੪. ਚਤੁਤ੍ਥਪਣ੍ਣਾਸਕਂ
(੧੬) ੧. ਸਦ੍ਧਮ੍ਮਵਗ੍ਗੋ
੧. ਪਠਮਸਮ੍ਮਤ੍ਤਨਿਯਾਮਸੁਤ੍ਤਵਣ੍ਣਨਾ
੧੫੧. ਚਤੁਤ੍ਥਸ੍ਸ ਪਠਮੇ ਅਭਬ੍ਬੋ ਨਿਯਾਮਂ ਓਕ੍ਕਮਿਤੁਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਨ੍ਤਿ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਭੂਤਂ ਮਗ੍ਗਨਿਯਾਮਂ ਓਕ੍ਕਮਿਤੁਂ ਅਭਬ੍ਬੋ ਅਭਾਜਨਂ. ਕਥਂ ਪਰਿਭੋਤੀਤਿਆਦੀਸੁ ‘‘ਕਿਂ ਕਥਾ ਨਾਮ ਏਸਾ’’ਤਿ ਵਦਨ੍ਤੋ ਕਥਂ ਪਰਿਭੋਤਿ ਨਾਮ. ‘‘ਕਿਂ ਨਾਮੇਸ ਕਥੇਤਿ, ਕਿਂ ਅਯਂ ਜਾਨਾਤੀ’’ਤਿ ਵਦਨ੍ਤੋ ਕਥਿਕਂ ਪਰਿਭੋਤਿ ਨਾਮ. ‘‘ਮਯਂ ਕਿਂ ਜਾਨਾਮ, ਕੁਤੋ ਅਮ੍ਹਾਕਂ ਏਤਂ ਸੋਤੁਂ ਬਲ’’ਨ੍ਤਿ ਵਦਨ੍ਤੋ ਅਤ੍ਤਾਨਂ ਪਰਿਭੋਤਿ ਨਾਮ. ਵਿਪਰਿਯਾਯੇਨ ਸੁਕ੍ਕਪਕ੍ਖੋ ਵੇਦਿਤਬ੍ਬੋ.
੨. ਦੁਤਿਯਸਮ੍ਮਤ੍ਤਨਿਯਾਮਸੁਤ੍ਤਵਣ੍ਣਨਾ
੧੫੨. ਦੁਤਿਯੇ ਅਨਞ੍ਞਾਤੇ ਅਞ੍ਞਾਤਮਾਨੀਤਿ ਅਵਿਞ੍ਞਾਤਸ੍ਮਿਂਯੇਵ ‘‘ਵਿਞ੍ਞਾਤਮਿਦਂ ਮਯਾ’’ਤਿ ਏਵਂਮਾਨੀ.
੩. ਤਤਿਯਸਮ੍ਮਤ੍ਤਨਿਯਾਮਸੁਤ੍ਤਵਣ੍ਣਨਾ
੧੫੩. ਤਤਿਯੇ ਮਕ੍ਖੀ ਧਮ੍ਮਂ ਸੁਣਾਤੀਤਿ ਮਕ੍ਖੀ ਹੁਤ੍ਵਾ ਗੁਣਮਕ੍ਖਨਚਿਤ੍ਤੇਨ ਧਮ੍ਮਂ ਸੁਣਾਤਿ. ਉਪਾਰਮ੍ਭਚਿਤ੍ਤੋਤਿ ਨਿਗ੍ਗਹਾਰੋਪਨਚਿਤ੍ਤੋ. ਰਨ੍ਧਗਵੇਸੀਤਿ ਗੁਣਰਨ੍ਧਂ ਗੁਣਚ੍ਛਿਦ੍ਦਂ ਗਵੇਸਨ੍ਤੋ.
੪. ਪਠਮਸਦ੍ਧਮ੍ਮਸਮ੍ਮੋਸਸੁਤ੍ਤਵਣ੍ਣਨਾ
੧੫੪. ਚਤੁਤ੍ਥੇ ਨ ਸਕ੍ਕਚ੍ਚਂ ਧਮ੍ਮਂ ਸੁਣਨ੍ਤੀਤਿ ਓਹਿਤਸੋਤਾ ਸੁਕਤਕਾਰਿਨੋ ਹੁਤ੍ਵਾ ਨ ਸੁਣਨ੍ਤਿ. ਨ ਪਰਿਯਾਪੁਣਨ੍ਤੀਤਿ ਯਥਾਸੁਤਂ ਧਮ੍ਮਂ ਵਲ਼ਞ੍ਜਨ੍ਤਾਪਿ ਸਕ੍ਕਚ੍ਚਂ ਨ ਵਲ਼ਞ੍ਜੇਨ੍ਤਿ. ਪਞ੍ਚਮਂ ਉਤ੍ਤਾਨਮੇਵ.
੬. ਤਤਿਯਸਦ੍ਧਮ੍ਮਸਮ੍ਮੋਸਸੁਤ੍ਤਵਣ੍ਣਨਾ
੧੫੬. ਛਟ੍ਠੇ ਅਪ੍ਪਟਿਸਰਣੋਤਿ ਅਪ੍ਪਤਿਟ੍ਠੋ. ਆਚਰਿਯਾ ਹਿ ਸੁਤ੍ਤਨ੍ਤਸ੍ਸ ਪਟਿਸਰਣਂ ਨਾਮ, ਤੇਸਂ ਅਭਾਵਾ ਅਪ੍ਪਟਿਸਰਣੋ ਹੋਤਿ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯਮੇਵ.
੭. ਦੁਕ੍ਕਥਾਸੁਤ੍ਤਵਣ੍ਣਨਾ
੧੫੭. ਸਤ੍ਤਮੇ ਪੁਗ੍ਗਲਂ ਉਪਨਿਧਾਯਾਤਿ ਤਂ ਤਂ ਪੁਗ੍ਗਲਂ ਉਪਨਿਕ੍ਖਿਪਿਤ੍ਵਾ, ਸਕ੍ਖਿਂ ਕਤ੍ਵਾਤਿ ਅਤ੍ਥੋ. ਕਚ੍ਛਮਾਨਾਯਾਤਿ ਕਥਿਯਮਾਨਾਯ. ਸੇਸਮੇਤ੍ਥ ਅਟ੍ਠਮਞ੍ਚ ਉਤ੍ਤਾਨਤ੍ਥਮੇਵਾਤਿ.
੯. ਉਦਾਯੀਸੁਤ੍ਤਵਣ੍ਣਨਾ
੧੫੯. ਨਵਮੇ ਅਨੁਪੁਬ੍ਬਿਂ ਕਥਂ ਕਥੇਸ੍ਸਾਮੀਤਿ ਦਾਨਾਨਨ੍ਤਰਂ ਸੀਲਂ, ਸੀਲਾਨਨ੍ਤਰਂ ਸਗ੍ਗਨ੍ਤਿ ਏਵਂ ਦੇਸਨਾਨੁਪੁਬ੍ਬਿਂ ਕਥਂ ਵਾ, ਯਂ ਯਂ ਸੁਤ੍ਤਪਦਂ ਵਾ ਗਾਥਾਪਦਂ ਵਾ ਨਿਕ੍ਖਿਤ੍ਤਂ ਹੋਤਿ, ਤਸ੍ਸ ਤਸ੍ਸ ਅਨੁਰੂਪਕਥਂ ਕਥੇਸ੍ਸਾਮੀਤਿ ਚਿਤ੍ਤਂ ਉਪਟ੍ਠਪੇਤ੍ਵਾ ਪਰੇਸਂ ਧਮ੍ਮੋ ਦੇਸੇਤਬ੍ਬੋ. ਪਰਿਯਾਯਦਸ੍ਸਾਵੀਤਿ ਤਸ੍ਸ ਤਸ੍ਸ ਅਤ੍ਥਸ੍ਸ ਤਂ ਤਂ ਕਾਰਣਂ ਦਸ੍ਸੇਨ੍ਤੋ. ਕਾਰਣਞ੍ਹਿ ਇਧ ਪਰਿਯਾਯੋਤਿ ਵੁਤ੍ਤਂ. ਅਨੁਦ੍ਦਯਤਂ ਪਟਿਚ੍ਚਾਤਿ ‘‘ਮਹਾਸਮ੍ਬਾਧਪ੍ਪਤ੍ਤੇ ਸਤ੍ਤੇ ਸਮ੍ਬਾਧਤੋ ਮੋਚੇਸ੍ਸਾਮੀ’’ਤਿ ਅਨੁਕਮ੍ਪਂ ਆਗਮ੍ਮ. ਨ ਆਮਿਸਨ੍ਤਰੋਤਿ ਨ ਆਮਿਸਹੇਤੁਕੋ, ਅਤ੍ਤਨੋ ਚਤੁਪਚ੍ਚਯਲਾਭਂ ਅਨਾਸੀਸਨ੍ਤੋਤਿ ਅਤ੍ਥੋ. ਅਤ੍ਤਾਨਞ੍ਚ ਪਰਞ੍ਚ ਅਨੁਪਹਚ੍ਚਾਤਿ ਅਤ੍ਤੁਕ੍ਕਂਸਨਪਰਵਮ੍ਭਨਾਦਿਵਸੇਨ ਅਤ੍ਤਾਨਞ੍ਚ ਪਰਞ੍ਚ ਗੁਣੁਪਘਾਤੇਨ ਅਨੁਪਹਨ੍ਤ੍ਵਾ.
੧੦. ਦੁਪ੍ਪਟਿਵਿਨੋਦਯਸੁਤ੍ਤਵਣ੍ਣਨਾ
੧੬੦. ਦਸਮੇ ਦੁਪ੍ਪਟਿਵਿਨੋਦਯਾਤਿ ਯਾਨਿ ਹਸ੍ਸਾਦੀਨਿ ਕਿਚ੍ਚਾਨਿ ਨਿਪ੍ਫਾਦੇਤੁਂ ਠਾਨਾਨਿ ਉਪ੍ਪਨ੍ਨਾਨਿ ਹੋਨ੍ਤਿ, ਤੇਸੁ ਮਤ੍ਥਕਂ ਅਸਮ੍ਪਤ੍ਤੇਸੁ ਅਨ੍ਤਰਾਯੇਵ ਦੁਨ੍ਨੀਹਾਰਾ ਦੁਵਿਕ੍ਖਮ੍ਭਯਾ ਹੋਨ੍ਤਿ. ਪਟਿਭਾਨਨ੍ਤਿ ਕਥੇਤੁਕਾਮਤਾ ਵੁਚ੍ਚਤਿ. ਇਮਾਨਿ ਪਞ੍ਚ ਦੁਪ੍ਪਟਿਵਿਨੋਦਯਾਨਿ, ਨ ਸੁਪ੍ਪਟਿਵਿਨੋਦਯਾਨਿ. ਉਪਾਯੇਨ ਪਨ ਕਾਰਣੇਨ ਅਨੁਰੂਪਾਹਿ ਪਚ੍ਚਵੇਕ੍ਖਣਅਨੁਸਾਸਨਾਦੀਹਿ ਸਕ੍ਕਾ ਪਟਿਵਿਨੋਦੇਤੁਨ੍ਤਿ.
ਸਦ੍ਧਮ੍ਮਵਗ੍ਗੋ ਪਠਮੋ.
(੧੭) ੨. ਆਘਾਤਵਗ੍ਗੋ
੧. ਪਠਮਆਘਾਤਪਟਿਵਿਨਯਸੁਤ੍ਤਵਣ੍ਣਨਾ
੧੬੧. ਦੁਤਿਯਸ੍ਸ ਪਠਮੇ ਆਘਾਤਂ ਪਟਿਵਿਨੇਨ੍ਤਿ ਵੂਪਸਮੇਨ੍ਤੀਤਿ ਆਘਾਤਪਟਿਵਿਨਯਾ. ਯਤ੍ਥ ਭਿਕ੍ਖੁਨੋ ਉਪ੍ਪਨ੍ਨੋ ਆਘਾਤੋ ਸਬ੍ਬਸੋ ਪਟਿਵਿਨੇਤਬ੍ਬੋਤਿ ਯਤ੍ਥ ਆਰਮ੍ਮਣੇ ਭਿਕ੍ਖੁਨੋ ਆਘਾਤੋ ਉਪ੍ਪਨ੍ਨੋ ਹੋਤਿ, ਤਤ੍ਥ ਸੋ ਸਬ੍ਬੋ ਇਮੇਹਿ ਪਞ੍ਚਹਿ ਪਟਿਵਿਨੋਦੇਤਬ੍ਬੋਤਿ ਅਤ੍ਥੋ. ਮੇਤ੍ਤਾ ਤਸ੍ਮਿਂ ਪੁਗ੍ਗਲੇ ਭਾਵੇਤਬ੍ਬਾਤਿ ਤਿਕਚਤੁਕ੍ਕਜ੍ਝਾਨਵਸੇਨ ਮੇਤ੍ਤਾ ਭਾਵੇਤਬ੍ਬਾ. ਕਰੁਣਾਯਪਿ ਏਸੇਵ ਨਯੋ. ਉਪੇਕ੍ਖਾ ਪਨ ਚਤੁਕ੍ਕਪਞ੍ਚਕਜ੍ਝਾਨਵਸੇਨ ਭਾਵੇਤਬ੍ਬਾ. ਯਸ੍ਮਾ ਪਨ ਯਂ ਪੁਗ੍ਗਲਂ ਪਸ੍ਸਤੋ ਚਿਤ੍ਤਂ ਨ ਨਿਬ੍ਬਾਤਿ, ਤਸ੍ਮਿਂ ਮੁਦਿਤਾ ਨ ਸਣ੍ਠਹਤਿ, ਤਸ੍ਮਾ ਸਾ ਨ ਵੁਤ੍ਤਾ. ਅਸਤਿਅਮਨਸਿਕਾਰੋਤਿ ਯਥਾ ਸੋ ਪੁਗ੍ਗਲੋ ਨ ਉਪਟ੍ਠਾਤਿ, ਕੁਟ੍ਟਾਦੀਹਿ ਅਨ੍ਤਰਿਤੋ ਵਿਯ ਹੋਤਿ, ਏਵਂ ਤਸ੍ਮਿਂ ਅਸਤਿਅਮਨਸਿਕਾਰੋ ਆਪਜ੍ਜਿਤਬ੍ਬੋ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵ.
੨. ਦੁਤਿਯਆਘਾਤਪਟਿਵਿਨਯਸੁਤ੍ਤਵਣ੍ਣਨਾ
੧੬੨. ਦੁਤਿਯੇ ਆਘਾਤੋ ਏਤੇਸੁ ਪਟਿਵਿਨੇਤਬ੍ਬੋਤਿ ਆਘਾਤਪਟਿਵਿਨਯਾ. ਆਘਾਤੋ ਏਤੇਹਿ ਪਟਿਵਿਨੇਤਬ੍ਬੋਤਿਪਿ ਆਘਾਤਪਟਿਵਿਨਯਾ. ਪਟਿਵਿਨਯੋਤਿ ਹਿ ਪਟਿਵਿਨਯਵਤ੍ਥੂਨਮ੍ਪਿ ਪਟਿਵਿਨਯਕਾਰਣਾਨਮ੍ਪਿ ਏਤਂ ਅਧਿਵਚਨਂ, ਤਦੁਭਯਮ੍ਪਿ ਇਧ ਵਟ੍ਟਤਿ. ਪਞ੍ਚ ਹਿ ਪੁਗ੍ਗਲਾ ਪਟਿਵਿਨਯਵਤ੍ਥੂ ਹੋਨ੍ਤਿ ਪਞ੍ਚਹਿ ਉਪਮਾਹਿ ਪਞ੍ਚ ਪਟਿਪਤ੍ਤਿਯੋ ਪਟਿਵਿਨਯਕਾਰਣਾਨਿ. ਲਭਤਿ ਚ ਕਾਲੇਨ ਕਾਲਂ ਚੇਤਸੋ ਵਿਵਰਂ ਚੇਤਸੋ ਪਸਾਦਨ੍ਤਿ ਕਾਲੇ ਕਾਲੇ ਸਮਥਵਿਪਸ੍ਸਨਾਚਿਤ੍ਤਸ੍ਸ ਉਪ੍ਪਨ੍ਨੋਕਾਸਸਙ੍ਖਾਤਂ ਵਿਵਰਞ੍ਚੇਵ ਸਦ੍ਧਾਸਮ੍ਪਨ੍ਨਭਾਵਸਙ੍ਖਾਤਂ ਪਸਾਦਞ੍ਚ ਲਭਤਿ.
ਰਥਿਯਾਯਾਤਿ ਅਨ੍ਤਰਵੀਥਿਯਂ. ਨਨ੍ਤਕਨ੍ਤਿ ਪਿਲੋਤਿਕਖਣ੍ਡਂ. ਨਿਗ੍ਗਹੇਤ੍ਵਾਤਿ ਅਕ੍ਕਮਿਤ੍ਵਾ. ਯੋ ਤਤ੍ਥ ਸਾਰੋਤਿ ਯਂ ਤਤ੍ਥ ਥਿਰਟ੍ਠਾਨਂ. ਤਂ ਪਰਿਪਾਤੇਤ੍ਵਾਤਿ ਤਂ ਲੁਞ੍ਚਿਤ੍ਵਾ. ਏਵਮੇਵ ਖੋਤਿ ਏਤ੍ਥ ਪਂਸੁਕੂਲਿਕੋ ਵਿਯ ਮੇਤ੍ਤਾਵਿਹਾਰੀ ਦਟ੍ਠਬ੍ਬੋ, ਰਥਿਯਾਯ ਨਨ੍ਤਕਂ ਵਿਯ ਵੇਰਿਪੁਗ੍ਗਲੋ, ਦੁਬ੍ਬਲਟ੍ਠਾਨਂ ਵਿਯ ਅਪਰਿਸੁਦ੍ਧਕਾਯਸਮਾਚਾਰਤਾ, ਥਿਰਟ੍ਠਾਨਂ ਵਿਯ ਪਰਿਸੁਦ੍ਧਵਚੀਸਮਾਚਾਰਤਾ, ਦੁਬ੍ਬਲਟ੍ਠਾਨਂ ਛਡ੍ਡੇਤ੍ਵਾ ਥਿਰਟ੍ਠਾਨਂ ਆਦਾਯ ਗਨ੍ਤ੍ਵਾ ਸਿਬ੍ਬਿਤ੍ਵਾ ਰਜਿਤ੍ਵਾ ਪਾਰੁਪਿਤ੍ਵਾ ਵਿਚਰਣਕਾਲੋ ਵਿਯ ਅਪਰਿਸੁਦ੍ਧਕਾਯਸਮਾਚਾਰਤਂ ਅਮਨਸਿਕਤ੍ਵਾ ਪਰਿਸੁਦ੍ਧਵਚੀਸਮਾਚਾਰਤਂ ਮਨਸਿਕਤ੍ਵਾ ਵੇਰਿਮ੍ਹਿ ਚਿਤ੍ਤੁਪ੍ਪਾਦਂ ਨਿਬ੍ਬਾਪੇਤ੍ਵਾ ਫਾਸੁਵਿਹਾਰਕਾਲੋ ਦਟ੍ਠਬ੍ਬੋ.
ਸੇਵਾਲਪਣਕਪਰਿਯੋਨਦ੍ਧਾਤਿ ਸੇਵਾਲੇਨ ਚ ਉਦਕਪਪ੍ਪਟਕੇਨ ਚ ਪਟਿਚ੍ਛਨ੍ਨਾ. ਘਮ੍ਮਪਰੇਤੋਤਿ ਘਮ੍ਮੇਨ ਅਨੁਗਤੋ. ਕਿਲਨ੍ਤੋਤਿ ਮਗ੍ਗਕਿਲਨ੍ਤੋ. ਤਸਿਤੋਤਿ ਤਣ੍ਹਾਭਿਭੂਤੋ. ਪਿਪਾਸਿਤੋਤਿ ਪਾਨੀਯਂ ਪਾਤੁਕਾਮੋ. ਅਪਵਿਯੂਹਿਤ੍ਵਾਤਿ ਅਪਨੇਤ੍ਵਾ. ਪਿਵਿਤ੍ਵਾਤਿ ਪਸਨ੍ਨਉਦਕਂ ਪਿਵਿਤ੍ਵਾ. ਏਵਮੇਵ ਖੋਤਿ ਏਤ੍ਥ ਘਮ੍ਮਾਭਿਤਤ੍ਤੋ ਪੁਰਿਸੋ ਵਿਯ ਮੇਤ੍ਤਾਵਿਹਾਰੀ ਦਟ੍ਠਬ੍ਬੋ, ਸੇਵਾਲਪਣਕਂ ਵਿਯ ਅਪਰਿਸੁਦ੍ਧਵਚੀਸਮਾਚਾਰਤਾ, ਪਸਨ੍ਨਉਦਕਂ ਵਿਯ ਪਰਿਸੁਦ੍ਧਕਾਯਸਮਾਚਾਰਤਾ, ਸੇਵਾਲਪਣਕਂ ਅਪਬ੍ਯੂਹਿਤ੍ਵਾ ਪਸਨ੍ਨੋਦਕਂ ਪਿਵਿਤ੍ਵਾ ਗਮਨਂ ਵਿਯ ਅਪਰਿਸੁਦ੍ਧਵਚੀਸਮਾਚਾਰਤਂ ਅਮਨਸਿਕਤ੍ਵਾ ਪਰਿਸੁਦ੍ਧਕਾਯਸਮਾਚਾਰਤਂ ਮਨਸਿਕਤ੍ਵਾ ਵੇਰਿਮ੍ਹਿ ਚਿਤ੍ਤੁਪ੍ਪਾਦਂ ਨਿਬ੍ਬਾਪੇਤ੍ਵਾ ਫਾਸੁਵਿਹਾਰਕਾਲੋ ਦਟ੍ਠਬ੍ਬੋ.
