੪. ਨਿਦਾਨਸੁਤ੍ਤਵਣ੍ਣਨਾ

੩੪. ਚਤੁਤ੍ਥੇ ਨਿਦਾਨਾਨੀਤਿ ਕਾਰਣਾਨਿ. ਕਮ੍ਮਾਨਨ੍ਤਿ ਵਟ੍ਟਗਾਮਿਕਮ੍ਮਾਨਂ. ਲੋਭੋ ਨਿਦਾਨਂ ਕਮ੍ਮਾਨਂ ਸਮੁਦਯਾਯਾਤਿ ਲੁਬ੍ਭਨਪਲੁਬ੍ਭਨਸਭਾਵੋ ਲੋਭੋ ਵਟ੍ਟਗਾਮਿਕਮ੍ਮਾਨਂ ਸਮੁਦਯਾਯ ਪਿਣ੍ਡਕਰਣਤ੍ਥਾਯ ਨਿਦਾਨਂ ਕਾਰਣਂ ਪਚ੍ਚਯੋਤਿ ਅਤ੍ਥੋ. ਦੋਸੋਤਿ ਦੁਸ੍ਸਨਪਦੁਸ੍ਸਨਸਭਾਵੋ ਦੋਸੋ. ਮੋਹੋਤਿ ਮੁਯ੍ਹਨਪਮੁਯ੍ਹਨਸਭਾਵੋ ਮੋਹੋ.

ਲੋਭਪਕਤਨ੍ਤਿ ਲੋਭੇਨ ਪਕਤਂ, ਲੋਭਾਭਿਭੂਤੇਨ ਲੁਦ੍ਧੇਨ ਹੁਤ੍ਵਾ ਕਤਕਮ੍ਮਨ੍ਤਿ ਅਤ੍ਥੋ. ਲੋਭਤੋ ਜਾਤਨ੍ਤਿ ਲੋਭਜਂ. ਲੋਭੋ ਨਿਦਾਨਮਸ੍ਸਾਤਿ ਲੋਭਨਿਦਾਨਂ. ਲੋਭੋ ਸਮੁਦਯੋ ਅਸ੍ਸਾਤਿ ਲੋਭਸਮੁਦਯਂ. ਸਮੁਦਯੋਤਿ ਪਚ੍ਚਯੋ, ਲੋਭਪਚ੍ਚਯਨ੍ਤਿ ਅਤ੍ਥੋ. ਯਤ੍ਥਸ੍ਸ ਅਤ੍ਤਭਾਵੋ ਨਿਬ੍ਬਤ੍ਤਤੀਤਿ ਯਸ੍ਮਿਂ ਠਾਨੇ ਅਸ੍ਸ ਲੋਭਜਕਮ੍ਮਵਤੋ ਪੁਗ੍ਗਲਸ੍ਸ ਅਤ੍ਤਭਾਵੋ ਨਿਬ੍ਬਤ੍ਤਤਿ, ਖਨ੍ਧਾ ਪਾਤੁਭਵਨ੍ਤਿ. ਤਤ੍ਥ ਤਂ ਕਮ੍ਮਂ ਵਿਪਚ੍ਚਤੀਤਿ ਤੇਸੁ ਖਨ੍ਧੇਸੁ ਤਂ ਕਮ੍ਮਂ ਵਿਪਚ੍ਚਤਿ. ਦਿਟ੍ਠੇ ਵਾ ਧਮ੍ਮੇਤਿਆਦਿ ਯਸ੍ਮਾ ਤਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਂ ਵਾ ਹੋਤਿ ਉਪਪਜ੍ਜਵੇਦਨੀਯਂ ਵਾ ਅਪਰਪਰਿਯਾਯਵੇਦਨੀਯਂ ਵਾ, ਤਸ੍ਮਾ ਤਂ ਪਭੇਦਂ ਦਸ੍ਸੇਤੁਂ ਵੁਤ੍ਤਂ. ਸੇਸਦ੍ਵਯੇਪਿ ਏਸੇਵ ਨਯੋ.

ਅਖਣ੍ਡਾਨੀਤਿ ਅਭਿਨ੍ਨਾਨਿ. ਅਪੂਤੀਨੀਤਿ ਪੂਤਿਭਾਵੇਨ ਅਬੀਜਤ੍ਤਂ ਅਪ੍ਪਤ੍ਤਾਨਿ. ਅਵਾਤਾਤਪਹਤਾਨੀਤਿ ਨ ਵਾਤੇਨ ਨ ਚ ਆਤਪੇਨ ਹਤਾਨਿ. ਸਾਰਾਦਾਨੀਤਿ ਗਹਿਤਸਾਰਾਨਿ ਸਾਰਵਨ੍ਤਾਨਿ ਨ ਨਿਸ੍ਸਾਰਾਨਿ. ਸੁਖਸਯਿਤਾਨੀਤਿ ਸਨ੍ਨਿਚਯਭਾਵੇਨ ਸੁਖਂ ਸਯਿਤਾਨਿ. ਸੁਖੇਤ੍ਤੇਤਿ ਮਣ੍ਡਖੇਤ੍ਤੇ. ਸੁਪਰਿਕਮ੍ਮਕਤਾਯ ਭੂਮਿਯਾਤਿ ਨਙ੍ਗਲਕਸਨੇਨ ਚੇਵ ਅਟ੍ਠਦਨ੍ਤਕੇਨ ਚ ਸੁਟ੍ਠੁ ਪਰਿਕਮ੍ਮਕਤਾਯ ਖੇਤ੍ਤਭੂਮਿਯਾ. ਨਿਕ੍ਖਿਤ੍ਤਾਨੀਤਿ ਠਪਿਤਾਨਿ ਰੋਪਿਤਾਨਿ. ਅਨੁਪ੍ਪਵੇਚ੍ਛੇਯ੍ਯਾਤਿ ਅਨੁਪ੍ਪਵੇਸੇਯ੍ਯ. ਵੁਦ੍ਧਿਨ੍ਤਿਆਦੀਸੁ ਉਦ੍ਧਗ੍ਗਮਨੇਨ ਵੁਦ੍ਧਿਂ, ਹੇਟ੍ਠਾ ਮੂਲਪ੍ਪਤਿਟ੍ਠਾਨੇਨ ਵਿਰੂਲ਼੍ਹਿਂ, ਸਮਨ੍ਤਾ ਵਿਤ੍ਥਾਰਿਕਭਾਵੇਨ ਵੇਪੁਲ੍ਲਂ.

ਯਂ ਪਨੇਤ੍ਥ ਦਿਟ੍ਠੇ ਵਾ ਧਮ੍ਮੇਤਿਆਦਿ ਵੁਤ੍ਤਂ, ਤਤ੍ਥ ਅਸਮ੍ਮੋਹਤ੍ਥਂ ਇਮਸ੍ਮਿਂ ਠਾਨੇ ਕਮ੍ਮਵਿਭਤ੍ਤਿ ਨਾਮ ਕਥੇਤਬ੍ਬਾ. ਸੁਤ੍ਤਨ੍ਤਿਕਪਰਿਯਾਯੇਨ ਹਿ ਏਕਾਦਸ ਕਮ੍ਮਾਨਿ ਵਿਭਤ੍ਤਾਨਿ. ਸੇਯ੍ਯਥਿਦਂ – ਦਿਟ੍ਠਧਮ੍ਮਵੇਦਨੀਯਂ ਉਪਪਜ੍ਜਵੇਦਨੀਯਂ ਅਪਰਪਰਿਯਾਯਵੇਦਨੀਯਂ, ਯਗ੍ਗਰੁਕਂ ਯਬ੍ਬਹੁਲਂ ਯਦਾਸਨ੍ਨਂ ਕਟਤ੍ਤਾ ਵਾ ਪਨ ਕਮ੍ਮਂ, ਜਨਕਂ ਉਪਤ੍ਥਮ੍ਭਕਂ ਉਪਪੀਲ਼ਕਂ ਉਪਘਾਤਕਨ੍ਤਿ. ਤਤ੍ਥ ਏਕਜਵਨਵੀਥਿਯਂ ਸਤ੍ਤਸੁ ਚਿਤ੍ਤੇਸੁ ਕੁਸਲਾ ਵਾ ਅਕੁਸਲਾ ਵਾ ਪਠਮਜਵਨਚੇਤਨਾ ਦਿਟ੍ਠਧਮ੍ਮਵੇਦਨੀਯਕਮ੍ਮਂ ਨਾਮ. ਤਂ ਇਮਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦੇਤਿ ਕਾਕਵਲ਼ਿਯਪੁਣ੍ਣਸੇਟ੍ਠੀਨਂ ਵਿਯ ਕੁਸਲਂ, ਨਨ੍ਦਯਕ੍ਖਨਨ੍ਦਮਾਣਵਕਨਨ੍ਦਗੋਘਾਤਕਕੋਕਾਲਿਯਸੁਪ੍ਪਬੁਦ੍ਧਦੇਵਦਤ੍ਤਚਿਞ੍ਚਮਾਣਵਿਕਾਨਂ ਵਿਯ ਚ ਅਕੁਸਲਂ. ਤਥਾ ਅਸਕ੍ਕੋਨ੍ਤਂ ਪਨ ਅਹੋਸਿਕਮ੍ਮਂ ਨਾਮ ਹੋਤਿ, ਅਵਿਪਾਕਂ ਸਮ੍ਪਜ੍ਜਤਿ. ਤਂ ਮਿਗਲੁਦ੍ਦਕੋਪਮਾਯ ਸਾਧੇਤਬ੍ਬਂ. ਯਥਾ ਹਿ ਮਿਗਲੁਦ੍ਦਕੇਨ ਮਿਗਂ ਦਿਸ੍ਵਾ ਧਨੁਂ ਆਕਡ੍ਢਿਤ੍ਵਾ ਖਿਤ੍ਤੋ ਸਰੋ ਸਚੇ ਨ ਵਿਰਜ੍ਝਤਿ, ਤਂ ਮਿਗਂ ਤਤ੍ਥੇਵ ਪਾਤੇਤਿ, ਅਥ ਨਂ ਮਿਗਲੁਦ੍ਦਕੋ ਨਿਚ੍ਚਮ੍ਮਂ ਕਤ੍ਵਾ ਖਣ੍ਡਾਖਣ੍ਡਿਕਂ ਛੇਤ੍ਵਾ ਮਂਸਂ ਆਦਾਯ ਪੁਤ੍ਤਦਾਰਂ ਤੋਸੇਨ੍ਤੋ ਗਚ੍ਛਤਿ. ਸਚੇ ਪਨ ਵਿਰਜ੍ਝਤਿ, ਮਿਗੋ ਪਲਾਯਿਤ੍ਵਾ ਪੁਨ ਤਂ ਦਿਸਂ ਨ ਓਲੋਕੇਤਿ. ਏਵਂ ਸਮ੍ਪਦਮਿਦਂ ਦਟ੍ਠਬ੍ਬਂ. ਸਰਸ੍ਸ ਅਵਿਰਜ੍ਝਿਤ੍ਵਾ ਮਿਗਵਿਜ੍ਝਨਂ ਵਿਯ ਹਿ ਦਿਟ੍ਠਧਮ੍ਮਵੇਦਨੀਯਸ੍ਸ ਕਮ੍ਮਸ੍ਸ ਵਿਪਾਕਵਾਰਪਟਿਲਾਭੋ, ਅਵਿਜ੍ਝਨਂ ਵਿਯ ਅਵਿਪਾਕਭਾਵਾਯ ਸਮ੍ਪਜ੍ਜਨਨ੍ਤਿ.

ਅਤ੍ਥਸਾਧਿਕਾ ਪਨ ਸਤ੍ਤਮਜਵਨਚੇਤਨਾ ਉਪਪਜ੍ਜਵੇਦਨੀਯਕਮ੍ਮਂ ਨਾਮ. ਤਂ ਅਨਨ੍ਤਰੇ ਅਤ੍ਤਭਾਵੇ ਵਿਪਾਕਂ ਦੇਤਿ. ਤਂ ਪਨੇਤਂ ਕੁਸਲਪਕ੍ਖੇ ਅਟ੍ਠਸਮਾਪਤ੍ਤਿਵਸੇਨ, ਅਕੁਸਲਪਕ੍ਖੇ ਪਞ੍ਚਾਨਨ੍ਤਰਿਯਕਮ੍ਮਵਸੇਨ ਵੇਦਿਤਬ੍ਬਂ. ਤਤ੍ਥ ਅਟ੍ਠਸਮਾਪਤ੍ਤਿਲਾਭੀ ਏਕਾਯ ਸਮਾਪਤ੍ਤਿਯਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਤਿ. ਪਞ੍ਚਨ੍ਨਮ੍ਪਿ ਆਨਨ੍ਤਰਿਯਾਨਂ ਕਤ੍ਤਾ ਏਕੇਨ ਕਮ੍ਮੇਨ ਨਿਰਯੇ ਨਿਬ੍ਬਤ੍ਤਤਿ, ਸੇਸਸਮਾਪਤ੍ਤਿਯੋ ਚ ਕਮ੍ਮਾਨਿ ਚ ਅਹੋਸਿਕਮ੍ਮਭਾਵਂਯੇਵ ਆਪਜ੍ਜਨ੍ਤਿ, ਅਵਿਪਾਕਾਨਿ ਹੋਨ੍ਤਿ. ਅਯਮ੍ਪਿ ਅਤ੍ਥੋ ਪੁਰਿਮਉਪਮਾਯਯੇਵ ਦੀਪੇਤਬ੍ਬੋ.

