੪. ਸਮਚਿਤ੍ਤਵਗ੍ਗਵਣ੍ਣਨਾ

੩੩. ਚਤੁਤ੍ਥਸ੍ਸ ਪਠਮੇ ਅਸਪ੍ਪੁਰਿਸਭੂਮੀਤਿ ਅਸਪ੍ਪੁਰਿਸਾਨਂ ਪਤਿਟ੍ਠਾਨਟ੍ਠਾਨਂ. ਸਪ੍ਪੁਰਿਸਭੂਮਿਯਮ੍ਪਿ ਏਸੇਵ ਨਯੋ. ਅਕਤਞ੍ਞੂਤਿ ਕਤਂ ਨ ਜਾਨਾਤਿ. ਅਕਤਵੇਦੀਤਿ ਕਤਂ ਪਾਕਟਂ ਕਤ੍ਵਾ ਨ ਜਾਨਾਤਿ. ਉਪਞ੍ਞਾਤਨ੍ਤਿ ਵਣ੍ਣਿਤਂ ਥੋਮਿਤਂ ਪਸਤ੍ਥਂ. ਯਦਿਦਨ੍ਤਿ ਯਾ ਅਯਂ. ਅਕਤਞ੍ਞੁਤਾ ਅਕਤਵੇਦਿਤਾਤਿ ਪਰੇਨ ਕਤਸ੍ਸ ਉਪਕਾਰਸ੍ਸ ਅਜਾਨਨਞ੍ਚੇਵ ਪਾਕਟਂ ਕਤ੍ਵਾ ਅਜਾਨਨਞ੍ਚ. ਕੇਵਲਾਤਿ ਸਕਲਾ. ਸੁਕ੍ਕਪਕ੍ਖੇਪਿ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ.

੩੪. ਦੁਤਿਯੇ ਮਾਤੁ ਚ ਪਿਤੁ ਚਾਤਿ ਜਨਕਮਾਤੁ ਚ ਜਨਕਪਿਤੁ ਚ. ਏਕੇਨ, ਭਿਕ੍ਖਵੇ, ਅਂਸੇਨ ਮਾਤਰਂ ਪਰਿਹਰੇਯ੍ਯਾਤਿ ਏਕਸ੍ਮਿਂ ਅਂਸਕੂਟੇ ਠਪੇਤ੍ਵਾ ਮਾਤਰਂ ਪਟਿਜਗ੍ਗੇਯ੍ਯ. ਏਕੇਨ ਅਂਸੇਨ ਪਿਤਰਂ ਪਰਿਹਰੇਯ੍ਯਾਤਿ ਏਕਸ੍ਮਿਂ ਅਂਸਕੂਟੇ ਠਪੇਤ੍ਵਾ ਪਿਤਰਂ ਪਟਿਜਗ੍ਗੇਯ੍ਯ. ਵਸ੍ਸਸਤਾਯੁਕੋ ਵਸ੍ਸਸਤਜੀਵੀਤਿ ਵਸ੍ਸਸਤਾਯੁਕਕਾਲੇ ਜਾਤੋ ਸਕਲਂ ਵਸ੍ਸਸਤਂ ਜੀਵਨ੍ਤੋ. ਇਦਂ ਵੁਤ੍ਤਂ ਹੋਤਿ – ਸਚੇ ਪੁਤ੍ਤੋ ਨਾਮ ‘‘ਮਾਤਾਪਿਤੂਨਂ ਪਟਿਕਰਿਸ੍ਸਾਮੀ’’ਤਿ ਉਟ੍ਠਾਯ ਸਮੁਟ੍ਠਾਯ ਦਕ੍ਖਿਣੇ ਅਂਸਕੂਟੇ ਮਾਤਰਂ, ਵਾਮੇ ਪਿਤਰਂ ਠਪੇਤ੍ਵਾ ਵਸ੍ਸਸਤਾਯੁਕੋ ਸਕਲਮ੍ਪਿ ਵਸ੍ਸਸਤਂ ਜੀਵਮਾਨੋ ਪਰਿਹਰੇਯ੍ਯ. ਸੋ ਚ ਨੇਸਂ ਉਚ੍ਛਾਦਨਪਰਿਮਦ੍ਦਨਨ੍ਹਾਪਨਸਮ੍ਬਾਹਨੇਨਾਤਿ ਸੋ ਚ ਪੁਤ੍ਤੋ ਨੇਸਂ ਮਾਤਾਪਿਤੂਨਂ ਅਂਸਕੂਟੇਸੁ ਠਿਤਾਨਂਯੇਵ ਦੁਗ੍ਗਨ੍ਧਪਟਿਵਿਨੋਦਨਤ੍ਥਂ ਸੁਗਨ੍ਧਕਰਣੇਨ ਉਚ੍ਛਾਦਨੇਨ, ਪਰਿਸ੍ਸਮਵਿਨੋਦਨਤ੍ਥਂ ਹਤ੍ਥਪਰਿਮਦ੍ਦਨੇਨ, ਸੀਤੁਣ੍ਹਕਾਲੇ ਚ ਉਣ੍ਹੋਦਕਸੀਤੋਦਕਨ੍ਹਾਪਨੇਨ, ਹਤ੍ਥਪਾਦਾਦੀਨਂ ਆਕਡ੍ਢਨਪਰਿਕਡ੍ਢਨਸਙ੍ਖਾਤੇਨ ਸਮ੍ਬਾਹਨੇਨ ਉਪਟ੍ਠਾਨਂ ਕਰੇਯ੍ਯ. ਤੇ ਚ ਤਤ੍ਥੇਵਾਤਿ ਤੇ ਚ ਮਾਤਾਪਿਤਰੋ ਤਤ੍ਥੇਵ ਤਸ੍ਸ ਅਂਸਕੂਟੇਸੁ ਨਿਸਿਨ੍ਨਾਵ ਮੁਤ੍ਤਕਰੀਸਂ ਚਜੇਯ੍ਯੁਂ. ਨਤ੍ਵੇਵ ,ਭਿਕ੍ਖਵੇਤਿ, ਭਿਕ੍ਖਵੇ, ਏਵਮ੍ਪਿ ਨਤ੍ਵੇਵ ਮਾਤਾਪਿਤੂਨਂ ਕਤਂ ਵਾ ਹੋਤਿ ਪਟਿਕਤਂ ਵਾ.

ਇਸ੍ਸਰਾਧਿਪਚ੍ਚੇ ਰਜ੍ਜੇਤਿ ਚਕ੍ਕਵਤ੍ਤਿਰਜ੍ਜਂ ਸਨ੍ਧਾਯੇਵਮਾਹ. ਆਪਾਦਕਾਤਿ ਵਡ੍ਢਕਾ ਅਨੁਪਾਲਕਾ. ਪੁਤ੍ਤਾ ਹਿ ਮਾਤਾਪਿਤੂਹਿ ਵਡ੍ਢਿਤਾ ਚੇਵ ਅਨੁਪਾਲਿਤਾ ਚ. ਪੋਸਕਾਤਿ ਹਤ੍ਥਪਾਦੇ ਵਡ੍ਢੇਤ੍ਵਾ ਹਦਯਲੋਹਿਤਂ ਪਾਯੇਤ੍ਵਾ ਪੋਸਕਾ. ਪੁਤ੍ਤਾ ਹਿ ਮਾਤਾਪਿਤੂਹਿ ਪੁਟ੍ਠਾ ਭਤਾ ਅਨ੍ਨਪਾਨਾਦੀਹਿ ਪਟਿਜਗ੍ਗਿਤਾ. ਇਮਸ੍ਸ ਲੋਕਸ੍ਸ ਦਸ੍ਸੇਤਾਰੋਤਿ ਸਚੇ ਹਿ ਮਾਤਾਪਿਤਰੋ ਜਾਤਦਿਵਸੇਯੇਵ ਪੁਤ੍ਤਂ ਪਾਦੇ ਗਹੇਤ੍ਵਾ ਅਰਞ੍ਞੇ ਵਾ ਨਦਿਯਂ ਵਾ ਪਪਾਤੇ ਵਾ ਖਿਪੇਯ੍ਯੁਂ, ਇਮਸ੍ਮਿਂ ਲੋਕੇ ਇਟ੍ਠਾਨਿਟ੍ਠਾਰਮ੍ਮਣਂ ਨ ਪਸ੍ਸੇਯ੍ਯ. ਏਵਂ ਅਕਤ੍ਵਾ ਆਪਾਦਿਤਤ੍ਤਾ ਪੋਸਿਤਤ੍ਤਾ ਏਸ ਇਮਸ੍ਮਿਂ ਲੋਕੇ ਇਟ੍ਠਾਨਿਟ੍ਠਾਰਮ੍ਮਣਂ ਮਾਤਾਪਿਤਰੋ ਨਿਸ੍ਸਾਯ ਪਸ੍ਸਤੀਤਿ ਤ੍ਯਾਸ੍ਸ ਇਮਸ੍ਸ ਲੋਕਸ੍ਸ ਦਸ੍ਸੇਤਾਰੋ ਨਾਮ ਹੋਨ੍ਤਿ. ਸਮਾਦਪੇਤੀਤਿ ਗਣ੍ਹਾਪੇਤਿ. ਇਮਸ੍ਮਿਂ ਸੁਤ੍ਤੇ ਸਦ੍ਧਾਸੀਲਚਾਗਪਞ੍ਞਾ ਲੋਕਿਯਲੋਕੁਤ੍ਤਰਮਿਸ੍ਸਕਾ ਕਥਿਤਾ. ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰਸਦਿਸੋਵ ਭਿਕ੍ਖੁ ਤੇਸੁ ਪਤਿਟ੍ਠਾਪੇਤਿ ਨਾਮਾਤਿ ਵੇਦਿਤਬ੍ਬੋ.

੩੫. ਤਤਿਯੇ ਤੇਨੁਪਸਙ੍ਕਮੀਤਿ ਸੋ ਹਿ ਬ੍ਰਾਹ੍ਮਣੋ ‘‘ਸਮਣੋ ਕਿਰ ਗੋਤਮੋ ਕਥਿਤਂ ਵਿਸ੍ਸਜ੍ਜੇਤਿ, ਪੁਚ੍ਛਾਯਸ੍ਸ ਵਿਰਜ੍ਝਨਂ ਨਾਮ ਨਤ੍ਥਿ. ਅਹਮਸ੍ਸ ਵਿਰਜ੍ਝਨਪਞ੍ਹਂ ਅਭਿਸਙ੍ਖਰਿਸ੍ਸਾਮੀ’’ਤਿ ਪਣੀਤਭੋਜਨਂ ਭੁਞ੍ਜਿਤ੍ਵਾ ਗਬ੍ਭਦ੍ਵਾਰਂ ਪਿਦਹਿਤ੍ਵਾ ਨਿਸਿਨ੍ਨੋ ਚਿਨ੍ਤੇਤੁਂ ਆਰਭਿ. ਅਥਸ੍ਸ ਏਤਦਹੋਸਿ – ‘‘ਇਮਸ੍ਮਿਂ ਠਾਨੇ ਉਚ੍ਚਾਸਦ੍ਦਮਹਾਸਦ੍ਦੋ ਵਤ੍ਤਤਿ, ਚਿਤ੍ਤਂ ਨ ਏਕਗ੍ਗਂ ਹੋਤਿ, ਭੂਮਿਘਰਂ ਕਾਰੇਸ੍ਸਾਮੀ’’ਤਿ ਭੂਮਿਘਰਂ ਕਾਰੇਤ੍ਵਾ ਤਤ੍ਥ ਪਵਿਸਿਤ੍ਵਾ – ‘‘ਏਵਂ ਪੁਟ੍ਠੋ ਏਵਂ ਕਥੇਸ੍ਸਤਿ, ਏਵਂ ਪੁਟ੍ਠੋ ਏਵਂ ਕਥੇਸ੍ਸਤੀ’’ਤਿ ਏਕਂ ਗਣ੍ਹਿਤ੍ਵਾ ਏਕਂ ਵਿਸ੍ਸਜ੍ਜੇਨ੍ਤੋ ਸਕਲਦਿਵਸਂ ਕਿਞ੍ਚਿ ਪਸ੍ਸਿਤੁਂ ਨਾਸਕ੍ਖਿ. ਤਸ੍ਸ ਇਮਿਨਾਵ ਨੀਹਾਰੇਨ ਚਤ੍ਤਾਰੋ ਮਾਸਾ ਵੀਤਿਵਤ੍ਤਾ. ਸੋ ਚਤੁਨ੍ਨਂ ਮਾਸਾਨਂ ਅਚ੍ਚਯੇਨ ਉਭਤੋਕੋਟਿਕਂ ਪਞ੍ਹਂ ਨਾਮ ਅਦ੍ਦਸ. ਏਵਂ ਕਿਰਸ੍ਸ ਅਹੋਸਿ – ‘‘ਅਹਂ ਸਮਣਂ ਗੋਤਮਂ ਉਪਸਙ੍ਕਮਿਤ੍ਵਾ ‘ਕਿਂਵਾਦੀ ਭਵ’ਨ੍ਤਿ ਪੁਚ੍ਛਿਸ੍ਸਾਮਿ. ਸਚੇ ‘ਕਿਰਿਯਵਾਦਿਮ੍ਹੀ’ਤਿ ਵਕ੍ਖਤਿ, ‘ਸਬ੍ਬਾਕੁਸਲਾਨਂ ਨਾਮ ਤੁਮ੍ਹੇ ਕਿਰਿਯਂ ਵਦੇਥਾ’ਤਿ ਨਂ ਨਿਗ੍ਗਣ੍ਹਿਸ੍ਸਾਮਿ. ਸਚੇ ‘ਅਕਿਰਿਯਵਾਦਿਮ੍ਹੀ’ਤਿ ਵਕ੍ਖਤਿ, ‘ਕੁਸਲਧਮ੍ਮਾਨਂ ਨਾਮ ਤੁਮ੍ਹੇ ਅਕਿਰਿਯਂ ਵਦੇਥਾ’ਤਿ ਨਂ ਨਿਗ੍ਗਣ੍ਹਿਸ੍ਸਾਮਿ. ਇਦਞ੍ਹਿ ਉਭਤੋਕੋਟਿਕਂ ਪਞ੍ਹਂ ਪੁਟ੍ਠੋ ਨੇਵ ਉਗ੍ਗਿਲਿਤੁਂ ਸਕ੍ਖਿਸ੍ਸਤਿ ਨ ਨਿਗ੍ਗਿਲਿਤੁਂ. ਏਵਂ ਮਮ ਜਯੋ ਭਵਿਸ੍ਸਤਿ, ਸਮਣਸ੍ਸ ਗੋਤਮਸ੍ਸ ਪਰਾਜਯੋ’’ਤਿ ਉਟ੍ਠਾਯ ਅਪ੍ਫੋਟੇਤ੍ਵਾ ਭੂਮਿਘਰਾ ਨਿਕ੍ਖਮ੍ਮ ‘‘ਏਵਰੂਪਂ ਪਞ੍ਹਂ ਪੁਚ੍ਛਨ੍ਤੇਨ ਨ ਏਕਕੇਨ ਗਨ੍ਤੁਂ ਵਟ੍ਟਤੀ’’ਤਿ ਨਗਰੇ ਘੋਸਨਂ ਕਾਰੇਤ੍ਵਾ ਸਕਲਨਾਗਰੇਹਿ ਪਰਿਵੁਤੋ ਯੇਨ ਭਗਵਾ ਤੇਨੁਪਸਙ੍ਕਮਿ. ਕਿਂਵਾਦੀਤਿ ਕਿਂਲਦ੍ਧਿਕੋ. ਕਿਮਕ੍ਖਾਯੀਤਿ ਕਿਂ ਨਾਮ ਸਾਵਕਾਨਂ ਪਟਿਪਦਂ ਅਕ੍ਖਾਯੀਤਿ ਪੁਚ੍ਛਿ. ਅਥਸ੍ਸ ਭਗਵਾ ਚਤੂਹਿ ਮਾਸੇਹਿ ਪਞ੍ਹਂ ਅਭਿਸਙ੍ਖਰਿਤ੍ਵਾ ‘‘ਦਿਟ੍ਠੋ ਮੇ ਸਮਣਸ੍ਸ ਗੋਤਮਸ੍ਸ ਪਰਾਜਯਪਞ੍ਹੋ’’ਤਿ ਮਾਨਂ ਪਗ੍ਗਯ੍ਹ ਆਗਤਭਾਵਂ ਞਤ੍ਵਾ ਏਕਪਦੇਨੇਵ ਤਂ ਪਞ੍ਹਂ ਭਿਨ੍ਦਨ੍ਤੋ ਕਿਰਿਯਵਾਦੀ ਚਾਹਂ, ਬ੍ਰਾਹ੍ਮਣਾਤਿਆਦਿਮਾਹ. ਅਥ ਬ੍ਰਾਹ੍ਮਣੋ ਅਤ੍ਤਨੋ ਮਾਨਂ ਅਪਨੇਤ੍ਵਾ ਭਗਵਨ੍ਤਂ ਆਯਾਚਨ੍ਤੋ ਯਥਾਕਥਂ ਪਨਾਤਿਆਦਿਮਾਹ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

੩੬. ਚਤੁਤ੍ਥੇ ਦਕ੍ਖਿਣੇਯ੍ਯਾਤਿ ਦਕ੍ਖਿਣਾ ਵੁਚ੍ਚਤਿ ਦਾਨਂ, ਤਸ੍ਸ ਪਟਿਗ੍ਗਹਣਯੁਤ੍ਤਾ ਕਤਿ ਪੁਗ੍ਗਲਾਤਿ ਪੁਚ੍ਛਤਿ. ਸੇਖੋਤਿ ਇਮਿਨਾ ਸਤ੍ਤ ਸੇਕ੍ਖੇ ਦਸ੍ਸੇਤਿ. ਏਤ੍ਥ ਚ ਸੀਲਵਨ੍ਤਪੁਥੁਜ੍ਜਨੋਪਿ ਸੋਤਾਪਨ੍ਨੇਨੇਵ ਸਙ੍ਗਹਿਤੋ. ਆਹੁਨੇਯ੍ਯਾ ਯਜਮਾਨਾਨਂ ਹੋਨ੍ਤੀਤਿ ਦਾਨਂ ਦਦਨ੍ਤਾਨਂ ਆਹੁਨਸ੍ਸ ਅਰਹਾ ਦਾਨਪਟਿਗ੍ਗਾਹਕਾ ਨਾਮ ਹੋਨ੍ਤੀਤਿ ਅਤ੍ਥੋ. ਖੇਤ੍ਤਨ੍ਤਿ ਵਤ੍ਥੁ ਪਤਿਟ੍ਠਾ, ਪੁਞ੍ਞਸ੍ਸ ਵਿਰੁਹਨਟ੍ਠਾਨਨ੍ਤਿ ਅਤ੍ਥੋ.

