ੍ਸਨ੍ਤਿ. ਸਨ੍ਨਿਧਿਕਾਰਪਰਿਭੋਗਨ੍ਤਿ ਸਨ੍ਨਿਧਿਕਤਸ੍ਸ ਪਰਿਭੋਗਂ. ਓਲ਼ਾਰਿਕਮ੍ਪਿ ਨਿਮਿਤ੍ਤਨ੍ਤਿ ਏਤ੍ਥ ਪਥਵਿਂ ਖਣਨ੍ਤੋਪਿ ਖਣਾਹੀਤਿ ਆਣਾਪੇਨ੍ਤੋਪਿ ਪਥਵਿਯਂ ਓਲ਼ਾਰਿਕਂ ਨਿਮਿਤ੍ਤਂ ਕਰੋਤਿ ਨਾਮ. ਤਿਣਕਟ੍ਠਸਾਖਾਪਲਾਸਂ ਛਿਨ੍ਦਨ੍ਤੋਪਿ ਛਿਨ੍ਦਾਤਿ ਆਣਾਪੇਨ੍ਤੋਪਿ ਹਰਿਤਗ੍ਗੇ ਓਲ਼ਾਰਿਕਂ ਨਿਮਿਤ੍ਤਂ ਕਰੋਤਿ ਨਾਮ. ਆਜੀਵਤ੍ਥਾਯ ਪਣ੍ਣਨਿਵਾਪਆਦੀਨਿ ਗਾਹਾਪੇਨ੍ਤੋ ਫਲਾਨਿ ਓਚਿਨਨ੍ਤੇ ਵਾ ਓਚਿਨਾਪੇਨ੍ਤੇਨ ਵਤ੍ਤਬ੍ਬਮੇਵ ਨਤ੍ਥਿ. ਇਮੇਸੁ ਚਤੂਸੁ ਸੁਤ੍ਤੇਸੁ ਸਤ੍ਥਾਰਾ ਸਾਸਨੇ ਵੁਦ੍ਧਿਪਰਿਹਾਨਿ ਕਥਿਤਾਤਿ.
ਯੋਧਾਜੀਵਵਗ੍ਗੋ ਤਤਿਯੋ.
(੯) ੪. ਥੇਰਵਗ੍ਗੋ
੧. ਰਜਨੀਯਸੁਤ੍ਤਵਣ੍ਣਨਾ
੮੧. ਚਤੁਤ੍ਥਸ੍ਸ ਪਠਮੇ ਰਜਨੀਯੇਸੂਤਿ ਰਾਗਸ੍ਸ ਪਚ੍ਚਯੇਸੁ ਆਰਮ੍ਮਣੇਸੁ. ਸੇਸੇਸੁਪਿ ਏਸੇਵ ਨਯੋ.
੨. ਵੀਤਰਾਗਸੁਤ੍ਤਵਣ੍ਣਨਾ
੮੨. ਦੁਤਿਯੇ ਮਕ੍ਖੀਤਿ ਗੁਣਮਕ੍ਖਕੋ. ਪਲ਼ਾਸੀਤਿ ਯੁਗਗ੍ਗਾਹਲਕ੍ਖਣੇਨ ਪਲ਼ਾਸੇਨ ਸਮਨ੍ਨਾਗਤੋ.
੩. ਕੁਹਕਸੁਤ੍ਤਵਣ੍ਣਨਾ
੮੩. ਤਤਿਯੇ ਕੁਹਕੋਤਿ ਤੀਹਿ ਕੁਹਨਵਤ੍ਥੂਹਿ ਸਮਨ੍ਨਾਗਤੋ. ਲਪਕੋਤਿ ਲਾਭਸਨ੍ਨਿਸ੍ਸਿਤਾਯ ਲਪਨਾਯ ਸਮਨ੍ਨਾਗਤੋ. ਨੇਮਿਤ੍ਤਿਕੋਤਿ ਨਿਮਿਤ੍ਤਕਿਰਿਯਕਾਰਕੋ. ਨਿਪ੍ਪੇਸਿਕੋਤਿ ਨਿਪ੍ਪੇਸਨਕਤਾਯ ਸਮਨ੍ਨਾਗਤੋ. ਲਾਭੇਨ ਚ ਲਾਭਂ ਨਿਜਿਗੀਸਿਤਾਤਿ ਲਾਭੇਨ ਲਾਭਗਵੇਸਕੋ. ਸੁਕ੍ਕਪਕ੍ਖੋ ਵੁਤ੍ਤਵਿਪਲ੍ਲਾਸਵਸੇਨ ਵੇਦਿਤਬ੍ਬੋ. ਚਤੁਤ੍ਥਂ ਉਤ੍ਤਾਨਮੇਵ.
