੫. ਚੂਲ਼ਵਗ੍ਗੋ

੧. ਸਮ੍ਮੁਖੀਭਾਵਸੁਤ੍ਤਵਣ੍ਣਨਾ

੪੧. ਪਞ੍ਚਮਸ੍ਸ ਪਠਮੇ ਸਮ੍ਮੁਖੀਭਾਵਾਤਿ ਸਮ੍ਮੁਖੀਭਾਵੇਨ, ਵਿਜ੍ਜਮਾਨਤਾਯਾਤਿ ਅਤ੍ਥੋ. ਪਸਵਤੀਤਿ ਪਟਿਲਭਤਿ. ਸਦ੍ਧਾਯ ਸਮ੍ਮੁਖੀਭਾਵਾਤਿ ਯਦਿ ਹਿ ਸਦ੍ਧਾ ਨ ਭਵੇਯ੍ਯ, ਦੇਯ੍ਯਧਮ੍ਮੋ ਨ ਭਵੇਯ੍ਯ, ਦਕ੍ਖਿਣੇਯ੍ਯਸਙ੍ਖਾਤਾ ਪਟਿਗ੍ਗਾਹਕਪੁਗ੍ਗਲਾ ਨ ਭਵੇਯ੍ਯੁਂ, ਕਥਂ ਪੁਞ੍ਞਕਮ੍ਮਂ ਕਰੇਯ੍ਯ. ਤੇਸਂ ਪਨ ਸਮ੍ਮੁਖੀਭਾਵੇਨ ਸਕ੍ਕਾ ਕਾਤੁਨ੍ਤਿ ਤਸ੍ਮਾ ‘‘ਸਦ੍ਧਾਯ ਸਮ੍ਮੁਖੀਭਾਵਾ’’ਤਿਆਦਿਮਾਹ. ਏਤ੍ਥ ਚ ਦ੍ਵੇ ਧਮ੍ਮਾ ਸੁਲਭਾ ਦੇਯ੍ਯਧਮ੍ਮਾ ਚੇਵ ਦਕ੍ਖਿਣੇਯ੍ਯਾ ਚ, ਸਦ੍ਧਾ ਪਨ ਦੁਲ੍ਲਭਾ. ਪੁਥੁਜ੍ਜਨਸ੍ਸ ਹਿ ਸਦ੍ਧਾ ਅਥਾਵਰਾ ਪਦਵਾਰੇਨ ਨਾਨਾ ਹੋਤਿ, ਤੇਨੇਵ ਮਹਾਮੋਗ੍ਗਲ੍ਲਾਨਸਦਿਸੋਪਿ ਅਗ੍ਗਸਾਵਕੋ ਪਾਟਿਭੋਗੋ ਭਵਿਤੁਂ ਅਸਕ੍ਕੋਨ੍ਤੋ ਆਹ – ‘‘ਦ੍ਵਿਨ੍ਨਂ ਖੋ ਤੇ ਅਹਂ, ਆਵੁਸੋ, ਧਮ੍ਮਾਨਂ ਪਾਟਿਭੋਗੋ ਭੋਗਾਨਞ੍ਚ ਜੀਵਿਤਸ੍ਸ ਚ, ਸਦ੍ਧਾਯ ਪਨ ਤ੍ਵਂਯੇਵ ਪਾਟਿਭੋਗੋ’’ਤਿ (ਉਦਾ. ੧੮).

੨. ਤਿਠਾਨਸੁਤ੍ਤਵਣ੍ਣਨਾ

੪੨. ਦੁਤਿਯੇ ਵਿਗਤਮਲਮਚ੍ਛੇਰੇਨਾਤਿ ਵਿਗਤਮਚ੍ਛਰਿਯਮਲੇਨ. ਮੁਤ੍ਤਚਾਗੋਤਿ ਵਿਸ੍ਸਟ੍ਠਚਾਗੋ. ਪਯਤਪਾਣੀਤਿ ਧੋਤਹਤ੍ਥੋ. ਅਸ੍ਸਦ੍ਧੋ ਹਿ ਸਤਕ੍ਖਤ੍ਤੁਂ ਹਤ੍ਥੇ ਧੋਵਿਤ੍ਵਾਪਿ ਮਲਿਨਹਤ੍ਥੋਵ ਹੋਤਿ, ਸਦ੍ਧੋ ਪਨ ਦਾਨਾਭਿਰਤਤ੍ਤਾ ਮਲਿਨਹਤ੍ਥੋਪਿ ਧੋਤਹਤ੍ਥੋਵ. ਵੋਸ੍ਸਗ੍ਗਰਤੋਤਿ ਵੋਸ੍ਸਗ੍ਗਸਙ੍ਖਾਤੇ ਦਾਨੇ ਰਤੋ. ਯਾਚਯੋਗੋਤਿ ਯਾਚਿਤੁਂ ਯੁਤ੍ਤੋ, ਯਾਚਕੇਹਿ ਵਾ ਯੋਗੋ ਅਸ੍ਸਾਤਿਪਿ ਯਾਚਯੋਗੋ. ਦਾਨਸਂਵਿਭਾਗਰਤੋਤਿ ਦਾਨਂ ਦਦਨ੍ਤੋ ਸਂਵਿਭਾਗਞ੍ਚ ਕਰੋਨ੍ਤੋ ਦਾਨਸਂਵਿਭਾਗਰਤੋ ਨਾਮ ਹੋਤਿ.

