੧. ਪਠਮਪਣ੍ਣਾਸਕਂ
੧. ਬਾਲਵਗ੍ਗੋ
੧. ਭਯਸੁਤ੍ਤਵਣ੍ਣਨਾ
੧. ਤਿਕਨਿਪਾਤਸ੍ਸ ਪਠਮੇ ਭਯਾਨੀਤਿਆਦੀਸੁ ਭਯਨ੍ਤਿ ਚਿਤ੍ਤੁਤ੍ਰਾਸੋ. ਉਪਦ੍ਦਵੋਤਿ ਅਨੇਕਗ੍ਗਤਾਕਾਰੋ. ਉਪਸਗ੍ਗੋਤਿ ਉਪਸਟ੍ਠਾਕਾਰੋ ਤਤ੍ਥ ਤਤ੍ਥ ਲਗ੍ਗਨਾਕਾਰੋ.
ਤੇਸਂ ਏਵਂ ਨਾਨਤ੍ਤਂ ਵੇਦਿਤਬ੍ਬਂ – ਪਬ੍ਬਤਵਿਸਮਨਿਸ੍ਸਿਤਾ ਚੋਰਾ ਜਨਪਦਵਾਸੀਨਂ ਪੇਸੇਨ੍ਤਿ – ‘‘ਮਯਂ ਅਸੁਕਦਿਵਸੇ ਨਾਮ ਤੁਮ੍ਹਾਕਂ ਗਾਮਂ ਪਹਰਿਸ੍ਸਾਮਾ’’ਤਿ. ਤੇ ਤਂ ਪਵਤ੍ਤਿਂ ਸੁਤਕਾਲਤੋ ਪਟ੍ਠਾਯ ਭਯਂ ਸਨ੍ਤਾਸਂ ਆਪਜ੍ਜਨ੍ਤਿ. ਅਯਂ ਚਿਤ੍ਤੁਤ੍ਰਾਸੋ ਨਾਮ. ‘‘ਯਥਾ ਨੋ ਤੇ ਚੋਰਾ ਕੁਪਿਤਾ ਅਨਤ੍ਥਮ੍ਪਿ ਆਵਹੇਯ੍ਯੁ’’ਨ੍ਤਿ ਹਤ੍ਥਸਾਰਂ ਗਹੇਤ੍ਵਾ ਦ੍ਵਿਪਦਚਤੁਪ੍ਪਦੇਹਿ ਸਦ੍ਧਿਂ ਅਰਞ੍ਞਂ ਪਵਿਸਿਤ੍ਵਾ ਤਤ੍ਥ ਤਤ੍ਥ ਭੂਮਿਯਂ ਨਿਪਜ੍ਜਨ੍ਤਿ ਡਂਸਮਕਸਾਦੀਹਿ ਖਜ੍ਜਮਾਨਾ, ਗੁਮ੍ਬਨ੍ਤਰਾਨਿ ਪਵਿਸਨ੍ਤਾ ਖਾਣੁਕਣ੍ਟਕੇ ਮਦ੍ਦਨ੍ਤਿ. ਤੇਸਂ ਏਵਂ ਵਿਚਰਨ੍ਤਾਨਂ ਵਿਕ੍ਖਿਤ੍ਤਭਾਵੋ ਅਨੇਕਗ੍ਗਤਾਕਾਰੋ ਨਾਮ. ਤਤੋ ਚੋਰੇਸੁ ਯਥਾਵੁਤ੍ਤੇ ਦਿਵਸੇ ਅਨਾਗਚ੍ਛਨ੍ਤੇਸੁ ‘‘ਤੁਚ੍ਛਕਸਾਸਨਂ ਭਵਿਸ੍ਸਤਿ, ਗਾਮਂ ਪਵਿਸਿਸ੍ਸਾਮਾ’’ਤਿ ਸਪਰਿਕ੍ਖਾਰਾ ਗਾਮਂ ਪਵਿਸਨ੍ਤਿ. ਅਥ ਤੇਸਂ ਪਵਿਟ੍ਠਭਾਵਂ ਞਤ੍ਵਾ ਗਾਮਂ ਪਰਿਵਾਰੇਤ੍ਵਾ ਦ੍ਵਾਰੇ ਅਗ੍ਗਿਂ ਦਤ੍ਵਾ ਮਨੁਸ੍ਸੇ ਘਾਤੇਤ੍ਵਾ ਚੋਰਾ ਸਬ੍ਬਂ ਵਿਭਵਂ ਵਿਲੁਮ੍ਪਿਤ੍ਵਾ ਗਚ੍ਛਨ੍ਤਿ. ਤੇਸੁ ਘਾਤਿਤਾਵਸੇਸਾ ਅਗ੍ਗਿਂ ਨਿਬ੍ਬਾਪੇਤ੍ਵਾ ਕੋਟ੍ਠਕਚ੍ਛਾਯਾਭਿਤ੍ਤਿਚ੍ਛਾਯਾਦੀਸੁ ਤਤ੍ਥ ਤਤ੍ਥ ਲਗ੍ਗਿਤ੍ਵਾ ਨਿਸੀਦਨ੍ਤਿ ਨਟ੍ਠਂ ਅਨੁਸੋਚਮਾਨਾ. ਅਯਂ ਉਪਸਟ੍ਠਾਕਾਰੋ ਲਗ੍ਗਨਾਕਾਰੋ ਨਾਮ.
ਨਲ਼ਾਗਾਰਾਤਿ ਨਲ਼ੇਹਿ ਛਨ੍ਨਪਟਿਚ੍ਛਨ੍ਨਅਗਾਰਾ. ਸੇਸਸਮ੍ਭਾਰਾ ਪਨੇਤ੍ਥ ਰੁਕ੍ਖਮਯਾ ਹੋਨ੍ਤਿ. ਤਿਣਾਗਾਰੇਪਿ ਏਸੇਵ ਨਯੋ. ਕੂਟਾਗਾਰਾਨੀਤਿ ਕੂਟਸਙ੍ਗਹਿਤਾਨਿ ਅਗਾਰਾਨਿ. ਉਲ੍ਲਿਤ੍ਤਾਵਲਿਤ੍ਤਾਨੀਤਿ ਅਨ੍ਤੋ ਚ ਬਹਿ ਚ ਲਿਤ੍ਤਾਨਿ. ਨਿਵਾਤਾਨੀਤਿ ਨਿਵਾਰਿਤਵਾਤਪ੍ਪਵੇਸਾਨਿ. ਫੁਸਿਤਗ੍ਗਲ਼ਾਨੀਤਿ ਛੇਕੇਹਿ ਵਡ੍ਢਕੀਹਿ ਕਤਤ੍ਤਾ ਪਿਟ੍ਠਸਙ੍ਘਾਟਮ੍ਹਿ ਸੁਟ੍ਠੁ ਫੁਸਿਤਕਵਾਟਾਨਿ. ਪਿਹਿਤਵਾਤਪਾਨਾਨੀਤਿ ਯੁਤ੍ਤਵਾਤਪਾਨਾਨਿ. ਇਮਿਨਾ ਪਦਦ੍ਵਯੇਨ ਕਵਾਟਵਾਤਪਾਨਾਨਂ ਨਿਚ੍ਚਪਿਹਿਤਤਂ ਅਕਥੇਤ੍ਵਾ ਸਮ੍ਪਤ੍ਤਿਯੇਵ ਕਥਿਤਾ. ਇਚ੍ਛਿਤਿਚ੍ਛਿਤਕ੍ਖਣੇ ਪਨ ਤਾਨਿ ਪਿਧੀਯਨ੍ਤਿ ਚ ਵਿਵਰੀਯਨ੍ਤਿ ਚ.
ਬਾਲਤੋ ਉਪ੍ਪਜ੍ਜਨ੍ਤੀਤਿ ਬਾਲਮੇਵ ਨਿਸ੍ਸਾਯ ਉਪ੍ਪਜ੍ਜਨ੍ਤਿ. ਬਾਲੋ ਹਿ ਅਪਣ੍ਡਿਤਪੁਰਿਸੋ ਰਜ੍ਜਂ ਵਾ ਓਪਰਜ੍ਜਂ ਵਾ ਅਞ੍ਞਂ ਵਾ ਪਨ ਮਹਨ੍ਤਂ ਠਾਨਂ ਪਤ੍ਥੇਨ੍ਤੋ ਕਤਿਪਯੇ ਅਤ੍ਤਨਾ ਸਦਿਸੇ ਵਿਧਵਪੁਤ੍ਤੇ ਮਹਾਧੁਤ੍ਤੇ ਗਹੇਤ੍ਵਾ ‘‘ਏਥ ਅਹਂ ਤੁਮ੍ਹੇ ਇਸ੍ਸਰੇ ਕਰਿਸ੍ਸਾਮੀ’’ਤਿ ਪਬ੍ਬਤਗਹਨਾਦੀਨਿ ਨਿਸ੍ਸਾਯ ਅਨ੍ਤਮਨ੍ਤੇ ਗਾਮੇ ਪਹਰਨ੍ਤੋ ਦਾਮਰਿਕਭਾਵਂ ਜਾਨਾਪੇਤ੍ਵਾ ਅਨੁਪੁਬ੍ਬੇਨ ਨਿਗਮੇਪਿ ਜਨਪਦੇਪਿ ਪਹਰਤਿ. ਮਨੁਸ੍ਸਾ ਗੇਹਾਨਿ ਛਡ੍ਡੇਤ੍ਵਾ ਖੇਮਟ੍ਠਾਨਂ ਪਤ੍ਥਯਮਾਨਾ ਪਕ੍ਕਮਨ੍ਤਿ. ਤੇ ਨਿਸ੍ਸਾਯ ਵਸਨ੍ਤਾ ਭਿਕ੍ਖੂਪਿ ਭਿਕ੍ਖੁਨਿਯੋਪਿ ਅਤ੍ਤਨੋ ਅਤ੍ਤਨੋ ਵਸਨਟ੍ਠਾਨਾਨਿ ਪਹਾਯ ਪਕ੍ਕਮਨ੍ਤਿ. ਗਤਗਤਟ੍ਠਾਨੇ ਭਿਕ੍ਖਾਪਿ ਸੇਨਾਸਨਮ੍ਪਿ ਦੁਲ੍ਲਭਂ ਹੋਤਿ. ਏਵਂ ਚਤੁਨ੍ਨਮ੍ਪਿ ਪਰਿਸਾਨਂ ਭਯਂ ਆਗਤਮੇਵ ਹੋਤਿ. ਪਬ੍ਬਜ੍ਜਿਤੇਸੁਪਿ ਦ੍ਵੇ ਬਾਲਾ ਭਿਕ੍ਖੂ ਅਞ੍ਞਮਞ੍ਞਂ ਵਿਵਾਦਂ ਪਟ੍ਠਪੇਤ੍ਵਾ ਚੋਦਨਂ ਆਰਭਨ੍ਤਿ. ਇਤਿ ਕੋਸਮ੍ਬਿਵਾਸਿਕਾਨਂ ਵਿਯ ਮਹਾਕਲਹੋ ਉਪ੍ਪਜ੍ਜਤਿ. ਚਤੁਨ੍ਨਂ ਪਰਿਸਾਨਂ ਭਯਂ ਆਗਤਮੇਵ ਹੋਤੀਤਿ ਏਵਂ ਯਾਨਿ ਕਾਨਿਚਿ ਭਯਾਨਿ ਉਪ੍ਪਜ੍ਜਨ੍ਤਿ, ਸਬ੍ਬਾਨਿ ਤਾਨਿ ਬਾਲਤੋ ਉਪ੍ਪਜ੍ਜਨ੍ਤੀਤਿ ਯਥਾਨੁਸਨ੍ਧਿਨਾ ਦੇਸਨਂ ਨਿਟ੍ਠਪੇਸਿ.
੨. ਲਕ੍ਖਣਸੁਤ੍ਤਵਣ੍ਣਨਾ
੨. ਦੁਤਿਯੇ ਕਾਯਦ੍ਵਾਰਾਦਿਪਵਤ੍ਤਂ ਕਮ੍ਮਂ ਲਕ੍ਖਣਂ ਸਞ੍ਜਾਨਨਕਾਰਣਂ ਅਸ੍ਸਾਤਿ ਕਮ੍ਮਲਕ੍ਖਣੋ. ਅਪਦਾਨਸੋਭਨੀ ਪਞ੍ਞਾਤਿ ਯਾ ਪਞ੍ਞਾ ਨਾਮ ਅਪਦਾਨੇਨ ਸੋਭਤਿ, ਬਾਲਾ ਚ ਪਣ੍ਡਿਤਾ ਚ ਅਤ੍ਤਨੋ ਅਤ੍ਤਨੋ ਚਰਿਤੇਨੇਵ ਪਾਕਟਾ ਹੋਨ੍ਤੀਤਿ ਅਤ੍ਥੋ. ਬਾਲੇਨ ਹਿ ਗਤਮਗ੍ਗੋ ਰੁਕ੍ਖਗਚ੍ਛਗਾਮਨਿਗਮਾਦੀਨਿ ਝਾਪੇਤ੍ਵਾ ਗਚ੍ਛਨ੍ਤਸ੍ਸ ਇਨ੍ਦਗ੍ਗਿਨੋ ਗਤਮਗ੍ਗੋ ਵਿਯ ਹੋਤਿ, ਝਾਮਟ੍ਠਾਨਮਤ੍ਤਮੇਵ ਅਙ੍ਗਾਰਮਸਿਛਾਰਿਕਾਸਮਾਕੁਲਂ ਪਞ੍ਞਾਯਤਿ. ਪਣ੍ਡਿਤੇਨ ਗਤਮਗ੍ਗੋ ਕੁਸੋਬ੍ਭਾਦਯੋ ਪੂਰੇਤ੍ਵਾ ਵਿਵਿਧਸਸ੍ਸਸਮ੍ਪਦਂ ਆਵਹਮਾਨੇਨ ਚਤੁਦੀਪਿਕਮੇਘੇਨ ਗਤਮਗ੍ਗੋ ਵਿਯ ਹੋਤਿ. ਯਥਾ ਤੇਨ ਗਤਮਗ੍ਗੇ ਉਦਕਪੂਰਾਨਿ ਚੇਵ ਵਿਵਿਧਸਸ੍ਸਫਲਾਫਲਾਨਿ ਚ ਤਾਨਿ ਤਾਨਿ ਠਾਨਾਨਿ ਪਞ੍ਞਾਯਨ੍ਤਿ, ਏਵਂ ਪਣ੍ਡਿਤੇਨ ਗਤਮਗ੍ਗੇ ਸਮ੍ਪਤ੍ਤਿਯੋਵ ਪਞ੍ਞਾਯਨ੍ਤਿ ਨੋ ਵਿਪਤ੍ਤਿਯੋਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.
੩. ਚਿਨ੍ਤੀਸੁਤ੍ਤਵਣ੍ਣਨਾ
੩. ਤਤਿਯੇ ਬਾਲਲਕ੍ਖਣਾਨੀਤਿ ‘‘ਬਾਲੋ ਅਯ’’ਨ੍ਤਿ ਏਤੇਹਿ ਲਕ੍ਖੀਯਤਿ ਞਾਯਤੀਤਿ ਬਾਲਲਕ੍ਖਣਾਨਿ. ਤਾਨੇਵਸ੍ਸ ਸਞ੍ਜਾਨਨਕਾਰਣਾਨੀਤਿ ਬਾਲਨਿਮਿਤ੍ਤਾਨਿ. ਬਾਲਾਪਦਾਨਾਨੀਤਿ ਬਾਲਸ੍ਸ ਅਪਦਾਨਾਨਿ. ਦੁਚ੍ਚਿਨ੍ਤਿਤਚਿਨ੍ਤੀਤਿ ਚਿਨ੍ਤਯਨ੍ਤੋ ਅਭਿਜ੍ਝਾਬ੍ਯਾਪਾਦਮਿਚ੍ਛਾਦਸ੍ਸਨਵਸੇਨ ਦੁਚ੍ਚਿਨ੍ਤਿਤਮੇਵ ਚਿਨ੍ਤੇਤਿ. ਦੁਬ੍ਭਾਸਿਤਭਾਸੀਤਿ ਭਾਸਮਾਨੋਪਿ ਮੁਸਾਵਾਦਾਦਿਭੇਦਂ ਦੁਬ੍ਭਾਸਿਤਮੇਵ ਭਾਸਤਿ. ਦੁਕ੍ਕਟਕਮ੍ਮਕਾਰੀਤਿ ਕਰੋਨ੍ਤੋਪਿ ਪਾਣਾਤਿਪਾਤਾਦਿਵਸੇਨ ਦੁਕ੍ਕਟਕਮ੍ਮਮੇਵ ਕਰੋਤਿ. ਪਣ੍ਡਿਤਲਕ੍ਖਣਾਨੀਤਿਆਦਿ ਵੁਤ੍ਤਾਨੁਸਾਰੇਨੇਵ ਵੇਦਿਤਬ੍ਬਂ. ਸੁਚਿਨ੍ਤਿਤਚਿਨ੍ਤੀਤਿਆਦੀਨਿ ਚੇਤ੍ਥ ਮਨੋਸੁਚਰਿਤਾਦੀਨਂ ਵਸੇਨ ਯੋਜੇਤਬ੍ਬਾਨਿ.
੪. ਅਚ੍ਚਯਸੁਤ੍ਤਵਣ੍ਣਨਾ
੪. ਚਤੁਤ੍ਥੇ ਅਚ੍ਚਯਂ ਅਚ੍ਚਯਤੋ ਨ ਪਸ੍ਸਤੀਤਿ ਅਤ੍ਤਨੋ ਅਪਰਾਧਂ ਅਪਰਾਧਤੋ ਨ ਪਸ੍ਸਤਿ. ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਨਪ੍ਪਟਿਕਰੋਤੀਤਿ ‘‘ਅਪਰਦ੍ਧਂ ਮਯਾ’’ਤਿ ਞਤ੍ਵਾਪਿ ਯੋ ਧਮ੍ਮੋ, ਤਂ ਨ ਕਰੋਤਿ, ਦਣ੍ਡਕਮ੍ਮਂ ਆਹਰਿਤ੍ਵਾ ਅਚ੍ਚਯਂ ਨ ਦੇਸੇਤਿ ਨਕ੍ਖਮਾਪੇਤਿ. ਅਚ੍ਚਯਂ ਦੇਸੇਨ੍ਤਸ੍ਸ ਯਥਾਧਮ੍ਮਂ ਨਪ੍ਪਟਿਗ੍ਗਣ੍ਹਾਤੀਤਿ ਪਰਸ੍ਸ ‘‘ਵਿਰਦ੍ਧਂ ਮਯਾ’’ਤਿ ਞਤ੍ਵਾ ਦਣ੍ਡਕਮ੍ਮਂ ਆਹਰਿਤ੍ਵਾ ਖਮਾਪੇਨ੍ਤਸ੍ਸ ਨਕ੍ਖਮਤਿ. ਸੁਕ੍ਕਪਕ੍ਖੋ ਵੁਤ੍ਤਪਟਿਪਕ੍ਖਤੋ ਵੇਦਿਤਬ੍ਬੋ.
੫. ਅਯੋਨਿਸੋਸੁਤ੍ਤਵਣ੍ਣਨਾ
੫. ਪਞ੍ਚਮੇ ਅਯੋਨਿਸੋ ਪਞ੍ਹਂ ਕਤ੍ਤਾ ਹੋਤੀਤਿ ‘‘ਕਤਿ ਨੁ ਖੋ, ਉਦਾਯਿ, ਅਨੁਸ੍ਸਤਿਟ੍ਠਾਨਾਨੀ’’ਤਿ ਵੁਤ੍ਤੇ ‘‘ਪੁਬ੍ਬੇਨਿਵਾਸੋ ਅਨੁਸ੍ਸਤਿਟ੍ਠਾਨਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਲਾਲ਼ੁਦਾਯਿਤ੍ਥੇਰੋ ਵਿਯ ਅਨੁਪਾਯਚਿਨ੍ਤਾਯ ਅਪਞ੍ਹਮੇਵ ਪਞ੍ਹਨ੍ਤਿ ਕਤ੍ਤਾ ਹੋਤਿ. ਅਯੋਨਿਸੋ ਪਞ੍ਹਂ ਵਿਸ੍ਸਜ੍ਜੇਤਾ ਹੋਤੀਤਿ ਏਵਂ ਚਿਨ੍ਤਿਤਂ ਪਨ ਪਞ੍ਹਂ ਵਿਸ੍ਸਜ੍ਜੇਨ੍ਤੋਪਿ ‘‘ਇਧ, ਭਨ੍ਤੇ, ਭਿਕ੍ਖੁ ਅਨੇਕਵਿਹਿਤਂ ਪੁਬ੍ਬੇਨਿਵਾਸਂ ਅਨੁਸ੍ਸਰਤਿ. ਸੇਯ੍ਯਥਿਦਂ, ਏਕਮ੍ਪਿ ਜਾਤਿ’’ਨ੍ਤਿਆਦਿਨਾ ਨਯੇਨ ਸੋਯੇਵ ਥੇਰੋ ਵਿਯ ਅਯੋਨਿਸੋ ਵਿਸ੍ਸਜ੍ਜੇਤਾ ਹੋਤਿ, ਅਪਞ੍ਹਮੇਵ ਪਞ੍ਹਨ੍ਤਿ ਕਥੇਤਿ. ਪਰਿਮਣ੍ਡਲੇਹਿ ਪਦਬ੍ਯਞ੍ਜਨੇਹੀਤਿ ਏਤ੍ਥ ਪਦਮੇਵ ਅਤ੍ਥਸ੍ਸ ਬ੍ਯਞ੍ਜਨਤੋ ਪਦਬ੍ਯਞ੍ਜਨਂ. ਤਂ ਅਕ੍ਖਰਪਾਰਿਪੂਰਿਂ ਕਤ੍ਵਾ ਦਸਵਿਧਂ ਬ੍ਯਞ੍ਜਨਬੁਦ੍ਧਿਂ ਅਪਰਿਹਾਪੇਤ੍ਵਾ ਵੁਤ੍ਤਂ ਪਰਿਮਣ੍ਡਲਂ ਨਾਮ ਹੋਤਿ, ਏਵਰੂਪੇਹਿ ਪਦਬ੍ਯਞ੍ਜਨੇਹੀਤਿ ਅਤ੍ਥੋ. ਸਿਲਿਟ੍ਠੇਹੀਤਿ ਪਦਸਿਲਿਟ੍ਠਤਾਯ ਸਿਲਿਟ੍ਠੇਹਿ. ਉਪਗਤੇਹੀਤਿ ਅਤ੍ਥਞ੍ਚ ਕਾਰਣਞ੍ਚ ਉਪਗਤੇਹਿ. ਨਾਬ੍ਭਨੁਮੋਦਿਤਾਤਿ ਏਵਂ ਯੋਨਿਸੋ ਸਬ੍ਬਂ ਕਾਰਣਸਮ੍ਪਨ੍ਨਂ ਕਤ੍ਵਾਪਿ ਵਿਸ੍ਸਜ੍ਜਿਤਂ ਪਰਸ੍ਸ ਪਞ੍ਹਂ ਨਾਭਿਨੁਮੋਦਤਿ ਨਾਭਿਨਨ੍ਦਤਿ ਸਾਰਿਪੁਤ੍ਤਤ੍ਥੇਰਸ੍ਸ ਪਞ੍ਹਂ ਲਾਲ਼ੁਦਾਯਿਤ੍ਥੇਰੋ ਵਿਯ. ਯਥਾਹ –
‘‘ਅਟ੍ਠਾਨਂ ਖੋ ਏਤਂ, ਆਵੁਸੋ ਸਾਰਿਪੁਤ੍ਤ, ਅਨਵਕਾਸੋ, ਯਂ ਸੋ ਅਤਿਕ੍ਕਮ੍ਮੇਵ ਕਬਲ਼ੀਕਾਰਾਹਾਰਭਕ੍ਖਾਨਂ ਦੇਵਾਨਂ ਸਹਬ੍ਯਤਂ ਅਞ੍ਞਤਰਂ ਮਨੋਮਯਂ ਕਾਯਂ ਉਪਪਨ੍ਨੋ ਸਞ੍ਞਾਵੇਦਯਿਤਨਿਰੋਧਂ ਸਮਾਪਜ੍ਜੇਯ੍ਯਾਪਿ ਵੁਟ੍ਠਹੇਯ੍ਯਾਪਿ, ਨਤ੍ਥੇਤਂ ਠਾਨ’’ਨ੍ਤਿ (ਅ. ਨਿ. ੫.੧੬੬).
ਯੋਨਿਸੋ ਪਞ੍ਹਂ ਕਤ੍ਤਾਤਿਆਦੀਸੁ ਆਨਨ੍ਦਤ੍ਥੇਰੋ ਵਿਯ ਯੋਨਿਸੋਵ ਪਞ੍ਹਂ ਚਿਨ੍ਤੇਤ੍ਵਾ ਯੋਨਿਸੋ ਵਿਸ੍ਸਜ੍ਜਿਤਾ ਹੋਤਿ. ਥੇਰੋ ਹਿ ‘‘ਕਤਿ ਨੁ ਖੋ, ਆਨਨ੍ਦ, ਅਨੁਸ੍ਸਤਿਟ੍ਠਾਨਾਨੀ’’ਤਿ ਪੁਚ੍ਛਿਤੋ ‘‘ਅਯਂ ਪਞ੍ਹੋ ਭਵਿਸ੍ਸਤੀ’’ਤਿ ਯੋਨਿਸੋ ਚਿਨ੍ਤੇਤ੍ਵਾ ਯੋਨਿਸੋ ਵਿਸ੍ਸਜ੍ਜੇਨ੍ਤੋ ਆਹ – ‘‘ਇਧ, ਭਨ੍ਤੇ, ਭਿਕ੍ਖੁ ਵਿਵਿਚ੍ਚੇਵ ਕਾਮੇਹਿ…ਪੇ… ਚਤੁਤ੍ਥਜ੍ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਇਦਂ, ਭਨ੍ਤੇ, ਅਨੁਸ੍ਸਤਿਟ੍ਠਾਨਂ ਏਵਂਭਾਵਿਤਂ ਏਵਂਬਹੁਲੀਕਤਂ ਦਿਟ੍ਠਧਮ੍ਮਸੁਖਵਿਹਾਰਾਯ ਸਂਵਤ੍ਤਤੀ’’ਤਿ. ਅਬ੍ਭਨੁਮੋਦਿਤਾ ਹੋਤੀਤਿ ਤਥਾਗਤੋ ਵਿਯ ਯੋਨਿਸੋ ਅਬ੍ਭਨੁਮੋਦਿਤਾ ਹੋਤਿ. ਤਥਾਗਤੋ ਹਿ ਆਨਨ੍ਦਤ੍ਥੇਰੇਨ ਪਞ੍ਹੇ ਵਿਸ੍ਸਜ੍ਜਿਤੇ ‘‘ਸਾਧੁ ਸਾਧੁ, ਆਨਨ੍ਦ, ਤੇਨ ਹਿ ਤ੍ਵਂ, ਆਨਨ੍ਦ, ਇਮਮ੍ਪਿ ਛਟ੍ਠਂ ਅਨੁਸ੍ਸਤਿਟ੍ਠਾਨਂ ਧਾਰੇਹਿ. ਇਧਾਨਨ੍ਦ, ਭਿਕ੍ਖੁ ਸਤੋਵ ਅਭਿਕ੍ਕਮਤਿ ਸਤੋਵ ਪਟਿਕ੍ਕਮਤੀ’’ਤਿਆਦਿਮਾਹ. ਛਟ੍ਠਾਦੀਨਿ ਉਤ੍ਤਾਨਤ੍ਥਾਨੇਵ.
੯. ਖਤਸੁਤ੍ਤਵਣ੍ਣਨਾ
੯. ਨਵਮੇ ਸੁਕ੍ਕਪਕ੍ਖੋ ਪੁਬ੍ਬਭਾਗੇ ਦਸਹਿਪਿ ਕੁਸਲਕਮ੍ਮਪਥੇਹਿ ਪਰਿਚ੍ਛਿਨ੍ਨੋ, ਉਪਰਿ ਯਾਵ ਅਰਹਤ੍ਤਮਗ੍ਗਾ ਲਬ੍ਭਤਿ. ਬਹੁਞ੍ਚ ਪੁਞ੍ਞਂ ਪਸਵਤੀਤਿ ਏਤ੍ਥ ਲੋਕਿਯਲੋਕੁਤ੍ਤਰਮਿਸ੍ਸਕਪੁਞ੍ਞਂ ਕਥਿਤਂ.
੧੦. ਮਲਸੁਤ੍ਤਵਣ੍ਣਨਾ
੧੦. ਦਸਮੇ ਦੁਸ੍ਸੀਲਭਾਵੋ ਦੁਸ੍ਸੀਲ੍ਯਂ, ਦੁਸ੍ਸੀਲ੍ਯਮੇਵ ਮਲਂ ਦੁਸ੍ਸੀਲ੍ਯਮਲਂ. ਕੇਨਟ੍ਠੇਨ ਮਲਨ੍ਤਿ? ਅਨੁਦਹਨਟ੍ਠੇਨ ਦੁਗ੍ਗਨ੍ਧਟ੍ਠੇਨ ਕਿਲਿਟ੍ਠਕਰਣਟ੍ਠੇਨ ਚ. ਤਞ੍ਹਿ ਨਿਰਯਾਦੀਸੁ ਅਪਾਯੇਸੁ ਅਨੁਦਹਤੀਤਿ ਅਨੁਦਹਨਟ੍ਠੇਨਪਿ ਮਲਂ. ਤੇਨ ਸਮਨ੍ਨਾਗਤੋ ਪੁਗ੍ਗਲੋ ਮਾਤਾਪਿਤੂਨਮ੍ਪਿ ਸਨ੍ਤਿਕੇ ਭਿਕ੍ਖੁਸਙ੍ਘਸ੍ਸਾਪਿ ਅਨ੍ਤਰੇ ਬੋਧਿਚੇਤਿਯਟ੍ਠਾਨੇਸੁਪਿ ਜਿਗੁਚ੍ਛਨੀਯੋ ਹੋਤਿ, ਸਬ੍ਬਦਿਸਾਸੁ ਚਸ੍ਸ ‘‘ਏਵਰੂਪਂ ਕਿਰ ਤੇਨ ਪਾਪਕਮ੍ਮਂ ਕਤ’’ਨ੍ਤਿ ਅਵਣ੍ਣਗਨ੍ਧੋ ਵਾਯਤੀਤਿ ਦੁਗ੍ਗਨ੍ਧਟ੍ਠੇਨਪਿ ਮਲਂ. ਤੇਨ ਚ ਸਮਨ੍ਨਾਗਤੋ ਪੁਗ੍ਗਲੋ ਗਤਗਤਟ੍ਠਾਨੇ ਉਪਤਾਪਞ੍ਚੇਵ ਲਭਤਿ, ਕਾਯਕਮ੍ਮਾਦੀਨਿ ਚਸ੍ਸ ਅਸੁਚੀਨਿ ਹੋਨ੍ਤਿ ਅਪਭਸ੍ਸਰਾਨੀਤਿ ਕਿਲਿਟ੍ਠਕਰਣਟ੍ਠੇਨਪਿ ਮਲਂ. ਅਪਿਚ ਤਂ ਦੇਵਮਨੁਸ੍ਸਸਮ੍ਪਤ੍ਤਿਯੋ ਚੇਵ ਨਿਬ੍ਬਾਨਸਮ੍ਪਤ੍ਤਿਞ੍ਚ ਮਿਲਾਪੇਤੀਤਿ ਮਿਲਾਪਨਟ੍ਠੇਨਪਿ ਮਲਨ੍ਤਿ ਵੇਦਿਤਬ੍ਬਂ. ਇਸ੍ਸਾਮਲਮਚ੍ਛੇਰਮਲੇਸੁਪਿ ਏਸੇਵ ਨਯੋ.
ਬਾਲਵਗ੍ਗੋ ਪਠਮੋ.
੨. ਰਥਕਾਰਵਗ੍ਗੋ
੧. ਞਾਤਸੁਤ੍ਤਵਣ੍ਣਨਾ
੧੧. ਦੁਤਿਯਸ੍ਸ ਪਠਮੇ ਞਾਤੋਤਿ ਪਞ੍ਞਾਤੋ ਪਾਕਟੋ. ਅਨਨੁਲੋਮਿਕੇਤਿ ਸਾਸਨਸ੍ਸ ਨ ਅਨੁਲੋਮੇਤੀਤਿ ਅਨਨੁਲੋਮਿਕਂ, ਤਸ੍ਮਿਂ ਅਨਨੁਲੋਮਿਕੇ. ਕਾਯਕਮ੍ਮੇਤਿ ਪਾਣਾਤਿਪਾਤਾਦਿਮ੍ਹਿ ਕਾਯਦੁਚ੍ਚਰਿਤੇ. ਓਲ਼ਾਰਿਕਂ ਵਾ ਏਤਂ, ਨ ਏਵਰੂਪੇ ਸਮਾਦਪੇਤੁਂ ਸਕ੍ਕੋਤਿ. ਦਿਸਾ ਨਮਸ੍ਸਿਤੁਂ ਵਟ੍ਟਤਿ, ਭੂਤਬਲਿਂ ਕਾਤੁਂ ਵਟ੍ਟਤੀਤਿ ਏਵਰੂਪੇ ਸਮਾਦਪੇਤਿ ਗਣ੍ਹਾਪੇਤਿ. ਵਚੀਕਮ੍ਮੇਪਿ ਮੁਸਾਵਾਦਾਦੀਨਿ ਓਲ਼ਾਰਿਕਾਨਿ, ਅਤ੍ਤਨੋ ਸਨ੍ਤਕਂ ਪਰਸ੍ਸ ਅਦਾਤੁਕਾਮੇਨ ‘‘ਨਤ੍ਥੀ’’ਤਿ ਅਯਂ ਵਞ੍ਚਨਮੁਸਾਵਾਦੋ ਨਾਮ ਵਤ੍ਤੁਂ ਵਟ੍ਟਤੀਤਿ ਏਵਰੂਪੇ ਸਮਾਦਪੇਤਿ. ਮਨੋਕਮ੍ਮੇਪਿ ਅਭਿਜ੍ਝਾਦਯੋ ਓਲ਼ਾਰਿਕਾ, ਕਮ੍ਮਟ੍ਠਾਨਂ ਵਿਸਂਵਾਦੇਤ੍ਵਾ ਕਥੇਨ੍ਤੋ ਪਨ ਅਨਨੁਲੋਮਿਕੇਸੁ ਧਮ੍ਮੇਸੁ ਸਮਾਦਪੇਤਿ ਨਾਮ ਦਕ੍ਖਿਣਵਿਹਾਰਵਾਸਿਤ੍ਥੇਰੋ ਵਿਯ. ਤਂ ਕਿਰ ਥੇਰਂ ਏਕੋ ਉਪਟ੍ਠਾਕੋ ਅਮਚ੍ਚਪੁਤ੍ਤੋ ਉਪਸਙ੍ਕਮਿਤ੍ਵਾ ‘‘ਮੇਤ੍ਤਾਯਨ੍ਤੇਨ ਪਠਮਂ ਕੀਦਿਸੇ ਪੁਗ੍ਗਲੇ ਮੇਤ੍ਤਾਯਿਤਬ੍ਬ’’ਨ੍ਤਿ ਪੁਚ੍ਛਿ. ਥੇਰੋ ਸਭਾਗਵਿਸਭਾਗਂ ਅਨਾਚਿਕ੍ਖਿਤ੍ਵਾ ‘‘ਪਿਯਪੁਗ੍ਗਲੇ’’ਤਿ ਆਹ. ਤਸ੍ਸ ਚ ਭਰਿਯਾ ਪਿਯਾ ਹੋਤਿ ਮਨਾਪਾ, ਸੋ ਤਂ ਆਰਬ੍ਭ ਮੇਤ੍ਤਾਯਨ੍ਤੋ ਉਮ੍ਮਾਦਂ ਪਾਪੁਣਿ. ਕਥਂ ਪਨੇਸ ਬਹੁਜਨਅਹਿਤਾਯ ਪਟਿਪਨ੍ਨੋ ਹੋਤੀਤਿ? ਏਵਰੂਪਸ੍ਸ ਹਿ ਸਦ੍ਧਿਵਿਹਾਰਿਕਾਦਯੋ ਚੇਵ ਉਪਟ੍ਠਾਕਾਦਯੋ ਚ ਤੇਸਂ ਆਰਕ੍ਖਦੇਵਤਾ ਆਦਿਂ ਕਤ੍ਵਾ ਤਾਸਂ ਤਾਸਂ ਮਿਤ੍ਤਭੂਤਾ ਯਾਵ ਬ੍ਰਹ੍ਮਲੋਕਾ ਸੇਸਦੇਵਤਾ ਚ ‘‘ਅਯਂ ਭਿਕ੍ਖੁ ਨ ਅਜਾਨਿਤ੍ਵਾ ਕਰਿਸ੍ਸਤੀ’’ਤਿ ਤੇਨ ਕਤਮੇਵ ਕਰੋਨ੍ਤਿ, ਏਵਮੇਸ ਬਹੁਜਨਅਹਿਤਾਯ ਪਟਿਪਨ੍ਨੋ ਹੋਤਿ.
