੬. ਦੇਵਦੂਤਸੁਤ੍ਤਵਣ੍ਣਨਾ

੩੬. ਛਟ੍ਠੇ ਦੇਵਦੂਤਾਨੀਤਿ ਦੇਵਦੂਤਾ. ਅਯਂ ਪਨੇਤ੍ਥ ਵਚਨਤ੍ਥੋ – ਦੇਵੋਤਿ ਮਚ੍ਚੁ, ਤਸ੍ਸ ਦੂਤਾਤਿ ਦੇਵਦੂਤਾ. ਜਿਣ੍ਣਬ੍ਯਾਧਿਮਤਾ ਹਿ ਸਂਵੇਗਜਨਨਟ੍ਠੇਨ ‘‘ਇਦਾਨਿ ਤੇ ਮਚ੍ਚੁਸਮੀਪਂ ਗਨ੍ਤਬ੍ਬ’’ਨ੍ਤਿ ਚੋਦੇਨ੍ਤਿ ਵਿਯ, ਤਸ੍ਮਾ ਦੇਵਦੂਤਾਤਿ ਵੁਚ੍ਚਨ੍ਤਿ. ਦੇਵਾ ਵਿਯ ਦੂਤਾਤਿਪਿ ਦੇਵਦੂਤਾ. ਯਥਾ ਹਿ ਅਲਙ੍ਕਤਪਟਿਯਤ੍ਤਾਯ ਦੇਵਤਾਯ ਆਕਾਸੇ ਠਤ੍ਵਾ ‘‘ਤ੍ਵਂ ਅਸੁਕਦਿਵਸੇ ਮਰਿਸ੍ਸਸੀ’’ਤਿ ਵੁਤ੍ਤੇ ਤਸ੍ਸਾ ਵਚਨਂ ਸਦ੍ਧਾਤਬ੍ਬਂ ਹੋਤਿ; ਏਵਮੇਵਂ ਜਿਣ੍ਣਬ੍ਯਾਧਿਮਤਾਪਿ ਦਿਸ੍ਸਮਾਨਾ ‘‘ਤ੍ਵਮ੍ਪਿ ਏਵਂਧਮ੍ਮੋ’’ਤਿ ਚੋਦੇਨ੍ਤਿ ਵਿਯ, ਤੇਸਞ੍ਚ ਤਂ ਵਚਨਂ ਅਨਞ੍ਞਥਾਭਾਵਿਤਾਯ ਦੇਵਤਾਯ ਬ੍ਯਾਕਰਣਸਦਿਸਮੇਵ ਹੋਤੀਤਿ ਦੇਵਾ ਵਿਯ ਦੂਤਾਤਿ ਦੇਵਦੂਤਾ. ਵਿਸੁਦ੍ਧਿਦੇਵਾਨਂ ਦੂਤਾਤਿਪਿ ਦੇਵਦੂਤਾ. ਸਬ੍ਬਬੋਧਿਸਤ੍ਤਾ ਹਿ ਜਿਣ੍ਣਬ੍ਯਾਧਿਮਤਪਬ੍ਬਜਿਤੇ ਦਿਸ੍ਵਾਵ ਸਂਵੇਗਂ ਆਪਜ੍ਜਿਤ੍ਵਾ ਨਿਕ੍ਖਮ੍ਮ ਪਬ੍ਬਜਿਂਸੁ. ਏਵਂ ਵਿਸੁਦ੍ਧਿਦੇਵਾਨਂ ਦੂਤਾਤਿਪਿ ਦੇਵਦੂਤਾ. ਇਧ ਪਨ ਲਿਙ੍ਗਵਿਪਲ੍ਲਾਸੇਨ ‘‘ਦੇਵਦੂਤਾਨੀ’’ਤਿ ਵੁਤ੍ਤਂ.

ਕਾਯੇਨ ਦੁਚ੍ਚਰਿਤਨ੍ਤਿਆਦਿ ਕਸ੍ਮਾ ਆਰਦ੍ਧਂ? ਦੇਵਦੂਤਾਨੁਯੁਞ੍ਜਨਟ੍ਠਾਨੁਪਕ੍ਕਮਕਮ੍ਮਦਸ੍ਸਨਤ੍ਥਂ. ਇਮਿਨਾ ਹਿ ਕਮ੍ਮੇਨ ਅਯਂ ਸਤ੍ਤੋ ਨਿਰਯੇ ਨਿਬ੍ਬਤ੍ਤਤਿ, ਅਥ ਨਂ ਤਤ੍ਥ ਯਮੋ ਰਾਜਾ ਦੇਵਦੂਤੇ ਸਮਨੁਯੁਞ੍ਜਤਿ. ਤਤ੍ਥ ਕਾਯੇਨ ਦੁਚ੍ਚਰਿਤਂ ਚਰਤੀਤਿ ਕਾਯਦ੍ਵਾਰੇਨ ਤਿਵਿਧਂ ਦੁਚ੍ਚਰਿਤਂ ਚਰਤਿ. ਵਾਚਾਯਾਤਿ ਵਚੀਦ੍ਵਾਰੇਨ ਚਤੁਬ੍ਬਿਧਂ ਦੁਚ੍ਚਰਿਤਂ ਚਰਤਿ. ਮਨਸਾਤਿ ਮਨੋਦ੍ਵਾਰੇਨ ਤਿਵਿਧਂ ਦੁਚ੍ਚਰਿਤਂ ਚਰਤਿ.

ਤਮੇਨਂ, ਭਿਕ੍ਖਵੇ, ਨਿਰਯਪਾਲਾਤਿ ਏਤ੍ਥ ਏਕਚ੍ਚੇ ਥੇਰਾ ‘‘ਨਿਰਯਪਾਲਾ ਨਾਮ ਨਤ੍ਥਿ, ਯਨ੍ਤਰੂਪਂ ਵਿਯ ਕਮ੍ਮਮੇਵ ਕਾਰਣਂ ਕਾਰੇਤੀ’’ਤਿ ਵਦਨ੍ਤਿ. ਤਂ ‘‘ਅਤ੍ਥਿ ਨਿਰਯੇ ਨਿਰਯਪਾਲਾਤਿ, ਆਮਨ੍ਤਾ. ਅਤ੍ਥਿ ਚ ਕਾਰਣਿਕਾ’’ਤਿਆਦਿਨਾ ਨਯੇਨ ਅਭਿਧਮ੍ਮੇ (ਕਥਾ. ੮੬੬) ਪਟਿਸੇਧਿਤਮੇਵ. ਯਥਾ ਹਿ ਮਨੁਸ੍ਸਲੋਕੇ ਕਮ੍ਮਕਾਰਣਕਾਰਕਾ ਅਤ੍ਥਿ, ਏਵਮੇਵ ਨਿਰਯੇ ਨਿਰਯਪਾਲਾ ਅਤ੍ਥੀਤਿ. ਯਮਸ੍ਸ ਰਞ੍ਞੋਤਿ ਯਮਰਾਜਾ ਨਾਮ ਵੇਮਾਨਿਕਪੇਤਰਾਜਾ. ਏਕਸ੍ਮਿਂ ਕਾਲੇ ਦਿਬ੍ਬਵਿਮਾਨੇ ਦਿਬ੍ਬਕਪ੍ਪਰੁਕ੍ਖਦਿਬ੍ਬਉਯ੍ਯਾਨਦਿਬ੍ਬਨਾਟਕਾਦਿਸਬ੍ਬਸਮ੍ਪਤ੍ਤਿਂ ਅਨੁਭਵਤਿ, ਏਕਸ੍ਮਿਂ ਕਾਲੇ ਕਮ੍ਮਵਿਪਾਕਂ, ਧਮ੍ਮਿਕੋ ਰਾਜਾ, ਨ ਚੇਸ ਏਕੋਵ ਹੋਤਿ, ਚਤੂਸੁ ਪਨ ਦ੍ਵਾਰੇਸੁ ਚਤ੍ਤਾਰੋ ਜਨਾ ਹੋਨ੍ਤਿ. ਅਮਤ੍ਤੇਯ੍ਯੋਤਿ ਮਾਤੁ ਹਿਤੋ ਮਤ੍ਤੇਯ੍ਯੋ, ਮਾਤਰਿ ਸਮ੍ਮਾ ਪਟਿਪਨ੍ਨੋਤਿ ਅਤ੍ਥੋ. ਨ ਮਤ੍ਤੇਯ੍ਯੋਤਿ ਅਮਤ੍ਤੇਯ੍ਯੋ, ਮਾਤਰਿ ਮਿਚ੍ਛਾ ਪਟਿਪਨ੍ਨੋਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ. ਅਬ੍ਰਹ੍ਮਞ੍ਞੋਤਿ ਏਤ੍ਥ ਚ ਖੀਣਾਸਵਾ ਬ੍ਰਾਹ੍ਮਣਾ ਨਾਮ, ਤੇਸੁ ਮਿਚ੍ਛਾ ਪਟਿਪਨ੍ਨੋ ਅਬ੍ਰਹ੍ਮਞ੍ਞੋ ਨਾਮ.

ਸਮਨੁਯੁਞ੍ਜਤੀਤਿ ਅਨੁਯੋਗਵਤ੍ਤਂ ਆਰੋਪੇਨ੍ਤੋ ਪੁਚ੍ਛਤਿ, ਲਦ੍ਧਿਂ ਪਤਿਟ੍ਠਾਪੇਨ੍ਤੋ ਪਨ ਸਮਨੁਗ੍ਗਾਹਤਿ ਨਾਮ, ਕਾਰਣਂ ਪੁਚ੍ਛਨ੍ਤੋ ਸਮਨੁਭਾਸਤਿ ਨਾਮ. ਨਾਦ੍ਦਸਨ੍ਤਿ ਅਤ੍ਤਨੋ ਸਨ੍ਤਿਕੇ ਪਹਿਤਸ੍ਸ ਕਸ੍ਸਚਿ ਦੇਵਦੂਤਸ੍ਸ ਅਭਾਵਂ ਸਨ੍ਧਾਯ ਏਵਂ ਵਦਤਿ.

ਅਥ ਨਂ ਯਮੋ ‘‘ਨਾਯਂ ਭਾਸਿਤਸ੍ਸ ਅਤ੍ਥਂ ਸਲ੍ਲਕ੍ਖੇਤੀ’’ਤਿ ਞਤ੍ਵਾ ਅਤ੍ਥਂ ਸਲ੍ਲਕ੍ਖਾਪੇਤੁਕਾਮੋ ਅਮ੍ਭੋਤਿਆਦਿਮਾਹ. ਤਤ੍ਥ ਜਿਣ੍ਣਨ੍ਤਿ ਜਰਾਜਿਣ੍ਣਂ. ਗੋਪਾਨਸਿਵਙ੍ਕਨ੍ਤਿ ਗੋਪਾਨਸੀ ਵਿਯ ਵਙ੍ਕਂ. ਭੋਗ੍ਗਨ੍ਤਿ ਭਗ੍ਗਂ. ਇਮਿਨਾਪਿਸ੍ਸ ਵਙ੍ਕਭਾਵਮੇਵ ਦੀਪੇਤਿ. ਦਣ੍ਡਪਰਾਯਣਨ੍ਤਿ ਦਣ੍ਡਪਟਿਸਰਣਂ ਦਣ੍ਡਦੁਤਿਯਂ. ਪਵੇਧਮਾਨਨ੍ਤਿ ਕਮ੍ਪਮਾਨਂ. ਆਤੁਰਨ੍ਤਿ ਜਰਾਤੁਰਂ. ਖਣ੍ਡਦਨ੍ਤਨ੍ਤਿ ਜਰਾਨੁਭਾਵੇਨ ਖਣ੍ਡਿਤਦਨ੍ਤਂ. ਪਲਿਤਕੇਸਨ੍ਤਿ ਪਣ੍ਡਰਕੇਸਂ. ਵਿਲੂਨਨ੍ਤਿ ਲੁਞ੍ਚਿਤ੍ਵਾ ਗਹਿਤਕੇਸਂ ਵਿਯ ਖਲ੍ਲਾਟਂ. ਖਲਿਤਸਿਰਨ੍ਤਿ ਮਹਾਖਲ੍ਲਾਟਸੀਸਂ. ਵਲਿਤਨ੍ਤਿ ਸਞ੍ਜਾਤਵਲਿਂ. ਤਿਲਕਾਹਤਗਤ੍ਤਨ੍ਤਿ ਸੇਤਤਿਲਕਕਾਲ਼ਤਿਲਕੇਹਿ ਵਿਕਿਣ੍ਣਸਰੀਰਂ. ਜਰਾਧਮ੍ਮੋਤਿ ਜਰਾਸਭਾਵੋ, ਅਪਰਿਮੁਤ੍ਤੋ ਜਰਾਯ, ਜਰਾ ਨਾਮ ਮਯ੍ਹਂ ਅਬ੍ਭਨ੍ਤਰੇਯੇਵ ਪਵਤ੍ਤਤੀਤਿ. ਪਰਤੋ ਬ੍ਯਾਧਿਧਮ੍ਮੋ ਮਰਣਧਮ੍ਮੋਤਿ ਪਦਦ੍ਵਯੇਪਿ ਏਸੇਵ ਨਯੋ.

