੩. ਤਤਿਯਪਣ੍ਣਾਸਕਂ
(੧੧) ੧. ਫਾਸੁਵਿਹਾਰਵਗ੍ਗੋ
੧. ਸਾਰਜ੍ਜਸੁਤ੍ਤਵਣ੍ਣਨਾ
੧੦੧. ਤਤਿਯਸ੍ਸ ਪਠਮੇ ਵੇਸਾਰਜ੍ਜਕਰਣਾਤਿ ਵਿਸਾਰਦਭਾਵਾਵਹਾ. ਸਾਰਜ੍ਜਂ ਹੋਤੀਤਿ ਦੋਮਨਸ੍ਸਂ ਹੋਤਿ.
੨. ਉਸ੍ਸਙ੍ਕਿਤਸੁਤ੍ਤਵਣ੍ਣਨਾ
੧੦੨. ਦੁਤਿਯੇ ਉਸ੍ਸਙ੍ਕਿਤਪਰਿਸਙ੍ਕਿਤੋਤਿ ਉਸ੍ਸਙ੍ਕਿਤੋ ਚ ਪਰਿਸਙ੍ਕਿਤੋ ਚ. ਅਪਿ ਅਕੁਪ੍ਪਧਮ੍ਮੋਪੀਤਿ ਅਪਿ ਅਕੁਪ੍ਪਧਮ੍ਮੋ ਖੀਣਾਸਵੋ ਸਮਾਨੋਪਿ ਪਰੇਹਿ ਪਾਪਭਿਕ੍ਖੂਹਿ ਉਸ੍ਸਙ੍ਕਿਤਪਰਿਸਙ੍ਕਿਤੋ ਹੋਤੀਤਿ ਅਤ੍ਥੋ. ਵੇਸਿਯਾਗੋਚਰੋਤਿਆਦੀਸੁ ਵੇਸਿਯਾ ਵੁਚ੍ਚਨ੍ਤਿ ਰੂਪੂਪਜੀਵਿਨਿਯੋ, ਤਾ ਗੋਚਰੋ ਅਸ੍ਸਾਤਿ ਵੇਸਿਯਾਗੋਚਰੋ, ਤਾਸਂ ਗੇਹਂ ਅਭਿਣ੍ਹਗਮਨੋਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ. ਤਤ੍ਥ ਪਨ ਵਿਧਵਾਤਿ ਮਤਪਤਿਕਾ. ਥੁਲ੍ਲਕੁਮਾਰਿਕਾਤਿ ਮਹਲ੍ਲਿਕਕੁਮਾਰਿਕਾਯੋ.
੩. ਮਹਾਚੋਰਸੁਤ੍ਤਵਣ੍ਣਨਾ
੧੦੩. ਤਤਿਯੇ ਇਤੋ ਭੋਗੇਨ ਪਟਿਸਨ੍ਥਰਿਸ੍ਸਾਮੀਤਿ ਇਤੋ ਮਮ ਸਾਪਤੇਯ੍ਯਤੋ ਭੋਗਂ ਗਹੇਤ੍ਵਾ ਤੇਨ ਪਟਿਸਨ੍ਥਾਰਂ ਕਰਿਸ੍ਸਾਮਿ, ਤਸ੍ਸ ਚ ਮਮ ਚ ਅਨ੍ਤਰਂ ਪਿਦਹਿਸ੍ਸਾਮੀਤਿ ਅਤ੍ਥੋ. ਗਹਣਾਨੀਤਿ ਪਰਸਨ੍ਤਕਾਨਂ ਭਣ੍ਡਾਨਂ ਗਹਣਾਨਿ. ਗੁਯ੍ਹਮਨ੍ਤਾਤਿ ਗੁਹਿਤਬ੍ਬਮਨ੍ਤਾ. ਅਨ੍ਤਗ੍ਗਾਹਿਕਾਯਾਤਿ ਸਸ੍ਸਤਂ ਵਾ ਉਚ੍ਛੇਦਂ ਵਾ ਗਹੇਤ੍ਵਾ ਠਿਤਾਯ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਚਤੁਤ੍ਥੇ ਸਬ੍ਬਂ ਹੇਟ੍ਠਾ ਵੁਤ੍ਤਨਯਮੇਵ.
੫. ਫਾਸੁਵਿਹਾਰਸੁਤ੍ਤਵਣ੍ਣਨਾ
੧੦੫. ਪਞ੍ਚਮੇ ਮੇਤ੍ਤਂ ਕਾਯਕਮ੍ਮਨ੍ਤਿ ਮੇਤ੍ਤਚਿਤ੍ਤੇਨ ਪਵਤ੍ਤਿਤਂ ਕਾਯਕਮ੍ਮਂ. ਆਵਿ ਚੇਵ ਰਹੋ ਚਾਤਿ ਸਮ੍ਮੁਖੇ ਚੇਵ ਪਰਮ੍ਮੁਖੇ ਚ. ਇਤਰੇਸੁਪਿ ਏਸੇਵ ਨਯੋ. ਯਾਨਿ ਤਾਨਿ ਸੀਲਾਨੀਤਿਆਦਿ ਚਤੁਪਾਰਿਸੁਦ੍ਧਿਸੀਲਵਸੇਨ ਵੁਤ੍ਤਂ. ਸਮਾਧਿਸਂਵਤ੍ਤਨਿਕਾਨੀਤਿ ਮਗ੍ਗਸਮਾਧਿਫਲਸਮਾਧਿਨਿਬ੍ਬਤ੍ਤਕਾਨਿ. ਸੀਲਸਾਮਞ੍ਞਗਤੋਤਿ ਸਮਾਨਸੀਲਤਂ ਗਤੋ, ਏਕਸਦਿਸਸੀਲੋ ਹੁਤ੍ਵਾਤਿ ਅਤ੍ਥੋ. ਤਕ੍ਕਰਸ੍ਸਾਤਿ ਯੋ ਨਂ ਕਰੋਤਿ, ਤਸ੍ਸ. ਇਤਿ ਇਮਸ੍ਮਿਂ ਸੁਤ੍ਤੇ ਸੀਲਂ ਮਿਸ੍ਸਕਂ ਕਥਿਤਂ, ਦਿਟ੍ਠਿ ਵਿਪਸ੍ਸਨਾਸਮ੍ਮਾਦਿਟ੍ਠੀਤਿ.
੬. ਆਨਨ੍ਦਸੁਤ੍ਤਵਣ੍ਣਨਾ
੧੦੬. ਛਟ੍ਠੇ ਨੋ ਚ ਪਰਂ ਅਧਿਸੀਲੇ ਸਮ੍ਪਵਤ੍ਤਾ ਹੋਤੀਤਿ ਪਰਂ ਸੀਲਭਾਵੇਨ ਨ ਗਰਹਤਿ ਨ ਉਪਵਦਤਿ. ਅਤ੍ਤਾਨੁਪੇਕ੍ਖੀਤਿ ਅਤ੍ਤਨੋਵ ਕਤਾਕਤਂ ਜਾਨਨਵਸੇਨ ਅਤ੍ਤਾਨਂ ਅਨੁਪੇਕ੍ਖਿਤਾ. ਨੋ ਪਰਾਨੁਪੇਕ੍ਖੀਤਿ ਪਰਸ੍ਸ ਕਤਾਕਤੇਸੁ ਅਬ੍ਯਾਵਟੋ. ਅਪਞ੍ਞਾਤੋਤਿ ਅਪਾਕਟੋ ਅਪ੍ਪਪੁਞ੍ਞੋ. ਅਪਞ੍ਞਾਤਕੇਨਾਤਿ ਅਪਞ੍ਞਾਤਭਾਵੇਨ ਅਪਾਕਟਤਾਯ ਮਨ੍ਦਪੁਞ੍ਞਤਾਯ. ਨੋ ਪਰਿਤਸ੍ਸਤੀਤਿ ਪਰਿਤਾਸਂ ਨਾਪਜ੍ਜਤਿ. ਇਤਿ ਇਮਸ੍ਮਿਂ ਸੁਤ੍ਤੇ ਖੀਣਾਸਵੋਵ ਕਥਿਤੋ.
੭-੮. ਸੀਲਸੁਤ੍ਤਾਦਿਵਣ੍ਣਨਾ
੧੦੭-੧੦੮. ਸਤ੍ਤਮੇ ਸੀਲਸਮਾਧਿਪਞ੍ਞਾ ਮਿਸ੍ਸਿਕਾ ਕਥਿਤਾ, ਵਿਮੁਤ੍ਤਿ ਅਰਹਤ੍ਤਫਲਂ, ਵਿਮੁਤ੍ਤਿਞਾਣਦਸ੍ਸਨਂ ਪਚ੍ਚਵੇਕ੍ਖਣਞਾਣਂ ਲੋਕਿਯਮੇਵ. ਅਟ੍ਠਮੇਪਿ ਏਸੇਵ ਨਯੋ. ਪਚ੍ਚਵੇਕ੍ਖਣਞਾਣਂ ਪਨੇਤ੍ਥ ਅਸੇਖਸ੍ਸ ਪਵਤ੍ਤਤ੍ਤਾ ਅਸੇਖਨ੍ਤਿ ਵੁਤ੍ਤਂ.
