੧. ਪਠਮਪਣ੍ਣਾਸਕਂ

੧. ਕਮ੍ਮਕਾਰਣਵਗ੍ਗੋ

੧. ਵਜ੍ਜਸੁਤ੍ਤਵਣ੍ਣਨਾ

੧. ਦੁਕਨਿਪਾਤਸ੍ਸ ਪਠਮੇ ਵਜ੍ਜਾਨੀਤਿ ਦੋਸਾ ਅਪਰਾਧਾ. ਦਿਟ੍ਠਧਮ੍ਮਿਕਨ੍ਤਿ ਦਿਟ੍ਠੇਵ ਧਮ੍ਮੇ ਇਮਸ੍ਮਿਂਯੇਵ ਅਤ੍ਤਭਾਵੇ ਉਪ੍ਪਨ੍ਨਫਲਂ. ਸਮ੍ਪਰਾਯਿਕਨ੍ਤਿ ਸਮ੍ਪਰਾਯੇ ਅਨਾਗਤੇ ਅਤ੍ਤਭਾਵੇ ਉਪ੍ਪਨ੍ਨਫਲਂ. ਆਗੁਚਾਰਿਨ੍ਤਿ ਪਾਪਕਾਰਿਂ ਅਪਰਾਧਕਾਰਕਂ. ਰਾਜਾਨੋ ਗਹੇਤ੍ਵਾ ਵਿਵਿਧਾ ਕਮ੍ਮਕਾਰਣਾ ਕਾਰੇਨ੍ਤੇਤਿ ਚੋਰਂ ਗਹੇਤ੍ਵਾ ਵਿਵਿਧਾ ਕਮ੍ਮਕਾਰਣਾ ਰਾਜਪੁਰਿਸਾ ਕਰੋਨ੍ਤਿ, ਰਾਜਾਨੋ ਪਨ ਤਾ ਕਾਰੇਨ੍ਤਿ ਨਾਮ. ਤਂ ਚੋਰਂ ਏਵਂ ਕਮ੍ਮਕਾਰਣਾ ਕਾਰਿਯਮਾਨਂ ਏਸ ਪਸ੍ਸਤਿ. ਤੇਨ ਵੁਤ੍ਤਂ – ‘‘ਪਸ੍ਸਤਿ ਚੋਰਂ ਆਗੁਚਾਰਿਂ ਰਾਜਾਨੋ ਗਹੇਤ੍ਵਾ ਵਿਵਿਧਾ ਕਮ੍ਮਕਾਰਣਾ ਕਾਰੇਨ੍ਤੇ’’ਤਿ. ਅਦ੍ਧਦਣ੍ਡਕੇਹੀਤਿ ਮੁਗ੍ਗਰੇਹਿ, ਪਹਾਰਸਾਧਨਤ੍ਥਂ ਵਾ ਚਤੁਹਤ੍ਥਦਣ੍ਡਂ ਦ੍ਵੇਧਾ ਛੇਤ੍ਵਾ ਗਹਿਤਦਣ੍ਡਕੇਹਿ. ਬਿਲਙ੍ਗਥਾਲਿਕਨ੍ਤਿ ਕਞ੍ਜਿਯਉਕ੍ਖਲਿਕਕਮ੍ਮਕਾਰਣਂ. ਤਂ ਕਰੋਨ੍ਤਾ ਸੀਸਕਟਾਹਂ ਉਪ੍ਪਾਟੇਤ੍ਵਾ ਤਤ੍ਤਂ ਅਯੋਗੁਲ਼ਂ ਸਣ੍ਡਾਸੇਨ ਗਹੇਤ੍ਵਾ ਤਤ੍ਥ ਪਕ੍ਖਿਪਨ੍ਤਿ, ਤੇਨ ਮਤ੍ਥਲੁਙ੍ਗਂ ਪਕ੍ਕੁਥਿਤ੍ਵਾ ਉਤ੍ਤਰਤਿ. ਸਙ੍ਖਮੁਣ੍ਡਿਕਨ੍ਤਿ ਸਙ੍ਖਮੁਣ੍ਡਕਮ੍ਮਕਾਰਣਂ. ਤਂ ਕਰੋਨ੍ਤਾ ਉਤ੍ਤਰੋਟ੍ਠਉਭਤੋਕਣ੍ਣਚੂਲ਼ਿਕਗਲਵਾਟਕਪਰਿਚ੍ਛੇਦੇਨ ਚਮ੍ਮਂ ਛਿਨ੍ਦਿਤ੍ਵਾ ਸਬ੍ਬਕੇਸੇ ਏਕਤੋ ਗਣ੍ਠਿਂ ਕਤ੍ਵਾ ਦਣ੍ਡਕੇਨ ਵੇਠੇਤ੍ਵਾ ਉਪ੍ਪਾਟੇਨ੍ਤਿ, ਸਹ ਕੇਸੇਹਿ ਚਮ੍ਮਂ ਉਟ੍ਠਹਤਿ. ਤਤੋ ਸੀਸਕਟਾਹਂ ਥੂਲਸਕ੍ਖਰਾਹਿ ਘਂਸਿਤ੍ਵਾ ਧੋਵਨ੍ਤਾ ਸਙ੍ਖਵਣ੍ਣਂ ਕਰੋਨ੍ਤਿ. ਰਾਹੁਮੁਖਨ੍ਤਿ ਰਾਹੁਮੁਖਕਮ੍ਮਕਾਰਣਂ. ਤਂ ਕਰੋਨ੍ਤਾ ਸਙ੍ਕੁਨਾ ਮੁਖਂ ਵਿਵਰਿਤ੍ਵਾ ਅਨ੍ਤੋਮੁਖੇ ਦੀਪਂ ਜਾਲੇਨ੍ਤਿ, ਕਣ੍ਣਚੂਲ਼ਿਕਾਹਿ ਵਾ ਪਟ੍ਠਾਯ ਮੁਖਂ ਨਿਖਾਦਨੇਨ ਖਨਨ੍ਤਿ, ਲੋਹਿਤਂ ਪਗ੍ਘਰਿਤ੍ਵਾ ਮੁਖਂ ਪੂਰੇਤਿ.

ਜੋਤਿਮਾਲਿਕਨ੍ਤਿ ਸਕਲਸਰੀਰਂ ਤੇਲਪਿਲੋਤਿਕਾਯ ਵੇਠੇਤ੍ਵਾ ਆਲਿਮ੍ਪੇਨ੍ਤਿ. ਹਤ੍ਥਪਜ੍ਜੋਤਿਕਨ੍ਤਿ ਹਤ੍ਥੇ ਤੇਲਪਿਲੋਤਿਕਾਯ ਵੇਠੇਤ੍ਵਾ ਦੀਪਂ ਵਿਯ ਪਜ੍ਜਾਲੇਨ੍ਤਿ. ਏਰਕਵਤ੍ਤਿਕਨ੍ਤਿ ਏਰਕਵਤ੍ਤਕਮ੍ਮਕਾਰਣਂ. ਤਂ ਕਰੋਨ੍ਤਾ ਹੇਟ੍ਠਾਗੀਵਤੋ ਪਟ੍ਠਾਯ ਚਮ੍ਮਵਟ੍ਟੇ ਕਨ੍ਤਿਤ੍ਵਾ ਗੋਪ੍ਫਕੇ ਠਪੇਨ੍ਤਿ, ਅਥ ਨਂ ਯੋਤ੍ਤੇਹਿ ਬਨ੍ਧਿਤ੍ਵਾ ਕਡ੍ਢਨ੍ਤਿ. ਸੋ ਅਤ੍ਤਨੋ ਚਮ੍ਮਵਟ੍ਟੇ ਅਕ੍ਕਮਿਤ੍ਵਾ ਅਕ੍ਕਮਿਤ੍ਵਾ ਪਤਤਿ. ਚੀਰਕਵਾਸਿਕਨ੍ਤਿ ਚੀਰਕਵਾਸਿਕਕਮ੍ਮਕਾਰਣਂ. ਤਂ ਕਰੋਨ੍ਤਾ ਤਥੇਵ ਚਮ੍ਮਵਟ੍ਟੇ ਕਨ੍ਤਿਤ੍ਵਾ ਕਟਿਯਂ ਠਪੇਨ੍ਤਿ, ਕਟਿਤੋ ਪਟ੍ਠਾਯ ਕਨ੍ਤਿਤ੍ਵਾ ਗੋਪ੍ਫਕੇਸੁ ਠਪੇਨ੍ਤਿ, ਉਪਰਿਮੇਹਿ ਹੇਟ੍ਠਿਮਸਰੀਰਂ ਚੀਰਕਨਿਵਾਸਨਨਿਵਤ੍ਥਂ ਵਿਯ ਹੋਤਿ. ਏਣੇਯ੍ਯਕਨ੍ਤਿ ਏਣੇਯ੍ਯਕਕਮ੍ਮਕਾਰਣਂ. ਤਂ ਕਰੋਨ੍ਤਾ ਉਭੋਸੁ ਕਪ੍ਪਰੇਸੁ ਚ ਉਭੋਸੁ ਜਾਣੁਕੇਸੁ ਚ ਅਯਵਲਯਾਨਿ ਦਤ੍ਵਾ ਅਯਸੂਲਾਨਿ ਕੋਟ੍ਟੇਨ੍ਤਿ. ਸੋ ਚਤੂਹਿ ਅਯਸੂਲੇਹਿ ਭੂਮਿਯਂ ਪਤਿਟ੍ਠਹਤਿ. ਅਥ ਨਂ ਪਰਿਵਾਰੇਤ੍ਵਾ ਅਗ੍ਗਿਂ ਕਰੋਨ੍ਤਿ. ‘‘ਏਣੇਯ੍ਯਕੋ ਜੋਤਿਪਰਿਗ੍ਗਹੋ ਯਥਾ’’ਤਿ ਆਗਤਟ੍ਠਾਨੇਪਿ ਇਦਮੇਵ ਵੁਤ੍ਤਂ. ਤਂ ਕਾਲੇਨ ਕਾਲਂ ਸੂਲਾਨਿ ਅਪਨੇਤ੍ਵਾ ਚਤੂਹਿ ਅਟ੍ਠਿਕੋਟੀਹਿਯੇਵ ਠਪੇਨ੍ਤਿ. ਏਵਰੂਪਾ ਕਮ੍ਮਕਾਰਣਾ ਨਾਮ ਨਤ੍ਥਿ.

ਬਲ਼ਿਸਮਂਸਿਕਨ੍ਤਿ ਉਭਤੋਮੁਖੇਹਿ ਬਲ਼ਿਸੇਹਿ ਪਹਰਿਤ੍ਵਾ ਚਮ੍ਮਮਂਸਨ੍ਹਾਰੂਨਿ ਉਪ੍ਪਾਟੇਨ੍ਤਿ. ਕਹਾਪਣਿਕਨ੍ਤਿ ਸਕਲਸਰੀਰਂ ਤਿਣ੍ਹਾਹਿ ਵਾਸੀਹਿ ਕੋਟਿਤੋ ਪਟ੍ਠਾਯ ਕਹਾਪਣਮਤ੍ਤਂ, ਕਹਾਪਣਮਤ੍ਤਂ ਪਾਤੇਨ੍ਤਾ ਕੋਟ੍ਟੇਨ੍ਤਿ. ਖਾਰਾਪਤਚ੍ਛਿਕਨ੍ਤਿ ਸਰੀਰਂ ਤਤ੍ਥ ਤਤ੍ਥ ਆਵੁਧੇਹਿ ਪਹਰਿਤ੍ਵਾ ਕੋਚ੍ਛੇਹਿ ਖਾਰਂ ਘਂਸਨ੍ਤਿ, ਚਮ੍ਮਮਂਸਨ੍ਹਾਰੂਨਿ ਪਗ੍ਘਰਿਤ੍ਵਾ ਅਟ੍ਠਿਕਸਙ੍ਖਲਿਕਾਵ ਤਿਟ੍ਠਤਿ. ਪਲਿਘਪਰਿਵਤ੍ਤਿਕਨ੍ਤਿ ਏਕੇਨ ਪਸ੍ਸੇਨ ਨਿਪਜ੍ਜਾਪੇਤ੍ਵਾ ਕਣ੍ਣਚ੍ਛਿਦ੍ਦੇਨ ਅਯਸੂਲਂ ਕੋਟ੍ਟੇਤ੍ਵਾ ਪਥਵਿਯਾ ਏਕਾਬਦ੍ਧਂ ਕਰੋਨ੍ਤਿ. ਅਥ ਨਂ ਪਾਦੇ ਗਹੇਤ੍ਵਾ ਆਵਿਞ੍ਛਨ੍ਤਿ. ਪਲਾਲਪੀਠਕਨ੍ਤਿ ਛੇਕੋ ਕਾਰਣਿਕੋ ਛਵਿਚਮ੍ਮਂ ਅਚ੍ਛਿਨ੍ਦਿਤ੍ਵਾ ਨਿਸਦਪੋਤੇਹਿ ਅਟ੍ਠੀਨਿ ਭਿਨ੍ਦਿਤ੍ਵਾ ਕੇਸੇਸੁ ਗਹੇਤ੍ਵਾ ਉਕ੍ਖਿਪਤਿ, ਮਂਸਰਾਸਿਯੇਵ ਹੋਤਿ. ਅਥ ਨਂ ਕੇਸੇਹੇਵ ਪਰਿਯੋਨਨ੍ਧਿਤ੍ਵਾ ਗਣ੍ਹਨ੍ਤਿ, ਪਲਾਲਵਟ੍ਟਿਂ ਵਿਯ ਕਤ੍ਵਾ ਪੁਨ ਵੇਠੇਨ੍ਤਿ. ਸੁਨਖੇਹਿਪੀਤਿ ਕਤਿਪਯਾਨਿ ਦਿਵਸਾਨਿ ਆਹਾਰਂ ਅਦਤ੍ਵਾ ਛਾਤਕਸੁਨਖੇਹਿ ਖਾਦਾਪੇਨ੍ਤਿ. ਤੇ ਮੁਹੁਤ੍ਤੇਨ ਅਟ੍ਠਿਕਸਙ੍ਖਲਿਕਮੇਵ ਕਰੋਨ੍ਤਿ. ਸੂਲੇ ਉਤ੍ਤਾਸੇਨ੍ਤੇਤਿ ਸੂਲੇ ਆਰੋਪੇਨ੍ਤੇ.

ਨ ਪਰੇਸਂ ਪਾਭਤਂ ਵਿਲੁਮ੍ਪਨ੍ਤੋ ਚਰਤੀਤਿ ਪਰੇਸਂ ਸਨ੍ਤਕਂ ਭਣ੍ਡਂ ਪਰਮ੍ਮੁਖਂ ਆਭਤਂ ਅਨ੍ਤਮਸੋ ਅਨ੍ਤਰਵੀਥਿਯਂ ਪਤਿਤਂ ਸਹਸ੍ਸਭਣ੍ਡਿਕਮ੍ਪਿ ਦਿਸ੍ਵਾ ‘‘ਇਮਿਨਾ ਜੀਵਿਸ੍ਸਾਮੀ’’ਤਿ ਵਿਲੁਮ੍ਪਨ੍ਤੋ ਨ ਵਿਚਰਤਿ, ਕੋ ਇਮਿਨਾ ਅਤ੍ਥੋਤਿ ਪਿਟ੍ਠਿਪਾਦੇਨ ਵਾ ਪਵਟ੍ਟੇਤ੍ਵਾ ਗਚ੍ਛਤਿ.

ਪਾਪਕੋਤਿ ਲਾਮਕੋ. ਦੁਕ੍ਖੋਤਿ ਅਨਿਟ੍ਠੋ. ਕਿਞ੍ਚ ਤਨ੍ਤਿ ਕਿਂ ਨਾਮ ਤਂ ਕਾਰਣਂ ਭਵੇਯ੍ਯ. ਯਾਹਨ੍ਤਿ ਯੇਨ ਅਹਂ. ਕਾਯਦੁਚ੍ਚਰਿਤਨ੍ਤਿ ਪਾਣਾਤਿਪਾਤਾਦਿ ਤਿਵਿਧਂ ਅਕੁਸਲਂ ਕਾਯਕਮ੍ਮਂ. ਕਾਯਸੁਚਰਿਤਨ੍ਤਿ ਤਸ੍ਸ ਪਟਿਪਕ੍ਖਭੂਤਂ ਤਿਵਿਧਂ ਕੁਸਲਕਮ੍ਮਂ. ਵਚੀਦੁਚ੍ਚਰਿਤਨ੍ਤਿ ਮੁਸਾਵਾਦਾਦਿ ਚਤੁਬ੍ਬਿਧਂ ਅਕੁਸਲਂ ਵਚੀਕਮ੍ਮਂ. ਵਚੀਸੁਚਰਿਤਨ੍ਤਿ ਤਸ੍ਸ ਪਟਿਪਕ੍ਖਭੂਤਂ ਚਤੁਬ੍ਬਿਧਂ ਕੁਸਲਕਮ੍ਮਂ. ਮਨੋਦੁਚ੍ਚਰਿਤਨ੍ਤਿ ਅਭਿਜ੍ਝਾਦਿ ਤਿਵਿਧਂ ਅਕੁਸਲਕਮ੍ਮਂ. ਮਨੋਸੁਚਰਿਤਨ੍ਤਿ ਤਸ੍ਸ ਪਟਿਪਕ੍ਖਭੂਤਂ ਤਿਵਿਧਂ ਕੁਸਲਕਮ੍ਮਂ. ਸੁਦ੍ਧਂ ਅਤ੍ਤਾਨਂ ਪਰਿਹਰਤੀਤਿ ਏਤ੍ਥ ਦੁਵਿਧਾ ਸੁਦ੍ਧਿ – ਪਰਿਯਾਯਤੋ ਚ ਨਿਪ੍ਪਰਿਯਾਯਤੋ ਚ. ਸਰਣਗਮਨੇਨ ਹਿ ਪਰਿਯਾਯੇਨ ਸੁਦ੍ਧਂ ਅਤ੍ਤਾਨਂ ਪਰਿਹਰਤਿ ਨਾਮ. ਤਥਾ ਪਞ੍ਚਹਿ ਸੀਲੇਹਿ, ਦਸਹਿ ਸੀਲੇਹਿ – ਚਤੁਪਾਰਿਸੁਦ੍ਧਿਸੀਲੇਨ, ਪਠਮਜ੍ਝਾਨੇਨ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨੇਨ, ਸੋਤਾਪਤ੍ਤਿਮਗ੍ਗੇਨ, ਸੋਤਾਪਤ੍ਤਿਫਲੇਨ…ਪੇ… ਅਰਹਤ੍ਤਮਗ੍ਗੇਨ ਪਰਿਯਾਯੇਨ ਸੁਦ੍ਧਂ ਅਤ੍ਤਾਨਂ ਪਰਿਹਰਤਿ ਨਾਮ. ਅਰਹਤ੍ਤਫਲੇ ਪਤਿਟ੍ਠਿਤੋ ਪਨ ਖੀਣਾਸਵੋ ਛਿਨ੍ਨਮੂਲਕੇ ਪਞ੍ਚਕ੍ਖਨ੍ਧੇ ਨ੍ਹਾਪੇਨ੍ਤੋਪਿ ਖਾਦਾਪੇਨ੍ਤੋਪਿ ਭੁਞ੍ਜਾਪੇਨ੍ਤੋਪਿ ਨਿਸੀਦਾਪੇਨ੍ਤੋਪਿ ਨਿਪਜ੍ਜਾਪੇਨ੍ਤੋਪਿ ਨਿਪ੍ਪਰਿਯਾਯੇਨੇਵ ਸੁਦ੍ਧਂ ਨਿਮ੍ਮਲਂ ਅਤ੍ਤਾਨਂ ਪਰਿਹਰਤਿ ਪਟਿਜਗ੍ਗਤੀਤਿ ਵੇਦਿਤਬ੍ਬੋ.

ਤਸ੍ਮਾਤਿ ਯਸ੍ਮਾ ਇਮਾਨਿ ਦ੍ਵੇ ਵਜ੍ਜਾਨੇਵ, ਨੋ ਨ ਵਜ੍ਜਾਨਿ, ਤਸ੍ਮਾ. ਵਜ੍ਜਭੀਰੁਨੋਤਿ ਵਜ੍ਜਭੀਰੁਕਾ. ਵਜ੍ਜਭਯਦਸ੍ਸਾਵਿਨੋਤਿ ਵਜ੍ਜਾਨਿ ਭਯਤੋ ਦਸ੍ਸਨਸੀਲਾ. ਏਤਂ ਪਾਟਿਕਙ੍ਖਨ੍ਤਿ ਏਤਂ ਇਚ੍ਛਿਤਬ੍ਬਂ, ਏਤਂ ਅਵਸ੍ਸਂਭਾਵੀਤਿ ਅਤ੍ਥੋ. ਯਨ੍ਤਿ ਨਿਪਾਤਮਤ੍ਤਂ, ਕਾਰਣਵਚਨਂ ਵਾ ਯੇਨ ਕਾਰਣੇਨ ਪਰਿਮੁਚ੍ਚਿਸ੍ਸਤਿ ਸਬ੍ਬਵਜ੍ਜੇਹਿ. ਕੇਨ ਪਨ ਕਾਰਣੇਨ ਪਰਿਮੁਚ੍ਚਿਸ੍ਸਤੀਤਿ? ਚਤੁਤ੍ਥਮਗ੍ਗੇਨ ਚੇਵ ਚਤੁਤ੍ਥਫਲੇਨ ਚ. ਮਗ੍ਗੇਨ ਹਿ ਪਰਿਮੁਚ੍ਚਤਿ ਨਾਮ, ਫਲਂ ਪਤ੍ਤੋ ਪਰਿਮੁਤ੍ਤੋ ਨਾਮ ਹੋਤੀਤਿ. ਕਿਂ ਪਨ ਖੀਣਾਸਵਸ੍ਸ ਅਕੁਸਲਂ ਨ ਵਿਪਚ੍ਚਤੀਤਿ? ਵਿਪਚ੍ਚਤਿ, ਤਂ ਪਨ ਖੀਣਾਸਵਭਾਵਤੋ ਪੁਬ੍ਬੇ ਕਤਂ. ਤਞ੍ਚ ਖੋ ਇਮਸ੍ਮਿਂਯੇਵ ਅਤ੍ਤਭਾਵੇ, ਸਮ੍ਪਰਾਯੇ ਪਨਸ੍ਸ ਕਮ੍ਮਫਲਂ ਨਾਮ ਨਤ੍ਥੀਤਿ. ਪਠਮਂ.

੨. ਪਧਾਨਸੁਤ੍ਤਵਣ੍ਣਨਾ

੨. ਦੁਤਿਯੇ ਪਧਾਨਾਨੀਤਿ ਵੀਰਿਯਾਨਿ. ਵੀਰਿਯਞ੍ਹਿ ਪਦਹਿਤਬ੍ਬਤੋ ਪਧਾਨਭਾਵਕਰਣਤੋ ਵਾ ਪਧਾਨਨ੍ਤਿ ਵੁਚ੍ਚਤਿ. ਦੁਰਭਿਸਮ੍ਭਵਾਨੀਤਿ ਦੁਸ੍ਸਹਾਨਿ ਦੁਪ੍ਪੂਰਿਯਾਨਿ, ਦੁਕ੍ਕਰਾਨੀਤਿ ਅਤ੍ਥੋ. ਅਗਾਰਂ ਅਜ੍ਝਾਵਸਤਨ੍ਤਿ ਅਗਾਰੇ ਵਸਨ੍ਤਾਨਂ. ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾਨੁਪ੍ਪਦਾਨਤ੍ਥਂ ਪਧਾਨਨ੍ਤਿ ਏਤੇਸਂ ਚੀਵਰਾਦੀਨਂ ਚਤੁਨ੍ਨਂ ਪਚ੍ਚਯਾਨਂ ਅਨੁਪ੍ਪਦਾਨਤ੍ਥਾਯ ਪਧਾਨਂ ਨਾਮ ਦੁਰਭਿਸਮ੍ਭਵਨ੍ਤਿ ਦਸ੍ਸੇਤਿ. ਚਤੁਰਤਨਿਕਮ੍ਪਿ ਹਿ ਪਿਲੋਤਿਕਂ, ਪਸਤਤਣ੍ਡੁਲਮਤ੍ਤਂ ਵਾ ਭਤ੍ਤਂ, ਚਤੁਰਤਨਿਕਂ ਵਾ ਪਣ੍ਣਸਾਲਂ, ਤੇਲਸਪ੍ਪਿਨਵਨੀਤਾਦੀਸੁ ਵਾ ਅਪ੍ਪਮਤ੍ਤਕਮ੍ਪਿ ਭੇਸਜ੍ਜਂ ਪਰੇਸਂ ਦੇਥਾਤਿ ਵਤ੍ਤੁਮ੍ਪਿ ਨੀਹਰਿਤ੍ਵਾ ਦਾਤੁਮ੍ਪਿ ਦੁਕ੍ਕਰਂ ਉਭਤੋਬ੍ਯੂਲ਼੍ਹਸਙ੍ਗਾਮਪ੍ਪਵੇਸਨਸਦਿਸਂ. ਤੇਨਾਹ ਭਗਵਾ –

‘‘ਦਾਨਞ੍ਚ ਯੁਦ੍ਧਞ੍ਚ ਸਮਾਨਮਾਹੁ,

ਅਪ੍ਪਾਪਿ ਸਨ੍ਤਾ ਬਹੁਕੇ ਜਿਨਨ੍ਤਿ;

ਅਪ੍ਪਮ੍ਪਿ ਚੇ ਸਦ੍ਦਹਾਨੋ ਦਦਾਤਿ,

ਤੇਨੇਵ ਸੋ ਹੋਤਿ ਸੁਖੀ ਪਰਤ੍ਥਾ’’ਤਿ. (ਜਾ. ੧.੮.੭੨; ਸਂ. ਨਿ. ੧.੩੩);

ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤਾਨਨ੍ਤਿ ਗੇਹਤੋ ਨਿਕ੍ਖਮਿਤ੍ਵਾ ਅਗਾਰਸ੍ਸ ਘਰਾਵਾਸਸ੍ਸ ਹਿਤਾਵਹੇਹਿ ਕਸਿਗੋਰਕ੍ਖਾਦੀਹਿ ਵਿਰਹਿਤਂ ਅਨਗਾਰਿਯਂ ਪਬ੍ਬਜ੍ਜਂ ਉਪਗਤਾਨਂ. ਸਬ੍ਬੂਪਧਿਪਟਿਨਿਸ੍ਸਗ੍ਗਤ੍ਥਾਯ ਪਧਾਨਨ੍ਤਿ ਸਬ੍ਬੇਸਂ ਖਨ੍ਧੂਪਧਿਕਿਲੇਸੂਪਧਿਅਭਿਸਙ੍ਖਾਰੂਪਧਿਸਙ੍ਖਾਤਾਨਂ ਉਪਧੀਨਂ ਪਟਿਨਿਸ੍ਸਗ੍ਗਸਙ੍ਖਾਤਸ੍ਸ ਨਿਬ੍ਬਾਨਸ੍ਸ ਅਤ੍ਥਾਯ ਵਿਪਸ੍ਸਨਾਯ ਚੇਵ ਮਗ੍ਗੇਨ ਚ ਸਹਜਾਤਵੀਰਿਯਂ. ਤਸ੍ਮਾਤਿ ਯਸ੍ਮਾ ਇਮਾਨਿ ਦ੍ਵੇ ਪਧਾਨਾਨਿ ਦੁਰਭਿਸਮ੍ਭਵਾਨਿ, ਤਸ੍ਮਾ. ਦੁਤਿਯਂ.

੩. ਤਪਨੀਯਸੁਤ੍ਤਵਣ੍ਣਨਾ

੩. ਤਤਿਯੇ ਤਪਨੀਯਾਤਿ ਇਧ ਚੇਵ ਸਮ੍ਪਰਾਯੇ ਚ ਤਪਨ੍ਤੀਤਿ ਤਪਨੀਯਾ. ਤਪ੍ਪਤੀਤਿ ਚਿਤ੍ਤਸਨ੍ਤਾਪੇਨ ਤਪ੍ਪਤਿ ਅਨੁਸੋਚਤਿ ਕਾਯਦੁਚ੍ਚਰਿਤਂ ਕਤ੍ਵਾ ਨਨ੍ਦਯਕ੍ਖੋ ਵਿਯ ਨਨ੍ਦਮਾਣਵੋ ਵਿਯ ਨਨ੍ਦਗੋਘਾਤਕੋ ਵਿਯ ਦੇਵਦਤ੍ਤੋ ਵਿਯ ਦ੍ਵੇਭਾਤਿਕਾ ਵਿਯ ਚ. ਤੇ ਕਿਰ ਗਾਵਂ ਵਧਿਤ੍ਵਾ ਮਂਸਂ ਦ੍ਵੇ ਕੋਟ੍ਠਾਸੇ ਅਕਂਸੁ. ਤਤੋ ਕਨਿਟ੍ਠੋ ਜੇਟ੍ਠਕਂ ਆਹ – ‘‘ਮਯ੍ਹਂ ਦਾਰਕਾ ਬਹੂ, ਇਮਾਨਿ ਮੇ ਅਨ੍ਤਾਨਿ ਦੇਹੀ’’ਤਿ. ਅਥ ਨਂ ਸੋ ‘‘ਸਬ੍ਬਂ ਮਂਸਂ ਦ੍ਵੇਧਾ ਵਿਭਤ੍ਤਂ, ਪੁਨ ਕਿਂ ਮਗ੍ਗਸੀ’’ਤਿ ਪਹਰਿਤ੍ਵਾ ਜੀਵਿਤਕ੍ਖਯਂ ਪਾਪੇਸਿ. ਨਿਵਤ੍ਤਿਤ੍ਵਾ ਚ ਨਂ ਓਲੋਕੇਨ੍ਤੋ ਮਤਂ ਦਿਸ੍ਵਾ ‘‘ਭਾਰਿਯਂ ਮੇ ਕਮ੍ਮਂ ਕਤ’’ਨ੍ਤਿ ਚਿਤ੍ਤਂ ਉਪ੍ਪਾਦੇਸਿ. ਅਥਸ੍ਸ ਬਲਵਸੋਕੋ ਉਪ੍ਪਜ੍ਜਿ. ਸੋ ਠਿਤਟ੍ਠਾਨੇਪਿ ਨਿਸਿਨ੍ਨਟ੍ਠਾਨੇਪਿ ਤਦੇਵ ਕਮ੍ਮਂ ਆਵਜ੍ਜੇਤਿ, ਚਿਤ੍ਤਸ੍ਸਾਦਂ ਨ ਲਭਤਿ. ਅਸਿਤਪੀਤਖਾਯਿਤਸਾਯਿਤਮ੍ਪਿਸ੍ਸ ਸਰੀਰੇ ਓਜਂ ਨ ਫਰਤਿ, ਅਟ੍ਠਿਚਮ੍ਮਮਤ੍ਤਮੇਵ ਅਹੋਸਿ. ਅਥ ਨਂ ਏਕੋ ਥੇਰੋ ਦਿਸ੍ਵਾ – ‘‘ਉਪਾਸਕ, ਤ੍ਵਂ ਪਹੂਤਅਨ੍ਨਪਾਨੋ, ਅਟ੍ਠਿਚਮ੍ਮਮਤ੍ਤਮੇਵ ਤੇ ਅਵਸਿਟ੍ਠਂ, ਅਤ੍ਥਿ ਨੁ ਖੋ ਤੇ ਕਿਞ੍ਚਿ ਤਪਨੀਯਕਮ੍ਮ’’ਨ੍ਤਿ? ਸੋ ‘‘ਆਮ, ਭਨ੍ਤੇ’’ਤਿ ਸਬ੍ਬਂ ਆਰੋਚੇਸਿ. ਅਥ ਨਂ ਥੇਰੋ ‘‘ਭਾਰਿਯਂ ਤੇ ਉਪਾਸਕ ਕਮ੍ਮਂ ਕਤਂ, ਅਨਪਰਾਧਟ੍ਠਾਨੇ ਅਪਰਦ੍ਧ’’ਨ੍ਤਿ ਆਹ. ਸੋ ਤੇਨੇਵ ਕਮ੍ਮੇਨ ਕਾਲਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤੋ. ਵਚੀਦੁਚ੍ਚਰਿਤੇਨ ਸੁਪ੍ਪਬੁਦ੍ਧਸਕ੍ਕਕੋਕਾਲਿਕਚਿਞ੍ਚਮਾਣਵਿਕਾਦਯੋ ਵਿਯ ਤਪ੍ਪਤਿ. ਸੇਸਮੇਤ੍ਥ ਚਤੁਤ੍ਥੇ ਚ ਉਤ੍ਤਾਨਤ੍ਥਮੇਵ. ਤਤਿਯਂ.

