੫. ਪਞ੍ਚਮਪਣ੍ਣਾਸਕਂ
(੨੧) ੧. ਕਿਮਿਲਵਗ੍ਗੋ
੧. ਕਿਮਿਲਸੁਤ੍ਤਵਣ੍ਣਨਾ
੨੦੧. ਪਞ੍ਚਮਸ੍ਸ ਪਠਮੇ ਕਿਮਿਲਾਯਨ੍ਤਿ ਏਵਂਨਾਮਕੇ ਨਗਰੇ. ਨਿਚੁਲਵਨੇਤਿ ਮੁਚਲਿਨ੍ਦਵਨੇ. ਏਤਦਵੋਚਾਤਿ ਅਯਂ ਕਿਰ ਥੇਰੋ ਤਸ੍ਮਿਂਯੇਵ ਨਗਰੇ ਸੇਟ੍ਠਿਪੁਤ੍ਤੋ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਪੁਬ੍ਬੇਨਿਵਾਸਞਾਣਂ ਪਟਿਲਭਿ. ਸੋ ਅਤ੍ਤਨਾ ਨਿਵੁਤ੍ਥਂ ਖਨ੍ਧਸਨ੍ਤਾਨਂ ਅਨੁਸ੍ਸਰਨ੍ਤੋ ਕਸ੍ਸਪਦਸਬਲਸ੍ਸ ਸਾਸਨੋਸਕ੍ਕਨਕਾਲੇ ਪਬ੍ਬਜਿਤ੍ਵਾ ਚਤੂਸੁ ਪਰਿਸਾਸੁ ਸਾਸਨੇ ਅਗਾਰਵਂ ਕਰੋਨ੍ਤੀਸੁ ਨਿਸ੍ਸੇਣਿਂ ਬਨ੍ਧਿਤ੍ਵਾ ਪਬ੍ਬਤਂ ਆਰੁਯ੍ਹ ਤਤ੍ਥ ਸਮਣਧਮ੍ਮਂ ਕਤ੍ਵਾ ਅਤ੍ਤਨੋ ਨਿਵੁਤ੍ਥਭਾਵਂ ਅਦ੍ਦਸ. ਸੋ ‘‘ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਤਂ ਕਾਰਣਂ ਪੁਚ੍ਛਿਸ੍ਸਾਮੀ’’ਤਿ ਏਤਂ ‘‘ਕੋ ਨੁ ਖੋ, ਭਨ੍ਤੇ’’ਤਿਆਦਿਵਚਨਂ ਅਵੋਚ.
ਸਤ੍ਥਰਿ ਅਗਾਰਵਾ ਵਿਹਰਨ੍ਤਿ ਅਪ੍ਪਤਿਸ੍ਸਾਤਿ ਸਤ੍ਥਰਿ ਗਾਰਵਞ੍ਚੇਵ ਜੇਟ੍ਠਕਭਾਵਞ੍ਚ ਅਨੁਪਟ੍ਠਪੇਤ੍ਵਾ ਵਿਹਰਨ੍ਤਿ. ਸੇਸੇਸੁਪਿ ਏਸੇਵ ਨਯੋ. ਤਤ੍ਥ ਚੇਤਿਯਙ੍ਗਣਾਦੀਸੁ ਛਤ੍ਤਂ ਧਾਰੇਤ੍ਵਾ ਉਪਾਹਨਾ ਆਰੁਯ੍ਹ ਵਿਚਰਨ੍ਤੋ ਨਾਨਪ੍ਪਕਾਰਞ੍ਚ ਨਿਰਤ੍ਥਕਕਥਂ ਕਥੇਨ੍ਤੋ ਸਤ੍ਥਰਿ ਅਗਾਰਵੋ ਵਿਹਰਤਿ ਨਾਮ. ਧਮ੍ਮਸ੍ਸਵਨਗ੍ਗੇ ਪਨ ਨਿਸੀਦਿਤ੍ਵਾ ਨਿਦ੍ਦਾਯਨ੍ਤੋ ਚੇਵ ਨਾਨਪ੍ਪਕਾਰਞ੍ਚ ਨਿਰਤ੍ਥਕਕਥਂ ਕਥੇਨ੍ਤੋ ਧਮ੍ਮੇ ਅਗਾਰਵੋ ਵਿਹਰਤਿ ਨਾਮ. ਸਙ੍ਘਮਜ੍ਝੇ ਬਾਹਾਵਿਕ੍ਖੇਪਕਂ ਨਾਨਤ੍ਤਕਥਂ ਕਥੇਨ੍ਤੋ ਥੇਰਨਵਮਜ੍ਝਿਮੇਸੁ ਚ ਚਿਤ੍ਤੀਕਾਰਂ ਅਕਰੋਨ੍ਤੋ ਸਙ੍ਘੇ ਅਗਾਰਵੋ ਵਿਹਰਤਿ ਨਾਮ. ਸਿਕ੍ਖਂ ਅਪਰਿਪੂਰੇਨ੍ਤੋ ਸਿਕ੍ਖਾਯ ਅਗਾਰਵੋ ਵਿਹਰਤਿ ਨਾਮ. ਅਞ੍ਞਮਞ੍ਞਂ ਕਲਹਭਣ੍ਡਨਾਦੀਨਿ ਕਰੋਨ੍ਤੋ ਅਞ੍ਞਮਞ੍ਞਂ ਅਗਾਰਵੋ ਵਿਹਰਤਿ ਨਾਮ. ਦੁਤਿਯਂ ਉਤ੍ਤਾਨਤ੍ਥਮੇਵ.
੩. ਅਸ੍ਸਾਜਾਨੀਯਸੁਤ੍ਤਵਣ੍ਣਨਾ
੨੦੩-੨੦੪. ਤਤਿਯੇ ਅਜ੍ਜਵੇਨਾਤਿ ਉਜੁਭਾਵੇਨ ਅਵਙ੍ਕਗਮਨੇਨ. ਜਵੇਨਾਤਿ ਪਦਜਵੇਨ. ਮਦ੍ਦਵੇਨਾਤਿ ਸਰੀਰਮੁਦੁਤਾਯ. ਖਨ੍ਤਿਯਾਤਿ ਅਧਿਵਾਸਨਕ੍ਖਨ੍ਤਿਯਾ. ਸੋਰਚ੍ਚੇਨਾਤਿ ਸੁਚਿਸੀਲਤਾਯ. ਭਿਕ੍ਖੁਵਾਰੇ ਅਜ੍ਜਵਨ੍ਤਿ ਞਾਣਸ੍ਸ ਉਜੁਕਗਮਨਂ. ਜਵੋਤਿ ਸੂਰਂ ਹੁਤ੍ਵਾ ਞਾਣਸ੍ਸ ਗਮਨਭਾਵੋ. ਮਦ੍ਦਵਨ੍ਤਿ ਸੀਲਮਦ੍ਦਵਂ. ਖਨ੍ਤੀਤਿ ਅਧਿਵਾਸਨਕ੍ਖਨ੍ਤਿਯੇਵ. ਸੋਰਚ੍ਚਂ ਸੁਚਿਸੀਲਤਾਯੇਵ. ਚਤੁਤ੍ਥੇ ਪਞ੍ਚ ਬਲਾਨਿ ਮਿਸ੍ਸਕਾਨਿ ਕਥਿਤਾਨਿ.
