੭. ਚਤੁਮਹਾਰਾਜਸੁਤ੍ਤਵਣ੍ਣਨਾ

੩੭. ਸਤ੍ਤਮੇ ਅਮਚ੍ਚਾ ਪਾਰਿਸਜ੍ਜਾਤਿ ਪਰਿਚਾਰਿਕਦੇਵਤਾ. ਇਮਂ ਲੋਕਂ ਅਨੁਵਿਚਰਨ੍ਤੀਤਿ ਅਟ੍ਠਮੀਦਿਵਸੇ ਕਿਰ ਸਕ੍ਕੋ ਦੇਵਰਾਜਾ ਚਤ੍ਤਾਰੋ ਮਹਾਰਾਜਾਨੋ ਆਣਾਪੇਤਿ – ‘‘ਤਾਤਾ, ਅਜ੍ਜ ਅਟ੍ਠਮੀਦਿਵਸੇ ਮਨੁਸ੍ਸਲੋਕਂ ਅਨੁਵਿਚਰਿਤ੍ਵਾ ਪੁਞ੍ਞਾਨਿ ਕਰੋਨ੍ਤਾਨਂ ਨਾਮਗੋਤ੍ਤਂ ਉਗ੍ਗਣ੍ਹਿਤ੍ਵਾ ਆਗਚ੍ਛਥਾ’’ਤਿ. ਤੇ ਗਨ੍ਤ੍ਵਾ ਅਤ੍ਤਨੋ ਪਰਿਚਾਰਕੇ ਪੇਸੇਨ੍ਤਿ – ‘‘ਗਚ੍ਛਥ, ਤਾਤਾ, ਮਨੁਸ੍ਸਲੋਕਂ ਵਿਚਰਿਤ੍ਵਾ ਪੁਞ੍ਞਕਾਰਕਾਨਂ ਨਾਮਗੋਤ੍ਤਾਨਿ ਸੁਵਣ੍ਣਪਟ੍ਟੇ ਲਿਖਿਤ੍ਵਾ ਆਨੇਥਾ’’ਤਿ. ਤੇ ਤਥਾ ਕਰੋਨ੍ਤਿ. ਤੇਨ ਵੁਤ੍ਤਂ – ‘‘ਇਮਂ ਲੋਕਂ ਅਨੁਵਿਚਰਨ੍ਤੀ’’ਤਿ. ਕਚ੍ਚਿ ਬਹੂਤਿਆਦਿ ਤੇਸਂ ਉਪਪਰਿਕ੍ਖਾਕਾਰਦਸ੍ਸਨਤ੍ਥਂ ਵੁਤ੍ਤਂ. ਏਵਂ ਉਪਪਰਿਕ੍ਖਨ੍ਤਾ ਹਿ ਤੇ ਅਨੁਵਿਚਰਨ੍ਤਿ. ਤਤ੍ਥ ਉਪੋਸਥਂ ਉਪਵਸਨ੍ਤੀਤਿ ਮਾਸਸ੍ਸ ਅਟ੍ਠਵਾਰੇ ਉਪੋਸਥਙ੍ਗਾਨਿ ਅਧਿਟ੍ਠਹਨ੍ਤਿ. ਪਟਿਜਾਗਰੋਨ੍ਤੀਤਿ ਪਟਿਜਾਗਰਉਪੋਸਥਕਮ੍ਮਂ ਨਾਮ ਕਰੋਨ੍ਤਿ. ਤਂ ਕਰੋਨ੍ਤਾ ਏਕਸ੍ਮਿਂ ਅਦ੍ਧਮਾਸੇ ਚਤੁਨ੍ਨਂ ਉਪੋਸਥਦਿਵਸਾਨਂ ਪਚ੍ਚੁਗ੍ਗਮਨਾਨੁਗ੍ਗਮਨਵਸੇਨ ਕਰੋਨ੍ਤਿ. ਪਞ੍ਚਮੀਉਪੋਸਥਂ ਪਚ੍ਚੁਗ੍ਗਚ੍ਛਨ੍ਤਾ ਚਤੁਤ੍ਥਿਯਂ ਉਪੋਸਥਿਕਾ ਹੋਨ੍ਤਿ, ਅਨੁਗਚ੍ਛਨ੍ਤਾ ਛਟ੍ਠਿਯਂ. ਅਟ੍ਠਮੀਉਪੋਸਥਂ ਪਚ੍ਚੁਗ੍ਗਚ੍ਛਨ੍ਤਾ ਸਤ੍ਤਮਿਯਂ, ਅਨੁਗਚ੍ਛਨ੍ਤਾ ਨਵਮਿਯਂ. ਚਾਤੁਦ੍ਦਸਿਂ ਪਚ੍ਚੁਗ੍ਗਚ੍ਛਨ੍ਤਾ ਤੇਰਸਿਯਂ, ਪਨ੍ਨਰਸੀਉਪੋਸਥਂ ਅਨੁਗਚ੍ਛਨ੍ਤਾ ਪਾਟਿਪਦੇ ਉਪੋਸਥਿਕਾ ਹੋਨ੍ਤਿ. ਪੁਞ੍ਞਾਨਿ ਕਰੋਨ੍ਤੀਤਿ ਸਰਣਗਮਨਨਿਚ੍ਚਸੀਲਪੁਪ੍ਫਪੂਜਾਧਮ੍ਮਸ੍ਸਵਨਪਦੀਪਸਹਸ੍ਸਆਰੋਪਨਵਿਹਾਰਕਰਣਾਦੀਨਿ ਨਾਨਪ੍ਪਕਾਰਾਨਿ ਪੁਞ੍ਞਾਨਿ ਕਰੋਨ੍ਤਿ. ਤੇ ਏਵਂ ਅਨੁਵਿਚਰਿਤ੍ਵਾ ਪੁਞ੍ਞਕਮ੍ਮਕਾਰਕਾਨਂ ਨਾਮਗੋਤ੍ਤਾਨਿ ਸੋਵਣ੍ਣਮਯੇ ਪਟ੍ਟੇ ਲਿਖਿਤ੍ਵਾ ਆਹਰਿਤ੍ਵਾ ਚਤੁਨ੍ਨਂ ਮਹਾਰਾਜਾਨਂ ਦੇਨ੍ਤਿ. ਪੁਤ੍ਤਾ ਇਮਂ ਲੋਕਂ ਅਨੁਵਿਚਰਨ੍ਤੀਤਿ ਚਤੂਹਿ ਮਹਾਰਾਜੇਹਿ ਪੁਰਿਮਨਯੇਨੇਵ ਪਹਿਤਤ੍ਤਾ ਅਨੁਵਿਚਰਨ੍ਤਿ. ਤਦਹੂਤਿ ਤਂਦਿਵਸਂ. ਉਪੋਸਥੇਤਿ ਉਪੋਸਥਦਿਵਸੇ.

ਸਚੇ, ਭਿਕ੍ਖਵੇ, ਅਪ੍ਪਕਾ ਹੋਨ੍ਤੀਤਿ ਚਤੁਨ੍ਨਂ ਮਹਾਰਾਜਾਨਂ ਅਮਚ੍ਚਾ ਪਾਰਿਸਜ੍ਜਾ ਤਾ ਤਾ ਗਾਮਨਿਗਮਰਾਜਧਾਨਿਯੋ ਉਪਸਙ੍ਕਮਨ੍ਤਿ, ਤਤੋ ਤਂ ਉਪਨਿਸ੍ਸਾਯ ਅਧਿਵਤ੍ਥਾ ਦੇਵਤਾ ‘‘ਮਹਾਰਾਜਾਨਂ ਅਮਚ੍ਚਾ ਆਗਤਾ’’ਤਿ ਪਣ੍ਣਾਕਾਰਂ ਗਹੇਤ੍ਵਾ ਤੇਸਂ ਸਨ੍ਤਿਕਂ ਗਚ੍ਛਨ੍ਤਿ. ਤੇ ਪਣ੍ਣਾਕਾਰਂ ਗਹੇਤ੍ਵਾ ‘‘ਕਚ੍ਚਿ ਨੁ ਖੋ ਮਾਰਿਸਾ ਬਹੂ ਮਨੁਸ੍ਸਾ ਮਤ੍ਤੇਯ੍ਯਾ’’ਤਿ ਵੁਤ੍ਤਨਯੇਨ ਮਨੁਸ੍ਸਾਨਂ ਪੁਞ੍ਞਪਟਿਪਤ੍ਤਿਂ ਪੁਚ੍ਛਿਤ੍ਵਾ ‘‘ਆਮ, ਮਾਰਿਸ, ਇਮਸ੍ਮਿਂ ਗਾਮੇ ਅਸੁਕੋ ਚ ਅਸੁਕੋ ਚ ਪੁਞ੍ਞਾਨਿ ਕਰੋਨ੍ਤੀ’’ਤਿ ਵੁਤ੍ਤੇ ਤੇਸਂ ਨਾਮਗੋਤ੍ਤਂ ਲਿਖਿਤ੍ਵਾ ਅਞ੍ਞਤ੍ਥ ਗਚ੍ਛਨ੍ਤਿ. ਅਥ ਚਾਤੁਦ੍ਦਸਿਯਂ ਚਤੁਨ੍ਨਂ ਮਹਾਰਾਜਾਨਂ ਪੁਤ੍ਤਾਪਿ ਤਮੇਵ ਸੁਵਣ੍ਣਪਟ੍ਟਂ ਗਹੇਤ੍ਵਾ ਤੇਨੇਵ ਨਯੇਨ ਅਨੁਵਿਚਰਨ੍ਤਾ ਨਾਮਗੋਤ੍ਤਾਨਿ ਲਿਖਨ੍ਤਿ. ਤਦਹੁਪੋਸਥੇ ਪਨ੍ਨਰਸੇ ਚਤ੍ਤਾਰੋਪਿ ਮਹਾਰਾਜਾਨੋ ਤੇਨੇਵ ਨਯੇਨ ਤਸ੍ਮਿਂਯੇਵ ਸੁਵਣ੍ਣਪਟ੍ਟੇ ਨਾਮਗੋਤ੍ਤਾਨਿ ਲਿਖਨ੍ਤਿ. ਤੇ ਸੁਵਣ੍ਣਪਟ੍ਟਪਰਿਮਾਣੇਨੇਵ – ‘‘ਇਮਸ੍ਮਿਂ ਕਾਲੇ ਮਨੁਸ੍ਸਾ ਅਪ੍ਪਕਾ, ਇਮਸ੍ਮਿਂ ਕਾਲੇ ਬਹੁਕਾ’’ਤਿ ਜਾਨਨ੍ਤਿ. ਤਂ ਸਨ੍ਧਾਯ ‘‘ਸਚੇ, ਭਿਕ੍ਖਵੇ, ਅਪ੍ਪਕਾ ਹੋਨ੍ਤਿ ਮਨੁਸ੍ਸਾ’’ਤਿਆਦਿ ਵੁਤ੍ਤਂ. ਦੇਵਾਨਂ ਤਾਵਤਿਂਸਾਨਨ੍ਤਿ ਪਠਮਂ ਅਭਿਨਿਬ੍ਬਤ੍ਤੇ ਤੇਤ੍ਤਿਂਸ ਦੇਵਪੁਤ੍ਤੇ ਉਪਾਦਾਯ ਏਵਂਲਦ੍ਧਨਾਮਾਨਂ. ਤੇਸਂ ਪਨ ਉਪ੍ਪਤ੍ਤਿਕਥਾ ਦੀਘਨਿਕਾਯੇ ਸਕ੍ਕਪਞ੍ਹਸੁਤ੍ਤਵਣ੍ਣਨਾਯ ਵਿਤ੍ਥਾਰਿਤਾ. ਤੇਨਾਤਿ ਤੇਨ ਆਰੋਚਨੇਨ, ਤੇਨ ਵਾ ਪੁਞ੍ਞਕਾਰਕਾਨਂ ਅਪ੍ਪਕਭਾਵੇਨ. ਦਿਬ੍ਬਾ ਵਤ, ਭੋ, ਕਾਯਾ ਪਰਿਹਾਯਿਸ੍ਸਨ੍ਤੀਤਿ ਨਵਨਵਾਨਂ ਦੇਵਪੁਤ੍ਤਾਨਂ ਅਪਾਤੁਭਾਵੇਨ ਦੇਵਕਾਯਾ ਪਰਿਹਾਯਿਸ੍ਸਨ੍ਤਿ, ਰਮਣੀਯਂ ਦਸਯੋਜਨਸਹਸ੍ਸਂ ਦੇਵਨਗਰਂ ਸੁਞ੍ਞਂ ਭਵਿਸ੍ਸਤਿ. ਪਰਿਪੂਰਿਸ੍ਸਨ੍ਤਿ ਅਸੁਰਕਾਯਾਤਿ ਚਤ੍ਤਾਰੋ ਅਪਾਯਾ ਪਰਿਪੂਰਿਸ੍ਸਨ੍ਤਿ. ਇਮਿਨਾ ‘‘ਮਯਂ ਪਰਿਪੁਣ੍ਣੇ ਦੇਵਨਗਰੇ ਦੇਵਸਙ੍ਘਮਜ੍ਝੇ ਨਕ੍ਖਤ੍ਤਂ ਕੀਲ਼ਿਤੁਂ ਨ ਲਭਿਸ੍ਸਾਮਾ’’ਤਿ ਅਨਤ੍ਤਮਨਾ ਹੋਨ੍ਤਿ. ਸੁਕ੍ਕਪਕ੍ਖੇਪਿ ਇਮਿਨਾਵ ਉਪਾਯੇਨ ਅਤ੍ਥੋ ਵੇਦਿਤਬ੍ਬੋ.

