੯. ਸੁਖੁਮਾਲਸੁਤ੍ਤਵਣ੍ਣਨਾ

੩੯. ਨਵਮੇ ਸੁਖੁਮਾਲੋਤਿ ਨਿਦ੍ਦੁਕ੍ਖੋ. ਪਰਮਸੁਖੁਮਾਲੋਤਿ ਪਰਮਨਿਦ੍ਦੁਕ੍ਖੋ. ਅਚ੍ਚਨ੍ਤਸੁਖੁਮਾਲੋਤਿ ਸਤਤਨਿਦ੍ਦੁਕ੍ਖੋ. ਇਮਂ ਭਗਵਾ ਕਪਿਲਪੁਰੇ ਨਿਬ੍ਬਤ੍ਤਕਾਲਤੋ ਪਟ੍ਠਾਯ ਨਿਦ੍ਦੁਕ੍ਖਭਾਵਂ ਗਹੇਤ੍ਵਾ ਆਹ, ਚਰਿਯਕਾਲੇ ਪਨ ਤੇਨ ਅਨੁਭੂਤਦੁਕ੍ਖਸ੍ਸ ਅਨ੍ਤੋ ਨਤ੍ਥੀਤਿ. ਏਕਤ੍ਥਾਤਿ ਏਕਿਸ੍ਸਾ ਪੋਕ੍ਖਰਣਿਯਾ. ਉਪ੍ਪਲਂ ਵਪ੍ਪਤੀਤਿ ਉਪ੍ਪਲਂ ਰੋਪੇਤਿ. ਸਾ ਨੀਲੁਪ੍ਪਲਵਨਸਞ੍ਛਨ੍ਨਾ ਹੋਤਿ. ਪਦੁਮਨ੍ਤਿ ਪਣ੍ਡਰਪਦੁਮਂ. ਪੁਣ੍ਡਰੀਕਨ੍ਤਿ ਰਤ੍ਤਪਦੁਮਂ. ਏਵਂ ਇਤਰਾਪਿ ਦ੍ਵੇ ਪਦੁਮਪੁਣ੍ਡਰੀਕਵਨੇਹਿ ਸਞ੍ਛਨ੍ਨਾ ਹੋਨ੍ਤਿ. ਬੋਧਿਸਤ੍ਤਸ੍ਸ ਕਿਰ ਸਤ੍ਤਟ੍ਠਵਸ੍ਸਿਕਕਾਲੇ ਰਾਜਾ ਅਮਚ੍ਚੇ ਪੁਚ੍ਛਿ – ‘‘ਤਰੁਣਦਾਰਕਾ ਕਤਰਕੀਲ਼ਿਕਂ ਪਿਯਾਯਨ੍ਤੀ’’ਤਿ? ਉਦਕਕੀਲ਼ਿਕਂ ਦੇਵਾਤਿ. ਤਤੋ ਰਾਜਾ ਕੁਦ੍ਦਾਲਕਮ੍ਮਕਾਰਕੇ ਸਨ੍ਨਿਪਾਤੇਤ੍ਵਾ ਪੋਕ੍ਖਰਣਿਟ੍ਠਾਨਾਨਿ ਗਣ੍ਹਾਪੇਸਿ. ਅਥ ਸਕ੍ਕੋ ਦੇਵਰਾਜਾ ਆਵਜ੍ਜੇਨ੍ਤੋ ਤਂ ਪਵਤ੍ਤਿਂ ਞਤ੍ਵਾ – ‘‘ਨ ਯੁਤ੍ਤੋ ਮਹਾਸਤ੍ਤਸ੍ਸ ਮਾਨੁਸਕਪਰਿਭੋਗੋ, ਦਿਬ੍ਬਪਰਿਭੋਗੋ ਯੁਤ੍ਤੋ’’ਤਿ ਵਿਸ੍ਸਕਮ੍ਮਂ ਆਮਨ੍ਤੇਤ੍ਵਾ – ‘‘ਗਚ੍ਛ, ਤਾਤ, ਮਹਾਸਤ੍ਤਸ੍ਸ ਕੀਲ਼ਾਭੂਮਿਯਂ ਪੋਕ੍ਖਰਣਿਯੋ ਮਾਪੇਹੀ’’ਤਿ ਆਹ. ਕੀਦਿਸਾ ਹੋਨ੍ਤੁ, ਦੇਵਾਤਿ? ਅਪਗਤਕਲਲਕਦ੍ਦਮਾ ਹੋਨ੍ਤੁ ਵਿਪ੍ਪਕਿਣ੍ਣਮਣਿਮੁਤ੍ਤਪਵਾਲ਼ਿਕਾ ਸਤ੍ਤਰਤਨਮਯਪਾਕਾਰਪਰਿਕ੍ਖਿਤ੍ਤਾ ਪਵਾਲ਼ਮਯਉਣ੍ਹੀਸੇਹਿ ਮਣਿਮਯਸੋਪਾਨਬਾਹੁਕੇਹਿ ਸੁਵਣ੍ਣਰਜਤਮਣਿਮਯਫਲਕੇਹਿ ਸੋਪਾਨੇਹਿ ਸਮਨ੍ਨਾਗਤਾ. ਸੁਵਣ੍ਣਰਜਤਮਣਿਪਵਾਲ਼ਮਯਾ ਚੇਤ੍ਥ ਨਾਵਾ ਹੋਨ੍ਤੁ, ਸੁਵਣ੍ਣਨਾਵਾਯ ਰਜਤਪਲ੍ਲਙ੍ਕੋ ਹੋਤੁ, ਰਜਤਨਾਵਾਯ ਸੁਵਣ੍ਣਪਲ੍ਲਙ੍ਕੋ, ਮਣਿਨਾਵਾਯ ਪਵਾਲ਼ਪਲ੍ਲਙ੍ਕੋ, ਪਵਾਲ਼ਨਾਵਾਯ ਮਣਿਪਲ੍ਲਙ੍ਕੋ, ਸੁਵਣ੍ਣਰਜਤਮਣਿਪਵਾਲ਼ਮਯਾਵ ਉਦਕਸੇਚਨਨਾਲ਼ਿਕਾ ਹੋਨ੍ਤੁ, ਪਞ੍ਚਵਣ੍ਣੇਹਿ ਚ ਪਦੁਮੇਹਿ ਸਞ੍ਛਨ੍ਨਾ ਹੋਨ੍ਤੂਤਿ. ‘‘ਸਾਧੁ, ਦੇਵਾ’’ਤਿ ਵਿਸ੍ਸਕਮ੍ਮਦੇਵਪੁਤ੍ਤੋ ਸਕ੍ਕਸ੍ਸ ਪਟਿਸ੍ਸੁਤ੍ਵਾ ਰਤ੍ਤਿਭਾਗੇ ਓਤਰਿਤ੍ਵਾ ਰਞ੍ਞੋ ਗਾਹਾਪਿਤਪੋਕ੍ਖਰਣਿਟ੍ਠਾਨੇਸੁਯੇਵ ਤੇਨੇਵ ਨਿਯਾਮੇਨ ਪੋਕ੍ਖਰਣਿਯੋ ਮਾਪੇਸਿ.