ਦਸ੍ਸਨਕਾਮੋ ਸੀਲਵਤਨ੍ਤਿ ਦਸਪਿ ਯੋਜਨਾਨਿ ਵੀਸਮ੍ਪਿ ਤਿਂਸਮ੍ਪਿ ਯੋਜਨਸਤਮ੍ਪਿ ਗਨ੍ਤ੍ਵਾ ਸੀਲਸਮ੍ਪਨ੍ਨੇ ਦਟ੍ਠੁਕਾਮੋ ਹੋਤਿ ਪਾਟਲਿਪੁਤ੍ਤਕਬ੍ਰਾਹ੍ਮਣੋ ਵਿਯ ਸਦ੍ਧਾਤਿਸ੍ਸਮਹਾਰਾਜਾ ਵਿਯ ਚ. ਪਾਟਲਿਪੁਤ੍ਤਸ੍ਸ ਕਿਰ ਨਗਰਦ੍ਵਾਰੇ ਸਾਲਾਯ ਨਿਸਿਨ੍ਨਾ ਦ੍ਵੇ ਬ੍ਰਾਹ੍ਮਣਾ ਕਾਲ਼ਵਲ੍ਲਿਮਣ੍ਡਪਵਾਸਿਮਹਾਨਾਗਤ੍ਥੇਰਸ੍ਸ ਗੁਣਕਥਂ ਸੁਤ੍ਵਾ ‘‘ਅਮ੍ਹੇਹਿ ਤਂ ਭਿਕ੍ਖੁਂ ਦਟ੍ਠੁਂ ਵਟ੍ਟਤੀ’’ਤਿ ਦ੍ਵੇਪਿ ਜਨਾ ਨਿਕ੍ਖਮਿਂਸੁ. ਏਕੋ ਅਨ੍ਤਰਾਮਗ੍ਗੇ ਕਾਲਮਕਾਸਿ. ਏਕੋ ਸਮੁਦ੍ਦਤੀਰਂ ਪਤ੍ਵਾ ਨਾਵਾਯ ਮਹਾਤਿਤ੍ਥਪਟ੍ਟਨੇ ਓਰੁਯ੍ਹ ਅਨੁਰਾਧਪੁਰਂ ਆਗਨ੍ਤ੍ਵਾ ‘‘ਕਾਲ਼ਵਲ੍ਲਿਮਣ੍ਡਪੋ ਕੁਹਿ’’ਨ੍ਤਿ ਪੁਚ੍ਛਿ. ਰੋਹਣਜਨਪਦੇਤਿ. ਸੋ ਅਨੁਪੁਬ੍ਬੇਨ ਥੇਰਸ੍ਸ ਵਸਨਟ੍ਠਾਨਂ ਪਤ੍ਵਾ ਚੂਲ਼ਨਗਰਗਾਮੇ ਧੁਰਘਰੇ ਨਿਵਾਸਂ ਗਹੇਤ੍ਵਾ ਥੇਰਸ੍ਸ ਆਹਾਰਂ ਸਮ੍ਪਾਦੇਤ੍ਵਾ ਪਾਤੋਵ ਵੁਟ੍ਠਾਯ ਥੇਰਸ੍ਸ ਵਸਨਟ੍ਠਾਨਂ ਪੁਚ੍ਛਿਤ੍ਵਾ ਗਨ੍ਤ੍ਵਾ ਜਨਪਰਿਯਨ੍ਤੇ ਠਿਤੋ ਥੇਰਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਸਕਿਂ ਤਤ੍ਥੇਵ ਠਿਤੋ ਵਨ੍ਦਿਤ੍ਵਾ ਪੁਨ ਉਪਸਙ੍ਕਮਿਤ੍ਵਾ ਗੋਪ੍ਫਕੇਸੁ ਦਲ਼੍ਹਂ ਗਹੇਤ੍ਵਾ ਵਨ੍ਦਨ੍ਤੋ ‘‘ਉਚ੍ਚਾ, ਭਨ੍ਤੇ, ਤੁਮ੍ਹੇ’’ਤਿ ਆਹ. ਥੇਰੋ ਚ ਨਾਤਿਉਚ੍ਚੋ ਨਾਤਿਰਸ੍ਸੋ ਪਮਾਣਯੁਤ੍ਤੋਵ, ਤੇਨ ਨਂ ਪੁਨ ਆਹ – ‘‘ਨਾਤਿਉਚ੍ਚਾ ਤੁਮ੍ਹੇ, ਤੁਮ੍ਹਾਕਂ ਪਨ ਗੁਣਾ ਮੇਚਕਵਣ੍ਣਸ੍ਸ ਸਮੁਦ੍ਦਸ੍ਸ ਮਤ੍ਥਕੇਨ ਗਨ੍ਤ੍ਵਾ ਸਕਲਜਮ੍ਬੁਦੀਪਤਲਂ ਅਜ੍ਝੋਤ੍ਥਰਿਤ੍ਵਾ ਗਤਾ, ਅਹਮ੍ਪਿ ਪਾਟਲਿਪੁਤ੍ਤਨਗਰਦ੍ਵਾਰੇ ਨਿਸਿਨ੍ਨੋ ਤੁਮ੍ਹਾਕਂ ਗੁਣਕਥਂ ਅਸ੍ਸੋਸਿ’’ਨ੍ਤਿ. ਸੋ ਥੇਰਸ੍ਸ ਭਿਕ੍ਖਾਹਾਰਂ ਦਤ੍ਵਾ ਅਤ੍ਤਨੋ ਤਿਚੀਵਰਂ ਪਟਿਯਾਦੇਤ੍ਵਾ ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਤਸ੍ਸੋਵਾਦੇ ਪਤਿਟ੍ਠਾਯ ਕਤਿਪਾਹੇਨੇਵ ਅਰਹਤ੍ਤਂ ਪਾਪੁਣਿ.

ਸਦ੍ਧਾਤਿਸ੍ਸਮਹਾਰਾਜਾਪਿ, ‘‘ਭਨ੍ਤੇ, ਮਯ੍ਹਂ ਵਨ੍ਦਿਤਬ੍ਬਯੁਤ੍ਤਕਂ ਏਕਂ ਅਯ੍ਯਂ ਆਚਿਕ੍ਖਥਾ’’ਤਿ ਪੁਚ੍ਛਿ. ਭਿਕ੍ਖੂ ‘‘ਮਙ੍ਗਲਵਾਸੀ ਕੁਟ੍ਟਤਿਸ੍ਸਤ੍ਥੇਰੋ’’ਤਿ ਆਹਂਸੁ. ਰਾਜਾ ਮਹਾਪਰਿਵਾਰੇਨ ਪਞ੍ਚਯੋਜਨਮਗ੍ਗਂ ਅਗਮਾਸਿ. ਥੇਰੋ ‘‘ਕਿਂ ਸਦ੍ਦੋ ਏਸੋ, ਆਵੁਸੋ’’ਤਿ ਭਿਕ੍ਖੁਸਙ੍ਘਂ ਪੁਚ੍ਛਿ. ‘‘ਰਾਜਾ, ਭਨ੍ਤੇ, ਤੁਮ੍ਹਾਕਂ ਦਸ੍ਸਨਤ੍ਥਾਯ ਆਗਤੋ’’ਤਿ. ਥੇਰੋ ਚਿਨ੍ਤੇਸਿ – ‘‘ਕਿਂ ਮਯ੍ਹਂ ਮਹਲ੍ਲਕਕਾਲੇ ਰਾਜਗੇਹੇ ਕਮ੍ਮ’’ਨ੍ਤਿ ਦਿਵਾਟ੍ਠਾਨੇ ਮਞ੍ਚੇ ਨਿਪਜ੍ਜਿਤ੍ਵਾ ਭੂਮਿਯਂ ਲੇਖਂ ਲਿਖਨ੍ਤੋ ਅਚ੍ਛਿ. ਰਾਜਾ ‘‘ਕਹਂ ਥੇਰੋ’’ਤਿ ਪੁਚ੍ਛਿਤ੍ਵਾ ‘‘ਦਿਵਾਟ੍ਠਾਨੇ’’ਤਿ ਸੁਤ੍ਵਾ ਤਤ੍ਥ ਗਚ੍ਛਨ੍ਤੋ ਥੇਰਂ ਭੂਮਿਯਂ ਲੇਖਂ ਲਿਖਨ੍ਤਂ ਦਿਸ੍ਵਾ ‘‘ਖੀਣਾਸਵਸ੍ਸ ਨਾਮ ਹਤ੍ਥਕੁਕ੍ਕੁਚ੍ਚਂ ਨਤ੍ਥਿ, ਨਾਯਂ ਖੀਣਾਸਵੋ’’ਤਿ ਅਵਨ੍ਦਿਤ੍ਵਾਵ ਨਿਵਤ੍ਤਿ. ਭਿਕ੍ਖੁਸਙ੍ਘੋ ਥੇਰਂ ਆਹ – ‘‘ਭਨ੍ਤੇ, ਏਵਂਵਿਧਸ੍ਸ ਸਦ੍ਧਸ੍ਸ ਪਸਨ੍ਨਸ੍ਸ ਰਞ੍ਞੋ ਕਸ੍ਮਾ ਵਿਪ੍ਪਟਿਸਾਰਂ ਕਰਿਤ੍ਥਾ’’ਤਿ. ‘‘ਆਵੁਸੋ, ਰਞ੍ਞੋ ਪਸਾਦਰਕ੍ਖਨਂ ਨ ਤੁਮ੍ਹਾਕਂ ਭਾਰੋ, ਮਹਲ੍ਲਕਤ੍ਥੇਰਸ੍ਸ ਭਾਰੋ’’ਤਿ ਵਤ੍ਵਾ ਅਪਰਭਾਗੇ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਨ੍ਤੋ ਭਿਕ੍ਖੁਸਙ੍ਘਂ ਆਹ – ‘‘ਮਯ੍ਹਂ ਕੂਟਾਗਾਰਮ੍ਹਿ ਅਞ੍ਞਮ੍ਪਿ ਪਲ੍ਲਙ੍ਕਂ ਅਤ੍ਥਰਥਾ’’ਤਿ. ਤਸ੍ਮਿਂ ਅਤ੍ਥਤੇ ਥੇਰੋ – ‘‘ਇਦਂ ਕੂਟਾਗਾਰਂ ਅਨ੍ਤਰੇ ਅਪ੍ਪਤਿਟ੍ਠਹਿਤ੍ਵਾ ਰਞ੍ਞਾ ਦਿਟ੍ਠਕਾਲੇਯੇਵ ਭੂਮਿਯਂ ਪਤਿਟ੍ਠਾਤੂ’’ਤਿ ਅਧਿਟ੍ਠਹਿਤ੍ਵਾ ਪਰਿਨਿਬ੍ਬਾਯਿ. ਕੂਟਾਗਾਰਂ ਪਞ੍ਚਯੋਜਨਮਗ੍ਗਂ ਆਕਾਸੇਨ ਅਗਮਾਸਿ. ਪਞ੍ਚਯੋਜਨਮਗ੍ਗੇ ਧਜਂ ਧਾਰੇਤੁਂ ਸਮਤ੍ਥਾ ਰੁਕ੍ਖਾ ਧਜਪਗ੍ਗਹਿਤਾਵ ਅਹੇਸੁਂ. ਗਚ੍ਛਾਪਿ ਗੁਮ੍ਬਾਪਿ ਸਬ੍ਬੇ ਕੂਟਾਗਾਰਾਭਿਮੁਖਾ ਹੁਤ੍ਵਾ ਅਟ੍ਠਂਸੁ.

