੫. ਪਰਿਸਵਗ੍ਗਵਣ੍ਣਨਾ

੪੩. ਪਞ੍ਚਮਸ੍ਸ ਪਠਮੇ ਉਤ੍ਤਾਨਾਤਿ ਪਾਕਟਾ ਅਪ੍ਪਟਿਚ੍ਛਨ੍ਨਾ. ਗਮ੍ਭੀਰਾਤਿ ਗੁਲ਼੍ਹਾ ਪਟਿਚ੍ਛਨ੍ਨਾ. ਉਦ੍ਧਤਾਤਿ ਉਦ੍ਧਚ੍ਚੇਨ ਸਮਨ੍ਨਾਗਤਾ. ਉਨ੍ਨਲ਼ਾਤਿ ਉਗ੍ਗਤਨਲ਼ਾ, ਉਟ੍ਠਿਤਤੁਚ੍ਛਮਾਨਾਤਿ ਵੁਤ੍ਤਂ ਹੋਤਿ. ਚਪਲਾਤਿ ਪਤ੍ਤਚੀਵਰਮਣ੍ਡਨਾਦਿਨਾ ਚਾਪਲ੍ਲੇਨ ਯੁਤ੍ਤਾ. ਮੁਖਰਾਤਿ ਮੁਖਖਰਾ ਖਰਵਚਨਾ. ਵਿਕਿਣ੍ਣਵਾਚਾਤਿ ਅਸਂਯਤਵਚਨਾ ਦਿਵਸਮ੍ਪਿ ਨਿਰਤ੍ਥਕਵਚਨਪਲਾਪਿਨੋ. ਮੁਟ੍ਠਸ੍ਸਤੀਤਿ ਵਿਸ੍ਸਟ੍ਠਸਤਿਨੋ. ਅਸਮ੍ਪਜਾਨਾਤਿ ਨਿਪ੍ਪਞ੍ਞਾ. ਅਸਮਾਹਿਤਾਤਿ ਚਿਤ੍ਤੇਕਗ੍ਗਤਾਮਤ੍ਤਸ੍ਸਾਪਿ ਅਲਾਭਿਨੋ. ਪਾਕਤਿਨ੍ਦ੍ਰਿਯਾਤਿ ਪਕਤਿਯਾ ਠਿਤੇਹਿ ਵਿਵਟੇਹਿ ਅਰਕ੍ਖਿਤੇਹਿ ਇਨ੍ਦ੍ਰਿਯੇਹਿ ਸਮਨ੍ਨਾਗਤਾ. ਸੁਕ੍ਕਪਕ੍ਖੋ ਵੁਤ੍ਤਵਿਪਲ੍ਲਾਸੇਨ ਵੇਦਿਤਬ੍ਬੋ.

੪੪. ਦੁਤਿਯੇ ਭਣ੍ਡਨਜਾਤਾਤਿ ਭਣ੍ਡਨਂ ਵੁਚ੍ਚਤਿ ਕਲਹਸ੍ਸ ਪੁਬ੍ਬਭਾਗੋ, ਤਂ ਤੇਸਂ ਜਾਤਨ੍ਤਿ ਭਣ੍ਡਨਜਾਤਾ. ਤਥਾ ‘‘ਮਯਂ ਤੁਮ੍ਹੇ ਦਣ੍ਡਾਪੇਸ੍ਸਾਮ ਬਨ੍ਧਾਪੇਸ੍ਸਾਮਾ’’ਤਿਆਦਿਵਚਨਪ੍ਪਵਤ੍ਤਿਯਾ ਸਞ੍ਜਾਤਕਲਹਾ. ਅਯਂ ਤਾਵ ਗਿਹੀਸੁ ਨਯੋ. ਪਬ੍ਬਜਿਤਾ ਪਨ ਆਪਤ੍ਤਿਵੀਤਿਕ੍ਕਮਵਾਚਂ ਵਦਨ੍ਤਾ ਕਲਹਜਾਤਾ ਨਾਮ. ਵਿਵਾਦਾਪਨ੍ਨਾਤਿ ਵਿਰੁਦ੍ਧਵਾਦਂ ਆਪਨ੍ਨਾ. ਮੁਖਸਤ੍ਤੀਹਿ ਵਿਤੁਦਨ੍ਤਾਤਿ ਗੁਣਾਨਂ ਛਿਨ੍ਦਨਟ੍ਠੇਨ ਦੁਬ੍ਭਾਸਿਤਾ ਵਾਚਾ ਮੁਖਸਤ੍ਤਿਯੋਤਿ ਵੁਚ੍ਚਨ੍ਤਿ, ਤਾਹਿ ਵਿਤੁਦਨ੍ਤਾ ਵਿਜ੍ਝਨ੍ਤਾ. ਸਮਗ੍ਗਾਤਿ ਏਕਕਮ੍ਮਂ ਏਕੁਦ੍ਦੇਸੋ ਸਮਸਿਕ੍ਖਤਾਤਿ ਏਤੇਸਂ ਕਰਣੇਨ ਸਮਗ੍ਗਤਾਯ ਸਹਿਤਾ. ਪਿਯਚਕ੍ਖੂਹੀਤਿ ਮੇਤ੍ਤਾਚਕ੍ਖੂਹਿ.