ਸੁਕ੍ਕਪਕ੍ਖੇ ਪਾਣਾਤਿਪਾਤਾ ਵੇਰਮਣਿਆਦੀਨਂਯੇਵ ਵਸੇਨ ਕਾਯਕਮ੍ਮਵਚੀਕਮ੍ਮਾਨਿ ਵੇਦਿਤਬ੍ਬਾਨਿ. ਕਮ੍ਮਟ੍ਠਾਨਂ ਪਨ ਅਵਿਸਂਵਾਦੇਤ੍ਵਾ ਕਥੇਨ੍ਤੋ ਅਨੁਲੋਮਿਕੇਸੁ ਧਮ੍ਮੇਸੁ ਸਮਾਦਪੇਤਿ ਨਾਮ ਕੋਲ਼ਿਤਵਿਹਾਰਵਾਸੀ ਚਤੁਨਿਕਾਯਿਕਤਿਸ੍ਸਤ੍ਥੇਰੋ ਵਿਯ. ਤਸ੍ਸ ਕਿਰ ਜੇਟ੍ਠਭਾਤਾ ਨਨ੍ਦਾਭਯਤ੍ਥੇਰੋ ਨਾਮ ਪੋਤਲਿਯਵਿਹਾਰੇ ਵਸਨ੍ਤੋ ਏਕਸ੍ਮਿਂ ਰੋਗੇ ਸਮੁਟ੍ਠਿਤੇ ਕਨਿਟ੍ਠਂ ਪਕ੍ਕੋਸਾਪੇਤ੍ਵਾ ਆਹ – ‘‘ਆਵੁਸੋ, ਮਯ੍ਹਂ ਸਲ੍ਲਹੁਕਂ ਕਤ੍ਵਾ ਏਕਂ ਕਮ੍ਮਟ੍ਠਾਨਂ ਕਥੇਹੀ’’ਤਿ. ਕਿਂ, ਭਨ੍ਤੇ, ਅਞ੍ਞੇਨ ਕਮ੍ਮਟ੍ਠਾਨੇਨ, ਕਬਲ਼ੀਕਾਰਾਹਾਰਂ ਪਰਿਗ੍ਗਣ੍ਹਿਤੁਂ ਵਟ੍ਟਤੀਤਿ? ਕਿਮਤ੍ਥਿਕੋ ਏਸ, ਆਵੁਸੋਤਿ? ਭਨ੍ਤੇ, ਕਬਲ਼ੀਕਾਰਾਹਾਰੋ ਉਪਾਦਾਰੂਪਂ, ਏਕਸ੍ਮਿਞ੍ਚ ਉਪਾਦਾਰੂਪੇ ਦਿਟ੍ਠੇ ਤੇਵੀਸਤਿ ਉਪਾਦਾਰੂਪਾਨਿ ਪਾਕਟਾਨਿ ਹੋਨ੍ਤੀਤਿ. ਸੋ ‘‘ਵਟ੍ਟਿਸ੍ਸਤਿ, ਆਵੁਸੋ, ਏਤ੍ਤਕ’’ਨ੍ਤਿ ਤਂ ਉਯ੍ਯੋਜੇਤ੍ਵਾ ਕਬਲ਼ੀਕਾਰਾਹਾਰਂ ਪਰਿਗ੍ਗਣ੍ਹਿਤ੍ਵਾ ਉਪਾਦਾਰੂਪਂ ਸਲ੍ਲਕ੍ਖੇਤ੍ਵਾ ਵਿਵਟ੍ਟੇਤ੍ਵਾ ਅਰਹਤ੍ਤਂ ਪਾਪੁਣਿ. ਅਥ ਨਂ ਥੇਰਂ ਬਹਿਵਿਹਾਰਾ ਅਨਿਕ੍ਖਨ੍ਤਮੇਵ ਪਕ੍ਕੋਸਿਤ੍ਵਾ, ‘‘ਆਵੁਸੋ, ਮਹਾਅਵਸ੍ਸਯੋਸਿ ਮਯ੍ਹਂ ਜਾਤੋ’’ਤਿ ਕਨਿਟ੍ਠਤ੍ਥੇਰਸ੍ਸ ਅਤ੍ਤਨਾ ਪਟਿਲਦ੍ਧਗੁਣਂ ਆਰੋਚੇਸਿ. ਬਹੁਜਨਹਿਤਾਯਾਤਿ ਏਤਸ੍ਸਪਿ ਹਿ ਸਦ੍ਧਿਵਿਹਾਰਿਕਾਦਯੋ ‘‘ਅਯਂ ਨ ਅਜਾਨਿਤ੍ਵਾ ਕਰਿਸ੍ਸਤੀ’’ਤਿ ਤੇਨ ਕਤਮੇਵ ਕਰੋਨ੍ਤੀਤਿ ਬਹੁਜਨਹਿਤਾਯ ਪਟਿਪਨ੍ਨੋ ਨਾਮ ਹੋਤੀਤਿ.
੨. ਸਾਰਣੀਯਸੁਤ੍ਤਵਣ੍ਣਨਾ
੧੨. ਦੁਤਿਯੇ ਖਤ੍ਤਿਯਸ੍ਸਾਤਿ ਜਾਤਿਯਾ ਖਤ੍ਤਿਯਸ੍ਸ. ਮੁਦ੍ਧਾਵਸਿਤ੍ਤਸ੍ਸਾਤਿ ਰਾਜਾਭਿਸੇਕੇਨ ਮੁਦ੍ਧਨਿ ਅਭਿਸਿਤ੍ਤਸ੍ਸ. ਸਾਰਣੀਯਾਨਿ ਭਵਨ੍ਤੀਤਿ ਸਰਿਤਬ੍ਬਾਨਿ ਅਸਮ੍ਮੁਸ੍ਸਨੀਯਾਨਿ ਹੋਨ੍ਤਿ. ਜਾਤੋਤਿ ਨਿਬ੍ਬਤ੍ਤੋ. ਯਾਵਜੀਵਂ ਸਾਰਣੀਯਨ੍ਤਿ ਦਹਰਕਾਲੇ ਜਾਨਿਤੁਮ੍ਪਿ ਨ ਸਕ੍ਕਾ, ਅਪਰਭਾਗੇ ਪਨ ਮਾਤਾਪਿਤੁਆਦੀਹਿ ਞਾਤਕੇਹਿ ਵਾ ਦਾਸਾਦੀਹਿ ਵਾ ‘‘ਤ੍ਵਂ ਅਸੁਕਜਨਪਦੇ ਅਸੁਕਨਗਰੇ ਅਸੁਕਦਿਵਸੇ ਅਸੁਕਨਕ੍ਖਤ੍ਤੇ ਜਾਤੋ’’ਤਿ ਆਚਿਕ੍ਖਿਤੇ ਸੁਤ੍ਵਾ ਤਤੋ ਪਟ੍ਠਾਯ ਯਾਵਜੀਵਂ ਸਰਤਿ ਨ ਸਮ੍ਮੁਸ੍ਸਤਿ. ਤੇਨ ਵੁਤ੍ਤਂ – ‘‘ਯਾਵਜੀਵਂ ਸਾਰਣੀਯਂ ਹੋਤੀ’’ਤਿ.
ਇਦਂ, ਭਿਕ੍ਖਵੇ, ਦੁਤਿਯਨ੍ਤਿ ਅਭਿਸੇਕਟ੍ਠਾਨਂ ਨਾਮ ਰਞ੍ਞੋ ਬਲਵਤੁਟ੍ਠਿਕਰਂ ਹੋਤਿ, ਤੇਨਸ੍ਸ ਤਂ ਯਾਵਜੀਵਂ ਸਾਰਣੀਯਂ. ਸਙ੍ਗਾਮਵਿਜਯਟ੍ਠਾਨੇਪਿ ਏਸੇਵ ਨਯੋ. ਏਤ੍ਥ ਪਨ ਸਙ੍ਗਾਮਨ੍ਤਿ ਯੁਦ੍ਧਂ. ਅਭਿਵਿਜਿਨਿਤ੍ਵਾਤਿ ਜਿਨਿਤ੍ਵਾ ਸਤ੍ਤੁਮਦ੍ਦਨਂ ਕਤ੍ਵਾ. ਤਮੇਵ ਸਙ੍ਗਾਮਸੀਸਨ੍ਤਿ ਤਮੇਵ ਸਙ੍ਗਾਮਟ੍ਠਾਨਂ. ਅਜ੍ਝਾਵਸਤੀਤਿ ਅਭਿਭਵਿਤ੍ਵਾ ਆਵਸਤਿ.
ਇਦਾਨਿ ਯਸ੍ਮਾ ਸਮ੍ਮਾਸਮ੍ਬੁਦ੍ਧਸ੍ਸ ਰਞ੍ਞੋ ਜਾਤਿਟ੍ਠਾਨਾਦੀਹਿ ਕਤ੍ਤਬ੍ਬਕਿਚ੍ਚਂ ਨਤ੍ਥਿ, ਇਮਸ੍ਮਿਂ ਪਨ ਸਾਸਨੇ ਤਪ੍ਪਟਿਭਾਗੇ ਤਯੋ ਪੁਗ੍ਗਲੇ ਦਸ੍ਸੇਤੁਂ ਇਦਂ ਕਾਰਣਂ ਆਭਤਂ, ਤਸ੍ਮਾ ਤੇ ਦਸ੍ਸੇਨ੍ਤੋ ਏਵਮੇਵ ਖੋ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਅਨਗਾਰਿਯਂ ਪਬ੍ਬਜਿਤੋ ਹੋਤੀਤਿ ਏਤ੍ਥ ਚਤੁਪਾਰਿਸੁਦ੍ਧਿਸੀਲਮ੍ਪਿ ਪਬ੍ਬਜ੍ਜਾਨਿਸ੍ਸਿਤਮੇਵਾਤਿ ਵੇਦਿਤਬ੍ਬਂ. ਸਾਰਣੀਯਂ ਹੋਤੀਤਿ ‘‘ਅਹਂ ਅਸੁਕਰਟ੍ਠੇ ਅਸੁਕਜਨਪਦੇ ਅਸੁਕਵਿਹਾਰੇ ਅਸੁਕਮਾਲ਼ਕੇ ਅਸੁਕਦਿਵਾਟ੍ਠਾਨੇ ਅਸੁਕਚਙ੍ਕਮੇ ਅਸੁਕਰੁਕ੍ਖਮੂਲੇ ਪਬ੍ਬਜਿਤੋ’’ਤਿ ਏਵਂ ਯਾਵਜੀਵਂ ਸਰਿਤਬ੍ਬਮੇਵ ਹੋਤਿ ਨ ਸਮ੍ਮੁਸ੍ਸਿਤਬ੍ਬਂ.
ਇਦਂ ਦੁਕ੍ਖਨ੍ਤਿ ਏਤ੍ਤਕਂ ਦੁਕ੍ਖਂ, ਨ ਇਤੋ ਉਦ੍ਧਂ ਦੁਕ੍ਖਂ ਅਤ੍ਥਿ. ਅਯਂ ਦੁਕ੍ਖਸਮੁਦਯੋਤਿ ਏਤ੍ਤਕੋ ਦੁਕ੍ਖਸਮੁਦਯੋ, ਨ ਇਤੋ ਉਦ੍ਧਂ ਦੁਕ੍ਖਸਮੁਦਯੋ ਅਤ੍ਥੀਤਿ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਏਵਮੇਤ੍ਥ ਚਤੂਹਿ ਸਚ੍ਚੇਹਿ ਸੋਤਾਪਤ੍ਤਿਮਗ੍ਗੋ ਕਥਿਤੋ. ਕਸਿਣਪਰਿਕਮ੍ਮਵਿਪਸ੍ਸਨਾਞਾਣਾਨਿ ਪਨ ਮਗ੍ਗਸਨ੍ਨਿਸ੍ਸਿਤਾਨੇਵ ਹੋਨ੍ਤਿ. ਸਾਰਣੀਯਂ ਹੋਤੀਤਿ ‘‘ਅਹਂ ਅਸੁਕਰਟ੍ਠੇ…ਪੇ… ਅਸੁਕਰੁਕ੍ਖਮੂਲੇ ਸੋਤਾਪਨ੍ਨੋ ਜਾਤੋ’’ਤਿ ਯਾਵਜੀਵਂ ਸਾਰਣੀਯਂ ਹੋਤਿ ਅਸਮ੍ਮੁਸ੍ਸਨੀਯਂ.
ਆਸਵਾਨਂ ਖਯਾਤਿ ਆਸਵਾਨਂ ਖਯੇਨ. ਚੇਤੋਵਿਮੁਤ੍ਤਿਨ੍ਤਿ ਫਲਸਮਾਧਿਂ. ਪਞ੍ਞਾਵਿਮੁਤ੍ਤਿਨ੍ਤਿ ਫਲਪਞ੍ਞਂ. ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾਤਿ ਅਤ੍ਤਨਾਵ ਅਭਿਵਿਸਿਟ੍ਠਾਯ ਪਞ੍ਞਾਯ ਪਚ੍ਚਕ੍ਖਂ ਕਤ੍ਵਾ. ਉਪਸਮ੍ਪਜ੍ਜ ਵਿਹਰਤੀਤਿ ਪਟਿਲਭਿਤ੍ਵਾ ਵਿਹਰਤਿ. ਸਾਰਣੀਯਨ੍ਤਿ ‘‘ਮਯਾ ਅਸੁਕਰਟ੍ਠੇ…ਪੇ… ਅਸੁਕਰੁਕ੍ਖਮੂਲੇ ਅਰਹਤ੍ਤਂ ਪਤ੍ਤ’’ਨ੍ਤਿ ਅਤ੍ਤਨੋ ਅਰਹਤ੍ਤਪਤ੍ਤਿਟ੍ਠਾਨਂ ਨਾਮ ਯਾਵਜੀਵਂ ਸਾਰਣੀਯਂ ਹੋਤਿ ਅਸਮ੍ਮੁਸ੍ਸਨੀਯਨ੍ਤਿ ਯਥਾਨੁਸਨ੍ਧਿਨਾਵ ਦੇਸਨਂ ਨਿਟ੍ਠਪੇਸਿ.
੩. ਆਸਂਸਸੁਤ੍ਤਵਣ੍ਣਨਾ
੧੩. ਤਤਿਯੇ ਸਨ੍ਤੋਤਿ ਅਤ੍ਥਿ ਉਪਲਬ੍ਭਨ੍ਤਿ. ਸਂਵਿਜ੍ਜਮਾਨਾਤਿ ਤਸ੍ਸੇਵ ਵੇਵਚਨਂ. ਲੋਕਸ੍ਮਿਨ੍ਤਿ ਸਤ੍ਤਲੋਕੇ. ਨਿਰਾਸੋਤਿ ਅਨਾਸੋ ਅਪਤ੍ਥਨੋ. ਆਸਂਸੋਤਿ ਆਸਂਸਮਾਨੋ ਪਤ੍ਥਯਮਾਨੋ. ਵਿਗਤਾਸੋਤਿ ਅਪਗਤਾਸੋ. ਚਣ੍ਡਾਲਕੁਲੇਤਿ ਚਣ੍ਡਾਲਾਨਂ ਕੁਲੇ. ਵੇਨਕੁਲੇਤਿ ਵਿਲੀਵਕਾਰਕੁਲੇ. ਨੇਸਾਦਕੁਲੇਤਿ ਮਿਗਲੁਦ੍ਦਕਾਨਂ ਕੁਲੇ. ਰਥਕਾਰਕੁਲੇਤਿ ਚਮ੍ਮਕਾਰਕੁਲੇ. ਪੁਕ੍ਕੁਸਕੁਲੇਤਿ ਪੁਪ੍ਫਚ੍ਛਡ੍ਡਕਕੁਲੇ.
ਏਤ੍ਤਾਵਤਾ ਕੁਲਵਿਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਯਸ੍ਮਾ ਨੀਚਕੁਲੇ ਜਾਤੋਪਿ ਏਕਚ੍ਚੋ ਅਡ੍ਢੋ ਹੋਤਿ ਮਹਦ੍ਧਨੋ, ਅਯਂ ਪਨ ਨ ਤਾਦਿਸੋ, ਤਸ੍ਮਾਸ੍ਸ ਭੋਗਵਿਪਤ੍ਤਿਂ ਦਸ੍ਸੇਤੁਂ ਦਲਿਦ੍ਦੇਤਿਆਦਿਮਾਹ. ਤਤ੍ਥ ਦਲਿਦ੍ਦੇਤਿ ਦਾਲਿਦ੍ਦਿਯੇਨ ਸਮਨ੍ਨਾਗਤੇ. ਅਪ੍ਪਨ੍ਨਪਾਨਭੋਜਨੇਤਿ ਪਰਿਤ੍ਤਕਅਨ੍ਨਪਾਨਭੋਜਨੇ. ਕਸਿਰਵੁਤ੍ਤਿਕੇਤਿ ਦੁਕ੍ਖਜੀਵਿਕੇ, ਯਤ੍ਥ ਵਾਯਾਮੇਨ ਪਯੋਗੇਨ ਜੀਵਿਤਵੁਤ੍ਤਿਂ ਸਾਧੇਨ੍ਤਿ, ਤਥਾਰੂਪੇਤਿ ਅਤ੍ਥੋ. ਯਤ੍ਥ ਕਸਿਰੇਨ ਘਾਸਚ੍ਛਾਦੋ ਲਬ੍ਭਤੀਤਿ ਯਸ੍ਮਿਂ ਕੁਲੇ ਦੁਕ੍ਖੇਨ ਯਾਗੁਭਤ੍ਤਘਾਸੋ ਚ ਕੋਪੀਨਮਤ੍ਤਂ ਅਚ੍ਛਾਦਨਞ੍ਚ ਲਬ੍ਭਤਿ.
ਇਦਾਨਿ ਯਸ੍ਮਾ ਏਕਚ੍ਚੋ ਨੀਚਕੁਲੇ ਜਾਤੋਪਿ ਉਪਧਿਸਮ੍ਪਨ੍ਨੋ ਹੋਤਿ ਅਤ੍ਤਭਾਵਸਮਿਦ੍ਧਿਯਂ ਠਿਤੋ, ਅਯਞ੍ਚ ਨ ਤਾਦਿਸੋ, ਤਸ੍ਮਾਸ੍ਸ ਸਰੀਰਵਿਪਤ੍ਤਿਮ੍ਪਿ ਦਸ੍ਸੇਤੁਂ ਸੋ ਚ ਹੋਤਿ ਦੁਬ੍ਬਣ੍ਣੋਤਿਆਦਿਮਾਹ. ਤਤ੍ਥ ਦੁਬ੍ਬਣ੍ਣੋਤਿ ਪਂਸੁਪਿਸਾਚਕੋ ਵਿਯ ਝਾਮਖਾਣੁਵਣ੍ਣੋ. ਦੁਦ੍ਦਸਿਕੋਤਿ ਵਿਜਾਤਮਾਤੁਯਾਪਿ ਅਮਨਾਪਦਸ੍ਸਨੋ. ਓਕੋਟਿਮਕੋਤਿ ਲਕੁਣ੍ਡਕੋ. ਕਾਣੋਤਿ ਏਕਕ੍ਖਿਕਾਣੋ ਵਾ ਉਭਯਕ੍ਖਿਕਾਣੋ ਵਾ. ਕੁਣੀਤਿ ਏਕਹਤ੍ਥਕੁਣੀ ਵਾ ਉਭਯਹਤ੍ਥਕੁਣੀ ਵਾ. ਖਞ੍ਜੋਤਿ ਏਕਪਾਦਖਞ੍ਜੋ ਵਾ ਉਭਯਪਾਦਖਞ੍ਜੋ ਵਾ. ਪਕ੍ਖਹਤੋਤਿ ਹਤਪਕ੍ਖੋ ਪੀਠਸਪ੍ਪੀ. ਪਦੀਪੇਯ੍ਯਸ੍ਸਾਤਿ ਵਟ੍ਟਿਤੇਲਕਪਲ੍ਲਕਾਦਿਨੋ ਪਦੀਪਉਪਕਰਣਸ੍ਸ. ਤਸ੍ਸ ਨ ਏਵਂ ਹੋਤੀਤਿ. ਕਸ੍ਮਾ ਨ ਹੋਤਿ? ਨੀਚਕੁਲੇ ਜਾਤਤ੍ਤਾ.
ਜੇਟ੍ਠੋਤਿ ਅਞ੍ਞਸ੍ਮਿਂ ਜੇਟ੍ਠੇ ਸਤਿ ਕਨਿਟ੍ਠੋ ਆਸਂ ਨ ਕਰੋਤਿ, ਤਸ੍ਮਾ ਜੇਟ੍ਠੋਤਿ ਆਹ. ਆਭਿਸੇਕੋਤਿ ਜੇਟ੍ਠੋਪਿ ਨ ਅਭਿਸੇਕਾਰਹੋ ਆਸਂ ਨ ਕਰੋਤਿ, ਤਸ੍ਮਾ ਆਭਿਸੇਕੋਤਿ ਆਹ. ਅਨਭਿਸਿਤ੍ਤੋਤਿ ਅਭਿਸੇਕਾਰਹੋਪਿ ਕਾਣਕੁਣਿਆਦਿਦੋਸਰਹਿਤੋ ਸਕਿਂ ਅਭਿਸਿਤ੍ਤੋ ਪੁਨ ਅਭਿਸੇਕੇ ਆਸਂ ਨ ਕਰੋਤਿ, ਤਸ੍ਮਾ ਅਨਭਿਸਿਤ੍ਤੋਤਿ ਆਹ. ਅਚਲਪ੍ਪਤ੍ਤੋਤਿ ਜੇਟ੍ਠੋਪਿ ਆਭਿਸੇਕੋ ਅਨਭਿਸਿਤ੍ਤੋ ਮਨ੍ਦੋ ਉਤ੍ਤਾਨਸੇਯ੍ਯਕੋ, ਸੋਪਿ ਅਭਿਸੇਕੇ ਆਸਂ ਨ ਕਰੋਤਿ. ਸੋਲ਼ਸਵਸ੍ਸੁਦ੍ਦੇਸਿਕੋ ਪਨ ਪਞ੍ਞਾਯਮਾਨਮਸ੍ਸੁਭੇਦੋ ਅਚਲਪ੍ਪਤ੍ਤੋ ਨਾਮ ਹੋਤਿ, ਮਹਨ੍ਤਮ੍ਪਿ ਰਜ੍ਜਂ ਵਿਚਾਰੇਤੁਂ ਸਮਤ੍ਥੋ, ਤਸ੍ਮਾ ‘‘ਅਚਲਪ੍ਪਤ੍ਤੋ’’ਤਿ ਆਹ. ਤਸ੍ਸ ਏਵਂ ਹੋਤੀਤਿ ਕਸ੍ਮਾ ਹੋਤਿ? ਮਹਾਜਾਤਿਤਾਯ.
ਦੁਸ੍ਸੀਲੋਤਿ ਨਿਸ੍ਸੀਲੋ. ਪਾਪਧਮ੍ਮੋਤਿ ਲਾਮਕਧਮ੍ਮੋ. ਅਸੁਚੀਤਿ ਅਸੁਚੀਹਿ ਕਾਯਕਮ੍ਮਾਦੀਹਿ ਸਮਨ੍ਨਾਗਤੋ. ਸਙ੍ਕਸ੍ਸਰਸਮਾਚਾਰੋਤਿ ਸਙ੍ਕਾਹਿ ਸਰਿਤਬ੍ਬਸਮਾਚਾਰੋ, ਕਿਞ੍ਚਿਦੇਵ ਅਸਾਰੁਪ੍ਪਂ ਦਿਸ੍ਵਾ ‘‘ਇਦਂ ਇਮਿਨਾ ਕਤਂ ਭਵਿਸ੍ਸਤੀ’’ਤਿ ਏਵਂ ਪਰੇਸਂ ਆਸਙ੍ਕਨੀਯਸਮਾਚਾਰੋ, ਅਤ੍ਤਨਾਯੇਵ ਵਾ ਸਙ੍ਕਾਹਿ ਸਰਿਤਬ੍ਬਸਮਾਚਾਰੋ, ਸਾਸਙ੍ਕਸਮਾਚਾਰੋਤਿ ਅਤ੍ਥੋ. ਤਸ੍ਸ ਹਿ ਦਿਵਾਟ੍ਠਾਨਾਦੀਸੁ ਸਨ੍ਨਿਪਤਿਤ੍ਵਾ ਕਿਞ੍ਚਿਦੇਵ ਮਨ੍ਤਯਨ੍ਤੇ ਭਿਕ੍ਖੂ ਦਿਸ੍ਵਾ ‘‘ਇਮੇ ਏਕਤੋ ਹੁਤ੍ਵਾ ਮਨ੍ਤੇਨ੍ਤਿ, ਕਚ੍ਚਿ ਨੁ ਖੋ ਮਯਾ ਕਤਕਮ੍ਮਂ ਜਾਨਿਤ੍ਵਾ ਮਨ੍ਤੇਨ੍ਤੀ’’ਤਿ ਏਵਂ ਸਾਸਙ੍ਕਸਮਾਚਾਰੋ ਹੋਤਿ. ਪਟਿਚ੍ਛਨ੍ਨਕਮ੍ਮਨ੍ਤੋਤਿ ਪਟਿਚ੍ਛਾਦੇਤਬ੍ਬਯੁਤ੍ਤਕੇਨ ਪਾਪਕਮ੍ਮੇਨ ਸਮਨ੍ਨਾਗਤੋ. ਅਸ੍ਸਮਣੋ ਸਮਣਪਟਿਞ੍ਞੋਤਿ ਅਸ੍ਸਮਣੋ ਹੁਤ੍ਵਾਵ ਸਮਣਪਤਿਰੂਪਕਤਾਯ ‘‘ਸਮਣੋ ਅਹ’’ਨ੍ਤਿ ਏਵਂ ਪਟਿਞ੍ਞੋ. ਅਬ੍ਰਹ੍ਮਚਾਰੀ ਬ੍ਰਹ੍ਮਚਾਰਿਪਟਿਞ੍ਞੋਤਿ ਅਞ੍ਞੇ ਬ੍ਰਹ੍ਮਚਾਰਿਨੋ ਸੁਨਿਵਤ੍ਥੇ ਸੁਪਾਰੁਤੇ ਸੁਮ੍ਭਕਪਤ੍ਤਧਰੇ ਗਾਮਨਿਗਮਰਾਜਧਾਨੀਸੁ ਪਿਣ੍ਡਾਯ ਚਰਿਤ੍ਵਾ ਜੀਵਿਕਂ ਕਪ੍ਪੇਨ੍ਤੇ ਦਿਸ੍ਵਾ ਸਯਮ੍ਪਿ ਤਾਦਿਸੇਨ ਆਕਾਰੇਨ ਤਥਾ ਪਟਿਪਜ੍ਜਨਤੋ ‘‘ਅਹਂ ਬ੍ਰਹ੍ਮਚਾਰੀ’’ਤਿ ਪਟਿਞ੍ਞਂ ਦੇਨ੍ਤੋ ਵਿਯ ਹੋਤਿ. ‘‘ਅਹਂ ਭਿਕ੍ਖੂ’’ਤਿ ਵਤ੍ਵਾ ਉਪੋਸਥਗ੍ਗਾਦੀਨਿ ਪਵਿਸਨ੍ਤੋ ਪਨ ਬ੍ਰਹ੍ਮਚਾਰਿਪਟਿਞ੍ਞੋ ਹੋਤਿਯੇਵ, ਤਥਾ ਸਙ੍ਘਿਕਂ ਲਾਭਂ ਗਣ੍ਹਨ੍ਤੋ. ਅਨ੍ਤੋਪੂਤੀਤਿ ਪੂਤਿਨਾ ਕਮ੍ਮੇਨ ਅਨ੍ਤੋ ਅਨੁਪਵਿਟ੍ਠੋ. ਅਵਸ੍ਸੁਤੋਤਿ ਰਾਗਾਦੀਹਿ ਤਿਨ੍ਤੋ. ਕਸਮ੍ਬੁਜਾਤੋਤਿ ਸਞ੍ਜਾਤਰਾਗਾਦਿਕਚਵਰੋ. ਤਸ੍ਸ ਨ ਏਵਂ ਹੋਤੀਤਿ. ਕਸ੍ਮਾ ਨ ਹੋਤਿ? ਲੋਕੁਤ੍ਤਰਧਮ੍ਮਉਪਨਿਸ੍ਸਯਸ੍ਸ ਨਤ੍ਥਿਤਾਯ. ਤਸ੍ਸ ਏਵਂ ਹੋਤੀਤਿ. ਕਸ੍ਮਾ ਹੋਤਿ? ਮਹਾਸੀਲਸ੍ਮਿਂ ਪਰਿਪੂਰਕਾਰਿਤਾਯ.
੪. ਚਕ੍ਕਵਤ੍ਤਿਸੁਤ੍ਤਵਣ੍ਣਨਾ
੧੪. ਚਤੁਤ੍ਥੇ ਚਤੂਹਿ ਸਙ੍ਗਹਵਤ੍ਥੂਹਿ ਜਨਂ ਰਞ੍ਜੇਤੀਤਿ ਰਾਜਾ. ਚਕ੍ਕਂ ਵਤ੍ਤੇਤੀਤਿ ਚਕ੍ਕਵਤ੍ਤੀ. ਵਤ੍ਤਿਤਂ ਵਾ ਅਨੇਨ ਚਕ੍ਕਨ੍ਤਿ ਚਕ੍ਕਵਤ੍ਤੀ. ਧਮ੍ਮੋ ਅਸ੍ਸ ਅਤ੍ਥੀਤਿ ਧਮ੍ਮਿਕੋ. ਧਮ੍ਮੇਨੇਵ ਦਸਵਿਧੇਨ ਚਕ੍ਕਵਤ੍ਤਿਵਤ੍ਤੇਨ ਰਾਜਾ ਜਾਤੋਤਿ ਧਮ੍ਮਰਾਜਾ. ਸੋਪਿ ਨ ਅਰਾਜਕਨ੍ਤਿ ਸੋਪਿ ਅਞ੍ਞਂ ਨਿਸ੍ਸਯਰਾਜਾਨਂ ਅਲਭਿਤ੍ਵਾ ਚਕ੍ਕਂ ਨਾਮ ਵਤ੍ਤੇਤੁਂ ਨ ਸਕ੍ਕੋਤੀਤਿ ਅਤ੍ਥੋ. ਇਤਿ ਸਤ੍ਥਾ ਦੇਸਨਂ ਪਟ੍ਠਪੇਤ੍ਵਾ ਯਥਾਨੁਸਨ੍ਧਿਂ ਅਪਾਪੇਤ੍ਵਾਵ ਤੁਣ੍ਹੀ ਅਹੋਸਿ. ਕਸ੍ਮਾ? ਅਨੁਸਨ੍ਧਿਕੁਸਲਾ ਉਟ੍ਠਹਿਤ੍ਵਾ ਅਨੁਸਨ੍ਧਿਂ ਪੁਚ੍ਛਿਸ੍ਸਨ੍ਤਿ, ਬਹੂ ਹਿ ਇਮਸ੍ਮਿਂ ਠਾਨੇ ਤਥਾਰੂਪਾ ਭਿਕ੍ਖੂ, ਅਥਾਹਂ ਤੇਹਿ ਪੁਟ੍ਠੋ ਦੇਸਨਂ ਵਡ੍ਢੇਸ੍ਸਾਮੀਤਿ. ਅਥੇਕੋ ਅਨੁਸਨ੍ਧਿਕੁਸਲੋ ਭਿਕ੍ਖੁ ਭਗਵਨ੍ਤਂ ਪੁਚ੍ਛਨ੍ਤੋ ਕੋ ਪਨ, ਭਨ੍ਤੇਤਿਆਦਿਮਾਹ. ਭਗਵਾਪਿਸ੍ਸ ਬ੍ਯਾਕਰੋਨ੍ਤੋ ਧਮ੍ਮੋ ਭਿਕ੍ਖੂਤਿਆਦਿਮਾਹ.