੫. ਚੇਤੋਖਿਲਸੁਤ੍ਤਵਣ੍ਣਨਾ
੨੦੫. ਪਞ੍ਚਮੇ ਚੇਤੋਖਿਲਾਤਿ ਚਿਤ੍ਤਸ੍ਸ ਥਦ੍ਧਭਾਵਾ, ਕਚਵਰਭਾਵਾ, ਖਾਣੁਕਭਾਵਾ. ਸਤ੍ਥਰਿ ਕਙ੍ਖਤੀਤਿ ਸਤ੍ਥੁ ਸਰੀਰੇ ਵਾ ਗੁਣੇ ਵਾ ਕਙ੍ਖਤਿ. ਸਰੀਰੇ ਕਙ੍ਖਮਾਨੋ ‘‘ਦ੍ਵਤ੍ਤਿਂਸਵਰਪੁਰਿਸਲਕ੍ਖਣਪਟਿਮਣ੍ਡਿਤਂ ਨਾਮ ਸਰੀਰਂ ਅਤ੍ਥਿ ਨੁ ਖੋ ਨਤ੍ਥੀ’’ਤਿ ਕਙ੍ਖਤਿ, ਗੁਣੇ ਕਙ੍ਖਮਾਨੋ ‘‘ਅਤੀਤਾਨਾਗਤਪਚ੍ਚੁਪ੍ਪਨ੍ਨਜਾਨਨਸਮਤ੍ਥਂ ਸਬ੍ਬਞ੍ਞੁਤਞ੍ਞਾਣਂ ਅਤ੍ਥਿ ਨੁ ਖੋ ਨਤ੍ਥੀ’’ਤਿ ਕਙ੍ਖਤਿ. ਵਿਚਿਕਿਚ੍ਛਤੀਤਿ ਵਿਚਿਨਨ੍ਤੋ ਕਿਚ੍ਛਤਿ, ਦੁਕ੍ਖਂ ਆਪਜ੍ਜਤਿ, ਵਿਨਿਚ੍ਛੇਤੁਂ ਨ ਸਕ੍ਕੋਤਿ. ਨਾਧਿਮੁਚ੍ਚਤੀਤਿ ਏਵਮੇਤਨ੍ਤਿ ਅਧਿਮੋਕ੍ਖਂ ਨ ਪਟਿਲਭਤਿ. ਨ ਸਮ੍ਪਸੀਦਤੀਤਿ ਗੁਣੇਸੁ ਓਤਰਿਤ੍ਵਾ ਨਿਬ੍ਬਿਚਿਕਿਚ੍ਛਭਾਵੇਨ ਪਸੀਦਿਤੁਂ ਅਨਾਵਿਲੋ ਭਵਿਤੁਂ ਨ ਸਕ੍ਕੋਤਿ. ਆਤਪ੍ਪਾਯਾਤਿ ਕਿਲੇਸਸਨ੍ਤਾਪਕਵੀਰਿਯਕਰਣਤ੍ਥਾਯ. ਅਨੁਯੋਗਾਯਾਤਿ ਪੁਨਪ੍ਪੁਨਂ ਯੋਗਾਯ. ਸਾਤਚ੍ਚਾਯਾਤਿ ਸਤਤਕਿਰਿਯਾਯ. ਪਧਾਨਾਯਾਤਿ ਪਦਹਨਤ੍ਥਾਯ. ਅਯਂ ਪਠਮੋ ਚੇਤੋਖਿਲੋਤਿ ਅਯਂ ਸਤ੍ਥਰਿ ਵਿਚਿਕਿਚ੍ਛਾਸਙ੍ਖਾਤੋ ਪਠਮੋ ਚਿਤ੍ਤਸ੍ਸ ਥਦ੍ਧਭਾਵੋ ਏਵਮੇਤਸ੍ਸ ਭਿਕ੍ਖੁਨੋ ਅਪ੍ਪਹੀਨੋ ਹੋਤਿ.
ਧਮ੍ਮੇਤਿ ਪਰਿਯਤ੍ਤਿਧਮ੍ਮੇ ਚ ਪਟਿਵੇਧਧਮ੍ਮੇ ਚ. ਪਰਿਯਤ੍ਤਿਧਮ੍ਮੇ ਕਙ੍ਖਮਾਨੋ ‘‘ਤੇਪਿਟਕਂ ਬੁਦ੍ਧਵਚਨਂ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸਾਨੀਤਿ ਵਦਨ੍ਤਿ, ਅਤ੍ਥਿ ਨੁ ਖੋ ਏਤਂ ਨਤ੍ਥੀ’’ਤਿ ਕਙ੍ਖਤਿ. ਪਟਿਵੇਧਧਮ੍ਮੇ ਕਙ੍ਖਮਾਨੋ ‘‘ਵਿਪਸ੍ਸਨਾਨਿਸ੍ਸਨ੍ਦੋ ਮਗ੍ਗੋ ਨਾਮ, ਮਗ੍ਗਨਿਸ੍ਸਨ੍ਦਂ ਫਲਂ ਨਾਮ, ਸਬ੍ਬਸਙ੍ਖਾਰਪਟਿਨਿਸ੍ਸਗ੍ਗੋ ਨਿਬ੍ਬਾਨਂ ਨਾਮਾਤਿ ਵਦਨ੍ਤਿ, ਤਂ ਅਤ੍ਥਿ ਨੁ ਖੋ ਨਤ੍ਥੀ’’ਤਿ ਕਙ੍ਖਤਿ. ਸਙ੍ਘੇ ਕਙ੍ਖਤੀਤਿ ‘‘ਉਜੁਪ੍ਪਟਿਪਨ੍ਨੋ’’ਤਿਆਦੀਨਂ ਪਦਾਨਂ ਵਸੇਨ ‘‘ਏਵਰੂਪਂ ਪਟਿਪਦਂ ਪਟਿਪਨ੍ਨੋ ਚਤ੍ਤਾਰੋ ਮਗ੍ਗਟ੍ਠਾ ਚਤ੍ਤਾਰੋ ਫਲਟ੍ਠਾਤਿ ਅਟ੍ਠਨ੍ਨਂ ਪੁਗ੍ਗਲਾਨਂ ਸਮੂਹਭੂਤੋ ਸਙ੍ਘੋ ਨਾਮ ਅਤ੍ਥਿ ਨੁ ਖੋ ਨਤ੍ਥੀ’’ਤਿ ਕਙ੍ਖਤਿ. ਸਿਕ੍ਖਾਯ ਕਙ੍ਖਮਾਨੋ ‘‘ਅਧਿਸੀਲਸਿਕ੍ਖਾ ਨਾਮ ਅਧਿਚਿਤ੍ਤਅਧਿਪਞ੍ਞਾਸਿਕ੍ਖਾ ਨਾਮਾਤਿ ਵਦਨ੍ਤਿ, ਸਾ ਅਤ੍ਥਿ ਨੁ ਖੋ ਨਤ੍ਥੀ’’ਤਿ ਕਙ੍ਖਤਿ. ਅਯਂ ਪਞ੍ਚਮੋਤਿ ਅਯਂ ਸਬ੍ਰਹ੍ਮਚਾਰੀਸੁ ਕੋਪਸਙ੍ਖਾਤੋ ਪਞ੍ਚਮੋ ਚਿਤ੍ਤਸ੍ਸ ਥਦ੍ਧਭਾਵੋ ਕਚਵਰਭਾਵੋ ਖਾਣੁਕਭਾਵੋ.