੩੭. ਪਞ੍ਚਮੇ ਪੁਬ੍ਬਾਰਾਮੇਤਿ ਸਾਵਤ੍ਥਿਤੋ ਪੁਰਤ੍ਥਿਮਦਿਸਾਭਾਗੇ ਆਰਾਮੇ. ਮਿਗਾਰਮਾਤੁਪਾਸਾਦੇਤਿ ਵਿਸਾਖਾਯ ਉਪਾਸਿਕਾਯ ਪਾਸਾਦੇ. ਸਾ ਹਿ ਮਿਗਾਰਸੇਟ੍ਠਿਨਾ ਮਾਤੁਟ੍ਠਾਨੇ ਠਪਿਤਤ੍ਤਾਪਿ, ਸਬ੍ਬਜੇਟ੍ਠਕਸ੍ਸ ਪੁਤ੍ਤਸ੍ਸ ਅਯ੍ਯਕਸੇਟ੍ਠਿਨੋਵ ਸਮਾਨਨਾਮਕਤ੍ਤਾਪਿ ਮਿਗਾਰਮਾਤਾਤਿ ਵੁਚ੍ਚਤਿ. ਤਾਯ ਕਾਰਿਤੋ ਸਹਸ੍ਸਗਬ੍ਭੋ ਪਾਸਾਦੋ ਮਿਗਾਰਮਾਤੁਪਾਸਾਦੋ ਨਾਮ. ਥੇਰੋ ਤਸ੍ਮਿਂ ਵਿਹਰਤਿ. ਤਤ੍ਰ ਖੋ ਆਯਸ੍ਮਾ ਸਾਰਿਪੁਤ੍ਤੋਤਿ ਤਸ੍ਮਿਂ ਪਾਸਾਦੇ ਵਿਹਰਨ੍ਤੋ ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰੋ.

ਭਿਕ੍ਖੂ ਆਮਨ੍ਤੇਸੀਤਿ ਕਸ੍ਮਿਂ ਕਾਲੇ ਆਮਨ੍ਤੇਸਿ? ਕਾਨਿਚਿ ਹਿ ਸੁਤ੍ਤਾਨਿ ਪੁਰੇਭਤ੍ਤੇ ਭਾਸਿਤਾਨਿ ਅਤ੍ਥਿ, ਕਾਨਿਚਿ ਪਚ੍ਛਾਭਤ੍ਤੇ, ਕਾਨਿਚਿ ਪੁਰਿਮਯਾਮੇ, ਕਾਨਿਚਿ ਮਜ੍ਝਿਮਯਾਮੇ, ਕਾਨਿਚਿ ਪਚ੍ਛਿਮਯਾਮੇ. ਇਦਂ ਪਨ ਸਮਚਿਤ੍ਤਪਟਿਪਦਾਸੁਤ੍ਤਂ ਪਚ੍ਛਾਭਤ੍ਤੇ ਭਾਸਿਤਂ. ਤਸ੍ਮਾ ਸਾਯਨ੍ਹਸਮਯੇ ਆਮਨ੍ਤੇਸਿ.

ਨ ਕੇਵਲਂ ਚੇਤਂ ਥੇਰੇਨੇਵ ਭਾਸਿਤਂ, ਤਥਾਗਤੇਨਾਪਿ ਭਾਸਿਤਂ. ਕਤ੍ਥ ਨਿਸੀਦਿਤ੍ਵਾਤਿ? ਵਿਸਾਖਾਯ ਰਤਨਪਾਸਾਦੇ ਨਿਸੀਦਿਤ੍ਵਾ. ਤਥਾਗਤੋ ਹਿ ਪਠਮਬੋਧਿਯਂ ਵੀਸਤਿ ਵਸ੍ਸਾਨਿ ਅਨਿਬਦ੍ਧਵਾਸੋ ਹੁਤ੍ਵਾ ਯਤ੍ਥ ਯਤ੍ਥ ਫਾਸੁਕਂ ਹੋਤਿ, ਤਤ੍ਥ ਤਤ੍ਥੇਵ ਗਨ੍ਤ੍ਵਾ ਵਸਿ. ਪਠਮਂ ਅਨ੍ਤੋਵਸ੍ਸਞ੍ਹਿ ਇਸਿਪਤਨੇ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਅਟ੍ਠਾਰਸ ਮਹਾਬ੍ਰਹ੍ਮਕੋਟਿਯੋ ਅਮਤਪਾਨਂ ਪਾਯੇਤ੍ਵਾ ਬਾਰਾਣਸਿਂ ਉਪਨਿਸ੍ਸਾਯ ਇਸਿਪਤਨੇ ਵਸਿ. ਦੁਤਿਯਂ ਅਨ੍ਤੋਵਸ੍ਸਂ ਰਾਜਗਹਂ ਉਪਨਿਸ੍ਸਾਯ ਵੇਲ਼ੁਵਨੇ, ਤਤਿਯਚਤੁਤ੍ਥਾਨਿਪਿ ਤਤ੍ਥੇਵ, ਪਞ੍ਚਮਂ ਅਨ੍ਤੋਵਸ੍ਸਂ ਵੇਸਾਲਿਂ ਉਪਨਿਸ੍ਸਾਯ ਮਹਾਵਨੇ ਕੂਟਾਗਾਰਸਾਲਾਯਂ, ਛਟ੍ਠਂ ਅਨ੍ਤੋਵਸ੍ਸਂ ਮਕੁਲਪਬ੍ਬਤੇ, ਸਤ੍ਤਮਂ ਤਾਵਤਿਂਸਭਵਨੇ, ਅਟ੍ਠਮਂ ਭਗ੍ਗੇ ਸੁਸੁਮਾਰਗਿਰਂ ਨਿਸ੍ਸਾਯ ਭੇਸਕਲ਼ਾਵਨੇ, ਨਵਮਂ ਕੋਸਮ੍ਬਿਯਂ, ਦਸਮਂ ਪਾਲਿਲੇਯ੍ਯਕੇ ਵਨਸਣ੍ਡੇ, ਏਕਾਦਸਮਂ ਨਾਲਾਯਂ ਬ੍ਰਾਹ੍ਮਣਗਾਮੇ, ਦ੍ਵਾਦਸਮਂ ਵੇਰਞ੍ਜਾਯਂ, ਤੇਰਸਮਂ ਚਾਲਿਯਪਬ੍ਬਤੇ, ਚੁਦ੍ਦਸਮਂ ਜੇਤਵਨੇ, ਪਞ੍ਚਦਸਮਂ ਕਪਿਲਵਤ੍ਥੁਸ੍ਮਿਂ, ਸੋਲ਼ਸਮਂ ਆਲ਼ਵਕਂ ਦਮੇਤ੍ਵਾ ਚਤੁਰਾਸੀਤਿਪਾਣਸਹਸ੍ਸਾਨਿ ਅਮਤਪਾਨਂ ਪਾਯੇਤ੍ਵਾ ਆਲ਼ਵਿਯਂ, ਸਤ੍ਤਰਸਮਂ ਰਾਜਗਹੇਯੇਵ, ਅਟ੍ਠਾਰਸਮਂ ਚਾਲਿਯਪਬ੍ਬਤੇਯੇਵ, ਤਥਾ ਏਕੂਨਵੀਸਤਿਮਂ, ਵੀਸਤਿਮਂ ਪਨ ਅਨ੍ਤੋਵਸ੍ਸਂ ਰਾਜਗਹਂਯੇਵ ਉਪਨਿਸ੍ਸਾਯ ਵਸਿ. ਏਵਂ ਵੀਸਤਿ ਵਸ੍ਸਾਨਿ ਅਨਿਬਦ੍ਧਵਾਸੋ ਹੁਤ੍ਵਾ ਯਤ੍ਥ ਯਤ੍ਥ ਫਾਸੁਕਂ ਹੋਤਿ, ਤਤ੍ਥ ਤਤ੍ਥੇਵ ਵਸਿ.

ਤਤੋ ਪਟ੍ਠਾਯ ਪਨ ਦ੍ਵੇ ਸੇਨਾਸਨਾਨਿ ਧੁਵਪਰਿਭੋਗਾਨਿ ਅਕਾਸਿ. ਕਤਰਾਨਿ ਦ੍ਵੇ? ਜੇਤਵਨਞ੍ਚ ਪੁਬ੍ਬਾਰਾਮਞ੍ਚ. ਕਸ੍ਮਾ? ਦ੍ਵਿਨ੍ਨਂ ਕੁਲਾਨਂ ਗੁਣਮਹਨ੍ਤਤਾਯ. ਅਨਾਥਪਿਣ੍ਡਿਕਸ੍ਸ ਹਿ ਵਿਸਾਖਾਯ ਚ ਗੁਣਂ ਸਨ੍ਧਾਯ ਗੁਣਂ ਪਟਿਚ੍ਚ ਸਤ੍ਥਾ ਤਾਨਿ ਸੇਨਾਸਨਾਨਿ ਧੁਵਪਰਿਭੋਗੇਨ ਪਰਿਭੁਞ੍ਜਿ. ਉਤੁਵਸ੍ਸਂ ਚਾਰਿਕਂ ਚਰਿਤ੍ਵਾਪਿ ਹਿ ਅਨ੍ਤੋਵਸ੍ਸੇ ਦ੍ਵੀਸੁਯੇਵ ਸੇਨਾਸਨੇਸੁ ਵਸਤਿ. ਏਵਂ ਵਸਨ੍ਤੋ ਪਨ ਜੇਤਵਨੇ ਰਤ੍ਤਿਂ ਵਸਿਤ੍ਵਾ ਪੁਨਦਿਵਸੇ ਭਿਕ੍ਖੁਸਙ੍ਘਪਰਿਵੁਤੋ ਦਕ੍ਖਿਣਦ੍ਵਾਰੇਨ ਸਾਵਤ੍ਥਿਂ ਪਿਣ੍ਡਾਯ ਪਵਿਸਿਤ੍ਵਾ ਪਾਚੀਨਦ੍ਵਾਰੇਨ ਨਿਕ੍ਖਮਿਤ੍ਵਾ ਪੁਬ੍ਬਾਰਾਮੇ ਦਿਵਾਵਿਹਾਰਂ ਕਰੋਤਿ. ਪੁਬ੍ਬਾਰਾਮੇ ਰਤ੍ਤਿਂ ਵਸਿਤ੍ਵਾ ਪੁਨਦਿਵਸੇ ਪਾਚੀਨਦ੍ਵਾਰੇਨ ਸਾਵਤ੍ਥਿਂ ਪਿਣ੍ਡਾਯ ਪਵਿਸਿਤ੍ਵਾ ਦਕ੍ਖਿਣਦ੍ਵਾਰੇਨ ਨਿਕ੍ਖਮਿਤ੍ਵਾ ਜੇਤਵਨੇ ਦਿਵਾਵਿਹਾਰਂ ਕਰੋਤਿ. ਤਸ੍ਮਿਂ ਪਨ ਦਿਵਸੇ ਸਮ੍ਮਾਸਮ੍ਬੁਦ੍ਧੋ ਜੇਤਵਨੇਯੇਵ ਵਸਿ. ਯਤ੍ਥ ਕਤ੍ਥਚਿ ਵਸਨ੍ਤਸ੍ਸ ਚਸ੍ਸ ਪਞ੍ਚਵਿਧਕਿਚ੍ਚਂ ਅਵਿਜਹਿਤਮੇਵ ਹੋਤਿ. ਤਂ ਹੇਟ੍ਠਾ ਵਿਤ੍ਥਾਰਿਤਮੇਵ. ਤੇਸੁ ਕਿਚ੍ਚੇਸੁ ਪਚ੍ਛਿਮਯਾਮਕਿਚ੍ਚਕਾਲੇ ਭਗਵਾ ਲੋਕਂ ਓਲੋਕੇਨ੍ਤੋ ਸਾਵਤ੍ਥਿਵਾਸੀਨਞ੍ਚ ਸਮਨ੍ਤਾ ਚ ਸਾਵਤ੍ਥਿਯਾ ਗਾਵੁਤਅਡ੍ਢਯੋਜਨਯੋਜਨਪਰਮੇ ਠਾਨੇ ਅਪਰਿਮਾਣਾਨਂ ਸਤ੍ਤਾਨਂ ਅਭਿਸਮਯਭਾਵਂ ਅਦ੍ਦਸ.

ਤਤੋ ‘‘ਕਸ੍ਮਿਂ ਨੁ ਖੋ ਕਾਲੇ ਅਭਿਸਮਯੋ ਭਵਿਸ੍ਸਤੀ’’ਤਿ ਓਲੋਕੇਨ੍ਤੋ ‘‘ਸਾਯਨ੍ਹਸਮਯੇ’’ਤਿ ਦਿਸ੍ਵਾ ‘‘ਮਯਿ ਨੁ ਖੋ ਕਥੇਨ੍ਤੇ ਅਭਿਸਮਯੋ ਭਵਿਸ੍ਸਤਿ, ਸਾਵਕੇ ਕਥੇਨ੍ਤੇ ਭਵਿਸ੍ਸਤੀ’’ਤਿ ‘‘ਸਾਰਿਪੁਤ੍ਤਤ੍ਥੇਰੇ ਕਥੇਨ੍ਤੇ ਭਵਿਸ੍ਸਤੀ’’ਤਿ ਅਦ੍ਦਸ. ਤਤੋ ‘‘ਕਤ੍ਥ ਨਿਸੀਦਿਤ੍ਵਾ ਕਥੇਨ੍ਤੇ ਭਵਿਸ੍ਸਤੀ’’ਤਿ ਓਲੋਕੇਨ੍ਤੋ ‘‘ਵਿਸਾਖਾਯ ਰਤਨਪਾਸਾਦੇ ਨਿਸੀਦਿਤ੍ਵਾ’’ਤਿ ਦਿਸ੍ਵਾ ‘‘ਬੁਦ੍ਧਾਨਂ ਨਾਮ ਤਯੋ ਸਾਵਕਸਨ੍ਨਿਪਾਤਾ ਹੋਨ੍ਤਿ, ਅਗ੍ਗਸਾਵਕਾਨਂ ਏਕੋ. ਤੇਸੁ ਅਜ੍ਜ ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰਸ੍ਸ ਸਾਵਕਸਨ੍ਨਿਪਾਤੋ ਭਵਿਸ੍ਸਤੀ’’ਤਿ ਅਦ੍ਦਸ. ਦਿਸ੍ਵਾ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਨਿਵਤ੍ਥਨਿਵਾਸਨੋ ਸੁਗਤਚੀਵਰਂ ਪਾਰੁਪਿਤ੍ਵਾ ਸੇਲਮਯਪਤ੍ਤਂ ਆਦਾਯ ਭਿਕ੍ਖੁਸਙ੍ਘਪਰਿਵੁਤੋ ਦਕ੍ਖਿਣਦ੍ਵਾਰੇਨ ਨਗਰਂ ਪਵਿਸਿਤ੍ਵਾ ਪਿਣ੍ਡਾਯ ਚਰਨ੍ਤੋ ਭਿਕ੍ਖੁਸਙ੍ਘਸ੍ਸ ਸੁਲਭਪਿਣ੍ਡਪਾਤਂ ਕਤ੍ਵਾ ਵਾਤਪ੍ਪਹਤਾ ਵਿਯ ਨਾਵਾ ਪਟਿਨਿਵਤ੍ਤਿਤ੍ਵਾ ਦਕ੍ਖਿਣਦ੍ਵਾਰੇਨ ਨਿਕ੍ਖਮਿਤ੍ਵਾ ਬਹਿਦ੍ਵਾਰੇ ਅਟ੍ਠਾਸਿ. ਤਤੋ ਅਸੀਤਿ ਮਹਾਸਾਵਕਾ ਭਿਕ੍ਖੁਨਿਪਰਿਸਾ ਉਪਾਸਕਪਰਿਸਾ ਉਪਾਸਿਕਾਪਰਿਸਾਤਿ ਚਤਸ੍ਸੋ ਪਰਿਸਾ ਸਤ੍ਥਾਰਂ ਪਰਿਵਾਰਯਿਂਸੁ.

ਸਤ੍ਥਾ ਸਾਰਿਪੁਤ੍ਤਤ੍ਥੇਰਂ ਆਮਨ੍ਤੇਸਿ – ‘‘ਸਾਰਿਪੁਤ੍ਤ, ਤਯਾ ਪੁਬ੍ਬਾਰਾਮਂ ਗਨ੍ਤੁਂ ਵਟ੍ਟਤਿ, ਤਵ ਚ ਪਰਿਸਂ ਗਹੇਤ੍ਵਾ ਗਚ੍ਛਾਹੀ’’ਤਿ. ‘‘ਸਾਧੁ, ਭਨ੍ਤੇ’’ਤਿ ਥੇਰੋ ਅਤ੍ਤਨੋ ਪਰਿਵਾਰੇਹਿ ਪਞ੍ਚਹਿ ਭਿਕ੍ਖੁਸਤੇਹਿ ਪਰਿਵੁਤੋ ਪੁਬ੍ਬਾਰਾਮਂ ਅਗਮਾਸਿ. ਏਤੇਨੇਵ ਨਿਯਾਮੇਨ ਅਸੀਤਿ ਮਹਾਸਾਵਕੇ ਪੁਬ੍ਬਾਰਾਮਮੇਵ ਪੇਸੇਤ੍ਵਾ ਸਯਂ ਏਕੇਨ ਆਨਨ੍ਦਤ੍ਥੇਰੇਨੇਵ ਸਦ੍ਧਿਂ ਜੇਤਵਨਂ ਅਗਮਾਸਿ. ਆਨਨ੍ਦਤ੍ਥੇਰੋਪਿ ਵਿਹਾਰੇ ਸਤ੍ਥੁ ਵਤ੍ਤਂ ਕਤ੍ਵਾ ਵਨ੍ਦਿਤ੍ਵਾ ‘‘ਪੁਬ੍ਬਾਰਾਮਂ ਗਚ੍ਛਾਮਿ, ਭਨ੍ਤੇ’’ਤਿ ਆਹ. ਏਵਂ ਕਰੋਹਿ ਆਨਨ੍ਦਾਤਿ. ਸਤ੍ਥਾਰਂ ਵਨ੍ਦਿਤ੍ਵਾ ਤਤ੍ਥੇਵ ਅਗਮਾਸਿ. ਸਤ੍ਥਾ ਏਕਕੋਵ ਜੇਤਵਨੇ ਓਹੀਨੋ.

