੫. ਰੋਹਿਤਸ੍ਸਸੁਤ੍ਤਵਣ੍ਣਨਾ

੪੫. ਪਞ੍ਚਮੇ ਯਤ੍ਥਾਤਿ ਚਕ੍ਕਵਾਲ਼ਲੋਕਸ੍ਸ ਏਕੋਕਾਸੇ ਭੁਮ੍ਮਂ. ਨ ਚਵਤਿ ਨ ਉਪਪਜ੍ਜਤੀਤਿ ਇਦਂ ਅਪਰਾਪਰਂ ਚੁਤਿਪਟਿਸਨ੍ਧਿਵਸੇਨ ਗਹਿਤਂ. ਗਮਨੇਨਾਤਿ ਪਦਗਮਨੇਨ. ਲੋਕਸ੍ਸ ਅਨ੍ਤਨ੍ਤਿ ਸਤ੍ਥਾ ਸਙ੍ਖਾਰਲੋਕਸ੍ਸ ਅਨ੍ਤਂ ਸਨ੍ਧਾਯ ਵਦਤਿ. ਞਾਤੇਯ੍ਯਨ੍ਤਿਆਦੀਸੁ ਞਾਤਬ੍ਬਂ ਦਟ੍ਠਬ੍ਬਂ ਪਤ੍ਤਬ੍ਬਨ੍ਤਿ ਅਤ੍ਥੋ. ਇਤਿ ਦੇਵਪੁਤ੍ਤੇਨ ਚਕ੍ਕਵਾਲ਼ਲੋਕਸ੍ਸ ਅਨ੍ਤੋ ਪੁਚ੍ਛਿਤੋ, ਸਤ੍ਥਾਰਾ ਸਙ੍ਖਾਰਲੋਕਸ੍ਸ ਕਥਿਤੋ. ਸੋ ਪਨ ‘‘ਅਤ੍ਤਨੋ ਪਞ੍ਹੇਨ ਸਦ੍ਧਿਂ ਸਤ੍ਥੁ ਬ੍ਯਾਕਰਣਂ ਸਮੇਤੀ’’ਤਿ ਸਞ੍ਞਾਯ ਸਮ੍ਪਹਂਸਨ੍ਤੋ ਅਚ੍ਛਰਿਯਨ੍ਤਿਆਦਿਮਾਹ.

ਦਲ਼੍ਹਧਮ੍ਮਾਤਿ ਦਲ਼੍ਹਧਨੁ ਉਤ੍ਤਮਪ੍ਪਮਾਣੇਨ ਧਨੁਨਾ ਸਮਨ੍ਨਾਗਤੋ. ਧਨੁਗ੍ਗਹੋਤਿ ਧਨੁਆਚਰਿਯੋ. ਸਿਕ੍ਖਿਤੋਤਿ ਦ੍ਵਾਦਸ ਵਸ੍ਸਾਨਿ ਧਨੁਸਿਪ੍ਪਂ ਸਿਕ੍ਖਿਤੋ. ਕਤਹਤ੍ਥੋਤਿ ਉਸਭਪ੍ਪਮਾਣੇਪਿ ਵਾਲਗ੍ਗਂ ਵਿਜ੍ਝਿਤੁਂ ਸਮਤ੍ਥਭਾਵੇਨ ਕਤਹਤ੍ਥੋ. ਕਤੂਪਾਸਨੋਤਿ ਕਤਸਰਕ੍ਖੇਪੋ ਦਸ੍ਸਿਤਸਿਪ੍ਪੋ. ਅਸਨੇਨਾਤਿ ਕਣ੍ਡੇਨ. ਅਤਿਪਾਤੇਯ੍ਯਾਤਿ ਅਤਿਕ੍ਕਮੇਯ੍ਯ. ਯਾਵਤਾ ਸੋ ਤਾਲਚ੍ਛਾਦਿਂ ਅਤਿਕ੍ਕਮੇਯ੍ਯ, ਤਾਵਤਾ ਕਾਲੇਨ ਏਕਂ ਚਕ੍ਕਵਾਲ਼ਂ ਅਤਿਕ੍ਕਮਾਮੀਤਿ ਅਤ੍ਤਨੋ ਜਵਸਮ੍ਪਤ੍ਤਿਂ ਦਸ੍ਸੇਤਿ.