ਰਞ੍ਞੋਪਿ ਪਣ੍ਣਂ ਪਹਿਣਿਂਸੁ ‘‘ਥੇਰੋ ਪਰਿਨਿਬ੍ਬੁਤੋ, ਕੂਟਾਗਾਰਂ ਆਕਾਸੇਨ ਆਗਚ੍ਛਤੀ’’ਤਿ. ਰਾਜਾ ਨ ਸਦ੍ਦਹਿ. ਕੂਟਾਗਾਰਂ ਆਕਾਸੇਨ ਗਨ੍ਤ੍ਵਾ ਥੂਪਾਰਾਮਂ ਪਦਕ੍ਖਿਣਂ ਕਤ੍ਵਾ ਸਿਲਾਚੇਤਿਯਟ੍ਠਾਨਂ ਅਗਮਾਸਿ. ਚੇਤਿਯਂ ਸਹ ਵਤ੍ਥੁਨਾ ਉਪ੍ਪਤਿਤ੍ਵਾ ਕੂਟਾਗਾਰਮਤ੍ਥਕੇ ਅਟ੍ਠਾਸਿ, ਸਾਧੁਕਾਰਸਹਸ੍ਸਾਨਿ ਪਵਤ੍ਤਿਂਸੁ. ਤਸ੍ਮਿਂ ਖਣੇ ਮਹਾਬ੍ਯਗ੍ਘਤ੍ਥੇਰੋ ਨਾਮ ਲੋਹਪਾਸਾਦੇ ਸਤ੍ਤਮਕੂਟਾਗਾਰੇ ਨਿਸਿਨ੍ਨੋ ਭਿਕ੍ਖੂਨਂ ਵਿਨਯਕਮ੍ਮਂ ਕਰੋਨ੍ਤੋ ਤਂ ਸਦ੍ਦਂ ਸੁਤ੍ਵਾ ‘‘ਕਿਂ ਸਦ੍ਦੋ ਏਸੋ’’ਤਿ ਪਟਿਪੁਚ੍ਛਿ. ਭਨ੍ਤੇ, ਮਙ੍ਗਲਵਾਸੀ ਕੁਟ੍ਟਤਿਸ੍ਸਤ੍ਥੇਰੋ ਪਰਿਨਿਬ੍ਬੁਤੋ, ਕੂਟਾਗਾਰਂ ਪਞ੍ਚਯੋਜਨਮਗ੍ਗਂ ਆਕਾਸੇਨ ਆਗਤਂ, ਤਤ੍ਥ ਸੋ ਸਾਧੁਕਾਰਸਦ੍ਦੋਤਿ. ਆਵੁਸੋ, ਪੁਞ੍ਞਵਨ੍ਤੇ ਨਿਸ੍ਸਾਯ ਸਕ੍ਕਾਰਂ ਲਭਿਸ੍ਸਾਮਾਤਿ ਅਨ੍ਤੇਵਾਸਿਕੇ ਖਮਾਪੇਤ੍ਵਾ ਆਕਾਸੇਨੇਵ ਆਗਨ੍ਤ੍ਵਾ ਤਂ ਕੂਟਾਗਾਰਂ ਪਵਿਸਿਤ੍ਵਾ ਦੁਤਿਯਮਞ੍ਚੇ ਨਿਸੀਦਿਤ੍ਵਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ. ਰਾਜਾ ਗਨ੍ਧਪੁਪ੍ਫਚੁਣ੍ਣਾਨਿ ਆਦਾਯ ਗਨ੍ਤ੍ਵਾ ਆਕਾਸੇ ਠਿਤਂ ਕੂਟਾਗਾਰਂ ਦਿਸ੍ਵਾ ਕੂਟਾਗਾਰਂ ਪੂਜੇਸਿ. ਤਸ੍ਮਿਂ ਖਣੇ ਕੂਟਾਗਾਰਂ ਓਤਰਿਤ੍ਵਾ ਪਥਵਿਯਂ ਪਤਿਟ੍ਠਿਤਂ. ਰਾਜਾ ਮਹਾਸਕ੍ਕਾਰੇਨ ਸਰੀਰਕਿਚ੍ਚਂ ਕਾਰੇਤ੍ਵਾ ਧਾਤੁਯੋ ਗਹੇਤ੍ਵਾ ਚੇਤਿਯਂ ਅਕਾਸਿ. ਏਵਰੂਪਾ ਸੀਲਵਨ੍ਤਾਨਂ ਦਸ੍ਸਨਕਾਮਾ ਨਾਮ ਹੋਨ੍ਤਿ.