ਨਨੁ ਚੇਤਾ ਅਪਗਤਕਲਲਕਦ੍ਦਮਾ, ਕਥਮੇਤ੍ਥ ਪਦੁਮਾਨਿ ਪੁਪ੍ਫਿਂਸੂਤਿ? ਸੋ ਕਿਰ ਤਾਸੁ ਪੋਕ੍ਖਰਣੀਸੁ ਤਤ੍ਥ ਤਤ੍ਥ ਸੁਵਣ੍ਣਰਜਤਮਣਿਪਵਾਲ਼ਮਯਾ ਖੁਦ੍ਦਕਨਾਵਾਯੋ ਮਾਪੇਤ੍ਵਾ ‘‘ਏਤਾ ਕਲਲਕਦ੍ਦਮਪੂਰਿਤਾ ਚ ਹੋਨ੍ਤੁ, ਪਞ੍ਚਵਣ੍ਣਾਨਿ ਚੇਤ੍ਥ ਪਦੁਮਾਨਿ ਪੁਪ੍ਫਨ੍ਤੂ’’ਤਿ ਅਧਿਟ੍ਠਾਸਿ. ਏਵਂ ਪਞ੍ਚਵਣ੍ਣਾਨਿ ਪਦੁਮਾਨਿ ਪੁਪ੍ਫਿਂਸੁ, ਰੇਣੁਵਟ੍ਟਿਯੋ ਉਗ੍ਗਨ੍ਤ੍ਵਾ ਉਦਕਪਿਟ੍ਠਂ ਅਜ੍ਝੋਤ੍ਥਰਿਤ੍ਵਾ ਵਿਚਰਨ੍ਤਿ. ਪਞ੍ਚਵਿਧਾ ਭਮਰਗਣਾ ਉਪਕੂਜਨ੍ਤਾ ਵਿਚਰਨ੍ਤਿ. ਏਵਂ ਤਾ ਮਾਪੇਤ੍ਵਾ ਵਿਸ੍ਸਕਮ੍ਮੋ ਦੇਵਪੁਰਮੇਵ ਗਤੋ. ਤਤੋ ਵਿਭਾਤਾਯ ਰਤ੍ਤਿਯਾ ਮਹਾਜਨੋ ਦਿਸ੍ਵਾ ‘‘ਮਹਾਪੁਰਿਸ੍ਸਸ੍ਸ ਮਾਪਿਤਾ ਭਵਿਸ੍ਸਨ੍ਤੀ’’ਤਿ ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਮਹਾਜਨਪਰਿਵਾਰੋ ਗਨ੍ਤ੍ਵਾ ਪੋਕ੍ਖਰਣਿਯੋ ਦਿਸ੍ਵਾ ‘‘ਮਮ ਪੁਤ੍ਤਸ੍ਸ ਪੁਞ੍ਞਿਦ੍ਧਿਯਾ ਦੇਵਤਾਹਿ ਮਾਪਿਤਾ ਭਵਿਸ੍ਸਨ੍ਤੀ’’ਤਿ ਅਤ੍ਤਮਨੋ ਅਹੋਸਿ. ਤਤੋ ਪਟ੍ਠਾਯ ਮਹਾਪੁਰਿਸੋ ਉਦਕਕੀਲ਼ਿਕਂ ਅਗਮਾਸਿ.

ਯਾਵਦੇਵ ਮਮਤ੍ਥਾਯਾਤਿ ਏਤ੍ਥ ਯਾਵਦੇਵਾਤਿ ਪਯੋਜਨਾਵਧਿਨਿਯਾਮਵਚਨਂ, ਯਾਵ ਮਮੇਵ ਅਤ੍ਥਾਯ, ਨਤ੍ਥੇਤ੍ਥ ਅਞ੍ਞਂ ਕਾਰਣਨ੍ਤਿ ਅਤ੍ਥੋ. ਨ ਖੋ ਪਨਸ੍ਸਾਹਨ੍ਤਿ ਨ ਖੋ ਪਨਸ੍ਸ ਅਹਂ. ਅਕਾਸਿਕਂ ਚਨ੍ਦਨਨ੍ਤਿ ਅਸਣ੍ਹਂ ਚਨ੍ਦਨਂ. ਕਾਸਿਕਂ, ਭਿਕ੍ਖਵੇ, ਸੁ ਮੇ ਤਂ ਵੇਠਨਨ੍ਤਿ, ਭਿਕ੍ਖਵੇ, ਵੇਠਨਮ੍ਪਿ ਮੇ ਕਾਸਿਕਂ ਹੋਤਿ. ਏਤ੍ਥ ਹਿ ਸੁਇਤਿ ਚ ਤਨ੍ਤਿ ਚ ਨਿਪਾਤਮਤ੍ਤਂ, ਮੇਤਿ ਸਾਮਿਵਚਨਂ. ਵੇਠਨਮ੍ਪਿ ਮੇ ਸਣ੍ਹਮੇਵ ਹੋਤੀਤਿ ਦਸ੍ਸੇਤਿ. ਕਾਸਿਕਾ ਕਞ੍ਚੁਕਾਤਿ ਪਾਰੁਪਨਕਞ੍ਚੁਕੋਪਿ ਸਣ੍ਹਕਞ੍ਚੁਕੋਵ. ਸੇਤਚ੍ਛਤ੍ਤਂ ਧਾਰੀਯਤੀਤਿ ਮਾਨੁਸਕਸੇਤਚ੍ਛਤ੍ਤਮ੍ਪਿ ਦਿਬ੍ਬਸੇਤਚ੍ਛਤ੍ਤਮ੍ਪਿ ਉਪਰਿਧਾਰਿਤਮੇਵ ਹੋਤਿ. ਮਾ ਨਂ ਫੁਸਿ ਸੀਤਂ ਵਾਤਿ ਮਾ ਏਤਂ ਬੋਧਿਸਤ੍ਤਂ ਸੀਤਂ ਵਾ ਉਣ੍ਹਾਦੀਸੁ ਵਾ ਅਞ੍ਞਤਰਂ ਫੁਸਤੂਤਿ ਅਤ੍ਥੋ.