ਪਠਮਂ ਦੇਵਦੂਤਂ ਸਮਨੁਯੁਞ੍ਜਿਤ੍ਵਾਤਿ ਏਤ੍ਥ ਜਰਾਜਿਣ੍ਣਸਤ੍ਤੋ ਅਤ੍ਥਤੋ ਏਵਂ ਵਦਤਿ ਨਾਮ – ‘‘ਪਸ੍ਸਥ, ਭੋ, ਅਹਮ੍ਪਿ ਤੁਮ੍ਹੇ ਵਿਯ ਤਰੁਣੋ ਅਹੋਸਿਂ ਊਰੁਬਲੀ ਬਾਹੁਬਲੀ ਜਵਸਮ੍ਪਨ੍ਨੋ, ਤਸ੍ਸ ਮੇ ਤਾ ਬਲਜਵਸਮ੍ਪਤ੍ਤਿਯੋ ਅਨ੍ਤਰਹਿਤਾ, ਵਿਜ੍ਜਮਾਨਾਪਿ ਮੇ ਹਤ੍ਥਪਾਦਾ ਹਤ੍ਥਪਾਦਕਿਚ੍ਚਂ ਨ ਕਰੋਨ੍ਤਿ, ਜਰਾਯਮ੍ਹਿ ਅਪਰਿਮੁਤ੍ਤਤਾਯ ਏਦਿਸੋ ਜਾਤੋ. ਨ ਖੋ ਪਨਾਹਮੇਵ, ਤੁਮ੍ਹੇਪਿ ਜਰਾਯ ਅਪਰਿਮੁਤ੍ਤਾਵ. ਯਥੇਵ ਹਿ ਮਯ੍ਹਂ, ਏਵਂ ਤੁਮ੍ਹਾਕਮ੍ਪਿ ਜਰਾ ਆਗਮਿਸ੍ਸਤਿ. ਇਤਿ ਤਸ੍ਸਾ ਪੁਰੇ ਆਗਮਨਾਵ ਕਲ੍ਯਾਣਂ ਕਰੋਥਾ’’ਤਿ. ਤੇਨੇਵੇਸ ਦੇਵਦੂਤੋ ਨਾਮ ਜਾਤੋ. ਆਬਾਧਿਕਨ੍ਤਿ ਬਾਧਿਕਂ. ਦੁਕ੍ਖਿਤਨ੍ਤਿ ਦੁਕ੍ਖਪ੍ਪਤ੍ਤਂ. ਬਾਲ਼੍ਹਗਿਲਾਨਨ੍ਤਿ ਅਧਿਮਤ੍ਤਗਿਲਾਨਂ.

ਦੁਤਿਯਂ ਦੇਵਦੂਤਨ੍ਤਿ ਏਤ੍ਥਪਿ ਗਿਲਾਨਸਤ੍ਤੋ ਅਤ੍ਥਤੋ ਏਵਂ ਵਦਤਿ ਨਾਮ – ‘‘ਪਸ੍ਸਥ, ਭੋ, ਅਹਮ੍ਪਿ ਤੁਮ੍ਹੇ ਵਿਯ ਨਿਰੋਗੋ ਅਹੋਸਿਂ, ਸੋਮ੍ਹਿ ਏਤਰਹਿ ਬ੍ਯਾਧਿਨਾ ਅਭਿਹਤੋ, ਸਕੇ ਮੁਤ੍ਤਕਰੀਸੇ ਪਲਿਪਨ੍ਨੋ, ਉਟ੍ਠਾਤੁਮ੍ਪਿ ਨ ਸਕ੍ਕੋਮਿ. ਵਿਜ੍ਜਮਾਨਾਪਿ ਮੇ ਹਤ੍ਥਪਾਦਾ ਹਤ੍ਥਪਾਦਕਿਚ੍ਚਂ ਨ ਕਰੋਨ੍ਤਿ, ਬ੍ਯਾਧਿਤੋਮ੍ਹਿ ਅਪਰਿਮੁਤ੍ਤਤਾਯ ਏਦਿਸੋ ਜਾਤੋ. ਨ ਖੋ ਪਨਾਹਮੇਵ, ਤੁਮ੍ਹੇਪਿ ਬ੍ਯਾਧਿਤੋ ਅਪਰਿਮੁਤ੍ਤਾਵ. ਯਥੇਵ ਹਿ ਮਯ੍ਹਂ, ਏਵਂ ਤੁਮ੍ਹਾਕਮ੍ਪਿ ਬ੍ਯਾਧਿ ਆਗਮਿਸ੍ਸਤਿ. ਇਤਿ ਤਸ੍ਸ ਪੁਰੇ ਆਗਮਨਾਵ ਕਲ੍ਯਾਣਂ ਕਰੋਥਾ’’ਤਿ. ਤੇਨੇਵੇਸ ਦੇਵਦੂਤੋ ਨਾਮ ਜਾਤੋ.