੬. ਵਿਨਿਬਨ੍ਧਸੁਤ੍ਤਵਣ੍ਣਨਾ
੨੦੬. ਛਟ੍ਠੇ ਚੇਤਸੋਵਿਨਿਬਨ੍ਧਾਤਿ ਚਿਤ੍ਤਂ ਵਿਨਿਬਨ੍ਧਿਤ੍ਵਾ ਮੁਟ੍ਠਿਯਂ ਕਤ੍ਵਾ ਵਿਯ ਗਣ੍ਹਨ੍ਤੀਤਿ ਚੇਤਸੋਵਿਨਿਬਨ੍ਧਾ. ਕਾਮੇਤਿ ਵਤ੍ਥੁਕਾਮੇਪਿ ਕਿਲੇਸਕਾਮੇਪਿ. ਕਾਯੇਤਿ ਅਤ੍ਤਨੋ ਕਾਯੇ. ਰੂਪੇਤਿ ਬਹਿਦ੍ਧਾਰੂਪੇ. ਯਾਵਦਤ੍ਥਨ੍ਤਿ ਯਤ੍ਤਕਂ ਇਚ੍ਛਤਿ, ਤਤ੍ਤਕਂ. ਉਦਰਾਵਦੇਹਕਨ੍ਤਿ ਉਦਰਪੂਰਂ. ਤਞ੍ਹਿ ਉਦਰਂ ਅਵਦੇਹਨਤੋ ਉਦਰਾਵਦੇਹਕਨ੍ਤਿ ਵੁਚ੍ਚਤਿ. ਸੇਯ੍ਯਸੁਖਨ੍ਤਿ ਮਞ੍ਚਪੀਠਸੁਖਂ, ਉਤੁਸੁਖਂ ਵਾ. ਪਸ੍ਸਸੁਖਨ੍ਤਿ ਯਥਾ ਸਮ੍ਪਰਿਵਤ੍ਤਕਂ ਸਯਨ੍ਤਸ੍ਸ ਦਕ੍ਖਿਣਪਸ੍ਸ ਵਾਮਪਸ੍ਸਾਨਂ ਸੁਖਂ ਹੋਤਿ, ਏਵਂ ਉਪ੍ਪਨ੍ਨਸੁਖਂ. ਮਿਦ੍ਧਸੁਖਨ੍ਤਿ ਨਿਦ੍ਦਾਸੁਖਂ. ਅਨੁਯੁਤ੍ਤੋਤਿ ਯੁਤ੍ਤਪ੍ਪਯੁਤ੍ਤੋ ਵਿਹਰਤਿ. ਪਣਿਧਾਯਾਤਿ ਪਤ੍ਥਯਿਤ੍ਵਾ. ਸੀਲੇਨਾਤਿਆਦੀਸੁ ਸੀਲਨ੍ਤਿ ਚਤੁਪਾਰਿਸੁਦ੍ਧਿਸੀਲਂ. ਵਤਨ੍ਤਿ ਵਤਸਮਾਦਾਨਂ. ਤਪੋਤਿ ਤਪਚਰਣਂ. ਬ੍ਰਹ੍ਮਚਰਿਯਨ੍ਤਿ ਮੇਥੁਨਵਿਰਤਿ. ਦੇਵੋ ਵਾ ਭਵਿਸ੍ਸਾਮੀਤਿ ਮਹੇਸਕ੍ਖਦੇਵੋ ਵਾ ਭਵਿਸ੍ਸਾਮਿ. ਦੇਵਞ੍ਞਤਰੋ ਵਾਤਿ ਅਪ੍ਪੇਸਕ੍ਖਦੇਵੇਸੁ ਵਾ ਅਞ੍ਞਤਰੋਤਿ.
੭-੮. ਯਾਗੁਸੁਤ੍ਤਾਦਿਵਣ੍ਣਨਾ
੨੦੭-੨੦੮. ਸਤ੍ਤਮੇ ਵਾਤਂ ਅਨੁਲੋਮੇਤੀਤਿ ਵਾਤਂ ਅਨੁਲੋਮੇਤ੍ਵਾ ਹਰਤਿ. ਵਤ੍ਥਿਂ ਸੋਧੇਤੀਤਿ ਧਮਨਿਯੋ ਸੁਦ੍ਧਾ ਕਰੋਤਿ. ਆਮਾਵਸੇਸਂ ਪਾਚੇਤੀਤਿ ਸਚੇ ਆਮਾਵਸੇਸਕਂ ਹੋਤਿ, ਤਂ ਪਾਚੇਤਿ. ਅਟ੍ਠਮੇ ਅਚਕ੍ਖੁਸ੍ਸਨ੍ਤਿ ਨ ਚਕ੍ਖੂਨਂ ਹਿਤਂ, ਚਕ੍ਖੁਂ ਵਿਸੁਦ੍ਧਂ ਨ ਕਰੋਤਿ.
੯. ਗੀਤਸ੍ਸਰਸੁਤ੍ਤਵਣ੍ਣਨਾ
੨੦੯. ਨਵਮੇ ਆਯਤਕੇਨਾਤਿ ਦੀਘੇਨ, ਪਰਿਪੁਣ੍ਣਪਦਬ੍ਯਞ੍ਜਨਕਂ ਗਾਥਾਵਤ੍ਤਞ੍ਚ ਵਿਨਾਸੇਤ੍ਵਾ ਪਵਤ੍ਤੇਨ. ਸਰਕੁਤ੍ਤਿਮ੍ਪਿ ਨਿਕਾਮਯਮਾਨਸ੍ਸਾਤਿ ਏਵਂ ਗੀਤਸ੍ਸਰੋ ਕਾਤਬ੍ਬੋਤਿ ਸਰਕਿਰਿਯਂ ਪਤ੍ਥਯਮਾਨਸ੍ਸ. ਸਮਾਧਿਸ੍ਸ ਭਙ੍ਗੋ ਹੋਤੀਤਿ ਸਮਥਵਿਪਸ੍ਸਨਾਚਿਤ੍ਤਸ੍ਸ ਵਿਨਾਸੋ ਹੋਤਿ.