ਸਦ੍ਧਮ੍ਮਂ ਸੋਤੁਮਿਚ੍ਛਤੀਤਿ ਤਥਾਗਤਪ੍ਪਵੇਦਿਤਂ ਸਦ੍ਧਮ੍ਮਂ ਸੋਤੁਕਾਮੋ ਹੋਤਿ ਪਿਣ੍ਡਪਾਤਿਕਤ੍ਥੇਰਾਦਯੋ ਵਿਯ. ਗਙ੍ਗਾਵਨਵਾਲਿਅਙ੍ਗਣਮ੍ਹਿ ਕਿਰ ਤਿਂਸ ਭਿਕ੍ਖੂ ਵਸ੍ਸਂ ਉਪਗਤਾ ਅਨ੍ਵਦ੍ਧਮਾਸਂ ਉਪੋਸਥਦਿਵਸੇ ਚਤੁਪਚ੍ਚਯਸਨ੍ਤੋਸਭਾਵਨਾਰਾਮਮਹਾਅਰਿਯਵਂਸਞ੍ਚ (ਅ. ਨਿ. ੪.੨੮) ਕਥੇਨ੍ਤਿ. ਏਕੋ ਪਿਣ੍ਡਪਾਤਿਕਤ੍ਥੇਰੋ ਪਚ੍ਛਾਭਾਗੇਨ ਆਗਨ੍ਤ੍ਵਾ ਪਟਿਚ੍ਛਨ੍ਨਟ੍ਠਾਨੇ ਨਿਸੀਦਿ. ਅਥ ਨਂ ਏਕੋ ਗੋਨਸੋ ਜਙ੍ਘਪਿਣ੍ਡਿਮਂਸਂ ਸਣ੍ਡਾਸੇਨ ਗਣ੍ਹਨ੍ਤੋ ਵਿਯ ਡਂਸਿ. ਥੇਰੋ ਓਲੋਕੇਨ੍ਤੋ ਗੋਨਸਂ ਦਿਸ੍ਵਾ ‘‘ਅਜ੍ਜ ਧਮ੍ਮਸ੍ਸਵਨਨ੍ਤਰਾਯਂ ਨ ਕਰਿਸ੍ਸਾਮੀ’’ਤਿ ਗੋਨਸਂ ਗਹੇਤ੍ਵਾ ਥਵਿਕਾਯ ਪਕ੍ਖਿਪਿਤ੍ਵਾ ਥਵਿਕਾਮੁਖਂ ਬਨ੍ਧਿਤ੍ਵਾ ਅਵਿਦੂਰੇ ਠਾਨੇ ਠਪੇਤ੍ਵਾ ਧਮ੍ਮਂ ਸੁਣਨ੍ਤੋਵ ਨਿਸੀਦਿ. ਅਰੁਣੁਗ੍ਗਮਨਞ੍ਚ ਵਿਸਂ ਵਿਕ੍ਖਮ੍ਭੇਤ੍ਵਾ ਥੇਰਸ੍ਸ ਤਿਣ੍ਣਂ ਫਲਾਨਂ ਪਾਪੁਣਨਞ੍ਚ ਵਿਸਸ੍ਸ ਦਟ੍ਠਟ੍ਠਾਨੇਨੇਵ ਓਤਰਿਤ੍ਵਾ ਪਥਵਿਪਵਿਸਨਞ੍ਚ ਧਮ੍ਮਕਥਿਕਤ੍ਥੇਰਸ੍ਸ ਧਮ੍ਮਕਥਾਨਿਟ੍ਠਾਪਨਞ੍ਚ ਏਕਕ੍ਖਣੇਯੇਵ ਅਹੋਸਿ. ਤਤੋ ਥੇਰੋ ਆਹ – ‘‘ਆਵੁਸੋ ਏਕੋ ਮੇ ਚੋਰੋ ਗਹਿਤੋ’’ਤਿ ਥਵਿਕਂ ਮੁਞ੍ਚਿਤ੍ਵਾ ਗੋਨਸਂ ਵਿਸ੍ਸਜ੍ਜੇਸਿ. ਭਿਕ੍ਖੂ ਦਿਸ੍ਵਾ ‘‘ਕਾਯ ਵੇਲਾਯ ਦਟ੍ਠਤ੍ਥ, ਭਨ੍ਤੇ’’ਤਿ ਪੁਚ੍ਛਿਂਸੁ. ਹਿਯ੍ਯੋ ਸਾਯਨ੍ਹਸਮਯੇ, ਆਵੁਸੋਤਿ. ਕਸ੍ਮਾ, ਭਨ੍ਤੇ, ਏਵਂ ਭਾਰਿਯਂ ਕਮ੍ਮਂ ਕਰਿਤ੍ਥਾਤਿ. ਆਵੁਸੋ, ਸਚਾਹਂ ਦੀਘਜਾਤਿਕੇਨ ਦਟ੍ਠੋਤਿ ਵਦੇਯ੍ਯਂ, ਨਯਿਮਂ ਏਤ੍ਤਕਂ ਆਨਿਸਂਸਂ ਲਭੇਯ੍ਯਨ੍ਤਿ. ਇਦਂ ਤਾਵ ਪਿਣ੍ਡਪਾਤਿਕਤ੍ਥੇਰਸ੍ਸ ਵਤ੍ਥੁ.

ਦੀਘਵਾਪਿਯਮ੍ਪਿ ‘‘ਮਹਾਜਾਤਕਭਾਣਕਤ੍ਥੇਰੋ ਗਾਥਾਸਹਸ੍ਸਂ ਮਹਾਵੇਸ੍ਸਨ੍ਤਰਂ ਕਥੇਸ੍ਸਤੀ’’ਤਿ ਤਿਸ੍ਸਮਹਾਗਾਮੇ ਤਿਸ੍ਸਮਹਾਵਿਹਾਰਵਾਸੀ ਏਕੋ ਦਹਰੋ ਸੁਤ੍ਵਾ ਤਤੋ ਨਿਕ੍ਖਮਿਤ੍ਵਾ ਏਕਾਹੇਨੇਵ ਨਵਯੋਜਨਮਗ੍ਗਂ ਆਗਤੋ. ਤਸ੍ਮਿਂਯੇਵ ਖਣੇ ਥੇਰੋ ਧਮ੍ਮਕਥਂ ਆਰਭਿ. ਦਹਰੋ ਦੂਰਮਗ੍ਗਾਗਮਨੇਨ ਸਞ੍ਜਾਤਕਾਯਦਰਥਤ੍ਤਾ ਪਟ੍ਠਾਨਗਾਥਾਯ ਸਦ੍ਧਿਂ ਅਵਸਾਨਗਾਥਂਯੇਵ ਵਵਤ੍ਥਪੇਸਿ. ਤਤੋ ਥੇਰਸ੍ਸ ‘‘ਇਦਮਵੋਚਾ’’ਤਿ ਵਤ੍ਵਾ ਉਟ੍ਠਾਯ ਗਮਨਕਾਲੇ ‘‘ਮਯ੍ਹਂ ਆਗਮਨਕਮ੍ਮਂ ਮੋਘਂ ਜਾਤ’’ਨ੍ਤਿ ਰੋਦਮਾਨੋ ਅਟ੍ਠਾਸਿ. ਏਕੋ ਮਨੁਸ੍ਸੋ ਤਂ ਕਥਂ ਸੁਤ੍ਵਾ ਗਨ੍ਤ੍ਵਾ ਥੇਰਸ੍ਸ ਆਰੋਚੇਸਿ, ‘‘ਭਨ੍ਤੇ, ‘ਤੁਮ੍ਹਾਕਂ ਧਮ੍ਮਕਥਂ ਸੋਸ੍ਸਾਮੀ’ਤਿ ਏਕੋ ਦਹਰਭਿਕ੍ਖੁ ਤਿਸ੍ਸਮਹਾਵਿਹਾਰਾ ਆਗਤੋ, ਸੋ ‘ਕਾਯਦਰਥਭਾਵੇਨ ਮੇ ਆਗਮਨਂ ਮੋਘਂ ਜਾਤ’ਨ੍ਤਿ ਰੋਦਮਾਨੋ ਠਿਤੋ’’ਤਿ. ਗਚ੍ਛਥ ਸਞ੍ਞਾਪੇਥ ਨਂ ‘‘ਪੁਨ ਸ੍ਵੇ ਕਥੇਸ੍ਸਾਮਾ’’ਤਿ. ਸੋ ਪੁਨਦਿਵਸੇ ਥੇਰਸ੍ਸ ਧਮ੍ਮਕਥਂ ਸੁਤ੍ਵਾ ਸੋਤਾਪਤ੍ਤਿਫਲਂ ਪਾਪੁਣਿ.