ਤਯੋ ਪਾਸਾਦਾ ਅਹੇਸੁਨ੍ਤਿ ਬੋਧਿਸਤ੍ਤੇ ਕਿਰ ਸੋਲ਼ਸਵਸ੍ਸੁਦ੍ਦੇਸਿਕੇ ਜਾਤੇ ਸੁਦ੍ਧੋਦਨਮਹਾਰਾਜਾ ‘‘ਪੁਤ੍ਤਸ੍ਸ ਵਸਨਕਪਾਸਾਦੇ ਕਾਰੇਸ੍ਸਾਮੀ’’ਤਿ ਵਡ੍ਢਕਿਨੋ ਸਨ੍ਨਿਪਾਤਾਪੇਤ੍ਵਾ ਭਦ੍ਦਕੇਨ ਨਕ੍ਖਤ੍ਤਮੁਹੁਤ੍ਤੇਨ ਨਵਭੂਮਿਕਤਪਰਿਕਮ੍ਮਂ ਕਾਰੇਤ੍ਵਾ ਤਯੋ ਪਾਸਾਦੇ ਕਾਰਾਪੇਸਿ. ਤੇ ਸਨ੍ਧਾਯੇਤਂ ਵੁਤ੍ਤਂ. ਹੇਮਨ੍ਤਿਕੋਤਿਆਦੀਸੁ ਯਤ੍ਥ ਸੁਖਂ ਹੇਮਨ੍ਤੇ ਵਸਿਤੁਂ, ਅਯਂ ਹੇਮਨ੍ਤਿਕੋ. ਇਤਰੇਸੁਪਿ ਏਸੇਵ ਨਯੋ. ਅਯਂ ਪਨੇਤ੍ਥ ਵਚਨਤ੍ਥੋ – ਹੇਮਨ੍ਤੇ ਵਾਸੋ ਹੇਮਨ੍ਤਂ, ਹੇਮਨ੍ਤਂ ਅਰਹਤੀਤਿ ਹੇਮਨ੍ਤਿਕੋ. ਇਤਰੇਸੁਪਿ ਏਸੇਵ ਨਯੋ.

ਤਤ੍ਥ ਹੇਮਨ੍ਤਿਕੋ ਪਾਸਾਦੋ ਨਵਭੂਮਕੋ ਅਹੋਸਿ, ਭੂਮਿਯੋ ਪਨਸ੍ਸ ਉਣ੍ਹਉਤੁਗ੍ਗਾਹਾਪਨਤ੍ਥਾਯ ਨੀਚਾ ਅਹੇਸੁਂ. ਤਤ੍ਥ ਦ੍ਵਾਰਵਾਤਪਾਨਾਨਿ ਸੁਫੁਸਿਤਕਵਾਟਾਨਿ ਅਹੇਸੁਂ ਨਿਬ੍ਬਿਵਰਾਨਿ. ਚਿਤ੍ਤਕਮ੍ਮਮ੍ਪਿ ਕਰੋਨ੍ਤਾ ਤਤ੍ਥ ਤਤ੍ਥ ਪਜ੍ਜਲਿਤੇ ਅਗ੍ਗਿਕ੍ਖਨ੍ਧੇਯੇਵ ਅਕਂਸੁ. ਭੂਮਤ੍ਥਰਣਂ ਪਨੇਤ੍ਥ ਕਮ੍ਬਲਮਯਂ, ਤਥਾ ਸਾਣਿਵਿਤਾਨਨਿਵਾਸਨਪਾਰੁਪਨਵੇਠਨਾਨਿ. ਵਾਤਪਾਨਾਨਿ ਉਣ੍ਹਗ੍ਗਾਹਾਪਨਤ੍ਥਂ ਦਿਵਾ ਵਿਵਟਾਨਿ ਰਤ੍ਤਿਂ ਪਿਹਿਤਾਨਿ ਹੋਨ੍ਤਿ.