੯-੧੦. ਚਾਤੁਦ੍ਦਿਸਸੁਤ੍ਤਾਦਿਵਣ੍ਣਨਾ
੧੦੯-੧੧੦. ਨਵਮੇ ਚਾਤੁਦ੍ਦਿਸੋਤਿ ਚਤੂਸੁ ਦਿਸਾਸੁ ਅਪ੍ਪਟਿਹਤਚਾਰੋ. ਇਮਸ੍ਮਿਮ੍ਪਿ ਸੁਤ੍ਤੇ ਖੀਣਾਸਵੋਵ ਕਥਿਤੋ. ਦਸਮੇ ਅਲਨ੍ਤਿ ਯੁਤ੍ਤੋ. ਇਧਾਪਿ ਖੀਣਾਸਵੋਵ ਕਥਿਤੋ.
ਫਾਸੁਵਿਹਾਰਵਗ੍ਗੋ ਪਠਮੋ.
(੧੨) ੨. ਅਨ੍ਧਕਵਿਨ੍ਦਵਗ੍ਗੋ
੧. ਕੁਲੂਪਕਸੁਤ੍ਤਵਣ੍ਣਨਾ
੧੧੧. ਦੁਤਿਯਸ੍ਸ ਪਠਮੇ ਅਸਨ੍ਥਵਵਿਸ੍ਸਾਸੀਤਿ ਅਤ੍ਤਨਾ ਸਦ੍ਧਿਂ ਸਨ੍ਥਵਂ ਅਕਰੋਨ੍ਤੇਸੁ ਵਿਸ੍ਸਾਸਂ ਅਨਾਪਜ੍ਜਨ੍ਤੇਸੁਯੇਵ ਵਿਸ੍ਸਾਸਂ ਕਰੋਤਿ. ਅਨਿਸ੍ਸਰਵਿਕਪ੍ਪੀਤਿ ਅਨਿਸ੍ਸਰੋਵ ਸਮਾਨੋ ‘‘ਇਮਂ ਦੇਥ, ਇਮਂ ਗਣ੍ਹਥਾ’’ਤਿ ਇਸ੍ਸਰੋ ਵਿਯ ਵਿਕਪ੍ਪੇਤਿ. ਵਿਸ੍ਸਟ੍ਠੁਪਸੇਵੀਤਿ ਵਿਸ੍ਸਟ੍ਠਾਨਿ ਭਿਨ੍ਨਕੁਲਾਨਿ ਘਟਨਤ੍ਥਾਯ ਉਪਸੇਵਤਿ. ਉਪਕਣ੍ਣਕਜਪ੍ਪੀਤਿ ਕਣ੍ਣਮੂਲੇ ਮਨ੍ਤਂ ਗਣ੍ਹਾਤਿ. ਸੁਕ੍ਕਪਕ੍ਖੋ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬੋ.
੨. ਪਚ੍ਛਾਸਮਣਸੁਤ੍ਤਵਣ੍ਣਨਾ
੧੧੨. ਦੁਤਿਯੇ ਪਤ੍ਤਪਰਿਯਾਪਨ੍ਨਂ ਨ ਗਣ੍ਹਾਤੀਤਿ ਉਪਜ੍ਝਾਯੇ ਨਿਵਤ੍ਤਿਤ੍ਵਾ ਠਿਤੇ ਅਤ੍ਤਨੋ ਤੁਚ੍ਛਪਤ੍ਤਂ ਦਤ੍ਵਾ ਤਸ੍ਸ ਪਤ੍ਤਂ ਨ ਗਣ੍ਹਾਤਿ, ਤਤੋ ਵਾ ਦੀਯਮਾਨਂ ਨ ਗਣ੍ਹਾਤਿ. ਨ ਨਿਵਾਰੇਤੀਤਿ ਇਦਂ ਵਚਨਂ ਆਪਤ੍ਤਿਵੀਤਿਕ੍ਕਮਵਚਨਂ ਨਾਮਾਤਿ ਨ ਜਾਨਾਤਿ. ਞਤ੍ਵਾ ਵਾਪਿ, ‘‘ਭਨ੍ਤੇ, ਏਵਰੂਪਂ ਨਾਮ ਵਤ੍ਤੁਂ ਨ ਵਟ੍ਟਤੀ’’ਤਿ ਨ ਨਿਵਾਰੇਤਿ. ਕਥਂ ਓਪਾਤੇਤੀਤਿ ਤਸ੍ਸ ਕਥਂ ਭਿਨ੍ਦਿਤ੍ਵਾ ਅਤ੍ਤਨੋ ਕਥਂ ਪਵੇਸੇਤਿ. ਜਲ਼ੋਤਿ ਜਡੋ. ਏਲ਼ਮੂਗੋਤਿ ਪਗ੍ਘਰਿਤਖੇਲ਼ਮੁਖੋ. ਤਤਿਯਂ ਉਤ੍ਤਾਨਮੇਵ.
੪. ਅਨ੍ਧਕਵਿਨ੍ਦਸੁਤ੍ਤਵਣ੍ਣਨਾ
੧੧੪. ਚਤੁਤ੍ਥੇ ਸੀਲਵਾ ਹੋਥਾਤਿ ਸੀਲਵਨ੍ਤਾ ਹੋਥ. ਆਰਕ੍ਖਸਤਿਨੋਤਿ ਦ੍ਵਾਰਰਕ੍ਖਿਕਾਯ ਸਤਿਯਾ ਸਮਨ੍ਨਾਗਤਾ. ਨਿਪਕ੍ਕਸਤਿਨੋਤਿ ਦ੍ਵਾਰਰਕ੍ਖਨਕੇਨੇਵ ਞਾਣੇਨ ਸਮਨ੍ਨਾਗਤਸ੍ਸਤਿਨੋ. ਸਤਾਰਕ੍ਖੇਨ ਚੇਤਸਾ ਸਮਨ੍ਨਾਗਤਾਤਿ ਸਤਾਰਕ੍ਖੇਨ ਚਿਤ੍ਤੇਨ ਸਮਨ੍ਨਾਗਤਾ. ਅਪ੍ਪਭਸ੍ਸਾਤਿ ਅਪ੍ਪਕਥਾ. ਸਮ੍ਮਾਦਿਟ੍ਠਿਕਾਤਿ ਕਮ੍ਮਸ੍ਸਕਤਜ੍ਝਾਨ-ਵਿਪਸ੍ਸਨਾਮਗ੍ਗ-ਫਲਵਸੇਨ ਪਞ੍ਚਵਿਧਾਯ ਸਮ੍ਮਾਦਿਟ੍ਠਿਯਾ ਸਮਨ੍ਨਾਗਤਾ. ਅਪਿਚ ਪਚ੍ਚਵੇਕ੍ਖਣਞਾਣਮ੍ਪਿ ਸਮ੍ਮਾਦਿਟ੍ਠਿਯੇਵਾਤਿ ਵੇਦਿਤਬ੍ਬਾ.
੫. ਮਚ੍ਛਰਿਨੀਸੁਤ੍ਤਵਣ੍ਣਨਾ
੧੧੫. ਪਞ੍ਚਮੇ ਆਵਾਸਮਚ੍ਛਰਿਨੀਤਿ ਆਵਾਸਂ ਮਚ੍ਛਰਾਯਤਿ, ਤਤ੍ਥ ਅਞ੍ਞੇਸਂ ਵਾਸਂ ਨ ਸਹਤਿ. ਕੁਲਮਚ੍ਛਰਿਨੀਤਿ ਉਪਟ੍ਠਾਕਕੁਲਂ ਮਚ੍ਛਰਾਯਤਿ, ਅਞ੍ਞੇਸਂ ਤਤ੍ਥ ਉਪਸਙ੍ਕਮਨਂ ਨ ਸਹਤਿ. ਲਾਭਮਚ੍ਛਰਿਨੀਤਿ ਲਾਭਂ ਮਚ੍ਛਰਾਯਤਿ, ਅਞ੍ਞੇਸਂ ਤਂ ਉਪ੍ਪਜ੍ਜਨ੍ਤਂ ਨ ਸਹਤਿ. ਵਣ੍ਣਮਚ੍ਛਰਿਨੀਤਿ ਗੁਣਂ ਮਚ੍ਛਰਾਯਤਿ, ਅਞ੍ਞੇਸਂ ਗੁਣਕਥਂ ਨ ਸਹਤਿ. ਧਮ੍ਮਮਚ੍ਛਰਿਨੀਤਿ ਪਰਿਯਤ੍ਤਿਧਮ੍ਮਂ ਮਚ੍ਛਰਾਯਤਿ, ਅਞ੍ਞੇਸਂ ਦਾਤੁਂ ਨ ਇਚ੍ਛਤਿ.
੬-੭. ਵਣ੍ਣਨਾਸੁਤ੍ਤਾਦਿਵਣ੍ਣਨਾ
੧੧੬-੧੧੭. ਛਟ੍ਠੇ ਸਦ੍ਧਾਦੇਯ੍ਯਂ ਵਿਨਿਪਾਤੇਤੀਤਿ ਪਰੇਹਿ ਸਦ੍ਧਾਯ ਦਿਨ੍ਨਪਿਣ੍ਡਪਾਤਤੋ ਅਗ੍ਗਂ ਅਗ੍ਗਹੇਤ੍ਵਾ ਪਰਸ੍ਸ ਦੇਤਿ. ਸਤ੍ਤਮੇ ਇਸ੍ਸੁਕਿਨੀਤਿ ਇਸ੍ਸਾਯ ਸਮਨ੍ਨਾਗਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਅਨ੍ਧਕਵਿਨ੍ਦਵਗ੍ਗੋ ਦੁਤਿਯੋ.
(੧੩) ੩. ਗਿਲਾਨਵਗ੍ਗੋ
੪. ਦੁਤਿਯਉਪਟ੍ਠਾਕਸੁਤ੍ਤਵਣ੍ਣਨਾ
੧੨੪. ਤਤਿਯਸ੍ਸ ਚਤੁਤ੍ਥੇ ਨਪ੍ਪਟਿਬਲੋਤਿ ਕਾਯਬਲੇਨ ਚ ਞਾਣਬਲੇਨ ਚ ਅਸਮਨ੍ਨਾਗਤੋ. ਆਮਿਸਨ੍ਤਰੋਤਿ ਆਮਿਸਹੇਤੁਕੋ ਚੀਵਰਾਦੀਨਿ ਪਚ੍ਚਾਸੀਸਮਾਨੋ.
੫-੬. ਅਨਾਯੁਸ੍ਸਾਸੁਤ੍ਤਦ੍ਵਯਵਣ੍ਣਨਾ
੧੨੫-੧੨੬. ਪਞ੍ਚਮੇ ਅਨਾਯੁਸ੍ਸਾਤਿ ਆਯੁਪਚ੍ਛੇਦਨਾ, ਨ ਆਯੁਵਡ੍ਢਨਾ. ਛਟ੍ਠੇਪਿ ਏਸੇਵ ਨਯੋ.
੭. ਵਪਕਾਸਸੁਤ੍ਤਵਣ੍ਣਨਾ
੧੨੭. ਸਤ੍ਤਮੇ ਨਾਲਂ ਸਙ੍ਘਮ੍ਹਾ ਵਪਕਾਸਿਤੁਨ੍ਤਿ ਸਙ੍ਘਤੋ ਨਿਕ੍ਖਮਿਤ੍ਵਾ ਏਕਕੋ ਵਸਿਤੁਂ ਨ ਯੁਤ੍ਤੋ. ਕਾਮਞ੍ਚੇਸ ਸਙ੍ਘਮਜ੍ਝੇਪਿ ਵਸਿਤੁਂ ਅਯੁਤ੍ਤੋਵ ਅਸਙ੍ਘਸੋਭਨਤਾਯ, ਓਵਾਦਾਨੁਸਾਸਨਿਪ੍ਪਟਿਬਦ੍ਧਤ੍ਤਾ ਪਨ ਨਿਪ੍ਪਰਿਯਾਯੇਨੇਵ ਸਙ੍ਘਮ੍ਹਾ ਵਪਕਾਸਿਤੁਂ ਨ ਯੁਤ੍ਤੋ. ਅਲਂ ਸਙ੍ਘਮ੍ਹਾ ਵਪਕਾਸਿਤੁਨ੍ਤਿ ਚਾਤੁਦ੍ਦਿਸਤ੍ਤਾ ਸਙ੍ਘਮ੍ਹਾ ਨਿਕ੍ਖਮ੍ਮ ਏਕਕੋ ਵਸਿਤੁਂ ਯੁਤ੍ਤੋ, ਸਙ੍ਘਸੋਭਨਤਾਯ ਪਨ ਸਙ੍ਘੇਪਿ ਵਸਿਤੁਂ ਯੁਤ੍ਤੋਯੇਵ. ਅਟ੍ਠਮਂ ਉਤ੍ਤਾਨਤ੍ਥਮੇਵ.
੯. ਪਰਿਕੁਪ੍ਪਸੁਤ੍ਤਵਣ੍ਣਨਾ
੧੨੯. ਨਵਮੇ ਆਪਾਯਿਕਾਤਿ ਅਪਾਯਗਾਮਿਨੋ. ਨੇਰਯਿਕਾਤਿ ਨਿਰਯਗਾਮਿਨੋ. ਪਰਿਕੁਪ੍ਪਾਤਿ ਪਰਿਕੁਪ੍ਪਨਸਭਾਵਾ ਪੁਰਾਣਵਣਸਦਿਸਾ. ਅਤੇਕਿਚ੍ਛਾਤਿ ਅਕਤ੍ਤਬ੍ਬਪਰਿਕਮ੍ਮਾ. ਦਸਮਂ ਉਤ੍ਤਾਨਤ੍ਥਮੇਵਾਤਿ.
ਗਿਲਾਨਵਗ੍ਗੋ ਤਤਿਯੋ.
(੧੪) ੪. ਰਾਜਵਗ੍ਗੋ
੧. ਪਠਮਚਕ੍ਕਾਨੁਵਤ੍ਤਨਸੁਤ੍ਤਵਣ੍ਣਨਾ
੧੩੧. ਚਤੁਤ੍ਥਸ੍ਸ ਪਠਮੇ ਧਮ੍ਮੇਨਾਤਿ ਦਸਕੁਸਲਧਮ੍ਮੇਨ. ਚਕ੍ਕਨ੍ਤਿ ਆਣਾਚਕ੍ਕਂ. ਅਤ੍ਥਞ੍ਞੂਤਿ ਰਜ੍ਜਤ੍ਥਂ ਜਾਨਾਤਿ. ਧਮ੍ਮਞ੍ਞੂਤਿ ਪਵੇਣਿਧਮ੍ਮਂ ਜਾਨਾਤਿ. ਮਤ੍ਤਞ੍ਞੂਤਿ ਦਣ੍ਡੇ ਵਾ ਬਲਮ੍ਹਿ ਵਾ ਪਮਾਣਂ ਜਾਨਾਤਿ. ਕਾਲਞ੍ਞੂਤਿ ਰਜ੍ਜਸੁਖਾਨੁਭਵਨਕਾਲਂ, ਵਿਨਿਚ੍ਛਯਕਰਣਕਾਲਂ, ਜਨਪਦਚਾਰਿਕਾਕਾਲਞ੍ਚ ਜਾਨਾਤਿ. ਪਰਿਸਞ੍ਞੂਤਿ ਅਯਂ ਪਰਿਸਾ ਖਤ੍ਤਿਯਪਰਿਸਾ, ਅਯਂ ਬ੍ਰਾਹ੍ਮਣਵੇਸ੍ਸਸੁਦ੍ਦਸਮਣਪਰਿਸਾਤਿ ਜਾਨਾਤਿ.
ਤਥਾਗਤਵਾਰੇ ਅਤ੍ਥਞ੍ਞੂਤਿ ਪਞ੍ਚ ਅਤ੍ਥੇ ਜਾਨਾਤਿ. ਧਮ੍ਮਞ੍ਞੂਤਿ ਚਤ੍ਤਾਰੋ ਧਮ੍ਮੇ ਜਾਨਾਤਿ. ਮਤ੍ਤਞ੍ਞੂਤਿ ਚਤੂਸੁ ਪਚ੍ਚਯੇਸੁ ਪਟਿਗ੍ਗਹਣਪਰਿਭੋਗਮਤ੍ਤਂ ਜਾਨਾਤਿ. ਕਾਲਞ੍ਞੂਤਿ ਅਯਂ ਕਾਲੋ ਪਟਿਸਲ੍ਲੀਨਸ੍ਸ, ਅਯਂ ਸਮਾਪਤ੍ਤਿਯਾ, ਅਯਂ ਧਮ੍ਮਦੇਸਨਾਯ, ਅਯਂ ਜਨਪਦਚਾਰਿਕਾਯਾਤਿ ਏਵਂ ਕਾਲਂ ਜਾਨਾਤਿ. ਪਰਿਸਞ੍ਞੂਤਿ ਅਯਂ ਪਰਿਸਾ ਖਤ੍ਤਿਯਪਰਿਸਾ…ਪੇ… ਅਯਂ ਸਮਣਪਰਿਸਾਤਿ ਜਾਨਾਤਿ. ਅਨੁਤ੍ਤਰਨ੍ਤਿ ਨਵਹਿ ਲੋਕੁਤ੍ਤਰਧਮ੍ਮੇਹਿ ਅਨੁਤ੍ਤਰਂ. ਧਮ੍ਮਚਕ੍ਕਨ੍ਤਿ ਸੇਟ੍ਠਚਕ੍ਕਂ.
