੫. ਹਤ੍ਥਕਸੁਤ੍ਤਵਣ੍ਣਨਾ

੩੫. ਪਞ੍ਚਮੇ ਆਲ਼ਵਿਯਨ੍ਤਿ ਆਲ਼ਵਿਰਟ੍ਠੇ. ਗੋਮਗ੍ਗੇਤਿ ਗੁਨ੍ਨਂ ਗਮਨਮਗ੍ਗੇ. ਪਣ੍ਣਸਨ੍ਥਰੇਤਿ ਸਯਂ ਪਤਿਤਪਣ੍ਣਸਨ੍ਥਰੇ. ਅਥਾਤਿ ਏਵਂ ਗੁਨ੍ਨਂ ਗਮਨਮਗ੍ਗਂ ਉਜੁਂ ਮਹਾਪਥਂ ਨਿਸ੍ਸਾਯ ਸਿਂਸਪਾਵਨੇ ਸਯਂ ਪਤਿਤਪਣ੍ਣਾਨਿ ਸਙ੍ਕਡ੍ਢਿਤ੍ਵਾ ਕਤਸਨ੍ਥਰੇ ਸੁਗਤਮਹਾਚੀਵਰਂ ਪਤ੍ਥਰਿਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸਿਨ੍ਨੇ ਤਥਾਗਤੇ. ਹਤ੍ਥਕੋ ਆਲ਼ਵਕੋਤਿ ਹਤ੍ਥਤੋ ਹਤ੍ਥਂ ਗਤਤ੍ਤਾ ਏਵਂਲਦ੍ਧਨਾਮੋ ਆਲ਼ਵਕੋ ਰਾਜਪੁਤ੍ਤੋ. ਏਤਦਵੋਚਾਤਿ ਏਤਂ ‘‘ਕਚ੍ਚਿ, ਭਨ੍ਤੇ, ਭਗਵਾ’’ਤਿਆਦਿਵਚਨਂ ਅਵੋਚ. ਕਸ੍ਮਾ ਪਨ ਸਮ੍ਮਾਸਮ੍ਬੁਦ੍ਧੋ ਤਂ ਠਾਨਂ ਗਨ੍ਤ੍ਵਾ ਨਿਸਿਨ੍ਨੋ, ਕਸ੍ਮਾ ਰਾਜਕੁਮਾਰੋ ਤਤ੍ਥ ਗਤੋਤਿ? ਸਮ੍ਮਾਸਮ੍ਬੁਦ੍ਧੋ ਤਾਵ ਅਟ੍ਠੁਪ੍ਪਤ੍ਤਿਕਾਯ ਧਮ੍ਮਦੇਸਨਾਯ ਸਮੁਟ੍ਠਾਨਂ ਦਿਸ੍ਵਾ ਤਤ੍ਥ ਨਿਸਿਨ੍ਨੋ, ਰਾਜਕੁਮਾਰੋਪਿ ਪਾਤੋਵ ਉਟ੍ਠਾਯ ਪਞ੍ਚਹਿ ਉਪਾਸਕਸਤੇਹਿ ਪਰਿਵੁਤੋ ਬੁਦ੍ਧੁਪਟ੍ਠਾਨਂ ਗਚ੍ਛਨ੍ਤੋ ਮਹਾਮਗ੍ਗਾ ਓਕ੍ਕਮ੍ਮ ਗੋਪਥਂ ਗਹੇਤ੍ਵਾ ‘‘ਬੁਦ੍ਧਾਨਂ ਪੂਜਨਤ੍ਥਾਯ ਮਿਸ੍ਸਕਮਾਲਂ ਓਚਿਨਿਸ੍ਸਾਮੀ’’ਤਿ ਗਚ੍ਛਨ੍ਤੋ ਸਤ੍ਥਾਰਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ, ਏਵਂ ਸੋ ਤਤ੍ਥ ਗਤੋਤਿ. ਸੁਖਮਸਯਿਤ੍ਥਾਤਿ ਸੁਖਂ ਸਯਿਤ੍ਥ.