੪੫. ਤਤਿਯੇ ਅਗ੍ਗਵਤੀਤਿ ਉਤ੍ਤਮਪੁਗ੍ਗਲਵਤੀ, ਅਗ੍ਗਾਯ ਵਾ ਉਤ੍ਤਮਾਯ ਪਟਿਪਤ੍ਤਿਯਾ ਸਮਨ੍ਨਾਗਤਾ. ਤਤੋ ਵਿਪਰੀਤਾ ਅਨਗ੍ਗਵਤੀ. ਬਾਹੁਲਿਕਾਤਿ ਚੀਵਰਾਦਿਬਾਹੁਲ੍ਲਾਯ ਪਟਿਪਨ੍ਨਾ. ਸਾਸਨਂ ਸਿਥਿਲਂ ਗਣ੍ਹਨ੍ਤੀਤਿ ਸਾਥਲਿਕਾ. ਓਕ੍ਕਮਨੇ ਪੁਬ੍ਬਙ੍ਗਮਾਤਿ ਏਤ੍ਥ ਓਕ੍ਕਮਨਂ ਵੁਚ੍ਚਤਿ ਅਵਗਮਨਟ੍ਠੇਨ ਪਞ੍ਚ ਨੀਵਰਣਾਨਿ, ਤੇਨ ਪਞ੍ਚਨੀਵਰਣਪੂਰਣੇ ਪੁਬ੍ਬਙ੍ਗਮਾਤਿ ਵੁਤ੍ਤਂ ਹੋਤਿ. ਪਵਿਵੇਕੇਤਿ ਉਪਧਿਵਿਵੇਕੇ ਨਿਬ੍ਬਾਨੇ. ਨਿਕ੍ਖਿਤ੍ਤਧੁਰਾਤਿ ਤਿਵਿਧੇਪਿ ਵਿਵੇਕੇ ਓਰੋਪਿਤਧੁਰਾ. ਨ ਵੀਰਿਯਂ ਆਰਭਨ੍ਤੀਤਿ ਦੁਵਿਧਮ੍ਪਿ ਵੀਰਿਯਂ ਨ ਕਰੋਨ੍ਤਿ. ਅਪ੍ਪਤ੍ਤਸ੍ਸ ਪਤ੍ਤਿਯਾਤਿ ਪੁਬ੍ਬੇ ਅਪ੍ਪਤ੍ਤਸ੍ਸ ਝਾਨਵਿਪਸ੍ਸਨਾਮਗ੍ਗਫਲਵਿਸੇਸਸ੍ਸ ਪਤ੍ਤਿਅਤ੍ਥਾਯ. ਇਤਰਂ ਪਦਦ੍ਵਯਂ ਤਸ੍ਸੇਵ ਵੇਵਚਨਂ. ਪਚ੍ਛਿਮਾ ਜਨਤਾਤਿ ਸਦ੍ਧਿਵਿਹਾਰਿਕਅਨ੍ਤੇਵਾਸਿਕਜਨੋ. ਦਿਟ੍ਠਾਨੁਗਤਿਂ ਆਪਜ੍ਜਤੀਤਿ ਆਚਰਿਯੁਪਜ੍ਝਾਯੇਹਿ ਕਤਂ ਅਨੁਕਰੋਨ੍ਤੋ ਦਿਟ੍ਠਸ੍ਸ ਤੇਸਂ ਆਚਾਰਸ੍ਸ ਅਨੁਗਤਿਂ ਆਪਜ੍ਜਤਿ ਨਾਮ. ਸੇਸਂ ਵੁਤ੍ਤਪਟਿਪਕ੍ਖਨਯੇਨ ਵੇਦਿਤਬ੍ਬਂ.