੧੦. ਮੁਟ੍ਠਸ੍ਸਤਿਸੁਤ੍ਤਵਣ੍ਣਨਾ
੨੧੦. ਦਸਮੇ ਦੁਕ੍ਖਂ ਸੁਪਤੀਤਿ ਨਾਨਾਵਿਧਂ ਸੁਪਿਨਂ ਪਸ੍ਸਨ੍ਤੋ ਦੁਕ੍ਖਂ ਸੁਪਤਿ. ਦੁਕ੍ਖਂ ਪਟਿਬੁਜ੍ਝਤੀਤਿ ਪਟਿਬੁਜ੍ਝਨ੍ਤੋਪਿ ਉਤ੍ਤਸਿਤ੍ਵਾ ਸਲੋਮਹਂਸੋ ਪਟਿਬੁਜ੍ਝਤਿ. ਇਮਸ੍ਮਿਂ ਸੁਤ੍ਤੇ ਸਤਿਸਮ੍ਪਜਞ੍ਞਂ ਮਿਸ੍ਸਕਂ ਕਥਿਤਂ.
ਕਿਮਿਲਵਗ੍ਗੋ ਪਠਮੋ.
(੨੨) ੨. ਅਕ੍ਕੋਸਕਵਗ੍ਗੋ
੧. ਅਕ੍ਕੋਸਕਸੁਤ੍ਤਵਣ੍ਣਨਾ
੨੧੧. ਦੁਤਿਯਸ੍ਸ ਪਠਮੇ ਅਕ੍ਕੋਸਕਪਰਿਭਾਸਕੋਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਕੋ, ਭਯਦਸ੍ਸਨੇਨ ਪਰਿਭਾਸਕੋ. ਛਿਨ੍ਨਪਰਿਪਨ੍ਥੋਤਿ ਲੋਕੁਤ੍ਤਰਪਰਿਪਨ੍ਥਸ੍ਸ ਛਿਨ੍ਨਤ੍ਤਾ ਛਿਨ੍ਨਪਰਿਪਨ੍ਥੋ. ਰੋਗਾਤਙ੍ਕਨ੍ਤਿ ਰੋਗੋਯੇਵ ਕਿਚ੍ਛਜੀਵਿਕਾਯਾਵਹਨਤੋ ਰੋਗਾਤਙ੍ਕੋ ਨਾਮ.
੨. ਭਣ੍ਡਨਕਾਰਕਸੁਤ੍ਤਵਣ੍ਣਨਾ
੨੧੨. ਦੁਤਿਯੇ ਅਧਿਕਰਣਕਾਰਕੋਤਿ ਚਤੁਨ੍ਨਂ ਅਧਿਕਰਣਾਨਂ ਅਞ੍ਞਤਰਸ੍ਸ ਕਾਰਕੋ. ਅਨਧਿਗਤਨ੍ਤਿ ਪੁਬ੍ਬੇ ਅਪ੍ਪਤ੍ਤਵਿਸੇਸਂ.
੩. ਸੀਲਸੁਤ੍ਤਵਣ੍ਣਨਾ
੨੧੩. ਤਤਿਯੇ ਦੁਸ੍ਸੀਲੋਤਿ ਅਸੀਲੋ ਨਿਸ੍ਸੀਲੋ. ਸੀਲਵਿਪਨ੍ਨੋਤਿ ਵਿਪਨ੍ਨਸੀਲੋ ਭਿਨ੍ਨਸਂਵਰੋ. ਪਮਾਦਾਧਿਕਰਣਨ੍ਤਿ ਪਮਾਦਕਾਰਣਾ. ਇਦਞ੍ਚ ਸੁਤ੍ਤਂ ਗਹਟ੍ਠਾਨਂ ਵਸੇਨ ਆਗਤਂ, ਪਬ੍ਬਜਿਤਾਨਮ੍ਪਿ ਪਨ ਲਬ੍ਭਤੇਵ. ਗਹਟ੍ਠੋ ਹਿ ਯੇਨ ਯੇਨ ਸਿਪ੍ਪਟ੍ਠਾਨੇਨ ਜੀਵਿਕਂ ਕਪ੍ਪੇਤਿ, ਯਦਿ ਕਸਿਯਾ, ਯਦਿ ਵਣਿਜ੍ਜਾਯ, ਪਾਣਾਤਿਪਾਤਾਦਿਵਸੇਨ ਪਮਤ੍ਤੋ ਤਂ ਤਂ ਯਥਾਕਾਲਂ ਸਮ੍ਪਾਦੇਤੁਂ ਨ ਸਕ੍ਕੋਤਿ, ਅਥਸ੍ਸ ਮੂਲਂ ਵਿਨਸ੍ਸਤਿ. ਮਾਘਾਤਕਾਲੇਪਿ ਪਾਣਾਤਿਪਾਤਂ ਅਦਿਨ੍ਨਾਦਾਨਾਦੀਨਿ ਚ ਕਰੋਨ੍ਤੋ ਦਣ੍ਡਵਸੇਨ ਮਹਤਿਂ ਭੋਗਜਾਨਿਂ ਨਿਗਚ੍ਛਤਿ. ਪਬ੍ਬਜਿਤੋ ਦੁਸ੍ਸੀਲੋ ਪਮਾਦਕਾਰਣਾ ਸੀਲਤੋ ਬੁਦ੍ਧਵਚਨਤੋ ਝਾਨਤੋ ਸਤ੍ਤਅਰਿਯਧਨਤੋ ਚ ਜਾਨਿਂ ਨਿਗਚ੍ਛਤਿ. ਗਹਟ੍ਠਸ੍ਸ ‘‘ਅਸੁਕੋ ਅਸੁਕਕੁਲੇ ਜਾਤੋ ਦੁਸ੍ਸੀਲੋ ਪਾਪਧਮ੍ਮੋ ਪਰਿਚ੍ਚਤ੍ਤਇਧਲੋਕਪਰਲੋਕੋ ਸਲਾਕਭਤ੍ਤਮਤ੍ਤਮ੍ਪਿ ਨ ਦੇਤੀ’’ਤਿ ਚਤੁਪਰਿਸਮਜ੍ਝੇ ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ. ਪਬ੍ਬਜਿਤਸ੍ਸ ‘‘ਅਸੁਕੋ ਨਾਸਕ੍ਖਿ ਸੀਲਂ ਰਕ੍ਖਿਤੁਂ ਬੁਦ੍ਧਵਚਨਂ ਗਹੇਤੁਂ, ਵੇਜ੍ਜਕਮ੍ਮਾਦੀਹਿ ਜੀਵਤਿ, ਛਹਿ ਅਗਾਰਵੇਹਿ ਸਮਨ੍ਨਾਗਤੋ’’ਤਿ ਏਵਂ ਅਬ੍ਭੁਗ੍ਗਚ੍ਛਤਿ.