ਏਕਾਹਮਤਨ੍ਤਿਆਦੀਸੁ ਏਕਾਹਂ ਮਤਸ੍ਸ ਅਸ੍ਸਾਤਿ ਏਕਾਹਮਤੋ, ਤਂ ਏਕਾਹਮਤਂ. ਪਰਤੋ ਪਦਦ੍ਵਯੇਪਿ ਏਸੇਵ ਨਯੋ. ਭਸ੍ਤਾ ਵਿਯ ਵਾਯੁਨਾ ਉਦ੍ਧਂ ਜੀਵਿਤਪਰਿਯਾਦਾਨਾ ਯਥਾਕ੍ਕਮਂ ਸਮੁਗ੍ਗਤੇਨ ਸੂਨਭਾਵੇਨ ਉਦ੍ਧੁਮਾਤਤ੍ਤਾ ਉਦ੍ਧੁਮਾਤਕਂ. ਵਿਨੀਲੋ ਵੁਚ੍ਚਤਿ ਵਿਪਰਿਭਿਨ੍ਨਵਣ੍ਣੋ, ਵਿਨੀਲੋਵ ਵਿਨੀਲਕੋ, ਤਂ ਵਿਨੀਲਕਂ. ਪਟਿਕੂਲਤ੍ਤਾ ਵਾ ਕੁਚ੍ਛਿਤਂ ਵਿਨੀਲਨ੍ਤਿ ਵਿਨੀਲਕਂ. ਵਿਪੁਬ੍ਬਕਨ੍ਤਿ ਵਿਸ੍ਸਨ੍ਦਮਾਨਪੁਬ੍ਬਕਂ, ਪਰਿਭਿਨ੍ਨਟ੍ਠਾਨੇ ਹਿ ਪਗ੍ਘਰਿਤੇਨ ਪੁਬ੍ਬੇਨ ਪਲਿਮਕ੍ਖਿਤਨ੍ਤਿ ਅਤ੍ਥੋ.

ਤਤਿਯਂ ਦੇਵਦੂਤਨ੍ਤਿ ਏਤ੍ਥ ਮਤਕਸਤ੍ਤੋ ਅਤ੍ਥਤੋ ਏਵਂ ਵਦਤਿ ਨਾਮ – ‘‘ਪਸ੍ਸਥ, ਭੋ, ਮਂ ਆਮਕਸੁਸਾਨੇ ਛਡ੍ਡਿਤਂ ਉਦ੍ਧੁਮਾਤਕਾਦਿਭਾਵਪ੍ਪਤ੍ਤਂ, ਮਰਣਤੋਮ੍ਹਿ ਅਪਰਿਮੁਤ੍ਤਤਾਯ ਏਦਿਸੋ ਜਾਤੋ. ਨ ਖੋ ਪਨਾਹਮੇਵ, ਤੁਮ੍ਹੇਪਿ ਮਰਣਤੋ ਅਪਰਿਮੁਤ੍ਤਾ. ਯਥੇਵ ਹਿ ਮਯ੍ਹਂ, ਏਵਂ ਤੁਮ੍ਹਾਕਮ੍ਪਿ ਮਰਣਂ ਆਗਮਿਸ੍ਸਤਿ. ਇਤਿ ਤਸ੍ਸ ਪੁਰੇ ਆਗਮਨਾਵ ਕਲ੍ਯਾਣਂ ਕਰੋਥਾ’’ਤਿ. ਤੇਨੇਵਸ੍ਸ ਦੇਵਦੂਤੋ ਨਾਮ ਜਾਤੋ.

ਇਮਂ ਪਨ ਦੇਵਦੂਤਾਨੁਯੋਗਂ ਕੋ ਲਭਤਿ, ਕੋ ਨ ਲਭਤਿ? ਯੇਨ ਤਾਵ ਬਹੁਂ ਪਾਪਂ ਕਤਂ, ਸੋ ਗਨ੍ਤ੍ਵਾ ਨਿਰਯੇ ਨਿਬ੍ਬਤ੍ਤਤਿਯੇਵ. ਯੇਨ ਪਨ ਪਰਿਤ੍ਤਂ ਪਾਪਂ ਕਤਂ, ਸੋ ਲਭਤਿ. ਯਥਾ ਹਿ ਸਭਣ੍ਡਂ ਚੋਰਂ ਗਹੇਤ੍ਵਾ ਕਤ੍ਤਬ੍ਬਮੇਵ ਕਰੋਨ੍ਤਿ ਨ ਵਿਨਿਚ੍ਛਿਨਨ੍ਤਿ. ਅਨੁਵਿਜ੍ਜਿਤ੍ਵਾ ਗਹਿਤਂ ਪਨ ਵਿਨਿਚ੍ਛਯਟ੍ਠਾਨਂ ਨਯਨ੍ਤਿ, ਸੋ ਵਿਨਿਚ੍ਛਯਂ ਲਭਤਿ. ਏਵਂਸਮ੍ਪਦਮੇਤਂ. ਪਰਿਤ੍ਤਪਾਪਕਮ੍ਮਾ ਹਿ ਅਤ੍ਤਨੋ ਧਮ੍ਮਤਾਯਪਿ ਸਰਨ੍ਤਿ, ਸਾਰੀਯਮਾਨਾਪਿ ਸਰਨ੍ਤਿ.