ਖੋਭੇਸ੍ਸਾਮੀਤਿ ਚਾਲੇਸ੍ਸਾਮਿ. ਲੋਲ਼ੇਸ੍ਸਾਮੀਤਿ ਆਕੁਲਂ ਕਰਿਸ੍ਸਾਮਿ. ਅਪੇਯ੍ਯਮ੍ਪਿ ਤਂ ਕਰਿਸ੍ਸਾਮੀਤਿ ਪਿਵਿਤੁਂ ਅਸਕ੍ਕੁਣੇਯ੍ਯਂ ਕਰਿਸ੍ਸਾਮਿ. ਚਤੁਕ੍ਕੁਣ੍ਡਿਕੋਤਿ ਜਾਣੂਹਿ ਚ ਹਤ੍ਥੇਹਿ ਚ ਭੂਮਿਯਂ ਪਤਿਟ੍ਠਾਨੇਨ ਚਤੁਕ੍ਕੁਣ੍ਡਿਕੋ ਹੁਤ੍ਵਾ. ਗੋਪੀਤਕਂ ਪਿਵਿਤ੍ਵਾਤਿ ਗਾਵਿਯੋ ਵਿਯ ਮੁਖੇਨ ਆਕਡ੍ਢੇਨ੍ਤੋ ਪਿਵਿਤ੍ਵਾ. ਏਵਮੇਵ ਖੋਤਿ ਏਤ੍ਥ ਘਮ੍ਮਾਭਿਤਤ੍ਤੋ ਪੁਰਿਸੋ ਵਿਯ ਮੇਤ੍ਤਾਵਿਹਾਰੀ ਦਟ੍ਠਬ੍ਬੋ, ਗੋਪਦਂ ਵਿਯ ਵੇਰਿਪੁਗ੍ਗਲੋ, ਗੋਪਦੇ ਪਰਿਤ੍ਤਉਦਕਂ ਵਿਯ ਤਸ੍ਸਬ੍ਭਨ੍ਤਰੇ ਪਰਿਤ੍ਤਗੁਣੋ, ਚਤੁਕ੍ਕੁਣ੍ਡਿਕਸ੍ਸ ਗੋਪੀਤਕਂ ਪਿਵਿਤ੍ਵਾ ਪਕ੍ਕਮਨਂ ਵਿਯ ਤਸ੍ਸ ਅਪਰਿਸੁਦ੍ਧਕਾਯਵਚੀਸਮਾਚਾਰਤਂ ਅਮਨਸਿਕਤ੍ਵਾ ਯਂ ਸੋ ਕਾਲੇਨ ਕਾਲਂ ਧਮ੍ਮਸ੍ਸਵਨਂ ਨਿਸ੍ਸਾਯ ਚੇਤਸੋ ਵਿਵਰਪ੍ਪਸਾਦਸਙ੍ਖਾਤਂ ਪੀਤਿਪਾਮੋਜ੍ਜਂ ਲਭਤਿ, ਤਂ ਮਨਸਿਕਤ੍ਵਾ ਚਿਤ੍ਤੁਪ੍ਪਾਦਨਿਬ੍ਬਾਪਨਂ ਵੇਦਿਤਬ੍ਬਂ.
ਆਬਾਧਿਕੋਤਿ ਇਰਿਯਾਪਥਭਞ੍ਜਨਕੇਨ ਵਿਸਭਾਗਾਬਾਧੇਨ ਆਬਾਧਿਕੋ. ਪੁਰਤੋਪਿਸ੍ਸਾਤਿ ਪੁਰਤੋਪਿ ਭਵੇਯ੍ਯ. ਅਨਯਬ੍ਯਸਨਨ੍ਤਿ ਅਵਡ੍ਢਿਵਿਨਾਸਂ. ਏਵਮੇਵ ਖੋਤਿ ਏਤ੍ਥ ਸੋ ਅਨਾਥਗਿਲਾਨੋ ਵਿਯ ਸਬ੍ਬਕਣ੍ਹਧਮ੍ਮਸਮਨ੍ਨਾਗਤੋ ਪੁਗ੍ਗਲੋ, ਅਦ੍ਧਾਨਮਗ੍ਗੋ ਵਿਯ ਅਨਮਤਗ੍ਗਸਂਸਾਰੋ, ਪੁਰਤੋ ਚ ਪਚ੍ਛਤੋ ਚ ਗਾਮਾਨਂ ਦੂਰਭਾਵੋ ਵਿਯ ਨਿਬ੍ਬਾਨਸ੍ਸ ਦੂਰਭਾਵੋ, ਸਪ੍ਪਾਯਭੋਜਨਾਨਂ ਅਲਾਭੋ ਵਿਯ ਸਾਮਞ੍ਞਫਲਭੋਜਨਾਨਂ ਅਲਾਭੋ, ਸਪ੍ਪਾਯਭੇਸਜ੍ਜਾਨਂ ਅਲਾਭੋ ਵਿਯ ਸਮਥਵਿਪਸ੍ਸਨਾਨਂ ਅਭਾਵੋ, ਪਤਿਰੂਪਉਪਟ੍ਠਾਕਾਨਂ ਅਲਾਭੋ ਵਿਯ ਓਵਾਦਾਨੁਸਾਸਨੀਹਿ ਕਿਲੇਸਤਿਕਿਚ੍ਛਕਾਨਂ ਅਭਾਵੋ, ਗਾਮਨ੍ਤਨਾਯਕਸ੍ਸ ਅਲਾਭੋ ਵਿਯ ਨਿਬ੍ਬਾਨਸਮ੍ਪਾਪਕਸ੍ਸ ਤਥਾਗਤਸ੍ਸ ਵਾ ਤਥਾਗਤਸਾਵਕਸ੍ਸ ਵਾ ਅਲਦ੍ਧਭਾਵੋ, ਅਞ੍ਞਤਰਸ੍ਸ ਪੁਰਿਸਸ੍ਸ ਦਿਸ੍ਵਾ ਕਾਰੁਞ੍ਞੁਪਟ੍ਠਾਨਂ ਵਿਯ ਤਸ੍ਮਿਂ ਪੁਗ੍ਗਲੇ ਮੇਤ੍ਤਾਵਿਹਾਰਿਕਸ੍ਸ ਕਾਰੁਞ੍ਞਂ ਉਪ੍ਪਾਦੇਤ੍ਵਾ ਚਿਤ੍ਤਨਿਬ੍ਬਾਪਨਂ ਵੇਦਿਤਬ੍ਬਂ.
ਅਚ੍ਛੋਦਕਾਤਿ ਪਸਨ੍ਨੋਦਕਾ. ਸਾਤੋਦਕਾਤਿ ਮਧੁਰੋਦਕਾ. ਸੀਤੋਦਕਾਤਿ ਤਨੁਸੀਤਸਲਿਲਾ. ਸੇਤਕਾਤਿ ਊਮਿਭਿਜ੍ਜਨਟ੍ਠਾਨੇਸੁ ਸੇਤਵਣ੍ਣਾ. ਸੁਪਤਿਤ੍ਥਾਤਿ ਸਮਤਿਤ੍ਥਾ. ਏਵਮੇਵ ਖੋਤਿ ਏਤ੍ਥ ਘਮ੍ਮਾਭਿਤਤ੍ਤੋ ਪੁਰਿਸੋ ਵਿਯ ਮੇਤ੍ਤਾਵਿਹਾਰੀ ਦਟ੍ਠਬ੍ਬੋ, ਸਾ ਪੋਕ੍ਖਰਣੀ ਵਿਯ ਪਰਿਸੁਦ੍ਧਸਬ੍ਬਦ੍ਵਾਰੋ ਪੁਰਿਸੋ, ਨ੍ਹਤ੍ਵਾ ਪਿਵਿਤ੍ਵਾ ਪਚ੍ਚੁਤ੍ਤਰਿਤ੍ਵਾ ਰੁਕ੍ਖਚ੍ਛਾਯਾਯ ਨਿਪਜ੍ਜਿਤ੍ਵਾ ਯਥਾਕਾਮਂ ਗਮਨਂ ਵਿਯ ਤੇਸੁ ਦ੍ਵਾਰੇਸੁ ਯਂ ਇਚ੍ਛਤਿ, ਤਂ ਆਰਮ੍ਮਣਂ ਕਤ੍ਵਾ ਚਿਤ੍ਤਨਿਬ੍ਬਾਪਨਂ ਵੇਦਿਤਬ੍ਬਂ. ਤਤਿਯਚਤੁਤ੍ਥਾਨਿ ਹੇਟ੍ਠਾ ਵੁਤ੍ਤਨਯਾਨੇਵ.
੫. ਪਞ੍ਹਪੁਚ੍ਛਾਸੁਤ੍ਤਵਣ੍ਣਨਾ
੧੬੫. ਪਞ੍ਚਮੇ ਪਰਿਭਵਨ੍ਤਿ ਪਰਿਭਵਨ੍ਤੋ, ਏਵਂ ਪਰਿਭਵਿਸ੍ਸਾਮੀਤਿ ਪਰਿਭਵਨਤ੍ਥਾਯ ਪੁਚ੍ਛਤੀਤਿ ਅਤ੍ਥੋ. ਅਞ੍ਞਾਤੁਕਾਮੋਤਿ ਜਾਨਿਤੁਕਾਮੋ ਹੁਤ੍ਵਾ.
੬. ਨਿਰੋਧਸੁਤ੍ਤਵਣ੍ਣਨਾ
੧੬੬. ਛਟ੍ਠੇ ਅਤ੍ਥੇਤਂ ਠਾਨਨ੍ਤਿ ਅਤ੍ਥਿ ਏਤਂ ਕਾਰਣਂ. ਨੋ ਚੇ ਦਿਟ੍ਠੇਵ ਧਮ੍ਮੇ ਅਞ੍ਞਂ ਆਰਾਧੇਯ੍ਯਾਤਿ ਨੋ ਚੇ ਇਮਸ੍ਮਿਂਯੇਵ ਅਤ੍ਤਭਾਵੇ ਅਰਹਤ੍ਤਂ ਪਾਪੁਣੇਯ੍ਯ. ਕਬਲ਼ੀਕਾਰਾਹਾਰਭਕ੍ਖਾਨਂ ਦੇਵਾਨਨ੍ਤਿ ਕਾਮਾਵਚਰਦੇਵਾਨਂ. ਅਞ੍ਞਤਰਂ ਮਨੋਮਯਂ ਕਾਯਨ੍ਤਿ ਝਾਨਮਨੇਨ ਨਿਬ੍ਬਤ੍ਤਂ ਅਞ੍ਞਤਰਂ ਸੁਦ੍ਧਾਵਾਸਬ੍ਰਹ੍ਮਕਾਯਂ. ਉਦਾਯੀਤਿ ਲਾਲ਼ੁਦਾਯੀ. ਸੋ ਹਿ ‘‘ਮਨੋਮਯ’’ਨ੍ਤਿ ਸੁਤ੍ਵਾ ‘‘ਆਰੁਪ੍ਪੇ ਨ ਭਵਿਤਬ੍ਬ’’ਨ੍ਤਿ ਪਟਿਬਾਹਿ. ਥੇਰੋ ‘‘ਸਾਰਿਪੁਤ੍ਤੋ ਕਿਂ ਜਾਨਾਤਿ, ਯਸ੍ਸ ਸਮ੍ਮੁਖਾ ਏਵਂ ਭਿਕ੍ਖੂ ਵਚਨਂ ਪਟਿਕ੍ਕੋਸਨ੍ਤੀ’’ਤਿ ਏਵਂ ਬਾਲਾਨਂ ਲਦ੍ਧਿਉਪ੍ਪਤ੍ਤਿਪਟਿਬਾਹਨਤ੍ਥਂ ਤਂ ਵਚਨਂ ਅਨਧਿਵਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ.
ਅਤ੍ਥਿ ਨਾਮਾਤਿ ਅਮਰਿਸਨਤ੍ਥੇ ਨਿਪਾਤੋ. ਤੇਨੇਵ ਚੇਤ੍ਥ ‘‘ਅਜ੍ਝੁਪੇਕ੍ਖਿਸ੍ਸਥਾ’’ਤਿ ਅਨਾਗਤਵਚਨਂ ਕਤਂ. ਅਯਞ੍ਹੇਤ੍ਥਤ੍ਥੋ – ਆਨਨ੍ਦ, ਤੁਮ੍ਹੇ ਥੇਰਂ ਭਿਕ੍ਖੁਂ ਵਿਹੇਠਿਯਮਾਨਂ ਅਜ੍ਝੁਪੇਕ੍ਖਥ, ਨ ਵੋ ਏਤਂ ਮਰਿਸਯਾਮਿ ਨ ਸਹਾਮਿ ਨਾਧਿਵਾਸੇਮੀਤਿ. ਕਸ੍ਮਾ ਪਨ ਭਗਵਾ ਆਨਨ੍ਦਥੇਰਂਯੇਵ ਏਵਮਾਹਾਤਿ? ਧਮ੍ਮਭਣ੍ਡਾਗਾਰਿਕਤ੍ਤਾ. ਧਮ੍ਮਭਣ੍ਡਾਗਾਰਿਕਸ੍ਸ ਹਿ ਏਵਂ ਵਦਨ੍ਤੋ ਪਟਿਬਾਹਿਤੁਂ ਭਾਰੋ. ਅਪਿਚੇਸ ਸਾਰਿਪੁਤ੍ਤਤ੍ਥੇਰਸ੍ਸ ਪਿਯਸਹਾਯੋ, ਤੇਨਾਪਿਸ੍ਸ ਏਸ ਭਾਰੋ. ਤਤ੍ਥ ਕਿਞ੍ਚਾਪਿ ਭਗਵਾ ਆਨਨ੍ਦਤ੍ਥੇਰਂ ਗਰਹਨ੍ਤੋ ਏਵਮਾਹ, ਨ ਪਨੇਸਾ ਤਸ੍ਸੇਵ ਗਰਹਾ, ਸਮ੍ਮੁਖੀਭੂਤਾਨਂ ਸਬ੍ਬੇਸਂਯੇਵ ਗਰਹਾਤਿ ਵੇਦਿਤਬ੍ਬਾ. ਵਿਹਾਰਨ੍ਤਿ ਗਨ੍ਧਕੁਟਿਂ.
ਅਨਚ੍ਛਰਿਯਨ੍ਤਿ ਨ ਅਚ੍ਛਰਿਯਂ. ਯਥਾਤਿ ਕਾਰਣਵਚਨਂ. ਆਯਸ੍ਮਨ੍ਤਂਯੇਵੇਤ੍ਥ ਉਪਵਾਨਂ ਪਟਿਭਾਸੇਯ੍ਯਾਤਿ ਏਤ੍ਥ ਭਗਵਤਾ ਚ ਏਵਂ ਏਤਦੇਵ ਕਾਰਣਂ ਆਰਬ੍ਭ ਉਦਾਹਟੇ ਆਯਸ੍ਮਤੋਯੇਵ ਉਪਵਾਨਸ੍ਸ ਪਟਿਵਚਨਂ ਪਟਿਭਾਤੁ ਉਪਟ੍ਠਾਤੂਤਿ ਦੀਪੇਤਿ. ਸਾਰਜ੍ਜਂ ਓਕ੍ਕਨ੍ਤਨ੍ਤਿ ਦੋਮਨਸ੍ਸਂ ਅਨੁਪਵਿਟ੍ਠਂ. ਸੀਲਵਾਤਿਆਦੀਹਿ ਖੀਣਾਸਵਸੀਲਾਦੀਨਿਯੇਵ ਕਥਿਤਾਨਿ. ਖਣ੍ਡਿਚ੍ਚੇਨਾਤਿਆਦੀਨਿ ਸਕ੍ਕਾਰਾਦੀਨਂ ਕਾਰਣਪੁਚ੍ਛਾਵਸੇਨ ਵੁਤ੍ਤਾਨਿ. ਕਿਂ ਖਣ੍ਡਿਚ੍ਚਾਦੀਹਿ ਕਾਰਣੇਹਿ ਤਂ ਤਂ ਸਬ੍ਰਹ੍ਮਚਾਰਿਂ ਸਕ੍ਕਰੇਯ੍ਯੁਨ੍ਤਿ ਅਯਞ੍ਹੇਤ੍ਥ ਅਧਿਪ੍ਪਾਯੋ.
੭. ਚੋਦਨਾਸੁਤ੍ਤਵਣ੍ਣਨਾ
੧੬੭. ਸਤ੍ਤਮੇ ਚੋਦਕੇਨਾਤਿ ਵਤ੍ਥੁਸਨ੍ਦਸ੍ਸਨਾ ਆਪਤ੍ਤਿਸਨ੍ਦਸ੍ਸਨਾ ਸਂਵਾਸਪ੍ਪਟਿਕ੍ਖੇਪੋ ਸਾਮੀਚਿਪ੍ਪਟਿਕ੍ਖੇਪੋਤਿ ਚਤੂਹਿ ਚੋਦਨਾਵਤ੍ਥੂਹਿ ਚੋਦਯਮਾਨੇਨ. ਕਾਲੇਨ ਵਕ੍ਖਾਮਿ ਨੋ ਅਕਾਲੇਨਾਤਿ ਏਤ੍ਥ ਚੁਦਿਤਕਸ੍ਸ ਕਾਲੋ ਕਥਿਤੋ, ਨ ਚੋਦਕਸ੍ਸ. ਪਰਂ ਚੋਦੇਨ੍ਤੇਨ ਹਿ ਪਰਿਸਮਜ੍ਝੇ ਵਾ ਉਪੋਸਥਪਵਾਰਣਗ੍ਗੇ ਵਾ ਆਸਨਸਾਲਾਭੋਜਨਸਾਲਾਦੀਸੁ ਵਾ ਨ ਚੋਦੇਤਬ੍ਬੋ, ਦਿਵਾਟ੍ਠਾਨੇ ਨਿਸਿਨ੍ਨਕਾਲੇ ‘‘ਕਰੋਤਾਯਸ੍ਮਾ ਓਕਾਸਂ, ਅਹਂ ਆਯਸ੍ਮਨ੍ਤਂ ਵਤ੍ਤੁਕਾਮੋ’’ਤਿ ਏਵਂ ਓਕਾਸਂ ਕਾਰੇਤ੍ਵਾ ਚੋਦੇਤਬ੍ਬੋ. ਪੁਗ੍ਗਲਂ ਪਨ ਉਪਪਰਿਕ੍ਖਿਤ੍ਵਾ ਯੋ ਲੋਲਪੁਗ੍ਗਲੋ ਅਭੂਤਂ ਵਤ੍ਵਾ ਭਿਕ੍ਖੂਨਂ ਅਯਸਂ ਆਰੋਪੇਤਿ, ਸੋ ਓਕਾਸਕਮ੍ਮਂ ਵਿਨਾਪਿ ਚੋਦੇਤਬ੍ਬੋ. ਭੂਤੇਨਾਤਿ ਤਚ੍ਛੇਨ ਸਭਾਵੇਨ. ਸਣ੍ਹੇਨਾਤਿ ਮਟ੍ਠੇਨ ਮੁਦੁਕੇਨ. ਅਤ੍ਥਸਂਹਿਤੇਨਾਤਿ ਅਤ੍ਥਕਾਮਤਾਯ ਹਿਤਕਾਮਤਾਯ ਉਪੇਤੇਨ. ਅਵਿਪ੍ਪਟਿਸਾਰੋ ਉਪਦਹਾਤਬ੍ਬੋਤਿ ਅਮਙ੍ਕੁਭਾਵੋ ਉਪਨੇਤਬ੍ਬੋ. ਅਲਂ ਤੇ ਅਵਿਪ੍ਪਟਿਸਾਰਾਯਾਤਿ ਯੁਤ੍ਤਂ ਤੇ ਅਮਙ੍ਕੁਭਾਵਾਯ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ. ਅਟ੍ਠਮਂ ਹੇਟ੍ਠਾ ਵੁਤ੍ਤਨਯਤ੍ਤਾ ਪਾਕਟਮੇਵ.