੫. ਅਕ੍ਖਮਸੁਤ੍ਤਵਣ੍ਣਨਾ
੮੫. ਪਞ੍ਚਮੇ ਅਕ੍ਖਮੋ ਹੋਤਿ ਰੂਪਾਨਨ੍ਤਿ ਰੂਪਾਰਮ੍ਮਣਾਨਂ ਅਨਧਿਵਾਸਕੋ ਹੋਤਿ, ਤਦਾਰਮ੍ਮਣੇਹਿ ਰਾਗਾਦੀਹਿ ਅਭਿਭੁਯ੍ਯਤਿ. ਏਸੇਵ ਨਯੋ ਸਬ੍ਬਤ੍ਥ.
੬. ਪਟਿਸਮ੍ਭਿਦਾਪ੍ਪਤ੍ਤਸੁਤ੍ਤਵਣ੍ਣਨਾ
੮੬. ਛਟ੍ਠੇ ਅਤ੍ਥਪਟਿਸਮ੍ਭਿਦਾਪ੍ਪਤ੍ਤੋਤਿ ਪਞ੍ਚਸੁ ਅਤ੍ਥੇਸੁ ਪਭੇਦਗਤਂ ਞਾਣਂ ਪਤ੍ਤੋ. ਧਮ੍ਮਪਟਿਸਮ੍ਭਿਦਾਪ੍ਪਤ੍ਤੋਤਿ ਚਤੁਬ੍ਬਿਧੇ ਧਮ੍ਮੇ ਪਭੇਦਗਤਂ ਞਾਣਂ ਪਤ੍ਤੋ. ਨਿਰੁਤ੍ਤਿਪਟਿਸਮ੍ਭਿਦਾਪ੍ਪਤ੍ਤੋਤਿ ਧਮ੍ਮਨਿਰੁਤ੍ਤੀਸੁ ਪਭੇਦਗਤਂ ਞਾਣਂ ਪਤ੍ਤੋ. ਪਟਿਭਾਨਪਟਿਸਮ੍ਭਿਦਾਪ੍ਪਤ੍ਤੋਤਿ ਤੇਸੁ ਤੀਸੁ ਞਾਣੇਸੁ ਪਭੇਦਗਤਂ ਞਾਣਂ ਪਤ੍ਤੋ. ਸੋ ਪਨ ਤਾਨਿ ਤੀਣਿ ਞਾਣਾਨੇਵ ਜਾਨਾਤਿ, ਨ ਤੇਸਂ ਕਿਚ੍ਚਂ ਕਰੋਤਿ. ਉਚ੍ਚਾਵਚਾਨੀਤਿ ਮਹਨ੍ਤਖੁਦ੍ਦਕਾਨਿ. ਕਿਂਕਰਣੀਯਾਨੀਤਿ ਇਤਿ ਕਤ੍ਤਬ੍ਬਾਨਿ.