੫. ਉਪਞ੍ਞਾਤਸੁਤ੍ਤਵਣ੍ਣਨਾ

੫. ਪਞ੍ਚਮੇ ਦ੍ਵਿਨ੍ਨਾਹਨ੍ਤਿ ਦ੍ਵਿਨ੍ਨਂ ਅਹਂ. ਉਪਞ੍ਞਾਸਿਨ੍ਤਿ ਉਪਗਨ੍ਤ੍ਵਾ ਗੁਣਂ ਅਞ੍ਞਾਸਿਂ, ਜਾਨਿਂ ਪਟਿਵਿਜ੍ਝਿਨ੍ਤਿ ਅਤ੍ਥੋ. ਇਦਾਨਿ ਤੇ ਧਮ੍ਮੇ ਦਸ੍ਸੇਨ੍ਤੋ ਯਾ ਚ ਅਸਨ੍ਤੁਟ੍ਠਿਤਾਤਿਆਦਿਮਾਹ. ਇਮਞ੍ਹਿ ਧਮ੍ਮਦ੍ਵਯਂ ਨਿਸ੍ਸਾਯ ਸਤ੍ਥਾ ਸਬ੍ਬਞ੍ਞੁਤਂ ਪਤ੍ਤੋ, ਤਸ੍ਮਾ ਤਸ੍ਸਾਨੁਭਾਵਂ ਦਸ੍ਸੇਨ੍ਤੋ ਏਵਮਾਹ. ਤਤ੍ਥ ਅਸਨ੍ਤੁਟ੍ਠਿਤਾ ਕੁਸਲੇਸੁ ਧਮ੍ਮੇਸੂਤਿ ਇਮਿਨਾ ਇਮਂ ਦੀਪੇਤਿ – ‘‘ਅਹਂ ਝਾਨਮਤ੍ਤਕੇਨ ਵਾ ਓਭਾਸਨਿਮਿਤ੍ਤਮਤ੍ਤਕੇਨ ਵਾ ਅਸਨ੍ਤੁਟ੍ਠੋ ਹੁਤ੍ਵਾ ਅਰਹਤ੍ਤਮਗ੍ਗਮੇਵ ਉਪ੍ਪਾਦੇਸਿਂ. ਯਾਵ ਸੋ ਨ ਉਪ੍ਪਜ੍ਜਿ, ਨ ਤਾਵਾਹਂ ਸਨ੍ਤੁਟ੍ਠੋ ਅਹੋਸਿਂ. ਪਧਾਨਸ੍ਮਿਂ ਚ ਅਨੁਕ੍ਕਣ੍ਠਿਤੋ ਹੁਤ੍ਵਾ ਅਨੋਸਕ੍ਕਨਾਯ ਠਤ੍ਵਾਯੇਵ ਪਧਾਨਕਿਰਿਯਂ ਅਕਾਸਿ’’ਨ੍ਤਿ ਇਮਮਤ੍ਥਂ ਦਸ੍ਸੇਨ੍ਤੋ ਯਾ ਚ ਅਪ੍ਪਟਿਵਾਨਿਤਾਤਿਆਦਿਮਾਹ. ਤਤ੍ਥ ਅਪ੍ਪਟਿਵਾਨਿਤਾਤਿ ਅਪ੍ਪਟਿਕ੍ਕਮਨਾ ਅਨੋਸਕ੍ਕਨਾ. ਅਪ੍ਪਟਿਵਾਨੀ ਸੁਦਾਹਂ, ਭਿਕ੍ਖਵੇ, ਪਦਹਾਮੀਤਿ ਏਤ੍ਥ ਸੁਦਨ੍ਤਿ ਨਿਪਾਤਮਤ੍ਤਂ. ਅਹਂ, ਭਿਕ੍ਖਵੇ, ਅਨੋਸਕ੍ਕਨਾਯਂ ਠਿਤੋ ਬੋਧਿਸਤ੍ਤਕਾਲੇ ਸਬ੍ਬਞ੍ਞੁਤਂ ਪਤ੍ਥੇਨ੍ਤੋ ਪਧਾਨਮਕਾਸਿਨ੍ਤਿ ਅਯਮੇਤ੍ਥ ਅਤ੍ਥੋ.

ਇਦਾਨਿ ਯਥਾ ਤੇਨ ਤਂ ਪਧਾਨਂ ਕਤਂ, ਤਂ ਦਸ੍ਸੇਨ੍ਤੋ ਕਾਮਂ ਤਚੋ ਚਾਤਿਆਦਿਮਾਹ. ਤਤ੍ਥ ਪਤ੍ਤਬ੍ਬਨ੍ਤਿ ਇਮਿਨਾ ਪਤ੍ਤਬ੍ਬਂ ਗੁਣਜਾਤਂ ਦਸ੍ਸੇਤਿ. ਪੁਰਿਸਥਾਮੇਨਾਤਿਆਦਿਨਾ ਪੁਰਿਸਸ੍ਸ ਞਾਣਥਾਮੋ ਞਾਣਵੀਰਿਯਂ ਞਾਣਪਰਕ੍ਕਮੋ ਚ ਕਥਿਤੋ. ਸਣ੍ਠਾਨਨ੍ਤਿ ਠਪਨਾ ਅਪ੍ਪਵਤ੍ਤਨਾ ਓਸਕ੍ਕਨਾ, ਪਟਿਪ੍ਪਸ੍ਸਦ੍ਧੀਤਿ ਅਤ੍ਥੋ. ਏਤ੍ਤਾਵਤਾ ਤੇਨ ਚਤੁਰਙ੍ਗਸਮਨ੍ਨਾਗਤਂ ਵੀਰਿਯਾਧਿਟ੍ਠਾਨਂ ਨਾਮ ਕਥਿਤਂ. ਏਤ੍ਥ ਹਿ ਕਾਮਂ ਤਚੋ ਚਾਤਿ ਏਕਂ ਅਙ੍ਗਂ, ਨ੍ਹਾਰੁ ਚਾਤਿ ਏਕਂ, ਅਟ੍ਠਿ ਚਾਤਿ ਏਕਂ, ਮਂਸਲੋਹਿਤਨ੍ਤਿ ਏਕਂ, ਇਮਾਨਿ ਚਤ੍ਤਾਰਿ ਅਙ੍ਗਾਨਿ. ਪੁਰਿਸਥਾਮੇਨਾਤਿਆਦੀਨਿ ਅਧਿਮਤ੍ਤਵੀਰਿਯਾਧਿਵਚਨਾਨਿ. ਇਤਿ ਪੁਰਿਮੇਹਿ ਚਤੂਹਿ ਅਙ੍ਗੇਹਿ ਸਮਨ੍ਨਾਗਤੇਨ ਹੁਤ੍ਵਾ ਏਵਂ ਅਧਿਟ੍ਠਿਤਂ ਵੀਰਿਯਂ ਚਤੁਰਙ੍ਗਸਮਨ੍ਨਾਗਤਂ ਵੀਰਿਯਾਧਿਟ੍ਠਾਨਂ ਨਾਮਾਤਿ ਵੇਦਿਤਬ੍ਬਂ. ਏਤ੍ਤਾਵਤਾ ਤੇਨ ਬੋਧਿਪਲ੍ਲਙ੍ਕੇ ਅਤ੍ਤਨੋ ਆਗਮਨੀਯਪਟਿਪਦਾ ਕਥਿਤਾ.

ਇਦਾਨਿ ਤਾਯ ਪਟਿਪਦਾਯ ਪਟਿਲਦ੍ਧਗੁਣਂ ਕਥੇਤੁਂ ਤਸ੍ਸ ਮਯ੍ਹਂ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਅਪ੍ਪਮਾਦਾਧਿਗਤਾਤਿ ਸਤਿਅਵਿਪ੍ਪਵਾਸਸਙ੍ਖਾਤੇਨ ਅਪ੍ਪਮਾਦੇਨ ਅਧਿਗਤਾ, ਨ ਸੁਤ੍ਤਪ੍ਪਮਤ੍ਤੇਨ ਲਦ੍ਧਾ. ਸਮ੍ਬੋਧੀਤਿ ਚਤੁਮਗ੍ਗਞਾਣਞ੍ਚੇਵ ਸਬ੍ਬਞ੍ਞੁਤਞ੍ਞਾਣਞ੍ਚ. ਨ ਹਿ ਸਕ੍ਕਾ ਏਤਂ ਸੁਤ੍ਤਪ੍ਪਮਤ੍ਤੇਨ ਅਧਿਗਨ੍ਤੁਨ੍ਤਿ. ਤੇਨਾਹ – ‘‘ਅਪ੍ਪਮਾਦਾਧਿਗਤਾ ਸਮ੍ਬੋਧੀ’’ਤਿ. ਅਨੁਤ੍ਤਰੋ ਯੋਗਕ੍ਖੇਮੋਤਿ ਨ ਕੇਵਲਂ ਬੋਧਿਯੇਵ, ਅਰਹਤ੍ਤਫਲਨਿਬ੍ਬਾਨਸਙ੍ਖਾਤੋ ਅਨੁਤ੍ਤਰੋ ਯੋਗਕ੍ਖੇਮੋਪਿ ਅਪ੍ਪਮਾਦਾਧਿਗਤੋਵ.

ਇਦਾਨਿ ਅਤ੍ਤਨਾ ਪਟਿਲਦ੍ਧਗੁਣੇਸੁ ਭਿਕ੍ਖੁਸਙ੍ਘਂ ਸਮਾਦਪੇਨ੍ਤੋ ਤੁਮ੍ਹੇ ਚੇਪਿ ਭਿਕ੍ਖਵੇਤਿਆਦਿਮਾਹ. ਤਤ੍ਥ ਯਸ੍ਸਤ੍ਥਾਯਾਤਿ ਯਸ੍ਸ ਅਤ੍ਥਾਯ, ਯਂ ਉਪਸਮ੍ਪਜ੍ਜ ਵਿਹਰਿਤੁਕਾਮਾ ਹੁਤ੍ਵਾਤਿ ਅਤ੍ਥੋ. ਤਦਨੁਤ੍ਤਰਨ੍ਤਿ ਤਂ ਅਨੁਤ੍ਤਰਂ. ਬ੍ਰਹ੍ਮਚਰਿਯਪਰਿਯੋਸਾਨਨ੍ਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਪਰਿਯੋਸਾਨਭੂਤਂ ਅਰਿਯਫਲਂ. ਅਭਿਞ੍ਞਾ ਸਚ੍ਛਿਕਤ੍ਵਾਤਿ ਅਭਿਞ੍ਞਾਯ ਉਤ੍ਤਮਪਞ੍ਞਾਯ ਪਚ੍ਚਕ੍ਖਂ ਕਤ੍ਵਾ. ਉਪਸਮ੍ਪਜ੍ਜ ਵਿਹਰਿਸ੍ਸਥਾਤਿ ਪਟਿਲਭਿਤ੍ਵਾ ਪਾਪੁਣਿਤ੍ਵਾ ਵਿਹਰਿਸ੍ਸਥ. ਤਸ੍ਮਾਤਿ ਯਸ੍ਮਾ ਅਪ੍ਪਟਿਵਾਨਪਧਾਨਂ ਨਾਮੇਤਂ ਬਹੂਪਕਾਰਂ ਉਤ੍ਤਮਤ੍ਥਸਾਧਕਂ, ਤਸ੍ਮਾ. ਪਞ੍ਚਮਂ.

੬. ਸਂਯੋਜਨਸੁਤ੍ਤਵਣ੍ਣਨਾ

੬. ਛਟ੍ਠੇ ਸਂਯੋਜਨਿਯੇਸੁ ਧਮ੍ਮੇਸੂਤਿ ਦਸਨ੍ਨਂ ਸਂਯੋਜਨਾਨਂ ਪਚ੍ਚਯਭੂਤੇਸੁ ਤੇਭੂਮਕਧਮ੍ਮੇਸੁ. ਅਸ੍ਸਾਦਾਨੁਪਸ੍ਸਿਤਾਤਿ ਅਸ੍ਸਾਦਤੋ ਪਸ੍ਸਿਤਾ ਪਸ੍ਸਨਭਾਵੋਤਿ ਅਤ੍ਥੋ. ਨਿਬ੍ਬਿਦਾਨੁਪਸ੍ਸਿਤਾਤਿ ਨਿਬ੍ਬਿਦਾਵਸੇਨ ਉਕ੍ਕਣ੍ਠਨਵਸੇਨ ਪਸ੍ਸਨਭਾਵੋ. ਜਾਤਿਯਾਤਿ ਖਨ੍ਧਨਿਬ੍ਬਤ੍ਤਿਤੋ. ਜਰਾਯਾਤਿ ਖਨ੍ਧਪਰਿਪਾਕਤੋ. ਮਰਣੇਨਾਤਿ ਖਨ੍ਧਭੇਦਤੋ. ਸੋਕੇਹੀਤਿ ਅਨ੍ਤੋਨਿਜ੍ਝਾਯਨਲਕ੍ਖਣੇਹਿ ਸੋਕੇਹਿ. ਪਰਿਦੇਵੇਹੀਤਿ ਤਨ੍ਨਿਸ੍ਸਿਤਲਾਲਪ੍ਪਿਤਲਕ੍ਖਣੇਹਿ ਪਰਿਦੇਵੇਹਿ. ਦੁਕ੍ਖੇਹੀਤਿ ਕਾਯਪਟਿਪੀਲ਼ਨਦੁਕ੍ਖੇਹਿ. ਦੋਮਨਸ੍ਸੇਹੀਤਿ ਮਨੋਵਿਘਾਤਦੋਮਨਸ੍ਸੇਹਿ. ਉਪਾਯਾਸੇਹੀਤਿ ਅਧਿਮਤ੍ਤਾਯਾਸਲਕ੍ਖਣਉਪਾਯਾਸੇਹਿ. ਦੁਕ੍ਖਸ੍ਮਾਤਿ ਸਕਲਵਟ੍ਟਦੁਕ੍ਖਤੋ. ਪਜਹਤੀਤਿ ਮਗ੍ਗੇਨ ਪਜਹਤਿ. ਪਹਾਯਾਤਿ ਏਤ੍ਥ ਪਨ ਫਲਕ੍ਖਣੋ ਕਥਿਤੋ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ. ਛਟ੍ਠਂ.

੭. ਕਣ੍ਹਸੁਤ੍ਤਵਣ੍ਣਨਾ

੭. ਸਤ੍ਤਮੇ ਕਣ੍ਹਾਤਿ ਨ ਕਾਲ਼ਵਣ੍ਣਤਾਯ ਕਣ੍ਹਾ, ਕਣ੍ਹਤਾਯ ਪਨ ਉਪਨੇਨ੍ਤੀਤਿ ਨਿਪ੍ਫਤ੍ਤਿਕਾਲ਼ਤਾਯ ਕਣ੍ਹਾ. ਸਰਸੇਨਾਪਿ ਵਾ ਸਬ੍ਬਾਕੁਸਲਧਮ੍ਮਾ ਕਣ੍ਹਾ ਏਵ. ਨ ਹਿ ਤੇਸਂ ਉਪ੍ਪਤ੍ਤਿਯਾ ਚਿਤ੍ਤਂ ਪਭਸ੍ਸਰਂ ਹੋਤਿ. ਅਹਿਰਿਕਨ੍ਤਿ ਅਹਿਰਿਕਭਾਵੋ. ਅਨੋਤ੍ਤਪ੍ਪਨ੍ਤਿ ਅਨੋਤ੍ਤਾਪਿਭਾਵੋ. ਸਤ੍ਤਮਂ.

੮. ਸੁਕ੍ਕਸੁਤ੍ਤਵਣ੍ਣਨਾ

੮. ਅਟ੍ਠਮੇ ਸੁਕ੍ਕਾਤਿ ਨ ਵਣ੍ਣਸੁਕ੍ਕਤਾਯ ਸੁਕ੍ਕਾ, ਸੁਕ੍ਕਤਾਯ ਪਨ ਉਪਨੇਨ੍ਤੀਤਿ ਨਿਪ੍ਫਤ੍ਤਿਸੁਕ੍ਕਤਾਯ ਸੁਕ੍ਕਾ. ਸਰਸੇਨਾਪਿ ਵਾ ਸਬ੍ਬਕੁਸਲਧਮ੍ਮਾ ਸੁਕ੍ਕਾ ਏਵ. ਤੇਸਂ ਹਿ ਉਪ੍ਪਤ੍ਤਿਯਾ ਚਿਤ੍ਤਂ ਪਭਸ੍ਸਰਂ ਹੋਤਿ. ਹਿਰੀ ਚ ਓਤ੍ਤਪ੍ਪਞ੍ਚਾਤਿ ਏਤ੍ਥ ਪਾਪਤੋ ਜਿਗੁਚ੍ਛਨਲਕ੍ਖਣਾ ਹਿਰੀ, ਭਾਯਨਲਕ੍ਖਣਂ ਓਤ੍ਤਪ੍ਪਂ. ਯਂ ਪਨੇਤ੍ਥ ਵਿਤ੍ਥਾਰਤੋ ਵਤ੍ਤਬ੍ਬਂ ਸਿਯਾ, ਤਂ ਵਿਸੁਦ੍ਧਿਮਗ੍ਗੇ ਵੁਤ੍ਤਮੇਵ. ਅਟ੍ਠਮਂ.

੯. ਚਰਿਯਸੁਤ੍ਤਵਣ੍ਣਨਾ

੯. ਨਵਮੇ ਲੋਕਂ ਪਾਲੇਨ੍ਤੀਤਿ ਲੋਕਂ ਸਨ੍ਧਾਰੇਨ੍ਤਿ ਠਪੇਨ੍ਤਿ ਰਕ੍ਖਨ੍ਤਿ. ਨਯਿਧ ਪਞ੍ਞਾਯੇਥ ਮਾਤਾਤਿ ਇਮਸ੍ਮਿਂ ਲੋਕੇ ਜਨਿਕਾ ਮਾਤਾ ‘‘ਅਯਂ ਮੇ ਮਾਤਾ’’ਤਿ ਗਰੁਚਿਤ੍ਤੀਕਾਰਵਸੇਨ ਨ ਪਞ੍ਞਾਯੇਥ. ਸੇਸਪਦੇਸੁਪਿ ਏਸੇਵ ਨਯੋ. ਸਮ੍ਭੇਦਨ੍ਤਿ ਸਙ੍ਕਰਂ ਮਰਿਯਾਦਭੇਦਂ ਵਾ. ਯਥਾ ਅਜੇਲ਼ਕਾਤਿਆਦੀਸੁ ਏਤੇ ਹਿ ਸਤ੍ਤਾ ‘‘ਅਯਂ ਮੇ ਮਾਤਾ’’ਤਿ ਵਾ ‘‘ਮਾਤੁਚ੍ਛਾ’’ਤਿ ਵਾ ਗਰੁਚਿਤ੍ਤੀਕਾਰਵਸੇਨ ਨ ਜਾਨਨ੍ਤਿ. ਯਂ ਵਤ੍ਥੁਂ ਨਿਸ੍ਸਾਯ ਉਪ੍ਪਨ੍ਨਾ, ਤਤ੍ਥੇਵ ਵਿਪ੍ਪਟਿਪਜ੍ਜਨ੍ਤਿ. ਤਸ੍ਮਾ ਉਪਮਂ ਆਹਰਨ੍ਤੋ ‘‘ਯਥਾ ਅਜੇਲ਼ਕਾ’’ਤਿਆਦਿਮਾਹ. ਨਵਮਂ.

੧੦. ਵਸ੍ਸੂਪਨਾਯਿਕਸੁਤ੍ਤਵਣ੍ਣਨਾ

੧੦. ਦਸਮਂ ਅਟ੍ਠੁਪ੍ਪਤ੍ਤਿਯਂ ਵੁਤ੍ਤਂ. ਕਤਰਅਟ੍ਠੁਪ੍ਪਤ੍ਤਿਯਂ? ਮਨੁਸ੍ਸਾਨਂ ਉਜ੍ਝਾਯਨੇ. ਭਗਵਤਾ ਹਿ ਪਠਮਬੋਧਿਯਂ ਵੀਸਤਿ ਵਸ੍ਸਾਨਿ ਵਸ੍ਸੂਪਨਾਯਿਕਾ ਅਪ੍ਪਞ੍ਞਤ੍ਤਾ ਅਹੋਸਿ. ਭਿਕ੍ਖੂ ਅਨਿਬਦ੍ਧਵਾਸਾ ਵਸ੍ਸੇਪਿ ਉਤੁਵਸ੍ਸੇਪਿ ਯਥਾਸੁਖਂ ਵਿਚਰਿਂਸੁ. ਤੇ ਦਿਸ੍ਵਾ ਮਨੁਸ੍ਸਾ ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਹੇਮਨ੍ਤਮ੍ਪਿ ਗਿਮ੍ਹਮ੍ਪਿ ਵਸ੍ਸਮ੍ਪਿ ਚਾਰਿਕਂ ਚਰਿਸ੍ਸਨ੍ਤਿ ਹਰਿਤਾਨਿ ਤਿਣਾਨਿ ਸਮ੍ਮਦ੍ਦਨ੍ਤਾ ਏਕਿਨ੍ਦ੍ਰਿਯਂ ਜੀਵਂ ਵਿਹੇਠੇਨ੍ਤਾ ਬਹੂ ਖੁਦ੍ਦਕੇ ਪਾਣੇ ਸਙ੍ਘਾਤਂ ਆਪਾਦੇਨ੍ਤਾ. ਇਮੇ ਹਿ ਨਾਮ ਅਞ੍ਞਤਿਤ੍ਥਿਯਾ ਦੁਰਕ੍ਖਾਤਧਮ੍ਮਾ ਵਸ੍ਸਾਵਾਸਂ ਅਲ੍ਲੀਯਿਸ੍ਸਨ੍ਤਿ ਸਂਕਸਾਯਿਸ੍ਸਨ੍ਤਿ, ਇਮੇ ਨਾਮ ਸਕੁਣਾ ਰੁਕ੍ਖਗ੍ਗੇਸੁ ਕੁਲਾਵਕਾਨਿ ਕਤ੍ਵਾ ਵਸ੍ਸਾਵਾਸਂ ਅਲ੍ਲੀਯਿਸ੍ਸਨ੍ਤਿ ਸਂਕਸਾਯਿਸ੍ਸਨ੍ਤੀ’’ਤਿਆਦੀਨਿ ਵਤ੍ਵਾ ਉਜ੍ਝਾਯਿਂਸੁ. ਤਮਤ੍ਥਂ ਭਿਕ੍ਖੂ ਭਗਵਤੋ ਆਰੋਚੇਸੁਂ. ਭਗਵਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਇਮਂ ਸੁਤ੍ਤਂ ਦੇਸੇਨ੍ਤੋ ਪਠਮਂ ਤਾਵ ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤੁ’’ਨ੍ਤਿ (ਮਹਾਵ. ੧੮੪) ਏਤ੍ਤਕਮੇਵਾਹ. ਅਥ ਭਿਕ੍ਖੂਨਂ ‘‘ਕਦਾ ਨੁ ਖੋ ਵਸ੍ਸਂ ਉਪਗਨ੍ਤਬ੍ਬ’’ਨ੍ਤਿ ਉਪ੍ਪਨ੍ਨਂ ਵਿਤਕ੍ਕਂ ਸੁਤ੍ਵਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਾਨੇ ਵਸ੍ਸਂ ਉਪਗਨ੍ਤੁ’’ਨ੍ਤਿ ਆਹ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਤਿ ਨੁ ਖੋ ਵਸ੍ਸੂਪਨਾਯਿਕਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਤਂ ਸੁਤ੍ਵਾ ਸਕਲਮ੍ਪਿ ਇਦਂ ਸੁਤ੍ਤਂ ਦੇਸੇਨ੍ਤੋ ਦ੍ਵੇਮਾ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਵਸ੍ਸੂਪਨਾਯਿਕਾਤਿ ਵਸ੍ਸੂਪਗਮਨਾਨਿ. ਪੁਰਿਮਿਕਾਤਿ ਅਪਰਜ੍ਜੁਗਤਾਯ ਆਸਾਲ਼੍ਹਿਯਾ ਉਪਗਨ੍ਤਬ੍ਬਾ ਪੁਰਿਮਕਤ੍ਤਿਕਪੁਣ੍ਣਮਿਪਰਿਯੋਸਾਨਾ ਪਠਮਾ ਤੇਮਾਸੀ. ਪਚ੍ਛਿਮਿਕਾਤਿ ਮਾਸਗਤਾਯ ਆਸਾਲ਼੍ਹਿਯਾ ਉਪਗਨ੍ਤਬ੍ਬਾ ਪਚ੍ਛਿਮਕਤ੍ਤਿਕਪਰਿਯੋਸਾਨਾ ਪਚ੍ਛਿਮਾ ਤੇਮਾਸੀਤਿ. ਦਸਮਂ.

ਕਮ੍ਮਕਾਰਣਵਗ੍ਗੋ ਪਠਮੋ.

੨. ਅਧਿਕਰਣਵਗ੍ਗਵਣ੍ਣਨਾ

੧੧. ਦੁਤਿਯਸ੍ਸ ਪਠਮੇ ਬਲਾਨੀਤਿ ਕੇਨਟ੍ਠੇਨ ਬਲਾਨਿ. ਅਕਮ੍ਪਿਯਟ੍ਠੇਨ ਬਲਾਨਿ ਨਾਮ, ਤਥਾ ਦੁਰਭਿਭਵਨਟ੍ਠੇਨ ਅਨਜ੍ਝੋਮਦ੍ਦਨਟ੍ਠੇਨ ਚ. ਪਟਿਸਙ੍ਖਾਨਬਲਨ੍ਤਿ ਪਚ੍ਚਵੇਕ੍ਖਣਬਲਂ. ਭਾਵਨਾਬਲਨ੍ਤਿ ਬ੍ਰੂਹਨਬਲਂ ਵਡ੍ਢਨਬਲਂ. ਸੁਦ੍ਧਂ ਅਤ੍ਤਾਨਨ੍ਤਿ ਇਦਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਤਤ੍ਰਾਤਿ ਤੇਸੁ ਦ੍ਵੀਸੁ ਬਲੇਸੁ. ਯਮਿਦਨ੍ਤਿ ਯਂ ਇਦਂ. ਸੇਖਾਨਮੇਤਂ ਬਲਨ੍ਤਿ ਸਤ੍ਤਨ੍ਨਂ ਸੇਖਾਨਂ ਞਾਣਬਲਮੇਤਂ. ਸੇਖਞ੍ਹਿ ਸੋ, ਭਿਕ੍ਖਵੇ, ਬਲਂ ਆਗਮ੍ਮਾਤਿ ਸਤ੍ਤਨ੍ਨਂ ਸੇਖਾਨਂ ਞਾਣਬਲਂ ਆਰਬ੍ਭ ਸਨ੍ਧਾਯ ਪਟਿਚ੍ਚ. ਪਜਹਤੀਤਿ ਮਗ੍ਗੇਨ ਪਜਹਤਿ. ਪਹਾਯਾਤਿ ਇਮਿਨਾ ਪਨ ਫਲਂ ਕਥਿਤਂ. ਯਂ ਪਾਪਨ੍ਤਿ ਯਂ ਪਾਪਕਂ ਲਾਮਕਂ. ਯਸ੍ਮਾ ਪਨੇਤਾਨਿ ਦ੍ਵੇਪਿ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਤਸ੍ਮਾ ਏਤ੍ਥ ਏਤਦਗ੍ਗਂ ਨਾਗਤਨ੍ਤਿ ਵੇਦਿਤਬ੍ਬਂ.

੧੨. ਦੁਤਿਯੇ ਸਤਿਸਮ੍ਬੋਜ੍ਝਙ੍ਗਂ ਭਾਵੇਤੀਤਿਆਦੀਸੁ ਅਯਂ ਹੇਟ੍ਠਾ ਅਨਾਗਤਾਨਂ ਪਦਾਨਂ ਵਸੇਨ ਅਤ੍ਥਵਣ੍ਣਨਾ – ਵਿਵੇਕਨਿਸ੍ਸਿਤਨ੍ਤਿ ਵਿਵੇਕਂ ਨਿਸ੍ਸਿਤਂ. ਵਿਵੇਕੋਤਿ ਵਿਵਿਤ੍ਤਤਾ. ਸ੍ਵਾਯਂ ਤਦਙ੍ਗਵਿਵੇਕੋ ਵਿਕ੍ਖਮ੍ਭਨ-ਸਮੁਚ੍ਛੇਦ-ਪਟਿਪ੍ਪਸ੍ਸਦ੍ਧਿ-ਨਿਸ੍ਸਰਣਵਿਵੇਕੋਤਿ ਪਞ੍ਚਵਿਧੋ. ਤਸ੍ਮਿਂ ਪਞ੍ਚਵਿਧੇ ਵਿਵੇਕੇ. ਵਿਵੇਕਨਿਸ੍ਸਿਤਨ੍ਤਿ ਤਦਙ੍ਗਵਿਵੇਕਨਿਸ੍ਸਿਤਂ, ਸਮੁਚ੍ਛੇਦਵਿਵੇਕਨਿਸ੍ਸਿਤਂ, ਨਿਸ੍ਸਰਣਵਿਵੇਕਨਿਸ੍ਸਿਤਞ੍ਚ ਸਤਿਸਮ੍ਬੋਜ੍ਝਙ੍ਗਂ ਭਾਵੇਤੀਤਿ ਅਯਮਤ੍ਥੋ ਵੇਦਿਤਬ੍ਬੋ. ਤਥਾ ਹਿ ਸਤਿਸਮ੍ਬੋਜ੍ਝਙ੍ਗਭਾਵਨਾਨੁਯੁਤ੍ਤੋ ਯੋਗੀ ਵਿਪਸ੍ਸਨਾਕ੍ਖਣੇ ਕਿਚ੍ਚਤੋ ਤਦਙ੍ਗਵਿਵੇਕਨਿਸ੍ਸਿਤਂ, ਅਜ੍ਝਾਸਯਤੋ ਨਿਸ੍ਸਰਣਵਿਵੇਕਨਿਸ੍ਸਿਤਂ, ਮਗ੍ਗਕਾਲੇ ਪਨ ਕਿਚ੍ਚਤੋ ਸਮੁਚ੍ਛੇਦਵਿਵੇਕਨਿਸ੍ਸਿਤਂ, ਆਰਮ੍ਮਣਤੋ ਨਿਸ੍ਸਰਣਵਿਵੇਕਨਿਸ੍ਸਿਤਂ ਸਤਿਸਮ੍ਬੋਜ੍ਝਙ੍ਗਂ ਭਾਵੇਤਿ. ਪਞ੍ਚਵਿਧਵਿਵੇਕਨਿਸ੍ਸਿਤਮ੍ਪੀਤਿ ਏਕੇ. ਤੇ ਹਿ ਨ ਕੇਵਲਂ ਬਲਵਵਿਪਸ੍ਸਨਾਮਗ੍ਗਫਲਕ੍ਖਣੇਸੁਯੇਵ ਬੋਜ੍ਝਙ੍ਗੇ ਉਦ੍ਧਰਨ੍ਤਿ, ਵਿਪਸ੍ਸਨਾਪਾਦਕਕਸਿਣਜ੍ਝਾਨਆਨਾਪਾਨਾਸੁਭਬ੍ਰਹ੍ਮਵਿਹਾਰਜ੍ਝਾਨੇਸੁਪਿ ਉਦ੍ਧਰਨ੍ਤਿ, ਨ ਚ ਪਟਿਸਿਦ੍ਧਾ ਅਟ੍ਠਕਥਾਚਰਿਯੇਹਿ. ਤਸ੍ਮਾ ਤੇਸਂ ਮਤੇਨ ਏਤੇਸਂ ਝਾਨਾਨਂ ਪਵਤ੍ਤਿਕ੍ਖਣੇ ਕਿਚ੍ਚਤੋ ਏਵ ਵਿਕ੍ਖਮ੍ਭਨਵਿਵੇਕਨਿਸ੍ਸਿਤਂ. ਯਥਾ ਚ ‘‘ਵਿਪਸ੍ਸਨਾਕ੍ਖਣੇ ਅਜ੍ਝਾਸਯਤੋ ਨਿਸ੍ਸਰਣਵਿਵੇਕਨਿਸ੍ਸਿਤ’’ਨ੍ਤਿ ਵੁਤ੍ਤਂ, ਏਵਂ ‘‘ਪਟਿਪ੍ਪਸ੍ਸਦ੍ਧਿਵਿਵੇਕਨਿਸ੍ਸਿਤਮ੍ਪਿ ਭਾਵੇਤੀ’’ਤਿ ਵਤ੍ਤੁਂ ਵਟ੍ਟਤਿ. ਏਸ ਨਯੋ ਵਿਰਾਗਨਿਸ੍ਸਿਤਨ੍ਤਿਆਦੀਸੁ. ਵਿਵੇਕਤ੍ਥਾ ਏਵ ਹਿ ਵਿਰਾਗਾਦਯੋ.

ਕੇਵਲਂ ਹੇਤ੍ਥ ਵੋਸ੍ਸਗ੍ਗੋ ਦੁਵਿਧੋ ਪਰਿਚ੍ਚਾਗਵੋਸ੍ਸਗ੍ਗੋ ਚ ਪਕ੍ਖਨ੍ਦਨਵੋਸ੍ਸਗ੍ਗੋ ਚਾਤਿ. ਤਤ੍ਥ ਪਰਿਚ੍ਚਾਗਵੋਸ੍ਸਗ੍ਗੋਤਿ ਵਿਪਸ੍ਸਨਾਕ੍ਖਣੇ ਚ ਤਦਙ੍ਗਵਸੇਨ, ਮਗ੍ਗਕ੍ਖਣੇ ਚ ਸਮੁਚ੍ਛੇਦਵਸੇਨ ਕਿਲੇਸਪ੍ਪਹਾਨਂ. ਪਕ੍ਖਨ੍ਦਨਵੋਸ੍ਸਗ੍ਗੋਤਿ ਵਿਪਸ੍ਸਨਾਕ੍ਖਣੇ ਤਨ੍ਨਿਨ੍ਨਭਾਵੇਨ, ਮਗ੍ਗਕ੍ਖਣੇ ਪਨ ਆਰਮ੍ਮਣਕਰਣੇਨ ਨਿਬ੍ਬਾਨਪਕ੍ਖਨ੍ਦਨਂ. ਤਦੁਭਯਮ੍ਪਿ ਇਮਸ੍ਮਿਂ ਲੋਕਿਯਲੋਕੁਤ੍ਤਰਮਿਸ੍ਸਕੇ ਅਤ੍ਥਵਣ੍ਣਨਾਨਯੇ ਵਟ੍ਟਤਿ. ਤਥਾ ਹਿ ਅਯਂ ਸਤਿਸਮ੍ਬੋਜ੍ਝਙ੍ਗੋ ਯਥਾਵੁਤ੍ਤੇਨ ਪਕਾਰੇਨ ਕਿਲੇਸੇ ਪਰਿਚ੍ਚਜਤਿ, ਨਿਬ੍ਬਾਨਞ੍ਚ ਪਕ੍ਖਨ੍ਦਤਿ. ਵੋਸ੍ਸਗ੍ਗਪਰਿਣਾਮਿਨ੍ਤਿ ਇਮਿਨਾ ਪਨ ਸਕਲੇਨ ਵਚਨੇਨ ਵੋਸ੍ਸਗ੍ਗਤ੍ਥਂ ਪਰਿਣਮਨ੍ਤਂ ਪਰਿਣਤਞ੍ਚ, ਪਰਿਪਚ੍ਚਨ੍ਤਂ ਪਰਿਪਕ੍ਕਞ੍ਚਾਤਿ ਇਦਂ ਵੁਤ੍ਤਂ ਹੋਤਿ. ਅਯਞ੍ਹਿ ਬੋਜ੍ਝਙ੍ਗਭਾਵਨਾਨੁਯੁਤ੍ਤੋ ਭਿਕ੍ਖੁ ਯਥਾ ਸਤਿਸਮ੍ਬੋਜ੍ਝਙ੍ਗੋ ਕਿਲੇਸਪਰਿਚ੍ਚਾਗਵੋਸ੍ਸਗ੍ਗਤ੍ਥਂ ਨਿਬ੍ਬਾਨਪਕ੍ਖਨ੍ਦਨਵੋਸ੍ਸਗ੍ਗਤ੍ਥਞ੍ਚ ਪਰਿਪਚ੍ਚਤਿ, ਯਥਾ ਚ ਪਰਿਪਕ੍ਕੋ ਹੋਤਿ, ਤਥਾ ਨਂ ਭਾਵੇਤੀਤਿ. ਏਸ ਨਯੋ ਸੇਸਬੋਜ੍ਝਙ੍ਗੇਸੁ.