੪੬. ਚਤੁਤ੍ਥੇ ਅਰਿਯਾਤਿ ਅਰਿਯਸਾਵਕਪਰਿਸਾ. ਅਨਰਿਯਾਤਿ ਪੁਥੁਜ੍ਜਨਪਰਿਸਾ. ‘‘ਇਦਂ ਦੁਕ੍ਖ’’ਨ੍ਤਿ ਯਥਾਭੂਤਂ ਨਪ੍ਪਜਾਨਨ੍ਤੀਤਿ ਠਪੇਤ੍ਵਾ ਤਣ੍ਹਂ ਤੇਭੂਮਕਾ ਪਞ੍ਚਕ੍ਖਨ੍ਧਾ ਦੁਕ੍ਖਸਚ੍ਚਂ ਨਾਮ, ਏਤ੍ਤਕਮੇਵ ਦੁਕ੍ਖਂ, ਇਤੋ ਉਦ੍ਧਂ ਦੁਕ੍ਖਂ ਨਤ੍ਥੀਤਿ ਯਥਾਸਭਾਵਤੋ ਨਪ੍ਪਜਾਨਨ੍ਤਿ. ਏਸ ਨਯੋ ਸਬ੍ਬਤ੍ਥ. ਸੇਸਪਦੇਸੁ ਪਨ ਤਸ੍ਸ ਦੁਕ੍ਖਸ੍ਸ ਸਮੁਟ੍ਠਾਪਿਕਾ ਪੁਰਿਮਤਣ੍ਹਾ ਸਮੁਦਯੋ ਨਾਮ, ਤਸ੍ਸਾਯੇਵ ਤਣ੍ਹਾਯ, ਦ੍ਵਿਨ੍ਨਮ੍ਪਿ ਵਾ ਤੇਸਂ ਸਚ੍ਚਾਨਂ ਅਚ੍ਚਨ੍ਤਕ੍ਖਯੋ ਅਸਮੁਪ੍ਪਤ੍ਤਿ ਦੁਕ੍ਖਨਿਰੋਧੋ ਨਾਮ, ਅਟ੍ਠਙ੍ਗਿਕੋ ਅਰਿਯਮਗ੍ਗੋ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਨਾਮਾਤਿ ਏਵਂ ਇਮਸ੍ਮਿਂ ਸੁਤ੍ਤੇ ਚਤੂਹਿ ਸਚ੍ਚੇਹਿ ਚਤ੍ਤਾਰੋ ਮਗ੍ਗਾ ਚ ਚਤ੍ਤਾਰਿ ਚ ਫਲਾਨਿ ਕਥਿਤਾਨਿ.

੪੭. ਪਞ੍ਚਮੇ ਪਰਿਸਾਕਸਟੋਤਿ ਕਸਟਪਰਿਸਾ ਕਚਵਰਪਰਿਸਾ ਪਲਾਪਪਰਿਸਾਤਿ ਅਤ੍ਥੋ. ਪਰਿਸਾਮਣ੍ਡੋਤਿ ਪਸਨ੍ਨਪਰਿਸਾ ਸਾਰਪਰਿਸਾਤਿ ਅਤ੍ਥੋ. ਛਨ੍ਦਾਗਤਿਂ ਗਚ੍ਛਨ੍ਤੀਤਿ ਛਨ੍ਦੇਨ ਅਗਤਿਂ ਗਚ੍ਛਨ੍ਤਿ, ਅਕਤ੍ਤਬ੍ਬਂ ਕਰੋਨ੍ਤੀਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ. ਇਮਾਨਿ ਪਨ ਚਤ੍ਤਾਰਿ ਅਗਤਿਗਮਨਾਨਿ ਭਣ੍ਡਭਾਜਨੀਯੇ ਚ ਵਿਨਿਚ੍ਛਯਟ੍ਠਾਨੇ ਚ ਲਬ੍ਭਨ੍ਤਿ. ਤਤ੍ਥ ਭਣ੍ਡਭਾਜਨੀਯੇ ਤਾਵ ਅਤ੍ਤਨੋ ਭਾਰਭੂਤਾਨਂ ਭਿਕ੍ਖੂਨਂ ਅਮਨਾਪੇ ਭਣ੍ਡਕੇ ਪਤ੍ਤੇ ਤਂ ਪਰਿਵਤ੍ਤੇਤ੍ਵਾ ਮਨਾਪਂ ਦੇਨ੍ਤੋ ਛਨ੍ਦਾਗਤਿਂ ਗਚ੍ਛਤਿ ਨਾਮ. ਅਤ੍ਤਨੋ ਪਨ ਅਭਾਰਭੂਤਾਨਂ ਮਨਾਪੇ ਭਣ੍ਡਕੇ ਪਤ੍ਤੇ ਤਂ ਪਰਿਵਤ੍ਤੇਤ੍ਵਾ ਅਮਨਾਪਂ ਦੇਨ੍ਤੋ ਦੋਸਾਗਤਿਂ ਗਚ੍ਛਤਿ ਨਾਮ. ਭਣ੍ਡਕਭਾਜਨੀਯਵਤ੍ਥੁਞ੍ਚ ਠਿਤਿਕਞ੍ਚ ਅਜਾਨਨ੍ਤੋ ਮੋਹਾਗਤਿਂ ਗਚ੍ਛਤਿ ਨਾਮ. ਮੁਖਰਾਨਂ ਵਾ ਰਾਜਾਦਿਨਿਸ੍ਸਿਤਾਨਂ ਵਾ ‘‘ਇਮੇ ਮੇ ਅਮਨਾਪੇ ਭਣ੍ਡਕੇ ਦਿਨ੍ਨੇ ਅਨਤ੍ਥਮ੍ਪਿ ਕਰੇਯ੍ਯੁ’’ਨ੍ਤਿ ਭਯੇਨ ਪਰਿਵਤ੍ਤੇਤ੍ਵਾ ਮਨਾਪਂ ਦੇਨ੍ਤੋ ਭਯਾਗਤਿਂ ਗਚ੍ਛਤਿ ਨਾਮ. ਯੋ ਪਨ ਏਵਂ ਨ ਗਚ੍ਛਤਿ, ਸਬ੍ਬੇਸਂ ਤੁਲਾਭੂਤੋ ਪਮਾਣਭੂਤੋ ਮਜ੍ਝਤ੍ਤੋ ਹੁਤ੍ਵਾ ਯਂ ਯਸ੍ਸ ਪਾਪੁਣਾਤਿ, ਤਞ੍ਞੇਵ ਤਸ੍ਸ ਦੇਤਿ, ਅਯਂ ਚਤੁਬ੍ਬਿਧਮ੍ਪਿ ਅਗਤਿਗਮਨਂ ਨ ਗਚ੍ਛਤਿ ਨਾਮ. ਵਿਨਿਚ੍ਛਯਟ੍ਠਾਨੇ ਪਨ ਅਤ੍ਤਨੋ ਭਾਰਭੂਤਸ੍ਸ ਗਰੁਕਾਪਤ੍ਤਿਂ ਲਹੁਕਾਪਤ੍ਤੀਤਿ ਕਤ੍ਵਾ ਕਥੇਨ੍ਤੋ ਛਨ੍ਦਾਗਤਿਂ ਗਚ੍ਛਤਿ ਨਾਮ. ਇਤਰਸ੍ਸ ਲਹੁਕਾਪਤ੍ਤਿਂ ਗਰੁਕਾਪਤ੍ਤੀਤਿ ਕਤ੍ਵਾ ਕਥੇਨ੍ਤੋ ਦੋਸਾਗਤਿਂ ਗਚ੍ਛਤਿ ਨਾਮ. ਆਪਤ੍ਤਿਵੁਟ੍ਠਾਨਂ ਪਨ ਸਮੁਚ੍ਚਯਕ੍ਖਨ੍ਧਕਞ੍ਚ ਅਜਾਨਨ੍ਤੋ ਮੋਹਾਗਤਿਂ ਗਚ੍ਛਤਿ ਨਾਮ. ਮੁਖਰਸ੍ਸ ਵਾ ਰਾਜਪੂਜਿਤਸ੍ਸ ਵਾ ‘‘ਅਯਂ ਮੇ ਗਰੁਕਂ ਕਤ੍ਵਾ ਆਪਤ੍ਤਿਂ ਕਥੇਨ੍ਤਸ੍ਸ ਅਨਤ੍ਥਮ੍ਪਿ ਕਰੇਯ੍ਯਾ’’ਤਿ ਗਰੁਕਮੇਵ ਲਹੁਕਾਤਿ ਕਤ੍ਵਾ ਕਥੇਨ੍ਤੋ ਭਯਾਗਤਿਂ ਗਚ੍ਛਤਿ ਨਾਮ. ਯੋ ਪਨ ਸਬ੍ਬੇਸਂ ਯਥਾਭੂਤਮੇਵ ਕਥੇਤਿ, ਅਯਂ ਚਤੁਬ੍ਬਿਧਮ੍ਪਿ ਅਗਤਿਗਮਨਂ ਨ ਗਚ੍ਛਤਿ ਨਾਮ.