੭. ਸੀਲਵਨ੍ਤਸੁਤ੍ਤਵਣ੍ਣਨਾ
੮੭. ਸਤ੍ਤਮਂ ਉਤ੍ਤਾਨਤ੍ਥਮੇਵ. ਸੀਲਂ ਪਨੇਤ੍ਥ ਖੀਣਾਸਵਸੀਲਮੇਵ, ਬਾਹੁਸਚ੍ਚਮ੍ਪਿ ਖੀਣਾਸਵਬਾਹੁਸਚ੍ਚਮੇਵ, ਵਾਚਾਪਿ ਖੀਣਾਸਵਸ੍ਸ ਕਲ੍ਯਾਣਵਾਚਾਵ, ਝਾਨਾਨਿਪਿ ਕਿਰਿਯਜ੍ਝਾਨਾਨੇਵ ਕਥਿਤਾਨੀਤਿ ਵੇਦਿਤਬ੍ਬਾਨਿ.
੮. ਥੇਰਸੁਤ੍ਤਵਣ੍ਣਨਾ
੮੮. ਅਟ੍ਠਮੇ ਥੇਰੋਤਿ ਥਿਰਭਾਵਪ੍ਪਤ੍ਤੋ. ਰਤ੍ਤਞ੍ਞੂਤਿ ਪਬ੍ਬਜਿਤਦਿਵਸਤੋ ਪਟ੍ਠਾਯ ਅਤਿਕ੍ਕਨ੍ਤਾਨਂ ਬਹੂਨਂ ਰਤ੍ਤੀਨਂ ਞਾਤਾ. ਞਾਤੋਤਿ ਪਞ੍ਞਾਤੋ ਪਾਕਟੋ. ਯਸਸ੍ਸੀਤਿ ਯਸਨਿਸ੍ਸਿਤੋ. ਮਿਚ੍ਛਾਦਿਟ੍ਠਿਕੋਤਿ ਅਯਾਥਾਵਦਿਟ੍ਠਿਕੋ. ਸਦ੍ਧਮ੍ਮਾ ਵੁਟ੍ਠਾਪੇਤ੍ਵਾਤਿ ਦਸਕੁਸਲਕਮ੍ਮਪਥਧਮ੍ਮਤੋ ਵੁਟ੍ਠਾਪੇਤ੍ਵਾ. ਅਸਦ੍ਧਮ੍ਮੇ ਪਤਿਟ੍ਠਾਪੇਤੀਤਿ ਅਕੁਸਲਕਮ੍ਮਪਥੇਸੁ ਪਤਿਟ੍ਠਾਪੇਤਿ.
੯. ਪਠਮਸੇਖਸੁਤ੍ਤਵਣ੍ਣਨਾ
੮੯. ਨਵਮੇ ਸੇਖਸ੍ਸਾਤਿ ਸਿਕ੍ਖਕਸ੍ਸ ਸਕਰਣੀਯਸ੍ਸ. ਪਰਿਹਾਨਾਯਾਤਿ ਉਪਰਿਗੁਣੇਹਿ ਪਰਿਹਾਨਤ੍ਥਾਯ. ਕਮ੍ਮਾਰਾਮਤਾਤਿ ਨਵਕਮ੍ਮੇ ਰਮਨਕਭਾਵੋ. ਭਸ੍ਸਾਰਾਮਤਾਤਿ ਆਲਾਪਸਲ੍ਲਾਪੇ ਰਮਨਕਭਾਵੋ. ਨਿਦ੍ਦਾਰਾਮਤਾਤਿ ਨਿਦ੍ਦਾਯਨੇ ਰਮਨਕਭਾਵੋ. ਸਙ੍ਗਣਿਕਾਰਾਮਤਾਤਿ ਗਣਸਙ੍ਗਣਿਕਾਯ ਰਮਨਕਭਾਵੋ. ਯਥਾਵਿਮੁਤ੍ਤਂ ਚਿਤ੍ਤਂ ਨ ਪਚ੍ਚਵੇਕ੍ਖਤੀਤਿ ਯਥਾ ਯਂ ਚਿਤ੍ਤਂ ਵਿਮੁਤ੍ਤਂ, ਯੇ ਚ ਦੋਸਾ ਪਹੀਨਾ, ਗੁਣਾ ਚ ਪਟਿਲਦ੍ਧਾ, ਤੇ ਪਚ੍ਚਵੇਕ੍ਖਿਤ੍ਵਾ ਉਪਰਿਗੁਣਪਟਿਲਾਭਾਯ ਵਾਯਾਮਂ ਨ ਕਰੋਤੀਤਿ ਅਤ੍ਥੋ. ਇਤਿ ਇਮਸ੍ਮਿਂ ਸੁਤ੍ਤੇ ਸਤ੍ਤਨ੍ਨਂ ਸੇਖਾਨਂ ਉਪਰਿਗੁਣੇਹਿ ਪਰਿਹਾਨਿਕਾਰਣਞ੍ਚ ਵੁਦ੍ਧਿਕਾਰਣਞ੍ਚ ਕਥਿਤਂ. ਯਞ੍ਚ ਨਾਮ ਸੇਖਸ੍ਸ ਪਰਿਹਾਨਕਾਰਣਂ, ਤਂ ਪੁਥੁਜ੍ਜਨਸ੍ਸ ਪਠਮਮੇਵ ਹੋਤੀਤਿ.
੧੦. ਦੁਤਿਯਸੇਖਸੁਤ੍ਤਵਣ੍ਣਨਾ
੯੦. ਦਸਮੇ ਵਿਯਤ੍ਤੋਤਿ ਬ੍ਯਤ੍ਤੋ ਛੇਕੋ. ਕਿਂਕਰਣੀਯੇਸੂਤਿ ਇਤਿ ਕਤ੍ਤਬ੍ਬੇਸੁ. ਚੇਤੋਸਮਥਨ੍ਤਿ ਸਮਾਧਿਕਮ੍ਮਟ੍ਠਾਨਂ. ਅਨਨੁਲੋਮਿਕੇਨਾਤਿ ਸਾਸਨਸ੍ਸ ਅਨਨੁਚ੍ਛਵਿਕੇਨ. ਅਤਿਕਾਲੇਨਾਤਿ ਅਤਿਪਾਤੋਵ. ਅਤਿਦਿਵਾਤਿ ਦਿਵਾ ਵੁਚ੍ਚਤਿ ਮਜ੍ਝਨ੍ਹਿਕੋ, ਤਂ ਅਤਿਕ੍ਕਮਿਤ੍ਵਾ. ਆਭਿਸਲ੍ਲੇਖਿਕਾਤਿ ਅਤਿਵਿਯ ਕਿਲੇਸਸਲ੍ਲੇਖਿਕਾ. ਚੇਤੋਵਿਵਰਣਸਪ੍ਪਾਯਾਤਿ ਚਿਤ੍ਤਵਿਵਰਣਸਙ੍ਖਾਤਾਨਂ ਸਮਥਵਿਪਸ੍ਸਨਾਨਂ ਸਪ੍ਪਾਯਾ. ਅਪ੍ਪਿਚ੍ਛਕਥਾਤਿ ਅਪ੍ਪਿਚ੍ਛਾ ਹੋਥਾਤਿ ਕਥਨਕਥਾ. ਸਨ੍ਤੁਟ੍ਠਿਕਥਾਤਿ ਚਤੂਹਿ ਪਚ੍ਚਯੇਹਿ ਸਨ੍ਤੁਟ੍ਠਾ ਹੋਥਾਤਿ ਕਥਨਕਥਾ. ਪਵਿਵੇਕਕਥਾਤਿ ਤੀਹਿ ਵਿਵੇਕੇਹਿ ਵਿਵਿਤ੍ਤਾ ਹੋਥਾਤਿ ਕਥਨਕਥਾ. ਅਸਂਸਗ੍ਗਕਥਾਤਿ ਪਞ੍ਚਵਿਧੇਨ ਸਂਸਗ੍ਗੇਨ ਅਸਂਸਟ੍ਠਾ ਹੋਥਾਤਿ ਕਥਨਕਥਾ. ਵੀਰਿਯਾਰਮ੍ਭਕਥਾਤਿ ਦੁਵਿਧਂ ਵੀਰਿਯਂ ਆਰਭਥਾਤਿ ਕਥਨਕਥਾ. ਸੀਲਕਥਾਦੀਸੁ ਸੀਲਂ ਆਰਬ੍ਭ ਕਥਾ ਸੀਲਕਥਾ. ਸਮਾਧਿਂ ਆਰਬ੍ਭ, ਪਞ੍ਞਂ ਆਰਬ੍ਭ, ਪਞ੍ਚਵਿਧਂ ਵਿਮੁਤ੍ਤਿਂ ਆਰਬ੍ਭ, ਏਕੂਨਵੀਸਤਿਪਚ੍ਚਵੇਕ੍ਖਣਸਙ੍ਖਾਤਂ ਵਿਮੁਤ੍ਤਿਞਾਣਦਸ੍ਸਨਂ ਆਰਬ੍ਭ ਕਥਾ ਵਿਮੁਤ੍ਤਿਞਾਣਦਸ੍ਸਨਕਥਾ. ਨ ਨਿਕਾਮਲਾਭੀਤਿਆਦੀਸੁ ਨ ਇਚ੍ਛਿਤਿਚ੍ਛਿਤਲਾਭੀ, ਦੁਕ੍ਖਲਾਭੀ ਨ ਵਿਪੁਲਲਾਭੀਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.