ਤਂ ਦਿਵਸਞ੍ਹਿ ਚਤਸ੍ਸੋ ਪਰਿਸਾ ਥੇਰਸ੍ਸੇਵ ਧਮ੍ਮਕਥਂ ਸੋਤੁਕਾਮਾ ਅਹੇਸੁਂ. ਕੋਸਲਮਹਾਰਾਜਾਪਿ ਬਲਕਾਯੇਨ ਪਰਿਵੁਤੋ ਪੁਬ੍ਬਾਰਾਮਮੇਵ ਗਤੋ. ਤਥਾ ਪਞ੍ਚਸਤਉਪਾਸਕਪਰਿਵਾਰੋ ਅਨਾਥਪਿਣ੍ਡਿਕੋ. ਵਿਸਾਖਾ ਪਨ ਮਹਾਉਪਾਸਿਕਾ ਦ੍ਵੀਹਿ ਜਙ੍ਘਸਹਸ੍ਸੇਹਿ ਪਰਿਵੁਤੋ ਅਗਮਾਸਿ. ਸਤ੍ਤਪਣ੍ਣਾਸਾਯ ਕੁਲਸਤਸਹਸ੍ਸਾਨਂ ਵਸਨਟ੍ਠਾਨੇ ਸਾਵਤ੍ਥਿਨਗਰੇ ਗੇਹਪਾਲਕਦਾਰਕੇ ਠਪੇਤ੍ਵਾ ਸੇਸਜਨੋ ਗਨ੍ਧਚੁਣ੍ਣਮਾਲਾਦੀਨਿ ਗਹੇਤ੍ਵਾ ਪੁਬ੍ਬਾਰਾਮਮੇਵ ਅਗਮਾਸਿ. ਚਤੂਸੁ ਦ੍ਵਾਰਗਾਮੇਸੁ ਗਾਵੁਤਅਡ੍ਢਯੋਜਨਯੋਜਨਪਰਮਟ੍ਠਾਨੇ ਸਬ੍ਬੇਯੇਵ ਮਨੁਸ੍ਸਾ ਗਨ੍ਧਚੁਣ੍ਣਮਾਲਾਦਿਹਤ੍ਥਾ ਪੁਬ੍ਬਾਰਾਮਮੇਵ ਅਗਮਂਸੁ. ਸਕਲਵਿਹਾਰੋ ਮਿਸ੍ਸਕਪੁਪ੍ਫੇਹਿ ਅਭਿਕਿਣ੍ਣੋ ਵਿਯ ਅਹੋਸਿ.

ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰੋਪਿ ਖੋ ਵਿਹਾਰਂ ਗਨ੍ਤ੍ਵਾ ਵਿਹਾਰਪਰਿਵੇਣੇ ਅਙ੍ਗਣਟ੍ਠਾਨੇ ਅਟ੍ਠਾਸਿ. ਭਿਕ੍ਖੂ ਥੇਰਸ੍ਸ ਆਸਨਂ ਪਞ੍ਞਾਪਯਿਂਸੁ. ਥੇਰੋ ਤਤ੍ਥ ਨਿਸੀਦਿਤ੍ਵਾ ਉਪਟ੍ਠਾਕਤ੍ਥੇਰੇਨ ਵਤ੍ਤੇ ਕਤੇ ਭਿਕ੍ਖੁਸਙ੍ਘਸ੍ਸ ਓਵਾਦਂ ਕਤ੍ਵਾ ਗਨ੍ਧਕੁਟਿਂ ਪਵਿਸਿਤ੍ਵਾ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਿ. ਸੋ ਪਰਿਚ੍ਛਿਨ੍ਨਕਾਲਵਸੇਨ ਸਮਾਪਤ੍ਤਿਤੋ ਵੁਟ੍ਠਾਯ ਅਚਿਰਵਤਿਂ ਗਨ੍ਤ੍ਵਾ ਰਜੋਜਲ੍ਲਂ ਪਵਾਹੇਤ੍ਵਾ ਪਟਿਪ੍ਪਸ੍ਸਦ੍ਧਦਰਥੋ ਓਤਿਣ੍ਣਤਿਤ੍ਥੇਨੇਵ ਉਤ੍ਤਰਿਤ੍ਵਾ ਨਿਵਤ੍ਥਨਿਵਾਸਨੋ ਸਙ੍ਘਾਟਿਂ ਪਾਰੁਪਿਤ੍ਵਾ ਅਟ੍ਠਾਸਿ. ਭਿਕ੍ਖੁਸਙ੍ਘੋਪਿ ਸਮ੍ਮੁਖਸਮ੍ਮੁਖਟ੍ਠਾਨੇਨ ਓਤਰਿਤ੍ਵਾ ਸਰੀਰੇ ਰਜੋਜਲ੍ਲਂ ਪਵਾਹੇਤ੍ਵਾ ਪਚ੍ਚੁਤ੍ਤਰਿਤ੍ਵਾ ਥੇਰਂ ਪਰਿਵਾਰਯਿਂਸੁ. ਅਨ੍ਤੋਵਿਹਾਰੇਪਿ ਥੇਰਸ੍ਸ ਧਮ੍ਮਾਸਨਂ ਪਞ੍ਞਾਪਯਿਂਸੁ. ਚਤਸ੍ਸੋਪਿ ਪਰਿਸਾ ਅਤ੍ਤਨੋ ਅਤ੍ਤਨੋ ਓਕਾਸਂ ਞਤ੍ਵਾ ਮਗ੍ਗਂ ਠਪੇਤ੍ਵਾ ਨਿਸੀਦਿਂਸੁ. ਸਾਰਿਪੁਤ੍ਤਤ੍ਥੇਰੋਪਿ ਪਞ੍ਚਭਿਕ੍ਖੁਸਤਪਰਿਵਾਰੋ ਧਮ੍ਮਸਭਂ ਆਗਨ੍ਤ੍ਵਾ ਸੀਹਮਤ੍ਥਕਪ੍ਪਤਿਟ੍ਠਿਤੇ ਸਮੁਸ੍ਸਿਤਸੇਤਚ੍ਛਤ੍ਤੇ ਰਤਨਪਲ੍ਲਙ੍ਕੇ ਚਿਤ੍ਤਬੀਜਨਿਂ ਗਹੇਤ੍ਵਾ ਪੁਰਤ੍ਥਾਭਿਮੁਖੋ ਨਿਸੀਦਿ. ਨਿਸੀਦਿਤ੍ਵਾ ਪਰਿਸਂ ਓਲੋਕੇਤ੍ਵਾ – ‘‘ਮਹਤੀ ਵਤਾਯਂ ਪਰਿਸਾ, ਇਮਿਸ੍ਸਾ ਨ ਅਪ੍ਪਮਤ੍ਤਿਕਾ ਪਰਿਤ੍ਤਕਧਮ੍ਮਦੇਸਨਾ ਅਨੁਚ੍ਛਵਿਕਾ, ਕਤਰਧਮ੍ਮਦੇਸਨਾ ਨੁ ਖੋ ਅਨੁਚ੍ਛਵਿਕਾ ਭਵਿਸ੍ਸਤੀ’’ਤਿ ਤੀਣਿ ਪਿਟਕਾਨਿ ਆਵਜ੍ਜਮਾਨੋ ਇਮਂ ਸਂਯੋਜਨਪਰਿਯਾਯ ਧਮ੍ਮਦੇਸਨਂ ਅਦ੍ਦਸ.

ਏਵਂ ਦੇਸਨਂ ਸਲ੍ਲਕ੍ਖੇਤ੍ਵਾ ਤਂ ਦੇਸੇਤੁਕਾਮੋ ਭਿਕ੍ਖੂ ਆਮਨ੍ਤੇਸਿ ਆਵੁਸੋ, ਭਿਕ੍ਖਵੇਤਿ. ਆਵੁਸੋਤਿ ਹਿ ਅਵਤ੍ਵਾ, ਭਿਕ੍ਖਵੇਤਿ ਵਚਨਂ ਬੁਦ੍ਧਾਲਾਪੋ ਨਾਮ ਹੋਤਿ, ਅਯਂ ਪਨਾਯਸ੍ਮਾ ‘‘ਦਸਬਲੇਨ ਸਮਾਨਂ ਆਲਪਨਂ ਨ ਕਰਿਸ੍ਸਾਮੀ’’ਤਿ ਸਤ੍ਥੁ ਗਾਰਵਵਸੇਨ ਸਾਵਕਾਲਾਪਂ ਕਰੋਨ੍ਤੋ, ‘‘ਆਵੁਸੋ ਭਿਕ੍ਖਵੇ’’ਤਿ ਆਹ. ਏਤਦਵੋਚਾਤਿ ਏਤਂ ‘‘ਅਜ੍ਝਤ੍ਤਸਂਯੋਜਨਞ੍ਚ, ਆਵੁਸੋ, ਪੁਗ੍ਗਲਂ ਦੇਸੇਸ੍ਸਾਮਿ ਬਹਿਦ੍ਧਾਸਂਯੋਜਨਞ੍ਚਾ’’ਤਿ ਧਮ੍ਮਦੇਸਨਾਪਦਂ ਅਵੋਚ.

ਤਸ੍ਮਿਂ ਪਨ ਰਤਨਪਾਸਾਦੇ ਅਧਿਵਤ੍ਥੋ ਏਕੋ ਸੋਤਾਪਨ੍ਨੋ ਦੇਵਪੁਤ੍ਤੋ ਅਤ੍ਥਿ, ਸੋ ਬੁਦ੍ਧੇਹਿ ਵਾ ਸਾਵਕੇਹਿ ਵਾ ਦੇਸਨਾਯ ਆਰਦ੍ਧਮਤ੍ਤਾਯਯੇਵ ਜਾਨਾਤਿ – ‘‘ਅਯਂ ਦੇਸਨਾ ਉਤ੍ਤਾਨਿਕਾ ਭਵਿਸ੍ਸਤਿ, ਅਯਂ ਗਮ੍ਭੀਰਾ. ਅਯਂ ਝਾਨਨਿਸ੍ਸਿਤਾ ਭਵਿਸ੍ਸਤਿ, ਅਯਂ ਵਿਪਸ੍ਸਨਾਨਿਸ੍ਸਿਤਾ. ਅਯਂ ਮਗ੍ਗਨਿਸ੍ਸਿਤਾ ਅਯਂ ਫਲਨਿਸ੍ਸਿਤਾ, ਅਯਂ ਨਿਬ੍ਬਾਨਨਿਸ੍ਸਿਤਾ’’ਤਿ. ਸੋ ਤਸ੍ਮਿਮ੍ਪਿ ਦਿਵਸੇ ਥੇਰੇਨ ਦੇਸਨਾਯ ਆਰਦ੍ਧਮਤ੍ਤਾਯ ਏਵਂ ਅਞ੍ਞਾਸਿ – ‘‘ਯੇਨ ਨੀਹਾਰੇਨ ਮਯ੍ਹਂ ਅਯ੍ਯੇਨ ਧਮ੍ਮਸੇਨਾਪਤਿਨਾ ਸਾਰਿਪੁਤ੍ਤਤ੍ਥੇਰੇਨ ਦੇਸਨਾ ਆਰਦ੍ਧਾ, ਅਯਂ ਦੇਸਨਾ ਵਿਪਸ੍ਸਨਾਗਾਲ਼੍ਹਾ ਭਵਿਸ੍ਸਤਿ, ਛਹਿ ਮੁਖੇਹਿ ਵਿਪਸ੍ਸਨਂ ਕਥੇਸ੍ਸਤਿ. ਦੇਸਨਾਪਰਿਯੋਸਾਨੇ ਕੋਟਿਸਤਸਹਸ੍ਸਦੇਵਤਾ ਅਰਹਤ੍ਤਂ ਪਾਪੁਣਿਸ੍ਸਨ੍ਤਿ, ਸੋਤਾਪਨ੍ਨਾਦੀਨਂ ਪਨ ਦੇਵਮਨੁਸ੍ਸਾਨਂ ਪਰਿਚ੍ਛੇਦੋ ਨ ਭਵਿਸ੍ਸਤਿ. ਦੇਸਨਾਯ ਅਨੁਚ੍ਛਵਿਕਂ ਕਤ੍ਵਾ ਮਯ੍ਹਂ ਅਯ੍ਯਸ੍ਸ ਸਾਧੁਕਾਰਂ ਦਸ੍ਸਾਮੀ’’ਤਿ ਦੇਵਾਨੁਭਾਵੇਨ ਮਹਨ੍ਤਂ ਸਦ੍ਦਂ ਕਤ੍ਵਾ – ‘‘ਸਾਧੁ ਸਾਧੁ ਅਯ੍ਯਾ’’ਤਿ ਆਹ.

ਦੇਵਰਾਜੇਨ ਸਾਧੁਕਾਰੇ ਦਿਨ੍ਨੇ ਪਰਿਵਾਰਕਪਾਸਾਦਸਹਸ੍ਸੇ ਅਧਿਵਤ੍ਥਾ ਦੇਵਤਾ ਸਬ੍ਬਾਵ ਸਾਧੁਕਾਰਂ ਅਦਂਸੁ. ਤਾਸਂ ਸਾਧੁਕਾਰਸਦ੍ਦੇਨ ਸਬ੍ਬਾ ਪੁਬ੍ਬਾਰਾਮੇ ਵਸਨਦੇਵਤਾ, ਤਾਸਂ ਸਦ੍ਦੇਨ ਗਾਵੁਤਮਤ੍ਤੇ ਦੇਵਤਾ, ਤਤੋ ਅਡ੍ਢਯੋਜਨੇ ਯੋਜਨੇਤਿ ਏਤੇਨੁਪਾਯੇਨ ਏਕਚਕ੍ਕਵਾਲ਼ੇ, ਦ੍ਵੀਸੁ ਚਕ੍ਕਵਾਲ਼ੇਸੁ, ਤੀਸੁ ਚਕ੍ਕਵਾਲ਼ੇਸੂਤਿ ਦਸਸਹਸ੍ਸਚਕ੍ਕਵਾਲ਼ੇਸੁ ਦੇਵਤਾ ਸਾਧੁਕਾਰਮਦਂਸੁ. ਤਾਸਂ ਸਾਧੁਕਾਰਸਦ੍ਦੇਨ ਪਥਵਿਟ੍ਠਕਨਾਗਾ ਚ ਆਕਾਸਟ੍ਠਕਦੇਵਤਾ ਚ. ਤਤੋ ਅਬ੍ਭਵਲਾਹਕਾ, ਉਣ੍ਹਵਲਾਹਕਾ, ਸੀਤਵਲਾਹਕਾ, ਵਸ੍ਸਵਲਾਹਕਾ, ਚਾਤੁਮਹਾਰਾਜਿਕਾ ਚਤ੍ਤਾਰੋ ਮਹਾਰਾਜਾਨੋ, ਤਾਵਤਿਂਸਾ ਦੇਵਤਾ, ਸਕ੍ਕੋ ਦੇਵਰਾਜਾ, ਯਾਮਾ ਦੇਵਤਾ, ਸੁਯਾਮੋ ਦੇਵਰਾਜਾ, ਤੁਸਿਤਾ ਦੇਵਤਾ, ਸਨ੍ਤੁਸਿਤੋ ਦੇਵਰਾਜਾ, ਨਿਮ੍ਮਾਨਰਤੀ ਦੇਵਤਾ, ਸੁਨਿਮ੍ਮਿਤੋ ਦੇਵਰਾਜਾ, ਵਸਵਤ੍ਤੀ ਦੇਵਤਾ, ਵਸਵਤ੍ਤੀ ਦੇਵਰਾਜਾ, ਬ੍ਰਹ੍ਮਪਾਰਿਸਜ੍ਜਾ, ਬ੍ਰਹ੍ਮਪੁਰੋਹਿਤਾ, ਮਹਾਬ੍ਰਹ੍ਮਾਨੋ, ਪਰਿਤ੍ਤਾਭਾ, ਅਪ੍ਪਮਾਣਾਭਾ, ਆਭਸ੍ਸਰਾ, ਪਰਿਤ੍ਤਸੁਭਾ, ਅਪ੍ਪਮਾਣਸੁਭਾ, ਸੁਭਕਿਣ੍ਹਾ, ਵੇਹਪ੍ਫਲਾ, ਅਵਿਹਾ, ਅਤਪ੍ਪਾ, ਸੁਦਸ੍ਸਾ, ਸੁਦਸ੍ਸੀ, ਅਕਨਿਟ੍ਠਾ ਦੇਵਤਾਤਿ ਅਸਞ੍ਞੇ ਚ ਅਰੂਪਾਵਚਰਸਤ੍ਤੇ ਚ ਠਪੇਤ੍ਵਾ ਸੋਤਾਯਤਨਪਵਤ੍ਤਿਟ੍ਠਾਨੇ ਸਬ੍ਬਾ ਦੇਵਤਾ ਸਾਧੁਕਾਰਮਦਂਸੁ.