੨. ਦੁਤਿਯਚਕ੍ਕਾਨੁਵਤ੍ਤਨਸੁਤ੍ਤਵਣ੍ਣਨਾ
੧੩੨. ਦੁਤਿਯੇ ਪਿਤਰਾ ਪਵਤ੍ਤਿਤਂ ਚਕ੍ਕਨ੍ਤਿ ਚਕ੍ਕਵਤ੍ਤਿਮ੍ਹਿ ਪਬ੍ਬਜਿਤੇ ਵਾ ਕਾਲਕਤੇ ਵਾ ਚਕ੍ਕਰਤਨਂ ਸਤ੍ਤਾਹਮਤ੍ਤਂ ਠਤ੍ਵਾ ਅਨ੍ਤਰਧਾਯਤਿ, ਕਥਮੇਸ ਤਂ ਅਨੁਪ੍ਪਵਤ੍ਤੇਤਿ ਨਾਮ? ਪਿਤੁ ਪਵੇਣਿਯਂ ਠਤ੍ਵਾ ਚਕ੍ਕਵਤ੍ਤਿਵਤ੍ਤਂ ਪੂਰੇਤ੍ਵਾ ਚਕ੍ਕਵਤ੍ਤਿਰਜ੍ਜਂ ਕਾਰੇਨ੍ਤੋਪਿ ਪਿਤਰਾ ਪਵਤ੍ਤਿਤਮੇਵ ਅਨੁਪ੍ਪਵਤ੍ਤੇਤਿ ਨਾਮ.
੩. ਧਮ੍ਮਰਾਜਾਸੁਤ੍ਤਵਣ੍ਣਨਾ
੧੩੩. ਤਤਿਯਂ ਤਿਕਨਿਪਾਤੇ ਵੁਤ੍ਤਨਯਮੇਵ. ਸੇਵਿਤਬ੍ਬਾਸੇਵਿਤਬ੍ਬੇ ਪਨੇਤ੍ਥ ਪਚ੍ਛਿਮਪਦਦ੍ਵਯਮੇਵ ਵਿਸੇਸੋ. ਤਤ੍ਥ ਸਮ੍ਮਾਆਜੀਵੋ ਸੇਵਿਤਬ੍ਬੋ, ਮਿਚ੍ਛਾਆਜੀਵੋ ਨ ਸੇਵਿਤਬ੍ਬੋ. ਸਪ੍ਪਾਯੋ ਗਾਮਨਿਗਮੋ ਸੇਵਿਤਬ੍ਬੋ, ਅਸਪ੍ਪਾਯੋ ਨ ਸੇਵਿਤਬ੍ਬੋ.
੪. ਯਸ੍ਸਂਦਿਸਂਸੁਤ੍ਤਵਣ੍ਣਨਾ
੧੩੪. ਚਤੁਤ੍ਥੇ ਉਭਤੋਤਿ ਦ੍ਵੀਹਿਪਿ ਪਕ੍ਖੇਹਿ. ਮਾਤਿਤੋ ਚ ਪਿਤਿਤੋ ਚਾਤਿ ਯਸ੍ਸ ਹਿ ਮਾਤਾ ਖਤ੍ਤਿਯਾ, ਮਾਤੁਮਾਤਾ ਖਤ੍ਤਿਯਾ, ਤਸ੍ਸਾਪਿ ਮਾਤਾ ਖਤ੍ਤਿਯਾ. ਪਿਤਾ ਖਤ੍ਤਿਯੋ, ਪਿਤੁਪਿਤਾ ਖਤ੍ਤਿਯੋ, ਤਸ੍ਸਪਿ ਪਿਤਾ ਖਤ੍ਤਿਯੋ. ਸੋ ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ. ਸਂਸੁਦ੍ਧਗਹਣਿਕੋਤਿ ਸਂਸੁਦ੍ਧਾਯ ਮਾਤੁਕੁਚ੍ਛਿਯਾ ਸਮਨ੍ਨਾਗਤੋ. ‘‘ਸਮਵੇਪਾਕਿਨਿਯਾ ਗਹਣਿਯਾ’’ਤਿ ਏਤ੍ਥ ਪਨ ਕਮ੍ਮਜਤੇਜੋਧਾਤੁ ਗਹਣੀਤਿ ਵੁਚ੍ਚਤਿ. ਯਾਵ ਸਤ੍ਤਮਾ ਪਿਤਾਮਹਯੁਗਾਤਿ ਏਤ੍ਥ ਪਿਤੁਪਿਤਾ ਪਿਤਾਮਹੋ, ਪਿਤਾਮਹਸ੍ਸ ਯੁਗਂ ਪਿਤਾਮਹਯੁਗਂ. ਯੁਗਨ੍ਤਿ ਆਯੁਪ੍ਪਮਾਣਂ ਵੁਚ੍ਚਤਿ. ਅਭਿਲਾਪਮਤ੍ਤਮੇਵ ਚੇਤਂ, ਅਤ੍ਥਤੋ ਪਨ ਪਿਤਾਮਹੋਯੇਵ ਪਿਤਾਮਹਯੁਗਂ. ਤਤੋ ਉਦ੍ਧਂ ਸਬ੍ਬੇਪਿ ਪੁਬ੍ਬਪੁਰਿਸਾ ਪਿਤਾਮਹਗ੍ਗਹਣੇਨੇਵ ਗਹਿਤਾ. ਏਵਂ ਯਾਵ ਸਤ੍ਤਮੋ ਪੁਰਿਸੋ, ਤਾਵ ਸਂਸੁਦ੍ਧਗਹਣਿਕੋ, ਅਥ ਵਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿਵਾਦੇਨਾਤਿ ਦਸ੍ਸੇਤਿ. ਅਕ੍ਖਿਤ੍ਤੋਤਿ ‘‘ਅਪਨੇਥ ਏਤਂ, ਕਿਂ ਇਮਿਨਾ’’ਤਿ ਏਵਂ ਅਕ੍ਖਿਤ੍ਤੋ ਅਨਵਕ੍ਖਿਤ੍ਤੋ. ਅਨੁਪਕ੍ਕੁਟ੍ਠੋਤਿ ਨ ਉਪਕ੍ਕੁਟ੍ਠੋ ਨ ਅਕ੍ਕੋਸਂ ਵਾ ਨਿਨ੍ਦਂ ਵਾ ਪਤ੍ਤਪੁਬ੍ਬੋ. ਕੇਨ ਕਾਰਣੇਨਾਤਿ? ਜਾਤਿਵਾਦੇਨ, ‘‘ਇਤਿਪਿ ਹੀਨਜਾਤਿਕੋ ਏਸੋ’’ਤਿ ਏਵਰੂਪੇਨ ਵਚਨੇਨਾਤਿ ਅਤ੍ਥੋ.