੯. ਖਿਪ੍ਪਨਿਸਨ੍ਤਿਸੁਤ੍ਤਵਣ੍ਣਨਾ
੧੬੯. ਨਵਮੇ ਖਿਪ੍ਪਂ ਨਿਸਾਮਯਤਿ ਉਪਧਾਰੇਤੀਤਿ ਖਿਪ੍ਪਨਿਸਨ੍ਤਿ. ਸੁਗ੍ਗਹਿਤਂ ਕਤ੍ਵਾ ਗਣ੍ਹਾਤੀਤਿ ਸੁਗ੍ਗਹਿਤਗ੍ਗਾਹੀ. ਅਤ੍ਥਕੁਸਲੋਤਿ ਅਟ੍ਠਕਥਾਯ ਛੇਕੋ. ਧਮ੍ਮਕੁਸਲੋਤਿ ਪਾਲ਼ਿਯਂ ਛੇਕੋ. ਨਿਰੁਤ੍ਤਿਕੁਸਲੋਤਿ ਨਿਰੁਤ੍ਤਿਵਚਨੇਸੁ ਛੇਕੋ. ਬ੍ਯਞ੍ਜਨਕੁਸਲੋਤਿ ਅਕ੍ਖਰਪ੍ਪਭੇਦੇ ਛੇਕੋ. ਪੁਬ੍ਬਾਪਰਕੁਸਲੋਤਿ ਅਤ੍ਥਪੁਬ੍ਬਾਪਰਂ, ਧਮ੍ਮਪੁਬ੍ਬਾਪਰਂ, ਅਕ੍ਖਰਪੁਬ੍ਬਾਪਰਂ, ਬ੍ਯਞ੍ਜਨਪੁਬ੍ਬਾਪਰਂ, ਅਨੁਸਨ੍ਧਿਪੁਬ੍ਬਾਪਰਨ੍ਤਿ ਇਮਸ੍ਮਿਂ ਪਞ੍ਚਵਿਧੇ ਪੁਬ੍ਬਾਪਰੇ ਛੇਕੋ. ਤਤ੍ਥ ਅਤ੍ਥਪੁਬ੍ਬਾਪਰਕੁਸਲੋਤਿ ਹੇਟ੍ਠਾ ਅਤ੍ਥੇਨ ਉਪਰਿ ਅਤ੍ਥਂ ਜਾਨਾਤਿ, ਉਪਰਿ ਅਤ੍ਥੇਨ ਹੇਟ੍ਠਾ ਅਤ੍ਥਂ ਜਾਨਾਤਿ. ਕਥਂ? ਸੋ ਹਿ ਹੇਟ੍ਠਾ ਅਤ੍ਥਂ ਠਪੇਤ੍ਵਾ ਉਪਰਿ ਅਤ੍ਥੇ ਵੁਤ੍ਤੇ ‘‘ਹੇਟ੍ਠਾ ਅਤ੍ਥੋ ਅਤ੍ਥੀ’’ਤਿ ਜਾਨਾਤਿ. ਉਪਰਿ ਅਤ੍ਥਂ ਠਪੇਤ੍ਵਾ ਹੇਟ੍ਠਾ ਅਤ੍ਥੇ ਵੁਤ੍ਤੇਪਿ ‘‘ਉਪਰਿ ਅਤ੍ਥੋ ਅਤ੍ਥੀ’’ਤਿ ਜਾਨਾਤਿ. ਉਭਤੋ ਠਪੇਤ੍ਵਾ ਮਜ੍ਝੇ ਅਤ੍ਥੇ ਵੁਤ੍ਤੇ ‘‘ਉਭਤੋ ਅਤ੍ਥੋ ਅਤ੍ਥੀ’’ਤਿ ਜਾਨਾਤਿ. ਮਜ੍ਝੇ ਅਤ੍ਥਂ ਠਪੇਤ੍ਵਾ ਉਭਤੋਭਾਗੇਸੁ ਅਤ੍ਥੇ ਵੁਤ੍ਤੇ ‘‘ਮਜ੍ਝੇ ਅਤ੍ਥੋ ਅਤ੍ਥੀ’’ਤਿ ਜਾਨਾਤਿ. ਧਮ੍ਮਪੁਬ੍ਬਾਪਰਾਦੀਸੁਪਿ ਏਸੇਵ ਨਯੋ. ਅਨੁਸਨ੍ਧਿਪੁਬ੍ਬਾਪਰੇ ਪਨ ਸੀਲਂ ਆਦਿਂ ਕਤ੍ਵਾ ਆਰਦ੍ਧੇ ਸੁਤ੍ਤਨ੍ਤੇ ਮਤ੍ਥਕੇ ਛਸੁ ਅਭਿਞ੍ਞਾਸੁ ਆਗਤਾਸੁ ‘‘ਯਥਾਨੁਸਨ੍ਧਿਂ ਯਥਾਨੁਪਰਿਚ੍ਛੇਦਂ ਸੁਤ੍ਤਨ੍ਤੋ ਗਤੋ’’ਤਿ ਜਾਨਾਤਿ. ਦਿਟ੍ਠਿਵਸੇਨ ਆਰਦ੍ਧੇ ਉਪਰਿ ਸਚ੍ਚੇਸੁ ਆਗਤੇਸੁਪਿ ‘‘ਯਥਾਨੁਸਨ੍ਧਿਨਾ ਗਤੋ’’ਤਿ ਜਾਨਾਤਿ. ਕਲਹਭਣ੍ਡਨਵਸੇਨ ਆਰਦ੍ਧੇ ਉਪਰਿ ਸਾਰਣੀਯਧਮ੍ਮੇਸੁ ਆਗਤੇਸੁਪਿ, ਦ੍ਵਤ੍ਤਿਂਸਤਿਰਚ੍ਛਾਨਕਥਾਵਸੇਨ ਆਰਦ੍ਧੇ ਉਪਰਿ ਦਸਕਥਾਵਤ੍ਥੂਸੁ (ਅ. ਨਿ. ੧੦.੬੯; ਉਦਾ.੩੧) ਆਗਤੇਸੁਪਿ ‘‘ਯਥਾਨੁਸਨ੍ਧਿਨਾ ਗਤੋ’’ਤਿ ਜਾਨਾਤੀਤਿ.
੧੦. ਭਦ੍ਦਜਿਸੁਤ੍ਤਵਣ੍ਣਨਾ
੧੭੦. ਦਸਮੇ ਅਭਿਭੂਤਿ ਅਭਿਭਵਿਤ੍ਵਾ ਠਿਤੋ ਜੇਟ੍ਠਕੋ. ਅਨਭਿਭੂਤੋਤਿ ਅਞ੍ਞੇਹਿ ਅਨਭਿਭੂਤੋ. ਅਞ੍ਞਦਤ੍ਥੂਤਿ ਏਕਂਸਵਚਨੇ ਨਿਪਾਤੋ. ਦਸ੍ਸਨਵਸੇਨ ਦਸੋ, ਸਬ੍ਬਂ ਪਸ੍ਸਤੀਤਿ ਅਧਿਪ੍ਪਾਯੋ. ਵਸਵਤ੍ਤੀਤਿ ਸਬ੍ਬਂ ਜਨਂ ਵਸੇ ਵਤ੍ਤੇਤਿ. ਯਥਾ ਪਸ੍ਸਤੋਤਿ ਇਟ੍ਠਾਰਮ੍ਮਣਂ ਵਾ ਹੋਤੁ ਅਨਿਟ੍ਠਾਰਮ੍ਮਣਂ ਵਾ, ਯੇਨਾਕਾਰੇਨ ਤਂ ਪਸ੍ਸਨ੍ਤਸ੍ਸ. ਅਨਨ੍ਤਰਾ ਆਸਵਾਨਂ ਖਯੋ ਹੋਤੀਤਿ ਅਨਨ੍ਤਰਾਯੇਵ ਅਰਹਤ੍ਤਂ ਉਪ੍ਪਜ੍ਜਤਿ. ਯਥਾ ਸੁਣਤੋਤਿ ਏਤ੍ਥਾਪਿ ਏਸੇਵ ਨਯੋ. ਅਥ ਵਾ ਯਂ ਚਕ੍ਖੁਨਾ ਰੂਪਂ ਦਿਸ੍ਵਾ ਨਿਰਨ੍ਤਰਮੇਵ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਤਂ ਤਸ੍ਸ ਅਰਹਤ੍ਤਂ ਚਕ੍ਖੁਵਿਞ੍ਞਾਣਾਨਨ੍ਤਰਂ ਨਾਮ ਹੋਤਿ. ਤਂ ਸਨ੍ਧਾਯ ਵੁਤ੍ਤਂ – ਇਦਂ ਦਸ੍ਸਨਾਨਂ ਅਗ੍ਗਨ੍ਤਿ. ਦੁਤਿਯਪਦੇਪਿ ਏਸੇਵ ਨਯੋ.
ਯਥਾ ਸੁਖਿਤਸ੍ਸਾਤਿ ਯੇਨ ਮਗ੍ਗਸੁਖੇਨ ਸੁਖਿਤਸ੍ਸ. ਅਨਨ੍ਤਰਾ ਆਸਵਾਨਂ ਖਯੋ ਹੋਤੀਤਿ ਸਮਨਨ੍ਤਰਮੇਵ ਅਰਹਤ੍ਤਂ ਉਪ੍ਪਜ੍ਜਤਿ. ਇਦਂ ਸੁਖਾਨਂ ਅਗ੍ਗਨ੍ਤਿ ਇਦਂ ਮਗ੍ਗਸੁਖਂ ਸੁਖਾਨਂ ਉਤ੍ਤਮਂ. ਯਥਾ ਸਞ੍ਞਿਸ੍ਸਾਤਿ ਇਧਾਪਿ ਮਗ੍ਗਸਞ੍ਞਾਵ ਅਧਿਪ੍ਪੇਤਾ. ਯਥਾ ਭੂਤਸ੍ਸਾਤਿ ਯਸ੍ਮਿਂ ਭਵੇ ਯਸ੍ਮਿਂ ਅਤ੍ਤਭਾਵੇ ਠਿਤਸ੍ਸ. ਅਨਨ੍ਤਰਾਤਿ ਅਨਨ੍ਤਰਾਯੇਨ ਅਰਹਤ੍ਤਂ ਉਪ੍ਪਜ੍ਜਤਿ. ਇਦਂ ਭਵਾਨਂ ਅਗ੍ਗਨ੍ਤਿ ਅਯਂ ਪਚ੍ਛਿਮੋ ਅਤ੍ਤਭਾਵੋ ਭਵਾਨਂ ਅਗ੍ਗਂ ਨਾਮ. ਅਥ ਵਾ ਯਥਾ ਭੂਤਸ੍ਸਾਤਿ ਯੇਹਿ ਖਨ੍ਧੇਹਿ ਮਗ੍ਗਕ੍ਖਣੇ ਭੂਤਸ੍ਸ ਵਿਜ੍ਜਮਾਨਸ੍ਸ. ਅਨਨ੍ਤਰਾ ਆਸਵਾਨਂ ਖਯੋ ਹੋਤੀਤਿ ਮਗ੍ਗਾਨਨ੍ਤਰਮੇਵ ਫਲਂ ਉਪ੍ਪਜ੍ਜਤਿ. ਇਦਂ ਭਵਾਨਂ ਅਗ੍ਗਨ੍ਤਿ ਇਦਂ ਮਗ੍ਗਕ੍ਖਣੇ ਖਨ੍ਧਪਞ੍ਚਕਂ ਭਵਾਨਂ ਅਗ੍ਗਂ ਨਾਮਾਤਿ.
ਆਘਾਤਵਗ੍ਗੋ ਦੁਤਿਯੋ.
(੧੮) ੩. ਉਪਾਸਕਵਗ੍ਗੋ
੧-੩. ਸਾਰਜ੍ਜਸੁਤ੍ਤਾਦਿਵਣ੍ਣਨਾ
੧੭੧-੧੭੩. ਤਤਿਯਸ੍ਸ ਪਠਮਦੁਤਿਯਤਤਿਯੇਸੁ ਅਗਾਰਿਯਪ੍ਪਟਿਪਤ੍ਤਿ ਕਥਿਤਾ. ਸੋਤਾਪਨ੍ਨਸਕਦਾਗਾਮਿਨੋਪਿ ਹੋਨ੍ਤੁ, ਵਟ੍ਟਨ੍ਤਿਯੇਵ.
੪. ਵੇਰਸੁਤ੍ਤਵਣ੍ਣਨਾ
੧੭੪. ਚਤੁਤ੍ਥੇ ਭਯਾਨੀਤਿ ਚਿਤ੍ਤੁਤ੍ਰਾਸਭਯਾਨਿ. ਵੇਰਾਨੀਤਿ ਅਕੁਸਲਵੇਰਾਨਿਪਿ ਪੁਗ੍ਗਲਵੇਰਾਨਿਪਿ. ਚੇਤਸਿਕਨ੍ਤਿ ਚਿਤ੍ਤਨਿਸ੍ਸਿਤਂ. ਦੁਕ੍ਖਨ੍ਤਿ ਕਾਯਪਸਾਦਵਤ੍ਥੁਕਂ ਦੁਕ੍ਖਂ. ਦੋਮਨਸ੍ਸਨ੍ਤਿ ਦੋਮਨਸ੍ਸਵੇਦਨਂ. ਇਮਸ੍ਮਿਂ ਸੁਤ੍ਤੇ ਵਿਰਤਿਪਹਾਨਂ ਕਥਿਤਂ.
੫. ਚਣ੍ਡਾਲਸੁਤ੍ਤਵਣ੍ਣਨਾ
੧੭੫. ਪਞ੍ਚਮੇ ਉਪਾਸਕਪਤਿਕੁਟ੍ਠੋਤਿ ਉਪਾਸਕਪਚ੍ਛਿਮਕੋ. ਕੋਤੂਹਲਮਙ੍ਗਲਿਕੋਤਿ ‘‘ਇਮਿਨਾ ਇਦਂ ਭਵਿਸ੍ਸਤੀ’’ਤਿ ਏਵਂ ਪਵਤ੍ਤਤ੍ਤਾ ਕੋਤੂਹਲਸਙ੍ਖਾਤੇਨ ਦਿਟ੍ਠਸੁਤਮੁਤਮਙ੍ਗਲੇਨ ਸਮਨ੍ਨਾਗਤੋ. ਮਙ੍ਗਲਂ ਪਚ੍ਚੇਤਿ ਨੋ ਕਮ੍ਮਨ੍ਤਿ ਮਙ੍ਗਲਂ ਓਲੋਕੇਤਿ, ਕਮ੍ਮਂ ਨ ਓਲੋਕੇਤਿ. ਇਤੋ ਚ ਬਹਿਦ੍ਧਾਤਿ ਇਮਮ੍ਹਾ ਸਾਸਨਾ ਬਹਿਦ੍ਧਾ. ਪੁਬ੍ਬਕਾਰਂ ਕਰੋਤੀਤਿ ਦਾਨਾਦਿਕਂ ਕੁਸਲਕਿਚ੍ਚਂ ਪਠਮਤਰਂ ਕਰੋਤਿ.
੬. ਪੀਤਿਸੁਤ੍ਤਵਣ੍ਣਨਾ
੧੭੬. ਛਟ੍ਠੇ ਕਿਨ੍ਤਿ ਮਯਨ੍ਤਿ ਕੇਨ ਨਾਮ ਉਪਾਯੇਨ ਮਯਂ. ਪਵਿਵੇਕਂ ਪੀਤਿਨ੍ਤਿ ਪਠਮਦੁਤਿਯਜ੍ਝਾਨਾਨਿ ਨਿਸ੍ਸਾਯ ਉਪ੍ਪਜ੍ਜਨਕਪੀਤਿਂ. ਕਾਮੂਪਸਂਹਿਤਨ੍ਤਿ ਕਾਮਨਿਸ੍ਸਿਤਂ ਦੁਵਿਧੇ ਕਾਮੇ ਆਰਬ੍ਭ ਉਪ੍ਪਜ੍ਜਨਕਂ. ਅਕੁਸਲੂਪਸਂਹਿਤਨ੍ਤਿ ‘‘ਮਿਗਸੂਕਰਾਦਯੋ ਵਿਜ੍ਝਿਸ੍ਸਾਮੀ’’ਤਿ ਸਰਂ ਖਿਪਿਤ੍ਵਾ ਤਸ੍ਮਿਂ ਵਿਰਦ੍ਧੇ ‘‘ਵਿਰਦ੍ਧਂ ਮਯਾ’’ਤਿ ਏਵਂ ਅਕੁਸਲੇ ਨਿਸ੍ਸਾਯ ਉਪ੍ਪਜ੍ਜਨਕਂ. ਤਾਦਿਸੇਸੁ ਪਨ ਠਾਨੇਸੁ ਅਵਿਰਜ੍ਝਨ੍ਤਸ੍ਸ ‘‘ਸੁਟ੍ਠੁ ਮੇ ਵਿਦ੍ਧਂ, ਸੁਟ੍ਠੁ ਮੇ ਪਹਟ’’ਨ੍ਤਿ ਉਪ੍ਪਜ੍ਜਨਕਂ ਅਕੁਸਲੂਪਸਂਹਿਤਂ ਸੁਖਂ ਸੋਮਨਸ੍ਸਂ ਨਾਮ. ਦਾਨਾਦਿਉਪਕਰਣਾਨਂ ਅਸਮ੍ਪਤ੍ਤਿਯਾ ਉਪ੍ਪਜ੍ਜਮਾਨਂ ਪਨ ਕੁਸਲੂਪਸਂਹਿਤਂ ਦੁਕ੍ਖਂ ਦੋਮਨਸ੍ਸਨ੍ਤਿ ਵੇਦਿਤਬ੍ਬਂ.
੭. ਵਣਿਜ੍ਜਾਸੁਤ੍ਤਵਣ੍ਣਨਾ
੧੭੭. ਸਤ੍ਤਮੇ ਵਣਿਜ੍ਜਾਤਿ ਵਾਣਿਜਕਮ੍ਮਾਨਿ. ਉਪਾਸਕੇਨਾਤਿ ਤਿਸਰਣਗਤੇਨ. ਸਤ੍ਥਵਣਿਜ੍ਜਾਤਿ ਆਵੁਧਭਣ੍ਡਂ ਕਾਰੇਤ੍ਵਾ ਤਸ੍ਸ ਵਿਕ੍ਕਯੋ. ਸਤ੍ਤਵਣਿਜ੍ਜਾਤਿ ਮਨੁਸ੍ਸਵਿਕ੍ਕਯੋ. ਮਂਸਵਣਿਜ੍ਜਾਤਿ ਸੂਕਰਮਿਗਾਦਯੋ ਪੋਸੇਤ੍ਵਾ ਤੇਸਂ ਵਿਕ੍ਕਯੋ. ਮਜ੍ਜਵਣਿਜ੍ਜਾਤਿ ਯਂਕਿਞ੍ਚਿ ਮਜ੍ਜਂ ਕਾਰੇਤ੍ਵਾ ਤਸ੍ਸ ਵਿਕ੍ਕਯੋ. ਵਿਸਵਣਿਜ੍ਜਾਤਿ ਵਿਸਂ ਕਾਰੇਤ੍ਵਾ ਤਸ੍ਸ ਵਿਕ੍ਕਯੋ. ਇਤਿ ਸਬ੍ਬਮ੍ਪਿ ਇਮਂ ਵਣਿਜ੍ਜਂ ਨੇਵ ਅਤ੍ਤਨਾ ਕਾਤੁਂ, ਨ ਪਰੇ ਸਮਾਦਪੇਤ੍ਵਾ ਕਾਰੇਤੁਂ ਵਟ੍ਟਤਿ.
੮. ਰਾਜਸੁਤ੍ਤਵਣ੍ਣਨਾ
੧੭੮. ਅਟ੍ਠਮੇ ਪਬ੍ਬਾਜੇਨ੍ਤੀਤਿ ਰਟ੍ਠਮ੍ਹਾ ਪਬ੍ਬਾਜੇਨ੍ਤਿ. ਯਥਾਪਚ੍ਚਯਂ ਵਾ ਕਰੋਨ੍ਤੀਤਿ ਯਥਾਧਿਪ੍ਪਾਯਂ ਯਥਾਜ੍ਝਾਸਯਂ ਕਰੋਨ੍ਤਿ. ਤਥੇਵ ਪਾਪਕਮ੍ਮਂ ਪਵੇਦੇਨ੍ਤੀਤਿ ਯਥਾ ਤੇਨ ਕਤਂ, ਤਂ ਤਥੇਵ ਅਞ੍ਞੇਸਂ ਆਰੋਚੇਨ੍ਤਿ ਕਥੇਨ੍ਤਿ.