ਤਤੋ ਖੀਣਾਸਵਮਹਾਬ੍ਰਹ੍ਮਾਨੋ – ‘‘ਮਹਾ ਵਤਾਯਂ ਸਾਧੁਕਾਰਸਦ੍ਦੋ, ਪਥਵਿਤਲਤੋ ਪਟ੍ਠਾਯ ਯਾਵ ਅਕਨਿਟ੍ਠਲੋਕਂ ਆਗਤੋ, ਕਿਮਤ੍ਥਂ ਨੁ ਖੋ ਏਸੋ’’ਤਿ ਆਵਜ੍ਜੇਨ੍ਤੋ ‘‘ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰੋ ਪੁਬ੍ਬਾਰਾਮੇ ਵਿਸਾਖਾਯ ਰਤਨਪਾਸਾਦੇ ਨਿਸੀਦਿਤ੍ਵਾ ਸਂਯੋਜਨਪਰਿਯਾਯਧਮ੍ਮਦੇਸਨਮਾਰਭਿ, ਅਮ੍ਹੇਹਿਪਿ ਤਤ੍ਥ ਕਾਯਸਕ੍ਖੀਹਿ ਭਵਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਤਤ੍ਥ ਅਗਮਂਸੁ. ਪੁਬ੍ਬਾਰਾਮੋ ਦੇਵਤਾਹਿ ਪਰਿਪੁਣ੍ਣੋ, ਸਮਨ੍ਤਾ ਪੁਬ੍ਬਾਰਾਮਸ੍ਸ ਗਾਵੁਤਂ ਅਡ੍ਢਯੋਜਨਂ, ਯੋਜਨਨ੍ਤਿ ਸਕਲਚਕ੍ਕਵਾਲ਼ਂ ਹੇਟ੍ਠਾ ਪਥਵਿਤਲੇਨ ਤਿਰਿਯਂ ਚਕ੍ਕਵਾਲ਼ਪਰਿਯਨ੍ਤੇਨ ਪਰਿਚ੍ਛਿਨ੍ਨਂ ਦਸਹਿ ਚਕ੍ਕਵਾਲ਼ਸਹਸ੍ਸੇਹਿ ਸਨ੍ਨਿਪਤਿਤਾਹਿ ਦੇਵਤਾਹਿ ਨਿਰਨ੍ਤਰਮਹੋਸਿ, ਆਰਗ੍ਗਨਿਤੁਦਨਮਤ੍ਤੇ ਠਾਨੇ ਉਪਰਿਮਕੋਟਿਯਾ ਸਟ੍ਠਿ ਦੇਵਤਾ ਸੁਖੁਮਤ੍ਤਭਾਵੇ ਮਾਪੇਤ੍ਵਾ ਅਟ੍ਠਂਸੁ.

ਅਥਾਯਸ੍ਮਾ ਸਾਰਿਪੁਤ੍ਤੋ ‘‘ਮਹਨ੍ਤਂ ਵਤਿਦਂ ਹਲਾਹਲਂ, ਕਿਂ ਨੁ ਖੋ ਏਤ’’ਨ੍ਤਿ ਆਵਜ੍ਜੇਨ੍ਤੋ ਦਸਸਹਸ੍ਸਚਕ੍ਕਵਾਲ਼ੇ ਠਿਤਾਨਂ ਦੇਵਤਾਨਂ ਏਕਚਕ੍ਕਵਾਲ਼ੇ ਸਨ੍ਨਿਪਤਿਤਭਾਵਂ ਅਦ੍ਦਸ. ਅਥ ਯਸ੍ਮਾ ਬੁਦ੍ਧਾਨਂ ਅਧਿਟ੍ਠਾਨਕਿਚ੍ਚਂ ਨਤ੍ਥਿ, ਪਰਿਸਪਰਿਮਾਣੇਨੇਵ ਪਸ੍ਸਨ੍ਤਿ ਚੇਵ ਸਦ੍ਦਞ੍ਚ ਸਾਵੇਨ੍ਤਿ. ਸਾਵਕਾਨਂ ਪਨ ਅਧਿਟ੍ਠਾਨਂ ਵਟ੍ਟਤਿ. ਤਸ੍ਮਾ ਥੇਰੋ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਸਮਾਪਤ੍ਤਿਤੋ ਵੁਟ੍ਠਾਯ ਮਹਗ੍ਗਤਚਿਤ੍ਤੇਨ ਅਧਿਟ੍ਠਾਸਿ – ‘‘ਚਕ੍ਕਵਾਲ਼ਪਰਿਯਨ੍ਤਾ ਪਰਿਸਾ ਸਬ੍ਬਾਪਿ ਮਂ ਪਸ੍ਸਤੁ, ਧਮ੍ਮਞ੍ਚ ਮੇ ਦੇਸੇਨ੍ਤਸ੍ਸ ਸਦ੍ਦਂ ਸੁਣਾਤੂ’’ਤਿ. ਅਧਿਟ੍ਠਿਤਕਾਲਤੋ ਪਟ੍ਠਾਯ ਦਕ੍ਖਿਣਜਾਣੁਪਸ੍ਸੇ ਚ ਚਕ੍ਕਵਾਲ਼ਮੁਖਵਟ੍ਟਿਯਞ੍ਚ ਨਿਸੀਦਿਤ੍ਵਾ ‘‘ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰੋ ਨਾਮ ਕੀਦਿਸੋ ਦੀਘੋ ਰਸ੍ਸੋ ਸਾਮੋ ਓਦਾਤੋ’’ਤਿ ਵਤ੍ਤਬ੍ਬਕਾਰਣਂ ਨਾਹੋਸਿ, ਸਬ੍ਬੇਸਮ੍ਪਿ ਸਬ੍ਬਦਿਸਾਸੁ ਨਿਸਿਨ੍ਨਾਨਂ ਅਭਿਮੁਖੇਯੇਵ ਪਞ੍ਞਾਯਿਤ੍ਥ, ਨਭਮਜ੍ਝੇ ਠਿਤਚਨ੍ਦੋ ਵਿਯ ਅਹੋਸਿ. ਧਮ੍ਮਂ ਦੇਸੇਨ੍ਤਸ੍ਸਾਪਿਸ੍ਸ ਦਕ੍ਖਿਣਜਾਣੁਪਸ੍ਸੇ ਚ ਚਕ੍ਕਵਾਲ਼ਮੁਖਵਟ੍ਟਿਯਞ੍ਚ ਨਿਸਿਨ੍ਨਾ ਸਬ੍ਬੇ ਏਕਕਂਸੇਨੇਵ ਸਦ੍ਦਂ ਸੁਣਿਂਸੁ.

ਏਵਂ ਅਧਿਟ੍ਠਹਿਤ੍ਵਾ ਥੇਰੋ ਅਜ੍ਝਤ੍ਤਸਂਯੋਜਨਞ੍ਚ, ਆਵੁਸੋਤਿ ਇਮਂ ਧਮ੍ਮਦੇਸਨਂ ਆਰਭਿ. ਤਤ੍ਥ ਅਜ੍ਝਤ੍ਤਨ੍ਤਿ ਕਾਮਭਵੋ. ਬਹਿਦ੍ਧਾਤਿ ਰੂਪਾਰੂਪਭਵੋ. ਕਿਞ੍ਚਾਪਿ ਹਿ ਸਤ੍ਤਾ ਕਾਮਭਵੇ ਅਪ੍ਪਂ ਕਾਲਂ ਵਸਨ੍ਤਿ ਕਪ੍ਪਸ੍ਸ ਚਤੁਤ੍ਥਮੇਵ ਕੋਟ੍ਠਾਸਂ, ਇਤਰੇਸੁ ਤੀਸੁ ਕੋਟ੍ਠਾਸੇਸੁ ਕਾਮਭਵੋ ਸੁਞ੍ਞੋ ਹੋਤਿ ਤੁਚ੍ਛੋ, ਰੂਪਭਵੇ ਬਹੁਂ ਕਾਲਂ ਵਸਨ੍ਤਿ, ਤਥਾਪਿ ਤੇਸਂ ਯਸ੍ਮਾ ਕਾਮਭਵੇ ਚੁਤਿਪਟਿਸਨ੍ਧਿਯੋ ਬਹੁਕਾ ਹੋਨ੍ਤਿ, ਅਪ੍ਪਕਾ ਰੂਪਾਰੂਪਭਵੇਸੁ. ਯਤ੍ਥ ਚ ਚੁਤਿਪਟਿਸਨ੍ਧਿਯੋ ਬਹੁਕਾ, ਤਤ੍ਥ ਆਲਯੋਪਿ ਪਤ੍ਥਨਾਪਿ ਅਭਿਲਾਸੋਪਿ ਬਹੁ ਹੋਤਿ. ਯਤ੍ਥ ਅਪ੍ਪਾ, ਤਤ੍ਥ ਅਪ੍ਪੋ. ਤਸ੍ਮਾ ਕਾਮਭਵੋ ਅਜ੍ਝਤ੍ਤਂ ਨਾਮ ਜਾਤਂ, ਰੂਪਾਰੂਪਭਵਾ ਬਹਿਦ੍ਧਾ ਨਾਮ. ਇਤਿ ਅਜ੍ਝਤ੍ਤਸਙ੍ਖਾਤੇ ਕਾਮਭਵੇ ਛਨ੍ਦਰਾਗੋ ਅਜ੍ਝਤ੍ਤਸਂਯੋਜਨਂ ਨਾਮ, ਬਹਿਦ੍ਧਾਸਙ੍ਖਾਤੇਸੁ ਰੂਪਾਰੂਪਭਵੇਸੁ ਛਨ੍ਦਰਾਗੋ ਬਹਿਦ੍ਧਾਸਂਯੋਜਨਂ ਨਾਮ. ਓਰਮ੍ਭਾਗਿਯਾਨਿ ਵਾ ਪਞ੍ਚ ਸਂਯੋਜਨਾਨਿ ਅਜ੍ਝਤ੍ਤਸਂਯੋਜਨਂ ਨਾਮ, ਉਦ੍ਧਮ੍ਭਾਗਿਯਾਨਿ ਪਞ੍ਚ ਬਹਿਦ੍ਧਾਸਂਯੋਜਨਂ ਨਾਮ. ਤਤ੍ਰਾਯਂ ਵਚਨਤ੍ਥੋ – ਓਰਂ ਵੁਚ੍ਚਤਿ ਕਾਮਧਾਤੁ, ਤਤ੍ਥ ਉਪਪਤ੍ਤਿਨਿਪ੍ਫਾਦਨਤੋ ਤਂ ਓਰਂ ਭਜਨ੍ਤੀਤਿ ਓਰਮ੍ਭਾਗਿਯਾਨਿ. ਉਦ੍ਧਂ ਵੁਚ੍ਚਤਿ ਰੂਪਾਰੂਪਧਾਤੁ, ਤਤ੍ਥ ਉਪਪਤ੍ਤਿਨਿਪ੍ਫਾਦਨਤੋ ਤਂ ਉਦ੍ਧਂ ਭਜਨ੍ਤੀਤਿ ਉਦ੍ਧਮ੍ਭਾਗਿਯਾਨਿ.

ਏਵਂ ਵੁਤ੍ਤਪ੍ਪਭੇਦੇਨ ਅਜ੍ਝਤ੍ਤਸਂਯੋਜਨੇਨ ਸਂਯੁਤ੍ਤੋ ਪੁਗ੍ਗਲੋ ਅਜ੍ਝਤ੍ਤਸਂਯੋਜਨੋ, ਬਹਿਦ੍ਧਾਸਂਯੋਜਨੇਨ ਸਂਯੁਤ੍ਤੋ ਪੁਗ੍ਗਲੋ ਬਹਿਦ੍ਧਾਸਂਯੋਜਨੋ. ਉਭਯਮ੍ਪਿ ਚੇਤਂ ਨ ਲੋਕਿਯਸ੍ਸ ਵਟ੍ਟਨਿਸ੍ਸਿਤਮਹਾਜਨਸ੍ਸ ਨਾਮਂ. ਯੇਸਂ ਪਨ ਭਵੋ ਦ੍ਵੇਧਾ ਪਰਿਚ੍ਛਿਨ੍ਨੋ, ਤੇਸਂ ਸੋਤਾਪਨ੍ਨਸਕਦਾਗਾਮਿਅਨਾਗਾਮੀਨਂ ਅਰਿਯਸਾਵਕਾਨਂ ਏਤਂ ਨਾਮਂ. ਯਥਾ ਹਿ ਮਹਾਅਰਞ੍ਞੇ ਖਦਿਰਵਨਸਾਲਵਨਾਦੀਨਿ ਥਮ੍ਭੋ ਤੁਲਾਸਙ੍ਘਾਟੋਤਿ ਨਾਮਂ ਨ ਲਭਨ੍ਤਿ, ਖਦਿਰਵਨਂ ਸਾਲਵਨਨ੍ਤਿ ਨਾਮਮੇਵ ਲਭਨ੍ਤਿ. ਯਦਾ ਪਨ ਤਤੋ ਰੁਕ੍ਖਾ ਤਿਣ੍ਹਾਯ ਕੁਠਾਰਿਯਾ ਛਿਨ੍ਦਿਤ੍ਵਾ ਥਮ੍ਭਾਦਿਸਣ੍ਠਾਨੇਨ ਤਚ੍ਛਿਤਾ ਹੋਨ੍ਤਿ, ਤਦਾ ਥਮ੍ਭੋ ਤੁਲਾਸਙ੍ਘਾਟੋਤਿ ਨਾਮਂ ਲਭਨ੍ਤਿ. ਏਵਮੇਵਂ ਅਪਰਿਚ੍ਛਿਨ੍ਨਭਵੋ ਬਹਲਕਿਲੇਸੋ ਪੁਥੁਜ੍ਜਨੋ ਏਤਂ ਨਾਮਂ ਨ ਲਭਤਿ, ਭਵਂ ਪਰਿਚ੍ਛਿਨ੍ਦਿਤ੍ਵਾ ਕਿਲੇਸੇ ਤਨੁਕੇ ਕਤ੍ਵਾ ਠਿਤਾ ਸੋਤਾਪਨ੍ਨਾਦਯੋਵ ਲਭਨ੍ਤਿ.

ਇਮਸ੍ਸ ਚ ਪਨਤ੍ਥਸ੍ਸ ਵਿਭਾਵਨਤ੍ਥਂ ਇਦਂ ਵਚ੍ਛਕਸਾਲੋਪਮਂ ਵੇਦਿਤਬ੍ਬਂ. ਵਚ੍ਛਕਸਾਲਂ ਹਿ ਕਤ੍ਵਾ ਅਨ੍ਤੋ ਖਾਣੁਕੇ ਕੋਟ੍ਟੇਤ੍ਵਾ ਵਚ੍ਛਕੇ ਯੋਤ੍ਤੇਹਿ ਬਨ੍ਧਿਤ੍ਵਾ ਤੇਸੁ ਉਪਨਿਬਨ੍ਧਨ੍ਤਿ, ਯੋਤ੍ਤੇਸੁ ਅਪ੍ਪਹੋਨ੍ਤੇਸੁ ਕਣ੍ਣੇਸੁਪਿ ਗਹੇਤ੍ਵਾ ਤਤ੍ਥ ਵਚ੍ਛਕੇ ਪਵੇਸੇਨ੍ਤਿ, ਅਨ੍ਤੋਸਾਲਾਯ ਓਕਾਸੇ ਅਪ੍ਪਹੋਨ੍ਤੇ ਬਹਿ ਖਾਣੁਕੇ ਕੋਟ੍ਟੇਤ੍ਵਾਪਿ ਏਵਮੇਵ ਕਰੋਨ੍ਤਿ. ਤਤ੍ਥ ਕੋਚਿ ਅਨ੍ਤੋਬਦ੍ਧੋ ਵਚ੍ਛਕੋ ਬਹਿਨਿਪਨ੍ਨੋ ਹੋਤਿ, ਕੋਚਿ ਬਹਿਬਦ੍ਧੋ ਅਨ੍ਤੋਨਿਪਨ੍ਨੋ, ਕੋਚਿ ਅਨ੍ਤੋਬਦ੍ਧੋ ਅਨ੍ਤੋਵ ਨਿਪਨ੍ਨੋ, ਕੋਚਿ ਬਹਿਬਦ੍ਧੋ ਬਹਿਯੇਵ ਨਿਪਨ੍ਨੋ. ਕੋਚਿ ਅਨ੍ਤੋਪਿ ਅਬਦ੍ਧੋਵ ਚਰਤਿ, ਬਹਿਪਿ ਅਬਦ੍ਧੋਵ. ਤਤ੍ਥ ਅਨ੍ਤੋਬਦ੍ਧਸ੍ਸ ਬਹਿਨਿਪਨ੍ਨਸ੍ਸ ਬਨ੍ਧਨਂ ਦੀਘਂ ਹੋਤਿ. ਸੋ ਹਿ ਉਣ੍ਹਾਦਿਪੀਲ਼ਿਤੋ ਨਿਕ੍ਖਮਿਤ੍ਵਾ ਬਹਿ ਵਚ੍ਛਕਾਨਂ ਅਬ੍ਭਨ੍ਤਰੇ ਨਿਪਜ੍ਜਤਿ. ਬਹਿਬਦ੍ਧੇ ਅਨ੍ਤੋਨਿਪਨ੍ਨੇਪਿ ਏਸੇਵ ਨਯੋ. ਯੋ ਪਨ ਅਨ੍ਤੋਬਦ੍ਧੋ ਅਨ੍ਤੋਨਿਪਨ੍ਨੋ, ਤਸ੍ਸ ਬਨ੍ਧਨਂ ਰਸ੍ਸਂ ਹੋਤਿ. ਬਹਿਬਦ੍ਧੇ ਬਹਿਨਿਪਨ੍ਨੇਪਿ ਏਸੇਵ ਨਯੋ. ਉਭੋਪਿ ਹਿ ਤੇ ਦਿਵਸਮ੍ਪਿ ਖਾਣੁਕਂ ਅਨੁਪਰਿਗਨ੍ਤ੍ਵਾ ਤਤ੍ਥੇਵ ਸਯਨ੍ਤਿ. ਯੋ ਪਨ ਅਨ੍ਤੋ ਅਬਦ੍ਧੋ ਤਤ੍ਥੇਵ ਵਚ੍ਛਕਾਨਂ ਅਨ੍ਤਰੇ ਵਿਚਰਤਿ. ਅਯਂ ਸੀਲਵਾ ਵਚ੍ਛਕੋ ਕਣ੍ਣੇ ਗਹੇਤ੍ਵਾ ਵਚ੍ਛਕਾਨਂ ਅਨ੍ਤਰੇ ਵਿਸ੍ਸਟ੍ਠੋ ਦਿਵਸਮ੍ਪਿ ਅਞ੍ਞਤ੍ਥ ਅਗਨ੍ਤ੍ਵਾ ਤਤ੍ਥੇਵ ਚਰਤਿ. ਬਹਿ ਅਬਦ੍ਧੇ ਤਤ੍ਥੇਵ ਵਿਚਰਨ੍ਤੇਪਿ ਏਸੇਵ ਨਯੋ.