ਤਤ੍ਥ ਧਮ੍ਮੋਤਿ ਦਸਕੁਸਲਕਮ੍ਮਪਥਧਮ੍ਮੋ. ਧਮ੍ਮਨ੍ਤਿ ਤਮੇਵ ਵੁਤ੍ਤਪ੍ਪਕਾਰਂ ਧਮ੍ਮਂ. ਨਿਸ੍ਸਾਯਾਤਿ ਤਦਧਿਟ੍ਠਾਨੇਨ ਚੇਤਸਾ ਤਮੇਵ ਨਿਸ੍ਸਯਂ ਕਤ੍ਵਾ. ਧਮ੍ਮਂ ਸਕ੍ਕਰੋਨ੍ਤੋਤਿ ਯਥਾ ਕਤੋ ਸੋ ਧਮ੍ਮੋ ਸੁਟ੍ਠੁ ਕਤੋ ਹੋਤਿ, ਏਵਮੇਤਂ ਕਰੋਨ੍ਤੋ. ਧਮ੍ਮਂ ਗਰੁਂ ਕਰੋਨ੍ਤੋਤਿ ਤਸ੍ਮਿਂ ਗਾਰਵੁਪ੍ਪਤ੍ਤਿਯਾ ਤਂ ਗਰੁਕਰੋਨ੍ਤੋ. ਧਮ੍ਮਂ ਅਪਚਾਯਮਾਨੋਤਿ ਤਸ੍ਸੇਵ ਧਮ੍ਮਸ੍ਸ ਅਞ੍ਜਲਿਕਰਣਾਦੀਹਿ ਨੀਚਵੁਤ੍ਤਿਤਂ ਕਰੋਨ੍ਤੋ. ਧਮ੍ਮਦ੍ਧਜੋ ਧਮ੍ਮਕੇਤੂਤਿ ਤਂ ਧਮ੍ਮਂ ਧਜਮਿਵ ਪੁਰਕ੍ਖਤ੍ਵਾ ਕੇਤੁਮਿਵ ਉਕ੍ਖਿਪਿਤ੍ਵਾ ਪਵਤ੍ਤਿਯਾ ਧਮ੍ਮਦ੍ਧਜੋ ਧਮ੍ਮਕੇਤੁ ਚ ਹੁਤ੍ਵਾਤਿ ਅਤ੍ਥੋ. ਧਮ੍ਮਾਧਿਪਤੇਯ੍ਯੋਤਿ ਧਮ੍ਮਾਧਿਪਤਿਭੂਤਾਗਤਭਾਵੇਨ ਧਮ੍ਮਵਸੇਨੇਵ ਚ ਸਬ੍ਬਕਿਰਿਯਾਨਂ ਕਰਣੇਨ ਧਮ੍ਮਾਧਿਪਤੇਯ੍ਯੋ ਹੁਤ੍ਵਾ. ਧਮ੍ਮਿਕਂ ਰਕ੍ਖਾਵਰਣਗੁਤ੍ਤਿਂ ਸਂਵਿਦਹਤੀਤਿ ਧਮ੍ਮੋ ਅਸ੍ਸਾ ਅਤ੍ਥੀਤਿ ਧਮ੍ਮਿਕਾ, ਰਕ੍ਖਾ ਚ ਆਵਰਣਞ੍ਚ ਗੁਤ੍ਤਿ ਚ ਰਕ੍ਖਾਵਰਣਗੁਤ੍ਤਿ. ਤਤ੍ਥ ‘‘ਪਰਂ ਰਕ੍ਖਨ੍ਤੋ ਅਤ੍ਤਾਨਂ ਰਕ੍ਖਤੀ’’ਤਿ ਵਚਨਤੋ ਖਨ੍ਤਿਆਦਯੋ ਰਕ੍ਖਾ. ਵੁਤ੍ਤਞ੍ਹੇਤਂ – ‘‘ਕਥਞ੍ਚ, ਭਿਕ੍ਖਵੇ, ਪਰਂ ਰਕ੍ਖਨ੍ਤੋ ਅਤ੍ਤਾਨਂ ਰਕ੍ਖਤਿ. ਖਨ੍ਤਿਯਾ ਅਵਿਹਿਂਸਾਯ ਮੇਤ੍ਤਚਿਤ੍ਤਤਾਯ ਅਨੁਦ੍ਦਯਾਯਾ’’ਤਿ (ਸਂ. ਨਿ. ੫.੩੮੫). ਨਿਵਾਸਨਪਾਰੁਪਨਗੇਹਾਦੀਨਿ ਆਵਰਣਂ. ਚੋਰਾਦਿਉਪਦ੍ਦਵਨਿਵਾਰਣਤ੍ਥਂ ਗੋਪਾਯਨਾ ਗੁਤ੍ਤਿ. ਤਂ ਸਬ੍ਬਮ੍ਪਿ ਸੁਟ੍ਠੁ ਵਿਦਹਤਿ ਪਵਤ੍ਤੇਤਿ ਠਪੇਤੀਤਿ ਅਤ੍ਥੋ.
ਇਦਾਨਿ ਯਤ੍ਥ ਸਾ ਸਂਵਿਦਹਿਤਬ੍ਬਾ, ਤਂ ਦਸ੍ਸੇਨ੍ਤੋ ਅਨ੍ਤੋਜਨਸ੍ਮਿਨ੍ਤਿਆਦਿਮਾਹ. ਤਤ੍ਰਾਯਂ ਸਙ੍ਖੇਪਤ੍ਥੋ – ਅਨ੍ਤੋਜਨਸਙ੍ਖਾਤਂ ਪੁਤ੍ਤਦਾਰਂ ਸੀਲਸਂਵਰੇ ਪਤਿਟ੍ਠਾਪੇਨ੍ਤੋ ਵਤ੍ਥਗਨ੍ਧਮਾਲਾਦੀਨਿ ਚਸ੍ਸ ਦਦਮਾਨੋ ਸਬ੍ਬੋਪਦ੍ਦਵੇ ਚਸ੍ਸ ਨਿਵਾਰਯਮਾਨੋ ਧਮ੍ਮਿਕਂ ਰਕ੍ਖਾਵਰਣਗੁਤ੍ਤਿਂ ਸਂਵਿਦਹਤਿ ਨਾਮ. ਖਤ੍ਤਿਯਾਦੀਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਅਭਿਸਿਤ੍ਤਖਤ੍ਤਿਯਾ ਭਦ੍ਰਅਸ੍ਸਾਜਾਨੀਯਾਦਿਰਤਨਸਮ੍ਪਦਾਨੇਨਪਿ ਉਪਗਣ੍ਹਿਤਬ੍ਬਾ, ਅਨੁਯਨ੍ਤਾ ਖਤ੍ਤਿਯਾ ਤੇਸਂ ਅਨੁਰੂਪਯਾਨਵਾਹਨਸਮ੍ਪਦਾਨੇਨਪਿ ਪਰਿਤੋਸੇਤਬ੍ਬਾ, ਬਲਕਾਯੋ ਕਾਲਂ ਅਨਤਿਕ੍ਕਮੇਤ੍ਵਾ ਭਤ੍ਤਵੇਤਨਸਮ੍ਪਦਾਨੇਨਪਿ ਅਨੁਗ੍ਗਹੇਤਬ੍ਬੋ, ਬ੍ਰਾਹ੍ਮਣਾ ਅਨ੍ਨਪਾਨਵਤ੍ਥਾਦਿਨਾ ਦੇਯ੍ਯਧਮ੍ਮੇਨ, ਗਹਪਤਿਕਾ ਭਤ੍ਤਬੀਜਨਙ੍ਗਲਬਲਿਬਦ੍ਦਾਦਿਸਮ੍ਪਦਾਨੇਨ, ਤਥਾ ਨਿਗਮਵਾਸਿਨੋ ਨੇਗਮਾ ਜਨਪਦਵਾਸਿਨੋ ਚ ਜਾਨਪਦਾ. ਸਮਿਤਪਾਪਬਾਹਿਤਪਾਪਾ ਪਨ ਸਮਣਬ੍ਰਾਹ੍ਮਣਾ ਸਮਣਪਰਿਕ੍ਖਾਰਸਮ੍ਪਦਾਨੇਨ ਸਕ੍ਕਾਤਬ੍ਬਾ, ਮਿਗਪਕ੍ਖਿਨੋ ਅਭਯਦਾਨੇਨ ਸਮਸ੍ਸਾਸੇਤਬ੍ਬਾ.
ਧਮ੍ਮੇਨੇਵ ਚਕ੍ਕਂ ਵਤ੍ਤੇਤੀਤਿ ਦਸਕੁਸਲਕਮ੍ਮਪਥਧਮ੍ਮੇਨੇਵ ਚਕ੍ਕਂ ਪਵਤ੍ਤੇਤਿ. ਤਂ ਹੋਤਿ ਚਕ੍ਕਂ ਅਪ੍ਪਟਿਵਤ੍ਤਿਯਨ੍ਤਿ ਤਂ ਤੇਨ ਏਵਂ ਪਵਤ੍ਤਿਤਂ ਆਣਾਚਕ੍ਕਂ ਅਪ੍ਪਟਿਵਤ੍ਤਿਯਂ ਹੋਤਿ. ਕੇਨਚਿ ਮਨੁਸ੍ਸਭੂਤੇਨਾਤਿ ਦੇਵਤਾ ਨਾਮ ਅਤ੍ਤਨਾ ਇਚ੍ਛਿਤਿਚ੍ਛਿਤਮੇਵ ਕਰੋਨ੍ਤਿ, ਤਸ੍ਮਾ ਤਾ ਅਗ੍ਗਣ੍ਹਿਤ੍ਵਾ ‘‘ਮਨੁਸ੍ਸਭੂਤੇਨਾ’’ਤਿ ਵੁਤ੍ਤਂ. ਪਚ੍ਚਤ੍ਥਿਕੇਨਾਤਿ ਪਟਿਅਤ੍ਥਿਕੇਨ, ਪਟਿਸਤ੍ਤੁਨਾਤਿ ਅਤ੍ਥੋ. ਧਮ੍ਮਿਕੋਤਿ ਚਕ੍ਕਵਤ੍ਤੀ ਦਸਕੁਸਲਕਮ੍ਮਪਥਵਸੇਨ ਧਮ੍ਮਿਕੋ, ਤਥਾਗਤੋ ਪਨ ਨਵਲੋਕੁਤ੍ਤਰਧਮ੍ਮਵਸੇਨ. ਧਮ੍ਮਰਾਜਾਤਿ ਨਵਹਿ ਲੋਕੁਤ੍ਤਰਧਮ੍ਮੇਹਿ ਮਹਾਜਨਂ ਰਞ੍ਜੇਤੀਤਿ ਧਮ੍ਮਰਾਜਾ. ਧਮ੍ਮਂਯੇਵਾਤਿ ਨਵਲੋਕੁਤ੍ਤਰਧਮ੍ਮਮੇਵ ਨਿਸ੍ਸਾਯ ਤਮੇਵ ਸਕ੍ਕਰੋਨ੍ਤੋ ਤਂ ਗਰੁਕਰੋਨ੍ਤੋ ਤਂ ਅਪਚਾਯਮਾਨੋ. ਸੋਵਸ੍ਸ ਧਮ੍ਮੋ ਅਬ੍ਭੁਗ੍ਗਤਟ੍ਠੇਨ ਧਜੋਤਿ ਧਮ੍ਮਦ੍ਧਜੋ. ਸੋਵਸ੍ਸ ਕੇਤੂਤਿ ਧਮ੍ਮਕੇਤੁ. ਤਮੇਵ ਅਧਿਪਤਿਂ ਜੇਟ੍ਠਕਂ ਕਤ੍ਵਾ ਵਿਹਰਤੀਤਿ ਧਮ੍ਮਾਧਿਪਤੇਯ੍ਯੋ. ਧਮ੍ਮਿਕਂ ਰਕ੍ਖਾਵਰਣਗੁਤ੍ਤਿਨ੍ਤਿ ਲੋਕਿਯਲੋਕੁਤ੍ਤਰਧਮ੍ਮਦਾਯਿਕਰਕ੍ਖਞ੍ਚ ਆਵਰਣਞ੍ਚ ਗੁਤ੍ਤਿਞ੍ਚ. ਸਂਵਿਦਹਤੀਤਿ ਠਪੇਤਿ ਪਞ੍ਞਪੇਤਿ. ਏਵਰੂਪਨ੍ਤਿ ਤਿਵਿਧਂ ਕਾਯਦੁਚ੍ਚਰਿਤਂ ਨ ਸੇਵਿਤਬ੍ਬਂ, ਸੁਚਰਿਤਂ ਸੇਵਿਤਬ੍ਬਨ੍ਤਿ ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਸਂਵਿਦਹਿਤ੍ਵਾਤਿ ਠਪੇਤ੍ਵਾ ਕਥੇਤ੍ਵਾ. ਧਮ੍ਮੇਨੇਵ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤੇਤੀਤਿ ਨਵਲੋਕੁਤ੍ਤਰਧਮ੍ਮੇਨੇਵ ਅਸਦਿਸਂ ਧਮ੍ਮਚਕ੍ਕਂ ਪਵਤ੍ਤੇਤਿ. ਤਂ ਹੋਤਿ ਚਕ੍ਕਂ ਅਪ੍ਪਟਿਵਤ੍ਤਿਯਨ੍ਤਿ ਤਂ ਏਵਂ ਪਵਤ੍ਤਿਤਂ ਧਮ੍ਮਚਕ੍ਕਂ ਏਤੇਸੁ ਸਮਣਾਦੀਸੁ ਏਕੇਨਪਿ ਪਟਿਵਤ੍ਤੇਤੁਂ ਪਟਿਬਾਹਿਤੁਂ ਨ ਸਕ੍ਕਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
੫. ਸਚੇਤਨਸੁਤ੍ਤਵਣ੍ਣਨਾ
੧੫. ਪਞ੍ਚਮੇ ਇਸਿਪਤਨੇਤਿ ਬੁਦ੍ਧਪਚ੍ਚੇਕਬੁਦ੍ਧਸਙ੍ਖਾਤਾਨਂ ਇਸੀਨਂ ਧਮ੍ਮਚਕ੍ਕਪ੍ਪਵਤ੍ਤਨਤ੍ਥਾਯ ਚੇਵ ਉਪੋਸਥਕਰਣਤ੍ਥਾਯ ਚ ਆਗਨ੍ਤ੍ਵਾ ਪਤਨੇ, ਸਨ੍ਨਿਪਾਤਟ੍ਠਾਨੇਤਿ ਅਤ੍ਥੋ. ਪਦਨੇਤਿਪਿ ਪਾਠੋ, ਅਯਮੇਵ ਅਤ੍ਥੋ. ਮਿਗਦਾਯੇਤਿ ਮਿਗਾਨਂ ਅਭਯਤ੍ਥਾਯ ਦਿਨ੍ਨੇ. ਛਹਿ ਮਾਸੇਹਿ ਛਾਰਤ੍ਤੂਨੇਹੀਤਿ ਸੋ ਕਿਰ ਰਞ੍ਞਾ ਆਣਤ੍ਤਦਿਵਸੇਯੇਵ ਸਬ੍ਬੂਪਕਰਣਾਨਿ ਸਜ੍ਜੇਤ੍ਵਾ ਅਨ੍ਤੇਵਾਸਿਕੇਹਿ ਸਦ੍ਧਿਂ ਅਰਞ੍ਞਂ ਪਵਿਸਿਤ੍ਵਾ ਗਾਮਦ੍ਵਾਰਗਾਮਮਜ੍ਝਦੇਵਕੁਲਸੁਸਾਨਾਦੀਸੁ ਠਿਤਰੁਕ੍ਖੇ ਚੇਵ ਝਾਮਪਤਿਤਸੁਕ੍ਖਰੁਕ੍ਖੇ ਚ ਵਿਵਜ੍ਜੇਤ੍ਵਾ ਸਮ੍ਪਨ੍ਨਪਦੇਸੇ ਠਿਤੇ ਸਬ੍ਬਦੋਸਵਿਵਜ੍ਜਿਤੇ ਨਾਭਿਅਰਨੇਮੀਨਂ ਅਨੁਰੂਪੇ ਰੁਕ੍ਖੇ ਗਹੇਤ੍ਵਾ ਤਂ ਚਕ੍ਕਂ ਅਕਾਸਿ. ਤਸ੍ਸ ਰੁਕ੍ਖੇ ਵਿਚਿਨਿਤ੍ਵਾ ਗਣ੍ਹਨ੍ਤਸ੍ਸ ਚੇਵ ਕਰੋਨ੍ਤਸ੍ਸ ਚ ਏਤ੍ਤਕੋ ਕਾਲੋ ਵੀਤਿਵਤ੍ਤੋ. ਤੇਨ ਵੁਤ੍ਤਂ – ‘‘ਛਹਿ ਮਾਸੇਹਿ ਛਾਰਤ੍ਤੂਨੇਹੀ’’ਤਿ. ਨਾਨਾਕਰਣਨ੍ਤਿ ਨਾਨਤ੍ਤਂ. ਨੇਸਨ੍ਤਿ ਨ ਏਸਂ. ਅਤ੍ਥੇਸਨ੍ਤਿ ਅਤ੍ਥਿ ਏਸਂ. ਅਭਿਸਙ੍ਖਾਰਸ੍ਸ ਗਤੀਤਿ ਪਯੋਗਸ੍ਸ ਗਮਨਂ. ਚਿਙ੍ਗੁਲਾਯਿਤ੍ਵਾਤਿ ਪਰਿਬ੍ਭਮਿਤ੍ਵਾ. ਅਕ੍ਖਾਹਤਂ ਮਞ੍ਞੇਤਿ ਅਕ੍ਖੇ ਪਵੇਸੇਤ੍ਵਾ ਠਪਿਤਮਿਵ.
ਸਦੋਸਾਤਿ ਸਗਣ੍ਡਾ ਉਣ੍ਣਤੋਣਤਟ੍ਠਾਨਯੁਤ੍ਤਾ. ਸਕਸਾਵਾਤਿ ਪੂਤਿਸਾਰੇਨ ਚੇਵ ਫੇਗ੍ਗੁਨਾ ਚ ਯੁਤ੍ਤਾ. ਕਾਯਵਙ੍ਕਾਤਿਆਦੀਨਿ ਕਾਯਦੁਚ੍ਚਰਿਤਾਦੀਨਂ ਨਾਮਾਨਿ. ਏਵਂ ਪਪਤਿਤਾਤਿ ਏਵਂ ਗੁਣਪਤਨੇਨ ਪਤਿਤਾ. ਏਵਂ ਪਤਿਟ੍ਠਿਤਾਤਿ ਏਵਂ ਗੁਣੇਹਿ ਪਤਿਟ੍ਠਿਤਾ. ਤਤ੍ਥ ਲੋਕਿਯਮਹਾਜਨਾ ਪਪਤਿਤਾ ਨਾਮ, ਸੋਤਾਪਨ੍ਨਾਦਯੋ ਪਤਿਟ੍ਠਿਤਾ ਨਾਮ. ਤੇਸੁਪਿ ਪੁਰਿਮਾ ਤਯੋ ਕਿਲੇਸਾਨਂ ਸਮੁਦਾਚਾਰਕ੍ਖਣੇ ਪਪਤਿਤਾ ਨਾਮ, ਖੀਣਾਸਵਾ ਪਨ ਏਕਨ੍ਤੇਨੇਵ ਪਤਿਟ੍ਠਿਤਾ ਨਾਮ. ਤਸ੍ਮਾਤਿ ਯਸ੍ਮਾ ਅਪ੍ਪਹੀਨਕਾਯਵਙ੍ਕਾਦਯੋ ਪਪਤਨ੍ਤਿ, ਪਹੀਨਕਾਯਵਙ੍ਕਾਦਯੋ ਪਤਿਟ੍ਠਹਨ੍ਤਿ, ਤਸ੍ਮਾ. ਕਾਯਵਙ੍ਕਾਦੀਨਂ ਪਨ ਏਵਂ ਪਹਾਨਂ ਵੇਦਿਤਬ੍ਬਂ – ਪਾਣਾਤਿਪਾਤੋ ਅਦਿਨ੍ਨਾਦਾਨਂ ਮਿਚ੍ਛਾਚਾਰੋ ਮੁਸਾਵਾਦੋ ਪਿਸੁਣਾਵਾਚਾ ਮਿਚ੍ਛਾਦਿਟ੍ਠੀਤਿ ਇਮੇ ਤਾਵ ਛ ਸੋਤਾਪਤ੍ਤਿਮਗ੍ਗੇਨ ਪਹੀਯਨ੍ਤਿ, ਫਰੁਸਾਵਾਚਾ ਬ੍ਯਾਪਾਦੋਤਿ ਦ੍ਵੇ ਅਨਾਗਾਮਿਮਗ੍ਗੇਨ, ਅਭਿਜ੍ਝਾ ਸਮ੍ਫਪ੍ਪਲਾਪੋਤਿ ਦ੍ਵੇ ਅਰਹਤ੍ਤਮਗ੍ਗੇਨਾਤਿ.
੬. ਅਪਣ੍ਣਕਸੁਤ੍ਤਵਣ੍ਣਨਾ
੧੬. ਛਟ੍ਠੇ ਅਪਣ੍ਣਕਪਟਿਪਦਨ੍ਤਿ ਅਵਿਰਦ੍ਧਪਟਿਪਦਂ ਏਕਂਸਪਟਿਪਦਂ ਨਿਯ੍ਯਾਨਿਕਪਟਿਪਦਂ ਕਾਰਣਪਟਿਪਦਂ ਸਾਰਪਟਿਪਦਂ ਮਣ੍ਡਪਟਿਪਦਂ ਅਪਚ੍ਚਨੀਕਪਟਿਪਦਂ ਅਨੁਲੋਮਪਟਿਪਦਂ ਧਮ੍ਮਾਨੁਧਮ੍ਮਪਟਿਪਦਂ ਪਟਿਪਨ੍ਨੋ ਹੋਤਿ, ਨ ਤਕ੍ਕਗ੍ਗਾਹੇਨ ਵਾ ਨਯਗ੍ਗਾਹੇਨ ਵਾ. ਏਵਂ ਗਹੇਤ੍ਵਾ ਪਟਿਪਨ੍ਨੋ ਹਿ ਭਿਕ੍ਖੁ ਵਾ ਭਿਕ੍ਖੁਨੀ ਵਾ ਉਪਾਸਕੋ ਵਾ ਉਪਾਸਿਕਾ ਵਾ ਮਨੁਸ੍ਸਦੇਵਨਿਬ੍ਬਾਨਸਮ੍ਪਤ੍ਤੀਹਿ ਹਾਯਤਿ ਪਰਿਹਾਯਤਿ, ਅਪਣ੍ਣਕਪਟਿਪਦਂ ਪਟਿਪਨ੍ਨੋ ਪਨ ਤਾਹਿ ਸਮ੍ਪਤ੍ਤੀਹਿ ਨ ਪਰਿਹਾਯਤਿ. ਅਤੀਤੇ ਕਨ੍ਤਾਰਦ੍ਧਾਨਮਗ੍ਗਂ ਪਟਿਪਨ੍ਨੇਸੁ ਦ੍ਵੀਸੁ ਸਤ੍ਥਵਾਹੇਸੁ ਯਕ੍ਖਸ੍ਸ ਵਚਨਂ ਗਹੇਤ੍ਵਾ ਬਾਲਸਤ੍ਥਵਾਹੋ ਸਦ੍ਧਿਂ ਸਤ੍ਥੇਨ ਅਨਯਬ੍ਯਸਨਂ ਪਤ੍ਤੋ, ਯਕ੍ਖਸ੍ਸ ਵਚਨਂ ਅਗ੍ਗਹੇਤ੍ਵਾ ‘‘ਉਦਕਦਿਟ੍ਠਟ੍ਠਾਨੇ ਉਦਕਂ ਛਡ੍ਡੇਸ੍ਸਾਮਾ’’ਤਿ ਸਤ੍ਥਕੇ ਸਞ੍ਞਾਪੇਤ੍ਵਾ ਮਗ੍ਗਂ ਪਟਿਪਨ੍ਨੋ ਪਣ੍ਡਿਤਸਤ੍ਥਵਾਹੋ ਵਿਯ. ਯਂ ਸਨ੍ਧਾਯ ਵੁਤ੍ਤਂ –
‘‘ਅਪਣ੍ਣਕਂ ਠਾਨਮੇਕੇ, ਦੁਤਿਯਂ ਆਹੁ ਤਕ੍ਕਿਕਾ;
ਏਤਦਞ੍ਞਾਯ ਮੇਧਾਵੀ, ਤਂ ਗਣ੍ਹੇ ਯਦਪਣ੍ਣਕ’’ਨ੍ਤਿ. (ਜਾ. ੧.੧.੧);
ਯੋਨਿ ਚਸ੍ਸ ਆਰਦ੍ਧਾ ਹੋਤੀਤਿ ਏਤ੍ਥ ਯੋਨੀਤਿ ਖਨ੍ਧਕੋਟ੍ਠਾਸਸ੍ਸਪਿ ਕਾਰਣਸ੍ਸਪਿ ਪਸ੍ਸਾਵਮਗ੍ਗਸ੍ਸਪਿ ਨਾਮਂ. ‘‘ਚਤਸ੍ਸੋ ਖੋ ਇਮਾ, ਸਾਰਿਪੁਤ੍ਤ, ਯੋਨਿਯੋ’’ਤਿਆਦੀਸੁ (ਮ. ਨਿ. ੧.੧੫੨) ਹਿ ਖਨ੍ਧਕੋਟ੍ਠਾਸੋ ਯੋਨਿ ਨਾਮ. ‘‘ਯੋਨਿ ਹੇਸਾ ਭੂਮਿਜ ਫਲਸ੍ਸ ਅਧਿਗਮਾਯਾ’’ਤਿਆਦੀਸੁ (ਮ. ਨਿ. ੩.੨੨੬) ਕਾਰਣਂ. ‘‘ਨ ਚਾਹਂ ਬ੍ਰਾਹ੍ਮਣਂ ਬ੍ਰੂਮਿ, ਯੋਨਿਜਂ ਮਤ੍ਤਿਸਮ੍ਭਵ’’ਨ੍ਤਿ (ਮ. ਨਿ. ੨.੪੫੭; ਧ. ਪ. ੩੯੬) ਚ ‘‘ਤਮੇਨਂ ਕਮ੍ਮਜਵਾਤਾ ਨਿਵਤ੍ਤਿਤ੍ਵਾ ਉਦ੍ਧਂਪਾਦਂ ਅਧੋਸਿਰਂ ਸਮ੍ਪਰਿਵਤ੍ਤੇਤ੍ਵਾ ਮਾਤੁ ਯੋਨਿਮੁਖੇ ਸਮ੍ਪਟਿਪਾਦੇਨ੍ਤੀ’’ਤਿ ਚ ਆਦੀਸੁ ਪਸ੍ਸਾਵਮਗ੍ਗੋ. ਇਧ ਪਨ ਕਾਰਣਂ ਅਧਿਪ੍ਪੇਤਂ. ਆਰਦ੍ਧਾਤਿ ਪਗ੍ਗਹਿਤਾ ਪਰਿਪੁਣ੍ਣਾ.
ਆਸਵਾਨਂ ਖਯਾਯਾਤਿ ਏਤ੍ਥ ਆਸਵਨ੍ਤੀਤਿ ਆਸਵਾ, ਚਕ੍ਖੁਤੋਪਿ…ਪੇ… ਮਨਤੋਪਿ ਸਨ੍ਦਨ੍ਤਿ ਪਵਤ੍ਤਨ੍ਤੀਤਿ ਵੁਤ੍ਤਂ ਹੋਤਿ. ਧਮ੍ਮਤੋ ਯਾਵ ਗੋਤ੍ਰਭੁ, ਓਕਾਸਤੋ ਯਾਵ ਭਵਗ੍ਗਾ ਸਵਨ੍ਤੀਤਿ ਵਾ ਆਸਵਾ, ਏਤੇ ਧਮ੍ਮੇ ਏਤਞ੍ਚ ਓਕਾਸਂ ਅਨ੍ਤੋਕਰਿਤ੍ਵਾ ਪਵਤ੍ਤਨ੍ਤੀਤਿ ਅਤ੍ਥੋ. ਅਨ੍ਤੋਕਰਣਤ੍ਥੋ ਹਿ ਅਯਂ ਆਕਾਰੋ. ਚਿਰਪਾਰਿਵਾਸਿਯਟ੍ਠੇਨ ਮਦਿਰਾਦਯੋ ਆਸਵਾ, ਆਸਵਾ ਵਿਯਾਤਿਪਿ ਆਸਵਾ. ਲੋਕਸ੍ਮਿਮ੍ਪਿ ਹਿ ਚਿਰਪਾਰਿਵਾਸਿਕਾ ਮਦਿਰਾਦਯੋ ਆਸਵਾਤਿ ਵੁਚ੍ਚਨ੍ਤਿ, ਯਦਿ ਚ ਚਿਰਪਾਰਿਵਾਸਿਯਟ੍ਠੇਨ ਆਸਵਾ, ਏਤੇਯੇਵ ਭਵਿਤੁਮਰਹਨ੍ਤਿ. ਵੁਤ੍ਤਞ੍ਹੇਤਂ – ‘‘ਪੁਰਿਮਾ, ਭਿਕ੍ਖਵੇ, ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਯ, ਇਤੋ ਪੁਬ੍ਬੇ ਅਵਿਜ੍ਜਾ ਨਾਹੋਸੀ’’ਤਿਆਦਿ (ਅ. ਨਿ. ੧੦.੬੧). ਆਯਤਂ ਵਾ ਸਂਸਾਰਦੁਕ੍ਖਂ ਸਵਨ੍ਤਿ ਪਸਵਨ੍ਤੀਤਿਪਿ ਆਸਵਾ. ਪੁਰਿਮਾਨਿ ਚੇਤ੍ਥ ਨਿਬ੍ਬਚਨਾਨਿ ਯਤ੍ਥ ਕਿਲੇਸਾ ਆਸਵਾਤਿ ਆਗਚ੍ਛਨ੍ਤਿ, ਤਤ੍ਥ ਯੁਜ੍ਜਨ੍ਤਿ, ਪਚ੍ਛਿਮਂ ਕਮ੍ਮੇਪਿ. ਨ ਕੇਵਲਞ੍ਚ ਕਮ੍ਮਕਿਲੇਸਾਯੇਵ ਆਸਵਾ, ਅਪਿਚ ਖੋ ਨਾਨਪ੍ਪਕਾਰਾ ਉਪਦ੍ਦਵਾਪਿ. ਸੁਤ੍ਤੇਸੁ ਹਿ ‘‘ਨਾਹਂ, ਚੁਨ੍ਦ, ਦਿਟ੍ਠਧਮ੍ਮਿਕਾਨਂਯੇਵ ਆਸਵਾਨਂ ਸਂਵਰਾਯ ਧਮ੍ਮਂ ਦੇਸੇਮੀ’’ਤਿ (ਦੀ. ਨਿ. ੩.੧੮੨) ਏਤ੍ਥ ਵਿਵਾਦਮੂਲਭੂਤਾ ਕਿਲੇਸਾ ਆਸਵਾਤਿ ਆਗਤਾ.
‘‘ਯੇਨ ਦੇਵੂਪਪਤ੍ਯਸ੍ਸ, ਗਨ੍ਧਬ੍ਬੋ ਵਾ ਵਿਹਙ੍ਗਮੋ;
ਯਕ੍ਖਤ੍ਤਂ ਯੇਨ ਗਚ੍ਛੇਯ੍ਯਂ, ਮਨੁਸ੍ਸਤ੍ਤਞ੍ਚ ਅਬ੍ਬਜੇ;
ਤੇ ਮਯ੍ਹਂ ਆਸਵਾ ਖੀਣਾ, ਵਿਦ੍ਧਸ੍ਤਾ ਵਿਨਲ਼ੀਕਤਾ’’ਤਿ. (ਅ. ਨਿ. ੪.੩੬) –
ਏਤ੍ਥ ਤੇਭੂਮਕਂ ਚ ਕਮ੍ਮਂ ਅਵਸੇਸਾ ਚ ਅਕੁਸਲਾ ਧਮ੍ਮਾ. ‘‘ਦਿਟ੍ਠਧਮ੍ਮਿਕਾਨਂ ਆਸਵਾਨਂ ਸਂਵਰਾਯ ਸਮ੍ਪਰਾਯਿਕਾਨਂ ਆਸਵਾਨਂ ਪਟਿਘਾਤਾਯਾ’’ਤਿ (ਪਾਰਾ. ੩੯; ਅ. ਨਿ. ੨.੨੦੨-੨੩੦) ਏਤ੍ਥ ਪਰੂਪਵਾਦਵਿਪ੍ਪਟਿਸਾਰਵਧਬਨ੍ਧਾਦਯੋ ਚੇਵ ਅਪਾਯਦੁਕ੍ਖਭੂਤਾ ਚ ਨਾਨਪ੍ਪਕਾਰਾ ਉਪਦ੍ਦਵਾ.
ਤੇ ਪਨੇਤੇ ਆਸਵਾ ਯਤ੍ਥ ਯਥਾ ਆਗਤਾ, ਤਤ੍ਥ ਤਥਾ ਵੇਦਿਤਬ੍ਬਾ. ਏਤੇ ਹਿ ਵਿਨਯੇ ਤਾਵ ‘‘ਦਿਟ੍ਠਧਮ੍ਮਿਕਾਨਂ ਆਸਵਾਨਂ ਸਂਵਰਾਯ, ਸਮ੍ਪਰਾਯਿਕਾਨਂ ਆਸਵਾਨਂ ਪਟਿਘਾਤਾਯਾ’’ਤਿ (ਪਾਰਾ. ੩੯; ਅ. ਨਿ. ੨.੨੦੨-੨੩੦) ਦ੍ਵੇਧਾ ਆਗਤਾ. ਸਲ਼ਾਯਤਨੇ ‘‘ਤਯੋ ਮੇ, ਆਵੁਸੋ, ਆਸਵਾ ਕਾਮਾਸਵੋ ਭਵਾਸਵੋ ਅਵਿਜ੍ਜਾਸਵੋ’’ਤਿ (ਸਂ. ਨਿ. ੪.੩੨੧) ਤਿਧਾ ਆਗਤਾ. ਅਞ੍ਞੇਸੁ ਚ ਸੁਤ੍ਤਨ੍ਤੇਸੁ (ਚੂਲ਼ਨਿ. ਜਤੁਕਣ੍ਣਿਮਾਣਵਪੁਚ੍ਛਾਨਿਦ੍ਦੇਸੋ ੬੯; ਪਟਿ. ਮ. ੧.੧੦੭) ਅਭਿਧਮ੍ਮੇ (ਧ. ਸ. ੧੧੦੨-੧੧੦੬; ਵਿਭ. ੯੩੭) ਚ ਤੇਯੇਵ ਦਿਟ੍ਠਾਸਵੇਨ ਸਹ ਚਤੁਧਾ ਆਗਤਾ. ਨਿਬ੍ਬੇਧਿਕਪਰਿਯਾਯੇਨ ‘‘ਅਤ੍ਥਿ, ਭਿਕ੍ਖਵੇ, ਆਸਵਾ ਨਿਰਯਗਾਮਿਨਿਯਾ, ਅਤ੍ਥਿ ਆਸਵਾ ਤਿਰਚ੍ਛਾਨਯੋਨਿਗਾਮਿਨਿਯਾ, ਅਤ੍ਥਿ ਆਸਵਾ ਪੇਤ੍ਤਿਵਿਸਯਗਾਮਿਨਿਯਾ, ਅਤ੍ਥਿ ਆਸਵਾ ਮਨੁਸ੍ਸਲੋਕਗਾਮਿਨਿਯਾ, ਅਤ੍ਥਿ ਆਸਵਾ ਦੇਵਲੋਕਗਾਮਿਨਿਯਾ’’ਤਿ (ਅ. ਨਿ. ੬.੬੩) ਪਞ੍ਚਧਾ ਆਗਤਾ. ਕਮ੍ਮਮੇਵ ਚੇਤ੍ਥ ਆਸਵਾਤਿ ਵੁਤ੍ਤਂ. ਛਕ੍ਕਨਿਪਾਤੇ ‘‘ਅਤ੍ਥਿ, ਭਿਕ੍ਖਵੇ, ਆਸਵਾ ਸਂਵਰਾਪਹਾਤਬ੍ਬਾ’’ਤਿਆਦਿਨਾ (ਅ. ਨਿ. ੬.੫੮) ਨਯੇਨ ਛਧਾ ਆਗਤਾ. ਸਬ੍ਬਾਸਵਪਰਿਯਾਯੇ (ਮ. ਨਿ. ੧.੧੪ ਆਦਯੋ) ਤੇਯੇਵ ਦਸ੍ਸਨੇਨ ਪਹਾਤਬ੍ਬੇਹਿ ਸਦ੍ਧਿਂ ਸਤ੍ਤਧਾ ਆਗਤਾ. ਇਧ ਪਨ ਅਭਿਧਮ੍ਮਨਯੇਨ ਚਤ੍ਤਾਰੋ ਆਸਵਾ ਅਧਿਪ੍ਪੇਤਾਤਿ ਵੇਦਿਤਬ੍ਬਾ.