ਗਿਮ੍ਹਿਕੋ ਪਨ ਪਞ੍ਚਭੂਮਕੋ ਅਹੋਸਿ. ਸੀਤਉਤੁਗ੍ਗਾਹਾਪਨਤ੍ਥਂ ਪਨੇਤ੍ਥ ਭੂਮਿਯੋ ਉਚ੍ਚਾ ਅਸਮ੍ਬਾਧਾ ਅਹੇਸੁਂ. ਦ੍ਵਾਰਵਾਤਪਾਨਾਨਿ ਨਾਤਿਫੁਸਿਤਾਨਿ ਸਵਿਵਰਾਨਿ ਸਜਾਲਾਨਿ ਅਹੇਸੁਂ. ਚਿਤ੍ਤਕਮ੍ਮੇ ਉਪ੍ਪਲਾਨਿ ਪਦੁਮਾਨਿ ਪੁਣ੍ਡਰੀਕਾਨਿਯੇਵ ਅਕਂਸੁ. ਭੂਮਤ੍ਥਰਣਂ ਪਨੇਤ੍ਥ ਦੁਕੂਲਮਯਂ, ਤਥਾ ਸਾਣਿਵਿਤਾਨਨਿਵਾਸਨਪਾਰੁਪਨਵੇਠਨਾਨਿ. ਵਾਤਪਾਨਸਮੀਪੇਸੁ ਚੇਤ੍ਥ ਨਵ ਚਾਟਿਯੋ ਠਪੇਤ੍ਵਾ ਉਦਕਸ੍ਸ ਪੂਰੇਤ੍ਵਾ ਨੀਲੁਪ੍ਪਲਾਦੀਹਿ ਸਞ੍ਛਾਦੇਨ੍ਤਿ. ਤੇਸੁ ਤੇਸੁ ਪਦੇਸੇਸੁ ਉਦਕਯਨ੍ਤਾਨਿ ਕਰੋਨ੍ਤਿ, ਯੇਹਿ ਦੇਵੇ ਵਸ੍ਸਨ੍ਤੇ ਵਿਯ ਉਦਕਧਾਰਾ ਨਿਕ੍ਖਮਨ੍ਤਿ. ਅਨ੍ਤੋਪਾਸਾਦੇ ਤਤ੍ਥ ਤਤ੍ਥ ਕਲਲਪੂਰਾ ਦੋਣਿਯੋ ਠਪੇਤ੍ਵਾ ਪਞ੍ਚਵਣ੍ਣਾਨਿ ਪਦੁਮਾਨਿ ਰੋਪਯਿਂਸੁ. ਪਾਸਾਦਮਤ੍ਥਕੇ ਸੁਕ੍ਖਮਹਿਂਸਚਮ੍ਮਂ ਬਨ੍ਧਿਤ੍ਵਾ ਯਨ੍ਤਂ ਪਰਿਵਤ੍ਤੇਤ੍ਵਾ ਯਾਵ ਛਦਨਪਿਟ੍ਠਿਯਾ ਪਾਸਾਣੇ ਆਰੋਪੇਤ੍ਵਾ ਤਸ੍ਮਿਂ ਵਿਸ੍ਸਜ੍ਜੇਨ੍ਤਿ. ਤੇਸਂ ਚਮ੍ਮੇ ਪਵਟ੍ਟਨ੍ਤਾਨਂ ਸਦ੍ਦੋ ਮੇਘਗਜ੍ਜਿਤਂ ਵਿਯ ਹੋਤਿ. ਦ੍ਵਾਰਵਾਤਪਾਨਾਨਿ ਪਨੇਤ੍ਥ ਦਿਵਾ ਪਿਹਿਤਾਨਿ ਹੋਨ੍ਤਿ ਰਤ੍ਤਿਂ ਵਿਵਟਾਨਿ.

ਵਸ੍ਸਿਕੋ ਸਤ੍ਤਭੂਮਕੋ ਅਹੋਸਿ. ਭੂਮਿਯੋ ਪਨੇਤ੍ਥ ਦ੍ਵਿਨ੍ਨਮ੍ਪਿ ਉਤੂਨਂ ਗਾਹਾਪਨਤ੍ਥਾਯ ਨਾਤਿਉਚ੍ਚਾ ਨਾਤਿਨੀਚਾ ਅਕਂਸੁ. ਏਕਚ੍ਚਾਨਿ ਦ੍ਵਾਰਵਾਤਪਾਨਾਨਿ ਸੁਫੁਸਿਤਾਨਿ, ਏਕਚ੍ਚਾਨਿ ਸਵਿਵਰਾਨਿ. ਤਤ੍ਥ ਚਿਤ੍ਤਕਮ੍ਮਮ੍ਪਿ ਕੇਸੁਚਿ ਠਾਨੇਸੁ ਪਜ੍ਜਲਿਤਅਗ੍ਗਿਕ੍ਖਨ੍ਧਵਸੇਨ, ਕੇਸੁਚਿ ਜਾਤਸ੍ਸਰਵਸੇਨ ਕਤਂ. ਭੂਮਤ੍ਥਰਣਾਦੀਨਿ ਪਨੇਤ੍ਥ ਕਮ੍ਬਲਦੁਕੂਲਵਸੇਨ ਉਭਯਮਿਸ੍ਸਕਾਨਿ. ਏਕਚ੍ਚੇ ਦ੍ਵਾਰਵਾਤਪਾਨਾ ਰਤ੍ਤਿਂ ਵਿਵਟਾ ਦਿਵਾ ਪਿਹਿਤਾ, ਏਕਚ੍ਚੇ ਦਿਵਾ ਵਿਵਟਾ ਰਤ੍ਤਿਂ ਪਿਹਿਤਾ. ਤਯੋਪਿ ਪਾਸਾਦਾ ਉਬ੍ਬੇਧੇਨ ਸਮਪ੍ਪਮਾਣਾ. ਭੂਮਿਕਾਸੁ ਪਨ ਨਾਨਤ੍ਤਂ ਅਹੋਸਿ.

ਏਵਂ ਨਿਟ੍ਠਿਤੇਸੁ ਪਾਸਾਦੇਸੁ ਰਾਜਾ ਚਿਨ੍ਤੇਸਿ – ‘‘ਪੁਤ੍ਤੋ ਮੇ ਵਯਪ੍ਪਤ੍ਤੋ, ਛਤ੍ਤਮਸ੍ਸ ਉਸ੍ਸਾਪੇਤ੍ਵਾ ਰਜ੍ਜਸਿਰਿਂ ਪਸ੍ਸਿਸ੍ਸਾਮੀ’’ਤਿ. ਸੋ ਸਾਕਿਯਾਨਂ ਪਣ੍ਣਾਨਿ ਪਹਿਣਿ – ‘‘ਪੁਤ੍ਤੋ ਮੇ ਵਯਪ੍ਪਤ੍ਤੋ, ਰਜ੍ਜੇ ਨਂ ਪਤਿਟ੍ਠਾਪੇਸ੍ਸਾਮਿ, ਸਬ੍ਬੇ ਅਤ੍ਤਨੋ ਅਤ੍ਤਨੋ ਗੇਹੇਸੁ ਵਯਪ੍ਪਤ੍ਤਾ, ਦਾਰਿਕਾ ਇਮਂ ਗੇਹਂ ਪੇਸੇਨ੍ਤੂ’’ਤਿ. ਤੇ ਸਾਸਨਂ ਸੁਤ੍ਵਾ – ‘‘ਕੁਮਾਰੋ ਕੇਵਲਂ ਦਸ੍ਸਨਕ੍ਖਮੋ ਰੂਪਸਮ੍ਪਨ੍ਨੋ, ਨ ਕਿਞ੍ਚਿ ਸਿਪ੍ਪਂ ਜਾਨਾਤਿ, ਦਾਰਭਰਣਂ ਕਾਤੁਂ ਨ ਸਕ੍ਖਿਸ੍ਸਤਿ, ਨ ਮਯਂ ਧੀਤਰੋ ਦਸ੍ਸਾਮਾ’’ਤਿ ਆਹਂਸੁ. ਰਾਜਾ ਤਂ ਪਵਤ੍ਤਿਂ ਸੁਤ੍ਵਾ ਪੁਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਆਰੋਚੇਸਿ. ਬੋਧਿਸਤ੍ਤੋ ‘‘ਕਿਂ ਸਿਪ੍ਪਂ ਦਸ੍ਸੇਤੁਂ ਵਟ੍ਟਤਿ, ਤਾਤਾ’’ਤਿ ਆਹ. ਸਹਸ੍ਸਥਾਮਧਨੁਂ ਆਰੋਪੇਤੁਂ ਵਟ੍ਟਤਿ, ਤਾਤਾਤਿ. ਤੇਨ ਹਿ ਆਹਰਾਪੇਥਾਤਿ. ਰਾਜਾ ਆਹਰਾਪੇਤ੍ਵਾ ਅਦਾਸਿ. ਧਨੁਂ ਪੁਰਿਸਸਹਸ੍ਸਂ ਆਰੋਪੇਤਿ, ਪੁਰਿਸਸਹਸ੍ਸਂ ਓਰੋਪੇਤਿ. ਮਹਾਪੁਰਿਸੋ ਧਨੁਂ ਆਹਰਾਪੇਤ੍ਵਾ ਪਲ੍ਲਙ੍ਕੇ ਨਿਸਿਨ੍ਨੋਵ ਜਿਯਂ ਪਾਦਙ੍ਗੁਟ੍ਠਕੇ ਵੇਠੇਤ੍ਵਾ ਕਡ੍ਢਨ੍ਤੋ ਪਾਦਙ੍ਗੁਟ੍ਠਕੇਨੇਵ ਧਨੁਂ ਆਰੋਪੇਤ੍ਵਾ ਵਾਮੇਨ ਹਤ੍ਥੇਨ ਦਣ੍ਡੇ ਗਹੇਤ੍ਵਾ ਦਕ੍ਖਿਣੇਨ ਹਤ੍ਥੇਨ ਕਡ੍ਢਿਤ੍ਵਾ ਜਿਯਂ ਪੋਥੇਸਿ. ਸਕਲਨਗਰਂ ਉਪ੍ਪਤਨਾਕਾਰਪ੍ਪਤ੍ਤਂ ਅਹੋਸਿ. ‘‘ਕਿਂ ਸਦ੍ਦੋ ਏਸੋ’’ਤਿ ਚ ਵੁਤ੍ਤੇ ‘‘ਦੇਵੋ ਗਜ੍ਜਤੀ’’ਤਿ ਆਹਂਸੁ. ਅਥਞ੍ਞੇ ‘‘ਤੁਮ੍ਹੇ ਨ ਜਾਨਾਥ, ਨ ਦੇਵੋ ਗਜ੍ਜਤਿ, ਅਙ੍ਗੀਰਸਸ੍ਸ ਕੁਮਾਰਸ੍ਸ ਸਹਸ੍ਸਥਾਮਧਨੁਂ ਆਰੋਪੇਤ੍ਵਾ ਜਿਯਂ ਪੋਥੇਨ੍ਤਸ੍ਸ ਜਿਯਪ੍ਪਹਾਰਸਦ੍ਦੋ ਏਸੋ’’ਤਿ ਆਹਂਸੁ. ਸਾਕਿਯਾ ਤਾਵਤਕੇਨੇਵ ਆਰਦ੍ਧਚਿਤ੍ਤਾ ਅਹੇਸੁਂ.

ਮਹਾਪੁਰਿਸੋ ‘‘ਅਞ੍ਞਂ ਕਿਂ ਕਾਤੁਂ ਵਟ੍ਟਤੀ’’ਤਿ ਆਹ. ਅਟ੍ਠਙ੍ਗੁਲਮਤ੍ਤਬਹਲਂ ਅਯੋਪਟ੍ਟਂ ਕਣ੍ਡੇਨ ਵਿਨਿਵਿਜ੍ਝਿਤੁਂ ਵਟ੍ਟਤੀਤਿ. ਤਂ ਵਿਨਿਵਿਜ੍ਝਿਤ੍ਵਾ ‘‘ਅਞ੍ਞਂ ਕਿਂ ਕਾਤੁਂ ਵਟ੍ਟਤੀ’’ਤਿ ਆਹ. ਚਤੁਰਙ੍ਗੁਲਬਹਲਂ ਅਸਨਫਲਕਂ ਵਿਨਿਵਿਜ੍ਝਿਤੁਂ ਵਟ੍ਟਤੀਤਿ. ਤਂ ਵਿਨਿਵਿਜ੍ਝਿਤ੍ਵਾ ‘‘ਅਞ੍ਞਂ ਕਿਂ ਕਾਤੁਂ ਵਟ੍ਟਤੀ’’ਤਿ ਆਹ. ਵਿਦਤ੍ਥਿਬਹਲਂ ਉਦੁਮ੍ਬਰਫਲਕਂ ਵਿਨਿਵਿਜ੍ਝਿਤੁਂ ਵਟ੍ਟਤੀਤਿ. ਤਂ ਵਿਨਿਵਿਜ੍ਝਿਤ੍ਵਾ ‘‘ਅਞ੍ਞਂ ਕਿਂ ਕਾਤੁਂ ਵਟ੍ਟਤੀ’’ਤਿ. ਯਨ੍ਤੇ ਬਦ੍ਧਂ ਫਲਕਸਤਂ ਵਿਨਿਵਿਜ੍ਝਿਤੁਂ ਵਟ੍ਟਤੀਤਿ. ਤਂ ਵਿਨਿਵਿਜ੍ਝਿਤ੍ਵਾ ‘‘ਅਞ੍ਞਂ ਕਿਂ ਕਾਤੁਂ ਵਟ੍ਟਤੀ’’ਤਿ ਆਹ. ਸਟ੍ਠਿਪਟਲਂ ਸੁਕ੍ਖਮਹਿਂਸਚਮ੍ਮਂ ਵਿਨਿਵਿਜ੍ਝਿਤੁਂ ਵਟ੍ਟਤੀਤਿ. ਤਮ੍ਪਿ ਵਿਨਿਵਿਜ੍ਝਿਤ੍ਵਾ ‘‘ਅਞ੍ਞਂ ਕਿਂ ਕਾਤੁਂ ਵਟ੍ਟਤੀ’’ਤਿ ਆਹ. ਤਤੋ ਵਾਲਿਕਸਕਟਾਦੀਨਿ ਆਚਿਕ੍ਖਿਂਸੁ. ਮਹਾਸਤ੍ਤੋ ਵਾਲਿਕਸਕਟਮ੍ਪਿ ਪਲਾਲਸਕਟਮ੍ਪਿ ਵਿਨਿਵਿਜ੍ਝਿਤ੍ਵਾ ਉਦਕੇ ਏਕੁਸਭਪ੍ਪਮਾਣਂ ਕਣ੍ਡਂ ਪੇਸੇਸਿ, ਥਲੇ ਅਟ੍ਠਉਸਭਪ੍ਪਮਾਣਂ. ਅਥ ਨਂ ‘‘ਇਦਾਨਿ ਵਾਤਿਙ੍ਗਣਸਞ੍ਞਾਯ ਵਾਲਂ ਵਿਜ੍ਝਿਤੁਂ ਵਟ੍ਟਤੀ’’ਤਿ ਆਹਂਸੁ. ਤੇਨ ਹਿ ਬਨ੍ਧਾਪੇਥਾਤਿ. ਸਦ੍ਦਨ੍ਤਰੇ ਬਜ੍ਝਤੁ, ਤਾਤਾਤਿ. ਪੁਰਤੋ ਗਚ੍ਛਨ੍ਤੁ, ਗਾਵੁਤਨ੍ਤਰੇ ਬਨ੍ਧਨ੍ਤੂਤਿ. ਪੁਰਤੋ ਗਚ੍ਛਨ੍ਤੁ, ਅਦ੍ਧਯੋਜਨੇ ਬਨ੍ਧਨ੍ਤੂਤਿ. ਪੁਰਤੋ ਗਚ੍ਛਨ੍ਤੁ ਯੋਜਨੇ ਬਨ੍ਧਨ੍ਤੂਤਿ. ਬਨ੍ਧਾਪੇਥ, ਤਾਤਾਤਿ ਯੋਜਨਮਤ੍ਥਕੇ ਵਾਤਿਙ੍ਗਣਸਞ੍ਞਾਯ ਵਾਲਂ ਬਨ੍ਧਾਪੇਤ੍ਵਾ ਰਤ੍ਤਨ੍ਧਕਾਰੇ ਮੇਘਪਟਲਚ੍ਛਨ੍ਨਾਸੁ ਦਿਸਾਸੁ ਕਣ੍ਡਂ ਖਿਪਿ, ਤਂ ਗਨ੍ਤ੍ਵਾ ਯੋਜਨਮਤ੍ਥਕੇ ਵਾਲਂ ਫਾਲੇਤ੍ਵਾ ਪਥਵਿਂ ਪਾਵਿਸਿ. ਨ ਕੇਵਲਞ੍ਚ ਏਤ੍ਤਕਮੇਵ, ਤਂ ਦਿਵਸਂ ਪਨ ਮਹਾਸਤ੍ਤੋ ਲੋਕੇ ਵਤ੍ਤਮਾਨਸਿਪ੍ਪਂ ਸਬ੍ਬਮੇਵ ਸਨ੍ਦਸ੍ਸੇਸਿ. ਸਕ੍ਯਰਾਜਾਨੋ ਅਤ੍ਤਨੋ ਅਤ੍ਤਨੋ ਧੀਤਰੋ ਅਲਙ੍ਕਰਿਤ੍ਵਾ ਪੇਸਯਿਂਸੁ, ਚਤ੍ਤਾਲੀਸਸਹਸ੍ਸਨਾਟਕਿਤ੍ਥਿਯੋ ਅਹੇਸੁਂ. ਮਹਾਪੁਰਿਸੋ ਤੀਸੁ ਪਾਸਾਦੇਸੁ ਦੇਵੋ ਮਞ੍ਞੇ ਪਰਿਚਾਰੇਨ੍ਤੋ ਮਹਾਸਮ੍ਪਤ੍ਤਿਂ ਅਨੁਭਵਤਿ.

ਨਿਪ੍ਪੁਰਿਸੇਹੀਤਿ ਪੁਰਿਸਵਿਰਹਿਤੇਹਿ. ਨ ਕੇਵਲਂ ਚੇਤ੍ਥ ਤੂਰਿਯਾਨੇਵ ਨਿਪ੍ਪੁਰਿਸਾਨਿ, ਸਬ੍ਬਟ੍ਠਾਨਾਨਿਪਿ ਨਿਪ੍ਪੁਰਿਸਾਨੇਵ. ਦੋਵਾਰਿਕਾਪਿ ਇਤ੍ਥਿਯੋਵ, ਨ੍ਹਾਪਨਾਦਿਪਰਿਕਮ੍ਮਕਰਾਪਿ ਇਤ੍ਥਿਯੋਵ. ਰਾਜਾ ਕਿਰ ‘‘ਤਥਾਰੂਪਂ ਇਸ੍ਸਰਿਯਸੁਖਸਮ੍ਪਤ੍ਤਿਂ ਅਨੁਭਵਮਾਨਸ੍ਸ ਪੁਰਿਸਂ ਦਿਸ੍ਵਾ ਪਰਿਸਙ੍ਕਾ ਉਪ੍ਪਜ੍ਜਤਿ, ਸਾ ਮੇ ਪੁਤ੍ਤਸ੍ਸ ਮਾ ਅਹੋਸੀ’’ਤਿ ਸਬ੍ਬਕਿਚ੍ਚੇਸੁ ਇਤ੍ਥਿਯੋਵ ਠਪੇਸਿ. ਪਰਿਚਾਰਯਮਾਨੋਤਿ ਮੋਦਮਾਨੋ. ਨ ਹੇਟ੍ਠਾਪਾਸਾਦਂ ਓਰੋਹਾਮੀਤਿ ਪਾਸਾਦਤੋ ਹੇਟ੍ਠਾ ਨ ਓਤਰਾਮਿ. ਇਤਿ ਮਂ ਚਤ੍ਤਾਰੋ ਮਾਸੇ ਅਞ੍ਞੋ ਸਿਖਾਬਦ੍ਧੋ ਪੁਰਿਸੋ ਨਾਮ ਪਸ੍ਸਿਤੁਂ ਨਾਲਤ੍ਥ. ਯਥਾਤਿ ਯੇਨ ਨਿਯਾਮੇਨ. ਦਾਸਕਮ੍ਮਕਰਪੋਰਿਸਸ੍ਸਾਤਿ ਦਾਸਾਨਞ੍ਚੇਵ ਦੇਵਸਿਕਭਤ੍ਤਵੇਤਨਾਭਤਾਨਂ ਕਮ੍ਮਕਰਾਨਞ੍ਚ ਨਿਸ੍ਸਾਯ ਜੀਵਮਾਨਪੁਰਿਸਾਨਞ੍ਚ. ਕਣਾਜਕਨ੍ਤਿ ਸਕੁਣ੍ਡਕਭਤ੍ਤਂ. ਬਿਲਙ੍ਗਦੁਤਿਯਨ੍ਤਿ ਕਞ੍ਜਿਕਦੁਤਿਯਂ.