੯. ਗਿਹਿਸੁਤ੍ਤਵਣ੍ਣਨਾ
੧੭੯. ਨਵਮੇ ਸਂਵੁਤਕਮ੍ਮਨ੍ਤਨ੍ਤਿ ਪਿਹਿਤਕਮ੍ਮਨ੍ਤਂ. ਆਭਿਚੇਤਸਿਕਾਨਨ੍ਤਿ ਉਤ੍ਤਮਚਿਤ੍ਤਨਿਸ੍ਸਿਤਾਨਂ. ਦਿਟ੍ਠਧਮ੍ਮਸੁਖਵਿਹਾਰਾਨਨ੍ਤਿ ਪਚ੍ਚਕ੍ਖੇਯੇਵ ਧਮ੍ਮੇ ਪਵਤ੍ਤਿਕ੍ਖਣੇ ਸੁਖਵਿਹਾਰਾਨਂ. ਅਰਿਯਕਨ੍ਤੇਹੀਤਿ ਅਰਿਯਾਨਂ ਕਨ੍ਤੇਹਿ ਮਗ੍ਗਫਲਸੀਲੇਹਿ.
ਅਰਿਯਧਮ੍ਮਂ ਸਮਾਦਾਯਾਤਿ ਏਤ੍ਥ ਅਰਿਯਧਮ੍ਮੋਤਿ ਪਞ੍ਚ ਸੀਲਾਨਿ ਕਥਿਤਾਨਿ. ਮੇਰਯਂ ਵਾਰੁਣਿਨ੍ਤਿ ਚਤੁਬ੍ਬਿਧਂ ਮੇਰਯਂ ਪਞ੍ਚਵਿਧਞ੍ਚ ਸੁਰਂ. ਧਮ੍ਮਞ੍ਚਾਨੁਵਿਤਕ੍ਕਯੇਤਿ ਨਵਵਿਧਂ ਲੋਕੁਤ੍ਤਰਧਮ੍ਮਂ ਅਨੁਸ੍ਸਤਿਵਸੇਨੇਵ ਵਿਤਕ੍ਕੇਯ੍ਯ. ਅਬ੍ਯਾਪਜ੍ਝਂ ਹਿਤਂ ਚਿਤ੍ਤਨ੍ਤਿ ਨਿਦ੍ਦੁਕ੍ਖਂ ਮੇਤ੍ਤਾਦਿਬ੍ਰਹ੍ਮਵਿਹਾਰਚਿਤ੍ਤਂ. ਦੇਵਲੋਕਾਯ ਭਾਵਯੇਤਿ ਬ੍ਰਹ੍ਮਲੋਕਤ੍ਥਾਯ ਭਾਵੇਯ੍ਯ. ਪੁਞ੍ਞਤ੍ਥਸ੍ਸ ਜਿਗੀਸਤੋਤਿ ਪੁਞ੍ਞੇਨ ਅਤ੍ਥਿਕਸ੍ਸ ਪੁਞ੍ਞਂ ਗਵੇਸਨ੍ਤਸ੍ਸ. ਸਨ੍ਤੇਸੂਤਿ ਬੁਦ੍ਧਪਚ੍ਚੇਕਬੁਦ੍ਧਤਥਾਗਤਸਾਵਕੇਸੁ. ਵਿਪੁਲਾ ਹੋਤਿ ਦਕ੍ਖਿਣਾਤਿ ਏਵਂ ਦਿਨ੍ਨਦਾਨਂ ਮਹਪ੍ਫਲਂ ਹੋਤਿ. ਅਨੁਪੁਬ੍ਬੇਨਾਤਿ ਸੀਲਪੂਰਣਾਦਿਨਾ ਅਨੁਕ੍ਕਮੇਨ. ਸੇਸਂ ਤਿਕਨਿਪਾਤੇ ਵੁਤ੍ਤਤ੍ਥਮੇਵ.
੧੦. ਗਵੇਸੀਸੁਤ੍ਤਵਣ੍ਣਨਾ
੧੮੦. ਦਸਮੇ ਸਿਤਂ ਪਾਤ੍ਵਾਕਾਸੀਤਿ ਮਹਾਮਗ੍ਗੇਨੇਵ ਗਚ੍ਛਨ੍ਤੋ ਤਂ ਸਾਲਵਨਂ ਓਲੋਕੇਤ੍ਵਾ ‘‘ਅਤ੍ਥਿ ਨੁ ਖੋ ਇਮਸ੍ਮਿਂ ਠਾਨੇ ਕਿਞ੍ਚਿ ਸੁਕਾਰਣਂ ਉਪ੍ਪਨ੍ਨਪੁਬ੍ਬ’’ਨ੍ਤਿ ਅਦ੍ਦਸ ਕਸ੍ਸਪਬੁਦ੍ਧਕਾਲੇ ਗਵੇਸਿਨਾ ਉਪਾਸਕੇਨ ਕਤਂ ਸੁਕਾਰਣਂ. ਅਥਸ੍ਸ ਏਤਦਹੋਸਿ – ‘‘ਇਦਂ ਸੁਕਾਰਣਂ ਭਿਕ੍ਖੁਸਙ੍ਘਸ੍ਸ ਅਪਾਕਟਂ ਪਟਿਚ੍ਛਨ੍ਨਂ, ਹਨ੍ਦ ਨਂ ਭਿਕ੍ਖੁਸਙ੍ਘਸ੍ਸ ਪਾਕਟਂ ਕਰੋਮੀ’’ਤਿ ਮਗ੍ਗਾ ਓਕ੍ਕਮ੍ਮ ਅਞ੍ਞਤਰਸ੍ਮਿਂ ਪਦੇਸੇ ਠਿਤੋਵ ਸਿਤਪਾਤੁਕਮ੍ਮਂ ਅਕਾਸਿ, ਅਗ੍ਗਗ੍ਗਦਨ੍ਤੇ ਦਸ੍ਸੇਤ੍ਵਾ ਮਨ੍ਦਹਸਿਤਂ ਹਸਿ. ਯਥਾ ਹਿ ਲੋਕਿਯਮਨੁਸ੍ਸਾ ਉਦਰਂ ਪਹਰਨ੍ਤਾ ‘‘ਕਹਂ ਕਹ’’ਨ੍ਤਿ ਹਸਨ੍ਤਿ, ਨ ਏਵਂ ਬੁਦ੍ਧਾ. ਬੁਦ੍ਧਾਨਂ ਪਨ ਹਸਿਤਂ ਹਟ੍ਠਪਹਟ੍ਠਾਕਾਰਮਤ੍ਤਮੇਵ ਹੋਤਿ.
ਹਸਿਤਞ੍ਚ ਨਾਮੇਤਂ ਤੇਰਸਹਿ ਸੋਮਨਸ੍ਸਸਹਗਤਚਿਤ੍ਤੇਹਿ ਹੋਤਿ. ਤਤ੍ਥ ਲੋਕਿਯਮਹਾਜਨੋ ਅਕੁਸਲਤੋ ਚਤੂਹਿ, ਕਾਮਾਵਚਰਕੁਸਲਤੋ ਚਤੂਹੀਤਿ ਅਟ੍ਠਹਿ ਚਿਤ੍ਤੇਹਿ ਹਸਤਿ, ਸੇਖਾ ਅਕੁਸਲਤੋ ਦਿਟ੍ਠਿਗਤਸਮ੍ਪਯੁਤ੍ਤਾਨਿ ਦ੍ਵੇ ਅਪਨੇਤ੍ਵਾ ਛਹਿ ਚਿਤ੍ਤੇਹਿ ਹਸਨ੍ਤਿ, ਖੀਣਾਸਵਾ ਚਤੂਹਿ ਸਹੇਤੁਕਕਿਰਿਯਚਿਤ੍ਤੇਹਿ, ਏਕੇਨ ਅਹੇਤੁਕਕਿਰਿਯਚਿਤ੍ਤੇਨਾਤਿ ਪਞ੍ਚਹਿ ਚਿਤ੍ਤੇਹਿ ਹਸਨ੍ਤਿ. ਤੇਸੁਪਿ ਬਲਵਾਰਮ੍ਮਣੇ ਆਪਾਥਮਾਗਤੇ ਦ੍ਵੀਹਿ ਞਾਣਸਮ੍ਪਯੁਤ੍ਤਚਿਤ੍ਤੇਹਿ ਹਸਨ੍ਤਿ, ਦੁਬ੍ਬਲਾਰਮ੍ਮਣੇ ਦੁਹੇਤੁਕਚਿਤ੍ਤਦ੍ਵਯੇਨ ਚ ਅਹੇਤੁਕਚਿਤ੍ਤੇਨ ਚਾਤਿ ਤੀਹਿ ਚਿਤ੍ਤੇਹਿ ਹਸਨ੍ਤਿ. ਇਮਸ੍ਮਿਂ ਪਨ ਠਾਨੇ ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁਸੋਮਨਸ੍ਸਸਹਗਤਚਿਤ੍ਤਂ ਭਗਵਤੋ ਪਹਟ੍ਠਾਕਾਰਮਤ੍ਤਹਸਿਤਂ ਉਪ੍ਪਾਦੇਤਿ.
ਤਂ ਪਨੇਤਂ ਹਸਿਤਂ ਏਵਂ ਅਪ੍ਪਮਤ੍ਤਕਮ੍ਪਿ ਥੇਰਸ੍ਸ ਪਾਕਟਂ ਅਹੋਸਿ. ਕਥਂ? ਤਥਾਰੂਪੇ ਹਿ ਕਾਲੇ ਤਥਾਗਤਸ੍ਸ ਚਤੂਹਿ ਦਾਠਾਹਿ ਚਾਤੁਦ੍ਦੀਪਿਕਮਹਾਮੇਘਮੁਖਤੋ ਸਮੋਸਰਿਤਾ ਵਿਜ੍ਜੁਲਤਾ ਵਿਯ ਵਿਰੋਚਮਾਨਾ ਮਹਾਤਾਲਕ੍ਖਨ੍ਧਪ੍ਪਮਾਣਾ ਰਸ੍ਮਿਵਟ੍ਟਿਯੋ ਉਟ੍ਠਹਿਤ੍ਵਾ ਤਿਕ੍ਖਤ੍ਤੁਂ ਸਿਰਵਰਂ ਪਦਕ੍ਖਿਣਂ ਕਤ੍ਵਾ ਦਾਠਗ੍ਗੇਸੁਯੇਵ ਅਨ੍ਤਰਧਾਯਨ੍ਤਿ. ਤੇਨ ਸਞ੍ਞਾਣੇਨ ਆਯਸ੍ਮਾ ਆਨਨ੍ਦੋ ਭਗਵਤੋ ਪਚ੍ਛਤੋ ਗਚ੍ਛਮਾਨੋਪਿ ਸਿਤਪਾਤੁਭਾਵਂ ਜਾਨਾਤਿ.
ਇਦ੍ਧਨ੍ਤਿ ਸਮਿਦ੍ਧਂ. ਫੀਤਨ੍ਤਿ ਅਤਿਸਮਿਦ੍ਧਂ ਸਬ੍ਬਪਾਲਿਫੁਲ੍ਲਂ ਵਿਯ. ਆਕਿਣ੍ਣਮਨੁਸ੍ਸਨ੍ਤਿ ਜਨਸਮਾਕੁਲਂ. ਸੀਲੇਸੁ ਅਪਰਿਪੂਰਕਾਰੀਤਿ ਪਞ੍ਚਸੁ ਸੀਲੇਸੁ ਅਸਮਤ੍ਤਕਾਰੀ. ਪਟਿਦੇਸਿਤਾਨੀਤਿ ਉਪਾਸਕਭਾਵਂ ਪਟਿਦੇਸਿਤਾਨਿ. ਸਮਾਦਪਿਤਾਨੀਤਿ ਸਰਣੇਸੁ ਪਤਿਟ੍ਠਾਪਿਤਾਨੀਤਿ ਅਤ੍ਥੋ. ਇਚ੍ਚੇਤਂ ਸਮਸਮਨ੍ਤਿ ਇਤਿ ਏਤਂ ਕਾਰਣਂ ਸਬ੍ਬਾਕਾਰਤੋ ਸਮਭਾਵੇਨੇਵ ਸਮਂ, ਨ ਏਕਦੇਸੇਨ. ਨਤ੍ਥਿ ਕਿਞ੍ਚਿ ਅਤਿਰੇਕਨ੍ਤਿ ਮਯ੍ਹਂ ਇਮੇਹਿ ਕਿਞ੍ਚਿ ਅਤਿਰੇਕਂ ਨਤ੍ਥਿ. ਹਨ੍ਦਾਤਿ ਵਵਸ੍ਸਗ੍ਗਤ੍ਥੇ ਨਿਪਾਤੋ. ਅਤਿਰੇਕਾਯਾਤਿ ਵਿਸੇਸਕਾਰਣਤ੍ਥਾਯ ਪਟਿਪਜ੍ਜਾਮੀਤਿ ਅਤ੍ਥੋ. ਸੀਲੇਸੁ ਪਰਿਪੂਰਕਾਰਿਂ ਧਾਰੇਥਾਤਿ ਪਞ੍ਚਸੁ ਸੀਲੇਸੁ ਸਮਤ੍ਤਕਾਰੀਤਿ ਜਾਨਾਥ. ਏਤ੍ਤਾਵਤਾ ਤੇਨ ਪਞ੍ਚ ਸੀਲਾਨਿ ਸਮਾਦਿਨ੍ਨਾਨਿ ਨਾਮ ਹੋਨ੍ਤਿ. ਕਿਮਙ੍ਗ ਪਨ ਨ ਮਯਨ੍ਤਿ ਮਯਂ ਪਨ ਕੇਨੇਵ ਕਾਰਣੇਨ ਪਰਿਪੂਰਕਾਰਿਨੋ ਨ ਭਵਿਸ੍ਸਾਮ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.
ਉਪਾਸਕਵਗ੍ਗੋ ਤਤਿਯੋ.
(੧੯) ੪. ਅਰਞ੍ਞਵਗ੍ਗੋ
੧. ਆਰਞ੍ਞਿਕਸੁਤ੍ਤਵਣ੍ਣਨਾ
੧੮੧. ਚਤੁਤ੍ਥਸ੍ਸ ਪਠਮੇ ਮਨ੍ਦਤ੍ਤਾ ਮੋਮੂਹਤ੍ਤਾਤਿ ਨੇਵ ਸਮਾਦਾਨਂ ਜਾਨਾਤਿ, ਨ ਆਨਿਸਂਸਂ. ਅਤ੍ਤਨੋ ਪਨ ਮਨ੍ਦਤ੍ਤਾ ਮੋਮੂਹਤ੍ਤਾ ਅਞ੍ਞਾਣੇਨੇਵ ਆਰਞ੍ਞਕੋ ਹੋਤਿ. ਪਾਪਿਚ੍ਛੋ ਇਚ੍ਛਾਪਕਤੋਤਿ ‘‘ਅਰਞ੍ਞੇ ਮੇ ਵਿਹਰਨ੍ਤਸ੍ਸ ‘ਅਯਂ ਆਰਞ੍ਞਕੋ’ਤਿ ਚਤੁਪਚ੍ਚਯਸਕ੍ਕਾਰਂ ਕਰਿਸ੍ਸਨ੍ਤਿ, ‘ਅਯਂ ਭਿਕ੍ਖੁ ਲਜ੍ਜੀ ਪਵਿਵਿਤ੍ਤੋ’ਤਿਆਦੀਹਿ ਚ ਗੁਣੇਹਿ ਸਮ੍ਭਾਵੇਸ੍ਸਨ੍ਤੀ’’ਤਿ ਏਵਂ ਪਾਪਿਕਾਯ ਇਚ੍ਛਾਯ ਠਤ੍ਵਾ ਤਾਯ ਏਵ ਇਚ੍ਛਾਯ ਅਭਿਭੂਤੋ ਹੁਤ੍ਵਾ ਆਰਞ੍ਞਕੋ ਹੋਤਿ. ਉਮ੍ਮਾਦਵਸੇਨ ਅਰਞ੍ਞਂ ਪਵਿਸਿਤ੍ਵਾ ਵਿਹਰਨ੍ਤੋ ਪਨ ਉਮ੍ਮਾਦਾ ਚਿਤ੍ਤਕ੍ਖੇਪਾ ਆਰਞ੍ਞਕੋ ਨਾਮ ਹੋਤਿ. ਵਣ੍ਣਿਤਨ੍ਤਿ ਇਦਂ ਆਰਞ੍ਞਕਙ੍ਗਂ ਨਾਮ ਬੁਦ੍ਧੇਹਿ ਚ ਬੁਦ੍ਧਸਾਵਕੇਹਿ ਚ ਵਣ੍ਣਿਤਂ ਪਸਤ੍ਥਨ੍ਤਿ ਆਰਞ੍ਞਕੋ ਹੋਤਿ. ਇਦਮਤ੍ਥਿਤਨ੍ਤਿ ਇਮਾਯ ਕਲ੍ਯਾਣਾਯ ਪਟਿਪਤ੍ਤਿਯਾ ਅਤ੍ਥੋ ਏਤਸ੍ਸਾਤਿ ਇਦਮਤ੍ਥੀ, ਇਦਮਤ੍ਥਿਨੋ ਭਾਵੋ ਇਦਮਤ੍ਥਿਤਾ. ਤਂ ਇਦਮਤ੍ਥਿਤਂਯੇਵ ਨਿਸ੍ਸਾਯ, ਨ ਅਞ੍ਞਂ ਕਿਞ੍ਚਿ ਲੋਕਾਮਿਸਨ੍ਤਿ ਅਤ੍ਥੋ. ਸੇਸਮੇਤ੍ਥ ਇਤੋ ਪਰੇਸੁ ਚ ਉਤ੍ਤਾਨਤ੍ਥਮੇਵ.
ਅਰਞ੍ਞਵਗ੍ਗੋ ਚਤੁਤ੍ਥੋ.
(੨੦) ੫. ਬ੍ਰਾਹ੍ਮਣਵਗ੍ਗੋ
੧. ਸੋਣਸੁਤ੍ਤਵਣ੍ਣਨਾ
੧੯੧. ਪਞ੍ਚਮਸ੍ਸ ਪਠਮੇ ਬ੍ਰਾਹ੍ਮਣਧਮ੍ਮਾਤਿ ਬ੍ਰਾਹ੍ਮਣਸਭਾਵਾ. ਸੁਨਖੇਸੂਤਿ ਕੁਕ੍ਕੁਰੇਸੁ. ਨੇਵ ਕਿਣਨ੍ਤਿ ਨ ਵਿਕ੍ਕਿਣਨ੍ਤੀਤਿ ਨ ਗਣ੍ਹਨ੍ਤਾ ਕਿਣਨ੍ਤਿ, ਨ ਦਦਨ੍ਤਾ ਵਿਕ੍ਕਿਣਨ੍ਤਿ. ਸਮ੍ਪਿਯੇਨੇਵ ਸਂਵਾਸਂ ਸਂਬਨ੍ਧਾਯ ਸਮ੍ਪਵਤ੍ਤੇਨ੍ਤੀਤਿ ਪਿਯੋ ਪਿਯਂ ਉਪਸਙ੍ਕਮਿਤ੍ਵਾ ਪਵੇਣਿਯਾ ਬਨ੍ਧਨਤ੍ਥਂ ਸਂਵਾਸਂ ਪਵਤ੍ਤਯਨ੍ਤਿ. ਉਦਰਾਵਦੇਹਕਨ੍ਤਿ ਉਦਰਂ ਅਵਦਿਹਿਤ੍ਵਾ ਉਪਚਿਨਿਤ੍ਵਾ ਪੂਰੇਤ੍ਵਾ. ਅਵਸੇਸਂ ਆਦਾਯ ਪਕ੍ਕਮਨ੍ਤੀਤਿ ਯਂ ਭੁਞ੍ਜਿਤੁਂ ਨ ਸਕ੍ਕੋਨ੍ਤਿ, ਤਂ ਭਣ੍ਡਿਕਂ ਕਤ੍ਵਾ ਗਹੇਤ੍ਵਾ ਗਚ੍ਛਨ੍ਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਂ.