ਉਭਿਨ੍ਨਂ ਅਨ੍ਤਰੇ ਪਨ ਪਞ੍ਚਜਵਨਚੇਤਨਾ ਅਪਰਪਰਿਯਾਯਵੇਦਨੀਯਕਮ੍ਮਂ ਨਾਮ. ਤਂ ਅਨਾਗਤੇ ਯਦਾ ਓਕਾਸਂ ਲਭਤਿ, ਤਦਾ ਵਿਪਾਕਂ ਦੇਤਿ. ਸਤਿ ਸਂਸਾਰਪ੍ਪਵਤ੍ਤਿਯਾ ਅਹੋਸਿਕਮ੍ਮਂ ਨਾਮ ਨ ਹੋਤਿ. ਤਂ ਸਬ੍ਬਂ ਸੁਨਖਲੁਦ੍ਦਕੇਨ ਦੀਪੇਤਬ੍ਬਂ. ਯਥਾ ਹਿ ਸੁਨਖਲੁਦ੍ਦਕੇਨ ਮਿਗਂ ਦਿਸ੍ਵਾ ਸੁਨਖੋ ਵਿਸ੍ਸਜ੍ਜਿਤੋ ਮਿਗਂ ਅਨੁਬਨ੍ਧਿਤ੍ਵਾ ਯਸ੍ਮਿਂ ਠਾਨੇ ਪਾਪੁਣਾਤਿ, ਤਸ੍ਮਿਂ ਯੇਵ ਡਂਸਤਿ; ਏਵਮੇਵਂ ਇਦਂ ਕਮ੍ਮਂ ਯਸ੍ਮਿਂ ਠਾਨੇ ਓਕਾਸਂ ਲਭਤਿ, ਤਸ੍ਮਿਂਯੇਵ ਵਿਪਾਕਂ ਦੇਤਿ, ਤੇਨ ਮੁਤ੍ਤੋ ਸਤ੍ਤੋ ਨਾਮ ਨਤ੍ਥਿ.

ਕੁਸਲਾਕੁਸਲੇਸੁ ਪਨ ਗਰੁਕਾਗਰੁਕੇਸੁ ਯਂ ਗਰੁਕਂ ਹੋਤਿ, ਤਂ ਯਗ੍ਗਰੁਕਂ ਨਾਮ. ਤਦੇਤਂ ਕੁਸਲਪਕ੍ਖੇ ਮਹਗ੍ਗਤਕਮ੍ਮਂ, ਅਕੁਸਲਪਕ੍ਖੇ ਪਞ੍ਚਾਨਨ੍ਤਰਿਯਕਮ੍ਮਂ ਵੇਦਿਤਬ੍ਬਂ. ਤਸ੍ਮਿਂ ਸਤਿ ਸੇਸਾਨਿ ਕੁਸਲਾਨਿ ਵਾ ਅਕੁਸਲਾਨਿ ਵਾ ਵਿਪਚ੍ਚਿਤੁਂ ਨ ਸਕ੍ਕੋਨ੍ਤਿ, ਤਦੇਵ ਦੁਵਿਧਮ੍ਪਿ ਪਟਿਸਨ੍ਧਿਂ ਦੇਤਿ. ਯਥਾ ਹਿ ਸਾਸਪਪ੍ਪਮਾਣਾਪਿ ਸਕ੍ਖਰਾ ਵਾ ਅਯਗੁਲ਼ਿਕਾ ਵਾ ਉਦਕਰਹਦੇ ਪਕ੍ਖਿਤ੍ਤਾ ਉਦਕਪਿਟ੍ਠੇ ਉਪ੍ਲਵਿਤੁਂ ਨ ਸਕ੍ਕੋਤਿ, ਹੇਟ੍ਠਾਵ ਪਵਿਸਤਿ; ਏਵਮੇਵ ਕੁਸਲੇਪਿ ਅਕੁਸਲੇਪਿ ਯਂ ਗਰੁਕਂ, ਤਦੇਵ ਗਣ੍ਹਿਤ੍ਵਾ ਗਚ੍ਛਤਿ.

ਕੁਸਲਾਕੁਸਲੇਸੁ ਪਨ ਯਂ ਬਹੁਲਂ ਹੋਤਿ, ਤਂ ਯਬ੍ਬਹੁਲਂ ਨਾਮ. ਤਂ ਦੀਘਰਤ੍ਤਂ ਲਦ੍ਧਾਸੇਵਨਵਸੇਨ ਵੇਦਿਤਬ੍ਬਂ. ਯਂ ਵਾ ਬਲਵਕੁਸਲਕਮ੍ਮੇਸੁ ਸੋਮਨਸ੍ਸਕਰਂ, ਅਕੁਸਲਕਮ੍ਮੇਸੁ ਸਨ੍ਤਾਪਕਰਂ, ਏਤਂ ਯਬ੍ਬਹੁਲਂ ਨਾਮ. ਤਦੇਤਂ ਯਥਾ ਨਾਮ ਦ੍ਵੀਸੁ ਮਲ੍ਲੇਸੁ ਯੁਦ੍ਧਭੂਮਿਂ ਓਤਿਣ੍ਣੇਸੁ ਯੋ ਬਲਵਾ, ਸੋ ਇਤਰਂ ਪਾਤੇਤ੍ਵਾ ਗਚ੍ਛਤਿ; ਏਵਮੇਵ ਇਤਰਂ ਦੁਬ੍ਬਲਕਮ੍ਮਂ ਅਵਤ੍ਥਰਿਤ੍ਵਾ ਯਂ ਆਸੇਵਨਵਸੇਨ ਵਾ ਬਹੁਲਂ, ਆਸਨ੍ਨਵਸੇਨ ਵਾ ਬਲਵਂ, ਤਂ ਵਿਪਾਕਂ ਦੇਤਿ, ਦੁਟ੍ਠਗਾਮਣਿਅਭਯਰਞ੍ਞੋ ਕਮ੍ਮਂ ਵਿਯ.

ਸੋ ਕਿਰ ਚੂਲ਼ਙ੍ਗਣਿਯਯੁਦ੍ਧੇ ਪਰਾਜਿਤੋ ਵਲ਼ਵਂ ਆਰੁਯ੍ਹ ਪਲਾਯਿ. ਤਸ੍ਸ ਚੂਲ਼ੁਪਟ੍ਠਾਕੋ ਤਿਸ੍ਸਾਮਚ੍ਚੋ ਨਾਮ ਏਕਕੋਵ ਪਚ੍ਛਤੋ ਅਹੋਸਿ. ਸੋ ਏਕਂ ਅਟਵਿਂ ਪਵਿਸਿਤ੍ਵਾ ਨਿਸਿਨ੍ਨੋ ਜਿਘਚ੍ਛਾਯ ਬਾਧਯਮਾਨਾਯ – ‘‘ਭਾਤਿਕ ਤਿਸ੍ਸ, ਅਤਿਵਿਯ ਨੋ ਜਿਘਚ੍ਛਾ ਬਾਧਤਿ, ਕਿਂ ਕਰਿਸ੍ਸਾਮਾ’’ਤਿ ਆਹ. ਅਤ੍ਥਿ, ਦੇਵ, ਮਯਾ ਸਾਟਕਨ੍ਤਰੇ ਠਪੇਤ੍ਵਾ ਏਕਂ ਸੁਵਣ੍ਣਸਰਕਭਤ੍ਤਂ ਆਭਤਨ੍ਤਿ. ਤੇਨ ਹਿ ਆਹਰਾਤਿ. ਸੋ ਨੀਹਰਿਤ੍ਵਾ ਰਞ੍ਞੋ ਪੁਰਤੋ ਠਪੇਸਿ. ਰਾਜਾ ਦਿਸ੍ਵਾ, ‘‘ਤਾਤ, ਚਤ੍ਤਾਰੋ ਕੋਟ੍ਠਾਸੇ ਕਰੋਹੀ’’ਤਿ ਆਹ. ਮਯਂ ਤਯੋ ਜਨਾ, ਕਸ੍ਮਾ ਦੇਵੋ ਚਤ੍ਤਾਰੋ ਕੋਟ੍ਠਾਸੇ ਕਾਰਯਤੀਤਿ? ਭਾਤਿਕ ਤਿਸ੍ਸ, ਯਤੋ ਪਟ੍ਠਾਯ ਅਹਂ ਅਤ੍ਤਾਨਂ ਸਰਾਮਿ, ਨ ਮੇ ਅਯ੍ਯਾਨਂ ਅਦਤ੍ਵਾ ਆਹਾਰੋ ਪਰਿਭੁਤ੍ਤਪੁਬ੍ਬੋ ਅਤ੍ਥਿ, ਸ੍ਵਾਹਂ ਅਜ੍ਜਪਿ ਅਦਤ੍ਵਾ ਨ ਪਰਿਭੁਞ੍ਜਿਸ੍ਸਾਮੀਤਿ. ਸੋ ਚਤ੍ਤਾਰੋ ਕੋਟ੍ਠਾਸੇ ਅਕਾਸਿ. ਰਾਜਾ ‘‘ਕਾਲਂ ਘੋਸੇਹੀ’’ਤਿ ਆਹ. ਛਡ੍ਡਿਤਾਰਞ੍ਞੇ ਕੁਤੋ, ਅਯ੍ਯੇ, ਲਭਿਸ੍ਸਾਮ ਦੇਵਾਤਿ. ‘‘ਨਾਯਂ ਤਵ ਭਾਰੋ. ਸਚੇ ਮਮ ਸਦ੍ਧਾ ਅਤ੍ਥਿ, ਅਯ੍ਯੇ, ਲਭਿਸ੍ਸਾਮ, ਵਿਸ੍ਸਤ੍ਥੋ ਕਾਲਂ ਘੋਸੇਹੀ’’ਤਿ ਆਹ. ਸੋ ‘‘ਕਾਲੋ, ਭਨ੍ਤੇ, ਕਾਲੋ, ਭਨ੍ਤੇ’’ਤਿ ਤਿਕ੍ਖਤ੍ਤੁਂ ਘੋਸੇਸਿ.

ਅਥਸ੍ਸ ਬੋਧਿਮਾਤੁਮਹਾਤਿਸ੍ਸਤ੍ਥੇਰੋ ਤਂ ਸਦ੍ਦਂ ਦਿਬ੍ਬਾਯ ਸੋਤਧਾਤੁਯਾ ਸੁਤ੍ਵਾ ‘ਕਤ੍ਥਾਯਂ ਸਦ੍ਦੋ’ਤਿ ਤਂ ਆਵਜ੍ਜੇਨ੍ਤੋ ‘‘ਅਜ੍ਜ ਦੁਟ੍ਠਗਾਮਣਿਅਭਯਮਹਾਰਾਜਾ ਯੁਦ੍ਧਪਰਾਜਿਤੋ ਅਟਵਿਂ ਪਵਿਸਿਤ੍ਵਾ ਨਿਸਿਨ੍ਨੋ ਏਕਂ ਸਰਕਭਤ੍ਤਂ ਚਤ੍ਤਾਰੋ ਕੋਟ੍ਠਾਸੇ ਕਾਰੇਤ੍ਵਾ ‘ਏਕਕੋਵ ਨ ਪਰਿਭੁਞ੍ਜਿਸ੍ਸਾਮੀ’ਤਿ ਕਾਲਂ ਘੋਸਾਪੇਸੀ’’ਤਿ ਞਤ੍ਵਾ ‘‘ਅਜ੍ਜ ਮਯਾ ਰਞ੍ਞੋ ਸਙ੍ਗਹਂ ਕਾਤੁਂ ਵਟ੍ਟਤੀ’’ਤਿ ਮਨੋਗਤਿਯਾ ਆਗਨ੍ਤ੍ਵਾ ਰਞ੍ਞੋ ਪੁਰਤੋ ਅਟ੍ਠਾਸਿ. ਰਾਜਾ ਦਿਸ੍ਵਾ ਪਸਨ੍ਨਚਿਤ੍ਤੋ ‘‘ਪਸ੍ਸ, ਭਾਤਿਕ, ਤਿਸ੍ਸਾ’’ਤਿ ਵਤ੍ਵਾ ਥੇਰਂ ਵਨ੍ਦਿਤ੍ਵਾ ‘‘ਪਤ੍ਤਂ, ਭਨ੍ਤੇ, ਦੇਥਾ’’ਤਿ ਆਹ. ਥੇਰੋ ਪਤ੍ਤਂ ਨੀਹਰਿ. ਰਾਜਾ ਅਤ੍ਤਨੋ ਕੋਟ੍ਠਾਸੇਨ ਸਦ੍ਧਿਂ ਥੇਰਸ੍ਸ ਕੋਟ੍ਠਾਸਂ ਪਤ੍ਤੇ ਪਕ੍ਖਿਪਿਤ੍ਵਾ, ‘‘ਭਨ੍ਤੇ, ਆਹਾਰਪਰਿਸ੍ਸਯੋ ਨਾਮ ਮਾ ਕਦਾਚਿ ਹੋਤੂ’’ਤਿ ਵਨ੍ਦਿਤ੍ਵਾ ਅਟ੍ਠਾਸਿ. ਤਿਸ੍ਸਾਮਚ੍ਚੋਪਿ ‘‘ਮਮ ਅਯ੍ਯਪੁਤ੍ਤੇ ਪਸ੍ਸਨ੍ਤੇ ਭੁਞ੍ਜਿਤੁਂ ਨ ਸਕ੍ਖਿਸ੍ਸਾਮੀ’’ਤਿ ਅਤ੍ਤਨੋ ਕੋਟ੍ਠਾਸਂ ਥੇਰਸ੍ਸੇਵ ਪਤ੍ਤੇ ਆਕਿਰਿ. ਵਲ਼ਵਾਪਿ ਚਿਨ੍ਤੇਸਿ – ‘‘ਮਯ੍ਹਮ੍ਪਿ ਕੋਟ੍ਠਾਸਂ ਥੇਰਸ੍ਸੇਵ ਦਾਤੁਂ ਵਟ੍ਟਤੀ’’ਤਿ. ਰਾਜਾ ਵਲ਼ਵਂ ਓਲੋਕੇਤ੍ਵਾ ‘‘ਅਯਮ੍ਪਿ ਅਤ੍ਤਨੋ ਕੋਟ੍ਠਾਸਂ ਥੇਰਸ੍ਸੇਵ ਪਤ੍ਤੇ ਪਕ੍ਖਿਪਨਂ ਪਚ੍ਚਾਸੀਸਤੀ’’ਤਿ ਞਤ੍ਵਾ ਤਮ੍ਪਿ ਤਤ੍ਥੇਵ ਪਕ੍ਖਿਪਿਤ੍ਵਾ ਥੇਰਂ ਵਨ੍ਦਿਤ੍ਵਾ ਉਯ੍ਯੋਜੇਸਿ. ਥੇਰੋ ਤਂ ਭਤ੍ਤਂ ਆਦਾਯ ਗਨ੍ਤ੍ਵਾ ਆਦਿਤੋ ਪਟ੍ਠਾਯ ਭਿਕ੍ਖੁਸਙ੍ਘਸ੍ਸ ਆਲੋਪਸਙ੍ਖੇਪੇਨ ਅਦਾਸਿ.

ਰਾਜਾਪਿ ਚਿਨ੍ਤੇਸਿ – ‘‘ਅਤਿਵਿਯਮ੍ਹਾ ਜਿਘਚ੍ਛਿਤਾ, ਸਾਧੁ ਵਤਸ੍ਸ ਸਚੇ ਅਤਿਰੇਕਭਤ੍ਤਸਿਤ੍ਥਾਨਿ ਪਹਿਣੇਯ੍ਯਾ’’ਤਿ. ਥੇਰੋ ਰਞ੍ਞੋ ਚਿਤ੍ਤਂ ਞਤ੍ਵਾ ਅਤਿਰੇਕਭਤ੍ਤਂ ਏਤੇਸਂ ਯਾਪਨਮਤ੍ਤਂ ਕਤ੍ਵਾ ਪਤ੍ਤਂ ਆਕਾਸੇ ਖਿਪਿ, ਪਤ੍ਤੋ ਆਗਨ੍ਤ੍ਵਾ ਰਞ੍ਞੋ ਹਤ੍ਥੇ ਪਤਿਟ੍ਠਾਸਿ. ਭਤ੍ਤਂ ਤਿਣ੍ਣਮ੍ਪਿ ਜਨਾਨਂ ਯਾਵਦਤ੍ਥਂ ਅਹੋਸਿ. ਅਥ ਰਾਜਾ ਪਤ੍ਤਂ ਧੋਵਿਤ੍ਵਾ ‘‘ਤੁਚ੍ਛਪਤ੍ਤਂ ਨ ਪੇਸਿਸ੍ਸਾਮੀ’’ਤਿ ਉਤ੍ਤਰਿਸਾਟਕਂ ਮੋਚੇਤ੍ਵਾ ਉਦਕਂ ਪੁਞ੍ਛਿਤ੍ਵਾ ਸਾਟਕਂ ਪਤ੍ਤੇ ਠਪੇਤ੍ਵਾ ‘‘ਪਤ੍ਤੋ ਗਨ੍ਤ੍ਵਾ ਮਮ ਅਯ੍ਯਸ੍ਸ ਹਤ੍ਥੇ ਪਤਿਟ੍ਠਾਤੂ’’ਤਿ ਆਕਾਸੇ ਖਿਪਿ. ਪਤ੍ਤੋ ਗਨ੍ਤ੍ਵਾ ਥੇਰਸ੍ਸ ਹਤ੍ਥੇ ਪਤਿਟ੍ਠਾਸਿ.

ਅਪਰਭਾਗੇ ਰਞ੍ਞੋ ਤਥਾਗਤਸ੍ਸ ਸਰੀਰਧਾਤੂਨਂ ਅਟ੍ਠਮਭਾਗਂ ਪਤਿਟ੍ਠਾਪੇਤ੍ਵਾ ਵੀਸਰਤਨਸਤਿਕਂ ਮਹਾਚੇਤਿਯਂ ਕਾਰੇਨ੍ਤਸ੍ਸ ਅਪਰਿਨਿਟ੍ਠਿਤੇਯੇਵ ਚੇਤਿਯੇ ਕਾਲਕਿਰਿਯਾਸਮਯੋ ਅਨੁਪ੍ਪਤ੍ਤੋ. ਅਥਸ੍ਸ ਮਹਾਚੇਤਿਯਸ੍ਸ ਦਕ੍ਖਿਣਪਸ੍ਸੇ ਨਿਪਨ੍ਨਸ੍ਸ ਪਞ੍ਚਨਿਕਾਯਵਸੇਨ ਭਿਕ੍ਖੁਸਙ੍ਘੇ ਸਜ੍ਝਾਯਂ ਕਰੋਨ੍ਤੇ ਛਹਿ ਦੇਵਲੋਕੇਹਿ ਛ ਰਥਾ ਆਗਨ੍ਤ੍ਵਾ ਪੁਰਤੋ ਆਕਾਸੇ ਅਟ੍ਠਂਸੁ. ਰਾਜਾ ‘‘ਪੁਞ੍ਞਪੋਤ੍ਥਕਂ ਆਹਰਥਾ’’ਤਿ ਆਦਿਤੋ ਪਟ੍ਠਾਯ ਪੁਞ੍ਞਪੋਤ੍ਥਕਂ ਵਾਚਾਪੇਸਿ. ਅਥ ਨਂ ਕਿਞ੍ਚਿ ਕਮ੍ਮਂ ਨ ਪਰਿਤੋਸੇਸਿ. ਸੋ ‘‘ਪਰਤੋ ਵਾਚੇਥਾ’’ਤਿ ਆਹ. ਪੋਤ੍ਥਕਵਾਚਕੋ ‘‘ਚੂਲ਼ਙ੍ਗਣਿਯਯੁਦ੍ਧੇ ਪਰਾਜਿਤੇਨ ਤੇ ਦੇਵ ਅਟਵਿਂ ਪਵਿਸਿਤ੍ਵਾ ਨਿਸਿਨ੍ਨੇਨ ਏਕਂ ਸਰਕਭਤ੍ਤਂ ਚਤ੍ਤਾਰੋ ਕੋਟ੍ਠਾਸੇ ਕਾਰੇਤ੍ਵਾ ਬੋਧਿਮਾਤੁਮਹਾਤਿਸ੍ਸਤ੍ਥੇਰਸ੍ਸ ਭਿਕ੍ਖਾ ਦਿਨ੍ਨਾ’’ਤਿ ਆਹ. ਰਾਜਾ ‘‘ਠਪੇਹੀ’’ਤਿ ਵਤ੍ਵਾ ਭਿਕ੍ਖੁਸਙ੍ਘਂ ਪੁਚ੍ਛਿ, ‘‘ਭਨ੍ਤੇ, ਕਤਰੋ ਦੇਵਲੋਕੋ ਰਮਣੀਯੋ’’ਤਿ? ਸਬ੍ਬਬੋਧਿਸਤ੍ਤਾਨਂ ਵਸਨਟ੍ਠਾਨਂ ਤੁਸਿਤਭਵਨਂ ਮਹਾਰਾਜਾਤਿ. ਰਾਜਾ ਕਾਲਂ ਕਤ੍ਵਾ ਤੁਸਿਤਭਵਨਤੋ ਆਗਤਰਥੇਵ ਪਤਿਟ੍ਠਾਯ ਤੁਸਿਤਭਵਨਂ ਅਗਮਾਸਿ. ਇਦਂ ਬਲਵਕਮ੍ਮਸ੍ਸ ਵਿਪਾਕਦਾਨੇ ਵਤ੍ਥੁ.

ਯਂ ਪਨ ਕੁਸਲਾਕੁਸਲੇਸੁ ਆਸਨ੍ਨਮਰਣੇ ਅਨੁਸ੍ਸਰਿਤੁਂ ਸਕ੍ਕੋਤਿ, ਤਂ ਯਦਾਸਨ੍ਨਂ ਨਾਮ. ਤਦੇਤਂ ਯਥਾ ਨਾਮ ਗੋਗਣਪਰਿਪੁਣ੍ਣਸ੍ਸ ਵਜਸ੍ਸ ਦ੍ਵਾਰੇ ਵਿਵਟੇ ਪਰਭਾਗੇ ਦਮ੍ਮਗਵਬਲਵਗਵੇਸੁ ਸਨ੍ਤੇਸੁਪਿ ਯੋ ਵਜਦ੍ਵਾਰਸ੍ਸ ਆਸਨ੍ਨੋ ਹੋਤਿ ਅਨ੍ਤਮਸੋ ਦੁਬ੍ਬਲਜਰਗ੍ਗਵੋਪਿ, ਸੋ ਏਵ ਪਠਮਤਰਂ ਨਿਕ੍ਖਮਤਿ, ਏਵਮੇਵ ਅਞ੍ਞੇਸੁ ਕੁਸਲਾਕੁਸਲੇਸੁ ਸਨ੍ਤੇਸੁਪਿ ਮਰਣਕਾਲਸ੍ਸ ਆਸਨ੍ਨਤ੍ਤਾ ਵਿਪਾਕਂ ਦੇਤਿ.