੪੮. ਛਟ੍ਠੇ ਓਕ੍ਕਾਚਿਤਵਿਨੀਤਾਤਿ ਦੁਬ੍ਬਿਨੀਤਾ. ਨੋ ਪਟਿਪੁਚ੍ਛਾਵਿਨੀਤਾਤਿ ਨ ਪੁਚ੍ਛਿਤ੍ਵਾ ਵਿਨੀਤਾ. ਗਮ੍ਭੀਰਾਤਿ ਪਾਲ਼ਿਵਸੇਨ ਗਮ੍ਭੀਰਾ ਸਲ੍ਲਸੁਤ੍ਤਸਦਿਸਾ. ਗਮ੍ਭੀਰਤ੍ਥਾਤਿ ਅਤ੍ਥਵਸੇਨ ਗਮ੍ਭੀਰਾ ਮਹਾਵੇਦਲ੍ਲਸੁਤ੍ਤਸਦਿਸਾ. ਲੋਕੁਤ੍ਤਰਾਤਿ ਲੋਕੁਤ੍ਤਰਅਤ੍ਥਦੀਪਕਾ. ਸੁਞ੍ਞਤਾਪਟਿਸਂਯੁਤ੍ਤਾਤਿ ਸਤ੍ਤਸੁਞ੍ਞਂ ਧਮ੍ਮਮਤ੍ਤਮੇਵ ਪਕਾਸਕਾ ਅਸਙ੍ਖਤਸਂਯੁਤ੍ਤਸਦਿਸਾ. ਨ ਅਞ੍ਞਾ ਚਿਤ੍ਤਂ ਉਪਟ੍ਠਪੇਨ੍ਤੀਤਿ ਵਿਜਾਨਨਤ੍ਥਾਯ ਚਿਤ੍ਤਂ ਨ ਉਪਟ੍ਠਪੇਨ੍ਤਿ, ਨਿਦ੍ਦਾਯਨ੍ਤਿ ਵਾ ਅਞ੍ਞਵਿਹਿਤਾ ਵਾ ਹੋਨ੍ਤਿ. ਉਗ੍ਗਹੇਤਬ੍ਬਂ ਪਰਿਯਾਪੁਣਿਤਬ੍ਬਨ੍ਤਿ ਉਗ੍ਗਹੇਤਬ੍ਬੇ ਚ ਪਰਿਯਾਪੁਣਿਤਬ੍ਬੇ ਚ. ਕਵਿਤਾਤਿ ਕਵੀਹਿ ਕਤਾ. ਇਤਰਂ ਤਸ੍ਸੇਵ ਵੇਵਚਨਂ. ਚਿਤ੍ਤਕ੍ਖਰਾਤਿ ਵਿਚਿਤ੍ਰਅਕ੍ਖਰਾ. ਇਤਰਂ ਤਸ੍ਸੇਵ ਵੇਵਚਨਂ. ਬਾਹਿਰਕਾਤਿ ਸਾਸਨਤੋ ਬਹਿਭੂਤਾ. ਸਾਵਕਭਾਸਿਤਾਤਿ ਤੇਸਂ ਤੇਸਂ ਸਾਵਕੇਹਿ ਭਾਸਿਤਾ. ਸੁਸ੍ਸੂਸਨ੍ਤੀਤਿ ਅਕ੍ਖਰਚਿਤ੍ਤਤਾਯ ਚੇਵ ਸਰਸਮ੍ਪਤ੍ਤਿਯਾ ਚ ਅਤ੍ਤਮਨਾ ਹੁਤ੍ਵਾ ਸੁਣਨ੍ਤਿ. ਨ ਚੇਵ ਅਞ੍ਞਮਞ੍ਞਂ ਪਟਿਪੁਚ੍ਛਨ੍ਤੀਤਿ ਅਞ੍ਞਮਞ੍ਞਂ ਅਤ੍ਥਂ ਵਾ ਅਨੁਸਨ੍ਧਿਂ ਵਾ ਪੁਬ੍ਬਾਪਰਂ ਵਾ ਨ ਪੁਚ੍ਛਨ੍ਤਿ. ਨ ਚ ਪਟਿਵਿਚਰਨ੍ਤੀਤਿ ਪੁਚ੍ਛਨਤ੍ਥਾਯ ਚਾਰਿਕਂ ਨ ਵਿਚਰਨ੍ਤਿ. ਇਦਂ ਕਥਨ੍ਤਿ ਇਦਂ ਬ੍ਯਞ੍ਜਨਂ ਕਥਂ ਰੋਪੇਤਬ੍ਬਂ ਕਿਨ੍ਤਿ ਰੋਪੇਤਬ੍ਬਂ? ਇਮਸ੍ਸ ਕੋ ਅਤ੍ਥੋਤਿ ਇਮਸ੍ਸ ਭਾਸਿਤਸ੍ਸ ਕੋ ਅਤ੍ਥੋ, ਕਾ ਅਨੁਸਨ੍ਧਿ, ਕਿਂ ਪੁਬ੍ਬਾਪਰਂ? ਅਵਿਵਟਨ੍ਤਿ ਪਟਿਚ੍ਛਨ੍ਨਂ. ਨ ਵਿਵਰਨ੍ਤੀਤਿ ਨ ਉਗ੍ਘਾਟੇਨ੍ਤਿ. ਅਨੁਤ੍ਤਾਨੀਕਤਨ੍ਤਿ ਅਪਾਕਟਂ ਕਤਂ. ਨ ਉਤ੍ਤਾਨਿਂ ਕਰੋਨ੍ਤੀਤਿ ਪਾਕਟਂ ਨ ਕਰੋਨ੍ਤਿ. ਕਙ੍ਖਾਠਾਨਿਯੇਸੂਤਿ ਕਙ੍ਖਾਯ ਕਾਰਣਭੂਤੇਸੁ. ਸੁਕ੍ਕਪਕ੍ਖੋ ਵੁਤ੍ਤਵਿਪਲ੍ਲਾਸੇਨ ਵੇਦਿਤਬ੍ਬੋ.