ਖਯਾਯਾਤਿ ਏਤ੍ਥ ਪਨ ਆਸਵਾਨਂ ਸਰਸਭੇਦੋਪਿ ਖੀਣਾਕਾਰੋਪਿ ਮਗ੍ਗਫਲਨਿਬ੍ਬਾਨਾਨਿਪਿ ‘‘ਆਸਵਕ੍ਖਯੋ’’ਤਿ ਵੁਚ੍ਚਤਿ. ‘‘ਯੋ ਆਸਵਾਨਂ ਖਯੋ ਵਯੋ ਭੇਦੋ ਪਰਿਭੇਦੋ ਅਨਿਚ੍ਚਤਾ ਅਨ੍ਤਰਧਾਨ’’ਨ੍ਤਿ ਏਤ੍ਥ ਹਿ ਆਸਵਾਨਂ ਸਰਸਭੇਦੋ ‘‘ਆਸਵਕ੍ਖਯੋ’’ਤਿ ਵੁਤ੍ਤੋ. ‘‘ਜਾਨਤੋ ਅਹਂ, ਭਿਕ੍ਖਵੇ, ਪਸ੍ਸਤੋ ਆਸਵਾਨਂ ਖਯਂ ਵਦਾਮੀ’’ਤਿ (ਮ. ਨਿ. ੧.੧੫; ਸਂ. ਨਿ. ੨.੨੩; ਇਤਿਵੁ. ੧੦੨) ਏਤ੍ਥ ਆਸਵਪ੍ਪਹਾਨਂ ਆਸਵਾਨਂ ਅਚ੍ਚਨ੍ਤਕ੍ਖਯੋ ਅਸਮੁਪ੍ਪਾਦੋ ਖੀਣਾਕਾਰੋ ਨਤ੍ਥਿਭਾਵੋ ‘‘ਆਸਵਕ੍ਖਯੋ’’ਤਿ ਵੁਤ੍ਤੋ.
‘‘ਸੇਖਸ੍ਸ ਸਿਕ੍ਖਮਾਨਸ੍ਸ, ਉਜੁਮਗ੍ਗਾਨੁਸਾਰਿਨੋ;
ਖਯਸ੍ਮਿਂ ਪਠਮਂ ਞਾਣਂ, ਤਤੋ ਅਞ੍ਞਾ ਅਨਨ੍ਤਰਾ’’ਤਿ. (ਇਤਿਵੁ. ੬੨) –
ਏਤ੍ਥ ਮਗ੍ਗੋ ‘‘ਆਸਵਕ੍ਖਯੋ’’ਤਿ ਵੁਤ੍ਤੋ. ‘‘ਆਸਵਾਨਂ ਖਯਾ ਸਮਣੋ ਹੋਤੀ’’ਤਿ (ਮ. ਨਿ. ੧.੪੩੮) ਏਤ੍ਥ ਫਲਂ.
‘‘ਪਰਵਜ੍ਜਾਨੁਪਸ੍ਸਿਸ੍ਸ, ਨਿਚ੍ਚਂ ਉਜ੍ਝਾਨਸਞ੍ਞਿਨੋ;
ਆਸਵਾ ਤਸ੍ਸ ਵਡ੍ਢਨ੍ਤਿ, ਆਰਾ ਸੋ ਆਸਵਕ੍ਖਯਾ’’ਤਿ. (ਧ. ਪ. ੨੫੩) –
ਏਤ੍ਥ ਨਿਬ੍ਬਾਨਂ. ਇਮਸ੍ਮਿਂ ਪਨ ਸੁਤ੍ਤੇ ਫਲਂ ਸਨ੍ਧਾਯ ‘‘ਆਸਵਾਨਂ ਖਯਾਯਾ’’ਤਿ ਆਹ, ਅਰਹਤ੍ਤਫਲਤ੍ਥਾਯਾਤਿ ਅਤ੍ਥੋ.
ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋਤਿ ਮਨਚ੍ਛਟ੍ਠੇਸੁ ਇਨ੍ਦ੍ਰਿਯੇਸੁ ਪਿਹਿਤਦ੍ਵਾਰੋ. ਭੋਜਨੇ ਮਤ੍ਤਞ੍ਞੂਤਿ ਭੋਜਨਸ੍ਮਿਂ ਪਮਾਣਞ੍ਞੂ, ਪਟਿਗ੍ਗਹਣਪਰਿਭੋਗਪਚ੍ਚਵੇਕ੍ਖਣਮਤ੍ਤਂ ਜਾਨਾਤਿ ਪਜਾਨਾਤੀਤਿ ਅਤ੍ਥੋ. ਜਾਗਰਿਯਂ ਅਨੁਯੁਤ੍ਤੋਤਿ ਰਤ੍ਤਿਨ੍ਦਿਵਂ ਛ ਕੋਟ੍ਠਾਸੇ ਕਤ੍ਵਾ ਪਞ੍ਚਸੁ ਕੋਟ੍ਠਾਸੇਸੁ ਜਾਗਰਣਭਾਵਂ ਅਨੁਯੁਤ੍ਤੋ, ਜਾਗਰਣੇਯੇਵ ਯੁਤ੍ਤਪ੍ਪਯੁਤ੍ਤੋਤਿ ਅਤ੍ਥੋ.
ਏਵਂ ਮਾਤਿਕਂ ਠਪੇਤ੍ਵਾ ਇਦਾਨਿ ਤਮੇਵ ਠਪਿਤਪਟਿਪਾਟਿਯਾ ਵਿਭਜਨ੍ਤੋ ਕਥਞ੍ਚ, ਭਿਕ੍ਖਵੇ, ਭਿਕ੍ਖੂਤਿਆਦਿਮਾਹ. ਤਤ੍ਥ ਚਕ੍ਖੁਨਾ ਰੂਪਂ ਦਿਸ੍ਵਾਤਿਆਦੀਨਂ ਅਤ੍ਥੋ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੫) ਵਿਤ੍ਥਾਰਿਤੋ, ਤਥਾ ਪਟਿਸਙ੍ਖਾ ਯੋਨਿਸੋ ਆਹਾਰਂ ਆਹਾਰੇਤਿ ਨੇਵ ਦਵਾਯਾਤਿਆਦੀਨਂ (ਵਿਸੁਦ੍ਧਿ. ੧.੧੮). ਆਵਰਣੀਯੇਹਿ ਧਮ੍ਮੇਹੀਤਿ ਪਞ੍ਚਹਿ ਨੀਵਰਣੇਹਿ ਧਮ੍ਮੇਹਿ. ਨੀਵਰਣਾਨਿ ਹਿ ਚਿਤ੍ਤਂ ਆਵਰਿਤ੍ਵਾ ਤਿਟ੍ਠਨ੍ਤਿ, ਤਸ੍ਮਾ ਆਵਰਣੀਯਾ ਧਮ੍ਮਾਤਿ ਵੁਚ੍ਚਨ੍ਤਿ. ਸੀਹਸੇਯ੍ਯਂ ਕਪ੍ਪੇਤੀਤਿ ਸੀਹੋ ਵਿਯ ਸੇਯ੍ਯਂ ਕਪ੍ਪੇਤਿ. ਪਾਦੇ ਪਾਦਂ ਅਚ੍ਚਾਧਾਯਾਤਿ ਵਾਮਪਾਦਂ ਦਕ੍ਖਿਣਪਾਦੇ ਅਤਿਆਧਾਯ. ਸਮਂ ਠਪਿਤੇ ਹਿ ਪਾਦੇ ਜਾਣੁਕੇਨ ਜਾਣੁਕਂ ਗੋਪ੍ਫਕੇਨ ਚ ਗੋਪ੍ਫਕਂ ਘਟੀਯਤਿ, ਤਤੋ ਵੇਦਨਾ ਉਟ੍ਠਹਨ੍ਤਿ. ਤਸ੍ਮਾ ਤਸ੍ਸ ਦੋਸਸ੍ਸ ਪਰਿਵਜ੍ਜਨਤ੍ਥਂ ਥੋਕਂ ਅਤਿਕ੍ਕਮਿਤ੍ਵਾ ਏਸ ਪਾਦਂ ਠਪੇਤਿ. ਤੇਨ ਵੁਤ੍ਤਂ – ‘‘ਪਾਦੇ ਪਾਦਂ ਅਚ੍ਚਾਧਾਯਾ’’ਤਿ.
ਸਤੋ ਸਮ੍ਪਜਾਨੋਤਿ ਸਤਿਯਾ ਚੇਵ ਸਮ੍ਪਜਞ੍ਞੇਨ ਚ ਸਮਨ੍ਨਾਗਤੋ. ਕਥਂ ਪਨੇਸ ਨਿਦ੍ਦਾਯਨ੍ਤੋ ਸਤੋ ਸਮ੍ਪਜਾਨੋ ਨਾਮ ਹੋਤੀਤਿ? ਪੁਰਿਮਪ੍ਪਵਤ੍ਤਿਵਸੇਨ. ਅਯਂ ਹਿ ਚਙ੍ਕਮੇ ਚਙ੍ਕਮਨ੍ਤੋ ਨਿਦ੍ਦਾਯ ਓਕ੍ਕਮਨਭਾਵਂ ਞਤ੍ਵਾ ਪਵਤ੍ਤਮਾਨਂ ਕਮ੍ਮਟ੍ਠਾਨਂ ਠਪੇਤ੍ਵਾ ਮਞ੍ਚੇ ਵਾ ਫਲਕੇ ਵਾ ਨਿਪਨ੍ਨੋ ਨਿਦ੍ਦਂ ਉਪਗਨ੍ਤ੍ਵਾ ਪੁਨ ਪਬੁਜ੍ਝਮਾਨੋ ਕਮ੍ਮਟ੍ਠਾਨਂ ਠਿਤਟ੍ਠਾਨੇ ਗਣ੍ਹਨ੍ਤੋਯੇਵ ਪਬੁਜ੍ਝਤਿ. ਤਸ੍ਮਾ ਨਿਦ੍ਦਾਯਨ੍ਤੋਪਿ ਸਤੋ ਸਮ੍ਪਜਾਨੋ ਨਾਮ ਹੋਤਿ. ਅਯਂ ਤਾਵ ਮੂਲਕਮ੍ਮਟ੍ਠਾਨੇ ਨਯੋਵ. ਪਰਿਗ੍ਗਹਕਮ੍ਮਟ੍ਠਾਨਵਸੇਨਾਪਿ ਪਨੇਸ ਸਤੋ ਸਮ੍ਪਜਾਨੋ ਨਾਮ ਹੋਤਿ. ਕਥਂ? ਅਯਂ ਹਿ ਚਙ੍ਕਮਨ੍ਤੋ ਨਿਦ੍ਦਾਯ ਓਕ੍ਕਮਨਭਾਵਂ ਞਤ੍ਵਾ ਪਾਸਾਣਫਲਕੇ ਵਾ ਮਞ੍ਚੇ ਵਾ ਦਕ੍ਖਿਣੇਨ ਪਸ੍ਸੇਨ ਨਿਪਜ੍ਜਿਤ੍ਵਾ ਪਚ੍ਚਵੇਕ੍ਖਤਿ – ‘‘ਅਚੇਤਨੋ ਕਾਯੋ ਅਚੇਤਨੇ ਮਞ੍ਚੇ ਪਤਿਟ੍ਠਿਤੋ, ਅਚੇਤਨੋ ਮਞ੍ਚੋ ਅਚੇਤਨਾਯ ਪਥਵਿਯਾ, ਅਚੇਤਨਾ ਪਥਵੀ ਅਚੇਤਨੇ ਉਦਕੇ, ਅਚੇਤਨਂ ਉਦਕਂ ਅਚੇਤਨੇ ਵਾਤੇ, ਅਚੇਤਨੋ ਵਾਤੋ ਅਚੇਤਨੇ ਆਕਾਸੇ ਪਤਿਟ੍ਠਿਤੋ. ਤਤ੍ਥ ਆਕਾਸਮ੍ਪਿ ‘ਅਹਂ ਵਾਤਂ ਉਕ੍ਖਿਪਿਤ੍ਵਾ ਠਿਤ’ਨ੍ਤਿ ਨ ਜਾਨਾਤਿ, ਵਾਤੋਪਿ ‘ਅਹਂ ਆਕਾਸੇ ਪਤਿਟ੍ਠਿਤੋ’ਤਿ ਨ ਜਾਨਾਤਿ. ਤਥਾ ਵਾਤੋ ਨ ਜਾਨਾਤਿ. ‘ਅਹਂ ਉਦਕਂ ਉਕ੍ਖਿਪਿਤ੍ਵਾ ਠਿਤੋ’ਤਿ…ਪੇ… ਮਞ੍ਚੋ ਨ ਜਾਨਾਤਿ, ‘ਅਹਂ ਕਾਯਂ ਉਕ੍ਖਿਪਿਤ੍ਵਾ ਠਿਤੋ’ਤਿ, ਕਾਯੋ ਨ ਜਾਨਾਤਿ ‘ਅਹਂ ਮਞ੍ਚੇ ਪਤਿਟ੍ਠਿਤੋ’ਤਿ. ਨ ਹਿ ਤੇਸਂ ਅਞ੍ਞਮਞ੍ਞਂ ਆਭੋਗੋ ਵਾ ਸਮਨ੍ਨਾਹਾਰੋ ਵਾ ਮਨਸਿਕਾਰੋ ਵਾ ਚੇਤਨਾ ਵਾ ਪਤ੍ਥਨਾ ਵਾ ਅਤ੍ਥੀ’’ਤਿ. ਤਸ੍ਸ ਏਵਂ ਪਚ੍ਚਵੇਕ੍ਖਤੋ ਤਂ ਪਚ੍ਚਵੇਕ੍ਖਣਚਿਤ੍ਤਂ ਭਵਙ੍ਗੇ ਓਤਰਤਿ. ਏਵਂ ਨਿਦ੍ਦਾਯਨ੍ਤੋਪਿ ਸਤੋ ਸਮ੍ਪਜਾਨੋ ਨਾਮ ਹੋਤੀਤਿ.
ਉਟ੍ਠਾਨਸਞ੍ਞਂ ਮਨਸਿਕਰਿਤ੍ਵਾਤਿ ‘‘ਏਤ੍ਤਕਂ ਠਾਨਂ ਗਤੇ ਚਨ੍ਦੇ ਵਾ ਤਾਰਕਾਯ ਵਾ ਉਟ੍ਠਹਿਸ੍ਸਾਮੀ’’ਤਿ ਉਟ੍ਠਾਨਕਾਲਪਰਿਚ੍ਛੇਦਿਕਂ ਸਞ੍ਞਂ ਮਨਸਿਕਰਿਤ੍ਵਾ, ਚਿਤ੍ਤੇ ਠਪੇਤ੍ਵਾਤਿ ਅਤ੍ਥੋ. ਏਵਂ ਕਰਿਤ੍ਵਾ ਸਯਿਤੋ ਹਿ ਯਥਾਪਰਿਚ੍ਛਿਨ੍ਨੇਯੇਵ ਕਾਲੇ ਉਟ੍ਠਹਤਿ.
੭. ਅਤ੍ਤਬ੍ਯਾਬਾਧਸੁਤ੍ਤਵਣ੍ਣਨਾ
੧੭. ਸਤ੍ਤਮੇ ਅਤ੍ਤਬ੍ਯਾਬਾਧਾਯਾਤਿ ਅਤ੍ਤਦੁਕ੍ਖਾਯ. ਪਰਬ੍ਯਾਬਾਧਾਯਾਤਿ ਪਰਦੁਕ੍ਖਾਯ. ਕਾਯਸੁਚਰਿਤਨ੍ਤਿਆਦੀਨਿ ਪੁਬ੍ਬਭਾਗੇ ਦਸਕੁਸਲਕਮ੍ਮਪਥਵਸੇਨ ਆਗਤਾਨਿ, ਉਪਰਿ ਪਨ ਯਾਵ ਅਰਹਤ੍ਤਾ ਅਵਾਰਿਤਾਨੇਵ.
੮. ਦੇਵਲੋਕਸੁਤ੍ਤਵਣ੍ਣਨਾ
੧੮. ਅਟ੍ਠਮੇ ਅਟ੍ਟੀਯੇਯ੍ਯਾਥਾਤਿ ਅਟ੍ਟਾ ਪੀਲ਼ਿਤਾ ਭਵੇਯ੍ਯਾਥ. ਹਰਾਯੇਯ੍ਯਾਥਾਤਿ ਲਜ੍ਜੇਯ੍ਯਾਥ. ਜਿਗੁਚ੍ਛੇਯ੍ਯਾਥਾਤਿ ਗੂਥੇ ਵਿਯ ਤਸ੍ਮਿਂ ਵਚਨੇ ਸਞ੍ਜਾਤਜਿਗੁਚ੍ਛਾ ਭਵੇਯ੍ਯਾਥ. ਇਤਿ ਕਿਰਾਤਿ ਏਤ੍ਥ ਇਤੀਤਿ ਪਦਸਨ੍ਧਿਬ੍ਯਞ੍ਜਨਸਿਲਿਟ੍ਠਤਾ, ਕਿਰਾਤਿ ਅਨੁਸ੍ਸਵਤ੍ਥੇ ਨਿਪਾਤੋ. ਦਿਬ੍ਬੇਨ ਕਿਰ ਆਯੁਨਾ ਅਟ੍ਟੀਯਥਾਤਿ ਏਵਮਸ੍ਸ ਸਮ੍ਬਨ੍ਧੋ ਵੇਦਿਤਬ੍ਬੋ. ਪਗੇਵ ਖੋ ਪਨਾਤਿ ਪਠਮਤਰਂਯੇਵ.
੯. ਪਠਮਪਾਪਣਿਕਸੁਤ੍ਤਵਣ੍ਣਨਾ
੧੯. ਨਵਮੇ ਪਾਪਣਿਕੋਤਿ ਆਪਣਿਕੋ, ਆਪਣਂ ਉਗ੍ਘਾਟੇਤ੍ਵਾ ਭਣ੍ਡਵਿਕ੍ਕਾਯਕਸ੍ਸ ਵਾਣਿਜਸ੍ਸੇਤਂ ਅਧਿਵਚਨਂ. ਅਭਬ੍ਬੋਤਿ ਅਭਾਜਨਭੂਤੋ. ਨ ਸਕ੍ਕਚ੍ਚਂ ਕਮ੍ਮਨ੍ਤਂ ਅਧਿਟ੍ਠਾਤੀਤਿ ਯਥਾ ਅਧਿਟ੍ਠਿਤਂ ਸੁਅਧਿਟ੍ਠਿਤਂ ਹੋਤਿ, ਏਵਂ ਸਯਂ ਅਤ੍ਤਪਚ੍ਚਕ੍ਖਂ ਕਰੋਨ੍ਤੋ ਨਾਧਿਟ੍ਠਾਤਿ. ਤਤ੍ਥ ਪਚ੍ਚੂਸਕਾਲੇ ਪਦਸਦ੍ਦੇਨ ਉਟ੍ਠਾਯ ਦੀਪਂ ਜਾਲੇਤ੍ਵਾ ਭਣ੍ਡਂ ਪਸਾਰੇਤ੍ਵਾ ਅਨਿਸੀਦਨ੍ਤੋ ਪੁਬ੍ਬਣ੍ਹਸਮਯਂ ਨ ਸਕ੍ਕਚ੍ਚਂ ਕਮ੍ਮਨ੍ਤਂ ਅਧਿਟ੍ਠਾਤਿ ਨਾਮ. ਅਯਂ ਹਿ ਯਂ ਚੋਰਾ ਰਤ੍ਤਿਂ ਭਣ੍ਡਂ ਹਰਿਤ੍ਵਾ ‘‘ਇਦਂ ਅਮ੍ਹਾਕਂ ਹਤ੍ਥਤੋ ਵਿਸ੍ਸਜ੍ਜੇਸ੍ਸਾਮਾ’’ਤਿ ਆਪਣਂ ਗਨ੍ਤ੍ਵਾ ਅਪ੍ਪੇਨ ਅਗ੍ਘੇਨ ਦੇਨ੍ਤਿ, ਯਮ੍ਪਿ ਬਹੁਵੇਰਿਨੋ ਮਨੁਸ੍ਸਾ ਰਤ੍ਤਿਂ ਨਗਰੇ ਵਸਿਤ੍ਵਾ ਪਾਤੋਵ ਆਪਣਂ ਗਨ੍ਤ੍ਵਾ ਭਣ੍ਡਂ ਗਣ੍ਹਨ੍ਤਿ, ਯਂ ਵਾ ਪਨ ਜਨਪਦਂ ਗਨ੍ਤੁਕਾਮਾ ਮਨੁਸ੍ਸਾ ਪਾਤੋਵ ਆਪਣਂ ਗਨ੍ਤ੍ਵਾ ਭਣ੍ਡਂ ਕਿਣਨ੍ਤਿ, ਤਪ੍ਪਚ੍ਚਯਸ੍ਸ ਲਾਭਸ੍ਸ ਅਸ੍ਸਾਮਿਕੋ ਹੋਤਿ.
ਅਞ੍ਞੇਸਂ ਭੋਜਨਵੇਲਾਯ ਪਨ ਭੁਞ੍ਜਿਤੁਂ ਆਗਨ੍ਤ੍ਵਾ ਪਾਤੋਵ ਭਣ੍ਡਂ ਪਟਿਸਾਮੇਤ੍ਵਾ ਘਰਂ ਗਨ੍ਤ੍ਵਾ ਭੁਞ੍ਜਿਤ੍ਵਾ ਨਿਦ੍ਦਾਯਿਤ੍ਵਾ ਸਾਯਂ ਪੁਨ ਆਪਣਂ ਆਗਚ੍ਛਨ੍ਤੋ ਮਜ੍ਝਨ੍ਹਿਕਸਮਯਂ ਨ ਸਕ੍ਕਚ੍ਚਂ ਕਮ੍ਮਨ੍ਤਂ ਅਧਿਟ੍ਠਾਤਿ ਨਾਮ. ਸੋ ਹਿ ਯਂ ਚੋਰਾ ਪਾਤੋਵ ਵਿਸ੍ਸਜ੍ਜੇਤੁਂ ਨ ਸਮ੍ਪਾਪੁਣਿਂਸੁ, ਦਿਵਾਕਾਲੇ ਪਨ ਪਰੇਸਂ ਅਸਞ੍ਚਾਰਕ੍ਖਣੇ ਆਪਣਂ ਗਨ੍ਤ੍ਵਾ ਅਪ੍ਪਗ੍ਘੇਨ ਦੇਨ੍ਤਿ, ਯਞ੍ਚ ਭੋਜਨਵੇਲਾਯ ਪੁਞ੍ਞਵਨ੍ਤੋ ਇਸ੍ਸਰਾ ‘‘ਆਪਣਤੋ ਇਦਞ੍ਚਿਦਞ੍ਚ ਲਦ੍ਧੁਂ ਵਟ੍ਟਤੀ’’ਤਿ ਪਹਿਣਿਤ੍ਵਾ ਆਹਰਾਪੇਨ੍ਤਿ, ਤਪ੍ਪਚ੍ਚਯਸ੍ਸ ਲਾਭਸ੍ਸ ਅਸ੍ਸਾਮਿਕੋ ਹੋਤਿ.
ਯਾਵ ਯਾਮਭੇਰਿਨਿਕ੍ਖਮਨਾ ਪਨ ਅਨ੍ਤੋਆਪਣੇ ਦੀਪਂ ਜਾਲਾਪੇਤ੍ਵਾ ਅਨਿਸੀਦਨ੍ਤੋ ਸਾਯਨ੍ਹਸਮਯਂ ਨ ਸਕ੍ਕਚ੍ਚਂ ਕਮ੍ਮਨ੍ਤਂ ਅਧਿਟ੍ਠਾਤਿ ਨਾਮ. ਸੋ ਹਿ ਯਂ ਚੋਰਾ ਪਾਤੋਪਿ ਦਿਵਾਪਿ ਵਿਸ੍ਸਜ੍ਜੇਤੁਂ ਨ ਸਮ੍ਪਾਪੁਣਿਂਸੁ, ਸਾਯਂ ਪਨ ਆਪਣਂ ਗਨ੍ਤ੍ਵਾ ਅਪ੍ਪਗ੍ਘੇਨ ਦੇਨ੍ਤਿ, ਤਪ੍ਪਚ੍ਚਯਸ੍ਸ ਲਾਭਸ੍ਸ ਅਸ੍ਸਾਮਿਕੋ ਹੋਤਿ.
ਨ ਸਕ੍ਕਚ੍ਚਂ ਸਮਾਧਿਨਿਮਿਤ੍ਤਂ ਅਧਿਟ੍ਠਾਤੀਤਿ ਸਕ੍ਕਚ੍ਚਕਿਰਿਯਾਯ ਸਮਾਧਿਂ ਨ ਸਮਾਪਜ੍ਜਤਿ. ਏਤ੍ਥ ਚ ਪਾਤੋਵ ਚੇਤਿਯਙ੍ਗਣਬੋਧਿਯਙ੍ਗਣੇਸੁ ਵਤ੍ਤਂ ਕਤ੍ਵਾ ਸੇਨਾਸਨਂ ਪਵਿਸਿਤ੍ਵਾ ਯਾਵ ਭਿਕ੍ਖਾਚਾਰਵੇਲਾ, ਤਾਵ ਸਮਾਪਤ੍ਤਿਂ ਅਪ੍ਪੇਤ੍ਵਾ ਅਨਿਸੀਦਨ੍ਤੋ ਪੁਬ੍ਬਣ੍ਹਸਮਯਂ ਨ ਸਕ੍ਕਚ੍ਚਂ ਸਮਾਧਿਨਿਮਿਤ੍ਤਂ ਅਧਿਟ੍ਠਾਤਿ ਨਾਮ. ਪਚ੍ਛਾਭਤ੍ਤਂ ਪਨ ਪਿਣ੍ਡਪਾਤਪਟਿਕ੍ਕਨ੍ਤੋ ਰਤ੍ਤਿਟ੍ਠਾਨਦਿਵਾਟ੍ਠਾਨਂ ਪਵਿਸਿਤ੍ਵਾ ਯਾਵ ਸਾਯਨ੍ਹਸਮਯਾ ਸਮਾਪਤ੍ਤਿਂ ਅਪ੍ਪੇਤ੍ਵਾ ਅਨਿਸੀਦਨ੍ਤੋ ਮਜ੍ਝਨ੍ਹਿਕਸਮਯਂ ਨ ਸਕ੍ਕਚ੍ਚਂ ਸਮਾਧਿਨਿਮਿਤ੍ਤਂ ਅਧਿਟ੍ਠਾਤਿ ਨਾਮ. ਸਾਯਂ ਪਨ ਚੇਤਿਯਂ ਵਨ੍ਦਿਤ੍ਵਾ ਥੇਰੂਪਟ੍ਠਾਨਂ ਕਤ੍ਵਾ ਸੇਨਾਸਨਂ ਪਵਿਸਿਤ੍ਵਾ ਪਠਮਯਾਮਂ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਅਨਿਸੀਦਨ੍ਤੋ ਸਾਯਨ੍ਹਸਮਯਂ ਨ ਸਕ੍ਕਚ੍ਚਂ ਸਮਾਧਿਨਿਮਿਤ੍ਤਂ ਅਧਿਟ੍ਠਾਤਿ ਨਾਮ. ਸੁਕ੍ਕਪਕ੍ਖੋ ਵੁਤ੍ਤਪਟਿਪਕ੍ਖਨਯੇਨੇਵ ਵੇਦਿਤਬ੍ਬੋ. ਅਪਿਚੇਤ੍ਥ ‘‘ਸਮਾਪਤ੍ਤਿਂ ਅਪ੍ਪੇਤ੍ਵਾ’’ਤਿ ਵੁਤ੍ਤਟ੍ਠਾਨੇ ਸਮਾਪਤ੍ਤਿਯਾ ਅਸਤਿ ਵਿਪਸ੍ਸਨਾਪਿ ਵਟ੍ਟਤਿ, ਸਮਾਧਿਨਿਮਿਤ੍ਤਨ੍ਤਿ ਚ ਸਮਾਧਿਆਰਮ੍ਮਣਮ੍ਪਿ ਵਟ੍ਟਤਿਯੇਵ. ਵੁਤ੍ਤਮ੍ਪਿ ਚੇਤਂ – ‘‘ਸਮਾਧਿਪਿ ਸਮਾਧਿਨਿਮਿਤ੍ਤਂ, ਸਮਾਧਾਰਮ੍ਮਣਮ੍ਪਿ ਸਮਾਧਿਨਿਮਿਤ੍ਤ’’ਨ੍ਤਿ.
੧੦. ਦੁਤਿਯਪਾਪਣਿਕਸੁਤ੍ਤਵਣ੍ਣਨਾ
੨੦. ਦਸਮੇ ਚਕ੍ਖੁਮਾਤਿ ਪਞ੍ਞਾਚਕ੍ਖੁਨਾ ਚਕ੍ਖੁਮਾ ਹੋਤਿ. ਵਿਧੁਰੋਤਿ ਵਿਸਿਟ੍ਠਧੁਰੋ ਉਤ੍ਤਮਧੁਰੋ ਞਾਣਸਮ੍ਪਯੁਤ੍ਤੇਨ ਵੀਰਿਯੇਨ ਸਮਨ੍ਨਾਗਤੋ. ਨਿਸ੍ਸਯਸਮ੍ਪਨ੍ਨੋਤਿ ਅਵਸ੍ਸਯਸਮ੍ਪਨ੍ਨੋ ਪਤਿਟ੍ਠਾਨਸਮ੍ਪਨ੍ਨੋ. ਪਣਿਯਨ੍ਤਿ ਵਿਕ੍ਕਾਯਿਕਭਣ੍ਡਂ. ਏਤ੍ਤਕਂ ਮੂਲਂ ਭਵਿਸ੍ਸਤਿ ਏਤ੍ਤਕੋ ਉਦਯੋਤਿ ਤਸ੍ਮਿਂ ‘‘ਏਵਂ ਕੀਤਂ ਏਵਂ ਵਿਕ੍ਕਾਯਮਾਨ’’ਨ੍ਤਿ ਵੁਤ੍ਤਪਣਿਯੇ ਯੇਨ ਕਯੇਨ ਤਂ ਕੀਤਂ, ਤਂ ਕਯਸਙ੍ਖਾਤਂ ਮੂਲਂ ਏਤ੍ਤਕਂ ਭਵਿਸ੍ਸਤਿ. ਯੋ ਚ ਤਸ੍ਮਿਂ ਵਿਕ੍ਕਯਮਾਨੇ ਵਿਕ੍ਕਯੋ, ਤਸ੍ਮਿਂ ਵਿਕ੍ਕਯੇ ਏਤ੍ਤਕੋ ਉਦਯੋ ਭਵਿਸ੍ਸਤਿ, ਏਤ੍ਤਿਕਾ ਵਡ੍ਢੀਤਿ ਅਤ੍ਥੋ.
ਕੁਸਲੋ ਹੋਤਿ ਪਣਿਯਂ ਕੇਤੁਞ੍ਚ ਵਿਕ੍ਕੇਤੁਞ੍ਚਾਤਿ ਸੁਲਭਟ੍ਠਾਨਂ ਗਨ੍ਤ੍ਵਾ ਕਿਣਨ੍ਤੋ ਦੁਲ੍ਲਭਟ੍ਠਾਨਂ ਗਨ੍ਤ੍ਵਾ ਵਿਕ੍ਕਿਣਨ੍ਤੋ ਚ ਏਤ੍ਥ ਕੁਸਲੋ ਨਾਮ ਹੋਤਿ, ਦਸਗੁਣਮ੍ਪਿ ਵੀਸਤਿਗੁਣਮ੍ਪਿ ਲਾਭਂ ਲਭਤਿ.
ਅਡ੍ਢਾਤਿ ਇਸ੍ਸਰਾ ਬਹੁਨਾ ਨਿਕ੍ਖਿਤ੍ਤਧਨੇਨ ਸਮਨ੍ਨਾਗਤਾ. ਮਹਦ੍ਧਨਾਤਿ ਵਲ਼ਞ੍ਜਨਕਵਸੇਨ ਮਹਦ੍ਧਨਾ. ਮਹਾਭੋਗਾਤਿ ਉਪਭੋਗਪਰਿਭੋਗਭਣ੍ਡੇਨ ਮਹਾਭੋਗਾ. ਪਟਿਬਲੋਤਿ ਕਾਯਬਲੇਨ ਚੇਵ ਞਾਣਬਲੇਨ ਚ ਸਮਨ੍ਨਾਗਤਤ੍ਤਾ ਸਮਤ੍ਥੋ. ਅਮ੍ਹਾਕਞ੍ਚ ਕਾਲੇਨ ਕਾਲਂ ਅਨੁਪ੍ਪਦਾਤੁਨ੍ਤਿ ਅਮ੍ਹਾਕਞ੍ਚ ਗਹਿਤਧਨਮੂਲਿਕਂ ਵਡ੍ਢਿਂ ਕਾਲੇਨ ਕਾਲਂ ਅਨੁਪ੍ਪਦਾਤੁਂ. ਨਿਪਤਨ੍ਤੀਤਿ ਨਿਮਨ੍ਤੇਨ੍ਤਿ. ਨਿਪਾਤੇਨ੍ਤੀਤਿਪਿ ਪਾਠੋ, ਅਯਮੇਵ ਅਤ੍ਥੋ.
ਕੁਸਲਾਨਂ ਧਮ੍ਮਾਨਂ ਉਪਸਮ੍ਪਦਾਯਾਤਿ ਕੁਸਲਧਮ੍ਮਾਨਂ ਸਮ੍ਪਾਦਨਤ੍ਥਾਯ ਪਟਿਲਾਭਤ੍ਥਾਯ. ਥਾਮਵਾਤਿ ਞਾਣਥਾਮੇਨ ਸਮਨ੍ਨਾਗਤੋ. ਦਲ਼੍ਹਪਰਕ੍ਕਮੋਤਿ ਥਿਰੇਨ ਞਾਣਪਰਕ੍ਕਮੇਨ ਸਮਨ੍ਨਾਗਤੋ. ਅਨਿਕ੍ਖਿਤ੍ਤਧੁਰੋਤਿ ‘‘ਅਗ੍ਗਮਗ੍ਗਂ ਅਪਾਪੁਣਿਤ੍ਵਾ ਇਮਂ ਵੀਰਿਯਧੁਰਂ ਨ ਠਪੇਸ੍ਸਾਮੀ’’ਤਿ ਏਵਂ ਅਟ੍ਠਪਿਤਧੁਰੋ.
ਬਹੁਸ੍ਸੁਤਾਤਿ ਏਕਨਿਕਾਯਾਦਿਵਸੇਨ ਬਹੁ ਬੁਦ੍ਧਵਚਨਂ ਸੁਤਂ ਏਤੇਸਨ੍ਤਿ ਬਹੁਸ੍ਸੁਤਾ. ਆਗਤਾਗਮਾਤਿ ਏਕੋ ਨਿਕਾਯੋ ਏਕੋ ਆਗਮੋ ਨਾਮ, ਦ੍ਵੇ ਨਿਕਾਯਾ ਦ੍ਵੇ ਆਗਮਾ ਨਾਮ, ਪਞ੍ਚ ਨਿਕਾਯਾ ਪਞ੍ਚ ਆਗਮਾ ਨਾਮ, ਏਤੇਸੁ ਆਗਮੇਸੁ ਯੇਸਂ ਏਕੋਪਿ ਆਗਮੋ ਆਗਤੋ ਪਗੁਣੋ ਪਵਤ੍ਤਿਤੋ, ਤੇ ਆਗਤਾਗਮਾ ਨਾਮ. ਧਮ੍ਮਧਰਾਤਿ ਸੁਤ੍ਤਨ੍ਤਪਿਟਕਧਰਾ. ਵਿਨਯਧਰਾਤਿ ਵਿਨਯਪਿਟਕਧਰਾ. ਮਾਤਿਕਾਧਰਾਤਿ ਦ੍ਵੇਮਾਤਿਕਾਧਰਾ. ਪਰਿਪੁਚ੍ਛਤੀਤਿ ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਪੁਚ੍ਛਤਿ. ਪਰਿਪਞ੍ਹਤੀਤਿ ‘‘ਇਮਂ ਨਾਮ ਪੁਚ੍ਛਿਸ੍ਸਾਮੀ’’ਤਿ ਅਞ੍ਞਾਤਿ ਤੁਲੇਤਿ ਪਰਿਗ੍ਗਣ੍ਹਾਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.
ਇਮਸ੍ਮਿਂ ਪਨ ਸੁਤ੍ਤੇ ਪਠਮਂ ਪਞ੍ਞਾ ਆਗਤਾ, ਪਚ੍ਛਾ ਵੀਰਿਯਞ੍ਚ ਕਲ੍ਯਾਣਮਿਤ੍ਤਸੇਵਨਾ ਚ. ਤਤ੍ਥ ਪਠਮਂ ਅਰਹਤ੍ਤਂ ਪਤ੍ਵਾ ਪਚ੍ਛਾ ਵੀਰਿਯਂ ਕਤ੍ਵਾ ਕਲ੍ਯਾਣਮਿਤ੍ਤਾ ਸੇਵਿਤਬ੍ਬਾਤਿ ਨ ਏਵਂ ਅਤ੍ਥੋ ਦਟ੍ਠਬ੍ਬੋ, ਦੇਸਨਾਯ ਨਾਮ ਹੇਟ੍ਠਿਮੇਨ ਵਾ ਪਰਿਚ੍ਛੇਦੋ ਹੋਤਿ ਉਪਰਿਮੇਨ ਵਾ ਦ੍ਵੀਹਿਪਿ ਵਾ ਕੋਟੀਹਿ. ਇਧ ਪਨ ਉਪਰਿਮੇਨ ਪਰਿਚ੍ਛੇਦੋ ਵੇਦਿਤਬ੍ਬੋ. ਤਸ੍ਮਾ ਕਥੇਨ੍ਤੇਨ ਪਠਮਂ ਕਲ੍ਯਾਣਮਿਤ੍ਤਉਪਨਿਸ੍ਸਯਂ ਦਸ੍ਸੇਤ੍ਵਾ ਮਜ੍ਝੇ ਵੀਰਿਯਂ ਦਸ੍ਸੇਤ੍ਵਾ ਪਚ੍ਛਾ ਅਰਹਤ੍ਤਂ ਕਥੇਤਬ੍ਬਨ੍ਤਿ.
ਰਥਕਾਰਵਗ੍ਗੋ ਦੁਤਿਯੋ.
੩. ਪੁਗ੍ਗਲਵਗ੍ਗੋ
੧. ਸਮਿਦ੍ਧਸੁਤ੍ਤਵਣ੍ਣਨਾ
੨੧. ਤਤਿਯਸ੍ਸ ਪਠਮੇ ਝਾਨਫਸ੍ਸਂ ਪਠਮਂ ਫੁਸਤਿ, ਪਚ੍ਛਾ ਨਿਰੋਧਂ ਨਿਬ੍ਬਾਨਂ ਸਚ੍ਛਿਕਰੋਤੀਤਿ ਕਾਯਸਕ੍ਖਿ. ਦਿਟ੍ਠਨ੍ਤਂ ਪਤ੍ਤੋਤਿ ਦਿਟ੍ਠਿਪ੍ਪਤ੍ਤੋ. ਸਦ੍ਦਹਨ੍ਤੋ ਵਿਮੁਤ੍ਤੋਤਿ ਸਦ੍ਧਾਵਿਮੁਤ੍ਤੋ. ਖਮਤੀਤਿ ਰੁਚ੍ਚਤਿ. ਅਭਿਕ੍ਕਨ੍ਤਤਰੋਤਿ ਅਤਿਸੁਨ੍ਦਰਤਰੋ. ਪਣੀਤਤਰੋਤਿ ਅਤਿਪਣੀਤਤਰੋ. ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤੀਤਿ ਸਮਿਦ੍ਧਤ੍ਥੇਰਸ੍ਸ ਕਿਰ ਅਰਹਤ੍ਤਮਗ੍ਗਕ੍ਖਣੇ ਸਦ੍ਧਿਨ੍ਦ੍ਰਿਯਂ ਧੁਰਂ ਅਹੋਸਿ, ਸੇਸਾਨਿ ਚਤ੍ਤਾਰਿ ਸਹਜਾਤਿਨ੍ਦ੍ਰਿਯਾਨਿ ਤਸ੍ਸੇਵ ਪਰਿਵਾਰਾਨਿ ਅਹੇਸੁਂ. ਇਤਿ ਥੇਰੋ ਅਤ੍ਤਨਾ ਪਟਿਵਿਦ੍ਧਮਗ੍ਗਂ ਕਥੇਨ੍ਤੋ ਏਵਮਾਹ. ਮਹਾਕੋਟ੍ਠਿਕਤ੍ਥੇਰਸ੍ਸ ਪਨ ਅਰਹਤ੍ਤਮਗ੍ਗਕ੍ਖਣੇ ਸਮਾਧਿਨ੍ਦ੍ਰਿਯਂ ਧੁਰਂ ਅਹੋਸਿ, ਸੇਸਾਨਿ ਚਤ੍ਤਾਰਿ ਇਨ੍ਦ੍ਰਿਯਾਨਿ ਤਸ੍ਸੇਵ ਪਰਿਵਾਰਾਨਿ ਅਹੇਸੁਂ. ਤਸ੍ਮਾ ਸੋਪਿ ਸਮਾਧਿਨ੍ਦ੍ਰਿਯਂ ਅਧਿਮਤ੍ਤਨ੍ਤਿ ਕਥੇਨ੍ਤੋ ਅਤ੍ਤਨਾ ਪਟਿਵਿਦ੍ਧਮਗ੍ਗਮੇਵ ਕਥੇਸਿ. ਸਾਰਿਪੁਤ੍ਤਤ੍ਥੇਰਸ੍ਸ ਪਨ ਅਰਹਤ੍ਤਮਗ੍ਗਕ੍ਖਣੇ ਪਞ੍ਞਿਨ੍ਦ੍ਰਿਯਂ ਧੁਰਂ ਅਹੋਸਿ. ਸੇਸਾਨਿ ਚਤ੍ਤਾਰਿ ਇਨ੍ਦ੍ਰਿਯਾਨਿ ਤਸ੍ਸੇਵ ਪਰਿਵਾਰਾਨਿ ਅਹੇਸੁਂ. ਤਸ੍ਮਾ ਸੋਪਿ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਨ੍ਤਿ ਕਥੇਨ੍ਤੋ ਅਤ੍ਤਨਾ ਪਟਿਵਿਦ੍ਧਮਗ੍ਗਮੇਵ ਕਥੇਸਿ.
ਨ ਖ੍ਵੇਤ੍ਥਾਤਿ ਨ ਖੋ ਏਤ੍ਥ. ਏਕਂਸੇਨ ਬ੍ਯਾਕਾਤੁਨ੍ਤਿ ਏਕਨ੍ਤੇਨ ਬ੍ਯਾਕਰਿਤੁਂ. ਅਰਹਤ੍ਤਾਯ ਪਟਿਪਨ੍ਨੋਤਿ ਅਰਹਤ੍ਤਮਗ੍ਗਸਮਙ੍ਗਿਂ ਦਸ੍ਸੇਤਿ. ਏਵਮੇਤਸ੍ਮਿਂ ਸੁਤ੍ਤੇ ਤੀਹਿਪਿ ਥੇਰੇਹਿ ਅਤ੍ਤਨਾ ਪਟਿਵਿਦ੍ਧਮਗ੍ਗੋਵ ਕਥਿਤੋ, ਸਮ੍ਮਾਸਮ੍ਬੁਦ੍ਧੋ ਪਨ ਭੁਮ੍ਮਨ੍ਤਰੇਨੇਵ ਕਥੇਸਿ.
੨. ਗਿਲਾਨਸੁਤ੍ਤਵਣ੍ਣਨਾ
੨੨. ਦੁਤਿਯੇ ਸਪ੍ਪਾਯਾਨੀਤਿ ਹਿਤਾਨਿ ਵੁਦ੍ਧਿਕਰਾਨਿ. ਪਤਿਰੂਪਨ੍ਤਿ ਅਨੁਚ੍ਛਵਿਕਂ. ਨੇਵ ਵੁਟ੍ਠਾਤਿ ਤਮ੍ਹਾ ਆਬਾਧਾਤਿ ਇਮਿਨਾ ਅਤੇਕਿਚ੍ਛੇਨ ਵਾਤਾਪਮਾਰਾਦਿਨਾ ਰੋਗੇਨ ਸਮਨ੍ਨਾਗਤੋ ਨਿਟ੍ਠਾਪਤ੍ਤਗਿਲਾਨੋ ਕਥਿਤੋ. ਵੁਟ੍ਠਾਤਿ ਤਮ੍ਹਾ ਆਬਾਧਾਤਿ ਇਮਿਨਾ ਖਿਪਿਤਕਕਚ੍ਛੁਤਿਣਪੁਪ੍ਫਕਜਰਾਦਿਭੇਦੋ ਅਪ੍ਪਮਤ੍ਤਆਬਾਧੋ ਕਥਿਤੋ. ਲਭਨ੍ਤੋ ਸਪ੍ਪਾਯਾਨਿ ਭੋਜਨਾਨਿ ਨੋ ਅਲਭਨ੍ਤੋਤਿ ਇਮਿਨਾ ਪਨ ਯੇਸਂ ਪਟਿਜਗ੍ਗਨੇਨ ਫਾਸੁਕਂ ਹੋਤਿ, ਸਬ੍ਬੇਪਿ ਤੇ ਆਬਾਧਾ ਕਥਿਤਾ. ਏਤ੍ਥ ਚ ਪਤਿਰੂਪੋ ਉਪਟ੍ਠਾਕੋ ਨਾਮ ਗਿਲਾਨੁਪਟ੍ਠਾਕਅਙ੍ਗੇਹਿ ਸਮਨ੍ਨਾਗਤੋ ਪਣ੍ਡਿਤੋ ਦਕ੍ਖੋ ਅਨਲਸੋ ਵੇਦਿਤਬ੍ਬੋ. ਗਿਲਾਨੁਪਟ੍ਠਾਕੋ ਅਨੁਞ੍ਞਾਤੋਤਿ ਭਿਕ੍ਖੁਸਙ੍ਘੇਨ ਦਾਤਬ੍ਬੋਤਿ ਅਨੁਞ੍ਞਾਤੋ. ਤਸ੍ਮਿਞ੍ਹਿ ਗਿਲਾਨੇ ਅਤ੍ਤਨੋ ਧਮ੍ਮਤਾਯ ਯਾਪੇਤੁਂ ਅਸਕ੍ਕੋਨ੍ਤੇ ਭਿਕ੍ਖੁਸਙ੍ਘੇਨ ਤਸ੍ਸ ਭਿਕ੍ਖੁਨੋ ਏਕੋ ਭਿਕ੍ਖੁ ਚ ਸਾਮਣੇਰੋ ਚ ‘‘ਇਮਂ ਪਟਿਜਗ੍ਗਥਾ’’ਤਿ ਅਪਲੋਕੇਤ੍ਵਾ ਦਾਤਬ੍ਬਾ. ਯਾਵ ਪਨ ਤੇ ਤਂ ਪਟਿਜਗ੍ਗਨ੍ਤਿ, ਤਾਵ ਗਿਲਾਨਸ੍ਸ ਚ ਤੇਸਞ੍ਚ ਦ੍ਵਿਨ੍ਨਂ ਯੇਨਤ੍ਥੋ, ਸਬ੍ਬਂ ਭਿਕ੍ਖੁਸਙ੍ਘਸ੍ਸੇਵ ਭਾਰੋ.
ਅਞ੍ਞੇਪਿ ਗਿਲਾਨਾ ਉਪਟ੍ਠਾਤਬ੍ਬਾਤਿ ਇਤਰੇਪਿ ਦ੍ਵੇ ਗਿਲਾਨਾ ਉਪਟ੍ਠਾਪੇਤਬ੍ਬਾ. ਕਿਂ ਕਾਰਣਾ? ਯੋਪਿ ਹਿ ਨਿਟ੍ਠਪਤ੍ਤਗਿਲਾਨੋ, ਸੋ ਅਨੁਪਟ੍ਠਿਯਮਾਨੋ ‘‘ਸਚੇ ਮਂ ਪਟਿਜਗ੍ਗੇਯ੍ਯੁਂ, ਫਾਸੁਕਂ ਮੇ ਭਵੇਯ੍ਯ. ਨ ਖੋ ਪਨ ਮਂ ਪਟਿਜਗ੍ਗਨ੍ਤੀ’’ਤਿ ਮਨੋਪਦੋਸਂ ਕਤ੍ਵਾ ਅਪਾਯੇ ਨਿਬ੍ਬਤ੍ਤੇਯ੍ਯ. ਪਟਿਜਗ੍ਗਿਯਮਾਨਸ੍ਸ ਪਨਸ੍ਸ ਏਵਂ ਹੋਤਿ ‘‘ਭਿਕ੍ਖੁਸਙ੍ਘੇਨ ਯਂ ਕਾਤਬ੍ਬਂ, ਤਂ ਕਤਂ. ਮਯ੍ਹਂ ਪਨ ਕਮ੍ਮਵਿਪਾਕੋ ਈਦਿਸੋ’’ਤਿ. ਸੋ ਭਿਕ੍ਖੁਸਙ੍ਘੇ ਮੇਤ੍ਤਂ ਪਚ੍ਚੁਪਟ੍ਠਾਪੇਤ੍ਵਾ ਸਗ੍ਗੇ ਨਿਬ੍ਬਤ੍ਤਿਸ੍ਸਤਿ. ਯੋ ਪਨ ਅਪ੍ਪਮਤ੍ਤਕੇਨ ਬ੍ਯਾਧਿਨਾ ਸਮਨ੍ਨਾਗਤੋ ਲਭਨ੍ਤੋਪਿ ਅਲਭਨ੍ਤੋਪਿ ਵੁਟ੍ਠਾਤਿਯੇਵ, ਤਸ੍ਸ ਵਿਨਾਪਿ ਭੇਸਜ੍ਜੇਨ ਵੂਪਸਮਨਬ੍ਯਾਧਿ ਭੇਸਜ੍ਜੇ ਕਤੇ ਖਿਪ੍ਪਤਰਂ ਵੂਪਸਮ੍ਮਤਿ. ਸੋ ਤਤੋ ਬੁਦ੍ਧਵਚਨਂ ਵਾ ਉਗ੍ਗਣ੍ਹਿਤੁਂ ਸਕ੍ਖਿਸ੍ਸਤਿ, ਸਮਣਧਮ੍ਮਂ ਵਾ ਕਾਤੁਂ ਸਕ੍ਖਿਸ੍ਸਤਿ. ਇਮਿਨਾ ਕਾਰਣੇਨ ‘‘ਅਞ੍ਞੇਪਿ ਗਿਲਾਨਾ ਉਪਟ੍ਠਾਤਬ੍ਬਾ’’ਤਿ ਵੁਤ੍ਤਂ.
ਨੇਵ ਓਕ੍ਕਮਤੀਤਿ ਨੇਵ ਪਵਿਸਤਿ. ਨਿਯਾਮਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਨ੍ਤਿ ਕੁਸਲੇਸੁ ਧਮ੍ਮੇਸੁ ਮਗ੍ਗਨਿਯਾਮਸਙ੍ਖਾਤਂ ਸਮ੍ਮਤ੍ਤਂ. ਇਮਿਨਾ ਪਦਪਰਮੋ ਪੁਗ੍ਗਲੋ ਕਥਿਤੋ. ਦੁਤਿਯਵਾਰੇਨ ਉਗ੍ਘਟਿਤਞ੍ਞੂ ਗਹਿਤੋ ਸਾਸਨੇ ਨਾਲਕਤ੍ਥੇਰਸਦਿਸੋ ਬੁਦ੍ਧਨ੍ਤਰੇ ਏਕਵਾਰਂ ਪਚ੍ਚੇਕਬੁਦ੍ਧਾਨਂ ਸਨ੍ਤਿਕੇ ਓਵਾਦਂ ਲਭਿਤ੍ਵਾ ਪਟਿਵਿਦ੍ਧਪਚ੍ਚੇਕਬੋਧਿਞਾਣੋ ਚ. ਤਤਿਯਵਾਰੇਨ ਵਿਪਞ੍ਚਿਤਞ੍ਞੂ ਪੁਗ੍ਗਲੋ ਕਥਿਤੋ, ਨੇਯ੍ਯੋ ਪਨ ਤਨ੍ਨਿਸ੍ਸਿਤੋਵ ਹੋਤਿ.
ਧਮ੍ਮਦੇਸਨਾ ਅਨੁਞ੍ਞਾਤਾਤਿ ਮਾਸਸ੍ਸ ਅਟ੍ਠ ਵਾਰੇ ਧਮ੍ਮਕਥਾ ਅਨੁਞ੍ਞਾਤਾ. ਅਞ੍ਞੇਸਮ੍ਪਿ ਧਮ੍ਮੋ ਦੇਸੇਤਬ੍ਬੋਤਿ ਇਤਰੇਸਮ੍ਪਿ ਧਮ੍ਮੋ ਕਥੇਤਬ੍ਬੋ. ਕਿਂ ਕਾਰਣਾ? ਪਦਪਰਮਸ੍ਸ ਹਿ ਇਮਸ੍ਮਿਂ ਅਤ੍ਤਭਾਵੇ ਧਮ੍ਮਂ ਪਟਿਵਿਜ੍ਝਿਤੁਂ ਅਸਕ੍ਕੋਨ੍ਤਸ੍ਸਾਪਿ ਅਨਾਗਤੇ ਪਚ੍ਚਯੋ ਭਵਿਸ੍ਸਤਿ. ਯੋ ਪਨ ਤਥਾਗਤਸ੍ਸ ਰੂਪਦਸ੍ਸਨਂ ਲਭਨ੍ਤੋਪਿ ਅਲਭਨ੍ਤੋਪਿ ਧਮ੍ਮਵਿਨਯਞ੍ਚ ਸਵਨਾਯ ਲਭਨ੍ਤੋਪਿ ਅਲਭਨ੍ਤੋਪਿ ਧਮ੍ਮਂ ਅਭਿਸਮੇਤਿ, ਸੋ ਅਲਭਨ੍ਤੋ ਤਾਵ ਅਭਿਸਮੇਤਿ. ਲਭਨ੍ਤੋ ਪਨ ਖਿਪ੍ਪਮੇਵ ਅਭਿਸਮੇਸ੍ਸਤੀਤਿ ਇਮਿਨਾ ਕਾਰਣੇਨ ਤੇਸਂ ਧਮ੍ਮੋ ਦੇਸੇਤਬ੍ਬੋ. ਤਤਿਯਸ੍ਸ ਪਨ ਪੁਨਪ੍ਪੁਨਂ ਦੇਸੇਤਬ੍ਬੋਵ.
੩. ਸਙ੍ਖਾਰਸੁਤ੍ਤਵਣ੍ਣਨਾ
੨੩. ਤਤਿਯੇ ਸਬ੍ਯਾਬਜ੍ਝਨ੍ਤਿ ਸਦੁਕ੍ਖਂ. ਕਾਯਸਙ੍ਖਾਰਨ੍ਤਿ ਕਾਯਦ੍ਵਾਰੇ ਚੇਤਨਾਰਾਸਿਂ. ਅਭਿਸਙ੍ਖਰੋਤੀਤਿ ਆਯੂਹਤਿ ਰਾਸਿਂ ਕਰੋਤਿ ਪਿਣ੍ਡਂ ਕਰੋਤਿ. ਵਚੀਮਨੋਦ੍ਵਾਰੇਸੁਪਿ ਏਸੇਵ ਨਯੋ. ਸਬ੍ਯਾਬਜ੍ਝਂ ਲੋਕਨ੍ਤਿ ਸਦੁਕ੍ਖਂ ਲੋਕਂ. ਸਬ੍ਯਾਬਜ੍ਝਾ ਫਸ੍ਸਾ ਫੁਸਨ੍ਤੀਤਿ ਸਦੁਕ੍ਖਾ ਵਿਪਾਕਫਸ੍ਸਾ ਫੁਸਨ੍ਤਿ. ਸਬ੍ਯਾਬਜ੍ਝਂ ਵੇਦਨਂ ਵੇਦਿਯਤੀਤਿ ਸਦੁਕ੍ਖਂ ਵਿਪਾਕਵੇਦਨਂ ਵੇਦਿਯਤਿ, ਸਾਬਾਧਂ ਨਿਰਸ੍ਸਾਦਨ੍ਤਿ ਅਤ੍ਥੋ. ਸੇਯ੍ਯਥਾਪਿ ਸਤ੍ਤਾ ਨੇਰਯਿਕਾਤਿ ਯਥਾ ਨਿਰਯੇ ਨਿਬ੍ਬਤ੍ਤਸਤ੍ਤਾ ਏਕਨ੍ਤਦੁਕ੍ਖਂ ਵੇਦਨਂ ਵੇਦਿਯਨ੍ਤਿ, ਏਵਂ ਵੇਦਿਯਤੀਤਿ ਅਤ੍ਥੋ. ਕਿਂ ਪਨ ਤਤ੍ਥ ਉਪੇਕ੍ਖਾਵੇਦਨਾ ਨਤ੍ਥੀਤਿ? ਅਤ੍ਥਿ, ਦੁਕ੍ਖਵੇਦਨਾਯ ਪਨ ਬਲਵਭਾਵੇਨ ਸਾ ਅਬ੍ਬੋਹਾਰਿਕਟ੍ਠਾਨੇ ਠਿਤਾ. ਇਤਿ ਨਿਰਯੋਵ ਨਿਰਯਸ੍ਸ ਉਪਮਂ ਕਤ੍ਵਾ ਆਹਟੋ. ਤਤ੍ਰ ਪਟਿਭਾਗਉਪਮਾ ਨਾਮ ਕਿਰ ਏਸਾ.
ਸੇਯ੍ਯਥਾਪਿ ਦੇਵਾ ਸੁਭਕਿਣ੍ਹਾਤਿ ਇਧਾਪਿ ਦੇਵਲੋਕੋਵ ਦੇਵਲੋਕਸ੍ਸ ਉਪਮਂ ਕਤ੍ਵਾ ਆਹਟੋ. ਯਸ੍ਮਾ ਪਨ ਹੇਟ੍ਠਿਮੇਸੁ ਬ੍ਰਹ੍ਮਲੋਕੇਸੁ ਸਪ੍ਪੀਤਿਕਜ੍ਝਾਨਵਿਪਾਕੋ ਵਤ੍ਤਤਿ, ਸੁਭਕਿਣ੍ਹੇਸੁ ਨਿਪ੍ਪੀਤਿਕੋ ਏਕਨ੍ਤਸੁਖੋਵ, ਤਸ੍ਮਾ ਤੇ ਅਗ੍ਗਹੇਤ੍ਵਾ ਸੁਭਕਿਣ੍ਹਾਵ ਕਥਿਤਾ. ਇਤਿ ਅਯਮ੍ਪਿ ਤਤ੍ਰ ਪਟਿਭਾਗਉਪਮਾ ਨਾਮਾਤਿ ਵੇਦਿਤਬ੍ਬਾ.
ਵੋਕਿਣ੍ਣਸੁਖਦੁਕ੍ਖਨ੍ਤਿ ਵੋਮਿਸ੍ਸਕਸੁਖਦੁਕ੍ਖਂ. ਸੇਯ੍ਯਥਾਪਿ ਮਨੁਸ੍ਸਾਤਿ ਮਨੁਸ੍ਸਾਨਂ ਹਿ ਕਾਲੇਨ ਸੁਖਂ ਹੋਤਿ, ਕਾਲੇਨ ਦੁਕ੍ਖਂ. ਏਕਚ੍ਚੇ ਚ ਦੇਵਾਤਿ ਕਾਮਾਵਚਰਦੇਵਾ. ਤੇਸਮ੍ਪਿ ਕਾਲੇਨ ਸੁਖਂ ਹੋਤਿ, ਕਾਲੇਨ ਦੁਕ੍ਖਂ. ਤੇਸਂ ਹਿ ਹੀਨਤਰਾਨਂ ਮਹੇਸਕ੍ਖਤਰਾ ਦੇਵਤਾ ਦਿਸ੍ਵਾ ਆਸਨਾ ਵੁਟ੍ਠਾਤਬ੍ਬਂ ਹੋਤਿ, ਮਗ੍ਗਾ ਉਕ੍ਕਮਿਤਬ੍ਬਂ, ਪਾਰੁਤਵਤ੍ਥਂ ਅਪਨੇਤਬ੍ਬਂ, ਅਞ੍ਜਲਿਕਮ੍ਮਂ ਕਾਤਬ੍ਬਨ੍ਤਿ ਤਂ ਸਬ੍ਬਮ੍ਪਿ ਦੁਕ੍ਖਂ ਨਾਮ ਹੋਤਿ. ਏਕਚ੍ਚੇ ਚ ਵਿਨਿਪਾਤਿਕਾਤਿ ਵੇਮਾਨਿਕਪੇਤਾ. ਤੇ ਹਿ ਕਾਲੇਨ ਸਮ੍ਪਤ੍ਤਿਂ ਅਨੁਭਵਨ੍ਤਿ ਕਾਲੇਨ ਕਮ੍ਮਨ੍ਤਿ ਵੋਕਿਣ੍ਣਸੁਖਦੁਕ੍ਖਾਵ ਹੋਨ੍ਤਿ. ਇਤਿ ਇਮਸ੍ਮਿਂ ਸੁਤ੍ਤੇ ਤੀਣਿ ਸੁਚਰਿਤਾਨਿ ਲੋਕਿਯਲੋਕੁਤ੍ਤਰਮਿਸ੍ਸਕਾਨਿ ਕਥਿਤਾਨੀਤਿ ਵੇਦਿਤਬ੍ਬਾਨਿ.
੪. ਬਹੁਕਾਰਸੁਤ੍ਤਵਣ੍ਣਨਾ
੨੪. ਚਤੁਤ੍ਥੇ ਤਯੋਮੇ, ਭਿਕ੍ਖਵੇ, ਪੁਗ੍ਗਲਾਤਿ ਤਯੋ ਆਚਰਿਯਪੁਗ੍ਗਲਾ. ਪੁਗ੍ਗਲਸ੍ਸ ਬਹੁਕਾਰਾਤਿ ਅਨ੍ਤੇਵਾਸਿਕਪੁਗ੍ਗਲਸ੍ਸ ਬਹੂਪਕਾਰਾ. ਬੁਦ੍ਧਨ੍ਤਿ ਸਬ੍ਬਞ੍ਞੁਬੁਦ੍ਧਂ. ਸਰਣਂ ਗਤੋ ਹੋਤੀਤਿ ਅਵਸ੍ਸਯਂ ਗਤੋ ਹੋਤਿ. ਧਮ੍ਮਨ੍ਤਿ ਸਤਨ੍ਤਿਕਂ ਨਵਲੋਕੁਤ੍ਤਰਧਮ੍ਮਂ. ਸਙ੍ਘਨ੍ਤਿ ਅਟ੍ਠਅਰਿਯਪੁਗ੍ਗਲਸਮੂਹਂ. ਇਦਞ੍ਚ ਪਨ ਸਰਣਗਮਨਂ ਅਗ੍ਗਹਿਤਸਰਣਪੁਬ੍ਬਸ੍ਸ ਅਕਤਾਭਿਨਿਵੇਸਸ੍ਸ ਵਸੇਨ ਵੁਤ੍ਤਂ. ਇਤਿ ਇਮਸ੍ਮਿਂ ਸੁਤ੍ਤੇ ਸਰਣਦਾਯਕੋ ਸੋਤਾਪਤ੍ਤਿਮਗ੍ਗਸਮ੍ਪਾਪਕੋ ਅਰਹਤ੍ਤਮਗ੍ਗਸਮ੍ਪਾਪਕੋਤਿ ਤਯੋ ਆਚਰਿਯਾ ਬਹੁਕਾਰਾਤਿ ਆਗਤਾ, ਪਬ੍ਬਜ੍ਜਾਦਾਯਕੋ ਬੁਦ੍ਧਵਚਨਦਾਯਕੋ ਕਮ੍ਮਵਾਚਾਚਰਿਯੋ ਸਕਦਾਗਾਮਿਮਗ੍ਗਸਮ੍ਪਾਪਕੋ ਅਨਾਗਾਮਿਮਗ੍ਗਸਮ੍ਪਾਪਕੋਤਿ ਇਮੇ ਆਚਰਿਯਾ ਨ ਆਗਤਾ, ਕਿਂ ਏਤੇ ਨ ਬਹੁਕਾਰਾਤਿ? ਨੋ, ਨ ਬਹੁਕਾਰਾ. ਅਯਂ ਪਨ ਦੇਸਨਾ ਦੁਵਿਧੇਨ ਪਰਿਚ੍ਛਿਨ੍ਨਾ. ਤਸ੍ਮਾ ਸਬ੍ਬੇਪੇਤੇ ਬਹੁਕਾਰਾ. ਤੇਸੁ ਸਰਣਗਮਨਸ੍ਮਿਂਯੇਵ ਅਕਤਾਭਿਨਿਵੇਸੋ ਵਟ੍ਟਤਿ, ਚਤੁਪਾਰਿਸੁਦ੍ਧਿਸੀਲਕਸਿਣਪਰਿਕਮ੍ਮਵਿਪਸ੍ਸਨਾਞਾਣਾਨਿ ਪਨ ਪਠਮਮਗ੍ਗਸਨ੍ਨਿਸ੍ਸਿਤਾਨਿ ਹੋਨ੍ਤਿ, ਉਪਰਿ ਦ੍ਵੇ ਮਗ੍ਗਾ ਚ ਫਲਾਨਿ ਚ ਅਰਹਤ੍ਤਮਗ੍ਗਸਨ੍ਨਿਸ੍ਸਿਤਾਨੀਤਿ ਵੇਦਿਤਬ੍ਬਾਨਿ.
ਇਮਿਨਾ ਪੁਗ੍ਗਲੇਨਾਤਿ ਇਮਿਨਾ ਅਨ੍ਤੇਵਾਸਿਕਪੁਗ੍ਗਲੇਨ. ਨ ਸੁਪ੍ਪਤਿਕਾਰਂ ਵਦਾਮੀਤਿ ਪਤਿਕਾਰਂ ਕਾਤੁਂ ਨ ਸੁਕਰਨ੍ਤਿ ਵਦਾਮਿ. ਅਭਿਵਾਦਨਾਦੀਸੁ ਅਨੇਕਸਤਵਾਰਂ ਅਨੇਕਸਹਸ੍ਸਵਾਰਮ੍ਪਿ ਹਿ ਪਞ੍ਚਪਤਿਟ੍ਠਿਤੇਨ ਨਿਪਤਿਤ੍ਵਾ ਵਨ੍ਦਨ੍ਤੋ ਆਸਨਾ ਵੁਟ੍ਠਾਯ ਪਚ੍ਚੁਗ੍ਗਚ੍ਛਨ੍ਤੋ ਦਿਟ੍ਠਦਿਟ੍ਠਕ੍ਖਣੇ ਅਞ੍ਜਲਿਂ ਪਗ੍ਗਣ੍ਹਨ੍ਤੋ ਅਨੁਚ੍ਛਵਿਕਂ ਸਾਮੀਚਿਕਮ੍ਮਂ ਕਰੋਨ੍ਤੋ ਦਿਵਸੇ ਦਿਵਸੇ ਚੀਵਰਸਤਂ ਚੀਵਰਸਹਸ੍ਸਂ ਪਿਣ੍ਡਪਾਤਸਤਂ ਪਿਣ੍ਡਪਾਤਸਹਸ੍ਸਂ ਦਦਮਾਨੋ ਚਕ੍ਕਵਾਲ਼ਪਰਿਯਨ੍ਤੇਨ ਸਬ੍ਬਰਤਨਮਯਂ ਆਵਾਸਂ ਕਰੋਨ੍ਤੋ ਸਪ੍ਪਿਨਵਨੀਤਾਦਿਨਾਨਪ੍ਪਕਾਰਂ ਭੇਸਜ੍ਜਂ ਅਨੁਪ੍ਪਦਜ੍ਜਮਾਨੋ ਨੇਵ ਸਕ੍ਕੋਤਿ ਆਚਰਿਯੇਨ ਕਤਸ੍ਸ ਪਤਿਕਾਰਂ ਨਾਮ ਕਾਤੁਨ੍ਤਿ ਏਵਮਤ੍ਥੋ ਵੇਦਿਤਬ੍ਬੋ.