ਅਡ੍ਢੋਤਿਆਦੀਸੁ ਯੋ ਕੋਚਿ ਅਤ੍ਤਨੋ ਸਨ੍ਤਕੇਨ ਵਿਭਵੇਨ ਅਡ੍ਢੋ ਹੋਤਿ. ਇਧ ਪਨ ਨ ਕੇਵਲਂ ਅਡ੍ਢੋਯੇਵ, ਮਹਦ੍ਧਨੋ ਮਹਤਾ ਅਪਰਿਮਾਣਸਙ੍ਖੇਨ ਧਨੇਨ ਸਮਨ੍ਨਾਗਤੋਤਿ ਅਤ੍ਥੋ. ਪਞ੍ਚਕਾਮਗੁਣਵਸੇਨ ਮਹਨ੍ਤਾ ਉਲ਼ਾਰਾ ਭੋਗਾ ਅਸ੍ਸਾਤਿ ਮਹਾਭੋਗੋ. ਪਰਿਪੁਣ੍ਣਕੋਸਕੋਟ੍ਠਾਗਾਰੋਤਿ ਕੋਸੋ ਵੁਚ੍ਚਤਿ ਭਣ੍ਡਾਗਾਰਂ, ਨਿਦਹਿਤ੍ਵਾ ਠਪਿਤੇਨ ਧਨੇਨ ਪਰਿਪੁਣ੍ਣਕੋਸੋ, ਧਞ੍ਞੇਨ ਚ ਪਰਿਪੁਣ੍ਣਕੋਟ੍ਠਾਗਾਰੋਤਿ ਅਤ੍ਥੋ. ਅਥ ਵਾ ਚਤੁਬ੍ਬਿਧੋ ਕੋਸੋ ਹਤ੍ਥੀ ਅਸ੍ਸਾ ਰਥਾ ਰਟ੍ਠਨ੍ਤਿ, ਤਿਵਿਧਂ ਕੋਟ੍ਠਾਗਾਰਂ ਧਨਕੋਟ੍ਠਾਗਾਰਂ ਧਞ੍ਞਕੋਟ੍ਠਾਗਾਰਂ ਵਤ੍ਥਕੋਟ੍ਠਾਗਾਰਨ੍ਤਿ. ਤਂ ਸਬ੍ਬਮ੍ਪਿ ਪਰਿਪੁਣ੍ਣਮਸ੍ਸਾਤਿ ਪਰਿਪੁਣ੍ਣਕੋਸਕੋਟ੍ਠਾਗਾਰੋ. ਅਸ੍ਸਵਾਯਾਤਿ ਕਸ੍ਸਚਿ ਬਹੁਮ੍ਪਿ ਧਨਂ ਦੇਨ੍ਤਸ੍ਸ ਸੇਨਾ ਨ ਸੁਣਾਤਿ, ਸਾ ਅਨਸ੍ਸਵਾ ਨਾਮ ਹੋਤਿ. ਕਸ੍ਸਚਿ ਅਦੇਨ੍ਤਸ੍ਸਾਪਿ ਸੁਣਾਤਿਯੇਵ, ਅਯਂ ਅਸ੍ਸਵਾ ਨਾਮ. ਓਵਾਦਪਟਿਕਰਾਯਾਤਿ ‘‘ਇਦਂ ਵੋ ਕਤ੍ਤਬ੍ਬ, ਇਦਂ ਨ ਕਤ੍ਤਬ੍ਬ’’ਨ੍ਤਿ ਦਿਨ੍ਨਓਵਾਦਕਰਾਯ. ਪਣ੍ਡਿਤੋਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤੋ. ਬ੍ਯਤ੍ਤੋਤਿ ਪਞ੍ਞਾਵੇਯ੍ਯਤ੍ਤਿਯੇਨ ਯੁਤ੍ਤੋ. ਮੇਧਾਵੀਤਿ ਠਾਨੁਪ੍ਪਤ੍ਤਿਕਪਞ੍ਞਾਯ ਸਮਨ੍ਨਾਗਤੋ. ਪਟਿਬਲੋਤਿ ਸਮਤ੍ਥੋ. ਅਤ੍ਥੇ ਚਿਨ੍ਤੇਤੁਨ੍ਤਿ ਵਡ੍ਢਿਅਤ੍ਥੇ ਚਿਨ੍ਤੇਤੁਂ. ਸੋ ਹਿ ਪਚ੍ਚੁਪ੍ਪਨ੍ਨਅਤ੍ਥਵਸੇਨੇਵ ‘‘ਅਤੀਤੇਪਿ ਏਵਂ ਅਹੇਸੁਂ, ਅਨਾਗਤੇਪਿ ਏਵਂ ਭਵਿਸ੍ਸਨ੍ਤੀ’’ਤਿ ਚਿਨ੍ਤੇਤਿ. ਵਿਜਿਤਾਵੀਨਨ੍ਤਿ ਵਿਜਿਤਵਿਜਯਾਨਂ, ਮਹਨ੍ਤੇਨ ਵਾ ਵਿਜਯੇਨ ਸਮਨ੍ਨਾਗਤਾਨਂ. ਵਿਮੁਤ੍ਤਚਿਤ੍ਤਾਨਨ੍ਤਿ ਪਞ੍ਚਹਿ ਵਿਮੁਤ੍ਤੀਹਿ ਵਿਮੁਤ੍ਤਮਾਨਸਾਨਂ.
੫-੬. ਪਤ੍ਥਨਾਸੁਤ੍ਤਦ੍ਵਯਵਣ੍ਣਨਾ
੧੩੫-੧੩੬. ਪਞ੍ਚਮੇ ਨੇਗਮਜਾਨਪਦਸ੍ਸਾਤਿ ਨਿਗਮਵਾਸਿਨੋ ਚ ਰਟ੍ਠਵਾਸਿਨੋ ਚ ਜਨਸ੍ਸ. ਹਤ੍ਥਿਸ੍ਮਿਨ੍ਤਿਆਦੀਹਿ ਹਤ੍ਥਿਅਸ੍ਸਰਥਥਰੁਧਨੁਲੇਖਮੁਦ੍ਦਾਗਣਨਾਦੀਨਿ ਸੋਲ਼ਸ ਮਹਾਸਿਪ੍ਪਾਨਿ ਦਸ੍ਸਿਤਾਨਿ. ਅਨਵਯੋਤਿ ਸਮਤ੍ਥੋ ਪਰਿਪੁਣ੍ਣੋ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਛਟ੍ਠੇ ਓਪਰਜ੍ਜਨ੍ਤਿ ਉਪਰਾਜਭਾਵਂ.
੭. ਅਪ੍ਪਂਸੁਪਤਿਸੁਤ੍ਤਵਣ੍ਣਨਾ
੧੩੭. ਸਤ੍ਤਮੇ ਪੁਰਿਸਾਧਿਪ੍ਪਾਯਾਤਿ ਅਸ੍ਸਦ੍ਧਮ੍ਮਵਸੇਨ ਪੁਰਿਸੇ ਉਪ੍ਪਨ੍ਨਾਧਿਪ੍ਪਾਯਾ ਪੁਰਿਸਜ੍ਝਾਸਯਾ. ਆਦਾਨਾਧਿਪ੍ਪਾਯੋਤਿ ਇਦਾਨਿ ਗਹੇਤੁਂ ਸਕ੍ਖਿਸ੍ਸਾਮਿ, ਇਦਾਨਿ ਸਕ੍ਖਿਸ੍ਸਾਮੀਤਿ ਏਵਂ ਗਹਣਾਧਿਪ੍ਪਾਯੋ. ਵਿਸਂਯੋਗਾਧਿਪ੍ਪਾਯੋਤਿ ਇਦਾਨਿ ਨਿਬ੍ਬਾਨਂ ਪਾਪੁਣਿਸ੍ਸਾਮਿ, ਇਦਾਨਿ ਪਾਪੁਣਿਸ੍ਸਾਮੀਤਿ ਏਵਂ ਨਿਬ੍ਬਾਨਜ੍ਝਾਸਯੋ.
੮. ਭਤ੍ਤਾਦਕਸੁਤ੍ਤਵਣ੍ਣਨਾ
੧੩੮. ਅਟ੍ਠਮੇ ਭਤ੍ਤਾਦਕੋਤਿ ਭਤ੍ਤਕ੍ਖਾਦਕੋ, ਬਹੁਭਤ੍ਤਭੁਞ੍ਜੋਤਿ ਅਤ੍ਥੋ. ਓਕਾਸਫਰਣੋਤਿ ਓਕਾਸਂ ਫਰਿਤ੍ਵਾ ਅਞ੍ਞੇਸਂ ਸਮ੍ਬਾਧਂ ਕਤ੍ਵਾ ਠਾਨੇਨ ਓਕਾਸਫਰਣੋ. ਤਤ੍ਥ ਤਤ੍ਥ ਲਣ੍ਡਂ ਸਾਰੇਤਿ ਪਾਤੇਤੀਤਿ ਲਣ੍ਡਸਾਰਣੋ. ਏਤ੍ਤਕਾ ਹਤ੍ਥੀਤਿ ਗਣਨਕਾਲੇ ਸਲਾਕਂ ਗਣ੍ਹਾਤੀਤਿ ਸਲਾਕਗ੍ਗਾਹੀ. ਨਿਸੀਦਨਸਯਨਵਸੇਨ ਮਞ੍ਚਪੀਠਂ ਮਦ੍ਦਤੀਤਿ ਮਞ੍ਚਪੀਠਮਦ੍ਦਨੋ. ਭਿਕ੍ਖੁਗਣਨਕਾਲੇ ਸਲਾਕਂ ਗਣ੍ਹਾਤੀਤਿ ਸਲਾਕਗ੍ਗਾਹੀ.
੯. ਅਕ੍ਖਮਸੁਤ੍ਤਵਣ੍ਣਨਾ
੧੩੯. ਨਵਮੇ ਹਤ੍ਥਿਕਾਯਨ੍ਤਿ ਹਤ੍ਥਿਘਟਂ. ਸੇਸੇਸੁਪਿ ਏਸੇਵ ਨਯੋ. ਸਙ੍ਗਾਮੇ ਅਵਚਰਨ੍ਤੀਤਿ ਸਙ੍ਗਾਮਾਵਚਰਾ. ਏਕਿਸ੍ਸਾ ਵਾ ਤਿਣੋਦਕਦਤ੍ਤਿਯਾ ਵਿਮਾਨਿਤੋਤਿ ਏਕਦਿਵਸਂ ਏਕੇਨ ਤਿਣੋਦਕਦਾਨੇਨ ਵਿਮਾਨਿਤੋ, ਏਕਦਿਵਸਮਤ੍ਤਂ ਅਲਦ੍ਧਤਿਣੋਦਕੋਤਿ ਅਤ੍ਥੋ. ਇਤੋ ਪਰਮ੍ਪਿ ਏਸੇਵ ਨਯੋ. ਨ ਸਕ੍ਕੋਤਿ ਚਿਤ੍ਤਂ ਸਮਾਦਹਿਤੁਨ੍ਤਿ ਆਰਮ੍ਮਣੇ ਚਿਤ੍ਤਂ ਸਮ੍ਮਾ ਠਪੇਤੁਂ ਨ ਸਕ੍ਕੋਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਇਮਸ੍ਮਿਂ ਪਨ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਨ੍ਤਿ ਵੇਦਿਤਬ੍ਬਂ.