ਅਪਰਾਪਿ ਉਲ੍ਲਕੋਲਿਕਣ੍ਣਿਵਾਸਿਕਾ ਏਕਾ ਇਤ੍ਥੀ ਪੁਤ੍ਤਕਂ ਪਾਯਮਾਨਾ ‘‘ਦੀਘਭਾਣਕਮਹਾਅਭਯਤ੍ਥੇਰੋ ਨਾਮ ਅਰਿਯਵਂਸਪਟਿਪਦਂ ਕਥੇਤੀ’’ਤਿ ਸੁਤ੍ਵਾ ਪਞ੍ਚਯੋਜਨਮਗ੍ਗਂ ਗਨ੍ਤ੍ਵਾ ਦਿਵਾਕਥਿਕਤ੍ਥੇਰਸ੍ਸ ਨਿਸਿਨ੍ਨਕਾਲੇਯੇਵ ਵਿਹਾਰਂ ਪਵਿਸਿਤ੍ਵਾ ਭੂਮਿਯਂ ਪੁਤ੍ਤਂ ਨਿਪਜ੍ਜਾਪੇਤ੍ਵਾ ਦਿਵਾਕਥਿਕਤ੍ਥੇਰਸ੍ਸ ਠਿਤਕਾਵ ਧਮ੍ਮਂ ਅਸ੍ਸੋਸਿ. ਸਰਭਾਣਕੇ ਥੇਰੇ ਉਟ੍ਠਿਤੇ ਦੀਘਭਾਣਕਮਹਾਅਭਯਤ੍ਥੇਰੋ ਚਤੁਪਚ੍ਚਯਸਨ੍ਤੋਸਭਾਵਨਾਰਾਮਮਹਾਅਰਿਯਵਂਸਂ ਆਰਭਿ. ਸਾ ਠਿਤਕਾਵ ਪਗ੍ਗਣ੍ਹਾਤਿ. ਥੇਰੋ ਤਯੋ ਏਵ ਪਚ੍ਚਯੇ ਕਥੇਤ੍ਵਾ ਉਟ੍ਠਾਨਾਕਾਰਂ ਅਕਾਸਿ. ਸਾ ਉਪਾਸਿਕਾ ਆਹ – ‘‘ਅਯ੍ਯੋ, ‘ਅਰਿਯਵਂਸਂ ਕਥੇਸ੍ਸਾਮੀ’ਤਿ ਸਿਨਿਦ੍ਧਭੋਜਨਂ ਭੁਞ੍ਜਿਤ੍ਵਾ ਮਧੁਰਪਾਨਕਂ ਪਿਵਿਤ੍ਵਾ ਯਟ੍ਠਿਮਧੁਕਤੇਲਾਦੀਹਿ ਭੇਸਜ੍ਜਂ ਕਤ੍ਵਾ ਕਥੇਤੁਂ ਯੁਤ੍ਤਟ੍ਠਾਨੇਯੇਵ ਉਟ੍ਠਹਤੀ’’ਤਿ. ਥੇਰੋ ‘‘ਸਾਧੁ, ਭਗਿਨੀ’’ਤਿ ਵਤ੍ਵਾ ਉਪਰਿ ਭਾਵਨਾਰਾਮਂ ਪਟ੍ਠਪੇਸਿ. ਅਰੁਣੁਗ੍ਗਮਨਞ੍ਚ ਥੇਰਸ੍ਸ ‘‘ਇਦਮਵੋਚਾ’’ਤਿ ਵਚਨਞ੍ਚ ਉਪਾਸਿਕਾਯ ਸੋਤਾਪਤ੍ਤਿਫਲੁਪ੍ਪਤ੍ਤਿ ਚ ਏਕਕ੍ਖਣੇਯੇਵ ਅਹੋਸਿ.

ਅਪਰਾਪਿ ਕਲ਼ਮ੍ਪਰਵਾਸਿਕਾ ਇਤ੍ਥੀ ਅਙ੍ਕੇਨ ਪੁਤ੍ਤਂ ਆਦਾਯ ‘‘ਧਮ੍ਮਂ ਸੋਸ੍ਸਾਮੀ’’ਤਿ ਚਿਤ੍ਤਲਪਬ੍ਬਤਂ ਗਨ੍ਤ੍ਵਾ ਏਕਂ ਰੁਕ੍ਖਂ ਨਿਸ੍ਸਾਯ ਦਾਰਕਂ ਨਿਪਜ੍ਜਾਪੇਤ੍ਵਾ ਸਯਂ ਠਿਤਕਾਵ ਧਮ੍ਮਂ ਸੁਣਾਤਿ. ਰਤ੍ਤਿਭਾਗਸਮਨਨ੍ਤਰੇ ਏਕੋ ਦੀਘਜਾਤਿਕੋ ਤਸ੍ਸਾ ਪਸ੍ਸਨ੍ਤਿਯਾਯੇਵ ਸਮੀਪੇ ਨਿਪਨ੍ਨਦਾਰਕਂ ਚਤੂਹਿ ਦਾਠਾਹਿ ਡਂਸਿਤ੍ਵਾ ਅਗਮਾਸਿ. ਸਾ ਚਿਨ੍ਤੇਸਿ – ‘‘ਸਚਾਹਂ ‘ਪੁਤ੍ਤੋ ਮੇ ਸਪ੍ਪੇਨ ਦਟ੍ਠੋ’ਤਿ ਵਕ੍ਖਾਮਿ, ਧਮ੍ਮਸ੍ਸ ਅਨ੍ਤਰਾਯੋ ਭਵਿਸ੍ਸਤਿ. ਅਨੇਕਕ੍ਖਤ੍ਤੁਂ ਖੋ ਪਨ ਮੇ ਅਯਂ ਸਂਸਾਰਵਟ੍ਟੇ ਵਟ੍ਟਨ੍ਤਿਯਾ ਪੁਤ੍ਤੋ ਅਹੋਸਿ, ਧਮ੍ਮਮੇਵ ਚਰਿਸ੍ਸਾਮੀ’’ਤਿ ਤਿਯਾਮਰਤ੍ਤਿਂ ਠਿਤਕਾਵ ਧਮ੍ਮਂ ਪਗ੍ਗਣ੍ਹਿਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਅਰੁਣੇ ਉਗ੍ਗਤੇ ਸਚ੍ਚਕਿਰਿਯਾਯ ਪੁਤ੍ਤਸ੍ਸ ਵਿਸਂ ਨਿਮ੍ਮਥੇਤ੍ਵਾ ਪੁਤ੍ਤਂ ਗਹੇਤ੍ਵਾ ਗਤਾ. ਏਵਰੂਪਾ ਪੁਗ੍ਗਲਾ ਧਮ੍ਮਂ ਸੋਤੁਕਾਮਾ ਨਾਮ ਹੋਨ੍ਤਿ.

੩. ਅਤ੍ਥਵਸਸੁਤ੍ਤਵਣ੍ਣਨਾ

੪੩. ਤਤਿਯੇ ਤਯੋ, ਭਿਕ੍ਖਵੇ, ਅਤ੍ਥਵਸੇ ਸਮ੍ਪਸ੍ਸਮਾਨੇਨਾਤਿ ਤਯੋ ਅਤ੍ਥੇ ਤੀਣਿ ਕਾਰਣਾਨਿ ਪਸ੍ਸਨ੍ਤੇਨ. ਅਲਮੇਵਾਤਿ ਯੁਤ੍ਤਮੇਵ. ਯੋ ਧਮ੍ਮਂ ਦੇਸੇਤੀਤਿ ਯੋ ਪੁਗ੍ਗਲੋ ਚਤੁਸਚ੍ਚਧਮ੍ਮਂ ਪਕਾਸੇਤਿ. ਅਤ੍ਥਪ੍ਪਟਿਸਂਵੇਦੀਤਿ ਅਟ੍ਠਕਥਂ ਞਾਣੇਨ ਪਟਿਸਂਵੇਦੀ. ਧਮ੍ਮਪ੍ਪਟਿਸਂਵੇਦੀਤਿ ਪਾਲ਼ਿਧਮ੍ਮਂ ਪਟਿਸਂਵੇਦੀ.

੪. ਕਥਾਪਵਤ੍ਤਿਸੁਤ੍ਤਵਣ੍ਣਨਾ

੪੪. ਚਤੁਤ੍ਥੇ ਠਾਨੇਹੀਤਿ ਕਾਰਣੇਹਿ. ਪਵਤ੍ਤਿਨੀਤਿ ਅਪ੍ਪਟਿਹਤਾ ਨਿਯ੍ਯਾਨਿਕਾ.