੨. ਦੋਣਬ੍ਰਾਹ੍ਮਣਸੁਤ੍ਤਵਣ੍ਣਨਾ
੧੯੨. ਦੁਤਿਯੇ ਤ੍ਵਮ੍ਪਿ ਨੋਤਿ ਤ੍ਵਮ੍ਪਿ ਨੁ. ਪਵਤ੍ਤਾਰੋਤਿ ਪਵਤ੍ਤਯਿਤਾਰੋ. ਯੇਸਨ੍ਤਿ ਯੇਸਂ ਸਨ੍ਤਕਂ. ਮਨ੍ਤਪਦਨ੍ਤਿ ਵੇਦਸਙ੍ਖਾਤਂ ਮਨ੍ਤਮੇਵ. ਗੀਤਨ੍ਤਿ ਅਟ੍ਠਕਾਦੀਹਿ ਦਸਹਿ ਪੋਰਾਣਕਬ੍ਰਾਹ੍ਮਣੇਹਿ ਸਰਸਮ੍ਪਤ੍ਤਿਵਸੇਨ ਸਜ੍ਝਾਯਿਤਂ. ਪਵੁਤ੍ਤਨ੍ਤਿ ਅਞ੍ਞੇਸਂ ਵੁਤ੍ਤਂ, ਵਾਚਿਤਨ੍ਤਿ ਅਤ੍ਥੋ. ਸਮੀਹਿਤਨ੍ਤਿ ਸਮੁਪਬ੍ਯੂਲ਼੍ਹਂ ਰਾਸਿਕਤਂ, ਪਿਣ੍ਡਂ ਕਤ੍ਵਾ ਠਪਿਤਨ੍ਤਿ ਅਤ੍ਥੋ. ਤਦਨੁਗਾਯਨ੍ਤੀਤਿ ਏਤਰਹਿ ਬ੍ਰਾਹ੍ਮਣਾ ਤਂ ਤੇਹਿ ਪੁਬ੍ਬੇਹਿ ਗੀਤਂ ਅਨੁਗਾਯਨ੍ਤਿ ਅਨੁਸਜ੍ਝਾਯਨ੍ਤਿ. ਤਦਨੁਭਾਸਨ੍ਤੀਤਿ ਤਂ ਅਨੁਭਾਸਨ੍ਤਿ. ਇਦਂ ਪੁਰਿਮਸ੍ਸੇਵ ਵੇਵਚਨਂ. ਭਾਸਿਤਮਨੁਭਾਸਨ੍ਤੀਤਿ ਤੇਹਿ ਭਾਸਿਤਂ ਅਨੁਭਾਸਨ੍ਤਿ. ਸਜ੍ਝਾਯਿਤਮਨੁਸਜ੍ਝਾਯਨ੍ਤੀਤਿ ਤੇਹਿ ਸਜ੍ਝਾਯਿਤਂ ਅਨੁਸਜ੍ਝਾਯਨ੍ਤਿ. ਵਾਚਿਤਮਨੁਵਾਚੇਨ੍ਤੀਤਿ ਤੇਹਿ ਅਞ੍ਞੇਸਂ ਵਾਚਿਤਂ ਅਨੁਵਾਚੇਨ੍ਤਿ. ਸੇਯ੍ਯਥਿਦਨ੍ਤਿ ਤੇ ਕਤਮੇਤਿ ਅਤ੍ਥੋ. ਅਟ੍ਠਕੋਤਿਆਦੀਨਿ ਤੇਸਂ ਨਾਮਾਨਿ. ਤੇ ਕਿਰ ਦਿਬ੍ਬੇਨ ਚਕ੍ਖੁਨਾ ਓਲੋਕੇਤ੍ਵਾ ਪਰੂਪਘਾਤਂ ਅਕਤ੍ਵਾ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਭਗਵਤੋ ਪਾਵਚਨੇਨ ਸਹ ਸਂਸਨ੍ਦੇਤ੍ਵਾ ਮਨ੍ਤੇ ਗਨ੍ਥੇਸੁਂ. ਅਪਰਾਪਰੇ ਪਨ ਬ੍ਰਾਹ੍ਮਣਾ ਪਾਣਾਤਿਪਾਤਾਦੀਨਿ ਪਕ੍ਖਿਪਿਤ੍ਵਾ ਤਯੋ ਵੇਦੇ ਭਿਨ੍ਦਿਤ੍ਵਾ ਬੁਦ੍ਧਵਚਨੇਨ ਸਦ੍ਧਿਂ ਵਿਰੁਦ੍ਧੇ ਅਕਂਸੁ. ਤ੍ਯਾਸ੍ਸੁ’ਮੇਤਿ ਏਤ੍ਥ ਅਸ੍ਸੂਤਿ ਨਿਪਾਤਮਤ੍ਤਂ, ਤੇ ਬ੍ਰਾਹ੍ਮਣਾ ਇਮੇ ਪਞ੍ਚ ਬ੍ਰਾਹ੍ਮਣੇ ਪਞ੍ਞਾਪੇਨ੍ਤੀਤਿ ਅਤ੍ਥੋ.
ਮਨ੍ਤੇ ਅਧੀਯਮਾਨੋਤਿ ਵੇਦੇ ਸਜ੍ਝਾਯਨ੍ਤੋ ਗਣ੍ਹਨ੍ਤੋ. ਆਚਰਿਯਧਨਨ੍ਤਿ ਆਚਰਿਯਦਕ੍ਖਿਣਂ ਆਚਰਿਯਭਾਗਂ. ਨ ਇਸ੍ਸਤ੍ਥੇਨਾਤਿ ਨ ਯੋਧਾਜੀਵਕਮ੍ਮੇਨ ਉਪ੍ਪਾਦੇਤਿ. ਨ ਰਾਜਪੋਰਿਸੇਨਾਤਿ ਨ ਰਾਜੁਪਟ੍ਠਾਕਭਾਵੇਨ. ਕੇਵਲਂ ਭਿਕ੍ਖਾਚਰਿਯਾਯਾਤਿ ਸੁਦ੍ਧਾਯ ਭਿਕ੍ਖਾਚਰਿਯਾਯ ਏਵ. ਕਪਾਲਂ ਅਨਤਿਮਞ੍ਞਮਾਨੋਤਿ ਤਂ ਭਿਕ੍ਖਾਭਾਜਨਂ ਅਨਤਿਮਞ੍ਞਮਾਨੋ. ਸੋ ਹਿ ਪੁਣ੍ਣਪਤ੍ਤਂ ਆਦਾਯ ਸੀਸਂ ਨ੍ਹਾਤੋ ਕੁਲਦ੍ਵਾਰੇਸੁ ਠਤ੍ਵਾ ‘‘ਅਹਂ ਅਟ੍ਠਚਤ੍ਤਾਲੀਸ ਵਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਿਂ, ਮਨ੍ਤਾਪਿ ਮੇ ਗਹਿਤਾ, ਆਚਰਿਯਸ੍ਸ ਆਚਰਿਯਧਨਂ ਦਸ੍ਸਾਮਿ, ਧਨਂ ਮੇ ਦੇਥਾ’’ਤਿ ਯਾਚਤਿ. ਤਂ ਸੁਤ੍ਵਾ ਮਨੁਸ੍ਸਾ ਯਥਾਸਤ੍ਤਿ ਯਥਾਬਲਂ ਅਟ੍ਠਪਿ ਸੋਲ਼ਸਪਿ ਸਤਮ੍ਪਿ ਸਹਸ੍ਸਮ੍ਪਿ ਦੇਨ੍ਤਿ. ਏਵਂ ਸਕਲਗਾਮਂ ਚਰਿਤ੍ਵਾ ਲਦ੍ਧਧਨਂ ਆਚਰਿਯਸ੍ਸ ਨਿਯ੍ਯਾਦੇਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਏਵਂ ਖੋ ਦੋਣ ਬ੍ਰਾਹ੍ਮਣੋ ਬ੍ਰਹ੍ਮਸਮੋ ਹੋਤੀਤਿ ਏਵਂ ਬ੍ਰਹ੍ਮਵਿਹਾਰੇਹਿ ਸਮਨ੍ਨਾਗਤਤ੍ਤਾ ਬ੍ਰਾਹ੍ਮਣੋ ਬ੍ਰਹ੍ਮਸਮੋ ਨਾਮ ਹੋਤਿ.
ਨੇਵ ਕਯੇਨ ਨ ਵਿਕ੍ਕਯੇਨਾਤਿ ਨੇਵ ਅਤ੍ਤਨਾ ਕਯਂ ਕਤ੍ਵਾ ਗਣ੍ਹਾਤਿ, ਨ ਪਰੇਨ ਵਿਕ੍ਕਯਂ ਕਤ੍ਵਾ ਦਿਨ੍ਨਂ. ਉਦਕੂਪਸ੍ਸਟ੍ਠਨ੍ਤਿ ਉਦਕੇਨ ਉਪਸ੍ਸਟ੍ਠਂ ਪਰਿਚ੍ਚਤ੍ਤਂ. ਸੋ ਹਿ ਯਸ੍ਮਿਂ ਕੁਲੇ ਵਯਪ੍ਪਤ੍ਤਾ ਦਾਰਿਕਾ ਅਤ੍ਥਿ, ਗਨ੍ਤ੍ਵਾ ਤਸ੍ਸ ਦ੍ਵਾਰੇ ਤਿਟ੍ਠਤਿ. ‘‘ਕਸ੍ਮਾ ਠਿਤੋਸੀ’’ਤਿ ਵੁਤ੍ਤੇ ‘‘ਅਹਂ ਅਟ੍ਠਚਤ੍ਤਾਲੀਸ ਵਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਿਂ, ਤਂ ਸਬ੍ਬਂ ਤੁਮ੍ਹਾਕਂ ਦੇਮਿ, ਤੁਮ੍ਹੇ ਮਯ੍ਹਂ ਦਾਰਿਕਂ ਦੇਥਾ’’ਤਿ ਵਦਤਿ. ਤੇ ਦਾਰਿਕਂ ਆਨੇਤ੍ਵਾ ਤਸ੍ਸ ਹਤ੍ਥੇ ਉਦਕਂ ਪਾਤੇਤ੍ਵਾ ਦੇਨ੍ਤਿ. ਸੋ ਤਂ ਉਦਕੂਪਸ੍ਸਟ੍ਠਂ ਭਰਿਯਂ ਗਣ੍ਹਿਤ੍ਵਾ ਗਚ੍ਛਤਿ. ਅਤਿਮੀਲ਼੍ਹਜੋਤਿ ਅਤਿਮੀਲ਼੍ਹੇ ਮਹਾਗੂਥਰਾਸਿਮ੍ਹਿ ਜਾਤੋ. ਤਸ੍ਸ ਸਾਤਿ ਤਸ੍ਸ ਏਸਾ. ਨ ਦਵਤ੍ਥਾਤਿ ਨ ਕੀਲ਼ਨਤ੍ਥਾ. ਨ ਰਤਤ੍ਥਾਤਿ ਨ ਕਾਮਰਤਿਅਤ੍ਥਾ. ਮੇਥੁਨਂ ਉਪ੍ਪਾਦੇਤ੍ਵਾਤਿ ਧੀਤਰਂ ਵਾ ਪੁਤ੍ਤਂ ਵਾ ਉਪ੍ਪਾਦੇਤ੍ਵਾ ‘‘ਇਦਾਨਿ ਪਵੇਣਿ ਘਟੀਯਿਸ੍ਸਤੀ’’ਤਿ ਨਿਕ੍ਖਮਿਤ੍ਵਾ ਪਬ੍ਬਜਤਿ. ਸੁਗਤਿਂ ਸਗ੍ਗਂ ਲੋਕਨ੍ਤਿ ਬ੍ਰਹ੍ਮਲੋਕਮੇਵ ਸਨ੍ਧਾਯੇਤਂ ਵੁਤ੍ਤਂ. ਦੇਵਸਮੋ ਹੋਤੀਤਿ ਦਿਬ੍ਬਵਿਹਾਰੇਹਿ ਸਮਨ੍ਨਾਗਤਤ੍ਤਾ ਦੇਵਸਮੋ ਨਾਮ ਹੋਤਿ.
ਤਮੇਵ ਪੁਤ੍ਤਸ੍ਸਾਦਂ ਨਿਕਾਮਯਮਾਨੋਤਿ ਯ੍ਵਾਸ੍ਸ ਧੀਤਰਂ ਵਾ ਪੁਤ੍ਤਂ ਵਾ ਜਾਤਂ ਦਿਸ੍ਵਾ ਪੁਤ੍ਤਪੇਮਂ ਪੁਤ੍ਤਸ੍ਸਾਦੋ ਉਪ੍ਪਜ੍ਜਤਿ, ਤਂ ਪਤ੍ਥਯਮਾਨੋ ਇਚ੍ਛਮਾਨੋ. ਕੁਟੁਮ੍ਬਂ ਅਜ੍ਝਾਵਸਤੀਤਿ ਕੁਟੁਮ੍ਬਂ ਸਣ੍ਠਪੇਤ੍ਵਾ ਕੁਟੁਮ੍ਬਮਜ੍ਝੇ ਵਸਤਿ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.
੩. ਸਙ੍ਗਾਰਵਸੁਤ੍ਤਵਣ੍ਣਨਾ
੧੯੩. ਤਤਿਯੇ ਪਗੇਵਾਤਿ ਪਠਮਞ੍ਞੇਵ. ਕਾਮਰਾਗਪਰਿਯੁਟ੍ਠਿਤੇਨਾਤਿ ਕਾਮਰਾਗਗ੍ਗਹਿਤੇਨ. ਕਾਮਰਾਗਪਰੇਤੇਨਾਤਿ ਕਾਮਰਾਗਾਨੁਗਤੇਨ. ਨਿਸ੍ਸਰਣਨ੍ਤਿ ਤਿਵਿਧਂ ਕਾਮਰਾਗਸ੍ਸ ਨਿਸ੍ਸਰਣਂ ਵਿਕ੍ਖਮ੍ਭਨਨਿਸ੍ਸਰਣਂ, ਤਦਙ੍ਗਨਿਸ੍ਸਰਣਂ, ਸਮੁਚ੍ਛੇਦਨਿਸ੍ਸਰਣਨ੍ਤਿ. ਤਤ੍ਥ ਅਸੁਭੇ ਪਠਮਜ੍ਝਾਨਂ ਵਿਕ੍ਖਮ੍ਭਨਨਿਸ੍ਸਰਣਂ ਨਾਮ, ਵਿਪਸ੍ਸਨਾ ਤਦਙ੍ਗਨਿਸ੍ਸਰਣਂ ਨਾਮ, ਅਰਹਤ੍ਤਮਗ੍ਗੋ ਸਮੁਚ੍ਛੇਦਨਿਸ੍ਸਰਣਂ ਨਾਮ. ਤਂ ਤਿਵਿਧਮ੍ਪਿ ਨਪ੍ਪਜਾਨਾਤੀਤਿ ਅਤ੍ਥੋ. ਅਤ੍ਤਤ੍ਥਮ੍ਪੀਤਿਆਦੀਸੁ ਅਰਹਤ੍ਤਸਙ੍ਖਾਤੋ ਅਤ੍ਤਨੋ ਅਤ੍ਥੋ ਅਤ੍ਤਤ੍ਥੋ ਨਾਮ, ਪਚ੍ਚਯਦਾਯਕਾਨਂ ਅਤ੍ਥੋ ਪਰਤ੍ਥੋ ਨਾਮ, ਸ੍ਵੇਵ ਦੁਵਿਧੋ ਉਭਯਤ੍ਥੋ ਨਾਮ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ.
ਅਯਂ ਪਨ ਵਿਸੇਸੋ – ਬ੍ਯਾਪਾਦਸ੍ਸ ਨਿਸ੍ਸਰਣਨ੍ਤਿਆਦੀਸੁ ਹਿ ਦ੍ਵੇਵ ਨਿਸ੍ਸਰਣਾਨਿ ਵਿਕ੍ਖਮ੍ਭਨਨਿਸ੍ਸਰਣਞ੍ਚ ਸਮੁਚ੍ਛੇਦਨਿਸ੍ਸਰਣਞ੍ਚ. ਤਤ੍ਥ ਬ੍ਯਾਪਾਦਸ੍ਸ ਤਾਵ ਮੇਤ੍ਤਾਯ ਪਠਮਜ੍ਝਾਨਂ ਵਿਕ੍ਖਮ੍ਭਨਨਿਸ੍ਸਰਣਂ ਨਾਮ, ਅਨਾਗਾਮਿਮਗ੍ਗੋ ਸਮੁਚ੍ਛੇਦਨਿਸ੍ਸਰਣਂ, ਥਿਨਮਿਦ੍ਧਸ੍ਸ ਆਲੋਕਸਞ੍ਞਾ ਵਿਕ੍ਖਮ੍ਭਨਨਿਸ੍ਸਰਣਂ, ਅਰਹਤ੍ਤਮਗ੍ਗੋ ਸਮੁਚ੍ਛੇਦਨਿਸ੍ਸਰਣਂ. ਉਦ੍ਧਚ੍ਚਕੁਕ੍ਕੁਚ੍ਚਸ੍ਸ ਯੋ ਕੋਚਿ ਸਮਥੋ ਵਿਕ੍ਖਮ੍ਭਨਨਿਸ੍ਸਰਣਂ, ਉਦ੍ਧਚ੍ਚਸ੍ਸ ਪਨੇਤ੍ਥ ਅਰਹਤ੍ਤਮਗ੍ਗੋ, ਕੁਕ੍ਕੁਚ੍ਚਸ੍ਸ ਅਨਾਗਾਮਿਮਗ੍ਗੋ ਸਮੁਚ੍ਛੇਦਨਿਸ੍ਸਰਣਂ. ਵਿਚਿਕਿਚ੍ਛਾਯ ਧਮ੍ਮਵਵਤ੍ਥਾਨਂ ਵਿਕ੍ਖਮ੍ਭਨਨਿਸ੍ਸਰਣਂ, ਪਠਮਮਗ੍ਗੋ ਸਮੁਚ੍ਛੇਦਨਿਸ੍ਸਰਣਂ.
ਯਾ ਪਨੇਤ੍ਥ ਸੇਯ੍ਯਥਾਪਿ, ਬ੍ਰਾਹ੍ਮਣ, ਉਦਪਤ੍ਤੋ ਸਂਸਟ੍ਠੋ ਲਾਖਾਯ ਵਾਤਿਆਦਿਕਾ ਉਪਮਾ ਵੁਤ੍ਤਾ, ਤਾਸੁ ਉਦਪਤ੍ਤੋਤਿ ਉਦਕਭਰਿਤਾ ਪਾਤਿ. ਸਂਸਟ੍ਠੋਤਿ ਵਣ੍ਣਭੇਦਕਰਣਵਸੇਨ ਸਂਸਟ੍ਠੋ. ਉਕ੍ਕੁਧਿਤੋਤਿ ਕੁਧਿਤੋ. ਉਸ੍ਸਦਕਜਾਤੋਤਿ ਉਸੁਮਕਜਾਤੋ. ਸੇਵਾਲਪਣਕਪਰਿਯੋਨਦ੍ਧੋਤਿ ਤਿਲਬੀਜਕਾਦਿਭੇਦੇਨ ਸੇਵਾਲੇਨ ਵਾ ਨੀਲਮਣ੍ਡੂਕਪਿਟ੍ਠਿਵਣ੍ਣੇਨ ਵਾ ਉਦਕਪਿਟ੍ਠਿਂ ਛਾਦੇਤ੍ਵਾ ਨਿਬ੍ਬਤ੍ਤੇਨ ਪਣਕੇਨ ਪਰਿਯੋਨਦ੍ਧੋ. ਵਾਤੇਰਿਤੋਤਿ ਵਾਤੇਨ ਏਰਿਤੋ ਕਮ੍ਪਿਤੋ. ਆਵਿਲੋਤਿ ਅਪ੍ਪਸਨ੍ਨੋ. ਲੁਲ਼ਿਤੋਤਿ ਅਸਨ੍ਨਿਸਿਨ੍ਨੋ. ਕਲਲੀਭੂਤੋਤਿ ਕਦ੍ਦਮੀਭੂਤੋ. ਅਨ੍ਧਕਾਰੇ ਨਿਕ੍ਖਿਤ੍ਤੋਤਿ ਕੋਟ੍ਠਕਨ੍ਤਰਾਦਿਭੇਦੇ ਅਨਾਲੋਕਟ੍ਠਾਨੇ ਠਪਿਤੋ. ਇਮਸ੍ਮਿਂ ਸੁਤ੍ਤੇ ਭਗਵਾ ਤੀਹਿ ਭਵੇਹਿ ਦੇਸਨਂ ਨਿਵਟ੍ਟੇਤ੍ਵਾ ਅਰਹਤ੍ਤਨਿਕੂਟੇਨ ਨਿਟ੍ਠਪੇਸਿ, ਬ੍ਰਾਹ੍ਮਣੋ ਪਨ ਸਰਣਮਤ੍ਤੇ ਪਤਿਟ੍ਠਿਤੋਤਿ.