੪੯. ਸਤ੍ਤਮੇ ਆਮਿਸਗਰੂਤਿ ਚਤੁਪਚ੍ਚਯਗਰੁਕਾ ਲੋਕੁਤ੍ਤਰਧਮ੍ਮਂ ਲਾਮਕਤੋ ਗਹੇਤ੍ਵਾ ਠਿਤਪਰਿਸਾ. ਸਦ੍ਧਮ੍ਮਗਰੂਤਿ ਨਵ ਲੋਕੁਤ੍ਤਰਧਮ੍ਮੇ ਗਰੁਕੇ ਕਤ੍ਵਾ ਚਤ੍ਤਾਰੋ ਪਚ੍ਚਯੇ ਲਾਮਕਤੋ ਗਹੇਤ੍ਵਾ ਠਿਤਪਰਿਸਾ. ਉਭਤੋਭਾਗਵਿਮੁਤ੍ਤੋਤਿ ਦ੍ਵੀਹਿ ਭਾਗੇਹਿ ਵਿਮੁਤ੍ਤੋ. ਪਞ੍ਞਾਵਿਮੁਤ੍ਤੋਤਿ ਪਞ੍ਞਾਯ ਵਿਮੁਤ੍ਤੋ ਸੁਕ੍ਖਵਿਪਸ੍ਸਕਖੀਣਾਸਵੋ. ਕਾਯਸਕ੍ਖੀਤਿ ਕਾਯੇਨ ਝਾਨਫਸ੍ਸਂ ਫੁਸਿਤ੍ਵਾ ਪਚ੍ਛਾ ਨਿਰੋਧਂ ਨਿਬ੍ਬਾਨਂ ਸਚ੍ਛਿਕਤ੍ਵਾ ਠਿਤੋ. ਦਿਟ੍ਠਿਪ੍ਪਤ੍ਤੋਤਿ ਦਿਟ੍ਠਨ੍ਤਂ ਪਤ੍ਤੋ. ਇਮੇ ਦ੍ਵੇਪਿ ਛਸੁ ਠਾਨੇਸੁ ਲਬ੍ਭਨ੍ਤਿ. ਸਦ੍ਧਾਵਿਮੁਤ੍ਤੋਤਿ ਸਦ੍ਦਹਨ੍ਤੋ ਵਿਮੁਤ੍ਤੋ. ਅਯਮ੍ਪਿ ਛਸੁ ਠਾਨੇਸੁ ਲਬ੍ਭਤਿ. ਧਮ੍ਮਂ ਅਨੁਸ੍ਸਰਤੀਤਿ ਧਮ੍ਮਾਨੁਸਾਰੀ. ਸਦ੍ਧਂ ਅਨੁਸ੍ਸਰਤੀਤਿ ਸਦ੍ਧਾਨੁਸਾਰੀ. ਇਮੇ ਦ੍ਵੇਪਿ ਪਠਮਮਗ੍ਗਸਮਙ੍ਗਿਨੋ. ਕਲ੍ਯਾਣਧਮ੍ਮੋਤਿ ਸੁਨ੍ਦਰਧਮ੍ਮੋ. ਦੁਸ੍ਸੀਲੋ ਪਾਪਧਮ੍ਮੋਤਿ ਨਿਸ੍ਸੀਲੋ ਲਾਮਕਧਮ੍ਮੋ. ਇਮਂ ਕਸ੍ਮਾ ਗਣ੍ਹਨ੍ਤਿ? ਸਬ੍ਬੇਸੁ ਹਿ ਏਕਸਦਿਸੇਸੁ ਜਾਤੇਸੁ ਸੀਲਵਨ੍ਤੇਸੁ ਬਲਵਗਾਰਵਂ ਨ ਹੋਤਿ, ਏਕਚ੍ਚੇਸੁ ਪਨ ਦੁਸ੍ਸੀਲੇਸੁ ਸਤਿ ਸੀਲਵਨ੍ਤਾਨਂ ਉਪਰਿ ਬਲਵਗਾਰਵਂ ਹੋਤੀਤਿ ਮਞ੍ਞਨ੍ਤਾ ਗਣ੍ਹਨ੍ਤਿ. ਤੇ ਤੇਨ ਲਾਭਂ ਲਭਨ੍ਤੀਤਿ ਤੇ ਭਿਕ੍ਖੂ ਏਕਚ੍ਚਾਨਂ ਵਣ੍ਣਂ ਏਕਚ੍ਚਾਨਂ ਅਵਣ੍ਣਂ ਕਥੇਤ੍ਵਾ ਚਤ੍ਤਾਰੋ ਪਚ੍ਚਯੇ ਲਭਨ੍ਤਿ. ਗਥਿਤਾਤਿ ਤਣ੍ਹਾਯ ਗਨ੍ਥਿਤਾ. ਮੁਚ੍ਛਿਤਾਤਿ ਤਣ੍ਹਾਵਸੇਨੇਵ ਮੁਚ੍ਛਿਤਾ. ਅਜ੍ਝੋਪਨ੍ਨਾਤਿ ਅਜ੍ਝੋਸਾਯ ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਠਿਤਾ. ਅਨਾਦੀਨਵਦਸ੍ਸਾਵਿਨੋਤਿ ਅਪਚ੍ਚਵੇਕ੍ਖਿਤਪਰਿਭੋਗੇ ਆਦੀਨਵਂ ਅਪਸ੍ਸਨ੍ਤਾ. ਅਨਿਸ੍ਸਰਣਪਞ੍ਞਾਤਿ ਚਤੂਸੁ ਪਚ੍ਚਯੇਸੁ ਛਨ੍ਦਰਾਗਅਪਕਡ੍ਢਨਾਯ ਨਿਸ੍ਸਰਣਪਞ੍ਞਾਯ ਵਿਰਹਿਤਾ ਇਦਮਤ੍ਥਂ ਏਤਨ੍ਤਿ ਅਜਾਨਨ੍ਤਾ. ਪਰਿਭੁਞ੍ਜਨ੍ਤੀਤਿ ਸਚ੍ਛਨ੍ਦਰਾਗਾ ਹੁਤ੍ਵਾ ਪਰਿਭੁਞ੍ਜਨ੍ਤਿ.