ਥੇਰਵਗ੍ਗੋ ਚਤੁਤ੍ਥੋ.
(੧੦) ੫. ਕਕੁਧਵਗ੍ਗੋ
੧-੨. ਸਮ੍ਪਦਾਸੁਤ੍ਤਦ੍ਵਯਵਣ੍ਣਨਾ
੯੧-੯੨. ਪਞ੍ਚਮਸ੍ਸ ਪਠਮੇ ਪਞ੍ਚ ਸਮ੍ਪਦਾ ਮਿਸ੍ਸਿਕਾ ਕਥਿਤਾ. ਦੁਤਿਯੇ ਪੁਰਿਮਾ ਚਤਸ੍ਸੋ ਮਿਸ੍ਸਿਕਾ, ਪਞ੍ਚਮੀ ਲੋਕਿਕਾਵ.
੩. ਬ੍ਯਾਕਰਣਸੁਤ੍ਤਵਣ੍ਣਨਾ
੯੩. ਤਤਿਯੇ ਅਞ੍ਞਾਬ੍ਯਾਕਰਣਾਨੀਤਿ ਅਰਹਤ੍ਤਬ੍ਯਾਕਰਣਾਨਿ. ਮਨ੍ਦਤ੍ਤਾਤਿ ਮਨ੍ਦਭਾਵੇਨ ਅਞ੍ਞਾਣੇਨ. ਮੋਮੂਹਤ੍ਤਾਤਿ ਅਤਿਮੂਲ਼੍ਹਭਾਵੇਨ. ਅਞ੍ਞਂ ਬ੍ਯਾਕਰੋਤੀਤਿ ਅਰਹਤ੍ਤਂ ਪਤ੍ਤੋਸ੍ਮੀਤਿ ਕਥੇਤਿ. ਇਚ੍ਛਾਪਕਤੋਤਿ ਇਚ੍ਛਾਯ ਅਭਿਭੂਤੋ. ਅਧਿਮਾਨੇਨਾਤਿ ਅਧਿਗਤਮਾਨੇਨ. ਸਮ੍ਮਦੇਵਾਤਿ ਹੇਤੁਨਾ ਨਯੇਨ ਕਾਰਣੇਨੇਵ.
੪-੫. ਫਾਸੁਵਿਹਾਰਸੁਤ੍ਤਾਦਿਵਣ੍ਣਨਾ
੯੪-੯੫. ਚਤੁਤ੍ਥੇ ਫਾਸੁਵਿਹਾਰਾਤਿ ਸੁਖਵਿਹਾਰਾ. ਪਞ੍ਚਮੇ ਅਕੁਪ੍ਪਨ੍ਤਿ ਅਰਹਤ੍ਤਂ.