੪. ਕਾਰਣਪਾਲੀਸੁਤ੍ਤਵਣ੍ਣਨਾ
੧੯੪. ਚਤੁਤ੍ਥੇ ਕਾਰਣਪਾਲੀਤਿ ਪਾਲੋਤਿ ਤਸ੍ਸ ਨਾਮਂ, ਰਾਜਕੁਲਾਨਂ ਪਨ ਕਮ੍ਮਨ੍ਤੇ ਕਾਰੇਤੀਤਿ ਕਾਰਣਪਾਲੀ ਨਾਮ ਜਾਤੋ. ਕਮ੍ਮਨ੍ਤਂ ਕਾਰੇਤੀਤਿ ਪਾਤੋਵ ਉਟ੍ਠਾਯ ਦ੍ਵਾਰਟ੍ਟਾਲਕਪਾਕਾਰੇ ਅਕਤੇ ਕਾਰੇਤਿ, ਜਿਣ੍ਣੇ ਪਟਿਜਗ੍ਗਾਪੇਤਿ. ਪਿਙ੍ਗਿਯਾਨਿਂ ਬ੍ਰਾਹ੍ਮਣਨ੍ਤਿ ਏਵਂਨਾਮਕਂ ਅਨਾਗਾਮਿਫਲੇ ਪਤਿਟ੍ਠਿਤਂ ਅਰਿਯਸਾਵਕਂ ਬ੍ਰਾਹ੍ਮਣਂ. ਸੋ ਕਿਰ ਪਾਤੋਵ ਉਟ੍ਠਾਯ ਗਨ੍ਧਮਾਲਾਦੀਨਿ ਗਾਹਾਪੇਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਨਗਰਂ ਆਗਚ੍ਛਤਿ, ਇਦਂ ਬ੍ਰਾਹ੍ਮਣਸ੍ਸ ਦੇਵਸਿਕਂ ਵਤ੍ਤਨ੍ਤਿ. ਤਂ ਸੋ ਏਵਂ ਵਤ੍ਤਂ ਕਤ੍ਵਾ ਆਗਚ੍ਛਨ੍ਤਂ ਅਦ੍ਦਸ. ਏਤਦਵੋਚਾਤਿ ‘‘ਅਯਂ ਬ੍ਰਾਹ੍ਮਣੋ ਪਞ੍ਞਵਾ ਞਾਣੁਤ੍ਤਰੋ, ਕਹਂ ਨੁ ਖੋ ਪਾਤੋਵ ਗਨ੍ਤ੍ਵਾ ਆਗਚ੍ਛਤੀ’’ਤਿ ਚਿਨ੍ਤੇਤ੍ਵਾ ਅਨੁਕ੍ਕਮੇਨ ਸਨ੍ਤਿਕਂ ਆਗਤਂ ਸਞ੍ਜਾਨਿਤ੍ਵਾ ‘‘ਹਨ੍ਦ ਕੁਤੋ ਨੂ’’ਤਿਆਦਿਵਚਨਂ ਅਵੋਚ.
ਤਤ੍ਥ ਦਿਵਾ ਦਿਵਸ੍ਸਾਤਿ ਦਿਵਸਸ੍ਸਾਪਿ ਦਿਵਾ, ਮਜ੍ਝਨ੍ਹਿਕਕਾਲੇਤਿ ਅਤ੍ਥੋ. ਪਣ੍ਡਿਤੋ ਮਞ੍ਞੇਤਿ ਭਵਂ ਪਿਙ੍ਗਿਯਾਨੀ ਸਮਣਂ ਗੋਤਮਂ ਪਣ੍ਡਿਤੋਤਿ ਮਞ੍ਞਤਿ, ਉਦਾਹੁ ਨੋਤਿ ਅਯਮੇਤ੍ਥ ਅਤ੍ਥੋ. ਕੋ ਚਾਹਂ, ਭੋਤਿ, ਭੋ, ਸਮਣਸ੍ਸ ਗੋਤਮਸ੍ਸ ਪਞ੍ਞਾਵੇਯ੍ਯਤ੍ਤਿਯਜਾਨਨੇ ਅਹਂ ਕੋ ਨਾਮ? ਕੋ ਚ ਸਮਣਸ੍ਸ ਗੋਤਮਸ੍ਸ ਪਞ੍ਞਾਵੇਯ੍ਯਤ੍ਤਿਯਂ ਜਾਨਿਸ੍ਸਾਮੀਤਿ ਕੁਤੋ ਚਾਹਂ ਸਮਣਸ੍ਸ ਗੋਤਮਸ੍ਸ ਪਞ੍ਞਾਵੇਯ੍ਯਤ੍ਤਿਯਂ ਜਾਨਿਸ੍ਸਾਮਿ, ਕੇਨ ਨਾਮ ਕਾਰਣੇਨ ਜਾਨਿਸ੍ਸਾਮੀਤਿ ਏਵਂ ਸਬ੍ਬਥਾਪਿ ਅਤ੍ਤਨੋ ਅਜਾਨਨਭਾਵਂ ਦੀਪੇਤਿ. ਸੋਪਿ ਨੂਨਸ੍ਸ ਤਾਦਿਸੋਵਾਤਿ ਯੋ ਸਮਣਸ੍ਸ ਗੋਤਮਸ੍ਸ ਪਞ੍ਞਾਵੇਯ੍ਯਤ੍ਤਿਯਂ ਜਾਨੇਯ੍ਯ, ਸੋਪਿ ਨੂਨ ਦਸ ਪਾਰਮਿਯੋ ਪੂਰੇਤ੍ਵਾ ਸਬ੍ਬਞ੍ਞੁਤਂ ਪਤ੍ਤੋ ਤਾਦਿਸੋ ਬੁਦ੍ਧੋਯੇਵ ਭਵੇਯ੍ਯ. ਸਿਨੇਰੁਂ ਵਾ ਹਿ ਪਥਵਿਂ ਵਾ ਆਕਾਸਂ ਵਾ ਪਮੇਤੁਕਾਮੇਨ ਤਪ੍ਪਮਾਣੋ ਦਣ੍ਡੋ ਵਾ ਰਜ੍ਜੁ ਵਾ ਲਦ੍ਧੁਂ ਵਟ੍ਟਤਿ, ਸਮਣਸ੍ਸ ਗੋਤਮਸ੍ਸ ਪਞ੍ਞਂ ਜਾਨਨ੍ਤੇਨਪਿ ਤਸ੍ਸ ਞਾਣਸਦਿਸਮੇਵ ਸਬ੍ਬਞ੍ਞੁਤਞ੍ਞਾਣਂ ਲਦ੍ਧੁਂ ਵਟ੍ਟਤੀਤਿ ਦੀਪੇਤਿ. ਆਦਰਵਸੇਨ ਪਨੇਤ੍ਥ ਆਮੇਡਿਤਂ ਕਤਂ. ਉਲ਼ਾਰਾਯਾਤਿ ਉਤ੍ਤਮਾਯ ਸੇਟ੍ਠਾਯ. ਕੋ ਚਾਹਂ, ਭੋਤਿ, ਭੋ, ਅਹਂ ਸਮਣਸ੍ਸ ਗੋਤਮਸ੍ਸ ਪਸਂਸਨੇ ਕੋ ਨਾਮ. ਕੋ ਚ ਸਮਣਂ ਗੋਤਮਂ ਪਸਂਸਿਸ੍ਸਾਮੀਤਿ ਕੇਨ ਕਾਰਣੇਨ ਪਸਂਸਿਸ੍ਸਾਮਿ.
ਪਸਤ੍ਥਪ੍ਪਸਤ੍ਥੋਤਿ ਸਬ੍ਬਗੁਣਾਨਂ ਉਪਰਿ ਚਰੇਹਿ ਸਬ੍ਬਲੋਕਪਸਤ੍ਥੇਹਿ ਅਤ੍ਤਨੋ ਗੁਣੇਹੇਵ ਪਸਤ੍ਥੋ, ਨ ਤਸ੍ਸ ਅਞ੍ਞੇਹਿ ਪਸਂਸਨਕਿਚ੍ਚਂ ਅਤ੍ਥਿ. ਯਥਾ ਹਿ ਚਮ੍ਪਕਪੁਪ੍ਫਂ ਵਾ ਨੀਲੁਪ੍ਪਲਂ ਵਾ ਪਦੁਮਂ ਵਾ ਲੋਹਿਤਚਨ੍ਦਨਂ ਵਾ ਅਤ੍ਤਨੋ ਵਣ੍ਣਗਨ੍ਧਸਿਰਿਯਾਵ ਪਾਸਾਦਿਕਞ੍ਚੇਵ ਸੁਗਨ੍ਧਞ੍ਚ, ਨ ਤਸ੍ਸ ਆਗਨ੍ਤੁਕੇਹਿ ਵਣ੍ਣਗਨ੍ਧੇਹਿ ਥੋਮਨਕਿਚ੍ਚਂ ਅਤ੍ਥਿ. ਯਥਾ ਚ ਮਣਿਰਤਨਂ ਵਾ ਚਨ੍ਦਮਣ੍ਡਲਂ ਵਾ ਅਤ੍ਤਨੋ ਆਲੋਕੇਨੇਵ ਓਭਾਸਤਿ, ਨ ਤਸ੍ਸ ਅਞ੍ਞੇਨ ਓਭਾਸਨਕਿਚ੍ਚਂ ਅਤ੍ਥਿ, ਏਵਂ ਸਮਣੋ ਗੋਤਮੋ ਸਬ੍ਬਲੋਕਪਸਤ੍ਥੇਹਿ ਅਤ੍ਤਨੋ ਗੁਣੇਹੇਵ ਪਸਤ੍ਥੋ ਥੋਮਿਤੋ, ਸਬ੍ਬਲੋਕਸ੍ਸ ਸੇਟ੍ਠਤਂ ਪਾਪਿਤੋ. ਨ ਤਸ੍ਸ ਅਞ੍ਞੇਨ ਪਸਂਸਨਕਿਚ੍ਚਂ ਅਤ੍ਥਿ.
ਪਸਤ੍ਥੇਹਿ ਵਾ ਪਸਤ੍ਥੋਤਿਪਿ ਪਸਤ੍ਥਪ੍ਪਸਤ੍ਥੋ. ਕੇ ਪਨ ਪਸਤ੍ਥਾ ਨਾਮ? ਰਾਜਾ ਪਸੇਨਦਿ ਕੋਸਲੋ ਕਾਸਿਕੋਸਲਵਾਸਿਕੇਹਿ ਪਸਤ੍ਥੋ, ਬਿਮ੍ਬਿਸਾਰੋ ਅਙ੍ਗਮਗਧਵਾਸੀਹਿ, ਵੇਸਾਲਿਕਾ ਲਿਚ੍ਛਵੀ ਵਜ੍ਜਿਤਟ੍ਠਵਾਸੀਹਿ ਪਸਤ੍ਥਾ, ਪਾਵੇਯ੍ਯਕਾ ਮਲ੍ਲਾ ਕੋਸਿਨਾਰਕਾ ਮਲ੍ਲਾ ਅਞ੍ਞੇਪਿ ਤੇ ਤੇ ਖਤ੍ਤਿਯਾ ਤੇਹਿ ਤੇਹਿ ਜਾਨਪਦੇਹਿ ਪਸਤ੍ਥਾ, ਚਙ੍ਕਿਆਦਯੋ ਬ੍ਰਾਹ੍ਮਣਾ ਬ੍ਰਾਹ੍ਮਣਗਣੇਹਿ, ਅਨਾਥਪਿਣ੍ਡਿਕਾਦਯੋ ਉਪਾਸਕਾ ਉਪਾਸਕਗਣੇਹਿ, ਵਿਸਾਖਾਆਦਿਕਾ ਉਪਾਸਿਕਾ ਅਨੇਕਸਤਾਹਿ ਉਪਾਸਿਕਾਹਿ, ਸਕੁਲੁਦਾਯਿਆਦਯੋ ਪਰਿਬ੍ਬਾਜਕਾ ਅਨੇਕੇਹਿ ਪਰਿਬ੍ਬਾਜਕਸਤੇਹਿ, ਉਪ੍ਪਲਵਣ੍ਣਤ੍ਥੇਰਿਆਦਿਕਾ ਮਹਾਸਾਵਿਕਾ ਅਨੇਕੇਹਿ ਭਿਕ੍ਖੁਨਿਸਤੇਹਿ, ਸਾਰਿਪੁਤ੍ਤਤ੍ਥੇਰਾਦਯੋ ਮਹਾਥੇਰਾ ਅਨੇਕਸਤੇਹਿ ਭਿਕ੍ਖੂਹਿ, ਸਕ੍ਕਾਦਯੋ ਦੇਵਾ ਅਨੇਕਸਹਸ੍ਸੇਹਿ ਦੇਵੇਹਿ, ਮਹਾਬ੍ਰਹ੍ਮਾਦਯੋ ਬ੍ਰਹ੍ਮਾਨੋ ਅਨੇਕਸਹਸ੍ਸੇਹਿ ਬ੍ਰਹ੍ਮੇਹਿ ਪਸਤ੍ਥਾ. ਤੇ ਸਬ੍ਬੇਪਿ ਦਸਬਲਂ ਥੋਮੇਨ੍ਤਿ ਵਣ੍ਣੇਨ੍ਤਿ ਪਸਂਸਨ੍ਤੀਤਿ ਭਗਵਾ ‘‘ਪਸਤ੍ਥਪ੍ਪਸਤ੍ਥੋ’’ਤਿ ਵੁਚ੍ਚਤਿ. ਅਤ੍ਥਵਸਨ੍ਤਿ ਅਤ੍ਥਾਨਿਸਂਸਂ.
ਅਥਸ੍ਸ ਸੋ ਅਤ੍ਤਨੋ ਪਸਾਦਕਾਰਣਂ ਆਚਿਕ੍ਖਨ੍ਤੋ ਸੇਯ੍ਯਥਾਪਿ, ਭੋ, ਪੁਰਿਸੋਤਿਆਦਿਮਾਹ. ਤਤ੍ਥ ਅਗ੍ਗਰਸਪਰਿਤਿਤ੍ਤੋਤਿ ਭੋਜਨਰਸੇਸੁ ਪਾਯਾਸੋ ਸ੍ਨੇਹਰਸੇਸੁ ਗੋਸਪ੍ਪਿ, ਕਸਾਵਰਸੇਸੁ ਖੁਦ੍ਦਕਮਧੁ ਅਨੇਲ਼ਕਂ, ਮਧੁਰਰਸੇਸੁ ਸਕ੍ਕਰਾਤਿ ਏਵਮਾਦਯੋ ਅਗ੍ਗਰਸਾ ਨਾਮ. ਤੇਸੁ ਯੇਨ ਕੇਨਚਿ ਪਰਿਤਿਤ੍ਤੋ ਆਕਣ੍ਠਪ੍ਪਮਾਣਂ ਭੁਞ੍ਜਿਤ੍ਵਾ ਠਿਤੋ. ਅਞ੍ਞੇਸਂ ਹੀਨਾਨਨ੍ਤਿ ਅਗ੍ਗਰਸੇਹਿ ਅਞ੍ਞੇਸਂ ਹੀਨਰਸਾਨਂ. ਸੁਤ੍ਤਸੋਤਿ ਸੁਤ੍ਤਤੋ, ਸੁਤ੍ਤਭਾਵੇਨਾਤਿ ਅਤ੍ਥੋ. ਸੇਸੁਪਿ ਏਸੇਵ ਨਯੋ. ਤਤੋ ਤਤੋਤਿ ਸੁਤ੍ਤਾਦੀਸੁ ਤਤੋ ਤਤੋ. ਅਞ੍ਞੇਸਂ ਪੁਥੁਸਮਣਬ੍ਰਾਹ੍ਮਣਾਪ੍ਪਵਾਦਾਨਨ੍ਤਿ ਯੇ ਅਞ੍ਞੇਸਂ ਪੁਥੂਨਂ ਸਮਣਬ੍ਰਾਹ੍ਮਣਾਨਂ ਲਦ੍ਧਿਸਙ੍ਖਾਤਪ੍ਪਵਾਦਾ, ਤੇਸਂ. ਨ ਪਿਹੇਤੀਤਿ ਨ ਪਤ੍ਥੇਤਿ, ਤੇ ਕਥਿਯਮਾਨੇ ਸੋਤੁਮ੍ਪਿ ਨ ਇਚ੍ਛਤਿ. ਜਿਘਚ੍ਛਾਦੁਬ੍ਬਲ੍ਯਪਰੇਤੋਤਿ ਜਿਘਚ੍ਛਾਯ ਚੇਵ ਦੁਬ੍ਬਲਭਾਵੇਨ ਚ ਅਨੁਗਤੋ. ਮਧੁਪਿਣ੍ਡਿਕਨ੍ਤਿ ਸਾਲਿਪਿਟ੍ਠਂ ਭਜ੍ਜਿਤ੍ਵਾ ਚਤੁਮਧੁਰੇਨ ਯੋਜੇਤ੍ਵਾ ਕਤਂ ਬਦ੍ਧਸਤ੍ਤੁਪਿਣ੍ਡਿਕਂ, ਮਧੁਰਪੂਵਮੇਵ ਵਾ. ਅਧਿਗਚ੍ਛੇਯ੍ਯਾਤਿ ਲਭੇਯ੍ਯ. ਅਸੇਚਨਕਨ੍ਤਿ ਮਧੁਰਭਾਵਕਰਣਤ੍ਥਾਯ ਅਞ੍ਞੇਨ ਰਸੇਨ ਅਨਾਸਿਤ੍ਤਕਂ ਓਜਵਨ੍ਤਂ ਪਣੀਤਰਸਂ.
ਹਰਿਚਨ੍ਦਨਸ੍ਸਾਤਿ ਸੁਵਣ੍ਣਵਣ੍ਣਚਨ੍ਦਨਸ੍ਸ. ਲੋਹਿਤਚਨ੍ਦਨਸ੍ਸਾਤਿ ਰਤ੍ਤਵਣ੍ਣਚਨ੍ਦਨਸ੍ਸ. ਸੁਰਭਿਗਨ੍ਧਨ੍ਤਿ ਸੁਗਨ੍ਧਂ. ਦਰਥਾਦਯੋ ਵਟ੍ਟਦਰਥਾ, ਵਟ੍ਟਕਿਲਮਥਾ, ਵਟ੍ਟਪਰਿਲ਼ਾਹਾ ਏਵ. ਉਦਾਨਂ ਉਦਾਨੇਸੀਤਿ ਉਦਾਹਾਰਂ ਉਦਾਹਰਿ. ਯਥਾ ਹਿ ਯਂ ਤੇਲਂ ਮਾਨਂ ਗਹੇਤੁਂ ਨ ਸਕ੍ਕੋਤਿ, ਵਿਸ੍ਸਨ੍ਦਿਤ੍ਵਾ ਗਚ੍ਛਤਿ, ਤਂ ਅਵਸੇਕੋਤਿ ਵੁਚ੍ਚਤਿ. ਯਞ੍ਚ ਜਲਂ ਤਲ਼ਾਕਂ ਗਹੇਤੁਂ ਨ ਸਕ੍ਕੋਤਿ, ਅਜ੍ਝੋਤ੍ਥਰਿਤ੍ਵਾ ਗਚ੍ਛਤਿ, ਤਂ ਓਘੋਤਿ ਵੁਚ੍ਚਤਿ. ਏਵਮੇਵਂ ਯਂ ਪੀਤਿਵਚਨਂ ਹਦਯਂ ਗਹੇਤੁਂ ਨ ਸਕ੍ਕੋਤਿ, ਅਧਿਕਂ ਹੁਤ੍ਵਾ ਅਨ੍ਤੋ ਅਸਣ੍ਠਹਿਤ੍ਵਾ ਬਹਿ ਨਿਕ੍ਖਮਤਿ, ਤਂ ਉਦਾਨਨ੍ਤਿ ਵੁਚ੍ਚਤਿ. ਏਵਰੂਪਂ ਪੀਤਿਮਯਵਚਨਂ ਨਿਚ੍ਛਾਰੇਸੀਤਿ ਅਤ੍ਥੋ.
੫. ਪਿਙ੍ਗਿਯਾਨੀਸੁਤ੍ਤਵਣ੍ਣਨਾ
੧੯੫. ਪਞ੍ਚਮੇ ਨੀਲਾਤਿ ਇਦਂ ਸਬ੍ਬਸਙ੍ਗਾਹਿਕਂ. ਨੀਲਵਣ੍ਣਾਤਿਆਦਿ ਤਸ੍ਸੇਵ ਵਿਭਾਗਦਸ੍ਸਨਂ. ਤਤ੍ਥ ਨ ਤੇਸਂ ਪਕਤਿਵਣ੍ਣੋ ਨੀਲੋ, ਨੀਲਵਿਲੇਪਨਵਿਲਿਤ੍ਤਤ੍ਤਾ ਪਨੇਤਂ ਵੁਤ੍ਤਂ. ਨੀਲਵਤ੍ਥਾਤਿ ਪਟਦੁਕੂਲਕੋਸੇਯ੍ਯਾਦੀਨਿਪਿ ਤੇਸਂ ਨੀਲਾਨੇਵ ਹੋਨ੍ਤਿ. ਨੀਲਾਲਙ੍ਕਾਰਾਤਿ ਨੀਲਮਣੀਹਿ ਨੀਲਪੁਪ੍ਫੇਹਿ ਅਲਙ੍ਕਤਾ, ਤੇਸਂ ਹਤ੍ਥਾਲਙ੍ਕਾਰ-ਅਸ੍ਸਾਲਙ੍ਕਾਰ-ਰਥਾਲਙ੍ਕਾਰ-ਸਾਣਿਵਿਤਾਨਕਞ੍ਚੁਕਾਪਿ ਸਬ੍ਬੇ ਨੀਲਾਯੇਵ ਹੋਨ੍ਤਿ. ਇਮਿਨਾ ਨਯੇਨ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ.