ਅਵਿਸਾਰਦੋਤਿ ਗਹਟ੍ਠੋ ਤਾਵ ‘‘ਅਵਸ੍ਸਂ ਬਹੂਨਂ ਸਨ੍ਨਿਪਾਤਟ੍ਠਾਨੇ ਕੋਚਿ ਮਮ ਕਮ੍ਮਂ ਜਾਨਿਸ੍ਸਤਿ, ਅਥ ਮਂ ਨਿਗ੍ਗਣ੍ਹਿਸ੍ਸਨ੍ਤਿ ਵਾ, ਰਾਜਕੁਲਸ੍ਸ ਵਾ ਦਸ੍ਸਨ੍ਤੀ’’ਤਿ ਸਭਯੋ ਉਪਸਙ੍ਕਮਤਿ. ਮਙ੍ਕੁਭੂਤੋ ਚ ਪਤਿਤਕ੍ਖਨ੍ਧੋ ਅਧੋਮੁਖੋ ਅਙ੍ਗੁਟ੍ਠਕੇਨ ਭੂਮਿਂ ਕਸਨ੍ਤੋ ਨਿਸੀਦਤਿ, ਵਿਸਾਰਦੋ ਹੁਤ੍ਵਾ ਕਥੇਤੁਂ ਨ ਸਕ੍ਕੋਤਿ. ਪਬ੍ਬਜਿਤੋਪਿ ‘‘ਬਹੂ ਭਿਕ੍ਖੂ ਸਨ੍ਨਿਪਤਿਤਾ, ਅਵਸ੍ਸਂ ਕੋਚਿ ਮਮ ਕਮ੍ਮਂ ਜਾਨਿਸ੍ਸਤਿ, ਅਥ ਮੇ ਉਪੋਸਥਮ੍ਪਿ ਪਵਾਰਣਮ੍ਪਿ ਠਪੇਤ੍ਵਾ ਸਾਮਞ੍ਞਾ ਚਾਵੇਤ੍ਵਾ ਨਿਕ੍ਕਡ੍ਢਿਸ੍ਸਨ੍ਤੀ’’ਤਿ ਸਭਯੋ ਉਪਸਙ੍ਕਮਤਿ, ਵਿਸਾਰਦੋ ਹੁਤ੍ਵਾ ਕਥੇਤੁਂ ਨ ਸਕ੍ਕੋਤਿ. ਏਕਚ੍ਚੋ ਪਨ ਦੁਸ੍ਸੀਲੋਪਿ ਦਪ੍ਪਿਤੋ ਵਿਯ ਚਰਤਿ, ਸੋਪਿ ਅਜ੍ਝਾਸਯੇਨ ਮਙ੍ਕੁ ਹੋਤਿਯੇਵ.
ਸਮ੍ਮੂਲ਼੍ਹੋ ਕਾਲਂ ਕਰੋਤੀਤਿ ਤਸ੍ਸ ਹਿ ਮਰਣਮਞ੍ਚੇ ਨਿਪਨ੍ਨਸ੍ਸ ਦੁਸ੍ਸੀਲਕਮ੍ਮਂ ਸਮਾਦਾਯ ਵਤ੍ਤਿਤਟ੍ਠਾਨਂ ਆਪਾਥਂ ਆਗਚ੍ਛਤਿ. ਸੋ ਉਮ੍ਮੀਲੇਤ੍ਵਾ ਇਧਲੋਕਂ ਪਸ੍ਸਤਿ, ਨਿਮ੍ਮੀਲੇਤ੍ਵਾ ਪਰਲੋਕਂ. ਤਸ੍ਸ ਚਤ੍ਤਾਰੋ ਅਪਾਯਾ ਉਪਟ੍ਠਹਨ੍ਤਿ, ਸਤ੍ਤਿਸਤੇਨ ਸੀਸੇ ਪਹਰਿਯਮਾਨੋ ਵਿਯ ਹੋਤਿ. ਸੋ ‘‘ਵਾਰੇਥ ਵਾਰੇਥਾ’’ਤਿ ਵਿਰਵਨ੍ਤੋ ਮਰਤਿ. ਤੇਨ ਵੁਤ੍ਤਂ – ‘‘ਸਮ੍ਮੂਲ਼੍ਹੋ ਕਾਲਂ ਕਰੋਤੀ’’ਤਿ. ਪਞ੍ਚਮਪਦਂ ਉਤ੍ਤਾਨਮੇਵ. ਆਨਿਸਂਸਕਥਾ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬਾ.
੪. ਬਹੁਭਾਣਿਸੁਤ੍ਤਵਣ੍ਣਨਾ
੨੧੪. ਚਤੁਤ੍ਥੇ ਬਹੁਭਾਣਿਸ੍ਮਿਨ੍ਤਿ ਪਞ੍ਞਾਯ ਅਪਰਿਚ੍ਛਿਨ੍ਦਿਤ੍ਵਾ ਬਹੁਂ ਭਣਨ੍ਤੇ. ਮਨ੍ਤਭਾਣਿਸ੍ਮਿਨ੍ਤਿ ਮਨ੍ਤਾ ਵੁਚ੍ਚਤਿ ਪਞ੍ਞਾ, ਤਾਯ ਪਰਿਚ੍ਛਿਨ੍ਦਿਤ੍ਵਾ ਭਣਨ੍ਤੇ.
੫. ਪਠਮਅਕ੍ਖਨ੍ਤਿਸੁਤ੍ਤਵਣ੍ਣਨਾ
੨੧੫. ਪਞ੍ਚਮੇ ਵੇਰਬਹੁਲੋਤਿ ਪੁਗ੍ਗਲਵੇਰੇਨਪਿ ਅਕੁਸਲਵੇਰੇਨਪਿ ਬਹੁਵੇਰੋ. ਵਜ੍ਜਬਹੁਲੋਤਿ ਦੋਸਬਹੁਲੋ.
੬. ਦੁਤਿਯਅਕ੍ਖਨ੍ਤਿਸੁਤ੍ਤਵਣ੍ਣਨਾ
੨੧੬. ਛਟ੍ਠੇ ਲੁਦ੍ਦੋਤਿ ਦਾਰੁਣੋ ਕਕ੍ਖਲ਼ੋ. ਵਿਪ੍ਪਟਿਸਾਰੀਤਿ ਮਙ੍ਕੁਭਾਵੇਨ ਸਮਨ੍ਨਾਗਤੋ.