ਏਵਰੂਪਾਯ ਇਦ੍ਧਿਯਾਤਿ ਏਵਂਜਾਤਿਕਾਯ ਪੁਞ੍ਞਿਦ੍ਧਿਯਾ ਸਮਨ੍ਨਾਗਤਸ੍ਸ. ਏਵਰੂਪੇਨ ਚ ਸੁਖੁਮਾਲੇਨਾਤਿ ਏਵਂਜਾਤਿਕੇਨ ਚ ਨਿਦ੍ਦੁਕ੍ਖਭਾਵੇਨ. ਸੋਖੁਮਾਲੇਨਾਤਿਪਿ ਪਾਠੋ. ਏਵਂ ਤਥਾਗਤੋ ਏਤ੍ਤਕੇਨ ਠਾਨੇਨ ਅਤ੍ਤਨੋ ਸਿਰਿਸਮ੍ਪਤ੍ਤਿਂ ਕਥੇਸਿ. ਕਥੇਨ੍ਤੋ ਚ ਨ ਉਪ੍ਪਿਲਾਵਿਤਭਾਵਤ੍ਥਂ ਕਥੇਸਿ, ‘‘ਏਵਰੂਪਾਯਪਿ ਪਨ ਸਮ੍ਪਤ੍ਤਿਯਾ ਠਿਤੋ ਪਮਾਦਂ ਅਕਤ੍ਵਾ ਅਪ੍ਪਮਤ੍ਤੋਵ ਅਹੋਸਿ’’ਨ੍ਤਿ ਅਪ੍ਪਮਾਦਲਕ੍ਖਣਸ੍ਸੇਵ ਦੀਪਨਤ੍ਥਂ ਕਥੇਸਿ. ਤੇਨੇਵ ਅਸ੍ਸੁਤਵਾ ਖੋ ਪੁਥੁਜ੍ਜਨੋਤਿਆਦਿਮਾਹ. ਤਤ੍ਥ ਪਰਨ੍ਤਿ ਪਰਪੁਗ੍ਗਲਂ. ਜਿਣ੍ਣਨ੍ਤਿ ਜਰਾਜਿਣ੍ਣਂ. ਅਟ੍ਟੀਯਤੀਤਿ ਅਟ੍ਟੋ ਪੀਲ਼ਿਤੋ ਹੋਤਿ. ਹਰਾਯਤੀਤਿ ਹਿਰਿਂ ਕਰੋਤਿ ਲਜ੍ਜਤਿ. ਜਿਗੁਚ੍ਛਤੀਤਿ ਅਸੁਚਿਂ ਵਿਯ ਦਿਸ੍ਵਾ ਜਿਗੁਚ੍ਛਂ ਉਪ੍ਪਾਦੇਤਿ. ਅਤ੍ਤਾਨਂਯੇਵ ਅਤਿਸਿਤ੍ਵਾਤਿ ਜਰਾਧਮ੍ਮਮ੍ਪਿ ਸਮਾਨਂ ਅਤ੍ਤਾਨਂ ਅਤਿਕ੍ਕਮਿਤ੍ਵਾ ਅਟ੍ਟੀਯਤਿ ਹਰਾਯਤੀਤਿ ਅਤ੍ਥੋ. ਜਰਾਧਮ੍ਮੋਤਿ ਜਰਾਸਭਾਵੋ. ਜਰਂ ਅਨਤੀਤੋਤਿ ਜਰਂ ਅਨਤਿਕ੍ਕਨ੍ਤੋ, ਅਨ੍ਤੋ ਜਰਾਯ ਵਤ੍ਤਾਮਿ. ਇਤਿ ਪਟਿਸਞ੍ਚਿਕ੍ਖਤੋਤਿ ਏਵਂ ਪਚ੍ਚਵੇਕ੍ਖਨ੍ਤਸ੍ਸ. ਯੋਬ੍ਬਨਮਦੋਤਿ ਯੋਬ੍ਬਨਂ ਨਿਸ੍ਸਾਯ ਉਪ੍ਪਜ੍ਜਨਕੋ ਮਾਨਮਦੋ. ਸਬ੍ਬਸੋ ਪਹੀਯੀਤਿ ਸਬ੍ਬਾਕਾਰੇਨ ਪਹੀਨੋ. ਮਗ੍ਗੇਨ ਪਹੀਨਸਦਿਸੋ ਕਤ੍ਵਾ ਦਸ੍ਸਿਤੋ. ਨ ਪਨੇਸ ਮਗ੍ਗੇਨ ਪਹੀਨੋ, ਪਟਿਸਙ੍ਖਾਨੇਨ ਪਹੀਨੋਵ ਕਥਿਤੋਤਿ ਵੇਦਿਤਬ੍ਬੋ. ਬੋਧਿਸਤ੍ਤਸ੍ਸ ਹਿ ਦੇਵਤਾ ਜਰਾਪਤ੍ਤਂ ਦਸ੍ਸੇਸੁਂ. ਤਤੋ ਪਟ੍ਠਾਯ ਯਾਵ ਅਰਹਤ੍ਤਾ ਅਨ੍ਤਰਾ ਮਹਾਸਤ੍ਤਸ੍ਸ ਯੋਬ੍ਬਨਮਦੋ ਨਾਮ ਨ ਉਪ੍ਪਜ੍ਜਤਿ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਏਤ੍ਥ ਪਨ ਆਰੋਗ੍ਯਮਦੋਤਿ ਅਹਂ ਨਿਰੋਗੋਤਿ ਆਰੋਗ੍ਯਂ ਨਿਸ੍ਸਾਯ ਉਪ੍ਪਜ੍ਜਨਕੋ ਮਾਨਮਦੋ. ਜੀਵਿਤਮਦੋਤਿ ਅਹਂ ਚਿਰਂ ਜੀਵੀਤਿ ਤਂ ਨਿਸ੍ਸਾਯ ਉਪ੍ਪਜ੍ਜਨਕੋ ਮਾਨਮਦੋ. ਸਿਕ੍ਖਂ ਪਚ੍ਚਕ੍ਖਾਯਾਤਿ ਸਿਕ੍ਖਂ ਪਟਿਕ੍ਖਿਪਿਤ੍ਵਾ. ਹੀਨਾਯਾਵਤ੍ਤਤੀਤਿ ਹੀਨਾਯ ਲਾਮਕਾਯ ਗਿਹਿਭਾਵਾਯ ਆਵਤ੍ਤਤਿ.