ਪਦੁਮਂ ਯਥਾਤਿ ਯਥਾ ਸਤਪਤ੍ਤਂ ਰਤ੍ਤਪਦੁਮਂ. ਕੋਕਨਦਨ੍ਤਿ ਤਸ੍ਸੇਵ ਵੇਵਚਨਂ. ਪਾਤੋਤਿ ਪਗੇਵ ਸੁਰਿਯੁਗ੍ਗਮਨਕਾਲੇ. ਸਿਯਾਤਿ ਭਵੇਯ੍ਯ. ਅਵੀਤਗਨ੍ਧਨ੍ਤਿ ਅਵਿਗਤਗਨ੍ਧਂ. ਅਙ੍ਗੀਰਸਨ੍ਤਿ ਭਗਵਤੋ ਅਙ੍ਗਮਙ੍ਗੇਹਿ ਰਸ੍ਮਿਯੋ ਨਿਚ੍ਛਰਨ੍ਤਿ, ਤਸ੍ਮਾ ਅਙ੍ਗੀਰਸੋਤਿ ਵੁਚ੍ਚਤਿ. ਤਪਨ੍ਤਮਾਦਿਚ੍ਚਮਿਵਨ੍ਤਲਿਕ੍ਖੇਤਿ ਦ੍ਵਿਸਹਸ੍ਸਦੀਪਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਆਲੋਕਕਰਣਵਸੇਨ ਅਨ੍ਤਲਿਕ੍ਖੇ ਤਪਨ੍ਤਂ ਆਦਿਚ੍ਚਂ ਵਿਯ ਵਿਰੋਚਮਾਨਂ. ਅਙ੍ਗੀਰਸਂ ਪਸ੍ਸਾਤਿ ਅਤ੍ਤਾਨਮੇਵ ਵਾ ਮਹਾਜਨਂ ਵਾ ਸਨ੍ਧਾਯ ਏਵਂ ਵਦਤਿ.
੬. ਮਹਾਸੁਪਿਨਸੁਤ੍ਤਵਣ੍ਣਨਾ
੧੯੬. ਛਟ੍ਠੇ ਮਹਾਸੁਪਿਨਾਤਿ ਮਹਨ੍ਤੇਹਿ ਪੁਰਿਸੇਹਿ ਪਸ੍ਸਿਤਬ੍ਬਤੋ ਮਹਨ੍ਤਾਨਞ੍ਚ ਅਤ੍ਥਾਨਂ ਨਿਮਿਤ੍ਤਭਾਵਤੋ ਮਹਾਸੁਪਿਨਾ. ਪਾਤੁਰਹੇਸੁਨ੍ਤਿ ਪਾਕਟਾ ਅਹੇਸੁਂ. ਤਤ੍ਥ ਸੁਪਿਨਂ ਪਸ੍ਸਨ੍ਤੋ ਚਤੂਹਿ ਕਾਰਣੇਹਿ ਪਸ੍ਸਤਿ ਧਾਤੁਕ੍ਖੋਭਤੋ ਵਾ ਅਨੁਭੂਤਪੁਬ੍ਬਤੋ ਵਾ ਦੇਵਤੋਪਸਂਹਾਰਤੋ ਵਾ ਪੁਬ੍ਬਨਿਮਿਤ੍ਤਤੋ ਵਾਤਿ.
ਤਤ੍ਥ ਪਿਤ੍ਤਾਦੀਨਂ ਖੋਭਕਰਣਪਚ੍ਚਯਪ੍ਪਯੋਗੇਨ ਖੁਭਿਤਧਾਤੁਕੋ ਧਾਤੁਕ੍ਖੋਭਤੋ ਸੁਪਿਨਂ ਪਸ੍ਸਤਿ. ਪਸ੍ਸਨ੍ਤੋ ਚ ਨਾਨਾਵਿਧਂ ਸੁਪਿਨਂ ਪਸ੍ਸਤਿ ਪਬ੍ਬਤਾ ਪਤਨ੍ਤੋ ਵਿਯ, ਆਕਾਸੇਨ ਗਚ੍ਛਨ੍ਤੋ ਵਿਯ, ਵਾਲ਼ਮਿਗਹਤ੍ਥਿਚੋਰਾਦੀਹਿ ਅਨੁਬਦ੍ਧੋ ਵਿਯ ਚ. ਅਨੁਭੂਤਪੁਬ੍ਬਤੋ ਪਸ੍ਸਨ੍ਤੋ ਪੁਬ੍ਬੇ ਅਨੁਭੂਤਪੁਬ੍ਬਂ ਆਰਮ੍ਮਣਂ ਪਸ੍ਸਤਿ. ਦੇਵਤੋਪਸਂਹਾਰਤੋ ਪਸ੍ਸਨ੍ਤਸ੍ਸ ਦੇਵਤਾ ਅਤ੍ਥਕਾਮਤਾਯ ਵਾ ਅਨਤ੍ਥਕਾਮਤਾਯ ਵਾ ਅਤ੍ਥਾਯ ਵਾ ਅਨਤ੍ਥਾਯ ਵਾ ਨਾਨਾਵਿਧਾਨਿ ਆਰਮ੍ਮਣਾਨਿ ਉਪਸਂਹਰਨ੍ਤਿ. ਸੋ ਤਾਸਂ ਦੇਵਤਾਨਂ ਆਨੁਭਾਵੇਨ ਤਾਨਿ ਆਰਮ੍ਮਣਾਨਿ ਪਸ੍ਸਤਿ. ਪੁਬ੍ਬਨਿਮਿਤ੍ਤਤੋ ਪਸ੍ਸਨ੍ਤੋ ਪੁਞ੍ਞਾਪੁਞ੍ਞਵਸੇਨ ਉਪ੍ਪਜ੍ਜਿਤੁਕਾਮਸ੍ਸ ਅਤ੍ਥਸ੍ਸ ਵਾ ਅਨਤ੍ਥਸ੍ਸ ਵਾ ਪੁਬ੍ਬਨਿਮਿਤ੍ਤਭੂਤਂ ਸੁਪਿਨਂ ਪਸ੍ਸਤਿ ਬੋਧਿਸਤ੍ਤਮਾਤਾ ਵਿਯ ਪੁਤ੍ਤਪਟਿਲਾਭਨਿਮਿਤ੍ਤਂ, ਕੋਸਲਰਾਜਾ ਵਿਯ ਸੋਲ਼ਸ ਸੁਪਿਨੇ, ਅਯਮੇਵ ਭਗਵਾ ਬੋਧਿਸਤ੍ਤਭੂਤੋ ਇਮੇ ਪਞ੍ਚ ਮਹਾਸੁਪਿਨੇ ਵਿਯ ਚਾਤਿ.
ਤਤ੍ਥ ਯਂ ਧਾਤੁਕ੍ਖੋਭਤੋ ਅਨੁਭੂਤਪੁਬ੍ਬਤੋ ਚ ਸੁਪਿਨੇ ਪਸ੍ਸਤਿ, ਨ ਤਂ ਸਚ੍ਚਂ ਹੋਤਿ. ਯਂ ਦੇਵਤੋਪਸਂਹਾਰਤੋ ਪਸ੍ਸਤਿ, ਤਂ ਸਚ੍ਚਂ ਵਾ ਹੋਤਿ ਅਲਿਕਂ ਵਾ. ਕੁਦ੍ਧਾ ਹਿ ਦੇਵਤਾ ਉਪਾਯੇਨ ਵਿਨਾਸੇਤੁਕਾਮਾ ਵਿਪਰੀਤਮ੍ਪਿ ਕਤ੍ਵਾ ਦਸ੍ਸੇਨ੍ਤਿ. ਯਂ ਪਨ ਪੁਬ੍ਬਨਿਮਿਤ੍ਤਤੋ ਪਸ੍ਸਤਿ, ਤਂ ਏਕਨ੍ਤਂ ਸਚ੍ਚਮੇਵ ਹੋਤਿ. ਏਤੇਸਂ ਚਤੁਨ੍ਨਂ ਮੂਲਕਾਰਣਾਨਂ ਸਂਸਗ੍ਗਭੇਦਤੋਪਿ ਸੁਪਿਨਭੇਦੋ ਹੋਤਿਯੇਵ.
ਤਂ ਪਨੇਤਂ ਚਤੁਬ੍ਬਿਧਮ੍ਪਿ ਸੁਪਿਨਂ ਸੇਖਪੁਥੁਜ੍ਜਨਾਵ ਪਸ੍ਸਨ੍ਤਿ ਅਪ੍ਪਹੀਨਵਿਪਲ੍ਲਾਸਤ੍ਤਾ, ਅਸੇਖਾ ਨ ਪਸ੍ਸਨ੍ਤਿ ਪਹੀਨਵਿਪਲ੍ਲਾਸਤ੍ਤਾ. ਕਿਂ ਪਨੇਤਂ ਪਸ੍ਸਨ੍ਤੋ ਸੁਤ੍ਤੋ ਪਸ੍ਸਤਿ ਪਟਿਬੁਦ੍ਧੋ, ਉਦਾਹੁ ਨੇਵ ਸੁਤ੍ਤੋ ਨ ਪਟਿਬੁਦ੍ਧੋਤਿ? ਕਿਞ੍ਚੇਤ੍ਥ ਯਦਿ ਤਾਵ ਸੁਤ੍ਤੋ ਪਸ੍ਸਤਿ, ਅਭਿਧਮ੍ਮਵਿਰੋਧੋ ਆਪਜ੍ਜਤਿ. ਭਵਙ੍ਗਚਿਤ੍ਤੇਨ ਹਿ ਸੁਪਤਿ, ਤਂ ਰੂਪਨਿਮਿਤ੍ਤਾਦਿਆਰਮ੍ਮਣਂ ਰਾਗਾਦਿਸਮ੍ਪਯੁਤ੍ਤਂ ਵਾ ਨ ਹੋਤਿ. ਸੁਪਿਨਂ ਪਸ੍ਸਨ੍ਤਸ੍ਸ ਚ ਈਦਿਸਾਨਿ ਚਿਤ੍ਤਾਨਿ ਉਪ੍ਪਜ੍ਜਨ੍ਤਿ. ਅਥ ਪਟਿਬੁਦ੍ਧੋ ਪਸ੍ਸਤਿ, ਵਿਨਯਵਿਰੋਧੋ ਆਪਜ੍ਜਤਿ. ਯਞ੍ਹਿ ਪਟਿਬੁਦ੍ਧੋ ਪਸ੍ਸਤਿ, ਤਂ ਸਬ੍ਬੋਹਾਰਿਕਚਿਤ੍ਤੇਨ ਪਸ੍ਸਤਿ. ਸਬ੍ਬੋਹਾਰਿਕਚਿਤ੍ਤੇਨ ਚ ਕਤੇ ਵੀਤਿਕ੍ਕਮੇ ਅਨਾਪਤ੍ਤਿ ਨਾਮ ਨਤ੍ਥਿ. ਸੁਪਿਨਂ ਪਸ੍ਸਨ੍ਤੇਨ ਪਨ ਕਤੇਪਿ ਵੀਤਿਕ੍ਕਮੇ ਏਕਨ੍ਤਂ ਅਨਾਪਤ੍ਤਿ ਏਵ. ਅਥ ਨੇਵ ਸੁਤ੍ਤੋ ਨ ਪਟਿਬੁਦ੍ਧੋ ਪਸ੍ਸਤਿ, ਨ ਨਾਮ ਪਸ੍ਸਤਿ. ਏਵਞ੍ਚ ਸਤਿ ਸੁਪਿਨਸ੍ਸ ਅਭਾਵੋ ਚ ਆਪਜ੍ਜਤਿ? ਨ ਅਭਾਵੋ. ਕਸ੍ਮਾ? ਯਸ੍ਮਾ ਕਪਿਮਿਦ੍ਧਪਰੇਤੋ ਪਸ੍ਸਤਿ. ਵੁਤ੍ਤਞ੍ਹੇਤਂ – ‘‘ਕਪਿਮਿਦ੍ਧਪਰੇਤੋ ਖੋ, ਮਹਾਰਾਜ, ਸੁਪਿਨਂ ਪਸ੍ਸਤੀ’’ਤਿ.
ਕਪਿਮਿਦ੍ਧਪਰੇਤੋਤਿ ਮਕ੍ਕਟਨਿਦ੍ਦਾਯ ਯੁਤ੍ਤੋ. ਯਥਾ ਹਿ ਮਕ੍ਕਟਸ੍ਸ ਨਿਦ੍ਦਾ ਲਹੁਪਰਿਵਤ੍ਤਾ ਹੋਤਿ, ਏਵਂ ਯਾ ਨਿਦ੍ਦਾ ਪੁਨਪ੍ਪੁਨਂ ਕੁਸਲਾਦਿਚਿਤ੍ਤਵੋਕਿਣ੍ਣਤ੍ਤਾ ਲਹੁਪਰਿਵਤ੍ਤਾ, ਯਸ੍ਸਾ ਪਵਤ੍ਤਿਯਂ ਪੁਨਪ੍ਪੁਨਂ ਭਵਙ੍ਗਤੋ ਉਤ੍ਤਰਣਂ ਹੋਤਿ, ਤਾਯ ਯੁਤ੍ਤੋ ਸੁਪਿਨਂ ਪਸ੍ਸਤਿ. ਤੇਨਾਯਂ ਸੁਪਿਨੋ ਕੁਸਲੋਪਿ ਹੋਤਿ ਅਕੁਸਲੋਪਿ ਅਬ੍ਯਾਕਤੋਪਿ. ਤਤ੍ਥ ਸੁਪਿਨਨ੍ਤੇ ਚੇਤਿਯਵਨ੍ਦਨਧਮ੍ਮਸ੍ਸਵਨਧਮ੍ਮਦੇਸਨਾਦੀਨਿ ਕਰੋਨ੍ਤਸ੍ਸ ਕੁਸਲੋ, ਪਾਣਾਤਿਪਾਤਾਦੀਨਿ ਕਰੋਨ੍ਤਸ੍ਸ ਅਕੁਸਲੋ, ਦ੍ਵੀਹਿ ਅਨ੍ਤੇਹਿ ਮੁਤ੍ਤੋ ਆਵਜ੍ਜਨਤਦਾਰਮ੍ਮਣਕ੍ਖਣੇ ਅਬ੍ਯਾਕਤੋਤਿ ਵੇਦਿਤਬ੍ਬੋ. ਸ੍ਵਾਯਂ ਦੁਬ੍ਬਲਵਤ੍ਥੁਕਤ੍ਤਾ ਚੇਤਨਾਯ ਪਟਿਸਨ੍ਧਿਂ ਆਕਡ੍ਢਿਤੁਂ ਅਸਮਤ੍ਥੋ. ਪਵਤ੍ਤੇ ਪਨ ਅਞ੍ਞੇਹਿ ਕੁਸਲਾਕੁਸਲੇਹਿ ਉਪਤ੍ਥਮ੍ਭਿਤੋ ਵਿਪਾਕਂ ਦੇਤਿ. ਕਿਞ੍ਚਾਪਿ ਵਿਪਾਕਂ ਦੇਤਿ, ਅਥ ਖੋ ਅਵਿਸਯੇ ਉਪ੍ਪਨ੍ਨਤ੍ਤਾ ਅਬ੍ਬੋਹਾਰਿਕਾਵ ਸੁਪਿਨਨ੍ਤਚੇਤਨਾ. ਸੋ ਪਨੇਸ ਸੁਪਿਨੋ ਕਾਲਵਸੇਨਪਿ ਦਿਵਾ ਤਾਵ ਦਿਟ੍ਠੋ ਨ ਸਮੇਤਿ, ਤਥਾ ਪਠਮਯਾਮੇ ਮਜ੍ਝਿਮਯਾਮੇ ਪਚ੍ਛਿਮਯਾਮੇ ਚ. ਬਲਵਪਚ੍ਚੂਸੇ ਪਨ ਅਸਿਤਪੀਤਖਾਯਿਤੇ ਸਮ੍ਮਾ ਪਰਿਣਾਮਂ ਗਤੇ ਕਾਯਸ੍ਮਿਂ ਓਜਾਯ ਪਤਿਟ੍ਠਿਤਾਯ ਅਰੁਣੇ ਉਗ੍ਗਚ੍ਛਮਾਨੇਵ ਦਿਟ੍ਠੋ ਸੁਪਿਨੋ ਸਮੇਤਿ. ਇਟ੍ਠਨਿਮਿਤ੍ਤਂ ਸੁਪਿਨਂ ਪਸ੍ਸਨ੍ਤੋ ਇਟ੍ਠਂ ਪਟਿਲਭਤਿ, ਅਨਿਟ੍ਠਨਿਮਿਤ੍ਤਂ ਪਸ੍ਸਨ੍ਤੋ ਅਨਿਟ੍ਠਂ.
ਇਮੇ ਪਨ ਪਞ੍ਚ ਮਹਾਸੁਪਿਨੇ ਨੇਵ ਲੋਕਿਯਮਹਾਜਨੋ ਪਸ੍ਸਤਿ, ਨ ਮਹਾਰਾਜਾਨੋ, ਨ ਚਕ੍ਕਵਤ੍ਤਿਰਾਜਾਨੋ, ਨ ਅਗ੍ਗਸਾਵਕਾ, ਨ ਪਚ੍ਚੇਕਬੁਦ੍ਧਾ, ਨ ਸਮ੍ਮਾਸਮ੍ਬੁਦ੍ਧਾ, ਏਕੋ ਸਬ੍ਬਞ੍ਞੁਬੋਧਿਸਤ੍ਤੋਯੇਵ ਪਸ੍ਸਤਿ. ਅਮ੍ਹਾਕਂ ਪਨ ਬੋਧਿਸਤ੍ਤੋ ਕਦਾ ਇਮੇ ਸੁਪਿਨੇ ਪਸ੍ਸੀਤਿ? ‘‘ਸ੍ਵੇ ਬੁਦ੍ਧੋ ਭਵਿਸ੍ਸਾਮੀ’’ਤਿ ਚਾਤੁਦ੍ਦਸਿਯਂ ਪਕ੍ਖਸ੍ਸ ਰਤ੍ਤਿਵਿਭਾਯਨਕਾਲੇ ਪਸ੍ਸਿ. ਤੇਰਸਿਯਨ੍ਤਿਪਿ ਵਦਨ੍ਤਿਯੇਵ. ਸੋ ਇਮੇ ਸੁਪਿਨੇ ਦਿਸ੍ਵਾ ਉਟ੍ਠਾਯ ਪਲ੍ਲਙ੍ਕਂ ਆਭੁਞ੍ਜਿਤ੍ਵਾ ਨਿਸਿਨ੍ਨੋ ਚਿਨ੍ਤੇਸਿ – ‘‘ਸਚੇ ਮਯਾ ਕਪਿਲਵਤ੍ਥੁਨਗਰੇ ਇਮੇ ਸੁਪਿਨਾ ਦਿਟ੍ਠਾ ਅਸ੍ਸੁ, ਪਿਤੁ ਮਹਾਰਾਜਸ੍ਸ ਕਥੇਯ੍ਯਂ. ਸਚੇ ਪਨ ਮੇ ਮਾਤਾ ਜੀਵੇਯ੍ਯ, ਤਸ੍ਸਾ ਕਥੇਯ੍ਯਂ. ਇਮਸ੍ਮਿਂ ਖੋ ਪਨ ਠਾਨੇ ਇਮੇਸਂ ਪਟਿਗ੍ਗਾਹਕੋ ਨਾਮ ਨਤ੍ਥਿ, ਅਹਮੇਵ ਪਟਿਗਣ੍ਹਿਸ੍ਸਾਮੀ’’ਤਿ. ਤਤੋ ‘‘ਇਦਂ ਇਮਸ੍ਸ ਪੁਬ੍ਬਨਿਮਿਤ੍ਤਂ ਇਦਂ ਇਮਸ੍ਸਾ’’ਤਿ ਸਯਮੇਵ ਸੁਪਿਨੇ ਪਟਿਗ੍ਗਣ੍ਹਿਤ੍ਵਾ ਉਰੁਵੇਲਗਾਮੇ ਸੁਜਾਤਾਯ ਦਿਨ੍ਨਂ ਪਾਯਾਸਂ ਪਰਿਭੁਞ੍ਜਿਤ੍ਵਾ ਬੋਧਿਮਣ੍ਡਂ ਆਰੁਯ੍ਹ ਬੋਧਿਂ ਪਤ੍ਵਾ ਅਨੁਕ੍ਕਮੇਨ ਜੇਤਵਨੇ ਵਿਹਰਨ੍ਤੋ ਅਤ੍ਤਨੋ ਮਕੁਲਬੁਦ੍ਧਕਾਲੇ ਦਿਟ੍ਠੇ ਪਞ੍ਚ ਮਹਾਸੁਪਿਨੇ ਵਿਤ੍ਥਾਰੇਤੁਂ ਭਿਕ੍ਖੂ ਆਮਨ੍ਤੇਤ੍ਵਾ ਇਮਂ ਦੇਸਨਂ ਆਰਭਿ.