ਅਨ੍ਤਰਟ੍ਠਕੋਤਿ ਮਾਘਫਗ੍ਗੁਣਾਨਂ ਅਨ੍ਤਰੇ ਅਟ੍ਠਦਿਵਸਪਰਿਮਾਣੋ ਕਾਲੋ. ਮਾਘਸ੍ਸ ਹਿ ਅਵਸਾਨੇ ਚਤ੍ਤਾਰੋ ਦਿਵਸਾ, ਫਗ੍ਗੁਣਸ੍ਸ ਆਦਿਮ੍ਹਿ ਚਤ੍ਤਾਰੋਤਿ ਅਯਂ ‘‘ਅਨ੍ਤਰਟ੍ਠਕੋ’’ਤਿ ਵੁਚ੍ਚਤਿ. ਹਿਮਪਾਤਸਮਯੋਤਿ ਹਿਮਸ੍ਸ ਪਤਨਸਮਯੋ. ਖਰਾਤਿ ਫਰੁਸਾ ਕਕ੍ਖਲ਼ਾ ਵਾ. ਗੋਕਣ੍ਟਕਹਤਾਤਿ ਨਵਵੁਟ੍ਠੇ ਦੇਵੇ ਗਾਵੀਨਂ ਅਕ੍ਕਨ੍ਤਕ੍ਕਨ੍ਤਟ੍ਠਾਨੇ ਖੁਰਨ੍ਤਰੇਹਿ ਕਦ੍ਦਮੋ ਉਗ੍ਗਨ੍ਤ੍ਵਾ ਤਿਟ੍ਠਤਿ, ਸੋ ਵਾਤਾਤਪੇਨ ਸੁਕ੍ਖੋ ਕਕਚਦਨ੍ਤਸਦਿਸੋ ਹੋਤਿ ਦੁਕ੍ਖਸਮ੍ਫਸ੍ਸੋ. ਤਂ ਸਨ੍ਧਾਯਾਹ – ‘‘ਗੋਕਣ੍ਟਕਹਤਾ ਭੂਮੀ’’ਤਿ. ਗੁਨ੍ਨਂ ਖੁਰਨ੍ਤਰੇਹਿ ਛਿਨ੍ਨਾਤਿਪਿ ਅਤ੍ਥੋ. ਵੇਰਮ੍ਭੋ ਵਾਤੋ ਵਾਯਤੀਤਿ ਚਤੂਹਿ ਦਿਸਾਹਿ ਵਾਯਨ੍ਤੋ ਵਾਤੋ ਵਾਯਤਿ. ਏਕਾਯ ਦਿਸਾਯ ਵਾ ਦ੍ਵੀਹਿ ਵਾ ਦਿਸਾਹਿ ਤੀਹਿ ਵਾ ਦਿਸਾਹਿ ਵਾਯਨ੍ਤੋ ਵਾਤੋ ਵੇਰਮ੍ਭੋਤਿ ਨ ਵੁਚ੍ਚਤਿ.

ਤੇਨ ਹਿ ਰਾਜਕੁਮਾਰਾਤਿ ਇਦਂ ਸਤ੍ਥਾ ‘‘ਅਯਂ ਰਾਜਕੁਮਾਰੋ ਲੋਕਸ੍ਮਿਂ ਨੇਵ ਸੁਖਵਾਸਿਨੋ, ਨ ਦੁਕ੍ਖਵਾਸਿਨੋ ਜਾਨਾਤਿ, ਜਾਨਾਪੇਸ੍ਸਾਮਿ ਨ’’ਨ੍ਤਿ ਉਪਰਿ ਦੇਸਨਂ ਵਡ੍ਢੇਨ੍ਤੋ ਆਹ. ਤਤ੍ਥ ਯਥਾ ਤੇ ਖਮੇਯ੍ਯਾਤਿ ਯਥਾ ਤੁਯ੍ਹਂ ਰੁਚ੍ਚੇਯ੍ਯ. ਇਧਸ੍ਸਾਤਿ ਇਮਸ੍ਮਿਂ ਲੋਕੇ ਅਸ੍ਸ. ਗੋਨਕਤ੍ਥਤੋਤਿ ਚਤੁਰਙ੍ਗੁਲਾਧਿਕਲੋਮੇਨ ਕਾਲ਼ਕੋਜਵੇਨ ਅਤ੍ਥਤੋ. ਪਟਿਕਤ੍ਥਤੋਤਿ ਉਣ੍ਣਾਮਯੇਨ ਸੇਤਤ੍ਥਰਣੇਨ ਅਤ੍ਥਤੋ. ਪਟਲਿਕਤ੍ਥਤੋਤਿ ਘਨਪੁਪ੍ਫੇਨ ਉਣ੍ਣਾਮਯਅਤ੍ਥਰਣੇਨ ਅਤ੍ਥਤੋ. ਕਦਲਿਮਿਗਪਵਰਪਚ੍ਚਤ੍ਥਰਣੋਤਿ ਕਦਲਿਮਿਗਚਮ੍ਮਮਯੇਨ ਉਤ੍ਤਮਪਚ੍ਚਤ੍ਥਰਣੇਨ ਅਤ੍ਥਤੋ. ਤਂ ਕਿਰ ਪਚ੍ਚਤ੍ਥਰਣਂ ਸੇਤਵਤ੍ਥਸ੍ਸ ਉਪਰਿ ਕਦਲਿਮਿਗਚਮ੍ਮਂ ਅਤ੍ਥਰਿਤ੍ਵਾ ਸਿਬ੍ਬਿਤ੍ਵਾ ਕਰੋਨ੍ਤਿ. ਸਉਤ੍ਤਰਚ੍ਛਦੋਤਿ ਸਹ ਉਤ੍ਤਰਚ੍ਛਦੇਨ, ਉਪਰਿ ਬਦ੍ਧੇਨ ਰਤ੍ਤਵਿਤਾਨੇਨ ਸਦ੍ਧਿਨ੍ਤਿ ਅਤ੍ਥੋ. ਉਭਤੋਲੋਹਿਤਕੂਪਧਾਨੋਤਿ ਸੀਸੂਪਧਾਨਞ੍ਚ ਪਾਦੂਪਧਾਨਞ੍ਚਾਤਿ ਪਲ੍ਲਙ੍ਕਸ੍ਸ ਉਭਤੋ ਠਪਿਤਲੋਹਿਤਕੂਪਧਾਨੋ. ਪਜਾਪਤਿਯੋਤਿ ਭਰਿਯਾਯੋ. ਮਨਾਪੇਨ ਪਚ੍ਚੁਪਟ੍ਠਿਤਾ ਅਸ੍ਸੂਤਿ ਮਨਾਪੇਨ ਉਪਟ੍ਠਾਨਵਿਧਾਨੇਨ ਪਚ੍ਚੁਪਟ੍ਠਿਤਾ ਭਵੇਯ੍ਯੁਂ.