੧੦. ਸੋਤਸੁਤ੍ਤਵਣ੍ਣਨਾ
੧੪੦. ਦਸਮੇ ਦੁਰੁਤ੍ਤਾਨਨ੍ਤਿ ਨ ਸੁਟ੍ਠੁ ਵੁਤ੍ਤਾਨਂ ਦੋਸਵਸੇਨ ਪਵਤ੍ਤਿਤਾਨਂ ਫਰੁਸਵਚਨਾਨਂ. ਦੁਰਾਗਤਾਨਨ੍ਤਿ ਦੁਕ੍ਖੁਪ੍ਪਾਦਨਾਕਾਰੇਨ ਸੋਤਦ੍ਵਾਰਂ ਆਗਤਾਨਂ. ਵਚਨਪਥਾਨਨ੍ਤਿ ਵਚਨਾਨਂ. ਦੁਕ੍ਖਾਨਨ੍ਤਿ ਦੁਕ੍ਖਮਾਨਂ. ਤਿਬ੍ਬਾਨਨ੍ਤਿ ਬਹਲਾਨਂ ਤਾਪਨਸਭਾਵਾਨਂ ਵਾ. ਖਰਾਨਨ੍ਤਿ ਫਰੁਸਾਨਂ. ਕਟੁਕਾਨਨ੍ਤਿ ਤਿਖਿਣਾਨਂ. ਅਸਾਤਾਨਨ੍ਤਿ ਅਮਧੁਰਾਨਂ. ਅਮਨਾਪਾਨਨ੍ਤਿ ਮਨਂ ਅਪ੍ਪਾਯਿਤੁਂ ਵਡ੍ਢੇਤੁਂ ਅਸਮਤ੍ਥਾਨਂ. ਪਾਣਹਰਾਨਨ੍ਤਿ ਜੀਵਿਤਹਰਾਨਂ. ਯਾ ਸਾ ਦਿਸਾਤਿ ਸਬ੍ਬਸਙ੍ਖਾਰਸਮਥਾਦਿਵਸੇਨ ਦਿਸ੍ਸਤਿ ਅਪਦਿਸ੍ਸਤੀਤਿ ਨਿਬ੍ਬਾਨਂ ਦਿਸਾਤਿ ਵੇਦਿਤਬ੍ਬਂ. ਯਸ੍ਮਾ ਪਨ ਤਂ ਆਗਮ੍ਮ ਸਬ੍ਬੇ ਸਙ੍ਖਾਰਾ ਸਮਥਂ ਗਚ੍ਛਨ੍ਤਿ, ਤਸ੍ਮਾ ਸਬ੍ਬਸਙ੍ਖਾਰਸਮਥੋਤਿ ਵੁਤ੍ਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਇਮਸ੍ਮਿਂ ਪਨ ਸੁਤ੍ਤੇ ਸੀਲਸਮਾਧਿਪਞ੍ਞਾ ਮਿਸ੍ਸਿਕਾ ਕਥਿਤਾਤਿ.
ਰਾਜਵਗ੍ਗੋ ਚਤੁਤ੍ਥੋ.
(੧੫) ੫. ਤਿਕਣ੍ਡਕੀਵਗ੍ਗੋ
੧. ਅਵਜਾਨਾਤਿਸੁਤ੍ਤਵਣ੍ਣਨਾ
੧੪੧. ਪਞ੍ਚਮਸ੍ਸ ਪਠਮੇ ਸਂਵਾਸੇਨਾਤਿ ਏਕਤੋਵਾਸੇਨ. ਆਦੇਯ੍ਯਮੁਖੋਤਿ ਆਦਿਯਨਮੁਖੋ, ਗਹਣਮੁਖੋਤਿ ਅਤ੍ਥੋ. ਤਮੇਨਂ ਦਤ੍ਵਾ ਅਵਜਾਨਾਤੀਤਿ ‘‘ਅਯਂ ਦਿਨ੍ਨਂ ਪਟਿਗ੍ਗਹੇਤੁਮੇਵ ਜਾਨਾਤੀ’’ਤਿ ਏਵਂ ਅਵਮਞ੍ਞਤਿ. ਤਮੇਨਂ ਸਂਵਾਸੇਨ ਅਵਜਾਨਾਤੀਤਿ ਅਪ੍ਪਮਤ੍ਤਕੇ ਕਿਸ੍ਮਿਞ੍ਚਿਦੇਵ ਕੁਜ੍ਝਿਤ੍ਵਾ ‘‘ਜਾਨਾਮਹਂ ਤਯਾ ਕਤਕਮ੍ਮਂ, ਏਤ੍ਤਕਂ ਅਦ੍ਧਾਨਂ ਅਹਂ ਕਿਂ ਕਰੋਨ੍ਤੋ ਵਸਿਂ, ਨਨੁ ਤੁਯ੍ਹਮੇਵ ਕਤਾਕਤਂ ਵੀਮਂਸਨ੍ਤੋ’’ਤਿਆਦੀਨਿ ਵਤ੍ਤਾ ਹੋਤਿ. ਅਥ ਇਤਰੋ ‘‘ਅਦ੍ਧਾ ਕੋਚਿ ਮਯ੍ਹਂ ਦੋਸੋ ਭਵਿਸ੍ਸਤੀ’’ਤਿ ਕਿਞ੍ਚਿ ਪਟਿਪ੍ਫਰਿਤੁਂ ਨ ਸਕ੍ਕੋਤਿ. ਤਂ ਖਿਪ੍ਪਞ੍ਞੇਵ ਅਧਿਮੁਚ੍ਚਿਤਾ ਹੋਤੀਤਿ ਤਂ ਵਣ੍ਣਂ ਵਾ ਅਵਣ੍ਣਂ ਵਾ ਸੀਘਮੇਵ ਸਦ੍ਦਹਤਿ. ਸਦ੍ਦਹਨਟ੍ਠੇਨ ਹਿ ਆਦਾਨੇਨ ਏਸ ਆਦਿਯਨਮੁਖੋਤਿ ਵੁਤ੍ਤੋ. ਆਧੇਯ੍ਯਮੁਖੋਤਿ ਪਾਲ਼ਿਯਾ ਪਨ ਠਪਿਤਮੁਖੋਤਿ ਅਤ੍ਥੋ. ਮਗ੍ਗੇ ਖਟਆਵਾਟੋ ਵਿਯ ਆਗਤਾਗਤਂ ਉਦਕਂ ਵਣ੍ਣਂ ਵਾ ਅਵਣ੍ਣਂ ਵਾ ਸਦ੍ਦਹਨਵਸੇਨ ਸਮ੍ਪਟਿਚ੍ਛਿਤੁਂ ਠਪਿਤਮੁਖੋਤਿ ਵੁਤ੍ਤਂ ਹੋਤਿ.
ਇਤ੍ਤਰਸਦ੍ਧੋਤਿ ਪਰਿਤ੍ਤਕਸਦ੍ਧੋ. ਕੁਸਲਾਕੁਸਲੇ ਧਮ੍ਮੇ ਨ ਜਾਨਾਤੀਤਿਆਦੀਸੁ ਕੁਸਲੇ ਧਮ੍ਮੇ ‘‘ਇਮੇ ਕੁਸਲਾ’’ਤਿ ਨ ਜਾਨਾਤਿ, ਅਕੁਸਲੇ ਧਮ੍ਮੇ ‘‘ਇਮੇ ਅਕੁਸਲਾ’’ਤਿ ਨ ਜਾਨਾਤਿ. ਤਥਾ ਸਾਵਜ੍ਜੇ ਸਦੋਸਧਮ੍ਮੇ ‘‘ਇਮੇ ਸਾਵਜ੍ਜਾ’’ਤਿ, ਅਨਵਜ੍ਜੇ ਚ ਨਿਦ੍ਦੋਸਧਮ੍ਮੇ ‘‘ਇਮੇ ਅਨਵਜ੍ਜਾ’’ਤਿ, ਹੀਨੇ ਹੀਨਾਤਿ, ਪਣੀਤੇ ਪਣੀਤਾਤਿ. ਕਣ੍ਹਸੁਕ੍ਕਸਪ੍ਪਟਿਭਾਗੇਤਿ ‘‘ਇਮੇ ਕਣ੍ਹਾ ਸੁਕ੍ਕੇ ਪਟਿਬਾਹੇਤ੍ਵਾ ਠਿਤਤ੍ਤਾ ਸਪ੍ਪਟਿਭਾਗਾ ਨਾਮ, ਇਮੇ ਚ ਸੁਕ੍ਕਾ ਕਣ੍ਹੇ ਪਟਿਬਾਹਿਤ੍ਵਾ ਠਿਤਤ੍ਤਾ ਸਪ੍ਪਟਿਭਾਗਾ’’ਤਿ ਨ ਜਾਨਾਤਿ.