੫. ਵਜਿਰੂਪਮਸੁਤ੍ਤਵਣ੍ਣਨਾ
੨੫. ਪਞ੍ਚਮੇ ਅਰੁਕੂਪਮਚਿਤ੍ਤੋਤਿ ਪੁਰਾਣਵਣਸਦਿਸਚਿਤ੍ਤੋ. ਵਿਜ੍ਜੂਪਮਚਿਤ੍ਤੋਤਿ ਇਤ੍ਤਰਕਾਲੋਭਾਸਨੇਨ ਵਿਜ੍ਜੁਸਦਿਸਚਿਤ੍ਤੋ. ਵਜਿਰੂਪਮਚਿਤ੍ਤੋਤਿ ਕਿਲੇਸਾਨਂ ਮੂਲਘਾਤਕਰਣਸਮਤ੍ਥਤਾਯ ਵਜਿਰੇਨ ਸਦਿਸਚਿਤ੍ਤੋ. ਅਭਿਸਜ੍ਜਤੀਤਿ ਲਗ੍ਗਤਿ. ਕੁਪ੍ਪਤੀਤਿ ਕੋਪਵਸੇਨ ਕੁਪ੍ਪਤਿ. ਬ੍ਯਾਪਜ੍ਜਤੀਤਿ ਪਕਤਿਭਾਵਂ ਪਜਹਤਿ, ਪੂਤਿਕੋ ਹੋਤਿ. ਪਤਿਤ੍ਥੀਯਤੀਤਿ ਥਿਨਭਾਵਂ ਥਦ੍ਧਭਾਵਂ ਆਪਜ੍ਜਤਿ. ਕੋਪਨ੍ਤਿ ਦੁਬ੍ਬਲਕੋਧਂ. ਦੋਸਨ੍ਤਿ ਦੁਸ੍ਸਨਵਸੇਨ ਤਤੋ ਬਲਵਤਰਂ. ਅਪ੍ਪਚ੍ਚਯਨ੍ਤਿ ਅਤੁਟ੍ਠਾਕਾਰਂ ਦੋਮਨਸ੍ਸਂ. ਦੁਟ੍ਠਾਰੁਕੋਤਿ ਪੁਰਾਣਵਣੋ. ਕਟ੍ਠੇਨਾਤਿ ਦਣ੍ਡਕਕੋਟਿਯਾ. ਕਠਲੇਨਾਤਿ ਕਪਾਲੇਨ. ਆਸਵਂ ਦੇਤੀਤਿ ਅਪਰਾਪਰਂ ਸਵਤਿ. ਪੁਰਾਣਵਣੋ ਹਿ ਅਤ੍ਤਨੋ ਧਮ੍ਮਤਾਯੇਵ ਪੁਬ੍ਬਂ ਲੋਹਿਤਂ ਯੂਸਨ੍ਤਿ ਇਮਾਨਿ ਤੀਣਿ ਸਵਤਿ, ਘਟ੍ਟਿਤੋ ਪਨ ਤਾਨਿ ਅਧਿਕਤਰਂ ਸਵਤਿ.
ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਦੁਟ੍ਠਾਰੁਕੋ ਵਿਯ ਹਿ ਕੋਧਨਪੁਗ੍ਗਲੋ, ਤਸ੍ਸ ਅਤ੍ਤਨੋ ਧਮ੍ਮਤਾਯ ਸਵਨਂ ਵਿਯ ਕੋਧਨਸ੍ਸਪਿ ਅਤ੍ਤਨੋ ਧਮ੍ਮਤਾਯ ਉਦ੍ਧੁਮਾਤਸ੍ਸ ਵਿਯ ਚਣ੍ਡਿਕਤਸ੍ਸ ਚਰਣਂ, ਕਟ੍ਠੇਨ ਵਾ ਕਠਲਾਯ ਵਾ ਘਟ੍ਟਨਂ ਵਿਯ ਅਪ੍ਪਮਤ੍ਤਂ ਵਚਨਂ, ਭਿਯ੍ਯੋਸੋਮਤ੍ਤਾਯ ਸਵਨਂ ਵਿਯ ‘‘ਮਾਦਿਸਂ ਨਾਮ ਏਸ ਏਵਂ ਵਦਤੀ’’ਤਿ ਭਿਯ੍ਯੋਸੋਮਤ੍ਤਾਯ ਉਦ੍ਧੁਮਾਯਨਭਾਵੋ ਦਟ੍ਠਬ੍ਬੋ.
ਰਤ੍ਤਨ੍ਧਕਾਰਤਿਮਿਸਾਯਨ੍ਤਿ ਰਤ੍ਤਿਂ ਚਕ੍ਖੁਵਿਞ੍ਞਾਣੁਪ੍ਪਤ੍ਤਿਨਿਵਾਰਣੇਨ ਅਨ੍ਧਭਾਵਕਰਣੇ ਬਹਲਤਮੇ. ਵਿਜ੍ਜਨ੍ਤਰਿਕਾਯਾਤਿ ਵਿਜ੍ਜੁਪ੍ਪਤ੍ਤਿਕ੍ਖਣੇ. ਇਧਾਪਿ ਇਦਂ ਓਪਮ੍ਮਸਂਸਨ੍ਦਨਂ – ਚਕ੍ਖੁਮਾ ਪੁਰਿਸੋ ਵਿਯ ਹਿ ਯੋਗਾਵਚਰੋ ਦਟ੍ਠਬ੍ਬੋ, ਅਨ੍ਧਕਾਰਂ ਵਿਯ ਸੋਤਾਪਤ੍ਤਿਮਗ੍ਗਵਜ੍ਝਾ ਕਿਲੇਸਾ, ਵਿਜ੍ਜੁਸਞ੍ਚਰਣਂ ਵਿਯ ਸੋਤਾਪਤ੍ਤਿਮਗ੍ਗਞਾਣਸ੍ਸ ਉਪ੍ਪਤ੍ਤਿਕਾਲੋ, ਵਿਜ੍ਜਨ੍ਤਰਿਕਾਯ ਚਕ੍ਖੁਮਤੋ ਪੁਰਿਸਸ੍ਸ ਸਮਨ੍ਤਾ ਰੂਪਦਸ੍ਸਨਂ ਵਿਯ ਸੋਤਾਪਤ੍ਤਿਮਗ੍ਗਕ੍ਖਣੇ ਨਿਬ੍ਬਾਨਦਸ੍ਸਨਂ, ਪੁਨ ਅਨ੍ਧਕਾਰਾਵਤ੍ਥਰਣਂ ਵਿਯ ਸਕਦਾਗਾਮਿਮਗ੍ਗਵਜ੍ਝਾ ਕਿਲੇਸਾ, ਪੁਨ ਵਿਜ੍ਜੁਸਞ੍ਚਰਣਂ ਵਿਯ ਸਕਦਾਗਾਮਿਮਗ੍ਗਞਾਣਸ੍ਸ ਉਪ੍ਪਾਦੋ, ਵਿਜ੍ਜਨ੍ਤਰਿਕਾਯ ਚਕ੍ਖੁਮਤੋ ਪੁਰਿਸਸ੍ਸ ਸਮਨ੍ਤਾ ਰੂਪਦਸ੍ਸਨਂ ਵਿਯ ਸਕਦਾਗਾਮਿਮਗ੍ਗਕ੍ਖਣੇ ਨਿਬ੍ਬਾਨਦਸ੍ਸਨਂ, ਪੁਨ ਅਨ੍ਧਕਾਰਾਵਤ੍ਥਰਣਂ ਵਿਯ ਅਨਾਗਾਮਿਮਗ੍ਗਵਜ੍ਝਾ ਕਿਲੇਸਾ, ਪੁਨ ਵਿਜ੍ਜੁਸਞ੍ਚਰਣਂ ਵਿਯ ਅਨਾਗਾਮਿਮਗ੍ਗਞਾਣਸ੍ਸ ਉਪ੍ਪਾਦੋ, ਵਿਜ੍ਜਨ੍ਤਰਿਕਾਯ ਚਕ੍ਖੁਮਤੋ ਪੁਰਿਸਸ੍ਸ ਸਮਨ੍ਤਾ ਰੂਪਦਸ੍ਸਨਂ ਵਿਯ ਅਨਾਗਾਮਿਮਗ੍ਗਕ੍ਖਣੇ ਨਿਬ੍ਬਾਨਦਸ੍ਸਨਂ ਵੇਦਿਤਬ੍ਬਂ.
ਵਜਿਰੂਪਮਚਿਤ੍ਤਤਾਯਪਿ ਇਦਂ ਓਪਮ੍ਮਸਂਸਨ੍ਦਨਂ – ਵਜਿਰਂ ਵਿਯ ਹਿ ਅਰਹਤ੍ਤਮਗ੍ਗਞਾਣਂ ਦਟ੍ਠਬ੍ਬਂ, ਮਣਿਗਣ੍ਠਿਪਾਸਾਣਗਣ੍ਠਿ ਵਿਯ ਅਰਹਤ੍ਤਮਗ੍ਗਵਜ੍ਝਾ ਕਿਲੇਸਾ, ਵਜਿਰਸ੍ਸ ਮਣਿਗਣ੍ਠਿਮ੍ਪਿ ਵਾ ਪਾਸਾਣਗਣ੍ਠਿਮ੍ਪਿ ਵਾ ਵਿਨਿਵਿਜ੍ਝਿਤ੍ਵਾ ਅਗਮਨਭਾਵਸ੍ਸ ਨਤ੍ਥਿਤਾ ਵਿਯ ਅਰਹਤ੍ਤਮਗ੍ਗਞਾਣੇਨ ਅਚ੍ਛੇਜ੍ਜਾਨਂ ਕਿਲੇਸਾਨਂ ਨਤ੍ਥਿਭਾਵੋ, ਵਜਿਰੇਨ ਨਿਬ੍ਬਿਦ੍ਧਵੇਧਸ੍ਸ ਪੁਨ ਅਪਤਿਪੂਰਣਂ ਵਿਯ ਅਰਹਤ੍ਤਮਗ੍ਗੇਨ ਛਿਨ੍ਨਾਨਂ ਕਿਲੇਸਾਨਂ ਪੁਨ ਅਨੁਪ੍ਪਾਦੋ ਦਟ੍ਠਬ੍ਬੋਤਿ.
੬. ਸੇਵਿਤਬ੍ਬਸੁਤ੍ਤਵਣ੍ਣਨਾ
੨੬. ਛਟ੍ਠੇ ਸੇਵਿਤਬ੍ਬੋਤਿ ਉਪਸਙ੍ਕਮਿਤਬ੍ਬੋ. ਭਜਿਤਬ੍ਬੋਤਿ ਅਲ੍ਲੀਯਿਤਬ੍ਬੋ. ਪਯਿਰੁਪਾਸਿਤਬ੍ਬੋਤਿ ਸਨ੍ਤਿਕੇ ਨਿਸੀਦਨਵਸੇਨ ਪੁਨਪ੍ਪੁਨਂ ਉਪਾਸਿਤਬ੍ਬੋ. ਸਕ੍ਕਤ੍ਵਾ ਗਰੁਂ ਕਤ੍ਵਾਤਿ ਸਕ੍ਕਾਰਞ੍ਚੇਵ ਗਰੁਕਾਰਞ੍ਚ ਕਤ੍ਵਾ. ਹੀਨੋ ਹੋਤਿ ਸੀਲੇਨਾਤਿਆਦੀਸੁ ਉਪਾਦਾਯੁਪਾਦਾਯ ਹੀਨਤਾ ਵੇਦਿਤਬ੍ਬਾ. ਤਤ੍ਥ ਯੋ ਹਿ ਪਞ੍ਚ ਸੀਲਾਨਿ ਰਕ੍ਖਤਿ, ਸੋ ਦਸ ਸੀਲਾਨਿ ਰਕ੍ਖਨ੍ਤੇਨ ਨ ਸੇਵਿਤਬ੍ਬੋ. ਯੋ ਦਸ ਸੀਲਾਨਿ ਰਕ੍ਖਤਿ, ਸੋ ਚਤੁਪਾਰਿਸੁਦ੍ਧਿਸੀਲਂ ਰਕ੍ਖਨ੍ਤੇਨ ਨ ਸੇਵਿਤਬ੍ਬੋ. ਅਞ੍ਞਤ੍ਰ ਅਨੁਦ੍ਦਯਾ ਅਞ੍ਞਤ੍ਰ ਅਨੁਕਮ੍ਪਾਤਿ ਠਪੇਤ੍ਵਾ ਅਨੁਦ੍ਦਯਞ੍ਚ ਅਨੁਕਮ੍ਪਞ੍ਚ. ਅਤ੍ਤਨੋ ਅਤ੍ਥਾਯੇਵ ਹਿ ਏਵਰੂਪੋ ਪੁਗ੍ਗਲੋ ਨ ਸੇਵਿਤਬ੍ਬੋ, ਅਨੁਦ੍ਦਯਾਨੁਕਮ੍ਪਾਵਸੇਨ ਪਨ ਤਂ ਉਪਸਙ੍ਕਮਿਤੁਂ ਵਟ੍ਟਤਿ.
ਸੀਲਸਾਮਞ੍ਞਗਤਾਨਂ ਸਤਨ੍ਤਿ ਸੀਲੇਨ ਸਮਾਨਭਾਵਂ ਗਤਾਨਂ ਸਨ੍ਤਾਨਂ. ਸੀਲਕਥਾ ਚ ਨੋ ਭਵਿਸ੍ਸਤੀਤਿ ਏਵਂ ਸਮਾਨਸੀਲਾਨਂ ਅਮ੍ਹਾਕਂ ਸੀਲਮੇਵ ਆਰਬ੍ਭ ਕਥਾ ਭਵਿਸ੍ਸਤਿ. ਸਾ ਚ ਨੋ ਪਵਤ੍ਤਿਨੀ ਭਵਿਸ੍ਸਤੀਤਿ ਸਾ ਚ ਅਮ੍ਹਾਕਂ ਕਥਾ ਦਿਵਸਮ੍ਪਿ ਕਥੇਨ੍ਤਾਨਂ ਪਵਤ੍ਤਿਸ੍ਸਤਿ ਨ ਪਟਿਹਞ੍ਞਿਸ੍ਸਤਿ. ਸਾ ਚ ਨੋ ਫਾਸੁ ਭਵਿਸ੍ਸਤੀਤਿ ਸਾ ਚ ਦਿਵਸਮ੍ਪਿ ਪਵਤ੍ਤਮਾਨਾ ਸੀਲਕਥਾ ਅਮ੍ਹਾਕਂ ਫਾਸੁਵਿਹਾਰੋ ਸੁਖਵਿਹਾਰੋ ਭਵਿਸ੍ਸਤਿ. ਸਮਾਧਿਪਞ੍ਞਾਕਥਾਸੁਪਿ ਏਸੇਵ ਨਯੋ.
ਸੀਲਕ੍ਖਨ੍ਧਨ੍ਤਿ ਸੀਲਰਾਸਿਂ. ਤਤ੍ਥ ਤਤ੍ਥ ਪਞ੍ਞਾਯ ਅਨੁਗ੍ਗਹੇਸ੍ਸਾਮੀਤਿ ਏਤ੍ਥ ਸੀਲਸ੍ਸ ਅਸਪ੍ਪਾਯੇ ਅਨੁਪਕਾਰਧਮ੍ਮੇ ਵਜ੍ਜੇਤ੍ਵਾ ਸਪ੍ਪਾਯੇ ਉਪਕਾਰਧਮ੍ਮੇ ਸੇਵਨ੍ਤੋ ਤਸ੍ਮਿਂ ਤਸ੍ਮਿਂ ਠਾਨੇ ਸੀਲਕ੍ਖਨ੍ਧਂ ਪਞ੍ਞਾਯ ਅਨੁਗ੍ਗਣ੍ਹਾਤਿ ਨਾਮ. ਸਮਾਧਿਪਞ੍ਞਾਕ੍ਖਨ੍ਧੇਸੁਪਿ ਏਸੇਵ ਨਯੋ. ਨਿਹੀਯਤੀਤਿ ਅਤ੍ਤਨੋ ਹੀਨਤਰਂ ਪੁਗ੍ਗਲਂ ਸੇਵਨ੍ਤੋ ਖਾਰਪਰਿਸ੍ਸਾਵਨੇ ਆਸਿਤ੍ਤਉਦਕਂ ਵਿਯ ਸਤਤਂ ਸਮਿਤਂ ਹਾਯਤਿ ਪਰਿਹਾਯਤਿ. ਤੁਲ੍ਯਸੇਵੀਤਿ ਅਤ੍ਤਨਾ ਸਮਾਨਸੇਵੀ. ਸੇਟ੍ਠਮੁਪਨਮਨ੍ਤਿ ਸੇਟ੍ਠਂ ਪੁਗ੍ਗਲਂ ਓਣਮਨ੍ਤੋ. ਉਦੇਤਿ ਖਿਪ੍ਪਨ੍ਤਿ ਖਿਪ੍ਪਮੇਵ ਵਡ੍ਢਤਿ. ਤਸ੍ਮਾ ਅਤ੍ਤਨੋ ਉਤ੍ਤਰਿਂ ਭਜੇਥਾਤਿ ਯਸ੍ਮਾ ਸੇਟ੍ਠਂ ਪੁਗ੍ਗਲਂ ਉਪਨਮਨ੍ਤੋ ਉਦੇਤਿ ਖਿਪ੍ਪਂ, ਤਸ੍ਮਾ ਅਤ੍ਤਨੋ ਉਤ੍ਤਰਿਤਰਂ ਵਿਸਿਟ੍ਠਤਰਂ ਭਜੇਥ.
੭. ਜਿਗੁਚ੍ਛਿਤਬ੍ਬਸੁਤ੍ਤਵਣ੍ਣਨਾ
੨੭. ਸਤ੍ਤਮੇ ਜਿਗੁਚ੍ਛਿਤਬ੍ਬੋਤਿ ਗੂਥਂ ਵਿਯ ਜਿਗੁਚ੍ਛਿਤਬ੍ਬੋ. ਅਥ ਖੋ ਨਨ੍ਤਿ ਅਥ ਖੋ ਅਸ੍ਸ. ਕਿਤ੍ਤਿਸਦ੍ਦੋਤਿ ਕਥਾਸਦ੍ਦੋ. ਏਵਮੇਵ ਖੋਤਿ ਏਤ੍ਥ ਗੂਥਕੂਪੋ ਵਿਯ ਦੁਸ੍ਸੀਲ੍ਯਂ ਦਟ੍ਠਬ੍ਬਂ. ਗੂਥਕੂਪੇ ਪਤਿਤ੍ਵਾ ਠਿਤੋ ਧਮ੍ਮਨਿਅਹਿ ਵਿਯ ਦੁਸ੍ਸੀਲਪੁਗ੍ਗਲੋ. ਗੂਥਕੂਪਤੋ ਉਦ੍ਧਰਿਯਮਾਨੇਨ ਤੇਨ ਅਹਿਨਾ ਪੁਰਿਸਸ੍ਸ ਸਰੀਰਂ ਆਰੁਲ਼੍ਹੇਨਾਪਿ ਅਦਟ੍ਠਭਾਵੋ ਵਿਯ ਦੁਸ੍ਸੀਲਂ ਸੇਵਮਾਨਸ੍ਸਾਪਿ ਤਸ੍ਸ ਕਿਰਿਯਾਯ ਅਕਰਣਭਾਵੋ. ਸਰੀਰਂ ਗੂਥੇਨ ਮਕ੍ਖੇਤ੍ਵਾ ਅਹਿਨਾ ਗਤਕਾਲੋ ਵਿਯ ਦੁਸ੍ਸੀਲਂ ਸੇਵਮਾਨਸ੍ਸ ਪਾਪਕਿਤ੍ਤਿਸਦ੍ਦਅਬ੍ਭੁਗ੍ਗਮਨਕਾਲੋ ਵੇਦਿਤਬ੍ਬੋ.
ਤਿਨ੍ਦੁਕਾਲਾਤਨ੍ਤਿ ਤਿਨ੍ਦੁਕਰੁਕ੍ਖਅਲਾਤਂ. ਭਿਯ੍ਯੋਸੋਮਤ੍ਤਾਯ ਚਿਚ੍ਚਿਟਾਯਤੀਤਿ ਤਂ ਹਿ ਝਾਯਮਾਨਂ ਪਕਤਿਯਾਪਿ ਪਪਟਿਕਾਯੋ ਮੁਞ੍ਚਨ੍ਤਂ ਚਿਚ੍ਚਿਟਾਤਿ ‘‘ਚਿਟਿਚਿਟਾ’’ਤਿ ਸਦ੍ਦਂ ਕਰੋਤਿ, ਘਟ੍ਟਿਤਂ ਪਨ ਅਧਿਮਤ੍ਤਂ ਕਰੋਤੀਤਿ ਅਤ੍ਥੋ. ਏਵਮੇਵ ਖੋਤਿ ਏਵਮੇਵਂ ਕੋਧਨੋ ਅਤ੍ਤਨੋ ਧਮ੍ਮਤਾਯਪਿ ਉਦ੍ਧਤੋ ਚਣ੍ਡਿਕਤੋ ਹੁਤ੍ਵਾ ਚਰਤਿ, ਅਪ੍ਪਮਤ੍ਤਕਂ ਪਨ ਵਚਨਂ ਸੁਤਕਾਲੇ ‘‘ਮਾਦਿਸਂ ਨਾਮ ਏਵਂ ਵਦਤਿ ਏਵਂ ਵਦਤੀ’’ਤਿ ਅਤਿਰੇਕਤਰਂ ਉਦ੍ਧਤੋ ਚਣ੍ਡਿਕਤੋ ਹੁਤ੍ਵਾ ਚਰਤਿ. ਗੂਥਕੂਪੋਤਿ ਗੂਥਪੁਣ੍ਣਕੂਪੋ, ਗੂਥਰਾਸਿਯੇਵ ਵਾ. ਓਪਮ੍ਮਸਂਸਨ੍ਦਨਂ ਪਨੇਤ੍ਥ ਪੁਰਿਮਨਯੇਨੇਵ ਵੇਦਿਤਬ੍ਬਂ. ਤਸ੍ਮਾ ਏਵਰੂਪੋ ਪੁਗ੍ਗਲੋ ਅਜ੍ਝੁਪੇਕ੍ਖਿਤਬ੍ਬੋ ਨ ਸੇਵਿਤਬ੍ਬੋਤਿ ਯਸ੍ਮਾ ਕੋਧਨੋ ਅਤਿਸੇਵਿਯਮਾਨੋ ਅਤਿਉਪਸਙ੍ਕਮਿਯਮਾਨੋਪਿ ਕੁਜ੍ਝਤਿਯੇਵ, ‘‘ਕਿਂ ਇਮਿਨਾ’’ਤਿ ਪਟਿਕ੍ਕਮਨ੍ਤੇਪਿ ਕੁਜ੍ਝਤਿਯੇਵ. ਤਸ੍ਮਾ ਪਲਾਲਗ੍ਗਿ ਵਿਯ ਅਜ੍ਝੁਪੇਕ੍ਖਿਤਬ੍ਬੋ ਨ ਸੇਵਿਤਬ੍ਬੋ ਨ ਭਜਿਤਬ੍ਬੋ. ਕਿਂ ਵੁਤ੍ਤਂ ਹੋਤਿ? ਯੋ ਹਿ ਪਲਾਲਗ੍ਗਿਂ ਅਤਿਉਪਸਙ੍ਕਮਿਤ੍ਵਾ ਤਪ੍ਪਤਿ, ਤਸ੍ਸ ਸਰੀਰਂ ਝਾਯਤਿ. ਯੋ ਅਤਿਪਟਿਕ੍ਕਮਿਤ੍ਵਾ ਤਪ੍ਪਤਿ, ਤਸ੍ਸ ਸੀਤਂ ਨ ਵੂਪਸਮ੍ਮਤਿ. ਅਨੁਪਸਙ੍ਕਮਿਤ੍ਵਾ ਅਪਟਿਕ੍ਕਮਿਤ੍ਵਾ ਪਨ ਮਜ੍ਝਤ੍ਤਭਾਵੇਨ ਤਪ੍ਪਨ੍ਤਸ੍ਸ ਸੀਤਂ ਵੂਪਸਮ੍ਮਤਿ, ਤਸ੍ਮਾ ਪਲਾਲਗ੍ਗਿ ਵਿਯ ਕੋਧਨੋ ਪੁਗ੍ਗਲੋ ਮਜ੍ਝਤ੍ਤਭਾਵੇਨ ਅਜ੍ਝੁਪੇਕ੍ਖਿਤਬ੍ਬੋ, ਨ ਸੇਵਿਤਬ੍ਬੋ ਨ ਭਜਿਤਬ੍ਬੋ ਨ ਪਯਿਰੁਪਾਸਿਤਬ੍ਬੋ.
ਕਲ੍ਯਾਣਮਿਤ੍ਤੋਤਿ ਸੁਚਿਮਿਤ੍ਤੋ. ਕਲ੍ਯਾਣਸਹਾਯੋਤਿ ਸੁਚਿਸਹਾਯੋ. ਸਹਾਯਾ ਨਾਮ ਸਹਗਾਮਿਨੋ ਸਦ੍ਧਿਂਚਰਾ. ਕਲ੍ਯਾਣਸਮ੍ਪਵਙ੍ਕੋਤਿ ਕਲ੍ਯਾਣੇਸੁ ਸੁਚਿਪੁਗ੍ਗਲੇਸੁ ਸਮ੍ਪਵਙ੍ਕੋ, ਤਨ੍ਨਿਨ੍ਨਤਪ੍ਪੋਣਤਪ੍ਪਬ੍ਭਾਰਮਾਨਸੋਤਿ ਅਤ੍ਥੋ.
੮. ਗੂਥਭਾਣੀਸੁਤ੍ਤਵਣ੍ਣਨਾ
੨੮. ਅਟ੍ਠਮੇ ਗੂਥਭਾਣੀਤਿ ਯੋ ਗੂਥਂ ਵਿਯ ਦੁਗ੍ਗਨ੍ਧਕਥਂ ਕਥੇਤਿ. ਪੁਪ੍ਫਭਾਣੀਤਿ ਯੋ ਪੁਪ੍ਫਾਨਿ ਵਿਯ ਸੁਗਨ੍ਧਕਥਂ ਕਥੇਤਿ. ਮਧੁਭਾਣੀਤਿ ਯੋ ਮਧੁ ਵਿਯ ਮਧੁਰਕਥਂ ਕਥੇਤਿ. ਸਭਗ੍ਗਤੋਤਿ ਸਭਾਯ ਠਿਤੋ. ਪਰਿਸਗ੍ਗਤੋਤਿ ਗਾਮਪਰਿਸਾਯ ਠਿਤੋ. ਞਾਤਿਮਜ੍ਝਗਤੋਤਿ ਞਾਤੀਨਂ ਮਜ੍ਝੇ ਠਿਤੋ. ਪੂਗਮਜ੍ਝਗਤੋਤਿ ਸੇਣੀਨਂ ਮਜ੍ਝੇ ਠਿਤੋ. ਰਾਜਕੁਲਮਜ੍ਝਗਤੋਤਿ ਰਾਜਕੁਲਸ੍ਸ ਮਜ੍ਝੇ ਮਹਾਵਿਨਿਚ੍ਛਯੇ ਠਿਤੋ. ਅਭਿਨੀਤੋਤਿ ਪੁਚ੍ਛਨਤ੍ਥਾਯਾਨੀਤੋ. ਸਕ੍ਖਿਪੁਟ੍ਠੋਤਿ ਸਕ੍ਖਿਂ ਕਤ੍ਵਾ ਪੁਚ੍ਛਿਤੋ. ਏਹਮ੍ਭੋ ਪੁਰਿਸਾਤਿ ਆਲਪਨਮੇਤਂ. ਅਤ੍ਤਹੇਤੁ ਵਾ ਪਰਹੇਤੁ ਵਾਤਿ ਅਤ੍ਤਨੋ ਵਾ ਪਰਸ੍ਸ ਵਾ ਹਤ੍ਥਪਾਦਾਦਿਹੇਤੁ ਵਾ ਧਨਹੇਤੁ ਵਾ. ਆਮਿਸਕਿਞ੍ਚਿਕ੍ਖਹੇਤੁ ਵਾਤਿ ਏਤ੍ਥ ਆਮਿਸਨ੍ਤਿ ਲਞ੍ਜੋ ਅਧਿਪ੍ਪੇਤੋ. ਕਿਞ੍ਚਿਕ੍ਖਨ੍ਤਿ ਯਂ ਵਾ ਤਂ ਵਾ ਅਪ੍ਪਮਤ੍ਤਕਂ ਅਨ੍ਤਮਸੋ ਤਿਤ੍ਤਿਰਿਯਵਟ੍ਟਕਸਪ੍ਪਿਪਿਣ੍ਡਨਵਨੀਤਪਿਣ੍ਡਾਦਿਮਤ੍ਤਕਸ੍ਸ ਲਞ੍ਜਸ੍ਸ ਹੇਤੂਤਿ ਅਤ੍ਥੋ. ਸਮ੍ਪਜਾਨਮੁਸਾ ਭਾਸਿਤਾ ਹੋਤੀਤਿ ਜਾਨਨ੍ਤੋਯੇਵ ਮੁਸਾਵਾਦਂ ਕਤ੍ਤਾ ਹੋਤਿ.
ਨੇਲਾਤਿ ਏਲਂ ਵੁਚ੍ਚਤਿ ਦੋਸੋ, ਨਾਸ੍ਸ ਏਲਨ੍ਤਿ ਨੇਲਾ, ਨਿਦ੍ਦੋਸਾਤਿ ਅਤ੍ਥੋ. ‘‘ਨੇਲਙ੍ਗੋ ਸੇਤਪਚ੍ਛਾਦੋ’’ਤਿ (ਉਦਾ. ੬੫) ਏਤ੍ਥ ਵੁਤ੍ਤਸੀਲਂ ਵਿਯ. ਕਣ੍ਣਸੁਖਾਤਿ ਬ੍ਯਞ੍ਜਨਮਧੁਰਤਾਯ ਕਣ੍ਣਾਨਂ ਸੁਖਾ, ਸੂਚਿਵਿਜ੍ਝਨਂ ਵਿਯ ਕਣ੍ਣਸੂਲਂ ਨ ਜਨੇਤਿ. ਅਤ੍ਥਮਧੁਰਤਾਯ ਸਕਲਸਰੀਰੇ ਕੋਪਂ ਅਜਨੇਤ੍ਵਾ ਪੇਮਂ ਜਨੇਤੀਤਿ ਪੇਮਨੀਯਾ. ਹਦਯਂ ਗਚ੍ਛਤਿ ਅਪ੍ਪਟਿਹਞ੍ਞਮਾਨਾ ਸੁਖੇਨ ਚਿਤ੍ਤਂ ਪਵਿਸਤੀਤਿ ਹਦਯਙ੍ਗਮਾ. ਗੁਣਪਰਿਪੁਣ੍ਣਤਾਯ ਪੁਰੇ ਭਵਾਤਿ ਪੋਰੀ. ਪੁਰੇ ਸਂਵਡ੍ਢਨਾਰੀ ਵਿਯ ਸੁਕੁਮਾਰਾਤਿਪਿ ਪੋਰੀ. ਪੁਰਸ੍ਸ ਏਸਾਤਿਪਿ ਪੋਰੀ. ਪੁਰਸ੍ਸ ਏਸਾਤਿ ਨਗਰਵਾਸੀਨਂ ਕਥਾਤਿ ਅਤ੍ਥੋ. ਨਗਰਵਾਸਿਨੋ ਹਿ ਯੁਤ੍ਤਕਥਾ ਹੋਨ੍ਤਿ, ਪਿਤਿਮਤ੍ਤਂ ਪਿਤਾਤਿ, ਮਾਤਿਮਤ੍ਤਂ ਮਾਤਾਤਿ, ਭਾਤਿਮਤ੍ਤਂ ਭਾਤਾਤਿ ਵਦਨ੍ਤਿ. ਏਵਰੂਪੀ ਕਥਾ ਬਹੁਨੋ ਜਨਸ੍ਸ ਕਨ੍ਤਾ ਹੋਤੀਤਿ ਬਹੁਜਨਕਨ੍ਤਾ. ਕਨ੍ਤਭਾਵੇਨੇਵ ਬਹੁਨੋ ਜਨਸ੍ਸ ਮਨਾਪਾ ਚਿਤ੍ਤਵੁਦ੍ਧਿਕਰਾਤਿ ਬਹੁਜਨਮਨਾਪਾ.
੯. ਅਨ੍ਧਸੁਤ੍ਤਵਣ੍ਣਨਾ
੨੯. ਨਵਮੇ ਚਕ੍ਖੁ ਨ ਹੋਤੀਤਿ ਪਞ੍ਞਾਚਕ੍ਖੁ ਨ ਹੋਤਿ. ਫਾਤਿਂ ਕਰੇਯ੍ਯਾਤਿ ਫੀਤਂ ਵਡ੍ਢਿਤਂ ਕਰੇਯ੍ਯ. ਸਾਵਜ੍ਜਾਨਵਜ੍ਜੇਤਿ ਸਦੋਸਨਿਦ੍ਦੋਸੇ. ਹੀਨਪ੍ਪਣੀਤੇਤਿ ਅਧਮੁਤ੍ਤਮੇ. ਕਣ੍ਹਸੁਕ੍ਕਸਪ੍ਪਟਿਭਾਗੇਤਿ ਕਣ੍ਹਸੁਕ੍ਕਾਯੇਵ ਅਞ੍ਞਮਞ੍ਞਂ ਪਟਿਬਾਹਨਤੋ ਪਟਿਪਕ੍ਖਵਸੇਨ ਸਪ੍ਪਟਿਭਾਗਾਤਿ ਵੁਚ੍ਚਨ੍ਤਿ. ਅਯਂ ਪਨੇਤ੍ਥ ਸਙ੍ਖੇਪੋ – ਕੁਸਲੇ ਧਮ੍ਮੇ ‘‘ਕੁਸਲਾ ਧਮ੍ਮਾ’’ਤਿ ਜਾਨੇਯ੍ਯ, ਅਕੁਸਲੇ ਧਮ੍ਮੇ ‘‘ਅਕੁਸਲਾ ਧਮ੍ਮਾ’’ਤਿ ਜਾਨੇਯ੍ਯ. ਸਾਵਜ੍ਜਾਦੀਸੁਪਿ ਏਸੇਵ ਨਯੋ. ਕਣ੍ਹਸੁਕ੍ਕਸਪ੍ਪਟਿਭਾਗੇਸੁ ਪਨ ਕਣ੍ਹਧਮ੍ਮੇ ‘‘ਸੁਕ੍ਕਸਪ੍ਪਟਿਭਾਗਾ’’ਤਿ ਜਾਨੇਯ੍ਯ, ਸੁਕ੍ਕਧਮ੍ਮੇ ‘‘ਕਣ੍ਹਸਪ੍ਪਟਿਭਾਗਾ’’ਤਿ ਯੇਨ ਪਞ੍ਞਾਚਕ੍ਖੁਨਾ ਜਾਨੇਯ੍ਯ, ਤਥਾਰੂਪਮ੍ਪਿਸ੍ਸ ਚਕ੍ਖੁ ਨ ਹੋਤੀਤਿ. ਇਮਿਨਾ ਨਯੇਨ ਸੇਸਵਾਰੇਸੁਪਿ ਅਤ੍ਥੋ ਵੇਦਿਤਬ੍ਬੋ.