ਇਧ ਪਨ ਨਿਬ੍ਬਾਨਂਯੇਵ ਸਬ੍ਬਸਙ੍ਖਤੇਹਿ ਵਿਵਿਤ੍ਤਤ੍ਤਾ ਵਿਵੇਕੋ, ਸਬ੍ਬੇਸਂ ਵਿਰਾਗਭਾਵਤੋ ਵਿਰਾਗੋ, ਨਿਰੋਧਭਾਵਤੋ ਨਿਰੋਧੋਤਿ ਵੁਤ੍ਤਂ. ਮਗ੍ਗੋ ਏਵ ਚ ਵੋਸ੍ਸਗ੍ਗਪਰਿਣਾਮੀ, ਤਸ੍ਮਾ ਸਤਿਸਮ੍ਬੋਜ੍ਝਙ੍ਗਂ ਭਾਵੇਤਿ ਵਿਵੇਕਂ ਆਰਮ੍ਮਣਂ ਕਤ੍ਵਾ ਪਵਤ੍ਤਿਯਾ ਵਿਵੇਕਨਿਸ੍ਸਿਤਂ, ਤਥਾ ਵਿਰਾਗਨਿਸ੍ਸਿਤਂ ਨਿਰੋਧਨਿਸ੍ਸਿਤਂ. ਤਞ੍ਚ ਖੋ ਅਰਿਯਮਗ੍ਗਕ੍ਖਣੁਪ੍ਪਤ੍ਤਿਯਾ ਕਿਲੇਸਾਨਂ ਸਮੁਚ੍ਛੇਦਤੋ ਪਰਿਚ੍ਚਾਗਭਾਵੇਨ ਚ ਨਿਬ੍ਬਾਨਪਕ੍ਖਨ੍ਦਨਭਾਵੇਨ ਚ ਪਰਿਣਤਂ ਪਰਿਪਕ੍ਕਨ੍ਤਿ ਅਯਮੇਵ ਅਤ੍ਥੋ ਦਟ੍ਠਬ੍ਬੋ. ਏਸ ਨਯੋ ਸੇਸਬੋਜ੍ਝਙ੍ਗੇਸੁ. ਇਤਿ ਇਮੇ ਸਤ੍ਤ ਬੋਜ੍ਝਙ੍ਗਾ ਲੋਕਿਯਲੋਕੁਤ੍ਤਰਮਿਸ੍ਸਕਾ ਕਥਿਤਾ. ਇਮੇਸੁਪਿ ਦ੍ਵੀਸੁ ਬਲੇਸੁ ਏਤਦਗ੍ਗਭਾਵੋ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

੧੩. ਤਤਿਯੇ ਵਿਵਿਚ੍ਚੇਵ ਕਾਮੇਹੀਤਿਆਦੀਨਂ ਚਤੁਨ੍ਨਂ ਝਾਨਾਨਂ ਪਾਲ਼ਿਅਤ੍ਥੋ ਚ ਭਾਵਨਾਨਯੋ ਚ ਸਬ੍ਬੋ ਸਬ੍ਬਾਕਾਰੇਨ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੬੯-੭੦) ਵਿਤ੍ਥਾਰਿਤੋਯੇਵ. ਇਮਾਨਿ ਪਨ ਚਤ੍ਤਾਰਿ ਝਾਨਾਨਿ ਏਕੋ ਭਿਕ੍ਖੁ ਚਿਤ੍ਤੇਕਗ੍ਗਤ੍ਥਾਯ ਭਾਵੇਤਿ, ਏਕੋ ਵਿਪਸ੍ਸਨਾਪਾਦਕਤ੍ਥਾਯ, ਏਕੋ ਅਭਿਞ੍ਞਾਪਾਦਕਤ੍ਥਾਯ, ਏਕੋ ਨਿਰੋਧਪਾਦਕਤ੍ਥਾਯ, ਏਕੋ ਭਵਵਿਸੇਸਤ੍ਥਾਯ. ਇਧ ਪਨ ਤਾਨਿਪਿ ਵਿਪਸ੍ਸਨਾਪਾਦਕਾਨਿ ਅਧਿਪ੍ਪੇਤਾਨਿ. ਅਯਂ ਹਿ ਭਿਕ੍ਖੁ ਇਮਾਨਿ ਝਾਨਾਨਿ ਸਮਾਪਜ੍ਜਿਤ੍ਵਾ ਸਮਾਪਤ੍ਤਿਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਿਤ੍ਵਾ ਹੇਤੁਪਚ੍ਚਯਪਰਿਗ੍ਗਹਂ ਕਤ੍ਵਾ ਸਪ੍ਪਚ੍ਚਯਂ ਨਾਮਰੂਪਞ੍ਚ ਵਵਤ੍ਥਪੇਤ੍ਵਾ ਇਨ੍ਦ੍ਰਿਯਬਲਬੋਜ੍ਝਙ੍ਗਾਨਿ ਸਮੋਧਾਨੇਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਏਵਮੇਤਾਨਿ ਝਾਨਾਨਿ ਲੋਕਿਯਲੋਕੁਤ੍ਤਰਮਿਸ੍ਸਕਾਨੇਵ ਕਥਿਤਾਨਿ. ਇਮਸ੍ਮਿਮ੍ਪਿ ਬਲਦ੍ਵਯੇ ਏਤਦਗ੍ਗਭਾਵੋ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

੧੪. ਚਤੁਤ੍ਥੇ ਸਂਖਿਤ੍ਤੇਨ ਚ ਵਿਤ੍ਥਾਰੇਨ ਚਾਤਿ ਸਂਖਿਤ੍ਤਧਮ੍ਮਦੇਸਨਾ ਵਿਤ੍ਥਾਰਧਮ੍ਮਦੇਸਨਾ ਚਾਤਿ ਦ੍ਵੇਯੇਵ ਧਮ੍ਮਦੇਸਨਾਤਿ ਦਸ੍ਸੇਤਿ. ਤਤ੍ਥ ਮਾਤਿਕਂ ਉਦ੍ਦਿਸਿਤ੍ਵਾ ਕਥਿਤਾ ਦੇਸਨਾ ਸਂਖਿਤ੍ਤਦੇਸਨਾ ਨਾਮ. ਤਮੇਵ ਮਾਤਿਕਂ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ ਵਿਤ੍ਥਾਰਦੇਸਨਾ ਨਾਮ. ਮਾਤਿਕਂ ਵਾ ਠਪੇਤ੍ਵਾਪਿ ਅਟ੍ਠਪੇਤ੍ਵਾਪਿ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ ਵਿਤ੍ਥਾਰਦੇਸਨਾ ਨਾਮ. ਤਾਸੁ ਸਂਖਿਤ੍ਤਦੇਸਨਾ ਨਾਮ ਮਹਾਪਞ੍ਞਸ੍ਸ ਪੁਗ੍ਗਲਸ੍ਸ ਵਸੇਨ ਕਥਿਤਾ, ਵਿਤ੍ਥਾਰਦੇਸਨਾ ਨਾਮ ਮਨ੍ਦਪਞ੍ਞਸ੍ਸ. ਮਹਾਪਞ੍ਞਸ੍ਸ ਹਿ ਵਿਤ੍ਥਾਰਦੇਸਨਾ ਅਤਿਪਪਞ੍ਚੋ ਵਿਯ ਹੋਤਿ. ਮਨ੍ਦਪਞ੍ਞਸ੍ਸ ਸਙ੍ਖੇਪਦੇਸਨਾ ਸਸਕਸ੍ਸ ਉਪ੍ਪਤਨਂ ਵਿਯ ਹੋਤਿ, ਨੇਵ ਅਨ੍ਤਂ ਨ ਕੋਟਿਂ ਪਾਪੁਣਿਤੁਂ ਸਕ੍ਕੋਤਿ. ਸਙ੍ਖੇਪਦੇਸਨਾ ਚ ਉਗ੍ਘਟਿਤਞ੍ਞੁਸ੍ਸ ਵਸੇਨ ਕਥਿਤਾ, ਵਿਤ੍ਥਾਰਦੇਸਨਾ ਇਤਰੇਸਂ ਤਿਣ੍ਣਂ ਵਸੇਨ. ਸਕਲਮ੍ਪਿ ਹਿ ਤੇਪਿਟਕਂ ਸਙ੍ਖੇਪਦੇਸਨਾ ਵਿਤ੍ਥਾਰਦੇਸਨਾਤਿ ਏਤ੍ਥੇਵ ਸਙ੍ਖਂ ਗਚ੍ਛਤਿ.

੧੫. ਪਞ੍ਚਮੇ ਯਸ੍ਮਿਂ, ਭਿਕ੍ਖਵੇ, ਅਧਿਕਰਣੇਤਿ ਵਿਵਾਦਾਧਿਕਰਣਂ, ਅਨੁਵਾਦਾਧਿਕਰਣਂ, ਆਪਤ੍ਤਾਧਿਕਰਣਂ, ਕਿਚ੍ਚਾਧਿਕਰਣਨ੍ਤਿ ਇਮੇਸਂ ਚਤੁਨ੍ਨਂ ਅਧਿਕਰਣਾਨਂ ਯਸ੍ਮਿਂ ਅਧਿਕਰਣੇ. ਆਪਨ੍ਨੋ ਚ ਭਿਕ੍ਖੂਤਿ ਆਪਤ੍ਤਿਂ ਆਪਨ੍ਨੋ ਭਿਕ੍ਖੁ ਚ. ਤਸ੍ਮੇਤਨ੍ਤਿ ਤਸ੍ਮਿਂ ਏਤਂ. ਦੀਘਤ੍ਤਾਯਾਤਿ ਦੀਘਂ ਅਦ੍ਧਾਨਂ ਤਿਟ੍ਠਨਤ੍ਥਾਯ. ਖਰਤ੍ਤਾਯਾਤਿ ਦਾਸ-ਕੋਣ੍ਡ-ਚਣ੍ਡਾਲ-ਵੇਨਾਤਿ ਏਵਂ ਖਰਵਾਚਾਪਵਤ੍ਤਨਤ੍ਥਾਯ. ਵਾਲ਼ਤ੍ਤਾਯਾਤਿ ਪਾਣਿ ਲੇਡ੍ਡੁਦਣ੍ਡਾਦੀਹਿ ਪਹਰਣਵਸੇਨ ਕਕ੍ਖਲ਼ਭਾਵਤ੍ਥਾਯ. ਭਿਕ੍ਖੂ ਚ ਨ ਫਾਸੁਂ ਵਿਹਰਿਸ੍ਸਨ੍ਤੀਤਿ ਅਞ੍ਞਮਞ੍ਞਂ ਵਿਵਾਦਾਪਨ੍ਨੇ ਭਿਕ੍ਖੁਸਙ੍ਘੇ ਯੇਪਿ ਉਦ੍ਦੇਸਂ ਵਾ ਪਰਿਪੁਚ੍ਛਂ ਵਾ ਗਹੇਤੁਕਾਮਾ ਪਧਾਨਂ ਵਾ ਅਨੁਯੁਞ੍ਜਿਤੁਕਾਮਾ, ਤੇ ਫਾਸੁਂ ਨ ਵਿਹਰਿਸ੍ਸਨ੍ਤਿ. ਭਿਕ੍ਖੁਸਙ੍ਘਸ੍ਮਿਂ ਹਿ ਉਪੋਸਥਪਵਾਰਣਾਯ ਠਿਤਾਯ ਉਦ੍ਦੇਸਾਦੀਹਿ ਅਤ੍ਥਿਕਾ ਉਦ੍ਦੇਸਾਦੀਨਿ ਗਹੇਤੁਂ ਨ ਸਕ੍ਕੋਨ੍ਤਿ, ਵਿਪਸ੍ਸਕਾਨਂ ਚਿਤ੍ਤੁਪ੍ਪਾਦੋ ਨ ਏਕਗ੍ਗੋ ਹੋਤਿ, ਤਤੋ ਵਿਸੇਸਂ ਨਿਬ੍ਬਤ੍ਤੇਤੁਂ ਨ ਸਕ੍ਕੋਨ੍ਤਿ. ਏਵਂ ਭਿਕ੍ਖੂ ਚ ਨ ਫਾਸੁਂ ਵਿਹਰਿਸ੍ਸਨ੍ਤਿ. ਨ ਦੀਘਤ੍ਤਾਯਾਤਿਆਦੀਸੁ ਵੁਤ੍ਤਪਟਿਪਕ੍ਖਨਯੇਨ ਅਤ੍ਥੋ ਵੇਦਿਤਬ੍ਬੋ.

ਇਧਾਤਿ ਇਮਸ੍ਮਿਂ ਸਾਸਨੇ. ਇਤਿ ਪਟਿਸਞ੍ਚਿਕ੍ਖਤੀਤਿ ਏਵਂ ਪਚ੍ਚਵੇਕ੍ਖਤਿ. ਅਕੁਸਲਂ ਆਪਨ੍ਨੋਤਿ ਏਤ੍ਥ ਅਕੁਸਲਨ੍ਤਿ ਆਪਤ੍ਤਿ ਅਧਿਪ੍ਪੇਤਾ, ਆਪਤ੍ਤਿਂ ਆਪਨ੍ਨੋਤਿ ਅਤ੍ਥੋ. ਕਞ੍ਚਿਦੇਵ ਦੇਸਨ੍ਤਿ ਨ ਸਬ੍ਬਮੇਵ ਆਪਤ੍ਤਿਂ, ਆਪਤ੍ਤਿਯਾ ਪਨ ਕਞ੍ਚਿਦੇਵ ਦੇਸਂ ਅਞ੍ਞਤਰਂ ਆਪਤ੍ਤਿਨ੍ਤਿ ਅਤ੍ਥੋ. ਕਾਯੇਨਾਤਿ ਕਰਜਕਾਯੇਨ. ਅਨਤ੍ਤਮਨੋਤਿ ਅਤੁਟ੍ਠਚਿਤ੍ਤੋ. ਅਨਤ੍ਤਮਨਵਾਚਨ੍ਤਿ ਅਤੁਟ੍ਠਵਾਚਂ. ਮਮੇਵਾਤਿ ਮਂਯੇਵ. ਤਤ੍ਥਾਤਿ ਤਸ੍ਮਿਂ ਅਧਿਕਰਣੇ. ਅਚ੍ਚਯੋ ਅਚ੍ਚਗਮਾਤਿ ਅਪਰਾਧੋ ਅਤਿਕ੍ਕਮਿਤ੍ਵਾ ਮਦ੍ਦਿਤ੍ਵਾ ਗਤੋ, ਅਹਮੇਵੇਤ੍ਥ ਅਪਰਾਧਿਕੋ. ਸੁਙ੍ਕਦਾਯਕਂਵ ਭਣ੍ਡਸ੍ਮਿਨ੍ਤਿ ਯਥਾ ਸੁਙ੍ਕਟ੍ਠਾਨਂ ਪਰਿਹਰਿਤ੍ਵਾ ਨੀਤੇ ਭਣ੍ਡਸ੍ਮਿਂ ਸੁਙ੍ਕਦਾਯਕਂ ਅਪਰਾਧੋ ਅਭਿਭਵਤਿ, ਸੋ ਚ ਤਤ੍ਥ ਅਪਰਾਧਿਕੋ ਹੋਤਿ, ਨ ਰਾਜਾਨੋ ਨ ਰਾਜਪੁਰਿਸਾਤਿ ਅਤ੍ਥੋ.

ਇਦਂ ਵੁਤ੍ਤਂ ਹੋਤਿ – ਯੋ ਹਿ ਰਞ੍ਞਾ ਠਪਿਤਂ ਸੁਙ੍ਕਟ੍ਠਾਨਂ ਪਰਿਹਰਿਤ੍ਵਾ ਭਣ੍ਡਂ ਹਰਤਿ, ਤਂ ਸਹ ਭਣ੍ਡਸਕਟੇਨ ਆਨੇਤ੍ਵਾ ਰਞ੍ਞੋ ਦਸ੍ਸੇਨ੍ਤਿ. ਤਤ੍ਥ ਨੇਵ ਸੁਙ੍ਕਟ੍ਠਾਨਸ੍ਸ ਦੋਸੋ ਅਤ੍ਥਿ, ਨ ਰਞ੍ਞੋ ਨ ਰਾਜਪੁਰਿਸਾਨਂ, ਪਰਿਹਰਿਤ੍ਵਾ ਗਤਸ੍ਸੇਵ ਪਨ ਦੋਸੋ, ਏਵਮੇਵਂ ਯਂ ਸੋ ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ, ਤਤ੍ਥ ਨੇਵ ਆਪਤ੍ਤਿਯਾ ਦੋਸੋ, ਨ ਚੋਦਕਸ੍ਸ. ਤੀਹਿ ਪਨ ਕਾਰਣੇਹਿ ਤਸ੍ਸੇਵ ਭਿਕ੍ਖੁਨੋ ਦੋਸੋ. ਤਸ੍ਸ ਹਿ ਆਪਤ੍ਤਿਂ ਆਪਨ੍ਨਭਾਵੇਨਪਿ ਦੋਸੋ, ਚੋਦਕੇ ਅਨਤ੍ਤਮਨਤਾਯਪਿ ਦੋਸੋ, ਅਨਤ੍ਤਮਨਸ੍ਸ ਸਤੋ ਪਰੇਸਂ ਆਰੋਚਨੇਨਪਿ ਦੋਸੋ. ਚੋਦਕਸ੍ਸ ਪਨ ਯਂ ਸੋ ਤਂ ਆਪਤ੍ਤਿਂ ਆਪਜ੍ਜਨ੍ਤਂ ਅਦ੍ਦਸ, ਤਤ੍ਥ ਦੋਸੋ ਨਤ੍ਥਿ. ਅਨਤ੍ਤਮਨਤਾਯ ਚੋਦਨਾਯ ਪਨ ਦੋਸੋ. ਤਮ੍ਪਿ ਅਮਨਸਿਕਰਿਤ੍ਵਾ ਅਯਂ ਭਿਕ੍ਖੁ ਅਤ੍ਤਨੋਵ ਦੋਸਂ ਪਚ੍ਚਵੇਕ੍ਖਨ੍ਤੋ ‘‘ਇਤਿ ਮਮੇਵ ਤਤ੍ਥ ਅਚ੍ਚਯੋ ਅਚ੍ਚਗਮਾ ਸੁਙ੍ਕਦਾਯਕਂਵ ਭਣ੍ਡਸ੍ਮਿ’’ਨ੍ਤਿ ਏਵਂ ਪਟਿਸਞ੍ਚਿਕ੍ਖਤੀਤਿ ਅਤ੍ਥੋ. ਦੁਤਿਯਵਾਰੇ ਚੋਦਕਸ੍ਸ ਅਨਤ੍ਤਮਨਤਾ ਚ ਅਨਤ੍ਤਮਨਤਾਯ ਚੋਦਿਤਭਾਵੋ ਚਾਤਿ ਦ੍ਵੇ ਦੋਸਾ, ਤੇਸਂ ਵਸੇਨ ‘‘ਅਚ੍ਚਯੋ ਅਚ੍ਚਗਮਾ’’ਤਿ ਏਤ੍ਥ ਯੋਜਨਾ ਕਾਤਬ੍ਬਾ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

੧੬. ਛਟ੍ਠੇ ਅਞ੍ਞਤਰੋਤਿ ਏਕੋ ਅਪਾਕਟਨਾਮੋ ਬ੍ਰਾਹ੍ਮਣੋ. ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਯੇਨਾਤਿ ਭੁਮ੍ਮਤ੍ਥੇ ਕਰਣਵਚਨਂ. ਤਸ੍ਮਾ ਯਤ੍ਥ ਭਗਵਾ, ਤਤ੍ਥ ਉਪਸਙ੍ਕਮੀਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਯੇਨ ਵਾ ਕਾਰਣੇਨ ਭਗਵਾ ਦੇਵਮਨੁਸ੍ਸੇਹਿ ਉਪਸਙ੍ਕਮਿਤਬ੍ਬੋ, ਤੇਨ ਕਾਰਣੇਨ ਉਪਸਙ੍ਕਮੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਕੇਨ ਚ ਕਾਰਣੇਨ ਭਗਵਾ ਉਪਸਙ੍ਕਮਿਤਬ੍ਬੋ? ਨਾਨਪ੍ਪਕਾਰਗੁਣਵਿਸੇਸਾਧਿਗਮਾਧਿਪ੍ਪਾਯੇਨ, ਸਾਦੁਫਲੂਪਭੋਗਾਧਿਪ੍ਪਾਯੇਨ ਦਿਜਗਣੇਹਿ ਨਿਚ੍ਚਫਲਿਤਮਹਾਰੁਕ੍ਖੋ ਵਿਯ. ਉਪਸਙ੍ਕਮੀਤਿ ਗਤੋਤਿ ਵੁਤ੍ਤਂ ਹੋਤਿ. ਉਪਸਙ੍ਕਮਿਤ੍ਵਾਤਿ ਉਪਸਙ੍ਕਮਨਪਰਿਯੋਸਾਨਦੀਪਨਂ. ਅਥ ਵਾ ਏਵਂ ਗਤੋ ਤਤੋ ਆਸਨ੍ਨਤਰਂ ਠਾਨਂ ਭਗਵਤੋ ਸਮੀਪਸਙ੍ਖਾਤਂ ਗਨ੍ਤ੍ਵਾਤਿਪਿ ਵੁਤ੍ਤਂ ਹੋਤਿ.

ਭਗਵਤਾ ਸਦ੍ਧਿਂ ਸਮ੍ਮੋਦੀਤਿ ਯਥਾ ਚ ਖਮਨੀਯਾਦੀਨਿ ਪੁਚ੍ਛਨ੍ਤੋ ਭਗਵਾ ਤੇਨ, ਏਵਂ ਸੋਪਿ ਭਗਵਤਾ ਸਦ੍ਧਿਂ ਸਮਪ੍ਪਵਤ੍ਤਮੋਦੋ ਅਹੋਸਿ, ਸੀਤੋਦਕਂ ਵਿਯ ਉਣ੍ਹੋਦਕੇਨ ਸਮ੍ਮੋਦਿਤਂ ਏਕੀਭਾਵਂ ਅਗਮਾਸਿ. ਯਾਯ ਚ ‘‘ਕਚ੍ਚਿ, ਭੋ ਗੋਤਮ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਭੋਤੋ ਗੋਤਮਸ੍ਸ ਚ ਸਾਵਕਾਨਞ੍ਚ ਅਪ੍ਪਾਬਾਧਂ ਅਪ੍ਪਾਤਙ੍ਕਂ ਲਹੁਟ੍ਠਾਨਂ ਬਲਂ ਫਾਸੁਵਿਹਾਰੋ’’ਤਿਆਦਿਕਾਯ ਕਥਾਯ ਸਮ੍ਮੋਦਿ, ਤਂ ਪੀਤਿਪਾਮੋਜ੍ਜਸਙ੍ਖਾਤਸ੍ਸ ਸਮ੍ਮੋਦਸ੍ਸ ਜਨਨਤੋ ਸਮ੍ਮੋਦਿਤੁਂ ਯੁਤ੍ਤਭਾਵਤੋ ਚ ਸਮ੍ਮੋਦਨੀਯਂ, ਅਤ੍ਥਬ੍ਯਞ੍ਜਨਮਧੁਰਤਾਯ ਸੁਚਿਰਮ੍ਪਿ ਕਾਲਂ ਸਾਰੇਤੁਂ ਨਿਰਨ੍ਤਰਂ ਪਵਤ੍ਤੇਤੁਂ ਅਰਹਰੂਪਤੋ ਸਰਿਤਬ੍ਬਭਾਵਤੋ ਚ ਸਾਰਣੀਯਂ. ਸੁਯ੍ਯਮਾਨਸੁਖਤੋ ਵਾ ਸਮ੍ਮੋਦਨੀਯਂ, ਅਨੁਸ੍ਸਰਿਯਮਾਨਸੁਖਤੋ ਸਾਰਣੀਯਂ, ਤਥਾ ਬ੍ਯਞ੍ਜਨਪਰਿਸੁਦ੍ਧਤਾਯ ਸਮ੍ਮੋਦਨੀਯਂ, ਅਤ੍ਥਪਰਿਸੁਦ੍ਧਤਾਯ ਸਾਰਣੀਯਨ੍ਤਿ ਏਵਂ ਅਨੇਕੇਹਿ ਪਰਿਯਾਯੇਹਿ ਸਮ੍ਮੋਦਨੀਯਂ ਸਾਰਣੀਯਂ ਕਥਂ ਵੀਤਿਸਾਰੇਤ੍ਵਾ ਪਰਿਯੋਸਾਪੇਤ੍ਵਾ ਨਿਟ੍ਠਪੇਤ੍ਵਾ ਯੇਨਤ੍ਥੇਨ ਆਗਤੋ, ਤਂ ਪੁਚ੍ਛਿਤੁਕਾਮੋ ਏਕਮਨ੍ਤਂ ਨਿਸੀਦਿ.

ਏਕਮਨ੍ਤਨ੍ਤਿ ਭਾਵਨਪੁਂਸਕਨਿਦ੍ਦੇਸੋ ‘‘ਵਿਸਮਂ ਚਨ੍ਦਿਮਸੂਰਿਯਾ ਪਰਿਵਤ੍ਤਨ੍ਤੀ’’ਤਿਆਦੀਸੁ (ਅ. ਨਿ. ੪.੭੦) ਵਿਯ. ਤਸ੍ਮਾ ਯਥਾ ਨਿਸਿਨ੍ਨੋ ਏਕਮਨ੍ਤਂ ਨਿਸਿਨ੍ਨੋ ਹੋਤਿ, ਤਥਾ ਨਿਸੀਦੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਭੁਮ੍ਮਤ੍ਥੇ ਵਾ ਏਤਂ ਉਪਯੋਗਵਚਨਂ. ਨਿਸੀਦੀਤਿ ਉਪਾਵਿਸਿ. ਪਣ੍ਡਿਤਾ ਹਿ ਪੁਰਿਸਾ ਗਰੁਟ੍ਠਾਨੀਯਂ ਉਪਸਙ੍ਕਮਿਤ੍ਵਾ ਆਸਨਕੁਸਲਤਾਯ ਏਕਮਨ੍ਤਂ ਨਿਸੀਦਨ੍ਤਿ. ਅਯਞ੍ਚ ਨੇਸਂ ਅਞ੍ਞਤਰੋ, ਤਸ੍ਮਾ ਏਕਮਨ੍ਤਂ ਨਿਸੀਦਿ.

ਕਥਂ ਨਿਸਿਨ੍ਨੋ ਪਨ ਏਕਮਨ੍ਤਂ ਨਿਸਿਨ੍ਨੋ ਹੋਤੀਤਿ? ਛ ਨਿਸਜ੍ਜਦੋਸੇ ਵਜ੍ਜੇਤ੍ਵਾ. ਸੇਯ੍ਯਥਿਦਂ – ਅਤਿਦੂਰਂ, ਅਚ੍ਚਾਸਨ੍ਨਂ, ਉਪਰਿਵਾਤਂ, ਉਨ੍ਨਤਪ੍ਪਦੇਸਂ, ਅਤਿਸਮ੍ਮੁਖਂ ਅਤਿਪਚ੍ਛਾਤਿ. ਅਤਿਦੂਰੇ ਨਿਸਿਨ੍ਨੋ ਹਿ ਸਚੇ ਕਥੇਤੁਕਾਮੋ ਹੋਤਿ, ਉਚ੍ਚਾਸਦ੍ਦੇਨ ਕਥੇਤਬ੍ਬਂ ਹੋਤਿ. ਅਚ੍ਚਾਸਨ੍ਨੇ ਨਿਸਿਨ੍ਨੋ ਸਙ੍ਘਟ੍ਟਨਂ ਕਰੋਤਿ. ਉਪਰਿਵਾਤੇ ਨਿਸਿਨ੍ਨੋ ਸਰੀਰਗਨ੍ਧੇਨ ਬਾਧਤਿ. ਉਨ੍ਨਤਪ੍ਪਦੇਸੇ ਨਿਸਿਨ੍ਨੋ ਅਗਾਰਵਂ ਪਕਾਸੇਤਿ. ਅਤਿਸਮ੍ਮੁਖਾ ਨਿਸਿਨ੍ਨੋ ਸਚੇ ਦਟ੍ਠੁਕਾਮੋ ਹੋਤਿ, ਚਕ੍ਖੁਨਾ ਚਕ੍ਖੁਂ ਆਹਚ੍ਚ ਦਟ੍ਠਬ੍ਬਂ ਹੋਤਿ. ਅਤਿਪਚ੍ਛਾ ਨਿਸਿਨ੍ਨੋ ਸਚੇ ਦਟ੍ਠੁਕਾਮੋ ਹੋਤਿ, ਗੀਵਂ ਪਸਾਰੇਤ੍ਵਾ ਦਟ੍ਠਬ੍ਬਂ ਹੋਤਿ. ਤਸ੍ਮਾ ਅਯਮ੍ਪਿ ਏਤੇ ਛ ਨਿਸਜ੍ਜਦੋਸੇ ਵਜ੍ਜੇਤ੍ਵਾ ਨਿਸੀਦਿ. ਤੇਨ ਵੁਤ੍ਤਂ ‘‘ਏਕਮਨ੍ਤਂ ਨਿਸੀਦੀ’’ਤਿ.

ਏਤਦਵੋਚਾਤਿ ਦੁਵਿਧਾ ਹਿ ਪੁਚ੍ਛਾ – ਅਗਾਰਿਕਪੁਚ੍ਛਾ, ਅਨਗਾਰਿਕਪੁਚ੍ਛਾ ਚ. ਤਤ੍ਥ ‘‘ਕਿਂ, ਭਨ੍ਤੇ, ਕੁਸਲਂ, ਕਿਂ ਅਕੁਸਲ’’ਨ੍ਤਿ (ਮ. ਨਿ. ੩.੨੯੬) ਇਮਿਨਾ ਨਯੇਨ ਅਗਾਰਿਕਪੁਚ੍ਛਾ ਆਗਤਾ. ‘‘ਇਮੇ ਨੁ ਖੋ, ਭਨ੍ਤੇ, ਪਞ੍ਚੁਪਾਦਾਨਕ੍ਖਨ੍ਧਾ’’ਤਿ (ਮ. ਨਿ. ੩.੮੬) ਇਮਿਨਾ ਨਯੇਨ ਅਨਗਾਰਿਕਪੁਚ੍ਛਾ. ਅਯਂ ਪਨ ਅਤ੍ਤਨੋ ਅਨੁਰੂਪਂ ਅਗਾਰਿਕਪੁਚ੍ਛਂ ਪੁਚ੍ਛਨ੍ਤੋ ਏਤਂ ‘‘ਕੋ ਨੁ ਖੋ, ਭੋ ਗੋਤਮ, ਹੇਤੁ ਕੋ ਪਚ੍ਚਯੋ’’ਤਿਆਦਿਵਚਨਂ ਅਵੋਚ. ਤਤ੍ਥ ਹੇਤੁ ਪਚ੍ਚਯੋਤਿ ਉਭਯਮ੍ਪੇਤਂ ਕਾਰਣਵੇਵਚਨਮੇਵ. ਅਧਮ੍ਮਚਰਿਯਾਵਿਸਮਚਰਿਯਾਹੇਤੂਤਿ ਅਧਮ੍ਮਚਰਿਯਾਸਙ੍ਖਾਤਾਯ ਵਿਸਮਚਰਿਯਾਯ ਹੇਤੁ, ਤਂਕਾਰਣਾ ਤਪ੍ਪਚ੍ਚਯਾਤਿ ਅਤ੍ਥੋ. ਤਤ੍ਰਾਯਂ ਪਦਤ੍ਥੋ – ਅਧਮ੍ਮਸ੍ਸ ਚਰਿਯਾ ਅਧਮ੍ਮਚਰਿਯਾ, ਅਧਮ੍ਮਕਾਰਣਨ੍ਤਿ ਅਤ੍ਥੋ. ਵਿਸਮਂ ਚਰਿਯਾ, ਵਿਸਮਸ੍ਸ ਵਾ ਕਮ੍ਮਸ੍ਸ ਚਰਿਯਾਤਿ ਵਿਸਮਚਰਿਯਾ. ਅਧਮ੍ਮਚਰਿਯਾ ਚ ਸਾ ਵਿਸਮਚਰਿਯਾ ਚਾਤਿ ਅਧਮ੍ਮਚਰਿਯਾਵਿਸਮਚਰਿਯਾ. ਏਤੇਨੁਪਾਯੇਨ ਸੁਕ੍ਕਪਕ੍ਖੇਪਿ ਅਤ੍ਥੋ ਵੇਦਿਤਬ੍ਬੋ. ਅਤ੍ਥਤੋ ਪਨੇਤ੍ਥ ਅਧਮ੍ਮਚਰਿਯਾਵਿਸਮਚਰਿਯਾ ਨਾਮ ਦਸ ਅਕੁਸਲਕਮ੍ਮਪਥਾ, ਧਮ੍ਮਚਰਿਯਾਸਮਚਰਿਯਾ ਨਾਮ ਦਸ ਕੁਸਲਕਮ੍ਮਪਥਾਤਿ ਵੇਦਿਤਬ੍ਬਾ.