੬. ਸੁਤਧਰਸੁਤ੍ਤਵਣ੍ਣਨਾ
੯੬. ਛਟ੍ਠੇ ਅਪ੍ਪਟ੍ਠੋਤਿ ਅਪ੍ਪਸਮਾਰਮ੍ਭੋ. ਅਪ੍ਪਕਿਚ੍ਚੋਤਿ ਅਪ੍ਪਕਰਣੀਯੋ. ਸੁਭਰੋਤਿ ਸੁਖੇਨ ਭਰਿਤਬ੍ਬੋ ਸੁਪੋਸੋ. ਸੁਸਨ੍ਤੋਸੋਤਿ ਤੀਹਿ ਸਨ੍ਤੋਸੇਹਿ ਸੁਟ੍ਠੁ ਸਨ੍ਤੋਸੋ. ਜੀਵਿਤਪਰਿਕ੍ਖਾਰੇਸੂਤਿ ਜੀਵਿਤਸਮ੍ਭਾਰੇਸੁ. ਅਪ੍ਪਾਹਾਰੋਤਿ ਮਨ੍ਦਾਹਾਰੋ. ਅਨੋਦਰਿਕਤ੍ਤਨ੍ਤਿ ਨ ਓਦਰਿਕਭਾਵਂ ਅਮਹਗ੍ਘਸਭਾਵਂ ਅਨੁਯੁਤ੍ਤੋ. ਅਪ੍ਪਮਿਦ੍ਧੋਤਿ ਨ ਬਹੁਨਿਦ੍ਦੋ. ਸਤ੍ਤਮਟ੍ਠਮਾਨਿ ਉਤ੍ਤਾਨਤ੍ਥਾਨਿ.
੯. ਸੀਹਸੁਤ੍ਤਵਣ੍ਣਨਾ
੯੯. ਨਵਮੇ ਸਕ੍ਕਚ੍ਚਞ੍ਞੇਵ ਦੇਤਿ ਨੋ ਅਸਕ੍ਕਚ੍ਚਨ੍ਤਿ ਅਨਵਞ੍ਞਾਯ ਅਵਿਰਜ੍ਝਿਤ੍ਵਾਵ ਦੇਤਿ, ਨੋ ਅਵਞ੍ਞਾਯ ਵਿਰਜ੍ਝਿਤ੍ਵਾ. ਮਾ ਮੇ ਯੋਗ੍ਗਪਥੋ ਨਸ੍ਸਾਤਿ ਮਯਾ ਕਤਯੋਗ੍ਗਪਥੋ ਮਯ੍ਹਂ ਮਾ ਨਸ੍ਸਤੁ, ‘‘ਏਕੋ ਸੀਹੋ ਉਟ੍ਠਾਯ ਬਿਲ਼ਾਰਂ ਪਹਰਨ੍ਤੋ ਵਿਰਜ੍ਝਿਤ੍ਵਾ ਪਹਰੀ’’ਤਿ ਏਵਂ ਵਤ੍ਤਾਰੋ ਮਾ ਹੋਨ੍ਤੂਤਿ ਅਤ੍ਥੋ. ਅਨ੍ਨਭਾਰਨੇਸਾਦਾਨਨ੍ਤਿ ਏਤ੍ਥ ਅਨ੍ਨਂ ਵੁਚ੍ਚਤਿ ਯਵਭਤ੍ਤਂ, ਤਂ ਭਾਰੋ ਏਤੇਸਨ੍ਤਿ ਅਨ੍ਨਭਾਰਾ. ਯਾਚਕਾਨਂ ਏਤਂ ਨਾਮਂ. ਨੇਸਾਦਾ ਵੁਚ੍ਚਨ੍ਤਿ ਸਾਕੁਣਿਕਾ. ਇਤਿ ਸਬ੍ਬਪਚ੍ਛਿਮਾਯ ਕੋਟਿਯਾ ਏਤੇਸਂ ਯਾਚਕਨੇਸਾਦਾਨਮ੍ਪਿ ਸਕ੍ਕਚ੍ਚਮੇਵ ਦੇਸੇਤਿ.