ਭੂਤਪੁਬ੍ਬਂ, ਭਿਕ੍ਖਵੇ, ਸਕ੍ਕੋ ਦੇਵਾਨਮਿਨ੍ਦੋਤਿ ਅਤ੍ਤਨੋ ਸਕ੍ਕਦੇਵਰਾਜਕਾਲਂ ਸਨ੍ਧਾਯ ਕਥੇਤਿ. ਏਕਸ੍ਸ ਵਾ ਸਕ੍ਕਸ੍ਸ ਅਜ੍ਝਾਸਯਂ ਗਹੇਤ੍ਵਾ ਕਥੇਤੀਤਿ ਵੁਤ੍ਤਂ. ਅਨੁਨਯਮਾਨੋਤਿ ਅਨੁਬੋਧਯਮਾਨੋ. ਤਾਯਂ ਵੇਲਾਯਨ੍ਤਿ ਤਸ੍ਮਿਂ ਕਾਲੇ.

ਪਾਟਿਹਾਰਿਯਪਕ੍ਖਞ੍ਚਾਤਿ ਏਤ੍ਥ ਪਾਟਿਹਾਰਿਯਪਕ੍ਖੋ ਨਾਮ ਅਨ੍ਤੋਵਸ੍ਸੇ ਤੇਮਾਸਂ ਨਿਬਦ੍ਧੁਪੋਸਥੋ, ਤਂ ਅਸਕ੍ਕੋਨ੍ਤਸ੍ਸ ਦ੍ਵਿਨ੍ਨਂ ਪਵਾਰਣਾਨਂ ਅਨ੍ਤਰੇ ਏਕਮਾਸਂ ਨਿਬਦ੍ਧੁਪੋਸਥੋ, ਤਮ੍ਪਿ ਅਸਕ੍ਕੋਨ੍ਤਸ੍ਸ ਪਠਮਪਵਾਰਣਤੋ ਪਟ੍ਠਾਯ ਏਕੋ ਅਦ੍ਧਮਾਸੋ ਪਾਟਿਹਾਰਿਯਪਕ੍ਖੋਯੇਵ ਨਾਮ. ਅਟ੍ਠਙ੍ਗਸੁਸਮਾਗਤਨ੍ਤਿ ਅਟ੍ਠਹਿ ਗੁਣਙ੍ਗੇਹਿ ਸਮਨ੍ਨਾਗਤਂ. ਯੋਪਿਸ੍ਸ ਮਾਦਿਸੋ ਨਰੋਤਿ ਯੋਪਿ ਸਤ੍ਤੋ ਮਾਦਿਸੋ ਭਵੇਯ੍ਯ. ਸਕ੍ਕੋਪਿ ਕਿਰ ਵੁਤ੍ਤਪ੍ਪਕਾਰਸ੍ਸ ਉਪੋਸਥਕਮ੍ਮਸ੍ਸ ਗੁਣਂ ਜਾਨਿਤ੍ਵਾ ਦ੍ਵੇ ਦੇਵਲੋਕਸਮ੍ਪਤ੍ਤਿਯੋ ਪਹਾਯ ਮਾਸਸ੍ਸ ਅਟ੍ਠ ਵਾਰੇ ਉਪੋਸਥਂ ਉਪਵਸਤਿ. ਤਸ੍ਮਾ ਏਵਮਾਹ. ਅਪਰੋ ਨਯੋ – ਯੋਪਿਸ੍ਸ ਮਾਦਿਸੋ ਨਰੋਤਿ ਯੋਪਿ ਸਤ੍ਤੋ ਮਾਦਿਸੋ ਅਸ੍ਸ, ਮਯਾ ਪਤ੍ਤਂ ਸਮ੍ਪਤ੍ਤਿਂ ਪਾਪੁਣਿਤੁਂ ਇਚ੍ਛੇਯ੍ਯਾਤਿ ਅਤ੍ਥੋ. ਸਕ੍ਕਾ ਹਿ ਏਵਰੂਪੇਨ ਉਪੋਸਥਕਮ੍ਮੇਨ ਸਕ੍ਕਸਮ੍ਪਤ੍ਤਿਂ ਪਾਪੁਣਿਤੁਨ੍ਤਿ ਅਯਮੇਤ੍ਥ ਅਧਿਪ੍ਪਾਯੋ.