ਨ ਚੇਵ ਭੋਗਾ ਤਥਾਰੂਪਾਤਿ ਤਥਾਜਾਤਿਕਾ ਭੋਗਾਪਿਸ੍ਸ ਨ ਹੋਨ੍ਤਿ. ਨ ਚ ਪੁਞ੍ਞਾਨਿ ਕੁਬ੍ਬਤੀਤਿ ਪੁਞ੍ਞਾਨਿ ਚ ਨ ਕਰੋਤਿ. ਏਤ੍ਤਾਵਤਾ ਭੋਗੁਪ੍ਪਾਦਨਚਕ੍ਖੁਨੋ ਚ ਪੁਞ੍ਞਕਰਣਚਕ੍ਖੁਨੋ ਚ ਅਭਾਵੋ ਵੁਤ੍ਤੋ. ਉਭਯਤ੍ਥ ਕਲਿਗ੍ਗਾਹੋਤਿ ਇਧਲੋਕੇ ਚ ਪਰਲੋਕੇ ਚਾਤਿ ਉਭਯਸ੍ਮਿਮ੍ਪਿ ਅਪਰਦ੍ਧਗ੍ਗਾਹੋ, ਪਰਾਜਯਗ੍ਗਾਹੋ ਹੋਤੀਤਿ ਅਤ੍ਥੋ. ਅਥ ਵਾ ਉਭਯਤ੍ਥ ਕਲਿਗ੍ਗਾਹੋਤਿ ਉਭਯੇਸਮ੍ਪਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਾਨਂ ਅਤ੍ਥਾਨਂ ਕਲਿਗ੍ਗਾਹੋ, ਪਰਾਜਯਗ੍ਗਾਹੋਤਿ ਅਤ੍ਥੋ. ਧਮ੍ਮਾਧਮ੍ਮੇਨਾਤਿ ਦਸਕੁਸਲਕਮ੍ਮਪਥਧਮ੍ਮੇਨਪਿ ਦਸਅਕੁਸਲਕਮ੍ਮਪਥਅਧਮ੍ਮੇਨਪਿ. ਸਠੋਤਿ ਕੇਰਾਟਿਕੋ. ਭੋਗਾਨਿ ਪਰਿਯੇਸਤੀਤਿ ਭੋਗੇ ਗਵੇਸਤਿ. ਥੇਯ੍ਯੇਨ ਕੂਟਕਮ੍ਮੇਨ, ਮੁਸਾਵਾਦੇਨ ਚੂਭਯਨ੍ਤਿ ਥੇਯ੍ਯਾਦੀਸੁ ਉਭਯੇਨ ਪਰਿਯੇਸਤੀਤਿ ਅਤ੍ਥੋ. ਕਥਂ? ਥੇਯ੍ਯੇਨ ਕੂਟਕਮ੍ਮੇਨ ਚ ਪਰਿਯੇਸਤਿ, ਥੇਯ੍ਯੇਨ ਮੁਸਾਵਾਦੇਨ ਚ ਪਰਿਯੇਸਤਿ, ਕੂਟਕਮ੍ਮੇਨ ਮੁਸਾਵਾਦੇਨ ਚ ਪਰਿਯੇਸਤਿ. ਸਙ੍ਘਾਤੁਨ੍ਤਿ ਸਙ੍ਘਰਿਤੁਂ. ਧਮ੍ਮਲਦ੍ਧੇਹੀਤਿ ਦਸਕੁਸਲਕਮ੍ਮਪਥਧਮ੍ਮਂ ਅਕੋਪੇਤ੍ਵਾ ਲਦ੍ਧੇਹਿ. ਉਟ੍ਠਾਨਾਧਿਗਤਨ੍ਤਿ ਵੀਰਿਯੇਨ ਅਧਿਗਤਂ. ਅਬ੍ਯਗ੍ਘਮਾਨਸੋਤਿ ਨਿਬ੍ਬਿਚਿਕਿਚ੍ਛਚਿਤ੍ਤੋ. ਭਦ੍ਦਕਂ ਠਾਨਨ੍ਤਿ ਸੇਟ੍ਠਂ ਦੇਵਟ੍ਠਾਨਂ. ਨ ਸੋਚਤੀਤਿ ਯਸ੍ਮਿਂ ਠਾਨੇ ਅਨ੍ਤੋਸੋਕੇਨ ਨ ਸੋਚਤਿ.
੧੦. ਅਵਕੁਜ੍ਜਸੁਤ੍ਤਵਣ੍ਣਨਾ
੩੦. ਦਸਮੇ ਅਵਕੁਜ੍ਜਪਞ੍ਞੋਤਿ ਅਧੋਮੁਖਪਞ੍ਞੋ. ਉਚ੍ਛਙ੍ਗਪਞ੍ਞੋਤਿ ਉਚ੍ਛਙ੍ਗਸਦਿਸਪਞ੍ਞੋ. ਪੁਥੁਪਞ੍ਞੋਤਿ ਵਿਤ੍ਥਾਰਿਕਪਞ੍ਞੋ. ਆਦਿਕਲ੍ਯਾਣਨ੍ਤਿਆਦੀਸੁ ਆਦੀਤਿ ਪੁਬ੍ਬਪਟ੍ਠਪਨਾ. ਮਜ੍ਝਨ੍ਤਿ ਕਥਾਵੇਮਜ੍ਝਂ. ਪਰਿਯੋਸਾਨਨ੍ਤਿ ਸਨ੍ਨਿਟ੍ਠਾਨਂ. ਇਤਿਸ੍ਸ ਤੇ ਧਮ੍ਮਂ ਕਥੇਨ੍ਤਾ ਪੁਬ੍ਬਪਟ੍ਠਪਨੇਪਿ ਕਲ੍ਯਾਣਂ ਭਦ੍ਦਕਂ ਅਨਵਜ੍ਜਮੇਵ ਕਤ੍ਵਾ ਕਥੇਨ੍ਤਿ, ਵੇਮਜ੍ਝੇਪਿ ਪਰਿਯੋਸਾਨੇਪਿ. ਏਤ੍ਥ ਚ ਅਤ੍ਥਿ ਦੇਸਨਾਯ ਆਦਿਮਜ੍ਝਪਰਿਯੋਸਾਨਾਨਿ, ਅਤ੍ਥਿ ਸਾਸਨਸ੍ਸ. ਤਤ੍ਥ ਦੇਸਨਾਯ ਤਾਵ ਚਤੁਪ੍ਪਦਿਕਗਾਥਾਯ ਪਠਮਪਦਂ ਆਦਿ, ਦ੍ਵੇ ਪਦਾਨਿ ਮਜ੍ਝਂ, ਅਵਸਾਨਪਦਂ ਪਰਿਯੋਸਾਨਂ. ਏਕਾਨੁਸਨ੍ਧਿਕਸ੍ਸ ਸੁਤ੍ਤਸ੍ਸ ਨਿਦਾਨਂ ਆਦਿ, ਅਨੁਸਨ੍ਧਿ ਮਜ੍ਝਂ, ਇਦਮਵੋਚਾਤਿ ਅਪ੍ਪਨਾ ਪਰਿਯੋਸਾਨਂ. ਅਨੇਕਾਨੁਸਨ੍ਧਿਕਸ੍ਸ ਪਠਮੋ ਅਨੁਸਨ੍ਧਿ ਆਦਿ, ਤਤੋ ਪਰਂ ਏਕੋ ਵਾ ਅਨੇਕੇ ਵਾ ਮਜ੍ਝਂ, ਪਚ੍ਛਿਮੋ ਪਰਿਯੋਸਾਨਂ. ਅਯਂ ਤਾਵ ਦੇਸਨਾਯ ਨਯੋ. ਸਾਸਨਸ੍ਸ ਪਨ ਸੀਲਂ ਆਦਿ, ਸਮਾਧਿ ਮਜ੍ਝਂ, ਵਿਪਸ੍ਸਨਾ ਪਰਿਯੋਸਾਨਂ. ਸਮਾਧਿ ਵਾ ਆਦਿ, ਵਿਪਸ੍ਸਨਾ ਮਜ੍ਝਂ, ਮਗ੍ਗੋ ਪਰਿਯੋਸਾਨਂ. ਵਿਪਸ੍ਸਨਾ ਵਾ ਆਦਿ, ਮਗ੍ਗੋ ਮਜ੍ਝਂ, ਫਲਂ ਪਰਿਯੋਸਾਨਂ. ਮਗ੍ਗੋ ਵਾ ਆਦਿ, ਫਲਂ ਮਜ੍ਝਂ, ਨਿਬ੍ਬਾਨਂ ਪਰਿਯੋਸਾਨਂ. ਦ੍ਵੇ ਦ੍ਵੇ ਵਾ ਕਯਿਰਮਾਨੇ ਸੀਲਸਮਾਧਯੋ ਆਦਿ, ਵਿਪਸ੍ਸਨਾਮਗ੍ਗਾ ਮਜ੍ਝਂ, ਫਲਨਿਬ੍ਬਾਨਾਨਿ ਪਰਿਯੋਸਾਨਂ.
ਸਾਤ੍ਥਨ੍ਤਿ ਸਾਤ੍ਥਕਂ ਕਤ੍ਵਾ ਦੇਸੇਨ੍ਤਿ. ਸਬ੍ਯਞ੍ਜਨਨ੍ਤਿ ਅਕ੍ਖਰਪਾਰਿਪੂਰਿਂ ਕਤ੍ਵਾ ਦੇਸੇਨ੍ਤਿ. ਕੇਵਲਪਰਿਪੁਣ੍ਣਨ੍ਤਿ ਸਕਲਪਰਿਪੁਣ੍ਣਂ ਅਨੂਨਂ ਕਤ੍ਵਾ ਦੇਸੇਨ੍ਤਿ. ਪਰਿਸੁਦ੍ਧਨ੍ਤਿ ਪਰਿਸੁਦ੍ਧਂ ਨਿਜ੍ਜਟਂ ਨਿਗ੍ਗਣ੍ਠਿਂ ਕਤ੍ਵਾ ਦੇਸੇਨ੍ਤਿ. ਬ੍ਰਹ੍ਮਚਰਿਯਂ ਪਕਾਸੇਨ੍ਤੀਤਿ ਏਵਂ ਦੇਸੇਨ੍ਤਾ ਚ ਸੇਟ੍ਠਚਰਿਯਭੂਤਂ ਸਿਕ੍ਖਤ੍ਤਯਸਙ੍ਗਹਿਤਂ ਅਰਿਯਂ ਅਟ੍ਠਙ੍ਗਿਕਂ ਮਗ੍ਗਂ ਪਕਾਸੇਨ੍ਤਿ. ਨੇਵ ਆਦਿਂ ਮਨਸਿ ਕਰੋਤੀਤਿ ਨੇਵ ਪੁਬ੍ਬਪਟ੍ਠਪਨਂ ਮਨਸਿ ਕਰੋਤਿ.
ਕੁਮ੍ਭੋਤਿ ਘਟੋ. ਨਿਕੁਜ੍ਜੋਤਿ ਅਧੋਮੁਖੋ ਠਪਿਤੋ. ਏਵਮੇਵ ਖੋਤਿ ਏਤ੍ਥ ਕੁਮ੍ਭੋ ਨਿਕੁਜ੍ਜੋ ਵਿਯ ਅਵਕੁਜ੍ਜਪਞ੍ਞੋ ਪੁਗ੍ਗਲੋ ਦਟ੍ਠਬ੍ਬੋ, ਉਦਕਾਸਿਞ੍ਚਨਕਾਲੋ ਵਿਯ ਧਮ੍ਮਦੇਸਨਾਯ ਲਦ੍ਧਕਾਲੋ, ਉਦਕਸ੍ਸ ਵਿਵਟ੍ਟਨਕਾਲੋ ਵਿਯ ਤਸ੍ਮਿਂ ਆਸਨੇ ਨਿਸਿਨ੍ਨਸ੍ਸ ਉਗ੍ਗਹੇਤੁਂ ਅਸਮਤ੍ਥਕਾਲੋ, ਉਦਕਸ੍ਸ ਅਸਣ੍ਠਾਨਕਾਲੋ ਵਿਯ ਵੁਟ੍ਠਹਿਤ੍ਵਾ ਅਸਲ੍ਲਕ੍ਖਣਕਾਲੋ ਵੇਦਿਤਬ੍ਬੋ.
ਆਕਿਣ੍ਣਾਨੀਤਿ ਪਕ੍ਖਿਤ੍ਤਾਨਿ. ਸਤਿਸਮ੍ਮੋਸਾਯ ਪਕਿਰੇਯ੍ਯਾਤਿ ਮੁਟ੍ਠਸ੍ਸਤਿਤਾਯ ਵਿਕਿਰੇਯ੍ਯ. ਏਵਮੇਵ ਖੋਤਿ ਏਤ੍ਥ ਉਚ੍ਛਙ੍ਗੋ ਵਿਯ ਉਚ੍ਛਙ੍ਗਪਞ੍ਞੋ ਪੁਗ੍ਗਲੋ ਦਟ੍ਠਬ੍ਬੋ, ਨਾਨਾਖਜ੍ਜਕਾਨਿ ਵਿਯ ਨਾਨਪ੍ਪਕਾਰਂ ਬੁਦ੍ਧਵਚਨਂ, ਉਚ੍ਛਙ੍ਗੇ ਨਾਨਾਖਜ੍ਜਕਾਨਿ ਖਾਦਨ੍ਤਸ੍ਸ ਨਿਸਿਨ੍ਨਕਾਲੋ ਵਿਯ ਤਸ੍ਮਿਂ ਆਸਨੇ ਨਿਸਿਨ੍ਨਸ੍ਸ ਉਗ੍ਗਣ੍ਹਨਕਾਲੋ, ਵੁਟ੍ਠਹਨ੍ਤਸ੍ਸ ਸਤਿਸਮ੍ਮੋਸਾ ਪਕਿਰਣਕਾਲੋ ਵਿਯ ਤਸ੍ਮਾ ਆਸਨਾ ਵੁਟ੍ਠਾਯ ਗਚ੍ਛਨ੍ਤਸ੍ਸ ਅਸਲ੍ਲਕ੍ਖਣਕਾਲੋ ਵੇਦਿਤਬ੍ਬੋ.
ਉਕ੍ਕੁਜ੍ਜੋਤਿ ਉਪਰਿਮੁਖੋ ਠਪਿਤੋ. ਸਣ੍ਠਾਤੀਤਿ ਪਤਿਟ੍ਠਹਤਿ. ਏਵਮੇਵ ਖੋਤਿ ਏਤ੍ਥ ਉਪਰਿਮੁਖੋ ਠਪਿਤੋ ਕੁਮ੍ਭੋ ਵਿਯ ਪੁਥੁਪਞ੍ਞੋ ਪੁਗ੍ਗਲੋ ਦਟ੍ਠਬ੍ਬੋ, ਉਦਕਸ੍ਸ ਆਸਿਤ੍ਤਕਾਲੋ ਵਿਯ ਦੇਸਨਾਯ ਲਦ੍ਧਕਾਲੋ, ਉਦਕਸ੍ਸ ਸਣ੍ਠਾਨਕਾਲੋ ਵਿਯ ਤਤ੍ਥ ਨਿਸਿਨ੍ਨਸ੍ਸ ਉਗ੍ਗਣ੍ਹਨਕਾਲੋ, ਨੋ ਵਿਵਟ੍ਟਨਕਾਲੋ ਵਿਯ ਵੁਟ੍ਠਾਯ ਗਚ੍ਛਨ੍ਤਸ੍ਸ ਸਲ੍ਲਕ੍ਖਣਕਾਲੋ ਵੇਦਿਤਬ੍ਬੋ.
ਦੁਮ੍ਮੇਧੋਤਿ ਨਿਪ੍ਪਞ੍ਞੋ. ਅਵਿਚਕ੍ਖਣੋਤਿ ਸਂਵਿਦਹਨਪਞ੍ਞਾਯ ਰਹਿਤੋ. ਗਨ੍ਤਾਤਿ ਗਮਨਸੀਲੋ. ਸੇਯ੍ਯੋ ਏਤੇਨ ਵੁਚ੍ਚਤੀਤਿ ਏਤਸ੍ਮਾ ਪੁਗ੍ਗਲਾ ਉਤ੍ਤਰਿਤਰੋਤਿ ਵੁਚ੍ਚਤਿ. ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋਤਿ ਨਵਲੋਕੁਤ੍ਤਰਧਮ੍ਮਸ੍ਸ ਅਨੁਧਮ੍ਮਂ ਸਹ ਸੀਲੇਨ ਪੁਬ੍ਬਭਾਗਪਟਿਪਦਂ ਪਟਿਪਨ੍ਨੋ. ਦੁਕ੍ਖਸ੍ਸਾਤਿ ਵਟ੍ਟਦੁਕ੍ਖਸ੍ਸ. ਅਨ੍ਤਕਰੋ ਸਿਯਾਤਿ ਕੋਟਿਕਰੋ ਪਰਿਚ੍ਛੇਦਕਰੋ ਪਰਿਵਟੁਮਕਰੋ ਭਵੇਯ੍ਯਾਤਿ.
ਪੁਗ੍ਗਲਵਗ੍ਗੋ ਤਤਿਯੋ.
੪. ਦੇਵਦੂਤਵਗ੍ਗੋ
੧. ਸਬ੍ਰਹ੍ਮਕਸੁਤ੍ਤਵਣ੍ਣਨਾ
੩੧. ਚਤੁਤ੍ਥਸ੍ਸ ਪਠਮੇ ਅਜ੍ਝਾਗਾਰੇਤਿ ਸਕੇ ਘਰੇ. ਪੂਜਿਤਾ ਹੋਨ੍ਤੀਤਿ ਯਂ ਘਰੇ ਅਤ੍ਥਿ, ਤੇਨ ਪਟਿਜਗ੍ਗਿਤਾ ਗੋਪਿਤਾ ਹੋਨ੍ਤਿ. ਇਤਿ ਮਾਤਾਪਿਤੁਪੂਜਕਾਨਿ ਕੁਲਾਨਿ ਮਾਤਾਪਿਤੂਹਿ ਸਬ੍ਰਹ੍ਮਕਾਨੀਤਿ ਪਕਾਸੇਤ੍ਵਾ ਇਦਾਨਿ ਨੇਸਂ ਸਪੁਬ੍ਬਾਚਰਿਯਕਾਦਿਭਾਵਂ ਪਕਾਸੇਨ੍ਤੋ ਸਪੁਬ੍ਬਾਚਰਿਯਕਾਨੀਤਿਆਦਿਮਾਹ. ਤਤ੍ਥ ਬ੍ਰਹ੍ਮਾਤਿਆਦੀਨਿ ਤੇਸਂ ਬ੍ਰਹ੍ਮਾਦਿਭਾਵਸਾਧਨਤ੍ਥਂ ਵੁਤ੍ਤਾਨਿ. ਬਹੁਕਾਰਾਤਿ ਪੁਤ੍ਤਾਨਂ ਬਹੂਪਕਾਰਾ. ਆਪਾਦਕਾਤਿ ਜੀਵਿਤਸ੍ਸ ਆਪਾਦਕਾ. ਪੁਤ੍ਤਕਾਨਂ ਹਿ ਮਾਤਾਪਿਤੂਹਿ ਜੀਵਿਤਂ ਆਪਾਦਿਤਂ ਪਾਲਿਤਂ ਘਟਿਤਂ ਅਨੁਪ੍ਪਬਨ੍ਧੇਨ ਪਵਤ੍ਤਿਤਂ. ਪੋਸਕਾਤਿ ਹਤ੍ਥਪਾਦੇ ਵਡ੍ਢੇਤ੍ਵਾ ਹਦਯਲੋਹਿਤਂ ਪਾਯੇਤ੍ਵਾ ਪੋਸੇਤਾਰੋ. ਇਮਸ੍ਸ ਲੋਕਸ੍ਸ ਦਸ੍ਸੇਤਾਰੋਤਿ ਪੁਤ੍ਤਾਨਂ ਹਿ ਇਮਸ੍ਮਿਂ ਲੋਕੇ ਇਟ੍ਠਾਨਿਟ੍ਠਾਰਮ੍ਮਣਸ੍ਸ ਦਸ੍ਸਨਂ ਨਾਮ ਮਾਤਾਪਿਤਰੋ ਨਿਸ੍ਸਾਯ ਜਾਤਨ੍ਤਿ ਇਮਸ੍ਸ ਲੋਕਸ੍ਸ ਦਸ੍ਸੇਤਾਰੋ ਨਾਮ.
ਬ੍ਰਹ੍ਮਾਤਿ ਮਾਤਾਪਿਤਰੋਤਿ ਸੇਟ੍ਠਾਧਿਵਚਨਂ. ਯਥਾ ਬ੍ਰਹ੍ਮੁਨੋ ਚਤਸ੍ਸੋ ਭਾਵਨਾ ਅਵਿਜਹਿਤਾ ਹੋਨ੍ਤਿ ਮੇਤ੍ਤਾ ਕਰੁਣਾ ਮੁਦਿਤਾ ਉਪੇਕ੍ਖਾਤਿ, ਏਵਮੇਵ ਮਾਤਾਪਿਤੂਨਂ ਪੁਤ੍ਤਕੇਸੁ ਚਤਸ੍ਸੋ ਭਾਵਨਾ ਅਵਿਜਹਿਤਾ ਹੋਨ੍ਤਿ. ਤਾ ਤਸ੍ਮਿਂ ਤਸ੍ਮਿਂ ਕਾਲੇ ਵੇਦਿਤਬ੍ਬਾ – ਕੁਚ੍ਛਿਗਤਸ੍ਮਿਂ ਹਿ ਦਾਰਕੇ ‘‘ਕਦਾ ਨੁ ਖੋ ਪੁਤ੍ਤਕਂ ਅਰੋਗਂ ਪਰਿਪੁਣ੍ਣਙ੍ਗਪਚ੍ਚਙ੍ਗਂ ਪਸ੍ਸਿਸ੍ਸਾਮਾ’’ਤਿ ਮਾਤਾਪਿਤੂਨਂ ਮੇਤ੍ਤਚਿਤ੍ਤਂ ਉਪ੍ਪਜ੍ਜਤਿ. ਯਦਾ ਪਨੇਸ ਮਨ੍ਦੋ ਉਤ੍ਤਾਨਸੇਯ੍ਯਕੋ ਊਕਾਹਿ ਵਾ ਮਙ੍ਕੁਲਾਦੀਹਿ ਪਾਣਕੇਹਿ ਦਟ੍ਠੋ ਦੁਕ੍ਖਸੇਯ੍ਯਾਯ ਵਾ ਪਨ ਪੀਲ਼ਿਤੋ ਪਰੋਦਤਿ ਵਿਰਵਤਿ, ਤਦਾਸ੍ਸ ਸਦ੍ਦਂ ਸੁਤ੍ਵਾ ਮਾਤਾਪਿਤੂਨਂ ਕਾਰੁਞ੍ਞਂ ਉਪ੍ਪਜ੍ਜਤਿ, ਆਧਾਵਿਤ੍ਵਾ ਵਿਧਾਵਿਤ੍ਵਾ ਕੀਲ਼ਨਕਾਲੇ ਪਨ ਲੋਭਨੀਯਵਯਸ੍ਮਿਂ ਵਾ ਠਿਤਕਾਲੇ ਦਾਰਕਂ ਓਲੋਕੇਤ੍ਵਾ ਮਾਤਾਪਿਤੂਨਂ ਚਿਤ੍ਤਂ ਸਪ੍ਪਿਮਣ੍ਡੇ ਪਕ੍ਖਿਤ੍ਤਸਤਵਿਹਤਕਪ੍ਪਾਸਪਿਚੁਪਟਲਂ ਵਿਯ ਮੁਦੁਕਂ ਹੋਤਿ ਆਮੋਦਿਤਂ ਪਮੋਦਿਤਂ, ਤਦਾ ਤੇਸਂ ਮੁਦਿਤਾ ਲਬ੍ਭਤਿ. ਯਦਾ ਪਨੇਸ ਪੁਤ੍ਤੋ ਦਾਰਾਭਰਣਂ ਪਚ੍ਚੁਪਟ੍ਠਾਪੇਤ੍ਵਾ ਪਾਟਿਯੇਕ੍ਕਂ ਅਗਾਰਂ ਅਜ੍ਝਾਵਸਤਿ, ਤਦਾ ਮਾਤਾਪਿਤੂਨਂ ‘‘ਸਕ੍ਕੋਤਿ ਦਾਨਿ ਨੋ ਪੁਤ੍ਤਕੋ ਅਤ੍ਤਨੋ ਧਮ੍ਮਤਾਯ ਯਾਪੇਤੁ’’ਨ੍ਤਿ ਮਜ੍ਝਤ੍ਤਭਾਵੋ ਉਪ੍ਪਜ੍ਜਤਿ, ਤਸ੍ਮਿਂ ਕਾਲੇ ਉਪੇਕ੍ਖਾ ਲਬ੍ਭਤੀਤਿ ਇਮਿਨਾ ਕਾਰਣੇਨ ‘‘ਬ੍ਰਹ੍ਮਾਤਿ ਮਾਤਾਪਿਤਰੋ’’ਤਿ ਵੁਤ੍ਤਂ.
ਪੁਬ੍ਬਾਚਰਿਯਾਤਿ ਵੁਚ੍ਚਰੇਤਿ ਮਾਤਾਪਿਤਰੋ ਹਿ ਜਾਤਕਾਲਤੋ ਪਟ੍ਠਾਯ ‘‘ਏਵਂ ਨਿਸੀਦ, ਏਵਂ ਤਿਟ੍ਠ, ਏਵਂ ਗਚ੍ਛ, ਏਵਂ ਸਯ, ਏਵਂ ਖਾਦ, ਏਵਂ ਭੁਞ੍ਜ, ਅਯਂ ਤੇ, ਤਾਤਾਤਿ ਵਤ੍ਤਬ੍ਬੋ, ਅਯਂ ਭਾਤਿਕਾਤਿ, ਅਯਂ ਭਗਿਨੀਤਿ, ਇਦਂ ਨਾਮ ਕਾਤੁਂ ਵਟ੍ਟਤਿ, ਇਦਂ ਨ ਵਟ੍ਟਤਿ, ਅਸੁਕਂ ਨਾਮ ਉਪਸਙ੍ਕਮਿਤੁਂ ਵਟ੍ਟਤਿ, ਅਸੁਕਂ ਨ ਵਟ੍ਟਤੀ’’ਤਿ ਗਾਹਾਪੇਨ੍ਤਿ ਸਿਕ੍ਖਾਪੇਨ੍ਤਿ. ਅਥਾਪਰਭਾਗੇ ਅਞ੍ਞੇ ਆਚਰਿਯਾ ਹਤ੍ਥਿਸਿਪ੍ਪਅਸ੍ਸਸਿਪ੍ਪਰਥਸਿਪ੍ਪਧਨੁਸਿਪ੍ਪਥਰੁਸਿਪ੍ਪਮੁਦ੍ਦਾਗਣਨਾਦੀਨਿ ਸਿਕ੍ਖਾਪੇਨ੍ਤਿ. ਅਞ੍ਞੋ ਸਰਣਾਨਿ ਦੇਤਿ, ਅਞ੍ਞੋ ਸੀਲੇਸੁ ਪਤਿਟ੍ਠਾਪੇਤਿ, ਅਞ੍ਞੋ ਪਬ੍ਬਾਜੇਤਿ, ਅਞ੍ਞੋ ਬੁਦ੍ਧਵਚਨਂ ਉਗ੍ਗਣ੍ਹਾਪੇਤਿ, ਅਞ੍ਞੋ ਉਪਸਮ੍ਪਾਦੇਤਿ, ਅਞ੍ਞੋ ਸੋਤਾਪਤ੍ਤਿਮਗ੍ਗਾਦੀਨਿ ਪਾਪੇਤਿ. ਇਤਿ ਸਬ੍ਬੇਪਿ ਤੇ ਪਚ੍ਛਾਚਰਿਯਾ ਨਾਮ ਹੋਨ੍ਤਿ, ਮਾਤਾਪਿਤਰੋ ਪਨ ਸਬ੍ਬਪਠਮਾ, ਤੇਨਾਹ – ‘‘ਪੁਬ੍ਬਾਚਰਿਯਾਤਿ ਵੁਚ੍ਚਰੇ’’ਤਿ. ਤਤ੍ਥ ਵੁਚ੍ਚਰੇਤਿ ਵੁਚ੍ਚਨ੍ਤਿ ਕਥਿਯਨ੍ਤਿ. ਆਹੁਨੇਯ੍ਯਾ ਚ ਪੁਤ੍ਤਾਨਨ੍ਤਿ ਪੁਤ੍ਤਾਨਂ ਆਹੁਤਂ ਪਾਹੁਤਂ ਅਭਿਸਙ੍ਖਤਂ ਅਨ੍ਨਪਾਨਾਦਿਂ ਅਰਹਨ੍ਤਿ, ਅਨੁਚ੍ਛਵਿਕਾ ਤਂ ਪਟਿਗ੍ਗਹੇਤੁਂ. ਤਸ੍ਮਾ ‘‘ਆਹੁਨੇਯ੍ਯਾ ਚ ਪੁਤ੍ਤਾਨ’’ਨ੍ਤਿ ਵੁਤ੍ਤਂ. ਪਜਾਯ ਅਨੁਕਮ੍ਪਕਾਤਿ ਪਰੇਸਂ ਪਾਣੇ ਅਚ੍ਛਿਨ੍ਦਿਤ੍ਵਾਪਿ ਅਤ੍ਤਨੋ ਪਜਂ ਪਟਿਜਗ੍ਗਨ੍ਤਿ ਗੋਪਾਯਨ੍ਤਿ. ਤਸ੍ਮਾ ‘‘ਪਜਾਯ ਅਨੁਕਮ੍ਪਕਾ’’ਤਿ ਵੁਤ੍ਤਂ.
ਨਮਸ੍ਸੇਯ੍ਯਾਤਿ ਨਮੋ ਕਰੇਯ੍ਯ. ਸਕ੍ਕਰੇਯ੍ਯਾਤਿ ਸਕ੍ਕਾਰੇਨ ਪਟਿਮਾਨੇਯ੍ਯ. ਇਦਾਨਿ ਤਂ ਸਕ੍ਕਾਰਂ ਦਸ੍ਸੇਨ੍ਤੋ ‘‘ਅਨ੍ਨੇਨਾ’’ਤਿਆਦਿਮਾਹ. ਤਤ੍ਥ ਅਨ੍ਨੇਨਾਤਿ ਯਾਗੁਭਤ੍ਤਖਾਦਨੀਯੇਨ. ਪਾਨੇਨਾਤਿ ਅਟ੍ਠਵਿਧਪਾਨੇਨ. ਵਤ੍ਥੇਨਾਤਿ ਨਿਵਾਸਨਪਾਰੁਪਨਕੇਨ ਵਤ੍ਥੇਨ. ਸਯਨੇਨਾਤਿ ਮਞ੍ਚਪੀਠਾਨੁਪ੍ਪਦਾਨੇਨ. ਉਚ੍ਛਾਦਨੇਨਾਤਿ ਦੁਗ੍ਗਨ੍ਧਂ ਪਟਿਵਿਨੋਦੇਤ੍ਵਾ ਸੁਗਨ੍ਧਕਰਣੁਚ੍ਛਾਦਨੇਨ. ਨ੍ਹਾਪਨੇਨਾਤਿ ਸੀਤੇ ਉਣ੍ਹੋਦਕੇਨ, ਉਣ੍ਹੇ ਸੀਤੋਦਕੇਨ ਗਤ੍ਤਾਨਿ ਪਰਿਸਿਞ੍ਚਿਤ੍ਵਾ ਨ੍ਹਾਪਨੇਨ. ਪਾਦਾਨਂ ਧੋਵਨੇਨਾਤਿ ਉਣ੍ਹੋਦਕਸੀਤੋਦਕੇਹਿ ਪਾਦਧੋਵਨੇਨ ਚੇਵ ਤੇਲਮਕ੍ਖਨੇਨ ਚ. ਪੇਚ੍ਚਾਤਿ ਪਰਲੋਕਂ ਗਨ੍ਤ੍ਵਾ. ਸਗ੍ਗੇ ਪਮੋਦਤੀਤਿ ਇਧ ਤਾਵ ਮਾਤਾਪਿਤੂਸੁ ਪਾਰਿਚਰਿਯਂ ਦਿਸ੍ਵਾ ਪਾਰਿਚਰਿਯਕਾਰਣਾ ਤਂ ਪਣ੍ਡਿਤਮਨੁਸ੍ਸਾ ਇਧੇਵ ਪਸਂਸਨ੍ਤਿ, ਪਰਲੋਕਂ ਪਨ ਗਨ੍ਤ੍ਵਾ ਸਗ੍ਗੇ ਠਿਤੋ ਸੋ ਮਾਤਾਪਿਤੁਉਪਟ੍ਠਾਕੋ ਦਿਬ੍ਬਸਮ੍ਪਤ੍ਤੀਹਿ ਆਮੋਦਤਿ ਪਮੋਦਤੀਤਿ.
੨. ਆਨਨ੍ਦਸੁਤ੍ਤਵਣ੍ਣਨਾ
੩੨. ਦੁਤਿਯੇ ਤਥਾਰੂਪੋਤਿ ਤਥਾਜਾਤਿਕੋ. ਸਮਾਧਿਪਟਿਲਾਭੋਤਿ ਚਿਤ੍ਤੇਕਗ੍ਗਤਾਲਾਭੋ. ਇਮਸ੍ਮਿਂ ਚ ਸਵਿਞ੍ਞਾਣਕੇਤਿ ਏਤ੍ਥ ਅਤ੍ਤਨੋ ਚ ਪਰਸ੍ਸ ਚਾਤਿ ਉਭਯੇਸਮ੍ਪਿ ਕਾਯੋ ਸਵਿਞ੍ਞਾਣਕਟ੍ਠੇਨ ਏਕਤੋ ਕਤ੍ਵਾ ਇਮਸ੍ਮਿਨ੍ਤਿ ਵੁਤ੍ਤੋ. ਅਹਙ੍ਕਾਰਮਮਙ੍ਕਾਰਮਾਨਾਨੁਸਯਾਤਿ ਅਹਙ੍ਕਾਰਦਿਟ੍ਠਿ ਚ ਮਮਙ੍ਕਾਰਤਣ੍ਹਾ ਚ ਮਾਨਾਨੁਸਯੋ ਚਾਤਿ ਅਤ੍ਤਨੋ ਚ ਪਰਸ੍ਸ ਚ ਕਿਲੇਸਾ. ਨਾਸ੍ਸੂਤਿ ਨ ਭਵੇਯ੍ਯੁਂ. ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਸੂਤਿ ਰੂਪਨਿਮਿਤ੍ਤਂ, ਸਦ੍ਦਨਿਮਿਤ੍ਤਂ, ਗਨ੍ਧਨਿਮਿਤ੍ਤਂ, ਰਸਨਿਮਿਤ੍ਤਂ, ਫੋਟ੍ਠਬ੍ਬਨਿਮਿਤ੍ਤਂ, ਸਸ੍ਸਤਾਦਿਨਿਮਿਤ੍ਤਂ, ਪੁਗ੍ਗਲਨਿਮਿਤ੍ਤਂ ਧਮ੍ਮਨਿਮਿਤ੍ਤਨ੍ਤਿ ਏਵਰੂਪੇਸੁ ਚ ਬਹਿਦ੍ਧਾ ਸਬ੍ਬਨਿਮਿਤ੍ਤੇਸੁ. ਚੇਤੋਵਿਮੁਤ੍ਤਿਂ ਪਞ੍ਞਾਵਿਮੁਤ੍ਤਿਨ੍ਤਿ ਫਲਸਮਾਧਿਞ੍ਚੇਵ ਫਲਞਾਣਞ੍ਚ. ਸਿਯਾਤਿ ਭਵੇਯ੍ਯ.
