੧੦. ਆਧਿਪਤੇਯ੍ਯਸੁਤ੍ਤਵਣ੍ਣਨਾ

੪੦. ਦਸਮੇ ਆਧਿਪਤੇਯ੍ਯਾਨੀਤਿ ਜੇਟ੍ਠਕਕਾਰਣਤੋ ਨਿਬ੍ਬਤ੍ਤਾਨਿ. ਅਤ੍ਤਾਧਿਪਤੇਯ੍ਯਨ੍ਤਿਆਦੀਸੁ ਅਤ੍ਤਾਨਂ ਜੇਟ੍ਠਕਂ ਕਤ੍ਵਾ ਨਿਬ੍ਬਤ੍ਤਿਤਂ ਗੁਣਜਾਤਂ ਅਤ੍ਤਾਧਿਪਤੇਯ੍ਯਂ. ਲੋਕਂ ਜੇਟ੍ਠਕਂ ਕਤ੍ਵਾ ਨਿਬ੍ਬਤ੍ਤਿਤਂ ਲੋਕਾਧਿਪਤੇਯ੍ਯਂ. ਨਵਵਿਧਂ ਲੋਕੁਤ੍ਤਰਧਮ੍ਮਂ ਜੇਟ੍ਠਕਂ ਕਤ੍ਵਾ ਨਿਬ੍ਬਤ੍ਤਿਤਂ ਧਮ੍ਮਾਧਿਪਤੇਯ੍ਯਂ. ਨ ਇਤਿ ਭਵਾਭਵਹੇਤੂਤਿ ਇਤਿ ਭਵੋ, ਇਤਿ ਭਵੋਤਿ ਏਵਂ ਆਯਤਿਂ, ਨ ਤਸ੍ਸ ਤਸ੍ਸ ਸਮ੍ਪਤ੍ਤਿਭਵਸ੍ਸ ਹੇਤੁ. ਓਤਿਣ੍ਣੋਤਿ ਅਨੁਪਵਿਟ੍ਠੋ. ਯਸ੍ਸ ਹਿ ਜਾਤਿ ਅਨ੍ਤੋਪਵਿਟ੍ਠਾ, ਸੋ ਜਾਤਿਯਾ ਓਤਿਣ੍ਣੋ ਨਾਮ. ਜਰਾਦੀਸੁਪਿ ਏਸੇਵ ਨਯੋ. ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸਾਤਿ ਸਕਲਸ੍ਸ ਵਟ੍ਟਦੁਕ੍ਖਰਾਸਿਸ੍ਸ. ਅਨ੍ਤਕਿਰਿਯਾ ਪਞ੍ਞਾਯੇਥਾਤਿ ਅਨ੍ਤਕਰਣਂ ਪਰਿਚ੍ਛੇਦਪਰਿਵਟੁਮਕਰਣਂ ਪਞ੍ਞਾਯੇਯ੍ਯ. ਓਹਾਯਾਤਿ ਪਹਾਯ. ਪਾਪਿਟ੍ਠਤਰੇਤਿ ਲਾਮਕਤਰੇ. ਆਰਦ੍ਧਨ੍ਤਿ ਪਗ੍ਗਹਿਤਂ ਪਰਿਪੁਣ੍ਣਂ, ਆਰਦ੍ਧਤ੍ਤਾਵ ਅਸਲ੍ਲੀਨਂ. ਉਪਟ੍ਠਿਤਾਤਿ ਚਤੁਸਤਿਪਟ੍ਠਾਨਵਸੇਨ ਉਪਟ੍ਠਿਤਾ. ਉਪਟ੍ਠਿਤਤ੍ਤਾਵ ਅਸਮ੍ਮੁਟ੍ਠਾ. ਪਸ੍ਸਦ੍ਧੋ ਕਾਯੋਤਿ ਨਾਮਕਾਯੋ ਚ ਕਰਜਕਾਯੋ ਚ ਪਸ੍ਸਦ੍ਧੋ ਵੂਪਸਨ੍ਤਦਰਥੋ. ਪਸ੍ਸਦ੍ਧਤ੍ਤਾਵ ਅਸਾਰਦ੍ਧੋ. ਸਮਾਹਿਤਂ ਚਿਤ੍ਤਨ੍ਤਿ ਆਰਮ੍ਮਣੇ ਚਿਤ੍ਤਂ ਸਮ੍ਮਾ ਆਹਿਤਂ ਸੁਟ੍ਠੁ ਠਪਿਤਂ. ਸਮ੍ਮਾ ਆਹਿਤਤ੍ਤਾਵ ਏਕਗ੍ਗਂ. ਅਧਿਪਤਿਂ ਕਰਿਤ੍ਵਾਤਿ ਜੇਟ੍ਠਕਂ ਕਤ੍ਵਾ. ਸੁਦ੍ਧਂ ਅਤ੍ਤਾਨਂ ਪਰਿਹਰਤੀਤਿ ਸੁਦ੍ਧਂ ਨਿਮ੍ਮਲਂ ਕਤ੍ਵਾ ਅਤ੍ਤਾਨਂ ਪਰਿਹਰਤਿ ਪਟਿਜਗ੍ਗਤਿ, ਗੋਪਾਯਤੀਤਿ ਅਤ੍ਥੋ. ਅਯਞ੍ਚ ਯਾਵ ਅਰਹਤ੍ਤਮਗ੍ਗਾ ਪਰਿਯਾਯੇਨ ਸੁਦ੍ਧਮਤ੍ਤਾਨਂ ਪਰਿਹਰਤਿ ਨਾਮ, ਫਲਪ੍ਪਤ੍ਤੋਵ ਪਨ ਨਿਪ੍ਪਰਿਯਾਯੇਨ ਸੁਦ੍ਧਮਤ੍ਤਾਨਂ ਪਰਿਹਰਤਿ.

ਸ੍ਵਾਕ੍ਖਾਤੋਤਿਆਦੀਨਿ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੪੭) ਵਿਤ੍ਥਾਰਿਤਾਨਿ. ਜਾਨਂ ਪਸ੍ਸਂ ਵਿਹਰਨ੍ਤੀਤਿ ਤਂ ਧਮ੍ਮਂ ਜਾਨਨ੍ਤਾ ਪਸ੍ਸਨ੍ਤਾ ਵਿਹਰਨ੍ਤਿ. ਇਮਾਨਿ ਖੋ, ਭਿਕ੍ਖਵੇ, ਤੀਣਿ ਆਧਿਪਤੇਯ੍ਯਾਨੀਤਿ ਏਤ੍ਤਾਵਤਾ ਤੀਣਿ ਆਧਿਪਤੇਯ੍ਯਾਨਿ ਲੋਕਿਯਲੋਕੁਤ੍ਤਰਮਿਸ੍ਸਕਾਨਿ ਕਥਿਤਾਨਿ.