੧੦. ਕਕੁਧਥੇਰਸੁਤ੍ਤਵਣ੍ਣਨਾ
੧੦੦. ਦਸਮੇ ਅਤ੍ਤਭਾਵਪਟਿਲਾਭੋਤਿ ਸਰੀਰਪਟਿਲਾਭੋ. ਦ੍ਵੇ ਵਾ ਤੀਣਿ ਵਾ ਮਾਗਧਕਾਨਿ ਗਾਮਕ੍ਖੇਤ੍ਤਾਨੀਤਿ ਏਤ੍ਥ ਮਾਗਧਿਕਂ ਗਾਮਕ੍ਖੇਤ੍ਤਂ ਅਤ੍ਥਿ ਖੁਦ੍ਦਕਂ, ਅਤ੍ਥਿ ਮਜ੍ਝਿਮਂ, ਅਤ੍ਥਿ ਮਹਨ੍ਤਂ. ਖੁਦ੍ਦਕਂ ਗਾਮਕ੍ਖੇਤ੍ਤਂ ਇਤੋ ਚਤ੍ਤਾਲੀਸਂ ਉਸਭਾਨਿ, ਇਤੋ ਚਤ੍ਤਾਲੀਸਨ੍ਤਿ ਗਾਵੁਤਂ ਹੋਤਿ, ਮਜ੍ਝਿਮਂ ਇਤੋ ਗਾਵੁਤਂ, ਇਤੋ ਗਾਵੁਤਨ੍ਤਿ ਅਡ੍ਢਯੋਜਨਂ ਹੋਤਿ, ਮਹਨ੍ਤਂ ਇਤੋ ਦਿਯਡ੍ਢਗਾਵੁਤਂ, ਇਤੋ ਦਿਯਡ੍ਢਗਾਵੁਤਨ੍ਤਿ ਤਿਗਾਵੁਤਂ ਹੋਤਿ. ਤੇਸੁ ਖੁਦ੍ਦਕੇਨ ਗਾਮਕ੍ਖੇਤ੍ਤੇਨ ਤੀਣਿ, ਖੁਦ੍ਦਕੇਨ ਚ ਮਜ੍ਝਿਮੇਨ ਚ ਦ੍ਵੇ ਗਾਮਕ੍ਖੇਤ੍ਤਾਨਿ ਤਸ੍ਸ ਅਤ੍ਤਭਾਵੋ. ਤਿਗਾਵੁਤਞ੍ਹਿਸ੍ਸ ਸਰੀਰਂ. ਪਰਿਹਰਿਸ੍ਸਾਮੀਤਿ ਪਟਿਜਗ੍ਗਿਸ੍ਸਾਮਿ ਗੋਪਯਿਸ੍ਸਾਮਿ. ਰਕ੍ਖਸ੍ਸੇਤਨ੍ਤਿ ਰਕ੍ਖਸ੍ਸੁ ਏਤਂ. ਮੋਘਪੁਰਿਸੋਤਿ ਤੁਚ੍ਛਪੁਰਿਸੋ. ਨਾਸ੍ਸਸ੍ਸਾਤਿ ਨ ਏਤਸ੍ਸ ਭਵੇਯ੍ਯ. ਸਮੁਦਾਚਰੇਯ੍ਯਾਮਾਤਿ ਕਥੇਯ੍ਯਾਮ. ਸਮ੍ਮਨ੍ਨਤੀਤਿ ਸਮ੍ਮਾਨਂ ਕਰੋਤਿ. ਯਂ ਤੁਮੋ ਕਰਿਸ੍ਸਤਿ ਤੁਮੋਵ ਤੇਨ ਪਞ੍ਞਾਯਿਸ੍ਸਤੀਤਿ ਯਂ ਏਸ ਕਰਿਸ੍ਸਤਿ, ਏਸੋਵ ਤੇਨ ਕਮ੍ਮੇਨ ਪਾਕਟੋ ਭਵਿਸ੍ਸਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਕਕੁਧਵਗ੍ਗੋ ਪਞ੍ਚਮੋ.
ਦੁਤਿਯਪਣ੍ਣਾਸਕਂ ਨਿਟ੍ਠਿਤਂ.