ਤਤ੍ਰਿਮਾਨਿ ਵਤ੍ਥੂਨਿ – ਮਧੁਅਙ੍ਗਣਗਾਮੇ ਕਿਰ ਏਕੋ ਦਮਿਲ਼ਦੋਵਾਰਿਕੋ ਪਾਤੋਵ ਬਲ਼ਿਸਂ ਆਦਾਯ ਗਨ੍ਤ੍ਵਾ ਮਚ੍ਛੇ ਵਧਿਤ੍ਵਾ ਤਯੋ ਕੋਟ੍ਠਾਸੇ ਕਤ੍ਵਾ ਏਕੇਨ ਤਣ੍ਡੁਲਂ ਗਣ੍ਹਾਤਿ, ਏਕੇਨ ਦਧਿਂ, ਏਕਂ ਪਚਤਿ. ਇਮਿਨਾ ਨੀਹਾਰੇਨ ਪਞ੍ਞਾਸ ਵਸ੍ਸਾਨਿ ਪਾਣਾਤਿਪਾਤਕਮ੍ਮਂ ਕਤ੍ਵਾ ਅਪਰਭਾਗੇ ਮਹਲ੍ਲਕੋ ਅਨੁਟ੍ਠਾਨਸੇਯ੍ਯਂ ਉਪਗਚ੍ਛਤਿ. ਤਸ੍ਮਿਂ ਖਣੇ ਗਿਰਿਵਿਹਾਰਵਾਸੀ ਚੂਲ਼ਪਿਣ੍ਡਪਾਤਿਕਤਿਸ੍ਸਤ੍ਥੇਰੋ ‘‘ਮਾ ਅਯਂ ਸਤ੍ਤੋ ਮਯਿ ਪਸ੍ਸਨ੍ਤੇ ਨਸ੍ਸਤੂ’’ਤਿ ਗਨ੍ਤ੍ਵਾ ਤਸ੍ਸ ਗੇਹਦ੍ਵਾਰੇ ਅਟ੍ਠਾਸਿ. ਅਥਸ੍ਸ ਭਰਿਯਾ, ‘‘ਸਾਮਿ, ਥੇਰੋ ਆਗਤੋ’’ਤਿ ਆਰੋਚੇਸਿ. ਅਹਂ ਪਞ੍ਞਾਸ ਵਸ੍ਸਾਨਿ ਥੇਰਸ੍ਸ ਸਨ੍ਤਿਕਂ ਨ ਗਤਪੁਬ੍ਬੋ, ਕਤਰੇਨ ਮੇ ਗੁਣੇਨ ਥੇਰੋ ਆਗਮਿਸ੍ਸਤਿ, ਗਚ੍ਛਾਤਿ ਨਂ ਵਦਥਾਤਿ. ਸਾ ‘‘ਅਤਿਚ੍ਛਥ, ਭਨ੍ਤੇ’’ਤਿ ਆਹ. ਥੇਰੋ ‘‘ਉਪਾਸਕਸ੍ਸ ਕਾ ਸਰੀਰਪ੍ਪਵਤ੍ਤੀ’’ਤਿ ਪੁਚ੍ਛਿ. ਦੁਬ੍ਬਲੋ, ਭਨ੍ਤੇਤਿ. ਥੇਰੋ ਘਰਂ ਪਵਿਸਿਤ੍ਵਾ ਸਤਿਂ ਉਪ੍ਪਾਦੇਤ੍ਵਾ ‘‘ਸੀਲਂ ਗਣ੍ਹਿਸ੍ਸਸੀ’’ਤਿ ਆਹ. ਆਮ, ਭਨ੍ਤੇ, ਦੇਥਾਤਿ. ਥੇਰੋ ਤੀਣਿ ਸਰਣਾਨਿ ਦਤ੍ਵਾ ਪਞ੍ਚ ਸੀਲਾਨਿ ਦਾਤੁਂ ਆਰਭਿ. ਤਸ੍ਸ ਪਞ੍ਚ ਸੀਲਾਨੀਤਿ ਵਚਨਕਾਲੇਯੇਵ ਜਿਵ੍ਹਾ ਪਪਤਿ. ਥੇਰੋ ‘‘ਵਟ੍ਟਿਸ੍ਸਤਿ ਏਤ੍ਤਕ’’ਨ੍ਤਿ ਨਿਕ੍ਖਮਿਤ੍ਵਾ ਗਤੋ. ਸੋਪਿ ਕਾਲਂ ਕਤ੍ਵਾ ਚਾਤੁਮਹਾਰਾਜਿਕਭਵਨੇ ਨਿਬ੍ਬਤ੍ਤਿ. ਨਿਬ੍ਬਤ੍ਤਕ੍ਖਣੇਯੇਵ ਚ ‘‘ਕਿਂ ਨੁ ਖੋ ਕਮ੍ਮਂ ਕਤ੍ਵਾ ਮਯਾ ਇਦਂ ਲਦ੍ਧ’’ਨ੍ਤਿ ਆਵਜ੍ਜੇਨ੍ਤੋ ਥੇਰਂ ਨਿਸ੍ਸਾਯ ਲਦ੍ਧਭਾਵਂ ਞਤ੍ਵਾ ਦੇਵਲੋਕਤੋ ਆਗਨ੍ਤ੍ਵਾ ਥੇਰਂ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ‘‘ਕੋ ਏਸੋ’’ਤਿ ਚ ਵੁਤ੍ਤੇ ‘‘ਅਹਂ, ਭਨ੍ਤੇ, ਦਮਿਲ਼ਦੋਵਾਰਿਕੋ’’ਤਿ ਆਹ. ਕੁਹਿਂ ਨਿਬ੍ਬਤ੍ਤੋਸੀਤਿ? ਚਾਤੁਮਹਾਰਾਜਿਕੇਸੁ, ਭਨ੍ਤੇ, ਸਚੇ ਮੇ ਅਯ੍ਯੋ ਪਞ੍ਚ ਸੀਲਾਨਿ ਅਦਸ੍ਸ, ਉਪਰਿ ਦੇਵਲੋਕੇ ਨਿਬ੍ਬਤ੍ਤੋ ਅਸ੍ਸਂ. ਅਹਂ ਕਿਂ ਕਰਿਸ੍ਸਾਮਿ, ਤ੍ਵਂ ਗਣ੍ਹਿਤੁਂ ਨਾਸਕ੍ਖਿ, ਪੁਤ੍ਤਕਾਤਿ. ਸੋ ਥੇਰਂ ਵਨ੍ਦਿਤ੍ਵਾ ਦੇਵਲੋਕਮੇਵ ਗਤੋ. ਇਦਂ ਤਾਵ ਕੁਸਲਕਮ੍ਮੇ ਵਤ੍ਥੁ.

ਅਨ੍ਤਰਗਙ੍ਗਾਯ ਪਨ ਮਹਾਵਾਚਕਾਲਉਪਾਸਕੋ ਨਾਮ ਅਹੋਸਿ. ਸੋ ਤਿਂਸ ਵਸ੍ਸਾਨਿ ਸੋਤਾਪਤ੍ਤਿਮਗ੍ਗਤ੍ਥਾਯ ਦ੍ਵਤ੍ਤਿਂਸਾਕਾਰਂ ਸਜ੍ਝਾਯਿਤ੍ਵਾ ‘‘ਅਹਂ ਏਵਂ ਦ੍ਵਤ੍ਤਿਂਸਾਕਾਰਂ ਸਜ੍ਝਾਯਨ੍ਤੋ ਓਭਾਸਮਤ੍ਤਮ੍ਪਿ ਨਿਬ੍ਬਤ੍ਤੇਤੁਂ ਨਾਸਕ੍ਖਿਂ, ਬੁਦ੍ਧਸਾਸਨਂ ਅਨਿਯ੍ਯਾਨਿਕਂ ਭਵਿਸ੍ਸਤੀ’’ਤਿ ਦਿਟ੍ਠਿਵਿਪਲ੍ਲਾਸਂ ਪਤ੍ਵਾ ਕਾਲਕਿਰਿਯਂ ਕਤ੍ਵਾ ਮਹਾਗਙ੍ਗਾਯ ਨਵਉਸਭਿਕੋ ਸੁਸੁਮਾਰਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਏਕਂ ਸਮਯਂ ਕਚ੍ਛਕਤਿਤ੍ਥੇਨ ਸਟ੍ਠਿ ਪਾਸਾਣਤ੍ਥਮ੍ਭਸਕਟਾਨਿ ਅਗਮਂਸੁ. ਸੋ ਸਬ੍ਬੇਪਿ ਤੇ ਗੋਣੇ ਚ ਪਾਸਾਣੇ ਚ ਖਾਦਿ. ਇਦਂ ਅਕੁਸਲਕਮ੍ਮੇ ਵਤ੍ਥੁ.

ਏਤੇਹਿ ਪਨ ਤੀਹਿ ਮੁਤ੍ਤਂ ਅਞ੍ਞਾਣਵਸੇਨ ਕਤਂ ਕਟਤ੍ਤਾ ਵਾ ਪਨ ਕਮ੍ਮਂ ਨਾਮ. ਤਂ ਯਥਾ ਨਾਮ ਉਮ੍ਮਤ੍ਤਕੇਨ ਖਿਤ੍ਤਦਣ੍ਡਂ ਯਤ੍ਥ ਵਾ ਤਤ੍ਥ ਵਾ ਗਚ੍ਛਤਿ, ਏਵਮੇਵ ਤੇਸਂ ਅਭਾਵੇ ਯਤ੍ਥ ਕਤ੍ਥਚਿ ਵਿਪਾਕਂ ਦੇਤਿ.

ਜਨਕਂ ਨਾਮ ਏਕਂ ਪਟਿਸਨ੍ਧਿਂ ਜਨੇਤ੍ਵਾ ਪਵਤ੍ਤਿਂ ਨ ਜਨੇਤਿ, ਪਵਤ੍ਤੇ ਅਞ੍ਞਂ ਕਮ੍ਮਂ ਵਿਪਾਕਂ ਨਿਬ੍ਬਤ੍ਤੇਤਿ. ਯਥਾ ਹਿ ਮਾਤਾ ਜਨੇਤਿਯੇਵ, ਧਾਤਿਯੇਵ ਪਨ ਜਗ੍ਗਤਿ; ਏਵਮੇਵਂ ਮਾਤਾ ਵਿਯ ਪਟਿਸਨ੍ਧਿਨਿਬ੍ਬਤ੍ਤਕਂ ਜਨਕਕਮ੍ਮਂ, ਧਾਤਿ ਵਿਯ ਪਵਤ੍ਤੇ ਸਮ੍ਪਤ੍ਤਕਮ੍ਮਂ. ਉਪਤ੍ਥਮ੍ਭਕਂ ਨਾਮ ਕੁਸਲੇਪਿ ਲਬ੍ਭਤਿ ਅਕੁਸਲੇਪਿ. ਏਕਚ੍ਚੋ ਹਿ ਕੁਸਲਂ ਕਤ੍ਵਾ ਸੁਗਤਿਭਵੇ ਨਿਬ੍ਬਤ੍ਤਤਿ. ਸੋ ਤਤ੍ਥ ਠਿਤੋ ਪੁਨਪ੍ਪੁਨਂ ਕੁਸਲਂ ਕਤ੍ਵਾ ਤਂ ਕਮ੍ਮਂ ਉਪਤ੍ਥਮ੍ਭੇਤ੍ਵਾ ਅਨੇਕਾਨਿ ਵਸ੍ਸਸਤਸਹਸ੍ਸਾਨਿ ਸੁਗਤਿਭਵਸ੍ਮਿਂਯੇਵ ਵਿਚਰਤਿ. ਏਕਚ੍ਚੋ ਅਕੁਸਲਂ ਕਤ੍ਵਾ ਦੁਗ੍ਗਤਿਭਵੇ ਨਿਬ੍ਬਤ੍ਤਤਿ. ਸੋ ਤਤ੍ਥ ਠਿਤੋ ਪੁਨਪ੍ਪੁਨਂ ਅਕੁਸਲਂ ਕਤ੍ਵਾ ਤਂ ਕਮ੍ਮਂ ਉਪਤ੍ਥਮ੍ਭੇਤ੍ਵਾ ਬਹੂਨਿ ਵਸ੍ਸਸਤਸਹਸ੍ਸਾਨਿ ਦੁਗ੍ਗਤਿਭਵਸ੍ਮਿਂਯੇਵ ਵਿਚਰਤਿ.

ਅਪਰੋ ਨਯੋ – ਜਨਕਂ ਨਾਮ ਕੁਸਲਮ੍ਪਿ ਹੋਤਿ ਅਕੁਸਲਮ੍ਪਿ. ਤਂ ਪਟਿਸਨ੍ਧਿਯਮ੍ਪਿ ਪਵਤ੍ਤੇਪਿ ਰੂਪਾਰੂਪਵਿਪਾਕਕ੍ਖਨ੍ਧੇ ਜਨੇਤਿ. ਉਪਤ੍ਥਮ੍ਭਕਂ ਪਨ ਵਿਪਾਕਂ ਜਨੇਤੁਂ ਨ ਸਕ੍ਕੋਤਿ, ਅਞ੍ਞੇਨ ਕਮ੍ਮੇਨ ਦਿਨ੍ਨਾਯ ਪਟਿਸਨ੍ਧਿਯਾ ਜਨਿਤੇ ਵਿਪਾਕੇ ਉਪ੍ਪਜ੍ਜਨਕਸੁਖਦੁਕ੍ਖਂ ਉਪਤ੍ਥਮ੍ਭੇਤਿ, ਅਦ੍ਧਾਨਂ ਪਵਤ੍ਤੇਤਿ. ਉਪਪੀਲ਼ਕਂ ਨਾਮ ਅਞ੍ਞੇਨ ਕਮ੍ਮੇਨ ਦਿਨ੍ਨਾਯ ਪਟਿਸਨ੍ਧਿਯਾ ਜਨਿਤੇ ਵਿਪਾਕੇ ਉਪ੍ਪਜ੍ਜਨਕਸੁਖਦੁਕ੍ਖਂ ਪੀਲ਼ੇਤਿ ਬਾਧੇਤਿ, ਅਦ੍ਧਾਨਂ ਪਵਤ੍ਤਿਤੁਂ ਨ ਦੇਤਿ. ਤਤ੍ਰਾਯਂ ਨਯੋ – ਕੁਸਲਕਮ੍ਮੇ ਵਿਪਚ੍ਚਮਾਨੇ ਅਕੁਸਲਕਮ੍ਮਂ ਉਪਪੀਲ਼ਕਂ ਹੁਤ੍ਵਾ ਤਸ੍ਸ ਵਿਪਚ੍ਚਿਤੁਂ ਨ ਦੇਤਿ. ਅਕੁਸਲਕਮ੍ਮੇ ਵਿਪਚ੍ਚਮਾਨੇ ਕੁਸਲਕਮ੍ਮਂ ਉਪਪੀਲ਼ਕਂ ਹੁਤ੍ਵਾ ਤਸ੍ਸ ਵਿਪਚ੍ਚਿਤੁਂ ਨ ਦੇਤਿ. ਯਥਾ ਵਡ੍ਢਮਾਨਕਂ ਰੁਕ੍ਖਂ ਵਾ ਗਚ੍ਛਂ ਵਾ ਲਤਂ ਵਾ ਕੋਚਿਦੇਵ ਦਣ੍ਡੇਨ ਵਾ ਸਤ੍ਥੇਨ ਵਾ ਭਿਨ੍ਦੇਯ੍ਯ ਵਾ ਛਿਨ੍ਦੇਯ੍ਯ ਵਾ, ਅਥ ਸੋ ਰੁਕ੍ਖੋ ਵਾ ਗਚ੍ਛੋ ਵਾ ਲਤਾ ਵਾ ਵਡ੍ਢਿਤੁਂ ਨ ਸਕ੍ਕੁਣੇਯ੍ਯ; ਏਵਮੇਵਂ ਕੁਸਲਂ ਵਿਪਚ੍ਚਮਾਨਂ ਅਕੁਸਲੇਨ ਉਪਪੀਲ਼ਿਤਂ, ਅਕੁਸਲਂ ਵਾ ਪਨ ਵਿਪਚ੍ਚਮਾਨਂ ਕੁਸਲੇਨ ਉਪਪੀਲ਼ਿਤਂ ਵਿਪਚ੍ਚਿਤੁਂ ਨ ਸਕ੍ਕੋਤਿ. ਤਤ੍ਥ ਸੁਨਕ੍ਖਤ੍ਤਸ੍ਸ ਅਕੁਸਲਕਮ੍ਮਂ ਕੁਸਲਂ ਉਪਪੀਲ਼ੇਸਿ, ਚੋਰਘਾਤਕਸ੍ਸ ਕੁਸਲਕਮ੍ਮਂ ਅਕੁਸਲਂ ਉਪਪੀਲ਼ੇਸਿ.