੭.ਪਠਮਅਪਾਸਾਦਿਕਸੁਤ੍ਤਵਣ੍ਣਨਾ
੨੧੭. ਸਤ੍ਤਮੇ ਅਪਾਸਾਦਿਕੇਤਿ ਅਪਾਸਾਦਿਕੇਹਿ ਕਾਯਕਮ੍ਮਾਦੀਹਿ ਸਮਨ੍ਨਾਗਤੇ. ਪਾਸਾਦਿਕੇਤਿ ਪਸਾਦਾਵਹੇ ਪਰਿਸੁਦ੍ਧਸਮਾਚਾਰੇ. ਅਟ੍ਠਮਨਵਮਾਨਿ ਉਤ੍ਤਾਨਤ੍ਥਾਨੇਵ.
੧੦. ਮਧੁਰਾਸੁਤ੍ਤਵਣ੍ਣਨਾ
੨੨੦. ਦਸਮੇ ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਮਧੁਰਾਯਨ੍ਤਿ ਏਕਂ ਸਮਯਂ ਭਗਵਾ ਭਿਕ੍ਖੁਸਙ੍ਘਪਰਿਵੁਤੋ ਚਾਰਿਕਂ ਚਰਮਾਨੋ ਮਧੁਰਾਨਗਰਂ ਸਮ੍ਪਾਪੁਣਿਤ੍ਵਾ ਅਨ੍ਤੋਨਗਰਂ ਪਵਿਸਿਤੁਂ ਆਰਭਿ. ਅਥੇਕਾ ਮਿਚ੍ਛਾਦਿਟ੍ਠਿਕਾ ਯਕ੍ਖਿਨੀ ਅਚੇਲਾ ਹੁਤ੍ਵਾ ਦ੍ਵੇ ਹਤ੍ਥੇ ਪਸਾਰੇਤ੍ਵਾ ਜਿਵ੍ਹਂ ਨਿਲ੍ਲਾਲੇਤ੍ਵਾ ਦਸਬਲਸ੍ਸ ਪੁਰਤੋ ਅਟ੍ਠਾਸਿ. ਸਤ੍ਥਾ ਅਨ੍ਤੋਨਗਰਂ ਅਪ੍ਪਵਿਸਿਤ੍ਵਾ ਤਤੋਵ ਨਿਕ੍ਖਮਿਤ੍ਵਾ ਵਿਹਾਰਂ ਅਗਮਾਸਿ. ਮਹਾਜਨੋ ਖਾਦਨੀਯਭੋਜਨੀਯਞ੍ਚੇਵ ਸਕ੍ਕਾਰਸਮ੍ਮਾਨਞ੍ਚ ਆਦਾਯ ਵਿਹਾਰਂ ਗਨ੍ਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਨਂ ਅਦਾਸਿ. ਸਤ੍ਥਾ ਤਸ੍ਸ ਨਗਰਸ੍ਸ ਨਿਗ੍ਗਣ੍ਹਨਤ੍ਥਾਯ ਇਮਂ ਸੁਤ੍ਤਂ ਆਰਭਿ. ਤਤ੍ਥ ਵਿਸਮਾਤਿ ਨ ਸਮਤਲਾ. ਬਹੁਰਜਾਤਿ ਵਾਤਪਹਰਣਕਾਲੇ ਉਦ੍ਧਤੇਨ ਰਜਕ੍ਖਨ੍ਧੇਨ ਪਰਿਯੋਨਦ੍ਧਾ ਵਿਯ ਹੋਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਅਕ੍ਕੋਸਕਵਗ੍ਗੋ ਦੁਤਿਯੋ.
(੨੩) ੩. ਦੀਘਚਾਰਿਕਵਗ੍ਗੋ
੧. ਪਠਮਦੀਘਚਾਰਿਕਸੁਤ੍ਤਵਣ੍ਣਨਾ
੨੨੧. ਤਤਿਯਸ੍ਸ ਪਠਮੇ ਅਨਵਤ੍ਥਚਾਰਿਕਨ੍ਤਿ ਅਵਵਤ੍ਥਿਤਚਾਰਿਕਂ. ਸੁਤਂ ਨ ਪਰਿਯੋਦਪੇਤੀਤਿ ਯਮ੍ਪਿਸ੍ਸ ਸੁਤਂ ਅਤ੍ਥਿ, ਤਂ ਪਰਿਯੋਦਪੇਤੁਂ ਨ ਸਕ੍ਕੋਤਿ. ਸੁਤੇਨੇਕਚ੍ਚੇਨ ਅਵਿਸਾਰਦੋ ਹੋਤੀਤਿ ਥੋਕਥੋਕੇਨ ਸੁਤੇਨ ਵਿਜ੍ਜਮਾਨੇਨਾਪਿ ਞਾਣੇਨ ਸੋਮਨਸ੍ਸਪ੍ਪਤ੍ਤੋ ਨ ਹੋਤਿ. ਸਮਵਤ੍ਥਚਾਰੇਤਿ ਸਮਵਤ੍ਥਿਤਚਾਰੇ. ਦੁਤਿਯਂ ਉਤ੍ਤਾਨਤ੍ਥਮੇਵ.
੩-੪. ਅਤਿਨਿਵਾਸਸੁਤ੍ਤਾਦਿਵਣ੍ਣਨਾ
੨੨੩-੨੨੪. ਤਤਿਯੇ ਬਹੁਭਣ੍ਡੋਤਿ ਬਹੁਪਰਿਕ੍ਖਾਰੋ. ਬਹੁਭੇਸਜ੍ਜੋਤਿ ਸਪ੍ਪਿਨਵਨੀਤਾਦੀਨਂ ਬਹੁਤਾਯ ਬਹੁਭੇਸਜ੍ਜੋ. ਬ੍ਯਤ੍ਤੋਤਿ ਬ੍ਯਾਸਤ੍ਤੋ. ਸਂਸਟ੍ਠੋਤਿ ਪਞ੍ਚਵਿਧੇਨ ਸਂਸਗ੍ਗੇਨ ਸਂਸਟ੍ਠੋ ਹੁਤ੍ਵਾ. ਅਨਨੁਲੋਮਿਕੇਨਾਤਿ ਸਾਸਨਸ੍ਸ ਅਨਨੁਚ੍ਛਵਿਕੇਨ. ਚਤੁਤ੍ਥੇ ਵਣ੍ਣਮਚ੍ਛਰੀਤਿ ਗੁਣਮਚ੍ਛਰੀ. ਧਮ੍ਮਮਚ੍ਛਰੀਤਿ ਪਰਿਯਤ੍ਤਿਮਚ੍ਛਰੀ.