ਪੁਰਤ੍ਥਿਮਾ ਸਮੁਦ੍ਦਾ ਪਚ੍ਛਿਮੋਤਿ ਯਥਾ ਪੁਰਤ੍ਥਿਮਾ ਸਮੁਦ੍ਦਾ ਪਚ੍ਛਿਮਸਮੁਦ੍ਦੋ ਦੂਰੇ, ਏਵਂ ਮੇ ਦੂਰੇ ਪਦਵੀਤਿਹਾਰੋ ਅਹੋਸੀਤਿ ਵਦਤਿ. ਸੋ ਕਿਰ ਪਾਚੀਨਚਕ੍ਕਵਾਲ਼ਮੁਖਵਟ੍ਟਿਯਂ ਠਿਤੋ ਪਾਦਂ ਪਸਾਰੇਤ੍ਵਾ ਪਚ੍ਛਿਮਚਕ੍ਕਵਾਲ਼ਮੁਖਵਟ੍ਟਿਂ ਅਤਿਕ੍ਕਮਤਿ, ਪੁਨ ਦੁਤਿਯਪਾਦਂ ਪਸਾਰੇਤ੍ਵਾ ਪਰਚਕ੍ਕਵਾਲ਼ਮੁਖਵਟ੍ਟਿਂ ਅਤਿਕ੍ਕਮਤਿ. ਇਚ੍ਛਾਗਤਨ੍ਤਿ ਇਚ੍ਛਾ ਏਵ. ਅਞ੍ਞਤ੍ਰੇਵਾਤਿ ਨਿਪ੍ਪਪਞ੍ਚਤਂ ਦਸ੍ਸੇਤਿ. ਭਿਕ੍ਖਾਚਾਰਕਾਲੇ ਕਿਰੇਸ ਨਾਗਲਤਾਦਨ੍ਤਕਟ੍ਠਂ ਖਾਦਿਤ੍ਵਾ ਅਨੋਤਤ੍ਤੇ ਮੁਖਂ ਧੋਵਿਤ੍ਵਾ ਕਾਲੇ ਸਮ੍ਪਤ੍ਤੇ ਉਤ੍ਤਰਕੁਰੁਮ੍ਹਿ ਪਿਣ੍ਡਾਯ ਚਰਿਤ੍ਵਾ ਚਕ੍ਕਵਾਲ਼ਮੁਖਵਟ੍ਟਿਯਂ ਨਿਸਿਨ੍ਨੋ ਭਤ੍ਤਕਿਚ੍ਚਂ ਕਰੋਤਿ, ਤਤ੍ਥ ਮੁਹੁਤ੍ਤਂ ਵਿਸ੍ਸਮਿਤ੍ਵਾ ਪੁਨ ਜਵਤਿ. ਵਸ੍ਸਸਤਾਯੁਕੋਤਿ ਤਦਾ ਦੀਘਾਯੁਕਕਾਲੋ ਹੋਤਿ, ਅਯਂ ਪਨ ਵਸ੍ਸਸਤਾਵਸਿਟ੍ਠੇ ਆਯੁਮ੍ਹਿ ਗਮਨਂ ਆਰਭਿ. ਵਸ੍ਸਸਤਜੀਵੀਤਿ ਤਂ ਵਸ੍ਸਸਤਂ ਅਨਨ੍ਤਰਾਯੇਨ ਜੀਵਨ੍ਤੋ. ਅਨ੍ਤਰਾਯੇਵ ਕਾਲਙ੍ਕਤੋਤਿ ਚਕ੍ਕਵਾਲ਼ਲੋਕਸ੍ਸ ਅਨ੍ਤਂ ਅਪ੍ਪਤ੍ਵਾ ਅਨ੍ਤਰਾਵ ਮਤੋ. ਸੋ ਪਨ ਤਤ੍ਥ ਕਾਲਂ ਕਤ੍ਵਾਪਿ ਆਗਨ੍ਤ੍ਵਾ ਇਮਸ੍ਮਿਂਯੇਵ ਚਕ੍ਕਵਾਲ਼ੇ ਨਿਬ੍ਬਤ੍ਤਿ.

ਅਪ੍ਪਤ੍ਵਾਤਿ ਸਙ੍ਖਾਰਲੋਕਸ੍ਸ ਅਨ੍ਤਂ ਅਪ੍ਪਤ੍ਵਾ. ਦੁਕ੍ਖਸ੍ਸਾਤਿ ਵਟ੍ਟਦੁਕ੍ਖਸ੍ਸ. ਅਨ੍ਤਕਿਰਿਯਨ੍ਤਿ ਪਰਿਯਨ੍ਤਕਰਣਂ. ਕਲ਼ੇਵਰੇਤਿ ਅਤ੍ਤਭਾਵੇ. ਸਸਞ੍ਞਿਮ੍ਹਿ ਸਮਨਕੇਤਿ ਸਸਞ੍ਞੇ ਸਚਿਤ੍ਤਕੇ. ਲੋਕਨ੍ਤਿ ਦੁਕ੍ਖਸਚ੍ਚਂ. ਲੋਕਸਮੁਦਯਨ੍ਤਿ ਸਮੁਦਯਸਚ੍ਚਂ. ਲੋਕਨਿਰੋਧਨ੍ਤਿ ਨਿਰੋਧਸਚ੍ਚਂ. ਪਟਿਪਦਨ੍ਤਿ ਮਗ੍ਗਸਚ੍ਚਂ. ਇਤਿ ‘‘ਨਾਹਂ, ਆਵੁਸੋ, ਇਮਾਨਿ ਚਤ੍ਤਾਰਿ ਸਚ੍ਚਾਨਿ ਤਿਣਕਟ੍ਠਾਦੀਸੁ ਪਞ੍ਞਪੇਮਿ, ਇਮਸ੍ਮਿਂ ਪਨ ਚਤੁਮਹਾਭੂਤਿਕੇ ਕਾਯਸ੍ਮਿਂਯੇਵ ਪਞ੍ਞਪੇਮੀ’’ਤਿ ਦਸ੍ਸੇਤਿ. ਸਮਿਤਾਵੀਤਿ ਸਮਿਤਪਾਪੋ. ਨਾਸੀਸਤੀਤਿ ਨ ਪਤ੍ਥੇਤਿ. ਛਟ੍ਠਂ ਉਤ੍ਤਾਨਤ੍ਥਮੇਵਾਤਿ.