ਰਾਜਗਹੇ ਕਿਰ ਵਾਤਕਾਲ਼ਕੋ ਪਞ੍ਞਾਸ ਵਸ੍ਸਾਨਿ ਚੋਰਘਾਤਕਮ੍ਮਂ ਅਕਾਸਿ. ਅਥ ਨਂ ਰਞ੍ਞੋ ਆਰੋਚੇਸੁਂ – ‘‘ਦੇਵ, ਵਾਤਕਾਲ਼ਕੋ ਮਹਲ੍ਲਕੋ ਚੋਰੇ ਘਾਤੇਤੁਂ ਨ ਸਕ੍ਕੋਤੀ’’ਤਿ. ‘‘ਅਪਨੇਥ ਨਂ ਤਸ੍ਮਾ ਠਾਨਨ੍ਤਰਾਤਿ. ਅਮਚ੍ਚਾ ਨਂ ਅਪਨੇਤ੍ਵਾ ਅਞ੍ਞਂ ਤਸ੍ਮਿਂ ਠਾਨੇ ਠਪਯਿਂਸੁ. ਵਾਤਕਾਲ਼ਕੋਪਿ ਯਾਵ ਤਂ ਕਮ੍ਮਂ ਅਕਾਸਿ, ਤਾਵ ਅਹਤਵਤ੍ਥਾਨਿ ਵਾ ਅਚ੍ਛਾਦਿਤੁਂ ਸੁਰਭਿਪੁਪ੍ਫਾਨਿ ਵਾ ਪਿਲ਼ਨ੍ਧਿਤੁਂ ਪਾਯਾਸਂ ਵਾ ਭੁਞ੍ਜਿਤੁਂ ਉਚ੍ਛਾਦਨਨ੍ਹਾਪਨਂ ਵਾ ਪਚ੍ਚਨੁਭੋਤੁਂ ਨਾਲਤ੍ਥ. ਸੋ ‘‘ਦੀਘਰਤ੍ਤਂ ਮੇ ਕਿਲਿਟ੍ਠਵੇਸੇਨ ਚਰਿਤ’’ਨ੍ਤਿ ‘‘ਪਾਯਾਸਂ ਮੇ ਪਚਾਹੀ’’ਤਿ ਭਰਿਯਂ ਆਣਾਪੇਤ੍ਵਾ ਨ੍ਹਾਨੀਯਸਮ੍ਭਾਰਾਨਿ ਗਾਹਾਪੇਤ੍ਵਾ ਨ੍ਹਾਨਤਿਤ੍ਥਂ ਗਨ੍ਤ੍ਵਾ ਸੀਸਂ ਨ੍ਹਤ੍ਵਾ ਅਹਤਵਤ੍ਥਾਨਿ ਅਚ੍ਛਾਦੇਤ੍ਵਾ ਗਨ੍ਧੇ ਵਿਲਿਮ੍ਪਿਤ੍ਵਾ ਪੁਪ੍ਫਾਨਿ ਪਿਲ਼ਨ੍ਧਿਤ੍ਵਾ ਘਰਂ ਆਗਚ੍ਛਨ੍ਤੋ ਸਾਰਿਪੁਤ੍ਤਤ੍ਥੇਰਂ ਦਿਸ੍ਵਾ ‘‘ਸਂਕਿਲਿਟ੍ਠਕਮ੍ਮਤੋ ਚਮ੍ਹਿ ਅਪਗਤੋ, ਅਯ੍ਯੋ ਚ ਮੇ ਦਿਟ੍ਠੋ’’ਤਿ ਤੁਟ੍ਠਮਾਨਸੋ ਥੇਰਂ ਘਰਂ ਨੇਤ੍ਵਾ ਨਵਸਪ੍ਪਿਸਕ੍ਕਰਚੁਣ੍ਣਾਭਿਸਙ੍ਖਤੇਨ ਪਾਯਾਸੇਨ ਪਰਿਵਿਸਿ. ਥੇਰੋ ਤਸ੍ਸ ਅਨੁਮੋਦਨਮਕਾਸਿ. ਸੋ ਅਨੁਮੋਦਨਂ ਸੁਤ੍ਵਾ ਅਨੁਲੋਮਿਕਖਨ੍ਤਿਂ ਪਟਿਲਭਿਤ੍ਵਾ ਥੇਰਂ ਅਨੁਗਨ੍ਤ੍ਵਾ ਨਿਵਤ੍ਤਮਾਨੋ ਅਨ੍ਤਰਾਮਗ੍ਗੇ ਤਰੁਣਵਚ੍ਛਾਯ ਗਾਵਿਯਾ ਮਦ੍ਦਿਤ੍ਵਾ ਜੀਵਿਤਕ੍ਖਯਂ ਪਾਪਿਤੋ ਗਨ੍ਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਭਿਕ੍ਖੂ ਤਥਾਗਤਂ ਪੁਚ੍ਛਿਂਸੁ – ‘‘ਭਨ੍ਤੇ, ਚੋਰਘਾਤਕੋ ਅਜ੍ਜੇਵ ਕਿਲਿਟ੍ਠਕਮ੍ਮਤੋ ਅਪਨੀਤੋ, ਅਜ੍ਜੇਵ ਕਾਲਙ੍ਕਤੋ, ਕਹਂ ਨੁ ਖੋ ਨਿਬ੍ਬਤ੍ਤੋ’’ਤਿ? ਤਾਵਤਿਂਸਭਵਨੇ, ਭਿਕ੍ਖਵੇਤਿ. ਭਨ੍ਤੇ, ਚੋਰਘਾਤਕੋ ਦੀਘਰਤ੍ਤਂ ਪੁਰਿਸੇ ਘਾਤੇਸਿ, ਤੁਮ੍ਹੇ ਚ ਏਵਂ ਵਦੇਥ, ਨਤ੍ਥਿ ਨੁ ਖੋ ਪਾਪਕਮ੍ਮਸ੍ਸ ਫਲਨ੍ਤਿ. ਮਾ, ਭਿਕ੍ਖਵੇ, ਏਵਂ ਅਵਚੁਤ੍ਥ, ਬਲਵਕਲ੍ਯਾਣਮਿਤ੍ਤੂਪਨਿਸ੍ਸਯਂ ਲਭਿਤ੍ਵਾ ਧਮ੍ਮਸੇਨਾਪਤਿਸ੍ਸ ਪਿਣ੍ਡਪਾਤਂ ਦਤ੍ਵਾ ਅਨੁਮੋਦਨਂ ਸੁਤ੍ਵਾ ਅਨੁਲੋਮਿਕਖਨ੍ਤਿਂ ਪਟਿਲਭਿਤ੍ਵਾ ਸੋ ਤਤ੍ਥ ਨਿਬ੍ਬਤ੍ਤੋਤਿ.

‘‘ਸੁਭਾਸਿਤਂ ਸੁਣਿਤ੍ਵਾਨ, ਨਾਗਰਿਯੋ ਚੋਰਘਾਤਕੋ;

ਅਨੁਲੋਮਖਨ੍ਤਿਂ ਲਦ੍ਧਾਨ, ਮੋਦਤੀ ਤਿਦਿਵਂ ਗਤੋ’’ਤਿ.

ਉਪਘਾਤਕਂ ਪਨ ਸਯਂ ਕੁਸਲਮ੍ਪਿ ਅਕੁਸਲਮ੍ਪਿ ਸਮਾਨਂ ਅਞ੍ਞਂ ਦੁਬ੍ਬਲਕਮ੍ਮਂ ਘਾਤੇਤ੍ਵਾ ਤਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਅਤ੍ਤਨੋ ਵਿਪਾਕਸ੍ਸ ਓਕਾਸਂ ਕਰੋਤਿ. ਏਵਂ ਪਨ ਕਮ੍ਮੇਨ ਕਤੇ ਓਕਾਸੇ ਤਂ ਵਿਪਾਕਂ ਉਪ੍ਪਨ੍ਨਂ ਨਾਮ ਵੁਚ੍ਚਤਿ. ਉਪਚ੍ਛੇਦਕਨ੍ਤਿਪਿ ਏਤਸ੍ਸੇਵ ਨਾਮਂ. ਤਤ੍ਰਾਯਂ ਨਯੋ – ਕੁਸਲਕਮ੍ਮਸ੍ਸ ਵਿਪਚ੍ਚਨਕਾਲੇ ਏਕਂ ਅਕੁਸਲਕਮ੍ਮਂ ਉਟ੍ਠਾਯ ਤਂ ਕਮ੍ਮਂ ਛਿਨ੍ਦਿਤ੍ਵਾ ਪਾਤੇਤਿ. ਅਕੁਸਲਕਮ੍ਮਸ੍ਸਪਿ ਵਿਪਚ੍ਚਨਕਾਲੇ ਏਕਂ ਕੁਸਲਕਮ੍ਮਂ ਉਟ੍ਠਾਯ ਤਂ ਕਮ੍ਮਂ ਛਿਨ੍ਦਿਤ੍ਵਾ ਪਾਤੇਤਿ. ਇਦਂ ਉਪਚ੍ਛੇਦਕਂ ਨਾਮ. ਤਤ੍ਥ ਅਜਾਤਸਤ੍ਤੁਨੋ ਕਮ੍ਮਂ ਕੁਸਲਚ੍ਛੇਦਕਂ ਅਹੋਸਿ, ਅਙ੍ਗੁਲਿਮਾਲਤ੍ਥੇਰਸ੍ਸ ਅਕੁਸਲਚ੍ਛੇਦਕਨ੍ਤਿ. ਏਵਂ ਸੁਤ੍ਤਨ੍ਤਿਕਪਰਿਯਾਯੇਨ ਏਕਾਦਸ ਕਮ੍ਮਾਨਿ ਵਿਭਤ੍ਤਾਨਿ.

ਅਭਿਧਮ੍ਮਪਰਿਯਾਯੇਨ ਪਨ ਸੋਲ਼ਸ ਕਮ੍ਮਾਨਿ ਵਿਭਤ੍ਤਾਨਿ, ਸੇਯ੍ਯਥਿਦਂ – ‘‘ਅਤ੍ਥੇਕਚ੍ਚਾਨਿ ਪਾਪਕਾਨਿ ਕਮ੍ਮਸਮਾਦਾਨਾਨਿ ਗਤਿਸਮ੍ਪਤ੍ਤਿਪਟਿਬਾਲ਼੍ਹਾਨਿ ਨ ਵਿਪਚ੍ਚਨ੍ਤਿ, ਅਤ੍ਥੇਕਚ੍ਚਾਨਿ ਪਾਪਕਾਨਿ ਕਮ੍ਮਸਮਾਦਾਨਾਨਿ ਉਪਧਿਸਮ੍ਪਤ੍ਤਿਪਟਿਬਾਲ਼੍ਹਾਨਿ ਨ ਵਿਪਚ੍ਚਨ੍ਤਿ, ਅਤ੍ਥੇਕਚ੍ਚਾਨਿ ਪਾਪਕਾਨਿ ਕਮ੍ਮਸਮਾਦਾਨਾਨਿ ਕਾਲਸਮ੍ਪਤ੍ਤਿਪਟਿਬਾਲ਼੍ਹਾਨਿ ਨ ਵਿਪਚ੍ਚਨ੍ਤਿ, ਅਤ੍ਥੇਕਚ੍ਚਾਨਿ ਪਾਪਕਾਨਿ ਕਮ੍ਮਸਮਾਦਾਨਾਨਿ ਪਯੋਗਸਮ੍ਪਤ੍ਤਿਪਟਿਬਾਲ਼੍ਹਾਨਿ ਨ ਵਿਪਚ੍ਚਨ੍ਤਿ. ਅਤ੍ਥੇਕਚ੍ਚਾਨਿ ਪਾਪਕਾਨਿ ਕਮ੍ਮਸਮਾਦਾਨਾਨਿ ਗਤਿਵਿਪਤ੍ਤਿਂ ਆਗਮ੍ਮ ਵਿਪਚ੍ਚਨ੍ਤਿ, ਉਪਧਿਵਿਪਤ੍ਤਿਂ, ਕਾਲਵਿਪਤ੍ਤਿਂ, ਪਯੋਗਵਿਪਤ੍ਤਿਂ ਆਗਮ੍ਮ ਵਿਪਚ੍ਚਨ੍ਤਿ. ਅਤ੍ਥੇਕਚ੍ਚਾਨਿ ਕਲ੍ਯਾਣਾਨਿ ਕਮ੍ਮਸਮਾਦਾਨਾਨਿ ਗਤਿਵਿਪਤ੍ਤਿਪਟਿਬਾਲ਼੍ਹਾਨਿ ਨ ਵਿਪਚ੍ਚਨ੍ਤਿ, ਉਪਧਿਵਿਪਤ੍ਤਿ, ਕਾਲਵਿਪਤ੍ਤਿ, ਪਯੋਗਵਿਪਤ੍ਤਿਪਟਿਬਾਲ਼੍ਹਾਨਿ ਨ ਵਿਪਚ੍ਚਨ੍ਤਿ. ਅਤ੍ਥੇਕਚ੍ਚਾਨਿ ਕਲ੍ਯਾਣਾਨਿ ਕਮ੍ਮਸਮਾਦਾਨਾਨਿ ਗਤਿਸਮ੍ਪਤ੍ਤਿਂ ਆਗਮ੍ਮ ਵਿਪਚ੍ਚਨ੍ਤਿ, ਉਪਧਿਸਮ੍ਪਤ੍ਤਿਂ, ਕਾਲਸਮ੍ਪਤ੍ਤਿਂ, ਪਯੋਗਸਮ੍ਪਤ੍ਤਿਂ ਆਗਮ੍ਮ ਵਿਪਚ੍ਚਨ੍ਤੀ’’ਤਿ (ਵਿਭ. ੮੧੦).