ਅਭਿਕ੍ਕਨ੍ਤਂ, ਭੋ ਗੋਤਮਾਤਿ ਏਤ੍ਥ ਅਯਂ ਅਭਿਕ੍ਕਨ੍ਤਸਦ੍ਦੋ ਖਯਸੁਨ੍ਦਰਾਭਿਰੂਪਅਬ੍ਭਨੁਮੋਦਨੇਸੁ ਦਿਸ੍ਸਤਿ. ‘‘ਅਭਿਕ੍ਕਨ੍ਤਾ, ਭਨ੍ਤੇ, ਰਤ੍ਤਿ, ਨਿਕ੍ਖਨ੍ਤੋ ਪਠਮੋ ਯਾਮੋ, ਚਿਰਨਿਸਿਨ੍ਨੋ ਭਿਕ੍ਖੁਸਙ੍ਘੋ’’ਤਿਆਦੀਸੁ (ਉਦਾ. ੪੫; ਚੂਲ਼ਵ. ੩੮੩; ਅ. ਨਿ. ੮.੨੦) ਹਿ ਖਯੇ ਦਿਸ੍ਸਤਿ. ‘‘ਅਯਂ ਇਮੇਸਂ ਚਤੁਨ੍ਨਂ ਪੁਗ੍ਗਲਾਨਂ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚਾ’’ਤਿਆਦੀਸੁ (ਅ. ਨਿ. ੪.੧੦੦) ਸੁਨ੍ਦਰੇ.

‘‘ਕੋ ਮੇ ਵਨ੍ਦਤਿ ਪਾਦਾਨਿ, ਇਦ੍ਧਿਯਾ ਯਸਸਾ ਜਲਂ;

ਅਭਿਕ੍ਕਨ੍ਤੇਨ ਵਣ੍ਣੇਨ, ਸਬ੍ਬਾ ਓਭਾਸਯਂ ਦਿਸਾ’’ਤਿ. –

ਆਦੀਸੁ (ਵਿ. ਵ. ੮੫੭) ਅਭਿਰੂਪੇ. ‘‘ਅਭਿਕ੍ਕਨ੍ਤਂ, ਭਨ੍ਤੇ’’ਤਿਆਦੀਸੁ (ਦੀ. ਨਿ. ੧.੨੫੦; ਪਾਰਾ. ੧੫) ਅਬ੍ਭਨੁਮੋਦਨੇ. ਇਧਾਪਿ ਅਬ੍ਭਨੁਮੋਦਨੇਯੇਵ. ਯਸ੍ਮਾ ਚ ਅਬ੍ਭਨੁਮੋਦਨੇ, ਤਸ੍ਮਾ ਸਾਧੁ ਸਾਧੁ, ਭੋ ਗੋਤਮਾਤਿ ਵੁਤ੍ਤਂ ਹੋਤੀਤਿ ਵੇਦਿਤਬ੍ਬਂ.

‘‘ਭਯੇ ਕੋਧੇ ਪਸਂਸਾਯਂ, ਤੁਰਿਤੇ ਕੋਤੂਹਲਚ੍ਛਰੇ;

ਹਾਸੇ ਸੋਕੇ ਪਸਾਦੇ ਚ, ਕਰੇ ਆਮੇਡਿਤਂ ਬੁਧੋ’’ਤਿ. –

ਇਮਿਨਾ ਚ ਲਕ੍ਖਣੇਨ ਇਧ ਪਸਾਦਵਸੇਨ ਪਸਂਸਾਵਸੇਨ ਚਾਯਂ ਦ੍ਵਿਕ੍ਖਤ੍ਤੁਂ ਵੁਤ੍ਤੋਤਿ ਵੇਦਿਤਬ੍ਬੋ. ਅਥ ਵਾ ਅਭਿਕ੍ਕਨ੍ਤਨ੍ਤਿ ਅਭਿਕ੍ਕਨ੍ਤਂ ਅਤਿਇਟ੍ਠਂ ਅਤਿਮਨਾਪਂ, ਅਤਿਸੁਨ੍ਦਰਨ੍ਤਿ ਵੁਤ੍ਤਂ ਹੋਤਿ.

ਤਤ੍ਥ ਏਕੇਨ ਅਭਿਕ੍ਕਨ੍ਤਸਦ੍ਦੇਨ ਦੇਸਨਂ ਥੋਮੇਤਿ, ਏਕੇਨ ਅਤ੍ਤਨੋ ਪਸਾਦਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਅਭਿਕ੍ਕਨ੍ਤਂ, ਭੋ ਗੋਤਮ, ਯਦਿਦਂ ਭੋਤੋ ਗੋਤਮਸ੍ਸ ਧਮ੍ਮਦੇਸਨਾ, ਅਭਿਕ੍ਕਨ੍ਤਂ ਯਦਿਦਂ ਭੋਤੋ ਗੋਤਮਸ੍ਸ ਧਮ੍ਮਦੇਸਨਂ ਆਗਮ੍ਮ ਮਮ ਪਸਾਦੋਤਿ. ਭਗਵਤੋਯੇਵ ਵਾ ਵਚਨਂ ਦ੍ਵੇ ਦ੍ਵੇ ਅਤ੍ਥੇ ਸਨ੍ਧਾਯ ਥੋਮੇਤਿ – ਭੋਤੋ ਗੋਤਮਸ੍ਸ ਵਚਨਂ ਅਭਿਕ੍ਕਨ੍ਤਂ ਦੋਸਨਾਸਨਤੋ, ਅਭਿਕ੍ਕਨ੍ਤਂ ਗੁਣਾਧਿਗਮਨਤੋ, ਤਥਾ ਸਦ੍ਧਾਜਨਨਤੋ, ਪਞ੍ਞਾਜਨਨਤੋ, ਸਾਤ੍ਥਤੋ, ਸਬ੍ਯਞ੍ਜਨਤੋ, ਉਤ੍ਤਾਨਪਦਤੋ, ਗਮ੍ਭੀਰਤ੍ਥਤੋ, ਕਣ੍ਣਸੁਖਤੋ, ਹਦਯਙ੍ਗਮਤੋ, ਅਨਤ੍ਤੁਕ੍ਕਂਸਨਤੋ, ਅਪਰਵਮ੍ਭਨਤੋ, ਕਰੁਣਾਸੀਤਲਤੋ, ਪਞ੍ਞਾਵਦਾਤਤੋ, ਆਪਾਥਰਮਣੀਯਤੋ, ਵਿਮਦ੍ਦਕ੍ਖਮਤੋ, ਸੁਯ੍ਯਮਾਨਸੁਖਤੋ, ਵੀਮਂਸਿਯਮਾਨਹਿਤਤੋਤਿ ਏਵਮਾਦੀਹਿ ਯੋਜੇਤਬ੍ਬਂ.

ਤਤੋ ਪਰਮ੍ਪਿ ਚਤੂਹਿ ਉਪਮਾਹਿ ਦੇਸਨਂਯੇਵ ਥੋਮੇਤਿ. ਤਤ੍ਥ ਨਿਕ੍ਕੁਜ੍ਜਿਤਨ੍ਤਿ ਅਧੋਮੁਖਠਪਿਤਂ, ਹੇਟ੍ਠਾਮੁਖਜਾਤਂ ਵਾ. ਉਕ੍ਕੁਜ੍ਜੇਯ੍ਯਾਤਿ ਉਪਰਿਮੁਖਂ ਕਰੇਯ੍ਯ. ਪਟਿਚ੍ਛਨ੍ਨਨ੍ਤਿ ਤਿਣਪਣ੍ਣਾਦਿਛਾਦਿਤਂ. ਵਿਵਰੇਯ੍ਯਾਤਿ ਉਗ੍ਘਾਟੇਯ੍ਯ. ਮੂਲ਼੍ਹਸ੍ਸਾਤਿ ਦਿਸਾਮੂਲ਼੍ਹਸ੍ਸ. ਮਗ੍ਗਂ ਆਚਿਕ੍ਖੇਯ੍ਯਾਤਿ ਹਤ੍ਥੇ ਗਹੇਤ੍ਵਾ ‘‘ਏਸ ਮਗ੍ਗੋ’’ਤਿ ਵਦੇਯ੍ਯ. ਅਨ੍ਧਕਾਰੇਤਿ ਕਾਲ਼ਪਕ੍ਖਚਾਤੁਦ੍ਦਸੀਅਡ੍ਢਰਤ੍ਤਘਨਵਨਸਣ੍ਡਮੇਘਪਟਲੇਹਿ ਚਤੁਰਙ੍ਗੇ ਤਮੇ. ਅਯਂ ਤਾਵ ਅਨੁਤ੍ਤਾਨਪਦਤ੍ਥੋ.

ਅਯਂ ਪਨ ਅਧਿਪ੍ਪਾਯਯੋਜਨਾ – ਯਥਾ ਕੋਚਿ ਨਿਕ੍ਕੁਜ੍ਜਿਤਂ ਉਕ੍ਕੁਜ੍ਜੇਯ੍ਯ, ਏਵਂ ਸਦ੍ਧਮ੍ਮਵਿਮੁਖਂ ਅਸਦ੍ਧਮ੍ਮੇ ਪਤਿਤਂ ਮਂ ਅਸਦ੍ਧਮ੍ਮਾ ਵੁਟ੍ਠਾਪੇਨ੍ਤੇਨ, ਯਥਾ ਪਟਿਚ੍ਛਨ੍ਨਂ ਵਿਵਰੇਯ੍ਯ, ਏਵਂ ਕਸ੍ਸਪਸ੍ਸ ਭਗਵਤੋ ਸਾਸਨਨ੍ਤਰਧਾਨਤੋ ਪਭੁਤਿ ਮਿਚ੍ਛਾਦਿਟ੍ਠਿਗਹਨਪਟਿਚ੍ਛਨ੍ਨਂ ਸਾਸਨਂ ਵਿਵਰਨ੍ਤੇਨ, ਯਥਾ ਮੂਲ਼੍ਹਸ੍ਸ ਮਗ੍ਗਂ ਆਚਿਕ੍ਖੇਯ੍ਯ, ਏਵਂ ਕੁਮ੍ਮਗ੍ਗਮਿਚ੍ਛਾਮਗ੍ਗਪ੍ਪਟਿਪਨ੍ਨਸ੍ਸ ਮੇ ਸਗ੍ਗਮੋਕ੍ਖਮਗ੍ਗਂ ਆਵਿਕਰੋਨ੍ਤੇਨ, ਯਥਾ ਅਨ੍ਧਕਾਰੇ ਤੇਲਪਜ੍ਜੋਤਂ ਧਾਰੇਯ੍ਯ, ਏਵਂ ਮੋਹਨ੍ਧਕਾਰੇ ਨਿਮੁਗ੍ਗਸ੍ਸ ਮੇ ਬੁਦ੍ਧਾਦਿਰਤਨਰੂਪਾਨਿ ਅਪਸ੍ਸਤੋ ਤਪ੍ਪਟਿਚ੍ਛਾਦਕਮੋਹਨ੍ਧਕਾਰਵਿਦ੍ਧਂਸਕਦੇਸਨਾਪਜ੍ਜੋਤਧਾਰਣੇਨ ਮਯ੍ਹਂ ਭੋਤਾ ਗੋਤਮੇਨ ਏਤੇਹਿ ਪਰਿਯਾਯੇਹਿ ਪਕਾਸਿਤਤ੍ਤਾ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋਤਿ.

ਏਵਂ ਦੇਸਨਂ ਥੋਮੇਤ੍ਵਾ ਇਮਾਯ ਦੇਸਨਾਯ ਰਤਨਤ੍ਤਯੇ ਪਸਨ੍ਨਚਿਤ੍ਤੋ ਪਸਨ੍ਨਾਕਾਰਂ ਕਰੋਨ੍ਤੋ ਏਸਾਹਨ੍ਤਿਆਦਿਮਾਹ. ਤਤ੍ਥ ਏਸਾਹਨ੍ਤਿ ਏਸੋ ਅਹਂ. ਭਵਨ੍ਤਂ ਗੋਤਮਂ ਸਰਣਂ ਗਚ੍ਛਾਮੀਤਿ ਭਵਂ ਮੇ ਗੋਤਮੋ ਸਰਣਂ ਪਰਾਯਣਂ ਅਘਸ੍ਸ ਤਾਤਾ ਹਿਤਸ੍ਸ ਚ ਵਿਧਾਤਾਤਿ ਇਮਿਨਾ ਅਧਿਪ੍ਪਾਯੇਨ ਭਵਨ੍ਤਂ ਗੋਤਮਂ ਗਚ੍ਛਾਮਿ ਭਜਾਮਿ ਸੇਵਾਮਿ ਪਯਿਰੁਪਾਸਾਮਿ, ਏਵਂ ਵਾ ਜਾਨਾਮਿ ਬੁਜ੍ਝਾਮੀਤਿ. ਯੇਸਞ੍ਹਿ ਧਾਤੂਨਂ ਗਤਿ ਅਤ੍ਥੋ, ਬੁਦ੍ਧਿਪਿ ਤੇਸਂ ਅਤ੍ਥੋ. ਤਸ੍ਮਾ ਗਚ੍ਛਾਮੀਤਿ ਇਮਸ੍ਸ ਜਾਨਾਮਿ ਬੁਜ੍ਝਾਮੀਤਿ ਅਯਮਤ੍ਥੋ ਵੁਤ੍ਤੋ. ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚਾਤਿ ਏਤ੍ਥ ਪਨ ਅਧਿਗਤਮਗ੍ਗੇ ਸਚ੍ਛਿਕਤਨਿਰੋਧੇ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨੇ ਚ ਚਤੂਸੁ ਅਪਾਯੇਸੁ ਅਪਤਮਾਨੇ ਧਾਰੇਤੀਤਿ ਧਮ੍ਮੋ. ਸੋ ਅਤ੍ਥਤੋ ਅਰਿਯਮਗ੍ਗੋ ਚੇਵ ਨਿਬ੍ਬਾਨਞ੍ਚ. ਵੁਤ੍ਤਞ੍ਹੇਤਂ – ‘‘ਯਾਵਤਾ, ਭਿਕ੍ਖਵੇ, ਧਮ੍ਮਾ ਸਙ੍ਖਤਾ, ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿ (ਅ. ਨਿ. ੪.੩੪) ਵਿਤ੍ਥਾਰੋ. ਨ ਕੇਵਲਞ੍ਚ ਅਰਿਯਮਗ੍ਗੋ ਚੇਵ ਨਿਬ੍ਬਾਨਞ੍ਚ, ਅਪਿਚ ਖੋ ਅਰਿਯਫਲੇਹਿ ਸਦ੍ਧਿਂ ਪਰਿਯਤ੍ਤਿਧਮ੍ਮੋਪਿ. ਵੁਤ੍ਤਞ੍ਹੇਤਂ ਛਤ੍ਤਮਾਣਵਕਵਿਮਾਨੇ –

‘‘ਰਾਗਵਿਰਾਗਮਨੇਜਮਸੋਕਂ, ਧਮ੍ਮਮਸਙ੍ਖਤਮਪ੍ਪਟਿਕੂਲਂ;

ਮਧੁਰਮਿਮਂ ਪਗੁਣਂ ਸੁਵਿਭਤ੍ਤਂ, ਧਮ੍ਮਮਿਮਂ ਸਰਣਤ੍ਥਮੁਪੇਹੀ’’ਤਿ. (ਵਿ. ਵ. ੮੮੭);

ਏਤ੍ਥ ਰਾਗਵਿਰੋਗੋਤਿ ਮਗ੍ਗੋ ਕਥਿਤੋ. ਅਨੋਜਮਸੋਕਨ੍ਤਿ ਫਲਂ. ਧਮ੍ਮਮਸਙ੍ਖਤਨ੍ਤਿ ਨਿਬ੍ਬਾਨਂ. ਅਪ੍ਪਟਿਕੂਲਂ ਮਧੁਰਮਿਮਂ ਪਗੁਣਂ ਸੁਵਿਭਤ੍ਤਨ੍ਤਿ ਪਿਟਕਤ੍ਤਯੇਨ ਵਿਭਤ੍ਤਾ ਸਬ੍ਬਧਮ੍ਮਕ੍ਖਨ੍ਧਾਤਿ. ਦਿਟ੍ਠਿਸੀਲਸਙ੍ਘਾਤੇਨ ਸਂਹਤੋਤਿ ਸਙ੍ਘੋ. ਸੋ ਅਤ੍ਥਤੋ ਅਟ੍ਠਅਰਿਯਪੁਗ੍ਗਲਸਮੂਹੋ. ਵੁਤ੍ਤਞ੍ਹੇਤਂ ਤਸ੍ਮਿਯੇਵ ਵਿਮਾਨੇ –

‘‘ਯਤ੍ਥ ਚ ਦਿਨ੍ਨਮਹਪ੍ਫਲਮਾਹੁ, ਚਤੂਸੁ ਸੁਚੀਸੁ ਪੁਰਿਸਯੁਗੇਸੁ;

ਅਟ੍ਠ ਚ ਪੁਗ੍ਗਲਧਮ੍ਮਦਸਾ ਤੇ, ਸਙ੍ਘਮਿਮਂ ਸਰਣਤ੍ਥਮੁਪੇਹੀ’’ਤਿ. (ਵਿ. ਵ. ੮੮੮);

ਭਿਕ੍ਖੂਨਂ ਸਙ੍ਘੋ ਭਿਕ੍ਖੁਸਙ੍ਘੋ. ਏਤ੍ਤਾਵਤਾ ਬ੍ਰਾਹ੍ਮਣੋ ਤੀਣਿ ਸਰਣਗਮਨਾਨਿ ਪਟਿਵੇਦੇਸਿ.

ਇਦਾਨਿ ਤੇਸੁ ਸਰਣਗਮਨੇਸੁ ਕੋਸਲ੍ਲਤ੍ਥਂ ਸਰਣਂ, ਸਰਣਗਮਨਂ, ਯੋ ਚ ਸਰਣਂ ਗਚ੍ਛਤਿ, ਸਰਣਗਮਨਪ੍ਪਭੇਦੋ, ਸਰਣਗਮਨਫਲਂ, ਸਂਕਿਲੇਸੋ, ਭੇਦੋਤਿ ਅਯਂ ਵਿਧਿ ਵੇਦਿਤਬ੍ਬੋ.

ਸੇਯ੍ਯਥਿਦਂ – ਪਦਤ੍ਥਤੋ ਤਾਵ ਹਿਂਸਤੀਤਿ ਸਰਣਂ, ਸਰਣਗਤਾਨਂ ਤੇਨੇਵ ਸਰਣਗਮਨੇਨ ਭਯਂ ਸਨ੍ਤਾਸਂ ਦੁਕ੍ਖਂ ਦੁਗ੍ਗਤਿਪਰਿਕਿਲੇਸਂ ਹਨਤਿ ਵਿਨਾਸੇਤੀਤਿ ਅਤ੍ਥੋ, ਰਤਨਤ੍ਤਯਸ੍ਸੇਵੇਤਂ ਅਧਿਵਚਨਂ. ਅਥ ਵਾ ਹਿਤੇ ਪਵਤ੍ਤਨੇਨ ਅਹਿਤਾ ਚ ਨਿਵਤ੍ਤਨੇਨ ਸਤ੍ਤਾਨਂ ਭਯਂ ਹਿਂਸਤੀਤਿ ਬੁਦ੍ਧੋ, ਭਵਕਨ੍ਤਾਰਾ ਉਤ੍ਤਾਰਣੇਨ ਲੋਕਸ੍ਸ ਅਸ੍ਸਾਸਦਾਨੇਨ ਚ ਧਮ੍ਮੋ, ਅਪ੍ਪਕਾਨਮ੍ਪਿ ਕਾਰਾਨਂ ਵਿਪੁਲਫਲਪਟਿਲਾਭਕਰਣੇਨ ਸਙ੍ਘੋ. ਤਸ੍ਮਾ ਇਮਿਨਾਪਿ ਪਰਿਯਾਯੇਨ ਰਤਨਤ੍ਤਯਂ ਸਰਣਂ. ਤਪ੍ਪਸਾਦਤਗ੍ਗਰੁਤਾਹਿ ਵਿਹਤਕਿਲੇਸੋ ਤਪ੍ਪਰਾਯਣਤਾਕਾਰਪ੍ਪਵਤ੍ਤੋ ਚਿਤ੍ਤੁਪ੍ਪਾਦੋ ਸਰਣਗਮਨਂ. ਤਂਸਮਙ੍ਗੀਸਤ੍ਤੋ ਸਰਣਂ ਗਚ੍ਛਤਿ, ਵੁਤ੍ਤਪ੍ਪਕਾਰੇਨ ਚਿਤ੍ਤੁਪ੍ਪਾਦੇਨ ‘‘ਏਤਾਨਿ ਮੇ ਤੀਣਿ ਰਤਨਾਨਿ ਸਰਣਂ, ਏਤਾਨਿ ਪਰਾਯਣ’’ਨ੍ਤਿ ਏਵਂ ਉਪੇਤੀਤਿ ਅਤ੍ਥੋ. ਏਵਂ ਤਾਵ ਸਰਣਂ ਸਰਣਗਮਨਂ ਯੋ ਚ ਸਰਣਂ ਗਚ੍ਛਤਿ ਇਦਂ ਤਯਂ ਵੇਦਿਤਬ੍ਬਂ.

ਸਰਣਗਮਨਪ੍ਪਭੇਦੇ ਪਨ ਦੁਵਿਧਂ ਸਰਣਗਮਨਂ ਲੋਕੁਤ੍ਤਰਂ ਲੋਕਿਯਞ੍ਚਾਤਿ. ਤਤ੍ਥ ਲੋਕੁਤ੍ਤਰਂ ਦਿਟ੍ਠਸਚ੍ਚਾਨਂ ਮਗ੍ਗਕ੍ਖਣੇ ਸਰਣਗਮਨੁਪਕ੍ਕਿਲੇਸਸਮੁਚ੍ਛੇਦੇਨ ਆਰਮ੍ਮਣਤੋ ਨਿਬ੍ਬਾਨਾਰਮ੍ਮਣਂ ਹੁਤ੍ਵਾ ਕਿਚ੍ਚਤੋ ਸਕਲੇਪਿ ਰਤਨਤ੍ਤਯੇ ਇਜ੍ਝਤਿ. ਲੋਕਿਯਂ ਪੁਥੁਜ੍ਜਨਾਨਂ ਸਰਣਗਮਨੁਪਕ੍ਕਿਲੇਸਵਿਕ੍ਖਮ੍ਭਨੇਨ ਆਰਮ੍ਮਣਤੋ ਬੁਦ੍ਧਾਦਿਗੁਣਾਰਮ੍ਮਣਂ ਹੁਤ੍ਵਾ ਇਜ੍ਝਤਿ. ਤਂ ਅਤ੍ਥਤੋ ਬੁਦ੍ਧਾਦੀਸੁ ਵਤ੍ਥੂਸੁ ਸਦ੍ਧਾਪਟਿਲਾਭੋ, ਸਦ੍ਧਾਮੂਲਿਕਾ ਚ ਸਮ੍ਮਾਦਿਟ੍ਠਿ ਦਸਸੁ ਪੁਞ੍ਞਕਿਰਿਯਾਵਤ੍ਥੂਸੁ ਦਿਟ੍ਠਿਜੁਕਮ੍ਮਨ੍ਤਿ ਵੁਚ੍ਚਤਿ.

ਤਯਿਦਂ ਚਤੁਧਾ ਪਵਤ੍ਤਤਿ ਅਤ੍ਤਸਨ੍ਨਿਯ੍ਯਾਤਨੇਨ ਤਪ੍ਪਰਾਯਣਤਾਯ ਸਿਸ੍ਸਭਾਵੂਪਗਮਨੇਨ ਪਣਿਪਾਤੇਨਾਤਿ. ਤਤ੍ਥ ਅਤ੍ਤਸਨ੍ਨਿਯ੍ਯਾਤਨਂ ਨਾਮ ‘‘ਅਜ੍ਜ ਆਦਿਂ ਕਤ੍ਵਾ ਅਹਂ ਅਤ੍ਤਾਨਂ ਬੁਦ੍ਧਸ੍ਸ ਨਿਯ੍ਯਾਤੇਮਿ, ਧਮ੍ਮਸ੍ਸ, ਸਙ੍ਘਸ੍ਸਾ’’ਤਿ ਏਵਂ ਬੁਦ੍ਧਾਦੀਨਂ ਅਤ੍ਤਪਰਿਚ੍ਚਜਨਂ. ਤਪ੍ਪਰਾਯਣਤਾ ਨਾਮ ‘‘ਅਜ੍ਜ ਆਦਿਂ ਕਤ੍ਵਾ ਅਹਂ ਬੁਦ੍ਧਪਰਾਯਣੋ, ਧਮ੍ਮਪਰਾਯਣੋ, ਸਙ੍ਘਪਰਾਯਣੋ ਇਤਿ ਮਂ ਧਾਰੇਥਾ’’ਤਿ ਏਵਂ ਤਪ੍ਪਰਾਯਣਭਾਵੋ. ਸਿਸ੍ਸਭਾਵੂਪਗਮਨਂ ਨਾਮ ‘‘ਅਜ੍ਜ ਆਦਿਂ ਕਤ੍ਵਾ ਅਹਂ ਬੁਦ੍ਧਸ੍ਸ ਅਨ੍ਤੇਵਾਸਿਕੋ, ਧਮ੍ਮਸ੍ਸ, ਸਙ੍ਘਸ੍ਸ ਇਤਿ ਮਂ ਧਾਰੇਥਾ’’ਤਿ ਏਵਂ ਸਿਸ੍ਸਭਾਵੂਪਗਮੋ. ਪਣਿਪਾਤੋ ਨਾਮ ‘‘ਅਜ੍ਜ ਆਦਿਂ ਕਤ੍ਵਾ ਅਹਂ ਅਭਿਵਾਦਨ-ਪਚ੍ਚੁਟ੍ਠਾਨ-ਅਞ੍ਜਲਿਕਮ੍ਮ-ਸਾਮੀਚਿਕਮ੍ਮਂ ਬੁਦ੍ਧਾਦੀਨਂਯੇਵ ਤਿਣ੍ਣਂ ਵਤ੍ਥੂਨਂ ਕਰੋਮਿ ਇਤਿ ਮਂ ਧਾਰੇਥਾ’’ਤਿ ਏਵਂ ਬੁਦ੍ਧਾਦੀਸੁ ਪਰਮਨਿਪਚ੍ਚਕਾਰੋ. ਇਮੇਸਞ੍ਹਿ ਚਤੁਨ੍ਨਮ੍ਪਿ ਆਕਾਰਾਨਂ ਅਞ੍ਞਤਰਮ੍ਪਿ ਕਰੋਨ੍ਤੇਨ ਗਹਿਤਂਯੇਵ ਹੋਤਿ ਸਰਣਗਮਨਂ.

ਅਪਿਚ ‘‘ਭਗਵਤੋ ਅਤ੍ਤਾਨਂ ਪਰਿਚ੍ਚਜਾਮਿ, ਧਮ੍ਮਸ੍ਸ, ਸਙ੍ਘਸ੍ਸ ਅਤ੍ਤਾਨਂ ਪਰਿਚ੍ਚਜਾਮਿ, ਜੀਵਿਤਂ ਪਰਿਚ੍ਚਜਾਮਿ, ਪਰਿਚ੍ਚਤ੍ਤੋਯੇਵ ਮੇ ਅਤ੍ਤਾ, ਪਰਿਚ੍ਚਤ੍ਤਂਯੇਵ ਮੇ ਜੀਵਿਤਂ, ਜੀਵਿਤਪਰਿਯਨ੍ਤਿਕਂ ਬੁਦ੍ਧਂ ਸਰਣਂ ਗਚ੍ਛਾਮਿ, ਬੁਦ੍ਧੋ ਮੇ ਸਰਣਂ ਲੇਣਂ ਤਾਣ’’ਨ੍ਤਿ ਏਵਮ੍ਪਿ ਅਤ੍ਤਸਨ੍ਨਿਯ੍ਯਾਤਨਂ ਵੇਦਿਤਬ੍ਬਂ. ‘‘ਸਤ੍ਥਾਰਞ੍ਚ ਵਤਾਹਂ ਪਸ੍ਸੇਯ੍ਯਂ, ਭਗਵਨ੍ਤਮੇਵ ਪਸ੍ਸੇਯ੍ਯਂ, ਸੁਗਤਞ੍ਚ ਵਤਾਹਂ ਪਸ੍ਸੇਯ੍ਯਂ, ਭਗਵਨ੍ਤਮੇਵ ਪਸ੍ਸੇਯ੍ਯਂ, ਸਮ੍ਮਾਸਮ੍ਬੁਦ੍ਧਞ੍ਚ ਵਤਾਹਂ ਪਸ੍ਸੇਯ੍ਯਂ, ਭਗਵਨ੍ਤਮੇਵ ਪਸ੍ਸੇਯ੍ਯ’’ਨ੍ਤਿ (ਸਂ. ਨਿ. ੨.੧੫੪) ਏਵਮ੍ਪਿ ਮਹਾਕਸ੍ਸਪਸ੍ਸ ਸਰਣਗਮਨੇ ਵਿਯ ਸਿਸ੍ਸਭਾਵੂਪਗਮਨਂ ਦਟ੍ਠਬ੍ਬਂ.

‘‘ਸੋ ਅਹਂ ਵਿਚਰਿਸ੍ਸਾਮਿ, ਗਾਮਾ ਗਾਮਂ ਪੁਰਾ ਪੁਰਂ;

ਨਮਸ੍ਸਮਾਨੋ ਸਮ੍ਬੁਦ੍ਧਂ, ਧਮ੍ਮਸ੍ਸ ਚ ਸੁਧਮ੍ਮਤ’’ਨ੍ਤਿ. (ਸੁ. ਨਿ. ੧੯੪; ਸਂ. ਨਿ. ੧.੨੪੬);

ਏਵਮ੍ਪਿ ਆਲ਼ਵਕਾਦੀਨਂ ਸਰਣਗਮਨਂ ਵਿਯ ਤਪ੍ਪਰਾਯਣਤਾ ਵੇਦਿਤਬ੍ਬਾ. ‘‘ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਤੋ ਪਾਦਾਨਿ ਮੁਖੇਨ ਚ ਪਰਿਚੁਮ੍ਬਤਿ, ਪਾਣੀਹਿ ਚ ਪਰਿਸਮ੍ਬਾਹਤਿ, ਨਾਮਞ੍ਚ ਸਾਵੇਤਿ – ‘ਬ੍ਰਹ੍ਮਾਯੁ ਅਹਂ, ਭੋ ਗੋਤਮ, ਬ੍ਰਾਹ੍ਮਣੋ; ਬ੍ਰਹ੍ਮਾਯੁ ਅਹਂ, ਭੋ ਗੋਤਮ, ਬ੍ਰਾਹ੍ਮਣੋ’’’ਤਿ (ਮ. ਨਿ. ੨.੩੯੪) ਏਵਮ੍ਪਿ ਪਣਿਪਾਤੋ ਵੇਦਿਤਬ੍ਬੋ.