੨. ਆਰਭਤਿਸੁਤ੍ਤਵਣ੍ਣਨਾ
੧੪੨. ਦੁਤਿਯੇ ਆਰਭਤਿ ਚ ਵਿਪ੍ਪਟਿਸਾਰੀ ਚ ਹੋਤੀਤਿ ਆਪਤ੍ਤਿਵੀਤਿਕ੍ਕਮਨਵਸੇਨ ਆਰਭਤਿ ਚੇਵ, ਤਪ੍ਪਚ੍ਚਯਾ ਚ ਵਿਪ੍ਪਟਿਸਾਰੀ ਹੋਤਿ. ਚੇਤੋਵਿਮੁਤ੍ਤਿਂ ਪਞ੍ਞਾਵਿਮੁਤ੍ਤਿਨ੍ਤਿ ਅਰਹਤ੍ਤਸਮਾਧਿਞ੍ਚੇਵ ਅਰਹਤ੍ਤਫਲਞਾਣਞ੍ਚ. ਨਪ੍ਪਜਾਨਾਤੀਤਿ ਅਨਧਿਗਤਤ੍ਤਾ ਨ ਜਾਨਾਤਿ. ਆਰਭਤਿ ਨ ਵਿਪ੍ਪਟਿਸਾਰੀ ਹੋਤੀਤਿ ਆਪਤ੍ਤਿਂ ਆਪਜ੍ਜਤਿ, ਵੁਟ੍ਠਿਤਤ੍ਤਾ ਪਨ ਨ ਵਿਪ੍ਪਟਿਸਾਰੀ ਹੋਤਿ. ਨਾਰਭਤਿ ਵਿਪ੍ਪਟਿਸਾਰੀ ਹੋਤੀਤਿ ਸਕਿਂ ਆਪਤ੍ਤਿਂ ਆਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ਪਚ੍ਛਾ ਕਿਞ੍ਚਾਪਿ ਨਾਪਜ੍ਜਤਿ, ਵਿਪ੍ਪਟਿਸਾਰਂ ਪਨ ਵਿਨੋਦੇਤੁਂ ਨ ਸਕ੍ਕੋਤਿ. ਨਾਰਭਤਿ ਨ ਵਿਪ੍ਪਟਿਸਾਰੀ ਹੋਤੀਤਿ ਨ ਚੇਵ ਆਪਤ੍ਤਿਂ ਆਪਜ੍ਜਤਿ, ਨ ਚ ਵਿਪ੍ਪਟਿਸਾਰੀ ਹੋਤਿ. ਤਞ੍ਚ ਚੇਤੋਵਿਮੁਤ੍ਤਿਂ…ਪੇ… ਨਿਰੁਜ੍ਝਨ੍ਤੀਤਿ ਅਰਹਤ੍ਤਂ ਪਨ ਅਪ੍ਪਤ੍ਤੋ ਹੋਤਿ. ਪਞ੍ਚਮਨਯੇਨ ਖੀਣਾਸਵੋ ਕਥਿਤੋ.
ਆਰਮ੍ਭਜਾਤਿ ਆਪਤ੍ਤਿਵੀਤਿਕ੍ਕਮਸਮ੍ਭਵਾ. ਵਿਪ੍ਪਟਿਸਾਰਜਾਤਿ ਵਿਪ੍ਪਟਿਸਾਰਤੋ ਜਾਤਾ. ਪਵਡ੍ਢਨ੍ਤੀਤਿ ਪੁਨਪ੍ਪੁਨਂ ਉਪ੍ਪਜ੍ਜਨੇਨ ਵਡ੍ਢਨ੍ਤਿ. ਆਰਮ੍ਭਜੇ ਆਸਵੇ ਪਹਾਯਾਤਿ ਵੀਤਿਕ੍ਕਮਸਮ੍ਭਵੇ ਆਸਵੇ ਆਪਤ੍ਤਿਦੇਸਨਾਯ ਵਾ ਆਪਤ੍ਤਿਵੁਟ੍ਠਾਨੇਨ ਵਾ ਪਜਹਿਤ੍ਵਾ. ਪਟਿਵਿਨੋਦੇਤ੍ਵਾਤਿ ਸੁਦ੍ਧਨ੍ਤੇ ਠਿਤਭਾਵਪਚ੍ਚਵੇਕ੍ਖਣੇਨ ਨੀਹਰਿਤ੍ਵਾ. ਚਿਤ੍ਤਂ ਪਞ੍ਞਞ੍ਚ ਭਾਵੇਤੂਤਿ ਵਿਪਸ੍ਸਨਾਚਿਤ੍ਤਞ੍ਚ ਤਂਸਮ੍ਪਯੁਤ੍ਤਂ ਪਞ੍ਞਞ੍ਚ ਭਾਵੇਤੁ. ਸੇਸਂ ਇਮਿਨਾ ਉਪਾਯੇਨੇਵ ਵੇਦਿਤਬ੍ਬਨ੍ਤਿ.
੩. ਸਾਰਨ੍ਦਦਸੁਤ੍ਤਵਣ੍ਣਨਾ
੧੪੩. ਤਤਿਯੇ ਕਾਮਾਧਿਮੁਤ੍ਤਾਨਨ੍ਤਿ ਵਤ੍ਥੁਕਾਮਕਿਲੇਸਕਾਮੇਸੁ ਅਧਿਮੁਤ੍ਤਾਨਂ. ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋਤਿ ਨਵਲੋਕੁਤ੍ਤਰਧਮ੍ਮਤ੍ਥਾਯ ਸਹਸੀਲਕਂ ਪੁਬ੍ਬਭਾਗਪ੍ਪਟਿਪਦਂ ਪਟਿਪਨ੍ਨੋ ਪਟਿਪਤ੍ਤਿਪੂਰਕੋ ਪੁਗ੍ਗਲੋ ਦੁਲ੍ਲਭੋ ਲੋਕਸ੍ਮਿਂ.
੪. ਤਿਕਣ੍ਡਕੀਸੁਤ੍ਤਵਣ੍ਣਨਾ
੧੪੪. ਚਤੁਤ੍ਥੇ ਅਪ੍ਪਟਿਕੂਲੇਤਿ ਅਪ੍ਪਟਿਕੂਲਾਰਮ੍ਮਣੇ. ਪਟਿਕੂਲਸਞ੍ਞੀਤਿ ਪਟਿਕੂਲਨ੍ਤਿ ਏਵਂਸਞ੍ਞੀ. ਏਸ ਨਯੋ ਸਬ੍ਬਤ੍ਥ. ਕਥਂ ਪਨਾਯਂ ਏਵਂ ਵਿਹਰਤੀਤਿ? ਇਟ੍ਠਸ੍ਮਿਂ ਵਤ੍ਥੁਸ੍ਮਿਂ ਪਨ ਅਸੁਭਾਯ ਵਾ ਫਰਤਿ, ਅਨਿਚ੍ਚਤੋ ਵਾ ਉਪਸਂਹਰਤਿ. ਏਵਂ ਤਾਵ ਅਪ੍ਪਟਿਕੂਲੇ ਪਟਿਕੂਲਸਞ੍ਞੀ ਵਿਹਰਤਿ. ਅਨਿਟ੍ਠਸ੍ਮਿਂ ਵਤ੍ਥੁਸ੍ਮਿਂ ਮੇਤ੍ਤਾਯ ਵਾ ਫਰਤਿ, ਧਾਤੁਤੋ ਵਾ ਉਪਸਂਹਰਤਿ. ਏਵਂ ਪਟਿਕੂਲੇ ਅਪ੍ਪਟਿਕੂਲਸਞ੍ਞੀ ਵਿਹਰਤਿ. ਉਭਯਸ੍ਮਿਂ ਪਨ ਪੁਰਿਮਨਯਸ੍ਸ ਚ ਪਚ੍ਛਿਮਨਯਸ੍ਸ ਚ ਵਸੇਨ ਤਤਿਯਚਤੁਤ੍ਥਵਾਰਾ ਵੁਤ੍ਤਾ, ਛਲ਼ਙ੍ਗੁਪੇਕ੍ਖਾਵਸੇਨ ਪਞ੍ਚਮੋ. ਛਲ਼ਙ੍ਗੁਪੇਕ੍ਖਾ ਚੇਸਾ ਖੀਣਾਸਵਸ੍ਸ ਉਪੇਕ੍ਖਾਸਦਿਸਾ, ਨ ਪਨ ਖੀਣਾਸਵੁਪੇਕ੍ਖਾ. ਤਤ੍ਥ ਉਪੇਕ੍ਖਕੋ ਵਿਹਰੇਯ੍ਯਾਤਿ ਮਜ੍ਝਤ੍ਤਭਾਵੇ ਠਿਤੋ ਵਿਹਰੇਯ੍ਯ. ਕ੍ਵਚਨੀਤਿ ਕਿਸ੍ਮਿਞ੍ਚਿ ਆਰਮ੍ਮਣੇ. ਕਤ੍ਥਚੀਤਿ ਕਿਸ੍ਮਿਞ੍ਚਿ ਪਦੇਸੇ. ਕਿਞ੍ਚਨਤਿ ਕੋਚਿ ਅਪ੍ਪਮਤ੍ਤਕੋਪਿ. ਇਤਿ ਇਮਸ੍ਮਿਂ ਸੁਤ੍ਤੇ ਪਞ੍ਚਸੁ ਠਾਨੇਸੁ ਵਿਪਸ੍ਸਨਾਵ ਕਥਿਤਾ. ਤਂ ਆਰਦ੍ਧਵਿਪਸ੍ਸਕੋ ਭਿਕ੍ਖੁ ਕਾਤੁਂ ਸਕ੍ਕੋਤਿ, ਞਾਣਵਾ ਪਞ੍ਞੁਤ੍ਤਰੋ ਬਹੁਸ੍ਸੁਤਸਮਣੋਪਿ ਕਾਤੁਂ ਸਕ੍ਕੋਤਿ. ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਨੋ ਕਾਤੁਂ ਸਕ੍ਕੋਨ੍ਤਿਯੇਵ, ਖੀਣਾਸਵੇ ਵਤ੍ਤਬ੍ਬਮੇਵ ਨਤ੍ਥੀਤਿ. ਪਞ੍ਚਮਂ ਉਤ੍ਤਾਨਮੇਵ.