੫. ਪਣ੍ਡਿਤਸੁਤ੍ਤਵਣ੍ਣਨਾ

੪੫. ਪਞ੍ਚਮੇ ਪਣ੍ਡਿਤਪਞ੍ਞਤ੍ਤਾਨੀਤਿ ਪਣ੍ਡਿਤੇਹਿ ਪਞ੍ਞਤ੍ਤਾਨਿ ਕਥਿਤਾਨਿ ਪਸਤ੍ਥਾਨਿ. ਸਪ੍ਪੁਰਿਸਪਞ੍ਞਤ੍ਤਾਨੀਤਿ ਸਪ੍ਪੁਰਿਸੇਹਿ ਮਹਾਪੁਰਿਸੇਹਿ ਪਞ੍ਞਤ੍ਤਾਨਿ ਕਥਿਤਾਨਿ ਪਸਤ੍ਥਾਨਿ. ਅਹਿਂਸਾਤਿ ਕਰੁਣਾ ਚੇਵ ਕਰੁਣਾਪੁਬ੍ਬਭਾਗੋ ਚ. ਸਂਯਮੋਤਿ ਸੀਲਸਂਯਮੋ. ਦਮੋਤਿ ਇਨ੍ਦ੍ਰਿਯਸਂਵਰੋ, ਉਪੋਸਥਵਸੇਨ ਵਾ ਅਤ੍ਤਦਮਨਂ, ਪੁਣ੍ਣੋਵਾਦੇ (ਮ. ਨਿ. ੩.੩੯੫ ਆਦਯੋ; ਸਂ. ਨਿ. ੪.੮੮ ਆਦਯੋ) ਦਮੋਤਿ ਵੁਤ੍ਤਾ ਖਨ੍ਤਿਪਿ ਆਲ਼ਵਕੇ (ਸਂ. ਨਿ. ੧.੨੪੬; ਸੁ. ਨਿ. ੧੮੩ ਆਦਯੋ) ਵੁਤ੍ਤਾ ਪਞ੍ਞਾਪਿ ਇਮਸ੍ਮਿਂ ਸੁਤ੍ਤੇ ਵਟ੍ਟਤਿਯੇਵ. ਮਾਤਾਪਿਤੁ ਉਪਟ੍ਠਾਨਨ੍ਤਿ ਮਾਤਾਪਿਤੂਨਂ ਰਕ੍ਖਨਂ ਗੋਪਨਂ ਪਟਿਜਗ੍ਗਨਂ. ਸਨ੍ਤਾਨਨ੍ਤਿ ਅਞ੍ਞਤ੍ਥ ਬੁਦ੍ਧਪਚ੍ਚੇਕਬੁਦ੍ਧਅਰਿਯਸਾਵਕਾ ਸਨ੍ਤੋ ਨਾਮ, ਇਧ ਪਨ ਮਾਤਾਪਿਤੁਉਪਟ੍ਠਾਕਾ ਅਧਿਪ੍ਪੇਤਾ. ਤਸ੍ਮਾ ਉਤ੍ਤਮਟ੍ਠੇਨ ਸਨ੍ਤਾਨਂ, ਸੇਟ੍ਠਚਰਿਯਟ੍ਠੇਨ ਬ੍ਰਹ੍ਮਚਾਰੀਨਂ. ਇਦਂ ਮਾਤਾਪਿਤੁਉਪਟ੍ਠਾਨਂ ਸਬ੍ਭਿ ਉਪਞ੍ਞਾਤਨ੍ਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਸਤਂ ਏਤਾਨਿ ਠਾਨਾਨੀਤਿ ਸਨ੍ਤਾਨਂ ਉਤ੍ਤਮਪੁਰਿਸਾਨਂ ਏਤਾਨਿ ਠਾਨਾਨਿ ਕਾਰਣਾਨਿ. ਅਰਿਯੋ ਦਸ੍ਸਨਸਮ੍ਪਨ੍ਨੋਤਿ ਇਧ ਇਮੇਸਂਯੇਵ ਤਿਣ੍ਣਂ ਠਾਨਾਨਂ ਕਾਰਣੇਨ ਅਰਿਯੋ ਚੇਵ ਦਸ੍ਸਨਸਮ੍ਪਨ੍ਨੋ ਚ ਵੇਦਿਤਬ੍ਬੋ, ਨ ਬੁਦ੍ਧਾਦਯੋ ਨ ਸੋਤਾਪਨ੍ਨਾ. ਅਥ ਵਾ ਸਤਂ ਏਤਾਨਿ ਠਾਨਾਨੀਤਿ ਮਾਤੁਪਟ੍ਠਾਨਂ ਪਿਤੁਪਟ੍ਠਾਨਨ੍ਤਿ ਏਤਾਨਿ ਠਾਨਾਨਿ ਸਨ੍ਤਾਨਂ ਉਤ੍ਤਮਪੁਰਿਸਾਨਂ ਕਾਰਣਾਨੀਤਿ ਏਵਂ ਮਾਤਾਪਿਤੁਉਪਟ੍ਠਾਕਵਸੇਨ ਇਮਿਸ੍ਸਾ ਗਾਥਾਯ ਅਤ੍ਥੋ ਵੇਦਿਤਬ੍ਬੋ. ਮਾਤਾਪਿਤੁਉਪਟ੍ਠਾਕੋਯੇਵ ਹਿ ਇਧ ‘‘ਅਰਿਯੋ ਦਸ੍ਸਨਸਮ੍ਪਨ੍ਨੋ’’ਤਿ ਵੁਤ੍ਤੋ. ਸ ਲੋਕਂ ਭਜਤੇ ਸਿਵਨ੍ਤਿ ਸੋ ਖੇਮਂ ਦੇਵਲੋਕਂ ਗਚ੍ਛਤੀਤਿ.

੬. ਸੀਲਵਨ੍ਤਸੁਤ੍ਤਵਣ੍ਣਨਾ

੪੬. ਛਟ੍ਠੇ ਤੀਹਿ ਠਾਨੇਹੀਤਿ ਤੀਹਿ ਕਾਰਣੇਹਿ. ਕਾਯੇਨਾਤਿਆਦੀਸੁ ਭਿਕ੍ਖੂ ਆਗਚ੍ਛਨ੍ਤੇ ਦਿਸ੍ਵਾ ਪਚ੍ਚੁਗ੍ਗਮਨਂ ਕਰੋਨ੍ਤਾ ਗਚ੍ਛਨ੍ਤੇ ਅਨੁਗਚ੍ਛਨ੍ਤਾ ਆਸਨਸਾਲਾਯ ਸਮ੍ਮਜ੍ਜਨਉਪਲੇਪਨਾਦੀਨਿ ਕਰੋਨ੍ਤਾ ਆਸਨਾਨਿ ਪਞ੍ਞਾਪੇਨ੍ਤਾ ਪਾਨੀਯਂ ਪਚ੍ਚੁਪਟ੍ਠਾਪੇਨ੍ਤਾ ਕਾਯੇਨ ਪੁਞ੍ਞਂ ਪਸਵਨ੍ਤਿ ਨਾਮ. ਭਿਕ੍ਖੁਸਙ੍ਘਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ‘‘ਯਾਗੁਂ ਦੇਥ, ਭਤ੍ਤਂ ਦੇਥ, ਸਪ੍ਪਿਨਵਨੀਤਾਦੀਨਿ ਦੇਥ, ਗਨ੍ਧਪੁਪ੍ਫਾਦੀਹਿ ਪੂਜੇਥ, ਉਪੋਸਥਂ ਉਪਵਸਥ, ਧਮ੍ਮਂ ਸੁਣਾਥ, ਚੇਤਿਯਂ ਵਨ੍ਦਥਾ’’ਤਿਆਦੀਨਿ ਵਦਨ੍ਤਾ ਵਾਚਾਯ ਪੁਞ੍ਞਂ ਪਸਵਨ੍ਤਿ ਨਾਮ. ਭਿਕ੍ਖੂ ਪਿਣ੍ਡਾਯ ਚਰਨ੍ਤੇ ਦਿਸ੍ਵਾ ‘‘ਲਭਨ੍ਤੂ’’ਤਿ ਚਿਨ੍ਤੇਨ੍ਤਾ ਮਨਸਾ ਪੁਞ੍ਞਂ ਪਸਵਨ੍ਤਿ ਨਾਮ. ਪਸਵਨ੍ਤੀਤਿ ਪਟਿਲਭਨ੍ਤਿ. ਪੁਞ੍ਞਂ ਪਨੇਤ੍ਥ ਲੋਕਿਯਲੋਕੁਤ੍ਤਰਮਿਸ੍ਸਕਂ ਕਥਿਤਂ.