੫-੬. ਕੁਲੂਪਕਸੁਤ੍ਤਾਦਿਵਣ੍ਣਨਾ
੨੨੫-੨੨੬. ਪਞ੍ਚਮੇ ਅਨਾਮਨ੍ਤਚਾਰੇ ਆਪਜ੍ਜਤੀਤਿ ‘‘ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਕੁਲੇਸੁ ਚਾਰਿਤ੍ਤਂ ਆਪਜ੍ਜੇਯ੍ਯਾ’’ਤਿ ਸਿਕ੍ਖਾਪਦੇ (ਪਾਰਾ. ੨੯੪) ਵੁਤ੍ਤਂ ਆਪਤ੍ਤਿਂ ਆਪਜ੍ਜਤਿ. ਰਹੋ ਨਿਸਜ੍ਜਾਯਾਤਿਆਦੀਨਿਪਿ ਤੇਸਂ ਤੇਸਂ ਸਿਕ੍ਖਾਪਦਾਨਂ ਵਸੇਨ ਵੇਦਿਤਬ੍ਬਾਨਿ. ਛਟ੍ਠੇ ਅਤਿਵੇਲਨ੍ਤਿ ਅਤਿਕ੍ਕਨ੍ਤਪਮਾਣਕਾਲਂ. ਸਤ੍ਤਮਂ ਉਤ੍ਤਾਨਮੇਵ.
੮. ਉਸ੍ਸੂਰਭਤ੍ਤਸੁਤ੍ਤਵਣ੍ਣਨਾ
੨੨੮. ਅਟ੍ਠਮੇ ਉਸ੍ਸੂਰਭਤ੍ਤੇਤਿ ਅਤਿਦਿਵਾਪਚਨਭਤ੍ਤੇ. ਨ ਕਾਲੇਨ ਪਟਿਪੂਜੇਨ੍ਤੀਤਿ ਯਾਗੁਕਾਲੇ ਯਾਗੁਂ, ਖਜ੍ਜਕਕਾਲੇ ਖਜ੍ਜਕਂ, ਭੋਜਨਕਾਲੇ ਭੋਜਨਂ ਅਪਚਨ੍ਤਾ ਯੁਤ੍ਤਪ੍ਪਯੁਤ੍ਤਕਾਲਸ੍ਸ ਅਤਿਨਾਮਿਤਤ੍ਤਾ ਨ ਕਾਲੇਨ ਪਟਿਪੂਜੇਨ੍ਤਿ, ਅਤ੍ਤਨੋ ਚਿਤ੍ਤੇਨੇਵ ਦੇਨ੍ਤਿ ਨਾਮ. ਤਤੋ ਤੇਪਿ ਤੇਸੁ ਅਤ੍ਤਨੋ ਗੇਹਂ ਆਗਤੇਸੁ ਤਥੇਵ ਕਰੋਨ੍ਤਿ. ਕੁਲਪਵੇਣਿਯਾ ਆਗਤਾ ਬਲਿਪਟਿਗ੍ਗਾਹਿਕਾ ਦੇਵਤਾਪਿ ਯੁਤ੍ਤਪ੍ਪਯੁਤ੍ਤਕਾਲੇਨ ਲਾਭਂ ਲਭਮਾਨਾਯੇਵ ਰਕ੍ਖਨ੍ਤਿ ਗੋਪਯਨ੍ਤਿ ਪੀਲ਼ਂ ਅਕਤ੍ਵਾ. ਅਕਾਲੇ ਲਭਮਾਨਾ ਪਨ ‘‘ਇਮੇ ਅਮ੍ਹੇਸੁ ਅਨਾਦਰਾ’’ਤਿ ਆਰਕ੍ਖਂ ਨ ਕਰੋਨ੍ਤਿ.
ਸਮਣਬ੍ਰਾਹ੍ਮਣਾਪਿ ‘‘ਏਤੇਸਂ ਗੇਹੇ ਭੋਜਨਵੇਲਾਯ ਭੋਜਨਂ ਨ ਹੋਤਿ, ਠਿਤਮਜ੍ਝਨ੍ਹਿਕੇ ਦੇਨ੍ਤੀ’’ਤਿ ਮਙ੍ਗਲਾਮਙ੍ਗਲੇਸੁ ਕਾਤਬ੍ਬਂ ਨ ਕਰੋਨ੍ਤਿ. ਵਿਮੁਖਾ ਕਮ੍ਮਂ ਕਰੋਨ੍ਤੀਤਿ ‘‘ਪਾਤੋ ਕਿਞ੍ਚਿ ਨ ਲਭਾਮ, ਖੁਦਾਯ ਪਟਿਪੀਲ਼ਿਤਾ ਕਮ੍ਮਂ ਕਾਤੁਂ ਨ ਸਕ੍ਕੋਮਾ’’ਤਿ ਕਮ੍ਮਂ ਵਿਸ੍ਸਜ੍ਜੇਤ੍ਵਾ ਨਿਸੀਦਨ੍ਤਿ. ਅਨੋਜਵਨ੍ਤਂ ਹੋਤੀਤਿ ਅਕਾਲੇ ਭੁਤ੍ਤਂ ਓਜਂ ਹਰਿਤੁਂ ਨ ਸਕ੍ਕੋਤਿ. ਸੁਕ੍ਕਪਕ੍ਖੋ ਵੁਤ੍ਤਵਿਪਲ੍ਲਾਸੇਨ ਵੇਦਿਤਬ੍ਬੋ.
੯. ਪਠਮਕਣ੍ਹਸਪ੍ਪਸੁਤ੍ਤਵਣ੍ਣਨਾ
੨੨੯. ਨਵਮੇ ਸਭੀਰੂਤਿ ਸਨਿਦ੍ਦੋ ਮਹਾਨਿਦ੍ਦਂ ਨਿਦ੍ਦਾਯਤਿ. ਸਪ੍ਪਟਿਭਯੋਤਿ ਤਂ ਨਿਸ੍ਸਾਯ ਭਯਂ ਉਪ੍ਪਜ੍ਜਤਿ, ਤਸ੍ਮਾ ਸਪ੍ਪਟਿਭਯੋ. ਮਿਤ੍ਤਦੁਬ੍ਭੀਤਿ ਪਾਨਭੋਜਨਦਾਯਕਮ੍ਪਿ ਮਿਤ੍ਤਂ ਦੁਬ੍ਭਤਿ ਹਿਂਸਤਿ. ਮਾਤੁਗਾਮੇਪਿ ਏਸੇਵ ਨਯੋ.
੧੦. ਦੁਤਿਯਕਣ੍ਹਸਪ੍ਪਸੁਤ੍ਤਵਣ੍ਣਨਾ
੨੩੦. ਦਸਮੇ ਘੋਰਵਿਸੋਤਿ ਕਕ੍ਖਲ਼ਵਿਸੋ. ਦੁਜ੍ਜਿਵ੍ਹੋਤਿ ਦ੍ਵਿਧਾ ਭਿਨ੍ਨਜਿਵ੍ਹੋ. ਘੋਰਵਿਸਤਾਤਿ ਘੋਰਵਿਸਤਾਯ. ਸੇਸਦ੍ਵਯੇਪਿ ਏਸੇਵ ਨਯੋ.
