੧੦. ਮਲਸੁਤ੍ਤਵਣ੍ਣਨਾ

੧੦. ਦਸਮੇ ਦੁਸ੍ਸੀਲਭਾਵੋ ਦੁਸ੍ਸੀਲ੍ਯਂ, ਦੁਸ੍ਸੀਲ੍ਯਮੇਵ ਮਲਂ ਦੁਸ੍ਸੀਲ੍ਯਮਲਂ. ਕੇਨਟ੍ਠੇਨ ਮਲਨ੍ਤਿ? ਅਨੁਦਹਨਟ੍ਠੇਨ ਦੁਗ੍ਗਨ੍ਧਟ੍ਠੇਨ ਕਿਲਿਟ੍ਠਕਰਣਟ੍ਠੇਨ ਚ. ਤਞ੍ਹਿ ਨਿਰਯਾਦੀਸੁ ਅਪਾਯੇਸੁ ਅਨੁਦਹਤੀਤਿ ਅਨੁਦਹਨਟ੍ਠੇਨਪਿ ਮਲਂ. ਤੇਨ ਸਮਨ੍ਨਾਗਤੋ ਪੁਗ੍ਗਲੋ ਮਾਤਾਪਿਤੂਨਮ੍ਪਿ ਸਨ੍ਤਿਕੇ ਭਿਕ੍ਖੁਸਙ੍ਘਸ੍ਸਾਪਿ ਅਨ੍ਤਰੇ ਬੋਧਿਚੇਤਿਯਟ੍ਠਾਨੇਸੁਪਿ ਜਿਗੁਚ੍ਛਨੀਯੋ ਹੋਤਿ, ਸਬ੍ਬਦਿਸਾਸੁ ਚਸ੍ਸ ‘‘ਏਵਰੂਪਂ ਕਿਰ ਤੇਨ ਪਾਪਕਮ੍ਮਂ ਕਤ’’ਨ੍ਤਿ ਅਵਣ੍ਣਗਨ੍ਧੋ ਵਾਯਤੀਤਿ ਦੁਗ੍ਗਨ੍ਧਟ੍ਠੇਨਪਿ ਮਲਂ. ਤੇਨ ਚ ਸਮਨ੍ਨਾਗਤੋ ਪੁਗ੍ਗਲੋ ਗਤਗਤਟ੍ਠਾਨੇ ਉਪਤਾਪਞ੍ਚੇਵ ਲਭਤਿ, ਕਾਯਕਮ੍ਮਾਦੀਨਿ ਚਸ੍ਸ ਅਸੁਚੀਨਿ ਹੋਨ੍ਤਿ ਅਪਭਸ੍ਸਰਾਨੀਤਿ ਕਿਲਿਟ੍ਠਕਰਣਟ੍ਠੇਨਪਿ ਮਲਂ. ਅਪਿਚ ਤਂ ਦੇਵਮਨੁਸ੍ਸਸਮ੍ਪਤ੍ਤਿਯੋ ਚੇਵ ਨਿਬ੍ਬਾਨਸਮ੍ਪਤ੍ਤਿਞ੍ਚ ਮਿਲਾਪੇਤੀਤਿ ਮਿਲਾਪਨਟ੍ਠੇਨਪਿ ਮਲਨ੍ਤਿ ਵੇਦਿਤਬ੍ਬਂ. ਇਸ੍ਸਾਮਲਮਚ੍ਛੇਰਮਲੇਸੁਪਿ ਏਸੇਵ ਨਯੋ.

ਬਾਲਵਗ੍ਗੋ ਪਠਮੋ.