ਤਤ੍ਥ ਦੀਘਜਯਨ੍ਤਦਮਿਲ਼ੋ ਨਾਮ ਅਤ੍ਤਨੋ ਧਮ੍ਮਤਾਯ ਸਰਿ. ਸੋ ਕਿਰ ਦਮਿਲ਼ੋ ਸੁਮਨਗਿਰਿਮਹਾਵਿਹਾਰੇ ਆਕਾਸਚੇਤਿਯਂ ਰਤ੍ਤਪਟੇਨ ਪੂਜੇਸਿ, ਅਥ ਨਿਰਯੇ ਉਸ੍ਸਦਸਾਮਨ੍ਤੇ ਨਿਬ੍ਬਤ੍ਤੋ ਅਗ੍ਗਿਜਾਲਸਦ੍ਦਂ ਸੁਤ੍ਵਾਵ ਅਤ੍ਤਨਾ ਪੂਜਿਤਪਟਂ ਅਨੁਸ੍ਸਰਿ, ਸੋ ਗਨ੍ਤ੍ਵਾ ਸਗ੍ਗੇ ਨਿਬ੍ਬਤ੍ਤੋ. ਅਪਰੋਪਿ ਪੁਤ੍ਤਸ੍ਸ ਦਹਰਭਿਕ੍ਖੁਨੋ ਖਲਿਸਾਟਕਂ ਦੇਨ੍ਤੋ ਪਾਦਮੂਲੇ ਠਪੇਸਿ, ਮਰਣਕਾਲਮ੍ਹਿ ਪਟਪਟਾਤਿ ਸਦ੍ਦੇ ਨਿਮਿਤ੍ਤਂ ਗਣ੍ਹਿ, ਸੋਪਿ ਉਸ੍ਸਦਸਾਮਨ੍ਤੇ ਨਿਬ੍ਬਤ੍ਤੋ ਜਾਲਸਦ੍ਦੇਨ ਤਂ ਸਾਟਕਂ ਅਨੁਸ੍ਸਰਿਤ੍ਵਾ ਸਗ੍ਗੇ ਨਿਬ੍ਬਤ੍ਤੋ. ਏਵਂ ਤਾਵ ਅਤ੍ਤਨੋ ਧਮ੍ਮਤਾਯ ਕੁਸਲਂ ਕਮ੍ਮਂ ਸਰਿਤ੍ਵਾ ਸਗ੍ਗੇ ਨਿਬ੍ਬਤ੍ਤਤੀਤਿ.