ਸੋ ਪਨੇਸ ਞਾਤਿਭਯਾਚਰਿਯਦਕ੍ਖਿਣੇਯ੍ਯਵਸੇਨ ਚਤੁਬ੍ਬਿਧੋ ਹੋਤਿ. ਤਤ੍ਥ ਦਕ੍ਖਿਣੇਯ੍ਯਪਣਿਪਾਤੇਨ ਸਰਣਗਮਨਂ ਹੋਤਿ, ਨ ਇਤਰੇਹਿ. ਸੇਟ੍ਠਵਸੇਨੇਵ ਹਿ ਸਰਣਂ ਗਣ੍ਹਾਤਿ, ਸੇਟ੍ਠਵਸੇਨ ਚ ਭਿਜ੍ਜਤਿ. ਤਸ੍ਮਾ ਯੋ ਸਾਕਿਯੋ ਵਾ ਕੋਲਿਯੋ ਵਾ ‘‘ਬੁਦ੍ਧੋ ਅਮ੍ਹਾਕਂ ਞਾਤਕੋ’’ਤਿ ਵਨ੍ਦਤਿ, ਅਗ੍ਗਹਿਤਮੇਵ ਹੋਤਿ ਸਰਣਂ. ਯੋ ਵਾ ‘‘ਸਮਣੋ ਗੋਤਮੋ ਰਾਜਪੂਜਿਤੋ ਮਹਾਨੁਭਾਵੋ ਅਵਨ੍ਦਿਯਮਾਨੋ ਅਨਤ੍ਥਮ੍ਪਿ ਕਰੇਯ੍ਯਾ’’ਤਿ ਭਯੇਨ ਵਨ੍ਦਤਿ, ਅਗ੍ਗਹਿਤਮੇਵ ਹੋਤਿ ਸਰਣਂ. ਯੋ ਵਾ ਬੋਧਿਸਤ੍ਤਕਾਲੇ ਭਗਵਤੋ ਸਨ੍ਤਿਕੇ ਕਿਞ੍ਚਿ ਉਗ੍ਗਹਿਤਂ ਸਰਮਾਨੋ ਬੁਦ੍ਧਕਾਲੇ ਵਾ –

‘‘ਏਕੇਨ ਭੋਗੇ ਭੁਞ੍ਜੇਯ੍ਯ, ਦ੍ਵੀਹਿ ਕਮ੍ਮਂ ਪਯੋਜਯੇ;

ਚਤੁਤ੍ਥਞ੍ਚ ਨਿਧਾਪੇਯ੍ਯ, ਆਪਦਾਸੁ ਭਵਿਸ੍ਸਤੀ’’ਤਿ. (ਦੀ. ਨਿ. ੩.੨੬੫) –

ਏਵਰੂਪਂ ਅਨੁਸਾਸਨਿਂ ਉਗ੍ਗਹੇਤ੍ਵਾ ‘‘ਆਚਰਿਯੋ ਮੇ’’ਤਿ ਵਨ੍ਦਤਿ, ਅਗ੍ਗਹਿਤਮੇਵ ਹੋਤਿ ਸਰਣਂ. ਯੋ ਪਨ ‘‘ਅਯਂ ਲੋਕੇ ਅਗ੍ਗਦਕ੍ਖਿਣੇਯ੍ਯੋ’’ਤਿ ਵਨ੍ਦਤਿ, ਤੇਨੇਵ ਗਹਿਤਂ ਹੋਤਿ ਸਰਣਂ.

ਏਵਂ ਗਹਿਤਸਰਣਸ੍ਸ ਚ ਉਪਾਸਕਸ੍ਸ ਵਾ ਉਪਾਸਿਕਾਯ ਵਾ ਅਞ੍ਞਤਿਤ੍ਥਿਯੇਸੁ ਪਬ੍ਬਜਿਤਮ੍ਪਿ ਞਾਤਿਂ ‘‘ਞਾਤਕੋ ਮੇ ਅਯ’’ਨ੍ਤਿ ਵਨ੍ਦਤੋ ਸਰਣਗਮਨਂ ਨ ਭਿਜ੍ਜਤਿ, ਪਗੇਵ ਅਪਬ੍ਬਜਿਤਂ. ਤਥਾ ਰਾਜਾਨਂ ਭਯਵਸੇਨ ਵਨ੍ਦਤੋ. ਸੋ ਹਿ ਰਟ੍ਠਪੂਜਿਤਤ੍ਤਾ ਅਵਨ੍ਦਿਯਮਾਨੋ ਅਨਤ੍ਥਮ੍ਪਿ ਕਰੇਯ੍ਯਾਤਿ. ਤਥਾ ਯਂ ਕਿਞ੍ਚਿ ਸਿਪ੍ਪਂ ਸਿਕ੍ਖਾਪਕਂ ਤਿਤ੍ਥਿਯਂ ‘‘ਆਚਰਿਯੋ ਮੇ ਅਯ’’ਨ੍ਤਿ ਵਨ੍ਦਤੋਪਿ ਨ ਭਿਜ੍ਜਤੀਤਿ ਏਵਂ ਸਰਣਗਮਨਪ੍ਪਭੇਦੋ ਵੇਦਿਤਬ੍ਬੋ.

ਏਤ੍ਥ ਚ ਲੋਕੁਤ੍ਤਰਸ੍ਸ ਸਰਣਗਮਨਸ੍ਸ ਚਤ੍ਤਾਰਿ ਸਾਮਞ੍ਞਫਲਾਨਿ ਵਿਪਾਕਫਲਂ, ਸਬ੍ਬਦੁਕ੍ਖਕ੍ਖਯੋ ਆਨਿਸਂਸਫਲਂ. ਵੁਤ੍ਤਞ੍ਹੇਤਂ –

‘‘ਯੋ ਚ ਬੁਦ੍ਧਞ੍ਚ ਧਮ੍ਮਞ੍ਚ, ਸਙ੍ਘਞ੍ਚ ਸਰਣਂ ਗਤੋ;

ਚਤ੍ਤਾਰਿ ਅਰਿਯਸਚ੍ਚਾਨਿ, ਸਮ੍ਮਪ੍ਪਞ੍ਞਾਯ ਪਸ੍ਸਤਿ. (ਧ. ਪ. ੧੯੦);

‘‘ਦੁਕ੍ਖਂ ਦੁਕ੍ਖਸਮੁਪ੍ਪਾਦਂ, ਦੁਕ੍ਖਸ੍ਸ ਚ ਅਤਿਕ੍ਕਮਂ;

ਅਰਿਯਞ੍ਚਟ੍ਠਙ੍ਗਿਕਂ ਮਗ੍ਗਂ, ਦੁਕ੍ਖੂਪਸਮਗਾਮਿਨਂ. (ਧ. ਪ. ੧੯੧);

‘‘ਏਤਂ ਖੋ ਸਰਣਂ ਖੇਮਂ, ਏਤਂ ਸਰਣਮੁਤ੍ਤਮਂ;

ਏਤਂ ਸਰਣਮਾਗਮ੍ਮ, ਸਬ੍ਬਦੁਕ੍ਖਾ ਪਮੁਚ੍ਚਤੀ’’ਤਿ. (ਧ. ਪ. ੧੯੨);

ਅਪਿਚ ਨਿਚ੍ਚਤੋ ਅਨੁਪਗਮਨਾਦਿਵਸੇਨਪੇਤਸ੍ਸ ਆਨਿਸਂਸਫਲਂ ਵੇਦਿਤਬ੍ਬਂ. ਵੁਤ੍ਤਞ੍ਹੇਤਂ –

‘‘ਅਟ੍ਠਾਨਮੇਤਂ, ਭਿਕ੍ਖਵੇ, ਅਨਵਕਾਸੋ, ਯਂ ਦਿਟ੍ਠਿਸਮ੍ਪਨ੍ਨੋ ਪੁਗ੍ਗਲੋ ਕਞ੍ਚਿ ਸਙ੍ਖਾਰਂ ਨਿਚ੍ਚਤੋ ਉਪਗਚ੍ਛੇਯ੍ਯ, ਸੁਖਤੋ ਉਪਗਚ੍ਛੇਯ੍ਯ, ਕਞ੍ਚਿ ਧਮ੍ਮਂ ਅਤ੍ਤਤੋ ਉਪਗਚ੍ਛੇਯ੍ਯ, ਮਾਤਰਂ ਜੀਵਿਤਾ ਵੋਰੋਪੇਯ੍ਯ, ਪਿਤਰਂ, ਅਰਹਨ੍ਤਂ ਜੀਵਿਤਾ ਵੋਰੋਪੇਯ੍ਯ, ਪਦੁਟ੍ਠਚਿਤ੍ਤੋ ਤਥਾਗਤਸ੍ਸ ਲੋਹਿਤਂ ਉਪ੍ਪਾਦੇਯ੍ਯ, ਸਙ੍ਘਂ ਭਿਨ੍ਦੇਯ੍ਯ, ਅਞ੍ਞਂ ਸਤ੍ਥਾਰਂ ਉਦ੍ਦਿਸੇਯ੍ਯ, ਨੇਤਂ ਠਾਨਂ ਵਿਜ੍ਜਤੀ’’ਤਿ (ਮ. ਨਿ. ੩.੧੨੮-੧੩੦; ਅ. ਨਿ. ੧.੨੭੨-੨੭੭).

ਲੋਕਿਯਸ੍ਸ ਪਨ ਸਰਣਗਮਨਸ੍ਸ ਭਵਸਮ੍ਪਦਾਪਿ ਭੋਗਸਮ੍ਪਦਾਪਿ ਫਲਮੇਵ. ਵੁਤ੍ਤਞ੍ਹੇਤਂ –

‘‘ਯੇ ਕੇਚਿ ਬੁਦ੍ਧਂ ਸਰਣਂ ਗਤਾਸੇ,

ਨ ਤੇ ਗਮਿਸ੍ਸਨ੍ਤਿ ਅਪਾਯਭੂਮਿਂ;

ਪਹਾਯ ਮਾਨੁਸਂ ਦੇਹਂ,

ਦੇਵਕਾਯਂ ਪਰਿਪੂਰੇਸ੍ਸਨ੍ਤੀ’’ਤਿ. (ਸਂ. ਨਿ. ੧.੩੭);

ਅਪਰਮ੍ਪਿ ਵੁਤ੍ਤਂ –

‘‘ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਅਸੀਤਿਯਾ ਦੇਵਤਾਸਹਸ੍ਸੇਹਿ ਸਦ੍ਧਿਂ ਯੇਨਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤੇਨੁਪਸਙ੍ਕਮਿ…ਪੇ… ਏਕਮਨ੍ਤਂ ਠਿਤਂ ਖੋ ਸਕ੍ਕਂ ਦੇਵਾਨਮਿਨ੍ਦਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਏਤਦਵੋਚ – ‘ਸਾਧੁ ਖੋ, ਦੇਵਾਨਮਿਨ੍ਦ, ਬੁਦ੍ਧਸਰਣਗਮਨਂ ਹੋਤਿ. ਬੁਦ੍ਧਸਰਣਗਮਨਹੇਤੁ ਖੋ ਦੇਵਾਨਮਿਨ੍ਦ ਏਵਮਿਧੇਕਚ੍ਚੇ ਸਤ੍ਤਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਨ੍ਤਿ. ਤੇ ਅਞ੍ਞੇ ਦੇਵੇ ਦਸਹਿ ਠਾਨੇਹਿ ਅਧਿਗਣ੍ਹਨ੍ਤਿ ਦਿਬ੍ਬੇਨ ਆਯੁਨਾ ਦਿਬ੍ਬੇਨ ਵਣ੍ਣੇਨ ਸੁਖੇਨ ਯਸੇਨ ਆਧਿਪਤੇਯ੍ਯੇਨ ਦਿਬ੍ਬੇਹਿ ਰੂਪੇਹਿ ਸਦ੍ਦੇਹਿ ਗਨ੍ਧੇਹਿ ਰਸੇਹਿ ਫੋਟ੍ਠਬ੍ਬੇਹੀ’’’ਤਿ (ਸਂ. ਨਿ. ੪.੩੪੧).

ਏਸੇਵ ਨਯੋ ਧਮ੍ਮੇ ਸਙ੍ਘੇ ਚ. ਅਪਿਚ ਵੇਲਾਮਸੁਤ੍ਤਾਦਿਵਸੇਨਾਪਿ (ਅ. ਨਿ. ੯.੨੦ ਆਦਯੋ) ਸਰਣਗਮਨਸ੍ਸ ਫਲਵਿਸੇਸੋ ਵੇਦਿਤਬ੍ਬੋ. ਏਵਂ ਸਰਣਗਮਨਫਲਂ ਵੇਦਿਤਬ੍ਬਂ.

ਤਤ੍ਥ ਲੋਕਿਯਸਰਣਗਮਨਂ ਤੀਸੁ ਵਤ੍ਥੂਸੁ ਅਞ੍ਞਾਣਸਂਸਯਮਿਚ੍ਛਾਞਾਣਾਦੀਹਿ ਸਂਕਿਲਿਸ੍ਸਤਿ, ਨ ਮਹਾਜੁਤਿਕਂ ਹੋਤਿ ਨ ਮਹਾਵਿਪ੍ਫਾਰਂ. ਲੋਕੁਤ੍ਤਰਸ੍ਸ ਨਤ੍ਥਿ ਸਂਕਿਲੇਸੋ. ਲੋਕਿਯਸ੍ਸ ਚ ਸਰਣਗਮਨਸ੍ਸ ਦੁਵਿਧੋ ਭੇਦੋ ਸਾਵਜ੍ਜੋ ਅਨਵਜ੍ਜੋ ਚ. ਤਤ੍ਥ ਸਾਵਜ੍ਜੋ ਅਞ੍ਞਸਤ੍ਥਾਰਾਦੀਸੁ ਅਤ੍ਤਸਨ੍ਨਿਯ੍ਯਾਤਨਾਦੀਹਿ ਹੋਤਿ, ਸੋ ਅਨਿਟ੍ਠਫਲੋ. ਅਨਵਜ੍ਜੋ ਕਾਲਕਿਰਿਯਾਯ, ਸੋ ਅਵਿਪਾਕਤ੍ਤਾ ਅਫਲੋ. ਲੋਕੁਤ੍ਤਰਸ੍ਸ ਪਨ ਨੇਵਤ੍ਥਿ ਭੇਦੋ. ਭਵਨ੍ਤਰੇਪਿ ਹਿ ਅਰਿਯਸਾਵਕੋ ਅਞ੍ਞਂ ਸਤ੍ਥਾਰਂ ਨ ਉਦ੍ਦਿਸਤੀਤਿ ਏਵਂ ਸਰਣਗਮਨਸ੍ਸ ਸਂਕਿਲੇਸੋ ਚ ਭੇਦੋ ਚ ਵੇਦਿਤਬ੍ਬੋ.

ਉਪਾਸਕਂ ਮਂ ਭਵਂ ਗੋਤਮੋ ਧਾਰੇਤੂਤਿ ਮਂ ਭਵਂ ਗੋਤਮੋ ‘‘ਉਪਾਸਕੋ ਅਯ’’ਨ੍ਤਿ ਏਵਂ ਧਾਰੇਤੁ, ਜਾਨਾਤੂਤਿ ਅਤ੍ਥੋ. ਉਪਾਸਕਵਿਧਿਕੋਸਲ੍ਲਤ੍ਥਂ ਪਨੇਤ੍ਥ ਕੋ ਉਪਾਸਕੋ, ਕਸ੍ਮਾ ਉਪਾਸਕੋਤਿ ਵੁਚ੍ਚਤਿ, ਕਿਮਸ੍ਸ ਸੀਲਂ, ਕੋ ਆਜੀਵੋ, ਕਾ ਵਿਪਤ੍ਤਿ, ਕਾ ਸਮ੍ਪਤ੍ਤੀਤਿ ਇਦਂ ਪਕਿਣ੍ਣਕਂ ਵੇਦਿਤਬ੍ਬਂ.

ਤਤ੍ਥ ਕੋ ਉਪਾਸਕੋਤਿ ਯੋ ਕੋਚਿ ਸਰਣਗਤੋ ਗਹਟ੍ਠੋ. ਵੁਤ੍ਤਞ੍ਹੇਤਂ –

‘‘ਯਤੋ ਖੋ, ਮਹਾਨਾਮ, ਉਪਾਸਕੋ ਬੁਦ੍ਧਂ ਸਰਣਂ ਗਤੋ ਹੋਤਿ, ਧਮ੍ਮਂ ਸਰਣਂ ਗਤੋ, ਸਙ੍ਘਂ ਸਰਣਂ ਗਤੋ ਹੋਤਿ. ਏਤ੍ਤਾਵਤਾ ਖੋ, ਮਹਾਨਾਮ, ਉਪਾਸਕੋ ਹੋਤੀ’’ਤਿ (ਸਂ. ਨਿ. ੫.੧੦੩੩).

ਕਸ੍ਮਾ ਉਪਾਸਕੋਤਿ. ਰਤਨਤ੍ਤਯਸ੍ਸ ਉਪਾਸਨਤੋ. ਸੋ ਹਿ ਬੁਦ੍ਧਂ ਉਪਾਸਤੀਤਿ ਉਪਾਸਕੋ. ਧਮ੍ਮਂ, ਸਙ੍ਘਂ ਉਪਾਸਤੀਤਿ ਉਪਾਸਕੋਤਿ.

ਕਿਮਸ੍ਸ ਸੀਲਨ੍ਤਿ. ਪਞ੍ਚ ਵੇਰਮਣਿਯੋ. ਯਥਾਹ –

‘‘ਯਤੋ ਖੋ, ਮਹਾਨਾਮ, ਉਪਾਸਕੋ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ, ਅਦਿਨ੍ਨਾਦਾਨਾ, ਕਾਮੇਸੁਮਿਚ੍ਛਾਚਾਰਾ, ਮੁਸਾਵਾਦਾ, ਸੁਰਾਮੇਰਯਮਜ੍ਜਪ੍ਪਮਾਦਟ੍ਠਾਨਾ ਪਟਿਵਿਰਤੋ ਹੋਤਿ. ਏਤ੍ਤਾਵਤਾ ਖੋ, ਮਹਾਨਾਮ, ਉਪਾਸਕੋ ਸੀਲਵਾ ਹੋਤੀ’’ਤਿ (ਸਂ. ਨਿ. ੫.੧੦੩੩).

ਕੋ ਆਜੀਵੋਤਿ. ਪਞ੍ਚ ਮਿਚ੍ਛਾਵਣਿਜ੍ਜਾ ਪਹਾਯ ਧਮ੍ਮੇਨ ਸਮੇਨ ਜੀਵਿਕਕਪ੍ਪਨਂ. ਵੁਤ੍ਤਞ੍ਹੇਤਂ –

‘‘ਪਞ੍ਚਿਮਾ, ਭਿਕ੍ਖਵੇ, ਵਣਿਜ੍ਜਾ ਉਪਾਸਕੇਨ ਅਕਰਣੀਯਾ. ਕਤਮਾ ਪਞ੍ਚ. ਸਤ੍ਥਵਣਿਜ੍ਜਾ, ਸਤ੍ਤਵਣਿਜ੍ਜਾ, ਮਂਸਵਣਿਜ੍ਜਾ, ਮਜ੍ਜਵਣਿਜ੍ਜਾ, ਵਿਸਵਣਿਜ੍ਜਾ. ਇਮਾ ਖੋ, ਭਿਕ੍ਖਵੇ, ਪਞ੍ਚ ਵਣਿਜ੍ਜਾ ਉਪਾਸਕੇਨ ਅਕਰਣੀਯਾ’’ਤਿ (ਅ. ਨਿ. ੫.੧੭੭).

ਕਾ ਵਿਪਤ੍ਤੀਤਿ. ਯਾ ਤਸ੍ਸੇਵ ਸੀਲਸ੍ਸ ਚ ਆਜੀਵਸ੍ਸ ਚ ਵਿਪਤ੍ਤਿ, ਅਯਮਸ੍ਸ ਵਿਪਤ੍ਤਿ. ਅਪਿਚ ਯਾਯ ਏਸ ਚਣ੍ਡਾਲੋ ਚੇਵ ਹੋਤਿ ਮਲਞ੍ਚ ਪਤਿਕੁਟ੍ਠੋ ਚ, ਸਾਪਿ ਤਸ੍ਸ ਵਿਪਤ੍ਤੀਤਿ ਵੇਦਿਤਬ੍ਬਾ. ਤੇ ਚ ਅਤ੍ਥਤੋ ਅਸ੍ਸਦ੍ਧਿਯਾਦਯੋ ਪਞ੍ਚ ਧਮ੍ਮਾ ਹੋਨ੍ਤਿ. ਯਥਾਹ –

‘‘ਪਞ੍ਚਹਿ, ਭਿਕ੍ਖਵੇ, ਧਮ੍ਮੇਹਿ ਸਮਨ੍ਨਾਗਤੋ ਉਪਾਸਕੋ ਉਪਾਸਕਚਣ੍ਡਾਲੋ ਚ ਹੋਤਿ ਉਪਾਸਕਮਲਞ੍ਚ ਉਪਾਸਕਪਤਿਕੁਟ੍ਠੋ ਚ. ਕਤਮੇਹਿ ਪਞ੍ਚਹਿ? ਅਸ੍ਸਦ੍ਧੋ ਹੋਤਿ, ਦੁਸ੍ਸੀਲੋ ਹੋਤਿ, ਕੋਤੂਹਲਮਙ੍ਗਲਿਕੋ ਹੋਤਿ, ਮਙ੍ਗਲਂ ਪਚ੍ਚੇਤਿ ਨੋ ਕਮ੍ਮਂ, ਇਤੋ ਚ ਬਹਿਦ੍ਧਾ ਦਕ੍ਖਿਣੇਯ੍ਯਂ ਪਰਿਯੇਸਤਿ, ਤਤ੍ਥ ਚ ਪੁਬ੍ਬਕਾਰਂ ਕਰੋਤੀ’’ਤਿ (ਅ. ਨਿ. ੫.੧੭੫).

ਕਾ ਸਮ੍ਪਤ੍ਤੀਤਿ. ਯਾ ਚਸ੍ਸ ਸੀਲਸਮ੍ਪਦਾ ਚ ਆਜੀਵਸਮ੍ਪਦਾ ਚ, ਸਾ ਸਮ੍ਪਤ੍ਤਿ. ਯੇ ਚਸ੍ਸ ਰਤਨਭਾਵਾਦਿਕਰਾ ਸਦ੍ਧਾਦਯੋ ਪਞ੍ਚ ਧਮ੍ਮਾ. ਯਥਾਹ –

‘‘ਪਞ੍ਚਹਿ, ਭਿਕ੍ਖਵੇ, ਧਮ੍ਮੇਹਿ ਸਮਨ੍ਨਾਗਤੋ ਉਪਾਸਕੋ ਉਪਾਸਕਰਤਨਞ੍ਚ ਹੋਤਿ ਉਪਾਸਕਪਦੁਮਞ੍ਚ ਉਪਾਸਕਪੁਣ੍ਡਰੀਕਞ੍ਚ. ਕਤਮੇਹਿ ਪਞ੍ਚਹਿ? ਸਦ੍ਧੋ ਹੋਤਿ, ਸੀਲਵਾ ਹੋਤਿ, ਨ ਕੋਤੂਹਲਮਙ੍ਗਲਿਕੋ ਹੋਤਿ, ਕਮ੍ਮਂ ਪਚ੍ਚੇਤਿ ਨੋ ਮਙ੍ਗਲਂ, ਨ ਇਤੋ ਬਹਿਦ੍ਧਾ ਦਕ੍ਖਿਣੇਯ੍ਯਂ ਗਵੇਸਤਿ, ਇਧ ਚ ਪੁਬ੍ਬਕਾਰਂ ਕਰੋਤੀ’’ਤਿ (ਅ. ਨਿ. ੫.੧੭੫).

ਅਜ੍ਜਤਗ੍ਗੇਤਿ ਏਤ੍ਥ ਅਯਂ ਅਗ੍ਗਸਦ੍ਦੋ ਆਦਿਕੋਟਿਕੋਟ੍ਠਾਸਸੇਟ੍ਠੇਸੁ ਦਿਸ੍ਸਤਿ. ‘‘ਅਜ੍ਜਤਗ੍ਗੇ ਸਮ੍ਮ, ਦੋਵਾਰਿਕ, ਆਵਰਾਮਿ ਦ੍ਵਾਰਂ ਨਿਗਣ੍ਠਾਨਂ ਨਿਗਣ੍ਠੀਨ’’ਨ੍ਤਿਆਦੀਸੁ (ਮ. ਨਿ. ੨.੭੦) ਹਿ ਆਦਿਮ੍ਹਿ ਦਿਸ੍ਸਤਿ. ‘‘ਤੇਨੇਵ ਅਙ੍ਗੁਲਗ੍ਗੇਨ ਤਂ ਅਙ੍ਗੁਲਗ੍ਗਂ ਪਰਾਮਸੇਯ੍ਯ (ਕਥਾ. ੪੪੧). ਉਚ੍ਛਗ੍ਗਂ ਵੇਲ਼ਗ੍ਗ’’ਨ੍ਤਿਆਦੀਸੁ ਕੋਟਿਯਂ. ‘‘ਅਮ੍ਬਿਲਗ੍ਗਂ ਵਾ ਮਧੁਰਗ੍ਗਂ ਵਾ ਤਿਤ੍ਤਕਗ੍ਗਂ ਵਾ (ਸਂ. ਨਿ. ੫.੩੭੪), ਅਨੁਜਾਨਾਮਿ, ਭਿਕ੍ਖਵੇ, ਵਿਹਾਰਗ੍ਗੇਨ ਵਾ ਪਰਿਵੇਣਗ੍ਗੇਨ ਵਾ ਭਾਜੇਤੁ’’ਨ੍ਤਿਆਦੀਸੁ (ਚੂਲ਼ਵ. ੩੧੮) ਕੋਟ੍ਠਾਸੇ. ‘‘ਯਾਵਤਾ, ਭਿਕ੍ਖਵੇ, ਸਤ੍ਤਾ ਅਪਦਾ ਵਾ…ਪੇ… ਤਥਾਗਤੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿਆਦੀਸੁ (ਅ. ਨਿ. ੪.੩੪) ਸੇਟ੍ਠੇ. ਇਧ ਪਨਾਯਂ ਆਦਿਮ੍ਹਿ ਦਟ੍ਠਬ੍ਬੋ. ਤਸ੍ਮਾ ਅਜ੍ਜਤਗ੍ਗੇਤਿ ਅਜ੍ਜਤਂ ਆਦਿਂ ਕਤ੍ਵਾਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਅਜ੍ਜਤਨ੍ਤਿ ਅਜ੍ਜਭਾਵਂ. ਅਜ੍ਜਦਗ੍ਗੇਤਿ ਵਾ ਪਾਠੋ, ਦਕਾਰੋ ਪਦਸਨ੍ਧਿਕਰੋ, ਅਜ੍ਜ ਅਗ੍ਗਂ ਕਤ੍ਵਾਤਿ ਅਤ੍ਥੋ.

ਪਾਣੁਪੇਤਨ੍ਤਿ ਪਾਣੇਹਿ ਉਪੇਤਂ, ਯਾਵ ਮੇ ਜੀਵਿਤਂ ਪਵਤ੍ਤਤਿ, ਤਾਵ ਉਪੇਤਂ, ਅਨਞ੍ਞਸਤ੍ਥੁਕਂ ਤੀਹਿ ਸਰਣਗਮਨੇਹਿ ਸਰਣਂ ਗਤਂ ਉਪਾਸਕਂ ਕਪ੍ਪਿਯਕਾਰਕਂ ਮਂ ਭਵਂ ਗੋਤਮੋ ਧਾਰੇਤੁ ਜਾਨਾਤੁ. ਅਹਞ੍ਹਿ ਸਚੇਪਿ ਮੇ ਤਿਖਿਣੇਨ ਅਸਿਨਾ ਸੀਸਂ ਛਿਨ੍ਦੇਯ੍ਯ, ਨੇਵ ਬੁਦ੍ਧਂ ‘‘ਨ ਬੁਦ੍ਧੋ’’ਤਿ ਵਾ ਧਮ੍ਮਂ ‘‘ਨ ਧਮ੍ਮੋ’’ਤਿ ਵਾ ਸਙ੍ਘਂ ‘‘ਨ ਸਙ੍ਘੋ’’ਤਿ ਵਾ ਵਦੇਯ੍ਯਨ੍ਤਿ ਏਵਂ ਅਤ੍ਤਸਨ੍ਨਿਯ੍ਯਾਤਨੇਨ ਸਰਣਂ ਗਨ੍ਤ੍ਵਾ ਚਤੂਹਿ ਚ ਪਚ੍ਚਯੇਹਿ ਪਵਾਰੇਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮੀਤਿ.

੧੭. ਸਤ੍ਤਮੇ ਜਾਣੁਸ੍ਸੋਣੀਤਿ ਜਾਣੁਸ੍ਸੋਣਿਠਾਨਨ੍ਤਰਂ ਕਿਰ ਨਾਮੇਕਂ ਠਾਨਨ੍ਤਰਂ, ਤਂ ਯੇਨ ਕੁਲੇਨ ਲਦ੍ਧਂ, ਤਂ ਜਾਣੁਸ੍ਸੋਣਿਕੁਲਨ੍ਤਿ ਵੁਚ੍ਚਤਿ. ਅਯਂ ਤਸ੍ਮਿਂ ਕੁਲੇ ਜਾਤਤ੍ਤਾ ਰਞ੍ਞੋ ਸਨ੍ਤਿਕੇ ਚ ਲਦ੍ਧਜਾਣੁਸ੍ਸੋਣਿਸਕ੍ਕਾਰਤ੍ਤਾ ਜਾਣੁਸ੍ਸੋਣੀਤਿ ਵੁਚ੍ਚਤਿ. ਤੇਨੁਪਸਙ੍ਕਮੀਤਿ ‘‘ਸਮਣੋ ਕਿਰ ਗੋਤਮੋ ਪਣ੍ਡਿਤੋ ਬ੍ਯਤ੍ਤੋ ਬਹੁਸ੍ਸੁਤੋ’’ਤਿ ਸੁਤ੍ਵਾ ‘‘ਸਚੇ ਸੋ ਲਿਙ੍ਗਵਿਭਤ੍ਤਿਕਾਰਕਾਦਿਭੇਦਂ ਜਾਨਿਸ੍ਸਤਿ, ਅਮ੍ਹੇਹਿ ਞਾਤਮੇਵ ਜਾਨਿਸ੍ਸਤਿ, ਅਞ੍ਞਾਤਂ ਕਿਂ ਜਾਨਿਸ੍ਸਤਿ. ਞਾਤਮੇਵ ਕਥੇਸ੍ਸਤਿ, ਅਞ੍ਞਾਤਂ ਕਿਂ ਕਥੇਸ੍ਸਤੀ’’ਤਿ ਚਿਨ੍ਤੇਤ੍ਵਾ ਮਾਨਦ੍ਧਜਂ ਪਗ੍ਗਯ੍ਹ ਸਿਙ੍ਗਂ ਉਕ੍ਖਿਪਿਤ੍ਵਾ ਮਹਾਪਰਿਵਾਰੇਹਿ ਪਰਿਵੁਤੋ ਯੇਨ ਭਗਵਾ ਤੇਨੁਪਸਙ੍ਕਮਿ. ਕਤਤ੍ਤਾ ਚ, ਬ੍ਰਾਹ੍ਮਣ, ਅਕਤਤ੍ਤਾ ਚਾਤਿ ਸਤ੍ਥਾ ਤਸ੍ਸ ਵਚਨਂ ਸੁਤ੍ਵਾ ‘‘ਅਯਂ ਬ੍ਰਾਹ੍ਮਣੋ ਇਧ ਆਗਚ੍ਛਨ੍ਤੋ ਨ ਜਾਨਿਤੁਕਾਮੋ ਅਤ੍ਥਗਵੇਸੀ ਹੁਤ੍ਵਾ ਆਗਤੋ, ਮਾਨਂ ਪਨ ਪਗ੍ਗਯ੍ਹ ਸਿਙ੍ਗਂ ਉਕ੍ਖਿਪਿਤ੍ਵਾ ਆਗਤੋ. ਕਿਂ ਨੁ ਖ੍ਵਸ੍ਸ ਯਥਾ ਪਞ੍ਹਸ੍ਸ ਅਤ੍ਥਂ ਜਾਨਾਤਿ, ਏਵਂ ਕਥਿਤੇ ਵਡ੍ਢਿ ਭਵਿਸ੍ਸਤਿ, ਉਦਾਹੁ ਯਥਾ ਨ ਜਾਨਾਤੀ’’ਤਿ ਚਿਨ੍ਤੇਤ੍ਵਾ ‘‘ਯਥਾ ਨ ਜਾਨਾਤਿ, ਏਵਂ ਕਥਿਤੇ ਵਡ੍ਢਿ ਭਵਿਸ੍ਸਤੀ’’ਤਿ ਞਤ੍ਵਾ ‘‘ਕਤਤ੍ਤਾ ਚ, ਬ੍ਰਾਹ੍ਮਣ, ਅਕਤਤ੍ਤਾ ਚਾ’’ਤਿ ਆਹ.

ਬ੍ਰਾਹ੍ਮਣੋ ਤਂ ਸੁਤ੍ਵਾ ‘‘ਸਮਣੋ ਗੋਤਮੋ ਕਤਤ੍ਤਾਪਿ ਅਕਤਤ੍ਤਾਪਿ ਨਿਰਯੇ ਨਿਬ੍ਬਤ੍ਤਿਂ ਵਦਤਿ, ਇਦਂ ਉਭਯਕਾਰਣੇਨਾਪਿ ਏਕਟ੍ਠਾਨੇ ਨਿਬ੍ਬਤ੍ਤਿਯਾ ਕਥਿਤਤ੍ਤਾ ਦੁਜ੍ਜਾਨਂ ਮਹਨ੍ਧਕਾਰਂ, ਨਤ੍ਥਿ ਮਯ੍ਹਂ ਏਤ੍ਥ ਪਤਿਟ੍ਠਾ. ਸਚੇ ਪਨਾਹਂ ਏਤ੍ਤਕੇਨੇਵ ਤੁਣ੍ਹੀ ਭਵੇਯ੍ਯਂ, ਬ੍ਰਾਹ੍ਮਣਾਨਂ ਮਜ੍ਝੇ ਕਥਨਕਾਲੇਪਿ ਮਂ ਏਵਂ ਵਦੇਯ੍ਯੁਂ – ‘ਤ੍ਵਂ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕਂ ਮਾਨਂ ਪਗ੍ਗਯ੍ਹ ਸਿਙ੍ਗਂ ਉਕ੍ਖਿਪਿਤ੍ਵਾ ਗਤੋਸਿ, ਏਕਵਚਨੇਨੇਵ ਤੁਣ੍ਹੀ ਹੁਤ੍ਵਾ ਕਿਞ੍ਚਿ ਵਤ੍ਤੁਂ ਨਾਸਕ੍ਖਿ, ਇਮਸ੍ਮਿਂ ਠਾਨੇ ਕਸ੍ਮਾ ਕਥੇਸੀ’ਤਿ. ਤਸ੍ਮਾ ਪਰਾਜਿਤੋਪਿ ਅਪਰਾਜਿਤਸਦਿਸੋ ਹੁਤ੍ਵਾ ਪੁਨ ਸਗ੍ਗਗਮਨਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਕੋ ਨੁ ਖੋ, ਭੋ ਗੋਤਮਾਤਿ ਇਮਂ ਦੁਤਿਯਪਞ੍ਹਂ ਆਰਭਿ.