ਤਤ੍ਥ ਵਚ੍ਛਕਸਾਲਾ ਵਿਯ ਤਯੋ ਭਵਾ ਵੇਦਿਤਬ੍ਬਾ. ਵਚ੍ਛਕਸਾਲਾਯਂ ਖਾਣੁਕਾ ਵਿਯ ਅਵਿਜ੍ਜਾਖਾਣੁਕੋ. ਵਚ੍ਛਕਬਨ੍ਧਨਯੋਤ੍ਤਂ ਵਿਯ ਦਸ ਸਂਯੋਜਨਾਨਿ. ਵਚ੍ਛਕਾ ਵਿਯ ਤੀਸੁ ਭਵੇਸੁ ਨਿਬ੍ਬਤ੍ਤਸਤ੍ਤਾ. ਅਨ੍ਤੋਬਦ੍ਧੋ ਬਹਿਸਯਿਤਵਚ੍ਛਕੋ ਵਿਯ ਰੂਪਾਰੂਪਭਵੇਸੁ ਸੋਤਾਪਨ੍ਨਸਕਦਾਗਾਮਿਨੋ. ਤੇ ਹਿ ਕਿਞ੍ਚਾਪਿ ਤਤ੍ਥੇਵ ਵਸਨ੍ਤਿ, ਸਂਯੋਜਨਂ ਪਨ ਤੇਸਂ ਕਾਮਾਵਚਰੂਪਨਿਬਦ੍ਧਮੇਵ. ਕੇਨਟ੍ਠੇਨ? ਅਪ੍ਪਹੀਨਟ੍ਠੇਨ. ਰੂਪਾਰੂਪਭਵੇਸੁ ਪੁਥੁਜ੍ਜਨੋਪਿ ਏਤੇਹੇਵ ਸਙ੍ਗਹਿਤੋ. ਸੋਪਿ ਹਿ ਕਿਞ੍ਚਾਪਿ ਤਤ੍ਥ ਵਸਤਿ, ਸਂਯੋਜਨਂ ਪਨਸ੍ਸ ਕਾਮਾਵਚਰੂਪਨਿਬਦ੍ਧਮੇਵ. ਬਹਿਬਦ੍ਧੋ ਅਨ੍ਤੋਸਯਿਤਵਚ੍ਛਕੋ ਵਿਯ ਕਾਮਾਵਚਰੇ ਅਨਾਗਾਮੀ. ਸੋ ਹਿ ਕਿਞ੍ਚਾਪਿ ਕਾਮਾਵਚਰੇ ਵਸਤਿ, ਸਂਯੋਜਨਂ ਪਨਸ੍ਸ ਰੂਪਾਰੂਪਭਵੂਪਨਿਬਦ੍ਧਮੇਵ. ਅਨ੍ਤੋਬਦ੍ਧੋ ਅਨ੍ਤੋਨਿਪਨ੍ਨੋ ਵਿਯ ਕਾਮਾਵਚਰੇ ਸੋਤਾਪਨ੍ਨਸਕਦਾਗਾਮਿਨੋ. ਤੇ ਹਿ ਸਯਮ੍ਪਿ ਕਾਮਾਵਚਰੇ ਵਸਨ੍ਤਿ, ਸਂਯੋਜਨਮ੍ਪਿ ਤੇਸਂ ਕਾਮਾਵਚਰੂਪਨਿਬਦ੍ਧਮੇਵ. ਬਹਿਬਦ੍ਧੋ ਬਹਿਨਿਪਨ੍ਨੋ ਵਿਯ ਰੂਪਾਰੂਪਭਵੇਸੁ ਅਨਾਗਾਮੀ. ਸੋ ਹਿ ਸਯਮ੍ਪਿ ਤਤ੍ਥ ਵਸਤਿ, ਸਂਯੋਜਨਮ੍ਪਿਸ੍ਸ ਰੂਪਾਰੂਪਭਵੂਪਨਿਬਦ੍ਧਮੇਵ. ਅਨ੍ਤੋਅਬਦ੍ਧੋ ਅਨ੍ਤੋਵਿਚਰਣਵਚ੍ਛਕੋ ਵਿਯ ਕਾਮਾਵਚਰੇ ਖੀਣਾਸਵੋ. ਬਹਿਅਬਦ੍ਧੋ ਬਹਿਵਿਚਰਣਵਚ੍ਛਕੋ ਵਿਯ ਰੂਪਾਰੂਪਭਵੇ ਖੀਣਾਸਵੋ. ਸਂਯੋਜਨੇਸੁ ਪਨ ਸਕ੍ਕਾਯਦਿਟ੍ਠਿ ਵਿਚਿਕਿਚ੍ਛਾ ਸੀਲਬ੍ਬਤਪਰਾਮਾਸੋਤਿ ਇਮਾਨਿ ਤੀਣਿ ਗਚ੍ਛਨ੍ਤਂ ਨਿਵਾਰੇਨ੍ਤਿ, ਗਤਂ ਪਟਿਆਨੇਨ੍ਤਿ. ਕਾਮਚ੍ਛਨ੍ਦੋ ਬ੍ਯਾਪਾਦੋਤਿ ਇਮਾਨਿ ਪਨ ਦ੍ਵੇ ਸਂਯੋਜਨਾਨਿ ਸਮਾਪਤ੍ਤਿਯਾ ਵਾ ਅਵਿਕ੍ਖਮ੍ਭੇਤ੍ਵਾ ਮਗ੍ਗੇਨ ਵਾ ਅਸਮੁਚ੍ਛਿਨ੍ਦਿਤ੍ਵਾ ਰੂਪਾਰੂਪਭਵੇ ਨਿਬ੍ਬਤ੍ਤਿਤੁਂ ਨ ਸਕ੍ਕੋਤਿ.

ਕਤਮੋ ਚਾਵੁਸੋਤਿ ਇਦਂ ਥੇਰੋ ਯਥਾ ਨਾਮ ਪੁਰਿਸੋ ਦ੍ਵੇ ਰਤਨਪੇਲ਼ਾ ਪਸ੍ਸੇ ਠਪੇਤ੍ਵਾ ਸਮ੍ਪਤ੍ਤਪਰਿਸਾਯ ਦ੍ਵੇ ਹਤ੍ਥੇ ਪੂਰੇਤ੍ਵਾ ਸਤ੍ਤਵਿਧਂ ਰਤਨਂ ਭਾਜੇਤ੍ਵਾ ਦਦੇਯ੍ਯ, ਏਵਂ ਪਠਮਂ ਰਤਨਪੇਲ਼ਂ ਦਤ੍ਵਾ ਦੁਤਿਯਮ੍ਪਿ ਤਥੇਵ ਦਦੇਯ੍ਯ. ਏਵਮੇਵਂ ‘‘ਅਜ੍ਝਤ੍ਤਸਂਯੋਜਨਞ੍ਚ, ਆਵੁਸੋ, ਪੁਗ੍ਗਲਂ ਦੇਸੇਸ੍ਸਾਮਿ ਬਹਿਦ੍ਧਾਸਂਯੋਜਨਞ੍ਚਾ’’ਤਿ ਇਮਾਨਿ ਦ੍ਵੇ ਪਦਾਨਿ ਮਾਤਿਕਾਵਸੇਨ ਠਪੇਤ੍ਵਾ ਇਦਾਨਿ ਅਟ੍ਠਵਿਧਾਯ ਪਰਿਸਾਯ ਭਾਜੇਤ੍ਵਾ ਦਸ੍ਸੇਤੁਂ ਵਿਤ੍ਥਾਰਕਥਂ ਆਰਭਿ.

ਤਤ੍ਥ ਇਧਾਤਿ ਇਮਸ੍ਮਿਂ ਸਾਸਨੇ. ਸੀਲਵਾ ਹੋਤੀਤਿ ਚਤੁਪਾਰਿਸੁਦ੍ਧਿਸੀਲੇਹਿ ਸੀਲਸਮ੍ਪਨ੍ਨੋ ਹੋਤਿ. ਇਤਿ ਥੇਰੋ ਏਤ੍ਤਾਵਤਾ ਚ ਕਿਰ ਚਤੁਪਾਰਿਸੁਦ੍ਧਿਸੀਲਂ ਉਦ੍ਦਿਸਿਤ੍ਵਾ ‘‘ਪਾਤਿਮੋਕ੍ਖਸਂਵਰਸਂਵੁਤੋ’’ਤਿ ਇਮਿਨਾ ਤਤ੍ਥ ਜੇਟ੍ਠਕਸੀਲਂ ਵਿਤ੍ਥਾਰੇਤ੍ਵਾ ਦਸ੍ਸੇਸੀਤਿ ਦੀਪਵਿਹਾਰਵਾਸੀ ਸੁਮ੍ਮਤ੍ਥੇਰੋ ਆਹ. ਅਨ੍ਤੇਵਾਸਿਕੋ ਪਨਸ੍ਸ ਤਿਪਿਟਕਚੂਲ਼ਨਾਗਤ੍ਥੇਰੋ ਆਹ – ‘‘ਉਭਯਤ੍ਥਾਪਿ ਪਾਤਿਮੋਕ੍ਖਸਂਵਰੋਵ ਵੁਤ੍ਤੋ. ਪਾਤਿਮੋਕ੍ਖਸਂਵਰੋਯੇਵ ਹਿ ਸੀਲਂ, ਇਤਰਾਨਿ ਪਨ ਤੀਣਿ ਸੀਲਨ੍ਤਿ ਵੁਤ੍ਤਟ੍ਠਾਨਂ ਨਾਮ ਅਤ੍ਥੀ’’ਤਿ ਅਨਨੁਜਾਨਨ੍ਤੋ ਉਤ੍ਤਰਿ ਆਹ – ਇਨ੍ਦ੍ਰਿਯਸਂਵਰੋ ਨਾਮ ਛਦ੍ਵਾਰਰਕ੍ਖਾਮਤ੍ਤਕਮੇਵ, ਆਜੀਵਪਾਰਿਸੁਦ੍ਧਿ ਧਮ੍ਮੇਨ ਸਮੇਨ ਪਚ੍ਚਯੁਪ੍ਪਤ੍ਤਿਮਤ੍ਤਕਂ, ਪਚ੍ਚਯਸਨ੍ਨਿਸ੍ਸਿਤਂ ਪਟਿਲਦ੍ਧਪਚ੍ਚਯੇ ‘‘ਇਦਮਤ੍ਥ’’ਨ੍ਤਿ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਨਮਤ੍ਤਕਂ, ਨਿਪ੍ਪਰਿਯਾਯੇਨ ਪਨ ਪਾਤਿਮੋਕ੍ਖਸਂਵਰੋਵ ਸੀਲਂ. ਯਸ੍ਸ ਸੋ ਭਿਨ੍ਨੋ, ਅਯਂ ਛਿਨ੍ਨਸੀਸੋ ਵਿਯ ਪੁਰਿਸੋ ਹਤ੍ਥਪਾਦੇ ਸੇਸਾਨਿ ਰਕ੍ਖਿਸ੍ਸਤੀਤਿ ਨ ਵਤ੍ਤਬ੍ਬੋ. ਯਸ੍ਸ ਪਨ ਸੋ ਅਰੋਗੋ, ਅਯਂ ਅਚ੍ਛਿਨ੍ਨਸੀਸੋ ਵਿਯ ਪੁਰਿਸੋ ਜੀਵਿਤਂ ਸੇਸਾਨਿ ਪੁਨ ਪਾਕਤਿਕਾਨਿ ਕਤ੍ਵਾ ਰਕ੍ਖਿਤੁਂ ਸਕ੍ਕੋਤਿ. ਤਸ੍ਮਾ ਸੀਲਵਾਤਿ ਇਮਿਨਾ ਪਾਤਿਮੋਕ੍ਖਸਂਵਰਂ ਉਦ੍ਦਿਸਿਤ੍ਵਾ ਤਂ ਵਿਤ੍ਥਾਰੇਨ੍ਤੋ ‘‘ਪਾਤਿਮੋਕ੍ਖਸਂਵਰਸਂਵੁਤੋ’’ਤਿਆਦਿਮਾਹਾਤਿ.

ਤਤ੍ਥ ਪਾਤਿਮੋਕ੍ਖਸਂਵਰਸਂਵੁਤੋਤਿ ਪਾਤਿਮੋਕ੍ਖਸਂਵਰੇਨ ਸਮਨ੍ਨਾਗਤੋ. ਆਚਾਰਗੋਚਰਸਮ੍ਪਨ੍ਨੋਤਿ ਆਚਾਰੇਨ ਚ ਗੋਚਰੇਨ ਚ ਸਮ੍ਪਨ੍ਨੋ. ਅਣੁਮਤ੍ਤੇਸੂਤਿ ਅਪ੍ਪਮਤ੍ਤਕੇਸੁ. ਵਜ੍ਜੇਸੂਤਿ ਅਕੁਸਲਧਮ੍ਮੇਸੁ. ਭਯਦਸ੍ਸਾਵੀਤਿ ਭਯਦਸ੍ਸੀ. ਸਮਾਦਾਯਾਤਿ ਸਮ੍ਮਾ ਆਦਿਯਿਤ੍ਵਾ. ਸਿਕ੍ਖਤਿ ਸਿਕ੍ਖਾਪਦੇਸੂਤਿ ਤਂ ਤਂ ਸਿਕ੍ਖਾਪਦਂ ਸਮਾਦਿਯਿਤ੍ਵਾ ਸਿਕ੍ਖਤਿ. ਅਪਿਚ ਸਮਾਦਾਯ ਸਿਕ੍ਖਤਿ ਸਿਕ੍ਖਾਪਦੇਸੂਤਿ ਯਂਕਿਞ੍ਚਿ ਸਿਕ੍ਖਾਪਦੇਸੁ ਸਿਕ੍ਖਾਕੋਟ੍ਠਾਸੇਸੁ ਸਿਕ੍ਖਿਤਬ੍ਬਂ ਕਾਯਿਕਂ ਵਾ ਵਾਚਸਿਕਂ ਵਾ, ਤਂ ਸਬ੍ਬਂ ਸਮ੍ਮਾ ਆਦਾਯ ਸਿਕ੍ਖਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨ ਸਬ੍ਬਾਨੇਤਾਨਿ ਪਾਤਿਮੋਕ੍ਖਸਂਵਰਾਦੀਨਿ ਪਦਾਨਿ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੪ ਆਦਯੋ) ਵੁਤ੍ਤਾਨਿ, ਚਤੁਪਾਰਿਸੁਦ੍ਧਿਸੀਲਞ੍ਚ ਸਬ੍ਬਾਕਾਰੇਨ ਵਿਭਜਿਤ੍ਵਾ ਦਸ੍ਸਿਤਂ. ਅਞ੍ਞਤਰਂ ਦੇਵਨਿਕਾਯਨ੍ਤਿ ਛਸੁ ਕਾਮਾਵਚਰਦੇਵਘਟਾਸੁ ਅਞ੍ਞਤਰਂ ਦੇਵਘਟਂ. ਆਗਾਮੀ ਹੋਤੀਤਿ ਹੇਟ੍ਠਾ ਆਗਾਮੀ ਹੋਤਿ. ਆਗਨ੍ਤਾ ਇਤ੍ਥਤ੍ਤਨ੍ਤਿ ਇਤ੍ਥਤ੍ਤਂ ਮਾਨੁਸਕਪਞ੍ਚਕ੍ਖਨ੍ਧਭਾਵਮੇਵ ਆਗਨ੍ਤਾ ਹੋਤਿ. ਤਤ੍ਰੂਪਪਤ੍ਤਿਕੋ ਵਾ ਉਪਰੂਪਪਤ੍ਤਿਕੋ ਵਾ ਨ ਹੋਤਿ, ਪੁਨ ਹੇਟ੍ਠਾਗਾਮੀਯੇਵ ਹੋਤੀਤਿ ਦਸ੍ਸੇਤਿ. ਇਮਿਨਾ ਅਙ੍ਗੇਨ ਸੁਕ੍ਖਵਿਪਸ੍ਸਕਸ੍ਸ ਧਾਤੁਕਮ੍ਮਟ੍ਠਾਨਿਕਭਿਕ੍ਖੁਨੋ ਹੇਟ੍ਠਿਮਂ ਮਗ੍ਗਦ੍ਵਯਞ੍ਚੇਵ ਫਲਦ੍ਵਯਞ੍ਚ ਕਥਿਤਂ.

ਅਞ੍ਞਤਰਂ ਸਨ੍ਤਂ ਚੇਤੋਵਿਮੁਤ੍ਤਿਨ੍ਤਿ ਅਟ੍ਠਸੁ ਸਮਾਪਤ੍ਤੀਸੁ ਅਞ੍ਞਤਰਂ ਚਤੁਤ੍ਥਜ੍ਝਾਨਸਮਾਪਤ੍ਤਿਂ. ਸਾ ਹਿ ਪਚ੍ਚਨੀਕਕਿਲੇਸਾਨਂ ਸਨ੍ਤਤ੍ਤਾ ਸਨ੍ਤਾ, ਤੇਹੇਵ ਚ ਕਿਲੇਸੇਹਿ ਚੇਤਸੋ ਵਿਮੁਤ੍ਤਤ੍ਤਾ ਚੇਤੋਵਿਮੁਤ੍ਤੀਤਿ ਵੁਚ੍ਚਤਿ. ਅਞ੍ਞਤਰਂ ਦੇਵਨਿਕਾਯਨ੍ਤਿ ਪਞ੍ਚਸੁ ਸੁਦ੍ਧਾਵਾਸਦੇਵਨਿਕਾਯੇਸੁ ਅਞ੍ਞਤਰਂ. ਅਨਾਗਨ੍ਤਾ ਇਤ੍ਥਤ੍ਤਨ੍ਤਿ ਪੁਨ ਇਮਂ ਪਞ੍ਚਕ੍ਖਨ੍ਧਭਾਵਂ ਅਨਾਗਨ੍ਤਾ, ਹੇਟ੍ਠੂਪਪਤ੍ਤਿਕੋ ਨ ਹੋਤਿ, ਉਪਰੂਪਪਤ੍ਤਿਕੋ ਵਾ ਹੋਤਿ ਤਤ੍ਥੇਵ ਵਾ ਪਰਿਨਿਬ੍ਬਾਯੀਤਿ ਦਸ੍ਸੇਤਿ. ਇਮਿਨਾ ਅਙ੍ਗੇਨ ਸਮਾਧਿਕਮ੍ਮਿਕਸ੍ਸ ਭਿਕ੍ਖੁਨੋ ਤਯੋ ਮਗ੍ਗਾ ਤੀਣਿ ਚ ਫਲਾਨਿ ਕਥਿਤਾਨਿ.