ਕਾਯਿਕਾਤਿ ਪਞ੍ਚਦ੍ਵਾਰਕਾਯਂ ਖੋਭਯਮਾਨਾ. ਚੇਤਸਿਕਾਤਿ ਮਨੋਦ੍ਵਾਰਂ ਖੋਭਯਮਾਨਾ. ਸੋ ਰਾਗੋ ਤਥਾਗਤਸ੍ਸ ਪਹੀਨੋਤਿ ਤਥਾਰੂਪੋ ਰਾਗੋ ਤਥਾਗਤਸ੍ਸ ਪਹੀਨੋਤਿ ਅਤ੍ਥੋ. ਯੋ ਪਨ ਤਸ੍ਸ ਰਾਗੋ, ਨ ਸੋ ਤਥਾਗਤਸ੍ਸ ਪਹੀਨੋ ਨਾਮ. ਦੋਸਮੋਹੇਸੁਪਿ ਏਸੇਵ ਨਯੋ.

ਬ੍ਰਾਹ੍ਮਣੋਤਿ ਬਾਹਿਤਪਾਪੋ ਖੀਣਾਸਵਬ੍ਰਾਹ੍ਮਣੋ. ਪਰਿਨਿਬ੍ਬੁਤੋਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ. ਨ ਲਿਮ੍ਪਤਿ ਕਾਮੇਸੂਤਿ ਵਤ੍ਥੁਕਾਮੇਸੁ ਚ ਕਿਲੇਸਕਾਮੇਸੁ ਚ ਤਣ੍ਹਾਦਿਟ੍ਠਿਲੇਪੇਹਿ ਨ ਲਿਮ੍ਪਤਿ. ਸੀਤਿਭੂਤੋਤਿ ਅਬ੍ਭਨ੍ਤਰੇ ਤਾਪਨਕਿਲੇਸਾਨਂ ਅਭਾਵੇਨ ਸੀਤਿਭੂਤੋ. ਨਿਰੂਪਧੀਤਿ ਕਿਲੇਸੂਪਧੀਨਂ ਅਭਾਵੇਨ ਨਿਰੂਪਧਿ. ਸਬ੍ਬਾ ਆਸਤ੍ਤਿਯੋ ਛੇਤ੍ਵਾਤਿ ਆਸਤ੍ਤਿਯੋ ਵੁਚ੍ਚਨ੍ਤਿ ਤਣ੍ਹਾਯੋ, ਤਾ ਸਬ੍ਬਾਪਿ ਰੂਪਾਦੀਸੁ ਆਰਮ੍ਮਣੇਸੁ ਆਸਤ੍ਤਵਿਸਤ੍ਤਾ ਆਸਤ੍ਤਿਯੋ ਛਿਨ੍ਦਿਤ੍ਵਾ. ਵਿਨੇਯ੍ਯ ਹਦਯੇ ਦਰਨ੍ਤਿ ਹਦਯਨਿਸ੍ਸਿਤਂ ਦਰਥਂ ਵਿਨਯਿਤ੍ਵਾ ਵੂਪਸਮੇਤ੍ਵਾ. ਸਨ੍ਤਿਂ ਪਪ੍ਪੁਯ੍ਯ ਚੇਤਸੋਤਿ ਚਿਤ੍ਤਸ੍ਸ ਕਿਲੇਸਨਿਬ੍ਬਾਨਂ ਪਾਪੁਣਿਤ੍ਵਾ. ਕਰਣਵਚਨਂ ਵਾ ਏਤਂ ‘‘ਸਬ੍ਬਚੇਤਸੋ ਸਮਨ੍ਨਾਹਰਿਤ੍ਵਾ’’ਤਿਆਦੀਸੁ ਵਿਯ, ਚੇਤਸਾ ਨਿਬ੍ਬਾਨਂ ਪਾਪੁਣਿਤ੍ਵਾਤਿ ਅਤ੍ਥੋ.