ਏਵਮ੍ਪਿ ਤਸ੍ਸ ਅਹੋਸਿ – ‘‘ਉਪਰਿਪਞ੍ਹੇਨ ਹੇਟ੍ਠਾਪਞ੍ਹਂ ਜਾਨਿਸ੍ਸਾਮਿ, ਹੇਟ੍ਠਾਪਞ੍ਹੇਨ ਉਪਰਿਪਞ੍ਹ’’ਨ੍ਤਿ. ਤਸ੍ਮਾਪਿ ਇਮਂ ਪਞ੍ਹਂ ਪੁਚ੍ਛਿ. ਸਤ੍ਥਾ ਪੁਰਿਮਨਯੇਨੇਵ ਚਿਨ੍ਤੇਤ੍ਵਾ ਯਥਾ ਨ ਜਾਨਾਤਿ, ਏਵਮੇਵ ਕਥੇਨ੍ਤੋ ਪੁਨਪਿ ‘‘ਕਤਤ੍ਤਾ ਚ, ਬ੍ਰਾਹ੍ਮਣ, ਅਕਤਤ੍ਤਾ ਚਾ’’ਤਿ ਆਹ. ਬ੍ਰਾਹ੍ਮਣੋ ਤਸ੍ਮਿਮ੍ਪਿ ਪਤਿਟ੍ਠਾਤੁਂ ਅਸਕ੍ਕੋਨ੍ਤੋ ‘‘ਅਲਂ, ਭੋ, ਨ ਈਦਿਸਸ੍ਸ ਪੁਰਿਸਸ੍ਸ ਸਨ੍ਤਿਕਂ ਆਗਤੇਨ ਅਜਾਨਿਤ੍ਵਾ ਗਨ੍ਤੁਂ ਵਟ੍ਟਤਿ, ਸਕਵਾਦਂ ਪਹਾਯ ਸਮਣਂ ਗੋਤਮਂ ਅਨੁਵਤ੍ਤਿਤ੍ਵਾ ਮਯ੍ਹਂ ਅਤ੍ਥਂ ਗਵੇਸਿਸ੍ਸਾਮਿ, ਪਰਲੋਕਮਗ੍ਗਂ ਸੋਧੇਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਸਤ੍ਥਾਰਂ ਆਯਾਚਨ੍ਤੋ ਨ ਖੋ ਅਹਨ੍ਤਿਆਦਿਮਾਹ. ਅਥਸ੍ਸ ਨਿਹਤਮਾਨਤਂ ਞਤ੍ਵਾ ਸਤ੍ਥਾ ਉਪਰਿ ਦੇਸਨਂ ਵਡ੍ਢੇਨ੍ਤੋ ਤੇਨ ਹਿ, ਬ੍ਰਾਹ੍ਮਣਾਤਿਆਦਿਮਾਹ. ਤਤ੍ਥ ਤੇਨ ਹੀਤਿ ਕਾਰਣਨਿਦ੍ਦੇਸੋ. ਯਸ੍ਮਾ ਸਂਖਿਤ੍ਤੇਨ ਭਾਸਿਤਸ੍ਸ ਅਤ੍ਥਂ ਅਜਾਨਨ੍ਤੋ ਵਿਤ੍ਥਾਰਦੇਸਨਂ ਯਾਚਸਿ, ਤਸ੍ਮਾਤਿ ਅਤ੍ਥੋ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

੧੮. ਅਟ੍ਠਮੇ ਆਯਸ੍ਮਾਤਿ ਪਿਯਵਚਨਮੇਤਂ. ਆਨਨ੍ਦੋਤਿ ਤਸ੍ਸ ਥੇਰਸ੍ਸ ਨਾਮਂ. ਏਕਂਸੇਨਾਤਿ ਏਕਨ੍ਤੇਨ. ਅਨੁਵਿਚ੍ਚਾਤਿ ਅਨੁਪਵਿਸਿਤ੍ਵਾ. ਵਿਞ੍ਞੂਤਿ ਪਣ੍ਡਿਤਾ. ਗਰਹਨ੍ਤੀਤਿ ਨਿਨ੍ਦਨ੍ਤਿ, ਅਵਣ੍ਣਂ ਭਾਸਨ੍ਤਿ. ਸੇਸਮੇਤ੍ਥ ਨਵਮੇ ਚ ਸਬ੍ਬਂ ਉਤ੍ਤਾਨਤ੍ਥਮੇਵ.

੨੦. ਦਸਮੇ ਦੁਨ੍ਨਿਕ੍ਖਿਤ੍ਤਞ੍ਚ ਪਦਬ੍ਯਞ੍ਜਨਨ੍ਤਿ ਉਪ੍ਪਟਿਪਾਟਿਯਾ ਗਹਿਤਪਾਲ਼ਿਪਦਮੇਵ ਹਿ ਅਤ੍ਥਸ੍ਸ ਬ੍ਯਞ੍ਜਨਤ੍ਤਾ ਬ੍ਯਞ੍ਜਨਨ੍ਤਿ ਵੁਚ੍ਚਤਿ. ਉਭਯਮੇਤਂ ਪਾਲ਼ਿਯਾਵ ਨਾਮਂ. ਅਤ੍ਥੋ ਚ ਦੁਨ੍ਨੀਤੋਤਿ ਪਰਿਵਤ੍ਤੇਤ੍ਵਾ ਉਪ੍ਪਟਿਪਾਟਿਯਾ ਗਹਿਤਾ ਅਟ੍ਠਕਥਾ. ਦੁਨ੍ਨਿਕ੍ਖਿਤ੍ਤਸ੍ਸ, ਭਿਕ੍ਖਵੇ, ਪਦਬ੍ਯਞ੍ਜਨਸ੍ਸ ਅਤ੍ਥੋਪਿ ਦੁਨ੍ਨਯੋ ਹੋਤੀਤਿ ਪਰਿਵਤ੍ਤੇਤ੍ਵਾ ਉਪ੍ਪਟਿਪਾਟਿਯਾ ਗਹਿਤਾਯ ਪਾਲ਼ਿਯਾ ਅਟ੍ਠਕਥਾ ਨਾਮ ਦੁਨ੍ਨਯਾ ਦੁਨ੍ਨੀਹਾਰਾ ਦੁਕ੍ਕਥਾ ਨਾਮ ਹੋਤਿ. ਏਕਾਦਸਮੇ ਵੁਤ੍ਤਪਟਿਪਕ੍ਖਨਯੇਨ ਅਤ੍ਥੋ ਵੇਦਿਤਬ੍ਬੋਤਿ.

ਅਧਿਕਰਣਵਗ੍ਗੋ ਦੁਤਿਯੋ.

੩. ਬਾਲਵਗ੍ਗਵਣ੍ਣਨਾ

੨੨. ਤਤਿਯਸ੍ਸ ਪਠਮੇ ਅਚ੍ਚਯਂ ਅਚ੍ਚਯਤੋ ਨ ਪਸ੍ਸਤੀਤਿ ‘‘ਅਪਰਜ੍ਝਿਤ੍ਵਾ ਅਪਰਦ੍ਧਂ ਮਯਾ’’ਤਿ ਅਤ੍ਤਨੋ ਅਪਰਾਧਂ ਨ ਪਸ੍ਸਤਿ, ਅਪਰਦ੍ਧਂ ਮਯਾਤਿ ਵਤ੍ਵਾ ਦਣ੍ਡਕਮ੍ਮਂ ਆਹਰਿਤ੍ਵਾ ਨ ਖਮਾਪੇਤੀਤਿ ਅਤ੍ਥੋ. ਅਚ੍ਚਯਂ ਦੇਸੇਨ੍ਤਸ੍ਸਾਤਿ ਏਵਂ ਵਤ੍ਵਾ ਦਣ੍ਡਕਮ੍ਮਂ ਆਹਰਿਤ੍ਵਾ ਖਮਾਪੇਨ੍ਤਸ੍ਸ. ਯਥਾਧਮ੍ਮਂ ਨਪ੍ਪਟਿਗ੍ਗਣ੍ਹਾਤੀਤਿ ‘‘ਪੁਨ ਏਵਂ ਨ ਕਰਿਸ੍ਸਾਮਿ, ਖਮਥ ਮੇ’’ਤਿ ਵੁਚ੍ਚਮਾਨੋ ਅਚ੍ਚਯਂ ਇਮਂ ਯਥਾਧਮ੍ਮਂ ਯਥਾਸਭਾਵਂ ਨ ਪਟਿਗ੍ਗਣ੍ਹਾਤਿ. ‘‘ਇਤੋ ਪਟ੍ਠਾਯ ਪੁਨ ਏਵਰੂਪਂ ਮਾ ਅਕਾਸਿ, ਖਮਾਮਿ ਤੁਯ੍ਹ’’ਨ੍ਤਿ ਨ ਵਦਤਿ. ਸੁਕ੍ਕਪਕ੍ਖੋ ਵੁਤ੍ਤਪਟਿਪਕ੍ਖਨਯੇਨੇਵ ਵੇਦਿਤਬ੍ਬੋ.

੨੩. ਦੁਤਿਯੇ ਅਬ੍ਭਾਚਿਕ੍ਖਨ੍ਤੀਤਿ ਅਭਿਭਵਿਤ੍ਵਾ ਆਚਿਕ੍ਖਨ੍ਤਿ, ਅਭੂਤੇਨ ਵਦਨ੍ਤਿ. ਦੋਸਨ੍ਤਰੋਤਿ ਅਨ੍ਤਰੇ ਪਤਿਤਦੋਸੋ. ਏਵਰੂਪੋ ਹਿ ‘‘ਨਤ੍ਥਿ ਸਮਣਸ੍ਸ ਗੋਤਮਸ੍ਸ ਉਤ੍ਤਰਿਮਨੁਸ੍ਸਧਮ੍ਮੋ’’ਤਿਆਦੀਨਿ ਵਦਨ੍ਤੋ ਸੁਨਕ੍ਖਤ੍ਤੋ ਵਿਯ ਤਥਾਗਤਂ ਅਬ੍ਭਾਚਿਕ੍ਖਤਿ. ਸਦ੍ਧੋ ਵਾ ਦੁਗ੍ਗਹਿਤੇਨਾਤਿ ਯੋ ਹਿ ਞਾਣਵਿਰਹਿਤਾਯ ਸਦ੍ਧਾਯ ਅਤਿਸਦ੍ਧੋ ਹੋਤਿ ਮੁਦ੍ਧਪ੍ਪਸਨ੍ਨੋ, ਸੋਪਿ ‘‘ਬੁਦ੍ਧੋ ਨਾਮ ਸਬ੍ਬਲੋਕੁਤ੍ਤਰੋ, ਸਬ੍ਬੇ ਤਸ੍ਸ ਕੇਸਾਦਯੋ ਬਾਤ੍ਤਿਂਸ ਕੋਟ੍ਠਾਸਾ ਲੋਕੁਤ੍ਤਰਾਯੇਵਾ’’ਤਿਆਦਿਨਾ ਨਯੇਨ ਦੁਗ੍ਗਹਿਤਂ ਗਣ੍ਹਿਤ੍ਵਾ ਤਥਾਗਤਂ ਅਬ੍ਭਾਚਿਕ੍ਖਤਿ. ਤਤਿਯਂ ਉਤ੍ਤਾਨਤ੍ਥਮੇਵਾਤਿ.

੨੫. ਚਤੁਤ੍ਥੇ ਨੇਯ੍ਯਤ੍ਥਂ ਸੁਤ੍ਤਨ੍ਤਨ੍ਤਿ ਯਸ੍ਸ ਅਤ੍ਥੋ ਨੇਤਬ੍ਬੋ, ਤਂ ਨੇਤਬ੍ਬਤ੍ਥਂ ਸੁਤ੍ਤਨ੍ਤਂ. ਨੀਤਤ੍ਥੋ ਸੁਤ੍ਤਨ੍ਤੋਤਿ ਦੀਪੇਤੀਤਿ ਕਥਿਤਤ੍ਥੋ ਅਯਂ ਸੁਤ੍ਤਨ੍ਤੋਤਿ ਵਦਤਿ. ਤਤ੍ਥ ‘‘ਏਕਪੁਗ੍ਗਲੋ, ਭਿਕ੍ਖਵੇ, ਦ੍ਵੇਮੇ, ਭਿਕ੍ਖਵੇ, ਪੁਗ੍ਗਲਾ, ਤਯੋਮੇ, ਭਿਕ੍ਖਵੇ, ਪੁਗ੍ਗਲਾ, ਚਤ੍ਤਾਰੋਮੇ, ਭਿਕ੍ਖਵੇ, ਪੁਗ੍ਗਲਾ’’ਤਿ ਏਵਰੂਪੋ ਸੁਤ੍ਤਨ੍ਤੋ ਨੇਯ੍ਯਤ੍ਥੋ ਨਾਮ. ਏਤ੍ਥ ਹਿ ਕਿਞ੍ਚਾਪਿ ਸਮ੍ਮਾਸਮ੍ਬੁਦ੍ਧੇਨ ‘‘ਏਕਪੁਗ੍ਗਲੋ, ਭਿਕ੍ਖਵੇ’’ਤਿਆਦਿ ਵੁਤ੍ਤਂ, ਪਰਮਤ੍ਥਤੋ ਪਨ ਪੁਗ੍ਗਲੋ ਨਾਮ ਨਤ੍ਥੀਤਿ ਏਵਮਸ੍ਸ ਅਤ੍ਥੋ ਨੇਤਬ੍ਬੋਵ ਹੋਤਿ. ਅਯਂ ਪਨ ਅਤ੍ਤਨੋ ਬਾਲਤਾਯ ਨੀਤਤ੍ਥੋ ਅਯਂ ਸੁਤ੍ਤਨ੍ਤੋਤਿ ਦੀਪੇਤਿ. ਪਰਮਤ੍ਥਤੋ ਹਿ ਪੁਗ੍ਗਲੇ ਅਸਤਿ ਨ ਤਥਾਗਤੋ ‘‘ਏਕਪੁਗ੍ਗਲੋ, ਭਿਕ੍ਖਵੇ’’ਤਿਆਦੀਨਿ ਵਦੇਯ੍ਯ. ਯਸ੍ਮਾ ਪਨ ਤੇਨ ਵੁਤ੍ਤਂ, ਤਸ੍ਮਾ ਪਰਮਤ੍ਥਤੋ ਅਤ੍ਥਿ ਪੁਗ੍ਗਲੋਤਿ ਗਣ੍ਹਨ੍ਤੋ ਤਂ ਨੇਯ੍ਯਤ੍ਥਂ ਸੁਤ੍ਤਨ੍ਤਂ ਨੀਤਤ੍ਥੋ ਸੁਤ੍ਤਨ੍ਤੋਤਿ ਦੀਪੇਤਿ. ਨੀਤਤ੍ਥਨ੍ਤਿ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਏਵਂ ਕਥਿਤਤ੍ਥਂ. ਏਤ੍ਥ ਹਿ ਅਨਿਚ੍ਚਮੇਵ ਦੁਕ੍ਖਮੇਵ ਅਨਤ੍ਤਾਯੇਵਾਤਿ ਅਤ੍ਥੋ. ਅਯਂ ਪਨ ਅਤ੍ਤਨੋ ਬਾਲਤਾਯ ‘‘ਨੇਯ੍ਯਤ੍ਥੋ ਅਯਂ ਸੁਤ੍ਤਨ੍ਤੋ, ਅਤ੍ਥਮਸ੍ਸ ਆਹਰਿਸ੍ਸਾਮੀ’’ਤਿ ‘‘ਨਿਚ੍ਚਂ ਨਾਮ ਅਤ੍ਥਿ, ਸੁਖਂ ਨਾਮ ਅਤ੍ਥਿ, ਅਤ੍ਤਾ ਨਾਮ ਅਤ੍ਥੀ’’ਤਿ ਗਣ੍ਹਨ੍ਤੋ ਨੀਤਤ੍ਥਂ ਸੁਤ੍ਤਨ੍ਤਂ ਨੇਯ੍ਯਤ੍ਥੋ ਸੁਤ੍ਤਨ੍ਤੋਤਿ ਦੀਪੇਤਿ ਨਾਮ. ਪਞ੍ਚਮਂ ਉਤ੍ਤਾਨਤ੍ਥਮੇਵਾਤਿ.

੨੭. ਛਟ੍ਠੇ ਪਟਿਚ੍ਛਨ੍ਨਕਮ੍ਮਨ੍ਤਸ੍ਸਾਤਿ ਪਾਪਕਮ੍ਮਸ੍ਸ. ਪਾਪਂ ਹਿ ਪਟਿਚ੍ਛਾਦੇਤ੍ਵਾ ਕਰੋਨ੍ਤਿ. ਨੋ ਚੇਪਿ ਪਟਿਚ੍ਛਾਦੇਤ੍ਵਾ ਕਰੋਨ੍ਤਿ, ਪਾਪਕਮ੍ਮਂ ਪਟਿਚ੍ਛਨ੍ਨਮੇਵਾਤਿ ਵੁਚ੍ਚਤਿ. ਨਿਰਯੋਤਿ ਸਹੋਕਾਸਕਾ ਖਨ੍ਧਾ. ਤਿਰਚ੍ਛਾਨਯੋਨਿਯਂ ਖਨ੍ਧਾਵ ਲਬ੍ਭਨ੍ਤਿ. ਸਤ੍ਤਮਟ੍ਠਮਾਨਿ ਉਤ੍ਤਾਨਤ੍ਥਾਨੇਵ.

੩੦. ਨਵਮੇ ਪਟਿਗ੍ਗਾਹਾਤਿ ਪਟਿਗ੍ਗਾਹਕਾ, ਦੁਸ੍ਸੀਲਂ ਪੁਗ੍ਗਲਂ ਦ੍ਵੇ ਠਾਨਾਨਿ ਪਟਿਗ੍ਗਣ੍ਹਨ੍ਤੀਤਿ ਅਤ੍ਥੋ.

੩੧. ਦਸਮੇ ਅਤ੍ਥਵਸੇਤਿ ਕਾਰਣਾਨਿ. ਅਰਞ੍ਞਵਨਪਤ੍ਥਾਨੀਤਿ ਅਰਞ੍ਞਾਨਿ ਚ ਵਨਪਤ੍ਥਾਨਿ ਚ. ਤਤ੍ਥ ਕਿਞ੍ਚਾਪਿ ਅਭਿਧਮ੍ਮੇ ਨਿਪ੍ਪਰਿਯਾਯੇਨ ‘‘ਨਿਕ੍ਖਮਿਤ੍ਵਾ ਬਹਿ ਇਨ੍ਦਖੀਲਾ, ਸਬ੍ਬਮੇਤਂ ਅਰਞ੍ਞ’’ਨ੍ਤਿ (ਵਿਭ. ੫੨੯) ਵੁਤ੍ਤਂ, ਤਥਾਪਿ ਯਂ ਤਂ ‘‘ਪਞ੍ਚਧਨੁਸਤਿਕਂ ਪਚ੍ਛਿਮ’’ਨ੍ਤਿ (ਪਾਰਾ. ੬੫੪) ਆਰਞ੍ਞਕਙ੍ਗਨਿਪ੍ਫਾਦਕਂ ਸੇਨਾਸਨਂ ਵੁਤ੍ਤਂ, ਤਦੇਵ ਅਧਿਪ੍ਪੇਤਨ੍ਤਿ ਵੇਦਿਤਬ੍ਬਂ. ਵਨਪਤ੍ਥਨ੍ਤਿ ਗਾਮਨ੍ਤਂ ਅਤਿਕ੍ਕਮਿਤ੍ਵਾ ਮਨੁਸ੍ਸਾਨਂ ਅਨੁਪਚਾਰਟ੍ਠਾਨਂ, ਯਤ੍ਥ ਨ ਕਸੀਯਤਿ ਨ ਵਪੀਯਤਿ. ਪਨ੍ਤਾਨੀਤਿ ਪਰਿਯਨ੍ਤਾਨਿ ਅਤਿਦੂਰਾਨਿ, ਦਿਟ੍ਠਧਮ੍ਮਸੁਖਵਿਹਾਰਨ੍ਤਿ ਲੋਕਿਯਲੋਕੁਤ੍ਤਰਂ ਫਾਸੁਵਿਹਾਰਂ. ਪਚ੍ਛਿਮਞ੍ਚ ਜਨਤਂ ਅਨੁਕਮ੍ਪਮਾਨੋਤਿ ਪਚ੍ਛਿਮੇ ਮਮ ਸਾਵਕੇ ਅਨੁਕਮ੍ਪਨ੍ਤੋ.

੩੨. ਏਕਾਦਸਮੇ ਵਿਜ੍ਜਾਭਾਗਿਯਾਤਿ ਵਿਜ੍ਜਾਕੋਟ੍ਠਾਸਿਕਾ. ਸਮਥੋਤਿ ਚਿਤ੍ਤੇਕਗ੍ਗਤਾ. ਵਿਪਸ੍ਸਨਾਤਿ ਸਙ੍ਖਾਰਪਰਿਗ੍ਗਾਹਕਞਾਣਂ. ਕਮਤ੍ਥਮਨੁਭੋਤੀਤਿ ਕਤਮਂ ਅਤ੍ਥਂ ਆਰਾਧੇਤਿ ਸਮ੍ਪਾਦੇਤਿ ਪਰਿਪੂਰੇਤਿ. ਚਿਤ੍ਤਂ ਭਾਵੀਯਤੀਤਿ ਮਗ੍ਗਚਿਤ੍ਤਂ ਭਾਵੀਯਤਿ ਬ੍ਰੂਹੀਯਤਿ ਵਡ੍ਢੀਯਤਿ. ਯੋ ਰਾਗੋ, ਸੋ ਪਹੀਯਤੀਤਿ ਯੋ ਰਜ੍ਜਨਕਵਸੇਨ ਰਾਗੋ, ਸੋ ਪਹੀਯਤਿ. ਰਾਗੋ ਹਿ ਮਗ੍ਗਚਿਤ੍ਤਸ੍ਸ ਪਚ੍ਚਨੀਕੋ, ਮਗ੍ਗਚਿਤ੍ਤਂ ਰਾਗਸ੍ਸ ਚ. ਰਾਗਕ੍ਖਣੇ ਮਗ੍ਗਚਿਤ੍ਤਂ ਨਤ੍ਥਿ, ਮਗ੍ਗਚਿਤ੍ਤਕ੍ਖਣੇ ਰਾਗੋ ਨਤ੍ਥਿ. ਯਦਾ ਪਨ ਰਾਗੋ ਉਪ੍ਪਜ੍ਜਤਿ, ਤਦਾ ਮਗ੍ਗਚਿਤ੍ਤਸ੍ਸ ਉਪ੍ਪਤ੍ਤਿਂ ਨਿਵਾਰੇਤਿ, ਪਦਂ ਪਚ੍ਛਿਨ੍ਦਤਿ. ਯਦਾ ਪਨ ਮਗ੍ਗਚਿਤ੍ਤਂ ਉਪ੍ਪਜ੍ਜਤਿ, ਤਦਾ ਰਾਗਂ ਸਮੂਲਕਂ ਉਬ੍ਬਟ੍ਟੇਤ੍ਵਾ ਸਮੁਗ੍ਘਾਤੇਨ੍ਤਮੇਵ ਉਪ੍ਪਜ੍ਜਤਿ. ਤੇਨ ਵੁਤ੍ਤਂ – ‘‘ਰਾਗੋ ਪਹੀਯਤੀ’’ਤਿ.

ਵਿਪਸ੍ਸਨਾ, ਭਿਕ੍ਖਵੇ, ਭਾਵਿਤਾਤਿ ਵਿਪਸ੍ਸਨਾਞਾਣਂ ਬ੍ਰੂਹਿਤਂ ਵਡ੍ਢਿਤਂ. ਪਞ੍ਞਾ ਭਾਵੀਯਤੀਤਿ ਮਗ੍ਗਪਞ੍ਞਾ ਭਾਵੀਯਤਿ ਬ੍ਰੂਹੀਯਤਿ ਵਡ੍ਢੀਯਤਿ. ਯਾ ਅਵਿਜ੍ਜਾ, ਸਾ ਪਹੀਯਤੀਤਿ ਅਟ੍ਠਸੁ ਠਾਨੇਸੁ ਵਟ੍ਟਮੂਲਿਕਾ ਮਹਾਅਵਿਜ੍ਜਾ ਪਹੀਯਤਿ. ਅਵਿਜ੍ਜਾ ਹਿ ਮਗ੍ਗਪਞ੍ਞਾਯ ਪਚ੍ਚਨੀਕਾ, ਮਗ੍ਗਪਞ੍ਞਾ ਅਵਿਜ੍ਜਾਯ. ਅਵਿਜ੍ਜਾਕ੍ਖਣੇ ਮਗ੍ਗਪਞ੍ਞਾ ਨਤ੍ਥਿ, ਮਗ੍ਗਪਞ੍ਞਾਕ੍ਖਣੇ ਅਵਿਜ੍ਜਾ ਨਤ੍ਥਿ. ਯਦਾ ਪਨ ਅਵਿਜ੍ਜਾ ਉਪ੍ਪਜ੍ਜਤਿ, ਤਦਾ ਮਗ੍ਗਪਞ੍ਞਾਯ ਉਪ੍ਪਤ੍ਤਿਂ ਨਿਵਾਰੇਤਿ, ਪਦਂ ਪਚ੍ਛਿਨ੍ਦਤਿ. ਯਦਾ ਮਗ੍ਗਪਞ੍ਞਾ ਉਪ੍ਪਜ੍ਜਤਿ, ਤਦਾ ਅਵਿਜ੍ਜਂ ਸਮੂਲਿਕਂ ਉਬ੍ਬਟ੍ਟੇਤ੍ਵਾ ਸਮੁਗ੍ਘਾਤਯਮਾਨਾਵ ਉਪ੍ਪਜ੍ਜਤਿ. ਤੇਨ ਵੁਤ੍ਤਂ – ‘‘ਅਵਿਜ੍ਜਾ ਪਹੀਯਤੀ’’ਤਿ. ਇਤਿ ਮਗ੍ਗਚਿਤ੍ਤਂ ਮਗ੍ਗਪਞ੍ਞਾਤਿ ਦ੍ਵੇਪਿ ਸਹਜਾਤਧਮ੍ਮਾਵ ਕਥਿਤਾ.

ਰਾਗੁਪਕ੍ਕਿਲਿਟ੍ਠਂ ਵਾ, ਭਿਕ੍ਖਵੇ, ਚਿਤ੍ਤਂ ਨ ਵਿਮੁਚ੍ਚਤੀਤਿ ਰਾਗੇਨ ਉਪਕ੍ਕਿਲਿਟ੍ਠਤ੍ਤਾ ਮਗ੍ਗਚਿਤ੍ਤਂ ਨ ਵਿਮੁਚ੍ਚਤੀਤਿ ਦਸ੍ਸੇਤਿ. ਅਵਿਜ੍ਜੁਪਕ੍ਕਿਲਿਟ੍ਠਾ ਵਾ ਪਞ੍ਞਾ ਨ ਭਾਵੀਯਤੀਤਿ ਅਵਿਜ੍ਜਾਯ ਉਪਕ੍ਕਿਲਿਟ੍ਠਤ੍ਤਾ ਮਗ੍ਗਪਞ੍ਞਾ ਨ ਭਾਵੀਯਤੀਤਿ ਦਸ੍ਸੇਤਿ. ਇਤਿ ਖੋ, ਭਿਕ੍ਖਵੇਤਿ ਏਵਂ ਖੋ, ਭਿਕ੍ਖਵੇ. ਰਾਗਵਿਰਾਗਾ ਚੇਤੋਵਿਮੁਤ੍ਤੀਤਿ ਰਾਗਸ੍ਸ ਖਯਵਿਰਾਗੇਨ ਚੇਤੋਵਿਮੁਤ੍ਤਿ ਨਾਮ ਹੋਤਿ. ਫਲਸਮਾਧਿਸ੍ਸੇਤਂ ਨਾਮਂ. ਅਵਿਜ੍ਜਾਵਿਰਾਗਾ ਪਞ੍ਞਾਵਿਮੁਤ੍ਤੀਤਿ ਅਵਿਜ੍ਜਾਯ ਖਯਵਿਰਾਗੇਨ ਪਞ੍ਞਾਵਿਮੁਤ੍ਤਿ ਨਾਮ ਹੋਤਿ. ਇਮਸ੍ਮਿਂ ਸੁਤ੍ਤੇ ਨਾਨਾਕ੍ਖਣਿਕਾ ਸਮਾਧਿਵਿਪਸ੍ਸਨਾ ਕਥਿਤਾਤਿ.

ਬਾਲਵਗ੍ਗੋ ਤਤਿਯੋ.

੪. ਸਮਚਿਤ੍ਤਵਗ੍ਗਵਣ੍ਣਨਾ

੩੩. ਚਤੁਤ੍ਥਸ੍ਸ ਪਠਮੇ ਅਸਪ੍ਪੁਰਿਸਭੂਮੀਤਿ ਅਸਪ੍ਪੁਰਿਸਾਨਂ ਪਤਿਟ੍ਠਾਨਟ੍ਠਾਨਂ. ਸਪ੍ਪੁਰਿਸਭੂਮਿਯਮ੍ਪਿ ਏਸੇਵ ਨਯੋ. ਅਕਤਞ੍ਞੂਤਿ ਕਤਂ ਨ ਜਾਨਾਤਿ. ਅਕਤਵੇਦੀਤਿ ਕਤਂ ਪਾਕਟਂ ਕਤ੍ਵਾ ਨ ਜਾਨਾਤਿ. ਉਪਞ੍ਞਾਤਨ੍ਤਿ ਵਣ੍ਣਿਤਂ ਥੋਮਿਤਂ ਪਸਤ੍ਥਂ. ਯਦਿਦਨ੍ਤਿ ਯਾ ਅਯਂ. ਅਕਤਞ੍ਞੁਤਾ ਅਕਤਵੇਦਿਤਾਤਿ ਪਰੇਨ ਕਤਸ੍ਸ ਉਪਕਾਰਸ੍ਸ ਅਜਾਨਨਞ੍ਚੇਵ ਪਾਕਟਂ ਕਤ੍ਵਾ ਅਜਾਨਨਞ੍ਚ. ਕੇਵਲਾਤਿ ਸਕਲਾ. ਸੁਕ੍ਕਪਕ੍ਖੇਪਿ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ.

੩੪. ਦੁਤਿਯੇ ਮਾਤੁ ਚ ਪਿਤੁ ਚਾਤਿ ਜਨਕਮਾਤੁ ਚ ਜਨਕਪਿਤੁ ਚ. ਏਕੇਨ, ਭਿਕ੍ਖਵੇ, ਅਂਸੇਨ ਮਾਤਰਂ ਪਰਿਹਰੇਯ੍ਯਾਤਿ ਏਕਸ੍ਮਿਂ ਅਂਸਕੂਟੇ ਠਪੇਤ੍ਵਾ ਮਾਤਰਂ ਪਟਿਜਗ੍ਗੇਯ੍ਯ. ਏਕੇਨ ਅਂਸੇਨ ਪਿਤਰਂ ਪਰਿਹਰੇਯ੍ਯਾਤਿ ਏਕਸ੍ਮਿਂ ਅਂਸਕੂਟੇ ਠਪੇਤ੍ਵਾ ਪਿਤਰਂ ਪਟਿਜਗ੍ਗੇਯ੍ਯ. ਵਸ੍ਸਸਤਾਯੁਕੋ ਵਸ੍ਸਸਤਜੀਵੀਤਿ ਵਸ੍ਸਸਤਾਯੁਕਕਾਲੇ ਜਾਤੋ ਸਕਲਂ ਵਸ੍ਸਸਤਂ ਜੀਵਨ੍ਤੋ. ਇਦਂ ਵੁਤ੍ਤਂ ਹੋਤਿ – ਸਚੇ ਪੁਤ੍ਤੋ ਨਾਮ ‘‘ਮਾਤਾਪਿਤੂਨਂ ਪਟਿਕਰਿਸ੍ਸਾਮੀ’’ਤਿ ਉਟ੍ਠਾਯ ਸਮੁਟ੍ਠਾਯ ਦਕ੍ਖਿਣੇ ਅਂਸਕੂਟੇ ਮਾਤਰਂ, ਵਾਮੇ ਪਿਤਰਂ ਠਪੇਤ੍ਵਾ ਵਸ੍ਸਸਤਾਯੁਕੋ ਸਕਲਮ੍ਪਿ ਵਸ੍ਸਸਤਂ ਜੀਵਮਾਨੋ ਪਰਿਹਰੇਯ੍ਯ. ਸੋ ਚ ਨੇਸਂ ਉਚ੍ਛਾਦਨਪਰਿਮਦ੍ਦਨਨ੍ਹਾਪਨਸਮ੍ਬਾਹਨੇਨਾਤਿ ਸੋ ਚ ਪੁਤ੍ਤੋ ਨੇਸਂ ਮਾਤਾਪਿਤੂਨਂ ਅਂਸਕੂਟੇਸੁ ਠਿਤਾਨਂਯੇਵ ਦੁਗ੍ਗਨ੍ਧਪਟਿਵਿਨੋਦਨਤ੍ਥਂ ਸੁਗਨ੍ਧਕਰਣੇਨ ਉਚ੍ਛਾਦਨੇਨ, ਪਰਿਸ੍ਸਮਵਿਨੋਦਨਤ੍ਥਂ ਹਤ੍ਥਪਰਿਮਦ੍ਦਨੇਨ, ਸੀਤੁਣ੍ਹਕਾਲੇ ਚ ਉਣ੍ਹੋਦਕਸੀਤੋਦਕਨ੍ਹਾਪਨੇਨ, ਹਤ੍ਥਪਾਦਾਦੀਨਂ ਆਕਡ੍ਢਨਪਰਿਕਡ੍ਢਨਸਙ੍ਖਾਤੇਨ ਸਮ੍ਬਾਹਨੇਨ ਉਪਟ੍ਠਾਨਂ ਕਰੇਯ੍ਯ. ਤੇ ਚ ਤਤ੍ਥੇਵਾਤਿ ਤੇ ਚ ਮਾਤਾਪਿਤਰੋ ਤਤ੍ਥੇਵ ਤਸ੍ਸ ਅਂਸਕੂਟੇਸੁ ਨਿਸਿਨ੍ਨਾਵ ਮੁਤ੍ਤਕਰੀਸਂ ਚਜੇਯ੍ਯੁਂ. ਨਤ੍ਵੇਵ ,ਭਿਕ੍ਖਵੇਤਿ, ਭਿਕ੍ਖਵੇ, ਏਵਮ੍ਪਿ ਨਤ੍ਵੇਵ ਮਾਤਾਪਿਤੂਨਂ ਕਤਂ ਵਾ ਹੋਤਿ ਪਟਿਕਤਂ ਵਾ.