ਇਧਾਨਨ੍ਦ, ਭਿਕ੍ਖੁਨੋਤਿ, ਆਨਨ੍ਦ, ਇਮਸ੍ਮਿਂ ਸਾਸਨੇ ਭਿਕ੍ਖੁਨੋ. ਏਤਂ ਸਨ੍ਤਂ ਏਤਂ ਪਣੀਤਨ੍ਤਿ ਨਿਬ੍ਬਾਨਂ ਦਸ੍ਸੇਨ੍ਤੋ ਆਹ. ਨਿਬ੍ਬਾਨਂ ਹਿ ਕਿਲੇਸਾਨਂ ਸਨ੍ਤਤਾਯ ਸਨ੍ਤਂ ਨਾਮ, ਨਿਬ੍ਬਾਨਂ ਸਨ੍ਤਨ੍ਤਿ ਸਮਾਪਤ੍ਤਿਂ ਅਪ੍ਪੇਤ੍ਵਾਵ ਦਿਵਸਮ੍ਪਿ ਨਿਸਿਨ੍ਨਸ੍ਸ ਚਿਤ੍ਤੁਪ੍ਪਾਦੋ ਸਨ੍ਤਨ੍ਤੇਵ ਪਵਤ੍ਤਤੀਤਿਪਿ ਸਨ੍ਤਂ. ਪਣੀਤਨ੍ਤਿ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸਿਨ੍ਨਸ੍ਸਾਪਿ ਚਿਤ੍ਤੁਪ੍ਪਾਦੋ ਪਣੀਤਨ੍ਤੇਵ ਪਵਤ੍ਤਤੀਤਿ ਨਿਬ੍ਬਾਨਂ ਪਣੀਤਂ ਨਾਮ. ਸਬ੍ਬਸਙ੍ਖਾਰਸਮਥੋਤਿਆਦੀਨਿਪਿ ਤਸ੍ਸੇਵ ਵੇਵਚਨਾਨਿ. ‘‘ਸਬ੍ਬਸਙ੍ਖਾਰਸਮਥੋ’’ਤਿ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸਿਨ੍ਨਸ੍ਸ ਹਿ ਦਿਵਸਭਾਗਮ੍ਪਿ ਚਿਤ੍ਤੁਪ੍ਪਾਦੋ ਸਬ੍ਬਸਙ੍ਖਾਰਸਮਥੋਤੇਵ ਪਵਤ੍ਤਤਿ…ਪੇ… ਤਥਾ ਤੀਸੁ ਭਵੇਸੁ ਵਾਨਸਙ੍ਖਾਤਾਯ ਤਣ੍ਹਾਯ ਅਭਾਵੇਨ ਨਿਬ੍ਬਾਨਨ੍ਤਿ ਲਦ੍ਧਨਾਮੇ ਤਸ੍ਮਿਂ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸਿਨ੍ਨਸ੍ਸ ਚਿਤ੍ਤੁਪ੍ਪਾਦੋ ਨਿਬ੍ਬਾਨਂ ਨਿਬ੍ਬਾਨਨ੍ਤੇਵ ਪਵਤ੍ਤਤੀਤਿ ਸਬ੍ਬਸਙ੍ਖਾਰਸਮਥੋਤਿਆਦੀਨਿ ਨਾਮਾਨਿ ਲਭਤਿ. ਇਮਸ੍ਮਿਂ ਪਨ ਅਟ੍ਠਵਿਧੇ ਆਭੋਗਸਮਨ੍ਨਾਹਾਰੇ ਇਮਸ੍ਮਿਂ ਠਾਨੇ ਏਕੋਪਿ ਲਬ੍ਭਤਿ, ਦ੍ਵੇਪਿ ਸਬ੍ਬੇਪਿ ਲਬ੍ਭਨ੍ਤੇਵ.
ਸਙ੍ਖਾਯਾਤਿ ਞਾਣੇਨ ਜਾਨਿਤ੍ਵਾ. ਪਰੋਪਰਾਨੀਤਿ ਪਰਾਨਿ ਚ ਓਪਰਾਨਿ ਚ. ਪਰਅਤ੍ਤਭਾਵਸਕਅਤ੍ਤਭਾਵਾਨਿ ਹਿ ਪਰਾਨਿ ਚ ਓਪਰਾਨਿ ਚਾਤਿ ਵੁਤ੍ਤਂ ਹੋਤਿ. ਯਸ੍ਸਾਤਿ ਯਸ੍ਸ ਅਰਹਤੋ. ਇਞ੍ਜਿਤਨ੍ਤਿ ਰਾਗਿਞ੍ਜਿਤਂ ਦੋਸਮੋਹਮਾਨਦਿਟ੍ਠਿਕਿਲੇਸਦੁਚ੍ਚਰਿਤਿਞ੍ਜਿਤਨ੍ਤਿ ਇਮਾਨਿ ਸਤ੍ਤ ਇਞ੍ਜਿਤਾਨਿ ਚਲਿਤਾਨਿ ਫਨ੍ਦਿਤਾਨਿ. ਨਤ੍ਥਿ ਕੁਹਿਞ੍ਚੀਤਿ ਕਤ੍ਥਚਿ ਏਕਾਰਮ੍ਮਣੇਪਿ ਨਤ੍ਥਿ. ਸਨ੍ਤੋਤਿ ਪਚ੍ਚਨੀਕਕਿਲੇਸਾਨਂ ਸਨ੍ਤਤਾਯ ਸਨ੍ਤੋ. ਵਿਧੂਮੋਤਿ ਕਾਯਦੁਚ੍ਚਰਿਤਾਦਿਧੂਮਵਿਰਹਿਤੋ. ਅਨੀਘੋਤਿ ਰਾਗਾਦਿਈਘਵਿਰਹਿਤੋ. ਨਿਰਾਸੋਤਿ ਨਿਤ੍ਤਣ੍ਹੋ. ਅਤਾਰੀਤਿ ਤਿਣ੍ਣੋ ਉਤ੍ਤਿਣ੍ਣੋ ਸਮਤਿਕ੍ਕਨ੍ਤੋ. ਸੋਤਿ ਸੋ ਅਰਹਂ ਖੀਣਾਸਵੋ. ਜਾਤਿਜਰਨ੍ਤਿ ਏਤ੍ਥ ਜਾਤਿਜਰਾਗਹਣੇਨੇਵ ਬ੍ਯਾਧਿਮਰਣਮ੍ਪਿ ਗਹਿਤਮੇਵਾਤਿ ਵੇਦਿਤਬ੍ਬਂ. ਇਤਿ ਸੁਤ੍ਤਨ੍ਤੇਪਿ ਗਾਥਾਯਪਿ ਅਰਹਤ੍ਤਫਲਸਮਾਪਤ੍ਤਿਯੇਵ ਕਥਿਤਾਤਿ.
੩. ਸਾਰਿਪੁਤ੍ਤਸੁਤ੍ਤਵਣ੍ਣਨਾ
੩੩. ਤਤਿਯੇ ਸਂਖਿਤ੍ਤੇਨਾਤਿ ਮਾਤਿਕਾਠਪਨੇਨ. ਵਿਤ੍ਥਾਰੇਨਾਤਿ ਠਪਿਤਮਾਤਿਕਾਵਿਭਜਨੇਨ. ਸਂਖਿਤ੍ਤਵਿਤ੍ਥਾਰੇਨਾਤਿ ਕਾਲੇ ਸਂਖਿਤ੍ਤੇਨ ਕਾਲੇ ਵਿਤ੍ਥਾਰੇਨ. ਅਞ੍ਞਾਤਾਰੋ ਚ ਦੁਲ੍ਲਭਾਤਿ ਪਟਿਵਿਜ੍ਝਨਕਪੁਗ੍ਗਲਾ ਪਨ ਦੁਲ੍ਲਭਾ. ਇਦਂ ਭਗਵਾ ‘‘ਸਾਰਿਪੁਤ੍ਤਤ੍ਥੇਰਸ੍ਸ ਞਾਣਂ ਘਟ੍ਟੇਮੀ’’ਤਿ ਅਧਿਪ੍ਪਾਯੇਨ ਕਥੇਸਿ. ਤਂ ਸੁਤ੍ਵਾ ਥੇਰੋ ਕਿਞ੍ਚਾਪਿ ‘‘ਅਹਂ, ਭਨ੍ਤੇ, ਆਜਾਨਿਸ੍ਸਾਮੀ’’ਤਿ ਨ ਵਦਤਿ, ਅਧਿਪ੍ਪਾਯੇਨ ਪਨ ‘‘ਵਿਸ੍ਸਤ੍ਥਾ ਤੁਮ੍ਹੇ, ਭਨ੍ਤੇ, ਦੇਸੇਥ, ਅਹਂ ਤੁਮ੍ਹੇਹਿ ਦੇਸਿਤਂ ਧਮ੍ਮਂ ਨਯਸਤੇਨ ਨਯਸਹਸ੍ਸੇਨ ਪਟਿਵਿਜ੍ਝਿਸ੍ਸਾਮਿ, ਮਮੇਸ ਭਾਰੋ ਹੋਤੂ’’ਤਿ ਸਤ੍ਥਾਰਂ ਦੇਸਨਾਯ ਉਸ੍ਸਾਹੇਨ੍ਤੋ ਏਤਸ੍ਸ ਭਗਵਾ ਕਾਲੋਤਿਆਦਿਮਾਹ.
ਅਥਸ੍ਸ ਸਤ੍ਥਾ ਤਸ੍ਮਾਤਿਹਾਤਿ ਦੇਸਨਂ ਆਰਭਿ. ਤਤ੍ਥ ਇਮਸ੍ਮਿਞ੍ਚ ਸਵਿਞ੍ਞਾਣਕੇਤਿਆਦਿ ਵੁਤ੍ਤਨਯਮੇਵ. ਅਚ੍ਛੇਚ੍ਛਿ ਤਣ੍ਹਨ੍ਤਿ ਮਗ੍ਗਞਾਣਸਤ੍ਥੇਨ ਤਣ੍ਹਂ ਛਿਨ੍ਦਿ. ਵਿਵਤ੍ਤਯਿ ਸਂਯੋਜਨਨ੍ਤਿ ਦਸਵਿਧਮ੍ਪਿ ਸਂਯੋਜਨਂ ਸਮੂਲਕਂ ਉਬ੍ਬਤ੍ਤੇਤ੍ਵਾ ਛਡ੍ਡੇਸਿ. ਸਮ੍ਮਾ ਮਾਨਾਭਿਸਮਯਾ ਅਨ੍ਤਮਕਾਸਿ ਦੁਕ੍ਖਸ੍ਸਾਤਿ ਸਮ੍ਮਾ ਉਪਾਯੇਨ ਸਮ੍ਮਾ ਪਟਿਪਤ੍ਤਿਯਾ ਨਵਵਿਧਸ੍ਸ ਮਾਨਸ੍ਸ ਪਹਾਨਾਭਿਸਮਯੇਨ ਵਟ੍ਟਦੁਕ੍ਖਸ੍ਸ ਅਨ੍ਤਮਕਾਸਿ. ਇਦਞ੍ਚ ਪਨ ਮੇਤਂ, ਸਾਰਿਪੁਤ੍ਤ, ਸਨ੍ਧਾਯ ਭਾਸਿਤਨ੍ਤਿ, ਸਾਰਿਪੁਤ੍ਤ, ਮਯਾ ਪਾਰਾਯਨੇ ਉਦਯਪਞ੍ਹੇ ਇਦਂ ਫਲਸਮਾਪਤ੍ਤਿਮੇਵ ਸਨ੍ਧਾਯ ਏਤਂ ਭਾਸਿਤਂ.
ਇਦਾਨਿ ਯਂ ਤਂ ਭਗਵਤਾ ਭਾਸਿਤਂ, ਤਂ ਦਸ੍ਸੇਨ੍ਤੋ ਪਹਾਨਂ ਕਾਮਸਞ੍ਞਾਨਨ੍ਤਿਆਦਿ ਆਰਦ੍ਧਂ. ਉਦਯਪਞ੍ਹੇ ਚ ਏਤਂ ਪਦਂ ‘‘ਪਹਾਨਂ ਕਾਮਚ੍ਛਨ੍ਦਾਨ’’ਨ੍ਤਿ (ਸੁ. ਨਿ. ੧੧੧੨; ਚੂਲ਼ਨਿ. ਉਦਯਮਾਣਵਪੁਚ੍ਛਾਨਿਦ੍ਦੇਸੋ ੭੫) ਆਗਤਂ, ਇਧ ਪਨ ਅਙ੍ਗੁਤ੍ਤਰਭਾਣਕੇਹਿ ‘‘ਕਾਮਸਞ੍ਞਾਨ’’ਨ੍ਤਿ ਆਰੋਪਿਤਂ. ਤਤ੍ਥ ਬ੍ਯਞ੍ਜਨਮੇਵ ਨਾਨਂ, ਅਤ੍ਥੋ ਪਨ ਏਕੋਯੇਵ. ਕਾਮਸਞ੍ਞਾਨਨ੍ਤਿ ਕਾਮੇ ਆਰਬ੍ਭ ਉਪ੍ਪਨ੍ਨਸਞ੍ਞਾਨਂ, ਅਟ੍ਠਹਿ ਵਾ ਲੋਭਸਹਗਤਚਿਤ੍ਤੇਹਿ ਸਹਜਾਤਸਞ੍ਞਾਨਂ. ਦੋਮਨਸ੍ਸਾਨ ਚੂਭਯਨ੍ਤਿ ਏਤਾਸਞ੍ਚ ਕਾਮਸਞ੍ਞਾਨਂ ਚੇਤਸਿਕਦੋਮਨਸ੍ਸਾਨਞ੍ਚਾਤਿ ਉਭਿਨ੍ਨਮ੍ਪਿ ਪਹਾਨਂ ਪਟਿਪ੍ਪਸ੍ਸਦ੍ਧਿਪਹਾਨਸਙ੍ਖਾਤਂ ਅਰਹਤ੍ਤਫਲਂ ਅਞ੍ਞਾਵਿਮੋਕ੍ਖਂ ਪਬ੍ਰੂਮੀਤਿ ਅਤ੍ਥੋ. ਨਿਦ੍ਦੇਸੇ ਪਨ ‘‘ਕਾਮਚ੍ਛਨ੍ਦਸ੍ਸ ਚ ਦੋਮਨਸ੍ਸਸ੍ਸ ਚ ਉਭਿਨ੍ਨਂ ਪਹਾਨਂ ਵੂਪਸਮਂ ਪਟਿਨਿਸ੍ਸਗ੍ਗਂ ਪਟਿਪ੍ਪਸ੍ਸਦ੍ਧਿਂ ਅਮਤਂ ਨਿਬ੍ਬਾਨ’’ਨ੍ਤਿ (ਚੂਲ਼ਨਿ. ਉਦਯਮਾਣਵਪੁਚ੍ਛਾਨਿਦ੍ਦੇਸੋ ੭੫) ਵੁਤ੍ਤਂ, ਤਂ ਅਤ੍ਥੁਦ੍ਧਾਰਵਸੇਨ ਵੁਤ੍ਤਂ. ਪਹਾਨਨ੍ਤਿ ਹਿ ਖੀਣਾਕਾਰਸਙ੍ਖਾਤੋ ਵੂਪਸਮੋਪਿ ਵੁਚ੍ਚਤਿ, ਕਿਲੇਸੇ ਪਟਿਨਿਸ੍ਸਜ੍ਜਨ੍ਤੋ ਮਗ੍ਗੋਪਿ, ਕਿਲੇਸਪਟਿਪ੍ਪਸ੍ਸਦ੍ਧਿਸਙ੍ਖਾਤਂ ਫਲਮ੍ਪਿ, ਯਂ ਆਗਮ੍ਮ ਕਿਲੇਸਾ ਪਹੀਯਨ੍ਤਿ, ਤਂ ਅਮਤਂ ਨਿਬ੍ਬਾਨਮ੍ਪਿ. ਤਸ੍ਮਾ ਤਤ੍ਥ ਤਾਨਿ ਪਦਾਨਿ ਆਗਤਾਨਿ. ‘‘ਅਞ੍ਞਾਵਿਮੋਕ੍ਖਂ ਪਬ੍ਰੂਮੀ’’ਤਿ ਵਚਨਤੋ ਪਨ ਅਰਹਤ੍ਤਫਲਮੇਵ ਅਧਿਪ੍ਪੇਤਂ. ਥਿਨਸ੍ਸ ਚ ਪਨੂਦਨਨ੍ਤਿਪਿ ਥਿਨਸ੍ਸ ਚ ਪਨੂਦਨਨ੍ਤੇ ਉਪ੍ਪਨ੍ਨਤ੍ਤਾ ਅਰਹਤ੍ਤਫਲਮੇਵ ਅਧਿਪ੍ਪੇਤਂ. ਕੁਕ੍ਕੁਚ੍ਚਾਨਂ ਨਿਵਾਰਣਨ੍ਤਿ ਕੁਕ੍ਕੁਚ੍ਚਨਿਵਾਰਣਸ੍ਸ ਮਗ੍ਗਸ੍ਸ ਅਨਨ੍ਤਰਂ ਉਪ੍ਪਨ੍ਨਤ੍ਤਾ ਫਲਮੇਵ ਅਧਿਪ੍ਪੇਤਂ.
ਉਪੇਕ੍ਖਾਸਤਿਸਂਸੁਦ੍ਧਨ੍ਤਿ ਚਤੁਤ੍ਥਜ੍ਝਾਨਿਕੇ ਫਲੇ ਉਪ੍ਪਨ੍ਨਾਯ ਉਪੇਕ੍ਖਾਯ ਚ ਸਤਿਯਾ ਚ ਸਂਸੁਦ੍ਧਂ. ਧਮ੍ਮਤਕ੍ਕਪੁਰੇਜਵਨ੍ਤਿ ਧਮ੍ਮਤਕ੍ਕੋ ਵੁਚ੍ਚਤਿ ਸਮ੍ਮਾਸਙ੍ਕਪ੍ਪੋ, ਸੋ ਆਦਿਤੋ ਹੋਤਿ, ਪੁਰਤੋ ਹੋਤਿ, ਪੁਬ੍ਬਙ੍ਗਮੋ ਹੋਤਿ ਅਞ੍ਞਾਵਿਮੋਕ੍ਖਸ੍ਸਾਤਿ ਧਮ੍ਮਤਕ੍ਕਪੁਰੇਜਵੋ. ਤਂ ਧਮ੍ਮਤਕ੍ਕਪੁਰੇਜਵਂ. ਅਞ੍ਞਾਵਿਮੋਕ੍ਖਨ੍ਤਿ ਅਞ੍ਞਿਨ੍ਦ੍ਰਿਯਪਰਿਯੋਸਾਨੇ ਉਪ੍ਪਨ੍ਨਂ ਵਿਮੋਕ੍ਖਂ, ਅਞ੍ਞਾਯ ਵਾ ਵਿਮੋਕ੍ਖਂ ਅਞ੍ਞਾਵਿਮੋਕ੍ਖਂ, ਪਞ੍ਞਾਵਿਮੁਤ੍ਤਨ੍ਤਿ ਅਤ੍ਥੋ. ਅਵਿਜ੍ਜਾਯ ਪਭੇਦਨਨ੍ਤਿ ਅਵਿਜ੍ਜਾਯ ਪਭੇਦਨਨ੍ਤੇ ਉਪ੍ਪਨ੍ਨਤ੍ਤਾ, ਅਵਿਜ੍ਜਾਯ ਪਭੇਦਨਸਙ੍ਖਾਤਂ ਵਾ ਨਿਬ੍ਬਾਨਂ ਆਰਬ੍ਭ ਉਪ੍ਪਨ੍ਨਤ੍ਤਾ ਏਵਂਲਦ੍ਧਨਾਮਂ ਅਰਹਤ੍ਤਫਲਮੇਵ. ਇਤਿ ਸਬ੍ਬੇਹਿਪਿ ਇਮੇਹਿ ਪਹਾਨਨ੍ਤਿਆਦੀਹਿ ਪਦੇਹਿ ਅਰਹਤ੍ਤਫਲਮੇਵ ਪਕਾਸਿਤਨ੍ਤਿ ਵੇਦਿਤਬ੍ਬਂ.
੪. ਨਿਦਾਨਸੁਤ੍ਤਵਣ੍ਣਨਾ
੩੪. ਚਤੁਤ੍ਥੇ ਨਿਦਾਨਾਨੀਤਿ ਕਾਰਣਾਨਿ. ਕਮ੍ਮਾਨਨ੍ਤਿ ਵਟ੍ਟਗਾਮਿਕਮ੍ਮਾਨਂ. ਲੋਭੋ ਨਿਦਾਨਂ ਕਮ੍ਮਾਨਂ ਸਮੁਦਯਾਯਾਤਿ ਲੁਬ੍ਭਨਪਲੁਬ੍ਭਨਸਭਾਵੋ ਲੋਭੋ ਵਟ੍ਟਗਾਮਿਕਮ੍ਮਾਨਂ ਸਮੁਦਯਾਯ ਪਿਣ੍ਡਕਰਣਤ੍ਥਾਯ ਨਿਦਾਨਂ ਕਾਰਣਂ ਪਚ੍ਚਯੋਤਿ ਅਤ੍ਥੋ. ਦੋਸੋਤਿ ਦੁਸ੍ਸਨਪਦੁਸ੍ਸਨਸਭਾਵੋ ਦੋਸੋ. ਮੋਹੋਤਿ ਮੁਯ੍ਹਨਪਮੁਯ੍ਹਨਸਭਾਵੋ ਮੋਹੋ.
ਲੋਭਪਕਤਨ੍ਤਿ ਲੋਭੇਨ ਪਕਤਂ, ਲੋਭਾਭਿਭੂਤੇਨ ਲੁਦ੍ਧੇਨ ਹੁਤ੍ਵਾ ਕਤਕਮ੍ਮਨ੍ਤਿ ਅਤ੍ਥੋ. ਲੋਭਤੋ ਜਾਤਨ੍ਤਿ ਲੋਭਜਂ. ਲੋਭੋ ਨਿਦਾਨਮਸ੍ਸਾਤਿ ਲੋਭਨਿਦਾਨਂ. ਲੋਭੋ ਸਮੁਦਯੋ ਅਸ੍ਸਾਤਿ ਲੋਭਸਮੁਦਯਂ. ਸਮੁਦਯੋਤਿ ਪਚ੍ਚਯੋ, ਲੋਭਪਚ੍ਚਯਨ੍ਤਿ ਅਤ੍ਥੋ. ਯਤ੍ਥਸ੍ਸ ਅਤ੍ਤਭਾਵੋ ਨਿਬ੍ਬਤ੍ਤਤੀਤਿ ਯਸ੍ਮਿਂ ਠਾਨੇ ਅਸ੍ਸ ਲੋਭਜਕਮ੍ਮਵਤੋ ਪੁਗ੍ਗਲਸ੍ਸ ਅਤ੍ਤਭਾਵੋ ਨਿਬ੍ਬਤ੍ਤਤਿ, ਖਨ੍ਧਾ ਪਾਤੁਭਵਨ੍ਤਿ. ਤਤ੍ਥ ਤਂ ਕਮ੍ਮਂ ਵਿਪਚ੍ਚਤੀਤਿ ਤੇਸੁ ਖਨ੍ਧੇਸੁ ਤਂ ਕਮ੍ਮਂ ਵਿਪਚ੍ਚਤਿ. ਦਿਟ੍ਠੇ ਵਾ ਧਮ੍ਮੇਤਿਆਦਿ ਯਸ੍ਮਾ ਤਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਂ ਵਾ ਹੋਤਿ ਉਪਪਜ੍ਜਵੇਦਨੀਯਂ ਵਾ ਅਪਰਪਰਿਯਾਯਵੇਦਨੀਯਂ ਵਾ, ਤਸ੍ਮਾ ਤਂ ਪਭੇਦਂ ਦਸ੍ਸੇਤੁਂ ਵੁਤ੍ਤਂ. ਸੇਸਦ੍ਵਯੇਪਿ ਏਸੇਵ ਨਯੋ.
ਅਖਣ੍ਡਾਨੀਤਿ ਅਭਿਨ੍ਨਾਨਿ. ਅਪੂਤੀਨੀਤਿ ਪੂਤਿਭਾਵੇਨ ਅਬੀਜਤ੍ਤਂ ਅਪ੍ਪਤ੍ਤਾਨਿ. ਅਵਾਤਾਤਪਹਤਾਨੀਤਿ ਨ ਵਾਤੇਨ ਨ ਚ ਆਤਪੇਨ ਹਤਾਨਿ. ਸਾਰਾਦਾਨੀਤਿ ਗਹਿਤਸਾਰਾਨਿ ਸਾਰਵਨ੍ਤਾਨਿ ਨ ਨਿਸ੍ਸਾਰਾਨਿ. ਸੁਖਸਯਿਤਾਨੀਤਿ ਸਨ੍ਨਿਚਯਭਾਵੇਨ ਸੁਖਂ ਸਯਿਤਾਨਿ. ਸੁਖੇਤ੍ਤੇਤਿ ਮਣ੍ਡਖੇਤ੍ਤੇ. ਸੁਪਰਿਕਮ੍ਮਕਤਾਯ ਭੂਮਿਯਾਤਿ ਨਙ੍ਗਲਕਸਨੇਨ ਚੇਵ ਅਟ੍ਠਦਨ੍ਤਕੇਨ ਚ ਸੁਟ੍ਠੁ ਪਰਿਕਮ੍ਮਕਤਾਯ ਖੇਤ੍ਤਭੂਮਿਯਾ. ਨਿਕ੍ਖਿਤ੍ਤਾਨੀਤਿ ਠਪਿਤਾਨਿ ਰੋਪਿਤਾਨਿ. ਅਨੁਪ੍ਪਵੇਚ੍ਛੇਯ੍ਯਾਤਿ ਅਨੁਪ੍ਪਵੇਸੇਯ੍ਯ. ਵੁਦ੍ਧਿਨ੍ਤਿਆਦੀਸੁ ਉਦ੍ਧਗ੍ਗਮਨੇਨ ਵੁਦ੍ਧਿਂ, ਹੇਟ੍ਠਾ ਮੂਲਪ੍ਪਤਿਟ੍ਠਾਨੇਨ ਵਿਰੂਲ਼੍ਹਿਂ, ਸਮਨ੍ਤਾ ਵਿਤ੍ਥਾਰਿਕਭਾਵੇਨ ਵੇਪੁਲ੍ਲਂ.
ਯਂ ਪਨੇਤ੍ਥ ਦਿਟ੍ਠੇ ਵਾ ਧਮ੍ਮੇਤਿਆਦਿ ਵੁਤ੍ਤਂ, ਤਤ੍ਥ ਅਸਮ੍ਮੋਹਤ੍ਥਂ ਇਮਸ੍ਮਿਂ ਠਾਨੇ ਕਮ੍ਮਵਿਭਤ੍ਤਿ ਨਾਮ ਕਥੇਤਬ੍ਬਾ. ਸੁਤ੍ਤਨ੍ਤਿਕਪਰਿਯਾਯੇਨ ਹਿ ਏਕਾਦਸ ਕਮ੍ਮਾਨਿ ਵਿਭਤ੍ਤਾਨਿ. ਸੇਯ੍ਯਥਿਦਂ – ਦਿਟ੍ਠਧਮ੍ਮਵੇਦਨੀਯਂ ਉਪਪਜ੍ਜਵੇਦਨੀਯਂ ਅਪਰਪਰਿਯਾਯਵੇਦਨੀਯਂ, ਯਗ੍ਗਰੁਕਂ ਯਬ੍ਬਹੁਲਂ ਯਦਾਸਨ੍ਨਂ ਕਟਤ੍ਤਾ ਵਾ ਪਨ ਕਮ੍ਮਂ, ਜਨਕਂ ਉਪਤ੍ਥਮ੍ਭਕਂ ਉਪਪੀਲ਼ਕਂ ਉਪਘਾਤਕਨ੍ਤਿ. ਤਤ੍ਥ ਏਕਜਵਨਵੀਥਿਯਂ ਸਤ੍ਤਸੁ ਚਿਤ੍ਤੇਸੁ ਕੁਸਲਾ ਵਾ ਅਕੁਸਲਾ ਵਾ ਪਠਮਜਵਨਚੇਤਨਾ ਦਿਟ੍ਠਧਮ੍ਮਵੇਦਨੀਯਕਮ੍ਮਂ ਨਾਮ. ਤਂ ਇਮਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦੇਤਿ ਕਾਕਵਲ਼ਿਯਪੁਣ੍ਣਸੇਟ੍ਠੀਨਂ ਵਿਯ ਕੁਸਲਂ, ਨਨ੍ਦਯਕ੍ਖਨਨ੍ਦਮਾਣਵਕਨਨ੍ਦਗੋਘਾਤਕਕੋਕਾਲਿਯਸੁਪ੍ਪਬੁਦ੍ਧਦੇਵਦਤ੍ਤਚਿਞ੍ਚਮਾਣਵਿਕਾਨਂ ਵਿਯ ਚ ਅਕੁਸਲਂ. ਤਥਾ ਅਸਕ੍ਕੋਨ੍ਤਂ ਪਨ ਅਹੋਸਿਕਮ੍ਮਂ ਨਾਮ ਹੋਤਿ, ਅਵਿਪਾਕਂ ਸਮ੍ਪਜ੍ਜਤਿ. ਤਂ ਮਿਗਲੁਦ੍ਦਕੋਪਮਾਯ ਸਾਧੇਤਬ੍ਬਂ. ਯਥਾ ਹਿ ਮਿਗਲੁਦ੍ਦਕੇਨ ਮਿਗਂ ਦਿਸ੍ਵਾ ਧਨੁਂ ਆਕਡ੍ਢਿਤ੍ਵਾ ਖਿਤ੍ਤੋ ਸਰੋ ਸਚੇ ਨ ਵਿਰਜ੍ਝਤਿ, ਤਂ ਮਿਗਂ ਤਤ੍ਥੇਵ ਪਾਤੇਤਿ, ਅਥ ਨਂ ਮਿਗਲੁਦ੍ਦਕੋ ਨਿਚ੍ਚਮ੍ਮਂ ਕਤ੍ਵਾ ਖਣ੍ਡਾਖਣ੍ਡਿਕਂ ਛੇਤ੍ਵਾ ਮਂਸਂ ਆਦਾਯ ਪੁਤ੍ਤਦਾਰਂ ਤੋਸੇਨ੍ਤੋ ਗਚ੍ਛਤਿ. ਸਚੇ ਪਨ ਵਿਰਜ੍ਝਤਿ, ਮਿਗੋ ਪਲਾਯਿਤ੍ਵਾ ਪੁਨ ਤਂ ਦਿਸਂ ਨ ਓਲੋਕੇਤਿ. ਏਵਂ ਸਮ੍ਪਦਮਿਦਂ ਦਟ੍ਠਬ੍ਬਂ. ਸਰਸ੍ਸ ਅਵਿਰਜ੍ਝਿਤ੍ਵਾ ਮਿਗਵਿਜ੍ਝਨਂ ਵਿਯ ਹਿ ਦਿਟ੍ਠਧਮ੍ਮਵੇਦਨੀਯਸ੍ਸ ਕਮ੍ਮਸ੍ਸ ਵਿਪਾਕਵਾਰਪਟਿਲਾਭੋ, ਅਵਿਜ੍ਝਨਂ ਵਿਯ ਅਵਿਪਾਕਭਾਵਾਯ ਸਮ੍ਪਜ੍ਜਨਨ੍ਤਿ.
ਅਤ੍ਥਸਾਧਿਕਾ ਪਨ ਸਤ੍ਤਮਜਵਨਚੇਤਨਾ ਉਪਪਜ੍ਜਵੇਦਨੀਯਕਮ੍ਮਂ ਨਾਮ. ਤਂ ਅਨਨ੍ਤਰੇ ਅਤ੍ਤਭਾਵੇ ਵਿਪਾਕਂ ਦੇਤਿ. ਤਂ ਪਨੇਤਂ ਕੁਸਲਪਕ੍ਖੇ ਅਟ੍ਠਸਮਾਪਤ੍ਤਿਵਸੇਨ, ਅਕੁਸਲਪਕ੍ਖੇ ਪਞ੍ਚਾਨਨ੍ਤਰਿਯਕਮ੍ਮਵਸੇਨ ਵੇਦਿਤਬ੍ਬਂ. ਤਤ੍ਥ ਅਟ੍ਠਸਮਾਪਤ੍ਤਿਲਾਭੀ ਏਕਾਯ ਸਮਾਪਤ੍ਤਿਯਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਤਿ. ਪਞ੍ਚਨ੍ਨਮ੍ਪਿ ਆਨਨ੍ਤਰਿਯਾਨਂ ਕਤ੍ਤਾ ਏਕੇਨ ਕਮ੍ਮੇਨ ਨਿਰਯੇ ਨਿਬ੍ਬਤ੍ਤਤਿ, ਸੇਸਸਮਾਪਤ੍ਤਿਯੋ ਚ ਕਮ੍ਮਾਨਿ ਚ ਅਹੋਸਿਕਮ੍ਮਭਾਵਂਯੇਵ ਆਪਜ੍ਜਨ੍ਤਿ, ਅਵਿਪਾਕਾਨਿ ਹੋਨ੍ਤਿ. ਅਯਮ੍ਪਿ ਅਤ੍ਥੋ ਪੁਰਿਮਉਪਮਾਯਯੇਵ ਦੀਪੇਤਬ੍ਬੋ.
ਉਭਿਨ੍ਨਂ ਅਨ੍ਤਰੇ ਪਨ ਪਞ੍ਚਜਵਨਚੇਤਨਾ ਅਪਰਪਰਿਯਾਯਵੇਦਨੀਯਕਮ੍ਮਂ ਨਾਮ. ਤਂ ਅਨਾਗਤੇ ਯਦਾ ਓਕਾਸਂ ਲਭਤਿ, ਤਦਾ ਵਿਪਾਕਂ ਦੇਤਿ. ਸਤਿ ਸਂਸਾਰਪ੍ਪਵਤ੍ਤਿਯਾ ਅਹੋਸਿਕਮ੍ਮਂ ਨਾਮ ਨ ਹੋਤਿ. ਤਂ ਸਬ੍ਬਂ ਸੁਨਖਲੁਦ੍ਦਕੇਨ ਦੀਪੇਤਬ੍ਬਂ. ਯਥਾ ਹਿ ਸੁਨਖਲੁਦ੍ਦਕੇਨ ਮਿਗਂ ਦਿਸ੍ਵਾ ਸੁਨਖੋ ਵਿਸ੍ਸਜ੍ਜਿਤੋ ਮਿਗਂ ਅਨੁਬਨ੍ਧਿਤ੍ਵਾ ਯਸ੍ਮਿਂ ਠਾਨੇ ਪਾਪੁਣਾਤਿ, ਤਸ੍ਮਿਂ ਯੇਵ ਡਂਸਤਿ; ਏਵਮੇਵਂ ਇਦਂ ਕਮ੍ਮਂ ਯਸ੍ਮਿਂ ਠਾਨੇ ਓਕਾਸਂ ਲਭਤਿ, ਤਸ੍ਮਿਂਯੇਵ ਵਿਪਾਕਂ ਦੇਤਿ, ਤੇਨ ਮੁਤ੍ਤੋ ਸਤ੍ਤੋ ਨਾਮ ਨਤ੍ਥਿ.