ਪਕੁਬ੍ਬਤੋਤਿ ਕਰੋਨ੍ਤਸ੍ਸ. ਅਤ੍ਤਾ ਤੇ ਪੁਰਿਸ ਜਾਨਾਤਿ, ਸਚ੍ਚਂ ਵਾ ਯਦਿ ਵਾ ਮੁਸਾਤਿ ਯਂ ਤ੍ਵਂ ਕਰੋਸਿ, ਤਂ ਯਦਿ ਵਾ ਯਥਾਸਭਾਵਂ ਯਦਿ ਵਾ ਨੋ ਯਥਾਸਭਾਵਨ੍ਤਿ ਤਵ ਅਤ੍ਤਾਵ ਜਾਨਾਤਿ. ਇਮਿਨਾ ਚ ਕਾਰਣੇਨ ਵੇਦਿਤਬ੍ਬਂ ‘‘ਪਾਪਕਮ੍ਮਂ ਕਰੋਨ੍ਤਸ੍ਸ ਲੋਕੇ ਪਟਿਚ੍ਛਨ੍ਨਟ੍ਠਾਨਂ ਨਾਮ ਨਤ੍ਥੀ’’ਤਿ. ਕਲ੍ਯਾਣਨ੍ਤਿ ਸੁਨ੍ਦਰਂ. ਅਤਿਮਞ੍ਞਸੀਤਿ ਅਤਿਕ੍ਕਮਿਤ੍ਵਾ ਮਞ੍ਞਸਿ. ਅਤ੍ਤਾਨਂ ਪਰਿਗੂਹਸੀਤਿ ਯਥਾ ਮੇ ਅਤ੍ਤਾਪਿ ਨ ਜਾਨਾਤਿ, ਏਵਂ ਨਂ ਪਰਿਗੂਹਾਮੀਤਿ ਵਾਯਮਸਿ. ਅਤ੍ਤਾਧਿਪਤੇਯ੍ਯਕੋਤਿ ਅਤ੍ਤਜੇਟ੍ਠਕੋ. ਲੋਕਾਧਿਪੋਤਿ ਲੋਕਜੇਟ੍ਠਕੋ. ਨਿਪਕੋਤਿ ਪਞ੍ਞਵਾ. ਝਾਯੀਤਿ ਝਾਯਨ੍ਤੋ. ਧਮ੍ਮਾਧਿਪੋਤਿ ਧਮ੍ਮਜੇਟ੍ਠਕੋ. ਸਚ੍ਚਪਰਕ੍ਕਮੋਤਿ ਥਿਰਪਰਕ੍ਕਮੋ ਭੂਤਪਰਕ੍ਕਮੋ. ਪਸਯ੍ਹ ਮਾਰਨ੍ਤਿ ਮਾਰਂ ਪਸਹਿਤ੍ਵਾ. ਅਭਿਭੁਯ੍ਯ ਅਨ੍ਤਕਨ੍ਤਿ ਇਦਂ ਤਸ੍ਸੇਵ ਵੇਵਚਨਂ. ਯੋ ਚ ਫੁਸੀ ਜਾਤਿਕ੍ਖਯਂ ਪਧਾਨਵਾਤਿ ਯੋ ਝਾਯੀ ਪਧਾਨਵਾ ਮਾਰਂ ਅਭਿਭਵਿਤ੍ਵਾ ਜਾਤਿਕ੍ਖਯਂ ਅਰਹਤ੍ਤਂ ਫੁਸਿ. ਸੋ ਤਾਦਿਸੋਤਿ ਸੋ ਤਥਾਵਿਧੋ ਤਥਾਸਣ੍ਠਿਤੋ. ਲੋਕਵਿਦੂਤਿ ਤਯੋ ਲੋਕੇ ਵਿਦਿਤੇ ਪਾਕਟੇ ਕਤ੍ਵਾ ਠਿਤੋ. ਸੁਮੇਧੋਤਿ ਸੁਪਞ੍ਞੋ. ਸਬ੍ਬੇਸੁ ਧਮ੍ਮੇਸੁ ਅਤਮ੍ਮਯੋ ਮੁਨੀਤਿ ਸਬ੍ਬੇ ਤੇਭੂਮਕਧਮ੍ਮੇ ਤਣ੍ਹਾਸਙ੍ਖਾਤਾਯ ਤਮ੍ਮਯਤਾਯ ਅਭਾਵੇਨ ਅਤਮ੍ਮਯੋ ਖੀਣਾਸਵਮੁਨਿ ਕਦਾਚਿ ਕਤ੍ਥਚਿ ਨ ਹੀਯਤਿ ਨ ਪਰਿਹੀਯਤੀਤਿ ਵੁਤ੍ਤਂ ਹੋਤੀਤਿ.

ਦੇਵਦੂਤਵਗ੍ਗੋ ਚਤੁਤ੍ਥੋ.