ਅਤ੍ਤਨੋ ਧਮ੍ਮਤਾਯ ਅਸਰਨ੍ਤੇ ਪਨ ਤਯੋ ਦੇਵਦੂਤੇ ਪੁਚ੍ਛਤਿ. ਤਤ੍ਥ ਕੋਚਿ ਪਠਮੇਨ ਦੇਵਦੂਤੇਨ ਸਰਤਿ, ਕੋਚਿ ਦੁਤਿਯਤਤਿਯੇਹਿ, ਕੋਚਿ ਤੀਹਿਪਿ ਨਸ੍ਸਰਤਿ. ਤਂ ਯਮੋ ਰਾਜਾ ਦਿਸ੍ਵਾ ਸਯਂ ਸਾਰੇਤਿ. ਏਕੋ ਕਿਰ ਅਮਚ੍ਚੋ ਸੁਮਨਪੁਪ੍ਫਕੁਮ੍ਭੇਨ ਮਹਾਚੇਤਿਯਂ ਪੂਜੇਤ੍ਵਾ ਯਮਸ੍ਸ ਪਤ੍ਤਿਂ ਅਦਾਸਿ, ਤਂ ਅਕੁਸਲਕਮ੍ਮੇਨ ਨਿਰਯੇ ਨਿਬ੍ਬਤ੍ਤਂ ਯਮਸ੍ਸ ਸਨ੍ਤਿਕਂ ਨਯਿਂਸੁ. ਤਸ੍ਮਿਂ ਤੀਹਿਪਿ ਦੇਵਦੂਤੇਹਿ ਕੁਸਲਂ ਅਸਰਨ੍ਤੇ ਯਮੋ ਸਯਂ ਓਲੋਕੇਨ੍ਤੋ ਦਿਸ੍ਵਾ – ‘‘ਨਨੁ ਤ੍ਵਂ ਮਹਾਚੇਤਿਯਂ ਸੁਮਨਪੁਪ੍ਫਕੁਮ੍ਭੇਨ ਪੂਜੇਤ੍ਵਾ ਮਯ੍ਹਂ ਪਤ੍ਤਿਂ ਅਦਾਸੀ’’ਤਿ ਸਾਰੇਸਿ, ਸੋ ਤਸ੍ਮਿਂ ਕਾਲੇ ਸਰਿਤ੍ਵਾ ਦੇਵਲੋਕਂ ਗਤੋ. ਯਮੋ ਪਨ ਸਯਂ ਓਲੋਕੇਤ੍ਵਾਪਿ ਅਪਸ੍ਸਨ੍ਤੋ – ‘‘ਮਹਾਦੁਕ੍ਖਂ ਨਾਮ ਅਨੁਭਵਿਸ੍ਸਤਿ ਅਯਂ ਸਤ੍ਤੋ’’ਤਿ ਤੁਣ੍ਹੀ ਅਹੋਸਿ.

ਤਤ੍ਤਂ ਅਯੋਖਿਲਨ੍ਤਿ ਤਿਗਾਵੁਤਂ ਅਤ੍ਤਭਾਵਂ ਸਮ੍ਪਜ੍ਜਲਿਤਾਯ ਲੋਹਪਥਵਿਯਾ ਉਤ੍ਤਾਨਕਂ ਨਿਪਜ੍ਜਾਪੇਤ੍ਵਾ ਦਕ੍ਖਿਣਹਤ੍ਥੇ ਤਾਲਪ੍ਪਮਾਣਂ ਅਯਸੂਲਂ ਪਵੇਸੇਨ੍ਤਿ, ਤਥਾ ਵਾਮਹਤ੍ਥਾਦੀਸੁ. ਯਥਾ ਚ ਤਂ ਉਤ੍ਤਾਨਕਂ ਨਿਪਜ੍ਜਾਪੇਤ੍ਵਾ, ਏਵਂ ਉਰੇਨਪਿ ਵਾਮਪਸ੍ਸੇਨਪਿ ਦਕ੍ਖਿਣਪਸ੍ਸੇਨਪਿ ਨਿਪਜ੍ਜਾਪੇਤ੍ਵਾ ਤੇ ਤਂ ਕਮ੍ਮਕਾਰਣਂ ਕਰੋਨ੍ਤਿਯੇਵ. ਸਂਵੇਸੇਤ੍ਵਾਤਿ ਜਲਿਤਾਯ ਲੋਹਪਥਵਿਯਾ ਤਿਗਾਵੁਤਂ ਅਤ੍ਤਭਾਵਂ ਨਿਪਜ੍ਜਾਪੇਤ੍ਵਾ. ਕੁਠਾਰੀਹੀਤਿ ਮਹਤੀਹਿ ਗੇਹਸ੍ਸ ਏਕਪਕ੍ਖਚ੍ਛਦਨਮਤ੍ਤਾਹਿ ਕੁਠਾਰੀਹਿ ਤਚ੍ਛਨ੍ਤਿ, ਲੋਹਿਤਂ ਨਦੀ ਹੁਤ੍ਵਾ ਸਨ੍ਦਤਿ, ਲੋਹਪਥਵਿਤੋ ਜਾਲਾ ਉਟ੍ਠਹਿਤ੍ਵਾ ਤਚ੍ਛਿਤਟ੍ਠਾਨਂ ਗਣ੍ਹਾਤਿ, ਮਹਾਦੁਕ੍ਖਂ ਉਪ੍ਪਜ੍ਜਤਿ. ਤਚ੍ਛਨ੍ਤਾ ਪਨ ਸੁਤ੍ਤਾਹਤਂ ਕਰਿਤ੍ਵਾ ਦਾਰੁਂ ਵਿਯ ਅਟ੍ਠਂਸਮ੍ਪਿ ਛਲ਼ਂਸਮ੍ਪਿ ਕਰੋਨ੍ਤਿ. ਵਾਸੀਹੀਤਿ ਮਹਾਸੁਪ੍ਪਪ੍ਪਮਾਣਾਹਿ ਵਾਸੀਹਿ. ਰਥੇ ਯੋਜੇਤ੍ਵਾਤਿ ਸਦ੍ਧਿਂ ਯੁਗਯੋਤ੍ਤਪਕ੍ਖਰਥਚਕ੍ਕਕੁਬ੍ਬਰਪਾਜਨੇਹਿ ਸਬ੍ਬਤੋ ਪਜ੍ਜਲਿਤੇ ਰਥੇ ਯੋਜੇਤ੍ਵਾ. ਮਹਨ੍ਤਨ੍ਤਿ ਮਹਾਕੂਟਾਗਾਰਪ੍ਪਮਾਣਂ. ਆਰੋਪੇਨ੍ਤੀਤਿ ਸਮ੍ਪਜ੍ਜਲਿਤੇਹਿ ਅਯਮੁਗ੍ਗਰੇਹਿ ਪੋਥੇਨ੍ਤਾ ਆਰੋਪੇਨ੍ਤਿ. ਸਕਿਮ੍ਪਿ ਉਦ੍ਧਨ੍ਤਿ ਸੁਪਕ੍ਕੁਥਿਤਾਯ ਉਕ੍ਖਲਿਯਾ ਪਕ੍ਖਿਤ੍ਤਤਣ੍ਡੁਲਾ ਵਿਯ ਉਦ੍ਧਮਧੋਤਿਰਿਯਞ੍ਚ ਗਚ੍ਛਤਿ. ਮਹਾਨਿਰਯੇਤਿ ਅਵੀਚਿਮਹਾਨਿਰਯਮ੍ਹਿ.