੭. ਸਙ੍ਖਤਲਕ੍ਖਣਸੁਤ੍ਤਵਣ੍ਣਨਾ

੪੭. ਸਤ੍ਤਮੇ ਸਙ੍ਖਤਸ੍ਸਾਤਿ ਪਚ੍ਚਯੇਹਿ ਸਮਾਗਨ੍ਤ੍ਵਾ ਕਤਸ੍ਸ. ਸਙ੍ਖਤਲਕ੍ਖਣਾਨੀਤਿ ਸਙ੍ਖਤਂ ਏਤਨ੍ਤਿ ਸਞ੍ਜਾਨਨਕਾਰਣਾਨਿ ਨਿਮਿਤ੍ਤਾਨਿ. ਉਪ੍ਪਾਦੋਤਿ ਜਾਤਿ. ਵਯੋਤਿ ਭੇਦੋ. ਠਿਤਸ੍ਸ ਅਞ੍ਞਥਤ੍ਤਂ ਨਾਮ ਜਰਾ. ਤਤ੍ਥ ਸਙ੍ਖਤਨ੍ਤਿ ਤੇਭੂਮਕਾ ਧਮ੍ਮਾ. ਮਗ੍ਗਫਲਾਨਿ ਪਨ ਅਸਮ੍ਮਸਨੂਪਗਤ੍ਤਾ ਇਧ ਨ ਕਥੀਯਨ੍ਤਿ. ਉਪ੍ਪਾਦਾਦਯੋ ਸਙ੍ਖਤਲਕ੍ਖਣਾ ਨਾਮ. ਤੇਸੁ ਉਪ੍ਪਾਦਕ੍ਖਣੇ ਉਪ੍ਪਾਦੋ, ਠਾਨਕ੍ਖਣੇ ਜਰਾ, ਭੇਦਕ੍ਖਣੇ ਵਯੋ. ਲਕ੍ਖਣਂ ਨ ਸਙ੍ਖਤਂ, ਸਙ੍ਖਤਂ ਨ ਲਕ੍ਖਣਂ, ਲਕ੍ਖਣੇਨ ਪਨ ਸਙ੍ਖਤਂ ਪਰਿਚ੍ਛਿਨ੍ਨਂ. ਯਥਾ ਹਤ੍ਥਿਅਸ੍ਸਗੋਮਹਿਂਸਾਦੀਨਂ ਸਤ੍ਤਿਸੂਲਾਦੀਨਿ ਸਞ੍ਜਾਨਨਲਕ੍ਖਣਾਨਿ ਨ ਹਤ੍ਥਿਆਦਯੋ, ਨਪਿ ਹਤ੍ਥਿਆਦਯੋ ਲਕ੍ਖਣਾਨੇਵ, ਲਕ੍ਖਣੇਹਿ ਪਨ ਤੇ ‘‘ਅਸੁਕਸ੍ਸ ਹਤ੍ਥੀ, ਅਸੁਕਸ੍ਸ ਅਸ੍ਸੋ, ਅਸੁਕਹਤ੍ਥੀ, ਅਸੁਕਅਸ੍ਸੋ’’ਤਿ ਵਾ ਪਞ੍ਞਾਯਨ੍ਤਿ, ਏਵਂਸਮ੍ਪਦਮਿਦਂ ਵੇਦਿਤਬ੍ਬਂ.

੮. ਅਸਙ੍ਖਤਲਕ੍ਖਣਸੁਤ੍ਤਵਣ੍ਣਨਾ

੪੮. ਅਟ੍ਠਮੇ ਅਸਙ੍ਖਤਸ੍ਸਾਤਿ ਪਚ੍ਚਯੇਹਿ ਸਮਾਗਨ੍ਤ੍ਵਾ ਅਕਤਸ੍ਸ. ਅਸਙ੍ਖਤਲਕ੍ਖਣਾਨੀਤਿ ਅਸਙ੍ਖਤਂ ਏਤਨ੍ਤਿ ਸਞ੍ਜਾਨਨਕਾਰਣਾਨਿ ਨਿਮਿਤ੍ਤਾਨਿ. ਨ ਉਪ੍ਪਾਦੋ ਪਞ੍ਞਾਯਤੀਤਿਆਦੀਹਿ ਉਪ੍ਪਾਦਜਰਾਭਙ੍ਗਾਨਂ ਅਭਾਵੋ ਵੁਤ੍ਤੋ. ਉਪ੍ਪਾਦਾਦੀਨਞ੍ਹਿ ਅਭਾਵੇਨ ਅਸਙ੍ਖਤਨ੍ਤਿ ਪਞ੍ਞਾਯਤਿ.

੯. ਪਬ੍ਬਤਰਾਜਸੁਤ੍ਤਵਣ੍ਣਨਾ

੪੯. ਨਵਮੇ ਮਹਾਸਾਲਾਤਿ ਮਹਾਰੁਕ੍ਖਾ. ਕੁਲਪਤਿਨ੍ਤਿ ਕੁਲਜੇਟ੍ਠਕਂ. ਸੇਲੋਤਿ ਸਿਲਾਮਯੋ. ਅਰਞ੍ਞਸ੍ਮਿਨ੍ਤਿ ਅਗਾਮਕਟ੍ਠਾਨੇ. ਬ੍ਰਹ੍ਮਾਤਿ ਮਹਨ੍ਤੋ. ਵਨੇਤਿ ਅਟਵਿਯਂ. ਵਨਪ੍ਪਤੀਤਿ ਵਨਜੇਟ੍ਠਕਾ. ਇਧ ਧਮ੍ਮਂ ਚਰਿਤ੍ਵਾਨ, ਮਗ੍ਗਂ ਸੁਗਤਿਗਾਮਿਨਨ੍ਤਿ ਸੁਗਤਿਗਾਮਿਕਮਗ੍ਗਸਙ੍ਖਾਤਂ ਧਮ੍ਮਂ ਚਰਿਤ੍ਵਾ.

੧੦. ਆਤਪ੍ਪਕਰਣੀਯਸੁਤ੍ਤਵਣ੍ਣਨਾ

੫੦. ਦਸਮੇ ਆਤਪ੍ਪਂ ਕਰਣੀਯਨ੍ਤਿ ਵੀਰਿਯਂ ਕਾਤੁਂ ਯੁਤ੍ਤਂ. ਅਨੁਪ੍ਪਾਦਾਯਾਤਿ ਅਨੁਪ੍ਪਾਦਤ੍ਥਾਯ, ਅਨੁਪ੍ਪਾਦਂ ਸਾਧੇਸ੍ਸਾਮੀਤਿ ਇਮਿਨਾ ਕਾਰਣੇਨ ਕਤ੍ਤਬ੍ਬਨ੍ਤਿ ਅਤ੍ਥੋ. ਪਰਤੋਪਿ ਏਸੇਵ ਨਯੋ. ਸਾਰੀਰਿਕਾਨਨ੍ਤਿ ਸਰੀਰਸਮ੍ਭਵਾਨਂ. ਦੁਕ੍ਖਾਨਨ੍ਤਿ ਦੁਕ੍ਖਮਾਨਂ. ਤਿਬ੍ਬਾਨਨ੍ਤਿ ਬਹਲਾਨਂ, ਤਾਪਨਵਸੇਨ ਵਾ ਤਿਬ੍ਬਾਨਂ. ਖਰਾਨਨ੍ਤਿ ਫਰੁਸਾਨਂ. ਕਟੁਕਾਨਨ੍ਤਿ ਤਿਖਿਣਾਨਂ. ਅਸਾਤਾਨਨ੍ਤਿ ਅਮਧੁਰਾਨਂ. ਅਮਨਾਪਾਨਨ੍ਤਿ ਮਨਂ ਵਡ੍ਢੇਤੁਂ ਅਸਮਤ੍ਥਾਨਂ. ਪਾਣਹਰਾਨਨ੍ਤਿ ਜੀਵਿਤਹਰਾਨਂ. ਅਧਿਵਾਸਨਾਯਾਤਿ ਅਧਿਵਾਸਨਤ੍ਥਾਯ ਸਹਨਤ੍ਥਾਯ ਖਮਨਤ੍ਥਾਯ.