ਤਤ੍ਥ ਪਾਪਕਾਨੀਤਿ ਲਾਮਕਾਨਿ. ਕਮ੍ਮਸਮਾਦਾਨਾਨੀਤਿ ਕਮ੍ਮਗ੍ਗਹਣਾਨਿ. ਗਹਿਤਸਮਾਦਿਨ੍ਨਾਨਂ ਕਮ੍ਮਾਨਮੇਤਂ ਅਧਿਵਚਨਂ. ਗਤਿਸਮ੍ਪਤ੍ਤਿਪਟਿਬਾਲ਼੍ਹਾਨਿ ਨ ਵਿਪਚ੍ਚਨ੍ਤੀਤਿਆਦੀਸੁ ਅਨਿਟ੍ਠਾਰਮ੍ਮਣਾਨੁਭਵਨਾਰਹੇ ਕਮ੍ਮੇ ਵਿਜ੍ਜਮਾਨੇਯੇਵ ਸੁਗਤਿਭਵੇ ਨਿਬ੍ਬਤ੍ਤਸ੍ਸ ਤਂ ਕਮ੍ਮਂ ਗਤਿਸਮ੍ਪਤ੍ਤਿਪਟਿਬਾਲ਼੍ਹਂ ਨ ਵਿਪਚ੍ਚਤਿ ਨਾਮ. ਗਤਿਸਮ੍ਪਤ੍ਤਿਯਾ ਪਤਿਬਾਹਿਤਂ ਹੁਤ੍ਵਾ ਨ ਵਿਪਚ੍ਚਤੀਤਿ ਅਤ੍ਥੋ. ਯੋ ਪਨ ਪਾਪਕਮ੍ਮੇਨ ਦਾਸਿਯਾ ਵਾ ਕਮ੍ਮਕਾਰਿਯਾ ਵਾ ਕੁਚ੍ਛਿਯਂ ਨਿਬ੍ਬਤ੍ਤਿਤ੍ਵਾ ਉਪਧਿਸਮ੍ਪਨ੍ਨੋ ਹੋਤਿ, ਅਤ੍ਤਭਾਵਸਮਿਦ੍ਧਿਯਂ ਤਿਟ੍ਠਤਿ. ਅਥਸ੍ਸ ਸਾਮਿਕਾ ਤਸ੍ਸ ਰੂਪਸਮ੍ਪਤ੍ਤਿਂ ਦਿਸ੍ਵਾ ‘‘ਨਾਯਂ ਕਿਲਿਟ੍ਠਕਮ੍ਮਸ੍ਸਾਨੁਚ੍ਛਵਿਕੋ’’ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ਅਤ੍ਤਨੋ ਜਾਤਪੁਤ੍ਤਂ ਵਿਯ ਭਣ੍ਡਾਗਾਰਿਕਾਦਿਟ੍ਠਾਨੇਸੁ ਠਪੇਤ੍ਵਾ ਸਮ੍ਪਤ੍ਤਿਂ ਯੋਜੇਤ੍ਵਾ ਪਰਿਹਰਨ੍ਤਿ. ਏਵਰੂਪਸ੍ਸ ਕਮ੍ਮਂ ਉਪਧਿਸਮ੍ਪਤ੍ਤਿਪਟਿਬਾਲ਼੍ਹਂ ਨ ਵਿਪਚ੍ਚਤਿ ਨਾਮ. ਯੋ ਪਨ ਪਠਮਕਪ੍ਪਿਕਕਾਲਸਦਿਸੇ ਸੁਲਭਸਮ੍ਪਨ੍ਨਰਸਭੋਜਨੇ ਸੁਭਿਕ੍ਖਕਾਲੇ ਨਿਬ੍ਬਤ੍ਤਤਿ, ਤਸ੍ਸ ਵਿਜ੍ਜਮਾਨਮ੍ਪਿ ਪਾਪਕਮ੍ਮਂ ਕਾਲਸਮ੍ਪਤ੍ਤਿਪਟਿਬਾਲ਼੍ਹਂ ਨ ਵਿਪਚ੍ਚਤਿ ਨਾਮ. ਯੋ ਪਨ ਸਮ੍ਮਾਪਯੋਗਂ ਨਿਸ੍ਸਾਯ ਜੀਵਤਿ, ਉਪਸਙ੍ਕਮਿਤਬ੍ਬਯੁਤ੍ਤਕਾਲੇ ਉਪਸਙ੍ਕਮਤਿ, ਪਟਿਕ੍ਕਮਿਤਬ੍ਬਯੁਤ੍ਤਕਾਲੇ ਪਟਿਕ੍ਕਮਤਿ, ਪਲਾਯਿਤਬ੍ਬਯੁਤ੍ਤਕਾਲੇ ਪਲਾਯਤਿ. ਲਞ੍ਜਦਾਨਯੁਤ੍ਤਕਾਲੇ ਲਞ੍ਜਂ ਦੇਤਿ, ਚੋਰਿਕਯੁਤ੍ਤਕਾਲੇ ਚੋਰਿਕਂ ਕਰੋਤਿ, ਏਵਰੂਪਸ੍ਸ ਪਾਪਕਮ੍ਮਂ ਪਯੋਗਸਮ੍ਪਤ੍ਤਿਪਟਿਬਾਲ਼੍ਹਂ ਨ ਵਿਪਚ੍ਚਤਿ ਨਾਮ.

ਦੁਗ੍ਗਤਿਭਵੇ ਨਿਬ੍ਬਤ੍ਤਸ੍ਸ ਪਨ ਪਾਪਕਮ੍ਮਂ ਗਤਿਵਿਪਤ੍ਤਿਂ ਆਗਮ੍ਮ ਵਿਪਚ੍ਚਤਿ ਨਾਮ. ਯੋ ਪਨ ਦਾਸਿਯਾ ਵਾ ਕਮ੍ਮਕਾਰਿਯਾ ਵਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤੋ ਦੁਬ੍ਬਣ੍ਣੋ ਹੋਤਿ ਦੁਸ੍ਸਣ੍ਠਾਨੋ, ‘‘ਯਕ੍ਖੋ ਨੁ ਖੋ ਮਨੁਸ੍ਸੋ ਨੁ ਖੋ’’ਤਿ ਵਿਮਤਿਂ ਉਪ੍ਪਾਦੇਤਿ. ਸੋ ਸਚੇ ਪੁਰਿਸੋ ਹੋਤਿ, ਅਥ ਨਂ ‘‘ਨਾਯਂ ਅਞ੍ਞਸ੍ਸ ਕਮ੍ਮਸ੍ਸ ਅਨੁਚ੍ਛਵਿਕੋ’’ਤਿ ਹਤ੍ਥਿਂ ਵਾ ਰਕ੍ਖਾਪੇਨ੍ਤਿ ਅਸ੍ਸਂ ਵਾ ਗੋਣੇ ਵਾ, ਤਿਣਕਟ੍ਠਾਦੀਨਿ ਵਾ ਆਹਰਾਪੇਨ੍ਤਿ, ਖੇਲ਼ਸਰਕਂ ਵਾ ਗਣ੍ਹਾਪੇਨ੍ਤਿ. ਸਚੇ ਇਤ੍ਥੀ ਹੋਤਿ, ਅਥ ਨਂ ਹਤ੍ਥਿਅਸ੍ਸਾਦੀਨਂ ਭਤ੍ਤਮਾਸਾਦੀਨਿ ਵਾ ਪਚਾਪੇਨ੍ਤਿ, ਕਚਵਰਂ ਵਾ ਛਡ੍ਡਾਪੇਨ੍ਤਿ, ਅਞ੍ਞਂ ਵਾ ਪਨ ਜਿਗੁਚ੍ਛਨੀਯਕਮ੍ਮਂ ਕਾਰੇਨ੍ਤਿ. ਏਵਰੂਪਸ੍ਸ ਪਾਪਕਮ੍ਮਂ ਉਪਧਿਵਿਪਤ੍ਤਿਂ ਆਗਮ੍ਮ ਵਿਪਚ੍ਚਤਿ ਨਾਮ. ਯੋ ਪਨ ਦੁਬ੍ਭਿਕ੍ਖਕਾਲੇ ਵਾ ਪਰਿਹੀਨਸਮ੍ਪਤ੍ਤਿਕਾਲੇ ਵਾ ਅਨ੍ਤਰਕਪ੍ਪੇ ਵਾ ਨਿਬ੍ਬਤ੍ਤਤਿ, ਤਸ੍ਸ ਪਾਪਕਮ੍ਮਂ ਕਾਲਵਿਪਤ੍ਤਿਂ ਆਗਮ੍ਮ ਵਿਪਚ੍ਚਤਿ ਨਾਮ. ਯੋ ਪਨ ਪਯੋਗਂ ਸਮ੍ਪਾਦੇਤੁਂ ਨ ਜਾਨਾਤਿ, ਉਪਸਙ੍ਕਮਿਤਬ੍ਬਯੁਤ੍ਤਕਾਲੇ ਉਪਸਙ੍ਕਮਿਤੁਂ ਨ ਜਾਨਾਤਿ…ਪੇ… ਚੋਰਿਕਯੁਤ੍ਤਕਾਲੇ ਚੋਰਿਕਂ ਕਾਤੁਂ ਨ ਜਾਨਾਤਿ, ਤਸ੍ਸ ਪਾਪਕਮ੍ਮਂ ਪਯੋਗਵਿਪਤ੍ਤਿਂ ਆਗਮ੍ਮ ਵਿਪਚ੍ਚਤਿ ਨਾਮ.

ਯੋ ਪਨ ਇਟ੍ਠਾਰਮ੍ਮਣਾਨੁਭਵਨਾਰਹੇ ਕਮ੍ਮੇ ਵਿਜ੍ਜਮਾਨੇਯੇਵ ਗਨ੍ਤ੍ਵਾ ਦੁਗ੍ਗਤਿਭਵੇ ਨਿਬ੍ਬਤ੍ਤਤਿ, ਤਸ੍ਸ ਤਂ ਕਮ੍ਮਂ ਗਤਿਵਿਪਤ੍ਤਿਪਟਿਬਾਲ਼੍ਹਂ ਨ ਵਿਪਚ੍ਚਤਿ ਨਾਮ. ਯੋ ਪਨ ਪੁਞ੍ਞਾਨੁਭਾਵੇਨ ਰਾਜਰਾਜਮਹਾਮਤ੍ਤਾਦੀਨਂ ਗੇਹੇ ਨਿਬ੍ਬਤ੍ਤਿਤ੍ਵਾ ਕਾਣੋ ਵਾ ਹੋਤਿ ਕੁਣੀ ਵਾ ਖਞ੍ਜੋ ਵਾ ਪਕ੍ਖਹਤੋ ਵਾ, ਤਸ੍ਸ ਓਪਰਜ੍ਜਸੇਨਾਪਤਿਭਣ੍ਡਾਗਾਰਿਕਟ੍ਠਾਨਾਦੀਨਿ ਨ ਅਨੁਚ੍ਛਵਿਕਾਨੀਤਿ ਨ ਦੇਨ੍ਤਿ. ਇਚ੍ਚਸ੍ਸ ਤਂ ਪੁਞ੍ਞਂ ਉਪਧਿਵਿਪਤ੍ਤਿਪਟਿਬਾਲ਼੍ਹਂ ਨ ਵਿਪਚ੍ਚਤਿ ਨਾਮ. ਯੋ ਪਨ ਦੁਬ੍ਭਿਕ੍ਖਕਾਲੇ ਵਾ ਪਰਿਹੀਨਸਮ੍ਪਤ੍ਤਿਕਾਲੇ ਵਾ ਅਨ੍ਤਰਕਪ੍ਪੇ ਵਾ ਮਨੁਸ੍ਸੇਸੁ ਨਿਬ੍ਬਤ੍ਤਤਿ, ਤਸ੍ਸ ਤਂ ਕਲ੍ਯਾਣਕਮ੍ਮਂ ਕਾਲਵਿਪਤ੍ਤਿਪਟਿਬਾਲ਼੍ਹਂ ਨ ਵਿਪਚ੍ਚਤਿ ਨਾਮ. ਯੋ ਹੇਟ੍ਠਾ ਵੁਤ੍ਤਨਯੇਨੇਵ ਪਯੋਗਂ ਸਮ੍ਪਾਦੇਤੁਂ ਨ ਜਾਨਾਤਿ, ਤਸ੍ਸ ਕਲ੍ਯਾਣਕਮ੍ਮਂ ਪਯੋਗਵਿਪਤ੍ਤਿਪਟਿਬਾਲ਼੍ਹਂ ਨ ਵਿਪਚ੍ਚਤਿ ਨਾਮ.