ਸੁਕ੍ਕਪਕ੍ਖੇ ਉਭਤੋਭਾਗਵਿਮੁਤ੍ਤੋਤਿਆਦੀਸੁ ਅਯਂ ਸਤ੍ਤਨ੍ਨਮ੍ਪਿ ਅਰਿਯਪੁਗ੍ਗਲਾਨਂ ਸਙ੍ਖੇਪਪਕਾਸਨਾ – ਏਕੋ ਭਿਕ੍ਖੁ ਪਞ੍ਞਾਧੁਰੇਨ ਅਭਿਨਿਵਿਟ੍ਠੋ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਸੋਤਾਪਤ੍ਤਿਮਗ੍ਗਂ ਪਾਪੁਣਾਤਿ. ਸੋ ਤਸ੍ਮਿਂ ਖਣੇ ਧਮ੍ਮਾਨੁਸਾਰੀ ਨਾਮ ਹੋਤਿ, ਸੋਤਾਪਤ੍ਤਿਫਲਾਦੀਸੁ ਛਸੁ ਠਾਨੇਸੁ ਕਾਯਸਕ੍ਖਿ ਨਾਮ, ਅਰਹਤ੍ਤਫਲਕ੍ਖਣੇ ਉਭਤੋਭਾਗਵਿਮੁਤ੍ਤੋ ਨਾਮ. ਸਮਾਪਤ੍ਤੀਹਿ ਵਿਕ੍ਖਮ੍ਭਨਵਿਮੁਤ੍ਤਿਯਾ ਮਗ੍ਗੇਨ ਸਮੁਚ੍ਛੇਦਵਿਮੁਤ੍ਤਿਯਾਤਿ ਦ੍ਵਿਕ੍ਖਤ੍ਤੁਂ ਵਾ ਦ੍ਵੀਹਿ ਵਾ ਭਾਗੇਹਿ ਵਿਮੁਤ੍ਤੋਤਿ ਅਤ੍ਥੋ. ਅਪਰੋ ਪਞ੍ਞਾਧੁਰੇਨ ਅਭਿਨਿਵਿਟ੍ਠੋ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤੋ ਸੁਕ੍ਖਵਿਪਸ੍ਸਕੋਵ ਹੁਤ੍ਵਾ ਸੋਤਾਪਤ੍ਤਿਮਗ੍ਗਂ ਪਾਪੁਣਾਤਿ. ਸੋ ਤਸ੍ਮਿਂ ਖਣੇ ਧਮ੍ਮਾਨੁਸਾਰੀ ਨਾਮ ਹੋਤਿ, ਸੋਤਾਪਤ੍ਤਿਫਲਾਦੀਸੁ ਛਸੁ ਠਾਨੇਸੁ ਦਿਟ੍ਠਿਪ੍ਪਤ੍ਤੋ ਨਾਮ, ਅਰਹਤ੍ਤਫਲਕ੍ਖਣੇ ਪਞ੍ਞਾਵਿਮੁਤ੍ਤੋ ਨਾਮ. ਅਪਰੋ ਸਦ੍ਧਾਧੁਰੇਨ ਅਭਿਨਿਵਿਟ੍ਠੋ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਸੋਤਾਪਤ੍ਤਿਮਗ੍ਗਂ ਪਾਪੁਣਾਤਿ. ਸੋ ਤਸ੍ਮਿਂ ਖਣੇ ਸਦ੍ਧਾਨੁਸਾਰੀ ਨਾਮ ਹੋਤਿ, ਸੋਤਾਪਤ੍ਤਿਫਲਾਦੀਸੁ ਛਸੁ ਠਾਨੇਸੁ ਕਾਯਸਕ੍ਖਿ ਨਾਮ, ਅਰਹਤ੍ਤਫਲਕ੍ਖਣੇ ਉਭਤੋਭਾਗਵਿਮੁਤ੍ਤੋ ਨਾਮ. ਅਪਰੋ ਸਦ੍ਧਾਧੁਰੇਨ ਅਭਿਨਿਵਿਟ੍ਠੋ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤੋ ਸੁਕ੍ਖਵਿਪਸ੍ਸਕੋਵ ਹੁਤ੍ਵਾ ਸੋਤਾਪਤ੍ਤਿਮਗ੍ਗਂ ਪਾਪੁਣਾਤਿ. ਸੋ ਤਸ੍ਮਿਂ ਖਣੇ ਸਦ੍ਧਾਨੁਸਾਰੀ ਨਾਮ ਹੋਤਿ, ਸੋਤਾਪਤ੍ਤਿਫਲਾਦੀਸੁ ਛਸੁ ਠਾਨੇਸੁ ਸਦ੍ਧਾਵਿਮੁਤ੍ਤੋ ਨਾਮ, ਅਰਹਤ੍ਤਫਲਕ੍ਖਣੇ ਪਞ੍ਞਾਵਿਮੁਤ੍ਤੋ ਨਾਮ.