ਏਤ੍ਤਕੇ ਠਾਨੇ ਸਤ੍ਥਾ ਆਣਾਪੇਤ੍ਵਾ ਆਣਤ੍ਤਿਂ ਪਵਤ੍ਤੇਤ੍ਵਾ ਇਦਾਨਿ ਸਮਾਦਪੇਨ੍ਤੋ ਯਤੋ ਖੋ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਯਤੋਤਿ ਯਦਾ. ਆਤਾਪੀਤਿ ਵੀਰਿਯਵਾ. ਨਿਪਕੋਤਿ ਸਪ੍ਪਞ੍ਞੋ. ਸਤੋਤਿ ਸਤਿਯਾ ਸਮਨ੍ਨਾਗਤੋ. ਦੁਕ੍ਖਸ੍ਸ ਅਨ੍ਤਕਿਰਿਯਾਯਾਤਿ ਵਟ੍ਟਦੁਕ੍ਖਸ੍ਸ ਪਰਿਚ੍ਛੇਦਪਰਿਵਟੁਮਕਿਰਿਯਾਯ. ਇਮੇ ਚ ਪਨ ਆਤਾਪਾਦਯੋ ਤਯੋਪਿ ਲੋਕਿਯਲੋਕੁਤ੍ਤਰਮਿਸ੍ਸਕਾ ਕਥਿਤਾ.

੧੧. ਮਹਾਚੋਰਸੁਤ੍ਤਵਣ੍ਣਨਾ

੫੧. ਏਕਾਦਸਮੇ ਮਹਾਚੋਰੋਤਿ ਮਹਨ੍ਤੋ ਬਲਵਚੋਰੋ. ਸਨ੍ਧਿਨ੍ਤਿ ਘਰਸਨ੍ਧਿਂ. ਨਿਲ੍ਲੋਪਨ੍ਤਿ ਮਹਾਵਿਲੋਪਂ. ਏਕਾਗਾਰਿਕਨ੍ਤਿ ਏਕਮੇਵ ਗੇਹਂ ਪਰਿਵਾਰੇਤ੍ਵਾ ਵਿਲੁਮ੍ਪਨਂ. ਪਰਿਪਨ੍ਥੇਪਿ ਤਿਟ੍ਠਤੀਤਿ ਪਨ੍ਥਦੂਹਨਕਮ੍ਮਂ ਕਰੋਤਿ. ਨਦੀਵਿਦੁਗ੍ਗਨ੍ਤਿ ਨਦੀਨਂ ਦੁਗ੍ਗਮਟ੍ਠਾਨਂ ਅਨ੍ਤਰਦੀਪਕਂ, ਯਤ੍ਥ ਸਕ੍ਕਾ ਹੋਤਿ ਦ੍ਵੀਹਿਪਿ ਤੀਹਿਪਿ ਜਙ੍ਘਸਹਸ੍ਸੇਹਿ ਸਦ੍ਧਿਂ ਨਿਲੀਯਿਤੁਂ. ਪਬ੍ਬਤਵਿਸਮਨ੍ਤਿ ਪਬ੍ਬਤਾਨਂ ਵਿਸਮਟ੍ਠਾਨਂ ਪਬ੍ਬਤਨ੍ਤਰਂ, ਯਤ੍ਥ ਸਕ੍ਕਾ ਹੋਤਿ ਸਤ੍ਤਹਿ ਵਾ ਅਟ੍ਠਹਿ ਵਾ ਜਙ੍ਘਸਹਸ੍ਸੇਹਿ ਸਦ੍ਧਿਂ ਨਿਲੀਯਿਤੁਂ. ਤਿਣਗਹਨਨ੍ਤਿ ਤਿਣੇਨ ਵਡ੍ਢਿਤ੍ਵਾ ਸਞ੍ਛਨ੍ਨਂ ਦ੍ਵਤ੍ਤਿਯੋਜਨਟ੍ਠਾਨਂ. ਰੋਧਨ੍ਤਿ ਘਨਂ ਅਞ੍ਞਮਞ੍ਞਂ ਸਂਸਟ੍ਠਸਾਖਂ ਏਕਾਬਦ੍ਧਂ ਮਹਾਵਨਸਣ੍ਡਂ. ਪਰਿਯੋਧਾਯ ਅਤ੍ਥਂ ਭਣਿਸ੍ਸਨ੍ਤੀਤਿ ਪਰਿਯੋਦਹਿਤ੍ਵਾ ਤਂ ਤਂ ਕਾਰਣਂ ਪਕ੍ਖਿਪਿਤ੍ਵਾ ਅਤ੍ਥਂ ਕਥਯਿਸ੍ਸਨ੍ਤਿ. ਤ੍ਯਾਸ੍ਸਾਤਿ ਤੇ ਅਸ੍ਸ. ਪਰਿਯੋਧਾਯ ਅਤ੍ਥਂ ਭਣਨ੍ਤੀਤਿ ਕਿਸ੍ਮਿਞ੍ਚਿ ਕਿਞ੍ਚਿ ਵਤ੍ਤੁਂ ਆਰਦ੍ਧੇਯੇਵ ‘‘ਮਾ ਏਵਂ ਅਵਚੁਤ੍ਥ, ਮਯਂ ਏਤਂ ਕੁਲਪਰਮ੍ਪਰਾਯ ਜਾਨਾਮ, ਨ ਏਸ ਏਵਰੂਪਂ ਕਰਿਸ੍ਸਤੀ’’ਤਿ ਤਂ ਤਂ ਕਾਰਣਂ ਪਕ੍ਖਿਪਿਤ੍ਵਾ ਮਹਨ੍ਤਮ੍ਪਿ ਦੋਸਂ ਹਰਨ੍ਤਾ ਅਤ੍ਥਂ ਭਣਨ੍ਤਿ. ਅਥ ਵਾ ਪਰਿਯੋਧਾਯਾਤਿ ਪਟਿਚ੍ਛਾਦੇਤ੍ਵਾਤਿਪਿ ਅਤ੍ਥੋ. ਤੇ ਹਿ ਤਸ੍ਸਪਿ ਦੋਸਂ ਪਟਿਚ੍ਛਾਦੇਤ੍ਵਾ ਅਤ੍ਥਂ ਭਣਨ੍ਤਿ. ਖਤਂ ਉਪਹਤਨ੍ਤਿ ਗੁਣਖਨਨੇਨ ਖਤਂ, ਗੁਣੁਪਘਾਤੇਨ ਉਪਹਤਂ. ਵਿਸਮੇਨ ਕਾਯਕਮ੍ਮੇਨਾਤਿ ਸਮ੍ਪਕ੍ਖਲਨਟ੍ਠੇਨ ਵਿਸਮੇਨ ਕਾਯਦ੍ਵਾਰਿਕਕਮ੍ਮੇਨ. ਵਚੀਮਨੋਕਮ੍ਮੇਸੁਪਿ ਏਸੇਵ ਨਯੋ. ਅਨ੍ਤਗ੍ਗਾਹਿਕਾਯਾਤਿ ਦਸਵਤ੍ਥੁਕਾਯ ਅਨ੍ਤਂ ਗਹੇਤ੍ਵਾ ਠਿਤਦਿਟ੍ਠਿਯਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਚੂਲ਼ਵਗ੍ਗੋ ਪਞ੍ਚਮੋ.