ਕਾਮਾਨਂਯੇਵ ਨਿਬ੍ਬਿਦਾਯਾਤਿ ਦੁਵਿਧਾਨਮ੍ਪਿ ਕਾਮਾਨਂ ਨਿਬ੍ਬਿਨ੍ਦਨਤ੍ਥਾਯ ਉਕ੍ਕਣ੍ਠਨਤ੍ਥਾਯ. ਵਿਰਾਗਾਯਾਤਿ ਵਿਰਜ੍ਜਨਤ੍ਥਾਯ. ਨਿਰੋਧਾਯਾਤਿ ਅਪ੍ਪਵਤ੍ਤਿਕਰਣਤ੍ਥਾਯ. ਪਟਿਪਨ੍ਨੋ ਹੋਤੀਤਿ ਪਟਿਪਤ੍ਤਿਂ ਪਟਿਪਨ੍ਨੋ ਹੋਤਿ. ਏਤ੍ਤਾਵਤਾ ਸੋਤਾਪਨ੍ਨਸ੍ਸ ਚ ਸਕਦਾਗਾਮਿਨੋ ਚ ਪਞ੍ਚਕਾਮਗੁਣਿਕਰਾਗਕ੍ਖਯਤ੍ਥਾਯ ਅਨਾਗਾਮਿਮਗ੍ਗਵਿਪਸ੍ਸਨਾ ਕਥਿਤਾ ਹੋਤਿ. ਭਵਾਨਂਯੇਵਾਤਿ ਤਿਣ੍ਣਂ ਭਵਾਨਂ. ਇਮਿਨਾ ਅਨਾਗਾਮਿਨੋ ਭਵਰਾਗਕ੍ਖਯਤ੍ਥਾਯ ਅਰਹਤ੍ਤਮਗ੍ਗਵਿਪਸ੍ਸਨਾ ਕਥਿਤਾ ਹੋਤਿ. ਤਣ੍ਹਾਕ੍ਖਯਾਯ ਪਟਿਪਨ੍ਨੋ ਹੋਤੀਤਿ ਇਮਿਨਾਪਿ ਸੋਤਾਪਨ੍ਨਸਕਦਾਗਾਮੀਨਂਯੇਵ ਪਞ੍ਚਕਾਮਗੁਣਿਕਤਣ੍ਹਾਕ੍ਖਯਕਰਣਤ੍ਥਂ ਅਨਾਗਾਮਿਮਗ੍ਗਵਿਪਸ੍ਸਨਾ ਕਥਿਤਾ. ਸੋ ਲੋਭਕ੍ਖਯਾਯਾਤਿ ਇਮਿਨਾਪਿ ਅਨਾਗਾਮਿਨੋ ਭਵਲੋਭਕ੍ਖਯਤ੍ਥਾਯ ਅਰਹਤ੍ਤਮਗ੍ਗਵਿਪਸ੍ਸਨਾਵ ਕਥਿਤਾ. ਅਞ੍ਞਤਰਂ ਦੇਵਨਿਕਾਯਨ੍ਤਿ ਸੁਦ੍ਧਾਵਾਸੇਸ੍ਵੇਵ ਅਞ੍ਞਤਰਂ ਦੇਵਨਿਕਾਯਂ. ਅਨਾਗਨ੍ਤਾ ਇਤ੍ਥਤ੍ਤਨ੍ਤਿ ਇਮਂ ਖਨ੍ਧਪਞ੍ਚਕਭਾਵਂ ਅਨਾਗਨ੍ਤਾ, ਹੇਟ੍ਠੂਪਪਤ੍ਤਿਕੋ ਨ ਹੋਤਿ, ਉਪਰੂਪਪਤ੍ਤਿਕੋ ਵਾ ਹੋਤਿ, ਤਤ੍ਥੇਵ ਵਾ ਪਰਿਨਿਬ੍ਬਾਯਤਿ.

ਇਤਿ ਪਠਮੇਨ ਅਙ੍ਗੇਨ ਸੁਕ੍ਖਵਿਪਸ੍ਸਕਸ੍ਸ ਧਾਤੁਕਮ੍ਮਟ੍ਠਾਨਿਕਭਿਕ੍ਖੁਨੋ ਹੇਟ੍ਠਿਮਾਨਿ ਦ੍ਵੇ ਮਗ੍ਗਫਲਾਨਿ ਕਥਿਤਾਨਿ, ਦੁਤਿਯੇਨ ਸਮਾਧਿਕਮ੍ਮਿਕਸ੍ਸ ਤੀਣਿ ਮਗ੍ਗਫਲਾਨਿ, ‘‘ਸੋ ਕਾਮਾਨ’’ਨ੍ਤਿ ਇਮਿਨਾ ਸੋਤਾਪਨ੍ਨਸਕਦਾਗਾਮੀਨਂ ਪਞ੍ਚਕਾਮਗੁਣਿਕਰਾਗਕ੍ਖਯਾਯ ਉਪਰਿ ਅਨਾਗਾਮਿਮਗ੍ਗਵਿਪਸ੍ਸਨਾ, ‘‘ਸੋ ਭਵਾਨਂਯੇਵਾ’’ਤਿ ਇਮਿਨਾ ਅਨਾਗਾਮਿਸ੍ਸ ਉਪਰਿ ਅਰਹਤ੍ਤਮਗ੍ਗਵਿਪਸ੍ਸਨਾ, ‘‘ਸੋ ਤਣ੍ਹਾਕ੍ਖਯਾਯਾ’’ਤਿ ਇਮਿਨਾ ਸੋਤਾਪਨ੍ਨਸਕਦਾਗਾਮੀਨਂ ਪਞ੍ਚਕਾਮਗੁਣਿਕਤਣ੍ਹਾਕ੍ਖਯਾਯ ਉਪਰਿ ਅਨਾਗਾਮਿਮਗ੍ਗਵਿਪਸ੍ਸਨਾ, ‘‘ਸੋ ਲੋਭਕ੍ਖਯਾਯਾ’’ਤਿ ਇਮਿਨਾ ਅਨਾਗਾਮਿਨੋ ਭਵਲੋਭਕ੍ਖਯਾਯ ਉਪਰਿ ਅਰਹਤ੍ਤਮਗ੍ਗਵਿਪਸ੍ਸਨਾ ਕਥਿਤਾਤਿ ਏਵਂ ਛਹਿ ਮੁਖੇਹਿ ਵਿਪਸ੍ਸਨਂ ਕਥੇਤ੍ਵਾ ਦੇਸਨਂ ਯਥਾਨੁਸਨ੍ਧਿਂ ਪਾਪੇਸਿ. ਦੇਸਨਾਪਰਿਯੋਸਾਨੇ ਕੋਟਿਸਤਸਹਸ੍ਸਦੇਵਤਾ ਅਰਹਤ੍ਤਂ ਪਾਪੁਣਿਂਸੁ, ਸੋਤਾਪਨ੍ਨਾਦੀਨਂ ਪਰਿਚ੍ਛੇਦੋਵ ਨਾਹੋਸਿ. ਯਥਾ ਚ ਇਮਸ੍ਮਿਂ ਸਮਾਗਮੇ, ਏਵਂ ਮਹਾਸਮਯਸੁਤ੍ਤੇ ਮਙ੍ਗਲਸੁਤ੍ਤੇ ਚ ਚੂਲ਼ਰਾਹੁਲੋਵਾਦਸੁਤ੍ਤੇ ਚ ਕੋਟਿਸਤਸਹਸ੍ਸਦੇਵਤਾ ਅਰਹਤ੍ਤਂ ਪਾਪੁਣਿਂਸੁ, ਸੋਤਾਪਨ੍ਨਾਦੀਨਂ ਦੇਵਮਨੁਸ੍ਸਾਨਂ ਪਰਿਚ੍ਛੇਦੋ ਨਾਹੋਸਿ.

ਸਮਚਿਤ੍ਤਾ ਦੇਵਤਾਤਿ ਚਿਤ੍ਤਸ੍ਸ ਸੁਖੁਮਭਾਵਸਮਤਾਯ ਸਮਚਿਤ੍ਤਾ. ਸਬ੍ਬਾਪਿ ਹਿ ਤਾ ਅਤ੍ਤਨੋ ਅਤ੍ਤਭਾਵੇ ਸੁਖੁਮੇ ਚਿਤ੍ਤਸਰਿਕ੍ਖਕੇ ਕਤ੍ਵਾ ਮਾਪੇਸੁਂ. ਤੇਨ ਸਮਚਿਤ੍ਤਾ ਨਾਮ ਜਾਤਾ. ਅਪਰੇਨਪਿ ਕਾਰਣੇਨ ਸਮਚਿਤ੍ਤਾ – ‘‘ਥੇਰੇਨ ਸਮਾਪਤ੍ਤਿ ਤਾਵ ਕਥਿਤਾ, ਸਮਾਪਤ੍ਤਿਥਾਮੋ ਪਨ ਨ ਕਥਿਤੋ. ਮਯਂ ਦਸਬਲਂ ਪਕ੍ਕੋਸਿਤ੍ਵਾ ਸਮਾਪਤ੍ਤਿਯਾ ਥਾਮਂ ਕਥਾਪੇਸ੍ਸਾਮਾ’’ਤਿ ਸਬ੍ਬਾਪਿ ਏਕਚਿਤ੍ਤਾ ਅਹੇਸੁਨ੍ਤਿਪਿ ਸਮਚਿਤ੍ਤਾ. ਅਪਰਮ੍ਪਿ ਕਾਰਣਂ – ‘‘ਥੇਰੇਨ ਏਕੇਨ ਪਰਿਯਾਯੇਨ ਸਮਾਪਤ੍ਤਿਪਿ ਸਮਾਪਤ੍ਤਿਥਾਮੋਪਿ ਕਥਿਤੋ, ਕੋ ਨੁ ਖੋ ਇਮਂ ਸਮਾਗਮਂ ਸਮ੍ਪਤ੍ਤੋ, ਕੋ ਨ ਸਮ੍ਪਤ੍ਤੋ’’ਤਿ ਓਲੋਕਯਮਾਨਾ ਤਥਾਗਤਸ੍ਸ ਅਸਮ੍ਪਤ੍ਤਭਾਵਂ ਦਿਸ੍ਵਾ ‘‘ਮਯਂ ਤਥਾਗਤਂ ਪਕ੍ਕੋਸਿਤ੍ਵਾ ਪਰਿਸਂ ਪਰਿਪੁਣ੍ਣਂ ਕਰਿਸ੍ਸਾਮਾ’’ਤਿ ਸਬ੍ਬਾਪਿ ਏਕਚਿਤ੍ਤਾ ਅਹੇਸੁਨ੍ਤਿਪਿ ਸਮਚਿਤ੍ਤਾ. ਅਪਰਮ੍ਪਿ ਕਾਰਣਂ – ਅਨਾਗਤੇ ਕੋਚਿਦੇਵ ਭਿਕ੍ਖੁ ਵਾ ਭਿਕ੍ਖੁਨੀ ਵਾ ਦੇਵੋ ਵਾ ਮਨੁਸ੍ਸੋ ਵਾ ‘‘ਅਯਂ ਦੇਸਨਾ ਸਾਵਕਭਾਸਿਤਾ’’ਤਿ ਅਗਾਰਵਂ ਕਰੇਯ੍ਯ, ਸਮ੍ਮਾਸਮ੍ਬੁਦ੍ਧਂ ਪਕ੍ਕੋਸਿਤ੍ਵਾ ਇਮਂ ਦੇਸਨਂ ਸਬ੍ਬਞ੍ਞੁਭਾਸਿਤਂ ਕਰਿਸ੍ਸਾਮ. ਏਵਂ ਅਨਾਗਤੇ ਗਰੁਭਾਵਨੀਯਾ ਭਵਿਸ੍ਸਤੀਤਿ ਸਬ੍ਬਾਵ ਏਕਚਿਤ੍ਤਾ ਅਹੇਸੁਨ੍ਤਿਪਿ ਸਮਚਿਤ੍ਤਾ. ਅਪਰਮ੍ਪਿ ਕਾਰਣਂ – ਸਬ੍ਬਾਪਿ ਹਿ ਤਾ ਏਕਸਮਾਪਤ੍ਤਿਲਾਭਿਨਿਯੋ ਵਾ ਅਹੇਸੁਂ ਏਕਾਰਮ੍ਮਣਲਾਭਿਨਿਯੋ ਵਾਤਿ ਏਵਮ੍ਪਿ ਸਮਚਿਤ੍ਤਾ.

ਹਟ੍ਠਾਤਿ ਤੁਟ੍ਠਪਹਟ੍ਠਾ ਆਮੋਦਿਤਾ ਪਮੋਦਿਤਾ. ਸਾਧੂਤਿ ਆਯਾਚਨਤ੍ਥੇ ਨਿਪਾਤੋ. ਅਨੁਕਮ੍ਪਂ ਉਪਾਦਾਯਾਤਿ ਨ ਥੇਰਸ੍ਸ ਅਨੁਕਮ੍ਪਂ ਕਾਰੁਞ੍ਞਂ ਅਨੁਦ੍ਦਯਂ ਪਟਿਚ੍ਚ, ਨ ਚ ਇਮਸ੍ਮਿਂ ਠਾਨੇ ਥੇਰਸ੍ਸ ਅਨੁਕਮ੍ਪਿਤਬ੍ਬਕਿਚ੍ਚਂ ਅਤ੍ਥਿ. ਯਸ੍ਮਿਂ ਹਿ ਦਿਵਸੇ ਥੇਰੋ ਸੂਕਰਖਤਲੇਣਦ੍ਵਾਰੇ ਭਾਗਿਨੇਯ੍ਯਸ੍ਸ ਦੀਘਨਖਪਰਿਬ੍ਬਾਜਕਸ੍ਸ ਵੇਦਨਾਕਮ੍ਮਟ੍ਠਾਨੇ (ਮ. ਨਿ. ੨.੨੦੬) ਕਥਿਯਮਾਨੇ ਤਾਲਵਣ੍ਟਂ ਗਹੇਤ੍ਵਾ ਸਤ੍ਥਾਰਂ ਬੀਜਮਾਨੋ ਠਿਤੋ ਪਰਸ੍ਸ ਵਡ੍ਢਿਤਭੋਜਨਂ ਭੁਞ੍ਜਿਤ੍ਵਾ ਖੁਦਂ ਵਿਨੋਦੇਨ੍ਤੋ ਵਿਯ ਪਰਸ੍ਸ ਸਜ੍ਜਿਤਪਸਾਧਨਂ ਸੀਸੇ ਪਟਿਮੁਞ੍ਚਨ੍ਤੋ ਵਿਯ ਚ ਸਾਵਕਪਾਰਮਿਞਾਣਸ੍ਸ ਨਿਪ੍ਪਦੇਸਤੋ ਮਤ੍ਥਕਂ ਪਤ੍ਤੋ, ਤਸ੍ਮਿਂਯੇਵ ਦਿਵਸੇ ਭਗਵਤਾ ਅਨੁਕਮ੍ਪਿਤੋ ਨਾਮ. ਅਵਸੇਸਾਨਂ ਪਨ ਤਂ ਠਾਨਂ ਸਮ੍ਪਤ੍ਤਾਨਂ ਦੇਵਮਨੁਸ੍ਸਾਨਂ ਅਨੁਕਮ੍ਪਂ ਉਪਾਦਾਯ ਗਚ੍ਛਤੁ ਭਗਵਾਤਿ ਭਗਵਨ੍ਤਂ ਯਾਚਿਂਸੁ.

ਬਲਵਾ ਪੁਰਿਸੋਤਿ ਦੁਬ੍ਬਲੋ ਹਿ ਖਿਪ੍ਪਂ ਸਮਿਞ੍ਜਨਪਸਾਰਣਂ ਕਾਤੁਂ ਨ ਸਕ੍ਕੋਤਿ, ਬਲਵਾਵ ਸਕ੍ਕੋਤਿ. ਤੇਨੇਤਂ ਵੁਤ੍ਤਂ. ਸਮ੍ਮੁਖੇ ਪਾਤੁਰਹੋਸੀਤਿ ਸਮ੍ਮੁਖਟ੍ਠਾਨੇ ਪੁਰਤੋਯੇਵ ਪਾਕਟੋ ਅਹੋਸਿ. ਭਗਵਾ ਏਤਦਵੋਚਾਤਿ ਏਤਂ ‘‘ਇਧ ਸਾਰਿਪੁਤ੍ਤਾ’’ਤਿਆਦਿਨਾ ਨਯੇਨ ਅਤ੍ਤਨੋ ਆਗਮਨਕਾਰਣਂ ਅਵੋਚ. ਏਵਂ ਕਿਰਸ੍ਸ ਅਹੋਸਿ – ‘‘ਸਚੇ ਕੋਚਿ ਬਾਲੋ ਅਕਤਞ੍ਞੂ ਭਿਕ੍ਖੁ ਵਾ ਭਿਕ੍ਖੁਨੀ ਵਾ ਉਪਾਸਕੋ ਵਾ ਉਪਾਸਿਕਾ ਵਾ ਏਵਂ ਚਿਨ੍ਤੇਯ੍ਯ – ‘ਸਾਰਿਪੁਤ੍ਤਤ੍ਥੇਰੋ ਮਹਨ੍ਤਂ ਪਰਿਸਂ ਅਲਤ੍ਥ, ਸਮ੍ਮਾਸਮ੍ਬੁਦ੍ਧੋ ਏਤ੍ਤਕਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਉਸੂਯਾਯ ਪਰਿਸਂ ਉਟ੍ਠਾਪੇਤੁਂ ਆਗਤੋ’ਤਿ. ਸੋ ਇਮਂ ਮਯਿ ਮਨੋਪਦੋਸਂ ਕਤ੍ਵਾ ਅਪਾਯੇ ਨਿਬ੍ਬਤ੍ਤੇਯ੍ਯਾ’’ਤਿ. ਅਥਤ੍ਤਨੋ ਆਗਮਨਕਾਰਣਂ ਕਥੇਨ੍ਤੋ ਏਤਂ ‘‘ਇਧ ਸਾਰਿਪੁਤ੍ਤਾ’’ਤਿਆਦਿਵਚਨਂ ਅਵੋਚ.