ਦੀਘਚਾਰਿਕਵਗ੍ਗੋ ਤਤਿਯੋ.
(੨੪) ੪. ਆਵਾਸਿਕਵਗ੍ਗੋ
੧. ਆਵਾਸਿਕਸੁਤ੍ਤਵਣ੍ਣਨਾ
੨੩੧. ਚਤੁਤ੍ਥਸ੍ਸ ਪਠਮੇ ਨ ਆਕਪ੍ਪਸਮ੍ਪਨ੍ਨੋਤਿ ਸਮਣਾਕਪ੍ਪੇਨ ਸਮ੍ਪਨ੍ਨੋ. ਅਭਾਵਨੀਯੋ ਹੋਤੀਤਿ ਵਡ੍ਢਨੀਯੋ ਨ ਹੋਤਿ. ਦੁਤਿਯਂ ਉਤ੍ਤਾਨਮੇਵ.
੩. ਸੋਭਨਸੁਤ੍ਤਵਣ੍ਣਨਾ
੨੩੩. ਤਤਿਯੇ ਪਟਿਬਲੋਤਿ ਕਾਯਬਲੇਨ ਚ ਞਾਣਬਲੇਨ ਚ ਸਮਨ੍ਨਾਗਤਤ੍ਤਾ ਪਟਿਬਲੋ.
੪. ਬਹੂਪਕਾਰਸੁਤ੍ਤਵਣ੍ਣਨਾ
੨੩੪. ਚਤੁਤ੍ਥੇ ਖਣ੍ਡਫੁਲ੍ਲਨ੍ਤਿ ਪਤਿਤਟ੍ਠਾਨਞ੍ਚ ਭਿਨ੍ਨਟ੍ਠਾਨਞ੍ਚ. ਪਟਿਸਙ੍ਖਰੋਤੀਤਿ ਪਟਿਪਾਕਤਿਕਂ ਕਰੋਤਿ. ਆਰੋਚੇਤੀਤਿ ਇਦਂ ਪਵਾਰਿਤਕੁਲਾਨਂ ਵਸੇਨ ਵੁਤ੍ਤਂ.
੫. ਅਨੁਕਮ੍ਪਸੁਤ੍ਤਵਣ੍ਣਨਾ
੨੩੫. ਪਞ੍ਚਮੇ ਅਧਿਸੀਲੇਸੂਤਿ ਪਞ੍ਚਸੁ ਸੀਲੇਸੁ. ਧਮ੍ਮਦਸ੍ਸਨੇ ਨਿਵੇਸੇਤੀਤਿ ਚਤੁਸਚ੍ਚਧਮ੍ਮਦਸ੍ਸਨੇ ਪਤਿਟ੍ਠਾਪੇਤਿ. ਅਰਹਗ੍ਗਤਨ੍ਤਿ ਸਬ੍ਬਸਕ੍ਕਾਰਾਨਂ ਅਰਹੇ ਰਤਨਤ੍ਤਯੇਵ ਗਤਂ, ਤੀਸੁ ਵਤ੍ਥੂਸੁ ਗਰੁਚਿਤ੍ਤੀਕਾਰਂ ਉਪਟ੍ਠਪੇਥਾਤਿ ਅਤ੍ਥੋ. ਛਟ੍ਠਂ ਉਤ੍ਤਾਨਮੇਵ.
੭. ਦੁਤਿਯਅਵਣ੍ਣਾਰਹਸੁਤ੍ਤਵਣ੍ਣਨਾ
੨੩੭. ਸਤ੍ਤਮੇ ਆਵਾਸਪਲਿਗੇਧੀਤਿ ਆਵਾਸਂ ਬਲਵਗਿਦ੍ਧਿਵਸੇਨ ਗਿਲਿਤ੍ਵਾ ਵਿਯ ਠਿਤੋ. ਸੇਸਂ ਸਬ੍ਬਂ ਉਤ੍ਤਾਨਮੇਵਾਤਿ.
ਆਵਾਸਿਕਵਗ੍ਗੋ ਚਤੁਤ੍ਥੋ.
(੨੫) ੫. ਦੁਚ੍ਚਰਿਤਵਗ੍ਗੋ
੧. ਪਠਮਦੁਚ੍ਚਰਿਤਸੁਤ੍ਤਵਣ੍ਣਨਾ
੨੪੧. ਪਞ੍ਚਮਸ੍ਸ ਪਠਮੇ ਦੁਚ੍ਚਰਿਤੇ ਸੁਚਰਿਤੇਤਿ ਇਦਂ ਅਭੇਦਤੋ ਵੁਤ੍ਤਂ, ਕਾਯਦੁਚ੍ਚਰਿਤੇਤਿਆਦਿ ਕਾਯਦ੍ਵਾਰਾਦੀਨਂ ਵਸੇਨ ਭੇਦਤੋ. ਸਦ੍ਧਮ੍ਮਾਤਿ ਦਸਕੁਸਲਕਮ੍ਮਪਥਧਮ੍ਮਤੋ. ਅਸਦ੍ਧਮ੍ਮੇਤਿ ਅਕੁਸਲਕਮ੍ਮਪਥਸਙ੍ਖਾਤੇ ਅਸ੍ਸਦ੍ਧਮ੍ਮੇ.
੯. ਸਿਵਥਿਕਸੁਤ੍ਤਵਣ੍ਣਨਾ
੨੪੯. ਨਵਮੇ ਸਿਵਥਿਕਾਯਾਤਿ ਸੁਸਾਨੇ. ਆਰੋਦਨਾਤਿ ਆਰੋਦਨਟ੍ਠਾਨਂ. ਅਸੁਚਿਨਾਤਿ ਜਿਗੁਚ੍ਛਨੀਯੇਨ.
੧੦. ਪੁਗ੍ਗਲਪ੍ਪਸਾਦਸੁਤ੍ਤਵਣ੍ਣਨਾ
੨੫੦. ਦਸਮੇ ਪੁਗ੍ਗਲਪ੍ਪਸਾਦੇਤਿ ਏਕਪੁਗ੍ਗਲਸ੍ਮਿਂ ਉਪ੍ਪਨ੍ਨਪ੍ਪਸਾਦੇ. ਅਨ੍ਤੇ ਨਿਸੀਦਾਪੇਤੀਤਿ ਭਿਕ੍ਖੂਨਂ ਆਸਨਪਰਿਯਨ੍ਤੇ ਨਿਸੀਦਾਪੇਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਦੁਚ੍ਚਰਿਤਵਗ੍ਗੋ ਪਞ੍ਚਮੋ.
ਪਞ੍ਚਮਪਣ੍ਣਾਸਕਂ ਨਿਟ੍ਠਿਤਂ.