ਕਲ੍ਯਾਣਕਮ੍ਮੇਨ ਪਨ ਸੁਗਤਿਭਵੇ ਨਿਬ੍ਬਤ੍ਤਸ੍ਸ ਤਂ ਕਮ੍ਮਂ ਗਤਿਸਮ੍ਪਤ੍ਤਿਂ ਆਗਮ੍ਮ ਵਿਪਚ੍ਚਤਿ ਨਾਮ. ਰਾਜਰਾਜਮਹਾਮਤ੍ਤਾਦੀਨਂ ਕੁਲੇ ਨਿਬ੍ਬਤ੍ਤਿਤ੍ਵਾ ਉਪਧਿਸਮ੍ਪਤ੍ਤਿਂ ਪਤ੍ਤਸ੍ਸ ਅਤ੍ਤਭਾਵਸਮਿਦ੍ਧਿਯਂ ਠਿਤਸ੍ਸ ਦੇਵਨਗਰੇ ਸਮੁਸ੍ਸਿਤਰਤਨਤੋਰਣਸਦਿਸਂ ਅਤ੍ਤਭਾਵਂ ਦਿਸ੍ਵਾ ‘‘ਇਮਸ੍ਸ ਓਪਰਜ੍ਜਸੇਨਾਪਤਿਭਣ੍ਡਾਗਾਰਿਕਟ੍ਠਾਨਾਦੀਨਿ ਅਨੁਚ੍ਛਵਿਕਾਨੀ’’ਤਿ ਦਹਰਸ੍ਸੇਵ ਸਤੋ ਤਾਨਿ ਠਾਨਨ੍ਤਰਾਨਿ ਦੇਨ੍ਤਿ, ਏਵਰੂਪਸ੍ਸ ਕਲ੍ਯਾਣਕਮ੍ਮਂ ਉਪਧਿਸਮ੍ਪਤ੍ਤਿਂ ਆਗਮ੍ਮ ਵਿਪਚ੍ਚਤਿ ਨਾਮ. ਯੋ ਪਠਮਕਪ੍ਪਿਕੇਸੁ ਵਾ ਸੁਲਭਨ੍ਨਪਾਨਕਾਲੇ ਵਾ ਨਿਬ੍ਬਤ੍ਤਤਿ, ਤਸ੍ਸ ਕਲ੍ਯਾਣਕਮ੍ਮਂ ਕਾਲਸਮ੍ਪਤ੍ਤਿਂ ਆਗਮ੍ਮ ਵਿਪਚ੍ਚਤਿ ਨਾਮ. ਯੋ ਵੁਤ੍ਤਨਯੇਨੇਵ ਪਯੋਗਂ ਸਮ੍ਪਾਦੇਤੁਂ ਜਾਨਾਤਿ, ਤਸ੍ਸ ਕਮ੍ਮਂ ਪਯੋਗਸਮ੍ਪਤ੍ਤਿਂ ਆਗਮ੍ਮ ਵਿਪਚ੍ਚਤਿ ਨਾਮ. ਏਵਂ ਅਭਿਧਮ੍ਮਪਰਿਯਾਯੇਨ ਸੋਲ਼ਸ ਕਮ੍ਮਾਨਿ ਵਿਭਤ੍ਤਾਨਿ.

ਅਪਰਾਨਿਪਿ ਪਟਿਸਮ੍ਭਿਦਾਮਗ੍ਗਪਰਿਯਾਯੇਨ ਦ੍ਵਾਦਸ ਕਮ੍ਮਾਨਿ ਵਿਭਤ੍ਤਾਨਿ. ਸੇਯ੍ਯਥਿਦਂ – ‘‘ਅਹੋਸਿ ਕਮ੍ਮਂ ਅਹੋਸਿ ਕਮ੍ਮਵਿਪਾਕੋ, ਅਹੋਸਿ ਕਮ੍ਮਂ ਨਾਹੋਸਿ ਕਮ੍ਮਵਿਪਾਕੋ, ਅਹੋਸਿ ਕਮ੍ਮਂ ਅਤ੍ਥਿ ਕਮ੍ਮਵਿਪਾਕੋ, ਅਹੋਸਿ ਕਮ੍ਮਂ ਨਤ੍ਥਿ ਕਮ੍ਮਵਿਪਾਕੋ, ਅਹੋਸਿ ਕਮ੍ਮਂ ਭਵਿਸ੍ਸਤਿ ਕਮ੍ਮਵਿਪਾਕੋ, ਅਹੋਸਿ ਕਮ੍ਮਂ ਨ ਭਵਿਸ੍ਸਤਿ ਕਮ੍ਮਵਿਪਾਕੋ, ਅਤ੍ਥਿ ਕਮ੍ਮਂ ਅਤ੍ਥਿ ਕਮ੍ਮਵਿਪਾਕੋ, ਅਤ੍ਥਿ ਕਮ੍ਮਂ ਨਤ੍ਥਿ ਕਮ੍ਮਵਿਪਾਕੋ, ਅਤ੍ਥਿ ਕਮ੍ਮਂ ਭਵਿਸ੍ਸਤਿ ਕਮ੍ਮਵਿਪਾਕੋ, ਅਤ੍ਥਿ ਕਮ੍ਮਂ ਨ ਭਵਿਸ੍ਸਤਿ ਕਮ੍ਮਵਿਪਾਕੋ, ਭਵਿਸ੍ਸਤਿ ਕਮ੍ਮਂ ਭਵਿਸ੍ਸਤਿ ਕਮ੍ਮਵਿਪਾਕੋ, ਭਵਿਸ੍ਸਤਿ ਕਮ੍ਮਂ ਨ ਭਵਿਸ੍ਸਤਿ ਕਮ੍ਮਵਿਪਾਕੋ’’ਤਿ (ਪਟਿ. ਮ. ੧.੨੩੪).

ਤਤ੍ਥ ਯਂ ਕਮ੍ਮਂ ਅਤੀਤੇ ਆਯੂਹਿਤਂ ਅਤੀਤੇਯੇਵ ਵਿਪਾਕਵਾਰਂ ਲਭਿ, ਪਟਿਸਨ੍ਧਿਜਨਕਂ ਪਟਿਸਨ੍ਧਿਂ ਜਨੇਸਿ, ਰੂਪਜਨਕਂ ਰੂਪਂ, ਤਂ ਅਹੋਸਿ ਕਮ੍ਮਂ ਅਹੋਸਿ ਕਮ੍ਮਵਿਪਾਕੋਤਿ ਵੁਤ੍ਤਂ. ਯਂ ਪਨ ਵਿਪਾਕਵਾਰਂ ਨ ਲਭਿ, ਪਟਿਸਨ੍ਧਿਜਨਕਂ ਪਟਿਸਨ੍ਧਿਂ ਰੂਪਜਨਕਂ ਵਾ ਰੂਪਂ ਜਨੇਤੁਂ ਨਾਸਕ੍ਖਿ, ਤਂ ਅਹੋਸਿ ਕਮ੍ਮਂ ਨਾਹੋਸਿ ਕਮ੍ਮਵਿਪਾਕੋਤਿ ਵੁਤ੍ਤਂ. ਯਂ ਪਨ ਅਤੀਤੇ ਆਯੂਹਿਤਂ ਏਤਰਹਿ ਲਦ੍ਧਵਿਪਾਕਵਾਰਂ ਪਟਿਸਨ੍ਧਿਜਨਕਂ ਪਟਿਸਨ੍ਧਿਂ ਜਨੇਤ੍ਵਾ ਰੂਪਜਨਕਂ ਰੂਪਂ ਜਨੇਤ੍ਵਾ ਠਿਤਂ, ਤਂ ਅਹੋਸਿ ਕਮ੍ਮਂ ਅਤ੍ਥਿ ਕਮ੍ਮਵਿਪਾਕੋਤਿ ਵੁਤ੍ਤਂ. ਯਂ ਅਲਦ੍ਧਵਿਪਾਕਵਾਰਂ ਪਟਿਸਨ੍ਧਿਜਨਕਂ ਵਾ ਪਟਿਸਨ੍ਧਿਂ ਰੂਪਜਨਕਂ ਵਾ ਰੂਪਂ ਜਨੇਤੁਂ ਨਾਸਕ੍ਖਿ, ਤਂ ਅਹੋਸਿ ਕਮ੍ਮਂ ਨਤ੍ਥਿ ਕਮ੍ਮਵਿਪਾਕੋਤਿ ਵੁਤ੍ਤਂ. ਯਂ ਪਨ ਅਤੀਤੇ ਆਯੂਹਿਤਂ ਅਨਾਗਤੇ ਵਿਪਾਕਵਾਰਂ ਲਭਿਸ੍ਸਤਿ, ਪਟਿਸਨ੍ਧਿਜਨਕਂ ਪਟਿਸਨ੍ਧਿਂ ਰੂਪਜਨਕਂ ਰੂਪਂ ਜਨੇਤੁਂ ਸਕ੍ਖਿਸ੍ਸਤਿ, ਤਂ ਅਹੋਸਿ ਕਮ੍ਮਂ ਭਵਿਸ੍ਸਤਿ ਕਮ੍ਮਵਿਪਾਕੋਤਿ ਵੁਤ੍ਤਂ. ਯਂ ਅਨਾਗਤੇ ਵਿਪਾਕਵਾਰਂ ਨ ਲਭਿਸ੍ਸਤਿ, ਪਟਿਸਨ੍ਧਿਜਨਕਂ ਪਟਿਸਨ੍ਧਿਂ ਰੂਪਜਨਕਂ ਵਾ ਰੂਪਂ ਜਨੇਤੁਂ ਨ ਸਕ੍ਖਿਸ੍ਸਤਿ, ਤਂ ਅਹੋਸਿ ਕਮ੍ਮਂ ਨ ਭਵਿਸ੍ਸਤਿ ਕਮ੍ਮਵਿਪਾਕੋਤਿ ਵੁਤ੍ਤਂ.

ਯਂ ਪਨ ਏਤਰਹਿ ਆਯੂਹਿਤਂ ਏਤਰਹਿਯੇਵ ਵਿਪਾਕਵਾਰਂ ਲਭਤਿ, ਤਂ ਅਤ੍ਥਿ ਕਮ੍ਮਂ ਅਤ੍ਥਿ ਕਮ੍ਮਵਿਪਾਕੋਤਿ ਵੁਤ੍ਤਂ. ਯਂ ਪਨ ਏਤਰਹਿ ਵਿਪਾਕਵਾਰਂ ਨ ਲਭਤਿ, ਤਂ ਅਤ੍ਥਿ ਕਮ੍ਮਂ ਨਤ੍ਥਿ ਕਮ੍ਮਵਿਪਾਕੋਤਿ ਵੁਤ੍ਤਂ. ਯਂ ਪਨ ਏਤਰਹਿ ਆਯੂਹਿਤਂ ਅਨਾਗਤੇ ਵਿਪਾਕਵਾਰਂ ਲਭਿਸ੍ਸਤਿ, ਪਟਿਸਨ੍ਧਿਜਨਕਂ ਪਟਿਸਨ੍ਧਿਂ ਰੂਪਜਨਕਂ ਰੂਪਂ ਜਨੇਤੁਂ ਸਕ੍ਖਿਸ੍ਸਤਿ, ਤਂ ਅਤ੍ਥਿ ਕਮ੍ਮਂ ਭਵਿਸ੍ਸਤਿ ਕਮ੍ਮਵਿਪਾਕੋਤਿ ਵੁਤ੍ਤਂ. ਯਂ ਪਨ ਵਿਪਾਕਵਾਰਂ ਨ ਲਭਿਸ੍ਸਤਿ, ਪਟਿਸਨ੍ਧਿਜਨਕਂ ਪਟਿਸਨ੍ਧਿਂ ਰੂਪਜਨਕਂ ਵਾ ਰੂਪਂ ਜਨੇਤੁਂ ਸਕ੍ਖਿਸ੍ਸਤਿ, ਤਂ ਅਤ੍ਥਿ ਕਮ੍ਮਂ ਨ ਭਵਿਸ੍ਸਤਿ ਕਮ੍ਮਵਿਪਾਕੋਤਿ ਵੁਤ੍ਤਂ.