੬. ਮਿਤ੍ਤਸੁਤ੍ਤਵਣ੍ਣਨਾ
੧੪੬. ਛਟ੍ਠੇ ਕਮ੍ਮਨ੍ਤਂ ਕਾਰੇਤੀਤਿ ਖੇਤ੍ਤਾਦਿਕਮ੍ਮਨ੍ਤਂ ਕਾਰੇਤਿ. ਅਧਿਕਰਣਂ ਆਦਿਯਤੀਤਿ ਚਤ੍ਤਾਰਿ ਅਧਿਕਰਣਾਨਿ ਆਦਿਯਤਿ. ਪਾਮੋਕ੍ਖੇਸੁ ਭਿਕ੍ਖੂਸੂਤਿ ਦਿਸਾਪਾਮੋਕ੍ਖੇਸੁ ਭਿਕ੍ਖੂਸੁ. ਪਟਿਵਿਰੁਦ੍ਧੋ ਹੋਤੀਤਿ ਪਚ੍ਚਨੀਕਗ੍ਗਾਹਿਤਾਯ ਵਿਰੁਦ੍ਧੋ ਹੋਤਿ. ਅਨਵਤ੍ਥਚਾਰਿਕਨ੍ਤਿ ਅਨਵਤ੍ਥਾਨਚਾਰਿਕਂ.
੭. ਅਸਪ੍ਪੁਰਿਸਦਾਨਸੁਤ੍ਤਵਣ੍ਣਨਾ
੧੪੭. ਸਤ੍ਤਮੇ ਅਸਕ੍ਕਚ੍ਚਂ ਦੇਤੀਤਿ ਨ ਸਕ੍ਕਰਿਤ੍ਵਾ ਸੁਚਿਂ ਕਤ੍ਵਾ ਦੇਤਿ. ਅਚਿਤ੍ਤੀਕਤ੍ਵਾ ਦੇਤੀਤਿ ਅਚਿਤ੍ਤੀਕਾਰੇਨ ਅਗਾਰਵਵਸੇਨ ਦੇਤਿ. ਅਪਵਿਦ੍ਧਂ ਦੇਤੀਤਿ ਨ ਨਿਰਨ੍ਤਰਂ ਦੇਤਿ, ਅਥ ਵਾ ਛਡ੍ਡੇਤੁਕਾਮੋ ਵਿਯ ਦੇਤਿ. ਅਨਾਗਮਨਦਿਟ੍ਠਿਕੋ ਦੇਤੀਤਿ ਕਤਸ੍ਸ ਨਾਮ ਫਲਂ ਆਗਮਿਸ੍ਸਤੀਤਿ ਨ ਏਵਂ ਆਗਮਨਦਿਟ੍ਠਿਂ ਨ ਉਪ੍ਪਾਦੇਤ੍ਵਾ ਦੇਤਿ.
ਸੁਕ੍ਕਪਕ੍ਖੇ ਚਿਤ੍ਤੀਕਤ੍ਵਾ ਦੇਤੀਤਿ ਦੇਯ੍ਯਧਮ੍ਮੇ ਚ ਦਕ੍ਖਿਣੇਯ੍ਯੇਸੁ ਚ ਚਿਤ੍ਤੀਕਾਰਂ ਉਪਟ੍ਠਪੇਤ੍ਵਾ ਦੇਤਿ. ਤਤ੍ਥ ਦੇਯ੍ਯਧਮ੍ਮਂ ਪਣੀਤਂ ਓਜਵਨ੍ਤਂ ਕਤ੍ਵਾ ਦੇਨ੍ਤੋ ਦੇਯ੍ਯਧਮ੍ਮੇ ਚਿਤ੍ਤੀਕਾਰਂ ਉਪਟ੍ਠਪੇਤਿ ਨਾਮ. ਪੁਗ੍ਗਲਂ ਵਿਚਿਨਿਤ੍ਵਾ ਦੇਨ੍ਤੋ ਦਕ੍ਖਿਣੇਯ੍ਯੇਸੁ ਚਿਤ੍ਤੀਕਾਰਂ ਉਪਟ੍ਠਪੇਤਿ ਨਾਮ. ਸਹਤ੍ਥਾ ਦੇਤੀਤਿ ਆਣਤ੍ਤਿਯਾ ਪਰਹਤ੍ਥੇਨ ਅਦਤ੍ਵਾ ‘‘ਅਨਮਤਗ੍ਗੇ ਸਂਸਾਰੇ ਵਿਚਰਨ੍ਤੇਨ ਮੇ ਹਤ੍ਥਪਾਦਾਨਂ ਅਲਦ੍ਧਕਾਲਸ੍ਸ ਪਮਾਣਂ ਨਾਮ ਨਤ੍ਥਿ, ਵਟ੍ਟਮੋਕ੍ਖਂ ਭਵਨਿਸ੍ਸਰਣਂ ਕਰਿਸ੍ਸਾਮੀ’’ਤਿ ਸਹਤ੍ਥੇਨੇਵ ਦੇਤਿ. ਆਗਮਨਦਿਟ੍ਠਿਕੋਤਿ ‘‘ਅਨਾਗਤਭਵਸ੍ਸ ਪਚ੍ਚਯੋ ਭਵਿਸ੍ਸਤੀ’’ਤਿ ਕਮ੍ਮਞ੍ਚ ਵਿਪਾਕਞ੍ਚ ਸਦ੍ਦਹਿਤ੍ਵਾ ਦੇਤੀਤਿ.
੮. ਸਪ੍ਪੁਰਿਸਦਾਨਸੁਤ੍ਤਵਣ੍ਣਨਾ
੧੪੮. ਅਟ੍ਠਮੇ ਸਦ੍ਧਾਯਾਤਿ ਦਾਨਞ੍ਚ ਦਾਨਫਲਞ੍ਚ ਸਦ੍ਦਹਿਤ੍ਵਾ. ਕਾਲੇਨਾਤਿ ਯੁਤ੍ਤਪ੍ਪਤ੍ਤਕਾਲੇਨ. ਅਨਗ੍ਗਹਿਤਚਿਤ੍ਤੋਤਿ ਅਗ੍ਗਹਿਤਚਿਤ੍ਤੋ ਮੁਤ੍ਤਚਾਗੋ ਹੁਤ੍ਵਾ. ਅਨੁਪਹਚ੍ਚਾਤਿ ਅਨੁਪਘਾਤੇਤ੍ਵਾ ਗੁਣੇ ਅਮਕ੍ਖੇਤ੍ਵਾ. ਕਾਲਾਗਤਾ ਚਸ੍ਸ ਅਤ੍ਥਾ ਪਚੁਰਾ ਹੋਨ੍ਤੀਤਿ ਅਤ੍ਥਾ ਆਗਚ੍ਛਮਾਨਾ ਵਯੋਵੁਡ੍ਢਕਾਲੇ ਅਨਾਗਨ੍ਤ੍ਵਾ ਯੁਤ੍ਤਪ੍ਪਤ੍ਤਕਾਲੇ ਪਠਮਵਯਸ੍ਮਿਂਯੇਵ ਆਗਚ੍ਛਨ੍ਤਿ ਚੇਵ ਬਹੂ ਚ ਹੋਨ੍ਤਿ.
੯. ਪਠਮਸਮਯਵਿਮੁਤ੍ਤਸੁਤ੍ਤਵਣ੍ਣਨਾ
੧੪੯. ਨਵਮੇ ਸਮਯਵਿਮੁਤ੍ਤਸ੍ਸਾਤਿ ਅਪ੍ਪਿਤਪ੍ਪਿਤਕ੍ਖਣੇਯੇਵ ਵਿਕ੍ਖਮ੍ਭਿਤੇਹਿ ਕਿਲੇਸੇਹਿ ਵਿਮੁਤ੍ਤਤ੍ਤਾ ਸਮਯਵਿਮੁਤ੍ਤਿਸਙ੍ਖਾਤਾਯ ਲੋਕਿਯਵਿਮੁਤ੍ਤਿਯਾ ਵਿਮੁਤ੍ਤਚਿਤ੍ਤਸ੍ਸ. ਦਸਮਂ ਉਤ੍ਤਾਨਤ੍ਥਮੇਵ.
ਤਿਕਣ੍ਡਕੀਵਗ੍ਗੋ ਪਞ੍ਚਮੋ.
ਤਤਿਯਪਣ੍ਣਾਸਕਂ ਨਿਟ੍ਠਿਤਂ.