ਤਤ੍ਥ ਮਹਾਪਥਵੀਤਿ ਚਕ੍ਕਵਾਲ਼ਗਬ੍ਭਂ ਪੂਰੇਤ੍ਵਾ ਠਿਤਾ ਮਹਾਪਥਵੀ. ਮਹਾਸਯਨਂ ਅਹੋਸੀਤਿ ਸਿਰਿਸਯਨਂ ਅਹੋਸਿ. ਓਹਿਤੋਤਿ ਠਪਿਤੋ. ਸੋ ਪਨ ਨ ਉਦਕਸ੍ਮਿਂਯੇਵ ਠਪਿਤੋ ਅਹੋਸਿ, ਅਥ ਖੋ ਪਾਚੀਨਸਮੁਦ੍ਦਸ੍ਸ ਉਪਰੂਪਰਿਭਾਗੇਨ ਗਨ੍ਤ੍ਵਾ ਪਾਚੀਨਚਕ੍ਕਵਾਲ਼ਮਤ੍ਥਕੇ ਠਪਿਤੋ ਅਹੋਸੀਤਿ ਵੇਦਿਤਬ੍ਬੋ. ਪਚ੍ਛਿਮੇ ਸਮੁਦ੍ਦੇ ਦਕ੍ਖਿਣੇ ਸਮੁਦ੍ਦੇਤਿ ਏਤੇਸੁਪਿ ਏਸੇਵ ਨਯੋ. ਤਿਰਿਯਾ ਨਾਮ ਤਿਣਜਾਤੀਤਿ ਦਬ੍ਬਤਿਣਂ ਵੁਚ੍ਚਤਿ. ਨਾਭਿਯਾ ਉਗ੍ਗਨ੍ਤ੍ਵਾ ਨਭਂ ਆਹਚ੍ਚ ਠਿਤਾ ਅਹੋਸੀਤਿ ਨਙ੍ਗਲਮਤ੍ਤੇਨ ਰਤ੍ਤਦਣ੍ਡੇਨ ਨਾਭਿਤੋ ਉਗ੍ਗਨ੍ਤ੍ਵਾ ਪਸ੍ਸਨ੍ਤਸ੍ਸ ਪਸ੍ਸਨ੍ਤਸ੍ਸੇਵ ਵਿਦਤ੍ਥਿਮਤ੍ਤਂ ਰਤਨਮਤ੍ਤਂ ਬ੍ਯਾਮਮਤ੍ਤਂ ਯਟ੍ਠਿਮਤ੍ਤਂ ਗਾਵੁਤਮਤ੍ਤਂ ਅਡ੍ਢਯੋਜਨਮਤ੍ਤਂ ਯੋਜਨਮਤ੍ਤਨ੍ਤਿ ਏਵਂ ਉਗ੍ਗਨ੍ਤ੍ਵਾ ਉਗ੍ਗਨ੍ਤ੍ਵਾ ਅਨੇਕਯੋਜਨਸਹਸ੍ਸਂ ਨਭਂ ਆਹਚ੍ਚ ਠਿਤਾ ਅਹੋਸਿ. ਪਾਦੇਹਿ ਉਸ੍ਸਕ੍ਕਿਤ੍ਵਾਤਿ ਅਗ੍ਗਨਖਤੋ ਪਟ੍ਠਾਯ ਪਾਦੇਹਿ ਅਭਿਰੁਹਿਤ੍ਵਾ. ਨਾਨਾਵਣ੍ਣਾਤਿ ਏਕੋ ਨੀਲਵਣ੍ਣੋ, ਏਕੋ ਪੀਤਵਣ੍ਣੋ, ਏਕੋ ਲੋਹਿਤਵਣ੍ਣੋ, ਏਕੋ ਪਣ੍ਡੁਪਲਾਸਵਣ੍ਣੋਤਿ ਏਵਂ ਨਾਨਾਵਣ੍ਣਾ. ਸੇਤਾਤਿ ਪਣ੍ਡਰਾ ਪਰਿਸੁਦ੍ਧਾ. ਮਹਤੋ ਮੀਲ਼੍ਹਪਬ੍ਬਤਸ੍ਸਾਤਿ ਤਿਯੋਜਨੁਬ੍ਬੇਧਸ੍ਸ ਗੂਥਪਬ੍ਬਤਸ੍ਸ. ਉਪਰੂਪਰਿ ਚਙ੍ਕਮਤੀਤਿ ਮਤ੍ਥਕਮਤ੍ਥਕੇ ਚਙ੍ਕਮਤਿ. ਦੀਘਾਯੁਕਬੁਦ੍ਧਾ ਪਨ ਤਿਯੋਜਨਿਕੇ ਮੀਲ਼੍ਹਪਬ੍ਬਤੇ ਅਨੁਪਵਿਸਿਤ੍ਵਾ ਨਿਸਿਨ੍ਨਾ ਵਿਯ ਹੋਨ੍ਤਿ.
ਏਵਂ ਏਤ੍ਤਕੇਨ ਠਾਨੇਨ ਪੁਬ੍ਬਨਿਮਿਤ੍ਤਾਨਿ ਦਸ੍ਸੇਤ੍ਵਾ ਇਦਾਨਿ ਸਹ ਪੁਬ੍ਬਨਿਮਿਤ੍ਤੇਹਿ ਪਟਿਲਾਭਂ ਦਸ੍ਸੇਤੁਂ ਯਮ੍ਪਿ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਸਬ੍ਬਗੁਣਦਾਯਕਤ੍ਤਾ ਬੁਦ੍ਧਾਨਂ ਅਰਹਤ੍ਤਮਗ੍ਗੋ ਅਨੁਤ੍ਤਰਾ ਸਮ੍ਮਾਸਮ੍ਬੋਧਿ ਨਾਮ. ਤਸ੍ਮਾ ਯਂ ਸੋ ਚਕ੍ਕਵਾਲ਼ਮਹਾਪਥਵਿਂ ਸਿਰਿਸਯਨਭੂਤਂ ਅਦ੍ਦਸ, ਤਂ ਬੁਦ੍ਧਭਾਵਸ੍ਸ ਪੁਬ੍ਬਨਿਮਿਤ੍ਤਂ. ਯਂ ਹਿਮਵਨ੍ਤਪਬ੍ਬਤਰਾਜਾਨਂ ਬਿਮ੍ਬੋਹਨਂ ਅਦ੍ਦਸ, ਤਂ ਸਬ੍ਬਞ੍ਞੁਤਞ੍ਞਾਣਬਿਮ੍ਬੋਹਨਸ੍ਸ ਪੁਬ੍ਬਨਿਮਿਤ੍ਤਂ. ਯਂ ਚਤ੍ਤਾਰੋ ਹਤ੍ਥਪਾਦੇ ਚਕ੍ਕਵਾਲ਼ਮਤ੍ਥਕੇ ਠਿਤੇ ਅਦ੍ਦਸ, ਤਂ ਧਮ੍ਮਚਕ੍ਕਸ੍ਸ ਅਪ੍ਪਟਿਵਤ੍ਤਿਯਭਾਵੇ ਪੁਬ੍ਬਨਿਮਿਤ੍ਤਂ. ਯਂ ਅਤ੍ਤਾਨਂ ਉਤ੍ਤਾਨਕਂ ਨਿਪਨ੍ਨਂ ਅਦ੍ਦਸ, ਤਂ ਤੀਸੁ ਭਵੇਸੁ ਅਵਕੁਜ੍ਜਾਨਂ ਸਤ੍ਤਾਨਂ ਉਤ੍ਤਾਨਮੁਖਭਾਵਸ੍ਸ ਪੁਬ੍ਬਨਿਮਿਤ੍ਤਂ. ਯਂ ਅਕ੍ਖੀਨਿ ਉਮ੍ਮੀਲੇਤ੍ਵਾ ਪਸ੍ਸਨ੍ਤੋ ਵਿਯ ਅਹੋਸਿ, ਤਂ ਦਿਬ੍ਬਚਕ੍ਖੁਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ. ਯਂ ਯਾਵ ਭਵਗ੍ਗਾ ਏਕਾਲੋਕਂ ਅਹੋਸਿ, ਤਂ ਅਨਾਵਰਣਞਾਣਸ੍ਸ ਪੁਬ੍ਬਨਿਮਿਤ੍ਤਂ. ਸੇਸਂ ਪਾਲ਼ਿਵਸੇਨੇਵ ਵੇਦਿਤਬ੍ਬਨ੍ਤਿ.
੭. ਵਸ੍ਸਸੁਤ੍ਤਵਣ੍ਣਨਾ
੧੯੭. ਸਤ੍ਤਮੇ ਨੇਮਿਤ੍ਤਾਤਿ ਨਿਮਿਤ੍ਤਪਾਠਕਾ. ਤੇਜੋਧਾਤੁ ਪਕੁਪ੍ਪਤੀਤਿ ਮਹਾਅਗ੍ਗਿਕ੍ਖਨ੍ਧੋ ਉਪ੍ਪਜ੍ਜਤਿ. ਪਾਣਿਨਾ ਉਦਕਂ ਸਮ੍ਪਟਿਚ੍ਛਿਤ੍ਵਾਤਿ ਉਪ੍ਪਨ੍ਨਂ ਉਤੁਸਮੁਟ੍ਠਾਨਂ ਉਦਕਂ ਤਿਯੋਜਨਸਤੇਨ ਹਤ੍ਥੇਨ ਪਟਿਗ੍ਗਹੇਤ੍ਵਾ. ਪਮਤ੍ਤਾ ਹੋਨ੍ਤੀਤਿ ਅਤ੍ਤਨੋ ਕੀਲ਼ਾਯ ਪਮਤ੍ਤਾ ਹੋਨ੍ਤਿ ਵਿਪ੍ਪਵੁਟ੍ਠਸਤਿਨੋ. ਤੇਸਞ੍ਹਿ ਸਕਾਯ ਰਤਿਯਾ ‘‘ਰਮਾਮਾ’’ਤਿ ਚਿਤ੍ਤੇ ਉਪ੍ਪਨ੍ਨੇ ਅਕਾਲੇਪਿ ਦੇਵੋ ਵਸ੍ਸਤਿ, ਤਦਭਾਵੇ ਨ ਵਸ੍ਸਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ – ‘‘ਨ ਕਾਲਵਸ੍ਸ’’ਨ੍ਤਿ. ਅਟ੍ਠਮਨਵਮਾਨਿ ਉਤ੍ਤਾਨਤ੍ਥਾਨੇਵ.
੧੦. ਨਿਸ੍ਸਾਰਣੀਯਸੁਤ੍ਤਵਣ੍ਣਨਾ
੨੦੦. ਦਸਮੇ ਨਿਸ੍ਸਾਰਣੀਯਾਤਿ ਨਿਸ੍ਸਟਾ ਵਿਸਞ੍ਞੁਤ੍ਤਾ. ਧਾਤੁਯੋਤਿ ਅਤ੍ਤਸੁਞ੍ਞਸਭਾਵਾ. ਕਾਮਂ ਮਨਸਿਕਰੋਤੋਤਿ ਕਾਮਂ ਮਨਸਿਕਰੋਨ੍ਤਸ੍ਸ, ਅਸੁਭਜ੍ਝਾਨਤੋ ਵੁਟ੍ਠਾਯ ਅਗਦਂ ਗਹੇਤ੍ਵਾ ਵਿਸਂ ਵੀਮਂਸਨ੍ਤੋ ਵਿਯ ਵੀਮਂਸਨਤ੍ਥਂ ਕਾਮਾਭਿਮੁਖਂ ਚਿਤ੍ਤਂ ਪੇਸੇਨ੍ਤਸ੍ਸਾਤਿ ਅਤ੍ਥੋ. ਨ ਪਕ੍ਖਨ੍ਦਤੀਤਿ ਨਪ੍ਪਵਿਸਤਿ. ਨਪ੍ਪਸੀਦਤੀਤਿ ਪਸਾਦਂ ਨਾਪਜ੍ਜਤਿ. ਨ ਸਨ੍ਤਿਟ੍ਠਤੀਤਿ ਨਪ੍ਪਤਿਟ੍ਠਹਤਿ. ਨ ਵਿਮੁਚ੍ਚਤੀਤਿ ਨ ਅਧਿਮੁਚ੍ਚਤਿ. ਯਥਾ ਪਨ ਕੁਕ੍ਕੁਟਪਤ੍ਤਂ ਵਾ ਨ੍ਹਾਰੁਦਦ੍ਦੁਲਂ ਵਾ ਅਗ੍ਗਿਮ੍ਹਿ ਪਕ੍ਖਿਤ੍ਤਂ ਪਟਿਲੀਯਤਿ ਪਤਿਕੁਟਤਿ ਪਤਿਵਟ੍ਟਤਿ ਨ ਸਂਪਸਾਰੀਯਤਿ, ਏਵਂ ਪਟਿਲੀਯਤਿ ਨ ਸਂਪਸਾਰੀਯਤਿ. ਨੇਕ੍ਖਮ੍ਮਂ ਖੋ ਪਨਾਤਿ ਇਧ ਨੇਕ੍ਖਮ੍ਮਂ ਨਾਮ ਅਸੁਭੇਸੁ ਪਠਮਜ੍ਝਾਨਂ, ਤਦਸ੍ਸ ਮਨਸਿਕਰੋਤੋ ਚਿਤ੍ਤਂ ਪਕ੍ਖਨ੍ਦਤਿ. ਤਸ੍ਸ ਤਂ ਚਿਤ੍ਤਨ੍ਤਿ ਤਸ੍ਸ ਤਂ ਅਸੁਭਜ੍ਝਾਨਚਿਤ੍ਤਂ. ਸੁਗਤਨ੍ਤਿ ਗੋਚਰੇ ਗਤਤ੍ਤਾ ਸੁਟ੍ਠੁ ਗਤਂ. ਸੁਭਾਵਿਤਨ੍ਤਿ ਅਹਾਨਭਾਗਿਯਤ੍ਤਾ ਸੁਟ੍ਠੁ ਭਾਵਿਤਂ. ਸੁਵੁਟ੍ਠਿਤਨ੍ਤਿ ਕਾਮਤੋ ਵੁਟ੍ਠਿਤਂ. ਸੁਵਿਮੁਤ੍ਤਨ੍ਤਿ ਕਾਮੇਹਿ ਸੁਟ੍ਠੁ ਵਿਮੁਤ੍ਤਂ. ਕਾਮਪਚ੍ਚਯਾ ਆਸਵਾ ਨਾਮ ਕਾਮਹੇਤੁਕਾ ਚਤ੍ਤਾਰੋ ਆਸਵਾ. ਵਿਘਾਤਾਤਿ ਦੁਕ੍ਖਾ. ਪਰਿਲ਼ਾਹਾਤਿ ਕਾਮਰਾਗਪਰਿਲ਼ਾਹਾ. ਨ ਸੋ ਤਂ ਵੇਦਨਂ ਵੇਦਿਯਤੀਤਿ ਸੋ ਤਂ ਕਾਮਵੇਦਨਂ ਵਿਘਾਤਪਰਿਲ਼ਾਹਵੇਦਨਞ੍ਚ ਨ ਵੇਦਿਯਤਿ. ਇਦਮਕ੍ਖਾਤਂ ਕਾਮਾਨਂ ਨਿਸ੍ਸਰਣਨ੍ਤਿ ਇਦਂ ਅਸੁਭਜ੍ਝਾਨਂ ਕਾਮੇਹਿ ਨਿਸ੍ਸਟਤ੍ਤਾ ਕਾਮਾਨਂ ਨਿਸ੍ਸਰਣਨ੍ਤਿ ਅਕ੍ਖਾਤਂ. ਯੋ ਪਨ ਤਂ ਝਾਨਂ ਪਾਦਕਂ ਕਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤੋ ਤਤਿਯਮਗ੍ਗਂ ਪਤ੍ਵਾ ਅਨਾਗਾਮਿਫਲੇਨ ਨਿਬ੍ਬਾਨਂ ਦਿਸ੍ਵਾ ‘‘ਪੁਨ ਕਾਮਾ ਨਾਮ ਨਤ੍ਥੀ’’ਤਿ ਜਾਨਾਤਿ. ਤਸ੍ਸ ਚਿਤ੍ਤਂ ਅਚ੍ਚਨ੍ਤਨਿਸ੍ਸਰਣਮੇਵ. ਸੇਸਪਦੇਸੁਪਿ ਏਸੇਵ ਨਯੋ.
ਅਯਂ ਪਨ ਵਿਸੇਸੋ – ਦੁਤਿਯਵਾਰੇ ਮੇਤ੍ਤਾਝਾਨਾਨਿ ਬ੍ਯਾਪਾਦਸ੍ਸ ਨਿਸ੍ਸਰਣਂ ਨਾਮ. ਤਤਿਯਵਾਰੇ ਕਰੁਣਾਝਾਨਾਨਿ ਵਿਹਿਂਸਾਯ ਨਿਸ੍ਸਰਣਂ ਨਾਮ. ਚਤੁਤ੍ਥਵਾਰੇ ਅਰੂਪਜ੍ਝਾਨਾਨਿ ਰੂਪਾਨਂ ਨਿਸ੍ਸਰਣਂ ਨਾਮ. ਅਚ੍ਚਨ੍ਤਨਿਸ੍ਸਰਣਞ੍ਚੇਤ੍ਥ ਅਰਹਤ੍ਤਫਲਂ ਯੋਜੇਤਬ੍ਬਂ. ਪਞ੍ਚਮਵਾਰੇ ਸਕ੍ਕਾਯਂ ਮਨਸਿਕਰੋਤੋਤਿ ਸੁਦ੍ਧਸਙ੍ਖਾਰੇ ਪਰਿਗ੍ਗਣ੍ਹਿਤ੍ਵਾ ਅਰਹਤ੍ਤਂ ਪਤ੍ਤਸ੍ਸ ਸੁਕ੍ਖਵਿਪਸ੍ਸਕਸ੍ਸ ਫਲਸਮਾਪਤ੍ਤਿਤੋ ਵੁਟ੍ਠਾਯ ਵੀਮਂਸਨਤ੍ਥਂ ਪਞ੍ਚੁਪਾਦਾਨਕ੍ਖਨ੍ਧਾਭਿਮੁਖਂ ਚਿਤ੍ਤਂ ਪੇਸੇਨ੍ਤਸ੍ਸ. ਇਦਮਕ੍ਖਾਤਂ ਸਕ੍ਕਾਯਸ੍ਸ ਨਿਸ੍ਸਰਣਨ੍ਤਿ ਇਦਂ ਅਰਹਤ੍ਤਮਗ੍ਗੇਨ ਚ ਫਲੇਨ ਚ ਨਿਬ੍ਬਾਨਂ ਦਿਸ੍ਵਾ ਠਿਤਸ੍ਸ ਭਿਕ੍ਖੁਨੋ ‘‘ਪੁਨ ਸਕ੍ਕਾਯੋ ਨਤ੍ਥੀ’’ਤਿ ਉਪ੍ਪਨ੍ਨਂ ਅਰਹਤ੍ਤਫਲਸਮਾਪਤ੍ਤਿਚਿਤ੍ਤਂ ਸਕ੍ਕਾਯਸ੍ਸ ਨਿਸ੍ਸਰਣਨ੍ਤਿ ਅਕ੍ਖਾਤਂ. ਇਦਾਨਿ ਏਵਂ ਸਕ੍ਕਾਯਨਿਸ੍ਸਰਣਂ ਨਿਰੋਧਂ ਪਤ੍ਵਾ ਠਿਤਸ੍ਸ ਖੀਣਾਸਵਸ੍ਸ ਵਣ੍ਣਂ ਕਥੇਨ੍ਤੋ ਤਸ੍ਸ ਕਾਮਨਨ੍ਦੀਪਿ ਨਾਨੁਸੇਤੀਤਿਆਦਿਮਾਹ. ਤਤ੍ਥ ਨਾਨੁਸੇਤੀਤਿ ਨ ਨਿਬ੍ਬਤ੍ਤਤਿ. ਅਨਨੁਸਯਾਤਿ ਅਨਿਬ੍ਬਤ੍ਤਿਯਾ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.
ਬ੍ਰਾਹ੍ਮਣਵਗ੍ਗੋ ਪਞ੍ਚਮੋ.
ਚਤੁਤ੍ਥਪਣ੍ਣਾਸਕਂ ਨਿਟ੍ਠਿਤਂ.