ਵੁਸਿਤਵਾਤਿ ਵੁਤ੍ਥਵਾਸੋ. ਕਤਕਰਣੀਯੋਤਿ ਚਤੂਹਿ ਮਗ੍ਗੇਹਿ ਕਤ੍ਤਬ੍ਬਕਿਚ੍ਚਂ ਕਤ੍ਵਾ ਠਿਤੋ. ਓਹਿਤਭਾਰੋਤਿ ਖਨ੍ਧਭਾਰਕਿਲੇਸਭਾਰਅਭਿਸਙ੍ਖਾਰਭਾਰੇ ਓਤਾਰੇਤ੍ਵਾ ਠਿਤੋ. ਅਨੁਪ੍ਪਤ੍ਤਸਦਤ੍ਥੋਤਿ ਸਦਤ੍ਥੋ ਵੁਚ੍ਚਤਿ ਅਰਹਤ੍ਤਂ, ਤਂ ਅਨੁਪ੍ਪਤ੍ਤੋ. ਪਰਿਕ੍ਖੀਣਭਵਸਂਯੋਜਨੋਤਿ ਯੇਨ ਸਂਯੋਜਨੇਨ ਬਦ੍ਧੋ ਭਵੇਸੁ ਆਕਡ੍ਢੀਯਤਿ, ਤਸ੍ਸ ਖੀਣਤ੍ਤਾ ਪਰਿਕ੍ਖੀਣਭਵਸਂਯੋਜਨੋ. ਸਮ੍ਮਦਞ੍ਞਾ ਵਿਮੁਤ੍ਤੋਤਿ ਹੇਤੁਨਾ ਨਯੇਨ ਕਾਰਣੇਨ ਜਾਨਿਤ੍ਵਾ ਵਿਮੁਤ੍ਤੋ. ਕਲ੍ਲਂ ਵਚਨਾਯਾਤਿ ਯੁਤ੍ਤਂ ਵਤ੍ਤੁਂ.

ਯੋਪਿਸ੍ਸ ਮਾਦਿਸੋ ਨਰੋਤਿ ਯੋਪਿ ਮਾਦਿਸੋ ਖੀਣਾਸਵੋ ਅਸ੍ਸ, ਸੋਪਿ ਏਵਰੂਪਂ ਉਪੋਸਥਂ ਉਪਵਸੇਯ੍ਯਾਤਿ ਉਪੋਸਥਕਮ੍ਮਸ੍ਸ ਗੁਣਂ ਜਾਨਨ੍ਤੋ ਏਵਂ ਵਦੇਯ੍ਯ. ਅਪਰੋ ਨਯੋ ਯੋਪਿਸ੍ਸ ਮਾਦਿਸੋ ਨਰੋਤਿ ਯੋਪਿ ਸਤ੍ਤੋ ਮਾਦਿਸੋ ਅਸ੍ਸ, ਮਯਾ ਪਤ੍ਤਂ ਸਮ੍ਪਤ੍ਤਿਂ ਪਾਪੁਣਿਤੁਂ ਇਚ੍ਛੇਯ੍ਯਾਤਿ ਅਤ੍ਥੋ. ਸਕ੍ਕਾ ਹਿ ਏਵਰੂਪੇਨ ਉਪੋਸਥਕਮ੍ਮੇਨ ਖੀਣਾਸਵਸਮ੍ਪਤ੍ਤਿਂ ਪਾਪੁਣਿਤੁਨ੍ਤਿ ਅਯਮੇਤ੍ਥ ਅਧਿਪ੍ਪਾਯੋ. ਅਟ੍ਠਮਂ ਉਤ੍ਤਾਨਤ੍ਥਮੇਵ.