ਯਂ ਪਨਾਨਾਗਤੇ ਆਯੂਹਿਸ੍ਸਤਿ, ਅਨਾਗਤੇਯੇਵ ਵਿਪਾਕਵਾਰਂ ਲਭਿਸ੍ਸਤਿ, ਪਟਿਸਨ੍ਧਿਜਨਕਂ ਪਟਿਸਨ੍ਧਿਂ ਰੂਪਜਨਕਂ ਵਾ ਰੂਪਂ ਜਨੇਸ੍ਸਤਿ, ਤਂ ਭਵਿਸ੍ਸਤਿ ਕਮ੍ਮਂ ਭਵਿਸ੍ਸਤਿ ਕਮ੍ਮਵਿਪਾਕੋਤਿ ਵੁਤ੍ਤਂ. ਯਂ ਪਨ ਵਿਪਾਕਵਾਰਂ ਨ ਲਭਿਸ੍ਸਤਿ, ਪਟਿਸਨ੍ਧਿਜਨਕਂ ਪਟਿਸਨ੍ਧਿਂ ਰੂਪਜਨਕਂ ਵਾ ਰੂਪਂ ਜਨੇਤੁਂ ਨ ਸਕ੍ਖਿਸ੍ਸਤਿ, ਤਂ ਭਵਿਸ੍ਸਤਿ ਕਮ੍ਮਂ ਨ ਭਵਿਸ੍ਸਤਿ ਕਮ੍ਮਵਿਪਾਕੋਤਿ ਵੁਤ੍ਤਂ. ਏਵਂ ਪਟਿਸਮ੍ਭਿਦਾਮਗ੍ਗਪਰਿਯਾਯੇਨ ਦ੍ਵਾਦਸ ਕਮ੍ਮਾਨਿ ਵਿਭਤ੍ਤਾਨਿ.

ਇਤਿ ਇਮਾਨਿ ਚੇਵ ਦ੍ਵਾਦਸ ਅਭਿਧਮ੍ਮਪਰਿਯਾਯੇਨ ਵਿਭਤ੍ਤਾਨਿ ਚ ਸੋਲ਼ਸ ਕਮ੍ਮਾਨਿ ਅਤ੍ਤਨੋ ਠਾਨਾ ਓਸਕ੍ਕਿਤ੍ਵਾ ਸੁਤ੍ਤਨ੍ਤਿਕਪਰਿਯਾਯੇਨ ਵੁਤ੍ਤਾਨਿ ਏਕਾਦਸ ਕਮ੍ਮਾਨਿਯੇਵ ਭਵਨ੍ਤਿ. ਤਾਨਿਪਿ ਤਤੋ ਓਸਕ੍ਕਿਤ੍ਵਾ ਤੀਣਿਯੇਵ ਕਮ੍ਮਾਨਿ ਹੋਨ੍ਤਿ ਦਿਟ੍ਠਧਮ੍ਮਵੇਦਨੀਯਂ, ਉਪਪਜ੍ਜਵੇਦਨੀਯਂ, ਅਪਰਪਰਿਯਾਯਵੇਦਨੀਯਨ੍ਤਿ. ਤੇਸਂ ਸਙ੍ਕਮਨਂ ਨਤ੍ਥਿ, ਯਥਾਠਾਨੇਯੇਵ ਤਿਟ੍ਠਨ੍ਤਿ. ਯਦਿ ਹਿ ਦਿਟ੍ਠਧਮ੍ਮਵੇਦਨੀਯਂ ਕਮ੍ਮਂ ਉਪਪਜ੍ਜਵੇਦਨੀਯਂ ਵਾ ਅਪਰਪਰਿਯਾਯਵੇਦਨੀਯਂ ਵਾ ਭਵੇਯ੍ਯ, ‘‘ਦਿਟ੍ਠੇ ਵਾ ਧਮ੍ਮੇ’’ਤਿ ਸਤ੍ਥਾ ਨ ਵਦੇਯ੍ਯ. ਸਚੇਪਿ ਉਪਪਜ੍ਜਵੇਦਨੀਯਂ ਦਿਟ੍ਠਧਮ੍ਮਵੇਦਨੀਯਂ ਵਾ ਅਪਰਪਰਿਯਾਯਵੇਦਨੀਯਂ ਵਾ ਭਵੇਯ੍ਯ, ‘‘ਉਪਪਜ੍ਜ ਵਾ’’ਤਿ ਸਤ੍ਥਾ ਨ ਵਦੇਯ੍ਯ. ਅਥਾਪਿ ਅਪਰਪਰਿਯਾਯਵੇਦਨੀਯਂ ਦਿਟ੍ਠਧਮ੍ਮਵੇਦਨੀਯਂ ਵਾ ਉਪਪਜ੍ਜਵੇਦਨੀਯਂ ਵਾ ਭਵੇਯ੍ਯ, ‘‘ਅਪਰੇ ਵਾ ਪਰਿਯਾਯੇ’’ਤਿ ਸਤ੍ਥਾ ਨ ਵਦੇਯ੍ਯ.

ਸੁਕ੍ਕਪਕ੍ਖੇਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਏਤ੍ਥ ਪਨ ਲੋਭੇ ਵਿਗਤੇਤਿ ਲੋਭੇ ਅਪਗਤੇ ਨਿਰੁਦ੍ਧੇ. ਤਾਲਵਤ੍ਥੁਕਤਨ੍ਤਿ ਤਾਲਵਤ੍ਥੁ ਵਿਯ ਕਤਂ, ਮਤ੍ਥਕਚ੍ਛਿਨ੍ਨਤਾਲੋ ਵਿਯ ਪੁਨ ਅਵਿਰੁਲ਼੍ਹਿਸਭਾਵਂ ਕਤਨ੍ਤਿ ਅਤ੍ਥੋ. ਅਨਭਾਵਂ ਕਤਨ੍ਤਿ ਅਨੁਅਭਾਵਂ ਕਤਂ, ਯਥਾ ਪੁਨ ਨੁਪ੍ਪਜ੍ਜਤਿ, ਏਵਂ ਕਤਨ੍ਤਿ ਅਤ੍ਥੋ. ਏਵਸ੍ਸੂਤਿ ਏਵਂ ਭਵੇਯ੍ਯੁਂ. ਏਵਮੇਵ ਖੋਤਿ ਏਤ੍ਥ ਬੀਜਾਨਿ ਵਿਯ ਕੁਸਲਾਕੁਸਲਂ ਕਮ੍ਮਂ ਦਟ੍ਠਬ੍ਬਂ, ਤਾਨਿ ਅਗ੍ਗਿਨਾ ਡਹਨਪੁਰਿਸੋ ਵਿਯ ਯੋਗਾਵਚਰੋ, ਅਗ੍ਗਿ ਵਿਯ ਮਗ੍ਗਞਾਣਂ, ਅਗ੍ਗਿਂ ਦਤ੍ਵਾ ਬੀਜਾਨਂ ਡਹਨਕਾਲੋ ਵਿਯ ਮਗ੍ਗਞਾਣੇਨ ਕਿਲੇਸਾਨਂ ਦਡ੍ਢਕਾਲੋ, ਮਸਿਕਤਕਾਲੋ ਵਿਯ ਪਞ੍ਚਨ੍ਨਂ ਖਨ੍ਧਾਨਂ ਛਿਨ੍ਨਮੂਲਕੇ ਕਤ੍ਵਾ ਠਪਿਤਕਾਲੋ, ਮਹਾਵਾਤੇ ਓਪੁਨਿਤ੍ਵਾ ਨਦਿਯਾ ਵਾ ਪਵਾਹੇਤ੍ਵਾ ਅਪ੍ਪਵਤ੍ਤਿਕਤਕਾਲੋ ਵਿਯ ਉਪਾਦਿਨ੍ਨਕਸਨ੍ਤਾਨਸ੍ਸ ਨਿਰੋਧੇਨ ਛਿਨ੍ਨਮੂਲਕਾਨਂ ਪਞ੍ਚਨ੍ਨਂ ਖਨ੍ਧਾਨਂ ਅਪ੍ਪਟਿਸਨ੍ਧਿਕਭਾਵੇਨ ਨਿਰੁਜ੍ਝਿਤ੍ਵਾ ਪੁਨ ਭਵਸ੍ਮਿਂ ਪਟਿਸਨ੍ਧਿਂ ਅਗ੍ਗਹਿਤਕਾਲੋ ਵੇਦਿਤਬ੍ਬੋ.

ਮੋਹਜਞ੍ਚਾਪਵਿਦ੍ਦਸੂਤਿ ਮੋਹਜਞ੍ਚਾਪਿ ਅਵਿਦ੍ਦਸੁ. ਇਦਂ ਵੁਤ੍ਤਂ ਹੋਤਿ – ਯਂ ਸੋ ਅਵਿਦੂ ਅਨ੍ਧਬਾਲੋ ਲੋਭਜਞ੍ਚ ਦੋਸਜਞ੍ਚ ਮੋਹਜਞ੍ਚਾਤਿ ਕਮ੍ਮਂ ਕਰੋਤਿ, ਏਵਂ ਕਰੋਨ੍ਤੇਨ ਯਂ ਤੇਨ ਪਕਤਂ ਕਮ੍ਮਂ ਅਪ੍ਪਂ ਵਾ ਯਦਿ ਵਾ ਬਹੁਂ. ਇਧੇਵ ਤਂ ਵੇਦਨਿਯਨ੍ਤਿ ਤਂ ਕਮ੍ਮਂ ਤੇਨ ਬਾਲੇਨ ਇਧ ਸਕੇ ਅਤ੍ਤਭਾਵੇਯੇਵ ਵੇਦਨੀਯਂ, ਤਸ੍ਸੇਵ ਤਂ ਅਤ੍ਤਭਾਵੇ ਵਿਪਚ੍ਚਤੀਤਿ ਅਤ੍ਥੋ. ਵਤ੍ਥੁਂ ਅਞ੍ਞਂ ਨ ਵਿਜ੍ਜਤੀਤਿ ਤਸ੍ਸ ਕਮ੍ਮਸ੍ਸ ਵਿਪਚ੍ਚਨਤ੍ਥਾਯ ਅਞ੍ਞਂ ਵਤ੍ਥੁ ਨਤ੍ਥਿ. ਨ ਹਿ ਅਞ੍ਞੇਨ ਕਤਂ ਕਮ੍ਮਂ ਅਞ੍ਞਸ੍ਸ ਅਤ੍ਤਭਾਵੇ ਵਿਪਚ੍ਚਤਿ. ਤਸ੍ਮਾ ਲੋਭਞ੍ਚ ਦੋਸਞ੍ਚ, ਮੋਹਜਞ੍ਚਾਪਿ ਵਿਦ੍ਦਸੂਤਿ ਤਸ੍ਮਾ ਯੋ ਵਿਦੂ ਮੇਧਾਵੀ ਪਣ੍ਡਿਤੋ ਤਂ ਲੋਭਜਾਦਿਭੇਦਂ ਕਮ੍ਮਂ ਨ ਕਰੋਤਿ, ਸੋ ਵਿਜ੍ਜਂ ਉਪ੍ਪਾਦਯਂ ਭਿਕ੍ਖੁ, ਸਬ੍ਬਾ ਦੁਗ੍ਗਤਿਯੋ ਜਹੇ, ਅਰਹਤ੍ਤਮਗ੍ਗਵਿਜ੍ਜਂ ਉਪ੍ਪਾਦੇਤ੍ਵਾ ਤਂ ਵਾ ਪਨ ਵਿਜ੍ਜਂ ਉਪ੍ਪਾਦੇਨ੍ਤੋ ਸਬ੍ਬਾ ਦੁਗ੍ਗਤਿਯੋ ਜਹਤਿ. ਦੇਸਨਾਸੀਸਮੇਵੇਤਂ, ਸੁਗਤਿਯੋਪਿ ਪਨ ਸੋ ਖੀਣਾਸਵੋ ਜਹਤਿਯੇਵ. ਯਮ੍ਪਿ ਚੇਤਂ ‘‘ਤਸ੍ਮਾ ਲੋਭਞ੍ਚ ਦੋਸਞ੍ਚਾ’’ਤਿ ਵੁਤ੍ਤਂ, ਏਤ੍ਥਾਪਿ ਲੋਭਦੋਸਸੀਸੇਨ ਲੋਭਜਞ੍ਚ ਦੋਸਜਞ੍ਚ ਕਮ੍ਮਮੇਵ ਨਿਦ੍ਦਿਟ੍ਠਨ੍ਤਿ ਵੇਦਿਤਬ੍ਬਂ. ਏਵਂ ਸੁਤ੍ਤਨ੍ਤੇਸੁਪਿ ਗਾਥਾਯਪਿ ਵਟ੍ਟਵਿਵਟ੍ਟਮੇਵ ਕਥਿਤਨ੍ਤਿ.