ਇਸ੍ਸਰਾਧਿਪਚ੍ਚੇ ਰਜ੍ਜੇਤਿ ਚਕ੍ਕਵਤ੍ਤਿਰਜ੍ਜਂ ਸਨ੍ਧਾਯੇਵਮਾਹ. ਆਪਾਦਕਾਤਿ ਵਡ੍ਢਕਾ ਅਨੁਪਾਲਕਾ. ਪੁਤ੍ਤਾ ਹਿ ਮਾਤਾਪਿਤੂਹਿ ਵਡ੍ਢਿਤਾ ਚੇਵ ਅਨੁਪਾਲਿਤਾ ਚ. ਪੋਸਕਾਤਿ ਹਤ੍ਥਪਾਦੇ ਵਡ੍ਢੇਤ੍ਵਾ ਹਦਯਲੋਹਿਤਂ ਪਾਯੇਤ੍ਵਾ ਪੋਸਕਾ. ਪੁਤ੍ਤਾ ਹਿ ਮਾਤਾਪਿਤੂਹਿ ਪੁਟ੍ਠਾ ਭਤਾ ਅਨ੍ਨਪਾਨਾਦੀਹਿ ਪਟਿਜਗ੍ਗਿਤਾ. ਇਮਸ੍ਸ ਲੋਕਸ੍ਸ ਦਸ੍ਸੇਤਾਰੋਤਿ ਸਚੇ ਹਿ ਮਾਤਾਪਿਤਰੋ ਜਾਤਦਿਵਸੇਯੇਵ ਪੁਤ੍ਤਂ ਪਾਦੇ ਗਹੇਤ੍ਵਾ ਅਰਞ੍ਞੇ ਵਾ ਨਦਿਯਂ ਵਾ ਪਪਾਤੇ ਵਾ ਖਿਪੇਯ੍ਯੁਂ, ਇਮਸ੍ਮਿਂ ਲੋਕੇ ਇਟ੍ਠਾਨਿਟ੍ਠਾਰਮ੍ਮਣਂ ਨ ਪਸ੍ਸੇਯ੍ਯ. ਏਵਂ ਅਕਤ੍ਵਾ ਆਪਾਦਿਤਤ੍ਤਾ ਪੋਸਿਤਤ੍ਤਾ ਏਸ ਇਮਸ੍ਮਿਂ ਲੋਕੇ ਇਟ੍ਠਾਨਿਟ੍ਠਾਰਮ੍ਮਣਂ ਮਾਤਾਪਿਤਰੋ ਨਿਸ੍ਸਾਯ ਪਸ੍ਸਤੀਤਿ ਤ੍ਯਾਸ੍ਸ ਇਮਸ੍ਸ ਲੋਕਸ੍ਸ ਦਸ੍ਸੇਤਾਰੋ ਨਾਮ ਹੋਨ੍ਤਿ. ਸਮਾਦਪੇਤੀਤਿ ਗਣ੍ਹਾਪੇਤਿ. ਇਮਸ੍ਮਿਂ ਸੁਤ੍ਤੇ ਸਦ੍ਧਾਸੀਲਚਾਗਪਞ੍ਞਾ ਲੋਕਿਯਲੋਕੁਤ੍ਤਰਮਿਸ੍ਸਕਾ ਕਥਿਤਾ. ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰਸਦਿਸੋਵ ਭਿਕ੍ਖੁ ਤੇਸੁ ਪਤਿਟ੍ਠਾਪੇਤਿ ਨਾਮਾਤਿ ਵੇਦਿਤਬ੍ਬੋ.

੩੫. ਤਤਿਯੇ ਤੇਨੁਪਸਙ੍ਕਮੀਤਿ ਸੋ ਹਿ ਬ੍ਰਾਹ੍ਮਣੋ ‘‘ਸਮਣੋ ਕਿਰ ਗੋਤਮੋ ਕਥਿਤਂ ਵਿਸ੍ਸਜ੍ਜੇਤਿ, ਪੁਚ੍ਛਾਯਸ੍ਸ ਵਿਰਜ੍ਝਨਂ ਨਾਮ ਨਤ੍ਥਿ. ਅਹਮਸ੍ਸ ਵਿਰਜ੍ਝਨਪਞ੍ਹਂ ਅਭਿਸਙ੍ਖਰਿਸ੍ਸਾਮੀ’’ਤਿ ਪਣੀਤਭੋਜਨਂ ਭੁਞ੍ਜਿਤ੍ਵਾ ਗਬ੍ਭਦ੍ਵਾਰਂ ਪਿਦਹਿਤ੍ਵਾ ਨਿਸਿਨ੍ਨੋ ਚਿਨ੍ਤੇਤੁਂ ਆਰਭਿ. ਅਥਸ੍ਸ ਏਤਦਹੋਸਿ – ‘‘ਇਮਸ੍ਮਿਂ ਠਾਨੇ ਉਚ੍ਚਾਸਦ੍ਦਮਹਾਸਦ੍ਦੋ ਵਤ੍ਤਤਿ, ਚਿਤ੍ਤਂ ਨ ਏਕਗ੍ਗਂ ਹੋਤਿ, ਭੂਮਿਘਰਂ ਕਾਰੇਸ੍ਸਾਮੀ’’ਤਿ ਭੂਮਿਘਰਂ ਕਾਰੇਤ੍ਵਾ ਤਤ੍ਥ ਪਵਿਸਿਤ੍ਵਾ – ‘‘ਏਵਂ ਪੁਟ੍ਠੋ ਏਵਂ ਕਥੇਸ੍ਸਤਿ, ਏਵਂ ਪੁਟ੍ਠੋ ਏਵਂ ਕਥੇਸ੍ਸਤੀ’’ਤਿ ਏਕਂ ਗਣ੍ਹਿਤ੍ਵਾ ਏਕਂ ਵਿਸ੍ਸਜ੍ਜੇਨ੍ਤੋ ਸਕਲਦਿਵਸਂ ਕਿਞ੍ਚਿ ਪਸ੍ਸਿਤੁਂ ਨਾਸਕ੍ਖਿ. ਤਸ੍ਸ ਇਮਿਨਾਵ ਨੀਹਾਰੇਨ ਚਤ੍ਤਾਰੋ ਮਾਸਾ ਵੀਤਿਵਤ੍ਤਾ. ਸੋ ਚਤੁਨ੍ਨਂ ਮਾਸਾਨਂ ਅਚ੍ਚਯੇਨ ਉਭਤੋਕੋਟਿਕਂ ਪਞ੍ਹਂ ਨਾਮ ਅਦ੍ਦਸ. ਏਵਂ ਕਿਰਸ੍ਸ ਅਹੋਸਿ – ‘‘ਅਹਂ ਸਮਣਂ ਗੋਤਮਂ ਉਪਸਙ੍ਕਮਿਤ੍ਵਾ ‘ਕਿਂਵਾਦੀ ਭਵ’ਨ੍ਤਿ ਪੁਚ੍ਛਿਸ੍ਸਾਮਿ. ਸਚੇ ‘ਕਿਰਿਯਵਾਦਿਮ੍ਹੀ’ਤਿ ਵਕ੍ਖਤਿ, ‘ਸਬ੍ਬਾਕੁਸਲਾਨਂ ਨਾਮ ਤੁਮ੍ਹੇ ਕਿਰਿਯਂ ਵਦੇਥਾ’ਤਿ ਨਂ ਨਿਗ੍ਗਣ੍ਹਿਸ੍ਸਾਮਿ. ਸਚੇ ‘ਅਕਿਰਿਯਵਾਦਿਮ੍ਹੀ’ਤਿ ਵਕ੍ਖਤਿ, ‘ਕੁਸਲਧਮ੍ਮਾਨਂ ਨਾਮ ਤੁਮ੍ਹੇ ਅਕਿਰਿਯਂ ਵਦੇਥਾ’ਤਿ ਨਂ ਨਿਗ੍ਗਣ੍ਹਿਸ੍ਸਾਮਿ. ਇਦਞ੍ਹਿ ਉਭਤੋਕੋਟਿਕਂ ਪਞ੍ਹਂ ਪੁਟ੍ਠੋ ਨੇਵ ਉਗ੍ਗਿਲਿਤੁਂ ਸਕ੍ਖਿਸ੍ਸਤਿ ਨ ਨਿਗ੍ਗਿਲਿਤੁਂ. ਏਵਂ ਮਮ ਜਯੋ ਭਵਿਸ੍ਸਤਿ, ਸਮਣਸ੍ਸ ਗੋਤਮਸ੍ਸ ਪਰਾਜਯੋ’’ਤਿ ਉਟ੍ਠਾਯ ਅਪ੍ਫੋਟੇਤ੍ਵਾ ਭੂਮਿਘਰਾ ਨਿਕ੍ਖਮ੍ਮ ‘‘ਏਵਰੂਪਂ ਪਞ੍ਹਂ ਪੁਚ੍ਛਨ੍ਤੇਨ ਨ ਏਕਕੇਨ ਗਨ੍ਤੁਂ ਵਟ੍ਟਤੀ’’ਤਿ ਨਗਰੇ ਘੋਸਨਂ ਕਾਰੇਤ੍ਵਾ ਸਕਲਨਾਗਰੇਹਿ ਪਰਿਵੁਤੋ ਯੇਨ ਭਗਵਾ ਤੇਨੁਪਸਙ੍ਕਮਿ. ਕਿਂਵਾਦੀਤਿ ਕਿਂਲਦ੍ਧਿਕੋ. ਕਿਮਕ੍ਖਾਯੀਤਿ ਕਿਂ ਨਾਮ ਸਾਵਕਾਨਂ ਪਟਿਪਦਂ ਅਕ੍ਖਾਯੀਤਿ ਪੁਚ੍ਛਿ. ਅਥਸ੍ਸ ਭਗਵਾ ਚਤੂਹਿ ਮਾਸੇਹਿ ਪਞ੍ਹਂ ਅਭਿਸਙ੍ਖਰਿਤ੍ਵਾ ‘‘ਦਿਟ੍ਠੋ ਮੇ ਸਮਣਸ੍ਸ ਗੋਤਮਸ੍ਸ ਪਰਾਜਯਪਞ੍ਹੋ’’ਤਿ ਮਾਨਂ ਪਗ੍ਗਯ੍ਹ ਆਗਤਭਾਵਂ ਞਤ੍ਵਾ ਏਕਪਦੇਨੇਵ ਤਂ ਪਞ੍ਹਂ ਭਿਨ੍ਦਨ੍ਤੋ ਕਿਰਿਯਵਾਦੀ ਚਾਹਂ, ਬ੍ਰਾਹ੍ਮਣਾਤਿਆਦਿਮਾਹ. ਅਥ ਬ੍ਰਾਹ੍ਮਣੋ ਅਤ੍ਤਨੋ ਮਾਨਂ ਅਪਨੇਤ੍ਵਾ ਭਗਵਨ੍ਤਂ ਆਯਾਚਨ੍ਤੋ ਯਥਾਕਥਂ ਪਨਾਤਿਆਦਿਮਾਹ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

੩੬. ਚਤੁਤ੍ਥੇ ਦਕ੍ਖਿਣੇਯ੍ਯਾਤਿ ਦਕ੍ਖਿਣਾ ਵੁਚ੍ਚਤਿ ਦਾਨਂ, ਤਸ੍ਸ ਪਟਿਗ੍ਗਹਣਯੁਤ੍ਤਾ ਕਤਿ ਪੁਗ੍ਗਲਾਤਿ ਪੁਚ੍ਛਤਿ. ਸੇਖੋਤਿ ਇਮਿਨਾ ਸਤ੍ਤ ਸੇਕ੍ਖੇ ਦਸ੍ਸੇਤਿ. ਏਤ੍ਥ ਚ ਸੀਲਵਨ੍ਤਪੁਥੁਜ੍ਜਨੋਪਿ ਸੋਤਾਪਨ੍ਨੇਨੇਵ ਸਙ੍ਗਹਿਤੋ. ਆਹੁਨੇਯ੍ਯਾ ਯਜਮਾਨਾਨਂ ਹੋਨ੍ਤੀਤਿ ਦਾਨਂ ਦਦਨ੍ਤਾਨਂ ਆਹੁਨਸ੍ਸ ਅਰਹਾ ਦਾਨਪਟਿਗ੍ਗਾਹਕਾ ਨਾਮ ਹੋਨ੍ਤੀਤਿ ਅਤ੍ਥੋ. ਖੇਤ੍ਤਨ੍ਤਿ ਵਤ੍ਥੁ ਪਤਿਟ੍ਠਾ, ਪੁਞ੍ਞਸ੍ਸ ਵਿਰੁਹਨਟ੍ਠਾਨਨ੍ਤਿ ਅਤ੍ਥੋ.

੩੭. ਪਞ੍ਚਮੇ ਪੁਬ੍ਬਾਰਾਮੇਤਿ ਸਾਵਤ੍ਥਿਤੋ ਪੁਰਤ੍ਥਿਮਦਿਸਾਭਾਗੇ ਆਰਾਮੇ. ਮਿਗਾਰਮਾਤੁਪਾਸਾਦੇਤਿ ਵਿਸਾਖਾਯ ਉਪਾਸਿਕਾਯ ਪਾਸਾਦੇ. ਸਾ ਹਿ ਮਿਗਾਰਸੇਟ੍ਠਿਨਾ ਮਾਤੁਟ੍ਠਾਨੇ ਠਪਿਤਤ੍ਤਾਪਿ, ਸਬ੍ਬਜੇਟ੍ਠਕਸ੍ਸ ਪੁਤ੍ਤਸ੍ਸ ਅਯ੍ਯਕਸੇਟ੍ਠਿਨੋਵ ਸਮਾਨਨਾਮਕਤ੍ਤਾਪਿ ਮਿਗਾਰਮਾਤਾਤਿ ਵੁਚ੍ਚਤਿ. ਤਾਯ ਕਾਰਿਤੋ ਸਹਸ੍ਸਗਬ੍ਭੋ ਪਾਸਾਦੋ ਮਿਗਾਰਮਾਤੁਪਾਸਾਦੋ ਨਾਮ. ਥੇਰੋ ਤਸ੍ਮਿਂ ਵਿਹਰਤਿ. ਤਤ੍ਰ ਖੋ ਆਯਸ੍ਮਾ ਸਾਰਿਪੁਤ੍ਤੋਤਿ ਤਸ੍ਮਿਂ ਪਾਸਾਦੇ ਵਿਹਰਨ੍ਤੋ ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰੋ.

ਭਿਕ੍ਖੂ ਆਮਨ੍ਤੇਸੀਤਿ ਕਸ੍ਮਿਂ ਕਾਲੇ ਆਮਨ੍ਤੇਸਿ? ਕਾਨਿਚਿ ਹਿ ਸੁਤ੍ਤਾਨਿ ਪੁਰੇਭਤ੍ਤੇ ਭਾਸਿਤਾਨਿ ਅਤ੍ਥਿ, ਕਾਨਿਚਿ ਪਚ੍ਛਾਭਤ੍ਤੇ, ਕਾਨਿਚਿ ਪੁਰਿਮਯਾਮੇ, ਕਾਨਿਚਿ ਮਜ੍ਝਿਮਯਾਮੇ, ਕਾਨਿਚਿ ਪਚ੍ਛਿਮਯਾਮੇ. ਇਦਂ ਪਨ ਸਮਚਿਤ੍ਤਪਟਿਪਦਾਸੁਤ੍ਤਂ ਪਚ੍ਛਾਭਤ੍ਤੇ ਭਾਸਿਤਂ. ਤਸ੍ਮਾ ਸਾਯਨ੍ਹਸਮਯੇ ਆਮਨ੍ਤੇਸਿ.

ਨ ਕੇਵਲਂ ਚੇਤਂ ਥੇਰੇਨੇਵ ਭਾਸਿਤਂ, ਤਥਾਗਤੇਨਾਪਿ ਭਾਸਿਤਂ. ਕਤ੍ਥ ਨਿਸੀਦਿਤ੍ਵਾਤਿ? ਵਿਸਾਖਾਯ ਰਤਨਪਾਸਾਦੇ ਨਿਸੀਦਿਤ੍ਵਾ. ਤਥਾਗਤੋ ਹਿ ਪਠਮਬੋਧਿਯਂ ਵੀਸਤਿ ਵਸ੍ਸਾਨਿ ਅਨਿਬਦ੍ਧਵਾਸੋ ਹੁਤ੍ਵਾ ਯਤ੍ਥ ਯਤ੍ਥ ਫਾਸੁਕਂ ਹੋਤਿ, ਤਤ੍ਥ ਤਤ੍ਥੇਵ ਗਨ੍ਤ੍ਵਾ ਵਸਿ. ਪਠਮਂ ਅਨ੍ਤੋਵਸ੍ਸਞ੍ਹਿ ਇਸਿਪਤਨੇ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਅਟ੍ਠਾਰਸ ਮਹਾਬ੍ਰਹ੍ਮਕੋਟਿਯੋ ਅਮਤਪਾਨਂ ਪਾਯੇਤ੍ਵਾ ਬਾਰਾਣਸਿਂ ਉਪਨਿਸ੍ਸਾਯ ਇਸਿਪਤਨੇ ਵਸਿ. ਦੁਤਿਯਂ ਅਨ੍ਤੋਵਸ੍ਸਂ ਰਾਜਗਹਂ ਉਪਨਿਸ੍ਸਾਯ ਵੇਲ਼ੁਵਨੇ, ਤਤਿਯਚਤੁਤ੍ਥਾਨਿਪਿ ਤਤ੍ਥੇਵ, ਪਞ੍ਚਮਂ ਅਨ੍ਤੋਵਸ੍ਸਂ ਵੇਸਾਲਿਂ ਉਪਨਿਸ੍ਸਾਯ ਮਹਾਵਨੇ ਕੂਟਾਗਾਰਸਾਲਾਯਂ, ਛਟ੍ਠਂ ਅਨ੍ਤੋਵਸ੍ਸਂ ਮਕੁਲਪਬ੍ਬਤੇ, ਸਤ੍ਤਮਂ ਤਾਵਤਿਂਸਭਵਨੇ, ਅਟ੍ਠਮਂ ਭਗ੍ਗੇ ਸੁਸੁਮਾਰਗਿਰਂ ਨਿਸ੍ਸਾਯ ਭੇਸਕਲ਼ਾਵਨੇ, ਨਵਮਂ ਕੋਸਮ੍ਬਿਯਂ, ਦਸਮਂ ਪਾਲਿਲੇਯ੍ਯਕੇ ਵਨਸਣ੍ਡੇ, ਏਕਾਦਸਮਂ ਨਾਲਾਯਂ ਬ੍ਰਾਹ੍ਮਣਗਾਮੇ, ਦ੍ਵਾਦਸਮਂ ਵੇਰਞ੍ਜਾਯਂ, ਤੇਰਸਮਂ ਚਾਲਿਯਪਬ੍ਬਤੇ, ਚੁਦ੍ਦਸਮਂ ਜੇਤਵਨੇ, ਪਞ੍ਚਦਸਮਂ ਕਪਿਲਵਤ੍ਥੁਸ੍ਮਿਂ, ਸੋਲ਼ਸਮਂ ਆਲ਼ਵਕਂ ਦਮੇਤ੍ਵਾ ਚਤੁਰਾਸੀਤਿਪਾਣਸਹਸ੍ਸਾਨਿ ਅਮਤਪਾਨਂ ਪਾਯੇਤ੍ਵਾ ਆਲ਼ਵਿਯਂ, ਸਤ੍ਤਰਸਮਂ ਰਾਜਗਹੇਯੇਵ, ਅਟ੍ਠਾਰਸਮਂ ਚਾਲਿਯਪਬ੍ਬਤੇਯੇਵ, ਤਥਾ ਏਕੂਨਵੀਸਤਿਮਂ, ਵੀਸਤਿਮਂ ਪਨ ਅਨ੍ਤੋਵਸ੍ਸਂ ਰਾਜਗਹਂਯੇਵ ਉਪਨਿਸ੍ਸਾਯ ਵਸਿ. ਏਵਂ ਵੀਸਤਿ ਵਸ੍ਸਾਨਿ ਅਨਿਬਦ੍ਧਵਾਸੋ ਹੁਤ੍ਵਾ ਯਤ੍ਥ ਯਤ੍ਥ ਫਾਸੁਕਂ ਹੋਤਿ, ਤਤ੍ਥ ਤਤ੍ਥੇਵ ਵਸਿ.

ਤਤੋ ਪਟ੍ਠਾਯ ਪਨ ਦ੍ਵੇ ਸੇਨਾਸਨਾਨਿ ਧੁਵਪਰਿਭੋਗਾਨਿ ਅਕਾਸਿ. ਕਤਰਾਨਿ ਦ੍ਵੇ? ਜੇਤਵਨਞ੍ਚ ਪੁਬ੍ਬਾਰਾਮਞ੍ਚ. ਕਸ੍ਮਾ? ਦ੍ਵਿਨ੍ਨਂ ਕੁਲਾਨਂ ਗੁਣਮਹਨ੍ਤਤਾਯ. ਅਨਾਥਪਿਣ੍ਡਿਕਸ੍ਸ ਹਿ ਵਿਸਾਖਾਯ ਚ ਗੁਣਂ ਸਨ੍ਧਾਯ ਗੁਣਂ ਪਟਿਚ੍ਚ ਸਤ੍ਥਾ ਤਾਨਿ ਸੇਨਾਸਨਾਨਿ ਧੁਵਪਰਿਭੋਗੇਨ ਪਰਿਭੁਞ੍ਜਿ. ਉਤੁਵਸ੍ਸਂ ਚਾਰਿਕਂ ਚਰਿਤ੍ਵਾਪਿ ਹਿ ਅਨ੍ਤੋਵਸ੍ਸੇ ਦ੍ਵੀਸੁਯੇਵ ਸੇਨਾਸਨੇਸੁ ਵਸਤਿ. ਏਵਂ ਵਸਨ੍ਤੋ ਪਨ ਜੇਤਵਨੇ ਰਤ੍ਤਿਂ ਵਸਿਤ੍ਵਾ ਪੁਨਦਿਵਸੇ ਭਿਕ੍ਖੁਸਙ੍ਘਪਰਿਵੁਤੋ ਦਕ੍ਖਿਣਦ੍ਵਾਰੇਨ ਸਾਵਤ੍ਥਿਂ ਪਿਣ੍ਡਾਯ ਪਵਿਸਿਤ੍ਵਾ ਪਾਚੀਨਦ੍ਵਾਰੇਨ ਨਿਕ੍ਖਮਿਤ੍ਵਾ ਪੁਬ੍ਬਾਰਾਮੇ ਦਿਵਾਵਿਹਾਰਂ ਕਰੋਤਿ. ਪੁਬ੍ਬਾਰਾਮੇ ਰਤ੍ਤਿਂ ਵਸਿਤ੍ਵਾ ਪੁਨਦਿਵਸੇ ਪਾਚੀਨਦ੍ਵਾਰੇਨ ਸਾਵਤ੍ਥਿਂ ਪਿਣ੍ਡਾਯ ਪਵਿਸਿਤ੍ਵਾ ਦਕ੍ਖਿਣਦ੍ਵਾਰੇਨ ਨਿਕ੍ਖਮਿਤ੍ਵਾ ਜੇਤਵਨੇ ਦਿਵਾਵਿਹਾਰਂ ਕਰੋਤਿ. ਤਸ੍ਮਿਂ ਪਨ ਦਿਵਸੇ ਸਮ੍ਮਾਸਮ੍ਬੁਦ੍ਧੋ ਜੇਤਵਨੇਯੇਵ ਵਸਿ. ਯਤ੍ਥ ਕਤ੍ਥਚਿ ਵਸਨ੍ਤਸ੍ਸ ਚਸ੍ਸ ਪਞ੍ਚਵਿਧਕਿਚ੍ਚਂ ਅਵਿਜਹਿਤਮੇਵ ਹੋਤਿ. ਤਂ ਹੇਟ੍ਠਾ ਵਿਤ੍ਥਾਰਿਤਮੇਵ. ਤੇਸੁ ਕਿਚ੍ਚੇਸੁ ਪਚ੍ਛਿਮਯਾਮਕਿਚ੍ਚਕਾਲੇ ਭਗਵਾ ਲੋਕਂ ਓਲੋਕੇਨ੍ਤੋ ਸਾਵਤ੍ਥਿਵਾਸੀਨਞ੍ਚ ਸਮਨ੍ਤਾ ਚ ਸਾਵਤ੍ਥਿਯਾ ਗਾਵੁਤਅਡ੍ਢਯੋਜਨਯੋਜਨਪਰਮੇ ਠਾਨੇ ਅਪਰਿਮਾਣਾਨਂ ਸਤ੍ਤਾਨਂ ਅਭਿਸਮਯਭਾਵਂ ਅਦ੍ਦਸ.

ਤਤੋ ‘‘ਕਸ੍ਮਿਂ ਨੁ ਖੋ ਕਾਲੇ ਅਭਿਸਮਯੋ ਭਵਿਸ੍ਸਤੀ’’ਤਿ ਓਲੋਕੇਨ੍ਤੋ ‘‘ਸਾਯਨ੍ਹਸਮਯੇ’’ਤਿ ਦਿਸ੍ਵਾ ‘‘ਮਯਿ ਨੁ ਖੋ ਕਥੇਨ੍ਤੇ ਅਭਿਸਮਯੋ ਭਵਿਸ੍ਸਤਿ, ਸਾਵਕੇ ਕਥੇਨ੍ਤੇ ਭਵਿਸ੍ਸਤੀ’’ਤਿ ‘‘ਸਾਰਿਪੁਤ੍ਤਤ੍ਥੇਰੇ ਕਥੇਨ੍ਤੇ ਭਵਿਸ੍ਸਤੀ’’ਤਿ ਅਦ੍ਦਸ. ਤਤੋ ‘‘ਕਤ੍ਥ ਨਿਸੀਦਿਤ੍ਵਾ ਕਥੇਨ੍ਤੇ ਭਵਿਸ੍ਸਤੀ’’ਤਿ ਓਲੋਕੇਨ੍ਤੋ ‘‘ਵਿਸਾਖਾਯ ਰਤਨਪਾਸਾਦੇ ਨਿਸੀਦਿਤ੍ਵਾ’’ਤਿ ਦਿਸ੍ਵਾ ‘‘ਬੁਦ੍ਧਾਨਂ ਨਾਮ ਤਯੋ ਸਾਵਕਸਨ੍ਨਿਪਾਤਾ ਹੋਨ੍ਤਿ, ਅਗ੍ਗਸਾਵਕਾਨਂ ਏਕੋ. ਤੇਸੁ ਅਜ੍ਜ ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰਸ੍ਸ ਸਾਵਕਸਨ੍ਨਿਪਾਤੋ ਭਵਿਸ੍ਸਤੀ’’ਤਿ ਅਦ੍ਦਸ. ਦਿਸ੍ਵਾ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਨਿਵਤ੍ਥਨਿਵਾਸਨੋ ਸੁਗਤਚੀਵਰਂ ਪਾਰੁਪਿਤ੍ਵਾ ਸੇਲਮਯਪਤ੍ਤਂ ਆਦਾਯ ਭਿਕ੍ਖੁਸਙ੍ਘਪਰਿਵੁਤੋ ਦਕ੍ਖਿਣਦ੍ਵਾਰੇਨ ਨਗਰਂ ਪਵਿਸਿਤ੍ਵਾ ਪਿਣ੍ਡਾਯ ਚਰਨ੍ਤੋ ਭਿਕ੍ਖੁਸਙ੍ਘਸ੍ਸ ਸੁਲਭਪਿਣ੍ਡਪਾਤਂ ਕਤ੍ਵਾ ਵਾਤਪ੍ਪਹਤਾ ਵਿਯ ਨਾਵਾ ਪਟਿਨਿਵਤ੍ਤਿਤ੍ਵਾ ਦਕ੍ਖਿਣਦ੍ਵਾਰੇਨ ਨਿਕ੍ਖਮਿਤ੍ਵਾ ਬਹਿਦ੍ਵਾਰੇ ਅਟ੍ਠਾਸਿ. ਤਤੋ ਅਸੀਤਿ ਮਹਾਸਾਵਕਾ ਭਿਕ੍ਖੁਨਿਪਰਿਸਾ ਉਪਾਸਕਪਰਿਸਾ ਉਪਾਸਿਕਾਪਰਿਸਾਤਿ ਚਤਸ੍ਸੋ ਪਰਿਸਾ ਸਤ੍ਥਾਰਂ ਪਰਿਵਾਰਯਿਂਸੁ.

ਸਤ੍ਥਾ ਸਾਰਿਪੁਤ੍ਤਤ੍ਥੇਰਂ ਆਮਨ੍ਤੇਸਿ – ‘‘ਸਾਰਿਪੁਤ੍ਤ, ਤਯਾ ਪੁਬ੍ਬਾਰਾਮਂ ਗਨ੍ਤੁਂ ਵਟ੍ਟਤਿ, ਤਵ ਚ ਪਰਿਸਂ ਗਹੇਤ੍ਵਾ ਗਚ੍ਛਾਹੀ’’ਤਿ. ‘‘ਸਾਧੁ, ਭਨ੍ਤੇ’’ਤਿ ਥੇਰੋ ਅਤ੍ਤਨੋ ਪਰਿਵਾਰੇਹਿ ਪਞ੍ਚਹਿ ਭਿਕ੍ਖੁਸਤੇਹਿ ਪਰਿਵੁਤੋ ਪੁਬ੍ਬਾਰਾਮਂ ਅਗਮਾਸਿ. ਏਤੇਨੇਵ ਨਿਯਾਮੇਨ ਅਸੀਤਿ ਮਹਾਸਾਵਕੇ ਪੁਬ੍ਬਾਰਾਮਮੇਵ ਪੇਸੇਤ੍ਵਾ ਸਯਂ ਏਕੇਨ ਆਨਨ੍ਦਤ੍ਥੇਰੇਨੇਵ ਸਦ੍ਧਿਂ ਜੇਤਵਨਂ ਅਗਮਾਸਿ. ਆਨਨ੍ਦਤ੍ਥੇਰੋਪਿ ਵਿਹਾਰੇ ਸਤ੍ਥੁ ਵਤ੍ਤਂ ਕਤ੍ਵਾ ਵਨ੍ਦਿਤ੍ਵਾ ‘‘ਪੁਬ੍ਬਾਰਾਮਂ ਗਚ੍ਛਾਮਿ, ਭਨ੍ਤੇ’’ਤਿ ਆਹ. ਏਵਂ ਕਰੋਹਿ ਆਨਨ੍ਦਾਤਿ. ਸਤ੍ਥਾਰਂ ਵਨ੍ਦਿਤ੍ਵਾ ਤਤ੍ਥੇਵ ਅਗਮਾਸਿ. ਸਤ੍ਥਾ ਏਕਕੋਵ ਜੇਤਵਨੇ ਓਹੀਨੋ.

ਤਂ ਦਿਵਸਞ੍ਹਿ ਚਤਸ੍ਸੋ ਪਰਿਸਾ ਥੇਰਸ੍ਸੇਵ ਧਮ੍ਮਕਥਂ ਸੋਤੁਕਾਮਾ ਅਹੇਸੁਂ. ਕੋਸਲਮਹਾਰਾਜਾਪਿ ਬਲਕਾਯੇਨ ਪਰਿਵੁਤੋ ਪੁਬ੍ਬਾਰਾਮਮੇਵ ਗਤੋ. ਤਥਾ ਪਞ੍ਚਸਤਉਪਾਸਕਪਰਿਵਾਰੋ ਅਨਾਥਪਿਣ੍ਡਿਕੋ. ਵਿਸਾਖਾ ਪਨ ਮਹਾਉਪਾਸਿਕਾ ਦ੍ਵੀਹਿ ਜਙ੍ਘਸਹਸ੍ਸੇਹਿ ਪਰਿਵੁਤੋ ਅਗਮਾਸਿ. ਸਤ੍ਤਪਣ੍ਣਾਸਾਯ ਕੁਲਸਤਸਹਸ੍ਸਾਨਂ ਵਸਨਟ੍ਠਾਨੇ ਸਾਵਤ੍ਥਿਨਗਰੇ ਗੇਹਪਾਲਕਦਾਰਕੇ ਠਪੇਤ੍ਵਾ ਸੇਸਜਨੋ ਗਨ੍ਧਚੁਣ੍ਣਮਾਲਾਦੀਨਿ ਗਹੇਤ੍ਵਾ ਪੁਬ੍ਬਾਰਾਮਮੇਵ ਅਗਮਾਸਿ. ਚਤੂਸੁ ਦ੍ਵਾਰਗਾਮੇਸੁ ਗਾਵੁਤਅਡ੍ਢਯੋਜਨਯੋਜਨਪਰਮਟ੍ਠਾਨੇ ਸਬ੍ਬੇਯੇਵ ਮਨੁਸ੍ਸਾ ਗਨ੍ਧਚੁਣ੍ਣਮਾਲਾਦਿਹਤ੍ਥਾ ਪੁਬ੍ਬਾਰਾਮਮੇਵ ਅਗਮਂਸੁ. ਸਕਲਵਿਹਾਰੋ ਮਿਸ੍ਸਕਪੁਪ੍ਫੇਹਿ ਅਭਿਕਿਣ੍ਣੋ ਵਿਯ ਅਹੋਸਿ.

ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰੋਪਿ ਖੋ ਵਿਹਾਰਂ ਗਨ੍ਤ੍ਵਾ ਵਿਹਾਰਪਰਿਵੇਣੇ ਅਙ੍ਗਣਟ੍ਠਾਨੇ ਅਟ੍ਠਾਸਿ. ਭਿਕ੍ਖੂ ਥੇਰਸ੍ਸ ਆਸਨਂ ਪਞ੍ਞਾਪਯਿਂਸੁ. ਥੇਰੋ ਤਤ੍ਥ ਨਿਸੀਦਿਤ੍ਵਾ ਉਪਟ੍ਠਾਕਤ੍ਥੇਰੇਨ ਵਤ੍ਤੇ ਕਤੇ ਭਿਕ੍ਖੁਸਙ੍ਘਸ੍ਸ ਓਵਾਦਂ ਕਤ੍ਵਾ ਗਨ੍ਧਕੁਟਿਂ ਪਵਿਸਿਤ੍ਵਾ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਿ. ਸੋ ਪਰਿਚ੍ਛਿਨ੍ਨਕਾਲਵਸੇਨ ਸਮਾਪਤ੍ਤਿਤੋ ਵੁਟ੍ਠਾਯ ਅਚਿਰਵਤਿਂ ਗਨ੍ਤ੍ਵਾ ਰਜੋਜਲ੍ਲਂ ਪਵਾਹੇਤ੍ਵਾ ਪਟਿਪ੍ਪਸ੍ਸਦ੍ਧਦਰਥੋ ਓਤਿਣ੍ਣਤਿਤ੍ਥੇਨੇਵ ਉਤ੍ਤਰਿਤ੍ਵਾ ਨਿਵਤ੍ਥਨਿਵਾਸਨੋ ਸਙ੍ਘਾਟਿਂ ਪਾਰੁਪਿਤ੍ਵਾ ਅਟ੍ਠਾਸਿ. ਭਿਕ੍ਖੁਸਙ੍ਘੋਪਿ ਸਮ੍ਮੁਖਸਮ੍ਮੁਖਟ੍ਠਾਨੇਨ ਓਤਰਿਤ੍ਵਾ ਸਰੀਰੇ ਰਜੋਜਲ੍ਲਂ ਪਵਾਹੇਤ੍ਵਾ ਪਚ੍ਚੁਤ੍ਤਰਿਤ੍ਵਾ ਥੇਰਂ ਪਰਿਵਾਰਯਿਂਸੁ. ਅਨ੍ਤੋਵਿਹਾਰੇਪਿ ਥੇਰਸ੍ਸ ਧਮ੍ਮਾਸਨਂ ਪਞ੍ਞਾਪਯਿਂਸੁ. ਚਤਸ੍ਸੋਪਿ ਪਰਿਸਾ ਅਤ੍ਤਨੋ ਅਤ੍ਤਨੋ ਓਕਾਸਂ ਞਤ੍ਵਾ ਮਗ੍ਗਂ ਠਪੇਤ੍ਵਾ ਨਿਸੀਦਿਂਸੁ. ਸਾਰਿਪੁਤ੍ਤਤ੍ਥੇਰੋਪਿ ਪਞ੍ਚਭਿਕ੍ਖੁਸਤਪਰਿਵਾਰੋ ਧਮ੍ਮਸਭਂ ਆਗਨ੍ਤ੍ਵਾ ਸੀਹਮਤ੍ਥਕਪ੍ਪਤਿਟ੍ਠਿਤੇ ਸਮੁਸ੍ਸਿਤਸੇਤਚ੍ਛਤ੍ਤੇ ਰਤਨਪਲ੍ਲਙ੍ਕੇ ਚਿਤ੍ਤਬੀਜਨਿਂ ਗਹੇਤ੍ਵਾ ਪੁਰਤ੍ਥਾਭਿਮੁਖੋ ਨਿਸੀਦਿ. ਨਿਸੀਦਿਤ੍ਵਾ ਪਰਿਸਂ ਓਲੋਕੇਤ੍ਵਾ – ‘‘ਮਹਤੀ ਵਤਾਯਂ ਪਰਿਸਾ, ਇਮਿਸ੍ਸਾ ਨ ਅਪ੍ਪਮਤ੍ਤਿਕਾ ਪਰਿਤ੍ਤਕਧਮ੍ਮਦੇਸਨਾ ਅਨੁਚ੍ਛਵਿਕਾ, ਕਤਰਧਮ੍ਮਦੇਸਨਾ ਨੁ ਖੋ ਅਨੁਚ੍ਛਵਿਕਾ ਭਵਿਸ੍ਸਤੀ’’ਤਿ ਤੀਣਿ ਪਿਟਕਾਨਿ ਆਵਜ੍ਜਮਾਨੋ ਇਮਂ ਸਂਯੋਜਨਪਰਿਯਾਯ ਧਮ੍ਮਦੇਸਨਂ ਅਦ੍ਦਸ.

ਏਵਂ ਦੇਸਨਂ ਸਲ੍ਲਕ੍ਖੇਤ੍ਵਾ ਤਂ ਦੇਸੇਤੁਕਾਮੋ ਭਿਕ੍ਖੂ ਆਮਨ੍ਤੇਸਿ ਆਵੁਸੋ, ਭਿਕ੍ਖਵੇਤਿ. ਆਵੁਸੋਤਿ ਹਿ ਅਵਤ੍ਵਾ, ਭਿਕ੍ਖਵੇਤਿ ਵਚਨਂ ਬੁਦ੍ਧਾਲਾਪੋ ਨਾਮ ਹੋਤਿ, ਅਯਂ ਪਨਾਯਸ੍ਮਾ ‘‘ਦਸਬਲੇਨ ਸਮਾਨਂ ਆਲਪਨਂ ਨ ਕਰਿਸ੍ਸਾਮੀ’’ਤਿ ਸਤ੍ਥੁ ਗਾਰਵਵਸੇਨ ਸਾਵਕਾਲਾਪਂ ਕਰੋਨ੍ਤੋ, ‘‘ਆਵੁਸੋ ਭਿਕ੍ਖਵੇ’’ਤਿ ਆਹ. ਏਤਦਵੋਚਾਤਿ ਏਤਂ ‘‘ਅਜ੍ਝਤ੍ਤਸਂਯੋਜਨਞ੍ਚ, ਆਵੁਸੋ, ਪੁਗ੍ਗਲਂ ਦੇਸੇਸ੍ਸਾਮਿ ਬਹਿਦ੍ਧਾਸਂਯੋਜਨਞ੍ਚਾ’’ਤਿ ਧਮ੍ਮਦੇਸਨਾਪਦਂ ਅਵੋਚ.

ਤਸ੍ਮਿਂ ਪਨ ਰਤਨਪਾਸਾਦੇ ਅਧਿਵਤ੍ਥੋ ਏਕੋ ਸੋਤਾਪਨ੍ਨੋ ਦੇਵਪੁਤ੍ਤੋ ਅਤ੍ਥਿ, ਸੋ ਬੁਦ੍ਧੇਹਿ ਵਾ ਸਾਵਕੇਹਿ ਵਾ ਦੇਸਨਾਯ ਆਰਦ੍ਧਮਤ੍ਤਾਯਯੇਵ ਜਾਨਾਤਿ – ‘‘ਅਯਂ ਦੇਸਨਾ ਉਤ੍ਤਾਨਿਕਾ ਭਵਿਸ੍ਸਤਿ, ਅਯਂ ਗਮ੍ਭੀਰਾ. ਅਯਂ ਝਾਨਨਿਸ੍ਸਿਤਾ ਭਵਿਸ੍ਸਤਿ, ਅਯਂ ਵਿਪਸ੍ਸਨਾਨਿਸ੍ਸਿਤਾ. ਅਯਂ ਮਗ੍ਗਨਿਸ੍ਸਿਤਾ ਅਯਂ ਫਲਨਿਸ੍ਸਿਤਾ, ਅਯਂ ਨਿਬ੍ਬਾਨਨਿਸ੍ਸਿਤਾ’’ਤਿ. ਸੋ ਤਸ੍ਮਿਮ੍ਪਿ ਦਿਵਸੇ ਥੇਰੇਨ ਦੇਸਨਾਯ ਆਰਦ੍ਧਮਤ੍ਤਾਯ ਏਵਂ ਅਞ੍ਞਾਸਿ – ‘‘ਯੇਨ ਨੀਹਾਰੇਨ ਮਯ੍ਹਂ ਅਯ੍ਯੇਨ ਧਮ੍ਮਸੇਨਾਪਤਿਨਾ ਸਾਰਿਪੁਤ੍ਤਤ੍ਥੇਰੇਨ ਦੇਸਨਾ ਆਰਦ੍ਧਾ, ਅਯਂ ਦੇਸਨਾ ਵਿਪਸ੍ਸਨਾਗਾਲ਼੍ਹਾ ਭਵਿਸ੍ਸਤਿ, ਛਹਿ ਮੁਖੇਹਿ ਵਿਪਸ੍ਸਨਂ ਕਥੇਸ੍ਸਤਿ. ਦੇਸਨਾਪਰਿਯੋਸਾਨੇ ਕੋਟਿਸਤਸਹਸ੍ਸਦੇਵਤਾ ਅਰਹਤ੍ਤਂ ਪਾਪੁਣਿਸ੍ਸਨ੍ਤਿ, ਸੋਤਾਪਨ੍ਨਾਦੀਨਂ ਪਨ ਦੇਵਮਨੁਸ੍ਸਾਨਂ ਪਰਿਚ੍ਛੇਦੋ ਨ ਭਵਿਸ੍ਸਤਿ. ਦੇਸਨਾਯ ਅਨੁਚ੍ਛਵਿਕਂ ਕਤ੍ਵਾ ਮਯ੍ਹਂ ਅਯ੍ਯਸ੍ਸ ਸਾਧੁਕਾਰਂ ਦਸ੍ਸਾਮੀ’’ਤਿ ਦੇਵਾਨੁਭਾਵੇਨ ਮਹਨ੍ਤਂ ਸਦ੍ਦਂ ਕਤ੍ਵਾ – ‘‘ਸਾਧੁ ਸਾਧੁ ਅਯ੍ਯਾ’’ਤਿ ਆਹ.

ਦੇਵਰਾਜੇਨ ਸਾਧੁਕਾਰੇ ਦਿਨ੍ਨੇ ਪਰਿਵਾਰਕਪਾਸਾਦਸਹਸ੍ਸੇ ਅਧਿਵਤ੍ਥਾ ਦੇਵਤਾ ਸਬ੍ਬਾਵ ਸਾਧੁਕਾਰਂ ਅਦਂਸੁ. ਤਾਸਂ ਸਾਧੁਕਾਰਸਦ੍ਦੇਨ ਸਬ੍ਬਾ ਪੁਬ੍ਬਾਰਾਮੇ ਵਸਨਦੇਵਤਾ, ਤਾਸਂ ਸਦ੍ਦੇਨ ਗਾਵੁਤਮਤ੍ਤੇ ਦੇਵਤਾ, ਤਤੋ ਅਡ੍ਢਯੋਜਨੇ ਯੋਜਨੇਤਿ ਏਤੇਨੁਪਾਯੇਨ ਏਕਚਕ੍ਕਵਾਲ਼ੇ, ਦ੍ਵੀਸੁ ਚਕ੍ਕਵਾਲ਼ੇਸੁ, ਤੀਸੁ ਚਕ੍ਕਵਾਲ਼ੇਸੂਤਿ ਦਸਸਹਸ੍ਸਚਕ੍ਕਵਾਲ਼ੇਸੁ ਦੇਵਤਾ ਸਾਧੁਕਾਰਮਦਂਸੁ. ਤਾਸਂ ਸਾਧੁਕਾਰਸਦ੍ਦੇਨ ਪਥਵਿਟ੍ਠਕਨਾਗਾ ਚ ਆਕਾਸਟ੍ਠਕਦੇਵਤਾ ਚ. ਤਤੋ ਅਬ੍ਭਵਲਾਹਕਾ, ਉਣ੍ਹਵਲਾਹਕਾ, ਸੀਤਵਲਾਹਕਾ, ਵਸ੍ਸਵਲਾਹਕਾ, ਚਾਤੁਮਹਾਰਾਜਿਕਾ ਚਤ੍ਤਾਰੋ ਮਹਾਰਾਜਾਨੋ, ਤਾਵਤਿਂਸਾ ਦੇਵਤਾ, ਸਕ੍ਕੋ ਦੇਵਰਾਜਾ, ਯਾਮਾ ਦੇਵਤਾ, ਸੁਯਾਮੋ ਦੇਵਰਾਜਾ, ਤੁਸਿਤਾ ਦੇਵਤਾ, ਸਨ੍ਤੁਸਿਤੋ ਦੇਵਰਾਜਾ, ਨਿਮ੍ਮਾਨਰਤੀ ਦੇਵਤਾ, ਸੁਨਿਮ੍ਮਿਤੋ ਦੇਵਰਾਜਾ, ਵਸਵਤ੍ਤੀ ਦੇਵਤਾ, ਵਸਵਤ੍ਤੀ ਦੇਵਰਾਜਾ, ਬ੍ਰਹ੍ਮਪਾਰਿਸਜ੍ਜਾ, ਬ੍ਰਹ੍ਮਪੁਰੋਹਿਤਾ, ਮਹਾਬ੍ਰਹ੍ਮਾਨੋ, ਪਰਿਤ੍ਤਾਭਾ, ਅਪ੍ਪਮਾਣਾਭਾ, ਆਭਸ੍ਸਰਾ, ਪਰਿਤ੍ਤਸੁਭਾ, ਅਪ੍ਪਮਾਣਸੁਭਾ, ਸੁਭਕਿਣ੍ਹਾ, ਵੇਹਪ੍ਫਲਾ, ਅਵਿਹਾ, ਅਤਪ੍ਪਾ, ਸੁਦਸ੍ਸਾ, ਸੁਦਸ੍ਸੀ, ਅਕਨਿਟ੍ਠਾ ਦੇਵਤਾਤਿ ਅਸਞ੍ਞੇ ਚ ਅਰੂਪਾਵਚਰਸਤ੍ਤੇ ਚ ਠਪੇਤ੍ਵਾ ਸੋਤਾਯਤਨਪਵਤ੍ਤਿਟ੍ਠਾਨੇ ਸਬ੍ਬਾ ਦੇਵਤਾ ਸਾਧੁਕਾਰਮਦਂਸੁ.

ਤਤੋ ਖੀਣਾਸਵਮਹਾਬ੍ਰਹ੍ਮਾਨੋ – ‘‘ਮਹਾ ਵਤਾਯਂ ਸਾਧੁਕਾਰਸਦ੍ਦੋ, ਪਥਵਿਤਲਤੋ ਪਟ੍ਠਾਯ ਯਾਵ ਅਕਨਿਟ੍ਠਲੋਕਂ ਆਗਤੋ, ਕਿਮਤ੍ਥਂ ਨੁ ਖੋ ਏਸੋ’’ਤਿ ਆਵਜ੍ਜੇਨ੍ਤੋ ‘‘ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰੋ ਪੁਬ੍ਬਾਰਾਮੇ ਵਿਸਾਖਾਯ ਰਤਨਪਾਸਾਦੇ ਨਿਸੀਦਿਤ੍ਵਾ ਸਂਯੋਜਨਪਰਿਯਾਯਧਮ੍ਮਦੇਸਨਮਾਰਭਿ, ਅਮ੍ਹੇਹਿਪਿ ਤਤ੍ਥ ਕਾਯਸਕ੍ਖੀਹਿ ਭਵਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਤਤ੍ਥ ਅਗਮਂਸੁ. ਪੁਬ੍ਬਾਰਾਮੋ ਦੇਵਤਾਹਿ ਪਰਿਪੁਣ੍ਣੋ, ਸਮਨ੍ਤਾ ਪੁਬ੍ਬਾਰਾਮਸ੍ਸ ਗਾਵੁਤਂ ਅਡ੍ਢਯੋਜਨਂ, ਯੋਜਨਨ੍ਤਿ ਸਕਲਚਕ੍ਕਵਾਲ਼ਂ ਹੇਟ੍ਠਾ ਪਥਵਿਤਲੇਨ ਤਿਰਿਯਂ ਚਕ੍ਕਵਾਲ਼ਪਰਿਯਨ੍ਤੇਨ ਪਰਿਚ੍ਛਿਨ੍ਨਂ ਦਸਹਿ ਚਕ੍ਕਵਾਲ਼ਸਹਸ੍ਸੇਹਿ ਸਨ੍ਨਿਪਤਿਤਾਹਿ ਦੇਵਤਾਹਿ ਨਿਰਨ੍ਤਰਮਹੋਸਿ, ਆਰਗ੍ਗਨਿਤੁਦਨਮਤ੍ਤੇ ਠਾਨੇ ਉਪਰਿਮਕੋਟਿਯਾ ਸਟ੍ਠਿ ਦੇਵਤਾ ਸੁਖੁਮਤ੍ਤਭਾਵੇ ਮਾਪੇਤ੍ਵਾ ਅਟ੍ਠਂਸੁ.

ਅਥਾਯਸ੍ਮਾ ਸਾਰਿਪੁਤ੍ਤੋ ‘‘ਮਹਨ੍ਤਂ ਵਤਿਦਂ ਹਲਾਹਲਂ, ਕਿਂ ਨੁ ਖੋ ਏਤ’’ਨ੍ਤਿ ਆਵਜ੍ਜੇਨ੍ਤੋ ਦਸਸਹਸ੍ਸਚਕ੍ਕਵਾਲ਼ੇ ਠਿਤਾਨਂ ਦੇਵਤਾਨਂ ਏਕਚਕ੍ਕਵਾਲ਼ੇ ਸਨ੍ਨਿਪਤਿਤਭਾਵਂ ਅਦ੍ਦਸ. ਅਥ ਯਸ੍ਮਾ ਬੁਦ੍ਧਾਨਂ ਅਧਿਟ੍ਠਾਨਕਿਚ੍ਚਂ ਨਤ੍ਥਿ, ਪਰਿਸਪਰਿਮਾਣੇਨੇਵ ਪਸ੍ਸਨ੍ਤਿ ਚੇਵ ਸਦ੍ਦਞ੍ਚ ਸਾਵੇਨ੍ਤਿ. ਸਾਵਕਾਨਂ ਪਨ ਅਧਿਟ੍ਠਾਨਂ ਵਟ੍ਟਤਿ. ਤਸ੍ਮਾ ਥੇਰੋ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਸਮਾਪਤ੍ਤਿਤੋ ਵੁਟ੍ਠਾਯ ਮਹਗ੍ਗਤਚਿਤ੍ਤੇਨ ਅਧਿਟ੍ਠਾਸਿ – ‘‘ਚਕ੍ਕਵਾਲ਼ਪਰਿਯਨ੍ਤਾ ਪਰਿਸਾ ਸਬ੍ਬਾਪਿ ਮਂ ਪਸ੍ਸਤੁ, ਧਮ੍ਮਞ੍ਚ ਮੇ ਦੇਸੇਨ੍ਤਸ੍ਸ ਸਦ੍ਦਂ ਸੁਣਾਤੂ’’ਤਿ. ਅਧਿਟ੍ਠਿਤਕਾਲਤੋ ਪਟ੍ਠਾਯ ਦਕ੍ਖਿਣਜਾਣੁਪਸ੍ਸੇ ਚ ਚਕ੍ਕਵਾਲ਼ਮੁਖਵਟ੍ਟਿਯਞ੍ਚ ਨਿਸੀਦਿਤ੍ਵਾ ‘‘ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰੋ ਨਾਮ ਕੀਦਿਸੋ ਦੀਘੋ ਰਸ੍ਸੋ ਸਾਮੋ ਓਦਾਤੋ’’ਤਿ ਵਤ੍ਤਬ੍ਬਕਾਰਣਂ ਨਾਹੋਸਿ, ਸਬ੍ਬੇਸਮ੍ਪਿ ਸਬ੍ਬਦਿਸਾਸੁ ਨਿਸਿਨ੍ਨਾਨਂ ਅਭਿਮੁਖੇਯੇਵ ਪਞ੍ਞਾਯਿਤ੍ਥ, ਨਭਮਜ੍ਝੇ ਠਿਤਚਨ੍ਦੋ ਵਿਯ ਅਹੋਸਿ. ਧਮ੍ਮਂ ਦੇਸੇਨ੍ਤਸ੍ਸਾਪਿਸ੍ਸ ਦਕ੍ਖਿਣਜਾਣੁਪਸ੍ਸੇ ਚ ਚਕ੍ਕਵਾਲ਼ਮੁਖਵਟ੍ਟਿਯਞ੍ਚ ਨਿਸਿਨ੍ਨਾ ਸਬ੍ਬੇ ਏਕਕਂਸੇਨੇਵ ਸਦ੍ਦਂ ਸੁਣਿਂਸੁ.

ਏਵਂ ਅਧਿਟ੍ਠਹਿਤ੍ਵਾ ਥੇਰੋ ਅਜ੍ਝਤ੍ਤਸਂਯੋਜਨਞ੍ਚ, ਆਵੁਸੋਤਿ ਇਮਂ ਧਮ੍ਮਦੇਸਨਂ ਆਰਭਿ. ਤਤ੍ਥ ਅਜ੍ਝਤ੍ਤਨ੍ਤਿ ਕਾਮਭਵੋ. ਬਹਿਦ੍ਧਾਤਿ ਰੂਪਾਰੂਪਭਵੋ. ਕਿਞ੍ਚਾਪਿ ਹਿ ਸਤ੍ਤਾ ਕਾਮਭਵੇ ਅਪ੍ਪਂ ਕਾਲਂ ਵਸਨ੍ਤਿ ਕਪ੍ਪਸ੍ਸ ਚਤੁਤ੍ਥਮੇਵ ਕੋਟ੍ਠਾਸਂ, ਇਤਰੇਸੁ ਤੀਸੁ ਕੋਟ੍ਠਾਸੇਸੁ ਕਾਮਭਵੋ ਸੁਞ੍ਞੋ ਹੋਤਿ ਤੁਚ੍ਛੋ, ਰੂਪਭਵੇ ਬਹੁਂ ਕਾਲਂ ਵਸਨ੍ਤਿ, ਤਥਾਪਿ ਤੇਸਂ ਯਸ੍ਮਾ ਕਾਮਭਵੇ ਚੁਤਿਪਟਿਸਨ੍ਧਿਯੋ ਬਹੁਕਾ ਹੋਨ੍ਤਿ, ਅਪ੍ਪਕਾ ਰੂਪਾਰੂਪਭਵੇਸੁ. ਯਤ੍ਥ ਚ ਚੁਤਿਪਟਿਸਨ੍ਧਿਯੋ ਬਹੁਕਾ, ਤਤ੍ਥ ਆਲਯੋਪਿ ਪਤ੍ਥਨਾਪਿ ਅਭਿਲਾਸੋਪਿ ਬਹੁ ਹੋਤਿ. ਯਤ੍ਥ ਅਪ੍ਪਾ, ਤਤ੍ਥ ਅਪ੍ਪੋ. ਤਸ੍ਮਾ ਕਾਮਭਵੋ ਅਜ੍ਝਤ੍ਤਂ ਨਾਮ ਜਾਤਂ, ਰੂਪਾਰੂਪਭਵਾ ਬਹਿਦ੍ਧਾ ਨਾਮ. ਇਤਿ ਅਜ੍ਝਤ੍ਤਸਙ੍ਖਾਤੇ ਕਾਮਭਵੇ ਛਨ੍ਦਰਾਗੋ ਅਜ੍ਝਤ੍ਤਸਂਯੋਜਨਂ ਨਾਮ, ਬਹਿਦ੍ਧਾਸਙ੍ਖਾਤੇਸੁ ਰੂਪਾਰੂਪਭਵੇਸੁ ਛਨ੍ਦਰਾਗੋ ਬਹਿਦ੍ਧਾਸਂਯੋਜਨਂ ਨਾਮ. ਓਰਮ੍ਭਾਗਿਯਾਨਿ ਵਾ ਪਞ੍ਚ ਸਂਯੋਜਨਾਨਿ ਅਜ੍ਝਤ੍ਤਸਂਯੋਜਨਂ ਨਾਮ, ਉਦ੍ਧਮ੍ਭਾਗਿਯਾਨਿ ਪਞ੍ਚ ਬਹਿਦ੍ਧਾਸਂਯੋਜਨਂ ਨਾਮ. ਤਤ੍ਰਾਯਂ ਵਚਨਤ੍ਥੋ – ਓਰਂ ਵੁਚ੍ਚਤਿ ਕਾਮਧਾਤੁ, ਤਤ੍ਥ ਉਪਪਤ੍ਤਿਨਿਪ੍ਫਾਦਨਤੋ ਤਂ ਓਰਂ ਭਜਨ੍ਤੀਤਿ ਓਰਮ੍ਭਾਗਿਯਾਨਿ. ਉਦ੍ਧਂ ਵੁਚ੍ਚਤਿ ਰੂਪਾਰੂਪਧਾਤੁ, ਤਤ੍ਥ ਉਪਪਤ੍ਤਿਨਿਪ੍ਫਾਦਨਤੋ ਤਂ ਉਦ੍ਧਂ ਭਜਨ੍ਤੀਤਿ ਉਦ੍ਧਮ੍ਭਾਗਿਯਾਨਿ.

ਏਵਂ ਵੁਤ੍ਤਪ੍ਪਭੇਦੇਨ ਅਜ੍ਝਤ੍ਤਸਂਯੋਜਨੇਨ ਸਂਯੁਤ੍ਤੋ ਪੁਗ੍ਗਲੋ ਅਜ੍ਝਤ੍ਤਸਂਯੋਜਨੋ, ਬਹਿਦ੍ਧਾਸਂਯੋਜਨੇਨ ਸਂਯੁਤ੍ਤੋ ਪੁਗ੍ਗਲੋ ਬਹਿਦ੍ਧਾਸਂਯੋਜਨੋ. ਉਭਯਮ੍ਪਿ ਚੇਤਂ ਨ ਲੋਕਿਯਸ੍ਸ ਵਟ੍ਟਨਿਸ੍ਸਿਤਮਹਾਜਨਸ੍ਸ ਨਾਮਂ. ਯੇਸਂ ਪਨ ਭਵੋ ਦ੍ਵੇਧਾ ਪਰਿਚ੍ਛਿਨ੍ਨੋ, ਤੇਸਂ ਸੋਤਾਪਨ੍ਨਸਕਦਾਗਾਮਿਅਨਾਗਾਮੀਨਂ ਅਰਿਯਸਾਵਕਾਨਂ ਏਤਂ ਨਾਮਂ. ਯਥਾ ਹਿ ਮਹਾਅਰਞ੍ਞੇ ਖਦਿਰਵਨਸਾਲਵਨਾਦੀਨਿ ਥਮ੍ਭੋ ਤੁਲਾਸਙ੍ਘਾਟੋਤਿ ਨਾਮਂ ਨ ਲਭਨ੍ਤਿ, ਖਦਿਰਵਨਂ ਸਾਲਵਨਨ੍ਤਿ ਨਾਮਮੇਵ ਲਭਨ੍ਤਿ. ਯਦਾ ਪਨ ਤਤੋ ਰੁਕ੍ਖਾ ਤਿਣ੍ਹਾਯ ਕੁਠਾਰਿਯਾ ਛਿਨ੍ਦਿਤ੍ਵਾ ਥਮ੍ਭਾਦਿਸਣ੍ਠਾਨੇਨ ਤਚ੍ਛਿਤਾ ਹੋਨ੍ਤਿ, ਤਦਾ ਥਮ੍ਭੋ ਤੁਲਾਸਙ੍ਘਾਟੋਤਿ ਨਾਮਂ ਲਭਨ੍ਤਿ. ਏਵਮੇਵਂ ਅਪਰਿਚ੍ਛਿਨ੍ਨਭਵੋ ਬਹਲਕਿਲੇਸੋ ਪੁਥੁਜ੍ਜਨੋ ਏਤਂ ਨਾਮਂ ਨ ਲਭਤਿ, ਭਵਂ ਪਰਿਚ੍ਛਿਨ੍ਦਿਤ੍ਵਾ ਕਿਲੇਸੇ ਤਨੁਕੇ ਕਤ੍ਵਾ ਠਿਤਾ ਸੋਤਾਪਨ੍ਨਾਦਯੋਵ ਲਭਨ੍ਤਿ.

ਇਮਸ੍ਸ ਚ ਪਨਤ੍ਥਸ੍ਸ ਵਿਭਾਵਨਤ੍ਥਂ ਇਦਂ ਵਚ੍ਛਕਸਾਲੋਪਮਂ ਵੇਦਿਤਬ੍ਬਂ. ਵਚ੍ਛਕਸਾਲਂ ਹਿ ਕਤ੍ਵਾ ਅਨ੍ਤੋ ਖਾਣੁਕੇ ਕੋਟ੍ਟੇਤ੍ਵਾ ਵਚ੍ਛਕੇ ਯੋਤ੍ਤੇਹਿ ਬਨ੍ਧਿਤ੍ਵਾ ਤੇਸੁ ਉਪਨਿਬਨ੍ਧਨ੍ਤਿ, ਯੋਤ੍ਤੇਸੁ ਅਪ੍ਪਹੋਨ੍ਤੇਸੁ ਕਣ੍ਣੇਸੁਪਿ ਗਹੇਤ੍ਵਾ ਤਤ੍ਥ ਵਚ੍ਛਕੇ ਪਵੇਸੇਨ੍ਤਿ, ਅਨ੍ਤੋਸਾਲਾਯ ਓਕਾਸੇ ਅਪ੍ਪਹੋਨ੍ਤੇ ਬਹਿ ਖਾਣੁਕੇ ਕੋਟ੍ਟੇਤ੍ਵਾਪਿ ਏਵਮੇਵ ਕਰੋਨ੍ਤਿ. ਤਤ੍ਥ ਕੋਚਿ ਅਨ੍ਤੋਬਦ੍ਧੋ ਵਚ੍ਛਕੋ ਬਹਿਨਿਪਨ੍ਨੋ ਹੋਤਿ, ਕੋਚਿ ਬਹਿਬਦ੍ਧੋ ਅਨ੍ਤੋਨਿਪਨ੍ਨੋ, ਕੋਚਿ ਅਨ੍ਤੋਬਦ੍ਧੋ ਅਨ੍ਤੋਵ ਨਿਪਨ੍ਨੋ, ਕੋਚਿ ਬਹਿਬਦ੍ਧੋ ਬਹਿਯੇਵ ਨਿਪਨ੍ਨੋ. ਕੋਚਿ ਅਨ੍ਤੋਪਿ ਅਬਦ੍ਧੋਵ ਚਰਤਿ, ਬਹਿਪਿ ਅਬਦ੍ਧੋਵ. ਤਤ੍ਥ ਅਨ੍ਤੋਬਦ੍ਧਸ੍ਸ ਬਹਿਨਿਪਨ੍ਨਸ੍ਸ ਬਨ੍ਧਨਂ ਦੀਘਂ ਹੋਤਿ. ਸੋ ਹਿ ਉਣ੍ਹਾਦਿਪੀਲ਼ਿਤੋ ਨਿਕ੍ਖਮਿਤ੍ਵਾ ਬਹਿ ਵਚ੍ਛਕਾਨਂ ਅਬ੍ਭਨ੍ਤਰੇ ਨਿਪਜ੍ਜਤਿ. ਬਹਿਬਦ੍ਧੇ ਅਨ੍ਤੋਨਿਪਨ੍ਨੇਪਿ ਏਸੇਵ ਨਯੋ. ਯੋ ਪਨ ਅਨ੍ਤੋਬਦ੍ਧੋ ਅਨ੍ਤੋਨਿਪਨ੍ਨੋ, ਤਸ੍ਸ ਬਨ੍ਧਨਂ ਰਸ੍ਸਂ ਹੋਤਿ. ਬਹਿਬਦ੍ਧੇ ਬਹਿਨਿਪਨ੍ਨੇਪਿ ਏਸੇਵ ਨਯੋ. ਉਭੋਪਿ ਹਿ ਤੇ ਦਿਵਸਮ੍ਪਿ ਖਾਣੁਕਂ ਅਨੁਪਰਿਗਨ੍ਤ੍ਵਾ ਤਤ੍ਥੇਵ ਸਯਨ੍ਤਿ. ਯੋ ਪਨ ਅਨ੍ਤੋ ਅਬਦ੍ਧੋ ਤਤ੍ਥੇਵ ਵਚ੍ਛਕਾਨਂ ਅਨ੍ਤਰੇ ਵਿਚਰਤਿ. ਅਯਂ ਸੀਲਵਾ ਵਚ੍ਛਕੋ ਕਣ੍ਣੇ ਗਹੇਤ੍ਵਾ ਵਚ੍ਛਕਾਨਂ ਅਨ੍ਤਰੇ ਵਿਸ੍ਸਟ੍ਠੋ ਦਿਵਸਮ੍ਪਿ ਅਞ੍ਞਤ੍ਥ ਅਗਨ੍ਤ੍ਵਾ ਤਤ੍ਥੇਵ ਚਰਤਿ. ਬਹਿ ਅਬਦ੍ਧੇ ਤਤ੍ਥੇਵ ਵਿਚਰਨ੍ਤੇਪਿ ਏਸੇਵ ਨਯੋ.