ਏਵਂ ਅਤ੍ਤਨੋ ਆਗਮਨਕਾਰਣਂ ਕਥੇਤ੍ਵਾ ਇਦਾਨਿ ਸਮਾਪਤ੍ਤਿਯਾ ਥਾਮਂ ਕਥੇਤੁਂ ਤਾ ਖੋ ਪਨ, ਸਾਰਿਪੁਤ੍ਤ, ਦੇਵਤਾ ਦਸਪਿ ਹੁਤ੍ਵਾਤਿਆਦਿਮਾਹ. ਤਤ੍ਥ ਯਸਵਸੇਨ ਵਾ ਅਤ੍ਥਂ ਆਹਰਿਤੁਂ ਵਟ੍ਟਤਿ ਸਮਾਪਤ੍ਤਿਵਸੇਨ ਵਾ. ਯਸਵਸੇਨ ਤਾਵ ਮਹੇਸਕ੍ਖਾ ਦੇਵਤਾ ਦਸ ਦਸ ਏਕਟ੍ਠਾਨੇ ਅਟ੍ਠਂਸੁ, ਤਾਹਿ ਅਪ੍ਪੇਸਕ੍ਖਤਰਾ ਵੀਸਤਿ ਵੀਸਤਿ ਏਕਟ੍ਠਾਨੇ ਅਟ੍ਠਂਸੁ, ਤਾਹਿ ਅਪ੍ਪੇਸਕ੍ਖਤਰਾ…ਪੇ… ਸਟ੍ਠਿ ਸਟ੍ਠਿ ਏਕਟ੍ਠਾਨੇ ਅਟ੍ਠਂਸੁ. ਸਮਾਪਤ੍ਤਿਵਸੇਨ ਪਨ ਯਾਹਿ ਪਣੀਤਾ ਸਮਾਪਤ੍ਤਿ ਭਾਵਿਤਾ, ਤਾ ਸਟ੍ਠਿ ਸਟ੍ਠਿ ਏਕਟ੍ਠਾਨੇ ਅਟ੍ਠਂਸੁ. ਯਾਹਿ ਤਤੋ ਹੀਨਤਰਾ, ਤਾ ਪਞ੍ਞਾਸ ਪਞ੍ਞਾਸ…ਪੇ… ਯਾਹਿ ਤਤੋ ਹੀਨਤਰਾ ਸਮਾਪਤ੍ਤਿ ਭਾਵਿਤਾ…ਪੇ… ਤਾ ਦਸ ਦਸ ਏਕਟ੍ਠਾਨੇ ਅਟ੍ਠਂਸੁ. ਯਾਹਿ ਵਾ ਹੀਨਾ ਭਾਵਿਤਾ, ਤਾ ਦਸ ਦਸ ਏਕਟ੍ਠਾਨੇ ਅਟ੍ਠਂਸੁ. ਯਾਹਿ ਤਤੋ ਪਣੀਤਤਰਾ ਭਾਵਿਤਾ, ਤਾ ਵੀਸਤਿ ਵੀਸਤਿ. ਯਾਹਿ ਤਤੋ ਪਣੀਤਤਰਾ…ਪੇ… ਤਾ ਸਟ੍ਠਿ ਸਟ੍ਠਿ ਏਕਟ੍ਠਾਨੇ ਅਟ੍ਠਂਸੁ.

ਆਰਗ੍ਗਕੋਟਿਨਿਤੁਦਨਮਤ੍ਤੇਤਿ ਆਰਗ੍ਗਕੋਟਿਯਾ ਪਤਨਮਤ੍ਤੇ ਓਕਾਸੇ. ਨ ਚ ਅਞ੍ਞਮਞ੍ਞਂ ਬ੍ਯਾਬਾਧੇਨ੍ਤੀਤਿ ਏਵਂ ਸਮ੍ਬਾਧੇ ਠਾਨੇ ਤਿਟ੍ਠਨ੍ਤਿਯੋਪਿ ਅਞ੍ਞਮਞ੍ਞਂ ਨ ਬ੍ਯਾਬਾਧੇਨ੍ਤਿ ਨ ਘਟ੍ਟੇਨ੍ਤਿ, ਅਸਮ੍ਪੀਲ਼ਾ ਅਸਮ੍ਬਾਧਾਵ ਅਹੇਸੁਂ. ‘‘ਤਵ ਹਤ੍ਥੋ ਮਂ ਬਾਧਤਿ, ਤਵ ਪਾਦੋ ਮਂ ਬਾਧਤਿ, ਤ੍ਵਂ ਮਂ ਮਦ੍ਦਨ੍ਤੀ ਠਿਤਾ’’ਤਿ ਵਤ੍ਤਬ੍ਬਕਾਰਣਂ ਨਾਹੋਸਿ. ਤਤ੍ਥ ਨੂਨਾਤਿ ਤਸ੍ਮਿਂ ਭਵੇ ਨੂਨ. ਤਥਾਚਿਤ੍ਤਂ ਭਾਵਿਤਨ੍ਤਿ ਤੇਨਾਕਾਰੇਨ ਚਿਤ੍ਤਂ ਭਾਵਿਤਂ. ਯੇਨ ਤਾ ਦੇਵਤਾਤਿ ਯੇਨ ਤਥਾਭਾਵਿਤੇਨ ਚਿਤ੍ਤੇਨ ਤਾ ਦੇਵਤਾ ਦਸਪਿ ਹੁਤ੍ਵਾ…ਪੇ… ਤਿਟ੍ਠਨ੍ਤਿ, ਨ ਚ ਅਞ੍ਞਮਞ੍ਞਂ ਬ੍ਯਾਬਾਧੇਨ੍ਤੀਤਿ. ਇਧੇਵ ਖੋਤਿ ਸਾਸਨੇ ਵਾ ਮਨੁਸ੍ਸਲੋਕੇ ਵਾ ਭੁਮ੍ਮਂ, ਇਮਸ੍ਮਿਂਯੇਵ ਸਾਸਨੇ ਇਮਸ੍ਮਿਂਯੇਵ ਮਨੁਸ੍ਸਲੋਕੇਤਿ ਅਤ੍ਥੋ. ਤਾਸਞ੍ਹਿ ਦੇਵਤਾਨਂ ਇਮਸ੍ਮਿਂਯੇਵ ਮਨੁਸ੍ਸਲੋਕੇ ਇਮਸ੍ਮਿਂਯੇਵ ਚ ਸਾਸਨੇ ਤਂ ਚਿਤ੍ਤਂ ਭਾਵਿਤਂ, ਯੇਨ ਤਾ ਸਨ੍ਤੇ ਰੂਪਭਵੇ ਨਿਬ੍ਬਤ੍ਤਾ, ਤਤੋ ਚ ਪਨ ਆਗਨ੍ਤ੍ਵਾ ਏਵਂ ਸੁਖੁਮੇ ਅਤ੍ਤਭਾਵੇ ਮਾਪੇਤ੍ਵਾ ਠਿਤਾ. ਤਤ੍ਥ ਕਿਞ੍ਚਾਪਿ ਕਸ੍ਸਪਦਸਬਲਸ੍ਸ ਸਾਸਨੇ ਤੀਣਿ ਮਗ੍ਗਫਲਾਨਿ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਦੇਵਤਾਪਿ ਅਤ੍ਥਿ, ਸਬ੍ਬਬੁਦ੍ਧਾਨਂ ਪਨ ਏਕਾਵ ਅਨੁਸਾਸਨੀ ਏਕਂ ਸਾਸਨਨ੍ਤਿ ਕਤ੍ਵਾ ‘‘ਇਧੇਵ ਖੋ, ਸਾਰਿਪੁਤ੍ਤਾ’’ਤਿ ਅਞ੍ਞਬੁਦ੍ਧਾਨਂ ਸਾਸਨਮ੍ਪਿ ਇਮਮੇਵ ਸਾਸਨਂ ਕਰੋਨ੍ਤੋ ਆਹ. ਏਤ੍ਤਾਵਤਾ ਤਥਾਗਤੇਨ ਸਮਾਪਤ੍ਤਿਯਾ ਥਾਮੋ ਕਥਿਤੋ.

ਇਦਾਨਿ ਸਾਰਿਪੁਤ੍ਤਤ੍ਥੇਰਂ ਆਰਬ੍ਭ ਤਨ੍ਤਿਵਸੇਨ ਅਨੁਸਾਸਨਿਂ ਕਥੇਨ੍ਤੋ ਤਸ੍ਮਾਤਿਹ, ਸਾਰਿਪੁਤ੍ਤਾਤਿ ਆਹ. ਤਤ੍ਥ ਤਸ੍ਮਾਤਿ ਯਸ੍ਮਾ ਤਾ ਦੇਵਤਾ ਇਧੇਵ ਸਨ੍ਤਂ ਸਮਾਪਤ੍ਤਿਂ ਨਿਬ੍ਬਤ੍ਤੇਤ੍ਵਾ ਸਨ੍ਤੇ ਭਵੇ ਨਿਬ੍ਬਤ੍ਤਾ, ਤਸ੍ਮਾ. ਸਨ੍ਤਿਨ੍ਦ੍ਰਿਯਾਤਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਸਨ੍ਤਤਾਯ ਨਿਬ੍ਬੁਤਤਾਯ ਪਣੀਤਤਾਯ ਸਨ੍ਤਿਨ੍ਦ੍ਰਿਯਾ. ਸਨ੍ਤਮਾਨਸਾਤਿ ਮਾਨਸਸ੍ਸ ਸਨ੍ਤਤਾਯ ਨਿਬ੍ਬੁਤਤਾਯ ਪਣੀਤਤਾਯ ਸਨ੍ਤਮਾਨਸਾ. ਸਨ੍ਤਂਯੇਵ ਉਪਹਾਰਂ ਉਪਹਰਿਸ੍ਸਾਮਾਤਿ ਕਾਯਚਿਤ੍ਤੂਪਹਾਰਂ ਸਨ੍ਤਂ ਨਿਬ੍ਬੁਤਂ ਪਣੀਤਂਯੇਵ ਉਪਹਰਿਸ੍ਸਾਮ. ਸਬ੍ਰਹ੍ਮਚਾਰੀਸੂਤਿ ਸਮਾਨਂ ਏਕੁਦ੍ਦੇਸਤਾਦਿਂ ਬ੍ਰਹ੍ਮਂ ਚਰਨ੍ਤੇਸੁ ਸਹਧਮ੍ਮਿਕੇਸੁ. ਏਵਞ੍ਹਿ ਵੋ, ਸਾਰਿਪੁਤ੍ਤ, ਸਿਕ੍ਖਿਤਬ੍ਬਨ੍ਤਿ ਇਮਿਨਾ ਏਤ੍ਤਕੇਨ ਵਾਰੇਨ ਭਗਵਾ ਦੇਸਨਂ ਸਬ੍ਬਞ੍ਞੁਭਾਸਿਤਂ ਅਕਾਸਿ. ਅਨਸ੍ਸੁਨ੍ਤਿ ਨਟ੍ਠਾ ਵਿਨਟ੍ਠਾ. ਯੇ ਇਮਂ ਧਮ੍ਮਪਰਿਯਾਯਂ ਨਾਸ੍ਸੋਸੁਨ੍ਤਿ ਯੇ ਅਤ੍ਤਨੋ ਪਾਪਿਕਂ ਤੁਚ੍ਛਂ ਨਿਰਤ੍ਥਕਂ ਦਿਟ੍ਠਿਂ ਨਿਸ੍ਸਾਯ ਇਮਂ ਏਵਰੂਪਂ ਧਮ੍ਮਦੇਸਨਂ ਸੋਤੁਂ ਨ ਲਭਿਂਸੂਤਿ ਯਥਾਨੁਸਨ੍ਧਿਨਾ ਦੇਸਨਂ ਨਿਟ੍ਠਾਪੇਸਿ.

੩੮. ਛਟ੍ਠੇ ਵਰਣਾਯਂ ਵਿਹਰਤੀਤਿ ਵਰਣਾ ਨਾਮ ਏਕਂ ਨਗਰਂ, ਤਂ ਉਪਨਿਸ੍ਸਾਯ ਵਿਹਰਤਿ. ਕਾਮਰਾਗਾਭਿਨਿਵੇਸਵਿਨਿਬਨ੍ਧਪਲਿਗੇਧਪਰਿਯੁਟ੍ਠਾਨਜ੍ਝੋਸਾਨਹੇਤੂਤਿ ਕਾਮਰਾਗਾਭਿਨਿਵੇਸਹੇਤੁ, ਕਾਮਰਾਗਵਿਨਿਬਨ੍ਧਹੇਤੁ, ਕਾਮਰਾਗਪਲਿਗੇਧਹੇਤੁ, ਕਾਮਰਾਗਪਰਿਯੁਟ੍ਠਾਨਹੇਤੁ, ਕਾਮਰਾਗਅਜ੍ਝੋਸਾਨਹੇਤੂਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਯ੍ਵਾਯਂ ਪਞ੍ਚ ਕਾਮਗੁਣੇ ਨਿਸ੍ਸਾਯ ਉਪ੍ਪਜ੍ਜਤਿ ਕਾਮਰਾਗੋ, ਤਸ੍ਸਾਭਿਨਿਵੇਸਾਦਿਹੇਤੁ. ਕਾਮਰਾਗੇਨ ਅਭਿਨਿਵਿਟ੍ਠਤ੍ਤਾ ਵਿਨਿਬਦ੍ਧਤ੍ਤਾ ਤਸ੍ਮਿਂਯੇਵ ਚ ਕਾਮਰਾਗੇ ਮਹਾਪਙ੍ਕੇ ਵਿਯ ਪਲਿਗੇਧਤ੍ਤਾ ਅਨੁਪਵਿਟ੍ਠਤ੍ਤਾ ਤੇਨੇਵ ਚ ਕਾਮਰਾਗੇਨ ਪਰਿਯੁਟ੍ਠਿਤਤ੍ਤਾ ਗਹਿਤਤ੍ਤਾ ਕਾਮਰਾਗੇਨੇਵ ਚ ਅਜ੍ਝੋਸਿਤਤ੍ਤਾ ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਗਹਿਤਤ੍ਤਾਤਿ. ਦਿਟ੍ਠਿਰਾਗਾਦਿਪਦੇਸੁਪਿ ਏਸੇਵ ਨਯੋ. ਦਿਟ੍ਠਿਰਾਗੋਤਿ ਪਨੇਤ੍ਥ ਦ੍ਵਾਸਟ੍ਠਿ ਦਿਟ੍ਠਿਯੋ ਨਿਸ੍ਸਾਯ ਉਪ੍ਪਜ੍ਜਨਕਰਾਗੋ ਵੇਦਿਤਬ੍ਬੋ. ਪੁਰਤ੍ਥਿਮੇਸੁ ਜਨਪਦੇਸੂਤਿ ਥੇਰਸ੍ਸ ਵਸਨਟ੍ਠਾਨਤੋ ਸਾਵਤ੍ਥਿਜਨਪਦੋ ਪੁਰਤ੍ਥਿਮਦਿਸਾਭਾਗੇ ਹੋਤਿ, ਥੇਰੋ ਚ ਨਿਸੀਦਨ੍ਤੋਪਿ ਤਤੋਮੁਖੋਵ ਨਿਸਿਨ੍ਨੋ, ਤਸ੍ਮਾ ਏਵਮਾਹ. ਉਦਾਨਂ ਉਦਾਨੇਸੀਤਿ ਉਦਾਹਾਰਂ ਉਦਾਹਰਿ. ਯਥਾ ਹਿ ਯਂ ਤੇਲਂ ਮਾਨਂ ਗਹੇਤੁਂ ਨ ਸਕ੍ਕੋਤਿ, ਵਿਸ੍ਸਨ੍ਦਿਤ੍ਵਾ ਗਚ੍ਛਤਿ, ਤਂ ਅਵਸੇਸਕੋਤਿ ਵੁਚ੍ਚਤਿ. ਯਞ੍ਚ ਜਲਂ ਤਲ਼ਾਕਂ ਗਹੇਤੁਂ ਨ ਸਕ੍ਕੋਤਿ, ਅਜ੍ਝੋਤ੍ਥਰਿਤ੍ਵਾ ਗਚ੍ਛਤਿ, ਤਂ ਓਘੋਤਿ ਵੁਚ੍ਚਤਿ, ਏਵਮੇਵਂ ਯਂ ਪੀਤਿਵਚਨਂ ਹਦਯਂ ਗਹੇਤੁਂ ਨ ਸਕ੍ਕੋਤਿ, ਅਧਿਕਂ ਹੁਤ੍ਵਾ ਅਨ੍ਤੋ ਅਸਣ੍ਠਹਿਤ੍ਵਾ ਬਹਿ ਨਿਕ੍ਖਮਤਿ, ਤਂ ਉਦਾਨਨ੍ਤਿ ਵੁਚ੍ਚਤਿ, ਏਵਰੂਪਂ ਪੀਤਿਮਯਵਚਨਂ ਨਿਚ੍ਛਾਰੇਸੀਤਿ ਅਤ੍ਥੋ.

