੧. ਸਮਾਧਿਭਾਵਨਾਸੁਤ੍ਤਵਣ੍ਣਨਾ

੪੧. ਪਞ੍ਚਮਸ੍ਸ ਪਠਮੇ ਞਾਣਦਸ੍ਸਨਪ੍ਪਟਿਲਾਭਾਯਾਤਿ ਦਿਬ੍ਬਚਕ੍ਖੁਞਾਣਦਸ੍ਸਨਸ੍ਸ ਪਟਿਲਾਭਾਯ. ਦਿਵਾਸਞ੍ਞਂ ਅਧਿਟ੍ਠਾਤੀਤਿ ਦਿਵਾਤਿ ਏਵਂ ਸਞ੍ਞਂ ਅਧਿਟ੍ਠਾਤਿ. ਯਥਾ ਦਿਵਾ ਤਥਾ ਰਤ੍ਤਿਨ੍ਤਿ ਯਥਾ ਦਿਵਾ ਆਲੋਕਸਞ੍ਞਾ ਮਨਸਿ ਕਤਾ, ਤਥੇਵ ਤਂ ਰਤ੍ਤਿਮ੍ਪਿ ਮਨਸਿ ਕਰੋਤਿ. ਦੁਤਿਯਪਦੇਪਿ ਏਸੇਵ ਨਯੋ. ਸਪ੍ਪਭਾਸਨ੍ਤਿ ਦਿਬ੍ਬਚਕ੍ਖੁਞਾਣੋਭਾਸੇਨ ਸਹੋਭਾਸਂ. ਕਿਞ੍ਚਾਪਿ ਆਲੋਕਸਦਿਸਂ ਕਤਂ, ਅਤ੍ਥੋ ਪਨੇਤ੍ਥ ਨ ਏਵਂ ਸਲ੍ਲਕ੍ਖੇਤਬ੍ਬੋ. ਦਿਬ੍ਬਚਕ੍ਖੁਞਾਣਾਲੋਕੋ ਹਿ ਇਧਾਧਿਪ੍ਪੇਤੋ.

ਵਿਦਿਤਾਤਿ ਪਾਕਟਾ ਹੁਤ੍ਵਾ. ਕਥਂ ਪਨ ਵੇਦਨਾ ਵਿਦਿਤਾ ਉਪ੍ਪਜ੍ਜਨ੍ਤਿ, ਵਿਦਿਤਾ ਅਬ੍ਭਤ੍ਥਂ ਗਚ੍ਛਨ੍ਤੀਤਿ? ਇਧ ਭਿਕ੍ਖੁ ਵਤ੍ਥੁਂ ਪਰਿਗ੍ਗਣ੍ਹਾਤਿ, ਆਰਮ੍ਮਣਂ ਪਰਿਗ੍ਗਣ੍ਹਾਤਿ. ਤਸ੍ਸ ਪਰਿਗ੍ਗਹਿਤਵਤ੍ਥਾਰਮ੍ਮਣਤਾਯ ਤਾ ਵੇਦਨਾ ‘‘ਏਵਂ ਉਪ੍ਪਜ੍ਜਿਤ੍ਵਾ ਏਵਂ ਠਤ੍ਵਾ ਏਵਂ ਨਿਰੁਜ੍ਝਨ੍ਤੀ’’ਤਿ ਵਿਦਿਤਾ ਉਪ੍ਪਜ੍ਜਨ੍ਤਿ, ਵਿਦਿਤਾ ਤਿਟ੍ਠਨ੍ਤਿ, ਵਿਦਿਤਾ ਅਬ੍ਭਤ੍ਥਂ ਗਚ੍ਛਨ੍ਤਿ ਨਾਮ. ਸਞ੍ਞਾਵਿਤਕ੍ਕੇਸੁਪਿ ਏਸੇਵ ਨਯੋ.

ਉਦਯਬ੍ਬਯਾਨੁਪਸ੍ਸੀਤਿ ਉਦਯਞ੍ਚ ਵਯਞ੍ਚ ਪਸ੍ਸਨ੍ਤੋ. ਇਤਿ ਰੂਪਨ੍ਤਿ ਏਵਂ ਰੂਪਂ ਏਤ੍ਤਕਂ ਰੂਪਂ ਨ ਇਤੋ ਪਰਂ ਰੂਪਂ ਅਤ੍ਥੀਤਿ. ਇਤਿ ਰੂਪਸ੍ਸ ਸਮੁਦਯੋਤਿ ਏਵਂ ਰੂਪਸ੍ਸ ਉਪ੍ਪਾਦੋ. ਅਤ੍ਥਙ੍ਗਮੋਤਿ ਪਨ ਭੇਦੋ ਅਧਿਪ੍ਪੇਤੋ. ਵੇਦਨਾਦੀਸੁਪਿ ਏਸੇਵ ਨਯੋ. ਇਦਞ੍ਚ ਪਨ ਮੇਤਂ, ਭਿਕ੍ਖਵੇ, ਸਨ੍ਧਾਯ ਭਾਸਿਤਨ੍ਤਿ, ਭਿਕ੍ਖਵੇ, ਯਂ ਮਯਾ ਏਤਂ ਪੁਣ੍ਣਕਪਞ੍ਹੇ ‘‘ਸਙ੍ਖਾਯ ਲੋਕਸ੍ਮਿ’’ਨ੍ਤਿਆਦਿ ਭਾਸਿਤਂ, ਤਂ ਇਦਂ ਫਲਸਮਾਪਤ੍ਤਿਂ ਸਨ੍ਧਾਯ ਭਾਸਿਤਨ੍ਤਿ ਅਤ੍ਥੋ.

ਤਤ੍ਥ ਸਙ੍ਖਾਯਾਤਿ ਞਾਣੇਨ ਜਾਨਿਤ੍ਵਾ. ਲੋਕਸ੍ਮਿਨ੍ਤਿ ਸਤ੍ਤਲੋਕੇ. ਪਰੋਪਰਾਨੀਤਿ ਉਚ੍ਚਾਵਚਾਨਿ ਉਤ੍ਤਮਾਧਮਾਨਿ. ਇਞ੍ਜਿਤਨ੍ਤਿ ਚਲਿਤਂ. ਨਤ੍ਥਿ ਕੁਹਿਞ੍ਚਿ ਲੋਕੇਤਿ ਲੋਕਸ੍ਮਿਂ ਕਤ੍ਥਚਿ ਏਕਕ੍ਖਨ੍ਧੇਪਿ ਏਕਾਯਤਨੇਪਿ ਏਕਧਾਤੁਯਾਪਿ ਏਕਾਰਮ੍ਮਣੇਪਿ ਨਤ੍ਥਿ. ਸਨ੍ਤੋਤਿ ਪਚ੍ਚਨੀਕਕਿਲੇਸਵੂਪਸਮੇਨ ਸਨ੍ਤੋ. ਵਿਧੂਮੋਤਿ ਕੋਧਧੂਮੇਨ ਵਿਗਤਧੂਮੋ. ਏਵਮੇਤ੍ਥ ਸੁਤ੍ਤਨ੍ਤੇ ਮਗ੍ਗੇਕਗ੍ਗਤਮ੍ਪਿ ਕਥੇਤ੍ਵਾ ਗਾਥਾਯ ਫਲਸਮਾਪਤ੍ਤਿਯੇਵ ਕਥਿਤਾਤਿ.