ਭਾਗਸੋ ਮਿਤੋਤਿ ਭਾਗੇ ਠਪੇਤ੍ਵਾ ਵਿਭਤ੍ਤੋ. ਪਰਿਯਨ੍ਤੋਤਿ ਪਰਿਕ੍ਖਿਤ੍ਤੋ. ਅਯਸਾਤਿ ਉਪਰਿ ਅਯਪਟ੍ਟੇਨ ਛਾਦਿਤੋ. ਸਮਨ੍ਤਾ ਯੋਜਨਸਤਂ, ਫਰਿਤ੍ਵਾ ਤਿਟ੍ਠਤੀਤਿ ਏਵਂ ਫਰਿਤ੍ਵਾ ਤਿਟ੍ਠਤਿ, ਯਥਾ ਤਂ ਸਮਨ੍ਤਾ ਯੋਜਨਸਤੇ ਠਤ੍ਵਾ ਓਲੋਕੇਨ੍ਤਸ੍ਸ ਅਕ੍ਖੀਨਿ ਯਮਕਗੋਲ਼ਕਾ ਵਿਯ ਨਿਕ੍ਖਮਨ੍ਤਿ.

ਹੀਨਕਾਯੂਪਗਾਤਿ ਹੀਨਂ ਕਾਯਂ ਉਪਗਤਾ ਹੁਤ੍ਵਾ. ਉਪਾਦਾਨੇਤਿ ਤਣ੍ਹਾਦਿਟ੍ਠਿਗ੍ਗਹਣੇ. ਜਾਤਿਮਰਣਸਮ੍ਭਵੇਤਿ ਜਾਤਿਯਾ ਚ ਮਰਣਸ੍ਸ ਚ ਕਾਰਣਭੂਤੇ. ਅਨੁਪਾਦਾਤਿ ਚਤੂਹਿ ਉਪਾਦਾਨੇਹਿ ਅਨੁਪਾਦਿਯਿਤ੍ਵਾ. ਜਾਤਿਮਰਣਸਙ੍ਖਯੇਤਿ ਜਾਤਿਮਰਣਸਙ੍ਖਯਸਙ੍ਖਾਤੇ ਨਿਬ੍ਬਾਨੇ ਵਿਮੁਚ੍ਚਨ੍ਤਿ. ਦਿਟ੍ਠਧਮ੍ਮਾਭਿਨਿਬ੍ਬੁਤਾਤਿ ਦਿਟ੍ਠਧਮ੍ਮੇ ਇਮਸ੍ਮਿਂਯੇਵ ਅਤ੍ਤਭਾਵੇ ਸਬ੍ਬਕਿਲੇਸਨਿਬ੍ਬਾਨੇਨ ਨਿਬ੍ਬੁਤਾ. ਸਬ੍ਬਦੁਕ੍ਖਂ ਉਪਚ੍ਚਗੁਨ੍ਤਿ ਸਕਲਵਟ੍ਟਦੁਕ੍ਖਂ ਅਤਿਕ੍ਕਨ੍ਤਾ.