ਯਥਾਧਮ੍ਮਾਤਿ ਬ੍ਯਾਧਿਆਦੀਹਿ ਯਥਾਸਭਾਵਾ. ਤਥਾਸਨ੍ਤਾਤਿ ਯਥਾ ਸਨ੍ਤਾ ਏਵ ਅਵਿਪਰੀਤਬ੍ਯਾਧਿਆਦਿਸਭਾਵਾਵ ਹੁਤ੍ਵਾਤਿ ਅਤ੍ਥੋ. ਜਿਗੁਚ੍ਛਨ੍ਤੀਤਿ ਪਰਪੁਗ੍ਗਲਂ ਜਿਗੁਚ੍ਛਨ੍ਤਿ. ਮਮ ਏਵਂ ਵਿਹਾਰਿਨੋਤਿ ਮਯ੍ਹਂ ਏਵਂ ਜਿਗੁਚ੍ਛਾਵਿਹਾਰੇਨ ਵਿਹਰਨ੍ਤਸ੍ਸ ਏਵਂ ਜਿਗੁਚ੍ਛਨਂ ਨਪ੍ਪਤਿਰੂਪਂ ਭਵੇਯ੍ਯ ਨਾਨੁਚ੍ਛਵਿਕਂ. ਸੋਹਂ ਏਵਂ ਵਿਹਰਨ੍ਤੋਤਿ ਸੋ ਅਹਂ ਏਵਂ ਪਰਂ ਜਿਗੁਚ੍ਛਮਾਨੋ ਵਿਹਰਨ੍ਤੋ, ਏਵਂ ਵਾ ਇਮਿਨਾ ਪਟਿਸਙ੍ਖਾਨਵਿਹਾਰੇਨ ਵਿਹਰਨ੍ਤੋ. ਞਤ੍ਵਾ ਧਮ੍ਮਂ ਨਿਰੂਪਧਿਨ੍ਤਿ ਸਬ੍ਬੂਪਧਿਵਿਰਹਿਤਂ ਨਿਬ੍ਬਾਨਧਮ੍ਮਂ ਞਤ੍ਵਾ. ਸਬ੍ਬੇ ਮਦੇ ਅਭਿਭੋਸ੍ਮੀਤਿ ਸਬ੍ਬੇ ਤਯੋਪਿ ਮਦੇ ਅਭਿਭਵਿਂ ਸਮਤਿਕ੍ਕਮਿਂ. ਨੇਕ੍ਖਮ੍ਮੇ ਦਟ੍ਠੁ ਖੇਮਤਨ੍ਤਿ ਨਿਬ੍ਬਾਨੇ ਖੇਮਭਾਵਂ ਦਿਸ੍ਵਾ. ਨੇਕ੍ਖਮ੍ਮਂ ਦਟ੍ਠੁ ਖੇਮਤੋਤਿਪਿ ਪਾਠੋ, ਨਿਬ੍ਬਾਨਂ ਖੇਮਤੋ ਦਿਸ੍ਵਾਤਿ ਅਤ੍ਥੋ. ਤਸ੍ਸ ਮੇ ਅਹੁ ਉਸ੍ਸਾਹੋਤਿ ਤਸ੍ਸ ਮਯ੍ਹਂ ਤਂ ਨੇਕ੍ਖਮ੍ਮਸਙ੍ਖਾਤਂ ਨਿਬ੍ਬਾਨਂ ਅਭਿਪਸ੍ਸਨ੍ਤਸ੍ਸ ਉਸ੍ਸਾਹੋ ਅਹੁ, ਵਾਯਾਮੋ ਅਹੋਸੀਤਿ ਅਤ੍ਥੋ. ਨਾਹਂ ਭਬ੍ਬੋ ਏਤਰਹਿ, ਕਾਮਾਨਿ ਪਟਿਸੇਵਿਤੁਨ੍ਤਿ ਅਹਂ ਦਾਨਿ ਦੁਵਿਧੇਪਿ ਕਾਮੇ ਪਟਿਸੇਵਿਤੁਂ ਅਭਬ੍ਬੋ. ਅਨਿਵਤ੍ਤਿ ਭਵਿਸ੍ਸਾਮੀਤਿ ਪਬ੍ਬਜ੍ਜਤੋ ਚ ਸਬ੍ਬਞ੍ਞੁਤਞ੍ਞਾਣਤੋ ਚ ਨ ਨਿਵਤ੍ਤਿਸ੍ਸਾਮਿ, ਅਨਿਵਤ੍ਤਕੋ ਭਵਿਸ੍ਸਾਮਿ. ਬ੍ਰਹ੍ਮਚਰਿਯਪਰਾਯਣੋਤਿ ਮਗ੍ਗਬ੍ਰਹ੍ਮਚਰਿਯਪਰਾਯਣੋ ਜਾਤੋਸ੍ਮੀਤਿ ਅਤ੍ਥੋ. ਇਤਿ ਇਮਾਹਿ ਗਾਥਾਹਿ ਮਹਾਬੋਧਿਪਲ੍ਲਙ੍ਕੇ ਅਤ੍ਤਨੋ ਆਗਮਨੀਯਵੀਰਿਯਂ ਕਥੇਸਿ.