੫੦. ਅਟ੍ਠਮੇ ਵਿਸਮਾਤਿ ਸਪਕ੍ਖਲਨਟ੍ਠੇਨ ਵਿਸਮਾ. ਸਮਾਤਿ ਨਿਪਕ੍ਖਲਨਟ੍ਠੇਨ ਸਮਾ. ਅਧਮ੍ਮਕਮ੍ਮਾਨੀਤਿ ਉਦ੍ਧਮ੍ਮਾਨਿ ਕਮ੍ਮਾਨਿ. ਅਵਿਨਯਕਮ੍ਮਾਨੀਤਿ ਉਬ੍ਬਿਨਯਾਨਿ ਕਮ੍ਮਾਨਿ.

੫੧. ਨਵਮੇ ਅਧਮ੍ਮਿਕਾਤਿ ਨਿਦ੍ਧਮ੍ਮਾ. ਧਮ੍ਮਿਕਾਤਿ ਧਮ੍ਮਯੁਤ੍ਤਾ.

੫੨. ਦਸਮੇ ਅਧਿਕਰਣਨ੍ਤਿ ਵਿਵਾਦਾਧਿਕਰਣਾਦਿਚਤੁਬ੍ਬਿਧਂ ਅਧਿਕਰਣਂ. ਆਦਿਯਨ੍ਤੀਤਿ ਗਣ੍ਹਨ੍ਤਿ. ਸਞ੍ਞਾਪੇਨ੍ਤੀਤਿ ਜਾਨਾਪੇਨ੍ਤਿ. ਨ ਚ ਸਞ੍ਞਤ੍ਤਿਂ ਉਪਗਚ੍ਛਨ੍ਤੀਤਿ ਸਞ੍ਞਾਪਨਤ੍ਥਂ ਨ ਸਨ੍ਨਿਪਤਨ੍ਤਿ. ਨ ਚ ਨਿਜ੍ਝਾਪੇਨ੍ਤੀਤਿ ਨ ਪੇਕ੍ਖਾਪੇਨ੍ਤਿ. ਨ ਚ ਨਿਜ੍ਝਤ੍ਤਿਂ ਉਪਗਚ੍ਛਨ੍ਤੀਤਿ ਅਞ੍ਞਮਞ੍ਞਂ ਨਿਜ੍ਝਾਪਨਤ੍ਥਾਯ ਨ ਸਨ੍ਨਿਪਤਨ੍ਤਿ. ਅਸਞ੍ਞਤ੍ਤਿਬਲਾਤਿ ਅਸਞ੍ਞਤ੍ਤਿਯੇਵ ਬਲਂ ਏਤੇਸਨ੍ਤਿ ਅਸਞ੍ਞਤ੍ਤਿਬਲਾ. ਅਪ੍ਪਟਿਨਿਸ੍ਸਗ੍ਗਮਨ੍ਤਿਨੋਤਿ ਯੇਸਂ ਹਿ ਏਵਂ ਹੋਤਿ – ‘‘ਸਚੇ ਅਮ੍ਹੇਹਿ ਗਹਿਤਂ ਅਧਿਕਰਣਂ ਧਮ੍ਮਿਕਂ ਭਵਿਸ੍ਸਤਿ, ਗਣ੍ਹਿਸ੍ਸਾਮ. ਸਚੇ ਅਧਮ੍ਮਿਕਂ, ਵਿਸ੍ਸਜ੍ਜੇਸ੍ਸਾਮਾ’’ਤਿ, ਤੇ ਪਟਿਨਿਸ੍ਸਗ੍ਗਮਨ੍ਤਿਨੋ ਨਾਮ ਹੋਨ੍ਤਿ. ਇਮੇ ਪਨ ਨ ਤਥਾ ਮਨ੍ਤੇਨ੍ਤੀਤਿ ਅਪ੍ਪਟਿਨਿਸ੍ਸਗ੍ਗਮਨ੍ਤਿਨੋ. ਥਾਮਸਾ ਪਰਾਮਾਸਾ ਅਭਿਨਿਵਿਸ੍ਸਾਤਿ ਦਿਟ੍ਠਿਥਾਮੇਨ ਚ ਦਿਟ੍ਠਿਪਰਾਮਾਸੇਨ ਚ ਅਭਿਨਿਵਿਸਿਤ੍ਵਾ. ਇਦਮੇਵ ਸਚ੍ਚਨ੍ਤਿ ਇਦਂ ਅਮ੍ਹਾਕਂ ਵਚਨਮੇਵ ਸਚ੍ਚਂ. ਮੋਘਮਞ੍ਞਨ੍ਤਿ ਅਵਸੇਸਾਨਂ ਵਚਨਂ ਮੋਘਂ ਤੁਚ੍ਛਂ. ਸੁਕ੍ਕਪਕ੍ਖੋ ਉਤ੍ਤਾਨਤ੍ਥੋਯੇਵਾਤਿ.

ਪਰਿਸਵਗ੍ਗੋ ਪਞ੍ਚਮੋ.