੩੯. ਸਤ੍ਤਮੇ ਗੁਨ੍ਦਾਵਨੇਤਿ ਏਵਂ ਨਾਮਕੇ ਵਨੇ. ਉਪਸਙ੍ਕਮੀਤਿ ‘‘ਮਹਾਕਚ੍ਚਾਨਤ੍ਥੇਰੋ ਕਿਰ ਨਾਮ ਅਤ੍ਤਨੋ ਪਿਤੁਮਤ੍ਤਮ੍ਪਿ ਅਯ੍ਯਕਮਤ੍ਤਮ੍ਪਿ ਦਿਸ੍ਵਾ ਨੇਵ ਅਭਿਵਾਦੇਤਿ ਨ ਪਚ੍ਚੁਟ੍ਠੇਤਿ ਨ ਆਸਨੇਨ ਨਿਮਨ੍ਤੇਤੀ’’ਤਿ ਸੁਤ੍ਵਾ ‘‘ਨ ਸਕ੍ਕਾ ਏਤ੍ਤਕੇਨ ਨਿਟ੍ਠਂ ਗਨ੍ਤੁਂ, ਉਪਸਙ੍ਕਮਿਤ੍ਵਾ ਨਂ ਪਰਿਗ੍ਗਣ੍ਹਿਸ੍ਸਾਮੀ’’ਤਿ ਭੁਤ੍ਤਪਾਤਰਾਸੋ ਯੇਨਾਯਸ੍ਮਾ ਮਹਾਕਚ੍ਚਾਨੋ ਤੇਨੁਪਸਙ੍ਕਮਿ. ਜਿਣ੍ਣੇਤਿ ਜਰਾਜਿਣ੍ਣੇ. ਵੁਦ੍ਧੇਤਿ ਵਯੋਵੁਦ੍ਧੇ. ਮਹਲ੍ਲਕੇਤਿ ਜਾਤਿਮਹਲ੍ਲਕੇ. ਅਦ੍ਧਗਤੇਤਿ ਦੀਘਕਾਲਦ੍ਧਾਨਂ ਅਤਿਕ੍ਕਨ੍ਤੇ. ਵਯੋਅਨੁਪ੍ਪਤ੍ਤੇਤਿ ਪਚ੍ਛਿਮਵਯਂ ਅਨੁਪ੍ਪਤ੍ਤੇ. ਤਯਿਦਂ, ਭੋ ਕਚ੍ਚਾਨ, ਤਥੇਵਾਤਿ, ਭੋ ਕਚ੍ਚਾਨ, ਯਂ ਤਂ ਅਮ੍ਹੇਹਿ ਕੇਵਲਂ ਸੁਤਮੇਵ, ਤਂ ਇਮਿਨਾ ਦਿਟ੍ਠੇਨ ਸਮੇਤਿ. ਤਸ੍ਮਾ ਤਂ ਤਥੇਵ, ਨ ਅਞ੍ਞਥਾ. ਨ ਹਿ ਭਵਂ ਕਚ੍ਚਾਨੋ ਬ੍ਰਾਹ੍ਮਣੇਤਿ ਇਦਂ ਅਤ੍ਤਾਨਂ ਸਨ੍ਧਾਯ ਵਦਤਿ. ਅਯਂ ਕਿਰਸ੍ਸ ਅਧਿਪ੍ਪਾਯੋ – ਅਮ੍ਹੇ ਏਵਂ ਮਹਲ੍ਲਕੇ ਦਿਸ੍ਵਾ ਭੋਤੋ ਕਚ੍ਚਾਨਸ੍ਸ ਅਭਿਵਾਦਨਮਤ੍ਤਮ੍ਪਿ ਪਚ੍ਚੁਟ੍ਠਾਨਮਤ੍ਤਮ੍ਪਿ ਆਸਨੇਨ ਨਿਮਨ੍ਤਨਮਤ੍ਤਮ੍ਪਿ ਨਤ੍ਥੀਤਿ. ਨ ਸਮ੍ਪਨ੍ਨਮੇਵਾਤਿ ਨ ਯੁਤ੍ਤਮੇਵ ਨ ਅਨੁਚ੍ਛਵਿਕਮੇਵ.

ਥੇਰੋ ਬ੍ਰਾਹ੍ਮਣਸ੍ਸ ਵਚਨਂ ਸੁਤ੍ਵਾ ‘‘ਅਯਂ ਬ੍ਰਾਹ੍ਮਣੋ ਨੇਵ ਵੁਦ੍ਧੇ ਜਾਨਾਤਿ ਨ ਦਹਰੇ, ਆਚਿਕ੍ਖਿਸ੍ਸਾਮਿਸ੍ਸ ਵੁਦ੍ਧੇ ਚ ਦਹਰੇ ਚਾ’’ਤਿ ਦੇਸਨਂ ਵਡ੍ਢੇਨ੍ਤੋ ਅਤ੍ਥਿ ਬ੍ਰਾਹ੍ਮਣਾਤਿਆਦਿਮਾਹ. ਤਤ੍ਥ ਜਾਨਤਾਤਿ ਸਬ੍ਬਂ ਨੇਯ੍ਯਂ ਜਾਨਨ੍ਤੇਨ. ਪਸ੍ਸਤਾਤਿ ਤਦੇਵ ਹਤ੍ਥੇ ਠਪਿਤਂ ਆਮਲਕਂ ਵਿਯ ਪਸ੍ਸਨ੍ਤੇਨ. ਵੁਦ੍ਧਭੂਮੀਤਿ ਯੇਨ ਕਾਰਣੇਨ ਵੁਦ੍ਧੋ ਨਾਮ ਹੋਤਿ, ਤਂ ਕਾਰਣਂ. ਦਹਰਭੂਮੀਤਿ ਯੇਨ ਕਾਰਣੇਨ ਦਹਰੋ ਨਾਮ ਹੋਤਿ, ਤਂ ਕਾਰਣਂ. ਆਸੀਤਿਕੋਤਿ ਅਸੀਤਿਵਸ੍ਸਵਯੋ. ਨਾਵੁਤਿਕੋਤਿ ਨਵੁਤਿਵਸ੍ਸਵਯੋ. ਕਾਮੇ ਪਰਿਭੁਞ੍ਜਤੀਤਿ ਵਤ੍ਥੁਕਾਮੇ ਕਿਲੇਸਕਾਮੇਤਿ ਦੁਵਿਧੇਪਿ ਕਾਮੇ ਕਮਨਵਸੇਨ ਪਰਿਭੁਞ੍ਜਤਿ. ਕਾਮਮਜ੍ਝਾਵਸਤੀਤਿ ਦੁਵਿਧੇਪਿ ਕਾਮੇ ਘਰੇ ਘਰਸ੍ਸਾਮਿਕੋ ਵਿਯ ਵਸਤਿ ਅਧਿਵਸਤਿ. ਕਾਮਪਰਿਯੇਸਨਾਯ ਉਸ੍ਸੁਕੋਤਿ ਦੁਵਿਧਾਨਮ੍ਪਿ ਕਾਮਾਨਂ ਪਰਿਯੇਸਨਤ੍ਥਂ ਉਸ੍ਸੁਕ੍ਕਮਾਪਨ੍ਨੋ. ਬਾਲੋ ਨ ਥੇਰੋਤ੍ਵੇਵ ਸਙ੍ਖ੍ਯਂ ਗਚ੍ਛਤੀਤਿ ਸੋ ਨ ਥੇਰੋ ਬਾਲੋ ਮਨ੍ਦੋਤ੍ਵੇਵ ਗਣਨਂ ਗਚ੍ਛਤਿ. ਵੁਤ੍ਤਂ ਹੇਤਂ –

‘‘ਨ ਤੇਨ ਥੇਰੋ ਸੋ ਹੋਤਿ, ਯੇਨਸ੍ਸ ਪਲਿਤਂ ਸਿਰੋ;

ਪਰਿਪਕ੍ਕੋ ਵਯੋ ਤਸ੍ਸ, ਮੋਘਜਿਣ੍ਣੋਤਿ ਵੁਚ੍ਚਤੀ’’ਤਿ. (ਧ. ਪ. ੨੬੦);

ਦਹਰੋਤਿ ਤਰੁਣੋ. ਯੁਵਾਤਿ ਯੋਬ੍ਬਨੇਨ ਸਮਨ੍ਨਾਗਤੋ. ਸੁਸੁਕਾਲ਼ਕੇਸੋਤਿ ਸੁਟ੍ਠੁ ਕਾਲ਼ਕੇਸੋ. ਭਦ੍ਰੇਨ ਯੋਬ੍ਬਨੇਨ ਸਮਨ੍ਨਾਗਤੋਤਿ ਯੇਨ ਯੋਬ੍ਬਨੇਨ ਸਮਨ੍ਨਾਗਤੋ ਯੁਵਾ, ਤਂ ਯੋਬ੍ਬਨਂ ਭਦ੍ਰਂ ਲਦ੍ਧਕਨ੍ਤਿ ਦਸ੍ਸੇਤਿ. ਪਠਮੇਨ ਵਯਸਾਤਿ ਪਠਮਵਯੋ ਨਾਮ ਤੇਤ੍ਤਿਂਸ ਵਸ੍ਸਾਨਿ, ਤੇਨ ਸਮਨ੍ਨਾਗਤੋਤਿ ਅਤ੍ਥੋ. ਪਣ੍ਡਿਤੋ ਥੇਰੋਤ੍ਵੇਵ ਸਙ੍ਖ੍ਯਂ ਗਚ੍ਛਤੀਤਿ ਸੋ ਏਵਰੂਪੋ ਪੁਗ੍ਗਲੋ ਪਣ੍ਡਿਤੋਤਿ ਚ ਥੇਰੋਤਿ ਚ ਗਣਨਂ ਗਚ੍ਛਤਿ. ਵੁਤ੍ਤਮ੍ਪਿ ਚੇਤਂ –

‘‘ਯਮ੍ਹਿ ਸਚ੍ਚਞ੍ਚ ਧਮ੍ਮੋ ਚ, ਅਹਿਂਸਾ ਸਂਯਮੋ ਦਮੋ;

ਸ ਵੇ ਵਨ੍ਤਮਲੋ ਧੀਰੋ, ਥੇਰੋ ਇਤਿ ਪਵੁਚ੍ਚਤੀ’’ਤਿ. (ਧ. ਪ. ੨੬੧);

੪੦. ਅਟ੍ਠਮੇ ਚੋਰਾ ਬਲਵਨ੍ਤੋ ਹੋਨ੍ਤੀਤਿ ਪਕ੍ਖਸਮ੍ਪਨ੍ਨਾ, ਪਰਿਵਾਰਸਮ੍ਪਨ੍ਨਾ, ਧਨਸਮ੍ਪਨ੍ਨਾ, ਨਿਵਾਸਟ੍ਠਾਨਸਮ੍ਪਨ੍ਨਾ, ਵਾਹਨਸਮ੍ਪਨ੍ਨਾ ਚ ਹੋਨ੍ਤਿ. ਰਾਜਾਨੋ ਤਸ੍ਮਿਂ ਸਮਯੇ ਦੁਬ੍ਬਲਾ ਹੋਨ੍ਤੀਤਿ ਤਸ੍ਮਿਂ ਸਮਯੇ ਰਾਜਾਨੋ ਤਾਸਂ ਸਮ੍ਪਤ੍ਤੀਨਂ ਅਭਾਵੇਨ ਦੁਬ੍ਬਲਾ ਹੋਨ੍ਤਿ. ਅਤਿਯਾਤੁਨ੍ਤਿ ਬਹਿਦ੍ਧਾ ਜਨਪਦਚਾਰਿਕਂ ਚਰਿਤ੍ਵਾ ਇਚ੍ਛਿਤਿਚ੍ਛਿਤਕ੍ਖਣੇ ਅਨ੍ਤੋਨਗਰਂ ਪਵਿਸਿਤੁਂ. ਨਿਯ੍ਯਾਤੁਨ੍ਤਿ ‘‘ਚੋਰਾ ਜਨਪਦਂ ਵਿਲੁਮ੍ਪਨ੍ਤਿ ਮਦ੍ਦਨ੍ਤਿ, ਤੇ ਨਿਸੇਧੇਸ੍ਸਾਮਾ’’ਤਿ ਪਠਮਯਾਮੇ ਵਾ ਮਜ੍ਝਿਮਯਾਮੇ ਵਾ ਪਚ੍ਛਿਮਯਾਮੇ ਵਾ ਨਿਕ੍ਖਮਿਤੁਂ ਫਾਸੁਕਂ ਨ ਹੋਤਿ. ਤਤੋ ਉਟ੍ਠਾਯ ਚੋਰਾ ਮਨੁਸ੍ਸੇ ਪੋਥੇਤ੍ਵਾ ਅਚ੍ਛਿਨ੍ਦਿਤ੍ਵਾ ਗਚ੍ਛਨ੍ਤਿ. ਪਚ੍ਚਨ੍ਤਿਮੇ ਵਾ ਜਨਪਦੇ ਅਨੁਸਞ੍ਞਾਤੁਨ੍ਤਿ ਗਾਮਂ ਵਾਸਕਰਣਤ੍ਥਾਯ ਸੇਤੁਂ ਅਤ੍ਥਰਣਤ੍ਥਾਯ ਪੋਕ੍ਖਰਣਿਂ ਖਣਾਪਨਤ੍ਥਾਯ ਸਾਲਾਦੀਨਂ ਕਰਣਤ੍ਥਾਯ ਪਚ੍ਚਨ੍ਤਿਮੇ ਜਨਪਦੇ ਅਨੁਸਞ੍ਞਾਤੁਮ੍ਪਿ ਨ ਸੁਖਂ ਹੋਤਿ. ਬ੍ਰਾਹ੍ਮਣਗਹਪਤਿਕਾਨਨ੍ਤਿ ਅਨ੍ਤੋਨਗਰਵਾਸੀਨਂ ਬ੍ਰਾਹ੍ਮਣਗਹਪਤਿਕਾਨਂ. ਬਾਹਿਰਾਨਿ ਵਾ ਕਮ੍ਮਨ੍ਤਾਨੀਤਿ ਬਹਿਗਾਮੇ ਆਰਾਮੇ ਖੇਤ੍ਤਕਮ੍ਮਨ੍ਤਾਨਿ. ਪਾਪਭਿਕ੍ਖੂ ਬਲਵਨ੍ਤੋ ਹੋਨ੍ਤੀਤਿ ਪਕ੍ਖੁਤ੍ਤਰਾ ਯਸੁਤ੍ਤਰਾ ਪੁਞ੍ਞਵਨ੍ਤੋ ਬਹੁਕੇਹਿ ਉਪਟ੍ਠਾਕੇਹਿ ਚ ਉਪਟ੍ਠਾਕੀਹਿ ਚ ਸਮਨ੍ਨਾਗਤਾ ਰਾਜਰਾਜਮਹਾਮਤ੍ਤਸਨ੍ਨਿਸ੍ਸਿਤਾ. ਪੇਸਲਾ ਭਿਕ੍ਖੂ ਤਸ੍ਮਿਂ ਸਮਯੇ ਦੁਬ੍ਬਲਾ ਹੋਨ੍ਤੀਤਿ ਤਸ੍ਮਿਂ ਸਮਯੇ ਪਿਯਸੀਲਾ ਭਿਕ੍ਖੂ ਤਾਸਂ ਸਮ੍ਪਤ੍ਤੀਨਂ ਅਭਾਵੇਨ ਦੁਬ੍ਬਲਾ ਹੋਨ੍ਤਿ. ਤੁਣ੍ਹੀਭੂਤਾ ਤੁਣ੍ਹੀਭੂਤਾਵ ਸਙ੍ਘਮਜ੍ਝੇ ਸਙ੍ਕਸਾਯਨ੍ਤੀਤਿ ਨਿਸ੍ਸਦ੍ਦਾ ਹੁਤ੍ਵਾ ਸਙ੍ਘਮਜ੍ਝੇ ਨਿਸਿਨ੍ਨਾ ਕਿਞ੍ਚਿ ਏਕਵਚਨਮ੍ਪਿ ਮੁਖਂ ਉਕ੍ਖਿਪਿਤ੍ਵਾ ਕਥੇਤੁਂ ਅਸਕ੍ਕੋਨ੍ਤਾ ਪਜ੍ਝਾਯਨ੍ਤਾ ਵਿਯ ਨਿਸੀਦਨ੍ਤਿ. ਤਯਿਦਨ੍ਤਿ ਤਦੇਤਂ ਕਾਰਣਂ. ਸੁਕ੍ਕਪਕ੍ਖੋ ਵੁਤ੍ਤਵਿਪਲ੍ਲਾਸੇਨ ਵੇਦਿਤਬ੍ਬੋ.

੪੧. ਨਵਮੇ ਮਿਚ੍ਛਾਪਟਿਪਤ੍ਤਾਧਿਕਰਣਹੇਤੂਤਿ ਮਿਚ੍ਛਾਪਟਿਪਤ੍ਤਿਯਾ ਕਾਰਣਹੇਤੁ ਪਟਿਪਜ੍ਜਨਹੇਤੂਤਿ ਅਤ੍ਥੋ. ਞਾਯਂ ਧਮ੍ਮਂ ਕੁਸਲਨ੍ਤਿ ਸਹਵਿਪਸ੍ਸਨਕਂ ਮਗ੍ਗਂ. ਏਵਰੂਪੋ ਹਿ ਸਹਵਿਪਸ੍ਸਨਕਂ ਮਗ੍ਗਂ ਆਰਾਧੇਤੁਂ ਸਮ੍ਪਾਦੇਤੁਂ ਪੂਰੇਤੁਂ ਨ ਸਕ੍ਕੋਤਿ. ਸੁਕ੍ਕਪਕ੍ਖੋ ਵੁਤ੍ਤਵਿਪਲ੍ਲਾਸੇਨ ਵੇਦਿਤਬ੍ਬੋ. ਇਮਸ੍ਮਿਂ ਸੁਤ੍ਤੇ ਸਹ ਵਿਪਸ੍ਸਨਾਯ ਮਗ੍ਗੋ ਕਥਿਤੋ.

੪੨. ਦਸਮੇ ਦੁਗ੍ਗਹਿਤੇਹੀਤਿ ਉਪ੍ਪਟਿਪਾਟਿਯਾ ਗਹਿਤੇਹਿ. ਬ੍ਯਞ੍ਜਨਪ੍ਪਤਿਰੂਪਕੇਹੀਤਿ ਬ੍ਯਞ੍ਜਨਸੋ ਪਤਿਰੂਪਕੇਹਿ ਅਕ੍ਖਰਚਿਤ੍ਰਤਾਯ ਲਦ੍ਧਕੇਹਿ. ਅਤ੍ਥਞ੍ਚ ਧਮ੍ਮਞ੍ਚ ਪਟਿਬਾਹਨ੍ਤੀਤਿ ਸੁਗ੍ਗਹਿਤਸੁਤ੍ਤਨ੍ਤਾਨਂ ਅਤ੍ਥਞ੍ਚ ਪਾਲ਼ਿਞ੍ਚ ਪਟਿਬਾਹਨ੍ਤਿ, ਅਤ੍ਤਨੋ ਦੁਗ੍ਗਹਿਤਸੁਤ੍ਤਨ੍ਤਾਨਂਯੇਵ ਅਤ੍ਥਞ੍ਚ ਪਾਲ਼ਿਞ੍ਚ ਉਤ੍ਤਰਿਤਰਂ ਕਤ੍ਵਾ ਦਸ੍ਸੇਨ੍ਤਿ. ਸੁਕ੍ਕਪਕ੍ਖੋ ਵੁਤ੍ਤਵਿਪਲ੍ਲਾਸੇਨ ਵੇਦਿਤਬ੍ਬੋ. ਇਮਸ੍ਮਿਂ ਸੁਤ੍ਤੇ ਸਾਸਨਸ੍ਸ ਵੁਦ੍ਧਿ ਚ ਪਰਿਹਾਨਿ ਚ ਕਥਿਤਾਤਿ.

ਸਮਚਿਤ੍ਤਵਗ੍ਗੋ ਚਤੁਤ੍ਥੋ.